དཔའ་བོ་གཅིག་པའི་བསྐྱེད་རིམ་སྙིང་པོའི་དོན་གསལ།
དཔའ་བོ་གཅིག་པའི་བསྐྱེད་རིམ་སྙིང་པོའི་དོན་གསལ་ཞེས་བྱ་བ་བཞུགས་སོ། །
བླ་མ་གཤིན་རྗེའི་གཤེད་ལ་ཕྱག་འཚལ་ལོ། །དཔའ་གཅིག་གི་བསྐྱེད་རིམ་ནི། རགས་པ་བཅུ་གསུམ་མའི་དང་པོ་སྦྱོར་བ་ཡན་ཆད་དང་འདྲ་བས་ཐོ་ཙམ་ལ་སྒོས་ཆོས་རྣམས་ཀྱིས་ཅུང་ཟད་ཟུར་བརྒྱན་ཏེ་འགོད་པ་ནི། ལམ་ཐུན་མོང་བས་རྒྱུད་སྦྱངས་ཤིང་དབང་ཐོབ། དམ་ཚིག་གཙང་བའི་སྒྲུབ་པ་པོས་གནས་དང་ཡོ་བྱད་སྤྱོད་ལམ་སོགས་རྒྱུད་དང་མཐུན་པར་བྱས་ཏེ་ཀུན་སློང་བཅོས། རང་ལ་ཐ་མལ་གྱི་སྣང་ཞེན་འགོག་པའི་ཕྱིར་ལུས་འོད་དུ་སྦྱངས་ནས་པད་ཉི་ལ་འཇིགས་བྱེད་ཞལ་གཅིག་ཕྱག་གཉིས་པའི་སྐུར་དཀྲོང་གིས་བསྐྱེད། ལས་སྔགས་བརྗོད་ཅིང་ཁྲོ་བོ་སྤྲོས་ཏེ་བགེགས་བསྐྲད། སྟོང་པར་སྦྱངས་ཏེ་དེ་ཁོ་ནའི་ངང་ལས་སྣང་ཙམ་པ་སྒྱུ་མ་ལྟ་བུའི་རྣམ་རོལ་ཏུ་རླུང་མེའི་དཀྱིལ་འཁོར། མི་མགོ་རློན་པའི་སྒྱེད་བུ། དེ་ལ་གནས་པའི་ཐོད་པ་དུམ་བུ་གཅིག་པ་བདེ་སྟོང་མཚོན་བྱེད། དེའི་ནང་
དུ་གཤེགས་པ་ལྔའི་ས་བོན་ལས་ཤ་ལྔ་དང༌། ཡུམ་ལྔའི་ས་བོན་ལས་བདུད་རྩི་ལྔ་རང་རང་གི་མིང་ཡིག་དང་པོས་མཚན་པ། སྟེང་དུ་ཐུགས་གསུང་སྐུ་རྡོ་རྗེའི་ངོ་བོ་ཡི་གེ་གསུམ་བརྩེགས་མར་གནས་པ་ལྷུང་སྟེ་ཞུ་བས། ཆོས་དབྱིངས་ཡེ་ཤེས་ཀྱིས་མ་དག་པའི་ཉེས་པའི་རྩ་བ་སྦྱངས། ཚེ་དཔག་མེད་གསུང་རྡོ་རྗེའི་ས་བོན་གྱིས་འཆི་མེད་བདུད་རྩིར་བྱས། གཟུགས་ཀྱི་ཕུང་བོས་རབ་ཏུ་ཕྱེ་བ་རྣམ་སྣང་གིས་མང་པོར་སྤེལ་བར་བསམས་ལ། སེམས་ཅན་ཐམས་ཅད་ཀྱི་སྒོ་གསུམ་གྱི་ཉེས་པའང་སྦྱངས་པར་བསམས་ཏེ་འབྲུ་གསུམ་བརྗོད། ཕྱོགས་སྐྱོང་གི་མཆོད་པ་ཀུན་ཀྱང་བདེ་སྟོང་མཚོན་པའི་སྣོད་དུ་བདེ་སྟོང་གི་ས་བོན་ཁོ་ན་ལས། རང་བཞིན། རྣམ་པ། བྱེད་ལས་ཀྱི་ཁྱད་པར་གསུམ་གསུམ་དང་ལྡན་པར་བསྐྱེད་ཅིང་རྡོ་རྗེ་གསུམ་གྱི་བར་དུ་བཅུག་པས་བྱིན་གྱིས་བརླབ། ཕྱོགས་
སྐྱོང་གི་གཏོར་མ་ནང་མཆོད་ལྟར་བརླབས་ལ། དེ་དག་བཀུག་ནས་སོ་སོའི་ཕྱོགས་སུ་འཁོད་པ་འོད་གསལ་དུ་བཅུག་སྟེ་འཇིགས་བྱེད་ཀྱི་སྐུར་བསྒོམ། ལྗགས་བྱིན་གྱིས་བརླབས་ཤིང་རྩ་སྔགས་ཀྱིས་ལྷ་ལ་ཕུད་དབུལ། སོ་སོའི་སྔགས་ཉེ་སྙིང་དང་སྤེལ་བས་ཆོས་རྒྱལ་ཡབ་ཡུམ། ལྷ་མོ། ལས་བཞིའི་གཤིན་རྗེ་རྣམས་དང་། སྙིང་པོ་དང་བརྒྱ་བྱིན་སོགས་ཕྱོགས་སྐྱོང་གཞན་གྱི་མིང་སྤེལ་བས་དེ་དག་ལ་ཕུལ་ཏེ་འཕྲིན་ལས་བཅོལ། ཡིག་བརྒྱའི་སྐབས་སོ་སོའི་རིགས་བདག་གི་ཐུགས་ཀའི་ཧཱུཾ་ལ་ཡིག་བརྒྱས་བསྐོར་བ་ལས་བདུད་རྩིའི་རྒྱུན་དབབ་པས་དེ་དག་གི་ཐུགས་དང་འགལ་བའི་ཉེས་པ་ཀུན་སྦྱངས་པར་བསམས། བཛྲ་མུཿ ཞེས་ཕྱིར་བཀྱེད་དེ་ཕྱོགས་དེ་དང་དེར་བྱ་ར་བྱེད་ཅིང་བཞུགས་པར་བསམས། བདག་བསྐྱེད་མཆོད་པའང་འདྲ་བས། འདི་དག་ནི་ཐུན་མགོར་བྱ་རྒྱུའི་སྐོར་རོ། །༈ ཐུན་དངོས་གཞི་སྐུ་གསུམ་ལམ་འཁྱེར་གྱིས་བསྡུས་པས། དང་པོ་ལ་ཆོས་སྐུའི་ལམ་འཁྱེར་དངོས་དང་དེའི་སྔོན་དུ་སྐྱེས་ནས་མྱོང་འགྱུར་གྱི་ལས་གསོག་པ་དང་མཚུངས་པའི་བསོད་ནམས་ཀྱི་ཚོགས་གསོག་པ་གཉིས་ཏེ། དེའང་བླ་མ་རིགས་བདག་ཏུ་བཞུགས་པའི་འཇིགས་བྱེད་ཀྱི་ལྷ་ཚོགས་སྤྱན་དྲངས་པ་ལ་ཕྱག་མཆོད་སྒྲུབ་པའི་མཆོད་པའི་མཆོག་སྡོམ་གཟུང་སོགས་ཞིང་ཁྱད་པར་ཅན་ལ་བརྟེན་པ་དང་། ཚད་མེད་བཞི་བསྒོམ་སྟེ་ཞིང་ཕལ་བ་ལ་བརྟེན་པའི་བསོད་ནམས་ཀྱི་ཚོགས་གསོག་
ཚུལ་གཉིས་ཡོད། ཡེ་ཤེས་ཀྱི་ཚོགས་གསོག་པ་དང་ཆོས་སྐུའི་ལམ་འཁྱེར་དངོས་གཉིས་སྟབས་གཅིག་ཏུ་བྱ་བ་ནི་བཅུ་གསུམ་མའི་སྐབས་ཡབ་ཡུམ་གྱི་སྦྱོར་མཚམས་ནས་ཀྱང་འོད་ཟེར་སྤྲོ་བ་བྱེད་ལ། འདིར་ཐུགས་ཀའི་ཧཱུཾ་ཁོ་ན་ལས་སྤྲོས་པའི་འོད་ཀྱིས་སྣོད་བཅུད་ཐམས་ཅད་ཞུ་བ་རང་དང༌། དེའང་སྟོད་སྨད་ནས་ཐུགས་ཀའི་ཧཱུཾ་ལ་བསྡུ་ཞིང༌། མཐར་ནཱ་དའང་མི་དམིགས་པར་ཡལ་བའི་སྟོང་སང་ལ་མཉམ་པར་བཞག་སྟེ་སྔགས་གཉིས་ཀྱི་དོན་འབྲས་དུས་ཀྱི་ཡེ་ཤེས་ཆོས་སྐུའི་ང་རྒྱལ་འཛིན། ང་རྒྱལ་དེའི་ངང་ལས་མ་གཡོས་བཞིན་དུ་བློའི་ཟུར་གཅིག་གིས་འབྱུང་བཞི་རིམ་བརྩེགས། སྲུང་བའི་འཁོར་ལོ། གཞལ་ཡས་ཁང་གདན་བཅས་གསལ་འདེབས་དགོས་ལ། འབྱུང་བཞི་རང་རང་གི་ས་བོན་ལས་བསྐྱེད་ཚུལ་སྤྱི་དང་འདྲའང༌། རླུང་དཀྱིལ་འོག་མ་བཞིན་ནག་ལ་དམར་མདངས་ཆགས་པའི་དུད་ཁར་བྱེད་པ་ནི་འདི་མངོན་སྤྱོད་གཙོ་ཆེ་བའི་སྒོས་ཆོས་ཡིན། འབྱུང་བཞིའི་སྟེང་གི་སྣ་ཚོགས་རྡོ་རྗེའི་ལྟེ་བའི་ཧཱུཾ་ལས་འོད་ཟེར་ཀུན་ཏུ་འཕྲོས་པས་རྡོ་རྗེ་དྲུག་ཅུ་རྩ་བཞིའི་རང་བཞིན་གྱི་ས་གཞི །རྭ་བ། གུར། བླ་རེ་དང་བཅས་པ་བསྐལ་པའི་མེ་དཔུང་འཁྲུགས་པས་ཀླུབས་པའི་སྲུང་འཁོར་ཐུན་མོང་བ་བསྒོམ། ཟ་མ་ཏོག་ཏུ་སྲུང་འཁོར་ཐུན་མོང་མ་ཡིན་པ་ཞལ་འཕང་ཙམ་མཛད་ལ། བདུད་ལས་རྣམ་རྒྱལ་དུ་གསལ་བར་མཛད་པ་ནི་དགོངས་
པ་ཤིན་ཏུ་ཟབ་སྟེ། ལྷ་འདི་སྒྲུབ་པའི་དགོས་པའི་གཙོ་བོ་ནོར་བུའི་གླིང་དུ་འཇུག་པའི་དེད་དཔོན་བཞིན་ཆོས་སྒྲུབ་པའི་བར་ཆད་བཟློག་པ་དང༌། ཡང་དེའི་རྐྱེན་སེལ་ཙམ་མ་ཡིན་པར་གདུལ་བྱ་དབང་པོ་མཆོག་རྣམས་ལས་དང་ཡེ་ཤེས་ཀྱི་ཕྱག་རྒྱ་ལ་བརྟེན་ནས་དགའ་བཞིས་འོད་གསལ་འགྲུབ་ཅིང༌། དེ་ལས་སྒྱུ་མའི་སྐུར་བཞེངས་པས་ཕ་མའི་རྒྱུད་ཀྱི་ཟབ་གནད་གཉིས་ཀ་ཚང་ཚུལ། ཁ་ཊྭཱཾ། མེ་ཐབ། རྒྱུ་མ་སོགས་ཀྱིས་མཚོན་པའི་དོན་ཏེ་གཉིས་ཡོད་པས། རྗེས་འཇུག་སྤྱི་ཁྱབ་ལ་ཕན་པའི་དོན་དུ་དགོས་པ་དང་པོ་གཙོ་བོར་བྱས་ཏེ་དཔའ་བོ་གཅིག་པའི་སྒྲུབ་ཐབས་གཙོ་བོར་མཛད་ཅིང༌། དེའི་གནད་ཀྱིས་ཁྲོ་བཅུའི་སྲུང་འཁོར་ཡང་རྩལ་འདོན་མཛད་ལ། སྒྲུབ་ཐབས་ཀྱི་མཚན་ཡང་བདུད་ལས་རྣམ་རྒྱལ་ཞེས་བཏགས་སོ། །དགོས་པ་ཕྱི་མའི་དབང་དུ་མཛད་དེ་ཡུམ་བཅས་བཅུ་གསུམ་མའི་སྒྲུབ་ཐབས་མཛད་ཅིང༌། རྒྱུད་དོན་གྱི་ནོར་བུ་མ་ལུས་པ་འདིའི་ནང་ནས་བླང་དུ་ཡོད་པས་ཟ་མ་ཏོག་ཅེས་བཏགས་སོ། །ཚུལ་འདི་རྒྱུད་དང་གྲུབ་ཆེན་ཀུན་གྱི་དགོངས་པའང་ཡིན་ཏེ། སམྦུ་ཊའི་རབ་བྱེད་ཉེར་བརྒྱད་པར་དཔའ་བོ་གཅིག་པའི་ཆོ་ག་གསལ་བར་གསུངས་ལ། དེར་གཞན་དང་ཐུན་མོང་དུ་ཁྲོ་བཅུའི་སྲུང་འཁོར་ཡང་གསུངས་པས། རྗེ་བླ་མས་ཀྱང་ཁྲོ་བཅུ་བསྐྱེད་ཚུལ་སོགས་རྒྱུད་ཀྱི་དགོངས་པ་མན་སྙེར་བཀྲལ་བ་བཞིན་མཛད་དོ། །ཀུན་མཁྱེན་བླ་མ་སྐུ་སྔ་ཕྱིས་ཀྱང་ཚོགས་ཁང་དུ་དཔའ་བོ་གཅིག་པ་ལ་ཁྲོ་བོ་བཅུས་བསྐོར་བ་དམིགས་རྟེན་དུ་བྲི་བར་མཛད་པའང་དགག་བྱ་ཆུང་ལ་དགོས་པ་ཆེ་བའི་གནད་འདི་ཐུགས་ལ་བཞག་པ་ཡིན་ནོ། །དེ་བསྒོམ་ཚུལ་ནི། དབྱིབས་མདུང་ལྕགས་
གཉིས་ཀྱི་རྟིང་པ་སྤྲད་པ་ལྟ་བུའི་སྦུབས་སྟོང་ནང་དུ་གནོད་མཛེས་བསྒོམས་ཏེ། སྙོམས་འཇུག་གི་སྦྱོར་བས་ཁྲོ་བཅུ་ཞལ་དུ་དྲངས་པ་ཞུ་སྟེ་ཡུམ་གྱི་པདྨར་ཕབ་པ་སོ་སོའི་མདོག་ཅན་གྱི་ཐིག་ལེ་བཅུ་དང༌། དེ་ཧཱུཾ་བཅུ། དེ་ཁྲོ་བཅུར་གྱུར་ཏེ་མངལ་ནས་སྤྲོས། རྩིབས་སོ་སོར་གདན་སུམ་བརྩེག་རེ་ཡོད་པའི་སྟེང་དུ་འཁོད་པར་བསམས་ལ་གནད་ལྔ་དང་ལྡན་པའི་སྒོ་ནས་ཁྲོ་བཅུའི་སྔགས་བཟླ། གནོད་མཛེས་རྡོར་སེམས་སུ་བསྒྱུར་བ་ནི་ཆོས་འབྱུང་དང༌། དེའི་ནང་དུ་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེའི་ལྟེ་བར་བྷྲུཾཿ དང་འཁོར་ལོ་ལས་རྣམ་སྣང་བསྐྱེད། འདིའི་ཕྱག་མཚན་གྱི་འཁོར་ལོ་རྡོ་རྗེ་ཕྱེད་པའི་ཡུ་བ་ཅན་དུ་འགའ་ཞིག་བཤད་ཀྱང་དེ་ཙམ་གྲི་གུག་ལའང་ཡོད་ལ། འདིས་རྡོ་རྗེའང་འཛིན་པར་བསྐྱེད་རིམ་ཆེན་མོ་ལས་གསུངས་པས་ཕྱེད་པ་ཡིན་མིན་བརྟག་དགོས། དེ་ལས་བསྒྲུབས་པའི་གཞལ་ཡས་ཁང་གི་རྒྱ་དཔངས་སོགས་ཀྱི་ཁྱད་པར་ཞིབ་ཏུ་ཐིག་གིས་གཏན་ལ་འབེབས་དགོས་ཤིང༌། བཅུ་གསུམ་མ་དང་འདྲ་ལ། འོན་ཀྱང་འདིར་ཕ་གུའི་ཁ་དོག་སེར་པོར་བྱེད་པ་དང༌། ནང་གི་ཟླུམ་སྐོར་ནི་བཅུ་གསུམ་མ་ལ་རྩ་ཐིག་དང་ཚངས་ཐིག་འཕྲད་མཚམས་ནས་ཆ་ཆུང་གཅིག་ནང་དུ་འོངས་ཏེ་བསྐོར་ཡང༌། འདི་ཕྱེད་ཕྱེད་ཀྱི་ཚད་ནས་བསྐོར་དགོས་པས། གཞི་ལ་རེ་མིག་དགུར་བྱས་ནས་གཙོ་བོའི་གནས་ཧ་ཅང་ཆུང་བར་འགྱུར་བས། བདུད་ལས་རྣམ་རྒྱལ་རང་ལས། གཞལ་ཡས་ཁང་གི་དབུས་སུ་ཡཾ་ལས་རླུང་གི་དཀྱིལ་འཁོར་ཞེས་འབྱུང་བ་བཞིན་དུ་བྱ་དགོས་ལ། དཔེ་དུ་མར་རེ་མིག་
དགུ་བའི་ཞེས་འབྱུང་བ་ནི། སྟེང་དུ་གདུང་བསྣོལ་མར་འཕང་ཚེ་རེ་མིག་དགུ་འབྱུང་བའི་དོན་ཡིན་ཀྱང་དེ་དང་ལྷ་གནས་བསྟུན་མི་དགོས་པས་བྲི་བྱ་ལའང་མི་དགོས་སོ། །གཞལ་ཡས་ཁང་བསྒོམ་པ་ནི་གང་དུ་སྐྱེ་བ་ལེན་པའི་གནས་དང་རྣམ་པ་མཚུངས་ཤིང་མ་དག་པའི་སྣོད་སྦྱོང་བ་དང༌། འབྲས་དུས་ཀྱི་དག་པའི་གཞལ་ཡས་ཁང་འགྲུབ་པའི་རྒྱུར་འགྱུར་རོ། །དེ་ནས་ལོངས་སྐུའི་ལམ་འཁྱེར་ནི། ངག་ཏུ་འདོན་པའི་ཚེ་བར་དུ་འགྱང་ཆེའང༌། ཡིད་ངོར་ཆོས་སྐུའི་ང་རྒྱལ་ལས་བར་མ་ཆད་པར་ལྡང་བ་ཡིན་པས། གཞི་ལ་འཆི་བ་འོད་གསལ་ལས་ལུགས་ལྡོག་གི་ཉེར་ཐོབ་ཏུ་ལྡང་བ་ན་བར་དོ་འགྲུབ་པ་སྲང་མདའི་མཐོ་དམན་བཞིན་ཡིན་པ་དང་རྣམ་པ་མི་མཐུན་པའི་སྐྱོན་མེད་དེ། གཞི་ལ་སྐྱེ་བ་ལེན་པའི་གནས་རང་ཆས་སུ་ཡོད་ཀྱང༌། འདིར་བློའི་ཟུར་གྱིས་གསལ་མ་བཏབ་པར་བྱར་མེད་པའི་ཁྱད་ཙམ་ཡིན་ནོ། །དེའང་ཆོས་སྐུའི་ངང་ཙམ་དུ་གནས་པས་གདུལ་བྱའི་དོན་དུ་མི་འགྱུར་བར་མཐོང་སྟེ། ལས་ཀྱི་བར་དོ་སྦྱངས་ནས་འབྲས་དུས་ཀྱི་ལོངས་སྐུར་ལྡང་སྙམ་པའི་འཕེན་པས། ཟླ་བའི་དཀྱིལ་འཁོར་གྱི་དབུས་སུ་ཞུགས་པ་རྗེ་བཙུན་གྱི་མཁྱེན་པ་དང་དབྱེར་མི་ཕྱེད་པའི་དྷཱིཿ སེར་པོ་རང་སྒྲ་སྒྲོགས་བཞིན་པ་དང༌། དེ་ལས་རལ་གྲི་གྱེན་འགྲེང་ཡུ་བ་རྡོ་རྗེ་ཕྱེད་པའི་ལྟེ་བར་དྷཱིཿ ས་མཚན་པ། དེ་ལས་སྤྲོས་པའི་འོད་ཀྱིས་རྒྱལ་བ་སྲས་བཅས་ཐམས་ཅད་འཇམ་དབྱངས་རིགས་ལྔའི་རྣམ་པར་སྤྱན་དྲངས་ཏེ་ཐིམ་པ་ལས་རྒྱུ་རྡོ་རྗེ་འཛིན་པ་འཇམ་དཔལ་གཞུང་བཞིན་བསྐྱེད། འདིའི་ཟླ་བ། ས་བོན། ཕྱག་མཚན། སྒྲུབ་གཞིས། གཞི་ལམ་
འབྲས་བུ་གསུམ་གའི་སྐབས་ཀྱི་བསྒྲུབ་གཞིའི་ཕྲ་བའི་རླུང་སེམས་དང༌། དེས་བསྒྲུབས་པའི་ངག །ཡིད། ལུས་ཏེ་བཞི་བཞི་མཚོན་ནོ། །སྤྲུལ་སྐུའི་ལམ་འཁྱེར་ནི། སྒྱུ་མའི་ལུས་དེ་ཙམ་གྱིས་ཀྱང་གཞན་དོན་མི་རྫོགས་པས། ཐ་མལ་གྱིས་མཐོང་ནུས་པའི་རགས་པའི་སྤྲུལ་སྐུ་གཟུང་སྙམ་པ་བྱས་ལ། འཇམ་དཔལ་གྱི་ཐུགས་ཀར་དོན་གྱི་འོད་གསལ་མཚོན་པའི་ཉི་དཀྱིལ་བསམས་ཤིང༌། དེའི་འོད་ཟེར་གྱིས་སངས་རྒྱས་བྱང་སེམས་ཐམས་ཅད་རྒྱུ་རྡོ་རྗེ་འཛིན་པའི་རྣམ་པར་སྤྱན་དྲངས་ཏེ་རང་ཉིད་འཇམ་དཔལ་དུ་གསལ་བ་དང་བཅས་ལྷན་ཅིག་ཏུ་ཉི་མ་ལ་ཞུགས་པས། ཉི་དཀྱིལ་དཔག་ཚད་སྟོང་ཕྲག་བརྒྱར་ཁྱབ་པ་གདུག་པ་ཅན་སྲེག་པར་བྱེད་པའི་འོད་ཟེར་ཚ་སྲེག་འབར་བ་དེ་ལྟ་བུར་གྱུར་པར་བསམ། གོང་གི་ཟླ་དཀྱིལ་བསྒོམ་པ་ཟླ་བའམ་མེ་ལོང་ཡེ་ཤེས་ལས་བྱང་ཆུབ་པ། དེའི་སྟེང་དྷཱིཿ བསྐྱེད་པ་ནས་འདིའི་བར་ཉི་མ་དང་མཉམ་ཉིད་ཡེ་ཤེས་ལས་བྱང་ཆུབ་པ་ཡིན། ཡང་དེའི་དབུས་ཀྱི་ཧཱུཾ་ཡིག་འོད་ཟེར་ལྔ་ལྡན་རང་སྒྲ་འབྲུག་ལྟར་སྒྲོགས་པ་ལས་སྤྲོས་པའི་འོད་ཟེར་གྱིས་སངས་རྒྱས་སྲས་བཅས་འཇིགས་བྱེད་ཀྱི་རྣམ་པར་སྤྱན་དྲངས་ཏེ་ཧཱུཾ་ལ་བསྟིམས་པས་ཁྲོ་བོའི་རྡོ་རྗེ་ཧཱུཾ་གིས་མཚན་པར་གྱུར་པ་འདི་ས་བོན་དང་ཕྱག་མཚན་ལས་བྱང་ཆུབ་པའམ་སོར་རྟོག་ཡེ་ཤེས་ལས་བྱང་ཆུབ་པ་ཡིན། ཡང་ཧཱུཾ་ལས་རྡོ་རྗེ་ཕྲ་མོའི་ཚོགས་སྤྲོས་པ་ཡོངས་སུ་གྱུར་པའི་སངས་རྒྱས་བྱང་སེམས་རྣམས་ཀྱིས་ཞིང་ཁམས་རབ་འབྱམས་སུ་འགྲོ་དོན་མཛད། སེམས་ཅན་ཐམས་ཅད་
འཇིགས་བྱེད་ཀྱི་སྐུར་གྱུར་ཏེ། ཕར་སྤྲོས་པའི་ལྷ་རྣམས་དང་ལྷན་དུ་ཚུར་འདུས་ནས་རྡོ་རྗེ་ཧཱུཾ་དང་བཅས་པ་ལ་ཐིམ། དང་པོ་ནས་གདན་གྱི་ཚུལ་དུ་ཡོད་པའི་ཟླ་བ་དང༌། དེའི་སྟེང་གི་ཉི་མ། རྡོ་རྗེ། ས་བོན་ཐམས་ཅད་གཅིག་ཏུ་འདྲེས་པར་བསམས་པ་ནི་བྱ་གྲུབ་ཡེ་ཤེས་ལས་བྱང་ཆུབ་པའམ་སྐད་ཅིག་མ་གཅིག་ལ་མངོན་པར་བྱང་ཆུབ་པ་ཡིན་ལ། དེ་ལས་རྡོ་རྗེ་འཇིགས་བྱེད་ཆེན་པོའི་སྐུར་བསྐྱེད་པ་ནི་སྐུ་རྫོགས་པ་ལས་སམ་ཆོས་དབྱིངས་ཡེ་ཤེས་ལས་བྱང་ཆུབ་པ་ཡིན་ནོ། །གོང་གི་ཟླ་བ་ནས་འདིའི་བར་གྱིས་ཕ་མའི་ཁུ་ཁྲག་དང༌། དེར་མཚམས་སྦྱོར་ཞིང་རིམ་གྱིས་འཕེལ་ཏེ་ཕྱིར་བཙས་པ་དང་ཆོས་མཐུན་སྦྱོར་ཚུལ་སོགས་ཡོད་ལ། སྐུའི་ཉམས་དང་ཞལ་གྱི་འཁོར་ལུགས། ཕྱག་བསྒྲིག་ཚུལ། ཕྱག་མཚན་དང་ཞབས་འོག་གི་སྲོག་ཆགས་སོ་སོའི་ཁྱད་པར་སོགས་དཀྱུས་སུ་གསལ་ཞིང་ཞིབ་པར་གཞན་ལས་ཤེས་དགོས། སྐྱེ་མཆེད་བྱིན་རླབས་ནི། ལྕགས་བསྲེགས་པ་མེའི་ངོ་བོར་སོང་བ་བཞིན་རྣམ་པ་མིག་སོགས་སུ་སྣང་ཡང༌། ངོ་བོ་ས་སྙིང་སོགས་ཀྱི་རང་བཞིན་དུ་བསམ་དགོས་ལ། མ་མཐའ་འང་སྐྱེ་མཆེད་སོ་སོར་ལྷ་སོ་སོའི་ངོ་བོ་ཡི་གེ་རྣམས་མེ་ལོང་ལ་གཟུགས་བརྙན་བཞིན་སྣང་བར་བསྒོམ། སེམས་དཔའ་གསུམ་ནི་ཡེ་ཤེས་པ་འཕྲོ་འདུའི་གཞིར་གྱུར་པས་དམ་ཚིག་སེམས་དཔའ་བདེ་སྟོང་ཡེ་ཤེས་ཀྱི་ངོ་བོ་ཙམ་ཡིན་པས་ཡེ་ཤེས་སེམས་དཔའ། གང་ལ་དམིགས་ནས་ཏིང་འཛིན་མཆོག་སྐྱེ་བས་ཏིང་ངེ་འཛིན་སེམས་དཔའ་སྟེ། རགས་པའི་ལུས། ཕྲ་བའི་ལུས། ཕྲ་བའི་སེམས་གསུམ་དང་ཆོས་མཐུན་པ་དང༌། འབྲས་དུས་ཀྱི་རགས་
པའི་སྤྲུལ་སྐུ། སྒྱུ་མ། འོད་གསལ་གསུམ་ཡང་མཚོན་ནོ། །དེ་དག་གིས་ཐ་མལ་གྱི་སྐྱེ་ཤི་བར་དོ་གསུམ་སྦྱོང་ཞིང་ལམ་གྱི་སྐུ་གསུམ་སྨིན་པར་བྱས་ཏེ་འབྲས་བུའི་སྐུ་གསུམ་སྒྲུབ་པའི་བསྐྱེད་རིམ་གྱི་གནད་ཚང་ངོ༌། །འོ་ན་སྐུ་གསུམ་པོ་དེའང་འདོད་ཆགས་ཀྱི་ཆོས་ཀྱིས་ཐོབ་པར་བསྟན་པའི་ཕྱིར་རིག་མ་འདུ་བྱ་བ་ནི་བསྐྱེད་རིམ་འཁོར་བའི་རྩ་བ་གཅོད་བྱེད་དུ་འགྲོ་བ་དང༌། རིམ་པ་འདིར་འདོད་ཡོན་ལམ་དུ་བྱེད་ཚུལ་བསྐྱེད་རིམ་གྱི་གནད་མཐར་ཐུག་ཏུ་བཤད་པ་མ་ཡིན་ནམ། དཔའ་གཅིག་ལ་དེ་མ་ཚང་བར་བསྐྱེད་རིམ་མཚན་ཉིད་པ་ཇི་ལྟར་འབྱུང་སྙམ་ན་སྐྱོན་མེད་དེ། མཚན་མ་གྱེན་འགྲེང་གིས་བདེ་ཆེན་མཚོན་པར་གསུངས་པ་བཞིན་དགའ་བཞིས་དྲངས་པའི་བདེ་སྟོང་སྦྱོར་བར་ནུས་ལ། ལིངྒ་ལི་ཡ་ཏི་ཞེས་པ་སྦས་དོན་དུ་བཤད་པའི་ཚེ་བྷ་གར་ཐིམ་པ་ལ་འཇུག་ཅིང༌། རྒྱུན་དུ་ཡུམ་མེད་ནའང་དམིགས་བསལ་གྱི་ཚེ་ཡོད་ཆོག་པ་དབང་དང་བསང་མཆོད་ལྟ་བུ་ཡིན་པས་མ་ཚང་བ་མིན་ནོ། །དེར་མ་ཟད་གཞན་གྱི་བསྐྱེད་རིམ་ལ་མ་མཐའ་ལྷ་ལྔ་ཚང་དགོས་ཀྱང༌། འདིར་དཔའ་བོ་གཅིག་པ་ལ་བསྐྱེད་རིམ་རུང་བ་ཕྱག་མཚན་གྱི་གནད་ཡིན་པར་གསུངས་ཏེ། ཞེ་དགུ་མའི་སྐབས་ཕྱག་མཚན་དང་ཞབས་འོག་གི་སྲོག་ཆགས་རྣམས་དཀྱིལ་འཁོར་གྱི་ལྷའི་རང་བཞིན་དུ་བཤད་པའི་གནད་ཀྱིས་ཡིན་ནོ། །འོ་ན་ཕུང་པོ་ལྔ་རིགས་ལྔ་དང༌། གཞལ་ཡས་ཁང་རྣམ་སྣང་གི་རང་བཞིན་ཡིན་པས་གང་ལ་ཡིན་ཀྱང་ལྷའི་འཁོར་ལོ་ཚང་བར་འགྱུར་རོ་ཞེ་ན། ཕུང་པོ་ལྔ་དེའི་རང་བཞིན་ཙམ་ཡིན་ཀྱང་སོ་སོར་ཕྱེ་སྟེ་ལྷར་གནས་
སུ་བཀོད་པ་མེད་པས་འདི་དང་མི་མཚུངས་ཏེ། ལྷའི་གནས་བཟུང་ནས་བཀོད་ཚེ་དགྲ་ནག་གི་ཐོད་པ་བཞིའང་གྲངས་ཕན་དུ་བྱས་ཏེ་ལྷ་བཅུ་བདུན་ཞེས་གྲགས་པ་བཞིན་ནོ། །སྔགས་རིམ་ལས་བླ་མེད་གཞན་གྱི་བསྙེན་པ་ལ་ལྷའི་འཁོར་ལོ་ཚང་བ་དགོས་ཀྱང་འདི་དམིགས་བསལ་དུ་གསུངས་པའི་དོན། འགའ་ཞིག་དཔའ་གཅིག་ལ་དཔའ་གཅིག་གི་བསྙེན་པས་གོ་ཆོད་མི་ཆོད་དོགས་པ་མེད་པས། བཅུ་གསུམ་མ་ལའང་དེས་གོ་ཆོད་ཟེར་བ་དོན་མིན་ཏེ། དེའི་དགོངས་པ་གསང་འདུས་གཙོ་བོ་གཅིག་པུར་བསྙེན་པ་བཏང་ནས་དེའི་ཟུར་བཀའི་དབང་བསྐུར་ཚུལ་བཤད་པ་མེད་ལ། འདིའི་གཙོ་བོ་གཅིག་པུ་ལ་བསྙེན་པ་བཏང་སྟེ་དེའི་སྒོ་ནས་དབང་བསྐུར་དུ་ཡོད་པ་དང༌། དབང་གིས་ཇི་ལྟར་སྨིན་པར་བྱས་པ་བཞིན་དཔའ་བོ་གཅིག་པ་ལ་བརྟེན་ནས་རིམ་གཉིས་ཀྱི་རྣལ་འབྱོར་བསྐྱང་དུ་ཡོད་པའི་དོན་ནོ། །དེ་ནས་ཡེ་ཤེས་པ་སྤྱན་དྲངས་ཏེ་དགུག་གཞུག་བཅིང་མཉེས། དབང་ལྷས་དབང་བསྐུར་ཏེ་རིགས་ངེས་པར་བྱ་བའི་ཕྱིར་རིགས་བདག་གིས་རྒྱས་གདབ་པ། ཕྱི་ནང་གི་མཆོད་པས་མཆོད་ཅིང་བསྟོད་པ་བྱ་བ་སོགས་སྤྱི་དང་འདྲ་ལ། བཅུ་གསུམ་མར་འཁོར་རྣམས་ཀྱིས་བསྟོད་པའི་དོད། འདིར་ཐུགས་ཀ་ནས་སྤྲོས་པའི་ལྷ་མོ་རྣམས་ཀྱིས་བྲག་ཆའི་དབྱངས་བཞིན་བསྟོད་པར་མོས་པ་ཡིན་ནོ། །རྒྱས་པར་ན་ཀུན་མཁྱེན་འཇམ་དབྱངས་བཞད་པས། ཕྱི་ནང་གསང་བ་དེ་ཉིད་བཞིས་མཆོད་བསྟོད། །ལྷ་མཉེས་ཚོགས་རྫོགས་འདོད་ཡོན་ལམ་བྱེད་མྱུར། །ཞེས་པ་ལྟར་ཡིན་པས་ཡུམ་གསལ་འདེབས་པ་འགལ་བ་མེད་པར་བཤད་ཟིན་ཏོ། །དེ་ནས་མ་ཧེའི་ཞལ་
རྭ་སྔོན་པོ་ཟིང་ངེ་བའམ། ཤངས་བུག་ཟངས་དུང་དམར་པོ་བསྲེགས་པ་བཞིན་དམར་ཧུར་རེ་བ་ལྟ་བུ་འཆར་གང་བདེ་ཞིག་ནས་བརྩམས་ཏེ་སྔ་མ་མ་ཤོར་བའི་ངང་ནས་དམིགས་པ་བསྣན་གྱིན་ཞལ་གཅིག་ཕྱག་གཉིས་པ་ལ་སེམས་གཟུང༌། དེ་ནས་ཞལ་ཕྱག་རིམ་པར་བསྣན་ཏེ་ཡོངས་སུ་རྫོགས་པ་ཐོག་མར་སྤྱི་བམ་དང༌། རྗེས་སུ་རྒྱན་ཆ་ལུགས་སྤྱན་དཀར་ནག་གི་ཆ་ཕྲ་མོ་ཚུན་ཆད་ལ་གསལ་སྣང་དང༌། དེ་དང་དེ་དངོས་ཡིན་སྙམ་པའི་ང་རྒྱལ་བརྟན་པོས་ཐ་མལ་གྱི་སྣང་ཞེན་བཟློག་ཅིང༌། དེ་ཐམས་ཅད་ཀྱང་སྣང་ལ་རང་བཞིན་མེད་པ་སྒྱུ་མའི་རྣམ་རོལ་དུ་བལྟ་བའི་ཟབ་གསལ་གཉིས་མེད་ཀྱི་ངང་དུ་སེམས་འཛིན། དེ་ལ་སེམས་བརྟན་པ་ན་སྟེང་འོག་གི་སྣ་རྩེར་ཐིག་ལེ་བསྒོམ་པ་སོགས་བསྐྱེད་རིམ་ཕྲ་མོ་ལ་སློབ་ཚུལ་གཞན་ནས་འབྱུང་བ་བཞིན་བྱ། སྐྱོ་ན་དག་པ་དྲན་པ་གཞུང་བཞིན་ཏེ་ལམ་དང་འབྲས་བུའི་རྣམ་པ་ཐམས་ཅད་མཚོན་ཞིང༌། བདེ་སྟོང་གི་ཡེ་ཤེས་གཅིག་ཉིད་རྣམ་པ་ཅིར་ཡང་འཆར་བའི་གསང་བའི་གནད་ལ་ངེས་པ་བསྐྱེད་པར་བྱའོ། །དེ་ནས་འཕྲེང་བ་འཇིགས་བྱེད་ཞལ་གཅིག་ཕྱག་གཉིས་པར་བསྐྱེད་བསྟིམ་འོད་ཞུ་སོགས་བྱ་ཞིང༌། བཟླས་པ་ནི། སྦྲགས་སྒྲུབ་བྱེད་ན་ཡེ་ཤེས་སེམས་དཔའི་ཐུགས་ཀའི་ཉི་གདན་ཟླ་གདན་དང་ཧཱུཾ་ཡིག་དྷཱིཿ ཡིག་ཏུ་གྱུར་པའི་ཕྱི་རོལ་འཁོར་ལོའི་རྩིབས་དྲུག་ལ་ཨ་ར་པ་ཙ་བཀོད་དེ་རྒྱལ་བ་སྲས་བཅས་ཀྱི་མཁྱེན་རབ་བསྡུས་པར་བསམས་ལ་བཟླ། དེ་ནས་ཕྱིར་བསྒྱུར་ཏེ་ཧཱུཾ་གི་མཐར་ཉེ་སྙིང་ཚར་གསུམ། དེའི་ཕྱི་
སྐོར་ལ་སྙིང་པོ་ཚར་གཉིས། དེའི་ཕྱིར་རྩ་སྔགས་རྣམས་ཀྱིས་གཡས་སྐོར་དུ་བསྐོར་བའི་འོད་ཟེར་གྱིས་ལུས་ཐམས་ཅད་གང་བས་སྡིག་སྒྲིབ་ནད་གདོན་ཐམས་ཅད་སྦྱངས། དབུགས་ཕྱིར་འགྲོ་བ་ན་ཧཱུཾ་ཡིག་སྔགས་ཕྲེང་དང་བཅས་པ་ལས་འཇིགས་བྱེད་ཀྱི་སྐུའམ་འོད་ཟེར་གྲངས་མེད་སྤྲོས་ཏེ་སྣ་བུག་གཡས་ནས་ཐོན། སེམས་ཅན་ཐམས་ཅད་གཤིན་རྗེའི་གཤེད་ཀྱི་གོ་འཕང་ལ་བཀོད་དབུགས་ཚུར་རྔུབ་པ་དང་ལྷན་ཅིག་སྣ་བུག་གཡོན་ནས་ཞུགས་ཏེ་སྤྲོ་གཞི་ལ་ཐིམ་པའི་དམིགས་པ་བྱ། གེགས་འཚུབ་ཤིན་ཏུ་ཆེ་བ་ལྟ་བུའི་ཚེ་མེ་དང་ཁྲོ་བོའི་ཚོགས་སྤྲོས་པས་གནོད་བྱེད་གདོན་བགེགས་ཐམས་ཅད་བསྲེགས་ཏེ་ཐལ་བར་བརླག་པར་བསམ། རེས་འགའ་སྤྲོ་བསྡུ་མི་བྱེད་པར་དམིགས་རྟེན་ལ་རྩེ་གཅིག་ཏུ་སེམས་གཏད་དེ་བསྒོམ་ཞིང༌། མྱུར་བུལ་ཆད་ལྷག་སོགས་ཀྱི་སྐྱོན་དང་བྲལ་བ། ཞལ་ཐམས་ཅད་ནས་འུར་འུར་སྒྲོགས་པའི་མོས་པ་བྱེད་ཚུལ་སོགས་མན་ངག་བཞིན་བྱ། བཟླས་པ་ཟིན་ནས་རིགས་བདག་གི་ཐུགས་ཀར་ཟླ་གདན་ལ་ཧཱུཾ་ཡིག་གི་མཐར་ཡིག་བརྒྱ་དཀར་པོས་བསྐོར་བ་ལས་བབས་པའི་བདུད་རྩིས་ཆད་ལྷག་སོགས་ཀྱི་ཉེས་པ་བྱང་བར་བསམས་ཏེ་ཡིག་བརྒྱ་བཟླ། ཐུན་གྱི་མཐར་གཏོར་མ་བྱིན་གྱིས་བརླབས་ནས་འདས་མ་འདས་མགྲོན་སྤྱན་དྲངས། ལྗགས་བྱིན་གྱིས་བརླབས་ཏེ་དབུལ་ཞིང་འཕྲིན་ལས་བཅོལ་ནས་གཤེགས་སུ་གསོལ་བ་དང༌། གཏང་རག་གི་མཆོད་བསྟོད། ཉེར་བསྡུ། བསྔོ་བས་མཐའ་བརྒྱན་པ་སོགས་དཀྱུས་ལྟར་བྱའོ། །ཞེས་པ་འདི་ནི་དད་བརྩོན་ལྡན་པ་དགེ་སློང་ངག་
དབང་དོན་གྲུབ་དང༌། ཨུ་ཅུ་མུ་ཆིན་ཤོག་གི་དཀའ་བཅུ་བློ་བཟང་ནོར་ལྡན་སོགས་ཀྱིས་སྔ་ཕྱིར་ཡང་ཡང་བསྐུལ་བའི་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།ན་མོ་གུ་རུ་བཛྲ་བྷཻ་ར་ཝཱ་ཡ། འདིར་དཔལ་རྡོ་རྗེ་འཇིགས་བྱེད་ཆེན་པོའི་རྫོགས་རིམ་ཉམས་སུ་ལེན་ཚུལ་མདོར་བསྡུས་ཏེ་བཤད་པ་ནི། ལམ་ཐུན་མོང་བས་རྒྱུད་སྦྱངས་ཤིང་སྔགས་ཀྱི་སྒོར་ཞུགས་ཏེ་དམ་སྡོམ་ཚུལ་བཞིན་དུ་བསྲུང༌། བསྐྱེད་རིམ་སྔོན་དུ་བཏང་སྟེ། ཉེ་བའི་སྔོན་འགྲོ་རྡོར་སེམས་བསྒོམ་བཟླས། བླ་མའི་རྣལ་འབྱོར་ཐུན་མོང་མ་ཡིན་པ། དབང་བཞི་བྱིན་རླབས་དང་བཅས་སྤྱི་ལྟར་བྱས་ལ། ལུས་ཀྱི་གནད་རྣམ་སྣང་གི་ཆོས་བདུན་ལྡན། དུས་ཀྱི་གནད་ཐོ་རངས་དང་ཕྱི་དྲོ། ཡུལ་གྱི་གནད་རང་འཇིགས་བྱེད་ཕྱག་གཉིས་པ་ཡུམ་བཅས་སུ་གསལ་བའི་ལྟེ་བའི་རྩ་འཁོར་གྱི་དབུས། རླུང་གི་གནད་རླུང་རོ་བསལ་ནས་སྙོམས་པར་གྱུར་པའོ། །རླུང་རོ་སེལ་ཚུལ་ལུས་ཀྱི་དབུས་སུ་དབུ་མ་གྲོ་སོག་ཙམ། གཡས་སུ་རོ་མ་དམར་པོ། གཡོན་དུ་རྐྱང་མ་དཀར་པོ། དང་པོའི་ཡར་སྣེ་སྨིན་མཚམས་དང་གཞན་གཉིས་སྣའི་སྦུ་གུའི་ཐད། མར་སྣེ་གསུམ་རྟགས་ཀྱི་བུ་ག་དང་མཉམ་པ། སྤྱི་བོའི་རྩ་འཁོར་རྩ་འདབ་སོ་གཉིས་པ་ཁ་ཐུར་ལྟ། མགྲིན་པར་བཅུ་དྲུག་པ་གྱེན་ལྟ། སྙིང་གར་བརྒྱད་པ་ཐུར་ལྟ། ལྟེ་བར་རེ་བཞི་པ་གྱེན་ལྟ། གསང་གནས་སུ་སོ་གཉིས་པ་ཐུར་ལྟ། མགྲིན་པ་དང་སྙིང་གའི་རྩ་འཁོར་གྱི་
མཚམས་ཀྱི་དབྱིབས་ཟླུམ་པོ། གཞན་རྣམས་གྲུ་གསུམ། རྩ་རྣམས་མདུད་པས་མ་བཅིངས་པ་ཧར་རེ་བྱེད་པར་མོས་ལ། རོ་མའི་མར་སྣེ་རྐྱང་མར་བཅུག་སྟེ་གཡས་ནས་ལན་གསུམ་རྔུབ་པས་རོ་མ་བརྒྱུད་ཅིང་རྐྱང་མའི་ཞར་འཁུམ་སོགས་ཀྱི་སྐྱོན་བསལ་ཏེ་དྲང་ཞིང་གསལ་བར་གྱུར་པར་བསམས་ལ་གཡོན་ནས་འབུད། དམིགས་པ་དེ་ལས་བཟློག་སྟེ་གཡས་ནས་ལན་གསུམ་བུས། གཉིས་ཀའི་སྣེ་དབུ་མར་བཅུག་ལ་གཉིས་ཀ་ནས་མཉམ་དུ་རྔུབ་པའི་རླུང་གིས་དབུ་མའི་སྐྱོན་སྦྱངས་པར་བསམས་ལ་མཉམ་དུ་འབུད་པ་གསུམ་སྟེ་དགུ་ཕྲུགས་སུ་བྱེད་པ་ཡིན་ནོ། །དངོས་གཞིའི་དམིགས་པ་སྐྱོང་ཚུལ་ལ། སྔགས་ཀྱི་རྣལ་འབྱོར། དམ་ཚིག་གི་རྣལ་འབྱོར། དབྱིབས་ཀྱི་རྣལ་འབྱོར། རྣམ་དག་ཡེ་ཤེས་ཀྱི་རྣལ་འབྱོར་བཞི། དང་པོ་ལ་ལྟེ་བར་གནད་དུ་བསྣུན་ཚུལ་དང༌། སྙིང་གར་རྡོར་བཟླས་བྱེད་ཚུལ་གཉིས། དང་པོ་ནི། རྩ་དང་འཁོར་ལོ་གོང་བཞིན་བསྒོམས་པའི་དྷཱུ་ཏཱིའི་མར་སྣེ་ལྟེ་འོག་སོར་བཞི་ཙམ་གྱི་སར་རང་གི་རྣམ་ཤེས་འོད་ཀྱི་ཐིག་ལེར་གསལ་བས་སྐུའི་རྣམ་པ་ཀུན་ལ་བལྟ། དེ་ནས་དྷཱུ་ཏཱིའི་ནང་གྱེན་ལ་ཧྲིལ་གྱིས་སོང་སྟེ་སྤྱི་བོའི་རྩ་འཁོར་གྱི་དབུས་སུ་ཕྱིན་ནས་རྩ་འཁོར་འོག་མ་རྣམས་བལྟ། སྙིང་ག་ལྟེ་བ་སོགས་སུ་འོངས་ནས་ཡར་མར་ལ་བལྟ་ཞིང་ཡར་འགྲོ་མར་འགྲོ་བྱས་ཏེ་ལམ་སྦྱངས། དེར་གསལ་སྣང་ཐོན་པ་ན་ཐིག་ལེ་དེ་ཉིད་ལྟེ་བའི་རྩ་འཁོར་གྱི་དབུས་སུ་ཉི་གདན་ལ་ཡེ་ཤེས་སེམས་དཔའ་འཇིགས་བྱེད་དཔའ་བོ་ཕྱག་གཉིས་པ་ཡུམ་བཅས་རྒྱ་སྲན་ཙམ་གྱི་སྐུར་བཞེངས། དེའི་ཐུགས་ཀར་ཉི་གདན་ལ་ཧཱུཾ་ཡིག་དཀར་ལ་དམར་བའི་མདངས་ཅན་
ཡུངས་འབྲུ་ཙམ་གྱིས་མཚན་པར་བསམ། དེར་སེམས་བརྟན་པ་ན་ལྟེ་བའི་ཡེ་ཤེས་སེམས་དཔའ་ཡབ་ཡུམ་སྙོམས་པར་ཞུགས་པའི་འོད་ཀྱིས་མ་དག་པའི་སྣོད་བཅུད་ཐམས་ཅད་སྦྱངས་ཏེ་དག་པའི་རྟེན་བརྟེན་པར་གྱུར་ཅིང་རིམ་གྱིས་བསྡུས་པ་དམ་ཚིག་སེམས་དཔའ་དང༌། དེ་ཡེ་ཤེས་སེམས་དཔའ། དེ་ཧཱུཾ་ཡིག །དེའང་ཞབས་ཀྱུ་ནས་བསྡུས་ཏེ་ནཱ་ད་ལ་སེམས་འཛིན་ཅིང༌། དབང་པོ་རབ་ཀྱིས་ནཱ་དའང་མི་དམིགས་པར་བསམས་ནས་ལྟེ་བའི་རྩ་འཁོར་གྱི་དབུས་ཀྱི་ཐད་དེར་སེམས་བཟུང་བས་ཞུགས་གནས་ཐིམ་གསུམ་འབྱུང་ལ། ཞུགས་པའི་རྟགས་མཉམ་རྒྱུ་ཤེད་མཚུངས། གནས་རྟགས་སྣ་བུག་ནས་རྒྱུ་བ་ཆད་ཅིང་ལྟོ་བ་མི་འགུལ། ཐིམ་རྟགས་འབྱུང་བཞི་ཐིམ་ཚེ་སྨིག་རྒྱུ་དུ་བ་མེ་ཁྱེར་མར་མེ་ལྟ་བུའི་སྣང་བ་དང༌། སྣང་མཆེད་ཐོབ་གསུམ་སོ་སོའི་རང་དུས་སུ་དཀར་ལམ་དམར་ལམ་ནག་ལམ་འཆར་ཞིང་འོད་གསལ་གྱི་ཚེ་སྟོན་གནམ་གཡའ་དག་ལྟ་བུའི་ཉམས་འཆར་རོ། །འོད་གསལ་དེ་ལ་གནས་བཞིན་པའི་ངང་ནས་བློའི་ཟུར་གཅིག་གིས་ལྷའི་སྐུ་དང་རྩ་འཁོར་སྔར་བཞིན་ལ་སྤྱི་བོར་ཧཾ་ཡིག་མགོ་ཐུར་ལྟ་དང་སྙིང་གར་ཧཱུཾ་ཡིག་བྱང་ཆུབ་ཀྱི་སེམས་ཀྱི་རང་བཞིན་ཅན། མགྲིན་པར་གཏུམ་མོའི་མེའི་རང་བཞིན་ཨཱཿ དམར་པོ་དང་ལྟེ་བར་ཡང་ཨ་ཐུང་ཤད་ཀྱི་རྣམ་པ་ཟླ་ཚེས་ཐིག་ལེ་དང་བཅས་བསམས་ལ་སྣ་བུག་གཉིས་ནས་རླུང་རྔུབ་པ་རོ་རྐྱང་བརྒྱུད་དེ་ཡུམ་གྱི་དབུ་མའི་རླུང་དང་ལྷན་ཅིག་རང་གི་དབུ་མར་ཞུགས། ལྟེ་བའི་ཨ་ཐུང་ལ་ཕོག་པས་འབར་ལ་ཁད་དུ་བྱེད་པ་མེ་གསོ་བ་དང༌། ཡང་བུས་པས་རྒྱ་ཁབ་ཙམ་འབར་
བ་མེ་སྦར་བ་དང༌། ཡང་བུས་པས་ཆེར་འབར་ཏེ་སྤྱི་བོའི་ཧཾ་ཡིག་ཞུ་ནས་མགྲིན་པ། སྙིང་ག །ལྟེ་བ། གསང་གནས་ཀྱི་རྩེའི་བར་སླེབ་པས་དགའ་བཞི་ལུགས་འབྱུང་དང༌། དེ་ལས་བཟློག་ནས་སྤྱི་བོའི་བར་དུ་སོན་པས་ལུགས་ལྡོག་གི་དགའ་བཞི་དྲངས་ཏེ་ལྷན་སྐྱེས་ཀྱི་བདེ་བ་དང་འོད་གསལ་གཉིས་སྦྱར་ནས་བསྒོམས་པ་ནི་སད་དུས་ཀྱི་ཆོས་སྐུའི་བསྲེ་བ་ཡིན། དེ་ལས་འཕེན་པའི་དབང་གིས་ལོངས་སྐུ་འཇིགས་བྱེད་དུ་ལྡང་བ་ན་སྔ་མའི་རྟགས་རྣམས་ལུགས་ལྡོག་ཏུ་འབྱུང་ཞིང་སད་དུས་ཀྱི་ལོངས་སྐུའི་བསྲེ་བ་དང༌། དེ་ཕུང་པོ་རྙིང་པ་འཇིགས་བྱེད་དམ་ཚིག་པར་གསལ་བ་ལ་འཇུག་པ་སད་དུས་ཀྱི་སྤྲུལ་སྐུའི་བསྲེ་བའོ། །དེ་གོམས་ན་གཉིད་དུས་ཀྱི་བསྲེ་བ་གསུམ་བསྒོམ་ཞིང༌། དེ་གཉིས་གོམས་ལ་ཚེ་འདིར་ལམ་གོང་མ་མ་ཐོབ་ན་འཆི་ཚེ་འཆི་དུས་ཀྱི་བསྲེ་བ་སྐོར་གསུམ་བསྒོམ། འདི་དག་ནི་ལུས་དབེན་གྱི་དོད་ཐུབ་ཡིན་ཞིང་སྔགས་ཀྱི་གཞིའི་རྣལ་འབྱོར་ཞེས་བྱའོ། །གཉིས་པ་སྙིང་གར་གནད་དུ་བསྣུན་པའི་སྔགས་ཀྱི་རྣལ་འབྱོར་དངོས་ལ་བུམ་པ་ཅན་དང་རྡོར་བཟླས་བསྒོམ་ཚུལ་གཉིས། དང་པོ་ནི། ཐུགས་ཀའི་རྩ་འཁོར་གྱི་དབུས་སུ་ཐིག་ལེ་དམར་པོ་འོག་དང་དཀར་པོ་སྟེང་བྱས་ཏེ་ཁ་སྦྱར་བ་སྲན་ཆུང་ཙམ། དེའི་ལྟེ་བར་ཧཱུཾ་དཀར་པོ་ཡུངས་འབྲུ་ཙམ་བསམ་པར་སེམས་བཟུང་ལ་སྣ་བུག་གཉིས་ནས་རླུང་ཅུང་ཟད་རྔུབ་མཆིལ་མ་སྒྲ་མེད་ཅིག་མིད་པ་དང་མཉམ་དུ་སྟེང་རླུང་སྲོག་འཛིན་དཀར་པོ་མར་མནན། འོག་རླུང་ཐུར་སེལ་སེར་པོ་ཡར་དྲངས་ཏེ་ཧཱུཾ་ལ་བསྟིམ་ནས་བསྒོམས་པས་ཞུགས་གནས་ཐིམ་གསུམ་འབྱུང་ཞིང༌། སྔར་བཞིན་གཏུམ་མོ་སྦར་བས་དགའ་བཞི་དྲངས་ལ་བདེ་
སྟོང་སྦྱར་ཏེ་བསྲེ་བ་གསུམ་སོགས་བསྒོམ་མོ། །རྡོར་བཟླས་ནི་ལྷ་སྐུ་རྩ་འཁོར་ཐུགས་ཀའི་དམིགས་རྟེན་ཧཱུཾ་ཡིག་རྣམས་སྔར་བཞིན་གསལ་བཏབ་ལ་ཧཱུཾ་གི་ནཱ་ད་ལས་རླུང་སྤོས་རེངས་ཀྱི་དུ་བ་ཕྲ་མོ་ལྟ་བུ་ཞིག་ཐོན་པས་ཧཱུཾ་གི་གདངས་དེ་སྤྱི་བོའི་རྩ་འཁོར་བར་དུ་སོང༌། ཨོཾ་གྱི་གདངས་ཀྱིས་ཕྱིར་དམིགས་རྟེན་ལ་ཐིམ་པ་ན་ཏིང་ལ་ཕུ་བཏབ་པ་ལྟར་ཨཱཿའི་གདངས་སུ་གནས་པར་བསམ་པ་སྟེང་འགྲོའི་རྡོར་བཟླས་དང༌། ཞབས་ཀྱུ་ནས་སྔར་ལྟར་འབྱུང་འཇུག་གནས་གསུམ་བྱེད་པ་འོག་འགྲོ། སྟེང་འོག་གཉིས་གཅིག་ནས་ཕྱིར་ཐིམ་པ་དང་གཅིག་ནས་ཕྱིར་འབྱུང་བ་མཉམ་དུ་བྱེད་པ་འབྲོས་འདེད། སྟེང་འོག་གཉིས་ཀར་མཉམ་དུ་ཕྱིར་འབྱུང་བ་སོགས་བྱེད་པ་ལྟག་སྤྲོད་དེ་རྩ་བའི་རླུང་གི་རྡོར་བཟླས་བཞི་དང༌། མིག་གི་མངོན་ཤེས་སོགས་འགྲུབ་པའི་ཕྱིར་རྩའི་རྩེ་མོ་མིག་གི་སྒོ་སོགས་སུ་ཟུག་པར་མོས་ལ་ཡན་ལག་གི་རླུང་ལྔའི་རྡོར་བཟླས་བྱེད་ཅིང་ཐིམ་རིམ་གྱི་མཐར་དགའ་བཞི་འདྲེན་ཚུལ་དང་བསྲེ་བ་སོགས་སྔར་བཞིན་བྱ་སྟེ་ངག་དབེན་གྱི་ལམ་མོ། །འདི་ལ་དང་པོ་སྔགས་སུ་ཕར་མོས་པ་ཙམ་དང་ཕྱིས་སྔགས་ཀྱི་གདངས་སུ་ཚུར་འཆར་བའི་གསུང་གི་ང་རྒྱལ་དུ་འཕོས་པ་འབྱུང་ལ། གནས་པའང་དང་པོ་ཆེད་དུ་བྱེད་པ་དགོས་ཀྱང་ཕྱིས་ངང་གིས་ལོངས་སྐུ་སོང་ནས་དེ་འབའ་ཞིག་པར་འགྲོའོ། །གཉིས་པ་དམ་ཚིག་གི་རྣལ་འབྱོར་ནི། དེ་ལྟར་རྡོར་བཟླས་ཀྱིས་རྩ་མདུད་ཅུང་ཟད་ལྷོད་ཀྱང་ཁྱབ་བྱེད་མ་འདུས་པས། དེ་བསྡུ་ཚུལ་དམིགས་རྟེན་སྔར་ལྟར་ལ་སེམས་དབེན་གྱི་སྟོང་པ་དང་པོར་འདྲེན་དུས་པདྨ་ཅན་སོགས་ལས་
རྒྱ་མེད་མི་རུང་ཡིན་ཞིང་ཕྱིས་ཡེ་རྒྱ་ལའང་བརྟེན་ཆོག་པས་ཕྱག་རྒྱའི་དྷཱུ་ཏཱི་རང་གི་དྷཱུ་ཏཱིར་བཅུག །དེ་གཉིས་ནས་རླུང་ཅུང་ཟད་རེ་བྱུང་བ་ཕྲད་མཚམས་སུ་འཁྱིལ། རླུང་ཕྲ་མོ་རེ་ཕན་ཚུན་གྱི་དྷཱུ་ཏཱིར་ཞུགས་པས་ཡབ་ཀྱི་སྤྱི་བོ་ནས་ཐིག་ལེ་དཀར་པོ་དང༌། ཡུམ་གྱི་སྤྱི་བོ་ནས་ཐིག་ལེ་དམར་པོ་ཡུངས་འབྲུ་ཙམ་རེ་ཕབ་པ་སྦྱོར་མཚམས་སུ་ཁ་སྦྱར་བས་རྩ་རླུང་ཐིག་ལེའི་རྡོ་རྗེ་སྐྱིལ་ཀྲུང་གསུམ་བྱས་ལ། རྩ་ཕྲན་ཀུན་གྱི་རྩ་བ་དམིགས་རྟེན་ལ་ཟུག །རྩེ་བ་སྤུའི་བུ་ག་དང་མཉམ་པའི་རྩ་རླུང་ཟིལ་བ་ཕྲོམ་མེ་བར་བསམ། དམིགས་རྟེན་ལས་རྩ་སོ་སོའི་ནང་དུ་རླུང་དུ་བ་ལྟ་བུ་ཧཱུཾ་གི་གདངས་ཀྱིས་འཕྲོས། སྣེར་སླེབ་པ་ན་དེས་སྣ་དྲངས་ཏེ་རྩ་བའི་རླུང་དང་བཅས་ཨོཾ་གྱི་གདངས་ཀྱིས་འདུས། དམིགས་རྟེན་ལ་ཐིམ་སྟེ་ཨཱཿ འི་གདངས་སུ་གནས་པ་དང༌། ཡང་དེ་ལས་འོད་འཕྲོས་སྣོད་བཅུད་དག་པར་བསྒྱུར་ཅིང་བསྡུས་ཏེ་རང་ཡབ་ཡུམ་དང་ཡུམ་ཡབ་ལ་ཐིམ་པ་ནས། མཐར་དམིགས་རྟེན་ལ་ཐིམ་པས་རྟགས་རྣམས་རིམ་པར་འཆར་རོ། །སྐབས་འདིར་སྙིང་གར་དགའ་བཞི་ལུགས་འབྱུང་ལྡོག་ཏུ་འདྲེན་ཚུལ་ནི། ལྟེ་གསང་གི་གཏུམ་མོ་སྦར་བས་རླུང་དང་བྱང་སེམས་འདུས་པ་སྙིང་གའི་རྩ་འདབ་རིམ་པ་གསུམ་གྱི་དང་པོར་སླེབ་པ་ན་དགའ་བ་དང་སྟོང་པ། བར་མར་སླེབ་པ་ན་མཆོག་དགའ་དང་ཤིན་ཏུ་སྟོང་པ། ནང་མར་སླེབ་པ་ན་ཁྱད་དགའ་དང་སྟོང་ཆེན། མི་ཤིགས་པའི་ཐིག་ལེའི་ངོ་བོ་ཧཱུཾ་ལ་ཐིམ་པ་ན་ལྷན་སྐྱེས་ཀྱི་དགའ་བ་དང་ཐམས་ཅད་སྟོང་པ་འོད་གསལ་ཏེ་ལུགས་འབྱུང་དང༌། དེ་ནས་ཕྱིར་རྩ་འདབ་གསུམ་དང་སྒོ་ཀུན་ཏུ་སླེབ་པས་ལུགས་ལྡོག་
གི་དགའ་བཞི་དང་སྟོང་བཞི་འབྱུང་བས་ལྷན་སྐྱེས་ཀྱི་དུས་བདེ་སྟོང་སྦྱོར་བ་སོགས་སད་དུས་ཀྱི་བསྲེ་བ་གསུམ་དང་གཉིད་དུས་ཀྱི་བསྲེ་བ་གསུམ་ཡང་སྒོམ་དགོས་སོ། །གསུམ་པ་དབྱིབས་ཀྱི་རྣལ་འབྱོར་ནི། སྒྱུ་ལུས་འགྲུབ་ཏུ་ཉེ་བར་མཐོང་བ་ན་སྔར་ལྟར་ཕྱིའི་རྐྱེན་ལས་ཀྱི་ཕྱག་རྒྱ་དང་སྙོམས་པར་འཇུག་ཅིང༌། ནང་གི་རྐྱེན་རྗེས་གཞིག་གི་སྡུད་རིམ་ལ་བརྟེན་ནས་རླུང་མཐའ་དག་འཆི་རིམ་ཇི་ལྟ་བ་བཞིན་སྙིང་གའི་མི་ཤིགས་པ་ལ་རྫོགས་པར་བསྡུས་པས་སེམས་དབེན་དཔེའི་འོད་གསལ་མཐར་ཐུག་གྲུབ་པ་ན་དེའི་བཞོན་པའི་རླུང་གིས་ཉེར་ལེན་དང༌། སེམས་རང་གིས་ལྷན་ཅིག་བྱེད་རྐྱེན་བྱས་པ་ལས་ལུགས་ལྡོག་གི་ཉེར་ཐོབ་གྲུབ་པ་དང་མཉམ་དུ་དབྱིབས་ཀྱི་རྣལ་འབྱོར་རིམ་པ་གསུམ་པའི་སྒྱུ་མའི་སྐུ་རྣམ་སྨིན་གྱི་ཕུང་པོ་རྙིང་པ་ལས་ལོགས་སུ་ཕྱེ་ནས་འགྲུབ་པ་རྨི་ལམ་གྱི་ལུས་ཁྱད་པར་བ་འགའ་ཞིག་དང་འདྲ་ལ། ལུས་རགས་པ་ལྟར་སྣང་ཡང་དེས་སྟོང་པས་རླུང་སེམས་ཀྱི་མདངས་ཙམ་ཡིན་པ་སྒྱུ་མ་ལྟ་བུ་དང༌། གཅིག་ལས་དུ་མར་སྤྲུལ་ནུས་པ་ཆུ་ཟླ་ལྟ་བུ། དཔེའི་འོད་གསལ་གྱི་མཇུག་ཐོགས་དེ་མ་ཐག་རླུང་ཙམ་ལས་ཐོལ་གྱིས་འབྱུང་བ་ཆུ་བུར་ལྟ་བུ། མཚན་དཔེ་སོགས་ཀུན་ཆ་ཚང་བ་གཟུགས་བརྙན་ལྟ་བུ་སྟེ་དཔེ་ལྔ་གསུངས་ལ་འདུས་པར་དཔེ་བཅུ་གཉིས་གསུངས་སོ། །སྒྱུ་ལུས་པ་དེས་ཀྱང་སྔར་ལྟར་ཕྱི་ནང་གི་ཐབས་གཉིས་ཀྱིས་ཡང་ཡང་འོད་གསལ་དུ་ཞུགས་ཏེ་ཡིད་ངོར་དག་པའི་སྒྱུ་མའི་སྐུར་ལྡང་བ་སོགས་བྱ་ལ། རྗེས་ཐོབ་ཏུ་ལྡང་བའི་
ཚེ་ཕུང་པོ་རྙིང་པ་འཇིགས་བྱེད་དུ་བལྟ་བའི་སྤྱི་བོ་ནས་ཞུགས་ཏེ་ཆོས་སྟོན་པ། སྙོམས་འཇུག །བཟའ་བཏུང་སོགས་ཀྱི་རྣལ་འབྱོར་སྐྱོང་བའོ། །བཞི་པ་རྣམ་དག་ཡེ་ཤེས་ཀྱི་རྣལ་འབྱོར་ལ་དོན་གྱི་འོད་གསལ་འགྲུབ་ཚུལ་དང༌། དེ་ལས་ཟུང་འཇུག་གི་སྐུར་ལྡང་ཚུལ་གཉིས། དང་པོ་ནི། དོན་གྱི་འོད་གསལ་འགྲུབ་ཏུ་ཉེ་བའི་མཚན་མ་མཐོང་བ་ན་བོགས་འབྱིན་གྱི་སྤྱོད་པ་ཅི་རིགས་བྱེད་ཅིང༌། འགྲུབ་པའི་སྲོད་ལ་བླ་མ་ཚོགས་ཀྱི་འཁོར་ལོ་སོགས་ཀྱིས་མཉེས་པར་བྱས་ཤིང་དེས་འོད་གསལ་གྱི་གདམས་པ་བསྟན་པ་བཞིན་ཕྱག་རྒྱ་བསྟེན་པ་དང་སྡུད་རིམ་གྱི་ཐབས་གཉིས་ལ་བརྟེན་ནས་ཕྱིའི་མངོན་བྱང་ཐོ་རངས་གཡའ་དག་གི་དུས་ནང་གི་མངོན་བྱང་ཐམས་ཅད་སྟོང་པ་དོན་གྱི་འོད་གསལ་ལམ་རྣམ་དག་ཡེ་ཤེས་ཀྱི་རྣལ་འབྱོར་མངོན་དུ་བྱེད་ཅིང༌། དེས་ཉོན་སྒྲིབ་ཀུན་བཏགས་ལྷན་སྐྱེས་ཐམས་ཅད་ཀྱི་དངོས་གཉེན་བྱེད་ཅིང་སྟོང་ཉིད་གསར་དུ་མངོན་སུམ་དུ་རྟོགས་པས་སྔགས་ཀྱི་འཕགས་ལམ་གྱི་ཐོག་མ་ཡིན་ནོ། །གཉིས་པ་དེ་ལས་ཟུང་འཇུག་གི་སྐུར་ལྡང་ཚུལ་ནི། འོད་གསལ་དེའི་ཚེ་མ་དག་པའི་སྒྱུ་མའི་སྐུ་རྒྱུན་ཆད་ཀྱང་དག་པའི་སྒྱུ་མའི་སྐུར་ལྡང་སྙམ་པའི་འཕེན་པའི་ཤུགས་ཀྱིས་མཇུག་དེ་མ་ཐག་འོད་གསལ་དེས་ལྷན་ཅིག་བྱེད་རྐྱེན་དང༌། དེའི་བཞོན་པའི་རླུང་འོད་ཟེར་ལྔ་པས་ཉེར་ལེན་བྱས་ཏེ་ཕུང་པོ་རྙིང་པ་ལས་ལོགས་སུ་དག་པའི་སྒྱུ་ལུས་འཇིགས་བྱེད་དཀར་པོ་ཡུམ་བཅས་ཀྱི་སྐུར་དངོས་གནས་ལ་ལྡང་བ་འབྱུང༌། དེའི་ཚེ་ཟུང་འཇུག་གཙོ་བོ་མ་ཐོབ་ཀྱང་ཉོན་སྒྲིབ་སྤངས་པའི་སྤངས་པ་ཟུང་འཇུག་ཐོབ་སྟེ་དགྲ་བཅོམ་པར་གྱུར་པ་ཡིན་
ནོ། །དེ་དང་མཉམ་དུ་ལུགས་ལྡོག་གི་ཉེར་ཐོབ་ནས་སྨིག་རྒྱུའི་བར་གྱི་རྟགས་རྣམས་འབྱུང་ངོ༌། །དེ་ནས་སྡུད་རིམ་གྱི་དམིགས་པ་མི་དགོས་པར་རང་བཞིན་མེད་པའི་སྟོང་ཉིད་ཀྱི་དོན་བསྒོམས་པ་ཁོ་ནས་རླུང་དབུ་མར་ཞུགས་གནས་ཐིམ་གསུམ་འབྱུང་བས་འོད་གསལ་དེས་སྐུ་དག་པ་སྒྱུ་མའི་སྐུ་དང༌། ཐུགས་དག་པ་དོན་གྱི་འོད་གསལ་གཉི་ག་དངོས་སུ་ཚང་བའི་སློབ་པའི་ཟུང་འཇུག་ཐོབ་ལ་འདི་ནས་ཤེས་སྒྲིབ་སྤོང་བའི་མགོ་ཚུགས་སོ། །དེ་ལས་རྗེས་ཐོབ་ཏུ་ལངས་པ་ན་ཡིད་ངོར་མི་སློབ་པའི་ཟུང་འཇུག་གི་སྐུར་ལྡང་སྙམ། དོན་སློབ་པའི་ཟུང་འཇུག་ལ་གནས་ཤིང་ཕུང་པོ་རྙིང་པ་སོགས་ལ་ཞུགས་ནས་སྔར་མ་བསླབས་པ་གསར་སློབ་མེད་ཀྱང་བསླབས་ཟིན་གོམས་པའི་ཕྱིར་རྗེས་ཀྱི་ཉམས་ལེན་ཅི་རིགས་སྐྱོང་ཞིང་ཤེས་སྒྲིབ་སྐོར་བར་པ་བདུན་རིམ་པར་སྤོང་ངོ༌། །དེ་ལྟར་རྣལ་འབྱོར་བཞིའི་བགྲོད་པ་མཐར་སོན་ཏེ་འབྲས་བུ་མངོན་དུ་བྱ་བའི་ཚུལ་ནི་སམྦུ་ཊི་ལས་འབྱུང་བ་བཞིན་མི་སློབ་པའི་ཟུང་འཇུག་འགྲུབ་ཏུ་ཉེ་བའི་མཚན་མ་མཐོང་བ་ན་ཚེས་བཅོ་ལྔའི་སྲོད་ལ་ཚོགས་ཀྱི་འཁོར་ལོ་བཤམས། གུང་ལ་བླ་མས་དབང་གསུམ་པ་དངོས་དབང་དུ་བསྐུར། ཐོ་རངས་ཟུང་འཇུག་གི་གདམས་པ་ཕོག་པ་བཞིན་ཕྱི་ནང་གི་མངོན་བྱང་སྦྱར་ཏེ་ཤེས་སྒྲིབ་ཐ་མའི་དངོས་གཉེན་སློབ་པ་མཐའི་དོན་གྱི་འོད་གསལ་མངོན་དུ་བྱས་པའི་སྐད་ཅིག་གཉིས་པར་མངོན་པར་རྫོགས་པར་སངས་རྒྱས་ཏེ་ཁ་སྦྱོར་ཡན་ལག་བདུན་ལྡན་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བྱེད་པ་ཡིན་ནོ། །གེགས་སེལ་
བོགས་འབྱིན་ཞལ་ལས་ཤེས་དགོས་ཀྱང༌། །རྣལ་འབྱོར་བཞི་ཡི་དོན་གྱི་གནད་ཚང་བ། །གསང་ཆེན་བཅུད་ཀྱི་ཐིག་པ་འདི་བྲིས་པའི། །དགེ་བས་འགྲོ་ཀུན་འཇམ་དཔལ་གནས་ཐོབ་ཤོག །ཅེས་པ་འདི་ནི་ལུང་དང་རིགས་པ་སྨྲ་བའི་རྣམ་དཔྱོད་མཆོག་ཏུ་ཡངས་པ་རྡོ་རམས་པ་ཡོན་ཏན་ལེགས་གྲུབ་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་ཤིན་ཏུ་གོ་བདེ་ཞིང་གནད་ཚང་བར་བྱས་ཏེ་བསྒྲིགས་པ་ཡིན་པས་གང་བྱུང་ལ་མི་སྟོན་པར་སྦས་པའི་ཚུལ་གྱིས་སྙིང་གི་ཐིག་ལེར་འཆང་དགོས་སོ།། །།