གཟུགས་མཆོག་མའི་འགྲེལ་པ།
གཟུགས་མཆོག་མའི་འགྲེལ་པ་བཞུགས་སོ། །
བླ་མ་གཤིན་རྗེའི་གཤེད་ལ་ཕྱག་འཚལ་ལོ། །རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་མཛད་པའི་འཇིགས་བྱེད་བསྐྱེད་རིམ་ལས། གྲུབ་ཆེན་ལཱ་ལི་ཏ་ནི་རྒྱུད་སྡུད་པ་པོ་དང་དབྱེར་མེད་པ་ཡིན་པས་གྲུབ་ཆེན་འདིའི་གསུང་རྣམས་རྒྱུད་ཀྱི་ཚིག་དང་དབྱེར་མེད་པར་བྱིན་རླབས་ཤིན་ཏུ་ཆེ་བ་དང༌། དོན་རྒྱ་ཆེ་བར་བྱེད་པས་ཚིགས་བཅད་འདི་ལ་བདེ་ཆེན་ཆོས་སྐུའི་སྒོ་ནས་བསྟོད་པ་དང༌། ཟུང་འཇུག་གཟུགས་སྐུའི་སྒོ་ནས་བསྟོད་པ་དང༌། མཛད་པ་འཕྲིན་ལས་ཀྱི་སྒོ་ནས་བསྟོད་པ་སོགས་བཤད་ཚུལ་མང་དུ་ཡོད་ཅིང༌། རྡོ་རྗེ་འཇིགས་བྱེད་ཀྱི་བྱིན་རླབས་མྱུར་དུ་འཇུག་པའི་སྔགས་དང་དབྱེར་མེད་པ་ཡིན་པས་རྗེ་རིན་པོ་ཆེས་ཀྱང་འདིའི་སྒོ་ནས་ཕྱག་འཚལ་ཚུལ་གསུངས་པ་ཡིན་ནོ། །ཞེས་པ་འདིའི་དོན་འགྲེལ་ཚུལ་ཇི་ལྟར་ཡིན་ཞེས་དྲིས་པའི་ལན་ཅུང་ཟད་དགྲོལ་བ་ལ། གཟུགས་མཆོག་མཆོག་ཏུ་དྲག་པོ་ཆེ། །ཞེས་སོགས་ཀྱི་ཚིགས་བཅད་འདི་ནི་ལཱ་ལི་ཏས་མཛད་པའི་སྒྲུབ་ཐབས་ཆེ་བ་ཞེ་དགུ་མའི་མཆོད་བརྗོད་ཡིན་ཞིང༌། བསྐྱེད་རིམ་རྣམས་ན་འདིའི་དོན་མཐའ་ཆོད་པར་བཀྲལ་བ་མི་སྣང་ཡང་མཚན་བརྗོད་དང་ཞིབ་ཏུ་བསྒྲགས་ཚེ། རྐང་པ་རེ་རེས་ཀྱང་བསྟོད་ཚུལ་དེ་གསུམ་གསུམ་བསྟན་པའི་བཅུ་གཉིས། བསྟོད་ཚུལ་གསུམ་རེ་རེའང་རྐང་པ་བཞི་བཞིས་བསྟན་པའི་བཅུ་གཉིས། རྐང་པ་རེ་དང་བསྟོད་ཚུལ་རེ་སྦྱར་ལ་རྐང་པ་ཐ་མ་དོན་བསྡུར་བྱས་པའི་བཞི་སྟེ་བཤད་
ཚུལ་ཉེར་བརྒྱད་ཀྱང་རུང་བར་སྣང་ནའང༌། འདིར་གནད་བསྡུས་ཏེ་བཤད་ན། གཟུགས་མཆོག་ཅེས་པ་ནི། གཟུགས་མེད་གཟུགས་བཟང་དམ་པ་སྟེ། །ཞེས་བདེ་ཆེན་ཡེ་ཤེས་ཁོ་ན་འཇའ་ཚོན་ལྟར་གཟུགས་སྐུར་སྣང་ནས་གཞན་དོན་སྒྲུབ་པ་ནི་རང་དོན་ཆོས་སྐུ་སྒྲིབ་པའི་དྲི་མ་དང་བྲལ་བ་གཟུགས་མེད་པའི་ནམ་མཁའ་ལྟ་བུ་དེའི་མཐུ་ལས་བྱུང་བ་ཡིན་ཏེ། ནམ་མཁའ་ལས་བྱུང་རང་བྱུང་བ། །ཞེས་རང་བྱུང་ནི་ལྷུན་གྱིས་གྲུབ་པ་ལོངས་སྐུ་ཡིན་པས་དེ་ཆོས་སྐུའི་ནམ་མཁའ་ལས་བྱུང་བར་བསྟན་པ་ཡིན་ནོ། །འདི་སོར་སྡུད་ཀྱི་ལམ་རྟགས་ལ་སྦྱར་བའི་སྐབས་ཡོད་ཀྱང་རྡོ་རྗེའི་ཚིག་གཅིག་དོན་དུ་མར་འཇུག་པས་མི་འགལ་ལོ། །མཆོག་ཏུ་དྲག་པོ་ཆེ། །ཞེས་པ་ཤིན་ཏུ་ཁྲོས་པའི་ཉམས་རྫོགས་པའི་གཤིན་རྗེའི་གཤེད་ཀྱི་སྐུར་བཞེངས་པ་ལ་སྦྱར་ན་གཟུགས་མཆོག་ཅེས་པར་བསྟོད་ཚུལ་སྔ་མ་གཉིས། དྲག་པོ་ཆེ་ཞེས་པར་ཕྱི་མ་སྟེ་གསུམ་ཚང་ངོ༌། །རྐང་པ་འདི་ཆོས་སྐུ་གཅིག་པུར་སྦྱར་ན་གཟུགས་མཆོག་ཅེས་པའི་མཆོག་ཏུ་འགྲོ་བྱེད་ཀྱི་རྒྱུ་ཟ་མ་ཏོག་གི་ནང་གི་ནོར་བུ་ལྟ་བུ་ཆོས་སྐུ་ཡིན་པས་དེ་གཙོ་ཆེ་ལ། དྲག་པོ་ཞེས་པའང༌། དྲག་པོ་ཆེན་པོ་དྲག་ཤུལ་ཆེ། །ཞེས་པའི་ཐད་ཀྱི་འཇམ་དཔལ་གྲགས་པའི་འགྲེལ་ཆེན་ལས། ཉོན་མོངས་པའི་དགྲ་བོ་རྟོག་པའི་བག་ཆགས་རྩ་བ་ནས་འབྱིན་པས་ན་དྲག་པོ་ཆེན་པོ་ཞེས་པ་ལྟར་རོ། །ལོངས་སྐུ་
གཅིག་པུར་སྦྱར་ན། གཟུགས་མཆོག་ཅེས་པ་ངོ་བོའི་སྒོ་ནས་དག་པའི་རླུང་སེམས་ཀྱི་རང་མདངས་ཙམ་དང་མཚན་དཔེ་རྫོགས་པའི་ལོངས་སྐུར་གོ་སླ་ལ། དྲག་པོར་སྣང་བའང་ངེས་པར་ཁྲོས་པ་མིན་གྱི། རླུང་དབུ་མར་ཞུགས་པའི་བདེ་ཆེན་གྱིས་གང་འདོད་དུ་སྣང་ནས་འགྲོ་བའི་གདུང་བ་སེལ་བའི་ནོར་བུ་ལྟ་བུ་ཐུན་མོང་མ་ཡིན་པའི་སྙིང་རྗེའི་མཐུ་ཡིན་ཏེ། རྩ་རྒྱུད་ལས། དྲག་ཤུལ་ཆེ་ཞིང་འཇིགས་པར་བྱེད། །ཅེས་པའི་འགྲེལ་བར་གཞོན་ནུ་ཟླ་བས། ཤིན་ཏུ་དྲག་པོའི་ལྷ་ཐམས་ཅད་འཇིགས་པར་བྱེད་པའི་ཕྱིར་དེའང་སྙིང་རྗེའི་འབྲས་བུ་ཉིད་དོ། །ཞེས་དང༌། འཇམ་དཔལ་འགྲེལ་ཆེན་ལས། ཐུགས་རྗེ་ནི་དྲག་པོ་ཆེན་པོ་ལ་སོགས་པའི་སྐུར་སྟོན་པ། ཞེས་སོ། །འདི་ཐུན་མོང་བའི་སྙིང་རྗེས་ཀུན་སློང་བྱས་པ་ལྟ་བུ་ཙམ་ཞིག་མིན་གྱི། ཐུན་མོང་མ་ཡིན་པའི་སྙིང་རྗེ་བདེ་ཆེན་རང་ཉིད་དེ་ལྟ་བུར་ཤར་བའི་དོན་ཡིན་ཏེ། སྤྱོད་བསྡུས་སུ་རྒྱུད་དྲངས་པ་ལས། གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་བུའི་ཉམས་ཀྱིས་དུ་མའི་གར་མཛད་དོ། །ཞེས་གདུལ་བྱ་ལ་ཕན་པའི་ཐབས་རྣམ་པ་ཐམས་ཅད་དུ་ཤར་ནས་དོན་སྒྲུབ་པ་ནོར་བུ་ལྟ་བུ་ཡིན་པས། དོན་ཡོད་ཞབས་ཀྱིས། ཡིད་བཞིན་ནོར་བུ་ཆེན་པོ་ལྟར། །ཇི་ལྟར་འདོད་པའི་སྐུར་སྟོན་མཛད། །ཅེས་དང༌། ཞི་བ་ཡེ་ཤེས་ཀྱིས་ཀྱང༌། ཐུགས་རྗེས་གདུག་པ་མ་ལུས་འདུལ་བའི་ཕྱིར། །ཞེས་གསུངས་པས། མཆོག་ཏུ་དྲག་པོར་འགྲོ་ཚུལ་མཆོག་ཏུ་བརྩེ་བའི་བདེ་ཆེན་ལྷན་ཅིག་སྐྱེས་པ་ལ་བྱེད་ཅིང་དེ་གསང་དབང་གི་ལམ་གྱི་བསྒྲུབ་བྱ་ཡིན་པས་འབྲས་བུ་ལོངས་སྐུ་དང་འབྲེལ་ལོ། །རྐང་
པ་དེ་སྤྲུལ་སྐུར་སྦྱར་ན། གཟུགས་མཆོག་ཏུ་འགྲོ་བའི་རྒྱུ་མཚན། གཟུགས་རྣམ་ཐམས་ཅད་སྣང་བའི་དཔལ། །ཞེས་གདུལ་བྱའི་དོན་ལ་གང་འགྱུར་དེ་ཐམས་ཅད་དུ་ཤར་ནས་སྐྱོབ་པའི་བྱེད་ལས་འབྲས་བུའི་ཆ་དེའི་སྒོ་ནས་གཙོ་བོར་བཞག་པ་ཡིན། མཆོག་ཏུ་དྲག་པོ་ཆེ། །ཞེས་པ། ཁྲོ་བོ་གཤིན་རྗེ་གཤེད་མཐོང་ན། །ཁྲོ་བོ་གཞན་རྣམས་ཐམས་ཅད་ཀྱིས། །ཐམས་ཅད་ཐམས་ཅད་ལག་ཆ་འཆོར། །ཞེས་ཤིན་ཏུ་ཁྲོ་ཉམས་ཡོངས་སུ་རྫོགས་པ་ལ་གྲགས་ཆེ་བ་ལྟར་རོ། །རྐང་པ་གཉིས་པའང་དཔའ་བོ་ནི། །དཔའ་བོ་བདུད་དགྲ་བདུད་འདུལ་བ། །ཞེས་བདུད་བཞིའི་གཡུལ་ལས་རྒྱལ་བའི་རང་དོན་ཆོས་སྐུ་བསྟན། ལྷག་མས་དེ་ཐོབ་ནས་གཟུགས་སྐུ་གཉིས་ཀྱིས་གཞན་དོན་ལ་སྤྱོད་པས་དོན་ཚན་ཕྱི་མ་གཉིས་བསྟན་ཏོ། །ཡང་འགྲེལ་ཆེན་ལས། ཕྱི་དང་ནང་གི་བདག་ཉིད་ཅན་གྱི་དགྲ་བོ་ངེས་པར་ཟློག་པར་མཛད་པའི་བརྩོན་འགྲུས་དང་ལྡན་པས་དཔའ་བོའོ། །ཞེས་པ་ལྟར་ན། དཔའ་བོའང་ནང་གི་དགྲ་བོའམ་གཤིན་རྗེ་ཉོན་མོངས་བཅོམ་པས་ཆོས་སྐུ། གསང་བའི་གཤིན་རྗེ་ལས་རླུང་བཅོམ་པས་ལོངས་སྐུ། ཕྱིའི་གཤིན་རྗེ་འབྱུང་པོ་མ་རུངས་པ་རྣམས་འཇོམས་པའི་དྲག་པོའི་སྤྲུལ་སྐུ་གསུམ་ག་ལ་སོ་སོར་སྦྱར་དུ་རུང༌། མཆོག་གི་སྤྱོད་ཡུལ་ཅན། །ཞེས་པའང༌། སངས་རྒྱས་ཀུན་གྱིས་མངོན་སུམ་པ། །ཞེས་སངས་རྒྱས་ནང་ཕན་ཚུན་ཁོ་ནའི་མངོན་སུམ་གྱི་སྤྱོད་ཡུལ་དུ་གྱུར་པ་སོ་སོར་རང་གི་རིག་པའི་ཡེ་ཤེས་ཆོས་སྐུ་དང༌། དག་པའི་བརྟན་གཡོ་འབའ་ཞིག་གི་རྣམ་པར་
རོལ་བས་ལོངས་སྐུ། བརྟན་གཡོ་རབ་འབྱམས་ཀྱི་རྣམ་པར་རོལ་བས་སྤྲུལ་སྐུ་སྟེ། མཆོག་གི་སྒྲ་རབ་དང་རྒྱ་ཆེན་པོ་སོགས་དུ་མ་ལ་འཇུག་གོ །རྐང་པ་དེ་ལོངས་སྐུ་གཅིག་པུར་སྦྱོར་ན། དཔའ་བོ་ནི་དྲིལ་བུ་པའི་དབང་ཆོག་ལས། དཔའ་བོ་བདེ་བ་ཆེན་པོས་རྟོགས། ཞེས་ཟུང་འཇུག་གི་ཡར་གྱུར་པའི་སྒྱུ་ལུས་དཔའ་བོའི་སྒྲས་བསྟན་པ་གཞན་དོན་ལ་མི་འཇིགས་པའི་ཐབས་གཙོ་བོར་གྱུར་པའི་རྒྱུ་མཚན་གྱིས་ཡིན་པས་བརྟེན་པ་ལྷའི་སྐུ་བསྟན་ཅིང༌། ཕྱི་མས་རྟེན་གཞལ་ཡས་ཁང་སོགས་བསྟན་ནོ། །རྐང་པ་དེ་སྤྲུལ་སྐུ་དང་སྦྱར་ན་ཤིན་ཏུ་ཁྲོས་པའི་རྣམ་རོལ་གྱིས་འཇིག་རྟེན་དང་འཇིག་རྟེན་ལས་འདས་པའི་ལྷ་ལ་བསྡིགས་པར་མཛད་ཅིང༌། ཁྱད་པར་དུ་དྲག་པོ་སོགས་འཇིག་རྟེན་པའི་ལྷ་མཐུ་བོ་ཆེ་ཐམས་ཅད་ཞབས་འོག་ཏུ་མནན་ནས་དབང་དུ་བྱེད་པའི་དཔའ་བོ་དང༌། དེ་དག་གི་ཆུང་མ་བྷི་མོ་སྟེ་དྲག་མོ་སོགས་ཕྲོགས་ནས་དགའ་བ་བཞིས་རོལ་ཅིང༌། གཞན་ཡང་གནས་འཁོར་རྒྱན་ལག་ཆ་སོགས་ཐམས་ཅད་ཕྲོགས་ནས་ལོངས་སུ་སྤྱོད་པས་མཆོག་གི་སྤྱོད་ཡུལ་ཅན་ནོ། །དེ་གཉིས་ནི་སངས་རྒྱས་མཉམ་སྦྱོར་ལས། སྡིག་མེད་སྟོབས་ཀྱིས་ངོ་མཐོན་དུ། །དབང་ཕྱུག་དམ་པ་རབ་མནན་ནས། །ལྷ་མོ་བྷི་མོ་ཕྲོགས་ནས་ནི། །དེ་ཚེ་ལོངས་སྤྱོད་རང་གིར་མཛད། །ཅེས་དང༌། ཞི་བ་ཡེ་ཤེས་ཀྱིས། གཡས་ཀྱི་ཞབས་བརྒྱད་བསྐུམ་ཞེས་སོགས་དོན་འདྲའོ། །སྲིད་པའི་རི་བོ་ཆེན་པོ་འཇོམས། །ཞེས་པའང་དྲང་དོན་དུ་བཤད་པའི་ཚེ་འཇིག་རྟེན་གྱི་ལྷ་ཆེན་པོར་རློམ་པས་དྲེགས་པ་རྣམས་ཀྱི་ཁེངས་པ་བསྙིལ་བ་ལ་གསུངས་ཤིང༌། བཏུལ་བའི་དོན་དབང་དུ་བྱེད་
པ་དང་། ལོངས་སྤྱོད་པ་དང༌། ཐིམ་པ་གསུམ་དུ་གསུངས་པས་སོ་སོར་ཕྱེ་ན་སྔར་བཞིན་ཡིན་ལ། ལོངས་སྤྱོད་པ་དང་དབང་དུ་བྱེད་པ་ཡིན་པས་གཉིས་ཀ་གཉི་གར་སྦྱར་ཆོག་སྟེ། འགྲེལ་ཆེན་ལས། ཡང་ན་ཚངས་པ་དང༌། དབང་ཕྱུག་ཆེན་པོ་དང༌། ཞེས་པ་ནས། དགའ་མོ་མཐུ་སྟོབས་ཀྱིས་བླངས་ཏེ། དྲག་པོའི་སྟོབས་ཀྱིས་ལེན་པར་མཛད་པས་ན་དཔའ་བོ། ཞེས་སོ། །རྐང་པ་གསུམ་པ་ནི། གདུལ་དཀའ་འདུལ་བ་རྣམས་ཀྱི་མཆོག་ཅེས་པ་ལ་དྲང་ངེས་ཀྱི་བཤད་པ་མཛད་པ་ལྟར། ཤིན་ཏུ་གདུལ་དཀའ་བ་ཉོན་མོངས་དང་ལས་རླུང་དང་འབྱུང་བོ་གདུག་ཅན་སོ་སོ་དང་གསུམ་ཆར་འདུལ་བའི་སྒོ་ནས་དོན་ཚན་རེ་རེ་བ་དང་གསུམ་གར་སྦྱོར་དགོས་ལ། གཏམ་རྒྱུད་ཀྱི་རྟོག་པ་སོགས་གྲགས་ཚོད་ཆེ་བ་དང་བསྟུན་ན་དྲག་པོའི་ཆོ་འཕྲུལ་གྱིས་གཤིན་རྗེ་དང་མ་མོ་ཕྱོགས་སྐྱོང་བཅུ་སོགས་བཏུལ་བ་ལ་སྒེར་དུ་སྦྱར་ན་འབྲེལ་ཆེ་སྟེ། ཞི་བ་ཡེ་ཤེས་ཀྱིས། དུར་ཁྲོད་ཆེན་པོའི་དཀྱིལ་འཁོར་ཞེས་སོགས་དང༌། དཔལ་འཛིན་གྱི་བསྟོད་པ་དེ་ཉིད་ལྔ་པ་ལས། སྡིགས་མཛུབ་དྲག་པོས་གདུལ་དཀའ་འདུལ། །མགོ་ལྡོག་མནན་ནས་རབ་ཏུ་གསོལ། །ཞེས་སོགས་ཤིན་ཏུ་མང་ངོ༌། །རྐང་པ་བཞི་པའང༌། འཇིགས་ཆེན་འཇིགས་པར་བྱེད་པ་པོ། །ཞེས་པའི་འགྲེལ་ཆེན་ལས། དྲག་ཤུལ་ཆེ་བའི་འཇིགས་བྱེད་ཆེན་པོའི་གཟུགས་འཇིགས་སུ་རུང་བར་བསྟན་ནས། ཞེས་པ་ལྟ་བུ་ཕྱི་ལ་སྦྱར་བ་དྲང་དོན་ཡིན་ཞིང༌། ངེས་དོན་ནི་དུས་འཁོར་ཊཱིཀ་ཆེན་དེ་ཉིད་སྣང་བ་ལས། སེམས་ཅན་རྣམས་ལ་འཇིགས་པར་
བྱེད་པའི་སྒྲིབ་པའི་བག་ཆགས་དག་ཀྱང་འཇིགས་པར་བྱེད་པའི་བདེ་ཆེན་དེ་ཉིད། ཅེས་པ་ལྟར། བདེན་གཉིས་དབྱེར་མི་ཕྱེད་པའི་ཡེ་ཤེས་ཀྱི་སྐུ་ལ་བྱེད་པས། དོན་ཚན་གསུམ་ག་དེའི་ཁོངས་ནས་ཐོན་ཞིང་མཐའ་ཆོད་པར་ནི་མཚན་བརྗོད་ལུགས་དྲུག་སོགས་ཀྱི་བཤད་སྲོལ་གུང་བསྒྲིགས་ཏེ་བཙལ་བར་བྱའོ། །ཞེས་པ་འདི་ནི་བསོད་ནམས་ཀྱིས་མངོན་པར་མཐོ་བ་ནཻ་མན་ཝང་གི་སྲས་བློ་དང་བརྩོན་པར་ལྡན་པ་འཇམ་དཔལ་རྡོ་རྗེའི་འདུན་པ་བཞིན། ྋབཙུན་པ་དཀོན་མཆོག་བསྟན་པའི་སྒྲོན་མེས་མདོ་ཙམ་དུ་བྱས་པའོ། །དགེ་ལེགས་འཕེལ། །