རྡོར་སེམས་བསྒོམ་བཟླས་ཀྱི་སྒོ་ནས་ཉེས་ལྟུང་སྦྱོང་ཚུལ།
རྡོར་སེམས་བསྒོམ་བཟླས་ཀྱི་སྒོ་ནས་ཉེས་ལྟུང་སྦྱོང་བའི་ཉམས་ལེན་སྙིང་པོར་བྱ་ཚུལ་བཞུགས་སོ། །
ན་མོ་གུ་རུ་བཛྲ་སཏྭ་ཡ། འདིར་རྡོར་སེམས་བསྒོམ་བཟླས་ཀྱི་སྒོ་ནས་ཉེས་ལྟུང་སྦྱོང་བ་ཉམས་ལེན་གྱི་སྙིང་པོར་བྱེད་པར་འདོད་པའི་གང་ཟག་གིས་དམ་ཚིག་དང་སྡོམ་པའི་བསྔོ་བགྲང༌། སྡིག་ལྟུང་སོ་སོའི་ཉེས་དམིགས་རྣམས་ཡིད་ལ་དྲན་པས་སྔར་བྱས་ཀྱི་ཉེས་ཚོགས་ལ་འགྱོད་སེམས་དང༌། ལྷ་སྔགས་ཀྱི་བྱིན་རླབས་ལ་ཡིད་ཆེས་ཤུགས་དྲག་པོའི་སྒོ་ནས་སྐྱབས་སེམས་སྔོན་དུ་བཏང་ལ། རང་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོར་དྲིལ་འཛིན་པའི་སྐུར་གྱུར། རང་གི་སྤྱི་བོར་པཾ་ལས་པདྨ་དང་ཨཱ་ལས་ཟླ་བའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་དཀར་པོ་རྩེ་ལྔ་པ། ལྟེ་བ་ལ་ཧཱུཾ་གིས་མཚན་པ། དེ་ལས་འོད་འཕྲོས། འདུས་ཡོངས་སུ་གྱུར་པ་ལས། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་བསྙེམས་མ་དཀར་མོ་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་དར་གྱི་ན་བཟའ་དང་རིན་པོ་ཆེའི་རྒྱན་སྣ་ཚོགས་པས་བརྒྱན་པ། ཡབ་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་དཀར་པོ། དེ་ལས་འོད་ཟེར་འཕྲོས། རང་འདྲའི་ཡེ་ཤེས་པ་སྤྱན་དྲངས། གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རྣམས་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས་
ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་དབང་བསྐུར། སྐུ་ཡེ་ཤེས་ཀྱི་བདུད་རྩིས་གང༌། མི་བསྐྱོད་པས་དབུ་བརྒྱན་པར་གྱུར། མཆོད་པ་བླ་མེད་ལྟར་བྱིན་གྱིས་བརླབས་ལ། ཨོཾ་བཛྲ་སཏྭ་ཨརྒྷཾ་ནས་ཤཔྟ་པྲ་ཏཱིཙྪ་ཧཱུཾ་སྭཱཧཱ། ཞེས་པའི་བར་གྱིས་དབུལ། དམིགས་མེད་བདེ་ཆེན་རྡོ་རྗེའི་མཚོན་རྣོན་གྱིས། །ལས་ཉོན་སྡིག་ལྟུང་དྲ་བ་གཅོད་མཛད་ཅིང༌། །ཟུང་འཇུག་གནས་སུ་འཁྲིད་པའི་ས་མཁན་མཆོག །བླ་མ་རྡོ་རྗེ་སེམས་དཔའ་ལ་ཕྱག་འཚལ། །སྤྲོ་ན་དེའི་འཕྲོར། ཕུལ་བྱུང་བྱམས་དང་སྙིང་རྗེ་ཕྱག་བརྐྱངས་ཏེ། །ངན་སོང་གཡང་ལས་སྒྲོལ་བའི་འདྲེན་པ་མཆོག །ཡབ་གཅིག་བསྟན་པའི་སྒྲོན་མེ་ཐུགས་རྗེའི་གཏེར། །བཀའ་དྲིན་དྲན་པའི་ཡིད་ཀྱིས་གསོལ་འདེབས་ན། །དལ་འབྱོར་རྙེད་དཀའ་འཇིག་པར་སླ་བ་དང༌། །ངན་སོང་སྡུག་བསྔལ་བསམ་པས་འཇིགས་སྐྲག་གིས། །སྐྱབས་འགྲོ་ལས་འབྲས་བླང་དོར་ལ་འབད་ནས། །ངན་སོང་སྐྱེ་སྒོ་ཆོད་པར་བྱིན་གྱིས་རློབས། །བསྟན་པའི་གཞི་མ་སོ་ཐར་ཁྲིམས་ནོད་ཅིང༌། །ཐར་པའི་དྲུང་དུ་འཇུག་པའི་ལམ་སྟོན་པ། །ཡབ་གཅིག་བསྟན་པའི་སྒྲོན་མེ་༝། །བཀའ་དྲིན་དྲན་པའི་ཡིད་༝། །རྣམ་དག་ངེས་འབྱུང་བརྟན་པོས་རྒྱུད་འཁུལ་ཞིང༌། །མི་བཟད་ཉེས་པའི་སྒོ་བཞི་ཡོངས་བཀག་སྟེ། །བསླབ་གསུམ་རྣམ་པར་དག་པའི་ཉམས་ལེན་གྱིས། །ཐར་པའི་རྒྱལ་མཚན་ཚུགས་པར་བྱིན་གྱིས་རློབས། །ཐེག་པ་མཆོག་གི་ཚུལ་ཁྲིམས་ལ་བཀོད་
དེ། སྲིད་དང་ཞི་བའི་མཐའ་ལས་ཡོངས་སུ་འཛིན། །ཡབ་གཅིག་བསྟན་པའི་སྒྲོན་མེ་༝། །བཀའ་དྲིན་༝། །བྱམས་དང་སྙིང་རྗེ་བདག་གཞན་བརྗེ་བའི་བློས། །རིན་ཆེན་བྱང་ཆུབ་སེམས་ཀྱི་རྩ་བརྟན་ཅིང༌། །ཚོགས་གཉིས་སྤྱོད་པའི་ཡལ་འདབ་རྒྱས་པ་ཡི། །ཐེག་མཆོག་ལམ་བཟང་སྐྱེ་བར་བྱིན་གྱིས་རློབས། །འཇུག་སྒོ་རྣམ་དག་དབང་གིས་སྨིན་བྱས་ཏེ། །གསང་ཆེན་གདམས་པའི་དགའ་སྟོན་ལྷུག་པར་སྩོལ། །ཡབ་གཅིག་བསྟན་པའི་སྒྲོན་མེ་༝། །བཀའ་དྲིན་དྲན་༝། །དངོས་གྲུབ་རྩ་བ་དམ་ཚིག་རྣམ་པར་དག །མཚན་བཅས་མཚན་མེད་རིམ་གཉིས་རྣལ་འབྱོར་སོགས། །གསང་ཆེན་ལམ་གྱི་བགྲོད་པ་མཐར་ཕྱིན་ཏེ། །ཟུང་འཇུག་གོ་འཕང་ཐོབ་པར་བྱིན་གྱིས་རློབས། །མདོར་ན་ཇི་སྲིད་བྱང་ཆུབ་སྙིང་པོའི་བར། །འདྲེན་པ་ཁྱོད་ཀྱིས་འབྲལ་མེད་རྗེས་འཛིན་ཅིང༌། །ཟབ་རྒྱས་གདམས་པའི་བདུད་རྩི་མྱང་བ་ཡིས། །སྟོབས་བཅུ་མངའ་བའི་གོ་འཕང་མྱུར་ཐོབ་ཤོག །ཅེས་པའི་གསོལ་འདེབས་འདི་ཉིད་སྦྱོར། དེ་ནས། བླ་མ་ལྷའི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་གི་མཐའ་མར་ཡི་གེ་བརྒྱ་པའི་སྔགས་ཀྱིས་བསྐོར་བར་གྱུར། བཅོམ་ལྡན་འདས་རྡོ་རྗེ་སེམས་དཔའ། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་དང༌། དམ་ཚིག་ཉམས་ཆག་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས། ཐུགས་ཀའི་ཧཱུཾ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཉེས་པའི་མཆོད་པ་ཕུལ། དེ་རྣམས་ཀྱི་ཡོན་ཏན་ཐམས་ཅད་འོད་ཀྱི་རྣམ་པར་བསྡུས་ནས་ཐུགས་ཀའི་ཧཱུཾ་ལ་ཐིམ་པས་གཟི་བརྗིད་དང་མཐུ་སྟོབས་ཕུན་སུམ་ཚོགས་པར་གྱུར། བཟླས་
པ་ཅི་འགྲུབ་བྱ། མཇུག་ཏུ་མཆོད་བསྟོད་གོང་བཞིན་བྱས་ལ། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །རྡོ་རྗེ་སེམས་དཔའི་ཞལ་ནས་རིགས་ཀྱི་བུ། ཁྱོད་ཀྱི་སྡིག་སྒྲིབ་དང་དམ་ཚིག་ཉམས་ཆག་ཐམས་ཅད་བྱང་ཞིང་དག་གོ །ཞེས་གསུངས་ནས། རང་ལ་ཐིམ་པས་རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མི་ཕྱེད་པར་གྱུར། ཅེས་སྔ་མའི་སྡིག་ལྟུང་སངས་ཀྱིས་དག་སོང་སྙམ་དུ་དགའ་བ་སྐྱེད་ཅིང༌། ཕྱིན་ཆད་མི་བྱེད་སྙམ་པའི་སྡོམ་སེམས་ནན་ཏན་དུ་བྱ་བའི་བཤགས་པ་གནད་དུ་འགྲོ་བའི་བོགས་འབྱིན་གྱི་གཙོ་བོ་ཡིན་ནོ། །ཞེས་པ་འདི་ནི་དད་བརྩོན་བློ་དང་ལྡན་པ་ཆོས་སྐྱོང་རྒྱ་མཚོས་ངག་འདོན་དུ་བྱ་རྒྱུར། ༸བཙུན་པ་དཀོན་མཆོག་བསྟན་པའི་སྒྲོན་མེས་བསྒྲིགས་པའོ།། །།དཀོན་མཆོག་ཀུན་འདུས་འཇིགས་མེད་དབང་པོའི་སྡེ། །བཀའ་དྲིན་མཉམ་མེད་མཁས་གྲུབ་བསྟན་འཛིན་ཞབས། །ཐར་ལམ་གསལ་མཛད་བསྟན་པའི་སྒྲོན་མེ་སྟེ། །རྗེ་བཙུན་བླ་མ་རྣམས་ལ་གསོལ་བ་འདེབས། །ཐོག་མེད་དུས་ནས་མི་དགེ་ཅི་བགྱིས་དང༌། །ཁྱད་པར་སྡོམ་གསུམ་བཅས་མཚམས་ལས་འདས་ཤིང༌། །བླ་མ་མཆོག་གསུམ་ཞིང་ལ་བརྟེན་པ་ཡི། །མི་བཟད་སྡིག་པ་གང་བགྱིས་མཐོལ་ལོ་བཤགས། །བདག་སོགས་ལས་ངན་ཇི་ཙམ་མཐའ་ཡས་པ། །ཁྱེད་རྣམས་ཐུགས་རྗེའི་མཐའ་ཡང་དེ་ཙམ་ཕྱིར། །སེམས་ཀྱི་དབང་དུ་གྱུར་ལ་མི་རྨོངས་པར། །ཉེས་ཀུན་ལྷག་མེད་བྱང་བར་བྱིན་གྱིས་རློབས། །སྒོ་གསུམ་དགེ་བ་ཕྲ་རགས་ཅི་
མཆིས་པ། །བླ་མའི་ཐུགས་བསྐྱེད་རྒྱ་མཚོར་རོ་གཅིག་ཏུ། །འདྲེས་ཏེ་དུས་གསུམ་རྒྱལ་བས་བསྔགས་པ་ཡི། །རྒྱལ་སྲས་སྤྱོད་པ་ཀུན་གྱི་རྒྱུར་གྱུར་ཅིག །འདི་ནས་འཕོས་ཚེ་བླ་མ་ལྷག་པའི་ལྷས། །དགྱེས་པའི་འཛུམ་ཞལ་བསྟན་ནས་དག་ཞིང་དུ། །ཁྲིད་དེ་འབྲལ་བ་མེད་པར་རྗེས་བཟུང་ནས། །གསུང་གི་བདུད་རྩིས་སྨིན་ཅིང་གྲོལ་གྱུར་ཅིག །འདི་ཡང་རྗེ་ཉིད་ཀྱིས་གསུངས་སོ།།