མགོན་པོ་འོད་དཔག་མེད་ལ་བརྟེན་པའི་འཕོ་ཁྲིད་སོགས།
མགོན་པོ་འོད་དཔག་མེད་ལ་བརྟེན་པའི་འཕོ་ཁྲིད་སོགས་འཕོ་ཁྲིད་ཀྱི་སྐོར་དག་ཞིང་དུ་མར་བགྲོད་པའི་མྱུར་ལམ་ཞེས་བྱ་བ་བཞུགས་སོ། །
རབ་འབྱམས་རྒྱལ་བའི་འཁོར་ལོ་མ་ལུས་པའི། །མི་ཤིགས་གསུང་གི་གསང་བ་རྡོ་རྗེ་ཆོས། །བདེ་ལྡན་ཞིང་མགོན་སྣང་བ་མཐའ་ཡས་ཀྱིས། །དམིགས་མེད་ཐུགས་རྗེས་བྱང་ཆུབ་བར་དུ་སྐྱོངས། །ཐུབ་པའི་གསང་གསུང་ཆོས་ཀྱི་རོལ་མཚོ་ལས། །བསྔགས་པའི་རླབས་ཕྲེང་འབུམ་ཕྲག་སྤྲོ་བའི་གནས། །སྐྱོན་བྲལ་དག་པའི་ཞིང་མཆོག་བདེ་ལྡན་དུ། །བགྲོད་བྱེད་ཐབས་ཀྱི་གྲུ་གཟིངས་བརྟེན་པར་རིགས། །དེའང་སྟོན་པ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་གདུལ་བྱའི་མོས་པ་བཞིན་དུ་ཆོས་ཀྱི་ཕུང་པོ་མཐའ་ཡས་པར་གསུངས་པ་རྣམས་མཐར་སྲིད་ཞིའི་རྒུད་པ་མཐའ་དག་ལས་གྲོལ་བའི་མི་གནས་པའི་མྱང་འདས་སུ་བགྲོད་བྱེད་ཤ་སྟག་ཡིན་ཀྱང་། དེ་ལ་ཐོག་མར་འཁོར་བ་ལས་རྒྱབ་ཀྱིས་ཕྱོགས་པ་དང་། དེའི་སྔོན་དུའང་ངན་སོང་གི་སྒོ་ཁེགས་པ་ཞིག་བྱེད་དགོས་པས། བཙན་ཐབས་འཚང་རྒྱ་འཕོ་བའི་གདམས་པ་ཞེས་བྱ་བ་སྒྲུབ་པར་སླ་ཞིང་ཤིན་ཏུ་དོན་ཆེན་པོ་དང་ལྡན་པ་འདི་ལྟ་བུ་ལ་ཉམས་ལེན་གྱི་མཐིལ་དུ་བཟུང་སྟེ་འབད་དགོས་ཤིང་། དེའང་འཕོ་བའི་གདམས་པ་ནི་དཔལ་གསང་བ་འདུས་པ་སོགས་བླ་མེད་ཀྱི་རྒྱུད་སྡེ་མ་གཏོགས་གཞན་ལས་ངོས་ཟིན་གསལ་བར་མ་བྱུང་ཡང་། དམ་པ་གོང་མ་རྣམས་དེའི་རིགས་པས་རྒྱས་བཀབ་སྟེ་མགོན་པོ་འོད་དཔག་མེད་དང་རྗེ་བཙུན་བྱམས་མགོན་
སོགས་ལ་བརྟེན་པའི་འཕོ་བའི་རིགས་མང་དུ་གསུངས་ལ། དེ་རྣམས་ཀྱི་ནང་ནས་ཀྱང་། རྒྱལ་བ་འོད་དཔག་མེད་ལ་བརྟེན་པའི་འཕོ་བ་ནི་ཤིན་ཏུ་ཟབ་ཅིང་དོན་ཆེ་སྟེ། རྒྱལ་བ་རང་ཉིད་ཀྱིས་སྔོན་སྨོན་ལམ་མཛད་པ་ལས། སེམས་ཅན་གང་དག་ང་ཡི་མིང་ཐོས་ན། །ང་ཡི་ཞིང་དུ་རྟག་ཏུ་འོང་བར་ཤོག །ང་ཡི་སྨོན་ལམ་བཟང་པོ་དེ་རྫོགས་པས། །འཇིག་རྟེན་ཁམས་མང་དག་ནས་སེམས་ཅན་འོང་། །དེ་དག་ང་ཡི་ཞིང་དུ་ལྷགས་ནས་ནི། །དེ་དག་སྐྱེ་བ་གཅིག་ལས་ཕྱིར་མི་ལྡོག། །ཅེས་ཞིང་དེར་སྐྱེ་བའི་རྒྱུ་སྒྲུབ་པར་སླ་ཞིང་དེར་སྐྱེས་ནས་སླར་ལས་ཉོན་གྱི་གཞན་དབང་དུ་གྱུར་ཏེ། འཁོར་བར་ཉིང་མཚམས་སྦྱོར་བ་མི་སྲིད་པར་གསུངས་ལ། དེའི་རྒྱུ་མཚན་གྱིས་སྟོན་པ་ཐུབ་པའི་དབང་པོས་ཀྱང་གཟུངས་དང་མདོ་སྡེ་དུ་མར་ཕན་ཡོན་གྱི་སྐབས་སུ་དག་པའི་ཞིང་བདེ་བ་ཅན་དུ་སྐྱེ་བར་འགྱུར་རོ། །ཞེས་དག་པའི་ཞིང་ཐམས་ཅད་ལས་འདི་ཉིད་དམིགས་ཀྱིས་བཀར་ནས་དེར་སྐྱེ་བའི་ཐབས་ལ་སྒོ་དུ་མ་ནས་སྦྱོར་བར་མཛད་དོ། །དེར་སྐྱེ་བའི་རྒྱུའང་ཞིང་བཀོད་ཀྱི་མདོ་དང་། ཞིང་མཆོག་སྒོ་འབྱེད་སོགས་ལས་གསུངས་པ་ལྟར། རྒྱལ་བ་འོད་དཔག་མེད་ལ་དམིགས་པའི་དད་པ། ཞིང་མཆོག་བདེ་བ་ཅན་དུ་སྐྱེ་འདོད་ཀྱི་འདུན་པ། རང་གི་སྔར་བྱས་ཀྱི་དགེ་རྩ་ཐམས་ཅད་ཞིང་དེར་སྐྱེ་བའི་རྒྱུར་བསྔོ་བ་གསུམ་
ནི་མེད་མི་རུང་ཡིན་ཞིང་། དེ་ན་དངོས་ཀྱི་གདུལ་བྱ་རིགས་ཅན་གཉིས་སུ་ཡོད་པ་ལས། ཐེག་པ་ཆེན་པོའི་རིགས་ཅན་དུ་སྐྱེ་བ་ལ་རྒྱུ་སྔ་མ་གསུམ་གྱི་སྟེང་དུ་བྱང་ཆུབ་ཀྱི་སེམས་བསྐྱེད་པའང་དགོས་པར་གསུངས་པས་དེ་དག་རང་རྒྱུད་ལ་ཚང་མ་ཚང་ལེགས་པར་བརྟགས་ཏེ་མཐུན་རྐྱེན་ཡོངས་སུ་རྫོགས་པའི་རྨང་གཞི་ཟིན་པ་དང་། ཚེ་འདིའི་ལུས་ལོངས་སྤྱོད་གཉེན་བཤེས་སོགས་ལ་ཆགས་པ་ནི་བ་ལ་ཧའི་རྟོགས་བརྗོད་ལྟར་དག་པའི་ཞིང་དུ་འཕོ་བའི་གེགས་བྱེད་ཀྱི་གཙོ་བོར་གསུངས་པས་མི་མཐུན་པའི་རྐྱེན་རྣམས་དང་བྲལ་བར་བྱས་ཏེ་འཕོ་བའི་གདམས་པ་དངོས་ཀྱི་ཉམས་ལེན་ལ་འཇུག་པར་བྱའོ། །དེ་ལ་ཐོག་མར་མགོན་པོ་འོད་དཔག་མེད་ཀྱི་སྐུ་དང་བདེ་བ་ཅན་གྱི་ཞིང་བཀོད་སོགས་དམིགས་རྟེན་རྣམས་ལེགས་པར་བཀྲམ། མཆོད་པ་གཙང་ཞིང་གྱ་ནོམ་པ་བཀོད་པས་མཛེས་པར་བཤམས། རང་ཉིད་བདེ་བའི་སྟན་ལ་འཁོད་དེ་ཀུན་སློང་ལེགས་པར་བཅོས་ནས་སྐྱབས་སེམས་སྔོན་དུ་གཏོང་བ་སོགས་སྦྱོར་བའི་ཆོས་རྣམས་གདམས་པ་སྤྱི་དང་འདྲ་བར་ཚགས་སུ་ཚུད་པར་བྱ། དེ་ནས། རང་གི་མདུན་གྱི་ནམ་མཁར་རྨ་བྱས་བཏེག་པའི་རིན་པོ་ཆེའི་ཁྲིའི་སྟེང་དུ་པད་ཟླའི་གདན་ལ་རྒྱལ་བ་འོད་དཔག་མེད་སྐུ་མདོག་དམར་པོ་བྱུ་རུའི་མདོག་ཅན། མཉམ་བཞག་གི་ཕྱག་རྒྱས་བདུད་རྩིས་གང་བའི་ལྷུང་བཟེད་བསྣམས་པ། སྐུ་ལ་ཆོས་གོས་ངུར་སྨྲིག་གསོལ་ཞིང་དབུ་གཙུག་ཏོར་དང་བཅས་པ། རྡོ་རྗེ་སྐྱིལ་མོ་ཀྲུང་གིས་བཞུགས་པའི་གནས་གསུམ་དུ་ཡི་གེ་གསུམ་གྱིས་མཚན་པའི་ཐུགས་ཀའི་ཧཱུཾ་ཡིག་ལས་
འཕྲོས་པའི་འོད་ཟེར་གྱིས་ནུབ་ཕྱོགས་བདེ་བ་ཅན་ནས་མགོན་པོ་འོད་དཔག་མེད་ཡེ་ཤེས་པ་སྤྱན་དྲངས་ཏེ་མདུན་གྱི་འོད་དཔག་མེད་ལ་བསྟིམ་པའམ། ཡང་ན་དམ་ཚིག་པ་མི་སྐྱེད་པར་ལྷ་མགྲོན་གྱི་ཚུལ་དུ་སྤྱན་འདྲེན་པ་ལ་མ་ག་དྷའི་རྟོགས་བརྗོད་ལྟར་བྱས་ལ། ཚོགས་གཉིས་རིན་ཆེན་དག་པའི་ཁམས་ལས་གྲུབ། །སྲིད་པའི་སྐྱོན་བྲལ་བདེ་ལྡན་ཞིང་མཆོག་ནས། །བཅོམ་ལྡན་འོད་དཔག་མེད་མགོན་འཁོར་དང་བཅས། །དགྱེས་བཞིན་འདིར་གཤེགས་མདུན་གྱི་ནམ་མཁར་བཞུགས། །ཞེས་སྤྱན་དྲངས། སྒོ་གསུམ་མི་ཕྱེད་དང་བས་ཕྱག་འཚལ་ཞིང་། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོས་མཆོད། །ཐོག་མེད་ནས་བསགས་སྡིག་ལྟུང་མ་ལུས་བཤགས། །བདག་གཞན་དགེ་བའི་ཚོགས་ལ་རྗེས་ཡི་རང་། །མྱ་ངན་མི་འདའ་བསྐལ་བརྒྱར་རྟག་བཞུགས་ནས། །ཟབ་རྒྱས་ཆོས་ཀྱི་འཁོར་ལོ་བསྐོར་དུ་གསོལ། །ལེགས་བྱས་མཐའ་དག་བྱང་ཆུབ་མཆོག་ཏུ་བསྔོ། །ཞེས་བསགས་སྦྱང་གི་གནད་བསྡུས་པ་ཡན་ལག་བདུན་པ་དབུལ། དེ་ནས་རང་གི་ལུས་ཤེལ་གྱི་ཕྲུ་མ་བུས་པ་བཞིན་དུ་དྭངས་ཤིང་གསལ་བའི་དབུས་ཅུང་ཟད་རྒྱབ་ལ་ཉེ་བའི་ཕྱོགས་སུ་རྩ་དབུ་མ་མདའ་སྙུག་གི་ཚད་ཙམ་པ་ཕྱི་དཀར་ལ་ནང་དམར་བ་རྩའི་སྐྱོན་རྣམས་དང་བྲལ་ཞིང་སྨད་ཕྲ་བ་ལྟེ་འོག་སོར་གསུམ་ཙམ་དུ་སླེབ་ཅིང་། སྟོད་ཡངས་པ་སྤྱི་བོའི་གཙུག་དང་ཁ་ད་ཆད་དུ་ཡོད་པའི་མར་སྣེའི་ནང་དུ་རྣམ་ཤེས་ཀྱི་ངོ་བོ་ཡི་གེའམ། འོད་ཀྱི་རང་བཞིན་ཅན་
གྱི་ཐིག་ལེ་དཀར་ལ་དམར་བའི་མདངས་ཆགས་པ་འཕར་ལ་ཁད་པ་ཞིག་གསལ་གདབ་དེའང་རང་ཉིད་འཕེན་པ་པོ་དང་རྣམ་ཤེས་འཕང་བྱ་ལྟ་བུའི་ངོ་བོ་སོ་སོ་བར་བཟུང་ནས་ཅི་ཙམ་སྦྱངས་ཀྱང་འཕོ་བ་གནད་དུ་མི་འགྲོ་བར་གསུངས་པས་ཕྱིའི་ལུས་འདི་སྡོད་གནས་ཀྱི་ཁང་པ་ལྟ་བུར་བྱས་ཏེ། རང་ཉིད་ནི་དབུ་མའི་ནང་གི་ཤིན་ཏུ་ཕྲ་བའི་རླུང་སེམས་ཀྱི་ངོ་བོ་ཐིག་ལེ་དང་ངོ་བོ་དབྱེར་མེད་པའི་ཚུལ་གྱིས་ཙེན་ནེ་གནས་པར་བསམ་ལ། ངག་ཏུ་ཚིགས་བཅད་བརྗོད་པ་དང་ལྷན་ཅིག་བྱས་ན་འཇུག་པ་བདེ་བས། རང་ལུས་དྲང་པོར་བསྲང་བའི་ལྟེ་བའི་འོག །སོར་གསུམ་ཐད་ནས་དབུ་མ་མདའ་སྙུག་ཙམ། །རྒལ་གཞུང་ལ་ཉེ་ཚངས་བུག་ལ་ཟུག་པ། །སྨད་ཕྲ་སྟོད་སྦོམ་རག་དུང་དབྱིབས་ཅན་གྱི། །མར་སྣེའི་ནང་དུ་རྣམ་ཤེས་ཡི་གེ་འམ། །འོད་ཀྱི་ཐིག་ལེ་དཀར་འཚེར་འཕར་ལ་ཁད། །རྩེ་གཅིག་བསྒོམས་ཏེ་མདུན་གྱི་བླ་མ་ལྷར། །སྙིང་ཁུང་རུས་པས་གསོལ་བ་འདི་ལྟར་འདེབས། །དུས་གསུམ་ཕྱོགས་བཅུའི་རྒྱལ་བ་ཐམས་ཅད་ཀྱི། །ཡོན་ཏན་གཅིག་བསྡུས་རྩ་བའི་བླ་མ་དང་། །དབྱེར་མེད་སྐྱབས་མགོན་ཐུགས་རྗེ་གཏེར་ཁྱོད་ལ། །གསོལ་བ་འདེབས་སོ་ངན་འགྲོའི་འཇིགས་ལས་སྐྱོབས། །ཞེས་གསོལ་བ་ཕུར་ཚུགས་སུ་འདེབས། དེ་ནས་མདུན་གྱི་འོད་དཔག་མེད་དེ་ཉིད་སྤྱི་བོར་བྱོན་པའམ་རང་འདྲ་གཉིས་པ་ཞིག་བྱོན་པར་མོས་ལ། ངག་ཏུའང་། དེ་ལྟར་གསོལ་བཏབ་མདུན་གྱི་སྣང་མཐའ་ལས། །གཉིས་པ་ཆད་ནས་རང་གི་ཚངས་བུག་སྟེང་། །རིགས་བདག་ཚུལ་བཞུགས་ཐུགས་ཀའི་ཐད་དྲང་གི །དབུ་མ་རག་དུང་དབྱིབས་ཅན་
མར་སྣེའི་ནང་། །ཐལ་ལེ་ཡོད་པའི་ཁ་དང་རང་ཉིད་ཀྱི། །སྤྱི་བོའི་དབུ་མ་ཕྲད་མཚམས་གང་གིས་ཀྱང་། །དབྱེ་མི་ནུས་པར་བསམས་ལ་སྣང་མཐའ་ཡི། །ཐུགས་ཀའི་ཐད་ཀྱི་དྷཱུ་ཏཱིའི་ནང་དུ་ནི། །ཧྲཱིཿ ཡིག་དམར་ལ་ཤིན་ཏུ་འཚེར་བ་ཞིག །བསྒོམས་ཏེ་སླར་ཡང་གསོལ་བ་འདི་ལྟར་འདེབས། །ཞེས་ཚིག་དོན་དྲན་བཞིན་པས་དལ་བུས་བརྗོད་ལ། རྩ་དབུ་མ་གཉིས་ཁ་སྦྱོར་དུ་ཡོད་པའི་རང་གི་དབུ་མའི་ནང་ནས་ཡར་བལྟས་པས། སྤྱི་བོའི་འོད་དཔག་མེད་ཀྱི་ཐུགས་ཀའི་གཉིས་སུ་མེད་པའི་ཡེ་ཤེས་ཀྱི་ངོ་བོ་ཧྲཱིཿ ཡིག་དེ་ཉིད་མཐོང་སྟེ་རང་ཡང་དེར་འཕོ་འདོད་ཀྱི་འདུན་པ་ཤུགས་དྲག་པོ་སྦྱངས་ལ། དེའང་རྒྱལ་བ་དེ་ཉིད་ཀྱི་ཐུགས་རྗེ་བྱིན་རླབས་ལ་རག་ལས་པར་མཐོང་ནས་བློ་ལིངས་ཀྱིས་བཀལ་བའི་རེ་ལྟོས་རྩེ་གཅིག་པ་དང་བཅས། བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བའི་དཔའ་བོ་སྟེ། །དག་པའི་ཞིང་དུ་འཁྲིད་པའི་དེད་དཔོན་མཆོག །མགོན་པོ་འོད་དཔག་མེད་ལ་གསོལ་བ་འདེབས། །ཞེས་ལན་གསུམ་མམ་བདུན་སོགས་བརྗོད། དེ་ནས། འདི་ཕྱི་བར་དོའི་འཇིགས་ལས་བསྒྲལ་དུ་གསོལ། །འཁྲུལ་སྣང་བར་དོའི་འཕྲང་ལས་བསྐྱབ་ཏུ་གསོལ། །བཟོད་དཀའ་ངན་འགྲོའི་གཡང་ལས་དྲང་དུ་གསོལ། །འདི་སྣང་ཞེན་པའི་འཆིང་བ་གཅད་དུ་གསོལ། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །དག་པའི་
ཞིང་དུ་འཁྲིད་པར་བྱིན་གྱིས་རློབས། །རེ་ས་གཞན་ན་མེད་དོ་ཐུགས་རྗེས་གཟིགས། །ཞེས་གསོལ་བ་བཏབ་པས་སྤྱི་བོའི་འོད་དཔག་མེད་ཀྱི་ཐུགས་ཀའི་ཧྲཱིཿ དེ་ལས་འོད་ཟེར་ལྕགས་ཀྱུ་ལྟ་བུ་ཞིག་ནར་གྱིས་བྱུང་བས་རང་སེམས་ཐིག་ལེར་བཏབ། རང་གིས་ཀྱང་འོག་རླུང་དྲག་ཏུ་འཕེན་པའི་ཤུགས་ཀྱིས་གྱེན་དུ་འཕང་བའི་དམིགས་པ་དང་བཅས་ཏེ་ཧིཀ་ཅེས་བརྗོད་པས་གྱེན་དུ་སྤར། ཀ་ཞེས་བརྗོད་པས་རང་གནས་སུ་བབ་པ་ལན་གསུམ་ལ་སོགས་སུ་བྱ། ལས་སྦྱོར་དངོས་གཞིའི་ཚེ་ཧིཀ་ཐ་མས་འོད་དཔག་མེད་ཀྱི་ཐུགས་དང་དབྱེར་མེད་དུ་བསྲེས། ཕཊ་ཅེས་བརྗོད་པས་དེ་ཉིད་བདེ་བ་ཅན་དུ་གཤེགས། དེའི་ཐུགས་ཀ་ནས་ཕྱིར་ཕྱུང་པདྨའི་སྦུབས་སུ་ཡིད་ལུས་བླངས་ཏེ་རྒྱལ་བ་དེའི་གསུང་གི་བདུད་རྩི་ལ་ལོངས་སྤྱད་པར་མོས་ཤིང་རྒྱུན་ལྡན་དུ་མཐར་སྤྱི་བོའི་འོད་དཔག་མེད་དེ་ཉིད་འོད་དུ་ལྟེམ་གྱིས་ཞུ་བས་ཚངས་བུག་ཐལ་གྱིས་བཀག་པར་མོས་ན་བྱིན་རླབས་ཀྱི་ཁྱད་དང་ཚེ་སྒྲུབ་ཀྱི་མན་ངག་ཟབ་མོར་འགྱུར་རོ། །འདིར་འབད་ལས་བྱུང་ལེགས་བྱས་པདྨ་དཀར། །རྣམ་དག་བསླབ་གསུམ་སྦྲང་རྩིའི་སྙིང་པོ་ཅན། །བདེ་ལྡན་ཞིང་མཆོག་ལྷ་ཡི་དགའ་ཚལ་དུ། །སྣང་བ་མཐའ་ཡས་མདུན་སར་མཛེས་གྱུར་ཅིག །ཅེས་མགོན་པོ་འོད་དཔག་མེད་ལ་བརྟེན་པའི་འཕོ་བའི་ཉམས་ལེན་མདོར་བསྡུས་འདི་ནི། བསྔགས་འོས་ཡོན་
ཏན་དུ་མས་མངོན་པར་མཐོ་བ་རྒ་ཤོའུ་སྤྲུལ་སྐུ་བློ་བཟང་དབང་གྲགས་རྒྱལ་མཚན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་ཀ་ཇུའི་མཁར་དུ་བྲིས་པ་སྐྱེ་འགྲོ་ཀུན་ལ་ཕན་ཐོགས་པར་གྱུར་ཅིག །༈ བདེ་བ་ཅན་ནས་རྩ་བའི་བླ་མ་དང་། །དབྱེར་མེད་སྐྱབས་ཀྱི་དམ་པ་འོད་དཔག་མེད། །འཁོར་བཅས་ཐོགས་མེད་རང་མདུན་མདའ་གང་གི །ནམ་མཁར་སྤྱན་དྲངས་དགྱེས་པའི་ཚུལ་གྱིས་བཞུགས། །སྒོ་གསུམ་གུས་པས་ཕྱག་འཚལ་ཕྱི་ནང་གི །མཆོད་འབུལ་སྡིག་ལྟུང་བཤགས་ཤིང་རང་གཞན་གྱི། །དགེ་ལ་ཡི་རང་ཆོས་འཁོར་བསྐོར་བ་དང་། །མྱ་ངན་མི་འདའ་རྟག་བཞུགས་དགེ་རྣམས་བསྔོ། །བླ་མ་སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་འཁོར་རྒྱལ་སྲས་རྒྱ་མཚོའི་ཚོགས་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ལན་བདུན་སོགས། དུས་གསུམ་ཕྱོགས་བཅུའི་རྒྱལ་བ་ཐམས་ཅད་ཀྱི། །ཡོན་ཏན་གཅིག་བསྡུས་རྩ་བའི་བླ་མ་དང་། །དབྱེར་མེད་སྐྱབས་མགོན་ཐུགས་རྗེའི་གཏེར་ཁྱོད་ལ། །གསོལ་བ་འདེབས་སོ་ངན་འགྲོའི་འཇིགས་ལས་སྐྱོབས། །བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བའི་དཔའ་བོ་སྟེ། །དག་པའི་ཞིང་དུ་འཁྲིད་པའི་དེད་དཔོན་མཆོག །མགོན་པོ་འོད་དཔག་མེད་ལ་གསོལ་བ་འདེབས། །ཚར་གསུམ། འདི་ཕྱི་བར་དོའི་འཇིགས་ལས་
བསྒྲལ་དུ་གསོལ། །བཟོད་དཀའ་ངན་འགྲོའི་གཡང་ལས་བསྐྱབ་ཏུ་གསོལ། །ཚེ་འདི་བློ་ཡིས་ཐོངས་པར་བྱིན་གྱིས་རློབས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །དག་པའི་ཞིང་དུ་འཁྲིད་པར་བྱིན་གྱིས་རློབས། །རེ་ས་གཞན་ན་མེད་དོ་ཐུགས་རྗེས་གཟིགས། །ཧིཀ་གསུམ། ཕཊ་ཅེས་མཇུག་ཏུ་སྦྱོར། ༈ ཚེ་ལྡན་ཡིན་ན་ཡན་ལག་བདུན་པའི་འཕྲོར། ཁྱོད་ལུས་དྲང་བོར་བསྲང་བའི་ལྟེ་བའི་འོག །སོར་གསུམ་ཐད་ནས་དབུ་མ་མདའ་སྙུག་ཙམ། །སྒལ་གཞུང་ལ་ཉེ་ཚངས་བུག་ལ་ཟུག་པ། །སྨད་ཕྲ་སྟོད་སྦོམ་རག་དུང་དབྱིབས་ཅན་གྱི། །མར་སྣེའི་ནང་དུ་རྣམ་ཤེས་ཡི་གེ་འམ། །འོད་ཀྱི་ཐིག་ལེ་དཀར་འཚེར་འཕར་ལ་ཁད། །རྩེ་གཅིག་བསྒོམས་ཏེ་མདུན་གྱི་བླ་མ་ལྷར། །སྙིང་ཁུང་རུས་པས་གསོལ་བ་འདི་ལྟར་ཐོབས། །དུས་གསུམ་ཕྱོགས་བཅུའི། ཞེས་པ་ནས། འཇིགས་ལས་སྐྱོབས། །དེ་ལྟར་གསོལ་བཏབ་མདུན་གྱི་སྣང་མཐའ་ལས། །གཉིས་པ་ཆད་ནས་ཁྱོད་ཀྱི་ཚངས་བུག་སྟེང་། །རིགས་བདག་ཚུལ་བཞུགས་ཐུགས་ཀའི་ཐད་དྲང་གི །དབུ་མ་རག་དུང་དབྱིབས་ཅན་མར་སྣེའི་ནང་། །ཐལ་ལེ་ཡོད་པའི་ཁ་དང་ཁྱོད་རང་གི །སྤྱི་བོའི་དབུ་མ་ཕྲད་མཚམས་གང་གིས་ཀྱང་། །དབྱེ་མི་ནུས་པར་བསམ་ལ་སྣང་མཐའ་ཡི། །ཐུགས་ཀའི་ཐད་ཀྱི་དྷཱུ་ཏཱིའི་ནང་དུ་ནི། །ཧྲཱིཿ ཡིག་དམར་ལ་ཤིན་ཏུ་འཚེར་བ་ཞིག །བསྒོམས་ཏེ་སླར་ཡང་གསོལ་བ་འདི་ལྟར་ཐོབ། །བསླུ་མེད་མ་མན་འདྲ། ཧིཀ །ཀཿ སྦྲེལ་བ་ཚར་གསུམ། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །ཞེས་སོགས་བསྔོ་སྨོན་གྱིས་མཚམས་སྦྱར་བར་བྱའོ། །༈ བླ་མ་
འོད་དཔག་མེད་ལ་ཕྱག་འཚལ་ལོ། །འདིར་གཤིན་པོ་ལ་འཕོ་བ་འདེབས་པའི་ཚུལ་ཆོ་ག་ལྷོ་སྒོ་སོགས་དང་འབྲེལ་ན་དེས་འཐུས་ལ། མིན་ཚེ་འཕོ་བའི་སྔོན་དུ་གཤིན་པོའི་རྣམ་ཤེས་དགུག་དགོས་པས། མཆོག་གསུམ་གྱི་བདེན་བརྗོད་སོགས་དངོས་སུ་བྱེད་པའམ། མིན་ཡང་ཡིད་ཀྱིས་གསོལ་བ་བཏབ་སྟེ་ར་མདར་སྦྲན་ཞིང་བཀུག་པའི་དམིགས་པ་སྐྱོང་བ་གལ་ཆེ་བས་སྐྱབས་ཡུལ་ལ་དད་པ་དང་གཤིན་པོ་ལ་སྙིང་རྗེའི་དམིགས་པ་སྔོན་དུ་བཏང་སྟེ། བདེ་བ་ཅན་ནས་རྩ་བའི་བླ་མ་དང་། །དབྱེར་མེད་སྐྱབས་ཀྱི་དམ་པ་འོད་དཔག་མེད། །འཁོར་བཅས་སྤྱན་དྲངས་དུས་འདས་མདུན་གྱི་མཁར། །བརྩེ་ཞིང་དགྱེས་པའི་ཉམས་ཀྱིས་བཞུགས་པར་གྱུར། །དེ་ནས་ཡན་ལག་བདུན་པའི་དམིགས་རྣམ་དང་བཅས། སྒོ་གསུམ་གུས་པས་ཕྱག་འཚལ་ཕྱི་ནང་གི །མཆོད་འབུལ་སྡིག་ལྟུང་བཤགས་ཤིང་རང་གཞན་གྱི །དགེ་ལ་ཡི་རང་ཆོས་འཁོར་བསྐུལ་བ་དང་། །མྱ་ངན་མི་འདའ་རྟག་བཞུགས་དགེ་རྣམས་བསྔོ། །ཞེས་དང་། སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ཞེས་གསོལ་བ་འདེབས་པ་ལན་གང་མང་བྱ། འཽ། །འཇིག་རྟེན་འདི་ན་མཆོག་དམན་ཐམས་ཅད་ཀྱི་སྟེང་དུ་ཁྱད་པར་མེད་པར་འབབ་པའི་འཆི་བ་མི་རྟག་པ་བྱ་བ་དེ་ད་ལན་ཁྱོད་ཀྱི་སྟེང་དུ་བབས་ནས་ད་ལྟ་སྲིད་པ་བར་དོ་ན་གནས་པའི་སྐབས་ཡིན། ཁྱོད་རང་གིས་ལེགས་པར་བརྟག་ན་འགྲོ་འོང་བྱ་སྤྱོད་སྣང་ཚུལ་ཐམས་ཅད་སྔར་དང་མི་འདྲ་བ་དེ་བར་དོར་གནས་པའི་
རྟགས་ཡིན། སྐབས་འདིར་དགའ་མི་དགའི་སྣང་བ་ཅི་བྱུང་ཡང་གསོན་དུས་ཀྱི་རྨི་ལམ་དང་འདྲ་བས་དེའི་རྗེས་སུ་འབྲང་མི་ཉན། དེ་ལས་དཀོན་མཆོག་ལ་གསོལ་བ་བཏབ་ན་ད་ལྟ་ཉེན་ཆེ་ལ་སྒྱུར་སླ་བའི་དུས་ཡིན་པས། ཁྱེད་ཀྱི་མགོན་སྐྱབས་སུ་བླ་མ་འོད་དཔག་མེད་ངེད་ཀྱིས་སྤྱན་དྲངས་ཡོད་པ་འདིར་ངས་བརྗོད་པའི་ཚིག་རིས་བཞིན་གསོལ་བ་རྩེ་གཅིག་ཏུ་ཐོབ་ཅིག །དུས་གསུམ་ཕྱོགས་བཅུའི་རྒྱལ་བ་ཐམས་ཅད་ཀྱི། །ཡོན་ཏན་གཅིག་བསྡུས་རྩ་བའི་བླ་མ་དང་། །དབྱེར་མེད་སྐྱབས་མགོན་ཐུགས་རྗེའི་གཏེར་ཁྱོད་ལ། །གསོལ་བ་འདེབས་སོ་ངན་འགྲོའི་འཇིགས་ལས་སྐྱོབས། །ཞེས་གསོལ་བ་བཏབ་པས་འོད་དཔག་མེད་གཤིན་པོའི་སྤྱི་བོར་བྱོན་ཏེ་བཞུགས་པའི་དབུ་མའི་མར་སྣེ་དང་གཤིན་པོའི་དབུ་མའི་ཡར་སྣེ་དབྱེར་མེད་དུ་སྦྱར་བའི་ལམ་ནས་རྣམ་ཤེས་གྱེན་དུ་འཕོ་བའི་ཕྱིར་སླར་ཡང་། བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བའི་དཔའ་བོ་སྟེ། །དག་པའི་ཞིང་དུ་འཁྲིད་པའི་དེད་དཔོན་མཆོག །བླ་མ་འོད་དཔག་མེད་ལ་གསོལ་བ་འདེབས། །འདི་ཕྱི་བར་དོའི་འཇིགས་ལས་བསྒྲལ་དུ་གསོལ། །བཟོད་དཀའ་ངན་འགྲོའི་གཡང་ལས་བསྐྱབ་ཏུ་གསོལ། །ཚེ་འདི་བློ་ཡིས་ཐོངས་པར་བྱིན་གྱིས་རློབས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །དག་པའི་ཞིང་དུ་འཁྲིད་པར་བྱིན་གྱིས་རློབས། །རེ་ས་གཞན་ན་མེད་དོ་ཐུགས་རྗེས་གཟིགས། །ཞེས་གསོལ་བ་བཏབ་པས་ཐུགས་ཀའི་ཧྲཱིཿ ལས་འོད་ཟེར་ལྕགས་ཀྱུ་ལྟ་བུ་ཐུར་དུ་འཕྲོས། གཤིན་པོའི་རྣམ་ཤེས་དབུ་མའི་ལམ་ནས་གྱེན་དུ་
དྲངས་ཏེ་ཧྲཱིཿ ལ་ཐིམ་པར་བསམ་ཞིང་ཧིག་ལན་གསུམ་བརྗོད། ཕཊ་ཅེས་བརྗོད་པ་དང་མཉམ་དུ་དེ་ཉིད་བདེ་བ་ཅན་དུ་གཤེགས་པའི་ཐུགས་ཀ་ནས་རྣམ་ཤེས་ཕྱིར་ཐོན། པདྨའི་སྦུབས་སུ་སྐྱེ་བ་བླངས་ཏེ་མགོན་པོ་འོད་དཔག་མེད་ཀྱི་སྲས་ཀྱི་ཐུ་བོར་གྱུར་པར་བསམ་ཞིང་། རྒྱལ་བའི་དཀྱིལ་འཁོར་ཞེས་སོགས་ཀྱི་སྨོན་པས་མཚམས་སྦྱར་བར་བྱའོ། །༈ བསྔོ་བའི་མགོ་མཇུག་ཐམས་ཅད་སྤྱི་དང་འདྲ། གཤིན་པོའི་ཆེད་དམིགས་ཀྱིས་ཅུང་ཟད་རྒྱས་པར་བྱེད་ན། དམིགས་ཡུལ་ཚེ་ལས་འདས་པ་དེ་ཉིད་ཀྱི་ཆེད་དུ་དམིགས་ཏེ་ཉེ་དུ་མཛའ་བཤེས་ཤུལ་ན་མཆིས་པ་རྣམས་ཀྱིས་འཁོར་གསུམ་རྣམ་པར་དག་པའི་སྒོ་ནས་དཀོན་མཆོག་ལ་མཆོད་པ། དབུལ་ཕོངས་ལ་སྦྱིན་པ། གཟུངས་སྔགས་ཟབ་མོའི་བཟླས་བརྗོད། མདོ་སྡེ་ཀློག་འདོན། དཀྱིལ་འཁོར་དུ་བཅུག་སྟེ་དབང་བསྐུར་བ་སོགས་དགེ་བའི་རྩ་བ་ཇི་སྙེད་ཅིག་བགྱིས་པ་ཐམས་ཅད་ཀྱང་ཚེ་འདས་དེ་ཉིད་ཀྱི་རྣམ་པར་ཤེས་པ་ཁམས་གསུམ་འགྲོ་བ་རིགས་དྲུག་གང་དུ་གནས་ཀྱང་དེའི་རྗེས་སུ་འབྲང་ཞིང་རྗེས་སུ་འཇུག་པར་གྱུར་ཅིག །དེའི་མཐུ་དང་ནུས་པ་ལ་བརྟེན་ནས་སྐྱེ་བ་ནས་ཚེ་རབས་ཐམས་ཅད་དུ་ངན་སོང་ངན་འགྲོ་ལོག་པར་ལྟུང་བའི་སྐྱེ་གནས་རྣམས་སུ་ནམ་ཡང་མི་སྐྱེ་བར་དལ་འབྱོར་གྱི་ཆོས་བཅོ་བརྒྱད་དང་ལྡན་ཞིང་མཐོ་རིས་ཀྱི་ཡོན་ཏན་བདུན་ཚང་བའི་རྟེན་བཟང་པོ་བར་མ་ཆད་དུ་ཐོབ་པར་གྱུར་ཅིག །རྟེན་དེ་དག་ལ་གཞོན་ནུ་ཉིད་ནས་རབ་ཏུ་བྱུང་ཞིང་ཐེག་པ་མཆོག་གི་དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་དགྱེས་བཞིན་རྗེས་སུ་འཛིན་པར་གྱུར་ཅིག །དེས་ཇི་ལྟར་གདམས་པ་བཞིན་
དུ་ཐོས་བསམ་སྒོམ་པའི་སྒོ་ནས་ལམ་ཐུན་མོང་བ་བཤེས་གཉེན་བསྟེན་ཚུལ་ནས་བཟུང་ལམ་གྱི་གཙོ་བོ་རྣམ་པ་གསུམ་དང་སྐྱེས་བུ་གསུམ་གྱི་ལམ་གྱི་རིམ་པས་བློ་ལེགས་པར་སྦྱོང་བར་གྱུར་ཅིག །ཐུན་མོང་ལམ་སྦྱང་གི་རིམ་པ་སྔོན་དུ་བཏང་སྟེ་ཐུན་མོང་མ་ཡིན་པ་གསང་ཆེན་རྡོ་རྗེ་ཐེག་པའི་ལམ་གྱི་འཇུག་སྒོ་དབང་བཞི་རྣམ་པར་དག་པ་མནོས། དབང་དུས་སུ་ཁས་བླངས་པའི་དམ་ཚིག་དང་སྡོམ་པ་ཚུལ་བཞིན་དུ་བསྲུང་། སྨིན་བྱེད་བསྐྱེད་པའི་རིམ་པ་དང་གྲོལ་བྱེད་རྫོགས་པའི་ལམ་རིམ་པ་གཉིས་ཀྱི་བགྲོད་པ་ལ་བརྟེན་ནས་ཁ་སྦྱོར་ཡན་ལག་བདུན་ལྡན་ཟུང་འཇུག་རྡོ་རྗེ་འཆང་ཆེན་པོའི་སྐུར་མྱུར་དུ་མངོན་པར་རྫོགས་པར་འཚང་རྒྱ་བའི་སྐལ་བ་དང་ལྡན་པར་གྱུར་ཅིག །གཞན་རྣམས་འདྲ། ཞེས་གཤིན་པོ་ལ་འཕོ་བ་དང་བསྔོ་བ་བྱེད་ཚུལ་དམིགས་ཀྱིས་བཀར་བ་ཞིག་དགོས་ཞེས་ཧལ་ཧ་ཇ་སག་ཐུ་ཧཱན་གྱི་ཤོག་ནས་དད་ལྡན་དགེ་སློང་བློ་བཟང་ཉི་མས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་བྷིཀྵུ་རཏྣཱན་ནྟའོ།། །།༈ བླ་མ་དང་མགོན་པོ་འོད་དཔག་ཏུ་མེད་པ་དབྱེར་མི་ཕྱེད་པ་ལ་ཕྱག་འཚལ་ལོ། །དེའང་བདེ་བ་ཅན་དུ་སྐྱེ་བར་འདོད་པའི་གང་ཟག་གིས་མགོན་པོ་འོད་དཔག་མེད་ལ་དད་པ་དང་། ཞིང་དེར་སྐྱེ་འདོད་ཀྱི་འདུན་པ། དགེ་རྩ་གང་བྱས་ཞིང་དེར་སྐྱེ་བའི་རྒྱུར་བསྔོ་བ་གསུམ་རྒྱུན་དུ་ཡིད་ལ་བྱེད་ཅིང་འབད་པ་ནི་རྒྱུའི་གཙོ་བོ་ཡིན་ཞིང། དངོས་གཞི་ལག་ལེན་དུ་བསྟར་ཚུལ་ནི། འོད་དཔག་མེད་ཀྱི་སྐུ་དང་ཞིང་བཀོད་སོགས་དགྲམ། མཆོད་པ་ལེགས་པར་བཤམ། ཁ་ནུབ་ཕྱོགས་སུ་བལྟས་ཏེ་སྐྱབས་སེམས་སྔོན་དུ་བཏང་ལ། མི་མཇེད་ཞིང་ནས་ནུབ་ཀྱི་ཕྱོགས་ཉིད་དུ། །བྱེ་བ་ཕྲག་ཁྲིག་བརྒྱ་སྟོང་སངས་རྒྱས་ཀྱི། །ཞིང་
ཁམས་རྣམས་ནི་འདས་པར་གྱུར་པ་ན། །རྨད་བྱུང་བདེ་བ་ཅན་གྱི་ཞིང་ཁམས་ཞེས། །སྡུག་བསྔལ་རྣམས་ཀྱི་མིང་ཡང་མི་གྲགས་ཤིང་། །ཟག་མེད་འབྱོར་བའི་དཔལ་དང་ལྡན་པ་དེར། །འོད་དཔག་མེད་མགོན་ཉེ་བའི་སྲས་དང་བཅས། །བཞུགས་རྣམས་བདག་ལ་བརྩེ་བས་དགོངས་སུ་གསོལ། །བླང་དོར་གནས་རྣམས་མ་རིག་མཐུག་པོས་བསྒྲིབས། །ཁོང་ཁྲོའི་མཚོན་གྱིས་མཐོ་རིས་སྲོག་ཕྲོགས་ཤིང་། །འདོད་སྲེད་ཞགས་པས་འཁོར་བའི་བཙོན་རར་བཅིངས། །ལས་ཀྱི་ཆུ་བོས་སྲིད་པའི་རྒྱ་མཚོར་ཁྱེར། །ན་རྒའི་སྡུག་བསྔལ་རྦ་རླབས་མང་པོས་གཡེངས། །མི་བཟད་འཆི་བདག་ཆུ་སྲིན་ཁར་ཆུད་པས། །མི་འདོད་སྡུག་བསྔལ་ཁུར་གྱིས་ནོན་གྱུར་པ། །མགོན་མེད་བདག་གིས་ཉམ་ཐག་ང་རོ་ཡིས། །ཡིད་ལ་སྨོན་པ་འགྲུབ་པའི་དབང་པོ་རུ། །ཕོངས་པའི་གཉེན་གཅིག་འདྲེན་པ་འོད་དཔག་མེད། །འཁོར་དང་བཅས་ལ་གུས་པས་གསོལ་འདེབས་ན། །དཔག་མེད་བསྐལ་པར་བདག་ཅག་རྣམས་ཀྱི་ཕྱིར། །ཐུགས་མཆོག་བསྐྱེད་པའི་དམ་བཅའ་མ་བསྙེལ་བར། །འདབ་བཟང་གཙོ་བོ་ལྷ་ཡི་ལམ་ལ་བཞིན། །རྫུ་འཕྲུལ་སྟོབས་ཀྱིས་བརྩེ་བས་འདིར་གཤེགས་ཤིག །བར་དོའི་འཕྲང་ལས་སྒྲོལ་བའི་ས་མཁན་ཏེ། །བཟོད་དཀའ་ངན་སོང་འཇིགས་ལས་སྒྲོལ་བའི་སྐྱབས། །སྲིད་པའི་མཚོ་ལས་སྒྲོལ་བའི་སྟོན་པ་མཆོག །མགོན་པོ་འོད་དཔག་མེད་ལ་ཕྱག་འཚལ་ལོ། །དངོས་བཤམས་ཡིད་སྤྲུལ་མཆོད་ཚོགས་ཐམས་ཅད་དང་། །
དུས་གསུམ་དགེ་བའི་དངོས་པོ་ཅི་མཆིས་པ། །གུས་པས་འབུལ་ལོ་བདེ་ཅན་ཞིང་མཆོག་ཏུ། །སྐྱེ་བའི་རྒྱུ་རུ་འགྱུར་བར་བྱིན་གྱིས་རློབས། །མི་བཟད་སྡིག་ལྟུང་ཁུར་ཆེན་ཅི་མཆིས་དང་། །འདི་སྣང་ཞེན་པའི་འཆིང་བ་མ་ལུས་པ། །ཐུགས་རྗེ་བདེན་པའི་ཕྱག་གིས་ཉེར་བསལ་ཏེ། །མྱུར་བ་མྱུར་བར་ཞིང་དེར་དྲང་དུ་གསོལ། །ནམ་ཞིག་ཚེ་ཡི་འདུ་བྱེད་གཏོང་བ་ན། །འཁོར་ཚོགས་རྒྱ་མཚོས་བསྐོར་བའི་འོད་དཔག་མེད། །མིག་གི་ལམ་དུ་གསལ་བར་མཐོང་གྱུར་ནས། །དད་དང་སྙིང་རྗེས་བདག་རྒྱུད་གང་བར་ཤོག །བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང་། །ཐམས་ཅད་མ་ལུས་མངོན་དུ་འགྱུར་བར་ཤོག །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །མདོར་ན་འགྲོ་བ་མགོན་མེད་བདག་གི་མགོན། །ཁྱོད་མིན་རེ་བའི་སྐྱབས་གཞན་མ་མཆིས་པའི། །གདུང་བའི་འོ་དོད་ལྷང་ལྷང་འབོད་ལགས་ན། །ཐུགས་རྗེའི་ཕྱག་གིས་བཟུང་སྟེ་དྲང་དུ་གསོལ། །འདི་སྣང་ཞེན་པ་ཆོད་པར་བྱིན་གྱིས་རློབས། །གནད་གཅོད་སྡུག་བསྔལ་ཞི་བར་བྱིན་གྱིས་རློབས། །འཆི་བའི་འཇིགས་སྐྲག་སེལ་བར་བྱིན་གྱིས་རློབས། །བར་དོའི་འཁྲུལ་སྣང་ཡལ་བར་བྱིན་གྱིས་རློབས། །ལས་ངན་
སྡིག་སྒྲིབ་དག་པར་བྱིན་གྱིས་རློབས། །དག་པའི་ཞིང་དུ་སྐྱེ་བར་བྱིན་གྱིས་རློབས། །ལམ་བཟང་རྟོགས་པ་སྐྱེ་བར་བྱིན་གྱིས་རློབས། །མགོན་པོ་ཁྱོད་ཀྱི་ཐུགས་དང་བདག་གི་ཡིད། །དབྱེར་མེད་གཅིག་ཏུ་འདྲེ་བར་བྱིན་གྱིས་རློབས། །ཞེས་མགོན་པོ་འོད་དཔག་མེད་ཀྱི་ཐུགས་ཀར་འཕོས་པའི་དམིགས་པ་བྱ་ཞིང་གཙོ་བོར་བློ་ལིངས་ཀྱིས་བཀལ་བའི་མོས་གུས་ཤུགས་དྲག་པོ་སྦྱོང་བ་གལ་ཆེའོ། །མཇུག་ཏུའང་བསྔོ་སྨོན་སོགས་ཀྱིས་མཚམས་སྦྱོར་ཅི་རིགས་བྱ། ཞེས་པ་འདི་ནི་དད་བརྩོན་བློ་དང་ལྡན་པ་རབ་འབྱམས་པ་ཆོས་རྒྱ་མཚོས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། །།༈ ན་མོ་མཉྫུ་ཤྲི་ཡི། འཇམ་དབྱངས་ཀུན་གཟིགས་ལ་བརྟེན་པའི་འཕོ་བ་ཉམས་སུ་ལེན་པར་འདོད་པའི་གང་ཟག་གིས་དཀོན་མཆོག་བརྩེགས་པའི་ཆོས་ཀྱི་རྣམ་གྲངས་ཀུན་གཟིགས་ཀྱི་ཞིང་གི་བཀོད་པའི་མདོ་ལས་གསུངས་པ་ལྟར། ལྷོ་ཕྱོགས་སུ་དེའི་ཞིང་ཁམས་སྨོན་ལམ་ཇི་ལྟ་བ་བཞིན་དུ་ཡོངས་སུ་རྫོགས་ཤིང་དག་ལ་རྡུལ་མེད་པ་ཞེས་ཟག་པ་མེད་པའི་བདེ་འབྱོར་ཕུན་སུམ་ཚོགས་པའི་ཞིང་ཁམས་ཁྱད་པར་ཅན་ཡོད་ཚུལ་ཡང་ཡང་བསམས་ནས་དེར་སྐྱེ་འདོད་ཀྱི་འདུན་པ་སྦྱོང་ཞིང་དགེ་ཚོགས་རྣམས་དེའི་རྒྱུར་བསྔོ་བ་སོགས་འཕོ་བ་གནད་དུ་འགྲོ་བའི་རྒྱུ་ཚོགས་ཚང་བར་བྱས་ལ། དེའི་ཞིང་བཀོད་ཀྱི་བྲིས་ཐང་ངམ་སྐུ་བྲིས་འབུར་ཅི་རིགས་སོགས་བཀྲམ་ནས་མཆོད་པ་ལེགས་པར་བཤམ། སྐྱབས་སེམས་སྔོན་དུ་བཏང་ལ། རབ་འབྱམས་རྒྱལ་བའི་དམིགས་མེད་ཡེ་ཤེས་མཆོག །མ་དག་འཁྲུལ་བའི་དྲི་མ་ཀུན་དག་ཅིང། །དངོས་འཛིན་རྡུལ་བྲལ་ཞིང་མཆོག་དམ་པ་ནས། །རྗེ་བཙུན་འཁོར་བཅས་འདིར་གཤེགས་བརྟན་པར་བཞུགས། །
ཐུགས་གསུང་སྐུ་ཡི་ཡོན་ཏན་རྗེས་དྲན་ནས། །གུས་པས་ཕྱག་འཚལ་མཆོད་ཅིང་སྡིག་ལྟུང་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །དགེ་ཚོགས་ཀུན་ཀྱང་བྱང་ཆུབ་ཆེན་པོར་བསྔོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇམ་དཔལ་དབྱངས་ཀུན་གཟིགས་ལ་སོགས་པ་དག་ལ་རྡུལ་མེད་པའི་ཞིང་དུ་འཚོ་ཞིང་གཞེས་པའི་བདེ་བར་གཤེགས་པ་རྒྱལ་སྲས་དཔའ་བོའི་ཚོགས་དང་བཅས་པ་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཞེས་ལན་གང་མང་། རང་ལུས་དབུས་ཀྱི་ཨ་ཝ་དྷཱུ་ཏིའི་ནང། །སྙིང་གའི་ཐད་དུ་རང་སེམས་ཐིག་ལེའི་གཟུགས། །ཤིན་ཏུ་དཀར་འཚེར་ཡང་ཞིང་གཡོ་བ་ཡི། །རྣམ་པ་ཤིན་ཏུ་གསལ་བ་གནས་པར་གྱུར། །མ་དག་འཁོར་བའི་བཙོན་རར་ཆུད་པ་ཡི། །ཉམ་ཐག་འགྲོ་ཀུན་བདེ་ཆེན་གྲོང་ཁྱེར་དུ། །འཁྲིད་པའི་ས་མཁན་ཐར་པའི་མིག་གཅིག་པུ། །རྗེ་བཙུན་མཁྱེན་པའི་གཏེར་ལ་གསོལ་བ་འདེབས། །དེང་ནས་བཟུང་སྟེ་བྱང་ཆུབ་སྙིང་པོའི་བར། །ཁྱོད་མིན་སྐྱབས་གཞན་མེད་དོ་བརྩེར་དགོངས་ཏེ། །བྱིན་རླབས་ཐུགས་རྗེའི་ཕྱག་གིས་བཟུང་དུ་གསོལ། །གནས་ངན་འཁོར་བའི་འདམ་ལས་དྲང་དུ་གསོལ། །སྡུག་བསྔལ་ལྗོན་པའི་རྩ་བ་དབྱུང་དུ་གསོལ། །མི་བཟད་ལས་ཀྱི་ལྕགས་སྒྲོག་གཅད་དུ་གསོལ། །མ་རིག་ཉོན་མོངས་མུན་པ་བསལ་དུ་གསོལ། །ཡང་དག་ལམ་གྱི་རྟོགས་པ་སྐྱེད་དུ་གསོལ། །ཁྱོད་ཀྱི་ཞིང་ཁམས་མཆོག་དེར་དྲང་དུ་གསོལ། །མཆོག་ཐུན་
དངོས་གྲུབ་མ་ལུས་སྩལ་དུ་གསོལ། །རེ་ས་གཞན་ན་མེད་ན་ཐུགས་རྗེས་གཟིགས། །མགོན་སྐྱབས་གཞན་ན་མེད་དོ་བྱིན་གྱིས་རློབས། །ཞེས་གསོལ་འདེབས་ཀྱི་ཚིགས་བཅད་རྣམས་ལན་གསུམ་མམ་བདུན་སོགས་བརྗོད། དེ་ལྟར་གསོལ་བ་བཏབ་པས་མཁྱེན་གཏེར་མཆོག །སྤྱི་བོར་བྱོན་ནས་རིགས་བདག་ཚུལ་བཞུགས་པའི། །ཐུགས་ཀའི་ཐད་དུ་མཁྱེན་རབ་དྷཱིཿ ཡིག་གཟུགས། །རབ་འབར་འོད་ཀྱི་དྲ་བས་འཁྱུད་པ་ལས། །སྤྲོས་པའི་འོད་ཀྱི་ལྕགས་ཀྱུས་རང་སེམས་ལ། །རེག་པས་དེ་ཡི་ཐུགས་ཀར་དྲངས་པར་གྱུར། །བར་བསམ་ཞིང་ཧིཀ་དང་། ཕྱིར་རང་གནས་སུ་ཕབ་པར་མོས་ནས་ཀ་ཞེས་སྤེལ་མར་བརྗོད། མཐར་སྤྱི་བོའི་འཇམ་མགོན་མར་ཕེབས་ཏེ་རང་སེམས་དང་འདྲེས་པར་བསམས་ལ། འཇམ་དཔལ་དཔའ་བོས་སོགས་སྨོན་ལས་ཀྱིས་མཚམས་སྦྱར་བར་བྱའོ། །ཞེས་པ་འདིའང་ད་ཚང་ལྷུན་གྲུབ་གླིང་ནས་རྣམ་དཔྱོད་ཡངས་པ་བྱམས་ཁང་བླ་མས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ། །༈ ན་མོ་ཨཱརྱ་ལོ་ཀེ་ཤྭ་རཱ་ཡ། འདིར་རྒྱལ་བ་ཀུན་གྱི་སྙིང་རྗེའི་རང་གཟུགས་འཕགས་པ་ཐུགས་རྗེ་ཆེན་པོ་ལ་བརྟེན་པའི་ཟབ་ལམ་འཕོ་བའི་མན་ངག་གི་སྒོ་ནས་དག་པའི་ཞིང་དུ་བགྲོད་པར་འདོད་པ་རྣམས་ཀྱིས་ཚེ་འདིའི་གཉེན་ཉེ་དུ་ལུས་ལོངས་སྤྱོད་སོགས་ལ་ཞེན་པའི་འདི་སྣང་གི་འཆིང་བ་མཐའ་དག་བཙན་ཐབས་སུ་བཅད་དེ། འཕགས་མཆོག་ཕྱག་ན་པདྨ་ཡི་དམ་གྱི་ལྷའི་གཙོ་བོར་བཟུང་ནས་རྒྱུན་གྱི་བསྙེན་སྒྲུབ་ལ་བརྩོན་པ་དང་། ལྷག་པར་ཚོགས་བསགས་སྒྲིབ་སྦྱང་གི་གནད་འདུས་པ་བྱིན་རླབས་ཀྱི་གཏེར་ཆེན་པོ་སྨྱུང་བར་གནས་པའི་ཆོ་ག་སོགས་ལ་ཆིག་དྲིལ་དུ་བརྩོན་ཞིང། དེས་མཚོན་པའི་དུས་གསུམ་
གྱི་དགེ་ཚོགས་མཐའ་དག་ཀྱང་བདག་དང་ཕ་མ་རིགས་དྲུག་གི་སེམས་ཅན་ཐམས་ཅད་འཕགས་པ་ཐུགས་རྗེ་ཆེན་པོའི་ཞབས་དྲུང་དུ་སྐྱེ་བའི་རྒྱུར་བསྔོ་བ་སོགས་འཕོ་བ་འབྱོངས་པའི་རྒྱུ་ཚོགས་རྣམས་སྒོ་དུ་མ་ནས་བསྒྲུབས་ཏེ། དངོས་གཞི་ལ་སྐྱབས་སེམས་སྔོན་དུ་བཏང་སྟེ་ཚིག་དོན་དྲན་བཞིན་པའི་སྒོ་ནས། རི་པོ་ཏ་ལ་ཡི་རྩེ་མོ་ནས། །ལྷ་གངས་རིའི་མགོན་པོ་སྤྱན་རས་གཟིགས། །མ་མགོན་མེད་འགྲོ་བའི་མགོན་གཅིག་ཁྱོད། །ཐུགས་བརྩེ་བ་ཆེན་པོས་གནས་འདིར་གཤེགས། །ཞེས་སྤྱན་དྲངས། མདུན་མཁའ་ལ་པད་དཀར་ཟླ་བའི་སྟེང་། །སྐུའི་སྣང་བ་མི་འགྱུར་བརྟན་པར་བཞུགས། །ཡིད་སྒོ་གསུམ་གུས་པས་ཕྱག་དང་བཅས། །དཔལ་ཀུན་བཟང་མཆོད་པའི་སྤྲིན་གྱིས་མཆོད། །སྡིག་ཉེས་ལྟུང་གང་བགྱིས་མཐོལ་ལོ་བཤགས། །ལས་རྣམ་དཀར་དགེ་ལ་རྗེས་ཡི་རང་། །ཆོས་ཟབ་རྒྱས་འཁོར་ལོ་བསྐོར་བར་བསྐུལ། །དགེ་མཐའ་དག་བྱང་ཆུབ་མཆོག་ཏུ་བསྔོ། །ཞེས་ཡན་ལག་བདུན་པ་དབུལ། ལུས་ཤེལ་གྱི་ཕྲུ་མ་བུས་པ་ལྟར། །ཆེས་དྭངས་ཤིང་གསལ་བའི་དབུས་ཀྱི་ཆར། །རྩ་དབུ་མ་སྨད་ཕྲ་སྟོད་སྦོམ་པ། །རྩའི་མར་སྣེ་ལྟེ་འོག་སོར་གསུམ་ཙམ། །ཡེ་ཚངས་པའི་བུ་ག་ཐལ་གྱིས་ཕྱེ། །དབུས་ཆོས་ཀྱི་འཁོར་ལོའི་ཐད་དྲང་དུ། །ཆེས་ཕྲ་བ་གཉུག་མའི་སེམས་ཀྱི་དངོས། །མདངས་དཀར་ལ་དམར་བའི་འོད་ཆགས་པ། །གསལ་འཚེར་ཞིང་འཕར་ལ་ཁད་པ་ཡིས། །འོད་ཐིག་ལེའི་གཟུགས་སུ་གནས་པར་གྱུར། །ཅེས་རྩ་དང་ཐིག་ལེ་གསལ་གདབ། དེའང་རྣམ་ཤེས་ཀྱི་ངོ་བོ་ཐིག་ལེ་དེ་ཉིད་འཕེན་བྱ་དང་། རང་ཉིད་འཕེན་པ་པོ་ལྟ་བུའི་
སོ་སོ་བར་བསམས་ནས་ཇི་ཙམ་སྦྱང་ཡང་འཕོ་བ་གནད་དུ་མི་འགྲོ་བར་གསུངས་པས་རྩ་དབུ་མའི་ནང་དེར་ལམ་གྱི་འདུ་ཤེས་དང་། རང་དང་ཕྲ་བའི་རླུང་སེམས་ཀྱི་ངོ་བོ་ཐིག་ལེ་གཉིས་དབྱེར་མི་ཕྱེད་པའི་ཚུལ་གྱིས་དེར་འགྲོ་བ་པོར་མོས་པ་ཤིན་ཏུ་གནད་ཆེའོ། །དེ་ནས་ཡང་མདུན་གྱི་མགོན་པོ་སྤྱན་རས་གཟིགས་ལ་དམིགས་པའི་དད་པ་ཤུགས་དྲག་པོ་དང་བཅས། ལྷ་སྐྱབས་གསུམ་འདུས་པའི་ངོ་བོ་ཉིད། །རྗེ་དྲིན་ཅན་རྩ་བའི་བླ་མ་དང་། །དབྱེར་མེད་པ་འཕགས་མཆོག་ཐུགས་རྗེའི་གཏེར། །བུ་ཉམ་ཐག་འགྲོ་བའི་མགོན་མཛོད་ཅིག །ཅེས་གསོལ་བ་གདབ། ཚུལ་དེ་ལྟར་གསོལ་བ་བཏབ་པ་ཡིས། །མདུན་མཁའ་ལ་བཞུགས་པའི་སྤྱན་རས་གཟིགས། །ཚུར་བྱོན་ནས་རིགས་བདག་ཚུལ་བཞུགས་པའི། །སྐུའི་དཀྱིལ་དུ་དབུ་མ་སྟོད་ཕྲ་ཞིང་། །སྨད་ཡངས་པ་རང་གི་ཚངས་བུག་དང། །དབྱེར་མེད་པར་སྦྱར་བའི་ཡར་སྣེའི་ནང། །ཐུགས་གཉིས་སུ་མེད་པའི་ཡེ་ཤེས་དངོས། །ཧྲཱིཿ དཀར་ཞིང་གསལ་བས་མཚན་པར་གྱུར། །ཅེས་བརྗོད་ལ་མགོན་པོ་སྤྱན་རས་གཟིགས་རང་གི་སྤྱི་བོར་བྱོན་ནས་བཞུགས་པའི་དྷཱུ་ཏཱིའི་ཡར་སྣེའི་ནང་གི་ཟག་མེད་ཡེ་ཤེས་ཀྱི་ངོ་བོ་ཧྲཱིཿ ཡིག་དེ་ཉིད་རང་གི་དབུ་མའི་ལམ་ནས་ཡར་བལྟས་ཏེ་མཐོང་བས་རང་ཉིད་ཀྱང་དེར་འཕོ་འདོད་ཀྱི་འདུན་པ་ཤུགས་དྲག་པོ་བསྐྱེད་ལ་སླར་ཡང་ཕུར་ཚུགས་སུ་གསོལ་བ་གདབ་པ་ནི། རྣམ་འདྲེན་རྒྱལ་བ་ཀུན་གྱི་ཐུགས་རྗེའི་གཏེར། །རྒྱལ་སྲས་ཕྱག་ན་པདྨ་སྙིང་རྗེའི་ལྷ། །ཆེར་སྙིགས་ལྔ་བདོ་གདུལ་དཀའི་འགྲོ་བ་རྣམས། །སྒྲོལ་བའི་ཐུགས་བསྐྱེད་དམ་བཅའ་ཉེར་དགོངས་ཏེ། །སྲིད་ཞིའི་རྒུད་པ་ཀུན་ལས་བསྐྱབ་ཏུ་
གསོལ། །འཁྲུལ་སྣང་བར་དོའི་འཇིགས་སྐྲག་བསལ་དུ་གསོལ། །བཟོད་དཀའ་ངན་འགྲོའི་གཡང་ལས་བསྒྲལ་དུ་གསོལ། །འདི་སྣང་ཞེན་པའི་འཆིང་བ་གཅད་དུ་གསོལ། །ཞིང་མཆོག་པོ་ཏ་ལ་རུ་དྲང་དུ་གསོལ། །བྱང་ཆུབ་བར་དུ་རྗེས་སུ་གཟུང་དུ་གསོལ། །གསོལ་བ་འདེབས་སོ་མགོན་པོ་སྤྱན་རས་གཟིགས། །བྱིན་གྱིས་རློབས་ཤིག་བླ་མ་ལྷག་པའི་ལྷ། །ཞེས་ལན་གསུམ་བརྗོད། དེ་ནས་སྟེང་གི་ཧྲཱིཿ ཡིག་ལས་འོད་ཟེར་ཐུར་དུ་འཕྲོས་པས་རང་སེམས་ཐིག་ལེའི་རྣམ་པ་དེ་ཉིད་ཉ་ལ་ལྕགས་ཀྱུས་བཏབ་པ་བཞིན་དུ་ཡར་དྲངས་ཤིང་འོག་རླུང་དྲག་ཏུ་འཐེན་པའི་ཤུགས་ཀྱིས་གྱེན་དུ་འཕངས་པའི་དམིགས་པ་དང་བཅས་ངག་ཏུ་ཧིཀ་ཅེས་བརྗོད། སླར་ཡང་ཀ་ཞེས་བརྗོད་པས་རང་གནས་སུ་དབབ་པ་ལན་གསུམ་སོགས་སུ་བྱ་ལ། འཆི་ཁའི་ཉམས་ལེན་ནམ། གཤིན་པོ་ལྟ་བུའི་དོན་དུ་ཡིན་ན་ཧིཀ་ལན་གསུམ་གྱི་མཐར། ཕཊ་ཅེས་བརྗོད་པས་མགོན་པོ་སྤྱན་རས་གཟིགས་དེ་ཉིད་པོ་ཏ་ལར་རྒྱངས་ཏེ་བྱོན་པའི་ཐུགས་ཀ་ནས་རྣམ་པར་ཤེས་པ་ཕྱིར་ཐོན་པདྨའི་སྦུབས་སུ་ཡིད་ལུས་བླངས་ནས་དེའི་གསུང་གི་བདུད་རྩི་ལ་ལོངས་སྤྱད་པའི་དམིགས་པ་བྱའོ། །དེའང་འཕོ་བ་སྦྱངས་པའི་སྐབས་རྣམས་སུ་སྤྱི་བོའི་ལྷག་པའི་ལྷ་དེ་ཉིད་འོད་དུ་ཞུ་བའི་བདུད་རྩི་གསེར་ཞུན་མ་ལྟ་བུས་ཚངས་བུག་ཆིལ་གྱིས་བཀག་པར་མོས་ན་ཚེ་སྒྲུབ་ཏུ་འགྱུར་ཞིང་བྱིན་རླབས་ཀྱི་འཇུག་པ་མྱུར་བའི་དགོས་པ་ཡོད་དོ། །དེ་ནས། ཚུལ་འདི་ལྟར་འབད་པའི་དགེ་ཚོགས་དང་། །གཟུངས་ཡི་གེ་དྲུག་མའི་བྱིན་རླབས་ཀྱིས། །ཞིང་ཁྱད་འཕགས་པོ་ཏ་ལར་སྐྱེས་ནས། །ལྷ་ཐུགས་རྗེ་ཆེན་པོའི་ཞལ་མཐོང་ཤོག །ཅེས་དང་། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །འཕགས་མཆོག་
སྤྱན་རས་གཟིགས་ཀྱིས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །ཅེས་སོགས་བསྔོ་སྨོན་གྱི་མཚམས་སྦྱོར་བྱའོ། །དེ་ལྟར་འཕགས་པ་ཐུགས་རྗེ་ཆེན་པོ་དང་འབྲེལ་བའི་འཕོ་བ་བྱེད་ཚུལ་འདི་ནི། སྨྱུང་གནས་སོགས་ཀྱི་སྒོ་ནས་དལ་འབྱོར་དོན་ལྡན་དུ་སྒྲུབ་པའི་ཐབས་ལ་བརྩོན་པའི་རི་ཁྲོད་པ་དགེ་སློང་ངག་དབང་རྒྱལ་མཚན་དང་དགེ་སློང་བློ་བཟང་དར་རྒྱས་གཉིས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་ཀྱོའུ་ཀྱའི་གཞི་ཁར་བྲིས་པའོ།། །