གྲུབ་ཆེན་ནག་པོ་སྤྱོད་པའི་ལུགས་ཀྱི་འཁོར་ལོ་སྡོམ་པའི་སྒྲུབ་ཐབས།
གྲུབ་ཆེན་ནག་པོ་སྤྱོད་པའི་ལུགས་ཀྱི་འཁོར་ལོ་སྡོམ་པའི་སྒྲུབ་ཐབས་བཞུགས་སོ། །
བླ་མ་འཁོར་ལོ་སྡོམ་པའི་ལྷ་ཚོགས་ལ་ཕྱག་འཚལ་ལོ། །རྗེ་བཙུན་རྣལ་འབྱོར་མ་དང་མཉམ་སྦྱོར་བའི། །ལྷན་སྐྱེས་བདེ་བ་མཆོག་གི་རོལ་པ་ལས། །རབ་འབྱམས་འཁོར་ལོ་ལྔ་ཡི་ལྷ་ཚོགས་ཀུན། །སྤྲོ་མཛད་དཔལ་ཆེན་ཧེ་རུ་ཀ་ཡིས་སྐྱོངས། །བདེ་མཆོག་སྦས་ཆུའི་རྒྱ་མཚོ་བསྲུབས་པ་ལས། །གྲུབ་དབང་བྱེ་བའི་བཞེད་དགོངས་རླབས་འཁྲུག་ཅིང༌། །སྙིང་པོར་གྱུར་པ་ལཱུ་ནག་དྲིལ་གསུམ་གྱི། །གདམས་པའི་བདུད་རྩི་ཐར་འདོད་སྲོག་གི་ཟུངས། །དེ་ཕྱིར་སྤྱོད་འཆང་དབང་པོའི་བཀའ་སྲོལ་བཞིན། །དཔལ་ལྡན་འཁོར་ལོ་སྡོམ་པའི་སྒྲུབ་ཐབས་ཀྱི། །ངག་འདོན་རིམ་པ་ཚང་ལ་མ་ནོར་བ། །དམ་པའི་མན་ངག་ཇི་བཞིན་བྲི་བར་བྱ། དེ་ལ་ཐོག་མར་མཐུན་པའི་གནས་སུ་ཡོ་བྱད་རྣམས་ཚོགས་པར་བྱས་ཏེ། རང་ཉིད་སྐད་ཅིག་གིས་ལྷར་བསྐྱེད་པ། ནང་མཆོད་བྱིན་གྱིས་བརླབས་པ། སྔོན་འགྲོའི་
མཆོད་པ་དང་གཏོར་མ་བྱིན་གྱིས་བརླབས་ཏེ་དབུལ་བ། བདག་བསྐྱེད་མཆོད་པ་བྱིན་རླབས། སྐྱབས་འགྲོ། རྡོར་སེམས་བསྒོམ་བཟླས་རྣམས་ལཱུ་ཨི་བའི་ལུགས་ལྟར་བྱས་ལ། སྒོ་གསུམ་དག་པར་བྱ་བ་ནི། ཤྲཱི་ཧེ་རུ་ཀ །ཧེ་ནི་ཆོས་ཀྱི་བདག་གིས་སྟོང་པ་དང༌། རུ་ནི་གང་ཟག་གི་བདག་དང་བྲལ་བ་སྟེ། ཀ་ནི་དེ་གཉིས་སུ་ཞེན་པ་མེད་པའི་ཡེ་ཤེས་དང༌། ཤྲཱི་ཡུལ་དང་ཡུལ་ཅན་རོ་གཅིག་ཏུ་ཞུགས་པ། ཨེ་ཝཾ་གྱི་དོན་ནོ། །སྟོང་པའི་ངང་ལས་རང་ཉིད་ཧེ་རུ་ཀ་ཞལ་གཅིག་ཕྱག་གཉིས་པ་ཡུམ་དང་བཅས་པའི་སྐུར་བཞེངས་པར་གྱུར། ཤྲཱི་ཧེ་རུ་ཀོ྅ཧཾ། ལན་གསུམ། ཨོཾ་ཨ་ཨཱ་ནས། ས་ཧ་ཀྵ་ཧཱུཾ་ཧཱུཾ་ཕཊ། ལན་གསུམ། ལྟེ་བའི་ཕྱོགས་སུ་སྔགས་ཕྲེང་འོད་ཟེར་ལྔ་པ་གཡོན་དུ་སུམ་སྐོར་གྱིས་གནས་པ་ལས་འཁོར་ལོ་གསུམ་གྱི་ལྷ་ཚོགས་འཕྲོས། སྣ་བུག་གཡས་ནས་ཐོན། བགེགས་རྣམས་བསྐྲད་དེ་སླར་སྔགས་ཕྲེང་ལ་ཐིམ་པར་གྱུར། རང་ཧེ་
རུ་ཀར་གནས་པའི་སྙིང་གར་བཾ་སེར་པོ་ལས་སྣ་ཚོགས་པད་མར་ཨཾ་ལས་བྱུང་བའི་ཟླ་བའི་དཀྱིལ་འཁོར་གྱི་སྟེང་དུ། དཔལ་མཆོག་དང་པོའི་ཡི་གེ་ཧཱུཾ་ཡིག་སྔོན་པོ་ཡེ་ཤེས་ལྔའི་རང་བཞིན་ཅན། འོད་ཟེར་ཁ་དོག་སྣ་ལྔ་འཕྲོ་བའི་འོད་ཟེར་གྱིས་རང་གི་སྤྱི་བོ་ནས་རྐང་པའི་བར་གང་སྟེ། ཐོག་མ་མེད་པ་ནས་ཀྱི་སྒོ་གསུམ་གྱི་དྲི་མ་རྣམས་སྦྱངས་པས། ལུས་ཤེལ་སྒོང་བཞིན་དུ་དག་པར་གྱུར་ཏེ། བ་སྤུའི་སྒོ་ནས་ཕྱིར་འཕྲོས་པའི་འོད་ཟེར་གྱིས་འགྲོ་བ་ཀུན་གྱི་ལུས་སྦྱངས་སྒོ་གསུམ་དག་པར་བྱས། སྤྲིན་སྒྲའི་ཡི་གེའི་འོད་དེས་བླ་མ་རྡོ་རྗེ་འཆང་གི་རྣམ་པ་ཅན་དང༌། སྔོན་ནས་གྲུབ་པའི་འཁོར་ལོ་སྡོམ་པའི་དཀྱིལ་འཁོར་གྱི་ལྷ་ཚོགས་དང༌། གཞན་ཡང་སངས་རྒྱས་དང་བྱང་ཆུབ་སེམས་དཔའ་དང་ལྷ་དང་ལྷ་མོ་དང༌། ཁྲོ་བོས་ནམ་མཁའི་ཁམས་ཏིལ་གྱི་གང་བུ་ལྟར་གང་བ་མདུན་གྱི་ནམ་མཁར་སྤྱན་དྲངས་ཏེ། འོད་ཟེར་རང་གི་སྙིང་གའི་ཧཱུཾ་ལ་འདུས་པར་གྱུར། གང་གི་དྲིན་གྱིས་བདེ་ཆེན་གནས། །སྐད་ཅིག་གིས་ནི་ཐོབ་འགྱུར་བ། །བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །ཧེ་རུ་ཀ་དཔལ་དཔའ་བོ་ཆེ། །རྣམ་དག་རྡོ་རྗེའི་དབང་ཕྱུག་དང༌། །རྗེས་ཆགས་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་དེ་ལ་འདུད། །གནས་དང་ཉེ་བའི་གནས་དང་ཞིང༌། །འདུས་དང་དུར་ཁྲོད་གནས་པ་ཡི། །དཔའ་བོ་དཔའ་མོའི་དབང་ཕྱུག་མ། །ཀུན་ལ་བདག་ནི་གུས་ཕྱག་འཚལ། །
སྙིང་གའི་ས་བོན་ལས་བྱུང་བའི་མཆོད་པའི་ལྷ་མོ་རྣམས་ཀྱིས་མཆོད་པར་གྱུར། ཤྲཱི་ཧེ་རུ་ཀ་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། དེ་བཞིན་དུ། པཱཏྱཾ། ཨོཾ་པུཥྤེ་ཨཱཿ ཧཱུཾ་སྭཧཱ། དེ་བཞིན་དུ། དྷུ་པེ། དཱི་པེ། གནྡྷེ། ནཻ་ཝི་ཏེ། ཤཔྟ། རྣམས་བཅུག་ལ་དབུལ། ཨོཾ་བཛྲ་བཱི་ནི་ཧཱུཾ་ཧཱུཾ་ཕཊ། ཨོཾ་བཛྲ་བཱཾ་ཤེ་ཧཱུཾ་ཧཱུཾ་ཕཊ། ཨོཾ་བཛྲ་མྲི་ཏཾ་གེ་ཧཱུཾ་ཧཱུཾ་ཕཊ། ཨོཾ་བཛྲ་མུ་ར་ཛེ་ཧཱུཾ་ཧཱུཾ་ཕཊ། ཨོཾ་བཛྲ་ཧཱ་སྱ་ཧཱུཾ་ཧཱུཾ་ཕཊ། ཨོཾ་བཛྲ་ལཱ་སྱ་ཧཱུཾ་ཧཱུཾ་ཕཊ། ཨོཾ་བཛྲ་གཱིརྟི་ཧཱུཾ་ཧཱུཾ་ཕཊ། ཨོཾ་བཛྲ་ནྲི་ཏྱ་ཧཱུཾ་ཧཱུཾ་ཕཊ། ཨོཾ་བཛྲ་པུཥྤེ་ཧཱུཾ་ཧཱུཾ་ཕཊ། ཨོཾ་བཛྲ་དྷུ་པེ་ཧཱུཾ་ཧཱུཾ་ཕཊ། ཨོཾ་བཛྲ་དཱི་པེ་ཧཱུཾ་ཧཱུཾ་ཕཊ། ཨོཾ་བཛྲ་གནྡྷེ་ཧཱུཾ་ཧཱུཾ་ཕཊ། ཨོཾ་རཱུ་པ་བཛྲི་ཧཱུཾ་ཧཱུཾ་ཕཊ། ཨོཾ་ར་ས་བཛྲི་ཧཱུཾ་ཧཱུཾ་ཕཊ། ཨོཾ་སྤརྴེ་བཛྲི་ཧཱུཾ་ཧཱུཾ་ཕཊ། ཨོཾ་དྷརྨཱ་དྷ་ཏུ་བཛྲི་ཧཱུཾ་ཧཱུཾ་ཕཊ། ཐུགས་ཀའི་ས་བོན་ལས་བྱུང་བའི་སྙིང་པོའི་རྣལ་འབྱོར་མ་བཞི་དང་སྒོ་མཚམས་མ་བརྒྱད་ཀྱིས་ཐོད་པའི་ནང་གི་བདུད་རྩི་ལྔས་ལྷ་རྣམས་ལ་མཆོད་པར་གྱུར། ཨོཾ་སརྦྦ་བཛྲ་ཀ་མི་ནི་སརྦྦ་བྷ་ཀྵཾ་ཤོ་དྷ་ཡ་གུ་ཧྱ་བཛྲ་ཎི་སྭཱཧཱ། སྙིང་པོའི་རྣལ་འབྱོར་མ་བཞི་ཕག་མོ་ལ་ཐིམ། དེ་དང་ཧེ་རུ་ཀ་ཡབ་ཡུམ་སྙོམས་པར་ཞུགས་ཏེ་བདེ་བ་ཆེན་པོ་བསྐྱེད་པས། ལྷ་ཐམས་ཅད་ཀྱིས་ཀྱང་བདེ་བ་ཆེན་པོ་ཉམས་སུ་མྱོང་བར་གྱུར། དེ་ནས་རྐང་བརྒྱད་ཀྱི་སྔགས་ཀྱིས་བསྟོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་
ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་བསལ་བའི་ཕྱིར་ནམ་མཁའི་མཐས་གཏུགས་པའི་སངས་རྒྱས་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་ལོ། །རྒྱལ་བ་མྱ་ངན་ལས་འདའ་བར་བཞེད་པ་རྣམས་འགྲོ་བ་ཀུན་ལ་ཕན་པ་དང་བདེ་བའི་དོན་དུ། བསྐལ་པ་ཞིང་གི་རྡུལ་སྙེད་དུ་བཞུགས་པར་གསོལ་བ་འདེབས་སོ། །བགྲོད་དཀའ་སྲིད་པའི་རྒྱ་མཚོ་ལས། །བདག་གིས་འགྲོ་རྣམས་བསྒྲལ་བའི་ཕྱིར། །རང་གི་བདག་ཉིད་སྐད་ཅིག་མ། །སངས་རྒྱས་རྣམས་ལ་དབུལ་བར་བགྱི། །ཞེས་བརྗོད། དེ་ནས། སེམས་ཅན་ཐམས་ཅད་ཁྱད་པར་དུ་འཕགས་པའི་བདེ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་ཅེས་པ་སྦྱར་ནས། སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །ཐོབ་ཟིན་པའི་བདེ་བ་དང་མི་འབྲལ་བར་གྱུར་ཅིག །ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་དང་བྲལ་བར་གྱུར་ཅིག །བཅོམ་ལྡན་འདས་འཁོར་ལོ་སྡོམ་པའི་ལྷ་ཚོགས་རྣམས་ཀྱིས་བདག་ལ་བྱིན་གྱིས་བརླབ་ཏུ་གསོལ། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ། ཌི་ཌྷོ་མེ་བྷཱ་ཝ། སུ་ཏོ་ཥྱོ་མེ་བྷཱ་ཝ། སུ་པོ་ཥྱོ་མེ་བྷཱ་ཝ། ཨ་ནུ་རཀྟོ་མེ་བྷཱ་ཝ། སརྦ་སིད་དྷི་མྨེ་པྲ་ཡཙྪ་སརྦ་ཀརྨཱ་སུ་ཙ་མེ་ཙིཏྟཾ་ཤྲཱི་
ཡཿ ཀུ་རུ་ཧཱུཾ་ཧ་ཧ་ཧ་ཧ་ཧོཿ བྷཱ་ག་ཝཱན། བཛྲ་ཧེ་རུ་ཀ་མ་མེ་མུཉྩ་ཧེ་རུ་ཀ་བྷཱ་ཝ་མཧཱ་ས་མ་ཡ་སཏྭ་ཨཱཿ ཧཱུཾ་ཕཊ། ཚོགས་ཞིང་རྣམས་རང་ལ་ཐིམ་པས་བྱིན་གྱིས་བརླབས་པར་གྱུར། མཆོད་ཡུལ་དང་མཆོད་མཁན་དང་མཆོད་རྫས་རྣམས་རྣམ་པར་རིག་པའི་སེམས་ཀྱིས་བཏགས་པ་ཙམ་དུ་ཟད་དོ། །དཔྲལ་བའི་དབུས་སུ་བྷྲུཾ་དཀར་པོ་ཡོངས་སུ་གྱུར་པ་ལས་རྣམ་སྣང་དཀར་པོ་ཕྱག་གཡས་འཁོར་ལོ་འཕྱར་ཞིང༌། གཡོན་འགྱིང་བ་དང་བཅས་པས་དྲིལ་བུ་དཀུར་བརྟེན་པ། ལྟེ་བར་ཨཾ་སེར་པོ་ལས་རྡོ་རྗེ་ཉི་མ་སེར་པོ་གཡས་རིན་པོ་ཆེ་འཕྱར་ཞིང༌། མགྲིན་པར་ཧྲཱིཿ དམར་པོ་ལས་པདྨ་གར་གྱི་དབང་ཕྱུག་དམར་པོ་གཡས་པདྨ་དམར་པོ་འཕྱར་ཞིང༌། རྐང་པ་གཉིས་ཀྱི་ལོང་བུའི་འོག་ཏུ་ཧོ་ལྗང་གུ་ལས་རྡོ་རྗེ་རྒྱལ་པོ་ལྗང་གུ་གཡས་སྣ་ཚོགས་རྡོ་རྗེ་འཕྱར་ཞིང༌། གཡོན་འགྱིང་བ་དང་བཅས་པས་དྲིལ་བུ་ཐུགས་ཀར་འཛིན་པ། ཞེས་པ་གོང་མ་གཉིས་ལའང་སྦྱར། སྙིང་གར་ཧཱུཾ་དཀར་པོ་ལས་རྡོ་རྗེ་སེམས་དཔའ་དཀར་པོ་གཡས་ཐུགས་ཀར་རྡོ་རྗེ་འཛིན་ཞིང༌། སྤྱི་གཙུག་ཏུ་ཧི་ནག་པོ་ལས་ཧེ་རུ་ཀ་ནག་པོ་གཡས་ས་གནོན་གྱི་ཕྱག་རྒྱས་རྡོ་རྗེ་འཛིན་ཞིང༌། དེ་དྲུག་ནི་ཕུང་པོ་ལྔ་དང་དེ་ལྔ་ཀའི་དེ་བཞིན་ཉིད་བྱིན་གྱིས་རློབ་པའོ། །མིག་གཉིས་སུ་ཨོཾ་དཀར་པོ་ཡོངས་སུ་གྱུར་པ་ལས་གཏི་མུག་རྡོ་རྗེ་དཀར་པོ་གཡས་འཁོར་ལོ་འཕྱར་ཞིང༌། རྣ་བ་གཉིས་སུ་ཧཱུཾ་ནག་པོ་ལས་ཞེ་སྡང་རྡོ་རྗེ་ནག་པོ་གཡས་ཐུགས་ཀར་རྡོ་རྗེ་འཛིན་ཞིང་གཡོན་འགྱིང་བ་དང་བཅས་པས་དྲིལ་བུ་དཀུར་བརྟེན་པ། ཞེས་པ་གོང་གི་ལྷག་མ་རྣམས་ལའང་སྦྱར་རོ། །སྣ་བུག་གཉིས་སུ་ཏྲཾ་སེར་པོ་
ལས་སེར་སྣ་རྡོ་རྗེ་སེར་པོ། གཡས་རོལ་པ་དང་བཅས་པས་རིན་པོ་ཆེ་འཕྱར་ཞིང༌། ལྕེའི་རྩ་བར་ཨཾ་དམར་པོ་ལས་འདོད་ཆགས་རྡོ་རྗེ་དམར་པོ། གཡས་རོལ་པ་དང་བཅས་པས་པདྨ་དམར་པོ་འཕྱར་ཞིང༌། དཔྲལ་བར་ཁཾ་ལྗང་གུ་ལས་ཕྲག་དོག་རྡོ་རྗེ་ལྔང་གུ །གཡས་རོལ་པ་དང་བཅས་པས་སྣ་ཚོགས་རྡོ་རྗེ་འཕྱར་ཞིང༌། གཡོན་རོལ་པ་དང་བཅས་པས་དྲིལ་བུ་ཐུགས་ཀར་འཛིན་པ། ཞེས་པ་གོང་མ་གཉིས་ལའང་སྦྱར། སྙིང་གར་ཧཾ་དཀར་པོ་ལས་དབང་ཕྱུག་རྡོ་རྗེ་དཀར་པོ། གཡས་རྡོ་རྗེ་ཐུགས་ཀར་འཛིན་ཅིང༌། གཡོན་འགྱིང་བ་དང་བཅས་པས་དྲིལ་བུ་དཀུར་བརྟེན་པ། དེ་དྲུག་ནི་སྐྱེ་མཆེད་དྲུག་བྱིན་གྱིས་རློབ་པའོ། །ཐམས་ཅད་ཀྱང་ཞལ་གཅིག་པ་ཕྱག་གཉིས་པ། སྤྱན་གསུམ་པ། རལ་པའི་ཅོད་པན་ཅན། ཕྱག་རྒྱ་ལྔས་བརྒྱན་པ། གཡས་བརྐྱང་གིས་བཞུགས་པ། ལྟེ་བ་ས་ལ་ལཾ་སེར་པོ་ལས་ལྟུང་བྱེད་མ་སེར་མོ་ཞལ་གཅིག་ཕྱག་བཞིའི་གཡས་གཉིས་ན་གྲི་གུག་དང་འཁོར་ལོ། སྙིང་ག་ཆུ་ལ་མཾ་ནག་པོ་ལས་གསོད་བྱེད་མ་ནག་མོ། མགྲིན་པ་མེ་ལ་པཾ་དམར་པོ་ལས་འགུགས་བྱེད་མ་དམར་མོ། དཔྲལ་བ་རླུང་ལ་ཏཾ་ལྗང་གུ་ལས་གར་གྱི་དབང་ཕྱུག་མ་ལྗང་གུ །དེ་གསུམ་གའི་གཡས་ཀྱི་གཉིས་པ་ན་རྡོ་རྗེ་པདྨ་རལ་གྲི་རྣམས་མ་གཏོགས་ཞལ་ཕྱག་སྔ་མ་ལྟར་རོ། །དེ་བཞི་ཀའི་གཡོན་གཉིས་ན་ཐོད་པ་དང་ཁ་ཊྭཱཾ་ག་འཛིན་པ། གསང་གནས་ནམ་མཁའི་ཁམས་ལ་ཁཾ་དུད་ཁ་ལས། པདྨའི་དྲ་བ་ཅན་དུད་ཁ་རྩ་ཞལ་དུད་ཁ་གཡས་དཀར་གཡོན་དམར་བའི་ཞལ་གསུམ་ཕྱག་དྲུག་གི་གཡས་གྲི་གུག་ཚངས་མགོ་ལྕགས་ཀྱུ། གཡོན་ཐོད་པ་ཁ་ཊྭཱཾ་ག་ཞགས་པ་འཛིན་པ། ཐམས་ཅད་ཀྱང་ཞལ་རེ་རེ་ལ་སྤྱན་གསུམ་པ། གཅེར་
བུ་སྐྲ་གྲོལ་བ། ཕྱག་རྒྱ་ལྔས་བརྒྱན་པ། གཡས་བརྐྱང་གིས་བཞུགས་པ། འདི་ཁམས་ལྔ་བྱིན་གྱིས་རློབ་པའོ། །ལྷ་དེ་རྣམས་གནས་དེ་རྣམས་སུ་བཀོད་པ་ཙམ་མ་ཡིན་པར་ལྷ་རེ་རེ་ནས་ང་རྒྱལ་འཛིན་དགོས་པར་ཀུན་སྤྱོད་ཀྱི་དགོངས་པ་ཡིན་ཞེས་འདོད་འཇོ་ལས་གསུངས་སོ། །ཕུང་ཁམས་སྐྱེ་མཆེད་བྱིན་རླབས་འདིར་བཀོད་པ་ནི་མངོན་སྤྱོད་ཀྱི་དགོངས་པ་ཡིན་པར་འདོད་འཇོ་ལས་གསུངས་ཤིང༌། དེ་དང་འདིའི་སྔོན་འགྲོའི་རིམ་པ་རྣམས་མཐུན་པར་སྣང་བས་འདིར་བཀོད་པ་ཡིན་ནོ། །དེ་ལྟར་ལྷ་བཅུ་བདུན་པོ་བསྐྱེད་པའི་མཐར། ཨོཾ་པྲ་ཀྲི་ཏ་པ་རི་ཤུདྡྷཿ སརྦ་དྷརྨཱཿ པྲ་ཀྲི་ཏ་པ་རི་ཤུདྡྷོ྅ཧཾ། རང་གི་སྤྱི་བོར་ཧེ་དཀར་པོ། མགྲིན་པར་རུ་དམར་པོ། སྙིང་གར་ཀ་མཐིང་ཀ །དེ་གསུམ་གྱི་དོན་རང་བཞིན་གྱིས་གྲུབ་པའི་རྒྱུ་དང༌། བརྗོད་པ་དང་བྲལ་བ་དང༌། གང་དུ་ཡང་མི་གནས་པ་ཉིད་དོ། །སེམས་ཅན་རྣམས་ཀྱིས་ཆོས་རྣམས་ཀྱི་ཡིན་ཚུལ་འདི་ལྟ་བུ་མ་ཤེས་པས་འཁོར་བར་འཁྱམས་པས་ན་བདག་གིས་ཧེ་རུ་ཀའི་གོ་འཕང་མངོན་དུ་བྱས་ལ་གཟུང་འཛིན་བདེན་པས་སྟོང་པའི་སེམས་ཅན་གྱིས་ཡིན་ཚུལ་འདི་རྟོགས་པར་བྱས་ཏེ་འཁོར་བའི་སྡུག་བསྔལ་ལས་ཐར་བར་བྱའོ། །སྙམ་དུ་ཆོས་ལ་དམིགས་པའི་སྙིང་རྗེ་བསྐྱེད། ཨོཾ་སྭ་བྷཱ་ཝ་ཤུད་དྷཿ སརྦ་དྷརྨ་སྭ་བྷཱ་ཝ་ཤུད་དྷོ྅ཧཾ། ཁམས་གསུམ་པོ་རང་བཞིན་གྱིས་གྲུབ་པས་སྟོང་པར་གྱུར། ཡི་གེ་གསུམ་པོ་ཡོངས་སུ་གྱུར་པ་ལས། སྨོན་ལམ་གྱི་དབང་གིས་རང་གི་སེམས་དེ་སྟེང་ནས་སྟེང་དུ་བརྩེགས་པའི་ཨོཾ་དཀར་པོ། ཨཱཿ དམར་པོ། ཧཱུཾ་སྔོན་པོར་གྱུར། དེ་གསུམ་ལས་རིམ་པ་བཞིན་དུ་སྐུ་གསུང་ཐུགས་ཀྱི་ལྷ་རྣམས་སྤྲོས་ཏེ། ས་འོག་དང་མི་ཡུལ་དང༌། མཐོ་
རིས་རྣམས་འཁོར་ལོ་གསུམ་གྱི་ལྷའི་ངོ་བོར་བྱས་ནས་སྙོམས་པར་འཇུག་པ་སྔོན་དུ་འགྲོ་བས་སྐུའི་འཁོར་ལོའི་ལྷ་རྣམས་ཞུ་བ་ཨོཾ་དང༌། གསུང་གི་འཁོར་ལོའི་ལྷ་རྣམས་ཞུ་བ་ཨཱཿ དང༌། ཐུགས་ཀྱི་འཁོར་ལོའི་ལྷ་རྣམས་ཞུ་བ་ཧཱུཾ་ལ་ཐིམ་ཞིང༌། ཨོཾ་ཡང་ཨཱཿ ལ་དང༌། ཨཱཿ ཡང་ཧཱུཾ་ལ་ཐིམ་ཞིང་ཧཱུཾ་གི་ཞབས་ཀྱུ་ཨཱུ་ཧ་ལ་ཧ་ནི་ཧའི་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ། ཐིག་ལེ་ནཱ་ད་ལ་ཐིམ་ཞིང༌། དཱ་ན་ཡང་སྐྲའི་རྩེ་མོ་བརྒྱ་སྟོང་གི་ཆའི་ཚད་ཙམ་དུ་གནས་པར་གྱུར། སེམས་ཅན་རྣམས་ཀྱིས་ཆོས་ཉིད་མ་རྟོགས་པས་འཁོར་བར་འཁྱམས་པས་ན་བདག་གིས་ཆོས་ཉིད་མངོན་སུམ་དུ་རྟོགས་པར་བྱས་ལ། རང་བཞིན་གྱིས་གྲུབ་པས་སྟོང་པའི་སེམས་ཅན་རྣམས་ཀྱིས་ཀྱང་ཆོས་ཉིད་ཁོང་དུ་ཆུད་པར་བྱས་ཏེ་འཁོར་བའི་སྡུག་བསྔལ་ལས་ཐར་བར་བྱའོ། །སྙམ་དུ་དམིགས་པ་མེད་པའི་སྙིང་རྗེ་བསྒོམས་ལ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ནཱ་ད་ཡང་མི་དམིགས་པར་གྱུར། སྟོང་པའི་ངང་ལས་པཾ་ལས་སྣ་ཚོགས་པདྨ། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ། ཤར་གྱི་རྭ་དཀར། བྱང་གི་རྭ་ལྗང༌། ནུབ་ཀྱི་རྭ་དམར། ལྷོའི་རྭ་སེར། ལྟེ་བ་མཐིང་ནག་ཧཱུཾ་གིས་མཚན་པའི་ཧཱུཾ་ལས་ཧཱུཾ་ཕྱོགས་བཅུར་འཕྲོས་དེ་རྣམས་ཡོངས་སུ་གྱུར་པ་ལས་ཤར་དང་སྟེང་དུ་ཁྭ་གདོང་མ་དཀར་སྔོན་དུ་སྣང་བ་གཉིས། བྱང་དུ་འུག་གདོང་མ་དཀར་ལྗང་དུ་སྣང་བ། ནུབ་དང་འོག་ཏུ་ཁྱི་གདོང་མ་དཀར་དམར་དུ་སྣང་བ་གཉིས། ལྷོར་ཕག་གདོང་མ་དཀར་སེར་དུ་སྣང་བ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ།
ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཞལ་གཅིག་ཕྱག་གཉིས་པ། ལྟེ་བ་མན་ཆད་ཕུར་བུའི་རྣམ་པ་ཅན། གཡས་ཀྱིས་རྡོ་རྗེ་ཐོ་བ་དང༌། གཡོན་གྱིས་རང་འདྲའི་ཕུར་བུ་བསྣམས་པ། དེ་རྣམས་ཀྱིས་རང་འདྲ་དུ་མ་ཕྱོགས་བཅུར་སྤྲོས་ཏེ་ཕྱོགས་བཅུའི་བགེགས་རྣམས་བཀུག་ནས་སྣ་ཚོགས་རྡོ་རྗེའི་རྭ་རྩེའི་ཕྱི་རོལ་དང་ཉེ་བར་ཧཱུཾ། ཧཱུཾ་རིང་པོ་ནག་པོ་བཅུ་ལས་གྲུབ་པའི་ཁྲོན་པ་གྲུ་གསུམ་པ་བཅུར་སོ་སོའི་བགེགས་རྣམས་བཅུག་པར་གྱུར། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚཾ་བིགྷྣཱན་ཧཱུཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པ་བཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷ་རོ་ཨ་ཛྙཱ་པ་ཡ་ཏི་སརྦ་དུཥྚཾ་བིགྷྣཱན་ཀ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་མུད་ག་ར་བཛྲ་ཀཱི་ལ་ཡ་ཨ་ཀོ་ཊ་ཡ་ཧཱུཾ་ཧཱུཾ་ཕཊ་ཕཊ། ཅེས་ལན་བཅུ་བརྗོད་ལ། ཤར་ནས་བརྩམས་ཏེ་ཕྱོགས་གཡོན་སྐོར་དང༌། མེ་ནས་བརྩམས་ཏེ་མཚམས་གཡས་སྐོར་དང༌། སྟེང་འོག་ཏུ་བགེགས་རྣམས་ཀྱི་སྤྱི་བོར་ཕུར་བུ་ཟུག །ཁྲོ་མོ་རྣམས་ཀྱིས་ཕྱག་གཡས་ཀྱི་ཐོ་བས་བརྡུངས་པས། སྤྱི་གཙུག་ནས་རྐང་མཐིལ་གྱི་བར་དུ་སོན་པར་ཕུར་བུས་བཏབ་པས། བགེགས་ཐམས་ཅད་བདེ་སྟོང་དབྱེར་མེད་ཀྱི་ངོ་བོར་རོ་གཅིག་ཏུ་གྱུར། རང་ཉིད་ཧེ་རུ་ཀར་གྱུར། རང་གི་ལག་པ་གཡོན་པའི་མཐེབ་མཛུབ་ཀྱིས་ཕྱོགས་རེར་སེ་གོལ་གཏོགས་པ་སྔོན་དུ་འགྲོ་བས། ཨོཾ་སུཾ་བྷ་ནི་སུཾ་བྷ་ཧཱུཾ་ཧཱུཾ་ཕཊ། ཤར་དུ་སྔགས་དེ་ཉིད་ཁ་དོག་ནག་པོ། ཨོཾ་གྲིཧྣ་གྲིཧྣ་ཧཱུཾ་ཧཱུཾ་ཕཊ། བྱང་དུ་སྔགས་དེ་ཉིད་ཁ་དོག་
ལྗང་གུ །ཨོཾ་གྲིཧྣ་པ་ཡ་གྲིཧྣ་པ་ཡ་ཧཱུཾ་ཧཱུཾ་ཕཊ། ནུབ་ཏུ་སྔགས་དེ་ཉིད་ཁ་དོག་དམར་པོ། ཨོཾ་ཨཱ་ན་ཡ་ཧོ་བྷ་ག་ཝཱན་བཱིཏྱ་རཱ་ཛ་ཧཱུཾ་ཧཱུཾ་ཕཊ། ལྷོར་སྔགས་དེ་ཉིད་ཁ་དོག་སེར་པོ་རྣམས་འཁོད་པར་གྱུར། སྔགས་དེ་རྣམས་ལས་རང་རང་གི་ཁ་དོག་ཅན་གྱི་འོད་ཟེར་འཕྲོས་པས་ཚངས་པའི་འཇིག་རྟེན་ནས་འོག་གསེར་གྱི་ས་གཞི་ལ་ཐུག་པར་ཁྱབ་པའི་འོད་ཟེར་འབར་བའི་གཟུགས་ཆེན་པོ་རྣམས་སུ་གྱུར། སྔགས་འོད་ཟེར་དང་བཅས་པ་ཡོངས་སུ་གྱུར་པ་ལས། ཤར་ནག །བྱང་ལྗང༌། ནུབ་དམར། ལྷོ་སེར་བའི་སྣ་ཚོགས་རྡོ་རྗེའི་རྭ་བ་གྲུ་བཞི་པ་རྒྱར་ཁོར་ཡུག་གི་ལྕགས་རིའི་ཚད་དང་མཐོ་ཁྱད་ཚངས་པའི་འཇིག་རྟེན་ནས་གསེར་གྱི་ས་གཞི་ལ་ཐུག་པའི་བར་དུ་ཁྱབ་པར་གྱུར། རྭ་བ་གྲུབ་པ་དང་དུས་མཉམ་དུ་སྣ་ཚོགས་རྡོ་རྗེ་སྟེ། ཧཱུཾ་གི་འོད་ཟེར་ལས་གསེར་གྱི་ས་གཞི་ལ་ཐུག་པའི་འོག་གི་ས་གཞི་སྣ་ཚོགས་རྡོ་རྗེའི་རང་བཞིན་དུ་གྱུར། སྣ་ཚོགས་རྡོ་རྗེའི་ཧཱུཾ་གི་འོད་ཟེར་ལས་ཕྱི་རོལ་ཏུ་སྟེང་དང་ལོགས་ཀུན་ཏུ་ཁྱབ་པར་རྡོ་རྗེ་རྩེ་ལྔ་པའི་རྣམ་པ་ཅན་གྱི་མདའི་དྲ་བ་དང༌། དེའི་འོག་ཏུ་རྡོ་རྗེའི་གུར་དང༌། གུར་གྱི་འོག་རྭ་བའི་སྟེང་དུ་རྡོ་རྗེའི་བླ་རེ་རྣམས་བར་མཚམས་མེད་པ་དུམ་བུ་གཅིག་ཏུ་གྱུར་པའི་ཕྱི་རོལ་ཏུ་རྡོ་རྗེའི་མེ་འཇིག་དུས་ཀྱི་མེ་ལྟ་བུས་བསྐོར་བར་གྱུར། ཨོཾ་མེ་དི་ནཱི་བཛྲ་བྷ་བ་བཛྲ་བན་དྷ་ཧཱུཾ། ཨོཾ་བཛྲ་པྲ་ཀ་ར་ཧཱུཾ་པཾ་ཧཱུཾ། ཨོཾ་བཛྲ་པཉྫ་ར་ཧཱུཾ་པཾ་ཧཱུཾ། ཨོཾ་བཛྲ་བི་ཏཱ་ནཱ་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཧཱུཾ་ཧཱུཾ། ཁྭ་གདོང་མ་ལ་སོགས་པས་བགེགས་ལྷག་མ་རྣམས་རྒྱང་རིང་དུ་བསྐྲད་ནས་རྡོ་རྗེའི་རྭ་བ་གྲུ་བཞི་པ་ལ་ཐིམ་པས། ཆུ་ལ་ཆུ་བརྡབས་པས་ཟེགས་མ་ཕྱིར་འཐོར་བ་བཞིན་དུ་
འོད་ཟེར་ཕྱིར་འཕྲོས་པ་ལས་རྡོ་རྗེ་དང་པད་མ་དང་འཁོར་ལོའི་རྭ་བ་ཟླུམ་པོ་གསུམ་བར་མཚམས་མེད་པར་དུམ་བུ་གཅིག་ཏུ་གྱུར་པའི་ཕྱི་རོལ་ཏུ་རྡོ་རྗེའི་མེ་གཡོན་སྐོར་དུ་འཁྱིལ་ཞིང་འབར་བ། སྟེང་དང་ལོགས་ཀུན་ཏུ་ཁྱབ་པས་འགྲོ་བ་ཐམས་ཅད་ཀྱང་རྣམ་པ་ཐམས་ཅད་དུ་བགེགས་དང་བྲལ་བར་གྱུར། ཨོཾ་བཛྲ་པྲ་ཀཱ་རཱ་ཧཱུཾ། ཨོཾ་པདྨ་པྲ་ཀཱ་རཱ་ཧཱུཾ། ཨོཾ་ཙཀྲ་པྲ་ཀཱ་རཱ་ཧཱུཾ། གོང་གི་ཛྭ་ལ་ཡང་འདིར་ལེན། སྲུང་འཁོར་གྱི་དབུས་སུ་ཨེ་ལས་ཆོས་འབྱུང་དཀར་པོ་ཟུར་གསུམ་པ་གདེངས་ཀ་ཆེ་བ་གྱེན་དུ་ཕྱོགས་ཤིང་རྩེ་མོ་ཕྲ་བ་ཐུར་དུ་ཟུག་པའི་ནང་དུ། ཡཾ་སྔོན་པོ་ཡོངས་སུ་གྱུར་པ་ལས་རླུང་གི་དཀྱིལ་འཁོར་ཁ་དོག་སྔོན་པོ་དབྱིབས་གཞུ་ལྟ་བུ་གཡས་གཡོན་གཉིས་སུ་རྒྱལ་མཚན་གྱིས་མཚན་པ། དེའི་སྟེང་དུ་རཾ་དམར་པོ་ལས་མེའི་དཀྱིལ་འཁོར་ཁ་དོག་དམར་པོ་དབྱིབས་གྲུ་གསུམ་པ། གྲུ་གསུམ་དུ་རཾ་གྱིས་མཚན་པ། དེའི་སྟེང་དུ་བཾ་དཀར་པོ་ལས་ཆུའི་དཀྱིལ་འཁོར་ཁ་དོག་དཀར་པོ་དབྱིབས་ཟླུམ་པོ་དབུས་སུ་བུམ་པས་མཚན་པ། དེའི་སྟེང་དུ་ལཾ་སེར་པོ་ལས་སའི་དཀྱིལ་འཁོར་ཁ་དོག་སེར་པོ། དབྱིབས་གྲུ་བཞི་པ། གྲྭ་བཞིར་རྡོ་རྗེ་རྩེ་གསུམ་པས་མཚན་པ། དེའི་སྟེང་དུ་སུཾ་ལས་རི་རབ་ལྷུན་པོ་གྲུ་བཞི་པ། རིན་པོ་ཆེ་སྣ་བཞིའི་རང་བཞིན་ཅན་སྟེང་གི་ཕྱོགས་མཚམས་སུ་ལྕོག་བརྒྱད་ཀྱིས་ཉེ་བར་མཛེས་པ། དེའི་སྟེང་དུ་པཾ་སེར་པོ་ལས་སྣ་ཚོགས་པདྨ། དེའི་ལྟེ་བར་ཧཱུཾ་ལས་སྣ་ཚོགས་རྡོ་རྗེ། དེའི་ལྟེ་བར་བྷྲུཾ་ལས་འཁོར་ལོ། དེ་ཡོངས་སུ་གྱུར་པ་ལས་རྣམ་སྣང་སྐུ་མདོག་དཀར་པོ་ཞལ་གཅིག་ཕྱག་བཞིའི་གཡས་གཉིས་ན་འཁོར་ལོ་དང་ཌཱ་མ་རུ། གཡོན་གཉིས་ན་ཐོད་
པ་དང་ཁ་ཊྭཱཾ་ག་བསྣམས་ཤིང༌། རང་སྣང་གི་ཤེས་རབ་མས་འཁྱུད་པ། གཡས་བརྐྱང་གི་སྟབས་ཀྱིས་བཞུགས་པ། དེ་ཞུ་བ་ལས་བྱུང་བའི་ཁང་པ་བརྩེགས་པའི་གཞལ་ཡས་ཁང༌། གྲུ་བཞི་སྒོ་བཞི་པ། ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བའི་རིམ་པ་ལྔ་དང་ལྡན་པའི་རིན་པོ་ཆེའི་རྩིག་པས་བསྐོར་བའི་སྟེང་ན་རིན་པོ་ཆེའི་ཕ་གུ་གཞི་དམར་པོ་ལ་རིན་པོ་ཆེ་ཟུར་གསུམ་དང་གྲུ་བཞི་ལ་སོགས་པས་སྤྲས་པ། དེའི་སྟེང་ན་གནས་པའི་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་མུ་ཏིག་གི་དོ་ཤལ་དང་དོ་ཤལ་ཕྱེད་པ་འཕྱང་བ། དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་ན་པདྨ་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་ལ་གནས་པའི་གསེར་གྱི་བུམ་པ་ནས་འཐོན་པའི་རྒྱལ་མཚན་དང་བ་དན་བརྒྱད་བརྒྱད་ཀྱིས་མཛེས་པར་བྱས་པ། ཕྱིའི་སྟེང་གི་ཟུར་བཞི་ལ་གདུགས་བཞིས་བརྒྱན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་བཞུགས་སྟབས་དང་ཁ་དོག་སྣ་ཚོགས་པའི་ལྷ་མོ་རྣམས་ཀྱིས་མཆོད་པ་བྱེད་བཞིན་པ། སྒོ་དང་སྒོ་ཁྱུད་ཀྱི་ཕྱིའི་མཚམས་དང༌། རྩིག་པའི་ཕྱི་ནང་གི་ཟུར་བཞིར་ཟླ་ཕྱེད་ལ་གནས་པའི་རིན་པོ་ཆེ་དམར་པོའི་སྟེང་དུ་རྡོ་རྗེས་བརྒྱན་པ། སྒོ་བཞི་སོ་སོའི་མདུན་དུ་སྟེགས་བུ་གྲུ་བཞི་པའི་སྟེང་དུ་བུམ་པ་ལ་གནས་པའི་ཀ་བ་བཞི་བཞིས་བཏེག་པའི་རྟ་བབས། སྣམ་བུ་བཅུ་གཅིག་དང་ལྡན་པའི་རྩེ་མོར་ཆོས་ཀྱི་འཁོར་ལོའི་གཡས་གཡོན་དུ་རི་དྭགས་ཕོ་མོ་དང་བཅས་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་ལ་རྒྱལ་སྲིད་རིན་པོ་ཆེ་སྣ་བདུན་དང༌།
བར་བར་དུ་གྲུབ་པ་ཐོབ་པ་དང༌། སྤྲིན་གྱི་གསེབ་ནས་བྱུང་བའི་ལྷ་མེ་ཏོག་གི་འཕྲེང་བ་བཟུང་བ་རྣམས་ཀྱིས་ཀུན་ནས་མཛེས་པར་བྱས་པ། དེའི་ཕྱི་རོལ་ཏུ་སྣ་ཚོགས་རྡོ་རྗེ་དང༌། པདྨ་དང༌། འཁོར་ལོའི་རྭ་བ་གསུམ་གྱིས་བསྐོར་བ་ལ་སོགས་པའི་སྲུང་འཁོར། དེའི་ཕྱི་རོལ་ཏུ་བསྐལ་པ་འཇིག་པའི་དུས་ཀྱི་མེ་ལྟ་བུ། རྡོ་རྗེའི་མེ་ཁ་དོག་སྣ་ལྔ་པས་ལོགས་ཀུན་ཏུ་ཁྱབ་པར་གཡོན་སྐོར་དུ་འཁྱིལ་ཞིང་འབར་བ། དེའི་ཕྱི་རོལ་ཏུ་གཏུམ་དྲག་ལ་སོགས་པའི་དུར་ཁྲོད་བརྒྱད་ན་ཤི་རི་ཥ་ལ་སོགས་པའི་ཤིང་བརྒྱད། ཤིང་གི་རྩ་བར་དབང་པོ་ལ་སོགས་པའི་ཕྱོགས་སྐྱོང་བརྒྱད་དང༌། རྩེ་མོར་གླང་པོའི་གདོང་ཅན་ལ་སོགས་པའི་ཞིང་སྐྱོང་བརྒྱད། ཐུགས་རྗེའི་ཆུ་བརྒྱད་དང་ནོར་རྒྱས་ལ་སོགས་པ་དེ་ལ་གནས་པའི་ཀླུ་བརྒྱད། ལྷུན་པོ་ལ་སོགས་པའི་རི་བརྒྱད་ལ་གནས་པའི་མཆོད་རྟེན་བརྒྱད་དང་གྲུབ་ཆེན་བརྒྱད་ཡེ་ཤེས་ཀྱི་མེ་བརྒྱད་དང་དེ་དག་གི་སྟེང་གི་ནམ་མཁའ་ལ་སྒྲོག་པ་ལ་སོགས་པའི་སྤྲིན་བརྒྱད། གཞན་ཡང་བྱ་མི་རོ་ཟ་བ་རྣམས་དང་ཅེ་སྤྱང་དང་སྦྲུལ་བ་ལང་གི་མགོ་ཅན་ལ་སོགས་པ་ཕྱོགས་སུ་རྒྱུ་ཞིང༌། མི་རོ་གསར་རྙིང་སྣ་ཚོགས་པ་དང་ཀེང་རུས་དུ་མ་གཅལ་དུ་བཀྲམ་པ། གནོད་སྦྱིན་དང༌། རོ་ལངས་དང༌། སྲིན་པོ་རྣམས་ཀྱིས་ཀི་ལི་ཀི་ལིའི་སྒྲ་ཆེན་པོ་སྒྲོགས་པ། གྲུབ་པ་ཐོབ་པ་དང་རིག་པ་འཛིན་པ་དང་དམ་ཚིག་སྤྱོད་པའི་རྣལ་འབྱོར་པ་དང་རྣལ་འབྱོར་མ་བཅོམ་ལྡན་འདས་ལ་རྩེ་གཅིག་ཏུ་བལྟ་བ། གཅེར་བུ་སྐྲ་བཤིགས་པ། ཕྱག་རྒྱ་ལྔས་བརྒྱན་པ། ཅང་ཏེའུ་དང་ཐོད་པ་དང་ཁ་ཊྭཱཾ་ག་འཛིན་པ། ཐོད་པས་སྤྱི་བོར་བརྒྱན་པ། རྒོད་ཅིང་དུར་ཁྲོད་དུ་འཇུག་པ་རྣམས་
ཀྱིས་ངོ་མཚར་བར་བྱེད་པའོ། །གཞལ་ཡས་ཁང་གི་ནང་གི་སྟེང་དང་འོག་གི་ས་གཞི་ཐམས་ཅད་ཤར་དཀར། བྱང་ལྗང༌། ནུབ་དམར། ལྷོ་སེར་བ། དབུས་ཀྱི་ས་གཞི་སྔོན་པོ་ལ་གནས་པའི་སྐུའི་འཁོར་ལོ་དཀར་པོ་རྩིབས་བརྒྱད་པའི་མུ་ཁྱུད་ལ་འཁོར་ལོའི་ཕྲེང་བས་བསྐོར་བ། དེའི་ལྟེ་བར་གསུང་གི་འཁོར་ལོ་དམར་པོ་རྩིབས་བརྒྱད་པའི་མུ་ཁྱུད་ལ་པདྨའི་ཕྲེང་བས་བསྐོར་བ། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པའི་མུ་ཁྱུད་ལ་རྡོ་རྗེའི་ཕྲེང་བས་བསྐོར་བ། དེའི་ལྟེ་བར་བདེ་ཆེན་གྱི་འཁོར་ལོ་སྣ་ཚོགས་པདྨ་འདབ་མ་བཅུ་དྲུག་པའི་བརྒྱད་འོག་དང༌། བརྒྱད་སྟེང་དུ་ཁ་ཕྱོགས་པའི་མུ་ཁྱུད་ལ་གྲི་གུག་གི་ཕྲེང་བས་བསྐོར་བ། འཁོར་ལོ་བཞི་པོ་རེ་རེ་ལ་མཚམས་རྣམས་ན་གནས་པའི་འཁོར་ལོ་པདྨ་རྡོ་རྗེ་གྲི་གུག་རྣམས་ཀྱིས་མཚན་པའི་ཀ་བ་བརྒྱད་བརྒྱད་ཀྱིས་བཏེག་པའི་གདུང་ཟླུམ་རིམ་པ་བཞིའི་ཐོག་གིས་ཇེ་མཐོ་ཇེ་མཐོར་གྱུར་པའི་རྩེ་མོར་རྡོ་རྗེ་ནོར་བུ་རིན་པོ་ཆེའི་ཏོག་གིས་སྤྲས་པ། དབུས་ཀྱི་པདྨའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ་འཇིགས་བྱེད་དང་དུས་མཚན། ལྷ་གཞན་ཐམས་ཅད་ཀྱི་གནས་སུ་རོ་དང་ཉི་མའི་གདན་རེ་རེ། གཞན་དབུས་མའི་སྟེང་དུ་མཚན་སོ་གཉིས་ཀྱི་ངོ་བོ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ སྟེ། དབྱངས་ཡིག་དཀར་པོ་བཅུ་དྲུག་པ་ཕྲག་གཅིག་གཡས་སྐོར་དང༌། སླར་ཡང་ཨ་ཨཱ་ནས་ཨཿ སྟེ། དབྱངས་ཡིག་དཀར་པོ་བཅུ་དྲུག་པ་ཕྲག་གཅིག་གཡོན་སྐོར་ཏེ། དེ་གཉིས་ཡོངས་སུ་གྱུར་པ་ལས། ཟླ་བའི་དཀྱིལ་འཁོར་ཡོངས་སུ་རྫོགས་པ་ཨཱ་ལིས་མཚན་པ་ནི་མེ་ལོང་ལྟ་བུའི་ཡེ་ཤེས། དེའི་སྟེང་དུ་དཔེ་བྱད་བརྒྱད་ཅུའི་ངོ་བོ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌ་
ཌྷ་ཌྷ་ཎ། ཏ་ཐ་ད་ད་དྷ་དྷ་ན། པ་ཕ་བ་བྷ་མ། ཡ་ཡ་ར་ལ་ལ་ཝ། ཤ་ཥ་ས་ཧ་ཀྵ་སྟེ། གསལ་བྱེད་དམར་པོ་བཞི་བཅུ་པ་ཕྲག་གཅིག་གཡས་སྐོར་དང༌། སླར་ཡང་ཀ་ཁ་ནས། ཀྵ་སྟེ། གསལ་བྱེད་དམར་པོ་བཞི་བཅུ་པ་ཕྲག་གཅིག་གཡོན་སྐོར་ཏེ། དེ་གཉིས་ཡོངས་སུ་གྱུར་པ་ལས། ཉི་མའི་དཀྱིལ་འཁོར་ཀཱ་ལིས་མཚན་པ་ནི་མཉམ་པ་ཉིད་ཀྱི་ཡེ་ཤེས། ཟླ་ཉིའི་དབུས་སུ་ནཱ་ད་དེ་ལས་ཐིག་ལེ། དེ་ལས་ཟླ་ཕྱེད། དེ་ལས་ཧའི་མགོ་བོ། དེ་ལས་ཧའི་ལུས། དེ་ལས་ཨུ་གྲུབ་པའི་ཚུལ་གྱིས་ཧཱུཾ་ཡིག་དཀར་ལ་དམར་པའི་མདངས་ཅན་ཡོངས་སུ་གྱུར་པ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ཧཱུཾ་གྱིས་མཚན་པ་ནི་སོ་སོར་རྟོག་པའི་ཡེ་ཤེས། ཧཱུཾ་ལས་ཁ་དོག་སྣ་ལྔ་པའི་འོད་ཟེར་འཕྲོ་བའི་རྩེ་མོ་ལས་འཁོར་ལོ་ལྔའི་ལྷ་ཚོགས་རྣམས་འཐོན་ཏེ། འགྲོ་བ་རྣམས་འཁོར་ལོ་ལྔའི་ལྷ་ཚོགས་ཀྱི་གོ་འཕང་ལ་འགོད་པ་དང༌། སྔོན་ཐོག་མ་མེད་པ་ནས་གྲུབ་པའི་དཔའ་བོ་དང་རྣལ་འབྱོར་མ་ལ་སོགས་པ་ཕྱོགས་བཅུའི་ཞིང་ཁམས་ན་བཞུགས་པ་རྣམས་ལྷན་ཅིག་སྤྱན་དྲངས་ཏེ། མཉམ་པར་སྦྱར་བ་སྔོན་དུ་འགྲོ་བས་ཞུ་བར་གྱུར་ཏེ་ཧཱུཾ་ཡིག་གི་ནཱ་ད་ལ་ཐིམ་ཞིང༌། ཧཱུཾ་ཡིག་ལྷན་སྐྱེས་ཀྱི་དགའ་བའི་རང་བཞིན་ཅན་དུ་གྱུར་པ་ནི་བྱ་བ་གྲུབ་པའི་ཡེ་ཤེས་སོ། །དེ་ནས། ཨོཾ་ཨཱཿ ཧཱུཾ། ཨོཾ་སརྦ་བཱི་ར་ཡོ་གི་ནཱི་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨོཾ་བཛྲ་ཤུདྡྷཿ སརྦ་དྷརྨྨཿ བཛྲ་ཤུདྡྷོ྅ཧཾ། ཟླ་ཉི་དབྱངས་གསལ་ཕྱག་མཚན་ས་བོན་དང་བཅས་པ་རྣམས་ཡོངས་སུ་གྱུར་པ་ལས། རྒྱུ་རྡོ་རྗེ་འཆང་ཡབ་ཡུམ་གྱི་སྐུར་ཡོངས་སུ་རྫོགས་པར་གྱུར་པ་ནི། ཆོས་ཀྱི་དབྱིངས་ཀྱི་ཡེ་ཤེས་ཏེ། དེ་ཡང་རང་ཉིད་
རྒྱུ་རྡོ་རྗེ་འཆང་ཧེ་རུ་ཀ་སྐུ་མདོག་དཀར་པོ་སྐུའི་འོད་ཟེར་ལས་རྒྱལ་བ་རིགས་དྲུག་གི་ཚོགས་དཔག་ཏུ་མེད་པ་སྤྲོས་ནས་སེམས་ཅན་རྣམས་སྨིན་གྲོལ་མཛད་པ། ཞལ་བཞི་པའི་རྩ་ཞལ་དཀར། གཡོན་ཞལ་དམར། རྒྱབ་ཞལ་སེར། གཡས་ཞལ་གནག་པ་ཞལ་རེ་རེ་ཡང་སྤྱན་གསུམ་པ་ཕྱག་བཅུ་གཉིས་པ་དཔྲལ་བར་རྡོ་རྗེ་རྩེ་ལྔ་པའི་འཕྲེང་བ་འཛིན་པ། ཞབས་གཡས་བརྐྱངས་པས་འཇིགས་བྱེད་ནག་པོ་ལག་པ་བཞི་པའི་དང་པོ་གཉིས་ཐལ་མོ་སྦྱར་བ། ལྷག་མ་གཡས་ཌཱ་མ་རུ་དང༌། གཡོན་རལ་གྲི་འཛིན་པའི་མགོ་བོ་མནན་པ། གཡོན་བསྐུམས་པས་དུས་མཚན་མ་དམར་མོ། ལག་པ་བཞི་པའི་དང་པོ་གཉིས་ཐལ་མོ་སྦྱར་བ། ལྷག་མ་གཡས་ཐོད་པ་དང་གཡོན་ཁ་ཊྭཱཾ་ག་འཛིན་པའི་ནུ་མ་མནན་པ། གདན་གཉིས་ཀའང་གདོང་གཅིག་པ། མིག་གསུམ་པ། ཕྱག་རྒྱ་ལྔས་བརྒྱན་པའོ། །ཕྱག་དང་པོ་གཉིས་ཀྱིས་རྡོ་རྗེ་ཕག་མོ་ལ་འཁྱུད་པའི་གཡས་པས་རྡོ་རྗེ་རྩེ་ལྔ་པ་དང༌། གཡོན་པས་དྲིལ་བུ་བསྣམས་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་དཀར་པོ་ཁྲག་དང་བཅས་པའི་ན་བཟའ་ཕྱག་གཡས་པས་ལག་པ་གཡོན་པ་དང་གཡོན་པས་རྐང་པ་གཡོན་པའི་པགས་པ་རང་གི་རྒྱབ་ཏུ་སྡིགས་མཛུབ་དང་བཅས་པའི་ཕྱག་གིས་བརྒྱངས་ཏེ་འཛིན་པའི་སྡིགས་མཛུབ་ཀྱི་རྩེ་གཉིས་སྨིན་མའི་ཐད་སོར་གནས་པ། གཡས་ཀྱི་གསུམ་པ་ན་མདུང་རྩེ་གསུམ་པ་བསྒྲེང་བ། བཞི་པ་ན་གྲི་གུག །ལྔ་པ་ན་དགྲ་སྟ། དྲུག་པ་ན་ཌཱ་མ་རུ། གཡོན་གྱི་ཕྱག་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག །བཞི་པ་ན་རྡོ་རྗེའི་ཞགས་པ། ལྔ་པ་ན་ཁྲག་གིས་བཀང་བའི་ཐོད་པ། དྲུག་པ་ན་ཚངས་པའི་མགོ་བོ་གདོང་བཞི་པ་བསྣམས་ཤིང༌། སྣ་ཚོགས་རྡོ་
རྗེས་མཚན་པའི་རལ་པའི་ཐོར་ཅོག་ཅན། དབུ་རེ་རེ་ལ་རྡོ་རྗེ་ནག་པོའི་ཕྲེང་བ་སྟོད་སྨད་དུ་གནས་པ་གཉིས་ལ་བརྒྱུས་པའི་ཐོད་པ་སྐམ་པོ་ལྔ་ལྔའི་འཕྲེང་བས་བརྒྱན་པ། དབུའི་གཡོན་དུ་ཅུང་ཟད་ཡོ་བའི་ཟླ་བ་ཕྱེད་པ་འཕྱང་བ། ཞལ་རྣམ་པར་འགྱུར་བ། མཆེ་བ་བཞི་བཞི་ཅུང་ཟད་གཙིགས་ཤིང་འཇིགས་སུ་རུང་བ། སྒེག་པ་དཔའ་བ་མི་སྡུག་པ་སྟེ་སྐུའི་ཉམས་གསུམ་དང༌། རྒོད་དང་དྲག་ཤུལ་འཇིགས་སུ་རུང་བ་སྟེ། གསུང་གི་ཉམས་གསུམ་དང༌། སྙིང་རྗེ་དང་རྔམ་པ་དང་ཞི་བ་སྟེ་ཐུགས་ཀྱི་ཉམས་གསུམ་སྟེ་ཉམས་དགུ་དང་ལྡན་པ། སྟག་གི་པགས་པའི་ཤམ་ཐབས་ཅན། མིའི་རྒྱུ་མ་ལ་བརྒྱུས་པའི་མི་མགོ་རློན་པ་ལྔ་བཅུའི་འཕྲེང་བ་འཕྱང་བ། ཕྱག་རྒྱ་དྲུག་གིས་རྒྱས་བཏབ་པ། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པའོ། །བཅོམ་ལྡན་འདས་ལ་མངོན་དུ་ཕྱོགས་པར། བཅོམ་ལྡན་འདས་མ་རྡོ་རྗེ་ཕག་མོ་དྲག་མོ་ཆེན་མོ་སྐུ་མདོག་དམར་མོ་ཞལ་གཅིག་ཕྱག་གཉིས་མ། སྤྱན་གསུམ་པ། གཅེར་མོ་སྐྲ་གྲོལ་བ། ཐོད་པའི་དུམ་བུས་བརྒྱན་པའི་འོག་པག་ཅན། ཕྱག་གཡོན་པས་ཡབ་ཀྱི་མགུལ་བ་ནས་འཁྱུད་པའི་ཐོད་པ་ན་བདུད་བཞི་ལ་སོགས་པའི་ཁྲག་གིས་བཀང་བ་བསྣམས་ནས་ཡབ་ཀྱི་ཞལ་དུ་སྟོབ་པ། གཡས་པས་ཕྱོགས་བཅུའི་གདུག་པ་ཅན་ཀུན་ལ་རྡོ་རྗེ་དང་བཅས་པའི་སྡིགས་མཛུབ་ཀྱིས་བསྡིགས་པར་མཛད་པ། བསྐལ་པ་འཇིག་པའི་དུས་ཀྱི་མེ་འོད་ལྟ་བུའི་སྐུ་ལས་འོད་ཟེར་དུ་མ་འཕྲོ་བ་ཁྲོ་གཉེར་རླབས་ལྟར་འཁྱུག་ཅིང་ཁྲོ་ཆགས་ཀྱི་ཟུར་མིག་བལྟ་བའི་ཉམས་དང་ལྡན་པ། ཉི་མའི་འོད་ཅན་གྱི་གཟི་བརྗིད་ཆེ་བ། ཁྲག་ལ་དགྱེས་ཤིང་ཁྲག་འཛག་པ།
བྱིན་པ་གཉིས་ཀྱིས་ཡབ་ཀྱི་བརླའི་སྟེང་དུ་ལེགས་པར་འཁྲིལ་བ། ལྷག་མཐོང་གི་རང་བཞིན་གྱི་བདེ་བ་ཆེན་པོར་གནས་ཀྱང་འགྲོ་བའི་དོན་བྱེད་པའི་ཐུགས་རྗེའི་བདག་ཉིད་ཅན། ཕྱག་རྒྱ་ལྔས་བརྒྱན་པ། མི་མགོ་སྐམ་པོ་ལྔའི་ཐོད་དང༌། མི་མགོ་སྐམ་པོ་ལྔ་བཅུའི་དོ་ཤལ་ཅན། ཡབ་ཀྱི་གསང་གནས་མི་དམིགས་པའི་ངང་ལས་ཧཱུཾ་དཀར་པོ་ལས་བྱུང་བའི་རྡོ་རྗེ་དཀར་པོ་རྩེ་ལྔ་པ། བྱཱ་དམར་པོ་ལས་བྱུང་བའི་ནོར་བུ་དམར་པོ་རྩེ་མོ་ལ་བྱཱ་སེར་པོས་མཚན་པ། ཡུམ་གྱི་གསང་གནས་མི་དམིགས་པའི་ངང་ལས་ཨ་ལས་བྱུང་བའི་པདྨ་དམར་པོ་འདབ་མ་གསུམ་པ་བྱཱ་དཀར་པོ་ལས་བྱུང་བའི་བྱང་ཆུབ་ཀྱི་སེམས་མཚོན་པའི་ལྟེ་བ་དཀར་པོ། རྩེ་མོར་དྱཱ་སེར་པོས་མཚན་པ། ཡབ་ཀྱི་ལྟེ་བ་དང་ཐུགས་ཀར་ཟླ་གདན་ལ། ཡུམ་གྱི་སྙིང་པོ་དང་ཉེ་སྙིང༌། མགྲིན་པ་དང་དཔྲལ་བར་ཉི་གདན་ལ། ཡབ་ཀྱི་སྙིང་པོ་དང་ཉེ་སྙིང༌། ཡུམ་གྱི་ལྟེ་བ་དང་ཐུགས་ཀར་ཉི་གདན་ལ། ཡབ་ཀྱི་སྙིང་པོ་དང་ཉེ་སྙིང༌། མགྲིན་པ་དང་དཔྲལ་བར་ཟླ་གདན་ལ། ཡུམ་གྱི་སྙིང་པོ་དང་ཉེ་སྙིང༌། སྔགས་ཐམས་ཅད་ཁ་དོག་དམར་པོ་འོད་ཟེར་འཕྲོ་བ། གཡོན་སྐོར་དུ་གནས་པ། སྔགས་རྣམས་ཀྱང་ཕན་ཚུན་ཞལ་སྦྱོར་ཞིང༌། འོད་ཟེར་འཁྱུད་པའི་རྣམ་པ་ཅན་དུ་གྱུར། ཨོཾ་ཨཱཿ ཧཱུཾ། ཡབ་ཡུམ་སྙོམས་པར་ཞུགས་པའི་དགའ་བའི་སྒྲས། མཁའ་ཁྱབ་ཀྱི་སངས་རྒྱས་ཐམས་ཅད་བཀུག་སྟེ་རང་གི་སྤྱི་གཙུག་ནས་ཞུགས། བྱང་ཆུབ་ཀྱི་སེམས་དང་ལྷན་ཅིག་ཏུ་ཞུ་བ། སྤྱི་བོ་ནས་མགྲིན་པར་སླེབ་པ་ན་དགའ་བ། མགྲིན་པ་ནས་སྙིང་གར་སླེབ་པ་ན་མཆོག་དགའ། སྙིང་ག་ནས་ལྟེ་བར་སླེབ་པ་ན་ཁྱད་པར་གྱི་དགའ་བ། ལྟེ་བ་ནས་ནོར་བུའི་རྩེར་སླེབ་པ་ན་ལྷན་ཅིག་སྐྱེས་དགའི་ཡེ་ཤེས་ཉམས་སུ་མྱོང་ཞིང་
བརྟན་པར་བྱས་ནས་ཡུམ་གྱི་པདྨར་བབས་པའི་བྱང་སེམས་ཨཱ་ལི་དང༌། ཡུམ་གྱི་ཟླ་མཚན་ཀཱ་ལིའི་དབུས་སུ་དེ་བཞིན་གཤེགས་པ་རྣམས་ཀྱི་ཐུགས་ཡེ་ཤེས་པ་ཞུགས། ནཱ་ད་དང་དེ་ལས་རིམ་གྱིས་རྫོགས་པའི་ཧཱུཾ་ཡིག་དང་ལྷན་ཅིག་འདྲེས་པས། འབྲས་བུ་རྡོ་རྗེ་འཆང་འདྲ་བའི་ཧེ་རུ་ཀས་གཙོ་བོ་བྱས་པའི་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པར་གྱུར། མངལ་གྱི་གཙོ་བོ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས། སེམས་ཅན་ཐམས་ཅད་བཀུག་ནས་སློབ་མ་འཇུག་པའི་རིམ་པས་བྷ་གའི་དཀྱིལ་འཁོར་དུ་བཅུག་པས། ཆོས་འབྱུང་གི་ཕྱག་རྒྱའི་འོད་ཀྱིས་རེག་པ་ཙམ་གྱིས་སྒྲིབ་པ་དག་ནས་དེ་བཞིན་གཤེགས་པའི་སྐུར་གྱུར། རྣམ་སྣང་ལ་སོགས་པའི་སངས་རྒྱས་ཐམས་ཅད་དཀྱིལ་འཁོར་གྱི་གཙོ་བོའི་སྐུ་ལ་བཅུག །རྗེས་སུ་ཆགས་པའི་སྦྱོར་བས་ཞུ་བར་གྱུར་པའི་བྱང་ཆུབ་ཀྱི་སེམས་རྡོ་རྗེའི་ལམ་ནས་ཕྱུང་ནས་སེམས་ཅན་གྱི་ཚོགས་དེ་རྣམས་ལ་དབང་བསྐུར་བས་དེ་རྣམས་ཀྱི་ཕུང་ཁམས་སྐྱེ་མཆེད་རྣམས་རྣམ་པར་སྦྱངས་ཤིང༌། ཕུང་ཁམས་སྐྱེ་མཆེད་རྣམས་བདེ་བ་ཆེན་པོའི་རང་བཞིན་གྱི་དཀྱིལ་འཁོར་གྱི་ལྷ་ཚོགས་སུ་གྱུར་ཏེ། དེ་ཡང་གཟུགས་ཀྱི་ཕུང་པོ་བྷྲུཾ་ལས་རྣམ་པར་སྣང་མཛད། ཚོར་བའི་ཕུང་པོ་ཏྲཾ་ལས་རྡོ་རྗེ་ཉི་མ། འདུ་ཤེས་ཀྱི་ཕུང་པོ་ཧྲཱིཿ ལས་པདྨ་གར་གྱི་དབང་ཕྱུག །འདུ་བྱེད་ཀྱི་ཕུང་པོ་ཧོ་ལས་རྡོ་རྗེ་རྒྱལ་པོ། རྣམ་ཤེས་ཀྱི་ཕུང་པོ་ཧཱུཾ་ལས་རྡོ་རྗེ་སེམས་དཔའ། ཕུང་པོ་ལྔའི་དེ་བཞིན་ཉིད་ཧི་ལས་དཔལ་ཧེ་རུ་ཀ །མིག་ཨོཾ་ལས་གཏི་མུག་རྡོ་རྗེ། རྣ་བ་ཧཱུཾ་ལས་ཞེ་སྡང་རྡོ་རྗེ། སྣ་ཏྲཾ་ལས་སེར་སྣ་རྡོ་རྗེ། ལྕེ་ཨཾ་ལས་འདོད་ཆགས་
རྡོ་རྗེ། ལུས་ཁཾ་ལས་ཕྲག་དོག་རྡོ་རྗེ། ཡིད་ཧཾ་ལས་དབང་ཕྱུག་རྡོ་རྗེ། སའི་ཁམས་ལཾ་ལས་ལྟུང་བྱེད་མ། ཆུའི་ཁམས་མཾ་ལས་གསོད་བྱེད་མ། མེའི་ཁམས་བཾ་ལས་འགུགས་བྱེད་མ། རླུང་གི་ཁམས་ཏཾ་ལས་གར་གྱི་དབང་ཕྱུག་མ། ནམ་མཁའི་ཁམས་ཁཾ་ལས་པདྨའི་དྲ་བ་ཅན།ལུས་ཨོཾ་ལས་སྐུ་རྡོ་རྗེ། ངག་ཨཱཿ ལས་གསུང་རྡོ་རྗེ། ཡིད་ཧཱུཾ་ལས་ཐུགས་རྡོ་རྗེར་གྱུར་ཏེ། ཨོཾ་ཞེས་བརྗོད་པས་ལྷ་རྣམས་མངལ་ནས་སྤྲོས་ཏེ་ཕྱོགས་བཅུའི་སེམས་ཅན་གྱི་དོན་ལ་གཤེགས་ཤིང༌། རྟེན་གྱི་དཀྱིལ་འཁོར་ཡང་མི་དམིགས་པར་གྱུར། རང་ནམ་མཁའི་ནཱ་དས་རྒྱུ་རྡོ་རྗེ་འཆང་ཡབ་ཡུམ་སྙོམས་པར་ཞུགས་པ་མཐོང་ནས་བདག་གིས་སངས་རྒྱས་ཡབ་ཡུམ་གྱི་བྱང་སེམས་དཀར་དམར་གྱི་དབུས་སུ་སྐྱེ་བ་བླངས་ལ་སེམས་ཅན་གྱི་དོན་བྱའོ་སྙམ་པའི་འཕེན་པ་དང་ལྡན་པས་སྐར་མདའ་འཕོ་བ་བཞིན་དུ་འོངས་ཏེ་ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པད་མར་ཞུགས་ཏེ་ཡབ་ཡུམ་གྱི་བྱང་ཆུབ་ཀྱི་སེམས་དཀར་དམར་གཉིས་འདྲེས་པ་ལ་ཐིམ་པའི་མཐུས་ཞུ་བས་རྐྱེན་བྱས་ནས་ཡབ་ཡུམ་གཉིས་ཀྱང་ཆགས་པ་ཆེན་པོའི་མེས་ཞུ་ནས་བྱང་ཆུབ་ཀྱི་སེམས་ཀྱི་ཐིག་ལེའི་ངོ་བོར་གནས་པར་གྱུར། དེ་ནས་ཕྱོགས་བཅུའི་སངས་རྒྱས་ཐམས་ཅད་འདུས་ནས། ཨོཾ་མཧཱ་སུ་ཁ་བཛྲ་སཏྭ་ཛཿ ཧཱུཾ་བཾ་ཧོཿ སུ་ར་ཏ་སྟྭཾ་ཏྲི་ཤྱ་ཧོཿ ཞེས་བསྐུལ་བས་ཐིག་ལེ་དེ་ཉིད་ཧཱུཾ་དང་ཨཾ་དུ་གྱུར། ཧཱུཾ་ལས་རྡོ་རྗེ་རྩེ་ལྔ་པ་ལྟེ་བར་ཧཱུཾ་གིས་མཚན་པ། ཨཾ་ལས་ཐོད་པ་ཨཾ་གིས་མཚན་པ། དེ་གཉིས་ཡོངས་སུ་གྱུར་པ་ལས། དབུས་ཀྱི་གདན་གྱི་སྟེང་དུ་རང་ཉིད་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་མཐིང་ག་ཞལ་བཞི་པའི་རྩ་ཞལ་ནག །གཡོན་ཞལ་དམར། རྒྱབ་ཞལ་
སེར། གཡས་ཞལ་དཀར་བ། ཞལ་རེ་རེའང་སྤྱན་གསུམ་པ། ཞེས་པ་ནས། མཆེ་བའི་སྐབས་སུ་ཅུང་ཟད་ཅེས་པ་མ་གཏོགས་པ། ལུས་ཐམས་ཅད་ལ་བྱུགས་པའོ། །ཞེས་པའི་བར་སྔར་བཞིན་ནོ། །བཅོམ་ལྡན་འདས་ལ་མངོན་དུ་ཕྱོགས་པར་བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ། ཞལ་གཅིག་མ། ཕྱག་གཉིས་པ། སྤྱན་གསུམ་པ། གཅེར་མོ། ཞེས་པ་ནས། བསྡིགས་པར་མཛད་པ། ཞེས་པའི་བར་སྔ་མ་བཞིན་ནོ། །འགྲོ་བ་སྟོང་པ་ཉིད་དུ་མཉམ་པར་རྟོགས་པས་བསྐལ་པ་འཇིག་པའི་དུས་ཀྱི་མེ་ལྟ་བུ། ཤིན་ཏུ་དག་པའི་ཡེ་ཤེས་ཀྱི་སྣང་བ་དང་ལྡན་པས་ཉི་མའི་འོད་ཅན་གྱི་ཞེས་པ་ནས། མི་མགོ་སྐམ་པོ་ལྔ་བཅུའི་དོ་ཤལ་ཅན། ཞེས་པའི་བར་སྔར་བཞིན། གཙོ་བོའི་ཞལ་བཞི་ནས་གཡོན་སྐོར་དུ་རིམ་པ་བཞིན། ཨོཾ་སུཾ་བྷ་ནི་སུཾ་བྷ་ཧཱུཾ་ཧཱུཾ་ཕཊ། ཨོཾ་གྲིཧྣ་གྲིཧྣ་ཧཱུཾ་ཧཱུཾ་ཕཊ། ཨོཾ་གྲིཧྣ་པ་ཡ་གྲིཧྣ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བིདྱ་རཱ་ཛ་ཧཱུཾ་ཧཱུཾ་ཕཊ། ཅེས་གསུངས་པའི་སྔགས་ལས་ཁྲོ་བོའི་ཚོགས་དཔག་ཏུ་མེད་པ་སྤྲོས་ཕྱོགས་བཅུའི་གདུག་པ་ཅན་ཐམས་ཅད་ཚར་བཅད། སླར་འདུས་ཞལ་བཞི་ལ་ཐིམ་པས་བྱིན་གྱིས་བརླབས་པར་གྱུར། ཨོཾ་དྷརྨཱ་དྷ་ཏུ་སྭ་བྷཱ་ཝ་ཨཏྨ་ཀོ྅ཧཾ། ཆོས་ཀྱི་དབྱིངས་ཐོག་མ་དང་ཐ་མ་མེད་པའི་བྱང་ཆུབ་ཀྱི་སེམས་ཆེན་པོའི་རང་བཞིན་གྱི་བདག་ཉིད་ཅན་དེ་ངའོ། །རང་གི་སྙིང་གར་ཟླ་བ་ལ་རྡོ་རྗེ་སེམས་དཔའི་ངོ་བོ་ཨོཾ་ཨོཾ་ཧཱཿ དཀར་པོ། མགོ་བོར་ཉི་མ་ལ་རྣམ་སྣང་གི་ངོ་བོ་ཨོཾ་ན་མ་ཧི་སེར་པོ། སྤྱི་གཙུག་ཏུ་ཉི་མ་ལ་པདྨ་གར་དབང་གི་ངོ་བོ་ཨོཾ་སྭཱཧཱ་ཧུ་དམར་པོ། ཕྲག་པ་གཉིས་སུ་ཉི་མ་ལ་དཔལ་ཧེ་རུ་ཀའི་ངོ་བོ་ཨོཾ་བོ་ཥཊ་ཧེ་ནག་པོ། མིག་གཉིས་
སུ་ཉི་མ་ལ་རྡོ་རྗེ་ཉི་མའི་ངོ་བོ་ཨོཾ་ཧཱུཾ་ཧཱུཾ་ཧོཿ དམར་སེར། དཔྲལ་བར་ཉི་མ་ལ་ཡན་ལག་ཐམས་ཅད་ཀྱི་ལུས་དབང་གི་ངོ་བོ་རྟ་མཆོག་གི་རང་བཞིན་ཨོཾ་ཕཊ་ཧཾ་ལྗང་གུ །གཙོ་མོའི་ལྟེ་བར་ཉི་མ་ལ་རྡོ་རྗེ་ཕག་མོའི་ངོ་བོ་ཨོཾ་ཨོཾ་བཾ་དམར་པོ། སྙིང་གར་ཉི་མ་ལ་གཤིན་རྗེ་མའི་ངོ་བོ་ཨོཾ་ཧཾ་ཡོཾ་སྔོན་པོ། མགྲིན་པར་ཟླ་བ་ལ་རྨོངས་བྱེད་མའི་ངོ་བོ་ཨོཾ་ཧྲིཾ་མོཾ་དཀར་པོ། མགོ་བོར་ཉི་མ་ལ་སྐྱོད་བྱེད་མའི་ངོ་བོ་ཨོཾ་ཧྲིཾ་ཧྲིཾ་སེར་པོ། སྤྱི་གཙུག་ཏུ་ཉི་མ་ལ་སྐྲག་བྱེད་མའི་ངོ་བོ་ཨོཾ་ཧཱུཾ་ཧཱུཾ་ལྗང་གུ །དཔྲལ་བར་ཉི་མ་ལ་ལུས་དབང་གི་ངོ་བོ་ཙནྜི་ཀའི་རང་བཞིན་ཨོཾ་ཕཊ་ཕཊ་དུད་ཁ། ཡབ་ཀྱི་ཐུགས་ཀར་ཟླ་གདན་ལ་ཐུགས་རྡོ་རྗེའི་ངོ་བོ་ཧཱུཾ་ནག་པོ། མགྲིན་པར་ཟླ་གདན་ལ་གསུང་རྡོ་རྗེའི་ངོ་བོ་ཨོཾ་ཧྲཱིཿ ཧ་ཧ་ཧཱུཾ་ཧཱུཾ་ཕཊ་དམར་པོ། དཔྲལ་བར་ཟླ་གདན་ལ་སྐུ་རྡོ་རྗེའི་ངོ་བོ་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌ་ཀཱི་ནཱི་ཛཱ་ལ་ཤཾ་བ་རཾ་སྭཱཧཱ་དཀར་པོ། ཐུགས་ཀར་རྡོ་རྗེ་རྩེ་ལྔ་པའི་ལྟེ་བར། ཡེ་ཤེས་སེམས་དཔའི་ངོ་བོ་ཧཱུཾ་སྔོན་པོ། ཡུམ་གྱི་ཐུགས་ཀར་ཟླ་གདན་ལ་ཐུགས་རྡོ་རྗེའི་ངོ་བོ་ཨོཾ་སརྦ་བུདྡྷ་ཌ་ཀཱི་ནཱི་ཡེ་བཛྲ་ཝརྞྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ་ནག་པོ། མགྲིན་པར་ཟླ་གདན་ལ་གསུང་རྡོ་རྗེའི་ངོ་བོ་ཨོཾ་ཙཽ་རི་ཧཱུཾ་ཧཱུཾ་ཕཊ་དམར་པོ། དཔྲལ་པར་ཟླ་གདན་ལ་སྐུ་རྡོ་རྗེའི་ངོ་བོ་ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་དཀར་པོ། ཐུགས་ཀར་ཟླ་གདན་ལ་ཡེ་ཤེས་སེམས་དཔའི་ངོ་བོ་བཾ་དམར་པོ། ཡུམ་གྱི་སྤྱི་བོའི་ནང་དུ་ཟླ་བ་ལ་ཨོཾ་དཀར་པོ་སྐུའི་རིགས་ཀྱི་རང་བཞིན་ཞུ་བའི་རྡུལ་ཕྲན་གྱིས་སྙིང་གའི་བར་དུ་ཁྱབ། སྙིང་གར་ཉི་མ་ལ་ཧཱུཾ་སྔོན་པོ། ཐུགས་ཀྱི་རིགས་ཀྱི་རང་བཞིན་ཞུ་བའི་རྡུལ་ཕྲན་གྱིས་ལྟེ་བའི་བར་དུ་ཁྱབ། ལྟེ་བར་ཉི་མ་ལ་གནས་པའི་སྭཱ་སེར་པོ་རིན་པོ་ཆེའི་རིགས་ཀྱི་རང་བཞིན་ཞུ་བའི་རྡུལ་
ཕྲན་གྱིས་གསང་བའི་བར་དུ་ཁྱབ། གསང་བའི་པདྨའི་ཟེའུ་འབྲུ་ལ་ཉི་མ་ལ་གནས་པའི་ཨཱཿ དམར་པོ་གསུང་གི་རིགས་ཀྱི་རང་བཞིན་དུ་ཞུ་བའི་རྡུལ་ཕྲན་གྱིས་བརླའི་བར་དུ་ཁྱབ། བརླ་གཉིས་སུ་ཉི་མ་ལ་གནས་པའི་ཧ་ལྗང་གུ་ལས་ཀྱི་རིགས་ཀྱི་རང་བཞིན་ཞུ་བའི་རྡུལ་ཕྲན་གྱིས་རྐང་པའི་མཐར་ཐུག་པར་ཁྱབ་པར་གྱུར། རང་གི་ཐུགས་ཀར་ཟླ་གདན་ལ་གནས་པའི་ཧཱུཾ་ཡིག་ལས་འཕྲོས་པའི་འོད་ཟེར་གྱིས། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དཔའ་བོ་དང་དཔའ་མོའི་དབང་ཕྱུག་མ་ཡེ་ཤེས་ཀྱི་འཁོར་ལོ། དབང་གི་ལྷ་དཀྱིལ་འཁོར་པ་དང་བཅས་པ་མདུན་གྱི་ནམ་མཁར་སྤྱན་དྲངས། འོད་ཟེར་རང་གི་སྙིང་གའི་ཧཱུཾ་ལ་འདུས་པར་གྱུར། དབང་གི་ལྷ་མོ་རྣམས་ནི་ཡེ་ཤེས་ཀྱི་བདུད་རྩིས་བཀང་བའི་ཐོད་པ་དང་ཌཱ་མ་རུ་འཛིན་པ། རིག་མ་བཅུ་དྲུག་གིས་མཆོད། བཛྲ་ཨཾ་ཀུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷནྜ་ཧོཿ ཡབ་ཡུམ་གཉིས་ཀའི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿ དམར་པོ། ཐུགས་ཀར་ཉི་མ་ལ་ཧཱུཾ་སྔོན་པོ། ཨོཾ་ཡོ་ག་ཤུད་དྷ་སརྦ་དྷརྨཱཿ ཡོ་ག་ཤུདྡྷོ྅ཧཾ། ཞེས་བརྗོད་ཅིང་རྣམ་ལྔ་འདོད་པའི་ཕྱོགས་སུ་བསྐོར་བ་བྱས་ལ། ཨོཾ་ཨཱཿ ཧཱུཾ། ཞེས་མཐར་འཁྱུད་པའི་ཚུལ་བྱས་ལ་བྱིན་གྱིས་བརླབ་བོ། །དམ་ཚིག་པ་དང་ཡེ་ཤེས་པ་གཉིས་རོ་མཉམ་དུ་སྦྱར་བ་ནི་ཆོས་ཐམས་ཅད་ཀྱི་དེ་ཁོ་ན་ཉིད་དང་བདེ་བ་ཆེན་པོའི་ཡེ་ཤེས་གཉིས་ངོ་བོ་དབྱེར་མེད་ཡིན་ལ། དེ་ཉིད་རྟེན་དང་བརྟེན་པའི་དཀྱིལ་འཁོར་དུ་ཤར་བ་ཡིན་ཞིང༌། དེ་ཡང་གཙོ་བོ་ཡབ་ཡུམ་དུ་ཤར་བའི་ཆ་ཤས་སོ། །སྔར་གྱི་སྐད་ཅིག་མའི་སྔགས་བརྗོད་ལ་ལག་པ་གཉིས་ཀྱིས་སྙིང་གར་པད་ཀོར་བྱས་པའི་མཐར། ཕྱག་རྒྱ་སྡུད་པ་ན་འཁྱུད་པའི་ཚུལ་བྱེད་
པའི་སྙིང་པོའི་ཕྱག་རྒྱ་སྦྱིན་པར་བྱ་ཞིང༌། སྔགས་དོན་ལྟར་ང་རྒྱལ་གཟུང་ངོ༌། །སླར་ཡང་རིག་མ་བཅུ་དྲུག་གིས་དབང་གི་ལྷ་རྣམས་ལ་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་སྒོ་མཚམས་མ་བརྒྱད་ཀྱིས་བགེགས་བསྐྲད། དཔའ་བོ་རྣམས་ཀྱིས་ཤིས་པ་བརྗོད། དཔའ་མོ་རྣམས་ཀྱིས་རྡོ་རྗེའི་གླུ་ལེན། གཙོ་བོས་དབང་བསྐུར་བའི་དགོངས་པ་མཛད། ཡུམ་བཞི་ཕག་མོ་དང་ལྔས་ཕྱག་གཡོན་པའི་ཐོད་པ་ཅུང་ཟད་ཡོ་བར་བྱས་ཏེ། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱི་འོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་བདུད་རྩིའི་ཆུ་རྒྱུན་གྱིས་སྤྱི་བོ་ནས་དབང་བསྐུར་བས། ཡབ་ཡུམ་གཉིས་ཀའང༌། བདེ་བ་ཆེན་པོའི་བདག་ཉིད་དུ་གྱུར། སྤྱི་བོ་ནས་སྐུ་ལ་ཞུགས་པའི་ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་གཙོ་བོ་ལ་མི་བསྐྱོད་པ། ཕག་མོ་ལ་རྣམ་སྣང་གིས་དབུ་བརྒྱན་ཅིང་དབང་གི་ལྷ་རྣམས་ཀྱང་རང་ཉིད་ལ་ཐིམ་པར་གྱུར། མཆོད་པ་ནི་ཕྱི་དང་ནང་མཆོད་འོག་ནས་འབྱུང་བ་ལྟར་བྱ་ལ། གསང་མཆོད་ནི། ཨོཾ་ཨཱཿ ཧཱུཾ། གནས་བཞི་དང་གསང་གནས་བྱིན་གྱིས་བརླབས་པའི་ཡབ་ཡུམ་སྙོམས་པར་ཞུགས་པའི་བྱང་སེམས་ཞུ་བ་སྤྱི་བོ་ནས་མགྲིན་པར་སླེབ་པ་ན་དགའ་བ། མགྲིན་པ་ནས་སྙིང་གར་སླེབ་པ་ན་མཆོག་དགའ། སྙིང་ག་ནས་ལྟེ་བར་སླེབ་པ་ན་ཁྱད་པར་གྱི་དགའ་བ། ལྟེ་བ་ནས་ནོར་བུའི་རྩེར་སླེབ་པ་ན་ལྷན་ཅིག་སྐྱེས་དགའི་ཡེ་ཤེས་ཉམས་སུ་མྱོང་ཞིང༌། བདེ་བ་ཆེན་པོ་དང་དེ་ཁོ་ན་ཉིད་དབྱེར་མེད་པའི་ཏིང་ངེ་འཛིན་ལ་སྙོམས་པར་ཞུགས་པས།
རྟེན་དང་བརྟེན་པའི་དཀྱིལ་འཁོར་གཉིས་ཀའང་བདེ་སྟོང་དབྱེར་མེད་ཀྱི་ངོ་བོར་གྱུར། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་པཱུ་ཛ་བཛྲ་སྭ་བྷཱ་ཝ་ཨཏྨ་ཀོ྅ཧཾ། རང་གི་ཐུགས་ཀའི་ཧཱུཾ་གི་འོད་ཟེར་གྱིས་ཐོག་མ་མེད་པ་ནས་གྲུབ་པའི་འཁོར་ལོ་སྡོམ་པའི་ལྷ་ཚོགས་ལ་སངས་རྒྱས་བྱང་སེམས་ཀྱིས་བསྐོར་བ་རྣམས་སྤྱན་དྲངས། རང་གི་སྣ་བུག་གཡོན་པ་ནས་ཞུགས་ཏེ། སྨིན་མཚམས་ཀྱི་དབུས་ཀྱི་དྷཱུ་ཏཱིའི་ཡར་སྣ་ནས་བརྒྱུད་དེ་སྤྱི་བོའི་ཧཾ་ལ་ཞུགས། ཡབ་ཡུམ་སྙོམས་པར་ཞུགས་པའི་རྐྱེན་གྱིས་ལྟེ་བའི་ཨ་ཐུང་གཏུམ་མོའི་མེ་སྐད་ཅིག་གིས་འབར་བས། སངས་རྒྱས་ཐམས་ཅད་འདུས་པའི་ངོ་བོའི་ཧཾ་ཡིག་བཞུས་ནས། དཔའ་བོ་དང་རྣལ་འབྱོར་མ་རྣམས་རླུང་དང་ཐིག་ལེའི་རྟ་ལ་ཞོན་ནས་རྡོ་རྗེའི་ལམ་ནས་ཡུམ་གྱི་པདྨར་བབས་པའི་ཐིག་ལེའི་ཆ་གཅིག་བྷྲུཾ་དེ་ཡོངས་སུ་གྱུར་པ་ལས་གཞལ་ཡས་ཁང༌། གྲུ་བཞི་པ་སྒོ་བཞི་པ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ་གདན་དང་བཅས་པར་གྱུར། ཐིག་ལེའི་ཆ་གཅིག་གདན་དེ་རྣམས་ཀྱི་སྟེང་དུ་ཆ་སུམ་ཅུ་སོ་བདུན་དུ་གྱུར། དེ་རྣམས་ཡོངས་སུ་གྱུར་པ་ལས། ཧཱུཾ་བཾ་ལཱཾ་མཱཾ་པཱཾ་ཏཱཾ། ཀཾ་ཁཾ་གཾ་གྷཾ་ངཾ་ཙཾ་ཚཾ་ཛཾ། ཛྷཾ་ཉཾ་ཊཾ་ཋཾ། ཌཾ་ཌྷཾ་ཎཾ་ཏཾ། ཐཾ་དཾ་དྷཾ་ནཾ། པཾ་ཕཾ་བཾ་བྷཾ། ཡཾ་རཾ་ལཾ་ཝཾ། ཤཾ་ཥཾ་སཾ་ཧཾ་རྣམས་སུ་གྱུར། དེ་རྣམས་ཡོངས་སུ་གྱུར་པ་ལས། རྒྱུ་རྡོ་རྗེ་འཆང་འདྲ་བའི་མི་བསྐྱོད་པ་ཧེ་རུ་ཀ་གཙོ་བོར་གྱུར་པའི་ལྷ་སུམ་ཅུ་སོ་བདུན་ཐོད་པ་བཞི་དང་བཅས་པར་གྱུར། ཧཱུཾ་བཾ་གཙོ་བོ་ཡབ་ཡུམ་གྱི་པདྨ་ནས་ཕྱུང༌། ཕྱོགས་བཅུར་འཕྲོས་སེམས་ཅན་རྣམས་ཀྱི་ཞེ་སྡང་དང་རྣམ་ཤེས་ཀྱི་ཕུང་པོ་སྦྱངས། མི་བསྐྱོད་པའི་གོ་
འཕང་ལ་བཀོད། སླར་འདུས་རང་དང་ཡུམ་ལ་ཐིམ་པར་གྱུར། འདི་ཕྱི་དཀྱིལ་དང་ལུས་དཀྱིལ་གཉིས་ཕྱོགས་གཅིག་ཏུ་བསྒོམ་པའི་ལུགས་ཡིན་ཞེས་གསུངས་པས། ལུས་རྟེན་གྱི་དཀྱིལ་འཁོར་དུ་བསྒོམ་པ་ནི། དེ་ཡང་རྐང་པ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས། འབྱུང་བ་རིམ་བརྩེགས་ཀྱི་རླུང་གཞུའི་དབྱིབས་ཅན། སུམ་མདོ་གྲུ་གསུམ་གྱི་གཟུགས་སུ་ཡོད་པ་ལས་མེ་དཀྱིལ་གྲུ་གསུམ་པ། ལྟོ་བ་ཟླུམ་པོའི་དབྱིབས་ཅན་ལས་ཆུ་དཀྱིལ་ཟླུམ་པོ། སྙིང་ག་གྲུ་བཞི་པ་ལས་ས་དཀྱིལ་གྲུ་བཞི། སྒལ་ཚིགས་ལས་རི་རབ། སྤྱི་བོའི་རྩ་སོ་གཉིས་ལས་པདྨ། ལུས་འདོམ་གང་ཡན་མན་དང་ཕན་ཚུན་དུ་མཉམ་པ་ལས། ངོས་བཞི་མཉམ་པའི་གཞལ་ཡས་ཁང་གྲུ་བཞི་པ། ཕ་གུ་དང་དྲ་ཕྱེད་སོགས་ཀྱི་རྒྱན་གྱིས་རབ་ཏུ་མཛེས་པའི་ཧེ་རུ་ཀའི་དཀྱིལ་འཁོར། རྐང་བརྒྱད་ལས་ཀ་བ་བརྒྱད། རང་གི་ལུས་ངག་ཡིད་གསུམ་ལས་འཁོར་ལོ་གསུམ་དུ་གྱུར། ལུས་བརྟེན་པའི་དཀྱིལ་འཁོར་དུ་བསྒོམ་པ་ནི། རང་གི་སྙིང་ག་ཆོས་ཀྱི་འཁོར་ལོའི་དབུས་ཀྱི་དྷཱུ་ཏཱིའི་ནང་གི་བྱང་སེམས་བ་མོ་ལྟ་བུ་འཛག་པ། ཡུངས་ཀར་སྦོམ་པོའི་ཚད་ཀྱི་དཔྱིད་ཧཱུཾ་ཡིག་ཡོངས་སུ་གྱུར་པ་ལས། བཅོམ་ལྡན་འདས་ཧེ་རུ་ཀ་ཞེས་པ་ནས། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པ། ལྟེ་བའི་དམར་ཆ་གཏུམ་མོའི་མེའི་གཟུགས་ཀྱི་ཐིག་ལེ་ཡོངས་སུ་གྱུར་པ་ལས། བཅོམ་ལྡན་འདས་མ་རྡོ་རྗེ་ཕག་མོ་ཞེས་པ་ནས། མི་མགོ་སྐམ་པོ་ལྔ་བཅུའི་དོ་ཤལ་ཅན། ཞེས་པའི་བར་འབྲས་བུ་ཧེ་རུ་ཀ་ཡབ་ཡུམ་བཞིན་ནོ། །དཔྱིད་དང་ཐིག་ལེའི་ངོ་བོ་གཉིས་སྙིང་གར་ཕྲད་ནས་སྙོམས་པར་འཇུག་པས་བཞུགས་པའོ། །ལཾ་མཾ་པཾ་ཏཾ། སྙིང་པོའི་རྣལ་འབྱོར་མ་བཞི་ཡུམ་གྱི་པདྨ་ནས་ཕྱུང༌། བདེ་
ཆེན་འཁོར་ལོའི་ཕྱོགས་བཞིའི་འདབ་མར་འཁོད། བདེ་ཆེན་འཁོར་ལོའི་ཕྱོགས་ཀྱི་འདབ་མ་དང་སྙིང་གའི་ཤར་ལ་སོགས་པའི་འབྱུང་བ་བཞིའི་རླུང་རྒྱུ་བའི་རྩ་འདབ་བཞི་ཡོངས་སུ་གྱུར་པ་ལས། ཤར་དུ་མཁའ་འགྲོ་མ་དཀར་སྔོན་དུ་སྣང་བ། བྱང་དུ་ལཱ་མ་དཀར་ལྗང་དུ་སྣང་བ། ནུབ་ཏུ་དུམ་སྐྱེས་མ་དཀར་དམར་དུ་སྣང་བ། ལྷོར་གཟུགས་ཅན་མ་དཀར་སེར་དུ་སྣང་བ། ཐམས་ཅད་ཀྱང་ཞལ་གཅིག་མ། ཕྱག་གཉིས་མ། སྤྱན་གསུམ་མ། སྤྱན་རྩ་དམར་བ། ཧཱུཾ་གྱི་སྒྲས་བསྡིགས་ཤིང༌། ཧ་ཧའི་གད་རྒྱངས་ཀྱིས་གདུག་པ་ཅན་སྐྲག་པར་མཛད་པ། དབུ་སྐྲ་སེར་པོ་གྱེན་དུ་འབར་བ། ཕྱག་གཡས་ཀྱིས་གྲི་གུག་འཕྱར་ཞིང༌། གཡོན་གྱིས་ཐོད་པ་རྣམས་ན་གླང་པོ་ཆེ་དང༌། ཅེ་སྤྱང་དང༌། མི་དང༌། བ་གླང་བསྣམས་པའོ། །གསལ་ཞིང་རབ་ཏུ་འབར་བའི་འོད་ཟེར་དུ་མ་འཕྲོ་བ་ཁྲོ་གཉེར་རླབས་ལྟར་འཁྱུག་ཅིང་ཁྲོ་ཆགས་ཀྱིས་ཟུར་མིག་བལྟ་བའི་ཉམས་དང་ལྡན་པ། ཟླ་བ་ཕྱེད་པ་ལ་གནས་པའི་རྡོ་རྗེ་རྩེ་ལྔ་པ་གྱེན་དུ་འགྲེང་བའི་རྩེ་ཕྲན་ལྔས་དཔྲལ་བར་བརྒྱན་པ། ཐོད་སྐམ་ལྔའི་དབུ་རྒྱན་དང༌། ཐོད་སྐམ་ལྔ་བཅུའི་དོ་ཤལ་ཅན། ཕྱག་རྒྱ་ལྔས་བརྒྱན་པ། ཐོད་པའི་དུམ་བུས་བརྒྱན་པའི་འོག་པག་དང༌། ཞབས་གདུབ་དྲིལ་བུ་གཡེར་ཁས་སིལ་སིལ་གྱི་སྒྲ་སྒྲོགས་པ། རོ་དང་ཉི་མའི་དཀྱིལ་འཁོར་གྱི་སྟེང་ན་ཞབས་གཡོན་བརྐྱང་བའི་བརླ་ལ་གཡས་པའི་རྩེ་མོས་རེག་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། ཨོཾ་ཨཱཿ ཧཱུཾ། ཐོད་པ་བཞི་ཡུམ་གྱི་པདྨ་ནས་ཕྱུང༌། བདེ་ཆེན་འཁོར་ལོའི་མཚམས་ཀྱི་འདབ་མ་བཞིར་འཁོད། བདེ་ཆེན་
འཁོར་ལོའི་མཚམས་ཀྱི་འདབ་མ་དང༌། སྙིང་གའི་ཤར་ལྷོ་ལ་སོགས་པའི་མཆོད་པ་བཞིའི་རྩ་འདབ་བཞི་ཡོངས་སུ་གྱུར་པ་ལས། བདུད་རྩི་ལྔས་གང་བའི་ཐོད་པ་ལ་སངས་རྒྱས་ལྔའི་གཟུགས་ཀྱིས་ཉེ་བར་མཛེས་པའི་བདེ་ཆེན་འཁོར་ལོ་སྟེ། སྤྱི་བོ་ལ་སོགས་པའི་གནས་ཉེར་བཞིར། པཱུ་ཛ། ཨོ་ཨ། གོ་རཱ། དེ་མ། ཀཱ་ཨོ། ཏྲི་ཀོ ཀཱ་ལ། ཀཱ་ཧི། པྲེ་གྲི། སཽ་སུ། ན་སི། མ་ཀུ་རྣམས་ཐིག་ལེས་བརྒྱན་པ་ཡོངས་སུ་གྱུར་པ་ལས། རྩིབས་ཁོང་སྟོང་རྩིབས་ཤུན་གྱི་རྣམ་པ་དང་ལྡན་པའི་འཁོར་ལོ་ཉེར་བཞིའི་རྣམ་པ་ཅན་ཕྱིའི་ཡུལ་ཉེར་བཞིར་གྱུར། གནས་ཉེར་བཞིའི་རྩ་དང་ཁམས་རྣམས་ངོ་བོ་དབྱེར་མེད་དུ་གནས་པ་ཡོངས་སུ་གྱུར་པ་ལས། དཔའ་བོ་ཉེར་བཞི་དང་དཔའ་མོ་ཉེར་བཞིར་གྱུར། ཀཾ་ཁཾ་གཾ་གྷཾ་ངཾ་ཙཾ་ཚཾ་ཛཾ། ཐུགས་ཀྱི་འཁོར་ལོའི་ལྷ་རྣམས་ཡུམ་གྱི་པདྨ་ནས་ཕྱུང༌། ཐུགས་ཀྱི་འཁོར་ལོའི་རྩིབས་བརྒྱད་ལ་འཁོད། ཐུགས་ཀྱི་འཁོར་ལོའི་ཤར་རྩིབས་པུལླི་ར་མ་ལ་ཡ་དང༌། སྐྲ་མཚམས་པུལླི་ར་མ་ལ་ཡར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། ཁཎྜ་ཀ་པཱ་ལ་དང་རབ་གཏུམ་མ། བྱང་རྩིབས་ཛཱ་ལན་དྷ་ར་དང༌། སྤྱི་གཙུག་ཛཱ་ལན་དྷ་རར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། མཧཱ་ཀངྐ་ལ་དང་གཏུམ་མིག་མ། ནུབ་རྩིབས་ཨོ་ཊི་ཡ་ན་དང༌། རྣ་བ་གཡས་པ་ཨོ་ཊི་ཡ་ནར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། ཀངྐ་ལ་དང་འོད་ལྡན་མ། ལྷོ་རྩིབས་ཨརྦུ་ཏ་དང༌། ལྟག་པ་ཨརྦུ་ཏར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། མཆེ་བ་རྣམ་པར་གཙིགས་པ་དང་སྣ་ཆེན་མ་སྟེ་
གནས་སོ། །དབང་ལྡན་གྱི་རྩིབས་གོ་དཱ་བ་རི་དང༌། རྣ་བ་གཡོན་པ་གོ་དཱ་བ་རིར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། སུ་ར་བེ་རི་ཎི་དང༌། དཔའ་བོའི་བློ་ཅན་མ། མེ་རྩིབས་ར་མེ་ཤྭ་རི་དང༌། སྨིན་མཚམས་ར་མེ་ཤྭ་རིར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། འོད་དཔག་མེད་དང་ཁརྦ་རི། བདེན་བྲལ་གྱི་རྩིབས་དེ་བི་ཀོ་ཊི་དང༌། མིག་གཉིས་དེ་བི་ཀོ་ཊིར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྡོ་རྗེ་འོད་དང་ལཾ་ཀའི་དབང་ཕྱུག་མ། རླུང་རྩིབས་མཱ་ལ་བ་དང༌། ཕྲག་པ་གཉིས་མཱ་ལ་བར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྡོ་རྗེའི་སྐུ་དང་ཤིང་གྲིབ་མ་སྟེ་ཉེ་བའི་གནས་སོ། །ཐུགས་ཀྱི་འཁོར་ལོའི་ལྷ་རྣམས་ནམ་མཁའ་ལ་སྤྱོད་པའི་ཚུལ་གྱིས་བཞུགས་པ། ཐམས་ཅད་ཀྱང་སྐུ་མདོག་སྔོན་པོ། ཛྷཾ་ཉཾ་ཊཾ་ཋཾ་ཌཾ་ཌྷཾ་ཎཾ་ཏཾ། གསུང་གི་འཁོར་ལོའི་ལྷ་རྣམས་ཡུམ་གྱི་པདྨ་ནས་ཕྱུང༌། གསུང་གི་འཁོར་ལོའི་རྩིབས་བརྒྱད་ལ་འཁོད། གསུང་གི་འཁོར་ལོའི་ཤར་རྩིབས་ཀཱ་མ་རཱུ་པ་དང༌། མཆན་ཁུང་གཉིས་ཀཱ་མ་རཱུ་པར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། མྱུ་གུ་ཅན་དང་ས་སྲུང་མ། བྱང་རྩིབས་ཨོ་ཌེ་དང༌། ནུ་མ་གཉིས་ཨོ་ཌེ་རུ་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྡོ་རྗེ་རལ་པ་ཅན་དང༌། འཇིགས་བྱེད་ཆེན་མོ་སྟེ་ཞིང་ངོ༌། །ནུབ་རྩིབས་ཏྲི་ཤ་ཀུ་ནེ་དང༌། ལྟེ་བ་ཏྲི་ཤ་ཀུ་ནེར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། དཔའ་བོ་ཆེན་པོ་དང་རླུང་གི་
ཤུགས་ཅན་མ། ལྷོ་རྩིབས་ཀོ་སཱ་ལ་དང་སྣ་རྩེ་ཀོ་སཱ་ལར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྡོ་རྗེ་ཧཱུཾ་མཛད་དང་ཆང་འཐུང་མ་སྟེ་ཉེ་བའི་ཞིང༌། དབང་ལྡན་གྱི་རྩིབས་ཀ་ལིང་ཀ་དང༌། ཁ་ཀ་ལིངྒར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རབ་ཏུ་བཟང་པོ་དང༌། སྔོ་བསངས་ལྷ་མོ། མེ་རྩིབས་ལམ་པ་ཀ་དང༌། མགྲིན་པ་ལམ་པ་ཀར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྡོ་རྗེ་བཟང་པོ་དང་ཤིན་ཏུ་བཟང་མོ་སྟེ་ཚནྡོ་ཧའོ། །བདེན་བྲལ་གྱི་རྩིབས་ཀཉྩི་དང༌། སྙིང་ཀཉྪིར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། འཇིགས་བྱེད་ཆེན་པོ་དང་རྟ་རྣ་མ། རླུང་རྩིབས་ཧི་མ་ལ་ཡ་དང༌། འབྲས་བུ་གཉིས་ཧི་མ་ལ་ཡར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། མིག་མི་བཟང་དང་བྱ་གདོང་མ་སྟེ་ཉེ་བའི་ཚནྡོ་ཧའོ། །གསུང་གི་འཁོར་ལོའི་ལྷ་རྣམས་ས་ལ་སྤྱོད་པའི་ཚུལ་གྱིས་བཞུགས་པ། ཐམས་ཅད་ཀྱང་སྐུ་མདོག་དམར་པོ། ཐཾ་དཾ་དྷཾ་ནཾ་པཾ་ཕཾ་བཾ་བྷཾ། སྐུའི་འཁོར་ལོའི་ལྷ་རྣམས་ཡུམ་གྱི་པདྨ་ནས་ཕྱུང༌། སྐུའི་འཁོར་ལོའི་རྩིབས་བརྒྱད་ལ་འཁོད། སྐུའི་འཁོར་ལོའི་ཤར་རྩིབས་པྲེ་ཏ་པཱུ་རི་དང༌། མཚན་མ་པྲེ་ཏ་པཱུ་རིར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། སྟོབས་པོ་ཆེ་དང་འཁོར་ལོའི་ཤུགས་ཅན་མ། བྱང་རྩིབས་གྲི་ཧ་དེ་བ་ཏ་དང༌། བཤང་ལམ་གྲི་ཧ་དེ་བ་ཏར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རིན་ཆེན་རྡོ་རྗེ་དང་དུམ་སྐྱེས་མ་སྟེ་འདུ་བའོ། །ནུབ་རྩིབས་སོའུ་རཥྚ་
དང། བརླ་གཉིས་སོའུ་རཥྚར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྟ་མགྲིན་དང་ཆང་འཚོང་མ། ལྷོ་རྩིབས་སུ་བརྞ་དི་པ་དང༌། བྱིན་པ་གཉིས་སུ་བརྞ་དི་པར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། ནམ་མཁའི་སྙིང་པོ་དང༌། འཁོར་ལོའི་གོ་ཆ་མ་སྟེ་ཉེ་བའི་འདུ་བའོ། །དབང་ལྡན་གྱི་རྩིབས་ན་ག་ར་དང༌། སོར་མོ་བཅུ་དྲུག་ན་ག་རར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། ཧེ་རུ་ཀ་དང་ཤིན་ཏུ་དཔའ་མོ། མེ་རྩིབས་སིན་དྷུ་དང༌། བོལ་གོང་གཉིས་སིན་དྷུར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། པདྨ་གར་གྱི་དབང་ཕྱུག་དང་སྟོབས་ཆེན་མ་སྟེ་དུར་ཁྲོད་དོ། །བདེན་བྲལ་གྱི་རྩིབས་མ་རུ་དང༌། མཐེ་བོང་བཞི་མ་རུར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྣམ་པར་སྣང་མཛད་དང་འཁོར་ལོས་བསྒྱུར་མ། རླུང་རྩིབས་ཀུ་ལུ་ཏ་དང༌། པུས་མོ་གཉིས་ཀུ་ལུ་ཏར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་དོ། །སྐུའི་འཁོར་ལོའི་ལྷ་རྣམས་ས་འོག་ལ་སྤྱོད་པའི་ཚུལ་གྱིས་བཞུགས་པ། ཐམས་ཅད་ཀྱང་སྐུ་མདོག་དཀར་པོ། དཔའ་བོ་ཉེར་བཞི་པོ་ཐམས་ཅད་ཀྱང་ཞལ་གཅིག་པ། ཕྱག་གཉིས་པ། སྤྱན་གསུམ་པ། རལ་པའི་ཐོར་ཚུགས་ཅན། སྤྱི་བོར་སྣ་ཚོགས་རྡོ་རྗེ་དང༌། གཡོན་དུ་ཟླ་བ་ཚེས་པ། དཔྲལ་བར་རྡོ་རྗེའི་ཕྲེང་བ་དང༌། དར་དཔྱངས་ཀྱིས་བརྒྱན་པ།
ཕྱག་གཉིས་ཀྱིས་རྡོར་དྲིལ་བསྣམས་ནས་ཡུམ་ལ་འཁྱུད་ཅིང༌། གཡོན་གྱིས་རང་གི་ཡུམ་གྱི་ནུ་མ་འཚིར་བ། ཡུམ་ལ་གཟིགས་ཤིང་སྒྲོས་འཛིན་པ། ཕྱག་རྒྱ་དྲུག་གིས་རྒྱས་བཏབ་པ། ཐོད་སྐམ་ལྔའི་དབུ་རྒྱན་དང༌། ཐོད་རློན་ལྔ་བཅུའི་དོ་ཤལ་ཅན། སྟག་གི་པགས་པའི་ཤམ་ཐབས་འཕྱར་བ། གར་གྱི་ཉམས་དགུ་དང་ལྡན་པ། གཡས་བརྐྱང་གིས་བཞུགས་པའོ། །དཔའ་མོ་ཉེར་བཞི་པོ་ཐམས་ཅད་ཀྱང་ཞལ་གཅིག་མ་ཞེས་པ་ནས། དབུ་སྐྲ་སེར་པོ་གྱེན་དུ་འབར་བ་ཞེས་པའི་བར་སྙིང་པོའི་རྣལ་འབྱོར་མ་དང་འདྲ་ལ། ཡབ་ལ་འཁྱུད་པའི་ཕྱག་གཉིས་ཀྱི་གཡས་པས་གདུག་པ་ལ་བསྡིགས་པའི་སྡིགས་མཛུབ་དང་བཅས་པས་གྲི་གུག་འཛིན་ཅིང༌། གཡོན་པས་ཁྲག་གིས་བཀང་བའི་ཐོད་པ་འཛིན་ཅིང་སྟོབ་པ། གསལ་ཞིང་ཞེས་པ་ནས། སིལ་སིལ་གྱི་སྒྲ་སྒྲོགས་པ། ཞེས་པའི་བར་སྔར་དང་འདྲ་ལ། བྱིན་པ་གཉིས་ཀྱིས་ཡབ་ཀྱི་བརླའི་སྟེང་ནས་ལེགས་པར་འཁྲིལ་བ། ཡཾ་རཾ་ལཾ་ཝཾ། ཤཾ་ཥཾ་སཾ་ཧཾ་སྒོ་མཚམས་མ་བརྒྱད་ཡུམ་གྱི་པདྨ་ནས་ཕྱུང༌། སྒོ་བཞི་དང་མཚམས་རྣམས་སུ་འཁོད། ཤར་སྒོ་དང་ལྕེའི་རྩ་བར་གནས་པའི་རྩ་ཡོངས་སུ་གྱུར་པ་ལས། ཁྭ་གདོང་མ་དཀར་སྔོན་དུ་སྣང་བ། བྱང་སྒོ་དང་ལྟེ་བའི་བུག་པར་གནས་པའི་རྩ་ཡོངས་སུ་གྱུར་པ་ལས། འུག་གདོང་མ་དཀར་ལྗང་དུ་སྣང་བ། ནུབ་སྒོ་དང་རྟགས་ཀྱི་སྒོར་གནས་པའི་རྩ་ཡོངས་སུ་གྱུར་པ་ལས། ཁྱི་གདོང་མ་དཀར་དམར་དུ་སྣང་བ། ལྷོ་སྒོ་དང་བཤང་ལམ་གྱི་སྒོར་གནས་པའི་རྩ་ཡོངས་སུ་གྱུར་པ་ལས། ཕག་གདོང་མ་དཀར་སེར་དུ་སྣང་བ། ཤར་ལྷོ་དང་མཛོད་སྤུའི་བུག་པར་གནས་པའི་རྩ་ཡོངས་སུ་གྱུར་པ་
ལས། གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་དང་རྣ་བུག་གཉིས་སུ་གནས་པའི་རྩ་ཡོངས་སུ་གྱུར་པ་ལས། གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དང་མིག་གཉིས་སུ་གནས་པའི་རྩ་ཡོངས་སུ་གྱུར་པ་ལས། གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དང་སྣ་བུག་གཉིས་ན་གནས་པའི་རྩ་ཡོངས་སུ་གྱུར་པ་ལས། གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཞལ་གཅིག་མ་ཞེས་པ་ནས། སིལ་སིལ་གྱི་སྒྲ་སྒྲོགས་པ། ཞེས་པའི་བར་སྙིང་པོའི་རྣལ་འབྱོར་མ་དང་འདྲའོ། །ཁྱད་པར་ནི། ཕྲག་པ་གཡོན་པར་ཁ་ཊྭཱཾ་ག་མཆོད་ཕྱིར་ཐོགས་ཀྱི་ཚུལ་དུ་འཁྱུད་པ། སྟག་ལྤགས་ཀྱི་ན་བཟའ་ཅན། གཡོན་བརྐྱང་གི་སྟབས་ཀྱིས་བཞུགས་པ། ཨོཾ་ཨཱཿ ཧཱུཾ་གཞལ་ཡས་ཁང་ཡུམ་གྱི་པདྨ་ནས་ཕྱུང༌། སྔར་གྱི་གཞལ་ཡས་ཁང་ལ་ཐིམ་པར་གྱུར། དེ་ནས་རང་དང་ལྷ་ཐམས་ཅད་ཅེས་བརྗེ་བ་མ་གཏོགས་སྔར་ལྟར་ཡེ་ཤེས་པ་སྤྱན་དྲངས་ནས་མཆོད་ལ་དགུག་གཞུག་བཅིང་མཉེས་བྱས་ལ། ལྷ་ཐམས་ཅད་ཀྱི་སྤྱི་བོར་ཟླ་གདན་ལ་ཨོཾ་དཀར་པོ་ཞེས་སོགས་སྔར་ལྟར་རོ། །དབང་བསྐུར་གྱི་སྐབས་སུ་ཡང་རིག་མ་བཅུ་དྲུག་གིས་མཆོད་པ་ནས། སྤྱི་བོ་ནས་དབང་བསྐུར་བས་ཞེས་པའི་བར་སྔར་དང་འདྲ་ལ། ཁྱད་པར་ནི། རང་དང་ལྷ་ཐམས་ཅད་བདེ་བ་ཆེན་པོའི་བདག་ཉིད་དུ་གྱུར། སྤྱི་བོ་ནས་ཞེས་པ་ནས། ཕག་མོ་ལ་རྣམ་སྣང༌། མཁའ་འགྲོ་མ་སོགས་བཞི་ལ་རིན་འབྱུང༌། ཐུགས་ཀྱི་འཁོར་ལོའི་ལྷ་རྣམས་ལ་མི་བསྐྱོད་པ། གསུང་གི་འཁོར་ལོའི་ལྷ་རྣམས་ལ་འོད་དཔག་མེད། སྐུའི་འཁོར་
ལོའི་ལྷ་རྣམས་ལ་རྣམ་སྣང༌། དམ་ཚིག་གི་འཁོར་ལོའི་ལྷ་རྣམས་ལ་དོན་གྲུབ་ཀྱིས་དབུ་བརྒྱན་ཅིང༌། དབང་གི་ལྷ་རྣམས་ཀྱང་རང་ཉིད་ལ་ཐིམ་པར་གྱུར། མཆོད་པ་བྱིན་རླབས་སྔར་ལྟར་བྱས་ལ། མཆོད་ཡོན་ནས་རིག་མ་བཅུ་དྲུག་གི་བར་ཚོགས་ཞིང་ལྟར་མཆོད་པ་ནི་ཕྱི་མཆོད་དོ། །དེ་ནས་ནང་མཆོད་གཏོར་མ་ལྟར་བྱིན་གྱིས་བརླབས་ལ། མགྲོན་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་དཀར་པོ་རྩེ་གསུམ་པ་ནས་འབྲུ་ཙམ་འཁོད་པ། ཨོཾ་ཨ་མྲྀ་ཏ་ཨུ་ད་ཀ་ཧཱུཾ་ཧཱུཾ་ཧཱུཾ་ཋ་ཋ་ཏྲཾ་ཨཱཿ ཁཾ་ཧཱུཾ། ཨོཾ་ཨཱཿ ཧཱུཾ། ལྷ་མོ་རོ་རྡོ་རྗེ་མས་བདུད་རྩི་བསྟབས་པ་རྡོ་རྗེའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། བླ་མ་རྣམས་ཀྱི་མཚན་གྱི་མཐར་ཡི་གེ་གསུམ་བཏགས་ལ་དབུལ། དེ་ནས་དཀྱིལ་འཁོར་པའི་ལྷ་རྣམས་ཀྱི་སྔགས་རྒྱས་བསྡུས་གང་རུང་གི་མཐར་ཡི་གེ་གསུམ་བཏགས་ལ་དབུལ། དེ་ནས་རང་གི་སྒོས་ཀྱི་ཆོས་སྐྱོང་དང་ཕྱོགས་སྐྱོང་དང་འབྱུང་པོའི་བར་ལའང་དབུལ་ཞིང་རང་གི་ལྕེ་ལ་བཞག་ལ། ཨོཾ་ཨ་མྲྀ་ཏ་སྭ་ད་ན་སྭ་བྷཱ་ཝ་ཨཏྨ་ཀོ྅ཧཾ། ཞེས་བརྗོད་དེ། མགྲོན་ཐམས་ཅད་ཡེ་ཤེས་ཀྱི་བདུད་རྩིས་མཉེས་ཤིང་ཚིམ་པར་གྱུར། སྙིང་གའི་ས་བོན་ལས་བྱུང༌། ཞེས་པ་ནས། བཛྲ་ཎི་སྭཱཧཱ། ཞེས་པའི་བར་གྱིས་སྔར་བཞིན་མཆོད་པ་ནི་ནང་མཆོད་དོ། །དེ་ནས་ཡབ་ཡུམ་གྱི་གསང་གནས་སྦྱང་བ་སོགས་དྲན་པར་བྱས་ལ་སྔར་བཞིན། སྙོམས་པར་འཇུག་པས་དགའ་བ་བསྐྱེད་དེ། ཕྱི་ནང་གི་ལྷ་ཐམས་ཅད་ཀྱིས་ཀྱང་ལྷན་སྐྱེས་ཀྱི་བདེ་བ་ཆེན་པོ་ཉམས་སུ་མྱོང་བར་གྱུར། ཅེས་པ་ནི་གསང་བའི་མཆོད་པའོ། །དཀྱིལ་འཁོར་པའི་ལྷ་རྣམས་ཀྱིས་ཀྱང་ལྷན་སྐྱེས་ཀྱི་བདེ་བ་དང་དེ་ཁོ་ན་ཉིད་དབྱེར་མེད་པའི་ཏིང་ངེ་འཛིན་ལ་སྙོམས་པར་ཞུགས་པས། དེ་ཁོ་ན་ཉིད་ཀྱི་མཆོད་པས་མཉེས་པར་གྱུར། ཅེས་པ་ནི། དེ་ཁོ་ན་ཉིད་ཀྱི་མཆོད་པའོ། །དེ་ནས་སོ་སོའི་སྔགས་བརྗོད་པ་
ནི། སོ་སོའི་ལྷ་སྐུ་ལ་གསལ་བར་དམིགས་ནས་ཡབ་ཀྱི་སྙིང་པོ་ནི། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛཱ་ལ་ཤཾ་བ་རཾ་སྭཧཱ། ཞེས་དང༌། ཉེ་སྙིང་ནི། ཨོཾ་ཧྲཱིཿ ཧ་ཧ་ཧུཾ་ཧཱུཾ་ཕཊ། ཅེས་པའོ། །ཡུམ་གྱི་སྙིང་པོ་ནི། ཨོཾ་སརྦ་བུད་དྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧུཾ་ཧཱུཾ་ཕཊ་སྭཱཧཱ། ཉེ་སྙིང་ནི། ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་ཕཊ་སྭཱཧཱ། སྙིང་པོའི་རྣལ་འབྱོར་མ་བཞིའི་སྔགས་ནི། ཨོཾ་ཌཱ་ཀཱི་ནཱི་ཡེ་ཧུཾ་ཧཱུཾ་ཕཊ། ཨོཾ་ལཱ་མེ་ཧུཾ་ཧཱུཾ་ཕཊ། ཨོཾ་ཁཎྜ་རོ་ཧི་ཧུཾ་ཧཱུཾ་ཕཊ། ཨོཾ་རཱུ་པི་ཎི་ཡེ་ཧུཾ་ཧཱུཾ་ཕཊ། ཅེས་པའོ། །དཔའ་བོ་ཉེར་བཞི་དང་དཔའ་མོ་ཉེར་བཞིའི་སྔགས་ནི། ཨོཾ་ཀ་ར་ཀ་ར་ཧུཾ་ཧཱུཾ་ཕཊ། ཨོཾ་པྲ་ཙཎྜི་ཧུཾ་ཧཱུཾ་ཕཊ། ཨོཾ་ཀུ་རུ་ཀུ་རུ་ཧུཾ་ཧཱུཾ་ཕཊ། ཨོཾ་ཙཎྜ་ཨཀྵི་ཡེ་ཧུཾ་ཧཱུཾ་ཕཊ། ཨོཾ་བྷནྡྷ་བྷནྡྷ་ཧུཾ་ཧཱུཾ་ཕཊ། ཨོཾ་པྲ་བྷ་བ་ཏཱི་ཡེ་ཧུཾ་ཧཱུཾ་ཕཊ། ཨོཾ་པྲ་ས་ཡ་ཏྲཱ་ས་ཡ་ཧུཾ་ཧཱུཾ་ཕཊ། ཨོཾ་མཧཱ་ནཱ་སེ་ཧུཾ་ཧཱུཾ་ཕཊ། ཨོཾ་ཀྵོ་ཡ་བྷ་ཀྵོ་བྷྱ་ཡ་ཧུཾ་ཧཱུཾ་ཕཊ། ཨོཾ་བཱི་ར་མ་ཏཱི་ཡེ་ཧུཾ་ཧཱུཾ་ཕཊ། ཨོ་ཧྲཽཾ་ཧྲཽཾ་ཧུཾ་ཧཱུཾ་ཕཊ། ཨོཾ་ཁརྦ་རི་ཡེ་ཧུཾ་ཧཱུཾ་ཕཊ། ཨོཾ་ཧྲཿ ཧྲཿ ཧུཾ་ཧཱུཾ་ཕཊ། ཨོཾ་ལཾ་ཀེ་ཤྭ་རི་ཡེ་ཧུཾ་ཧཱུཾ་ཕཊ། ཨོཾ་ཕེཾ་ཕིཾ་ཧུཾ་ཧཱུཾ་ཕཊ། ཨོཾ་དྲུ་མཙྪ་ཡེ་ཧུཾ་ཧཱུཾ་ཕཊ། ཨོཾ་ཕཊ་ཕཊ་ཧུཾ་ཧཱུཾ་ཕཊ། ཨོཾ་ཨེ་རཱ་བ་ཏཱི་ཡེ་ཧུཾ་ཧཱུཾ་ཕཊ། ཨོཾ་ད་ཧ་ད་ཧ་ཧུཾ་ཧཱུཾ་ཕཊ། ཨོཾ་མཧཱ་བྷཻ་ར་ཝཱི་ཧུཾ་ཧཱུཾ་ཕཊ། ཨོཾ་པ་ཙ་པ་ཙ་ཧུཾ་ཧཱུཾ་ཕཊ། ཨོཾ་བཱ་ཡུ་བེ་གེ་ཧུཾ་ཧཱུཾ་ཕཊ། ཨོཾ་བྷཀྵ་བྷཀྵ་བ་ས་རུ་དྷི་རཱནྟྲ་མཱ་ལཱ་པ་ལཾ་བི་ནི་ཧུཾ་ཧཱུཾ་ཕཊ། ཨོཾ་སུ་རཱ་བྷཀྵི་ཡེ་ཧུཾ་ཧཱུཾ་ཕཊ། ཨོཾ་གྲིཧྣ་གྲིཧྣ་སཔྟ་པཱ་ཏཱ་ལ་ག་ཏ་བྷུ་ཛཾ་གཾ་སརྦཾ་པཱ་ཏ་རྫ་ཡ་ཏ་རྫ་ཡ་ཧུཾ་ཧཱུཾ་ཕཊ། ཨོཾ་ཤྱཱ་མཱ་དེ་བཱི་ཧུཾ་ཧཱུཾ་ཕཊ། ཨོཾ་ཨཱ་ཀཌྜྷྱ་ཨ་ཀཌྜྷྱ་ཨཱ་ཀ་ཌྷྱ་ཧུཾ་ཧཱུཾ་ཕཊ། ཨོཾ་སུ་བྷ་ཏྲི་ཧུཾ་ཧཱུཾ་ཕཊ། ཨོཾ་ཧྲཱིཾ་ཧྲཱིཾ་ཧུཾ་ཧཱུཾ་ཕཊ། ཨོཾ་ཧ་ཡ་ཀརྞེ་ཧུཾ་ཧུཾ་ཧཱུཾ་ཕཊ། ཨོཾ་ཛྞོཾ་ཛྞོཾ་ཧུཾ་ཧཱུཾ་ཕཊ། ཨོཾ་ཁ་གཱ་ན་ནེ་ཧུཾ་ཧཱུཾ་ཕཊ།
ཨོཾ་ཀྵྨཱཾ་ཀྵྨཱཾ་ཧུཾ་ཧཱུཾ་ཕཊ། ཨོཾ་ཙཀྲ་བེ་གེ་ཧུཾ་ཧཱུཾ་ཕཊ། ཨོཾ་ཧཱཾ་ཧཱཾ་ཧུཾ་ཧུཾ་ཕཊ། ཨོཾ་ཁནྜ་རོ་ཧི་ཧུཾ་ཧཱུཾ་ཕཊ། ཨོཾ་ཧཱིཾ་ཧཱིཾ་ཧུཾ་ཧཱུཾ་ཕཊ། ཨོཾ་ཤོཎྚི་ནི་ཧུཾ་ཧཱུཾ་ཕཊ། ཨོཾ་ཧཱུཾ་ཧཱུཾ་ཧུཾ་ཧུཾ་ཕཊ། ཨོཾ་ཙཀྲ་བརྨཱི་ཎི་ཧུཾ་ཧཱུཾ་ཕཊ། ཨོཾ་ཀི་ལི་ཀི་ལི་ཧུཾ་ཧཱུཾ་ཕཊ། ཨོཾ་སུ་བཱི་རེ་ཧུཾ་ཧཱུཾ་ཕཊ། ཨོཾ་སི་ལི་སི་ལི་ཧུཾ་ཧཱུཾ་ཕཊ། ཨོཾ་མཧཱ་བ་ལེ་ཧུཾ་ཧཱུཾ་ཕཊ། ཨོཾ་ཧི་ལི་ཧི་ལི་ཧུཾ་ཧཱུཾ་ཕཊ། ཨོཾ་ཙཀྲ་བརྟི་ནཱི་ཧུཾ་ཧཱུཾ་ཕཊ། ཨོཾ་དྷི་ལི་དྷི་ལི་ཧུཾ་ཧཱུཾ་ཕཊ། ཨོཾ་མཧཱ་བཱིདྱ་ཧུཾ་ཧཱུཾ་ཕཊ། ཅེས་པའོ། །སྒོ་མ་བཞིའི་སྔགས་ནི། ཨོཾ་ཀཱ་ཀ་སྱེ་ཧུཾ་ཧཱུཾ་ཕཊ། ཨོཾ་ཨུ་ལུ་ཀཱ་སྱེ་ཧུཾ་ཧཱུཾ་ཕཊ། ཨོཾ་ཤྭ་ནཱ་སྱེ་ཧུཾ་ཧཱུཾ་ཕཊ། ཨོཾ་ཤཱུ་ཀཱ་རཱ་སྱེ་ཧུཾ་ཧཱུཾ་ཕཊ། ཅེས་པའོ། །མཚམས་མ་བཞིའི་སྔགས་ནི། ཨོཾ་ཡ་མ་དཱ་ཌྷཱི་ཧུཾ་ཧཱུཾ་ཕཊ། ཨོཾ་ཡ་མ་དཱུ་ཏཱི་ཧུཾ་ཧཱུཾ་ཕཊ། ཨོཾ་ཡ་མ་དཾཥྚི་ཎི་ཧུཾ་ཧཱུཾ་ཕཊ། ཨོཾ་ཡ་མ་མ་ཐ་ནཱི་ཧུཾ་ཧཱུཾ་ཕཊ། ཅེས་པའོ། །ཨོཾ་ན་མོ་བྷ་ག་ཝ་ཏེ་ཝཱི་རེ་ཤཱ་ཡ་ཧཱུཾ་ཧཱུཾ་ཕཊ། ཨོཾ་མཧཱ་ཀལྤཱགྣི་སཾ་ནི་བྷཱ་ཡ་ཧཱུཾ་ཧཱུཾ་ཕཊ། ཨོཾ་ཛ་ཊཱ་མུ་ཀུ་ཊོངྐ་ཊཱ་ཡ་ཧཱུཾ་ཧཱུཾ་ཕཊ། ཨོཾ་དཾཥྚ་ཀ་རཱ་ལོ་གྲ་བྷཱི་ཥ་ཎ་མུ་ཁཱ་ཡ་ཧཱུཾ་ཧཱུཾ་ཕཊ། ཨོཾ་ས་ཧ་སྲ་བྷཱུ་ཛ་བྷཱ་སུ་རཱ་ཡ་ཧཱུཾ་ཧཱུཾ་ཕཊ། ཨོཾ་པ་ར་ཤཱུ་པཱ་ཤོ་དྱ་ཏ་ཤཱུ་ལ་ཁ་ཊྭཱཾ་ག་དྷ་རི་ཎེ་ཧཱུཾ་ཧཱུཾ་ཕཊ། ཨོཾ་བྱཱ་གྷྲ་ཛི་ནཾ་པཱ་ར་དྷ་རཱ་ཡ་ཧཱུཾ་ཧཱུཾ་ཕཊ། ཨོཾ་མཧཱ་དྷུམྤྲཱནྟ་ཀཱ་ར་ཝ་པུ་ཥཱ་ཡ་ཧཱུཾ་ཧཱུཾ་ཕཊ། ཅེས་ཡབ་ཀྱི་རྐང་བརྒྱད་དང༌། ཨོཾ་ན་མོ་བྷ་ག་ཝ་ཏི་བཛྲ་བཱ་རཱ་ཧཱི་བཾ་ཧཱུཾ་ཧཱུཾ་ཕཊ། ཨོཾ་ན་མོ་ཨཱརྱ་ཨ་པ་རཱ་ཛི་ཏ་ཏྲཻ་ལོ་ཀྱ་མཱ་ཏེ་བཱིདྱ་ཤྭ་རི་ཧཱུཾ་ཧཱུཾ་ཕཊ། ཨོཾ་ན་མོ་སརྦྦ་བྷཱུ་ཏ་བྷ་ཡཱེ་བ་ཧེ་མཧཱ་བཛྲེ་ཧཱུཾ་ཧཱུཾ་ཕཊ། ཨོཾ་ན་མོ་བཛྲཱ་ས་ནི་ཨ་ཛི་ཏཾ་ཨ་པ་ར་ཛི་ཏེ་བཱ་ཤྱཾ་ཀ་རི་ཎེ་ཏྲ་ཧཱུཾ་ཧཱུཾ་ཕཊ། ཨོཾ་ན་མོ་བྷྲ་མ་ཎི་ཤོ་ཥ་ཎི་རོ་ཥ་ནི་ཀྲོ་དྷེ་ཀ་རཱ་ལེ་ནི་ཧཱུཾ་ཧཱུཾ་ཕཊ། ཨོཾ་ན་མོ་ཏྲཱ་ས་ནི་མཱ་ར་ཎི་པྲ་བྷེ་དཱ་ནཱི་པ་རཱ་ཛ་ཡེ་ཧཱུཾ་ཧཱུཾ་ཕཊ། ཨོཾ་
ན་མོ་བི་ཛ་ཡེ་ཛམྦྷ་ནི་སྟམྦྷ་ནི་མོ་ཧ་ནི་ཧཱུཾ་ཧཱུཾ་ཕཊ། ཨོཾ་ན་མོ་བཛྲ་བཱ་རཱ་ཧཱི་མཧཱ་ཡོ་གི་ནཱི་ཀཱ་མེ་ཤྭ་རི་ཁ་གེ་ཧཱུཾ་ཧཱུཾ་ཕཊ། ཅེས་ཡུམ་གྱི་རྐང་བརྒྱད་ཀྱིས་ཀྱང་བསྟོད་དེ་སྔགས་ཀྱི་མཆོད་པ་ཡང་ཡིན་ནོ། །ཨོཾ་ཨཱཿ ཧཱུཾ། གནས་བཞི་དང་གསང་གནས་བྱིན་གྱིས་བརླབས་པའི་ཡབ་ཡུམ་སྙོམས་པར་ཞུགས་པས་བྱང་སེམས་ཞུ་བ་སྤྱི་བོ་ནས་མགྲིན་པར་སླེབ་པ་ན་དགའ་བ། མགྲིན་པ་ནས་སྙིང་གར་སླེབ་པ་ན་མཆོག་དགའ། སྙིང་ག་ནས་ལྟེ་བར་སླེབ་པ་ན་ཁྱད་པར་གྱི་དགའ་བ། ལྟེ་བ་ནས་ནོར་བུའི་རྩེར་སླེབ་པ་ན་ལྷན་ཅིག་སྐྱེས་དགའི་ཡེ་ཤེས་སྐྱེས་པས། བདེ་སྟོང་དབྱེར་མེད་དུ་སྦྱར་བ་དེ་ཉིད་བྱང་ཕྱོགས་སོ་བདུན་གྱི་ངོ་བོར་གྱུར་པ་ནི་ལྷ་སོ་བདུན་དུ་ཤར་བ་ཡིན་ཞིང༌། དེ་ཡང་ལུས་རྗེས་སུ་དྲན་པ་ཉེ་བར་བཞག་པ་དང༌། ཚོར་བ་དང༌། ཆོས་དང༌། སེམས་རྗེས་སུ་དྲན་པ་ཉེ་བར་བཞག་པ་བཞི་ནི། རིམ་པ་བཞིན་མཁའ་འགྲོ་མ་དང༌། ལཱ་མ་དང༌། དུམ་སྐྱེས་མ་དང༌། གཟུགས་ཅན་མ། འདུན་པའི་དང༌། བརྩོན་འགྲུས་ཀྱི་དང༌། དཔྱོད་པའི་དང༌། སེམས་ཀྱི་རྫུ་འཕྲུལ་གྱི་རྐང་པ་བཞི་ནི་རིམ་པ་བཞིན། རབ་གཏུམ་མ་དང༌། གཏུམ་མིག་མ་དང༌། འོད་ལྡན་མ་དང༌། སྣ་ཆེན་མ། དད་པའི་དང༌། བརྩོན་འགྲུས་ཀྱི་དང༌། དྲན་པའི་དང༌། ཏིང་ངེ་འཛིན་གྱི་དབང་པོ་བཞི་ནི། རིམ་པ་བཞིན་དཔའ་བོའི་བློ་ཅན་མ་དང༌། མིའུ་ཐུང་མ་དང༌། ལཾ་ཀའི་དབང་ཕྱུག་མ་དང༌། ཤིང་གྲིབ་མ། ཤེས་རབ་ཀྱི་དབང་པོ་དང༌། དད་པའི་དང༌། བརྩོན་འགྲུས་ཀྱི་དང༌། དྲན་པའི་སྟོབས་བཞི་ནི། རིམ་པ་བཞིན་ས་སྲུང་མ་དང་འཇིགས་བྱེད་ཆེན་
མོ་དང༌། རླུང་ཤུགས་མ་དང༌། ཆང་འཐུང་མ། ཏིང་ངེ་འཛིན་གྱི་སྟོབས་དང༌། ཤེས་རབ་ཀྱི་སྟོབས་དང༌། ཏིང་ངེ་འཛིན་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་བཞི་ནི། རིམ་པ་བཞིན་སྔོ་བསངས་ལྷ་མོ་དང༌། ཤིན་ཏུ་བཟང་མོ་དང༌། རྟ་རྣ་མ་དང༌། བྱ་གདོང་མ། དགའ་བ་དང་ཤིན་ཏུ་སྦྱངས་པ་དང༌། ཆོས་རབ་ཏུ་རྣམ་འབྱེད་དང༌། དྲན་པ་ཡང་དག་བྱང་ཆུབ་ཀྱི་ཡན་ལག་བཞི་ནི། རིམ་པ་བཞིན་འཁོར་ལོའི་ཤུགས་ཅན་མ་དང༌། དུམ་སྐྱེས་མ་དང༌། ཆང་འཚོང་མ་དང༌། འཁོར་ལོའི་གོ་ཆ་མ། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དང༌། ཡང་དག་པའི་ལྟ་བ་དང༌། རྟོག་པ་དང༌། ངག་བཞི་ནི། རིམ་པ་བཞིན་ཤིན་ཏུ་དཔའ་མོ་དང༌། སྟོབས་ཆེན་མ་དང༌། འཁོར་ལོས་སྒྱུར་མ་དང༌། བརྩོན་འགྲུས་ཆེན་མོ། ཡང་དག་པའི་ལས་ཀྱི་མཐའ་དང༌། འཚོ་བ་དང༌། རྩོལ་བ་དང༌། དྲན་པ་བཞི་ནི། རིམ་པ་བཞིན་ཁྭ་གདོང་མ་དང༌། འུག་གདོང་མ་དང༌། ཁྱི་གདོང་མ་དང༌། ཕག་གདོང་མ། ཡང་དག་པའི་ཏིང་ངེ་འཛིན་ནི་དཔལ་ཧེ་རུ་ཀའོ། །དགེ་བའི་ཆོས་མ་སྐྱེས་པ་རྣམས་སྐྱེད་པ་དང༌། སྐྱེས་པ་རྣམས་བསྲུང་བ་དང༌། མི་དགེ་བའི་ཆོས་སྐྱེས་པ་རྣམས་སྤོང་བ་དང༌། མ་སྐྱེས་པ་རྣམས་མི་སྐྱེས་པའི་ཡང་དག་སྤོང་བ་བཞི་ནི། རིམ་པ་བཞིན་གཤིན་རྗེ་བརྟན་མ་དང༌། གཤིན་རྗེ་ཕོ་ཉ་མོ་དང༌། གཤིན་རྗེ་མཆེ་བ་མ་དང༌། གཤིན་རྗེ་འཇོམས་མའོ། །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་བཅོམ་ལྡན་འདས་དང་འཁོར་གྱི་ལྷ་ཐམས་ཅད་ཀྱི་སྐུ་ལས་རང་འདྲའི་སྐུ་དཔག་ཏུ་མེད་པ་ཕྱོགས་བཅུར་འཕྲོས། སེམས་ཅན་ཐམས་ཅད་
ཀྱི་དོན་བྱས་རྡོ་རྗེ་འཆང་ཆེན་པོའི་གོ་འཕང་ལ་བཀོད། སླར་འདུས་རང་རང་གི་རྩ་བའི་སྐུ་ལ་ཐིམ་པར་གྱུར། བཟླས་བྱའི་སྔགས་ནི། རྩ་རྒྱུད་ལས། ས་སྟེང་ན་ནི་རིན་ཆེན་བཞི། ཕྲེང་བའི་སྔགས་ནི་དམ་པ་ཡིན། ཞེས་ཡབ་ཡུམ་གྱི་རྩ་སྔགས་དང༌། སྙིང་པོ་དང༌། ཉེ་སྙིང་དང༌། གོ་ཆའི་སྔགས་ཏེ་རིན་ཆེན་བཞིའི་སྔགས་དང༌། ཕྲེང་སྔགས་མཆོག་ཏུ་གསུངས་སོ། །དེ་ལ་རྩ་སྔགས་སམ། འཕྲེང་སྔགས་ལ་གཉིས་ཡོད་པའི་ཡབ་ཀྱི་འཕྲེང་སྔགས་ནི་ཀ་ར་ཀ་ར་སོགས་སྔགས་ཚན་པ་ཉེར་བཞིར་མ་བཅད་པར་ཕྱོགས་གཅིག་ཏུ་སྦྲེལ་ཏེ། མགོ་བོར་ཨོཾ། མཐར་ཧཱུཾ་ཧཱུཾ་ཕཊ། སྦྱར་བའོ། །ཡུམ་གྱི་འཕྲེང་སྔགས་ལ་མི་འདྲ་བ་མང་དུ་ཡོད་ཀྱང༌། འཁྲུལ་སྤོང་སོགས་རྒྱ་གཞུང་འགའ་ཞིག་ལས་ནི། ཨོཾ་ན་མོ་བྷ་ག་ཝཱ་ཏི་བཛྲ་བཱ་རཱ་ཧཱི་བཾ། ཨཱརྱ་ཨ་པ་རཱ་ཛི་ཏ་ཏྲཻ་ལོ་ཀ་མ་ཏེ། བཱི་དྱ་ཤྭ་རི། སརྦ་བྷཱུ་ཏ་བྷཱ་ཡ་བ་ཧེ་མཧཱ་བཛྲེ། བཛྲ་ས་ནི་ཨ་ཛི་ཏེ་ཨ་པ་རཱ་ཛཱི་ཏེ་བཱ་ཤྱཾ་ཀ་རི་ནེ་ཏྲ། བྷྲ་མ་ཎི་ཤོ་ཥ་ཎི་རོ་ཥ་ཎི་ཀྲོ་དྷེ་ཀཱ་ར་ལེ་ནི། ཏྲ་ས་ནི་མཱ་ར་ཎི་པྲ་བྷེ་ད་ནཱི་པ་རཱ་ཛ་ཡེ། བི་ཛ་ཡེ་ཛམྦྷ་ནི། སྟམྦྷ་ནི། མོ་ཧ་ནི། བཛྲ་བཱ་རཱ་ཧཱི་མཧཱ་ཡོ་གི་ནཱི་ཀཱ་མེ་ཤྭ་རི་ཁ་གེ །ཏདྱ་ཐཱ། པྲོ་ཏངྒེ་པྲོ་ཏངྒེ་ཧ་ན་ཧ་ན་པྲཱ་ཎཾ། ཀིཾ་ཀི་ཎི། ཁིཾ་ཁི་ཎི། དྷུ་ན་དྷུ་ན་བཛྲ་ཧ་སྟེ། ཤོ་ཥ་ཡ་ཤོ་ཥ་ཡ། བཛྲ་ཁ་ཊྭཱཾ་ག་ཀ་པཱ་ལ་དྷ་རི་ཎི། མཧཱ་བི་ཤི་ཏ་མཱཾ་སཱ་ས་ནི། མ་ནུ་ཥཱནྟྲ་པྲ་བྲྀ་ཏེ་ས་ན་དྷྱ་ན་ར་སི་ར་མཱ་ལ་གྲཱཾ་ཐི་ཏ་དྷ་ར་ཎི། སུམྦྷ་ནི་སུམྦྷ་ཧ་ན་ཧ་ན་པྲ་ཎཾ་སརྦ་པ་ཤ་པཱ་ནཱཾ། མཧཱ་མནྶ་ཙྪེ་ད་ནི་ཀྲོ་དྷ་མུརྟེ་དཾཥྚ་ཀ་རཱ་ལི་ནི་མཧཱ་མུ་ཏྲེ། ཤྲཱི་ཧེ་རུ་ཀ་དེ་བ་སྱཱ། གྲ་མ་ཧི་ཥཱི་ས་ཧ་སྲ་ཤཱི་རེ་ཧ་ས་སྲ་བཱ་ཧ་བེ། ཤ་ཏ་ས་ཧ་སྲ་ན་ནཻ་ཛྭ་ལི་ཏ་ཏེ་ཛ་སེ། ཛྭ་ལཱ་མུ་ཁེ་སཾ་ག་ལ་ལོ་ཙ་ནེ། བཛྲ་ཤྭ་རི་རེ་བཛྲ་ས་ནི། མི་ལི་ཏ་ཙི་ལི་ཏ། ཧེ་ཧེ། ཧཱུཾ་ཧཱུཾ། ཁ་ཁ། དྷུ་རུ་དྷུ་རུ།
མུ་རུ་མུ་རུ། ཨ་དྭེ་ཏེ། མཧཱ་ཡོ་གི་ནཱི། པ་ཋི་ཏ་སིདྡྷེ། ཏྲེཾ་དྷཾ་ཏྲེཾ་དྷཾ། གྲཾ་གྲཾ། ཧེ་ཧེ། ཧ་ཧ། བྷི་མེ་ཧ་ས་ཧ་ས་བཱི་རེ། ཧཱ་ཧཱ། ཧེ་ཧེ། ཧཱུཾ་ཧཱུཾ། ཏྲཻ་ལོ་ཀྱ་བི་ནཱ་ཤ་ནི་ཤ་ཏ་ས་ཧ་སྲ་ཀོ་ཊེ། ཏ་ཐཱ་ག་ཏ་པ་རི་བཱ་རེ་ཧཱུཾ་ཧཱུཾ་ཕཊ། སིཾ་ཧ་རུ་པེ་ཁཿ ག་ཙ་རུ་པེ་ཨཱཿ ཏྲཻ་ལོཀྱ་ཨུ་དྷ་རེ་ས་མུ་ཏྲ་མེ་ཁ་ལེ། གྲ་ས་གྲ་ས་ཧཱུཾ་ཧཱུཾ་ཕཊ། བཱི་ར་དྭེ་ཏེ་ཧཱུཾ་ཧཱུཾ། ཧ་ཧ། མཧཱ་པ་ཤུ་མོ་ཧཱ་ནཱི་ཡོ་གི་ཤྭ་རི་ཎཾ། ཌཱ་ཀི་ནཱི་སརྦ་ལོ་ཀཱ་ནཱཾ་བྷནྡྷ་ནི་ས་དྱ་པྲ་དྱ་ཡ་ཀ་རེ་ཎི་ཧཱུཾ་ཧཱུཾ་ཕཊ། བྷུ་ཏ་ཏྲཱ་ས་ནི་མཧཱ་བཱི་ར་པ་ར་མ་སིདྡྷ་ཡོ་གི་ཤྭ་རི་ཕཊ་ཧཱུཾ་ཧཱུཾ་ཕཊ། ཧཱུཾ་ཧཱུཾ་ཕཊ་སྭཱཧཱ། གོ་ཆ་ལ་ཨོཾ་ཧ་སོགས་ཀྱི་ཐོག་མར་ཨོཾ་དང༌། མཐར་ཧཱུཾ་ཧཱུཾ་ཕཊ་སྦྱར་བའམ། རྡོ་རྗེ་མཁའ་འགྲོའི་འགྲེལ་པར། སོ་སོའི་མཐར་སྭཱཧཱ་སྦྱར་བས་ཀྱང་ཆོག་པར་གསུངས་སོ། །སྙིང་པོ་གཉིས་དང་ཉེ་སྙིང་གཉིས་དང་ལྷ་སོ་སོའི་སྔགས་ནི་སྔར་བཤད་ཟིན་ཏོ། །གཞན་ཡང་ལྷ་དྲུག་ཅུའི་སྔགས་ཤིན་ཏུ་བསྡུས་པ་བྱེད་ན། རྀ་ལྀ་བཞི་དང༌། མ་ཡིག་དོར་བའི་ཀ་ཙ་ཊ་ཏ་པའི་སྡེ་ཚན་གྱི་ཡི་གེ་ཉེར་བཞི་དང༌། ཡ་ར་ལ་ཝ་བཞི་དང༌། ཤ་ཥ་ས་ཧ་བཞིའི་མགོར་ཐིག་ལེ་བྱིན་ནས། ཐོག་མར་ཨོཾ་དང༌། མཐར་ཧཱུཾ་ཧཱུཾ་ཕཊ་སྦྱར་བ་རྣམས་རིམ་པ་བཞིན་དུ་སྙིང་པོའི་རྣལ་འབྱོར་མ་བཞི་དང༌། འཁོར་ལོ་གསུམ་གྱི་ལྷ་ཟུང་ཉེར་བཞི་དང༌། སྒོ་མ་བཞི་དང༌། མཚམས་མ་བཞིའི་སྔགས་སུ་མངོན་བརྗོད་ལས་གསུངས་སོ། །ས་བོན་སོ་དྲུག་སྦྲེལ་ནས་ཐོག་མཐར་སྔར་བཞིན་སྦྱར་ཡང་ཆོག་གོ །སྔགས་ཟློ་བའི་ཚུལ་ནི། མི་རུས་ཀྱི་འཕྲེང་བའམ་པོ་ཏི་ཙེ་ལ་སོགས་པ། ཕྲེང་ཐག་གཞོན་ནུ་མ་མ་ཉམས་པས་བཀལ་བའི་རས་བལ་གྱི་སྐུད་པ་ལས་བྱས་པ་བསང་སྦྱང་བྱས་ཏེ། ཕྲེང་བའི་བསྐྱེད་ཆོག་རྒྱས་པའམ། དེ་མ་གྲུབ་ན། སྐད་ཅིག་གིས་གསུང་རྡོ་རྗེ་པདྨ་གར་དབང་དུ་བསྐྱེད། རང་འདྲའི་ཡེ་ཤེས་པ་དང་གཅིག་ཏུ་བྱས། བུམ་ཆུས་གཏོར་ལ་མཆོད་ནས། ཨོཾ་པདྨ་ནིརྟི་ཤྭ་རི་ཧཱུཾ་ཧཱུཾ་ཕཊ། ཅེས་པའམ་སྭཱཧཱ་ཧུའི་ཐོག་མཐར་སྔར་བཞིན་སྦྱར་
བ་བརྒྱ་རྩ་བརྒྱད་བཟླས་ཏེ་གསུང་རྡོ་རྗེ་ཡོངས་སུ་གྱུར་པ་ལས་ཕྲེང་བའི་རྣམ་པར་བསམས་ལ། ལག་པའི་མཐེབ་སྲིན་གྱིས་བཟུང་སྟེ། གཙོ་བོ་རང་གི་སྙིང་པོ་དང་ཉེ་སྙིང་ཟློ་ན། རང་གི་སྙིང་གར་ཟླ་བ་ལ་གནས་པའི་ཧཱུཾ་སྔོན་པོའམ། ནཱ་ད་རྐྱང་བ་ལ་བལྟས་ལ། དེ་ལ་བཟླས་བྱའི་སྔགས་ཀྱིས་བསྐོར་བར་དམིགས་ཏེ། དབུས་ཀྱི་ཡི་གེ་ལས་འཁོར་ལོ་ལྔའི་ལྷ་ཚོགས་སྤྲོས་ནས་འགྲོ་བའི་དོན་བྱས་སླར་སྡུད་པའི་ཚེ་དབུས་ཀྱི་ཡི་གེ་ལ་སྡུད་པའི་ཚུལ་གྱིས་ཟློ་ལ། ཡུམ་གྱི་སྙིང་པོ་དང་ཉེ་སྙིང་དང་ལྷ་གཞན་རྣམས་ཀྱི་སྔགས་ཟློ་ན། རང་རང་གི་ཐུགས་ཀར་ཉི་གདན་ལ་ཏིང་ངེ་འཛིན་སེམས་དཔའམ་ཧཱུཾ་ཡིག་བཀོད་ལ་དེ་ལ་བཟླས་བྱའི་སྔགས་ཀྱིས་འཁོར་བར་དམིགས་ནས། སྔར་བཞིན་སྤྲོ་བསྡུའི་ཚུལ་གྱིས་ཟློས་ཏེ། དམ་ཚིག་གི་བཟླས་པའོ། །ཡབ་ཡུམ་གྱི་འཕྲེང་སྔགས་ཟློ་ན། ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་གྱིས། སྔགས་འཕྲེང་རང་གི་ཞལ་ནས་ཞུགས་ཏེ། རྡོ་རྗེའི་ལམ་ནས་ཡུམ་གྱི་པདྨར་ཞུགས། དེའི་དྷཱུ་ཏཱིའི་ལམ་ནས་སྟེང་དུ་བྱུང་སྟེ། གཙོ་མོའི་ཞལ་ནས་འཐོན་ནས་རང་གི་ཞལ་དུ་ཞུགས་ཤིང་ན་དར་ཐིམ་པ་དང༌། ཡང་སྔར་བཞིན་འཁོར་བར་བསྒོམས་ནས་ཟློས་ཏེ་དོ་ལིའི་བཟླས་པའོ། །སེམས་མ་གཡེངས་པ་ལ་འབད་ནས་བཟླས་པའི་སྐྱོན་ཧ་ཅང་མྱུར་བུལ་དང༌། ཧ་ཅང་སྒྲ་ཆེས་པ་དང༌། རིང་ཐུང་གི་ཚད་ལས་ཉམས་པ་དང༌། དེ་གཉིས་བཟློག་ནས་འཛིན་པ་སོགས་དང་བྲལ་བར་བྱ་ཞིང༌། མཐེ་བོང་ལྕགས་ཀྱུར་བྱས་ལ་ལྷ་རྣམས་འགུགས་པའི་ཚུལ་གྱིས་བཟླའོ། །འདི་ལ་ཡིད་བཟླས་རྡོ་རྗེའི་བཟླས་པ་དང༌། ངག་བཟླས་གསུམ་ག་ཡོད་ལ། དེ་ཡང་ཐུན་གྱི་ངོ་བོ་ལ་མ་ཡེངས་པར་བཟླས་པ་རྣམས་གྲངས་སུ་གཞུག་གི །ཐུན་བར་དུ་བཟླས་པ་དང༌། སེམས་གཡེངས་ནས་བཟླས་པ་སོགས་ནི་གྲངས་ལ་མི་ཕན་ཡང་བཟླས་པར་ནི་བཤད་དོ། །གཏོར་མ་འབུལ་བ་ནི། འཇིག་རྟེན་
དང་འཇིག་རྟེན་ལས་འདས་པའི་གཏོར་མ་ཤ་ཆེན་གྱིས་བརྒྱན་པ་གཉིས། དུམ་སྐྱེས་མའི་སྔགས་ཀྱིས་བསངས། ནང་མཆོད་ལྟར་བྱིན་གྱིས་བརླབས་ཏེ། འབར་བའི་ཕྱག་རྒྱ་དང་བཅས། ཕེཾ། དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ཕྱོགས་སྐྱོང་དང་བཅས་པ་སྤྱན་དྲངས། ཤྲཱི་ཧེ་རུ་ཀ་ཨརྒྷཾ། ཞེས་སོགས་ཆུ་གཉིས་ནས་རོལ་མོའི་བར་གྱིས་མཆོད་ནས། ལག་པ་གཉིས་ཨ་ཨཱ། ཞེས་པ་ནས། ཀྵ་ཡོངས་སུ་གྱུར་པ་ལས་ཟླ་བ་དང་ཉི་མའི་རང་བཞིན་དུ་གྱུར་པའི་དབུས་སུ་ཧཱུཾ། ཨོཾ་ཨ་ནྱོ་ནྱ། ཨ་ནུ་ག་ཏ་སརྦ་དྷརྨཿ པ་ར་སྥ་ར། ཨ་ནུ་པྲ་བིཥྚ་སརྦ་དྷརྨཱཿ ཨ་ཏྱནྟ། ཨ་ནུ་པྲ་བིཥྚ་སརྦ་དྷརྨྨཿ ཨོཾ་ཨཱཿ ཧཱུཾ། ཟླ་ཉི་ཧཱུཾ་དང་བཅས་པ་ཡོངས་སུ་གྱུར་པ་ལས་རྡོ་རྗེ་ཐལ་མོར་གྱུར། ཐལ་མོའི་དབུས་སུ་གཏོར་སྣོད་བཞག་པའམ་བཞག་པར་མོས་ལ། དེ་ནས་མགྲོན་གྱིས་གཏོར་མ་བདག་གིར་མཛད་པའི་ཕྱིར་རང་གི་འདོད་དོན་བརྗོད་དེ། ལྷ་མོ་ཚད་མ་དམ་ཚིག་ཚད་མ་དང༌། །དེས་བརྗོད་གསུང་ཡང་མཆོག་ཏུ་ཚད་མ་སྟེ། །བདེན་པ་འདི་དག་གིས་ནི་ལྷ་མོ་རྣམས། །བདག་ཅག་རྗེས་སུ་འཛིན་པའི་རྒྱུར་གྱུར་ཅིག །ཅེས་བརྗོད་དེ། མཆོད་པའི་འཁོར་གསུམ་བདེ་སྟོང་དབྱེར་མེད་ཀྱི་ངོ་བོར་གྱུར། མགྲོན་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་འཁོད། ཨོཾ་ཨ་མྲྀ་ཏ་ཨུ་ད་ཀ་ཧཱུཾ་ཧཱུཾ་ཋ་ཋ། ཏྲཾ་ཨཱཿ ཁཾ་ཧཱུཾ། ཨོཾ་ཨཱཿ ཧཱུཾ། ལྷ་མོ་རོ་རྡོ་རྗེ་མས་བདུད་རྩི་བསྟབས་པ། རྡོ་རྗེའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། ཨོཾ་ཨ་ར་ལླི་ཧོཿ ཛཿ ཧཱུཾ་བཾ་ཧོཿ ས་མ་ཡ་སྟྭཾ་ཏྲི་ཤྱ་ཧོཿ བཛྲ་ཌཱ་ཀི་ནི་ཁ་ཁ་ཁཱ་ཧི་ཁཱ་ཧི་ཨི་མཾ་བ་ལིཾ་བྷུཉྫ་ཐ་བི་པ་ཐ། མ་མ་དཀཱ་ཏྱ། ས་དྷ་ཡ་ཐ། ཨོཾ་ཨཱཿ ཧཱུཾ་ཕེཾ་ཕེཾ་སྭཱཧཱ། ཞེས་པ་ལན་ལྔས་འཁོར་ལོ་ལྔའི་
ལྷ་ལ་ཕྱོགས་གཡོན་སྐོར་དང་མཚམས་གཡས་སྐོར་གྱིས་དབུལ་ལོ། །རིག་མ་བཅུ་དྲུག་གིས་མཆོད། རྐང་བརྒྱད་ཀྱིས་བསྟོད་ལ། འདོད་དོན་ལ་གསོལ་བ་གདབ་པ་ནི། སྲིད་པ་དང་མཉམ་ཞི་བའི་ཆགས་བཅོམ་ཀུན་ཏུ་རྟོག་པ་འཇོམས། །ཁྱོད་ནི་དངོས་པོ་མཐའ་དག་མཁའ་ལྟར་གཟིགས་པ་དང་ལྡན་པ། །མགོན་པོ་ཤིན་ཏུ་བརྩེ་བ་ལྕི་བའི་ཆུས་བརླན་ཐུགས་ཀྱི་ཆུས། །མཛོད་ཅིག་ལྷ་མོ་རྣམས་ཀྱིས་བདག་ལ་ཤིན་ཏུ་རྗེས་བརྩེར་མཛོད། །ཅེས་བརྗོད། དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང་ཞིང་སྐྱོང་དང་ཀླུ་ལ་སོགས་པ་སྐད་ཅིག་གིས་འོད་གསལ་དུ་བཅུག་པ་ལས་བདེ་མཆོག་གི་ལྷ་ཡབ་ཡུམ་གྱི་སྐུར་བཞེངས་པའི་མགྲོན་རྣམས་ཀྱི་ལྗགས། ཞེས་པ་ནས། གསོལ་བར་གྱུར། ཅེས་པའི་བར་སྔར་བཞིན་བྱས་ལ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས། བྷུ་ཏ་པྲེ་ཏ། པི་ཤཱ་ཙ། ཨུནྨ་ད། ཨ་པ་སྨ་ར། བཛྲ་ཌཱ་ཀ་ཌཱ་ཀི་ནཱི་ད་ཡ། ཨི་མཾ་བ་ལིཾ་གྲིཧྣ་ཏུ། ས་མ་ཡ་རཀྵནྟུ། མཱ་མ་སརྦ་སིད་དྷི་མྨེ་པྲ་ཡཙྪན་ཏུ། ཡ་ཐེ་པཾ། ཡ་ཐེཥྚཾ། བྷུ་ཛ་ཐ། པི་པཱ་ཐ། ཛི་གྲ་ཐ། མཱ་ཏི་ཀྲ་མ་ཐ། མ་མ་སརྦ་ཀརྟ་ཡ། སད་སུ་ཁཾ་བི་ཤུདྡྷ་ཡེ། ས་ཧ་ཡི་ཀ་བྷ་བནྟུ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་ལན་གཉིས་བརྗོད་དེ། ཕྱོགས་དང་མཚམས་ན་གནས་པ་ལ་དབུལ་ལོ། །ཨོཾ་བཛྲ་ཏཾ་བུ་ལ་ཡེ་སྭཱཧཱ། ཞེས་སོ་རྩི་དང༌། རིག་མ་བཅུ་དྲུག་དང༌། ནང་མཆོད་ཀྱིས་ཀྱང་མཆོད། རྐང་བརྒྱད་ཀྱིས་བསྟོད་དེ། ལྷ་ཡི་ཚོགས་རྣམས་མ་ལུས་དང༌། །ཀླུ་ཡི་ཚོགས་རྣམས་མ་ལུས་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་འདོད་དོན་ལ་གསོལ་བ་གདབ་བོ། །དེ་ནས་ལྷག་ཆད་སྐོང་བའི་དོན་དུ་དྲིལ་བུ་དཀྲོལ་ཞིང་ཡིག་བརྒྱ་བཟླས་པའི་འོག་ཏུ། ཨོཾ་ཡོ་ག་ཤུད་དྷཿ སརྦ་དྷརྨཱཿ ཡོ་ག་ཤུདྡྷོ྅ཧཾ།
ཞེས་བརྗོད་ཅིང་སྙིང་གར་པད་ཀོར་གྱི་ཕྱག་རྒྱས་མཉེས་པར་བྱས་ལ་ཕྱག་རྒྱ་སྡུད་པ་ན་ལག་པས་འཁྱུད་པའི་ཚུལ་བྱ་ཞིང༌། མཐེ་བོང་དང་སྲིན་ལག་གིས་སེ་གོལ་གཏོག་པ་སྔོན་དུ་འགྲོ་བས། ཨོཾ་བཛྲ་མུཿ འཇིག་རྟེན་པ་རྣམས་རང་གནས་སུ་གཤེགས་ཤིང༌། དཀྱིལ་འཁོར་གྱི་འཁོར་ལོ་རང་ཉིད་ལ་ཐིམ་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་གཙོ་བོ་ཡབ་ཡུམ་དང་ཕྱི་ནང་གི་ལྷ་རྣམས་དང༌། ཁང་པ་བརྩེགས་མ་རྣམས་སྣང་བར་བྱས་ཏེ་འོད་དུ་གྱུར་པའི་དུར་ཁྲོད་སྲུང་འཁོར་དང་བཅས་པ་རྟེན་གྱི་དཀྱིལ་འཁོར་ལ་ཐིམ། རྟེན་གྱི་འཁོར་ལོ་སྒོ་མཚམས་མ་བརྒྱད་དང་བཅས་པ་སྐུ་འཁོར་ལ་ཐིམ། དེ་གསུང་འཁོར་ལ་ཐིམ། དེ་ཐུགས་འཁོར་ལ་ཐིམ། དེའི་ཤར་ནས་བརྩམས་ཏེ། ཕྱོགས་ན་གནས་པ་བཞི་ནི། མཁའ་འགྲོ་མ་ནས་བཟུང་སྟེ་གཡོན་སྐོར་གྱིས་ལྷ་མོ་བཞི་ལ་ཐིམ། མེ་ནས་བརྩམས་ཏེ་མཚམས་ན་གནས་པ་བཞི་ནི་གཟུགས་ཅན་མ་ནས་བཟུང་སྟེ་གཡས་སྐོར་གྱིས་ལྷ་མོ་བཞི་ལ་ཐིམ། ཐོད་པ་བཞི་ཡང་གཟུགས་ཅན་མ་ལ་སོགས་པའི་ལྷ་མོ་བཞི་ལ་ཐིམ། ལྷ་མོ་བཞི་ཡང་རང་ངོས་ཀྱི་གཙོ་བོའི་ཞལ་བཞི་ལ་ཐིམ། ལུས་དཀྱིལ་གྱི་སྒོ་མཚམས་མ་བརྒྱད་སྐུ་འཁོར་ལ་ཐིམ། དེ་གསུང་འཁོར་ལ་ཐིམ། དེ་ཐུགས་འཁོར་ལ་ཐིམ། དེ་ལྷ་མོ་བཞི་ཐོད་པ་དང་བཅས་པ་ལ་ཐིམ། དེ་རྣམས་ཀྱང་སྙིང་གའི་ཧེ་རུ་ཀ་ཡབ་ཡུམ་ལ་ཐིམ། དེ་གཉིས་ཀྱང་རང་གནས་སུ་ཐིམ་པས་རྩ་དང་ཁམས་རྣམས་བྱིན་གྱིས་བརླབས་པར་གྱུར་པ་དང༌། ལུས་དཀྱིལ་གྱི་ལྷ་རྣམས་རང་རང་གི་གནས་སུ་ཐིམ་པས་རྩ་དང་ཁམས་རྣམས་བྱིན་གྱིས་བརླབས་པར་སེམས་པ་གཉིས་ཀ་སྤེལ་མར་བྱའོ། །རང་གཙོ་བོ་ཡབ་ཡུམ་འོད་དུ་
ཞུ་ནས་སྙིང་གའི་ཧཱུཾ་ཡིག་ལ་ཐིམ། ཧཱུཾ་གི་ཞབས་ཀྱུ་ཨུ་ཧ་ལ་ཐིམ་པ་ནས། ནཱ་ད་ཡང་མི་དམིགས་པར་བྱས་ལ། སྟོང་པའི་ངང་ལས་རང་ཉིད་ཧེ་རུ་ཀ་ཡབ་ཡུམ་གྱི་སྐུར་བཞེངས་པ་ལ། ཡབ་ཡུམ་གྱི་གོ་ཆ་བསྡུས་པ་འགོད་པ་དང་གོ་ཆ་ཆེན་པོའི་བསྲུང་བ་རྣམས་ཀྱང་བྱས་ནས་ཐུན་མཚམས་སུ་འཇུག་པར་བྱ་ཞིང༌། སྲིད་པ་གསུམ་འབར་སྐུ་ནི་རྗེས་ཆགས་དུལ་བར་ལྡན། །འོད་ཟེར་སྔོན་པོ་སྟོང་ལྡན་ཉི་མ་བརྒྱ་སྟོང་ལྡན། །རྣམ་མང་སྐུ་དང་ཆ་ལུགས་རྗེས་ཆགས་སེམས་དཔར་ལྡན། །ཧེ་རུ་ཀ་དཔལ་དེ་དང་ལྷན་ཅིག་གར་བྱེད་ཤོག །ཅེས་དང༌། ལྷ་མོ་ཚད་མ་ཞེས་སོགས་དང༌། སེམས་ཅན་ཀུན་གྱི་དོན་གྱི་ཕྱིར། །ཞེས་པ་ནས། གོ་འཕང་མཆོག་ལ་འགོད་པར་ཤོག །ཅེས་སྔར་གྱི་སེམས་བསྐྱེད་སྨོན་ལམ་དུ་བསྒྱུར་བ་ལ་སོགས་པས་དགེ་བ་བསྔོ་བར་བྱའོ། །ཐུན་མཚམས་སུ་རང་ཧེ་རུ་ཀ་ཕྱག་གཉིས་པ་ཡུམ་བཅས་ཀྱི་ང་རྒྱལ་ལ་གནས་པས་མཐེབ་མཛུབ་ཀྱིས་ཤར་ནས་གཡོན་སྐོར་དུ་སེ་གོལ་གཏོག་ཅིང༌། ཞལ་བཞི་པའི་སྔགས་བརྗོད་དེ་ཚམ་རྔམས་ཀྱིས་སྲུང་བ་དང༌། མཐོང་ཐོས་ཐམས་ཅད་འཁོར་ལོ་བདེ་མཆོག་ཏུ་བལྟ་བའི་ཚངས་སྤྱོད་ལ་རྟག་ཏུ་གནས་ཤིང༌། སངས་རྒྱས་བྱང་སེམས་ཀྱི་སྐུ་གང་མཐོང་བདེ་མཆོག་ཏུ་མོས་ནས། རྐང་བརྒྱད་ཀྱིས་བསྟོད་པ་དང༌། གཡོན་པའི་ཀུན་སྤྱོད་ལ་སོགས་པ་མ་རྒྱུད་ཀྱི་སྒོས་ཆོས་མཐའ་དག་ཚུལ་བཞིན་དུ་བསྲུང་ཞིང༌། གཞན་ཡང་ཟས་ཀྱི་རྣལ་འབྱོར་དང༌། གཉིད་དང་ལྡང་བ་དང༌། ཁྲུས་ཀྱི་རྣལ་འབྱོར་ལ་སོགས་པ། བླ་མེད་སྤྱིའི་ཐུན་མོང་བ་རྣམས་ཀྱང༌། དམ་པའི་དགོངས་པ་ཇི་ལྟ་བ་བཞིན་ལག་ལེན་དུ་བཏབ་སྟེ། རྣལ་འབྱོར་དབང་ཕྱུག་བྱེ་བའི་གཤེགས་ཤུལ། དཔལ་ཧེ་རུ་ཀའི་གྲོང་ཁྱེར་ཆེན་པོར་འཇུག་པའི་ཐབས་ལ་འབད་པར་བྱའོ། །སྨྲས་པ། བྱེ་བ་བཅུ་དྲུག་རྣལ་འབྱོར་གསང་མཐའི་རྒྱུད། །
ཀུན་གྱི་བླ་མ་དཔལ་ལྡན་ཧེ་རུ་ཀའི། །སྒྲུབ་ཐབས་ནག་པོ་སྤྱོད་པའི་བཞེད་གཞུང་བཞིན། །སྦྱར་བའི་དགེ་འདིས་འགྲོ་བ་མ་ལུས་པ། །གསང་ཆེན་ཐེག་པ་མཆོག་གི་སྒོར་ཞུགས་ཏེ། །རྣལ་འབྱོར་མ་ཚོགས་བྱེ་བའི་གྲོགས་དང་བཅས། །བརྟན་གཡོའི་དངོས་ཀུན་ལྷན་སྐྱེས་བདེ་ཆེན་དུ། །སྡོམ་མཛད་བཅོམ་ལྡན་དཔའ་བོའི་གནས་ཐོབ་ཤོག །ཅེས་གྲུབ་ཆེན་ནག་པོ་སྤྱོད་པའི་ལུགས་ཀྱི་འཁོར་ལོ་སྡོམ་པའི་སྒྲུབ་ཐབས་ངག་འདོན་གྱི་རིམ་པར་བསྒྲིགས་པ་འདི་ནི་འདིའི་མངོན་དཀྱིལ་ས་སྐྱ་གོང་མའི་གསུང་དང། ཏཱ་ར་ནཱ་ཐ། སྒམ་པོ་བཀྲ་ཤིས་རྣམ་རྒྱལ་སོགས་ཀྱི་གསུང་མང་དུ་འདུག་ནའང་རྡོ་རྗེ་འཛིན་པ་ཆེན་པོ་ཐང་སྟོན་རྡོ་རྗེ་བཟང་པོས་མཛད་པའི་སྒྲུབ་ཐབས་བདེ་ཆེན་སྒྲོན་མེ་ནི་ནག་པོའི་གཞུང་རྣམས་དང་མཐུན་ཞིང༌། རྗེ་བླ་མའི་དགོངས་པ་ཇི་ལྟ་བར་སྣང་བས་དེ་ཉིད་གཞིར་བཞག་སྟེ་ཧལ་ཧ་ཛ་སག་ཐུ་ཧན་གྱི་ཕྱོགས་ནས་ལམ་འདི་ལ་མཆོག་ཏུ་མོས་པ། དགེ་བཤེས་བསོད་ནམས་དབང་རྒྱལ་གྱིས་བསྐུལ་བའི་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་རྒྱལ་བའི་ལུང་གིས་ཟིན་པའི་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་སྦྱར་བ་འདིས་ཀྱང་རྣལ་འབྱོར་གསང་མཐའི་བསྟན་པ་ཕྱོགས་དུས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག།། །།