དྲིལ་བུ་ལུས་དཀྱིལ་གྱི་མངོན་རྟོགས།
དྲིལ་བུ་ལུས་དཀྱིལ་གྱི་མངོན་རྟོགས་མདོར་བསྡུས་བཞུགས་སོ། །
རྩ་བའི་བླ་མ་དཔལ་ཧེ་རུ་ཀ་དང་གཉིས་སུ་མེད་པའི་ཞབས་ལ་ཕྱག་འཚལ་ལོ། །ཚེ་རབས་ཐམས་ཅད་དུ་རྗེས་སུ་གཟུང་དུ་གསོལ། སྐད་ཅིག་གིས་རང་ཉིད་ཧེ་རུ་ཀ་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་གཡས་བརྐྱང་གིས་བཞུགས་པ། ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པས་འཁྱུད་པར་གྱུར། ཨོཾ་ཁཎྜ་རོ་ཧི་ཧཱུཾ་ཧཱུཾ་ཕཊ། ཨོཾ་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་གི་མདུན་དུ་སྐད་ཅིག་གིས་ཐོད་པ་དུམ་བུ་གཅིག་པ་ཕྱི་དཀར་ལ་ནང་དམར་བའི་ནང་དུ་ཤ་ལྔ་དང་བདུད་རྩི་ལྔས་གང་བ་ཨོཾ་ཨཱཿ ཧཱུཾ་གིས་མཚན་པར་གྱུར། ཧ་ཧོ་ཧྲཱིཿ ས་ཁ་དོག་དྲི་རོ་ནུས་པའི་སྐྱོན་བཅོམ་ཞིང༌། དེ་རྣམས་ཞུ་བས་བདུད་རྩིར་གྱུར། ཨོཾ་ཨཱཿ ཧཱུཾ། ལན་གསུམ་གྱིས་ནང་མཆོད་བྱིན་གྱིས་བརླབ། བདག་བསྐྱེད་མཆོད་པ་བསང་སྦྱངས། སྟོང་པའི་ངང་ལས་སྐད་ཅིག་གིས་ཐོད་པའི་ནང་དུ་ཧཱུཾ་ལས་བྱུང་བའི་མཆོད་རྫས་རྣམས་དྭངས་ཤིང་ཐོགས་པ་མེད་པ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ཨོཾ་ཨརྒྷཾ་ཨཱཿ ཧཱུཾ། ཨོཾ་པཱདྱཾ་ཨཱཿ ཧཱུཾ། ཨོཾ་ཨཱཉྩ་མ་ཎཾ་ཨཱཿ ཧཱུཾ། ཨོཾ་པྲོཀྵ་ཎཾ་ཨཱཿ ཧཱུཾ། ཨོཾ་བཛྲ་པུཥྤེ། དྷུ་པེ། དཱི་པེ། གནྡྷེ། ནཻ་ཝིདྱ། ཤཔྟ་ཨཱཿ ཧཱུཾ། དེ་ནས། སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །སེམས་ཅན་ཀུན་གྱི་དོན་གྱི་ཕྱིར། །བདག་ནི་ཧེ་རུ་ཀར་གྱུར་ཅིག །རང་གི་སྤྱི་བོར་པད་ཟླའི་སྟེང་དུ་སྐད་
ཅིག་གིས་བླ་མ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པའི་ཡབ་ཡུམ་གཉིས་ཀའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་དང་དབང་གི་ལྷ་རྣམས་སྤྱན་དྲངས། ཡེ་ཤེས་པ་དམ་ཚིག་པ་དང་གཉིས་སུ་མེད་པར་གྱུར། དབང་ལྷས་དབང་བསྐུར། ལུས་གང། བདེ་བ་སྐྱེས། ཆུ་ལྷག་མ་སྤྱི་བོར་འཁྱིལ་བ་ལས་མི་བསྐྱོད་པས་དབུ་བརྒྱན་པར་གྱུར། ཡབ་ཡུམ་གྱི་སྦྱོར་མཚམས་ནས་བདུད་རྩིའི་རྒྱུན་བབས། རང་གི་ཚངས་བུག་ནས་ཞུགས་ཏེ་ལུས་ཐམས་ཅད་གང་ཞིང་སྡིག་སྒྲིབ་ཐམས་ཅད་དག་པར་གྱུར། ཧེ་རུ་ཀའི་ཡིག་བརྒྱ་བཟླས་ལ། རྡོ་རྗེ་སེམས་དཔའ་ཡབ་ཡུམ་རང་ལ་ཐིམ་པས་རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མི་ཕྱེད་པར་གྱུར། ཤྲཱི་ཧེ་རུ་ཀཿ ཧེ་ནི་ཆོས་ཀྱི་བདག་མེད་པ། རུ་ནི་གང་ཟག་གི་བདག་དང་བྲལ་བ། ཀཿ ནི་དེ་ཁོ་ན་ཉིད་ཀྱི་ཡུལ་ཡུལ་ཅན་མི་མཐུན་པར་མི་གནས་པ། ཤྲཱི་སྟོང་པ་ཉིད་དང་རོ་གཅིག་པའི་ཡེ་ཤེས་ཨེ་བཾ་གྱི་དོན་བཞིན་རང་དང་སྣང་བ་ཐམས་ཅད་སྟོང་པར་གསལ་བའི་ངང་ལས་སྐད་ཅིག་གིས་ཧེ་རུ་ཀ་ཡབ་ཡུམ་གྱི་སྐུར་གྱུར། ཤྲཱི་ཧེ་རུ་ཀོ྅ཧཾ། ལན་གསུམ། ཨོཾ་ཨ་ཨཱ། ཨི་ཨཱྀ། ཨུ་ཨཱུ། རྀ་རཱྀ། ལི་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་
ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵཿ ཧཱུཾ་ཧཱུཾ་ཕཊ། ལན་གསུམ་མམ། བསྡུ་ན། ཨོཾ་ཨཱཿ ཧཱུཾ་གིས་ཆོག །རང་གི་ལྟེ་བའི་ཕྱོགས་སུ་སྔགས་འཕྲེང་གཡོན་སྐོར་དུ་གནས་པ་ལས་འཁོར་ལོ་གསུམ་གྱི་ལྷ་ཚོགས་ཕྱོགས་བཅུར་འཕྲོས་པས་བགེགས་ཐམས་ཅད་བསྐྲད། སླར་བྱོན་ནས་རང་ལ་ཐིམ་པར་གྱུར། རང་ཧེ་རུ་ཀར་གསལ་བའི་ཐུགས་ཀའི་པད་ཟླའི་སྟེང་གི་ཡེ་ཤེས་ལྔའི་རང་བཞིན་ཅན་གྱི་ཧཱུཾ་ཡིག་ལས་འོད་ཟེར་འཕྲོས། འོག་མིན་ནས་བླ་མ་དང་གཉིས་སུ་མེད་པའི་བཅོམ་ལྡན་འདས་འཁོར་ལོ་སྡོམ་པའི་ལྷ་ཚོགས་མདུན་གྱི་ནམ་མཁར་སྤྱན་དྲངས། འོད་ཟེར་རང་གི་སྙིང་གར་ཐིམ་པར་གྱུར། ཨོཾ་གུ་རུ་ཙཀྲ་སམྦ་ར་སརྦྦ་ཌཱ་ཀི་ནཱི་བྷྱཿ ཞེས་ཕྱག་བྱ། ཨོཾ་ཨརྒྷཾ་པྲ་ཏཱིཙྩ་སྭཱཧཱ། ཨོཾ་པཱདྱཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿ ཧཱུཾ་སྭཱཧཱ། ཞེས་པ་ནས། ཨོཾ་བཛྲ་ཤཔྟ་ཨཱཿ ཧཱུཾ་སྭཱཧཱ། ཨོཾ་ཨཱཿ བཛྲ་ཨ་དརྴེ་ཧཱུཾ། ཨོཾ་ཨཱཿ བཛྲ་བི་ནཱི་ཧཱུཾ། ཨོཾ་ཨཱཿ བཛྲ་གནྡྷེ་ཧཱུཾ། ཨོཾ་ཨཱཿ བཛྲ་ར་སེ་ཧཱུཾ། ཨོཾཨཱཿ བཛྲ་སྤརྴེ་ཧཱུཾ། ཨོཾ་ཨཱཿ བཛྲ་དྷརྨེ་ཧཱུཾ། ཨོཾ་ཨཱཿ ཧཱུཾ། གིས་ནང་མཆོད་ཕུལ། ཡབ་ཡུམ་སྙོམས་པར་ཞུགས་པའི་བདེ་སྟོང་གི་ཡེ་ཤེས་གསང་བ་དང་དེ་ཁོ་ན་ཉིད་ཀྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །ཚོགས་ཞིང་རྣམས་རང་ལ་ཐིམ་པས་བྱིན་གྱིས་བརླབ་པར་གྱུར། ཨོཾ་སྭ་བྷཱ་ཝ་ཤུདྡྷཿ སརྦ་དྷརྨྨཿ སྭ་བྷཱ་ཝ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ལྟར་སྣང་བ་ཐམས་
ཅད་བསྡུས་པའི་སྟོང་པའི་ངང་ལས་རང་གི་སེམས་ནཱ་དའི་གཟུགས་གྱེན་དུ་འགྲེང་བ་ཤིན་ཏུ་ཕྲ་བ་དཀར་ལ་དམར་བའི་མདངས་ཆགས་པ་ནམ་མཁར་གནས་པར་གྱུར། སྐད་ཅིག་གིས་རྡོ་རྗེའི་ས་གཞི་རྭ་བ་གུར་བླ་རེ་མེ་རི་དང་བཅས་པའི་དབུས་སུ་འབྱུང་བཞི་རིམ་བརྩེགས་རི་རབ་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེའི་ལྟེ་བར་སྣ་ཚོགས་པདྨ་འདབ་མ་བརྒྱད་པའི་དབུས་སུ་མཚན་དཔེའི་ངོ་བོ་དབྱངས་སོ་གཉིས་དང་གསལ་བྱེད་བརྒྱད་ཅུ་ལས་དབྱངས་གསལ་གྱི་གཟུགས་བརྙན་དང་ལྡན་པའི་ཟླ་བ་དཀར་ལ་དམར་བའི་མདངས་ཅན་མེ་ལོང་དང་མཉམ་པ་ཉིད་ཀྱི་ཡེ་ཤེས། རང་ནམ་མཁའི་ནཱ་དས་ཟླ་བ་དཀར་ལ་དམར་བའི་མདངས་ཅན་མཐོང་བ་ན་བདག་གིས་སངས་རྒྱས་ཡབ་ཡུམ་གྱི་བྱང་སེམས་དཀར་དམར་གྱི་དབུས་སུ་སྐྱེ་བ་བླངས་ལ་སེམས་ཅན་གྱི་དོན་བྱའོ་སྙམ་པའི་འཕེན་པ་དང་ལྡན་པས། ཟླ་བའི་དབུས་སུ་ནཱ་ད་ཞུགས་པ་ལས་རིམ་བཞིན་ཧཱུཾ་ཡིག་དཀར་ལ་དམར་བའི་མདངས་ཅན་དུ་གྱུར་པ་ནི་སོ་སོར་རྟོག་པའི་ཡེ་ཤེས། ཧཱུཾ་ལས་འོད་ཟེར་འཕྲོས། དོན་གཉིས་བྱས་འདུས་ནཱ་ད་ལ་ཐིམ་ཞིང་ཧཱུཾ་ཡིག་ལྷན་སྐྱེས་ཀྱི་དགའ་བའི་རང་བཞིན་ཅན་དུ་གྱུར་པ་ནི་བྱ་སྒྲུབ་ཡེ་ཤེས་སོ། །ཨོཾ་ཨཱཿ ཧཱུཾ། ཨོཾ་སརྦྦ་བཱི་ར་ཡོ་གཱི་ནཱི་ཀཱ་ཡ་ཝཱཀྩི་ཏ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་བཛྲ་ཤུདྡྷ་སརྦ་དྷརྨྨཿ བཛྲ་ཤུདྡྷོ྅ཧཾ། ཟླ་བ་དབྱངས་གསལ་ཧཱུཾ་དང་བཅས་པ་ཡོངས་སུ་གྱུར་པ་ལས་རྟེན་དང་བརྟེན་པའི་དཀྱིལ་འཁོར་ཐམས་ཅད་དུས་གཅིག་ཏུ་གྲུབ་པ་ནི་ཆོས་ཀྱི་དབྱིངས་ཀྱི་
ཡེ་ཤེས་ཏེ། དེའང་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་བཅས་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཉི་གདན་ལ་རང་ཉིད་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་མཐིང་ག་ཞལ་བཞི་པའི་རྩ་ཞལ་ནག །གཡོན་ཞལ་ལྗང༌། རྒྱབ་ཞལ་དམར། གཡས་ཞལ་སེར་བ། ཞལ་རེ་རེའང་སྤྱན་གསུམ་གསུམ་པ། ཕྱག་བཅུ་གཉིས་པ། དཔྲལ་བ་རྡོ་རྗེ་རྩེ་ལྔ་པའི་འཕྲེང་བ་འཛིན་པ། ཞབས་གཡས་བརྐྱངས་པས་འཇིགས་བྱེད་ནག་པོའི་མགོ་བོ་མནན་ཅིང༌། གཡོན་བསྐུམས་པས་དུས་མཚན་མ་དམར་མོའི་ནུ་མ་མནན་པ། ཕྱག་དང་པོ་གཉིས་ཀྱིས་རྡོར་དྲིལ་འཛིན་པས་རྡོ་རྗེ་ཕག་མོ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་སྡིགས་མཛུབ་དང་བཅས་པས་བརྒྱངས་ཏེ་འཛིན་པ། གཡས་གསུམ་པ་ན་ཌཱ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་པ། གཡོན་པའི་ཕྱག་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག། །བཞི་པ་ན་ཁྲག་གིས་གང་བའི་ཐོད་པ། ལྔ་པ་ན་རྡོ་རྗེའི་ཞགས་པ། དྲུག་པ་ན་ཚངས་པའི་མགོ་བོ་གདོང་བཞི་པ་བསྣམས་པ། སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན། དབུ་རེ་རེ་ལ་ཐོད་པ་སྐམ་པོ་ལྔ་ལྔས་བརྒྱན་ཅིང༌། དབུའི་གཡོན་དུ་ཅུང་ཟད་ཡོ་བའི་ཟླ་བ་ཕྱེད་པ་འཆང་བ། ཞལ་རྣམ་པར་འགྱུར་བ། མཆེ་བ་བཞི་བཞི་གཙིགས་པ། གར་གྱི་ཉམས་དགུ་དང་ལྡན་ཞིང་སྟག་གི་པགས་པའི་ཤམ་ཐབས་ཅན། མི་མགོ་ལྔ་བཅུའི་འཕྲེང་བ་འཕྱང་བ། ཕྱག་རྒྱ་དྲུག་གིས་
རྒྱས་བཏབ་པ། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པའོ། །བཅོམ་ལྡན་འདས་ལ་མངོན་དུ་ཕྱོགས་པར་བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་ཀྱི་ཕྱག་གཡོན་པས་ཡབ་ཀྱི་མགུལ་བ་ནས་འཁྱུད་པའི་ཐོད་པ་ན་བདུད་བཞི་ལ་སོགས་པའི་ཁྲག་གིས་གང་བ་བསྣམས་ནས་ཡབ་ཀྱི་ཞལ་དུ་སྟོབ་པ། གཡས་པས་ཕྱོགས་བཅུའི་གདུག་པ་ཅན་ཀུན་ལ་གྲི་གུག་དང་བཅས་པའི་སྡིགས་མཛུབ་ཀྱིས་བསྡིགས་པར་མཛད་པ། སྤྱན་གསུམ་དམར་ཞིང་མེ་ལྟར་འབར་བ། བྱིན་པ་གཉིས་ཀྱིས་ཡབ་ཀྱི་བརླའི་སྟེང་དུ་ལེགས་པར་འཁྲིལ་བ། ཐུགས་རྗེའི་བདག་ཉིད་ཅན། ཕྱག་རྒྱ་ལྔས་བརྒྱན་པ། མི་མགོ་སྐམ་པོ་ལྔའི་ཐོད་དང་སྐམ་པོ་ལྔ་བཅུའི་དོ་ཤལ་ཅན། གཉིས་ཀའང་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དེའི་རྐང་པ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས་འབྱུང་བ་རིམ་བརྩེགས་ཀྱི་རླུང་གཞུའི་དབྱིབས་ཅན་དང༌། སུམ་མདོ་གྲུ་གསུམ་གྱི་གཟུགས་སུ་ཡོད་པ་ལས་མེ་དཀྱིལ་ཟུར་གསུམ་དང༌། ལྟོ་བ་ཟླུམ་པོའི་དབྱིབས་ཅན་ལས་ཆུ་དཀྱིལ་ཟླུམ་པོ། སྙིང་ག་གྲུ་བཞི་པ་ལས་ས་དཀྱིལ་གྲུ་བཞི། སྒལ་ཚིགས་ལས་རི་རབ། སྤྱི་བོའི་རྩ་སོ་གཉིས་ལས་པདྨ། ལུས་འདོམ་གང་ཡན་མན་དང་ཕན་ཚུན་དུ་མཉམ་པ་ལས་ངོས་བཞི་མཉམ་པའི་གཞལ་ཡས་ཁང་གྲུ་བཞི་པ། ཕ་གུ་དང་དྲ་ཕྱེད་སོགས་ཀྱི་རྒྱན་གྱིས་མཛེས་པའི་ཧེ་རུ་ཀའི་དཀྱིལ་འཁོར། རྐང་བརྒྱད་ལས་ཀ་བ་བརྒྱད། རང་གི་ལུས་ངག་ཡིད་
གསུམ་ལས་འཁོར་ལོ་གསུམ། སྙིང་ག་ཆོས་ཀྱི་འཁོར་ལོའི་དབུས་ཀྱི་དྷཱུ་ཏཱིའི་ནང་གི་བྱང་སེམས་བ་མོ་ལྟ་བུ་འཛག་པ། ཉུངས་ཀར་སྦོམ་པོའི་ཚད་ཀྱི་དཔྱིད་ཧཱུཾ་ཡིག་ཡོངས་སུ་གྱུར་པ་ལས་བཅོམ་ལྡན་འདས་ཧེ་རུ་ཀ་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཕྱག་རྒྱ་དྲུག་གིས་བརྒྱན་པ། ལྟེ་བའི་དམར་ཆ་གཏུམ་མོའི་མེའི་གཟུགས་ཀྱི་ཐིག་ལེ་ཡོངས་སུ་གྱུར་པ་ལས་ཕག་མོ་དམར་མོ་གྲི་གུག་དང་ཐོད་པ་འཛིན་པ་སྟེ། ཕྱག་རྒྱ་ལྔས་བརྒྱན་པ། དཔྱིད་དང་ཐིག་ལེའི་ངོ་བོ་གཉིས་སྙིང་གར་ཕྲད་ནས་སྙོམས་པར་འཇུག་པའི་ཚུལ་གྱིས་བཞུགས་པ། སྙིང་གའི་ཤར་ལ་སོགས་པའི་འབྱུང་བ་བཞིའི་རླུང་རྒྱུ་བའི་རྩ་འདབ་བཞི་ཡོངས་སུ་གྱུར་པ་ལས། མཁའ་འགྲོ་མ་ནག་མོ། ལཱ་མ་ལྗང་གུ །དུམ་སྐྱེས་མ་དམར་མོ། གཟུགས་ཅན་མ་སེར་མོ། བཞི་གའང་ཞལ་གཅིག་ཕྱག་གཉིས་གྲི་ཐོད་འཛིན་པའི་མཆན་ཁུང་ན་ཁ་ཊྭཱཾཾ་ག་བསྣམས་པ། གཡས་བརྐྱང་གིས་བཞུགས་པ། ཕྱག་རྒྱ་ལྔས་བརྒྱན་པ། ཐོད་སྐམ་ལྔའི་དབུ་རྒྱན་དང་ཐོད་སྐམ་ལྔ་བཅུའི་དོ་ཤལ་ཅན། ཤར་ལྷོ་ལ་སོགས་པའི་མཆོད་པ་བཞིའི་རྩ་འདབ་ལས་བདུད་རྩི་ལྔས་གང་བའི་ཐོད་པ་བཞི་སྟེ་བདེ་ཆེན་གྱི་འཁོར་ལོ། སྤྱི་བོ་ལ་སོགས་པའི་གནས་ཉེར་བཞི། པཱུ། ཛཱ། ཨོ། ཨ། གོ། ར། དེ། མཱ། ཀཱ། ཨོ། ཏྲི། ཀོ། ཀ།། ལ། ཀཱ། ཧི། པྲེ། གྲྀ། སཽ། སུ། ན། སི། མ། ཀུ། རྣམས་ཐིག་ལེས་བརྒྱན་པ་ཡོངས་སུ་གྱུར་པ་ལས། རྩིབས་ཁོང་སྟོང་རྩིབས་ཤུན་གྱི་རྣམ་པ་དང་ལྡན་པའི་འཁོར་ལོ་ཉེར་བཞིའི་རྣམ་པ་ཅན་ཕྱིའི་ཡུལ་ཉེར་བཞིའི་ངོ་བོར་གྱུར། གནས་ཉེར་
བཞིའི་རྩ་དང་ཁམས་ངོ་བོ་དབྱེར་མེད་དུ་གནས་པ་ཡོངས་སུ་གྱུར་པ་ལས། རྩ་ནང་གི་ཁམས་ལས་དཔའ་བོ་ཉེར་བཞི་དང༌། རྩ་ལས་དཔའ་མོ་ཉེར་བཞིར་གྱུར་པ་ནི། སྐྲ་མཚམས་པཱུ་ལཱི་ར་མ་ལ་ཡར་ཁཎྜ་ཀ་པཱ་ལ་དང་རབ་གཏུམ་མ། སྤྱི་གཙུག་ཛཱ་ལནྡྷ་རར་མཧཱ་ཀངྐ་ལ་དང་གཏུམ་མིག་མ། རྣ་བ་གཡས་པ་ཨོ་ཌི་ཡ་ནར་ཀངྐ་ལ་དང་འོད་ལྡན་མ། ལྟག་པ་ཨརྦུ་ཏར་མཆེ་བ་རྣམ་པར་གཙིགས་པ་དང་སྣ་ཆེན་མ། རྣ་བ་གཡོན་པ་གོ་ད་བ་རིར་སུ་ར་བཻ་རི་ཎ་དང་དཔའ་བོའི་བློ་ཅན་མ། སྨིན་མཚམས་རཱ་མེ་ཤྭ་རིར་འོད་དཔག་མེད་དང་ཁརྦ་རི། མིག་གཉིས་དེ་ཝཱི་ཀོ་ཊིར་རྡོ་རྗེའི་འོད་དང་ལངྐའི་དབང་ཕྱུག་མ། ཕྲག་པ་གཉིས་མཱ་ལ་བར་རྡོ་རྗེའི་སྐུ་དང་ཤིང་གྲིབ་མ་སྟེ་ཐུགས་ཀྱི་འཁོར་ལོའི་ལྷ་སྐུ་མདོག་སྔོན་པོ་ནམ་མཁའ་ལ་སྤྱོད་པའི་ཚུལ་གྱིས་བཞུགས་པ། མཆན་ཁུང་གཉིས་ཀཱ་མ་རཱུ་པར་མྱུ་གུ་ཅན་དང་ས་སྲུང་མ། ནུ་མ་གཉིས་ཨོ་ཊིར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ལྟེ་བ་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་སཱ་ལར་རྡོ་རྗེ་ཧཱུཾ་མཛད་དང་ཆང་འཐུང་མ། ཁ་ཀ་ལིངྐར་རབ་ཏུ་བཟང་པོ་དང་སྔོ་བསངས་ལྷ་མོ། མགྲིན་པ་ལམ་པ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། སྙིང་ཀཉྩིར་འཇིགས་བྱེད་ཆེན་པོ་དང་རྟ་རྣ་མ། འབྲས་བུ་གཉིས་ཧི་མ་ལ་ཡར་མིག་མི་བཟང་དང་བྱ་གདོང་མ་སྟེ་གསུང་གི་འཁོར་ལོའི་ལྷ་སྐུ་མདོག་དམར་པོ་ས་ལ་སྤྱོད་པའི་ཚུལ་གྱིས་བཞུགས་པ། མཚན་མ་པྲེ་ཏ་པཱུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་གྲྀ་ཧ་དེ་བ་ཏར་རིན་ཆེན་རྡོ་རྗེ་དང་དུམ་སྐྱེས་མ། བརླ་གཉིས་
སཽ་རཤྚར་རྟ་མགྲིན་དང་ཆང་འཚོང་མ། བྱིན་པ་གཉིས་སུ་ཝརྞ་དྭཱི་པར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། སོར་མོ་བཅུ་དྲུག་ནཱ་ག་རར་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་གཉིས་སིནྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ། མཐེ་བོང་བཞི་མ་རུར་རྣམ་པར་སྣང་མཛད་དང་འཁོར་ལོས་སྒྱུར་མ། པུས་མོ་གཉིས་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་སྐུའི་འཁོར་ལོའི་ལྷ་སྐུ་མདོག་དཀར་པོ་ས་འོག་ན་སྤྱོད་པའི་ཚུལ་གྱིས་བཞུགས་པ། དཔའ་བོ་དཔའ་མོ་ཐམས་ཅད་ཞལ་གཅིག་ཕྱག་གཉིས་སྤྱན་གསུམ་པ། ཐོད་སྐམ་ལྔའི་དབུ་རྒྱན་ཅན། དཔའ་བོ་རྣམས་རྡོར་དྲིལ་བཟུང་ནས་ཡུམ་ལ་འཁྱུད་ཅིང༌། རལ་པའི་ཐོར་ཅོག་ལ་སྣ་ཚོགས་རྡོ་རྗེ་དང་ཟླ་ཚེས་ཀྱིས་བརྒྱན་པ། དཔྲལ་བར་རྡོ་རྗེའི་ཕྲེང་བ་དང་ཕྱག་རྒྱ་དྲུག་གིས་བརྒྱན་པ། ཐོད་རློན་ལྔ་བཅུའི་དོ་ཤལ་ཅན། སྟག་ཤམ་གསོལ་ཞིང་གཡས་བརྐྱང་གིས་བཞུགས་པ། དཔའ་མོ་རྣམས་གྲི་ཐོད་འཛིན་ཅིང་ཡབ་ལ་འཁྲིལ་སྦྱོར་གྱིས་བཞུགས་པ། ཐོད་པའི་དུམ་བུས་བརྒྱན་པའི་འོག་པག་དང་ཐོད་སྐམ་ལྔ་བཅུའི་དོ་ཤལ་ཅན། ཕྱག་རྒྱ་ལྔས་བརྒྱན་པ། གནས་རང་རང་གི་རྩ་ཧཱུཾ་རིང་པོ་དང་ངོ་བོ་དབྱེར་མེད་དུ་གནས་པ་ཡོངས་སུ་གྱུར་པ་ལས་སྒོ་མཚམས་མ་བརྒྱད་དུ་གྱུར་པ་ནི། ལྕེའི་རྩ་བར་ཁྭ་གདོང་མ་ནག་མོ། ལྟེ་བའི་བུག་པར་འུག་གདོང་མ་ལྗང་གུ །རྟགས་ཀྱི་སྒོར་ཁྱི་གདོང་མ་དམར་མོ། བཤང་ལམ་གྱི་སྒོར་ཕག་གདོང་མ་སེར་མོ། མཛོད་སྤུའི་བུ་གར་གཤིན་རྗེའི་བརྟན་མ་གཡས་སྔོ་གཡོན་སེར་བ། རྣ་བའི་བུག་པ་གཉིས་སུ་གཤིན་རྗེ་ཕོ་ཉ་མོ་
གཡས་སེར་གཡོན་དམར་བ། མིག་གཉིས་སུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། སྣའི་བུག་པ་གཉིས་སུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། བརྒྱད་ཀའང་ཞལ་གཅིག་ཕྱག་གཉིས་གྲི་ཐོད་འཛིན་པའི་མཆན་ཁུང་ན་ཁ་ཊྭཱཾ་ག་བསྣམས་པ། ཕྱག་རྒྱ་ལྔས་བརྒྱན་ཅིང་རོའི་གདན་ལ་གཡས་བརྐྱང་གིས་བཞུགས་པ། ཐོད་སྐམ་ལྔའི་དབུ་རྒྱན་དང་སྐམ་པོ་ལྔ་བཅུའི་དོ་ཤལ་ཅན་དུ་གྱུར། ཡབ་ཀྱི་གསང་གནས་ཧཱུཾ་ལས་རྡོ་རྗེ་དཀར་པོ་བྱཱ་ལས་ནོར་བུ་དམར་པོ་རྩེ་མོར་བྱཱ་སེར་པོས་མཚན་པ། ཡུམ་གྱི་གསང་གནས་ཨཱཿ ལས་པདྨ་དམར་པོ་དྱཱ་ལས་ཟེའི་འབྲུ་དཀར་པོ་རྩེ་མོར་དྱཱ་སེར་པོས་མཚན་པ། ཡབ་ཀྱི་ལྟེ་བ་དང་ཐུགས་ཀ། །ཡུམ་གྱི་མགྲིན་པ་དང་སྤྱི་བོར་ཟླ་གདན་ལ་ཡུམ་གྱི་སྙིང་པོ་དང་ཉེ་སྙིང། ཡུམ་གྱི་ལྟེ་བ་དང་ཐུགས་ཀ། །ཡབ་ཀྱི་མགྲིན་པ་དང་སྤྱི་བོར་ཉི་གདན་ལ་ཡབ་ཀྱི་སྙིང་པོ་དང་ཉེ་སྙིང་རྣམས་ཁ་དོག་དམར་པོ་ཕན་ཚུན་ཞལ་སྦྱོར་ཞིང་འོད་ཟེར་འཁྱུད་པའི་རྣམ་པར་གྱུར། ཨོཾ་ཨཱཿ ཧཱུཾ། སྙོམས་པར་ཞུགས་པས་དགའ་བཞི་རིམ་བཞིན་དྲངས། ལྷན་སྐྱེས་ཀྱི་བདེ་སྟོང་དབྱེར་མེད་དུ་སྦྱར་བ་བྱང་ཕྱོགས་སོ་བདུན་གྱི་ངོ་བོ་ལྷ་སོ་བདུན་གྱི་རྣམ་པར་ཤར་བ་ནམ་མཁའི་འཇའ་ཚོན་ལྟ་བུར་གྱུར། རང་གི་སྙིང་གར་ཟླ་གདན་ལ་རྡོ་རྗེ་སེམས་དཔའི་ངོ་བོ་ཨོཾ་ཧ་དཀར་པོ། མགོ་བོར་ཉི་མ་ལ་རྣམ་སྣང་གི་ངོ་བོ་ན་མ་ཧི་སེར་པོ། སྤྱི་གཙུག་ཏུ་ཉི་མ་ལ་པདྨ་གར་དབང་གི་ངོ་བོ་སྭཱཧཱ་ཧཱུཾ་དམར་པོ། ཕྲག་པ་གཉིས་སུ་ཉི་མ་ལ་དཔལ་ཧེ་རུ་ཀའི་ངོ་བོ་བོ་ཥཊ་ཧེ་ནག་པོ། མིག་གཉིས་སུ་ཉི་མ་ལ་རྡོ་རྗེ་ཉི་མའི་ངོ་བོ་ཧཱུཾ་
ཧཱུཾ་ཧོ་དམར་སེར། དཔྲལ་བར་ཉི་མ་ལ་ཡན་ལག་ཐམས་ཅད་ཀྱི་ལུས་དབང་གི་རང་བཞིན་རྟ་མཆོག་གི་ངོ་བོ་ཕཊ་ཧཾ་ལྗང་གུ །གཙོ་མོའི་ལྟེ་བར་ཉི་མ་ལ་རྡོ་རྗེ་ཕག་མོའི་ངོ་བོ་ཨོཾ་བཾ་དམར་པོ། སྙིང་གར་ཉི་མ་ལ་གཤིན་རྗེ་མའི་ངོ་བོ་ཧཾ་ཡོཾ་སྔོན་པོ། མགྲིན་པར་ཟླ་བ་ལ་རྨོངས་བྱེད་མའི་ངོ་བོ་ཧྲཱིཾ་མོཾ་དཀར་པོ། མགོ་བོར་ཉི་མ་ལ་སྐྱོད་བྱེད་མའི་ངོ་བོ་ཧྲཾི་ཧྲཾི་སེར་པོ། སྤྱི་གཙུག་ཏུ་ཉི་མ་ལ་སྐྲག་བྱེད་མའི་ངོ་བོ་ཧཱུཾ་ཧཱུཾ་ལྗང་གུ །དཔྲལ་བར་ཉི་མ་ལ་ཡན་ལག་ཐམས་ཅད་ཀྱི་ལུས་དབང་གི་རང་བཞིན་ཙཎྜི་ཀའི་ངོ་བོ་ཕཊ་ཕཊ་དུད་ཁས་མཚན་པར་གྱུར། ལྷ་རྣམས་ཀྱི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿ དམར་པོ། ཐུགས་ཀར་ཉི་མ་ལ་ཧཱུཾ་སྔོན་པོ། ཕཻཾ། རང་གི་ཐུགས་ཀའི་ཧཱུཾ་གི་འོད་ཟེར་གྱིས་བསྒོམས་པ་དང་འདྲ་བའི་ཡེ་ཤེས་པ་དབང་གི་ལྷ་མཆོད་པའི་ལྷ་མོ་དང་བཅས་པ་སྤྱན་དྲངས། འོད་ཟེར་སྙིང་གར་ཐིམ། ཨོཾ་ཁཎྜ་རོ་ཧི་ཧུཾ་ཧཱུཾ་ཕཊ། ཨོཾ་ཨརྒྷཾ་པྲ་ཏཱིཙྪ་ཨཱཿ ཧཱུཾ། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། ཨོཾ་ཡོ་ག་ཤུདྡྷཿ སརྦ་དྷརྨྨཱ་ཡོ་ག་ཤུདྡྷོ྅ཧཾ། ཨོཾ་ཨརྒྷཾ་པྲ་ཏཱིཙྪ་ཨཱཿ ཧཱུཾ། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་དབང་བསྐུར་བས་གཙོ་བོ་ལ་རྡོར་སེམས། ཕག་མོ་ལ་མི་བསྐྱོད་པ། མཁའ་འགྲོ་མ་སོགས་བཞི་ལ་རིན་འབྱུང༌། ཐུགས་འཁོར་གྱི་ལྷ་རྣམས་ལ་མི་བསྐྱོད་པ། གསུང་འཁོར་གྱི་ལྷ་རྣམས་ལ་སྣང་མཐའ། སྐུ་འཁོར་གྱི་ལྷ་རྣམས་ལ་རྣམ་སྣང༌། དམ་ཚིག་གི་འཁོར་ལོའི་ལྷ་
རྣམས་ལ་དོན་གྲུབ་ཀྱིས་དབུ་བརྒྱན་ཅིང་དབང་གི་ལྷ་རྣམས་རང་ལ་ཐིམ་པར་གྱུར། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་དང༌། ཨོཾ་བཛྲ་ཝི་ཎེ་ཧཱུཾ་ཧཱུཾ་ཕཊ། ཨོཾ་བཛྲ་ཝཾ་ཤེ་ཧཱུཾ་ཧཱུཾ་ཕཊ། ཨོཾ་བཛྲ་མྲྀ་ཏཾ་གེ་ཧཱུཾ་ཧཱུཾ་ཕཊ། ཨོཾ་བཛྲ་མུ་ར་ཛེ་ཧཱུཾ་ཧཱུཾ་ཕཊ། ཨོཾ་བཛྲ་ཧ་སྱ་ཧཱུཾ་ཧཱུཾ་ཕཊ། ཨོཾ་བཛྲ་ལཱ་སྱ་ཧཱུཾ་ཧཱུཾ་ཕཊ། ཨོཾ་བཛྲ་གཱིརྟི་ཧཱུཾ་ཧཱུཾ་ཕཊ། ཨོཾ་བཛྲ་ནྲྀ་ཏྱ་ཧཱུཾ་ཧཱུཾ་ཕཊ། ཨོཾ་བཛྲ་པུཥྤེ་ཧཱུཾ་ཧཱུཾ་ཕཊ། ཨོཾ་བཛྲ་དྷཱུ་པེ་ཧཱུཾ་ཧཱུཾ་ཕཊ། ཨོཾ་བཛྲ་དཱི་པེ་ཧཱུཾ་ཧཱུཾ་ཕཊ། ཨོཾ་བཛྲ་གནྡྷེ་ཧཱུཾ་ཧཱུཾ་ཕཊ། ཨོཾ་རཱུ་པ་བཛྲཱི་ཧཱུཾ་ཧཱུཾ་ཕཊ། ཨོཾ་ར་ས་བཛྲཱི་ཧཱུཾ་ཧཱུཾ་ཕཊ། ཨོཾ་སྤརྴ་བཛྲཱི་ཧཱུཾ་ཧཱུཾ་ཕཊ། ཨོཾ་དྷརྨཱ་དྷཱ་ཏུ་བཛྲཱི་ཧཱུཾ་ཧཱུཾ་ཕཊ། ཅེས་རིག་མ་བཅུ་དྲུག་གིས་མཆོད། བསྡུ་ན། ཤཔྟའི་རྗེས་སུ་ཨོཾ་ཨཱཿ བཛྲ་ཨཱ་དརྴེ་ཧཱུཾ། དེ་བཞིན་དུ། ཝི་ཎེ། གནྡྷེ། ར་ས། སྤརྴེ། དྷརྨེ། ཞེས་རིག་མ་དྲུག་གིས་མཆོད། དེ་ནས། དྲིན་ཅན་རྩ་བའི་བླ་མ་རིན་པོ་ཆེ། རྒྱལ་བ་རྡོ་རྗེ་འཆང༌། ཡེ་ཤེས་ཀྱི་མཁའ་འགྲོ་མ། རྡོ་རྗེ་དྲིལ་བུ་པ། རུས་སྦལ་ཞབས། ཛ་ལནྡྷ་ར་པ། ནག་པོ་སྤྱོད་པ། གུ་ཧྱ་པ། རྣམ་རྒྱལ་ཞབས། ཏཻ་ལོ་པ། ནཱ་རོ་པ་ལ་སོགས་བརྒྱུད་པའི་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཿ ཧཱུཾ། བཅོམ་ལྡན་འདས་དཔལ་འཁོར་ལོ་བདེ་མཆོག་གི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿ ཧཱུཾ། གཞན་ཡང་ཆོས་སྐྱོང་སྲུང་མ་ལ་སོགས་པ་རྣམས་ཀྱི་ཞལ་དུ་ཨོཾ་ཨཱཿ ཧཱུཾ། རང་གི་ལྕེ་ལ་བདུད་རྩི་བཞག་ལ། ཨོཾ་ཨ་མྲྀ་ཏ་ཨཱཿ ཧཱུཾ། མགྲོན་ཐམས་ཅད་བདུད་རྩིས་ཚིམ་པར་གྱུར། ཡབ་ཡུམ་སྙོམས་པར་ཞུགས་པས་དགའ་བ་བཞི་དང་ཁྱད་པར་ལྷན་སྐྱེས་ཀྱི་བདེ་བ་ཆེན་པོས་རང་དང་ལྷ་ཐམས་ཅད་ཀྱིས་བདེ་བ་ཆེན་པོ་ཉམས་
སུ་མྱོང་ཞིང༌། བདེ་བ་དེ་དང་སྟོང་པ་ཉིད་རོ་གཅིག་ཏུ་གྱུར་པའི་དེ་ཁོ་ན་ཉིད་ཀྱི་མཆོད་པས་དགྱེས་པར་གྱུར། དེ་ནས་ཡབ་ཡུམ་གྱི་སྙིང་པོ་ཉེ་སྙིང་གཉིས་གཉིས་དང་མཁའ་འགྲོ་མ་བཞི་སོགས་ཀྱི་སྔགས་བརྗོད་པས་སྔགས་མཆོད་བྱ། སྤྲོ་ན་སྔགས་དང་བོད་སྐད་ཀྱི་རྐང་བརྒྱད་ཅི་རིགས་པས་བསྟོད་ཅིང༌། བསྡུ་ན། ཧེ་རུ་ཀ་དཔལ་དཔའ་བོ་ཆེ། །རྣམ་དག་རྡོ་རྗེའི་དབང་ཕྱུག་དང༌། །རྗེས་ཆགས་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་དེ་ལ་འདུད། །གནས་དང་ཉེ་བའི་གནས་དང་ཞིང༌། །འདུ་དང་དུར་ཁྲོད་གནས་པ་ཡི། །དཔའ་བོ་དཔའ་མོའི་དབང་ཕྱུག་མ། །ཀུན་ལ་བདག་ནི་ཕྱག་འཚལ་ལོ། །ཞེས་པས་བསྟོད། ཕྲེང་བ་མི་དམིགས་པ་སྟོང་པའི་ངང་ལས་སྐད་ཅིག་གིས་གསུང་རྡོ་རྗེའི་ངོ་བོར་གྱུར། ཡབ་ཡུམ་གྱི་ཐུགས་ཀར་ཉི་གདན་ལ་ཧཱུཾ་དང་བཾ་གྱི་མཐར་སྔགས་ཀྱིས་བསྐོར་བའི་དབུས་ཀྱི་ཡི་གེ་ལས་འཁོར་ལོ་ལྔའི་ལྷ་ཚོགས་སྤྲོས། འགྲོ་བའི་དོན་བྱས་དབུས་ཀྱི་ཡི་གེ་ལ་ཐིམ་པར་གྱུར་པར་བསམས་ལ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧུཾ་ཧཱུཾ་ཕཊ། ཌཱ་ཀཱི་ནཱི་ཛཱ་ལ་ཤཾ་བ་རཾ་སྭཱཧཱ། གཙོ་བོའི་སྙིང་པོའོ། །ཨོཾ་ཧྲཱིཿ ཧ་ཧ་ཧུཾ་ཧཱུཾ་ཕཊ། ཉེ་སྙིང་ངོ་། །ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་ཕཊ་སྭཱཧཱ། ཡུམ་གྱི་སྙིང་པོའོ། །ཨོཾ་སརྦ་བུདྡྷ་ཌཱ་ཀཱི་ནཱི་ཡེ་བཛྲ་ཝ་རྞ་ནི་ཡེ་ཧུཾ་ཧཱུཾ་ཕཊ་སྭཱཧཱ། ཉེ་སྙིང་ངོ་། །དེ་ནས། ཨོཾ་ཌཱ་ཀཱི་ནཱི་ཡེ་ཧུཾ་ཧཱུཾ་ཕཊ། ཅེས་པ་ནས། ཨོཾ་ཡ་མ་མ་ཐ་ནཱི་ཧུཾ་ཧཱུཾ་ཕཊ། ཅེས་པའི་བར་འཁོར་གྱི་སྔགས་རྒྱས་པའམ། ཤིན་ཏུ་བསྡུས་པ་བྱེད་ན། ཨོཾ་རྀཾ་རཱྀཾ། ལྀཾ་ལཱྀཾ། ཀཾ་ཁཾ་གཾ་གྷཾ་ངཾ༌། ཙཾ་ཚཾ་ཛཾ་ཛྷཾ་ཉཾ། ཊཾ་ཋཾ་ཌཾ་ཌྷཾ་ཎཾ། ཏཾ་ཐཾ་དཾ་དྷཾ་ནཾ། པཾ་ཕཾ་བཾ་བྷཾ། ཡཾ་རཾ་ལཾ་ཝཾ། ཤཾ་ཥཾ་སཾ་ཧཾ་ཧཱུཾ་ཧཱུཾ་ཕཊ། ཅེས་ཀྱང་རུང་ངོ༌། །དེ་ནས། ཨོཾ་ཨོཾ་ཧ། ན་མ་ཧི། སྭཱཧཱ་ཧུ། བོ་ཥཊ་ཧེ། ཧཱུཾ་ཧཱུཾ་ཧོ། ཕཊ་ཧཾ་ཧུཾ་ཧུཾ་ཕཊ། ཅེས་དང༌། ཨོཾ་ཨོཾ་བཾ། ཧཾ་ཡོཾ། ཧྲཱིཾ་མོཾ། ཧྲིཾ་ཧྲིཾ།
ཧཱུཾ་ཧཱུཾ། ཕཊ་ཕཊ་ཧུཾ་ཧཱུཾ་ཕཊ། ཅེས་གོ་ཆའི་སྔགས་བཟླ། སྤྲོ་ན་ཡབ་ཡུམ་གྱི་ཕྲེང་སྔགས་གཉིས་ཀྱང་འདོན། དེ་ནས་ཧེ་རུ་ཀའི་ཡིག་བརྒྱ་བཟླས་ལ། གཏོར་མ་ནང་མཆོད་ལྟར་བྱིན་གྱིས་བརླབས་ནས། ཕཻཾ། རང་གི་ཐུགས་ཀར་ཉི་གདན་ལ་གནས་པའི་ཧཱུཾ་ཡིག་གི་འོད་ཟེར་གྱིས་དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང་ཞིང་སྐྱོང་ལ་སོགས་པ་འཁོར་དང་བཅས་པ་ཡོངས་སུ་རྫོགས་པའི་དཀྱིལ་འཁོར་མདུན་གྱི་ནམ་མཁར་སྤྱན་དྲངས། ཆུ་གཉིས་ཉེར་སྤྱོད་རོལ་མོས་མཆོད། ལྷ་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་འཁོད་པའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། ཨོཾ་བཛྲ་ཨ་ར་ལི་ཧོཿ ཛཿ ཧཱུཾ་བཾ་ཧོཿ བཛྲ་ཌཱ་ཀཱི་ནྱ་ས་མ་ཡ་སྟྭཾ། ཏྲི་ཤྱ་ཧོཿ ཚར་གཅིག་གིས་གཙོ་བོ། ཚར་གཉིས་པས་ཡུམ། ཚར་གསུམ་པས་རྣལ་འབྱོར་མ་བཞི་ལ་འབུལ། ཨོཾ་ཀ་ར་སོགས་རྩ་སྔགས་ཚར་གཅིག་གིས་འཁོར་ལོ་གསུམ་གྱི་ལྷ་ཚོགས་དང༌། བཛྲ་ཨ་ར་ལི་སོགས་ཚར་གཉིས་ཀྱིས་སྒོ་མ་བཞི་དང་མཚམས་མ་བཞི་ལ་དབུལ། ཨོཾ་སརྦྦ་ཏ་ཐཱ་ག་ཏ་ཤྲཱི་ཙཀྲ་སཾ་བ་ར་མཎྜ་ལ་ཝཱི་ར་ཡོ་གི་ནཱི་བཛྲ་ཨརྒྷཾ་པྲ་ཏཱིཙྪ་ཨཱཿ ཧཱུཾ་སྭཱཧཱ། ནས། ཤཔྟའི་བར་གྱིས་མཆོད། དེ་ལ། ཨོཾ་ཨཱཿ ཧཱུཾ། བཏགས་པས་ནང་མཆོད་དབུལ། རྐང་བརྒྱད་ཀྱིས་བསྟོད། སྲིད་པ་དང་མཉམ་ཞི་བ་ཆགས་བཅོམ་ཀུན་ཏུ་རྟོག་པ་འཇོམས། །ཁྱོད་ནི་དངོས་པོ་མཐའ་དག་མཁའ་ལྟར་གཟིགས་པ་དང་ལྡན་པ། །མགོན་པོ་ཤིན་ཏུ་བརྩེ་བ་ལྕི་བའི་ཆུས་བརླན་ཐུགས་ཀྱི་ཆུས། །མཛོད་ཅིག་ལྷ་མོ་རྣམས་ཀྱིས་བདག་ལ་ཤིན་ཏུ་རྗེས་བརྩེར་མཛོད། །ཅེས་པས་གསོལ་བ་གདབ། དེ་ནས། དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང་ཞིང་
སྐྱོང་ཀླུ་ལ་སོགས་པ་ཐམས་ཅད་སྐད་ཅིག་གིས་འོད་གསལ་དུ་བཅུག་པ་ལས་བདེ་མཆོག་གི་ལྷ་ཡབ་ཡུམ་གྱི་སྐུར་བཞེངས་པའི་མགྲོན་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་འཁོད་པའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། ཨོཾ་ཁ་ཁ་ནས་ཧཱུཾ་ཧཱུཾ་ཕཊ་སྭཱཧཱ། ལན་གཉིས་ཀྱིས་ཕྱོགས་གཡོན་དང་མཚམས་གཡས་སྐོར་དུ་གནས་པ་ལ་དབུལ། ཨོཾ་ཨརྒྷཾ་པྲ་ཏཱིཙྪ་སྭཱཧཱ། ཨོཾ་པཱདྱཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿ ཧཱུཾ་སྭཱཧཱ། ནས། ཤཔྟ་ཨཱཿ ཧཱུཾ་སྭཱཧཱ། ཕྱོགས་སྐྱོང་དང་ཞིང་སྐྱོང་ལ་སོགས་པ་རྣམས་ཀྱི་ཞལ་དུ་ཨོཾ་ཨཱཿ ཧཱུཾ། ལྷ་ཡི་ཚོགས་རྣམས་མ་ལུས་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཡིག་བརྒྱ་བཟླ། ཨོཾ་ཡོ་ག་ཤུདྡྷཿ སརྦ་དྷརྨཱ་ཡོ་ག་ཤུདྡྷོ྅ཧཾ། ཨོཾ་བཛྲ་མུཿ འཇིག་རྟེན་པ་རྣམས་རང་གནས་སུ་གཤེགས་ཤིང༌། དཀྱིལ་འཁོར་གྱི་འཁོར་ལོ་བདག་ཉིད་ལ་ཐིམ་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྟེན་དང་བརྟེན་པའི་དཀྱིལ་འཁོར་རྣམས་སྣང་བར་བྱས་ཏེ་འོད་དུ་གྱུར་པས། སྲུང་འཁོར་དུར་ཁྲོད་དང་བཅས་པ་གཞལ་ཡས་ཁང་ལ་ཐིམ། གཞལ་ཡས་ཁང་གཙོ་བོ་ཡབ་ཡུམ་ལ་ཐིམ། ལུས་དཀྱིལ་གྱི་ལྷ་རྣམས་རང་རང་གི་གནས་སུ་ཐིམ། གཞིའི་ཧེ་རུ་ཀ་ཡབ་ཡུམ་ཧཱུཾ་ཡིག་ལ་ཐིམ། ཧཱུཾ་ཡིག་ཡོངས་སུ་གྱུར་པ་ལས་ཧེ་རུ་ཀ་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་ཡུམ་དང་བཅས་པར་གྱུར་པའི་ཐུགས་ཀར་ཟླ་བ་ལ་རྡོ་རྗེ་སེམས་དཔའི་ངོ་བོ་ཨོཾ་ཧ་དཀར་པོ། ནས། ཕཊ་ཕཊ་དུད་ཁ་རྣམས་ཀྱིས་མཚན་པར་གྱུར། སྤྱི་བོ་ལ་སོགས་པའི་གནས་ཉེར་བཞིར་ཉི་གདན་ལ་
པཱུ་ཛཱ་ནས། ཀུ་རྣམས་ཐིག་ལེས་བརྒྱན་པར་གྱུར། ཨོཾ་སུམྦྷ་ནི་སུམྦྷ་སོགས་ཞལ་བཞི་པའི་སྔགས་བརྗོད། སྲིད་པ་གསུམ་འབར་སྐུ་ནི་རྗེས་ཆགས་དུལ་བར་ལྡན། །འོད་ཟེར་སྔོན་པོ་སྟོང་ལྡན་ཉི་མ་བརྒྱ་སྟོང་ལྡན། །རྣམ་མང་སྐུ་དང་ཆ་ལུགས་རྗེས་ཆགས་སེམས་དཔར་ལྡན། །ཧེ་རུ་ཀ་དཔལ་དེ་དང་ལྷན་ཅིག་གར་བྱེད་ཤོག །ལྷ་མོ་ཚད་མ་དམ་ཚིག་ཚད་མ་དང༌། །དེས་བརྗོད་གསུང་ཡང་མཆོག་ཏུ་ཚད་མ་སྟེ། །བདེན་པ་འདི་དག་གིས་ནི་ལྷ་མོ་རྣམས། །བདག་ཅག་རྗེས་སུ་འཛིན་པའི་རྒྱུར་གྱུར་ཅིག །སེམས་ཅན་ཀུན་གྱི་དོན་གྱི་ཕྱིར། །བདག་ནི་ཧེ་རུ་ཀར་གྱུར་ནས། །སེམས་ཅན་ཐམས་ཅད་ཧེ་རུ་ཀའི། །གོ་འཕང་མཆོག་ལ་འགོད་པར་ཤོག །ཅེས་བསྔོ་སྨོན་དང་བཀྲ་ཤིས་ཀྱིས་མཐའ་བརྒྱན་པར་བྱའོ། །ཐུན་མཚམས་སུ་གང་སྣང་ཐམས་ཅད་ཧེ་རུ་ཀའི་ཐུགས་བདེ་སྟོང་གི་རྣམ་རོལ་ཏུ་བལྟ་ཞིང་སྤྱོད་ལམ་ཀུན་ཕྱག་རྒྱ་དང་སྔགས་སུ་མོས་པས་ཚོགས་བདེ་བླག་ཏུ་རྫོགས་པར་བྱ། ཟས་ལ་སྤྱོད་ཚེ། ལག་པ་གཡས་སུ་སྣོད་རྣམ་སྣང་གི་ངོ་བོ་ཧོ་དཀར་པོ་ལས་སྐྱེས་པའི་འཁོར་ལོའི་སྟེང་ནས་གཡོན་པར་སྣང་མཐའི་རང་བཞིན་ཧ་དམར་པོ་ལས་སྐྱེས་པའི་པདྨས་བཀབ་པའི་ནང་གི་ཟས་ཀྱི་སྟེང་དུ་ཉི་མ་ལ་གནས་པའི་ཧྲཱིཿ སྔོན་པོ་མི་བསྐྱོད་པའི་རང་བཞིན་གྱིས་མཚན་པར་གྱུར། ཧ་ཧོ་ཧྲཱིཿ གསུམ། ཁ་དོག་དྲི་ནུས་ཀྱི་སྐྱོན་སྦྱངས་ནས་བདུད་རྩིར་བསྒྱུར། ཧྲཱིཿའི་གཡས་གཡོན་དང་མདུན་དུ་ཨོཾ་ཨཱཿ ཧཱུཾ་གིས་མཚན་པ་ཞུ་བས་རྒྱ་ཆེར་སྤེལ་ཞིང་བྱིན་གྱིས་བརླབ་པར་གྱུར། ཨོཾ་ཨཱཿ ཧཱུཾ། ལན་གསུམ་བརྗོད། ཕུད་ཀྱིས་བླ་མ་ལྷ་ལ་མཆོད་ཅིང་བདེ་སྟོང་གི་མོས་པ་བརྟན་པོ་བྱ། ཨོཾ་ཡོ་ག་ཤུདྡྷཿ སརྦྦ་དྷརྨྨཱ་ཡོ་ག་ཤུདྡྷོ྅ཧཾ། ལྕེ་
ཧཱུཾ་དཀར་པོ་ལས་བྱུང་བའི་རྡོ་རྗེའི་འོད་ཀྱི་སྦུ་གུས་དྲངས་ཏེ་སྙིང་གའི་བདེ་ཆེན་འཁོར་ལོའི་ལྷ་ལ་ཕུལ་བས་ཚིམ་པར་བསམས་པ་ནང་གི་སྦྱིན་སྲེག་གི་ཚུལ་དུ་སྤྱོད་པ་ནི་དུས་རྒྱུན་དུ་བྱེད་དགོས་ལ། འདིའི་རྩ་བཤད་ཀྱི་རྒྱུད་ལས་ཡར་ངོ་མར་ངོའི་ཚེས་བཅུ་ལ་ལག་མཆོད་དང་ཚོགས་འཁོར་སོགས་ཀྱིས་དཔའ་བོ་མཁའ་འགྲོ་རྣམས་མཉེས་པར་བྱེད་པར་གསུང་ཞིང༌། སློབ་དཔོན་དྲིལ་བུ་བའི་དགོངས་པའང་ཟས་ཀྱི་རྣལ་འབྱོར་དང་དཀྱུས་གཅིག་ཏུ་བྱེད་པ་འདི་ཡིན་པས། དེ་ལྟར་ན་བྱིན་རླབས་གོང་བཞིན་བྱས་པའི་འཕྲོར། གཡོན་པའི་སོར་མོ་རྣམས་རྩེ་བསྡུས་ནས། གཡས་པས་མཐེབ་སྲིན་གྱིས་ནང་མཆོད་བླངས་ཏེ་འབྲུ་གསུམ་གྱིས་གཡོན་པ་བསངས་ལ། ལག་པ་གཡོན་པའི་མཐེ་བོང་ལ་ཟླ་གདན། གཞན་བཞི་དང་སེན་མོ་བསྡུས་པར་ཉི་མའི་གདན་ལ་རྡོར་སེམས་སོགས་ཀྱི་ངོ་བོ་ཨོཾ་ཧ། ན་མ་ཧི། སྭཱཧཱ་ཧཱུཾ། བོ་ཥཊ་ཧེ། ཧཱུཾ་ཧཱུཾ་ཧོཿ ཕཊ་ཧཾ་རྣམས་དང༌། གཡོན་པའི་མཐིལ་དུ་པདྨ་དམར་པོ་འདབ་མ་ལྔ་པའི་ལྟེ་བ་དང༌། ཤར་ནས་གཡོན་སྐོར་གྱི་འདབ་མ་རྣམས་ལ་ཕག་མོ་སོགས་ཀྱི་ངོ་བོ་ཨོཾ་བཾ། ཧཾ་ཡོཾ། ཧྲཱིཾ་མོཾ། ཧྲཱིཾ་ཧྲཱིཾ། ཧཱུཾ་ཧཱུཾ། ཕཊ་ཕཊ་རྣམས་ཀྱིས་མཚན་པར་གྱུར། གཡོན་པའི་རྒྱབ་ཀྱི་བོལ་ལ་འཁོར་ལོ་གསུམ་གྱི་ལྷ་ཚོགས་གཟུགས་བརྙན་བཞིན་དུ་གསལ་ཞིང༌། ལག་པའི་ས་ཆུ་མེ་རླུང་ནམ་མཁའི་ཁམས་རྣམས་ཀྱང་ལྟུང་བྱེད་མ་སོགས་ཀྱི་ངོ་བོར་གྱུར། གོ་ཆའི་སྔགས་དང་རྀཾ་རྀཾ་སོགས་བརྗོད་ཅིང་ནང་མཆོད་གཡོན་པའི་ཕྱི་ནང་ཀུན་ཏུ་བྱུགས། ཟས་རྣམས་དེའི་ལྷ་ཚོགས་ཀུན་ལ་ཕུལ་བར་མོས་ཏེ་འབྲུ་གསུམ་དང་རྐང་བརྒྱད་ཀྱི་སྔགས་བརྗོད། ཨོཾ་ཨརྒྷཾ་སོགས་ཀྱིས་ཆུ་གཉིས་ཉེར་སྤྱོད་རོལ་མོ་རྣམས་དང༌། གོ་ཆའི་སྔགས་ལ་འབྲུ་གསུམ་བཏགས་པས་ནང་མཆོད་དབུལ། ཡིག་བརྒྱའི་ལྷག་ཆད་བསྐང༌། འདོད་དོན་ལ་གསོལ་བ་གདབ། ལག་པར་
འགོས་པའི་རྫས་རྣམས་བསྡུས་ཏེ། ཧཱུཾ་ཨཱཿ ཨོཾ། ཞེས་བརྗོད་ཅིང་གཡོན་པའི་སྲིན་ལག་གིས་སྙིང་ག་དང་ལྕེ་དང་མགོར་བྱུགས་པས། ལག་པའི་ལྷ་རྣམས་སྤྱི་བོ་ནས་ཞུགས་ཏེ་རང་ལ་ཐིམ་པར་བསམ་མོ། །ལག་མཆོད་ཀྱི་རྫས་དེའི་ཕྱེད་ཀ་ཟས་ལ་བསྲེ། ཕྱེད་སྣོད་དུ་བསགས་ན་ལོངས་སྤྱོད་འཕེལ་བ་དང༌། ལུས་ལ་བྱུགས་ན་སྲུང་བའི་མཆོག་ཏུ་འགྱུར་རོ། །ཚོགས་འཁོར་བྱེད་ན་རྒྱས་པའམ། ཤིན་ཏུ་བསྡུས་པ་ཐུའུ་བཀྭན་རིན་པོ་ཆེའི་གསུང་བཞིན་བྱ། ཉལ་ལྡང་ཁྲུས་ཀྱི་རྣལ་འབྱོར་སོགས་ཀྱང་ཇི་ལྟ་བ་བཞིན་ལག་ལེན་དུ་བསྟར་ཏེ་ཡང་དག་པའི་ལམ་བཟང་འདི་ལ་བག་ཆགས་ཐེབས་ངེས་པས་དལ་འབྱོར་དོན་དང་ལྡན་པར་བྱའོ། །ཞེས་པ་འདི་ནི་སུ་ཉིད་ཤོག་ནས་ཚུལ་འདི་ལ་མོས་བརྩོན་ལྷུར་བྱེད་ཅིང་ལྷག་བསམ་དང་རྣམ་དཔྱོད་ཕུལ་དུ་བྱུང་བའི་ཞབས་དྲུང་དཀོན་མཆོག་རྣམ་རྒྱལ་གྱིས་བསྐུལ་བའི་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་རྗེ་བླ་མའི་གསུང་དང༌། ཕྱི་ནང་གི་འདོར་ལེན་བྱེད་ཚུལ་བཟང་སྐྱོང་བའི་སློབ་མ་མཁས་དབང་ཆོས་ཀྱི་གྲགས་པས་གསལ་བར་ཕྱེ་བ་དང༌། དེའི་དོན་བཞིན་ལྕང་སྐྱ་ཐམས་ཅད་མཁྱེན་པ་གོང་མས་མཛད་པ་སོགས་ལ་གཞི་བྱས། རྒྱལ་བ་དབེན་ས་པ་དང་པཎ་ཆེན་ཆོས་རྒྱན་སོགས་ཀྱིས་བསྡུ་ཚུལ་དང་བསྟུན་ཏེ་བྲིས་པ་ཡིན་ཀྱང༌། རྗེའི་གསུང་གི་ཚིག་ཟུར་རེ་ལའང་དོན་དང་དགོས་པ་ཆེ་བས་ཐུབ་ན་ཅིས་ཀྱང་དེའི་སྟེང་ནས་བྱ་དགོས་ལ། བློ་ཧ་ཅང་རྟུལ་བས་མི་ཟིན་པ་དང༌། བྲེལ་བས་ལོང་མེད་བྱུང་ཚེ་འདིའི་སྟེང་ནས་ཉམས་ལེན་མ་ཆག་པ་བྱས་ན་ལེགས་སོ། །འདིའང་ལུས་ཅན་མཐའ་དག་དཔལ་འཁོར་ལོ་སྡོམ་པས་རྗེས་སུ་འཛིན་པའི་རྒྱུར་གྱུར་ཅིག །བདེ་ཆེན་བདེ་འཐུང་རྒྱས་པའི་ཞགས་པ་ཡིས། །བརྟན་གཡོའི་བརྟན་པ་འཕྲོག་པས་འཁོར་འདས་ཀུན། །གཅིག་ཅར་གཅིག་ཏུ་སྡོམ་མཛད་སམྦ་ར། །མྱུར་བ་མྱུར་བར་བདག་གི་རྒྱུད་ལ་ཞུགས། །སྙིང་དབུས་ལྷན་སྐྱེས་དཔྱིད་ཀྱི་ཧེ་རུ་ཀཿ །རྗེས་ཆགས་ཏིལླཀཿ དངོས་རྣལ་འབྱོར་
མར། །མི་འབྲལ་རྟག་ཏུ་མཉམ་སྦྱོར་དགའ་བའི་སྒྲས། །གནས་གསུམ་མཁའ་འགྲོ་མཐའ་དག་མགྲོན་དུ་ཁུགས། །དབང་བཞིའི་དྲོད་གཤེར་བཅུད་དུ་ལོན་པ་ཡིས། །རྩ་ཁམས་ས་བོན་ཡོངས་སྨིན་འཁོར་ལོ་ལྔའི། །ལྷ་ཚོགས་དགྱེས་དགུར་རྩེན་པའི་གར་སྟབས་ཀྱིས། །སྡིག་ལྟུང་ལས་ཉོན་བདུད་སྡེ་ཆམ་ལ་ཕོབས། །རབ་འབྱམས་ལྷ་ཚོགས་སྣང་བའི་ཆུ་འཛིན་འཕྲེང༌། །སྤྲོ་བསྡུའི་ཡུམ་ཆེན་ཤེས་རབ་དབྱིངས་ཀྱི་མཁར། །དགའ་བས་རོལ་པ་ཕྱི་ནང་མཁའ་སྤྱོད་ཀྱི། །རྡོ་རྗེའི་གྲོང་དུ་འཁྲིད་པའི་ས་མཁན་མཛོད། །ཇི་སྲིད་བཅོམ་ལྡན་དཔའ་བོའི་དབང་ཕྱུག་གིས། །རང་གི་གནས་སུ་འགོད་པ་དེ་སྲིད་བདག །འབྲལ་མེད་ཐུགས་ཀྱི་སྲས་སུ་ཡོངས་བཟུང་སྟེ། །སྲིད་ཞིའི་འཇིགས་པ་ཀུན་ལས་སྒྲོལ་གྱུར་ཅིག།། །།