འཇིགས་བྱེད་ལྷ་བཅུ་གསུམ་མའི་མངོན་རྟོགས་བསྡུས་པ།
དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་མངོན་རྟོགས་ཤིན་ཏུ་བསྡུས་པ་བཞུགས་སོ། །
བླ་མ་གཤིན་རྗེའི་གཤེད་ལ་ཕྱག་འཚལ་ལོ། །བཅུ་གསུམ་མའི་ཆོ་ག་རྒྱུན་འཁྱེར་ཆག་མེད་ལ་ཧ་ཅང་བྲེལ་བ་སོགས་ཀྱིས་མ་ལྕོགས་ཚེ་དམིགས་བསལ་མདོར་བསྡུས་ཙམ་བྱེད་ན། རང་ཉིད་འཇིགས་བྱེད་ཞལ་གཅིག་ཕྱག་གཉིས་གྲི་ཐོད་འཛིན་པ་ཡུམ་དང་བཅས་པ་སྐུར་བཞེངས་པར་གྱུར། ཧྲཱིཿ ཥྚྲཱིཿ ས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཡཾ་ལས་རླུང༌། རཾ་ལས་མེ། ཨཱཿ ལས་མི་མགོའི་སྒྱེད་པུ་གསུམ་གྱི་སྟེང་དུ་ཨཱཿ ལས་བྱུང་བའི་ཐོད་པའི་ནང་དུ་བྷྲུཾ་ཨཾ་ཛྲིཾ་ཁཾ་ཧཱུཾ་ལས་ཤ་ལྔ། ལཾ་མཱཾ་པཾ་ཏཱཾ་བཾ་ལས་བདུད་རྩི་ལྔ་རྣམས་རང་རང་གི་མིང་ཡིག་དང་པོས་མཚན་པའི་སྟེང་དུ་ཨོཾ་ཨཱཿ ཧཱུཾ་བརྩེགས་ཏེ་གནས་པ་ཞུ་བས། ཧཱུཾ་གིས་མ་དག་པའི་སྐྱོན་སྦྱངས། ཨཱཿ ས་འཆི་མེད་ཀྱི་བདུད་རྩིར་རྟོགས་པར་བྱས། ཨོཾ་གྱིས་མང་པོར་སྤེལ་བར་གྱུར། ཨོཾ་ཨཱཿ ཧཱུཾ། ལན་གསུམ་གྱིས་ནང་མཆོད་བྱིན་གྱིས་བརླབ། སྔོན་འགྲོའི་མཆོད་པ་བསངས་སྦྱངས། སྟོང་པའི་ངང་ལས་ཨཱཿ ལས་བྱུང་བའི་ཐོད་པའི་ནང་དུ་ཧཱུཾ་ཧཱུཾ་ཞུ་བ་ལས་བྱུང་བའི་ཆུ་གཉིས་ཉེར་སྤྱོད་རོལ་མོ་རྣམས་ཟག་པ་མེད་པའི་མཆོད་རྫས་ཁྱད་པར་གསུམ་དང་ལྡན་པར་གྱུར། ཨོཾ་ཨརྒྷཾ་ཨཱཿ ཧཱུཾ། ནས། ཨོཾ་ཤཔྟ་ཨཱཿ ཧཱུཾ་གི་བར་གྱིས་བྱིན་གྱིས་བརླབ། དེའི་གཏོར་མ་ནང་མཆོད་ལྟར་བྱིན་བརླབ་བྱ། རང་གི་ཐུགས་ཀའི་ཧཱུཾ་གི་འོད་ཟེར་གྱིས་ཕྱོགས་སྐྱོང་འཁོར་བཅས་བཀུག་སྟེ་འོད་གསལ་དུ་བཅུག་པ་ལས་རྡོ་རྗེ་འཇིགས་བྱེད་ཡུམ་དང་བཅས་པའི་སྐུར་བཞེངས་པའི་
ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ཨོཾ་ཡ་མ་རཱ་ཛ་སོགས་ཚར་གཅིག ཨོཾ་བྷུ་ཙ་ར་སོགས་ཚར་གསུམ། ཨོཾ་ད་ཤ་དཱིཀ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཨོཾ་ཨཱཿ ཧཱུཾ་བཏགས་ལ་ནང་མཆོད་དབུལ། ལས་གཤིན་ཕྱོགས་སྐྱོང་འཁོར་དང་བཅས་རྣམས་ཀྱིས། །གཤིན་རྗེའི་གཤེད་པོའི་སྤྱན་སྔར་ཁས་བླངས་བཞིན། །སྒྲུབ་པ་པོ་ཡི་འགལ་རྐྱེན་ཀུན་སེལ་ཞིང༌། །མཐུན་རྐྱེན་མ་ལུས་ལྷུན་གྱིས་གྲུབ་པར་མཛོད། །བདག་བསྐྱེད་མཆོད་པ་སྔར་ལྟར་བྱིན་གྱིས་བརླབ། རང་ལྷར་གསལ་བའི་ཐུགས་ཀར་པད་ཉི་ལ་གནས་པའི་ཧཱུཾ་གི་འོད་ཟེར་གྱིས་བླ་མ་རིགས་ཀྱི་བདག་པོར་བཞུགས་པའི་རྡོ་རྗེ་འཇིགས་བྱེད་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། བླ་མ་ཡི་དམ་ལྷ་ཚོགས་ལ། །མི་ཕྱེད་དད་པས་ཕྱག་འཚལ་ཞིང༌། །རབ་འབྱམས་མཆོད་ཚོགས་ཀུན་འབུལ་ན། །ཟག་མེད་བདེ་བས་ཚིམ་གྱུར་ཅིག །སྡིག་པ་རྣམས་ནི་བཤགས་པར་བྱ། །ཞེས་པ་ནས། མཆིས་ཀྱི་བར། །རིགས་ལྔ་སྤྱི་དང་སོ་སོ་ཡི། །དམ་ཚིག་སྡོམ་པ་མ་ལུས་གཟུང༌། །མ་བསྒྲལ་བ་རྣམས། ནས། མྱ་ངན་འདས་ལ་འགོད། །སེམས་ཅན་ཐམས་ཅད་སྡུག་བསྔལ་དང༌། །བྲལ་ཞིང་བདེ་ལ་གནས་པ་དང༌། །ཟག་མེད་དགའ་བ་མི་ཉམས་ཤིང༌། །ཆགས་སྡང་རྟོག་པ་ཞི་གྱུར་ཅིག །ཨོཾ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ།
ཨོཾ་ཤཱུ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། བདག་དང་སྣང་བ་ཐམས་ཅད་རང་བཞིན་མི་དམིགས་པའི་སྟོང་པ་ཉིད་དུ་གྱུར༌། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོ་དམར་རྒྱལ་མཚན་གྱིས་མཚན་པ། རཾ་ལས་མེའི་དཀྱིལ་འཁོར་འབར་བའི་འཕྲེང་བས་མཚན་པ། བཾ་ལས་ཆུའི་དཀྱིལ་འཁོར་བུམ་པས་མཚན་པ། ལཾ་ལས་སའི་དཀྱིལ་འཁོར་རྡོ་རྗེས་མཚན་པའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ། དེ་ལས་འོད་ཟེར་ཀུན་ཏུ་འཕྲོས་པས་རྡོ་རྗེའི་ས་གཞི། རྭ་བ། གུར། བླ་རེ། མེ་རི་དང་བཅས་པའི་སྲུང་བའི་འཁོར་ལོའི་ནང་དུ་རྡོ་རྗེ་སེམས་དཔའ་དཀར་པོ་ཞལ་གསུམ་ཕྱག་དྲུག་པ་ཡུམ་དང་བཅས་པ། དེ་ཞུ་བ་ལས་བྱུང་བའི་ཆོས་འབྱུང་གི་དབུས་སུ་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ་ལྟེ་བར་བྷྲུཾ་ལས་འཁོར་ལོ་བྷྲུཾ་གྱིས་མཚན་པ་ལས་རྣམ་སྣང་དཀར་པོ་ཞལ་གསུམ་ཕྱག་དྲུག་པ་ཡུམ་དང་བཅས་པ། དེ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ། དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་ནང་གི་རེའུ་མིག་དགུ་པོའི་དབུས་སུ་ཡཾ་ལས་རླུང་གི་དཀྱིལ་འཁོར། ཞེས་པ་ནས། གདན་ཟུང་རེ་རེ། གདན་དབུས་མའི་སྟེང་དུ། ཞེས་པ་ནས། བརྒྱངས་ཏེ་འཛིན་པ། ལྷག་མ་གཡས་ཀྱི་ཕྱག་བཅུ་དྲུག་ན་གྲི་གུག །བྷི་དྷི་པཱ་ལ། གཏུན་ཤིང༌། ཆུ་གྲི། ཀ་ཎ་ཡ། དགྲ་སྟ། མདུང༌། མདའ། ལྕགས་ཀྱུ། དབྱུག་ཏོ། ཁ་ཊྭཱཾ་ག།།འཁོར་ལོ། རྡོ་རྗེ་རྩེ་ལྔ་པ། རྡོ་རྗེ་ཐོ་བ། རལ་གྲི། ཅང་ཏེའུ་རྣམས་དང༌། གཡོན་གྱི་ལྷག་མ་བཅུ་དྲུག་ན་ཐོད་ཁྲག །ཚངས་མགོ །ཕུབ། རྐང་པ། ཞགས་པ།
གཞུ། རྒྱུ་མ། དྲིལ་བུ། ལག་པ། དུར་ཁྲོད་ཀྱི་རས། སྐྱེས་བུ་གསལ་ཤིང་ལ་བཙུགས་པ། མེ་ཐབ། ཐོད་ཚལ། སྡིགས་མཛུབ། འཕན་རྩེ་གསུམ་པ། རླུང་རས་རྣམས་འཛིན་པ། ཞབས་གཡས་པ་བརྒྱད་ཀྱིས་མི་ལ་སོགས་པའི་སྲོག་ཆགས་བརྒྱད་དང༌། གཡོན་པ་བརྒྱད་ཀྱིས་བྱ་རྒོད་ལ་སོགས་པའི་འདབ་ཆགས་བརྒྱད། ཚངས་པ་ལ་སོགས་པའི་ལྷ་ཆེན་པོ་རྣམས་མནན་ཏེ་མེ་དཔུང་འབར་བའི་ཀློང་དཀྱིལ་ན་བཞུགས་པ། རང་ཉིད་དམ་ཚིག་སེམས་དཔའི་ཐུགས་ཀར་ཟླ་གདན་ལ་ཡེ་ཤེས་སེམས་དཔའ་འཇམ་དཔལ་གཞོན་ནུར་གྱུར་པ་དང༌། དེའི་ཐུགས་ཀར་ཉི་མའི་དཀྱིལ་འཁོར་གྱི་དབུས་སུ་ཧཱུཾ་ཡིག་མཐིང་ག་འོད་ཟེར་ལྔ་འཕྲོ་བས་མཚན་པ། དེའི་པང་ན་ཡུམ་རྡོ་རྗེ་རོ་ལངས་མ་སྔོན་མོ་གཡས་གྲི་གུག་འཕྱར་ཞིང་གཡོན་ཐོད་ཁྲག་འཛིན་པས་ཡབ་ལ་འཁྱུད་པ། ཐོད་སྐམ་ལྔའི་དབུ་རྒྱན་དང༌། ཞེས་པ་ནས། ཟེའུ་འབྲུ་བུ་ག་ཕཊ་ཀྱིས་བཀག་པ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་གི་ཐུགས་ཀའི་ཧཱུཾ་ཡིག་གི་འོད་ཟེར་གྱི་ལྕགས་ཀྱུས་མཁའ་ཁྱབ་ཀྱི་སངས་རྒྱས་ཐམས་ཅད་བཀུག་ནས་རང་གི་ཞལ་དུ་བཅུག །ཐུགས་ཀར་འོད་དུ་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་ཞུགས་པའི་ཐིག་ལེ་ཆ་གཅིག་བྷྲུཾ་དང་དེ་ཡོངས་སུ་གྱུར་པ་ལས་གཞལ་ཡས་ཁང་གདན་དང་བཅས་པ། ཐིག་ལེ་ཆ་གཅིག་གདན་དེ་རྣམས་ཀྱི་སྟེང་དུ་ཆ་བཅུ་བདུན་དུ་གནས་པ་ལས། དབུས་སུ་ཧཱུཾ་ལས་རྡོ་རྗེ་ཞེས་པ་ནས། ཕྱག་མཚན་ས་བོན་གྱིས་མཚན་པ་རྣམས་ཡོངས་སུ་གྱུར་པ་ལས། ལྷ་བཅུ་གསུམ་གྱི་སྐུར་ཡོངས་སུ་རྫོགས་པ་ནི།
དབུས་སུ་དཔལ་རྡོ་རྗེ་འཇིགས་བྱེད་ཞལ་དགུ། ཕྱག་སོ་བཞི། ཞབས་བཅུ་དྲུག་པ། གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་མེ་དཔུང་རབ་ཏུ་འབར་བའི་ཀློང་དཀྱིལ་ན་ཡུམ་རྡོ་རྗེ་རོ་ལངས་མ་དང་མཉམ་པར་སྦྱོར་བའི་ཚུལ་གྱིས་བཞུགས་པ། ནང་གི་ཤར་དུ་གཏི་མུག་གཤིན་རྗེའི་གཤེད་དང༌། ཤར་ལྷོར་ཙ་རྩི་ཀ་དཀར་མོ་དཀར་སྔོ་དམར་བའི་ཞལ་གསུམ། ཕྱག་འོག་མ་བཞིའི་གཡས་འཁོར་ལོ་རལ་གྲི། གཡོན་ནོར་བུ་པདྨ་འཛིན་པ། ལྷོ་སེར་སྣ་གཤིན་རྗེའི་གཤེད་སེར་པོ། སེར་སྔོ་དཀར་བའི་ཞལ་གསུམ། གཡས་ནོར་བུ། རལ་གྲི། གཡོན་འཁོར་ལོ། པདྨ་འཛིན་པ། ལྷོ་ནུབ་ཏུ་ཕག་མོ་སྔོན་པོ་ཕག་གདོང་ཅན་སྔོ་དཀར་དམར་བའི་ཞལ་གསུམ། གཡས་རྡོ་རྗེ་རལ་གྲི། གཡོན་འཁོར་ལོ་པདྨ་འཛིན་པ། ནུབ་ཏུ་འདོད་ཆགས་གཤིན་རྗེའི་གཤེད་དང༌། ནུབ་བྱང་དུ་དབྱངས་ཅན་མ་དམར་མོ་དམར་སྔོ་དཀར་བའི་ཞལ་གསུམ། གཡས་པདྨ། རལ་གྲི། གཡོན་ནོར་བུ། འཁོར་ལོ་འཛིན་པ། བྱང་དུ་ཕྲག་དོག་གཤིན་རྗེའི་གཤེད་དང༌། བྱང་ཤར་དུ་གཽ་རཱི་ལྗང་གུ །ལྗང་སྔོ་དཀར་བའི་ཞལ་གསུམ། གཡས་རལ་གྲི། འཁོར་ལོ། གཡོན་ནོར་བུ་པདྨ་འཛིན་པ། ཤར་སྒོར་ཐོ་བ་གཤིན་རྗེའི་གཤེད་སྔོན་པོ་སྔོ་དཀར་དམར་བའི་ཞལ་གསུམ། གཡས་ཐོ་བ། རལ་གྲི། གཡོན་ནོར་བུ། པདྨ་འཛིན་པ། ལྷོ་སྒོར་དབྱུག་པ་གཤིན་རྗེའི་གཤེད་དཀར་པོ་དཀར་སྔོ་དམར་བའི་ཞལ་གསུམ། གཡས་དབྱུག་པ། རལ་གྲི། གཡོན་པདྨ་འཁོར་ལོ་འཛིན་པ། ནུབ་སྒོར་པདྨ་གཤིན་རྗེའི་གཤེད་དམར་པོ། དམར་སྔོ་
དཀར་བའི་ཞལ་གསུམ། གཡས་པདྨ། རལ་གྲི། གཡོན་འཁོར་ལོ། ནོར་བུ་འཛིན་པ། བྱང་སྒོར་རལ་གྲི་གཤིན་རྗེའི་གཤེད་ལྗང་གུ །ལྗང་སྔོ་དཀར་བའི་ཞལ་གསུམ། གཡས་རལ་གྲི། འཁོར་ལོ། གཡོན་ནོར་བུ། པདྨ་འཛིན་པ། ཡབ་བརྒྱད་ཀའི་རྩ་ཕྱག་གཉིས་ཀྱིས་གྲི་ཐོད་འཛིན་པས་ཡུམ་ལ་འཁྱུད་ཅིང༌། ཐོད་སྐམ་ལྔའི་དབུ་རྒྱན་དང༌། མགོ་རློན་ལྔ་བཅུའི་དོ་ཤལ་ཅན། ཡུམ་བཞིས་རྩ་ཕྱག་གཉིས་ཀྱིས་གྲི་ཐོད་འཛིན་པས་ཡབ་ལ་འཁྱུད་ཅིང༌། ཐོད་སྐམ་ལྔའི་དབུ་རྒྱན་དང༌། སྐམ་པོ་ལྔ་བཅུའི་དོ་ཤལ་ཅན། ཕྱིའི་གྲྭ་བཞིར་ཎ་ཡོ་ནི་རའི་ཡི་གེ་བཞི་ཡོངས་སུ་གྱུར་པ་ལས། མིའི་ཐོད་པ་བདུད་རྩིས་གང་བ་བཞིར་གྱུར། ཨོཾ་ཧྲཱིཿ ཥྚྲཱི་ཝི་ཀྲྀ་ཏཱ་ན་ན་ཧཱུཾ་ཕཊ། ཨོཾ་ཛི་ན་ཛིཀ་ཧཱུཾ་ཕཊ། ཨོཾ་རཏྣ་དྷྲིཀ་ཧཱུཾ་ཕཊ། ཨོཾ་ཨ་རོ་ལིཀ་ཧཱུཾ་ཕཊ། ཨོཾ་པྲཛྙཱ་དྷྲྀཀ་ཧཱུཾ་ཕཊ། གཤིན་རྗེའི་གཤེད་རིགས་ལྔ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་དུག་ལྔ་སྦྱངས། ཡེ་ཤེས་ལྔ་ལ་བཀོད། ཚུར་འདུས་གཙོ་བོ་རང་ཡབ་ཡུམ་ལ་ཐིམ་ཞིང༌། གཞན་བཞི་ཕྱོགས་བཞིར་འཁོད། ཨོཾ་མུངྒ་ར་དྷྲྀཀ་ཧཱུཾ་ཕཊ། ཨོཾ་དཎྜ་དྷྲྀཀ་ཧཱུཾ་ཕཊ། ཨོཾ་པདྨ་དྷྲྀཀ་ཧཱུཾ་ཕཊ། ཨོཾ་ཁཌྒ་དྷྲིཀ་ཧཱུཾ་ཕཊ། སྒོ་བ་བཞི་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་བདུད་བཞི་བཅོམ། དད་པའི་སྟོབས་སོགས་ལ་བཀོད། ཚུར་འདུས། སྒོ་བཞིར་འཁོད། ཨོཾ་
མོ་ཧ་ར་ཏི་ཧཱུཾ་ཕཊ། ཨོཾ་དྭེ་ཥ་ར་ཏི་ཧཱུཾ་ཕཊ། ཨོཾ་ར་ག་ར་ཏི་ཧཱུཾ་ཕཊ། ཨོཾ་བཛྲ་ར་ཏི་ཧཱུཾ་ཕཊ། ཡུམ་བཞི་བསྐུལ། དཔག་ཏུ་མེད་པར༌༝ ཡུམ་གྱི་བ་སྤུའི་སྒོ་ནས༌༝ ཕྱོགས་བཅུར་གཤེགས། སེམས་ཅན་རྣམས་ཀྱི་འབྱུང་བཞིའི་ཁམས་སྦྱངས། ཚད་མེད་བཞི་ལ་བཀོད། ཚུར་འདུས། གྲྭ་བཞིར་འཁོད། ཨོཾ་ཨཱཿ ཧཱུཾ། ཐོད་པ་བཞི་བསྐུལ། དཔག་ཏུ་མེད་པར་༝ ཡུམ་གྱི་བ་སྤུའི་སྒོ་ནས༌༝ ཕྱོགས་བཅུར་༝ ཡུལ་དྲུག་གི་དྲི་མ་སྦྱངས། སླར་འདུས། ཕྱིའི་གྲྭ་བཞིར་འཁོད། ཨོཾ་ཨཱཿ ཧཱུཾ། གཞལ་ཡས་༝ དཔག་ཏུ་མེད་པར་༝ ཡུམ་གྱི་༝ ཕྱོགས་བཅུར་༝ སྣོད་ཀྱི་སྐྱོན་སྦྱངས། བདེ་བ་ལ་གནས་པ་རྣམས་བརྟན་པར་བྱས། གཅིག་ཏུ་འདུས། དམ་ཚིག་གི་གཞལ་ཡས་ཁང་ལ་ཐིམ་པར་གྱུར། ཨོཾ་ཧྲཱིཿ ཥྚྲཱིཿ ༝ ཧཱུཾ་ཧཱུཾ་ཕཊ་ཕཊ་སརྦ་དུཥྚྲཾ་ཨིནྡྲ་ཨཱ་དི་ན་ས་པ་རཱི་ཝ་ར་ཨཱ་ཀརྵ་ཡ་ཛཿ རང་གི་སྙིང་ག་ནས་ཁྲོ་བོ་གཤིན་རྗེའི་གཤེད་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས་ཏེ། ཕྱོགས་སྐྱོང་འཁོར་དང་བཅས་པ་བཀུག་ནས་གཞལ་ཡས་ཁང་གི་ཕྱོགས་མཚམས་རྣམས་སུ་འཁོད་པར་གྱུར། ཨོཾ་ཧྲཱིཿ ཥྚྲཱིཿ༝ ཧཱུཾ་ཧཱུཾ་ཕཊ་ཕཊ་ཧཱུཾ་སརྦ་དུཥྚྲཾ༝ ཝཱ་རཱ་ན་ཀི་ལ་ཡ་ཧཱུཾ་ཕཊ་སྭཱཧཱ། རང་གི་སྙིང་ག་ནས་ཁྲོ་བོ་གཤིན་རྗེའི་གཤེད་ཕུར་བུ་ཐོགས་པ་དཔག་ཏུ་མེད་པ་སྤྲོས་ཏེ། ཕྱོགས་སྐྱོང་རྣམས་ལ་ཕུར་བུས་བཏབ་པས། གྲུབ་པའི་བཅུད་ལེན་གྲུབ་པ་བཞིན་དུ་འཇིགས་བྱེད་ཞལ་གཅིག་ཕྱག་གཉིས་པ་ཡུམ་དང་བཅས་པའི་སྐུར་བཞེངས་པར་གྱུར། གཙོ་འཁོར་ཐམས་ཅད་ཀྱི་མིག་གཉིས་སུ་ཀྵིཾ། རྣ་བ་གཉིས་སུ་ཛྲིཾ། སྣར་ཁཾ། ལྕེ་རྩ་བར་རཾ། དཔྲལ་བར་ཀཾ །ལྟེ་
བར་སཾ་རྣམས་དང༌། སྤྱི་བོར་སྐུ་རྡོ་རྗེའི་ངོ་བོ་ཨོཾ་དཀར་པོ། མགྲིན་པར་གསུང་རྡོ་རྗེའི་ངོ་བོ་ཨཱཿ དམར་པོ། ཐུགས་ཀར་ཐུགས་རྡོ་རྗེའི་ངོ་བོ་ཧཱུཾ་སྔོན་པོས་མཚན་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྡོ་རྗེ་གསུམ་གྱི་ལྷ་ཚོགས་སྤྱན་དྲངས། ཨོཾ་ཧྲཱིཿ ཥྚྲཱིཿ ཧཿ ཤཔྟ་ཨཱཿ ཧཱུཾ། འོད་ཟེར་གྱིས་བཀུག་སྟེ་ལྷ་རང་རང་གི་རྡོ་རྗེ་གསུམ་ལ་ཐིམ་པར་གྱུར། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱ་ཀ་༝ ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ༝ ཀོ྅ཧཾ། ཨོཾ་ཧྲཱིཿ ཧ་བྷོ་མཧཱ་ཀྲོ་དྷ་ཨ་གཙྪ་ཨ་གཙྪ་ཨསྨཱ་ད་པུ་ཛ་པྲ་ཏི་གྲྀ་ཧྣནྟུ་པྲ་སཱ་ད་མེཿ དྷཱི་མཱན་ཀུ་རུ་སྭཱཧཱ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས། རང་བཞིན་གྱི་གནས་ནས་རྡོ་རྗེ་འཇིགས་བྱེད་ལྷ་བཅུ་གསུམ་གྱི་དཀྱིལ་འཁོར་མདུན་གྱི་ནམ་མཁར་སྤྱན་དྲངས། ཨོཾ་ཧྲཱིཿ ཥྚྲཱིཿ ཝི་ཀྲི་ཏ༝ ཧཱུཾ་ཕཊ། ཨོཾ་ཧྲཱིཿ ཥྚྲཱིཿ ཧཿ ༝ ཤཔྟ་ཨཱ་ཧཱུཾ། ཨོཾ་མུ་ག་ར་ཛཿ ཨོཾ་དཎྜ་ཧཱུཾ། ཨོཾ་པདྨ་བཾ། ཨོཾ་ཁངྒ་ཧོཿ ༝ སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་ཕྱོགས་བཅུའི་རྒྱལ་བ་སྲས་བཅས་སྤྱན་དྲངས། ཨོཾ་ཧྲཱིཿ ཥྚྲཱིཿ ༝ ཤཔྟ་ཨཱཿ ཧཱུཾ། དེ་བཞིན་གཤེགས་པ་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཙ་རྩི་ཀ་ལ་སོགས་པའི་ལྷ་མོ་རྣམས་ཀྱིས་བདུད་རྩི་ལྔས་གང་བའི་བུམ་པས་སྤྱི་བོ་ནས་དབང་བསྐུར། ལུས་གང་དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ལས་མི་བསྐྱོད་པ་ལ་སོགས་པ་རང་རང་གི་རིགས་ཀྱི་བདག་པོས་དབུ་བརྒྱན་པར་གྱུར། ཨོཾ་ཡ་མཱནྟ་ཀ་ས་པ་རི་ཝཱ་ར་ཨརྒྷཾ་པྲཱ་ཏཱིཙྪ་ཧཱུཾ་སྭཱཧཱ །ཞེས་སོགས་ཀྱིས་མཆོད། ཨོཾ་མཆོད་
དོ་སྐྱབས་གསུམ་ཀུན་འདུས་ཀྱི་ངོ་བོ་དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ཨོཾ་ཨཱཿ ཧཱུཾ། བརྒྱུད་པའི་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱ་ཧཱུཾ། ཨོཾ་ཧྲཱིཿ ཥྚྲཱིཿ ནས། བཛྲ་ར་ཏི་ཧཱུཾ་ཕཊ། ཨོཾ་ཨཱ་ཿ ཧཱུཾ། ཡི་དམ་རྒྱུད་སྡེ་བཞིའི་ལྷ་ཚོགས་རྣམས་ཀྱི་ཞལ་དུ༌༝། དཔའ་བོ་མཁའ་འགྲོ་ཆོས་སྐྱོང་སྲུང་མ་རྣམས་ཀྱི༌༝། ཕྱོགས་སྐྱོང་ཞིང་སྐྱོང་གཞི་བདག་གཉུག་མར་གནས་པ་དང་སེམས་ཅན་ཐམས་ཅད་ལྷར་གྱུར་པ་རྣམས་ཀྱི་ཞལ་དུ་ཨོཾ་ཨཱཿ ཧཱུཾ། ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ཏེ་རང་གི་ལུས་ལ་ཞུགས་པར་གྱུར། ཨོཾ་ཧྲཱིཿ ཥྚྲཱིཿཝི་ཀྲྀ་༝ ཨོཾ་ཨཱཿ ཧཱུཾ། ཨོཾ་ཨ་མྲྀ་ཏ་སྭཱ་ད་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། མཆོད་པ་ཕྱི་མ་གཉིས་བྱེད་ན་གཞུང་ལྟར་བྱ། ཤིན་ཏུ་ཞི་བའི་ཚུལ་འཆང་འཇམ་པའི་དབྱངས། །དྲག་པོའི་སྟོབས་ཀྱིས་སྙེམས་པའི་གདུག་པ་ཅན། །འདུལ་ཕྱིར་ཤིན་ཏུ་ཁྲོས་པའི་སྐུར་བསྟན་པ། །རྡོ་རྗེ་འཇིགས་བྱེད་འཁོར་དང་བཅས་ལ་བསྟོད། །དེའང་གཏན་ལ་དབབ་པའི་གཞི། གསུང་རབ་ཡན་ལག་དགུའི་བརྗོད་བྱ་ནས། གོ་བར་བྱེད་པའོ། །ཕྲེང་བ་བསང་སྦྱངས། སྟོང་པའི་ངང་ལས་མེ་ལས་པདྨ་མེས་མཚན་པ་ལས་འདོད་ཆགས་གཤིན་རྗེའི་གཤེད་ཀྱི་སྐུར་གྱུར། རང་གི་ཐུགས་ཀའི་ཧཱུཾ་གི་འོད་ཟེར་གྱིས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། དབང་ལྷས་དབང་བསྐུར། འོད་དཔག་མེད་ཀྱིས་དབུ་བརྒྱན་པར་གྱུར། ཨོཾ་ཨཱ་རོ་ལིཀ་ཨརྒྷཾ་སོགས་ཀྱིས་མཆོད་པ་དང་ནང་མཆོད། འདོད་ཆགས་རྡོ་རྗེ་སོགས་ཀྱིས་བསྟོད། འདོད་ཆགས་གཤིན་རྗེའི་གཤེད་ཞུ་ནས་ཁྲག་འཛག་པའི་མི་མགོའི་ཕྲེང་བའི་རྣམ་པར་གྱུར། གཙོ་འཁོར་གྱི་སྔགས་རྣམས་བཟླ་ཞིང་
ཡིག་བརྒྱས་ལྷག་ཆད་བསྐང༌། གཏོང་མ་ནང་མཆོད་ལྟར་བྱིན་གྱིས་བརླབ། རང་གི་ཐུགས་ཀའི་ཧཱུཾ་གི་འོད་ཟེར་གྱིས་རྡོ་རྗེ་འཇིགས་བྱེད་འཁོར་དང་བཅས་པ་སྤྱན་དྲངས། མགྲོན་རྣམས་ཀྱི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་བསམས་ལ་གཙོ་འཁོར་སོ་སོར་རིམ་བཞིན་དབུལ། མཆོད་པ་ནང་མཆོད། བསྟོད་པ་རྣམས་གོང་བཞིན་བྱ། ཡ་མ་རཱ་ཛ་སོགས་ཀྱིས་ཕྱོགས་སྐྱོང་ལ་ཕུལ་ནས་འཕྲིན་ལས་བཅོལ། གཏང་རག་གི་མཆོད་བསྟོད་དང༌། རྣམ་དག་བསམ་པས་ཞེས་སོགས་ཀྱིས་བསྔོ་བ། ཡིག་བརྒྱས་ལྷག་ཆད་བསྐང་ཞིང་ནོངས་པ་བཟོད་གསོལ། ཉེར་བསྡུ། བཀྲ་ཤིས་ཀྱིས་མཐའ་བརྒྱན་པ་རྣམས་དཀྱུས་ལྟར་བྱའོ། །དགེ་འདིས་འཇམ་མགོན་བླ་མ་དང༌། །དབྱེར་མེད་གཤིན་རྗེའི་གཤེད་པོ་ཡིས། །ཚེ་རབས་ཀུན་ཏུ་རྗེས་གཟུང་སྟེ། །ཡང་དག་ལམ་བཟང་མྱུར་བགྲོད་ཤོག །དེའང་རྗེ་བླ་མའི་གསུང་གི་ཚིག་རེ་རེ་ལའང་རྒྱུད་དང་གྲུབ་ཆེན་གྱི་དགོངས་པའི་གནད་དང་དགོས་པ་ཁྱད་པར་ཅན་དུ་མ་ཡོད་པས་བསྡུ་བར་མི་ཕོད་པ་ལྟ་བུ་ཡིན་ཀྱང༌། གཏན་མ་ལྕོགས་ཚེ་མདོར་བསྡུས་ཙམ་རེ་ཡིན་ཀྱང་བྱས་ན་ལེགས་པར་དགོངས་ནས་དམ་པ་གོང་མ་རྣམས་ཀྱིས་འདི་འདྲ་མཛད་འདུག་པ་ལྟར་མདོར་བསྡུས་པའི་ངག་འདོན་ཙམ་ཞིག་བཀོད་པ་འདི་ནི། མཐོན་པའི་རིགས་སུ་འཁྲུངས་ཤིང་ལྷག་བསམ་རྣམ་དཔྱོད་ཀྱི་རྒྱན་དང་ལྡན་པ་བཱ་རིན་ཐོ་ཡོན་དཀོན་མཆོག་བསྟན་པའི་ཉི་མས་བསྐུལ་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།བཀྲ་ཤིས།།