འཕགས་མཆོག་འཇིག་རྟེན་དབང་ཕྱུག་གི་སྒོ་ནས་རིལ་སྒྲུབ་བྱེད་ཚུལ།
འཕགས་མཆོག་འཇིག་རྟེན་དབང་ཕྱུག་གི་སྒོ་ནས་རིལ་སྒྲུབ་བྱེད་ཚུལ་ཕན་བདེའི་མཆོག་སྦྱིན་ཞེས་བྱ་བ་བཞུགས་སོ། །
ན་མོ་གུ་རུ་ལོ་ཀེ་ཤྭ་རཱ་ཡ། སྒྲིབ་བྲལ་ནམ་མཁའི་དབྱིངས་ཀྱི་རྡོ་རྗེ་ནི། །རང་མདངས་འོད་ལྔའི་རིགས་སུ་ཤར་བ་ལས། །སོར་རྟོག་བདག་ཉིད་འཇིག་རྟེན་དབང་ཕྱུག་ལ། །བཏུད་ནས་དེ་ཡི་སྒྲུབ་ཐབས་མདོ་ཙམ་སྤེལ། །དེའང་དཔལ་ལྡན་འདུས་པའི་རྒྱུད་ཀྱི་དགོངས་པ་ལྟར་གཙོ་བོ་འཕོ་བའི་མན་ངག་གིས་འཇིག་རྟེན་དབང་ཕྱུག་གི་སྒོ་ནས་རིལ་སྒྲུབ་བྱ་ཚུལ་ནི། རྒྱ་བོད་ཀྱི་རྟེན་སྣ། བུམ་རྫས་ཉེར་ལྔ་སོགས་སྦྱར་བའི་རིལ་བུ་ལེགས་པར་དྲིལ་ཞིང་ན་བཟའ་གསོལ་ཏེ་བུམ་པར་བླུགས་ནས་པྲོག་ཞུ་དང་དར་དཔྱངས་སོགས་ཀྱིས་བརྒྱན། སྟེགས་མཐོན་པོར་བཞག་ལ་མཆོད་གཏོར་ལེགས་པར་བཤམ། སྐྱབས་སེམས་སྔོན་དུ་བཏང་སྟེ། ༈ རང་ཉིད་འཇིག་རྟེན་དབང་ཕྱུག་སྐུ་མདོག་དམར་པོ་དམར་ནག་དཀར་བའི་ཞལ་གསུམ་ཕྱག་དྲུག་གི་གཡོན་གྱི་དང་པོས་དྲིལ་བུ་དང་བཅས་པའི་པདྨ་དམར་པོའི་རྩ་བ་དཀུར་བརྟེན་ནས་འཛིན་ཅིང༌། གཡས་ཀྱི་དང་པོས་ཐུགས་ཀར་པདྨ་ཁ་འབྱེད་པར་མཛད་པ། ལྷག་མ་གཡས་རྡོ་རྗེ་འཁོར་ལོ། གཡོན་རིན་ཆེན་རལ་གྲི་འཛིན་པ། རང་དང་འདྲ་བའི་དྲི་རྡོ་རྗེ་མས་འཁྱུད་པ། གཉིས་ཀའང་རིན་པོ་ཆེའི་རྒྱན་བརྒྱད་ཀྱིས་བརྒྱན་པ། ཞེས་སོགས་རྡོར་དྲིལ་བྱིན་བརླབས། ནང་མཆོད་དང་སྔོན་འགྲོའི་མཆོད་གཏོར་བྱིན་རླབས་རྣམས་དཀྱུས་ལྟར་ལ། དེ་ནས། རང་གི་ཐུགས་ཀའི་ཨོཾ་དམར་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ཕྱོགས་སྐྱོང་བཅོ་ལྔ་འཁོར་དང་བཅས་པ་བཀུག་སྟེ། ཞེས་པ་ནས་རྡོར་སེམས་བསྒོམ་བཟླས་ཀྱི་བར་འདྲ། རང་ཉིད་འཇིག་རྟེན་དབང་ཕྱུག་ཏུ་གསལ་བའི་ཐུགས་ཀར་སྣ་ཚོགས་པདྨ་དང་ཉི་མ་ལ་གནས་པའི་ཨོཾ་དམར་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་རང་བཞིན་
གྱི་གནས་ནས་བླ་མ་དང་གཉིས་སུ་མེད་པའི་འཇིག་རྟེན་དབང་ཕྱུག་གི་དཀྱིལ་འཁོར་སྤྱན་དྲངས། འོད་ཟེར་རང་གི་སྙིང་གར་ཐིམ། ཞེས་པ་ནས། ཕྱོགས་བཅུ་ནས་རིགས་ལྔ་འཁོར་དང་བཅས་པ་དཔག་ཏུ་མེད་པ་སྤྱན་དྲངས། དེ་ལ་ཐིམ། དེ་ཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པའི་ལྟེ་བ་ལ་ཨོཾ་ཨཱཿ ཧཱུཾ་གིས་མཚན་པ། པདྨ་ཨཱཏྨ་ཀོ྅ཧཾ། མཚམས་འདིར་ཁ་ཅིག་དང་པོའི་མགོན་པོ་སྐུ་མདོག་དཀར་པོ་ཞིག་བསྐྱེད་ན་རུང་ཟེར་ཡང༌། ཀུན་མཁྱེན་འཇམ་དབྱངས་བཞད་པས་དེ་ལྟར་མ་གསུངས་པ་ནི་མཐའ་དཔྱོད་མྱུ་གུའི་དགོངས་པ་ཡིན་པས། དེས་ན་མཚམས་འདིར། པདྨ་ཡི་གེ་དང་བཅས་པ་ཡོངས་སུ་གྱུར་པ་ལས་རང་ཉིད་སྤྲུལ་སྐུ་འཇིག་རྟེན་དབང་ཕྱུག་དམར་པོ་དམར་ནག་དཀར་བའི་ཞལ་གསུམ་ཕྱག་དྲུག་གི་གཡོན་གྱི་དང་པོས་དྲིལ་བུ་དང་བཅས་པའི་པདྨ་དམར་པོའི་རྩ་བ་དཀུར་བརྟེན་ནས་འཛིན་ཅིང༌། གཡས་ཀྱི་དང་པོས་ཐུགས་ཀར་པདྨ་ཁ་འབྱེད་པར་མཛད་པ། ལྷག་མ་གཡས་རྡོ་རྗེ་འཁོར་ལོ། གཡོན་རིན་ཆེན་རལ་གྲི་འཛིན་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། རང་གི་ལུས་ཀྱི་མདུན་རྒྱབ་དང༌། ཞེས་སོགས་ལུས་དཀྱིལ་དང་སྐུ་གསུང་ཐུགས་བྱིན་རླབས་ཡན་ཆད་དཀྱུས་ལྟར་དང༌། རང་ཉིད་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་གསུམ་དབྱེར་མི་ཕྱེད་པའི་འཇིག་རྟེན་དབང་ཕྱུག་ཏུ་གྱུར། ཨོཾ་སརྦྦ་ཏ་ཐཱ་ག་ཏ་ཀཱ་ཡ་ཝཱཀྩི་ཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་ཉིད་དམ་ཚིག་སེམས་དཔའི་ཐུགས་ཀར་རང་འདྲའི་ཡེ་ཤེས་སེམས་དཔའ་སྐུ་མདོག་དམར་པོ་ཞལ་གཅིག་ཕྱག་
གཉིས་ཀྱིས་པདྨ་དང་དྲིལ་བུ་འཛིན་པས་རང་སྣང་གི་ཤེས་རབ་མ་ལ་འཁྱུད་པ། ཁ་སྦྱོར་གྱི་སྦྱོར་བས་ལུས་རྒྱས་པར་བྱེད་པ། དེའི་ཐུགས་ཀར་ཟླ་བའི་གདན་ལ་པདྨའི་ལྟེ་བར་ཏིང་ངེ་འཛིན་སེམས་དཔའ་ཨོཾ་ཡིག་དམར་པོ། རྟག་ཏུ་འཆར་བ་མར་མེ་ཆེན་པོ་ལྟ་བུ། ཞེས་སོགས་མན་འདྲ། རིག་མ་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་དྲིའི་དུང་ཆོས་པཾ་གྱིས་མཚན་པ། དེ་ཡོངས་སུ་གྱུར་པ་ལས་དྲི་རྡོ་རྗེ་མ་དམར་མོ་འོད་དཔག་མེད་ཀྱི་དབུ་རྒྱན་ཅན། དམར་ནག་དཀར་བའི་ཞལ་གསུམ་ཕྱག་དྲུག་གི་རྩ་ཕྱག་གཉིས་ཀྱིས་དྲིའི་དུང་ཆོས་འཛིན་ཅིང༌། ལྷག་མ་གཡས་རྡོ་རྗེ་འཁོར་ལོ། གཡོན་རིན་ཆེན་རལ་གྲི་འཛིན་པ། དབུ་སྐྲ་རལ་པ་ཕྱེད་བཅིངས་སུ་བྱས་པ། ཞེས་པ་ནས། ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་ཉིད་འཇིག་རྟེན་དབང་ཕྱུག་ཏུ་གྱུར། ཧཱུཾ། སྙོམས་པར་འཇུག་པའི་ལས་ལ་གནས་པར་བྱས་པས་མཆོག་ཏུ་དགའ་བའི་བདེ་བ་ཐོབ། རང་ཉིད་དོན་གྲུབ་ཏུ་གྱུར། ཕཊ། ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། གཤེགས་པ་གཞན་གཙོ་བོར་འཕོས་པའི་ཚེ་མི་བསྐྱོད་པ་དང་གོ་ས་བརྗེས་པ་ཙམ་གྱིས་ཆོག་ལ། གཤེགས་པ་གཞན་བཞིའི་རིགས་ཀྱི་སེམས་དཔའ་ལྟ་བུ་གཙོ་བོར་འཕོས་ཚེ་གཤེགས་པ་དེ་ཉིད་རིགས་བདག་ཏུ་བྱས་ནས་དེའི་གོ་སར་མི་བསྐྱོད་པ་འགོད་ཅིང༌། སེམས་དཔའི་གནས་དེར་རང་འདྲ་གཉིས་པ་བཀོད་པས་ལྷ་སོ་གཉིས་ཚང་བར་འགྱུར་བ་ཡིན་གྱི། འཇིག་རྟེན་དབང་ཕྱུག་གི་རྣམ་པ་ལ་འོད་དཔག་མེད་ཀྱི་ང་རྒྱལ་འཛིན་པར་རྗེ་འགོས་ཀྱིས་བཞེད་པ་བཞིན་བྱས་ན་འཇིག་རྟེན་དབང་ཕྱུག་གཙོ་བོར་འཕོས་པར་མི་འགྲོ་བར་མཐའ་དཔྱོད་མྱུ་གུ་ལས་གསུངས་སོ། །འོད་དཔག་མེད་རིགས་བདག་ཏུ་བསམ་ཚུལ་ཡང་ཆོ་ག་རྒྱས་པའི་སྐབས་མངལ་འབྱིན་གྱི་ཚེ་སླར་སྤྱན་དྲངས་ནས་རང་གི་རིགས་བདག་ལ་བསྟིམ་པ་དེས་ཆོག་ལ། དང་སྦྱོར་གྱི་སྐབས་འདིར་དེ་ལྟར་བསྟིམ་རྒྱུ་མེད་ཀྱང་རིགས་བདག་རྡོ་རྗེ་འཆང་གི་ངོ་བོ་འོད་དཔག་མེད་དང་དབྱེར་མི་ཕྱེད་པར་བསམས་ན་ཆོག་གི །དེ་བསྒྱུར་ནས་འོད་དཔག་མེད་
ཞལ་གཅིག་ཕྱག་གཉིས་པའི་རྣམ་པར་གསལ་བཏབ་ན་མན་ངག་དང་མི་མཐུན་པའི་རྟོག་བཟོར་འགྱུར་རོ། །འདིར་འཇིག་རྟེན་དབང་ཕྱུག་གཉིས་པ་གསལ་བཏབ་ཡོད་པ་བཞིན་དུ་བཟླས་པ་དང་མཆོད་པའི་སྐབས་ཀུན་ལའང་དེའི་སྔགས་མ་ཆད་པ་དགོས་པ་དཔྱོད་ལྡན་རྣམས་ཀྱིས་ཤེས་པར་བྱ་ཡི། གོང་དུ་སོང་ཟིན་སྙམ་ནས་དོར་མི་རུང་ངོ༌། །དང་སྦྱོར་ཙམ་བྱེད་ན་མཚམས་འདི་ནས་བཟླས་པ་ལ་འཇུག་པར་བྱ་སྟེ། འབྲུ་གསུམ་ཡིད་བཟླས་དང༌། ཨོཾ་ཨཱཿ ཧྲཱིཿ ཧཱུཾ། ཨོཾ་མ་ཎི་པདྨེ་ཧཱུཾ། ཞེས་ཡི་གེ་བཅུ་པ་ནས། སུམྦྷ་རཱ་ཛའི་བར་མདུན་བསྐྱེད་ནས་འབྱུང་བ་ལྟར་རིམ་བཞིན་བཟླ། ཡིག་བརྒྱས་ལྷག་ཆད་བསྐང༌། དེ་ནས། རྡོ་རྗེ་མི་འཆི་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །ཞེས་སོགས་ཤླཽ་ཀ་ལྔས་བསྟོད་པ་ནས་བཟུང་སྟེ། རང་ཉིད་དོན་གྲུབ་ཏུ་གྱུར། ཕཊ། ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པའི་བར་དང༌། ལུས་དཀྱིལ་གྱི་ལྷ་ཐམས་ཅད་ཀྱིས་ཀྱང་ལྷན་ཅིག་སྐྱེས་པའི་དགའ་བ་ཉམས་སུ་མྱོང་སྟེ་བདེ་བ་ཆེན་པོ་དང་དེ་ཁོ་ན་ཉིད་དབྱེར་མི་ཕྱེད་པའི་ཏིང་ངེ་འཛིན་ལ་སྙོམས་པར་ཞུགས་པས་གསང་བ་དང་དེ་ཁོ་ན་ཉིད་ཀྱི་མཆོད་པས་དགྱེས་པར་གྱུར། གཞལ་ཡས་ཁང་གི་ཆ་སོ་སོ་ཡང་རང་གི་ལུས་ཀྱི་ཆ་སོ་སོ་ལ་ཐིམ་པར་གྱུར། རང་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་འོད་ཟེར་འཕྲོས་པས་སེམས་ཅན་ཐམས་ཅད་ལ་དབང་བསྐུར། སྒྲིབ་པ་སྦྱངས། ཨོཾ་ཡིག་ཏུ་གྱུར། དེས་ནམ་མཁའི་ཁམས་གང་བ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་ཏུ་གྱུར་པ་རྣམས་རང་གི་འོད་ཟེར་གྱིས་དྲངས་ནས་རང་ཉིད་ལ་ཐིམ་པར་གྱུར། ཨོཾ་ཡོ་ག་ཤུད་དྷཿ སརྦྦ་དྷརྨྨཿ ཡོ་ག་ཤུདྡྷོ྅ཧཾ། ༈ དེ་ནས་མདུན་བསྐྱེད་ནི། ཨོཾ་ཨཱཿ བིགྷྣཱནྟ་ཀྲིཏ་ཧཱུཾ། ཞེས་པས་བསངས། ཤཱུ་ནྱ་ཏས་སྦྱངས། བུམ་པ་སྟོང་པ་ཉིད་དུ་གྱུར། སྟོང་པའི་ངང་ལས་བཾ་ལས་བྱུང་བའི་རིན་པོ་ཆེའི་བུམ་པ་དཀར་པོ་
ལྟོ་བ་ཆེ་བ། མགྲིན་པ་རིང་བ། མཆུ་འཕྱང་བ་ལ་སོགས་པའི་མཚན་ཉིད་ཐམས་ཅད་དང་ལྡན་པའི་ནང་དུ་རིལ་བུ་རྣམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་སྐད་ཅིག་གིས་རྡོ་རྗེའི་ས་གཞི་ར་བ་གུར་བླ་རེ་མེ་རི་དང་བཅས་པའི་དབུས་སུ་རིལ་བུ་རྣམས་རེ་རེ་ནས་སྣ་ཚོགས་པདྨའི་གདན་སུམ་ཅུ་སོ་གཅིག་དང༌། དེའི་སྟེང་དུ་ཐུན་མོང་མ་ཡིན་པའི་གདན་སུམ་ཅུ་སོ་གཅིག །གདན་དེ་རྣམས་ཀྱི་སྟེང་དུ་ཨོཾ་ཨཱཿ ཨོཾ་ཧཱུཾ། ཨོཾ་ཨཱཿ བཾཾ་ཧཱུཾ། ཨོཾ་ཨཱཿ ཨོཾ་ཧཱུཾ། ཨོཾ་ཨཱཿ སྭཱ་ཧཱུཾ། ཨོཾ་ཨཱཿ ཧཱུཾ་ཧཱུཾ། ཨོཾ་ཨཱཿ ཧཱ་ཧཱུཾ། ཨོཾ་ཨཱཿ ལཾ་ཧཱུཾ། ཨོཾ་ཨཱཿ མཾ་ཧཱུཾ། ཨོཾ་ཨཱཿ པཾ་ཧཱུཾ། ཨོཾ་ཨཱཿ ཏཾ་ཧཱུཾ། ཨོཾ་ཨཱཿ ཛཿ ཧཱུཾ། ཨོཾ་ཨཱཿ ཧཱུཾ་ཧཱུཾ། ཨོཾ་ཨཱཿ ཁཾ་ཧཱུཾ། ཨོཾ་ཨཱཿ ཧོཿ ཧཱུཾ། ཨོཾ་ཨཱཿ མཻཾ་ཧཱུཾ། ཨོཾ་ཨཱཿ ཐླཱིཾ་ཧཱུཾ། ཨོཾ་ཨཱ་ཨོཾཿ ཧཱུཾ། ཨོཾ་ཨཱཿ ཨོཾ་ཧཱུཾ། ཨོཾ་ཨཱཿ ཨོཾ་ཧཱུཾ། ཨོཾ་ཨཱཿ ཧཱུཾ་ཧཱུཾ། ཨོཾ་ཨཿ ཨོཾ་ཧཱུཾ། ཨོཾ་ཨཱ་སཾ་ཧཱུཾ། ཨོཾ་ཨཱ་ཧཱུཾ་ཧཱུཾ་བཅུ་རྣམས་སུ་གྱུར། དེ་རྣམས་ཡོངས་སུ་གྱུར་པ་ལས། པདྨ། དྲིའི་དུང་ཆོས། འཁོར་ལོ། རིན་པོ་ཆེ། རྡོ་རྗེ། སྣ་ཚོགས་རྡོ་རྗེ། འཁོར་ལོ། རྡོ་རྗེ། ཨུཏྤལ། སྣ་ཚོགས་རྡོ་རྗེ། མེ་ལོང་དམར་པོ། པི་ཝང་སྔོན་པོ། རྡོ་རྗེ། རོའི་སྣོད། ཀླུ་ཤིང་གི་མེ་ཏོག་སྡོང་བུ་དང་བཅས་པ་འཁོར་ལོས་མཚན་པ། འཁོར་ལོ། རིན་པོ་ཆེ་གཉིས། པདྨ་གཉིས། རལ་གྲི་གཉིས། ཞེས་པ་ནས། ལྷ་སུམ་ཅུ་རྩ་གཉིས་སུ་གྱུར་པ་ནི། འཇིག་རྟེན་དབང་ཕྱུག་དམར་པོ་འོད་དཔག་མེད་ཀྱི་དབུ་རྒྱན་ཅན། ཞེས་པ་ནས། དཔེ་བྱད་བཟང་པོ་བརྒྱད་ཅུས་བརྒྱན་པ། ཡུམ་དྲི་རྡོ་རྗེ་མ་དམར་མོ་འོད་དཔག་མེད་ཀྱི་དབུ་རྒྱན་ཅན། ཞེས་པ་ནས། འདོད་ཡོན་ལྔའི་དགའ་བས་རོལ་བ། ཡབ་ཡུམ་གཉི་གས་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉི་གའང་རིན་པོ་ཆེའི་དབུ་རྒྱན་གསོལ་བ། ཞེས་པ་ནས། སྐྱིལ་མོ་
ཀྲུང་གིས་བཞུགས་པར་གྱུར། རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན་༝ རིན་འབྱུང་སེར་པོ་༝ མི་བསྐྱོད་པ་སྔོན་པོ་༝ དོན་གྲུབ་ལྗང་གུ༌༝ སྤྱན་མ་དཀར་མོ་༝ མཱ་མ་ཀཱི་སྔོན་མོ་༝ གོས་དཀར་མོ་༝ སྒྲོལ་མ་༝ གཟུགས་རྡོ་རྗེ་མ་༝ སྒྲ་རྡོ་རྗེ་མ་༝ རེག་བྱ་རྡོ་རྗེ་མ་༝ རོ་རྡོ་རྗེ་མ་༝ ལྷ་མོ་བརྒྱད་པོ་ཐམས་ཅད་ཀྱང་དབུ་སྐྲ་རལ་པ་ཕྱེད་བཅིངས་སུ་བྱས་པ། རིན་པོ་ཆེའི་དབུ་རྒྱན་གསོལ་བ། ཞེས་པ་ནས། དགའ་བས་རོལ་པ། འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན་རང་རང་གི་གདན་ལ་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། བྱམས་པ་དང་ས་སྙིང་དཀར་པོ་༝ ཕྱག་རྡོར་དང་ནམ་སྙིང་སེར་པོ་༝ འཇིག་རྟེན་དབང་ཕྱུག་དང་འཇམ་དཔལ་དམར་པོ། ཞེས་པ་ནས། གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར། དེ་རྣམས་ཀྱི་ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ་ཞལ་གཅིག་ཕྱག་གཉིས་པ་རེ་རེ། ཡེ་ཤེས་སེམས་དཔའ་དེ་རྣམས་ཀྱི་ཐུགས་ཀར་ཏིང་ངེ་འཛིན་སེམས་དཔའ། ཨོཾ་བཾ། ཨོཾ་སྭཱ་ཧཱུཾ་ཧཱ། ལཾ་མཱཾ་པཾ་ཏཱཾ། ཛཿ ཧཱུཾ་ཁཾ་ཧོཿ མཻཾ་ཐླཱིཾ་ཨོཾ་ཨོཾ། ཨོཾ་ཧཱུཾ་ཨོཾ་སཾ། ཧཱུཾ་བཅུ་རྣམས་འོད་ཟེར་གྱི་ཕུང་པོ་ཆེན་པོ་དང་བཅས་པར་གྱུར། དེ་རྣམས་ཀྱི་ཐུགས་ཀའི་ཏིང་ངེ་འཛིན་སེམས་དཔའི་འོད་ཟེར་ལྕགས་ཀྱུ་ལྟ་བུ་འཕྲོས་པ་རྣམས་གཅིག་ཏུ་གྱུར་བས་ཡེ་ཤེས་པ་སེམས་དཔའ་སུམ་བརྩེགས་ཅན་རྣམས་ཀྱི་ཐུགས་ཀར་བཏབ་སྟེ་སྒྲུབ་པ་པོ་ལ་དངོས་གྲུབ་སྩོལ་བར་བསྐུལ་བའི་འོག་ཏུ་རང་གི་ཐུགས་ཀའི་ཨོཾ་ཡིག་གི་འོད་ཟེར་གྱིས་གནོད་མཛེས་བཀུག་ནས་མདུན་དུ་བཀའ་ནོད་པ་ལ་རྒྱལ་བ་རྣམས་དམ་རྫས་རིལ་བུ་འདི་ལ་དངོས་གྲུབ་ཆེད་དུ་འབྱོན་པར་སྐུལ་ཅིག །ཅེས་བཀའ་བསྒོས་པས་དེས་ཀྱང་རང་འདྲའི་
ཡེ་ཤེས་པ་སྤྱན་དྲངས་ཤིང༌། དེ་རྣམས་ཀྱང་རང་རང་གི་དམ་ཚིག་པ་སོ་སོ་ལ་ཐིམ་པར་གྱུར། ཨེ་ཧྱེ་ཧི་བྷ་ག་ཝན་ནས། ཧཱུཾ་སྭཱཧཱ། ལན་གསུམ། རང་གི་ཐུགས་ཀའི་ཨོཾ་དམར་པོ་འོད་ཟེར་ལྕགས་ཀྱུའི་རྣམ་པ་ཅན་གྱིས་འོག་མིན་གྱི་རྒྱལ་བ། ཞེས་པ་དང༌། སྤརྴ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡ་ཤྲི་ཡེ་ཨཱཿ ཧཱུཾ། མ་ལུས་འགྲོ་བའི་རང་བཞིན་ནས། འདིར་གཤེགས་ཤིག །ལན་གསུམ། ཨོཾ་བཛྲ་ས་མ་ཛཿ ཛཿ ཛཿ ཛཿ ཞེས་པ་ནས། སོ་སོ་ལ་དབང་བསྐུར་བར་གྱུར། མཆོད་པ་བྱིན་བརླབ་བྱ། དག་ཅིང་དྲི་མེད་སོགས་ཀྱིས་ཆུ་བཞི། ལྷ་ཡི་མེ་ཏོག་སོགས་ཀྱིས་ཉེར་སྤྱོད་རོལ་མོ། རིན་ཆེན་དབང་གི་རྒྱལ་པོ་སོགས་ཀྱིས་འདོད་ཡོན་ལྔ། ཞིང་འདི་རིན་ཆེན་སོགས་ཀྱིས་རྒྱལ་སྲིད་སྣ་བདུན་རྣམས་དབུལ། ལོ་ཀེ་ཤྭ་ར་ཨོཾ་ཨཱཿ ཧཱུཾ། གནྔྷེ་བཛྲ་ཨོཾ་ཨཱཿ ཧཱུཾ། ཛི་ན་ཛིཀ་ཨོཾ་ཨཱཿ ཧཱུཾ། ཞེས་པ་ནས། སུམྦྷ་རཱ་ཛ་ཨོཾ་ཨཱཿ ཧཱུཾ། བདུད་རྩི་ལྔ་ཡི་བཟའ་བ་ནི། །ཞེས་པ་ནས། པཉྩ་ཨ་མྲྀ་ཏ་པྲ་ཏཱིཙྪ་ཧཱུཾ་སྭཱཧཱ། རྡོ་རྗེ་དཔག་མེད་རྒྱལ་པོ་ཆེ། །སོགས་ཤླཽ་ཀ་ལྔ་དང༌། གང་ཞིག་གཟུགས་དང་ཞེས་སོགས་ཤོ་ལོ་ཀ་གསུམ་གྱིས་བསྟོད། རྒྱལ་བའི་སྲས་པོ་འཕགས་མཆོག་སྤྱན་རས་གཟིགས། །ཞེས་པ་ནས། ཆུ་ལ་ཆུ་བཞག་བཞིན་དུ་རོ་གཅིག་གྱུར། །ཨོཾ་ཨཱཿ ཧྲཱིཿ ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་ཨཱཿ ལོ་ཀེ་ཤྭ་ར་ཨོཾ་ཧཱུཾ། ཨོཾ་ཨཱཿ གནྔྷེ་བཛྲ་བཾ་ཧཱུཾ། ཨོཾ་ཨཱཿ ཛི་ན་ཛིཀ་ཨོཾ་ཧཱུཾ། ཨོཾ་ཨཱཿ རཏྣ་དྷྲིཀ་སྭཱ་ཧཱུཾ། ཨོཾ་ཨཱཿ བཛྲ་དྷྲིཀ་ཧཱུཾ་ཧཱུཾ། ཨོཾ་ཨཱཿ པྲཛྙཱ་དྷྲིཀ་ཧཱ་ཧཱུཾ། ཞེས་སོགས་སྔགས་ཡོངས་རྫོགས་བཟླ། ཡིག་བརྒྱས་ལྷག་ཆད་བསྐང༌། ཨོཾ་ལོ་ཀེ་ཤྭ་ར་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། སྔགས་སོ་སོའི་གཤམ་དུ་འབྲུ་གསུམ་བཏགས་པས་ནང་མཆོད་དབུལ། རྡོ་རྗེ་དཔག་མེད་སོགས་ཤོ་ལོ་ཀ་ལྔས་བསྟོད། དེ་ནི་ཐུན་དང་པོའོ།། ༈ ཐུན་གཉིས་པ་ལ། རང་ཉིད་འཇིག་རྟེན་དབང་ཕྱུག་སྐུ་མདོག་དམར་པོ་དམར་ནག་དཀར་བའི། ཞེས་པ་ནས།
གཡོན་རིན་ཆེན་རལ་གྲི་འཛིན་པ། རང་དང་འདྲ་བའི་དྲི་རྡོ་རྗེ་མས་འཁྱུད་པ། གཉི་གའང་ཞེས་པ་ནས། ཤམ་ཐབས་འཕྱར་བར་གྱུར། ནང་མཆོད་དང་མཆོད་པ་བྱིན་བརླབ་བྱ། །ཨོཾ་ཨཱཿ བིགྷྣཱནྟ་ཀྲིཏ། ནས། ཧཾ། བུམ་པ་སྟོང་པ་ཉིད་དུ་གྱུར། སྟོང་པའི་ངང་ལས་བཾ་ལས་བྱུང་བའི་རིན་པོ་ཆེའི་བུམ་པ་དཀར་པོ་ལྟོ་བ་ཆེ་བ། མགྲིན་པ་རིང་བ། མཆུ་འཕྱང་བ་ལ་སོགས་པའི་མཚན་ཉིད་ཐམས་ཅད་དང་ལྡན་པའི་ནང་དུ་རིལ་བུ་རྣམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་ཧྲཱིཿ ལས་པདྨ་ཧྲཱིཿ ས་མཚན་པ། དེ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་དམར་པོ་དམར་ནག་དཀར་བའི། ཞེས་པ་ནས། རལ་གྲི་འཛིན་པ། དྲི་རྡོ་རྗེ་མ་དམར་མོ་དམར་ནག་དཀར་བའི། ཞེས་པ་ནས། རལ་གྲི་འཛིན་པ། ཡབ་ཡུམ་གཉི་གའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་དང་དབང་གི་ལྷ་སྤྱན་དྲངས། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། དབང་གི་ལྷས་དབང་བསྐུར། འོད་དཔག་མེད་ཀྱིས་དབུ་བརྒྱན་པར་གྱུར། ཨོཾ་ལོ་ཀེ་ཤྭ་ར་གནྔྷེ་བཛྲ་ཨརྒྷཾ་སོགས་ཀྱིས་མཆོད། ལོ་ཀེ་ཤྭ་ར་ཨོཾ་ཨཱཿ ཧཱུཾ། གནྡྷེ་བཛྲ་ཨོཾ་ཨཱཿ ཧཱུཾ། རྡོ་རྗེ་དཔག་མེད་མ་ཤླཽ་ཀ་གཅིག་དང༌། དྲི་མེད་དུང་མདོག་མས་བསྟོད། རྒྱལ་བའི་སྲས་པོ་འཕགས་མཆོག་སྤྱན་རས་གཟིགས། ཞེས་པ་ནས། རོ་གཅིག་གྱུར། ཨོཾ་ཨཱཿ ཧྲཱིཿ ཧཱུཾ། ཨོཾ་མ་ཎི་པདྨེ་ཧཱུཾ། ཞེས་ཡི་གེ་བཅུ་པ་དང༌། ཡིག་དྲུག་འབྲུ་གསུམ་གྱི་བར་དུ་བཅུག་ལ་ཅི་ནུས་བཟླ། ཨོཾ་ཨ་ལོ་ཀེ་ཤྭ་ར་ཨོཾ་ཧཱུཾ། ཨོཾ་ཨཱཿ གནྔྷེ་བཛྲ་བཾ་ཧཱུཾ། ཞེས་དང༌། མཐར་ཡིག་བརྒྱ་བཟླ། ཨོཾ་ལོ་ཀེ་ཤྭ་ར་གནྔྷེ་བཛྲ་ཨརྒྷཾ་སོགས་ཀྱིས་མཆོད། ལོ་ཀེ་ཤྭ་ར་ཨོཾ་ཨཱཿ ཧཱུཾ། གནྔྷེ་བཛྲ་ཨོཾ་ཨཱཿ ཧཱུཾ། རྡོ་རྗེ་དཔག་མེད་མ་ཤོ་ལོ་ཀ་གཅིག་
གིས་བསྟོད། ཐུན་རྗེས་མ་རྣམས་དེའི་རིགས་འགྲེ་བྱའོ། །༈ ཐུན་ཐ་མའི་བཟླས་པའི་མཚམས་སུ་སྤྱན་འདྲེན་ཁྲུས་གསོལ་དང༌། མཇུག་ཏུ་གཏོར་མ་ནང་མཆོད་ལྟར་བྱིན་གྱིས་བརླབས། རང་གི་ཐུགས་ཀའི་ཨོཾ་དམར་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས། ཞེས་པ་ནས། སྦུ་གུ་ཅན་རྣམས་སུ་གྱུར། ཨོཾ་ཨཱཿ ཧྲཱིཿ པྲ་ཝ་ར་སད་ཀ་རཾ་ཨརྒྷཾ་སོགས་ཀྱིས་ཆུ་བཞི། ཨོཾ་ཨཱཿ ལོ་ཀེ་ཤྭ་ར་ཨོཾ། གནྔྷེ་བཛྲ་པཾ། ཛི་ན་ཛིཀ་ཨོཾ། རཏྣ་དྷིཀ་སྭཱ། བཛྲ་དྷྲིཀ་ཧཱུཾ། པྲཛྙཱ་དྷྲིཀ་ཧཱ། ཞེས་པ་ནས། ཨུཥྞཱི་ཥ་ཙཀྲ་ཝ་རྟི་ཧཱུཾ། སུམྦྷ་རཱ་ཛ་ཧཱུཾ་ཧཱུཾ། སརྦ་དུཥྚཾ་ས་མ་ཡ། ཞེས་པ་ནས། ཙ་ཀུ་རུ་སྭཱཧཱ། ཞེས་པས་འདས་ལྷ་དང༌། ཨོཾ་ཨཱཿ དུས་གསུམ་སྐྱེས་པ་ཀུན་དང༌། ཞེས་པ་ནས། ཞི་བ་དང་ནི་སྲུང་བར་མཛད་དུ་གསོལ། །ཧཱུཾ་སྭཱཧཱ། ཞེས་པས་འཇིག་རྟེན་པའི་ལྷ་ཚོགས་རྣམས་ལ་གཏོར་མ་དབུལ། ཨོཾ་ཨཱཿ ཧྲཱི་པྲ་ཝ་ར་སད་ཀ་རཾ་ཨཉྩ་མ་ཎཾ། ཨརྒྷཾ་༝ ཨོཾ་བཛྲ་ཏམྦུ་ལ་ཡེ་སྭཱཧཱ། ཨོཾ་སརྦྦ་ཏ་ཐཱ་ག་ཏ་པུཥྤེ་ནས། ཤཔྟའི་བར་གྱིས་མཆོད། ལོ་ཀེ་ཤྭ་ར་ཨོཾ་ཨཱཿ ཧཱུཾ། གནྡྷེ་བཛྲ་ཨོཾ་ཨཱཿ ཧཱུཾ། ཛི་ན་ཛིཀ་ཨོཾ་ཨཱཿ ཧཱུཾ། ཞེས་པ་ནས། སུམྦྷ་རཱ་ཛ་ཨོཾ་ཨཱཿ ཧཱུཾ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝ་ར་པུཥྤེ། ཞེས་པ་ནས། ཨོཾ་ཨཱཿ ཧཱུཾ་བཛྲ་མུཿ ཕྱོགས་སྐྱོང་འཁོར་བཅས་རང་གནས་སུ་གཤེགས་པར་གྱུར། ༈ དེ་ནས་གཏང་རག་གི་མཆོད་པ་བྱིན་གྱིས་བརླབས། དག་ཅིང་དྲི་མེད་མས་ཆུ་བཞི། ལྷ་ཡི་མེ་ཏོག་མས་ཉེར་སྤྱོད་རོལ་མོའི་བར། ཨེ་མའོ་མཆོད་པ་དང༌། ཕྱག་རྒྱའི་རྣམ་པ་སྔོན་པོ། ཞེས་སོགས་གང་རུང་གིས་འདོད་ཡོན་ལྔ་དང༌། ལོ་ཀེ་ཤྭ་ར་ཨོཾ་ཨཱཿ ཧཱུཾཿ ཞེས་སོགས་སྔགས་སོ་སོའི་མཇུག་ཏུ་འབྲུ་གསུམ་བཏགས་པས་ནང་མཆོད་དབུལ། རྡོ་རྗེ་དཔག་མེད་སོགས་ཤླཽ་ཀ་ལྔས་བསྟོད། དེ་ནས་དགེ་བ་འདིས་མཚོན་དུས་གསུམ་དགེ་ཚོགས་ཀུན། །གཅིག་ཏུ་བསྡུས་ཏེ་སྲས་བཅས་རྒྱལ་ཀུན་གྱི། །ཐུགས་བསྐྱེད་སྨོན་པའི་ཆུ་ཀླུང་དང་འདྲེས་ནས། །བྱང་ཆུབ་མཆོག་གི་རྒྱ་མཚོར་གཞོལ་གྱུར་ཅིག །ཚེ་རབས་ཀུན་ཏུ་དལ་བའི་རྟེན་ཐོབ་ཅིང༌། །མཚན་ལྡན་
བཤེས་གཉེན་དམ་པས་རྗེས་བཟུང་སྟེ། །སྔོན་འགྲོ་ཐུན་མོང་ལམ་གྱིས་རྒྱུད་སྦྱངས་ནས། །དཔལ་ལྡན་འདུས་པའི་ལམ་ལ་འཇུག་གྱུར་ཅིག །རྣམ་དག་དབང་ཐོབ་དམ་སྡོམ་ཚུལ་བཞིན་བསྲུངས། །བསྐྱེད་རམ་ཕྲ་རགས་རྣལ་འབྱོར་མཐར་ཕྱིན་ཅིང༌། །རྡོ་རྗེའི་ལུས་ལ་གནད་དུ་བསྣུན་པ་ཡིས། །བདེན་གཉིས་ལམ་བཟང་མངོན་དུ་འགྱུར་བར་ཤོག །ཚུལ་འདིར་འབྲེལ་ཐོགས་སྐྱེ་བོ་མཐའ་དག་ཀྱང༌། །འཇིག་རྟེན་དབང་ཕྱུག་ཐུགས་རྗེའི་གྲུ་གཟིངས་ལ། །བརྟེན་ནས་ཕྲ་རགས་འཁོར་བའི་རྒྱ་མཚོ་ལས། །བརྒལ་ཏེ་ཟུང་འཇུག་གོ་འཕང་མྱུར་ཐོབ་ཤོག །ཅེས་སྨོན་ལམ་དང༌། ཡིག་བརྒྱ། བཟོད་གསོལ། ཤིས་བརྗོད་རྣམས་དཀྱུས་ལྟར་བྱ། ༈ གྲོལ་ཁའི་ཐུན་ལ། ཡིག་བརྒྱ། མཆོད་བསྟོད། གཏོར་འབུལ། གཏང་རག་མཆོད་པ། ནང་མཆོད། རྡོ་རྗེ་དཔག་མེད་སོགས་ཤོ་ལོ་ཀ་ལྔ། གང་ཞིག་གཟུགས་དང་ཞེས་སོགས་ཤོ་ལོ་ཀ་གསུམ། དྲི་མེད་དུང་མདོག་མ། སྨོན་ལམ། ཡིག་བརྒྱ། གང་ཡང་བདག་བློ་༝ མ་རྙེད་ཡོངས་སུ་༝ བདག་ལ་དངོས་གྲུབ་ནས། དངོས་གྲུབ་བླ་ན་མེད་པ་སྩོལ། །རྒྱལ་བའི་སྲས་པོ་ཞེས་པ་ནས། རིལ་བུ་ཐུགས་རྗེ་ཆེན་པོར་གསལ་བ་རྣམས། །འོད་ཞུ་གཉིས་སུ་མེད་པར་བྱིན་གྱིས་རློབས། །ཞེས་རིལ་བུ་ལ་བསྟིམ། དེ་ནས། འཆི་མེད་རོལ་པའི་ལམ་བཟང་ཡོངས་གང་བ། །བཅོམ་ལྡན་འཇིག་རྟེན་དབང་ཕྱུག་ལྷ་ཚོགས་ཀྱིས། །དགེ་མཚན་བྱེ་བའི་མེ་ཏོག་ཆར་ཕབ་སྟེ། །འགྲོ་ཀུན་དབུགས་དབྱུང་དགའ་སྟོན་རྒྱས་པར་མཛོད། །རྡོ་རྗེ་འཆང་དབང་རྒྱལ་སྲས་གྲུབ་པའི་ཚོགས། །ཀུན་མཁྱེན་རྒྱལ་བ་གཉིས་པ་ཡབ་སྲས་དང༌། །འཇམ་དཔལ་དབྱངས་དངོས་བཞད་པའི་རྡོ་རྗེ་སོགས། །དངོས་བརྒྱུད་བླ་མ་རྣམས་ཀྱི་བཀྲ་ཤིས་ཤོག །གང་གི་མཚན་ཙམ་ཡིད་ལ་དྲན་པས་ཀྱང༌། །སྲིད་པའི་འཇིགས་འཕྲོག་
འཆི་མེད་དཔལ་སྟེར་བ། །ཐུགས་རྗེའི་བདག་ཉིད་འཇིག་རྟེན་དབང་ཕྱུག་སོགས། །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག །དཔལ་ལྡན་འདུས་པའི་རྩ་བཤད་རྒྱུད་རྣམས་དང༌། །རྒྱུད་སྡེ་བཞིས་བསྡུས་སྤྱན་རས་གཟིགས་ཀྱི་རྒྱུད། །སྨིན་ཅིང་གྲོལ་བྱེད་རིམ་གཉིས་ལམ་ལ་སོགས། །ལུང་རྟོགས་དམ་པའི་ཆོས་ཀྱི་བཀྲ་ཤིས་ཤོག །སྤྱན་རས་གཟིགས་དབང་ཐུགས་རྗེའི་ཟླ་ཟེར་གྱིས། །རྣམ་དཔྱོད་ཀུ་མུ་ད་ཚལ་རབ་རྒྱས་ཤིང༌། །བཤད་སྒྲུབ་སྦྲང་རྩིའི་བཅུད་ཀྱིས་གཏམས་པ་ཡི། །འཕགས་པའི་དགེ་འདུན་རྣམས་ཀྱི་བཀྲ་ཤིས་ཤོག །ནམ་མཁའི་ཁྱོན་ལྟར་ཡངས་པའི་ཕོ་བྲང་མཆོག །ཅེས་སོགས་བཀྲ་ཤིས་ཀྱིས་མཐའ་བརྒྱན་པར་བྱའོ། །རྒྱུད་རྣམས་ཀུན་གྱི་རྩེར་སོན་འདུས་པའི་ལམ། །འཕགས་མཆོག་འཇིག་རྟེན་དབང་ཕྱུག་སྒྲུབ་པའི་ཐབས། །གོ་སླ་འཇུག་བདེར་སྦྱར་བའི་དགེ་ཚོགས་མཐུས། །འགྲོ་ཀུན་སྲིད་པའི་མཚོ་ལས་སྒྲོལ་གྱུར་ཅིག །ཅེས་འཕགས་མཆོག་འཇིག་རྟེན་དབང་ཕྱུག་གི་སྒོ་ནས་རིལ་སྒྲུབ་བྱེད་ཚུལ་ཕན་བདེའི་མཆོག་སྦྱིན་ཞེས་བྱ་བ་འདི་ནི་དད་བརྩོན་ལྡན་པ་རབ་འབྱམས་པ་མཁས་གྲུབ་ཀྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་ྋཀུན་མཁྱེན་འཇམ་དབྱངས་བཞད་པའི་གསུང་གཞིར་བཞག་ལ། འཇུག་པ་བདེ་བའི་ཕྱིར་བདག་བསྐྱེད་དང་སྦྱོར་དང་འབྲེལ་བར་བྱེད་ཚུལ་གསལ་བར་ཁ་བསྐང་སྟེ་བསྒྲིགས་པའི་ཡི་གེ་པ་ནི་རཏྣ་ཨཱ་ནནྟས་བགྱིས་པ་འདིས་ཀྱང་སྐྱེ་འགྲོ་རྣམས་ལ་ཕན་ཐོགས་པར་གྱུར་ཅིག། །།