སྨྱུང་གནས་ཀྱི་ཆོ་གའི་ཟུར་རྒྱན་བདེ་བ་ཅན་གྱི་ལམ་ཡིག
སྨྱུང་གནས་ཀྱི་ཆོ་གའི་ཟུར་རྒྱན་བདེ་བ་ཅན་གྱི་ལམ་ཡིག་ཅེས་བྱ་བ་བཞུགས་སོ། །
ཇི་སྙེད་རྒྱལ་བ་ཀུན་གྱི་ཐུགས་རྗེ་ནི། །མཁའ་མཉམ་འགྲོ་བའི་མགོན་དུ་ཤར་བའི་ལྷ། །ཁྱད་པར་སྙིགས་མའི་འགྲོ་ལ་རྗེས་བརྩེ་བ། །བླ་མ་སྤྱན་རས་གཟིགས་མགོན་ཞབས་ལ་འདུད། །བདེ་གཤེགས་གཞན་གྱིས་འདུལ་བར་མ་ནུས་པ། །ཁྱོད་ཉིད་གཅིག་པུས་བདག་གིར་མཛད་པ་བཞིན། །བདག་ཀྱང་ལྷ་མཆོག་ཀུན་ལས་ཁྱོད་ཞབས་ལ། །གུས་པས་བསྙེན་ནོ་བྱང་ཆུབ་བར་དུ་སྐྱོངས། །དེའང་དུས་གསུམ་རྒྱལ་བ་ཀུན་གྱིས་འགྲོ་བ་སྐྱོབ་པའི་རྒྱུ་ཐུན་མོང་མ་ཡིན་པ་ནི་བརྩེ་བ་སྙིང་རྗེ་ཆེན་པོ་ཡིན་ལ། དེ་ཉིད་གཅིག་ཏུ་བསྡུས་ཏེ་བཞིན་ལག་གི་རྣམ་པར་ཤར་བ་འཕགས་མཆོག་ཐུགས་རྗེ་ཆེན་པོ་ཡིན་པས། སྲིད་ཞིའི་འཇིགས་པ་ལས་ཐར་བར་འདོད་པས་མེད་མི་རུང་དུ་འདི་ཉིད་སྐྱབས་སུ་བསྟེན་དགོས་སོ། །དེ་བསྟེན་པའི་ཚུལ་མི་འདྲ་བའི་བཀའ་བབ་ཀྱི་བརྒྱུད་པའང་འཕགས་པ་ཐུགས་རྗེ་ཆེན་པོ་ཉིད་མི་རྗེའི་གཟུགས་སུ་བྱོན་པ་སྲོང་
བཙན་སྒམ་པོའི་བཀའ་འབུམ་སོགས་ནས་འབྱུང་བ་རྒྱལ་པོ་ལུགས་གྲུབ་ཐོབ་དངོས་གྲུབ་ནས་བརྒྱུད་པ་དང༌། ངོ་མཚར་བའི་རྣམ་ཐར་བཅོ་བརྒྱད་དང་ལྡན་པ་མི་ཏྲ་ཛོ་ཀི་ནས་བརྒྱུད་པ་དང༌། ལ་སྟོད་དམར་པོའམ་དམ་པ་དམར་པོས་རྡོ་རྗེ་གདན་པ་ལ་ཞུས་པ་ནས་བརྒྱུད་པ་དང༌། བི་རུ་པ་གྲུབ་ཐོབ་མང་པོའི་བླ་མར་གྱུར་པའི་པཎྚི་ཏ་ཨེ་ར་པ་ཏི་ནས་བརྒྱུད་པ་དང༌། ཇོ་བོ་རྗེའི་དབོན་པོ་དཱ་བྱང་ཆུབ་སེམས་དཔའ་ནས་བརྒྱུད་པ་དང༌། དམར་ཁྲིད་བྱང་སེམས་ཟླ་བ་རྒྱལ་མཚན་ནས་བརྒྱུད་པ་དང༌། གཉན་ཚེམ་བུ་པ་དར་མ་འོད་ཟེར་ནས་བརྒྱུད་པ་སོགས་མང་དུ་ཡོད་ཀྱང༌། སྙིགས་མའི་དུས་འདིར་འཕྲིན་ལས་དང་བྱིན་རླབས་ཀྱི་བཀའ་བབ་ཁྱབ་བརྡལ་དུ་ཆེ་བ་ནི་གྲུབ་བརྙེས་དགེ་སློང་མ་དཔལ་མོའི་ལུགས་གཙོ་བོ་སྨྱུང་བར་གནས་པའི་སྒོ་ནས་སྒྲུབ་པ་འདི་ཡིན། སྨྱུང་གནས་ཀྱི་ཆོ་ག་རྒྱས་འབྲིང་
བསྡུས་པའི་རིམ་པ་མཐའ་ཡས་པ་ཞིག་བཞུགས་པས་གསར་དུ་བྲི་མི་དགོས། འདིར་དེ་ཐམས་ཅད་ལ་ཐུན་མོང་དུ་སྦྱོར་རྒྱུའི་ཉེར་མཁོའི་རིམ་པ་འགའ་ཞིག་ཟུར་འདེབས་ཀྱི་ཚུལ་དུ་འགོད་པ་ལ། སྤྲོ་བ་བསྐྱེད་པའི་ཕྱིར་ལོ་རྒྱུས་དང་ཕན་ཡོན་བཤད་པ། གནད་དུ་འགྲོ་བའི་ཕྱིར་བླང་དོར་གྱི་ལག་ལེན་བཤད་པ། ཐུགས་རྗེ་བསྐུལ་བའི་ཕྱིར་གསོལ་འདེབས་ཀྱི་དམིགས་པ་བཤད་པ་དང་གསུམ། དང་པོ་ནི། བསྐལ་པ་བཟང་པོ་འདི་ལ་སངས་རྒྱས་སྟོང་འབྱོན་པས། གཞན་རྣམས་ཀྱིས་རང་རང་གི་ཞིང་བདག་གིར་མཛད་དེ་སྙིགས་མ་ལྔ་བདོ་བའི་སྐབས་འདི་ཡལ་བར་འདོར་བ་ན་སྟོན་པ་ཐུགས་རྗེ་ཅན་གྱིས་རྗེས་སུ་གཟུང་སྟེ་བྱོན་ནས་འགྲོ་བ་རྣམས་སྨིན་གྲོལ་ལ་བཀོད་ཀྱང༌། ཁ་བ་ཅན་གྱི་ཞིང་འདི་དེའི་འང་དངོས་ཀྱི་འདུལ་ཞིང་དུ་མ་གྱུར་པར་ལུས་པ་འཕགས་མཆོག་ཐུགས་རྗེ་ཆེན་པོས་བདག་ཏུ་མཛད་དེ་ཟ་མ་ཏོག་བཀོད་པར་གསུངས་པ་བཞིན། དང་པོར་སྤྲུལ་བའི་སྒོ་ནས་མིའི་འགྲོ་བ་བསྐྱེད། དེ་ནས་ཟས་གོས་སོགས་གནས་སྐབས་ཀྱི་འཚོ་ཆས་དང༌། དེ་སྒྲུབ་ལུགས་ཚུན་ཆད་བསླབས་ཏེ་ཕན་པ་ལ་སྦྱར། རིམ་པས་བློ་གྲོས་རྒྱས་ཏེ་ཆོས་ཀྱི་སྣོད་དུ་གྱུར་པ་ན་སྐུ་གསུང་ཐུགས་ཀྱི་སྤྲུལ་བ་སྣ་ཚོགས་པས་ཆོས་ལ་བཅུག་པ་ཡིན་པས། རང་ཅག་རྣམས་ལ་དུས་གསུམ་རྒྱལ་བ་ཐམས་ཅད་ལས་ཀྱང་འདི་ཉིད་བཀའ་དྲིན་ཆེ་ཞིང་འབྲེལ་ཟབ་སྟེ། ལྷ་ཐོ་ཐོ་རིའི་རིང་ལ་བསྟན་པའི་དབུ་བརྙེས་པའི་
ཚེའང་ཕོ་བྲང་སྟེང་དུ་ཟ་མ་ཏོག་བཀོད་པའི་གླེགས་བམ་བབས་པ་ཡིན་ལ། སྲོང་བཙན་སྐུ་འཁྲུངས་པའི་ཚེ་མ་ཎིའི་སྒྲ་འབྲུག་སྐད་ལྟ་བུ་ཞིག་གྲགས་ཤིང་གྱེ་རེའི་བྲག་ལ་ཡིག་དྲུག་རང་བྱོན་དུ་ཕེབས་པས་གསུང་རྟེན་གྱི་མགོའང་དེ་དག་ནས་ཚུགས་པ་ཡིན། སྐུའི་རྟེན་གྱི་ཐོག་མའང་སྲོང་བཙན་དགུང་ལོ་བཅོ་ལྔ་པའི་དུས་ཙན་དན་སྦྲུལ་གྱི་སྙིང་པོ་ལས་རང་བྱོན་གྱི་ཐུགས་རྗེ་ཆེན་པོའི་སྐུ་གདན་དྲངས་ཏེ་རང་བྱོན་ལྔ་ལྡན་བཞེངས་པ་ནས་ཚུགས་པ་ཡིན་ཞིང༌། ད་ལྟའང་བྱིས་པ་ཆུང་ངུ་ཚུན་ཆད་ལ་ཆེད་དུ་སློབ་མི་དགོས་པར་མ་ཎི་ཤེས་པ་འདི་དེའི་འདུལ་སྐལ་ཡིན་པ་དང་འབྲེལ་ཆེ་བའི་རྟགས་ཡིན། ལྷག་པའི་ལྷ་གང་ལ་འབྲེལ་ཆེ་བ་དེ་སྒྲུབ་ན་འགྲུབ་ཐག་ཉེ་ལ། ལྷག་པར་ཡང་འདི་སྙིང་རྗེའི་ལྷ་ཡིན་པས་འགྲུབ་སླ་སྟེ། སྔོན་དགེ་སློང་མ་དཔལ་མོ་ལའང་སྔོན་ལས་ཀྱིས་ཀླུ་ནད་བྱུང་བ་ཐབས་གང་གིས་ཀྱང་མ་ཕན་པའི་ཚེ་ཨིནྡྲ་བྷུ་ཏིས་ལུང་བསྟན་ཏེ། ལི་ཁ་ར་ཤིང་འཕེལ་གྱི་ཇོ་བོ་བཅུ་གཅིག་ཞལ་ལ་ཞག་བདུན་དུ་གསོལ་བ་བཏབ་པས་ཀླུ་ནད་སོས་ཤིང་གྲུབ་པའི་གོ་འཕང་བརྙེས། འགའ་ཞིག་གིས་སྐུར་པ་བཏབ་པར་རང་གི་དབུ་བཅད་ནས་འཁར་གསིལ་གྱི་རྩེ་ལ་བཏགས་ཏེ་གར་སྟབས་མཛད་ཅིང་ང་ལ་ཕམ་པ་མ་བྱུང་ན་སྔར་བཞིན་གྱུར་ཅིག་གསུང་བས་ཕྱིར་འབྱར་བ་སོགས་རྫུ་འཕྲུལ་སྣ་ཚོགས་བསྟན། དེའི་ཚེ་པཎྚི་ཏ་ཡེ་ཤེས་བཟང་པོ་བྱ་བར་ཕོལ་མིག་བྱུང་སྟེ་ལུས་ལྕགས་སྲེག་བཞིན་
ཚ་བ་འབར་བས་མཚེའུ་བསྐྱིལ་ཏེ་ནང་དུ་བསྡད་ན་ཆུ་ཁོལ་བ་བྱུང་ཡང་སྔོན་ལས་ཀྱིས་སྲོག་འདོར་མི་ཐུབ་པ་བྱུང་ནས། ཁོ་རང་གི་བླ་མ་པཎྚི་ཏ་ཟླ་བ་གཞོན་ནུ་གདན་དྲངས་པ་ན། དེ་ལ་མཁའ་འགྲོ་མས་ཁྱོད་རང་ཕྱིན་ཡང་མི་ཕན། དགེ་སློང་མ་དཔལ་མོ་སྤྱན་དྲངས་ན་དོན་ཆེ་ཚུལ་གྱི་ལུང་བསྟན་བྱུང་བ་བཞིན་ཁོང་གིས་གདན་དྲངས་ཏེ་ཕེབས་ནས་པཎྚི་ཏ་གཉི་གར་དབང་དང་གདམས་པ་གནང༌། ཡེ་ཤེས་བཟང་པོས་སྨྱུང་གནས་ལན་བདུན་བྱས་པས་ནད་ལྷག་མེད་དུ་དྭངས། མཐར་གཉིས་ཀས་ཀྱང་མཆོག་གི་དངོས་གྲུབ་བརྙེས་སོ། །དེ་རྗེས་བལ་པོ་པེ་ཉ་པ་ཟེར་བ་སེམས་ཅན་ལ་སྙིང་རྗེ་ཤུགས་འབྱུང་གིས་དུས་འདའ་བས་འདི་ཐམས་ཅད་ལ་ཕན་ཆེ་ཞིང་སྒྲུབ་སླ་བའི་གདམས་པ་ཞིག་དགོས་པར་འདུག་སྙམ་ནས་རྒྱ་གར་དུ་ཕེབས་ཏེ་པཎྚི་ཏ་དེ་གཉིས་དང་མཇལ་ནས་གསོལ་བ་བཏབ་པས་འདི་ལས་ཟབ་པ་མེད་གསུངས་ཏེ་འདིའི་ཆོས་སྐོར་གནང༌། ལོ་ལྔར་བསྒྲུབས་པས་འཕགས་པའི་ཞལ་མཐོང་གྲུབ་པ་བརྙེས་ཏེ་སེམས་ཅན་དཔག་ཏུ་མེད་པའི་དོན་མཛད། དེའི་དྲུང་ནས་བྱང་སེམས་ཟླ་བ་རྒྱལ་མཚན་གྱིས་གསན་ཏེ་རང་བྱུང་ཝ་ཏིའི་དྲུང་དུ་སྨྱུང་གནས་མང་དུ་མཛད། ཞག་བདུན་ལ་གསོལ་བ་ཕུར་ཚུགས་སུ་བཏབ་པས་འཕགས་པའི་ཞལ་མཐོང༌། ས་ཆེན་ཀུན་སྙིང་དང་ཕག་མོ་གྲུབ་པ་སོགས་མཁས་གྲུབ་ཀུན་གྱི་གཙུག་རྒྱན་དུ་གྱུར་མི་བརྒྱ་ཕྲག་གི་སྲོག་བསྐྱབས་པ། གཙུག་ལག་ཁང་བརྒྱ་ཕྲག་བཞེངས་པ། དགེ་སློང་ལྔ་བརྒྱ་ཙམ་གྱི་འཚོ་བ་སྦྱོར་བ་སོགས་གཞན་ཕན་འཕྲིན་ལས་བསམ་གྱིས་མི་ཁྱབ་པ་བྱུང༌། དེའི་སློབ་མ་ཉི་ཁུག་པས་ཀྱང་འཕགས་པ་བསྒྲུབས་པས་མངོན་ཤེས་རྫུ་འཕྲུལ་ལ་དབང་འབྱོར། དེའི་སློབ་མ་སྤྲུལ་བ་
རྡོ་རྗེ་རྒྱལ་པོས་སྨྱུང་གནས་ལོ་ལྔ་དང༌། དེའི་སློབ་མ་ཞིང་སྟོན་དགྲ་འཇིགས་ཀྱིས་སྨྱུང་གནས་ལོ་གསུམ་མཛད་པས་འཕགས་པ་ཞལ་གཟིགས། དེའི་སློབ་མ་མཁན་ཆེན་རྩི་འདུལ་བ། དེའི་སློབ་མ་བྱང་སེམས་བདེ་བ་ཅན་པ། དེའི་སློབ་མ་བྱང་སེམས་ཆུ་བཟང་བ་གསུམ་གས་སྨྱུང་གནས་སུམ་བརྒྱ་རེ་སོང་བའི་མཚམས་སུ་འཕགས་པ་ཞལ་གཟིགས་ཏེ་གྲུབ་པ་བརྙེས་པ་སོགས་ཡི་དམ་གཞན་ལས་འདི་ཉིད་སྒྲུབ་ཐག་ཉེ་བའི་ལོ་རྒྱུས་ཤིན་ཏུ་མང་ངོ༌། །སྡིག་པ་ཚན་པོ་ཆེའི་ཇི་ལྟ་བུའང་འདི་ལ་བརྟེན་ནས་སྦྱང་སླ་བ་ནི་འཕགས་པ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པའི་གཟུངས་ཞེས་བྱ་བའི་རྒྱུད་ལས། བཅོམ་ལྡན་འདས་བདག་གི་སྙིང་པོ་འདི་ནི་དེ་ལྟར་རྫུ་འཕྲུལ་ཆེ་བ་ལེགས་སོ། །ལན་གཅིག་བརྗོད་པས་རྩ་བའི་ལྟུང་བ་བཞི་པོ་དག་ཀྱང་བྱང་བར་འགྱུར། མཚམས་མ་མཆིས་པ་ལྔ་པོ་དག་ཀྱང་མ་ལུས་པར་འབྱང་བར་འགྱུར་ན། ཇི་སྐད་བསྟན་པ་བཞིན་དུ་ནན་ཏན་བགྱིད་པ་ལྟ་སྨོས་ཀྱང་ཅི་འཚལ། དེ་དག་ནི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མ་ལ་དགེ་བའི་རྩ་བ་བསྐྱེད་པར་འགྱུར་བ་ལགས་ན། བཟླས་བརྗོད་བགྱིད་པ་དང༌། བསྒྲུབ་པ་ལྟ་སྨོས་ཀྱང་ཅི་འཚལ་ཏེ། བསམ་པ་ཐམས་ཅད་ཡིད་བཞིན་དུ་ཡོངས་སུ་རྫོགས་པར་བགྱིའོ། །སུ་ཞིག་བདག་གི་སླད་དུ་ཚེས་བཅུ་བཞིའམ། བཅོ་ལྔ་ལ་སྨྱུང་བར་བགྱིས་ན་བསྐལ་པ་བཞི་ཁྲིའི་འཁོར་བ་ཕྱིར་བསྙིལ་བར་འགྱུར་ལགས་སོ། །བཅོམ་ལྡན་འདས་བདག་གི་མིང་འཛིན་པ་ནི་དོན་མཆིས་ཏེ། སངས་རྒྱས་བྱེ་བ་ཕྲག་འབུམ་གྱི་བས་ལྷག་ལགས་སོ། །བདག་གི་མིང་འཛིན་པའི་སེམས་ཅན་ཐམས་ཅད་ནི་ཕྱིར་མི་ལྡོག་པ་ཉིད་ལ་གནས་པར་འགྱུར། བྲོ་ནད་ཐམས་ཅད་ལས་
ཡོངས་སུ་ཐར་བར་འགྱུར། སྒྲིབ་པ་ཐམས་ཅད་དང༌། ལུས་དང་ངག་དང་ཡིད་ཀྱི་ཉེས་པར་སྤྱོད་པ་ཐམས་ཅད་ལས་ཡོངས་སུ་ཐར་བར་འགྱུར་ལགས་སོ། །གང་ལ་ལ་ཞིག་ཆོ་ག་བཞིན་དུ་སྦྱོར་བ་བགྱིད་ན་དེ་དག་གི་སུག་པར་སངས་རྒྱས་ཀྱི་བྱང་ཆུབ་ཐོབ་པ་ལགས་སོ། །ཞེས་གསུངས། ཐབས་གཞན་གྱིས་སྦྱོང་མི་ནུས་པ་དགེ་འདུན་གྱི་དཀོར་འཕྲོག་པ་ལྟ་བུའང་འདིས་སྦྱོང་ནུས་པའི་ཚུལ། ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས་ལས། སེམས་ཅན་གང་ལ་ལ་ཞིག་དགེ་འདུན་གྱི་ཞལ་ཟས་དང་དཀོར་འཕྲོག་ཅིང་ཆུད་གསོན་པ་གང་ལགས་པ་དེ་དག་གི་སངས་རྒྱས་སྟོང་འཇིག་རྟེན་དུ་བྱུང་བ་དག་ལ་འགྱོད་པས་མཐོལ་ཞིང་བཤགས་ནའང་འབྱང་ཞིང་ཚངས་པར་མི་འགྱུར་མོད་ཀྱི། འོན་དང་ཐུགས་རྗེ་ཆེན་པོའི་རིགས་སྔགས་འདི་བཏོན་པ་དེ་དག་ཡོངས་སུ་འབྱང་བར་འགྱུར་ལགས་ཏེ། དཀོན་མཆོག་གསུམ་གྱི་ཞལ་ཟས་དང༌། དཀོན་མཆོག་གསུམ་གྱི་དཀོར་ནོར་འཕྲོག་ཅིང་ཆུད་གསོན་པ་དེ་དག་ནི་ཕྱོགས་བཅུའི་སྟོན་པ་རྣམས་མངོན་སུམ་དུ་གྱུར་པའི་སྤྱན་སྔར་བཤགས་ན་གདོད་ཡོངས་སུ་འབྱང་བར་འགྱུར་ལགས་ལ། ཐུགས་རྗེ་ཆེན་པོའི་གཟུངས་འདི་འདོན་པའི་ཚེ་ཕྱོགས་བཅུའི་སྟོན་པ་རྣམས་དེར་གཤེགས་ནས་དབང་མཛད་པར་འགྱུར་བས་ཁ་ན་མ་ཐོ་བའི་སྒྲིབ་པ་དེ་དག་ཐམས་ཅད་ཀྱང་ཡོངས་སུ་འབྱོང་བར་འགྱུར། མི་དགེ་བ་བཅུ་དང༌། མཚམས་མ་མཆིས་པ་ལྔ་དང༌། གང་ཟག་ལ་སྐུར་པ་བཏབ་པ་དང༌། ཆོས་ལ་སྐུར་པ་བཏབ་པ་དང༌། གསོ་སྦྱོང་བཤིགས་པ་དང༌། ཚུལ་ཁྲིམས་བཤིགས་པ་དང༌། མཆོད་རྟེན་བཤིགས་པ་དང༌། གཙུག་ལག་ཁང་བཤིགས་པ་ཐམས་ཅད་དང༌། དགེ་
འདུན་གྱི་དཀོར་བརྐུས་པ་དང༌། ཡོངས་སུ་དག་པའི་ཚངས་པར་སྤྱོད་པ་སུན་པར་བགྱིས་པ་འདི་ལྟ་བུ་ལ་སོགས་པ་སྡིག་པའི་ལས་ལྕི་བ་ཐམས་ཅད་ཡོངས་སུ་འབྱང་བར་འགྱུར་ལགས་སོ། །ཞེས་གསུངས་ཏེ། ཇོ་གདན་མཁན་ཆེན་བསོད་ནམས་བཟང་པོས་མཛད་པའི་སྨྱུང་གནས་ཀྱི་ལོ་རྒྱུས་ལས་ཀྱང༌། ཟས་བཅད་དེ་སྨྱུང་གནས་བྱས་པས་ལུས་ཀྱི་སྒྲིབ་པ་འདག །གཏམ་མི་སྨྲ་བར་ངག་བཅད་བྱས་པས་ངག་གི་སྒྲིབ་པ་འདག །ཆགས་སྡང་གི་ངན་རྟོག་བཀག་སྟེ་དད་པ་དང་ཡིད་བཟླས་བྱས་པས་ཡིད་ཀྱི་སྒྲིབ་པ་འདག །དེ་གསུམ་གྱིས་རིམ་པ་བཞིན་ཡི་དྭགས། དུད་འགྲོ །དམྱལ་བ་རྣམས་སུ་སྐྱེ་བའི་ལས་ཀྱང་སྦྱོང་བར་གསུངས། འོན་ཀྱང་ཡིད་ཆེས་ཀྱི་དད་པ་མེད་མི་རུང་དུ་གལ་ཆེ་སྟེ། ཐེ་ཚོམ་ཅུང་ཟད་ཅིག་སྐྱེས་ནའང་ཕན་ཡོན་བཤད་པ་བཞིན་མི་འབྱུང་བའི་ཚུལ་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་ལུང་དེའི་འཕྲོ་དེ་མ་ཐག་ཏུ། ཐེ་ཚོམ་འཚལ་བར་གྱུར་ན་ཐ་ན་ཁ་ན་མ་ཐོ་བ་ཆུང་ངུའི་ལས་ཡང་བ་ཙམ་ཡང་ཡོངས་སུ་འབྱང་བར་མི་འགྱུར་ན་ཁ་ན་མ་ཐོ་བ་ལྕི་བ་ལྟ་སྨོས་ཀྱང་ཅི་འཚལ་ལགས་ཞེས་སྟོབས་ཆུང་ཚུལ་དང༌། ཡང་ཡིད་ཆེས་མེད་པར་ཁ་ནས་བཏོན་པ་ཙམ་ལ་དགོས་པ་ཅི་ཡང་མེད་དམ་སྙམ་པ་ལ། དེ་མ་ཡིན་པར་ནམ་ཞིག་ན་དེས་ཀྱང་ཐར་བའི་ས་བོན་བཞག་སྟེ་འཁོར་བ་མཐའ་ཅན་དུ་འགྱུར་ཚུལ་སྟོན་པར། ཁ་ན་མ་ཐོ་བ་ལྕི་བ་དག་ཡོངས་སུ་འབྱང་བར་མི་འགྱུར་མོད་ཀྱི། འོན་ཀྱང་བྱང་ཆུབ་ཀྱི་རིང་བའི་རྒྱུ་ནི་བགྱིད་པར་འགྱུར་ལགས་སོ། །ཞེས་གསུངས་སོ། །ཤིན་ཏུ་སྙིགས་མའི་དུས་འདིར་དེ་འདྲ་ཙམ་ལའང་དོན་ཆེ་ཚུལ་ཤེས་དགོས་
ཏེ། དོན་ཞགས་ཀྱི་ཆོ་ག་ཞིབ་མོ་ལས། རྗེ་དཔོན་གྱིས་སྐྲག་པས་བགྱིས་སམ། བཞད་གད་ཙམ་གྱི་རྒྱུས་ཉན་པར་བགྱིད་ན། བཅོམ་ལྡན་འདས་མཁས་པས་འཕགས་པ་སྤྱན་རས་གཟིགས་དབང་ཕྱུག་གི་མཐུས་དེ་དག་གི་རྣ་ཁུང་དུ་སྒྲ་དེ་གྲག་པ་ལགས་པར་འཚལ་བར་བགྱིའོ། །ཞེས་པ་ནས། གཡོ་དང་རྒྱུས་མཆོད་པ་བགྱིད་ནའང་དེ་ཉིད་སེམས་ཅན་དམུ་རྒོད་དག་གི་དགེ་བའི་རྒྱུར་འགྱུར་ལགས་སོ། །ཞེས་གསུངས་ཏེ་ཐུགས་རྗེ་དང་སྨོན་ལམ་བསམ་གྱིས་མི་ཁྱབ་པའི་མཐུ་ཡིན་ནོ། །སྤྱན་རས་གཟིགས་ཕྱག་སྟོང་སྤྱན་སྟོང་དུ་སྤྲུལ་བའི་གཟུངས་ལས། གང་ཞིག་རི་བྲག་དགོན་པར་གནས་པའི་ཚེ། །གཅན་གཟན་སྟག་དང་དོམ་དྲེད་སྤྱང་ཀི་དང༌། །སྦྲུལ་གདུག་ཅན་དང་བརླབས་པའི་འདྲེ་རྣམས་ལ། །སྔགས་འདི་བརྗོད་པ་ཙམ་གྱིས་གནོད་མི་ནུས། །གང་ཞིག་རྒྱ་མཚོའམ་ཆུ་ཀླུང་སར་འགྲོ་ན། །ཀླུ་གདུག་འཇོག་པོ་ཆུ་སྲིན་ཉ་རྣམས་དང༌། །གནོད་སྦྱིན་སྲིན་པོ་འབར་བ་རུ་སྦལ་རྣམས། །སྔགས་འདི་ཐོས་པ་ཙམ་གྱིས་ལུས་སྦེད་འགྱུར། །ཕ་རོལ་དམག་ཚོགས་ཕྲད་དེ་དགྲས་བསྐོར་རམ། །སྡིག་པ་ཅན་གྱིས་ནོར་ཟས་འཇོམས་པའི་ཚེ། །བསམ་པ་ཐག་པས་ཐུགས་རྗེའི་སྔགས་བརྗོད་ན། །དེ་དག་བྱམས་སེམས་གཡོ་ཞིང་ཕྱིར་ཡང་ལྡོག །གང་ཞིག་རྗེ་དཔོན་དག་གིས་བཙོན་བཟུང་ནས། །ཁྲི་མོན་དང་ནི་བཙོན་རར་འཇུག་པའི་ཚེ། །བསམ་པ་ཐག་པས་ཐུགས་རྗེའི་སྔགས་བརྗོད་ན། །རྗེ་དཔོན་སེམས་སློད་གནང་ཞིང་སླར་ལ་གཏོང༌། །དུག་ཅན་ཟས་རྣམས་གནོད་པར་གྱུར་པའི་ཚེ། །བསམ་པ་ཐག་པས་ཐུགས་རྗེའི་སྔགས་བརྗོད་ན། །དུག་ཅན་ཟས་དེ་འཕྲལ་དུ་བདུད་རྩིར་འགྱུར། །བུད་མེད་གང་ཞིག་བུ་དག་བཙའ་བ་ན། །གདོན་
བགེགས་ཞུགས་ཏེ་སྡུག་བསྔལ་མི་བཟད་ཚེ། །ཐུགས་རྗེ་ཡི་ནི་སྔགས་འདི་བརྗོད་བྱས་པས། །གདོན་བགེགས་བྱེར་ཞིང་བདེ་བར་བཙའ་བར་འགྱུར། །ཀླུ་གདུག་གོར་འདྲེས་རིམས་ནད་གཏོང་བ་ན། །ན་ཚ་མི་བཟད་འཆི་སྒོར་བསྙེན་པའི་ཚེ། །བསམ་པ་ཐག་པས་ཐུགས་རྗེའི་སྔགས་བརྗོད་ན། །རིམས་ནད་ཞི་ཞིང་ཚེ་སྲོག་ནུས་པར་འགྱུར། །ཀླུ་དང་ཆུ་སྲིན་གདོན་གྱིས་སྐྲངས་གྱུར་ཅིང༌། །འབྲས་དང་ཤུ་བ་རྣག་ཁྲག་མི་བཟད་ཚེ། །བསམ་པ་ཐག་པས་ཐུགས་རྗེའི་སྔགས་བརྗོད་ནས། །མཆིལ་མ་ཐེངས་གསུམ་བཏབ་པས་རྗེས་བཞིན་འབྱང༌། །སྙིགས་མ་ཅན་གྱི་སེམས་ཅན་སྡིག་སྤྱོད་ཅིང༌། །སྔགས་དང་བྱད་ཀྱིས་ཁོན་ལ་ཤར་གཉེར་བ། །བསམ་པ་ཐག་པས་ཐུགས་རྗེའི་སྔགས་བརྗོད་ན། །བྱང་སྔགས་དྲག་པོ་དེ་ལ་སླར་འཁོར་རོ། །དུས་ངན་སྙིགས་ཅན་འཁྲུག་ཅིང་ཆོས་འཇིག་ཚེ། །ཆགས་མེད་བདེ་ཞིང་འདོད་ལ་སེམས་རྨོངས་ཏེ། །བཟའ་ཤུག་དབེན་ཞིང་ཉིན་མཚན་གཞན་དག་ལ། །འདོད་པའི་ཆགས་སེམས་གཏོང་བའི་དུས་མེད་པ། །དེ་ཚེ་ཐུགས་རྗེ་ཅན་གྱི་སྔགས་བརྗོད་ན། །འདོད་ཆགས་མེ་དང་འཁྲུག་སེམས་འགག་པར་འགྱུར། །གལ་ཏེ་ང་ཡི་སྔགས་ཀྱི་ཡོན་ཏན་ཀུན། །རྒྱ་ཆེར་བཤད་དུ་བསྐལ་པར་མི་རྫོགས་སོ། །ཞེས་གསུངས་ལ། དམ་ཆོས་པད་དཀར་དུ་འཇིགས་པ་བརྒྱད་ལས་ཐར་ཚུལ་གསུངས་པ་སོགས་གནས་སྐབས་དང་མཐར་ཐུག་གི་ཕན་ཡོན་མཐའ་ཡས་པ་ཞིག་མདོ་རྒྱུད་དུ་མ་ལས་གསུངས་ཤིང༌། ཁྱད་པར་དུ་འཆི་ཁའི་དུས་སངས་རྒྱས་རྣམས་ཀྱིས་ཞལ་བསྟན་ནས་དག་ཞིང་དུ་འཁྲིད་པའི་ཚུལ་སེམས་རྒྱ་ཆེར་ཡོངས་སུ་རྫོགས་པའི་
གཟུངས་ལས། ལྷའམ་མི་གང་ལ་ལ་ཞིག་ཐུགས་རྗེ་ཆེན་པོའི་ཚིག་འདོན་ཞིང་འཛིན་པར་བགྱིད་ན་འཆི་བའི་དུས་ཀྱི་ཚེ། ཕྱོགས་བཅུའི་དེ་བཞིན་གཤེགས་པ་རྣམས་དེར་གཤེགས་ནས་ཕྱག་སློང་བར་འགྱུར་བས་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འཚལ་བར་ཇི་ལྟར་སྨོན་པ་བཞིན་དུ་དེ་དག་ཏུ་སྐྱེ་བར་འགྱུར་ལགས་སོ། །ཞེས་དང༌། དོན་ཞགས་ཀྱི་རྒྱུད་ལས། འགུམ་པའི་དུས་སུ་འཕགས་པ་སྤྱན་རས་གཟིགས་དབང་ཕྱུག་དགེ་སློང་གི་གཟུགས་སུ་མངོན་སུམ་དུ་ཞལ་སྟོན་པར་འགྱུར་རོ། །བདེ་བར་འཆི་བའི་དུས་བྱེད་པར་འགྱུར་རོ། །ལྟ་བ་འཁྲུལ་བར་མི་འགྱུར་རོ། །ཞེས་པ་ནས། སངས་རྒྱས་ཀྱི་ཞིང་གང་དུ་སྨོན་པ་དེར་སྐྱེ་བར་འགྱུར་ཞིང༌། དགེ་བའི་བཤེས་གཉེན་དང་འབྲལ་བར་མི་འགྱུར་རོ། །ཞེས་གསུངས་སོ། །མདོར་ན་དམ་ཆོས་པད་དཀར་ལས། གང་ཞིག་སངས་རྒྱས་བཅོམ་ལྡན་འདས་གངྒཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་བཞུགས་ཏེ་འཚོ་ཞིང་གཞེས་པ། ཞེས་པ་ནས། སངས་རྒྱས་བཅོམ་ལྡན་འདས་དེ་ཉིད་ལ་བཀུར་སྟི་བྱས་པའི་བསོད་ནམས་མངོན་པར་འདུ་བྱེད་པ་དང༌། གང་གིས་ཐ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་ལན་ཅིག་བྱས་པ་དང༌། མིང་འཛིན་པའི་བསོད་ནམས་མངོན་པར་འདུ་བྱེད་པ་གཉི་ག་མཉམ་སྟེ། ལྷག་པའང་མེད། འཕགས་པའང་མེད་དོ། །ཞེས་མཚན་ཐོས་པ་ཙམ་ལའང་གཞན་ལས་ལྷག་པའི་ཕན་ཡོན་འབྱུང་བ་ནི་མགོན་པོ་འདི་ཉིད་ཀྱི་ཐུན་མོང་མ་ཡིན་པའི་ཁྱད་ཆོས་ཡིན་པས། སྤྱོད་འཇུག་ལས། དེ་བས་མགོན་པོ་སྤྱན་རས་གཟིགས། །ཐུགས་རྗེ་ཆེན་པོས་འགྲོ་བ་ཡིས། །འཁོར་བའི་འཇིགས་
པའང་བསལ་བའི་ཕྱིར། །རང་གི་མཚན་ཡང་བྱིན་གྱིས་བརླབས། །ཞེས་གསུངས་ཏེ། སྙིང་ནས་གསོལ་བ་འདེབས་ནུས་ན་ཉིན་ཞག་གཅིག་ལ་སྨྱུང་གནས་བསྲུང་ཞིང་ཡིག་དྲུག་བགྲང་བས་ཀྱང༌། ས་ཆེན་པོའི་རྡུལ་གྲངས་དང་མཉམ་པའི་ལོ་ལ་དམྱལ་བའི་མེ་ནང་དུ་བར་མཚམས་མེད་པར་བསྲེག་ངེས་པའི་ལས་ངན་ཚན་པོ་ཆེའང་བྱང་ཞིང་དག་པར་རྒྱུད་སྡེ་ལས་གསུངས་པས། རང་ཅག་ཐོག་མེད་ནས་བསགས་པའི་སྡིག་པ་མཐའ་ཡས་པའི་ཐོག་ཏུ་ཚེ་འདིར་ཡང་སྡོམ་གསུམ་གྱི་བཅས་མཚམས་དང་འགལ་བ། བླ་མ་དང་གྲོགས་རྡོ་རྗེ་སྤུན་དཀོན་མཆོག་གསུམ་གྱི་རྟེན་སོགས་ཞིང་ཁྱད་པར་ཅན་ལ་སྡིག་བསགས་པ། དཀོར་ཟས་སོགས་ལ་བག་མེད་དུ་སྤྱད་དེ་དམྱལ་བའི་གཡང་ཁར་གནས་པ་རྣམས་ཀྱིས་ལྷ་དང་ཆོས་འདི་ལྟ་བུ་ཞིག་དང་མཇལ་བའི་ཚེ་སེམས་ཤིག་ཡོད་ན་རང་ལ་ནུས་པ་གང་ཡོད་ཀྱིས་འབད་པ་ཆིག་དྲིལ་དུ་མི་བྱ་བའི་ཐབས་མེད་དོ། །གཉིས་པ་གནད་དུ་འགྲོ་བའི་ཕྱིར་བླང་དོར་གྱི་ལག་ལེན་བཤད་པ་ནི། རང་ཅག་ཆོས་སྒྲུབ་པའི་ཁུལ་བྱས་ཀྱང་ཇི་བཞིན་མི་འགྲུབ་པ་དེ། སངས་རྒྱས་ཀྱིས་འབྲས་བུ་འདི་འགྲུབ་པ་ལ་རྒྱུ་འདི་བྱེད་དགོས་གསུངས་པ་གཅིག་ཀྱང་མ་བྱས། འདི་དང་འདི་བྱར་མི་རུང་གསུང་བ་ཐམས་ཅད་བྱས་པས་ལན་པ་མི་ཤེས་པར་ད་དུང་སངས་རྒྱས་ཀྱི་གསུང་མ་བདེན་པར་བརྩི་བ་ནི་སྨྱོན་པའི་སྤྱོད་པ་ཡིན་ཏེ། དཔེར་ན་ཤར་གྱི་གྲོང་ཁྱེར་དུ་འགྲོ་འདོད་པ་ལ་གཞན་ཞིག་གིས་དེའི་ལམ་དྲང་པོར་བསྟན་ཀྱང༌། ཁོ་རང་ནུབ་ཏུ་སོང་སོང་ནས་ཤར་དུ་སླེབ་རྒྱུ་མ་བྱུང་
ཚེ་གཞན་དེས་རྫུན་སྨྲས་པར་འདུག་ཅེས་བཤད་པ་དང་ཁྱད་མེད་དོ། །འདི་ལ་དགོངས་ཏེ་འཇམ་དཔལ་རྩ་རྒྱུད་ལས། ཚུལ་ཁྲིམས་འཆལ་ལ་ཐུབ་དབང་གིས། །སྔགས་འགྲུབ་པར་ནི་མ་གསུངས་ཏེ། །ཞེས་དང༌། རྡོ་རྗེ་རྩེ་མོ་ལས། གང་ཟག་བཞིས་ནི་འཇིག་རྟེན་དུ། །བསྒྲུབས་ཀྱང་འགྲུབ་པ་ཉིད་མི་འགྱུར། །བྱང་ཆུབ་སེམས་ནི་མ་སྐྱེས་དང༌། །ཐེ་ཚོམ་ལྡན་པ་ཉིད་དང་ནི། །བཀའ་བཞིན་དུ་ནི་མི་སྤྱོད་པ། །དད་པ་མེད་ཉིད་འགྲུབ་མི་འགྱུར། །ཞེས་གསུངས་པས། འགལ་རྐྱེན་རྣམས་དང་བྲལ་ཞིང་མཐུན་རྐྱེན་རྣམས་ཚང་ན་འབྲས་བུ་ཇི་ལྟར་གསུང་བ་བཞིན་འབྱུང་བ་ལ་ཐེ་ཚོམ་མེད་དོ། །དེའང་བསམ་པའི་ཁྱད་པར་ཁམས་གསུམ་འཁོར་བ་སྡུག་བསྔལ་གྱི་རང་བཞིན་དུ་ཤེས་པའི་ངེས་འབྱུང་དང༌། རང་ཉམས་ལ་དཔག་སྟེ་མ་རྒན་སེམས་ཅན་རྣམས་ལ་དམིགས་པའི་སྙིང་རྗེ། དེ་དག་གི་དོན་དུ་སངས་རྒྱས་ཐོབ་འདོད་ཀྱི་བསམ་པ་སེམས་བསྐྱེད་རྣམས་མ་མཐའ་བཅོས་མ་ཙམ་རེ་ཡིན་ཀྱང་གསལ་བཏབ་ནས་དེས་ཟིན་པར་བྱེད་པ་དང༌། སྦྱོར་བའི་ཁྱད་པར་ཁས་བླངས་པའི་དམ་ཚིག་དང་སྡོམ་པ་ཚུལ་བཞིན་དུ་བསྲུང་བ་ལས་མ་འདས་ལ། འདིར་སྡོམ་པ་ནི་ཐུགས་རྗེ་ཆེན་པོའི་དབང་ངེས་པར་སྔོན་དུ་ཐོབ་དགོས་ཤིང༌། དེར་སྔགས་སྡོམ་འཛིན་རྒྱུ་མེད་ཀྱང་བྱང་སྡོམ་ལེན་དགོས་པས། དེའི་བསླབ་བྱ་རྩ་ལྟུང་བཅོ་བརྒྱད་དང༌། ཉེས་བྱས་ཞེ་དྲུག་གི་བསྲུང་མཚམས་སོགས་འདིར་བྲིས་ན་ཧ་ཅང་མང་འགྲོ་བ་དང༌། བླ་མ་གོང་མའི་གསུང་གི་བསླབ་བྱ་རྒྱས་བསྡུས་ཅི་འདྲ་ཞིག་དགོས་ཀྱང་ལག་མི་ཐོགས་པས་དེ་དག་གི་སྟེང་ནས་ལེགས་པར་རྩད་བཅད་དེ་བསྲུང་དགོས། དེའི་སྟེང་དུ་སྔགས་ཀྱི་དམ་ཚིག་
ཀྱང་མང་པོ་ཞིག་གསུང་བས་འདིར་ལག་ལེན་ཉེར་མཁོ་གལ་ཆེ་བ་འགའ་ཙམ་སྨོས་ན། ལེགས་གྲུབ་ཀྱི་རྒྱུད་ལས། དངོས་གྲུབ་མྱུར་དུ་ཐོབ་འགྱུར་བའི། །གསང་སྔགས་ཟློས་པའི་འདུལ་བ་བཤད། །མཁས་པས་གསང་སྔགས་ཆོ་ག་དང༌། །གསང་སྔགས་རང་བཟོ་མི་བྱ་ཞིང༌། །བླ་མ་དཀྱིལ་འཁོར་སྟོན་པ་ནི། །སྤྱོད་པ་ངན་པར་གྱུར་ན་ཡང༌། །ངག་གམ་ཡང་ན་ཡིད་ཀྱིས་སུ། །ནམ་ཡང་སྨད་པར་མི་བྱ་འོ། །གཞན་གྱིས་རྗེས་སུ་མ་གནང་བར། །གསང་སྔགས་གཟུང་བར་མི་བྱ་སྟེ། །རྒྱུད་དང་དཀྱིལ་འཁོར་བཤད་པ་དག །དཀྱིལ་འཁོར་མ་ཞུགས་ལ་མི་སྦྱིན། །སྔགས་ཀྱི་སྒྲུབ་པ་པོ་དག་དང༌། །ལྷན་ཅིག་ནམ་ཡང་འགྲན་མི་བྱ། །ཉེས་པ་ཆུང་ངུ་དག་ལ་ནི། །ཁྲོས་ནས་དྲག་ཤུལ་སྤྱད་མི་བྱ། །ཟློས་པ་ཆོ་ག་ལ་གནས་པས། །གླུ་གར་རྩེད་མོ་མི་བྱ་སྟེ། །མཛེས་པར་བྱ་ཕྱིར་ཕྲེང་བ་དང༌། །ཁ་དོག་འཆང་བར་མི་བྱ་འོ། །འགོང་བ་དང་ནི་མཆོང་བ་དང༌། །རྒྱུག་པ་དང་ནི་ཙབ་ཧྲལ་དང༌། །ལུས་ལས་བྱུང་བའི་གནས་ངན་ལེན། །ཐམས་ཅད་ཡོངས་སུ་སྤངས་པར་བྱ། །བདེན་པའི་ཆོས་ལ་གནས་པ་ཡིས། །དོན་མེད་གཏམ་ཡང་མི་བྱ་འོ། །བློ་ཅན་བཟླས་བརྗོད་བྱེད་པ་ན། །སྔགས་གཡོག་གཅིག་པུ་མ་གཏོགས་པར། །གཞན་དང་ལྷན་ཅིག་དགོས་མེད་པར། །འགའ་དང་ཡང་ནི་སྨྲ་མི་བྱ། །སྙིམ་པ་ཁོ་ནར་མི་ཟ་སྟེ། །འཁར་བའི་སྣོད་དུའང་ཟ་མི་བྱ། །ལོ་མའི་རྒྱབ་ཏུའང་མི་ཟ་ཞིང༌། །མཁས་པས་ཆགས་པའི་ཟས་མི་ཟ། །ཡང་དང་ཡང་དུ་མི་ཟ་སྟེ། །ཧ་ཅང་ཆུང་དང་ཆེར་མི་ཟ། །མི་ཟ་བར་ཡང་མི་བྱ་ལ། །གང་དག་དོགས་པའང་མི་ཟ་འོ། །ཟས་དང་དེ་བཞིན་སྤྱོད་པ་ལ། །མ་བསྡམས་པར་ནི་ཡོངས་མི་བྱ། །སྒྲིམ་པ་ལྷོད་པར་མི་བྱ་འོ། །
ཡིད་ནི་གཞན་དུ་མ་གྱུར་དང༌། །བསམ་པ་མང་པོ་མ་ཡིན་དང༌། །མི་གཙང་ཆགས་པའི་སེམས་མེད་པར། །ཟློས་པ་པོས་ནི་གསང་སྔགས་གདོན། །ཞེས་དང༌། དཔུང་བཟང་གིས་ཞུས་པའི་རྒྱུད་ལས། སྟངས་དང་མཆོད་པ་དང་ནི་གར་བྱེད་དང༌། །གླུ་ལེན་རྔ་བརྡུང་སྐྱེ་བོས་དཔྱས་འགྱུར་དང༌། །ལྷག་པའི་ང་རྒྱལ་འདྲིད་དང་འདོད་ཆེན་དང༌། །རྒྱན་པོ་དང་མི་འདུས་པ་བལྟ་འདོད་དང༌། །དུས་མིན་གཉིད་དང་མི་འགྲུབ་སྨྲ་བ་དང༌། །བསྟན་བཅོས་ངན་དང་སྙན་དངགས་ཀློག་འདོན་དང༌། །ཆགས་དང་འཚིག་དང་དྲེགས་དང་རྒྱགས་པ་དང༌། །ཞེ་ལ་འཛིན་དང་ལེ་ལོ་གཡོ་སྒྱུ་སྤང༌། །ཤ་ཆང་ཀེ་འུ་བཙོང་དང་སྒོག་རྡོག་དང༌། །འབྲུ་མར་ཏིལ་དང་ལ་ཕུག་སུ་ར་ན། །འབྱུང་པོའི་ཟས་དང་ལྷ་བཤོས་གཏོར་མ་དང༌། །གུ་ལང་མཆོད་བྱས་གཏོར་མ་མི་ཟའོ། །ཞེས་གསུངས། དོན་ཞགས་ཀྱི་རྒྱུད་ལས་ཀྱང༌། ཆང་དང་ཤ་དང་ཀུན་དོང་དང་ཀེའུ་དང་སྒོག་སྐྱ་དང༌། འདྲེས་པ་དང༌། ལྷག་རོལ་དང༌། འདི་རྣམས་ཁྱད་པར་དུ་དོན་དུ་གཉེར་བས་སྤང་བར་བགྱིའོ། །ཞེས་དྲི་ངན་འདི་དག་ལ་འཛེམ་དགོས་ཚུལ་ནན་ཏན་དུ་གསུངས་པས་ངེས་པར་ཕན་ཡོན་ཞིག་འདོད་ན་ཤིན་ཏུ་ཟོན་བྱེད་དགོས་ཏེ། སྔོན་ལོ་ཙཱ་བ་རིན་ཆེན་བཟང་པོའི་སློབ་མ་ཞིག་ལ་རྗེ་བཙུན་འཇམ་དབྱངས་ཀྱི་སྒྲུབ་ཐབས་གནང་ནས་སྒོམ་དུ་བཅུག་པའི་ཚེ་དེས་ཀྱང་རྩེ་གཅིག་ཏུ་བསྒྲུབས་ཏེ་དུས་ཡུན་རིང་སོང་ཡང་གྲུབ་པའི་མཚན་མ་གང་ཡང་མ་བྱུང་བ་ན། ལོ་ཆེན་གྱི་ཞལ་ནས་ངས་ནི་ཁྱོད་ལ་དགའ་བཞིན་དུ་བྱིན་པ་ཡིན། ཆོ་གའི་ཡན་ལག་འདྲ་ཉམས་པ་མིན་ནམ་གསུངས་པ་ན། ཁོང་གིས་ཆོ་གའི་ཡན་ལག་གཞན་རྣམས་ཚང་སྟེ། ཁྲུས་བྱེད་པ་མ་བྱུང་ཞུས་པ་ན། ལོ་ཆེན་གྱི་ཞལ་ནས་དེར་ལན་པ་ཡིན་པས།
ད་ཁྲུས་གྱིས་ལ་སྒྲུབས་ཤིག་ཅེས་གསུང༌། ཁོང་གིས་ཀྱང་དེ་བཞིན་བྱས་པས་མྱུར་དུ་གྲུབ་པའི་གཏམ་རྒྱུད་ལྟ་བུ། ཕྲ་མོ་དེ་ཙམ་རེས་ཀྱང་ཕན་གནོད་ཆེན་པོ་བྱུང་བ་ཡིན། །མདོར་ན་བྱ་རྒྱུད་དོན་གསལ་ལས། འདུལ་བའི་བཅས་མཚམས་དག་པ་དང༌། བྱང་སེམས་ཀྱི་སྤྱོད་པ་ལ་སློབ་པ་གཞིར་བཟུང་ནས་སྔགས་ཀྱི་ཉམས་ལེན་བྱ་དགོས་ཚུལ་དང༌། སྐབས་འདིར་གཙང་སྦྲ་ཤིན་ཏུ་གལ་ཆེ་བས་སྤྱོད་ལམ་ཀུན་ཏུ་གཙང་སྦྲ་དགོས་ཚུལ་དང༌། དེའི་ནང་ནས་ཀྱང་བཟའ་བཏུང་གི་ཚེ་གཙང་སྦྲ་ཤིན་ཏུ་གལ་ཆེ་བས། གནས་གང་དུ་ཟ་བ་དང༌། གང་དུ་མི་རུང་བའི་ཁྱད་པར། སྣོད་གང་དུ་ཟ་བ་དང་གང་དུ་མི་རུང་བའི་ཁྱད་པར། ཟས་གང་ཟ་བ་དང་གང་ཟ་མི་རུང་བའི་ཁྱད་པར༌། སྦྱིན་བདག་ཇི་ལྟ་བུ་ལ་སློང་རུང་བ་དང་མི་རུང་བའི་ཁྱད་པར་རྣམས་ཞིབ་ཏུ་ཤེས་པར་བྱས་ནས་ཇི་ལྟར་གསུངས་པ་ལྟར་བྱེད་པ་ཤིན་ཏུ་གལ་ཆེ། གསུངས་པ་ལྟར་ཡིན་པས་ཟས་དང་སྤྱོད་ལམ་གྱི་སྐོར་འདི་ལ་གཟབ་དགོས་ལྷག་པར་ཡང་བདུད་ཀྱི་ཆོ་འཕྲུལ། དུས་ངན་སྙིགས་མའི་རང་རྟགས་ཐ་མ་ཁ་ཟེར་བའི་རྫས་ངན་འདི་ལ་ཤིན་ཏུ་འཛེམ་དགོས་ཏེ། གོང་དུ་སྒོག་པ་སོགས་ལ་དགག་བྱ་ཆེར་མཛད་ནའང༌། དེའི་ནུས་པ་འདུལ་བ་མདོ་རྩ་བར། སྒོག་སྐྱ་ནི་ཞག་བདུན། ཀུན་དོང་ནི་ཞག་གསུམ། ཀེའུ་ནི་ཞག་གཅིག་མ་ལོན་པར་གཙུག་ལག་ཁང་དུ་འཇུག་པར་མི་བྱའོ། །ཞེས་ཡུན་དེའི་བར་དུ་དྲི་ངན་ཡལ་མི་ཐུབ་པས་གཙུག་ལག་ཁང་དུ་འཇུག་མི་རུང་ཡང༌། རླུང་ནད་ཅན་གྱིས་རྟེན་གསུམ་མེད་པའི་དབེན་པར་བསྡད་ན་སྐྱོན་མེད་པར་གསུངས། འདི་ནི་དྲི་ངན་པ་ཙམ་མ་ཡིན་པར་འདི་ཕྱི་
ཀུན་ལ་གནོད་པའི་ཉེས་དམིགས་མང་པོ་ཡོད་དེ། དེའི་རྒྱུ་མཚན་དང་པོའི་འབྱུང་ཁུངས་ཀྱང༌། སློབ་དཔོན་པདྨས་རཏྣའི་ལུང་བསྟན་དུ་གསུངས་པ་ལྟར་དམ་སྲི་སྤུན་དགུའི་ཐ་ཆུང་གིས་སྨོན་ལམ་ལོག་འདེབས་བྱས་པས་བདུད་རིགས་ཀྱི་བུད་མེད་ཅིག་ཏུ་སྐྱེས་སླར་ཡང་ལས་སྨོན་ལོག་པ་དེ་ལ་གསོས་བཏབ་སྟེ་ཤི་བའི་ཟླ་མཚན་གྱིས་ས་བོན་བྱས་ནས་སྐྱེས། དམ་སྲིས་སྙིང་བསྒུལ་ཏེ་སྐྱེ་བོ་མང་པོས་དེ་ལ་ལོངས་སྤྱད་པས་འཕྲལ་དུ་དགའ་སྣང་སྐྱེ་ཞིང༌། དེ་ནས་ཉོན་མོངས་པ་དུག་ལྔ་མེ་ལྟར་མཆེད། སྒོ་གསུམ་གྱི་སྤྱོད་པ་ཐམས་ཅད་ལད། དཀར་ཕྱོགས་ཀྱི་ལྷ་རྣམས་མནོལ། ནད་གདོན་ཀུན་གྱི་སྣ་འདྲེན་པའི་ཉེས་དམིགས་ཤིན་ཏུ་མང་སྟེ། རཏྣའི་ལུང་བསྟན་ལས། རྟེན་གྱི་སྐུ་ལ་དུ་བ་ཕོག་པ་ཡིས། །ལྷན་ཅིག་སྐྱེས་པའི་ལྷ་ནི་བྲོས་པ་དང༌། །འཐུང་བའི་མོད་ལ་བྱང་ཆུབ་སེམས་རྩ་སྐེམས། །སྲོག་རྩར་གདོན་ཞུགས་ཚེ་ཐུང་དབུགས་ཀྱང་འཚང༌། །བཞི་བརྒྱ་རྩ་བཞིའི་ནད་རྣམས་སྣ་འདྲེན་བྱེད། །མདོག་ངན་འགྱུར་དང་མཁྲིས་ནད་འཕེལ་བར་འགྱུར། །ཡུལ་དེར་མུ་གེ་བྱུང་ནས་ཕལ་ཆེར་འཆི། །འཐབ་རྩོད་འཁྲུག་པ་བྱུང་ནས་མཚོན་གྱིས་འཆི། །བསྟན་འཛིན་སྐུ་ཚེ་མི་བརྟན་ཞིང་གཞན་གཤེགས། །དུག་གི་དུད་པ་ཧ་ཅང་ཆེ་དྲགས་པས། །ནམ་མཁར་ལྟས་ངན་གཏོང་བའི་སྐར་མ་འཆར། །དུག་གི་དུད་པ་ནམ་མཁར་ཕོག་པ་ཡིས། །ལྷ་ཡི་གྲོང་ཁྱེར་འབུམ་ཚོ་འཇིག་པར་བྱེད། །དེ་ཡི་སྟོབས་ཀྱིས་གནམ་ནས་ཆར་མི་འབབ། །དུག་གི་དུད་པ་ས་གཞིར་ཕོག་པ་ཡིས། །ཀླུ་ཡི་གྲོང་ཁྱེར་ཆེན་པོ་འབུམ་ཚོ་འཇིག །དེ་ཡི་དབང་གིས་གནམ་ལ་སྤྲིན་མི་འབྱུང༌། །ཆར་ཆུ་མི་འབབ་ལོ་ཕྱུགས་མི་ལེགས་ཤིང༌། །
འཐུང་བའི་མི་རྣམས་ཡི་དམ་ལྷ་བསྒྲུབས་ཀྱང༌། །ལྷ་ཞལ་མི་སྟོན་ཚུར་ལ་གདོན་ཞལ་མཐོང༌། །བསྐལ་པར་བསྒྲུབས་ཀྱང་མི་འགྲུབ་བར་ཆད་འབྱུང༌། །ཞེས་དང༌། པཎ་ཆེན་བློ་བཟང་ཆོས་རྒྱན་གྱིས། མི་གཙང་རྩོག་གིས་མནོལ་བས་སད་སེར་དང༌། །མི་འདོད་འབྲས་བུ་སྣ་ཚོགས་འགྲོ་ལ་འབྱུང༌། །རྣམ་སྨིན་རང་ཉིད་མ་ཟད་དྲི་ཕོག་པའི། །འགྲོ་རྣམས་དམྱལ་བ་ཡི་དྭགས་དུད་འགྲོ་སོགས། །གནས་ངན་མི་ཁོམ་གནས་སུ་སྐྱེ་བས་ན། །རིག་ལྡན་སུ་ཞིག་དེ་འདྲ་ལ་མི་འཛེམ། །ཞེས་གསུངས་ཤིང༌། རང་གིས་འཐེན་པར་མ་ཟད་གཞན་གྱིས་འཐེན་པའི་དུ་བ་ཕོག་ནའང་དགེ་སྦྱོར་ལ་ཤིན་ཏུ་གནོད་པར་རྒྱལ་སྲས་བློ་བཟང་བསྟན་འཛིན་གྱིས་གསུངས་སོ། །འདི་སངས་རྒྱས་ཀྱི་དུས་སུ་མེད་པས་གླེང་གཞི་མ་བྱུང་བ་མ་གཏོགས། བྱུང་ན་ཆང་དང་ཁྱད་མེད་དུ་འགོག་རྒྱུའི་ཚོད་ཡིན་ཞེས་པཎ་ཆེན་གྱིས་གསུངས་ཚུལ་དམ་པ་གོང་མའི་གསུང་རྒྱུན་ལས་འབྱུང་བས། འདུལ་བ་མདོར་བསྡུས་ཀྱི་དོན་བཞིན་རུང་མཐུན་སྦྱར་ཚེ་འདུལ་བའི་བཅས་མཚམས་དང་འགལ་བའི་ཉེས་པའང་ཆེན་པོར་འགྲོ། དེའི་རྒྱུ་མཚན་ནི་འདིས་སེམས་མྱོས་པར་བྱེད་ཅིང་མང་དུ་བསྟེན་གྱིན་སྤྱོད་པ་ཇེ་རྩིང་དུ་སོང་སྟེ་འཕྱར་གཡེང་སོགས་བག་མེད་པའི་སྤྱོད་པ་སྣ་ཚོགས་ལ་འཇུག་པར་འགྱུར་བ་དང༌། དམ་སྲིའི་ལོག་སྨོན་གྱིས་བསྐྱེད་པའི་རྫས་ཡིན་པས། དམ་སྲིས་སྣ་དྲངས་ཏེ་གདོན་བགེགས་ལོག་འདྲེན་ཐམས་ཅད་ཤ་རུལ་ལ་སྦྲང་བུ་འཁོར་བ་བཞིན་དུ་དེར་འདུ། དེ་དག་འདུས་པ་བཞིན་གྱིས་གྲིབ་དང་ཆམ་པ་གློ་ནད་ཚད་རིམས་སོགས་ལུས་ཀྱི་ནད་སྣ་ཚོགས་པ། འདོད་ཆགས་
ཕྲག་དོག་སོགས་ཉོན་མོངས་པའི་རྟོག་པ་དང་དེ་ལ་བརྟེན་པའི་ལུས་སེམས་ཀྱི་སྡུག་བསྔལ་མི་ཁ་གཏམ་ངན་སོགས་མི་འདོད་པ་སྣ་ཚོགས་པ། ཡུལ་ཁམས་སུའང་སད་སེར་ལོ་ཉེས་མི་ནད་ཕྱུགས་ནད་དམག་འཁྲུག་སོགས་བཀྲ་མི་ཤིས་པ་སྣ་ཚོགས་སྒོ་དུ་མ་ནས་འོང་ངོ༌། །ཁྱད་པར་དུ་སྒྲུབ་པ་ཉམས་ལེན་བྱེད་པ་ལ་ཕྱིའི་སྒབ་འདྲེ་མནན་པ་ཞེས་དམ་སྲི་ཕར་བསྐྲད་དགོས་པ་དེ་བསམ་བཞིན་དུ་ཚུར་བོས། བསྟེན་རྒྱུའི་ཡི་དམ་ཆོས་སྲུང་རྣམས་ལ་ལྷ་དབྱེའི་རྫས་ངན་གྱི་དུད་པ་བདུག་སྟེ་རང་མགོན་སྐྱབས་དང་བྲལ་བའི་ཐབས་ཕ་རོལ་གྱི་བྱད་མས་བྱེད་རྒྱུ་དེ་རང་གིས་བྱས་པ་ཡིན་སྔགས་ཀྱི་ནུས་པ་ཉམས་ཤིང༌། དུ་བ་མང་དུ་འཐེན་པ་དེས་རྩ་ལམ་རྣམས་འགགས་ཏེ་འཕོ་བ་སྦྱངས་ཀྱང་མི་ཐེབས་ལ། འཆི་ཁའི་དུས་སྐྱེས་བུ་དམ་པ་གཞན་གྱིས་འཕོ་བ་བཏབ་ཀྱང་ཕན་མི་ཐོགས་པས་འདི་ཕྱི་གཉི་ག་ཕུང་བ། གཞན་གྱིས་མཐོང་ན་མ་དད་པ་སྐྱེ་བས་ཁྱིམ་པ་སུན་འབྱིན་དུ་འགྲོ་ཞིང་བསྟན་པའི་དབུ་འཕང་སྨོད་པ། ཉེས་དམིགས་ཆེ་ལ་དགོས་པ་ཅི་ཡང་མེད་པའི་སྨྱོན་པའི་སྤྱོད་པ་ལྟ་བུ་འདིར་དགའ་བ་ནི་ཤེས་རྒྱུད་བདུད་ཀྱིས་བརླམས་པ་ཡིན་པས་རྟོག་དཔྱོད་དང་ལྡན་པ་ཞིག་ཡིན་ན་འཇུག་ཚུལ་མེད་དོ། །དེ་དག་གིས་སྤང་བྱའི་གཙོ་བོར་རགས་རིམ་ཙམ་བཤད་པ་ཡིན་ཞིང༌། དེ་ནས་ལག་ཏུ་ལེན་རྒྱུའི་རིམ་པ་ཉེར་མཁོ་གལ་ཆེ་བ་རྣམས་བརྗོད་ན། བསྙེན་མཚམས་ལྟ་བུ་བྱེད་ཚེ་གནས་བཟང་པོར་ཕྱག་དར་བྱས་ཏེ་བགེགས་གཏོར་གཏང༌། ཨོཾ་ཨ་མོ་གྷ་ས་མནྟ། ད་ཤ་དིཀ་མཧཱ་བི་མ་ན། བནྷ་ཡི་དྷུ་རུ་དྷུ་རུ་ཧཱུཾ་ཕཊ་སྭཱཧཱ། ཡུངས་ཀར་ལ་ལན་བདུན་བཟླས་བརྗོད་བྱས་པས་མཚམས་གཅད། ཡུལ་ལྷ་ལ་
དཀར་གཏོར་བསྔོས། སྨན་པ་ལྟ་བུ་གལ་ཅན་སླར་འོངས་དགོས་པ་ཡོད་ན་དེའི་འདུ་ཤེས་ཀྱི་རྡེའུ་བཞག་སྟེ་མཚམས་ནང་དུ་ཡོད་པའི་དམིགས་པ་བྱ། རྒྱུན་གྱི་མཚམས་གཡོག་དམ་གཙང་བག་ཡོད་བློ་དང་མཐུན་པ་གལ་ཆེ། མཚམས་ཐོ་འཕགས་སྐྱེས་པོར་བསམ་ལ་མཆོད་པ་དངོས་སུ་ཡོད་ན་ཨརྒྷཾ་སོགས་དང༌། མེད་ཚེ་མཧཱ་རཱ་ཛ་ས་པ་རི་ཝཱ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཧཱུཾ། ཨོཾ་རུ་རུ་སྥུ་རུ་ཛྭཱ་ལ་ཏིཥྛ་སིདྡྷི་ལོ་ཙཱ་ནི་སརྦྦ་ཨརྠ་ས་དྷ་ནི་སྭཱཧཱ། ཞེས་ནམ་མཁའ་མཛོད་ཀྱི་སྔགས་རྒྱས་སྤྲུལ་ཏེ་དབུལ། བཅོམ་ལྡན་འདས་ཀྱི་སྤྱན་སྔ་རུ། །སྒྲུབ་པ་མཛད་པའི་གང་ཟག་ལ། །བུ་བཞིན་སྐྱོང་བར་ཞལ་བཞེས་བཞིན། །བདག་གི་སྒྲུབ་པའི་གྲོགས་མཛོད་ཅིག །ཅེས་པ་ལྟ་བུས་འཕྲིན་ལས་བཅོལ། དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་མོ་གྷ་བི་མོ་ཀྵ། མཎྜ་ལ་མཧཱ་ད་བྷཱུ་ཏ་བི་མ་ལེ། དྷ་ར་དྷ་ར། དྷི་ར་དྷི་ར། མཧཱ་བྷཱུ་ཏ། ཨ་མི་ཏཱ་བྷ། མ་ཀུ་ཊ་དྷ་ར་ཧཱུཾ་ཕཊ་སྭཱཧཱ། ཞེས་བཟླས་ཏེ་བསྔགས་པའི་ཆུས་ཆག་ཆག་བཏབ་སྟེ་ས་གཞི་བྱིན་གྱིས་བརླབ། ཨོཾ་ཨ་མོ་གྷ་པདྨ་ས་སུན་དྷ་ར། དྷ་ར་དྷ་ར། དྷ་ར་ཎི། མཎྜེ་ཧཱུཾ། ཞེས་སྟན་བྱིན་གྱིས་བརླབ། ཨོཾ་ཨ་མོ་གྷ་རཀྵ་ཎ། པཱ་ཤ་ཧ་སྟེ། བྷུ་རུ་བྷུ་རུ་སྭཱཧཱ། ཞེས་བདག་བསྲུང་བ་བྱ་སྟེ་འདི་དག་ཟླ་མེད་ཀྱི་བསྲུང་འཁོར་སྒོམ་པའི་དོད་ཡིན། སྟན་གྱི་འོག་ཏུ་གཡུང་དྲུང་གཡས་སྐོར་བྲི་ཞིང་དུར་བ་དགྲམ་པར་འཇམ་དཔལ་རྩ་རྒྱུད་ལས་གསུངས་ལ། དཔུང་བཟང་གི་རྒྱུད་དུ་ཀུ་ཤ་དགྲམ་པར་གསུང༌། དུས་ཡར་ངོའི་ཚེས་བརྒྱད་དང་བཅོ་ལྔ་སོགས་གཙོ་བོར་བྱ་སྟེ། དོན་ཞགས་ཀྱི་
རྒྱུད་ལས། རིག་སྔགས་འཆང་བ་ཁྲུས་བྱས་ནས། །གོས་གཙང་བགོས་ཏེ་སྨྱུང་བ་ལ། །ཉེ་བར་གནས་པ་ཚེས་བརྒྱད་དམ། །བཅུ་བཞི་ཚེས་ནི་བཅོ་ལྔ་སྟེ། །ཟླ་བ་ཡར་གྱི་ངོ་ལ་བསྒྲུབ། །ཅེས་གསུངས། ཁྱད་པར་དུ་ས་གའི་བཅོ་ལྔ་ནི་དུས་ཆེན་གསུམ་འཛོམ་ཡིན་པར་མ་ཟད། དགེ་སློང་མ་དཔལ་མོས་ལམ་འདིའི་སྒོ་ནས་མཆོག་གི་དངོས་གྲུབ་བརྙེས་པའི་དུས་ཡིན་ཞིང༌། བརྒྱུད་པའི་བླ་མ་མང་པོས་ཀྱང་དུས་འདིར་འཕགས་པའི་ཞལ་གཟིགས་པ་སོགས་ཀྱི་རྟེན་འབྲེལ་གྱིས་སྒྲུབ་པའི་མགོ་འདི་ནས་བརྩམས་ན་བྱིན་རླབས་མྱུར་བའི་ཁྱད་ཆེ། ཁ་ལྟ་ཕྱོགས་ཤར་དུ་གསུང་བ་མང་ཡང༌། སྨྱུང་གནས་འདི་ལ་ཁང་པའི་སྟབས་འགྲིག་ན་ནུབ་ཏུ་བལྟ་ཞིང༌། མིན་ན་དེར་ཡིད་ཀྱིས་མོས་པ་གཙོ་བོར་བྱེད་པ་སྒོས་ཆོས་ཡིན། དེ་ནས། ཨོཾ་ཨ་མོ་གྷ་ཛ་ལ་བི་མ་ལེ། སུ་རུ་སུ་རུ་སྭཱཧཱ། ཞེས་ཉེར་གཅིག་བཟླས་པའི་དྲི་བཟང་གི་ཆུ་ཁྲུས་དང་ཉེ་རེག་སོགས་ཀྱི་དོན་དུ་བཞག །དཀྱིལ་ཐང་ངམ་པདྨ་འདབ་བརྒྱད་ལ་ཚོམ་བུ་དགོད་པ་དང༌། གཞན་ཡང་འཕགས་པའི་སྐུ་བྲིས་འབུར་ཅི་རིགས། བྱ་རྒྱུད་ཀྱི་བུམ་རྫས་བཏབ་པའི་བུམ་པ་གཙང་མ་མགུལ་ཆིངས་ཅན་མཆོད་གཏོར་དང་བཅས་པ་བཤམ་ཚུལ་ངག་འདོན་གྱི་རིམ་པ་སོགས་ཆོ་གའི་གཞུང་བཞིན་བྱ། དོན་ཞགས་ལས་གཙུག་ཏོར་སོགས་ཀྱི་ཆོས་གོས་ཐམས་ཅད་ལ་སྔགས་མང་པོ་སོ་སོར་གསུངས་པ་བཞིན་གྲུབ་ན་རྒྱུད་སྡེ་གོང་མའི་སྐྱེ་མཆེད་བྱིན་རླབས་སོགས་ཀྱི་དོད་ཡིན་པས་གལ་ཆེ་ལ། དངོས་དག་པ་ཞིག་ཡོང་དཀའ་བས་དེ་ཐམས་ཅད་ཀྱི་ཚབ་ཏུ་སྐུ་གསུང་ཐུགས་བྱིན་རླབས་ཀྱི་འཕྲོ་དེར་ལག་པ་པདྨ་ཁ་ཕྱེ་བའི་ཚུལ་དུ་བྱས་པ་པདྨའི་རིགས་ཀྱི་དམ་རྒྱ་སྙིང་ག །སྨིན་མཚམས། མགྲིན་པ། དཔུང་མགོ་གཡས་གཡོན་ཏེ་གནས་ལྔར་གཏུགས་ལ། ཨོཾ་པདྨ་ཨུདྡྷ་ཝ་
ཡེ་སྭཱཧཱ། ཞེས་པ་ཚར་ལྔ་བརྗོད་ན་གོ་ཆོད་པས་ནན་ཏན་དུ་བྱའོ། །འཕྲེང་བ་ནི་དེ་བཞིན་གཤེགས་པའི་རིགས་ལ་བོ་དེ་ཙེ། པདྨའི་རིགས་ལ་པདྨའི་སྙིང་པོ། རྡོ་རྗེའི་རིགས་ལ་རུ་རཀྴ་མཆོག་ཏུ་གསུངས་པས་སྐབས་འདིར་པདྨའི་སྙིང་པོ་འབྱོར་ན་རབ་དང༌། དེ་མིན་བོ་དེ་ཙེའམ། ཤེལ་འཕྲེང་གང་རིགས་བྱས་ན་ལེགས་པར་མངོན། འཕྲེང་བ་གསར་དུ་བཟུང་བའམ་མཚམས་མགོ་ལྟ་བུ་ལ་སྙིམ་པར་བཞག་སྟེ། ན་མོ་རཏྣ་ཏྲ་ཡཱ་ཡ། ན་མོ་ཨཱརྱ་ཨ་ཝ་ལོ་ཀེ་ཏེ་ཤྭ་རཱ་ཡ། བོ་དྷི་སཏྭཱ་ཡ། མཧཱ་སཏྭཱ་ཡ། ཨོཾ་ཨ་མྲྀ་ཏ་མ་ག་ལེ་ཤྲཱི་ཡེ་ཤྲཱི་ཡ་མ་ལི་ན་སྭཱཧཱ། ཞེས་པའི་སྔགས་བརྒྱ་རྩ་བརྒྱད་བཟླས་ནས་རབ་གནས་བྱ། རྒྱུན་པར་བཟླས་པ་བྱེད་དུས་ནི། ཐལ་མོ་སྙིང་གར་སྦྱར་ནས། ཨོཾ་གུ་རུ་སརྦ་ཏ་ཐཱ་ག་ཏཱ་ཀཱ་ཡ་ཝཱ་ཀ་ཙིཏྟ་པྲ་ཎ་མ་ན་སརྦ་ཏ་ཐཱ་ག་ཏཱ་བཛྲ་པཱ་ད་བནྡྷ་ནཾ་ཀ་རོ་མི། ཞེས་ལྷ་དང་བླ་མ་ལ་ཕྱག་བྱས་ཏེ་འཕྲེང་བ་སྙིམ་པར་བླངས་ལ། ཨོཾ་བ་སུ་མ་ཏཾ་ཤྲཱི་ཡེ་སྭཱཧཱ། ཞེས་པ་འདི་ལན་བདུན་བཟླས་ཏེ་བྱིན་གྱིས་བརླབ། ཞོགས་ཀ་ངག་བྱིན་རླབས། འགྱུར་སྔགས། ཕྲེང་སྔགས་སོགས་ཁོ་བོས་ཆོས་སྤྱོད་གསལ་སྒྲོན་དུ་བཀོད་པ་བཞིན་བྱས་ཡོད་ན་དེས་འཐུས། འཕྲེང་བ་འཛིན་ཚུལ། གུང་མོ་དང་མཐེའུ་ཆུང་བརྐྱངས། མཛུབ་མོ་རྒྱབ་ཏུ་བཞག་ནས་སྲིན་ལག་དང་མཐེ་བོས་འདྲེན་པར་གསུངས་ལ། འདིའང་ལས་ཐམས་ཅད་པ་ལ་ཤིས་པའི་འཕྲེང་བ་འཛིན་ལུགས་ཡིན་པས་ཐོག་མར་གཟུངས་རིང་ངམ་སྙིང་པོ་བརྒྱ་རྩ་རེ་ལྟ་བུ་གཡས་ཀྱིས་དེ་བཞིན་འདྲེན་ལ། རྒྱུན་པར་མ་ལྕོགས་ན་གཡོན་པས་ཀྱང་གང་བདེར་བགྲང་ཆོག་པར་སྔགས་རིམ་ལས་གསུང༌། བཟླས་པའི་སྐབས་ཀྱི་དམིགས་པ་ནི། རང་
ཐུགས་རྗེ་ཆེན་པོར་གསལ་བའི་ཐུགས་ཀར་ཟླ་གདན་ལ་ཡེ་ཤེས་སེམས་དཔའ་རང་འདྲའམ་ཞལ་གཅིག་ཕྱག་གཉིས་པ། དེའི་ཐུགས་ཀར་ཏིང་ངེ་འཛིན་སེམས་དཔའ་ཧྲཱིཿ དཀར་པོ། དེ་ལ་སྔགས་ཕྲེང་དཀར་པོ་འོད་ཟེར་སྤྲོ་བཞིན་པས་གཡས་སྐོར་དུ་བསྐོར་བ། དེའི་འོད་ཟེར་གྱིས་ལུས་གང་བས་སྡིག་སྒྲིབ་ནད་གདོན་ཐམས་ཅད་སྦྱངས། ཕྱིར་སྤྲོས་པའི་སྣེ་ལས་མཆོད་ལྷ་སྤྲོས་རྒྱལ་བ་སྲས་བཅས་མཆོད། རིགས་དྲུག་སོ་སོའི་གནས་སུ་སོང་སྟེ་རང་རང་གི་སྡུག་བསྔལ་ལས་ཐར་བར་བྱས། འཕགས་པའི་གོ་འཕང་ལ་བཀོད་པ་སོགས་འཁྱེར་སོ་གསུམ་གྱི་ངང་ནས་བཟླ། སྔགས་འདོན་ཚུལ་ནི་དཔུང་བཟང་གིས་ཞུས་པའི་རྒྱུད་ལས། བཟླས་བརྗོད་བྱེད་ཚེ་མི་མྱུར་མི་དལ་ཞིང༌། །སྒྲ་ཆེར་མི་བྱ་ཧ་ཅང་ཆུང་བའང་མིན། །སྨྲ་བཞིན་མ་ཡིན་གཞན་དུ་གཡེང་བཞིན་མིན། །གུག་སྐྱེད་ཀླད་ཀོར་ཚེག་རྣམས་ཉམས་པ་མིན། །ཞེས་དང༌། ལེགས་གྲུབ་ཀྱི་རྒྱུད་ལས། བཟླས་བརྗོད་བྱེད་པས་ཁྲོ་མི་བྱ། །ཡུལ་གྱི་བདག་ཉིད་དགའ་མི་བྱ། །ཞུམ་དང་མི་དགའ་འཇིགས་པ་དང༌། །འཇུངས་དང་ང་རྒྱལ་ཡོངས་སུ་སྤངས། །ཟློས་ཚེ་ཅི་ཡང་མི་སྨྲ་ཞིང༌། །ཡན་ལག་འགྱུར་བར་མི་བྱའོ། །ཀུན་རྟོག་རླུང་གིས་བསྐྱོད་ནས་ནི། །ཅི་ཡང་རུང་བ་མི་བསམ་མོ། །ཞེས་རྣམ་རྟོག་སྣ་ཚོགས་ཀྱི་དབང་དུ་མི་གཏོང་བར་གསུངས་པས་སེམས་མ་གཡེང་བ་ཤིན་ཏུ་གལ་ཆེ་སྟེ། གདོང་དྲུག་གི་རྒྱུད་ལས། གཞན་དུ་མི་འགྲོ་སེམས་ཀྱིས་ནི། །དེ་ལྟའི་ཚུལ་དུ་བཟླས་པ་བྱ། །ཡུལ་གཞན་བློ་ནི་འགྲོ་བ་ཡིས། །བསྐལ་པར་བཟླས་ཀྱང་འབྲས་མི་འབྱིན། །ཞེས་གསུངས་པའི་ཕྱིར་རོ། །བཟླས་པའི་སྐབས་ནོར་ནས་ལྷ་གཞན་གྱི་སྔགས་བཟླས་པ་དང༌། གཏམ་སྨྲ་བ། གཉིད་དང་འོག་རླུང༌། གླལ་བ་དང་སྦྲིད་པ་སོགས་བྱུང་ན་ཉེ་
རེག་བྱས་ནས་ཐུན་སླར་བསྡམས་དགོས་ཀྱི། དེ་ཡན་ལ་ཐུན་དེར་བཟླས་པ་རྣམས་ཀྱིས་གྲངས་ཀྱི་གོ་མི་ཆོད་དོ། །གཞན་ཡང་འཕྲེང་བ་མ་རྫོགས་པར་འཕྲོ་བཞག་པ་དང༌། གནས་གཞན་དུ་བཟླས་པའི་འཕྲོ་བསྐང་བ་ལྟ་བུས་བསྙེན་གྲངས་ཀྱི་གོ་མི་ཆོད་ལ། མཚན་མོ་རྨི་ལམ་ངན་པ་བྱུང་ཚེ་ནངས་པར་རིགས་ཀྱི་བདག་པོའི་སྔགས་བརྒྱ་མ་བཟླས་པར་བསྙེན་པ་བྱས་ཀྱང་གྲངས་སུ་མི་འགྲོ་བར་གསུངས་སོ། །བྱ་རྒྱུད་ཀྱི་སྐབས་འདིར་སྤྱོད་ལམ་ཤིན་ཏུ་གཟབ་དགོས་ལ། ཐུན་རིང་ན་སྐྱོན་མེད་ཅིག་འོང་དཀའ་བས་དང་པོ་ཐུང་ཙམ་བྱས་ན་ལེགས། ཐུན་གྱི་གྲངས་ནི་བསམ་གཏན་ཕྱི་མ་ལས། དུས་གསུམ་དུ་ནི་ཕྲ་མོ་འདི། །གསང་སྔགས་སྒྲུབ་ལ་བརྟུན་པ་ཡིན། །ཞེས་དང༌། ལེགས་གྲུབ་ལས། མཁས་པས་དུས་གསུམ་ཁོ་ནར་ཡང༌། །ཁྲུས་བྱེད་ནས་ནི་བཟླས་བརྗོད་བྱ། །ཞེས་གསུངས་ལ། དོན་ཞགས་ཀྱི་རྒྱུད་ལས་ཀྱང༌། གསོ་སྦྱོང་དག་ནི་བླངས་པ་དང༌། །དཀར་གསུམ་ཟས་ཀྱི་འཚལ་ནས་སུ། །དུས་གསུམ་བཟླས་བརྗོད་བགྱིས་ནས་སུ། །ཞེས་གསུངས་པའི་དུས་གསུམ་ནི་ལེགས་གྲུབ་ལས། སྔ་དྲོ་མེལ་ཚེ་ཐུན་གཅིག་དང༌། །ཕྱི་དྲོ་མེལ་ཚེ་ཐུན་གཅིག་བཟླས༌། །ཉི་མའི་གུང་ལ་ཐུན་ཕྱེད་དམ། །ཡང་ན་ཐུན་གྱི་སུམ་ཆ་བཟླས། །ཡང་ན་ཐུན་གྱི་བཞི་ཆའམ། །ཡང་ན་མཁས་པས་ཅུང་ཟད་བཟླས། །ཞེས་སྔ་དྲོ་ཉི་མ་ཕྱེད་ཤར་ནས་གྲིབ་མ་སོར་བཞི་ལ་སླེབ་པའི་བར་དང༌། ཉིན་གུང་ཆུ་ཚོད་བརྒྱད་དམ་དགུ །ཕྱི་དྲོ་གྲིབ་མ་སོར་བཞི་ལུས་པ་ནས་ཉི་མ་ཕྱེད་ནུབ་པའི་བར་གསུམ་ལ་བྱེད་པར་སྔགས་རིམ་ལས་གསུངས། དོན་ཞགས་ལས། ཉིན་པར་དུས་སུ་ལན་གསུམ་རེ། །མཚན་མོའི་དུས་སུ་ལན་གསུམ་བགྱིད། །ཅེས་ཐུན་དྲུག་
བྱེད་ཚུལ་ཡང་གསུངས་ལ། ལེགས་གྲུབ་ཀྱི་ལུང་སྔ་མའི་འཕྲོར། མཚན་མོ་སྲོད་དང་ཐོ་རངས་ལ། །མེལ་ཚེ་ཐུན་ནི་ཕྱེད་ཕྱེད་དུ། །གང་ཞིག་མཁས་པས་བཟླས་བྱས་པ། །དེ་ནི་ལྷག་པར་མཆོད་པར་འགྱུར། །ཞེས་པ་ལྟར་ན་མཚན་ཐུན་གཉིས་ལྟ་བུར་སྣང་ཞིང༌། དེ་ནི་ཉི་མ་ཕྱེད་ནུབ་ནས་སྲོད་ཕྱེད་ཀྱི་བར་དང༌། ཐོ་རངས་ཀྱི་ཕྱེད་ནས་ཉི་མ་ཕྱེད་ཤར་བའི་བར་ཡིན་ལ། ནམ་ཕྱེད་ཀྱི་དུས་དེ་བསྙེན་གྲངས་དངོས་གཞིའི་དུས་ཡིན་མིན་སྔགས་རིམ་ལ་དཔྱད་དགོས། བསྙེན་པའི་གྲངས་ནི་ལེགས་གྲུབ་ལས། བཅོ་ལྔ་མན་ཆད་གྲངས་རྣམས་ལ། །སྤྱིར་ན་ཡི་གེ་དུ་ཡོད་པ། །དེ་སྙེད་འབུམ་ཕྲག་བཟླས་བརྗོད་བྱ། །ཡི་གེ་སུམ་ཅུ་རྩ་གཉིས་ལ། །བཟླས་བརྗོད་སུམ་འབུམ་བྱ་བར་བཤད། །དེ་བས་ཡི་གེ་མང་པོ་ལ། །སྔོན་དུ་བསྙེན་པ་ཁྲི་བྱ་འོ། །ཞེས་གསུངས་པ་ལྟར་རོ། །ཟླ་ཕྱེད་ཀྱི་མཚམས་སུ་སྨྱུང་གནས་བྱས་ཏེ་བ་བྱུང་དང་བཅས་པའི་ཆུ་ལ། ན་མོ་བྷ་ག་ཝ་ཏེ་ཨུཥྞཱི་ཡ་ཨཾ་བི་ཤུདྡྷེ་བཱི་ར་ཛ་ཤི་བི་ཤནྟི་ཀ་རེ་སྭཱཧཱ། ཞེས་པའི་སྔགས་བརྒྱ་བཟླས་ནས་ཤར་དུ་བལྟས་ཏེ་ཙོག་པུར་བསྡད་ནས་ཆུ་སྲང་གསུམ་ཙམ་འཐུང་ན་ཟླ་ཕྱེད་ཀྱི་རིང་གླལ་བ། སྦྲིད་པ། བཟའ་བྱ་མིན་པ་ཟོས་པ་སོགས་ཀྱིས་སྔགས་ནུས་ཕྲོགས་པའི་ཉེས་པ་ཐམས་ཅད་བྱང་བར་ལེགས་གྲུབ་ལས་གསུངས་པས། རང་ཅག་ཉེས་སྤྱོད་ཤིན་ཏུ་མང་བ་རྣམས་ཀྱིས་རྡོ་རྗེ་འཆང་གིས་གསུངས་པའི་ཉེས་སྤྱོད་སྦྱོང་ཐབས་ཟབ་མོ་འདི་དག་ཤེས་པ་ཤིན་ཏུ་གལ་ཆེའོ། །གཞན་ཡང་དགེ་རྩ་ཁོང་ཁྲོ་སོགས་ཀྱིས་མི་འཇོམས་པར་བྱ་བ་དང༌། དགེ་བ་མི་ཉམས་ཤིང་གོང་འཕེལ་དུ་འགྱུར་ཕྱིར་བཟླས་བརྗོད་ཀྱི་མཇུག་ཏུ་བུམ་པའི་ཕྱག་རྒྱ་བཅས་ཏེ་དགེ་རྩ་ལྷ་ལ་འབུལ་བ་སོགས་ནི་ཆོ་གའི་གཞུང་ལས་འབྱུང་བ་བཞིན་
ནན་ཏན་དུ་བྱ། མཚམས་ཀྱི་སྐབས་གཞན་གྱིས་རང་མཐོང་བ་ལ་རལ་བ་དང༌། རང་གིས་གཞན་མཐོང་བ་ལ་བུག་པ་ཟེར་བས་འཛེམ་དགོས་ཤིང༌། ལྷག་པར་དམ་ཚིག་ཉམས་པའི་ལག་ནས་བྱུང་བའི་ཟས་སོགས་དུག་ལྟར་སྤངས། མེ་མི་སྤུར་ཞིང་མཚོན་རྩེ་ཁར་མི་གཞུག་པ། གདན་མི་སྤྲུག་ཅིང་དྲོད་མ་ཡལ་བར་བྱེད་པ། ཕྲེང་བ་མི་འགོམ་པ། ཐུན་མཚམས་སུ་ལོང་གཏམ་སྣ་ཚོགས་མི་བྱ་བར་ཕྱག་དང་མཆོད་པ། གཟུངས་ཀྱི་ཕན་ཡོན། བླ་མ་བརྒྱུད་པའི་རྣམ་ཐར། འཁོར་བའི་ཉེས་དམིགས། བྱམས་སྙིང་རྗེའི་དམིགས་རྣམ་སོགས་ཡང་ཡང་གསལ་བཏབ་སྟེ་ཐུན་དངོས་གཞིའི་བོགས་འབྱིན་དུ་འགྱུར་བ་བྱ། གཏོར་འབུལ་སྐབས་མཚམས་ཐོའི་རྒྱལ་ཆེན་ལའང་བསྔོ་ཞིང༌། མཚམས་གྲོལ་ཚེ་རྒྱལ་ཆེན་ལ་གཏང་རག་གི་མཆོད་བསྟོད་གཤེགས་གསོལ་བྱས་ཏེ་མཚམས་ཐོ་དབེན་པའི་གཙང་སར་འཇོག །དང་པོ་ནང་མཚམས་གྲོལ་ཏེ་ཡིད་མཐུན་རེ་གཉིས་དང་ཕྲད་ཅིང༌། དེ་ནས་ཕྱི་མཚམས་གྲོལ་བ་མ་གཏོགས་ཧར་འདོན་མི་བྱ། ཆོ་ག་གཞན་འདོན་མི་འདོན་དམ་པའི་ཕྱག་བཞེས་གཉིས་འབྱུང་ཡང༌། དམ་བཅའ་ཅན་ཡིན་ན་བདག་བསྐྱེད་བསྡུས་ཏེ་ཐུན་བར་དུ་གདོན། སྲུང་མའི་གཏོར་འབུལ་སོགས་རང་ཐུགས་རྗེ་ཆེན་པོར་གསལ་བའི་ངང་ནས་བྱས་པར་འགལ་བ་མེད། མཚམས་ཀྱི་སྤང་བླང་ཞིབ་པ་ནི་སློབ་དཔོན་སངས་རྒྱས་གསང་བའི་རྣལ་འབྱོར་རྟོགས་པའི་གེགས་སེལ་དང་བྱ་རྒྱུད་དོན་གསལ་སོགས་ལས་ཤེས་པར་བྱའོ། །གསུམ་པ་ཐུགས་རྗེ་བསྐུལ་བའི་ཕྱིར་གསོལ་བ་འདེབས་པ་པོ་བསྟོད་ཀྱི་དོན་ནི། ཨོཾ་འཇིག་རྟེན་མགོན་པོ་ལ་ཕྱག་འཚལ་ལོ། །ཞེས་ཨོཾ་སྨོས་པ་ནི། རྡོ་རྗེ་རྩེ་མོར་ཨོཾ་གྱིས་མཆོག་དང་ནོར་སྟེར་བ་དང་བཀྲ་
ཤིས་པའི་དོན་དུ་གསུངས་ལ། དོན་ཞགས་ཀྱི་རྒྱུད་ལས་ཐུགས་རྗེ་ཆེན་པོའི་སྔགས་ཡི་གེ་གཅིག་པར་གསུངས་པས་ཐུགས་རྗེ་སྐུལ་བྱེད་ཡིན་ནོ། །འཇིག་རྟེན་མགོན་པོ་ཞེས་པ་འགྱུར་ཕྱག་ཡིན་ནམ་སྙམ། དེ་ནས་ཁམས་གསུམ་སེམས་ཅན་ཐམས་ཅད་ལ་རང་རང་དང་འཚམ་པར་ཕན་པ་མཛད་དེ་དེ་དག་ཀུན་གྱི་གུས་པའི་ཡུལ་དུ་གྱུར་པས། འཇིག་རྟེན་བླ་མ་སྲིད་པ་གསུམ་གྱིས་བསྟོད་པ་པོ། །ཚངས་པ་དང་དབང་ཕྱུག་སོགས་ཀྱང་གནས་སྐབས་ཀྱི་ཕན་པ་ཙམ་སྒྲུབ་ནུས་རུང༌། གཏན་གྱི་དོན་ལ་རང་རང་ཡང་མགོན་པོ་འདིའི་ཐུགས་རྗེར་རེ་དགོས་པས། ལྷ་ཡི་གཙོ་བོ་བདུད་དང་ཚངས་པས་བསྟོད་པ་པོ། །ཐུབ་པས་རྒྱལ་བ་མཆོག་ཅེས་བསྟོད་ཡུལ་ལ་བྱས་ནའང་བསྟོད་པ་གཞན་དང་འགྲིག་ལ། འོན་ཀྱང་མགོན་པོ་འདིར་གུས་པས་བསྟེན་པ་ལས་ཉེས་སྤྱོད་མཐའ་དག་སྡོམ་ཞིང་བདུད་བཞི་ལས་རྒྱལ་བའི་སངས་རྒྱས་ཀྱང་འགྲུབ་ནུས་པས། ཐུབ་པས་རྒྱལ་མཆོག་བསྟོད་པས་གྲུབ་པར་མཛད་པ་པོ། །འགྲོ་བ་རིས་མེད་པར་སྲིད་ཞིའི་འཇིགས་པ་ཀུན་ལས་སྒྲོལ་བས། འཇིག་རྟེན་གསུམ་གྱི་མགོན་པོ་མཆོག་ལ་ཕྱག་འཚལ་ལོ། །ཞེས་མདོར་བསྟན་ཏོ། །རྒྱས་པར་བཤད་པ་ནི་བསྟོད་པ་བརྒྱ་ལྔ་བཅུ་པ་ལས། རྟེན་གྱི་ཡོན་ཏན་དག་དང་ནི། །བརྟེན་པའི་ཡོན་ཏན་ཕན་ཚུན་དུ། །འཚམ་པས་ཁྱོད་ཀྱི་སྐུ་དང་ནི། །ཡོན་ཏན་ཕུན་ཚོགས་མཆོག་དང་ལྡན། །ཞེས་རྟེན་སྐུ་དང༌། བརྟེན་པ་ཡོན་ཏན་གཉིས་ཕན་ཚུན་རྗེས་སུ་འགྲོ་ལྡོག་མི་འཁྲུལ་བའི་མཚོན་བྱ་མཚོན་བྱེད་དུ་གསུང་བ་དང་མཐུན་པར་བཤད་པ་ལ། རྟེན་སྐུའི་ཡོན་ཏན་དང༌། དེ་ལ་བརྟེན་པ་དོན་གཉིས་ཕུན་སུམ་ཚོགས་པའི་ཡོན་ཏན་གཉིས་ལས། དང་པོ་ནི། བདེ་གཤེགས་དཔག་མེད་ཅེས་པ་ནས་ཤམ་ཐབས་འཛིན་པ་པོ། །ཞེས་པའི་བར་གྱིས་
བསྟན་ཏོ། །དེའང་ཟ་མ་ཏོག་བཀོད་པར་གསུངས་པ་བཞིན་བ་སྤུའི་ཁུང་བུ་རེ་རེར་ཡང་སངས་རྒྱས་ཀྱི་ཞིང་དཔག་མེད་བཞུགས་པ་དང༌། ཀླུ་སྒྲུབ་ཀྱིས་མཛད་པའི་སྒྲུབ་ཐབས་ལས་འབྱུང་བ་བཞིན་ཕྱག་སྟོང་ལས་འཁོར་སྒྱུར་སྟོང་དང༌། སྤྱན་སྟོང་ལས་བསྐལ་བཟང་སངས་རྒྱས་སྟོང་སྤྲུལ་བ་དང༌། གཞན་ཡང་སྤྱན་གཉིས་ལས་སྒྲོལ་མ་དཀར་ལྗང༌། རྟ་མགྲིན། ཛཾ་དཀར་སོགས་སྤྲུལ་བའི་ལོ་རྒྱུས་ལྟར་ཀུན་གྱི་འབྱུང་གནས་སུ་གྱུར་པས། བདེ་གཤེགས་དཔག་མེད་སྐུ་སྟེ་སྐུ་བཟང་འཛིན་པ་པོ། །རིགས་ཀྱི་བདག་པོ་བླ་མ་འོག་དཔག་མེད་སྐུ་ལུས་ཡོངས་རྫོགས་སམ་ཞལ་གྱི་རྣམ་པར་འབྲལ་མེད་དུ་སྤྱི་བོར་བཀུར་བས། བདེ་གཤེགས་སྣང་བ་མཐའ་ཡས་དབུ་རྒྱན་འཛིན་པ་པོ། །རྒྱུན་པར་བསྒོམ་དུས་རང་བློར་གང་འཚམ་གྱི་ཕྱག་སྟོང་དང༌། བརྒྱད་དང༌། བཞི་དང༌། གཡས་མཆོག་སྦྱིན་གཡོན་པདྨ་བསྣམས་པའི་ཕྱག་གཉིས་གང་བདེ་བྱ་བར་དཔལ་མོའི་སྒྲུབ་ཐབས་སུ་གསུང་བས་འདིར་ཕྱག་གཉིས་གཙོ་བོར་བསྟན། དེའང་སྐུ་ལས་ཆུ་རྒྱུན་འབབ་པས་དམྱལ་མེ་ཆིལ་ཆིལ་གསོད་ཅིང༌། ཁྱད་པར་དུ་ཉམ་ཐག་རྣམས་དབུགས་དབྱུང་བའི་ཕྱིར་ལེགས་པར་བརྐྱངས་པའི་སོར་རྩེ་ལས་བདུད་རྩི་དང་འོ་རྒྱུན་འབེབས་པས། ཕྱག་གཡས་མཆོག་སྦྱིན་ཡི་དྭགས་བཀྲེས་སྐོམ་སེལ་བ་པོ། །རང་ཉིད་འཁོར་བའི་སྐྱོན་གྱིས་མ་གོས་པ་མཚོན་པའི་ཕྱིར། ཕྱག་གཡོན་གསེར་གྱི་པདྨས་རྣམ་པར་བརྒྱན་པ་པོ། །ཡུལ་ལ་ཞེན་པ་སྤངས་པས་དབུ་སྐུ་གཞན་རྣམས་གནག་ཅིང་སྣུམ་ལ་བྱང་ཆུབ་ཡན་ལག་གོམས་པས་དྲི་བཟང་དང་མྱང་འདས་མངོན་དུ་མཛད་པའི་བརྡར་སྟེང་གི་ཁྲོ་ཞལ་གྱི་དབུ་སྐྲ་གྱེན་དུ་བརྫེས་པ་སྟེ།
དྲི་ཞིམ་རལ་པའི་ཕྲེང་བ་དམར་སེར་འཁྱུག་པ་པོ། །སྨོན་ལམ་ཡོངས་སུ་རྫོགས་པས་དབུ་དང་འགྲམ་པ་སོགས་ལ་འབུར་དང་རྙོངས་མེད་པར་ཆ་མཉམ་དུ་གང་བས། ཞལ་རས་རྒྱས་པ་ཟླ་བ་ལྟ་བུར་མཛེས་པ་པོ། །ཆོས་ཐམས་ཅད་གཟིགས་ཤིང་འགྲོ་བ་ཀུན་ལ་བུ་གཅིག་པ་ལྟར་དགོངས་པས་དཀར་ནག་འགྱེས་ཤིང་དཀྱུས་རིང་བས། སྤྱན་གྱི་པདྨ་མཆོག་ཏུ་བཟང་ཞིང་ཡངས་པ་པོ། །སྐྱོན་གྱི་རིགས་མཐའ་དག་ཟད་ཅིང་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པས་མཁུར་ཚོས་དང་འགྲམ་པ་སོགས་ཞལ་དང་སྐུའི་ཆ་གང་ལ་ཡང་ནག་པོའི་ར་རི་མེད་པ། ཁ་བ་དུང་ལྟར་རྣམ་དཀར་དྲི་ངད་ལྡང་བ་པོ། །དཔལ་མོས་མཛད་པའི་འཇིག་རྟེན་དབང་ཕྱུག་གི་བསྟོད་པ་དང༌། ཟླ་མཛེས་མས་མཛད་པའི་བསྟོད་པ་ཟེར་བ་གཉིས་ཀྱང་པོ་བསྟོད་འདི་དང་འགྲོས་མཐུན་པར་སྣང་བས། སྔ་མར་པདྨ་ལྟར་ཡངས་མཆོག་ཏུ་མཛེས་པའི་སྤྱན། །མཁུར་བ་གངས་ཀྱི་དུམ་བུ་ལྟ་བུར་དཀར། །ཞེས་དང༌། ཕྱི་མར། མཆོག་ཏུ་མཛེས་པའི་སྤྱན་ནི་པདྨ་ལྟ་བུར་སངས། །ཁ་བ་དུང་ལྟར་རྣམ་པར་དཀར་བའི་འགྲམ་མདོག་ཅན། །ཞེས་འབྱུང་བས་ཞལ་ནས་མར་རིམ་གྱིས་སྨོས་པར་སྣང་ངོ༌། །རྒྱན་སོ་སོའི་མཚོན་དོན་དང་དག་པ་བླ་མེད་ཇི་ལྟ་བ་འདིར་མི་སྦྱོར་ཡང༌། ཐུན་མོང་བ་རྣམས་སྦྱར་དུ་རུང་བ་གོང་གི་དབུ་རྒྱན་གྱིས་བླ་མ་ལ་གུས་པར་མཚོན་པ་དེས་ཞེ་སྡང་སྤངས་པའང་མཚོན་ཞིང༌། འདིར་ང་རྒྱལ་དང་སེར་སྣ་སྤང་བ་མཚོན་བྱེད་དུ་མགུལ་བར་ནོར་བུའི་རིགས་དུ་མ་དང་སྤེལ་བའི། དྲི་མེད་འོད་ཆགས་མུ་ཏིག་ཚོམ་བུ་འཛིན་པ་པོ། །ཡང་འདིའི་འཇིག་རྟེན་དབང་ཕྱུག་གི་བསྟོད་པར། ཉི་མ་འཆར་ཀ་ལྟར་དམར་བཙོད་ཀྱི་མདོག །པདྨ་གཞོན་ནུ་ལྟ་བུ་མཆུ་དམར་ལ། །ཞེས་
ཐད་འདིར་འབྱུང་བ་བཞིན་སྐྱ་རེངས་ཤར་ཏེ་མཚམས་སྤྲིན་གྱི་མདངས་ཤར་བ་ལྟར་འཛུམ་ཞིང༌། མཛེས་པའི་འོད་ཟེར་སྐྱ་རེངས་དམར་པོས་བརྒྱན་པ་པོ། །གཡས་གཡོན་གྱི་ཕྱག་རྣམས་བསྒྲིགས་ཏེ་གནས་པ་ནི་ཕན་ཚུན་གྱི་འགྲམ་བརྒྱུད་དེ་མེ་ཏོག་གི་ཕྲེང་བ་ཁ་ཕྱེ་ནས་ཡོད་པའི། པདྨའི་མཚོ་ལྟར་ཕྱག་ནི་དངར་བར་བྱས་པ་པོ། །ཕྱག་དེ་དག་ཀྱང་འདྲེས་ནས་ཡོད་པ་ལྟ་བུ་མ་ཡིན་པར་མཚམས་གསལ་ཞིང་བརྩེགས་མ་བརྩེགས་མར་ཡོད་པ་ཆར་དང་བྲལ་བའི། སྟོན་ཀའི་སྤྲིན་གྱི་མདོག་དང་ལྡན་ཞིང་གཞོན་པ་པོ། །འཇམ་གཉེན་གཞོན་ཤ་ཆགས་པའི་ཕྱག་དེ་དག་ཀྱང་ཚིགས་ཀྱི་མཚམས་གོང་འོག་ཏུ་གདུ་བུས་སྤྲས་པ་གཏི་མུག་རྣམ་པར་དག་པ་མཚོན་བྱེད་ཡིན་པས། རིན་ཆེན་མང་པོས་དཔུང་པ་གཉིས་ནི་བརྒྱན་པ་པོ། །གདུལ་བྱ་ལ་ཕན་བདེའི་ཆོས་ཀྱི་དགའ་སྟོན་སྩོལ་བའི་ཕྱིར་ཕྱག་ལྷག་མ་ཕལ་ཆེར་མཆོག་སྦྱིན་མཛད་པའི་ངོས་ནི་ལྕུག་ཕྲན་གསར་སྐྱེས་ཀྱི། ལོ་མའི་མཆོག་ལྟར་ཕྱག་མཐིལ་གཞོན་ཞིང་འཇམ་པ་པོ། །ཁྱད་པར་དུ་སྙིང་རྗེ་ཆེན་པོ་མཚོན་པའི་ཕྱིར་ཀྲྀཥྞ་ས་རའམ་དེ་ཟུར་ཆག་པས་སྙན་ཞེས་བྱ་བའི། རི་དྭགས་པགས་པས་ནུ་མ་གཡོན་པ་བཀབ་པ་པོ། །འདོད་ཆགས་རྣམ་པར་དག་པ་མཚོན་བྱེད་དུ། སྙན་ཆ་གདུ་བུས་སྒེག་ཅིང་རྒྱན་རྣམས་འཆང་བ་པོ། །སྲིད་པར་གནས་ཀྱང་དེ་བཞིན་ཉིད་ལས་མི་གཡོ་བས་སྲིད་པའི་སྐྱོན་གྱིས་མ་གོས་པའི་བརྡར། དྲི་མ་མེད་པ་པདྨའི་མཆོག་ལ་གནས་པ་པོ། །དེ་ལྟར་བཞེངས་པའི་རྣམ་པ་བརྗོད་པ་ན་ལྟེ་བ་དང་སྐུ་སྨད་ཀྱི་ཉམས་ཤར་ཡོང་བ་དེ་དང་མཐུན་པར་བསྟོད་པ་ནི། དཀུ་ཟླུམ་ཞིང་མ་རྙོང་བས་ཕྱང་ངེ་བ་པདྨ་
རབ་ཏུ་རྒྱས་པའི་འདབ་མ་ཐང་ཆོད་པ་ལྟ་བུའི་དཀྱིལ་ན་ཆོས་ཟབ་མོ་རྟོགས་པ་མཚོན་པས་ལྟེ་བའི་སྦུབས་ཟབ་ལ་གཡས་སུ་འཁྱིལ་བའི། ལྟེ་བའི་ངོས་ནི་པདྨའི་འདབ་ལྟར་འཇམ་པ་པོ། །ཕྲག་དོག་རྣམ་པར་དག་པ་མཚོན་བྱེད་འོག་པག་གམ། གསེར་གྱི་སྐུ་རགས་མཆོག་ལ་ནོར་བུས་སྤྲས་པ་པོ། །རྒྱན་འདི་རྣམས་ཀྱིས་དུག་ལྔ་རྣམ་པར་དག་པ་མཚོན་པའི་ཤུགས་ཀྱིས་ཡེ་ཤེས་ལྔ་མཚོན་ཚུལ་ཤེས་དགོས་ལ། བརྟག་གཉིས་སུ་ཕྱིན་དྲུག་ལ་སྦྱར་བ་རྣམས་ཀྱང་འདིར་ཚང་ངོ༌། །རྒྱན་ལས། རྒྱལ་སྲས་ངོ་ཚ་ཤེས་པའི་གོས་ཅན་ནི། །ཞེས་པ་ལྟར་ངོ་ཚ་ཁྲེལ་ཡོད་མཚོན་བྱེད། སྟ་ཟུར་དཀྲིས་པའི་རས་བཟང་ཤམ་ཐབས་འཛིན་པ་པོ། །ཞེས་པ་འདི་ཡན་གྱིས་སྐུའི་རྣམ་པ་གཙོ་བོར་བྱས་ཏེ་བསྟོད་པ་ཡིན་ནོ། །གཉིས་པ་དེ་ལ་བརྟེན་པ་དོན་གཉིས་ཕུན་སུམ་ཚོགས་པའི་ཡོན་ཏན་ལ། རང་དོན་ཚོགས་གཉིས་ཡོངས་སུ་རྫོགས་པ་དང༌། གཞན་དོན་འཕྲིན་ལས་ལྷུན་གྱིས་གྲུབ་པའི་ཚུལ་གཉིས། དང་པོ་ལ་ཡེ་ཤེས་ཀྱི་ཚོགས་ཡོངས་སུ་རྫོགས་པས་མཉམ་རྗེས་རེས་འཇོག་མེད་པར་ཇི་ལྟ་ཇི་སྙེད་ཀྱི་རྣམ་པ་མཐའ་དག་ཅིག་ཅར་མངོན་སུམ་དུ་གཟིགས་པ་མཐར་ཐུག་པས། ཐུབ་པའི་མཁྱེན་མཆོག་མཚོ་ཆེན་ཕ་རོལ་ཕྱིན་པ་པོ། །བསོད་ནམས་ཀྱི་ཚོགས་ཡོངས་སུ་རྫོགས་ཏེ། རིན་ཆེན་ཕྲེང་བར་འཇིག་རྟེན་ཀུན་གྱི་བསོད་ནམས་བཅུ་འགྱུར་བྱས་པས་སངས་རྒྱས་ཀྱི་བ་སྤུའི་བུ་ག་གཅིག་འགྲུབ་པར་གསུངས་པ་ལྟ་བུ་རྒྱ་ཆེ་བའི་སྤྱོད་པ་མཐར་ཕྱིན་པ་ལས་བྱུང་བས་ན། མཆོག་བརྙེས་བསོད་ནམས་མང་པོ་ཉེ་བར་བསག་པ་པོ། །སྟེ་འདི་གཉིས་ལ་འཇིག་རྟེན་དབང་ཕྱུག་གི་བསྟོད་པར། རྒྱལ་བའི་ཡེ་ཤེས་རྒྱ་མཚོའི་ཕ་རོལ་
ཕྱིན། །བསོད་ནམས་དུ་མ་ལས་ནི་འཁྲུངས་པའི་མགོན། །ཞེས་འབྱུང་ངོ༌། །གཉིས་པ་གཞན་དོན་ཕྲིན་ལས་ལ། སྐྱེས་བུ་ཆུང་འབྲིང་ཆེ་གསུམ་གྱི་དོན་སོ་སོར་མཛད་ཚུལ་དང༌། ཞིང་ཁམས་རིས་མེད་ཀྱི་སེམས་ཅན་མ་ལུས་པའི་དོན་མཛད་ཚུལ་གཉིས། དང་པོ་ནི་རྒྱན་ལས། འཚེ་བ་དག་ནི་ཐམས་ཅད་དང༌། །ངན་སོང་དག་ནི་ཐབས་མིན་དང༌། །འཇིག་ཚོགས་ཐེག་པ་དམན་པ་ལས། །སྐྱོབ་ཕྱིར་སྐྱབས་ཀྱི་དམ་པ་འོ། །ཞེས་པ་ལྟར་ཆུང་ངུའི་རིགས་ཅན་རྣམས་ཚེ་འདིར་ནད་རིམས་རྒུད་པ་ཀུན་གྱི་འཚེ་བ་ལས་སྐྱོབ་ཅིང་ཕྱི་མར་རིམ་པས་ངེས་ལེགས་ཀྱི་བདེ་བ་འབྱུང་བའི་གནས་མངོན་མཐོ་ཁྱད་པར་ཅན་ལ་འགོད་པས། རྟག་ཏུ་བདེ་བའི་འབྱུང་གནས་རྒ་ནད་སེལ་བ་པོ། །འབྲིང་རྣམས་འཁོར་བའི་རྩ་བ་འཇིག་ཚོགས་ལ་ལྟ་བའི་འཆིང་བ་བཅད་དེ་ཁམས་གསུམ་གྱི་འཁོར་བ་ལས་ཐར་པའི་ཉེར་ཞིའི་དབྱིངས་ཀྱི་མཁའ་ལ་འཁྲིད་པས། གསུམ་མཐར་མཛད་ཅིང་མཁའ་སྤྱོད་སྤྱོད་པ་སྟོན་པ་པོ། །ཆེན་པོའི་རིགས་ཅན་རྣམས་བདུད་བཞི་ཕྲ་རགས་མ་ལུས་པ་ལས་རྒྱས་པའི་སངས་རྒྱས་ཀྱི་སར་བཀྲི་བས། ལུས་ཅན་མཆོག་སྟེ་བདུད་དཔུང་འཁྲུག་ལས་རྒྱལ་བ་པོ། །འདི་གསུམ་འཇིག་རྟེན་དབང་ཕྱུག་གི་བསྟོད་པར། རིམས་དང་ནད་འཇོམས་བདེ་བ་མཆོག་སྐྱེད་པ། །སྲིད་པ་མཐའ་མཛད་མཁའ་ལ་རྒྱུ་བ་དང༌། །བདུད་རིགས་སྣ་ཚོགས་སྟོབས་ནི་ངེས་པར་འཇོམས། །ཞེས་འབྱུང་བ་དང་སྦྱར་ན་གོ་བདེའོ། །གཉིས་པ་ཞིང་ཁམས་རིས་མེད་ཀྱི་སེམས་ཅན་མ་ལུས་པའི་དོན་མཛད་ཚུལ་ནི། མངོན་ཤེས་དྲུག་གི་རིམ་པས་སེམས་ཅན་གྱི་དོན་མཛད་ཚུལ། རྒྱན་ལས་འབྱུང་
བ་བཞིན། དང་པོར་གདུལ་བྱ་གར་ཡོད་ཀྱི་ཞིང་དུ་རྫུ་འཕྲུལ་གྱི་རྐང་པ་བཞི་ལ་བརྟེན་ནས་བྱོན་ཏེ་དོན་མཛད་དགོས་པས། གསེར་གྱི་རྐང་གདུབ་སྒྲ་ཡིས་ཞབས་ཡིད་འོང་བ་པོ། །འཇིག་རྟེན་འབྱོར་རྒུད་འདུ་འཛི་འཁྲུག་ལོང་སོགས་ཟང་ཟིང་ཇི་ལྟ་བུའི་གསེབ་ཏུ་བྱོན་ཡང་ཐེག་ཆེན་གྱི་བྱམས་སྙིང་རྗེ་དགའ་བ་བཏང་སྙོམས་བཞིའི་སྒོ་ནས་དམན་པའི་ཡིད་བྱེད་དང་མཚན་མའི་རྣམ་གཡེང་རྒྱང་རིང་དུ་བསྲིངས་ཏེ། ཚངས་པའི་གནས་པ་བཞི་ཡིས་དབེན་པར་མཛད་པ་པོ། །དེའང་མི་ལ་སོགས་པས་སྟེང་གི་འགྲོ་བ་ཙམ་དུ་མ་ཟད་ས་བླ་དང་ས་འོག་གི་འཇིག་རྟེན་དུའང་བྱོན་ནས་དེའི་འགྲོ་བ་རྣམས་གདུལ་བར་མཛད་པ་ལ་མཁས་པ་ཉིད་ཀྱིས། ངང་པའི་འགྲོས་འདྲ་གླང་ཆེན་དྲེགས་ལྟར་གཤེགས་པ་པོ། །མདོར་ན་རྗེ་བླ་མས། འདྲེན་པ་མཆོག་དེས་དཀའ་བ་དཔག་མེད་ཀྱིས། །ནན་ཏན་སྙིང་པོར་མཛད་ནས་བསྒྲུབས་པ་འདི། །གསུངས་པ་བཞིན་ལུས་ཅན་ཡོངས་ཀྱི་ཕན་བདེའི་འབྱུང་གནས་གཅིག་པུར་དཀའ་བ་བརྒྱ་ཕྲག་གི་སྒོ་ནས་བསགས་ཤིང་བསྒྲུབས་པའི་བསྟན་པ་འདི་ཉིད་འཕེལ་ཞིང་གནས་པའི་ཐབས་ཁོ་ན་དོན་དུ་གཉེར་བས། ཡོངས་རྫོགས་ཉེ་བར་བསགས་ཤིང་བསྟན་པ་གཉེར་བ་པོ། །ཞེས་པའམ། ཡང་ན་དང་པོར་ཐུགས་བསྐྱེད་བར་དུ་ཚོགས་བསགས་པ་ཀུན་གྱི་དགོས་པའི་མཐིལ་གདུལ་བྱའི་དོན་ཡིན་ལ། དེའི་གཙོ་བོ་ཆོ་འཕྲུལ་གསུམ་ལས་གསུང་རྗེས་སུ་བསྟན་པའི་ཆོ་འཕྲུལ་གྱིས་སོ་སོའི་སྐལ་བ་བཞིན་ཆོས་བསྟན་ནས་སྨིན་གྲོལ་ལ་འགོད་པའི་དོན་དུ་བྱ་སྟེ། འགྱུར་གཞན་ལས། ཚོགས་ཀུན་ཉེ་བར་བསགས་ནས་ཆོས་ཀུན་སྟོན་པ་པོ། །ཞེས་འབྱུང་ངོ༌། །དེ་ལྟར་བྱས་ཏེ་གདུལ་བྱའི་དོན་
རྫོགས་པར་གྲུབ་ཚུལ་ནི་ཉན་རང་གི་མྱང་འདས་ཐོབ་ན་ཟག་མེད་ཀྱི་བདེ་བ་དང་ལྡན་ཡང་ཞི་བའི་མཐའ་ལ་ལྷུང་བར་གཟིགས་ཏེ། དེ་ལས་ཀྱང་སྒྲོལ་བར་མཛད་ན་སྡུག་བསྔལ་གསུམ་གྱི་རྦ་ཀློང་འཁྲུགས་པའི་འཁོར་བའི་རྒྱ་མཚོ་ལས་སྒྲོལ་བ་ལྟ་ཅི་སྨོས་པས། འོ་མའི་མཚོ་དང་ཆུ་ཡི་མཚོ་ལས་སྒྲོལ་བ་པོ། །སྟེ་སྲིད་ཞིའི་རྒུད་པ་མཐའ་དག་ལས་བསྐྱབས་ཏེ་སངས་རྒྱས་ཀྱི་ས་ལ་འགོད་པའི་དོན་ནོ། །འགྱུར་གཞན་དུ། སྡུག་བསྔལ་མཚོ་དང་ཉོན་མོངས་མཚོ་ལས་སྒྲོལ་བ་པོ། །ཞེས་འབྱུང་བ་དོན་ལ་བསམས་ནས་བསྒྱུར་བའམ། ཡང་ན་འོ་མའི་མིང་དངོས་ནི། བ་ཡཿ ཡིན་ཀྱང༌། བཞོས་པའི་དོན་གྱི་དུ་གྔྷཾ་ཞེས་ཟེར་བ་དང༌། ཆུའི་མིང་གི་རྣམ་གྲངས་ཀཱི་ལཱ་ལཾ་འཆིང་བྱེད་དང༌། ཨམྦྷཿ ནི་ནང་བྱེད་ལ་འཇུག་པས་སྐད་དོན་གྱི་སྟེང་ནས་ཡིན་དཔྱོད་དགོས། ཟླ་མཛེས་མས་མཛད་པར། འོ་མའི་ཆུ་གཏེར་རྒྱ་མཚོ་ལྟ་བུར་རྟག་ཏུ་གནས། །ཞེས་འབྱུང་བ་ནི་འགྱུར་འཆུག་པའམ་དོན་གཞན་ཡིན་གྱི་འདི་དང་བསྒྲིག་ཏུ་མེད་དོ། །མཇུག་གི་དོན་ཕན་ཡོན་ནི། སྤྱིར་རྒྱུན་དུ་གསོལ་བ་འདེབས་ཤིང༌། ཁྱད་པར་ཐོ་རངས་ནི་བྱང་ཆུབ་པའི་དུས་དང་དཔལ་མོ་རང་གིས་ཀྱང་མཆོག་བརྙེས་པའི་དུས་ཡིན་པས་རྟེན་འབྲེལ་གྱི་ཁྱད། གང་ཞིག་རྟག་ཏུ་ཐོ་རངས་ལངས་ནས་གུས་པ་ཡིས། །རེ་ས་གཞན་ན་མེད་པའི་བློ་ལྟོས་བྱས་ཏེ། སྤྱན་རས་གཟིགས་ཀྱི་དབང་པོ་ཡིད་ལ་སེམས་བྱེད་ཅིང༌། །དེའི་ཡོན་ཏན་བརྗོད་པ་ཚིག་རིས་ཙམ་གོ་སླ་ཞིང་ཞར་ལ་སྐུའི་རྣམ་པ་འཆར་བདེ་བ། བློ་གྲོས་ཅན་གྱིས་བརྟག་ན་དོན་ཟབ་ཅིང་རྒྱ་ཆེ་བའི། བསྟོད་པའི་མཆོག་འདིས་དག་ཅིང་གསལ་བར་བསྟོད་བྱེད་ན། །ངེས་པར་རྗེས་སུ་འཛིན་ལ། མ་མཐའ། སྐྱོན་གྱིས་མ་གོས་སྐུ་མདོག་དཀར། །རྫོགས་སངས་
རྒྱས་ཀྱིས་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །ཞེས་པ་འདི་དཔལ་མོ་རང་གིས་མཛད་པ་པོ་བསྟོད་འདིའི་དོན་བསྡུ་ལྟ་བུ་ཡིན་པས་དེ་ཙམ་ལས་མི་ཤེས་ཀྱང་ཡིད་ཆེས་ཀྱིས་གསོལ་བ་འདེབས་ནུས་ན་དབང་པོ་རྟུལ་ཞིང་སྡིག་པ་ཆེ་བ་རིགས་ངན་ཐ་ཤལ་ཇི་འདྲ་ཞིག་ཡིན་ཀྱང་འཕགས་པའི་ཐུགས་རྗེ་ལ་ཉེ་རིང་མེད་པས། དེ་ནི་སྐྱེས་པའམ་ནི་བུད་མེད་ཡིན་ཡང་རུང༌། །བརྩེ་བས་རྗེས་སུ་གཟུང་སྟེ་ནད་རིམས་གདོན་བགེགས་ཕྱིན་ཅི་ལོག་གི་བློ་སྣ་ངན་པ་སོགས་ཞི་ཞིང༌། ཚེ་དང་བསོད་ནམས་དད་བརྩོན་ཤེས་རབ་སོགས་རྒྱས་པས། སྐྱེ་བ་འདི་འམ་མ་འོངས་སྐྱེ་བ་ཐམས་ཅད་དུ། །བདེ་བ་ནས་བདེ་བར་འགྲོ་ཞིང་ས་ལམ་གྱི་རྟོགས་པ་གོང་ནས་གོང་དུ་འཕེལ་བས། འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །ཞེས་བཀའ་བདེན་པས་ཞལ་གྱིས་བཞེས་པ་ལ་ཡིད་ཆེས་བསྐྱེད་དེ་འབད་པར་བྱའོ། །བསྟོད་པ་འདི་འདོན་པའི་ཚེ་དམིགས་པ་བྱ་ཚུལ་ནི། དགེ་སློང་མ་དཔལ་མོ་རང་གི་སྤྱི་བོར་བཞུགས་ཏེ་འཕགས་པའི་ཞལ་ལ་གཟིགས་ནས་ངོ་ཆེན་གྱི་ཚུལ་དུ་རང་ལ་འདོན་གྲོགས་མཛད། རང་གིས་ལག་པ་གཉིས་ཐལ་མོ་སྦྱར་བས་འཕགས་པའི་ཞབས་ལ་འཇུས། ཞབས་ཀྱི་མཐེ་བོང་ལ་སྨིན་མཚམས་གཏད་ནས་གསོལ་བ་བཏབ་པ་ན་ཆང་རྫའི་ཐེམ་བུ་བརྡོལ་བ་བཞིན་མཐེ་བོང་གི་རྩེ་ལས་བདུད་རྩིའི་རྒྱུན་བབས་པ་སྨིན་མཚམས་ནས་ཞུགས་པས་ལུས་ཀུན་གང༌། སྡིག་སྒྲིབ་ཐམས་ཅད་བྱང༌། འཕགས་པའི་བྱིན་རླབས་མ་ལུས་པ་ཐོབ་བྱུང་སྙམ་པའི་མོས་པ་བྱ། གོམས་པ་ན་རིགས་དྲུག་སེམས་ཅན་ཐམས་ཅད་ཀྱི་སྤྱི་བོར་དཔལ་མོ་རེ་བཞུགས་ཏེ་གསོལ་བ་
བཏབ་པས་བདུད་རྩི་འབེབ་སྦྱང་དང༌། མཐར་ཐམས་ཅད་འཕགས་པའི་སྐུར་གྱུར་པའི་མོས་པ་བྱའོ། །སྨྲས་པ། དལ་འབྱོར་རྙེད་དཀའ་ཚེ་ལ་ལོང་མེད་ཅིང༌། །ངན་སོང་གསུམ་གྱི་གཡང་ས་ཉམ་ང་བས། །ཞིང་མཆོག་བདེ་བ་ཅན་དུ་འབྲོས་འདོད་རྣམས། །འཕགས་མཆོག་སྒྲུབ་པའི་ཉེ་ལམ་འདིར་ཞུགས་ཤིག །ཟབ་ཅིང་རྒྱ་ཆེའི་གདམས་པ་གྲངས་མང་ཡང༌། །སྙིགས་དུས་སྒྲུབ་སླ་ཤིན་ཏུ་དོན་ཆེ་བ། །ལྷ་ཆོས་འདི་ལས་ལྷག་པ་གཞན་མེད་པས། །འབད་པར་རིགས་སོ་ཤེས་ལྡན་གྲོགས་པོ་དག །འདིར་འབད་དགེ་བ་རྟ་མཆོག་བ་ལ་ཧས། །བདག་སོགས་མཁའ་མཉམ་ལུས་ཅན་དོན་མཐུན་ཚོགས། །འཁོར་བ་སྲིན་མོའི་གླིང་ནས་མྱུར་དྲངས་ཏེ། །བདེ་ཆེན་ཐར་པའི་ས་ལ་འགོད་གྱུར་ཅིག །ཅེས་སྨྱུང་གནས་ཀྱི་ཆོ་གའི་ཟུར་རྒྱན་བདེ་བ་ཅན་གྱི་ལམ་ཡིག་ཅེས་བྱ་བ་འདི་ནི་ཆོས་ཚུལ་འདི་ལ་མཆོག་ཏུ་མོས་པ་རབ་འབྱམས་པ་དཀོན་མཆོག་སྨོན་ལམ་གྱིས་འདིའི་ཕན་ཡོན་ལོ་རྒྱུས་བླང་དོར་གྱི་ལག་ལེན་དང་བཅས་གསལ་བར་བསྟན་པ་ཞིག་དགོས་ཞེས་ལན་བཅུ་གསུམ་གྱི་བར་ནན་ཏན་དུ་བསྐུལ་ཅིང༌། དད་བརྩོན་བློ་དང་ལྡན་པ་རབ་འབྱམས་པ་དཀོན་མཆོག་ཡེ་ཤེས་ཀྱིས་ཐུགས་རྗེ་ཆེན་པོས་གཙོས་པའི་བྱ་རྒྱུད་ཀྱི་བསྙེན་ཡིག་ཅིག་དགོས་ཚུལ་སྔར་ནས་བསྐུལ་བ་དང༌། ཡང་དགེ་སྦྱོར་ལ་བརྩོན་པའི་རི་ཁྲོད་པ་དཀོན་མཆོག་མཆོག་ལྡན་གྱིས་པོ་བསྟོད་ལ་ཊཱིཀྐ་ཞིག་དགོས་ཞེས་ཡང་ཡང་བསྐུལ་བ་རྣམས་དོན་མཐུན་པར་སྣང་བས་ཕྱོགས་གཅིག་ཏུ་བསྡེབས་ཏེ། ༸བཙུན་པ་དཀོན་མཆོག་བསྟན་པའི་སྒྲོན་མེས་མེ་བྱིའི་དགུན་མཚམས་སྐབས་ཉིན་གུང་གི་
ཐུན་གསེང་ལ་སུག་བྲིས་སུ་བགྱིས་པ་ལས་ཤོག་བུར་འབེབས་པ་པོ་ནི་སྔགས་རམས་པ་དཀོན་མཆོག་ཀུན་དགའོ།། །།དགེ་འདིས་ཕན་བདེའི་འབྱུང་གནས་ཐུབ་བསྟན་དར། །བསྟན་འཛིན་ཐུགས་མཐུན་བཤད་སྒྲུབ་བྱ་བ་འཕེལ། །མི་ཡི་དབང་ཕྱུག་པཻ་ལི་བློན་འབངས་སོགས། །བསྟན་པའི་སྦྱིན་བདག་མངའ་ཐང་དར་བར་ཤོག །ཁྱད་པར་འབྲེལ་ཐོགས་འགྲོ་བ་མ་ལུས་པ། །ཕྱག་ན་པདྨས་འབྲལ་མེད་རྗེས་གཟུང་སྟེ། །ཞིང་མཆོག་བདེ་བ་ཅན་དང་པོ་ཏ་ལར། །སྐྱེས་ནས་ས་ལམ་བགྲོད་པ་མཐར་ཕྱིན་ཤོག །ཅེས་པ་འདི་ནི་ཧལ་ཧ་དང་ཧན་པཻ་ལིའི་ཤོག་ནས་དད་ལྡན་སྔགས་རམས་པ་དཀོན་མཆོག་བསྟན་འཕེལ་གྱིས་པར་གསར་བསྐྲུན་བགྱིས་སྐབས་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།།