རྡོ་རྗེ་རྣམ་པར་འཇོམས་པའི་སྒྲུབ་དཀྱིལ་ཆ་ལག་དང་བཅས་པ།
རྡོ་རྗེ་རྣམ་པར་འཇོམས་པའི་སྒྲུབ་དཀྱིལ་ཆ་ལག་དང་བཅས་པ་མཆོག་ཐུན་དངོས་གྲུབ་གཏེར་མཛོད་ཅེས་བྱ་བ་བཞུགས་སོ། །
ན་མོ་གུ་རུ་བཛྲ་བི་དཱ་རཱ་ཡ། གསང་གསུམ་སྦྲང་ཆར་བཅུད་ལྡན་གསང་བའི་བདག །མཐུ་སྟོབས་སྒྲ་བརྒྱས་བདུད་འཇོམས་རྡོ་རྗེ་ཅན། །བྱིན་རླབས་བདུད་རྩིའི་རྒྱུན་གྱིས་ཉེར་འཚེ་ཀུན། །རྣམ་པར་འཇོམས་པ་ལྷག་པའི་ལྷ་དེར་འདུད། །རྡོ་རྗེ་འཆང་དབང་ཉིད་ལས་གཞན་མིན་གསང་ཆེན་བཀའ་ཡི་སྡུད་པ་པོ། །སྙིགས་མའི་སྐྱོན་བརྒྱས་གཙེས་ཀྱང་གཞན་མིན་འགྲོ་བའི་དོན་ལ་གཅིག་ཏུ་གཞོལ། །ལྷག་པའི་ལྷ་མཆོག་གང་དང་གཞན་མིན་ཡབ་རྗེ་འཇིགས་མེད་དབང་པོ་ལ། །གུས་པས་འདུད་དོ་ནམ་ཡང་གཞན་མིན་ཁྱོད་ཉིད་ཁོ་ན་སྐྱབས་སུ་བསྟེན། །ནག་ཕྱོགས་རྣམ་པར་གཅོད་པའི་རྩིབས་སྟོང་གི །འཁོར་ལོས་རབ་འབྱམས་འཕྲིན་ལས་གླིང་བཞི་ལ། །དབང་བསྒྱུར་ཐབས་ཀྱི་རྣམ་པ་ཆ་ཚང་བར། །སྤེལ་འདི་སྐལ་ལྡན་རྣམས་ཀྱིས་གུས་པས་བསྟེན། །དེའང་རྒྱལ་བ་ཀུན་གྱི་མཐུ་སྟོབས་ནུས་པའི་བདག་ཉིད་དཔལ་གསང་བའི་བདག་པོ་ཕྱག་ན་རྡོ་རྗེ་ལ་རྒྱུད་སྡེ་བཞི་སོ་སོར་གཏོགས་པ་དང༌། མདོ་
ལུགས་སུ་གཏོགས་པ། གྲུབ་ཆེན་སོ་སོ་ནས་བརྒྱུད་པ་སོགས་སྲོལ་མཐའ་ཡས་པ་ཞིག་ཡོད་ཀྱང༌། གཙོ་ཆེ་བ་ཕྱག་ན་རྡོ་རྗེ་ཆེ་བ་བརྒྱད་དམ་དགུར་གྲགས་པ་རྣམས་ཡིན་ཞིང༌། དེའི་ནང་ནས་རྡོ་རྗེ་རྣམ་འཇོམ་ཁྲུས་ཀྱི་ཆེ་བ་ཞེས་བྱ་བ་ཡིན། འདིའི་གཟུངས་མདོ་དང་ཟ་མ་ཏོག་བཀོད་པ་སོགས་རྒྱུད་བསྒྱུར་བའི་ཐོག་མ་ཡིན་ཞིང་ཆོས་རྒྱལ་གོང་མ་རྣམས་ཐུགས་དམ་མཛད་པས་རྒྱལ་པོ་མདོ་ལྔར་གྲགས་པ་བྱུང༌། གྲུབ་མཐའ་རིས་མེད་ལ་འཕྲིན་ལས་ཁྱབ་བརྡལ་དུ་ཆེ་ཞིང༌། རྙིང་མ་པ་རྣམས་རྡོ་རྗེ་ཕུར་བ་དང་ངོ་བོ་གཅིག་པར་འདོད། འདི་ཉིད་ལས། མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པ་ཞེས་པའི་དོན་དུ་བསམས་ཏེ་མ་གཤིན་ཕུར་གསུམ་སོགས་ཀྱི་ལས་སྦྱོར་གང་ལའང་བོགས་འབྱིན་པའི་རྒྱབ་ཆོས་འདི་ལ་བྱེད་དོ། །འདི་ལའང་རྣམ་འཇོམས་ལྗང་སྔོན་རྡོ་རྗེ་གདན་པ་ནས་བ་རི་ལོ་ཙཱ་བ་ལ་བརྒྱུད་པ་ད་ལྟ་གྲགས་ཆེ་ཞིང༌། རྣམ་འཇོམས་དཀར་པོ་ས་ཝ་རི་བའི་ལུགས་ལྷ་བཅུ་དགུ་བའི་དབང་སོགས་དེ་ཝ་པཱུུ་རྞ་ནས་མགར་ཆོས་བཟང་ལ་བརྒྱུད་པ་དང༌། གྲུབ་ཆེན་རཱ་ཧུ་ལས་མཁས་གྲུབ་ཁྱུང་པོ་ལ་གནང་བ་རྣམ་འཇོམས་ཞི་བ་དཀར་པོ་དང་དྲག་པོ་ལྗང་གུ་སྦྲགས་སྒྲུབ་ཅིག་ཀྱང་ཡོད། རྣམ་འཇོམས་མཐིང་ག་གསང་སྒྲུབ་ནི་ཁྱུང་
པོས་ནི་གུ་མ་ལ་གསན་ཞིང༌། མང་འོད་བྱང་ཆུབ་ཤེས་རབ་ནས་བརྒྱུད་པ་རྣམ་འཇོམས་མཐིང་ག་ཁྲོ་བོ་བཅུས་བསྐོར་བ་ཞིག་ཀྱང་ཡོད། གྲུབ་ཐོབ་ཤོལ་པོ་བ་ཞེས་རྙིང་མ་དང་བཀའ་གདམས་འབྲེལ་མའི་ཆོས་བརྒྱུད་འཛིན་པ་ཞིག་གིས་ཀྱང་རྣམ་འཇོམས་མཐིང་གའི་སྒྲུབ་པ་བྱས་པས་ཞལ་གཟིགས་ཏེ་སྒྲུབ་ཐབས་སྔ་མ་དང་ཅུང་མི་འདྲ་བ་ཞིག་བྱས། རྗེ་བཙུན་ས་སྐྱ་བ་ཆེན་པོ་ལ་བིརྺ་པས་དག་སྣང་གི་ཚུལ་དུ་དབང་བསྐུར་བ་ནི་དབང་བཞི་ཚང་བས་བླ་མེད་ཀྱི་ལུགས་ཡིན་ཞིང་གཙོ་བོ་ཡབ་ཡུམ་ཁྲོ་བོ་བཅུ། ཕོ་ཉ་མོ་དྲུག་ཅུ་རྩ་བཞི། སྒོ་བ་བཞི་སྟེ་ལྷ་དོན་དགུ་ཡོད་པས་འདི་ལ་རྣམ་འཇོམས་བིར་ལུགས་སུ་གྲགས། མཁན་ཆེན་ལས་ཀྱི་རྡོ་རྗེའི་གདམས་པ་འདིའང་ཕྱོགས་ཙམ་དེ་དང་འདྲའང་དེ་ལ་ཁུངས་བཅོལ་བ་མིན་པར། རང་ཉིད་ལ་ཡི་དམ་ལྷས་ཇི་ལྟར་གནང་བ་བཞིན་བཀོད་པ་ཡིན་པར་འདུག་པས་གྲུབ་ཆེན་གྱི་དགོངས་པ་གཞིར་བཟུང༌། མན་ངག་གབ་སྦས་ཀྱིས་ཅུང་ཟད་མི་གསལ་ཞིང་གོ་རིམ་དཀྲུག་པ་རྣམས་དོན་དང་མི་འགལ་བར་བཅོས་ཤིང་བསྡེབས་ནས་ལག་ཏུ་བླང་བདེ་བར་ནག་འགྲོས་སུ་འགོད་པ་ལ། བདག་བསྐྱེད་དང་འབྲེལ་བར་བསྙེན་པ་སྔོན་དུ་བྱ་ཚུལ། བསྙེན་པ་ལས་སུ་རུང་ནས་དཀྱིལ་འཁོར་སྒྲུབ་ཅིང་མཆོད་དེ་དབང་བསྐུར་བ། ཞར་བྱུང་ཉེ་བར་མཁོ་བའི་ལས་ཚོགས་གཞན་བསྟན་པ་དང་གསུམ། དང་པོ་ལ་སྔོན་འགྲོ། དངོས་གཞི། རྗེས་གསུམ་ལས། དང་པོ་ནི། རྟེན་དང་མཆོད་གཏོར་བཤམས། ཁྲུས་དང་གཙང་སྦྲ་བྱས། བདེ་བའི་སྟན་ལ་སྤྱོད་ལམ་ཚུལ་མཐུན་གྱིས་འཁོད་དེ་སྐྱབས་སེམས་སྔོན་དུ་བཏང་ལ། རང་ཉིད་སྐད་ཅིག་གིས་རྡོ་རྗེ་གཏུམ་པོ་ཞལ་གཅིག་ཕྱག་གཉིས་པའི་སྐུར་བཞེངས་པར་གྱུར། མཆོད་པ། ཨ་མྲྀ་ཏས་བསང༌། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་མཆོད་རྫས་རྣམས་
དྭངས་ཤིང་ཐོགས་པ་མེད་པ་ཟག་པ་མེད་པའི་བདེ་བ་ཁྱད་པར་ཅན་སྟེར་བར་གྱུར། ཨོཾ་ཨརྒྷཾ་ཨཱཿ ཧཱུཾ་ནས་ཨོཾ་ཤཔྟ་ཨཱཿ ཧཱུཾ་གི་བར་གྱིས་བྱིན་གྱིས་བརླབས། རང་གི་སྙིང་གར་པཾ་ལས་པདྨ་ཨ་ལས་ཟླ་བའི་སྟེང་དུ་ཧཱུཾ་མཐིང་གས་མཚན་པ་ལས་བཾ་ཡིག་ཅིག་ཆད་དེ་མདུན་དུ་གནས་པ་ཡོངས་སུ་གྱུར་པ་ལས། པདྨའི་སྡོང་པོ་ཡངས་ཤིང་རྒྱ་ཆེ་བ་འདབ་མ་སྟོང་དང་ལྡན་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་ལྕང་ལོ་ཅན་གྱི་གནས་ནས་རྩ་བའི་བླ་མ་དང་དཔལ་ཕྱག་ན་རྡོ་རྗེ་དབྱེར་མེད་པ་འཁོར་དང་བཅས་པ་མདུན་གྱི་ནམ་མཁར་སྤྱན་དྲངས། པདྨའི་སྟེང་དུ་བཞུགས་པར་གྱུར། གང་གིས་འཁོར་བའི་ཉེས་པ་འདི། །དྲན་པ་ཙམ་གྱིས་འཇོམས་མཛད་ཅིང༌། །བླ་མེད་བྱང་ཆུབ་ཐོབ་མཛད་པའི། །བླ་མའི་ཞབས་ལ་ཕྱག་འཚལ་ལོ། །སངས་རྒྱས་གཙོ་ལ་ཕྱག་འཚལ་ལོ། །སྐྱོབ་པ་ཆོས་ལ་ཕྱག་འཚལ་ལོ། །དགེ་འདུན་ཆེ་ལ་ཕྱག་འཚལ་ལོ། །གསུམ་ལ་རྟག་ཏུ་ཕྱག་འཚལ་ལོ། །ལྕང་ལོ་ཅན་གྱི་གནས་མཆོག་དམ་པ་ནས། །གསང་སྔགས་རིག་སྔགས་ཀུན་གྱི་བདག་པོ་སྟེ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པའི། །བཅོམ་ལྡན་རྡོ་རྗེ་ཅན་ལ་ཕྱག་འཚལ་ལོ། །ཞེས་ཕྱག་བྱ། ཨོཾ་ཨརྒྷཾ་པྲ་ཏཱིཙྪ་ཡེ་སྭཱཧཱ། ཨརྒྷཾ་གྱི་གནས་སུ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྟ་པྲ་ཏཱིཙྪ་ཡེ་སྭཱཧཱ། དཀོན་མཆོག་གསུམ་ལ་བདག་སྐྱབས་མཆི། །ཞེས་པ་ནས། སངས་རྒྱས་འགྲུབ་པར་ཤོག །ཅེས་པའི་བར་གྱིས་རྒྱུན་བཤགས་ལན་གསུམ་བྱ། བཛྲ་མུཿ ཚོགས་ཞིང་རྣམས་རང་
གནས་སུ་གཤེགས་པར་གྱུར། སེམས་ཅན་ཐམས་ཅད་བདེ་བ་མཐའ་དག་དང་ལྡན་པར་གྱུར་ཅིག །སེམས་ཅན་ཐམས་ཅད་སྡུག་བསྔལ་མཐའ་དག་དང་བྲལ་བར་གྱུར་ཅིག །སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་ལ་གནས་པར་གྱུར་ཅིག །སེམས་ཅན་ཐམས་ཅད་ཉེ་རིང་ཆགས་སྡང་དང་བྲལ་བའི་བཏང་སྙོམས་ཆེན་པོའི་ས་ལ་གནས་པར་གྱུར་ཅིག །ཅེས་ཚད་མེད་བཞི་བསྒོམ། དངོས་གཞི་ལ་རྟེན་དང་བརྟེན་པ་གསལ་གདབ་པ། ཡེ་ཤེས་པ་སྤྱན་དྲངས་ཏེ་མཆོད་ཅིང་བསྟིམ་པ། བཟླས་པའི་རིམ་པ་སོགས་གསུམ། དང་པོ་ནི། གོང་དུ་བསོད་ནམས་ཀྱི་ཚོགས་སོང་ཟིན་ནས། འདིར་ཡེ་ཤེས་ཀྱི་ཚོགས་གསོག་དགོས་པས་སྔགས་དོན་དྲན་བཞིན་པར། ཨོཾ་སྭ་བྷཱ་ཝ་ཤུདྡྷཿ སརྦྦ་དྷརྨཿ སྭ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་སྟོང་ཞིང་བདག་མེད་པ་སྤྲོས་པའི་མཐའ་ཐམས་ཅད་དང་བྲལ་བར་གྱུར། སྟོང་པའི་ངང་ལས་རང་གི་སེམས་ཉིད་ཡི་གེ་ཧཱུཾ་མཐིང་ག་གཅིག་ཏུ་གྱུར་པ་དེ་ལས་ཨེ་ཡིག་ཅིག་ཆད་དེ་འོག་ཏུ་སོན་པ་ཡོངས་སུ་གྱུར་པ་ལས་ཆོས་འབྱུང་གྲུ་གསུམ་རྩ་བ་ཐུར་དུ་ཟུག་པ། གདེངས་ཀ་གྱེན་དུ་ཕྱོགས་ཤིང་ཕྱི་སྔོ་ལ་ནང་དམར་བའི་རང་བཞིན་ནམ་མཁའ་དང་མཉམ་པར་གྱུར། དེའི་ནང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུ་ལྟ་བུའི་མཆོག་མ་གཉིས་ལ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་ཟུར་དུ་རཾ་འབར་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་ཕྱོགས་བཞིར་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་གྲུ་བཞི་སེར་པོ་ཟུར་བཞིར་རྡོ་རྗེ་ཕྱེད་པས་མཚན་པ། དེའི་དབུས་སུ་སུཾ་ལས་རིའི་རྒྱལ་པོ་རི་རབ། ཤར་དཀར། ལྷོ་སེར། ནུབ་དམར། བྱང་ལྗང༌། ཟུར་བཞིར་ལྕོག་ཆེན་བརྒྱད་ཀྱིས་ཉེ་བར་མཛེས་པ། དེའི་སྟེང་དུ་པཾ་ལས་པདྨ། རཾ་ལས་ཉི་མའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ཕྱོགས་ཀྱི་མདོག་
ཅན་ལྟེ་བ་སྔོན་པོ་ཧཱུཾ་གིས་མཚན་པ་ལས་འོད་ཟེར་ཕྱོགས་བཅུར་འཕྲོས་པས་སྲུང་བའི་འཁོར་ལོ་ཡངས་ཤིང་རྒྱ་ཆེ་བ། རྡོ་རྗེ་ཆུང་ངུ་མང་པོས་སྲུབ་ཐམས་ཅད་བཀག་སྟེ་བསྐལ་པའི་རླུང་གིས་ཀྱང་མི་ཕྱེད་པའི་རང་བཞིན་ཅན་དུ་གྱུར། ཨོཾ་བཛྲ་རཀྵ་ཧཱུཾ། དེའི་འོག་གི་ཉི་དཀྱིལ་འོད་དུ་ཞུ་ནས་ཡེ་ཤེས་ཀྱི་མེའི་ངོ་བོར་གྱུར་ཏེ་ཤར་དུ་ཞེ་སྡང་སྲེག་པའི་མེ་མཐིང་ནག་ཏུ་འབར་བ། ལྷོར་ཕྲག་དོག་སྲེག་པའི་མེ་སེར་ནག་ཏུ་འབར་བ། ནུབ་ཏུ་འདོད་ཆགས་སྲེག་པའི་མེ་དམར་ནག་ཏུ་འབར་བ། བྱང་དུ་ང་རྒྱལ་སྲེག་པའི་མེ་ལྗང་ནག་ཏུ་འབར་བ། དབུས་སུ་གཏི་མུག་སྲེག་པའི་མེ་སྨུག་ནག་ཏུ་འབར་བ། སྟེང་གི་མེ་ལྕེ་འོག་ཏུ་འབར་ཞིང་འཁྲུག་པ། འོག་གི་མེ་ལྕེ་སྟེང་དུ་འབར་ཞིང་འཁྲུག་པ། མེའི་འུར་སྒྲ་དང་ཚེག་སྒྲས་སྟོང་གསུམ་གཡོ་བ་ལྟ་བུར་གྱུར། རང་སེམས་ཧཱུཾ་གི་རྣམ་པ་དེ་ལས་སླར་ཡང་བྷྲུཾ་ཡིག་ཅིག་ཆད་དེ་སྲུང་འཁོར་གྱི་དབུས་སུ་གནས་པ་ཞུ་བ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི། སྒོ་བཞི་དང་ལྡན་པ། ནང་ནས་རིམ་པ་བཞིན་དུ་ནག་པོ་དང༌། ལྗང་གུ་དང༌། སེར་པོ་དང༌། དམར་པོ་དང༌། དཀར་པོའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་སེར་པོ་ལ་དྲ་བ་དང་དྲ་བ་ཕྱེད་པ་འཕྱང་བ། དེའི་སྟེང་དུ་རིན་པོ་ཆེའི་ཤར་བུ་དང་མདའ་ཡབ་དང་པུ་ཤུས་མཛེས་པར་ཕུབ་པ། ནང་ཀ་བ་བརྒྱད་ཀྱིས་བཏེག་པ། སྟེང་རྡོ་རྗེའི་གདུང་བཞིས་མིག་མངས་རིས་སུ་བྲེས་ཤིང་མཛེས་པར་ཕུབ་པ། དབུས་ཕྱུར་བུར་གྱུར་པའི་སྟེང་དུ་རྡོ་རྗེ་ཕྱེད་པའི་ཏོག་གིས་སྤྲས་པ། འདོད་ཡོན་གྱི་སྣམ་བུ་དམར་པོ་ལ་མཆོད་པའི་ལྷ་མོ་རྣམས་ཀྱིས་མཆོད་རྫས་དུ་མ་ཐོགས་ནས་བཅོམ་ལྡན་འདས་ལ་མཆོད་པ། སྒོའི་མདུན་དུ་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་དང་
ལྡན་པའི་སྟེང་དུ་ཆོས་ཀྱི་འཁོར་ལོ་དང་གདུགས་དང་རི་དྭགས་དང༌། གཞན་ཡང་འཕན་དང་ཟླ་བ་རླུང་གིས་བསྐྱོད་པ་རྔ་ཡབ་ནོར་བུའི་ཡུ་བ་ཅན་ལ་སོགས་པ་རྒྱན་དུ་མས་སྤྲས་པ། རྡོ་རྗེའི་རྭ་བ་མེ་རི་དང་བཅས་པའི་ཕྱི་རོལ་ཏུ་འཇིག་རྟེན་པའི་ཁོར་ཡུག་ལ་རིན་པོ་ཆེ་སྣ་ཚོགས་ལས་གྲུབ་པའི་ཤིང་ལྗོན་པ་ལོ་འདབ་རྒྱས་པ། མེ་ཏོག་ཁ་དོག་སྣ་ཚོགས་དང་རོ་བཅུད་ཕུན་སུམ་ཚོགས་པའི་ཤིང་ཐོག་སྨིན་པར་འཕྱང་བ། ཤིང་ལྗོན་པ་དེ་ལ་སྤྲུལ་བའི་བྱ་མང་པོས་གསང་སྔགས་ཀྱི་སྒྲ་སྒྲོགས་པ། ཡན་ལག་བརྒྱད་དང་ལྡན་པའི་ཁྲུས་ཀྱི་རྫིང་བུ་ལ་ཆུ་བྱ་མང་པོ་ལྡིང་བ། ནེའུ་གསིང་དང་མ་རྨོས་པའི་ལོ་ཏོག་སོགས་ཡིད་ལ་བདེ་བ་སྐྱེད་པའི་མཆོད་པས་དཀྲིགས་པ། དེའི་ཕྱི་རོལ་ཏུ་གཏུམ་དྲག་སོགས་ཀྱི་དུར་ཁྲོད་བརྒྱད་ན་ཤིརྵ་ལ་སོགས་པའི་ཤིང་བརྒྱད་ཀྱི་རྩ་བར་བརྒྱ་བྱིན་ལ་སོགས་པའི་ཕྱོགས་སྐྱོང་བརྒྱད་དང༌། རྩེ་མོར་གླང་པོའི་གདོང་པ་ཅན་སོགས་ཞིང་སྐྱོང་བརྒྱད། བྷི་ཤ་དྷ་ཀ་ལ་སོགས་པའི་ཆུ་བརྒྱད་ལ་ནོར་རྒྱས་ལ་སོགས་པའི་ཀླུ་བརྒྱད་དང༌། དེའི་སྟེང་དུ་སྒྲོག་བྱེད་སེར་པོ་ལ་སོགས་པའི་སྤྲིན་བརྒྱད། བྱང་ཆུབ་ཆེན་པོ་ལ་སོགས་པའི་མཆོད་རྟེན་བརྒྱད་དང༌། ཨིནྡྲ་བོ་དྷི་ལ་སོགས་པའི་གྲུབ་ཆེན་བརྒྱད། ཡེ་ཤེས་ཀྱི་མེ་བརྒྱད་དང་དེ་ལ་གནས་པའི་སྲིན་པོ་བརྒྱད། རིན་པོ་ཆེའི་རང་བཞིན་གྱི་ལྷུན་པོ་ལ་སོགས་པའི་རི་བརྒྱད། དེ་དག་གི་བར་མཚམས་རྣམས་སུ་མི་རོ་ཆེ་ཆུང་མང་པོ་ཁྲ་ཁྲེས་སུ་ཡོད་པ། ཀེང་རུས་སྐམ་རློན་དུ་མ་རང་རེང་དུ་སྤུངས་པ། སྟག་གཟིག་དོམ་དྲེད་མང་པོ་ངར་སྒྲ་དང་ངུར་སྒྲས་འགེངས་པ། དུར་བྱ་རྗེན་ཤ་ཟ་བ་མང་པོ་རྒྱུ་ལྟོ་འདྲད་པ། ཕྲ་མེན་དང་འདྲེ་སྲིན་མང་པོས་སྐྱོ་ཞིང་འཇིགས་པའི་སྣང་བ་སྣ་ཚོགས་སྟོན་པ། བདུད་དང་གཤིན་རྗེ་སྲིན་པོ་མ་རུངས་པས་གད་མོ་ཆེན་པོ་རྒོད་པ། ཞིང་སྐྱོང་མཁའ་འགྲོ་མང་པོ་སྣ་ཚོགས་
པའི་སྐུ་མདོག་དང་ཕྱག་མཚན་དང་ཕྱག་རྒྱ་དང་བཅས་ཏེ་དུར་ཁྲོད་བརྒྱད་པོ་དེ་དག་ཉུལ་བ་སོགས་སྐྱི་གཡའ་ཞིང་ངོ་མཚར་བར་བྱེད་པ། གཞལ་ཡས་ཁང་གི་ནང་གི་སྟེང་དང་འོག་གི་ས་གཞི་ཐམས་ཅད་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་ཨིནྡྲ་ནཱི་ལའི་ས་གཞི་ལྟར་མཐིང་ག །དེའི་ནང་དུ་སྣ་ཚོགས་པདྨ་ལ་གནས་པའི་འཁོར་ལོ་རྩིབས་བཅུ་པ་མུ་ཁྱུད་རིམ་པ་གསུམ་དང་ལྡན་པ། དེའི་དབུས་སུ་པདྨ་འདབ་མ་བརྒྱད་པའི་ལྟེ་བར་ཨ་ལས་ཟླ་བ་དང་རཾ་ལས་ཉི་མའི་དཀྱིལ་འཁོར། ཕྱོགས་ཀྱི་པད་འདབ་བཞི་དང་འཁོར་ལོའི་རྩིབས་བཅུ། སྒོ་བཞི་སོགས་ལ་རཾ་ལས་ཉི་གདན་དང༌། མཚམས་ཀྱི་པད་འདབ་བཞི་ལ་ཨ་ལས་ཟླ་བའི་གདན་རེ་རེ། རང་སེམས་ཧཱུཾ་གི་ཡི་གེ་ནམ་མཁར་གནས་པ་དེ་ཉིད་གདན་དབུས་མའི་སྟེང་དུ་བབས་པ་ལས་འོད་ཟེར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་སྐད་ཅིག་གིས་དཔལ་རྡོ་རྗེ་རྣམ་པར་འཇོམས་པ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། ཕྱག་གཡས་རྡོ་རྗེ་རྒྱ་གྲམ་ནམ་མཁའ་ལ་འཕྱར་བ། གཡོན་པ་ལོག་འདྲེན་ཚར་གཅོད་པའི་སྡིགས་མཛུབ་ཐུགས་ཀ་ན་གདེངས་པ། སྤྱན་གསུམ་དང་ལྡན་པ། མཆེ་བ་བཞི་གཙིགས་པ། ཤངས་ནས་བསྐལ་པའི་རླུང་འབྱིན་པ། སྨ་རའི་གསེབ་ནས་མེ་སྟག་འཕྲོ་བ། དབུ་སྐྲ་ཁམ་སེར་གྱེན་དུ་འཕྲོ་བ། ཞབས་གཡས་བསྐུམས་པས་དགྲ་དང་བགེགས་མནན་པ། གཡོན་བརྐྱངས་པས་བདུད་དང་མུ་སྟེགས་མནན་པ། ཀླུ་རྒྱལ་རིགས་དཀར་ཁྲས་དབུ་བརྒྱན་པ། རྗེའུ་རིགས་སེར་ཁྲས་སྙན་རྒྱན་དང་དཔུང་རྒྱན་བྱས་པ། བྲམ་ཟེའི་རིགས་དམར་ཁྲས་མགུལ་བ་བརྒྱན་
པ། དམངས་རིགས་ལྗང་ཁྲས་ཕྱག་གདུབ་བྱས་པ། གདོལ་པ་ནག་པོས་དོ་ཤལ་བྱས་པ། རྡོ་རྗེའི་ཐོད་དང༌། རྡོ་རྗེ་ཆུང་ངུ་ཟ་རམ་ཚགས་སུ་འཕྱང་བ། རྡོ་རྗེའི་སྙན་རྒྱན་དང་དཔུང་རྒྱན། རྡོ་རྗེའི་མགུལ་རྒྱན། རྡོ་རྗེའི་ཕྱག་གདུབ་ཞབས་གདུབ། རྡོ་རྗེའི་དོ་ཤལ། རྡོ་རྗེའི་ལ་ཐོད་དང༌། མགུལ་རྒྱན། དོ་ཤལ་གསུམ་ལ་རྡོ་རྗེ་ཆུང་ངུ་ཟ་རམ་ཚགས་སུ་འཕྱང་བ་སྟེ་རྡོ་རྗེའི་རྒྱན་ཐམས་ཅད་ཀྱིས་བརྒྱན་པ། སྟག་གི་པགས་པའི་ཤམ་ཐབས་གསོལ་བ། ཡེ་ཤེས་ཀྱི་མེ་དཔུང་འབར་བའི་ཀློང་ན་བཞུགས་པ། རང་གི་ཐུགས་ཀ་ནས་ཧཱུཾ་བཞི་ཆད་དེ་ཕྱོགས་ཀྱི་འདབ་མར་འཁོད་པས། ཤར་དུ་ཧཱུཾ་ལས་རྡོ་རྗེ་གཏུམ་པོ་སྐུ་མདོག་སྨུག་ནག་ཞལ་གཅིག་ཕྱག་གཉིས་པ། གཡས་རྡོ་རྗེ། ལྷོར་ཧཱུཾ་ལས་རྡོ་རྗེ་ཕུར་པ་སྐུ་མདོག་སེར་ནག་ཞལ་གཅིག་ཕྱག་གཉིས་པ། གཡས་ཕུར་པ། ནུབ་ཏུ་ཧཱུཾ་ལས་རྡོ་རྗེ་བེ་ཅོན་སྐུ་མདོག་དམར་ནག་ཞལ་གཅིག་ཕྱག་གཉིས་པ། གཡས་བེ་ཅོན། བྱང་དུ་ཧཱུཾ་ལས་རྡོ་རྗེ་ཐོ་བ་སྐུ་མདོག་ལྗང་ནག་ཞལ་གཅིག་ཕྱག་གཉིས་པ། གཡས་ཐོ་བ། ཐམས་ཅད་ཀྱིས་གཡས་ཀྱི་ཕྱག་མཚན་ནམ་མཁའ་ལ་འཕྱར་ཞིང༌། གཡོན་སྡིགས་མཛུབ་ཐུགས་ཀར་གདེངས་པ། སྤྱན་གསུམ་གསུམ་དང་ལྡན་པ། ཀླུ་རིགས་ལྔ་དང་རྡོ་རྗེའི་རྒྱན་དྲུག་གིས་བརྒྱན་པ། ཡེ་ཤེས་ཀྱི་མེ་འབར་བའི་ཀློང་ན་ཞབས་གཡས་བསྐུམ་ཞིང་གཡོན་བརྐྱང་ནས་བཞུགས་པ། རང་གི་ཐུགས་ཀ་ནས་ཧཱུཾ་ཏྲཱཾ་ཧྲཱིཿ ཏཱཾ་བཞི་ཆད་དེ་མཚམས་ཀྱི་འདབ་མར་འཁོད་པས། ཤར་ལྷོར་ཧཱུཾ་ལས་སངས་རྒྱས་སྤྱན་སྐུ་མདོག་དཀར་མོ་ཞལ་གཅིག་ཕྱག་གཉིས་གཡས་རྡོ་རྗེ། ལྷོ་ནུབ་ཏུ་ཏྲཱཾ་ལས་མཱ་མ་ཀཱི་སྐུ་མདོག་སྔོན་མོ་ཞལ་གཅིག་ཕྱག་གཉིས་གཡས་རིན་པོ་ཆེ། ནུབ་བྱང་དུ་ཧྲཱིཿ ལས་གོས་དཀར་མོ་སྐུ་མདོག་དམར་མོ་ཞལ་
གཅིག་ཕྱག་གཉིས་གཡས་པདྨ། བྱང་ཤར་དུ་ཏཱཾ་ལས་དམ་ཚིག་སྒྲོལ་མ་སྐུ་མདོག་ལྗང་གུ་ཞལ་གཅིག་ཕྱག་གཉིས་གཡས་ཨུཏྤ་ལ། གཡོན་པ་རྣམས་ཀྱིས་རིམ་པ་བཞིན་ཤེལ། གཡུ། བྱུ་རུ། ཨིནྡྲ་ནཱི་ལའི་བུམ་པ་བདུད་རྩིས་གང་བ་བསྣམས་པ། ཐམས་ཅད་རིན་པོ་ཆེའི་རྒྱན་སྣ་ཚོགས་པས་བརྒྱན་ཅིང༌། དར་སྣ་ཚོགས་ཀྱི་ན་བཟའ་གསོལ་བ། ཞལ་གཙོ་བོ་ལ་ཕྱོགས་ཏེ་བཞུགས་པ། རང་གི་ཐུགས་ཀ་ནས་ཧཱུཾ་བཅུ་ཆད་དེ་རྩིབས་བཅུ་ལ་འཁོད་པ་ལས། ཤར་དུ་རྣམ་པར་རྒྱལ་བ་སྐུ་མདོག་དཀར་པོ་རྡོ་རྗེ་བསྣམས་པ། ཤར་ལྷོར་དབྱུག་སྔོན་ཅན་སྐུ་མདོག་སྔོན་པོ་དབྱུག་པ་བསྣམས་པ། ལྷོར་གཤིན་རྗེའི་གཤེད་སྐུ་མདོག་སེར་པོ་བེ་ཅོན་བསྣམས་པ། ལྷོ་ནུབ་ཏུ་ཁྲོ་གཉེར་ཅན་སྐུ་མདོག་དམར་ནག་རལ་གྲི་བསྣམས་པ། ནུབ་ཏུ་རྟ་མགྲིན་སྐུ་མདོག་དམར་པོ་པདྨ་བསྣམས་པ། ནུབ་བྱང་དུ་དོན་ཡོད་ཞགས་པ་སྐུ་མདོག་མཐིང་ག་མདུང་ཐུང་བསྣམས་པ། བྱང་དུ་བདུད་རྩི་འཁྱིལ་པ་སྐུ་མདོག་ལྗང་ནག་རྡོ་རྗེ་བསྣམས་པ། བྱང་ཤར་དུ་རྡོ་རྗེ་འཁོར་ལོ་སྐུ་མདོག་ལྗང་གུ་འཁོར་ལོ་བསྣམས་པ། སྟེང་དུ་ཧཱུཾ་ཆེན་ཀཱ་ར་སྐུ་མདོག་མཐིང་ག་རྡོ་རྗེ་བསྣམས་པ། འོག་ཕྱོགས་སུ་སྟོབས་པོ་ཆེ་སྐུ་མདོག་ནག་པོ་རྩེ་གསུམ་བསྣམས་པ་སྟེ། ཐམས་ཅད་ཞལ་གཅིག་ཕྱག་གཉིས། གཡས་རང་རང་གི་ཕྱག་མཚན་ནམ་མཁའ་ལ་འཕྱར་བ། གཡོན་ཐུགས་ཀར་སྡིགས་མཛུབ་གདེངས་པ། སྤྱན་གསུམ་དང་ལྡན་ཞིང་མཆེ་བ་བཞི་གཙིགས་པ། སྟག་གི་པགས་པའི་ཤམ་ཐབས་གསོལ་བ། ཀླུ་རིགས་ལྔས་བརྒྱན་ཅིང་རྡོ་རྗེའི་རྒྱན་དྲུག་གིས་སྤྲས་པ། ཡེ་ཤེས་ཀྱི་མེ་འབར་བའི་ཀློང་ན་ཞབས་
གཉིས་བརྐྱང་བསྐུམ་གྱི་ཚུལ་གྱིས་བཞུགས་པའོ། །དེའི་ཕྱི་རིམ་གྱི་མུ་ཁྱུད་ལ་ཤར་དུ་བཀྲ་ཤིས་ཀྱི་ལྷ་མོ་སྐུ་མདོག་དཀར་མོ་གཡས་གདུགས་དང་གཡོན་མེ་ཏོག་བསྣམས་པ། ཤར་ལྷོར་བཀྲ་ཤིས་ཀྱི་ལྷ་མོ་སྐུ་མདོག་སེར་མོ་གཡས་གསེར་ཉ་དང་གཡོན་སྣང་གསལ་བསྣམས་པ། ལྷོར་བཀྲ་ཤིས་ཀྱི་ལྷ་མོ་སྐུ་མདོག་དམར་པོ་གཡས་དུང་དང་གཡོན་སིལ་སྙན་བསྣམས་པ། ལྷོ་ནུབ་ཏུ་བཀྲ་ཤིས་ཀྱི་ལྷ་མོ་སྐུ་མདོག་དམར་མོ་གཡས་པདྨ་གཡོན་ཞལ་ཟས་བསྣམས་པ། ནུབ་ཏུ་བཀྲ་ཤིས་ཀྱི་ལྷ་མོ་སྐུ་མདོག་སེར་མོ་གཡས་གསེར་བུམ་གཡོན་པི་ཝང་བསྣམས་པ། ནུབ་བྱང་དུ་བཀྲ་ཤིས་ཀྱི་ལྷ་མོ་སྐུ་མདོག་དམར་མོ་གཡས་རྒྱལ་མཚན་གཡོན་བདུག་སྤོས་བསྣམས་པ། བྱང་དུ་བཀྲ་ཤིས་ཀྱི་ལྷ་མོ་སྐུ་མདོག་སྔོན་མོ་གཡས་དཔལ་བེའུ་གཡོན་དྲི་ཆབ་བསྣམས་པ། བྱང་ཤར་དུ་བཀྲ་ཤིས་ཀྱི་ལྷ་མོ་སྐུ་མདོག་ལྗང་གུ་གཡས་འཁོར་ལོ། གཡོན་ལྷའི་ན་བཟའ་བསྣམས་པ། ཐམས་ཅད་ཀྱང་སྐུ་ལ་རིན་པོ་ཆེའི་རྒྱན་དང་དར་སྣ་ཚོགས་ཀྱི་ཤམ་ཐབས་གསོལ་བ། ཞབས་གར་སྟབས་སུ་བཞུགས་པ། ཤར་གྱི་ཁྱམས་ལ་རྡོ་རྗེའི་རིགས་ཀྱི་ཕོ་ཉ་བཅུ་དྲུག་སྐུ་མདོག་དཀར་པོ། ཕྱག་གཡས་རྡོ་རྗེ་གཡོན་ལྕགས་ཀྱུ་བསྣམས་པ། ལྷོར་རིན་པོ་ཆེའི་རིགས་ཀྱི་ཕོ་ཉ་བཅུ་དྲུག་སྐུ་མདོག་སེར་པོ། གཡས་རྡོ་རྗེ་གཡོན་ཞགས་པ། ནུབ་ཏུ་པདྨའི་རིགས་ཀྱི་ཕོ་ཉ་བཅུ་དྲུག་སྐུ་མདོག་དམར་པོ། གཡས་རྡོ་རྗེ་གཡོན་ལྕགས་སྒྲོག །བྱང་དུ་ལས་ཀྱི་རིགས་ཀྱི་ཕོ་ཉ་བཅུ་དྲུག་སྐུ་མདོག་ལྗང་གུ །གཡས་རྡོ་རྗེ་གཡོན་དྲིལ་བུ་བསྣམས་པ་སྟེ། ཐམས་ཅད་ཀྱང་རིན་པོ་ཆེས་བརྒྱན་ཅིང་ཞབས་བརྐྱང་
བསྐུམ་གྱི་ཚུལ་གྱིས་པདྨའི་གདན་ལ་བཞུགས་པ། ཤར་སྒོར་ཛཿ ལས་ལྕགས་ཀྱུ་མ་དཀར་མོ། ལྷོ་སྒོར་ཧཱུཾ་ལས་ཞགས་པ་མ་སེར་མོ། ནུབ་སྒོར་བཾ་ལས་ལྕགས་སྒྲོག་མ་དམར་མོ། བྱང་སྒོར་ཧོཿ ལས་དྲིལ་བུ་མ་ལྗང་གུ་སྟེ། ཐམས་ཅད་རིན་པོ་ཆེའི་རྒྱན་གྱིས་སྤྲས་པ། དེ་བཞི་གའི་ཕྱི་ངོས་སུ་ཤར་སྒོར་ཡུལ་འཁོར་སྲུང༌། ལྷོ་སྒོར་འཕགས་སྐྱེས་པོ། ནུབ་སྒོར་སྤྱན་མི་བཟང༌། བྱང་སྒོར་རྣམ་ཐོས་སྲས་ཏེ་བཞི་གའང་སྐུ་མདོག་ཕྱོགས་ཀྱི་མདོག་ཅན། ཞི་མ་ཁྲོའི་ཚུལ་དུ་བཞུགས་པ། འདོད་ཡོན་གྱི་སྣམ་བུའི་སྟེང་དུ་མཆོད་པའི་ལྷ་མོ་བཅུ་དྲུག་གིས་མཆོད་རྫས་དཔག་ཏུ་མེད་པ་ཐོགས་ནས་དཀྱིལ་འཁོར་གྱི་ལྷ་ཚོགས་ཐམས་ཅད་མཆོད་ཅིང་སྐོར་བ་མཛད་པ། ཕྱི་རོལ་འཇིག་རྟེན་སྐྱོང་བའི་ཁོར་ཡུག་ལ་ཕྱོགས་སྐྱོང་བཅུ་ལ་སོགས་པ་གཙང་རིས་ཀྱི་མགོན་པོ་བདུན་ཅུ་རྣམས་དང་སྲུང་མའི་ཚོགས་ཐམས་ཅད་བཞུགས་པ། ལྷ་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་པད་ཉིའི་སྟེང་དུ་ཧཱུཾ་མཐིང་གས་མཚན་པར་གྱུར། གཉིས་པ་ཡེ་ཤེས་པ་སྤྱན་འདྲེན་པ་སོགས་ནི། ཧཱུཾ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །མི་བཟད་བདུད་ཀྱི་དཔུང་རྣམས་འཇོམས་མཛད་པ། །བཅོམ་ལྡན་རྡོ་རྗེ་ཅན་གྱི་ལྷ་ཚོགས་རྣམས། །ཐུགས་རྗེའི་དབང་གིས་གནས་འདིར་གཤེགས་སུ་གསོལ། །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། རྡོ་རྗེ་རྣམ་པར་འཇོམས་པའི་ལྷ་ཚོགས་ལ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་བ། མཁའ་འགྲོ་ཆོས་སྐྱོང་དམ་ཅན་སྲུང་མ་དང་བཅས་པ་སྤྱན་དྲངས། མདུན་གྱི་ནམ་མཁར་སྤྲིན་
གཏིབས་པ་བཞིན་དུ་བཞུགས་པར་གྱུར། ཨོཾ་བཛྲ་བི་དཱ་ར་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། སླར་ཡང་ཐུགས་ཀ་ནས་འོད་ཟེར་འཕྲོས། རིགས་ལྔའི་སངས་རྒྱས་བྱང་སེམས་ཐམས་ཅད་སྤྱན་དྲངས། ཨོཾ་ཨརྒྷཾ་སོགས་ཀྱིས་མཆོད། བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་ཅིང་གསོལ་བ་ལྟར། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་གསོལ་བ་བཏབ་པས། ཁྲོ་བོ་རྣམས་ཀྱིས་བགེགས་བསྐྲད། རིགས་ལྔའི་ལྷ་ཚོགས་ཐམས་ཅད་ཀྱིས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་ནས། རང་དང་ལྷ་ཚོགས་ཀྱི་སྤྱི་གཙུག་ནས། ཁྲུས་མཆོག་འདི་ནི་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་པས། །ཅི་འདོད་དངོས་གྲུབ་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥཱིཉྩ་ཏ་ཡ་ཤྲཱི་ཡེ་ཧཱུཾ། ཞེས་གསུང་ཞིང་དབང་བསྐུར་བས། བདུད་རྩིའི་ཆུ་རྒྱུན་གྱིས་སྨིན་མཚམས། མགྲིན་པ། སྙིང་ག །ལྟེ་བ། གསང་གནས། ཡན་ལག་རིམ་པ་བཞིན་གང༌། ལུས་ངག་ཡིད་གསུམ་གྱི་སྒྲིབ་པ་བག་ཆགས་དང་བཅས་པ་ཐམས་ཅད་རིམ་བཞིན་དག །ཆུ་ལྷག་མ་ཡར་ལུད་པ་ལས་གཙོ་བོ་ལ་དབུས་སུ་ཕྱག་ན་རྡོ་རྗེ། གཡས་སུ་འཇམ་དཔལ། གཡོན་དུ་སྤྱན་རས་གཟིགས་དང༌། གཞན་རྣམས་ལའང་རང་རང་གི་རིགས་ཀྱི་བདག་པོས་དབུ་བརྒྱན་པར་གྱུར། གསུམ་པ་བཟླས་པ་སོགས་ཀྱི་རིམ་པ་ནི། རང་གི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཚེ་དང་བསོད་ནམས་
ཉམས་པ་སོགས་མི་འདོད་པའི་སྡུག་བསྔལ་ཐམས་ཅད་མེད་པར་བྱས། ཕ་རོལ་གྱི་རིག་སྔགས་བྱད་སྟེམས་སོགས་ཀྱི་ལས་དང༌། གཟའ་དང་རྒྱུ་སྐར་ངན་པ་སོགས་མི་བཟད་པའི་གདོན་གྱི་ཉེར་འཚེ་དང༌། རྨི་ལམ་མཚན་ལྟས་ངན་པ་ཐམས་ཅད་ཞི་བར་བྱས། རྒྱལ་བ་སྲས་བཅས་ལ་མཆོད་པ་ཕུལ་ཏེ། དེ་དག་གི་བྱིན་རླབས་དྲངས་ནས་བསྟིམ་པས་རིག་སྔགས་མ་གྲུབ་པ་རྣམས་གྲུབ་ཅིང༌། གྲུབ་ཟིན་རྣམས་བརྟན་པར་བྱས། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་རྒྱས་པར་གྱུར་པར་བསམས་ལ་ཡིད་གཞན་དུ་མ་ཡེངས་པར་བཟླས་པ་བྱའོ། །བཟླ་བྱའི་སྔགས་གཟུངས་རིང་ནི་རྩ་སྔགས་ཡིན་ལ། ན་མོ་རཏྣ་ཏྲ་ཡཱ་ཡ། ན་མཤྩནྜ་བཛྲ་པཱ་ན་ཡེ། མཧཱ་ཡཀྵ་སེ་ན་པ་ཏ་ཡེ། ཏདྱ་ཐཱ། ཨོཾ་ཧ་ར་ཧ་ར་བཛྲ། ཞེས་པ་ནས། བྷིནྡ་བྷིནྡ་བཛྲ་ཧཱུཾ་ཕཊ། ཅེས་པ་སྙིང་པོ་དང༌། ན་མཤྩནྜ་བཛྲ་ཀྲོ་དྷཱ་ཡ། ཞེས་སོགས་ཉེ་སྙིང་ཡིན་ཞིང་དེ་གསུམ་གང་རུང་གིས་ཆོག་གོ །པཎ་གྲུབ་སོ་སོའི་འགྲེལ་པ་དང་སྒྲུབ་ཐབས་རྣམས་སུ་ལྷ་ལྔ། ལྷ་དགུ། ལྷ་བཅུ་གསུམ། བཅུ་དགུ་སོགས་མི་འདྲ་བ་མང་བས་འཁོར་གྱི་སྔགས་ངོས་འཛིན་མི་འདྲའང༌། གྲུབ་ཆེན་གྱི་གསུང་འདི་སངས་རྒྱས་གསང་བ་དང་མཐུན་ཤས་ཆེ་བས། དེ་ལྟར་ན་ཉེ་སྙིང་གི་ཧུ་ལུ་སོགས་བཞི་ནང་གི་ཁྲོ་བོ་བཞི་ལ་བྱས་ནས་དེ་ལྔ་གར་གཙོ་བོའི་ཐ་སྙད་ཀྱང་མཛད་དོ། །སྙིང་པོའི་ཧ་ར་ཧ་ར་བཛྲ་སོགས་བཅུ་ཁྲོ་བཅུའི་སྔགས་ཡིན་ཞིང༌། རྩ་སྔགས་ཀྱི་ནང་དུ་རྡོ་རྗེའི་རིགས་ཀྱི་ཁྲོ་བོ་ཁྲོ་མོ་ཕོ་ཉ་མངག་གཞུག་ཐམས་ཅད་ཀྱི་སྔགས་ཚང་བ་ཡིན་ནོ། །ཡང་ཙུ་རུ་ཙུ་རུ་ཙཎྜ་ཞེས་སོགས་སྔགས་ཚན་བཞིའང་ནང་གི་ཁྲོ་བོ་བཞིའི་སྔགས་ཡིན་ཞིང་སོ་སོར་སྦྱོར་ཚུལ། སངས་རྒྱས་གསང་བས་ཕུར་པ་བེ་ཅོན་ཐོ་བ་གཏུམ་པོ་བཞི་ལ་རིམ་བཞིན་སྦྱར་ཡང༌། སློབ་
དཔོན་པདྨས་མཛད་ཟེར་བའི་འགྲེལ་པར། གཏུམ་པོ། ཕུར་བུ། བེ་ཅོན། ཐོ་བ་བཞི་ལ་སྦྱར་བ་སྔགས་དང་མཚན་ཟུར་མཐུན་ཞིང་སྒྲུབ་ཐབས་འདིའི་གོ་རིམ་དང་འགྲིག་གོ །བཟླས་པའི་མཇུག་ཏུ་ཡིག་བརྒྱས་ལྷག་ཆད་བསྐང༌། བདག་བསྐྱེད་ཀྱི་ཡེ་ཤེས་པ་མདུན་གྱི་ནམ་མཁར་བཞུགས་པར་བསམས་ལ་སྔར་བཞིན་མཆོད། མཐུ་སྟོབས་རྩེ་བརྒྱ་འབར་བ་ཡིས། །བགེགས་དང་ལོག་འདྲེན་ཀུན་འཇོམས་ཤིང༌། །འཕྲིན་ལས་མ་ལུས་སྒྲུབ་མཛད་པ། །ཁྲོ་རྒྱལ་འཁོར་དང་བཅས་ལ་བསྟོད། །ཅེས་པས་བསྟོད། བོད་ཀྱི་བླ་མ་སྔ་མ་ཕལ་ཆེར་བསྙེན་པ་བྱེད་ཚེ་མདུན་བསྐྱེད་བུམ་པ་ཅི་རིགས་ལ་བརྟེན་དགོས་པར་འདོད་ཀྱང༌། མར་མེ་མཛད་བཟང་པོ་སོགས་ཁུངས་ཐུབ་དུ་མས་མངོན་རྟོགས་ཀྱི་བསྙེན་པ་ལས་ཟུར་དུ་མ་གསུངས་པས་བདག་བསྐྱེད་ཀྱི་སྟེང་ནས་བྱས་ཆོག་པར་སྔགས་རིམ་དུ་གསུང་ངོ༌། །དེས་ན་འདིར་བསྙེན་པ་གཏོང་ཚུལ་ཟུར་ཙམ་འགོད་ན། ཐོག་མར་ཆོས་སྲུང་ལ་གཏོར་འབུལ། ཡུལ་ལྷ་ལ་དཀར་གཏོར། བགེགས་གཏོར་སོགས་བཏང་སྟེ། མཚམས་ཐོ་བསླང་ནས་བསྐྱེད་ཆོག །གདན་ལ་གཡུང་དྲུང་འདྲི་བ། ཡོ་བྱད་ཚོགས་ཤིང་མཆོད་གཏོར་བཤམ་པ། ཁྲུས་དང་བསང་དུད་བྱ་བ་སོགས་སྤྱི་ལྟར་བྱ། བཟླས་པའི་ཚེ་མ་གཡེང་ཞིང་ཐ་མལ་གྱི་ངག་དང་ལྷ་གཞན་གྱི་སྔགས་ཀྱང་མ་འདྲེས་ལ། གླལ་སྦྲིད་འོག་རླུང་གཉིད་སོགས་ཀྱང་མ་ཤོར་བ་བྱེད་ཅིང༌། གལ་ཏེ་བྱུང་ན་ཐུན་བཏང་སྟེ་ཁྲུས་དང་ཉེ་རེག་བྱས་ཏེ་སླར་ཐུན་ལ་འཇུག་དགོས་པས་སྔ་མ་བསྙེན་གྲངས་སུ་མི་གཞུག །སྤྱིར་བྱ་རྒྱུད་ལ་སྔགས་དང་ཕྱག་རྒྱ་རིམ་པ་མང་པོ་ཞིག་ཡོད་ཀྱང༌། འདི་སྙིགས་མའི་གདུལ་བྱ་བརྩོན་འགྲུས་དང་བློའི་མཐུ་ཞན་པ་རྣམས་ལ་ཕན་པའི་ཕྱིར་དུ་འཇིག་པ་བདེ་བའི་ཚུལ་གྱིས་ཡི་དམ་ལྷས་དངོས་སུ་གནང་བ་ཡིན་པས་ཁ་བསྐང་དགོས་པའི་ངེས་པ་མེད་ཀྱང༌། ལས་རུང་གི་སྐབས་སོགས་སུ་ཅུང་ཟད་རྒྱས་པར་བྱས་ན་བཟང་བས། སྐད་ཅིག་དཀྲོང་བསྐྱེད་ཀྱི་
རྗེས་དེར་རྡོ་རྗེའི་རིགས་ཀྱི་དམ་རྒྱ་ཐལ་མོ་བཟློག་སྟེ་སྦྱར་ལ་མཐེ་བོང་གཉིས་དང་མཐེའུ་ཆུང་སྦྱར་ཏེ་ལྟེ་བའི་ཐད་ཀར་བཞག་ནས། ཨོཾ་བཛྲ་ཨུདྦྷ་ཝ་ཡེ་སྭཱཧཱ། ཞེས་དང༌། མཐེ་བོང་གིས་མཐེའུ་ཆུང་གི་སེན་མོ་མནན་ལ་སོར་མོ་ལྷག་མ་རྣམས་རྡོ་རྗེའི་མཚན་ཉིད་དུ་བྱས་ཏེ་བསྣོལ་ནས་དཔུང་པར་བཞག་ལ། ན་མོ་རཏྣ་ཏྲ་ཡཱ་ཡ། ན་མཤྩནྚ་བཛྲ་པཱ་ཎི་ཡེ། མཧཱ་ཡཀྵ་སེ་ན་པ་ཏ་ཡེ། ན་མོ་བཛྲ་ཀྲོ་དྷ་ཡ། ཏདྱ་ཐཱ། ཨོཾ་ཧུ་ལུ་ཧུ་ལུ་ཏིཥྛ་ཏིཥྛ་བནྡྷ་བནྡྷ་ཧ་ན་ཧ་ན་ཨ་མྲྀ་ཏེ་ཧཱུཾ་ཕཊ། ཅེས་བདུད་རྩི་ཐབ་སྦྱོར་གྱི་སྔགས་རྒྱས་བདག་དང་གནས་ཐམས་ཅད་བསྲུང༌། མཚམ་འགོར་འཕྲེང་བ་སྙིམ་པར་བཟུང་སྟེ། ཨོཾ་ཀཱི་རི་ཀཱི་རི་རོ་ཏྲི་ཎི་སྭཱཧཱ། ཞེས་པ་ལན་བརྒྱ་རྩ་བཟླས་ནས་འཕྲེང་བ་བསྒྲུབ། རྒྱུན་དུ་བཟླས་པའི་འགོར། ཨོཾ་བཛྲ་ཡ་ཛ་ཏན་ཛ་ཡེ་སྭཱཧཱ། ཞེས་པ་ལན་བདུན་བཟླའོ། །ཕྲེང་བ་ནི་རུ་རཀྴ་མཆོག་ཡིན་ལ། བོ་ཏི་ཙིས་ཀྱང་རུང༌། བཟླས་པ་བྱེད་ཚུལ་དཔུང་བཟང་ལས། བཟླས་བརྗོད་བྱེད་ཚེ་མི་མྱུར་མི་དལ་ཞིང༌། །སྒྲ་ཆེར་མི་བྱ་ཧ་ཅང་ཆུང་བ་མིན། །སྨྲ་ཞིང་མ་ཡིན་གཞན་དུ་གཡེང་བཞིན་མིན། །གུག་སྐྱེད་ཀླད་ཀོར་ཚེག་རྣམས་ཉམས་པ་མིན། །ཞེས་སོགས་དམན་ལྷག་མྱུར་བུལ་སོགས་ཀྱི་སྐྱོན་དང་བྲལ་བ་བྱ། ཐོག་མར་ཤུབ་བུའི་བཟླས་པ་དང༌། ཅུང་ཟད་བརྟན་པ་ཐོབ་ནས་ཡིད་བཟླས་བྱ་བར་གསུང༌། གྲངས་ལེགས་གྲུབ་ལས། བཅོ་ལྔ་མན་ཆད་གྲངས་རྣམས་ལ། །སྤྱིར་ན་ཡི་གེ་དུ་ཡོད་པ། །དེ་སྙེད་འབུམ་ཕྲག་བཟླས་བརྗོད་བྱ། །ཡི་གེ་སུམ་ཅུ་རྩ་གཉིས་ལ། །བཟླས་བརྗོད་སུམ་འབུམ་བྱ་བར་བཤད། །དེ་བས་ཡི་གེ་མང་པོ་ལ། །སྔོན་དུ་བསྙེན་པ་ཁྲི་བྱ་འོ། །ཞེས་གསུངས་པས། ཉེ་སྙིང་ལ་བྱེད་ན་སུམ་འབུམ་བཟླ་དགོས་ཤིང༌། སྙིང་པོའམ་རྩ་སྔགས་ལ་བྱེད་ན་ཁྲིས་ཆོག་གོ །འདིའི་གཟུངས་མདོར། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་
བརྒྱད། །རྡོ་རྗེ་རྣམ་འཇོམས་བཟླས་ནས་ནི། །ཞེས་པ་བི་མ་ལ་མི་ཏྲ་སོགས་ཀྱིས་ཁྲུས་ཀྱི་ཚེ་རྒྱལ་པོ་དང་འབངས་ལ་ཁྱད་ཕྱེ་བ་ཡིན་པར་བཤད་ཀྱང༌། སངས་རྒྱས་གསང་བ་དང་ཡེ་ཤེས་རྡོ་རྗེས་རྩ་སྔགས་དང་སྔགས་ཐུང་ལ་སྦྱར་ཞིང༌། སྨྲྀ་ཏིས་ཐུན་རེ་ལ་རྩ་སྔགས་ཉེར་གཅིག །སྔགས་ཐུང་བརྒྱ་རྩ་བརྒྱད་ཡན་ཆད་བཟླ་བའི་དོན་དུ་བཤད་པས་དེ་ལྟར་བྱ། ཡེ་ཤེས་འབེབ་སྔགས་ནི་ཉེ་སྙིང་གི་མཐར། ཨོཾ་བཛྲ་པྲ་བེ་ཤ་ཡ་ཧཱུཾ། ཞེས་བཏགས་པ་ཡིན་ལ། སྤྱི་འགྲོ་ལྟར་ཧཱུཾ་ཧཱཿ ཨ་ཛྷེཿ ཞེས་བཏགས་ཀྱང་ཆོག་ཅེས་ཀུན་མཁྱེན་འཇིགས་མེད་དབང་པོས་གསུངས། བཟླ་ཚུལ་ཐུན་ཐམས་ཅད་ལ་ཆ་བགོ་བའམ། གཙོ་བོའི་སྔགས་གྲངས་རྫོགས་ནས་བཟླ་བ་གང་བྱས་ཀྱང་ཆོག་ལ། གྲངས་ཁྲི་ཕྲག་གཅིག་བཟླ། བསྙེན་གྲངས་གནས་དང་མཚམས་རྒྱུན་གཅིག་ལ་འགྲོ་དགོས་ཤིང་ཁ་སྐོང་གི་སྦྱིན་སྲེག་སླར་ནམ་འགྲིག་ཏུ་བྱའོ། །གཉིས་པ་དཀྱིལ་འཁོར་བསྒྲུབས་ཏེ་མཆོད་ཅིང་དབང་བསྐུར་བ་ནི། བདག་བསྐྱེད་སྔོན་དུ་བཏང༌། དཀྱིལ་འཁོར་འགྲེམ་པའི་གཞི་དེར་མནྜལ་ལ་ཚོམ་བུ་དགོད། མདུན་དུ་སྐད་ཅིག་གིས་སའི་ལྷ་མོ་བརྟན་མ་སྐུ་མདོག་སེར་མོ། གཡས་དཔང་པོར་ཁས་ལེན་པའི་ཕྱག་རྒྱ་དང་གཡོན་བུམ་པ་འཛིན་ཅིང་རྒྱན་སྣ་ཚོགས་ཀྱིས་བརྒྱན་པ་མངོན་སུམ་དུ་བཞུགས་པར་གྱུར། ཨོཾ་པྲྀ་ཐཱི་བི་དེ་བཱི་ཨརྒྷཾ་སོགས་ཀྱིས་མཆོད། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང༌། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱས་ཏེ་དཀྱིལ་འཁོར་བྲི། །ལན་གསུམ། དགྱེས་བཞིན་དུ་གནང་བ་བྱིན་ནས་དེ་ཉིད་དུ་ཐིམ་པར་གྱུར། རས་བྲིས་ལ་བརྟེན་ཚེ་ས་བརྟག་བསླང་སྦྱང་བ་རྣམས་མི་དགོས་ཤིང༌། ལྷ་སྟ་གོན་མ་བྱས་ཀྱང་ཆོག །བུམ་པ་སྟ་གོན་ནི།
གྲུབ་ཆེན་གྱིས་བླ་མ་ཕྱག་ན་རྡོ་རྗེར་བསྐྱེད་པ། ཡི་དམ་ཕྱག་ན་རྡོ་རྗེར་བསྐྱེད་པ་ཞེས་གསུངས་པའི་སྔ་མ་བུམ་བསྐྱེད་ཡིན་པ་གཞུང་དུ་གསལ་ལ། ཕྱི་མ་མདུན་བསྐྱེད་ཡིན་པ་གཏོར་མ་འབུལ་ཚུལ་སོགས་ཀྱིས་ཤེས་ཤིང༌། མངོན་རྟོགས་མུན་སེལ་སྒྲོན་མེར་བདག་མདུན་བུམ་གསུམ་བྱས་ནས་གསུངས་སོ། །བློས་ལྕོགས་ན་བདག་བསྐྱེད་དང་གསུམ་ག་མཉམ་དུ་སྒྲུབ་ཆོག་པར་གསུངས་ཀྱང་བདག་བསྐྱེད་སྔོན་དུ་བཏང་ན་བདེ་བས། འདིེར་བུམ་པ་དང་མདུན་བསྐྱེད་ལྷན་དུ་སྒྲུབ་ཚུལ་ནི། རས་བྲིས་བསངས་སྦྱངས། སྟོང་པའི་ངང་ལས་ཨེ་ལས་ཆོས་འབྱུང་གྲུ་གསུམ། ཞེས་པ་ནས། སྟོང་གསུམ་གཡོ་བ་ལྟ་བུར་གྱུར། དེའི་དབུས་སུ་བྷྲུཾ་ཡིག་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཞེས་པ་ནས། ཟླ་བའི་གདན་རེ་རེ། དེ་ནས་བུམ་པ་བསང་སྦྱངས། སྟོང་པའི་ངང་ལས་རིན་པོ་ཆེ་སྣ་ཚོགས་ལས་གྲུབ་པའི་བུམ་པ་ལྟོ་བ་ལྡིར་བ། ཞབས་ཞུམ་པ། ཁ་གཡེལ་བ། མཆུ་འཕྱང་བ། མགྲིན་པ་ཕྲ་བ་ལ་ལྷ་རྫས་ཀྱི་གོས་ཀྱིས་དཀྲིས་པ། ཕྱི་བུམ་པའི་རྣམ་པ་ལ་ནང་གཞལ་ཡས་ཁང་ཕྱི་ནང་ཀུན་གསལ་བར་གྱུར། ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུཾ་ཕཊ། ལན་གསུམ། ནང་དུ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་འཁྱིལ་བའི་དབུས་སུ་སྣ་ཚོགས་པདྨ་ལ་གནས་པའི་འཁོར་ལོ་རྩིབས་བཅུ་པ། དབུས་སུ་པདྨ་འདབ་བརྒྱད་ཟླ་ཉི་སོ་སོའི་གདན་དང་བཅས་པར་གྱུར། གཞལ་ཡས་ཁང་གཉི་གའི་དབུས་དང་ཕྱོགས་ཀྱི་པད་འདབ་བཞི་རྩིབས་བཅུ་རྣམས་ལ་ཧཱུཾ་ཡིག་དང༌། མཚམས་ཀྱི་འདབ་མ་བཞི་ལ་ཧཱུཾ་ཏྲཱཾ་ཧྲཱིཿ ཏཱཾ། མདུན་བསྐྱེད་ཀྱི་སྒོ་བཞིར་ཛཿ ཧཱུཾ་བཾ་ཧོཿ བཞི་རྣམས་ཡོངས་སུ་གྱུར་
པ་ལས་རྡོ་རྗེ་རྣམ་པར་འཇོམས་པའི་ལྷ་ཚོགས་ཀྱི་སྐུར་བཞེངས་པ་ནི། གཉི་གའི་དབུས་སུ་དཔལ་རྡོ་རྗེ་རྣམ་པར་འཇོམས་པ་སྐུ་མདོག་མཐིང་ནག་ཅེས་པ་ནས། འབར་བའི་ཀློང་ན་བཞུགས་པ། ཤར་དུ་རྡོ་རྗེ་གཏུམ་པོ་ཞེས་སོགས་དང༌། ལྷོར་རྡོ་རྗེ་ཕུར་བུ་ཞེས་སོགས་སྦྱར། གཡོན་བརྐྱངས་ནས་བཞུགས་པ། ཤར་ལྷོར་སངས་རྒྱས་སྤྱན་ཞེས་པ་ནས། ཕྱོགས་ཏེ་བཞུགས་པ། རྩིབས་བཅུ་ལ་ཤར་དུ་རྣམ་པར་རྒྱལ་བ་ཞེས་པ་ནས། བརྐྱང་བསྐུམ་གྱི་ཚུལ་གྱིས་བཞུགས་པའོ། །མདུན་བསྐྱེད་ཀྱི་སོ་སོའི་ཕྱི་རིམ་གྱི་མུ་ཁྱུད་ལ་ཞེས་པ་ནས། སྲུང་མའི་ཚོགས་ཐམས་ཅད་བཞུགས་པ། ཞེས་པའི་བར་བདག་བསྐྱེད་ལྟར་ལ། ཤར་སྒོར་རྡོ་རྗེ་ལྕགས་ཀྱུ་ཞེས་སོགས་བསྒྱུར། ལས་བུམ་གྱི་ནང་དུ་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས་བདུད་རྩི་འཁྱིལ་བ་སྐུ་མདོག་ལྗང་སྔོན་ཁྲོ་འཛུམ་སྒེག་པའི་ཉམས་ཅན། ཞལ་གཅིག་ཕྱག་གཉིས་ཀྱི་གཡས་སྣ་ཚོགས་རྡོ་རྗེ་ཐུགས་ཀར་གཏོད་པའི་ཚུལ་གྱིས་འཛིན་ཅིང༌། གཡོན་སྣ་ཚོགས་རྡོ་རྗེ་ཡུ་བ་བྱས་པའི་དྲིལ་བུ་དཀུར་བརྟེན་པ། སྦྲུལ་དང་རིན་པོ་ཆེའི་རྒྱན་གྱིས་བརྒྱན་ཅིང༌། དར་གྱི་སྟོད་གཡོགས་དང་སྟག་གི་པགས་པའི་ཤམ་ཐབས་ཅན། ཁྲོ་བོའི་ཉམས་ཐམས་ཅད་དང་ལྡན་ཞིང་གཡོན་བརྐྱང་གི་སྟབས་ཀྱིས་བཞུགས་པ། ལྷ་ཐམས་ཅད་ཀྱི་སྤྱི་བོར་ཨོཾ་དཀར་པོ། ཞེས་པ་ནས། རྒྱས་གདབ་ཀྱི་བར་བདག་བསྐྱེད་ལྟར་ལ་རང་སྒྲ་དོར། མཆོད་པ་སྔར་ལྟར་བྱིན་གྱིས་བརླབ། རྒྱལ་བ་རྒྱ་མཚོའི་མཆོད་རྫས་ལས་གྲུབ་པའི། །ཞིང་ཁམས་རྒྱ་མཚོའི་མཆོད་ཡོན་རྒྱ་མཚོའི་
ཚོགས། །ཡོན་ཏན་རྒྱ་མཚོའི་རྒྱལ་བ་འཁོར་བཅས་ལ། །དད་པ་རྒྱ་མཚོས་འབུལ་ལོ་བཞེས་སུ་གསོལ། །ཨོཾ་བཛྲ་བི་དཱ་ར་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཞེས་མཆོད་ཡོན་གྱི་གནས་སུ་ཞབས་བསིལ་སོགས་དང༌། ཨརྒྷཾ་གྱི་གནས་སུ་པཱདྱཾ་སོགས་བཅུག་སྟེ། ཤཔྟའི་བར་གྱིས་མཆོད། ཁ་དོག་དབྱིབས་ལེགས་ཡིད་འོང་རྒྱན་འཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །མོས་བློས་དཀྱིལ་འཁོར་ལྷ་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་བཛྲ་བི་དཱ་ར་ས་པ་རི་ཝཱ་ར་རཱུ་པ་པྲ་ཏཱིཙྪ་སྭཱཧཱ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཡིད་འོང་སྒྲ་སྙན་ཞེས་སོགས་ཀྱིས་འདོད་ཡོན་ལྔ་དབུལ། ཕུན་ཚོགས་ཆོས་ཀྱི་སྲིད་ལ་འདོད་དགུ་རུ། །དབང་སྒྱུར་བྱེད་པའི་རྒྱལ་སྲིད་རིན་ཆེན་བདུན། །མོས་བློས་དཀྱིལ་འཁོར་ལྷ་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་བཛྲ་བི་དཱ་ར་ས་པ་རི་ཝཱ་ར་མཧཱ་སཔྟ་རཏྣ་པྲ་ཏཱིཙྪ་སྭཱཧཱ། མཐོང་ཐོས་དྲན་དང་རེག་པ་ཙམ་གྱིས་ཀྱང༌། །དགེ་ལེགས་དཔལ་སྟེར་བཀྲ་ཤིས་རྟགས་རྫས་བརྒྱད། །མོས་བློས་དཀྱིལ་འཁོར་ལྷ་ལ་བདག་འབུལ་གྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །ཨོཾ་བཛྲ་བི་དཱ་ར་ས་པ་རི་ཝཱ་ར་ཨཥྚ་མངྒ་ལ་པྲ་ཏཱིཙྪ་སྭཱཧཱ། བསྟོད་པ་ནི། དབུས་ཕྱོགས་རྣམ་དག་དྲག་པོའི་དཀྱིལ་འཁོར་དུ། །ཆོས་ཉིད་རྣམ་དག་དབྱིངས་ལས་བཞེངས་པའི་དཔལ། །སྐུ་མདོག་མཐིང་ནག་མཁའ་ལྟར་དག་པའི་འོད། །ཚོགས་གཉིས་མཐར་ཕྱིན་ཉོན་མོངས་སྤོང་ལ་བསྟོད། །ཞལ་གཅིག་ཕྱག་གཉིས་གཡས་པ་རྒྱ་གྲམ་འཛིན། །
གཡོན་པ་སྡིགས་མཛུབ་གདེངས་པས་ལོག་འདྲེན་གཟིར། །ཞལ་གདངས་མཆེ་གཙིགས་ཧཱུཾ་གི་འབྲུག་སྒྲ་འབྱིན། །སྤྱན་གསུམ་སྡང་མིག་ཕྱོགས་བཅུར་བགྲད་ལ་བསྟོད། །དབུ་སྐྲ་གྱེན་བསྒྲེང་མི་བསྐྱོད་དབུ་ལ་བརྒྱན། །བརྐྱང་བསྐུམ་གར་གྱིས་དགྲ་བགེགས་གདུག་པ་བརྫིས། །དུས་མཐའི་མེ་ལྟར་འབར་བའི་ཀློང་དཀྱིལ་ནས། །ཉོན་མོངས་རྟོག་པའི་གྲོང་ཁྱེར་འཇོམས་ལ་བསྟོད། །ཡེ་ཤེས་ལྔ་ལྡན་དཀྱིལ་འཁོར་ཀུན་གྱི་གཙོ། །རིགས་ཀྱི་མངའ་བདག་ཁྲོ་རྒྱལ་ཀུན་གྱི་རྗེ། །སྟོབས་བཅུའི་སྟོབས་ལྡན་ཕ་རོལ་ཕྱིན་བཅུའི་བདག །རྡོ་རྗེ་རྒྱན་གྱིས་སྤྲས་ལ་ཕྱག་འཚལ་བསྟོད། །ཕྱོགས་བཞིའི་ཆུ་སྐྱེས་ཉི་མའི་གདན་སྟེང་དུ། །ཧཱུཾ་ལས་སྐྱེས་པའི་ཕྱོགས་ཀྱི་ཁྲོ་རྒྱལ་བཞི། །རིགས་ཀྱི་ཁྲོ་བོ་རྔམ་པའི་ངང་ཚུལ་ཅན། །ལས་བཞིའི་ལས་མཛད་ཁྲོ་རྒྱལ་བཞི་ལ་བསྟོད། །མཚམས་བཞིའི་ཆུ་སྐྱེས་རི་བོང་དཀྱིལ་འཁོར་སྟེང༌། །རིགས་ཀྱི་མདོག་ཅན་རྒྱལ་བའི་ཡུམ་ཆེན་བཞི། །སྣ་ཚོགས་དར་དང་རིན་ཆེན་རྒྱན་གྱིས་ཀླུབས། །མཛེས་པའི་ཚུལ་འཆང་རིགས་ཀྱི་ཡུམ་ལ་བསྟོད། །འཁོར་ལོའི་རྩིབས་བཅུར་རཾ་ཡིག་ལས་བྱུང་སྟེང༌། །ཕ་རོལ་ཕྱིན་བཅུའི་མངའ་བདག་ཁྲོ་རྒྱལ་བཅུ། །སྐུ་མདོག་ངེས་མེད་མཚོན་ཆ་སྣ་ཚོགས་ཀྱིས། །ཕྱོགས་བཅུ་འདུལ་མཛད་ཁྲོ་རྒྱལ་བཅུ་ལ་བསྟོད། །ཕྱོགས་བཞི་མཚམས་བཞིར་པདྨའི་གདན་གྱི་སྟེང༌། །སྐུ་མདོག་སྣ་ཚོགས་མཛེས་ཚུལ་གར་སྟབས་ཀྱིས། །འདོད་ཡོན་མཆོད་པའི་སྤྲིན་ཕུང་རྒྱལ་བ་མཆོད། །བཀྲ་ཤིས་ལྷ་མོ་བརྒྱད་ལ་ཕྱག་འཚལ་ལོ། །རང་རྟགས་ཆས་འཛིན་ལས་ཀྱི་ཕོ་ཉ་དང༌། །འཕྲིན་ལས་བཞི་ལྡན་ཡེ་ཤེས་སྒོ་མ་བཞི། །རྒྱལ་ཆེན་བཞི་དང་ཕྱོགས་
སྐྱོང་བཅུ་ལ་སོགས། །དྲག་པོའི་ལས་མཛད་སྲུང་མའི་ཚོགས་ལ་བསྟོད། །རང་གི་ཐུགས་ཀ་ནས་འོད་ཟེར་འཕྲོས། བུམ་ནང་གི་ལྷ་དང་མདུན་བསྐྱེད་ཀྱི་ལྷའི་ཐུགས་རྒྱུད་བསྐུལ་ཏེ་འོད་ཟེར་སྤྲོ་བསྡུས་དོན་གཉིས་བྱས། རྒྱལ་བ་སྲས་བཅས་ཀྱི་བྱིན་རླབས་བསྡུས་ཏེ་བསྟིམ་པས། བུམ་ནང་གི་ལྷའི་ཐུགས་ཀའི་སྔགས་འཕྲེང་ལས་ཀྱང་བདུད་རྩིའི་རྒྱུན་བབ་པས་བུམ་པ་གང་བར་བསམས་ལ་གཟུངས་ཐག་གཟུང་སྟེ་སྔགས་གསུམ་བཟླ། གཟུངས་རྡོར་ལས་བུམ་གྱི་ཁར་བཞག་ལ་ཨ་མྲྀ་ཏ་བཟླ། ཉེ་སྙིང་བརྗོད་དེ་དུང་ཆོས་ཀྱི་ཆུ་བུམ་པ་གཉིས་སུ་བླུག་པས་ལྷ་རྣམས་ཟག་པ་མེད་པའི་བདེ་བའི་རང་བཞིན་དུ་ཞུ་སྟེ་བུམ་པའི་ཆུ་དང་རོ་གཅིག་ཏུ་གྱུར་པར་བསམས། གཏོར་མ་བསང་སྦྱངས། སྟོང་པའི་ངང་ལས་རིན་པོ་ཆེའི་སྣོང་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿ ཧཱུཾ་ཞུ་བ་ལས་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། རྒྱལ་བ་སྲས་བཅས་ཀྱི་ཐུགས་ཀ་ནས་ཀྱང་ཡེ་ཤེས་ཀྱི་བདུད་རྩི་སྤྱན་དྲངས། དམ་ཚིག་གི་བདུད་རྩི་དང་ཡེ་ཤེས་ཀྱི་བདུད་རྩི་གཉིས་སུ་མེད་པར་གཅིག་ཏུ་འདྲེས་པས་ཁ་དོག་དྲི་རོ་རེག་བྱ་ཕུན་སུམ་ཚོགས་པ་རོ་བརྒྱ་དང་ལྡན་པ་གཅིག་ཏུ་བསམས་ལ། སམྦྷ་ར་ལན་གསུམ་གྱིས་བྱིན་གྱིས་བརླབ། མདུན་བསྐྱེད་ཀྱི་ལྷ་རྣམས་ཀྱི་ལྗགས་འོད་ཟེར་གྱི་སྦུ་གུས་དྲངས་ཏེ་གསོལ་བར་གྱུར། ཨོཾ་བཛྲ་བི་དཱ་ར་ས་པ་རི་ཝཱ་ར་ཨ་ཀཱ་རོ་ཞེས་སོགས་ལན་གསུམ་གྱིས་དབུལ། མཆོད་བསྟོད་མདོར་བསྡུས་བྱ། བསྙེན་པའི་སྐབས་ལྟ་བུར་བདག་བསྐྱེད་ཀྱི་མཇུག་ཏུ་གཏོར་མ་འབུལ་ཚེ་བྱིན་རླབས་ཀྱི་རྗེས་ལ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། རྡོ་རྗེ་རྣམ་པར་འཇོམས་པའི་ལྷ་ཚོགས་སྤྱན་
དྲངས། ལྗགས་འོད་ཟེར་གྱི་སྦུ་གུས་དྲངས་ཏེ། ཞེས་སོགས་སྦྱར་དགོས། སྟ་གོན་གྱི་ཉིན་བུམ་པ་ཙམ་སྒྲུབ་ཚེ། གདན་དང་བཅས་པར་གྱུར་པའི་དབུས་དང་ཕྱོགས་ཀྱི་འདབ་མ་བཞི་རྩིབས་བཅུ་རྣམས་ལ་ཧཱུཾ་ཡིག་དང༌། མཚམས་ཀྱི་འདབ་མ་བཞི་ལ་ཧཱུཾ་ཏྲཱཾ་ཧཱིཿ ཏཱཾ་རྣམས་ཡོངས་སུ་གྱུར་པ་ལས་རྡོ་རྗེ་རྣམ་པར་འཇོམས་པའི་ལྷ་ཚོགས་ཀྱི་སྐུར་བཞེངས་པ་ནི། དབུས་སུ་དཔལ་རྡོ་རྗེ་རྣམ་པར་འཇོམས་པ་ཞེས་སྦྱོར་ཞིང༌། བརྐྱང་བསྐུམ་གྱི་ཚུལ་གྱིས་བཞུགས་པའོ། །ཞེས་པའི་འཕྲོར་ལས་བུམ་བསྒྲུབ་ཅིང་མདུན་བསྐྱེད་ཅེས་པ་བཞག་པའི་ལྷག་མ་ཐམས་ཅད་འདྲ་སྟེ། གྲུབ་ཆེན་གྱིས་རྣམ་རྒྱལ་དུ་ལྷ་བཅུ་དགུ་ལས་མ་གསུངས་སོ།། ༈ དེ་ནས་སློབ་མ་སྟ་གོན་ནི། སློབ་མ་རྣམས་ཁྲུས་བྱས། མཎྜལ་ཕུལ་ནས་མདུན་དུ་འཁོད་པ་ལ། དེའང་འདི་ཉིད་ཀྱི་གཟུངས་མདོ་ལས། དེ་ནས་རབ་བཀྲུས་གཙང་མ་ཡིས། །མདོ་སྡེ་དམ་པ་མཉན་པར་གྱིས། །གང་དག་ཡིད་དགེ་སེམས་དྭངས་ཤིང༌། །གཙང་མའི་གོས་ཀྱིས་རབ་བརྒྱན་ཏེ། །ཞེས་པས་སློབ་མ་སྟ་གོན་གྱི་རིམ་པ་དང༌། ནོར་བུ་ཡུངས་ཀར་དུརྦ་དང༌། །ཞེས་པ་མན་ཆད་ཀྱིས་བུམ་ཆོག་བསྟན་པར་སློབ་དཔོན་ཞི་འཚོའི་འགྲེལ་པར་གསུངས་ལ། བུམ་ཆོག་བསྟན་པའི་ཤུགས་ཀྱིས་དཀྱིལ་འཁོར་གྱི་ཆོ་ག་འགྲུབ་པར་ཡེ་ཤེས་རྡོ་རྗེའི་འགྲེལ་པར་གསུངས། སྔ་མས་སྟ་གོན་གྱི་རིམ་པ་བསྟན་ཚུལ་ནི། རབ་བཀྲུས་གཙང་མ་ཞེས་པ་སློབ་དཔོན་བདེ་བའི་མྱུ་གུའི་རྣམ་འཇོམས་ཀྱི་འགྲེལ་པ་ལས། ཕྱིའི་ཁྲུས་ཀྱིས་ཉོན་མོངས་སྦྱངས་ཏེ་ཉན་ཐོས་ཀྱི་བྱང་ཆུབ་འགྲུབ་པ། ནང་གི་ཁྲུས་ཀྱིས་ལྷའི་རྣལ་འབྱོར་གྱིས་རང་རྒྱལ་གྱི་བྱང་ཆུབ་འགྲུབ་པ།
གསང་བའི་ཁྲུས་ཀྱིས་སེམས་ཙམ་དུ་རྟོགས་པ། དེ་ཁོ་ན་ཉིད་ཀྱི་ཁྲུས་ཀྱིས་སྤྲོས་བྲལ་རྟོགས་པར་བཤད་པ་ལྟ་བུ་དོན་ལ་གནས་མི་གནས་ཀྱི་བཤད་ཚུལ་མང་པོ་ཡོད་ཀྱང༌། རྒྱུད་རྡོ་རྗེ་རྩེ་མོ་ལས་ཁྲུས་བཞི་དང་གོས་གསུམ་གསུངས་པའི་དོན་ཚང་དགོས་པས། མདོར་བསྡུ་ན་ཀུན་སློང་རྣམ་པར་དག་པ། དམ་ཚིག་དང་སྡོམ་པ་གཟུང་བ། ལྷའི་རྣལ་འབྱོར་ལ་བརྩོན་པ་སྟེ་སྣོད་རུང་དུ་བྱེད་པའི་རིམ་པ་བསྟན་པ་ཡིན། དང་པོ་ཀུན་སློང་འཆོས་ཚུལ་ནི་གསང་བ་སྤྱི་རྒྱུད་ལས། ལ་ལ་གསང་སྔགས་སྒྲུབ་དོན་གཉེར། །འདི་ན་དཀྱིལ་འཁོར་འཇུག་པར་བྱེད། །བསོད་ནམས་འདོད་པས་དེ་ལས་གཞན། །གཞན་དག་འཇིག་རྟེན་གཞན་དོན་གཉེར། །འཇིག་རྟེན་ཕ་རོལ་དོན་གཉེར་བའི། །དད་པ་མང་དུ་བྱེད་པ་ཡི། །བློ་ལྡན་དཀྱིལ་འཁོར་འཇུག་བྱ་ཡིས། །ཚེ་འདིའི་འབྲས་བུ་འདོད་མི་བྱ། །ཚེ་འདི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མི་འགྱུར། །འཇིག་རྟེན་ཕ་རོལ་དོན་གཉེར་སྐྱེས། །འཇིག་རྟེན་འདི་ཡི་འབྲས་བུའང་རྒྱས། །ཞེས་གསུངས་པ་ལྟར། ཀུན་སློང་དམན་པ་འདི་དང་ཕྱི་མའི་མངོན་མཐོ་ཙམ་དོན་དུ་གཉེར་བ་ལྟ་བུ་མ་ཡིན་པར། མཁའ་མཉམ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་ཆོས་ཟབ་མོ་འདི་ཉིད་གསན་སྙམ་པ་བྱེད་དགོས། གསན་བྱའི་ཆོས་ནི་རྒྱལ་བས་ཆོས་ཕུང་ཇི་སྙེད་ཅིག་བཀའ་སྩལ་པ་རྣམས་ཀྱི་མཆོག་གསང་སྔགས་རྡོ་རྗེ་ཐེག་པ་ལ་རྒྱུད་སྡེ་བཞིར་ཡོད་པ་ལས་བྱ་བའི་རྒྱུད། དེ་ལ་དེ་བཞིན་
གཤེགས་པའི་རིགས། པདྨའི་རིགས། རྡོ་རྗེའི་རིགས་ཏེ་འཇིག་རྟེན་ལས་འདས་པའི་རིགས་གསུམ། འཇིག་རྟེན་པའི་རིགས་གསུམ་སྟེ་དྲུག་ཡོད་པའི་རྡོ་རྗེའི་རིགས། དེ་ལའང་སྡེ་ཚན་འགའ་ཡོད་པས། ཁ་ཅིག་རྡོ་རྗེའི་རིགས་ཀྱི་ཁྲོ་བོར་འདོད་ཀྱང༌། རང་ལུགས་རྡོ་རྗེའི་རིགས་ཀྱི་བདག་པོར་འཇོག་པ་ཡིན། གསུང་བའི་གནས་ཀྱང་གཟུངས་ཀྱི་འགོར། རྡོ་རྗེ་ལ་བཞུགས་ཏེ་ཞེས་པ་ལ་བརྟེན་ནས་རྡོ་རྗེ་གདན་དུ་གསུང་བར་འདོད་མཁན་མང་ཡང༌། སློབ་དཔོན་སངས་རྒྱས་གསང་བས་རྡོ་རྗེ་གདན་ནི་འཚང་རྒྱ་བའི་གནས་ཡིན་གྱི། ཆོས་གསུང་བའི་གནས་མ་ཡིན་པར་བསམ་གྱིས་མི་ཁྱབ་པའི་མདོ་ལས་གསུངས་པ་དྲངས་ཏེ་བཀག་ནས། གཟུངས་འདི་རི་རབ་ཀྱི་ཤར་ལྷོ་རྡོ་རྗེ་ལྷུན་པོ་རི་རབ་ཀྱི་ཟོམ་ཞེས་བྱ་བར་གསུངས་པ་ཡིན། དེར་མ་ཟད། རྒྱུད་དོ་ཅོག་གི་རྩ་བ་སྟེ། །ཞེས་པས་རྡོ་རྗེ་ལྷུན་པོ་རི་རབ་ཀྱི་ཟོམ་གྱི་རྒྱུད་དེ་ལ་ལེའུ་བརྒྱ་དང་བརྒྱད་ཡོད་པས། ལེའུ་དང་པོ་མདོར་བསྟན་ལྟ་བུ་འདི་ཡིན་པས་འོག་མ་ཐམས་ཅད་ཀྱི་རྩ་བར་བསྟན་པ་ཡིན། འདི་ལ་འཕགས་ཡུལ་གྱི་འགྲེལ་པ་བདུན་བརྒྱད་ཙམ་དང༌། གཟུངས་ཀྱི་ཚིག་རེ་རེ་ལ་བརྟེན་པའི་ལས་སྦྱོར་རེ་རེ་བྱས་པས། ལས་སྦྱོར་བརྒྱ་རྩ་སོགས་བཤད་སྒྲུབ་གཉི་གའི་སྒོ་ནས་དར་རྒྱས་ཆེ་བ་བྱུང༌། སྤྲོ་ན་གོང་གི་ལོ་རྒྱུས་ཀྱང་འདིར་སྦྱོར། ཁྱད་པར་དུ་ལྷོ་བྲག་གྲུབ་ཆེན་ལས་ཀྱི་རྡོ་རྗེ་ཞེས་པ་དཔལ་གསང་བའི་བདག་པོ་མིའི་གཟུགས་སུ་ཤར་པ་ཡིན་པས་ཡི་དམ་ལྷ་དང་ངོ་བོ་དབྱེར་མ་མཆིས་ཤིང༌། ཐུན་མོང་སྣང་ཚོད་ལའང་ཡི་དམ་ལྷས་ཞལ་དངོས་སུ་བསྟན་ཏེ་ཟབ་ཅིང་རྒྱ་ཆེ་བའི་སྙན་བརྒྱུད་ཀྱི་གདམས་པ་མཐའ་ཡས་
པ་སྩོལ་བར་མཛད་པའི་ནང་ཚན་རྡོ་རྗེ་རྣམ་འཇོམས་མཐིང་གའི་དབང་གསན་པར་བྱེད་པ་ལ། ཆོས་ཉན་པའི་ཀུན་སློང་ཀུན་སྤྱོད་སྤྱི་བྱེ་བྲག་ཐམས་ཅད་གསལ་བཏབ་སྟེ་གསན་པར་ཞུ། ཞེས་བརྡ་སྤྲད། དེ་ནས་ཆུ་དང་ཡུངས་ཀར། འབྲས་ཆང༌། ཆང་བུ་ལག་པ་གཉིས་ཀྱིས་བཟུང་སྟེ་གཡས་དང་གཡོན་དུ་བསྐོར་ཞིང༌། ཨོཾ་སརྦྦ་པཱ་པཾ་ད་ཧ་ན་བཛྲཱ་ཡ་སྭཱཧཱ། ཞེས་བརྗོད་ཅིང་བྱུར་ཐམས་ཅད་བསལ་བར་བསམ། དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བརྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་ཏུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་བགྱི། །ཞེས་པ་ལན་གསུམ་གྱིས་གསོལ་བ་གདབ། སེམས་བསྐྱེད་པའི་ཆོ་ག་ཡན་ལག་བདུན་པ་བྱ་བ་ལ། མདུན་དུ་ཚོགས་ཞིང་ནམ་མཁའ་གང་བ་བཞུགས་པའི་མོས་པ་བྱས་ཏེ། དེའི་དྲུང་དུ་སྔོན་འགྲོ་སྡིག་པ་བཤགས་ཤིང་སྐྱབས་སུ་འགྲོ་བ། དངོས་གཞི་བདག་འབུལ་བ་དང་སེམས་བསྐྱེད་པའི་སྒོ་ནས་བྱང་ཆུབ་སེམས་དཔའི་སྡོམ་པ་གཟུང་བ། རྗེས་ཀྱི་ཡན་ལག་བསྐུལ་གསོལ་བསྔོ་བ་རྣམས་ཚུལ་བཞིན་དུ་བྱེད་སྙམ་པས་འདིའི་རྗེས་ཟློས་གྱིས་བྱས་ལ། འཁོར་བ་ཐོག་མ་མེད་པ་ནས། །སྔོན་ཆད་སྡིག་པ་ཅི་བགྱིས་པ། །སངས་རྒྱས་བྱང་སེམས་སྤྱན་སྔར་ནི། །དུས་རྣམས་ཀུན་ཏུ་བཤགས་པར་བགྱི། །སྡུག་བསྔལ་རྒྱ་མཚོར་བྱིང་བ་ཡི། །སེམས་ཅན་རྣམས་ལ་བརྩེ་བའི་ཕྱིར། །སངས་རྒྱས་ཆོས་དང་
ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །སངས་རྒྱས་ཀུན་དང་དེ་ཡི་སྲས། །ཤེས་རབ་ཅན་ལ་བདག་འབུལ་གྱི། །ཁྱེད་རྣམས་ཀྱིས་ནི་བདག་བཞེས་ལ། །འབྲས་བུ་རྒྱ་ཆེན་སྩལ་ཏུ་གསོལ། །སྡུག་བསྔལ་ཆུ་བོའི་ནང་གནས་པའི། །སྐྱེ་བོ་ཡུན་གནས་བསྐྱངས་པ་དང༌། །རྒྱལ་བའི་བཞེད་པ་སྒྲུབ་པའི་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་སྙིང་པོར་ཉེར་གནས་ཏེ། །གང་རྣམས་བྱང་ཆུབ་མཆོག་རྟོགས་པའི། །བདག་གིས་གསོལ་བས་རྒྱལ་བ་ཀུན། །ཆོས་ཀྱི་འཁོར་ལོ་བསྐོར་དུ་གསོལ། །བྱ་བ་ཐམས་ཅད་སྔོན་བྱས་ནས། །སངས་རྒྱས་མྱ་ངན་འདའ་རྣམས་ལ། །བདག་གིས་གསོལ་བས་རྒྱལ་བ་ཀུན། །སངས་རྒྱས་མྱ་ངན་མི་འདར་གསོལ། །ཕྱག་འཚལ་མཆོད་སོགས་བསོད་ནམས་གང༌། །ཚད་མེད་བདག་གིས་བསགས་པ་རྣམས། །ཇི་ལྟར་མགོན་པོས་མཁྱེན་པ་བཞིན། །བྱང་ཆུབ་ཏུ་ནི་དེ་བཞིན་བསྔོ། །ཞེས་ལན་གསུམ་གྱིས་བྱང་སྡོམ་འབོག །དེས་བྱང་སྡོམ་ཐོབ་པ་ཡིན་པས་བྱང་སྡོམ་གྱི་བསླབ་བྱ་མཐའ་དག་ལ་སློབ་དགོས་ཤིང༌། འདི་ལ་སྔགས་སྡོམ་ལེན་རྒྱུ་མེད་ནའང་སྔགས་ཀྱི་དམ་ཚིག་བསྲུང་དགོས་པ་མང་དུ་ཡོད་པས་འདི་དག་ཀྱང་གསན་པར་ཞུ། དེ་རིང་ཕྱིན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང༌། །རིགས་ལྔའི་ཚོགས་རྣམས་མ་ལུས་པར། །དད་པ་རབ་ཏུ་བསྟེན་པར་བྱོས། །ཁྱད་པར་ཐེག་པ་ཆེན་པོ་ལ། །རྟག་པར་རབ་ཏུ་མོས་པར་བྱ། །དམ་ཚིག་ཅན་དང་མཛའ་བོ་དང༌། །བླ་མ་ལ་ནི་གུས་པར་བྱ། །ལྷ་རྣམས་ཀུན་ལ་སྡང་མི་བྱ། །དུས་མཚམས་རྟག་ཏུ་མཆོད་པར་
བྱ། །སྟོན་པ་གཞན་གྱི་གཞུང་མི་མཆོད། །རྟག་ཏུ་གློ་བུར་མགྲོན་མཆོད་བྱ། །སྲོག་ཆགས་རྣམས་ལ་བྱམས་པ་ཡིས། །རབ་ཏུ་བརྟན་པས་ཉེ་བར་བཞག །ཐེག་པ་ཆེ་ལ་དགའ་རྣམས་ཀྱིས། །བསོད་ནམས་དག་ལ་ནན་ཏན་སྐྱེད། །བཟླས་བརྗོད་བྱེད་ལ་འབད་པ་ཡིས། །གསང་སྔགས་སྤྱོད་ལ་བརྩོན་པར་བྱ། །གསང་སྔགས་རྒྱུད་ལ་བརྟེན་པ་ཡི། །དམ་ཚིག་རྣམས་ནི་བསྲུང་བར་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་སྦྱིན་མི་བྱ། །གསང་སྔགས་རྒྱུད་ནས་ལེགས་གསུངས་པ། །དེ་ཡང་བདག་གིས་རྟོགས་པར་བྱ། །ཞེས་པའི་བར་བརྗོད། སྡོམ་པ་འབོག་པའི་སྐོར་འདི་རྣམས་ནི། གང་དག་ཡིད་དགེ་སེམས་དང་ཞིང༌། །ཞེས་དགེ་བའི་བསམ་པ་ཁྱད་པར་ཅན་བསྐྱེད་པ་དང༌། ཡུལ་ཁྱད་པར་ཅན་ལ་སེམས་དང་བར་བྱེད་ཚུལ་ནི། ཟབ་མོ་སངས་རྒྱས་སྤྱོད་ཡུལ་བ། །ཞེས་ཟབ་ཅིང་གསང་བར་བསྟན་པས་སྣོད་དུ་རུང་མི་རུང་དང་བར་ཆད་ཡོད་མེད་སོགས་ཞིབ་ཏུ་བརྟག་དགོས་པར་བསྟན་པ་དེ་རྟོག་ཚུལ་སོ་ཤིང་དང་རྨི་ལམ་གྱི་སྒོ་ནས་བརྟག །ཁྱོར་ཆུ་དང་དཔུང་སྐུད་ཀྱིས་དྲི་མ་བཀྲུ་ཞིང་སྲུང་བར་བྱེད་པ་ཡིན་པས་འདི་རྣམས་ཚིག་རྐང་དེས་བསྟན་པ་ཡིན། སོ་ཤིང་གི་རྩེ་གྱེན་ནམ་བླ་མ་ལ་བསྟན་ན་མཆོག་དང༌། ཤར་ལྷོ་ནུབ་བྱང་ཞི་རྒྱས་དབང་དྲག་དང༌། མཚམས་སུ་འཇིག་རྟེན་པ་དང༌། ཐུར་དུ་བལྟས་ན་འོག་གི་དངོས་གྲུབ་ཐོབ་པར་བརྡ་སྦྱར་ཏེ། སོ་ཤིང་སོར་བཅུ་གཉིས་པ་རྩེ་མོར་མེ་ཏོག་བཅིངས་པ། ཨོཾ་བཛྲ་ཡཀྵས་བསངས་ནས་ལག་པར་གཏད་དེ་འདོར་དུ་གཞུག །ལས་བུམ་གྱི་ཆུ་སྦྱིན་ཞིང༌། ཨོཾ་ཧྲཱིཿ བི་ཤུདྡྷ་དྷརྨཱ་སརྦྦ་བ་པི་ནི་ཙ་ཨ་སྱ་ཤོ་དྷྱ་
སརྦྦ་བི་ཀལྤཱ་ན་ཨ་བ་ན་ཡ་ཧཱུཾ། ཞེས་བརྗོད། ཧུབ་གསུམ་བཏུང་བས་ལུས་ངག་ཡིད་གསུམ་གྱི་སྡིག་སྒྲིབ་དག་པར་བསམ། ལྷག་མ་ཅུང་ཟད་རྒྱབ་ཏུ་དོར། སྲད་བུ་དམར་པོ་སུམ་སྒྲིལ་ལ་མདུད་པ་གསུམ་བྱས་པ་ལ་ཡང་སྙིང་བཟླས་པ་དཔུང་པ་གཡོན་ལ་བཅིངས་ཏེ། ཨོཾ་ལོ་ཙཱ་ན་ཡ་ཐ་ཏ་ཏྲཾ་སཾ་པྲ་ཌི་མི་བ་ཤུ་ཏི་ཏ་རཏྣ་ཏྲཱ་ཡ་སད་ཏི་ན་བིར་དར་ཤ་ཡ་སྭཱཧཱ། བྱང་ཆུབ་སྙིང་པོ་མ་ཐོབ་ཀྱི་བར་དུ་གནོད་བྱེད་སྲུངས་ཤིག །ཅེས་བརྗོད། ཀུ་ཤ་བཛྲ་ཡཀྵས་བསངས་ཏེ། ཆུང་བ་དྷཱིཿ ཞེས་གཡས་དང༌། ཆེ་བ་ཧ་ཞེས་གཡོན་དུ་གཏད། ཆུང་བ་སྔས་དང་ཆེ་བ་སྟན་དུ་བྱས་ཏེ་རྨི་ལམ་བརྟག་དགོས་པར་བརྡ་སྤྲད། གཏང་རག་གི་མཎྜལ་འབུལ་དུ་གཞུག །འདིར་འགའ་ཞིག་ཏུ་སྦྱིན་སྲེག་གི་སྟ་གོན་ཞིག་ཀྱང་བཤད། གྲུབ་ཆེན་གྱིས་གཏོར་མ་ལྷག་གནས་བྱ་བར་གསུངས་པས། སང་དབང་བསྐུར་བྱེད་པ་ལ་བར་ཆད་མི་འབྱུང་བའི་ཕྱིར་ཡི་དམ་ཆོས་སྲུང་ལ་གཏོར་འབུལ་དང་ཆ་བཞི་སོགས་བསྔོ། སྟ་གོན་ཡོངས་གྲགས་ཀྱི་ཁྱད་པར་མ་ཚང་བ་རྣམས་ཁ་བསྐང་དགོས་པའི་ངེས་པ་མེད་དོ། །དངོས་གཞིའི་ཉིན་བདག་བསྐྱེད་སྔོན་དུ་བཏང༌། །བུམ་པ་དང་མདུན་བསྐྱེད་ལྷན་དུ་བསྒྲུབ། བུམ་ལྷ་བཞུས་ནས་མདུན་བསྐྱེད་ལ་གཏོར་མ་དབུལ། ཤུགས་འཇུག་མི་དགོས། འོག་ཏུ་དབང་བསྐུར་ཚུལ་བཤད་པ་འདོར་ལེན་ཅུང་ཟད་དང༌། སློབ་མ་ཞེས་པ་རྣམས་སུ་བདག་སྒྲ་སྦྱོར་བ་མ་གཏོགས་ཇི་ལྟ་བ་བཞིན་དུ་བདག་འཇུག་བླངས། བདེན་པ་གང་གིས་ཡེ་ཤེས་མཆོག །ཤེས་རབ་ཐབས་བདག་དཀྱིལ་འཁོར་གྱི། །བདེན་པ་དེ་ཡིས་མགོན་པོ་ཁྱོད། །འདོད་པ་དག་ལ་ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་
དག་འབྱུང༌། །དེ་ཉིད་དེ་བཞིན་ཉིད་ངེས་འབྱུང༌། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་སྒྲིབ་མེད་མཐོང་བར་ཤོག །ཅེས་བདེན་སྟོབས་བརྗོད། སློབ་མ་ཁྲུས་བྱས་མདུན་དུ་འཁོད་ནས་མནྜལ་ཕུལ། རྨི་ལམ་དྲིས་ནས་བར་ཆད་ཟློག་པའི་ཕྱིར་ལས་སྔགས་ཀྱིས་བསངས། ཀུན་སློང་བཅོས་ཏེ། དགའ་ཆེན་ཁྱོད་བདག་ཅེས་སོགས་ཀྱིས་གསོལ་བ་ལན་གསུམ་བྱ། ལས་བུམ་གྱི་ཆུ་བྱིན་ཏེ། འདི་ནི་ཁྱོད་ཀྱི་དམྱལ་བའི་རྒྱུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཅི་སྟེ་དམ་ཚིག་འདས་ན་ནི། །དེ་མ་ཐག་ཏུ་དྲལ་ནས་གཤེགས། །རྡོ་རྗེ་འཛིན་རྒྱལ་ཁྲོས་ནས་ཀྱང༌། །བདུན་བརྒྱུད་རིགས་རྣམས་རླག་པར་བྱེད། །དེ་བས་རྟག་ཏུ་བུ་ཁྱོད་ཀྱིས། །རྒྱལ་བས་གསུངས་པའི་དམ་ཚིག་དང༌། །སྡོམ་པ་དང་ནི་བླ་མའི་བཀའ། །ཤིན་ཏུ་མོས་པས་བསྲུང་བར་བྱ། །ཁྱོད་ཀྱིས་སྲོག་ཆགས་བསད་མི་བྱ། །མ་བྱིན་པར་ཡང་བླང་མི་བྱ། །རྫུན་དང་འདོད་པ་སྤྱོད་པ་རྣམས། །དངོས་གྲུབ་འདོད་པས་བྱ་བ་མིན། །ཆང་ནི་བཏུང་བར་མི་བྱ་ཞིང༌། །ཤ་ལ་སོགས་པ་བཟའ་མི་བྱ། །སེམས་ཅན་གནོད་པའི་སྦྱོར་བ་ནི། །ནམ་ཡང་བྱ་བ་མ་ཡིན་ནོ། །དཀོན་མཆོག་གསུམ་ནི་ཡོངས་མི་སྤང༌། །དུས་ཀུན་ཏུ་ནི་བྱང་ཆུབ་སེམས། །སྙིང་པོ་སྔགས་དང་ཕྱག་རྒྱ་དང༌། །ལྷ་དང་བླ་མ་དེ་བཞིན་ནོ། །སྡིག་པའི་ལས་རྣམས་གང་ཡིན་དང༌། །བླ་མའི་བཀའ་ལས་འདའ་མི་བྱ། །ལྷ་ལ་ཕུལ་བའི་རྙིང་པ་དང༌། །དེ་ཡི་གྲིབ་མའང་འགོམ་
མི་བྱ། །ཕྱག་རྒྱའི་གཟུགས་ལའང་དེ་བཞིན་ནོ། །སྔགས་དང་ལྷ་ལ་སྨོད་མི་བྱ། །གདོན་གྱི་ལས་སོགས་བྱ་བ་མིན། །མུ་སྟེགས་ཅན་ལ་སྨད་མི་བྱ། །མདོར་ན་ཐེ་ཚོམ་ཡིད་གཉིས་སྤངས། །བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་དམ་ཚིག་བསྒྲགས་ནས་དབང་བསྐུར་བ་ལ། དཀྱིལ་འཁོར་དུ་གཞུག་པའི་རིམ་པ་དང༌། ཞུགས་པ་ལ་དབང་དངོས་གཞི་བསྐུར་བ་གཉིས་ལས། དང་པོ་ལའང་བྱིན་གྱིས་བརླབས་པ་ནས་བཀྲུ་བྱབས་སྲུང་བའི་བར་མང་དུ་ཡོད་པས་སོ་སོར་སྤྱན་དམིགས་མ་ཡེངས་པ་མཛོད་ཅེས་བརྡ་སྤྲད་ལ། སློབ་མའི་སྤྱི་བོར་ཨོཾ་ལས་འཁོར་ལོ་ཨོཾ་གྱིས་མཚན་པ། མགྲིན་པར་ཨཱཿ ལས་པདྨ་ཨཱཿ ས་མཚན་པ། ཐུགས་ཀར་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ལྟེ་བ་དང་གསང་གནས་སུའང་ཧཱུཾ་རེ་རེས་མཚན་པར་གྱུར། མ་ཏིསྠི་རཱ་ཡ་སྭཱཧཱ། ཞེས་ལུས་ངག་ཡིད་གསུམ་བྱིན་གྱིས་བརླབ། དེ་ནས་མིག་དར་བཅིང༌། བླ་མ་རྡོ་རྗེ་འཛིན་པ་ཀྱཻ། །གཙོ་འཁོར་བཅས་པ་དགོངས་སུ་གསོལ། །མི་ཤེས་མུན་པས་བསྒྲིབས་པ་ལ། །དཀྱིལ་འཁོར་དམ་པ་བསྟན་དུ་གསོལ། །ཞེས་ལན་གསུམ་གྱིས་གསོལ་བ་བཏབ། ལམ་ཆེན་འདི་ནི་བསྟན་པར་བྱ། །ཁྱོད་ཀྱིས་ལམ་འདི་བསྒྲུབ་པར་བགྱི། །ལམ་མཆོག་སྒྲུབ་པར་རབ་ཏུ་དཀའ། །ཉེས་པ་དག་གིས་མ་གོས་པར། །འབྲས་བུ་མྱུར་དུ་འབྱིན་པར་ངེས། །དམ་ཚིག་འདས་ན་དམྱལ་བར་ལྟུང༌། །ན་མོ་རཏྣ་ཏྲ་ཡཱ་ཡ། ན་མཤྩནྜ་བཛྲ་པཱ་ཎཱ་ཡེ། ན་ར་ཀན་ཧཱུཾ། ཞེས་མནའ་ཆུ་བླུད། སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཡི་གེ་ཧཱུཾ་གི་རྣམ་པར་སློབ་མའི་ལུས་
ངག་ཡིད་གསུམ་ལ་ཐིམ་པར་གྱུར་པར་བསམ་ཞིང༌། ཨོཾ་བཛྲ་པྲ་བེ་ཤ་ཡ་ཧཱུཾ། ཞེས་རོལ་མོའི་སྒྲ་དང་བཅས་ལན་མང་དུ་བརྗོད། དེ་ནས་དཀྱིལ་འཁོར་ལ་ཕྱོགས་ཏེ་དྲིལ་གསིལ་དང་བཅས། ཡང་དག་པ་ཡི་དཀྱིལ་འཁོར་འདིར། །བདག་གིས་སློབ་མ་གཞུག་པར་བགྱི། །ལྷ་རྣམས་ཀྱི་ནི་རིགས་ཇི་བཞིན། །ཇི་ལྟར་བསོད་ནམས་དེ་བཞིན་ཤོག །ཅེས་བདེན་སྟོབས་བརྗོད། སློབ་མའི་ལག་ཏུ་མེ་ཏོག་གཏད་དེ། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ་པཱུ་ཛ་ཧོཿ ཞེས་དཀྱིལ་འཁོར་ལ་མེ་ཏོག་འདོར་དུ་གཞུག །མེ་ཏོག་བླངས་ཏེ་སློབ་མའི་མགོར་བཞག་པས་མེ་ཏོག་འཕྲེང་བའི་དབང་ཐོབ་པའི་མོས་པ་བྱེད་དུ་གཞུག །མི་ཤེས་མུན་པས་བསྒྲིབས་པ་ལ། །དཀྱིལ་འཁོར་འདི་ནི་བསྟན་པར་བྱ། །མཎྜལ་ཕཊ། ཅེས་གདོང་གཡོགས་བསལ། སྲུང་བའི་འཁོར་ལོ་མེ་རི་དང་བཅས་པའི་ནང་དུ་གཞལ་ཡས་ཁང་ཆེན་པོ་མཚན་ཉིད་ཡོངས་སུ་རྫོགས་པའི་དབུས་ན་བཞུགས་པ་བཅོམ་ལྡན་འདས་དཔལ་རྡོ་རྗེ་རྣམ་པར་འཇོམས་པ་ཞེས་བྱ་བ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་ཐམས་ཅད་ཀྱི་བདག་པོ་ཡིན་ནོ། །པདྨ་འདབ་བརྒྱད་ཀྱི་ཤར་དུ་རྡོ་རྗེ་གཏུམ་པོ། ལྷོར་རྡོ་རྗེ་ཕུར་པ། ནུབ་ཏུ་རྡོ་རྗེ་བེ་ཅོན། བྱང་དུ་རྡོ་རྗེ་ཐོ་བ་སྟེ་ཐུགས་ཀྱི་ཁྲོ་བོ་ཆེན་པོ་བཞི་དང༌། ཤར་ལྷོར་སངས་རྒྱས་སྤྱན། ལྷོ་ནུབ་ཏུ་མཱ་མ་ཀཱི། ནུབ་བྱང་དུ་གོས་དཀར་མོ། བྱང་ཤར་དུ་སྒྲོལ་མ་སྟེ་ཡུམ་བཞི་དང༌། དེའི་ཕྱི་རོལ་གྱི་འཁོར་ལོ་རྩིབས་བཅུ་པའི་ཤར་དུ་རྣམ་པར་རྒྱལ་བ། ལྷོར་གཤིན་རྗེའི་གཤེད། ནུབ་ཏུ་རྟ་མགྲིན། བྱང་དུ་བདུད་
རྩི་འཁྱིལ་བ། ཤར་ལྷོར་དབྱུག་པ་སྔོན་པོ། ལྷོ་ནུབ་ཏུ་ཁྲོ་གཉེར་ཅན། ནུབ་བྱང་དུ་དོན་ཡོད་ཞགས་པ། བྱང་ཤར་དུ་རྡོ་རྗེ་འཁོར་ལོ། སྟེང་དུ་འཁོར་ལོས་སྒྱུར་རྒྱལ། འོག་ཏུ་སྟོབས་པོ་ཆེ་སྟེ་ཁྲོ་བོ་བཅུ་དང༌། དེའི་ཕྱི་ལ་བཀྲ་ཤིས་ཀྱི་ལྷ་མོ་བརྒྱད་དང༌། ཁྱམས་ལ་ཕོ་ཉ་དྲུག་ཅུ་རྩ་བཞི་ཕྱོགས་རེ་རེ་ལ་བཅུ་དྲུག་བཅུ་དྲུག་དང་བཅས་པ་དེ་དག་ཁྱེད་རྣམས་ཀྱི་ཡི་དམ་གྱི་ལྷ་ཡིན་ནོ། །གཞན་ཡང་ཤར་སྒོ་ན་ཡུལ་འཁོར་སྲུང༌། ལྷོ་སྒོ་ན་འཕགས་སྐྱེས་པོ། ནུབ་སྒོ་ན་མིག་མི་བཟང༌། བྱང་སྒོ་ན་རྣམ་ཐོས་སྲས། སྒོའི་ནང་ན་སྒོ་མ་བཞི་དང༌། འཁོར་ཡུག་ལ་ཕྱོགས་སྐྱོང་བཅུ་དང་བཅས་བཞུགས་པ། འདི་རྣམས་ཁྱེད་ཅག་གི་སྲུང་མ་ཡིན་པས་དེང་ཕྱིན་ཆད་མཆོད་པ་དང་གཏོར་མས་མཉེས་པར་གྱིས་ཤིག །དེ་ནས་ཡི་དམ་ཆོས་སྲུང་དེ་རྣམས་ཀྱི་ཐུགས་རྒྱུད་བསྐུལ་ནས་བགེགས་ཐམས་ཅད་རྒྱ་མཚོའི་ཕར་འགྲམ་དུ་བསྐྲད་པར་མོས་ལ། སྔོན་ཚེ་བདེ་གཤེགས་ཕོ་བྲང་སྤྱན་སྔ་རུ། །གདུག་པ་འདུལ་ཕྱིར་རྡོ་རྗེ་ཅན་གྱིས་ནི། །རྗེས་མཐུན་ཁྱད་པར་འཕྲིན་ལས་གང་བསྒོ་བ། །དམ་བཅས་འཕྲིན་ལས་དེ་ནི་དེ་དགོངས་ལ། །ཕྱིར་རྒོལ་བགེགས་དང་ལོག་འདྲེན་ཚར་ཆོད་ཅིག །འགྲོ་བ་འདི་ལ་རྗེས་སུ་གཟུང་བའི་ཕྱིར། །སྡུག་བསྔལ་ངེས་བསལ་བདེ་མཆོག་སྦྱོར་བ་འོ། །ཁྲོ་རྒྱལ་ཁྱོད་ཀྱིས་དེང་འདིར་བྱིན་རླབས་མཛོད། །ན་མཿ ས་མནྟ་ཀཱ་ཡ་ཝ་ཀྩིཏྟ་བཛྲ་ཎཱཾ། ན་མོ་བཛྲ་ཀྲོ་དྷཱ་ཡ། མཧཱ་དཾཥྚོཏ་ཀ་ཊ་བྷཻ་ར་ཝཱ་ཡ། ཨ་སི་མུ་ས་ལ། པ་ར་ཤུ་པ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བྷནྡྷ་བྷནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊཱ་ཡ་བི་སྥོ་ཊཱ་ཡ།
སརྦ་བིགྷྣཱན། བི་ན་ཡ་ཀ་ན། མཧཱ་ག་ཎ་པ་ཏི་ཛི་བི་ཏཱནྟ་ཀ་རཱ་ཡ། སརྦ་དུཥྚ་ཨུ་ཙ་ཏ་ཡ་ཧཱུཾ་ཕཊ། ཅེས་བརྗོད་ཅིང་མར་དང་བུ་རམ་གུ་གུལ་བསྲེགས་པས་བདུགས། རྡོ་རྗེ་ཁུ་ཚུར་གནས་གསུམ་དུ་གཏུག་ཅིང༌། ཨོཾ་བཛྲ་ད་མ་ད་མ་ཧཱུཾ་སྥོ་ཊ་ཡ་བྷསྨི་ཀུ་རུ་ཧཱུཾ་སྭཱཧཱ། ཞེས་བརྗོད། དེ་ནས། ཨོཾ་པྲ་ཙ་ཏ་ཀུ་པི་ཏ་ས་ས་ཏི་ཨུཀྵི་པི་དྷ་ན་དྷ་ར་ཎི་དྷ་ར་དྷ་ར་ཧཱུཾ་ཧཱུཾ་ཕཊ་ཕཊ། ཅེས་བརྗོད་ལ་ཡུངས་ཀར་གྱིས་བྲབས། ན་མོ་རཏྣ་ཏྲ་ཡཱ་ཡ། ན་མཥྩཎྜ་བཛྲ་ཀྲོ་དྷ་ཡ། མཧཱ་བིདྡྷ་སྱ་མཧཱ་བིདྡྷ་ར་ཙ་ཡ། ཏདྱ་ཐཱ། དྷ་ར་དྷ་ར། མཧཱ་ཀྲོ་དྷ། མུ་རུ་མུ་རུ། སརྦ་བིགྷྣཱན་བི་ནཱ་ཡ་ཀ་ན་མ་ཐ་མ་ཐ། པྲ་ཧ་ར་པྲ་ཧ་ར། སརྦ་དུཥྚཾ་ཡནྟ་ཀ །བ་ཏ་ན་བི་ནཱ་ཤ་ཡ་བྷསྨི་ཀུ་རུ། ད་ཧ་ད་ཧ། ཧཱུཾ་ཧཱུཾ་ཕཊ་ཕཊ། ནིརྨ་ཐ་ནིརྨ་ཐ། མཧཱ་ཀྲོ་དྷ། ཛ་ཡ་ཛ་ཡ། སརྦ་དུཥྚཾ་པ་རི་ཀ །ཛྭ་ལ་ཛྭ་ལ་སྭཱཧཱ། ཞེས་ལན་གསུམ་བརྗོད། སླར་ཡང་སློབ་མའི་དོན་དུ་ལྷ་ལ་གསོལ་བ་གདབ་པ་ནི། རྡོ་རྗེ་སློབ་མ་འདི་དག་རྣམས། །ཚེ་འདིར་ནད་མེད་བདེ་བ་དང༌། །གདོན་རྣམས་ཀུན་ལས་ཐར་པ་དང༌། །དགྲ་རྣམས་ཀུན་ལས་རྒྱལ་བའི་ཕྱིར། །མགོན་པོ་ཁྱོད་ལ་སྐྱབས་སུ་མཆི། །བསམ་པ་གང་ཡིན་རྫོགས་པར་མཛོད། །བཅོམ་ལྡན་ཁྱོད་ལ་ཐུགས་རྗེ་མངའ། །འདི་ལ་སྐྱབས་གནས་མ་མཆིས་པས། །དེས་ན་འགྲོ་བ་གུས་པ་འདི། །ཁྱོད་ཀྱིས་བྱིན་གྱིས་བརླབ་ཏུ་གསོལ། །ཅེས་བརྗོད། དེ་ནས་བུམ་པ་སློབ་མའི་སྤྱི་བོར་གཟུང་སྟེ། ཧཱུཾཿ ཁྲུས་མཆོག་འདི་ནི་དཔལ་དང་ལྡན། །ཐུགས་རྗེའི་ཁྲུས་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩལ་ཏུ་གསོལ། །ཡེ་
ཤེས་ཆུ་བོ་ཁྲུས་ཀྱི་རྫིང༌། །བུམ་པའི་ཁ་རྒྱན་དཔག་བསམ་ཤིང༌། །བཀྲ་ཤིས་བུམ་པས་སྤྱི་བླུགས་ནས། །དབང་བསྐུར་ཐམས་ཅད་འདིར་སྩོལ་ཅིག །ཡང་སྙིང་སྔོན་དུ་བཏང་སྟེ། ཨོཾ་བཛྲ་པཱ་ཎ་ཡེ་ཆེ་གེ་མོའི་སརྦ་བིགྷན་ཤཱནྟིཾ་ཀུ་རུ་ཡེ་སྭཱཧཱ། དེ་བཞིན་དུ། སརྦ་བྱཱ་དྷི་བྷྱཿ ཤཱནྟིཾ། ༝ སརྦ་ཨུ་པ་དྲ་བེ་བྷྱཿ ༝ སརྦ་ཨ་ཀཱ་ལ་མྲྀཏྱུ་བྷྱཿ ༝ སརྦ་གྲ་ཧེ་བྷྱཿ ༝ སརྦ་ཛྭ་རེ་བྷྱཿ ༝ སརྦ་དུར་སྭསྣེ་བྷྱཿ ༝ སརྦ་དུརྣི་མི་ཏེ་བྷྱཿ ༝ སརྦ་ཙིཏྟ་བྱཱ་ཀུ་ལེ་བྷྱཿ ཤཱནྟིཾ་ཀུ་རུ་ཡེ་སྭཱཧཱ། ཞེས་ཁྲུས་བྱ། རྨ་བྱའི་སྒྲོའི་སྟེང་དུ་ཧཱུཾ་ཡིག་ལ་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས་ཏེ་བཀྲུས་པས་མ་དག་པའི་དྲི་མ་རྣམས་བྱབས་པར་བསམ་ཞིང༌། གོང་གི་ཤཱནྟིཾ་ཀུ་རུ་ཡེ་ཞེས་པའི་ཚབ་ཏུ། ཨ་པ་ན་ཡེ་སྭཱཧཱ། ཞེས་པ་བཅུག་སྟེ་བྱབས་ནས་ཁྲུས་ཆུ་རྒྱང་རིང་དུ་དོར། ཨ་པ་ནའི་ཚབ་ཏུ་རཀྵ་རཀྵ་ཞེས་པ་བཅུག་སྟེ་གནས་ལྔར་རྡོ་རྗེ་རྒྱ་གྲམ་དུ་བཞག །ཐལ་མོ་ཁོང་སྟོང་དུ་སྦྱར་བ་ལས། མཛུབ་མོ་གཉིས་དང་གུང་མོ་གཉིས་བཀུག་སྟེ། མཐེ་བོང་གཉིས་དང་སྲིན་ལག་མཐེའུ་ཆུང་བསྒྲེང་བ་ནི་སྲུང་བ་ཆེན་མོའི་ཕྱག་རྒྱ་ཞེས་བྱ་བ་སྟེ། སྙིང་ག་དང་དཔུང་པ་གཡས་དང་རྒྱབ་དཔུང་པ་གཡོན་དུ་གཏུག་སྟེ། གནས་དེ་རྣམས་སུ། ཙ། པ། ས། ཀྵ་བཞི་ལས་མི་འཇིགས་པ་གསེར་གྱི་མདོག་ཅན་དཀར་མོ་གོས་དཀར་པོ་གྱོན་པ་དབྱུག་ཏོ་ཅན། འཇིག་པ་ཐམས་ཅད་མེད་པར་བྱེད་པ་སྐུ་མདོག་དང་ན་བཟའ་དཀར་པོ་ཅན་རལ་གྲི་འཛིན་པ། གདུལ་དཀའ་མ་དམར་མོ་གོས་དམར་ཅན་འཛུམ་པས་དཀྱིལ་འཁོར་ལ་བལྟ་བ། མི་ཐུབ་པ་ནག་མོ་ཁྲོ་གཉེར་མ་སྨད་གཡོགས་ནག་པོ་ཅན་དབྱུག་ཏོ་འཆང་བ། ཀུན་ཀྱང་ཐོར་ཚུགས་ཅོད་པན་དང་རིན་པོ་ཆེའི་རྒྱན་དང་ལྡན་པ། འཇིག་རྟེན་གྱི་ཁམས་འོད་ཀྱིས་
འགེངས་པ་རེ་རེ་བཞུགས་པར་གྱུར། ན་མཿ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཏདྑཾ་ཨུདྒ་རཀྵ་མཧཱ་བ་ལེ། སརྦ་ཏ་ཐཱ་ག་ཏེ་པུརྞ་ཎི་ར་ཛ་ཏེ་ཧཱུཾ་ཧཱུཾ་ཏྲ་ཐ་ཏྲ་ཐ། ཨ་པྲ་ཏི་ཧ་ཏ་ཧཱུཾ་ཕཊ་སྭཱཧཱ། ཞེས་པས་བྱིན་གྱིས་བརླབ། བུམ་ཆུ་མགོ་ལུས་ལ་བྱུགས་ཤིང༌། བ་སྤུའི་བུ་ག་ཐམས་ཅད་ལྷ་མོའི་ཚོགས་དང་ཁྲོ་བོ་རྡུལ་ཕྲ་རབ་ཀྱིས་གང་བར་བསམ། ཧཱུཾཿ ལྕང་ལོ་ཅན་གྱི་གནས་མཆོག་དམ་པ་རུ། །དྲེགས་པ་ཀུན་འདུལ་གདུག་པའི་ཚོགས་འཇོམས་པ། །ཕྱག་ན་རྡོ་རྗེའི་སྔགས་བཟླས་དྲག་པོའི་མཐུས། །ཀླུ་ཡི་གདུག་པའི་ནད་གདོན་དག་གྱུར་ཅིག །མཐུ་སྟོབས་བདག་པོས་གདུག་བྱེད་གཉེན་པོ་མཛོད། །ལས་དང་རྐྱེན་འཛོམ་སྐྱེས་བུ་འདི་དག་གི །དུས་གསུམ་རྣམ་སྨིན་གདུག་པའི་ནད་ཆེན་འདི། །ཕྱག་ན་རྡོ་རྗེའི་མཐུ་ཡིས་དག་གྱུར་ཅིག །རླུང་མཁྲིས་བད་ཀན་འདུས་ལས་གྱུར་པ་ཡིས། །མཛེ་དང་སྐྲན་དང་སྐྱ་རྦབ་ཕོལ་འབྲས་སོགས། །གང་ཞིག་ས་བདག་ཀླུ་གཉན་གདུག་པ་ཡིས། །ཟིན་པའི་གདོན་དང་ནད་རྣམས་དག་གྱུར་ཅིག །ཅེས་བརྗོད། སློབ་མའི་ལག་ཏུ་མདའ་དར་བཞག་སྟེ། ཚེ་དང་བསོད་ནམས་འཕེལ་བར་གྱུར། །སྡིག་པ་ཀུན་ལས་རྣམ་པར་ཐར། །ཅེས་དེ་ལྟར་བསམ་ཞིང་བརྗོད་དུ་གཞུག །སླར་ཡང་རྡོ་རྗེ་གནས་གསུམ་དུ་གཏུག་ཅིང༌། བི་ཤ་བཛྲ་ཀཱ་ཡ་ཝཱཀྩིཏྟ་རཀྵ་རཀྵ་སྭཱཧཱ། སློབ་མའི་ལུས་ངག་ཡིད་གསུམ་ལ་རྡོ་རྗེའི་གོ་ཆ་བགོས་པར་གྱུར། གོང་གི །རྡོ་རྗེ་སློབ་མ་འདི་དག་རྣམས། །ཞེས་པ་ནས། འདིའི་བར་གྱི་བཀྲུ་བྱབས་སྲུང་བའི་སྐོར་བདག་འཇུག་
ལ་མི་དགོས། ༈ གཉིས་པ་དབང་དངོས་གཞི་ལ། བུམ་དབང༌། རིགས་གཏད། རྗེས་གནང་གསུམ། དང་པོ་ནི། གདན་དཀར་ལ་འཁོར་ལོ་རྩིབས་བཅུ་པ་བྲིས་པའི་སྟེང་དུ་སློབ་མ་འདུག་ཏུ་བཅུག་སྟེ། བླ་མ་དང་མདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་ཀ་ནས་བཀྲ་ཤིས་ཀྱི་ལྷ་མོ་བདུད་རྩིས་གང་བའི་བུམ་པ་ཐོགས་པ་དཔག་ཏུ་མེད་པ་སྤྲོས་ཏེ་སྤྱི་བོ་ནས་དབང་བསྐུར་བར་གྱུར། ལས་ཀྱི་རྡོ་རྗེས་རྣམ་བུམ་བཏེག་པ། ཕུན་སུམ་ཚོགས་པ་མངའ་བ་ཞེས་སོགས་མཆོག་གསུམ་གྱི་ཤིས་བརྗོད་དང༌། ཡོན་ཏན་རྒྱས་པ་སྐུ་མདོག་བཙོ་མའི་གསེར་དང་མཚུངས། །ཤེས་རབ་རྟགས་སུ་ཤེར་ཕྱིན་པུས་ཏི་རལ་གྲི་བསྣམས། །འཕགས་པ་འཇམ་དཔལ་དབྱངས་ཀྱི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཐུགས་རྗེའི་རྟགས་སུ་སྐུ་མདོག་སྟོན་ཀའི་ཟླ་བའི་འོད། །མ་ཆགས་སྐྱོན་གྱིས་མ་གོས་ཕྱག་ན་པདྨ་བསྣམས། །འཕགས་པ་སྤྱན་རས་གཟིགས་ཀྱི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཆོས་ཉིད་མི་འགྱུར་རྟགས་སུ་སྐུ་མདོག་མཐིང་ནག་སྟེ། །ཐབས་དང་ཤེས་རབ་དབྱེར་མེད་རྟགས་སུ་རྡོ་རྗེ་འཛིན། །དཔལ་ལྡན་ཕྱག་ན་རྡོ་རྗེའི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཅེས་རིགས་གསུམ་གྱི་ཤིས་པ་བརྗོད། ལེགས་གྲུབ་ལས་ཀྱང་བྱ་རྒྱུད་ལ་སྐབས་ཀུན་ཏུ་མཆོག་གསུམ་དང་རིགས་གསུམ་ལ་ཕྱག་བྱ་བར་གསུངས་ཤིང༌། བླ་མེད་ལ་རིགས་ལྔའི་ཤིས་པ་བརྗོད་པ་ལྟར། འདིར་རིགས་གསུམ་གྱི་ཤིས་པ་བརྗོད་ན་སྐབས་དང་འབྲེལ་ཞིང༌། འདིའི་གོང་གི་ཚིགས་
བཅད་མང་པོ་ས་ཝ་རི་བའི་དཀྱིལ་ཆོག་ནས་བླངས་འདུག་པ་ལྟར། དེར་གསུངས་པའི་ཤིས་བརྗོད་འདིའང་བྱས་ན་ལེགས། ཇི་ལྟར་བལྟམས་པའི་དུས་ཀྱི་ཚེ། །ལྷ་རྣམས་ཀྱིས་ནི་ཁྲུས་གསོལ་ལྟར། །དེ་བཞིན་བདག་གིས་ལྷ་ཡི་ཆུ། །དག་པ་ཡིས་ནི་སྐུ་ཁྲུས་གསོལ། །ཨོཾ་ན་མཿ སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་ཁྲུས་བྱས་པས་ལུས་ངག་ཡིད་གསུམ་གྱི་དྲི་མ་དག་ནས་ལུས་ལྷའི་སྐུར་གྱུར། ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་གྱུར། གཉིས་པ་རིགས་གཏད་ལ་སྐུའི་རིགས་གཏད་ནི་བྲིས་སྐུ་སྦྱིན་ཞིང༌། དུས་གསུམ་བདེ་བར་གཤེགས་པའི་སྐུ་ཡི་མཆོག། །སྐུ་དང་ཡོངས་སུ་རྒྱས་པའི་སྐུ། །སྐུ་མདོག་འདི་ནི་ཁྱོད་ཀྱིས་ཟུངས། །ལུས་ཀྱི་མི་དགེ་སྤང་བར་བྱ། །སརྦ་ཏ་ཐཱ་ག་ཏ་སུ་ཏིསྠཱི་ར་བཛྲ་ཨོཾ། གསུང་གི་རིགས་གཏད་ནི་འཕྲེང་བ་སྦྱིན་ཞིང༌། དུང་དང་པདྨ་རཱ་ག་དང༌། །མུ་ཏིག་ལས་ཀྱང་བྱ་བ་ཡིན། །བྱུ་རུ་རིན་ཆེན་བཟང་པོ་ཡི། །འཕྲེང་བ་རབ་ཏུ་གཟུང་བར་བྱ། །ཨོཾ་རུ་ཙི་ར་མ་ཎི་པྲ་ཝ་རྟ་ཡེ་ཧཱུཾ་ཕཊ་སྭཱཧཱ། གླེགས་བམ་སྦྱིན་ཞིང༌། མི་འབྲལ་གཟུངས་ཀྱི་བདག་ཉིད་ཆེ། །མུ་ཏིག་རིན་ཆེན་ཕྲེང་བ་འདི། །སྐུ་དང་ཡེ་ཤེས་མི་འབྲལ་བས། །ངག་གི་ཉེས་སེལ་ཕྲེང་བ་གཟུང༌། །སརྦ་ཏ་ཐཱ་ག་ཏ་པྲ་ཏིསྠཱིར་བཛྲ་ཨཱཿ མི་བསྐྱོད་རྡོ་རྗེ་ཞེས་བྱ་བའི་དེ་བཞིན་གཤེགས་པའོ། །ཞེས་པ་ལྟ་བུ་མེ་ཏོག་གང་ལ་ཕོག་པའི་གསང་མཚན་གདགས། ཐུགས་ཀྱི་རིགས་གཏད་ནི་རྡོར་དྲིལ་བསྣོལ་ཐབས་སུ་སྙིང་གར་འཛིན་ཞིང༌། དུས་གསུམ་བདེ་བར་གཤེགས་པའི་ཐུགས་ཀྱི་མཆོག །ཐུགས་དང་འཕྲིན་ལས་
བརྟན་པའི་ཐུགས། །ཡེ་ཤེས་འདི་ནི་ཁྱོད་ཀྱིས་ཟུངས། །ཡིད་ཀྱི་ལས་དག་མི་བྱ་འོ། །སརྦ་ཏ་ཐཱ་ག་ཏ་མ་ཏིསྠཱི་ར་བཛྲ་ཧཱུཾ། ཞེས་བརྗོད། གསུམ་པ་རྗེས་གནང་ལ་གསུམ་ལས། སློབ་མ་རྣམས་པད་ཉིའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས་རྡོ་རྗེ་རྣམ་པར་འཇོམས་པའི་སྐུར་གྱུར། འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་བས། །ཁྱོད་ཀྱིས་ནམ་ཡང་མ་བྱེད་ཅིག །མཧཱ་ས་མ་ཡ་ཧཱ་ན་ཧཱུཾ་ཕཊ། གཉིས་པ་སྔགས་བཟླ་བའི་རྗེས་གནང་ནི། བླ་མས། རིག་སྔགས་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །ཞེས་ལྷ་ལ་གནང་བ་ཞུ། སློབ་མ་རྣམས་ཀྱིས། རིག་སྔགས་བདག་གིས་གཟུང་ལགས་ཀྱི། །བདག་ལ་བྱིན་གྱིས་བརླབ་ཏུ་གསོལ། །ཞེས་གསོལ་བ་གདབ། གཟུངས་རིང་སྙིང་པོ་ཉེ་སྙིང་རྣམས་ཀྱི་རྗེས་ཟློས་ལན་གསུམ་རེ་བྱ། དེང་ཕྱིན་ཆད་དཔལ་གསང་བའི་བདག་པོ་ཕྱག་ན་རྡོ་རྗེ་འཁོར་དང་བཅས་པ་ཡི་དམ་གྱི་ལྷར་བཟུང་སྟེ་མཆོད་དགོས་པས་མཆོད་པ་འབུལ་བར་ཞུ་བྱས་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་ཏྱ། ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་སྭ་བྷཱ་ཝ་བི་ཤུདྡྷེ་དྷརྨཱ་ཏེ་བཛྲ་སིདྡྷི་ཧཱུཾ། ན་མཿ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཏདྑཾ་ཨུདྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱཧཱ། ཞེས་མཆོད་པ་དབུལ། དེ་ནས་ཕུན་སུམ་ཚོགས་པའི་ཡན་ལག་ཏུ་བཀྲ་ཤིས་རྟགས་བརྒྱད་དང་རྫས་བརྒྱད། རྒྱལ་སྲིད་སྣ་བདུན་རྣམས་ཀྱི་དབང་བསྐུར་ཞིང་ཤིས་པས་མཐའ་བརྒྱན་པ་ནི། དེ་དག་བསང་སྦྱངས། སྟོང་པའི་ངང་ལས་རང་
རང་གི་མིང་ཡིག་དང་པོ་ཞུ་བ་ལས་སྲིད་ཞིའི་དགེ་མཚན་སྤེལ་བའི་མཐུ་དང་ལྡན་པར་གྱུར་པར་བསམ་སྟེ། རྒྱས་པར་བྱེད་ན། བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་གདུགས་དཀར་གསེར་གྱི་ཡུ་བ་ཅན། །ཐོགས་ནས་སློབ་མ་རྣམས་ལ་དབང་བསྐུར་བས། །དབུ་ལ་གདུགས་ཀྱི་བཀྲ་ཤིས་འཁོར་གྱུར་ཅིག །བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་གསེར་གྱི་ཉ་མོ་འོད་འབར་བ། །ཐོགས་ནས་སློབ་མ་རྣམས་ལ་དབང་བསྐུར་བས། །སྤྱན་ལ་ཉ་ཡི་བཀྲ་ཤིས་གསལ་གྱུར་ཅིག །བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་གསེར་གྱི་པདྨ་ཡིད་འོང་བ། །ཐོགས་ནས་སློབ་མ་རྣམས་ལ་དབང་བསྐུར་བས། །ལྗགས་ལ་པདྨའི་བཀྲ་ཤིས་རྒྱས་གྱུར་ཅིག །བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་གསེར་གྱི་བུམ་པ་ཡིད་འོང་བ། །ཐོགས་ནས་སློབ་མ་རྣམས་ལ་དབང་བསྐུར་བས། །མགུལ་ལ་བུམ་པའི་བཀྲ་ཤིས་མཛེས་གྱུར་ཅིག །བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་ཆོས་ཀྱི་དུང་སྒྲ་སྒྲོགས་མཛད་པ། །ཐོགས་ནས་སློབ་མ་རྣམས་ལ་དབང་བསྐུར་བས། །གསུང་དབྱངས་དུང་གི་བཀྲ་ཤིས་སྙན་གྱུར་ཅིག །བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་གསེར་གྱི་དཔལ་བེའུ་ཡིད་འོང་བ། །ཐོགས་ནས་སློབ་མ་རྣམས་ལ་དབང་བསྐུར་བས། །ཐུགས་ལ་དཔལ་བེའུའི་བཀྲ་ཤིས་འཁྱིལ་གྱུར་ཅིག །བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་གསེར་གྱི་
རྒྱལ་མཚན་ཡིད་འོང་བ། །ཐོགས་ནས་སློབ་མ་རྣམས་ལ་དབང་བསྐུར་བས། །སྐུ་ལ་རྒྱལ་མཚན་བཀྲ་ཤིས་བསྒྲེང་གྱུར་ཅིག །བཀྲ་ཤིས་གང་ཞིག་དབང་གི་ལྷ་རྣམས་ཀྱིས། །ཕྱག་ན་གསེར་གྱི་འཁོར་ལོ་རྩིབས་སྟོང་ལྡན། །ཐོགས་ནས་སློབ་མ་རྣམས་ལ་དབང་བསྐུར་བས། །ཕྱག་ཞབས་འཁོར་ལོའི་བཀྲ་ཤིས་མཛེས་གྱུར་ཅིག །ཅེས་དང༌། མེ་ལོང་ཡེ་ཤེས་རྒྱ་མཚོ་ཞེས་སོགས་དང༌། ལྷ་རྫས་ལས་བྱས་ལྟེ་བ་ཞེས་སོགས་ཚིགས་བཅད་དང་སྔགས་སོ་སོ་བའི་སྒོ་ནས་བྱེད་ལ། བསྡུ་ན། གང་ཞིག་རེག་ཅིང་མཐོང་ཐོས་དྲན་པས་ཀྱང༌། །མི་ཤིས་ཀུན་སེལ་ཕུན་ཚོགས་མཆོག་སྩོལ་བར། །རྒྱལ་བས་བྱིན་བརླབས་བཀྲ་ཤིས་རྟགས་བརྒྱད་ཀྱི། །དབང་བསྐུར་དགེ་ལེགས་སྣང་བ་འབར་གྱུར་ཅིག །ཨོཾ་ཨཥྚ་མངྒ་ལ་ཨ་བྷི་ཥཱིཉྩ་མཱཾ། རྟགས་བརྒྱད་ལ་རྫས་བརྒྱད་ཅེས་བསྒྱུར་ཏེ། ཨོཾ་ཨཥྚ་མངྒ་ལ་བྷ་བ་ཨ་བྷི་ཥཱིཉྩ་མཱཾ། མི་དབང་རིན་ཆེན་བདུན་གྱི་དབང་བསྐུར་བས། །བྱང་ཆུབ་ཡན་ལག་བདུན་ལྡན་ལམ་བཟང་གིས། །ཐེག་མཆོག་ཆོས་ཀྱི་སྲིད་ལ་དབང་འབྱོར་ཏེ། །མ་ལུས་འགྲོ་བའི་མགོན་དང་དཔལ་གྱུར་ཅིག །ཨོཾ་མཧཱ་སཔྟ་རཏྣ་ཨ་བྷི་ཥཱིཉྩ་མཱཾ། མི་འགྱུར་ལྷུན་པོ་ཞེས་སོགས་དང༌། མཆོག་གསུམ་གྱི་ཤིས་པ་བརྗོད་དེ་མེ་ཏོག་གི་ཆར་དབབ་ཅིང༌། སངས་རྒྱས་སྐུ་གསུམ་བརྙེས་པའི་ཞེས་སོགས་བདེན་པས་བྱིན་གྱིས་བརླབ་བོ། །སློབ་མ་རྣམས་ཀྱིས་གཏང་རག་གི་མཎྜལ་དབུལ་ཞིང༌། བླ་མས་མཇུག་གི་མཆོད་བསྟོད། ནོངས་པ་བཟོད་གསོལ། ཡེ་ཤེས་པ་གཤེགས་ཏེ་དམ་ཚིག་པ་རང་ལ་བསྟིམ་པ། བཀྲ་ཤིས་ཀྱིས་མཐའ་བརྒྱན་པ་སོགས་བྱའོ། །༈ གསུམ་པ་ཞར་བྱུང་
ཉེ་བར་མཁོ་བའི་ལས་ཚོགས་གཞན་བསྟན་པ་ལ། སྦྱིན་སྲེག་ནི། ཐབ་ཀྱི་དབུས་སུ་རྡོ་རྗེ་ལ་ཧཱུཾ་གིས་མཚན་པ་བྲི། དམ་རྒྱ་རྡོ་རྗེའི་རིགས་ཀྱི་དམ་རྒྱ་གོང་དུ་བཤད་པ་བཞིན་བྱེད། དགང་བླུགས་ཀྱི་ཁ་ལ་ཧཱུཾ་གསལ་འདེབས་ཤིང༌། མེ་ལྷའི་ཐུགས་ཀར་མེ་གྲུ་གསུམ་རབ་ཏུ་འབར་བའི་དབུས་སུ་པད་ཉི་ལ་གཙོ་བོ་མངོན་རྟོགས་བཞིན་བསྐྱེད་ནས་ཡེ་ཤེས་པ་གཞུག་ཅིང་དབང་བསྐུར་རྒྱས་གདབ་བྱ། འཁོར་རྣམས་གསལ་འདེབས་མི་དགོས་ཆོ་གའི་གཞུང་ནི་བྱ་རྒྱུད་ཀྱི་སྦྱིན་སྲེག་ཚད་ལྡན་གང་རིགས་ཤིག་དང་བསྟུན་ན་ཆོག་གོ །གཞན་ཡང་འདིའི་སྔགས་སོ་སོ་དང༌། མདོ་ཚིག་རེ་རེ་བཞིན་ལ་བརྟེན་པའི་ལས་སྦྱོར་བརྒྱ་རྩ་བརྒྱད་ཡེ་ཤེས་རྡོ་རྗེ་སོགས་ཀྱིས་མཛད་ཅིང༌། སློབ་དཔོན་པདྨས་མཛད་པར་གྲགས་པའི་ཐེམ་ཡིག་དང་བཅས་པ་ཡོད། དེ་དག་བསྡུས་ནས་ལས་མཐའ་བཅོ་བརྒྱད་དུ་ཕྱེ་ཞིང༌། དེའང་ཞི་བའི་འཁྲུལ་འཁོར་གསུམ། རྒྱས་པའི་བཞི། དབང་གི་གཉིས། མངོན་སྤྱོད་ཀྱི་བརྒྱད། ཁྲུས་ཀྱི་ཆོ་ག་དང་བཅས་ལས་བཞིའི་འཁྲུལ་འཁོར་དུ་བསྡུ་ཚུལ་སྨྲྀ་ཏིའི་མན་ངག་ལས་འབྱུང་ཞིང༌། སྨྲྀ་ཏིའི་འགྲེལ་པར་དེ་དྲང་དོན་གྱི་སྒྲུབ་ཚུལ་དུ་བྱས་ཏེ། ངེས་དོན་སྟོང་ཉིད་བཅོ་བརྒྱད་རྟོགས་པའི་ཡེ་ཤེས་ཀྱིས་སངས་རྒྱས་ཀྱི་ཆོས་མ་འདྲིས་པ་བཅོ་བརྒྱད་དུ་སྒྲུབ་ཚུལ་ཞིག་ཀྱང་གསུངས་ཏེ། མདོར་ན་ལྷ་གཅིག་མི་གཅིག་གི་ཚུལ་དུ་ཡི་དམ་འདི་ཉིད་ཁོ་ན་ལ་རྩལ་དུ་བཏོན་ན་འདིའི་སྒོ་ནས་ཀྱང་མཆོག་ཐུན་གྱི་ལས་རབ་འབྱམས་ཅི་འདོད་སྒྲུབ་པར་ནུས་པས་ནོར་བུའི་གཏེར་
མཛོད་ལྟ་བུར་ཡོད་དོ། །འདིེར་དེ་དག་གི་ནང་ནས་ཉེར་མཁོ་ཉུང་ཤས་ཤིག་ཐོ་ཙམ་འགོད་ན། ༈ ནོར་ལོངས་སྤྱོད་སྤེལ་བར་འདོད་པས་རང་རྣམ་འཇོམས་སུ་བསྐྱེད། བུམ་པའི་ནང་དུ་སྔགས་འཕྲེང་གསལ་བཏབ་སྟེ་གཟུངས་བཟླས་ལ་བུམ་པའི་ཆུ་དང་དབྱེར་མེད་དུ་བསྟིམ། མདུན་གྱི་ནམ་མཁར་སྐད་ཅིག་གིས་སྟོན་པ་ཐུབ་པའི་དབང་པོ་དང༌། དེའི་འོག་ཙམ་དུ་སྐད་ཅིག་གིས་ཛཾ་ལྷ་དཀར་པོ་གཡུ་འབྲུག་ལ་ཞོན་པའམ། སེར་པོ་གཏེར་ལ་གནས་པ། ནག་པོ་ནོར་སྦྱིན་སེར་པོའི་སྟེང་ན་བཞེངས་ཏེ་བཞུགས་པ་གང་རིགས་ཤིག་ཀྱང་ཕྱག་མཚན་རྒྱན་དང་བཅས་པ་ཡོངས་སུ་རྫོགས་པ་གསལ་བར་གྱུར་པར་བསམས་ཏེ། སྔར་སྒྲུབ་པའི་བུམ་ཆུས་སྤྱི་བོ་ནས་ཁྲུས་གསོལ་ཞིང་ཞལ་དུ་ཕུལ་བར་བསམས་ཏེ་ཛཾ་ལྷའི་སྔགས་འདོན་ཞིང་ཆུ་སྦྱིན་བྱ། ཐུབ་པའི་དབང་པོ་དཔང་པོའི་ཚུལ་དུ་བཞུགས་པ་འདི་བཞིན་དུ་གནོད་སྦྱིན་ཆེན་པོ་ཁྱེད་ཀྱིས་དཔལ་གསང་བའི་བདག་པོ་ཕྱག་ན་རྡོ་རྗེའི་བཀའ་ལས་མ་འདའ་བར་རྣལ་འབྱོར་པ་བདག་གིས་ཆོས་སྒྲུབ་པའི་དཔལ་འབྱོར་ལེགས་ཚོགས་ཐམས་ཅད་ཡར་ངོའི་ཟླ་བ་ལྟར་གོང་ནས་གོང་དུ་རྒྱས་པའི་སྡོངས་གྲོགས་མཛོད་ཅིག །ཅེས་འཕྲིན་ལས་བཅོལ། ༈ ཆར་འབེབས་པར་འདོད་པས། རང་ཉིད་སྒྲུབ་གྲོགས་དགེ་སློང་བཞི་དང་བཅས་པས་ནངས་སྔ་བར་ཐེག་པ་ཆེན་པོའི་གསོ་སྦྱོང་བླངས་ཏེ། རང་གིས་རྣམ་འཇོམས་གཙོ་རྐྱང་ངམ་གཙོ་འཁོར་གྱི་བདག་བསྐྱེད་བུམ་བསྐྱེད་གཞུང་བཞིན་བྱ། སྒྲུབ་གྲོགས་བཞིའི་གཉིས་ཀྱིས་འདིའི་གཟུངས་མདོ་དང་སྤྲིན་ཆེན་པོའི་མདོ་བཀླག །གཉིས་ཀྱིས་ཀླུ་རྣམས་ཀྱི་སྙིང་
པོ་བཟླ་ཞིང་ཀླུ་གཏོར་བསྔོ། སྔགས་ཀྱི་མཇུག་ཏུ། ཆར་གྱི་རྒྱུན་ཕུན་སུམ་ཚོགས་པ་འབབ་བར་བྱིན་གྱིས་རློབས་ཤིག །ཅེས་སྤེལ་ཚིག་སྦྱོར་ཞིང༌། མདུན་བསྐྱེད་ཀྱི་ཐུགས་ཀ་ནས་འོད་ཟེར་འཕྲོས་ཏེ་ཀླུ་རྣམས་ཀྱི་རྒྱུད་བསྐུལ་ནས་ཆར་ཕབ་པའི་དམིགས་པ་དང༌། བུམ་ལྷ་འོད་ཞུ་བྱས་ནས་ཆུ་མིག་སོགས་སུ་བླུགས་པས་བྱིན་རླབས་ཀྱི་བདུད་རྩིའི་རྒྱུན་གྱིས་ཀླུ་རྣམས་ཚིམ་སྟེ་ཆར་ཕབ་པའི་དམིགས་པ་བྱེད། དེས་མ་བབ་ན་སྙིང་པོ་དྲག་ཏུ་བཟླ་ཞིང་ཁྲོ་བཅུའི་ལྷ་ཚོགས་རང་འདྲ་དཔག་མེད་འཕྲོས་ཏེ་ཀླུ་རྣམས་ཀྱི་མགྲིན་པ་ནས་བཅིངས་ཤིང་བསྡིགས་ཏེ་དྲག་ཤུལ་གྱི་སྒོ་ནས་འབེབ་ཏུ་བཅུག་པར་བསམས། ༈ སེར་བ་བསྲུང་ན། སྔོན་ནས་ཕུར་པ་བཅུ་ཁྲོ་བོ་བཅུར་བསྐྱེད་ནས་ཡུན་རིང་དུ་བསྒྲུབས། དངོས་གཞིའི་དུས་རང་ཉིད་རྡོ་རྗེ་རྣམ་འཇོམས་ཕྱག་མཚན་རྒྱན་སོགས་གཞུང་ལྟར་ལ་སྐུ་མདོག་དམར་པོར་བསྒོམས་ཏེ་སྙིང་པོ་དང་ཉེ་སྙིང་བཟླ། སེར་བ་འོང་བའི་ཕྱོགས་ཕྱོགས་སུ་ཕུར་བུ་རྣམས་གདབ་ཅིང་སྔགས་བཟླས་པའི་ཡུངས་ཀར་གཏོར། རང་གི་ཁ་ནས་སྔགས་ཕྲེང་མེ་འོད་འབར་བ་དཔག་མེད་འཕྲོས་པའི་མེ་དཔུང་གིས་ནམ་མཁའ་ཁེངས་ཤིང་དྲག་པོའི་རླུང་གིས་སྤྲིན་རྣམས་ཕྱོགས་ཕྱོགས་སུ་གཏོར་བར་བསམས་ཏེ་ནམ་མཁར་སྡང་མིག་དང་མཛུབ་རིས་བྱ། ༈ གཞན་གྱི་ངན་སྔགས་གཅོད་པར་བྱེད་ན། བདག་བསྐྱེད་སྔོན་དུ་བཏང༌། རང་གི་ལུས་ཀྱི་ཡན་ལག་དང་ཉིང་ལག་བ་སྤུའི་བུ་ག་ཚུན་ཆད་རྡོ་རྗེའི་རྡུལ་ཕྲ་རབ་ཀྱིས་གཏམས་ཤིང༌། དེ་ལས་མེའི་ཚ་ཚ་དཔག་མེད་འཕྲོ་
བར་བསམས། རོ་རས་ལ་ངན་སྔགས་བྱེད་པ་པོའི་མིང་རུས་བྲི་བ་དང༌། སྲད་བུ་ནག་པོ་མདུན་དུ་བཞག་སྟེ་བདེན་བརྗོད་སྔོན་དུ་འགྲོ་བས་ཕ་རོལ་གྱི་བྱད་མའི་རྣམ་ཤེས་བཀུག་པ་ལིངྒ་ལ་བསྟིམ་ཞིང༌། དེའི་ངན་སྔགས་ཀྱི་ནུས་པ་ཐམས་ཅད་སྲད་བུ་ལ་བསྟིམ་པར་བསམ་ཞིང་དགུག་གཞུག་ལན་མང་དུ་བྱ། དེ་ནས། ཨོཾ་ས་ར་ས་ར་མཱ་ར་ཡ་བཛྲ་བིནྡཱ་ར་ཡཱ་སྭཱཧཱ། ཞེས་བརྗོད་ཅིང་ལིངྒ་གྲིས་གཏུབས་ནས་དུར་ཁྲོད་དུ་རླུང་ལ་བསྐུར། སྲད་བུ་དུམ་བུར་གཏུབས་ཏེ་མེར་བསྲེག་གོ །ཡང་ན་དུར་ཁྲོད་ཀྱི་གཡམ་པ་སྔོན་པོ་ལ་དུག་ཁྲག་གིས་སྣ་ཚོགས་རྡོ་རྗེ་བྲིས་ཏེ་ལྟེ་བ་ལ། ཕ་རོལ་གྱི་རིག་སྔགས་ནན། ཞེས་པ་དང༌། རྭ་རྣམས་ལ་ལཾ་ནན་ཞེས་པ་བྲི། མཐའ་སྐོར་དུ། ཕ་རོལ་གྱི་མཐུ་གཏད་ངན་སྔགས་ཐམས་ཅད་སྟམྦྷ་ཡ་ནན། ཞེས་པ་བྲིས་ཏེ། རྡོ་རྗེ་རྣམ་པར་འཇོམས་པའི་མཐུ་སྟོབས་ཀྱིས་ཕ་རོལ་གྱི་ནུས་པ་ཐམས་ཅད་མནན་པར་བསམ་ཞིང༌། ཨོཾ་ཨ་མོ་གྷ་བཛྲ་ནན། ཨོཾ་ལཾ། ཨཱཿ ལཾ། ཧཱུཾ་ལཾ། ཞེས་པ་ཁྲི་ཕྲག་གསུམ་བཟླ། དེ་ནས་ལམ་རྒྱ་གྲམ་དུ་མནན་ན་བྱད་ཕུར་དེ་དག་ལྡང་མི་ནུས་སོ། ། ༈ མིག་ནད་སེལ་བར་འདོད་པས། ལྷའི་རྣལ་འབྱོར་སྔོན་དུ་བཏང༌། རང་གི་ཐུགས་ཀའི་སྔགས་འཕྲེང་ལས་འོད་ཟེར་དཔག་མེད་འཕྲོས་ཏེ་རྒྱལ་བ་སྲས་བཅས་ལ་གཟུགས་ཀྱི་མཆོད་པ་སྣ་ཚོགས་པ་དང་སྣང་གསལ་ལ་སོགས་པ་ཕུལ། དེ་དག་གི་ཡེ་ཤེས་ཀྱི་སྤྱན་གྱི་བྱིན་རླབས་བསྡུས་ཏེ་བུམ་ཆུ་དང་བྱུགས་པའི་རྫས་ལ་ཐིམ་པར་བསམས་ནས་སྔགས་ཅི་མང་བཟླ། དེ་ནས་ཁྲུས་ཀྱི་ཆོ་ག་སྤྱི་ལྟར་བྱས་པའི་མཇུག་ཏུ་སྔགས་བཟླ་བཞིན་པར་
སྔར་བྱིན་གྱིས་བརླབས་པའི་རྫས་ཀྱིས་བྱུགས་ཏེ། དེའང་མིག་ནད་སྤྱི་ལ་ཨུཏྤལ་སྔོན་པོ་དང་སྐྱེར་པའི་ཁནྜ། རབ་རིབ་ཅན་ལ་ཨ་རུ་རའི་ཁུ་བ། ལིང་ཏོག་ཅན་ལ་མཚལ་དང་ཅོང་ཞིའི་ཁུ་བ་ལ་བཟླས་ཏེ་བྱུགས་ན་ཕན་ནོ། ། ༈ གཞན་ལ་སྲུང་བ་གདགས་པར་འདོད་པས། རས་དཀར་པོ་གཙང་མ་ལ་གུར་ཀུམ་སོགས་ཀྱིས་འཁོར་ལོ་རྩིབས་བརྒྱད་བྲིས། ལྟེ་བར། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎཱ་ཡ། མཧཱ་ཡཀྵ་སེ་ན་པ་ཏ་ཡེ་ཆེ་གེ་མོ་རཀྵ་རཀྵཿ ཞེས་པ་བྲི། རྩིབས་རྣམས་ལ། ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ་ཆེ་གེ་མོ་ལ་རཀྵ་རཀྵཿ ཞེས་པ་དང༌། མུ་ཁྱུད་ལ་སྙིང་པོ་སྟེ་ཐམས་ཅད་ཡིག་མགོ་ཕྱིར་བསྟན་ནས་བྲི། རང་ལྷའི་རྣལ་འབྱོར་ལ་གནས་པས་འཁོར་ལོའི་ལྟེ་བར་རྡོ་རྗེ་རྣམ་འཇོམས་བསྐྱེད་དེ་བསྙེན་པ་གནད་དུ་འགྲོ་ངེས་བྱ། མཐར་མཆོད་བསྟོད་བྱས་ཏེ་འོད་དུ་ཞུ་བ་སྲུང་འཁོར་ལ་ཐིམ་པར་བསམ། རྟེན་འབྲེལ་སྙིང་པོ་བརྒྱ་རྩ་བརྒྱད་བཟླས་ལ་རང་སྔགས་དང་དཀོན་མཆོག་གསུམ་གྱི་ཤིས་པ་བརྗོད་པ་སོགས་ཀྱིས་རབ་ཏུ་གནས་པར་བྱ། ལེགས་པར་བལྟེབས་ཏེ་དར་སྔོན་པོས་དྲིལ་ནས་གདགས་ཤིང་འགོམ་ཡུག་མ་ཤོར་བར་བྱས་ན་སྲུང་བའི་མཆོག་ཏུ་འགྱུར་རོ། །དེང་དུས་ཕལ་མོ་ཆེ་རང་ངོས་ནས་རྒྱུ་ཚོགས་མ་ཚང་བ་མི་ཤེས་པར། ལྷའི་ངོས་ནས་ལས་སྦྱོར་དང་བྱིན་རླབས་ཀྱི་སྒོ་མ་ཚང་བ་ལྟ་བུར་བལྟ་མོད་ཀྱང༌། སྔགས་རིམ་ལས། དཀྱིལ་འཁོར་གྱི་འཁོར་ལོ་གཅིག་ལ་བཟླས་པ་དང་བསྒོམ་པ་ཚད་དུ་ཕྱིན་ན། དེ་ནས་ལྷའི་རྣལ་འབྱོར་དེ་
ཉིད་ལ་སྒྱུར་ལུགས་རེ་བྱས་པས་ནད་དང་བགེགས་ཞི་བ་དང༌། ཚེ་དང་ཤེས་རབ་འཕེལ་བ་དང༌། བསྟན་པ་ལ་མི་དད་པ་ལ་སོགས་པ་དབང་དུ་བྱ་བ་དང༌། དྲག་པོ་མིན་པས་མི་འདུལ་བ་རྣམས་མངོན་སྤྱོད་ཀྱིས་ཚར་གཅོད་པ་ལ་སོགས་པ་གང་ཡང་བྱས་པས་ཆོག་པས། ཚེ་སྒྲུབ་དང་བློ་འཕེལ་སོགས་ཀྱི་གདམས་པ་རྣམས་ཟུར་ནས་བཙལ་མི་དགོས་སོ། །ཞེས་པ་ལྟར་ཡིན་པས། བསྙེན་སྒྲུབ་ཀྱིས་རྨང་གཞི་ཟིན་ངེས་པ་ཞིག་བྱས་ན་རྟ་ཕྱག་ཁྱུང་གསུམ་སོགས་ཀྱི་ལས་ཚོགས་གང་ལའང་ལྷ་སྔགས་ཀྱིས་ཁ་བསྒྱུར་ནས་སྦྱར་ཆོག་སྟེ། དེ་ཉིད་བསྡུས་པ་ལས། སྙིང་པོ་ཕྱག་རྒྱ་སྔགས་རིག་རྣམས། །ཇི་ལྟར་འདོད་པའི་ཚུལ་གྱིས་ནི། །དུམ་བུ་ལས་བཤད་རང་བྱས་པའམ། །སྒྲུབ་པ་འདིར་ནི་ཐམས་ཅད་དོ། །ཞེས་པའི་དགོངས་པའོ། །སྨྲས་པ། བླ་མ་ལྷ་ཡི་ཞབས་མཐིལ་བཀྲ་ཤིས་མཚན། །བདག་གི་གཙུག་རྒྱན་རྩིབས་བརྒྱད་འཁོར་ལོ་སྟེ། །གང་གི་གསུང་གསང་འགག་མེད་ཆོས་ཀྱི་དུང༌། །རིན་ཆེན་འཁྱིལ་བས་བདག་གི་སྙན་ཤལ་མཛེས། །དེ་ཕྱིར་མཚན་ཙམ་དྲན་པས་རྒུད་པ་ཀུན། །རྣམ་པར་འཇོམས་པ་ཡེ་ཤེས་རྡོ་རྗེ་ཡི། །སྒྲུབ་དཀྱིལ་ཆ་ལག་དང་བཅས་གྲུབ་ཆེན་གྱི། །བཞེད་དགོངས་དབང་གི་རྒྱལ་པོའི་འཕྲེང་བར་སྤེལ། །དགེ་བས་ལག་ན་རྡོ་རྗེའི་གནས་ཐོབ་སྟེ། །བདུད་བཞི་སྡེ་དང་བཅས་པའི་དཔུང་བཅོམ་ནས། །ནམ་མཁའི་མཐས་གཏུགས་མར་གྱུར་འགྲོ་བ་རྣམས། །བདེ་བ་ཆེན་པོའི་གནས་ལ་འགོད་གྱུར་ཅིག །ཅེས་རྡོ་རྗེ་རྣམ་པར་འཇོམས་པའི་སྒྲུབ་དཀྱིལ་ཆ་ལག་དང་བཅས་པ་མཆོག་ཐུན་དངོས་
གྲུབ་གཏེར་མཛོད་ཅེས་བྱ་བ་འདི་ནི། ཨོར་དུ་སུ་ཨོ་ཐོག་ཤོག་ནས་གཞན་ཕན་གྱི་ལྷག་བསམ་དང་མཁྱེན་དཔྱོད་རྨད་དུ་བྱུང་བ་སྨན་པ་བླ་ཟུར་བློ་བཟང་ཡོན་ཏན་གྱིས་རིན་པོ་ཆེ་སྣ་ཚོགས་པའི་མནྜལ་དང་བཅས་ནན་ཆེན་བསྐུལ་བའི་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས་འདིའི་རྒྱ་གཞུང་རྣམས་གུང་བསྒྲིགས་ཏེ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།