མི་འཁྲུགས་པ་ལྷ་དགུའི་ཆོ་ག་ཆ་ལག་དང་བཅས་པ།
མི་འཁྲུགས་པ་ལྷ་དགུའི་ཆོ་ག་ཆ་ལག་དང་བཅས་པ་ཐར་པའི་འཇུག་ངོགས་ཞེས་བྱ་བ་བཞུགས་སོ། །
ན་མོ་གུ་རུ་བྷ་ག་ཝ་ཏི་ཨཀྵོ་བྷྱཿ སྤྲོས་ཀུན་ཉེར་ཞིའི་དབྱིངས་ལས་སྙིང་རྗེའི་མདངས། །དག་པའི་འཁོར་ལོ་སྒྱུ་མའི་རྣམ་རོལ་བ། །བཅོམ་ལྡན་མི་བསྐྱོད་རྒྱལ་བའི་དབང་པོ་དང༌། །དབྱེར་མེད་བླ་མ་མཆོག་ལ་མགོས་ཕྱག་འཚལ། །མི་བཟད་ལས་ཉོན་ཆུ་བོ་འབུམ་འདུས་ཏེ། །སྡུག་བསྔལ་རྦ་ཀློང་འཁྲུགས་པ་སྲིད་པའི་མཚོ། །བརྒལ་བྱེད་ཐབས་མཁས་གྲུ་གཟིངས་ཟླ་མེད་པ། །འདི་ཡི་བསྙེན་བསྒྲུབ་དང་མཚུངས་གཞན་ཡོད་མིན། །དེ་ཕྱིར་བདག་བློ་ཀུ་ཤའི་འདབ་མ་ཡིས། །དམ་པའི་མན་ངག་བདུད་རྩིའི་བསང་གཏོར་གྱིས། །གདུང་སེལ་མཆོད་སྦྱིན་བགྱིད་དོ་བློ་ལྡན་རྣམས། །སྲིད་པའི་ཚ་གདུང་བཅིལ་བསླད་བསྟེན་པར་མཛོད། །འདིར་ངན་སོང་གསུམ་གྱི་སྐྱེ་སྒོ་འགོག་པར་བྱེད་ཅིང༌། ལས་ཀྱི་སྒྲིབ་པ་མཐའ་དག་དྲུངས་ནས་འབྱིན་པ། བྱ་རྒྱུད་རྡོ་རྗེའི་རིགས་ཀྱི་བདག་པོ།
བཅོམ་ལྡན་འདས་མི་འཁྲུགས་པའི་སྒོ་ནས་རང་གཞན་གྱི་དོན་རླབས་པོ་ཆེ་སྒྲུབ་པར་བྱེད་པ་ལ། ཐོག་མར་བསྙེན་པ་ཇི་ལྟར་བྱེད་པའི་ཚུལ་དང༌། དེ་ནས་དཀྱིལ་འཁོར་སྒྲུབ་ཅིང་མཆོད་དེ་དབང་བླང་བ། ཁྲུས་དབང་སོགས་ཀྱི་སྒོ་ནས་གཞན་རྗེས་སུ་འཛིན་པའི་ཚུལ། སྦྱིན་སྲེག་གི་ཆོ་ག་དང་བཞི། དང་པོ་ནི་གནས་ཁང་བྱི་དོར་བྱས་ལ། མི་འཁྲུགས་པའི་སྐུ་བྲིས་འབུར་ཅི་རིགས་སོགས་སྐུ་གསུང་ཐུགས་ཀྱི་རྟེན་བཀྲམ། བདག་བསྐྱེད་ཀྱི་མཆོད་པ་དང༌། སྔོན་འགྲོའི་མཆོད་གཏོར། གཏོར་མགྲོན་ལ་འབུལ་རྒྱུའི་དཀར་གཏོར། རྡོར་དྲིལ་སོགས་མཁོ་བའི་ཡོ་བྱད་རྣམས་འདུ་བྱས་ཏེ། བསང་ཆུ་བསྒྲུབས་ནས་ཁྲུས་བྱས། བགེགས་གཏོར་དང་གཞི་བདག་གཏོར་མ་བསྔོས། ཐེག་པ་ཆེན་པོའི་གསོ་སྦྱོང་ཡང་གྲུབ་ན་མཚམས་འདིར་བྱ། དེ་ནས་བདེ་བའི་སྟན་ལ་འཁོད་དེ་སྐྱབས་སེམས་སྔོན་དུ་བཏང་ལ། ལག་པའི་རྒྱབ་གཉིས་གཡས་པ་སྟེང་དང་གཡོན་པ་འོག་ཏུ་བྱས་ཏེ་སྦྱར། གཡས་ཀྱི་མཐེ་བོང་དང་
གཡོན་གྱི་མཐེའུ་ཆུང་གཉིས་དང༌། གཡོན་གྱི་མཐེ་བོང་དང་གཡས་ཀྱི་མཐེའུ་ཆུང་གཉིས་བསྣོལ་ཏེ་ཁ་སྦྱར། གཡས་ཀྱི་སོར་མོ་ལྷག་མ་གསུམ་སྟེང་དང༌། གཡོན་གྱི་སོར་མོ་ལྷག་མ་གསུམ་འོག་ཏུ་བསྒྲེང་སྟེ་མཛུབ་སྲིན་གཉིས་ཀྱི་རྩེ་གུང་མོའི་ཚིགས་དང་པོ་ལ་གཏད་ནས་རྡོ་རྗེ་རྩེ་གསུམ་པའི་དབྱིབས་ལྟ་བུ་བྱས་པ་རྡོ་རྗེའི་རིགས་ཀྱི་དམ་རྒྱ་ལྟེ་བའི་ཐད་ཀར་བཅིངས་ནས། ཨོཾ་བཛྲ་ཨུད་བྷ་ཝ་ཡེ་སྭཱཧཱ། ཞེས་བརྗོད། རང་ཉིད་སྐད་ཅིག་གིས་བཅོམ་ལྡན་འདས་རྡོ་རྗེ་མི་འཁྲུགས་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་གཡས་ས་གནོན་དང༌། གཡོན་མཉམ་གཞག་གི་སྟེང་ན་རྡོ་རྗེ་བསྣམས་པ། འཁོར་ལོས་བསྒྱུར་བའི་ཆ་བྱད་ཅན་རྡོ་རྗེའི་སྐྱིལ་ཀྲུང་གིས་བཞུགས་པར་གྱུར། སྔོན་འགྲོའི་མཆོད་གཏོར་བྱིན་གྱིས་བརླབ་པ་ནི། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་མཆོད་པ་དང་གཏོར་མ་རྣམས་ཕུལ་དུ་བྱུང་བའི་ལྷ་རྫས་སུ་གྱུར། ཨོཾ་ཨཱཿ ཧཱུཾ། ལན་གསུམ་བརྗོད། མགོན་པོ་ཀུན་གཤེགས་གདན་ལ་བཞུགས། །ད་ལྟ་སྙིགས་མ་ལྔ་ཡི་དུས། །གཤེགས་ཤིང་བཞུགས་པའི་གནས་ངན་ཡང༌། །ཤཱཀྱའི་བསྟན་པ་བསྲུང་བ་དང༌། །བདག་ཅག་རྣམས་ལ་ཕན་གདགས་ཕྱིར། །གནས་འདི་ཉིད་དུ་གཤེགས་སུ་གསོལ། །ཨེ་ཧྱ་ཧི་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ས་མ་ཡེ་སྭཱཧཱ། ཞེས་སྤྱན་དྲངས། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ། པཱདྱཾ། པུཥྤེ། དྷཱུ་པེ། ཨ་ལོ་ཀེ །གནྡྷེ། ནཻ་ཝཱི་ཏྱེ། ཤཔྟ་པྲ་ཏཱིཙྪ་སྭཱཧཱ།
ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ན་མཿ སརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ སརྦ་ཏད་ཁཾ་ཨུདྒ་ཏེ་སྥ་ར་ན་ཧི་མཾ་ག་ག་ན་ཁཾ་གྲྀ་ཧྣེ་དམ་བ་ལིཾ་ཏེ་སྭཱཧཱ། ཞེས་པ་ལན་གསུམ་གྱིས་གཏོར་མ་ཕུལ། ཤར་ཕྱོགས་རྡོ་རྗེ་ཅན་ཏེ་ལྷ་ཚོགས་བཅས། །གཏོར་མ་ཕུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་སྟེ། །དབང་ལྡན་ལྷ་སྟེ་འབྱུང་པོའི་བདག་པོ་དང༌། །སྟེང་གི་ཉི་ཟླ་ཚངས་པ་ཆེན་པོ་དང༌། །ལྷ་རྣམས་ཀུན་དང་ས་ཡི་ཀླུ་རྣམས་དང༌། །རི་ཡི་ལྷ་དང་གནོད་སྦྱིན་ཚོགས་བཅས་ལ། །སོ་སོ་སོ་སོར་གཏོར་མ་ཕུལ་བ་རྣམས། །རབ་ཏུ་དགྱེས་པ་ཡིས་ནི་བཞེས་ནས་ཀྱང༌། །རང་རང་ཕྱོགས་སུ་ལེགས་པར་བཞུགས་ནས་སུ། །རང་གི་བུ་སྨད་མཛའ་བཤེས་གཉེན་འདུན་དང༌། །ནང་མི་དམག་དང་དཔུང་བཅས་ཐབས་གཅིག་ཏུ། །མེ་ཏོག་དྲི་དང་བདུག་པ་གཏོར་མར་བཅས། །འདི་རྣམས་བཏུང་ཞིང་ལེགས་པར་གསོལ་ནས་ཀྱང༌། །བདག་གི་ལས་འདི་འབྲས་བུ་མཆིས་པར་མཛོད། །ཕྱོགས་སྐྱོང་འཁོར་དང་བཅས་པ་རྣམས་ཀྱིས་བདག་གི་དགེ་བའི་བྱ་བ་རྣམས་མཐར་ཕྱིན་པ་དང་དེའི་བར་ཆད་ཞི་བའི་འཕྲིན་ལས་མཛོད་ཅིག །ཕྱོགས་སྐྱོང་འཁོར་བཅས་རང་གནས་སུ་གཤེགས་པར་གྱུར། །བདག་བསྐྱེད་ཀྱི་མཆོད་པ་བྱིན་གྱིས་བརླབ་པ་ནི། ཨ་མྲྀ་ཏས་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་
རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་མཆོག །ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། སོ་སོའི་ཕྱག་རྒྱ་དང་བཅས་པས། ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པཱདྱཾ་སྭཱཧཱ། ཨོཾ་བཛྲ་པུཥྤེ་སྭཱཧཱ། ཞེས་སོགས་ནས། ཨོཾ་བཛྲ་ཤཔྟ་སྭཱཧཱ། ཞེས་པའི་མཐར། ཨོཾ་དྷརྨཱ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ། པྲ་ཙ་ལི་ནི། པྲཛྙཱ་པ་ར་མི་ཏཱ་ནཱ་ད་སྭ་བྷཱ་ཝེ། བཛྲ་སཏྭ་སནྟོ་ཥ་ནི་ཧཱུཾ་ཧཱུཾ་ཧཱུཾ་ཨ་ཁཾ་སྭཱཧཱ། སོགས་རོལ་མོ་དང་བཅས་པས་བྱིན་དབབ། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་བསྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །བདག་གིས་རྫོགས་པའི་བྱང་ཆུབ་ཕྱིར། །དེང་ནས་བྱང་ཆུབ་སེམས་བསྐྱེད་དོ། །ཞེས་སོགས་ལན་གསུམ་བྱ། ཚོགས་ཞིང་མཆོད་པ་ནི། རང་ཉིད་རྡོ་རྗེ་མི་འཁྲུགས་པར་གསལ་བའི་ཐུགས་ཀར་པད་ཟླའི་སྟེང་དུ་ཧཱུཾ་སྔོན་པོ། དེ་ལས་འོད་ཟེར་འཕྲོས་པས། བླ་མ་དང་རྡོ་རྗེ་མི་འཁྲུགས་པའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ རྡོ་རྗེ་བསྡུ་བའི་ཕྱག་རྒྱས་སྤྱན་དྲངས། ཐལ་མོ་སྦྱར་ཏེ། ན་མོ་གུ་རུ་བྷྱཿ ན་མཿ སརྦ་ཏ་ཐཱ་ག་ཏ་བཛྲ་ཨཀྵོ་བྷྱཿ མཎྜ་ལ་ས་པ་རི་ཝཱ་ར་བྷྱཿ ཞེས་པས་ཕྱག་བྱ། ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱཿ མནྜ་
ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཞེས་སོགས་ནས། ཤཔྟ་པྲ་ཏཱིཙྪ་སྭཱཧཱ། ཞེས་པས་མཆོད། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་གྱིས་རྒྱུན་བཤགས་བྱ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་སོགས་ཚད་མེད་བཞི་བསྒོམས། ཚོགས་ཞིང་རྣམས་རང་གནས་སུ་གཤེགས་པར་བསམ། དངོས་གཞི་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་དང་བསྒོམ་བྱའི་ལྷ་གཉིས་གང་ཟག་དང་ཆོས་ཀྱི་བདག་མཐའ་དག་གིས་སྟོང་པའི་སྟོང་པ་ཉིད་དུ་གྱུར། སྟོང་པའི་ངང་ལས་བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པར་རྟོག་པ་གཉིས་སུ་སྣང་བ་ཐམས་ཅད་དབེན་པའི་རང་གི་སེམས་དོན་དམ་པའི་བྱང་ཆུབ་ཀྱི་སེམས་དེ་ཉིད་ཟླ་བའི་དཀྱིལ་འཁོར་ཡོངས་སུ་རྫོགས་པའི་རྣམ་པར་གྱུར། དེའི་སྟེང་དུ་ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨཱ་པ་རཾ་པ་རཱ་ཎི་མི་སརྦ་སཏྭཱ་ནཉྩ་སྭཱཧཱ། ཞེས་པའི་སྔགས་ཀྱི་རང་གདངས་ཀྱི་སྒྲ་དྲིལ་བུའི་སྒྲ་བཞིན་གྲགས་པར་གྱུར། སྔགས་ཀྱི་གདངས་གྲགས་པ་དེ་ཉིད་ཟླ་བའི་དཀྱིལ་འཁོར་གྱི་སྟེང་དུ་ཡིག་འབྲུ་བྲིས་པའི་རྣམ་པ་ཅན་དུ་འཁོད་པར་གྱུར་པ་ལས་རྡོ་རྗེ་སྔོན་པོ་རྩེ་ལྔ་པའི་ལྟེ་བར་སྔགས་ཀྱིས་མཚན་པར་གྱུར། ཟླ་བ་ཕྱག་མཚན་སྔགས་དང་བཅས་པའི་འོད་ཟེར་གྱི་མཐུ་ལས་རྒྱལ་བ་ཐམས་ཅད་མཆོད་ཅིང༌། ཐུགས་རྗེའི་ཆར་རྒྱུན་གྱིས་དམྱལ་བ་སོགས་ཀྱི་སྡུག་བསྔལ་ཐམས་ཅད་སྦྱངས། ཚུར་འདུས་ཡོངས་སུ་གྱུར་པ་
ལས། པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། བདག་ཉིད་བཅོམ་ལྡན་འདས་རྡོ་རྗེ་མི་འཁྲུགས་པ་སྐུ་མདོག་ཨིནྡྲ་ནཱི་ལའི་ལྷུན་པོ་ལ་ཉི་མ་ཤར་བ་ལྟར་རབ་ཏུ་དྭངས་ཤིང་འོད་ཟེར་ཁ་དོག་སྣ་ཚོགས་པ་འཕྲོ་བ་ཞལ་གཅིག་ཕྱག་གཉིས་པ་གཡས་ས་གནོན་དང༌། གཡོན་མཉམ་གཞག་གི་ཕྱག་རྒྱ་མཛད་པའི་སྟེང་ན་རྡོ་རྗེ་རྩེ་ལྔ་པ་འཛིན་པ། སྤྱན་དཀྱུས་རིང་བའི་སྤྱན་གཉིས་སེམས་དཔའི་ལྟ་སྟངས་ཀྱིས་འགྲོ་བ་མཐའ་དག་ལ་ཐུགས་རྗེའི་སྤྱན་གྱིས་གཟིགས་ཤིང་ཞལ་འཛུམ་ཞིང་རབ་ཏུ་ཞི་བ། དབུ་སྐྲ་རལ་པའི་ཐོར་ལྕོག་སྤྱི་བོར་བཅིངས་ཤིང་ལྷག་མ་ཅུང་ཟད་ལྕང་ལོའི་ཚུལ་དུ་འཕྱང་བ། ལྷ་རྫས་ལས་གྲུབ་པའི་དར་གྱི་སྟོད་གཡོགས་དང་ཤམ་ཐབས་གསོལ་བ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། དམ་ཚིག་གི་ཕྱག་རྒྱས་གནས་གསུམ་དུ་རེག་ལ། ཀཾ་ཀ་ནི་ཚར་རེ་རེ་བརྗོད་ཅིང་བྱིན་གྱིས་བརླབས། རང་གི་སྙིང་གའི་ཧཱུཾ་ལས་འོད་ཟེར་འཕྲོས་པས། རང་བཞིན་གྱི་གནས་ནས་བཅོམ་ལྡན་འདས་རྡོ་རྗེ་མི་འཁྲུགས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་པ་ལ། ཨོཾ་ཨརྒྷཾ་སྭཱཧཱ། ཞེས་པས་མཆོད་ཡོན་ཕུལ། ཛཿ ཧཱུཾ་བཾ་ཧོཿ དེ་རྣམས་རང་ཉིད་ལ་ཐིམ་པ་འོད་དུ་ཞུ། རང་གི་ཐུགས་ཀར་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་དབུས་སུ་ཧཱུཾ་ལས་མི་བསྐྱོད་པ་སྔོན་པོ་གཡས་ས་གནོན། གཡོན་མཉམ་གཞག་གི་ཕྱག་རྒྱ་
མཛད་པ། ཤར་དུ་ཨོཾ་ལས་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་མཛད་པ། ལྷོར་ཏྲཱཾ་ལས་རིན་ཆེན་འབྱུང་ལྡན་སེར་པོ་གཡས་མཆོག་སྦྱིན། གཡོན་མཉམ་གཞག་གི་ཕྱག་རྒྱ་མཛད་པ། ནུབ་ཏུ་ཧྲཱིཿ ལས་འོད་དཔག་མེད་དམར་པོ་ཏིང་ངེ་འཛིན་གྱི་ཕྱག་རྒྱ་མཛད་པ། བྱང་དུ་ཨཱཿ ལས་དོན་ཡོད་གྲུབ་པ་ལྗང་གུ་གཡས་སྐྱབས་སྦྱིན་གཡོན་མཉམ་གཞག་གི་ཕྱག་རྒྱ་མཛད་པ། ཐམས་ཅད་ཀྱང་རིན་པོ་ཆེའི་རྒྱན་དང་དར་གྱི་ན་བཟའ་ཅན། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། མཚན་དང་དཔེ་བྱད་ཀྱིས་སྤྲས་ཤིང༌། འོད་ཟེར་སྣ་ཚོགས་འཕྲོ་བའོ། །སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་དབང་གི་ལྷ་རྣམས་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཨཱཿ ཧཱུཾ། ཞེས་གསུངས་ཤིང༌། བདུད་རྩིའི་ཆུས་དབང་བསྐུར་ལུས་གང་དྲི་མ་དག་ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་མི་བསྐྱོད་པས་དབུ་བརྒྱན་ཅིང་དབང་གི་ལྷ་རྣམས་རང་ཉིད་ལ་ཐིམ་པར་གྱུར། དེ་ནས། ཨརྒྷཾ་སོགས་ཀྱིས་མཆོད། བསྟོད་པ་མཉམ་མེད་མའམ་བསྡུ་ན། ཆོས་དབྱིངས་རྣམ་དག་མཁའ་ཀློང་ཡངས་པ་ལས། །དཔལ་ལྡན་ལོངས་སྤྱོད་རྫོགས་སྐུའི་བཅུ་གཉིས་བདག །དངོས་གྲུབ་ཀུན་གྱི་འོད་སྟོང་རབ་འགྱེད་པའི། །རྡོ་རྗེའི་རིགས་ཀྱི་བདག་པོར་ཕྱག་འཚལ་བསྟོད། །ཀུན་གསལ་ལན་བརྒྱར་མེ་ལྕེས་རབ་བཞུས་པ། །བྱེད་པོས་པིར་གྱིས་
ལྷུན་པོར་བྱུགས་པས་ཀྱང༌། །ཁྱོད་སྐུའི་ཆ་ཤས་ལ་འགྲན་སྐལ་བ་ཡིས། །དབེན་པར་སྟོན་པ་བཅོམ་ལྡན་སྐུ་ལ་བསྟོད། །ཁྱོད་སྐུ་མཚན་དང་དཔེ་བྱད་བཟང་པོ་ཡིས། །ནམ་ཡང་ཡིད་གཅུགས་མཛའ་བ་མ་བཏང་ཚེ། །རླུང་གི་རྒྱལ་མཚན་མཛེས་མ་ཕྲག་དོག་གིས། །ལྷ་ལམ་གཞོན་ནུར་འཁྱུད་པའི་ངལ་བ་བསྟེན། །སྒྲིབ་གཉིས་ཟད་པར་སྤངས་ཀྱང་རྒོད་པ་སོགས། །ཆགས་པའི་ཉམས་ཀྱི་རྣམ་འགྱུར་ཅི་ཡང་སྟོན། །སྣ་ཚོགས་སྤྲོས་པའི་འཆིང་ལས་རྟག་གྲོལ་ཀྱང༌། །དར་ཟབ་རིན་ཆེན་རྒྱན་གྱིས་མངོན་པར་མཛེས། །གང་གི་རྣལ་འབྱོར་མེ་ཡིས་སྒྲིབ་པའི་ཤིང༌། །མ་ལུས་བསྲེག་ཀྱང་ཐུགས་རྗེའི་ཆར་རྒྱུན་གྱིས། །འཇིགས་རུང་ངན་སོང་ཚ་གདུང་ཀུན་སེལ་བའི། །བཅོམ་ལྡན་མི་འཁྲུགས་པ་ལ་ཕྱག་འཚལ་བསྟོད། །རང་གི་ཐུགས་ཀའི་ཟླ་གདན་ལ་སྔགས་འཕྲེང་དཀར་པོས་བསྐོར་བ་ལས་འོད་ཟེར་འཕྲོས། རྒྱལ་བ་སྲས་བཅས་མཆོད་ཅིང༌། དེ་དག་གི་ཡོན་ཏན་མ་ལུས་པ་གཟུངས་སྔགས་ལ་ཐིམ། བདུད་རྩིའི་རྒྱུན་གྱིས་སྡིག་སྒྲིབ་འགལ་རྐྱེན་འགྲོ་དྲུག་གི་སྡུག་བསྔལ་མ་ལུས་པ་སྦྱངས་པར་གྱུར་པར་བསམ་ལ། ཀཾ་ཀ་ནི་ཅི་ནུས་བཟླས་པའི་མཐར། མགོན་པོ་ཐུགས་རྗེ་ཆེན་པོ་དང་ལྡན་པས་བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ་པས། བདག་གི་སྙིང་ག་ནས་ཡེ་ཤེས་པ་རྣམས་མདུན་གྱི་ནམ་མཁར་བྱོན་པར་གྱུར་པར་བསམ་མོ། །དེ་ལ་མཆོད་བསྟོད་གོང་ལྟར་བྱས་ལ། བཅོམ་ལྡན་འདས་བདག་དང་
སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་ཏུ་གསོལ། ཞེས་གསོལ་བ་བཏབ། རྡོ་རྗེ་སེམས་དཔའི་ཡིག་བརྒྱ་ལན་གསུམ་གྱི་མཐར། ནོངས་པ་བཟོད་པར་གསོལ། ཨོཾ་བཛྲ་མུཿ ཡེ་ཤེས་པ་གཤེགས། རང་དམ་ཚིག་པའི་ང་རྒྱལ་གྱིས་འཁོད་པར་བསམ། རྒྱུན་འཁྱེར་ལ། བདག་བསྐྱེད་རྐྱང་པ་བྱེད་ཚེ་ཐུན་གྱི་མཇུག་ཏུ། གཏོར་མ་འབུལ་བར་འདོད་ན་ཐུན་ཐ་མའི་བཟླས་པའི་མཐར་གཏོར་མ་སྔོན་འགྲོའི་སྐབས་ལྟར་བྱིན་གྱིས་བརླབ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། བཅོམ་ལྡན་འདས་རྡོ་རྗེ་མི་འཁྲུགས་པའི་ལྷ་ཚོགས་མདུན་གྱི་ནམ་མཁར་སྤྱན་དྲངས། ལྗགས་རྡོ་རྗེའི་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་བསམས་ལ། ཨོཾ་ཨཀྵོ་བྷྱཿ མཎྜ་ལ་ས་པ་རི་ཝཱ་ར་ཨ་ཀཱ་རོ་མུ་ཁཾ་ཞེས་པ་ནས། བ་ལིཾ་ཏ་ཡེ་སྭཱཧཱ། ཞེས་པ་ལན་གསུམ་གྱིས་འབུལ། མཆོད་བསྟོད་མདོར་བསྡུས་བྱ། བཅོམ་ལྡན་འདས་འཁོར་དང་བཅས་པས་བདག་སོགས་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་ཏུ་གསོལ། ཞེས་གསོལ་བ་གདབ། ཡིག་བརྒྱ་ལན་གསུམ། ནོངས་པ་བཟོད་གསོལ་བྱས་ལ། ཨོཾ་བཛྲ་མུཿ བདག་བསྐྱེད་ཀྱི་ཡེ་ཤེས་པ་དང༌། གཏོར་མགྲོན་རང་གནས་སུ་གཤེགས་པར་གྱུར། ཅེས་བརྗོད། དགེ་བ་འདི་ཡིས་མྱུར་དུ་བདག །མི་འཁྲུགས་རྒྱལ་པོ་འགྲུབ་གྱུར་ནས། །ཞེས་སོགས་བསྔོ་སྨོན་བྱ། ཐུན་མཚམས་སུ་ཡང་གང་སྣང་ཐམས་ཅད་མི་འཁྲུགས་པའི་སྐུ་དང་སྒྲ་ཐམས་ཅད་གཟུངས་སྔགས་ཀྱི་གདངས། དྲན་རྟོག་ཐམས་ཅད་ཟབ་གསལ་གཉིས་མེད་ཀྱི་ཡེ་ཤེས་ཀྱི་རོལ་པར་ཤེས་པའི་སྒོ་ནས་དགེ་སྦྱོར་དང་མ་བྲལ་བར་བྱ་ཞིང༌།
ཁྲུས་དང་གཙང་སྦྲ་ལ་གནས་པ་སོགས་བྱ་སྤྱོད་ཀྱི་བསྙེན་པ་བྱེད་པའི་སྐབས་ཀྱི་སྤྱོད་ལམ་རྒྱས་པར་སྔགས་རིམ་སོགས་ནས་འབྱུང་བ་ལྟར་ལག་ཏུ་བླངས་ན་ཤིན་ཏུ་ལེགས་སོ། །༈ གཉིས་པ་དཀྱིལ་འཁོར་བསྒྲུབ་ཅིང་དབང་བླང་བ་ལ། གང་དུ་དབང་བསྐུར་བའི་དཀྱིལ་འཁོར་ནི་སྤྱིར་སྒྲས་བརྗོད་ཀྱི་དབྱེ་བས་བདུན་དུ་གསུངས་ཤིང༌། བུམ་དབང་གང་དུ་འཐོབ་པའི་དཀྱིལ་འཁོར་ལ་ཡང༌། གྲུབ་ཆེན་དྲིལ་བུ་ཞབས་ཀྱིས། འོན་ཀྱང་དཀྱིལ་འཁོར་དེའི་རང་བཞིན། །ཅི་ཡིན་འདིར་ནི་ཤེས་པར་བྱ། །རི་མོས་གནས་པའི་ལས་དང་ནི། །ཐིག་ལས་ཚོན་དགྱེའི་རིམ་པ་བསྟན། །འགྲོ་བ་འདི་ཉིད་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་རི་མོར་གནས་པའི་ལས་ཀྱི་རང་བཞིན་བྲིས་སྐུའི་དཀྱིལ་འཁོར། ཐིག་བཏབ་སྟེ་ཚོན་དགྱེ་བའི་རིམ་པས་གྲུབ་པ་རྡུལ་ཚོན་གྱི་དཀྱིལ་འཁོར། འགྲོ་བ་དག་ལ་རང་བཞིན་གྱིས་གནས་པ་ལུས་ཀྱི་དཀྱིལ་འཁོར་གསུམ་དུ་གསུངས་སོ། །འོན་ཀྱང་རྒྱུད་སྡེ་གོང་འོག་ཐམས་ཅད་དུ་གདུལ་བྱའི་ཚོགས་རྫོགས་པ་སོགས་དགོས་པ་དུ་མའི་དབང་གིས་རྡུལ་ཚོན་གྱིས་དཀྱིལ་འཁོར་བྲིས་ནས་དེར་དབང་བསྐུར་བའི་རྣམ་གཞག་རྒྱས་པར་གསུངས་པའི། དེའི་དབང་དུ་བྱས་ཏེ་འགོད་པ་ལ་གསུམ། སའི་ཆོ་ག །སྟ་གོན་གྱི་ཆོ་ག །དངོས་གཞིའི་ཆོ་གའོ། །དང་པོ་ལ། ས་བརྟག་པ། བསླང་བ། སྦྱང་བ། བཟུང་བ། བསྲུང་ཞིང་བྱིན་གྱིས་བརླབས་པ་དང་ལྔ། དང་པོ་ལ་ཡང༌། ཕྱོགས་དང༌། ཁ་དོག་དང༌། ཁུང་བུ་བརྐོས་ཏེ་ས་དང་ཆུས་བཀང་ནས་བརྟག་ཚུལ་སོགས་ཡོད་ཀྱང་ཕལ་ཆེར་ལ་ཉེར་མཁོ་ཆུང་བས་མ་བྲིས། གཉིས་པ་ལ། གནས་ཀྱི་བདག་པོ་མངོན་པ་རྒྱལ་པོ་སོགས་དང༌། མི་མངོན་པ་ཞིང་སྐྱོང་སོགས་ལས་བསླང་བ་གཉིས་ཀྱི་ཕྱི་མ་ལ་ཡང༌། གཞི་བདག་དང༌། ས་ལྷ་ལས་བསླང་བ་གཉིས་ཀྱི་དང་པོ་ནི། བདག་བསྐྱེད་རྒྱས་པ་འམ། བསྡུ་ན། རང་ཉིད་སྐད་ཅིག་གིས་བཅོམ་ལྡན་འདས་རྡོ་རྗེ་མི་འཁྲུགས་
པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་གཡས་ས་གནོན། གཡོན་མཉམ་གཞག་གི་ཕྱག་རྒྱའི་སྟེང་ན་རྡོ་རྗེ་རྩེ་ལྔ་པ་འཛིན་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར་པར་བསམ་ནས། གཞི་བདག་གི་མཆོད་གཏོར་བཤམས་པ་རྣམས་གོང་དུ་བཤད་པའི་སྔོན་འགྲོའི་མཆོད་གཏོར་བཞིན་བྱིན་གྱིས་བརླབ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་གཞི་བདག་འཁོར་དང་བཅས་པ་སྤྱན་དྲངས། ཨོཾ་བྷུ་མི་པ་ཏི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། ནས། ཤཔྟའི་བར་གྱིས་མཆོད། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཏྱ་ནུཏྤནྣ་ཏྭཱཏྟ། ཨོཾ་ཨཱཿ ཧཱུཾ་ཕཊ་སྭཱཧཱ། ཞེས་པ་ལན་གསུམ་གྱིས་གཏོར་མ་ཕུལ་ནས། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བགྱི། །དཀྱིལ་འཁོར་དོན་དུ་ཁྱེད་ཀྱིས་སྩོལ། །ཞེས་ལན་གསུམ་བརྗོད། དཀྱིལ་འཁོར་གྱི་ལས་ཅི་བདེ་བར་གྱིས་ཤིག །ཅེས་དགྱེས་བཞིན་དུ་གནང་བ་བྱིན་ནས་རང་གནས་སུ་གཤེགས་པར་གྱུར་པར་བསམས་ནས། ཨོཾ་བཛྲ་ཨ་མྲྀ་ཏ་ཅེས་པ་བཟླས་པའི་ཡུངས་ཀར་དང་ཆུ་དང་ཐལ་བས་ལན་རེ་གཏོར་ལ་བསང་ངོ༌། །གཉིས་པ་ས་ལྷ་ལ་བསླང་བ་ནི། དཀྱིལ་འཁོར་གང་དུ་འོང་བའི་དབུས་སུ་དྲིའི་ཐིག་ལེའི་སྟེང་དུ་མེ་ཏོག་གི་ཚོམ་བུ་བཀོད་མཆོད་པ་བྱིན་བརླབ་སྔར་བཞིན་ལ། ཨོཾ་འོད་དུ་ཞུ་བ་ལས་བྱུང་བའི་ཞབས་བསིལ་ཞལ་བསིལ་མཆོད་ཡོན། མེ་ཏོག་ཅེས་སོགས་དང༌། ཨོཾ་པཱ་ཏྱཾ་ཨཱཿ ཧཱུཾ། ཨོཾ་ཨཉྩ་མཱ་ནཾ་ཨཱཿ ཧཱུཾ། ཨོཾ་ཨརྒྷཾ་ཨཱཿ ཧཱུཾ། ཨོཾ་པུཥྤེ་ཨཱཿ ཧཱུཾ། ནས། ཤཔྟའི་བར་བརྗོད་ཅིང༌། གཏོར་མ་ཡེ་ཤེས་ཀྱི་བདུད་རྩིར་བྱིན་གྱིས་བརླབ། དཀྱིལ་འཁོར་གྱི་སའི་དབུས་སུ་བཾ་ལས་བྱུང་བའི་སའི་ལྷ་མོ་སེར་མོ་
ཞལ་གཅིག་ཕྱག་གཉིས་མ། དགའ་བ་དང་ལྡན་པའི་ཐུགས་ཅན་ཞི་བ། ན་བཟའ་དཀར་པོ་མནབས་ཤིང་རྒྱན་ཐམས་ཅད་ཀྱིས་བརྒྱན་པ། ལུས་ཕྱེད་འཐོན་པ། གཡས་མི་འཇིགས་པའི་ཕྱག་རྒྱ་དང་གཡོན་གསེར་གྱི་བུམ་པ་བསྣམས་ཤིང་པདྨའི་གདན་ལ་བཞུགས་པར་གྱུར། རང་གི་ལག་པ་གཡས་པའི་མཐིལ་དུ་ཟླ་བའི་སྟེང་དུ་ཧཱུཾ་ཧཱུཾ་ཧཱུཾ། སོར་མོའི་རྩེ་མོས་ས་ལ་ལན་གསུམ་བསྣུན་པའི་སྒྲ་དང་ཧཱུཾ་གི་འོད་ཟེར་གྱིས་བསྐུལ་བས་ས་གཡོས་པས་གསེབ་ནས་སའི་ལྷ་མོ་ཡེ་ཤེས་པ་སྤྱན་དྲངས། དམ་ཚིག་པ་དང་གཉིས་སུ་མེད་པར་གྱུར། ཕྱག་རྒྱ་དང་བཅས། ཨོཾ་པྲི་ཐི་ཝཱི་དེ་ཝི་བྷྱཿ ས་པ་རི་ཝཱ་ར་པཱ་ཏྱཾ་པྲ་ཏཱིཙྪ་ཧཱུཾ་སྭཱཧཱ་དང༌། པཱ་ཏྱཾ་གྱི་གནས་སུ། ཨཉྩ་མ་ཎཾ། ཨརྒྷཾ། པུཥྤེ་སོགས་བཅུག་པས་མཆོད། ཨ་ཀཱ་རོ་ལན་གསུམ་གྱིས་གཏོར་མ་ཕུལ། ལག་པ་གཡས་རྡོ་རྗེ་གསོར་ཞིང་གཡོན་དྲིལ་བུ་དཀྲོལ་བ་དང་བཅས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང༌། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དབང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་དཔུང་བཅོམ་པ། །དེ་ལྟར་བདག་གིས་བདུད་ཀྱི་སྟོབས། །བཅོམ་ནས་དཀྱིལ་འཁོར་བྲི་བར་བྱ། །ཞེས་ལན་གསུམ་བརྗོད། དཀྱིལ་འཁོར་གྱི་ལས་ཇི་ལྟར་བདེ་བར་གྱིས་ཤིག ། ཅེས་གནང་བ་བྱིན་ནས་ནམ་མཁར་བཞུགས་པར་གྱུར་པར་བསམ། གསུམ་པ་སྦྱང་བ་ལ། རྫས་སྔགས་ཏིང་ངེ་འཛིན་གསུམ་གྱིས་ཇི་ལྟར་སྦྱང་ཚུལ་ནི། རང་རྡོ་རྗེ་མི་འཁྲུགས་པའི་ང་རྒྱལ་ལ་གནས་པས། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཅེས་བཟླས་པའི་ཡུངས་ཀར་དང་ཆུ་དང་ཐལ་བས་དཀྱིལ་འཁོར་གྱི་ས་ལ་གཏོར་ཞིང་སྔགས་དེ་བཟླས་པའི་
བ་བྱུང་ལྔས་ཤར་ནས་བརྩམས་ཏེ་བྱུགས་ལ། དྲིའི་ཆུས་ཀྱང་གཏོར། ལག་པ་གཡས་པ་ས་གནོན་གྱི་ཕྱག་རྒྱའི་རྩེ་མོས་ས་ལ་རེག་ནས། ཨོཾ་བྷུ་ཁཾ། ས་གཞི་སྟོང་པ་ཉིད་དུ་གྱུར། ཧཱུཾ་ལཾ་ཧཱུཾ། ས་གཞི་རྡོ་རྗེའི་རང་བཞིན་དུ་གྱུར། ཨོཾ་མེ་དཱི་ནི་བཛྲ་བྷ་བ་བཛྲ་བྷན་དྷ་ཧཱུཾ། ས་གཞི་རྡོ་རྗེའི་རང་བཞིན་དུ་བཅིངས་ཏེ་བརྟན་པར་གྱུར། ཨོཾ་ཧ་ན་ཧ་ན་བཛྲ་ཀྲོ་དྷ་ཧཱུཾ་ཕཊ། རྡོ་རྗེ་ཁྲོ་བོས་བགེགས་རྣམས་བཅོམ་པར་གྱུར། ཨོཾ་ཨཱ་ཧཱུཾ་ཤོ་དྷ་ཡ་ཤོ་དྷ་ཡ། རཀྵ་རཀྵ་ཧཱུཾ་ཧཱུཾ་ཕཊ། རྡོ་རྗེ་གསུམ་གྱིས་སའི་ཉེས་སྐྱོན་སྦྱང་ཞིང་བསྲུང་བར་གྱུར། དེ་ནས། སྔར་ནམ་མཁར་བཏེག་པའི་སའི་ལྷ་མོ་སྤྱན་དྲངས། མདུན་དུ་སའི་དབུས་སུ་བཞུགས་པར་གྱུར་པར་བསམས་ལ། ཨོཾ་པྲི་ཐི་ཝི་དེ་ཝཱི་བྷྱཿ ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། ཨོཾ་པྲི་ཐི་ཝི་དེ་ཝཱི་བྷྱཿ ས་པ་རི་ཝཱ་ར་པཱདྱཾ་པྲ་ཏཱིཙྪ་ཧཱུཾ་སྭཱཧཱ། ཨོཾ་པྲི་ཐི་ཝི་དེ་ཝཱི་བྷྱཿ ས་པ་རི་ཝཱ་ར་པུཥྤེ་པྲ་ཏཱིཙྪ་ཧཱུཾ་སྭཱཧཱ། ཨོཾ་པྲི་ཐི་ཝི་དེ་ཝཱི་བྷྱཿ ས་པ་རི་ཝཱ་ར་དྷུ་པེ། སོགས་ཀྱིས་མཆོད་ཅིང་སྔར་ལྟར་གཏོར་མ་ཕུལ། སའི་ལྷ་མོ་དགྱེས་བཞིན་དུ་དེ་ཉིད་དུ་ཐིམ་པས་བྱིན་གྱིས་བརླབ་པར་གྱུར་པར་བསམ་ནས་པད་ཀོར་བྱས་ལ། ཨོཾ་ཨཱཿ ཧཱུཾ་དང་ཡིག་བརྒྱ་བཟླའོ། །དེ་ནས་ས་ལ་སོགས་པ་སྣ་ཚོགས་པའི་ཆོས་ཐམས་ཅད་སྟོང་པ་ཉིད་དང་རོ་གཅིག་ཏུ་གྱུར་པར་མོས། འདི་ནི་བླ་ན་མེད་པའི་དག་པས་སྦྱང་བ་ཞེས་སྦྱང་བ་གཞན་ལས་མཆོག་ཏུ་བཤད་པས་མོས་པ་ཚུན་ཆད་ཀྱིས་བསྒོམ་པ་གལ་ཆེའོ། །བཞི་པ་ལ་གཉིས། ལྷའི་རྣལ་འབྱོར་བྱས་ནས་གསོལ་བ་གདབ་ཅིང་དཀྱིལ་འཁོར་འདེགས་པ་དང༌། ལངས་ཏེ་ང་རྒྱལ་བཟུང་ནས་བགེགས་ལ་བཀའ་བསྒོ་བའོ། །དང་པོ་ནི། དཀྱིལ་འཁོར་གྱི་ས་གཞིར་
མེ་ཏོག་གཅལ་དུ་བཀྲམ་པའི་དབུས་སུ་ཁ་ཤར་དུ་ཕྱོགས་པར་འདུག་སྟེ། བདག་བསྐྱེད་བཟླས་པ་ལ་ཐུག་གི་བར་རྫོགས་པར་བཏང༌། རང་གི་ཐུགས་ཀའི་ཧཱུཾ་གི་འོད་ཟེར་གྱིས་རྒྱལ་བ་སྲས་བཅས་ཐམས་ཅད་བསྒོམས་པ་དང་འདྲ་བའི་དཀྱིལ་འཁོར་པའི་རྣམ་པར་མདུན་གྱི་ནམ་མཁར་སྤྱན་དྲངས། ཨོཾ་སརྦ་ཏ་ཐ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད། བདག་ཉིད་ཀྱི་ལྕེ་ཧཱུཾ་ལས་བྱུང་བའི་རྡོ་རྗེར་གྱུར་པར་བསམས་ལ། ལག་པ་གཡས་པས་སྤོས་ཕོར་རམ་སྤོས་བཟུང་ནས། མ་ལུས་ཕྱོགས་ན་བཞུགས་པ་ཡི། །སངས་རྒྱས་རྣམས་ནི་བདག་ལ་དགོངས། །བདག་ནི་རྡོ་རྗེ་ཆེ་གེ་ཡིས། །འདིར་ནི་དཀྱིལ་འཁོར་བྲི་བར་བགྱི། །སངས་རྒྱས་ལ་སོགས་ཀུན་བྱོན་འཚལ། །དངོས་གྲུབ་འདི་ནི་ཡང་དག་སྩོལ། །ཞེས་བརྗོད་ལ་སྙན་གསན་དབབ། དེ་ནས་སྒོའི་སློབ་མ་བཞི་ཡོད་ན་ཕྱོགས་རེར་འཁོད་ནས་ཐམས་ཅད་ཀྱི་ཐུན་མོང་དུ་བླ་མ་བཅོམ་ལྡན་འདས་མི་འཁྲུགས་པར་མོས་པ་ལ། ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་མཎྜ་ལ་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། ཆོས་དབྱིངས་རང་བཞིན་ཨིནྡྲ་ནི་ལའི་མདོག །ཅེས་སོགས་ཤོ་ལོ་ཀ་གཅིག་གིས་བསྟོད། མཆོད་པ་འདི་སྔགས་རིམ་དུ་མི་འབྱུང་བས་མ་བྱས་ཀྱང་ཆད་པའི་སྐྱོན་མེད་ལ། རྒྱ་བོད་ཀྱི་དཀྱིལ་ཆོག་ཚད་ལྡན་གཞན་མང་པོར་གསུངས་པས་བྱས་ཀྱང་རུང༌། སློབ་མ་ཐམས་ཅད་ཀྱིས་ཐུན་མོང་དུ། ས་གཞི་སྤོས་ཀྱིས་ཞེས་སོགས་ཀྱིས་བླ་མ་ལ་མཎྜལ་ཕུལ། ཤར་གྱི་སློབ་མས། རང་ཉིད་རྣམ་སྣང་དཀར་པོ་ཞལ་གཅིག་ཕྱག་གཉིས་བྱང་ཆུབ་མཆོག་གི་ཕྱག་རྒྱ་ཅན་དུ་གྱུར་པས། ནམ་མཁར་གནས་པའི་དེ་བཞིན་གཤེགས་པ་རྣམས་དང་ལྷན་ཅིག་ཏུ་གསོལ་བ་ནི། དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་
བདག་མེད་པ་ཡི་མཆོག །༈ དེ་བཞིན་གཤེགས་པ་བཞིའི་ཕྱག་སྟབས་འདི་འཇམ་དཔལ་གསང་ལྡན་དང་བྱ་རྒྱུད་ཐུགས་རྗེ་ཆེན་པོ་བཅུ་གཅིག་ཞལ་གྱི་སྒྲུབ་ཐབས་ལྟར་བཀོད། ༈ དཀྱིལ་འཁོར་དམ་པ་བཤད་དུ་གསོལ། །ཞེས་བརྗོད། ལྷོའི་སློབ་མས། རང་ཉིད་རིན་འབྱུང་སེར་པོ་ཞལ་གཅིག་ཕྱག་གཉིས་མཆོག་སྦྱིན་མཉམ་གཞག་གི་ཕྱག་རྒྱ་ཅན་དུ་གྱུར་པས་ནམ་མཁར་གནས་པའི་དེ་བཞིན་གཤེགས་པ་རྣམས་དང་ལྷན་ཅིག་ཏུ་གསོལ་བ་ནི། མཚན་ཉིད་ཐམས་ཅད་ཡང་དག་རྫོགས། །མཚན་ཉིད་མིན་པ་ཐམས་ཅད་སྤངས། །ཀུན་ཏུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཞེས་བརྗོད། ནུབ་ཀྱི་སློབ་མས། རང་ཉིད་འོད་དཔག་མེད་དམར་པོ་ཞལ་གཅིག་ཕྱག་གཉིས་མཉམ་གཞག་གི་ཕྱག་རྒྱ་ཅན་དུ་གྱུར་པས་ནམ་མཁར་གནས་པའི་དེ་བཞིན་གཤེགས་པ་རྣམས་དང་ལྷན་ཅིག་ཏུ་གསོལ་བ་ནི། ཞི་བའི་ཆོས་མཆོག་ལས་བྱུང་བ། །ཡེ་ཤེས་སྤྱོད་པ་རྣམ་སྦྱོང་མཛད། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །ཞེས་བརྗོད། བྱང་གི་སློབ་མས། རང་ཉིད་དོན་གྲུབ་ལྗང་གུ་ཞལ་གཅིག་ཕྱག་གཉིས་སྐྱབས་སྦྱིན་མཉམ་གཞག་གི་ཕྱག་རྒྱ་ཅན་དུ་གྱུར་པས་ནམ་མཁར་གནས་པའི་དེ་བཞིན་གཤེགས་པ་རྣམས་དང་ལྷན་ཅིག་ཏུ་གསོལ་བ་ནི། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་ཅིང་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཤད་དུ་གསོལ། །ཞེས་བརྗོད། །སྒོའི་སློབ་མ་གཅིག་ལས་མེད་ན་གཅིག་པུས་ཤར་ནས་རིམ་བཞིན་གཡས་སྐོར་དུ་སོང་ནས་རིགས་སོ་སོའི་ང་རྒྱལ་དང་གསོལ་བ་འདེབས་པ་
སྔར་བཞིན་བྱ་ཞིང༌། སློབ་མ་མེད་ན་བླ་མ་རང་ཉིད་ཀྱིས་དེ་བཞིན་གཤེགས་པས་ཕྱོགས་སོ་སོ་ནས་གསོལ་བ་བཏབ་པར་མོས་ལ། ཚིག་རྣམས་རང་ཉིད་ཀྱིས་བརྗོད། དེ་ནས་སློབ་དཔོན་གྱིས་རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་བརྐྱངས་ལ་རྩེ་མོ་སྦྱར་བ་འོག་ཏུ་ཕྱོགས་པས་སྤྱི་བོར་བཟུང་སྟེ། ཧཱུཾ་བཛྲ་ཨུཏ་ཏིཥྛ། ཞེས་བརྗོད་ནས། བསྒོམས་པའི་དཀྱིལ་འཁོར་སྟེང་གི་ནམ་མཁའ་ལ་བཞུགས་པར་གྱུར། ཅེས་དཀྱིལ་འཁོར་ནམ་མཁའ་ལ་བཏེག་གོ །གཉིས་པ་ནི། སློབ་དཔོན་ལངས་ཏེ་ཤར་དུ་ཕྱོགས་པས་མཉམ་པའི་རྐང་སྟབས་བྱས་མགོ་བོར་ཐལ་མོ་སྦྱར་ཏེ། ཨོཾ་པྲ་ན་མ་མི་སརྦ་ཏ་ཐཱ་ག་ཏན། ཞེས་བརྗོད་པས་དེ་བཞིན་གཤེགས་པ་རྣམས་ལ་ཕྱག་བྱ། དེ་ནས། སེམས་ཅན་མ་རིག་པའི་མུན་པས་བསྒྲིབས་ཤིང་བདུད་ཀྱི་དབང་དུ་སོང་བ་རྣམས་ཀྱི་བདུད་བསལ་བའི་ཕྱིར་རང་གཙོ་བོ་ལས་ཕྱེ་བའི་ཁྲོ་བོ་ཧཱུཾ་མཛད་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། རིན་པོ་ཆེ་དང་ཀླུ་ཆེན་པོ་བརྒྱད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། སྤྱན་གསུམ་མེ་ལྟར་འབར་ཞིང་མཆེ་བ་གཙིགས་པ། ཧཱུཾ་གི་སྒྲ་སྒྲོགས་པ་ཁྲོ་བོའི་ཉམས་ཐམས་ཅད་ཡོངས་སུ་རྫོགས་པར་གྱུར་པའི་མིག་གཡས་པ་མ་ལས་ཉི་མ། གཡོན་པ་ཊ་ལས་ཟླ་བ། མིག་འབྲས་ཧཱུཾ་ལས་དུས་མཐའི་མེ་ལྟར་འབར་བའི་རྡོ་རྗེའི་ལྟ་བས་ཕྱོགས་ཐམས་ཅད་དུ་འགྲོ་བ་རྣམས་ལ་བལྟས་པས་བགེགས་དང་བྲལ་བར་གྱུར་པར་བསམས་ལ། རྡོ་རྗེ་ལྟ་བས་ཕྱོགས་ཐམས་ཅད་དུ་བལྟ། དེ་ནས། ང་ནི་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་རང་ཉིད་དང༌། །ང་ནི་སངས་རྒྱས་རྒྱལ་པོ་ཆེ། །ང་ནི་སྟོབས་ཆེན་རྡོ་རྗེ་ཅན། །ང་ནི་རྣལ་འབྱོར་དབང་ཕྱུག་རྒྱལ། །ཕྱག་ན་རྡོ་རྗེ་བརྟན་པ་ང༌། །ང་ནི་བདག་པོ་རྡོ་
རྗེ་ཆེ། །བྱིན་གྱིས་བརླབ་པ་མི་འདོར་རོ། །ཞེས་བརྗོད་ནས་ང་རྒྱལ་བཟུང༌། དེ་ནས། རྐང་མཐིལ་གཉིས་སུ་ཧཱུཾ་ཧཱུཾ་ལས་བྱུང་བའི་རྡོ་རྗེ་འབར་བ་རེ་རེ་ཧཱུཾ། ཞེས་བརྗོད་ཅིང་འགྱིང་བ་དང་བཅས་གཡས་རྡོ་རྗེ་གསོར། གཡོན་དྲིལ་བུ་དཀྲོལ་ཞིང་རྡོ་རྗེའི་རྐང་སྟབས་ཀྱིས་དབང་ལྡན་ཕྱོགས་སུ་བྱིན། དེ་ནས་བརྩམས་ཏེ་སྒོའི་སློབ་མ་ཡོད་ན་དེ་དང་ལྷན་ཅིག་ཏུ་དཀྱིལ་འཁོར་གྱི་ས་གཞིར་གཡས་སྐོར་དུ་རྡོ་རྗེའི་རྐང་སྟངས་ཀྱིས་གར་བྱས་ཏེ་སྐོར་བ་གཅིག་བྱ་ལ། མི་ཤེས་ན། སྐོར་བ་གཅིག་བྱས་པའི་མཐར་དབང་ལྡན་ནས་ཁ་ནང་དུ་ཕྱོགས་ཏེ། ལུས་ངག་སེམས་ལ་གནས་པ་ཡི། །བགེགས་ཀྱི་ཚོགས་ཀུན་ཡང་དག་ཉོན། །ང་ནི་དཔལ་ལྡན་རྡོ་རྗེ་འཆང༌། །བཀའ་ཡི་འཁོར་ལོ་སྦྱོར་བ་པོ། །རྡོ་རྗེ་འབར་བའི་གཟུགས་ཀྱིས་ནི། །ལུས་གསུམ་ལས་བྱུང་དགས་བྱ་སྟེ། །གལ་ཏེ་ཁ་ཅིག་བདག་ལས་འདྲལ། །འདིར་ནི་འཇིག་འགྱུརགཞན་དུ་མིན། །ཞེས་ལན་གསུམ་བརྗོད་ནས་བཀའ་བསྒོ་བྱ། དེ་ནས་རང་གི་ཐུགས་ཀ་ནས་ཁྲོ་བོ་དཔག་ཏུ་མེད་པ་སྤྲོས་ཏེ་བགེགས་ཐམས་ཅད་བསྐྲད་པར་གྱུར་པར་བསམ་ཞིང༌། སུམྦྷ་ནི་དང༌། ཨོཾ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་བཟླས་ལ་གུ་གུལ་གྱིས་བདུག །ཡུངས་ཀར་གྱིས་བྲབས། རོལ་མོས་ཚམ་རྔམས་བྱ། དཀྱིལ་འཁོར་གྱི་ས་གཞི་ཡང་དབང་ཆེན་གྱི་གཏིང་གི་བར་དུ་ཧཱུཾ་ལས་བྱུང་བའི་རྡོ་རྗེའི་རང་བཞིན་ཅན་དུ་གྱུར་པར་བསམས་ལ་བྱིན་གྱིས་བརླབ་བོ། །ལྔ་པ་ནི། འགྲོ་བ་རྣམས་རྡོ་རྗེ་འཆང་གི་གོ་འཕང་ལ་འགོད་པའི་ཕྱིར་བགེགས་བསྐྲད་པར་བྱའོ་སྙམ་དུ་སེམས་བསྐྱེད་ཅིང༌། སྟོང་ཉིད་བསྒོམ། སྟོང་པའི་ངང་ལས་སྐད་ཅིག་གིས་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་སྣ་ཚོགས་རྡོ་རྗེའི་ལྟེ་བར་ཧཱུཾ་གིས་མཚན་པའི་འོད་ཟེར་ལས་བྱུང་བའི་རྡོ་རྗེ་འབར་བ་སྤྲོས་པས་ཕྱོགས་མཚམས་
མེད་པར་དུམ་བུ་གཅིག་ཏུ་གྱུར་པའི་རྡོ་རྗེའི་རྭ་བ་དང༌། སྟེང་དུ་རྡོ་རྗེའི་གུར་དང༌། དེའི་འོག་རྭ་བའི་སྟེང་དུ་རྡོ་རྗེའི་བླ་བྲེ་དང༌། ཕྱི་རོལ་ཏུ་མདའི་དྲ་བ་དང༌། འོག་གི་ས་གཞི་ཡང་འབར་ཞིང་བཟོད་པར་དཀའ་བའི་སྣ་ཚོགས་རྡོ་རྗེའི་རང་བཞིན་དུ་གྱུར་པར་མོས། དེ་ནས་ཕུར་གདབ་བྱ་བ་ལ་དམ་པ་མང་པོའི་ཕྱག་བཞེས་སུ་བསམ་གཏན་གྱི་ཕུར་གདབ་མཛད་པ་མང་བས་དེ་ལྟར་ཡང་རུང་ལ། དངོས་སུ་བྱེད་ན་ཕུར་བུའི་གྲངས་བཞེད་ཚུལ་མི་འདྲ་བ་དུ་མ་ཡོད་ཀྱང་འཇུག་པ་བདེ་བའི་ཕྱིར། སེང་ལྡེང་ངམ་ལྕགས་སོགས་ལས་བྱས་པའི་ཕུར་བུ་ཚད་ལྡན་ལྔའམ་བཞི་དྲི་དམར་པོས་བྱུག །མེ་ཏོག་དམར་པོའི་ཕྲེང་བ་བཅིང༌། ཚོན་སྐུད་སྣ་ལྔའམ་དམར་པོས་དཀྲིས་ཏེ་ཟངས་གཞོང་ལ་སོགས་པའི་སྣོད་དུ་བཀོད་ལ། བཛྲ་ཨ་མྲྀ་ཏས་བསངས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཕུར་བུ་རྣམས་སྟོང་པ་ཉིད་དུ་གྱུར། སྟོང་པའི་ངང་ལས་ཕུར་བུ་རྣམས་སྟོད་ཁྲོ་བོ་བདུད་རྩི་འཁྱིལ་བ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་ཀྱི་གཡས་སྣ་ཚོགས་རྡོ་རྗེ་འཕྱར་ཞིང༌། གཡོན་ཐུགས་ཀར་སྡིགས་མཛུབ་མཛད་པ། ཁྲོ་བོའི་རྒྱན་རྣམས་ཀྱིས་བརྒྱན་པ། ལྟེ་བ་མན་ཆད་མདུང་རྩེ་གཅིག་པའི་དབྱིབས་ཅན་གྱི་ཕུར་བུ་མེ་དཔུང་རབ་ཏུ་འབར་བ་རྣམས་སུ་གྱུར་པར་བསམ་ཞིང༌། སྤྲོ་ན། ཡེ་ཤེས་པ་དགུག་གཞུག་དང་དབང་བསྐུར་རྒྱས་གདབ་མཆོད་བསྟོད་སོགས་བདག་བསྐྱེད་ཀྱི་སྐབས་ལྟར་བྱས་པས་རུང༌། ཐོ་བ། ཨ་མྲྀ་ཏས་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་རྡོ་རྗེའི་ཐོ་བ་མེ་རབ་ཏུ་འབར་བར་གྱུར་པར་བསམ། དེ་ནས་ལངས་ལ་དཀྱིལ་འཁོར་གྱི་དབང་ལྡན་ཕྱོགས་སུ་ཕྱིན་ཏེ་ལག་པ་གཡོན་དུ་ཕུར་བུ་དང༌། གཡས་པས་ཐོ་བ་ཐོགས་ཏེ། རང་ཉིད་ཁྲོ་བོ་ཧཱུཾ་མཛད་དུ་གསལ་བའི་ཐུགས་ཀའི་ས་བོན་ལས་འོད་
ཟེར་འཕྲོས། བགེགས་ཐམས་ཅད་བཀུག་སྟེ་དཀྱིལ་འཁོར་གྱི་ཕྱིའི་དབང་ལྡན་སོགས་སུ་ཧཱུཾ་རིང་པོ་གྲུབ་པའི་ཁྲོན་པ་བྲུབ་ཁུང་གི་རྣམ་པ་ཅན་རྣམས་སུ་བཅུག་པའི་མགོ་བོར་ཕུར་བུ་བཏབ་པར་གྱུར་པར་བསམ་ནས། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་ཧཱུཾ། ཞེས་པའམ། ཡང་ན། ཨོཾ་གྷ་གྷ་གྷ་ཏ་ཡ་གྷ་ཏ་ཡ་སརྦ་དུཥྚཾ་ཕཊ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷཱ་ར་ཨ་ཛྙཱ་པ་ཡ་ཏི་སརྦ་བིགྷྣཱན་ཀ་ཡ་ཝ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ། ཅེས་པ་གཉིས་གང་ཡང་རུང་བ་ཞིག་གིས་ཕུར་བུ་འདེབས་ཤིང༌། ཨོཾ་བཛྲ་མུད་ག་ར་ཨ་ཀོ་ཊ་ཡ་ཧཱུཾ་ཕཊ། ཅེས་བརྗོད་ནས་ཐོ་བས་ཕུར་བུ་རྣམས་ཀྱི་མགོ་བོ་ནས་བརྡུང༌། བགེགས་རྣམས་ཀྱི་སྤྱི་བོ་ནས་རྐང་མཐིལ་གྱི་བར་དུ་ཕུར་བུ་བཏབ་པས་ལུས་ངག་ཡིད་གསུམ་གཡོ་འགུལ་མེད་ཅིང༌། ཡིད་དེ་བཞིན་ཉིད་ཀྱི་ངང་དུ་རོ་གཅིག་ཏུ་གྱུར། བགེགས་ལྷག་མ་རྣམས་རྒྱང་རིང་དུ་བྲོས་པ་དང༌། སྟེང་འོག་དང་ཕྱོགས་སུ་ཁོར་ཡུག་ཆེན་མོའི་བར་དུ་འགྲོ་བ་རྣམས་རྣམ་པ་ཐམས་ཅད་དུ་བགེགས་དང་བྲལ་བར་གྱུར་པར་བསམ། དེ་ཡང་ཕུར་བུ་བཞི་བྱེད་ན་དབང་ལྡན་ནས་བརྩམས་ཏེ་མཚམས་བཞིར་འདེབས་ཤིང༌། ལྔ་བྱེད་ན། དང་པོར་དཀྱིལ་འཁོར་གྱི་དབུས་སུ་བྲུབ་ཁུང་སྔར་ལྟར་བསྐྱེད་པའི་ནང་དུ་བགེགས་བཅུག་ལ་བཏབ་པར་མོས་ནས་དབུས་སུ་འདེབས་སྟངས་བྱས་ལ་དངོས་སུ་དབང་ལྡན་གྱི་ཕུར་བུའི་འཁྲིས་སུ་འདེབས། དེ་ནས་དབང་ལྡན་ནས་བརྩམས་ཏེ་མཚམས་བཞིར་གདབ། དང་པོར་སློབ་དཔོན་གྱིས་གདབ་ཅིང་བརྡུང་ལ། དེ་ནས་མི་ནུས་ན་སྒོའི་སློབ་དཔོན་སོགས་ཀྱིས་བྱ་བར་རུང་ཞིང༌། དཀྱིལ་འཁོར་གྱི་ལས་མ་ཟིན་
བར་དུ་ཐུན་སོ་སོ་ལ་ཕུར་བུའི་མཆོད་པ་ཉིན་རེ་བཞིན་བྱ། དེ་ནས། ལག་པ་གན་རྐྱལ་དུ་གནས་པ་བསྒྱུར་ནས། ཨོཾ་བཛྲ་ཨཱཿ ཧཱུཾ། ཞེས་བརྗོད་ཅིང་ས་ལ་བསྣུན་ཏེ། ས་རྡོ་རྗེའི་རང་བཞིན་དུ་གྱུར་པར་མོས་པ་བྱའོ། །གཉིས་པ་སྟ་གོན་ལ་ལྔ། ས་ལྷ་དང་ལྷ་དང་བུམ་པ་སྟ་གོན། ལྷ་ལ་གསོལ་བ་གདབ་པ། སློབ་མ་སྟ་གོན་ནོ། །དང་པོ་ནི། རང་ཉིད་ཤར་ནས་དཀྱིལ་འཁོར་གྱི་དབུས་སུ་ཕྱོགས་པར་འདུག །དཀྱིལ་འཁོར་གྱི་དབུས་དངོས་སམ། དེང་སང་གི་ཕྱག་ལེན་དུ་དཀྱིལ་འཁོར་གྱི་ས་གཞིའི་དབུས་སུ་མཉྫིའི་ཁར་མཎྜལ་གྱི་སྟེང་དུ་དགོད་པ་ལྟར་ཡང་རུང་བའི་དེར་དྲིའི་ཐིག་ལེ་དང་ཚོམ་བུ་བཀོད། ས་ལྷའི་མཆོད་གཏོར་བྱིན་གྱིས་བརླབ། དཀྱིལ་འཁོར་གྱི་དབུས་སུ་བཾ་ལས་སའི་ལྷ་མོ་ཞེས་པ་ནས། བཅོམ་ནས་དཀྱིལ་འཁོར་བྲི་བར་བྱ། ཞེས་ལན་གསུམ་བརྗོད་པའི་བར་སྔར་ས་བསླང་གི་སྐབས་ལྟར་བྱས་རྗེས། དཀྱིལ་འཁོར་གྱི་ལས་ཇི་ལྟར་བདེ་བར་གྱིས་ཤིག་ཅེས་གནང་བ་བྱིན་ནས་དེ་ཉིད་དུ་ཐིམ་པར་གྱུར་པར་བསམ། དེ་ནས་ལག་པ་གཉིས་རྡོ་རྗེ་ནང་བསྡམས་བྱས་པ་དེས་ས་མནན་ལ། ཨོཾ་བཛྲ་བྷཱ་ཝ་ཧཱུཾ། ཞེས་ལན་གསུམ་བརྗོད། རྡོ་རྗེ་བསྡམས་པ་ལས་བྱུང་བའི་ཧཱུཾ་ཡིག་འོད་ཟེར་འབར་བ་འཕྲོས་པས་དབང་ཆེན་གསེར་གྱི་ས་གཞི་ལ་ཐུག་གི་བར་རྡོ་རྗེར་བྱས་པར་གྱུར་པར་བསམས་ལ། ཨོཾ་བཛྲ་དྲི་ཌྷ་ཏིཥྛ། ཞེས་ལན་གསུམ་བརྗོད་ཅིང་བྱིན་གྱིས་བརླབ་བོ། །གཉིས་པ་ལ་གཉིས། ལྷ་གནས་ངེས་པའི་ཕྱིར་ཐིག་གདབ་པ་དང༌། དེ་ནས་ལྷ་སྟ་གོན་དངོས་བྱ་བའོ། །དང་པོ་ནི། གཙང་ཞིང་མ་ཉམས་པའི་རས་སྐུད་ལ་སོགས་པ་སྐྲ་མ་འདྲེས་པ་ཁ་དོག་དཀར་པོ་འཇུར་མདུད་མེད་པར་སུམ་བསྒྲིལ་དུ་བྱས་པའི་རིང་ཐུང་གི་ཚད་དཔོན་སློབ་གཉིས་ཀྱི་སོར་མོ་བཞི་ལ་དཀྲིས་པའི་ཆ་རྣམས་མ་གཏོགས་པའི་བར་ལ་དཀྱིལ་འཁོར་ཚད་ཅི་ཙམ་བྱེད་པ་དེའི་མདའ་ཡབ་ནས་མདའ་ཡབ་ཀྱི་བར་གྱི་ཚད་ཉིས་འགྱུར། སྦོམ་ཕྲ་
སྒོའི་ཉི་ཤུའི་ཆ་བྱེད་པ་སོགས་མཚན་ཉིད་དང་ལྡན་པའི་ལས་ཐིག་གི་སྐུད་པ་འདུ་བྱ། དེ་ལ་དྲི་བཟང་པོའི་ཆུ་དང༌། ཞོ་འོ་མ་མར་སྦྲང་རྩི་ཀ་ར་སྟེ་ཕྱིའི་བདུད་རྩི་ལྔ་དང༌། བ་བྱུང་ལྔས་བྱུགས་ཏེ་སྣོད་གཙང་མར་བཞག །རང་མི་འཁྲུགས་པའི་རྣལ་འབྱོར་དང་ལྡན་པས། ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། ཐིག་སྐུད་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དང་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ལྟེ་བ་ལ་ཧཱུཾ་གིས་མཚན་པ། དེ་ཡོངས་སུ་གྱུར་པ་ལས་ཁྲོ་བོ་བདུད་རྩི་འཁྱིལ་པ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་ཀྱི་གཡས་སྣ་ཚོགས་རྡོ་རྗེ་འཕྱར་ཞིང༌། གཡོན་ཐུགས་ཀར་སྡིགས་མཛུབ་མཛད་པ། ཁྲོ་བོའི་རྒྱན་དང་ཉམས་ཐམས་ཅད་ཡོངས་སུ་རྫོགས་པར་གྱུར་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོས་མཚན་པར་གྱུར། ཐུགས་ཀའི་ཧཱུཾ་ལས་འོད་ཟེར་འཕྲོས། རང་འདྲའི་ཡེ་ཤེས་པ་སྤྱན་དྲངས། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར་པར་བསམ། ཐིག་སྐུད་ཀྱི་མཆོད་པ་རྣམས་བསང་སྦྱངས་སོགས་བྱས་ནས། ཨོཾ་བཛྲ་མཧཱ་ཀྲོ་དྷ་རཱ་ཛ་ཨརྒྷཾ་ནས། ཤཔྟའི་བར་གྱིས་མཆོད། ཧཱུཾ། འཇིགས་པའི་ཧཱུཾ་སྒྲ་ངེས་སྒྲོགས་ཤིང༌། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་ཐམས་ཅད་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །ཅེས་པས་བསྟོད། ལག་པས་ཐིག་སྐུད་ལ་རེག་ཅིང༌། ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུཾ་ཕཊ། ཅེས་བཟླས་ཏེ་བསྲུང༌། སྔགས་དེ་ཉིད་བཟླས་པའི་ཕྱིའི་བདུད་རྩི་ལྔའི་ཆུ་དང༌། ཡུངས་ཀར་དང༌། དྲིའི་ཆུས་གཏོར་ལ་རྡོ་རྗེ་དང་བཅས་པས་ལག་པ་གཡས་པས་རེག་སྟེ། ཨོཾ་བཛྲ་ས་མ་ཡ་
སཱུ་དྲ་མ་ཏི་ཀྲ་མ་ཧཱུཾ། ཞེས་བཟླས་ནས། ཨོཾ་ཨཱཿ ཧཱུཾ། ལན་བརྒྱ་རྩ་བརྒྱད་བཟླས་ཏེ་ཐིག་སྐུད་ལྷག་གནས་བྱའོ། །དེ་ནས་དཀྱིལ་འཁོར་གྱི་ས་ལ་བུམ་པ་ཐམས་ཅད་ཀྱི་ཆུས་བསང་གཏོར་བྱ་ཞིང༌། ཨོཾ་སརྦ་སཾ་ཤོ་དྷ་ནི་ཧཱུཾ་ཕཊ། ཅེས་བརྗོད་པས་གཙང་མར་བྱས་པའི་ས་ལ་དྲིས་བྱུགས་ནས་ཕྱི་རོལ་ཏུ་མེ་ཏོག་བཀྲམ། ནམ་མཁར་གནས་པའི་ཡེ་ཤེས་ཀྱི་དཀྱིལ་འཁོར་མངོན་སུམ་དུ་གྱུར་པར་བསམས་ལ། ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། ཆོས་དབྱིངས་རང་བཞིན་ཞེས་སོགས་ཤོ་ལོ་ཀ་གཅིག་གིས་བསྟོད། དེ་ནས། ཤར་སོགས་ཕྱོགས་ཀྱི་ཐིག་ལེའི་སྟེང༌། །སྲད་བུ་བཟུང་ནས་མཎྜལ་བཞིའི། །ཉ་ཡི་མགོ་དང་མཇུག་མའི་མཐར། །ཚངས་ཐིག་དང་ནི་ཟུར་ཐིག་གདབ། །ཅེས་གསུངས་པ་ལྟར་གྱི་ཚངས་ཟུར་གྱི་ཐིག་གི་འགྲོ་འཚམས་རྟོགས་པའི་ཕྱིར་ཟླུམ་པོ་ལྔ་སྐོར་བྱས་རྗེས། རང་ཉིད་བཅོམ་ལྡན་འདས་མི་འཁྲུགས་པ་དང་སློབ་མ་སྐད་ཅིག་གིས་བདུད་རྩི་འཁྱིལ་བར་གྱུར་པའི་མིག་གཉིས་ཛ་ཛ་ལས་ཉི་མ་དང༌། ཟླ་བ་འོད་ཟེར་སེར་པོ་ཅན་དུ་གྱུར་པར་བསྒོམས་ལ། སློབ་དཔོན་གྱི་ལག་པ་གཡོན་པ་རྡོ་རྗེ་ཁུ་ཚུར་གྱིས་ཐིག་སྐུད་ལྟེ་བར་བཟུང་ཞིང་གྲོགས་ལ། ཛྫཿ ཛྫཿ ཛྫཿ ཞེས་པ་དང༌། ཛ་གསུམ་བརྗོད་པས་ཐིག་སྐུད་ཀྱི་སྣེ་མོ་སློབ་མ་ལ་གཏད། དེས་ཀྱང་སྔགས་དེ་བཞིན་དུ་བརྗོད་ནས། དྲངས་ཏེ་གཡོན་པའི་རྡོ་རྗེ་ཁུ་ཚུར་གྱིས་ལྟེ་བར་བཟུང་ལ། ཤར་ལ་སོགས་པའི་ཕྱོགས་ཐམས་ཅད་བློས་བཏགས་པ་ཙམ་ལས་རང་བཞིན་མེད་པར་མཉམ་པ་ཉིད་དོ། །སྙམ་དུ་མོས་ནས། རང་རྐང་པ་གཡོན་པ་སྐྱིལ་ཀྲུང་ཕྱེད་པ་དང༌། གཡས་པ་ས་ལ་བཙུགས་ཏེ་བསྡད། སློབ་མ་དེ་ལས་ལྡོག་སྟེ་བསྡད་ནས་གཉིས་ཀའི་ལག་པ་ལྷན་ཅིག་ས་ལ་ཕབ། དེ་ཡང་བླ་མ་ནུབ་ནས་ཤར་དང༌། སློབ་མ་ཤར་ནས་ནུབ་ཏུ་ཕྱོགས་པས་ཤར་ནུབ་ཀྱི་ཚངས་ཐིག་གདབ། དེ་ནས།
རང་དང་སློབ་མའི་རྐང་མཐིལ་གཉིས་སུ་ཧཱུཾ་ཧཱུཾ་ལས་རྡོ་རྗེ་འབར་བ་རེ་རེ། ཞེས་བརྗོད་ཅིང་བསྒོམ་པས་རྐང་པ་བྱིན་གྱིས་བརླབ་ལ་གཉིས་ཀ་གཡས་སྐོར་གྱིས་སོང་སྟེ་བླ་མ་ལྷོ་དང༌། སློབ་མ་བྱང་དུ་གནས་པས་ལྷོ་བྱང་གི་ཚངས་ཐིག་གདབ། དེ་ནས་གཡས་སྐོར་གྱིས་ཡོངས་ཏེ་སློབ་དཔོན་ཤར་ལྷོ་དང༌། སློབ་མ་ནུབ་བྱང་དུ་གནས་པས་མེ་རླུང་གི་ཟུར་ཐིག་གདབ། དེ་ནས་གཡས་སྐོར་གྱིས་སློབ་དཔོན་ལྷོ་ནུབ་དང༌། སློབ་མ་བྱང་ཤར་དུ་གནས་པས་ཟུར་ཐིག་གཉིས་པ་གདབ། དེ་ནས་སློབ་དཔོན་ཤར་ལྷོ་དང༌། སློབ་མ་བྱང་ཤར་དུ་གནས་པས་ཤར་གྱི་རྩ་ཐིག །སློབ་དཔོན་ནུབ་བྱང་དང༌། སློབ་མ་ལྷོ་ནུབ་ཏུ་གནས་པས་ནུབ་ཀྱི་རྩ་ཐིག །སློབ་དཔོན་དེ་ཉིད་དང་སློབ་མ་བྱང་ཤར་དུ་གནས་པས་བྱང་གི་རྩ་ཐིག །སླར་ཡང་སློབ་དཔོན་ཤར་ལྷོ་དང༌། སློབ་མ་ལྷོ་ནུབ་ཏུ་གནས་པས་ལྷོའི་རྩ་ཐིག་རྣམས་གདབ། དེ་ནས། རང་བཅོམ་ལྡན་འདས་རྡོ་རྗེ་མི་འཁྲུགས་པ་ལྷ་སྐུ་སྒྱུ་མ་ལྟ་བུར་གསལ་བའི་མིག་གཉིས་ཧཱི་ཧཱི་ལས་གཡས་ཉི་མ་གཡོན་ཟླ་བར་གྱུར་པར་བསམ་སྟེ་ཁྲོ་བོའི་ལྟ་བས་ཕྱོགས་ཐམས་ཅད་དུ་བལྟས་ནས་ཧཱི་ཧཱི་ཞེས་བརྗོད་ནས། ཐར་པའི་སྒོའི་བགེགས་སུ་གྱུར་པའི་སྒྲིབ་པ་རྣམས་དབྱི་བར་བྱའོ། །སྙམ་དུ་བསམ་ནས་ཤར་སྒོའི་ཚངས་ཐིག་དང་རྩ་ཐིག་གཉིས་ཕྲད་མཚམས་གཡས་གཡོན་ནས་རྩ་ཐིག་གི་ཆ་ཆུང་གཉིས་དབྱི་ལ། དེ་ནས་ལྷོ་ནུབ་བྱང་གི་སྒོའི་ཐིག་ཀྱང་དབྱི་བར་བྱ། དེ་ནས་དཀྱིལ་འཁོར་གྱི་ཕྱི་ཐིག་ལྷག་མ་ཇི་ལྟར་གདབ་པའི་ཚུལ་ནི། ཁྲུ་ལ་སོགས་པའི་རྩ་ཐིག་གི །དབུས་སུ་བརྒྱད་ཆ་ཕྱིས་པ་དེ། །སྒོ་དེའི་བཞི་ཆ་ཆ་ཆུང་སྟེ། །རྩ་བའི་ཕྱི་རོལ་གཅིག་དང་གཉིས། །གཅིག་གཉིས་གཅིག་དང་གཅིག་གི་མཐར། །ཐིག་དྲུག་ཟུར་ནས་ངོས་སུ་སྟེ། །ཚངས་ལས་རིམ་གྱིས་རིང་བར་ནི། །ཆ་ཆུང་གསུམ་དུ་དང་པོའི་ཐིག །གཉིས་
ཐིག་ཆ་ཆུང་གཉིས་རྩེར་རེག །ཆ་ཆུང་བརྒྱད་དུ་གསུམ་སྟེགས་བུའི། །ཐིག་ལས་དྲང་པོའི་ཐིག་བཞི་སྟེ། །གསུམ་ནི་ཆ་ཆུང་ལྔ་བཞི་པ། །ཆ་ཆུང་བཞི་དེའི་དང་པོ་ནི། །ངོས་ཐིག་རྩེ་མོར་ཡང་དག་རེག །གསུམ་ནི་ཆ་ཆུང་རེ་རེའི་བར། །བཞི་པའི་རྩེ་ནས་ངོས་སུ་ཐིག །ཆ་ཆུང་བཅུ་དང་ལྡན་པའོ། །རྩ་བའི་རྩེ་ནས་བྱུང་བའི་ཐིག །ཆ་ཆུང་བཞི་པ་ངོས་སྟེང་དུ། །ཆ་ཆུང་གཉིས་གཉིས་ཐད་ཀར་ནི། །ཆ་ཆུང་བརྒྱད་དེ་གསུམ་འཁྱོག་པ། །ཞེས་པའི་དོན་དེ་ལྟར་ལེགས་པར་གདབ་སྟེ་འགྲམ་ལོགས་སྒོ་དང་མི་མཉམ་པའི་ལུགས་སོ། །དེ་ནས་རྟ་བབས་ཀྱི་ཐིག་གདབ་པ་ནི། ཀ་བའི་རྩེ་ནས་ཕྱི་ངོས་སུ། །ཆ་ཆུང་རེ་རེ་དོར་བར་ཐིག །བཅུ་གཅིག་འདི་ལ་ལྔ་པ་དང༌། །བདུན་པ་ཆ་ཆུང་ཕྱེད་དང་གཉིས། །ཡང་ན་གསུམ་པ་བདུན་པ་དང༌། །དགུ་པ་ཆ་ཆུང་རེ་རེ་འོ། །བཞི་པ་དྲུག་པ་བཅུ་པ་རྣམས། །སོ་སོར་ཆ་ཆུང་ཕྱེད་ཕྱེད་དོ། །ལྔ་ནི་ཆ་ཆུང་ཕྱེད་དང་གཉིས། །དེ་ལ་ཕྱོགས་གཉིས་སུ་ནི་རྒྱར། །ཚངས་པའི་གཡས་དང་གཡོན་དུ་ནི། །ཆ་ཆུང་ཕྱེད་བཅས་མདའ་ཡི་མཐར། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །ཆ་ཆུང་དྲུག་མཐར་གཉིས་པ་དང༌། །གསུམ་པ་ཆ་ཆུང་གསུམ་པ་འོ། །ཆ་ཆུང་བཞི་མཐར་བཞི་པ་ནི། །ཆ་ཆུང་ལྔ་སྟེ་མདའ་ཕྱེད་བཅས། །གསུམ་དོར་ནས་ནི་ཕྱེད་དང་ལྔ། །གསུམ་ནས་དྲུག་པ་ཆ་ཆུང་ལྔ། །བཞི་ནི་ཆ་ཆུང་བདུན་རྣམས་ཏེ། །ཐིག་བཅུ་གཅིག་པ་ཆ་ཆུང་ལྔ། །སྣམ་བུ་ལྔ་པའི་སྟེང་གི་ནི། །ངོས་སུ་ཆ་ཆུང་ཕྱེད་དང་བཞི། །བདུན་པའི་འོག་ལ་ཆ་ཆུང་གསུམ། །སྟེང་ནི་ཆ་ཆུང་དྲུག་སྟེང་དུ། །སྣམ་བུ་རྣམས་མཐར་སོན་པའི་ཐིག །གཞན་གྱི་མཐའ་དང་ལྷན་ཅིག་སྟེ། །ཀྱོགས་པོ་གཅིག་གོ་འདི་ནང་དུའང༌། །ཆ་ཆུང་ཕྱེད་ནས་དེ་བཞིན་གཞན། །དེའི་ཕྱིར་ཆ་ཆུང་རིག་བྱེད་མཐར། །ཐིག་ཟླུམ་དེ་ནི་གཉིས་ཡིན་ཏེ། །ཆ་ཆུང་
གཉིས་གཉིས་དོར་བར་རེ། །བཞི་དོར་བར་ནི་ཟླུམ་པོ་གཞན། །ཞེས་པ་ལྟར་གདབ་སྟེ་རྟ་བབས་སྒོ་ཚད་གསུམ་མའི་ལུགས་ཡིན་པས་འདི་ཉིད་ལེགས་སོ། །སྣ་ཚོགས་རྡོ་རྗེའི་རྭའི་ཐིག་སྐོར་ལུགས་ནི། ཚངས་དང་མདའ་ཡབ་ཕྲད་པ་ནས། །ཆ་ཆུང་བཞི་དང་བཞི་གསུམ་ནི། །སོང་བར་ཆ་ཆུང་དགུ་དང་ནི། །བཞི་ཆས་གཡས་གཡོན་ཕྱི་རྭ་བསྐོར། །མདའ་ཡབ་ཚངས་ལས་ཆ་ཆུང་ནི། །ཕྱེད་བཅས་གསུམ་ནི་ཐད་ཀར་གཡས། །དྲུག་ནས་ཕྱེད་བཅས་བཅུ་གཉིས་ཀྱིས། །གཡོན་བསྐོར་གཡས་པ་དེ་ལས་ལྡོག །ཅེས་པ་ལྟར་གདབ། དཀྱིལ་འཁོར་གྱི་ནང་གི་ཐིག་གདབ་ལུགས་ནི། ཚངས་པའི་ཐིག་ལས་ཕྱི་ངོས་སུ། ཆ་ཆུང་ལྔ་དོར་བར་པདྨའི་ལྟེ་བའི་དོན་དུ་ཐིག་ཟླུམ་པོ་གཅིག །དེའི་ཕྱི་ངོས་སུ་འདབ་མའི་དོན་དུ་ཆ་ཆུང་བཅུ་དོར་བར་ཟླུམ་པོ་གཅིག་བསྐོར། དེའི་ཕྱི་ངོས་སུ་ཆ་ཆུང་གཅིག་དོར་བར་གདུང་འཁོར་གྱི་རྡོ་རྗེའི་ཕྲེང་བའི་དོན་དུ་སྐོར་ཐིག་གཅིག །ནང་གི་ལྟེ་བའི་ཐིག་གི་ཕྱི་ངོས་སུ་གེ་སར་གྱི་དོན་དུ་སླར་ཡང་ཆ་ཆུང་ཕྱེད་དོར་ནས་ཐིག་ཟླུམ་གཅིག་བསྐོར་ལ། ཚངས་ཐིག་བཞི་འདབ་མའི་དབུས་སུ་འོང་བར་བྱས་ནས་ཕྱོགས་མཚམས་ཀྱི་འདབ་མ་བརྒྱད་ཆ་མཉམ་པ་བྱའོ། །ཕྱི་ནང་གི་ཐིག་གཞན་དེ་རྣམས་འདེབས་པའི་ཚེ་ཡང་སྐོར་ཕྱོགས་དང༌། སྡོད་སའི་གནས་དང༌། གོ་རིམ་རྣམས་སྔ་མ་ལྟར་བྱ་ཞིང་སྐབས་ཐམས་ཅད་དུ་སློབ་མས་རྒྱབ་མི་སྟོན་པར་འགྲོ་ལ། རྡོ་རྗེ་ཁུ་ཚུར་གྱིས་ཐིག་ཐམས་ཅད་འདེབས་པ་མ་བདེ་ན་དང་པོ་ལ་བྱ་ཞིང་ལྷག་མ་ཅི་བདེར་བྱ། སྐོར་ཐིག་རྣམས་བྱེད་པའི་ཚེ་སེང་ལྡེང་གི་ཕུར་བུ་འོག་རྡོ་རྗེ་རྩེ་གཅིག་པ་སྟེང་རྡོ་རྗེ་རྩེ་ལྔ་པའི་དབྱིབས་ཅན་བསངས་སྦྱངས། སྟོང་པའི་ངང་ལས་ཧཱུཾ་ལས་བྱུང་བའི་ཕུར་བུ་སྟེང་རྡོ་རྗེ་རྩེ་ལྔ་པ་འོག་རྡོ་རྗེ་རྩེ་གཅིག་པའི་རྣམ་པ་ཅན་དུ་གྱུར་པར་བསམ་ནས།
ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་ཧཱུཾ། ཅེས་པ་བརྒྱ་རྩ་བརྒྱད་བཟླས་ནས། ཨོཾ་བཛྲ་མུད་ག་ར་ཨ་ཀོ་ཊ་ཡ་ཧཱུཾ་ཕཊ། ཅེས་བརྗོད་ཅིང་རྡོ་རྗེ་ཐོ་བས་བརྡུངས་ནས་དཀྱིལ་འཁོར་གྱི་གཞིའི་དབུས་སུ་བཏབ་པ་ལ་ཐིག་སྐུད་གཉིས་བལྟབ་ཏུ་བྱས་པ་བཏགས་ནས་དབང་ལྡན་ནས་བརྩམས་ཏེ་གཡས་སྐོར་དུ་བསྐོར་ལ་གདབ། སྐོར་ཐིག་ཟིན་རྗེས་ཕུར་བུ་དཀྱིལ་འཁོར་གྱི་མཇུག་ཆོག་སྐབས་སུ་བཤད་པའི་སྔགས་དང་ཕྱག་རྒྱས་དབྱུང་ནས། ཕུར་བུ་རང་གི་ལག་གི་རྡོ་རྗེ་ལ་ཐིམ་པར་གྱུར་པར་བསམ་ཞིང༌། ཕུར་བུ་དངོས་སུ་མེད་ནའང་བསྒོམ་པའི་རིམ་པས་དེ་དག་བྱ་ལ། གཞན་གྱི་ཐིག་གི་ལྟས་བརྟག་ལུགས་སོགས་ཞིབ་པར་སྔགས་རིམ་ཆེན་མོ་ལས་ཤེས་པར་བྱས་ནས་ཚད་ལྡན་གྱི་ཕྱག་ལེན་མཐོང་བ་བརྒྱུད་པ་བཞིན་ཐིག་ལེགས་པར་གདབ་པར་བྱའོ། །དེ་ལྟར་ཐིག་རྫོགས་པར་ཐེབས་ནས་ཐིག་སྐུད་ལ། ཨོཾ་བཛྲ་མཧཱ་ཀྲོ་དྷ་རཱ་ཛ་ཨརྒྷཾ་ནས། ཤཔྟའི་བར་གྱིས་མཆོད། སྔར་གྱི་བསྟོད་པས་བསྟོད། ཨོཾ་ཨཱཿ ཧཱུཾ། བཛྲ་མུཿ ཐིག་སྐུད་ཀྱི་ཡེ་ཤེས་པ་རང་གནས་སུ་གཤེགས་པར་གྱུར། ཞེས་བརྗོད་ཅིང་མོས་ལ་དམ་ཚིག་པ་རང་ལ་བསྡུས་ཏེ། ཐིག་སྐུད་གནས་ཅི་བདེ་བར་བཞག་གོ །གཉིས་པ་ལྷ་སྟ་གོན་དངོས་བྱ་བ་ནི། དཀྱིལ་འཁོར་གྱི་ས་གཞི་དྲི་བཟང་ལ་སོགས་པས་བྱུགས་ཤིང་མེ་ཏོག་གཅལ་དུ་བཀྲམ། བདུད་རྩི་ལྔ་དང་བཅས་པའི་དྲི་བཟང་པོས་ལྷ་གནས་སོ་སོར་ཐིག་ལེ་བྱ་ཞིང༌། དེ་ཡང་གཙོ་བོའི་གནས་སུ་གྲུ་བཞི་དང༌། ལྷ་གཞན་རྣམས་ཀྱི་གནས་སུ་ཟླུམ་པོ། དྲིའི་ཐིག་ལེའི་སྟེང་དུ་ལྷ་རང་རང་གི་སྔགས་བརྗོད་ནས་མེ་ཏོག་གི་ཚོམ་བུ་རེ་བཀོད། མཐའ་སྐོར་དུ་ཉེར་སྤྱོད་ཉུང་མཐའ་ཚར་བཅུ་ལས་མི་ཉུང་བ་མདུན་གྱི་ལྷའི་གཡས་ནས་མགོ་བརྩམས་ཏེ་བཤམས། རང་ཤར་ནས་དབུས་སུ་ཕྱོགས་པར་འདུག་ལ་ལྷའི་རྣལ་འབྱོར་དང་ལྡན་པས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿ སྭ་བྷཱ་ཝ་ཤུདྡྷོོ྅ཧཾ། སྟོང་པ་ཉིད་དུ་གྱུར། སྟོང་པའི་ངང་
ལས་ཧཱུཾ་ལས་བྱུང་བའི་རྡོ་རྗེའི་ས་གཞི། ཞེས་པ་ནས། ཟླ་བ་ལ་རྒྱབ་བརྟེན་ཅིང་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །ཞེས་པའི་བར་གྱི་གཞལ་ཡས་ཁང་དང་ལྷ་བསྐྱེད་ཚུལ་འོག་ནས་འབྱུང་བའི་མདུན་བསྐྱེད་ཀྱི་སྐབས་ལྟར་བྱས་རྗེས། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། སྔར་ནམ་མཁར་བཏེག་པའི་དཀྱིལ་འཁོར་གྱི་ལྷ་ཚོགས་ཨོཾ་བཛྲ་ས་མ་ཛཿ ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རྣམས་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཨཱཿ ཧཱུཾ། ཞེས་གསུངས་ཤིང་བདུད་རྩིའི་ཆུས་དབང་བསྐུར། ལུས་གང༌། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་མི་བསྐྱོད་པའི་དབུ་བརྒྱན་པར་གྱུར་པར་བསམ། སྟ་གོན་གྱི་མཆོད་པ། ཨ་མྲྀ་ཏས་བསངས་ལ། སྔར་ལྟར་བྱིན་གྱིས་བརླབ། དག་ཅིང་དྲི་མེད་ཡིད་འོང་བའི། །སྔགས་ཀྱི་ཡོན་ཆབ་མཆོག་འདི་དག །བདག་གི་དད་པས་འབུལ་ལགས་ཀྱི། །བཞེས་ནས་བདག་ལ་བཀའ་དྲིན་སྩོལ། །ཨོཾ་ཨཱཿ ཧྲཱིཿ པྲ་ཝ་ར་སད་ཀ་རཾ་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། ཞེས་དང༌། མཆོད་ཡོན་གྱི་གནས་སུ། ཞབས་བསིལ། ཨརྒྷཾ་གྱི་གནས་སུ། པཱདྱཾ། བཅུག་པས་ཆུ་གཉིས་འབུལ། ལྷ་ཡི་མེ་ཏོག་དམ་པ་འདི། །དཀྱིལ་འཁོར་མཆོད་པ་བགྱིད་པར་འཚལ། །ཐུགས་ནི་བརྩེ་བས་ཉེར་དགོངས་ཏེ། །མགོན་པོ་མཆོད་པ་འདི་བཞེས་ཤིག །ཨོཾ་སརྦ་ཏ་ཐཱ་ག་ཏ་པུཥྤེ་པྲ་ཏཱིཙྪ་ཧཱུཾ་སྭཱཧཱ། དེ་བཞིན་དུ་མེ་ཏོག་གི་གནས་སུ། བདུག་སྤོས།
སྣང་གསལ། དྲི་ཆབ། ཞལ་ཟས། སྒྲ་སྙན། ཞེས་པ་རྣམས་དང༌། པུཥྤེའི་གནས་སུ། དྷུ་པེ། ཨ་ལོ་ཀེ། གནྡྷེ། ནཻ་ཝི་དྱ། ཤཔྟ་རྣམས་བཅུག་པས་མཆོད། མཉམ་མེད་མི་གཡོ་མཉམ་མེད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁར་དང་ཡང་བསྒྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང༌། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་བསྒྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང༌། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང༌། །ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགག་པར་ཡོད་མི་འགྱུར། །ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པས། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །ཞེས་བསྟོད། གསུམ་པ་བུམ་པ་
སྟ་གོན་ནི། རྣམ་རྒྱལ་དང་ལས་བུམ་གཉིས། ཁ་རྒྱན་དུང་ཆོས་གཟུངས་རྡོར་མཆོད་པ་དང་བཅས་པ་ཕྱག་བཞེས་བཞིན་བཤམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་བ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་བུམ་པའི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བ་དང་འདབ་མ་རྣམས་ལ་ཟླ་བའི་དཀྱིལ་འཁོར་རེ་རེ། དབུས་ཀྱི་གདན་གྱི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། བཅོམ་ལྡན་འདས་རྡོ་རྗེ་མི་འཁྲུགས་པ་སྐུ་མདོག་ཨིནྡྲ་ནཱི་ལའི་ལྷུན་པོ། ཞེས་པ་ནས། སྐྱིལ་མོ་ཀྲུང་གིས་བཞུགས་པ། ཞེས་གཙོ་བོ་གོང་ལྟར་བསྐྱེད། འདབ་མ་བརྒྱད་ལ། ཤར་དུ་ཤཾ་ལས་དཔལ་བེའུ། ཞེས་པ་ནས། སྐྱིལ་མོ་ཀྲུང་གིས་བཞུགས་པའོ། །ལས་བུམ་དུ་སྣ་ཚོགས་པདྨ་དང་ཉི་མའི་གདན་ལ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། ཁྲོ་བོ་བདུད་རྩི་འཁྱིལ་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་སྣ་ཚོགས་རྡོ་རྗེ་འཕྱར་ཞིང༌། གཡོན་ཐུགས་ཀར་སྡིགས་མཛུབ་དང་བཅས་པའི་ཞགས་པ་འཛིན་པ། སྤྱན་གསུམ་དམར་ཞིང་ཟླུམ་པ། ཞལ་གདངས་ཤིང་མཆེ་བ་གཙིགས་པ། ལྗགས་འདྲིལ་བ། དབུ་སྐྲ་ཁམ་སེར་གྱེན་དུ་
བརྫེས་ཤིང༌། རིན་པོ་ཆེ་དང་སྦྲུལ་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། ཞབས་གཡོན་བརྐྱང་གི་སྟབས་ཀྱིས་བཞུགས་པ། དེ་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱ་དམར་པོ། ཐུགས་ཀར་ཧཱུཾ་སྔོན་པོས་མཚན་པར་གྱུར། རང་གི་སྙིང་གའི་ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཅོམ་ལྡན་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་ཨོཾ་བཛྲ་ས་མཱ་ཛཿ སྤྲིན་བྲལ་མཁའ་ལ་ཡིད་འོང་འཇའ་ཚོན་བཞིན། །ཆོས་དབྱིངས་ངང་ལས་གཟུགས་སྐུའི་རྣམ་རོལ་གྱིས། །གྲངས་མེད་འགྲོ་བའི་དོན་མཛད་ལྷའི་འཁོར་ལོ། །རྟེན་དང་བརྟེན་པར་བཅས་པ་གཤེགས་སུ་གསོལ། །ཞེས་བརྗོད། ལས་སྔགས་ལན་བདུན་གྱིས་བསྔགས་པའི་མཆོད་ཡོན་གྱི་སྣོད་དམ་ཚིག་གི་ཕྱག་རྒྱས་གཟུང་ལ། མཛུབ་མོ་གཡོབ་ཅིང༌། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །བདག་གི་མཆོད་ཡོན་བཞེས་ནས་ཀྱང༌། །མཆོད་པས་བདག་ལ་དགྱེས་པར་མཛོད། །ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་ཨེ་ཧྱེ་ཧི། ཞེས་དང༌། ཨོཾ་མཾ་ག་ལ་ཤྲཱི་ཛདྨ་ཛ་སྭཱཧཱ། འདི་ལ་ཀུན་དགའ་གྲོལ་མཆོག་གི་ཆོ་གར་ཤྲཱི་བ་ང་ས་ཞེས་འབྱུང་བ་འཁྲི་ཤིང་ཤན་སྦྱར་དང་ཀ་ལ་པའི་ཊཱིཀྐ་སོགས་དང་མཐུན་ཞིང་གཞན་ཕལ་ཆེར་ལས་ཛའི་རྗེས་སུ་ང་ས་དང་མ་བརྩེགས་པ་འདི་འབྱུང་བས་དཔྱད། དེ་བཞིན་དུ་སྔགས་ཀྱི་ཐོག་མཐའ་འདྲ་བར་སྦྱར་ལ། མཾ་ག་ལ་པདྨ། མཾ་ག་ལ་ཚ་ཏྲཾ་ག །མཾ་ག་ལ་ཤཾ་ཁ། མཾ་ག་ལ་ཙཀྲ །མཾ་ག་ལ་དྷྭ་ཛ། མཾ་ག་ལ་ཀ་ལ་ཤ །མཾ་ག་ལ་ཉ་ཚ་སྭཱཧཱ། ཞེས་
པ་རྣམས་རེ་རེའི་མཐར། ཨེ་ཧྱ་ཧི། ཞེས་བརྗོད་ཅིང༌། སོ་སོའི་མཐར་བཟེད་ཞལ་གྱི་ནང་དུ་མཆོད་ཡོན་ཅུང་ཟད་རེ་བླུགས་ཤིང་སྤྱན་དྲངས། ཨོཾ་ཨཱཿ བིགྷྣཱན་ཏ་ཀྲྀཏ་ཧཱུཾ་ཕཊ། ཅེས་ལན་གསུམ་གྱིས་ཕྱི་འབྲང་གི་བགེགས་བསྐྲད། དམ་ཚིག་གི་ཕྱག་རྒྱ་བསྟན་ཏེ། ཨོཾ་སརྦ་ཏ་ཐཱ་ག་ཏོདྦྷ་ཝ་ཡེ་སྭཱཧཱ། ཞེས་བརྗོད་པས་ལྷ་ཐམས་ཅད་མཉེས་པར་བསམ། ཛཿ ཧཱུཾ་བཾ་ཧོཿ ལྷ་རྣམས་བུམ་པའི་ནང་གི་དམ་ཚིག་པ་དང་གཉིས་སུ་མེད་པར་གྱུར། དབང་བསྐུར་རྒྱས་འདེབས་བདག་བསྐྱེད་ལྟར་བྱ། ཆུ་གཉིས་ཉེར་སྤྱོད་རོལ་ཆེན་དང་བཅས་པས་མཆོད། བསྟོད་པ་རྒྱས་བསྡུས་གང་རིགས་ཀྱིས་བསྟོད། རང་གི་སྙིང་ག་ནས་སྔགས་ཀྱི་འཕྲེང་བ་གཟུངས་ཐག་ལ་བརྟེན་ཏེ་སོང་བ་བུམ་ནང་གི་ལྷ་རྣམས་ལ་ཕོག་པས་དེ་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་སྔགས་ཀྱི་ཕྲེང་བས་བསྐོར་བ་ལས་བདུད་རྩིའི་ཆུ་རྒྱུན་བྱུང་བས་བུམ་པ་གང་བར་བསམ་ལ། གཟུངས་ཐག་ནས་བཟུང་སྟེ། གཟུངས་རིང་དང་ལྷ་མོ་བརྒྱད་ཀྱི་སྔགས་བརྒྱ་རྩ་རེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་པ་ཅི་མང་དང༌། ལས་བུམ་ལ། ཨ་མྲྀ་ཏ་བརྒྱ་རྩ་དང་ཡིག་བརྒྱས་ལྷག་ཆད་བསྐངས། དུང་ཆོས་ཀྱི་ཆུ་ལ་དམིགས་ཏེ། ཨོཾ་ཨཱཿ ཧཱུཾ། ལན་བདུན་བཟླས། གཟུངས་ཀྱི་མཐར་ཧཱུཾ་ལན་བདུན་གྱིས་བུམ་པའི་ལྷ་ལ་དུང་ཆོས་ཀྱི་ཆུས་མཆོད་ཡོན་འབུལ། ལས་སྔགས་ཀྱིས་མེ་ཏོག་དཀར་པོ་གསུམ་གསུམ་གཞུག །ལས་བུམ་གྱི་ཆུ་གཏོར་ལ། ཇི་སྲིད་དཀྱིལ་འཁོར་གྱི་བྱ་བ་རྣམས་མ་རྫོགས་ཀྱི་བར་དུ་བགེགས་རྣམ་པར་བཟློག་པའི་འཕྲིན་ལས་མཛོད་ཅིག །ཅེས་འཕྲིན་ལས་བཅོལ། ཨོཾ་སརྦ་ཏ་ཐཱ་ག་ཏ་པུཥྤེ་སོགས་ཀྱིས་མཆོད།
ཆོས་དབྱིངས་རང་བཞིན་ཨིནྡྲ་ནི་ལའི་མདོག །ཅེས་སོགས་དང༌། ཧཱུཾཿ འཇིགས་པའི་ཧཱུཾ་སྒྲ་ངེས་སྒྲོགས་ཤིང༌། །ཞེས་སོགས་ཀྱིས་བསྟོད། གང་ཡང་བདག་བློ་རྨོངས་པ་ཡིས། །ཞེས་སོགས་ཀྱིས་བཟོད་པར་གསོལ། ཨོཾ་བཛྲ་མཱུཿ ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་འོད་དུ་ཞུ་ནས་བུམ་པའི་ཆུ་ནུས་པ་དང་ལྡན་པར་བྱིན་གྱིས་བརླབ་པར་གྱུར་པར་བསམས་ལ། རྣམ་རྒྱལ་བུམ་པ་སྟེང་ཁེབས་སོགས་ཀྱིས་གཡོགས་ཏེ་དབེན་པར་བཞག །ལས་བུམ་བསང་གཏོར་གྱི་ཆེད་དུ་རང་གི་ཉེ་ལོགས་སུ་འཇོག་ཅིང་དཀྱིལ་འཁོར་གྱི་བྱ་བ་མ་ཟིན་བར་དུ། མཆོད་བསྟོད་བཟླས་པ་ཚར་རེ་རེ་ཉིན་རེ་བཞིན་མ་ཆགས་པ་བྱ། བཞི་པ་ལྷ་ལ་གསོལ་བ་གདབ་པ་ནི། སྟ་གོན་གྱི་ལྷ་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད། པུས་མོ་གཡས་པ་ས་ལ་བཙུགས་ཏེ། བདག་ཉིད་ཀྱི་ལྕེ་ཧཱུཾ་ལས་སྐྱེས་པའི་རྡོ་རྗེ་ཧཱུཾ་གིས་མཚན་པར་གྱུར་པར་བསམས་ལ། ལག་པ་གཡས་སྤོས་ཕོར་ཐོགས། གཡོན་པས་དྲིལ་བུ་དཀྲོལ་ནས། མི་འཁྲུགས་རྒྱལ་པོ་བཅོམ་ལྡན་འདས། །རིགས་པའི་རྒྱལ་པོ་ཁྱོད་ལ་འདུད། །སློབ་མ་རྣམས་ལ་བརྩེ་ཕྱིར་དང༌། །ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཅན། །དཀྱིལ་འཁོར་འདྲི་བར་བདག་འཚལ་ལོ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པར་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང༌། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང༌། །འབྱུང་པོ་བྱང་ཆུབ་བསྟན་གནས་དང༌། །
སེམས་ཅན་བསྟན་ལ་མངོན་དགའ་བ། །གང་སུ་རྡོ་རྗེ་སྤྱན་མངའ་རྣམས། །བདག་ལ་ཡང་དག་དགོངས་སུ་གསོལ། །བདག་ནི་ཆེ་གེ་རྡོ་རྗེ་ཅན། །བཅོམ་ལྡན་མི་འཁྲུགས་དཀྱིལ་འཁོར་ནི། །ཇི་ལྟར་ནུས་པ་ཉེར་སྤྱོད་པས། །འགྲོ་བ་སྦྱང་ཕྱིར་བྲི་བར་བྱ། །དེ་ཕྱིར་བདག་དང་སློབ་མ་ལ། །རྗེས་སུ་བརྩེ་བར་ཉེར་བཟུང་ནས། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་འབྱོན་པར་མཛད་པར་རིགས། །ཞེས་ལན་གསུམ་གྱིས་གསོལ་བ་གདབ་པར་བྱའོ། །ལྔ་པ་སློབ་མ་སྟ་གོན་ལ་ཡང༌། ཀུན་སློང་འཆོས་ཤིང་གཙོ་བོར་བསྐྱེད་པ། གསོལ་བ་གདབ་ཅིང་འཛིན་དུ་གཞུག་པ། སྡོམ་པ་གཟུང་ཞིང་བྱིན་གྱིས་བརླབ་པ། སོ་ཤིང་དོར་ཞིང་ཁྱོར་ཆུ་སོགས་གསུམ་སྦྱིན་པ། སྤྲོ་བ་བསྐྱེད་ཅིང་བསྲུང་སྟེ་རྨི་ལམ་བརྟག་པར་གདམས་པའོ། །དང་པོ་ནི་སྟ་གོན་གྱི་ཚོམ་བུ་དང་བུམ་པ་སོགས་ཡོལ་བས་བསྐོར་ལ། སློབ་མ་རྣམས་ཁྲུས་བྱས་ཏེ་ནང་དུ་འདུས་པར་མེ་ཏོག་བཀྱེ་བསྡུ་བྱས་ལ། སྟ་གོན་གྱི་རིམ་པ་ཞུ་བའི་ཡོན་དུ་མཎྜལ་འབུལ་དུ་གཞུག །དེ་ནས་སྤྱི་དང་བྱེ་བྲག་གི་ཆོས་བཤད་གང་འཚམས་དང༌། ཁྱད་པར་གསང་བ་སྤྱི་རྒྱུད་ལས། ལ་ལ་གསང་སྔགས་སྒྲུབ་དོན་གཉེར། །འདི་ན་དཀྱིལ་འཁོར་འཇུག་པར་བྱེད། །བསོད་ནམས་འདོད་པས་དེ་ལས་གཞན། །གཞན་དག་འཇིག་རྟེན་གཞན་དོན་གཉེར། །འཇིག་རྟེན་ཕ་རོལ་དོན་གཉེར་བའི། །དད་པ་མང་དུ་བྱེད་པ་ཡིས། །བློ་ལྡན་དཀྱིལ་འཁོར་འཇུག་བྱ་ཡི། །ཚེ་འདིའི་འབྲས་བུ་འདོད་མི་བྱ། །ཚེ་འདི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མི་འགྱུར། །འཇིག་རྟེན་ཕ་རོལ་དོན་གཉེར་སྐྱེས། །འཇིག་རྟེན་འདི་ཡི་འབྲས་
བུ་རྒྱས། །ཞེས་གསུངས་པས་དོན་བཤད་དེ་ཀུན་སློང་འཆོས། སློབ་མ་རྣམས་ལ་བསང་ཆུ་གཏོར་ཞིང༌། ཨ་མྲྀ་ཏས་བསངས་ལ། སློབ་མ་རྣམས་སྐད་ཅིག་གིས་རྡོ་རྗེ་མི་འཁྲུགས་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པའི་རྣམ་པ་ཅན་དུ་གྱུར། ཅེས་བརྗོད་ཅིང་བསམ། གཉིས་པ་ནི། སློབ་མ་ལ་གསོལ་འདེབས་ཀྱི་ཚིག་དོན་བཤད་ནས་དེ་རྣམས་དྲན་བཞིན་པའི་སྒོ་ནས་དཀྱིལ་འཁོར་གྱི་ཤར་སྒོའི་ཕྱི་རོལ་ཏུ་གནས་པས་གསོལ་བ་འདེབས་པར་མོས་སུ་བཅུག་སྟེ། སྐྱེ་རྒ་འཆི་བ་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བ། །སྲིད་པའི་མཚོ་ལས་བདག་སྒྲོལ་མཛོད། །དགའ་ཆེན་སྟོན་པ་ཁྱོད་གཅིག་པུ། །བྱང་ཆུབ་ཆེན་པོའི་ཚུལ་བརྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་པ་ལན་གསུམ་རྗེས་ཟློས་ཀྱིས་གསོལ་བ་བཏབ། དེ་ནས། བུ་ཚུར་ཤོག་ཅིག་ཐེག་ཆེན་པོ། །གསང་སྔགས་སྤྱོད་ཚུལ་ཆོ་ག་ནི། །ཁྱེད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་གྱིས། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་པ། །གང་གིས་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟད་ཆེན་པོ་སྟོབས་ཆེན་བཅོམ། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་
འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་སྡོམ་འབྱུང་སོགས་ལས་ཅི་རིགས་པར་འབྱུང་བའི་ཚིགས་བཅད་འདི་རྣམས་ཀྱི་དོན་བཤད་ནས་སྔགས་ལ་མོས་པ་བརྟན་པོ་འཛིན་དུ་འཇུག་གོ །གསུམ་པ་ལ། བྱང་ཆུབ་སེམས་དཔའི་སྡོམ་པ་གཟུང་བ་ནི། མདུན་གྱི་ནམ་མཁར་དཀྱིལ་འཁོར་གྱི་ལྷ་ལ་སོགས་པའི་རྒྱལ་བ་སྲས་བཅས་ཐམས་ཅད་བཞུགས་པར་མོས་སུ་བཅུག་ནས། བླ་མ་དང་ལྷ་ཚོགས་ཀྱི་སྤྱན་སྔར་སྐྱབས་འགྲོ་དང་སྡིག་པ་བཤགས་པ་ཡི་རང་སྔོན་དུ་འགྲོ་བའི་སྒོ་ནས་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་ཐོབ་འདོད་ཀྱི་སྨོན་སེམས་བཟུང་བ་དང༌། བྱང་ཆུབ་སེམས་དཔའི་སྡོམ་པ་བླངས་ནས། རྒྱལ་སྲས་ཀྱི་སྤྱོད་པ་མཐའ་དག་ལ་བྱང་ཆུབ་མ་ཐོབ་ཀྱི་བར་དུ་བསླབ་པར་བྱ་སྙམ་པའི་སྡོམ་པ་བཟུང་བ་དང་བསྲུང་འདོད་བསྐྱེད་པ་སོགས་བརྡ་འཕྲོད་ངེས་བྱས་ནས་དཀོན་མཆོག་གསུམ་ལ་བདག་སྐྱབས་མཆི། །ཞེས་པ་ནས། སངས་རྒྱས་འགྲུབ་པར་ཤོག །ཅེས་པའི་བར་ལན་གསུམ་གྱིས་བྱང་སྡོམ་འཛིན་དུ་གཞུག་ཅིང་ལན་གསུམ་པའི་མཐར་བྱང་སྡོམ་སྐྱེས་པའི་ཐོབ་དུས་ཀྱང་གོ་བར་བྱ། བྱིན་གྱིས་བརླབ་པ་ནི། བཛྲ་ཨ་མྲྀ་ཏའི་སྔགས་བརྗོད་པ་དང་མཉམ་དུ་བསང་ཆུ་གཏོར་ལ་བསྲུང༌། སློབ་མ་རྣམས་ཀྱི་སྙིང་གར་རྡོ་རྗེ་ནག་པོ་རྩེ་ལྔ་པའི་ལྟེ་བར་ཉི་མ་ལ་ཧཱུཾ་ནག་པོ། མགྲིན་པར་པདྨ་དམར་པོ་འདབ་མ་བརྒྱད་པའི་ལྟེ་བར་ཟླ་བ་ལ་ཨཱཿ དམར་པོ། སྤྱི་བོར་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཟླ་བ་ལ་ཨོཾ་དཀར་པོས་མཚན་པར་གྱུར། ཅེས་བརྗོད་ཅིང་བསམ་ནས་སློབ་མའི་སྙིང་ག་མགྲིན་པ་སྤྱི་བོ་རྣམས་སུ་རྡོ་རྗེ་དང་བཅས་པའི་ཁུ་ཚུར་གཡས་པའི་དྲིའི་ཆུས་བྱུགས་ཤིང༌། ཧཱུཾ་ཨཱཿ ཨོཾ། ཞེས་བརྗོད་ལ་གནས་གསུམ་བྱིན་གྱིས་བརླབ། དེ་ནས། སློབ་མ་ལྷར་
གསལ་བའི་སྒོ་གསུམ་རྡོ་རྗེ་གསུམ་གྱི་ངོ་བོར་བྱིན་གྱིས་བརླབ་ནས་མཆོད་ཡུལ་དུ་བྱས་པ་ལ། དབུ་ལ་མེ་ཏོག །ཤངས་ལ་བདུག་སྤོས། མདུན་ནམ་སྤྱན་ལ་མར་མེ། སྙིང་གར་དྲིས་བྱུགས་པ་ཕུལ་བར་མོས་ཏེ་མཆོད་པ་དེ་བཞི་རིམ་པ་བཞིན། བཛྲ་པུཥྤེ། བཛྲ་དྷུ་པེ། བཛྲ་ཨ་ལོ་ཀེ །བཛྲ་གནྡྷེ། ཞེས་བརྗོད་པའི་སྒོ་ནས་འབུལ། བཞི་པ་ནི། སོ་ཤིང་དོར་བའི་གནས་རྒྱར་ཁྲུ་བཞི་པ། དབྱིབས་གྲུ་བཞི་པའི་དཀྱིལ་འཁོར་ལ་བ་ལྕི་སོགས་ཀྱིས་སྲབ་མཐུག་བའི་ཀོ་བ་ཙམ་བྱུགས། སོ་ཤིང་འོ་མ་ཅན་གྱི་ཤིང་ཧ་ཅང་སྦོམ་ཕྲའི་སྐྱོན་དང་བྲལ་བ་དྲང་ཞིང་སྲོག་ཆགས་མེད་པ་མ་གས་པ་རྨ་མེད་པ་མགོ་མཇུག་མཉམ་པ་སོར་བཅུ་གཉིས་པའི་ཚད་ཅན་དྲི་བཟང་གི་ཆུས་བཀྲུ་ཞིང་བདུག་པས་བདུག །རྩེ་མོར་མེ་ཏོག་བཅིངས་པ་ལ་བླ་མས། ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུཾ་ཕཊ། ཅེས་བཟླས་ཏེ་ཁ་བྱང་དུ་ཕྱོགས་པས་སློབ་མའི་ལག་པ་ཐལ་མོ་སྦྱར་བའི་བར་དུ་བྱིན་ལ། དེས་བྱང་ངམ་ཤར་དུ་ཕྱོགས་ཏེ། ཨོཾ་བཛྲ་ཧ་ས་ཧཾ། ཞེས་བརྗོད་ཅིང་རྩེ་མོ་ནས་འཆོས་ཏེ་མིག་སྟེང་དུ་བལྟ་བས་དཀྱིལ་འཁོར་གྱི་སྟེང་དུ་ལྟོས་པ་མེད་པར་འདོར་དུ་གཞུག །སོ་ཤིང་མགོ་གང་དུ་བསྟན་པ་ལ་བརྟགས་ནས་དངོས་གྲུབ་འདི་འགྲུབ་ཅེས་བརྡ་སྤྲོད། དེ་ནས། བཾ་ལས་སྐྱེས་པའི་ཆུ་བཾ། བཟླས་པ་ཁ་བཤལ་བའི་ཕྱིར་བྱིན་ཏེ་ཁ་བཤལ་དུ་བཅུག །དེ་ནས། བཛྲ་ཨ་མྲྀ་ཏ། ལན་བདུན་བཟླས་པས་དྲི་ཞིམ་པོའི་ཆུ་ཁྱོར་བ་གསུམ། ཨོཾ་ཧྲཱིཿ བི་ཤུདྡྷ་དྷརྨཱ་སརྦ་བཱ་བཱ་ནི་ཙཱ་ཨ་སྱ་བི་ཤོ་དྷ་ཡ་སརྦ་བི་ཀལྤཱ་ན་ཨ་བ་ན་ཡ་ཧཱུཾ། ཞེས་བརྗོད་ནས་བྱིན། དེ་ནས། བཀྲ་ཤིས་པའི་རྨི་ལམ་མི་འཁྲུལ་བའི་ཆེད་དུ་ཀུ་ཤ་མང་བ་རྩེ་མོ་མ་ཉམས་པ། ཧཱུཾ་ལས་བྱུང་བའི་ཀུ་ཤ་ཧཱུཾ། ཞེས་བྱིན་གྱིས་བརླབ་པ་སྟན་དུ་གཏིང་བའི་དོན་དང༌། ཀུ་ཤ་ཉུང་བ་དྷཱིཿ ལས་བྱུང་བའི་ཀུ་ཤ་དྷཱིཿ ཞེས་དང༌། བཛྲ་ཨ་མྲྀ་ཏ་བཟླས་ནས་སྔས་ཀྱི་དོན་དུ་སློབ་མའི་ལག་པ་ཐལ་མོ་སྦྱར་བའི་བར། ཨོཾ་བཛྲ་ཏིཀྵཱ་བཾ། ཞེས་པས་སྔགས་བརྗོད་ནས་བྱིན། དེ་ནས།
ཧཱུཾ་ལས་བྱུང་བའི་སྐུད་པ་དམར་པོ་སློབ་མའི་ལུས་ཚད་སུམ་བལྟབ་མདུད་པ་གསུམ་བྱས་ཏེ། ཨོཾ་བུད་དྷ་མཻ་ཏྲི་རཀྵ་རཀྵ་སརྦཱན་སྭཱཧཱ། ཞེས་བརྗོད་ཅིང་སློབ་མའི་དཔུང་པ་གཡས་སུ་བླ་མ་རང་ཉིད་ཀྱིས་བཅིང་ངོ༌། །ལྔ་པ་ནི། འཇིག་རྟེན་དུ་ནི་ཀུན་མཁྱེན་རྣམས། །རེས་འགའ་འབྱུང་ངམ་མི་འབྱུང་སྲིད། །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །གང་གིས་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་ཤིན་ཏུ་དཀོན། །བསྐལ་པ་བྱེ་བ་དུ་མ་རུ། །སྡིག་པ་གང་ཞིག་སྔོན་བྱས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་འགྱུར་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་གྱུར། །སྤྱོད་མཆོག་འདི་ལ་གང་རྣམས་ཀྱི། །བློ་གྲོས་ཤིན་ཏུ་དྲི་མ་མེད། །དེ་རྣམས་ཀྱི་ནི་སྡུག་བསྔལ་ཀུན། །འབྱུང་བའི་ངན་འགྲོ་ཡང་དག་ཞི། །བདག་ཉིད་ཆེན་པོ་ཁྱེད་རྣམས་ཀྱིས། །དེ་རིང་རྙེད་པ་མཉམ་མེད་རྙེད། །གང་གིས་ཁྱེད་རྣམས་རྒྱལ་བ་ཀུན། །བདག་ཉིད་ཆེན་པོ་སྲས་བཅས་ཀྱིས། །བསྟན་འདི་ཀུན་ལ་ཡོངས་སུ་བཟུང༌། །གནས་པ་སྐྱེ་བར་འགྱུར་བ་ནི། །དེ་ཡིས་ཁྱེད་རྣམས་ཐེག་ཆེན་ལ། །ལེགས་པར་སྐྱེ་བ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །གང་གིས་ཁྱེད་རྣམས་འགྲོ་འགྱུར་བས། །དེ་བཞིན་གཤེགས་པར་
འགྱུར་བ་ཡིན། །ཞེས་རྣམ་སྣང་མངོན་བྱང་སོགས་ལས་འབྱུང་བ་འདིའི་དོན་བཤད་ནས་སྤྲོ་བ་བསྐྱེད་པར་བྱའོ། །དེ་ནས། སློབ་མ་རྣམས་ལ་བསང་ཆུ་གཏོར་བ་དང་མཉམ་དུ། བཛྲ་ཨ་མྲྀ་ཏའི་སྔགས་བཟླས་པས་བསྲུང༌། སྔགས་དེ་སློབ་མ་ལ་བཟླས་པའི་དོན་དུ་བྱིན་ལ། ཁྱེད་རྣམས་ཀྱིས་ཀུ་ཤ་ཆེ་བ་སྟན་དང་ཆུང་བ་སྔས་སུ་བཅུག་ནས། ཤར་ཕྱོགས་སུ་མགོ་བསྟན་སེང་གེ་ཉལ་སྟབས་ཀྱིས་ཉལ་བའི་མཚན་མོ་ལ་ཐུན་བཞིར་བྱས་པའི་ཐ་མ་ཐོ་རངས་ཀྱི་ཆར་རྨི་ལམ་གང་བྱུང་བ་དེ་ཉིད་མ་བརྗེད་པར་བྱོས་ལ། ནངས་པར་ང་ལ་སྨྲོས་ཤིག་ཅེས་པ་ལྟ་བུས་རྨི་ལམ་བརྟག་པར་གདམས་ལ། སློབ་མའི་སྟ་གོན་ཐོབ་པའི་གཏང་རག་གི་མཎྜལ་ཕུལ་རྗེས་རང་གནས་སུ་བཏང་ངོ༌། །བླ་མ་རང་ཉིད་དཀྱིལ་འཁོར་གྱི་ཁང་པར་ཞུགས་ཏེ་བསྲུང་བའི་དོན་དུ། བཛྲ་ཨ་མྲྀ་ཏ། གང་འགྲུབ་བཟླ། སྟ་གོན་གྱི་ལྷ་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ། ནས། ཤཔྟའི་བར་གྱིས་མཆོད་ནས། ཧཱུཾ་བཛྲ་ཨུཏ་ཏིཥྛ། ཞེས་པའི་སྔགས་དང་ཕྱག་རྒྱ་སྔར་བཤད་པས། སྟ་གོན་གྱི་དཀྱིལ་འཁོར་ནམ་མཁའ་ལ་བཞུགས་པར་གྱུར། ཅེས་བརྗོད་ནས་བཏེག་གོ །གསུམ་པ་དངོས་གཞིའི་ཆོ་ག་ལ་གཉིས། ཡེ་ཐིག་གདབ་ཅིང་ཚོན་དགྱེ་བ་དང༌། བསྒྲུབ་ཅིང་མཆོད་ནས་དབང་བསྐུར་པའོ། །དང་པོ་ལ་གཉིས། ཡེ་ཐིག་གདབ་པ་དང༌། ཚོན་དགྱེ་བའི་ཆོ་གའོ། །དང་པོ་ནི། རང་ཤར་དུ་ཕྱོགས་ཏེ་གཙོ་བོའི་རྣལ་འབྱོར་དང་ལྡན་བཞིན་པའི་ངང་ནས་ཐིག་སྐུད་ཀྱི་རྒྱུ་དང་འཁེལ་མཁན་སོགས་མཚན་ཉིད་དང་ལྡན་པའི་སྐུད་པ་ལྔ་ཚན་ལྔ་སྣོད་སོ་སོར་བཞག་ལ་ཡུངས་ཀར་གྱི་ཕྱེ་མ་དང༌། བདུད་རྩི་ལྔ་དང༌། དྲི་ཞིམ་པོ་བསྲེས་པའི་ཚོན་སྣ་ལྔས་སྐུད་པ་ལྔ་ཚན་རེ་ཁ་བསྒྱུར། དེ་ནས། རང་བཅོམ་ལྡན་འདས་མི་འཁྲུགས་པ་དང་སློབ་མ་སྐད་ཅིག་གིས་བདུད་རྩི་འཁྱིལ་བར་གྱུར་པར་བསམས་ལ། རང་གི་ལག་པ་གཡོན་པའི་མཐེའུ་ཆུང་གི་རྩ་བ་ནས་མཐེ་བོང་གི་
རྩ་བའི་བར་དུ་སྐུད་པ་དཀར། སེར། དམར། ལྗང་སྔོ་བ་རྣམས་རིམ་པ་ལྟར་བཀོད། ཐིག་སྐུད་དཀར་པོ་ཨོཾ་ལས་རྣམ་སྣང༌། སེར་པོ་ཏྲཱཾ་ལས་རིན་འབྱུང༌། དམར་པོ་ཧྲཱིཿ ལས་འོད་དཔག་མེད། ལྗང་གུ་ཨཱཿ ལས་དོན་གྲུབ། སྔོན་པོ་ཧཱུཾ་ལས་མི་བསྐྱོད་པའི་ངོ་བོར་གྱུར་པར་བསམས་ལ། མདུན་གྱི་ནམ་མཁར་དེ་བཞིན་གཤེགས་པ་རིགས་ལྔ་བཞུགས་པའི་ཐུགས་ཀར་ཨོཾ་ལ་སོགས་པ་རང་རང་གི་ས་བོན་ལས་བྱུང་བའི་ཡེ་ཤེས་ཀྱི་ཐིག་སྐུད་འོད་ཟེར་གྱི་རང་བཞིན་ཅན་དུ་གྱུར་པར་བསམས་ལ། ཨོཾ་ཨཱཿ ཤཱ་ཤྭ་ཏ་བཛྲ་སཱུ་ཏྲ་མེ་པྲ་ཡཙྪ་མཧཱ་མཎྜ་ལ་སཱུ་ཏྲ་ཏཱ་ཡ་ཧཱུཾ། ཞེས་པས་རྣམ་སྣང་ལ་གསོལ་བ་བཏབ། དེ་ནས། ཤཱ་ཤཱ་ཏའི་གནས་སུ། རཏྣ་སམྦྷ་ཝ་ཞེས་བཅུག་པས་རིན་འབྱུང༌། ཨ་མི་ཏ་བྷ་ཝ་བཅུག་པས་འོད་དཔག་མེད། ཨ་མོ་གྷ་སིདྡྷ་བཅུག་པས་དོན་གྲུབ། ཨཀྵོ་བྷྱ་བཅུག་པས་མི་བསྐྱོད་པ་ལ་གསོལ་བ་བཏབ། རང་གི་མིག་གཉིས་ཛ་ཛ་ལས་ཉི་མ་དང་ཟླ་བ་སེར་པོར་གྱུར། ཨོཾ་དཱིཔྟ་དྲིཥྛ་ཨཾ་ཀུ་ཤ་ཛ། ཞེས་བརྗོད་ཅིང་མིག་མྱུར་དུ་བསྒྲིལ་ནས་རྫི་མ་འདེགས་ཤིང་སྡེབས་པ་དང་བཅས། འབར་བའི་ལྟ་སྟངས་ལྕགས་ཀྱུ་ལྟ་བུས་དེ་བཞིན་གཤེགས་པ་རྣམས་ཀྱིས་བཏང་བའི་ཡེ་ཤེས་ཀྱི་ཐིག་སྐུད་བཀུགས་པ་རྣམས་ལག་པའི་ཐིག་སྐུད་སོ་སོ་ལ་ཐིམ་པར་གྱུར་པར་མོས། དེ་ནས་སློབ་མ་དང་ལྷན་ཅིག་ཏུ། ཨོཾ་ཨཱཿ ནྱོ་ནྱ་ཨ་ནུ་ག་ཏཱཿ སརྦ་དྷརྨཱཿ སྥ་ར་སྥ་ར་ཨ་ནུ་པྲ་བིཥྚཿ སརྦ་དྷརྨཱཿ ཨ་ཏྱནྟ་ཨ་ནུ་པྲ་བིཥྚཿ སརྦ་དྷརྨཱཿ ཨོཾ་ཨཱཿ ཧཱུཾ། ཞེས་པ་བརྗོད་ནས། དང་པོར་སྐུད་པ་དཀར་པོ་ལྔ་གཅིག་ཏུ་བསྒྲིལ་བ་སོགས་ལྔ་སོ་སོར་བསྒྲིལ་བ་དང་དེ་ནས་ལྔ་ཀ་གཅིག་ཏུ་བསྒྲིལ། དེ་ལྟར་ཟིན་པ་དང་སྔར་གྱི་ས་གཞིར་དྲིས་བྱུགས་པའི་སྣོད་
གཙང་མར་དྲིའི་ཆུ་དང༌། བདུད་རྩི་ལྔ་དང༌། བ་བྱུང་ལྔས་སྦངས་ཤིང༌། ཐིག་སྐུད་ཀྱི་ནང་གི་མཐའ་གཉིས་དང་དབུས་སུ་ཨོཾ་ཨཱཿ ཧཱུཾ་གིས་མཚན་པར་གྱུར་པར་བསམ། མཆོད་པ་བྱིན་བརླབ་བྱས་ནས། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད། ལག་པ་གཡས་པས་རེག་སྟེ། ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུཾ་ཕཊ། ཅེས་བཟླས་པས་བསྲུང༌། རང་གི་མིག་གཡས་པ་མ་ལས་ཉི་མ། གཡོན་པ་ཊ་ལས་ཟླ་བ་འོད་ཟེར་སེར་པོ་ཅན་དུ་གྱུར་པར་བསམས་ལ། བཛྲ་དྲིཥྚ་མ་ཊ། ཅེས་བརྗོད་པས་བརྟན་པར་བྱས་ཏེ། ཨོཾ་བཛྲ་ཨ་མྲྀ་ཏ་ཀུནྚ་ལི་ཧ་ན་ཧ་ན་ཧཱུཾ་ཕཊ། ཅེས་བཟླས་པའི་བདུད་རྩིའི་ཆུ་དང༌། ཡུངས་ཀར་དང༌། དྲིའི་ཆུས་གཏོར་ཏེ། རྡོ་རྗེ་དང་བཅས་པའི་ལག་པ་གཡས་པས་རེག་ལ། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་བཟླས་ནས། ཨོཾ་ཨཱཿ ཧཱུཾ། བརྒྱ་རྩ་བརྒྱད་བཟླས་ཏེ་ཐིག་སྐུད་ལྷག་གནས་བྱ། དེ་ནས་དཀྱིལ་འཁོར་གྱི་ས་ལ་བུམ་པ་ཐམས་ཅད་ཀྱི་ཆུས་བསངས་གཏོར་བྱ་ཞིང༌། ཨོཾ་སརྦ་སཾ་ཤོ་དྷ་ནི་ཧཱུཾ་ཕཊ། ཅེས་བརྗོད་ལ་གཙང་མར་བྱས་པའི་ས་ལ་དྲིས་བྱུགས་ནས་མེ་ཏོག་གཅལ་དུ་བཀྲམ། ནམ་མཁར་གནས་པའི་ཡེ་ཤེས་པའི་དཀྱིལ་འཁོར་མངོན་སུམ་དུ་གྱུར་པར་མོས་ནས། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད་ཅིང༌། ཆོས་དབྱིངས་རང་བཞིན་ཞེས་སོགས་ཀྱིས་བསྟོད། རང་བཅོམ་ལྡན་འདས་མི་འཁྲུགས་པ་དང་སློབ་མ་བདུད་རྩི་འཁྱིལ་པར་གསལ་བའི་མིག་གཉིས་སུ་ཛ་ཛ་ལས་ཉི་མ་དང་ཟླ་བ་འོད་ཟེར་སེར་པོ་ཅན་དུ་གྱུར་པར་མོས་ནས། ཛྫཿ ཛྫཿ ཛྫཿ ཞེས་དང༌། ཛ་གསུམ་བརྗོད་ནས་ཐིག་སྐུད་ཀྱི་སྣེ་སློབ་མར་གཏད་དེས་ཀྱང་དེ་བརྗོད་ནས་ལྟེ་བར་བཟུང༌། ཤར་ལ་སོགས་པའི་ཕྱོགས་ཐམས་ཅད་བློས་བཏགས་པ་ཙམ་ལས་རང་བཞིན་མེད་པར་མཉམ་པ་ཉིད་དོ་
སྙམ་དུ་མོས་ནས། སློབ་དཔོན་དཀྱིལ་འཁོར་གྱི་ནུབ་དང༌། སློབ་མ་ཤར་དུ་གནས་ནས་སློབ་དཔོན་གྱིས་རྡོ་རྗེ་དང་བཅས་པའི་ལག་པ་གཡས་པའི་མཐེ་བོང་དང་མཛུབ་མོས་ཐིག་སྐུད་བཟུང་ནས་ནམ་མཁར་འདེབས་ཤིང༌། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་པ་དང༌། ཧཱུཾ་ཨོཾ་སྭཱ་ཨཱཿ ཧཱ། ཞེས་བརྗོད་ཅིང་སེ་གོལ་གྱིས་སྒྲ་བྱ་ལ་སྔགས་དེ་ཐིག་གདབ་པའི་སྐབས་ཐམས་ཅད་དུ་བརྗོད། གདབ་ཚུལ་མཐེབ་སྲིན་གྱིས་ཐིག་སྐུད་སྟེང་འོག་ཏུ་བཟུང་ལ། འོག་ཏུ་བཅུག་ནས་སྟེང་དུ་གདབ་པར་ཡང་གསུངས། དེའི་ཚེ། ཐིག་གི་སྒྲས། སེམས་ཅན་དོན་དུ་ཁྱེད་རྣམས་ཀྱི། །དུས་མིན་དེ་ཕྱིར་འདིར་སྤྱོན་ཅིག །ཅེས་བསྐུལ་བས་ནམ་མཁའ་ཁྱབ་པའི་སངས་རྒྱས་རྣམས་བྱོན་ཏེ་ཐིག་སྐུད་ལ་ཐིམ་པར་གྱུར་པར་བསམ། དེ་ནས་དཔོན་སློབ་གཉིས་ཀའི་ལག་པ་ས་ལ་མཉམ་དུ་ཕབ་ནས་ཚངས་ཐིག་དང་པོའི་སྟེང་དུ་ཡེ་ཐིག་གདབ། ཐིག་གི་སྒྲས་སངས་རྒྱས་རྣམས་བསྐུལ་ཏེ་བྱོན་ནས་ཐིག་སྐུད་ལ་ཐིམ་ཞིང༌། ངོ་བོ་ཡེ་ཤེས་ལ་རྣམ་པ་སྲད་བུ་ཁ་དོག་ལྔར་སྣང་བའི་ཐིག་སྐུད་རེ་ཆད་ནས་ལས་ཐིག་ལ་ཐིམ་པར་གྱུར་པར་བསམ། དམིགས་པ་དེ་ནི་ཡེ་ཐིག་གདབ་པ་འོག་མ་རྣམས་ལའང་འདྲ། དེ་ནས། རང་དང་སློབ་མའི་རྐང་མཐིལ་གཉིས་སུ་ཧཱུཾ་ཧཱུཾ་ལས་རྡོ་རྗེ་འབར་བ་རེ་རེ། ཞེས་རྐང་པ་བྱིན་གྱིས་བརླབ་ནས་གཡས་སྐོར་དུ་ཡོང་སྟེ་བླ་མ་ལྷོ་དང༌། སློབ་མ་བྱང་དུ་གནས་པས་ནམ་མཁའ་དང་ས་ལ་ཚངས་ཐིག་གདབ་ལུགས་སྔར་ལྟར་བྱ། དེ་ནས་སློབ་མས་རྣམ་པ་ཐམས་ཅད་དུ་སློབ་དཔོན་ལ་རྒྱབ་མི་སྟོན་པར་འགྲོ་བ་དང༌། སྐོར་ཕྱོགས་དང༌། དཔོན་སློབ་ཀྱི་སྡོད་པའི་ཕྱོགས་སྔར་ལས་ཐིག་གི་སྐབས་ཇི་ལྟ་བ་བཞིན་བྱས་ཏེ། མེ་རླུང་གི་ཟུར་ཐིག་ཐམས་ཅད་ཀྱི་སྟེང་དུ་ཡེ་ཐིག་གདབ་ཅིང༌། དེ་རྣམས་ལ་ནམ་མཁའི་ཐིག་གདབ་པ་མི་དགོས་ལ་ཐིག་སྐུད་ཀྱི་ལྟས་རྟོགས་ལུགས་ལས་ཐིག་དང་འདྲའོ། །དེའི་ཚེ་
ཐིག་བྱིན་གྱིས་བརླབ་ཟིན་པ་ལ་འགོམ་དགོས་པ་དང༌། འོག་ཏུ་ཚོན་དགྱེ་བའི་ཚོན་བྱིན་རླབས་ཅན་ལ་འགོམ་དགོས་པ་བྱུང་ན། ཨོཾ་བཛྲ་བེ་ག་ཨ་ཀྲ་མ་ཧཱུཾ། ཞེས་བརྗོད་ཅིང་ཐིག་ཚོན་གང་ཡིན་དེ་ནམ་མཁར་བཏེག་པས་འོག་ཏུ་འཛུལ་བར་བསམས་ཏེ་སོང་རྗེས་སླར་ཡང་ཐིག་ཚོན་སོ་སོ་ལ་ཐིམ་པར་མོས། དེ་ལྟར་ཡེ་ཐིག་རྫོགས་པར་ཐེབས་ཟིན་པའི་རྗེས་སུ་ཐིག་སྐུད་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད། གཏོར་མ་བྱིན་གྱིས་བརླབས་ཏེ། ཨོཾ་ཨ་ཀཱ་རོ་མུ་ཁཾ། ཞེས་སོགས་ཀྱི་སྔགས་ཀྱིས་ཕུལ་རྗེས། ཨོཾ་ཨཱཿ ཧཱུཾ་བཛྲ་མཱུཿ ཞེས་པས། ཡེ་ཤེས་ཀྱི་ཐིག་སྐུད་ནམ་མཁའི་སྟ་གོན་གྱི་ལྷའི་ཐུགས་ཀར་གཤེགས་པར་གྱུར་པར་བསམས་ལ། ཐིག་སྐུད་རྙིང་པ་མི་འགོམ་པའི་གནས་གཙང་མར་བཞག་པར་བྱའོ། །གཉིས་པ་ལ་གཉིས། ཚོན་བྱིན་གྱིས་བརླབ་དང༌། དེས་རྟེན་དང་བརྟེན་པའི་དཀྱིལ་འཁོར་འདྲི་བའོ། །དང་པོ་ནི། གཏོར་མ་སྦྱིན་པ་སྔོན་དུ་འགྲོ་བའི། རབ་རིན་ཆེན་ལས་བྱས་པའམ། རིན་པོ་ཆེ་བསྲེས་པ་དང༌། མ་འབྱོར་ན་འབྲས་དང༌། རྡོ་བའི་བྱེ་མ་སོགས་ལས་བྱས་པའི་ཚོན་རྩི་སྣ་ལྔ་སྣོད་སོ་སོར་བླུགས་པ་དབུས་དང་ཤར་ནས་བརྩམས་ཏེ་ཕྱོགས་བཞིར་དཀར་སྔོ་སེར་དམར་ལྗང་བའི་རིམ་པས་བཞག །བཾ་ལཾ་རཾ་ཧཾ་ཨཾ་རྣམས་ལས་རིམ་པ་བཞིན་བྱུང་བའི་དཀར་སེར་དམར་ལྗང་སྔོན་པོའི་ཚོན་རྩི་རྣམས་སུ་གྱུར་པར་བསམ་ནས། ཨོཾ་ཧཱུཾ་ཏྲཱཾ་ཧྲཱིཿ ཨཱཿ རྣམས་སོ་སོར་བྲིས་པ་ལ། བཛྲ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་རྡུལ་ཚོན་དཀར་པོ་ཨོཾ་ལས་རྣམ་སྣང༌། ནག་པོ་ཧཱུཾ་ལས་མི་བསྐྱོད་པ། སེར་པོ་ཏྲཱཾ་ལས་རིན་འབྱུང༌། དམར་པོ་ཧྲཱིཿ ལས་འོད་དཔག་མེད། ལྗང་གུ་ཨཱཿ ལས་དོན་ཡོད་གྲུབ་པའི་ངོ་བོར་གྱུར་པར་བསམ། རང་གི་མིག་གཉིས་ཛ་ཛ་ལས་ཉི་མ་དང་ཟླ་བ་སེར་པོར་གྱུར། ཨོཾ་དཱིཔྟཱ་དྲིཥྚ་ཨངྐུ་ཤ་ཛ། ཞེས་བརྗོད་ཅིང་སྔར་ཡེ་ཐིག་གི་སྐབས་སུ་བཤད་པ་ལྟ་བུའི་ལྟ་སྟངས་བྱས་ནས། འབར་བའི་ལྟ་སྟངས་ལྕགས་ཀྱུ་ལྟ་བུས་
བཀུགས་པའི། ནམ་མཁར་བཞུགས་པའི་དེ་བཞིན་གཤེགས་པ་ལྷའི་ཐུགས་ཀར་རང་རང་གི་ས་བོན་ལས་གྲུབ་པའི་ཡེ་ཤེས་ཀྱི་ཚོན་ཐུགས་ཀ་ནས་བཏང་བ་རྣམས་ཚོན་སོ་སོ་དང་གཅིག་ཏུ་གྱུར་པར་བསམ། ཨོཾ་ཧཱུཾ་ཏྲཱཾ་ཧྲཱིཿ ཨཱཿ ཞེས་པས་བསྔགས་ནས། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་བརྒྱ་རྩ་བརྒྱད་བཟླ། དེ་ནས་འབར་བའི་ལྟ་སྟངས་ཀྱིས་གཟི་བརྗིད་བསྐྱེད་ཅིང་རྡུལ་ཚོན་རྣམས་ལ་ཧྲཱིཿ ཡིག་བཀོད་ནས། བདེན་པ་གང་གིས་སེམས་ཅན་རྣམས་རྡུལ་ཚོན་མང་ཞིང༌། སངས་རྒྱས་རྣམས་ནི་སེམས་ཅན་རྣམས་ལ་ཆགས་པས་རྗེས་སུ་ཆགས་པར་འགྱུར་བའི་བདེན་པ་དེས་རྡུལ་ཚོན་རྣམས་འབར་བར་གྱུར་ཅིག །ཅེས་ལྟ་སྟངས་དང་བདེན་པའི་བྱིན་རླབས་ཀྱིས་ཚོན་མང་པོར་འཕེལ་བར་བསམ། དེ་ནས་རྡུལ་ཚོན་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད་དོ། །གཉིས་པ་ནི། སྐོར་ཐིག་གི་དུས་བཏབ་པའི་ཕུར་བུ་སྔར་སྨོས་ཟིན་པ་ལྟར། སྔགས་རྒྱས་ཕྱུང་སྟེ། དེའི་ཤུལ་ཚོན་སྣ་ལྔས་དགང་ལ་བསམ་གཏན་གྱིས་དེ་ལྟར་བྱས་པ་ཡིན་ན་ཚོན་ལྔས་བཀང་བར་མོས། དེ་ནས་སློབ་དཔོན་དཀྱིལ་འཁོར་གྱི་དབུས་སུ་འདུག་ནས་རྡོ་རྗེ་གསོར། དེ་ཁོ་ན་ཉིད་ཀྱི་དོན་དྲན་པར་བྱས་ནས། ཆོས་དབྱིངས་འདི་ནི་དག་པ་སྟེ། །སེམས་ཅན་ཁམས་ནི་རབ་གྲོལ་བར། །རྒྱལ་ཆེན་དགྱེས་པ་རྡོ་རྗེ་ཡི། །དཀྱིལ་འཁོར་རབ་ཏུ་བྲི་བར་བྱའོ། །ཞེས་བརྗོད། འདིའི་དགོས་པ་ནི་འོག་ཏུ་ཚོན་ལ་བརྟེན་ནས་བྱུང་བའི་མཚན་མ་ངན་པ་རྣམས་སེལ་བའི་ཆེད་དོ། །དེ་ནས་སློབ་དཔོན་གྱི་ལག་པ་གཡས་སུ་རྡོ་རྗེ་བཟུང༌། གཡོན་པའི་རྡོ་རྗེ་ཁུ་ཚུར་གྱིས་དབང་ལྡན་ནས་བརྩམས་ཏེ་ཤར་གྱི་རྩིག་པ་ཕྱི་ནས་རིམ་པ་བཞིན་དཀར་སེར་དམར་ལྗང་སྔོན་པོའི་རིམ་པས་རྡུལ་ཚོན་དགྱེ་ལ། དེ་ཡང་སོར་བཅུ་གཉིས་ཀྱི་སྲིད་ཀྱི་བར་སློབ་དཔོན་རང་ཉིད་ཀྱིས་ངེས་པར་འདྲི་དགོས་ཤིང༌། རི་མོ་ཡོན་པས་གདུང་བ་བསྐྱེད། དམའ་བས་དངོས་གྲུབ་མི་འགྲུབ་པ་སོགས་གསུངས་པས་བག་དང་ལྡན་པར་བྱ་ལ། ཚོན་གྱི་རེ་ཁ་རྣམས་རིན་པོ་ཆེ་དཀར་པོ་སོགས་
ལས་བྱས་པའི་ཐུར་མ་ལ་སོགས་པའི་ངོ་བོར་མོས། དེ་ནས་རང་ངམ་སློབ་མ་སོགས་ཀྱིས་བཀྱེ་བས་ཆོག་ཅིང༌། རྡོ་རྗེ་ཁུ་ཚུར་གྱིས་འདྲི་བ་ཡང་ཚོན་དགྱེ་བའི་དང་པོར་བྱས་ནས། ཕྱིས་ཅི་བདེར་བྱ་རུང་ངོ་། །དཀྱིལ་འཁོར་གྱི་ཚོན་ས་ནི་རྩིག་པ་ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བ་དང༌། གཞལ་ཡས་ཁང་གི་ནང་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོ་བ། དེའི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བ་དང་འདབ་མ་རྣམས་ལ་ཟླ་བའི་དཀྱིལ་འཁོར་རེ་རེ། གདུང་འཁོར་གྱི་རེ་ཁཱ་གཞི་སྔོན་པོ་ལ་རྡོ་རྗེའི་རི་མོ་ཅན། གཞན་མ་ཐམས་ཅད་སྤྱི་དང་འདྲ་བས་དཀྱིལ་ཆོག་གཞན་ལས་ཤེས་པར་བྱ། བརྟེན་པ་ལྷའི་གནས་རྣམས་སུ་སྐུ་རྫོགས་པའམ། ཕྱག་མཚན་ནམ། ས་བོན་ནམ། སྐུ་མདོག་དང་མཐུན་པའི་ཚོན་གྱི་ཐིག་ལེ་རྣམས་གང་བདེར་བྱ་ཞིང༌། དཀྱིལ་འཁོར་བྲི་བ་ནས་བརྩམས་ཏེ་གནས་དེར་དབང་ཐོབ་པ་ཞིག་མེད་པར་སྟོང་པར་བཞག་ཏུ་མི་རུང་ལ། ཚོན་གྱི་སྐབས་ཀྱི་ལྟས་རྟོགས་ལུགས་དང༌། མཚན་མ་ངན་པ་བཟློག་པའི་ཐབས་ལ་སོགས་པ་ཞིབ་པར་སྔགས་རིམ་ཆེན་མོ་ལས་ཁོང་དུ་ཆུད་པར་བྱའོ། །དེ་ནས་སློབ་དཔོན་གྱིས་ཆད་ལྷག་ཡོད་མེད་ལེགས་པར་བརྟག་སྟེ། ཆད་པ་འདྲི། ལྷག་པ་དང་ཚོན་འཐོར་བ་རྣམས་དབྱི་ལ། ཆད་ལྷག་མ་ཚོར་བ་རྣམས་ཡི་གེ་བརྒྱ་པ་བརྗོད་དེ་ཉེས་པ་སྦྱང་བར་བདེ་ཆེན་རོལ་མཚོར་གསུངས། ཧཱུཾ་དང༌། བཛྲ་ཨ་མྲྀ་ཏ་བཟླས་པས་བདུད་རྩི་ལྔ་དང་བཅས་པའི་དྲིའི་ཆུས་དཀྱིལ་འཁོར་གྱི་ཕྱི་ངོས་སུ་བྱུགས་ཤིང་དེ་བཟླས་པའི་ཆུས་དཀྱིལ་འཁོར་བསངས། ཚོན་ལྷག་མ་རྣམས་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད། སྔར་ཡེ་ཐིག་གི་སྐབས་ལྟར་གཏོར་མ་འབུལ་བའམ་མ་བྱས་ཀྱང་ཆད་པའི་སྐྱོན་མེད་ལ། དེ་ནས། ཨོཾ་ཨཱཿ ཧཱུཾ་བཛྲ་མཱུཿ ལྷག་མའི་རྡུལ་ཚོན་གྱི་ཡེ་ཤེས་པ་ནམ་མཁར་བཞུགས་པས་རིགས་ལྔའི་ཐུགས་ཀར་གཤེགས་དམ་ཚིག་པ་རང་ལ་ཐིམ་པར་
གྱུར་པར་བསམ་ནས། ཚོན་རྣམས་ཅི་བདེར་བཞག་གོ །དེ་ནས་རས་བྲིས་ལ་བསྟེན་པ་ཡིན་ན། སའི་ཆོ་ག་ལྔ་ལས། དང་པོ་གསུམ་མི་དགོས་ཤིང༌། ཕུན་སུམ་ཚོགས་པའི་ཡན་ལག་ཏུ་ཕྱི་མ་གཉིས་དམ་པ་འགའ་ཞིག་གི་ཕྱག་བཞེས་སུ་མཛད་པ་ལྟར་བྱུང་ན་ལེགས་ལ། འོན་ཀྱང་འཇུག་པ་བདེ་བར་བྱེད་ན། ས་ཆོག་གི་སྐོར་རྣམས་བཞག་སྟེ། བདག་བསྐྱེད་རྫོགས་པར་གྲུབ་ནས། ས་ལྷ་སྟ་གོན་བྱས་ལ། དཀྱིལ་འཁོར་གང་དུ་བཀྲམ་པའི་གཞི་དེར་དྲི་བཟང་བྱུགས་ཤིང་མེ་ཏོག་གཅལ་དུ་བཀྲམ། མཎྜལ་གྱི་སྟེང་དུ་དྲི་བཟང་གི་ཆུས་ཐིག་ལེ་གཙོ་འཁོར་གྱི་གནས་སོ་སོར་བྱེད་ཚུལ་དང༌། ཚོམ་བུ་དགོད་ཚུལ། མཆོད་པ་སོགས་རྡུལ་ཚོན་གྱི་སྐབས་སུ་བཤད་པ་བཞིན་བྱས་ལ། ངག་འདོན་ཡང་དེ་དང་མཚུངས་ཤིང༌། ཁྱད་པར་ནི། དེར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། སྔར་ནམ་མཁར་བཏེག་པའི་དཀྱིལ་འཁོར་གྱི་ལྷ་ཚོགས་ཨོཾ་བཛྲ་ས་མ་ཛཿ ཞེས་པའི་ཚབ་ཏུ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་གྱི་ལྷ་ཚོགས་ཨོཾ་བཛྲ་ས་མ་ཛཿ ཞེས་འདོན་པ་བསྒྱུར་ཞིང༌། བུམ་པ་སྟ་གོན་དང༌། ལྷ་ལ་གསོལ་བ་གདབ་པ། སློབ་མ་སྟ་གོན་གསུམ་ནི་སྔ་མ་ཇི་ལྟ་བ་བཞིན་ནོ། །གསུམ་པ་དངོས་གཞིའི་ཆོ་ག་ལ། བསྒྲུབ་ཅིང་མཆོད་པ་དང༌། དབང་བསྐུར་བ་གཉིས་ལས། དང་པོ་ནི། སྔར་ལྷག་གནས་བྱས་པའི་བུམ་པ་སྤོས་ཀྱིས་སྣ་དྲངས། རོལ་མོའི་ཆ་བྱད་སྣ་ཚོགས་དང་བཅས་དཀྱིལ་འཁོར་ལ་གཡས་སྐོར་ལན་གསུམ་བྱས་ནས་རྣམ་རྒྱལ་དང་ལས་བུམ་ཤར་སྒོའི་ཁ་ནང་ལྟའི་གཡས་གཡོན་དུ་འགོད། དཀྱིལ་འཁོར་ལ་ཉེར་སྤྱོད་མ་མཐའ་བཅུ་ལས་མི་ཉུང་བའི་གང་རྒྱས་དང༌། གཞན་ཡང་གོས་ཟུང་དང༌། རྒྱལ་མཚན། བ་དན་ལ་སོགས་པ་མཆོད་པའི་ཡོ་བྱད། ཐ་ན་རི་མོར་བྲིས་པ་ཚུན་ཆད་ཀྱིས་ཀྱང་ཅི་འབྱོར་པ་བཤམས་པ་རྣམས་ལ་
ཧཱུཾ་དང༌། ཀཾ་ཀ་ནི་དང༌། ཨོཾ་བཛྲ་སྥ་ར་ཎ་ཁཾ། ཞེས་བརྗོད་པས་འབུལ་ལོ། །དེ་ནས་བདག་བསྐྱེད་རྒྱས་པ་ཉེར་བསྡུའི་བར་བཏང་སྟེ་ལྷའི་རྣལ་འབྱོར་ལ་གནས་པའི་ངང་ནས་ཁ་དཀྱིལ་འཁོར་ལ་ཕྱོགས་ཏེ་འདུག །ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཅེས་པའི་སྔགས་བརྗོད་ནས་ལས་བུམ་གྱི་ཆུས་དཀྱིལ་འཁོར་ལ་བསངས། ཨོཾ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། དཀྱིལ་འཁོར་སྟོང་པ་ཉིད་དུ་གྱུར། སྟོང་པའི་ངང་ལས་ཧཱུཾ་ལས་བྱུང་བའི་རྡོ་རྗེའི་ས་གཞི། ར་བ། དྲ་བ་དང༌། གུར། བླ་བྲེ། ཡེ་ཤེས་ཀྱི་མེ་འབར་བ་དང་བཅས་པའི་བསྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ། པཾ་ལས་སྣ་ཚོགས་པདྨ་འདབ་མ་སུམ་ཅུ་རྩ་གཉིས་པའི་ལྟེ་བར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་ལས་བྱུང་བའི་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོན་པོའི་ལྟེ་བར་བྷྲུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་པ། སྒོ་བཞི་པ། ཕྱི་ནས་རིམ་པ་བཞིན་དུ་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་རིན་པོ་ཆེའི་ཕ་གུ་སེར་པོས་བསྐོར་བ། དེའི་སྟེང་དུ་རིན་པོ་ཆེའི་བྲེ་ཕུལ་གྱི་སྟེང་དུ་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་བྱུང་བའི་དྲ་བ་དང་དྲ་བ་ཕྱེད་པ་དང༌། དྲིལ་བུ་དང་ཟླ་བ་རླུང་གིས་བསྐྱོད་པ་དང༌། མེ་ཏོག་གི་ཕྲེང་བ་དང༌། རྔ་ཡབ་ནོར་བུའི་ཡུ་བ་ཅན་འཕྱང་བ། དེའི་སྟེང་དུ་བྱ་འདབ་ལས་ཐུར་དུ་འཕྱང་བའི་མདའ་ཡབ་དང༌། སྟེང་དུ་ལངས་པའི་རིན་པོ་ཆེའི་དྲ་མིག་སེང་མའི་པུ་ཤུས་བསྐོར་བ། རྩིག་པའི་ཕྱི་རོལ་ཏུ་འདོད་ཡོན་གྱི་སྣམ་བུ་དམར་པོ་ལ་གནས་པའི་མཆོད་པའི་ལྷ་མོ་བཅུ་དྲུག་གིས་མཆོད་པ་བྱེད་པ། སྒོ་
དང་སྒོ་ཁྱུད་ཀྱི་མཚམས་དང༌། ཟུར་བཞིར་ཟླ་བ་ཕྱེད་པ་ལ་གནས་པའི་རྡོ་རྗེས་མཚན་པ། ནང་ཀ་བ་བརྒྱད་དང་ལྡན་པའི་སྟེང་རྡོ་རྗེའི་གདུང་ཟླུམ་པོ་དང༌། དེའི་སྟེང་དུ་རྡོ་རྗེའི་གདུང་བཞིས་མིག་མངས་རིས་སུ་བྲེས་ཤིང་མཛེས་པར་ཕུབ་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་ཕྱེད་པ་དང༌། ནོར་བུ་རིན་པོ་ཆེའི་ཏོག་གིས་སྤྲས་པ། སྒོ་བཞིའི་སྟེང་གི་ཐད་སོར་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་དང་གདུགས་དང་གཡས་གཡོན་ན་རི་དྭགས་ཕོ་མོ་དང་བཅས་ཤིང༌། སྣམ་བུ་སོ་སོ་ལ་རྒྱལ་མཚན་དང་བ་དན་ལ་སོགས་པའི་རྒྱན་ཐམས་ཅད་ཀྱིས་བརྒྱན་པའི་གཞལ་ཡས་ཁང་གི་ལྷ་སྣམ། ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོ་བ། དེའི་སྟེང་དུ་སྣ་ཚོགས་པདྨ་འདབ་མ་བརྒྱད་པའི་ལྟེ་བ་དང་འདབ་མ་རྣམས་ལ་ཟླ་བའི་དཀྱིལ་འཁོར་རེ་རེ། དབུས་ཀྱི་གདན་གྱི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་བཅོམ་ལྡན་འདས་རྡོ་རྗེ་མི་འཁྲུགས་པ། ཞེས་པ་ནས། སྐྱིལ་མོ་ཀྲུང་གིས་བཞུགས་པ། ཞེས་པའི་བར་གྱིས་གོང་ལྟར་གཙོ་བོ་བསྐྱེད། འདབ་མ་བརྒྱད་ལ་ཤར་དུ་ཤཾ་ལས་དཔལ་བེའུ་ཤཾ་གིས་མཚན་པ་ལས། པདྨ་ཅན་དཀར་མོ་གཡས་དཔལ་བེའུ་འཛིན་པ། ལྷོར་བཾ་ལས་པདྨ་བཾ་གྱིས་མཚན་པ་ལས། འོད་ལྡན་མ་དམར་མོ་གཡས་པདྨ༌༝། ནུབ་ཏུ་ཚཾ་ལས་གདུགས་ཚཾ་གྱིས་མཚན་པ་ལས། མདངས་ལྡན་སྔོན་མོ་གཡས་གདུགས༌༝། བྱང་དུ་ཤཾ་ལས་དུང་ཤཾ་གིས་མཚན་པ་ལས། དྲི་མེད་མ་ལྗང་གུ་
གཡས་དུང༌༝། མེར་ཙཾ་ལས་འཁོར་ལོ་ཙཾ་གྱིས་མཚན་པ་ལས། འཇིགས་བྱེད་མ་དཀར་མོ་གཡས་འཁོར་ལོ༌༝། སྲིན་པོར་དྷྭཾ་ལས་རྒྱལ་མཚན་དྷྭཾ་གྱིས་མཚན་པ་ལས། རྣལ་འབྱོར་མ་སྔོན་མོ་གཡས་རྒྱལ་མཚན༌༝། རླུང་དུ་ཀཾ་ལས་བུམ་པ་ཀཾ་གིས་མཚན་པ་ལས། དཀར་ཤམ་མ་དམར་སྐྱ་གཡས་བུམ་པ༌༝། དབང་ལྡན་དུ་མཾ་ལས་གསེར་ཉ་མཾ་གྱིས་མཚན་པ་ལས། ཡིད་གཞུངས་མ་ལྗང་གུ་གཡས་གསེར་ཉ་འཛིན་པ། ཐམས་ཅད་ཀྱང་ཞལ་གཅིག་ཕྱག་གཉིས་མ། གཡས་པས་རང་རང་གི་ཕྱག་མཚན་ཐུགས་ཀར་འཛིན་ཅིང༌། གཡོན་པ་དཀུར་བརྟེན་པ། ནུ་འབུར་ཟུང་གིས་མཛེས་ཤིང་ལང་ཚོ་དར་ལ་བབ་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན། ཟླ་བ་ལ་རྒྱབ་བརྟེན་ཅིང༌། སེམས་དཔའི་སྐྱིལ་མོ་ཀྲུང་གིས་བཞུགས་པའོ། །དེ་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་མར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། རང་གི་སྙིང་གའི་ཧཱུཾ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཅོམ་ལྡན་འདས་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་གྱི་རྣམ་པར་སྤྱན་དྲངས། ཨོཾ་བཛྲ་ས་མ་ཛཿ མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེས་རྣམ་སྦྱངས་ཤིང༌། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པ། །ཁྱེད་བཞེད་འགྲོ་དོན་མཛད་དུས་འདི་
ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་བརླབས་སྣ་ཚོགས་སྟོན་མཛད་ཅིང༌། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་གསོལ། །སྤྲིན་བྲལ་མཁའ་ལ་ཡིད་འོང་འཇའ་ཚོན་བཞིན། །ཆོས་དབྱིངས་ངང་ལས་གཟུགས་སྐུའི་རྣམ་རོལ་གྱིས། །གྲངས་མེད་འགྲོ་བའི་དོན་མཛད་ལྷའི་འཁོར་ལོ། །རྟེན་དང་བརྟེན་པར་བཅས་པ་གཤེགས་སུ་གསོལ། །ཞེས་བརྗོད། ལས་སྔགས་ལན་གསུམ་གྱིས་བསྔགས་པའི་མཆོད་ཡོན་གྱི་སྣོད་དམ་ཚིག་གི་ཕྱག་རྒྱས་བཟུང་ལ་མཛུབ་མོ་གཡོབ་ཅིང༌། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །བདག་གི་མཆོད་ཡོན་བཞེས་ནས་ཀྱང༌། །མཆོད་པས་བདག་ལ་དགྱེས་པར་མཛོད། །ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་ཨེ་ཧྱ་ཧི། ཞེས་དང༌། ཨོཾ་མཾ་ག་ལ་ཤྲཱི་ཛདྨ་ཛ་སྭཱཧཱ། དེ་བཞིན་དུ་སྔགས་ཀྱི་ཐོག་མཐའ་འདྲ་བར་སྦྱར་ལ། མཾ་ག་ལ་པདྨ། མཾ་ག་ལ་ཚ་ཏྲཾ་ག །མཾ་ག་ལ་ཤཾ་ཁ། མཾ་ག་ལ་ཙཀྲ །མཾ་ག་ལ་དྷྭ་ཛ། མཾ་ག་ལ་ཀ་ལ་ཤ །མཾ་ག་ལ་ཉ་ཚ་སྭཱཧཱ། ཞེས་པ་རྣམས་རེ་རེའི་མཐར། ཨེ་ཧྱ་ཧི། ཞེས་བརྗོད་ཅིང༌། སོ་སོའི་མཐར་བཟེད་ཞལ་གྱི་ནང་དུ་མཆོད་ཡོན་ཅུང་ཟད་རེ་བླུག་ཅིང་སྤྱན་དྲངས། ཨོཾ་ཨཱཿ བིགྷྣཱན་ཏ་ཀྲིཏ་ཧཱུཾ་ཕཊ། ཅེས་ལན་གསུམ་གྱིས་ཕྱི་འབྲང་གི་བགེགས་བསྐྲད། རྡོ་རྗེ་དྲིལ་བུ་འཛིན་པས། བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་ལ་མཆོད་ཡོན་བཞེས་ནས་ཀྱང༌། །འདི་ཉིད་དུ་ནི་བཞུགས་སུ་གསོལ། །ཨོཾ་སརྦ་ཏ་ཐཱ་ག་ཏ་པྲ་ཝ་ར་སད་ཀ་རཾ་
ཨརྒྷཾ་པྲ་ཏཱིཙྪ་སྭཱཧཱ། སྤྲོ་ན། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱི་འོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་ཁྲུས་གསོལ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཨོཾ་པདྨ་ཀ་མ་ལ་ཡེ་སྟྭཾ། ཞེས་པའི་གདན་ཕུལ་ལ། ཨོཾ་བཛྲ་པུཥྤེ་ཨཱཿ ཧཱུཾ། ཞེས་སོགས་ཀྱིས་མཆོད། ཐལ་མོ་སྦྱར་ཏེ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝ་ཀྩིཏྟ་པྲ་ཎ་མེ་ན་བཛྲ་བནྡྷ་ནཾ་ཀ་རོ་མི། ཞེས་པས་ཕྱག་བྱ། དམ་ཚིག་གི་ཕྱག་རྒྱ་བསྟན་ཏེ། ཨོཾ་སརྦ་ཏ་ཐཱ་ག་ཏོ་དྡྷ་ཝ་ཡེ་སྭཱཧཱ། ཞེས་བརྗོད་པས། ལྷ་ཐམས་ཅད་མཉེས་པར་བསམ། ཛཿ ཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། དེ་ནས་སྔར་ནམ་མཁར་བཏེག་པའི་སྟ་གོན་གྱི་ལྷ་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད། ཛཿ ཧཱུཾ་བཾ་ཧོཿ ཞེས་པའི་སྔགས་རྒྱས་དགུག་གཞུག་བཅིང་མཉེས་བྱས་ནས། སྟ་གོན་གྱི་དཀྱིལ་འཁོར་རྟེན་དང་བརྟེན་པ་རྣམས་རང་རང་གི་དམ་ཚིག་པ་སོ་སོ་ལ་ཐིམ་པས་གཉིས་སུ་མེད་པར་གྱུར་པར་བསམ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རྣམས་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང༌། བདུད་རྩིའི་ཆུས་དབང་བསྐུར། ལུས་གང༌། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་མི་བསྐྱོད་པའི་དབུ་
བརྒྱན་ཅིང༌། དབང་གི་ལྷ་རྣམས་དེ་ཉིད་ལ་ཐིམ་པར་གྱུར། ཅེས་དབང་བསྐུར་རྒྱས་གདབ་བྱ། དེ་ནས་མདུན་བསྐྱེད་ཀྱི་མཆོད་པ་རྣམས་བསངས་སྦྱངས་བྱིན་གྱིས་བརླབས་ལ། ཐལ་མོ་སྦྱར་ཏེ། འཇིག་རྟེན་ཁམས་ནི་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །སངས་རྒྱས་སྲས་དང་བཅས་ལ་འབུལ། །བཞེས་ནས་འགྲོ་བའི་དོན་ཀུན་མཛོད། །ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་མཎྜ་ལ་ས་པཱ་རི་ཝ་ར་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ། ཞབས་བསིལ་ནས་རོལ་མོའི་བར་དུ་འདོན་པ་བསྒྱུར་ལ་སོ་སོའི་སྔགས་དང་ཕྱག་རྒྱས་འབུལ། མཐར་དྷརྨ་ར་ཎི། ཞེས་རོལ་ཆེན་དང་བཅས་པ་བྱ། རིན་ཆེན་མཛེས་པའི་བཀྲ་ཤིས་བུམ་པ་འདི། །སྣ་ཚོགས་བཅུད་ཀྱིས་བཀང་སྟེ་ཕུལ་བ་ཡིས། །ལས་དང་ཉོན་མོངས་དྲི་མ་ཀུན་དག་ནས། །བྱང་ཆུབ་སེམས་ཀྱི་རླན་གྱིས་བརླན་པར་ཤོག །ཨོཾ་བཛྲ་ཀ་ལ་ཤ་པྲ་ཏཱིཙྪ་ཧཱུཾ་སྭཱཧཱ། སྣ་ཚོགས་དབང་པོའི་གཞུ་ལྟར་རབ་བཀྲ་བ། །གང་ལ་རེག་ན་བདེ་བའི་རྒྱུར་གྱུར་བའི། །གོས་བཟང་རིན་ཆེན་བདག་བློ་སྦྱངས་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ཨོཾ་བཛྲ་ཝསྟྲ་ཡེ་ཨཱཿ ཧཱུཾ་སྭཱཧཱ། རྒྱལ་བ་མཚན་དཔེའི་རང་བཞིན་རྒྱན་ལྡན་ཕྱིར། །རྒྱན་གཞན་དག་གིས་བརྒྱན་པར་མི་འཚལ་ཡང༌། །རིན་ཆེན་རྒྱན་མཆོག་ཕུལ་བས་འགྲོ་ཀུན་གྱིས། །མཚན་དཔེས་བརྒྱན་པའི་སྐུ་ལུས་ཐོབ་པར་ཤོག །ཨོཾ་བཛྲ་ཨཱ་ལཾ་ཀཱ་ར་ཝ་པུ་ཥ་ནི་སྭཱཧཱ། ཕུན་ཚོགས་བཀྲ་ཤིས་དགེ་མཚན་མ་ལུས་ཀུན། །གཅིག་ཏུ་རབ་འཁྱིལ་ཡིད་འོང་དཔལ་བེ་འུ། །དངོས་བཤམས་ཡིད་སྤྲུལ་དཀྱིལ་འཁོར་ལྷ་ཚོགས་ལ། །གུས་པས་འབུལ་ལོ་
བརྩེ་བས་བཞེས་སུ་གསོལ། །༝ ཨོཾ་སརྦ་ཏ་ཐཱ་ག་ཏ་མཾ་ག་ལ་ཤྲཱི་ཛངྨ་ཛ་པུ་ཛི་ཏེ་ཧཱུཾ། དེ་བཞིན་དུ་ཚིག་རྐང་འོག་མ་གཉིས་འདྲ་བ་ལ། སྟོང་གསུམ་ཀུན་ལ་ཐོགས་མེད་དབང་བསྒྱུར་བའི། །གསེར་སྦྱངས་ལས་གྲུབ་འཁོར་ལོ་རྩིབས་སྟོང་འདི། །༝ སྔགས་ཀྱི་ཐོག་མཐའ་འདྲ་བ་ལ། ཤྲཱི་ཛངྨ་ཛའི་ཚབ་ཏུ། ཙཀྲ། རྙོག་བྲལ་ཡིད་བཞིན་དལ་འགྲོ་འཁྱིལ་བའི་དབུས། །མཉེན་འཇམ་འདབ་སྟོང་འཛུམ་པའི་པད་དཀར་འདི། །༝ པ་དཱ། འདོད་དགུའི་ཆར་འབེབས་ནོར་བུའི་ཏོག་གིས་མཛེས། །སྲིད་པའི་རྩེ་མོར་བསྒྲེང་བའི་རྒྱལ་མཚན་འདི། །༝ དྷྭ་ཛ། རིན་ཆེན་ཕྲ་ཚོམ་གྱིས་སྤྲས་ཡུ་བ་ཅན། །ལྷ་རྫས་དར་གྱི་ཤམ་བུ་གཡོ་བའི་གདུགས། །༝ ཚ་ཏྲཾ་ག །ཟག་པ་མེད་པའི་བདུད་རྩིའི་བཏུང་བ་ཡིས། །མངོན་པར་བཀང་བའི་བུམ་པ་བཟང་པོ་འདི། །༝ ཀ་ལ་ཤ །རབ་སྙན་ཚངས་པའི་དབྱངས་ཀྱི་སྒྲ་ཆེན་པོ། །ཕྱོགས་བཅུར་སྒྲོགས་པའི་དུང་དཀར་གཡས་འཁྱིལ་འདི། །༝ ཤཾ་ཁ། གཟུགས་ཀུན་གསལ་མཐོང་འདྲེན་བྱེད་རབ་ལྡན་པའི། །འཛམ་བུ་ཆུ་བོའི་གསེར་ལས་གྲུབ་པའི་ཉ། །༝ ཉ་ཚ་ར། ཞེས་ཕྱག་རྒྱ་མེད་པ་རྣམས་ལ་ནམ་མཁའ་མཛོད་ཀྱི་ཕྱག་རྒྱས་དབུལ། རིན་ཆེན་དབང་གི་རྒྱལ་པོ་བཻ་ཌཱུརྱ། །སྔོན་པོ་ལ་སོགས་ཁ་དོག་དབྱིབས་ཀྱི་གཟུགས། །རྣམ་གསུམ་གཟུགས་ཀྱི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་སྤྱན་ལ་དབུལ་བར་བྱ། །ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་མཎྜ་ལ་ས་པ་རི་ཝཱ་ར་རཱུ་པ་པྲ་ཏཱིཙྪ་ཧཱུཾ་སྭཱཧཱ། མ་ཟིན་འབྱུང་བའི་ཚོགས་པ་ལས་བྱུང་བའི། །བརྗོད་བྲལ་དབྱངས་ལ་སོགས་པ་སྒྲ་ཡི་ཚོགས། །རྣམ་གསུམ་སྒྲ་ཡི་རྡོ་རྗེ་མར་བྱས་ནས། །དཀྱིལ་
འཁོར་ལྷ་ཡི་སྙན་ལ་དབུལ་བར་བྱ། །ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་མཎྜ་ལ་ས་པ་རི་ཝཱ་ར་ཤཔྟ་པྲ་ཏཱིཙྪ་ཧཱུཾ་སྭཱཧཱ། ག་བུར་ཨ་ཀར་ཛཱ་ཏི་ལ་སོགས་པ། །ལེགས་པར་སྦྱར་ལས་བྱུང་བ་དྲི་ཡི་ཚོགས། །རྣམ་གསུམ་དྲི་ཡི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་ཤངས་ལ་དབུལ་བར་བྱ། །ཨོཾ་སརྦ༌༝ཝཱ་ར་གནྡྷེ་པྲ་ཏཱིཙྪ་ཧཱུཾ་སྭཱཧཱ། ལུས་མཆོག་རྟས་བྱེད་བདུད་རྩིའི་ཟས་སོགས་ཀྱི། །མངར་སྐྱུར་ཁ་དང་བསྐ་ལ་སོགས་པའི་རོ། །རྣམ་གསུམ་རོ་ཡི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་ལྗགས་ལ་དབུལ་བར་བྱ། །ཨོཾ་སརྦ༌༝ཝཱ་ར་ར་ས་པྲ་ཏཱིཙྪ་ཧཱུཾ་སྭཱཧཱ། ལུས་ལ་རེག་པ་ཙམ་གྱིས་བདེ་སྟེར་བ། །དཔག་བསམ་གོས་ལ་སོགས་པ་རེག་བྱའི་ཚོགས། །རྣམ་གསུམ་རེག་བྱའི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་སྐུ་ལ་དབུལ་བར་བྱ། །ཨོཾ་སརྦ༌༝ཝཱ་ར་སྤརྴ་པྲ་ཏཱིཙྪ་ཧཱུཾ་སྭཱཧཱ། བཻ་ཌཱུར་སེར་པོའི་བརྟན་པ་འཕྲོག་བྱེད་པའི། །གཟི་འོད་འབར་བའི་རྩིབས་སྟོང་འཁོར་ལོ་འདི། །མི་འཁྲུགས་དཀྱིལ་འཁོར་འཁོར་ལོའི་ཚོགས་ལ་འབུལ། །ཇི་སྙེད་ཕན་བདེའི་མཆོག་དེ་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་ཙཀྲ་རཏྣ་པཱུ་ཛི་ཏེ་ཧཱུཾ། བསམ་པ་ཙམ་གྱིས་འདོད་པའི་དོན་རྣམས་ཀུན། །རབ་སྟེར་ནོར་བུ་དབང་གི་རྒྱལ་པོ་འདི། །མི་འཁྲུགས་༝ ཇི་སྙེད་༝ མ་ཎི། སྔོ་བསངས་རི་དྭགས་མིག་ཅན་སྐྱེངས་བྱེད་པའི། །སྒྱུ་རྩལ་ཉམས་ལྡན་ཐུན་མཚམས་མཛེས་མ་འདི། །མི་འཁྲུགས༌༝ ཇི་སྙེད༌༝ སྟྲི། བློ་གྲོས་ཆུ་གཏེར་ཆེ་ལས་ཆོས་ཀྱི་སྲིད། །རྦ་རླབས་གྱེན་འཕྱུར་ཁྱིམ་བདག་
རིན་ཆེན་འདི། །མི་འཁྲུགས༌༝ ཇི་སྙེད༌༝ པུ་རུ་ཥ། བསིལ་ལྡན་ལྷུན་པོར་རྒྱན་གྱི་འཕྱང་མོ་ཉུག །འཛིན་བྱེད་སྟོབས་ལྡན་གཉིས་འཐུང་དབང་པོ་འདི། །མི་འཁྲུགས༌༝ ཇི་སྙེད༌༝ ཧ་སྟི། རྡུལ་གྱི་རྒྱལ་མཚན་དལ་བའི་གནས་བསྟེན་པར། །བྱེད་པོ་ཅང་ཤེས་ཡིད་འོང་རྟ་མཆོག་འདི། །མི་འཁྲུགས༌༝ ཇི་སྙེད༌༝ ཏུ་རཾ་ག་ཨ་ཤྭ། དཔལ་རྩལ་སྟོབས་ཀྱིས་ར་གྷུའི་སྲས་པོ་ཡང༌། །ཞུམ་པར་བྱེད་པའི་ཕུན་ཚོགས་དམག་དཔོན་འདི། །མི་འཁྲུགས་དཀྱིལ་འཁོར་འཁོར་ལོའི་ཚོགས་ལ་འབུལ། །ཇི་སྙེད་ཕན་བདེའི་མཆོག་དེ་སྩལ་དུ་གསོལ། །ཁངྒ༌། རྒྱུན་གྱི་རྣལ་འབྱོར་དང་ལོང་སྐབས་མེད་དུས་མཆོད་པ་འདི་རྣམས་ཚིགས་བཅད་དོར་བའི་སྔགས་ཙམ་གྱིས་ཕུལ་ཀྱང་རུང༌། དེ་ནས་རྡོར་དྲིལ་འཛིན་པས་དྲིལ་སྟབས་དང་བཅས་ཏེ། རྒྱས་པར་སྤྲོ་ན། ཆོས་དབྱིངས་རྣམ་དག་མཁའ་ཀློང་ཡངས་པ་ལས། །ནས། བཅོམ་ལྡན་མི་འཁྲུགས་པ་ལ་ཕྱག་འཚལ་བསྟོད། །གྲངས་མེད་འགྲོ་ལ་བདེ་ཆེན་སྩོལ་བའི་སླད། །མཛེས་སྡུག་ཡིད་འོང་སྤྲུལ་བའི་ལྷ་མོ་བརྒྱད། །མཁའ་ལ་དབང་པོའི་གཞུ་ལྟར་རྣམ་བཀྲ་བའི། །བགྲང་ཡས་ལྷ་ཡི་ཚོགས་ལ་ཕྱག་འཚལ་ལོ། །སྒྲིབ་མེད་མཛེས་ལྡན་སྤྱན་གྱིས་ཉེར་གཟིགས་ལ། །བདག་ཅག་རྣམས་ཀྱིས་ཚེ་རབས་ཐོག་མེད་ནས། །རྨོངས་པའི་དབང་གྱུར་བསགས་པའི་སྡིག་ལྟུང་རྣམས། །བག་ཆགས་བཅས་པ་དྲུངས་ནས་འབྱིན་པར་མཛོད། །ཁྱད་པར་སྡོམ་གསུམ་བཅས་མཚམས་ལས་འགལ་དང༌། །བླ་མ་དཀོན་མཆོག་བྱང་སེམས་ཕ་མ་ལ། །ལོག་པར་བསྒྲུབ་དང་དམ་ཆོས་སྤངས་པ་སོགས། །ད་ལྟ་ཉིད་དུ་བྱང་ཞིང་དག་པར་མཛོད། །མི་ཁོམ་
བརྒྱད་དུ་སྐྱེ་འགྱུར་ལས་སྒྲིབ་སོགས། །མིང་ཙམ་ལྷག་མ་མེད་པར་ཞི་གྱུར་ནས། །འདི་སྣང་འགགས་ཚེ་བཅོམ་ལྡན་མི་འཁྲུགས་པ། །སྲས་བཅས་མངོན་སུམ་མཐོང་བར་བྱིན་གྱིས་རློབས། །མངོན་དགའ་ལ་སོགས་དག་པའི་ཞིང་མཆོག་ཏུ། །རྒྱལ་བའི་སྤྱན་སྔར་ཟབ་རྒྱས་དམ་པའི་ཆོས། །ཐོས་བསམ་བསྒོམ་པའི་སྐལ་བ་མཆོག་ཐོབ་ནས། །རྒྱས་སྲས་སྤྱོད་ལ་སློབ་པར་བྱིན་གྱིས་རློབས། །གཟུངས་དང་མངོན་ཤེས་རྣམ་པར་ཐར་པའི་སྒོ། །མུ་མཐའ་ཡས་པའི་ཏིང་འཛིན་ཚོགས་ཐོབ་ནས། །རྒྱལ་རྣམས་མཆོད་དང་འགྲོ་བ་སྒྲོལ་བ་ལ། །རྒྱས་སྲས་ཀུན་བཟང་ལྟ་བུར་བྱིན་གྱིས་རློབས། །ཞེས་བརྗོད། བསྡུ་ན། ཆོས་དབྱིངས་རང་བཞིན་ཞེས་སོགས་ཚིགས་བཅད་གཅིག་ཙམ་གྱིས་བསྟོད། གྲུབ་ན། ན་མཿ སརྦ་བུདྡྷ་བྷོ་དྷི་སཏྭཱ་ནཱཾ། སརྦ་ཏྲ་སཾ་ཀུ་རུ་མི་ཏཱ་བི་ཛྙཱ་ར་ཤི་ནི་ན་མོ་སྟུ་ཏེ་སྭཱཧཱ། ཞེས་བསྟོད་པ་འབྱུང་བའི་སྔགས་འདི་ཡང་ཅི་ནུས་བརྗོད། །དེ་ནས་བཟླས་པ་ནི། མདུན་བསྐྱེད་ཀྱི་ལྷ་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་གྱི་ཚོགས་འཕྲོས། རང་དང་དམིགས་ཡུལ་གྱིས་གཙོ་བྱས་པའི་སེམས་ཅན་ཐམས་ཅད་ལ་ཕོག་པས་ཚེ་རབས་ཐོག་མ་མེད་པ་ནས་བསགས་པའི་ལས་ངན་སྡིག་སྒྲིབ་སྤྱི་དང་ཁྱད་པར་དུ་ངན་འགྲོར་སྐྱེ་འགྱུར་གྱི་ལས་ངན་བག་ཆགས་དང་བཅས་པ་བྱང་ཞིང་དག །ས་ལམ་གྱི་ཡོན་ཏན་མཐའ་དག་མངོན་དུ་འགྱུར་བའི་སྐལ་བ་དང་ལྡན་པར་བྱིན་གྱིས་བརླབས་པར་བསམས་ལ། གཟུངས་རིང་བརྒྱ་སྟོང་སོགས་དང་འཁོར་
རྣམས་ཀྱི་སྔགས་ཀྱང་མ་མཐའ་ཉེར་གཅིག་ཙམ་རེ་བཟླ། མཇུག་ཏུ་ཡིག་བརྒྱ་བརྗོད་དེ་ལྷག་ཆད་ཁ་བསྐང༌། དཀྱིལ་འཁོར་པ་ལ་འབུལ་རྒྱུའི་གཏོར་མ་བྱིན་གྱིས་བརླབས་ལ། ལྷ་རྣམས་ཀྱི་ལྗགས་རྡོ་རྗེའི་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་གྱུར། ཨོཾ་སརྦ་ཏ་ཐཱ་ག་ཏ་བཛྲ་ཨཀྵོ་བྷྱ་མཎྜ་ལ་ས་པ་རི་ཝཱ་ར་ཨ་ཀ་རོ་མུ་ཁཾ་ཞེས་པ་ནས། གྲིཧྣ་དཾ་བ་ལིཾ་ཏ་ཡེ་སྭཱཧཱ། ཞེས་ལན་གསུམ་གྱིས་འབུལ། མཆོད་བསྟོད་མདོར་བསྡུས་བྱ། བཅོམ་ལྡན་འདས་འཁོར་དང་བཅས་པས་བདག་ཅག་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་ཏུ་གསོལ། །ཞེས་གསོལ་བ་བཏབ། ༈ དེ་ནས་ཕྱི་རོལ་ཏུ་གཏོར་མ་ཆ་གསུམ་སྤྱི་འགྲོ་ལྟར་བཏང༌། ཉེ་རེག་བྱས་ལ་ལས་སྔགས་བཟླ་ཞིང་ནང་དུ་འོངས་ཏེ། རང་ཉིད་ཧཱུཾ་མཛད་དུ་གསལ་བས་རྡོ་རྗེ་ཤུགས་ཀྱི་འཇུག་པས་དཀྱིལ་འཁོར་གྱི་ནང་དུ་ཞུགས། ཡིག་བརྒྱ་བརྗོད་ཅིང་བསྐོར་བ་ལན་གསུམ་བྱས་ཏེ། ཨོཾ་བཛྲོད་གྷ་ཊ། ཞེས་སོགས་ལན་བཞིས་སྒོ་དབྱེ་བྱ། ཨོཾ་པྲ་ན་མ་མི་སརྦ་ཏ་ཐཱ་ག་ཏན། ཞེས་ཕྱག་བྱ། བདག་དང་སེམས་ཅན་ཐམས་ཅད་ལ་དངོས་གྲུབ་ཐམས་ཅད་ཀྱི་བཀའ་དྲིན་སྩོལ་ཅིག །ཅེས་གསོལ་བ་གདབ་བོ། །གཉིས་པ་དབང་བསྐུར་བ་ལ་གསུམ། བདག་ཉིད་ཞུགས་ཤིང་དབང་བླང་སྟེ་བདེན་པའི་བྱིན་རླབས་བྱ་བ། སློབ་མ་བཅུག་ཅིང་དབང་བསྐུར་བ། དཀྱིལ་འཁོར་གྱི་མཇུག་གི་བྱ་བའོ། །དང་པོ་ལ་གཉིས། བདག་ཉིད་ཞུགས་ནས་དབང་བླང་བ་དང༌། བདེན་པའི་བྱིན་རླབས་བྱ་བའོ། །དང་པོ་ལ་གཉིས། དཀྱིལ་འཁོར་དུ་འཇུག་པ་དང༌། ཞུགས་ནས་དབང་བླང་བའོ། །དང་པོ་ལ་གཉིས། གདོང་གཡོགས་དང་བཅས་ཏེ་འཇུག་པ་དང༌། དཀྱིལ་འཁོར་མཐོང་བའི་བདག་ཉིད་དུ་འཇུག་པའོ། །དང་པོ་ལ་གཉིས། ཡོལ་
བའི་ཕྱི་འཇུག་དང༌། ནང་འཇུག་གོ །དང་པོ་ནི་བདག་འཇུག་གི་མཆོད་པ་རྣམས་བྱིན་གྱིས་བརླབ། རང་ལ་དབང་བསྐུར་བའི་བླ་མ་དང་དཀྱིལ་འཁོར་གྱི་གཙོ་བོ་ངོ་བོ་དབྱེར་མེད་དུ་མོས་པས་རང་ལ་དབང་གི་བྱ་བ་རྣམས་མཛད་པ་དང་རང་གཙོ་བོ་ལས་ཕྱེ་ནས་དབང་ཞུ་བ་པོའི་སློབ་མའི་ཚུལ་དུ་མོས་ནས་ཐོག་མར་ཤར་སྒོའི་ཕྱི་རོལ་ཏུ་གནས་པས་དཀྱིལ་འཁོར་དུ་འཇུག་པའི་སྐོར་རྣམས་ཞུ་བའི་ཕྱིར་མཎྜལ་རྒྱས་པ་ཕུལ་ལ། གསོལ་འདེབས་ཀྱི་ཚིག་དོན་རྣམས་དྲན་བཞིན་པར་གདུང་ཤུགས་དྲག་པོས། དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བརྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་བགྱི། །ཞེས་པ་ལན་གསུམ་གྱིས་གསོལ་བ་གདབ། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་དང༌། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང༌། །བྱང་ཆུབ་སེམས་པའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང༌། །དེ་བཞིན་དུ་ནི་བསླབ་པ་ལའང༌། །རིམ་པ་བཞིན་དུ་བསླབ་པར་བགྱི། །ཞེས་པ་རྣམས་ལན་
གསུམ་གྱིས་སྐྱབས་སེམས་ཁྱད་པར་ཅན་དང་བྱང་སྡོམ་བཟུང༌། ཨོཾ་ཙཀྵུ་བནྡྷ་ཝཱ་ར་མ་ན་ཡེ་ཧཱུཾ། ཞེས་པས་མིག་དར་བཅིངས། ཨཱཿ ཁཾ་བཱི་ར་ཧཱུཾ། གིས་མེ་ཏོག་གི་ཕྲེང་བ་བཟུང༌། ཆས་འཇུག་བསྡུས་པ་ལ་མོས་ན་མིག་དར་དང་མེ་ཏོག་བཟུང་བ་དེ་ཙམ་གྱིས་ཆོག་ལ། ཡང་རྒྱས་པར་སྤྲོ་ན་ཕྲེང་བ་ལས་འབྱུང་བ་བཞིན། ལས་སྔགས་བཟླས་པའི་གོས་དམར་པོ་འམ་སེར་པོ་སོགས་ཁ་དོག་གང་ཡང་རུང་བའི་སྨད་གཡོགས། ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཨ་ལཾ་ཀཱ་ར་ཝཱསྟྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་བརྗོད་ནས་བགོ་ཞིང༌། ཨོཾ་བཛྲ་རཀྵ་ཧཱུཾ། ཞེས་པས་སྟོད་གཡོགས་དང༌། ཨོཾ་བཛྲ་ཨུཥྞཱི་ཥ་ཧཱུཾ་ཕཊ། ཅེས་བརྗོད་ལ་གཙུག་ཏོར་གྱོན་རྡོ་རྗེའི་རིགས་ཀྱི་དམ་རྒྱ་སྙིང་གར་བཅིངས་ཏེ། ཨོཾ་བཛྲ་ཨུདྦྷ་ཝ་ཡེ་སྭཱཧཱ། ཞེས་བརྗོད། ཨོཾ་ཨ་མྲྀ་ཏེ་ཧཱུཾ་ཕཊ། ཅེས་བགེགས་བསང༌། རིགས་ངེས་པའི་སླད་དུ། ཀྱཻ་དགའ་བ་ལ་དགའ་ཁྱོད་སུ་ཡིན། །ཞེས་དྲི། བདེ་ཆེན་བདག་ནི་སྐལ་བཟང་ལགས། །ཞེས་ལན་གདབ། རང་གི་སྙིང་གར་ཟླ་བའི་དཀྱིལ་འཁོར་ཆ་ཤས་ཡོངས་སུ་རྫོགས་པ་ཉ་གང་བ་དེའི་སྟེང་དུ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་ཞིག་བྱུང་བར་མོས། སུ་ར་ཏི་ས་མ་ཡ་སྟྭཾ་ཧོཿ སིདྷི་བཛྲ་ཡ་ཐ་སུ་ཁཾ། ཞེས་བརྟན་པར་བྱ། གསང་བར་གདམས་པ་ནི། སྤྱི་བོར་རྡོ་རྗེ་བཞག་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །ཞེས་དམ་ལ་བཞག །གཉིས་པ་ཡོལ་བའི་ནང་འཇུག་གི་ཕྱག་ལེན་ལ་དཀྱིལ་འཁོར་གྱི་ཡོལ་བ་
དང་རྣམ་རྒྱལ་གྱི་སྟེང་ཁེབས་སོགས་བསལ་ཞིང༌། བསྒོམ་དོན་ནི། བླ་མས། ཨཱཿ ཁཾ་བཱི་ར་ཧཱུཾ། ཞེས་བརྗོད་དེ། རྡོ་རྗེ་དང་བཅས་པའི་ཕྱག་གིས་དཀྱིལ་འཁོར་གྱི་ནང་དུ་ཁྲིད་པར་བསམ། ཡེ་ཤེས་པ་དབབ་པའི་དོན་དུ་མཎྜལ་ཕུལ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །རྡོ་རྗེ་མི་འཁྲུགས་པ་བདག་ལ་དབབ་ཏུ་གསོལ། ཞེས་གསོལ་བ་བཏབ་ནས། རང་ཉིད་སྐད་ཅིག་གིས་མི་འཁྲུགས་པ་སྐུ་མདོག་སྔོན་པོ་ཞལ་གཅིག་ཕྱག་གཉིས། གཡས་ས་གནོན་གཡོན་མཉམ་གཞག་གི་སྟེང་ན་རྡོ་རྗེ་འཛིན་པ། དར་གྱི་ན་བཟའ་དང་རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལཀྲུང་གིས་བཞུགས་པའི་སྐུར་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་སྔོན་པོ། བླ་མ་དང་གཙོ་བོ་ཐ་མི་དད་པའི་ཐུགས་ཀ་ནས་འོད་ཟེར་འཕྲོས་པས། མདུན་བསྐྱེད་ཀྱི་ལྷ་རྣམས་ཀྱི་ཐུགས་ཀར་ཕོག །ཐུགས་རྒྱུད་བསྐུལ་ཏེ་ཐུགས་ཀ་ནས་འོད་ཟེར་ཕོ་ཉ་ལྟ་བུ་བསམ་གྱིས་མི་ཁྱབ་པ་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀར་ཕོག་པས་དེ་རྣམས་ཀྱི་ཐུགས་རྒྱུད་བསྐུལ་ཏེ། ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་ཧཱུཾ་སྔོན་པོ་བསམ་གྱིས་མི་ཁྱབ་པ་བྱུང་སྟེ། རང་གི་ཐུགས་ཀའི་ཧཱུཾ་ཡིག་ལ་གཉིས་སུ་མེད་པར་ཐིམ། བླ་མ་དང་གཙོ་བོ་ཐ་མི་དད་པའི་ཐུགས་ཀ་ནས་དེ་འདྲ་བ་དུ་མ་བྱུང་སྟེ། རང་གི་ཐུགས་ཀར་ཐིམ་པས་རྒྱུད་བྱིན་གྱིས་བརླབས་པར་མོས། གཟུངས་རིང་གི་མཐར། ཨོཾ་བཛྲ་ཨ་བེ་ཤ་ཡ་ཨ་ཨཱཿ ཏིཥྛ་བཛྲ། ཞེས་རྡོ་རྗེ་དང་
བཅས་བརྟན་པར་བྱ། སྤྱི་བོར་དམ་རྒྱ་དང༌། ཀཾ་ཀ་ནི། ཚར་གསུམ་གྱིས་བྱིན་གྱིས་བརླབས། གསོལ་བ་གདབ་པ་ནི། རྡོར་དྲིལ་འཛིན་པས། ཡང་དག་དཀྱིལ་འཁོར་འདི་རུ་ནི། །བདག་གིས་སློབ་མ་བཅུག་པ་འདིའི། །ལྷ་རྣམས་རིགས་ཀྱི་རིམ་པ་ནི། །བསོད་ནམས་ཇི་ལྟར་དེ་ལྟར་ཤོག །འདི་ཡི་དངོས་གྲུབ་ཇི་འདྲར་འགྱུར། །རིགས་ནི་གང་གི་སྣོད་དུ་འགྱུར། །བསོད་ནམས་མཐུ་ཡང་ཇི་འདྲ་བར། །དེ་འདྲ་དཀྱིལ་འཁོར་དུ་གྱུར་ཅིག །ཅེས་པ་བརྗོད་ནས་བདེན་པའི་བྱིན་རླབས་བྱ། གཉིས་པ་དཀྱིལ་འཁོར་མཐོང་བའི་བདག་ཉིད་ཅན་དུ་འདུག་པ་ནི། སྔར་བཟུང་བའི་མེ་ཏོག་གི་འཕྲེང་བ་ཏྲཱཾ་གྱིས་བསྔགས་པ་ལས་ཡང་ཞིང་རྙིང་བའི་མེ་ཏོག་གཅིག་བཏོན་ལ་ལག་པ་ཐལ་མོ་སྦྱར་བའི་བར་དུ་བཟུང་བ་རིན་པོ་ཆེའི་འཕྲེང་བར་མོས། རང་ཉིད་འབྲུ་གསུམ་གྱི་འོད་ཟེར་གྱིས་སྒོ་གསུམ་གྱི་སྡིག་སྒྲིབ་བཀྲུས་ཏེ་དཀྱིལ་འཁོར་གྱི་ནང་དུ་ཞུགས། གཙོ་བོ་འཁོར་བཅས་ཀྱི་མདུན་ན་གནས་པར་གྱུར་པར་བསམ། དེ་ནས་མེ་ཏོག་གཅིག་འཕྲེང་བར་མོས་པ་དེ་ཉིད་གཙོ་བོའི་དབུ་ལ་ཕུལ་བར་བསམ་ནས། སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ནི། །འགྲོ་ལ་ཕན་པའི་གཙོ་ཆེན་གྱིས། །སྨན་པར་དགོངས་ནས་བཞེས་སུ་གསོལ། །ཨོཾ་པྲ་ཏཱིཙྪ་བཛྲ་ཧོཿ ཞེས་མེ་ཏོག་གཏོར། ཨོཾ་པྲ་ཏི་གྲྀཧྣ་སྟྭཾ་ཨི་མཾ་སཏྭ་མཧཱ་བཱ་ལ། ཞེས་མེ་ཏོག་བཅིངས། རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བའི་ཐམས་ཅད་མཐོང་འགྱུར་བའི། །རྡོ་རྗེ་མིག་ནི་བླ་ན་མེད། །ཅེས་བརྗོད་ལ་མིག་དར་བསལ། ཧེ་བཛྲ་པཱ་ཤྱ། ཞེས་པའི་དཀྱིལ་འཁོར་ལ་བལྟ་བར་བསྐུལ། དེ་ཡང་ཕྱི་རོལ་ཏུ་རྡོ་རྗེའི་རཱ་བ་མེ་རི་དང་བཅས་པས་བསྐོར་བའི་
དབུས་སུ་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེའི་ལྟེ་བར་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པའི་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སྣ་ཚོགས་པདྨ་འདབ་མ་བརྒྱད་པ་ལྟེ་བ་དང་བཅས་པ་ལ་ཟླ་བའི་གདན་རེ་རེའི་སྟེང་དུ་དབུས་སུ་བཅོམ་ལྡན་འདས་མི་འཁྲུགས་པ། འདབ་མ་བརྒྱད་ལ་ཤར་དུ་པདྨ་ཅན་དཀར་མོ། ལྷོར་འོད་ལྡན་མ་དམར་མོ། ནུབ་ཏུ་མདངས་ལྡན་མ་སྔོན་མོ། བྱང་དུ་དྲི་མེད་མ་ལྗང་གུ །ཤར་ལྷོར་འཇིགས་བྱེད་མ་དཀར་མོ། ལྷོ་ནུབ་ཏུ་རྣལ་འབྱོར་མ་སྔོན་མོ། ནུབ་བྱང་དུ་དཀར་ཤམ་མ་དམར་སྐྱ། བྱང་ཤར་དུ་ཡིད་གཞུང་མ་ལྗང་གུ་བཅས་མི་འཁྲུགས་པ་ལྷ་དགུའི་རྟེན་དང་བརྟེན་པའི་དཀྱིལ་འཁོར་ཐམས་ཅད་མངོན་སུམ་དུ་མཐོང་བར་གྱུར་པར་བསམས་ལ། དཀྱིལ་འཁོར་དབང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་སངས་རྒྱས་རིགས་སུ་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བའི་ཕུན་ཚོགས་དངོས་གྲུབ་ཀྱང༌། །ཐམས་ཅད་ཁྱོད་ལ་མངོནདུ་འགྱུར། །དངོས་གྲུབ་ཕྱིར་ནི་དམ་ཚིག་སྲུངས། །གསང་སྔགས་ལའང་བརྩོན་པར་གྱིས། །ཞེས་ལྷ་ངོ་བསྟན་པར་བྱས་ཏེ། དེ་དག་ནི་དཀྱིལ་འཁོར་དུ་འཇུག་པའི་སྐོར་རོ། །གཉིས་པ་ཞུགས་ནས་དབང་བླངས་པ་ལ་བཞི། ཆུའི་དབང༌། ཅོད་པན་གྱི་དབང༌། ཆོས་བཤད་ཀྱི་རྗེས་གནང༌། རྒྱལ་སྲིད་སྣ་བདུན་དང་བཀྲ་ཤིས་རྫས་བརྒྱད་ཀྱི་དབང་ངོ༌། །དང་པོ་ནི། དབང་གི་དོན་དུ་མཎྜལ་ཕུལ་ནས། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །
བདག་ཀྱང་རབ་ཏུ་བསྒྲལ་བའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་གསོལ་བ་ལན་གསུམ་བཏབ། དཀྱིལ་འཁོར་གྱི་ཤར་ཕྱོགས་སུ་དབང་སྟེགས་ཀྱི་དཀྱིལ་འཁོར་གྱི་དབུས་སུ་རིན་པོ་ཆེའི་ཁྲིར་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་རང་བཅོམ་ལྡན་འདས་རྡོ་རྗེ་མི་འཁྲུགས་པ། ཞེས་སོགས་བདག་བསྐྱེད་ཀྱི་སྐབས་བཞིན་ལ། སྐྱིལ་ཀྲུང་གིས་བཞུགས་པ། དེའི་སྟེང་དུ་བླ་བྲེ། གཡས་སུ་གདུགས། གཡོན་དུ་རྒྱལ་མཚན། མཐའ་སྐོར་ཀུན་ཏུ་དུང་ལ་སོགས་པའི་མཆོད་པའི་ཡོ་བྱད་བསམ་གྱིས་མི་ཁྱབ་པས་བསྐོར་བར་བསམས་ལ། བུམ་ཆུ་བསང་སྦྱངས། སྟོང་པའི་ངང་ལས་ཨོཾ་ཧཱུཾ་ཏྲཱཾ་ཧྲཱིཿ ཨཱཿ རྣམས་ལས་བྱུང་བའི་ཡེ་ཤེས་ལྔའི་རང་བཞིན་གྱི་བུམ་ཆུར་གྱུར་པར་བསམས་ལ། བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་རྒྱལ་བ་འཁོར་བཅས་ཐམས་ཅད་རང་ལ་དབང་བསྐུར་བའི་ཕྱིར་བསྐུལ་ཏེ་སྤྱན་དྲངས་པ་རྣམས་ནམ་མཁར་བཞུགས། བསྒྲུབ་པའི་དཀྱིལ་འཁོར་པ་རྣམས་ཀྱིས་དབང་བསྐུར་བའི་དགོངས་པ་མཛད། སྤྱན་མ་ལ་སོགས་པའི་རིག་མ་དང་བཅས་པ་ནམ་མཁའ་བཞུགས་པ་རྣམས་ཀྱིས་གདུགས་དང་རྒྱལ་མཚན་ལ་སོགས་པ་རང་གི་སྟེང་ཕྱོགས་སུ་འཛིན། གླུ་གར་མཛད་ཅིང་རོལ་མོ་བརྡུང༌། མེ་ཏོག་དང་གུར་གུམ་ལ་སོགས་པའི་ཆར་འབེབས། ཕྱག་གིས་ཅུང་ཟད་ཡོ་བར་བཟུང་བའི་བུམ་པ་དཀར་པོ་བྱང་ཆུབ་ཀྱི་སེམས་ཀྱི་བདུད་རྩིས་གང་བ་རྣམས་ཀྱིས་དབང་བསྐུར། གཟུགས་རྡོ་རྗེ་མ་ལ་སོགས་པ་རྣམས་ཀྱིས་བཀྲ་ཤིས་ཀྱི་གླུ་དབྱངས་ཀྱི་ཤིས་པ་བརྗོད། ཁྲོ་བོ་རྣམས་ཕྱོགས་མཚམས་སུ་འཁོད་ནས་བགེགས་བསྐྲད་
པར་གྱུར། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨོ་རྒྱས་པའི་འདབ་འདྲའི་སྤྱན་མངའ་བ། །འདི་ནི་འཇིག་རྟེན་དགེ་བའི་བཀྲ་ཤིས་དང་པོ་འོ། །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །འདི་ནི་འཇིག་རྟེན་དགེ་བའི་བཀྲ་ཤིས་གཉིས་པ་འོ། །དགེ་འདུན་དམ་པ་ཆོས་དང་མཐུན་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱི་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་ཞིང༌། །འདི་ནི་འཇིག་རྟེན་དགེ་བའི་བཀྲ་ཤིས་གསུམ་པ་འོ། །༈ རིན་ཆེན་མཛེས་པའི་བཀྲ་ཤིས་བུམ་པའི་ཆུས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །ལས་དང་ཉོན་མོངས་སྒྲིབ་པ་དག་གྱུར་ཏེ། །བྱང་ཆུབ་སེམས་ཀྱི་རླན་གྱིས་བརླན་པར་ཤོག །ན་མོ་རཏྣ་ཏྲ་ཡཱ་ཡ། ཞེས་པ་ནས། སརྦ་སཏྭ་ནཉྩ་སྭཱཧཱ། ཨོཾ་ཨཀྵོ་བྷྱཿ མཎྜ་ལ་ས་པ་རི་ཝཱ་ར་དེ་ཝཱ་བཛྲ་ཀ་ལ་ཤ་ཨ་བྷི་ཥིཉྩ་མི། ཨོཾ་ཨཀྵོ་བྷྱཿ མཎྜ་ལ་ས་བ་རི་ཝཱ་ར་བཛྲ་པཱུ་ཛ་ཀ་ལ་ཤ་ཨ་བྷི་ཥིཉྩ་མི། ཇི་ལྟར་བལྟམས་པ་ཙམ་གྱིས་ནི། །ཞེས་པ་ནས། ཁྲུས་བགྱི་འོ། །ཨོཾ་ཨཱཿ བཛྲ་ཨུ་ད་ཀ་ཨ་བྷི་ཥིཉྩ་ཧཱུཾ། སུ་ར་ཏ་སྟྭཾ་ཨ་ཧཾ། ཞེས་དབང་བསྐུར། ལུས་ཐམས་ཅད་གང༌། བདེ་བ་ཆེན་པོ་མྱོང༌། དྲི་མ་ཐམས་ཅད་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་རིགས་ལྔས་དབུ་བརྒྱན་ཅིང༌། དབང་གི་ལྷ་
རྣམས་ཀྱང་རང་ལ་ཐིམ་པར་གྱུར། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་བདག་ཉིད་ལ་མཆོད། དེ་ལྟར་ཆུའི་དབང་ཐོབ། ཉོན་མོངས་པ་ལྔའི་དྲི་མ་སྦྱངས། རྣམ་པར་ཤེས་པ་ལྔ་གནས་འགྱུར། ལམ་མཚན་མ་མེད་པའི་རྣལ་འབྱོར་བསྒོམ་པ་ལ་དབང་བར་བྱས། འབྲས་བུ་ཆོས་ཀྱི་སྐུ་མངོན་དུ་འགྱུར་བའི་ནུས་པ་ཁྱད་པར་ཅན་འཇོག་གོ །ཅོད་པན་གྱི་དབང་ལ་རྒྱས་པར་ན་སྔར་ལྟར་གསོལ་བ་ལན་གསུམ་བཏབ། ཅོད་པན་བསང་སྦྱངས། སྟོང་པའི་ངང་ལས་ཨོཾ་ཧཱུཾ་ཏྲཱཾ་ཧྲཱིཿ ཨཱཿ ལས་དེ་བཞིན་གཤེགས་པ་རིགས་ལྔའི་རང་བཞིན་གྱི་ཅོད་པན་དུ་གྱུར། བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་རྒྱལ་བ་འཁོར་བཅས་ཐམས་ཅད༌༝ ཅེས་པ་ནས། ཁྲོ་བོ་རྣམས་ཕྱོགས་མཚམས་སུ་འཁོད་ནས་བགེགས་བསྐྲད་པར་གྱུར། སྔར་ལྟར་མཆོག་གསུམ་གྱི་བཀྲ་ཤིས་བརྗོད། དེ་བཞིན་གཤེགས་པའི་དབུ་རྒྱན་ཅོད་པན་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །སྐུ་གསུང་ཐུགས་ཀྱི་ཡོན་ཏན་རབ་རྫོགས་ཏེ། །རིགས་ལྔའི་སངས་རྒྱས་མྱུར་དུ་ཐོབ་པར་ཤོག །ཨོཾ་རཏྣ་མུ་ཀུ་ཊ་བཛྲ་པ་ཊྚཾ་ཨ་བྷི་ཥིཉྩ་མི། ཞེས་བརྗོད་དེ་དབུ་རྒྱན་བཅིངས། མཐའ་རྟེན་ཆུ་དབང་ནི། ཇི་ལྟར་བལྟམས་པ་ཞེས་པ་ནས། ཁྲུས་བགྱི་འོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏ་ས་མ་ཡ་ཤྲཱི་ཡེ་ཨཱཿ ཧཱུཾ། ཞེས་དབང་བསྐུར། ལུས་ཐམས་ཅད་གང༌། ཞེས་སོགས་ནས་བདག་ཉིད་ལ་མཆོད་པའི་བར་སྔར་བཞིན། དེ་ལྟར་ཅོད་པན་གྱི་དབང་ཐོབ། དྲི་མ་ལྔ་སྦྱངས། ཕུང་པོ་ལྔ་གནས་འགྱུར། ལམ་མཚན་མ་དང་བཅས་པའི་རྣལ་འབྱོར་བསྒོམ་པ་ལ་
དབང་བར་བྱས། འབྲས་བུ་གཟུགས་ཀྱི་སྐུ་འགྲུབ་པའི་ནུས་པ་ཁྱད་པར་ཅན་འཇོག་གོ །གསུམ་པ་ཆོས་བཤད་ཀྱི་རྗེས་གནང་ནི། བྷྲུཾ་ལས་བྱུང་བའི་འཁོར་ལོ། མདུན་ནམ་སྟན་དུ་བྱིན་ལ། ཨོཾ་བཛྲ་ཧེ་ཏུ་མཾ། ཞེས་བརྗོད། དབྱངས་ཐ་མ་ཨཿ ལས་བྱུང་བའི་དུང༌། ཨོཾ་བཛྲ་བྷཱ་ཥ་རཾ། ཞེས་པས་ལག་པ་གཡས་སུ་བྱིན། དབྱངས་དང་པོ་ཨ་ལས་བྱུང་བའི་པོ་ཏི། ཨ་ཞེས་བརྗོད་ནས་ལག་པ་གཡོན་དུ་བྱིན་ལ། དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་དུང་བླ་མེད་པ། །ཀུན་ནས་ཡོངས་སུ་བཀང་ནས་ནི། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བརྗོད། དབྱངས་ཐ་མ་ཨཿ ལས་བྱུང་བའི་དྲིལ་བུ་ཨཿ ཞེས་བརྗོད་ནས་ལག་པ་གཡོན་དུ་བྱིན་ལ་དཀྲོལ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ཡང་ནི་མཚན་ཉིད་མེད། །ནམ་མཁའ་མཉམ་པ་ཉིད་སྦྱོར་བས། །ཐམས་ཅད་མཆོག་ནི་མཉམ་ཉིད་གསལ། །ཞེས་བརྗོད། ད་ནི་དཀྱིལ་འཁོར་སློབ་དཔོན་གྱུར། །སྔགས་དང་རྒྱུད་ཀྱང་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀྱིས་ཀྱང་མཐུན་པར་གསུངས། །སེམས་ཅན་རྣམས་ལ་སྙིང་བརྩེའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱོར། །ཞེས་བརྗོད། དེ་ལྟར་རིགས་གསུམ་སྤྱི་དང་བྲེ་བྲག་གི་ཆོས་སྟོན་པ་སོགས་ཀྱི་སློབ་དཔོན་དུ་བྱ་བའི་ཆེད་དུ་རྗེས་སུ་གནང་བ་བྱིན་པས་རིགས་གསུམ་སྤྱི་དང་བྱེ་བྲག་གི་དཀྱིལ་འཁོར་བྲི་སྒྲུབ། དབང་བསྐུར་བ་སོགས་ལ་དབང་བར་བྱས། འཕྲིན་ལས་བཞིའི་སྒོ་ནས་འགྲོ་
བའི་དོན་འགྲུབ་པའི་ནུས་པ་བཞག །འབྲས་བུ་རིགས་གསུམ་གྱི་ཆོས་ཀྱི་འཁོར་ལོས་སྒྱུར་བའི་གོ་འཕང་མྱུར་དུ་ཐོབ་པའི་སྐལ་བ་ཅན་དུ་བྱས་སོ། །ཞེས་བརྗོད། རྗེས་གནང་འདི་དག་རྣམ་སྣང་མངོན་བྱང་སོགས་ཅི་རིགས་པར་གསུངས་པས་བྱ་སྤྱོད་གཉིས་ཀའི་སྐབས་སུ་སྟེར་བར་འགལ་བ་མེད་པར་མ་ཟད་ལེགས་པ་ཡིན་ལ། སྔགས་འཆང་འཇམ་དབྱངས་པའི་མི་ཏྲའི་མངོན་དཀྱིལ་སོགས་ལས་མ་བྱུང་བས་ཆད་པའི་སྐྱོན་མིན་པས་བཞག་ཀྱང་ཆོག་གོ །བཞི་པ་རྒྱལ་སྲིད་སྣ་བདུན་དང་བཀྲ་ཤིས་རྫས་བརྒྱད་ཀྱི་དབང་ནི། རྒྱལ་སྲིད་སྣ་བདུན་བྲིས་འབུར་ཅི་རིགས་མདུན་དུ་བཤམས། བསངས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རྒྱལ་སྲིད་རིན་པོ་ཆེ་སྣ་བདུན་དྭངས་ཤིང་ཐོགས་པ་མེད་པ། ངོ་བོ་ཡེ་ཤེས་ལ་རྣམ་པ་བདུད་དང་མི་མཐུན་པའི་ཕྱོགས་ཐམས་ཅད་ལས་རྒྱལ་བའི་རྫས་སུ་གྱུར། འཁོར་ལོ་དེ་ལག་ཏུ་ཐོགས་ལ། ལྷ་རྫས་ལས་བྱས་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཞིང་མུ་ཁྱུད་རབ་མཉམ་ལྡན། །སྡང་བའི་དགྲ་ལས་རྣམ་པར་རྒྱལ་གྱུར་པའི། །འཁོར་ལོ་རིན་ཆེན་དམ་པས་དབང་བསྐུར་རོ། །ཨོཾ་ཙཀྲ་རཏྣ་ཨ་བྷི་ཥིཉྩ་མཾ། ཞེས་བརྗོད་ཅིང་གཏད། རིན་ཆེན་ངོ་བོ་ལྷ་རྫས་བཻ་ཌཱུརྱ། །ཀུན་ཏུ་དཔག་ཚད་ཙམ་དུ་སྣང་བྱེད་ཅིང༌། །དྲི་མེད་ཉིན་མོ་ཇི་བཞིན་མཚན་དེ་བཞིན། །ནོར་བུ་རིན་ཆེན༌༝ ཨོཾ་མ་ཎི་རཏྣ་ཨ་བྷི་ཥིཉྩ་མཾ། གཟུགས་མཛེས་ལྟ་ན་སྡུག་ཅིང་ཚུལ་བཟང་ལ། །ལྤགས་པའི་མདོག་ལེགས་འཇམ་ཞིང་དྲི་མཆོག་ལྡན། །ཡིད་འོང་འདོད་དགུའི་རེག་བྱ་དང་ལྡན་པའི། །བཙུན་མོ་རིན་ཆེན༌༝ ཨོཾ་སྟྲི་རཏྣ་ཨ་བྷི་ཥིཉྩ་མཾ། གང་ཡང་རྒྱལ་བ་མུ་ཏིག་མདངས་ལྡན་པའི། །གསེར་སོགས་མང་པོ་ཐུབ་ལ་ཕུལ་བ་ལྟར། །བཟོད་ལྡན་མཚུངས་
པའི་ཁྱིམ་བདག་ནོར་ལྡན་པའི། །བློན་པོ་རིན་ཆེན་༝ ཨོཾ་པུ་རུ་ཥ་རཏྣ་ཨ་བྷི་ཥིཉྩ་མཾ། ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་གནས་གངས་ཆེན་རི་འདྲ་གླང་པོ་ཆེ། །རྒྱལ་པོ་ལ་འོས་མཁའ་ལ་རབ་འགྲོ་བའི། །གླང་པོ་རིན་ཆེན༌༝ ཨོཾ་ཧ་སྟཱི་རཏྣ་ཨ་བྷི་ཥིཉྩ་མཾ། ཐོ་རངས་དུས་སུ་ཕྱོགས་རྣམས་མ་ལུས་པའི། །ས་རྣམས་བསྐོར་ཏེ་སླར་ཡང་ལྡོག་ནུས་པ། །རྨ་བྱའི་མགྲིན་པའི་སྤུ་ལྟར་ཡིད་འོང་བའི། །རྟ་མཆོག་རིན་ཆེན༌༝ ཨོཾ་ཏུ་རཾ་ག་ཨ་ཤྭ་རཏྣ་ཨ་བྷི་ཥིཉྩ་མཾ། འགྲོ་དང་ལྡོག་དང་ཀུན་ནས་འོང་འགྱུར་བས། །མ་ལུས་བདུད་དཔུང་འཇིགས་པར་བྱེད་པ་སྟེ། །དཔའ་བརྟན་འབྱོར་བའི་དཔུང་དང་བཅས་པ་ཡི། །དམག་དཔོན་རིན་ཆེན༌༝ ཨོཾ་ཁངྒ་རཏྣ་ཨ་བྷི་ཥིཉྩ་མཾ། དེ་ནས་བཀྲ་ཤིས་རྫས་བརྒྱད་དངོས་སམ་ཙ་ཀ་ལི་སོགས་བསངས་སྦྱངས། སྟོང་པའི་ངང་ལས་མཾ་ལས་བྱུང་བའི་བཀྲ་ཤིས་པའི་རྫས་བརྒྱད་པོ་རྣམས་ཚེ་དང་བསོད་ནམས་དཔལ་དང་འབྱོར་པ་ཐམས་ཅད་རྒྱས་པར་བྱེད་པའི་ནུས་པ་དང་ལྡན་པར་གྱུར། ཨོཾ་མངྒ་ལ་ཨཥྚ་ཏྲ་བྱ་སྭཱཧཱ། དེ་ནས་རིམ་པས་ལག་ཏུ་གཏད་ལ། སྔོན་བཅོམ་ལྡན་འདས་ལ་གཟུགས་ཀྱི་ལྷ་མོ་འོད་འཆང་མས་མེ་ལོང་ཕྱག་ཏུ་ཕུལ་བ་ན། བཀྲ་ཤིས་པའི་རྫས་སུ་བྱིན་གྱིས་བརླབས་པ་དེ་བཞིན་དུ། དེང་འདིར་ཡང་མེ་ལོང་གི་རྫས་ལ་བརྟེན་ནས་ཤིན་ཏུ་བཀྲ་ཤིས་པར་གྱུར་ཅིག །མེ་ལོང་ཡེ་ཤེས་རྒྱ་མཚོ་ཆེན་པོ་སྟེ། །ཡེ་ཤེས་རྒྱ་མཚོ་མཆོག་ཏུ་དག་གྱུར་ནས། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག །དེ་བཞིན་དུ། སྔོན་བཅོམ་ལྡན་
འདས་ལ་གླང་པོ་ཆེ་ནོར་སྐྱོང་གིས་གྷི་ཧཾ་ཕྱག་ཏུ་ཕུལ་བ་ཞེས་དང༌། གྷི་ཧཾ་གི་རྫས་ལ་ཞེས་འདོན་པ་སྤོ། གྷི་ཧཾ་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོག་གྱུར་ཏེ། །ཉོན་མོངས་ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་སྡུག་བསྔལ་དག་གྱུར་ཅིག །དེ་བཞིན་དུ། ཞིང་པའི་བུ་མོ་ལེགས་སྐྱེས་མས་ཞོ་ཕྱག་ཏུ་ཕུལ་བ་ཞེས་དང༌། ཞོའི་རྫས་ལ་བརྟེན་ནས༌༝ ཞོ་ནི་ཀུན་གྱི་སྙིང་པོར་གྱུར་པ་སྟེ། །སྙིང་པོ་རྣམ་དག་ཡེ་ཤེས་མཆོག་རྟོག་ནས། །ཡོན་ཏན་ཀུན་གྱི་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་གྱུར་ཅིག །རྩྭ་ཚོང་ཁྱེའུ་བཀྲ་ཤིས་ཀྱིས་རྩྭ་དུར་བ༌༝ དུར་བའི་རྫས་ལ་བརྟེན་ནས༌༝ དུར་བས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་ནི་རབ་གྲུབ་ནས། །ཉོན་མོངས་སྐྱེས་ཤི་རྒྱུན་ཆད་གྱུར་པ་ཡི། །བཀྲ་ཤིས་དེས་ནི་ཚེ་ཡང་འཕེལ་གྱུར་ཅིག །ལྷ་ཚངས་པས་ཤིང་ཏོག་བིལ་བ༌༝ བིལ་བའི་རྫས་ལ་བརྟེན་ནས༌༝ བིལ་བ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་དག་གྱུར་པའི། །བཀྲ་ཤིས་དེས་ཀྱང་དོན་ཀུན་འགྲུབ་གྲུབ་ཅིག །ལྷའི་དབང་པོ་བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ༌༝ དུང་དཀར་གྱི་རྫས་ལ་བརྟེན་ནས༌༝ དུང་ནི་ཆོས་ཀྱི་སྒྲ་རྣམས་སྒྲོགས་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །ཆོས་རྣམས་མ་ནོར་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་ལ་དབང་ཐོབ་ཤོག །བྲམ་ཟེ་སྐར་རྒྱལ་གྱིས་ལི་ཁྲི༌༝ ལི་ཁྲིའི་རྫས་ལ་བརྟེན་ནས༌༝ ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་
མ་ནོར་དབང་དུ་བསྡུས་ནས་ཀྱང༌། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི། །བཀྲ་ཤིས་དེས་ཀྱང་ཁྱེད་སྲིད་བརྟན་གྱུར་ཅིག །ཕྱག་ན་རྡོ་རྗེས་གྲུབ་པའི་རྫས་ཡུངས་ཀར༌༝ ཡུངས་ཀར་གྱི་རྫས་ལ་བརྟེན་ནས༌༝ ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་བྱེད་པ་སྟེ། །མཐུ་སྟོབས་ཡོན་ཏན་ཕུན་སུམ་ཚོགས་པ་ཡི། །བཀྲ་ཤིས་དེས་ཀྱང་བགེགས་ཀུན་ཞི་བར་ཤོག །ཅེས་བརྗོད། བསྡུས་པ་ལ་མོས་ན། རྒྱལ་སྲིད་སྣ་བདུན་ལ། དུས་གསུམ་རྒྱལ་བ་ཀུན་གྱིས་བསྔགས་པ་ཡི། །ཐེག་མཆོག་ཆོས་ཀྱི་སྲིད་ལ་མངའ་བསྒྱུར་བའི། །རྒྱལ་སྲིད་རིན་ཆེན་བདུན་གྱི་དབང་བསྐུར་བས། །བདུད་བཞིའི་གཡུལ་ལས་རྣམ་པར་རྒྱལ་གྱུར་ཅིག །ཨོཾ་སཔྟ་རཏྣ་ཨ་བྷི་ཥཱིཉྩ་མཾ། ཞེས་དང་རྫས་བརྒྱད་ལ། གང་ཞིག་རེག་ཅིང་མཐོང་ཐོས་དྲན་པས་ཀྱང༌། །མི་ཤིས་ཀུན་སེལ་ཕུན་ཚོགས་མཆོག་སྩོལ་བར། །རྒྱལ་བས་བྱིན་གྱིས་བརླབས་པའི་བཀྲ་ཤིས་རྫས། །དམ་པས་དབང་བསྐུར་དགེ་ལེགས་འབར་གྱུར་ཅིག །ཨོཾ་ཨཥྚ་པ་ཏྲ་བེ་མངྒ་ལ་ཨ་བྷི་ཥཱིཉྩ་མཾ། ཞེས་བརྗོད་པར་བྱའོ། །དེ་ནས། དབང་དུས་སུ་ཁས་བླང་བའི་དམ་ཚིག་རྣམས་ཚུལ་བཞིན་དུ་བསྲུང་སྙམ་པ་བྱས་ལ། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། །ཅེས་ལན་གསུམ་དང༌། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་བཟུང་བ་དང༌། །ཆ་ཡི་ཀྱང་ནི་སྤྱད་དུ་གསོལ། །ཞེས་བརྗོད། དེ་ནས་དབང་རྫོགས་པར་ཐོབ་པའི་བཀའ་དྲིན་གཏང་རག་གི་ཡོན་དུ་བླ་མ་དང་དཀྱིལ་
འཁོར་གྱི་གཙོ་བོ་ཐ་མི་དད་དུ་མོས་པ་ལ་མཎྜལ་རྒྱས་པ་དབུལ་ལོ།། གཉིས་པ་ནི། དེ་ལྟར་བདག་འཇུག་ཟིན་ནས་སློབ་མ་ལ་དབང་བསྐུར་བའི་སྐབས་ཡིན་ན། བདེན་པའི་སྟོབས་བརྗོད་ནས་བྱིན་གྱིས་བརླབ་པར་བྱ་དགོས་པས་རྡོར་དྲིལ་བཟུང་སྟེ། བདེན་པ་གང་གིས་ཡེ་ཤེས་མཆོག །ཤེས་རབ་ཐབས་བདག་དཀྱིལ་འཁོར་གྱི། །བདེན་པ་དེ་ཡིས་མགོན་པོ་ཁྱོད། །འདོད་པ་བདག་ལ་ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་འབྱུང༌། །དེ་ཉིད་དེ་བཞིན་ཉིད་ངེས་འབྱུང༌། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་སྒྲིབ་མེད་མཐོང་བར་ཤོག །ཅེས་ལན་གསུམ་བརྗོད་ནས་སློབ་མ་ལ་དབང་བསྐུར་བའི་རིམ་པ་ལ་འཇུག་པར་བྱའོ། །གཉིས་པ་སློབ་མ་བཅུག་ཅིང་དབང་བསྐུར་བ་ནི། གོང་དུ་བཀོད་པ་དེ་རྣམས་བདག་འཇུག་གི་དབང་དུ་བྱས་པ་ཡིན་པས་གཞན་ལ་དབང་བསྐུར་བའི་ཚེ་རང་ཉིད་ཅེས་པ་དང་རང་ལ་ཞེས་སོགས་རྣམས་སློབ་མ་རྣམས་ཞེས་པ་ལྟ་བུར་བསྒྱུར་ཞིང༌། ཚིགས་བཅད་དང་སྔགས་རྣམས་ཀྱི་དོན་དང༌། དབང་གི་ངོ་བོ་ཇི་ལྟ་བུ་ཞིག་རྒྱུད་ལ་སྐྱེ་ཚུལ་སོགས་སློབ་མའི་དབང་པོ་དང་འཚམ་པར་བརྡ་ལེགས་པར་སྤྲད་ནས། མེད་མི་རུང་བའི་དབང་གི་སྐོར་རྣམས་མ་ཆད་ཅིང་མཐའ་རྟེན་སོགས་ལ་ལོང་སྐབས་དང་མོས་པ་དང་བསྟུན་པའི་རྒྱས་བསྡུས་ཀྱི་དབྱེ་བ་ཤེས་པར་བྱས་ནས་བརྒྱུད་ལྡན་དམ་པའི་ཕྱག་ལེན་མཐོང་བ་བརྒྱུད་པས་ཀྱང་བརྒྱན་ཏེ་ལེགས་པར་དབང་བསྐུར་བར་བྱའོ། །དེ་ཡང་ཆས་འཇུག་གི་རྗེས་སུ་སློབ་མ་ལ་རྡོ་རྗེའི་རིགས་ཀྱི་དམ་རྒྱ་འཆིངས་སུ་བཅུག་ནས། ཨོཾ་བཛྲ་ཨུདྦྷ་ཝ་ཡེ་སྭཱཧཱ། ཞེས་པའི་སྔགས་ཀྱི་རྗེས་ཟློས་བྱེད་དགོས་ལ། ཡེ་ཤེས་པ་དབབ་པའི་མཇུག་ཏུ་བླ་
མས་རྡོ་རྗེའི་རིགས་ཀྱི་དམ་རྒྱ་བཅིངས་ནས་སློབ་མའི་སྤྱི་བོར་བཞག་སྟེ། ཀཾ་ཀ་ནི། ཚར་གསུམ་གསུང༌། དེ་ནས། ཁྱེད་རང་རྣམས་ཀྱིས་མིག་དར་ཅུང་ཟད་བསལ་ནས་དཀྱིལ་འཁོར་གྱི་སྟེང་གི་བར་སྣང་ལ་ཧར་གྱིས་ལྟོས་ལ། ཁ་དོག་ཅི་ལྟ་བུ་སྣང་བ་སྨྲོས་ཤིག །ཅེས་སྨྲས་ནས་བལྟར་བཅུག་ལ། ཁྱོད་ཀྱི་མིག་ལ་ཇི་ལྟར་སྣང་ཞེས་དྲིས། སློབ་མས་དཀར་པོ་སྣང་ན་དཀར་པོ་སྣང་ཞེས་ལན་འདེབས། དེས་སེར་པོ་སོགས་ཀྱང་མཚོན། དེ་ལྟར་བལྟས་པས་དངོས་གྲུབ་ཀྱི་ལྟས་དཀར་པོ་ཞི་བ། སེར་པོ་རྒྱས་པ། དམར་པོ་དབང༌། སྔོན་པོ་དང་ནག་པོས་མངོན་སྤྱོད། ལྗང་གུའམ། སྣ་ཚོགས་སམ། ཁྲ་བོ་མཐོང་བས་ལས་སྣ་ཚོགས་འགྲུབ་པར་འགྱུར་རོ། །ཞེས་བརྡ་སྤྲད། འདི་ལ་བུ་སྟོན་གྱི་མི་འཁྲུགས་པའི་དཀྱིལ་ཆོག་ལས། ནམ་མཁའ་དཀར་པོས་མཆོག །སེར་བོས་ནོར། དམར་པོས་རྗེས་སུ་དགའ་བ། ནག་པོས་མངོན་སྤྱོད། སྣ་ཚོགས་པ་མཐོང་ན་དངོས་གྲུབ་ཐམས་ཅད་ཀྱི་ཡེ་ཤེས་ལ་བསླབ་བོ། །ཞེས་བརྡ་སྤྲོད་པར་གསུང༌། དེ་ནས། བླ་མ་དཀྱིལ་འཁོར་གྱི་ཤར་སྒོ་ནས་གཙོ་བོ་ལ་མངོན་དུ་ཕྱོགས་པར་བྱས་ཏེ་རྡོར་དྲིལ་བཟུང་བས། ཡང་དག་པ་ཡི་དཀྱིལ་འཁོར་འདིར། །ཞེས་སོགས་ལན་གསུམ་བརྗོད་དགོས། ཆུ་དང་ཅོད་པན་གྱི་དབང་གི་མཇུག་ཏུ་དབང་ལྷ་བསྟིམ་པའི་རྗེས་སུ། དེ་ལྟར་ཁྱེད་རང་རྣམས་མཆོད་པའི་ཡུལ་དུ་གྱུར་པ་ལ། མཆོད་པ་འབུལ་བ་བདག་གིར་མཛད་པར་ཞུ། ཞེས་བརྡ་སྤྲད་ཅིང༌། མཆོད་གཡོག་པས་མཆོད་པ་བཏེག་སྟེ། བླ་མས། ཨོཾ་སརྦ་ཏ་ཐཱ་ག་ཏ་ཨརྒྷཾ་སོགས་ཀྱིས་མཆོད་ལ། དེ་ནས་དག་པ་བརྗོད། ཅོད་པན་གྱི་དབང་གི་མཇུག་ཏུ་བཀྲུ་བྱབས་བསྲུང་གསུམ་བྱེད་དགོས་ཤིང༌། སྔགས་དབང་ངམ་བཟླས་ལུང་མ་བྱས་ཀྱང་ཆད་སྐྱོན་མེད་
མོད། འོན་ཀྱང་སྔགས་བཟླ་བ་སོགས་ལ་བཟླས་ལུང་ཐོབ་ན་ལེགས་པས། དེས་ན་བཟླས་ལུང་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་བདག་གིས་བཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ལན་གསུམ། སློབ་དཔོན་རྡོ་རྗེ་མི་འཁྲུགས་པར་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་སྔགས་ཀྱི་ཕྲེང་བས་བསྐོར་བ་དེ་ལས་རང་འདྲ་གཉིས་པ་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱུང་བ་སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ལྷར་གསལ་བའི་ཞལ་དུ་ཞུགས། ཐུགས་ཀར་ཟླ་གདན་གྱི་སྟེང་དུ་ཧཱུཾ་ཡིག་གི་མཐར་གཡས་སྐོར་དུ་འཁོད་པའི་མོས་པ་དང་བཅས་འདིའི་རྗེས་ཟློས་ལན་གསུམ་མཛོད། ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི། ཞེས་སོགས་ལན་གསུམ། དེ་ལྟར་བཟླས་པས་དང་པོས་རྒྱུད་བྱིན་གྱིས་བརླབས། གཉིས་པས་དབྱེར་མེད་དུ་བྱས། གསུམ་པས་བརྟན་པར་བྱས་པའི་མོས་པ་མཛོད། སློབ་མའི་སྤྱི་བོར་མེ་ཏོག་འཇོག་པའམ་འཐོར་བ་དང་བཅས། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩོལ་བ་དང༌། །བརྟུལ་ཞུགས་བརྟན་པར་མཛད་དུ་གསོལ། །ཞེས་བརྗོད། མཐའ་རྟེན་ལ། བཀྲུ་བྱབས་བསྲུང་གསུམ་བྱེད་པ་ལ། སྤྲོ་ན་ལྷ་ལ་ཁྲུས་གསོལ། དེ་ནས་སློབ་མ་ཧ་ཅང་མང་ན་གཙོ་བོ་ལ་དངོས་སུ་དང་གཞན་རྣམས་ལ་མེ་ལོང་དུ་གཟུགས་བརྙན་ཤར་བ་ལ་བྱས་ཀྱང་ཆོག་པས་སྐབས་ཤེས་པར་བྱས་ལ་མཆོད་གཡོག་གིས་ཀ་ཊོ་ར་ལྟ་བུ་བཟེད། སློབ་དཔོན་གྱིས་རྣམ་རྒྱལ་བུམ་པའི་ཆུ་ལས་ལས་བུམ་དུ་ཅུང་ཟད་བླུགས་པ་ལག་ཏུ་ཐོགས་ཏེ་འདི་སྐད་ཅེས། ཁྱེད་རྣམས་ལ་བུམ་པའི་ཆུས་ཁྲུས་བྱས་པས་ལས་ངན་སྡིག་སྒྲིབ་དང་དེའི་དབང་གིས་བྱུང་བའི་ནད་གདོན་བར་ཆད་
མི་མཐུན་པའི་ཕྱོགས་ཐམས་ཅད་བཀྲུས་ཏེ་སངས་ཀྱིས་དག་པའི་མོས་པ་མཛོད། བཅོམ་ལྡན་རྡོ་རྗེའི་མི་འཁྲུགས་པའི། །ཟག་མེད་ཡེ་ཤེས་བདུད་རྩིའི་ཆུས། །སློབ་མ་རྣམས་ལ་ཁྲུས་བགྱིས་པས། །སྡིག་སྒྲིབ་མ་ལུས་དག་གྱུར་ཅིག །ན་མོ་རཏྣ་ཏྲ་ཡཱ་ཡའི་མཇུག་ཏུ། རྡོ་རྗེའི་སློབ་མ་རྣམས་ཀྱི་སྡིག་སྒྲིབ་ཐམས་ཅད་ཤཱནྟིཾཀུ་རུ་སྭཱཧཱ། འདི་ནི་ཁྲུས་མཆོག་དཔལ་དང་ལྡན། །ཞེས་སོགས་དང༌། ཨོཾ་མངྒ་ལ་ཤྲི་ཛངྨ་ཛ་སྭཱཧཱ། རྡོ་རྗེའི་སློབ་མ་ཞེས་སོགས་སྦྱར། དེ་བཞིན་དུ། ཇི་ལྟར་བལྟམས་པ་ཙམ་གྱིས་སོགས་དང༌། ཨོཾ་མངྒ་ལ་པདྨ་སྭཱཧཱ། འདི་ནི་སྦྱིན་པའི། ཚ་ཏྲཾ་ཀ །འདི་ནི་ཚུལ་ཁྲིམས། ཤཾ་ཁ། འདི་ནི་བཟོད་པའི། ཙཀྲ །འདི་ནི་བརྩོན་འགྲུས། དྷྭ་ཛྲ། འདི་ནི་བསམ་གཏན། ཀ་ལ་ཤ །འདི་ནི་ཤེས་རབ། ཉ་ཚ་སྭཱཧཱ། རྡོ་རྗེའི་སློབ་མ་རྣམས་ཀྱི་སྡིག་སྒྲིབ་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་པ་རྣམས་རེ་རེའི་མཐར་བུམ་ཆུ་བླུགས་པས་ཁྲུས་བྱ། འཐུང་དུ་འཇུག །དེ་ནས། གཙོ་འཁོར་གྱི་སྔགས་ཐམས་ཅད་སྤེལ་བའམ། ཀཾ་ཀ་ནི་གཅིག་པུའི་མཐར། སརྦ་པཱ་པཾ་བྷྱཿ ཤཱནྟིཾ་ཀུ་རུ་སྭཱཧཱ། དེ་བཞིན་དུ། སརྦ་བིགྷྣཱན་བྷྱཿ ༝ སརྦ་རོ་ག་༝ སརྦ་དུཥྚན་༝ སརྦ་གྲ་ཧི་༝ སརྦ་ཛྭ་རེ་༝ སརྦ་བྱཱ་དྷི་༝ སརྦ་ཨུ་པ་ཏྲ་བེ་༝ སརྦ་ཨ་ཀཱ་ལ་མྲྀ་ཏྱ་ཡུ༌༝ སརྦ་དུར་སྭ་བ་ནི་༝ སརྦ་དུར་མི་ཏི་༝ སརྦ་ཙིཏྟ་ཀུ་ལེ་བྷྱཿ ཞེས་པ་རྣམས་ལ། ཤཱནྟིཾ་ཀུ་རུ་སྭཱཧཱ། བཏགས་ལ་ཁྲུས་བྱ་ཞིང༌། སྤེལ་ཚིག་རྣམས་བྱབས་ཁྲུས་ཀྱི་ཆོ་ག་གཞན་ནས་འབྱུང་བ་བཞིན། བོད་སྐད་དུ་བརྗོད་ཀྱང་ཆོག་གོ །དེ་ནས་བྱབས་པ་ནི། ཁར་ཆུ་ཅུང་ཟད་རེ་འཛིན་དུ་བཅུག་ལ། ངེད་ཀྱི་ལག་ན་ཐོགས་པའི་རྨ་བྱའི་མདོངས་ཀྱི་
དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་སྔགས་ཀྱིས་བསྐོར་བར་དམིགས་ལ། དེའི་འོད་ཟེར་གྱིས་བཀྲུས་པས་མ་དག་པའི་སྡིག་སྒྲིབ་ནད་གདོན་ཕྲ་ཞིང་ཕྲ་བ་ཐམས་ཅད་ཀྱང་རྡོ་ཁབ་ལེན་གྱིས་ལྕགས་ཕྱེ་ལེན་པ་བཞིན་བླངས་ཏེ་ཁར་བཟུང་བའི་ཆུ་ལ་བསྟིམས་པའི་མོས་པ་མཛོད། ཅེས་བརྗོད་ལ། བླ་མས་ལག་པ་གཡས་རྡོ་རྗེ་དང་བཅས་པས་རྨ་བྱའི་སྒྲོ་ཆུན་གྱིས་བྱབས་པའི་ཚུལ་དང་བཅས་སྔགས་དང་སྤེལ་ཚིག་གི་མཐར། ཤཱནྟིཾ་ཀུ་རུའི་ཚབ་ཏུ་ཨ་པ་ན་ཡེ་སྭཱཧཱ། ཞེས་བཏགས། མཇུག་ཏུ་ཁ་ནང་གི་ཆུ་སྣོད་དུ་དོར། དེ་ནས། སངས་རྒྱས་ཀྱི་བདེན་པ་དང༌། ཞེས་པ་ནས། ཁྱད་པར་དུ་བཅོམ་ལྡན་འདས་རྡོ་རྗེ་མི་འཁྲུགས་པ་ལྷ་དགུའི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང༌། བདེན་པ་ཆེན་པོའི་བྱིན་གྱིས་བརླབས་པ་ལ་བརྟེན་ནས། སློབ་མ་འདི་རྣམས་ཀྱི་ལུས་ངག་ཡིད་གསུམ་ལ་གནོད་ཅིང་འཚེ་བར་བྱེད་པའི་གདོན་བགེགས་ཐམས་ཅད་ཁྲུས་ཆུ་འདིས་ཚིམ་པར་གྱིས་ལ་རང་རང་གི་གནས་སུ་སོངས་ཤིག །གལ་ཏེ་མི་འགྲོ་ན་ཁྲོ་བོ་ཡེ་ཤེས་ཀྱི་མེ་རབ་ཏུ་འབར་བས་བསྲེག་ཅིང་རྣམ་པར་འཇོམས་པ་གདོན་མི་ཟའོ། །ལས་སྔགས་དང་སུམ་བྷ་ནི་དྲག་ཏུ་བརྗོད། གུ་གུལ་གྱིས་བདུག །རོལ་མོའི་སྒྲ་བྱ་ཞིང་ཁྲུས་ཆུ་རྒྱང་རིང་དུ་དོར་རོ། །སངས་རྒྱས་རྣམས་ནི་བདུད་ལས་རྒྱལ། །ཆོས་ནི་ཆོས་མ་ཡིན་ལས་རྒྱལ། །དགེ་འདུན་མུ་སྟེགས་རྣམས་ལས་རྒྱལ། །དབང་པོ་ལྷ་མིན་རྣམས་ལས་རྒྱལ། །ལྷ་མིན་ཟླ་བ་རྣམས་ལས་རྒྱལ། །ནམ་མཁའ་ལྡིང་ནི་རྒྱ་མཚོ་ལས། །མེ་ནི་ཤིང་རྣམས་ཀུན་ལས་རྒྱལ། །ཆུ་ནི་མེ་ལས་རྒྱལ་བ་སྟེ། །རླུང་ནི་སྤྲིན་ལས་རྒྱལ་བར་གྱུར། །རྡོ་རྗེ་ཡིས་ནི་རིན་
ཆེན་ཕུག །ལྷ་རྣམས་བདེན་པར་རབ་ཏུ་གནས། །ས་ཡང་བདེན་པར་གནས་པ་ལས། །སངས་རྒྱས་དང་ནི་ཆོས་ཀྱང་བདེན། །བདེན་པ་རྒྱལ་གྱུར་རྫུན་མ་ལགས། །བདེན་པ་དང་བདེན་པའི་ཚིག་འདི་དག་གིས་སློབ་མ་རྣམས་བདུད་དང་མི་མཐུན་པའི་ཕྱོགས་ཐམས་ཅད་ལས་རྒྱལ་བར་གྱུར་ཅིག །ཛ་ཡ་ཛ་ཡ། སིདྡྷི་སིདྡྷི། ཕ་ལ་ཕ་ལ་ཧོཿ ཞེས་བརྗོད་པར་བྱའོ། །དེ་ནས་བསྲུང་བ་ནི། སློབ་མའི་གནས་བདུན་དུ་རྡོ་རྗེ་རྒྱ་གྲམ་རེ་རེ་བཞག་པས། རྡོ་རྗེ་དེ་ལས་དེ་འདྲ་བསམ་གྱིས་མི་ཁྱབ་པ་སྤྲོས་ལུས་ལ་རྡོ་རྗེའི་གོ་བཀོན་ཏེ། ཕྱིན་ཆད་གནོད་པ་གང་གིས་ཀྱང་མི་ཚུགས་པར་བྱས་པའི་མོས་པ་གྱིས། ཞེས་བརྗོད་ལ། གནས་དེ་རྣམས་སུ་བླ་མས་རྡོ་རྗེ་རྒྱ་གྲམ་གྱི་ཚུལ་དུ་བསྣོལ་མར་གཏུག་ཅིང༌། སྔགས་ཀྱི་རྗེས་སུ་ཆེ་གེ་མོ་སྡིག་པ་དང་སྒྲིབ་པ་ཐམས་ཅད་ལས་ཞེས་སོགས་གོང་དང་འདྲ་བ་ལ། ཤཱནྟིཾ་ཀུ་རུའི་དོད་དུ་རཀྵ་རཀྵ་ཞེས་པ་བཅུག །གནས་བདུན་ནི། སྤྱི་བོ། སྙིང་ག །སོག་ཕྲག །དཔུང་པ་གཡས་གཡོན། པུས་མོ་གཡས་གཡོན་རྣམས་སོ། །རྒྱལ་བ་སྲས་བཅས་བདེན་པའི་བྱིན་རླབས་དང༌། །རྡོ་རྗེ་མི་འཁྲུགས་པ་ཡི་ཐུགས་རྗེ་ཡིས། །འགྲོ་བ་འདི་ལ་བདག་གིས་བསྲུང་ཟིན་གྱི། །འདི་ལ་སུས་ཀྱང་གནོད་པ་མ་བྱེད་ཅིག །ཅེས་བསྲུང་བ་བྱའོ། །གསུམ་པ་དཀྱིལ་འཁོར་གྱི་མཇུག་གི་བྱ་བ་ནི། ཆོ་གའི་ཆད་ལྷག་གི་ཉེས་པ་ཞི་བའི་ཕྱིར་ཞི་བའི་སྦྱིན་སྲེག་དང༌། ལྷ་ཚིམ་པར་བྱ་བའི་ཕྱིར་རྒྱས་པའི་སྦྱིན་སྲེག་དངོས་སུ་བྱ་བའམ། མ་གྲུབ་ན་བསམ་གཏན་གྱི་སྦྱིན་སྲེག་བྱ། གཏང་རག་གི་མཆོད་པ་བྱིན་གྱིས་བརླབས་ཏེ། ཚིགས་བཅད་སྔགས་དང་བཅས་པའམ། བསྡུ་ན། ཨོཾ་སརྦ་ཏ་ཐཱ་ག་ཏ་
ཨརྒྷཾ་སོགས་ཀྱིས་མཆོད། བསྟོད་པ་རྒྱས་བསྡུས་གང་རུང་གིས་བསྟོད། གཞན་ལ་དབང་བསྐུར་བ་ཡིན་ན། སློབ་མ་རྣམས་ལ་ནུས་པ་བསྟུན་པའི་དཀྱིལ་འཁོར་མཆོད་དུ་བཅུག་ལ། བཟའ་བ་ལ་སོགས་པས་ཚིམ་པར་བྱ། དཀྱིལ་འཁོར་བསྒྲུབ་ཅིང་མཆོད་པ་དང༌། དབང་བསྐུར་ཚུལ་བཞིན་དུ་བྱས་པ་སོགས་ཀྱི་དགེ་བའི་རྩ་བ་རྣམས་བྱང་ཆུབ་ཀྱི་རྒྱུར་འགྱུར་བའི་སྨོན་ལམ་དང༌། བསྔོ་བ་ཤུགས་དྲག་པོ་བྱ་ཞིང༌། ཕྱག་བཞེས་ཀྱི་རྒྱུན་ལ་གཏང་རག་གི་མཎྜལ་ཕུལ་བའི་མཇུག་ཏུ་དཔོན་སློབ་ལྷན་ཅིག་ཏུ་སྨོན་ལམ་དང་བསྟན་པ་རྒྱས་པར་འགྱུར་བའི་བདེན་ཚིག་ཤིས་བརྗོད་བཅས་མཛད་པའི་སྲོལ་ཡོད། དེ་ནས་བླ་མས་དཀྱིལ་འཁོར་ལ་ལན་གསུམ་བསྐོར་བའམ། དེ་ལྟར་མོས་ནས་ཤར་སྒོ་ནས་གཙོ་བོ་ལ་ཕྱོགས་པར་འདུག་སྟེ་ཆད་ལྷག་གི་ཉེས་པ་ཞི་བར་བྱ་བའི་ཕྱིར་ཡི་གེ་བརྒྱ་པ་ལན་གསུམ་བརྗོད། མེ་ཏོག་དང་བཅས་པའི་ཐལ་མོ་སྙིང་གར་སྦྱར་ནས། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱོད་དེ་ཀུན་བཟོད་པར་མཛོད། །མ་རྙེད་ཡོངས་སུ་མ་ཤེས་དང༌། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་གཙོ་བོས་བཟོད་མཛད་རིགས། ཅེས་པས་ཆད་པ་ལ་སོགས་པའི་ཉེས་པ་ཞི་བར་བྱ་བའི་ཕྱིར་བཟོད་གསོལ་བྱ་ཞིང༌། རང་གཞན་གྱི་ཆོས་སྒྲུབ་པའི་འགལ་རྐྱེན་ཐམས་ཅད་ཞི་ཞིང་གནས་སྐབས་དང་མཐར་ཐུག་གི་འདོད་དོན་རྣམས་འགྲུབ་པ་དང༌། བཤད་སྒྲུབ་ཀྱི་བསྟན་པ་རྒྱས་པ་སོགས་གསོལ་བ་བཏབ། དེ་ནས། ཨོཾ་ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཨོཾ་ཨཱཿཧཱུཾ།
བཛྲ་མཱུཿ ཞེས་བརྗོད་ནས། ཡེ་ཤེས་པའི་དཀྱིལ་འཁོར་རང་གནས་སུ་གཤེགས། དམ་ཚིག་པའི་རྟེན་དང་བརྟེན་པའི་དཀྱིལ་འཁོར་འོད་དུ་ཞུ་ནས་རང་ཉིད་ལ་ཐིམ་པར་གྱུར་པར་མོས། དེ་ནས། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨདྱ་ནུད་པན་ན་ཏྭཱ་ཏ་ཨོཾ་ཨཱཿ ཧཱུཾ་མུཿ ཞེས་འདོན་ཅིང་ཐམས་ཅད་རང་བཞིན་མེད་པར་མོས་ནས་གཡོན་པས་དྲིལ་བུ་དཀྲོལ། གཡས་པས་ཐོག་མར་ལྷ་ཚོན་རྣམས་མཐའ་ནས་རིམ་བཞིན་བསྡུས། དེ་ནས་གཡས་པའི་རྡོ་རྗེས་ཤར་སྒོ་ནས་བརྩམས་ཏེ་ཚངས་ཐིག་གི་ལམ་ནས་གཙོ་བོའི་གནས་ཀྱི་བར་དུ་དབྱི་ཞིང༌། རང་གི་མགོ་བོར་རྡུལ་ཚོན་ཅུང་ཟད་ཙམ་བླུག་ནས་པདྨ་ལ་སོགས་པ་རྣམས་དབྱི། དེ་ནས་སྒོ་རྣམས་དང་ཟུར་རྣམས་རྡོ་རྗེའི་རྩེ་མོས་གཞིག་པར་བྱའོ། །དེ་ནས་རྡོར་དྲིལ་བཟུང་བའི་ལག་པ་རྡོ་རྗེ་ཁུ་ཚུར་གཉིས་ཀྱི་མཛུབ་མོ་ལྕགས་ཀྱུ་བཞིན་བྱས་ཏེ། ཕན་ཚུན་འཁྱུད་པ་སྐམ་པའི་ཕྱག་རྒྱས། ཨོཾ་བཛྲ་ཀཱི་ལ་ཨུད་ཀཱི་ལ་ཡ་སརྦ་ཀཱི་ལཱ་ན་བཛྲ་དྷ་ར་ཨཱ་ཛྙཱ་པ་ཡ་ཧཱུཾ་ཧཱུཾ་ཧཱུཾ་ཕཊ་ཧོཿ ཞེས་བཟླས་ཏེ་ཕུར་བུ་རྣམས་དབྱུང་ངོ༌། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྷ་ལོ་ཙ་ནེ་སརྦ་ཨརྠ་སཱདྷ་ནི་སྭཱཧཱ། ཞེས་འོ་མ་ལ་བརྒྱ་རྩ་བརྒྱད་བཟླས་ཏེ། ཕུར་བུ་རྣམས་བཀྲུས་པས་བགེགས་རྣམས་སོས་ཏེ་སངས་རྒྱས་པར་བསམ་ཞིང་ཕུར་བུའི་ཁུང་བུ་དགང༌། བསམ་བཏན་གྱི་ཕུར་བུ་བཏབ་ན་དབྱུང་བ་དང་དགང་བ་མོས་པས་བྱ་ལ་སྔར་ཕུར་བུ་ལ་ཡེ་ཤེས་པ་བསྟིམ་པ་ཡིན་ན། ཡེ་ཤེས་པ་རང་བཞིན་གྱི་གནས་སུ་གཤེགས་པར་གྱུར་པར་བསམ་མོ། །ནད་ཞི་བ་ལ་སོགས་པའི་དོན་དུ་སློང་བ་ལ་ཅུང་ཟད་རེ་བྱིན་ནས་རྡུལ་ཚོན་བྱིངས་རྣམས་རྣམ་རྒྱལ་ལ་སོགས་པའི་བུམ་པ་གོས་ཀྱིས་བརྒྱན་པར་བླུག །རོལ་མོའི་སྒྲ་དང༌། གདུགས་དང་རྒྱལ་མཚན་དང་མཆོད་པ་རྣམས་དང་ལྡན་པས་ཁྱེར་ནས་འབབ་ཆུ་ལ་སོགས་པའི་འགྲམ་དུ་ཀླུའི་
དཀྱིལ་འཁོར་བྱ་ཚུལ་སོགས་སྔགས་རིམ་ཆེན་མོ་ལས་འབྱུང་བ་བཞིན་བྱས་ནས་ཀླུ་རྣམས་ལ་བྱིན་གྱིས་བརླབས་པའི་རྡུལ་ཚོན་རྣམས་གཏད། ཀླུ་རྣམས་ཀྱིས་ཀྱང་བཀུར་སྟི་ཆེན་པོས་ས་འོག་ཏུ་ཁྱེར་བར་མོས། རྡུལ་ཚོན་ཁྱེར་བའི་བུམ་པ་དེ་ཆུས་བཀང་ནས་སྔ་མ་བཞིན་དུ་ཁྱེར་ཏེ་ཆུ་དེས་ཞི་བའི་དོན་དུ་དཀྱིལ་འཁོར་གྱི་ཁང་པ་ལ་སོགས་པར་གཏོར་ཏེ་ཤིས་པར་བྱ། དེ་ལྟར་སྔར་བཤད་པའི་ཆོ་ག་ལ་སོགས་པ་དང༌། མཇུག་ཆོག་གི་རིམ་པ་འདི་དག་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བའི་དབང་དུ་བྱས་པ་ཡིན་ལ། རས་བྲིས་ཀྱི་དཀྱིལ་འཁོར་དུ་དབང་བསྐུར་ན། མཇུག་ཆོག་གི་སྐབས། བཟོད་གསོལ་དང༌། འདོད་དོན་ལ་གསོལ་བ་བཏབ་པའི་མཇུག་ཏུ། འདིར་ནི་རྟེན་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང༌། །ནད་མེད་ཚེ་དང་དབང་ཕྱུག་དང༌། །མཆོག་རྣམས་ལེགས་པར་སྩལ་ཏུ་གསོལ། །ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། ཞེས་བརྗོད་ནས་ཡེ་ཤེས་པ་རས་བྲིས་ལ་བརྟན་བཞུགས་བྱ། རྡུལ་ཚོན་བསྡུ་བ་དང༌། སྤྱན་འདྲེན་གྱི་སྐོར་མ་གཏོགས། ཕུར་བུ་དབྱུང་བ་སོགས་ཀྱང་སྔ་མ་བཞིན་བྱའོ།། གསུམ་པ་ཁྲུས་དབང་གི་སྒོ་ནས་གཤིན་པོ་སོགས་རྗེས་སུ་འཛིན་ཚུལ་ནི། བདག་བསྐྱེད་བུམ་བསྐྱེད་མདུན་བསྐྱེད་རྣམས་སྔོན་དུ་གཏོང་དགོས་ལ་བདག་འཇུག་གམ་སློབ་མའི་དབང་དང་འབྲེལ་ན། བུམ་པ་རྒྱས་པར་བསྒྲུབས་ཤིང༌། དེ་ལྟར་མིན་ཚེ། བུམ་པ་བསངས་སྦྱངས། སྟོང་པའི་ངང་ལས་བཾ་ལས་བྱུང་བའི་རིན་པོ་ཆེའི་བུམ་པ་དཀར་པོ་ཞེས་པ་ནས། གངྒཱ་དང་བུམ་པའི་ཆུ་དབྱེར་མི་ཕྱེད་པར་གྱུར། བུམ་པའི་ནང་དུ་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་བཟླས་བྱའི་སྔགས་ཀྱི་འཕྲེང་བས་བསྐོར་བ་ལས་འོད་ཟེར་འཕྲོས། ཕྱོགས་བཅུའི་བླ་མ་རྒྱལ་བ་སྲས་དང་བཅས་པ་ཐམས་ཅད་ཀྱིས་སྐུ་
གསུང་ཐུགས་ཀྱི་བྱིན་རླབས་ནུས་མཐུ་མ་ལུས་པ་འོད་ཟེར་གྱི་རྣམ་པར་སྤྱན་དྲངས་ཧཱུཾ་ཡིག་སྔགས་འཕྲེང་དང་བཅས་པ་ལ་ཐིམ། དེ་ལས་ཡེ་ཤེས་ཀྱི་བདུད་རྩིའི་རྒྱུན་བབས་པས་བུམ་པའི་ཆུ་དང་རོ་གཅིག་ཏུ་གྱུར་པར་བསམས་ལ། ཀཾ་ཀ་ནི། བརྒྱ་རྩའམ་ཉེར་གཅིག་བཟླས། ཟླ་བ་ཧཱུཾ་ཡིག་སྔགས་འཕྲེང་དང་བཅས་པ་འོད་དུ་ཞུ་ནས་བུམ་པའི་ཆུ་དང་དབྱེར་མི་ཕྱེད་པར་གྱུར། ཅེས་ཁྲུས་བུམ་ཙམ་གྱིས་ཆོག་གོ །དེ་ནས་གཤིན་པོའི་མིང་བྱང་མདུན་དུ་བཞག །ལས་བུམ་གྱི་ཆུ་དང་ལས་སྔགས་ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུཾ་ཕཊ། ཅེས་པས་བསང༌། ཨོཾ་ཤཱུ་ནྱ་ཏཱ་ཛྙཱ་ན་ཞེས་སོགས་ཀྱིས་སྦྱངས། རྟེན་སྣང་བ་མི་དམིགས་པའི་སྟོང་པ་ཉིད་དུ་གྱུར། སྟོང་པའི་ངང་ལས་ཚེ་འདས་ཀྱི་མིང་ཡིག་དང་པོ་ཐིག་ལེས་བརྒྱན་པ་ཡོངས་སུ་གྱུར་པ་ལས། ཚེ་ལས་འདས་པ་ཐ་མལ་པའི་ཆ་བྱད་ཅན། ཕུང་པོ་དང་ཁམས་དང་སྐྱེ་མཆེད་ཐམས་ཅད་གསལ་ཞིང་ཡོངས་སུ་རྫོགས་པར་གྱུར། ན་མོ་སངས་རྒྱས་ཀྱི་བདེན་པ་དང༌། ཆོས་ཀྱི་བདེན་པ་དང༌། དགེ་འདུན་གྱི་བདེན་པ་དང༌། དེ་བཞིན་གཤེགས་པ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། ལས་ཀྱི་རིགས་སུ་གྱུར་པ་ཐམས་ཅད་དང༌། སྙིང་པོ་དང༌། ཕྱག་རྒྱ་དང༌། གསང་སྔགས་དང༌། རིག་སྔགས་ཀྱི་ལྷའི་ཁྱད་པར་ཐམས་ཅད་དང༌། ཁྱད་པར་དུ་བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་རྡོ་རྗེ་མི་འཁྲུགས་པའི་ལྷ་ཚོགས་ཐམས་ཅད་ཀྱི་བདེན་པ་དང༌། བདེན་པ་ཆེན་པོའི་བྱིན་རླབས་ཀྱིས་ཚེ་ལས་འདས་པ་ཆེ་གེ་མོ་ཞེས་བྱ་བའི་རྣམ་པར་ཤེས་པ་སྲིད་པ་བར་དོ། ཁམས་གསུམ་འགྲོ་བ་རིགས་དྲུག་སྐྱེ་གནས་བཞིས་
བསྡུས་པའི་འཇིག་རྟེན་གང་ན་གནས་ཀྱང༌། སྐད་ཅིག་ཐང་ཅིག་ཡུད་ཙམ་ལ་འདིར་མཆིས་པར་གྱུར་ཅིག །རང་གི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས། ཚེ་འདས་ཀྱི་རྣམ་པར་ཤེས་པ་ཁ་དོག་དམར་ཞིང་གསལ་བ་ཨ་ཐུང་གི་གཟུགས་སུ་བཀུག་སྟེ། སྤྱི་གཙུག་ནས་ཞུགས་སྙིང་གར་ཐིམ་པར་བསམ། དེ་ནས་རྡོ་རྗེ་བསྡམ་པ་ལས་གུང་མོ་གཉིས་སྦྱར་ནས་བརྟན་པར་བསྒྲེང་བ་རྣམ་སྣང་གིའམ། སེམས་མ་རྡོ་རྗེ་མའི་དམ་རྒྱ་བཅིངས་ནས། ཨོཾ་བཛྲ་སརྦ་བི་ཤོ་དྷ་ནི་ཤོ་དྷ་ནི་སརྦ་པཱ་པཾ་ཨ་ན་ཡ་ཧཱུཾ། ཚེ་འདས་ཀྱི་ཐོག་མ་མེད་པ་ནས་བསགས་པའི་སྡིག་པ་ཐམས་ཅད་བཀུག་པར་བསམ། ཨོཾ་ཨཀྵོ་བྷྱཿ སརྦ་ཨ་པ་ཡ་བི་ཤོ་དྷ་ནེ་ཧཱུཾ་ཕཊ་སྭཱཧཱ། སྡིག་པ་ཐམས་ཅད་སྦྱངས་པར་བསམ། རྡོ་རྗེ་ཁུ་ཚུར་གཉིས་ལས་མཛུབ་མོ་གཉིས་མདུད་ནས་ལེགས་པར་གྱེན་དུ་འཕངས་པ་ལྟུང་བ་སློང་བའི་ཕྱག་རྒྱ་དང༌། ཨོཾ་སརྦ་ཨ་པཱ་ཡ། ཨཱ་ཀརྵ་ཎ་བི་ཤོ་དྷ་ནི་བཛྲ་ས་མ་ཡ་ཧཱུཾ་ཕཊ། ངན་འགྲོ་བ་ཐམས་ཅད་ཀྱང་བཀུག་པར་བསམ། དེ་ནས་རྡོ་རྗེ་བསྡམས་པ་ལས་གུང་མོ་གཉིས་བསྒྲེངས་ཏེ་ཁ་སྦྱར། མཐེ་བོང་མཐེའུ་ཆུང་སྦྱར་བ་དྲུག་ཏུ་དྲལ་བའི་ཚུལ་དང༌། ཨོཾ་བཛྲ་པ་ཎི་བི་སྥོ་ཊ་ཡ་སརྦ་ཨ་པཱ་ཡ་བནྡྷ་ན་ནི་པྲ་མོཀྵ་ཡ་སརྦ་ཨཱ་པཱ་ཡ་ག་ཏེ་བྷྱཿ སརྦ་ས་སྟྭ་ན་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ་ཀྱིས་སྒྲིབ་པ་ཐམས་ཅད་བཅོམ་པར་བསམ། དེ་ནས། བཛྲ་བནྡྷཱ་ཏྲཊ་ཅེས་པ་དང༌། རྡོ་རྗེ་བསྡམས་པ་ལན་གསུམ་དྲལ་བས་ལུས་ངག་ཡིད་གསུམ་གྱི་སྒྲིབ་པ་ཐམས་ཅད་བཅོམ་པར་བསམ། དེ་ནས་ཐལ་མོ་མཉམ་པར་སྦྱར་བ་དཔྲལ་བར་བཞག་ལ། ཚེ་འདས་ཀྱི་སྤྱི་བོར་ཨོཾ་དཀར་པོ། ཐལ་མོ་ཁ་ཕྱེ་སྟེ་པདྨའི་རྣམ་པར་བྱས་པ་མགྲིན་པར་བཞག་ལ། མགྲིན་པར་ཨཱཿ དམར་པོ། རྡོ་རྗེ་ཐལ་མོ་ལས་གུང་མོ་རྩེ་མོ་སྦྱར་བ་སྙིང་གར་བཞག་
སྟེ། ཐུགས་ཀར་ཧཱུཾ་སྔོན་པོས་མཚན་པར་གྱུར། རྡོ་རྗེ་ཁུ་ཚུར་གཉིས་བཅིངས་ནས་གུང་མོ་དང་མཐེ་བོང་དང༌། མཐེའུ་ཆུང་གྱེན་དུ་བསྒྲེངས་ནས་ཁ་སྦྱར་ཏེ་མཛུབ་མོ་དང་མིང་མེད་སེམས་དཔའི་སྐྱིལ་ཀྲུང་དུ་བྱས་ལ། སྙིང་ག་དང་མགྲིན་པ་དང་ཁ་དང་དཔྲལ་བ་དང་མཛོད་སྤུ་དང་སྨིན་མཚམས་དང་སྣ་དང་རྣ་བ་དང༌། དཀུ་དང་པུས་མོ་དང༌། རྐང་པ་དག་དང་བྱིན་པ་དང་མིག་གཉིས་དང༌། གསང་བར་རེག་ལ། ཨོཾ་ཨཀྵོ་བྷྱཿ བཛྲ་ཨ་དྷཱི་ཥྛཱ་ཛྙཱ་ན་ས་མ་ཡ་ཧཱུཾ། ཞེས་པས། གནས་དེ་རྣམས་སུ་ཟླ་བ་རྡོ་རྗེ་བསམས་ལ་བྱིན་གྱིས་བརླབས་སོ། །སེམས་མ་རྡོ་རྗེ་མའི་དམ་རྒྱ་བཅིང་བ་མན་ཆད་འདིའི་ལྷོ་སྒོའི་ཆོ་ག་དབེན་ས་པ་དང༌། ངོར་པ་དཀོན་མཆོག་ལྷུན་འགྲུབ། ཀུན་དགའ་གྲོལ་མཆོག །ལྕང་སྐྱ་ཐམས་ཅད་མཁྱེན་པ་སོགས་ཀྱིས་མཛད་པར་མི་འདུག་ཀྱང༌། བུ་སྟོན་དང༌། ཞ་ལུ་བ་ཡེ་ཤེས་རྒྱ་མཚོ་སོགས་མཁས་པ་དུ་མའི་གསུང་ལས་འབྱུང་བ་བཞིན་བཀོད་པ་ཡིན་པས། རང་གི་མོས་པ་དང་བསྟུན་ན་ཆད་ལྷག་ཏུ་མི་འགྱུར་བར་མངོན། དེ་ནས་བགེགས་སྦྱངས་པ་ནི། ཁྲོ་བོ་སྤྱན་དྲངས་ནས་མཆོད་བསྟོད་ཀྱི་བར་བྱ་སྟེ། གཏོར་མ་བཤམས་ནས་བྱིན་གྱིས་བརླབས་ལ། ཨོཾ་སརྦ་བིགྷྣཱན་ན་མ་སརྦ་ཏ་ཐཱ་ག་ཏ་བྷྱོ། ཞེས་སོགས་གསུམ་གྱིས་བགེགས་ལ་བསྔོ་བ་ནི། ཞི་བས་སྦྱང་བ། ཏིང་ལོའི་མར་མེ་དང་ཆང་བུ་སྦྲགས་ནས་རྟེན་ལ་ཕྱིར་བསྐོར་ཞིང༌། ཨོཾ་སུམ་བྷ་ནི་སུམ་བྷ་ཧཱུཾ། གྲི་ཧྣ་གྲི་ཧྣ་ཧཱུཾ། གྲི་ཧྣ་པ་ཡ། གྲི་ཧྣ་པ་ཡ་ཧཱུཾ། ཨ་ན་ཡ་ཧོཿ བྷ་ག་ཝན་བཛྲ་ཧཱུཾ་ཕཊ། ཅེས་བརྗོད་ཅིང་ཏིང་ལོ་དང་ཆང་བུ་གསུམ་གྱིས་བསྐོར་བ་ནི། ཞི་དྲག་ཕྱེད་མས་སྦྱང་བའོ། །དེ་ནས་སྔར་བཞིན། སངས་རྒྱས་ཀྱི་བདེན་པ་དང༌། ཞེས་པ་ནས། བདེན་པའི་བྱིན་རླབས་ཀྱིས་ཚེ་ལས་འདས་པ་ཆེ་གེ་མོ་ཞེས་བྱ་བ་གསོན་གྱི་དུས་ན་ཚེ་གནས་པ་ལ་བར་དུ་གཅོད་ཅིང༌། ཚེ་འཕོས་
ནས་གང་དུ་གནས་པའི་ལུས་སྲོག་དང་མཐོ་རིས་དང་ཐར་པ་ལ་བར་དུ་གཅོད་པའི་བགེགས་ཀྱི་ཚོགས་ཐམས་ཅད་དང༌། ཚེ་ལས་འདས་པའི་ཆ་བྱད་བཟུང་ནས་དེའི་ཉེ་འབྲེལ་དང་འཇིག་རྟེན་པ་རྣམས་ལ་བསླུ་ཞིང་གནོད་པར་བྱེད་པའི་གནོད་སྦྱིན་དང་ཤ་ཟ་དང༌། འབྱུང་པོ་ལ་སོགས་པ་ཐམས་ཅད་གཏོར་མ་འདིས་ཚིམ་པར་གྱིས་ལ་གནོད་པ་དང་འཚེ་བའི་བསམ་པ་ངན་པ་ཐམས་ཅད་སྤོང་ལ། ཕན་པ་བྱང་ཆུབ་ཀྱི་སེམས་དང་ལྡན་པས་རང་རང་སོ་སོའི་གནས་སུ་སོངས་ཤིག །གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་མེ་འབར་བ་རྣམས་ཀྱིས་སྲེག་ཅིང་རྣམ་པར་འཇོམས་པར་གདོན་མི་ཟའོ། །ཞེས་བརྗོད་ཅིང་སུམ་བྷ་ནིའི་སྔགས་བཟླ། གུ་གུལ་གྱིས་བདུག །ཡུངས་ཀར་གྱིས་བྲབ་པ་སོགས་བྱའོ། །དེ་ནས་མེ་བསང་སྦྱངས་ནས། རཾ་ལས་ཡེ་ཤེས་ཀྱི་མེ་འབར་བའི་ནང་དུ། ཁྲོ་བོ་རྡོ་རྗེ་མཁའ་འགྲོ་སྐུ་མདོག་མཐིང་ནག །ཞལ་གཅིག་ཕྱག་གཉིས་རྡོ་རྗེ་དང་དྲིལ་དུ་འཛིན་ཞིང༌། ཞལ་གདངས་པར་བསྐྱེད་ལ། ཚེ་འདས་ཀྱི་རྐང་མཐིལ་གཉིས་སུ་རླུང་གི་དཀྱིལ་འཁོར་ལྟེ་བར་ཡེ་ཤེས་ཀྱི་མེ་འབར་བ་སྙིང་གར་སྡིག་པའི་ས་བོན་པཾ་ནག་པོ་ལ་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་འདུས་པར་བསམས་ལ། ལྟེ་བའི་ཡེ་ཤེས་ཀྱི་མེ་འབར་བའི་འོད་ཟེར་གྱིས་སྙིང་གའི་པཾ་དེད་ནས་སྣ་སྒོ་ནས་ཐོན་སྡིག་པ་རྭ་ཅན་གྱི་རྣམ་པར་གྱུར་ནས། རང་གི་ལག་པའི་ཏིལ་ལ་ཐིམ་པར་བསམས་ལ། ཨོཾ་བཛྲ་ཌཱ་ཀ་ཁ་ཁ་ཁཱ་ཧི་ཁཱ་ཧི། སརྦ་པཱ་པཾ་དཱ་ཧ་ན་བྷསྨི་ཀུ་རུ་སྭཱཧཱ། ཞེས་ཁྲོ་བོའི་ཞལ་དུ་འབུལ། དེ་ནས་ཕྱེ་མའམ་ཡུངས་ཀར་ལ། ཀཾ་ཀ་ནི་སོགས་ཀྱི་གཟུངས་མང་དུ་བཟླས་ལ། ཨོཾ་སརྦ་པཱ་པཾ་ཞེས་སོགས་
བྲབ་སྔགས་བཅོ་ལྔ་བརྗོད་དེ་ཕུང་པོའམ་མིང་བྱང་སོགས་ལ་བྲབ། དེ་ནས། ཇི་ལྟར་བལྟམས་པ་ཙམ་གྱིས་ནི། །ཞེས་སོགས་དང་བཅས་པའི་ཁྲུས་གསོལ་བའི་ཆུ་བུམ་པར་བླུག་སྟེ། མིང་བྱང་སོགས་མེ་ལོང་ལ་ཤར་བ་ལ་ཁྲུས་བྱ་བ་ནི། འདི་ནི་སྦྱིན་པའི་༝ ཁྲུས་བགྱི་འོ། །ན་མོ་རཏྣ་ཏྲཱ་ཡཱ་ཡ། ཞེས་སོགས་བརྗོད་པའི་རྗེས་སུ། འཇིག་རྟེན་འདི་ནས་ཕ་རོལ་ཏུ་སོང་ཞིང་ཚེ་ལས་འདས་པ་ཆེ་གེ་མོ་ཞེས་བྱ་བས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་དང༌། ཁྱད་པར་དུ་ཉོན་མོངས་པ་སེར་སྣའི་དྲི་མ་ཐམས་ཅད་བྱང་ཞིང་དག་ནས། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག །ཅེས་བརྗོད། སྦྱིན་པའི་གནས་སུ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ། ཅེས་དང༌། སེར་སྣ། ཞེས་པའི་གནས་སུ། ཚུལ་འཆལ། ཁོང་ཁྲོ། ལེ་ལོ། རྣམ་གཡེང༌། ཤེས་འཆལ། རྣམས་བཅུག་ནས་སྔར་བཞིན་བཀྲུས། ཆུ་བོ་དྲུག་གིས་ཁྲུས་བྱས་པས། །བག་ཆགས་རྣམ་དྲུག་སྦྱངས་ནས་ནི། །གང་ལ་ཉེས་པ་མི་མངའ་ཞིང༌། །ཁྲུས་ལེགས་མཛད་ལ་ཕྱག་འཚལ་འདུད། །ན་མོ་རཏྣ་ཏྲཱ་ཡཱ་ཡ། ཞེས་སོགས་དང༌། དྲི་ཆུ་དྲུག་གིས་ཁྲུས་བྱས་པས། །དྲི་མ་རྣམ་དྲུག་སྦྱོང་མཛད་པ། །རྒྱ་ཆེན་ཡོན་ཏན་དྲུག་ལྡན་པ། །ཁྲུས་ལེགས་མཛད་ལ་ཉེས་མི་མངའ། །ན་མོ་རཏྣ་ཏྲཱ་ཡཱ་ཡ། ཞེས་སོགས་དང༌། དྲི་མ་རྣམ་དྲུག་དག་པ་ཡིས། །ཡོན་ཏན་ཐམས་ཅད་དང་ལྡན་པ། །སངས་རྒྱས་ཐམས་ཅད་མཆོད་དོན་དུ། །དད་
པས་བདག་གིས་ཁྲུས་བགྱི་འོ། །ན་མོ་རཏྣ་ཏྲཱ་ཡཱ་ཡ། ཞེས་སོགས་ཀྱི་མཐར། འཇིག་རྟེན་འདི་ནས་ཞེས་པ་ནས། ཁྱད་པར་ཕ་རོལ་ཏུ་ཕྱིན་པ་དྲུག་གི་མི་མཐུན་པའི་ཕྱོགས་ཐམས་ཅད་བྱང་ཞིང་དག་ནས། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ཏེ་མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག །ཅེས་བརྗོད། དེ་ནས་ཉོན་མོངས་པ་དང་དུག་བསལ་བ་ནི། འདོད་ཆགས་ཞེ་སྡང་གཏི་མུག་རྣམས། །འདི་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་གཟི་ཡིས་དུག་བཅོམ་མོ། །ན་མོ་རཏྣ་ཏྲཱ་ཡཱ་ཡ། ཞེས་སོགས་དང༌། ཁྱད་པར་ཉོན་མོངས་པ་དང་དེའི་དབང་གིས་བྱུང་བའི་དུག་ཐམས་ཅད་བྱང་ཞིང་དག་ནས་མྱུར་དུ་ཞེས་སོགས་བརྗོད། དེ་བཞིན་དུ་སངས་རྒྱས་ཞེས་པའི་གནས་སུ། བཅོམ་ལྡན་དམ་ཆོས་ཞེས་པ་དང༌། དམ་ཆོས་ཞེས་དང༌། ན་མོ་རཏྣ་ཏྲཱ་ཡཱ་ཡ། ཞེས་དང༌། འཕགས་པའི་དགེ་འདུན་ཞེས་དང༌། དགེ་འདུན་ཞེས་དང༌། ན་མོ་རཏྣ་ཏྲཱ་ཡཱ་ཡ། ཞེས་པ་སྤེལ་ཚིག་དང་བཅས་པ་སྦྱོར། ས་ནི་དུག་གི་མ་ཡིན་ཏེ། །ས་ནི་དུག་གི་ཕ་ཡང་ཡིན། །བདེན་པའི་བདེན་ཚིག་འདི་དག་གིས། །ཆེ་གེའི་དུག་ནི་དུག་མེད་ཤོག །དུག་ནི་ས་ཡི་ནང་དུ་སོང༌། །གང་བའི་སྣོད་དུ་དུག་སོངས་ཤིག །ན་མོ་རཏྣ་ཏྲཱ་ཡཱ་ཡ། ཞེས་དང༌། ཆེ་གེ་ཞེས་བྱ་བའི་འབྱུང་བ་དང་འབྱུང་བ་ལས་གྱུར་བའི་དུག་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་དང༌། དེ་བཞིན་དུ་སའི་གནས་སུ། ཆུ། མེ། རླུང༌། རྣམས་དང༌། གང་བའི་གནས་སུ། གཤེར་བའི། ཚ་བའི། གཡོ་བའི། ཞེས་པ་དང༌། གོང་གི་སྔགས་སྤེལ་ཚིག་དང་བཅས་པ་བྱའོ། །དེ་ནས་མི་ཤིས་པ་སྦྱོང་
བ་ནི། གང་ལ་སེར་སྣ་རྣམས་ཆགས་པ། །ཞེས་པ་ནས། ཁྱེད་ཅག་སྡིག་པར་མ་གྱུར་ཅིག །ཅེས་དྲིལ་བུ་གསིལ་ཞིང་མེ་ཏོག་གཏོར་ལ། ཆེ་གེ་མོ་ཞེས་བྱ་བ་བདུད་དང་མི་མཐུན་པའི་ཕྱོགས་ཐམས་ཅད་ལས་རྒྱལ་ནས་བཀྲ་ཤིས་པར་གྱུར་ཅིག །ཅེས་བརྗོད། དེ་ནས་བུ་ལ་སོགས་པའི་ཉེ་བས་མིང་བྱང་བཟུང་ནས་ཕྱག་བྱེད་པའམ་མེད་ཀྱང་རུང་སྟེ། ཚེ་འདས་འདི་ཉིད་བསམ་པ་དག་པས་དཀོན་མཆོག་གསུམ་འདུས་རྡོ་རྗེ་མི་འཁྲུགས་པའི་ལྷ་ཚོགས་དང་ཉེ་བའི་སྲས་བརྒྱད་ལ་སྐྱབས་སུ་འགྲོ་ཞིང༌། ཕྱག་བྱེད་པར་བསམས་ལ། གཙོ་བོ་རྒྱལ་བ་འགྲོ་བའི་མགོན། །ཞེས་པ་ནས། འཇིགས་པ་མྱུར་དུ་བསལ་དུ་གསོལ། །ཞེས་བརྗོད་པར་བསམ། དེ་རྣམས་ནི་སྦྱང་བའི་རིམ་པའོ། །དེ་ནས་དབང་སྐུར་བ་པོ་རྣམས་འདིས་དབང་ཐོབ་ཅིང་བསྙེན་པ་སོང་ཡོད་ན། སློབ་མ་རྗེས་འཛིན་གྱི་སྐོར་རྣམས་ཕྱག་ལེན་བཞིན་བྱ་རྒྱུ་བྱུང་ན་ཤིན་ཏུ་ཕན་ཡོན་ཆེ་སྟེ། རྡོ་རྗེ་གུར་གྱི་རྒྱུད་ལས། རྡུལ་ཚོན་དཀྱིལ་འཁོར་བྲིས་ནས་ནི། །གཤིན་ལ་གསོན་བཞིན་དབང་བསྐུར་ན། །ངན་སོང་གསུམ་དུ་སྐྱེས་ན་ཡང༌། །དེ་ཉིད་ཀྱིས་ནི་ཐར་བར་འགྱུར། །ཞེས་གསུངས་ཤིང༌། དུས་འཁོར་རྩ་རྒྱུད་ལས་ཀྱང་དེ་ཇི་ལྟ་བུ་བཞིན་གསུངས་ལ། སྦྱོང་རྒྱུད་ལས་མིང་བྱང་གཉེན་བཤེས་ཚུན་ཆད་གཞིར་བྱས་ཏེ། དབང་བསྐུར་ཚུལ་ཕན་ཡོན་དང་བཅས་པ་རྒྱས་པར་གསུངས་སོ། །དེའི་འདོན་ཚུལ་ནི། དགའ་ཆེན་ཁྱོད་བདག་ནས། མགོན་པོས་བདག་ནི་གཞུག་པར་བགྱི། །ལན་གསུམ། འདི་འདྲའི་ཚེ། སློབ་མས་བརྗོད་པར་མོས་དགོས་པས། བདག་ཅེས་པ་ཚིག་བསྒྱུར་མི་དགོས། དཀོན་མཆོག་གསུམ་ལ་སོགས་གསུམ། བྱང་ཆུབ་སྙིང་པོར་སོགས་གསུམ། ཨོཾ་ཙཀྵུ༌༝ ཨཱཿ ཁཾ་བཱི་ར་ཧཱུཾ། སློབ་མའི་སྙིང་གར་ཟླ་བའི་༝
སུ་ར་ཏ༌༝ སུ་ཁཾ། ཨཱཿ ཁཾ་བཱི་ར་ཧཱུཾ། དེ་བཞིན་གཤེགས་པ༌༝ སློབ་མ་སྐད་ཅིག་གིས་ནས། སློབ་མའི་སྙིང་གའི་ཧཱུཾ་ཡིག་ལ་གཉིས་སུ་མེད་པར་ཐིམ། བླ་མ་དང་ནས། སློབ་མའི་སྙིང་གར་ཐིམ་པས་རྒྱུད་བྱིན་གྱིས་བརླབས་པར་གྱུར། གཟུངས་རིང་མཐར། ཨོཾ་བཛྲ་ཨ་པེ་ཤ་ཡ་ཨ་ཨཱཿ ཏིཥྛ་བཛྲ། དམ་རྒྱ་བཅིང་ལ། ཀཾ་ཀ་ནི། ཚར་གསུམ་སློབ་མ་འབྲུ་གསུམ་གྱིས༌༝ སངས་རྒྱས་དངོས་གྲུབ་ནས། ཨོཾ་པྲ་ཏི༌༝ ཨོཾ་པྲ༌༝ རྡོ་རྗེ་སེམས་དཔའ་ནས། པཱ་ཤྱ་དེ་ཡང་ནས། མཐོང་བར་གྱུར། མནྜལ་ཕུལ། བྱང་ཆུབ་རྡོ་རྗེ༌༝ ཚར་གསུམ། དཀྱིལ་འཁོར་གྱི་ཤར༌༝ བུམ་ཆུ་བསང་སྦྱང་བྱིན་རླབས་དབང་ལྷ་སྤྱན་འདྲེན། ཤིས་བརྗོད་དབང་དངོས་རྣམས་གཞུང་བཞིན་ལ། སློབ་མ་ལ་དབང་བསྐུར་བའི་ཞེས་དང༌། སློབ་མའི་སྟེང་ཕྱོགས་ཞེས་དང༌། སློབ་མའི་ལུས་ལ་ཐིམ་པར་གྱུར། ཅེས་ཚིག་བསྒྱུར། ཨོཾ་སརྦ་ཏ་ཐཱ་ག་ཏ་ཨརྒྷཾ་སོགས་ཀྱིས་མཆོད། དེ་ལྟར་ཆུའི་དབང་ཞེས་སོགས་དག་པ་བརྗོད་མི་དགོས། ཅོད་པན་ལ་ཡང་དག་པ་བརྗོད་པ་དོར་ཏེ་གཞན་རྣམས་སྔ་མ་བཞིན་བྱ། མཐའ་རྟེན་གཞན་རྣམས་བཞག་ལ། རྒྱལ་སྲིད་སྣ་བདུན་བསང་སྦྱངས་བྱིན་གྱིས་བརླབ་སྟེ། ལྷ་རྫས་ལས་བྱས་སོགས་དང་རྫས་བརྒྱད་བྱིན་གྱིས་བརླབ་སྟེ། གང་ཞིག་རེག་ཅིང་ནས་ཥཱིཉྩ་མཾ། གཏང་རག་གི་མནྜལ་ཕུལ། དེ་ནས་ཚེ་འདས་དེ་ཉིད་པདྨ་དང་ཟླ་བའི་སྟེང་དུ་ས་བོན་ཕྱག་མཚན་དང་བཅས་པ་ལས་ལྷར་བསྐྱེད། ཆུ་གཉིས་ཉེར་སྤྱོད་རོལ་མོ་སོགས་སྔགས་ཕྱག་རྒྱ་དང་བཅས་པས་མཆོད། ཟས་གཏད་བྱ་དགོས་བྱུང་ན། བཟའ་བཏུང་རྣམས་བསངས་སྦྱངས་བསྐྱེད་ལ། ཁ་ཟས་རོ་བརྒྱ་སོགས་སུ་སྤྲུལ་ལ་འདོད་ཡོན་ལྔ་རྣམས། ཚིགས་བཅད་དང་བཅས་པའམ་སྔགས་ཙམ་གྱིས་ཚེ་འདས་ལྷར་བསྐྱེད་པ་ལ་འབུལ་བར་བྱེད། ཚེ་འདས་ལྷར་མི་བསྐྱེད་ན་བཟའ་བཏུང་
གསུར་རྣམས་བྱིན་གྱིས་བརླབས་ལ། ཚེ་འདས་ཀྱིས་གཙོ་བྱས་པའི་བར་དོའི་སེམས་ཅན་ཐམས་ཅད་ལ་བྱིན་པས་ཚིམ་པར་བསམ་མོ། །དེ་ནས་བར་དོའི་ཆོས་བཤད་ཀྱང་གང་འཚམ་བྱས་པའི་རྗེས་སུ། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་ཟེར་གྱིས། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་པ་ཀུན་སྦྱངས་ནས། །འཕགས་པའི་ལམ་དེར་འགྲོ་བར་ཤོག །ཨོཾ་རཏྣེ་རཏྣེ། མཧཱ་རཏྣེ། རཏྣ་སཾ་བྷ་ཝེ། རཏྣ་ཀི་ར་ཎེ། རཏྣ་མཱ་ལཱ་བི་ཤུདྡྷེ་ཤོ་དྷ་ཡ་སརྦ་པཱ་པཾ་ཧཱུཾ་ཕཊ། ཅེས་པས་ལམ་བསྟན་ལ། དེ་ནས། འདི་ནས་ཤར་གྱི་ཕྱོགས་རོལ་ན། །མངོན་པར་དགའ་བའི་ཞིང་ཁམས་ཡོད། །རྫོགས་པའི་སངས་རྒྱས་མི་འཁྲུགས་པ། །བྱང་ཆུབ་སེམས་དཔའི་འཁོར་དང་བཅས། །སྲིད་པའི་སྡུག་བསྔལ་ཀུན་ལས་སྒྲོལ། །ཞིང་གི་ཡོན་ཏན་བསམ་མི་ཁྱབ། །སུ་ཞིག་དེ་ཡི་མཚན་འཛིན་ཅིང༌། །དམིགས་པ་མེད་པའི་སེམས་ཀྱིས་སུ། །བྱང་ཆུབ་མཆོག་ཏུ་སེམས་བསྐྱེད་ན། །ཞིང་མཆོག་དེ་རུ་སྐྱེ་བར་གསུངས། །ཚེ་འདས་རིགས་ཀྱི་བུ་ཁྱོད་ཀྱང༌། །མི་འཁྲུགས་པ་ཡི་མཚན་བཟུང་ཞིང༌། །བྱང་ཆུབ་མཆོག་ཏུ་སེམས་བསྐྱེད་ཀྱིས། །ཞིང་མཆོག་དེ་རུ་སྐྱེ་བ་ཡིན། །ཞིང་མཆོག་དེ་རུ་སྐྱེས་ནས་ཀྱང༌། །སེམས་ཅན་དོན་ཀུན་བྱེད་པར་ཤོག །པདྨ་འདམ་གྱིས་མ་གོས་
ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨ་ལས་བྱུང་བ། །མངོན་དགའི་ཞིང་དུ་སྐྱེ་བར་ཤོག །ཨོཾ་པདྨེ་པདྨེ་པདྨ་སཾ་བྷ་ཝ་མཧཱ་ཨ་བྷི་ནནྟ་གཙྪནྟུ་སྭཱཧཱ། ཚེ་འདས་ཀྱི་རྣམ་ཤེས་དང༌། ལྷ་ཡེ་ཤེས་པ་དབྱེར་མེད་དུ་བསྲེས་པ་སྤྱི་གཙུག་ནས་ཐོན་ཏེ། མངོན་པར་དགའ་བའི་ཞིང་དུ་པདྨ་སོགས་ལ་བརྟེན་ནས་རྫུས་ཏེ་སྐྱེས་པ་ན། དེ་ན་གནས་པའི་བྱང་སེམས་སོགས་ཀྱིས། ཨོཾ་སརྦ་ཏ་ཐཱ་ག་ཏ་པྲ་ཝ་ར་སད་ཀ་རཾ་ཨརྒྷཾ་པྲ་ཏཱིཙྪ་སྭཱཧཱ། ཞེས་སོགས་ཀྱིས་ཆུ་གཉིས་ཉེར་སྤྱོད་རོལ་མོའི་བར་གྱིས་མཆོད། མངོན་དགའི་ཞིང་དུ་བཞུགས་པའི་སངས་རྒྱས་མི་འཁྲུགས་པ་འཁོར་བཅས་ཀྱི་ཞལ་མཐོང༌། དེ་རྣམས་ལ་ཡན་ལག་བདུན་པ་ཕུལ་བས། གདམས་པ་དང་རྗེས་སུ་གནང་བ་ཐོབ། དེ་ན་གནས་པའི་འཁོར་འགའ་ཞིག་གིས། བདག་གིས་ཆོ་ག་བྱས་པའི་མཐུར་ཤེས་ནས། བདག་གི་གམ་དུ་འོངས་ཏེ། སྔར་ལྟར་མཆོད་ཅིང༌། སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་དགེ་བ་མེད། །དགེ་འདུན་འདྲ་བའི་སྣོད་མེད་དེ། །སྔགས་དང་འདྲ་བའི་འདྲེན་པ་མེད། །ཅེས་ཆེད་དུ་བརྗོད་པར་བསམ། དེས་ཀྱང་དེར་སྐྱེས་པའི་རྒྱུ་བརྟགས་པས། བདག་གི་ཆོ་ག་བྱས་པའི་ནུས་མཐུར་ཤེས་ནས། སྐད་ཅིག་གིས་འོངས་ནས། །ཨེ་མ་ཤཱཀྱ་མགོན་པོ་ཡི། །སངས་རྒྱས་མཛད་པ་ངོ་མཚར་ཆེ། །གང་ཕྱིར་ངན་སོང་ལྷུང་བ་ཡི། །སེམས་ཅན་གློག་བཞིན་མྱུར་དུ་གྲོལ། །དེ་བཞིན་གཤེགས་པའི་ཆོས་ནི་བསམ་མི་ཁྱབ། །སྔགས་ཀྱི་ཡོན་ཏན་སྣ་ཚོགས་བསམ་མི་ཁྱབ། །བྱང་ཆུབ་བརྟེན་པ་རྣམས་ཀྱང་བསམ་མི་ཁྱབ། །ཚངས་སྤྱོད་ཚུལ་ཁྲིམས་དྲི་མེད་
སྐྱེ་བསམ་ཡས། །ཨེ་མ་སངས་རྒྱས་རྣམས་ཀྱི་ནི། །སྔགས་ཀྱི་བྱིན་རླབས་ཡ་མཚན་ཆེ། །གང་ཕྱིར་མཚམས་མེད་ལྷུང་བ་ཡི། །སེམས་ཅན་ལྷ་གནས་མྱུར་དུ་སྐྱེས། །ཞེས་ཆེད་དུ་བརྗོད་ནས། བདག་དང་ལྷ་ལ་གོང་བཞིན་མཆོད་ནས། སླར་ཡང་མངོན་དགའི་ཞིང་དུ་སོང་བར་གྱུར། ཅེས་བརྗོད་དེ། དེ་ལྟར་དུ་བསམ། ཨོཾ་སརྦ་བུདྡྷ་ཀྵེ་ཏྲ་གཙྪནྟུ་སྭཱཧཱ། ཞེས་བརྗོད་ཅིང་མེ་ཏོག་གཏོར་རོ། །དེ་ནས་དེས་ཀྱང་མངོན་དགའི་ཞིང་ནས་བལྟས་པས་མཐོང་བར་བསམ། རང་དང་ལྷ་རྣམས་ཀྱིས་ཚེ་འདས་ཀྱི་ཕུང་པོ་ལྷག་མ། རོ་ལྟ་བུའམ་སྡིག་སྒྲིབ་དང་བཅས་པའི་བྱང་བུ་རཾ་ལས་སྐྱེས་པའི་ཡེ་ཤེས་ཀྱི་མེས་བསྲེག་པར་བསམས་ལ། གསོན་ཅིག་དགོངས་ཤིག་རིགས་ཀྱི་བུ། །གསོན་ཅིག་ཚེ་འདས་རིགས༌༝ ཕུང་པོ་ལྔ་ཡི་བུད་ཤིང་ལ། །རྒྱལ་བ་ལྔ་ཡི་མེ་སྦར་རོ། །འབྱུང་བ་བཞི་ཡི་བུད་ཤིང་ལ། །ལྷ་མོ་བཞི་ཡི་མེ༌༝ དབང་པོ་དྲུག་གི་བུད་ཤིང་ལ། །བྱང་ཆུབ་སེམས་དཔའི་མེ༌༝ ཡུལ་རྣམས་དྲུག་གི་བུད་ཤིང་ལ། །ལྷ་མོ་དྲུག་གི་མེ་སྦར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བའི་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་ཀུན་འགྲུབ་པར་ཤོག །དེ་ནས་ཐམས་ཅད་མི་དམིགས་པའི་ངང་དུ་སྟོང་པར་བསམས་ལ། གཟུགས་སྟོང་པའོ། །སྟོང་པ་ཉིད་གཟུགས་སོ། །ཞེས་སོགས་ཀྱི་ཤེས་རབ་སྙིང་པོ་འདོན་ནོ། །མཇུག་ཆོག་སྔར་དང་འདྲ། དེ་ལྟ་བུའི་ཚུལ་གྱིས་གཤིན་པོ་རྗེས་སུ་འཛིན་པ་ནི་ཕན་ཡོན་བསམ་གྱིས་མི་ཁྱབ་པར་གསུང་བས། རྗེ་བཙུན་མི་ལའི་ཞལ་ནས། མི་ཤི་བའི་རོ་ཡི་སྔས་མགོ་ལ། །ནོར་ལེན་འདོད་ཀྱི་བན་བོན་ཅ་ཅོ་འདོན། །ཞེས་གསུངས་པ་དང༌། ཡང་དགོན་པའི་རི་ཆོས་སུ་གསུངས་པ་ལྟར། རྙེད་བཀུར་ལ་སྲེད་པ་
ཙམ་མ་ཡིན་པར་ལྷག་བསམ་རྣམ་པར་དག་པས་ཀུན་ནས་བསླང་སྟེ། དམ་པའི་ཕྱག་ལེན་བཞིན་མ་ཉམས་པར་བྱས་ནས། རང་གཞན་གཉིས་ཀའི་དོན་སྒྲུབ་ཚུལ་གནད་དུ་འགྲོ་ངེས་པ་ལ་འབད་པར་རིགས་སོ།། ༈ བཞི་པ་སྦྱིན་སྲེག་གི་ཆོ་ག་འཕྲོས་དང་བཅས་པ་ནི། སྤྱིར་ཐབ་བརྩིག་བརྐོ་བྲི་གསུམ་གང་བྱས་ཀྱང་རུང་ལ། ཕྱག་ལེན་འཇུག་པ་བདེ་བའི་ཕྱིར་བྲི་ཐབ་ཀྱི་དབང་དུ་བྱས་ན་སྟེགས་བུ་སོར་བཞི་པ་ངོས་མཉམ་པ་ལ་དཀར་རྩི་བྱུགས་ཤིང་ཐིག་གདབ་ཚུལ་ནི། །ནུབ་ནས་ཤར་དུ་རྒྱུ་བ་ཡི། །ཚངས་དང་ཚངས་ཆེན་སྤྱི་བཞིན་གདབ། །དབུས་ནས་སོར་མོ་བཅུ་གཉིས་བར། །ཟླུམ་པོ་ཐབ་ཀྱི་ནང་ཐིག་ཡིན། །དེ་ཡི་ཕྱི་རོལ་སོར་བཞི་དང༌། །སོར་མོ་བཞི་ཡི་ཟླུམ་གཉིས་བསྐོར། །ནང་མ་ཐབ་ཀྱི་མུ་རན་དང༌། །ཕྱི་མ་ཁ་ཁྱེར་རྡོ་རྗེའི་གནས། །ཁ་ཁྱེར་མཚམས་ནས་ཕྱི་རོལ་ཏུ། །སོར་གཉིས་དོར་བར་ཕྱོགས་བཞི་རུ། །ཐིག་ཆེན་སྟེང་དུ་མཚན་མ་བཏབ། །ཐིག་ཆེན་སྟེང་ནས་དབུས་སླེབ་པའི། །སྟེགས་བུའི་ཟུར་དུ་བྱ་རྗེས་བཙལ། །བྱ་རྗེས་སྟེང་ནས་ཟུར་ཐིག་དང༌། །སྟེགས་བུའི་ཐིག་འདེབས་མན་ངག་ལུགས། །པདྨ་ཟླ་ཕྱེད་འཕྲུལ་གྱི་ཐིག །མཐོང་བ་བརྒྱུད་ལས་ཤེས་པར་བྱ། །ཞེས་འབྱུང་བ་ལྟར་བྱས་ལ། ཐབ་ཀྱི་དབུས་སུ་པདྨ་འདབ་བརྒྱད་ཀྱི་ལྟེ་བར་རྡོ་རྗེ་སྔོན་པོ་རྩེ་ལྔ་བ། སོར་བརྒྱད་པ་དང༌། ཁ་ཁྱེར་ལ་རྡོ་རྗེའི་ཕྲེང་བ། གྲྭ་བཞིར་ཟླ་ཕྱེད་རྡོ་རྗེ་རྣམས་བྲི། དཀོན་མཆོག་ལྷུན་གྲུབ་ཀྱི་ཡིག་ཆར། འདབ་མ་བརྒྱད་ལ་ལྷ་སོ་སོའི་མཚན་མ་བྲི་བར་ཡང་བཤད། དེ་ནས། ཐབ་ཀྱི་གཡས་སུ་མེ་ལྷའི་མཆོད་པ་དང་གཏོར་མ། དེའི་ནང་དུ་འཇིག་རྟེན་ལས་འདས་པའི་མཆོད་པ་དང་གཏོར་མ་བཤམས། དེ་གཉིས་ཀྱི་ཕྱི་རོལ་ཏུ་ཡམ་ཤིང་སོགས་སྲེག་རྫས་རྣམས་འབུལ་བའི་རིམ་པ་བཞིན་དུ་བཀོད། དེའི་མཐར་གོས་ཟུང་དང་སོ་རྩི་གཉིས་བཤམས། གཡོན་ཕྱོགས་སུ་ཆུ་བཞིའི་སྣོད་གསུམ་དང༌། དེའི་མདུན་དུ་མཉྫིའི་ཁར་བཟེད་ཞལ་གསུམ། ལས་བུམ་རྡོར་
དྲིལ་ལམ་ཏིང་ཤག་རྣམས་བཤམས། མདུན་དུ་མར་ཁུ་དགང་བླུགས་རླུང་གཡབ་ཀུ་ཤ་རྣམས་བཞག །རང་ཉིད་ཁྲུས་བྱས་གོས་གཙང་མ་བགོས་ཏེ། སྟན་བདེ་བ་ལ་པདྨའི་འདུག་སྟངས་ཀྱིས་འཁོད་དེ་སྒྲུབ་ཐབས་ལྟར། བདག་བསྐྱེད་རྫོགས་པར་བསྒོམ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་ཕྱོགས་བཅུའི་སངས་རྒྱས་ཐམས་ཅད་ཀྱི་བྱིན་རླབས་དང་ནུས་མཐུ་ཐམས་ཅད་བཀུག་ནས་བསང་ཆུ་ལ་ཐིམ་པར་གྱུར། ཨོཾ་བཛྲ་ཨ་མྲྀ་ཏ༌༝ བརྒྱ་རྩ་བཟླས་ཏེ་བསང་ཆུ་བསྒྲུབ། ཀཾ་ཀ་ནིའི་མཇུག་ཏུ་ཨོཾ་ལན་བདུན་གྱིས་ཆུ་བཞི་བསྒྲུབ། ཨ་མྲྀ་ཏ་དང་བསང་ཆུས་རང་དང་ཐབ་དང་རྫས་རྣམས་གཡས་སྐོར་དུ་ལན་གསུམ་བསང༌། མཆོད་རྫས་རྣམས་བསང་སྦྱང་བྱིན་གྱིས་བརླབ་པ་སྒྲུབ་ཐབས་ལྟར་བྱ། དེ་ནས་རྫས་སྦྱོང་བའི་ཕྱག་རྒྱ་དང་བཅས་ཏེ། ཨོཾ་སྭཱཧཱ། ཨོཾ་ཨཱཿ སྭཱཧཱ། ཨོཾ་ཨོཾ་ཤྲཱིཾ་སྭཱཧཱ། ཨོཾ་ཛྲིཾ་སྭཱཧཱ། ཨོཾ་ཀུ་རུ་ཀུ་རུ་སྭཱཧཱ། རྫས་རྣམས་ཀྱི་མཚན་ཉིད་དང་མི་ལྡན་པའི་ཉེས་སྐྱོན་ཐམས་ཅད་སྦྱང་ཞིང་དག་ནས་ལྷ་རྫས་ཀྱི་ཡོ་བྱད་ཕུན་སུམ་ཚོགས་པར་གྱུར། དེ་ནས་འོ་མ་ཅན་གྱི་ཤིང་སོགས་ཀྱི་མེ་ལ་ལས་སྔགས་ལན་གསུམ་བརྗོད་པས་བསང་ཆུ་གཏོར་ཏེ་བསྲུང༌། ཨོཾ་ཨརྠ་ནི་ཛྭ་ལ་ཛྭ་ལ་དེ་བ་མུ་ཁེ་སྭཱཧཱ། ཞེས་པས་མེ་སྦར། ལས་སྔགས་ཀྱིས་ལན་གསུམ་བསངས། རླན་མེད་པའི་རྩྭའི་ཆུན་པོ་དང་བཅས་ཐབ་ཀྱི་ནང་དུ་འཇུག །ཨོཾ་ཛྭ་ལ་ཛྭ་ལ་ཧཱུཾ་དང༌། ཧཱུཾ་ལན་བདུན་བརྗོད་རླུང་གཡབ་ཀྱིས་མེ་སྦར། ཀཾ་ཀ་ནི་ལན་གདུན་དང༌། མར་ཁུས་མེ་གསོ། ཀུ་ཤ་ལག་ཏུ་བཟུང་ལ། ཨོཾ་བཛྲ་སཏྭ་ཨཱཿ ཞེས་པ་ལན་བདུན་དང༌། ཨོཾ་ཀུ་ཤ་འདི་ནི་གཙང་ཞིང་དགེ །ཚངས་པའི་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པའི་འདབ་མའི་སྙིང༌། །
བདག་གི་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། །ལས་ཐམས་ཅད་པ་བཟླ་ཞིང་ཐབ་ཀྱི་མཐར་ཀུ་ཤ་བཀྲམ་པ་དང་ནང་དུ་ཡང་ཀུ་ཤ་གཡོག །བགེགས་ཐམས་ཅད་ཞི་བ་དང་བཀྲ་ཤིས་པར་མཛད་དུ་གསོལ། ཞེས་བརྗོད། དེ་ནས་མེ་དང་བཅས་པའི་ཐབ་བསངས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས་ཧཱུཾ་ལས་ཡེ་ཤེས་ཀྱི་ཐབ་ཁ་དོག་དཀར་ཞིང་དབྱིབས་ཟླུམ་པ་མུ་རན་ཁ་ཁྱེར་དང་བཅས་པ་ཁ་ཁྱེར་ལ་རྡོ་རྗེའི་ཕྲེང་བས་བསྐོར་བ་གྲྭ་བཞིར་ཟླ་ཕྱེད་རྡོ་རྗེས་མཚན་པ་དྭངས་ཤིང་ཐོགས་པ་མེད་པར་གྱུར། ཐབ་ཀྱི་ནང་དུ་ཨོཾ་ཨརྠ་ནི་ཛྭ་ལ་ཛྭ་ལ་དེ་བ་མུ་ཁེ་སྭཱཧཱ། ཞེས་པ་ཡོངས་སུ་གྱུར་པ་ལས། མེ་གྲུ་གསུམ་འབར་བའི་དབུས་སུ་རཾ་ལས་བགྲང་ཕྲེང་དེ་ཡོངས་སུ་གྱུར་པ་ལས་མེ་ལྷ་སྐུ་མདོག་དཀར་པོ་ཤིན་ཏུ་ཞི་བའི་ཆ་ལུགས་ཅན་རལ་པ་དཀར་པོའི་ཐོར་ཅོག་དང་སྨ་ར་དཀར་པོའི་ཨག་ཚོམ་ཅན། ཕྱག་གཡས་ན་བགྲང་ཕྲེང་དང་གཡོན་རིལ་བ་འཛིན་པ། གོས་དཀར་པོ་དང་སྲད་བུ་དཀར་པོའི་སེ་རལ་ཁ་བྱས་ལ། པདྨའི་འདུག་སྟངས་ཀྱིས་པདྨ་དང་ཟླ་བའི་གདན་ལ་བཞུགས་པ། ཐུགས་ཀར་མེ་གྲུ་གསུམ་པ་རཾ་གྱིས་མཚན་པར་གྱུར། འདི་ལ་ན་བཟའ་དང་དེ་མོའི་ཡིག་ཆར། མེ་ལྷ་ཕྱག་བཞི་པ་གཡས་རྩེ་གསུམ་དང་དགང་གཟར། གཡོན་དབྱུག་པ་དང་སྤྱི་བླུགས་འཛིན་པར་བཤད། ལྷ་སྤྱན་འདྲེན་པའི་ཕྱག་རྒྱ་དང་བཅས། ཨོཾ་ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །དགང་བླུགས་ཞལ་ཟས་བཞེས་སླད་དུ། །འབར་བའི་གདན་ལ་བཞུགས་སུ་གསོལ། །ཐབ་ཀྱི་མེ་མཚམས་ཀྱི་ཀུ་ཤའི་གདན་ལ་བཞུགས་པར་བསམ། ལས་སྔགས་ཀྱིས་
ཕྱི་འབྲང་གི་བགེགས་བསྐྲད། མཆོད་ཡོན་འབུལ། ཨོཾ་ཨགྣེ་ཡེ་ཛྭ་ལཱ་ཡ་ཛྭ་ལཱ་ཡ་ཛཿ ཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། ཨོཾ་ཨཱཿ ཧྲཱིཿ པྲ་ཝཱ་ར་སད་ཀ་རཾ་པྲོཀྵ་ཎཾ་པྲ་ཏཱིཙྪ་སྭཱཧཱ། དེ་བཞིན་དུ་སྦྱར་ཏེ། ཨཉྩ་མ་ཎཾ། ཨརྒྷཾ། པཱདྱཾ། རྣམས་ཀྱིས་ཆུ་བཞི་འབུལ། ཨོཾ་ཨགྣེ་ཡེ་ས་པ་རི་ཝཱ་ར་པུཥྤེ་སོགས་ཀྱིས་ཉེར་སྤྱོད་རོལ་མོ་དང་བཅས་པས་མཆོད། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེགས། །འཛིན་བྱེད་མེ་ལྷ་ཉིད་ལ་མངོན་པར་འདུད། །ཅེས་པས་བསྟོད། མེ་ལྷའི་ལྗགས་རྡོ་རྗེའི་རྣམ་པ་ཅན་ལ་རཾ་ཡིག་དང་དགང་བླུགས་ཀྱི་ཁ་ལ་ཧཱུཾ་ཡིག་དཀར་པོས་མཚན་པར་བསམ། ཨོཾ་ཨགྣེ་ཡེ་ཨ་དི་བྱཱ་ཨ་དཱི་བྱཱ་ཨ་བེ་ཤ་ཨ་བེ་ཤ་མཧཱ་ཤྲི་ཡེ་ཧ་བྱཱ་ཀ་བྱཱ་བ་ཧཱ་ནཱ་ཡེ། བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་ཚེ་རབས་ཐོག་མ་མེད་པ་ནས་བསགས་པའི་ལས་ངན་སྡིག་སྒྲིབ་ཉེས་ལྟུང་བག་ཆགས་ནད་གདོན་བར་ཆད་བཀྲ་མི་ཤིས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཞེས་པ་ལན་བདུན་གྱིས་མར་ཁུ་འབུལ་ཞིང་འཕྲིན་ལས་བཅོལ་བས་ཞལ་གྱིས་བཞེས་པར་བསམ། ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་དུ་གྱུར་པར་བསམས་ལ། ཨོཾ་བོ་དྷི་པྲིཀྵ་ཡ། ཞེས་པས་ཡམ་ཤིང་དང༌། ཨོཾ་ཨགྣེ་ཞེས་པས་མར་ཁུ་དང༌། ཨོཾ་སརྦ་པ་བཾ་ད་ཧ་ན་བཛྲ་ཡ། ཞེས་པས་ཏིལ་དང༌། ཨོཾ་བཛྲ་ཨ་ཡུ་ཥེ། ཞེས་པས་དུར་བ་དང༌། ཨོཾ་བཛྲ་པུཥྚ་ཡེ། ཞེས་པས་འབྲས་དང༌། ཨོཾ་སརྦ་སཾ་པཱ་དེ་ཞེས་པས་ཞོ་ཟན་དང༌།
ཨོཾ་ཨ་པྲ་ཏི་ཧ་ཏ་བཛྲ་ཡ་ཞེས་པས་ཀུ་ཤ་དང༌། ཨོཾ་སརྦ་ཨརྠ་སིདྡྷ་ཡ་ཞེས་པས་ཡུངས་ཀར་དང༌། ཨོཾ་བཛྲ་བཱི་ཛ་ཡ་ཞེས་པས་སོ་བ་དང༌། ཨོཾ་མཧཱ་བེ་ག་ཡ་ཞེས་པས་ནས་དང༌། ཨོཾ་མཧཱ་བཱ་ལ་ཡ་ཞེས་པས་སྲན་མ་དང༌། ཨོཾ་བཛྲ་གྷསྨ་རི་ཞེས་པས་གྲོ་དང༌། རྫས་ཁྱད་པར་བ་ནི་མེ་ལྷའི་སྔགས་ཀྱིས་འབུལ། དེ་ཐམས་ཅད་ལ་སྤེལ་ཚིག་སྔར་གྱི་དེ་ཉིད་བཏགས་པས་ཆོག་ཅིང༌། སོ་སོའི་སྤེལ་ཚིག་སྦྱོར་བར་འདོད་ན། ཡམ་ཤིང་ལ། བཀྲ་མི་ཤིས་པ་ཐམས་ཅད་དང༌། ཞེས་པའི་མཇུག་ཏུ། གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་སྭཱཧཱ། དེ་བཞིན་དུ། མར་ཁུ་ལ། འབྱོར་པ་ཕུན་སུམ་ཚོགས་པ་ལ༌༝ ཏིལ་ལ། སྡིག་པ་ཐམས་ཅད༌༝ དུར་བ་ལ། ཚེ་མཐར་ཕྱིན་པ་ལ༌༝ འབྲས་ལ། བསོད་ནམས་རྒྱས་པ་ལ༌༝ ཞོ་ཟན་ལ། བདེ་བ་མཆོག་ལ༌༝ ཀུ་ཤ་ལ། བསྲུང་བ་མཆོག་ལ་བར་དུ་གཅོད་པ་དང་གྲིབ་དང་མི་གཙང་བ་ཐམས་ཅད༌༝ ཡུངས་ཀར་ལ། བགེགས་ཐམས་ཅད༌༝ སོ་བ་ལ། ནོར་དང་འབྲུ་རྒྱས་པ་ལ༌༝ ནས་ལ། མྱུར་བའི་ཤུགས་ཕུན་སུམ་ཚོགས་པ་ལ༌༝ སྲན་མ་ལ། སྟོབས་རྒྱས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། གྲོ་ལ། ནད་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཞེས་བཅུག་ལ་སྦྱོར། རྫས་ཁྱད་པར་བ་ལ། མཧཱ་ཤྲཱི་ཡ་ཨ་མ་སོ་ཧ། ཞེས་པ་སྦྱོར་བར་ཡང་གསུངས་ཤིང༌། སྤེལ་ཚིག་སྤྱི་འགྲོ་ལྟར་རམ། མཆོག་ཐུན་མོང་གི་དངོས་གྲུབ་བསྒྲུབ་པ་ལ། ཞེས་སོགས་སྦྱོར། ཡམ་ཤིང་མར་ཏིལ་ཡུངས་ཀར་བཞི་མ་གཏོགས་རྫས་གཞན་རྣམས་མེད་ན་གང་མེད་པའི་རྫས་དེ་དག་གི་སྔགས་འདོན་མི་དགོས་སོ། །རྒྱུད་སྡེ་ལ་མཁས་པའི་དམ་པ་འགའ་ཞིག་གི་གསུང་ལས། བྱ་རྒྱུད་ཀྱི་སྐབས་མེ་
ལྷ་དང་འདས་ལྷ་གཉིས་ཀ་ལ་རང་སྔགས་དང་སྤེལ་ཚིག་སྦྱར་བས་ཆོག་གི །རྫས་སྔགས་སོ་སོ་བ་འདོག་མི་དགོས་པ་སྤྱི་རྒྱུད་ཀྱི་དགོངས་པ་ཡིན་པར་གསུང་སྣང་ངོ༌། །དེ་ནས། ཨཉྩ་མ་ཎཾ་དང༌། པྲོཀྵ་ཎཾ་ཕུལ་ལ། ཨོཾ་ཨགྣེ་ཡེ་ཛྭ་ལ་རཾ། ཞེས་བརྗོད་པས་མེ་ལྷ་མེ་འབར་བའི་རྣམ་པར་གྱུར་པར་བསམ། དེ་མོའི་ཡིག་ཆར་མེ་ལྷའི་ཐུགས་ཀར་འདས་ལྷ་བསྐྱེད་པ་སོགས་ཡོངས་གྲགས་ལྟར་གསུངས་ཀྱང༌། འདིར་ལྕང་སྐྱ་ཐམས་ཅད་མཁྱེན་པའི་གསུང་ཉིད་རྒྱ་གཞུང་རྣམས་དང་བསྟུན་པར་སྣང་བས་རང་སོར་བཞག་གོ །འདས་ལྷ་མཆོད་པ་ནི། མཆོད་རྫས་དང་བསྲེག་རྫས་རྣམས་ལོགས་སུ་བཤམས་ཡོད་ན་སྔར་ལྟར་བྱིན་བརླབ་བྱ། ཐབ་ཀྱི་ནང་དུ་ཧཱུཾ་ལས་བྱུང་བའི་རྡོ་རྗེའི་ས་གཞི་ཞེས་པ་ནས། སྣ་ཚོགས་པདྨ་འདབ་མ་བརྒྱད་པའི་ལྟེ་བ་དང་འདབ་མ་རྣམས་ལ་ཟླ་བའི་གདན་རེ་རེ། དབུས་ཀྱི་གདན་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ཞེས་པ་ནས། ཆོ་ག་གསུམ་གྱིས་གཙོ་འཁོར་དགུ་བསྐྱེད་ཡེ་ཤེས་པ་བསྟིམ་པ་དབང་བསྐུར་རྒྱས་གདབ་རྣམས་བུམ་ཆོག་ལྟར་བྱ། ལྷ་རྣམས་ཀྱི་སྐུ་ལས་འོད་ཟེར་དཀར་པོའི་ཚོགས་འཕྲོ་བར་བསམ། སྤྲོ་ན། དག་ཅིང་དྲི་མེད། སོགས་ཚིགས་བཅད་དང་བཅས་པའམ། མེད་ཀྱང་རུང་སྟེ། ཨོཾ་ཨཱཿ ཧྲཱིཿ སོགས་ཀྱིས་ཆུ་བཞི་སྔར་བཤད་པ་ལྟར་དང་སྒྲུབ་ཐབས་ནས་འབྱུང་བ་ལྟར་གྱི་ཉེར་སྤྱོད་ལྔ་རོལ་མོ་སོགས་ཀྱིས་མཆོད། བསྟོད་པ་རྒྱས་བསྡུས་གང་རུང་གིས་བསྟོད། ལྷ་རྣམས་ཀྱི་ལྗགས་རྡོ་རྗེའི་རྣམ་པ་ཅན་དཀར་པོ་ལ་ཧཱུཾ་ཡིག་གིས་མཚན་པར་བསམས་ལ། ཀཾ་ཀ་ནི། སྤེལ་ཚིག་བཏགས་པས་མར་ཁུ་དགང་བླུགས་བདུན་ཕུལ་ཏེ་འཕྲིན་ལས་མཛད་པར་གསོལ་བ་བཏབ་པས་ཞལ་གྱིས་བཞེས་པར་བསམ། དེ་ནས་ཡམ་ཤིང་ནས་རྫས་ཁྱད་པར་བའི་བར་གཙོ་བོ་ལ། ཀཾ་ཀ་ནིའི་མཐར་རྫས་སྔགས་དང་སྤེལ་ཚིག་བཏགས་པ་དང་འཁོར་རྣམས་ལ་རང་རང་གི་སྔགས་
ལ་སྤེལ་ཚིག་བཏགས་པས་ཕུལ་ཞིང༌། ཡམ་ཤིང་མར་ཁུ་གཉིས་གཙོ་བོ་དང་སྡིག་པ་སྦྱང་བ་ལ་ཏིལ་དང་ཡུངས་ཀར་གཉིས་མང་དུ་འབུལ་བར་ཇོ་བོ་རྗེའི་གསུང་ལས་འབྱུང༌། གྲངས་བརྒྱ་སྟོང་ཁྲི་འབུམ་སོགས་སྐབས་དང་སྦྱར། དེ་ནས་ལྷ་རྣམས་ཀྱིས་ཐུགས་ཀ་ནས་ལྷ་མོ་དཀར་མོ་བུམ་པ་བདུད་རྩི་དཀར་པོས་བཀང་བ་ཐོགས་ནས་བསྒྲུབ་བྱ་ཟླ་བའི་དཀྱིལ་འཁོར་ལ་གནས་པ་ལ་དབང་བསྐུར་བས་ལས་ངན་སྡིག་སྒྲིབ་ནད་གདོན་བར་ཆད་ཐམས་ཅད་དག་ནས་ལུས་ཤེལ་ལྟར་དྭངས་པར་གྱུར་པར་བསམ། སླར་ཡང་རྩ་སྔགས་ཀྱིས་མར་ཁུ་བླུགས་གཟར་བདུན་ཕུལ། གཏོར་མ་གཞུང་བཞིན་ཕུལ་ན་མཆོད་ཡོན་ཞལ་བསིལ་བསང་གཏོར་རྣམས་ཕུལ། ཉེར་སྤྱོད་ཀྱིས་མཆོད། ཨོཾ་བཛྲ་ཝ་ས་སྱ་སྭཱཧཱ། ཞེས་པས་གོས་ཟུང་དང༌། ཨོཾ་བཛྲ་ཏཾ་བུ་ལ་ཡེ་སྭཱཧཱ། ཞེས་སོ་རྩི་འབུལ། ཆོས་དབྱིངས་རང་བཞིན་སོགས་ཀྱིས་བསྟོད། ཨོཾ་ཨཱཿ ཧྲཱིཿ སོགས་ཀྱིས་མཆོད་ཡོན་ཕུལ། བཅོམ་ལྡན་འདས་རྡོ་རྗེ་མི་འཁྲུགས་པའི་ལྷ་ཚོགས་འཁོར་དང་བཅས་པ་རྣམས་ཀྱིས་བདག་ཅག་དཔོན་སློབ་སྦྱིན་བདག་དང་བཅས་པའི་ཚེ་འཁོར་བ་ཐོག་མ་མེད་པ་ནས་བསགས་པའི་ལས་ཉོན་སྡིག་སྒྲིབ་ཉེས་ལྟུང་གི་ཚོགས་ཐམས་ཅད་བྱང་ཞིང་དག་སྟེ་ཚོགས་གཉིས་མྱུར་དུ་རྫོགས་ནས་བླ་ན་མེད་པའི་བྱང་ཆུབ་ཐོབ་པར་བྱིན་གྱིས་བརླབ་ཏུ་གསོལ། ཞེས་འདོད་དོན་ལ་གསོལ་བ་བཏབ། ཡིག་བརྒྱ་བཟླ། གང་ཡང་བདག་བློ་རྨོངས་པ་ཡིས། །ཞེས་སོགས་ཀྱིས་ནོངས་པ་བཟོད་པར་གསོལ། ཨོཾ་བཛྲ་མཱུཿ ཡེ་ཤེས་པ་རྣམས་རང་བཞིན་གྱི་གནས་སུ་གཤེགས། དམ་ཚིག་པ་རྣམས་རང་ཉིད་ལ་ཐིམ་པར་གྱུར། ཅེས་བརྗོད། སླར་ཡང༌། ཨགྣེ་ཡེ་ཛྭ་ལ་རཾ། ཐབ་ཀྱི་དབུས་སུ་མེ་ལྷ་སྐད་ཅིག་གིས་གསལ་བར་བསམས་ལ། སྔར་གྱི་
མེ་ལྷའི་སྐབས་བཞིན་ཉེར་སྤྱོད་རོལ་མོས་མཆོད། བསང་གཏོར། ཞལ་བསིལ། སོ་རྩི། གོས་ཟུང་རྣམས་འབུལ། རྫས་ལྷག་མ་རྣམས་སྔར་གྱི་མེ་ལྷའི་སྐབས་ལྟར་རིམ་པ་བཞིན་ཕུལ། འཇིག་རྟེན་དབང་ཕྱུག་ཅེས་སོགས་ཤོ་ལོ་ཀ་གཅིག་གིས་བསྟོད། ཞལ་བསིལ་བསང་གཏོར་དང་ཉེར་སྤྱོད་ལྔ་རོལ་མོ་དང་བཅས་པས་མཆོད། ཨ་ཀཱ་རོ་ལན་གསུམ་གྱིས་གཏོར་མ་བྱིན་གྱིས་བརླབ། མེ་ལྷའི་སྔགས་ལ་ཨ་ཀཱ་རོ་བཏགས་པ་ལན་གསུམ་གྱིས་ཕུལ། ཉེར་སྤྱོད་རོལ་མོས་མཆོད། མེ་སྟེ་བསྲེག་བྱ་ཟ་བའི་ལྷ། །ཞེས་སོགས་ཤོ་ལོ་ཀ་གཅིག་དང༌། མཆོད་སྦྱིན་གཏོར་མ་འདི་སྣོམས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་བརྗོད། མཆོད་ཡོན་ཕུལ། བཟོད་གསོལ་དང་འདོད་དོན་ལ་གསོལ་བ་བཏབ། ཨོཾ་ཨགྣེ་ཨ་དྷིི་པ་ཏི་གཙྪ། མེ་ལྷ་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་མེ་འབར་བའི་རྣམ་པར་གྱུར་པར་བསམ། བསྔོ་སྨོན་བཀྲ་ཤིས་བརྗོད་ཅིང་ལས་ཀྱི་རྗེས་མི་མངོན་པར་བྱའོ། །འདི་ནི་སྦྱིན་སྲེག་རྐྱང་པའི་དབང་དུ་བྱས་པ་ཡིན་ལ། དཀྱིལ་འཁོར་བསྒྲུབ་མཆོད་དང་འབྲེལ་བའི་སྐབས་ཡིན་ན། བསྒྲུབ་མཆོད་གང་དུ་བྱེད་པའི་གནས་ཁང་གི་ཤར་ཕྱོགས་སུ་བྱ་བར་གསུངས་ཤིང༌། མེ་ལྷ་བསྐྱེད་ཚུལ་སོགས་གོང་དང་འདྲ་ཡང༌། འདས་ལྷའི་སྐབས་སུ། འདབ་མ་རྣམས་ལ་ཟླ་བའི་གདན་རེ་རེ། ཞེས་པའི་མཚམས་སུ། ལས་ཀྱི་རྡོ་རྗེ་དཀྱིལ་འཁོར་གྱི་དྲུང་དུ་སོང་སྟེ། ཤར་སྒོ་ནས་ཕྱག་གསུམ་བཙལ་གུས་པས་འདུད་ཅིང་ཐལ་མོ་སྦྱར་ཏེ། བདག་ཅག་དཔོན་སློབ་ཡོན་བདག་དང་བཅས་པ་སོགས་སེམས་ཅན་ཐམས་ཅད་ལ་མཆོག་ཐུན་གྱི་དངོས་གྲུབ་སྩོལ་བའི་ཆེད་དུ་སྦྱིན་སྲེག་འབུལ་བས་ཐབ་ཀྱི་གཞལ་ཡས་ཁང་གི་ནང་དུ་གཤེགས་པར་ཞུ། ཞེས་བརྗོད་དེ་ལག་པ་གཡོན་སྤོས་འཛིན་ཅིང་གཡས་པས་མེ་
ཏོག་རེ་ལེན་པ་དང་ལྷའི་སྔགས་རེ་བརྗོད་པས། དཀྱིལ་འཁོར་པའི་ལྷ་སོ་སོ་ལས་ལྷ་གཉིས་པ་རེ་མར་མེ་གཅིག་ལས་གཉིས་ཆད་ཀྱི་ཚུལ་དུ་སྤྱན་དྲངས་པར་བསམས་ལ། མེ་ཏོག་སྣོད་བཟང་པོའི་ནང་དུ་བཞག་སྟེ་མཆོད་རོལ་དང་བཅས་པས་སྦྱིན་སྲེག་གི་སར་སྤྱན་དྲངས། ལས་ཀྱི་རྡོ་རྗེས་དེ་ལྟར་སྤྱན་འདྲེན་པའི་བར་ལ། རྡོ་རྗེ་སློབ་དཔོན་དཔོན་སློབ་ཀྱིས་སྔར་བསྒྲུབ་པའི་དཀྱིལ་འཁོར་ནས་ལྷ་རྣམས་མར་མེ་གཅིག་ལས་གཉིས་ཆད་ཀྱི་ཚུལ་དུ་སྤྱན་འདྲེན་པར་བསམས་ལ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །ཞེས་པ་ནས། ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཞེས་སྤྱན་འདྲེན་གྱི་ཚིགས་བཅད་དབྱངས་དང་བཅས་པ་བྱ། སྤྱན་འདྲེན་འདི་གཞུང་དང་རྗེས་འབྲང་གི་ཡིག་ཆར་མི་གསལ་ཡང་འགའ་ཞིག་གི་ལག་ལེན་ལ་བྱེད་སྲོལ་སྣང་བས། སྤྲོ་ན་བྱས་པར་ཉེས་སྐྱོན་མེད་ཅིང་མི་སྤྲོ་ན་མ་བྱས་ཀྱང་རུང་མོད་མི་བྱེད་ན་མེ་ཏོག་སླེབ་པ་དང་གདན་སྐྱེད་ཚར་བ་དུས་མཚུངས་པ་བྱ། དེ་ནས་ལས་ཀྱི་རྡོ་རྗེས་མེ་ཏོག་སློབ་དཔོན་གྱི་ཕྱག་ཏུ་ཕུལ། སློབ་དཔོན་གྱིས་ལྷ་རྣམས་རིམ་པ་བཞིན། ཐབ་ཀྱི་གཞལ་ཡས་ཁང་དུ་རང་རང་གི་གདན་ལ་བཞུགས་སུ་གསོལ་བར་མོས་ཏེ། མེ་ཏོག་རེ་ཐབ་ཏུ་འདོར་བ་དང་ལྷའི་སྔགས་རེ་བརྗོད། དེ་ནས། དབུས་ཀྱི་ཟླ་བའི་སྟེང་དུ་བཅོམ་ལྡན་འདས་རྡོ་རྗེ་མི་འཁྲུགས་པ། འདབ་མ་བརྒྱད་ལ་ཤར་དུ་པདྨ་ཅན། ལྷོར་འོད་ལྡན་མ། ནུབ་ཏུ་མདངས་ལྡན་མ། བྱང་དུ་དྲི་མེད་མ། ཤར་ལྷོར་འཇིགས་བྱེད་མ། ལྷོ་ནུབ་ཏུ་རྣལ་འབྱོར་མ། ནུབ་བྱང་དུ་དཀར་ཤམ་མ། བྱང་ཤར་དུ་ཡིད་གཞུང་མ། ལྷ་རྣམས་ཀྱི་སྐུ་ལས་འོད་ཟེར་དཀར་པོ་ཞེས་པ་མན་ཆད་དཀྱུས་ལྟར་ལ། མཐར་བཟོད་གསོལ་བྱས་ནས། ཨོཾ་བཛྲ་མཱུཿ ཞེས་བརྗོད་ཅིང༌། ལྷ་རྣམས་ཐབ་ཀྱི་དབུས་སུ་གཤེགས་པར་མོས་ཏེ་སློབ་དཔོན་གྱིས་
མེ་ཏོག་ལས་ཀྱི་རྡོ་རྗེ་ལ་གཏད། དེས་སློབ་དཔོན་ལ་ཕྱག་བྱས་ཏེ་མེ་ཏོག་བླངས་ལ་སྤོས་སོགས་མཆོད་རོལ་དང་བཅས་པས་དཀྱིལ་འཁོར་གྱི་དྲུང་དུ་སྤྱན་དྲངས། ལྷ་རྣམས་གཞལ་ཡས་ཁང་གི་ནང་དུ་སྤྱན་དྲངས་པར་མོས་ལ་རྡུལ་ཚོན་ཡིན་ན་མེ་ཏོག་དཀྱིལ་འཁོར་གྱི་དབུས་ཕྱོགས་སུ་ཕྱར་བ་ཙམ་བྱས་ལ་མདུན་དུ་བཞག་ཅིང༌། རས་བྲིས་ཡིན་ན་དཀྱིལ་འཁོར་གྱི་ནང་དུ་གཏོར་ཏེ་དཀྱིལ་འཁོར་ལ་ཕྱག་བྱ་བ་སོགས་མཐོང་བ་བརྒྱུད་པའི་ལག་ལེན་མ་ཉམས་པ་བྱའོ། །༈ རོ་སྲེག་ལ་ཐོག་མར་ས་བརྟག་བསླང་དང༌། སྟེགས་བུའི་སྟེང་དུ་སྦྱིན་སྲེག་གི་ཐིག་དཀྱུས་ལྟར་བཏབ་ལ། དེ་ཉིད་རས་སམ་ཤོག་བུ་སོགས་ཀྱིས་བཀབ་སྟེ་པུར་ཁང་མཆོད་རྟེན་གྱི་དབྱིབས་ལྟ་བུའམ། ཁྱིམ་པ་ཕོ་མོ་ལ་གདན་ཁྲི་དང་བིལ་པའི་དབྱིབས་ལྟ་བུ་བྱེད་ཚུལ་སོགས་གཞུང་གཞན་ནས་འབྱུང་བ་དང༌། མཐོང་བརྒྱུད་ལྟར་བྱས་ལ། གནས་ཡིག་སོགས་ཀྱང་ཚད་ལྡན་བྱུང་ན་ཤིན་ཏུ་ལེགས། དང་པོའི་འདུག་གནས་རང་ནས་ལྷོ་སྒོའི་ཆོ་ག་ལམ་སྦྱང་བསྟན་ནས། སླར་ཡང་མངོན་དགའི་ཞིང་དུ་སོང་བར་གྱུར། ཨོཾ་སརྦ་བུདྡྷ་ཀྵེ་ཏྲ་གཙྪནྟུ་སྭཱཧཱ། ཞེས་པའི་བར་གཞུང་བཞིན་བྱ། དེ་ནས་གང་དུ་རོ་སྲེག་བྱེད་པའི་སར་སོང་སྟེ་སྦྱིན་སྲེག་གི་ངག་འདོན་ཕལ་ཆེར་ཡང་དཀྱུས་དང་འདྲ་བ་ལ། དཔལ་འབར་གྱི་མེ་ལས་སྔགས་ཀྱིས་ལན་གསུམ་བསད་པའི་རྗེས་སུ་ལག་ཏུ་བཟུང་སྟེ། དྲིལ་སྟབས་དང་བཅས་པས། གསོན་ཅིག་དགོངས་ཤིག་རིགས་ཀྱི་བུ། །གསོན་ཅིག་ཚེ་འདས་རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་རིགས་ལྔའི་མེ་སྦར་རོ། །གསོན་ཅིག༝ གསོན་ཅིག༌༝ འབྱུང་བ་བཞི་ཡི༌༝ ལྷ་མོ་བཞི་ཡི་མེ༌༝ གསོན་ཅིག༌༝ གསོན་ཅིག༌༝ དབང་པོ་དྲུག་གི༌༝ བྱང་ཆུབ་སེམས་དཔའི་མེ༌༝ གསོན་ཅིག༌༝
གསོན་ཅིག༌༝ ཡུལ་རྣམས་དྲུག་གི༌༝ ལྷ་མོ་དྲུག་གི་མེ༌༝ གསོན་ཅིག་དགོངས་ཤིག་རིགས་ཀྱི་བུ། །གསོན་ཅིག་ཚེ་འདས་རིགས་ཀྱི་བུ། །ལུས་ངག་ཡིད་གསུམ་བུད་ཤིང་ལ། །རྒྱལ་བའི་སྐུ་གསུམ་མེ་སྦར་རོ། །སྟོང་ཉིད་ཡེ་ཤེས་འབར་བའི་མེས། །ཚེ་འདས་སྒྲིབ་པའི་བུད་ཤིང་དང༌། །འཁོར་བའི་སྡུག་བསྔལ་མ་ལུས་པ། །ཡེ་ཤེས་སྣང་བ་འབར་གྱུར་ཅིག །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་དུ་འགྲུབ་པར་ཤོག །ཅེས་པ་ལན་གསུམ་དང་ཨོཾ་ཨརྠ་ནི་སོགས་བརྗོད་ཅིང་དཔལ་འབར་ཐབ་ཏུ་གཞུག །རླུང་གཡབ་ཀྱིས་མེ་སྦར་བའི་རྗེས་སུ། གཟུགས་སྟོང་པའོ་ཞེས་པ་ནས། མངོན་པར་རྫོགས་པར་སངས་རྒྱས་སོ། །ཞེས་པའི་བར་འདོན། ཀཾ་ཀ་ནི་ལན་བདུན་བརྗོད་ལ་མར་ཁུས་མེ་གསོ་སོགས་དཀྱུས་དང་འདྲ། མེ་ལྷ་བསྐྱེད་དེ། དང་པོའི་མར་ཁུ་ལན་བདུན་ཕུལ་བའི་རྗེས་སུ། མེ་ལྷ་རྡོ་རྗེ་ལས་ཀྱི་གཙོ། །ཚེ་འདས་སྒྲིབ་པ་སྦྱངས་པ་དང༌། །ལྷ་རྣམས་ཚིམས་པར་བྱ་བའི་ཕྱིར། །འདི་ཉིད་དུ་ནི་འཕྲིན་ལས་མཛོད། །དྲང་སྲོང་ཆེན་པོ་མེ་ཡི་ལྷ། །སྔོན་གྱི་དམ་ལ་གནས་དགོངས་ལ། །ལྷ་རྣམས་ཞལ་ནི་མེ་ཡིན་ལ། །སྦྱིན་སྲེག་དེ་ནི་མེ་ལ་གནས། །ཞེས་གསོལ་བ་བཏབ་པས། མེ་ལྷའི་ཐུགས་ཀ་ནས་འོད་ཟེར་འཕྲོས། ཚེ་ལས་འདས་པ་མངོན་དགའི་ཞིང་ན་གནས་པ་ལ་ཕོག་པས། དེས་རང་གི་སྒྲིབ་པ་སྦྱོང་བར་ཤེས་ནས་དད་པའི་ཤུགས་ཀྱིས་སྐད་ཅིག་ཉིད་ལ་འོང་སྟེ་མདུན་དུ་འཁོད་པ་དང༌། སླར་ཡང་ཐུགས་ཀའི་འོད་ཟེར་གྱིས་དེའི་སྡུག་བསྔལ་དང་སྡིག་སྒྲིབ་ཉེས་ལྟུང་ཐམས་ཅད་དྲངས་ཏེ་རོ་དང་བསྲེག་རྫས་རྣམས་ལ་གཉིས་སུ་མེད་པར་བསྟིམ་ཞིང་དེ་ཉིད་ཡེ་ཤེས་
ལྔའི་རང་བཞིན་གྱི་མཆོད་པའི་རྫས་སུ་གྱུར། ཅེས་བརྗོད་ཅིང་བསམ། དེ་ནས་ཡམ་ཤིང་སོགས་ལ། འཇིག་རྟེན་འདི་ནས་ཕ་རོལ་ཏུ་སོང་ཞིང་ཚེ་ལས་འདས་པ་མིང་འདི་ཞེས་བགྱི་བའི་སྡིག་སྒྲིབ་ཉེས་ལྟུང་ཐམས་ཅད་དང་ཁྱད་པར་གང་དུ་གནས་པའི་ལུས་སྲོག་དང་མཐོ་རིས་དང་ཐར་པ་དང་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་སོ་སོར་སྦྱར་ཡང་རུང་བར་བཤད་ལ། འོན་ཀྱང་རྫས་ཐམས་ཅད་ལ་ཁྱད་མེད་དུ། འཇིག་རྟེན་འདི་ནས་ཕ་རོལ་ཏུ་སོང་ཞིང་ཚེ་ལས་འདས་པ་འདི་ཉིད་ཀྱི་ཚེ་རབས་འཁོར་བ་ཐོག་མེད་ནས་བསགས་པའི་སྒོ་གསུམ་གྱི་ཉེས་ལྟུང་སྡིག་སྒྲིབ་སོགས་མཐོ་རིས་དང་ཐར་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཞེས་སྦྱར་ན་འཇུག་པ་བདེ་ཞིང་སྐབས་དང་འབྲེལ་ལོ། །འདས་ལྷའི་སྐབས་སུ་ཡང་ཡམ་ཤིང་གི་སྔོན་མར་ཁུ་ལན་བདུན་ཕུལ་བའི་རྗེས་སུ། དེ་མོའི་ཡིག་ཆར་འབྱུང་བ་བཞིན། ནམ་མཁའི་མདངས་ལྡན་ཀུན་ནས་གསལ་བའི་སྐུ། །མཚན་དཔེས་རབ་མཛེས་རྡོ་རྗེའི་སྐྱིལ་ཀྲུང་བཞུགས། །རྡོ་རྗེ་དང་བཅས་བདུད་འདུལ་མཉམ་གཞག་མཛད། །མགོན་པོ་མི་འཁྲུགས་སྐུ་ལ་ཕྱག་འཚལ་ལོ། །ཆེ་གེ་ཞེས་བྱ་ཚེ་འདས་རིགས་ཀྱི་བུ། །འདིར་མིང་བརྗོད་མི་བདེ་ན། དུས་ཀྱི་དབང་གྱུར་ཚེ་འདས་རིགས་ཀྱི་བུ། །ཞེས་ཀྱང་རུང་ངོ༌། །ཐོག་མེད་ནས་བསགས་སྲོག་གཅོད་ལ་སོགས་པའི། །ལུས་ཀྱི་སྒྲིབ་པ་མ་ལུས་དག་གྱུར་ནས། །མི་འཁྲུགས་རྡོ་རྗེའི་སྐུ་ཡི་དངོས་གྲུབ་སྩོལ། །ལྷ་ཡི་རྔ་བོ་ཆེ་ལྟར་རྣམ་ཀུན་ཏུ། །རྣལ་འབྱོར་རྟོགས་མེད་ལེགས་བཤད་སེང་གེའི་སྒྲ། །ཡན་ལག་དྲུག་ཅུས་བརྒྱན་པ་ལེགས་
སྒྲོགས་པ། །བཅོམ་ལྡན་མི་འཁྲུགས་གསུང་ལ༌༝ ཆེ་གེ་ཞེས་བྱ༌༝ ཐོག་མེད་ནས་བསགས་རྫུན་ཚིག་ལ་སོགས་པའི། །ངག་གི་སྒྲིབ་པ་མ༌༝ ཡན་ལག་དྲུག་ཅུའི་གསུང་གི་དངོས་གྲུབ་སྩོལ། །ཡེ་ཤེས་རྒྱ་མཚོ་ཡོན་ཏན་ནོར་བུའི་རྒྱན། །ཆོ་འཕྲུལ་རྣམ་པར་འཕྲུལ་བའི་རྦ་རླབས་ཅན། །སྲིད་ཞིའི་རླུང་གིས་རྣམ་པར་མི་གཡོ་བའི། །མི་འཁྲུགས་རྒྱལ་པོའི་ཐུགས་ལ༌༝ ཆེ་གེ་ཞེས་བྱ༌༝ ཐོག་མེད་ནས་བསགས་བརྣབ་སེམས་ལ་སོགས་པའི། །ཡིད་ཀྱི་དྲི་མ་མ་ལུས༌༝ ཡེ་ཤེས་ལྔ་ལྡན་ཐུགས་ཀྱི་དངོས་གྲུབ་སྩོལ། །ཞེས་པའི་བར་ཡོངས་རྫོགས་སམ། བསྡུ་ན། གཙོ་བོ་དཀྱིལ་འཁོར་ལྷ་ཚོགས་དང་བཅས་ཀྱི། །དམིགས་ཡུལ་ཚེ་འདས་ལ་སོགས་འགྲོ་རྣམས་ལ། །སྒྲིབ་མེད་ཡེ་ཤེས་སྤྱན་གྱིས་ལེགས་གཟིགས་ནས། །བརྩེ་བ་ཆེན་པོའི་ཐུགས་རྗེས་ལེགས་བཟུང་སྟེ། །སྔོན་ཆད་བསགས་པའི་སྡིག་སྒྲིབ་གང་མཆིས་པ། །བག་ཆགས་དང་བཅས་རབ་ཏུ་སྦྱང་བ་དང༌། །སྲིད་དང་རྣམ་གྲོལ་བདེ་བ་མ་ལུས་པའི། །དངོས་གྲུབ་བདེ་ཆེན་མྱུར་དུ་སྩལ་ཏུ་གསོལ། །ཞེས་བརྗོད་ཅིང་ལྟུང་བ་སློང་བའི་ཕྱག་རྒྱ་རྡོ་རྗེ་ཁུ་ཚུར་གཉིས་ཀྱི་ནང་དུ་མཛུབ་མོ་ལྕགས་སྒྲོག་ལྟར་བཅིངས་ལེགས་པར་གྱེན་དུ་འཕངས་པར་བྱས་ལ། ཨོཾ་སརྦ་ཨ་པཱ་ཡ་ཨ་ཀརྵ་ཎ་བི་ཤྭ་དྷ་ན་བཛྲ་ས་མ་ཡ་ཧཱུཾ་ཕཊ། ངན་སོང་གསུམ་དང་ཚེ་འདས་གཙོ་བོའི་མདུན་དུ་བཀུག་པར་གྱུར། ཅེས་བརྗོད་ཅིང་བསམ། འདོད་རྒྱལ་གྱི་ཕྱག་རྒྱ་བཅིངས། ཨོཾ་ཤྭ་དྷ་ནི་ཤྭ་དྷ་ནི་སརྦ་པཱ་པཾ་ཨ་ན་ཡ་ཧཱུཾ། ཚེ་འདས་ཀྱི་སྡིག་སྒྲིབ་ཐམས་ཅད་བཀུགས་པར་གྱུར། ཅེས་བརྗོད་ཅིང་བསམ། སྡིག་པ་སྦྱོང་བའི་ཕྱག་རྒྱ་རྡོ་རྗེ་བསྡམས་པ་ལས་གུང་མོ་གཉིས་བསྒྲེང་སྟེ་
མཐེ་བོང་གཉིས་མཐེའུ་ཆུང་གཉིས་བསྒྲེང་སྟེ་མཉེ་ཞིང༌། ཨོཾ་བཛྲ་སཏྭ་ས་མ་ཡ། ཞེས་སོགས་ཚར་གཅིག་གི་མཇུག་ཏུ། སརྦ་པཱ་པཾ་བི་ཤོ་དྷ་ནི་ཧཱུཾ་ཕཊ། ཅེས་བརྗོད། སྙིང་གར་རྡོ་རྗེ་བསྡམས་པ་སྒྲ་དང་བཅས་འདྲལ་བ་ལན་གསུམ་བྱས་ཏེ། བཛྲ་བནྡྷ་ཏྲཊ། ཅེས་པ་ལན་གསུམ་བརྗོད། ཚེ་ལས་འདས་པའི་སྡིག་སྒྲིབ་ཐམས་ཅད་བཀུག་ཅིང་དྲལ་ཏེ་རོ་དང་བསྲེག་རྫས་རྣམས་དང་དབྱེར་མེད་དུ་འདྲེས་པ་ཡེ་ཤེས་ཀྱི་བདུད་རྩིའི་རང་བཞིན་དུ་གྱུར། ཅེས་བརྗོད་ཅིང་བསམ། ངན་སོང་དགུག་དྲལ་གྱི་ཚུལ་འདི་རྣལ་འབྱོར་རྒྱུད་ལས་འབྱུང་བས་བླ་མ་གོང་མ་རྣམས་བླ་མེད་ལ་དེས་རྒྱས་འགེབ་གནང་འདུག་ཅིང༌། བྱ་རྒྱུད་ལ་ཡང་དེ་མོའི་མི་འཁྲུགས་པའི་སྲེག་ཆོག་ཏུ་འབྱུང་ལ། ༸རྒྱལ་དབང་ཐམས་ཅད་མཁྱེན་པ་བསྐལ་བཟང་རྒྱ་མཚོའི་ཁ་སར་པ་ནིའི་ལྷོ་སྒོའི་ཆོ་གར་ཡང་འབྱུང་བས་སྦྱར་དུ་རུང་བར་མངོན། དེ་ནས་ཕུང་པོ་ཡོན་འབུལ་བྱ་སྟེ། བཅོམ་ལྡན་རྒྱལ་བ་རིགས་ལྔ་ལ། །ཚེ་འདས་ཕུང་པོ་མཆོད་པར་འབུལ། །ཕུང་པོའི་སྒྲིབ་པ་མ་ལུས་པ། །ཡེ་ཤེས་མེ་ཡིས་སྦྱང་དུ་གསོལ། །བཅོམ་ལྡན་ལྷ་མོ་རྣམ་བཞི་ལ། །ཚེ་འདས་འབྱུང་བཞི་༝ འབྱུང་བཞིའི་སྒྲིབ་པ་མ་ལུས་པ། །ཡེ་ཤེས༌༝ བཅོམ་ལྡན་སེམས་དཔའ་རྣམ་དྲུག་ལ། །ཚེ་འདས་དབང་པོ་༝ དབང་པོའི་སྒྲིབ་པ་མ་ལུས་པ། །ཡེ་ཤེས༌༝ བཅོམ་ལྡན་ལྷ་མོ་རྣམ་དྲུག་ལ། །ཚེ་འདས་ཡུལ་རྣམས༌༝ ཡུལ་གྱི་སྒྲིབ་པ་མ་ལུས་པ། །ཡེ་ཤེས༌༝ རྒྱལ་བའི་སྐུ་དང་གསུང་ཐུགས་ལ། །ཚེ་འདས་སྒོ་གསུམ་མཆོད་པར་འབུལ། །སྒོ་གསུམ་སྒྲིབ་པ་མ་ལུས་པ། །ཡེ་ཤེས་མེ་ཡིས་སྦྱང་དུ་གསོལ། །ཞེས་གསོལ་བ་བཏབ་པས་འཕྲིན་ལས་
མཛད་པར་ཞལ་གྱིས་བཞེས་པར་གྱུར༌། ཅེས་བརྗོད་ཅིང་བསམ། དེ་ནས་ཡམ་ཤིང་སོགས་འབུལ་ཚུལ་དང་སྤེལ་ཚིག་གོང་དང་འདྲ། འཕྲིན་ལས་བཅོལ་བ་ནི། ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་བུམ་པ་དཀར་པོ་བདུད་རྩི་ལྔས་གང་བ་ཐོགས་ནས། ཚེ་འདས་ཟླ་བའི་དཀྱིལ་འཁོར་ལ་གནས་པ་ལ་ཁྲུས་བྱས་པས་སྡིག་སྒྲིབ་ཐམས་ཅད་བྱང་ཞིང་དག་པར་གྱུར། ཅེས་བརྗོད། སླར་ཡང་ཚེ་འདས་ཧཱུཾ་དང་རྡོ་རྗེ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པར་གྱུར། དཀོན་མཆོག་རིན་ཆེན་ནས། སརྦ་པཱ་པཾ་ཧཱུཾ་ཕཊ། ཅེས་ལམ་བསྟན་པ་དང༌། འདི་ནས་ཤར་གྱི་ཕྱོགས་རོལ་ན། །མངོན་པར་དགའ་བའི་ཞིང་ཁམས་ཡོད། །རྫོགས་པའི་སངས་རྒྱས་མི་འཁྲུགས་པ། །བྱང་ཆུབ་སེམས་དཔའི་འཁོར་དང་བཅས། །སྲིད་པའི་སྡུག་བསྔལ་ཀུན་ལས་སྒྲོལ། །ཞིང་གི་ཡོན་ཏན་བསམ་མི་ཁྱབ། །སུ་ཞིག་དེ་ཡི་མཚན་འཛིན་ཅིང༌། །དམིགས་པ་མེད་པའི་སེམས་ཀྱིས་སུ། །བྱང་ཆུབ་མཆོག་ཏུ་སེམས་བསྐྱེད་ན། །ཞིང་མཆོག་དེ་རུ་སྐྱེ་བར་གསུང༌། །ཚེ་འདས་རིགས་ཀྱི་བུ་ཁྱོད་ཀྱང༌། །མི་འཁྲུགས་པ་ཡི་མཚན་བཟུང་ཞིང༌། །བྱང་ཆུབ་མཆོག་ཏུ་སེམས་བསྐྱེད་ཀྱིས། །ཞིང་མཆོག་དེ་རུ་སྐྱེས་པ་ཡིན། །དེ་ནི་ཞིང་མཆོག་དེར་གནས་ནས། །སེམས་ཅན་དོན་ཀུན་བྱེད་པར་ཤོག །པདྨ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨ་ལས་བྱུང་བ། །མངོན་དགའི་ཞིང་དུ་བགྲོད་པར་ཤོག །ཨོཾ་པདྨེ་པདྨེ་པདྨ་སཾ་བྷ་ཝ་མཧཱ་ཨ་བྷི་ནནྟ་གཙྪནྟུ་སྭཱཧཱ། ཞེས་ལམ་སྦྱངས་པར་བྱས་ལ། ལྷག་མ་དཀྱུས་ལྟར་རོ། །དེ་དག་གི་རྗེས་སུ་གཏང་རག་གི་མཆོད་པ་
གོང་ལྟར་ཕུལ། ༈ སྨོན་ལམ་ནི། གདོད་ནས་དག་པ་སྟོང་གསལ་ནམ་མཁའི་དབྱིངས། །མི་འཁྲུགས་དཀྱིལ་འཁོར་འཇའ་ཚོན་ལྟར་བཀྲ་བ། །མཆོད་བསྟོད་སྒོམ་དང་བཟླས་པ་ལ་སོགས་པའི། །གྲངས་མེད་དགེ་བའི་ཚོགས་ཀུན་བསགས་པའི་མཐུས། །ཚེ་རབས་ཀུན་ཏུ་དལ་འབྱོར་རྟེན་ཐོབ་ནས། །ཡང་དག་དགེ་བའི་བཤེས་ཀྱིས་རྗེས་བཟུང་སྟེ། །སྐྱེས་བུ་ཆེ་འབྲིང་ཆུང་གསུམ་ལམ་གྱི་གནད། །འཁྲུལ་མེད་བརྩོན་པས་ཉམས་སུ་ལེན་པར་ཤོག །ཐུན་མོང་ལམ་གྱིས་རྒྱུད་སྦྱངས་སྔོན་སོང་ནས། །རྣམ་དག་དབང་གིས་དྲི་མ་ཀུན་བཀྲུས་ཏེ། །ཡེ་ཤེས་མཆོག་གི་ས་བོན་ལེགས་ཐེབས་ནས། །རང་གི་རྒྱུད་ནི་ཡོངས་སུ་སྨིན་པར་ཤོག །དམ་ཚིག་སྡོམ་པ་མིག་གི་འབྲས་བུ་ལྟར། །ལེགས་པར་བསྲུངས་ཤིང་མཚན་བཅས་མཚན་མེད་ཀྱི། །རྣལ་འབྱོར་བསྒོམ་པས་ཚེ་འདིར་བཅོམ་ལྡན་འདས། །མི་འཁྲུགས་རྒྱལ་པོའི་གོ་འཕང་ཐོབ་པར་ཤོག །གལ་ཏེ་རྟེན་འདིར་མངོན་དུ་མ་གྱུར་ན། །ཚེ་འདིའི་སྣང་བ་འགགས་པར་གྱུར་པའི་དུས། །ཤར་ཕྱོགས་མངོན་པར་དགའ་བའི་ཞིང་ཁམས་དེར། །སྐྱེས་ནས་ཐེག་མཆོག་ཆོས་ལ་སྤྱོད་པར་ཤོག །མདོར་ན་བདག་དང་དམིགས་པའི་ཡུལ་ལ་སོགས། །ནམ་མཁའི་མཐའ་དང་མཉམ་པའི་སེམས་ཅན་ཀུན། །བཅོམ་ལྡན་མི་འཁྲུགས་རྒྱལ་པོའི་རྗེས་བཟུང་སྟེ། །དངོས་གྲུབ་རྣམ་གཉིས་ལྷུན་གྱིས་གྲུབ་པར་ཤོག །ཅེས་སྨོན་ལམ་གྱིས་མཚམས་སྦྱོར། ཡི་གེ་བརྒྱ་པས་ལྷག་ཆད་བསྐངས། གང་ཡང་བདག་བློ། ཞེས་སོགས་
ཀྱིས་ནོངས་པ་བཟོད་པར་གསོལ། འདོད་དོན་ལ་གསོལ་བ་བཏབ་ཅིང༌། རྟེན་ཡོད་ན། འདིར་ནི་གཟུགས་དང་སོགས་ཀྱིས་བརྟན་བཞུགས་དང༌། མེད་ན་གཤེགས་སུ་གསོལ་བ་དཀྱུས་ལྟར་བྱ། ༈ ཤིས་བརྗོད་ནི། རྣམ་དག་ལྷ་ཡི་ལམ་ལ་བཅོམ་ལྡན་འདས། །ལྷ་མོ་བརྒྱད་སོགས་གྲངས་མེད་འཁོར་ཚོགས་ཀྱིས། །སྙན་པའི་གླུ་དང་རོལ་མོའི་སྒྲ་དབྱངས་སྒྲོགས། །བཀྲ་ཤིས་མེ་ཏོག་ཕྱོགས་ཀྱི་འཁོར་ལོ་འགེངས། །འཇིགས་རུང་ཁྲོ་བོས་བདུད་སྡེའི་དཔུང་ཚོགས་བསྐྲད། །སྣ་ཚོགས་སྒེག་མོས་ཀུན་བཟང་མཆོད་སྤྲིན་སྤྲོ། །ཕུལ་བྱུང་དག་པ་རབ་འབྱམས་བཀྲ་ཤིས་ཀྱིས། །ཕྱོགས་དུས་ཀུན་ཏུ་དགེ་ལེགས་རྒྱ་མཚོ་སྩོལ། །དཀྱིལ་འཁོར་འཁོར་ལོ་སྤྲོ་བསྡུ་བྱེད་པོ་མཆོག །སངས་རྒྱས་འཇམ་དཔལ་ཛྙཱ་ན་གརྦྷ་དང༌། །ཛྙཱ་ན་ཤྲནྟ་བུདྡྷའི་མཚན་ཅན་ཟུང། །ཀུ་སཱ་ལི་པ་དྷརྨཱ་ཀཱིརྟིའི་ཞབས། །ཨ་ཏི་ཤ་སོགས་དངོས་དང་བརྒྱུད་པ་ཡི། །བཀའ་དྲིན་མཉམ་མེད་བླ་མའི་ཚོགས་རྣམས་ཀྱི། །གསང་གསུམ་མི་ཟད་རྒྱན་གྱི་འཁོར་ལོའི་མཛོད། །རྨད་བྱུང་མཁྱེན་བརྩེ་ནུས་པས་བཀྲ་ཤིས་ཤོག །འདབ་སྟོང་ལྟེ་བར་ཆུ་ཤེལ་དབང་པོའི་སྟེང༌། །ཨིནྡྲ་ནཱི་ལའི་ལྷུན་པོ་ཉིན་བྱེད་ཀྱིས། །ལན་བརྒྱར་འཁྱུད་པའི་མཚན་དཔེའི་གར་མཁན་ཆེ། །བཅོམ་ལྡན་མི་འཁྲུགས་ལྷ་ཡིས་བཀྲ་ཤིས་ཤོག །ཕྱོགས་མཚམས་བརྒྱད་ཀྱི་པདྨའི་གདན་སྟེང་དུ། །ལང་ཚོ་དར་བབས་མཛེས་སྡུག་ལྷ་མོའི་ཚོགས། །བཀྲ་ཤིས་རྟགས་ཀྱིས་མཛེས་པའི་ཕྱག་མཚན་ཅན། །དཀྱིལ་འཁོར་ལྷ་ཚོགས་རྣམས་ཀྱིས་བཀྲ་ཤིས་ཤོག །ཅེས་སོགས་དང་གཞན་ཡང་སྐབས་དང་འབྲེལ་བའི་ཚིགས་
སུ་བཅད་པ་ཅི་རིགས་སོགས་བཀྲ་ཤིས་ཀྱི་གླུ་དབྱངས་བརྗོད་ཅིང༌། མེ་ཏོག་གི་ཆར་དབབ་བོ། །སྨྲས་པ། གསང་ཆེན་རྒྱུད་སྡེའི་ཀླུང་བཞི་འཁྱིལ་བའི་དབུས། །མི་བསྐྱོད་རྡོ་རྗེའི་རིགས་གྱུར་གདེངས་ཅན་གཙོ། །བྱིན་རླབས་ཟད་མི་ཤེས་པའི་སྤྲིན་སྔོན་ལས། །སྲིད་ཞིའི་གདུང་སེལ་བདུད་རྩིའི་ཆར་རྒྱུན་འབེབས། །དེ་ཡི་བསྒྲུབ་དཀྱིལ་ཆ་ལག་དང་བཅས་འདི། །ངན་སོང་འཆིང་རྒྱ་གཅོད་པའི་རལ་གྲི་དང༌། །སྒོ་གསུམ་རྙོག་པ་བགྲུང་བའི་ཀེ་ཏ་ག །འདོད་དགུའི་དཔལ་སྟེར་བསམ་འཕེལ་ནོར་ཡང་ཡིན། །ཟབ་གསང་རྒྱུད་སྡེའི་དོན་ལ་མ་སྦྱང་བར། །འོལ་ཚོད་ཁོ་ནས་ཆོས་ལ་དབང་ཟ་དང༌། །རྒྱས་དང་བསྡུས་པའི་དགོས་དོན་མ་ཆོད་བཞིན། །སྦྱར་བྱང་ཙམ་གྱིས་ཁ་བསྒྱུར་བྱས་མིན་པར། །ལེགས་སྦྱར་བརྩོན་པས་འདི་ཡི་ཆོས་སྐོར་གྱི། །ལེགས་བཤད་ཀུན་ལ་རིང་དུ་འདྲིས་བྱས་ཏེ། །ལེགས་པའི་ཆ་ཀུན་བསྡུས་པ་ནོར་བུའི་ཕྲེང༌། །ལེགས་པར་བསྟར་འདི་བློ་གསལ་མགུལ་རྒྱན་ཡིན། །འདིར་འབད་ལས་བྱུང་ལེགས་བྱས་པདྨ་དཀར། །ངེས་ལེགས་སྦྲང་རྩི་གསར་པའི་སྙིང་པོ་ཅན། །ཞིང་མཆོག་མངོན་པར་དགའ་བའི་དགའ་ཚལ་དུ། །ལྷག་ལྷག་བཞད་པའི་དགའ་སྟོན་མྱོང་བར་ཤོག །ཅེས་བཅོམ་ལྡན་འདས་རྡོ་རྗེ་མི་འཁྲུགས་པ་ལྷ་དགུའི་སྒྲུབ་དཀྱིལ་ཆ་ལག་དང་བཅས་པ་འདི་ནི་ཆོས་གྲྭ་ཆེན་པོ་དཔལ་ལྡན་བཀྲ་ཤིས་འཁྱིལ་གྱི་གསོ་རིག་གཞན་ཕན་གླིང་དུ། སྐྱབས་མགོན་རྡོ་རྗེ་འཆང་ཁམས་གསུམ་ཆོས་ཀྱི་རྒྱལ་པོ་ྋ་རྗེ་བཙུན་འཇིགས་མེད་དབང་པོའི་ཞལ་སྔ་ནས་ཉིད་ཀྱིས་ཀུན་གཟིགས་ལྔ་པས་མཛད་པའི་མི་འཁྲུགས་པའི་
ཆོ་ག་ཚོགས་འདོན་དུ་བཙུག་ཡོད་པ་དེ་ཉིད་སོར་གནས་ཀྱི་སྟེང་ནས། བདག་འཇུག་དང་ས་ཐིག་ཆོ་ག །སྦྱིན་སྲེག །ལྷོ་སྒོ་སོགས་ཆ་ལག་ཡོངས་སུ་རྫོགས་པ་ཞིག་དགོས་ཞེས་མདོ་སྔགས་རིག་གནས་རྒྱ་མཚོའི་མངའ་བདག་སྨན་པ་སློབ་ཟུར་བློ་བཟང་འཇིགས་མེད། སྨྲ་བའི་ཁྱུ་མཆོག་སྨན་པ་དཔོན་སློབ་བློ་བཟང་རྒྱལ་མཚན། དགེ་བསྐོས་བསོད་ནམས་གྲགས་པ། དབུ་མཛད་འཇམ་དབྱངས་མཁས་གྲུབ་སོགས་གྲྭ་ཚང་སྤྱི་ནས་བསྐུལ་མ་བྱུང་བར་བརྟེན། ྋབཙུན་པ་དཀོན་མཆོག་བསྟན་པའི་སྒྲོན་མེས་རང་ལོ་སོ་བདུན་པ་ས་རྟའི་ལོ་ཁྲུམས་སྟོད་ཀྱི་ཟླ་བའི་དཀར་ཕྱོགས་ཀྱི་དགའ་བ་དང་པོའི་ཉིན་ཆོས་སྡེ་ཆེན་པོ་དགོན་ལུང་བྱམས་པ་གླིང་དུ་རྫོགས་པར་སྦྱར་བའི་ཡི་གེ་པ་ནི་དད་བརྩོན་བློ་དང་ལྡན་པ་དཀོན་མཆོག་མཁྱེན་རབ་བོ། །འདིས་ཀྱང་འཇམ་མགོན་བླ་མའི་རིང་ལུགས་དྲི་མ་མེད་པ་ཕྱོགས་དུས་ཀུན་ཏུ་རྒྱས་པར་གྱུར་ཅིག།།