ཐིག་ལེ་བཅུ་དྲུག་གི་བསྒོམ་བཟླས་ཉམས་སུ་ལེན་ཚུལ།
ཐིག་ལེ་བཅུ་དྲུག་གི་བསྒོམ་བཟླས་ཉམས་སུ་ལེན་ཚུལ་སྙིང་པོར་དྲིལ་བ་བཞུགས་སོ། །མཉམ་མེད་ཇོ་བོ་ཡབ་སྲས་འཕགས་པ་ཐུགས་རྗེ་ཆེན་པོའི་ལྷ་ཚོགས་དང་བཅས་པ་ལ་ཕྱག་འཚལ་ཞིང་སྐྱབས་སུ་མཆིའོ། །བྱང་ཆུབ་བར་དུ་རྗེས་སུ་གཟུང་དུ་གསོལ། དེའང་ཐིག་ལེ་བཅུ་དྲུག་གི་ཉམས་ལེན་སྙིང་པོར་དྲིལ་ཏེ་ལག་ཏུ་བླང་བའི་ཚུལ་ནི། ལྷ་ཆོས་བདུན་ལྡན་གྱི་རྣམ་ཐར་ལས་གསུང་རབ་མཐའ་དག་གི་ཉམས་ལེན་ཐིག་ལེ་བཅུ་དྲུག་ཏུ་འདུ་བ་དང༌། དེ་རྗེས་དྲན་ལྔར་འདུ་ཞིང༌། དེའང་བསྡུ་ན་ཐབས་ཤེས་གཉིས་སུ་འདུ་བར་གསུངས་པས་རྗེས་དྲན་ལྔའི་གདམས་པ་ནི་རྗེ་བཙུན་སྒྲོལ་མས་སྩལ་བ་ཡིན་ཏེ། ནོར་བུའི་ཕྲེང་བའི་ལེའུ་གཉིས་པ་ལས། སྲས་ཀྱི་ཐུ་བོ་སྤྱན་རས་གཟིགས། །ཁྱེད་ཀྱི་རྗེས་འབྲང་ཁོ་མོས་སྐྱོང༌། །ཁོ་མོའི་གདམས་པ་འདི་ལོང་ལ། །རྗེས་སུ་འབྲང་ལ་བསྟན་པར་གྱིས། །སྐྱབས་གནས་བླ་མ་དྲན་པར་མཛོད། །ལུས་ནི་ལྷ་ཡི་རང་བཞིན་ཏེ། །ངག་ནི་བཟླས་བརྗོད་རྒྱུན་པར་མཛོད། །འགྲོ་བ་མ་ལུས་ཕ་མར་སོམས། །སེམས་ཀྱི་གནས་ལུགས་སྟོང་པར་སྤྱོད། །ལྔ་པོ་དེ་ཡི་སྐྱ་བར་ནས། །དགེ་རྩ་ཐམས་ཅད་དག་པར་མཛོད། །ཅེས་གསུངས་པ་དེ་ཡིན་ལ། འདིའི་ཐོག་མཐར་སྦྱོར་རྒྱུ་གཉིས་ཀྱང་སྔ་མའི་འཕྲོ་དེ་མ་ཐག་ཏུ། དེ་ཡི་སྔོན་དུ་གཟུངས་འདི་སྦྱོར། །བྱེ་བ་འགྱུར་དུ་རྒྱལ་བས་གསུངས། །སྲས་མཆོག་དེ་ནི་འདི་ལྟ་སྟེ། །ཨོཾ་སམྦྷ་ར་སམྦྷ་ར་བྷི་མ་ན་ས་ར་མཧཱ་ཛམྦྷ་པ་ཧཱུཾ་ཕཊ་སྭཱཧཱ། སྲས་ཀྱི་ཐུ་བོ་དེང་ཡང་ཉོན། །དེ་ནི་གོང་དུ་སྤེལ་བྱེད་ཡིན། །སྒྱུར་བར་བྱེད་པ་བསྔོ་བ་མཆོག །དུས་གསུམ་དགེ་རྩ་མཆོག་བསགས་
པས། །མཆོག་རབ་མཆོག་གི་ལམ་ཉིད་ལ། །མཆོག་གི་སེམས་ཀྱིས་མཆོག་ཏུ་བསྔོ། །དེ་ནི་སྒྱུར་བྱེད་བསྔོ་བ་ཡིན། །ཞེས་ཐུན་གྱི་མཐར་འགྱུར་སྔགས་བཟླ་བ་དང༌། མཇུག་ཏུ་བསྔོ་བ་བྱེད་ཚུལ་བཅས་གསུངས་སོ། །ཡང་དེ་དག་ཐབས་ཤེས་གཉིས་སམ་ཟབ་རྒྱས་ཀྱི་ལམ་གཉིས་སུ་བསྡུས་ཏེ་ཉམས་སུ་ལེན་ཚུལ་ལེའུ་ཉི་ཤུ་པ་ལས། ངས་ཆོས་ཐམས་ཅད་ཧྲིལ་ཏེ་དྲིལ་བ་ཞིག་ཁྱེད་ལ་སྦྱིན། བདག་ཐོང་གཞན་ལོང་འོད་གུར་བཞུགས། །སྣང་ལྟོས་གཞི་ཆོད་ངོ་བོས་སྟོང༌། །དཔྱད་ནས་མ་རྙེད་ལམ་དུ་སོང༌། །ལམ་དེ་མི་ལྡོག་པ་ཡིན་ནོ། །གནས་ལུགས་ཚད་མེད་རྒྱུད་ལ་དྲིལ། །འཁོར་བའི་སྡུག་བསྔལ་རྩད་ནས་ཆོད། །ཅེས་པ་ནས། སྣང་བའི་ཐབས་ཀྱིས་འགྲོ་བ་དྲོངས། །ཤེས་རབ་དབྱིངས་སུ་གཟིམས་ལ་བཞུགས། །ཧྲིལ་ཏེ་དྲིལ་ན་འདི་ཉིད་ཡིན། །ཞེས་གསུངས་པའི་དགོངས་པ་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་བཀའ་གདམས་གླེགས་བམ་གྱི་སྙིང་པོའི་མན་ངག་བདུད་རྩིའི་བུམ་བཟང་དུ་གསུངས་པ་བཞིན་ཡིན་ཏེ། མདོར་བསྡུས་ན་སྟོང་ཉིད་སྙིང་རྗེའི་སྙིང་པོ་ཅན་ལས་མ་འདས་པས་འཕགས་མཆོག་ཐུགས་རྗེ་ཆེན་པོའི་རྣལ་འབྱོར་ཉིད་ཡིན་ནོ། །འདིར་རྗེས་དྲན་ལྔའི་ཆིངས་དང་སྦྱར་ཏེ་ཉམས་སུ་ལེན་པ་ལ། མདུན་གྱི་ནམ་མཁར་དངོས་བརྒྱུད་ཀྱི་བླ་མ་རྣམས་དང་རྒྱལ་བ་སྲས་བཅས་བཞུགས་པར་བསམས་ཏེ། འདྲེན་པ་མཉམ་མེད་སྟོན་པ་བཅོམ་ལྡན་འདས། །གངས་རིའི་མགོན་པོ་རྗེ་བཙུན་སྤྱན་རས་གཟིགས། །རྒྱལ་ཡུམ་སྒྲོལ་མ་བཅོམ་ལྡན་མི་གཡོ་མགོན། །བཀའ་གདམས་ལྷ་མཆོག་བཞི་ལ་གསོལ་བ་འདེབས། །བྱམས་པ་ཐོགས་མེད༌༝ འཇམ་དབྱངས་ཡོད་མེད་ཕྱོགས་འཇིག༌༝ ༝ ༝ ། །ཐུགས་རྗེ་ཆེན་པོ་བདེ་གཤེགས༌༝ ༝ ༝ ། །ལམ་བཟང་གསལ་མཛད་མགོན་པོ་ཨ་ཏི་ཤ །བཀའ་གདམས་བསྟན་པའི་མེས་པོ་རྒྱལ་བ་
འབྲོམ། །ལེགས་པའི་ཤེས་རབ་རྒྱལ་མཚན་བཞི་ལ་སོགས། །དངོས་བརྒྱུད་བླ་མ་རྣམས་ལ་གསོལ་བ་འདེབས། །སྲིད་ལ་ཞེན་ལོག་རྐྱེན་ངན་གྲོགས་སུ་ཤར། །བདག་གཞན་མཉམ་བརྗེས་རླབས་ཆེན་སྤྱོད་ལ་ཞུགས། །སྲིད་རྩ་དྲུངས་འབྱིན་ལྟ་བས་རྒྱས་བཏབ་སྟེ། །ཐུན་མོང་ལམ་བཟང་བགྲོད་པར་བྱིན་གྱིས་རློབས། །གསང་སྔགས་སྒོར་ཞུགས་དམ་ཚིག་ཚུལ་བཞིན་བསྲུང༌། །ཟབ་གསལ་གཉིས་མེད་ལྷ་ཡི་རྣལ་འབྱོར་གྱིས། །ཟུང་འཇུག་སྙིང་གི་ཐིག་ལེ་མངོན་གྱུར་ནས། །འགྲོ་ཀུན་མགོན་དུ་འགྱུར་བར་བྱིན་གྱིས་རློབས། །སངས་རྒྱས་ཆོས་ཚོགས་མ་ཚར་གསུམ་གྱིས་སྐྱབས་འགྲོ་སེམས་བསྐྱེད་བྱས་ལ། སྐྱབས་ཡུལ་རྣམས་རིམ་གྱིས་བསྡུས་ཏེ་རང་ལ་ཐིམ་པར་བསམ། རང་ཉིད་ཐུགས་རྗེ་ཆེན་པོ་ཕྱག་གཉིས་པ་ནོར་བུའི་འཕྲེང་བ་དང་ཤེལ་གྱི་འཁར་བ་སངས་རྒྱས་སྟོང་གིས་མཚན་པ་འཛིན་པ། མཉམ་པའི་སྟབས་ཀྱིས་བཞེངས་པའི་སྐུར་གྱུར། མཆོད་པ་བསང་སྦྱངས་སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་མཆོད་པའི་ཡོ་བྱད་ཕུན་སུམ་ཚོགས་པ་ཟག་པ་མེད་པའི་བདེ་བ་ཁྱད་པར་ཅན་སྐྱེད་པར་གྱུར། ཨོཾ་ཨརྒྷཾ་ནས། སྤརྴ་ཨཱཿ ཧཱུཾ་གི་བར་གྱིས་བྱིན་གྱིས་བརླབ། འོད་གསལ་སྟོང་པའི་དབྱིངས་ལས་སེམས་ཀྱི་མདངས། །འཇའ་ཚོན་གུར་ནང་པད་དཀར་ལྟེ་བ་ལ། །སྟེང་དང་ཕྱོགས་བཞི་འོག་རྣམས་ཡིག་དྲུག་གི །རང་བཞིན་གཞལ་ཡས་མཚན་ཉིད་རྫོགས་པའི་དབུས། །ཧྲཱིཿ ལས་བཀོད་པ་བསམ་གྱིས་མི་ཁྱབ་པའི། །རྒྱལ་བ་རྒྱ་མཚོ་ཕྱག་སྟོང་
སྤྱན་སྟོང་ལྡན། །མཐའ་ཀླས་རྒྱལ་བའི་ཞིང་ཀུན་སྐུ་ལ་གནས། །སྤྲུལ་བའི་གར་གྱིས་མཁའ་མཉམ་འགྲོ་བ་འདྲེན། །དེ་ཡི་ཐུགས་ཀར་སྟོང་གསུམ་མི་མཇེད་ཀྱི། །ཐིག་ལེ་སྔར་དང་མཚུངས་པའི་གཞལ་ཡས་དབུས། །ཐུབ་ཆེན་རྣམ་སྣང་སྐྱབས་སྦྱིན་མཉམ་གཞག་ཅན། །ཐེག་གསུམ་འཕགས་ཚོགས་མཆོག་ཟུང་བཅས་ཏེ་བཞུགས། །གསུམ་པ་ཁ་བ་ཅན་གྱི་ཐིག་ལེ་ཡི། །གཞལ་ཡས་དབུས་སུ་འཕགས་མཆོག་བཅུ་གཅིག་ཞལ། །གནས་ཁང་ཐིག་ལེར་འཕགས་མཆོག་ཕྱག་གཉིས་པ། །སངས་རྒྱས་སྟོང་གིས་མཚན་པའི་མཁར་བ་བསྣམས། །དེ་ཡི་ཐུགས་ཀར་ཡུམ་ཆེན་ཕྱག་བཞི་མ། །སྐྱབས་སྦྱིན་མཉམ་གཞག་རྡོ་རྗེ་གླེགས་བམ་འཛིན། །དེ་ནང་བདུད་འདུལ་ཐུབ་པའི་དབང་པོ་ནི། །ས་བཅུའི་བྱང་ཆུབ་སེམས་དཔའི་ཚོགས་ཀྱིས་བསྐོར། །ཐིག་ལེ་བདུན་པར་འཕགས་མཆོག་ཕྱག་བཞི་པ། །རྩ་ཕྱག་ཐལ་སྦྱར་ཤེལ་ཕྲེང་པད་དཀར་འཛིན། །ཐུགས་ཀར་རྒྱལ་ཡུམ་སྒྲོལ་མ་མརྒད་མདོག །ཕྱག་གཡས་སྐྱབས་སྦྱིན་གཡོན་པས་ཨུཏྤལ་བསྣམས། །དེ་ནང་སྒྲོལ་མ་ལྗང་ནག་དྲག་མོའི་གཟུགས། །གྲི་ཐོད་ཌཱ་མ་རུ་དང་ཁ་ཊྭཱཾ་འཛིན། །ཐིག་ལེ་བཅུ་པར་ཁྲོ་རྒྱལ་མི་གཡོ་མགོན། །གཡོན་གྱི་པུས་བཙུགས་རལ་གྲི་ཞགས་པ་འཛིན། །ཐུགས་ཀར་རྡོ་རྗེ་འཆང་གི་རྣམ་པ་ཅན། །ཇོ་བོ་ཆེན་པོ་ལྷ་བཞི་སོགས་ཀྱིས་བསྐོར། །དེ་ནང་འབྲོམ་རྗེ་པད་དཀར་དྲིལ་བུ་བསྣམས། །ཕྱི་ནང་གསང་གསུམ་སྤྲུལ་བའི་ཚོགས་བཅས་བཞུགས། །ཐིག་ལེ་བཅུ་གསུམ་པ་ལ་བྱམས་པ་མགོན། །སྟེང་དུ་རྒྱ་ཆེན་སྤྱོད་བརྒྱུད་ཚོགས་བཅས་དང༌། །དེ་ཡི་ཐུགས་ཀར་མགོན་པོ་འཇམ་པའི་དབྱངས། །ཟབ་
མོ་ལྟ་བའི་བླ་མ་བརྒྱུད་པར་བཅས། །འཇམ་མགོན་ཐུགས་ཀར་ཁྱབ་བདག་རྡོ་རྗེ་འཆང༌། །ཉམས་ལེན་བྱིན་རླབས་བརྒྱུད་ཀྱི་བླ་མས་བསྐོར། །དེ་ནང་ཆོས་སྐུ་ཟག་མེད་ཡེ་ཤེས་དངོས། །རྣམ་པ་ལོངས་སྐུ་མཉམ་གཞག་ཕྱག་རྒྱ་ཅན། །ཆོས་དབྱིངས་ངང་ལས་འགྲོ་དོན་མཁའ་ཁྱབ་ཏུ། །མཛད་པའི་སྙིང་དབུས་བྱང་ཆུབ་ཐིག་ལེ་ནི། །ཁྱོན་ཡངས་གསལ་འཚེར་དབུས་སུ་རང་གི་སེམས། །ཐིག་ལེ་སེར་པོ་འོད་འབར་རྒྱ་སྲན་ཙམ། །མེར་མེར་འཇུ་ཞིང་ཤིན་ཏུ་རྒྱས་པ་ཡི། །བཙོ་མའི་གསེར་མདོག་ཐིག་ལེའི་རྒྱ་མཚོར་གྱུར། །ཀུན་གྱིས་གནས་གསུམ་ཡི་གེ་གསུམ་མཚན་པའི། །ཧཱུཾ་ཡིག་འོད་ཀྱིས་ཞིང་ཁམས་རབ་འབྱམས་ནས། །ཡེ་ཤེས་པ་དང་དབང་ལྷ་སྤྱན་དྲངས་ཏེ། །བསྟིམ་ཞིང་དབང་བསྐུར་ས་བོན་གྱིས་མཚན་གྱུར། །དེ་ནས་གཞལ་ཡས་ཁང་ཐམས་ཅད་ཀྱི་སྒོ་ཅིག་ཅར་ཕྱེ་སྟེ་སོ་སོར་ཡན་ལག་བདུན་པ་དང་མཆོད་པའི་ལྷ་མོ་རྣམས་ཀྱིས་མཆོད་པར་བསམས་ལ། ཕྱག་དང་ཕྱག་ཡུལ་གཉིས་སྟོང་པའི། །རྣམ་དག་སྐུ་ལ་ཡེ་ཕྱག་འཚལ། །སྐྱེ་གནས་འཇིག་པས་མ་གོས་པའི། །དྲི་མེད་མཆོད་ཚོགས་འབུལ་ལོ་ལྷ། །སྒོ་གསུམ་སྐྱེ་གནས་འཇིག་བྲལ་བའི། །ཉེས་པའི་གཡང་ས་མཐོལ་ལོ་བཤགས། །སྟོང་ཡང་སྣ་ཚོགས་སྐུར་སྟོན་པའི། །གྲངས་མེད་འདྲེན་ལ་རྗེས་ཡི་རང༌། །སྨོན་དང་མཚན་མས་སྟོང་པ་ཡི། །འཁོར་ལོ་དབྱིངས་སུ་བསྐོར་དུ་གསོལ། །སྐྱེ་བས་སྟོང་པའི་ཆོས་སྐུ་ཁྱེད། །ལྷུན་གྲུབ་གནས་པའི་རང་བཞིན་ལས། །གང་དུའང་འདའ་བར་མ་མཛད་ཅིག །དགེ་བ་འདི་ཡིས་འཁོར་བ་རྣམས། །འདི་འདྲར་རྟོགས་ཏེ་འདི་འདྲ་བའི། །
གཞལ་ཡས་ཁང་དུ་འདྲོངས་གྱུར་ཏེ། །གསང་སྔགས་འདི་བཞིན་སྤྱོད་པར་བསྔོ། །གནས་སྐབས་ཀྲི་ཡའི་ལྷ་ལྔ་བཞིན། །པད་དཀར་སྟོང་ལྡན་ལྟེ་བ་ལ། །ཟླ་བ་ཞུན་མའི་གདན་སྟེང་དུ། །ཕྱི་ནང་གསང་བ་དེ་ཉིད་ཀྱི། །བསྐྱེད་རྫོགས་མཆོག་ཏུ་བསྔགས་པར་ཤོག །གློ་བུར་འདི་ཡང་ཆོས་དབྱིངས་ལས། །ཐ་དད་ཅི་ཡང་ཡོད་མ་མཆིས། །ཐ་དད་མེད་པར་ཕུན་ཚོགས་པའི། །བཀྲ་ཤིས་ཕུན་སུམ་ཚོགས་པར་ཤོག །གཙང་མ་རིགས་ཀྱི་བཀྲ་ཤིས་ཤོག །ཐོག་མཐའ་བར་གསུམ་གཙང་མ་ལས། །གཡོས་པ་མེད་པའི་བཀྲ་ཤིས་ཤོག །ཅེས་ཡན་ལག་བདུན་པ་ཕུལ། རྒྱལ་བ་རྒྱ་མཚོ་མ་སོགས་ཚིགས་བཅད་དང་སྦྲགས་པའམ། བསྡུ་ན། ཨོཾ་སརྦྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། དེ་བཞིན་དུ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝིདྱ། ཤཔྟ། རཱུ་པ། ཤཔྟ། གནྡྷེ། ར་ས། སྤརྴ་པྲ་ཏཱིཙྪ་ཧཱུཾ་སྭཱཧཱ། ཞེས་ཆུ་གཉིས་ཉེར་སྤྱོད་རོལ་མོ་འདོད་ཡོན་ལྔ་རྣམས་དབུལ། རབ་འབྱམས་རྒྱལ་དང་རྒྱལ་སྲས་རྒྱལ་བའི་ཡུམ། །རྒྱལ་བའི་བསྟན་སྲུང་ཀུན་འདུས་ལྷ་མཆོག་བཞི། །མི་ཡི་རྣམ་རོལ་ཇོ་བོ་ཡབ་སྲས་སོགས། །བསླུ་མེད་སྐྱབས་མཆོག་རྣམས་ལ་གུས་པས་བསྟོད། །ཁྱད་པར་ཆོས་སྐུའི་སྙིང་པོར་ཐབས་ཤེས་ཟུང༌། །ཐིག་ལེའི་རྣམ་པར་ཤར་ལ་བདག་བསྟོད་ན། །ལྷ་ཆོས་བདུན་གྱི་སྙིང་ཁུ་ཐིག་ལེའི་བཅུད། །ཚེ་འདིར་མངོན་དུ་འགྱུར་བར་བྱིན་གྱིས་རློབས། །དེ་ནས་ཡང་རང་ཐུགས་རྗེ་ཆེན་པོ་ཕྱག་གཉིས་པའི་རྣམ་པ་ལོགས་སུ་ཕྱེ་བས་སྣ་དྲངས་ཏེ་མར་གྱུར་སེམས་ཅན་ཐམས་ཅད་ཀྱིས་རྒྱལ་བ་རྒྱ་མཚོ་སོགས་ཕྱི་མ་རྣམས་ལ་ཕྱག་དང་སྐོར་བ་བྱས་ཏེ་གསོལ་བ་བཏབ། ཁྱད་པར་རང་གི་དུས་གསུམ་
དུ་བསགས་པའི་དགེ་ཚོགས་ཐམས་ཅད་ཀྱང་འགྲོ་བ་མགོན་དང་སྐྱབས་མེད་པ་རྣམས་ལ་ཕན་པ་དང་བདེ་བའི་རྒྱུ་གང་ལ་གང་འཚམས་ཀྱི་ཉེར་འཚོའི་རྟེན་དུ་འགྱུར་བའི་ཕྱིར་ལྷ་ཚོགས་རྣམས་ལ་མཆོད་པའི་སྤྲིན་དང་བཅས་ཏེ་ཕུལ་བས་ཟག་མེད་ཀྱི་བདེ་བས་དགྱེས། གནས་གསུམ་གྱི་ཡི་གེ་གསུམ་དང་ཁྱད་པར་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་འོད་དང་བདུད་རྩིའི་རྒྱུན་བྱུང༌། བདག་དང་སེམས་ཅན་ཐམས་ཅད་ཀྱི་ལས་ཉོན་སྡིག་སྒྲིབ་བག་ཆགས་དང་བཅས་པ་སྦྱངས་ནས་སྐུ་གསུང་ཐུགས་ཀྱི་བྱིན་རླབས་ཐོབ། ཐུགས་ཀ་ཕྱེ་ནས་ནང་མ་ནང་མར་ཕྱག་དང་སྐོར་བ་མཆོད་པ་སོགས་གོང་བཞིན་བྱས་པས་ཐམས་ཅད་ཀྱི་བྱིན་རླབས་ཐོབ་པར་བསམས་ལ། སོ་སོའི་སྔགས་སྒྲུབ་དཀྱིལ་རྣམས་སུ་འབྱུང་བ་ལྟར་བཟླ་བའམ། ཐམས་ཅད་ལ་ཡིག་དྲུག་བཟླས་ཀྱང་ཆོག་པར་བཀའ་གདམས་གླེགས་བམ་གྱི་ཆ་ལག་ཏུ་གསུང༌། དེར་མ་ཟད་ཐུགས་རྗེ་ཆེན་པོའི་སྐུའི་བ་སྤུའི་བུ་ག་རེར་ཡང་དཀྱིལ་འཁོར་གྱི་ལྷ་ཚོགས་རྒྱལ་བ་སྲས་བཅས་བཞུགས་ཚུལ། ཡི་གེ་དྲུག་པའི་བཟླས་བརྗོད་བྱེད་ཚུལ་ཟབ་ཤོས་ལ་དམིགས་རྣམ་འདི་འདྲ་ཞིག་དགོས་ཚུལ་ཟ་མ་ཏོག་བཀོད་པའི་མདོ་ལ་ཞིབ་ཏུ་བརྟག་ན་གསལ་ཞིང༌། མགོན་པོ་གསེར་གླིང་པས་ཀྱང་དེ་ལྟར་གསུངས་ཡོད་པས་བཟླས་པ་ཡིག་དྲུག་གཅིག་པུར་རྩལ་འདོན་བྱས་ན་ལེགས་ལ། ཐིག་ལེ་ཐམས་ཅད་ཀྱི་ནང་དུ་བདག་དང་སེམས་ཅན་ཐམས་ཅད་ཀྱིས་ཕྱག་མཆོད་སོགས་དུས་མཉམ་དུ་བྱེད་པའི་དམིགས་པ་བསྐྱངས་ནའང་ཆོག་གོ །དེ་ནས་ལྷག་ཆད་སྐོང་བའི་ཕྱིར་ཡིག་བརྒྱ་ཅི་མང་བཟླ། མཆོད་བསྟོད་གོང་བཞིན་བྱ། བརྒྱུད་པ་གསུམ་ལྡན་བླ་མ་ཐམས་ཅད་དང༌། །ཡི་དམ་ཐུགས་རྗེ་ཆེན་པོའི་ལྷ་ཚོགས་དང༌། །ཇོ་བོ་ཡབ་སྲས་ཐུགས་རྗེ་ཅན་རྣམས་ཀྱིས། །བདག་གི་སྨོན་པའི་གནས་
འདི་འགྲུབ་པར་མཛོད། །འདིས་མཚོན་དུས་གསུམ་དགེ་ཚོགས་བསྡོམས་པའི་མཐུས། །བདག་དང་མཁའ་མཉམ་འགྲོ་བ་མ་ལུས་པ། །བརྒྱུད་པ་གསུམ་ལྡན་བླ་མ་དམ་པ་ཡིས། །ཚེ་རབས་ཀུན་ཏུ་འབྲལ་མེད་རྗེས་གཟུང་སྟེ། །བཀའ་གདམས་རྣམ་ཐར་གཙང་མ་མཐར་ཕྱིན་ཤོག །སྐྱེས་བུ་གསུམ་གྱི་ལམ་དུ་གསུང་རབ་ཀུན། །བསྡུས་ཏེ་ཉམས་སུ་བླངས་པས་རྒྱུད་སྦྱངས་ནས། །གསང་ཆེན་སྒོར་ཞུགས་དམ་ཚིག་ཚུལ་བཞིན་བསྲུང༌། །ཟུང་འཇུག་སྙིང་གི་ཐིག་ལེ་འགྲུབ་པར་ཤོག །ལྷ་བཞིས་ལུས་དང་སྡེ་སྣོད་གསུམ་གྱིས་ངག །བསླབ་པ་གསུམ་གྱིས་སེམས་བརྒྱན་རྗེས་དྲན་ལྔའི། །ཉམས་ལེན་མཐར་ཕྱིན་འགྲོ་ཀུན་སྒྲོལ་བ་ལ། །རྒྱལ་བ་རྒྱ་མཚོ་ཉིད་དང་མཚུངས་པར་ཤོག །གསང་ཆེན་སྙིང་གི་ཐིག་ལེའི་གདམས་པ་མཆོག །དབེན་པའི་གནས་སུ་ཉམས་སུ་ལེན་པ་ལ། །ཇོ་བོའི་བཀའ་སྲུང་དགུ་བཅུ་རྩ་གཉིས་ཀྱིས། །གཡེལ་བ་མེད་པར་རྟག་ཏུ་གྲོགས་བྱེད་ཤོག །རང་གི་ཐུགས་ཀའི་བྱང་ཆུབ་ཀྱི་ཐིག་ལེའི་འོད་ཟེར་གྱིས་སྣོད་བཅུད་མཐའ་དག་བསྡུས་ཏེ་ཕྱི་བཀོད་པ་བསམ་གྱིས་མི་ཁྱབ་པའི་ཐིག་ལེ་ལ་ཐིམ། ཐིག་ལེ་ཕྱི་མ་བཅོ་ལྔ་པོ་རང་རང་གི་གཙོ་བོའི་མདོག་ཅན་གྱིས་ཐིག་ལེའི་རྣམ་པར་གྱུར་ཏེ། ནང་མ་ནང་མ་ལ་ཐིམ་ཞིང༌། བདག་ཉིད་སངས་རྒྱས་ཆོས་ཀྱི་སྐུའང་ཡི་གེ་གསུམ་དང༌། དེའི་ཨོཾ་ཨཱཿ ལ་ཐིམ། ཨཱཿ ཧཱུཾ་ལ་ཐིམ། ཧཱུཾ་བྱང་ཆུབ་ཀྱི་ཐིག་ལེ་ལ་ཐིམ་སྟེ་ཐབས་ཤེས་ཟུང་འཇུག་གི་ངོ་བོར་གྱུར། དེའི་ངང་ལས་སླར་ཡང་ཐུགས་རྗེ་ཆེན་པོ་ཞལ་གཅིག་ཕྱག་གཉིས་པའི་སྐུར་བཞེངས་པར་གྱུར། ལེགས་ཚོགས་ཀུན་གྱི་འབྱུང་གནས་བླ་མ་རྣམས་ཀྱི་བཀྲ་ཤིས་ཤོག །སྐུ་གསུམ་
མངོན་དུ་གྱུར་པ་སངས་རྒྱས་རྣམས་ཀྱི་བཀྲ་ཤིས་ཤོག །ཐོག་མཐའ་བར་དུ་དགེ་བ་དམ་པའི་ཆོས་ཀྱི་བཀྲ་ཤིས་ཤོག །བསླབ་གསུམ་རྣམ་པར་དག་པ་དགེ་འདུན་རྣམས་ཀྱི་བཀྲ་ཤིས་ཤོག །བདག་གཞན་མཉམ་བརྗེ་རིན་ཆེན་བྱང་ཆུབ་སེམས་ཀྱི་བཀྲ་ཤིས་ཤོག །ཐབས་ཤེས་ཟུང་འཇུག་རིམ་གཉིས་རྣལ་འབྱོར་ཟབ་མོའི་བཀྲ་ཤིས་ཤོག །ཕན་བདེའི་གཞིར་གྱུར་ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །འགྲོ་ཀུན་ཐེག་མཆོག་ཆོས་ཀྱི་དཔལ་ལ་སྤྱོད་པའི་བཀྲ་ཤིས་ཤོག །ཅེས་ཤིས་པ་བརྗོད་པས་མཐའ་བརྒྱན་པར་བྱའོ། །གསུང་རབ་ཀུན་གྱི་དགོངས་པའི་མཐིལ། །ཇོ་བོ་ཡབ་སྲས་ཐུགས་ཀྱི་བཅུད། །སྙིང་གི་ཐིག་ལེའི་རྣལ་འབྱོར་གྱིས། །འགྲོ་ཀུན་སྨིན་ཅིང་གྲོལ་གྱུར་ཅིག །ཅེས་ཐིག་ལེ་བཅུ་དྲུག་གི་བསྒོམ་བཟླས་ཉམས་སུ་ལེན་ཚུལ་སྙིང་པོར་དྲིལ་བ་འདི་ནི་མང་དུ་ཐོས་པའི་དོན་ཡང་དག་པའི་སྒྲུབ་པ་ལ་གཞོལ་བའི་རི་ཁྲོད་པ་ཡོན་ཏན་རྒྱ་མཚོས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།༈ རང་གི་སྤྱི་བོར་ཡིད་འོང་སེང་ཁྲིའི་སྟེང༌། །པད་ཟླའི་གདན་ལ་ཨོཾ་དང་འཁོར་ལོ་ལས། །རྣམ་སྣང་དཀར་པོ་ཞལ་བཞི་ཕྱག་གཉིས་པ། །མཉམ་གཞག་ཕྱག་རྒྱས་རྩིབས་བརྒྱད་འཁོར་ལོ་བསྣམས། །བཀའ་དྲིན་མཉམ་མེད་རྩ་བའི་བླ་མ་དང༌། །ངོ་བོ་དབྱེར་མེད་མཚན་དང་དཔེ་བྱད་རྫོགས། །དར་ཟབ་རྒྱན་སྤྲས་སྐྱིལ་མོ་ཀྲུང་གིས་བཞུགས། །ཉི་མའི་འོད་ཀྱི་རྒྱབ་ཡོལ་མངའ་བ་ཡི། །གནས་གསུམ་ཡི་གེ་མཚན་པའི་ཧཱུཾ་ཡིག་གིས། །ཡེ་ཤེས་པ་རྣམས་སྤྱན་དྲངས་དབྱེར་མེད་གྱུར། །ཆོས་དབྱིངས་ཡེ་ཤེས་བདག་ཉིད་ཐམས་ཅད་རིག །
མི་བཟད་ངན་སོང་སྡུག་བསྔལ་ཡོངས་སུ་སྦྱོང༌། །མ་ལུས་འགྲོ་བའི་སྐྱོབ་པ་བླ་ན་མེད། །བླ་མ་རྣམ་པར་སྣང་མཛད་ལ་ཕྱག་འཚལ། །ཀུན་བཟང་མཆོད་པའི་སྤྲིན་གྱིས་ལེགས་མཆོད་ཅིང༌། །སྔོན་བསགས་སྡིག་ལྟུང་མ་ལུས་སྙིང་ནས་བཤགས། །བཅོམ་ལྡན་ཐུགས་རྗེ་ཆེ་ལྡན་ཁྱེད་རྣམས་ཀྱིས། །ནོར་བུ་དྲི་མ་མེད་པ་བསྐྱབས་པ་བཞིན། །བདག་སོགས་ངན་སོང་སྡུག་བསྔལ་རྒྱུ་བཅས་ལས། །བསྐྱབས་ཏེ་བྱང་ཆུབ་སྤྱོད་ལ་བཞག་ཏུ་གསོལ། །དེ་ལྟར་གསོལ་བ་བཏབ་པས་མཛོད་སྤུ་ལས། །འོད་ཟེར་འཕྲེང་བ་སྟོང་གསུམ་ཁྱབ་པར་སྤྲོས། །ངན་སོང་ཀུན་སྦྱངས་སྲས་བཅས་རྒྱལ་རྣམས་ཀྱི། །བྱིན་རླབས་བསྡུས་ཏེ་རང་ལ་ཐིམ་པར་གྱུར། །དེ་ནས། ཨོྃ་ན་མོ་བྷ་ག་ཝ་ཏེ། སརྦ་དུརྒ་ཏེ་པ་རི་ཤོ་དྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་ས་མྱཀ་སཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦཱ་པཱ་པཾ། བི་ཤོ་དྷ་ནེ། ཤུདྡྷེ། བི་ཤུདྡྷེ། སརྦྦ་ཀརྨྨ་ཨཱ་ཝ་ར་ཎ་བི་ཤོདྷ་ནེ་སྭཱཧཱ། ཞེས་བཟླ། ཡང་ན། ཨོཾ་སརྦྦ་བིད་སརྦཱ་ཨཱ་ཝ་ར་ཎ་བི་ཤོ་དྷ་ན་ཡ་ཧ་ན་ཧཱུཾ་ཕཊ། ཅེས་སྙིང་པོ་དང༌། དེའང་མི་ཤེས་ན། ཨོཾ་སརྦྦ་བིད་ཨོཾ། ཞེས་ཉེ་སྙིང་ངམ་སྐྱེད་སྔགས་བཟླས་པས་ཆོག་ལ། གསུམ་ག་བཟླས་ནའང་ཕུན་སུམ་ཚོགས་པའི་ཡན་ལག་ཏུ་འགྱུར་རོ། །དེ་ནས་ཡིག་བརྒྱས་ལྷག་ཆད་བསྐང་ལ། འདིས་མཚོན་རང་གཞན་དགེ་ཚོགས་བསྡོམས་པའི་མཐུས། །ཕ་མ་ཉེ་འབྲེལ་རིགས་དྲུག་སེམས་ཅན་དང༌། །རྒྱུ་སྦྱོར་ཡོན་བདག་བཀོལ་སྤྱད་དུད་འགྲོ་སོགས། །འབྲེལ་ཐོགས་གསོན་གཤིན་འགྲོ་བ་མ་ལུས་པ། །མི་ཁོམ་ངན་སོང་སྐྱེ་བའི་རྒྱུན་བཅད་དེ། །ཐུན་མོང་ལམ་སྦྱངས་སྔགས་ཀྱི་སྒོར་ཞུགས་ནས། །ཟབ་གསལ་གཉིས་སུ་མེད་པའི་རྣལ་འབྱོར་གྱིས། །
རྣམ་སྣང་ཆེན་པོའི་གོ་འཕང་མྱུར་ཐོབ་ཤོག །ཅེས་པ་འདི་ནི་མོང་གོལ་ཅིན་ཤོག་ནས་དད་བརྩོན་ལྡན་པ་ཆོས་མཛད་དཀོན་མཆོག་བཟང་པོས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ན་མོ་གུ་རུ་བཛྲ་ག་རུ་ཌཱ་ཡ། འདིར་ཁྱུང་ནག་མེའི་སྤུ་གྲིའི་བསྒོམ་བཟླས་ཉམས་སུ་ལེན་པར་འདོད་པས། སྐུ་བྲིས་འབུར་ཅི་རིགས་ཀྱི་མདུན་དུ་ཟླུམ་གཏོར་འདབ་མ་བཞི་པ་ཆུ་གཉིས་ཉེར་སྤྱོད་སོགས་བཤམ་ལ། རང་བཞིན་སྤྲོས་བྲལ་སྟོང་པའི་ངང་ཉིད་ལས། །དུག་གི་རྒྱ་མཚོ་རྦ་ཀློང་འཁྲུག་པའི་དབུས། །དུག་རིགས་མཐའ་དག་ཚོགས་པའི་ལྷུན་པོའི་སྤོར། །པད་ཉིད་གདོན་གསུམ་བརྩེགས་པའི་གདན་ཁྲི་ལ། །རང་སེམས་ཧཱུཾ་ཡིག་མཐིང་ནག་འཕྲོ་འདུ་ལས། །རྡོ་རྗེ་མཁའ་ལྡིང་ནག་པོ་ཕྱག་གཉིས་ཀྱིས། །གདུག་པའི་སྦྲུལ་ནག་བཟུང་ནས་ཞལ་དུ་གསོལ། །གནམ་ལྕགས་འབར་བའི་རྭ་དང་མཆུ་སྡེར་ཅན། །ནོར་བུས་གཙུག་མཛེས་གསེར་མིག་ཉི་ལྟར་འབར། །དུང་སོ་ཚར་དངར་རྡོ་རྗེའི་སྒྲོ་གཤོག་ལས། །ཁྱུང་དང་གནམ་ལྕགས་མེ་ཡི་ཚ་ཚ་འབུམ། །སྤྲོས་པས་འོག་གདོན་མ་ལུས་སྔངས་པར་བྱེད། །གནས་གསུམ་ཡི་གེ་གསུམ་མཚན་ཧཱུཾ་ཡིག་གི །འོད་ཀྱིས་ཡེ་ཤེས་པ་དང་དབང་གི་ལྷ། །སྤྱན་དྲངས་དམ་ཡེ་དབྱེར་མེད་གཅིག་གྱུར་ནས། །དབང་བསྐུར་མི་བསྐྱོད་རྒྱལ་བས་རྒྱས་བཏབ་གྱུར། །མཆོད་པ་རྣམས་ཕུལ་དུ་བྱུང་བའི་ལྷ་རྫས་སུ་གྱུར། ཨོཾ་ཨཱཿ ཧཱུཾ། ལན་གསུམ། ཨོཾ་བཛྲ་ག་རུ་ཊ་ཨརྒྷཾ་ནས་ཤཔྟ་པྲ་ཏཱིཙྪ་སྭཱཧཱའི་བར་གྱིས་མཆོད། སྲིད་གསུམ་ཆེམ་ཆེམ་གཡོ་བའི་འཐོར་རླུང་ཅན། །རྡོ་རྗེའི་སྒྲོ་གཤོག་བརྡབ་པའི་མེ་ཆར་གྱིས། །
གདུག་པའི་ཀླུ་གཉན་ཐལ་བར་རློག་མཛད་པ། །བཅོམ་ལྡན་མཁའ་ལྡིང་དབང་པོར་ཕྱག་འཚལ་བསྟོད། །སྙིང་གར་ཉི་དཀྱིལ་སྟེང་དུ་ཁྲོཾ་ཡིག་མཐར། །འཁོད་པའི་སྔགས་འཕྲེང་འོད་ཀྱིས་རྒྱལ་ཀུན་མཆོད། །འགྲོ་བའི་སྒྲིབ་སྦྱངས་གདོན་གསུམ་སྲེག་བྱེད་པ། །སྟོང་གསུམ་མེ་ཡི་རྭ་གུར་གཅིག་ཏུ་གྱུར། །ཨོཾ་མ་ཎི་ཁྱུང་ཁྱུང་ཐུཾ་ཐུཾ་རྦད་རྦད་སྭཱཧཱ། ཞེས་ཞི་བའི་སྔགས་སྔོན་དུ་བཟླས་ལ། ནག་པོ་ཀཱ་ལ་རཀྵ་རྦད་རྦད། སོད་སོད། ཕྱུང་ཕྱུང༌། སྤུ་གྲི་ཟང་ཟང༌། ལྕགས་ཀྱི་སྡེར་མོས་སྙིང་ཕྱུངས། གནོད་བྱེད་གདུག་པའི་ཤ་ལ་ཟོ། ཨོཾ་ལྷང་ལྷང༌། ཙེར་ཙེར། འུབ་འུབ་སོད། ཅེས་དྲག་སྔགས་བཟླ། ཡིག་བརྒྱས་ལྷག་ཆད་བསྐང༌། དགེ་བ་འདི་ཡིས་མྱུར་དུ་བདག །མཁའ་ལྡིང་ནག་པོ་འགྲུབ་གྱུར་ནས། །ཞེས་སོགས་བསྔོ་བ་བྱ། གཏོར་མ་འབུལ་བར་འདོད་ན། བསངས་སྦྱངས། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་གཏོར་མ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམས་ལ། ཨོཾ་བཛྲ་ག་རུ་ཌ་ཨི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་དབུལ། མཆོད་བསྟོད་གོང་བཞིན་བྱ། འདིའི་སྒོ་ནས་ནད་པ་གསོ་བ། འཛག་བསྲུང༌། སེར་བ་འགོག་ཚུལ་སོགས་ཁྱུང་ཁྲས་རྒྱས་བཀབ་ཆོག་པས་ཐུའུ་བཀྭན་རིན་པོ་ཆེའི་གསུང་ལས་འབྱུང་བ་བཞིན་བྱ། བྱབས་ཁྲུས་བྱེད་ན་བུམ་པ་ཨ་མྲི་ཏས་བསང༌། དེ་ལ་དམིགས་ཏེ། རང་བཞིན་སྤྲོས་བྲལ་ཞེས་པ་ནས། བཟླས་པའི་བར་གོང་བཞིན་ལ། རང་སེམས་ཞེས་པ་དོར་ཏེ། ཧཱུཾ་ཡིག་མཐིང་ནག་འོད་ཀྱི་འཕྲོ་འདུ་ལས། །ཞེས་སྒྱུར། བཟླས་པའི་མཇུག་ཏུ། བུམ་ལྷ་ཡེ་ཤེས་པ་རྣམས་དབྱིངས་སུ་
གཤེགས། །དམ་ཚིག་པ་དང་བུམ་ཆུ་རོ་གཅིག་གྱུར། །བྱབས་ཁྲུས་དངོས་གཞི་སྔགས་ཀྱི་ཁྱད་ཙམ་མ་གཏོགས་ཁྱུང་ཁྲའི་བྱབས་ཁྲུས་ཁོ་བོས་བཀོད་པ་བཞིན་བྱས་པས་འཐུས། ཞེས་པ་འདི་ནི་དད་བརྩོན་བློ་དང་ལྡན་པ་རབ་འབྱམས་པ་དཀོན་མཆོག་རབ་གསལ་གྱིས་འདིའི་མངོན་རྟོགས་ལག་ཏུ་བླང་བདེ་བ་ཞིག་དགོས་ཞེས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ན་མོ་མཉྫུ་ཤྲི་ཡེ། སྐྱབས་སེམས་སྔོན་དུ་བཏང༌། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པད་ཟླའི་སྟེང་དུ་དྷཱིཿ ཡིག་མཐིང་ནག །དེ་ལས་འོད་ཟེར་འཕྲོས་དོན་གཉིས་བྱས། འདུས་ཡོངས་སུ་གྱུར་པ་ལས་རང་ཉིད་འཕགས་པ་འཇམ་དཔལ་སྐུ་མདོག་མཐིང་ནག་ཞལ་གཅིག་ཕྱག་གཉིས། གཡས་ཤེས་རབ་ཀྱི་རལ་གྲི་འཕྱར་ཞིང༌། གཡོན་ཤེར་ཕྱིན་གྱི་གླེགས་བམ་བསྣམས་པ། རུས་པ་དང་རིན་པོ་ཆེའི་རྒྱན་གྱིས་སྤྲས་ཤིང་རྡོ་རྗེ་སྐྱིལ་མོ་ཀྲུང་གིས་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། བསྒོམས་པ་དང་འདྲ་བའི་ཡེ་ཤེས་པ་དང་དབང་ལྷ་སྤྱན་དྲངས། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། དབང་ལྷས་དབང་བསྐུར། མི་བསྐྱོད་པས་དབུ་བརྒྱན་པར་གྱུར། མཆོད་པ་ཨ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་མཆོད་རྫས་རྣམས་ཕུལ་དུ་བྱུང་བའི་ལྷ་རྫས་སུ་གྱུར། ཨོཾ་ཨཱརྱ་མཉྫུ་ཤྲཱི་ཨརྒྷཾ་སོགས་ཀྱིས་མཆོད། རབ་འབྱམས་རྒྱལ་བའི་ཡེ་ཤེས་སྤྲིན་སྔོན་ལས། །བྱིན་རླབས་གྲུ་ཆར་
འཇོ་བས་ཉེས་ཚོགས་ཀུན། །སྦྱོང་ཞིང་ཕན་དང་བདེ་བའི་མཆོག་སྦྱིན་པ། །མགོན་པོ་འཇམ་པའི་དབྱངས་ལ་ཕྱག་འཚལ་ལོ། །རང་གི་ཐུགས་ཀར་ཟླ་བའི་སྟེང་དུ་དྷཱིཿ ཡིག་མཐིང་ནག་གི་མཐར་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས། གདོན་གསུམ་གྱི་གནོད་པ་དང་གྲིབ་དང་མི་གཙང་བ་ལ་སོགས་པའི་ཉེར་འཚེ་ཐམས་ཅད་སྦྱངས། རྒྱལ་བ་སྲས་བཅས་ཀྱི་བྱིན་རླབས་ཐམས་ཅད་བསྡུས་ཏེ་སྔགས་འཕྲེང་ལ་ཐིམ་པར་གྱུར། ཨོཾ་པྲ་སོད། ཆུ་སོད། དུར་ཏ་སོད། སྙིང་མགོ་ལ་ཆོད། ཁ་ལ་ཛཿ ཀཾ་ཤཾ་ཏྲཾ། རྦད་ཕཊ་སྭཱཧཱ། ཡིག་བརྒྱས་ལྷག་ཆད་བསྐང༌། མཇུག་ཏུ་མཆོད་བསྟོད་སྔར་བཞིན་དང༌། དགེ་བ་འདི་ཡིས་མྱུར་དུ་བདག །འཇམ་དཔལ་དཔའ་བོ་འགྲུབ་གྱུར་ནས། །ཞེས་སོགས་བསྔོ་སྨོན་བྱའོ། །ཞེས་པ་འདིའང་དད་ལྡན་རབ་འབྱམས་པ་དཀོན་མཆོག་བྱམས་པས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ རང་བཞིན་རྣམ་དག་འོད་གསལ་ཀློང་ཡངས་ནས། །ཡིད་བཞིན་འཁོར་ལོའི་ལྷ་ཚོགས་འཁོར་དང་བཅས། །སྔོན་གྱི་ཐུགས་བསྐྱེད་དམ་བཅའ་ཉེར་དགོངས་ཏེ། །བདག་ཅག་བསོད་ནམས་ཞིང་དུ་གཤེགས་སུ་གསོལ། །སྒོ་གསུམ་མི་ཕྱེད་དད་པས་ཕྱག་འཚལ་ཞིང༌། །མ་ཚང་མེད་པ་མཆོད་པའི་སྤྲིན་གྱིས་མཆོད། །མི་དགེ་ཀུན་བཤགས་དགེ་ལ་རྗེས་ཡི་རང༌། །སྐུལ་ཞིང་གསོལ་གདབ་དགེ་ཚོགས་མཆོག་ཏུ་བསྔོ། །འཕགས་མ་ཡིད་བཞིན་འཁོར་ལོ་ཐུགས་རྗེའི་གཏེར། །ཁྱོད་ཞབས་གུས་པས་བསྙེན་ཅིང་གསོལ་འདེབས་ན། །ཞི་རྒྱས་དབང་དྲག་གྲུབ་ཆེན་བརྒྱད་ལ་སོགས། །མཆོག་ཐུན་དངོས་གྲུབ་མ་ལུས་སྩལ་ཏུ་གསོལ། །ཞེས་
གསོལ་བ་བཏབ་པས་ཐུགས་ཀའི་སྔགས་འཕྲེང་ལས་འོད་དང་བདུད་རྩིའི་རྒྱུན་བྱུང༌། འོད་ཟེར་རང་གི་ལུས་ཀྱི་ཕྱི་ནས་གུར་ཁང་དྲུག་སྦྲགས་ཀྱི་རྣམ་པ་དང༌། བདུད་རྩི་སྤྱི་བོ་ནས་ཞུགས་པས་ལུས་གང་སྟེ་ནད་གདོན་སྡིག་སྒྲིབ་ཐམས་ཅད་དག་པར་བསམས་ལ་སྔགས་སྤེལ་ཚིག་དང་བཅས་པའི་བཟླས་པ་བྱ། དེ་ནས། འཇིགས་འཕྲོག་ལྟ་བས་མི་ངོམས་མཚན་དཔེའི་སྐུ། །གདངས་སྙན་འགག་པ་མེད་པ་ཚངས་པའི་དབྱངས། །དཔག་ཡས་མཁྱེན་བརྩེ་ཟུང་དུ་འཇུག་པའིཐུགས། །ཡིད་བཞིན་འཁོར་ལོའི་སྐུ་གསུང་ཐུགས་ལ་བསྟོད། །ཚེ་རབས་ཀུན་ཏུ་བཅོམ་ལྡན་འདས་མ་ཡིས། །འབྲལ་བ་མེད་པར་བརྩེ་བས་ཡོངས་བཟུང་སྟེ། །ཕྱི་ནང་ཉེར་འཚེ་མ་ལུས་ཞི་བ་དང༌། །ལུང་རྟོགས་ཡོན་ཏན་མཐའ་དག་རྒྱས་པར་མཛོད། །ཁྱད་པར་དུས་མིན་འཆི་བའི་གཡུལ་བཅོམ་སྟེ། །རྣམ་དག་དམ་ཆོས་སྒྲུབ་པ་མཐར་ཕྱིན་ཅིང༌། །བདེ་བ་ཅན་དུ་པདྨོ་ལས་སྐྱེས་ནས། །ས་དང་ལམ་གྱི་བགྲོད་པ་མཐར་ཕྱིན་ཤོག །ཅེས་པ་འདི་ནི་དད་ལྡན་དགེ་སློང་ངག་དབང་ནོར་འཕེལ་གྱིས་གསེར་གྱི་མེ་ཏོག་དང་བཅས་བསྐུལ་བའི་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།།