མི་གཡོ་བ་དཀར་པོའི་སྒྲུབ་ཐབས་བློ་གྲོས་དཔལ་སྟེར།
མི་གཡོ་བ་དཀར་པོའི་སྒྲུབ་ཐབས་བློ་གྲོས་དཔལ་སྟེར་ཞེས་བྱ་བ་བཞུགས་སོ། །མཐའ་ཡས་རྒྱལ་བ་ཀུན་གྱི་མཐུ་དང་སྟོབས། །རྣམ་པར་དག་པའི་ཡེ་ཤེས་སྒྱུ་མའི་འཕྲུལ། །གཏུམ་ཆེན་གངས་ཀྱི་རི་བོ་གཡོ་བའི་གར། །ཁྲོ་རྒྱལ་མི་གཡོ་མགོན་པོས་དེང་འདིར་སྐྱོངས། །དེ་ལ་འདིར་ཁྲོ་བོའི་རྒྱལ་པོ་མི་གཡོ་བ་བསྒོམ་པར་འདོད་པའི་གང་ཟག་གིས་སྐྱབས་སེམས་སྔོན་དུ་བཏང་ནས།
སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཧཱུཾ་ཡིག་དཀར་པོ། དེ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཕྱོགས་བཅུའི་སངས་རྒྱས་སྲས་བཅས་ཐམས་ཅད་ལ་མཆོད། དེ་རྣམས་ཀྱི་མཁྱེན་བརྩེ་མཛད་པ་འཕྲིན་ལས་ཐམས་ཅད་བསྡུས། ཧཱུཾ་ལ་ཐིམ། དེ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་མི་གཡོ་བ་སྐུ་མདོག་གངས་རི་ལྟར་དཀར་ཞིང་བརྗིད་པ་ཞལ་གཅིག་ཕྱག་གཉིས་གཡས་ཤེས་རབ་ཀྱི་རལ་གྲི་ནམ་མཁར་འཕྱར་ཞིང༌། གཡོན་ཐུགས་ཀར་སྡིགས་མཛུབ་དང་བཅས་པས་རྡོ་རྗེའི་ཞགས་པ་འཛིན་པ། ཞབས་གཡས་པའི་མཐིལ་གྱིས་ཉི་གདན་མནན་ཅིང༌། གཡོན་པའི་པུས་མོ་ཉི་གདན་ལ་བཙུགས་པ། དམར་ལ་ཟླུམ་བའི་སྤྱན་གསུམ་དང་ལྡན་ཞིང་ཞལ་གདངས་ནས་མཆེ་བ་བཞི་གཙིགས་པ། སྨིན་མ་དང་སྨ་ར་དམར་སེར་གྱེན་དུ་འཁྱིལ་ཞིང༌། དབུ་སྐྲ་ཁམ་སེར་གྱེན་དུ་བརྫེས་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང༌། སྐུ་སྨད་དར་གྱི་ཤམ་ཐབས་གསོལ་བ། དེའི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། དེ་ལས་འོད་འཕྲོས། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་འཕྲོས། དབང་གི་ལྷ་རྣམས་སྤྱན་དྲངས། ཁྱེད་རྣམས་ཀྱིས་བདག་ལ་མངོན་པར་དབང་བསྐུར་དུ་
གསོལ། ཞེས་གསོལ་བ་བཏབ་པས་ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་བདུད་རྩིའི་ཆུས་དབང་བསྐུར། ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། མི་བསྐྱོད་པས་དབུ་བརྒྱན་པར་བསམ། མཆོད་པ་བསང་སྦྱངས་བྱིན་གྱིས་བརླབས་ལ། ཨོཾ་ཨཱརྱ་ཨ་ཙ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། དེ་བཞིན་དུ་ཤཔྟའི་བར་སྦྱར་ལ་མཆོད་པ་དབུལ། དུས་གསུམ་རྒྱལ་བ་ཀུན་གྱི་སྐུ་ཡི་དངོས། །གངས་རི་ལྟར་དཀར་རབ་བརྗིད་ཁྲོ་བོའི་སྐུ། །དྲན་པ་ཙམ་གྱིས་ཤེས་རབ་མཆོག་སྩོལ་བའི། །བཅོམ་ལྡན་མི་གཡོ་མགོན་ལ་ཕྱག་འཚལ་ལོ། །ཞེས་པས་བསྟོད་ནས། བཟླས་པ་བྱ་བ་ནི། རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཧཱུཾ་ཡིག་དཀར་པོ། དེའི་མཐའ་སྐོར་དུ་ཨོཾ་ཙཎྜ་མཧཱ་རོ་ཥཎ་ཧཱུཾ་ཕཊ། ཅེས་པའི་ཡི་གེ་བཅུ་པའི་སྔགས་ཀྱི་ཕྲེང་བ་གཟུགས་ཡི་གེ་དབུ་ཅན་གྱི་རྣམ་པ་ཅན། ཁ་དོག་དཀར་ལ་དམར་བའི་མདངས་ཆགས་པས་བསྐོར་བ། དེ་ལས་འོད་ཟེར་དཔག་ཏུ་མེད་པ་འཕྲོས། ལུས་ཀྱི་ནང་ཐམས་ཅད་གང༌། སྒོ་གསུམ་གྱི་མི་ཤེས་པའི་མུན་པ་ཐམས་ཅད་བསལ། འོད་ཟེར་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུའི་རྒྱལ་བ་སྲས་བཅས་མཆོད་དེ་རྣམས་ཀྱི་མཁྱེན་པའི་ཡེ་ཤེས་དང༌། གཞན་ཡང་པཎྚི་ཏ་རྣམས་ཀྱི་འཆད་རྩོད་རྩོམ་གསུམ་གྱི་ཤེས་རབ། ཚངས་པ་བརྒྱ་བྱིན་ལ་སོགས་པ་རྣམས་ཀྱི་ཤེས་རབ་དང་མཐུ་སྟོབས་ཐམས་ཅད་དང༌། མདོར་ན་འཇིག་རྟེན་དང་འཇིག་རྟེན་ལས་འདས་པའི་ཤེས་རབ་ཐམས་ཅད་བསྡུས་ནས་རང་གི་ཐུགས་
ཀའི་ཧཱུཾ་ལ་ཐིམ་པས་འཆད་རྩོད་རྩོམ་གསུམ་ལ་བློ་གྲོས་ཀྱི་སྣང་བ་ཐོགས་མེད་དུ་རྒྱས་པར་མོས་ནས་སྨྲ་བ་བཅད་དེ་བསྙེན་པ་བྱ། ཡིག་བརྒྱས་ལྷག་ཆད་བསྐང་ཞིང༌། མཆོད་བསྟོད་མདོར་བསྡུས་བྱས་ཏེ། མདུན་བསྐྱེད་ལོགས་སུ་བྱེད་ན་སྒྲུབ་གཞི་རས་བྲིས་སམ་ཚོམ་བུ་ལྟ་བུ་ལ་དམིགས་ཏེ་བསངས་སྦྱངས། སྟོང་པའི་ངང་ལས་པཾ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་དཀར་པོ་ཞེས་པ་ནས། བསྟོད་པའི་བར་རང་སྒྲ་དོར་བ་མ་གཏོགས་བདག་བསྐྱེད་བཞིན་བྱ། མདུན་བསྐྱེད་ཀྱི་ཐུགས་ཀར་ཟླ་བ་ལ་གནས་པའི་ཧཱུཾ་ཡིག་སྔགས་ཕྲེང་དང་བཅས་པ་ལས་འོད་ཟེར་འཕྲོས། རྒྱལ་བ་སྲས་བཅས་ཀྱི་མཁྱེན་བརྩེ་ནུས་པའི་བྱིན་རླབས་མ་ལུས་པ་བསྡུས་ཏེ་རང་ལ་ཐིམ་པར་བསམ་ཞིང་བཟླས་པ་དང༌། ཡང་ན་བདག་མདུན་སོ་སོ་བ་མི་བྱེད་པར། བདག་བསྐྱེད་ཀྱི་དམ་ཚིག་པ་བསྒོམ་པའི་རྗེས་སུ་ཐུགས་ཀའི་ཧཱུཾ་གི་འོད་ཟེར་གྱིས་ཡེ་ཤེས་པ་སྤྱན་དྲངས་ཏེ་མདུན་དུ་པད་ཉིའི་སྟེང་དུ་རང་ཉིད་ལ་ཞལ་ཕྱོགས་ནས་བཞུགས་ཤིང༌། གཉིས་ཀའི་ཐུགས་ཀར་པད་ཉིའི་སྟེང་དུ་འཁོར་ལོ་རྩིབས་བཅུ་པ་རེ་རེ་དེའི་ལྟེ་བར་ཡེ་ཤེས་སེམས་དཔའ་མི་གཡོ་བ་ཚོན་གང་བ་རེ་རེ། དེའི་ཐུགས་ཀར་ཏིང་ངེ་འཛིན་སེམས་དཔའ་ཧཱུཾ་ཡིག་མར་མེ་ལྟར་འབར་བ། འཁོར་ལོའི་རྩིབས་བཅུ་ལ་སྔགས་ཕྲེང་ཡི་གེ་བཅུ་བསམ། རང་གི་སྙིང་གའི་མི་གཡོ་བའི་ཐུགས་ཀ་ནས་སྔགས་ཕྲེང་བྱུང་གཉིས་ཀའི་ཞལ་ནས་ཐོན། མདུན་གྱི་མི་གཡོ་བ་ཕྱི་ནང་གཉིས་ཀྱི་ཞལ་ནས་ཞུགས་ཐུགས་ཀར་ཐིམ། དེ་གཉིས་ཀྱི་ལྟེ་བ་ནས་ཐོན། རང་དང་སྙིང་གའི་མི་གཡོ་བའི་ལྟེ་བ་ནས་ཞུགས། ཐུགས་ཀར་ཐིམ་ཞིང་འཁོར་ལོ་གཡས་སུ་འཁོར་བ་རྒྱུན་མི་འཆད་པ་ལ་སེམས་གཏད། སྔགས་
ཀྱི་འོད་ཟེར་གྱིས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་བསྡུས་ནས་ཧཱུཾ་ལ་ཐིམ་པར་བསམ་ལ་བཟླས་པ་བྱ་བར་མཁས་པ་ཡོན་ཏན་ཁྲི་དང༌། ངོར་བ་དཀོན་མཆོག་ལྷུན་གྲུབ་སོགས་ཀྱིས་གསུངས་ལ་སྔ་མ་རྗེ་དགེ་འདུན་རྒྱ་མཚོའི་གསུང་ཇི་ལྟ་བ་བཞིན་བཀོད་པ་ཡིན་པས། རང་གི་མོས་པ་བཞིན་གང་བདེ་བ་བྱ། བོགས་འབྱིན་སྡིགས་མཛུབ་ཀྱི་སྦྱོར་བ་དང༌། ལེ་བརྒན་དར་གྱི་སྦྱོར་བ་སོགས་ཞལ་ཤེས་མང་དུ་ཡོད་པར་སྣང་ཡང༌། བླ་མ་བརྒྱུད་པའི་མན་ངག་མ་ཐོབ་པས། དཔེ་ལ་སློབ་དཔོན་བཅོལ་བར་མ་ནུས་སོ། །ཐུན་མཐར་གཏོར་མ་འབུལ་ན་དཀར་གཏོར་ཆབ་ཀྱིས་བྲན། ཨོཾ་ཨཱཿ ཧཱུཾ་གིས་བདུད་རྩིར་བྱིན་གྱིས་བརླབས། མདུན་བསྐྱེད་ཟུར་དུ་བསྒོམ་པའམ། ཡེ་ཤེས་པ་མདུན་དུ་བཞག་ཡོད་ཚེ་དེའི་ལྗགས་བྱིན་རླབས་བྱས་ཏེ་དབུལ་ཞིང༌། བདག་བསྐྱེད་རྐྱང་པའི་མཇུག་ཏུ་ཡིན་ན། རང་གི་ཐུགས་ཀའི་ས་བོན་གྱི་འོད་ཟེར་གྱིས་བསྒོམས་པ་དང་འདྲ་བའི་བཅོམ་ལྡན་འདས་མི་གཡོ་བ་མདུན་དུ་སྤྱན་དྲངས། དེའི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་འོད་ཀྱི་སྦུ་གུ་ཅན་དུ་གྱུར་པར་བསམས་ལ། ཨོཾ་ཙཎྜ་མཧཱ་རོ་ཥཎ་ཧཱུཾ་ཕཊ་བ་ལིཾ་ཏ་ཁ་ཁ། ཁཱ་ཧི་ཁཱ་ཧི་ལན་གསུམ་མམ་བདུན་གྱིས་དབུལ། ཨརྒྷཾ་སོགས་ཀྱིས་མཆོད། སྔར་བཞིན་བསྟོད་ནས་འདོད་དོན་ལ་གསོལ་བ་གདབ་པར་བྱའོ། །ཞེས་པ་འདི་ནི་དད་བརྩོན་ལྡན་པ་ཀརྨ་ཆོས་འབྱོར་གྱིས་བསྐུལ་ངོརྋབཙུན་པ་དཀོན་མཆོག་བསྟན་པའི་སྒྲོན་མེས་བསྒྲིགས་པའོ།།