རྟ་མགྲིན་གསང་སྒྲུབ་ཀྱི་སྒྲུབ་ཐབས།
རྟ་མགྲིན་གསང་སྒྲུབ་ཀྱི་སྒྲུབ་ཐབས་བཞུགས་སོ། །རང་བཞིན་སྤྲོས་བྲལ་དབྱིངས་སུ་པད་ཉི་ལ། །རང་སེམས་ཧྲཱིཿ ཡིག་འོད་ཀྱི་འཕྲོ་འདུ་ལས། །ཁྲོ་རྒྱལ་རྟ་མགྲིན་དམར་པོ་དབང་གི་ལྷ། །དམར་ལྗང་དཀར་བའི་ཞལ་གསུམ་ཁྲོ་གཉེར་གཡོ། །གསུམ་གསུམ་སྤྱན་གྱི་གློག་དམར་དྲག་ཏུ་འཁྱུག །མཆེ་བ་རབ་དཀར་ཏི་སེའི་གངས་ཀྱི་རིའི། །ཁོངས་ལས་གདུག་པའི་ཁྲག་གི་གངྒཱ་འབབ། །གཡས་ཀྱིས་རྡོ་རྗེ་རྩེ་གསུམ་རལ་གྲི་འབར། །གཡོན་པས་སྡིགས་མཛུབ་མདུང་དང་ཞགས་པ་འཛིན། །སྐམ་རློན་མགོ་འཕྲེང་རུས་པའི་རྒྱན་མང་འཁྲོལ། །སྟེང་ན་ཧ་ཧར་བཞད་པའི་རྟ་ལྗང་གི །ཞལ་གསུམ་ཕྱོགས་སུ་རྔམ་པས་སྲིད་གསུམ་གཡོ། །བརྐྱང་བསྐུམ་ཞབས་བརྒྱད་བརྡབ་པས་ཀླུ་ཆེན་འདུལ། །མེ་རླུང་འཁྲུགས་པའི་ཀློང་ན་བཞུགས་པ་ཡི། །གནས་གསུམ་ཡི་གེ་གསུམ་མཚན་ས་བོན་གྱིས། །ཡེ་ཤེས་པ་དང་དབང་ལྷ་སྤྱན་དྲངས་ཏེ། །དམ་ཡེ་གཅིག་གྱུར་དབང་ལྷས་དབང་བསྐུར་ཅིང༌། །ཆུ་ཡི་ལྷག་མ་སྤྱི་བོར་འཁྱིལ་པ་ལས། །ཆོས་སྐུ་ཡེ་ཤེས་འོད་མཐའ་ཡས་པའི་ངང༌། །ལོངས་སྐུ་དབང་ཆེན་ལྷ་དང་དབྱེར་མེད་པའི། །རྩ་བའི་བླ་མ་སྤྲུལ་སྐུའི་རྣམ་པ་ཅན། །མཉམ་
གཞག་ཕྱག་རྒྱས་བདུད་རྩིའི་ལྷུང་བཟེད་བསྣམས། །སྐྱིལ་ཀྲུང་ཚུལ་གྱིས་བཞུགས་པས་དབུ་བརྒྱན་ཅིང༌། །དེ་ཡི་ཐུགས་ཀར་ཧྲཱིཿ ལ་སྔགས་གསུམ་གྱིས། །བསྐོར་བ་ལས་བབས་བདུད་རྩིའི་ཆུ་རྒྱུན་གྱིས། །སྡིག་སྒྲིབ་ནད་གདོན་ཚེ་ཡི་བར་ཆད་སོགས། །ཉེས་ཀུན་ལྷག་མེད་བྱང་ཞིང་བླ་མ་ལྷའི། །བྱིན་རླབས་དངོས་གྲུབ་མ་ལུས་ཐོབ་པར་གྱུར། །ཅེས་བསམ་ཞིང་ཚེ་གཟུངས་རིང་ཐུང༌། རྟ་མགྲིན་གྱི་སྔགས། བླ་མའི་མཚན་སྔགས་རྣམས་བཟླ། ཡིག་བརྒྱས་ལྷག་ཆད་བསྐང༌། མདུན་དུ་བདེ་སྟོང་ཡེ་ཤེས་རང་བཞིན་གྱི། །མཆོད་རྫས་ཟག་མེད་བདེ་སྟེར་སྤྲིན་འཁྲིགས་པས། །པདྨ་དབང་གི་ལྷ་མཆོག་དགྱེས་གྱུར་ཏེ། །དོན་གཉིས་དངོས་གྲུབ་མ་ལུས་སྩོལ་གྱུར་ཅིག །ཉེར་ཞིའི་དབྱིངས་སུ་ཁྲོ་བ་མི་མངའ་ཡང༌། །ཁྲོས་པའི་གར་གྱིས་བདུད་སྡེ་ཕྱེ་མར་བརླག །རྣལ་འབྱོར་དམ་ཚིག་ལྡན་པའི་སྐྱབས་ཀྱི་མཆོག །བཅོམ་ལྡན་ཁྲོ་བོའི་དབང་པོ་ཁྱོད་ལ་བསྟོད། །བདག་གིས་ཁྱོད་ཞབས་པདྨོ་གུས་བསྟེན་ནས། །རྩེ་གཅིག་རེ་བའི་ཡིད་ཀྱིས་གསོལ་འདེབས་ན། །དམ་ཆོས་སྒྲུབ་པའི་བར་ཆད་ཀུན་སེལ་ཞིང༌། །མཆོག་ཐུན་དངོས་གྲུབ་མ་ལུས་སྩལ་ཏུ་གསོལ། །དེ་ནས་ཐུགས་ཀའི་ས་བོན་སྔགས་ཕྲེང་ལས། །རང་སྒྲ་འབྲུག་ལྟར་སྒྲོགས་ཤིང་འོད་ཟེར་དང༌། །ཞི་ཁྲོ་སྤྲུལ་པ་དཔག་མེད་འཕྲོ་བ་ཡིས། །དོན་གཉིས་ལས་བཞི་མཐའ་དག་སྒྲུབ་པར་གྱུར། །ཅེས་རྩ་སྔགས་བཟླ་ཞིང་དེའི་ཚེ་རེ་ཞིག་བར་དུ་རྒྱལ་བ་སྲས་བཅས་མཆོད་ནས་བྱིན་རླབས་བསྡུས་ཏེ་ཞུགས་པས་ཉེས་ཚོགས་མཐའ་དག་བྱང་ཞིང༌། དེ་དག་གི་བྱིན་
རླབས་ནུས་མཐུ་ཐམས་ཅད་ཐོབ་པར་བསམ་པ་རང་དོན་བྱིན་རླབས་བསྡུ་བའི་དམིགས་པ་གཙོ་བོར་བྱ། དེ་ནས་སེམས་ཅན་ཐམས་ཅད་ཀྱི་དོན་བྱེད་པ་གཞན་དོན་འཕྲིན་ལས་ཀྱི་དམིགས་པ་བྱ། དེ་ནས་ཁྲོ་ཆུང་དང་མེ་དཔུང་སྤྲོས་ཏེ་གདོན་བགེགས་ཐམས་ཅད་བསྲེག་པ་གནོད་བྱེད་ཚར་གཅོད་པའི་དམིགས་པ་བྱའོ། །སྤྱིར་ཕྱི་ནང་གསང་བ་དེ་ཁོ་ན་ཉིད་བཞི་དང༌། བསྙེན་སོགས་བཞི། ལས་བཞི་སོགས་བསྙེན་དམིགས་མང་དུ་བཤད་ཀྱང་རྩ་བ་འདི་གསུམ་དུ་འདུས་སོ། །ཐུན་གྱི་མཐར། ཨོཾ་བཛྲ་ཏུན་བྷྱོཿ ཏྲིག་ནན་ཛཿ ཛཿ ས་མ་ཡ་སྟྭཾ། ཞེས་སྡེ་བརྒྱད་དབང་སྡུད་དམ། གཤེད་འབེབས་ཀྱི་སྔགས་ཉེར་གཅིག་ཙམ་རེ་བཟླ་ཞིང༌། དེའི་ཚེ་རང་ཉིད་ལྷའི་ང་རྒྱལ་ལྷག་པར་ཤུགས་དྲག་ཏུ་བསྐྱེད་ལ། རང་གི་སྙིང་ག་ནས་འོད་ཟེར་དྲག་ཅིང་རྩུབ་པ་དཔག་ཏུ་མེད་པ་སྤྲོས་ཏེ་སྡེ་བརྒྱད་སོ་སོའི་མཐུ་སྟོབས་ནུས་པ་རྣམས་རང་རང་གི་ས་བོན་གྱི་རྣམ་པར་སྡུད་ཅིང༌། དེའང་ལྷའི་ཨ་དཀར་པོ། གཤིན་རྗེའི་ཡ། མ་མོའི་མ། བདུད་ཀྱི་དུ་གསུམ་ནག་པོ། གཟའི་རུ་ཁྲ་བོ། བཙན་དང་རྒྱལ་པོའི་ཙ་དམར་པོ། གནོད་སྦྱིན་དང་སྲིན་པོའི་ཤ་སེར་པོ། ཀླུ་དང་ས་བདག་གི་ན་སྔོ་སྐྱ་དང༌། གནོད་བྱེད་རིགས་གང་ཡིན་ངོས་མི་ཟིན་པ་ལ་སྤྱིའི་སྲོག་ཡིག་པྲེ་ཡིག་གི་རྣམ་པར་བསྡུས་ཏེ་རང་གི་ཞབས་འོག་ཏུ་གདན་ལ་སིབ་སིབ་ཐིམ་པར་བསམས། ཡང་གནོད་བྱེད་ཤིན་ཏུ་རྩུབ་པ་རྣམས་ཀྱི་སྙིང་ག་ནས་རང་རང་གི་དྭངས་མའི་ཚེ་སྲོག་ས་བོན་གྱི་རྣམ་པར་བསྡུས་ཏེ་རང་ལ་ཐིམ་པར་བསམ་པས་གནོད་བྱེད་སྒྲོལ་བ་དང༌། དེའི་ཚེ་བཅུད་རང་གིས་ཐོབ་པའི་དགོས་པ་ཁྱད་པར་ཅན་ཡོད་པར་གསུང༌། ལས་སྔགས་མི་འདྲ་བ་ཅི་རིགས་འབྱུང་བས། ༸རྒྱལ་དབང་གི་གསུང་ལྟར་ན། ས་མ་ཡ་ཛཿ ས་མ་ཡ་བཟློག །ས་མ་ཡ་བྷྱོཿ ས་མ་ཡ་གཏུབས། ས་མ་ཡ་བྱེར།
ས་མ་ཡ་རྦད། ས་མ་ཡ་རྦད་རྦུད། ཕཊ་ཡ་འབྱུང་པོ་མཱ་ར་ཡ་ཛཿ ཛཿ ཞེས་པ་འདི་ཡིན་ལ། རྒྱལ་བ་དགེ་འདུན་རྒྱ་མཚོས། ཨོཾ་ཧ་ཤ་ཏྲིག་ཏྲིག་ནན། ཏྲིག་ཧུར་ཐུཾ་ཛཿ མཱ་ར་ཡ་ཕཊ། ཨོཾ་རུ་ཏྲིག་ཏྲིག །རུ་ཏྲིག་ཏྲིག་ནན། ཏྲིག་ཧུར་ཐུཾ་ཛཿ མཱ་ར་ཡ་ཕཊ། ཅེས་པ་འདི་ལས་སྔགས་སུ་མཛད་པས་རང་གི་མོས་པ་དང་བསྟུན་ཏེ་རྩ་སྔགས་དང་སྡུད་སྔགས་ཀྱི་བསྙེན་པའི་རྗེས་སུ་འདི་གཉིས་གང་རུང་བཟླ་ཞིང༌། དེའི་ཚེ་དམིགས་པ་ནི་གནོད་བྱེད་དེ་ཉིད་རང་གི་མདུན་དུ་བཀུག་པའི་སྙིང་གར་བྷྲུཾ་དམར་པོ་ལས་མཚོན་ཆའི་འཁོར་ལོ་རྩིབས་སྟོང་དང་ལྡན་པ་ཁ་དོག་དམར་པོ་རྣོ་ངར་དང་ལྡན་པ་གཅིག་ཏུ་གྱུར་ཏེ་གཡོན་སྐོར་དུ་དྲག་ཏུ་འཁོར་བས་གནོད་བྱེད་ཀྱི་སྲོག་རྩ་ནང་ཁྲོལ་དང་བཅས་པ་ཐམས་ཅད་ཉལ་ཉིལ་བཅད་ཅིང་གཏུབས་ནས་ཐལ་བར་བརླག་པར་བསམས། བྱད་ཕུར་གྱི་ལྟས་སོགས་ལ་བཟློག་པ་གཙོ་བོར་བྱེད་དགོས་པ་བྱུང་ན། རྩ་སྔགས་ཀྱི་མཇུག་ཏུ། ཕ་རོལ་གྱི་བྱད་མ་རྦོད་གཏོང་དང་བཅས་པ་ཝ་ར་ཡ་ཕཊ། ཅེས་སྤེལ་ཚིག་བཏགས་ནས་བཟླ་ཞིང་ཐལ་མོ་བརྡེབ། བླ་མ་ཡི་དམ་མཆོག་གསུམ་དང༌། །པདྨ་དབང་ཆེན་བདེན་སྟོབས་ཀྱིས། །རྣལ་འབྱོར་བདག་ཅག་ཡོན་མཆོད་ལ། །གནོད་ཅིང་འཚེ་བ་ཐམས་ཅད་བཟློག །གདོན་དང་བགེགས་ཀྱི་དཔུང་ཚོགས་བཟློག །ནད་རིམས་དུས་མིན་འཆི་བ་བཟློག །འཐབ་རྩོད་ཁ་སྨྲས་གླེང་གཞི་བཟློག །རྨི་ལམ་མཚན་ལྟས་ངན་པ་བཟློག །ཕ་རོལ་བྱད་ཁ་ཕུར་ཁ་བཟློག །རྒྱལ་འགོང་དམ་སྲིའི་ཆོ་འཕྲུལ་བཟློག །མདོར་ན་འགལ་རྐྱེན་བར་ཆད་ཚོགས། །ཐམས་ཅད་སྡང་བའི་དགྲ་ལ་བྷྱོཿ །ཐམས་ཅད་གནོད་པའི་བགེགས་ལ་བྷྱོཿ །མཐུན་པའི་དངོས་
གྲུབ་མ་ལུས་པ། །ནས། རྒྱས་པར་མཛོད་ཅིག་ཁྲོ་བོའི་རྒྱལ། །དེ་ནས་རང་གི་སྤྱི་བོའི་བླ་མ་ལྷ། །འོད་ཞུ་རང་གི་སེམས་དང་དབྱེར་མེད་གྱུར། །ཡེ་ཤེས་སེམས་དཔའ་རང་བཞིན་གནས་སུ་གཤེགས། །རང་ཉིད་རྟ་མགྲིན་ཕྱག་གཉིས་རྣམ་པར་གྱུར། །དགེ་བ་འདི་ཡིས་མྱུར་དུ་བདག །རྟ་མཆོག་རོལ་པ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཟློག་པ་མི་བྱེད་ན་བཟླས་པའི་འཕྲོར་སྤྱི་བོའི་བླ་མ་བསྟིམ་པ་སོགས་བྱས་ཏེ་བསྔོ་བས་རྒྱས་གདབ་བོ། །ཞེས་པ་འདི་ནི་དུར་པིན་ཁུའུ་ཁེང་རཱ་ཝང་གི་ཤོག་ནས་ལྷག་བསམ་རྣམ་དཔྱོད་ཡངས་པ་གུ་ཤྲཱི་བློ་བཟང་ཆོས་གྲགས་ཀྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།