རྟ་མགྲིན་ཕྱག་གཉིས་པའི་སྒྲུབ་ཐབས་དངོས་གྲུབ་གཏེར་མཛོད།
རྟ་མགྲིན་ཕྱག་གཉིས་པའི་སྒྲུབ་ཐབས་དངོས་གྲུབ་གཏེར་མཛོད་ཅེས་བྱ་བ་བཞུགས་སོ།།
མཐུ་སྟོབས་ཉི་མ་འབར་བའི་གཟིས། །ནག་པོའི་རྩ་ལག་མཐར་བྱེད་པ། །ཁྲོ་རྒྱལ་རྟ་མགྲིན་ལ་བཏུད་ནས། །དེ་ཡི་བསྐང་འཕྲིན་མདོ་ཙམ་བྲ། །དེའང་རྟེན་གྱི་མདུན་དུ་མཆོད་གཏོར་དམ་རྫས་ཚོགས་པར་བྱས་ལ། སྐྱབས་སེམས་སྔོན་དུ་བཏང། རང་ཉིད་སྐད་ཅིག་གིས་དཔལ་རྟ་མགྲིན་སྐུ་མདོག་དམར་པོ་ཞལ་གཅིག་ཕྱག་གཉིས་པ་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པར་གྱུར། ཅེས་སྐད་ཅིག་དཀྲོང་བསྐྱེད་དམ། རྒྱས་པར་བྱེད་ན་ཚོགས་འཁོར་སྐབས་ཀྱི་བདག་བསྐྱེད་བཞིན་བྱ། ནང་མཆོད་ཨ་མྲི་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཡཾ་ལས་རླུང་རཾ་ལས་མེ། ཨཱཿ ལས་མི་མགོའི་སྒྱེད་བུ་གསུམ་གྱི་སྟེང་དུ་ཨཱཿ ལས་བྱུང་བའི་ཐོད་པ་དུམ་བུ་གཅིག་པ་དེའི་ནང་གི་ཕྱོགས་བཞི་དང་དབུས་སུ་བྷྲུཾ་ཨཾ་ཛིཾ་ཁཾ་ཧཱུཾ་ལས་ཤ་ལྔ། མཚམས་བཞི་དང་དབུས་སུ་ལཾ་མཾ་པཾ་ཏཱཾ་བཾ་ལས་བདུད་རྩི་ལྔ། དེའི་སྟེང་དུ་ཨོཾ་ཨཱཿ ཧཱུཾ་གི་ཡི་གེ་གསུམ་བརྩེགས་ཏེ་གནས་པར་གྱུར། རང་གི་ཐུགས་ཀའི་ཧཱུཾ་གི་འོད་ཟེར་གྱིས་རླུང་གཡོས། མེ་སྦར། ཐོད་པའི་ནང་གི་རྫས་རྣམས་ཞུ་ཞིང་ཁོལ་བ་དང༌། ཡི་གེ་གསུམ་གྱི་འོད་ཟེར་གྱིས་སྐུ་གསུང་ཐུགས་རྡོ་རྗེ་གསུམ་བསྡུས་ཏེ་སོ་སོ་ལ་ཐིམ་པ་རྣམས་ཐོད་པར་ལྷུང་ནས་ཞུ་བས། མ་དག་པའི་དྲི་མ་རྣམས་སྦྱངས་ནས། ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་གསུམ།
མཆོད་པ་བསངས་སྦྱངས། སྟོང་པའི་ངང་ལས་ཨཱཿ ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་རང་བཞིན་སྟོང་པ། རྣམ་པ་མཆོད་རྫས་སོ་སོའི་རྣམ་པ་ཅན། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ཨོཾ་ཨརྒྷཾ་ཨཱཿ ཧཱུཾ་ནས་ཤཔྟ་ཨཱཿ ཧཱུཾ། ཨོཾ་རཱུ་པ་ཨཱཿ ཧཱུཾ་ནས། ཨོཾ་སྤརྴ་ཨཱཿ ཧཱུཾ་གི་བར་གྱིས་བྱིན་གྱིས་བརླབས། དེ་ནས། ཨོཾ་བཛྲ་ཨ་མྲི་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་རང་བཞིན་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿ ཡིག་དམར་པོ་དེ་ལས་འོད་ཟེར་འཕྲོས། དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་བཅོམ་ལྡན་འདས་དཔལ་རྟ་མགྲིན་པདྨ་དབང་ཆེན་སྐུ་མདོག་དམར་པོ་ཞལ་གཅིག་ཕྱག་གཉིས་པ། དམར་ལ་ཟླུམ་པའི་སྤྱན་གསུམ་སྡང་མིག་གློག་ལྟར་གཡོ་ཞིང༌། མཆེ་བ་རྣོན་པོ་བཞི་གཙིགས་པ། དབུ་སྐྲ་དང་སྨ་ར་སྨིན་མ་དམར་སེར་དུས་མཐའི་མེ་ལྟར་འབར་ཞིང༌། དབུའི་གཙུག་ན་རྟ་མགོ་ལྗང་ནག་རྟ་སྐད་འཚེར་བ། རྔོག་མའི་གསེབ་ནས་མེ་སྟག་འཕྲོས་པས་སྟོང་གསུམ་མེའི་ར་གུར་གྱིས་འགེངས་ཤིང་བདུད་ཀྱི་དཀྱིལ་འཁོར་སྲེག་
པར་བྱེད་པ། གཡས་དབྱུག་ཏོ་འཕྱར་ཞིང༌། གཡོན་སྡིགས་མཛུབ་མཛད་པ། སྦྲུལ་དང་རུས་པའི་རྒྱན་སྣ་ཚོགས་ཀྱིས་བརྒྱན་པ། གར་དགུའི་ཉམས་དང་ལྡན་ཞིང་སྟག་གི་པགས་པ་རློན་པའི་ཤམ་ཐབས་ཅན། གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧྲཱིཿ ལ་ཧཱུཾ་གིས་མཚན་པར་གྱུར། ཐུགས་ཀའི་ཧྲཱིཿ ལས་འོད་ཟེར་འཕྲོས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿ ཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ཧྲཱིཿ ལས་འོད་ཟེར་འཕྲོས་ཏེ་དབང་གི་ལྷ་ཐམས་ཅད་སྤྱན་དྲངས། བདུད་རྩིའི་ཆུས་དབང་བསྐུར་ཞིང་སྣང་བ་མཐའ་ཡས་ཀྱིས་དབུ་བརྒྱན་པར་གྱུར། བདེ་སྟོང་ཏིང་འཛིན་མཆོག་གི་རོལ་པ་ཡིས། །བརྟན་གཡོ་ཀུན་ཁྱབ་མཆོད་པའི་སྤྲིན་ཕུང་ལས། །ཟག་མེད་དགའ་བའི་མཆོག་སྦྱིན་མཆོད་ཡོན་འདིས། །རབ་དགྱེས་མཆོག་ཐུན་དངོས་གྲུབ་སྩལ་ཏུ་གསོལ། ཨོཾ་ཧ་ཡ་གྲི་ཝ་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། མཆོད་ཡོན་གྱི་གནས་སུ། ཞབས་བསིལ་ནས། རོལ་མོའི་བར་དང༌། གཟུགས་མཆོག །སྒྲ་སྙན། དྲི་མཆོག །རོ་མཆོག །རེག་མཆོག་རྣམས་དང༌། ཨརྒྷཾ་གྱི་གནས་སུ་པཱཏྱཾ་ནས་སྤར་ཤའི་བར་བཅུག་ལ་དབུལ། ཨོཾ་ཧ་ཡ་གྲཱི་ཝ་ཨོཾ་ཨཱཿ ཧཱུཾ་གིས་ནང་མཆོད་དབུལ། རབ་འབྱམས་རྒྱལ་བའི་སོར་རྟོག་ཡེ་ཤེས་དངོས། །ལོངས་སྤྱོད་རྫོགས་ལ་གསུང་གི་རང་གདངས་ལྷ། །གདུག་པ་འདུལ་བྱེད་གཏུམ་ཆེན་ཁྲོ་བོའི་རྒྱལ། །པདྨ་དབང་ཆེན་ཞབས་ལ་ཕྱག་འཚལ་བསྟོད། །རང་གི་ཐུགས་ཀའི་ཧྲཱིཿ ཡིག་གི་འོད་ཟེར་གྱིས་རྡོ་རྗེ་གསུམ་
གྱི་ལྷ་ཚོགས་སྤྱན་དྲངས། ཡིག་བརྒྱ་ཉེར་གཅིག་བཟླས་ལ། བླ་མ་མཆོག་གསུམ་དཀྱིལ་འཁོར་ལྷ་ཚོགས་དང༌། །ཁྲོ་ཆེན་ཧ་ཡ་གྲཱི་ཝ་འཁོར་དང་བཅས། །དམིགས་མེད་སྙིང་རྗེའི་ཐུགས་ཀྱིས་ཉེར་དགོངས་ཏེ། །བདག་གི་ཉེས་པ་དབྱིངས་སུ་སྦྱོང་བར་མཛོད། །རྨོངས་ཤིང་མ་དད་ལོག་ལྟའི་དབང་གྱུར་པས། །དམ་ཚིག་ལས་འགལ་བསྙེན་ཅིང་བསྒྲུབ་ལ་གཡེལ། །མི་གཙང་གྲིབ་ཕོག་མཆོད་གཏོར་ཆག་པ་སོགས། །ནོངས་པ་གང་བགྱིས་འགྱོད་པས་མཐོལ་ལོ་བཤགས། །ཐོག་མེད་ནས་བསགས་མི་བཟད་སྡིག་ལྟུང་ཚོགས། །རྩ་བ་ཡན་ལག་དམ་ཚིག་ཉམས་ཆག་བཅས། །ཐུགས་རྗེ་ཆེ་ལྡན་རྣམས་ཀྱི་བྱིན་རླབས་མཐུས། །མ་ལུས་ལྷག་མེད་བྱང་ཞིང་དག་གྱུར་ཅིག །བསྐང་རྫས་བསང་སྦྱངས། སྟོང་པའི་ངང་ལས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས། བླ་མ་ཡི་དམ་ཆོས་སྐྱོང་འཁོར་བཅས་མཉེས་པར་བྱེད་པའི་དམ་རྫས་སྤྱན་གཟིགས་བསམ་གྱིས་མི་ཁྱབ་པ་ཞིག །བླ་མ་ཡི་དམ་ཆོས་སྐྱོང་འཁོར་དང་བཅས་པའི་སྤྱན་ལམ་དུ་འབྱུང་ཞིང་རྒྱས་པར་གྱུར། ཨོཾ་སརྦ་བིད། པཱུ་ར་པཱུ་ར། སུ་ར་སུ་ར། ཨཱ་ཝ་རྟ་ཡ་ཨཱ་ཝ་རྟ་ཡ་ཧོཿ བཛྲ་སྥ་ར་ཎ་ཁཾ། ལན་གསུམ། ཧྲཱིཿ ཀུན་བཟང་སྨོན་པའི་མཐུ་དང་ཏིང་འཛིན་གྱིས། །ལེགས་བྲིས་ངོ་མཚར་བཀོད་པ་མཐའ་ཡས་པས། །བླ་མ་ཡི་དམ་རྟ་མགྲིན་ལྷ་ཚོགས་ཀུན། །ཟག་མེད་བདེ་དགའ་མཆོག་གིས་སིམ་གྱུར་ཅིག །རཀྟའི་མཆོད་ཡོན་མེ་ཏོག་སྣ་ཚོགས་དང༌། །སྤོས་ཀྱི་དུད་སྤྲིན་རབ་གསལ་སྒྲོན་མེའི་ཚོགས། །བཟང་པོའི་
དྲི་ཆབ་རོ་བརྒྱའི་ཞལ་ཟས་དང༌། །སྙན་ཞིང་བརྗིད་ཆགས་སྣ་ཚོགས་རོལ་མོ་འདིས། །རྩ་བརྒྱུད་བླ་མ་རྣམས་ཀྱི་ཐུགས་དམ་བསྐང༌། །ཡི་དམ་དཀྱིལ་འཁོར་རྒྱ་མཚོའི་ཐུགས་དམ་བསྐང༌། །ཁྱད་པར་ཁྲོ་བོའི་རྒྱལ་པོ་གསུང་གི་ལྷ། །པདྨ་དབང་ཆེན་འཁོར་བཅས་ཐུགས་དམ་བསྐང༌། །བཅོམ་ལྡན་ཁྲོ་བོའི་དབང་ཕྱུག་བཀའ་ཉན་པ། །ཆོས་སྲུང་དམ་ཅན་རྒྱ་མཚོའི་ཐུགས་དམ་བསྐང༌། །ཐུགས་དམ་གཉན་པོ་དབྱིངས་སུ་སྐོང་གྱུར་ནས། །རྣལ་འབྱོར་དཔོན་སློབ་ཉམས་ཆག་སོས་གྱུར་ཅིག །མི་མཐུན་རྐྱེན་དང་བར་ཆད་ཟློག་པ་དང༌། །མཐུན་པའི་དངོས་གྲུབ་མ་ལུས་སྩལ་ཏུ་གསོལ། །ཐོད་པ་སྐམ་རློན་ཞིང་ཆེན་གླང་ལྤགས་དང༌། །འཁོར་ལོ་རྣ་ཆ་ལ་སོགས་རུས་པའི་རྒྱན། །སྟག་ལྤགས་ཤམ་ཐབས་སྣ་ཚོགས་གདུག་པའི་སྦྲུལ། །རིན་ཆེན་ཕྲ་ཚོམ་མཛེས་པའི་རྒྱན་རྣམས་ཀྱིས། །རྩ་བརྒྱུད་བླ་མ། སོགས་འདྲ། བདུད་སྡེ་མཐར་བྱེད་སེང་ལྡེང་དབྱུག་ཏོ་སོགས། །རྣོ་ངར་མཚོན་ཆའི་བྱེ་བྲག་སྣ་ཚོགས་དང༌། །མི་མཐུན་གཡུལ་གྱིས་བརྫི་བར་མི་ནུས་པའ། །སྲ་མཁྲེགས་རྡོ་རྗེ་གོ་ཆ་འབར་བ་ཡིས། །རྩ་བརྒྱུད༌༝། །སྣ་ཚོགས་བླ་བྲེ་གདུགས་དང་རྒྱལ་མཚན་དང༌། །ལྷ་ཀླུ་མི་ཡི་ནོར་བུ་རིན་པོ་ཆེ། །བཟང་པོའི་སྨན་དང་འབྲུ་སྣ་སྣ་ཚོགས་བཅས། །མཁོ་དགུའི་ཡོ་བྱད་ཟད་པ་མེད་པ་ཡིས། །རྩ་བརྒྱུད༌༝། །སྟག་སེང་ཁྱུང་འབྲུག་འབྲོང་གཡག་གླང་པོ་ཆེ། །རྔམས་ཤིང་འཇིགས་པའི་གཅན་གཟན་སྣ་ཚོགས་དང༌། །ཅང་ཤེས་རྟ་དང་ར་ལུག་རྐང་འགྲོའི་རིགས། །མཛེས་སྡུག་སྐད་སྙན་འདབ་ཆགས་ཚོགས་རྣམས་ཀྱིས། །རྩ་བརྒྱུད༌༝། །རི་རབ་གླིང་བཞི་ཉི་ཟླ་རིན་ཆེན་
བདུན། །བཀྲ་ཤིས་རྟགས་རྫས་འདོད་ཡོན་རྣམ་ལྔ་དང༌། །བྲིས་སྐུ་གླེགས་བམ་རྡོར་དྲིལ་བགྲང་འཕྲེང་སོགས། །བསྟེན་པའི་དམ་རྫས་མ་ཚང་མེད་པ་ཡིས། རྩ་བརྒྱུད༌༝། །རྣམ་དག་དམ་ཚིག་སྡོམ་པས་ལེགས་བསྡམས་ཤིང༌། །ལྟ་སྒོམ་སྤྱོད་པ་གཙང་མའི་ཉམས་ལེན་དང༌། །ཁྱད་པར་སྒྲིབ་བྲལ་ཆོས་སྐུའི་བདག་ཉིད་དུ། །རྩེ་གཅིག་མོས་པའི་དད་གུས་དྲག་པོ་ཡིས། །རྩ་བརྒྱུད་བླ་མ་རྣམས་ཀྱི་ཐུགས་དམ་བསྐང༌། །ཞེས་པ་ནས། མཐུན་པའི་དངོས་གྲུབ་མ་ལུས་སྩལ་ཏུ་གསོལ། །ཧྲཱིཿ ཆོས་སྐུ་ཡངས་པའི་ཕོ་བྲང་ནས། །པདྨ་དབང་ཆེན་འཁོར་བཅས་ཀྱིས། །མཐུན་པའི་དམ་རྫས་འདི་བཞེས་ལ། །ཞེས་པ་ནས། རྒྱས་པར་མཛོད་ཅིག་ཁྲོ་བོའི་རྒྱལ། །ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། ཅེས་བཟླས་པ་ཅི་འགྲུབ་དང༌། ཡིག་བརྒྱས་ལྷག་ཆད་བསྐང༌། གཏོར་མ་ནང་མཆོད་ལྟར་བྱིན་གྱིས་བརླབས། ལྷའི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ཨོཾ་ཧ་ཡ་གྲཱི་ཝ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་གྱིས་འབུལ། ཨོཾ་ཧ་ཡ་གྲཱི་ཝ་ཨརྒྷཾ་སོགས་ཀྱིས་མཆོད་པ་དང༌། འབྲུ་གསུམ་བཏགས་པས་ནང་མཆོད་དབུལ། བཅོམ་ལྡན་ཁྲོ་བོའི་རྒྱལ་པོ་ཡིས། །མཆོད་གཏོར་རྒྱ་མཚོ་འདི་བཞེས་ལ། །སངས་རྒྱས་བསྟན་པ་དར་བ་དང༌། །འཇིག་རྟེན་བདེ་འབྱོར་ཕུན་སུམ་ཚོགས། །རྣལ་འབྱོར་དཔོན་སློབ་འཁོར་བཅས་ཀྱི། །ཕྱི་ནང་ཉེར་འཚེའི་ཚོགས་ཞི་ཞིང༌། །མཐུན་རྐྱེན་ལེགས་ཚོགས་མ་ལུས་པ། །ལྷུན་གྱིས་གྲུབ་པའི་སྡོངས་གྲོགས་མཛོད། །ཅེས་འཕྲིན་ལས་བཅོལ། མཁའ་འགྲོའི་སྤྱི་གཏོར་
དང་གཞི་བདག་གཏོར་མ་བསྔོ། བསྟོད་པ་ནི། ཧྲཱི་བདེ་གཤེགས་སྣང་བ་མཐའ་ཡས་ཐུགས་རྗེའི་གར། །སྤྱན་རས་གཟིགས་དབང་ཁྲོས་པའི་རྣམ་རོལ་པ། །བདུད་སྡེ་མཐར་བྱེད་ཁྲོ་རྒྱལ་བཅོམ་ལྡན་འདས། །རྟ་མགྲིན་པདྨ་དབང་ཆེན་ཞབས་ལ་བསྟོད། །བྱུ་རུའི་ལྷུན་པོ་རབ་འབར་བསྐལ་པའི་མེས། །འཁྱུད་པ་ལྟ་བུ་བཟོད་དཀའི་གཟི་བརྗིད་ཅན། །དབང་གི་མདོག་འཆང་ཁྲོ་རྒྱལ་བཅོམ་ལྡན་འདས། །རྟ་མགྲིན་པདྨ༌༝། །གཡས་པས་སེང་ལྡེང་དབྱུག་པ་མཁའ་ལ་འཕྱར། །གཡོན་པ་སྡིགས་མཛུབ་རབ་ཏུ་བསྒྲེངས་པ་ཡིས། །བསྟན་དགྲ་ཚར་གཅོད་ཁྲོ་རྒྱལ༌༝། །རྟ་མགྲིན༌༝། །རྟ་སྐད་བཞད་པས་ཁམས་གསུམ་གཡོ་བྱེད་ཅིང༌། །མེ་ཡི་ཚ་ཚ་འཕྲོས་པས་གདོན་གསུམ་བསྲེགས། །སྣང་སྲིད་དབང་བསྒྱུར་ཁྲོ་རྒྱལ༌༝། །རྟ་མགྲིན༌༝། །སྡེར་ཕྲེང་གཡོ་བའི་སྟག་ལྤགས་ཤམ་ཐབས་གསོལ། །སྣ་ཚོགས་སྦྲུལ་དང་རུས་པའི་རྒྱན་གྱིས་སྤྲས། །བརྐྱངས་བསྐུམ་གར་མཛད་ཁྲོ་རྒྱལ༌༝། །རྟ་མགྲིན༌༝། །དྲག་སྔགས་ང་རོ་འབྲུག་ལྟར་སྒྲོགས་པ་ཡིས། །ནག་ཕྱོགས་འབྱུང་པོའི་ཚོགས་རྣམས་སྐྲག་བྱེད་ཅིང༌། །སྐལ་ལྡན་དབུགས་འབྱིན་ཁྲོ་རྒྱལ༌༝། །རྟ་མགྲིན༌༝། །སྒྲིབ་བྲལ་མཁྱེན་པས་ཆོས་ཀུན་མངོན་སུམ་གཟིགས། །དམིགས་མེད་སྙིང་རྗེས་འགྲོ་བ་ཀུན་སྐྱོང་ཞིང༌། །མཐུ་སྟོབས་ཐོགས་མེད་ཁྲོ་རྒྱལ་བཅོམ་ལྡན་འདས། །རྟ་མགྲིན་པདྨ་དབང་ཆེན་ཞབས་ལ་བསྟོད། །ཁྲོ་རྒྱལ་ཁྱོད་ལ་བསྟོད་ཅིང་གསོལ་བཏབ་མཐུས། །རྒྱལ་བསྟན་དར་ཞིང་དཔོན་སློབ་ཡོན་མཆོད་ཀུན། །ཕྱི་ནང་ཉེར་འཚེ་ཀུན་ལས་རྣམ་རྒྱལ་ཏེ། །ལེགས་ཚོགས་དོན་གཉིས་ལྷུན་གྱིས་གྲུབ་གྱུར་ཅིག །ཅེས་
བསྟོད། གཏང་རག་གི་མཆོད་པ་བྱིན་གྱིས་བརླབ། མཆོད་པ་དང་ནང་མཆོད་དབུལ་ཞིང༌། རབ་འབྱམས་རྒྱལ་བའི་སོར་རྟོག་ཡེ་ཤེས་དངོས། །ཞེས་སོགས་ཀྱིས་བསྟོད། དགེ་བ་འདི་ཡིས་མྱུར་དུ་བདག །ཁྲོ་རྒྱལ་རྟ་མགྲིན་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཡིག་བརྒྱ་དང༌། གང་ཡང་བདག་བློ་ཞེས་སོགས་ཀྱི་མཐར། སྤྱན་དྲངས་པའི་ཡེ་ཤེས་པ་རྣམས་རྟེན་དང་དབྱེར་མེད་དུ་གྱུར། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། ཞེས་བརྟན་བཞུགས་བྱ། རྟེན་གྱི་དྲུང་མ་ཡིན་པ་ཕྱོགས་གཞན་དུ་བྱེད་ན། ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་བདག་ཉིད་ལ་ཐིམ་པར་གྱུར། ཅེས་གཤེགས་གསོལ་བྱེད། ཆེ་བའི་ཆེ་མཆོག་ཅེས་སོགས་བཀྲ་ཤིས་ཀྱིས་མཐའ་བརྒྱན་པར་བྱའོ།། ཞེས་པ་འདི་ནི་ཨ་འགང་དགོན་པའི་ཚོགས་འདོན་དུ་དགོས་ཚུལ་དད་བརྩོན་ལྡན་པ་ཧོ་ཀྱཱ་རབ་འབྱམས་པ་བློ་བཟང་དཀོན་མཆོག །ལུ་ཀྱཱ་རབ་འབྱམས་པ་དཀོན་མཆོག་རྒྱ་མཚོ། ལུ་ཀྱཱ་དགེ་སློང་དར་རྒྱས་ཉི་མ་རྣམས་ཀྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ཚོགས་འཁོར་བྱ་ཚུལ་ནི། ཚོགས་རྫས་དང་གཏོར་མ་ཕྱག་ལེན་བཞིན་བཤམས། སྐྱབས་སེམས་སྔོན་དུ་བཏང༌། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་རང་བཞིན་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་རང་སེམས་ཧྲཱིཿ ཡིག་དམར་པོ། དེ་ལས་འོད་ཟེར་འཕྲོས། དོན་གཉིས་བྱས། ཚུལ་འདུས་ཡོངས་སུ་གྱུར་པ་ལས་
རང་ཉིད་བཅོམ་ལྡན་འདས་དཔལ་རྟ་མགྲིན་པངྨ་དབང་ཆེན་སྐུ་མདོག་དམར་པོ་ཞལ་གཅིག་ཕྱག་གཉིས་པ། དམར་ལ་ཟླུམ་པའི་སྤྱན་གསུམ་སྡང་མིག་གློག་ལྟར་གཡོ་ཞིང༌། མཆེ་བ་རྣོན་པོ་བཞི་གཙིགས་པ། དབུ་སྐྲ་དང་སྨ་ར་སྨིན་མ་དམར་སེར་དུས་མཐའི་མེ་ལྟར་འབར་ཞིང༌། དབུའི་གཙུག་ན་རྟ་མགོ་ལྗང་ནག་རྟ་སྐད་འཚེར་བ། རྔོག་མའི་གསེབ་ནས་མེ་སྟག་འཕྲོས་པས་སྟོང་གསུམ་མེའི་རྭ་གུར་གྱིས་འགེངས་ཤིང་བདུད་ཀྱི་དཀྱིལ་འཁོར་སྲེག་པར་བྱེད་པ། གཡས་དབྱུག་ཏོ་འཕྱར་ཞིང། གཡོན་སྡིགས་མཛུབ་མཛད་པ། སྦྲུལ་དང་རུས་པའི་རྒྱན་སྣ་ཚོགས་ཀྱིས་བརྒྱན་པ། གར་དགུའི་ཉམས་དང་ལྡན་ཞིང་སྟག་གི་པགས་པ་རློན་པའི་ཤམ་ཐབས་ཅན། གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧྲཱིཿ ལ་ཧཱུཾ་གིས་མཚན་པར་གྱུར། རང་གི་ཐུགས་ཀའི་ཧྲཱིཿ ལས་འོད་ཟེར་འཕྲོས། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿ ཧཱུཾཿ བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ཧྲཱིཿ ལས་འོད་ཟེར་འཕྲོས་ཏེ་དབང་གི་ལྷ་ཐམས་ཅད་སྤྱན་དྲངས། བདུད་རྩིའི་ཆུས་དབང་བསྐུར་ཞིང་སྣང་བ་མཐའ་ཡས་ཀྱིས་དབུ་བརྒྱན་པར་གྱུར། མཆོད་པ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨཱཿ ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ།
དྲི་ཆབ། ཞལ་ཟས་རོལ་མོ་རྣམས་རང་བཞིན་སྟོང་པ། རྣམ་པ་མཆོད་རྫས་སོ་སོའི་རྣམ་པ་ཅན་བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ཨོཾ་ཨརྒྷཾ་ཨཱཿ ཧཱུཾ་ནས། ཤཔྟ་ཨཱཿ ཧཱུཾ་གི་བར་གྱིས་བྱིན་གྱིས་བརླབ། ནང་མཆོད་དང་ཚོགས་གཏོར་ཨ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཡཾ་ལས་རླུང༌། རཾ་ལས་མེ། ཨཱཿ ལས་མི་མགོའི་སྒྱེད་བུ་གསུམ་གྱི་སྟེང་དུ། ཨཱཿ ལས་བྱུང་བའི་ཐོད་པ་དུམ་བུ་གཅིག་པ་དེའི་ནང་གི་ཕྱོགས་བཞི་དང་དབུས་སུ་བྷྲུཾ་ཨཾ་ཛིཾ་ཁཾ་ཧཱུཾ་ལས་ཤ་ལྔ། མཚམས་བཞི་དང་དབུས་སུ་ལཾ་མཾ་པཾ་ཏཱཾ་བཾ་ལས་བདུད་རྩི་ལྔ། དེའི་སྟེང་དུ་ཨོཾ་ཨཱཿ ཧཱུཾ་གི་ཡི་གེ་གསུམ་བརྩེགས་ཏེ་གནས་པར་གྱུར། རང་གི་ཐུགས་ཀའི་ཧཱུཾ་གི་འོད་ཟེར་གྱིས་རླུང་གཡོས། མེ་སྦར། ཐོད་པའི་ནང་གི་རྫས་རྣམས་ཞུ་ཞིང་ཁོལ་བ་དང༌། ཡི་གེ་གསུམ་གྱི་འོད་ཟེར་གྱིས་སྐུ་གསུང་ཐུགས་རྡོ་རྗེ་གསུམ་བསྡུས་ཏེ་སོ་སོ་ལ་ཐིམ་པ་རྣམས་ཐོད་པར་ལྷུང་ནས་ཞུ་བས། མ་དག་པའི་དྲི་མ་རྣམས་སྦྱངས་ནས་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿ ཧཱུཾ། ལན་གསུམ་གྱིས་བྱིན་གྱིས་བརླབ། ཨོཾ་ཧ་ཡ་གྲཱི་ཝ་ཨརྒྷཾ་ནས་ཤཔྟ་པྲ་ཏཱིཙྪ་ཧཱུཾ་སྭཱཧཱའི་བར་གྱིས་མཆོད། འབྲུ་གསུམ་བཏགས་ལ་ནང་མཆོད་དབུལ། རབ་འབྱམས་རྒྱལ་བའི་སོར་རྟོག་ཡེ་ཤེས་དངོས། །ལོངས་སྤྱོད་རྫོགས་པ་གསུང་གི་རང་གདངས་ལྷ། །གདུག་པ་འདུལ་བྱེད་གཏུམ་ཆེན་ཁྲོ་བོའི་རྒྱལ། །པངྨ་དབང་ཆེན་ཞབས་ལ་ཕྱག་འཚལ་བསྟོད། །ཅེས་པས་བསྟོད། རང་གི་ཐུགས་
ཀར་ཧྲཱིཿ ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་གདོན་གསུམ་གྱི་ཉེར་འཚེ་ཐམས་ཅད་བཅོམ་ཞིང༌། རྒྱལ་བ་སྲས་བཅས་ཀྱི་བྱིན་རླབས་མ་ལུས་པ་བསྡུས་ཏེ་ཐིམ་པར་བསམས་ལ། ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། ཅེས་བཟླས་པ་ཅི་འགྲུབ་དང༌། མཆོད་བསྟོད་གོང་བཞིན་བྱ། ཚོགས་འཁོར་དངོས་གཞི་ནི། ཨེ་མ་ཧོ་ལྷན་སྐྱེས་བདེ་བ་ཆེའ། །སྒྱུ་འཕྲུལ་སྣོད་བཅུད་དག་པའི་དངོས། །གང་སྣང་སྟོང་པའི་ཡེ་ཤེས་ཀྱིས། །རྒྱས་བཏབ་ཟུང་འཇུག་རོལ་པར་གྱུར། །ཧྲཱིཿ འོག་མིན་བདེ་ལྡན་ལ་སོགས་ཞིང་མཆོག་ནས། །དམིགས་མེད་ཐུགས་རྗེ་ཆེན་པོས་ཉེར་དགོངས་ཏེ། །རྩ་བརྒྱུད་བླ་མའི་ཚོགས་རྣམས་གཤེགས་སུ་གསོལ། །ཡི་དམ་དཀྱིལ་འཁོར་རྒྱ་མཚོ་གཤེགས་སུ་གསོལ། །ཁྱད་པར་ཁྲོ་བོའི་རྒྱལ་པོ་གསུང་གི་ལྷ། །པདྨ་དབང་ཆེན་འཁོར་བཅས་གཤེགས་སུ་གསོལ། །བཅོམ་ལྡན་ཁྲོ་བོའི་དབང་ཕྱུག་བཀའ་ཉན་པ། །ཆོས་སྲུང་དམ་ཅན་རྒྱ་མཚོ་གཤེགས་སུ་གསོལ། །ཕྱོགས་སྐྱོང་ཞིང་སྐྱོང་ལྷ་ཀླུ་གཞི་བདག་དང༌། །རིགས་དྲུག་ལ་སོགས་མགྲོན་རྣམས་གཤེགས་སུ་གསོལ། །མདུན་གྱི་ནམ་མཁར་ཀུན་བཟང་མཆོད་སྤྲིན་དབུས། །རང་རང་དགྱེས་པའི་ཕུན་ཚོགས་གདན་ཁྲི་ལ། །བརྟན་པར་བཞུགས་ཏེ་ཚོགས་མཆོད་རྒྱ་མཚོ་ལ། །དགའ་མགུར་རོལ་པའི་བདེ་བས་ཚིམ་གྱུར་ཅིག །ཧོ་ལྷན་སྐྱེས་བདེ་བ་མཆོག་གི་ཏིང་ངེ་འཛིན། །ཟབ་མོ་གསང་སྔགས་རིག་སྔགས་གཟུགས་སྔགས་དང༌། །རྒྱ་ཆེན་ཕྱག་རྒྱ་གྲུབ་པའི་བདེན་ཚིག་མཐུས། །བྱིན་བརླབས་ཟག་མེད་ཚོགས་མཆོད་རྒྱ་
མཚོ་འདི། །མཚོ་སྐྱེས་རྡོ་རྗེ་རྒྱལ་བ་གཉིས་པ་སོགས། །རྩ་བརྒྱུད་བླ་མའི་ཚོགས་རྣམས་ཀུན་ལ་འབུལ། །ཨོཾ་ཨཱཿ ཧཱུཾ། འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ་བྱིན་རླབས་ཆར་ཆེན་དབབ་ཏུ་གསོལ། །ཧོ་ལྷན་སྐྱེས་བདེ་བ་མཆོག་གི་ཏིང་ངེ་འཛིན། །ཟབ་མོ་ནས། ཚོགས་མཆོད་རྒྱ་མཚོ་འདི། །ཁྲོ་རྒྱལ་རྟ་མགྲིན་པདྨ་དབང་ཆེན་སོགས། །ཡི་དམ་ལྷ་དང་མཁའ་འགྲོའི་ཚོགས་ལ་འབུལ། །ཨོཾ་ཨཱཿ ཧཱུཾ། འདོད་དགུའི་༝། །ཨེ་མ་ཧོ་དངོས་གྲུབ་ཆར་ཆེན་དབབ་ཏུ་གསོལ། །ཧོ་ལྷན་སྐྱེས་བདེ་བ་ནས། རྒྱ་མཚོ་འདི། །བཅོམ་ལྡན་ཁྲོ་བོའི་དབང་ཕྱུག་བཀའ་ཉན་པ། །ཆོས་སྲུང་དམ་ཅན་རྒྱ་མཚོའི་ཚོགས་ལ་འབུལ། །ཨོཾ་ཨཱཿ ཧཱུཾ། འདོད་དགུའི༌༝། །ཨེ་མ་ཧོ་འཕྲིན་ལས་ཆར་ཆེན་དབབ་ཏུ་གསོལ། །ཧོ་ལྷན་སྐྱེས་ནས། རྒྱ་མཚོ་འདི། །ཕྱོགས་སྐྱོང་ཞིང་སྐྱོང་ལྷ་ཀླུ་གཞི་བདག་སོགས། །དྲེགས་པ་སྡེ་བརྒྱད་ཚོགས་རྣམས་ཀུན་ལ་འབུལ། །ཨོཾ་ཨཱཿ ཧཱུཾ། འདོད་དགུའི༌༝། །ཨེ་མ་ཧོ་མཐུན་རྐྱེན་སྡོངས་གྲོགས་མཛད་དུ་གསོལ། །ཧོ་ལྷན་སྐྱེས་ནས། རྒྱ་མཚོ་འདི། །རིགས་དྲུག་སེམས་ཅན་གནོད་བྱེད་གདོན་བགེགས་སོགས། །ལན་ཆགས་ཤ་འཁོན་གཉེར་པ་ཀུན་ལ་འབུལ། །ཨོཾ་ཨཱཿ ཧཱུཾ། འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ་ལས་ཉོན་སྒྲིབ་པ་དག་གྱུར་ཅིག །དེ་ནས་ཚོགས་ཕུད་བཏེག་སྟེ། ཨེ་མ་ཧོ་ཚོགས་ཀྱི་འཁོར་ལོ་ཆེ། །དུས་གསུམ་བདེ་གཤེགས་གཤེགས་བཤུལ་ཏེ། །དངོས་གྲུབ་མ་ལུས་འབྱུང་བའི་གནས། །དེ་ལྟར་ཤེས་ནས་དཔའ་
བོ་ཆེ། །རྣམ་པར་རྟོག་པའི་སེམས་བོར་ལ། །ཚོགས་ཀྱི་འཁོར་ལོར་རྒྱུན་དུ་རོལ། །ཅེས་དབུལ་ཞིང༌། དེ་ནས་ཚོགས་མང་ལ་བྲིམས་ནས་བཞེས་ཏེ། ཨ་ཧོ་མཧཱ་སུ་ཁ། ཞེས་བརྗོད། ཚོགས་ལྷག་སྣོད་གཅིག་ཏུ་བསྡུས་པར་སློབ་དཔོན་གྱིས་ཁ་བཀྲུས་བཏབ་ལ། ཨོཾ་ཨཱཿ ཧཱུཾ། ལན་གསུམ་གྱིས་བྱིན་གྱིས་བརླབས། ཧོ་ལྷན་སྐྱེས་བདེ་བ་ནས། ཚོགས་ལྷག་རྒྱ་མཚོ་འདི། །པངྨ་དབང་ཆེན་བཀའ་ཉན་ལྷག་སྡུད་པ། །ཕྱོགས་བཅུར་རྒྱུ་བའི་ལས་བྱེད་ཚོགས་ལ་འབུལ། །ཨོཾ་ཨཱཿ ཧཱུཾ། འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ་འཕྲིན་ལས་མ་ལུས་སྒྲུབ་ཏུ་གསོལ། །ཞེས་བརྗོད་དེ་ཕྱི་རོལ་ཏུ་དོར། མ་རྙེད་ཡོངས་སུ་མ་ཤེས་དང༌། །ཞེས་སོགས་ཀྱིས་ནོངས་པ་བཟོད་པར་གསོལ། འཇིག་རྟེན་པའི་མགྲོན་རྣམས་རང་གནས་སུ་གཤེགས། ཡེ་ཤེས་པ་རྣམས་རང་ཉིད་ལ་ཐིམ་པར་གྱུར། ཅེས་ཚོགས་ཞིང་བསྡུ། བཀྲ་ཤིས་ཀྱིས་མཐའ་བརྒྱན་པར་བྱའོ། །འདི་ནི་ཚོགས་འཁོར་རྐྱང་པའི་དབང་དུ་བྱས་པ་ཡིན་ལ། བསྐང་གསོ་སོགས་ཀྱི་མཇུག་ཏུ་བྱེད་ན། བདག་མདུན་གྱི་མངོན་རྟོགས་བསྐང་བཤགས་བསྟོད་པའི་བར་དཀྱུས་བཞིན་བཏང་ལ། དེ་ནས་ཚོགས་འཁོར་མཆོད་གཏོར་བྱིན་རླབས་བྱས་ཏེ། ཨེ་མ་ཧོ་ལྷན་སྐྱེས་བདེ་བ་ཆེའ། །སྒྱུ་འཕྲུལ་སྣོད་བཅུད་དག་པའི་དངོས། །ཞེས་པ་མན་ཆད་འདི་བཞིན་བྱའོ།། ཞེས་པ་འདིའང་ཨ་འགང་དགོན་པའི་ཚོགས་འདོན་དུ་དགོས་ཚུལ་དད་བརྩོན་ལྡན་པ་ཧོ་ཀྱཱ་རབ་འབྱམས་པ་བློ་བཟང་དཀོན་མཆོག །ལུ་ཀྱཱ་རབ་འབྱམས་པ་དཀོན་མཆོག་རྒྱ་མཚོ། ལུ་ཀྱཱ་དགེ་སློང་དར་རྒྱས་ཉི་མ་རྣམས་ཀྱིས་བསྐུལ་ངོརྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། །།