སྨན་ཆོག་མདོར་བསྡུས།
སྨན་ཆོག་མདོར་བསྡུས་བཞུགས་སོ།། སྙིགས་དུས་ཉམ་ཐག་མགོན་མེད་འགྲོ་བ་ལ། །ལྷག་པར་བརྩེ་བའི་སྟོན་པ་ཐུགས་རྗེ་ཅན། །བདེ་གཤེགས་མཆེད་བདུན་ཐུབ་དབང་འཁོར་དང་བཅས། །འདིར་བྱོན་བདག་སོགས་མགོན་དུ་བཞུགས་སུ་གསོལ། །གུས་པས་ཕྱག་འཚལ་མཆོད་ཚོགས་མ་ལུས་འབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རང༌། །བསྐལ་བརྒྱར་བཞུགས་ཏེ་ཆོས་འཁོར་བསྐོར་བར་བསྐུལ། །དགེ་ཚོགས་ཀུན་ཀྱང་བྱང་ཆུབ་ཆེན་པོར་བསྔོ། །ས་གཞི་སྤོས་ཀྱིས་ནས། སྤྱོད་པར་ཤོག །སྙིགས་དུས་ཉམ་ཐག་མགོན་མེད་འགྲོ་བ་ལ། །ལྷག་པར་བརྩེ་བའི་སྟོན་པ་ཐུགས་རྗེ་ཅན། །མཚན་ལེགས་ཡོངས་བསྒྲགས་དཔལ་ལ་ཕྱག་འཚལ་ལོ། །གདུང་བས་འོ་དོད་འབོད་དོ་བརྩེ་བས་དགོངས། །ཐུགས་བསྐྱེད་བདེན་པའི་དུས་ལ་བབ་ལགས་ན། །མགོན་པོ་ཁྱོད་ཀྱི་རླབས་ཆེན་སྨོན་ལམ་འབྲས། །དེང་འདིར་བདག་ལ་མངོན་དུ་གྱུར་པ་ཡིས། །སྲིད་ཞིའི་རྒུད་པ་ཀུན་ལས་བསྐྱབ་ཏུ་གསོལ། །སྙིགས་དུས་ཉམ་ཐག་མགོན་མེད་འགྲོ་བ་ལ། །ལྷག་པར་བརྩེ་བའི་སྟོན་པ་ཐུགས་རྗེ་ཅན། །ཞེས་པའི་རྐང་པ་གཉིས་ཀྱི་འཕྲོར། སྒྲ་དབྱངས་རྒྱལ་པོའི་ཞབས་ལ་ཕྱག་འཚལ་ལོ། །གསེར་བཟང་དྲི་མེད་སྣང་ལ་ཕྱག་འཚལ་ལོ། །མྱ་ངན་མེད་མཆོག་དཔལ་ལ་ཕྱག་འཚལ་ལོ། །ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མངོན་མཁྱེན་རྒྱལ་པོའི་ཞབས་ལ་ཕྱག་འཚལ་ལོ། །བཅོམ་ལྡན་སྨན་གྱི་བླ་ལ་ཕྱག་འཚལ་ལོ། །
རྣམ་འདྲེན་ཤཱཀྱའི་གཙོ་ལ་ཕྱག་འཚལ་ལོ། །ཞེས་པ་རེ་རེའི་མཐར། གདུང་བས་འོ་དོད། ཅེས་སོགས་ཚིག་རྐང་ལྷག་མ་ལྔ་སྦྱོར། མཇུག་ཏུའང༌། སྙིགས་དུས་ཉམ་ཐག་མགོན་མེད་འགྲོ་བ་ལ། །ལྷག་པར་བརྩེ་བའི་སྟོན་པ་ཐུགས་རྗེ་ཅན། །བདེ་གཤེགས་མཆེད་བདུན་ཐུབ་དབང་འཁོར་བཅས་ཀྱིས། །རྗེས་བཟུང་ས་ལམ་བགྲོད་པ་མཐར་ཕྱིན་ཤོག །ཅེས་བསྔོ་བས་མཚམས་སྦྱར་ལ། རྐང་པ་ཐ་མའི་དོད་དུ་ལེགས་ཚོགས་མ་ལུས་སྩོལ་བའི་བཀྲ་ཤིས་ཤོག །ཅེས་ཤིས་པ་བརྗོད་པས་ཀྱང་མཐའ་བརྒྱན་པར་བྱའོ།། ཞེས་པ་འདི་ནི་དུར་བེད་ཏྭ་ཝང་གི་ཤོག་ནས་ལྷག་བསམ་དང་མཁྱེན་དཔྱོད་རྨད་དུ་བྱུང་བ་རྡོ་རམས་པ་བསོད་ནམས་གྲགས་པས། ད་ལྟའི་སྐྱེ་བོ་བློ་ཤིན་ཏུ་རྟུལ་ཞིང་གཡེང་བས་ཁྱེར་བ་རྣམས་ལ་ཕན་པའི་ཐབས་སུ་གདུང་དབྱངས་ཀྱིས་གསོལ་བ་འདེབས་ཚུལ་ཤིན་ཏུ་གཟུང་སླ་བ་ཞིག་དགོས་ཞེས་བསྐུལ་བ་དང༌། རང་གིས་ཀྱང་དེ་རིགས་ལ་ཕན་ནམ་སྙམ་པའི་བློས། ྋབཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།