ཡོན་སྦྱོང་གི་ཆོ་ག་སྒྲིབ་པའི་མུན་སེལ།
ཡོན་སྦྱོང་གི་ཆོ་ག་སྒྲིབ་པའི་མུན་སེལ་ཞེས་བྱ་བ་བཞུགས་སོ།།
ཐུགས་རྗེ་བྱིན་རླབས་འབར་བའི་མེ་འོད་ཀྱིས། །དཀོར་སྒྲིབ་ཉེས་པའི་ཚང་ཚིང་སྲེག་བྱེད་ཅིང༌། །མངོན་མཐོ་ངེས་ལེགས་ལམ་བཟང་གསལ་མཛད་པ། །བཅོམ་ལྡན་ཐུགས་རྗེའི་གཏེར་ཆེན་དེ་ཡིས་སྐྱོངས། །ལྡན་གྲོལ་ཡོན་ཏན་གདེང་ཚད་མི་ལྡན་པར། །འཇུ་དཀའི་དཀོར་ལ་བག་མེད་སྤྱོད་པ་ཡིས། །གཏན་བདེའི་སྲོག་འཕྲོག་ནད་ཀྱིས་ཟིན་པ་རྣམས། །སྐྱོབ་བྱེད་སྨན་གྱི་སྦྱོར་བ་མདོ་ཙམ་སྤེལ། །དེ་ཡང་གཞན་གྱིས་དད་པས་སྦྱིན་པ་ལོངས་སྤྱོད་པའི་ཚུལ་ལ། བདག་པོའི་ཚུལ་གྱིས་སྤྱོད་པ་དང༌། བྱིན་པའི་ཚུལ་དུ་སྤྱོད་པ། བུ་ལོན་གྱི་ཚུལ་དུ་སྤྱོད་པ། ལྕགས་གོང་མེ་ལྕེ་འབར་བའི་ཚུལ་དུ་སྤྱོད་པ་དང་བཞི་མདོ་སྡེ་ལས་གསུངས་པའི་ཕྱི་མ་ནི། ལྕགས་གོང་མེ་ལྕེ་འབར་འདྲ་བ། །ཟོས་པར་གྱུར་པ་ཆེས་སླ་ཡི། །ཚུལ་འཆལ་ཡང་དག་མི་སྡོམ་པས། །ཡུལ་འཁོར་བསོད་སྙོམས་ཟ་བ་མིན། །ཞེས་པ་སྟེ། ད་ལྟ་རང་ཅག་སྡོམ་པ་གསུམ་གྱི་ཁས་ལེན་ཤིན་ཏུ་རྒྱ་ཆེ་ཡང༌། དེའི་བཅས་མཚམས་རྣམ་པར་དག་པ་སྣ་རེ་ཙམ་ཡང་བསྲུང་བ་སེམས་ལ་འཛིན་རྒྱུ་མེད་པར་གསོན་གཤིན་གྱི་དད་ཟས་ལ་བག་མེད་དུ་ལོངས་སྤྱོད་ཅིང༌། ད་དུང་ཡང་ལན་ཚྭའི་ཆུ་བཞིན་ངོམས་པ་མེད་པར་སྲེད་པ་ལྷག་པར་འཕེལ་ཏེ། ཁ་གསག་གཞོག་སློང་སོགས་ཐབས་སྣ་ཚོགས་ཀྱི་སྒོ་ནས་ལོག་པའི་འཚོ་བ་འབའ་ཞིག་བསྒྲུབས་པ་ནི། ཚེ་ཐུང་དགུན་ཉི་ལྟ་བུ་འདི་ཡུད་ཀྱིས་ཟད་དེ། འབད་པས་བསྒྲུབས་པའི་དཀོར་ཟས་ཐམས་ཅད་རྨི་ལམ་གྱི་དགའ་སྟོན་ལྟར་དྲན་པའི་ཡུལ་དུ་བཞག །དེའི་སྒྲིབ་པ་ཐམས་ཅད་སེམས་སྟེང་དུ་ཁུར་ཏེ་དམྱལ་བའི་གཏིང་དུ་ཕྱིན་ནས་ལོ་གྲངས་བྱེ་བ་ཕྲག་ཁྲིག་མང་པོར་ཁྲོ་ཆུ་ཁོལ་མའི་བཏུང་བ་དང༌། ལྕགས་ཀྱི་ཐུ་ལུམ་འབར་བ་ཟས་སུ་
ཟ་དགོས་པས། རང་ལ་རང་གཅེས་པར་འཛིན་པ་རྣམས་ཀྱིས་རབ་དཀོར་སྒྲིབ་ཚན་པོ་ཆེས་མ་གོས་པ་དང༌། མ་མཐའ་ཡང་དཀོར་སྒྲིབ་སྦྱོང་བའི་ཐབས་མ་ནོར་བ་རེ་ལ་འབད་པར་བྱེད་དགོས་སོ། །དེ་ཡང་སྤྱིར་སྟོན་པ་ཐུགས་རྗེ་ཅན་གྱིས་དཀོར་སྦྱོང་བའི་རིམ་པ་དུ་མ་ཞིག་གསུངས་ལ། ཁྱད་པར་དུ་བྱ་སླ་ཞིང་དོན་ཆེ་བར་གཟིགས་ཏེ་དེ་བཞིན་གཤེགས་པ་རིན་ཆེན་འོད་ཀྱི་རྒྱལ་པོ་མེ་འོད་རབ་ཏུ་གསལ་བའི་མཚན། ན་མཿ ས་མནྟ་པྲ་བྷ་རཱ་ཛཱ་ཡ་ཞེས་སོགས་ཡོན་སྦྱོང་གི་གཟུངས་དང་བཅས་པ་གསུངས་ལ། ན་མོ་བྷ་ག་ཝ་ཏེ། སུ་མེ་རུ་ཀལྤ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀ་སཾ་བུདྡྷཱ་ཡ། ཏངྱ་ཐཱ། ཨོཾ་ཀལྤེ་ཀལྤེ། མཧཱ་ཀལྤེ། ཀལྤེ་པ་རི་ཤོ་དྷ་ནི་སྭཱཧཱ། ཞེས་གཟུངས་རྐྱང་པ་གཅིག་ཀྱང་གསུངས་སོ། །འགྱུར་ཕལ་ཆེར་དུ་ཀུན་ནས་འོད་ཀྱི་རྒྱལ་པོ་ཞེས་པ་ཙམ་ལས་མི་འབྱུང་ཡང༌། ལྟུང་བཤགས་ཀྱི་ལྷ་སོ་ལྔའི་ནང་གི་རིན་ཆེན་མེ་ཡིན་པར་མངོན་ཏེ། རྒྱལ་ཚབ་རྗེས་ཇོ་བོའི་གསུང་རྒྱུན་ལྟར་མཚན་གྱི་ཕན་ཡོན་བཀོད་པ་ལས། རིན་ཆེན་མེས་དགེ་འདུན་གྱི་དཀོར་ལ་འབག་པའི་སྡིག་པ་འདག་གོ །ཞེས་གསུངས་པ་དང༌། མདོ་འདིའི་ཕན་ཡོན་དུ།ཡོན་མང་པོ་ལ་སྤྱད་པ་ཡང་བྱང་བར་འགྱུར་རོ། །ཡོན་བདག་དེའི་ཡོན་ཡོངས་སུ་འཕེལ་བར་འགྱུར་ཞིང་ཚོགས་ཐམས་ཅད་ཡོངས་སུ་རྫོགས་པར་འགྱུར་རོ། །ཞེས་གསུངས་པ་གཉིས་དོན་འདྲ་བར་སྣང་ངོ༌། །དེ་ལྟར་ན་ཀུན་ནས་འོད་ཀྱི་རྒྱལ་པོ་ཞེས་པ་ཞིང་གི་སྒོ་ནས་བཏགས་པ་ཡིན་ལ། རིན་ཆེན་མེའམ། མེ་འོད་རབ་ཏུ་གསལ་བ་ཞེས་པ་མཚན་དངོས་ཡིན་ཏེ། མེ་ཏོག་གི་ཚོགས་ཀྱི་མདོ་ལས། བྱང་ཕྱོགས་སུ་སངས་རྒྱས་ཀྱི་ཞིང་བྱེ་བ་བརྒྱ་སྟོང་གི་ཐ་མ་ན་འཇིག་རྟེན་གྱི་ཁམས་ནོར་བུ་སྣང་བ་ཅན་ཞེས་བྱ་བ་ན། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཞེས་བྱ་བ་བཞུགས་ཏེ། ཞེས་གསུངས་པས། འོད་དང་སྣང་བ་རྣམ་གྲངས་སུ་བྱས་པར་མངོན། སྟོན་ཚུལ་དེ་འདྲ་བ་མང་སྟེ། མདོ་དེར་རྡོ་རྗེ་སྙིང་པོས་རབ་ཏུ་འཇོམས་པའི་མཇུག་ཐོགས་སུ། རིན་ཆེན་མེ་དང་རིན་ཆེན་ཟླ་འོད་གཉིས་གསུངས་པ་ལྟ་བུ་ལྟུང་བཤགས་ཀྱི་ལྷ་ཚོགས་རགས་རིམ་ཞིག་ཐོར་བུ་ཐོར་བུར་གསུངས་ལ། དང་པོ་ཡང་རྡོ་རྗེའི་སྙིང་པོ་ཅན་ཞེས་པ་ཞིང་དང་། རྡོ་རྗེ་རབ་ཏུ་འཇོམས་པ་ཞེས་པ་མཚན་དངོས་ཡིན་པར་གསུངས་ཀྱང། ཕུང་པོ་གསུམ་པའི་མདོར་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བསྡུས་ནས་གསུངས་པ་བཞིན་ནོ། །དེས་ན་མགོན་པོ་འདི་ཉིད་ལ་བརྟེན་ནས་དཀོར་གྱི་སྒྲིབ་པ་སྦྱོང་བའི་ཐབས་ཟབ་མོ་ཉམས་སུ་ལེན་པ་ལ། ཐོག་མར་འདི་ཉིད་ཀྱི་སྐུ་བརྙན་ཟུར་པའམ། ལྟུང་བཤགས་ཀྱི་བྲིས་ཐང་ལྟ་བུའི་མདུན་དུ་མཆོད་པ་ལེགས་པར་བཤམ། སྐྱབས་སེམས་སྔོན་དུ་བཏང་ལ། ༈ རང་གི་མདུན་དུ་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་མཐོ་ཞིང་ཡངས་པའི་སྟེང་དུ་པདྨ་དང་ཟླ་བའི་གདན་ལ་བཅོམ་ལྡན་འདས་དེ་བཞིན་གཤེགས་པ་རིན་ཆེན་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་སྐུ་མདོག་དམར་པོ་ཞལ་གཅིག །ཕྱག་གཉིས་གཡས་ས་གནོན་དང་གཡོན་མཉམ་གཞག་གི་ཕྱག་རྒྱ་མཛད་པ། སྐུ་ལ་ཆོས་གོས་ངུར་སྨྲིག་གི་མདོག་ཅན་གསུམ་མཛེས་པར་གསོལ་བ། མཚན་དཔེས་བརྒྱན་པ་དྭངས་གསལ་འོད་ཀྱི་རང་བཞིན་ཅན། སྐུ་ལས་སྐྱེས་པའི་འོད་ཀྱི་ཕུང་པོའི་དཀྱིལ་ན་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། བྱང་ཕྱོགས་ནོར་བུ་སྣང་བ་ཅན་གྱི་ཞིང་ཁམས་ནས་
དེ་བཞིན་གཤེགས་པ་རིན་ཆེན་མེ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའ། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། དཀོར་སྒྲིབ་ཉེས་ལྟུང་ཁུར་གྱིས་ནོན་པ་ཡིས། །སྲིད་མཚོའི་གཏིང་དུ་བྱིང་བའི་ཉམ་ཐག་རྣམས། །བྱིན་རླབས་གྲུ་གཟིངས་མཆོག་གིས་སྒྲོལ་བའི་གཉེན། །བདེ་གཤེགས་རིན་ཆེན་མེ་ལ་ཕྱག་འཚལ་ལོ། །ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱི་འོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང༌། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་
དམ་པ་དང༌། །སིལ་སྙན་རྣམས་དང་བྱུག་པ་གདུགས་མཆོག་དང༌། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང༌། །ཕྱེ་མ་ཕུར་མ་རི་རབ་མཉམ་པ་དང༌། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ན། །ལུས་དང་ངག་དང་དེ་བཞིན་ཡིད་ཀྱིས་ཀྱང༌། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཁྱད་པར་འདོད་ལ་སྲེད་པའི་དབང་གྱུར་ཏེ། །མཆོག་གསུམ་དཀོར་དང་དད་པས་བྱིན་པའི་རྫས། །བག་མེད་སྤྱད་པས་བུ་ལོན་ཆགས་པ་ཀུན། །གདུངས་པས་འགྱོད་པ་དྲག་པོས་མཐོལ་ཞིང་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང༌། །འགྲོ་བ་ཀུན་གྱི་བསོད་ནམས་གང་ལ་ཡང༌། །དེ་དག་ཀུན་གྱི་རྗེས་སུ་བདག་ཡི་རང༌། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་རྣམས། །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་
བཞུགས་པར་ཡང༌། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང༌། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཆེན་པོར་བསྔོ། །ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །ལན་གང་མང༌། དེ་ནས། སྟོན་པ་ཐུགས་རྗེ་ཆེན་པོ་དང་ལྡན་པ་བདག་ལ་དགོངས་སུ་གསོལ། བདག་གིས་ཐོག་མེད་ནས་བསགས་པའི་སྡིག་ལྟུང་ཐམས་ཅད་དང༌། ཁྱད་པར་དུ་མཆོད་རྟེན་གྱི་དཀོར་རམ་དགེ་འདུན་གྱི་དཀོར་དང༌། གསོན་གཤིན་གྱི་དད་རྫས་སོགས་ལ་བག་མེད་པར་ལོངས་སྤྱད་པའི་ཉེས་པ་དཔག་ཏུ་མེད་པ་རྣམས། སངས་རྒྱས་བཅོམ་ལྡན་འདས་ཡེ་ཤེས་སུ་གྱུར་པ། སྤྱན་དུ་གྱུར་པ། དཔང་དུ་གྱུར་པ། ཚད་མར་གྱུར་པ། མཁྱེན་པས་གཟིགས་པ་ཁྱེད་ཀྱི་སྤྱན་སྔར་མཐོལ་ལོ། །མི་འཆབ་བོ། །འཆགས་སོ། །སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ། །མགོན་པོ་ཁྱོད་ཀྱི་ཐུགས་རྗེ་བྱིན་རླབས་བསམ་གྱིས་མི་ཁྱབ་པའི་སྟོབས་ཀྱིས་བྱང་ཞིང་དག་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་
པས། དེའི་ཐུགས་ཀར་ཟླ་བ་ལ་གནས་པའི་ཧཱུཾ་ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་བདུད་རྩི་སྣ་ལྔ་འོད་ཟེར་དང་བཅས་པའི་རྒྱུན་བབས། རང་གི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་ཐོག་མེད་ནས་བསགས་པའི་དཀོར་སྒྲིབ་ཉེས་ལྟུང་ཐམས་ཅད་བྱང་ཞིང་དག །རྒྱལ་བ་སྲས་བཅས་ཀྱི་བྱིན་རླབས་མ་ལུས་པ་ཐོབ་པར་གྱུར་པར་བསམས་ལ། ན་མཿ ས་མནྟ་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀ་སཾ་བུདྡྷཱ་ཡ། ན་མོ་མཉྫུ་ཤྲི་ཡེ། ཀུ་མཱ་ར་བྷཱུ་ཏཱ་ཡ། བོ་དྷི་སཏྭཱ་ཡ། མཧཱ་སཏྭཱ་ཡ། མཧཱ་ཀཱ་རུ་ཎི་ཀཱ་ཡ། ཏངྱ་ཐཱ། ཨོཾ་ནི་རཱ་ལམྦེ་ནི་རཱ་བྷཱ་སེ། ཛ་ཡེ་ཛ་ཡེ་ལབ་དྷེ། མཧཱ་མ་ཏེ་དཀྵེ་དཀྵི་ཎཱཾ་མེ་པ་རི་ཤོདྷཱ་ཡ་སྭཱཧཱ། ཞེས་བཟླས་པ་ཅི་འགྲུབ་བྱ། མཇུག་ཏུ་ཡི་གེ་བརྒྱ་པས་ལྷག་ཆད་བསྐང༌། དཀོར་སྒྲིབ་ཉེས་ལྟུང་ཁུར་གྱིས་ནོན་པ་ཡིས། །སྲིད་མཚོའི་གཏིང་དུ་བྱིང་བའི་ཉམ་ཐག་རྣམས། །བྱིན་རླབས་གྲུ་གཟིངས་མཆོག་གིས་སྒྲོལ་བའི་གཉེན། །བདེ་གཤེགས་རིན་ཆེན་མེ་ལ་ཕྱག་འཚལ་ལོ། །དངོས་བཤམས་ཡིད་སྤྲུལ་མཆོད་པ་མ་ལུས་འབུལ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །སྐྱེ་འཕགས་དགེ་བ་རྣམས་ལ་རྗེས་ཡི་རང༌། །འཁོར་བ་མ་སྟོངས་བར་དུ་ལེགས་བཞུགས་ནས། །འགྲོ་ལ་ཆོས་ཀྱི་འཁོར་ལོ་བསྐོར་བར་བསྐུལ། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །དེང་ནས་ཇི་སྲིད་བྱང་ཆུབ་སྙིང་པོའི་བར། །འདྲེན་པ་མཆོག་གིས་འབྲལ་མེད་རྗེས་བཟུང་ནས། །ལས་ཉོན་སྒྲིབ་པའི་དྲི་མ་དྲུངས་ཕྱུང་སྟེ། །ཡང་དག་ལམ་བཟང་སྐྱེ་བར་བྱིན་གྱིས་རློབས། །
ཞེས་གསོལ་བ་བཏབ་པས་འོད་ཀྱི་རྣམ་པར་ཞུ་སྟེ་རང་གི་སྨིན་མཚམས་ནས་ཐིམ་པར་གྱུར་པར་བསམས་ལ་བསྔོ་སྨོན་གྱིས་མཐའ་བརྒྱན་པར་བྱའོ། །འདིའི་ཕྱག་མཚན་ཀླུ་སྒྲུབ་ཀྱིས་མཛད་པར་གྲགས་པའི་ལྟུང་བཤགས་ཀྱི་འགྲེལ་པ་ལས། རིན་པོ་ཆེ་དང་མེའི་དཀྱིལ་འཁོར་བསྣམས་པ་ནི་རིན་ཆེན་མེ་སྟེ་ཞེས་འབྱུང་ཡང༌། ཛེ་ཏཱ་རིའི་ལྟུང་བཤགས་ཀྱི་ཊཱིཀྐ་དང༌། ནག་པོ་པའི་ཕུང་པོ་གསུམ་པའི་སྒྲུབ་ཐབས་སོགས་སུ་དེ་དང་སྒོ་བསྟུན་པའི་ཟུར་ཙམ་ཡང་མ་བྱུང་ལ། ས་པཎ་གྱིས་སྡོམ་གསུམ་རབ་དབྱེར་བཀག་ཅིང༌། རྗེ་བླ་མས་ཀྱང་དེ་ལ་ཚད་མར་མ་མཛད་པར་རང་གི་གཟིགས་སྣང་དང་བསྟུན་ནས་བཟང་སྐྱོང་བ་སོགས་ལ་གསུངས་པ་བཞིན། ལྷོ་བྲག་གྲུབ་ཆེན་གྱི་ལྟུང་བཤགས་ཆོ་གར་ཡང་བཀོད་སྣང་བས་སོ། །འགྲེལ་པ་དེ་ནི་༸རྒྱལ་དབང་བསྐལ་བཟང་རྒྱ་མཚོས་ཀླུ་སྒྲུབ་ལ་ཁ་གཡར་བའི་བོད་གཞུང་ཞིག་ཡིན་པར་གསུངས་པ་ལྟར་འཐད་དེ། འགྲེལ་པ་དེ་ཉིད་དུ། ཤར་ལྷོ་ཀླུ་ཡིས་ཁྱབ་པའི་ཞིང་ན་ཀླུ་དབང་གི་རྒྱལ་པོ་སྟེ་སྔོན་པོ་ཀླུ་ཤིང་དང་སྦྲུལ་སྔོན་པོ་བསྣམས་པའོ། །ཞེས་བཤད་པ་ཀླུ་སྒྲུབ་ཀྱི་གསུང་གཞན་དང་མི་མཐུན་ཞིང༌། ཀླུ་དབང་རྒྱལ་པོའི་ཞིང་ཡང་སྦྲང་རྩི་ཅན་དུ་མེ་ཏོག་གི་ཚོགས་ཀྱི་མདོ་ལས་གསུངས་པ་བཞིན་དམ་པ་གོང་མ་རྣམས་ཀྱང་དགོངས་པ་མཐུན་པས་ཤེས་པར་ནུས་སོ།། ཕྱི་དུས་མུ་མཐའ་ཡས་པའི་བསྐལ་པ་རུ། །བཟོད་དཀའི་རྣམ་སྨིན་ཁུར་ཆེན་འཁྱེར་དཀའ་བས། །དེང་དུས་དལ་འབྱོར་ཚང་བའི་གནས་སྐབས་འདིར། །གཏན་གྱི་བདེ་བ་སྒྲུབ་ལ་འབད་པར་རིགས། །དེ་ཕྱིར་སྒྲིབ་པ་སྦྱོང་བའི་ཐབས་ཀྱི་མཆོག །གཟུངས་མདོའི་ཆོ་ག་ལག་ཏུ་བླང་བའི་ཚུལ། །བཀོད་པའི་དགེ་བས་ངན་སོང་སྒོ་བཀག་སྟེ། །བདེ་ཆེན་ཐར་པའི་ས་ལ་རེག་གྱུར་ཅིག །
ཅེས་ཡོན་སྦྱོང་གི་ཆོ་ག་སྒྲིབ་པའི་མུན་སེལ་ཞེས་བྱ་བ་འདི་ནི་ཨོར་ཏུ་སུའི་ཤོག་ནས་ལྷག་བསམ་རྣམ་དཔྱོད་མཆོག་ཏུ་ཡངས་པ་སྨན་པ་བླ་ཟུར་བློ་བཟང་ཡོན་ཏན་གྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་དགེ་སློང་དཀོན་མཆོག་ཀུན་དགའོ།། །།