འཕགས་མཆོག་འཇམ་དཔལ་ནག་པོ་ལ་བརྟེན་པའི་སྦྱིན་སྲེག་སོགས།
འཕགས་མཆོག་འཇམ་དཔལ་ནག་པོ་ལ་བརྟེན་པའི་སྦྱིན་སྲེག་གི་ཆོ་ག་ཉེས་པ་ཀུན་སེལ། རི་ཁྲོད་ལྷ་མོ། ཆོས་རྒྱལ་གསང་སྒྲུབ། འཇིགས་བྱེད་ཆོས་རྒྱལ་སྦྲགས་པ། སེང་གདོང་མ། ལྷ་མོ་བཅས་ཀྱི་བསྙེན་པ་བྱེད་ཚུལ་བཅས་བཞུགས་སོ། །
རབ་འབྱམས་རྒྱལ་བའི་ཡེ་ཤེས་འབར་བའི་འོད། །སྤྲོས་བྲལ་དབྱིངས་དང་རོ་གཅིག་ཞུགས་པ་ཡི། །རང་མདངས་བཻ་ཌཱུརྱ་སྣང་གཟུགས་ཀྱི་སྐུའ། །རྣམ་རོལ་འཇམ་དཔལ་དཔའ་བོས་དགེ་ལེགས་སྩོལ། །ཕྱི་ནང་བླ་མེད་སྦྱིན་སྲེག་ཆོ་ག་ཡི། །ལས་ཉོན་སྒྲིབ་པའི་དུག་ཚེར་ཀུན་གཞོམ་ཞིང༌། །དངོས་གྲུབ་རིན་ཆེན་གཏེར་གྱི་སྒོ་འབྱེད་པར། །གསུང་ཕྱིར་དམ་པའི་གསུང་བཞིན་སྤེལ་བར་བྱ།། དེ་ཡང་དཔལ་ལྡན་ས་སྐྱ་པ་རྣམས་ཀྱི་ཐུགས་དམ་ཟབ་མོ་ཤིན་ཏུ་གསང་ཞིང་ཐུགས་གཙིགས་ཆེ་བའི་གསེར་ཆོས་བླ་ན་མེད་པ་མཛད་པ་བཅོམ་ལྡན་འདས་འཇམ་དཔལ་ནག་པོའི་སྦྱིན་སྲེག་ཇི་ལྟར་བྱ་བའི་ཚུལ་འཆད་པ་ལ། ཐོག་མར་ལྷ་འདི་ལ་གཙོ་བོར་བརྟེན་ནས་དངོས་གྲུབ་སྒྲུབ་པར་འདོད་པ་རྣམས་ཀྱིས་འདིའི་སྦྱིན་སྲེག་སོགས་ལའང་ནན་ཏན་བྱེད་དགོས་ཏེ། སམ་བྷུ་ཊ་ལས། སྦྱིན་སྲེག་ལྷ་རྣམས་ཚིམ་པར་བྱེད། །ཚིམ་པ་ལས་ནི་དངོས་གྲུབ་སྩོལ། །སྔགས་ནི་ལྷག་གམ་མ་ཚང་ན། །ཐམས་
ཅད་སྦྱིན་སྲེག་དག་གིས་སྐོང༌། །ཞེས་དང༌། སྡོམ་འབྱུང་ལས། མེ་ལྷའི་ཁར་ནི་ངེས་པར་ལྷ། །སྦྱིན་སྲེག་དངོས་གྲུབ་རབ་ཏུ་སྟེར། །ཞེས་གསུངས་ཤིང༌། ཁ་སྦྱོར་སོགས་དུ་མར། ལྷ་ཡི་ཁ་ནི་མེ་རུ་གསུངས། །ཞེས་སོགས་ཀྱིས་སྦྱིན་སྲེག་ནི་ལྷ་རྣམས་མཆོད་པའི་སྒོ་མཆོག་ཏུ་གྱུར་པ་དང་དངོས་གྲུབ་སྒྲུབ་པའི་ཐབས་ཕུལ་ཏུ་ཕྱིན་པར་གསུངས་ལ། དེར་མ་ཟད་ལྷག་པའི་ལྷ་གང་ཡིན་ཀྱང༌། དེའི་བྱིན་རླབས་རང་རྒྱུད་ལ་ཉེ་བར་བྱེད་པའི་བསྙེན་པ་གལ་ཆེ་བར་དམ་པ་ཐམས་ཅད་དགོངས་པ་མཐུན་ཞིང༌། དེ་ལྟར་ཡིན་ན་བསྙེན་པ་དེའི་ཆད་ལྷག་སོགས་ཀྱི་ཉེས་པ་སྦྱོང་ཞིང༌། ནུས་པ་བསྐྱེད་པའི་སྦྱིན་སྲེག་ཀྱང་དགོས་པར་མཚུངས་སོ། །དེས་ན་ཀུན་གཟིགས་ལྔ་པ་ཆེན་པོས་འདི་ལ་མཆོད་བསྟོད་དབང་བསྐུར་རྒྱས་གདབ་སོགས་ཀྱི་སྤྲོས་པ་བྱས་པར་དགག་བཞག་གནང་བ་ཡང༌། དམ་པའི་མན་ངག་མི་ཤེས་པ་ཁ་ཅིག་གིས་དེ་འདྲ་མེད་པའི་ཡིག་རྙིང་སོགས་མ་དག་པའི་གྲངས་སུ་བཅུག་སྟེ། མཐའ་གཅིག་ཏུ་དེ་ཐམས་ཅད་བྱེད་དགོས་པར་བཤད་པ་བཀག་པ་ཡིན་གྱི། དེ་འདྲ་
མི་རུང་བ་མིན་ཏེ། དཔེར་ན་ཡིག་དྲུག་ལྟ་བུ་སྤྱོད་ལམ་གང་གི་སྐབས་སུ་ཡང་བཟླས་ཆོག་པར་གསུངས་ན་ཡང༌། ཁྲུས་དང་གཙང་སྦྲ་སྨྱུང་བར་གནས་པ་སོགས་ཀྱི་སྒོ་ནས་བཟླས་ན་ལྷག་པར་ནུས་པ་ཆེ་བ་བཞིན་ནོ། །དེ་ནས་ཐོག་མར་བདག་བསྐྱེད་ནི། སྐྱབས་སེམས་སྔོན་དུ་བཏང་ལ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་སྣ་ཚོགས་པངྨའི་ལྟེ་བར་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་རང་གི་སེམས་ཉིད་དྷཱིཿ མཐིང་ནག་ལས་རལ་གྲི་འབར་བ་དྷཱིཿ ས་མཚན་པ། དེ་ལས་འོད་ཟེར་འཕྲོས། དོན་གཉིས་བྱས། ཚུར་འདུས་ཡོངས་སུ་གྱུར་པ་ལས། རང་ཉིད་རྗེ་བཙུན་འཇམ་དཔལ་སྐུ་མདོག་མཐིང་ག །ཞལ་གཅིག །ཕྱག་གཉིས། གཡས་རལ་གྲི་འབར་བ་ནམ་མཁའ་ལ་འཕྱར་ཞིང༌། གཡོན་མཐེབ་སྲིན་གྱིས་ཐུགས་ཀར་ཨུཏྤ་ལའི་ཡུ་བ་བསྣམས་པའི་འདབ་མ་སྙན་གྱི་ཐད་ཀར་ཁ་ཕྱེ་བའི་སྟེང་ན་ཤེར་ཕྱིན་གྱི་པོ་ཏི་འཛིན་པ། རིན་པོ་ཆེ་དང་རུས་པའི་རྒྱན་གྱིས་བརྒྱན་ཅིང༌། དར་སྣ་ཚོགས་ཀྱི་ན་བཟའ་གསོལ་བ། སྐུ་རྔམ་བརྗིད་དང་ལྡན་ཞིང༌། ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན། ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་དང་དབང་གི་ལྷ་རྣམས་སྤྱན་དྲངས། ཡེ་ཤེས་པ་ཛཿ ཧཱུཾ་བཾ་ཧོཿ གཉིས་སུ་མེད་པར་
གྱུར། དབང་གི་ལྷ་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་དབང་གི་ཆུས་སྤྱི་བོ་ནས་དབང་བསྐུར་སྐུ་གང༌། དྲི་མ་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། མི་བསྐྱོད་པས་དབུ་བརྒྱན་པར་གྱུར། མཆོད་པ་རྣམས་བསང་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས་རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའ་དང་མཉམ་པར་གྱུར། ཨོཾ་ཨརྒྷཾ་ཨཱཿ ཧཱུཾ། ནས། ཤཔྟ་ཨཱཿ ཧཱུཾ། གི་བར་གྱི་བྱིན་གྱིས་བརླབས། ཨོཾ་མཉྫུ་ཤྲཱི་ཀཱ་ལ་ཡ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ནས། ཤཔྟ་པྲ་ཏཱིཙྪ་སྭཱཧཱའི་བར་གྱིས་མཆོད། དུས་གསུམ་རྒྱལ་བའི་གསང་གསུམ་གཅིག་བསྡུས་པ། །མིག་སྨན་མདངས་ཅན་མཁྱེན་བརྩེ་ནུས་པའི་གཏེར། །བྱིན་རླབས་དངོས་གྲུབ་མཆོག་སྩོལ་ལྷག་པའི་ལྷ། །འཇམ་དཔལ་ཁྱོད་ཀྱི་སྐུ་གསུང་ཐུགས་ལ་བསྟོད། །གང་གི་ཞབས་རྡུལ་གུས་པས་བསྟེན་པ་རྣམས། །གདོན་གསུམ་གནོད་པའི་དཔུང་གིས་མི་བརྫི་ཞིང༌། །ཉམས་གྲིབ་དྲི་མ་མཐའ་དག་བྱང་བྱེད་པའ། །བྱིན་རླབས་གཏེར་ཆེན་ཁྱེད་ལ་གསོལ་བ་འདེབས། །རྩེ་གཅིག་ཡིད་ཀྱིས་ལྷག་པའི་ལྷར་བསྟེན་ན། །དམིགས་མེད་ཐུགས་རྗེ་
མཆོག་གིས་ཉེར་དགོངས་ཏེ། །ཕྱི་དང་ནང་གི་ཉེར་འཚེ་ཀུན་ཞི་ཞིང༌། །མཆོག་ཐུན་དངོས་གྲུབ་མ་ལུས་གྲུབ་པར་མཛོད། །རང་གི་ཐུགས་ཀར་ཉི་གདན་ལ་དྷཱིཿ ཡིག་མཐིང་ནག་གི་མཐར་སྔགས་ཀྱི་ཕྲེང་བ་ཁ་དོག་ནག་པོས་བསྐོར་བ་ལས་འོད་ཟེར་དམར་པོ་མེ་འོད་ལྟ་བུ་འཕྲོས། མི་དང་མི་མ་ཡིན་པའི་གནོད་འཚེ་བསམ་ངན་སྦྱོར་རྩུབ་གྲིབ་དང་མི་གཙང་བ་ཐམས་ཅད་བྱང་ཞིང་དག་པར་གྱུར་པར་བསམས་ལ། ཨོཾ་པྲ་སོད། ཆུ་སོད། དུར་ཏ་སོད། སྙིང་མགོ་ལ་ཆོད། ཁ་ལ་ཛཿ ཀཾ་ཤཾ་ཏྲི་རྦད་ཕཊ་སྭཱཧཱ། ཞེས་པ་འདི་རྩ་སྔགས་ཡིན་པས་ཅི་རིགས་པར་སྐབས་སུ་བབས་པའི་སྤྲོ་བསྡུའི་དམིགས་པ་དང་བཅས་ཏེ་བཟླའོ། །འདི་ལ་སྔགས་གསུམ་ཡོད་པ་ལས། ཛ་ཡན་ཆད་འདྲ་བ་ལ། ཤ་ཀཾ་ཤཾ་ཊཾ་ཊ་ཊཾ་རྦད་སྭཱཧཱ། ཞེས་པ་དང༌། ཡང་ན། ཤཾ་ཀཾ་སྭཱཧཱ། ཞེས་པ་སྟེ་འོན་ཀྱང་དམ་པ་གོང་མ་རྣམས་སྔགས་དང་པོ་གཙོ་བོར་མཛད། རོ་ལངས་ཀྱི་གནོད་པ་ཟློག་བྱེད། དུར་མི་སོད། ཞེས་པ། དུར་ཏ་སོད། ཅེས་པའི་མཇུག་ཏུ་སྦྱར་ཀྱང་རུང་ལ་མ་བཞག་ཀྱང་ཆད་པའི་ཉེས་པར་མི་འགྱུར་ཞེས་པཎ་ཆེན་ཐམས་ཅད་མཁྱེན་པ་དཔལ་ལྡན་ཡེ་ཤེས་གསུངས། བཟླས་པའི་མཇུག་ཏུ་ཡིག་བརྒྱས་ལྷག་ཆད་ཁ་བསྐང་ཞིང་མཆོད་བསྟོད་བྱ། གཏོར་མ་འབུལ་བར་འདོད་ན་གཏོར་མ་བསང་སྦྱངས་བདུད་རྩིར་བྱིན་གྱིས་བརླབས་ལ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། འཇམ་དཔལ་ནག་པོའི་ལྷ་ཚོགས་མདུན་གྱི་ནམ་མཁར་སྤྱན་དྲངས། ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། མཚན་སྔགས་ལ། ཨ་ཀཱ་རོ་བཏགས་པ་ལན་གསུམ་གྱིས་གཏོར་མ་འབུལ། བསྟོད་པའི་མཇུག་གི་ཚིགས་བཅད་ཕྱི་མས་འདོད་དོན་ལ་གསོལ་བ་གདབ། དེ་ནས་སྦྱིན་
སྲེག་བྱ་བ་ལ། ཆོ་ག་སྦྱོར་དངོས་རྗེས་གསུམ་ལས། དང་པོ་ནི། སྟེགས་བུ་གྲུ་བཞི་པ་ལ་དཀར་རྩི་བཏབ། ཐོག་མར་ཚངས་ཟུར་གྱི་ཐིག་བཏབ། ཐིག་སྐུད་ཁྲུ་ཕྱེད་པ་གཅིག་གིས་དབུས་ནས་ཟླུམ་པོར་བསྐོར། དེ་ལ་སོར་བཞི་བསྣན་ནས་ཟླུམ་སྐོར་དང༌། སླར་ཡང་སོར་བཞི་བསྣན་ནས་ཟླུམ་པོར་བསྐོར་བར་བྱའོ། །དེ་ནས་ཚངས་ཐིག་གི་སྟེང་ནས་སོར་གཉིས་ཕྱིར་གཞལ་བའི་མཚམས་སུ་བྱ་རྗེས་བཙལ་ཏེ་ཟུར་ཐིག་ནས་ཟུར་ཐིག་གི་བར་ལ་ཐིག་སྐུད་བརྐྱངས་ནས་གྲུ་བཞིར་གདབ། ཟུར་བཞིར་ཟླ་ཕྱེད་རྡོ་རྗེ། ཕྱིའི་ཁ་ཁྱེར་ལ་རྡོ་རྗེའི་ཕྲེང་བ། ཐབ་ཀྱི་དབུས་སུ་པདྨ་དཀར་པོ་འདབ་མ་བརྒྱད་པའི་ལྟེ་བར་རལ་གྲི། ཟླུམ་ཐིག་ནང་མའི་སྟེང་ནས་བུད་ཤིང་སྐམ་པོའམ། དགོན་པའི་བ་ལང་གི་ལྕི་བ་སྲོག་ཆགས་མེད་པ་ཟླུམ་པོར་བརྩིགས། གཡས་ཕྱོགས་སུ་འཇིག་རྟེན་པའི་ལྷ་ལ་འབུལ་རྒྱུའི་མཆོད་གཏོར་དང༌། ཡམ་ཤིང་སོགས་རྫས་ཆེན་བཅུ་གཉིས་དང་ཁྱད་པར་གྱི་རྫས་གང་འབྱོར་དང༌། དེའི་ཕྱི་རོལ་ཏུ་འཇིག་རྟེན་པའི་མཆོད་གཏོར་བསྲེགས་རྫས་རྣམས་བཀོད། གཡོན་ཕྱོགས་སུ་པདྨ་འདབ་བརྒྱད་དཀར་པོ་བྲིས་པ་ཆུ་བཞི་དང་བཟེད་ཞལ་བསང་གཏོར་གྱི་ཀུ་ཤའི་ཆུན་པོ་བཅས་དགོད། གཡས་ཕྱོགས་སུ་རྡོར་དྲིལ་དགང་གཟར་བླུགས་ཁ་སྦྱར་ལས་བུམ་སོ་རྩི་གོས་ཟུང་དཔལ་འབར་རླུང་གཡབ་ཀུ་ཤ་འཐོར་ནས་སོགས་ཉེ་བར་མཁོ་བའི་ཡོ་བྱད་ཚོགས་པར་བྱས་ཏེ། རང་ཉིད་ཁ་ཤར་དུ་ཕྱོགས་པས་སྟན་བདེ་བ་ལ་པདྨའི་འདུག་སྟངས་ཀྱིས་འཁོད་ནས་བསང་ཆུ་ལ་དམིགས་ཏེ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ལན་བདུན་དང་མཆོད་རྫས་རྣམས་ལ་གཡས་སྐོར་གྱིས་ལན་གསུམ་བསངས། མཆོད་པ་རྣམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་རིན་
པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། ཞལ་བསིལ། བསང་གཏོར། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། གཞན་ཡང་འཕན་གདུགས་རྒྱལ་མཚན་ལ་སོགས་པ་བསམ་གྱིས་མི་ཁྱབ་པ་དཔལ་ཀུན་ཏུ་བཟང་པོའི་མཆོད་སྤྲིན་ལྟ་བུ་དྭངས་ཤིང་ཐོགས་པ་མེད་པ་ནམ་མཁའི་ཁམས་གང་བ་འདི་ཉིད་བཅོམ་ལྡན་འདས་རྗེ་བཙུན་འཇམ་དཔལ་དབྱངས་ཀྱི་ལྷ་ཚོགས་འཁོར་དང་བཅས་པ་རྣམས་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཨོཾ་ཨརྒྷཾ་ཨཱཿ ཧཱུཾ། ནས། ཤཔྟ་ཨཱཿ ཧཱུཾ། གི་བར་བརྗོད། ནམ་མཁའ་མཛོད་ཀྱི་ཕྱག་རྒྱ་བྱས་ལ། ན་མཿ སརྦ་བུདྡྷ་བོ་དྷི་སཏྭཱ་ནཾ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨ་ཝ་རྟ་ཡ་ཨ་ཝ་རྟ་ཡ་ཧོཿ བཛྲ་སྥ་ར་ཎ་ཁཾ། མཐར་སེ་གོལ་དང་བཅས་དགྲོལ་བ་གསུམ། ལག་པ་རྡོ་རྗེ་ཁུ་ཚུར་ལས་གུང་མོ་གཉིས་རྩེ་སྤྲད་པའི་ཕྱག་རྒྱས་བསྲེག་རྫས་རྣམས་ལ་སྟོན་ཅིང༌། ཨོཾ་སྭཱཧཱ། ཞེས་པས་བསྲེག་རྫས་རྣམས་སྤྱིར་བཀྲུས་པར་བསམ། ཨོཾ་ཨཱཿ སྭཱཧཱས་ཡཾ་ཤིང་དང༌། ཨོཾ་ཤྲཱི་སྭཱཧཱས་ཞུན་མར་དང༌། ཨོཾ་ཛྲིཾ་སྭཱཧཱས་འབྲུ་དང༌། ཨོཾ་ཀུ་རུ་སྭཱཧཱས་གཞན་པའི་རྫས་རྣམས་སྦྱངས་པར་བསམས། རྫས་རྣམས་ཀྱི་མཚན་ཉིད་དང་མི་ལྡན་པའི་ཉེས་སྐྱོན་ཐམས་ཅད་སྦྱངས་ཤིང་དག་ནས་ཕྱིའི་བདུད་རྩི་ལྔའི་ངོ་བོར་གྱུར། མེ་གང་ཡང་རུང་བ། ཨོཾ་ཨཱཿ ཧཱུཾ། ལན་གསུམ་བརྗོད་དེ་སྣོད་དུ་བཞག་ལ། ལས་སྔགས་བརྗོད་པ་དང་བཅས་པས་བསང་ཆུས་གཡས་སྐོར་དུ་ལན་གསུམ་བསངས། རྩྭའི་ཆུན་པོ་དང་བཅས་ཐབ་ཀྱི་ནང་དུ་བཅུག་ལ། ཨོཾ་བཛྲ་ཛྭ་ལ་རཾ། ཞེས་གཟི་བྱིན་བསྐྱེད། ཧཱུཾ། ཞེས་བརྗོད་དེ་རླུང་གཡབ་ཀྱིས་མེ་སྦར། རྩ་སྔགས་ལན་བདུན་བརྗོད་ལ་མར་ཁུ་བླུགས་གཟར་བདུན་གྱིས་
མེ་གསོ་ཀུ་ཤ་ལག་ཏུ་བཟུང་ལ། ཨོཾ་བཛྲ་སཏྭ་ཨཱཿ ལན་གསུམ་གྱིས་བྱིན་གྱིས་བརླབས། ཨོཾ་ཀུ་ཤ་འདི་ནི་གཙང་ཞིང་དགེ །ཚངས་པའི་ལྷ་རྣམས་དག་བྱེད་ཅིང༌། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པའི་འདབ་མའི་སྙིང༌། །བདག་གི་བགེགས་རྣམས་ཐམས་ཅད་ན། །ཞི་དང་བཀྲ་ཤིས་མཛད་དུ་གསོལ། །ཞེས་བརྗོད་ནས་ཀུ་ཤ་གཉིས་གཉིས་རྩེ་མོ་གཤིབས་པ་རང་གི་གཡོན་ངོས་ནས་བརྩམས་ཏེ་ཁ་ཁྱེར་ལ་རྩེ་མོ་ཤར་དང༌། ལྷོ་དང༌། ནུབ་དང༌། བྱང་དུ་བསྟན་ལ་སྔ་མའི་རྩེ་མོས་ཕྱི་མའི་རྩ་བ་ནོན་པར་བཀྲམ་ཞིང༌། ཐབ་ཁུང་དུ་རྩེ་མོ་ཤར་དུ་བསྟན་པའི་ཀུ་ཤ་བ་ལང་གི་རྣ་བ་ལྟ་བུ་ཧ་ཅང་ཡང་མི་རིང་བས་གཡོག །ཀུ་ཤ་བཀྲམ་ཟིན་པ་དང་ཐལ་མོ་སྦྱར་ཏེ། བཅོམ་ལྡན་འདས་རྡོ་རྗེ་སེམས་དཔའ་བདག་གི་བགེགས་ཐམས་ཅད་ཞི་བ་དང་བཀྲ་ཤིས་པར་མཛད་དུ་གསོལ། ཞེས་གསོལ་བ་བཏབ་བོ། གཉིས་པ་དངོས་གཞི་ལ་གསུམ། ཐོག་མར་འཇིག་རྟེན་པའི་མེ་ལྷ་མཆོད་པ། བར་དུ་འཇིག་རྟེན་ལས་འདས་པའི་མེ་ལྷ་མཆོད་པ། མཐར་འཇིག་རྟེན་པའི་མེ་ལྷ་མཆོད་པའོ། །དང་པོ་ནི། ཐབ་སྔར་བཞིན་བསང་སྦྱངས། སྟོང་པའི་ངང་ལས་ཧཱུཾ་དཀར་པོ་ཞུ་བ་ལས་བྱུང་བའི་ཞི་བའི་ཐབ་ཁ་དོག་དཀར་ཞིང་དབྱིབས་ཟླུམ་པ་རྒྱར་ཁྲུ་གང་བ། ཟབས་སུ་ཁྲུ་ཕྱེད་པ། མུ་རན་ཁ་ཁྱེར་དང་བཅས་པའི་ཁ་ཁྱེར་ལ་རྡོ་རྗེ་ཕྲེང་བས་བསྐོར་བ། གྲྭ་བཞིར་ཟླ་ཕྱེད་རྡོ་རྗེས་མཚན་པ་དྭངས་ཤིང་ཐོགས་པ་མེད་པ་ཡེ་ཤེས་ཀྱི་རང་བཞིན་དུ་གྱུར། ཐབ་ཀྱི་ནང་གི་དབུས་སུ་སྣ་ཚོགས་པདྨའི་ལྟེ་བར་རཾ་ལས་བགྲང་ཕྲེང་རཾ་གྱིས་མཚན་པ། དེ་ཡོངས་སུ་གྱུར་པ་ལས་ཞི་བའི་མེ་ལྷ་འཛིན་བྱེད་སྐུ་མདོག་དམར་པོ་འོད་ཟེར་འཕྲོ་ཞིང་འདུ་བ། རྭ་སྐྱེས་ལ་ཞོན་པ། ཞལ་
གཅིག་ཕྱག་གཉིས་པ། གཡས་བགྲང་ཕྲེང་དང་གཡོན་སྤྱི་བླུགས་འཛིན་པ། རྣམ་སྣང་གི་དབུ་རྒྱན་ཅན། སྨིན་མ་དང་རལ་པའི་ཐོད་དང་སྨ་ར་འབར་ཞིང་འཁྲུགས་པ་གསུས་ཁྱིམ་ཆེ་ཞིང་གཟི་བརྗིད་དང་ལྡན་པ། གཡོན་བརྐྱང་གི་སྟབས་ཀྱིས་བཞུགས་པའི་ཐུགས་ཀར་མེ་གྲུ་གསུམ་པ་རཾ་གྱིས་མཚན་པ། དྲང་སྲོང་གི་ཚོགས་དཔག་ཏུ་མེད་པས་བསྐོར་བའི་གཙོ་འཁོར་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོས་མཚན་པར་གྱུར། རང་གི་ཐུགས་ཀའི་ས་བོན་ལས་འོད་ཟེར་འཕྲོས། ཤར་ལྷོ་ནས་མེ་ལྷ་དྲང་སྲོང་གི་ཚོགས་ཀྱིས་བསྐོར་བ་སྤྱན་དྲངས། ལག་པ་གཡས་མི་འཇིགས་པ་སྦྱིན་པའི་ཕྱག་རྒྱས་མཐེ་བོང་གཡབ་ཅིང༌། ཨོཾ་ཚུར་བྱོན་ཚུར་བྱོན་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེགས་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་སྒྲུབ་པ་པོ། །ཐུགས་རྗེས་སེམས་ཅན་དོན་མཛད་པ། །འདི་ཉིད་དུ་ནི་བཞུགས་སུ་གསོལ། །ཊཀྐི་ཧཱུཾ་ཛཿ ཐབ་ཀྱི་ཁ་ཁྱེར་གྱི་ཀུ་ཤའི་གདན་ལ་བཞུགས་པར་གྱུར། པདྨ་ཀ་མ་ལ་ཡེ་སྟྭཾ། ཨ་མྲྀ་ཏས་སྔགས་ཀྱིས་བསངས་ཆུ་འཐོར་ཞིང་ཕྱི་འབྲང་གི་བགེགས་བསྐྲད། ཨོཾ་བཛྲ་ཨཾ་ཀུ་ཤ་ཛཿ ཨོཾ་བཛྲ་པ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་གཎྜེ་ཧོཿ དམ་ཚིག་པ་དང་གཉིས་སུ་མེད་པར་གྱུར། ཨོཾ་ཨཱཿ ཧྲཱིཿ པྲ་ཝ་ར་སད་ཀ་རཾ་པྲོཀྵ་ནཾ་པྲ་ཏཱིཙྪ་སྭཱཧཱ། ཞེས་བསང་གཏོར་དང༌། པྲོཀྵ་ནཾ་གྱི་གནས་སུ། ཨཉྩ་མ་ཎཾ། ཨརྒྷཾ། པཱངྱཾ་རྣམས་སྦྱར་ཏེ་ཆུ་བཞི་ཕྱག་ལེན་ལྟར་འབུལ། ཨོཾ་ཨགྣ་ཡེ་ས་པ་རི་ཝཱ་ར་པུཥྤེ་པྲ་ཏཱིཙྪ་སྭཱཧཱ། དེ་བཞིན་དུ། དྷཱུ་པེ། ཨཱ་ལོ་ཀེ གནྡྷེ།
ནཻ་ཝིངྱེ། ཤཔྟ་རྣམས་སྦྱར་བས་མཆོད། དྲིལ་སྟབས་དང་བཅས། འཇིག་རྟེན་དབང་ཕྱུག་ཚངས་པ་མགོན་གྱི་སྲས། །མེ་ལྷའི་རྒྱལ་པོ་ཊཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །ཐུགས་རྗེའི་དབང་གིས་སྐུ་སྤྲུལ་བ། །རིགས་སྔགས་གྲུབ་པའི་དྲང་སྲོང་ཚུལ། །ཉོན་མོངས་བསྲེག་པའི་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་བའི་ཐེག་པ་བཅིབས། །རིགས་སྔགས་གསུང་ཞིང་བགྲང་ཕྲེང་འཛིན། །བདུད་རྩིའི་བཅུད་ལྡན་གྷུཎྜེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་བས་བསྟོད་དེ་ཕྱག་ཀྱང་འཚལ། །ཞེས་ཡོངས་རྫོགས་སམ་ཚིགས་བཅད་དང་པོ་ཅི་རིགས་ཀྱིས་བསྟོད། ཨོཾ་བཛྲ་ཨ་ན་ལ་མཧཱ་བྷུ་ཏ་ཛྭ་ལཱ་ཛྭ་ལཱ་ཡ་སརྦ་བྷསྨི་ཀུ་རུ་སརྦ་དུཥྚཾ་ཧཱུཾ་ཕཊ་ཏྲི་ཤྱ་ཛཿ ཧཱུཾ་བཾ་ཧོཿ ས་མ་ཡ་སྟྭཾ། ས་མཱ་ཡ་ཧཾ། ཞེས་དམ་ཚིག་ལན་གསུམ་བརྗོད་པས་ལས་བཅོལ་བ་ཞལ་གྱིས་བཞེས་པར་བསམ་མོ། །མེ་ལྷའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་ཡིག་དང༌། དགང་བླུགས་ཀྱི་ཁ་ལ་དྷཱིཿ ཡིག་འོད་ཟེར་དང་བཅས་པས་མཚན་པར་གྱུར། འདིར་དགང་བླུགས་ཀྱི་ཁ་ལ་སྐབས་ཐོབ་ཀྱི་ལྷག་པའི་ལྷ་དེའི་ས་བོན་བྱེད་པ་འཐད་པ་ཡིན་ཏེ། འོད་སྙེ་ལས། དགང་གཟར་དང་བླུགས་གཟར་གྱི་ཁ་ལ་རང་གི་ལྷའི་ས་བོན་ཡི་གེ་གསུམ་གྱིས་སྤེལ་བའི་འོད་ཟེར་དང་བཅས་པ་དང༌། མེ་ལྷའི་ཞལ་དུ་རཾ་
རྣམ་པར་བཀོད་ལ། ཞེས་དང༌། སྤྱན་སྔ་བློ་གྲོས་རྒྱལ་མཚན་གྱིས་དེའི་མཆན་འགྲེལ་དུ། རང་གི་ལྷའི་ས་བོན་ཧཱུཾ་དང་ཨ་སོགས་ཨོཾ་ཨཱཿ ཧཱུཾ་གི་ཡི་གེ་གསུམ་གྱིས་སྤེལ་བའི་འོད་ཟེར་དང་བཅས་པ་ཞེས་གསུངས་པའི་ཕྱིར། དེས་ན་ཁ་ཅིག་སྐྱབས་མགོན་མཆོག་གི་འཇམ་དཀར་གྱི་སྦྱིན་སྲེག་ཏུ་ཨ་ཡིག་གསུང་བ་ཡི་གེ་མ་དག་པར་བྱེད་པ་མི་འཐད་པར་མངོན་ནོ། །དེ་ནས། བྱང་ཆུབ་མཆོག་གི་ཕྱག་རྒྱས་བླུགས་གཟར་གྱི་མར་ཁུས་དགང་གཟར་བཀང་བ་བཟུང་སྟེ། ཨོཾ་ཨགྣ་ཡེ་ཨ་དི་བྱཱ་ཨ་དི་བྱཱ་ཨ་བི་ཤ་ཨ་བི་ཤ་མཧཱ་ཤྲཱི་ཡེ་ཧ་བྱཱ་ཀ་བྱཱ་བ་ཧ་ནཱ་ཡ། བདག་ཅག་གི་ཏིང་ངེ་འཛིན་མི་གསལ་ཞིང་སྔགས་ཆད་ལྷག་གི་ཉེས་པ་དང༌། ནད་གདོན་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། འདི་བསྙེན་པའི་ཁ་སྐོང་གི་དབང་དུ་བྱས་ཤིང༌། གང་འདོད་པའི་སྤེལ་ཚིག་སྦྱོར་བའི་ཁྱད་པར་ཤེས་དགོས་སོ། །ལག་པ་གཡས་མཆོག་སྦྱིན་གྱི་ཕྱག་རྒྱའི་མཐེབ་སྲིན་གྱིས་ཡམ་ཤིང་གཉིས་གཉིས་རྩེ་མོ་ལྷ་ལ་བསྟན་ནས་འབུལ། ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་དུ་གྱུར། ཨོཾ་ཨགྣ་ཡེ་ཨ་དི་བྱཱ་ནས་བ་ཧ་ནཱ་ཡ། ཨོཾ་བོ་དྷི་པྲིཀྵ་ཡ། བདག་ཅག་གི་ནས་བར་ཆད་མི་མཐུན་པའི་ཕྱོགས་ཐམས་ཅད་དང༌། ཁྱད་པར་དུ་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། མར་ཁུ། ཨོཾ་ཨགྣེ་ཡེ་ཞེས་པ་ནས། བ་ཧ་ནཱ་ཡ། ཨོཾ་ཨགྣ་ཡེ། བདག་ཅག་ནས། ཐམས་ཅད་དང༌། ཁྱད་པར་དུ་འབྱོར་པ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཏིལ་ལ། ཨོཾ་ཨགྣ་ཡེ་ཞེས་པ་ནས། སརྦ་པཱ་པཾ་ད་ཧ་ན་བཛྲ་ཡ། བདག་ཅག་ནས། ཐམས་ཅད་དང༌། ཁྱད་པར་དུ་སྡིག་སྒྲིབ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། དུར་བ་ལ། ཨོཾ་བཛྲ་ཨཱ་
ཡུ་ཥེ། ཚེ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། འབྲས་ལ། ཨོཾ་བཛྲ་པུཥྚ་ཡ། བསོད་ནམས་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཞོ་ཟན་ལ། ཨོཾ་སརྦ་སཾ་པ་དེ། བདེ་བ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཀུ་ཤ་ལ། ཨོཾ་ཨ་པྲ་ཏི་ཧ་ཏ་བཛྲ་ཡེ། གྲིབ་དང་མི་གཙང་བ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཡུངས་ཀར་ལ། ཨོཾ་སརྦ་ཨརྠ་སིད་དྷ་ཡེ། བགེགས་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། སོ་བ་ལ། ཨོཾ་བཛྲ་བི་ཛཱ་ཡ། ནོར་དང་འབྲུ་རྒྱས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ནས་ལ། ཨོཾ་མཧཱ་བེ་གཱ་ཡ། མྱུར་བའི་ཤུགས་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། སྲན་མ་ལ། ཨོཾ་མཧཱ་བཱ་ལཱ་ཡ། སྟོབས་རྒྱས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། གྲོ་ལ། ཨོཾ་བཛྲ་གྷསྨ་རི་༝ནད་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། ཁྱད་པར་གྱི་རྫས་ལ། ཨོཾ་ཨགྣ་ཡེ་ཞེས་པ་ནས། བདག་ཅག་ནས། མཆོག་དང་ཐུན་མོང་གི་དངོས་གྲུབ་སྒྲུབ་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། སྔར་བཞིན་ཞལ་བསིལ་དང་བསང་གཏོར་དབུལ། མར་ཁུ་བླུགས་གཟར་གང་ཐབ་ཏུ་ཕུལ་ནས། ཨོཾ་བཛྲ་ཛྭ་ལ་རཾ། མེ་ལྷ་མེ་འབར་བའི་རྣམ་པར་གྱུར། གཉིས་པ་འཇིག་རྟེན་ལས་འདས་པའི་མེ་ལྷ་མཆོད་པ་ནི། ཐབ་ཀྱི་མེ་སྔར་བཞིན་བསང་སྦྱངས། སྟོང་པའི་ངང་ལས་སྣ་ཚོགས་པདྨའི་ལྟེ་བར་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་དྷཱིཿ ཡིག་མཐིང་ནག་ལས་རལ་གྲི་འབར་བ་དྷཱིཿས་མཚན་པ། དེ་ལས་འོད་ཟེར་འཕྲོས། དོན་གཉིས་བྱས། ཚུར་འདུས་
ཡོངས་སུ་གྱུར་པ་ལས་རྗེ་བཙུན་འཇམ་དཔལ་ཞེས་པ་ནས། སྐྱིལ་ཀྲུང་གིས་བཞུགས་པ། ལྷའི་སྐུ་ལས་འོད་ཟེར་དཀར་པོའི་ཚོགས་འཕྲོ་བར་གྱུར། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀར་ཉི་གདན་ལ་གནས་པའི་དྷཱིཿ ཡིག་ལས་འོད་ཟེར་འཕྲོས་པས་རང་བཞིན་གྱི་གནས་ནས་རྗེ་བཙུན་འཇམ་པའི་དབྱངས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མ་ཛཿ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའ། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམ་སྦྱངས་ཤིང༌། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པ། །ཁྱེད་བཞེད་འགྲོ་དོན་མཛད་དུས་འདིར་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང༌། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་གསོལ། །འདིར་ནི་གཟུགས་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང༌། །ནད་མེད་ཚེ་དང་དབང་ཕྱུག་དང༌། །མཆོག་རྣམས་ལེགས་པར་སྩལ་དུ་གསོལ། །བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང༌། །འདི་ཉིད་དུ་ནི་བཞུགས་སུ་གསོལ། །བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ན། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་
ལྡན་བཞུགས་སུ་གསོལ། །ཛཿ ཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ།ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཨཱཿ ཧཱུཾ། ཞེས་དབང་བསྐུར། ལུས་གང༌། དྲི་མ་དག་ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་མི་བསྐྱོད་པས་དབུ་བརྒྱན་པར་གྱུར། རབ་འབྱམས་རྒྱ་མཚོ་དཔག་མེད་ན། །བསང་གཏོར་ཇི་སྙེད་ཡོད་པ་དང༌། །བདག་གིས་ཕུལ་བའི་བསང་གཏོར་འདི། །བཞེས་ནས་བདག་ལ་དངོས་གྲུབ་སྩོལ། །ཨོཾ་ཨཱཿ ཧྲཱིཿ པྲ་ཝ་ར་སད་ཀ་རཾ་པྲོཀྵ་ནཾ་པྲ་ཏཱིཙྪ་སྭཱཧཱ། ཞེས་པས་བསང་གཏོར་དང༌། དེ་བཞིན་དུ་བསང་གཏོར་གྱི་གནས་སུ། ཞལ་བསིལ། མཆོད་ཡོན། ཞབས་བསིལ་རྣམས་དང༌། པྲོཀྵ་ཎཾ་གྱི་གནས་སུ། ཨཉྩ་མ་ཎཾ། ཨརྒྷཾ། པཱདྱཾ་རྣམས་སྦྱར་ཏེ་ཆུ་བཞིའི་སྔགས་དང་ཕྱག་རྒྱས་དབུལ་ལོ། །རབ་འབྱམས་རྒྱ་མཚོ་དཔག་མེད་ན། །མེ་ཏོག་ཇི་སྙེད་ཡོད་པ་དང༌། །བདག་གིས་ཕུལ་བའི་མེ་ཏོག་འདི། །བཞེས་ནས་བདག་ལ་དངོས་གྲུབ་སྩོལ། །ཨོཾ་མཉྫུ་ཤྲི་ཀཱ་ལ་ས་པ་རི་ཝཱ་ར་པུཥྤེ་པྲ་ཏཱིཙྪ་སྭཱཧཱ། དེ་བཞིན་དུ། ཤཔྟའི་བར་སྦྱར་ལ་མཆོད། དུས་གསུམ་རྒྱལ་བའི་ཞེས་སོགས་ཤོ་ལོ་ཀ་གཅིག་གིས་བསྟོད། ལྷའི་ཞལ་འཛུམ་ཞིང་ཅུང་ཟད་གདངས་པའི་རྣམ་པ་ཅན་དུ་གྱུར། སྔགས་ཀྱི་མཇུག་ཏུ། ཨོཾ་ཨགྣེ་ཡེ་སྭཱཧཱ། བདག་གི་ཏིང་ངེ་འཛིན་ཞེས་པ་ནས་ཤཱནྟིཾ་ཀུ་རུ་སྭཱཧཱ།
ཞེས་མར་ཁུ་དགང་བླུགས་བདུན་ཕུལ། ཡཾ་ཤིང་རྩ་སྔགས་དང༌། ཨོཾ་བོ་དྷི་པྲིཀྵཱ་ཡ། བདག་ཅག་ཅེས་པ་ནས། ཤཱནྟིཾ་ཀུ་རུ་ཡེ་སྭཱཧཱ། དེ་བཞིན་དུ་བསྲེག་རྫས་ལྷག་མ་རྣམས་ལ་སྔགས་དང་སྤེལ་ཚིག་གོང་བཞིན་སྦྱར་ཏེ་གསུམ་མམ་བདུན་ནམ་ཉེར་གཅིག་སོགས་མང་ཉུང་རིགས་པས་དཔྱད་ཅིང་ཡཾ་ཤིང་དང་མར་ཁུ་གཙོ་བོ་ཡིན་པས་གང་མང་དང༌། འདི་བརྩོག་གྲིབ་སོགས་ལ་ཆེད་དུ་བསྔགས་པས་ཀུ་ཤ་ཡང་གཙོ་བོར་བྱེད་ཅིང༌། ལྷག་ཆད་ཀྱི་ཉེས་པ་སྦྱོང་བ་དགོས་པའི་གཙོ་བོ་ཡིན་པས་ཁ་སྐོང་ལ་ཏིལ་གྱི་གྲངས་གསོག་དགོས། དེ་བཞིན་དུ་ཁྱད་པར་གྱི་རྫས་ཡང་མང་ཙམ་དབུལ། རྩ་སྔགས་བརྗོད་ཅིང༌། མར་ཁུ་དགང་བླུགས་བདུན་དང༌། མཆོད་ཡོན། བསང་གཏོར། ཞལ་བསིལ་གསུམ་སྔར་བཞིན་སྔགས་རྒྱས་དབུལ། སྲབ་འཇམ་ཡང་པ་ལྷ་ཡི་གོས། །མགོན་པོ་འཇམ་དབྱངས་སྐུ་ལ་གསོལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །ཨོཾ་བཛྲ་ཝ་ས་སྱ་སྭཱཧཱ། ཞེས་པས་གོས་ཟུང་དང༌། ཨོཾ་བཛྲ་ཏཾ་བུ་ལ་ཡེ་སྭཱཧཱ། ཞེས་པས་སོ་རྩི་དབུལ། ཉེར་སྤྱོད་རོལ་མོ་དང་བཅས་པས་མཆོད། གཏོར་མ་བསངས་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿ ཧཱུཾ་འོད་དུ་ཞུ་བ་ལས་བྱུང་བའི་གཏོར་མ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། ཨོཾ་ཨཱཿ ཧཱུཾ། ལན་གསུམ་གྱིས་བྱིན་གྱིས་བརླབས། ལྷའི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། རྩ་སྔགས་ཀྱི་མཇུག་ཏུ། ཨོཾ་ཨཱ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨངྱ་ནུཏྤནྣ་ཏྭ་ཏ་བ་ལིངྟ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་གྱིས་མེ་ནང་དུ་བླུགས་གཟར་གྱིས་ཕུལ། གོང་གི་བསྟོད་པ་ཤོ་ལོ་ཀ་གསུམ་གྱིས་བསྟོད། བཅོམ་ལྡན་འདས་འཇམ་
དཔལ་དབྱངས་ཀྱིས་བདག་ཅག་གི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་ཞི་བར་མཛད་དུ་གསོལ། ཕ་རོལ་གྱི་བྱད་མ་རྦད་འདྲེ་རྦོད་གཏོང་དང་བཅས་པའི་བསམ་སྦྱོར་ངན་པ་མཐའ་དག་དང༌། ས་བདག་དང་ཀླུ་གཉན་སོགས་མི་དང་མི་མ་ཡིན་པའི་ཉེར་འཚེ་ནད་རིམས་གདོན་བགེགས་རྨི་ལམ་མཚན་ལྟས་ངན་པ། གྲིབ་དང་མི་གཙང་བ་ལ་སོགས་པ་ཐམས་ཅད་བྱང་ཞིང་དག་པར་མཛད་དུ་གསོལ། མདོར་ན་ཕྱི་ནང་གི་མི་མཐུན་པའི་ཉེར་འཚེ་ཐམས་ཅད་ཞི་ཞིང་མཐུན་རྐྱེན་ལེགས་ཚོགས་ཐམས་ཅད་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། ཞེས་འདོད་དོན་ལ་གསོལ་བ་ལན་གསུམ་གདབ། ཨོཾ་ཨཱཿ ཧྲཱིཿ པྲ་ཝ་ར་སད་ཀ་རཾ་ཨརྒྷཾ་པྲ་ཏཱིཙྪ་སྭཱཧཱ། ཞེས་མཆོད་ཡོན་ཕུལ། མེ་ཏོག་དང་བཅས་ཐལ་མོ་སྦྱར་ནས། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་པོས་དེ་ཀུན་བཟོད་པར་གསོལ། །ཞེས་ནོངས་པ་བཟོད་པར་གསོལ། ཡིག་བརྒྱ་བཟླས་ཏེ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །རང་གི་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །བཛྲ་མུཿ ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་རང་ཉིད་ལ་ཐིམ་པར་གྱུར། གསུམ་པ་མཐར་འཇིག་རྟེན་པའི་མེ་ལྷ་མཆོད་པ་ནི། ཨོཾ་བཛྲ་ཛྭ་ལ་རཾ། ཞེས་བརྗོད་དེ། མར་ཁུ་དགང་བླུགས་གསུམ་ཕུལ་བར། ཐབ་ཀྱི་མེ་དེ་ཉིད་སླར་ཡང་མེ་ལྷའི་སྐུར་བཞེངས་པར་གྱུར། ཨོཾ་ཨགྣ་ཡེ་ཞེས་པ་ནས། བ་ཧ་
ནཱ་ཡ་པུཥྤེ་པྲ་ཏཱིཙྪ་སྭཱཧཱ། དེ་བཞིན་དུ། ཤཔྟའི་བར་སྦྱར་ཏེ་མཆོད། བསང་གཏོར་དང༌། ཞལ་བསིལ་ཀྱང་ཕུལ། ཨོཾ་བཛྲ་ཏཾ་བུ་ལ་ཡེ་སྭཱཧཱ། ཞེས་པས་སོ་རྩི་དང༌། སྣ་ཚོགས་དབང་པོའི་ནས། གོས་ཀྱིས་བརྒྱན་པར་ཤོག །ཨོཾ་བཛྲ་ཝ་ས་སྱ་སྭཱཧཱ། ཞེས་པས་གོས་ཟུང་ཕུལ། རྫས་ལྷག་མེ་ལྷ་ལ་སྔར་བཞིན་ཕུལ། འཇིག་རྟེན་དབང་ཕྱུག །ཅེས་སོགས་ཀྱིས་བསྟོད། ཞལ་བསིལ་དང་བསང་གཏོར་ཀྱང་ཕུལ། གཏོར་མ་བསང་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་གཏོར་མ་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿ ཧཱུཾ། ལན་གསུམ། ཨོཾ་ཨགྣ་ཡེ་སོགས་ཀྱི་མཐར་ཨ་ཀཱ་རོ་བཏགས་པ་ལན་གསུམ་གྱིས་ཕུལ། ཉེར་སྤྱོད་རོལ་མོ་དང་བཅས་པས་མཆོད། མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་བ་བཟང༌། །ལོངས་སྤྱོད་རྒྱ་ཆེན་ཀུན་ཐོབ་ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྟོང་གྲོགས་མཛོད། །དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་རྒྱས་ཤིང་ཆོས་འཕེལ་དང༌། །བདེ་ལེགས་ཐམས་ཅད་འབྱུང་བ་ཡི། །ཡིད་ལ་འདོད་པ་ཀུན་འགྲུབ་ཤོག །ཨོཾ་ཨཱཿ ཧྲཱིཿ
པྲ་ཝཱ་ར་སད་ཀ་རཾ་ཨརྒྷཾ་པྲ་ཏཱིཙྪ་སྭཱཧཱ། མ་རྙེད་ཡོངས་སུ་མ་ཤེས་དང༌། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་ཁྱེད་ཀྱིས་བཟོད་མཛད་རིགས། །ཨོཾ་བཛྲ་སཏྭ་ཨཱཿ། ཨོཾ་རང་གི་དོན་དང་གཞན་གྱི་དོན། །སྒྲུབ་མཛད་བསྲེག་བྱ་ཟ་བ་གཤེགས། །ཇི་བཞིན་དུས་སུ་སླར་བྱོན་ཞིང༌། །བདག་གི་དངོས་གྲུབ་ཐམས་ཅད་སྒྲུབས། །ཨོཾ་ཨཱཿ བཛྲ་མུཿ མེ་ལྷ་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་མེ་འབར་བའི་རྣམ་པར་གྱུར། གསུམ་པ་རྗེས་ཀྱི་རིམ་པ། བདག་བསྐྱེད་ཀྱི་མཇུག་བསྡུ། བསྔོ་བ་སྨོན་ལམ་ཤིས་བརྗོད་སོགས་རྒྱས་པར་བྱ། མེ་མ་ཤི་བར་དུ་འཇོག་ལོང་མེད་ན་གཞིལ་ཐབས་དང་ལས་ཀྱི་རྗེས་མི་མངོན་པ་སོགས་ཕྱག་ལེན་ལྟར་བྱའོ།། སྨྲས་པ། སྙན་སྙན་ཚིག་གི་སྦྱོར་བ་སྤེལ་ལེགས་ཤིང༌། །འགྲིག་འགྲིག་དོན་གྱི་རིམ་པ་བློས་བྱས་རྣམས། །བློ་ཆུང་བྱིས་པའི་སྙིང་ལ་དགའ་བསྐྱེད་ཀྱང༌། །གསང་སྔགས་ཟབ་མོའི་ཆོས་ལ་སྤང་བྱ་ཡིན། །དེ་ཕྱིར་དམ་པའི་མན་ངག་ཇི་ལྟ་བར། །ལེགས་སྦྱར་དགེ་བས་མཁའ་མཉམ་འགྲོ་ཀུན་གྱི། །མི་བཟད་ཉེས་པའི་རྒུད་པ་ཀུན་སེལ་ཞིང༌། །རིང་མིན་འཇམ་དཔལ་དཔའ་བོའི་གནས་ཐོབ་ཤོག །ཅེས་འཇམ་དཔལ་ནག་པོ་ལ་བརྟེན་པའི་སྦྱིན་སྲེག་གི་ཆོ་ག་ཉེས་པ་ཀུན་སེལ་ཞེས་བྱ་བ་འདི་ནི། དགེ་སྦྱོར་ལ་གཅིག་ཏུ་གཞོལ་ཞིང༌། ཁྱད་པར་ལྷ་མཆོག་འདིའི་བསྙེན་བསྒྲུབ་ལ་བརྩོན་པ་ལྷུར་བྱེད་པ་དཀའ་བཅུ་ནོར་བུ་རྒྱལ་མཚན་གྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་ཡིག་རྙིང་དང༌། ལྷ་བཙུན་རྡོ་རྗེ་རྒྱལ་མཚན་གྱིས་མཛད་པའི་མངོན་རྟོགས། བླ་མ་དམ་པའི་གསུང་སྒྲོས་སོགས་ལ་གཞི་བྱས་ཏེ་ཆོས་གྲྭ་ཆེན་པོ་བཀྲ་ཤིས་
འཁྱིལ་དུ་སྦྱར་བ་འདིས་ཀྱང་སྐྱེ་འགྲོ་ལ་ཕན་ཐོགས་པར་གྱུར་ཅིག །