བཅོམ་ལྡན་འདས་ཀླུའི་དབང་ཕྱུག་རྒྱལ་པོའི་སྒོ་ནས་ཡུལ་ཁྲུས་བྱ་ཚུལ།
བཅོམ་ལྡན་འདས་ཀླུའི་དབང་ཕྱུག་རྒྱལ་པོའི་སྒོ་ནས་ཡུལ་ཁྲུས་བྱ་ཚུལ་ཀླུ་བསང་བཅས་བཞུགས་སོ།།
ཐུགས་བསྐྱེད་སྤྲིན་གྱི་གདེངས་ཀ་ལས། །བྱིན་རླབས་ཆར་གྱི་རྒྱུན་འབེབས་པས། །ཕན་བདེའི་ལོ་ཏོག་རྒྱས་མཛད་པ། །ཀླུ་ཡི་དབང་ཕྱུག་རྒྱལ་པོར་འདུད། །དེ་ཡང་ཀླུ་དང་ས་བདག་གི་ཉེར་འཚེ་ཞི་བའི་ཕྱིར་བཅོམ་ལྡན་འདས་ཀླུའི་དབང་ཕྱུག་རྒྱལ་པོའི་སྒོ་ནས་ཡུལ་ཁྲུས་བྱ་བར་འདོད་པའི་གང་ཟག་གིས་ཐོག་མར་བདག་བསྐྱེད་དང། འདིའི་སྒོ་ནས་བུམ་ཆུ་སྒྲུབ་ཚུལ་གྱི་ཆོ་ག་སོགས་ལོགས་སུ་བཀོད་ཡོད་པ་བཞིན་ཚད་དང་ལྡན་པར་བྱས་ལ། གཞི་བདག་གཙོ་ཆེ་བ་རྣམས་ཀྱི་གནས་རི་སོགས་མཐོང་བའི་ཕྱོགས་སུ་ཕྱིན་པའམ། ཡང་ན་དེ་དག་གི་མིང་དང་དབྱིབས་གཟུགས་སོགས་རི་མོར་བྲིས་པ་མེ་ལོང་ལ་འཆར་དུ་བཅུག །དེ་དག་གི་ནམ་མཁར་སྤྲིན་གྱི་ཕུང་པོ་ཁ་དོག་སྣ་ལྔ་པ་འཁྲིགས་པ་ལས། ཀླུའི་དབང་ཕྱུག་རྒྱལ་པོའི་ཐུགས་རྗེ་བྱིན་རླབས་ཀྱི་ངོ་བོ་ཆར་གྱི་རྒྱུན་དཔག་ཏུ་མེད་པ་བབས་པས། སྣོད་བཅུད་མཐའ་དག་གི་ཉེར་འཚེའི་རྒུད་པའི་རིགས་མ་ལུས་པ་ལྷག་མེད་དུ་བཀྲུས་པར་བསམས་ལ། ཐོག་མར་བཅོམ་ལྡན་འདས་ཀྱི་གཟུངས་ལན་མང་དུ་བརྗོད། དེ་ནས། བཅོམ་ལྡན་འདས་ཀླུའི་དབང་ཕྱུག་རྒྱལ་པོའི་ཐུགས་རྗེའི་མཐུ་དང་བདེན་པ་ཆེན་པོས་བྱིན་གྱིས་བརླབས་པ་ལ་བརྟེན་ནས། ཡུལ་ཕྱོགས་འདི་ན་གནས་པའི་ལྷ་ཀླུ་གཞི་བདག་ཐམས་ཅད་ཀྱི་ལུས་སེམས་ལ་གནོད་པའི་ཕྱི་ནང་གི་ཉེ་བར་འཚེ་བ་ཐམས་ཅད་ཤཱནྟིཾ་ཀུ་རུ་སྭཱཧཱ། ས་གཉན་བརྐོས་པ། རི་གཉན་རློག་པ། ཤིང་གཉན་བཅད་པ། ཆུ་གཉན་དཀྲུགས་པ་སོགས་ལ་བརྟེན་ནས་བྱུང་བའི་གནོད་པ་དང་འཁོན་ཐམས་ཅད་ཤཱནྟིཾ་ཀུ་རུ་
སྭཱཧཱ། མཛེ་གྲིབ་ཡུག་གྲིབ་དམེ་གྲིབ་རོ་གྲིབ་སོགས་གྲིབ་དང་མི་གཙང་བའི་གནོད་པ་ཐམས་ཅད་༝། མཛེ་དང་ཕོལ་མིག །དྲེག་གྲུམ། སྐྱ་རྦབ། གཞོག་སྐམ། ཞྭ་འཐེང་། ཤ་བཀྲ་སོགས་ཤ་རུས་པགས་པར་གནས་པའི་ནད་ཀྱི་རིགས་ཐམས་ཅད་༝། བྱེ་ཚན་དང་མཁའ་ལྡིང་གི་འཇིགས་པ་དྲག་སྔགས་མནན་གཏད་སོགས་ཀྱིས་གདུངས་པ་ཐམས་ཅད་༝། ཡུལ་ལྷ་རྣམས་ལ་གནོད་པའི་རྐྱེན་ལས་བྱུང་བའི་མི་ཕྱུགས་ཀྱི་ནད་ཡམས་མཐའ་དག་ཤཱནྟིཾ་༝། སད་སེར་ཐན་པ་དུས་མ་ཡིན་པའི་རླུང་དང་ཁ་ཆར་ས་གཡོས་སོགས་འབྱུང་བའི་ཁམས་ཀྱི་གནོད་པ་ཐམས་ཅད་༝། གཟའ་དང་རྒྱུ་སྐར་གྱི་གནོད་པ་དང་། རྒྱལ་པོ་དང་ཆོམ་རྐུན་གྱི་གནོད་པ་སོགས་མི་དང་མི་མ་ཡིན་པའི་ཉེ་བར་འཚེ་བ་ཐམས་ཅད་༝། ཕ་རོལ་གྱི་བྱད་ཁ་ཕུར་ཁ་དང་རྨི་ལམ་མཚན་ལྟས་ངན་པ་ཐམས་ཅད་༝། མདོར་ན་ཕྱི་ནང་སྣོད་བཅུད་མཐའ་དག་གི་ཉེ་བར་འཚེ་བ་དང་བཀྲ་མི་ཤིས་པའི་རིགས་ཐམས་ཅད་ཤཱནྟིཾཀུ་རུ་སྭཱཧཱ། ཞེས་ཁྲུས་བྱ། དེ་ནས་སྣོད་གཅིག་ཏུ་ཆུ་ཅུང་ཟད་བླུགས་ལ། རྨ་བྱའི་སྒྲོའི་ཆུན་པོའི་སྟེང་དུ་ཟླ་བ་རྡོ་རྗེ་དང་བཅས་པས་མཚན་པ་ལས་འོད་ཟེར་འཕྲོས། བཀྲུས་པས་མ་དག་པའི་དྲི་མ་ལྷག་མ་རྣམས་བྱབས་ཏེ་མདུན་གྱི་ཆུ་ལ་ཐིམ་པར་བསམས་ཤིང། ཤཱནྟིཾཀུ་རུ་ཞེས་པའི་ཚབ་ཏུ། ཨ་པ་ན་ཡ་ཞེས་པ་སྦྱོར། སངས་རྒྱས་ཀྱི་བདེན་པ་དང། ཆོས་ཀྱི་༝། དགེ་
འདུན་གྱི་༝། ཁྱད་པར་དུ་བཅོམ་ལྡན་འདས་ཀླུའི་དབང་ཕྱུག་རྒྱལ་པོའི་ཐུགས་རྗེ་བདེན་པའི་སྟོབས་ཀྱིས་ཡུལ་ཕྱོགས་འདི་ཉིད་ལ་གནོད་ཅིང་འཚེ་བར་བྱེད་པའི་གདོན་བགེགས་ཐམས་ཅད་ཁྲུས་ཆུ་འདིས་ཚིམ་པར་བྱས་ཏེ། གནོད་པ་དང་གདུག་པའི་སེམས་ཞི་ཞིང་། ཕན་པ་དང་ཞི་བའི་སེམས་དང་ལྡན་པས་རང་རང་སོ་སོའི་གནས་སུ་སོངས་ཤིག །སུམ་བྷ་ནིའི་སྔགས་བརྗོད་ཅིང་ཡུངས་ཀར་གྱིས་བྲབ་སྟེ་ཁྲུས་ཆུ་རྒྱང་རིང་དུ་དོར། སངས་རྒྱས་རྣམས་ནི་བདུད་ལས་རྒྱལ། །ཞེས་པ་ནས། བདེན་པ་རྒྱལ་གྱུར་རྫུན་མ་ལགས། །བདེན་པ་དང་བདེན་པ་ཆེན་པོའི་ཚིག་འདི་དག་གིས་ས་ཕྱོགས་ཡུལ་ཁམས་དཀར་ཕྱོགས་སྐྱོང་བའི་ལྷ་ཀླུ་ཐམས་ཅད་ཕྱི་ནང་གི་ཉེར་འཚེའི་གཡུལ་ལས་རྒྱལ་ཏེ། མཐུ་སྟོབས་གཟི་བྱིན་རྒྱས་ཤིང་དེའི་སྟོབས་ཀྱིས་མི་ནོར་ལོངས་སྤྱོད་ཆོས་སྲིད་ཀྱི་དཔལ་འབྱོར་མཐའ་དག་འཕེལ་ཞིང་རྒྱས་ནས་བཀྲ་ཤིས་པར་གྱུར་ཅིག །ཛ་ཡ་ཛ་ཡ་སིདྡྷི་སིདྡྷི། དེ་ནས་གནས་ཐམས་ཅད་དུ་རྡོ་རྗེ་རྒྱ་གྲམ་གྱི་ཚུལ་དུ་རེག་པའི་སྟངས་ཀ་དང་བཅས་གཟུངས་བརྗོད་ཅིང། ཤཱནྟིཾ་ཀུ་རུའི་ཚབ་ཏུ། རཀྵ་རཀྵ་ཞེས་བརྗོད་པས། ཡུལ་ཕྱོགས་མཐའ་དག་སྲུང་བ་རྡོ་རྗེའི་གུར་ཁང་གི་ནང་དུ་ཚུད་པའི་དམིགས་པ་བྱེད། རྒྱལ་བ་སྲས་བཅས་བདེན་པའི་བྱིན་རླབས་དང་། །ཀླུ་ཡི་དབང་ཕྱུག་རྒྱལ་པོའི་མཐུ་སྟོབས་ཀྱིས། །ཡུལ་ཕྱོགས་འདི་ལ་བདག་གིས་བསྲུངས་ཟིན་གྱི། །འདི་ལ་སུས་ཀྱང་གནོད་པ་མ་བྱེད་ཅིག །ཅེས་བརྗོད་ཅིང་། ཆེ་བའི་ཆེ་མཆོག་མ་སོགས་དཀོན་མཆོག་གསུམ་གྱི་ཤིས་པ་བརྗོད་པས་མཐའ་བརྒྱན་པར་བྱའོ། །ཞེས་པ་འདི་ནི་མིར་གན་ཤོག་ནས་དད་བརྩོན་ལྡན་པ་དགེ་སློང་བློ་བཟང་ལྷུན་གྲུབ་ཀྱིས་བསྐུལ་ངོར།
༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པ་དགེ་ལེགས་འཕེལ།། །། ༈ མཚན་ཙམ་དྲན་པའི་ག་བུར་གྱིས། །ཀླུ་གདོན་ཚ་བའི་གདུང་སེལ་བ། །ཀླུ་དབང་རྒྱལ་དང་སེང་གེའི་སྒྲར། །བཏུད་ནས་ཀླུ་བསང་ཆོ་ག་བྲ། །དེའང་ཐོག་མ་ཀླུ་སྨན་སྣ་ཚོགས། དུག་རིགས་མ་ཡིན་པའི་ཤིང་སྣ་དུ་མ། དཀར་གསུམ་མངར་གསུམ་སོགས་བསང་དང་གཏོར་མའི་རྫས་གཙང་ཞིང་གྱ་ནོམ་པ་ཤ་ཁྲག་དང་གླ་རྩི་སོགས་ཀྱི་དྲི་མས་མ་སྦགས་པ་ལེགས་པར་བཤམ། སྐྱབས་སེམས་སྔོན་དུ་བཏང་། རང་ཉིད་སྐད་ཅིག་གིས་པད་ཟླ་དང་སེང་གེའི་གདན་གྱི་སྟེང་དུ་འཕགས་མཆོག་སེང་གེའི་སྒྲ་སྐུ་མདོག་དཀར་པོ་ཞལ་གཅིག་ཕྱག་གཉིས། གཡས་པ་པུས་མོའི་སྟེང་དུ་བཙུགས་ཤིང་། གཡོན་པ་གདན་ལ་བརྟེན་པས་སྦྲུལ་གྱིས་དཀྲིས་པའི་ཏྲི་ཤུ་ལ་དང་སྨན་གྱིས་བཀང་བའི་ཐོད་པས་མཚན་པའི་པངྨ་བསྣམས་པ། དཀའ་ཐུབ་ཀྱི་ཆ་ལུགས་ཅན་རྒྱལ་པོ་རོལ་བའི་སྟབས་ཀྱིས་བཞུགས་པར་གྱུར། ཨོཾ་བཛྲ་ཨ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཡོངས་སུ་གྱུར་པ་ལས་མཆོད་གཏོར་དང་བསང་རྫས་རྣམས་མཆོད་ཡུལ་སྤྱི་དང་ཁྱད་པར་ཀླུ་རིགས་འཁོར་བཅས་དགྱེས་པ་སྐྱེད་པའི་མཐུ་དང་ལྡན་པར་གྱུར། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་ཝ་རྟ་ཡ་ཨཱ་ཝ་རྟ་ཡ། ཧོ་བཛྲ་སྥ་ར་ཎ་ཁཾ། ལན་གསུམ། ཨོཾ་སྭ་བྷཱ་ཝ་བི་ཤུདྡྷེ་དྷརྨཱ་ཏེ་བཛྲ་སིདྡྷི་ཧཱུཾ། ཞེས་པ་ནས། ཨརྠ་སཱ་དྷ་ནེ་སྭཱཧཱ། དེ་བཞིན་གཤེགས་པ་རྒྱལ་བ་རིན་ཆེན་མང་སོགས་བཞིའི་མཚན་བརྗོད། དེ་བཞིན་
གཤེགས་པ་རྣམས་ཀྱི་ཐུགས་རྗེ་དང་ཆོས་ཀྱི་དབྱིངས་ཀྱི་བདེན་པའི་སྟོབས་ཀྱིས་ཀླུ་རྣམས་མཆོད་སྤྲིན་རྒྱ་མཚོ་འདིས་ཚིམ་ཞིང་དགྱེས་ནས་ཤ་འཁོན་གནོད་པ་ཐམས་ཅད་ཞི་སྟེ་བྱམས་པའི་སེམས་ཀྱིས་ཆོས་དང་ལྡན་པའི་འཕྲིན་ལས་ཚུལ་བཞིན་དུ་སྒྲུབ་པར་གྱུར་ཅིག །བདག་གི་བསམ་པའི་སྟོབས་དང་ན། །ཞེས་པ་ནས། ཐོགས་པ་མེད་པར་འབྱུང་གྱུར་ཅིག །ལྷུན་པོ་རོལ་མཚོ་བདུན་དང་བཅས་པ་ལ། །གནས་བཅས་ཆུ་ཡི་བདག་པོ་ཝ་རུ་ཎ། །དགའ་བོ་ཉེ་དགའ་ཀླུ་ཆེན་བརྒྱད་ལ་སོགས། །འཇིག་རྟེན་སྐྱོང་བའི་ཀླུ་རིགས་ཐམས་ཅད་དང་། །འཛམ་གླིང་གདེངས་ཅན་བདག་པོ་མ་དྲོས་པ། །བྱེ་བྲག་བོད་ཁམས་འདིར་གནས་ཀླུ་ཡི་ཚོགས། །ཁྱད་པར་བདག་ཅག་གནས་ཀྱི་ཡུལ་ཕྱོགས་འདིའ། །མཚོ་དང་ཆུ་ཀླུང་ཆུ་མིག་ལྟེང་ཀ་དང་། །རི་བྲག་ལྗོན་ཤིང་སོགས་ལ་གནས་པ་ཡི། །རིགས་བཞིར་གཏོགས་པའི་ཀླུ་གཉན་མ་ལུས་པ། །ཐོགས་མེད་རྫུ་འཕྲུལ་ཤུགས་ཀྱིས་འདིར་གཤེགས་ཤིག །དཀར་གསུམ་མངར་གསུམ་བཟའ་བཅའ་བཏུང་བ་དང་། །རིན་ཆེན་རྣམ་མང་མཁོ་དགུའི་ཡོ་བྱད་སོགས། །དངོས་བཤམས་ཡིད་སྤྲུལ་མཆོད་པའི་སྤྲིན་ཕུང་འདིས། ཀླུ་རྒྱལ་འཁོར་བཅས་དགྱེས་པ་བསྐྱེད་གྱུར་ཅིག །ཁྱད་པར་བཟང་པོའི་སྨན་སྦྱོར་བརྒྱ་ཕྲག་དང་། །དྲི་ཞིམ་བསུང་ཤིང་སྣ་ཚོགས་དུད་པའི་སྤྲིན། །འཆི་མེད་ལམ་ཀུན་ཡོངས་སུ་ཁྱབ་པ་འདིས། །ཀླུ་དང་ས་བདག་གཉན་པོ་མ་ལུས་བསང། །རྐོ་རློག་ཐབ་གཞོབ་ཤིང་བཅད་ཆུ་བོ་དཀྲུགས། །མཁར་ལས་ཞིང་ས་མཚེར་མལ་ཉེས་པ་དང་། །གཞན་གྱི་མནན་གཏད་ཁྲམ་ལ་བཏབ་པ་སོགས། །གནོད་
པ་ཅི་མཆིས་བསང་གིས་དག་གྱུར་ཅིག །དམེ་འཁོན་ཡུག་གྲིབ་དམར་དང་རོ་གྲིབ་ཀྱིས། །བསྐྱེད་པའི་དོན་སྣོད་ཡན་ལག་པགས་པའི་ནད། །གག་ལྷོག་མཛེ་དང་ཕོལ་མིག་དྲེག་གྲུམ་སོགས། །ཀླུ་ཡི་ནད་ཀུན་བསང་གིས་དག་གྱུར་ཅིག །སྔོན་ཆད་འཁྲུལ་བའི་ནོངས་པ་ཅི་མཆིས་པ། །བསང་མཆོད་དམ་པ་འདི་ཡིས་བྱང་གྱུར་ཏེ། །དེང་ནས་ཀོ་ལོང་ཕྲག་དོག་མ་མཛད་པར། །རྣལ་འབྱོར་ཡོན་མཆོད་ཀུན་གྱི་གྲོགས་མཛོད་ཅིག །མི་དང་ཕྱུགས་ཀྱི་ནད་ཡམས་གོད་ཁ་ཆོད། །སད་སེར་ཐན་པ་འགོང་པོའི་གནོད་པ་བསྲུང་། །སྔགས་ནག་གདུག་པས་རྦད་པའི་གཏད་རྒྱ་ཁྲོལ། །མདོར་ན་ཕྱི་ནང་ཉེར་འཚེ་ཀུན་ལས་སྲུངས། །ཉེས་སྤྱོད་ལྔ་སྤོང་གཏན་གྱི་ཁྲིམས་མནོས་ཏེ། །རྩ་བརྒྱུད་བླ་མའི་སྤྱན་སྔར་ཁས་བླངས་ཤིང་། །ཡི་དམ་དཀྱིལ་འཁོར་གཉན་པོར་དམ་བཅས་བཞིན། །ཆོས་ལྡན་འཕྲིན་ལས་སྒྲུབ་ལ་མ་གཡེལ་ཅིག །མི་ཕྱུགས་ཟས་ནོར་གཡང་གི་མཚོ་བསྐྱིལ་ཏེ། །བདེ་སྐྱིད་དགའ་བའི་པད་ཚལ་བཞད་པའི་དབུས། །ཆོས་འབྱོར་སྦྲང་རྩིས་མྱོས་པའི་རྐང་དྲུག་པ། །གྲགས་སྙན་གླུ་དབྱངས་ལེན་པའི་བཀྲ་ཤིས་སྩོལ། །ཨོཾ་མུཿ ཀླུ་རྣམས་དགྱེས་བཞིན་རང་གནས་སུ་གཤེགས་པར་གྱུར། ཅེས་བརྗོད་ཅིང་བཀྲ་ཤིས་ཀྱིས་མཐའ་བརྒྱན་པར་བྱའོ། །དེ་ནས་གཏོར་མ་དང་འོ་མའི་ཕུད་སོགས་ཆུ་མིག་གམ་ཆུ་ཀླུང་དུ་དོར་བར་བྱ་ཞིང་། སེང་གེའི་སྒྲའི་གཟུངས་སྒྲོགས་པ་དང་། ཀླུ་རྒྱལ་དགའ་བོ་ཉེ་དགའ་བོ། །ཞེས་པ་ནས། གཏན་དུ་བདེ་བ་ཐོབ་པར་ཤོག །ཅེས་སོགས་ཀླུ་རྣམས་དང་རང་གཞན་ལ་ཕན་པའི་དོན་དུ་བསྔོ་སྨོན་གྱིས་རྒྱས་གདབ་
བོ། །ཞེས་ཀླུ་བསང་གཏོང་ཚུལ་མདོར་བསྡུས་འདི་ནི་དད་བརྩོན་ལྡན་པ་དཀོན་མཆོག་སྙན་གྲགས་ཀྱིས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའ་འོ།། །།