བཟང་སྤྱོད་ལ་བརྟེན་པའི་འཆི་བླུའི་ཆོ་ག་སྐྱེ་འགྲོའི་དབུགས་འབྱིན།
བཟང་སྤྱོད་ལ་བརྟེན་པའི་འཆི་བླུའི་ཆོ་ག་སྐྱེ་འགྲོའི་དབུགས་འབྱིན་ཞེས་བྱ་བ་བཞུགས་སོ།།
བླ་མ་དང་དཀོན་མཆོག་གསུམ་ལ་ཕྱག་འཚལ་ལོ། །རྙེད་དཀའི་དལ་འབྱོར་རྟེན་བཟང་ཡིད་བཞིན་ནོར། །རིང་དུ་གནས་པ་ཤིན་ཏུ་དོན་ཆེ་བས། །འཚོ་བ་བརྟན་བྱེད་འཆི་བླུའི་ཆོ་ག་ན། །རྒྱུད་དང་དམ་པའི་མན་ངག་བཞིན་བཤད་བྱ།། དེའང་འཆི་བླུའི་གདམས་པ་ངག་གི་དབང་ཕྱུག་གྲགས་པས་དམ་ཚིག་གསུམ་བཀོད། སྒྲོལ་དཀར། སོར་འབྲང་སོགས་ལ་བརྟེན་པ་དང། ཛེ་ཏཱ་རིས་ཚེ་དཔག་མེད་ལ་བརྟེན་པ་སོགས་གསུངས་པ་ལས། དམ་ཚིག་གསུམ་བཀོད་ལ་བརྟེན་པ་བཟང་སྤྱོད་འཆི་བླུར་གྲགས་པ་འདི་ནི་དོན་ཤིན་ཏུ་ཆེ་སྟེ། ངག་གི་དབང་ཕྱུག་གྲགས་པའི་འཆི་བླུའི་གཞུང་ལས། བཟང་སྤྱོད་ཡི་དམ་བཅས་པ་ཡི། །ཆོ་ག་ཡིས་ནི་འབུམ་བཟླས་ན། །ཐར་པ་ངེས་པར་སྐྱེད་བྱེད་ན། །འཆི་བ་བླུ་བ་སྨོས་ཅི་དགོས། །ཞེས་གསུངས་པ་ལྟར་རོ། །དེའང་བཟང་སྤྱོད་ཡི་དམ་བཅས་ཞེས་པ་ནི་གཙོ་བོར་བཟང་པོ་སྤྱོད་པ་སྟེ་སེམས་ཅན་ལ་ཕན་པའི་ལྷག་བསམ་གྱིས་ཟིན་
དགོས་པའི་དོན་ཡིན་པ་ནི་དམ་ཚིག་གསུམ་བཀོད་པའི་རྒྱལ་པོ་ལས། ཇི་ལྟར་སེམས་ཅན་རྣམས་འཚང་རྒྱ་བར་གྱུར་ཅིག །ཅེས་རྣམ་པར་བསམ་ལ་བཟླས་པ་བྱའོ། །དེ་བཞིན་དུ་སེམས་ཅན་ཐམས་ཅད་ཀྱི་ནད་རྣམས་རབ་ཏུ་ཞི་བ་དང། ཞེས་པ་ནས། སྟོབས་བཅུ་མཁྱེན་པའི་ས་ལ་སེམས་ཅན་སོ་སོར་གནས་པར་གྱུར་ཅིག་ཅེས་བྱ་བ་ལ་སོགས་པ་དང། གཞན་ཡང་སེམས་ཅན་ལ་ཕན་པའི་རྒྱུར་དམིགས་ཏེ་སྔགས་བཟླ་བར་བྱའོ། །ཞེས་དང་། སྒྲུབ་པ་འདིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་རབ་ཏུ་དད་པ་བསྐྱེད་ནས་བྱང་ཆུབ་ཀྱི་སེམས་ཀྱིས་ཡོངས་སུ་བཟུང་བ་དེ་ཡིས་ངེས་པར་འགྲུབ་པར་འགྱུར་རོ། །ཞེས་གསུངས་སོ། །འོན་ཀྱང་དེ་གསལ་འདེབས་པའི་ཕྱིར་བཟང་སྤྱོད་སོགས་གདོན་པའང་བསྟན་པ་ཡིན་ཏེ། དེ་ཉིད་ལས། ཐབས་ལ་མཁས་པ་འདིས་ཀྱང་ཡོངས་སུ་ཟིན་པར་བྱ་སྟེ། སྨོན་ལམ་རྒྱ་ཆེན་པོ་བྱ་བ་དང། ཞེས་པ་ནས། སྡོང་པོ་བཀོད་པ་ལ་སོགས་པ་ཤིན་ཏུ་རྒྱ་ཆེན་པོའི་མདོ་དང། བྱང་ཆུབ་སེམས་དཔའི་སྤྱོད་པའི་རྒྱུ་ལ་རབ་ཏུ་འཇུག་པ་
ཀློག་པ་ཉིད་དང། ཞེས་གསུངས་པའི་ཕྱིར། ཆོ་ག་ཞེས་པ་སྒྲུབ་ཚུལ་ཡིན་ལ། དེའང་གཙོ་བོར་ཡན་ལག་བདུན་པའི་སྒོ་ནས་བྱེད་ཚུལ་རྒྱུད་འདིའི་གོང་འོག་ཀུན་ཏུ་གསུངས་པ་དང། མཆོད་བསྟོད་སྨོན་པ་སོགས་ཀྱི་མཐུ་བསྐྱེད་པའི་ཐབས་མཁས་ཀྱི་སྔགས་ཀྱང་ལན་དུ་མར་གསུངས་པ་རྣམས་ཡིན་ནོ། །དཔེ་ལ་ལར། ཆོ་ག་ཡིས་ནི་འདི་བཟླས་ན། །ཞེས་འབྱུང་ཡང། འབུམ་བཟླས་ན་ཞེས་པ་དག་སྟེ། དེར་སྒྲོལ་དཀར་སོགས་ལ་འབུམ་ཕྲག་བཅུ་དགོས་པར་གསུངས་པ་བཞིན། འདིར་དེ་བཞིན་གཤེགས་པའི་ཡིག་བརྒྱ་འབུམ་བཟླ་དགོས་པའི་དོན་ཡིན་གྱི་བཟང་སྤྱོད་ཀྱི་གྲངས་མིན་ནོ། །འབུམ་གསུངས་པ་ཕུན་སུམ་ཚོགས་པའི་དབང་དུ་བྱས་ཀྱི་ངེས་གཟུང་མིན་ཏེ། ཉིན་ཞག་གཅིག་གིས་ཀྱང་འགྲུབ་པར་གསུངས་པས་སོ། །ཐར་པ་ངེས་པར་སྐྱེད་བྱེད་ན། །འཆི་བ་བླུ་བ་སྨོས་ཅི་དགོས། །ཞེས་པ་ནི་རྒྱུད་དེ་ཉིད་ལས་ཚིག་ཟིན་ལ་འཆི་བ་བླུ་བར་བསྟན་པ་མེད་ཀྱང་གནས་སྐབས་མཐར་ཐུག་གི་ཕན་ཡོན་མང་དུ་གསུངས་པའི་མཐར། མདོར་ན་མཐར་གྱིས་བྱང་ཆུབ་ལ་གཞོལ་ཞིང་སོ་སོར་འགོད་པ་དེ། ཞེས་བྱང་ཆུབ་ཐར་པའི་གོ་འཕང་ལའང་འགོད་ནུས་ན་ཚེ་བསྲིང་ནུས་པ་སྨོས་ཅི་དགོས་ཞེས་དོན་གྱིས་འཕང་བས་ཕན་ཡོན་བསྟན་པ་ཡིན་ནོ། །འདི་ཉིད་ལག་ཏུ་ལེན་པར་འདོད་པའི་གང་ཟག་གིས་ཡིད་དང་མཐུན་པའི་གནས་སུ་བྱི་དོར་བྱས་ལ་དཀོན་མཆོག་གི་རྟེན་མང་དུ་དཀྲམ། མཆོད་པ་སྣ་ལྔ་ཉུང་མཐའ་ཉེར་གཅིག་ཙམ་གྱིས་མཐའ་བསྐོར། གཙོ་བོ་ལ་ཟླུམ་གཏོར་རྒྱན་ལྡན་གཅིག་དང་གཞན་དཀར་གཏོར་བཞི་བཅས་བཤམ། འདིར་བཤམ་རྒྱུའི་རྟེན་ཡང་རྒྱུད་དེ་ཉིད་ལས་གོང་འོག་ཏུ་བྲིས་སྐུ་བྱེད་ཚུལ་རིམ་པ་དུ་མ་ཞིག་གསུངས་ནའང། སྐབས་འདི་དང་འབྲེལ་བ་ལ་གཙོ་བོ་དམ་
ཚིག་གསུམ་བཀོད་སྐུ་མདོག་གསེར་མདོག་ཆོས་འཁོར་གྱི་ཕྱག་རྒྱ་ཅན་སྤྲུལ་སྐུའི་རྣམ་པ་དང། གཡས་སུ་ཀུན་ཏུ་བཟང་པོ་སྐུ་མདོག་སེར་པོ་རལ་གྲིའམ་རིན་པོ་ཆེ་འཛིན་པ། གཡོན་དུ་རྟ་མཆོག་གི་ཤུགས་ཅན་མ་སྐུ་མདོག་ལྗང་གུ་ཕྱག་ཐལ་མོ་སྦྱར་བ་དང། ཕྱག་ན་རྡོ་རྗེ་སྐུ་མདོག་སྔོན་པོ་ཕྱག་གཡས་རྡོ་རྗེ་འཛིན་ཅིང་གཡོན་ཐལ་མོ་སྦྱར་བ། དེ་གསུམ་སེམས་དཔའི་ཆ་ལུགས་ཅན། ཀུན་ཏུ་བཟང་པོའི་འོག་ཏུ་སྒྲུབ་པ་པོ་རང་ཉིད་གཙོ་བོ་ལ་མངོན་དུ་ཕྱོགས་ནས་ཡོད་པ་འབྲི་བར་གསུངས་པ་ལྟ་བུའམ། ཡང་ན་པཎ་ཆེན་གསུང་གི་ཨེ་ཝཾ་ལས་དམ་ཚིག་གསུམ་བཀོད་ཀྱི་མངོན་རྟོགས་སུ་བཀོད་པ་ལྟར་བྲིས་པ་བྱུང་ན་ལེགས་ལ། དེ་མིན་ཡང་དམ་ཚིག་གསུམ་བཀོད་ཀྱི་སྐུ་དང། དེ་མ་བྱུང་ཚེ་ཐུབ་པའི་སྐུ་ཞིག་མེད་མི་རུང་དུ་དགོས་སོ། །སྒྲུབ་པ་པོའང་དགེ་སློང་ཚུལ་ཁྲིམས་རྣམ་པར་དག་པ་བཞི་ཙམ་མ་མཐའ་དགོས་པས། དེ་དག་ཚོགས་ནས་ཐོག་མར་སྡོམ་གསུམ་སོ་སོའི་ཕྱིར་བཅོས་གཞུང་བཞིན་བྱ། གལ་ཏེ་མ་འཛོམ་ནའང་སྤྱི་བཤགས་ལན་གསུམ་མཐོང་སྡོམ་དྲི་བ་ཐབས་ལེགས་དང་བཅས་པ་རྒྱུད་དག་ངེས་པར་བྱ། དེ་ནས་རྒྱུད་ལས། སེམས་ཅན་སྡུག་བསྔལ་བ་རྣམས་ཀྱི་དོན་ཡོངས་སུ་མི་ཉམས་པར་བྱ་བའི་ཆོ་ག་བཤད་པར་བྱ་སྟེ། ཞེས་པ་ནས། སྔ་དྲོ་དང་པོ་ལ་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་ཐམས་ཅད་ལ་བདག་ཉིད་དབུལ་བར་བྱ་སྟེ། ཞེས་བདག་འབུལ་བའི་སྒོ་ནས་བྱང་སྡོམ་གསོ་དགོས་པར་གསུངས་པས། བྱམས་སྙིང་རྗེ་བྱང་ཆུབ་ཀྱི་སེམས་ཀྱི་དམིགས་རྣམ་ལེགས་པར་གསལ་བཏབ་ལ། ཨོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཱཾ་ཀ་རོ་མི། ཕྱོགས་བཅུ་ན་
བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བྱང་ཆུབ་སྙིང་པོ་ལ་མཆིས་ཀྱི་བར་དུ་བདག་ཉིད་དུས་ཐམས་ཅད་དུ་ཡོང་ཡེ་འབུལ་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བདག་བཞེས་སུ་གསོལ། བདག་ལ་དངོས་གྲུབ་བླ་ན་མེད་པ་སྩལ་ཏུ་གསོལ། ཞེས་བདག་འབུལ། ཐལ་མོ་བཀན་པ་ལས་མཛུབ་མོ་བཀུག་པ་དེ་བཞིན་གཤེགས་པའི་རིགས་ཀྱི་དམ་རྒྱ་བཅས་ལ། ཨོཾ་སརྦ་ཏ་ཐཱ་ག་ཏ་ཨུདྦྷ་ཝ་ཡེ་སྭཱཧཱ། ཞེས་ཕྱག་རྒྱ་མགོ་བོར་བཞག །དེ་ནས་མདུན་གྱི་ནམ་མཁར་སྐྱབས་ཡུལ་གསལ་བཏབ་ལ། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བདག་གིས་བྱང་ཆུབ་སེམས་བསྐྱེད་དོ། །ཞེས་ལན་གསུམ་གྱིས་སྐྱབས་འགྲོ་སེམས་བསྐྱེད་བྱ། དེ་ནས། མར་གྱུར་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་སོགས་ཀྱིས་ཚད་མེད་བཞི་བསྒོམ། དེ་ནས། དེ་ལྟར་བདག་གི་དེ་ཁོ་ན་ཉིད་དོན་དམ་པར་སྤྲོས་པ་ཐམས་ཅད་དང་བྲལ་བ་ཇི་ལྟར་ཡིན་པ་དེ་བཞིན་དུ་ལྷའི་དེ་ཁོ་ན་ཉིད་ཀྱང་དེ་ལྟར་ཡིན་པས། དེ་གཉིས་ཆུ་དང་འོ་མ་འདྲེས་པ་བཞིན་དུ་རྣམ་པར་མི་རྟོག་པའི་སྣང་བའི་སྒོ་དེ་ཉིད་དུ་བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པར་གྱུར། སྟོང་པའི་ངང་ལས་ན་མ་སྟྲཻ་ཡ་དྷྭི་ཀཱ་ནཱཾ་ཏ་ཐཱ་ག་ཏཱ་ནཱཾ། སརྦ་ཏྲཱ་པྲ་ཏི་ཧ་ཏཱ་བཱབྟི་དྷརྨཱ་ཏཱ་བཱ་ལི་ནཱཾ། ཨ་ས་མ་ས་མ་ས་མནྟོ྅ནནྟཱ་བཱ་བྟི་ཤཱ་ས་ནི། ཧ་ར་ཧ་ར། སྨ་ར་སྨ་ར་ཎ། བི་ག་ཏ་རཱ་ག་བུདྡྷ་དྷརྨཱ་ཏེ། ས་ར་ས་ར། ས་མ་བཱ་ལ། ཧ་ས་ཧ་ས། ཏྲ་ཡ་ཏྲ་ཡ། བྷ་ག་བཱན་མཧཱ་བ་ར་ལཀྵ་ཎེ། ཛྭ་ལ་ཛྭ་ལ་ན་སཱ་ག་
རེ་སྭཱཧཱ། ཞེས་པའི་སྔགས་ཀྱི་གདངས་ཀྱི་རྣམ་པ་ནམ་མཁའ་ལ་གྲགས་པར་གྱུར། བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པའི་རྣམ་པ་ཅན་གྱི་རང་གི་སེམས་ཟླ་བའི་དཀྱིལ་འཁོར་གྱི་སྟེང་དུ་སྔགས་ཀྱི་གདངས་ཀྱི་རྣམ་པ་ནམ་མཁའ་ལ་གྲགས་པ་དེ་ཉིད་ཤིན་ཏུ་དག་པའི་དངུལ་ཆུ་གསེར་གྱི་བྱེ་མ་ལ་ཞེན་པ་ལྟར་ཡིག་འབྲུ་བྲིས་པའི་རྣམ་པ་ཅན་དུ་འཁོད་པ་ཡོངས་སུ་གྱུར་པ་ལས་བདུད་རྩིས་གང་བའི་ལྷུང་བཟེད་ཀྱི་མཐར་ན་མ་སྟྲཻ་ཡ། ཞེས་པ་ནས། ན་སཱ་ག་རེ་སྭཱཧཱ། ཞེས་པའི་སྔགས་ཀྱིས་མཚན་པར་གྱུར། ཟླ་བ་ཕྱག་མཚན་སྔགས་དང་བཅས་པ་ལས་འོད་ཟེར་སྣ་ཚོགས་འཕྲོས་པའི་རྩེ་མོ་ལས་བཅོམ་ལྡན་འདས་དམ་ཚིག་གསུམ་བཀོད་པའི་རྒྱལ་པོའི་ལྷའི་གཟུགས་དཔག་ཏུ་མེད་པ་བྱུང་བས་ནམ་མཁའི་དབྱིངས་ཐམས་ཅད་ཁྱབ་པར་བྱས། རྒྱལ་བ་ཐམས་ཅད་ལ་མཆོད་པའི་སྤྲིན་ཆེན་པོ་སྤྲུལ་བས་ལེགས་པར་མཆོད། གཞན་ཡང་སྤྲིན་ཆེན་པོ་སྤྲུལ་བ་ལས་བདུད་རྩིའི་ཆར་རྒྱུན་བབས་པས་དམྱལ་བ་ལ་སོགས་པའི་འགྲོ་བ་ཐམས་ཅད་ཀྱི་སྡུག་བསྔལ་གྱི་མེ་རྣམས་ཞི་ཞིང་བདེ་བས་ཚིམ་པར་བྱས་ནས་ལྷའི་སྐུ་དང་བཅས་པའི་འོད་ཟེར་སླར་ལོག །རང་གི་སེམས་ཟླ་བའི་དཀྱིལ་འཁོར་དང་ཕྱག་མཚན་སྔགས་དང་བཅས་པ་ལ་ཐིམ་པ་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་དམ་ཚིག་བཀོད་པའི་རྒྱལ་པོ་སྐུ་མདོག་གསེར་བཙོ་མ་ལྟ་བུ་དར་གྱི་ཆོས་གོས་དང་མཚན་དཔེའི་རྒྱན་གྱིས་སྤྲས་པ། ཕྱག་གཉིས་ཆོས་འཁོར་གྱི་ཕྱག་རྒྱས་འགྲོ་བ་ཐམས་ཅད་ཀྱི་སྡུག་བསྔལ་སེལ་བར་གྱུར་
པའི་སྤྱི་བོར་ཨོཾ་ལས་འཁོར་ལོ་དཀར་པོའི་ལྟེ་བར་ཨོཾ་གྱིས་མཚན་པ། མགྲིན་པར་ཨཱཿ ལས་པདྨ་དམར་པོའི་ལྟེ་བར་ཨཱཿས་མཚན་པ། ཐུགས་ཀར་ཧཱུཾ་ལས་རྡོ་རྗེ་སྔོན་པོའི་ལྟེ་བར་ཧཱུཾ་གིས་མཚན་པར་གྱུར། སྔར་གྱི་དམ་རྒྱ་སྤྱི་བོ། སྙིང་ག །སྨིན་མཚམས། མགྲིན་པ། དཔུང་མགོ་གཉིས་ཏེ་གནས་དྲུག་ཏུ་རེག་ཅིང། ཨོཾ་སརྦ་ཏ་ཐཱ་ག་ཏ་ཨུདྦྷ་ཝ་ཡེ་སྭཱཧཱ། ཞེས་བརྗོད། ཐུགས་ཀའི་ས་བོན་ལས་འོད་ཟེར་འཕྲོས། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ན་མཿ སརྦ་བུདྡྷ་བོ་དྷི་སཏྭ་ནཱཾ། སརྦ་ཐཱ་ཨུདྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱཧཱ། ཞེས་མཆོད་པ་འབྱུང་བའི་སྔགས་བརྗོད་ལ། ཨོཾ་སརྦ་ཏ་ཐཱ་ག་ཏཱ་ཨརྒྷཾ་ནས། ཤཔྟའི་བར་གྱིས་མཆོད། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷཿ སརྦ་དྷརྨཿ སྭ་བྷཱ་ཝ་ཤུདྡྷོ྅ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་ཨོཾ་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་རང་བཞིན་སྟོང་པ་རྣམ་པ་མཆོད་རྫས་བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་སྐྱེད་པར་གྱུར། ན་མཿ སརྦ་བུདྡྷ་བོ་དྷི་སཏྭཱ་ནཱཾ། སརྦ་ཐཱ་ཨུདྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱཧཱ། ཨོཾ་ཨརྒྷཾ་ཨཱཿ ཧཱུཾ་ནས། ཨོཾ་ཤཔྟ་ཨཱཿ ཧཱུཾ་གི་བར་གྱིས་བྱིན་གྱིས་བརླབ། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤཔྟའི་བར་གྱིས་མཆོད། ན་མཿ སརྦ་བུདྡྷ་བོ་དྷི་སཏྭཱ་ནཾ། སརྦ་ཏྲ་སཾ་ཀུ་སུ་མི་ཏ་ཨ་བྷི་
ཛྙཱ་རཱ་ཤི་ནི་ན་མཿ སྟུ་ཏེ་སྭཱཧཱ། ཞེས་བསྟོད་པ་འབྱུང་བའི་སྔགས་ཀྱིས་ཐོག་དྲངས། གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷམ་མེ་བ། །མགོན་པོ་མཆོག་བརྙེས་ཁྱོད་ལ་ཕྱག་འཚལ་ལོ། །མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མཆོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཅན་ཁྱོད་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པས་འདོད་ཆགས་བྲལ་བར་གྱུར། །དགེ་བས་ངན་སོང་ལས་གྲོལ་ཅིང། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གནས། །ཞིང་གི་དམ་པ་ཡོན་ཏན་ལྡན། །དགེ་འདུན་ལའང་ཕྱག་འཚལ་ལོ། །སངས་རྒྱས་གཙོ་ལ་ཕྱག་འཚལ་ལོ། །སྐྱོབ་པ་ཆོས་ལ་ཕྱག་འཚལ་ལོ། །དགེ་འདུན་ཆེ་ལ་ཕྱག་འཚལ་ལོ། །གསུམ་ལ་རྟག་ཏུ་གུས་ཕྱག་འཚལ། །ཞེས་ཕྱག་བྱ། དེ་ནས། རང་གི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཏྲཻཾ་ཡིག་དྲི་མ་མེད་པ་གསེར་བཙོ་མ་ལྟ་བུའི་མཐའ་སྐོར་དུ་ན་མ་སྟྲཻ་
ཡ་དྷྭི་ཀཱ་ནཱཾ་ཏ་ཐཱ་ག་ཏཱ་ནཱཾ། སརྦ་ཏྲཱ་པྲ་ཏི་ཧ་ཏཱ་བཱ་པྟི་དྷརྨཱ་ཏཱ་པཱ་ལི་ནཱཾ། ཨ་ས་མ་ས་མ་ས་མནྟོ྅ནྟཱ་བཱཔྟི་ཤཱ་ས་ནི། ཧ་ར་ཧ་ར་སྨ་ར་སྨ་ར་ཎ། བི་ག་ཏ་རཱ་ག་བུདྡྷ་དྷརྨཱ་ཏེ། ས་ར་ས་ར། ས་མ་བཱ་ལ། ཧ་ས་ཧ་ས། ཏྲ་ཡ་ཏྲ་ཡ། བྷ་ག་ཝཱན་མཧཱ་བ་ར་ལཀྵ་ཎེ། ཛྭ་ལ་ཛྭ་ལ་ན་སཱ་ག་རེ་སྭཱཧཱ། ཞེས་པས་བསྐོར་བ་ལས་འོད་ཟེར་འཕྲོས། དམྱལ་བ་ལ་སོགས་པའི་སྡུག་བསྔལ་རྣམས་ཞི་བར་བྱས། སངས་རྒྱས་སྲས་བཅས་ལ་མཆོད་པ་ཕུལ། སྐུ་གསུང་ཐུགས་ཀྱི་བྱིན་རླབས་ཐམས་ཅད་བསྡུས་ཏེ་རང་ཉིད་ལ་ཐིམ་པར་བསམས་ལ། དེ་བཞིན་གཤེགས་པའི་ཡི་གེ་བརྒྱ་པའི་སྔགས་དེ་ཉིད་གང་མང་བཟླ། གཙོ་བོ་ལ་འབུལ་རྒྱུའི་གཏོར་མ་ཨ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་གཏོར་མ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿ ཧཱུཾ། ལན་གསུམ་གྱིས་བྱིན་གྱིས་བརླབས་ལ། བཅོམ་ལྡན་འདས་དམ་ཚིག་གསུམ་བཀོད་པའི་རྒྱལ་པོའི་ལྷ་ཚོགས་སྤྱན་དྲངས། ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར་པར་བསམས་ལ། ཨོཾ་སརྦ་ཏ་ཐཱ་ག་ཏ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་གསུམ་མམ་བདུན་གྱིས་གཏོར་མ་དབུལ། ཨརྒྷཾ་སོགས་ཀྱིས་མཆོད། བཅོམ་ལྡན་ཐུགས་རྗེ་མངའ་བ་ཡིས། །བདག་ཅག་ཡོན་མཆོད་འཁོར་དང་བཅས། །དུས་མིན་འཆི་བ་ལས་བསྐྱབ་སྟེ། །མཆོག་ཐུན་དངོས་གྲུབ་མ་ལུས་སྩོལ། །ཅེས་འདོད་དོན་ལ་གསོལ་བ་གདབ། དཀར་
གཏོར་བཞི་སྔར་བཞིན་བྱིན་གྱིས་བརླབས་ལ། ཙ་ཏུར་མཧཱ་རཱ་ཛ་ས་པ་རི་ཝཱ་ར་ཨེ་ཧྱེ་ཧི། ཞེས་རྒྱལ་ཆེན་བཞི་སྤྱན་དྲངས། དཀར་གཏོར་དང་པོར་དམིགས་ཏེ། རྒྱལ་པོ་ཆེན་པོ་བཞིའི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་གྱུར། ཙ་ཏུར་མཧཱ་རཱ་ཛ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། གསུམ་སོགས་ཀྱིས་དབུལ། ཙ་ཏུར་མཧཱ་རཱ་ཛཱ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། དུས་འདི་ནས་བཟུང་ཚེ་རབས་ཐམས་ཅད་དུ། །ཆོས་སྐྱོང་སྲུང་མ་ཁྱེད་རྣམས་དང་འགྲོགས་ནས། །བར་ཆད་སྤྱི་དང་ཁྱད་པར་འཆི་བ་ཀུན། །མྱུར་དུ་བཟློག་པའི་འཕྲིན་ལས་དམ་པ་མཛོད། །ཅེས་འཕྲིན་ལས་བཅོལ། དཀར་གཏོར་གཉིས་པ། ན་མཿ སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། ཞེས་པ་ལན་གསུམ་གྱིས་འབྱུང་བོ་ལ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །ཕུན་ཚོགས་འདོད་ཡོན་ལྔ་ལྡན་པའ། །བདུད་རྩི་རྒྱ་མཚོའི་གཏོར་མ་འདི། །ཚེ་དང་སྲོག་རྣམས་འཕྲོག་པ་ཡི། །འབྱུང་པོའི་གདོན་རྣམས་ཀུན་ལ་བསྔོ། །བཞེས་ནས་ཚེ་ཡི་བར་ཆད་ཀུན། །མྱུར་དུ་བཟློག་པར་བྱས་ནས་ཀྱང་། །བྱམས་པའི་སེམས་དང་ལྡན་པ་དང། །རྟག་ཏུ་སྡོངས་གྲོགས་གཉན་པོ་མཛོད། །ཅེས་འཕྲིན་ལས་བཅོལ། དཀར་གཏོར་གཞན་གཉིས་སླར་འཆི་བ་ཟློག་པའི་འཕྲིན་ལས་མཛད་པ་ན་གཏང་རག་ལ་དབུལ་སྙམ་དུ་
གཏའ་གཏོར་གྱི་ཚུལ་དུ་འཇོག །དེ་ནས་དཀོན་མཆོག་སྤྱི་ལ་བཤམས་པའི་མཆོད་པ། ཨ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་རང་བཞིན་སྟོང་པ་རྣམ་པ་མཆོད་རྫས་བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ཨོཾ་ཨརྒྷཾ་ཨཱཿ ཧཱུཾ་ནས། ཨོཾ་ཤཔྟ་ཨཱཿ ཧཱུཾ་གི་བར་དང་མཆོད་པ་འབྱུང་བའི་སྔགས་ཀྱིས་བྱིན་གྱིས་བརླབ། དེ་ནས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དམིགས་ནས་སྤྱན་འདྲེན་པ་འདི་ལྟར་བརྗོད་དེ། དེ་བཞིན་གཤེགས་པ་བྱང་ཆུབ་སེམས་དཔའ་དང། །ཡི་དམ་དཔའ་བོ་མཁའ་འགྲོའི་ཚོགས་རྣམས་དང། །ཉན་ཐོས་རང་རྒྱལ་འཁོར་ཚོགས་རྒྱ་མཚོར་བཅས། །ཁྱེད་རྣམས་འཆི་བདག་བདུད་ཀྱི་སྡེ་བཅོམ་པའ། །བདེན་པ་དེ་ཡིས་དེང་འདིར་འཆི་བདག་དཔུང་། །འཇོམས་ཕྱིར་འཁོར་དང་བཅས་པ་རྫུ་འཕྲུལ་གྱིས། །ཐོགས་པ་མེད་པར་མདུན་གྱི་ནམ་མཁར་གཤེགས། །བདག་དང་སྦྱིན་བདག་རྣམས་ལ་དགྱེས་བཞིན་བཞུགས། །ཞེས་སྤྱན་དྲངས་པས། མདུན་གྱི་ནམ་མཁར་སེང་གེས་བཏེག་པའི་རིན་པོ་ཆེའི་ཁྲི་དཔངས་མཐོ་ཞིང་ཡངས་པའི་སྟེང་དུ་སྐྱབས་ཡུལ་རྣམས་བདག་དང་སྦྱིན་བདག་ལ་དགྱེས་བཞིན་དུ་བཞུགས་པར་བསམས་ཤིང་བྱིན་གྱིས་བརླབས་པའི་མཆོད་པ་རྣམས་ཀུན་ཏུ་བཟང་པོའི་མཆོད་སྤྲིན་དུ་དམིགས་ནས་ཕུལ་བར་མོས་ལ། བདག་དང་མ་དག་
ཞིང་ཁམས་ཇི་སྙེད་པ། །དེ་སྙེད་ཀུན་བཟང་མཆོད་པའི་སྤྲིན་གྱིས་གང། །དེ་ཀུན་མཆོད་ཡོན་ཞབས་བསིལ་མེ་ཏོག་དང། །བདུག་སྤོས་མར་མེ་དྲི་རོ་རོལ་མོར་བསྒྱུར། །དེ་ཡིས་བླ་མ་རྒྱལ་བ་སྲས་བཅས་མཆོད། །བདག་དང་འདི་ལ་ཐུགས་བརྩེས་བཞེས་ནས་ཀྱང་། །འཆི་བའི་དགྲ་ལས་རྣམ་པར་རྒྱལ་བ་དང། །ཐར་པའི་གོ་འཕང་སྟེར་བའི་དངོས་གྲུབ་སྩོལ། །ཨོཾ་སརྦ་ཏ་ཐཱ་ག་ཏ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུཾ། དེ་བཞིན་དུ་པཱངྱཾ་ནས། ཤཔྟའི་བར་གྱིས་མཆོད། དེ་བཞིན་གཟུགས་སྒྲ་དྲི་རོ་རེག་བྱ་དང། །གླིང་བཞི་རི་རབ་ཉི་ཟླ་རྫས་རྟགས་གཉིས། །རྒྱལ་སྲིད་བདུན་དང་ཉེ་བའི་རིན་ཆེན་བདུན། །མཆོད་པའི་སྤྲིན་ཕུང་མ་ཚང་མེད་པ་ཡིས། །བཅོམ་ལྡན་ཐུགས་རྗེའི་གཏེར་གྱུར་ཤཱཀྱའི་རྒྱལ། །ལ་སོགས་དཀོན་མཆོག་རིན་ཆེན་རྣམ་པ་གསུམ། །མཉེས་ཕྱིར་འབུལ་གྱི་དགྱེས་བཞིན་ལེགས་བཞེས་ནས། །འཆི་བ་བླུ་བའི་དངོས་གྲུབ་སྩལ་ཏུ་གསོལ། །ཨོཾ་སརྦ་ཏ་ཐཱ་ག་ཏ་རཱུ་པ་ནས། སྤརྴའི་བར་དང། ཨཥྚ་མངྒ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུཾ། ཞེས་པ་དང་། ཨོཾ་སརྦ་ཏ་ཐཱ་ག་ཏ་སརྦ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿ ཧཱུཾ། ཞེས་པ་རྣམས་ཀྱིས་མཆོད། སྐབས་འདིར་ཁྲུས་གསོལ་བྱ། དེ་ནས་མཎྜལ་ཕུལ་ཞིང་མེ་ཏོག་གཏོར་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་
བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་སེང་གེ་དམ་ཚིག་གསུམ་བཀོད་པའི་རྒྱལ་པོ་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་མུ་མཐའ་གྲངས་མེད་པ་ན་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་རྣམས་དང་རྒྱལ་བའི་སྲས་པོ་རྣམས་དང་ཉན་ཐོས་ཆེན་པོ་རྣམས་དང་དཀར་ཕྱོགས་སྐྱོང་བའི་ལྷ་རྣམས་བདག་ལ་དགོངས་སུ་གསོལ། བདག་དང་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དང། ཁྱད་པར་དུ་སྦྱིན་པའི་བདག་པོ་ཆེ་གེ་མོ་འཁོར་གཡོག་ལྟོས་བཅས་ཐམས་ཅད་དུས་མ་ཡིན་པའི་འཆི་བ་ལས་ལྡོག་པ་དང། ཚེ་ཟད་པ་ལས་རིང་དུ་སྤེལ་བའི་དངོས་གྲུབ་དམ་པ་སྩལ་ཏུ་གསོལ། ཁྱད་པར་དུ་ཀུན་ཏུ་བཟང་པོའི་སྨོན་ལམ་གྱི་མཐུ་དང་བདེན་པའི་བྱིན་གྱིས་བརླབ་ཀྱི་མཐུ་ཟབ་མོ་མངོན་སུམ་དུ་བསྟན་དུ་གསོལ། ཞེས་ལན་གསུམ་མམ་བདུན་སོགས་ཀྱིས་གསོལ་བ་གདབ། ན་མ་སྟྲཻ་ཡ་དྷཱི་ཀཱ་ནཱཾ། ཏ་ཐཱ་ག་ཏཱ་ནཱཾ། ས་མནྟ་གཱ་མེ་ནཱཾ། ཨུ་ཛྭཱ་ལ་ཡ་སྭཱཧཱ། ཞེས་བརྗོད་ན་ཀུན་ཏུ་བཟང་པོས་ཞལ་སྟོན་པར་གསུངས་ལ། ན་མ་སྟྲཻ་ཡ་དྷཱི་ཀཱ་ནཱཾ། ཏ་ཐཱ་ག་ཏཱ་ནཱཾ། ཨོཾ་ཨསྟ་བ་ར་བྷོ་གི་སྭཱཧཱ། ཞེས་བརྗོད་ན་ཀུན་ཏུ་བཟང་པོའི་སྨོན་པ་ལྟར་གྱི་སྤྱོད་པ་ལས་ཕྱིར་མི་ལྡོག་པར་བྱིན་གྱིས་བརླབས་ཏེ་སྨོན་ལམ་འགྲུབ་པར་གསུངས་པས་སྔགས་དེ་གཉིས་ཀྱང་ལན་ཁ་ཤས་རེ་སྔོན་དུ་བཏང་ལ། སྒྲ་དག་ཅིང་བར་མ་ཆད་པར་བྱས་ནས། བཟང་སྤྱོད་ལན་ཉེར་གཅིག་སོགས་ཅི་འགྲུབ་རེ་འདོན། དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་
བཀང་བ་གླུ་དང་ན། །རོལ་མོར་བཅས་པ་དུ་མས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་ཁྲུས་གསོལ་བས་ཆོ་ག་ཆད་ལྷག་གི་ཉེས་པ་སོགས་ཀྱང་དག་པར་བསམ། ཐུན་རྗེས་མའི་ཚེ། དེ་བཞིན་གཤེགས་པ་བྱང་ཆུབ་སེམས་དཔའ་དང། ཞེས་སོགས་ཀྱིས་སྤྱན་དྲངས་ཏེ་མཆོད་པ་འབུལ་བ་སོགས་སྔར་བཞིན་བྱ། བཟང་སྤྱོད་ཚར་དང་པོའི་མགོར་ཡན་ལག་བདུན་པའི་སྐབས་སློབ་དཔོན་གྱིས་མཎྜལ་ལག་ཏུ་ཐོགས་ཏེ་གདངས་དང་བཅས་དལ་བུས་གསུངས་ཤིང་། ཐམས་ཅད་བདག་གིས་བྱང་ཆུབ་ཕྱིར་བསྔོ་འོ། །ཞེས་པའི་མཚམས་སུ་མཎྜལ་དབུལ། ཚར་ཕྱི་མ་རྣམས་སྐབས་དང་བསྟུན་པར་བྱ། དེ་ལྟར་ཐུན་བཞི་བྱས་ནས་ཐུན་རྗེས་མའི་མཇུག་ཏུ་སྔར་མ་ཕུལ་བའི་དཀར་གཏོར་གཉིས་སླར་ཡང་བྱིན་གྱིས་བརླབ་ལ། དང་པོ་འདི་ཉིད་ཀྱི་སྒོས་ཀྱི་ཆོས་སྐྱོང་རྒྱལ་པོ་ཆེན་པོ་བཞི་ལ་དབུལ་ཏེ། དེའང། ཙ་ཏུར་མཧཱ་རཱ་ཛ་ཨེ་ཧྱེ་ཧི། ཨོཾ་ཌྷྲྀ་ཏ་རཱཥྚཱ་ཡ། ཨོཾ་བི་རཱུ་ཌྷ་ཀཱ་ཡ། ཨོཾ་བི་རཱུ་བཱ་ཀྵཱ་ཡ། ཨོཾ་བཻ་ཤྲ་མ་ཎཱ་ཡ་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད་ལ། རྒྱལ་པོ་ཆེན་པོ་དཔལ་ལྡན་པ། །མ་རྒད་མདོག་མཚུངས་པི་ཝཾ་འཛིན། །དྲི་ཟའི་ཚོགས་ལ་དབང་བསྒྱུར་བའི། །ཡུལ་འཁོར་སྲུང་ལ་ཕྱག་འཚལ་ལོ། །དཔའ་བོ་ཆེན་པོ་སྟོབས་པོ་ཆེ། །ཁ་དོག་སྔོན་པོ་རལ་གྲི་འཛིན། །གྲུལ་བུམ་ཚོགས་ལ་དབང་བསྒྱུར་བའི། །འཕགས་སྐྱེས་པོ་ལ་ཕྱག་འཚལ་ལོ། །མངའ་བདག་ཆེན་པོ་མཐུ་བོ་ཆེ། །ཁ་དོག་དམར་སེར་སྦྲུལ་ཞགས་འཛིན། །ཀླུ་ཡི་ཚོགས་ལ་མངའ་མཛད་པའ། །མིག་མི་བཟང་ལ་ཕྱག་འཚལ་ལོ། །དེད་དཔོན་ཆེན་པོ་གསེར་མདོག་ཅན། །
བེ་ཅོན་དང་ནི་ནེའུ་ལེ་འཛིན། །གནོད་སྦྱིན་ཚོགས་ལ་དབང་བསྒྱུར་བའི། །རྣམ་ཐོས་སྲས་ལ་ཕྱག་འཚལ་ལོ། །ཞེས་བསྟོད། རྒྱལ་པོ་ཆེན་པོ་བཞིའི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ཨོཾ་ཙ་ཏུར་མཧཱ་རཱ་ཛ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་བདུན་གྱིས་གཏོར་མ་ཕུལ། ཡང་སྔར་བཞིན་ཨརྒྷཾ་སོགས་ཀྱིས་མཆོད། རྒྱལ་པོ་ཆེན་པོ་འཁོར་བཅས་ཀྱིས། །མཆོད་སྦྱིན་གཏོར་མ་འདི་སྣོམས་ལ། །བདག་དང་རྒྱུ་སྦྱོར་ཡོན་བདག་གི །བར་གཅོད་མ་ལུས་ཟློག་པར་མཛོད། །ཅེས་འཕྲིན་ལས་བཅོལ། གཏོར་མ་གཉིས་པ་འབྱུང་པོ་སྤྱི་ལ་སྔར་བཞིན་བསྔོ། ཡང་ན་རྒྱལ་པོ་ཆེན་པོ་བཞིའི་གཏོར་མ་འབུལ་ཚུལ་ཚེ་ཆོག་ལས་འབྱུང་བ་བཞིན་བྱ། དེ་ནས། གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་སྟོན་ཏམ་ཀློག་པ་ཡི། །དེ་ཡི་རྣམ་པར་སྨིན་པས་འཆི་བ་དག །བླུ་བ་ལ་ནི་སོམ་ཉི་མ་བྱེད་ཅིག །ཅེས་ལན་བདུན་གྱིས་བདེན་ཚིག་བརྗོད། འཆི་བའི་དགྲ་ལས་ངེས་པར་ཐར་བར་འགྱུར་རོ་སྙམ་དུ་ཡིད་ཆེས་ཀྱི་དད་པ་བསྐྱེད་པ་ཤིན་ཏུ་གལ་ཆེ་སྟེ། ངག་གི་དབང་ཕྱུག་གྲགས་པས། འཆི་བདག་བླུ་བ་འབད་པ་ན། །དད་པ་ཡིས་ནི་བྱེད་པར་ནུས། །དེ་བས་དད་པ་བརྟན་པར་བྱ། །ཞེས་གསུངས་པ་ལྟར་རོ།། དེ་ནས། འཇམ་དཔལ་དཔའ་བོས་ཇི་ལྟར་མཁྱེན་པ་དང། །ཞེས་སོགས་ཀྱི་བསྔོ་བས་རྒྱས་འདེབས་ཤིང་། ཡིག་བརྒྱས་ལྷག་ཆད་བསྐང། མ་རྙེད་ཡོངས་སུ་ཞེས་སོགས་ཀྱིས་ནོངས་པ་བཟོད་པར་གསོལ། སྤྱན་དྲངས་པའི་ཡེ་ཤེས་པ་རྣམས་རང་བཞིན་གྱི་གནས་སུ་གཤེགས། དམ་ཚིག་པ་རྣམས་རྟེན་དང་དབྱེར་མི་ཕྱེད་པར་གྱུར། མགྲོན་གཞན་རྣམས་རང་
གནས་སུ་གཤེགས། རྟེན་མེད་ན། དམ་ཚིག་པ་རྣམས་བདག་ཉིད་ལ་བསྟིམ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །ཞེས་སོགས་བཀྲ་ཤིས་ཀྱིས་མཐའ་བརྒྱན་པར་བྱའོ།། ཚུལ་འདིར་འབད་པའི་དགེ་བ་ཡིས། །བསྟན་འཛིན་མཆོག་རྣམས་ཞབས་བརྟན་ཅིང་། །བསྟན་པའི་སྦྱིན་བདག་ཚེ་དཔལ་རྒྱས། །བསྟན་འགྲོའི་དགེ་ལེགས་འཕེལ་གྱུར་ཅིག །ཅེས་པ་འདི་ནི་བསྟན་པའི་རྩ་ལག་དམ་པ་རྒྱལ་མཁན་པོ་རིན་པོ་ཆེ་གྲགས་པ་རྒྱལ་མཚན་པའི་གསུང་གིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་འདོན་ཆ་དངོས་གཞི་བྱིན་རླབས་ཀྱི་ཁྱད་ནས་པཎ་ཆེན་ཐམས་ཅད་མཁྱེན་པའི་གསུང་སོར་བཞག་ལ། ཅུང་ཟད་རྒྱུད་སོགས་ནས་ཁ་བསྐངས་ཏེ་བསྒྲིགས་པ་འདིས་ཀྱང་སྐྱེ་བོ་རྣམས་དུས་མ་ཡིན་པར་འཆི་བའི་འཇིགས་པ་ལས་རྒྱལ་བར་གྱུར་ཅིག། །། དགེ་ལེགས་འཕེལ།།