ཚེ་བདག་མགོན་པོ་ལ་བརྟེན་ནས་འཆི་བླུ་བྱ་ཚུལ་ཚེ་ཉམས་གསོ་བྱེད།
ཚེ་བདག་མགོན་པོ་ལ་བརྟེན་ནས་འཆི་བླུ་བྱ་ཚུལ་ཚེ་ཉམས་གསོ་བྱེད་བདུད་རྩིའི་ཐིགས་པ་ཞེས་བྱ་བ་བཞུགས་སོ།།
རྒྱལ་ཀུན་ཐུགས་རྗེའི་བདག་ཉིད་སྤྱན་རས་གཟིགས། །ཁྲོས་པའི་ཟློས་གར་མྱུར་མཛད་མགོན་པོ་ན། །ཚེ་ཡི་ལྷར་བཞེངས་ཚེ་བདག་མགོན་པོ་ལ། །བཏུད་ནས་འཆི་བ་བླུ་བའི་ཆོ་ག་བྲ།། དེའང་མྱུར་མཛད་མགོན་པོ་ལ་བརྟེན་ནས་འཆི་བླུ་བྱ་བར་འདོད་ན། ཚེ་བདག་མགོན་པོ་ནི་ངོ་བོ་དེ་ཉིད་ཡིན་ཀྱང་ཚེའི་དངོས་གྲུབ་སྩོལ་བ་ལ་ཆེད་དུ་བསྟན་པ་ཡིན་པས། དེའི་སྒོ་ནས་བྱས་ན་འབྲེལ་ཆགས་པས་དེ་ལྟར་བྱེད་པ་ལ། མགོན་པོའི་མཆོད་གཏོར་ནང་མཆོད། བུམ་པ་བཅུད་ཀྱིས་བཀང་བ་མགུལ་ཆིངས་ཅན་དང། ཐོད་པ་ཆང་གིས་བཀང་བར་བདུད་རྩི་རིལ་བུ་བཏབ། ཌཱ་མ་རུ་དང་དྲིལ་བུ་འཐོར་ནས་སོགས་འདུ་བྱ། ཐོག་མར་བདུད་རྩི་འཁྱིལ་བ་བཟླས་པའི་ཆུས་བསྒྲུབ་བྱའི་ཡན་ལག་ལྔ་བཀྲུས་ཏེ་ཁྲུས་ཆུ་ཕྱེད་ཁམ་ཕོར་གསར་བའི་ནང་དུ་བླུགས་ནས་ཤར་དུ་བཞག །ཕྱེད་ལ་ཤཱ་ས་ན་བཟླས་ཏེ་བསྔགས། མཆོད་རྟེན་ཞིག་པའི་ས་དང་རོ་སོལ་ས་ནག་སོགས་བསྲེས་ཏེ་གཤིན་རྗེའི་གཟུགས་འཇིགས་སུ་རུང་བ་དབྱུག་པ་དང་ཞགས་པ་འཛིན་པ་མདོག་ནག་པོ་ཅན་བྱས་ལ་སླ་ངའི་ནང་དུ་སྦུབས་ནས་བཞག །གདན་ནག་གི་སྟེང་དུ་རས་སོགས་ཀྱི་གོས་ནག་པོ་བཀབ། དཀྱིལ་འཁོར་གྱི་ལྷོ་ཕྱོགས་སུ་མགོ་ལྷོར་བསྟན་པ་བཞག །དེའི་མདུན་དུ་ཁམ་ཕོར་འོ་མས་གང་བ་དང། ཉ་ཤའི་བདུག་སྤོས་ཀྱི་སྣོད། ཉེར་སྤྱོད་ལྔ། འབྲུ་ནག་སྣ་ཚོགས། མེ་ཏོག་ནག་པོ། ཤ་མར། ཚྭ། བུ་རམ། གསེར། དངུལ། གཡུ། གོས་དར་སྣ་ཚོགས། རྨ་བྱའི་མདོངས། དུར་བ། ངར་གླུད་གང་མང། སྲོག་ཆགས་སྣ་ཚོགས་ཀྱི་གཟུགས་སོགས་གཤིན་རྗེའི་རྫོངས་རྣམས་དང་། དེ་རྣམས་འཇལ་བའི་བྲེ་ལ་ལྷ་འདྲེའི་མིག་བསྒྱུར་བའི་སྔགས། ཨོཾ་ཨརྨ་སརྦ་ས་ཙི་མུར་ཏི་ཐིབས་སྭཱཧཱ། ཉེར་གཅིག་འདེབས། ཨོཾ་ཐིབ་ཏ་མཐོང་བའི་རྒྱལ་པོ་སྭཱཧཱ། ཞེས་པ་ཇ་སོགས་འདེགས་པའི་སྲང་ལ་འདེབས། ཨོཾ་མ་ཏི་ཏྲ་མོ་ཏ་ན་ཐིབས་སྭཱཧཱ། ཞེས་
པ་གསེར་དངུལ་སོགས་འཇལ་བའི་ཞོ་ཆ་དང་སྲང་གཉིས་ཀ་ལ་ཉེར་གཅིག་རེ་གདབ། འབྲང་རྒྱས་ཕྱེད་དཀར་པོ་བིལ་བའི་དབྱིབས་ཅན་ལ་མར་གྱི་ལྷ་བཤོས་ལྔ། རྩ་བ་ནག་པོ་ལ་སྣུམ་གྱི་སྡོང་བུ་བཙུགས་པ་ཤར་དུ་དང་། དཀྱིལ་འཁོར་གྱི་བྱང་དུ་ཀུ་ཤའི་གདན་ལ་བསྒྲུབ་བྱའི་གླུད་གོས་ཚོན་སྐུད་སྣ་ལྔས་རྒྱ་གྲམ་དུ་བཅིངས་པ་བཞག །དུག་སྣ་བཏབ་པ་འོ་ཆུ་འདྲེས་པས་གང་བའི་ཁམ་ཕོར་ཡང་གླུད་ཀྱི་མདུན་དུ་བཞག །སྟན་དཀར་པོ་གོས་དཀར་མེ་ཏོག་དཀར་པོ་སོགས་ཀྱང་ཅི་རིགས་སུ་སྟ་གོན་བྱ། དེ་ནས་སྐྱབས་སེམས་སྔོན་དུ་བཏང་ལ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པད་ཉི་ཚོགས་ཀྱི་བདག་པོའི་གདན་ལ་རང་གི་སེམས་ཉིད་ཧཱུཾ་ལས་གྲི་གུག་ཧཱུཾ་གིས་མཚན་པ་ལས་འོད་ཟེར་འཕྲོས་འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་མྱུར་མཛད་ཡེ་ཤེས་ཀྱི་མགོན་པོ་སྐུ་མདོག་ལྗང་གུ་ཞལ་གཅིག་ཕྱག་དྲུག་པ། ཕྱག་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་ཡུམ་ལ་འཁྱུད་པ། བར་པ་གཉིས་ཀྱིས་ཌཱ་མ་རུ་དང་རྩེ་གསུམ། ཐ་མ་གཉིས་ཀྱིས་བགྲང་ཕྲེང་དང་ཞགས་པ་བསྣམས་པ། སྨིན་མ་དང་སྨ་ར་རབ་ཏུ་འབར་བ་དབུ་སྐྲ་ཁམ་སེར་གྱེན་དུ་བརྫེས་པ། ཐོད་སྐམ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་འཕྱང་བ། སྟག་གི་པགས་པའི་ཤམ་ཐབས་གསོལ་ཞིང་རུས་པའི་རྒྱན་དྲུག་དང་སྦྲུལ་སྣ་ཚོགས་ཀྱིས་བརྒྱན་པ། དྲིལ་བུ་གཡེར་ཁའི་ཕྲེང་བ་སོགས་རྒྱན་དང་ཆ་ལུགས་ཐམས་ཅད་ཡོངས་སུ་རྫོགས་པ། ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དེའི་པང་ན་ཡུམ་རྡོ་རྗེ་མཁའ་འགྲོ་མ་སྐུ་
མདོག་སྔོན་མོ་གཡས་གྲི་གུག་དང་གཡོན་ཐོད་པ་འཛིན་པས་ཡབ་ལ་འཁྱུད་པ། མདུན་དུ་སངས་རྒྱས་མཁའ་འགྲོ་སྐུ་མདོག་དཀར་མོ་འཁོར་ལོ་དང་ཐོད་ཁྲག །ལྷོར་རིན་ཆེན་མཁའ་འགྲོ་སེར་མོ་རིན་པོ་ཆེ་དང་ཐོད་ཁྲག །ནུབ་ཏུ་པདྨ་མཁའ་འགྲོ་དམར་མོ་པདྨ་དང་ཐོད་ཁྲག །བྱང་དུ་ལས་ཀྱི་མཁའ་འགྲོ་ལྗང་གུ་རལ་གྲི་དང་ཐོད་ཁྲག་འཛིན་པ། མཁའ་འགྲོ་ལྔ་པོའང་ཐོད་སྐམ་ལྔས་དབུ་ལ་བརྒྱན་ཅིང་སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང་ལྡན་པ། སྒེག་ཅིང་ཆགས་པའི་ཉམས་ཅན། གཡོན་བརྐྱང་གི་སྟབས་ཀྱིས་བཞུགས་པའོ། །དེའི་ཕྱི་རོལ་ཏུ་མཁའ་འགྲོ་འབུམ་སྡེ་དམ་ཅན་རྒྱ་མཚོའི་ཚོགས་དང་བཅས་པ་འཁོད་པར་གྱུར། དེ་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། ལྟེ་བར་སྭཱ་སེར་པོ། གསང་གནས་སུ་ཧཱ་ལྗང་གུས་མཚན་པ། རང་གི་ཐུགས་ཀའི་ཧཱུཾ་ལས་འོད་འཕྲོས་པས་དུར་ཁྲོད་ཆེན་པོ་བསིལ་བའི་ཚལ་ནས་ཚེ་བདག་མགོན་པོ་ལ་མཁའ་འགྲོའི་ཚོགས་ཀྱིས་བསྐོར་བ་སྐད་ཅིག་གིས་སྤྱན་དྲངས། ཨོཾ་ཤྲཱི་མཧཱ་ཀཱ་ལ་ས་པ་རི་ཝཱ་ར་ཨེ་ཧྱ་ཧི། ཁྲིཾ་རིང་པོ་ཉེར་གཅིག་བརྗོད། ཛཿ ཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རིགས་ལྔ་མདུན་གྱི་ནམ་མཁར་སྤྱན་དྲངས། ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་བཛྲ་བྷ་ཝ་ཨ་བྷི་ཥཱིཉྩ་ཧཱུཾ། ཞེས་དབང་བསྐུར་སྐུ་གང། དྲི་མ་དག །ཆུའི་ལྷག་མ་ཡར་ལུད་པ་ལས་གཙོ་བོ་ལ་མི་བསྐྱོད་པ། སངས་རྒྱས་མཁའ་འགྲོ་མ་ལ་རྣམ་སྣང་། རིན་ཆེན་མཁའ་འགྲོ་མ་ལ་རིན་འབྱུང་། པདྨ་
མཁའ་འགྲོ་མ་ལ་སྣང་མཐའ། ལས་ཀྱི་མཁའ་འགྲོ་མ་ལ་དོན་གྲུབ་ཀྱིས་དབུ་བརྒྱན་པར་གྱུར། མཆོད་པ་དང་ནང་མཆོད་ཨ་མྲྀ་ཏས་བསངས། བྱིན་གྱིས་བརླབ། ཨོཾ་ཤྲཱི་མཧཱ་ཀཱ་ལ་པཉྩ་ཌཱ་ཀཱི་ནཱི་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། ཨོཾ་ཨཱཿ ཧཱུཾ་བཏགས་ལ་ནང་མཆོད་དབུལ། མ་རྒད་ལྷུན་པོའི་དཔལ་ལྟར་བརྗིད་པའི་སྐུ། །མི་བཟད་ང་རོ་འབྲུག་ལྟར་སྒྲོགས་པའི་གསུང། །བརྩེ་ཆེན་འཇིག་རྟེན་ཀུན་ལ་བརྩེ་བའི་ཐུགས། །ཚེ་བདག་མགོན་པོའི་ཞབས་ལ་ཕྱག་འཚལ་ལོ། །ཞེས་པས་བསྟོད། མགོན་པོ་ཡབ་ཡུམ་གྱི་ཐུགས་ཀར་ཉི་མའི་དཀྱིལ་འཁོར་རེ་རེ། དེའི་ཐུགས་ཀར་ཡབ་ཀྱི་ཐུགས་ཀར་ཧཱུཾ་དང་ཡུམ་གྱི་ཐུགས་ཀར་ཨཱཿ། དེ་གཉིས་ཀྱི་མཐར་སྔགས་ཕྲེང་གིས་བསྐོར་བ་ལས་བདུད་རྩིའི་རྒྱུན་བབས། ལུས་ཀྱི་ནང་ཐམས་ཅད་གང་བས་ཚེ་ཐོག་མ་མེད་པ་ནས་བསགས་པའི་ཚེ་ཐུང་འགྱུར་གྱི་སྡིག་སྒྲིབ་བག་ཆགས་ཐམས་ཅད་བྱང་ཞིང་དག །སླར་ཡང་སྔགས་ཕྲེང་ལས་འོད་འཕྲོས་པས་རྒྱལ་བ་སྲས་བཅས་ཀྱི་བྱིན་རླབས་ནུས་མཐུ་ཐམས་ཅད་དང་། འཇིག་རྟེན་ཁམས་ཀྱི་ཚེ་བསོད་དཔལ་འབྱོར་ཕུན་སུམ་ཚོགས་པ་ཐམས་ཅད་འོད་ཟེར་གྱི་རྣམ་པར་བསྡུས་ནས་ས་བོན་སྔགས་ཕྲེང་དང་བཅས་པ་ལ་ཐིམ་པས་འཆི་མེད་ཚེའི་དངོས་གྲུབ་ཐོབ་པར་གྱུར་པར་བསམས་ལ། ཨོཾ་བཛྲ་མཧཱ་ཀཱ་ལ་ཧ་རི་ནི་ས་སརྦ་ཨཱ་ཡུར་ཛྙཱ་ན་སིདྡྷི་ཛ། ཞེས་ཅི་འགྲུབ་བཟླ། ཡིག་བརྒྱས་ལྷག་ཆད་བསྐང་ལ་མཆོད་བསྟོད་མདོར་བསྡུས་བྱ། གཏོར་མ་ནང་མཆོད་ལྟར་བྱིན་གྱིས་བརླབ་ཅིང། རང་གི་ཐུགས་ཀའི་ཧཱུཾ་ལས་འོད་འཕྲོས་པས་ཤར་ལྷོ་བསིལ་བ་ཚལ་གྱི་དུར་ཁྲོད་ནས་མྱུར་མཛད་ཡེ་ཤེས་ཀྱི་མགོན་པོ་མཁའ་འགྲོའི་ཚོགས་དང་བཅས་པ་སྤྱན་དྲངས། ལྗགས་ཧཱུཾ་ལས་
སྐྱེས་པའི་རྡོ་རྗེ་རྩེ་གཅིག་པ་དཀར་པོ་འོད་ཀྱི་སྦུ་གུ་ཅན་གྱིས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ཨོཾ་གུ་རུ་མཧཱ་ཀཱ་ལ་པཉྩ་ཌཱ་ཀི་ནཱི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་གཏོར་མ་དབུལ། མཆོད་བསྟོད་མདོར་བསྡུས་བྱ། དེ་ནས་རྫས་རྣམས་བསངས་སྦྱངས། སྟོང་པའི་ངང་ལས་རྫས་རྣམས་ཀྱི་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་འཆི་བདག་གཤིན་རྗེ་འཁོར་བཅས་དགྱེས་པ་བསྐྱེད་པར་ནུས་པའི་མཆོད་རྫས་མཁོ་དགུ་མ་ཚང་བ་མེད་པ་ནམ་མཁའི་མཐའ་ཀླས་པར་གྱུར། སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབ། བདག་གི་བསམ་པའི་སྟོབས་དང་ན། །ཞེས་པ་ནས། ཐོགས་པ་མེད་པར་འབྱུང་གྱུར་ཅིག །རང་ཉིད་སྤྱན་རས་གཟིགས་མགོན་ཚེ་བདག་ཏུ། །གསལ་བའི་ཐུགས་ཀའི་ཧཱུཾ་གི་འོད་ཟེར་གྱིས། །འཆི་བདག་གཤིན་རྗེ་འཁོར་བཅས་སྤྱན་དྲངས་ཏེ། །མདུན་གྱི་གཟུགས་ལ་དབྱེར་མེད་ཐིམ་པར་གྱུར། །ཧོཿ ཆོས་དབྱིངས་བདེན་པ་བསམ་མི་ཁྱབ། །རྟེན་འབྲེལ་སྣང་བ་ཅིར་ཡང་འཆར། །སྔགས་དང་ཕྱག་རྒྱ་ཏིང་འཛིན་གྱི། །བདེན་པའི་བྱིན་རླབས་ལས་བྱུང་བ། །དར་ཚོན་སྣ་ལྔ་རྣམ་ཤེས་གླུད། །རྨ་བྱའི་མདོངས་བཀྲ་དབང་པོའི་གླུད། །ངར་གླུད་འབྱུང་བཞི་ལུས་ཀྱི་གླུད། །དུར་བ་རིན་ཆེན་ཚེ་ཡི་གླུད། །རིན་ཆེན་སྣ་ལྔ་བསོད་ནམས་གླུད། །སྲོག་ཆགས་སྣ་ཚོགས་ཕྱུགས་ཀྱི་གླུད། །འབྲས་བུ་སྣ་ཚོགས་དཔལ་འབྱོར་གླུད། །གླིང་བཞི་གླིང་ཕྲན་དབང་ཐང་གླུད། །བྲེ་དང་སྲང་ལ་འཇལ་རུང་རྣམས། །གཅིག་བཅུ་བརྒྱ་སྟོང་ཁྲི་འབུམ་སོགས། །གཞལ་ཏེ་འཆི་བདག་འཁོར་བཅས་ལ། །ཡོན་གྱི་བདག་པོ་འདི་ཉིད་ཀྱི། །ཚེ་དང་སྲོག་གི་གླུད་དུ་འབུལ། །མཆོད་ཡོན་འབྲུ་སྣ་སྣ་ཚོགས་དང། །འདོད་
ཡོན་རིན་ཆེན་སྣ་ལྔ་དང། །ཞལ་ཟས་མེ་ཏོག་ནག་པོས་མཆོད། །འདི་དག་ལོངས་ལ་ཚེ་སྲོག་བྱིན། །བཟུང་བ་ཐོངས་ལ་བཅིང་བ་ཁྲོལ། །ཡར་བ་སྡུད་ཅིང་ཉམས་པ་གསོས། །བླ་ཚེ་བརྐུས་པ་ཕྱིར་གཏད་དེ། །བཀའ་དང་དམ་ལས་མ་འདའ་ཞིག །ཁྲུས་ཆུ་ཕོར་པ་དང་ལྷན་ཅིག་གཤིན་རྗེའི་མདུན་དུ་བཞག །འབྲང་རྒྱས་ཕྱེད་མར་བཅད་ལ་ནག་པོའི་མར་མེ་སྦར། ཨ་ཀཱ་རོས་བྱིན་གྱིས་བརླབ། སརྦ་བིགྷན། ན་མཿ སརྦ་ཏ་ཐཱ་ག་ཏ་བྷྱོ་ཞེས་སོགས་ཀྱིས་མདུན་གྱི་གཤིན་རྗེ་འཁོར་བཅས་ལ་ལམ་རྒྱག་གི་ཚུལ་དུ་བསྔོ། ཨརྒྷཾ་ནས། ཤཔྟའི་བར་གྱིས་མཆོད། དེ་ནས་རང་ཉིད་ལྷའི་ང་རྒྱལ་བརྟན་པོ་ལ་གནས་པས་རོལ་མོ་གདངས་དང་བཅས་ཏེ། འདི་ནས་ལྷོ་ཡི་ཕྱོགས་རོལ་ན། །དཔག་ཚད་བརྒྱད་ཁྲིའི་ཕ་རོལ་ན། །ཐོད་པ་ལྕགས་ཀྱི་གྲོང་ཁྱེར་ན། །ཡི་དྭགས་ཀུན་གྱི་དེད་དཔོན་པོ། །མ་མོ་ཀུན་གྱི་ཚོགས་རྗེ་བོ། །གསོན་གཤིན་ཀུན་གྱི་ཟམ་ཁ་པ། །གསོན་པོ་བསྐོས་ལ་འདེབས་པ་པོ། །ཤི་བ་ཀུན་གྱི་གཤིན་བུ་རྗེ། །དགེ་བ་ཅན་གྱི་སྟངས་འཛིན་པ། །སྡིག་པ་ཅན་གྱི་ཆད་པ་མཁན། །ཉེས་ལེགས་ཆོས་བཞིན་སྤྱོད་པ་པོ། །ཆོས་རྒྱལ་གཤིན་རྗེ་ཞེས་བྱ་བ། །མངོན་ཤེས་རྫུ་འཕྲུལ་མཐུ་སྟོབས་ཅན། །འཁོར་བཅས་འདིར་ནི་བདག་ལ་ཉོན། །ཁྱོད་ཀྱི་འཁོར་གྱི་ཡི་དྭགས་ལ། །བཟའ་བ་བཟང་པོ་འདི་འབུལ་གྱི། །འདི་ཟོ་འཁོར་གྱི་ཡི་དྭགས་རྣམས། །མ་འཚེ་བར་ནི་གཞན་དུ་དེངས། །དྲག་སྔགས་བརྗོད། རོལ་མོ་དྲག་ཏུ་བྱ། གཤིན་རྗེའི་གཟུགས་རྫོངས་ཆས་ཉེར་སྤྱོད་གཏོར་མ་ཁྲུས་ཁུ་གདན་ཞལ་ཁེབས་སོགས་མ་ལུས་པ་ལྷོའི་གྲོང་ཟད་མཐར་རྡེབ་པའི་ཚུལ་མི་བྱེད་པར་དལ་བུས་མགོ་ལྷོར་བསྟན་ནས་འཇོག་ཅིང་རྫོངས་ཆས་རྣམས་དེའི་མདུན་དུ་བཞག་ལ། སྐྱེལ་མཁན་རྣམས་ཕྱི་མིག་མི་བལྟ་བ་གནད་དོ། །དེ་ནས་གླུད་གོས་ཀྱི་ཚོན་སྐུད་བཀྲོལ་ལ་དེས་བསྒྲུབ་བྱའི་ཡན་ལག་ལྔ་བཅིང། ན་མོ་རྗེ་
བཙུན་རྩ་བ་དང་བརྒྱུད་པར་བཅས་པའི། ཞེས་པ་ནས། ཁྱད་པར་དུའང་ཡེ་ཤེས་ཀྱི་མགོན་པོ་ཚེ་ཡི་བདག་པོའི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང། བདེན་པ་ཆེན་པོའི་བྱིན་གྱིས་བརླབ་ཀྱིས་ཆེ་གེ་མོའི་སྡིག་སྒྲིབ་ནད་གདོན་ཆགས་ཆེ་ཉམ་ང། བཙོག་གྲིབ་མི་གཙང་བ། ལོ་ཟླ་ཞག་སྐེག །མཐུ་གཏད་བྱད་ཕུར། དུས་ཀྱི་ཞགས་པ། གཤིན་རྗེའི་ཕོ་ཉ་བཀྱེ་བ་ལ་སོགས་པ་བར་ཆད་མི་མཐུན་པའི་ཕྱོགས་གང་ཡིན་པ་ཐམས་ཅད་ཚོན་སྐུད་འདི་ཉིད་ལ་མཆིས་ཤིང་ཐིམ་པར་གྱུར་ཅིག །ལན་གསུམ་གྱི་མཐར་ཕྱག་གཡས་ཀྱི་དང་པོའི་གྲི་གུག་གིས་རྦད་རྦད་གཏུབ་པར་བསམས་ལ་ཤཱ་ས་ན་བཟླ་བཞིན་དུ་ཚོན་སྐུད་གཅོད། བསླུ་མེད་མཆོག་གསུམ་བདེན་པ་དང། །འཇིག་རྟེན་སྐྱོང་བ་ཆེ་རྣམས་ཀྱི། །བདེན་སྟོབས་མཐུ་དང་གཟི་བྱིན་གྱིས། །བྱད་སྟེམས་ལས་རྣམས་ཆད་གྱུར་ཅིག །ཨོཾ་སརྦ་བནྡྷ་ཀཱ་ཁོ་རྡ་ཙྪེ་ད་ནཱ་ཡ་སྭཱཧཱ། ཞེས་བརྗོད་ཅིང་ཐུང་ངུ་ཐུང་ངུར་གཏུབས། ཁམ་ཕོར་སོ་མའི་ནང་གི་འོ་ཆབ་དུག་ཆུ་བསྲེས་པའི་ནང་དུ་དུམ་བུ་རེ་དང། ལས་བུམ་གྱི་ཆུ་ཐིགས་པ་རེ་བསྒྲུབ་བྱའི་ལུས་ལ་བསྐོར་ཏེ་བླུགས་ལ། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་གཟི་ཡིས་དུག་བཅོམ་མོ། །དེ་བཞིན་དུ་ཆོས་དང་དགེ་འདུན་ལའང་སྦྱར། གླུད་གོས་སོགས་བྱང་གི་གྲོང་ཟད་མཐར་བསྐྱལ་ལ་ཕྱི་མིག་མི་བལྟའོ། །དེ་ནས་བསྒྲུབ་བྱ་སྟན་དཀར་པོའི་སྟེང་དུ་བཞག་ལ། སངས་རྒྱས་རྣམས་ནི་བདུད་ལས་རྒྱལ། །ཆོས་ནི་ཆོས་མ་ཡིན་ལས་སོ། །དགེ་འདུན་མུ་སྟེགས་རྣམས་ལས་རྒྱལ། །དབང་པོ་ལྷ་མིན་རྣམས་ལས་རྒྱལ། །ཆུ་ནི་མེ་ལས་རྒྱལ་བར་འགྱུར། །རླུང་ནི་སྤྲིན་ལས་རྒྱལ་བར་འགྱུར། །རྡོ་རྗེ་ཡིས་ནི་རིན་ཆེན་ཕུག །ལྷ་རྣམས་བདེན་པར་རབ་ཏུ་གནས། །ས་ཡང་བདེན་པར་གནས་པ་ལ། །སངས་རྒྱས་དང་ནི་ཆོས་ཀྱང་བདེན། །
བདེན་པ་རྒྱལ་གྱུར་བརྫུན་མ་ལགས། །བདེན་པ་དང་བདེན་པའི་ཚིག་དེ་དག་གིས་ཆེ་གེ་མོ་མི་མཐུན་པའི་ཕྱོགས་ཐམས་ཅད་ལས་རྒྱལ་བར་གྱུར་ཅིག །ཛ་ཡ་ཛ་ཡ། སིདྡྷི་སིདྡྷི། ཕ་ལ་ཕ་ལ་ཧོཿ དེ་ནས་འབྲང་རྒྱས་ཀྱི་ཕྱེད་དཀར་པོ་དེ་བསྒྲུབ་བྱའི་ལག་ཏུ་གཏད་དེ། བཀྲ་ཤིས་ཚེ་བརྟན་དཔལ་གྱི་ཟས། །སྙིང་པོ་བསྡུས་པའི་བཅུད་འདི་ན། །དེ་རིང་བུ་ཡིས་ཟ་བར་གྱིས། །འདི་ཟོས་ཚེ་ཡི་བདག་པོ་ཡི། །ཞལ་ཟས་བསྟེན་པས་ནད་ཀུན་ལས། །གྲོལ་འགྱུར་ཐེ་ཚོམ་བྱ་མི་དགོས། །སྙིང་པོ་ལན་གསུམ་བཟླས་ལ་ཅུང་ཟད་ཟ་རུ་འཇུག །ཤིས་བརྗོད་རོལ་མོ་དང་བཅས་མེ་ཏོག་གི་ཆར་དབབ་པའི་དགེ་མཚན་གྱིས་མཐའ་བརྒྱན་པར་བྱའོ།། ཚེ་ཡི་མཆོག་སྦྱིན་ལྷ་ཚོགས་རྣམ་མང་ལས། །ཚེ་བདག་མགོན་པོར་གྲགས་པ་ལ་བརྟེན་ནས། །ཚེ་ཉམས་གསོ་བ་འཆི་བླུའི་ཆོ་ག་ཡིས། །ཚེ་དཔལ་མི་ཟད་སྦྱིན་པའི་ཡིད་བཞིན་ནོར། །འདི་བྲིས་དགེ་བས་བསྟན་འཛིན་ཡོན་མཆོད་ཀུན། །ཚེ་དང་བསོད་ནམས་ཆོས་ཀྱི་དགའ་སྟོན་ལ། །འགྲན་པ་ཇི་བཞིན་རྟག་ཏུ་སྤྱོད་པ་ཡིས། །རྫོགས་ལྡན་གསར་བའི་དཔལ་ལ་རོལ་གྱུར་ཅིག །ཅེས་ཚེ་བདག་མགོན་པོ་ལ་བརྟེན་ནས་འཆི་བླུ་བྱ་ཚུལ་ཚེ་ཉམས་གསོ་བྱེད་བདུད་རྩིའི་ཐིགས་པ་ཞེས་བྱ་བ་འདི་ནི་ཧལ་ཧའི་ཤོག་ནས་བསྟན་པའི་གསལ་བྱེད་ཆེན་པོ་ཆིང་སུ་ཙུག་ཐུ་ནོ་མོན་ཧན་བློ་བཟང་བསྟན་དར་དབང་ཕྱུག་གི་གསུང་གིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།