ཛཾ་དཀར་ལྷ་ལྔའི་ནོར་སྒྲུབ་བྱ་ཚུལ་གྱི་ཟུར་འདེབས་དང་ཛཾ་དམར་སྒྲུབ་ཐབས།
ཛཾ་དཀར་ལྷ་ལྔའི་ནོར་སྒྲུབ་བྱ་ཚུལ་གྱི་ཟུར་འདེབས་གསེར་གྱི་ལྡེ་མིག་དང་ཛཾ་དམར་སྒྲུབ་ཐབས་འདོད་དགུའི་མཆོག་སྦྱིན་སོགས་བཞུགས་སོ།།
ཨཱརྱ་ཛམ་བྷ་ལ་ལ་ཕྱག་འཚལ་ལོ། །དེའང་རྗེ་བཙུན་ཆོས་ཀྱི་ཉི་མའི་ཞལ་སྔ་ནས་ཀྱིས་མཛད་པའི་ཛཾ་དཀར་གྱི་ནོར་སྒྲུབ་ལ་ཅུང་ཟད་ཁ་འགེངས་འོས་རྣམས་བསྣན་ཏེ་ཟུར་འདེབས་ཀྱི་ཚུལ་དུ་འགོད་པ་ནི། གསང་སྒྲུབ་དང་ཡང་གསང་གི་སྒྲུབ་ཚུལ་གང་གི་སྐབས་སུའང་མདུན་བསྐྱེད་ཀྱི་བཟླས་པ་མཆོད་བསྟོད་མདོར་བསྡུས་དང་བཅས་པ་གྲུབ་པའི་མཚམས་དེར་གཡང་འབོད་བྱས་ན་ལེགས་ཤིང། དེའང་རྒྱས་པར་བྱེད་ན་གཡང་རྟེན་གྱི་གཏོར་མ་དང་གཡང་རྫས་བཤམས་པ་སོགས་ཡོངས་གྲགས་ལྟར་བྱ་ལ། དངོས་སུ་བཤམས་པ་མེད་ཀྱང་མོས་པ་བརྟན་པོས་ཚིག་ཏུ་བརྗོད་ནའང་རུང་བས། གཙོ་འཁོར་ལྔའི་ཐུགས་ཀའི་འོད་ཟེར་ལྕགས་ཀྱུ་ལྟ་བུས་སྲིད་ཞིའི་དཔལ་འབྱོར་མཐའ་དག་རྡོ་ཁབ་ལེན་གྱིས་ལྕགས་ཕྱེ་འདྲེན་པ་བཞིན་བསྡུས་ཏེ་རང་དང་བསྒྲུབ་བྱ་ལ་བསྟིམ་ཞིང། གནས་ཁང་ཡུལ་ཕྱོགས་ཐམས་ཅད་ཀྱང་དཔལ་འབྱོར་རྒྱ་ཆེན་པོས་གང་བར་བསམས་ལ། ཐུགས་རྗེ་ཆེན་པོ་ཨཱརྱ་ཛམྦྷ་ལ། །སྣང་སྲིད་དབང་སྡུད་མཁའ་འགྲོ་བཞི་
དང་བཅས། །བརྩེ་བས་དགོངས་ཏེ་གནས་འདིར་བྱིན་ཕོབ་ལ། །བསམ་དོན་ལྷུན་གྱིས་གྲུབ་པའི་དཔལ་སྩོལ་ཅིག །དགེ་བའི་ཉེར་ལེན་རང་ལ་གནས་པའི་གཞིར། །བདེ་བའི་རྐྱེན་བཟང་འདོད་དགུའི་ལེགས་ཚོགས་ཀུན། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །དལ་འབྱོར་རྟེན་གྱི་རིན་ཆེན་བུམ་བཟང་ལ། །འཆི་བ་མེད་པའི་ཚེ་དཔལ་བདུད་རྩིའི་རྒྱུན། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །སྔོན་བསགས་བསོད་ནམས་ལྷུན་སྟུག་རི་བོའི་རྩེར། །ཟས་ནོར་ལོངས་སྤྱོད་དབྱར་གྱི་ན་བུན་བཞིན། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །བཀྲ་ཤིས་གཡང་ཆགས་ཁྱིམ་དང་བང་མཛོད་ལ། །གསེར་དངུལ་
གོས་དར་ནོར་དང་འབྲུ་ཡི་ཚོགས། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །བཙན་ཞིང་ཡངས་པའི་ཕྱུགས་ལྷས་ར་བ་རུ། །གནག་ལུག་རྟ་མཛོ་ས་ཡི་དྲེག་པ་བཞིན། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །ཞི་དུལ་བཟང་པོའི་རང་བཞིན་འོ་མའི་མཚོར། །མཐུན་པའི་གཉེན་བཤེས་གཡོག་འཁོར་ངང་པའི་ཁྱུ། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །ཆོ་རིགས་གཙང་མའི་དཔག་བསམ་སྡོང་པོ་ལ། །ཡ་རབས་མཛངས་པའི་རིགས་རྒྱུད་མེ་ཏོག་འཕྲེང། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །སྒོ་གསུམ་ལེགས་བྱས་རྣམ་དཀར་སྤྲིན་གྱི་ཀློང། །མ་སྨད་གྲགས་སྙན་གཡུ་འབྲུག་སྒྲ་བརྒྱ་པ། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །མཆོད་སྦྱིན་དགེ་ཚོགས་གཞོན་ནུའི་ལང་ཚོ་ལ། །འདོད་པའི་ཡོན་ཏན་རྣམ་ལྔའི་རྒྱན་འཕྲེང་ཚོགས། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །ལྷ་ཡི་བདེ་སྐྱིད་ཚེ་དང་ཀླུའི་འབྱོར་བ། །མི་ཡི་ཆོས་དང་སྲིད་ཀྱི་ཕུན་ཚོགས་ཀུན། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན།།
བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །མོས་གུས་བརྟན་པོའི་ཡིད་ཀྱི་གཤོང་བུ་ལ། །མཆོག་གསུམ་ཐུགས་རྗེ་བྱིན་རླབས་ཆར་གྱི་རྒྱུན། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །དད་བརྩོན་བློ་གྲོས་རྒྱལ་མཚན་རྩེ་མོ་ལ། །རིགས་གསུམ་མཁྱེན་བརྩེ་ནུས་པའི་བསམ་འཕེལ་ནོར། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །བདེན་ཚིག་གྲུབ་པའི་ལེགས་བྱས་ནོར་འཛིན་གཞིར། །བཀྲ་ཤིས་རྟགས་རྫས་རྟེན་འབྲེལ་མེ་ཏོག་ཆར། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །ཚུལ་ཁྲིམས་རྣམ་པར་དག་པའི་ཞིང་ས་ལ། །ཐོས་བསམ་སྒོམ་གསུམ་ལེགས་སྨིན་སྙེ་མའི་ཚོགས། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །རྩེ་གཅིག་ཏིང་འཛིན་བསྒོམ་པའི་ནམ་མཁའ་ལ། །ཉམས་དང་རྟོགས་པའི་ཉི་ཟླ་སྐར་མའི་ཚོགས། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །དྲི་མེད་ཤེས་རབ་ནོར་བུའི་མེ་ལོང་ངོས། །ཆོས་ཚུལ་རབ་འབྱམས་དགོངས་དོན་སྣང་བརྙན་འབུམ། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་
མཚན་རྒྱས་པར་མཛོད། །མང་ཐོས་ཚུལ་བཞིན་སྒྲུབ་པའི་གངས་རི་ལ། །མཁས་དང་གྲུབ་པའི་རྩལ་རྫོགས་གདོང་ལྔ་པ། །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །ལུང་རྟོགས་བསྟན་པ་ནོར་བུའི་བ་གམ་རྩེར། །དོན་གཉིས་ལྷུན་གྲུབ་ཐར་པའི་རྒྱལ་མཚན་མཆོག །ཕྱོགས་དུས་ཀུན་ནས་ཕྱྭ་དང་གཡང་དུ་བྱོན། །བཀྲ་ཤིས་དཔལ་འབར་དགེ་མཚན་རྒྱས་པར་མཛོད། །མདོར་ན་ནོར་བདག་མཁའ་འགྲོའི་ཚོགས་བཅས་ཀྱིས། །སྲིད་ཞིའི་ཁམས་ན་ཇི་སྙེད་མཆིས་པ་ཡི། །རྒྱུ་ཡི་དགེ་ཚོགས་མཐའ་དག་དཔལ་དུ་ཁུགས། །འབྲས་བུ་བདེ་འབྱོར་ཐམས་ཅད་གཡང་དུ་ལོངས། །ས་ལ་གཡང་ཆགས་རྩི་བཅུད་ལོ་འབྲས་སྨིན། །ཡུལ་ལ་གཡང་ཆགས་ནད་མུག་འཁྲུག་རྩོད་ཞ། །མི་ལ་གཡང་ཆགས་ཚེ་བསོད་ཆོས་འབྱོར་རྒྱས། །ཕུན་ཚོགས་བཀྲ་ཤིས་རྒྱ་མཚོས་གང་གྱུར་ཅིག །ཅེས་གཡང་འབོད་བྱའོ། །ཡང་གསང་མཁའ་འགྲོ་མ་བཞིའི་གཏེར་སྦ་ཚུལ་ནི། བདག་བསྐྱེད་སྔོན་དུ་བཏང་ལ་བསངས་སྦྱངས། གའུ་འམ་བུམ་པ་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་དགོས་འདོད་ཐམས་ཅད་འབྱུང་བའི་ཡིད་བཞིན་གྱི་ནོར་བུའི་གཏེར་ཆེན་པོས་ཡོངས་སུ་གང་བ་ལྔའི་ནང་དུ་བཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་རེ་རེ། དབུས་མའི་སྟེང་དུ་ཛཾ་ཡིག་དཀར་པོ། ཞེས་པ་ནས། ཕྱེད་སྐྱིལ་གྱི་ཚུལ་གྱིས་བཞུགས་པ། ཤར་གྱི་གའུ་འམ་བུམ་པའི་ནང་གི་གདན་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ལྷོའི་གའུ་འམ་བུམ་པའི་ནང་གི་གདན་ལ་ཏྲཱཾ་ལས་རིན་པོ་ཆེ་ཏྲཱཾ་གིས་མཚན་པ། ཞེས་སོགས་བསྒྱུར་བ་མ་གཏོགས་གསང་སྒྲུབ་ཀྱི་སྐབས་ལྟར་བྱ། གང་དུ་སྦ་བའི་གནས་ནི་སའི་གནད་བཞི་ཚང་ཞིང། རྒྱབ་རི་མཐོ་ལ་དགྱེ་བ། མདུན་རི་དམའ་ཞིང་སྒུ་བ་གཡས་གཡོན་གྱི་རི་རྣམས་ཀྱང་ཚུར་འདུད་པའི་
རྣམ་པ་ཅན། ཆུ་བོའང་མདུན་དུ་ཚུར་འབབ་པ་སོགས་ས་དཔྱད་ལེགས་ཤིང་མིང་བཀྲ་བཟང་པོ་ཅན། གཞི་བདག་དཀར་ཕྱོགས་པ་གནས་པའི་ས་དེ་ལྟ་བུར་སྦ་དགོས་ལ། དེའང་ཐོག་མར་བསྒྲུབ་ཟིན་ནས་དེར་གདན་འདྲེན་པའི་ཚེ་སྟབས་བདེ་ན་སྤོས་རོལ་སོགས་རྒྱས་པར་བྱ་ཞིང། མ་མཐའང་དར་ཚོན་སོགས་ཀྱིས་བརྒྱན་ཏེ་སྤོས་འགྲིམ་སྔོན་དུ་འགྲོ་བས་བཀུར་སྟི་དང་བཅས་གདན་འདྲེན། དེའང་ཀརྨྨ་ཌཱ་ཀཱིའི་གའུ་རི་ཐང་མཚམས་དང། པདྨ་ཌཱ་ཀཱིའི་གའུ་ཡུལ་གྱི་ཆུའི་མགོ བཛྲ་ཌཱ་ཀཱིའི་གའུ་རིའི་རྩེ་མཐོ་སར་སྦ་བར་གསུངས་ཀྱང། རྩེ་མོ་ནས་ཅུང་ཟད་མར་བབ་པའི་རྩེ་ལྐོག་ཙམ་དུ་བྱས་ན་ལེགས་པར་བཤད། ཆུ་མིག་ཀྱང་རྒྱུན་འགྲོ་རྒྱུ་མེད་པའི་ལྐུག་པ་དང། མཚམས་མཚམས་སུ་སྐམ་པའི་དར་རྒུད་ཅན་མ་ཡིན་པར་རྟག་ཏུ་འགྲོ་ཞིང་ཆུ་ཀླུང་ཆེན་པོར་འདྲེ་བ་དགོས། གང་དུ་སྦ་བའི་གནས་དེར་ས་བྲུས་ནས་རྡོའི་ཁང་བུ་ཆེ་ཆུང་ཇི་ལྟར་འཚམ་པ་བྱས་ཏེ། དང་པོར་བསྒྲུབ་དུས་གཙོ་བོ་ལ་ཕྱོགས་པའི་ངོས་དེ་མ་ནོར་བར་བྱས་ཏེ་དེ་མདུན་དུ་བསྟན་ནས་གཞུག །མདུན་ངོས་དེར་ས་རལ་དང་འོབས་སོགས་དཔྱད་མི་ལེགས་པའི་རིགས་མེད་པ་ལྷག་པར་ཡང་གལ་ཆེའོ། །རིན་ཆེན་མཁའ་འགྲོའི་གའུ་ཐབ་ཚང་གི་རྒྱབ་གང་འོས་ཤིག་ཏུ་སྦ་བར་གསུངས་པས་ས་དཔྱད་སོགས་ཇི་བཞིན་མི་འོངས་ཀྱང་འཇོག་ཚུལ་སོགས་གོང་དང་འདྲ། གཙོ་བོའི་གའུ་མཛོད་ཕུགས་སུ་སྦ་བར་གསུངས་ཀྱང། མཛོད་ཁང་དུ་གཞན་གྱིས་མ་མཐོང་བར་བྱས་ནས་བཞག་ནས་བྲུས་ནས་སྦ་མི་དགོས་སོ། དེར་བཞག་ནས་ཀྱང་སོ་སོར་རང་རང་གི་བསྐྱེད་ཆོག་བཟླས་པ་མཇུག་གི་མཆོད་བསྟོད་ཀྱི་བར་གོང་བཞིན་བྱས་ལ། མེ་ཏོག་དང་བཅས་པས་ཐལ་མོ་སྦྱར་ཏེ། ཇི་ལྟར་སངས་རྒྱས་ཐམས་ཅད་ན། །དགའ་ལྡན་དུ་ནི་གནས་པ་ལས། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་དང་ལྷན་ཅིག་ཏུ། །འདི་རུ་མགོན་པོ་རྟག་བཞུགས་ནས། །བྱང་ཆུབ་སེམས་ནི་བསྐྱེད་པ་དང། །ཡོན་གྱི་བདག་པོའི་དོན་སླད་དུ། །བདག་གི་འབྱོར་པ་ཉིད་ཀྱིས་ན། །ཅི་འབྱོར་པ་ཡི་མཆོད་པ་དང། །
མེ་ཏོག་ལ་སོགས་འདི་བཞེས་ཤིག །བདག་དང་སློབ་མར་བཅས་རྣམས་ལ། །རྗེས་སུ་བརྩེ་བས་ཉེར་དགོངས་ནས། །ཀུན་གྱིས་འདི་ལ་བྱིན་རློབས་ཤིང། །འདི་ཉིད་དུ་ནི་བཞུགས་པར་རིགས། །ཞེས་དང། མགོན་པོ་ནམ་མཁའ་མཛོད་ལ་མངའ་བརྙེས་པའི་བཅོམ་ལྡན་འདས་གཏེར་གྱི་དབང་ཕྱུག་ཐུགས་རྗེ་ཆེན་པོ་དང་ལྡན་པ་ཁྱེད་སྔགས་དང་ཏིང་ངེ་འཛིན་གྱིས་བྱིན་གྱིས་བརླབས་ཏེ་འདོད་དགུའི་འབྱོར་པ་ཟད་མི་ཤེས་པས་ཡོངས་སུ་གང་བའི་གཏེར་མཛོད་འདི་རྣམས་སུ་ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་གྱི་ཁམས་རྣམས་ཟག་པ་མེད་པའི་ཡེ་ཤེས་ཀྱི་གཏེར་ཆེན་པོའི་ལོངས་སྤྱོད་ལ་དབང་འབྱོར་པར་མ་གྱུར་གྱི་བར་དེ་སྲིད་དུ་བརྟན་པར་བཞུགས་ནས་དབུལ་ཞིང་ཕོངས་པའི་སེམས་ཅན་རྣམས་ལ་ཐུགས་བརྩེ་བ་ཆེན་པོས་ཉེ་བར་དགོངས་ཏེ་བྱིན་གྱིས་རློབས་ལ་ཟས་ནོར་ལོངས་སྤྱོད་ཟད་མི་ཤེས་པ་འབྱུང་བ་དང། མཆོག་དང་ཐུན་མོང་གི་དངོས་གྲུབ་མ་ལུས་པ་སྩོལ་བར་མཛད་ཅིང་བརྟན་པར་བཞུགས་སུ་གསོལ། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། ཞེས་པའི་བར་ལན་གསུམ་དང། བདེ་གཤེགས་ཀུན་བཟང་མཐོང་བའི་བཀྲ་ཤིས་ལྟར། །རྒྱལ་བ་སྲས་བཅས་དེང་འདིར་བདེ་ལེགས་ཤོག །ངན་སྡིག་ལོག་པའི་ཚོགས་རྣམས་བཅོམ་གྱུར་ནས། །རྒྱལ་སྲས་རིག་འཛིན་ཚོགས་རྣམས་འཕེལ་དར་ཞིང་། །ཞལ་མཐོང་ཙམ་གྱིས་བདེ་བའི་མཆོག་བརྙེས་ནས། །ཉི་ལྟར་ཞལ་དྲོ་ཟླ་ལྟར་འོད་གསལ་ཞིང་། །བདག་དང་འགྲོ་ལ་ཞལ་དྲོ་བྱིན་ཆེ་བས། །བསྐལ་པའི་མཐར་ཐུག་བར་དུ་བཞུགས་སུ་གསོལ། །ཇི་སྲིད་མེ་དང་ཆུ་དང་ན། །རླུང་གིས་བསྐལ་པ་འཇིག་བར་དུ། །སེམས་ཅན་ཀུན་གྱི་དོན་གྱི་ཕྱིར། །
བཅོམ་ལྡན་ཁྱོད་ནི་བཞུགས་པར་མཛོད། །མགོན་པོ་བསྐལ་པ་ཇི་བཞིན་དུ། །སྣ་ཚོགས་གཟུགས་ནི་བཟུང་ནས་ཀྱང་། །ཕྱོགས་བཅུའི་འཇིག་རྟེན་ཁམས་རྣམས་སུ། །དེས་ནི་འགྲོ་བའི་དོན་ཀུན་མཛོད། །ཅེས་བརྗོད་དེ་བརྟན་བཞུགས་བྱ། ཁྱད་པར་ནི། ཀརྨྨ་ཌཱ་ཀཱི་ལ། ནམ་མཁའ་མཛོད་ལ་མངའ་བརྙེས་ཤིང་ཐུགས་རྗེ་ཆེན་པོ་དང་ལྡན་པ་ཀརྨྨ་ཌཱ་ཀི་མ་ཁྱེད་སྔགས་དང་ཏིང་ངེ་འཛིན་གྱིས། ཞེས་པ་ནས། དངོས་གྲུབ་མ་ལུས་པ་སྩོལ་ཞིང། ཁྱད་པར་དུ་ཡུལ་མི་ཐམས་ཅད་དབང་དུ་འདུས་ཏེ་ཟས་ནོར་མཐའ་དག་ཆར་བཞིན་དུ་འབེབས་པར་མཛད་ཅིང་བརྟན་པར་བཞུགས་སུ་གསོལ། ཞེས་སྦྱོར། པདྨ་ཌཱ་ཀཱི་ལ། ནམ་མཁའ་མཛོད་ལ་མངའ་བརྙེས་ཤིང་ཐུགས་རྗེ་ཆེན་པོ་དང་ལྡན་པ་པདྨ་ཌཱ་ཀི་མ་ཁྱེད་སྔགས་དང། ཞེས་པ་ནས། མ་ལུས་པ་སྩོལ་ཞིང། ཁྱད་པར་དུ་རོལ་མཚོ་བདུན་སོགས་ལ་གནས་པའི་ཀླུ་རྒྱལ་རྣམས་དང་ཡུལ་ཕྱོགས་འདིའི་ཀླུ་རྣམས་ཀྱིས་མཚོན་འོག་ཀླུའི་འཇིག་རྟེན་ཐམས་ཅད་དབང་དུ་འདུས་ཏེ་དངོས་གྲུབ་སྟེར་དུ་གཞུག་པར་མཛད་ཅིང་བརྟན་པར་བཞུགས་སུ་གསོལ། ཞེས་པ་དང། རྡོ་རྗེ་མཁའ་འགྲོ་མ་ལ། བཛྲ་ཌཱ་ཀི་མ་ཁྱེད། ཅེས་དང། མ་ལུས་པ་སྩོལ་ཞིང། ཁྱད་པར་དུ་སྟེང་ལྷའི་འཇིག་རྟེན་དང་གནས་འདི་མཐོང་ཚད་ཐམས་ཅད་དབང་དུ་འདུ་བར་མཛད་ཅིང། ཞེས་དང། རིན་ཆེན་མཁའ་འགྲོ་ལ། རཏྣ་ཌཱ་ཀི་མ་ཁྱེད། ཅེས་དང། ཁྱད་པར་དུ་རོ་བཅུད་ཕུན་སུམ་ཚོགས་པའི་ཟས་ཀྱི་འབྱོར་པ་རྒྱུན་མི་འཆད་པར་མཛད་ཅིང། ཞེས་བསྒྱུར་བ་མ་གཏོགས་གཞན་འདྲའོ། །དེ་ནས་རྡོ་ཁང་གི་ཁ་ལེགས་པར་བཅད་དེ་མི་མངོན་པར་བྱ། མཇུག་ཏུ་ཡེ་དྷརྨྨ་བདུན་ལ་སོགས་པ་བརྗོད་དེ་མེ་ཏོག་བྱིན་གྱིས་བརླབས་ནས་མདོ་ལས་བྱུང་བའི་དཀོན་མཆོག་གསུམ་གྱི་
བཀྲ་ཤིས་སོགས་ཤིས་པ་བརྗོད་པའི་ཚིག་ཅི་རིགས་པའི་སྒོ་ནས་མེ་ཏོག་གི་ཆར་ཆེན་པོ་དབབ་པར་བྱའོ། །ཞེས་ཛཾ་དཀར་ལྷ་ལྔའི་ནོར་སྒྲུབ་བྱ་ཚུལ་ནོར་བུའི་བང་མཛོད་ཀྱི་ཟུར་འདེབས་གསེར་གྱི་ལྡེ་མིག་ཅེས་བྱ་བ་འདི་ནི་རྣམ་དཔྱོད་མཆོག་ཏུ་ཡངས་པ་སྔགས་རམས་པ་འཇམ་དབྱངས་བདེ་ཆེན་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ཡིད་བཞིན་ནོར་དང་དཔག་བསམ་ཤིང་ལྟ་བུར། །དངོས་གྲུབ་འདོད་པ་འཇོ་བའི་གཏེར་གྱི་བདག །ནོར་གྱི་དབང་ཕྱུག་ཨཱརྻྻ་ཛམྦྷ་ལར། །གུས་པས་འདུད་དོ་བྱིན་རླབས་ཆར་དུ་སྙིལ། །འཇུངས་མེད་གཏོང་པ་ཡངས་པའི་ས་བོན་ན། །ཡི་དམ་ལྷ་ཡི་བྱིན་རླབས་ཆུས་བྲན་པས། །སྦྱིན་པའི་ཕ་རོལ་ཕྱིན་རྫོགས་ཡོངས་འདུའི་ལྗོན། །རྣམ་གྲོལ་འབྲས་བུས་དཔའ་བའི་ཐབས་འདི་རྨད། །འདིར་གཏེར་སྟོན་གྲྭ་པ་མངོན་ཤེས་ཀྱི་ལུགས་ཀྱི་ཛམྦྷ་ལ་དམར་པོ་ཞལ་གསུམ་ཕྱག་དྲུག་པའི་སྒོ་ནས་རང་གཞན་གྱི་དོན་སྒྲུབ་པ་ལ། བདག་བསྐྱེད་ཀྱི་སྒོ་ནས་བསྙེན་པ་བྱ་ཚུལ་དང། མདུན་བསྐྱེད་ལ་བརྟེན་ནས་དངོས་གྲུབ་བླང་བའི་ཚུལ་གཉིས། དང་པོ་ནི། སྐྱབས་སེམས་སྔོན་དུ་བཏང་ལ། རང་ཛམྦྷ་ལར་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་ཨཱརྻྻ་ཛམྦྷ་ལ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། ཨོཾ་ཨཱརྻྻ་ཛམྦྷ་ལ་ས་པ་རི་ཝཱ་ར་ཨརྒྷཾ་ནས། ཤཔྟ་པྲ་ཏཱིཙྪ་སྭཱཧཱའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་རྒྱུན་བཤགས་ལན་གསུམ་དང། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་སོགས་ཀྱིས་ཚད་མེད་བཞི་བསྒོམ། ཚོགས་ཞིང་རྣམས་རང་ལ་ཐིམ་པར་གྱུར་པར་བསམས་ལ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ། ཨ་ལས་ཟླ་བ། རཾ་ལས་
ཉི་མའི་སྟེང་དུ་རང་གི་སེམས་ཉིད་ཛཾ་ཡིག་དམར་པོ། དེ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་དབུལ་ཕོངས་ཀྱི་སྡུག་བསྔལ་བསལ། རྒྱལ་བ་སྲས་བཅས་ལ་མཉེས་པའི་མཆོད་པ་ཕུལ། དེ་རྣམས་ཀྱི་བྱིན་རླབས་དང་སྲིད་ཞིའི་དཔལ་འབྱོར་ཐམས་ཅད་བསྡུས་ཏེ་ཐིམ་པ་ཡོངས་སུ་གྱུར་པ་ལས་རང་ཉིད་ཛམྦྷ་ལ་སྐུ་མདོག་པདྨ་རཱ་གའི་ལྷུན་པོ་ལྟར་དམར་ཞིང་འོད་ཟེར་འཕྲོ་བ། ཞལ་གསུམ་ཕྱག་དྲུག་པ། ཤིན་ཏུ་སྒེག་ཅིང་ཆགས་པའི་ཉམས་དང་ལྡན་པ། ཀླུ་ཆེན་པོ་བརྒྱད་སྦྲུལ་གྱི་གཟུགས་ཅན་དང་རིན་པོ་ཆེའི་རྒྱན་དུ་མས་ཀུན་ནས་སྤྲས་པ། རྩ་ཞལ་དམར་ཞིང་གཡས་དཀར་གཡོན་སྔོ་བ། ཕྱག་གཡས་ཀྱི་དང་པོ་ན་ཡིད་བཞིན་གྱི་ནོར་བུ། བར་པ་ན་ལྕགས་ཀྱུ། གཡོན་དང་པོ་ན་ཐོད་པ་རིན་པོ་ཆེས་གང་བ། བར་པ་ན་ཞགས་པ། ཐ་མ་གཉིས་ཀྱིས་གཏེར་གྱི་ནེའུ་ལེ་རེ་རེ་བསྣམས་ནས་འཆིར་བས་ནོར་བུ་སྐྱུག་པ། ཞབས་བཞིས་ཉི་མའི་སྟེང་དུ་གནོད་སྦྱིན་ནོར་བུ་སྐྱུག་པ་གཉིས་མནན་ཏེ་བཞུགས་པ། དེའི་ཐུགས་ཀར་སྦས་པའི་ཡུམ་ཀུ་རུ་ཀུལླེ་དམར་མོ་ཞལ་གཅིག་ཕྱག་བཞི་མ། ཕྱག་དང་པོ་གཉིས་ཀྱིས་མདའ་གཞུ་འགེངས་པ། གཡས་འོག་མས་ལྕགས་ཀྱུ་དང། གཡོན་འོག་མས་ཞགས་པ་བསྣམས་པའི་ཐུགས་ཀར་ཧྲཱིཿ ཡིག་དམར་པོས་མཚན་པའི་སེམས་དཔའ་གསུམ་གྱི་བདག་ཉིད་ཅན། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། གོང་ལྟར་
མཆོད་ལ། ཛཿ ཧཱུཾ་བཾ་ཧོཿས་གཉིས་སུ་མེད་པར་བསྟིམ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་བཅས་སྤྱན་དྲངས། ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། ཨོཾ་སརྦ་ཏ་ཐཱ་ག་ཏ་ཨ་བྷི་ཥཱིཉྩ་ཏུ་མཾ། ཞེས་གསོལ་བ་བཏབ་པས། ཨོཾ་བཛྲི་བྷ་ཝ་ཨ་བྷི་ཥཱིཉྩ་ཧཱུཾ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང། དྲི་མ་དག །ཆུའི་ལྷག་མ་ཡར་ལུད་པ་ལས་རིན་ཆེན་འབྱུང་ལྡན་གྱིས་དབུ་བརྒྱན་པར་གྱུར། མཆོད་པ་ཨ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་མཆོད་རྫས་རྣམས་ཕུལ་དུ་བྱུང་བའི་ལྷ་རྫས་སུ་གྱུར། ཨོཾ་ཨརྒྷཾ་ཨཱཿ ཧཱུཾ་ནས། ཨོཾ་ཤཔྟ་ཨཱཿ ཧཱུཾ་གི་བར་གྱིས་བྱིན་གྱིས་བརླབ། ཨོཾ་ཨཱརྻྻ་ཛམྦྷ་ལ་ཨརྒྷཾ་པྲ་ཏཱིཙྪ་སྭཱཧཱ། སོགས་ཀྱིས་མཆོད། བདེ་གཤེགས་ཀུན་གྱི་གསུང་ལས་རབ་སྤྲུལ་ཅིང། །ཐུགས་རྗེ་ཆགས་པས་སྐུ་མདོག་དམར་པོར་བཞུགས། །དབང་གི་འཕྲིན་ལས་རྫོགས་མཛད་ཛམྦྷ་ལ། །མ་ལུས་འགྲོ་བའི་རེ་སྐོང་ལ་ཕྱག་འཚལ། །ཞེས་པས་བསྟོད། རང་གི་ཐུགས་ཀར་ཉི་མའི་སྟེང་དུ་ཧྲཱིཿ ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་ལྕགས་ཀྱུ་ལྟ་བུ་འཕྲོས། འཇིག་རྟེན་ཁམས་ཀྱི་ནོར་ལོངས་སྤྱོད་འབྲུ་བང་མཛོད། རྐང་འགྲོ་རིན་པོ་ཆེ་ལ་སོགས་པ་མདོར་ན་འཇིག་རྟེན་དང་འཇིག་རྟེན་ལས་འདས་པའི་དགོས་འདོད་ཐམས་ཅད་བསྡུས་ནས་རང་གི་ཡུལ་ཁམས་རྣམས་གང། ཁྱད་པར་དུ་ཧྲཱིཿ ཡིག་ལས་མཁའ་འགྲོ་མ་དམར་མོ་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས་ཏེ་འཇིག་རྟེན་ཁམས་ཀྱི་དཔལ་འབྱོར་ལོངས་སྤྱོད་ཐམས་ཅད་དང་། བྱེ་
བྲག་ཏུ་གང་ཞིག་དབང་དུ་སྡུད་པར་འདོད་པ་ཐམས་ཅད་ལྕགས་ཀྱུས་བཟུང་ཞིང་ཞགས་པས་བཅིངས་ཏེ་བཀུག་ནས་རང་གི་དབང་དུ་འདུས་པར་གྱུར་པར་བསམས་ལ། ཨོཾ་ཛམྦྷ་ལ་ཛ་ལེནྡྲ་ཡ་དྷ་ན་མེ་དྷི་ཧྲཱིཿ སྭཱཧཱ། ཞེས་ཡིད་གཞན་དུ་མ་ཡེངས་པར་བཟླས་པ་ཅི་འགྲུབ་བྱ། ཡིག་བརྒྱས་ལྷག་ཆད་བསྐང། བཅོམ་ལྡན་འདས་མགོན་པོ་ཛམྦྷ་ལ་འཁོར་དང་བཅས་པས་བདག་ཅག་དཔོན་སློབ་ཡོན་མཆོད་ཀུན་གྱི་དབུལ་བའི་སྡུག་བསྔལ་མ་ལུས་པ་བསལ་ནས་མཆོག་དང་ཐུན་མོང་གི་དངོས་གྲུབ་མཐའ་དག་བདེ་བླག་ཏུ་སྩོལ་བར་མཛད་དུ་གསོལ། ཞེས་འདོད་དོན་ལ་གསོལ་བ་གདབ། བསྙེན་པའི་སྐབས་བདག་བསྐྱེད་གཅིག་པུས་ཆོག་ལ། དེའི་ཚེ་ཐུན་སོ་སོའམ་དགོང་ཐུན་ལ་གཏོར་འབུལ་ངེས་ཅན་དུ་དགོས་པས་འོག་ནས་འབྱུང་བ་ལྟར་དབུལ། མཇུག་ཏུ་མཆོད་བསྟོད་བྱ། ཚུལ་དེ་ལྟ་བུའི་སྒོ་ནས་ཐུན་གསུམ་ལ་སོགས་པར་བྱས་ཏེ་བཟླས་སྒོམ་ལ་འབད་པས། གྲུབ་པའི་རྟགས་ནི། རབ་སེར་སྣ་སོགས་ཀྱི་ཀུན་འཛིན་ཞི་ཞིང་ཡི་དམ་ལྷས་ཞལ་དངོས་སུ་བསྟན་པ་དང། འབྲིང་ཉམས་སྣང་ལ་ལྷའི་ཞལ་མཐོང་བ་དང། ཐ་མ་རྨི་ལམ་དུ་སྐྱེ་བོ་མང་པོས་རང་ལ་འདུད་པ་དང། རིན་པོ་ཆེའི་ཁྲི་ལ་འཛེག་ཅིང་གདན་འདིང་བ། ཉི་ཟླ་འཆར་བ། ཆར་ཆེན་པོ་འབབ་པ། ཆུ་མིག་རྡོལ་བ། གཏེར་རྙེད་པ། གོས་དམར་པོ་ཁྱད་པར་ཅན་གྱོན་པ། རོལ་མོ་སྣ་ཚོགས་འཁྲོལ་བ་སོགས་ཡང་ཡང་རྨིས་ན་གྲུབ་པའི་མཚན་མར་བཤད་དོ། །བཟླས་པའི་གྲངས་རབ་ཡིག་འབྲུའི་གྲངས་ཀྱིས་འབུམ་ཕྲག་བཅོ་ལྔ་དང། མ་མཐའང་འབུམ་ཕྲག་གཅིག་ཚད་དང་ལྡན་པར་འགྲོ་ངེས་པ་དགོས་སོ།། ༈ གཉིས་པ་མདུན་བསྐྱེད་ལ་བརྟེན་ནས་དངོས་གྲུབ་བླང་བའི་ཚུལ་ལ་གཉིས། ཆུ་སྦྱིན་ལ་བརྟེན་ནས་རྒྱུན་འཁྱེར་བྱ་བའི་ཚུལ་དང། གསང་རྟེན་བྱས་ཏེ་འཆང་ཚུལ་ལོ། །དང་པོ་ནི། རིན་པོ་ཆེའམ་ཟངས་གཞོང་
གཙང་མའི་ནང་དུ་ཛམྦྷ་ལའི་སྐུ་རྒྱུ་རིན་པོ་ཆེ་སོགས་ལས་བསྒྲུབས་པ་གཟུངས་གཞུག་དང་རབ་གནས་ཅན་ཞབས་ཁག་ལེགས་པར་བསྡམས་ཏེ་རླན་གཤེར་གྱི་སྐྱོན་མི་འཇུག་པར་བྱས་པ་བཞུགས་སུ་བཅུག་ལ། རང་ཉིད་སྐད་ཅིག་གིས་འཕགས་པ་འཇིག་རྟེན་དབང་ཕྱུག་ཁ་སར་པཱ་ཎིའི་སྐུར་གྱུར། མདུན་དུ་པད་ཟླ་ཉི་མའི་དཀྱིལ་འཁོར་གྱི་གདན་ལ་ཛཾ་ཡིག་དམར་པོ། དེ་ཡོངས་སུ་གྱུར་པ་ལས་ཛམྦྷ་ལ་སྐུ་མདོག་པདྨ་རཱ་གའི་ལྷུན་པོ་ལྟར། ཞེས་པ་ནས། གཉིས་མནན་ཏེ་བཞུགས་པ། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། བསྒོམས་པ་དང་འདྲ་བའི་ཡེ་ཤེས་པ་དང་དབང་གི་ལྷ་སྤྱན་དྲངས། ཛཿ ཧཱུཾ་བཾ་ཧོཿ གཉིས་སུ་མེད་པར་གྱུར། དབང་ལྷས་དབང་བསྐུར། རིན་ཆེན་འབྱུང་ལྡན་གྱིས་དབུ་བརྒྱན་པར་གྱུར། དེའི་ཐུགས་ཀར་རཾ་ཡིག་གིས་མཚན་པ་ལས་མེ་འོད་གྱེན་དུ་འཕྲོས་པས་སྐོམ་པས་གདུངས་ཤིང་བདུད་རྩིའི་ཆུ་རྒྱུན་ཕུལ་བས་སྐུ་ལུས་ཐམས་ཅད་གང་ནས་གདུང་བ་ཐམས་ཅད་ཞི་སྟེ་བདེ་བ་ཆེན་པོས་རབ་ཏུ་དགྱེས། བདུད་རྩིའི་རྡུལ་ཕྲ་རབ་རྣམས་མུ་ཏིག་གི་ཕྲེང་བར་གྱུར་པས་སྐུ་ལུས་ཀྱི་ནང་ཐམས་ཅད་ཡོངས་སུ་གཏམས་ཤིང་ཞལ་ནས་མུ་ཏིག་གི་ཆར་བབས། ཕྱག་གི་ནེའུ་ལེ་དང་ཞབས་འོག་གི་གནོད་སྦྱིན་གཉིས་གཉིས་ཀྱི་ཞལ་ནས་ཀྱང་ནོར་བུ་དཔག་ཏུ་མེད་པ་སྐྱུག་པས་ས་ཕྱོགས་དང་གནས་ཁང་ཐམས་ཅད་ཕྱུར་བུར་གང་བར་གྱུར་པར་བསམ་ལ། ཆུ་གཙང་ཟངས་གཞོང་དུ་སྦྲེངས་ཤིང་། ཨོཾ་ཛམྦྷ་ལ་ཛ་ལེནྡྲ་ཡ་དྷ་ན་མེ་དྷི་ཧྲཱིཿ སྭཱཧཱ། ཞེས་པའི་སྔགས་བརྒྱ་རྩ་བཟླ། གཏོར་མ་གཏོང་བར་འདོད་ན། གཏོར་མ་ནོར་བུ་འབར་བའི་དབྱིབས་ཅན་བུ་རམ་སོགས་ཀྱིས་བརྒྱན་པ་བཤམ་སྟེ། བསངས་སྦྱངས། སྟོང་པའི་ངང་ལས་གཏོར་མ་འདོད་དགུ་འབྱུང་བའི་བདུད་རྩིའི་
རྒྱ་མཚོར་གྱུར་པར་བསམས་ལ། ཨོཾ་ཨཱཿ ཧཱུཾ། ལན་གསུམ་བརྗོད་དེ་བྱིན་གྱིས་བརླབ། སྔགས་གཤམ་དུ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་བཏགས་པ་ལྔའམ་བདུན་གྱིས་དབུལ། ཨོཾ་ཨཱརྻྻ་ཛམྦྷ་ལ་ཨརྒྷཾ་སོགས་ཀྱིས་མཆོད། ཉི་མ་སྟོང་ཕྲག་འོད་ཀྱིས་འཁྱུད་པ་ཡི། །བྱི་རུའི་རི་བོ་ལྟ་བུར་བརྗིད་པའི་སྐུ། །ཞལ་གསུམ་ཕྱག་དྲུག་འདོད་དགུའི་ཆར་འབེབས་པ། །མགོན་པོ་ཛམྦྷ་ལ་ལ་ཕྱག་འཚལ་ལོ། །གང་སྐུ་ཡིད་ལ་རི་མོར་བྲིས་པ་འམ། །མཚན་སྙན་རྣ་བའི་བདུད་རྩིར་གྱུར་པས་ཀྱང་། །དབུལ་བའི་གདུང་བ་མིང་གི་མཐར་བྱེད་པ། །སྐྱོབ་པ་མཚུངས་མེད་ཁྱོད་ལ་ཕྱག་འཚལ་ལོ། །ཁྱོད་ཞབས་གུས་པས་མཆོད་པ་ལྷུར་ལེན་ན། །མཐའ་དག་རྒུད་པའི་ཚོགས་ལས་སྐྱོབ་པ་དང། །དམ་ཆོས་སྒྲུབ་པའི་མཐུན་རྐྱེན་མ་ལུས་པ། །འབད་མེད་ལྷུན་གྱིས་གྲུབ་པའི་དངོས་གྲུབ་སྩོལ། །ཅེས་བསྟོད་ཅིང་གསོལ་བ་གདབ། འདིར་ནི་གཟུགས་དང་ཞེས་སོགས་ཀྱིས་རྟེན་ལ་བརྟན་བཞུགས་བྱ། རྟེན་མེད་པར་མོས་པ་ཙམ་གྱིས་བྱས་པ་ཡིན་ན། ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་བདག་ཉིད་ལ་ཐིམ་པར་བསམ། ཆུའི་རྡུལ་ཕྲ་རབ་རྣམས་དང་མཉམ་པའི་དངོས་གྲུབ་བྱིན་པར་བསམ་ལ་འབྲུ་གསུམ་བརྗོད་ཅིང་མཐེབ་སྲིན་གྱིས་ཆུ་བླངས་ཏེ་རང་གི་ལྕེ་ཐོག་ཏུ་སྦྱིན། ཆུ་ཅུང་ཟད་ཕྱོགས་བཞིར་གཏོར་ཞིང་ཡིག་བརྒྱ་བཟླ། ཆུ་ལྷག་གཞན་དུ་མ་འཁྱར་བར་ལོངས་སྤྱོད། ཡང་ཆུ་སྦྱིན་ཤིན་ཏུ་བསྡུས་པ་ལ་མོས་ན། རང་ཉིད་ཁ་སར་པཱ་ཎིར་གསལ་བའི་མདུན། །པད་ཟླ་ཉི་མའི་གདན་ལ་ཛམྦྷ་ལ། །སྐུ་མདོག་དམར་པོ་ཞལ་གསུམ་ཕྱག་དྲུག་པར། །ཆུ་རྒྱུན་དབུལ་ལོ་བཞེས་ནས་དངོས་གྲུབ་སྩོལ། །ཅེས་ཆུ་རྒྱུན་སྦྲེངས་ཤིང་སྔགས་བརྒྱ་རྩ་དང་། མཆོད་
བསྟོད་སོགས་གོང་བཞིན་བྱེད། ༈ གཉིས་པ་གསང་རྟེན་བྱས་ཏེ་འཆང་ཚུལ་ནི། བྲིས་སྐུ་བྱེད་ན་བཟོ་བོ་མཚན་ཉིད་དང་ལྡན་པས། སྐར་མ་རྒྱལ་དང་ས་རི་ས་ག་གང་རུང་གཟའ་སྤེན་པ་སོགས་དང་འཛོམ་པའི་དུས་ཚེས་བཟང་པོ་ལ་འདྲི་གཞི་དར་དམར་པོ་དྲི་བཟང་གིས་བསྒོས་པའམ། ཤོག་བུ་རྒྱ་ཚོས་ཀྱིས་ཁ་བསྒྱུར་བ་ལ་གསེར་རམ་གྷི་ཝང་གིས་བཅད་བྱས་ཏེ་ཛམྦྷ་ལའི་སྐུ་ཚད་དང་ལྡན་པ་བྲི། སྐུའི་རྒྱབ་ཏུ་སྔགས་ཚར་གསུམ་ཙམ་ལ། ཁམས་གསུམ་གྱི་སྣོད་བཅུད་ལེགས་ཚོགས་ཐམས་ཅད་ཝ་ཤཾ་ཀུ་རུ་ཧོཿ ཞེས་སྤེལ་ཚིག་བཏགས་པ་དང་རྟེན་འབྲེལ་སྙིང་པོ་བྲི། རབ་གནས་བྱས་ལ། རིན་པོ་ཆེ་ལྔ། འབྲུ་ལྔ། སྨན་ལྔ། དར་སྣ་ལྔ། ཁྱི་ཕག་བོང་བུ་མ་གཏོགས་པའི་རྟ་ནོར་ལུག་གསུམ་སོགས་ཀྱི་སྤུ་རིགས་ཟས་སྣ་སོགས་དང་ལྷན་ཅིག་ཏུ་གོས་དར་སོགས་ཀྱིས་ལེགས་པར་དྲིལ། ཚོན་སྐུད་སྣ་ལྔས་བཅིངས་ཏེ་མཆན་ཁུང་གཡོན་དུ་གདགས་ཤིང་གཞན་གྱིས་མ་མཐོང་བ་དང་འགོམ་ཡུག་མ་ཤོར་བ་བྱས་ན་དངོས་གྲུབ་ཤིན་ཏུ་མྱུར་བར་གསུངས་སོ། །མཛོད་ཁང་སོགས་སུ་བཞུགས་པར་འདོད་ན་སྐུ་དང་རྫས་རྣམས་གོང་བཞིན་དུ་འདུ་བྱས་ལ། རྫའི་གའུ་འམ། ཙནྡན་དང་ཤུག་པ་སོགས་ཤིང་བཟང་པོའི་སྒྲོམ་བུར་བཞུགས་སུ་བཅུག་སྟེ་བདག་བསྐྱེད་སྔོན་དུ་བཏང་། མདུན་གྱི་བསྒྲུབ་གཞི་བསངས་སྦྱངས། སྟོང་པའི་ངང་ལས་གའུ་འམ་སྒྲོམ་བུ་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་དགོས་འདོད་ཐམས་ཅད་འབྱུང་བའི་ཡིད་བཞིན་གྱི་ནོར་བུའི་གཏེར་ཆེན་པོས་ཡོངས་སུ་གང་བའི་དབུས་སུ་པཾ་ལས་པདྨ། ཨ་ལས་ཟླ་བ། རཾ་ལས་ཉི་མའི་སྟེང་དུ་ཛཾ་ཡིག་དམར་པོ། དེ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་དབུལ་ཕོངས་ཀྱི་སྡུག་བསྔལ་བསལ། རྒྱལ་བ་སྲས་བཅས་ལ་མཉེས་པའི་མཆོད་པ་ཕུལ། དེ་རྣམས་ཀྱི་བྱིན་རླབས་དང་སྲིད་ཞིའི་དཔལ་འབྱོར་ཐམས་ཅད་བསྡུས་ཏེ་ཐིམ་པ་ཡོངས་སུ་གྱུར་པ་ལས་ཛམྦྷ་ལ་སྐུ་མདོག་
པདྨ་རཱ་གའི་ལྷུན་པོ་ལྟར་དམར་ཞིང་། ཞེས་པ་ནས། དབང་བསྐུར་རྒྱས་གདབ་མཆོད་པ་བྱིན་རླབས་ཡན་ཆད་བདག་བསྐྱེད་ཀྱི་སྐབས་བཞིན་བྱས་ལ། ཀུན་བཟང་བདེ་ཆེན་རོལ་བ་ལས་བྱུང་བའི། །ཡིད་འོང་མཆོད་ཡོན་བཀོད་པ་མཐའ་ཀླས་པ། །བཅོམ་ལྡན་མགོན་པོ་ཛམྦྷ་ལ་ལ་འབུལ། །དགྱེས་བཞིན་བཞེས་ནས་དངོས་གྲུབ་སྩལ་ཏུ་གསོལ། ཨོཾ་ཨཱརྻྻ་ཛམྦྷ་ལ་ཨརྒྷཾ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཧཱུཾ། མཆོད་ཡོན་གྱི་གནས་སུ། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་དང། ཨརྒྷཾ་གྱི་གནས་སུ། པཱངྱཾ་སོགས་བཏགས་པས་མཆོད། ཉི་མ་སྟོང་ཕྲག་ཅེས་སོགས་ཀྱིས་བསྟོད། མདུན་བསྐྱེད་ཀྱི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿའི་མཐར་སྔགས་ཀྱི་འཕྲེང་བས་བསྐོར་བ་ལས་འོད་ཟེར་ལྕགས་ཀྱུ་ལྟ་བུ་འཕྲོས། འཇིག་རྟེན་ཁམས་ཀྱི་ནོར་ལོངས་སྤྱོད་འབྲུ་བང་མཛོད། རྐང་འགྲོ་རིན་པོ་ཆེ་ལ་སོགས་པ་མདོར་ན་འཇིག་རྟེན་དང་འཇིག་རྟེན་ལས་འདས་པའི་དགོས་འདོད་ཐམས་ཅད་བསྡུས་ནས་རང་གི་ཡུལ་ཁམས་རྣམས་གང། ཁྱད་པར་དུ་ཧྲཱིཿ ཡིག་ལས་མཁའ་འགྲོ་མ་དམར་མོ་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས་ཏེ་འཇིག་རྟེན་ཁམས་ཀྱི་དཔལ་འབྱོར་ལོངས་སྤྱོད་ཐམས་ཅད་དང། བྱེ་བྲག་ཏུ་གང་ཞིག་དབང་དུ་སྡུད་པར་འདོད་པ་ཐམས་ཅད་ལྕགས་ཀྱུས་བཟུང་ཞིང་ཞགས་པས་བཅིངས་ཏེ་བཀུག་ནས་རང་གི་དབང་དུ་འདུས་པར་གྱུར་པར་བསམས་ལ། བཟླས་པ་ཅི་འགྲུབ་དང། ཡིག་བརྒྱས་ལྷག་ཆད་བསྐང་ཞིང། གཏོར་མ་གོང་བཞིན་དབུལ། མཆོད་བསྟོད་མདོར་བསྡུས་བྱ། ཐུན་
ཕྱི་མ་རྣམས་སུ་ས་བོན་ལས་མི་བསྐྱེད་པར། གཏེར་ཆེན་པོས་ཡོངས་སུ་གང་བའི་དབུས་སུ་པདྨ་དང་ཟླ་བ་དང་ཉི་མའི་དཀྱིལ་འཁོར་གྱི་སྟེང་དུ་ཛམྦྷ་ལ། ཞེས་སྦྱོར། བསྒྲུབ་གཞི་འབུར་སྐུ་བྱེད་ན་རྒྱུ་རིན་པོ་ཆེ་སོགས་ལས་བསྒྲུབ་པ་སོར་བཞི་ལས་མི་ཆུང་བ་བྱ་ཞིང་། འདྲི་གཞི་གོང་ལྟར་ལ་གསེར་རམ་གྷི་ཝང་གིས་སྔགས་སྤེལ་ཚིག་དང་བཅས་པ་རྟེན་འབྲེལ་སྙིང་པོ་སོགས་བྲིས་པ་གཟུངས་གཞུག་ཏུ་དབུལ་ཞིང། ཡང་ན་རིན་པོ་ཆེའི་ཕྱེ་མ། གནས་ཆེན་གྱི་ས་སྣ། དགོན་སྡེ་ཆེན་པོ་དང་རྒྱལ་པོའི་ཕོ་བྲང། ཡུལ་མི་ཕྱུག་པོ་སོགས་ཀྱི་ཁང་ས་རྣམས་བསྲེས་པ་ལ་འབྲང་རྒྱས་མཐེབ་རྩེ་ཙམ་བྱས་ཏེ་དེ་སྐུ་གཟུགས་ཀྱི་ནང་དུ་བཅུག་ནའང་ལེགས་པར་གསུངས་སོ། །དེ་ནས་སྐུ་བརྙན་དེ་ཉིད་གའུ་འམ་སྒྲོམ་བུ་རིན་པོ་ཆེ་སྣ་ལྔ་སོགས་ཀྱིས་བཀང་བའི་དབུས་སྟོད་ཀྱི་ཆར་བཞུགས་སུ་བཅུག་ལ་རས་བྲིས་ཀྱི་སྐབས་ལྟར་སྒྲུབ། དེ་ལྟར་ཞག་གྲངས་ཅི་ཙམ་བྱེད་པའི་མཐར་མཛོད་ཁང་དུ་གདན་འདྲེན་པ་ན་སྤོས་དང་རོལ་མོ་སོགས་ཀྱི་མཆོད་པས་སྔོན་བསུས་ཏེ་ཇི་ལྟར་འོས་པའི་གདན་ཁྲི་ཕུན་སུམ་ཚོགས་པར་བཀོད། མཆོད་བསྟོད་ཚར་གཅིག་བྱས་ལ་མེ་ཏོག་དང་བཅས་པའི་ཐལ་མོ་སྦྱར་ཏེ། ཇི་ལྟར་སངས་རྒྱས་ཐམས་ཅད་ན། །དགའ་ལྡན་དུ་ནི་གནས་པ་ལས། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་དང་ལྷན་ཅིག་ཏུ། །འདི་རུ་མགོན་པོ་རྟག་བཞུགས་ནས། །བྱང་ཆུབ་སེམས་ནི་བསྐྱེད་པ་དང། །ཡོན་གྱི་བདག་པོའི་དོན་སླད་དུ། །བདག་གི་འབྱོར་པ་ཉིད་ཀྱིས་ན། །ཅི་འབྱོར་པ་ཡི་མཆོད་པ་དང། །མེ་ཏོག་ལ་སོགས་འདི་བཞེས་ཤིག །བདག་དང་སློབ་མར་བཅས་རྣམས་ལ། །རྗེས་སུ་བརྩེ་བས་ཉེར་དགོངས་ནས། །ཀུན་གྱིས་འདི་ལ་བྱིན་རློབས་ཤིང། །འདི་ཉིད་དུ་ནི་བཞུགས་པར་རིགས། །ཞེས་དང། མགོན་པོ་ནམ་མཁའ་མཛོད་ལ་མངའ་
བརྙེས་པའི་བཅོམ་ལྡན་འདས་གཏེར་གྱི་དབང་ཕྱུག་ཐུགས་རྗེ་ཆེན་པོ་དང་ལྡན་པ་ཁྱེད་སྔགས་དང་ཏིང་ངེ་འཛིན་གྱིས་བྱིན་གྱིས་བརླབས་ཏེ་འདོད་དགུའི་འབྱོར་པ་ཟད་མི་ཤེས་པས་ཡོངས་སུ་གང་བའི་གཏེར་མཛོད་འདི་རྣམས་སུ་ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་གྱི་ཁམས་རྣམས་ཟག་པ་མེད་པའི་ཡེ་ཤེས་ཀྱི་གཏེར་ཆེན་པོའི་ལོངས་སྤྱོད་ལ་དབང་འབྱོར་པར་མ་གྱུར་གྱི་བར་དེ་སྲིད་དུ་བརྟན་པར་བཞུགས་ནས་དབུལ་ཞིང་ཕོངས་པའི་སེམས་ཅན་རྣམས་ལ་ཐུགས་བརྩེ་བ་ཆེན་པོས་ཉེ་བར་དགོངས་ཏེ་བྱིན་གྱིས་རློབས་ལ་ཟས་ནོར་ལོངས་སྤྱོད་ཟད་མི་ཤེས་པ་འབྱུང་བ་དང། མཆོག་དང་ཐུན་མོང་གི་དངོས་གྲུབ་མ་ལུས་པ་སྩོལ་བར་མཛད་ཅིང་བརྟན་པར་བཞུགས་སུ་གསོལ། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། ཞེས་པའི་བར་ལན་གསུམ་དང་། བདེ་གཤེགས་ཀུན་བཟང་མཐོང་བའི་བཀྲ་ཤིས་ལྟར། །རྒྱལ་བ་སྲས་བཅས་དེང་འདིར་བདེ་ལེགས་ཤོག །ངན་སྡིག་ལོག་པའི་ཚོགས་རྣམས་བཅོམ་གྱུར་ནས། །རྒྱལ་སྲས་རིག་འཛིན་ཚོགས་རྣམས་འཕེལ་དར་ཞིང། །ཞལ་མཐོང་ཙམ་གྱིས་བདེ་བའི་མཆོག་བརྙེས་ནས། །ཉི་ལྟར་ཞལ་དྲོ་ཟླ་ལྟར་འོད་གསལ་ཞིང། །བདག་དང་འགྲོ་ལ་ཞལ་དྲོ་བྱིན་ཆེ་བས། །བསྐལ་པའི་མཐར་ཐུག་བར་དུ་བཞུགས་སུ་གསོལ། །ཇི་སྲིད་མེ་དང་ཆུ་དང་ན། །རླུང་གིས་བསྐལ་པ་འཇིག་བར་དུ། །སེམས་ཅན་ཀུན་གྱི་དོན་གྱི་ཕྱིར། །བཅོམ་ལྡན་ཁྱོད་ནི་བཞུགས་པར་མཛོད། །མགོན་པོ་བསྐལ་པ་ཇི་བཞིན་དུ། །སྣ་ཚོགས་གཟུགས་ནི་བཟུང་ནས་ཀྱང་། །ཕྱོགས་བཅུའི་འཇིག་རྟེན་ཁམས་རྣམས་སུ། །དེས་ནི་འགྲོ་བའི་དོན་ཀུན་
མཛོད། །ཅེས་བརྗོད་དེ་བརྟན་བཞུགས་བྱ། ཡེ་དྷརྨཱ་བདུན་ལ་སོགས་པ་བརྗོད་དེ་མེ་ཏོག་བྱིན་གྱིས་བརླབས་ནས་མདོ་ལས་བྱུང་བའི་དཀོན་མཆོག་གསུམ་གྱི་བཀྲ་ཤིས་སོགས་ཤིས་པ་བརྗོད་པའི་ཚིག་ཅི་རིགས་པའི་སྒོ་ནས་མེ་ཏོག་གི་ཆར་ཆེན་པོ་དབབ་པར་བྱའོ།། སྨྲས་པ། གང་གི་ཐུགས་རྗེའི་འོད་སྟོང་རྩེ་དགའ་ཡིས། །ལེགས་བྱས་དཔལ་གྱི་འདབ་བརྒྱ་རྒྱས་བྱེད་པ། །ཛམ་ལྷ་དམར་པོའི་སྒྲུབ་ཐབས་བཀོད་པའི་དགེས། །འགྲོ་ཀུན་ཕན་བདེའི་དཔལ་ལ་སྤྱོད་གྱུར་ཅིག །ཅེས་གྲྭ་པ་མངོན་ཤེས་ཀྱི་ལུགས་ཀྱི་ཛམ་ལྷ་དམར་པོའི་སྒྲུབ་ཐབས་ལས་ཚོགས་དང་བཅས་པ་འདོད་དགུའི་མཆོག་སྦྱིན་ཞེས་བྱ་བ་འདི་ནི། ཨ་ལག་ཤཱ་ཤོག་ནས་དད་བརྩོན་བློ་དང་ལྡན་པ་མགྲོན་གཉེར་ཡེ་ཤེས་དོན་གྲུབ་ཀྱིས་བསྐུལ་ངོར་༸ བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་དུ་སྦྱར་པའི་ཡི་གེ་པ་ནི་དགེ་སློང་དཀོན་མཆོག་ཀུན་དགའོ།།