མདོ་སྔགས་ཀྱི་ལམ་ཡོངས་རྫོགས་ཟུང་ལྡན་གྱི་སྒོ་ནས་བསྟན་པ།
མདོ་སྔགས་ཀྱི་ལམ་ཡོངས་རྫོགས་ཟུང་ལྡན་གྱི་སྒོ་ནས་བསྟན་པ་རྒྱལ་བ་དགྱེས་པའི་དབྱངས་སྙན་ཞེས་བྱ་བ་བཞུགས་སོ།།
འཇམ་དབྱངས་དབྱངས་ཅན་བཅས་ལ་གུས་བཏུད་ནས། །གསུང་རབ་རབ་འབྱམས་ཀུན་གྱི་དགོངས་པའི་དོན། །སྙན་ཚིག་ཚིག་འཕྲེང་ཉུང་ངུར་སྤེལ་བ་ཡིས། །མདོ་རྒྱུད་རྒྱུད་མངས་འཁྲོལ་བའི་དབྱངས་སུ་ལེན། །ལེགས་ཚོགས་ཚོགས་གཉིས་འབྲས་བུར་བཅས་པ་ཡི། །འབྱུང་གནས་གནས་སྐབས་མཐར་ཐུག་དུས་ཀུན་གྱི། །སྐྱབས་མཆོག་མཆོག་གསུམ་འདུས་པའི་ངོ་བོ་ཉིད། །བླ་མ་མ་བཅོས་དད་པས་ཚུལ་བཞིན་བསྟེན། །འདོད་གཟུགས་གཟུགས་མེད་ཀུན་ཏུ་འཁྱམས་ན་ཡང། །ཆོས་ཚུལ་ཚུལ་བཞིན་སྒྲུབ་པའི་དལ་འབྱོར་རྟེན། །རྙེད་དཀའ་དཀའ་བ་བརྒྱ་ཡིས་བསྒྲུབས་ན་ཡང། །མྱུར་དུ་དུ་མའི་རྐྱེན་གྱིས་འཇིག་པར་ངེས། །ངན་སོང་སོང་ཚེ་འགྱོད་ཀྱང་བྱར་མེད་པས། །དེ་ལས་ལས་འབྲས་བླང་དོར་ཤེས་དུས་འདིར། །བདག་བདེ་བདེ་འགྲོའི་གོ་འཕང་དོན་གཉེར་གྱིས། །སྐྱབས་འགྲོ་འགྲོ་བ་བཞི་བྲལ་ལ་འབད་དེ། །ཕྱི་མ་མ་གིར་མི་འགྲོའི་གདེང་ཚད་ཅིག །གང་སྐྱེས་སྐྱེས་བུ་ཆུང་ངུའི་ཡང་རྩེ་ཡིན། །ཇི་སྲིད་སྲིད་པའི་རྩ་བ་མ་ཆོད་པ། །དེ་སྲིད་སྲིད་འདིར་བདེ་བའི་སྐབས་མེད་པས། །སྲིད་ལ་ལ་འུར་འཇིགས་ཤིང་སྐྲག་པ་ཡིས། །དེ་སྤོང་སྤོང་བདུན་ཁྲིམས་ལ་ལེགས་གནས་ཏེ། །ཉེར་ཞི་ཞི་བདེ་གཙོ་བོར་སྒྲུབ་འདོད་ཀྱི། །བློ་སྐྱེས་སྐྱེས་བུ་འབྲིང་གི་ལམ་དུ་བཤད། །སྲིད་འདི་འདི་ལྟར་ཐོག་མ་མེད་ནས་མྱུལ། །ཕ་མ་
མ་བྱས་སེམས་ཅན་འགའ་ཡང་མེད། །དེས་ན་ན་འཆི་སྲིད་པའི་རྒྱ་མཚོ་ལས། །འགྲོ་ཀུན་ཀུན་མཁྱེན་ཐར་པའི་གྲོང་མཆོག་ཏུ། །འཁྲིད་ཕྱིར་ཕྱིར་མི་ལྡོག་པའི་སེམས་བསྐྱེད་མཆོག །ནམ་སྐྱེས་སྐྱེས་བུ་ཆེན་པོའི་གྲངས་སུ་ཚུད། །གཞན་ཕན་ཕན་སེམས་ཙམ་གྱིས་མི་འགྲུབ་པས། །བྱ་དཀའ་དཀའ་བ་བརྒྱ་ཕྲག་སྤྱོད་དགོས་ལ། །དེ་ཡང་ཡང་དག་ལམ་གྱི་སྤྱི་སྡོམ་ན། །བདོག་ཀུན་ཀུན་འཛིན་མེད་པ་སྦྱིན་པའི་མཆོག །ངང་ཚུལ་ཚུལ་དང་མཐུན་པ་ཁྲིམས་ཀྱི་མཆོག །དགྲ་གཉེན་གཉེན་དུ་སྙོམས་པ་བཟོད་པའི་མཆོག །བྱ་བར་བར་གཅོད་མི་ཚུགས་བརྩོན་པའི་མཆོག །ཏིང་འཛིན་འཛིན་མེད་གསལ་སྟོང་བསམ་གཏན་མཆོག །བདེན་ཞེན་ཞེན་ཡུལ་དྲུངས་ཕྱུང་ཤེས་རབ་མཆོག །སྙིང་རྗེས་རྗེས་སུ་ཆགས་པ་ཐབས་མཆོག་བཅས། །ཐེག་ཆེན་ཆེན་པོ་བདུན་ལྡན་ལམ་བཟང་ལ། །འབད་དེ་དེ་ནི་རྒྱལ་བའི་གཞུང་ལམ་ཡིན། །དེ་ཚེ་ཚེ་གཅིག་ཉིད་ལ་རྫོགས་སངས་རྒྱས། །སྒྲུབ་རྣམས་རྣམ་དག་དབང་ཐོབ་དམ་ཚིག་བསྲུང། །ཟབ་ལམ་ལམ་བཟང་བསྐྱེད་རྫོགས་གཉིས་སོགས་ལ། །གོ་རིམ་རིམ་པ་བཞིན་དུ་སློབ་པ་གཅེས། །འོད་གསལ་གསལ་བར་འཆར་བའི་ལུས་ཀྱི་གནད། །མཐར་ཐུག་ཐུགས་ཀའི་རྩ་མདུད་རྫོགས་པར་གྲོལ། །སྤྲོས་ཀུན་ཀུན་གསལ་དབྱིངས་སུ་ཞི་བ་ན། །ངེས་དོན་དོན་དམ་བདེན་
པའི་རིམ་པ་ཡིན། །ལུས་ཀུན་ཀུན་ད་ཞུ་བའི་བདེ་ཆེན་གྱིས། །ཁྱབ་ལས་ལས་རླུང་རྒྱུ་བ་ཀུན་འགགས་ཏེ། །གང་སྣང་སྣང་སྟོང་ལྷ་མི་འཁོར་ལོ་རུ། །ཤར་ཀུན་ཀུན་རྫོབ་བདེན་པའི་རིམ་པ་ཡིན། །བདེན་གཉིས་གཉིས་སུ་མི་ཕྱེད་སྒྱུ་ལུས་དང། །འོད་ཟུང་ཟུང་དུ་འཇུག་པའི་སྒྱུ་འཕྲུལ་གྱིས། །ཀུན་ཁྱབ་ཁྱབ་བདག་དཔལ་ལྡན་རྡོ་རྗེ་འཆང། །ལེགས་ཐོབ་ཐོབ་བྱའི་འབྲས་བུ་མཐར་ཐུག་ཡིན། །སྒྲ་རྒྱན་རྒྱན་གྱི་ལུགས་དང་མི་འགལ་ཞིང། །བརྗོད་དོན་དོན་གྱི་སྙིང་པོ་ཀུན་འདུས་པའ། །གཏམ་འདི་འདི་འདྲའི་ཚུལ་ལ་མོས་རྣམས་ཀྱིས། །གསན་ཏེ་ཏེ་བོར་ལག་ཏུ་ལེན་པར་མཛོད། །དགེ་བས་བས་མཐར་སྒྲུབ་པའི་བཅུད་མྱོང་ཞིང། །སྙན་ངག་ངག་གི་ལོངས་སྤྱོད་མགྲིན་གླུ་ལེན། །མང་ཐོས་ཐོས་དོན་སྒྲུབ་ལ་གཞོལ་རྣམས་ཀྱིས། །ཚུལ་འདི་འདི་བཞིན་གེགས་མེད་སྤྱོད་གྱུར་ཅིག །དེའང་ཟུང་ལྡན་གྱི་སྦྱོར་ཚུལ་ནི་རྗེ་བླ་མའི་གསུང་རབ་རྣམས་ལས་མང་དུ་འབྱུང་བ་བཞིན། སྔ་ཕྱི་མི་ཟློས་ཤིང་དོན་དང་འབྲེལ་བ་ཞིག་དགོས་ནའང། ད་ལྟ་འགའ་ཞིག་གིས་དཀར་དཀར་མང་མང་བཟང་བཟང་ཟེར་བ་ལྟ་བུ་བསྒྲིགས་འདུག་པ་ནི་དགོས་ནུས་ཆུང་བར་སྣང་བས། མདོ་སྔགས་ཀྱི་ལམ་ཡོངས་རྫོགས་ཟུང་ལྡན་གྱི་སྒོ་ནས་བསྟན་པ་རྒྱལ་བ་དགྱེས་པའི་དབྱངས་སྙན་ཞེས་བྱ་བ་འདིའང་རྗེའི་གསུང་གི་རྗེས་སུ་འབྲངས་ཏེ། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དལ་འབྱོར་དོན་ཆེ་དང་རྙེད་དཀའ་བསམ་ན། །དོན་མེད་བྱ་བ་ལ་བཀོལ་བ་འཕང་ངོ་། །ནམ་འཆི་ངེས་མེད་དང་བཟློག་མེད་བསམ་ན། །བག་མེད་སོས་དལ་དུ་སྡོད་པ་འཁྲུལ་ལོ། །བཟོད་དཀའ་ཐར་མེད་ཀྱི་
ངན་སོང་བསམ་ན། །སྐྱབས་ཤིག་དེ་རིང་རང་མི་བཙལ་ཐབས་མེད། །ལས་འབྲས་ངེས་པ་དང་འཕེལ་ཚུལ་བསམ་ན། །དགེ་སྡིག་ཕྲ་མོར་ཡང་བག་ཟོན་བྱེད་དགོས། །འཁོར་བ་མཐའ་ངན་གྱི་ངང་ཚུལ་བསམ་ནས། །ངེས་འབྱུང་ཚུལ་ཁྲིམས་ལ་སློབ་པར་བྱེད་དགོས། །དྲིན་ལན་འཁོར་མེད་ཀྱི་མ་རྣམས་དོན་དུ། །སེམས་བསྐྱེད་ཕྱིན་དྲུག་གི་སྤྱོད་ལ་སློབ་དགོས། །ཁྱད་པར་མཐའ་བྲལ་གྱི་ལྟ་བས་རྒྱས་བཏབ། །ཟབ་ལམ་གསང་སྔགས་ཀྱི་སྣོན་པ་འདེབས་དགོས། །དེ་དག་ཐམས་ཅད་ཀྱི་རྩ་བ་བཤེས་གཉེན། །བསྟེན་ཚུལ་རྟེན་འབྲེལ་གྱི་མགོ་ནས་འགྲིག་དགོས། །ཞེས་པའང་རྗེ་ཉིད་ཀྱི་གསུང་ཡིན་ནོ།། །།