འཇམ་མགོན་བླ་མ་བསྟོད་པའི་རབ་ཏུ་བྱེད་པ་ཀ་ལ་པིངྐའི་གླུ་དབྱངས།
འཇམ་མགོན་བླ་མ་ལ་བསྟོད་པའི་རབ་ཏུ་བྱེད་པ་ཀ་ལ་པིངྐའི་གླུ་དབྱངས་དང་། ཀུན་མཁྱེན་འཇིགས་མེད་དབང་པོ་ལ་བསྟོད་པ་བཞུགས་སོ།།
བློ་བཟང་དབྱངས་ཅན་ངག་གི་དཔལ་མངའ་བ། །གྲགས་པའི་རྫ་རྔ་ཕྱོགས་ཀྱི་མཛེས་མས་བརྡུང། །དཔལ་ལྡན་མཁས་པ་ཀུན་གྱི་མགོས་གཏུགས་པ། །ཁྱོད་ཀྱི་ཞབས་ལ་བདག་ཀྱང་ཕྱག་བགྱིད་དོ། །ངོ་མཚར་ཟད་མི་ཤེས་པ་ལུང་རྟོགས་ཀྱི། །ཡོན་ཏན་རིན་ཆེན་འབྱུང་གནས་གཏིང་དང་མཐའ། །རྒྱལ་ཀུན་མཁྱེན་པའི་དཔལ་དང་ནམ་མཁའི་ཁྱོན། །ལྷན་ཅིག་མཉམ་པ་ཉིད་དུ་བརྗོད་ལས་འདས། །བརྗོད་བྲལ་བརྗོད་པར་རྩོམ་པའི་ངལ་ཁུར་གྱིས། །དབྱངས་ལྡན་དབྱངས་ཀྱི་ང་རོ་འདར་དང་བཅས། །ཕང་འགྲོ་ཕང་བར་ཉལ་བའི་ཟོལ་བརྟེན་ན། །ཕལ་པས་ཕུལ་དུ་ཕྱིན་པར་ག་ལ་ཞིག །འོན་ཏང་ཁུང་བུ་མ་ཡིན་ཁ་སྒོ་ལས། །སྔགས་ཀྱིས་རེངས་པར་མ་བྱས་རོ་འཛིན་གྱིས། །ཚེ་རབས་འདི་དང་གཞན་དུ་འདོད་པའི་དོན། །སྒྲུབ་ཕྱིར་ཆ་ཙམ་སྤེལ་ལ་ཆེས་ཆེར་སྤྲོ། །ཡ་རབས་རིགས་མཐོ་སྐྱེས་རི་མཐོན་པོའི་རྒྱུད། །འཕྲིན་ལས་རྒྱུན་མི་འཆད་པའི་རྒྱུན་གྱི་ངོགས། །ཙོང་ཁ་ཞེས་གྲགས་འཛིན་མའི་ཐིག་ལེ་རུ། །གཟིགས་པ་རྣམ་ལྔའི་དགེ་མཚན་སྐྱ་རེངས་ཤར། །སྙིགས་མའི་གཤིན་རྗེར་ཁྲོས་པ་འཇམ་པའི་དབྱངས། །རལ་པ་ར་ཡི་གདེངས་ཀར་བསྒྱུར་བས་ཀྱང། །མ་ངོམས་གསེར་གྱི་ཅོད་པན་རྩེ་གཅིག་ཏུ། །བསྒྲིལ་ཏེ་སྲིད་པའི་ལྟོ་བ་འདྲལ་བར་ཆས། །རིགས་གསུམ་རྣམ་པར་འཕྲུལ་བའི་ལྟས་ཀྱི་གཏམ། །དཔྱད་གསུམ་དག་པའི་གཏན་ཚིགས་ཆེ་ན་ཡང་། །
དུས་གསུམ་རྒྱལ་བ་ཡོངས་ཀྱི་མཁྱེན་བརྩེ་དང། །ནུས་གསུམ་འབྲལ་བའི་དོགས་པ་གང་ན་མཆིས། །དོན་ཀུན་གྲུབ་པ་གཉིས་པའི་གཞོན་ནུ་དེ། །དོན་གྲུབ་རིན་ཆེན་བཤེས་ཀྱིས་ཡོངས་གཟུང་བས། །དོན་དམ་བློ་གྲོས་བཟང་པོར་གྲགས་པའི་མཚན། །དོན་དང་མཐུན་པ་རྣ་བའི་བཅུད་ལེན་གྱུར། །མ་ལ་ཡར་སྐྱེས་ལྕུག་ཕྲན་མངར་བའི་གསུང། །ལྷན་སྐྱེས་གདུང་སེལ་ཆོ་ག་རྫོགས་པ་དེས། །འདི་ན་དྲི་བཟང་བྱུགས་པའི་གོར་མ་ལ། །སྣོམས་པའི་ཚོགས་ལ་འཕྱ་བ་གོར་མ་ཆག །མཁྱེན་རབ་སྣང་བའི་མཆོག་སྦྱིན་མཁྱེན་གཏེར་གྱིས། །རྗེས་སུ་བརྩེ་བས་འབྲལ་མེད་རྗེས་བཟུང་ཞེས། །བསྔགས་པ་གཞན་སེམས་འབྲིད་པའི་བསྔགས་བརྗོད་དེ། །རང་གི་བྱེད་པ་ཇི་ལྟར་རང་ལ་འཇུག །དེ་ནས་དྲན་དབང་གསེར་རིའི་འཕྲེང་བསྟར་བའི། །དབུས་འགྱུར་ཆོས་ཀྱི་རྒྱ་མཚོ་མངོན་ཕྱོགས་པ། །གདོས་པ་ཟུང་གིས་བསྐྱོད་པའི་གཟིངས་བཞིན་ཏེ། །ཐུགས་ཀྱང་བློ་དང་བརྩོན་འགྲུས་འཁར་བས་བརྟེན། །དེར་ཡང་མཁས་དགུའི་ཐུགས་བཅུད་ཕོན་པོའི་ཚོགས། །རེ་རེའི་ཁམ་གྱིས་ལྷག་མར་མ་ལུས་ཚེ། །རེ་བའི་ཕྱོགས་སུ་སྣོམས་པའི་གཉིས་འཐུང་དབང། །རང་གི་གཙུག་སྐྱེས་འགྲམ་ཆང་ཁོ་ནས་མྱོས། །དེ་ལྟ་ན་ཡང་གཞོན་ནུའི་བློ་གྲོས་མཚོ། །མཁས་པའི་དབང་པོ་གཞོན་ནུ་བློ་གྲོས་ཀྱི། །ལེགས་བཤད་ཀླུང་བརྒྱས་ཆ་ཙམ་
གང་ན་ཡང། །ལྟ་བ་འཚོལ་བའི་རྟ་གདོང་ངོམས་མ་གྱུར། །ཀླུ་སྒྲུབ་ཀླུ་ཡི་དབང་པོའི་རོལ་གནས་ལས། །ཟླ་བྲལ་ཟླ་བའི་ལེགས་བཤད་བདུད་རྩིའི་ཆུས། །གཉིས་མེད་གཉིས་སུ་སྣང་བའི་བདེན་དོན་ཟུང་། །མ་ནོར་མ་འདྲེས་འབྱེད་པའི་སྤོབས་པ་བརྙེས། །རང་བཞིན་སྟོང་པའི་མཁའ་ལས་མི་འདའ་ཡང། །ལྟ་ལ་ཆགས་པའི་གནས་མེད་སྤྲོས་དང་བྲལ། །ཇི་སྙེད་འཛིན་མའི་དཀྱིལ་འཁོར་ཀུན་གསལ་ཡང། །འགར་ཡང་མངོན་ཞེན་དམིགས་གཏད་རེག་པ་མེད། །སྣང་བ་ཙམ་གྱི་ཐ་སྙད་མེ་ལོང་ལ། །གཞི་ལམ་འབྲས་བུའི་བྱི་དོར་བྱ་བྱེད་ཀུན། །བསྙོན་མེད་འཆར་བའི་ངོ་མཚར་གཟིགས་མོ་ཡིས། །བློ་ལྡན་སྒེག་མོའི་དགོས་དོན་ཅི་ཡང་འགྲུབ། །རྟེན་འབྱུང་འདོམས་པ་རྒྱལ་བའི་ངོ་མཚར་སྐུ། །དྭངས་པའི་ཐུགས་ཀྱི་མེ་ལོང་ལ་འཕོས་ཚེ། །བར་པ་མཚན་མེད་གཏན་གྱི་བྲག་ཆའི་དབྱངས། །དེ་ཡིས་ཁྱོད་ཀྱི་མགུར་ནས་བསྒྲགས་པ་བཞིན། །རྟག་ཆད་འཕྲང་སྐྱ་ཐགས་སུ་འཁྲུལ་བ་ཡིས། །དགག་སྒྲུབ་རྐང་སྟབས་འཆའ་བའི་རབ་རིབ་ཅན། །ཀུན་ཀྱང་བློ་མིག་གསེར་གྱི་ཐུར་མ་ཡིས། །ཕྱེ་ཚེ་དགའ་དང་སྐྲག་པས་འདར་བ་བསྟེན། །ཀ་རཱི་ཀ་ཡི་རུང་ཆུ་འདེབས་པ་ནས། །ས་མ་ཛ་ཡི་བདེན་གཉིས་དབྱེར་མེད་བར། །མདོ་སྔགས་བཅུ་དྲུག་ཆ་ཤས་ལམ་གྱི་ལུས། །དཀྱིལ་འཁོར་གཅིག་ཏུ་རྫོགས་ཏེ་ཐུགས་མཁར་གསལ། །དྲང་ངེས་རི་ཀླུང་བཀོད་པ་མཐའ་ཡས་ཀྱང་། །རྟོན་པ་རྣམ་བཞིའི་མཁའ་ལ་ལྡིང་བ་ཡི། །རྣམ་དཔྱོད་གྲིབ་མ་མཐུན་པར་འཇུག་པ་ན། །འགལ་བའི་གཅོང་རོང་བརྒྱ་ཡིས་དགག་ཏུ་མེད། །བརྡ་སྤྲོད་ལས་
བཞི་བྱ་བའི་འཁོར་ལོ་སོགས། །བསྟན་པའི་གདུགས་དཀར་རྩིབས་མ་རེ་རེ་སྟེ། །རྫོགས་པར་འདེགས་ལ་མདོ་སྔགས་ལམ་རིམ་ཉིད། །ཡུ་བར་ཕུལ་བྱུང་ཞབས་དང་ཁྱོད་ཀྱིས་གཟིགས། །རབ་དཀར་གངས་རིས་བསྐོར་ཡང་མུན་ནག་གཏིབས། །ཀུན་ཀྱང་དབུ་མར་བསྙེམས་བཞིན་མཐའ་ལ་ལྷུང། །རིག་འཛིན་ཕལ་ཆེར་སྔགས་ལ་མ་ཕྱོགས་པས། །རྒྱལ་བསྟན་མིང་གི་ལྷག་མར་གྱུར་པ་ན། །ཐུབ་པས་ཁྱོད་ལ་དབང་པོའི་ཏོག་གི་དྲུང། །དམ་བཅས་བུ་ལོན་བཞིན་དུ་བསྙགས་པའི་ལན། །ཆོས་ཚུལ་རབ་འབྱམས་ནོར་བུའི་ཟོང་བཀྲམ་པས། །ཐར་འདོད་ཡོངས་ཀྱི་རེ་བ་ཅིག་ཅར་བསྐངས། །སྒྱུ་ལུས་སྒྱུ་མའི་གླང་པོ་བཞིན་གྱུར་ཅིང། །འོད་གསལ་འོད་སྣང་ཡལ་བར་རྩོམ་པ་ན། །ཟུང་དུ་སྦྲེལ་ཏེ་ཟུང་འཇུག་གནད་དང་བཅས། །རྡོ་རྗེ་འཆང་དབང་རྡོ་རྗེའི་ཚིག་གིས་བཀྲལ། །རྩིང་སྤྱོད་རྦ་ཀློང་འཁྲུགས་པ་སྙིགས་མའི་མཚོར། །བྱིང་བ་རྒྱུད་སྡེ་རྣམ་བཞིའི་རིག་བྱེད་གཞུང། །བཤད་སྒྲུབ་རུས་སྦལ་ཟོལ་གྱིས་བཏེག་པ་ན། །འཕྲོག་བྱེད་རང་གི་སྙེམས་པའང་གཏིང་དུ་བྱིངས། །གསུང་རབ་ཀུན་ལ་རྒྱས་བཏབ་ཕྱག་རྒྱ་སྟེ། །མཁས་པ་ཀུན་གྱི་གཙུག་ན་ནོར་བུའི་ཏོག །སྨྲ་ངན་ཀུན་ལ་དུས་ཀྱི་ཆད་པ་བཞིན། །གྱུར་པ་ཁྱོད་གསུང་རྣམ་པ་ཀུན་དང་ལྡན། །དེ་ཡི་བྲག་ཆ་ཕྱོགས་ཀྱི་རི་བོའི་མགུལ། །ཀུན་ནས་བསྒྲགས་པ་མ་སྨད་རི་བོའི་དབྱངས། །རྒྱ་མཚོའི་སྐ་རགས་འཆང་བའི་འཛིན་མ་འདིར། །མཐའ་དབུས་མེད་པ་ལྷ་ཡི་རྔ་བཞིན་ཁྱབ། །མངོན་པར་འཕེལ་ལོ་ཟླ་བས་རྒྱ་མཚོ་དང། །འོད་སྟོང་
འབར་བའི་ཟེར་གྱིས་པདྨའི་ཚལ། །ཁྱོད་ཀྱི་མཛད་པས་ཐུབ་བསྟན་མཐའ་དག་དང། །གཟུར་གནས་དད་པས་ཁྱོད་ཀྱི་གྲགས་པའི་འཕྲེང། །ཆོས་དོན་པདྨའི་ཚལ་ལ་འཕུར་ལྡིང་གིས། །རྩེན་པའི་རྐང་དྲུག་ཉེར་ཞིའི་དྲི་བསུང་དང། །ད་ལྟ་རྙེད་བཀུར་ཟང་ཟིང་ཤ་རུལ་ལ། །འཁོར་བའི་སྦྲང་བུ་འདི་སྣང་དྲི་ང་མཚོན། །ཆོས་དང་ཆོས་མིན་མི་ཕྱེད་སྐྱེ་བོ་ལ། །གྲགས་པར་གྲགས་པ་ཕལ་ཆེར་ལོག་པ་སྟེ། །མཁས་པའི་མཁས་པ་ཀུན་གྱི་མགོས་གཏུགས་པའ། །མགོན་ཁྱོད་མགོན་དུ་བསྟེན་རྣམས་སྐལ་བ་བཟང། །ལེགས་བཤད་མཛེས་དགའ་མ་ཡི་ལང་ཚོ་ལ། །རྗེས་སུ་ཆགས་པའི་དྲན་དབང་གཞོན་ནུའི་ཚོགས། །ཁྱོད་ཞབས་པདྨའི་དྲུང་དུ་བསྙེགས་པ་ན། །སོ་གའི་གླང་ཆེན་མཚོ་ལ་འདུ་བ་བཞིན། །གང་གི་ཡོན་ཏན་རྨད་བྱུང་སྦྲང་རྩིའི་ཆང། །ཆ་ཙམ་མྱང་ཚེ་ཕྱི་ཕྱིར་འཕེལ་བ་ཡིས། །ཤུགས་དྲག་འདུན་པ་བཟློག་ཏུ་མ་མཆིས་པས། །གཞན་གྱི་ལྟ་སྒོམ་སྤྱོད་པས་དྲངས་སུ་མེད། །སྲིད་པ་གསུམ་ན་ཆེར་འཕགས་ཡོངས་འདུའི་ལྗོན། །གང་གསུང་ལས་སྐྱེས་མེ་ཏོག་རེ་རེའི་བསུང། །ཕྱོགས་ཀྱི་འཁོར་ལོའི་མཐའ་ལ་འཁྱུད་པ་ན། །བདག་ཉིད་ཆེན་པོའི་རང་བཞིན་སུ་ཡིས་དཔོག །ཡབ་གཅིག་ཁྱོད་ཀྱི་ཐུགས་རྗེས་ཡོངས་བཟུང་བའི། །སྐལ་ལྡན་དུས་ཀྱི་མཐར་ཡང་མི་འཆར་ཕྱིར། །དཔྱད་གསུམ་དག་པའི་བཤད་སྒྲུབ་འཕྲིན་ལས་རྒྱུན། །བསྐལ་པ་ཕྱི་མཐས་གཏུགས་པར་ཆད་པ་མེད། །འཛིན་མ་འཛིན་བཟོད་མི་དབང་བློན་འབངས་སོགས། །འབྱོར་ལྡན་འབྱོར་བའི་སྙིང་པོ་ཀུན་བསྟབས་པ། །རྒྱལ་དང་རྒྱལ་སྲས་རྣམས་ལ་མཆོད་
སྤྲིན་དང། །དགེ་ལྡན་དགེ་འདུན་འདུས་པའི་ཆས་སུ་བསྒྲུབས། །གཞན་དུ་འདོད་ཡོན་འདོད་ལྷའི་དགའ་མའི་འཛུམ། །ཐར་པའི་སྲོག་འཕྲོག་སྲིན་མོའི་ཁྲོ་གཉེར་དུ། །གཟིགས་ནས་སྲེད་བྲལ་སྲིད་གསུམ་བླ་མ་ཁྱོད། །ལོངས་སྤྱོད་གདུག་སྦྲུལ་གདེངས་ཀ་རྡོག་པས་མནན། །མཐའ་གཉིས་སྤངས་པའི་སྤྱོད་པ་རྣམ་པར་དག །མཐའ་གཉིས་སྤངས་པའི་སྒོམ་པ་མཉམ་པར་འཇུག །མཐའ་གཉིས་སྤངས་པའི་ལྟ་བ་སྤྲོས་དང་བྲལ། །དེ་ཕྱིར་ཀུན་ཏུ་དབུ་མ་ཆེན་པོར་གནས། །ཐུབ་བསྟན་རིན་ཆེན་འཛིན་སྐྱོང་སྤེལ་བའི་ཐབས། །རྒྱལ་སྲས་རྣམས་ཀྱིས་བསྐལ་པར་དགོངས་པའི་དོན། །མཐའ་དག་མ་ཚང་མེད་པར་བསྒྲུབས་པ་ཡིས། །གངས་ཅན་བསྟན་འཛིན་ཀུན་གྱི་རྩེ་མོར་སོན། །རྒྱན་དྲུག་མཆོག་གཉིས་གྲུབ་ཆེན་བརྒྱད་ཅུ་སོགས། །འདུས་ཞལ་གཅིག་པུར་གྱུར་པ་ཁྱོད་ཀྱི་ཞབས། །བསྙེན་པས་ཀུན་གྱི་གསང་མཛོད་འཐོབ་ནུས་ན། །བཟང་པོའི་སྐལ་བར་མི་སྤྱོད་ཤེས་ལྡན་གང། །དེ་ཕྱིར་བདག་ཀྱང་བདེ་གཤེགས་སྙིང་པོའི་འབྲས། །བྱང་ཆུབ་གསེར་སྦྱང་ཁམས་སུ་སྨིན་པའི་བར། །ཁྱོད་ཀྱི་ཐུགས་རྗེ་བྱིན་རླབས་མ་དྲོས་མཚོར། །འབྲལ་མེད་བསྟེན་པ་སྨོན་པའི་སྙིང་པོར་བགྱིད། །དེ་ཉིད་ཁོ་ན་ཡིད་ལ་བརྣག་པ་ཡིས། །བསྟོད་ཚིག་ཀ་ལ་པིང་ཀའི་གླུར་བླངས་ཏེ། །མཁས་དབང་མཁའ་འགྲོའི་ཚོགས་ཀྱི་མགྲིན་པའི་རྔ། །ཕྱོགས་བརྒྱར་འཁྲོལ་བ་ཡིས་ཀྱང་སྤྲོ་བ་སྐྱེས། །རབ་འབྱམས་རྒྱལ་བའི་གདུང་འཚོབ་གཅིག་པུ་སྟེ། །ཐུབ་བསྟན་ཡོངས་ཀྱི་མངའ་བདག་གཅིག་པུ་དང། །མ་ལུས་འགྲོ་བའི་མགོན་སྐྱབས་གཅིག་པུ་
པ། །ཁྱོད་ཀྱི་ཞབས་ལ་སྙིང་ནས་ཕྱག་བགྱིད་དོ། །འདིས་མཚོན་དགེ་ཚོགས་ཟླ་བའི་འཁྲི་ཤིང་ན། །དལ་འབྱོར་ཚེས་ཀྱི་འཕེལ་བ་མི་ཉམས་ཤིང་། །རྣམ་དག་བསླབ་གསུམ་ཆ་ཤས་ཡོངས་གང་ལས། །ལེགས་བཤད་བསིལ་བའི་ཟེར་བརྒྱ་སྤྲོ་བར་ཤོག །ཡབ་རྗེས་ཇི་ལྟར་གདམས་པའི་བཀའ་སྲོལ་མཆོག །ཚང་ལ་མ་ནོར་མདོ་སྔགས་ལམ་བཟང་ལ། །གོལ་བ་མེད་པའི་བགྲོད་པ་མཐར་ཕྱིན་ཏེ། །ངེས་ལེགས་ཁང་བཟང་རྩེ་མོར་འཇུག་གྱུར་ཅིག །མ་ལུས་རྒྱལ་བའི་ཆོས་ཀྱི་མཛོད་འཛིན་པ། །ཁྱོད་བཞིན་ཁྱོད་ཀྱི་གསང་བའི་མཛོད་བཟུང་སྟེ། །ཐར་འདོད་ཡོངས་ལ་མཆོད་སྦྱིན་འགྱེད་པ་ཡི། །འགྲོ་ཀུན་སྲིད་ཞིའི་དབུལ་བ་སེལ་གྱུར་ཅིག །གངས་རིའི་ཐོར་ཅོག་ཞུ་བ་གངྒཱའི་རྒྱུན། །ཟབ་ཡངས་རྒྱ་མཚོའི་ཀློང་དུ་སིམ་པ་བཞིན། །རྣམ་དཀར་དགེ་ཚོགས་མགོན་ཁྱོད་ཐུགས་བསྐྱེད་ཀྱི། །རྒྱ་མཚོར་རོ་གཅིག་མི་ཟད་གནས་ཐོབ་ཤོག །མདོར་ན་ཀུན་ཏུ་བཟང་དང་འཇམ་དཔལ་སོགས། །རྒྱལ་སྲས་ཀུན་གྱི་རླབས་ཆེན་སྨོན་ལམ་དང། །སྤྱོད་པ་ཀུན་ལ་ཞུམ་མེད་སློབ་པ་ཡིས། །རིང་མིན་ཀུན་མཁྱེན་རྒྱལ་བའི་གནས་ཐོབ་ཤོག །ཅེས་འཇམ་མགོན་བླ་མ་ལ་བསྟོད་པའི་རབ་ཏུ་བྱེད་པ་ཀ་ལ་པིདྐའི་གླུ་དབྱངས་ཞེས་བྱ་བ་འདི་ནི་ཨ་མཆོག་དགེ་བཤེས་ཀྱི་སྤྲུལ་སྐུ་མཁྱེན་རབ་ཀྱི་དབང་ཕྱུག་རཏྣ་ཤཱ་ས་ན་དྷྭ་ཛས་རྗེའི་རྟོགས་བརྗོད་སྙན་ཚིག་གི་ལམ་ནས་དྲངས་པ་ཞིག་དགོས་ཞེས་བསྐུལ་བ་ལྟར། མཁས་གྲུབ་ཐམས་ཅད་མཁྱེན་པའི་གསུང་གི་ཚིགས་བཅད་འདིའི་རྒྱས་བཤད་ཀྱི་ཚུལ་དུ། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།