ཀུན་མཁྱེན་འཇིགས་མེད་དབང་པོ་ལ་ཐོག་མའི་ཟུང་ལྡན་གྱི་སྒོ་ནས་བསྟོད་པ།
ཁྱབ་བདག་རྡོ་རྗེ་འཆང་ཀུན་མཁྱེན་འཇིགས་མེད་དབང་པོ་ལ་ཐོག་མའི་ཟུང་ལྡན་གྱི་སྒོ་ནས་བསྟོད་པ་དགེ་ལེགས་དཔལ་མཆོག་ཅེས་བྱ་བ་བཞུགས་སོ།། ༈ དགེ་ལེགས་ཆུ་གཏེར་གཏིང་མཐའ་མི་མངོན་ཞིང། །དགེ་ཚོགས་རིན་ཆེན་རྡུལ་བརྩེགས་ལྷུན་པོའི་སྤོར། །དགེ་འདུན་འདུས་པ་ལྷ་བརྒྱའི་གཙུག་གི་རྒྱན། །དགེ་ལྡན་བསྟན་པའི་གཉེན་གཅིག་རྒྱལ་གྱུར་ཅིག །ལེགས་བྱས་བྱེ་བ་བརྒྱ་ཡིས་བསྐྲུན་པའི་སྐུ། །ལེགས་བཤད་ཟབ་མོའི་དབྱངས་སྙན་སྒྲོགས་པའི་གསུང་། །ལེགས་ཉེས་བླང་དོར་མ་ལུས་གཟིགས་པའི་ཐུགས། །ལེགས་པའི་ལམ་སྟོན་འདྲེན་པ་གཙུག་གིས་མཆོད། །དཔལ་མཆོག་བདེ་བ་ཆེན་པོའི་སྒྱུ་འཕྲུལ་གར། །དཔལ་སྟུག་དག་པའི་བརྟན་གཡོ་རབ་འབྱམས་ཀྱི། །དཔལ་དུ་ཤར་བ་དཀྱིལ་འཁོར་འཁོར་ལོའི་མགོན། །དཔལ་ལྡན་བླ་མ་སྙིང་གི་ཟེའུ་འབྲུར་བཞུགས། །མཆོག་ཏུ་མི་འགྱུར་ཆོས་སྐུའི་མཁའ་དབྱིངས་ལས། །མཆོག་ཐུན་དངོས་གྲུབ་གྲུ་ཆར་འཇོ་བ་ཡིས། །མཆོག་དམན་སྐྱེ་རྒུའི་རེ་བ་རྫོགས་མཛད་པ། །མཆོག་གི་དང་པོའི་མགོན་པོ་དེར་ཕྱག་འཚལ། །རབ་འབྱམས་རྒྱལ་བའི་ཡེ་ཤེས་མེ་ཤེལ་ཁམས། །རབ་ཡངས་བསྟན་འགྲོའི་ཕན་བདེའི་ནམ་མཁའ་ལ། །རབ་གསལ་འཕྲིན་ལས་འོད་ཀྱི་སྣང་བ་འབུམ། །རབ་ཏུ་སྤྲོ་མཛད་ས་གསུམ་འགྲོ་བའི་མིག །སྐྱབས་གནས་དཀོན་མཆོག་རྣམ་གསུམ་གཅིག་བསྡུས་ཏེ། །སྐྱབས་ཀྱི་མཆོག་གྱུར་བཤེས་གཉེན་ཚུལ་བཟུང་བ། །སྐྱབས་གཅིག་འཇིགས་མེད་དབང་པོའི་ཞབས་པད་ལ། །སྐྱབས་སུ་མཆི་འོ་བྱང་ཆུབ་བར་དུ་སྐྱོངས། །ཀུན་བཟང་སྤྱོད་ཚུལ་
དཔག་ཡས་རྣམ་པར་ཐར། །ཀུན་གསལ་མཐའ་དང་མཉམ་པའི་ཆ་ཙམ་ཞིག །ཀུན་ནས་དང་བའི་ཡིད་ཀྱིས་སྤེལ་བ་འདི། །ཀུན་མཁྱེན་བླ་མ་དགྱེས་པའི་མཆོད་པར་འབུལ། །རྒྱལ་བསྟན་ཀུན་ལ་མང་ཐོས་མཐར་སོན་ཅིང། །རྒྱལ་གསུང་དྲང་ངེས་མ་ལུས་གདམས་པར་ཤར། །རྒྱལ་བའི་དགོངས་པ་ཇི་བཞིན་སྒྲུབ་པ་ཡིས། །རྒྱལ་བ་གཉིས་པའི་རྣམ་ཐར་རང་གིར་མཛད། །རྣམ་འདྲེན་ཡོངས་འཛིན་དུ་མའི་ཞབས་ཀྱི་རྡུལ། །རྣམ་པ་ཀུན་ཏུ་གུས་པས་ལེགས་བསྙེན་ཏེ། །རྣམ་མང་ཆོས་ཀྱི་མཛོད་ལ་མངའ་བརྙེས་པས། །རྣམ་ཐར་དང་པོའི་རྟེན་འབྲེལ་སྒོ་འཕར་ཕྱེས། །གནས་གསུམ་གཞལ་བྱའི་ཁྱོན་ཡངས་ཇི་སྙེད་དང་། །གནས་ལུགས་ཇི་ལྟ་བ་ཡི་དོན་གཟིགས་ཤིང། །གནས་ལྔ་རིག་པའི་ཕ་རོལ་སོན་པ་ཡིས། །གནས་སྐབས་ཀུན་ཏུ་འཁྲུལ་པའི་དྲི་མ་བྲལ། །སྨྲ་ངན་སྤོབས་པ་འཕྲོག་བྱེད་སྒྲ་ཚད་དང། །སྨྲ་བསམ་ལུས་བཟོ་གསོ་བ་རིག་པའི་གཞུང། །སྨྲ་དབང་ཐུབ་བསྟན་སྙིང་པོ་ནང་དོན་ཀུན། །སྨྲ་ལ་ཟླ་མེད་མཧཱ་པཎྚི་ཏ། །ས་སྟེང་མཁས་པ་ཀུན་གྱི་གཙུག་གི་རྒྱན། །ས་གསུམ་ཐར་འདོད་ཡོངས་ཀྱི་མིག་གཅིག་པུ། །ས་བཅུའི་དབང་ཕྱུག་རྒྱལ་སྲས་ཚོགས་ཀྱི་རྗེ། །ས་འདིར་ཀུན་མཁྱེན་འཇིགས་མེད་དབང་པོར་གྲགས། །ཆོས་མཛོད་ཟད་མི་ཤེས་པའི་གཏེར་གྲོལ་ཏེ། །ཆོས་འདོད་སྐལ་ལྡན་ཡོངས་ཀྱི་མོས་པ་བཞིན། །ཆོས་སྦྱིན་མི་ཟད་འདོད་དགུའི་མཆོག་སྦྱིན་པ། །ཆོས་ཀྱི་རྒྱལ་པོ་ཁམས་གསུམ་འགྲོ་བའི་མགོན། །རྒྱ་ཆེན་འཁོར་དབུས་ལེགས་བཤད་འདོམས་པ་ན། །རྒྱ་མཚོ་
ཆེན་པོར་གྲུ་གཟིངས་བཏང་བ་བཞིན། །རྒྱ་བོད་མཁས་མང་གཞུང་བརྒྱའི་ཁོག་ཕུབ་སྟེ། །རྒྱ་ཆེར་བཤད་པས་བློ་གྲོས་རྒྱས་པར་བྱེད། །འཇམ་མཉེན་ལྗགས་ཀྱི་དབང་པོ་ཉེར་བཀྲམ་སྟེ། །འཇམ་དབྱངས་བླ་མའི་ལེགས་བཤད་སྙན་དགུའི་ཚོགས། །འཇམ་ཞིང་སྙན་པའི་གདངས་སུ་བསྒྲགས་པ་ན། །འཇམ་དཔལ་གཞོན་ནུ་ཉིད་དང་དབྱེར་མ་མཆིས། །མ་དག་སྲིད་པའི་བཙོན་རར་ཆུད་པ་ཡི། །མ་རྣམས་བདེ་ཆེན་ཐར་པར་འཁྲིད་པའི་ཕྱིར། །མ་ལུས་དབང་ཁྲིད་ལུང་དང་མན་ངག་ཀུན། །མ་ལྟར་བརྩེ་བའི་ཐུགས་ཀྱིས་འདོམས་པར་མཛད། །དུས་ཀྱི་དབང་གིས་ཆོས་རྒྱུན་ཉམས་པ་རྣམས། །དུས་མཐར་དམ་ཆོས་འཛིན་པའི་ཐུགས་བསྐྱེད་མཐུས། །དུས་འདིར་ས་སྟེང་ཀུན་ཏུ་རྒྱས་མཛད་པས། །དུས་གསུམ་རྒྱལ་ཀུན་བཞེད་པ་ཡོངས་སུ་བསྐངས། །ཕྱོགས་གླང་གྲགས་པའི་རིགས་ལམ་ཟབ་མོ་ཡིས། །ཕྱོགས་ལས་རྣམ་རྒྱལ་རྔ་གསང་ལྡིར་བ་ན། །ཕྱོགས་འཛིན་རྨོངས་པས་མངོན་རློམ་གྱིས་མཐོ་བའི། །ཕྱོགས་སྔ་ཀུན་གྱི་སྙིང་རྩ་ལྐོག་མར་བྲོས། །སྨྲ་བ་ངག་གི་དཔལ་ལ་དབང་འབྱོར་བའི། །སྨྲ་བའི་སེང་གེའི་རྩོད་ངག་གད་རྒྱངས་ཀྱིས། །སྨྲ་བ་ངན་པའི་ཝ་སྐྱེས་ཚོགས་རྣམས་ཀུན། །སྨྲ་བཅད་དགུན་གྱི་ཁུ་བྱུག་བཞིན་དུ་བྱས། །ལེགས་སྦྱར་སྒྲ་དོན་རྒྱན་གྱི་འཁོར་ལོ་ཡིས། །ལེགས་གསུང་སྡེ་སྣོད་ནོར་བུའི་མཛོད་འདྲེན་པ། །ལེགས་བཤད་དྲི་མེད་རྩོམ་པའི་དགའ་སྟོན་མཆོག །ལེགས་པར་སྤེལ་བས་མཁས་ཀུན་ཡིད་རབ་ཕྲོགས། །སོ་ཐར་སོགས་ཀྱི་ཚུལ་ཁྲིམས་རྣམ་
པར་དག །སོ་ན་གནས་པའི་རྩེ་གཅིག་ཏིང་འཛིན་བརྟན། །སོ་སོར་རྟོགས་པའི་ཤེས་རབ་ཆེར་རྒྱས་པས། །སོ་སོར་རང་རིག་ཡེ་ཤེས་མངོན་དུ་མཛད། །བདག་གཞན་བརྗེ་བའི་བྱང་ཆུབ་སེམས་གོམས་པས། །བདག་བདེ་གཞན་ལ་གཏོང་ཞིང་སྡིག་སྡུག་ཀུན། །བདག་གི་སྟེང་དུ་ལེན་ལ་མི་ཞུམ་པ། །བདག་ཉིད་ཆེན་པོའི་ངང་ཚུལ་ཨེ་མ་རྨད། །རྣམ་དག་ཁྲིམས་ཀྱིས་ཉེས་སྤྱོད་ཀུན་སྡོམ་ཞིང། །རྣམ་ཀུན་དགེ་བའི་ཆོས་ཚུལ་ཡོངས་སུ་སྡུད། །རྣམ་མང་སེམས་ཅན་ཀུན་གྱི་དོན་སྒྲུབ་པས། །རྣམ་གསུམ་ཚུལ་ཁྲིམས་སྤྱོད་པ་ཡོངས་སུ་རྫོགས། །ཕ་མ་རིགས་དྲུག་འགྲོ་ལ་རྗེས་བརྩེ་བས། །ཕ་རོལ་ཕྱིན་དྲུག་སྤྱོད་པའི་གཟིངས་སྦྱར་ཏེ། །ཕ་མཐའ་མི་མངོན་སྲིད་པའི་ཆུ་གཏེར་གྱི། །ཕ་རོལ་སྒྲོལ་བའི་དེད་དཔོན་བླ་ན་མེད། །ཤིན་སྦྱངས་མཆོག་གིས་ཟིན་པའི་ཏིང་ངེ་འཛིན། །ཤིན་ཏུ་གསལ་བའི་མངོན་ཤེས་མེ་ལོང་ངོས། །ཤིན་ལྐོག་བསྐལ་པའི་གནས་རྣམས་མཐའ་དག་ཀྱང་། །ཤིན་ཏུ་གསལ་ཞིང་མ་འདྲེས་འཇའ་ཚོན་བཞིན། །མཐའ་བྲལ་ལྟ་བའི་སྒྲོན་མེས་རྟག་ཆད་ཀྱི། །མཐའ་ལ་ཞེན་པའི་མུན་པ་རབ་བསལ་ཏེ། །མཐའ་སྤངས་དབུ་མའི་ལམ་བཟང་གསལ་མཛད་པས། །མཐའ་དག་ཐར་འདོད་གདུལ་བྱའི་བློ་མིག་ཕྱེས། །སྣང་བ་ཇི་བཞིན་བདེན་པར་མི་དམིགས་ཀྱང། །སྣང་ཙམ་ཉིད་ལ་བྱ་བྱེད་འཐད་པ་སོགས། །སྣང་སྟོང་ཟུང་འཇུག་ཀླུ་སྒྲུབ་དགོངས་པའི་གནད། །སྣང་བྱེད་སྨྲ་བའི་ཟླ་བ་ཁྱོད་མིན་སུ། །རྒྱུད་སྡེ་རྣམ་བཞིའི་དབང་གིས་རྒྱུད་སྨིན་ཅིང། །རྒྱུད་འབྲེལ་མན་ངག་གདམས་པའི་མཛོད་བཟུང་སྟེ། །རྒྱུད་དོན་ཇི་བཞིན་མངོན་དུ་གྱུར་པ་ཡིས། །རྒྱུད་སྡེ་རྒྱ་
མཚོའི་ཁྱོན་ལ་དབང་བསྒྱུར་ཏེ། །རྡོ་རྗེ་འཆང་དབང་ཐུགས་ཀྱི་དགོངས་པ་བཞིན། །རྡོ་རྗེ་ཐེག་པའི་གནད་རྣམས་འདོམས་མཛད་ཅིང། །རྡོ་རྗེའི་རྣལ་འབྱོར་ཟབ་མོར་གཞོལ་བ་ཡིས། །རྡོ་རྗེ་འཛིན་པའི་ཚོགས་ཀྱི་གཙོ་བོར་གྱུར། །རབ་ཏུ་བརྟན་པའི་རིམ་གཉིས་ལམ་བཟང་གིས། །རབ་རྨོངས་ཀུན་རྟོག་སྤྲོས་པ་སྡེར་བཅས་བཅོམ། །རབ་ཞིའི་དབྱིངས་ལས་སྒྱུ་འཕྲུལ་དྲ་བའི་གར། །རབ་འབྱམས་དཀྱིལ་འཁོར་འཁོར་ལོའི་བདག་པོར་བཞེངས། །མི་བཟད་སྲིད་པའི་སྡུག་བསྔལ་ལས་འདས་པ། །མི་འགྱུར་བདེ་ཆེན་ཐུགས་དང་རོ་གཅིག་པའ། །མི་ཤིགས་རླུང་གི་རང་འོད་ཟུང་འཇུག་སྐུ། །མི་ཟད་རྒྱན་གྱི་འཁོར་ལོ་ཡོངས་སུ་རྫོགས། །བསྟན་པ་ཁོ་ན་ལུས་ཅན་ཕན་བདེའི་གཞིར། །བསྟན་བཞིན་ཚད་མའི་ངེས་པ་ལེགས་འཁྲུངས་པས། །བསྟན་པའི་བྱ་བར་གཅིག་ཏུ་གཞོལ་བ་ལ། །བསྟན་འཛིན་ཀུན་གྱི་ཁྲོད་ན་ཟླ་དང་བྲལ། །ཆོས་གཞི་གསར་བསྐྲུན་གསོ་དང་རྟེན་བཞེངས་སོགས། །ཆོས་སྤྱོད་རྣམ་བཅུ་རིས་སུ་མ་ཆད་པ། །ཆོས་ལྡན་བྱ་བའི་འཁོར་ལོ་རྩིབས་སྟོང་གིས། །ཆོས་ཀྱི་རྒྱལ་སྲིད་འཇིག་རྟེན་ཀུན་ཏུ་བསྐྱངས། །ནམ་མཁའི་མཐས་གཏུགས་ཞིང་ཁམས་རབ་འབྱམས་སུ། །ནམ་མཁའ་ཇི་སྲིད་འགྲོ་རྣམས་སྐྱོབ་པ་ལ། །ནམ་ཡང་བསྙེལ་བ་མེད་པའི་ཐུགས་རྗེ་ཅན། །ནམ་མཁའི་རྡོ་རྗེ་ལྷག་པའི་ལྷ་ཡི་མཆོག །གདམས་དང་རྗེས་སུ་བསྟན་པའི་མཛོད་གྱུར་ཀྱང། །གདམས་ཡུལ་དབྱེ་བ་མེད་པར་མི་སྟོན་པར། །གདམས་པའི་བཀའ་བབ་སོ་སོར་འདོམས་པ་
ཡིས། །གདམས་དོན་ཇི་བཞིན་ནམ་ཡང་བསླུ་བ་མེད། །རྣམ་གྲོལ་དོན་གཉེར་གདུལ་བྱ་མཆོག་རྣམས་ལ། །རྣམ་ཀུན་མཆོག་ལྡན་སྟོང་དང་རྟེན་འབྱུང་སོགས། །རྣམ་མང་མདོ་རྒྱུད་རྒྱ་མཚོའི་བཅུད་བསྡུས་ནས། །རྣམ་པར་བསྟན་ཏེ་བྱང་ཆུབ་གསུམ་ལ་སྦྱོར། །ཐ་མལ་རྣམས་ཀྱང་ཡལ་བར་མི་འདོར་བར། །ཐ་སྙད་རིགས་ལམ་ཕྲ་མོ་ནས་བཟུང་སྟེ། །ཐ་ན་ཡི་གེ་འདྲི་རྐོས་ཚུན་ཆད་ལ། །ཐ་དད་བློ་དང་འཚམ་པར་སྦྱོར་མཛད་པས། །གང་ཞིག་ཁྱོད་ཞབས་པདྨོ་བསྟེན་པ་རྣམས། །གང་ལས་མ་དྲངས་སྲིད་ཞིའི་རྒུད་པ་དང། །གང་ལ་མ་བཀོད་ཕུན་ཚོགས་ལེགས་བྱས་དཔལ། །གང་དེ་ཀུན་མཁྱེན་གྱིས་ཀྱང་དམིགས་སུ་མེད། །མི་བསྲུན་བདུད་ཀྱི་གཉེན་གྱུར་དུ་མ་ཡིས། །མི་བཟད་གཤེ་སྐུར་གནོད་པའི་ཚོགས་བགྱིས་ཀྱང་། །མི་འཁྲུགས་གནོད་ལན་ཕན་པ་སྒྲུབ་མཛད་ཕྱིར། །མི་མཆོག་སྐྱེས་བུ་འདུལ་བ་བླ་ན་མེད། །དམ་ཚིག་རྡོ་རྗེའི་གདེངས་ཀ་འཕྱར་བ་ཡིས། །དམ་ཅན་ཆོས་སྲུང་རྒྱ་མཚོ་བྲན་དུ་འཁོལ། །དམ་ཉམས་ཚར་གཅོད་སྐལ་ལྡན་རྗེས་འཛིན་སོགས། །དམ་པའི་རྨད་བྱུང་ཐབས་མཁས་བསམ་མི་ཁྱབ། །ཡིད་སྲུབ་སྡེ་དང་བཅས་པའི་དཔུང་འཇོམས་ཤིང། །ཡིད་བཞིན་ནོར་ལྟར་འགྲོ་བའི་རེ་བ་སྐོང། །ཡིད་ལ་དྲན་པས་སྲིད་ཞིའི་གདུང་སེལ་བ། །ཡིད་ཅན་ཀུན་གྱི་མགོན་དང་སྐྱབས་ཀྱི་ཕུལ། །ཁྱོད་ནི་བླ་མ་ཁྱོད་ནི་ཡི་དམ་དང། །ཁྱོད་ནི་མཁའ་འགྲོ་ཆོས་སྐྱོང་ཀུན་དངོས་ཏེ། །ཁྱོད་མིན་སྐྱབས་གཞན་འགའ་ཡང་མི་འཚོལ་བས། །ཁྱོད་ཀྱིས་ཐུགས་རྗེས་ནམ་ཡང་མ་གཏོང་ཞིག །
དོན་ཆེ་རྙེད་དཀའ་དལ་བའི་རྟེན་བཟང་འདི། །དོན་མེད་བྱ་བའི་ངང་དུ་མི་གཏོང་བར། །དོན་ལྡན་ཆོས་ལ་གཅིག་ཏུ་བརྩོན་པ་ཡིས། །དོན་གཉིས་དགའ་སྟོན་འགྲུབ་པར་བྱིན་གྱིས་རློབས། །སྲིད་གསུམ་འཁོར་བ་མེ་འོབས་ལྟར་མཐོང་སྟེ། །སྲིད་པའི་ཕུན་ཚོགས་ཀུན་ལ་ཞེན་ལོག་ནས། །སྲིད་བྲལ་ཞི་བའི་གོ་འཕང་དོན་གཉེར་གྱིས། །སྲིད་ལས་ངེས་པར་འབྱུང་བར་བྱིན་གྱིས་རློབས། །མ་ལུས་རྒྱལ་སྲས་སྤྱོད་པའི་གཞི་དང་རྟེན། །མ་ལྟར་བརྩེ་བ་ཆེན་པོའི་དབང་གྱུར་ཏེ། །མ་རྣམས་སྒྲོལ་འདོད་རིན་ཆེན་བྱང་ཆུབ་སེམས། །མ་བཅོས་རྣལ་མ་སྐྱེ་བར་བྱིན་གྱིས་རློབས། །མཚན་ལྡན་བཤེས་གཉེན་གདམས་པའི་མིག་སྨན་གྱིས། །མཚན་མར་འཛིན་པའི་རབ་རིབ་ཀུན་བསལ་ཏེ། །མཚན་མེད་སྤྲོས་བྲལ་ལྟ་བས་གནས་ལུགས་ཀྱི། །མཚན་ཉིད་མངོན་སུམ་མཐོང་བར་བྱིན་གྱིས་རློབས། །རིམ་པར་རྒྱུད་སྦྱངས་གསང་སྔགས་སྒོར་ཞུགས་ཏེ། །རིམ་པ་དང་པོའི་ཕྲ་རགས་རྣལ་འབྱོར་དང། །རིམ་ལྔས་བསྡུས་པའི་སྦྱོར་བ་ཡན་ལག་དྲུག །རིམ་བཞིན་རྒྱུད་ལ་སྐྱེ་བར་བྱིན་གྱིས་རློབས། །སྲིད་པར་འཆིང་བའི་ཉེས་པ་ཀུན་སྤངས་ཀྱང་། །སྲིད་འདིར་བསམ་བཞིན་སྐྱེ་བའི་གར་མཛད་པ། །སྲིད་གསུམ་བླ་མ་ཐུགས་རྗེའི་བདག་ཉིད་དེས། །སྲིད་པ་ཇི་སྲིད་རྗེས་སུ་འཛིན་གྱུར་ཅིག །ས་མཁན་བཤེས་གཉེན་དམ་པའི་རྗེས་ཞུགས་ཏེ། །ས་དང་ལམ་གྱི་རྟོགས་པ་རིམ་བགྲོད་ནས། །ས་བཅུའི་མཐར་སོན་སྤངས་རྟོགས་ཀུན་རྫོགས་ཏེ། །ས་གསུམ་འགྲོ་བའི་མགོན་དུ་
འགྱུར་བར་ཤོག །བསྟན་པའི་རྩ་ལག་མཆོག་རྣམས་ཞབས་བརྟན་ཅིང། །བསྟན་སྲུང་རྒྱ་མཚོས་འཕྲིན་ལས་ཚུལ་བཞིན་སྒྲུབས། །བསྟན་ལ་གུས་མཆོད་བགྱིད་རྣམས་མངའ་ཐང་རྒྱས། །བསྟན་པའི་རྒྱལ་མཚན་ཕྱོགས་བཅུར་བསྒྲེང་གྱུར་ཅིག །ཅེས་བཀའ་དྲིན་འཁོར་མེད་ཁྱབ་བདག་རྡོ་རྗེ་འཆང་རྗེ་བཙུན་དཀོན་མཆོག་འཇིགས་མེད་དབང་པོའི་ཞལ་སྔ་ནས་ལ་ཐོག་མའི་ཟུང་ལྡན་གྱི་སྒོ་ནས་བསྟོད་པ་དགེ་ལེགས་དཔལ་མཆོག་ཅེས་བྱ་བ་འདི་ནི། ཨ་མཆོག་ལམ་རིམ་གྲྭ་ཚང་གི་སློབ་ཟུར་ལྷག་བསམ་རྣམ་དཔྱོད་ཕུལ་དུ་བྱུང་བ་འཇམ་དབྱངས་ཕུན་ཚོགས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་ཐུན་མོང་སྣང་ཚོད་ཀྱི་རྣམ་ཐར་རགས་པ་ཙམ་ཞིག་སྒྲོ་སྐུར་སྤངས་ཏེ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགས་བགྱིས་པ་འདིའང་ཚེ་རབས་ཀུན་ཏུ་བླ་མ་མཆོག་གིས་རྗེས་སུ་འཛིན་པའི་རྒྱུར་གྱུར་ཅིག། །།