སྟོན་པ་ཐུབ་པའི་དབང་པོ་ལ་མ་བརྗོད་པར་བསྟོད་པ་སོགས།
སྟོན་པ་ཐུབ་པའི་དབང་པོ་ལ་མ་བརྗོད་པར་བསྟོད་པ་སྒོ་མཐའ་ཡས་སོགས་བསྟོད་ཚོགས་གསོལ་འདེབས་ཀྱི་སྐོར་བྱིན་རླབས་གཏེར་གྱི་སྒོ་འབྱེད་ཅེས་བྱ་བ་བཞུགས་སོ།།
ན་མོ་མུ་ནི་དྷརྨཱ་ཀཱ་ཡཱ་ཡ། སྣང་དང་གནས་ཚུལ་བདེན་པའི་དྲི་བཞོན་གྱི། །རྗེས་འགྲོ་ཚོགས་གཉིས་སྤྲིན་ཆེན་སྣང་སྟོང་ལས། །ལྷུན་གྲུབ་འཇོ་བ་འཕྲིན་ལས་གྲུ་ཆར་གྱིས། །འཇིག་རྟེན་ཀུན་ཁྱབ་རྒྱལ་བའི་ཡོན་ཏན་ན། །སྲིད་པ་ཡང་འབྱུང་མེད་པར་བཅོམ་པའི་རྒྱུད། །སྤྲོས་བྲལ་ཟག་མེད་བདེ་དང་སྐྱ་བསྒྲིལ་བ། །གསུང་ལས་སྐྱེས་དང་རྐྱེན་རྟོགས་གསུམ་རིག་ཚོགས། །སྤོབས་པའི་ཁྱམས་ལས་རིང་དུ་འདས་གྱུར་ན། །ཀུན་སྦྱོར་འཆིང་བ་མ་གྲོལ་ཟག་བཅས་ཀྱི། །བསོད་ནམས་རྣམ་སྨིན་སྐད་ཅིག་གཟི་ལྡན་པ། །རང་བྱུང་བདེ་འབྱུང་བདག་པོ་འདོད་པ་སོགས། །ཆ་ཙམ་དཔོག་པའི་གོ་སྐབས་ག་ལ་ཞིག །རྒྱལ་བ་སྲས་ཀྱི་ཐུ་བོར་བཅས་རྣམས་ཀྱིས། །མཁྱེན་པས་ཁྱབ་ཀྱང་འཁོར་བའི་མཐའི་བར་དུ། །བརྗོད་པས་རྫོགས་མིན་མཐའ་བྲལ་རང་གི་གཤིས། །མཐའ་ལྡན་བགྱི་བ་བདེན་གཉིས་ཚུལ་ལས་
འདས། །དེ་ཕྱིར་ཚིག་གི་ལམ་དུ་མཚོན་མིན་པར། །བསམ་ཡས་མཁའ་མཐའ་མཉམ་པར་ཡིད་ཆེས་པས། །ཐལ་སྦྱར་གུས་པས་བཏུད་པའི་དགེ་བ་འདིས། །ཀུན་ལ་གསང་མཛོད་མངོན་དུ་འགྱུར་བར་ཤོག །ཅེས་སྟོན་པ་ཐུབ་པའི་དབང་པོ་ལ་མ་བརྗོད་པར་བསྟོད་པ་སྒོ་མཐའ་ཡས་ཞེས་བྱ་བ་འདི་ནི། བསྟན་པའི་རྗེས་སུ་སློབ་པ་དཀོན་མཆོག་བསྟན་པའི་སྒྲོན་མེས་ཕུལ་བའོ།། ༈ གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷམ་མེ་བ། །མགོན་པོ་མཆོག་བརྙེས་ཁྱོད་ལ་ཕྱག་འཚལ་ལོ། །མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་
འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཅན་ཁྱོད་ལ་ཕྱག་འཚལ་ལོ། །ཉི་མའི་འོད་ཟེར་དག་གིས་པདྨ་ཁ་འབྱེད་ལྟར། །གསུང་གི་འོད་ཟེར་དག་གིས་འཇིག་རྟེན་སད་པར་མཛད། །སྟོན་པ་ཤཱཀྱ་ཐུབ་པ་སྒྲོན་མེ་ཐུགས་རྗེ་ཅན། །མྱ་ངན་འདའ་སྟོན་གང་ཡིན་དེ་ལ་ཕྱག་འཚལ་ལོ། །མགོན་པོ་ཁྱོད་ཀྱི་ཐུགས་རྗེའི་འོད་སྟོང་གིས། །མི་ཤེས་རྨོངས་པའི་མུན་པ་བསལ་དུ་གསོལ། །ཐོག་མེད་ནས་བསགས་ལས་ཉོན་སྡིག་སྒྲིབ་ཀུན། །ཐུགས་རྗེ་བདུད་རྩིའི་ཆབ་ཀྱིས་སྦྱང་དུ་གསོལ། །གསུང་རབ་རྒྱ་མཚོའི་དགོངས་དོན་ཁོང་དུ་ཆུད། །ཐོས་དོན་ཇི་བཞིན་སྒྲུབ་པས་ཉམས་སུ་ལོན། །བློ་བཟང་རྒྱལ་བསྟན་ཕྱོགས་མཐར་སྤེལ་བ་ཡི། །སྨོན་པ་གེགས་མེད་འགྲུབ་པར་བྱིན་གྱིས་རློབས། །མདོར་ན་བདག་སོགས་ལྟོས་བཅས་འབྲེལ་ཐོགས་ཀུན། །སྟོན་པ་མཆོག་དེས་འབྲལ་མེད་རྗེས་གཟུང་སྟེ། །བསྟན་ལ་གེགས་མེད་ཚུལ་བཞིན་བསླབ་པ་ཡི། །སྐུ་གསུམ་གོ་འཕང་བདེ་བླག་ཐོབ་གྱུར་ཅིག །ཅེས་པ་འདི་ནི་བསྟན་པའི་གསལ་བྱེད་ཆས་པ་རྒྱ་མཁར་སྤྲུལ་སྐུ་དཀོན་མཆོག་བསྟན་པའི་རྒྱལ་མཚན་ནས་ཇོ་ཤཱཀ་སོགས་མཇལ་སྐབས་འདོན་རྒྱུའི་གསོལ་འདེབས་སྨོན་ཚིག་ཅིག་དགོས་ཚུལ་བསྐུལ་མ་བྱུང་བ་ལྟར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ རྒྱལ་བའི་གསུང་གི་གསང་མཛོད་མཐའ་དག་དང། །ཁྱད་པར་རྒྱ་ཆེན་སྤྱོད་པའི་སྲོལ་བཟུང་སྟེ། །སྦས་དོན་མངོན་རྟོགས་རིམ་པ་གསལ་མཛད་པ། །རྒྱལ་ཚབ་
བྱམས་པ་མགོན་ལ་ཕྱག་འཚལ་ལོ། །ལམ་གྱི་རིམ་པ་ཀུན་ལ་ངེས་རྙེད་ཅིང། །བྱང་ཆུབ་སེམས་མཆོག་མྱོང་བ་མཐར་སོན་ཏེ། །གཞན་ཕན་གཟུགས་སྐུ་འགྲུབ་པའི་ཐབས་ཀྱི་མཆོག །བསོད་ནམས་ཚོགས་ཆེན་རྫོགས་པར་བྱིན་གྱིས་རློབས། །རྒྱལ་བའི་གསུང་གི་གསང་མཛོད་མཐའ་དག་དང། །ཁྱད་པར་ཟབ་མོ་ལྟ་བའི་སྲོལ་བཟུང་སྟེ། །དངོས་བསྟན་སྟོང་ཉིད་རིམ་པ་གསལ་མཛད་པ། །མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཟབ་མོ་རྟེན་འབྱུང་དོན་ལ་ངེས་རྙེད་ཅིང། །ཡང་དག་ལྟ་བའི་མྱོང་བ་མཐར་སོན་ཏེ། །སྒྲིབ་བྲལ་ཆོས་སྐུ་འགྲུབ་པའི་ཐབས་ཀྱི་མཆོག །ཡེ་ཤེས་ཚོགས་ཆེན་རྫོགས་པར་བྱིན་གྱིས་རློབས། །རྗེ་བཙུན་ཨཱརྱ་མཻ་ཏྲི་མཉྫུ་ཤྲཱ། །དབྱེར་མེད་ཐུགས་རྗེ་བདེན་པའི་བྱིན་རླབས་མཐུས། །ཟབ་རྒྱས་ལམ་གྱི་ཉམས་ལེན་མཐར་སོན་ཏེ། །དོན་གཉིས་མཐར་ཕྱིན་སངས་རྒྱས་མྱུར་ཐོབ་ཤོག །ཅེས་པ་འདི་ནི་དཀོན་མཆོག་ཡེ་ཤེས་ཀྱིས་བསྐུལ་ངོར་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ འཆི་མེད་ཚེ་དང་ཡེ་ཤེས་དཔལ་སྟེར་ཞིང། །མི་བཟད་དུས་ཀྱི་རྒུད་པ་མཐར་མཛད་པ། །འགྲོ་བའི་མགོན་པོ་འཇིག་རྟེན་མཐའ་དག་ལས། །རྣམ་པར་རྒྱལ་མའི་ཞབས་ལ་ཕྱག་འཚལ་ལོ། །ཡིད་འོང་འཇའ་ཚོན་བཀྲ་བའི་གུར་ཁང་དབུས། །པད་ཟླའི་གདན་ལ་སྒེག་པའི་ཉམས་ལྡན་པ། །དཀར་སེར་སྔོ་བའི་ཞལ་དཀྱིལ་རབ་རྒྱས་ཤིང་། །
སྣ་ཚོགས་ཉམས་ཀྱིས་རོལ་པ་དེ་ལ་འདུད། །རལ་པའི་ཐོར་ཅོག་རིན་ཆེན་རྒྱན་གྱིས་སྤུད། །སྤྱན་མཛེས་ཤངས་ཀྱི་རྒྱུད་ནི་ཡིད་དུ་འོང། །མཆུ་སྒྲོས་འཛུམ་ལྡན་ནོར་བུའི་རྣ་ལུང་གཡོ། །ཡིད་འཕྲོག་བལྟ་བས་མི་ངོམས་ཁྱོད་ལ་འདུད། །རྡོ་རྗེ་སྣང་མཐའ་མདའ་དང་མཆོག་སྦྱིན་གཡས། །གཡོན་བཞིའི་ཞགས་པ་མི་འཇིགས་ཕྱག་རྒྱ་དང། །གཞུ་དང་འཆི་མེད་བདུད་རྩིའི་བུམ་བཟང་གིས། །མི་ཟད་ཚེ་ཡི་དགའ་སྟོན་སྤེལ་ལ་འདུད། །བརྒྱད་གཉིས་ལང་ཚོའི་དཔལ་མངའ་མཛེས་པའི་སྐུ། །དྲི་མེད་ཤེལ་གྱི་འཁྲི་ཤིང་གཞོན་ནུའི་དངོས། །རྣམ་བཀྲའི་གོས་དང་དོ་ཤལ་རྩེ་དགའ་འཛིན། །གདུལ་བྱའི་ཁམས་བཞིན་སྟོན་པར་མཛད་ལ་འདུད། །རྨོངས་པ་ཀུན་བཅད་བདེན་གཉིས་མངོན་སུམ་གཟིགས། །ཀུན་ལ་སྙོམས་པའི་ཐུགས་རྗེ་རྒྱུན་ཆད་མེད། །འཇིགས་པ་ཀུན་སྐྱོབ་ཕན་དང་བདེ་སྟེར་བ། །མ་ལུས་འགྲོ་བའི་སྐྱབས་མཆོག་ཁྱོད་ལ་འདུད། །རྒྱལ་སྲས་ཕྱག་ན་པདྨ་རྡོ་རྗེ་འཛིན། །མི་གཡོ་འདོད་རྒྱལ་དབྱུག་སྔོན་སྟོབས་པོ་ཆེ། །གཙང་མའི་གནས་ཀྱི་གཞོན་ནུ་གཉིས་ལ་སོགས། །དག་པའི་འཁོར་གྱིས་བསྐོར་ལ་ཕྱག་འཚལ་ལོ། །རིང་ནས་བདག་ཅག་དོན་དུ་ཐུགས་བསྐྱེད་ཅིང། །འཕྲིན་ལས་དུས་ལས་ཡོལ་བ་མི་མངའ་ན། །ཇི་སྐད་གསུངས་པའི་གཟུངས་ཀྱི་ཕན་ཡོན་རྣམས། །དེང་འདིར་བདག་ལ་མངོན་དུ་འགྱུར་བར་མཛོད། །ཕྱི་ནང་འགལ་རྐྱེན་ཉེས་ལྟུང་ཀུན་ཞི་ཞིང། །ཚེ་དཔལ་ལུང་རྟོགས་ཡོན་ཏན་རྒྱས་པ་དང། །བྱང་ཆུབ་སྒྲུབ་པའི་ཐབས་ལ་དབང་འབྱོར་ཏེ། །བདུད་དཔུང་འཇོམས་ལ་མཐུ་དང་ལྡན་པར་ཤོག །མདོར་ན་བཤེས་གཉེན་དམ་པ་མཉེས་བྱས་ནས། །
ཐུབ་པའི་དགོངས་པ་རྙེད་པའི་མང་ཐོས་ཀྱིས། །བསྒྲུབ་པའི་བྱ་བ་ལེགས་པར་མཐར་ཕྱིན་ནས། །རྒྱལ་བའི་བསྟན་པ་ཕྱོགས་བཅུར་རྒྱས་བྱེད་ཤོག །ཅེས་གཙུག་ཏོར་རྣམ་པར་རྒྱལ་མ་ལ་བསྟོད་པ་འདི་ནི་དད་བརྩོན་ལྡན་པ་དཀོན་མཆོག་དམ་ཆོས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྱིན་རླབས་ཀྱི་ཁྱད་ནས་རྗེ་བླ་མའི་གསུང་གི་ཚིག་སྣ་བསྡུས་ཏེ་བསྡེབས་པའོ།། ༈ བླ་མ་གཤིན་རྗེའི་གཤེད་ལ་ཕྱག་འཚལ་ལོ། །ཡེ་ཤེས་ལྔ་ལྡན་ཟུར་ཕུད་འབར་བའི་ཀློང། །བདེན་གཉིས་རྭ་གདེངས་སྣང་སྟོང་སྲིན་པོའི་གར། །རྣམ་གསུམ་གཤིན་རྗེའི་གཤེད་དུ་བསྒྱུར་བའི་ལྷ། །ཁྲོ་རྒྱལ་རྡོ་རྗེ་འཇིགས་མཛད་ལ་ཕྱག་འཚལ། །གང་ཐུགས་བདེ་སྟོང་སྒྱུ་མའི་རོལ་བ་ལས། །མི་འགྱུར་ལྷན་ཅིག་སྐྱེས་དགའི་མཆོག་སྦྱིན་ཕྱིར། །བསྐལ་པའི་མཐར་ཡང་སྦྱོར་བའི་ཡུམ་གཅིག་མ། །རྡོ་རྗེ་རོ་ལངས་མ་ལ་ཕྱག་འཚལ་ལོ། །གདུལ་བྱའི་ཁམས་བཞིན་ཞི་ཁྲོའི་རོལ་གར་བརྒྱ། །བསྒྱུར་མཛད་འཇམ་དཔལ་དཔའ་བོའི་བཀོད་པ་བཞིན། །མཛེས་སྡུག་རྒྱ་མཚོའི་ཟླ་རིས་དབྱངས་ལྡན་མ། །དྲག་མོའི་སྐུར་བསྟན་ཁྱོད་ལ་ཕྱག་འཚལ་ལོ། །སྟོན་མཚན་མཁའ་ལ་གཡོ་བའི་སྤྲིན་སྔོན་གྱི། །ཁོངས་ལས་རྒྱུ་སྐར་ཚོམ་བུ་རྒོད་པ་བཞིན། །གཤིན་རྗེའི་གཤེད་དང་མཉམ་སྦྱོར་གཅེར་མོའི་ལུས། །རུས་པའི་རྒྱན་ཕྲེང་བཀྲ་བ་ཁྱོད་ལ་འདུད། །མེ་ལོང་གཅིག་ལ་རབ་འབྱམས་གཟུགས་སྣང་བཞིན། །དག་པའི་རྟེན་དང་བརྟེན་པ་ལྷའི་འཁོར་ལོ། །མཐའ་ཡས་ཀུན་ཏུ་སྤྲོ་ཞིང་འཛིན་མཛད་པ། །དུས་གསུམ་རྒྱལ་བའི་
ཡུམ་ལ་ཕྱག་འཚལ་ལོ། །བཀའ་ཡི་འཁོར་ལོས་གནས་གསུམ་ཌཱ་ཀིའི་ཚོགས། །ཀུན་ལ་མངའ་བསྒྱུར་ཡེ་ཤེས་མཁའ་འགྲོ་མ། །ཁྱོད་ཞབས་གུས་བསྟེན་དམ་ཚིག་ལྡན་པའི་བུར། །མ་དང་སྲིང་ལྟར་བརྩེ་བས་ཉེར་དགོངས་ཤིག །དེང་ནས་ཇི་སྲིད་འཇམ་དཔལ་གནས་ཐོབ་པ། །དེ་སྲིད་ཁྱོད་ཀྱིས་འབྲལ་མེད་རྗེས་བཟུང་སྟེ། །དངོས་གྲུབ་བདུད་རྩིའི་བཅུད་ཀྱིས་རབ་བསྐྱངས་ནས། །ཟག་མེད་དགའ་བའི་ལང་ཚོ་རྒྱས་གྱུར་ཅིག །ཅེས་བཅོམ་ལྡན་འདས་མ་རྡོ་རྗེ་རོ་ལངས་མ་ལ་བསྟོད་པ་འདི་ནི་དགེ་བའི་བཤེས་གཉེན་རྡོ་རམས་པ་འཇིགས་མེད་རྒྱལ་མཚན་གྱིས་བསྐུལ་བ་ལྟར་༸དཀོན་མཆོག་བསྟན་པའི་སྒྲོན་མེས་བཀྲ་ཤིས་འཁྱིལ་དུ་བྲིས་པའོ།། ༈ ན་མོ་བཛྲ་དྷཱ་རཱ་ཡ། གསང་ཆེན་སྒྱུ་འཕྲུལ་གར་གྱི་རི་མོ་འབུམ། །ཅིར་ཡང་འཆར་བའི་ངོ་མཚར་ཐབས་མཁས་ཀྱིས། །ཐར་འདོད་ཐར་པར་འཁྲིད་པའི་ས་མཁན་མཆོག །བཞད་པའི་རྡོ་རྗེ་སྲིད་པ་གསུམ་ན་རྒྱལ། །ཀུན་གསལ་མཐའ་ལས་འགོངས་པའི་ཡོན་ཏན་གྱི། །རིན་ཆེན་སྙེ་མ་གཡུར་དུ་ཟ་བ་ལས། །རང་བློར་དཔག་པའི་རྣམ་ཐར་མུཀྟི་ཀའ། །ཕྲེང་བ་རྣམ་དཔྱོད་སོར་མོས་བསྟར་བར་བྱ། །མི་ལའི་རིགས་འཁྲུངས་མིང་ཐོས་དགའ་བ་ཁྱོད། །ཞི་བའི་མགྲོན་སླད་སྲིད་པའི་རྒུད་པ་བརྒྱས། །སྐྱབས་མེད་དམ་དང་ལྷན་ཅིག་མནར་བྱས་ཀྱང། །ད་དུང་གདངས་སྙན་གླུ་རུ་ལེན་དེ་མཚར། །དེ་ཚེ་ཞེ་སྡང་བདག་མེའི་འཐོར་རླུང་གིས། །ཁྱོད་མཐུ་གསར་པའི་མེ་ཆེན་སྦར་བ་ཡིས། །གཉེན་མི་དགྲ་སྡེ་ཐལ་བར་བརླག་པ་ན། །ཡིད་སྲུབ་རང་གནས་བསྲེག་པའི་ལྟས་ཀྱིས་འཇིགས། །སྒྱུ་མའི་སྡིག་ཆེན་སྤྱོད་པའི་མིག་འཕྲུལ་དུ། །དེད་དཔོན་མང་བཀུར་མཐོ་རིས་རྟེན་ལ་ཡང། །དམྱལ་བའི་སྡུག་བསྔལ་བཟོད་པའི་དཀའ་ཐུབ་ཀྱིས། །མཁར་
ལན་ལ་སོགས་ལྟས་མོ་ཅི་ཡང་བསྟན། །དེ་ནས་མར་པ་ལོ་ཙཱ་ཧེ་བཛྲ། །གཉིས་མེད་ཡེ་ཤེས་རང་བཞིན་དཀྱིལ་འཁོར་དུ། །སྐུ་བཞིའི་ས་བོན་འགྲུབ་པའི་དབང་བསྐུར་གྱིས། །སྨིན་ཚེ་གྲོལ་བྱེད་ལམ་ལ་རིངས་པར་ཆས། །ཀུན་རྟོག་ཚེར་མ་གཟིར་བའི་སེམས་ཀྱི་ཟྭ། །བཅུད་དུ་བསྒྱུར་བའི་ཐབས་མཁས་རྣལ་འབྱོར་ཆེ། །ཁྱོད་ཐུགས་སྟོང་པའི་དབྱིངས་སུ་ཞུགས་པ་ན། །སྐུ་ཡང་ནམ་མཁའི་མདངས་བཟང་སྟོན་པ་བཞིན། །འཆི་མེད་ལམ་ལས་བརྒལ་ནས་ཞི་བའི་གྲོང། །བསྙེགས་འདྲ་གཡའ་རི་གངས་ཀྱི་རི་སུལ་ནས། །རས་གོས་རྐྱང་བས་གྲང་རེག་གཞོམ་པ་དེ། །གཏུམ་མོའི་ཚ་ཟེར་ཁོང་ནས་བཞད་མིན་ནམ། །དེ་ཚེ་བཞི་རལ་བརྒྱད་གྱེས་ཁང་པ་དང། །ལྷུ་ཚིགས་ཀུན་ནས་རྒོད་པ་ཨ་མའི་གདུང། །གཏོལ་མེད་ཕྱོགས་མཐར་འཁྱམས་པ་སྲིང་མོས་ཀྱང། །འཁོར་བའི་ངང་ཚུལ་བསྟན་ནས་ཆོས་ལ་བསྐུལ། །བརྩོན་པ་བརྩོན་པའི་བསྐུལ་མ་རྗེས་འགྲོ་ཅན། །དྲག་འཕྱུར་ཁམ་ནག་དབྱར་གྱི་ཆུ་ཀླུང་བཞིན། །ལས་ཉོན་སྒྲིབ་པའི་ལྗན་ལྗིན་མ་ལུས་པ། །ལྷག་མེད་བྱང་ཚེ་རྟོགས་པ་ཀློང་ནས་རྡོལ། །རིམ་གཉིས་གོམ་སྟབས་བསྒྱུར་ལ་སྙིགས་མའི་ཚེ། །ཐུང་ཡང་མི་འུ་ཐུང་གི་གོམ་གཅིག་གིས། །བསྐལ་མང་བགྲོད་དཀའི་སྒྲ་ཆེན་སངས་རྒྱས་ས། །མནན་ཚེ་རྒྱལ་རྣམས་སྟོབས་ལྡན་རྫུ་ལ་བརྟེན། །འོད་གསལ་སྒྱུ་མའི་རས་དཀར་འདབ་མ་ཟུང། །བསྐྱོད་པའི་གཉིས་སྐྱེས་ཀ་ལ་པིང་ག་ཁྱོད། །མགྲིན་པའི་འཁོར་ལོ་གྲོལ་ལས་གསང་ཆེན་གླུ། །ལྷང་ལྷང་བསྒྲགས་ཚེ་ཌཱ་ཀིའི་སྙིང་རྩ་འདར། །ལུང་བསྟན་བུ་སློབ་རྒྱལ་ཕྲན་
སྟོང་གི་དབུས། །ཟུང་འཇུག་འཁོར་ལོས་བསྒྱུར་བའི་རྒྱལ་ཐབས་མཁན། །འཁོར་བའི་དགྲ་སྡེ་ཀུན་ལས་རྒྱལ་ཁྱོད་ལ། །མི་མིན་འགའ་ཡིས་མ་ཚུགས་མཚར་སྐད་མཚར། །རྫུ་ཞིང་འཕྲུལ་བའི་རྣམ་རོལ་ཕྲ་མོ་ཡིས། །ཁྱོད་ལ་བསྔགས་པའང་བྱིས་པའི་བློ་གྲོས་ཏེ། །སྔོན་ནས་ངོ་མཚར་མ་ལ་ཡ་རླུང་གིས། །འཕགས་ཡུལ་བརྟན་གཡོའི་འདབ་མ་བསྙིལ་མིན་ནམ། །ཨེ་མ་གྲགས་པའི་གཞིར་གྱུར་ཁྱོད་ཀྱི་མཐུ། །ལྕེ་རྩེའི་མཚོ་ལ་དབྱངས་ཅན་ངང་མོ་འབུམ། །ཅིག་ཅར་འཁྱུད་ཀྱང་བསྐལ་བརྒྱར་རྫོགས་མིན་ན། །རྨོངས་པས་རྨོངས་པ་བདག་འདྲས་ཇི་ལྟར་བརྗོད། །འོན་ཀྱང་ཆ་ཙམ་སྤེལ་བའི་དགེ་བ་འདིས། །ཆོས་བརྒྱད་འགོང་པོ་རྡོག་པས་བརྫི་བྱས་ཏེ། །རིམ་གཉིས་ལམ་བཟང་གོམ་པའི་གར་སྟབས་ཀྱིས། །མི་བསྐྱོད་རྒྱལ་བའི་གནས་སུ་བགྲོད་པར་ཤོག །ཅེས་བསིལ་ལྗོངས་གྲུབ་རིགས་ཡོངས་ཀྱི་འཁོར་ལོས་བསྒྱུར་བ་ཆེན་པོ་མི་ལ་བཞད་པའི་རྡོ་རྗེ་ལ་བསྟོད་པ་གྲུབ་དབང་དགྱེས་པའི་འཛུམ་ཟེར་ཞེས་བྱ་བ་འདི་ནི། ཁྱབ་བདག་ཆེན་པོ་དེ་ཉིད་ཀྱི་རྣམ་ཐར་ལ་ཡིད་མོས་ཀྱང་རྐྱེན་དབང་དུ་ཤོར་བའི་སྙོམས་ལས་པ་དཀོན་མཆོག་བསྟན་པའི་སྒྲོན་མེས་རང་ལོ་ཉེར་བདུན་པ་ལ་དབེན་གནས་ཡིད་དགའ་ཆོས་འཛིན་དུ་མཚམས་ལ་སྡོད་སྐབས་ཤིག་མཚན་མོ་གཉིད་ཀྱི་བར་སྐབས་སུ་གང་དྲན་ཡིད་ཀྱི་མེ་ལོང་ལ་བྲིས་པའོ།།