དབྱངས་ཅན་མ་དམར་མོའི་བསྟོད་པ་ལྷ་མོ་དགྱེས་པའི་གླུ་དབྱངས།
དབྱངས་ཅན་མ་དམར་མོའི་བསྟོད་པ་ལྷ་མོ་དགྱེས་པའི་གླུ་དབྱངས་ཞེས་བྱ་བ་བཞུགས་སོ།། མཉམ་གཞག་མི་གཡོ་སྟོང་པའི་མེ་ལོང་ངོས། །བརྩེ་བའི་འཇའ་ཚོན་སྣང་བའི་རི་མོ་འབུམ། །རྣམ་པར་བཀྲ་བ་དབྱངས་ཅན་ངག་གི་ལྷ། །ཟླ་བྲལ་སྤོབས་པ་བདག་ལ་གྲུབ་པར་མཛོད། །ཁྱོད་སྐུ་བྱུ་རུའི་འཁྲི་ཤིང་ལང་ཚོའི་དཔལ། །སྙེ་མའི་ནུ་འབུར་གཡོ་བས་མངོན་དགའ་ཞིང། །མུ་ཏིག་དོ་ཤལ་གསར་པའི་འོད་ཆགས་དེས། །དང་བའི་སེམས་ཀྱི་དོ་ར་མཛེས་གྱུར་ཅིག །ཞལ་ཁྱིམ་ལི་ཁྲིས་རབ་རྒྱས་པདྨའི་མཚོར། །སྨིན་ལེགས་རྩེད་འཇོའི་གར་རོལ་བུང་བའི་མིག །རྣ་རྒྱན་སྦྲང་རྩིའི་དོག་པར་རྗེས་ཆགས་བཞིན། །བརྩེ་བའི་ཟུར་མིག་གཡོ་བས་རྟག་སྐྱོངས་ཤིག །འཁྲིལ་ལྡེམ་སྐེད་སྐབས་ས་ཧ་ཀ་རའི་ལྗོན། །མཛེས་བྱེད་འོག་པག་གཞོན་ནུའི་འཁྲི་ཤིང་ངོས། །གདངས་སྙན་
སྒྲ་སྒྲོགས་དྲིལ་ཆུང་བུང་བའི་ཁྱུ། །རྟག་པར་རྩེན་པ་སོ་གའི་དུས་སྟོན་བཞིན། །གང་གི་ཞབས་སྐྱེས་ཟླ་ཤེལ་མྱུ་གུའི་ཆ། །རེག་པས་ཀུན་རྨོངས་གདུང་བ་མཐར་མཛད་ན། །རྩེ་གཅིག་གུས་བསྟེན་བདག་གི་ཡིད་མཁའ་ལ། །རྟག་པར་རོལ་ཅིག་དབྱངས་ཅན་ཀུནྡའི་གཉེན། །ཁྱོད་གསུང་དྲི་ཟའི་འཇིག་རྟེན་རྫོགས་པའི་དཔྱིད། །བུང་བའི་ཕྲེང་བ་མྱོས་པའི་གདངས་མཚུངས་པར། །ག་མ་ཀས་བཅིངས་སྙན་འགྱུར་དྲུག་ཅུའི་དབྱངས། །ནམ་ཡང་མི་ཟད་རྣ་བའི་བདུད་རྩིར་མཛོད། །ཆོས་ཚུལ་མཐའ་བྲལ་སྙེམས་པའི་ནོར་འཛིན་ཁྱོན། །ཅིག་ཅར་འཁྱུད་པའི་བློ་གྲོས་སྔོ་བསངས་མ། །ཏིང་འཛིན་རྒྱུ་སྐར་བྱེ་བའི་རོལ་པ་ཅན། །ཡིད་རབ་དང་བའི་ཆུ་མཚོར་འཕོ་གྱུར་ཅིག །གྲངས་རིང་སྐྱེ་བར་སྒྲ་དབྱངས་ལྷ་མོ་ཡི། །ཞབས་སྐྱེས་བསྣུན་པའི་བདག་བློ་པཉྫུ་ལ། །ཐར་འདོད་རྐང་དྲུག་དཔྱིད་གྱུར་འཆད་རྩོད་རྩོམ། །ལོ་འབྲས་གཡུར་དུ་ཟ་བའི་དཔལ་ཐོབ་ཤོག །མདོར་ན་སྨག་ཆེན་སྲིད་པའི་འབྲོག་དགོན་འདིར། །འཁྱམས་པའི་འགྲོ་ལ་མཐའ་སྤངས་ཞི་བའི་ལམ། །སྣང་བའི་བྱེད་པོ་ཚོགས་གཉིས་སྐྱ་རེངས་ཀྱིས། །དྲངས་པའི་ཉི་མ་ཆེན་པོར་བདག་གྱུར་ཅིག །ཅེས་སྒྲ་དབྱངས་ལྷ་མོ་ལ་བསྟོད་པ་འདོད་གསོལ་དང་བཅས་པ་འདི་ནི། དད་བརྩོན་ལྡན་པ་དགེ་སློང་ཉི་མ་གྲགས་པས་བསྐུལ་ངོར་རིགས་པ་སྨྲ་བའི་༸བཙུན་པ་
དཀོན་མཆོག་བསྟན་པའི་སྒྲོན་མེས་དཔལ 
་ལྡན་འབྲས་སྤུངས་སུ་བྲིས་པའོ།།