དཔལ་མགོན་ཀླུ་སྒྲུབ་ཞབས་ལ་བསྟོད་པ་དབུ་མའི་སྣང་བ།
དཔལ་མགོན་ཀླུ་སྒྲུབ་ཞབས་ལ་བསྟོད་པ་དབུ་མའི་སྣང་བ་ཞེས་བྱ་བ་བཞུགས་སོ།། རྒྱལ་བས་ཆོས་ཚུལ་གང་བསྟན་པ། །འགྲོ་བ་མུན་པས་ཁེབས་པ་ལ། །འོད་གསལ་བ་ཡི་ཕྱིར་ཡིན་པས། །སྒྲོན་མ་ཀླུ་སྒྲུབ་རྒྱལ་གྱུར་ཅིག །དམིགས་ལས་དམིགས་པ་རྣམ་མང་བས། །འགྲོ་བ་དུབ་པར་
གྱུར་པ་རྣམས། །དམིགས་པ་མེད་པ་ཞི་བའི་བདེར། །འཁྲིད་པ་ཁྱོད་ནི་དེད་དཔོན་ལགས། །ཤེས་རབ་ཕར་ཕྱིན་ཤེས་རབ་བསླབ། །ཤེས་རབ་མདོ་སྡེའི་མཆོག་གྱུར་ཕྱིར། །ཤེས་རབ་གཞུང་མཆོག་མཛད་པ་ཁྱོད། །བསྟན་འཛིན་ཀུན་ལས་བླ་མར་གྱུར། །རིག་གནས་ཤེས་བྱར་སྲིད་ཀུན་ལ། །མུན་སངས་བློ་གྲོས་རབ་རྒྱས་པས། །སངས་རྒྱས་གཉིས་པ་ཀླུ་སྒྲུབ་ཅེས། །དངོས་པོར་སྨྲ་བ་རྣམས་ཀྱང་འདུད། །མ་རིག་འགག་པས་ཡན་ལག་ཀུན། །འགག་པར་མདོ་སྡེ་ཀུན་གསུངས་ཀྱང། །གབ་པ་སྲིད་པའི་སྲོག་རྩ་ན། །གསལ་བར་གཅོད་པའི་རིགས་པ་བྱིན། །གཞན་དག་སྟོང་ཞེས་བཀག་པར་དང། །བརྟེན་ཞེས་སྒྲུབ་པ་ཉིད་གོ་བས། །ཐག་མཁན་སྟབས་བཞིན་ཕྱོགས་སུ་ལྷུང། །ཁྱོད་ཀྱིས་བཟློག་སྟེ་བདེ་བར་བཞུགས། །རྒྱུ་རྐྱེན་ཡན་ལག་དུ་མ་ཞིག །ཚོགས་ནས་ཕར་ལ་འཇོག་དགོས་པ། །ཚུགས་ཐུབ་རང་དབང་བྲལ་བའི་རྟགས། །དེས་ནི་རྟེན་འབྱུང་སྟོང་པར་བཤད། །རང་དབང་ངོ་བོས་མ་དམིགས་ཀྱང། །སྣ་ཚོགས་སྣང་བ་མི་འགག་པས། །རྐྱེན་ཚོགས་འཇའ་ཚོན་སྣང་ཙམ་དང། །འདྲ་བར་སྟོང་པས་རྟེན་འབྱུང་གསུངས། །མ་ཚོགས་པ་ལ་གནས་མེད་ཅིང། །བརྒྱ་སྟོང་ཚོགས་ལ་གཅིག་པ་མེད། །གཅིག་མེད་པ་ལ་དུ་མ་མེད། །གཅིག་དང་གཞན་མིན་ཅི་ཡང་མེད། །དངོས་པོ་རྫས་དང་ལྡོག་པ་ལས། །གཅིག་དང་ཐ་དད་རྣམ་འབྱེད་པ། །གཉིས་ལ་ལྕེ་གཉིས་སྨྲ་བའི་ཚིག །ཇི་བཞིན་བདེན་པར་ག་ལ་འགྱུར། །དེ་བཞིན་ལ་ལར་སྐྱེ་དང་ཡོད། །གཞན་འགར་འགག་དང་མེད་པ་སོགས། །རེས་འགའ་བ་ཀུན་རྫུན་པ་སྟེ། །བདེན་པ་གཅིག་ལས་འགྱུར་བ་མེད། །ཡོད་ན་རྟག་ཏུ་ཡོད་པ་ལ། །རྐྱེན་གྱིས་ཅི་བྱ་གཉིས་ཀ་མཉམ། །མེད་པར་བདེན་པ་
འབྱུང་མི་སྲིད། །ཤི་བ་པོས་ཀྱང་མགྲོན་དུ་མིན། །རྒྱུ་ལ་རྒྱུ་ཡི་དངོས་གནས་ཚེ། །འབྲས་བུར་དེ་འཆར་མྱུག་བཞིན་ན། །སྟོང་ཕྱིར་སྟོང་ཙམ་དེར་འཆར་དེ། །མཁའ་ཉིད་སྣང་དང་མུན་པ་བཞིན། །ཐ་དད་ལྟོས་མེད་རྒྱུ་འབྲས་མིན། །ཡང་ན་ཀུན་ཀྱང་དེར་བརྗོད་རུང། །ཐེར་ཟུག་རྒྱུ་ནི་འབྲས་བུའི་གེགས། །དེ་ཡིས་གྲོལ་བའི་སྐབས་ཀྱང་ཅ། །དབང་བསྒྱུར་བདེན་པ་བཅོས་མེད་ལ། །བདེན་མིན་བཅིངས་ཀྱང་ཐབས་གཞན་ལྡན། །གྲོལ་སོགས་རུང་ཞེས་བདེན་གཉིས་ཀྱི། །སྒྲུབ་པས་ཐར་འདོད་དབུགས་དབྱུང་མཛད། །ལྟ་ངན་ཀུན་གཙོ་འཇིག་ཚོགས་ལ། །ལྟ་བ་སྲིད་པའི་རྩ་བ་ན། །ལྟ་ཀུན་མཆོག་གྱུར་མཐའ་བྲལ་གྱི། །ལྟ་བས་བཅད་ཉིད་ཐར་པར་བཞེད། །དེ་ཕྱིར་བགྲོད་གཅིག་ཤེས་རབ་རྨད། །འོན་ཀྱང་ཐེག་ཆེན་ནམ་མཁའ་ལྟར། །བྱེད་པོ་ཐབས་ནི་དེ་བས་རྨད། །དེས་ན་ཟབ་རྒྱས་ཟུང་དུ་མཛད། །སྟོང་ཡང་སྣང་ངོ་ཞེས་བྱ་འདིས། །བདེན་པའི་བྱ་བྱེད་རང་རོང་གི །འགལ་འདུའི་མི་བདེ་ཀུན་བསྙལ་བས། །ཀླན་ཀའི་གོ་སྐབས་ཡོངས་ལས་འདས། །ཡོད་མེད་མཐའ་བྲལ་དབུ་མའི་ལམ། །ཡོད་མེད་མཐའ་སྤངས་ཟུང་འཇུག་དོན། །གསལ་བར་ལུང་བསྟན་གསལ་བ་གཉིས། །རྒྱལ་བའི་དགོངས་པ་ཚད་མར་གནས། །མར་མེ་མཛད་ཀྱང་བྱོན་པའི་སྔར། །ལུང་བསྟན་བརྙེས་པས་དཔག་དཀའ་ཡང། །ཕལ་པ་ལྟ་བུར་བྱིན་རློབས་པ། །རྒྱལ་བའི་རྣམ་འཕྲུལ་བསམ་མི་ཁྱབ། །རུང་མིན་དོན་མིན་ཀུན་བསལ་ཏེ། །ཆོས་འདུལ་ལྟ་དང་འདུས་པའི་གནད། །གསལ་མཛད་སངས་རྒྱས་གཉིས་པ་དང། །རྒྱལ་བ་གཉིས་པ་མཚན་དོན་གཅིག །དེ་དག་གཤེགས་བཤུལ་ནང་གནས་ཀྱང། །འཕྱེ་བོ་
བདག་ཅག་བགྲོད་ནུས་མིན། །རྗེས་སུ་འོ་དོད་འབོད་པ་བཞིན། །གདུང་བའི་དབྱངས་ཀྱིས་གསོལ་བ་འདེབས། །གུས་པས་གསོལ་བཏབ་དགེ་སྨིན་པས། །རྒྱ་ཆེན་ཐབས་ཀྱི་གཤོག་རླབས་ཅན། །ཟབ་མོའི་དེ་ཉིད་རིགས་པ་ཡིས། །དོན་གཉིས་མཁའ་ལ་བགྲོད་གྱུར་ཅིག །ཅེས་དཔལ་མགོན་ཀླུ་སྒྲུབ་ཞབས་ལ་བསྟོད་པ་དབུ་མའི་སྣང་བ་ཞེས་བྱ་བ་འདི་ནི་ཚུལ་འདིར་མོས་པའི་བློ་ཅན་ཧལ་ཧ་རབ་འབྱམས་པ་སངས་རྒྱས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། ༈ བློ་གྲོས་བུམ་བཟ༷ང་ཚུ༷ལ་ཁྲི༷མས་བདུད་རྩིས་གཏམས། །འཇི༷གས་མེ༷ད་སྤོབས་པས་བསྟ༷ན་པ༷འི་རྒྱ༷ལ་མཚ༷ན་བསྒྲེངས། །རྨད་བྱུང་མཛད་པས་འགྲོ་ཀུན་སྐྱོབ་མཛད་པ། །མཆོག་སྤྲུལ་དམ་པའི་ཞབས་ལ་གསོལ་བ་འདེབས། །བློ༷་གཏེར་ཀུན་བཟ༷ང་སྤྱོད་ཚུ༷ལ་འདབ་བརྒྱ་བཞད། །བསླབ་ཁྲི༷མས་རྣམ་པར་དག་པའི་དྲི་བཟང་འཕྲོ། །འཇི༷གས་མེ༷ད་རྣམ་དཔྱོད་བསྟ༷ན་པ༷འི་དགའ་ཚལ་གྱི། །རྒྱན་གྱུར་སྦྲང་རྩིའི་རྒྱ༷ལ་མཚ༷ན་རྟག་བརྟན་ཤོག །བློ༷་བཟ༷ང་རྒྱལ་བའི་ཆོས་ཚུ༷ལ་སྤེལ་བའི་ཕྱིར། །ཁྲི༷མས་ལྡན་དགེ་འདུན་འདུས་པའི་གཙུག་རྒྱན་དུ། །འཇི༷གས་མེ༷ད་གདོང་ལྔའི་ཁྲི་ལ་རྟག་བཞུགས་ནས། །བཤད་སྒྲུབ་བསྟ༷ན་པ༷འི་རྒྱ༷ལ་མཚ༷ན་བསྒྲེང་གྱུར་ཅིག །བདག་ཀྱང་བློ༷་གསལ་རིག་བཟ༷ང་ཚུ༷ལ་ཁྲི༷མས་དག །སྲིད་ལ་འཇི༷གས་ཤིང་བདག་མེ༷ད་གནས་ལུགས་མཐོང་། །བསྟ༷ན་པ༷འི་ཡང་སྙིང་རྒྱ༷ལ་བའི་བཀའ་བཞིན་བསྒྲུབས། །མཚ༷ན་ལྡན་བཤེས་གཉེན་རྗེས་སུ་སློབ་གྱུར་ཅིག །བློ༷་ལྡན་སྐལ་བཟ༷ང་གདུལ་བྱའི་མོས་གུས་དང། །ཚུ༷ལ་ཁྲི༷མས་རྣམ་དག་སྨོན་པའི་བདེན་ཚིག་མཐུས། །འཇི༷གས་མེ༷ད་བསྟ༷ན་པ༷འི་རྒྱ༷ལ་མཚ༷ན་དཔལ་བཟང་པོ། །སྲིད་ཞིའི་
གཙུག་ཏོར་རྩེ་མོར་མཛེས་གྱུར་ཅིག །ཅེས་འཇམ་མགོན་བསྟན་པའི་ཉིན་བྱེད་རྗེ་བཙུན་དམ་པའི་མཆོག་གི་སྤྲུལ་བའི་སྐུ་རིན་པོ་ཆེ་བློ་བཟང་ཚུལ་ཁྲིམས་འཇིགས་མེད་བསྟན་པའི་རྒྱལ་མཚན་ཞབས་པད་བརྟན་ཅིང་མཛད་འཕྲིན་རྒྱས་པའི་དོན་གྱི་སྨོན་ཚིག་འདི་ནི་ཧལ་ཧ་ཁུ་རེ་ཆེན་མོའི་གྲྭ་རིགས་བློ་བཟང་ཚེ་རིང་གིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ རྒྱལ་ཀུན་ཐུགས་རྗེའི་སྒྱུ་འཕྲུལ་དྲ་བའི་གར། །ནམ་མཁའ་ཞིང་ཁམས་རབ་འབྱམས་ཀུན་ཁྱབ་པས། །མཐའ་ཀླས་བསྟན་དང་འགྲོ་བའི་མགོན་གྱུར་པ། །ཁྱབ་བདག་འཁོར་ལོའི་མགོན་ལ་གསོལ་བ་འདེབས། །ཁྱད་པར་རྗེ་བཙུན་འཇམ་དཔལ་སྙིང་པོ་ཡི། །ལུང་རྟོགས་ཆོས་ཀྱི་བསྟན་པའི་སྲོག་འཛིན་ཅིང། །གཞན་ཕན་འཕྲིན་ལས་ས་གསུམ་ཀུན་ཏུ་ཁྱབ། །མཚུངས་མེད་འདྲེན་མཆོག་དམ་པར་གསོལ་བ་འདེབས། །རིང་ནས་གོམས་པའི་ཐུགས་བསྐྱེད་རྟ་ལྗང་གིས། །ཉེར་དྲངས་མཚུངས་མེད་མཆོག་སྤྲུལ་ནམ་མཁའི་ནོར། །དགེ་ལྡན་ལུགས་བཟང་འདབ་བརྒྱ་བཞད་པའི་གཉེན། །འགྲོ་བའི་སྒྲོན་མེ་བསྐལ་བརྒྱར་ཞབས་བརྟན་ཤོག །འཇམ་དཔལ་བཀའ་ཉན་ཆོས་ཀྱི་རྒྱལ་པོ་སོགས། །བསྟན་འཛིན་སྲུང་མ་དམ་ཅན་རྒྱ་མཚོའི་མཐུས། །རྗེ་བཙུན་བླ་མ་བསྐལ་བརྒྱར་ཞབས་བརྟན་ཅིང། །འཕྲིན་ལས་རྒྱ་མཚོའི་གོས་ཅན་ཁྱབ་གྱུར་ཅིག །ཁྱོད་ཞབས་གུས་པས་བསྟེན་པ་བདག་ཅག་ཀྱང། །ཇི་སྲིད་བྱང་ཆུབ་རྡོ་རྗེའི་གནས་ཐོབ་པ། །དེ་སྲིད་འབྲལ་མེད་དགྱེས་བཞིན་རྗེས་འཛིན་ཅིང། །མཉེས་པ་གསུམ་གྱིས་མཉེས་པ་སྒྲུབ་པར་ཤོག །གང་གི་ཐུགས་རྗེའི་གྲུ་གཟིངས་ལ་བརྟེན་ནས། །མདོ་སྔགས་ལམ་བཟང་རྒྱ་མཚོའི་འཇིང་བརྒལ་ཏེ། །མཆོག་ཐུན་དངོས་གྲུབ་ནོར་བུའི་དགའ་སྟོན་ལ། །
འདོད་དགུར་སྤྱོད་པའི་སྐལ་བཟང་ཐོབ་པར་ཤོག །མདོར་ན་མགོན་ཁྱོད་ཞབས་པད་རྟག་བརྟན་ཅིང། །སྡེ་འདིར་མདོ་སྔགས་བཤད་སྒྲུབ་བསྟན་པ་རྒྱས། །ཡངས་པའི་འཇིག་རྟེན་བདེ་འབྱོར་གྱིས་འཚོ་བའི། །བཀྲ་ཤིས་རྒྱ་མཚོས་ཕྱོགས་ཀུན་ཁྱབ་གྱུར་ཅིག །ཅེས་སྐྱེ་དགུའི་འདྲེན་མཆོག་དམ་པ་འཇམ་མགོན་བསྟན་པའི་རྩ་ལག་བཙན་པོ་ནོ་མིན་ཧན་མཆོག་གི་སྤྲུལ་བའི་སྐུ་རིན་པོ་ཆེ་རྗེ་བཙུན་འཇམ་དཔལ་ཆོས་ཀྱི་བསྟན་འཛིན་འཕྲིན་ལས་དཔལ་བཟང་པོའི་ཞབས་བརྟན་གསོལ་འདེབས་འདི་ནི། དཔའ་རི་འབྲི་གུ་དགོན་ཁྲི་པ་མཁས་བཙུན་བཟང་པོའི་བདག་ཉིད་བློ་བཟང་བསྟན་འཛིན་འཕྲིན་ལས། ཁྲི་ཟུར་སྐལ་བཟང་མཆོག་གྲུབ། ཁྲི་ཟུར་ངག་དབང་ཆོས་རྒྱ་མཚོ། ཁྲི་ཟུར་སྐལ་བཟང་དངོས་གྲུབ་སོགས་ཐུན་མོང་ནས་བསྐུལ་མ་བྱུང་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།།