ལེགས་པར་བཤད་པ་ཤིང་གི་བསྟན་བཅོས།
ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་བཞུགས་སོ།།
ཨོཾ་བདེ་ལེགས་སུ་གྱུར་ཅིག །རིན་ཆེན་སེམས་ཀྱི་རྩ་བ་བརྟན། །རླབས་ཆེན་ཚོགས་གཉིས་ཡལ་ག་རྒྱས། །སྐུ་གསུམ་འབྲས་བཟང་སྙེ་མས་དུད། །སངས་རྒྱས་ལྗོན་པ་དེ་ལ་འདུད། །སྣང་བ་དཔེ་རུ་ཤར་བ་ཡི། །རྣལ་འབྱོར་དེ་ལ་གདམས་ངག་མང། །ནགས་ཀླུང་སྟུག་པོའི་དོ་ར་རུ། །ཤིང་ལོའི་ཕུང་པོ་ཟད་པ་མེད། ༈ །དཔག་བསམ་ཤིང་ལ་བརྟེན་བྱས་ན། །དགོས་འདོད་ཐམས་ཅད་ཆར་དུ་བསྙིལ། །དེ་བཞིན་བཤེས་གཉེན་དམ་པ་ལ། །བརྟེན་ན་ལེགས་ཚོགས་ལྷུན་གྱིས་འགྲུབ། །བཤེས་ལ་མི་གུས་སྐྱེ་བོ་དེས། །གཞུང་བརྒྱ་ཤེས་ཀྱང་དོན་མི་འགྱུར། །ཤིང་སྐམ་ལོ་བརྒྱ་ཆུར་འཕང་ཡང། །ལོ་འདབ་སྐྱེ་བ་སྲིད་ན་མེད། །དད་ལྡན་རང་བཞིན་བཟང་པོ་དེར། །ཚིགས་བཅད་གཅིག་ཙམ་གྱིས་ཀྱང་ཕན། །རྐང་འཐུང་གསར་པའི་མྱུ་གུ་དེ། །ཆུ་ཆར་གཟེགས་མ་ཡིས་ཀྱང་འཕེལ། ༈ །ཚེར་མ་ཅན་དང་དུག་ཤིང་གིས། །མི་དགོས་བཞིན་དུ་ས་འདི་གང། །མི་ཁོམ་ངན་སོང་སྐྱེ་བ་ན། །ས་ཡི་རྡུལ་བཞིན་བགྲང་ལས་འདས། །ཙན་དན་ས་མཆོག་ལྗོན་པ་དེ། །འཇིག་རྟེན་འདི་ན་སྲིད་པ་ཙམ། །དལ་འབྱོར་ཚང་བའི་རྟེན་བཟང་ཡང། །བརྒྱ་ལམ་ཐོབ་པ་མ་བཀག་ཙམ། །དལ་འབྱོར་སྙིང་པོ་མ་བླངས་ན། །དུད་འགྲོའི་རྟེན་དང་གཉིས་སུ་མེད། །ཨ་མྲའི་འབྲས་བུ་མི་སྤྱོད་ན། །ཨེ་རན་ད་དང་ཁྱད་པར་ཅ། ༈ །མདངས་དང་ལོ་འབྲས་མེ་ཏོག་སོགས། །ལྗོན་པ་གཅིག་ཀྱང་དུས་ཀྱི་
འགྱུར། །སྐྱེ་རྒ་ན་དང་འཆི་བ་ཡི། །ཟློས་གར་སྐད་ཅིག་སྐད་ཅིག་བསྒྱུར། །རིང་དུ་འབྲེལ་བའི་ཤིང་ལོ་དེ། །ལན་གཅིག་བྲུལ་བ་སླར་མི་འབྱོར། །མཛའ་བ་ཡུན་རིང་འཁོད་འཁོད་ནས། །ནམ་ཞིག་གཏན་དུ་འབྲལ་བར་འགྱུར། ༈ །སྡོང་པོ་གཤགས་གཏུབ་དྲས་པ་ཡིས། །ཤིང་མཁན་མྱུར་དུ་ངལ་བར་འགྱུར། །བསྐལ་པར་དེ་འདྲའི་ལས་བསྒྲུབ་ཀྱང། །དམྱལ་སྲུང་རྣམས་ནི་ངལ་བ་མེད། །ཇི་སྲིད་མི་དགེ་མ་ཟད་པ། །དེ་སྲིད་སྡུག་བསྔལ་འཁོར་མོར་མྱོང། །དུག་གི་ས་བོན་གནས་ཀྱི་བར། །དུག་ལོ་སྐྱེ་བ་ཆོས་ཉིད་ཡིན། ༈ །གང་ཞིག་གསུམ་ལ་སྐྱབས་སོང་བ། །དེ་ལ་སྲིད་ཞིའི་རྒུད་པ་མེད། །ལྗོན་པ་ཆེ་ལ་བསྟེན་པ་དེ། །གཅན་གཟན་གདུག་པས་གཙེ་མི་ནུས། །རྩ་བ་རུལ་བའི་ལྗོན་པ་ལ། །བརྟེན་པར་བྱེད་པ་བླུན་པོའི་རྟགས། །རང་ཡང་འཁོར་བར་བྱིང་བ་ལ། །སྐྱབས་སུ་འཛིན་རྣམས་ཀྱེ་མ་འཁྲུལ། ༈ །དུག་དང་སྨན་གྱི་མྱུ་གུ་ལས། །འབྲས་བུ་འཆོལ་བ་འགར་ཡང་མེད། །དགེ་དང་མི་དགེའི་ལས་ལས་ཀྱང། །འབྲས་བུ་གཞན་འབྱུང་གནས་མ་ཡིན། །ཐོག་མེད་དུས་ནས་བསགས་པའི་ལས། །བསྐལ་པ་བརྒྱར་ཡང་ཆུད་མི་ཟ། །ཏ་ལའི་ཤིང་འབྲས་སྟོང་ཕྲག་ལོར། །སྐམ་ཡང་རླན་དང་འཕྲད་ན་སྐྱེ། །ས་བོན་ཆུང་སྨིན་ནྱ་གྲོ་ཏའ། །ཡལ་འདབ་རྒྱས་པས་རྒྱང་གྲགས་ཁེབས། །ཁམ་གཅིག་ཟས་ཀྱི་སྦྱིན་པས་ཀྱང། །འབྲས་བུ་འཁོར་ལོས་བསྒྱུར་བ་འཐོབ། ༈ །རྣམ་བཀྲ་
སྲིད་པའི་འཁོར་ལོ་འདིར། །དོན་ལྡན་སྙིང་པོ་འགའ་མ་མཆིས། །ཆུ་ཤིང་རློན་པའི་སྡོང་པོ་ལ། །རྩེ་རྟིང་ཀུན་ན་སྙིང་པོ་མེད། །ལྗོན་ཤིང་ལོ་བརྒྱར་སྐྱེས་པ་ཡང། །ནམ་ཞིག་ཚེ་ན་འགྱེལ་བར་འགྱུར། །སྲིད་པའི་རྩེ་མོར་ཕྱིན་ནས་ན། །སླར་ཡང་མི་བཟད་ངན་འགྲོར་འགྲོ། ༈ །བུར་ཤིང་ཁུ་བས་རབ་བགོས་ན། །ཏིག་ཏའི་ཁ་བ་སེལ་བར་ནུས། །ལམ་གྱི་བདེན་པ་རབ་གོམས་པས། །སྡུག་བསྔལ་རྩ་བ་ཀུན་འབྱུང་སྤོང། །ཀ་གདུང་ལྕམ་དང་དྲལ་མ་རྣམས། །ཚོགས་པས་ཡིད་འོང་ལྡིང་ཁང་སྟེ། །ལྷག་པའི་བསླབ་པ་གསུམ་ཚོགས་པས། །ཐར་པ་དམ་པའི་ཁང་བཟང་འགྲུབ། ༈ །ཛན་དུའི་ས་བོན་དེའི་ས་བོན། །གཞན་ལས་སྐྱེ་ཕྱིར་ཐོག་མ་མེད། །མཐའ་མེད་འཁོར་བར་སྐྱེས་པ་ན། །ཕ་མར་མ་གྱུར་སུ་ཞིག་ཡོད། །རྟ་གླང་བརྒྱ་ཡི་ཁུར་ལྕི་བ། །ཤིང་རྟ་ཆེན་པོ་གཅིག་གིས་འདྲེན། །ཉན་རང་ཀུན་གྱིས་མ་ལོང་བའི། །ཁུར་ཏེ་རྒྱལ་སྲས་ཕྲག་ན་མཛེས། །ཤིང་གཞན་འབྲས་བུ་བླངས་པས་འཛད། །དཔག་བསམ་ཤིང་འབྲས་ཟད་པ་མེད། །དགེ་བ་གཞན་འབྲས་སྤྱད་པས་འཛད། །བྱང་ཆུབ་སེམས་དགེ་ཕྱིར་ཞིང་འཕེལ། ༈ །ཡོངས་སྨིན་འབྲས་བུས་སྤ་བ་ཡི། །རྐང་འཐུང་དེ་ལ་སྐྱེ་བོ་འདུ། །འཇུངས་མེད་གཏོང་བའི་དཔལ་ཡོན་ཅན། །དེ་ཡིས་སྐྱེ་དགུའི་རེ་བ་བསྐོང་། ༈ །མངོན་པར་མཐོ་དང་ངེས་ལེགས་ཀྱི། །རྩ་བ་ཚུལ་ཁྲིམས་ལས་གཞན་མེད། །ཡལ་འདབ་གཡུར་དུ་ཟ་བ་ཡི། །རྩ་བ་སྡོང་བུ་ཉག་གཅིག་ཡིན། ༈ །ཚེར་མ་ཟུག་པའི་ལན་དུ་སླར། །ཁུ་ཚུར་བརྡེག་པ་བཞད་གད་རྒྱུ། །གནོད་བྱེད་ལ་ཡང་སླར་ཁྲོ་བ། །རང་ཉིད་ཉམས་པའི་རྒྱུ་རུ་ཟད། །རྒྱུ་དུས་བརྩོན་པ་མ་བཏང་
ན། །འབྲས་དུས་ཡོན་ཏན་ཐམས་ཅད་སྐྱེ། །རྩ་བ་རླན་དང་མ་བྲལ་ན། །རྩེ་མོར་ལོ་འབྲས་སྨིན་པར་འགྱུར། ༈ །སྡོང་པོ་རླུང་གིས་ཆེར་བསྐྱོད་ན། །འབྲས་བུ་ས་ལ་འབྲུལ་བ་ལྟར། །བྱིང་རྒོད་གཡེང་བས་རབ་གཡོས་པས། །ཏིང་འཛིན་དམིགས་པ་སྟོར་བར་བྱེད། །བསམ་གཏན་རྣམ་པར་དག་པ་ལས། །མངོན་ཤེས་ལ་སོགས་ཡོན་ཏན་འབྱུང། །སྡོང་བུ་ཉམས་པ་མེད་གྱུར་ན། །མེ་ཏོག་གེ་སར་མགོ་ལྕོག་ལྡེམ། ༈ །ཤིང་གི་རལ་གྲི་གཡུལ་གྱི་ངོར། །འཕྱར་བ་དགྲ་ཡི་དགའ་སྟོན་ཡིན། །ལྟར་སྣང་ཉི་ཚེའི་ལྟ་བ་ཡིས། །སྲིད་རྩ་གཅོད་འདོད་ཀྱི་ཧུད་མཚར། །ཧ་རི་ཙནྡན་བཟང་པོ་ཡིས། །ལུས་ཀྱི་ཚ་གདུང་སེལ་བར་བྱེད། །སྙིང་རྗེའི་བཅུད་ལྡན་ལྟ་བ་ཡིས། །དུག་གསུམ་ནད་བརྒྱ་དྲུངས་ནས་འབྱིན། ༈ །ཤིང་ལས་སྐྱེས་པའི་སྲིན་བུ་ཡིས། །ཤིང་དེ་ཟད་པར་བྱེད་པ་བཞིན། །འདོད་ཆགས་ལས་སྐྱེས་ཡེ་ཤེས་ཀྱིས། །འདོད་ཆགས་ཉེས་པ་ཞི་བར་བྱེད། ༈ །ཤིང་སྐྱ་རླན་གྱིས་ཟིན་པ་ལས། །བཻ་ཌཱུར་མདངས་སུ་འཕོ་བ་ལྟར། །ཐ་མལ་སྣང་བ་འོད་གསལ་གྱིས། །སྦྱང་སྟེ་དག་པའི་ལྷ་སྐུར་ལྡང། ༈ །ཡལ་འདབ་ཡོངས་སུ་རྫོགས་པ་ཡི། །ལྗོན་པའི་གྲིབ་མ་ཀུན་ཏུ་བསིལ། །ཡོན་ཏན་མ་ལུས་རྫོགས་པ་ཡི། །རྒྱལ་བ་སྐྱེ་དགུའི་མགོན་དུ་གྱུར། ༈ །དེ་ལྟར་ཤིང་གི་བསྟན་ཆོས་ལས། །ཆོས་ཀྱི་ལམ་བསྟན་སརྒ་སྟེ། ༈ །ད་ནི་འཇིག་རྟེན་ཚུལ་ལུགས་འགའ། །བཤད་དོ་རྣ་བ་བརླག་སྟེ་ཉོན། ༈ །ཆོས་ལྡན་རྒྱལ་པོའི་གཟི་བྱིན་གྱིས། །དགྲ་སྡེ་རྣམས་ཀྱང་དབང་དུ་འདུ། །མ་ལ་ཡར་སྐྱེས་དྲི་བསུང་དེ། །བུང་བ་འགུག་པའི་ཕོ་ཉ་ཡིན། །
རྒྱལ་ངན་ཆབ་འབངས་གཟིར་བ་དེར། །ནམ་ཞིག་གཡོག་ཀྱང་འཁོར་མི་འགྱུར། །སྲན་ཕུང་དབྱུག་པས་གཏོར་ན་ཡང། །དབྱུག་པའི་ངོས་ལ་འབྱར་མི་སྲིད། །བློན་དང་འབངས་ཀྱིས་མ་བཀུར་ན། །རྒྱལ་པོ་ཆེན་པོ་ཇི་ལྟར་གནས། །གདུང་མ་ཀ་བས་མ་བཏེག་ན། །རྒྱལ་པོའི་ཕོ་བྲང་གང་ལས་འབྱུང། །རྗེ་དཔོན་བཟང་པོའི་བཀའ་དྲིན་གྱིས། །གཡོག་འཁོར་མངའ་ཐང་དར་བར་འགྱུར། །ལྗོན་པ་ཆེ་ལ་བརྟེན་པ་ཡི། །འཁྲི་ཤིང་རྩེ་མོ་དགུང་ལ་བསྙེགས། །ཚེར་མའི་ཤིང་ལ་བརྟེན་བྱས་ན། །གནད་དུ་ཟུག་པའི་སྡུག་བསྔལ་སྐྱེ། །སྐྱེ་བོ་ངན་ལ་བརྟེན་བྱས་ཀྱང། །ཕྱི་ཕྱིར་སྡུག་བསྔལ་འབའ་ཞིག་བསྐྱེད། །ཆབ་འབངས་བདེ་སྐྱིད་རྒྱས་པ་དེ། །རྗེ་དཔོན་ཉིད་ཀྱི་ཆེ་བའི་རྟགས། །རབ་རྒྱས་ཡལ་གའི་ཁྱོན་ཡངས་པ། །སྡོང་པོ་རྩ་བའི་མཛེས་རྒྱན་ཡིན། །གཡོག་འཁོར་རྒུད་པའི་སྡེ་དཔོན་དེ། །རང་ཉིད་འབྱོར་ཡང་ངོ་ཚའི་རྒྱུ། །སྡོང་པོ་ཅི་ཙམ་སྦོམ་ན་ཡང། །ཡལ་འདབ་མེད་ན་གཅེར་བུ་ཡིན། །སྡོང་རུལ་རྩ་བར་གནས་པའི་མ། །ཉིན་མཚན་ཀུན་ཏུ་བག་ཕེབས་བྲལ། །གཙོ་བོ་ངན་པའི་གཡོག་འཁོར་ཡང། །རྟག་ཏུ་སེམས་ཁྲལ་གདུང་བས་གཟིར། །དཔོན་ངན་གཡོག་འཁོར་འབྲོས་ན་ཡང། །སྡེ་དཔོན་བཟང་པོས་བསྐྲད་ཀྱང་འདུ། །ཚེར་ཤིང་འབོར་བའི་བྷྲ་མ་ར། །ཙུ་ཏའི་ཤིང་ལས་བསྐྲད་ཀྱང་འཁོར། །རྗེ་དཔོན་གསར་ཚེ་བྱམས་བྱེད་ཀྱང། །ཕྱི་ནས་བསྒྲུབ་དཀའི་དཔྱ་ཁྲལ་འབེབ། །ཤིང་ལ་ཆར་སྐྱོབས་བྱེད་མོད་ཀྱང། །རྗེས་སུ་ཐིགས་ཕྲེང་ལྕི་བར་འབབ། །ལྗོན་པའི་གྲིབ་བསིལ་ཀུན་ལ་སྙོམས། །ཉི་ཟླའི་སྣང་བ་ཀུན་ལ་སྙོམས། །སྤྲིན་གྱི་ཆུ་ཆར་ཀུན་
ལ་སྙོམས། །རྒྱལ་པོའི་བཀའ་ཁྲིམས་ཀུན་ལ་སྙོམས། །གཙོ་བོ་བཟང་ཡང་འཁོར་ངན་ན། །དེ་ཡི་དྲུང་དུ་བསྙེན་པར་དཀའ། །གདུག་པའི་སྦྲུལ་གྱིས་དཀྲིས་པ་ཡི། །ཙནྡན་ལྗོན་པ་སུ་ཡིས་བསྟེན། ༈ །ཕྱི་ནང་སྨིན་དང་མ་སྨིན་པའ། །ཨ་མྲའི་འབྲས་བུ་རིགས་བཞིར་གསུངས། །མི་ཡང་སེམས་དང་སྤྱོད་པ་གཉིས། །དག་དང་མ་དག་དབྱེ་བ་མང། ༈ །མཁས་པ་ཡོན་ཏན་ཀུན་ལྡན་དེ། །རློམ་སེམས་མེད་པར་ཞི་ཞིང་དུལ། །སྙེ་མའི་ཁུར་གྱིས་བརྗིད་པ་ཡི། །ལྗོན་ཤིང་རྩེ་མོ་དུད་དེ་གནས། །ཡོན་ཏན་མེད་པའི་སྐྱེ་བོ་དེ། །ང་རྒྱལ་མགོ་འཕང་ཅི་ལས་མཐོ། །འབྲས་བུའི་བཅུད་ཀྱིས་མ་བཟུང་བའི། །ལྗོན་པ་རེངས་པ་ཆོས་ཉིད་ཡིན། །ལྷན་སྐྱེས་ཡོན་ཏན་མེད་གྱུར་ན། །ཕྱི་ཚུལ་བཅོས་པས་ཅི་ལ་ཕན། །ཡལ་འདབ་མེད་པའི་ཤིང་སྐམ་དེར། །ཅོད་པན་བཏགས་ཀྱང་ག་ལ་མཛེས། །བསླབ་སྦྱང་དུས་ན་གཡེལ་བ་དེས། །མཁས་འདོད་རེ་བ་འབྲས་མེད་ཡིན། །མེ་ཏོག་སད་ཀྱིས་ཁྱེར་བ་ཡི། །ཤིང་ལ་འབྲས་བུའི་རེ་བ་མེད། །བློ་གྲོས་རྩལ་དང་མི་ལྡན་ན། །གོ་ས་མཐོ་ཡང་ཁྲེལ་བའི་གཞ། །ཤིང་ལས་བྱས་པའི་སེངྒེ་དེ། །འཇིགས་འཇིགས་འདྲ་ཡང་སྙིང་པོ་མེད། །དྲི་ཞིམ་བསུང་དང་མི་ལྡན་ན། །ཙནྡན་ཡིན་ཞེས་སྨྲས་ཀྱང་རྫུན། །དམ་པའི་ཚུལ་དང་མི་མཐུན་ན། །དམ་པར་ཁས་འཆེ་དོན་དང་བྲལ། །དམན་པ་རྒྱལ་སར་བཏོན་ན་ཡང། །མ་རབས་སྤྱོད་པའི་རྗེས་སུ་འཇུག །ཆུ་ཤིང་གྱེན་དུ་སྐྱེས་ན་ཡང། །འདབ་མ་ཐུར་དུ་འཕྱང་བར་འགྱུར། །ཨ་གར་དུམ་བུ་བརྒྱར་གཏུབས་ཀྱང། །ལྷན་སྐྱེས་དྲི་བཟང་མི་གཏོང་ལྟར། །དམ་པ་ཅི་ཙམ་
རྒུད་ན་ཡང། །བཟང་པོའི་རང་བཞིན་ག་ལ་འདོར། །ཤུག་པའི་ལོ་མ་མེར་བཅུག་ན། །ལྷག་པར་དྲི་བཟང་རྒྱས་པ་བཞིན། །དམ་པ་རྣམས་ལ་གནོད་བྱས་པས། །ཕྱིར་ཞིང་དེ་ཡི་ཆེ་བ་འདོན། །དམ་པ་དབེན་པར་གནས་ན་ཡང། །གྲགས་སྙན་ལྷ་ཡིས་སྒྲོག་པར་བྱེད། །ལྷོ་ཡི་རི་ལས་སྐྱེས་པ་ཡི། །ཙནྡན་དྲི་བསུང་རླུང་གིས་འགྱེད། །འཁྱོག་པའི་ཤིང་དེ་བསྲང་ན་ཡང། །རླན་དང་འཕྲད་ཚེ་ཡ་ཡོར་འགྱུར། །རང་བཞིན་ངན་པ་བཅོས་ན་ཡང། །རྐྱེན་དང་འཕྲད་ཚེ་རང་མཚང་སྟོན། །ཀླད་ཆུང་རང་བཞིན་ངན་པ་ལ། །ཡོན་ཏན་ཡོད་ཀྱང་ཕན་མི་ཐོགས། །རྩ་བ་དུག་ཏུ་གནས་པ་ཡི། །མེ་ཏོག་མཛེས་ཀྱང་སུ་ལ་མཁོ། །ཙནྡན་ཤུག་པའི་ཀ་བ་གཉིས། །གདུང་མ་འདེགས་པའི་ནུས་པ་མཚུངས། །སྙིང་སྟོབས་ལྡན་ན་དབུལ་ཕྱུག་གཉིས། །བྱ་བ་བྱེད་པའི་དུས་སུ་འདྲ། །ལོངས་སྤྱོད་མངའ་ཐང་མཉམ་ན་ཡང། །བཟང་ངན་ལས་ལ་སྦྱར་ན་ཤེས། །ཕྲ་སྦོམ་མཉམ་ཡང་ཆུར་ལ་འདོན། །ཤིང་གི་མགོ་མཇུག་ཤེས་པར་ནུས། །མཁས་པའི་སྐྱེ་བོ་ཡུལ་གཞན་དུ། །བྲིན་ཞིང་ཀུན་གྱིས་བཀུར་བར་འགྱུར། །ནགས་སུ་སྐྱེས་པའི་ཤིང་གིས་ན། །གཞན་དུ་ཤིང་གི་བྱ་བ་བྱེད། །ཤིང་བལ་རླུང་གིས་བདས་པ་དེ། །རི་རྩེར་མི་སྡོད་གཤོང་དུ་ཆགས། །བློ་ཆུང་ཕྱོགས་མཐར་འཁྱམས་འཁྱམས་ནས། །མཐའ་མར་རྒུད་པའི་གནས་སུ་ལྟུང་། །སྐྱོན་གྱིས་གོས་པ་ཆེས་སླ་སྟེ། །ཡོན་ཏན་སློབ་པ་དེ་ལྟ་མིན། །ཤིང་ལ་མེ་ལྕེ་མཆེད་སླ་ཡང། །ཆུ་བོ་སོ་སོར་འགྱེད་པར་དཀའ། ༈ །མ་རབས་སྐྱེ་བོ་གཉིས་འགྲོགས་ན། །ཕུགས་སུ་རང་གཞན་གཉིས་ཀ་འཕོངས། །གཙུབ་ཤིང་ཟུང་དུ་བརྡར་བ་ཡིས། །མཇུག་ཏུ་
གཉིས་ཀ་སྲེག་པར་བྱེད། །ཕུན་སུམ་ཚོགས་པའི་ལྗོན་པ་ཡང། །ཆུ་དང་འགྲོགས་ན་རྩ་བ་འབྱིན། །ཡ་རབས་ཡོན་ཏན་ལྡན་པ་ཡང། །གྲོགས་པོ་ངན་པས་ཉམས་པར་བྱེད། །འབྲས་ལྡན་ཤིང་གཉིས་སྦྱར་བ་ལས། །འབྲས་བུ་ཕུང་གསུམ་འབྱུང་བ་ལྟར། །བློ་དང་ལྡན་པ་གཉིས་འགྲོགས་ན། །སྔོན་མེད་ལེགས་པའི་བློ་གྲོས་སྐྱེ། །ལྗོན་པའི་གྲིབ་བསིལ་བསྟེན་པ་ཡི། །གླང་པོས་ཤིང་གི་རྩ་བ་འབྱིན། །གཡོག་འཁོར་ངན་པ་བསྟེན་པ་ཡིས། །ལེགས་བྱས་རྩ་བ་ཉམས་པར་བྱེད། །ཤིང་སྡོང་གཙུག་གིས་བཀུར་བ་ཡིས། །འདབ་ཆགས་འགྲོ་ཚེ་བྱ་ཐལ་གཏོང། །ཟླ་གྲོགས་ངན་པ་བརྟེན་ན་ཡང། །ནམ་ཞིག་རྗེས་ངན་བཞག་ནས་འགྲོ། །ངན་པར་ཅི་ཙམ་ཕན་བཏགས་ཀྱང། །ལན་དུ་ཕན་པའི་རེ་བ་མེད། །ཤིང་གིས་རྟག་ཏུ་མེ་གསོས་ཀྱང། །མེ་ཡིས་དེ་ཉིད་ཐལ་བར་བྱེད། །བློ་དང་མཐུ་ལྡན་རེ་རེས་ཀྱང། །མཆོག་དམན་ཀུན་གྱིས་དགོས་པ་བསྒྲུབ། །འོད་མའི་གནམ་རུ་གཅིག་གིས་ཀྱང། །ཉག་ཕྲན་སྟོང་གི་བྱ་བ་བྱེད། ༈ །ལོངས་སྤྱོད་དཔལ་དང་མི་ལྡན་ན། །རིགས་རུས་མཐོ་ཡང་དགོས་པ་ཆུང། །དགོས་པའི་གྲིབ་བསིལ་མེད་གྱུར་ཚེ། །རྩེ་མོ་མཐོ་བས་ཅི་ལ་ཕན། །རྩ་བ་བསོད་ནམས་མེད་གྱུར་ན། །བསགས་པས་དབུལ་བ་མི་སེལ་དེ། །སྡོང་པོ་བརླན་དང་བྲལ་བ་ལ། །ཡལ་གར་ཆུ་བོས་བྱུག་ཀྱང་ཅ། །བུན་དང་སྐྱེད་ཀྱིས་ནོར་སྤེལ་བར། །འདོད་ཀྱང་རྩ་བ་སྟོར་བ་མང། །ཤིང་སྐྱེས་བཅད་ནས་ས་གཞན་དུ། །བཙུགས་པ་ཕལ་ཆེར་སྐམ་པར་འགྱུར། །གཡང་ས་མཐོན་པོར་སྐྱེས་པ་ཡི། །ས་ཧ་ཀ་རའི་འབྲས་བུ་
བཞིན། །རང་གཞན་གང་ལའང་མི་ཕན་པའ། །ལོངས་སྤྱོད་ཆེ་དེ་ལྦ་བ་ཡིན། །ལོངས་སྤྱོད་སྤེལ་བར་འདོད་པ་ཡིས། །ཆ་ཤས་གཏོང་བ་མན་ངག་སྟེ། །ལྗོན་ཤིང་ཡལ་ག་རྒྱས་འདོད་ན། །རྩེ་མོ་འབྲེག་པ་ཐབས་སུ་བཟང། །དམན་པས་བསགས་ཀྱང་མི་འགྲུབ་ལ། །བསོད་ནམས་ལྡན་པས་བཏང་ཡང་འབྱོར། །བརླན་སར་བཅད་ཀྱང་སྐྱེ་བའི་ཤིང། །སྐམ་སར་བཙུགས་ཀྱང་ག་ལ་སྐྱེ། །ལམ་ཁའི་ཤིང་གི་འབྲས་བུ་དེ། །བྱིས་པའི་རྡོ་ཆར་འབེབས་པའི་རྒྱུ། །བདག་པོ་ངན་པའི་ལོངས་སྤྱོད་ཀྱང། །ཕལ་ཆེར་དགྲ་ཡི་གཡབ་མོ་ཡིན། །བསོད་ནམས་དམན་པའི་སྐྱེས་བུ་དེར། །དཔལ་འབྱོར་བྱུང་ན་སྲོག་ཀྱང་བརླག །སྨྱིག་མའི་ཤིང་གི་རྩེ་མོ་ལ། །འབྲས་བུ་ཆགས་པ་ཉམས་པའི་ལྟས། །བུར་ཤིང་གཅོད་པ་རོ་ཡི་ཕྱིར། །ཝ་སྐྱེས་གསོད་པ་པགས་པའི་སླད། །དོན་མཐུན་འཛོམས་པ་ནོར་གྱི་དོན། །རྒྱལ་པོར་རྒོལ་བ་འབངས་ཀྱི་ཆེད། ༈ །ཤིང་ལ་ཐོག་མར་ཐིག་འདེབས་ཀྱི། །དྲས་ཤིང་གཏུབས་ནས་བསྒྱུར་དུ་མེད། །བྱ་བའི་ཐོག་མར་བསམ་དགོས་ཀྱི། །རྗེས་ནས་གྱོད་བརྡལ་བླུན་པོའི་རྟགས། །སྟབས་ལེགས་ཙམ་གྱིས་དོན་གྲུབ་ཀྱང། །བློ་དང་ལྡན་པར་སུ་ཞིག་རློམ། །ལོ་མ་འཁུམ་ནས་ཉལ་བས་ཤིང། །སེམས་ལྡན་བསྒྲུབ་པ་མུ་སྟེགས་ལུགས། ༈ །སྲང་མདོར་ལོ་འདབ་ཉལ་ཉིལ་དུ། །གནས་པས་ཤིང་དེ་ཀུན་གྱིས་བརྫ། །དོན་མེད་འཆོལ་བའི་གཏམ་མང་བའི། །མི་དེ་ཀུན་ལ་ངོ་ཐང་ཆུང། །མི་ངན་བྱས་པ་ཆུང་ན་ཡང། །དྲིན་ཆེའི་ཡུས་ཀྱིས་རྣ་བ་འགེམས། །བུད་ཤིང་རློན་པ་མེ་ཆུང་ཡང། །དུད་པ་ནག་པོས་ཚང་མང་འགེངས། །ཤིང་ལ་ལན་ཅིག་
སྦྲུལ་གནས་དེ། །ཕྱིས་ཀྱང་མཐོང་ཚེ་འཇིགས་པ་ལྟར། །རྐུ་དང་རྫུན་ལ་གཅིག་ཞུགས་པའ། །མི་དེར་རྟག་ཏུ་དོགས་པ་སྐྱེ། ༈ །ཚེར་མ་རྣོ་ཡང་བྲག་རི་ལ། །བསྣུན་ན་རྩེ་མོ་འཇིལ་བར་བྱེད། །སྐྱེས་བུ་དམ་པར་ཕྲག་དོག་གིས། །སྨོད་པ་རང་གི་དམའ་འབེབས་ཡིན། །གནས་མིན་ལ་ཡང་དུལ་ཆེས་ན། །སྙིགས་མའི་དུས་འདིར་ཀུན་གྱིས་བརྙས། །ཤིང་བལ་འཇམ་མོ་འཇམ་མོ་ཞེས། །ཀུན་གྱི་གདན་དུ་མི་བྱེད་དམ། །ཤིང་སྐྱེས་དྲང་པོ་མཛེས་ན་ཡང། །སྒ་ཤིང་འཁྱོག་པོ་ཅི་ལས་བཟང། །རང་བཞིན་དྲང་ན་བཟང་མོད་ཀྱང། །རེས་འགའ་ལྡེམ་པོ་རྒྱལ་བས་གསུངས། །མདེ་འུ་མེད་པའི་མདའ་འཕེན་པ། །དགྲ་བོ་སྤྱན་འདྲེན་ཕོ་ཉ་ཡིན། །དགྲ་བོ་འཇོམས་པའི་མཐུ་མེད་ན། །དོན་མེད་དཔའ་སྐད་ཅི་ལ་སྨྲ། །གཉེན་ལ་ཧ་ཅང་བྱམས་པ་ཡང། །འཁོན་གྱི་རྒྱུ་རུ་འགྲོ་བ་མང། །བུར་ཤིང་མངར་པོ་སྤྱོད་ཆེས་ན། །མ་ཞུས་སྒྲེགས་པ་སྐྱུར་མོ་འབྱུང། །ཤིང་དགྲ་སྟ་རེ་ཡིན་མོད་ཀྱང། །དེ་ཡི་ཡུ་བ་ཤིང་གིས་བྱེད། །དགྲ་ཡིས་བརྩམས་པའི་ཕུང་ཁྲོལ་ཀྱང། །ཕལ་ཆེར་རྩ་བ་གཉེན་གྱིས་བྱས། །སྡོང་པོ་གཅོད་པའི་ཐབས་ཉེས་ན། །རང་གི་སྟེང་དུ་ལྟུང་བར་འགྱུར། །དགྲ་ལ་ཧ་ཅང་སྡང་བ་ཡང། །རང་གི་གཤེད་དུ་འགྲོ་བ་མང་། ༈ །ཤིང་སྐམ་དགུག་པར་མི་ནུས་དེ། །རླན་གྱིས་བགོས་ན་ལས་སུ་རུང། །དགྲ་བོ་མི་བསྲུན་སེམས་ལྡན་ཡང། །ཐབས་ལ་མཁས་ན་འདུལ་བར་ནུས། །ཉི་ཟླས་མི་ཕྱེད་མྱ་ངན་མེད། །ན་ཆུང་རྐང་གདུབ་རེག་པས་འབྱེད། །ལེགས་པར་བཤད་ཀྱང་མི་གོ་བའི། །མ་རབས་ལ་ལ་སྨད་པས་ཐུལ། ༈ །ནགས་ན་གནས་
རྣམས་ཁང་བཟང་དང། །དེར་གནས་སྐྱེད་མོའི་ཚལ་ལ་དགའ། །འཚོ་བས་དབུལ་བ་རབ་བྱུང་དང། །རྒྱག་པས་མྱོས་པ་ཁྱིམ་ལ་ཕྱོགས། །ནགས་དེར་སྐྱེས་པའི་སྤྲེ་འུ་ཡང། །འབྲས་བུ་ཟད་ན་གཞན་དུ་འགྲོ། །རྒུད་ཚེ་སྙིང་དུ་སྡུག་པ་ཡི། །བུ་ཡང་གཞན་གྱི་ཕྱོགས་སུ་འབྲོས། །ནགས་ཚལ་ཕུན་སུམ་ཚོགས་པ་དེར། །དོན་མེད་ནམ་མཁའི་བྱ་ཡང་འཁོར། །གང་ན་བདེ་སྐྱིད་འཛོམ་པ་དེས། །མ་བསྡུས་པར་ཡང་སྐྱེ་བོ་འདུ། ༈ །ཤིང་གི་འབྲས་བུ་ལེགས་བསྐྱངས་ན། །ལོ་འདབ་ལ་སོགས་ཞར་ལ་འབྱུང། །དམ་པའི་ཆོས་ལ་བརྩོན་བྱས་ན། །སྲིད་ཀྱི་དཔལ་ཡང་དེ་ཡིས་འགྲུབ། ༈ །དེ་ལྟར་ལུགས་གཉིས་བླང་དོར་ཀུན། །ཤིང་གི་ཁྱད་པར་ཁོ་ན་ཡིས། །མཚོན་བྱེད་གཏམ་གྱི་སྦྱོར་བ་འདི། །སྔོན་མེད་མཁས་པའི་དགའ་སྟོན་ཡིན། །གང་མགྲིན་འོ་མའི་རྒྱ་མཚོ་རུ། །དབྱངས་ལྡན་ངང་མོ་རྣམ་རོལ་པ། །དེ་ཡི་ཁ་ལས་ལེགས་བཤད་ཀྱི། །རྦ་རླབས་འཁྲི་ཤིང་ཅི་ཡང་གཡོ། །གྲགས་སྙན་ནོར་བུའི་ཞགས་པ་ཡིས། །རྒྱ་བོད་འཛིན་མའི་མཐའ་བཅིང་བ། །དཔལ་ལྡན་ས་སྐྱ་པཎྚི་ཏའ། །ལེགས་བཤད་ལམ་ལ་བརྟེན་པ་ཡིན། །དོན་གྱི་སྒོ་ལྕགས་མཁྱིད་གང་ལ། །དཔེ་ཡི་ལྡེ་མིག་ཁྲུ་གང་བ། །དེ་ལྟའི་གཞུང་ཡང་སྣང་མོད་དེ། །མཁས་བླུན་སུ་ཡི་དབང་དུ་བྱས། །ལུགས་གཉིས་བླང་དོར་ཤེས་འདོད་རྣམས། །དཔེ་ཡི་སོར་མོ་ཙམ་མིན་པར། །དོན་གྱི་ཟླ་ཤེལ་ལྟོས་ཤིག་དང། །ངོ་མཚར་རི་དྭགས་མཚན་མ་ཡོད། །འདིར་འབད་ལེགས་བྱས་ནྱ་གྲོ་ཏའ། །ས་བོན་སྨིན་པའི་དགེ་མཚན་གྱི། །ཡལ་ག་ཕྱོགས་བཅུར་རྒྱས་པ་ཡིས། །འགྲོ་བ་ཀུན་གྱི་དོན་བྱེད་ཤོག །
ཅེས་ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་འདི་ནི་མཐོང་སྣང་སྣ་ཚོགས་ཀྱིས་རྐྱེན་བྱས་ཏེ་བཙུན་པ་དཀོན་མཆོག་བསྟན་པའི་སྒྲོན་མེས་ཚྭ་རྒན་སྨན་ཆུར་ཕྱིན་པའི་ལམ་ཁར་གང་དྲན་སུག་བྲིས་སུ་བགྱིས་པའོ།། །།