ཁྱབ་བདག་ལྕང་སྐྱ་རོལ་པའི་རྡོ་རྗེའི་གསང་བའི་རྣམ་ཐར།
ཁྱབ་བདག་ལྕང་སྐྱ་རོལ་པའི་རྡོ་རྗེའི་གསང་བའི་རྣམ་པར་ཐར་པ་ཡོན་ཏན་རིན་ཆེན་གསལ་བའི་སྒྲོན་མེ་ཞེས་བྱ་བ་བཞུགས་སོ།། དཔལ་ལྡན་ཚོགས་གཉིས་བྱེད་པོའི་མཐར་སོན་པས། །སྐུ་དང་ཡེ་ཤེས་དབྱེར་མེད་རྫོགས་བྱང་ཆུབ། །རྟག་པའི་འཕྲིན་ལས་འགྲོ་བའི་དཔལ་གྱུར་པ། །བླ་མ་དང་པོའི་མགོན་པོ་རྒྱལ་གྱུར་ཅིག །དངོས་ཀུན་སྟོང་པར་ཞུ་བའི་བདེ་བ་ཆེ། །ངེས་པ་ལྔ་ལྡན་གཟུགས་སྐུའི་རོལ་བ་ལས། །སླར་ཡང་བྱེ་བ་ཕྲག་བརྒྱའི་སྒྱུ་འཕྲུལ་གར། །བརྟན་གཡོ་ཀུན་ཁྱབ་འཇུག་པ་བླ་ན་མེད། །ཡེ་ཤེས་མཁའ་ལྡིང་དབང་པོར་གྲུབ་པའི་བྱིན། །བསྟན་པའི་མཁའ་མཐར་རོལ་པའི་ཤུགས་འཆང་ཞིང། །བརྩེ་ཆེན་མིག་དམར་སྒྲོན་མེའི་གཟི་འབར་བ། །སྲིད་པ་རླུང་གི་ཟས་ཅན་ཟས་སུ་བྱེད། །བསྟན་པ་རྫོགས་ལྡན་སྤྲིན་གྱི་གདེངས་ཀ་ལ། །རྣམ་འབྱེད་བདེ་འཐུང་དྲ་བས་འཁྱུད་པའི་གར། །སྙན་པར་གྲགས་པའི་རྔ་གསང་ཕྱོགས་བྲལ་དུ། །རྒོད་
པའི་ང་རོ་འོག་མིན་གནས་སུ་ལྡིར། །འཇིག་རྟེན་མཁྱེན་པ་ཉིན་མོར་བྱེད་པ་ཡིས། །མ་བཟུང་ཆེར་སྙིགས་ཐུན་གསུམ་མཚན་མོའི་སྨག །ཐུགས་རྗེའི་སྣང་བ་རལ་གྲིའི་རྣོ་རྒྱུན་གྱིས། །གཅོད་ལ་མཉམ་མེད་ཟླ་བ་རྒྱལ་བའི་སྲས། །ཐུགས་བསྐྱེད་དཔྱིད་ཀྱི་དཔལ་མོས་རྣམ་པ་བརྒྱར། །བསྐྱེད་བསྲིང་དབྱར་གྱི་ལང་ཚོ་མངོན་དགའི་དཔལ། །བསྟན་དང་འགྲོ་ལ་སྨན་དགུའི་མཛད་བཟང་གི །རྩི་སྨན་རིགས་ཀྱི་དབྱེ་བ་བསམ་ལས་འདས། །གང་གི་གསང་གསུམ་འཁོར་ལོ་ནམ་མཁའི་ཚད། །འཇིག་རྟེན་འཛིན་མའི་མཐའ་དང་དམིགས་མེད་དུ། །མཉམ་ཕྱིར་སྨྲ་བའི་རྒྱལ་པོ་མཐའ་དག་ཀྱང། །དུམ་བུར་བསྔགས་པའི་མེ་ཏོག་སིལ་མ་འཐོར། །ན་ཚོད་སྤྲིན་གྱི་རྒྱ་ལས་སྔོན་གནས་ཀུན། །ཐུན་ཚོད་གཞན་བཞིན་རྗེས་དྲན་དབྱངས་སྒྲོགས་པ། །དེ་ཚེ་མངོན་མཁྱེན་མདོངས་མཐས་རོལ་པ་ཀུན། །རྗེས་མཐུན་ལུང་གི་གྲེ་འགྱུར་ཀུན་ནས་འཚེར། །དགོན་གནས་རྟེན་དང་བརྟེན་པའི་ཁྱད་པར་སོགས། །མཐོང་བའི་ཆོས་ལས་མ་གཡོས་དུ་མས་ཀྱང། །བརྗེད་ངས་ལམ་དུ་སྟོར་རྣམས་ལེགས་གསུངས་ཚེ། །ངོ་མཚར་དད་པའི་པདྨ་འབུམ་དུ་བཞད། །འཇིགས་རུང་གཡུལ་གྱི་ཀླུང་ཆེན་བྲུབས་པ་ན། །ཁྱོད་ཀྱི་ཐུགས་རྗེའི་བྲག་རིར་འཆེལ་བ་ཡི། །བགྲང་ལས་སྐྱེ་བོར་སྲོག་གི་མཆོག་སྦྱིན་གྱིས། །གཞན་ཕན་ཐུགས་བསྐྱེད་འབྲས་བཟང་ངང་གིས་སྨིན། །ཡེ་ཤེས་ཟུར་ཕུད་ལྔ་པ་མི་ཡི་ལྷས། །ལང་ཚོ་ཁ་འབུས་མེ་ཏོག་གཞོན་ནུའི་རྒྱན། །ཐོད་བཅིངས་དགའ་བ་བརྒྱ་བའི་དཔལ་ཐོབ་ཚེ། །དྲེགས་ལྡན་ཉེ་དབང་བྱེ་བས་ཅིག་ཅར་བཏུད། །གཞོན་ནུའི་ལུས་ཅན་རྒྱལ་ཀུན་མེས་པོའི་བློ། །གང་ཞིག་རིགས་
པའི་རལ་གྲི་གདེངས་པ་ན། །རིང་དུ་སྦྱངས་པའི་ཡུས་ཀྱིས་རྟོག་གེའི་ཚོགས། །སྙིང་དང་ལྷན་ཅིག་ལྕེ་རྩེ་ལྐོག་མར་བྲོས། །ཟབ་ཅིང་རྒྱ་ཆེ་ཤིང་རྟ་ཆེན་པོའི་གཞུང། །རང་རྒྱུད་ཤར་གསུམ་སྡེ་བདུན་མདོ་དང་བཅས། །ཐོགས་མེད་གཟིགས་པའི་མཁྱེན་རབ་རྩེ་བརྒྱ་ཡིས། །སྨྲ་ངན་སྦྱིན་སྐྱེས་རྒོལ་བའི་སྤོབས་པ་བཅོམ། །རྨི་ལམ་ཟོལ་བརྟེན་ཡབ་གཅིག་ངག་གི་ལྷ། །ཡེ་ཤེས་མགོན་དང་སིང་ཧ་མུ་ཁ་སོགས། །གེགས་མེད་འཕྲིན་ལས་སྣང་བས་ས་གསུམ་དུ། །དགེ་ལེགས་སྦྱིན་པའི་སྐལ་བཟང་ཉེ་བར་མཚོན། །ཁྱད་པར་འདོད་པའི་གྲངས་ཀྱི་བགྲང་བྱའི་ཚེ། །འཇམ་དཔལ་སྙིང་པོས་རྟེན་འབྱུང་སེང་གེའི་རྒྱུད། །རྣམ་པར་འཁྲོལ་བས་དངོས་འཛིན་གཟིངས་བཅོམ་སྟེ། །མཐའ་བྲལ་ལྟ་བའི་གནས་ལུགས་རྗེན་པར་གཟིགས། །དབུ་ཚད་སེང་གེ་མཇིང་བསྣོལ་རིགས་གཞུང་གིས། །རིང་ནས་དངོས་པོར་ཞེན་པ་བག་ཆགས་བཅས། །སྦྱོང་བྱེད་རྒྱལ་བ་དགྱེས་པའི་ལམ་གཅིག་པུར། །མཐོང་བ་ཐ་མའི་དུས་འདིར་ཁྱོད་གཅིག་པུ། །འཁོར་ལོའི་མགོན་པོ་ཆོས་ཀྱི་རྒྱ་མཚོ་ལས། །དུས་དགྲའི་སྨིན་བྱེད་ནོར་བུའི་མཛོད་བླངས་ཚེ། །ལྟ་བའི་རྟ་གདོང་མེ་དང་བདེ་བ་ཆེ། །ཕྲད་པས་དགའ་བ་མཚོན་བྱེད་བདུད་རྩིར་འཕྱུར། །དངོས་གྲུབ་རྩ་བར་བྱང་ཆུབ་རྡོ་རྗེ་ཡིས། །བསྔགས་པ་གང་ལས་ནམ་ཡང་མི་གཡོ་བར། །ངེས་དོན་ལྷ་བརྒྱའི་སྣང་བ་འགོག་མེད་ལ། །ཕྱི་རོལ་གཟིགས་སྣང་ངོ་མཚར་སྙིང་པོ་མིན། །དགེ་ལྡན་བསྟན་པའི་སྲུང་མ་ཉི་མའི་བུས། །བགེགས་དཔུང་གཞོམ་སོགས་འབྱུང་འགྱུར་གཟིགས་པ་ཀུན། །མ་འཁྲུལ་རྨི་ལམ་སྣང་བར་
བཏགས་པ་ཡིས། །ཏིང་འཛིན་སྒྱུ་མའི་རོལ་པར་འཇུག་ཅིང་ལྡང། །བློ་བཟང་བསྟན་པ་ཉི་མའི་འོད་རླབས་ཀྱིས། །ཤེས་རབ་དར་དྲགས་འདབ་མ་རྒྱས་པའི་རྩེར། །བློ་བཟང་ཆོས་ཚུལ་སྦྲང་རྩིའི་བཅུད་འཛིན་ཡང། །ད་དུང་བཤེས་གཉེན་ཚོལ་ལ་ནོར་བཟང་བཞིན། །དེ་ཚེ་འཇམ་དབྱངས་བླ་མས་རྟེན་འབྲེལ་སྒོ། །ཕྱེ་སྟེ་རྒྱལ་བའི་དབང་པོ་ཡོངས་འཛིན་བཅས། །ཞལ་སྐྱིན་ཕོ་ཉར་མངགས་ནས་མགོན་ཁྱོད་ལ། །མདོ་སྔགས་ཆོས་ཀྱི་རྒྱལ་སྲིད་རྫོགས་པར་གཏད། །ཀ་མ་རཱུ་པར་བླ་མ་ཧེ་རུ་ཀ། །དཔའ་བོ་མཁའ་འགྲོའི་ཚོགས་བཅས་མངོན་སུམ་དུ། །ཚིམ་པ་དྲུག་ལྡན་དགའ་བས་རོལ་མཛད་ཀྱང་། །ཕྱི་རོལ་འཇའ་ཚོན་སྣང་བས་བྱིས་པ་བྲིད། །དྲང་ངེས་རྒྱུ་འབྲས་ཐེག་པའི་ཆུ་ཀླུང་འབུམ། །སྐྱེས་སྦྱངས་རྣམ་དཔྱོད་ཧུབ་ཀྱིས་དྲངས་པའི་བཅུད། །དགེ་ལྡན་རང་ལུགས་འཆད་རྩོད་རྩོམ་གསུམ་གྱི། །བདུད་རྩིར་འབེབས་པ་ས་གསུམ་སྐྱེ་དགུའི་གསོས། །ལྷ་ཆོས་བདུན་ལྡན་བཀའ་གདམས་གཙང་མའི་སྲོལ། །དུས་མཐར་འགག་མེད་སྲོག་ཏུ་ཁྱོད་གཟིགས་ནས། །རྒྱལ་བའི་འབྱུང་གནས་གསང་བ་ཌཱ་ཀིའི་ཚོགས། །འཛུམ་ཞལ་མངོན་གྱུར་དགྱེས་པའི་བརྡ་ཐབས་བསྟན། །ལྟ་བས་རྒྱས་བཏབ་རིམ་གཉིས་གསང་བའི་མཛོད། །མ་ཚང་མེད་པར་འཛིན་ཅིང་སྤེལ་བ་ཡིས། །དབང་པོའི་ཏོག་ལས་གཡར་དམ་ཐོད་བཅིངས་པ། །སྙིང་སྟོབས་ཆེན་པོའི་མཆེད་ཟླ་ཁྱོད་མིན་སུ། །སོར་རྟོག་རང་མདངས་མ་རུ་ཙེ་ཡི་བདག །ཙི་ནའི་ཡུལ་སྐྱོང་སྤྲིན་རིང་རྒྱལ་པོ་ཡང། །སྣང་བ་མཐའ་ཡས་བཀའ་རྟགས་ཕྱག་རྒྱ་ཡིས། །ནམ་ཡང་མི་འབྲལ་ལས་བཞིའི་བྲན་དུ་བཀོལ། །སོ་སོ་རིག་བཞིའི་རྩལ་
རྫོགས་ཏམྦུ་ར། །ཧོར་དང་མན་ཇུས་སྐད་ཀྱིས་བཀའ་བསྟན་ཀུན། །ཚིག་དོན་འཁྲུལ་མེད་རྒྱུད་དུ་འཁྲོལ་བ་ཡིས། །སྔོན་བྱོན་ལོ་པཎ་ཀུན་གྱི་སྙེམས་པ་ཕྲོགས། །ཐུགས་བསྐྱེད་གུར་ཀུམ་པིར་གྱི་བཀོད་པ་ཡིས། །ཁྲིམས་ལྡན་ངུར་སྨྲིག་འཆང་བ་འདུས་སྡེའི་ཕྲེང། །དབང་ཕྱོགས་ཀ་ཤིའི་རས་བཟང་ཁྱོན་འགེངས་པའ། །དགེ་ལེགས་མི་ཟད་བསྟན་ལ་རི་མོར་བྱས། །དབྱངས་ལྡན་ཁྲོས་པ་འདོད་ཁམས་དབང་ཕྱུག་མས། །ཕ་རོལ་བྱད་ཕུར་འབར་བའི་བྱིན་ཟ་སོགས། །ཉེར་འཚེ་བཟློག་ཅིང་གནོད་བྱེད་དྲུངས་ཕྱུང་སྟེ། །མ་དང་སྲིང་བཞིན་འདུ་འབྲལ་མེད་པར་བསྐྱངས། །སྡེ་བཞིའི་དཔལ་མངའ་ས་ཡི་ཚངས་པ་ཆེ། །ཐུན་མོང་ལམ་གྱིས་རྒྱུད་སྦྱངས་ཧེ་རུ་ཀའ། །དཀྱིལ་འཁོར་མཆོག་ཏུ་རྫོགས་པར་སྨིན་མཛད་དེ། །ངེས་དོན་རྡོ་རྗེའི་རིགས་ཀྱི་སྲས་སུ་བསྐྲུན། །དོན་དམ་གསང་བའི་གཏིང་མཐའ་མཚོན་མིན་ལ། །ཐུན་མོང་སྐྱེ་བའི་ཕྲེང་བ་དུ་མར་ཡང། །འཛིན་མ་འཛིན་བྱེད་གང་དང་འདབ་མ་ཟུང། །ཐུབ་བསྟན་ལུས་འདེགས་སྤྱོད་པ་གཅིག་ཏུ་གྱུར། །སད་རྨི་མཉམ་པར་རྒྱལ་དང་རྒྱལ་སྲས་ཀུན། །གདམས་ཤིང་རྗེས་བསྟན་བདུད་རྩིའི་ཆར་འབེབས་པས། །རིན་ཆེན་སེམས་ཀྱི་ཆུ་གཏེར་འཕྱུར་བ་ལས། །ཕྱིན་དྲུག་སྤྱོད་པའི་རླབས་ཀྱི་འཁྲི་ཤིང་གཡོ། །མན་ཇུས་རིགས་ཀྱི་པདྨ་ཁ་འབུས་ཀྱང། །ཚངས་སྤྱོད་གེ་སར་བཅུད་ཀྱིས་མ་བཟུང་བ། །ཁྱོད་ཀྱི་ཐུགས་རྗེ་ཉི་འོད་དང་འགྲོགས་པས། །བསླབ་གསུམ་སྦྲང་རྩིའི་སྙིང་པོ་ཅི་ཡང་རྒྱས། །ས་ཡི་འབྱེར་འཇིག་དཔལ་གྱི་དགྲ་ཟླ་ཀུན། །ཆོས་སྐྱོང་
བྲན་ཁོལ་དྲག་པོའི་ལས་སྦྱོར་གྱི། །མཐུ་སྟོབས་གོམ་པ་གཅིག་གིས་རྣམ་གནོན་ཁྱོད། །ཆོས་ལྡན་རྒྱལ་ཐབས་སྲུང་བའི་ཁོར་ཡུག་བཞིན། །ལྔ་ཕྲག་སྙིགས་མ་བདོ་བའི་ཆུ་གཏེར་ནང། །བསྟན་འགྲོའི་ཕན་བདེའི་ནོར་འཛིན་བྱིང་རྩོམ་པ། །དེ་ཚེ་ཐུགས་བསྐྱེད་རུས་སྦལ་གྱིས་བཀུར་ཡང། །བཀའ་དྲིན་བསྟན་འཛིན་ཡོངས་ལ་ཁུར་དུ་ལྕ། །མི་མཐུན་ཕྱོགས་གྱུར་བདུད་ལས་མཚན་མོའི་སྨག །མཛད་བཟང་ཐུན་མཚམས་འོད་ཀྱིས་ཉེར་བཅད་དེ། །གངས་ཅན་ལྷ་གཅིག་༸རྒྱལ་དབང་ཉིན་མོར་བྱེད། །སྔ་ཕྱིར་འདྲེན་པའི་ཁྱུང་སྔོན་སྐྱེས་དེ་གང། །འཇམ་མགོན་ཐུགས་བཅུད་ཁྲིད་ཆེན་བརྒྱད་དང་དྲུག །འདུས་པ་ལཱུ་དྲིལ་འཁོར་ཆེན་དབང་སོགས་ཀྱིས། །ས་ཡི་ཉི་ཟླ་རིག་འཛིན་སྡེ་གཉིས་སོགས། །མཁས་དགུ་ངེས་དོན་ཡབ་རྗེའི་སྲོལ་དུ་བཙུད། །ཁྱད་པར་རྣམ་སྣང་མངོན་པར་བྱང་ཆུབ་པའ། །བཀའ་སྲོལ་རིང་ནས་ནུབ་པ་སླར་གསོས་ཏེ། །བསྟན་པའི་འབྱུང་གནས་དབུས་འགྱུར་སྒྲ་བོ་ཆེར། །རྒྱུད་བཞི་ད་གཟོད་ཚང་བ་ཁྱོད་ཀྱི་དྲིན།། །།གཞན་ཡང་དབང་བཀའ་མན་ངག་བཤད་པའི་རྒྱུན། །ཡོངས་སུ་འཛིན་མེད་ཆེས་ཕྲར་གྱུར་པ་ཀུན། །བསྟན་པའི་ཁུར་ཆེན་འཁྱེར་བའི་མགོན་ཁྱོད་ཀྱིས། །རྨང་ནས་གསོས་ཕྱིར་རྒྱལ་བ་གཉིས་པ་བཞིན། །དེ་སླད་འབྲོག་རི་ཆེན་པོར་ཙོང་ཁ་པའི། །མངོན་སུམ་གཟིགས་ཤིང་གཞན་ཚེ་བདུད་རྩིའི་ཆུས། །སྒོ་གསུམ་སྒྲིབ་བྲལ་རྡོ་རྗེ་གསུམ་བདག་ཏུ། །བྱིན་རླབས་ཉེ་བརྒྱུད་སྲས་ཀྱི་ཐུ་བོར་གྱུར། །འཇམ་དཔལ་ཞིང་མཆོག་རྩེ་ལྔ་ལ་སོགས་སུ། །རྐྱེན་སེལ་ནོར་སྒྲུབ་ཆ་དང་མ་འདྲེས་པའི། །
ཟབ་ལམ་རྡོ་རྗེའི་རྣལ་འབྱོར་ལྷུར་མཛད་དེ། །གསང་ཆེན་ནོར་བུའི་ཐེམ་སྐས་མཆོག་ཏུ་འཛེགས། །བརྟན་གཡོའི་དངོས་ཀུན་ལྷན་སྐྱེས་བདེ་བ་ཆེར། །སྡོམ་མཛད་བཅོམ་ལྡན་དཔའ་བོའི་དབང་ཕྱུག་གིས། །མཆོད་ཆེན་མངོན་སུམ་ཉིད་དུ་སྩལ་བ་ཡི། །བྱིན་རླབས་བདེ་ཆེན་བདུད་རྩིའི་ཆང་གིས་མྱོས། །གཤིན་རྗེའི་གཤེད་པོའི་རིམ་གཉིས་མཐར་སོན་ཚེ། །སྟོན་པ་ཕུན་ཚོགས་འཁོར་ལོའི་མགོན་ཁྱོད་ལས། །བཀའ་སྲུང་མཆོག་གིས་གཡར་དམ་ཉེར་བླངས་ཤིང། །བསྙེན་སྒྲུབ་གསང་བའི་མན་ངག་རྩོམ་པར་བསྐུལ། །ཐར་ལམ་དངོས་སྟོབས་གཏན་ཚིགས་ཀྱིས་བསྒྲུབས་ཏེ། །མངོན་དུ་གྱུར་ནས་གཞན་ལ་འདོམས་པའི་ཚུལ། །འཇམ་དབྱངས་དངོས་ཀྱིས་གདམས་པ་འདི་འདྲ་བ། །ཁྱོད་དང་ཐོགས་མེད་ཞབས་ཀྱི་མ་འདྲེས་ཆོས། །རྣམ་གསུམ་རིགས་དབྱེའི་གཏན་ཚིགས་མཆོག་གྱུར་འདིས། །རྟག་ཏུ་ཤར་བའི་བླ་མ་ཡི་དམ་ལྷ། །མ་མགོན་སྲུང་མའི་ཚོགས་ཀྱི་སྣང་བ་ཀུན། །རང་མཚན་ཉིད་དེ་ཉམས་ཀྱི་དོ་ཟླ་མིན། །མདོར་ན་ཀུན་རྟོག་སྤྲོས་པ་ལས་རླུང་བཅས། །ཡོངས་དག་འོད་གསལ་ཐུགས་ཀྱི་མེ་ལོང་ངོས། །བདེ་ཆེན་རང་མདངས་རྒྱུ་འབྲས་སྐྱབས་ཀྱི་ལྷ། །འཕྲིན་ལས་རྣམ་བཞིའི་གར་གྱིས་འགྲན་པ་བཞིན། །གདུལ་བྱའི་སྐལ་བ་འབྱུང་འགྱུར་འཕོ་འཇིག་སོགས། །གནས་གསུམ་ཤེས་བྱའི་དཀྱིལ་འཁོར་མཐའ་དག་ལ། །གཟིགས་པ་ཚད་མར་གྱུར་བཞིན་འདོམས་མཛད་པ། །ཁྱོད་ནི་སྟོན་པ་བདེ་གཤེགས་སྐྱོབ་པ་ཉིད། །ཐུགས་རྗེ་ག་བུར་འོད་ཀྱིས་ཐུབ་པའི་བསྟན། །རིས་མེད་ཀུན་ལ་སྣང་བའི་མཆོག་སྦྱིན་ཞིང་། །སྙིང་པོ་ཀུནྡའི་དགའ་ཚལ་
བཞད་པ་ན། །ཡིད་མཚོ་དད་པའི་རླབས་ཀྱི་འཇོ་སྒེག་འཛིན། །དེ་ཕྱིར་གསང་གསུམ་རིན་ཆེན་འབྱུང་གནས་ལས། །དེད་དཔོན་བཤེས་གཉེན་དམ་པའི་བཀའ་དྲིན་གྱིས། །ཆ་ཙམ་བསོད་ནམས་སྐལ་བར་རྙེད་པ་འདི། །ཐར་འདོད་དོན་མཐུན་ཡོངས་ལ་མགྲོན་དུ་བཀྱེ། །དགེ་བས་མ་འོངས་ཚེ་རབས་པདྨོའི་འཕྲེང། །འདྲེན་མཆོག་ཉིན་བྱེད་འོད་ཀྱིས་མི་གཏོང་ཞིང། །ཐུན་མོང་ལམ་གྱི་འདབ་སྟོང་བཞད་པའི་དབུས། །རིམ་གཉིས་བདུད་རྩིའི་བཅུད་ཀྱིས་བསྟེན་པར་ཤོག །གྲངས་རིང་བསྐལ་པར་བརྣག་པའི་དགོངས་པ་བཞིན། །ཐུབ་བསྟན་ཡང་སྙིང་ཕྱོགས་མཐར་རྒྱས་པ་དང། །དེ་འཛིན་མཐའ་དག་དྲང་སྲོང་ཆེན་པོའི་ལམ། །ཁྱོད་ཀྱིས་གདམས་པའི་རྗེས་སུ་སློབ་གྱུར་ཅིག །མདོར་ན་སྟོབས་བཅུའི་དཔལ་མངའ་བླ་མ་ལྷའ། །གོ་འཕང་རྣམ་པར་རྒྱལ་བའི་གནས་ཐོབ་སྟེ། །སྲིད་མཚོ་ཉམ་ངར་བྱིང་བའི་འགྲོ་བ་ཀུན། །བདེ་ཆེན་ཐར་པའི་ལམ་ལ་འགོད་གྱུར་ཅིག །ཅེས་ངེས་པ་དོན་གྱི་བསྟན་པའི་སྲོག་ཤིང་རིགས་དང་དཀྱིལ་འཁོར་རྒྱ་མཚོའི་མངའ་བདག་ལྕང་སྐྱ་རོལ་པའི་རྡོ་རྗེ་ཡེ་ཤེས་བསྟན་པའི་སྒྲོན་མེ་དཔལ་བཟང་པོའི་ཞལ་སྔ་ནས་ཀྱི་གསང་བའི་རྣམ་པར་ཐར་པ་ཡོན་ཏན་རིན་ཆེན་གསལ་བའི་སྒྲོན་མེ་ཞེས་བྱ་བ་འདི་ནི། བསྟན་པའི་རྩ་ལག་དམ་པ་མཁྱེན་རབ་ཀྱི་དབང་ཕྱུག་ལྕང་ལུང་པཎྚི་ཏ་མཁན་པོ་ངག་དབང་བློ་བཟང་བསྟན་པའི་རྒྱལ་མཚན་གྱིས་གསུང་ནན་ཆེན་པོས་བསྐུལ་བ་ལྟར་༸བཙུན་པ་དཀོན་མཆོག་བསྟན་པའི་སྒྲོན་མེས་རྒྱལ་བའི་ལུང་གིས་ཟིན་པའི་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་སྦྱར་བའི་ཡི་གེ་པ་ནི་བློ་དང་ལྡན་པ་དཀོན་མཆོག་ཀུན་དགའ་འོ།། ༈ རྨད་བྱུང་གསང་གསུམ་སྣང་བ་དམ་པའི་མཛོད། །སྒྱུ་འཕྲུལ་དྲ་བའི་འོད་ཟེར་ཕྱོགས་ཀྱི་གོས། །བློ༷་བཟ༷ང་ལེགས་བཤད་འདབ་བརྒྱའི་དཔལ་འབར་བ། །ཆོ༷ས་ཀྱི༷་ཉི༷་མ༷་སྲིད་
ཞིའི་གཙུག་ན་རྒྱལ། །མཁྱེན་རབ་གཏིང་མཐའ་བྲལ་བའི་ཆུ་གཏེར་ཆེ། །དམིགས་མེད་སྙིང་རྗེའི་རླབས་ཕྲེང་རོལ་པ་ལས། །སྤྲུལ་བའི་ཟློས་གར་གཡས་འཁྱིལ་དུང་གི་སྒྲས། །ས་གསུམ་ཁྱབ་པའི་ངོ་མཚར་བརྗོད་ལས་འདས། །ཁྱད་པར་ཐུན་གསུམ་ཀློང་དུ་འཁྱམས་པའི་འགྲོར། །སྣང་བའི་མཆོག་སྦྱིན་ཟླ་ཤེལ་དྲི་མ་མེད། །ངར་འཛིན་སྨག་ཆེན་གཅོད་ལ་དཔའ་བ་ཡི། །ལྷན་སྐྱེས་འོད་དཀར་འཇིག་རྟེན་མཚན་མོའི་མགོན། །དཔལ་ལྡན་འཕྲིན་ལས་བཟང་པོའི་ག་བུར་རྒྱུན། །ཀླུ་སྒྲུབ་ལུགས་བཟང་རྒྱ་མཚོའི་བཅུད་དུ་འབེབས། །ནོར་འཛིན་ཁྱོན་ཡངས་སྐྱོང་བའི་ལེགས་བྱས་ཀྱི། །རི་མོའི་གཙུག་ལག་ཀུནྡའི་རྩེ་དགའ་འཛིན། །དེ་ནས་སྙིང་སྟོབས་རབ་བརྟན་མན་དྷ་རས། །ཟབ་ཡངས་ཆོས་ཀྱི་རྒྱ་མཚོ་བསྲུབས་པ་ལས། །བློ༷་བཟ༷ང་ཆོ༷ས་ཚུལ་ཕྱོགས་ཀྱི༷་འཁོར་ལོའི་ཁྱོན། །གསལ་བྱེད་བསྟན་པའི་ཉི༷་མ༷་དེང་འདིར་ཤར། །ཐུགས་བསྐྱེད་མ་ལ་ཡར་སྐྱེས་ཙན་དན་ལྗོན། །ལྷན་སྐྱེས་དམ་པའི་རང་བཞིན་མངར་བའི་བསུང། །བཀའ་ལུང་འཁྲུལ་བྲལ་དྲི་ཡི་བཞོན་པར་བཅས། །གདུང་སེལ་བདུད་རྩིའི་ཆོ་ག་དང་པོར་གྲུབ། །བཤེས་གཉེན་ལྷུན་པོའི་གདེངས་ཀ་མངོན་མཐོ་ཞིང། །མདོ་རྒྱུད་མན་ངག་ནོར་བུའི་ཚོགས་ཀྱིས་གཏམས། །འཕྲིན་ལས་རླབས་ཀྱི་ཞགས་པས་ནོར་འཛིན་བཅིངས། །དཔལ་ལྡན་བླ་མའི་ཞབས་ལ་གསོལ་བ་འདེབས། །བསླབ་གསུམ་རྣམ་པར་དག་པའི་དགའ་ཚལ་དུ། །མང་ཐོས་གར་གྱིས་རོལ་པའི་མེ་ན་ཀ། །མཁས་དབང་གཞོན་ནུའི་བརྟན་པ་འཕྲོག་བྱེད་པའ། །མཚུངས་མེད་བཤེས་གཉེན་དམ་པར་གསོལ་བ་འདེབས། །འཆད་པའི་རོལ་མོ་
སྐལ་བཟང་རྣ་བའི་རྒྱན། །རྩོད་ངག་རིགས་ལམ་རྡོ་རྗེའི་མེ་ཆར་སྤྲོ། །སྡེབ་ལེགས་རྩོམ་པའི་དབྱངས་ཀྱི་དཀྱིལ་འཁོར་རྫོགས། །སྨྲ་བའི་དབང་ཕྱུག་མཆོག་ལ་གསོལ་བ་འདེབས། །ཤེས་རབ་རལ་གྲིས་སྲིད་པའི་དགྲ་སྡེ་འཇོམས། །སྙིང་རྗེའི་འཛུམ་གྱིས་འགྲོ་ཀུན་ཐཪ་པར་འཁྲིད། །ཡང་དག་ལྟ་བས་འཁོར་འདས་མཉམ་པར་གཟིགས། །རྒྱལ་སྲས་དཔའ་བོ་མཆོག་ལ་གསོལ་བ་འདེབས། །དག་པའི་འཁོར་ལོ་འདབ་བརྒྱར་གྲོལ་བའི་དཔྱིད། །དངོས་ཀུན་བདེ་ཆེན་སྦྲང་རྩིའི་རོ་གཅིག་ཏུ། །མྱོང་བའི་ལྷན་སྐྱེས་དགའ་བས་རབ་མྱོས་པ། །རྡོ་རྗེ་འཛིན་པའི་གཙོ་ལ་གསོལ་བ་འདེབས། །རྣལ་འབྱོར་མ་དཔལ་ཐུགས་རྗེའི་གློག་ཕྲེང་ཅན། །ལེགས་བཤད་སྤྲིན་སྔོན་རོལ་བའི་གདེངས་ཀ་ལས། །གཞན་ཕན་འཕྲིན་ལས་འདོད་དགུའི་ཆར་དུ་བསྙིལ། །མཚུངས་མེད་བླ་མ་མཆོག་ལ་གསོལ་བ་འདེབས། །བློ༷་བཟ༷ང་ཡེ་ཤེས་ལྔ་ཡི་དཀྱིལ་འཁོར་རྫོགས། །ཟབ་རྒྱས་ཆོ༷ས་ཀྱི༷་འོད་ཟེར་འབུམ་ཕྲག་འགྱེད། །སྨྲ་བའི་ཉི༷་མ༷་ཐེག་གསུམ་པདྨོའི་གཉེན། །སྐྱབས་གསུམ་ཀུན་འདུས་ངོ་བོར་གསོལ་བ་འདེབས། །གང་གི་ཐུགས་རྗེའི་ཉི་འོད་རེག་པ་ཡིས། །མཐར་བྱེད་ཀུནྡའི་གདེངས་ཀ་ཟུམ་བྱེད་པ། །འཆི་མེད་ཚེ་ལ་དབང་བའི་ལྷ་ཚོགས་མཐུས། །དཔལ་ལྡན་བླ་མ་བསྐལ་བརྒྱར་ཞབས་བརྟན་ཤོག །བཤེས་གཉེན་རི་ཡི་དབང་པོ་རབ་བརྟན་ཅིང། །འཕྲིན་ལས་ཉི་ཟླའི་འོད་ཀྱིས་ས་གསུམ་ཁྱབ། །བསྟན་འཛིན་གསེར་རིའི་ཕྲེང་བས་ཡོངས་བསྐོར་ཏེ། །ཐུབ་བསྟན་ས་ཆེན་རྟག་ཏུ་མཛེས་གྱུར་ཅིག །ཚེ་རབས་ཕྲེང་བར་ཁྱོད་ཞབས་པདྨོའི་རྡུལ། །སྤྱི་བོར་རེག་པའི་སྐལ་
བཟང་མི་ཉམས་ཤིང་། །སྲིད་དང་ཞི་བའི་མཐའ་ལས་ཡོངས་བཟུང་སྟེ། །རྣམ་དག་ལམ་བཟང་མངོན་དུ་འགྱུར་བར་ཤོག །བདག་གཞན་འགྲོ་ལ་ལེགས་པའི་དཔྱིད་འཇོ་བའི། །རྣམ་དཀར་ལེགས་བྱས་སྨོན་པའི་དངོས་པོ་ཀུན། །བླ་མ་མཆོག་གསུམ་ཐུགས་རྗེ་བདེན་པའི་མཐུས། །གེགས་མེད་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་ཡོངས་རྫོགས་བསྟན་པའི་མངའ་བདག་དཀྱིལ་འཁོར་འཁོར་ལོའི་མགོན་པོ་ཁྱབ་བདག་རྡོ་རྗེ་འཆང་༸བློ་བཟང་ཆོས་ཀྱི་ཉི་མའི་ཞལ་སྔ་ནས་ཀྱི་ཞབས་བརྟན་གསོལ་འདེབས་འདི་ནི། བསྟན་པའི་གསལ་བྱེད་སྤྲུལ་བའི་སྐུ་བློ་བཟང་བསྟན་འཛིན་དར་རྒྱས་དང། རིགས་ལམ་སྨྲ་བ་དཀོན་མཆོག་རྒྱ་མཚོ་བཅས་ཀྱིས་བསྐུལ་ཞིང། རང་ཉིད་ཀྱང་དད་པའི་ཡིད་ཀྱིས་མཚམས་སྦྱར་བ་ལ་བརྟེན་ནས་བཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པའོ།། ༈ ཕུན་ཚོགས་དགེ་ལེགས་བྱེ་བའི་གཟི་འོད་ཀྱིས། །སྲིད་ཞིའི་དཀྱིལ་འཁོར་རྒྱས་པར་འགེངས་མཛད་པ། །བླ་མ་མཆོག་གསུམ་ཡི་དམ་རྒྱ་མཚོ་ཡིས། །ཕན་བདེའི་སྣང་བ་དམ་པའི་མཆོག་སྦྱིན་མཛོད། །བློ༷་བཟ༷ང་རྒྱལ་བ་གཉིས་པའི་ཐུགས་ཀྱི་བཅུད། །ཐུ༷བ་བསྟ༷ན་ཡང་སྙིང་མདོ་སྔགས་དམ་ཆོ༷ས་ཀྱི༷། །རྒྱ༷ལ་མཚ༷ན་བསྒྲེང་ཕྱིར་སྐྱེ་བའི་གར་མཛད་པ། །འདྲེན་མཆོག་སྤྲུལ་བའི་སྐུ་ལ་གསོལ་བ་འདེབས། །བློ༷་གྲོས་དྲི་མེད་གསེར་བཟ༷ང་འཁོར་ལོ་ཡིས། །ཐུ༷བ་བསྟ༷ན་ཡོངས་ལ་མངའ་བསྒྱུར་ཆོ༷ས་ཀྱི༷་རྗེ། །རྒྱ༷ལ་ཀུན་སྤྱི་གཟུགས་རྗེ་བཙུན་བླ་མ་ཡི། །མཚ༷ན་དཔེའི་སྣང་བརྙན་བསྐལ་བརྒྱར་རྟག་བརྟན་ཤོག །མཆོག་སྤྲུལ་དམ་པའི་སྐུ་ཚེ་མཛད་འཕྲིན་དང། །
བསྟན་པའི་བྱ་བ་དབྱར་མཚོ་ལྟར་རྒྱས་ཤིང་། །བསྟན་འཛིན་བུ་སློབ་ས་སྟེང་གང་བ་ཡིས། །བསྟན་འགྲོའི་དོན་ཆེན་ལྷུན་གྱིས་གྲུབ་གྱུར་ཅིག །བྱིན་རླབས་འོད་སྟོང་འབར་བའི་གདེངས་ཀ་ཡིས། །དུས་ཀྱི་མུན་པ་མཐར་བྱེད་ཚེ་ཡི་ལྷ། །རྣམ་གསུམ་ཐུགས་རྗེའི་བདེན་པ་ཆེན་པོའི་མཐུས། །མཆོག་སྤྲུལ་དམ་པའི་སྐུ་ཚེ་བསྐལ་བརྒྱར་སྤེལ། །ཕྱག་དྲུག་མགོན་པོ་ལས་གཤིན་དཔལ་མགོན་དང། །མ་ཅིག་དཔལ་ལྡན་ལྷ་མོ་འཁོར་བཅས་ཀྱིས། །མི་ཕྱེད་རྡོ་རྗེའི་གཡར་དམ་ཉེར་དགོངས་ཏེ། །འགལ་རྐྱེན་སེལ་ཞིང་མཐུན་རྐྱེན་མ་ལུས་སྒྲུབས། །བླ་མ་མཆོག་གསུམ་ཐུགས་རྗེ་བྱིན་རླབས་དང། །ཡི་དམ་ཆོས་སྲུང་རྒྱ་མཚོའི་བདེན་སྟོབས་ཀྱིས། །སྨོན་པ་ཇི་བཞིན་ལྷུན་གྱིས་གྲུབ་པ་ཡི། །དགེ་མཚན་ནོར་འཛིན་ཀུན་ཏུ་ཁྱབ་གྱུར་ཅིག །ཅེས་བསྟན་འགྲོའི་དཔུང་གཉེན་དམ་པ་མཚུངས་བྲལ་མཆོག་གི་སྤྲུལ་བའི་སྐུ་རིན་པོ་ཆེ་བློ་བཟང་ཐུབ་བསྟན་ཆོས་ཀྱི་རྒྱལ་མཚན་དཔལ་བཟང་པོའི་ཞབས་བརྟན་གསོལ་འདེབས་འདི་ནི། མཁས་བཙུན་བཟང་པོའི་བདག་ཉིད་དགོན་ལུང་ཁྲི་པ་འདན་མ་ཞབས་དྲུང་རིན་པོ་ཆེས་གཙོས་ལས་སྣེ་མོ་གྲྭ་རྒན་འདུས་སྤྱི་ནས་བསྐུལ་བ་ལྟར་༸བཙུན་པ་དཀོན་མཆོག་བསྟན་པའི་སྒྲོན་མེས་དགོན་ལུང་ བྱམས་པ་གླིང 
་དུ་བྲིས་པའོ།། ༈ བློ༷་ལྡན་སྐལ་བཟ༷ང་གདུལ་བྱའི་ཚོགས་རྣམས་ལ། །ཐུ༷བ་བསྟ༷ན་ནོར་བུའི་དགའ་སྟོན་འགྱེད་པའི་ཕྱིར། །བསམ་བཞིན་སྐྱེ་བའི་ཟློས་གར་ལྷུར་མཛད་པ། །ཆོ༷ས་ཀྱི༷་རྒྱ༷ལ་མཚ༷ན་ཞབས་ལ་གསོལ་བ་འདེབས། །འདིའང་འཁྲུངས་རབས་གསོལ་འདེབས་ཀྱི་ཁ་སྐོང་དུ་འདི་ལྟ་བུ་ཞིག་དགོས་ཞེས་ཞུས་ཏེ་དེ་སྐབས་གནང་བ་ཡིན། ༈ དགེ་ལེགས་འདབ་སྟོང་བཞད་པའི་པདྨ་དཀར། །འདུན་ལྡན་ཐུགས་བསྐྱེད་སྨིན་པའི་གེ་སར་ལས། །ཕུན་ཚོགས་འཕྲིན་ལས་མངར་བའི་བསུང་འཕྲོ་
བ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ངག་དབང་དབྱངས་ཅན་མགྲིན་མཚོར་རྟག་རོལ་ཅིང། །བསྟན་པའི་གནད་རྫོགས་བདུད་རྩིས་ཐུགས་ཀ་གཏམས། །སྒྲུབ་པའི་རྒྱལ་མཚན་འཛིན་ལ་ཟླ་བྲལ་བ། །མཚུངས་མེད་བཤེས་གཉེན་དམ་པར་གསོལ་བ་འདེབས། །གང་གི་ཐུགས་རྗེ་ཟླ་བའི་མ་མ་ལས། །གསར་དུ་ཚེས་པའི་ཡང་སྲིད་བདུད་རྩིའི་འོད། །ཐུབ་བསྟན་ཀུ་མུད་བཞད་པའི་དཔལ་ཡོན་ཅན། །མཆོག་སྤྲུལ་དམ་པའི་ཞབས་ལ་གསོལ་བ་འདེབས། །བློ་བཟང་རྒྱལ་བསྟན་དབྱར་སྐྱེས་ལྡིང་ཁང་རྩེར། །ལུང་རིགས་སྒྲ་བརྒྱ་རྒོད་པའི་དུན་དུ་བྷ། །བརྡུངས་པས་ཕྱོགས་ཀྱི་འཁོར་ལོ་འགེངས་མཛད་པ། །དཀོན་མཆོག་བསྟན་པའི་སྒྲོན་མེར་གསོལ་བ་འདེབས། །དུས་ཀྱི་མཐར་ཡང་བུ་རམ་ཤིང་པའི་བསྟན། །རྣམ་དཔྱོད་དཔུང་པས་འཛིན་ལ་སྙིང་སྟོབས་མཐུ། །ཟླ་བྲལ་འཇིགས་མེད་སྨྲ་བའི་སེང་གེ་ཁྱོད། །བགྲང་ཡས་བསྐལ་པ་རྒྱ་མཚོར་ཞབས་བརྟན་ཤོག །བསླུ་མེད་རིན་ཆེན་གསུམ་གྱི་བདེན་པའི་མཐུ། །ཡི་དམ་ཆོས་སྲུང་རྒྱ་མཚོའི་ནུས་མཐུ་དང། །དཔོན་སློབ་མི་ཕྱེད་དམ་ཚིག་རྡོ་རྗེའི་མཐུས། །སྨོན་པའི་རེ་འབྲས་གཡུར་དུ་ཟ་བར་ཤོག །ཚེ་རབས་ཕྲེང་བར་ཁྱོད་ཀྱིས་རྗེས་འཛིན་ཞིང། །མཉེས་པ་གསུམ་གྱིས་མཉེས་པར་བསྒྲུབས་པ་ལས། །གསུང་གི་བདུད་རྩིས་ཐར་པའི་སྲོག་བཟུང་སྟེ། །འགྲོ་བ་ཀུན་ཀྱང་སྲིད་ལས་སྒྲོལ་བར་ཤོག །ཅེས་པ་འདི་ནི་རང་གི་གམ་བཅར་རྣམས་ཀྱིས་བསྐུལ་ངོར་༸དཀོན་མཆོག་བསྟན་པའི་སྒྲོན་མེས་ཐེ་བོ་ཆུ་ཚན་ཁར་བྲིས། ༈ མཁའ་མཉམ་འགྲོ་ལ་
ཕན་བདེའི་ལྷག་བསམ་གྱིས། །ཐུབ་དབང་བསྟན་པའི་སྒྲོན་མེ་ས་གསུམ་དུ། །གསལ་བར་མཛད་པའི་ཐུགས་བསྐྱེད་ལྷུན་གྱིས་གྲུབ། །རྗེ་བཙུན་བླ་མའི་ཞབས་ལ་གསོལ་བ་འདེབས། །སྔོན་ཚེ་བློ་བཟང་རྒྱལ་བ་གཉིས་པ་ཡི། །ཐུགས་བཅུད་སྙིང་པོ་དཔལ་ལྡན་འདུས་པ་སོགས། །གསང་ཆེན་གདམས་པའི་བཀའ་བབས་ཆོས་ཀྱི་རྗེ། །ཤེས་རབ་སེང་གེའི་ཞབས་ལ་གསོལ་བ་འདེབས། །སླར་ཡང་དགེ་ལྡན་བསྟན་པ་མཐའ་དག་དང། །ཁྱད་པར་དཔལ་ལྡན་རིག་པ་འཛིན་པའི་སྡེ། །འཛིན་སྐྱོང་སྤེལ་བའི་འཕྲིན་ལས་ཟླ་མེད་པ། །དགེ་འདུན་ཕུན་ཚོགས་ཞབས་ལ་གསོལ་བ་འདེབས། །མདོ་སྨད་ནོར་འཛིན་ཡངས་པའི་ཐིག་ལེ་རུ། །བློ་བཟང་འཇམ་དཔལ་སྙིང་པོའི་ལུང་རྟོགས་བསྟན། །བཤད་དང་སྒྲུབ་པས་གསལ་མཛད་ངག་གི་དབང། །བསྟན་པའི་རྒྱལ་མཚན་ཞབས་ལ་གསོལ་བ་འདེབས། །སྔོན་རབས་དམ་པའི་རྣམ་ཐར་གཙང་མའི་སྲོལ། །ཇི་བཞིན་ཐུབ་བསྟན་སྤེལ་བའི་ཁུར་བཞེས་ཏེ། །འཆད་རྩོད་རྩོམ་པའི་འོད་སྣང་འབུམ་འགྱེད་པ། །དཀོན་མཆོག་བསྟན་པའི་སྒྲོན་མེར་གསོལ་བ་འདེབས། །མི་ཤིགས་རྡོ་རྗེའི་ཚེ་ཡི་མཆོག་སྦྱིན་པ། །སྣང་བ་མཐའ་ཡས་རྣམ་རྒྱལ་སྒྲོལ་མ་སོགས། །ཡི་དམ་ལྷ་དང་ཆོས་སྐྱོང་སྲུང་མའི་མཐུས། །དཔལ་ལྡན་བླ་མ་བསྐལ་བརྒྱར་ཞབས་བརྟན་ཤོག །སྐྱེ་དང་སྐྱེ་བར་རྗེ་བཙུན་བླ་མ་ཡི། །ཞབས་སེན་འབྲལ་མེད་གཙུག་གིས་བསྟེན་པ་དང། །ཚང་ལ་མ་ནོར་གདམས་པའི་བདུད་རྩིའི་བཅུད། །རྫོགས་པར་མྱོང་བའི་སྐལ་བཟང་ཐོབ་པར་ཤོག །འདི་སྣང་ཞེན་ལོག་སྲིད་ལས་ངེས་འབྱུང་
དང། །གཞན་ཕན་བྱང་སེམས་ཕྱིན་དྲུག་བསྡུ་བཞིའི་སྤྱོད། །རྟག་ཆད་མཐའ་བྲལ་དབུ་མའི་ལྟ་བ་སོགས། །ཟབ་རྒྱས་ལམ་གྱི་བགྲོད་པ་མཐར་ཕྱིན་ཤོག །ཐུན་མོང་ལམ་སྦྱང་གསང་ཆེན་སྒོར་ཞུགས་ཏེ། །དམ་ཚིག་ལ་གནས་རིམ་གཉིས་རྣལ་འབྱོར་གྱིས། །བདེ་ཆེན་ཟུང་འཇུག་གོ་འཕང་མྱུར་ཐོབ་ནས། །མ་ལུས་འགྲོ་བ་སྲིད་ལས་སྒྲོལ་གྱུར་ཅིག །ཅེས་པ་འདི་ནི་སྤོང་བ་བསམ་གཏན་གྱི་འཁོར་ལོ་ལ་གཅིག་ཏུ་གཞོལ་བའི་རི་ཁྲོད་པ་དཀོན་མཆོག་རྒྱལ་མཚན་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ཕུལ་བྱུང་ཟབ་རྒྱས་གདམས་པའི་དགའ་སྟོན་གྱིས། །སྐལ་བ་ཇི་བཞིན་སྨིན་ཅིང་གྲོལ་མཛད་པ། །བཀའ་དྲིན་མཚུངས་མེད་སྐྱབས་གསུམ་ངོ་བོ་ཉིད། །དཀོན་མཆོག་བསྟན་པའི་སྒྲོན་མེར་གསོལ་བ་འདེབས། །ཞེས་པ་འདི་ནི་མཚུངས་བྲལ་བསྟན་པའི་རྩ་ལག་དམ་པ་ཀིརྟི་སྤྲུལ་བའི་སྐུ་རིན་པོ་ཆེ་ནས་དབང་སོ་སོའི་བརྒྱུད་འདེབས་ཀྱི་མཇུག་ཏུ་སྦྱོར་རྒྱུ་ཞིག་དགོས་ཞེས་བཀས་བསྐུལ་བ་ལྟར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ཡོན་ཏན་འབྱུང་གནས་མཚན་ལྡན་དགེ་བའི་བཤེས། །རྣམ་མང་བསམ་དང་སྦྱོར་བས་གུས་བསྟེན་པས། །ཚང་ལ་མ་ནོར་གདམས་པའི་མཛོད་བརྙེས་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །མང་ཐོས་རལ་པ་གསིག་པའི་གདོང་ལྔ་པ། །འཇིགས་མེད་རྣམ་པར་དཔྱོད་པའི་གད་རྒྱངས་ཀྱི། །སྨྲ་ངན་སྤོབས་པ་འཕྲོག་པའི་དཔལ་ཡོན་ཅན། །ཐུབ་བསྟན་གངས་རི་སྐྱོང་ལ་གསོལ་བ་འདེབས། །སངས་རྒྱས་ལས་ཀྱང་དཀོ༷ན་པའི་ཐེག་མཆོ༷ག་ཆོས། །ཟབ་ཅིང་རྒྱ་ཆེའི་
བསྟ༷ན་པ༷འི་སྙིང་པོ་ཀུན། །ལེགས་བཤད་སྒྲོ༷ན་མེ༷འི་འོད་ཀྱིས་གསལ་མཛད་པ། །བཀའ་དྲིན་མཚུངས་མེད་ཞབས་ལ་གསོལ་བ་འདེབས། །མིང་ཙམ་ལྷག་མར་གྱུར་པའི་བསྟན་པ་འདི། །ཆ་ཤས་ཙམ་ཡང་མཁའ་མཉམ་ལུས་ཅན་གྱི། །ཕན་བདེའི་སྲོག་ཏུ་ངེས་ཕྱིར་མགོན་པོ་ཁྱོད། །ཞབས་པད་བསྐལ་པ་རྒྱ་མཚོར་རྟག་བརྟན་ཤོག །བསྟ༷ན་སྲུང་རྒྱ་མཚོའི་མཐུ་དང་བདེན་སྟོབས་ཀྱིས། །བསྟ༷ན་པའི་དཔལ་གྱུར་བླ་མའི་ཞབས་བརྟན་ཅིང། །བསྟ༷ན་འཛིན་ཐུགས་མཐུན་བཤད་སྒྲུབ་འཕེལ་བ་ཡིས། །བསྟ༷ན་པ་རིན་ཆེན་ཕྱོགས་བཅུར་རྒྱས་གྱུར་ཅིག །ཅེས་པ་འདི་ནི་མགྲོན་གཉེར་དཀའ་བཅུ་ངག་དབང་དཔལ་བཟང་དང་མཆོད་དཔོན་ངག་དབང་ཆོས་ལྡན་གཉིས་ཀྱིས་སྔར་ནས་བསྐུལ་བའི་ཐོག །༸རྗེ་བཙུན་སྤྲུལ་བའི་སྐུ་རིན་པོ་ཆེ་ནས་བཀའ་གནང་ཞིང་ཕྱག་མཛོད་ཆོས་རྗེ་དང་དགེ་རྒན་སོགས་ཀྱིས་ཀྱང་བསྐུལ་མ་བྱུང་བར་བརྟེན་༸བཙུན་པ་དཀོན་མཆོག་བསྟན་པའི་སྒྲོན་མེས་ཐུའུ་བཀྭན་བླ་བྲང་བཀྲ་ཤིས་འོད་འབར་དུ་བྲིས་པའོ།། ༈ བསླུ་མེད་དཀོ༷ན་མཆོ༷ག་ཐུགས་རྗེའི་མཁའ་དབྱིངས་ལས། །བློ་བཟང་བསྟ༷ན་པ༷འི་འོད་སྣང་འབུམ་ཕྲག་གིས། །སྙིང་གི་མུན་པ་སེལ་བའི་སྒྲོ༷ན་མེ༷་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །དུས་འདི་ནས་བཟུང་སྐྱེ་བའི་ཕྲེང་བ་རུ། །ཁྱོད་ཞབས་པདྨོ་འབྲལ་མེད་གུས་བསྟེན་ཅིང། །ལེགས་གསུང་ཟབ་དང་རྒྱ་ཆེའི་བདུད་རྩིའི་བཅུད། །ངོམས་པ་མེད་པར་རྟག་ཏུ་མྱོང་གྱུར་ཅིག །དེ་ཡི་མཐུ་ལས་རྒྱུ་འབྲས་ཐེག་པའི་ལམ། །འཁྲུལ་བྲལ་ཚང་ལ་མ་ནོར་བསྟན་པའི་གནད། །མཐའ་དག་ཇི་བཞིན་ཉམས་སུ་བླངས་པ་ཡིས། །ཟུང་འཇུག་གོ་འཕང་བདེ་བླག་ཐོབ་གྱུར་ཅིག །ཅེས་པ་འདི་ནི་མཁས་བཙུན་བཟང་པོའི་བདག་ཉིད་ཀ་རིང་སྤྲུལ་བའི་སྐུ་དཀོན་
མཆོག་བསྟན་འཛིན་རྒྱལ་མཚན་གྱིས་བསྐུལ་བའི་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་གྲོ་ཚང་དགོན་དུ་བྲིས་པའོ།། ༈ འཇིག་རྟེན་གསུམ་ན་དཀོ༷ན་པའི་རིན་ཆེན་མཆོ༷ག །འཁྲུལ་བྲལ་བསྟ༷ན་པ༷འི་སྙིང་པོ་མདོ་སྔགས་ཀྱི། །ལེགས་བཤད་སྒྲོ༷ན་མེ༷ས་ཐར་ལམ་གསལ་མཛད་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །བླ་མ་ལྷག་པའི་ལྷ་ཡི་བྱིན་རླབས་མཐུས། །རྣམ་དག་ཐོས་བསམ་སྒོམ་པ་མཐར་ཕྱིན་ཅིང། །གེགས་མེད་བཤད་སྒྲུབ་བྱ་བའི་དཔུང་པ་ཡིས། །ཐུབ་བསྟན་རྒྱལ་མཚན་རིང་དུ་འཛིན་གྱུར་ཅིག །ཚེ་རབས་ཕྲེང་བར་ཁྱོད་ཀྱིས་རྗེས་བཟུང་མཐུས། །ཐུན་མོང་ལམ་གྱི་གཙོ་བོ་རྣམ་གསུམ་དང། །གསང་ཆེན་ཐེག་པའི་ལམ་བཟང་རིམ་བགྲོད་ནས། །མཐར་ཐུག་སྐུ་བཞིའི་གོ་འཕང་ཐོབ་པར་ཤོག །ཅེས་པ་འདི་ནི་རྨད་དུ་བྱུང་བའི་མཁྱེན་རབ་ཀྱི་དབང་ཕྱུག་སྐྱེས་མཆོག་དམ་པ་གྲོ་ཚང་ཁྲི་རྒན་སྤྲུལ་སྐུ་བློ་བཟང་དཀོན་མཆོག་ཉི་མས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་རྡོ་རྗེ་འཆང་གི་ལྷ་ཁང་ཉེ་འདབས་སུ་བྲིས་པའོ།། ༈ བླ་མ་ཡི་དམ་དཀོ༷ན་མཆོ༷ག་རིན་ཆེན་གསུམ། །སྤྱི་དང་ཁྱད་པར་ཁྱབ་བདག་འཁོར་ལོའི་མགོན། །བཀའ་དྲིན་མཉམ་མེད་བསྟ༷ན་པ༷འི་སྒྲོ༷ན་མེ༷་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྐྱབས་གནས་མ་ལུས་འདུས་པའི་ངོ་བོ་རུ། །རྩེ་གཅིག་གུས་པའི་ཡིད་ཀྱིས་ཁྱོད་བསྟེན་ན། །འདི་ཕྱི་བར་དོའི་འཇིགས་པ་ཀུན་སེལ་ཞིང། །རྣམ་དཀར་འདོད་དོན་འགྲུབ་པར་བྱིན་གྱིས་རློབས། །ཇི་སྲིད་བྱང་ཆུབ་རྡོ་རྗེའི་གནས་ཐོབ་པ། །དེ་སྲིད་འདྲེན་པ་ཁྱོད་ཀྱིས་རྗེས་འཛིན་ཞིང། །གདམས་དང་རྗེས་སུ་བསྟན་པའི་བདུད་རྩི་ཡིས། །
ཡང་དག་ལམ་གྱི་ལུས་སྟོབས་རྒྱས་གྱུར་ཅིག །མི་ཁོམ་ངན་སོང་སྐྱེ་བའི་རྒྱུན་བཅད་དེ། །རྟག་ཏུ་འཁོར་ལོ་བཞི་ལྡན་རྟེན་ཐོབ་ནས། །ཚང་ལ་མ་ནོར་མདོ་སྔགས་ལམ་བཟང་ལ། །རྒྱལ་བའི་དགོངས་པ་ཇི་བཞིན་སློབ་གྱུར་ཅིག །བསླུ་མེད་བླ་མ་ལྷ་ཡི་ཐུགས་རྗེའི་མཐུས། །གནས་སྐབས་མཐར་ཐུག་དོན་ཀུན་ལྷུན་གྲུབ་ཅིང། །རིང་མིན་སྟོབས་བཅུ་མངའ་བའི་དཔལ་ཐོབ་ནས། །མཁའ་མཉམ་ལུས་ཅན་སྲིད་ལས་སྒྲོལ་གྱུར་ཅིག །ཅེས་པ་འདི་ནི་རྣམ་དཔྱོད་མཆོག་ཏུ་ཡངས་པ་གྲོ་ཚང་ཆོས་རྗེ་དགེ་ལེགས་དབང་རྒྱལ་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་མཛོ་མོ་མཁར་དུ་བྲིས་པའོ།། ༈ ཟབ་ཅིང་རྒྱ་ཆེའི་ལེགས་བཤད་གདོང་ལྔའི་རྒྱུད། །སྲིད་པའི་ཀུན་སྦྱོར་གྲུ་གཟིངས་མཐར་བྱེད་ཀྱང་། །སྐལ་བཟང་རྣ་བར་བདུད་རྩིའི་དཔྱིད་འཇོ་བ། །ཟླ་མེད་བཤེས་གཉེན་དམ་པར་གསོལ་བ་འདེབས། །བདེ་ཆེན་ཐུགས་རྗེའི་བདག་ཉིད་ཀ་ལཱ་ཤས། །རྨད་བྱུང་འཆི་མེད་བདུད་རྩིའི་དབང་སྦྱིན་པ། །ཡི་དམ་རྒྱལ་བ་རྒྱ་མཚོ་བཅས་པའི་མཐུས། །རྗེ་བཙུན་བླ་མ་བསྐལ་བརྒྱར་ཞབས་བརྟན་ཤོག །མ་འོངས་ཚེ་རབས་པདྨ་དཀར་པོའི་འཕྲེང། །བཤེས་གཉེན་ཉིན་བྱེད་བདག་པོས་ཡོངས་བཟུང་སྟེ། །གསུང་གསང་འོད་བརྒྱའི་སྣང་བ་དང་འགྲོགས་པས། །ཐོས་བསམ་སྒོམ་པའི་སྦྲང་རྩི་སྨིན་གྱུར་ཅིག །རྣམ་དག་ཆོས་འདུལ་སྤྱོད་པ་ལ་གནས་ཏེ། །ངེས་འབྱུང་བྱང་སེམས་ཡང་དག་ལྟ་བ་སོགས། །ཚང་ལ་མ་ནོར་རྒྱུ་འབྲས་ཐེག་པ་ཡིས། །ཡང་དག་ལམ་གྱི་བགྲོད་པ་མཐར་ཕྱིན་ཤོག །བསླུ་མེད་དཀོན་མཆོག་རྣམ་གསུམ་བདེན་པའི་མཐུས། །བསྟན་པའི་སྒྲོན་མེ་ཡུན་དུ་གནས་པ་དང། །བཤད་སྒྲུབ་ཟུང་
འཇུག་བསྟན་པའི་བྱ་བ་ཀུན། །དབྱར་གྱི་ཆུ་གཏེར་ཇི་བཞིན་རྒྱས་གྱུར་ཅིག །ཅེས་པ་འདི་ནི་དད་བརྩོན་བློ་དང་ལྡན་པ་རབ་འབྱམས་པ་ཡེ་ཤེས་ཤེས་རབ་ཀྱིས་ལི་ཏིང་ཆེ་ལེགས་ལྷ་དར་བཅས་ནན་ཆེར་བསྐུལ་བའི་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དཀོ༷ན་མཆོ༷ག་རྒྱལ་བའི་ཐུགས་རྗེ་མེ་ཤེལ་ཁམས། །འཁྲུལ་བྲལ་མདོ་སྔགས་བསྟ༷ན་པ༷འི་འོད་བརྒྱ་པ། །འགྲོ་བློའི་རྨོངས་མུན་སེལ་བའི་སྒྲོ༷ན་མེ༷་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །མཆོག་གསུམ་མཐུ་དང་ཆོས་དབྱིངས་བདེན་པའི་མཐུས། །འདྲེན་མཆོག་དམ་པའི་སྐུ་ཚེ་རབ་བརྟན་ཅིང། །དུས་འདི་ནས་བཟུང་བྱང་ཆུབ་སྙིང་པོའི་བར། །འབྲལ་མེད་དགྱེས་བཞིན་རྗེས་སུ་འཛིན་པར་ཤོག །སྒོ་གསུམ་དགེ་བ་ཇི་སྙེད་བསགས་པ་ཀུན། །ཡང་དག་ལམ་གྱི་རིམ་པ་མྱུར་བགྲོད་དེ། །བླ་མེད་བྱང་ཆུབ་གོ་འཕང་མཆོག་ཐོབ་ནས། །མཁའ་མཉམ་འགྲོ་ཀུན་འདྲེན་པའི་རྒྱུར་གྱུར་ཅིག །ཅེས་པ་འདི་ནི་རི་ཁྲོད་པ་དགེ་སློང་བློ་བཟང་འཇམ་དབྱངས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དཀོན་མཆོག་གསུམ་འདུས་ངོ་བོ་དྲིན་ཅན་རྗེ། །ལུང་རྟོགས་བསྟན་པའི་འདབ་བརྒྱ་བཞད་པའི་གཉེན། །འགྲོ་བློའི་མ་རིག་མུན་སེལ་སྒྲོན་མེ་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །ཞེས་པ་འདི་ནི་དད་ལྡན་དགེ་སློང་ངག་དབང་ལྷུན་གྲུབ་ཀྱིས་བསྐུལ་ངོར༌༸བཙུན་པ་དཀོན་མཆོག་བསྟན་པའི་སྒྲོན་མེས་ད་ཚང་དགོན་དུ་བྲིས།། ༈ བསླུ་མེད་དཀོན་མཆོག་ཐུགས་རྗེའི་མཁའ་དབྱིངས་ངོས། །བློ་བཟང་བསྟན་པའི་སྒྲོན་མེ་ལེགས་བཟུང་སྟེ། །བགྲང་ཡས་འགྲོ་ལ་ཐར་
པའི་ལམ་སྟོན་པ། །མཚུངས་མེད་བཤེས་གཉེན་དམ་པར་གསོལ་བ་འདེབས། །ཞེས་པ་འདི་ནི་ཐུགས་དམ་ལ་བརྩོན་པ་དགེ་སློང་བློ་བཟང་དཔལ་འབྱོར་གྱིས་ལམ་རིམ་བརྒྱུད་འདེབས་སུ་དེ་ལྟ་བུ་ཞིག་དགོས་ཚུལ་ལྟར་བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ བླ་མ་ཡི་དམ་དཀོན་མཆོག་རིན་ཆེན་གསུམ། །དམ་ཅན་ཆོས་སྐྱོང་རྒྱ་མཚོའི་ཚོགས་དང་བཅས། །དུས་འདི་ནས་བཟུང་བྱང་ཆུབ་སྙིང་པོའི་བར། །ནམ་ཡང་མི་འབྲལ་བདག་གི་སྐྱབས་མཛོད་ཅིག །དཀོན་མཆོག་ཐུགས་རྗེའི་བདག་ཉིད་ཟླ་ཤེལ་ཁམས། །མདོ་སྔགས་བསྟན་པའི་ཀུནྡ་བཞད་པའི་གཉེན། །ཀུན་རྨོངས་མུན་པ་སེལ་བའི་སྒྲོན་མེ་མཆོག །དཀོན་མཆོག་བསྟན་པའི་སྒྲོན་མེར་གསོལ་བ་འདེབས། །རབ་འབྱམས་ཞིང་གི་རྒྱལ་བ་མ་ལུས་པའ། །ཐུགས་བཅུད་ཟབ་དང་རྒྱ་ཆེ་ཨ་མྲྀ་ཏས། །སྲིད་དང་ཞི་བའི་གདུང་བ་ཀུན་སེལ་བ། །ཐེག་མཆོག་དགེ་བའི་བཤེས་ལ་གསོལ་བ་འདེབས། །བསླབ་གསུམ་རྣམ་པར་དག་པའི་ཆུ་གཏེར་ཆེ། །མདོ་རྒྱུད་མན་ངག་ཡིད་བཞིན་ནོར་གྱིས་གཏམས། །འཆད་རྩོད་རྩོམ་པའི་རླབས་ཕྲེང་རོལ་པ་ཅན། །བཤེས་གཉེན་གདེངས་ཅན་དབང་པོར་གསོལ་བ་འདེབས། །བསླུ་མེད་མཆོག་གསུམ་སྤྱི་དང་བླ་མ་ལྷའ། །ཐུགས་རྗེའི་བདེན་པ་ཆེན་པོའི་བྱིན་རླབས་ཀྱིས། །མི་འདོད་ཉེ་བར་འཚེ་བ་ཀུན་ཞི་ནས། །ཆོས་ལྡན་སྨོན་པ་ཡིད་བཞིན་འགྲུབ་པར་ཤོག །རྩ་བརྒྱུད་བླ་མའི་བཀའ་ལས་མི་འདའ་བར། །རྡོ་རྗེ་གཡར་དམ་ལྷུར་མཛད་སྲུང་ཚོགས་ཀྱིས། །ནམ་ཡང་མི་གཡེལ་མགོན་དང་སྐྱབས་མཛད་དེ། །ཆོས་སྲིད་དཔལ་འབྱོར་རྒྱས་པའི་དངོས་གྲུབ་སྩོལ། །དུས་འདི་ནས་བཟུང་ཚེ་རབས་
ཀུན་ཏུ་ཡང། །ལེགས་ཚོགས་རྩ་བ་བླ་མ་དཀོན་མཆོག་གསུམ། །རྩེ་གཅིག་གུས་པའི་ཡིད་ཀྱིས་གཙུག་བསྟེན་ནས། །བྱིན་རླབས་བདུད་རྩིས་རྟག་ཏུ་ཚིམ་གྱུར་ཅིག །སྐྱེ་ཞིང་སྐྱེ་བར་དལ་བའི་རྟེན་ཐོབ་ཅིང། །ཡང་དག་ལམ་བཟང་གེགས་མེད་མཐར་ཕྱིན་ནས། །ཕྲ་རགས་འཁོར་བའི་རྒྱ་མཚོ་ལས་བརྒལ་ཏེ། །ཐར་པའི་གྲོང་ཁྱེར་མཆོག་ཏུ་འཇུག་གྱུར་ཅིག །མདོར་ན་དགེ་བཅུའི་ཁྲིམས་ཀྱི་རྩ་བརྟན་ཅིང། །ཚེ་དཔལ་བསོད་ནམས་ཡལ་ག་འབུམ་ལྡན་པ། །ཆབ་སྲིད་དཔག་བསམ་ལྗོན་པ་རྒྱས་པའི་རྩེར། །བྱང་ཆུབ་མཆོག་གི་འབྲས་བཟང་སྨིན་གྱུར་ཅིག །ཅེས་པ་འདི་ནི་ཡངས་པའི་མངའ་འབངས་མཐའ་དག་ཆོས་བཞིན་དུ་སྐྱོང་བ་ལ་མ་ཞུམ་ཞིང་བླང་དོར་འབྱེད་པའི་སྤོབས་པ་དང། གཟུ་བོར་གནས་པའི་རང་བཞིན་ཅན། དད་པ་དང་གཏོང་བའི་རྒྱན་གྱིས་མཛེས་པ་སོ་མོའི་རྒྱལ་མོ་བསོད་ནམས་སྒྲོལ་མས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་སོ་མོ་མཁར་ནོར་བུའི་གླིང་དུ་བྲིས་པའོ།། ༈ རྒྱུ་འབྲས་ཐེག་པའི་ཆོས་ཀུན་བྱང་ཆུབ་པའ། །སྙིང་པོ་ཟབ་རྒྱས་མན་ངག་བདུད་རྩིའི་ཆབ། །ཐར་འདོད་ཡོངས་ལ་འབབ་པའི་ཨ་གསྟཿ །མཚུངས་མེད་བཤེས་གཉེན་རྣམས་ལ་གསོལ་བ་འདེབས། །ཁྱད་པར་ལྟ་སྒོམ་སྤྱོད་དང་གཞི་ལམ་འབྲས། །ཀུན་ལ་འཁྲུལ་བྲལ་འཇམ་དཔལ་སྙིང་པོའི་བསྟན། །འཆད་རྩོད་རྩོམ་པས་སྤེལ་མཛད་འགྲོ་བའི་མིག །ཐར་འདོད་དེད་དཔོན་རྣམས་ལ་གསོལ་བ་འདེབས། །སོ་ཐར་བྱང་སེམས་སྡོམ་པས་རྒྱུད་སྦྱངས་ཤིང། །གསང་ཆེན་རྡོ་རྗེ་ཐེག་པའི་སྒོར་བཙུད་དེ། །མན་ངག་ནོར་བུའི་དགའ་སྟོན་མཆོག་སྦྱིན་པ། །དྲིན་ཅན་བླ་མ་རྣམས་ལ་གསོལ་བ་འདེབས། །ཁྱད་པར་དཀོན་མཆོག་
གསུམ་འདུས་ངོ་བོ་ཉིད། །ཐུབ་དབང་བསྟན་པའི་སྒྲོན་མེ་ལེགས་བཟུང་ནས། །མངོན་མཐོ་ངེས་ལེགས་ལམ་བཟང་གསལ་མཛད་པ། །བཀའ་དྲིན་གསུམ་ལྡན་བླ་མར་གསོལ་བ་འདེབས། །འདིས་མཚོན་ལེགས་བྱས་ས་བོན་ཛམྦུའི་འབྲས། །བསོད་ནམས་ཞིང་མཆོག་མ་དྲོས་མཚོར་བརྟེན་པས། །གནས་སྐབས་མཐར་ཐུག་དགེ་མཚན་གཟི་འབར་བ། །གསེར་བཟང་སྙིང་པོ་མཆོག་ཏུ་གྲུབ་གྱུར་ཅིག །ནད་རིམས་ཉེར་འཚེ་ལ་སོགས་ལུས་སེམས་ཀྱི། །གདུང་བ་མ་ལུས་དྲུངས་ནས་ཞི་བ་དང་། །མཐུན་རྐྱེན་ཚེ་དཔལ་མངའ་ཐང་ལོངས་སྤྱོད་རྣམས། །དགེ་བཅུའི་ཁྲིམས་དང་ལྷན་ཅིག་རྒྱས་གྱུར་ཅིག །ཚེ་རབས་ཕྲེང་བར་དམ་པའི་མགོན་གྱིས་བཟུང། །རྣམ་དག་བསྟན་ལ་ཚུལ་བཞིན་སློབ་པ་སོགས། །དོན་གཉིས་དགེ་བའི་ལེགས་སྨོན་མ་ལུས་པ། །མཆོག་གསུམ་བདེན་པའི་མཐུ་ཡིས་འགྲུབ་གྱུར་ཅིག །ཅེས་པ་འདི་ནི་ལྕོག་རྩེ་རྒྱལ་པོའི་སྲས་མོ་དད་མོས་དང་ལྷག་བསམ་མཆོག་ཏུ་དགེ་བ་བསོད་ནམས་མཚོ་རྒྱལ་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དཀོ༷ན་མཆོ༷ག་རྒྱལ་བའི་དབང་པོ་རྫོགས་སངས་རྒྱས། །ལུང་རྟོགས་བསྟ༷ན་པ༷འི་བདག་ཉིད་དམ་པའི་ཆོས། །འགྲོ་བའི་སྒྲོ༷ན་མེ༷་རིག་གྲོལ་དགེ་འདུན་ཏེ། །སྐྱབས་གསུམ་ངོ་བོ་བླ་མར་གསོལ་བ་འདེབས། །རླབས་ཆེན་ཐུགས་བསྐྱེད་མཆོག་གི་སྤྲིན་སྔོན་ལས། །ཕུལ་བྱུང་ལེགས་བཤད་ཆོས་ཀྱི་ཆར་འབེབས་པས། །རྣམ་གྲོལ་ཐར་པའི་མྱུ་གུ་བསྐྲུན་མཛད་པ། །རྗེ་བཙུན་བསྟན་པའི་སྒྲོན་མེར་གསོལ་བ་འདེབས། །སྲས་བཅས་རྒྱལ་བའི་ཞལ་སྐྱིན་བླ་མ་དང། །རྒྱལ་ཀུན་འཕྲིན་ལས་རང་གཟུགས་
བཅོམ་ལྡན་མ། །དབྱེར་མེད་བླ་མ་ལྷ་ཡི་ཞབས་པད་ལ། །སྙིང་ནས་འདུད་དོ་ཐུགས་རྗེས་བྱིན་གྱིས་རློབས། །རྩེ་གཅིག་གུས་པའི་ཡིད་ཀྱིས་གསོལ་བཏབ་མཐུས། །ཉེར་འཚེའི་འཇིགས་པ་ཀུན་ལས་རྣམ་རྒྱལ་ཞིང། །སྡེ་བཞིའི་དཔལ་གྱི་དགེ་མཚན་དར་བ་ཡིས། །གནས་སྐབས་མཐར་ཐུག་དོན་གཉིས་ལྷུན་གྲུབ་ཤོག །དེང་ནས་བརྩམས་ཏེ་བྱང་ཆུབ་སྙིང་པོའི་བར། །རྟག་ཏུ་དམ་པའི་མགོན་གྱིས་རྗེས་འཛིན་ཅིང། །མཆོག་གསུམ་བྱིན་རླབས་སྙིང་ལ་འགྲོགས་པ་ཡིས། །ལེགས་ཚོགས་དབྱར་མཚོ་ཇི་བཞིན་རྒྱས་གྱུར་ཅིག །ཅེས་པ་འདི་ནི་དཀོན་མཆོག་གསུམ་ལ་དད་པའི་བག་ཆགས་ཀྱི་མཐུ་བརྟས་པ་སོ་མངས་རྒྱལ་པོའི་སྲས་མོ་བསོད་ནམས་དབང་མོས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ཡིད་བཞིན་ནོར་ལས་དཀོན་པའི་གདམས་པ་མཆོག །འཁྲུལ་བྲལ་མདོ་སྔགས་བསྟན་པའི་སྙིང་པོ་ཀུན། །དྲི་མེད་ལུང་རིགས་སྒྲོན་མེས་གསལ་མཛད་པ། །དྲིན་ཅན་བླ་མའི་ཞབས་ལ་གསོལ་བ་འདེབས། །དེང་ནས་ཚེ་རབས་ཀུན་ཏུ་མགོན་ཁྱོད་ཀྱིས། །ནམ་ཡང་འབྲལ་མེད་དགྱེས་བཞིན་རྗེས་འཛིན་ཅིང། །ཟབ་རྒྱས་གསུང་གི་གསང་བ་ཀུན་འཛིན་པའ། །སྲས་ཀྱི་ཐུ་བོ་མཆོག་ཏུ་འགྱུར་བར་ཤོག །ཇི་ལྟར་གདམས་ཤིང་རྗེས་སུ་བསྟན་པ་བཞིན། །ཐུན་མོང་ལམ་གྱིས་རིམ་པས་རྒྱུད་སྦྱངས་ཏེ། །གསང་སྔགས་སྒོར་ཞུགས་དམ་ཚིག་ཚུལ་བཞིན་བསྲུང། །རིམ་གཉིས་ལམ་གྱི་བགྲོད་པ་མཐར་ཕྱིན་ཤོག །དཔལ་ལྡན་བླ་མའི་རྣམ་པར་ཐར་པ་ལ། །ཞེས་སོགས་དང། སྐྱེ་བ་ཀུན་ཏུ་ཞེས་སོགས་བྱ། ཞེས་པ་འདི་ནི་དད་བརྩོན་ལྡན་པ་དགེ་སློང་དཀོན་མཆོག་འཇམ་
དབྱངས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དཀོན་མཆོག་ཀུན་འདུས་འཇིགས་མེད་དབང་པོ་ཡི། །བཞེད་དགོངས་བཤད་སྒྲུབ་བསྟན་པའི་ཁང་བཟང་གི །ཁྱོན་ཡངས་གསལ་བར་བྱེད་པའི་སྒྲོན་མེ་མཆོག །མཚུངས་མེད་བཤེས་གཉེན་དམ་པར་གསོལ་བ་འདེབས། །རབ་འབྱམས་གསུང་རབ་ཀུན་ལ་བློ་གྲོས་ཀྱི། །སྣང་བ་རབ་རྒྱས་འཆད་རྩོད་རྩོམ་པ་ཡིས། །ཐར་འདོད་རེ་བ་ཡོངས་སུ་ཚིམ་མཛད་པ། །མཚུངས་མེད་བཤེས་གཉེན་དམ་པ་ཞབས་བརྟན་ཤོག །དགེ་འདིས་མཚོན་པའི་དུས་གསུམ་ལེགས་བྱས་ཀུན། །གཅིག་གྱུར་མཐུ་ལས་མཁའ་མཉམ་འགྲོ་བ་རྣམས། །དེང་ནས་བཟུང་སྟེ་ཚེ་རབས་ཐམས་ཅད་དུ། །མཚུངས་མེད་བཤེས་གཉེན་དམ་པས་རྗེས་འཛིན་ཤོག །ཅེས་པ་འདིའང་དད་བརྩོན་ལྡན་པ་རབ་འབྱམས་པ་ཤེས་རབ་རྒྱ་མཚོས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས།། ༈ ཟླ་བྲལ་འཇིགས་མེད་རྣམ་དཔྱོད་གངས་རིའི་སྤོར། །ཡང་དག་རིགས་པའི་གད་རྒྱངས་ཆེར་སྒྲོགས་པ། །སྨྲ་བའི་སེང་གེ་ཁམས་གསུམ་སྐྱེ་རྒུའི་གཉེན། །དགེ་ལྡན་བསྟན་པའི་མངའ་བདག་རྒྱལ་གྱུར་ཅིག །རླབས་ཆེན་ཐུགས་བསྐྱེད་རི་བོ་མནྡ་རས། །ཚོགས་གཉིས་འོ་མའི་ཆུ་གཏེར་བསྲུབས་པ་ལས། །འཁྲུངས་པའི་རྒྱལ་སྲས་སྙིང་རྗེའི་ཟླ་བ་མཆོག །ལུས་ཅན་ཀུནྡའི་གཉེན་གཅིག་ཁྱོད་ལ་འདུད། །སྟོབས་བཅུའི་དཔལ་ལྡན་རྒྱལ་དབང་གྲགས་པའི་བསྟན། །རྒྱ་མཚོའི་གོས་ཅན་ཡངས་པའི་ཁོར་ཡུག་ཏུ། །སྤེལ་མཛད་བཀའ་དྲིན་མཚུངས་མེད་ཐུགས་རྗེའི་གཏེར། །གང་གི་ཞབས་ལ་གུས་པས་ཕྱག་འཚལ་ལོ། །རིམ་གཉིས་རྡོ་རྗེའི་རྣལ་འབྱོར་མཐར་
སོན་ཅིང། །ཡི་དམ་ཆོས་སྲུང་རྒྱ་མཚོས་འཕྲིན་ལས་བསྒྲུབ། །ཟབ་རྒྱས་མན་ངག་གདམས་པའི་མཛོད་འཛིན་པ། །གསང་ཆེན་བསྟན་པའི་མངའ་བདག་ཁྱོད་ལ་འདུད། །གནས་གསུམ་སྒྲིབ་མེད་གཟིགས་པའི་ཡེ་ཤེས་ཀྱིས། །བླང་དོར་མ་ལུས་ཇི་བཞིན་འདོམས་པ་ཡི། །ལུས་ཅན་ཡོངས་ཀྱི་འདྲེན་པ་བླ་ན་མེད། །རྗེ་བཙུན་བླ་མ་བསྐལ་བརྒྱར་ཞབས་བརྟན་ཤོག །རྒྱལ་ཀུན་སོར་རྟོག་ཡེ་ཤེས་ངོ་བོ་ཉིད། །ཚེ་མཐའ་ཡས་དང་རྣམ་རྒྱལ་སྒྲོལ་མ་སོགས། །ལྷག་པའི་ལྷ་ཚོགས་ཐུགས་རྗེ་བདེན་པ་ཡིས། །འདྲེན་མཆོག་དམ་པའི་སྐུ་ཚེ་བསྐལ་བརྒྱར་སྲིངས། །མཐུ་ལྡན་རྒྱལ་བའི་བསྟན་སྲུང་ཐམས་ཅད་དང། །ཁྱད་པར་རྒྱལ་ཀུན་ཡུམ་གཅིག་དབྱངས་ཅན་མ། །དྲག་མོའི་སྐུར་བསྟན་འདོད་ཁམས་དབང་ཕྱུག་མས། །དཔལ་ལྡན་བླ་མའི་འཕྲིན་ལས་གཡེལ་མེད་སྒྲུབས། །བདག་སོགས་ཀུན་ཀྱང་སྐྱེ་ཞིང་སྐྱེ་བ་རུ། །ཁྱོད་ཞབས་གུས་པས་མཆོད་པ་མི་གཏོང་ཞིང། །ཟབ་ཅིང་རྒྱ་ཆེའི་གསུང་གི་གསང་བའི་མཛོད། །འཛིན་པའི་སྲས་ཀྱི་ཐུ་བོར་འགྱུར་བར་ཤོག །མདོར་ན་དཔལ་ལྡན་བླ་མའི་ཞབས་བརྟན་ཅིང། །རྣམ་དཀར་མཛད་འཕྲིན་སྣང་བ་ཕྱོགས་བཅུར་རྒྱས། །ལུས་ཅན་ཀུན་ཀྱང་ཆོས་འབྱོར་དགའ་སྟོན་ལ། །ལོངས་སུ་སྤྱོད་པའི་དགེ་མཚན་རྒྱས་གྱུར་ཅིག །ཅེས་དགེ་ལྡན་བསྟན་པའི་སྲོག་ཤིང་མཚུངས་ཟླ་མེད་པ་ཁྲི་ཆེན་དཔལ་ལྡན་གྲགས་པའི་མཆོག་གི་སྤྲུལ་བའི་སྐུ་རིན་པོ་ཆེ་འཇིགས་མེད་རིགས་པའི་སེང་གེའི་ཞལ་སྔ་ནས་ཀྱི་ཞབས་བརྟན་གསོལ་འདེབས་འདི་ནི་རབ་འབྱམས་པ་གྲགས་པ་དར་རྒྱས་ཀྱིས་བསྐུལ་ངོར་བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ འཇི༷གས་
མེ༷ད་སྟོབས་བཅུའི་ལང་ཚོ་རབ་རྒྱས་ཤིང། །ལུ༷ང་རི༷གས་གད་རྒྱངས་མཐོན་པོས་ས་གསུམ་འགེངས། །དཔལ་ལྡན་མཚུངས་བྲལ་སྨྲ༷་བ༷འི་སེ༷ང་གེ༷་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །རིང་ནས་གོམས་པའི་ཐུགས་བསྐྱེད་དཔུང་པ་ཡིས། །ཐུབ་བསྟན་རྣམ་པར་རྒྱལ་བའི་ལྡིང་ཁང་རྩེར། །བཤད་སྒྲུབ་གསེར་གྱི་རྒྱལ་མཚན་བསྒྲེང་མཛད་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །མཁས་ཤིང་གྲུབ་བརྙེས་ཡོངས་འཛིན་དུ་མ་ལས། །ཟབ་དང་རྒྱ་ཆེའི་གདམས་པའི་མཛོད་མནོས་ཏེ། །ཐར་འདོད་ཡོངས་ཀྱི་རེ་བ་སྐོང་བའི་གཉེན། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཚོགས་གཉིས་ལང་ཚོ་རྒྱས་པའི་གཟི་བྱིན་གྱིས། །སྒྲིབ་པའི་དཔུང་ཚོགས་རྨེག་མེད་བཅོམ་བྱས་ཏེ། །རྣམ་གྲོལ་བདེ་བའི་དཔལ་ལ་དབང་འབྱོར་བ། །རྗེ་བཙུན་བླ་མའི་ཞབས་ལ་གསོལ་བ་འདེབས། །བསླབ་གསུམ་དག་པའི་ཆ་ཤས་ཡོངས་གང་ཞིང། །འཆད་རྩོད་རྩོམ་པས་འོད་དཀར་དྲ་བ་འགྱེད། །བློ་བཟང་རྒྱལ་བསྟན་ཀུ་མུད་བཞད་པའི་གཉེན། །རྗེ་བཙུན་བླ་མའི་ཞབས་ལ་གསོལ་བ་འདེབས། །མཐར་བྱེད་དཔུང་འཇོམས་ཚེ་ཡི་ལྷ་ཚོགས་དང། །ཡི་དམ་ཆོས་སྲུང་རྒྱ་མཚོའི་ཐུགས་རྗེ་མཐུས། །རྗེ་བཙུན་བླ་མ་མཆོག་གི་ཞབས་བརྟན་ཅིང། །འཕྲིན་ལས་འོད་སྣང་འགོག་མེད་འཕྲོ་གྱུར་ཅིག །བདག་སོགས་ཀུན་ཀྱང་སྐྱེ་བའི་ཕྲེང་བ་རུ། །ཁྱོད་གསུང་བདུད་རྩིའི་བཅུད་ཀྱིས་བསྐྱང་བ་ཡིས། །ཡང་དག་ལམ་བཟང་བགྲོད་པ་མཐར་ཕྱིན་ནས། །སྐུ་གསུམ་གོ་འཕང་བདེ་བླག་འགྲུབ་གྱུར་ཅིག །ཅེས་དགེ་ལྡན་བསྟན་པའི་ཉི་མ་ཆེན་པོ་ཁྲི་ཆེན་སྤྲུལ་བའི་
སྐུ་འཇིགས་མེད་རིགས་པའི་སེང་གེའི་ཞལ་སྔ་ནས་ཀྱི་ཞབས་བརྟན་གསོལ་འདེབས་འདི་ནི་སུ་ཉིད་ཤོག་རབ་འབྱམས་པ་དཀོན་མཆོག་རྒྱལ་མཚན་གྱིས་བསྐུལ་ངོར་བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ མདོ་རྒྱུད་མན་ངག་གདམས་པ་བདུད་རྩིའི་ཆུས། །དབང་བསྐུར་ཆོས་ཀྱི་སྲིད་ལ་མངའ་བསྒྱུར་བའི། །བཀྲ་ཤིས་དགེ་མཚན་ནོར་འཛིན་ཀུན་ཏུ་ཁྱབ། །ཆོས་ཀྱི་རྒྱལ་པོ་བླ་མའི་ཞབས་ལ་འདུད། །མི་ཟད་ངག་གི་དབང་ཕྱུག་མཆོག་བརྙེས་ཏེ། །དཔལ་ལྡན་བཀྲ་ཤིས་གཡས་སུ་འཁྱིལ་བའི་མཚོར། །ལེགས་བཤད་མགྲིན་པའི་རྫ་རྔ་རྟག་འཁྲོལ་བ། །བཀའ་དྲིན་མཚུངས་མེད་དམ་པར་གསོལ་བ་འདེབས། །ལེགས་བཤད་ཡལ་གའི་ཁྱོན་ཡངས་ངག་གི་དབང། །སྤོང་བ་བསམ་གཏན་མེ་ཏོག་རྣམ་པར་བཀྲ། །བྱ་བ་ལས་ཀྱི་དགའ་ཚལ་ཤིས་པར་བསྒྲུབས། །འཁོར་ལོ་གསུམ་གྱི་དཔལ་མངའ་ཁྱོད་ལ་འདུད། །ངག་རིག་གྲུབ་པའི་གཉིས་སྐྱེས་ཀུན་གྱི་གཙོ། །ཐུབ་དབང་བསྟན་པའི་ཀུནྡ་བཞད་པའི་གཉེན། །བཀྲ་ཤིས་འོད་སྣང་བདུད་རྩིའི་ཟེར་འཕྲོ་བ། །སྨྲ་བའི་ཟླ་བ་མཆོག་ལ་གསོལ་བ་འདེབས། །དབྱངས་ཅན་ངག་གི་རོལ་མཚོ་ལས་འོངས་པའ། །ལེགས་བཤད་དབང་གི་རྒྱལ་པོའི་ཟ་མ་ཏོག །བཀྲ་ཤིས་གཏེར་གྱི་བུམ་བཟང་དང་མཚུངས་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཡབ་གཅིག་ངག་གི་དབང་པོའི་བྱིན་རླབས་ཀྱི། །གློག་ཕྲེང་བཀྲ་བའི་ཐུགས་ཀྱི་སྤྲིན་སྔོན་ལས། །ལེགས་བཤད་གྲུ་ཆར་བསྙིལ་བས་འཇིག་རྟེན་ཀུན། །ཕུལ་བྱུང་ཤིས་པར་བསྒྲུབས་ལ་གསོལ་བ་འདེབས། །ཁྱོད་གསུང་ལེགས་བཤད་བདུད་རྩིའི་བཅུད་
མྱང་བས། །སྲིད་པའི་ནད་བརྒྱ་སེལ་བའི་སྨན་གཅིག་པུ། །མཐའ་བྲལ་ལྟ་བའི་གནད་ཀུན་འབྱེད་པ་ལ། །རྗེ་བཙུན་མཁྱེན་པའི་གཏེར་དང་མཚུངས་པར་ཤོག །༈ བློ་ཆེན་རྒྱལ་ཀུན་ཐུགས་རྗེ་ཟླ་ཤེལ་ཁམས། །མཁས་བཙུན་བཟང་པོའི་དཀྱིལ་འཁོར་རབ་རྒྱས་ཤིང། །དོན་གཉིས་ཀུནྡའི་དགའ་ཚལ་རྒྱས་མཛད་པ། །གྲུབ་དབང་སྨྲ་བའི་ཟླ་བ་གཙུག་ན་མཛེས། །བློ་གཏེར་འཇམ་མགོན་དགྱེས་བཞད་རྡོ་རྗེ་ཡི། །མཛད་བཟང་གདུགས་དཀར་སྲིད་པའི་རྩེར་བསྒྲེང་བའི། །བཞེད་དོན་གེགས་མེད་སྨོན་པའི་མཐུ་གྲུབ་པ། །བཀའ་དྲིན་མཚུངས་མེད་དམ་པར་གསོལ་བ་འདེབས། །བློ་ལྡན་སྐལ་བཟང་གདུལ་བྱའི་འཛིན་མ་ལ། །དོན་ཟབ་གདམས་པ་བདུད་རྩིའི་ཆར་འབེབས་པས། །གཞན་ཕན་ཐུགས་བསྐྱེད་འབྲས་བཟང་ལྷུན་གྱིས་གྲུབ། །ཐེག་མཆོག་དགེ་བའི་བཤེས་ལ་གསོལ་བ་འདེབས། །བདེ་སྟོང་དབྱེར་མེད་བློ་གྲོས་ལུས་སྟོབས་རྒྱས། །རིམ་གཉིས་ལམ་བཟང་རལ་པའི་ཁུར་གྱིས་བརྗིད། །རྒྱུད་དོན་ལེགས་པར་བཤད་པའི་གད་རྒྱངས་སྒྲོགས། །གྲུབ་མཆོག་གདོང་ལྔའི་དབང་པོར་གསོལ་བ་འདེབས། །གདུལ་བྱ་རང་རང་བློ་དང་འཚམ་པ་ཡི། །ལམ་བཟང་སྤེལ་བས་འགྲོ་བའི་དོན་སྤྱོད་ཅིང། །རིགས་སྔགས་གྲུབ་པའི་དཔུང་གིས་བདུད་སྡེ་གཞོམ། །རྡོ་རྗེ་འཛིན་པའི་གཙོ་ལ་གསོལ་བ་འདེབས། །རྒྱལ་གསུང་གསང་བའི་མཛོད་འཛིན་རྡོ་རྗེ་ཅན། །ངུར་སྨྲིག་གར་རོལ་རྗེ་བཙུན་བླ་མ་ཡིས། །ཚེ་རབས་ཀུན་ཏུ་འབྲལ་མེད་རྗེས་བཟུང་སྟེ། །རིམ་གཉིས་ལམ་བཟང་མངོན་དུ་འགྱུར་བར་ཤོག །དཔལ་ལྡན་གསང་བའི་བདག་པོ་ཁྱོད་ཀྱི་མཐུས། །བདུད་བཞིའི་
གཡུལ་ལས་ངེས་པར་འབྱུང་བ་ལ། །ཕྱི་ནང་གནོད་པས་ནམ་ཡང་མི་བརྫི་བའི། །མཐུ་སྟོབས་ནུས་པའི་ཕ་རོལ་སོན་པར་ཤོག །༈ ཡེ་ཤེས་སྒྱུ་འཕྲུལ་དྲ་བ་འཇམ་པའི་དབྱངས། །དམིགས་མེད་སྙིང་རྗེའི་པད་དཀར་བཞད་པའི་ལྷ། །བདུད་བཞིའི་དགྲ་ལས་རྣམ་རྒྱལ་རྡོ་རྗེ་འཛིན། །འཇམ་དབྱངས་བཞད་པའི་རྡོ་རྗེར་གསོལ་བ་འདེབས། །གང་གསུང་ལེགས་བཤད་དགའ་ཚལ་ལས་འཁྲུངས་པའ། །བགྲང་ཡས་དགེ་འདུན་རྐང་འཐུང་ཚོགས་ཀྱི་དབུས། །ཕུན་ཚོགས་འཁོར་ལོ་གསུམ་གྱི་འབྲས་སྨིན་པ། །ཡབ་རྗེའི་སྲས་མཆོག་ཞབས་ལ་གསོལ་བ་འདེབས། །དེ་ཡི་ཐུགས་བསྐྱེད་སྨིན་པའི་ཟློས་གར་ལས། །ངག་གི་དབང་ཕྱུག་བཞད་པའི་རྡོ་རྗེ་ཡི། །བཤད་སྒྲུབ་བསྟན་པའི་རྒྱལ་མཚན་བསྒྲེང་བའི་ཕྱིར། །ལེགས་བྱོན་མཆོག་སྤྲུལ་དམ་པར་གསོལ་བ་འདེབས། །བྱམས་དང་སྙིང་རྗེའི་རྩ་བ་རབ་བརྟན་ཅིང། །གཞན་ཕན་འཕྲིན་ལས་ཡལ་ག་ཁྱོན་ཡངས་པོས། །ཐར་འདོད་སྙིང་གི་གདུང་བ་སེལ་མཛད་པ། །འགྲོ་བའི་འདྲེན་མཆོག་དམ་པར་གསོལ་བ་འདེབས། །གཞུང་དང་གདམས་ངག་ཀུན་ལ་དབང་འབྱོར་ཏེ། །བསྟན་པའི་གནད་ཀུན་ཉམས་སུ་བསྟར་བ་ཡིས། །སྒྲུབ་པའི་རྒྱལ་མཚན་འཛིན་ལ་ཟླ་བྲལ་བ། །མཚུངས་མེད་བཤེས་གཉེན་དམ་པར་གསོལ་བ་འདེབས། །ཟབ་ལམ་མན་ངག་གདུལ་བྱའི་དབང་པོ་དང། །འཚམ་པར་བསྟན་པའི་ལེགས་བཤད་དགའ་སྟོན་གྱིས། །རྒྱལ་བའི་དགོངས་པ་ཇི་བཞིན་བསྒྲུབ་མཛད་པ། །མཚན་ཉིད་ཀུན་ལྡན་བླ་མར་གསོལ་བ་འདེབས། །ཁྱོད་ཀྱི་ཐུགས་རྗེ་བདུད་རྩིའི་ཆུ་རྒྱུན་
གྱིས། །ཡིད་ཀྱི་ཉེས་ལྟུང་དྲི་མ་ཀུན་བྱང་སྟེ། །བརྩེ་ཆེན་ལྷག་བསམ་ལུས་སྟོབས་རྫོགས་པ་ཡིས། །རྒྱལ་སྲས་སྤྱོད་པ་རྒྱ་མཚོའི་མཐར་སོན་ཤོག །ཅེས་མཁས་པའི་གཙུག་རྒྱན་དམ་པ་ཁྲི་ངག་དབང་བཀྲ་ཤིས། གྲུབ་པའི་དབང་ཕྱུག་བློ་བཟང་དོན་གྲུབ། ཁྲི་ཆེན་སྤྲུལ་བའི་སྐུ་ངག་དབང་བསྟན་པའི་རྒྱལ་མཚན་རྣམས་ཆོས་སྡེ་འདི་གར་བཀའ་དྲིན་ལྷག་པར་ཆེ་བས་གསོལ་འདེབས་འདོན་སྲོལ་ཚུགས་ཀྱང། ཡང་སྲིད་མྱུར་འབྱོན་ལ་ཁ་བསྒྱུར་བྱས་པས་འབྲེལ་མ་ཆགས་ཤིང་མཛེས་ལམ་ཆུང་བར་བརྟེན། གསོལ་འདེབས་མདོར་བསྡུས་པ་རེ་དགོས་ཚུལ་མཁྱེན་རབ་ཀྱི་མངའ་བདག་རྒྱུད་པ་དཔོན་སློབ་འཇིགས་མེད་རྒྱལ་མཚན་པའི་གསུང་གིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དགེ་ལེགས་འབུམ་ཕྲག་པདྨ་དཀར་པོའི་ཚལ། །ལྷག་བསམ་ཉིན་བྱེད་སྣང་བ་དང་འགྲོགས་པས། །དལ་འབྱོར་ཟིལ་དངར་རྫོགས་པ་སྦྲང་རྩིའི་བཅུད། །ཐར་འདོད་བུང་བའི་ཉེར་འཚོ་རྒྱལ་གྱུར་ཅིག །འཇིག་རྟེན་ཆེ་དགུའི་རྗེས་སུ་མི་འབྲང་བར། །ཁེངས་དྲེགས་སྤངས་ཏེ་དམ་པའི་མགོན་ལ་བརྟེན། །མོས་གུས་ཉམས་མེད་དམ་ཚིག་ཚུལ་བཞིན་བསྲུངས། །བཤེས་གཉེན་ཐུགས་ཀྱི་སྲས་པོ་ཁྱོད་ལ་འདུད། །ཐ་སྙད་སྦུན་པའི་རྗེས་སུ་མི་འབྲང་བར། །ནང་དོན་འཕགས་བོད་མཁས་པའི་གཞུང་ལུགས་ལ། །སྦྱངས་པས་དྲི་མེད་རིགས་པའི་དགའ་སྟོན་མྱོང། །སྨྲ་བའི་དབང་པོ་མཆོག་ལ་གསོལ་བ་འདེབས། །ཟབ་གནད་ཐང་མར་བརྡལ་བའི་བཤད་པ་དང། །གྲུབ་མཐའི་དེ་ཉིད་འབྱེད་པའི་རྩོད་པ་དང། །ཚིག་དོན་ཕུན་ཚོགས་རྩོམ་པའི་དགའ་སྟོན་ལ། །དབང་བསྒྱུར་བཤེས་གཉེན་དམ་པར་གསོལ་བ་འདེབས། །ལས་འབྲས་བླང་དོར་ཚུལ་ལ་ངེས་རྙེད་པས། །མངོན་ལྐོག་མེད་པར་དྲན་
ཤེས་བག་ཡོད་ཀྱིས། །བསླབ་ཁྲིམས་དག་པ་ཉམས་ལེན་མཐིལ་དུ་མཛད། །གནས་བརྟན་འདུལ་བ་འཛིན་ལ་གསོལ་བ་འདེབས། །མཐའ་ཡས་འགྲོ་ལ་ཕན་པའི་ལྷག་བསམ་གྱི། །འབྲས་བུ་རྒྱལ་བསྟན་ཁོ་ནར་རག་ལས་པའ། །དེ་ཉིད་བཤད་དང་སྒྲུབ་པས་སྤེལ་མཛད་པ། །རྒྱལ་བའི་གདུང་འཚོབ་དམ་པར་གསོལ་བ་འདེབས། །རྡོ་རྗེ་འཆང་དངོས་བཤེས་གཉེན་དམ་པ་དག །བསྟེན་ནས་རྡོ་རྗེའི་དམ་ཚིག་ལེགས་བསྲུངས་ཤིང། །རྒྱུད་སྡེ་རྒྱ་མཚོའི་དགོངས་དོན་ཐུགས་སུ་ཆུད། །དཔལ་ལྡན་རིག་པ་འཛིན་ལ་གསོལ་བ་འདེབས། །རྙེད་བཀུར་ཟང་ཟིང་འབྱོར་བའི་ཡོ་ལང་རྣམས། །རྣམ་སྨིན་ཁུར་ཆེན་འགེལ་བའི་དགྲར་གཟིགས་ནས། །མཆོག་གསུམ་ཞིང་དུ་བསྔོས་ཏེ་དོན་ལྡན་མཛད། །དད་ལྡན་སྐྱེ་བོའི་མགོན་ལ་གསོལ་བ་འདེབས། །ཐུབ་བསྟན་རིན་ཆེན་རིང་དུ་གནས་འདོད་པའ། །ཐུགས་བསྐྱེད་ཤུགས་དྲག་དྲི་ཡི་བཞོན་པ་ཅན། །འཁོར་ལོ་གསུམ་གྱིས་མཛད་པའི་དྲི་བཟང་འཕྲོ། །བཤེས་གཉེན་དཔག་བསམ་ལྗོན་པ་རྟག་བརྟན་ཤོག །ནམ་ཡང་མི་བསླུ་དཀོན་མཆོག་བདེན་པའི་མཐུས། །བསྟན་པའི་སྒྲོན་མེ་བསྐལ་བརྒྱར་ཞབས་བརྟན་ཅིང། །བདག་ཀྱང་དེང་ནས་བྱང་ཆུབ་སྙིང་པོའི་བར། །དགྱེས་བཞིན་འབྲལ་མེད་རྗེས་སུ་འཛིན་པར་ཤོག །ཟབ་རྒྱས་གདམས་པ་བདུད་རྩིའི་དགའ་སྟོན་གྱིས། །ཡང་དག་ལམ་བཟང་ལུས་སྟོབས་རབ་རྒྱས་ནས། །བླ་མ་ལྷ་ཡི་གོ་འཕང་མྱུར་ཐོབ་སྟེ། །མ་ལུས་འགྲོ་བ་སྲིད་ལས་སྒྲོལ་གྱུར་ཅིག །ཅེས་པ་འདི་ནི་རང་གི་གམ་བཅར་དད་བརྩོན་ཚུལ་ཁྲིམས་ལྡན་པ་རབ་འབྱམས་པ་དཀོན་མཆོག་བསྟན་འཛིན་གྱིས་བསྐུལ་
ངོར་༸དཀོན་མཆོག་བསྟན་པའི་སྒྲོན་མེས་བྲིས།། ༈ རྒྱལ་བ་གཉིས་པ་འཇམ་དབྱངས་ཙོང་ཁ་པའ། །མདོ་སྔགས་གཞུང་ལུགས་མཐའ་དག་སྤེལ་སླད་དུ། །རླབས་ཆེན་སྨོན་ལམ་མཆོག་གིས་བསྐྲུན་པའི་སྐུ། །དཀོན་མཆོག་བསྟན་པའི་སྒྲོན་མེར་གསོལ་བ་འདེབས། །དེ་ལྟར་རྩེ་གཅིག་གུས་པས་གསོལ་བཏབ་མཐུས། །མགོན་ཁྱོད་ཞབས་ཟུང་སྲིད་མཐར་བརྟན་པ་དང། །བདག་ཀྱང་དེང་ནས་ཚེ་རབས་ཐམས་ཅད་དུ། །རྗེས་བཟུང་ལེགས་བཤད་དགའ་སྟོན་མྱོང་བར་ཤོག །འདིས་མཚོན་དགེ་བས་མར་གྱུར་འགྲོ་བ་རྣམས། །ཐེག་མཆོག་དགེ་བའི་བཤེས་དང་མི་འབྲལ་ཞིང། །རབ་འབྱམས་རྒྱལ་བའི་ཆོས་ཚུལ་ཀུན་བཟུང་ནས། །ས་ལམ་བགྲོད་པ་མྱུར་དུ་མཐར་ཕྱིན་ཤོག །ཅེས་པ་འདི་ནི་དད་ལྡན་སློབ་མ་བློ་བཟང་དཀའ་བཅུས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་སྨྲས་པའོ།། ༈ རྣམ་དག་ངེས་འབྱུང་ཁྲིམས་ཀྱི་རྩ་བརྟན་ཅིང། །གཞན་ཕན་རྒྱལ་སྲས་སྤྱོད་པའི་གོས་བཟང་གཡོ། །བདེ་སྟོང་ཡེ་ཤེས་ནོར་བུས་མཛེས་པ་ཡི། །བསྟན་པའི་རྒྱལ་མཚན་འཛིན་ལ་གསོལ་བ་འདེབས། །ངག་ལ་དབང་བསྒྱུར་བློ་བཟང་རྒྱལ་བའི་བསྟན། །བཤད་སྒྲུབ་དཔུང་པས་གྱེན་དུ་འདེགས་པ་ལ། །ས་ཆེན་འདི་ན་སྙིང་སྟོབས་ཟླ་བྲལ་བ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཚེ་རབས་འཕྲེང་བར་ཁྱོད་ཀྱིས་རྗེས་འཛིན་ཞིང། །མོས་གུས་རྩོལ་མེད་ངང་གིས་སྐྱེ་བ་དང། །བཀུར་སྟི་རྙེད་དང་རིམ་གྲོ་སྒྲུབ་པའི་སྒོས། །གཅིག་ཏུ་མཉེས་པ་འབའ་ཞིག་སྒྲུབ་པར་ཤོག །དེའི་གསུང་ཆོས་ཀྱི་བདུད་རྩིར་ཆེད་བརྟེན་པས། །མངོན་རྟོགས་ཚོགས་ཀྱི་ལམ་ལ་རབ་ཞུགས་ཏེ། །སྨོན་འཇུག་
སེམས་བསྐྱེད་གྲངས་མེད་ཚོགས་བརྩམས་ནས། །ཆོས་རྒྱུན་ཏིང་ངེ་འཛིན་ལ་རེག་པར་ཤོག །ཆོས་ཉིད་དོན་སྤྱིས་མངོན་མཐོང་སྦྱོར་བའི་ལམ། །འཇིག་རྟེན་སྒོམ་བྱུང་དྲོད་རྩེ་བཟོད་མཆོག་གི །རིམ་པས་གཟུང་འཛིན་རྟོག་པ་ཟིལ་མནན་ཏེ། །མོས་སྤྱོད་ས་ཡི་ཚོགས་གཉིས་རྫོགས་པར་ཤོག །བདེན་པ་གསར་མཐོང་གཙོར་གྱུར་རབ་དགའི་སར། །བརྒྱ་ཕྲག་བཅུ་གཉིས་ཡོན་ཏན་གཏེར་ཐོབ་ཅིང། །ཀུན་བཟང་སྨོན་གྲུབ་ཆོས་དབྱིངས་ཀུན་འགྲོ་རུ། །མཐོང་བས་སྦྱིན་པའི་ཕར་ཕྱིན་ལྷག་ཐོབ་ཤོག །དེ་ཚེ་སོམ་ཉི་སྤངས་ཤིང་དེ་ཡི་རྗེས། །མཆོག་གི་དོན་དུ་གོམས་ལས་འཆལ་བའི་ཁྲིམས། །ཀུན་ཏུ་མི་འབྱུང་དྲི་མ་མེད་པའི་སར། །ཚུལ་ཁྲིམས་ལྷག་ཅིང་བཅུ་འགྱུར་དཔལ་ཐོབ་ཤོག །རྒྱུ་མཐུན་མཐོང་ལས་ཆོས་ཚོལ་བཟོད་པ་ཡི། །སྣང་བ་བྱེད་པ་འོད་བྱེད་ས་ནས་ན། །སྔ་མའི་ཡོན་ཏན་བརྒྱ་ཡིས་བསྒྱུར་ཐོབ་ཅིང། །ལྷག་པའི་སེམས་སྦྱངས་མངོན་ཤེས་སོགས་ཐོབ་ཤོག །འཛིན་མེད་མཐོང་བས་བྱང་ཆུབ་ཕྱོགས་ལ་ཡང། །སྲེད་ལྟ་སྲེག་བྱེད་བརྩོན་འགྲུས་འབར་བ་ཡི། །འོད་འཕྲོས་ས་ལ་ལྷ་དབང་རྣམ་རོལ་ཞིང། །ལྷག་པའི་ཤེས་རབ་དང་པོ་སྤྱོད་པར་ཤོག །མཉམ་ཉིད་བཅུ་ཡི་སྐྱེ་འཕགས་དུས་གསུམ་རྒྱུད། །ཐ་དད་བཀག་ཕྱིར་བདུད་སོགས་རྐྱེན་ངན་གྱིས། །མི་འཕྲོག་ལུས་ཅན་སྨིན་བྱེད་སྦྱངས་དཀའི་སར། །བདེན་ལ་མཁས་པའི་བསམ་གཏན་ལྷག་ཐོབ་ཤོག །ཤེས་རབ་ཕུང་པོའམ་བསླབ་པ་རབ་སྦྱངས་ལས། །ཀུན་ཉོན་རྣམ་བྱང་དམ་པའི་དོན་དུ་ན། །མིན་པར་མངོན་མཐོང་མངོན་དུ་གྱུར་པའི་སར། །ཤེས་རབ་ལྷག་པས་ལུས་
ཅན་གྲོལ་བྱེད་ཤོག །མཚན་མ་ཐ་དད་མེད་པ་རིང་སོང་སར། །བཅུ་གཉིས་ཐབས་མཁས་ལྷག་ཐོབ་འགོག་པ་ལ། །སྐད་ཅིག་འཇུག་ཅིང་བསླབ་པའི་འབྲས་ལ་རེག །གྲུབ་ལ་མ་གྲུབ་ཚོགས་གཉིས་རྫོགས་པར་ཤོག །དག་པའི་ས་ལ་བྲི་འཕེལ་མེད་མཐོང་བས། །སྲིད་ཞིར་མཉམ་ཞིང་མི་རྟོག་ཞིང་ལ་དབང། །མཚན་མ་རྩོལ་བས་མི་གཡོ་སྨོན་ལམ་གྲུབ། །སྟོང་གསུམ་འབུམ་གྱི་རྡུལ་སྙེད་དཔལ་ཐོབ་ཤོག །སོ་སོ་རིག་ལྡན་ལེགས་པའི་བློ་གྲོས་ཏེ། །འབྲས་བུའི་ཆ་ལས་ཡེ་ཤེས་གནས་སུ་མཐོང་། །བསམ་པའི་སྟོབས་སོགས་རབ་རྫོགས་སྔ་མ་ཡི། །ཡོན་ཏན་གྲངས་མེད་བསྒྱུར་བ་ཐོབ་པར་ཤོག །ཆོས་ཀྱི་སྤྲིན་ཚེ་འོད་ཀྱི་དབང་བསྐུར་ལས། །ཡེ་ཤེས་ལྷག་པར་ཐོབ་ཅིང་རྒྱལ་བ་ཡི། །ལས་ལ་དབང་བསྒྱུར་བརྗོད་མེད་ཡོན་ཏན་ཐོབ། །ཚོགས་གཉིས་ལེགས་གྲུབ་རྫོགས་སྨིན་སྦྱོང་བྱེད་ཤོག །དེ་ནས་ཆེས་ཕྲ་དྲི་མའི་ལྷག་མ་རྣམས། །རྡོ་རྗེ་ཐེག་པའི་ལམ་གྱིས་རབ་སྦྱངས་ཏེ། །ཡན་ལག་བདུན་ལྡན་རྡོ་རྗེ་འཆང་དབང་གི །གོ་འཕང་ཐོབ་ནས་འགྲོ་ཀུན་སྒྲོལ་བར་ཤོག །ཅེས་སྐྱེ་བ་ཀུན་ཏུ་ཡང་དག་བླ་མ་དང་༝། །ཞེས་སོགས་ཀྱི་ཚིག་དོན་ཕྱེ་སྟེ་ས་ལམ་གྱི་རིམ་པ་དང་སྦྱར་བའི་སྨོན་ཚིག་སྦྱོར་ཚུལ་འདི་ལྟ་བུ་ཞིག་དགོས་ཞེས། ཐུགས་དམ་དགེ་སྦྱོར་ལ་མཆོག་ཏུ་བརྩོན་པའི་རབ་འབྱམས་པ་དཀོན་མཆོག་ཆོས་བཟང་གིས་བསྐུལ་ངོར་ཆོས་སྨྲ་བ་དཀོན་མཆོག་བསྟན་པའི་སྒྲོན་མེས་དབེན་གནས་ཡིད་དགའ་ཆོས་འཛིན་དུ་བྲིས།། ༈ རབ་འབྱམས་རྒྱལ་བའི་གསང་གསུམ་འཕྲིན་ལས་ཀྱི། །ཆོས་མཛོད་སྙིང་པོ་ཟབ་ལམ་རྡོ་རྗེ་ཐེག །འཛིན་སྐྱོང་སྤེལ་བའི་ཐུགས་བསྐྱེད་མཐུ་གྲུབ་པ། །རྡོ་རྗེ་འཛིན་པའི་གཙོ་ལ་གསོལ་བ་འདེབས། །བློ་བཟང་རྒྱལ་བསྟན་སྤྱི་དང་ཁྱད་པར་དུ། །འཇམ་
དཔལ་དབྱངས་དངོས་བཞད་པའི་རྡོ་རྗེ་ཡི། །བཞེད་དོན་མ་ལུས་ལྷུན་གྱིས་གྲུབ་མཛད་པ། །ཡབ་རྗེའི་སྲས་མཆོག་དམ་པར་གསོལ་བ་འདེབས། །འཇིགས་མེད་སྤོབས་པའི་རླབས་ཕྲེང་ཆེར་གཡོ་ཞིང། །ཕུལ་བྱུང་ལུང་རིགས་ནོར་བུའི་ཚོགས་ཀྱིས་གཏམས། །མཁྱེན་བརྩེའི་རྒྱ་མཚོ་གཏིང་མཐའ་མི་མངོན་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །འཇམ་དབྱངས་བླ་མའི་ལེགས་བཤད་ས་འཛིན་གྱིས། །ཐུབ་དབང་བསྟན་པའི་ཆུ་གཏེར་བསྲུབས་པ་ལས། །ལམ་བཟང་གསལ་བྱེད་ཉི་མའི་འོད་འབར་བ། །མཚུངས་མེད་འདྲེན་མཆོག་དམ་པར་གསོལ་བ་འདེབས། །དྲི་མེད་བསླབ་གསུམ་ནོར་བུས་རྒྱུད་གཏམས་ཤིང། །འཆད་རྩོད་རྩོམ་པས་སྐལ་ལྡན་རྗེས་སུ་འཛིན། །མཁའ་ཁྱབ་བསྟན་དང་འགྲོ་བའི་དཔུང་གཉེན་མཆོག །བགྲང་ཡས་བསྐལ་པ་རྒྱ་མཚོར་ཞབས་བརྟན་ཤོག །མ་འོངས་ཚེ་རབས་ཕྲེང་བ་ཀུན་ཏུ་ཡང། །བཤེས་གཉེན་དམ་པས་འབྲལ་མེད་རྗེས་འཛིན་ཅིང། །ཟབ་རྒྱས་གསུང་གི་བདུད་རྩིའི་བཅུད་མྱང་སྟེ། །ཡང་དག་ལམ་བཟང་ལུས་སྟོབས་རྒྱས་གྱུར་ཅིག །བློ་བཟང་རྒྱལ་བསྟན་ཕྱོགས་མཐར་རྒྱས་པ་དང། །དེ་འཛིན་སྐྱེས་བུས་ས་སྟེང་ཀུན་ཁྱབ་ཅིང། །བསྟན་པའི་སྦྱིན་བདག་མངའ་ཐང་དར་བ་ཡིས། །ལེགས་ཚོགས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པ་འདི་ནི་ཨ་རོ་ཧོར་ཆེན་ཤོག་ནས་དད་བརྩོན་ལྡན་པ་སློབ་མ་འགའ་ཞིག་གིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ རྒྱལ་ཀུ༷ན་ཐུགས་རྗེའི་དག༷འ་ཚལ་ལས་འཁྲུངས་ཤིང། །ཆོ༷ས་ཚུལ་འདབ་ཡངས་
འཕ༷གས་ཚོགས་ཡོངས་འདུའི་གཙོ། །བསྟ༷ན་འཛིན་དམ་པ༷འི་ཁྲོད་ན་ཉི༷་ཟླ་ལྟར། །མཚུངས་མེད་རྗེ་བཙུན་བླ་མ༷ར་གསོལ་བ་འདེབས། །ཀུ༷ན་བཟང་སྤྱོད་པའི་འོད་སྟོང་རྩེ་དག༷འ་ཡིས། །ལུང་རྟོགས་ཆོ༷ས་ཀྱི་འདབ་བརྒྱ་བཞད་པའི་གཉེན། །སྐལ་བཟང་གདུལ་བྱའི་བསོད་ནམས་མཁར་འཕ༷གས་པ། །མཆོག་སྤྲུལ་བསྟན༷་པ༷འི་ཉི༷་མ༷ར་གསོལ་བ་འདེབས། །རྣམ་ཀུ༷ན་སྲིད་ན་མངོན་དག༷འ་སྙིང་རྗེ་དང། །ཆོ༷ས་ཀུན་དོན་གཟིགས་འཕ༷གས་པའི་ཡེ་ཤེས་ཀྱིས། །བསྟ༷ན་དང་འགྲོ་ལ་ཕན་པ༷འི་དཔལ་སྟེར་བ། །སྨྲ་བའི་ཉི༷་མ༷་མཆོག་ལ་གསོལ་བ་འདེབས། །ལུས་ཅན་ཀུ༷ན་ལ་བདེ་དག༷འ་མཆོག་སྦྱིན་པ། །སངས་རྒྱས་ཆོ༷ས་དང་འཕ༷གས་ཚོགས་དགེ་འདུན་མཐུས། །བསྟ༷ན་པ༷འི་ཉི༷་མ༷་བསྐལ་བརྒྱར་ཞབས་བརྟན་ཅིང། །རྣམ་དཀར་མཛད་འཕྲིན་གེགས་མེད་རྒྱས་གྱུར་ཅིག །འགྲོ་ཀུ༷ན་གནས་སྐབས་མཐར་ཐུག་དག༷འ་བདེས་འཚོ། །ཆོ༷ས་སྲིད་འབྱོར་པ་ལྷུན་པོའི་སྤོ་ལྟར་འཕ༷གས། །བསྟ༷ན་པ༷འི་ཉི༷་མ༷་ཕྱོགས་བརྒྱར་གསལ་བ་ཡིས། །དགེ་ལེགས་རྒྱ་མཚོའི་དཔལ་ཡོན་རྒྱས་གྱུར་ཅིག །ཅེས་སྐུ་འཕྲེང་དུ་མར་དགེ་ལྡན་བསྟན་པའི་རྩ་ལག་དམ་པར་གྱུར་པ་ཀིརྟི་སྤྲུལ་བའི་སྐུ་རིན་པོ་ཆེ་ཀུན་དགའ་ཆོས་འཕགས་བསྟན་པའི་ཉི་མ་དཔལ་བཟང་པོའི་ཞབས་བརྟན་སྨོན་ཚིག་འདི་ནི། བླ་མ་དབུ་མཛད་བློ་བཟང་བསྟན་པ་སོགས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ རྒྱལ་བའི་སྲས་པོ་དྲི་མེད་གྲགས་པ་དང། །དཔལ་ལྡན་ཟླ་བའི་ཞབས་དང་དབུ་མ་པ། །རྒྱུད་ཆེན་གཉིས་སོགས་འཁྲུངས་རབས་ཚར་དུ་དངར། །ཀུན་མཁྱེན་འཇམ་དབྱངས་བཞད་པར་གསོལ་བ་འདེབས། །རྒྱ་མཚོའི་གོས་ཅན་ཀུན་ཏུ་རྒྱལ་བའི་བསྟན། །འཁོར་ལོ་གསུམ་གྱིས་སྤེལ་བའི་ཐུགས་
བསྐྱེད་མཐུ། །ཟླ་བྲལ་རྗེ་བཙུན་འཇིགས་མེད་དབང་པོ་དང། །བློ་བཟང་འཇིགས་མེད་རྒྱ་མཚོར་གསོལ་བ་འདེབས། །མཐའ་ཀླས་འགྲོ་བའི་མགོན་དང་དཔུང་གཉེན་དུ། །ཞབས་ཟུང་རྡོ་རྗེའི་རེ་ཁ་ཉེར་བརྟན་ཅིང། །འཕྲིན་ལས་གསེར་བཟང་འོད་ཀྱི་སྣང་བ་ཡིས། །བློ་བཟང་བསྟན་པའི་པད་ཚལ་རྒྱས་གྱུར་ཅིག །བདག་ཀྱང་དེང་ནས་སྐྱེ་ཞིང་སྐྱེ་བ་རུ། །བཤེས་གཉེན་དམ་པས་དགྱེས་བཞིན་རྗེས་འཛིན་ཞིང། །མདོ་སྔགས་ལམ་བཟང་ཇི་ལྟར་གདམས་པ་བཞིན། །ཡང་དག་སྒྲུབ་པས་ཉམས་སུ་ལེན་པར་ཤོག །མཐའ་བྲལ་ལྟ་བ་སྙིང་རྗེའི་སྙིང་པོ་ཅན། །གསང་ཆེན་ཟབ་མོའི་ལམ་གྱིས་རྒྱས་བཏབ་པའ། །མྱུར་ལམ་མཆོག་གི་བགྲོད་པ་ལ་བརྟེན་ནས། །ཟུང་འཇུག་དང་པོའི་མགོན་པོ་ཉིད་གྱུར་ཅིག །ཅེས་པ་འདི་ནི་མཁྱེན་རབ་ཀྱི་དབང་ཕྱུག་དམ་པ་བིས་མདོའི་ཁྲི་པ་ལྷ་ཞིས་སྤྲུལ་བའི་སྐུ་ངག་དབང་འཇམ་དཔལ་བསྟན་འཛིན་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དཀོན་མཆོག་ཀུན་འདུས་བློ་བཟང་རྒྱལ་བའི་བསྟན། །ལུང་དང་རིགས་པའི་སྒྲོན་མེས་གསལ་མཛད་པ། །སྐལ་བཟང་ཐར་འདོད་ཡོངས་ཀྱི་མིག་གཅིག་པུ། །རྗེ་བཙུན་བླ་མའི་ཞབས་ལ་གསོལ་བ་འདེབས། །འདི་ཕྱི་བར་དོའི་གནས་སྐབས་གང་དུ་ཡང། །འདྲེན་པ་ཁྱོད་མིན་སྐྱབས་གཞན་མ་མཆིས་པས། །བླ་མགོན་དབྱེར་མེད་བརྩེ་བས་ཕྱག་བརྐྱངས་ཏེ། །མི་ཁོམ་ངན་སོང་གཡང་ལས་བསྒྲལ་དུ་གསོལ། །ཇི་སྲིད་བྱང་ཆུབ་སྙིང་པོར་མཆིས་ཀྱི་བར། །དལ་བའི་རྟེན་ཐོབ་ཁྱོད་ཞབས་གུས་པས་མཆོད། །ཁྱོད་གསུང་ཇི་བཞིན་བསླབ་གསུམ་ཉམས་ལེན་གྱིས། །ཐར་པའི་རྒྱལ་མཚན་ཚུགས་པར་བྱིན་གྱིས་
རློབས། །སྟོང་ཉིད་སྙིང་རྗེ་ཟུང་འཇུག་ལམ་བཟང་གིས། །རྒྱལ་སྲས་སྤྱོད་པ་རྒྱ་མཚོའི་མཐར་སོན་ཅིང། །ཁྱད་པར་བདེ་ཆེན་གསང་སྔགས་མྱུར་ལམ་གྱིས། །ཟུང་འཇུག་གོ་འཕང་བདེ་བླག་ཐོབ་གྱུར་ཅིག །ལྷུན་གྲུབ་འཕྲིན་ལས་གྲུ་གཟིངས་འབུམ་སྦྱར་ཏེ། །སྲིད་མཚོ་ཉམ་ངར་བྱིང་བའི་འགྲོ་བ་ཀུན། །བདེ་ཆེན་ཐར་པའི་ཞིང་དུ་འཁྲིད་པ་ཡིས། །མ་ལུས་རྒྱལ་བའི་མཛད་པ་སྒྲུབ་གྱུར་ཅིག །ཅེས་པ་འདི་ནི་ཨ་བ་ཀ་ཏཱ་པཻ་ལི་མཧཱ་པཱ་ལིའི་དགོན་ཕུན་དཔལ་གླིང་གི་དགེ་བསྐོས་བློ་བཟང་རབ་བརྟན་གྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ སངས་རྒྱས་ཀུན་གྱི་ཡེ་ཤེས་གཅིག་བསྡུས་པ། །རྡོ་རྗེ་རྣོན་པོའི་གསང་གསུམ་སྒྱུ་འཕྲུལ་གར། །འཇམ་མགོན་བློ་བཟང་གྲགས་པའི་མདོ་སྔགས་ཀྱི། །བསྟན་པའི་རྒྱལ་མཚན་འཛིན་ལ་གསོལ་བ་འདེབས། །ངེས་པར་འབྱུང་བའི་ཚུལ་ཁྲིམས་དྲི་བཟང་དང། །འགྲོགས་པའི་གྲགས་སྙན་མ་ལ་ཡ་རླུང་གིས། །སྲིད་པའི་གདུང་སེལ་ཐར་པའི་རྒྱལ་མཚན་འཛིན། །གནས་བརྟན་འདུལ་འཛིན་ཆེན་པོར་གསོལ་བ་འདེབས། །མ་སྨད་གྲགས་པའི་གཞིར་གྱུར་རྒྱལ་སྲས་ཀྱི། །སྤྱོད་མཆོག་ཐབས་ཤེས་ཟུང་འཇུག་གར་གྱིས་རྩེན། །མཚན་ཉིད་བཅུ་ལྡན་ཐེག་མཆོག་དགེ་བའི་བཤེས། །མཚུངས་མེད་འགྲོ་བའི་འདྲེན་པར་གསོལ་བ་འདེབས། །གྲགས་པ་མཐའ་ཡས་གསང་ཆེན་རྡོ་རྗེ་ཐེག །རྒྱལ་བའི་ཐུགས་བཅུད་ཟབ་ལམ་རིམ་གཉིས་དང། །མཚན་བཅས་མཚན་མེད་རྣལ་འབྱོར་ལ་གནས་པ། །རྡོ་རྗེ་འཛིན་པའི་གཙོ་ལ་གསོལ་བ་འདེབས། །བླ་མ་ཡི་དམ་ཆོས་སྲུང་རྒྱ་མཚོའི་མཐུས། །འདྲེན་མཆོག་དམ་པའི་རྣམ་དཀར་མཛད་འཕྲིན་དང། །སྙན་པའི་གྲགས་པ་ས་སྟེང་ཀུན་ཁྱབ་ཅིང། །སྐུ་ཚེ་རྒྱལ་
མཚན་བསྐལ་བརྒྱར་བརྟན་གྱུར་ཅིག །བདག་སོགས་ཀུན་ཀྱང་སྐྱེ་བའི་ཕྲེང་བ་རུ། །བླ་མ་མཆོག་གིས་དགྱེས་བཞིན་རྗེས་འཛིན་ཅིང། །རྒྱལ་དབང་གྲགས་པའི་བསྟན་ལ་རབ་ཞུགས་ཏེ། །བཤད་དང་སྒྲུབ་པའི་རྒྱལ་མཚན་འཛིན་གྱུར་ཅིག །མདོར་ན་བསྟན་དང་འགྲོ་བའི་ཕན་བདེ་ཀུན། །སྤེལ་བའི་གྲགས་སྙན་དབྱར་རྔ་བཞད་པ་དང། །ལྷན་ཅིག་བདུད་སྡེའི་གཡུལ་ལས་རྣམ་རྒྱལ་བའི། །དགེ་མཚན་ཡངས་པའི་ནོར་འཛིན་ཁྱབ་གྱུར་ཅིག །ཅེས་འཇམ་མགོན་བསྟན་པའི་གསལ་བྱེད་དམ་པ་སྒོ་མང་མཁན་པོ་སངས་རྒྱས་རྡོ་རྗེའི་སྤྲུལ་བའི་སྐུ་གྲགས་པ་རྒྱལ་མཚན་པའི་ཞབས་བརྟན་གསོལ་འདེབས་འདི་ནི་སྤོང་བ་བསམ་གཏན་ལ་གཅིག་ཏུ་གཞོལ་བའི་དགེ་བའི་བཤེས་གཉེན་བློ་བཟང་དཀོན་མཆོག་གིས་བསྐུལ་ཏེ་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ ཕུལ་བྱུང་མཁྱེན་པའི་གྲགས་པ་ལྷ་ཡི་རྔ། །ཟབ་རྒྱས་ཆོས་ཀྱི་གདངས་སྙན་ང་རོ་ཡིས། །སྲིད་ཞིའི་རྒུད་པའི་གཡུལ་ལས་རྣམ་རྒྱལ་བ། །མཚན་ལྡན་བཤེས་གཉེན་དམ་པར་གསོལ་བ་འདེབས། །དཔལ་ལྡན་མཁས་མང་གཙུག་གི་རྒྱན་གྱུར་ཀྱང་། །སྙེམས་བྲལ་ཞི་དུལ་བག་ཡོད་ཁྲིམས་ཀྱིས་བསྡམས། །ཐུབ་བསྟན་སྤེལ་བའི་ཁུར་གྱིས་མི་ངལ་བ། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཐུགས་ཀྱི་བུམ་བཟང་བསླབ་གསུམ་བདུད་རྩིས་གཏམས། །སྡེ་སྣོད་གསུམ་གྱི་ལེགས་བཤད་དགའ་སྟོན་སྤེལ། །བགྲང་ཡས་འགྲོ་ལ་ཐར་ལམ་མཚོན་པའི་མིག །འདྲེན་མཆོག་དམ་པ་བསྐལ་བརྒྱར་ཞབས་བརྟན་ཤོག །བདག་ཀྱང་བཤེས་གཉེན་དམ་པས་རྗེས་འཛིན་ཅིང། །བཤད་སྒྲུབ་ནོར་བུའི་ཐེམ་སྐས་རིམ་བགྲོད་ནས། །ཡང་དག་ལམ་
གྱི་རི་དབང་རྩེར་སོན་ཏེ། །སྐུ་གསུམ་འཆི་མེད་དབང་པོའི་གནས་ཐོབ་ཤོག །བླ་མ་ཡི་དམ་རིན་ཆེན་རྣམ་པ་གསུམ། །ཐུགས་བསྐྱེད་རྒྱ་མཚོའི་རླབས་བཞིན་མི་ཡོལ་བའི། །བདེན་མཐུས་ཇི་ལྟར་སྨོན་པའི་འབྲས་བུ་ཀུན། །གེགས་མེད་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་དགེ་ལྡན་བསྟན་པའི་སྣང་བྱེད་དམ་པ་རྒྱལ་མཁན་པོ་གྲགས་པ་རྒྱལ་མཚན་པའི་ཞབས་བརྟན་གསོལ་འདེབས་འདི་ནི་དད་བརྩོན་ལྡན་པ་རབ་འབྱམས་པ་འཇིགས་མེད་སྙན་གྲགས་ཀྱིས་བསྐུལ་ངོར་༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། ༈ དཀོན་མཆོག་གསུམ་འདུས་འཇིགས་མེད་སྟོབས་བཅུའི་བདག །ཐུབ་དབང་བསྟན་པའི་སྙིང་པོ་ལུང་རིགས་ཀྱི། །སྒྲོན་མེ་གསལ་བྱེད་སྨྲ་བའི་སེང་གེ་མཆོག །ཁྱབ་བདག་འཁོར་ལོའི་མགོན་པོར་གསོལ་བ་འདེབས། །འདིའང་རབ་འབྱམས་པ་ཡོན་ཏན་རྒྱ་མཚོའི་འདུན་མོས་ལྟར་གནང་བའོ།།