རྣམ་སྲས་གཏོར་འབུལ།
རྣམ་སྲས་གཏོར་འབུལ་བཞུགས་སོ། །ན་མོ་གུ་རུ་བྷྱཿ འདིར་རྒྱལ་ཆེན་རྣམ་ཐོས་སྲས་ལ་མཆོད་གཏོར་འབུལ་བར་འདོད་པས་མཆོད་པ་གཙང་མ་དཀར་གསུམ་གྱི་གཏོར་མ་ཁང་བརྩེགས་མའམ་ཟླུམ་པོ་རྒྱན་ལྡན། ཌཱ་དྲིལ་སོགས་འདུ་བྱ། སྐྱབས་སེམས་སྔོན་དུ་བཏང༌། རང་ཉིད་སྐད་ཅིག་གིས་དཔལ་ཕྱག་ན་རྡོ་རྗེའམ་རྡོ་རྗེ་འཇིགས་བྱེད་སྐུ་མདོག་སྔོན་པོ་ཞལ་གཅིག་ཕྱག་གཉིས་གཡོན་བརྐྱང་གི་སྟབས་ཀྱིས་བཞུགས་པར་གྱུར། མཆོད་པ་བྱ་རྒྱུད་ལྟར་བྱིན་གྱིས་བརླབ། གཏོར་མའང་སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཁཾ་འོད་དུ་ཞུ་བ་ལས་ལྷོའི་ཞལ་ཟས་དྲི་རོ་ནུས་པ་ཕུན་སུམ་ཚོགས་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿ ཧཱུཾ། ལན་གསུམ་གྱིས་བྱིན་གྱིས་བརླབ། བཻ། རི་རབ་ལྷུན་པོའི་བྱང་ཕྱོགས་ལྕང་ལོ་ཅན། །རིན་ཆེན་སྣ་བཞིའི་རང་བཞིན་གཞལ་ཡས་ནས། །རེ་འདོད་ཀུན་སྐོང་རྒྱལ་ཆེན་ཡུམ་སྲས་བློན། །རང་རིགས་འཁོར་ཚོགས་དང་བཅས་གནས་འདིར་གཤེགས། །ལུས་ཅན་ཕོངས་པ་སེལ་བའི་ཐུགས་བསྐྱེད་བཞིན། །གུས་ལྡན་བདག་སོགས་ཀུན་གྱི་མགོན་མཛད་ཕྱིར། །འདོད་དགུའི་མཆོག་སྦྱིན་རྒྱལ་ཆེན་ངལ་བསོས་པོ། །འཁོར་བཅས་དགྱེས་བཞིན་བརྟན་པར་བཞུགས་སུ་གསོལ། །རི་རབ་གླིང་དང་གླིང་ཕྲན་རིན་ཆེན་བདུན། །བཀྲ་ཤིས་རྟགས་རྫས་ཉེར་སྤྱོད་འདོད་ཡོན་ལྔ། །ཕྱི་ནང་གསང་རྟེན་མ་ཚང་མེད་པ་ཡིས། །ནོར་འཛིན་ཡངས་པའི་ཁྱོན་ཀུན་བཀང་སྟེ་འབུལ། །ཁྱད་པར་དཀར་གསུམ་མངར་གསུམ་སྦྱར་བ་ཡི། །མཆོད་གཏོར་རི་ལྟར་སྤུངས་ཤིང་མཚོ་ལྟར་བསྐྱིལ། །ཟག་མེད་བདུད་རྩིའི་ངོ་བོར་བྱིན་བརླབས་ནས། །གུས་པས་འབུལ་ལོ་དགྱེས་བཞིན་
བཞེས་སུ་གསོལ། །ཉིན་བྱེད་གཟི་འབར་གསེར་གྱི་རི་བོ་ཡིས། །འདོད་དགུའི་ཆར་ཆེན་ཕྱོགས་སུ་འབེབས་པ་བཞིན། །བརྗིད་ཅིང་ལྷུན་ཆགས་སྐྱེ་དགུའི་རེ་སྐོང་བ། །རྒྱལ་ཆེན་ཡིད་བཞིན་ནོར་བུ་ཁྱོད་ལ་འདུད། །ཁྱོད་ཞབས་གུས་པས་བསྟེན་ཅིང་མཆོད་བྱེད་ན། །དབུལ་ཕོངས་ཕྱི་ནང་ཉེར་འཚེ་ཀུན་བསལ་ཏེ། །ཆོས་སྲིད་དཔལ་འབྱོར་ལེགས་ཚོགས་མ་ལུས་པ། །དབྱར་གྱི་ཆུ་གཏེར་ཇི་བཞིན་རྒྱས་པར་མཛོད། །གནས་སྐབས་ཆོས་མཐུན་འབྱོར་བ་འཕེལ་བ་དང༌། །མཐར་ཐུག་ནམ་མཁའ་མཛོད་ཀྱི་ཏིང་འཛིན་མཐུས། །མཁའ་མཉམ་འགྲོ་བའི་དབུལ་བ་ཀུན་བསལ་ནས། །ཕུན་ཚོགས་དོན་གཉིས་དཔལ་ལ་སྦྱོར་གྱུར་ཅིག །ཅེས་པ་འདི་ནི་དད་ལྡན་དགེ་སློང་དཀོན་མཆོག་ཚུལ་ཁྲིམས་ཀྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །དགེ་ལེགས་འཕེལ། །