ཆོས་རྒྱལ་ཕྱི་ནང་གསང་གསུམ་གྱི་བསྙེན་སྒྲུབ།
ཆོས་རྒྱལ་ཕྱི་ནང་གསང་གསུམ་གྱི་བསྙེན་ཅིང་སྒྲུབ་པའི་རིམ་པ་ཁ་སྐོང་གསང་སྒྲུབ་ཀྱི་བསྐང་བ་དང་བཅས་པ་བཞུགས་སོ། །
ན་མོ་གུ་རུ་བཛྲ་བྷཻ་ར་ཝཱ་ཡ། རྒྱལ་ཡུམ་དེ་ཉིད་རྟོགས་པའི་ཤེས་རབ་ལ། །རྒྱལ་བའི་ཡབ་ཏུ་གྱུར་པའི་ངོ་མཚར་ཡང། །རྒྱལ་སྲས་ཚུལ་དུ་རྩེན་པའི་སྒྱུ་འཕྲུལ་གར། །རྒྱལ་བའི་དབང་པོ་ཙོང་ཁ་པ་ལ་འདུད། །ཧ་ཧར་བཞད་པའི་གད་རྒྱངས་མཐོན་པོ་ཡིས། །སྲིད་པ་གསུམ་པོ་ཤིག་ཤིག་འདར་བྱེད་ཅིང། །ནམ་མཁའི་དབྱིངས་སུ་རྭ་གདེངས་མ་ཧེའི་གདོང༌། །གཤིན་རྗེ་གཤེད་པོས་བགེགས་ལས་རྒྱལ་བར་མཛོད། །བླ་མ་རྡོ་རྗེ་འཇིགས་བྱེད་ཞབས་པད་ལ། །གུས་པས་བཏུད་ནས་ལས་གཤིན་རིགས་གསུམ་གྱི། །བསྙེན་སྒྲུབ་རིམ་པ་དམ་པས་བཤད་ཟིན་འགའ། །ཤིན་ཏུ་གོ་སླའི་ཚུལ་གྱིས་བྲི་བར་བྱ། །དེ་ལ་འདིར་ལས་ཀྱི་གཤིན་རྗེ་ཕྱི་ནང་གསང་གསུམ་གྱི་བསྙེན་སྒྲུབ་ཚུལ་བཞིན་དུ་བྱ་བར་འདོད་པའི་གང་ཟག་གིས་ཐོག་མར་གང་དུ་བསྒྲུབ་པའི་གནས་ནི། དུར་ཁྲོད་ལ་སོགས་པ་གཙོ་བོར་གསུངས་ཀྱང། གནས་ཁང་ལྟ་བུར་བྱེད་ན། མུན་པ་ཤིན་ཏུ་འཐིབ་པས་རྔམས་གནག་པ། ཁ་ལྷོར་བལྟ་བ་དངོས་སམ། ཡང་ན་ཡིད་ཀྱིས་དེ་ལྟ་བུར་མོས་ཏེ། གཟའ་དང་རྒྱུ་སྐར་སོགས་ཀྱང་མངོན་སྤྱོད་ཀྱི་ལས་དང་མཐུན་པར་འཆར་བའི་ཚེས་ལ། ཐུན་ཚོད་ཀྱང་དེ་ལྟ་བུ་ནས་འགོ་རྩོམ་པར་བཤད་དོ། །དེ་ལ་ཐོག་མར་གནས་ཁང་བྱི་དོར་ལེགས་པར་བྱས། ཡི་དམ་དང་ལས་གཤིན་རིགས་གསུམ་གྱི་རྟེན་རྣམས་གོ་རིམ་བཞིན་དུ་བཀྲམ། དེའི་མདུན་དུ་སྟེགས་བུ་མཐོན་པོའི་སྟེང་དུ། ལྕགས་སྣོད་
ལྟ་བུར་ནས་ནག་རྗེན་བཏགས་ལས་བྱས་པའི་གཏོར་མ་ཁྲུ་གང་ལས་མི་ཆུང་བར་བྱ་དགོས་ལ། དེ་ཡང་ཡི་དམ་གྱི་གཏོར་མ་དཀྱུས་ལྟར་དང། ཕྱི་སྒྲུབ་ལ་དཔལ་བཤོས་ཟུར་གསུམ་པ་རྩེ་མོར་ཐོད་དབྱུག་དང་རྡོ་རྗེའི་ཏོག་གིས་སྤྲས་ཤིང། མེ་རི་སོགས་ཀྱིས་བརྒྱན་པ། ནང་སྒྲུབ་ཀྱི་དབྱིབས་དེ་མཚུངས་ལ་གྲི་ཐོད་ཀྱིས་བརྒྱན་པ་དང། གསང་སྒྲུབ་ཀྱི་གཏོར་མ་ནོར་བུ་འབར་བའི་དབྱིབས་ཅན། ཕྱི་སྒྲུབ་ཀྱི་གཏོར་མའི་གཡོན་དུ། ཙཱ་མུཎྜའི་གཏོར་མ་མཐོ་གང་ལས་མི་ཆུང་བ་རྩེ་གསུམ་གྱིས་མཚན་པ་དང། མཐའ་སྐོར་དུ་མཐེབ་ཀྱུ་སོགས་ཕྱག་བཞེས་མ་ཉམས་པར་ཚུལ་བཞིན་དུ་བཤམ། མདུན་དུ་འབུལ་གཏོར་དང་ཉེར་སྤྱོད་སོགས་ཅི་འབྱོར་བའི་མཆོད་པ་དམ་ཉམས་ཀྱི་རྫས་སོགས་ཀྱིས་མ་སྦགས་པའི་གཙང་ཞིང་གྱ་ནོམ་པ། ཕུད་མ་ཉམས་ཤིང༌། གཡོ་ཟོལ་གྱིས་མ་བསླད་པ་དང། ཁྱད་པར་དུ་ཡང་འདིའི་བསྙེན་པའི་ཡན་ལག་ལ་མེད་དུ་མི་རུང་བ། མི་རྐང་གི་གླིང་བུ། ཐོད་པའི་ཌཱ་མ་རུ། ཤ་ཆེན་གུ་གུལ་བསྲེས་པའི་སྤོས་སྦྱོར། ནང་མཆོད་སོགས་ཡོ་བྱད་རྣམས་ཚགས་སུ་ཚུད་པར་བྱས། རོ་གདན་དངོས་མ་འབྱོར་ཡང། རོ་རས་ལྟ་བུ་ལ་བྲིས་པའམ། ཐ་མའང་ཡིད་ཀྱིས་དེ་ལྟ་བུར་མོས་པའི་སྟན་ལ་འཁོད། སྐྱབས་སེམས་སྔོན་དུ་བཏང༌། ཡི་དམ་གྱི་མངོན་རྟོགས་རྒྱས་བསྡུས་གང་ཡང་རུང་བའི་སྒོ་ནས། རང་ལྷའི་ང་རྒྱལ་བརྟན་པོ་ལ་གནས་པ་ཞིག་མེད་མི་རུང་བར་དགོས་ཏེ། རང་ལ་དེ་ལྟ་བུའི་
གདེང་ཅི་ཡང་མེད་པར་སྐྱེ་འགྲོའི་སྲོག་གི་བདག་པོ་འདི་ལྟ་བུ་ལ་བཀའ་བསྒོ་བ་ནི། རང་ཉིད་ཀྱི་འཚོ་བ་ཐུང་ངུར་བྱེད་པའི་སྦྱོར་བ་ལྷུར་ལེན་པ་ཡིན་པར་ཤེས་པར་བྱའོ། །དེ་ལྟར་ལྷའི་ང་རྒྱལ་དང་གསལ་སྣང་ཁྱད་པར་ཅན་འབྱུང་བ་ལ་ཡང་བཤེས་གཉེན་མཚན་ཉིད་དང་ལྡན་པ་ཚུལ་བཞིན་དུ་བསྟེན་ནས་མཉེས་པར་བྱས་པ་ལས། སྨིན་བྱེད་དབང་གི་ཆུ་བོ་ཉམས་པ་མེད་པར་མནོས་པ་ཞིག་དགོས་ཤིང། དེའི་སྔོན་དུའང་འཆི་བ་མི་རྟག་པ་ནས་བཟུང་སྟེ། ཐུན་མོང་བའི་ལམ་གྱི་རིམ་པས་རྒྱུད་ལེགས་པར་སྦྱངས་པ་ཞིག་དགོས་པས། ཐོག་མར་རང་རྒྱུད་ལ་རྨང་གཞི་དེ་དག་ཚང་མ་ཚང་བལྟ་དགོས་ཀྱི། དང་པོ་ཉིད་ནས་མཐོ་མཐོ་དང་རྔམ་རྔམ་འབའ་ཞིག་ལ་དགའ་བས་ནི་གར་ཡང་མི་ཕྱིན་ནོ། །ཁྱད་པར་དུ་ཡང་ལས་ཀྱི་གཤིན་རྗེ་འདི་ཉིད་ལམ་གྱི་འགྲོས་དང་བསྟུན་པའི་སྲུང་མ་བཤད་པའི་སྐབས་སུ། སྐྱེས་བུ་ཆུང་ངུའི་ཆོས་སྐྱོང་དུ་གསུངས་པའི་དོན་འཆི་བ་མི་རྟག་པ་ལ་སྦྱར་ནས་བཤད་པའང་ཡོད་ལ། གཙོ་བོ་འདི་ཉིད་ལས་དཀར་ནག་གི་ཤན་འབྱེད་ཡིན་ཞིང། སྐྱེས་བུ་ཆུང་ངུའི་ལམ་གྱི་སྲོག་ཀྱང་ལས་འབྲས་ཀྱི་སྤང་བླང་འདི་ཉིད་ཡིན་པས། དེའི་དབང་དུ་བྱས་པ་ཡིན་ལ། དེས་ན་ལས་འབྲས་ཀྱི་བླང་དོར་ཚུལ་བཞིན་དུ་བྱས་ཏེ། དམ་ཚིག་དང་སྡོམ་པ་མིག་གི་འབྲས་བུ་བཞིན་དུ་བསྲུངས་ན། བསྙེན་སྒྲུབ་ཀྱང་ལོགས་སུ་མི་དགོས་པར་ཆོས་སྐྱོང་རང་དབང་མེད་པར་འཁོར་བའི་རྟེན་དེ་ལས་ལྷག་པ་མེད་ཅིང༌། དེ་དག་ཡལ་བར་བོར་ནས་བཟླས་བརྗོད་དང་དམོད་བཅོལ་ཅི་ཙམ་བྱས་ཀྱང། ཡི་དམ་ཆོས་སྲུང་རྣམས་ཐུགས་ཁྲེལ་བའི་རྒྱུ་ལས་མ་འདས་པས་དམ་ཚིག་དང་སྡོམ་པ་གཙང་བ་ཤིན་ཏུ་གལ་ཆེའོ། །
དེ་ལ་ལས་གཤིན་རིགས་གསུམ་པོ་འདི་ནི། གཞན་གྱི་ཆོས་སྐྱོང་ཐ་དད་པ་གསུམ་ལྟ་བུ་མ་ཡིན་པར། རྩ་བ་དམ་ཅན་ཆོས་རྒྱལ་གཅིག་པུ་དེ་ཉིད་སྒྲུབ་པ་པོའི་མོས་པ་ཐ་དད་པའི་དབང་གིས་ལས་སོ་སོ་ལ་སྐུའི་རྣམ་པ་སྟོན་ཚུལ་ཙམ་ཡིན་པས། དཀྱུས་གཅིག་ཏུ་བསྒྲུབ་པའི་ཚེ་ཡང༌། མངོན་རྟོགས་སོགས་གསལ་འདེབས་པའི་ཚུལ་རགས་པ་ཙམ་ཞིག་སོ་སོར་བྱས་ཀྱང༌། ཆོ་གའི་ཆ་རྣམ་པ་ཐམས་ཅད་ནས་མ་འདྲེས་པ་མི་དགོས་པས། འདིར་ཡང་ཕྱི་སྒྲུབ་ནང་སྒྲུབ་གཉིས་ཀྱི་མངོན་རྟོགས་སོགས་དཀྱུས་ལྟར་བྱས་ཏེ། དེའི་བར་དུ་གསང་སྒྲུབ་ཀྱི་སྐོར་རྣམས་འཇུག་པའི་ཚུལ་ནི། ཡི་དམ་གྱི་བསྒོམ་བཟླས་གཏོར་འབུལ་རྣམས་གྲུབ་པའི་རྗེས་སུ་ཧྲཱིཿ ཥྚྲཱིཿ ས་བསང༌། སྭ་བྷཱ་ཝས་སྦྱངས། སྟོང་པའི་ངང་ལས་སྣ་ཚོགས་པདྨ་དང་ཉི་མ། ཞེས་པ་ནས༌། ལིངྒ་དམར་པོ་གྱེན་དུ་ལངས་པ། ཡང་མདུན་གྱི་ནམ་མཁར་པདྨ་དང་ཉི་མ་དང་མ་ཧེ་དམར་པོའི་གདན་གྱི་སྟེང་དུ་ཡཾ་ཡིག་དམར་པོ་དེ་ལས་འོད་ཟེར་འཕྲོས། གནོད་བྱེད་གདུག་པ་ཅན་རྣམས་ཚར་བཅད་ཅིང༌། སེམས་ཅན་རྣམས་ཀྱི་དབུལ་ཕོངས་ཀྱི་སྡུག་བསྔལ་བསལ། སྲིད་ཞིའི་དཔལ་འབྱོར་མཐའ་དག་བསྡུས་ཏེ་ཡཾ་ཡིག་ལ་ཐིམ། དེ་ཡོངས་སུ་གྱུར་པ་ལས། ཆོས་ཀྱི་རྒྱལ་པོ་སྐུ་མདོག་དམར་ནག་རབ་ཏུ་འཇིགས་པའི་གཟུགས་ཅན། བྱུ་རུའི་རི་བོ་ལ་བསྐལ་པའི་མེས་འཁྱུད་པ་ལྟ་བུ། མ་ཧེ་རབ་ཏུ་ཁྲོས་པའི་གདོང་དང་ལྡན་པ། འབར་བའི་སྤྱན་གསུམ་སྡང་མིག་གློག་ལྟར་འཁྱུག་ཅིང༌། མེའི་ཚ་ཚ་འཕྲོ་བའི་སྨ་ར་དང། སྨིན་མ་དམར་སེར་གྱེན་དུ་བརྫེས་པ། མཆེ་བ་རྣོན་པོ་བཞི་གཙིགས་ཤིང་ལྗགས་འདྲིལ་བ།
གཡས་ཡིད་བཞིན་གྱི་ནོར་བུ་དང། གཡོན་བདུད་རྩིས་གང་བའི་ཐོད་པ་ཐུགས་ཀར་འཛིན་ཅིང༌། ཐོད་སྐམ་ལྔའི་དབུ་རྒྱན་དང༌། ཁྲག་འཛག་པའི་མགོ་བོ་རློན་པ་ལྔ་བཅུའི་དོ་ཤལ་ཅན། གཡས་བསྐུམ་གཡོན་བརྐྱང་གི་སྟབས་ཀྱིས་བཞུགས་ཤིང༌། ལིངྒ་དམར་པོ་གྱེན་དུ་ལངས་པ། གཞན་ཡང་པདྨ་དང་ཉི་མ་ཞེས་སོགས། ཕྱི་སྒྲུབ་ཀྱི་མངོན་རྟོགས་དཀྱུས་ལྟར་བྱས། སྤྱན་འདྲེན་གྱི་ཚེ་ཡང་གསུམ་ག་ལྷན་ཅིག་ཏུ་སྦྱན་དྲངས་ཏེ། དམ་ཚིག་པ་སོ་སོ་ལ་ཐིམ་པའི་མོས་པ་དང་དབང་བསྐུར་རྒྱས་གདབ་ཀྱང་ལྷན་ཅིག་ཏུ་བྱས་པས་ཆོག་ལ། གང་དུ་བཞུགས་པའི་གནས་ནི། རང་ཡི་དམ་གྱི་རྟེན་བརྟེན་པའི་ང་རྒྱལ་ལ་གནས་པའི་ཚེ། ཤར་སྒོའི་རྟ་བབས་ཀྱི་རྒྱབ་ཐད་དྲང་གི་ནམ་མཁར་གསལ་འདེབས་པར་གསུངས་སོ། །ནང་མཆོད་འབུལ་བའི་ཚེ། ཡ་མ་རཱ་ཛཱ་སརྦ་སིདྡྷི་ས་པ་རི་ཝཱ་ར་ཨོཾ་ཨཱཿ ཧཱུཾ། ཞེས་པ་བཅུག་ཅིང༌། བསྟོད་པ་ཐུན་མོང་དུ་བྱ། སྔ་ཕྱིའི་ཐུན་གང་རུང་གཅིག་མ་གཏོགས་པར་འདི་ནས་བཟླས་པ་ལ་ཞུགས་པས་ཆོག་ཀྱང༌། བསྐང་བཤགས་བྱེད་པའི་ཚེ། ཧཱུཾ་བླ་མ་མཆོག་དང། ཞེས་པ་ནས། སྤྲོས་བྲལ་ཆོས་དབྱིངས་ངང་དུ་བཤགས་པར་བགྱི། །ཞེས་པའི་རྗེས་སུ། ཧཱུཾ་འཇམ་པའི་དབྱངས་སོགས་རྩ་བརྒྱུད་བླ་མ་དང༌། །དགེ་སྡིག་ཤན་འབྱེད་ཆོས་ཀྱི་རྒྱལ་པོ་སོགས། །ཡེ་ཤེས་སྤྱན་ལྡན་སྲུང་མ་འཁོར་དང་བཅས། །མ་ལུས་བདག་ལ་བརྩེ་བས་དགོངས་སུ་གསོལ། །ཐོག་མེད་དུས་ནས་སྲིད་པའི་བཙོན་རར་ཆུད། །སེར་སྣ་ལ་སོགས་ཉེས་བརྒྱའི་ལྕགས་ཀྱིས་བསྡམས། །རྨོངས་པའི་མུན་པ་འཐིབ་པོའི་དབང་གྱུར་ཏེ། །ལས་འབྲས་ཚུལ་ལ་བླང་དོར་ལོག་པར་བསྒྲུབས། །དངོས་གྲུབ་རྩ་བ་བླ་མར་སྐྱོན་བརྟགས་ཤིང༌། །ཡི་དམ་
ལྷག་པའི་ལྷར་ཡང་སོམ་ཉི་བགྱིས། །ཆོས་སྐྱོང་སྲུང་མའི་བསྙེན་སྒྲུབ་གཡེལ་བ་སོགས། །སྒོ་གསུམ་ཉེས་པའི་ཚོགས་ཀུན་མཐོལ་ལོ་བཤགས། །དངོས་གྲུབ་ཀུན་གྱི་རྟེན་དུ་གྱུར་པ་ཡི། །བསྲུང་སྡོམ་བཅས་པའི་མཚམས་ལས་འདས་པ་དང༌། །དམ་རྫས་གཏོར་མ་སོགས་ལ་ཉམས་གྲིབ་ཀྱིས། །སྦགས་པའི་ནོངས་པ་ཅི་བགྱིས་མཐོལ་ལོ་བཤགས། །དབུལ་ཕོངས་སེར་སྣའི་སྐྱོན་དུ་མ་རྟོགས་པར། །ཕྱི་ཕྱིར་འཇུངས་པས་སྦྱིན་པ་མི་གཏོང་ཞིང། །འདོད་ལ་སྲེད་པས་གཞན་ནོར་བླངས་པ་སོགས། །ཁྱོད་ཀྱི་དམ་ཚིག་ལས་འགལ་བགྱིས་རྣམས་བཤགས། །ཡབ་རྗེ་རྒྱལ་བའི་བསྟན་ལ་འཁུ་བའི་དགྲར། །དྲག་པོས་ལས་ཀྱི་ཚམ་རྔམ་མི་སྟོན་པར། །ཟས་ནོར་གཏམ་གྱིས་བྱམས་པར་བསྐྱངས་པ་སོགས། །ཁྱོད་ཀྱི་ཐུགས་དང་འགལ་བ་བགྱིས་རྣམས་བཤགས། །མདོར་ན་བཟང་ངན་སྤྲོས་པའི་མཐའ་བྲལ་བ། །ཆོས་ཀྱི་དབྱིངས་ལ་ནོངས་པ་མ་མཆིས་ཀྱང། །ཀུན་རྫོབ་འཁྲུལ་ངོར་བཀྲ་བའི་ཉེས་ལྟུང་ཀུན། །བརྩེ་ཆེན་ཐུགས་རྗེའི་སྟོབས་ཀྱིས་བྱང་གྱུར་ཅིག །བསྐང་བ་ནི། ཧཱུཾ། མི་འགྱུར་ལྷན་སྐྱེས་བདེ་བའི་རོལ་པ་ལས། །ཏིང་འཛིན་གསལ་བའི་རི་མོ་མཆོད་པའི་སྤྲིན། །སྣ་ཚོགས་དབང་པོའི་གཞུ་བཞིན་བཀྲ་བ་ཡིས། །ཆོས་ཀྱི་རྒྱལ་པོ་འཁོར་བཅས་དགྱེས་གྱུར་ཅིག །ཁྲག་གི་མཆོད་ཡོན་རྦ་རླབས་མཁའ་ལ་འཕྱོ། །དབང་པོའི་མེ་ཏོག་འདབ་མ་འབུམ་དུ་བཞད། །ཤ་ཆེན་དུད་སྤྲིན་ལྷ་ཡི་ལམ་ཀུན་འགེངས། །ཚིལ་ཆེན་སྒྲོན་མེ་ཉི་ཟླའི་འོད་ལ་འཁུ། །ཁྲག་དང་ཞག་གི་དྲི་ཆབ་རྒྱ་མཚོར་འཁྱིལ། །ཤ་དང་རུས་པའི་ཞལ་ཟས་ལྷུན་པོར་སྤུངས། །སྙན་ཅིང་བརྗིད་པའི་རོལ་
མོ་འབྲུག་ལྟར་སྒྲོགས༌། །ཕྱི་དང་ནང་གི་ཉེར་སྤྱོད་དམ་པ་འདིས། །བླ་མ་གཤིན་རྗེའི་གཤེད་པོའི་ཐུགས་དམ་བསྐང༌། །ཆོས་རྒྱལ་ཡིད་བཞིན་ནོར་བུའི་ཐུགས་དམ་བསྐང། །འཁོར་ཚོགས་དམ་ཅན་རྒྱ་མཚོའི་ཐུགས་དམ་བསྐང༌། །ཐུགས་དམ་བསྐངས་ཤིང་ཉམས་ཆག་སོས་གྱུར་ནས། །བསྟན་ལ་གནོད་པའི་དགྲ་བགེགས་བརླག་པ་དང༌། །དབུལ་ཞིང་ཕོངས་པའི་སྡུག་བསྔལ་བསལ་བྱས་ཏེ། །རྣལ་འབྱོར་དམ་ཆོས་བསྒྲུབ་པའི་མཐུན་རྐྱེན་ཀུན། །འབད་མེད་ལྷུན་གྱིས་གྲུབ་པའི་དངོས་གྲུབ་སྩོལ། །བསྐལ་པའི་མེ་འོད་འཕྲོ་བའི་བྲག་གི་རིས། །རབ་ཏུ་རྔམ་པའི་ངར་སྒྲ་སྒྲོགས་པ་བཞིན། །ཁ་དོག་དམར་ནག་རྣོ་བའི་རྭ་གདེངས་ཤིང༌། །རུས་པའི་རྒྱན་སྤྲས་གཏུམ་དྲག་མ་ཧེ་འདིས། །བླ་མ་གཤིན་རྗེ་གཤེད་སོགས་ཤོ་ལོ་ཀ་གཉིས་གོང་དང་འདྲ། ཟས་ནོར་ལོངས་སྤྱོད་འདོད་དགུའི་གཏེར་ཆེན་པོ། །ཆར་དུ་བསྙིལ་བའི་ནོར་བུ་བསམ་འཕེལ་དང༌། །ཡངས་ཤིང་རྒྱ་ཆེ་མཚན་ལྡན་ཀ་པཱ་ལ། །དམར་སེར་བདུད་རྩིའི་རྒྱུན་གྱིས་གང་བ་འདིས། །བླ་མ་ནས། གངས་རིའི་མདངས་ལྡན་ཐོད་པའི་དབུ་རྒྱན་དང༌། །ཆིལ་ཆིལ་ཁྲག་འབབ་བརྒྱ་ཕྱེད་མགོ་བོའི་འཕྲེང༌། །མུ་ཏིག་འོད་ཆགས་རུས་པའི་དོ་ཤལ་སོགས། །སྣ་ཚོགས་རྒྱན་གྱི་བྱེ་བྲག་དམ་པ་ཡིས། །བླ་མ་ནས། གཞན་ཡང་ལྷུན་པོ་ཉི་ཟླའི་རྣ་ཆ་ཅན། །གླིང་དང་གླིང་ཕྲན་བཀྲ་ཤིས་རྟགས་རྫས་ཚོགས། །རིན་ཆེན་བདུན་དང་གོ་མཚོན་ཟས་ནོར་སོགས། །དངོས་བཤམས་ཡིད་སྤྲུལ་མཆོད་པའི་སྤྲིན་ཕུང་འདིས། །བླ་མ་གཤིན་རྗེ་ནས། ལྷུན་གྱིས་གྲུབ་པའི་དངོས་གྲུབ་སྩོལ། །ཟློག་པ་ཐུན་མོང་དང་བཟླས་པའི་སྐབས་སུ། ཨོཾ་ཡ་མ་རཱ་ཛཱ་སརྦ་སིདྡྷི་ཧཱུཾ། ཞེས་བཟླ་
ཞིང༌། གཏོར་འབུལ་གྱི་ཚེ་ཡང༌། ཡ་མ་རཱ་ཛཱ་སརྦ་སིད་དྷི་ས་པ་རི་ཝཱ་ར་ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་བཅུག་ལ། ནང་མཆོད་ཀྱང་སྔར་ལྟར་དབུལ། བསྟོད་པ་ནི། ཧཱུཾ། གང་ཞིག་ཡིད་ལ་དྲན་པའི་བསིལ་ཟེར་གྱིས། །དབུལ་ཞིང་ཕོངས་པའི་ཚ་གདུང་འཇིལ་བྱེད་ཅིང༌། །སྲིད་ཞིའི་དཔལ་འབྱོར་ཀུནྡ་རྒྱས་བྱེད་པ། །ཆོས་རྒྱལ་ཡིད་བཞིན་ནོར་བུ་ལ་ཕྱག་འཚལ། །རིན་ཆེན་རོ་ཧི་ཏ་ཀའི་ལྷུན་པོ་ལ། །རབ་འབར་གློག་གི་ཞགས་པས་འཁྱུད་པ་བཞིན། །སྐུ་མདོག་དམར་ནག་རབ་འཇིགས་སྲིན་པོའི་གཟུགས། །གཏུམ་དྲག་ཚམ་རྔམ་འཕྲོ་བ་ཁྱོད་ལ་བསྟོད། །དམར་སེར་མེ་ཡི་རལ་པ་མཁའ་ལ་གསིག །ཧ་ཧའི་གད་རྒྱངས་དྲག་པོས་སྲིད་གསུམ་འགེངས། །བརྐྱང་བསྐུམ་ཞབས་གཉིས་བརྡབ་པས་ས་ཆེན་གཡོ། །རྒྱལ་བསྟན་སྲུང་མའི་གཙོ་བོ་ཁྱོད་ལ་བསྟོད། །འཇིག་རྟེན་གསུམ་གྱི་དཔལ་འབྱོར་མ་ལུས་པ། །དབང་དུ་སྡུད་པའི་ནོར་བུ་རིན་ཆེན་དང། །བདུད་རྩིའི་རྒྱུན་གྱིས་གང་བའི་ཀ་པཱ་ལ། །གཡས་གཡོན་ཕྱག་གིས་འཛིན་མཛད་ཁྱོད་ལ་བསྟོད། །ཡེ་ཤེས་རང་བཞིན་རབ་འབར་བྱིན་ཟ་ཡིས། །སྡེ་དང་བཅས་པའི་བདུད་རྣམས་སྲེག་བྱེད་ཅིང། །སྒྲུབ་པ་པོ་ལ་དངོས་གྲུབ་ཆར་འབེབས་པའི། །བསམ་འཕེལ་དབང་གི་རྒྱལ་པོ་ཁྱོད་ལ་བསྟོད། །འཇམ་མགོན་ངུར་སྨྲིག་གར་བསྒྱུར་ཙོང་ཁ་པའི། །བསྟན་དང་བསྟན་འཛིན་བརྒྱུད་པར་བཅས་པ་ཀུན། །འཛད་མེད་དངོས་གྲུབ་ཆར་གྱིས་སྐྱོང་མཛད་པའི། །ཆོས་སྐྱོང་ཆེན་པོ་ཁྱོད་ལ་སྙིང་ནས་འདུད། །བདག་ཅག་དེང་ནས་བྱང་ཆུབ་སྙིང་པོའི་བར། །དམ་ཆོས་སྒྲུབ་པའི་བར་གཅོད་མི་འབྱུང་ཞིང༌། །ཕྱི་དང་
ནང་གི་མཐུན་རྐྱེན་མ་ལུས་པ། །འདོད་དགུར་ལྷུན་གྱིས་གྲུབ་པའི་སྡོངས་གྲོགས་མཛོད། །ཅེས་པས་བསྟོད། དེ་དག་ནི་གཙོ་བོར་ངག་འདོན་གྱི་རིམ་པ་ཙམ་སྟེ། གཙོ་བོར་གྱུར་པ་བསྙེན་པའི་དམིགས་པ་ནི། ནང་སྒྲུབ་ལ་རང་ཡི་དམ་དུ་གསལ་བའི་ཐུགས་ཀའི་ཏིང་ངེ་འཛིན་སེམས་དཔའ། ཧཱུཾ་ཡིག་མཐིང་གའི་འོག་ཙམ་ལ་པདྨ་དམར་པོ་འདབ་མ་བཞི་པའི་ལྟེ་བར་ཧཱུཾ་ཡིག་དང༌། མཐའ་སྐོར་དུ་སྔགས་ཀྱི་ཕྲེང་བས་བསྐོར་བ་གསལ་བཏབ། ཆོས་རྒྱལ་གྱི་ཐུགས་ཀར་ཡང་དེ་ལྟ་བུའི་སྔགས་འཁོར་ཞིག་གསལ་བཏབ་སྟེ། རང་གི་ཐུགས་ཀའི་སྔགས་འཁོར་དེ་ཉིད་དྲག་ཏུ་བསྐྱོད། སྐུའི་དབྱིབས་བརྒྱུད་དེ། ཤངས་བུག་གཡས་ནས་བྱུང༌། ཆོས་རྒྱལ་གྱི་ཤངས་བུག་གཡོན་པ་ནས་ཞུགས། ཐུགས་ཀའི་སྔགས་འཁོར་གྱི་དབུས་ཀྱི་ས་བོན་ལ་སིབ་ཀྱིས་ཐིམ། སླར་ཡང་ཆོས་ཀྱི་རྒྱལ་པོའི་སྐུའི་དབྱིབས་བརྒྱུད་དེ་ཤངས་བུག་གཡས་ནས་བྱུང༌། རང་གི་ཤངས་བུག་གཡོན་ནས་ཞུགས་ཏེ་ཐུགས་ཀར་འཁོད། དེ་ལྟ་བུའི་ཚུལ་གྱིས་མགལ་མེའི་འཁོར་ལོ་བཞིན་དུ་འཁོར་ཞིང། དེ་ལ་ཡི་གེ་རྣམས་ལས་སྔགས་ཀྱི་གདངས་ཟབ་མོ་འབྲུག་སྒྲ་བཞིན་དུ་འུ་རུ་རུ་སྒྲོག་བཞིན་པ་དང། མེ་སྟག་དམར་ཆེམ་ཆེམ་འཕྲོ་བ་དེ་ལྟ་བུ་བསམ་དགོས་ལ། དེ་ལྟ་བུའི་སྔགས་ཀྱི་འཕྲེང་བ་བརྒྱུད་མར་འཁོར་བས། ཆོས་ཀྱི་རྒྱལ་པོའི་ཐུགས་རྒྱུད་རང་དབང་མེད་པར་བསྐུལ་ཏེ། རང་ལ་ལྟ་མི་ནུས་བཞིན་དུ་འདུད་ཅིང་གུས་པའི་ཚུལ་གྱིས་ཞི་རྒྱས་དབང་དྲག་གི་ལས་རབ་འབྱམས་གང་བཅོལ་ཐམས་ཅད་བདག་གིས་བྱའོ་ཞེས་ཞལ་གྱིས་བཞེས་ཤིང་དམ་བཅས་པར་བསམས་ཏེ། སྔགས་བཟླས་པ་ལ་འཇུག་དགོས་ཤིང། ཕྱི་སྒྲུབ་ལ་སྔགས་འཁོར་
གཉིས་ཀའི་དབུས་ཀྱི་ས་བོན་ལ་ཡཾ་ཡིག་མཐིང་ག་དང། ཙཱ་མུཎྜིའི་ཐུགས་ཀར་རྩེ་གསུམ་ལ་གནས་པའི་ཙཾ་ཡིག་གི་མཐར། སྔགས་འཁོར་འགོད་དགོས་ཀྱི། དམིགས་པའི་ཁྱད་པར་གཞན་འདྲའོ། །ནང་སྒྲུབ་ཀྱི་སྔགས། ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ་ཕཊ། ཅེས་པ་འདི་ཉིད་ཡིན་པར་གྲགས་ཆེ་ལ། ཕྱི་ནང་གཉིས་ཀའི་སྔགས་གཅིག་པར་བཞེད་པ་ཡང་ཡོད་དེ་དཔྱད་པར་བྱའོ། །གསང་སྒྲུབ་ཀྱི་བཟླས་པའི་དམིགས་པ་ནི། ཐུགས་ཀར་ཉི་གདན་གྱི་སྟེང་དུ་དབུས་སུ་ནོར་བུ་འབར་བ་ལ་གནས་པའི་ཡཾ་ཡིག་དམར་པོ་དང༌། མཐའ་སྐོར་དུ། ཨོཾ་ཡ་མ་རཱ་ཛཱ་སརྦ་སིད་དྷི་ཧཱུཾ་ཞེས་པས་བསྐོར་བར་བསམས་ཏེ། སྔགས་འཕྲེང་སྤྲོ་བསྡུ་སོགས་སྔ་མ་དང་འདྲ་ཡང༌། དམིགས་པའི་ཁྱད་པར་ནི། འདིའི་སྔགས་འཕྲེང་ལས་འོད་ཟེར་དམར་པོ་ལྕགས་ཀྱུ་དང། ཞགས་པའི་རྣམ་པ་ལྟ་བུ་དཔག་ཏུ་མེད་པ་འཕྲོས་ནས། འཇིག་རྟེན་གྱི་ཁམས་ཀུན་ཏུ་ཁྱབ་པས་ཟས་ནོར་ལོངས་སྤྱོད་མཐའ་དག་དང་ཁྱད་པར་རྒྱལ་བློན་སྡེ་འབངས་སོགས། གང་ཞིག་དབང་དུ་བསྡུ་བར་འདོད་པ་ཐམས་ཅད་རང་དབང་མེད་པར་ཁབ་ལེན་གྱིས་ལྕགས་ཕྱེ་བསྡུས་པ་བཞིན་དུ་བཀུག་སྟེ་དབང་དུ་འདུས་པར་བསམ་ལ་བཟླས་པ་བྱའོ། །བསྙེན་པའི་ཚེ་ཅུང་ཟད་འཚུབ་པའི་རྣམ་པ་བྱུང་ན། ཆོས་རྒྱལ་གྱི་སྤྱི་བོར་རྡོ་རྗེ་ནག་པོ་རྩེ་ལྔ་བའི་ལྟེ་བའི་ནང་དུ། ཡི་དམ་རྡོ་རྗེ་འཇིགས་བྱེད་ཀྱི་ངོ་བོ་ཧཱུཾ་ཡིག་མཐིང་ནག་འོད་ཟེར་དྲག་ཏུ་འབར་བ་ཞིག་གོང་གནོན་གྱི་ཚུལ་དུ་གསལ་བཏབ་དེས་འཚུབ་ཞི་བར་མ་ནུས་ན། རྡོ་རྗེའི་ལྟེ་བར་འཇིགས་བྱེད་མ་ཧེའི་ཞལ་ཅན། ཞལ་གཅིག་ཕྱག་གཉིས་པ། ཆེ་ཆུང་ཚོན་གང་བ་ཞིག་གསལ་བཏབ།
དེས་ཀྱང་མ་ནོན་པར་ཤིན་ཏུ་འཚུབ་ཅིང་ལས་བསྒྲུབ་པར་མི་ཉན་པའི་རྣམ་པ་བྱུང་ན། གནམ་ལྕགས་ཀྱི་རང་བཞིན་གྱི་རྭ་རྩེ་དང་རྨིག་པ་ཤིན་ཏུ་རྣོ་བའི་མ་ཧེ་ལ་གནས་པའི་འཇིགས་བྱེད། ཞལ་གཅིག་ཕྱག་གཉིས་པ་ཞིག་གསལ་བཏབ་སྟེ། དེ་ལ་ཡེ་ཤེས་པ་བཅུག །ཕྱོགས་བཅུའི་སངས་རྒྱས་ཐམས་ཅད་ཀྱི་ནུས་མཐུ་ཡང་འོད་ཟེར་གྱི་རྣམ་པར་བསྡུས་ཏེ་བསྟིམ་པས་གཟི་བྱིན་དང་ལྡན་པར་བསམས་ལ། རང་གི་ཐུགས་ཀའི་ཧཱུཾ་ལས་འཕྲོས་པའི་འོད་ཟེར་གྱིས། དེའི་ཐུགས་རྒྱུད་བསྐུལ་བས་དྲག་ཏུ་ཁྲོས་ཏེ་གར་མཛད་ཅིང། མ་ཧེས་ཀྱང་ཆོས་རྒྱལ་གྱི་དབུའི་སྟེང་དུ། ཡན་ལག་བཞི་དྲག་ཏུ་བརྡབ་ནས་ཟིང་ཟིང་འཁྲབ་པས། ཆོས་རྒྱལ་བཟོད་གླགས་མེད་པར་གྱུར་ནས་ལས་གང་བཅོལ་བསྒྲུབ་པའི་གཡར་དམ་པོར་བར་བསམ་མོ། །ཕྱི་མ་འདི་དམིགས་པ་ཤིན་ཏུ་འཚུབ་པས། ཡི་དམ་གྱི་བསྙེན་སྒྲུབ་ཚད་དང་ལྡན་པའི་གདེང་མ་ཐོབ་པར་གཏན་ནས་བྱ་མི་རུང་ལ། དེ་ལྟ་བུ་ཡོད་ཀྱང་བརྒྱ་ལ་ཐབས་མེད་བྱུང་ན་མ་གཏོགས་ཤིན་ཏུ་འཛེམ་པར་བྱ་དགོས་སོ། །འཁུ་ཞིང་ཟློག་ན་སྲོག་མནན་པ་ནི། རང་གི་ཐུགས་ཀ་ནས་སྤྲོས་པའི་འོད་ཟེར་ཆོས་སྐྱོང་གི་ཐུགས་ཀའི་ས་བོན་ལ་ཕོག་པས། དེའི་གཟི་བྱིན་བཀྲག་མདངས་ཐམས་ཅད་བསྡུས་ཏེ། རང་ལ་ཐིམ་པར་བསམ། ཆོས་སྐྱོང་ཕྱི་བཞིན་འབྲང་བའི་ཐབས་ནི། ཐུན་འཇོག་ཁར་དེའི་ཐུགས་ཀའི་སྔགས་འཁོར་དེ་ཉིད་དབུས་ཀྱི་ས་བོན་ལ་ཐིམ། ས་བོན་ཡང་ཤངས་བུག་ནས་ཐོན། རང་གི་སྙིང་གའི་ས་བོན་ལ་ཐིམ་པར་བསམ་མོ། །དམ་ཚིག་ཉམས་ཆག་སྐོང་བ་ནི། རང་དང་ཆོས་སྐྱོང་གཉིས་ཀའི་ཐུགས་ཀར་ཉི་མའི་དཀྱིལ་འཁོར་གྱི་དབུས་སུ་ཧཱུཾ་ཡིག་དཀར་པོ་རེ་དང། ཡི་གེ་བརྒྱ་པའི་སྔགས་
ཀྱི་འཕྲེང་བ་གསལ་བཏབ་སྟེ། ཡི་གེ་བརྒྱ་པ་ཅི་ནུས་སུ་བཟླ་ཞིང༌། དམ་ཚིག་ཉམས་ཆག་ཐམས་ཅད་བྱང་ཞིང་དག་པར་བསམ། གཟི་བྱིན་བསྐྱེད་པ་ནི། རང་དང་ཆོས་རྒྱལ་གཉིས་ཀའི་ཐུགས་ཀར་ཉི་གདན་ལ་ཧཱུཾ་ཡིག་མཐིང་ནག་རེ་བསམ་ཞིང༌། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པ་དེའི་ཐུགས་ཀར་ཕོག །དེའི་ཐུགས་ཀའི་ཧཱུཾ་ལས་ཀྱང་འོད་ཟེར་དམར་པོ་ཕྱོགས་བཅུར་འཕྲོས་པས། ཕྱོགས་བཅུའི་རྒྱལ་བ་སྲས་བཅས་ཀྱི་ནུས་མཐུ་ཐམས་ཅད་འོད་ཟེར་དམར་པོའི་རྣམ་པར་བསྡུས་ཏེ། དེ་ལ་ཐིམ་པས་ཧཱུཾ་ཡིག་དེ་ཉིད། འཇིགས་བྱེད་ཞལ་ཕྱག་ཡོངས་རྫོགས་ཀྱི་རྣམ་པར་གྱུར་ཅིང༌། བ་སྤུའི་བུ་ག་རྣམས་ཀྱང་དེ་ལྟ་བུས་གང་བར་བསམ། དེ་ལྟར་བཟླས་པ་བྱས་པའི་བསྙེན་གྲངས་ནི། རབ་བྱེ་ཆེན། འབྲིང་འབུམ་ཕྲག་བཅུ། ཐ་མའང་སུམ་འབུམ་བཟླ་དགོས་པར་གསུངས་ལ། བསྙེན་པ་ཚད་དང་ལྡན་པར་སོང་ནས། མཇུག་ཏུ་ཁ་སྐོང་གི་སྦྱིན་སྲེག་གྲུབ་ན་ལེགས་པས། དེའི་ཚུལ་ཡང་ཇི་ལྟར་བྱེད་སྙམ་ན། མགོན་པོ་སོགས་ཀྱི་སྦྱིན་སྲེག་ལོགས་སུ་སྣང་བས་དཔེ་འགྲེ་བྱས་ཏེ། མེ་ལྷའི་ཐུགས་ཀར་ཆོས་རྒྱལ་ཙམ་ཞིག་བསྐྱེད་པ་སོགས། ཟུར་རྣམས་བསྒྱུར་ནས་ཆོས་རྒྱལ་སྦྱིན་སྲེག་གསར་རྩོམ་གྱི་མིང་ཞིག་ལེན་པ་ལས་སླ་ཡང༌། ཀུན་མཁྱེན་འཇམ་དབྱངས་བཞད་པའི་རྡོ་རྗེའི་གསུང་དྲིས་ལན་ཞིག་ཏུ། ཁོ་རང་གི་སྦྱིན་སྲེག་ཡོད་པ་ཡིན་ནམ། འཇིགས་བྱེད་སྦྱིན་སྲེག་བྱས་པས་ཆོག་ཅེས་ཞུས་པའི་ལན་གྱི་མཆན་བུར། འཇིགས་བྱེད་དང་ཆོས་རྒྱལ་བསྐྱེད། གཞན་འདྲ་ཞེས་གསུངས་པ་ལྟར། འཇིགས་བྱེད་སྦྱིན་སྲེག་ཇི་ལྟ་བ་བཞིན་ལ། མདུན་དུ་ལས་གཤིན་གཏོར་ཆོག་ལྟར་བསྐྱེད་དགོས་པ་ཡིན་ཏེ། འདིར་
ནམ་གྱི་ཚེ་ཡང་ཡི་དམ་ཆོས་སྐྱོང་འདི་གཉིས་ཟུང་འབྲེལ་དུ་བྱ་བ་ནི། མན་ངག་གི་གནད་ཁྱད་པར་ཅན་ཡིན་པས། ཚུལ་དེ་འདྲ་མ་གོ་ན། གནད་སྟོར་བའི་སྟབས་བདེ་བདེ་རེ་ལ་གདམས་པའི་མཐིལ་དུ་འཛིན་པ་འབྱུང་ཉེན་ཆེ་བར་སྣང་ངོ་། །གཉིས་པ་བསྒྲུབ་པའི་རྣམ་གཞག་ནི། ལྕགས་མཁར་དང་འབྲེལ་བའི་སྐོར་རྣམས་པཎ་ཆེན་ཐམས་ཅད་མཁྱེན་པའི་གསུང་ལས་འབྱུང་བ་རྒྱུན་གྱི་ཕྱག་བཞེས་སུ་བསྟར་བཞིན་པ་ལས་ཤེས་དགོས་ཤིང༌། གཏོར་མའི་བཅའ་ཐབས། འཁོར་ལོ་དང་ལིངྒ་བྲི་ཚུལ་དེ་དག་གི་རྫས། དགྲ་བོ་འགུག་ཅིང་གཞུག་པའི་ཚུལ། རྟགས་མཚན་གྱི་ཁྱད་པར་སོགས་མདོར་བསྡུས་པ་ཙམ་ཞིག་ནི། མཁས་གྲུབ་ཐམས་ཅད་མཁྱེན་པའི་གསུང་ལས་འབྱུང་བ་ལྟར་ཡིན་ལ། སྐྱོབ་པའི་ལྷ་དང་བྲལ་བར་བྱ་བའི་ཚུལ་ཞལ་ལས་ཤེས་དགོས་ཞེས་ཁ་འཕང་མཛད་སྣང་བས། དེ་ཉིད་ཇི་ལྟར་ཡིན་སྙམ་ན། ཁ་སྦྱོར་དབྱེ་བའི་ཆོ་ག་བྱ་བ་ནི། དང་པོ་སྲུང་འཁོར་དང་ཕྱེ། དེ་རྗེས་སྲུང་མདུད། དེ་ནས་གོ་ཆ། དེ་ནས་འགོ་བའི་ལྷ་དང་འབྱེད་པ་ཡིན་ལ། དེས་ཀྱང་མ་གྲུབ་ན། དགྲ་བོའི་ལྷ་སྲུང་རྣམས་དགྲ་བོ་རང་ཉིད་ལ་ཁྲོས་ནས། དེ་ཉིད་གན་རྐྱལ་དུ་བསྒྱེལ་བའི་སྙིང་གི་ཐད་དུ་གནམ་ལྕགས་ཀྱི་འཁོར་ལོ་རྩིབས་དྲུག་པའི་རྣམ་པར་གྱུར་ཏེ། གཡོན་སྐོར་དུ་འཁོར་བས་སྙིང་ཁྲག་དམར་ཆིལ་གྱིས་བྱུང༌། དེ་ནས་འཁོར་ལོ་དེ་ཉིད་སྡིག་པ་ཁ་དགུ་མིག་དགུ་པ་ཞིག་ཏུ་གྱུར་ཏེ། དགྲའི་ཤ་ཁྲག་རྣམས་ལྷག་མེད་དུ་ཟོས་པར་བསམ་མོ། །གསུམ་པ་ལས་ལ་སྦྱར་བ་ནི་སྒྲུབ་པའི་སྐབས་སུ། དགུག་གཞུག་བྱས་པའི་ལིངྒ་དེ་ཉིད་དགྲ་བོ་དངོས་སུ་བསམས་ཏེ། གནས་ལྔ་དང༌། ཚིགས་རྣམས་སུ་གཟེར་བཏབ། སྐུད་པ་ནག་པོས་རྒྱ་གྲམ་དུ་བཅིངས། ཐོད་པས་སྟེང་ནས་བཀབ་པའི་སྲུབ་ལ་
ཡང༌། སྔགས་དང་སྤེལ་ཚིག་བྲིས། སྟེགས་བུ་གྲུ་གསུམ་པའི་ཁར་བཞག །བདག་བསྐྱེད་དང་ལས་གཤིན་གྱི་བསྐྱེད་ཆོག་གནད་དུ་འགྲོ་ངེས་པ་བྱས། དེ་རྗེས་སྐབས་སྐབས་སུ་ཐུན་བྲབ་ཅིང། སྔ་དྲོ་ཕྱི་དྲོ་དང་ཐུན་སྔ་ཕྱིར་བཟླ་རྒྱུའི་སྔགས་མི་འདྲ་བའི་ཁྱད་པར། ཤིན་ཏུ་ཁྲོས་འཁྲུགས་རྔམ་པའི་གཤིན་རྗེ་རྣམས་ཀྱིས་མཚོན་ཆའི་ཆར་ཕབ་སྟེ། ཤིན་ཏུ་ཉམ་ཐག་པའི་ཚུལ་གྱིས་གནས་པའི་དགྲ་བོ་དེ་ཉིད་ཐལ་བའི་རྡུལ་དུ་བརླག་ནས། ཤ་རུས་ལྷག་མེད་དུ་གསོལ་བའི་དམིགས་པ་བྱ་ཚུལ་སོགས་མཁས་གྲུབ་ཐམས་ཅད་མཁྱེན་པའི་གསུང་ལས་འབྱུང་བ་བཞིན་བྱ་ལ། མཇུག་གི་མཆོད་བསྟོད། བཟོད་གསོལ། ལྷག་ཆད་ཁ་བསྐང་བ། ཡེ་ཤེས་པ་གཤེགས་སུ་གསོལ་ཞིང། བཀྲ་ཤིས་ཀྱིས་མཐའ་བརྒྱན་པ་སོགས་ནི་དཀྱུས་ལྟར་རོ། །ཁམས་གསུམ་ཟ་བྱེད་གཤིན་རྗེའི་གཤེད་པོ་ཡི། །བཀའ་སྡོད་ལས་ཀྱི་གཤིན་རྗེའི་བསྙེན་སྒྲུབ་ཀྱི། །རྣམ་གཞག་ཅུང་ཟད་སྨྲས་པའི་དགེ་བ་དེས། །བྱང་ཆུབ་བསྒྲུབ་ལ་བར་ཆད་མེད་པར་ཤོག །ཅེས་ཆོས་ཀྱི་རྒྱལ་པོ་ཕྱི་ནང་གསང་གསུམ་བསྙེན་ཅིང་སྒྲུབ་བའི་རིམ་པ་ཁ་སྐོང་གསང་སྒྲུབ་ཀྱི་བསྐང་བ་དང་བཅས་པ་འདི་ནི་དད་བརྩོན་རྣམ་དཔྱོད་དང་ལྡན་པ་རབ་འབྱམས་པ་དཀོན་མཆོག་བསོད་ནམས་ཀྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་ཆོས་གྲྭ་ཆེན་པོ་བཀྲ་ཤིས་འཁྱིལ་དུ་བྲིས་པའོ། །