དགེ་ལྡན་བསྟན་པ་རྒྱས་པའི་སྨོན་ལམ་སོགས།
དགེ་ལྡན་བསྟན་པ་རྒྱས་པའི་སྨོན་ལམ་སོགས་སྨོན་ཚིག་གི་སྐོར་དྲང་སྲོང་ཆེན་པོའི་བདེན་ཚིག་ཅེས་བྱ་བ་བཞུགས་སོ། །
རྒྱལ་བ་མ་ལུས་སྐྱེད་པའི་ཡབ་གྱུར་ཀྱང༌། །རྒྱལ་སྲས་ཚུལ་གྱིས་ཞིང་ཁམས་རབ་འབྱམས་སུ། །རྒྱལ་བའི་ཆོས་འཛིན་ཐུགས་བསྐྱེད་བདེན་པའི་མཐུས། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །སྔོན་ཚེ་དབང་བོའི་ཏོག་གི་སྤྱན་སྔ་རུ། །དམ་བཅས་ཚེ་ན་སྙིང་སྟོབས་ཆེན་པོ་ཞེས། །སྲས་བཅས་རྒྱལ་བས་བསྔགས་བརྗོད་བདེན་པའི་མཐུས། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །ལྟ་སྤྱོད་གཙང་མའི་བརྒྱུད་པ་སྤེལ་བའི་ཕྱིར། །ཐུབ་པའི་དྲུང་དུ་ཤེལ་དཀར་འཕྲེང་བ་ཕུལ། །ཆོས་དུང་གནང་ཞིང་ལུང་བསྟན་བདེན་པའི་མཐུས། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །ལྟ་བ་རྣམ་དག་རྟག་ཆད་མཐའ་ལས་གྲོལ། །སྒོམ་པ་རྣམ་དག་བྱིང་རྨུགས་མུན་པ་སངས། །སྤྱོད་པ་རྣམ་དག་རྒྱལ་བའི་བཀའ་བཞིན་བསྒྲུབས། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །མང་དུ་ཐོས་པ་རྒྱ་
ཆེར་བཙལ་བས་མཁས། །ཐོས་དོན་ཇི་བཞིན་རྒྱུད་ལ་སྦྱར་བས་བཙུན། །ཀུན་ཀྱང་བསྟན་འགྲོའི་དོན་དུ་བསྔོ་བས་བཟང༌། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །དྲང་ངེས་གསུང་རབ་མ་ལུས་འགལ་མེད་དུ། །གང་ཟག་གཅིག་གི་ཉམས་ལེན་གདམས་པ་རུ། །ངེས་པ་རྙེད་པས་ཉེས་སྤྱོད་མཐའ་དག་འགགས། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །ལུང་ཆོས་སྡེ་སྣོད་གསུམ་གྱི་འཆད་ཉན་དང༌། །རྟོགས་པའི་བསྟན་པ་བསླབ་གསུམ་ཉམས་ལེན་ཏེ། །མཁས་ཤིང་གྲུབ་པའི་རྣམ་ཐར་རྨད་དུ་བྱུང༌། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །ཕྱི་རུ་ཉན་ཐོས་སྤྱོད་པས་ཞི་ཞིང་དུལ། །ནང་དུ་རིམ་གཉིས་རྣལ་འབྱོར་གདེང་དང་ལྡན། །མདོ་སྔགས་ལམ་བཟང་འགལ་མེད་གྲོགས་སུ་འཁྱེར། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །རྒྱུ་ཡི་ཐེག་པར་བཤད་པའི་
སྟོང་པ་ཉིད། །འབྲས་བུའི་ཐབས་ཀྱིས་སྒྲུབ་པའི་བདེ་ཆེན་དང༌། །མཉམ་སྦྱོར་ཆོས་ཕུང་བརྒྱད་ཁྲིའི་སྙིང་པོའི་བཅུད། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །སྐྱེས་བུ་གསུམ་གྱི་ལམ་གྱི་སྲུང་མའི་གཙོ། །མྱུར་མཛད་མགོན་དང་རྣམ་སྲས་ལས་གཤིན་སོགས། །བསྟན་སྲུང་དམ་ཅན་རྒྱ་མཚོའི་མཐུ་སྟོབས་ཀྱིས། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །མདོར་ན་དཔལ་ལྡན་བླ་མའི་སྐུ་ཚེ་བརྟན། །མཁས་བཙུན་བསྟན་འཛིན་དམ་པས་ས་སྟེང་གང༌། །བསྟན་པའི་སྦྱིན་བདག་མངའ་ཐང་དར་བ་ཡིས། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག །ཅེས་པ་འདི་ནི་ལྷག་བསམ་རྣམ་དཔྱོད་ཡངས་པ་རབ་འབྱམས་པ་བློ་བཟང་བསྟན་པས་བསྐུལ་ཞིང༌། སྤྱིར་དེང་དུས་རྗེ་བླ་མའི་བསྟན་པ་འདི་ནི་ཟུངས་ཟད་ཀྱི་ནད་པ་སྨན་པས་བོར་བ་བཞིན་དུ་བདག་ཏུ་འཛིན་པ་འགའང་མི་སྣང་བས་ཅུང་ཟད་རེ་བསྲིང་ཐུབ་ནའང་ཅི་མ་རུང་སྙམ་དུ་སྨོན་པའི་ཡིད་ཀྱིས། ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ ན་མོ་ཨཱརྻྻ་མཻ་ཏྲི་ཡེ། བྱམས་པས་བསྒྲུབས་པའི་མཛེས་སྐུ་མཚན་དཔེའི་དཔལ། །བྱམས་པའི་ཤུགས་ཀྱིས་ལེགས་འདོམས་ཚངས་པའི་དབྱངས། །བྱམས་བརྩེའི་ཡེ་ཤེས་ཆོས་ཀུན་མངོན་བྱང་ཆུབ། །བྱམས་མགོན་ཐུགས་རྗེའི་གཏེར་ལ་ཕྱག་འཚལ་ལོ། །རིང་ནས་གོམས་པས་ཐུགས་ལ་ཞེན་པ་ཡི། །བྱམས་ཆེན་བདུད་རྩིས་ཞེ་སྡང་མེ་དཔུང་བཅིལ། །མི་བཟད་བདུད་ཀྱི་སྙེམས་པ་མཐར་བྱེད་ཅིང༌། །གྲགས་པའི་མཚན་གྱིས་ཕྱོགས་བཅུའི་ཞིང་ཀུན་ཁྱབ། །གང་གིས་ཡོངས་སུ་བཟུང་བའི་དག་པའི་ཞིང༌། །
དགའ་ལྡན་གནས་མཆོག་ཡིད་དགའ་ཆོས་འཛིན་ཞེས། །སྙན་པ་ཡིད་འོང་བདུད་རྩིའི་གཟེགས་མས་ཀྱང༌། །ཡིད་ལ་ཟག་མེད་དགའ་བའི་དཔལ་སྟེར་བ། །དེར་ནི་སྐྱེ་བའི་མྱུ་གུ་འགྲུབ་པ་དང༌། །རྒྱལ་བའི་ཞལ་བཟང་དཀྱིལ་འཁོར་མཐོང་བ་དང༌། །ཟབ་རྒྱས་གདམས་པའི་བདུད་རྩི་མྱོང་བའི་ཕྱིར། །ལེགས་སྨོན་ཕྲེང་བ་མདོ་ཙམ་སྤེལ་བ་འདི། །རྒྱལ་ཚབ་མགོན་གྱི་དམ་བཅའི་དཔུང་པ་དང༌། །རྒྱལ་སྲས་རྒྱ་མཚོའི་ཐུགས་རྗེ་བྱིན་རླབས་དང༌། །རྒྱལ་ཡུམ་ཆོས་དབྱིངས་རྣམ་དག་བདེན་པའི་མཐུས། །རྒྱལ་བའི་དགོངས་པ་ཇི་བཞིན་འགྲུབ་གྱུར་ཅིག །བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱིས་ཐོག་མ་མེད་པ་ནས་བཟུང་སྟེ། སྦྱིན་པ་དང༌། ཚུལ་ཁྲིམས་དང༌། བསྒོམ་པ་ལས་བྱུང་བའི་དགེ་བའི་རྩ་བ་བགྱིས་པ་དང༌། བགྱིད་དུ་སྩལ་པ་དང༌། བགྱིས་པ་ལ་རྗེས་སུ་ཡི་རང་བའི་དགེ་བའི་རྩ་བ་ཇི་སྙེད་ཅིག་མཆིས་པ་ཐམས་ཅད་གཅིག་ཏུ་བསྡོམས་པའི་མཐུ་ལ་བརྟེན་ནས། འཆི་བའི་དུས་ལ་ཉེ་བར་བབ་པ་ན། སྟོབས་བཅུ་མངའ་བ་རྒྱལ་ཚབ་བྱམས་པ་མགོན་པོ་རྒྱལ་སྲས་བྱེ་བའི་འཁོར་དང་བཅས་པ་མདུན་གྱི་ནམ་མཁར་བྱོན་ནས་དགྱེས་པའི་འཛུམ་ཞལ་མངོན་སུམ་དུ་སྟོན་པར་གྱུར་ཅིག །དེ་ནས་འཇིགས་པ་མེད་པ་ཚངས་པའི་དབྱངས་ཀྱིས་བུ་བུ་འཁོར་བའི་འཆིང་ཐག་གཉེན་བཤེས་ཟས་ནོར་སོགས་ལ་ཞེན་པ་སྤངས་ཤིང་འཁྲུལ་སྣང་ཟ་ཟིའི་རྗེས་སུ་མི་འབྲང་བར་ངའི་སྐུ་དང་ཞིང་གི་བཀོད་པ་ཡིད་ལ་གྱིས་ལ་དག་
པའི་ཞིང་དུ་ཤོག་ཅིག་ཅེས་བརྩེ་བའི་གསུང་གིས་དབུགས་འབྱིན་པར་གྱུར་ཅིག །དེའི་སྟོབས་ཀྱིས་ལུས་དང་སེམས་ལ་སྡུག་བསྔལ་ཕྲ་མོ་ཙམ་ཡང་མེད་པར་དགེ་བའི་བསམ་པ་ཁྱད་པར་ཅན་གྱི་ངང་ནས་ཤི་འཕོས་ཏེ་དགའ་ལྡན་ཡིད་དགའ་ཆོས་འཛིན་དུ་འདབ་སྟོང་པདྨའི་སྦུབས་སུ་རྫུས་ཏེ་སྐྱེ་བ་ལེན་པར་གྱུར་ཅིག །དེ་མ་ཐག་ཏུ་ཆོས་ཀྱི་ཕོ་བྲང་རྒྱལ་མཚན་མཐོན་པོར་མི་ཕམ་མགོན་པོའི་དྲུང་དུ་ལྷགས་ཤིང༌། དེའི་སྐུ་མཚན་དང་དཔེ་བྱད་ཀྱིས་འབར་བ་གསེར་གྱི་ལྷུན་པོ་ཉི་མ་འབུམ་གྱིས་འཁྱུད་པ་ལྟ་བུ། འཇིག་རྟེན་གསུམ་གྱི་མཛེས་སྡུག་མ་ལུས་པ་གཅིག་ཏུ་བསྡུས་པ་ལྟ་བུ། ཚོགས་གཉིས་དགེ་བའི་སྤྱོད་པ་མཐའ་དག་གཟུགས་སུ་ཤར་བ་ལྟ་བུ་མིག་གི་བདུད་རྩིར་གྱུར་ཏེ་དགའ་བ་དང་སྤྲོ་བ་དང་དད་པའི་ཤུགས་ཕན་ཚུན་འགྲན་པ་བཞིན་དུ་འཕེལ་བར་གྱུར་ཅིག །དེ་ན་བཞུགས་པ་མཉམ་མེད་ཇོ་བོ་ཆེན་པོ་དང༌། བློ་བཟང་འཇམ་དཔལ་སྙིང་པོ་ལ་སོགས་པ་བདག་ཉིད་ཆེན་པོ་ཀུན་གྱི་ཞབས་ལ་མགོ་བོས་ཕྱག་འཚལ་ཞིང༌། དེ་དག་ཐམས་ཅད་ཀྱིས་ཀྱང་བརྩེ་བས་རྗེས་སུ་འཛིན་པར་གྱུར་ཅིག །དེ་ནས་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ནམ་མཁའ་གང་བ་ཡོངས་སུ་སྤྲུལ་ཏེ་རྒྱལ་བ་སྲས་དང་བཅས་པ་ཐམས་ཅད་མཉེས་པར་བྱེད་པར་གྱུར་ཅིག །དེས་རྗེས་སུ་བསྟན་པ་ལ་བརྟེན་ནས་རིས་སུ་མ་ཆད་པའི་མ་རྒན་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་ཤུགས་དྲག་ཏུ་སྐྱེས་པས་རྒྱུད་བསྐུལ་ཞིང༌། རྒྱལ་བའི་ཡོན་ཏན་མཐོང་བས་ཡིད་དྲངས་ཏེ་བླ་ན་མེད་པའི་བྱང་ཆུབ་མཆོག་ཏུ་སེམས་བསྐྱེད་པར་གྱུར་ཅིག །སེམས་བསྐྱེད་ནས་ཀྱང་རྒྱལ་སྲས་ཀྱི་སྤྱོད་པ་ལ་སློབ་པའི་ཕྱིར་དུ་ཐོགས་
པ་མེད་པའི་རྫུ་འཕྲུལ་གྱིས་སངས་རྒྱས་ཀྱི་ཞིང་རབ་འབྱམས་སུ་བགྲོད་ནས་གདམས་པ་དང་རྗེས་སུ་བསྟན་པ་ཟད་མི་ཤེས་པ་ནོད་པར་གྱུར་ཅིག །དེའི་དོན་ཐོས་པ་དང༌། བསམ་པ་ལས་བྱུང་བའི་ཤེས་རབ་ཀྱིས་མ་ཚང་བ་མེད་པར་གཏན་ལ་ཕབ་སྟེ། ཉན་ཐོས་ཀྱི་ལམ་དང༌། རང་སངས་རྒྱས་ཀྱི་ལམ་དང༌། བྱང་ཆུབ་སེམས་དཔའི་ལམ་གྱི་དབྱེ་བ་ཤེས་པར་བྱས་ནས་སྲིད་ཞིའི་མཐའ་གཉིས་དང་བྲལ་བའི་ཐེག་པ་ཆེན་པོའི་ཐབས་མཁས་ཀྱི་ཉེ་བའི་ལམ་ལ་མཁས་པར་བྱེད་པར་གྱུར་ཅིག །དེ་ནས་དབང་དུ་བྱེད་པ་བསྒོམ་པ་ལས་བྱུང་བའི་ཤེས་རབ་ཞི་གནས་དང༌། ལྷག་མཐོང་ཟུང་དུ་འབྲེལ་བའི་སྒོ་ནས་དམིགས་པ་དང་རྣམ་པ་དང་མཚན་ཉིད་ཡོངས་སུ་རྫོགས་པའི་ཐེག་པ་གསུམ་གྱི་རྟོགས་པའི་རིགས་མ་ལུས་པ་ལ་སློབ་པར་གྱུར་ཅིག །སེམས་ཀྱི་རང་བཞིན་ཡོངས་སུ་སྦྱངས་པའི་རྣམ་པར་རྟོག་པའི་དྲི་མ་ཅི་རིགས་པ་དང་བྲལ་ནས་གོམས་པ་དབང་དུ་གྱུར་པའི་རྩེ་མོའི་སྦྱོར་བ་ཐོབ་པར་གྱུར་ཅིག །གང་ལ་བསླབ་པར་བྱ་བ་དམིགས་པའི་ཡུལ་མཐའ་ཡས་པ་དང༌། ཆེད་དུ་བྱ་བ་གོ་རིམ་བཞིན་དུ་སློབ་ཅིང༌། ཕ་རོལ་ཏུ་ཕྱིན་པ་དྲུག་དྲུག་ཚང་བའི་གོ་ཆ་མ་ཉམས་པ་བགོས་ཏེ། དེའི་ཚོགས་མ་ཚང་བ་མེད་པའི་སྒོ་ནས་རྒྱལ་བའི་སྲས་ཀྱི་ས་གོང་མ་གོང་མ་རྣམས་སུ་མཐར་གྱིས་འཇུག་པར་གྱུར་ཅིག །དེ་ནས་ངེས་པར་འབྱུང་བའི་སྒྲུབ་པ་མཚན་མ་མེད་ཅིང་རྩོལ་བ་མེད་པའི་ལམ་གྱིས་ཟོ་ཆུན་གྱི་འཁོར་ལོ་ཅིག་ཅར་བསྒྱུར་བ་བཞིན་དུ་སྒྲིབ་པ་མ་ལུས་པ་འབྱིན་པའི་སྦྱོར་བ་མཐར་ཐུག་པ་སྐད་ཅིག་མ་གཅིག་གིས་མངོན་དུ་བྱེད་པར་གྱུར་ཅིག །དེའི་སྐད་ཅིག་གཉིས་པར་གང་ལ་དམིགས་ནས་སེམས་བསྐྱེད་པ་ཆོས་ཀྱི་
སྐུ་སྤངས་པ་དང་རྟོགས་པའི་ཡོན་ཏན་མཐར་ཕྱིན་པ་བརྙེས་ནས་དག་པ་དང་མ་དག་པའི་གདུལ་བྱ་རྣམས་ལ་གང་འཚམ་དུ་སྐུའི་བཀོད་པ་བསྟན་ཏེ་ལྷུན་གྱིས་གྲུབ་པའི་འཕྲིན་ལས་རྒྱུན་མི་འཆད་པར་འཁོར་བའི་མཐས་གཏུགས་པར་འགྲོ་བ་ཀུན་གྱི་ཕན་པ་དང་བདེ་བའི་ཉེར་འཚོའི་རྟེན་དུ་གྱུར་ཅིག །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨར་ཧ་ཏེ་སཾ་མྱཀྶཾ་བུདྡྷ་ཡ། ཏདྱ་ཐཱ། ཨོཾ་ཨ་ཛི་ཏེ། ཨ་ཛི་ཏེ། ཨ་པ་རཱ་ཛི་ཏེ། ཨ་ཛི་ཏན་ཛཱ་ཡ། ཧ་ར་ཧ་ར། མཻ་ཏྲི་ཨ་བ་ལོ་ཀི་ཏེ། ཀ་ར་ཀ་ར། མཧཱ་ས་མ་ཡ་སིདྡྷི། བྷ་ར་བྷ་ར། མཧཱ་བོ་དྷི་མཎྜ་བི་ཛེ། སྨ་ར་སྨ་ར། ཨ་སྨ་ཀཾ་ས་མ་ཡ། བོ་དྷི་བོ་དྷི། མཧཱ་བོ་དྷི་སྭཱཧཱ། ཨོཾ་མོ་ཧི་མོ་ཧི། མཧཱ་མོ་ཧི་སྭཱཧཱ། ཨོཾ་མུ་ནི་མུ་ནི་སྨ་ར་སྭཱཧཱ། ལན་གསུམ། ན་མོ་བླ་མ་ཡི་དམ་དཀོན་མཆོག་གསུམ་གྱི་བདེན་པ་དང༌། ཁྱད་པར་རྒྱལ་ཚབ་མི་ཕམ་མགོན་པོའི་ཐུགས་བསྐྱེད་དམ་བཅའི་མཐུ་དང༌། གཟུངས་ཀྱི་བདེན་པ་ལ་བརྟེན་ནས་ཇི་ལྟར་སྨོན་པའི་དོན་ཐམས་ཅད་དེ་བཞིན་དུ་འགྲུབ་པར་གྱུར་ཅིག །འབྲས་བུ་དམན་པ་འཁོར་བར་འཆིང་བྱེད་ཀྱི་རྙེད་བཀུར་སྙན་གྲགས་ལ་སོགས་པའི་རྒྱུར་ཅུང་ཟད་ཙམ་ཡང་མི་སྨིན་པར་གྱུར་ཅིག །གལ་ཏེ་སྐྱེ་བ་གཞན་གྱིས་བར་མ་ཆོད་པར་དགའ་ལྡན་གྱི་གནས་སུ་སྐྱེ་བར་མ་ནུས་ནའང་དལ་འབྱོར་ཚང་བའི་རྟེན་བཟང་པོ་བརྒྱུད་མར་ཐོབ་ཅིང་བྱམས་མགོན་ཐུགས་རྗེའི་གཏེར་གྱིས་དགེ་བའི་བཤེས་གཉེན་མཛད་པ་དང་མི་འབྲལ་བར་གྱུར་ཅིག །ཁྱད་པར་སྐྱེ་དགུ་ཚེ་ལོ་བརྒྱད་ཁྲིའི་དུས་སུ་བྱམས་མགོན་རྒྱལ་བའི་ཉི་མ་འཇིག་རྟེན་དུ་ཤར་བའི་ཚེ་འཁོར་གྱི་ཐོག་མར་སྐྱེས་ནས་གསུང་གི་བདུད་རྩི་ལ་ངོམས་མེད་དུ་ལོངས་སྤྱད་དེ་ས་ལམ་གྱི་རྟོགས་
པ་ཁྱད་པར་ཅན་རྣམས་བདེ་བླག་ཏུ་བགྲོད་ནུས་པར་གྱུར་ཅིག །དགེ་བའི་རྩ་བ་འདི་དག་གིས་མཚོན་བདག་དང་གཞན་གྱི་དགེ་བའི་རྩ་བ་ཐམས་ཅད་ཁོང་ཁྲོ་དང༌། ལྟ་བ་ངན་པ་དང༌། ལོག་པར་བསྔོ་བ་ལ་སོགས་པའི་སྐྱོན་གྱིས་ཅུང་ཟད་ཙམ་ཡང་མི་ཉམས་པར་དུས་གསུམ་གྱི་རྒྱལ་བ་ཐམས་ཅད་ཀྱིས་གང་དུ་བསྔོས་ཤིང་བསྔོ་བར་འགྱུར་བ་དང༌། རྒྱལ་སྲས་ཆེན་པོ་འཇམ་དཔལ་ཀུན་བཟང་སོགས་ཀྱིས་ཇི་ལྟར་སྨོན་པའི་འབྲས་བུ་དེ་དང་དེ་དག་འགྲུབ་པའི་རྒྱུ་རྣམ་པར་དག་པ་ཁོ་ནར་གྱུར་ཅིག །ནམ་ཞིག་འདི་སྣང་འགག་པར་ཉེ་བའི་ཚེ། །བྱམས་མགོན་ཞལ་མཐོང་དད་པས་ཡིད་དྲངས་ཏེ། །དགའ་ལྡན་གནས་སུ་པདྨོ་ལས་སྐྱེས་ནས། །རྒྱལ་བ་སྲས་བཅས་མཉེས་པར་བྱེད་པར་ཤོག །ཟབ་རྒྱས་གདམས་པའི་བདུད་རྩིའི་བཅུད་མྱངས་ཏེ། །བླ་མེད་བྱང་ཆུབ་མཆོག་ཏུ་སེམས་བསྐྱེད་ཅིང༌། །ཐེག་གསུམ་ལམ་གྱི་རྟོགས་རིགས་ཡོངས་རྫོགས་ནས། །མཐར་ཐུག་སྐུ་བཞིའི་གོ་འཕང་མྱུར་ཐོབ་ཤོག །མདོར་ན་དུས་གསུམ་བསགས་པའི་དགེ་ཚོགས་ཀུན། །འབྲས་བུ་དམན་པའི་རྒྱུ་རུ་མི་འགྱུར་བར། །བྱམས་མགོན་འཁོར་གྱི་ཐོག་མར་སྐྱེས་གྱུར་ཏེ། །ཡང་དག་ལམ་བཟང་གེགས་མེད་མཐར་ཕྱིན་ཤོག །ཅེས་དགའ་ལྡན་ཡིད་དགའ་ཆོས་འཛིན་དུ་སྐྱེ་བའི་སྨོན་ལམ་འདི་ནི་དད་བརྩོན་བློ་དང་ལྡན་པ་དཀོན་མཆོག་ཐབས་མཁས་ཀྱིས་བསྐུལ་བའི་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས། སྐལ་མཉམ་རྣམས་ལ་ཕན་པའི་སླད་གོ་བདེ་བར་འབོལ་རྩོམ་དུ་བགྱིས་པ་འདིས་ཀྱང་སྐྱེ་བོ་རྣམས་ལ་ཕན་ཐོགས་པར་གྱུར་ཅིག། ། ༈ རབ་འབྱམས་རྒྱལ་བ་ཀུན་གྱི་
ཡབ་གཅིག་པུ། །དུས་གསུམ་བདེ་གཤེགས་སྲས་ཀྱི་ཐུ་བོའི་ཚུལ། །རྣམ་འདྲེན་ཡོངས་ཀྱི་ཡེ་ཤེས་གཅིག་བསྡུས་དངོས། །ཀུན་གཟིགས་མཁྱེན་པའི་གཏེར་གྱིས་རིང་དུ་སྐྱོངས། །སྒྲིབ་བྲལ་ཡེ་ཤེས་གསེར་གྱི་ཐུར་མ་ཡིས། །སྐལ་བཟང་ཐར་འདོད་བློ་མིག་འབྱེད་པའི་གཉེན། །ཁྱོད་ཞབས་གུས་པས་བསྟེན་པ་བདག་ཅག་གི །མི་ཤེས་རྨོངས་པའི་དྲ་བ་གཅད་དུ་གསོལ། །ཡང་དག་ལམ་གྱི་རྗེས་སུ་མངོན་ཕྱོགས་པའི། །ལེགས་སྨོན་ཡིད་ཀྱི་འདུན་པ་མ་ལུས་པ། །གེགས་མེད་སྨོན་བཞིན་འགྲུབ་པའི་དཔང་མཛད་དེ། །ཐུགས་རྗེའི་བདེན་པ་མངོན་སུམ་བསྟན་དུ་གསོལ། །ནམ་མཁའི་ཁམས་ཀྱི་མཐས་གཏུགས་པའི་སྐྱེ་འཕགས་ལུས་ཅན་ཀུན་གྱི་རྣམ་དཀར་ཕུང་པོ་བདག་ཅག་གི་ཐོས་བསམ་སྒོམ་པའི་དགེ་ཚོགས་དང་ཆབས་ཅིག་ཏུ་བསྡོམས་ཤིང་ཁྱད་པར་དུ་ཚུལ་ཁྲིམས་རྣམ་པར་དག་པ་སོགས་རྒྱལ་བའི་སྲས་ཀྱི་སྨོན་ལམ་འགྲུབ་པ་དང་སངས་རྒྱས་ཀྱི་ཞིང་གི་བཀོད་པ་ཡོངས་སུ་འཛིན་པའི་རྒྱུ་ཚོགས་ལྔ་བཅུ་རྩ་ལྔ་གསུངས་པ་སོགས་ཀྱི་རྗེས་སུ་བསླབ་པའི་མཐུ་ལ་བརྟེན་ནས་སྙིང་རྗེའི་སྙིང་པོ་ཅན་གྱི་ཡང་དག་པའི་ལྟ་བས་བློ་མིག་ཕྱེ་སྟེ་ཐར་པ་བླ་ན་མེད་པའི་གྲོང་ཁྱེར་དུ་འཇུག་པར་གྱུར་ཅིག །འཇིག་རྟེན་ཕྱི་མར་འཕོ་བའི་ཚེ་སྐྱེ་འཆིའི་སྣང་བ་ཀུན་ལ་མཚན་མར་མི་ཞེན་ཅིང་དེ་ལྟར་མ་རྟོགས་པའི་འགྲོ་བ་རྣམས་ལ་སྙིང་རྗེ་དང་རྒྱལ་བ་ཀུན་གཟིགས་ཀྱི་སྐུ་དང་གསུང་གི་སྣང་བ་མངོན་དུ་གྱུར་པའི་དད་པས་ཡིད་དྲངས་ཏེ་དེ་ཉིད་ཀྱི་ཞིང་ཁམས་ཡོངས་སུ་རྫོགས་ཤིང་དག་ལ་རྡུལ་མེད་པ་བསགས་པ་ཞེས་བྱ་བ་སངས་རྒྱས་ཀྱི་ཞིང་གངྒཱའི་ཀླུང་དུ་མའི་བྱེ་མ་སྙེད་ཙམ་དུ་ཐ་
གྲུ་ཡངས་ཤིང་གང་ལ་གང་འདོད་ཀྱི་རིན་པོ་ཆེ་སྣ་ཚོགས་པའི་རང་བཞིན་དུ་སྣང་བ་སངས་རྒྱས་ཀྱི་ཞིང་གྲངས་མེད་པས་གཏམས་ཤིང་བྱང་ཆུབ་སེམས་དཔའི་ཚོགས་རབ་ཏུ་བྱུང་བ་ཤ་སྟག་གིས་གང་བ་དེ་ལྟ་བུར་སྐྱེ་བར་གྱུར་ཅིག །སྐྱེས་མ་ཐག་ཏུ་སྟོང་གསུམ་བཅུའི་ཚད་དང་ལྡན་པའི་བྱང་ཆུབ་ཀྱི་ཤིང་དྲུང་ན་དེ་བཞིན་གཤེགས་པ་ཀུན་གཟིགས་སྐུ་དཔག་ཚད་བརྒྱད་ཁྲི་བཞི་སྟོང་མངའ་བ་འཛམ་བུ་ཆུ་བོའི་གསེར་གྱི་རི་བོ་ལྟར་ལྷམ་མེར་བཞུགས་ཤིང་འཁོར་དཔག་ཚད་བཞི་ཁྲི་ཉིས་སྟོང་ཙམ་གྱི་བྱང་ཆུབ་སེམས་དཔའི་ཚོགས་གྲངས་མེད་པས་བསྐོར་བ་མངོན་སུམ་དུ་མཐོང་བར་གྱུར་ཅིག །མཐོང་བའི་མོད་ལ་ཚིག་གིས་མཚོན་མི་དགོས་པར་རྨོངས་པ་དང་སོམ་ཉིའི་དྲ་བ་ཡོངས་སུ་ཆོད་དེ་ཟབ་ཅིང་རྒྱ་ཆེ་བའི་ཆོས་ཀྱི་ཚིག་དོན་མ་ལུས་པ་བདེ་བླག་ཏུ་རྟོགས་པར་གྱུར་ཅིག །ཆོས་དང་དོན་མངོན་པར་རྟོགས་པས་བསྡུས་པ་མོས་པ་སྤྱོད་པའི་ས་ལ་སྙིང་རྗེ་བྱང་སེམས་ཡང་དག་པའི་ལྟ་བ་གསུམ་སྦྱོང་ཞིང་ཁྱད་པར་དུ་དེ་ཁོ་ན་ཉིད་ཀྱི་དོན་ཐོས་བསམ་དང་སྒོམ་བྱུང་གི་ཤེས་རབ་ཀྱིས་གཏན་ལ་ཕབ་སྟེ་གཟུང་འཛིན་རྟོག་པ་མངོན་གྱུར་པ་ཉམས་སྨོད་ཅིང་གྲངས་མེད་དང་པོའི་ཚོགས་ཡོངས་སུ་རྫོགས་པར་གྱུར་ཅིག །དེ་ནས་བདེན་པ་མངོན་པར་རྟོགས་པས་ས་རབ་ཏུ་དགའ་བ་ལ་ཆོས་ཀྱི་དབྱིངས་བདག་དང་གཞན་དུ་མཉམ་པ་ཀུན་ཏུ་འགྲོ་བའི་དོན་དུ་རྟོགས་པའི་སྟོབས་ཀྱིས་སྦྱིན་པའི་ཕར་ཕྱིན་ལྷག་པར་ཐོབ་པར་གྱུར་ཅིག །རྗེས་ལ་མངོན་པར་རྟོགས་པས་བསྡུས་པས་ལྷག་མ་རྣམས་ལའང་སྤང་བླང་དོན་དམ་པར་མེད་ཀྱང་ཐ་སྙད་དུ་མཆོག་གི་
དོན་དུ་མཐོང་བས་ཚུལ་ཁྲིམས་ལྷག་པ་སོགས་ཆོས་ཉིད་གཟིགས་ཚུལ་གྱི་དབང་གིས་བཟོད་པ་དང་བརྩོན་འགྲུས་དང་བསམ་གཏན་དང་ཤེས་རབ་དང་ཐབས་མཁས་དང་སྨོན་ལམ་དང་སྟོབས་དང་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམས་ལྷག་པར་ཐོབ་པར་གྱུར་ཅིག །ས་དང་པོར་སྐད་ཅིག་མ་གཅིག་ལ་སངས་རྒྱས་བརྒྱ་མཐོང་བ་དང་དེ་དག་གིས་བྱིན་གྱིས་རློབ་པ་དང་བསྐལ་པ་བརྒྱར་གནས་པ་དང་སྔ་ཕྱིའི་བསྐལ་པ་བརྒྱ་གཟིགས་པ་དང་ཏིང་ངེ་འཛིན་བརྒྱ་ལ་འཇུག་པ་དང་འཇིག་རྟེན་གྱི་ཁམས་བརྒྱ་གཡོ་བ་དང་ཞིང་བརྒྱར་འགྲོ་བ་དང་ཞིང་བརྒྱ་སྤྲུལ་བ་དང་སེམས་ཅན་བརྒྱ་སྨིན་པ་དང་ཆོས་སྒོ་བརྒྱ་འབྱེད་པ་དང་ལུས་བརྒྱ་སྤྲུལ་བ་དང་ལུས་རེ་རེ་ལ་འཁོར་བྱང་སེམས་བརྒྱ་བརྒྱ་དང་ལྡན་པ་སྟེ་ཡོན་ཏན་བརྒྱ་ཕྲག་བཅུ་གཉིས་ཐོབ་ཅིང༌། ས་ལྷག་མ་རྣམས་ལ་ཡོན་ཏན་སྡེ་ཚན་བཅུ་གཉིས་པོ་དེ་དག་རེ་རེ་ཞིང་སྟོང་ཕྲག་དང་འབུམ་ཕྲག་དང་བྱེ་བ་བརྒྱ་ཕྲག་དང་བྱེ་བ་སྟོང་ཕྲག་དང་བྱེ་བ་འབུམ་ཕྲག་བྱེ་བ་ཁྲག་ཁྲིག་འབུམ་ཕྲག་དང་སྟོང་གསུམ་འབུམ་ཕྲག་གཅིག་གི་རྡུལ་གྲངས་དང་སྟོང་གསུམ་གྲངས་མེད་འབུམ་ཕྲག་བཅུའི་རྡུལ་གྲངས་དང་བརྗོད་དུ་མེད་པའི་ཡང་བརྗོད་དུ་མེད་པའི་སྟོང་གསུམ་གྱི་རྡུལ་གྲངས་དང་མཉམ་པ་ཐོབ་པར་གྱུར་ཅིག །ས་དང་པོར་ཐུན་མོང་མ་ཡིན་པའི་བསླབ་པ་གསུམ་དང་ཟག་མེད་ཀྱི་ཕུང་པོ་སྦྱོང་བའི་རྟེན་འགྲུབ་ཅིང༌། གཉིས་པར་ཚུལ་ཁྲིམས། གསུམ་པར་ཏིང་ངེ་འཛིན། བཞི་པ་ལྔ་པ་དྲུག་པ་གསུམ་ལ། བྱང་ཆུབ་ཕྱོགས་མཐུན་དང་བདེན་བཞི་དང་རྟེན་འབྲེལ་ཤེས་པའི་ཤེས་རབ་ཀྱི་བསླབ་པ་འགྲུབ་ཅིང༌། ས་ལྷག་མ་རྣམས་སུ་བསླབ་པའི་འབྲས་བུ་གྲུབ་པ་དང་རྣམ་པར་གྲོལ་བའི་
ཕུང་པོ་ཡོངས་སུ་སྤྱོད་པར་གྱུར་ཅིག །མདོར་ན་འཁོར་ལོས་བསྒྱུར་བའི་ལུས་སོགས་རྣམ་སྨིན་གྱི་སྐྱེ་བ་འཛིན་པའི་ཁྱད་པར་དང་རྨི་ལྟས་ཀྱི་ཁྱད་པར་སྤང་བྱ་སྤངས་པའི་ཁྱད་པར་སོགས་རིམ་པ་བཞིན་དུ་མངོན་དུ་གྱུར་ཏེ་མ་དག་ས་བདུན་དུ་གྲངས་མེད་གཉིས་པའི་ཚོགས་དང༌། མཚན་མ་མེད་ཅིང་རྩོལ་བ་མེད་པ་དག་པའི་ས་གསུམ་དུ་གྲངས་མེད་གསུམ་པའི་ཚོགས་ཡོངས་སུ་རྫོགས་པར་གྱུར་ཅིག །དེ་ནས་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་མ་ལུས་པ་དྲུངས་ཕྱུང་ནས་རང་དོན་ཕུན་ཚོགས་ཆོས་ཀྱི་སྐུ་མངོན་དུ་བྱས་ཏེ་གཞན་གྱི་དོན་ལ་ཐོགས་པ་མེད་པར་འཇུག་པ་སྟོབས་བཅུའི་སྒོ་ནས་ནམ་མཁའི་མཐས་གཏུགས་པའི་འགྲོ་བ་མ་ལུས་པ་འཁོར་བའི་རྒྱ་མཚོ་ལས་ཡོངས་སུ་སྒྲོལ་བར་གྱུར་ཅིག །དུས་གསུམ་གྱི་དགེ་ཚོགས་མཐའ་དག་ཀྱང་དམིགས་མེད་ཀྱི་ལྟ་བས་ཡོངས་སུ་ཟིན་པའི་དབང་གིས་ནམ་ཡང་མཉམ་པ་མེད་པ་དང་དེའི་མཐུ་ལ་བརྟེན་ནས་གནས་ལུགས་ཟབ་མོའི་དོན་ལ་ཐོས་བསམ་སྒོམ་པ་མཐར་ཕྱིན་ཅིང་ཐབས་ཁྱད་པར་ཅན་གྱི་གྲོགས་དང་བཅས་པས་སྲིད་ཞིའི་རྒུད་པ་མཐའ་དག་བསལ་ཏེ་དོན་གཉིས་ལྷུན་གྱིས་གྲུབ་པའི་དཔལ་ལ་མྱུར་དུ་རེག་པར་གྱུར་ཅིག །ན་མོ་མཉྫུ་ཤྲི་ཀུ་མ་ར་བྷཱུ་ཏཱ་ཡ། ཏདྱ་ཐཱ། ཨོཾ་ཨ་ར་ཛེ་བི་ར་ཛེ། ཤུདྡྷེ་བི་ཤུདྡྷེ། ཤོ་དྷ་ནེ་བི་ཤོ་དྷ་ནེ། ཤོ་དྷ་ཡ་བི་ཤོ་དྷ་ཡ། ཨ་མ་ལེ། བི་མ་ལེ། ནིར་མ་ལེ། ཛ་ཡ་བཱ་རེ། རུ་རུ་ཙ་ལེ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱཧཱ། ལན་གསུམ། རྣམ་འདྲེན་ཀུན་གྱི་ཡབ་གཅིག་འཇམ་པའི་དབྱངས། །ཕྱི་ནང་གཤིན་རྗེའི་གཤེད་པོ་བྷཻ་ར་ཝ། །ངུར་སྨྲིག་གར་མཛད་བློ་བཟང་རྒྱལ་བའི་དབང༌། །དབྱེར་མེད་
ཐུགས་རྗེའི་བདེན་པ་ཆེན་པོའི་མཐུས། །བདག་གཞན་དུས་གསུམ་དགེ་ཚོགས་མ་ལུས་པ། །འཇམ་དཔལ་དཔའ་བོའི་ཐུགས་བསྐྱེད་དང་འདྲེས་ཏེ། །སྙིང་རྗེའི་སྙིང་པོ་ཅན་གྱི་ལྟ་བ་ཡིས། །སྲིད་ཞིའི་འཆིང་བ་གཅོད་པའི་རྒྱུར་གྱུར་ཅིག །འཁྲུལ་བྲལ་བློ་བཟང་རྒྱལ་བའི་བསྟན་པ་ལ། །ཐོས་བསམ་སྒོམ་པ་གེགས་མེད་མཐར་ཕྱིན་ནས། །བླ་མ་ལྷ་ཡི་གོ་འཕང་མངོན་གྱུར་ཏེ། །འགྲོ་ཀུན་བྱང་ཆུབ་མཆོག་ལ་འགོད་གྱུར་ཅིག །ཅེས་པ་འདི་ནི་རྣམ་དཔྱོད་མཆོག་ཏུ་ཡངས་པ་རབ་འབྱམས་པ་གྲགས་པ་ཆོས་བཟང་གིས་བསྐུལ་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ། ། ༈ ཚུལ་ཁྲིམས་ཕུང་པོ་ཡོངས་རྫོགས་བཅོམ་ལྡན་འདས། །ཚུལ་ཁྲིམས་ཏིང་འཛིན་ཤེས་རབ་དམ་པའི་ཆོས། །ཚུལ་ཁྲིམས་ལྡན་ཞིང་མང་ཐོས་དགེ་འདུན་རྣམས། །ཚུལ་བཞིན་སྨོན་པ་འགྲུབ་པའི་དཔང་བོ་མཛོད། །དེང་ནས་བརྩམས་ཏེ་སྐྱེ་བའི་ཕྲེང་བ་རུ། །དལ་འབྱོར་རྟེན་ཐོབ་དམ་པའི་མགོན་གྱིས་བཟུང༌། །ཚུལ་བཞིན་ཐོས་བསམ་སྒོམ་པའི་རིམ་པ་ཡིས། །རྣམ་དག་རྒྱལ་བའི་བསྟན་ལ་སློབ་གྱུར་ཅིག །ཁྱད་པར་མངོན་མཐོ་ངེས་ལེགས་ཀུན་གྱི་རྒྱུ། །བསྟན་པའི་རྩ་བ་སྟོན་པའི་གདུང་འཚོབ་མཆོག །ཉོན་མོངས་དགྲ་འཇོམས་ཐར་པའི་སྒོ་གཅིག་པུ། །སོ་ཐར་སྡོམ་པ་ཚུལ་བཞིན་སྲུང་གྱུར་ཅིག །སྲིད་དང་ཞི་བའི་གཡང་ས་ལས་སྒྲོལ་ཞིང༌། །དགེ་ཚོགས་མི་ཟད་བྱང་ཆུབ་གཏེར་དུ་སྒྲུབ། །རྒྱལ་རྣམས་གཤེགས་བཤུལ་འགྲོ་ཀུན་ཉེར་འཚོའི་གཞི། །བྱང་སེམས་སྡོམ་པ་ཚུལ་བཞིན་སྲུང་གྱུར་ཅིག །མཆོག་དང་ཐུན་མོང་དངོས་གྲུབ་ཀུན་གྱི་
སྒོ། །ཡི་དམ་མཁའ་འགྲོ་ཆོས་སྐྱོང་འདུ་བའི་རྟེན། །མ་བསྒོམ་གྱུར་ཀྱང་མྱུར་དུ་འཚང་རྒྱའི་ལམ། །གསང་སྔགས་སྡོམ་པ་ཚུལ་བཞིན་སྲུང་གྱུར་ཅིག །བརྒྱ་ལ་ལྟུང་བའི་སྒོ་བཞི་ཅི་རིགས་ཀྱི། །དབང་གྱུར་ཉེས་པས་གོས་ཀྱང་བཤགས་བསྡམས་དང༌། །རང་རང་ཕྱིར་བཅོས་འབད་པས་ལྟུང་བ་དང༌། །ཞག་ཏུ་མི་འགྲོགས་འཕེལ་ཁ་ཆོད་པར་ཤོག །དེ་ལྟར་ཚུལ་ཁྲིམས་དག་པའི་མཆོད་ཀོང་དུ། །ཏིང་འཛིན་ཞུན་མར་སྡོང་བུ་ཚོགས་པ་ལས། །ཤེས་རབ་ཟབ་མོའི་མེ་ལྕེ་འབར་བ་ཡིས། །མཐར་འཛིན་རྨོངས་པའི་མུན་པ་དྲུངས་འབྱིན་ཤོག །ཆོས་ཕུང་ཀུན་འདུས་སྡེ་སྣོད་གསུམ་ལ་མཁས། །དེ་དོན་བསླབ་གསུམ་ཉམས་ལེན་སྙིང་པོར་བྱེད། །སྐལ་བཟང་གཞན་ཡང་ཚུལ་དེར་བཀྲི་བ་ཡིས། །རྒྱལ་བའི་བསྟན་ལ་བྱ་བ་བྱེད་གྱུར་ཅིག །བསླབ་གསུམ་ངོ་བོ་ཚོགས་གཉིས་མཐར་སོན་ཏེ། །རིག་དང་རྐང་པར་ལྡན་པ་སྟོབས་བཅུའི་དཔལ། །ཐོབ་ནས་མཁའ་མཉམ་མ་རྒན་འགྲོ་བ་རྣམས། །ཕྲ་རགས་འཁོར་བའི་མཚོ་ལས་སྒྲོལ་གྱུར་ཅིག །ཅེས་ཚེ་རབས་ཀུན་ཏུ་ཚུལ་ཁྲིམས་རྣམ་པར་དག་པ་སྲུང་ནུས་པའི་སྨོན་ཚིག་ཅིག་དགོས་ཞེས་ཨོར་དུ་སུ་ལི་ཅོག་ནས་དད་བརྩོན་ལྡན་པ་དཀོན་མཆོག་མཐའ་ཡས། དཀོན་མཆོག་ཆོས་ལྡན་གཉིས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ རྒྱལ་བའི་མདུན་ན་རྒྱལ་སྲས་དྲི་མེད་གྲགས། །རྒྱ་གར་ཡུལ་ན་ཟླ་བ་གྲགས་པ་སོགས། །ལྗོངས་འདིར་ཀུན་མཁྱེན་འཇམ་དབྱངས་བཞད་པ་ཞེས། །འཁྲུངས་རབས་རིམ་བྱོན་རྣམས་ལ་གསོལ་བ་འདེབས། །དེ་ཡི་ཐུགས་བསྐྱེད་ཆུ་བོ་རྣམ་བཞིའི་རྒྱུན། །
ངོ་མཚར་དགེ་མཚན་གཡས་སུ་འཁྱིལ་བའི་བཅུད། །རིང་བསྲེལ་རྣམ་བཞི་སྐུ་གསུང་ཐུགས་ཀྱི་རྟེན། །དཔག་ཡས་ཕྱུར་བུར་གཏམས་ལ་ཕྱག་འཚལ་ལོ། །ཁྱད་པར་མདོ་སྨད་མུན་པའི་སྨག་རུམ་དུ། །མདོ་སྔགས་བཤད་སྒྲུབ་ཟུང་འཇུག་ཐུབ་པའི་བསྟན། །རྒྱས་མཛད་རྒྱལ་བས་ལུང་བསྟན་ཆོས་ཀྱི་སྡེ། །དཔོན་སློབ་སྡེ་དང་བཅས་ལ་ཕྱག་འཚལ་ལོ། །ཕྱི་མར་བསླབ་གསུམ་ལྡན་པའི་རྟེན་ཐོབ་ནས། །འཕགས་པའི་དགེ་འདུན་རྣམས་དང་ལྷན་ཅིག་ཏུ། །བསྟན་ལ་ཐོས་བསམ་སྒོམ་པས་རབ་ཞུགས་ནས། །སྲིད་པའི་རྒྱ་མཚོ་མྱུར་དུ་སྐེམ་པར་ཤོག །སྐྱབས་མགོན་ཡབ་སྲས་རྣམས་ཀྱི་ཞབས་བརྟན་ཅིང༌། །དགེ་འདུན་ཐུགས་མཐུན་བཤད་སྒྲུབ་བསྟན་པ་དར། །འགྲོ་ལ་ཆོས་སྲིད་འབྱོར་པའི་བདེ་དགའ་རྒྱས། །དགེ་མཚན་མ་ལུས་འགྲུབ་པའི་བཀྲ་ཤིས་ཤོག །ཅེས་དགོན་པའི་བླ་གྲྭ་རྟེན་བཅས་ཕྱི་ནང་བསྡོམས་པར་ཕྱག་འཚལ་སྨོན་ཚིག་དང་བཅས་པ་ཞིག་དགོས་ཚུལ་དགེ་སློང་འཇམ་དབྱངས་བདེ་ཆེན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ བསླུ་མེད་བླ་མ་ཡི་དམ་དཀོན་མཆོག་གསུམ། །ཉམ་ཐག་འགྲོ་ལ་བརྩེ་བས་ཉེར་དགོངས་ཏེ། །རྨད་བྱུང་ཐུགས་རྗེས་བདེན་པའི་དཔུང་བསྐྱེད་ནས། །བདག་གི་ལེགས་སྨོན་འགྲུབ་པའི་དཔང་མཛོད་ཅིག །འདིས་མཚོན་བདག་དང་མཁའ་མཉམ་འགྲོ་ཀུན་གྱིས། །དུས་གསུམ་བསགས་པའི་དགེ་རྩ་ཅི་མཆིས་པ། །སྲས་བཅས་རྒྱལ་བའི་རྣམ་དཀར་དགེ་ཚོགས་དང༌། །དབྱེར་མེད་རོ་གཅིག་ངོ་བོར་འདྲེས་གྱུར་ཅིག །དེ་མཐུས་ཉེས་དམིགས་ཆེ་ལ་མནོག་ཆུང་བ། །འཁོར་བའི་བདེ་འབྱོར་རྒྱུ་རུ་མི་སྨིན་ཞིང༌། །
ཁོང་ཁྲོ་ལྟ་བ་ངན་ལ་སོགས་པ་ཡི། །ཉེས་པས་ནམ་ཡང་གཞོམ་པར་མ་གྱུར་ཅིག །མི་བཟད་ཉེས་ལྟུང་སྒྲིབ་པ་ཀུན་བྱང་ཞིང༌། །དུས་གསུམ་རྒྱལ་བ་ཀུན་གྱིས་བསྔགས་པ་ཡི། །གནས་སྐབས་མཐར་ཐུག་འབྲས་བཟང་མ་ལུས་པ། །བདེ་བླག་ཉིད་དུ་འགྲུབ་པའི་རྒྱུར་གྱུར་ཅིག །འདི་སྣང་འགག་ཚེ་བླ་མ་ལྷག་པའི་ལྷས། །ཞལ་བསྟན་དབུགས་དབྱུང་ངན་འགྲོའི་སྒོ་བཀག་སྟེ། །དམ་ཆོས་སྒྲུབ་པའི་རྟེན་བཟང་རིམ་བརྒྱུད་དེ། །མཚན་ལྡན་བཤེས་གཉེན་དམ་པས་རྗེས་འཛིན་ཤོག །དེ་ཉིད་བསམ་དང་སྦྱོར་བས་ལེགས་བསྙེན་ཅིང༌། །འབྲལ་མེད་གསུང་གི་བདུད་རྩིའི་བཅུད་མྱང་སྟེ། །ཐོས་བསམ་སྒོམ་པས་ཉམས་སུ་བླངས་པ་ཡིས། །ཡང་དག་ལམ་གྱི་བཙན་ས་ཟིན་པར་ཤོག །ཁྱད་པར་བྱམས་མགོན་ཉིན་བྱེད་འོད་སྟོང་གིས། །ཐེག་མཆོག་རིགས་ཀྱི་ས་བོན་སྨིན་པ་ལས། །རླབས་ཆེན་ཚོགས་གཉིས་འདབ་བརྒྱ་བཞད་པ་ཡིས། །མཁའ་མཉམ་ལུས་ཅན་རྐང་དྲུག་ཚིམ་བྱེད་ཤོག །ཅེས་པ་འདི་ནི་དད་བརྩོན་མཆོག་ཏུ་དགེ་བ་བདེ་ཆེན་རྒྱ་མཚོས་དགེ་སྦྱོར་གང་བྱས་ཀྱི་མཇུག་ཏུ་འདོན་རྒྱུའི་སྨོན་ཚིག་ཅིག་དགོས་ཞེས་བསྐུལ་བ་ལྟར། ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ སྒྲིབ་བྲལ་བདེ་གཤེགས་ཐུགས་ཀྱི་མེ་ལོང་ངོས། །དྷཱིཿ ཧཱུཾ་ཡི་གེའི་རྣམ་རོལ་ཡེ་ཤེས་ལྷ། །རྒྱལ་ཀུན་མེས་པོར་གྱུར་ཀྱང་གཞོན་ནུའི་ཚུལ། །མགོན་པོ་མཁྱེན་པའི་གཏེར་གྱིས་རིང་དུ་སྐྱོངས། །ཕྱི་མའི་ཚེ་རབས་མི་ལྟུང་ཕྲེང་བ་ཀུན། །འཇམ་མགོན་བདུད་རྩིའི་འོད་དང་འགྲོགས་པ་ལས། །བྱིན་རླབས་སྣང་བའི་དཔལ་ཡོན་གྱིས་བསྐྱངས་ཏེ། །ཡང་དག་ལམ་
གྱི་མཁའ་དབྱིངས་བགྲོད་གྱུར་ཅིག །ཀུན་བྱང་བླང་དོར་མཐའ་ཀླས་འཛིན་མའི་ཁྱོན། །བློ་གྲོས་ནམ་མཁའི་ཁམས་ཀྱིས་ཀུན་ཁྱབ་ཅིང༌། །གཏིང་ཟབ་ཆོས་ཀྱི་དེ་ཉིད་འབྱེད་པ་ཡི། །གཏུགས་པ་མེད་པའི་ཤེས་རབ་ཐོབ་གྱུར་ཅིག །མ་རྟོགས་ལོག་པར་རྟོག་པའི་དྲ་བ་ཀུན། །གཅོད་པའི་ཤེས་རབ་རལ་གྲིའི་རྣོ་རྒྱུན་གྱིས། །དངོས་པོར་འཛིན་པའི་འཆིང་བ་དྲུངས་ཕྱུང་སྟེ། །རྣམ་པར་གྲོལ་བའི་གླིང་དུ་འཇུག་གྱུར་ཅིག །གསུང་རབ་ཀུན་གྱི་དེ་ཉིད་ལེགས་རྟོགས་ནས། །འཇིགས་བྲལ་འཆད་རྩོད་རྩོམ་པའི་རྣམ་དཔྱོད་ཀྱིས། །མི་ནུབ་བསྟན་པའི་རྒྱལ་མཚན་ལེགས་བསྒྲེངས་ནས། །འགྲོ་ལ་ཕན་བདེའི་དགའ་སྟོན་འགྱེད་གྱུར་ཅིག །འཁྲུལ་བྲལ་བློ་བཟང་རྒྱལ་བའི་བསྟན་པ་ལ། །ངོམས་པ་མེད་པའི་ཐོས་པ་མཐར་ཕྱིན་ཏེ། །ཡང་དག་སྒྲུབ་པ་སྙིང་པོར་བྱེད་པ་ཡིས། །ཐོས་བསམ་སྒོམ་པའི་ཤེས་རབ་འཕེལ་གྱུར་ཅིག །མདོར་ན་བླང་དོར་ལྟ་བའི་མིག་གཅིག་པུ། །རྣམ་པར་འབྱེད་པའི་ཤེས་རབ་མཆོག་ཐོབ་ནས། །མ་ནོར་ཐེག་མཆོག་ལམ་བཟང་རིམ་བགྲོད་དེ། །རྣམ་ཀུན་མཁྱེན་པའི་གླིང་དུ་འཇུག་གྱུར་ཅིག །ཅེས་པ་འདི་ནི་དད་བརྩོན་ལྷག་བསམ་དགེ་བ་རབ་འབྱམས་པ་བློ་བཟང་རབ་བརྟན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ དགེ་ལེགས་ཀུན་གྱི་འབྱུང་གནས་བླ་མ་དང༌། །བསླུ་མེད་མཆོག་གསུམ་ཆོས་སྲུང་རྒྱ་མཚོའི་མཐུ། །རྒྱུ་འབྲས་རྟེན་འབྱུང་བདེན་སྟོབས་ཚོགས་པ་ཡིས། །གང་བཏབ་སྨོན་པའི་འབྲས་བུ་འགྲུབ་གྱུར་ཅིག །འདིས་མཚོན་དུས་གསུམ་དགེ་ཚོགས་ཅི་བགྱིས་དང༌། །ཐེག་གསུམ་སྐྱེ་འཕགས་ཡོངས་ཀྱི་རྣམ་དཀར་ཚོགས། །གཅིག་ཏུ་
བསྡོམས་ཏེ་མ་ལུས་འགྲོ་བའི་ཕྱིར། །བླ་མེད་བྱང་ཆུབ་འཐོབ་པའི་རྒྱུ་རུ་བསྔོ། །སྐྱེ་ཞིང་སྐྱེ་བར་དལ་འབྱོར་རྟེན་ཐོབ་ཅིང༌། །བཤེས་གཉེན་དམ་པས་འབྲལ་མེད་རྗེས་སུ་གཟུང༌། །སྐྱེས་བུ་གསུམ་གྱི་ལམ་ལ་བློ་སྦྱངས་ཏེ། །རྒྱལ་བའི་དགོངས་པ་ཇི་བཞིན་སྒྲུབ་གྱུར་ཅིག །བསྟན་པའི་སྙིང་པོ་གསང་ཆེན་ཐེག་པའི་སྒོར། །ཞུགས་ནས་དམ་ཚིག་སྡོམ་པ་ཚུལ་བཞིན་བསྲུང༌། །རིམ་གཉིས་ལམ་གྱི་བགྲོད་པ་མཐར་སོན་ཏེ། །ཟུང་འཇུག་གོ་འཕང་བདེ་བླག་མྱུར་ཐོབ་ཤོག །ཁྱད་པར་དུས་གསུམ་དགེ་བ་ཅི་བགྱིས་པ། །དོན་མེད་འཁོར་བའི་རྒྱུ་རུ་མི་སྨིན་ཞིང༌། །མི་མཐུན་རྐྱེན་གྱིས་ནམ་ཡང་མི་གཞོམ་པར། །བསྟན་དང་འགྲོ་ལ་ཕན་པའི་རྒྱུར་གྱུར་ཅིག །ཅེས་པ་འདི་ནི་དད་བརྩོན་བློ་གྲོས་ཀྱི་ནོར་དང་ལྡན་པ་སྨན་པ་དཀོན་མཆོག་བསྟན་དར་གྱིས་སྒོ་གསུམ་གྱི་དགེ་ཚོགས་རྣམས་ཆུད་མི་ཟ་བར་བྱ་བའི་ཕྱིར་བྱང་ཆུབ་མཆོག་ཏུ་བསྔོ་བས་རྒྱས་འདེབས་པའི་སྨོན་ཚིག་ཅིག་དགོས་ཞེས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ བླ་མ་ལྷག་པའི་ལྷ་མཆོག་ཐུགས་རྗེའི་མཐུས། །ཕན་བདེ་མ་ལུས་འབྱུང་བའི་སྒོ་གཅིག་པུ། །འཁྲུལ་བྲལ་བློ་བཟང་རྒྱལ་བའི་མདོ་སྔགས་བསྟན། །ཕྱོགས་དུས་ཀུན་ཏུ་དར་ཞིང་རྒྱས་གྱུར་ཅིག །རྣམ་དག་ཁྲིམས་ལྡན་ལྷག་བསམ་གོ་ཆ་བགོས། །མདོ་སྔགས་ཐུབ་བསྟན་ཡོངས་རྫོགས་བཤད་སྒྲུབ་ཀྱིས། །འཛིན་སྐྱོང་སྤེལ་རྒྱུར་དམ་པའི་སྐྱེས་བུ་ཡིས། །ཆོས་གྲྭ་ཆེ་འདི་ཡོངས་སུ་གང་གྱུར་ཅིག །དྲི་མེད་ལུང་རིགས་སྨྲ་བའི་ཚོགས་རྣམས་ལ། །ཕྱི་དང་ནང་གི་ཉེར་འཚེ་མི་འབྱུང་ཞིང༌། །ཆོས་དང་
མཐུན་པའི་ལོངས་སྤྱོད་དཔལ་འབྱོར་སོགས། །མཐུན་རྐྱེན་མ་ལུས་ལྷུན་གྱིས་འགྲུབ་པར་ཤོག།།འདྲེན་མཆོག་འཇིགས་མེད་རྒྱ་མཚོའི་དཔལ་ལ་སོགས། །དམ་པའི་མགོན་རྣམས་ཞབས་པད་རྟག་བརྟན་ཅིང༌། །བསྟན་དང་འགྲོ་བའི་ཕན་བདེ་སྤེལ་བ་ཡི། །འཕྲིན་ལས་ས་སྟེང་ཀུན་ལ་ཁྱབ་གྱུར་ཅིག །མདོར་ན་ཡུལ་དུ་དགེ་བཅུའི་དཔལ་འབྱོར་རྒྱས། །དགེ་འདུན་ཐུགས་མཐུན་ཐོས་བསམ་སྒོམ་གསུམ་འཕེལ། །དགེ་ཚོགས་ཀུན་ཀྱང་མཁའ་མཉམ་ལུས་ཅན་ཀུན། །བླ་མེད་བྱང་ཆུབ་ཐོབ་པའི་རྒྱུར་གྱུར་ཅིག །ཅེས་པ་འདི་ནི་རྒྱལ་བ་སེང་གེའི་ང་རོའི་གཟུངས་གཞུག་བླ་བྲང་ཆེན་མོ་ནས་ཁུར་ལེན་བྱས་ཏེ་བསྒྲུབ་སྐབས་སྤེལ་ཚིག་ཅིག་དགོས་ཞེས་ཞུས་ཏེ་གནང་བའོ། ། ༈ ཡོན་ཏན་རིན་ཆེན་བྱེ་བའི་ཁམས་ལས་གྲུབ། །དངོས་ཀུན་མཚན་མར་འཛིན་པའི་རྡུལ་དང་བྲལ། །རྡུལ་མེད་བསགས་པའི་ཞིང་གི་དཔལ་གྱུར་པ། །ཀུན་གཟིགས་འཇམ་པའི་དབྱངས་ལ་ཕྱག་འཚལ་ལོ། །རབ་འབྱམས་རྒྱལ་བ་སྐྱེད་པའི་ཡབ་གྱུར་ཅིང༌། །འཁོར་བ་སྲིད་དང་ནམ་མཁའི་མཐས་གཏུགས་པར། །རྒྱལ་དང་རྒྱལ་སྲས་སྐྱེ་འཕགས་སྣ་ཚོགས་ཀྱི། །རྣམ་འཕྲུལ་ཅིར་ཡང་སྟོན་ལ་ཕྱག་འཚལ་ལོ། །ཁྱད་པར་དབང་པོའི་ཏོག་གི་སྤྱན་སྔ་རུ། །མཐའ་བྲལ་ལྟ་བས་ཡོངས་བཟུང་རྡོ་རྗེ་ཐེག །སྤེལ་བའི་ཐུགས་བསྐྱེད་དམ་བཅའ་ལྷུན་གྱིས་གྲུབ། །བློ་བཟང་རྒྱལ་བའི་དབང་པོར་ཕྱག་འཚལ་ལོ། །དེད་དཔོན་མཆོག་གིས་སྤྲུལ་བའི་གྲོང་ཁྱེར་བཞིན། །རྨད་བྱུང་བཀོད་པར་འཚང་རྒྱའི་ཚུལ་བསྟན་ཚེ། །གདུལ་བྱ་ཐེག་པ་མཆོག་ལ་སྦྱོར་མཛད་པ། །རྒྱལ་བ་སེང་གེའི་ང་རོར་ཕྱག་འཚལ་ལོ། །ཀུན་མཁྱེན་བླ་མའི་མདོ་སྔགས་
ཆོས་ཚུལ་ལ། །ཐོས་བསམ་སྒོམ་པས་ཚུལ་བཞིན་བསླབ་པ་སོགས། །དུས་གསུམ་དགེ་ཚོགས་གཅིག་ཏུ་བསྡོམས་པའི་མཐུས། །སྨོན་པའི་རེ་འབྲས་ལྷུན་གྱིས་འགྲུབ་པར་ཤོག །ནམ་ཞིག་ཚེ་འདིའི་སྣང་བ་འགགས་མ་ཐག །ངོ་མཚར་རྨད་བྱུང་བཀོད་པའི་ཞིང་ཁམས་སུ། །སྐྱེས་ནས་རྒྱལ་བ་སེང་གེའི་ང་རོ་ཡི། །ཞལ་བཟང་མིག་གི་བདུད་རྩིར་འགྱུར་བར་ཤོག །ཐེག་མཆོག་རིགས་ཀྱི་ས་བོན་མ་ཉམས་པ། །གཞན་ཕན་བྱམས་དང་སྙིང་རྗེའི་ཆུས་བརླན་པར། །རྒྱལ་སྲས་སྤྱོད་པའི་ལོ་ཏོག་རབ་རྒྱས་ཏེ། །འགྲོ་ཀུན་ཉེར་འཚོའི་རྟེན་དུ་འགྱུར་བར་ཤོག །ཁྱོད་སྐུ་མཆོད་སྡོང་དང་བཅས་མཐོང་ཙམ་ལས། །མཚན་འཛིན་དམིགས་གཏད་ཞིག་པའི་སྟོང་པ་དང༌། །མིང་ཙམ་ལྷག་མར་ལུས་པའི་རྟེན་འབྱུང་གཉིས། །ཟུང་འཇུག་རྒྱལ་བའི་དགོངས་པ་རྙེད་པར་ཤོག །རྒྱལ་ཀུན་གསུང་གི་གསང་མཛོད་སྤྱོད་པའི་མཆོག །སངས་རྒྱས་ལས་ཀྱང་དཀོན་པའི་རྡོ་རྗེ་ཐེག །རྨད་བྱུང་ཐབས་མཁས་ཟབ་མོའི་མྱུར་ལམ་དུ། །ཞུགས་ནས་རིམ་གཉིས་དགའ་སྟོན་མྱོང་བར་ཤོག །གཟུངས་སྤོབས་མངོན་ཤེས་རྫུ་འཕྲུལ་མཆོག་ཐོབ་ནས། །སྐད་ཅིག་རེར་ཡང་གློག་གི་རོལ་རྩེད་བཞིན། །སངས་རྒྱས་ཞིང་མང་བགྲོད་དེ་རྒྱལ་ཀུན་ལས། །བོགས་འབྱིན་ཟབ་མོའི་གདམས་པ་ནོད་པར་ཤོག །ཟབ་མོའི་ལྟ་དང་མྱུར་ལམ་གསང་བ་སྔགས། །ཟུང་དུ་འཇུག་པ་རྡོ་རྗེའི་འཕྲུལ་སྒྱོག་གིས། །ཀུན་རྟོག་བཞོན་པར་བཅས་པའི་དཔུང་བཅོམ་སྟེ། །བདེ་ཆེན་དང་པོའི་མགོན་པོ་ཉིད་གྱུར་ཅིག །མུ་མཐའ་ཡས་པའི་རབ་འབྱམས་ཞིང་དུ་ཡང༌། །གང་ལ་གང་འདུལ་སྤྲུལ་བའི་བཀོད་
པ་ཡིས། །རྒྱལ་བསྟན་ཡང་སྙིང་མདོ་སྔགས་ཟུང་འཇུག་ལམ། །སྤེལ་བས་འགྲོ་ཀུན་སྲིད་ལས་སྒྲོལ་གྱུར་ཅིག །ཅེས་ངོ་མཚར་རྨད་བྱུང་བཀོད་པའི་ཞིང་དུ་སྐྱེ་བ་འཛིན་པའི་སྨོན་ལམ་འདི་ཉིད་དད་བརྩོན་ལྡན་པ་ཁ་ཀྱའི་རབ་འབྱམས་པ་ངག་དབང་བསམ་གཏན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ ཀུན་རྟོག་སྤྲོས་པའི་དྲ་བ་ཉེར་ཞི་བ། །མཐའ་བྲལ་ཆོས་ཀྱི་དབྱིངས་དང་དབྱེར་མེད་པའི། །ཡེ་ཤེས་མཚན་དཔེའི་གཟུགས་ཀྱི་རོལ་གར་མཁན། །མགོན་པོ་འཇམ་པའི་དབྱངས་ལ་ཕྱག་འཚལ་ལོ། །གང་གི་མཚན་ཙམ་དྲན་པའི་འོད་རྣོན་གྱིས། །རྨོངས་པའི་མུན་སངས་བློ་གྲོས་འདབ་བརྒྱའི་ཚལ། །ཕྱེ་སྟེ་ལེགས་བཤད་སྦྲང་རྩིས་གཏམས་མཛད་པའི། །སྙན་པ་ཕྱོགས་བཅུའི་ཞིང་ཁམས་ཀུན་ཏུ་ཁྱབ། །དེ་ཕྱིར་བདག་ཀྱང་རྩེ་གཅིག་གུས་པ་ཡིས། །ཁྱོད་སྐུའི་སྣང་བ་ཡིད་ལ་རྟག་འགོད་ཅིང༌། །བཟླས་བརྗོད་མཆོད་པའི་ལས་ལ་བརྩོན་བགྱིད་ན། །བརྩེ་བས་དགོངས་ཏེ་བྱིན་རླབས་མྱུར་སྩོལ་ཅིག །རྒྱ་ཆེན་མདོ་སྔགས་གཞུང་ལུགས་རྒྱ་མཚོའི་འཇིངས། །ཕུལ་བྱུང་རྣམ་དཔྱོད་གྲུ་གཟིངས་ཀྱིས་བརྒལ་ཏེ། །ཐར་འདོད་དོན་མཐུན་ཚོགས་ཀྱི་རེ་སྐོང་བའི། །འཆད་པའི་ཤེས་རབ་ཕུན་ཚོགས་ཐོབ་གྱུར་ཅིག །དྲི་མེད་རིགས་པ་རལ་གྲིའི་རྣོ་རྒྱུན་གྱིས། །མ་རྟོགས་ལོག་རྟོག་འཁྲུལ་པའི་དྲ་བ་ཀུན། །ཅིག་ཅར་ཉིད་དུ་གཅོད་ལ་ཐོགས་མེད་པ། །ཟླ་བྲལ་རྩོད་པའི་ཤེས་རབ་རྒྱས་གྱུར་ཅིག །རྗོད་བྱེད་ཕུན་ཚོགས་རྣ་བའི་བཅུད་ལེན་ཞིང༌། །དོན་ཟབ་ཀུན་བྱང་བླང་དོར་ཇི་བཞིན་སྟོན། །ཐུབ་བསྟན་རིན་ཆེན་མཛེས་པའི་རྒྱན་གྱུར་པ། །བདེ་བླག་རྩོམ་པའི་ཤེས་རབ་
འཕེལ་གྱུར་ཅིག །ཆོས་རྣམས་ཀུན་གྱི་གནས་ལུགས་ཟབ་མོའི་དོན། །རྒྱ་ཆེའི་ཕུང་ཁམས་སྐྱེ་མཆེད་ཀུན་རྫོབ་ཆོས། །རིག་གནས་ལྔ་སོགས་ཤེས་བྱའི་གནས་ཀུན་ལ། །མཁས་པའི་རླབས་ཆེན་ཤེས་རབ་ཐོབ་གྱུར་ཅིག །ཟབ་བརླིང་བཀའ་དང་བསྟན་བཅོས་དཀའ་གནད་ཀུན། །མ་ནོར་མ་འདྲེས་མྱུར་དུ་འབྱེད་པ་ཡི། །ཟབ་གསལ་མྱུར་བའི་ཤེས་རབ་ལ་བརྟེན་ནས། །གཞུང་ལུགས་རྒྱ་མཚོའི་ཕ་རོལ་ཕྱིན་གྱུར་ཅིག །ཇི་སྙེད་ཐོས་བསམ་འབད་པས་ཤེས་པ་ཀུན། །ཤེས་ཀྱི་ཁེ་དང་རྙེད་གྲགས་འདོད་པའི་རྒྱུར། །མི་འགྱུར་རང་སེམས་འདུལ་ཐབས་འབའ་ཞིག་ཏུ། །གོམས་པས་ཡང་དག་ལམ་བཟང་བགྲོད་གྱུར་ཅིག །སྲིད་གསུམ་འཁོར་བའི་གནས་ལ་ཞེན་ལོག་ཅིང༌། །རང་ཉིད་གཅེས་འཛིན་ཉེས་དམིགས་མཐོང་བ་ཡིས། །སྲིད་དང་ཞི་བའི་གཡང་ས་ཀུན་སྤངས་ཏེ། །མི་གནས་མྱ་ངན་འདས་ལ་བགྲོད་གྱུར་ཅིག །མདོར་ན་ཤེས་རབ་རྩིབས་སྟོང་འཁོར་ལོ་ཡིས། །ཁམས་གསུམ་ཆོས་ཀྱི་རྒྱལ་པོར་དབང་བསྒྱུར་ཏེ། །ནམ་མཁའི་མཐས་གཏུགས་མར་གྱུར་འགྲོ་བ་ཀུན། །འཇམ་དཔལ་དཔའ་བོའི་གནས་ལ་འགོད་གྱུར་ཅིག །ཅེས་མགོན་པོ་འཇམ་པའི་དབྱངས་ལ་གསོལ་བ་འདེབས་ཤིང་ཤེས་རབ་འཕེལ་བའི་དོན་གྱི་སྨོན་ཚིག་འདི་ནི་སོ་ཉིད་གཡས་རུའི་ཤོག་ནས་དད་བརྩོན་ལྡན་པ་དགེ་སློང་དཀོན་མཆོག་ལྷུན་གྲུབ་ཀྱིས་བསྐུལ་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའོ། ། ༈ སྐྱབས་གསུམ་ཀུན་འདུས་ཤཱཀྱ་མུ་ནི་དང༌། །གངས་རིའི་མགོན་པོ་སྤྱན་རས་གཟིགས་དབང་སོགས། །རྒྱལ་དང་རྒྱལ་སྲས་སློབ་
མར་བཅས་པ་ལ། །སྒོ་གསུམ་མི་ཕྱེད་དད་པས་ཕྱག་འཚལ་ལོ། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །དགེ་ཚོགས་མཐའ་དག་སྒྲུབ་པའི་མཆོད་པར་འབུལ། །ཁྱོད་མིན་རེ་བའི་སྐྱབས་གཞན་མ་མཆིས་པས། །ཚེ་རབས་ཀུན་ཏུ་འབྲལ་མེད་ཐུགས་རྗེས་ཟུངས། །ཕྱག་སྐོར་བཟླས་བརྗོད་སོགས་ལ་བརྩོན་པ་ཡི། །རྣམ་དཀར་འདིས་མཚོན་དུས་གསུམ་དགེ་ཚོགས་མཐུས། །བཀའ་དྲིན་མཉམ་མེད་རྩ་བའི་བླ་མ་རྣམས། །ཞབས་པད་བརྟན་ཅིང་ཐུབ་བསྟན་རྒྱས་གྱུར་ཅིག །དྲིན་ཅན་ཕ་མས་ཐོག་དྲངས་འགྲོ་བ་ཀུན། །ངན་སོང་གཡང་ས་ལས་གྲོལ་དལ་འབྱོར་གྱི། །རྟེན་ཐོབ་བཤེས་གཉེས་དམ་པས་རྗེས་གཟུང་སྟེ། །ཡང་དག་ལམ་ལ་གེགས་མེད་སློབ་གྱུར་ཅིག །ཁྱད་པར་འདི་ནས་ཤི་འཕོས་གྱུར་མ་ཐག །བདེ་བ་ཅན་དུ་པདྨོ་ལས་སྐྱེས་ཏེ། །མགོན་པོ་འོད་དཔག་མེད་ཀྱི་ཞལ་མཐོང་ཞིང༌། །གསུང་གི་བདུད་རྩིའི་དགའ་སྟོན་མྱོང་གྱུར་ཅིག །ཤཱཀྱའི་དབང་པོ་འདྲེན་པ་འོད་དཔག་མེད། །མི་ཕམ་འཇམ་དབྱངས་གསང་བདག་སྤྱན་རས་གཟིགས། །བདེ་གཤེགས་འཁོར་བཅས་རྟེན་འབྲེལ་མི་བསླུ་བའི། །བདེན་པས་སྨོན་ལམ་ཅི་བཏབ་མྱུར་འགྲུབ་ཤོག །ཅེས་དང༌། སངས་རྒྱས་སྐུ་གསུམ་བརྙེས་པའི་བྱིན་རླབས་དང༌། །ཞེས་སོགས་བྱའོ། ། ༈ སྐྱབས་གསུམ་ཀུན་འདུས་རྩ་བའི་བླ་མ་ལ། །གསོལ་བ་འདེབས་སོ་ངན་འགྲོའི་འཇིགས་ལས་སྐྱོབས། །ལས་འབྲས་བསླུ་མེད་ཚུལ་ལ་ངེས་རྙེད་ནས། །བླང་དོར་ཚུལ་བཞིན་ནུས་པར་བྱིན་གྱིས་རློབས། །སྡོམ་གསུམ་བཀའ་དྲིན་སྩོལ་མཛད་བླ་མ་ལ། །གསོལ་བ་འདེབས་སོ་སྲིད་པའི་མཚོ་ལས་སྒྲོལ། །བདེན་
བཞིའི་བླང་དོར་ཚུལ་བཞིན་སྒྲུབ་པ་ཡིས། །ཐར་པའི་རྒྱལ་མཚན་ཚུགས་པར་བྱིན་གྱིས་རློབས། །ཐེག་མཆོག་ལམ་བཟང་གསལ་མཛད་མགོན་ཁྱོད་ལ། །གསོལ་བ་འདེབས་སོ་སྲིད་ཞིའི་འཇིགས་ལས་སྐྱོབས། །ཐབས་ཤེས་ཟུང་འཇུག་ཕྱིན་དྲུག་ཉམས་ལེན་གྱིས། །རྒྱལ་སྲས་སྤྱོད་ལ་སློབ་པར་བྱིན་གྱིས་རློབས། །བཀའ་དྲིན་གསུམ་ལྡན་འཁོར་ལོའི་མགོན་པོ་ལ། །གསོལ་བ་འདེབས་སོ་བདུད་བཞིའི་གཡུལ་ལས་སྐྱོབས། །དམ་ཚིག་རྣམ་དག་རིམ་གཉིས་ཉམས་ལེན་གྱིས། །ཟུང་འཇུག་གོ་འཕང་ཐོབ་པར་བྱིན་གྱིས་རློབས། །སྐྱེ་བ་ཀུན་ཏུ་ཞེས་སོགས་བྱ། ཞེས་པ་འདི་ནི་དད་བརྩོན་ལྡན་པ་དཀའ་བཅུ་ཡེ་ཤེས་བསྟན་འཛིན་གྱིས་བསྐུལ་ངོར། ྋབཙུན་པ་དཀོན་མཆོག་བསྟན་པའི་སྒྲོན་མེས་དགོན་ལུང་བྱམས་པ་གླིང་དུ་བྲིས་པའོ། །༈ སྡེ་སྣོད་གསུམ་གྱི་ཡལ་གའི་ཁྱོན་ཡངས་ཤིང༌། །རྣམ་དག་བསླབ་གསུམ་འབྲས་བུའི་ཁུར་གྱིས་དུད། །འགྲོ་ཀུན་གདུང་སེལ་ཕན་བདེའི་གྲིབ་བསིལ་ཅན། །རྒྱལ་བསྟན་ཕྱོགས་དུས་ཀུན་ཏུ་རྒྱས་གྱུར་ཅིག །འདྲེན་མཆོག་བློ་བཟང་འཇིགས་མེད་རྒྱ་མཚོ་སོགས། །བསྟན་འཛིན་སྐྱེས་བུ་མཆོག་རྣམས་ཞབས་བརྟན་ཅིང༌། །བཞེད་དགོངས་གེགས་མེད་ལྷུན་གྱིས་གྲུབ་པ་ཡིས། །མི་ནུབ་བསྟན་པའི་རྒྱལ་མཚན་བསྒྲེང་གྱུར་ཅིག །ཁྱད་པར་ཀུན་མཁྱེན་འཇམ་དབྱངས་བཞད་པའི་སྡེའི། །ཐུགས་བསྐྱེད་ཇི་བཞིན་ཐུབ་བསྟན་འབྱུང་གནས་འདིར། །བཤད་སྒྲུབ་ཉི་མའི་འོད་ལྟར་གསལ་མཛད་པའི༌། །ལེགས་བྱས་རྒྱ་མཚོ་རིང་དུ་འཕེལ་གྱུར་ཅིག །འབྲེལ་ཐོགས་འགྲོ་ཀུན་གནས་སྐབས་བདེ་འབྱོར་གྱིས། །འཚོ་བས་རྫོགས་ལྡན་ཀུན་དགའི་
དཔལ་འབར་ཞིང༌། །བསྐལ་བཟང་རྣམ་འདྲེན་ཀུན་གྱིས་རྗེས་གཟུང་སྟེ། །བླ་མེད་བྱང་ཆུབ་མཆོག་ལ་འགོད་གྱུར་ཅིག །ཅེས་པ་འདི་ནི་སངས་རྒྱས་སྟོང་སྐུའི་གཟུངས་གཞུག་གི་སྨོན་ཚིག་ཏུ་སྩལ་བའོ། ། ༈ བདེ་ལྡན་ཞིང་ནས་རྩ་བའི་བླ་མ་དང༌། །དབྱེར་མེད་འགྲོ་བའི་འདྲེན་མཆོག་འོད་དཔག་མེད། །སྤྱན་རས་གཟིགས་དབང་རྡོ་རྗེ་ཅན་ལ་སོགས། །མཐུ་ཆེན་རྒྱལ་སྲས་དཔའ་བོའི་ཚོགས་དང་བཅས། །རིང་ནས་གོམས་པའི་ཐུགས་བསྐྱེད་རྒྱ་མཚོ་བཞིན། །བདག་སོགས་མཁའ་མཉམ་འགྲོ་བའི་དཔུང་གཉེན་དུ། །ཐོགས་མེད་རྫུ་འཕྲུལ་ཤུགས་ཀྱིས་འདིར་གཤེགས་ཏེ། །བསོད་ནམས་ཞིང་དུ་བརྟན་པར་བཞུགས་སུ་གསོལ། །སྲིད་དང་ཞི་བའི་འཇིགས་པ་ཀུན་སེལ་ཞིང༌། །མཆོག་དང་ཐུན་མོང་དངོས་གྲུབ་མ་ལུས་སྩོལ། །གནས་སྐབས་མཐར་ཐུག་ཀུན་གྱི་སྐྱབས་གཅིག་པུ། །བླ་མ་འོད་དཔག་མེད་ལ་ཕྱག་འཚལ་ལོ། །བདག་ལུས་ལོངས་སྤྱོད་དགེ་བཅས་མཆོད་པར་འབུལ། །བསོད་ནམས་ཕུང་པོ་རྫོགས་ཕྱིར་བཞེས་སུ་གསོལ། །རྨོངས་པའི་བྲན་དུ་གྱུར་ཏེ་བཅས་རང་གི །ཉེས་ལྟུང་ཅི་བགྱིས་སྙིང་ནས་མཐོལ་ལོ་བཤགས། །ཨེ་མ་བདེ་ལེགས་འབྱུང་གནས་རང་གཞན་གྱི། །དགེ་ཚོགས་སྨན་གྱི་མྱུ་གུ་འཕེལ་གྱུར་ཅིག །སྐལ་བ་ཇི་བཞིན་ཆོས་ཀྱི་བདུད་རྩི་ཡིས། །སྲིད་ཞིའི་གདུང་བ་མ་ལུས་བསལ་དུ་གསོལ། །དུས་གསུམ་དགེ་ཚོགས་གཅིག་ཏུ་བསྡོམས་པའི་མཐུས། །རང་དང་དམིགས་ཡུལ་མཁའ་མཉམ་འགྲོ་བ་ཀུན། །མི་ཁོམ་སྐྱེ་བས་བར་དུ་མི་གཅོད་པར། །དལ་འབྱོར་རྟེན་བཟང་རྟག་ཏུ་ཐོབ་གྱུར་ཅིང༌། །ཐེག་མཆོག་བཤེས་དང་དགེ་བའི་གྲོགས་ཀྱིས་བསྐྱངས། །
ཚང་ལ་མ་ནོར་རྒྱལ་བའི་བསྟན་དང་མཇལ། །ལམ་གྱི་གཙོ་བོ་གསུམ་གྱིས་རྒྱུད་སྦྱངས་ཏེ། །བྱང་ཆུབ་གཞུང་ལམ་དྲང་པོར་བགྲོད་གྱུར་ཅིག །ཁྱད་པར་ཚེ་འདིའི་སྣང་བ་འགགས་པའི་ཚེ། །གནད་གཅོད་འཁྲུལ་སྣང་སྡུག་བསྔལ་མི་འབྱུང་ཞིང། །འོད་དཔག་མེད་མགོན་སྲས་དང་བཅས་པ་ཡིས། །དབུགས་དབྱུང་དགའ་དད་ངང་ནས་འཕོ་གྱུར་ཅིག །བདེ་བ་ཅན་དུ་པདྨོ་ལས་སྐྱེས་ནས། །སྣང་མཐའ་ཡས་པའི་ཞབས་པད་གུས་བསྟེན་ཅིང༌། །ཟབ་རྒྱས་གསུང་གི་བདུད་རྩིས་བསྐྱངས་པ་ཡིས། །ས་ལམ་བགྲོད་པ་མྱུར་དུ་མཐར་ཕྱིན་ཤོག །བླ་མ་ལྷ་ཡི་གོ་འཕང་མྱུར་ཐོབ་སྟེ། །ལྷུན་གྲུབ་འཕྲིན་ལས་གྲུ་གཟིངས་འབུམ་སྦྱར་ནས། །ནམ་མཁའི་མཐས་གཏུགས་མ་རྒན་འགྲོ་བ་རྣམས། །ཕྲ་རགས་སྲིད་པའི་མཚོ་ལས་སྒྲོལ་གྱུར་ཅིག །བསླུ་མེད་མཆོག་གསུམ་ཐུགས་རྗེ་རྒྱ་མཚོ་དང༌། །བདག་གིས་ཅི་བགྱིས་དགེ་ཚོགས་གངྒཱའི་ཀླུང༌། །རྙོག་བྲལ་ཆོས་ཀྱི་དབྱིངས་སུ་དབྱེར་མེད་པའི། །བདེན་མཐུས་སྨོན་པའི་དོན་ཀུན་འགྲུབ་གྱུར་ཅིག །ཅེས་པ་མཁྱེན་རབ་ཀྱི་དབང་ཕྱུག་བསྟན་པའི་གསལ་བྱེད་སྤྲུལ་བའི་སྐུ་དཀོན་མཆོག་དམ་ཆོས་ཡར་འཕེལ་ནས་སྨོན་ཚིག་འདི་ལྟ་བུ་ཞིག་དུས་ཚེས་འདིར་འབྲི་དགོས་ཞེས་སྔར་ནས་བསྐུལ་ཡོད་པའི་ཐོག །ཉིན་དེར་འོད་དཔག་མེད་ཀྱི་གོས་སྐུ་གསར་བཞེངས་ཀྱི་ཐིག་འདེབས་དུས་དང་འགྲིག་པས། ཐིག་འདེབས་ས་དེ་ཉིད་ནས་༸དཀོན་མཆོག་བསྟན་པའི་སྒྲོན་མེས་སུག་བྲིས་བགྱིས་པའོ། ། ༈ གང་གི་མཚན་ཙམ་རྣ་བར་ལྷུང་བས་ཀྱང༌། །ངན་སོང་སྐྱེ་བའི་རྒྱུན་ལམ་ཡོངས་གཅད་དེ། །ཐར་པའི་མཆོག་སྦྱིན་རྣམ་པར་སྣང་མཛད་དང༌། །དབྱེར་མེད་བླ་མའི་ཞབས་ལ་ཕྱག་
བགྱིད་དོ། །དེ་ཡི་རྒྱུད་དོན་འགྲེལ་བྱེད་ཊཱིཀ་ཆུང་ཞེས། །ཉུང་གསལ་ལེགས་བཤད་ནོར་བུའི་འཕྲེང་བ་འདི། །པར་དུ་བསྐྲུན་པའི་དགེ་བས་འགྲོ་བ་ཀུན། །མི་ཁོམ་ངན་སོང་གཡང་ལས་གྲོལ་གྱུར་ཅིག །རྟག་ཏུ་དལ་འབྱོར་ཚང་བའི་རྟེན་ཐོབ་ཅིང༌། །མཚན་ལྡན་བཤེས་གཉེན་དམ་པས་རྗེས་གཟུང་སྟེ། །ཐུན་མོང་ལམ་སྦྱངས་སྔགས་ཀྱི་སྒོར་ཞུགས་ནས། །རྒྱུད་དོན་ཇི་བཞིན་ཉམས་སུ་ལེན་པར་ཤོག །སྒོ་གསུ༷མ་བྱ་བར་བཅས་པའི་ལྕགས་ཀྱི་ཁམས། །ཕྱག་རྒྱ་རྣམ་བཞི༷འི་གསེར་འགྱུར་རྩིས་བྲན་ཏེ། །མངོན་བྱང་ལྔ༷་ཡིས་རྣམ་སྣང་སྐུ་ཐོབ་ནས། །མཁའ་མཉམ་འགྲོ་དྲུ༷ག་འདྲེན་པའི་དཔལ་གྱུར་ཅིག །ཅེས་པ་འདི་ནི་སྔ་སོར་སྐྱབས་མགོན་འཇིགས་མེད་དབང་པོའི་བཀས་ཊཱིཀ་ཆུང་འདི་ཉིད་དུས་འཁོར་གྲྭ་ཚང་གི་འཛིན་གྲྭ་གཤམ་མའི་འཛིན་ཆོས་སུ་གཏོང་བཞིན་པ་ཡིན་ཀྱང་བྲིས་ནོར་རྒྱུན་འབྱམས་ཀྱིས་ཡིད་བརྟན་ཤིན་ཏུ་དཀའ་བར་བརྟེན། །དཔོན་སློབ་ལས་ཐོག་པ་མཁས་བཙུན་བཟང་པོའི་བདག་ཉིད་ཞབས་དྲུང་འཇམ་དབྱངས་སྐལ་ལྡན་ནས་རྒྱུ་སྦྱར་ཏེ་ཐུགས་ཁུར་བཞེས་ཤིང༌། སྨྲ་བའི་དབང་ཕྱུག་རྡོ་རྗེ་འཛིན་པ་དཀོན་མཆོག་ཆོས་ལྡན་སོགས་ཀྱིས་ཞུས་དག་ལེགས་པར་བགྱིས་ཏེ་པར་དུ་བསྐྲུན་པའི་པར་བྱང་དུ། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ རླབས་ཆེན་ཐུགས་བསྐྱེད་ས་བོན་སྨིན་པ་ལས། །སྟོབས་བཅུའི་དཔལ་མངའ་གསེར་བཟང་པདྨ་སྟོང༌། །བསྐལ་བཟང་ཆུ་གཏེར་གཅིག་ཏུ་བཞད་པ་ཡི། །ཐུབ་དབང་སློབ་མར་བཅས་པ་རྣམས་ལ་འདུད། །གང་གིས་དང་པོར་བྱང་ཆུབ་ཐུགས་བསྐྱེད་དེ། །ཚོགས་གཉིས་མཐར་སོན་མངོན་པར་སངས་རྒྱས་ནས། །བགྲང་ཡས་གདུལ་བྱ་སྨིན་ཅིང་གྲོལ་མཛད་པའི། །སྤྱོད་ཚུལ་མ་སྨད་རྒྱུ་དང་འབྲས་བུར་བཅས། །རྒྱ་ཆེར་སྟོན་
པ་མདོ་སྡེ་བསྐལ་བཟང་ཞེས། །རྒྱལ་སྲས་བྱེ་བའི་འཇུག་ངོགས་ཟླ་མེད་འདི། །གསེར་སྦྱངས་དག་པའི་ཁམས་ལས་ལེགས་བྲིས་པའི། །རྣམ་དཀར་འདིས་མཚོན་དུས་གསུམ་དགེ་ཚོགས་མཐུས། །དེང་ནས་བཟུང་སྟེ་སྐྱེ་བའི་འཕྲེང་བ་རུ། །ཐེག་མཆོག་བཤེས་གཉེན་དམ་པས་རྗེས་གཟུང་སྟེ། །རླབས་ཆེན་ཚོགས་གཉིས་སྤྱོད་པ་མཐའ་དག་ལ། །རྒྱལ་བ་རྣམས་ཀྱི་རྗེས་སུ་སློབ་གྱུར་ཅིག །ཕན་བདེའི་འབྱུང་གནས་ཐུབ་བསྟན་རྒྱས་པ་དང༌། །འདྲེན་པ་མཆོག་རྣམས་ཞབས་པད་རྟག་བརྟན་ཅིང༌། །དགེ་འདུན་ཐུགས་མཐུན་བཤད་སྒྲུབ་འཕེལ་བ་ཡིས། །ལུས་ཅན་ཕན་བདེའི་དགའ་སྟོན་རྒྱས་གྱུར་ཅིག །ཁྱད་པར་སྒྲོན་མེའི་བསྐལ་པ་འདི་ཉིད་ལ། །རྒྱལ་བ་རྣམས་ཀྱིས་ཐུགས་རྗེས་ཡོངས་བཟུང་སྟེ། །ཕྲ་རགས་སྲིད་པའི་རྒྱ་མཚོ་ཉེར་བརྒལ་ནས། །བླ་མེད་གཏན་བདེའི་བཙན་ས་ཟིན་གྱུར་ཅིག །འབྲེལ་ཐོགས་སྐྱེ་བོའི་པུཎྜ་རཱི་ཀའི་ཚོགས། །རྒྱལ་བའི་ཉི་མ་སྟོང་གིས་ཡོངས་སྨིན་ཏེ། །ངེས་ལེགས་སྦྲང་རྩིའི་བཅུད་ཀྱིས་གཏམས་པ་ཡིས། །བདེ་ཆེན་རྐང་དྲུག་གླུ་དབྱངས་སྒྲོགས་གྱུར་ཅིག །ཅེས་པ་འདི་ནི་གཞུང་ལུགས་རྒྱ་མཚོའི་མངའ་བདག་དུས་འཁོར་སློབ་ཟུར་བློ་བཟང་འཇིགས་མེད་པས་མདོ་སྡེ་བསྐལ་བཟང་གསེར་ཞུན་གྱིས་བྲིས་ཏེ་དགེ་རྩ་རྫོགས་བྱང་དུ་བསྔོ་བའི་སྨོན་ཚིག་ཅིག་དགོས་ཚུལ་བྱུང་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ དགེ་འདིས་མཚོན་ནས་དུས་གསུམ་དང་འབྲེལ་བའི། །རྣམ་དཀར་ཇི་སྙེད་གཅིག་ཏུ་བསྡོམས་པའི་མཐུས། །ནམ་ཞིག་འདི་སྣང་འགག་པར་གྱུར་མ་ཐག །ཡིད་དགའ་ཆོས་འཛིན་གནས་སུ་སྐྱེ་བར་ཤོག །དེ་ནས་མ་ཕམ་རྒྱལ་བའི་དབང་པོ་ཡི། །
ཞལ་བཟང་མིག་གི་བདུད་རྩིར་རྟག་འགྲོགས་ཤིང༌། །འབྲལ་མེད་ཞབས་ཀྱི་པདྨོར་གུས་བཏུད་ནས། །ལེགས་གསུང་གདམས་པའི་དགའ་སྟོན་མྱོང་བར་ཤོག །ཟབ་ཅིང་རྒྱ་ཆེའི་ལམ་བཟང་མ་ལུས་པ། །ཇི་ལྟར་གདམས་བཞིན་ཉམས་སུ་བླངས་པ་ཡིས། །ས་དང་ལམ་གྱི་བགྲོད་པ་མཐར་ཕྱིན་ནས། །སྐུ་བཞིའི་གོ་འཕང་བདེ་བླག་ཐོབ་གྱུར་ཅིག །ཅེས་དགེ་རྩ་གང་བྱས་བྱམས་མགོན་གྱིས་རྗེས་སུ་འཛིན་པའི་རྒྱུར་བསྔོ་བའི་སྨོན་ཚིག་མདོར་བསྡུས་པ་འདིའང་སྐུལ་བ་པོའི་འདུན་པ་བཞིན། ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ ལྷན་སྐྱེས་བདེ་བ་མཆོག་གི་ཚོན་བརྒྱའི་མདངས། །ལུས་ཅན་བསོད་ནམས་ཀ་ཤིའི་རས་བཟང་ངོས། །སྐལ་བ་ཇི་བཞིན་འཕོས་པའི་འཁྲུངས་རབས་ཀྱི། །འཕྲེང་བ་ཚར་དུ་དངར་རྣམས་ཕྱག་གི་ཡུལ། །ཁྱད་པར་བློ་བཟང་རྒྱལ་བ་མ་ལུས་པའི། །ཞལ་སྐྱིན་ཟབ་རྒྱས་ཆོས་ཀྱི་འོད་སྟོང་གིས། །ཐར་ལམ་སྣང་བྱེད་འགྲོ་བའི་ཉི་མ་དེར། །དང་བའི་དངོས་པོ་ཀུན་གྱིས་ལན་བརྒྱར་འདུད། །ཐུགས་རྗེའི་བདག་ཉིད་རྗེ་བཙུན་བླ་མ་ཡིས། །སྐྱེ་ཞིང་སྐྱེ་བར་འབྲལ་མེད་རྗེས་འཛིན་ཞིང༌། །མཉེས་པ་གསུམ་གྱིས་མཉེས་པར་བསྒྲུབས་པ་ཡིས། །ཡང་དག་ལམ་གྱི་རྟོགས་པ་མཐར་ཕྱིན་ཤོག །ཅེས་པ་འདི་ནི་དད་བརྩོན་ལྡན་པ་གསོལ་དཔོན་བློ་གྲོས་དར་རྒྱས་ཀྱིས་བླ་མ་རྡོ་རྗེ་འཆང་ཆེན་པོའི་འཁྲུངས་རབས་ཞལ་ཐང་བྱིན་རླབས་ཀྱི་གཏེར་དུ་གྱུར་པ་གསར་བཞེངས་སྐབས་ཁ་བྱང་སྨོན་ཚིག་ཅིག་དགོས་ཚུལ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ དུས་གསུམ་བདེ་གཤེགས་སྲས་བཅས་སྐྱེད་པའི་ཡུམ། །འགྲོ་ཀུན་སྲིད་ཞིའི་འཇིགས་ལས་སྒྲོལ་བའི་གཉེན། །སྤྲོས་པའི་
མཐའ་བྲལ་བཅོམ་ལྡན་འདས་མ་ལ། །མི་ལྡོག་དང་བའི་ཡིད་ཀྱིས་ཕྱག་བགྱིད་དོ། །གང་གི་དོན་སྟོན་ཕ་རོལ་ཕྱིན་པའི་གཞུང༌། །གསེར་ཞུན་ཁུ་བས་ལེགས་བྲིས་དགེ་འདིས་མཚོན། །སྔོན་བསགས་ལེགས་བྱས་ཆུ་ཀླུང་མ་ལུས་པ། །བྱང་ཆུབ་མཆོག་གི་རྒྱ་མཚོར་གཞོལ་གྱུར་ཅིག །དེང་ནས་བརྩམས་ཏེ་སྐྱེ་ཞིང་སྐྱེ་བ་རུ། །དམ་ཆོས་ཚུལ་བཞིན་སྒྲུབ་པའི་རྟེན་རྙེད་ཅིང༌། །སྲིད་པའི་འབྱོར་པ་སྦྲུལ་གདུག་ལྟར་མཐོང་སྟེ། །རྣམ་དག་ཚངས་སྤྱོད་བརྟུལ་ཞུགས་འཛིན་པར་ཤོག །མཚན་ཉིད་ཀུན་ལྡན་ཐེག་མཆོག་དགེ་བའི་བཤེས། །བསམ་དང་སྦྱོར་བས་ཚུལ་བཞིན་སྟེན་བྱེད་ཅིང༌། །རྒྱལ་བའི་མདོ་སྔགས་ཆོས་ཚུལ་མ་ལུས་པ། །ཐོས་བསམ་སྒོམ་པས་ཉམས་སུ་ལེན་པར་ཤོག །ཁྱད་པར་ཤེར་ཕྱིན་དགོངས་དོན་ཆོས་འཕགས་ཀྱིས། །ཇི་ལྟར་གདམས་བཞིན་བདག་ལ་འདོམས་བྱེད་ཅིང༌། །བདག་ཀྱང་ལུས་དང་སྲོག་ལ་མི་ལྟ་བར། །རྟག་ཏུ་ངུ་བཞིན་དེ་ལ་སློབ་པར་ཤོག །ནམ་མཁའི་མཐས་གཏུགས་མར་གྱུར་འགྲོ་བ་ཀུན། །སྒྲོལ་ལ་ཞུམ་མེད་སྙིང་རྗེའི་གོ་བགོས་ཏེ། །ཕྱིན་དྲུག་བསྡུ་བཞིའི་ཉམས་ལེན་གྱིས་བསྡུས་པའི། །རྒྱལ་སྲས་སྤྱོད་པ་རྒྱ་མཚོར་སློབ་པར་ཤོག །དག་པའི་ཞིང་མཆོག་ཀུན་ཏུ་སྒྱུ་འཕྲུལ་གྱིས། །བགྲོད་དེ་མཐའ་ཡས་རྒྱལ་རྣམས་མཆོད་བྱེད་ཅིང༌། །ལས་ཉོན་སྡིག་ལྟུང་དྲི་མ་ཀུན་བྱང་ནས། །བྱང་ཆུབ་མཆོག་ཏུ་ལུང་བསྟན་ཐོབ་པར་ཤོག །བསོད་ནམས་ཡེ་ཤེས་ཚོགས་གཉིས་གཤོག་རླབས་ཀྱིས། །སྲིད་དང་ཞི་བའི་མཐའ་ལས་རབ་གྲོལ་ཏེ། །ཐེག་པ་མཆོག་གི་ལམ་ལྔ་རིམ་བགྲོད་ནས། །རྣམ་དག་ཆོས་སྐུའི་གླིང་དུ་སོན་པར་ཤོག །དེ་ནས་འོད་ཟེར་ཕྲེང་བ་རེ་རེས་ཀྱང༌། །
དག་དང་མ་དག་ཞིང་ཀུན་སྣང་བྱེད་ཅིང༌། །རིགས་དྲུག་སོ་སོའི་སྡུག་བསྔལ་ལས་གྲོལ་ཏེ། །རྒྱལ་བ་དགྱེས་པའི་ལམ་ལ་འགོད་པར་ཤོག །ཚུལ་དེར་བསམ་སྦྱོར་དངོས་པོ་ཅི་རིགས་ཀྱིས། །འབྲེལ་བ་ཐོགས་པའི་སྐྱེ་བོ་ཐམས་ཅད་ཀྱང། །གནས་སྐབས་ཚེ་རིང་ནད་མེད་ལོངས་སྤྱོད་འཕེལ། །མཐར་ཐུག་ས་ལམ་རྟོགས་པ་མྱུར་བགྲོད་ཤོག །མི་དགེའི་བཤེས་དང་སྡིག་པའི་གྲོགས་ལ་སོགས། །མཐའ་དག་བདུད་ཀྱི་གཡུལ་ངོ་ཕམ་བྱས་ཏེ། །འགྲོ་ཀུན་ཐེག་པ་མཆོག་ལ་གཞོལ་གྱུར་ནས། །རྒྱལ་བ་སྲས་བཅས་དགྱེས་པ་སྐྱེད་གྱུར་ཅིག །བསྟན་འཛིན་སྐྱེས་བུ་མཐའ་དག་ཞབས་བརྟན་ཅིང༌། །ཕན་བདེའི་འབྱུང་གནས་རྒྱལ་བསྟན་ཕྱོགས་བརྒྱར་སྤེལ། །འཇིག་རྟེན་ཀུན་ཏུ་ཆོས་འབྱོར་རྒྱས་གྱུར་ཏེ། །དོན་གཉིས་དགའ་སྟོན་ལྷུན་གྱིས་གྲུབ་པར་ཤོག །ནམ་ཡང་མི་བསླུ་མཆོག་གསུམ་ཐུགས་རྗེ་དང༌། །སྣང་སྟོང་ཟུང་འཇུག་ཆོས་དབྱིངས་བདེན་པའི་མཐུས། །བདག་གཞན་དགེ་བའི་འབྲས་བུ་མ་ལུས་པ། །དམ་པའི་དགོངས་པ་ཇི་བཞིན་སྒྲུབ་གྱུར་ཅིག །ཅེས་པ་འདི་ནི་བླ་བྲང་ཆེན་པོའི་མཛོད་པ་དར་ཧན་ཀུན་དགས་བརྒྱད་སྟོང་པའི་གླེགས་བམ་གསར་བསྐྲུན་གྱི་སྨོན་ཚིག་ཅིག་དགོས་ཚུལ་བྱུང་བ་ལྟར༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས། ། ༈ འདིས་མཚོན་རྣམ་དཀར་ས་བོན་ཅི་མཆིས་པ། །དགའ་ལྡན་ཆོས་ཀྱི་མདུན་ས་དེར་སྦྲུམ་ཞིང༌། །བྱམས་མགོན་གསུང་གི་བདུད་རྩིས་བྲན་པ་ལས། །ཐེག་མཆོག་རིགས་ཀྱི་མྱུ་གུ་སྨིན་པར་ཤོག །ཁྱད་པར་ཚེ་འདིའི་སྣང་བ་འགགས་གྱུར་ཏེ། །གཉེན་མེད་གྲོགས་མེད་བར་དོ་འཁྱམས་པའི་ཚེ། །ཁྱོད་གསུང་ཚངས་དབྱངས་སྙན་པོས་དབུགས་ཕྱུང་སྟེ། །ཡིད་
དགའ་ཆོས་འཛིན་གནས་དེར་དྲང་དུ་གསོལ། །དེ་ནས་ཁྱོད་ཀྱིས་ཇི་ལྟར་གདམས་པ་བཞིན། །སེམས་བསྐྱེད་རྩ་བརྟན་སྦྱོར་བཞིའི་ཡལ་འདབ་གཡོ། །མཁྱེན་གསུམ་འདབ་ཡངས་ཆོས་སྐུའི་ཟེའུ་འབྲུ་ཅན། །མངོན་པར་རྟོགས་པའི་རིམ་པ་མཐར་ཕྱིན་ཤོག །ཅེས་པ་འདི་ནི་སྤྲུལ་སྐུ་དགེ་འདུན་རྒྱ་མཚོས་བསྐུལ་ངོར༸བཙུན་པ་དཀོན་མཆོག་བསྟན་པའི་སྒྲོན་མེས་བྱམས་ཆེན་མཐོང་བ་དོན་ལྡན་གྱི་མདུན་དུ་སུག་བྲིས་སུ་བགྱིས་པའོ། །༈ མཆོག་ཏུ་མི་འགྱུར་བདེ་བའི་བདག་ཉིད་ལ། །སྟོང་གཟུགས་ཕྱག་རྒྱ་ཆེན་མོས་ཡང་དག་སྦྱོར། །དཔལ་ལྡན་དུས་ཀྱི་འཁོར་ལོ་ངུར་སྨྲིག་གི །གར་མཛད་འཇིགས་མེད་དབང་པོའི་ཞབས་ལ་འདུད། །དེ་ཡི་གསུང་གསང་བདུད་རྩིའི་གཟེགས་མ་ཡང༌། །སྐལ་བཟང་འཆི་མེད་ཉེར་འཚོའི་དགའ་སྟོན་དུ། །སྒྲུབ་སླད་པར་དུ་བསྐྲུན་པའི་ལེགས་བྱས་མཐུས། །ལམ་བཟང་འདི་ཡིས་འགྲོ་ཀུན་སྒྲོལ་གྱུར་ཅིག །ཅེས་པ་འདི་ནི་དད་བརྩོན་ལྡན་པ་རབ་འབྱམས་པ་དཀོན་མཆོག་འཕྲིན་ལས་ཀྱིས་སྐྱབས་མགོན་མཆོག་གི་གསུང་རྒྱུན་འཁྲུལ་མེད་གྲྭ་ཚང་གི་ཚོགས་འདོན་དུ་མཛད་པའི་ཞབས་འདེགས་སུ་པར་དུ་བསྒྲུབས་པའི་ཚེ་སྨོན་ཚིག་ཅིག་དགོས་ཚུལ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ དཔྱིད་དང་ཐིག་ལེ་མཉམ་སྦྱོར་བདེ་བ་ཆེར། །བརྟན་གཡོའི་དངོས་ཀུན་སྡུད་པ་ཧེ་རུ་ཀའི། །རྩེ་གཅིག་ཏིང་འཛིན་སྦྱོར་བ་ལ་ཞུགས་པས། །ཡབ་གཅིག་མི་བསྐྱོད་དགྱེས་བཞད་རྡོ་རྗེ་དྲན། །བསམ་ཞིང་བསམ་ཞིང་དད་པས་མཆི་མ་འཁྲུག །བསྒོམ་ཞིང་བསྒོམ་ཞིང་དྲན་པས་སྙིང་རྩ་འདར། །ཨ་ལ་ལ་རང་སེམས་བདག་ཉིད་བླ་མ་ལྷ། །ནམ་ཡང་འདུ་འབྲལ་
མེད་དེ་ཨེ་མ་ཧོ། །རྣལ་འབྱོར་མ་དཔལ་བྱེ་བ་ཨ་ར་ལིའི། །དབྱངས་ཀྱིས་ཚོགས་སུ་རོལ་བའི་གཙུག་གི་ནོར། །ཁྱབ་བདག་བཅོམ་ལྡན་དཔའ་བོའི་དབང་ཕྱུག་གིས། །དག་པའི་སྣང་བར་དབང་བཞིའི་ཆུ་རྒྱུན་སྩོལ། །དཔའ་བོ་གང་གིས་སྲས་སུ་བཟུང་བ་དེར། །ཞིང་སྔགས་ལྷན་ཅིག་སྐྱེས་པའི་མཁའ་འགྲོ་མ། །ཀུན་ཀྱང་མ་ལྟར་དངོས་གྲུབ་མཆོག་སྦྱིན་ཕྱིར། །བརྩེ་བས་གཟིགས་པ་མ་གཡེལ་རྗེས་འཛིན་མཛོད། །བདེ་ཆེན་རྒྱལ་པོ་བླ་མ་རྡོ་རྗེ་འཆང༌། །སྙིང་གི་ཆུ་སྐྱེས་ཟེའུ་འབྲུར་བཞུགས་པ་ཡིས། །ཀུན་ཏུ་རྟོག་པ་རྨོངས་པའི་དགྲ་བཅོམ་ནས། །སྤྲོས་ཀུན་འོད་གསལ་དབྱིངས་སུ་སྡུད་པར་མཛོད། །དེ་ཡི་སྒྱུ་འཕྲུལ་བདེ་བའི་རོལ་པ་ཆེས། །རྩ་ཁམས་ཕྱི་ནང་སྣོད་བཅུད་དངོས་པོ་ཀུན། །དག་པའི་འཁོར་ལོར་བསྡོམས་པའི་བཀོད་པ་ཡིས། །ས་གསུམ་ཁྱོན་ལ་ཅིག་ཅར་དབང་མཛོད་ཅིག །བསྒྱུར་རོ་བསྒྱུར་རོ་བདེ་ཆེན་ལྷ་ཡི་གར། །འཁྲོལ་ལོ་འཁྲོལ་ལོ་སྟོང་པའི་ཌཱ་མ་རུ། །བཏེག་གོ་ཟུང་འཇུག་ནམ་མཁའི་དབྱིངས་སུ་ཡ། །ཕེཾ་ཕེཾ་ས་གསུམ་སྤྱོད་པའི་མཁའ་འགྲོ་མ། །ཞེས་པ་འདི་ནི་ཁྱབ་བདག་རྡོ་རྗེ་འཆང་རྗེ་བཙུན་དཀོན་མཆོག་འཇིགས་མེད་དབང་པོའི་ཞལ་སྔ་ནས་ཉིད་ཞི་བའི་དབྱིངས་སུ་གཟིམས་པའི་ཚུལ་བསྟན་པའི་རྗེས་ཙམ་ལ་དཔལ་འཁོར་ལོ་སྡོམ་པའི་བསྙེན་མཚམས་ཤིག་ཏུ་གནས་པའི་ཚེ། ལྷའི་སྐུ་ལ་ཡིད་ཅི་ཙམ་གཏད་པ་བཞིན། བླ་མ་རྡོ་རྗེ་འཆང་གི་སྐུའི་རྣམ་པ་ཡིད་ངོར་ལམ་གྱིས་འཆར་བ་ཞིག་བྱུང་བའི་རྐྱེན་གྱིས། བླ་མ་ཡི་དམ་དབྱེར་མི་ཕྱེད་པའི་མོས་གུས་དང༌། སྐྱོ་ཤས་ཀྱིས་མཚམས་སྦྱར་ཏེ། འདིའི་ལམ་རིམ་གཉིས་སོགས་ཀྱི་བརྟན་པ་མ་ཐོབ་ཀྱང༌། ཅུང་ཟད་མོས་པའི་བག་ཆགས་བརྟས་པ་དཀོན་མཆོག་བསྟན་པའི་སྒྲོན་མེས་གང་དྲན་གླུར་བླངས་པའོ། ། ༈ བསླུ་མེད་དཀོན་མཆོག་རྣམ་གསུམ་
གཅིག་བསྡུས་ནས། །བཤད་སྒྲུབ་བསྟན་པའི་སྒྲོན་མེ་སྦར་བའི་ཕྱིར། །ཐེག་མཆོག་དགེ་བའི་བཤེས་ཀྱི་རྣམ་རོལ་པ། །བླ་མ་དྲིན་པོ་ཆེ་ལ་གསོལ་བ་འདེབས། །བདག་གིས་དུས་གསུམ་དགེ་ཚོགས་ཅི་བགྱིས་ཀུན། །མཆོག་གསུམ་ཐུགས་རྗེའི་རྒྱ་མཚོ་དང་འདྲེས་ཏེ། །རྣམ་དག་སྨོན་པའི་གནས་ཀུན་འགྲུབ་པའི་རྒྱུར། །བྱིན་གྱིས་རློབས་ཤིག་བླ་མ་ཐུགས་རྗེ་ཅན། །རྟེན་འདིར་ཕྱི་ནང་ཉེར་འཚེ་མི་འབྱུང་བར། །རྣམ་དག་དམ་ཆོས་སྒྲུབ་པ་མཐར་ཕྱིན་ཅིང༌། །གནད་གཅོད་སྡུག་བསྔལ་མེད་པར་འཕོ་བའི་ཚེ། །བླ་མ་ལྷ་ཡི་ཞལ་མཐོང་དབུགས་འབྱིན་ཤོག །དེ་ནས་བར་དོའི་འཁྲུལ་སྣང་མི་འབྱུང་ཞིང༌། །དག་པའི་ཞིང་ངམ་དལ་བའི་རྟེན་བཟང་མཆོག །བླངས་ཏེ་ཁྱོད་ཀྱིས་དགེ་བའི་བཤེས་མཛད་ནས། །འབྲལ་མེད་དགྱེས་བཞིན་རྗེས་སུ་འཛིན་པར་ཤོག །དེ་ཡིས་ཇི་ལྟར་རྗེས་སུ་གདམས་པ་བཞིན། །ཚང་ལ་མ་ནོར་བསྟན་པའི་སྒོར་ཞུགས་ཏེ། །དམ་ཚིག་སྡོམ་པ་མིག་འབྲས་ལྟར་བསྲུང་ཞིང༌། །རིམ་གཉིས་རྣལ་འབྱོར་གྲུ་གཟིངས་ལ་བརྟེན་ནས། །ཟུང་འཇུག་ནོར་བུའི་གླིང་དུ་ཕྱིན་གྱུར་ཅིག །མདོར་ན་མཆོག་གསུམ་ཡི་དམ་ཆོས་སྐྱོང་ཀུན། །གཅིག་ཏུ་བསྡུས་པ་བླ་མའི་ཐུགས་རྗེ་ཡིས། །གནས་སྐབས་མཐར་ཐུག་སྨོན་པའི་གནས་རྣམས་ཀུན། །གེགས་མེད་བདེ་བླག་ཉིད་དུ་འགྲུབ་གྱུར་ཅིག །ཅེས་པ་འདི་ནི་ལྷག་བསམ་དང་མཁྱེན་དཔྱོད་ཕུལ་དུ་ཕྱིན་པའི་རང་གི་སློབ་མ་ཨོར་ཏུ་སུའི་བླ་ཟུར་བློ་བཟང་ཡོན་ཏན་ནས་འདུན་པ་དྲག་པོས་བསྐུལ་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་སུག་བྲིས་སུ་བགྱིས་པའོ། ། ༈ མི་ཟད་བྱིན་རླབས་བདུད་རྩིའི་
ཆུ་རྒྱུན་གྱིས། །མི་དགེའི་ལས་ཀྱི་དྲི་མ་ཀུན་སྦྱོང་ཞིང༌། །མི་འགྱུར་བདེ་བ་མཆོག་ལ་སྦྱོར་མཛད་པ། །མི་འཁྲུགས་རྒྱལ་བའི་ཞབས་ལ་ཕྱག་འཚལ་ལོ། །ཐོག་མ་མེད་ནས་དུག་གསུམ་དབང་གྱུར་ཏེ། །སྒོ་གསུམ་ཉེས་པ་ཇི་སྙེད་བགྱིས་པ་དང༌། །ཁྱད་པར་སྡོམ་གསུམ་བཅས་མཚམས་ལས་འདས་པའི། །ཉེས་ལྟུང་མཐའ་དག་སྙིང་ནས་མཐོལ་བཤགས་ན། །བརྩེ་ལྡན་མི་འཁྲུགས་རྒྱལ་བའི་ཐུགས་རྗེ་དང༌། །ཉེས་ཀུན་དྲུངས་འབྱིན་སྤྲོས་བྲལ་དབྱིངས་ཀྱི་སྟོབས། །ཟུང་འཇུག་བདེན་པ་ཆེན་པོའི་བྱིན་རླབས་ཀྱིས། །ལྷག་མེད་བྱང་ཞིང་དག་པར་བྱིན་གྱིས་རློབས། །མི་ཤེས་དབང་གིས་བཅས་པའི་ཉེས་པ་དང༌། །ཉིན་རེ་བཞིན་དུ་མཆེད་པ་འཕེལ་ཁའི་འཕྲོ། །རྣམ་སྨིན་མི་ཟད་ལྟུང་བའི་ངོ་བོ་ཀུན། །ལྷག་མེད་བྱང་ཞིང་དག་པར་བྱིན་གྱིས་རློབས། །བླ་མ་རྡོ་རྗེ་སྤུན་དང་མཆོག་གསུམ་རྟེན། །ཕ་མ་ལ་སོགས་ཞིང་དང་བསམ་སྦྱོར་མཇུག །མཐུ་ཆེན་ཤུགས་དྲག་ཉེས་པ་གང་བགྱིས་རྣམས། །ལྷག་མེད་བྱང་ཞིང་དག་པར་བྱིན་གྱིས་རློབས། །དཀོན་མཆོག་གསུམ་གྱི་དཀོར་དང་ཁྱད་པར་དུ། །དགེ་འདུན་འདུ་སྒོ་གསོན་གཤིན་དད་ཟས་སོགས། །མེ་འདག་ལྟ་བུ་བག་མེད་སྤྱད་པ་ཀུན། །ལྷག་མེད་བྱང་ཞིང་དག་པར་བྱིན་གྱིས་རློབས། །དེང་ནས་སྐྱེ་ཞིང་སྐྱེ་བ་ཐམས་ཅད་དུ། །མི་བསྐྱོད་རྒྱལ་བས་དགྱེས་བཞིན་རྗེས་གཟུང་སྟེ། །ལས་དང་ཉོན་མོངས་གཡང་ས་ལས་བསྒྲལ་ནས། །ཡང་དག་ལམ་གྱི་སྲོལ་དུ་འཛུད་པར་ཤོག །ཁྱད་པར་ཚེ་འདིའི་སྣང་བ་འགགས་མ་ཐག །དགྱེས་པའི་ཞལ་བསྟན་གསུང་གིས་དབུགས་དབྱུང་སྟེ། །ཤར་ཕྱོགས་མངོན་པར་དགའ་བའི་ཞིང་ཁམས་སུ། །ཁྲིད་ཅིང་སྲས་ཀྱི་ཐུ་བོར་འགྱུར་
བར་ཤོག །མདོར་ན་རྟག་ཏུ་དལ་འབྱོར་རྟེན་ཐོབ་ཅིང༌། །དམ་པས་རྗེས་གཟུང་ཉེས་ལྟུང་རྒྱང་བསྲིངས་ཏེ། །ཚུལ་ཁྲིམས་ཕ་རོལ་ཕྱིན་པ་ཡོངས་རྫོགས་ནས། །མི་འཁྲུགས་མགོན་པོའི་གོ་འཕང་མྱུར་ཐོབ་ཤོག །ཅེས་པ་འདི་ནི་ཧལ་ཧ་ཐུ་ཤེ་ཡེ་གུང་གི་ཤོག་དད་བརྩོན་བློ་དང་ལྡན་པ་དགེ་སློང་ངག་དབང་ཚངས་དབྱངས་ཀྱིས་མི་འཁྲུགས་པའི་ཆོ་ག་ཆ་ལག་སྦྱིན་སྲེག་དང་བཅས་པ་ཞིག་དགོས་ཚུལ་བྱུང་ཡང༌། སྔར་གསོ་རིག་གཞན་ཕན་གླིང་དུ་འཛུག་རྒྱུར་དེའི་མངོན་དཀྱིལ་ཁྲུས་དབང་སྦྱིན་སྲེག་དང་བཅས་ཆ་ཚང་བ་ངེད་ཀྱིས་སྔར་ནས་བསྒྲིགས་ཡོད་པ་དེས་འཐུས་པར་སྣང་བས། དེའི་ཁ་སྐོང་གི་ཚུལ་དུ་སྐུལ་བ་པོའི་འདུན་པ་ལྟར་གྱི་འདོད་གསོལ་སྨོན་ཚིག་འདི་ནི། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ ན་མོ་གུ་རུ་ཤྲཱི་ཧེ་རུ་ཀཱ་ཡ། བརྟན་གཡོའི་དངོས་ཀུན་ལྷན་སྐྱེས་བདེ་བ་ཆེའི། །སྒྱུ་འཕྲུལ་དྲ་བར་སྡོམ་མཛད་ཧེ་རུ་ཀ །སྟོང་ཉིད་བྷ་ག་བཟང་མོ་རྡོ་རྗེ་ཡུམ། །མཉམ་སྦྱོར་བླ་མ་དང་པོའི་མགོན་དེས་སྐྱོངས། །ཟུང་འཇུག་སར་གཤེགས་གྲུབ་མཆོག་ཕམ་མཐིང་པ། །རགས་པའི་ཟ་མ་ཏོག་གི་བཀོད་པའི་ལུས། །དཔའ་བོ་རྣལ་འབྱོར་མར་བཅས་སྐུར་བཞེངས་ཏེ། །སྐྱེ་དགུའི་མགོན་པོར་སྒྱུ་མའི་གར་གྱིས་རྩེན། །འདི་ཉིད་མཐོང་ཐོས་དྲན་རེག་དགེ་བ་ཡིས། །ས་བོན་ཉུངས་འབྲུའི་ཚད་ཀྱང་བླ་མ་ལྷའི། །ཐུགས་རྗེས་ཡོངས་བཟུང་ཡལ་གའི་ཕྱོགས་རྫོགས་པ། །ས་གསུམ་ཁྱབ་པའི་བསོད་ནམས་དཔྱིད་དུ་འབར། །དེ་སླད་བདག་སོགས་མཁའ་མཉམ་འགྲོ་བ་ཀུན། །ཇི་སྲིད་བྱང་ཆུབ་རྡོ་རྗེའི་གནས་ཐོབ་པར། །ཐུགས་རྗེ་ཀྱོ་བས་ནམ་ཡང་མི་གཏོང་ཞིང༌། །མཆོག་ཐུན་དངོས་གྲུབ་བྱེ་བའི་དགའ་
སྟོན་སྩོལ། །ཁྱད་པར་མཐའ་བྲལ་ལྟ་བས་རྒྱས་བཏབ་པ། །ཟབ་གསང་རྡོ་རྗེ་ཐེག་པའི་ལམ་བགྲོད་ནས། །རིང་མིན་ཧེ་རུ་ཀ་ཡི་གནས་ཐོབ་སྟེ། །འགྲོ་ཀུན་བདེ་ཆེན་ས་ལ་འགོད་གྱུར་ཅིག །དེ་ཡང་རྟེན་མཆོག་འདི་ལ་ལོ་རྒྱུས་ཅི་རིགས་འདུག་ཀྱང་ཕམ་མཐིང་པ་རྒྱ་ནག་ཏུ་བྱོན་ཚུལ་རྗེའི་གསུང་དུའང་འབྱུང་བ་དང༌། དམ་པ་དུ་མའི་གསུང་གུང་བསྒྲིགས་པས་ལོ་རྒྱུས་ཡོངས་གྲགས་ལྟར་འཐད་དམ་སྙམ། དེ་ཉིད་སོར་བཞག་ལ་སྨོན་ཚིག་དང་བཅས་པ་འདི་ནི། ༸གུང་ཐང་པ་དཀོན་མཆོག་བསྟན་པའི་སྒྲོན་མེས་བདེ་མཆོག་རང་བྱོན་ཉིད་ཀྱི་མདུན་དུ་བྲིས་པའོ། ། ༈ མཆོག་གསུམ་ངོ་བོ་དྲིན་ཅན་བླ་མ༌ལ། །གསོལ་བ་འདེབས་སོ་འབྲལ་མེད་རྗེས་གཟུང་སྟེ། །ཕྱིན་ཅི་ལོག་གི་བློ་སྣ་ཀུན་འགག་ཅིང༌། །ཡང་དག་ལམ་བཟང་སྐྱེ་བར་བྱིན་གྱིས་རློབས། །བསླབ་པར་བྱ་བའི་རིམ་པ་མཐའ་ཡས་ཀྱང༌། །རྩ་བ་རང་རྒྱུད་འདུལ་བ་ཉིད་ཡིན་པས། །ལེགས་ཉེས་ཀུན་གྱི་བྱེད་པོ་རང་སེམས་འདི། །རྒྱུན་དུ་དྲན་ཤེས་སྲབ་ཀྱིས་ཁ་ལོ་བསྒྱུར། །ནམ་ཡང་དཀོན་མཆོག་གསུམ་ལ་བློ་ཕུགས་གཏོད། །བྱ་བ་ཐམས་ཅད་ལས་འབྲས་དཔང་པོར་ཞོག །ཁས་བླངས་བསླབ་ཁྲིམས་ཉམས་ལེན་མཐིལ་དུ་གྱིས། །ནམ་ཕུགས་མི་བསླུ་འདུན་མའི་ཡང་རྩེ་ཡིན། །ནངས་པར་ལྡང་བའི་དུས་ནས་ཀུན་སློང་བཅོས། །རྒྱུན་པར་སྒོ་གསུམ་ལས་ལ་བག་ཟོན་གྱིས། །ཉལ་ཁར་དགེ་སྡིག་ལྟུང་བའི་བསྔོ་བགྲང་བྱ། །ལྟུང་བར་ཞག་ཏུ་མི་འགྲོགས་གདམས་པའི་མཐིལ། །ནོར་རྫས་ཅི་ཙམ་འཁྱོར་ཡང་འཁྱེར་ས་མེད། །དགྲ་གཉེན་མང་ཡང་རང་ཉིད་གཅིག་པུར་འགྲོ། །གཏན་དུ་ཕན་པ་ཆོས་ལས་གཞན་མེད་པས། །སྦུན་པ་མ་འཕྱར་དགེ་ལ་
གཅིག་ཏུ་དྲིལ། །ངེས་འབྱུང་བྱང་སེམས་བཅོས་མ་ཚུན་ཆད་དང༌། །ལྟ་བའི་སྒྲ་སྤྱི་ཙམ་གྱིས་ཟིན་ནས་ཀྱང༌། །གསང་ཆེན་ལམ་ལ་བག་ཆགས་འཇོག་ནུས་ན། །ཡོངས་རྫོགས་རྒྱལ་བའི་བསྟན་དང་མཇལ་བ་ཡིན། །སྡིག་གྲོགས་སྤོང་ཞིང་ཆོས་མཐུན་གྲོགས་ལ་བརྟེན། །བྱ་བ་མི་མང་གང་བརྩམས་མཐའ་རུ་འདོན། །གཞུང་བཟང་བལྟ་ཞིང་ཤེས་ཚད་རྒྱུད་ལ་སྦྱོར། །འདི་ཡང་ལུགས་གཉིས་བྱ་བའི་སྡོམ་ཞིག་ཡིན། །ཉེར་མཁོའི་བསླབ་བྱ་རགས་བསྡུས་བསྙད་པ་འདིས། །དྲན་གསོ་བགྱིས་ཏེ་འཇམ་མགོན་བླ་མ་ཡི། །ཞལ་ཆེམས་བྱང་ཆུབ་ལམ་གྱི་རིམ་པ་ལ། །བརྟེན་ནས་དོན་གཉིས་དགའ་སྟོན་སྒྲུབ་པར་མཛོད། །ཅེས་པ་འདི་ནི༸བཙུན་པ་དཀོན་མཆོག་བསྟན་པའི་སྒྲོན་མེས། རང་གི་སློབ་མ་ཞབས་དྲུང་དཀོན་མཆོག་རྣམ་རྒྱལ་ལ་གདམས་པའོ། ། ༈ དགེ་འདིས་མཚོན་ནས་དུས་གསུམ་དང་འབྲེལ་བའི། །རྣམ་དཀར་ཇི་སྙེད་གཅིག་ཏུ་བསྡོམས་པའི་མཐུས། །ནམ་ཞིག་འདི་སྣང་འགག་པར་གྱུར་མ་ཐག །ཡིད་དགའ་ཆོས་འཛིན་གནས་སུ་སྐྱེ་བར་ཤོག །དེ་ནས་མི་ཕམ་རྒྱལ་བའི་དབང་པོ་ཡི། །ཞལ་བཟང་མིག་གི་བདུད་རྩིར་རྟག་འགྲོགས་ཤིང༌། །འབྲལ་མེད་ཞབས་ཀྱི་པདྨོར་གུས་བཏུད་ནས། །ལེགས་གསུང་གདམས་པའི་དགའ་སྟོན་མྱོང་བར་ཤོག །ཟབ་ཅིང་རྒྱ་ཆེའི་ལམ་བཟང་མ་ལུས་པ། །ཇི་ལྟར་གདམས་བཞིན་ཉམས་སུ་བླངས་པ་ཡིས། །ས་དང་ལམ་གྱི་བགྲོད་པ་མཐར་ཕྱིན་ནས། །སྐུ་བཞིའི་གོ་འཕང་བདེ་བླག་ཐོབ་གྱུར་ཅིག ། ཅེས་དགེ་རྩ་གང་བྱས་བྱམས་མགོན་གྱིས་རྗེས་སུ་འཛིན་པའི་
རྒྱུར་བསྔོ་བའི་སྨོན་ཚིག་མདོར་བསྡུས་པ་འདིའང་སྐུལ་བ་པོའི་འདུན་པ་བཞིན། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ སྨྲས་པ། བདག་གནས་སྲུང་བའི་རྭ་བར་ཚོགས་ཀྱི་གཞི། །སྔགས་རྒྱའི་དྲོད་གཤེར་གྱིས་སྨིན་རྟེན་བརྟེན་པའི། །དཔག་བསམ་ལྗོན་པ་དམིགས་མེད་བསུང་འཕྲོ་ཞིང༌། །ཕྱི་ནང་བཟླས་བརྗོད་འབྲས་བུའི་ཁུར་གྱིས་དུད། །རྒྱུད་སྡེ་གཉིས་པའི་གཙོར་གྱུར་འདི་ཡི་སྲོལ། །གསང་ཆེན་བསྟན་པ་རྫོགས་པའི་ཁུར་འཁྱེར་བ། །སྐྱབས་གཅིག་འཇིགས་མེད་དབང་པོས་ཕྱེ་བའི་ཚུལ། །བསམ་གྱིན་གཟུར་གནས་དད་པས་མཆི་མ་འཁྲུགས། །མགོན་དེའི་བཀའ་དྲིན་ཕུང་པོ་བསབ་པའི་ཕྱིར། །ཚུལ་འདིར་འབད་པ་ལྷུར་ལེན་སྐྱེ་བོ་རྣམས། །རྣལ་འབྱོར་བཞི་ཡི་གྲུ་གཟིངས་ལ་བརྟེན་ནས། །དག་པའི་སྐུ་གཉིས་ནོར་བུའི་དཔལ་ཐོབ་ཤོག །ཅེས་པ་འདི་ནི་རབ་འབྱམས་པ་དཀོན་མཆོག་བརྩོན་འགྲུས་ཀྱིས་གང་ཅིའི་མཐུན་རྐྱེན་སྦྱར་ཏེ་རྣམ་སྣང་མངོན་བྱང་གི་ཆོ་ག་པར་དུ་བསྒྲུབས་པའི་ཚེ། པར་བྱང་སྨོན་ཚིག་ཅིག་དགོས་ཚུལ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའོ། ། ༈ རྒྱལ་ཀུན་མཁྱེན་པའི་ཡེ་ཤེས་འཛམ་བུའི་འབྲས། །བརྩེ་ཆེན་མ་དྲོས་ཀློང་དུ་རོལ་པ་ལས། །གསེར་མདོག་ལང་ཚོའི་དཔལ་འབར་གཟུགས་ཀྱི་སྐུ། །འཇམ་མགོན་བླ་མའི་ཞབས་ལ་གསོལ་བ་འདེབས། །འཇམ་དབྱངས་དགྱེས་དགུར་བཞད་པའི་གཟི་བྱིན་གྱིས། །དཔལ་ལྡན་འཇིགས་མེད་མཁས་དང་གྲུབ་པའི་ཚོགས། །ཀུན་གྱི་དབང་པོར་མངའ་གསོལ་དྲིན་ཅན་རྗེ། །བྱང་ཆུབ་བར་དུ་འབྲལ་མེད་གཙུག་ན་མཛེས། །ཁྱོད་གསུང་ནོར་བུའི་ཅོད་པན་
ལེགས་བཅིངས་ཏེ། །འཇམ་མགོན་གསུང་གསང་བདུད་རྩིའི་གཟེགས་མ་བརྒྱ། །ཅིག་ཅར་འགྱེད་པའི་ཐབས་ཀྱི་འོད་དཀར་ཅན། །ལེགས་སྨོན་ཟུར་ཕུད་རྩེ་མོར་འགྲོགས་གྱུར་ཅིག །བསླུ་མེད་སྐྱབས་ཀྱི་མཆོག་གྱུར་རིན་ཆེན་གསུམ། །དངོས་བརྒྱུད་བླ་མ་ཡི་དམ་ལྷ་ཚོགས་དང༌། །ཁྱད་པར་འདྲེན་མཆོག་ཡབ་སྲས་བརྒྱུད་པར་བཅས། །ཡེ་ཤེས་མགོན་པོ་ཆོས་རྒྱལ་ཕྱི་ནང་གསང༌། །དཔལ་ལྡན་ལྷ་མོ་རྣམ་མང་ཐོས་སྲས་དང༌། །རྡོ་རྗེ་དྲེགས་ལྡན་ལ་སོགས་སྲུང་མས་ཀྱང༌། །ཇི་ལྟར་སྨོན་པའི་འདོད་དོན་མ་ལུས་པ། །གེགས་མེད་ལྷུན་གྱིས་གྲུབ་པའི་གྲོགས་མཛོད་ཅིག །དེ་ཡི་མཐུ་ལས་སྐྱེ་ཞིང་སྐྱེ་བ་རུ། །འཁྲུལ་བྲལ་འཇམ་མགོན་བླ་མའི་རང་ལུགས་ལ། །གཞན་དྲིང་མི་འཇོག་ངེས་པ་རྙེད་གྱུར་ཏེ། །ཐོས་བསམ་སྒོམ་པས་ཚུལ་བཞིན་སློབ་པར་ཤོག །མདོར་ན་རྗེ་བཙུན་བླ་མ་ཡབ་སྲས་ཀྱིས། །དགྱེས་བཞིན་རྗེས་གཟུང་གསུང་གི་བདུད་རྩི་ལ། །ལོངས་སུ་སྤྱད་དེ་ས་ལམ་རིམ་བགྲོད་ནས། །ཀུན་མཁྱེན་རྒྱལ་བའི་གོ་འཕང་མྱུར་ཐོབ་ཤོག །ཅེས་པ་འདི་ནི་མོང་གོལ་ཇིན་ཤོག་ནས་དད་བརྩོན་རྣམ་དཔྱོད་དང་ལྡན་པ་ཐོ་ཡོན་ངག་དབང་རིན་ཆེན་གྱིས་སྐྱབས་མགོན་རྡོ་རྗེ་འཆང་དེ་ཉིད་ཀྱི་བཀའ་ལུང་སྤྱི་བོར་བཅིངས་ཏེ་འཇམ་མགོན་ཙོང་ཁ་པ་ཆེན་པོའི་གསུང་འབུམ་པར་དུ་བརྐོ་བའི་འདུན་པ་ཤུགས་དྲག་ཡོད་པའི་སྐབས་དེ་ཉིད་གེགས་མེད་འགྲུབ་ཅིང་ཚེ་རབས་ཐམས་ཅད་དུ་འཇམ་མགོན་བླ་མ་ཡབ་སྲས་ཀྱིས་རྗེས་སུ་འཛིན་པའི་སྨོན་ཚིག་དགོས་ཚུལ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ བློ༷་བཟ༷ང་རྒྱལ་བའི་རིང་ལུགས་དྲི་མ་མེད། །ཚེ༷་གཅིག་འཚང་
རྒྱ་མདོ་སྔགས་ཟུང་འབྲེལ་ལམ། །འཕེ༷ལ་ཕྱིར་བཤད་སྒྲུབ་ལས་ལ་གཞོལ་བ་ཡི། །བཤེས་གཉེན་ངེས་པ་དོན་གྱི་བསྟན་འཛིན་མཆོག །གང་གི་ཆོས་ཀུན་སྙིང་པོ་ལམ་རིམ་གཞུང༌། །དཔྱད་གསུམ་དག་པའི་མདོ་དང་སྦྱར་བ་ཡི། །མཚམས་སྦྱོར་དོན་གྱི་འབྲེལ་ཟབ་རྒྱ་ཆེ་ཞིང༌། །རྩ་ཚིག་ཉུང་ངུའི་ཚུལ་གྱིས་གཟུང་སླ་བ། །མདོ་བཏུས་གཉིས་པ་ལྟ་བུའི་ལེགས་བཤད་འདི། །གཟུར་གནས་ཐར་འདོད་ཡོངས་ཀྱི་འཇུག་ངོགས་ཏེ། །སྙིགས་དུས་ཆེན་པོའི་དབང་དང་རྟོག་གེ་ཡིས། །བློས་བྱས་མུ་ཅོར་གཏམ་གྱིས་དོ་ཟླ་མིན། །དེ་ཕྱིར་རྒྱལ་ཀུན་ཡེ༷་ཤེ༷ས་གཅིག་བསྡུས་པ། །འཇམ་དཔལ་སྙིང་པོའི་ཞལ་ལུང་དགོངས་འགྲེལ་གྱི། །པར་འདི་དད་ལྡན་སློབ་མའི་ཚོགས་རྣམས་ཀྱི། །ལྷག་བསམ་རྒྱུ་སྦྱོར་བརྩོན་པའི་མཐུ་ལ༷ས་གྲུ༷བ། །དགེ་བས་འཁྲུལ་བྲལ་འཇམ་དཔལ་སྙིང་པོའི་བསྟན། །ཕྱོགས་དུས་ཀུན་ཏུ་དར་ཞིང་རྒྱས་པ་དང༌། །འབྲེལ་ཐོགས་ཀུན་ཀྱང་ལམ་བཟང་འདི་ཉིད་དང༌། །མི་འབྲལ་ཐོས་བསམ་སྒོམ་པ་མཐར་ཕྱིན་ཤོག །ཅེས་མཁས་བཙུན་བཟང་པོའི་ཡོན་ཏན་གྱི་གཏེར་མཛོད་ངེས་དོན་གྱི་བཤེས་གཉེན་དམ་པ་དཀའ་བཅུ་སྨྲ་བ་བློ་བཟང་ཚེ་འཕེལ་བས་མཛད་པའི་བྱིན་རླབས་སྤུངས་ཞུས་ཀྱི་འགྲེལ་པ་འདི་ཉིད་མོང་གོལ་ཅི་ན་ཚོགས་ཆེན་དགེ་བསྐོས་ཆོས་རྗེ་ཡེ་ཤེས་ལས་གྲུབ་ཀྱིས་རྒྱུ་སྦྱར་ཏེ་པར་དུ་བསྐྲུན་པའི་ཚེ་པར་བྱང་སྨོན་ཚིག་ཅིག་དགོས་ཚུལ་བྱུང་བ་ལྟར། བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ ཨོཾ་ཨཱཿ ཝཱ་གིནྡྲ་བཱིརྻྻ་སིདྡྷི་ཧཱུཾ་ཧཱུཾ། ཨོཾཨཱཿ རཏྣ་ཨ་བྷྱེནྡྲ་སིདྡྷི་ཧཱུཾ་ཧཱུཾ། ཨོཾ་ཨཱཿ སུ་དྷཱི་མུ་ནེ་ཤིཥྚཱ་བྷྱ་སཱ་ར་སིདྡྷི་ཧཱུཾ་ཧཱུཾ། ཨོཾ་ཨཱཿ རཏྣ་ཤཱ་ས་ན་དཱི་པཾ་སིདྡྷི་ཧཱུཾ་ཧཱུཾ། དངོས་བརྒྱུད་བླ་མ་རྣམས་ཀྱི་ཐུགས་བསྐྱེད་དང༌། །བདེན་མཐུས་འདྲེན་པ་
མཆོག་རྣམས་ཞབས་བརྟན་ཅིང༌། །དགེ་འདུན་ཐུགས་མཐུན་ཁྲིམས་གཙང་བཤད་སྒྲུབ་རྒྱས། །ལུང་རྟོགས་བསྟན་པ་དར་བར་བྱིན་གྱིས་རློབས། །༈ ཡི་དམ་རྒྱལ་བ་རྒྱ་མཚོའི་ཐུགས་རྗེའི་མཐུས། །སྡིག་ལྟུང་དམ་ཚིག་ཉམས་ཆག་ཀུན་བྱང་ཞིང༌། །མཆོག་དང་ཐུན་མོང་དངོས་གྲུབ་དགའ་སྟོན་ལ། །འདོད་དགུར་ལོངས་སུ་སྤྱོད་པར་བྱིན་གྱིས་རློབས། །དམ་ཅན་ཆོས་སྲུང་རྒྱ་མཚོའི་ཚོགས་རྣམས་ཀྱིས། །རྡོ་རྗེའི་གཡར་དམ་གཉན་པོ་ཉེར་དགོངས་ཏེ། །དམ་ཆོས་སྒྲུབ་པའི་འགལ་རྐྱེན་ཀུན་ཞི་ཞིང། །སྲུང་སྐྱོབ་གཡེལ་བ་མེད་པའི་སྡོངས་གྲོགས་མཛོད། །༈ འདོད་དགུའི་དཔལ་སྟེར་ནོར་ལྷའི་ཚོགས་རྣམས་དང༌། །ལྷ་དང་དྲང་སྲོང་བདེན་ཚིག་གྲུབ་པའི་མཐུས། །ལོག་འཚོ་དང་བྲལ་ཆོས་མཐུན་འབྱོར་བ་སོགས། །བསམ་དོན་ལྷུན་གྱིས་གྲུབ་པའི་དགེ་ལེགས་སྩོལ། ། ༈ རྗེ་བཙུན་འཕགས་མ་སྒྲོལ་མ་ལ་ཕྱག་འཚལ་ལོ། །སྒྲོལ་དཀར་ཡིད་བཞིན་འཁོར་ལོ་ལ་ཕྱག་འཚལ་ལོ། །འཕགས་མ་ཡིད་བཞིན་ནོར་བུ་ལ་ཕྱག་འཚལ་ལོ། །དགོས་འདོད་ཀུན་འབྱུང་མ་ལ་ཕྱག་འཚལ་ལོ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །རྒྱལ་ཀུན་སྐྱེད་མཛད་མ་ལ་ཕྱག་འཚལ་ལོ། །འཁོར་བ་ལས་སྒྲོལ་མ་ལ་ཕྱག་འཚལ་ལོ། །ལྷག་པའི་ལྷ་མཆོག་མ་ལ་ཕྱག་འཚལ་ལོ། །ནད་རིམས་ཀུན་སེལ་མ་ལ་ཕྱག་འཚལ་ལོ། །འཇིགས་པ་བརྒྱད་སྐྱོབ་མ་ལ་ཕྱག་འཚལ་ལོ། །འཆི་མེད་དཔལ་སྟེར་མ་ལ་ཕྱག་འཚལ་ལོ། །ཚེ་ཡི་མཆོག་སྦྱིན་མ་ལ་ཕྱག་འཚལ་ལོ། །ཡེ་ཤེས་རྒྱས་མཛད་མ་ལ་ཕྱག་འཚལ་ལོ། །
རབ་མཛེས་ཡིད་འཕྲོག་མ་ལ་ཕྱག་འཚལ་ལོ། །གསུང་སྙན་དབུགས་འབྱིན་མ་ལ་ཕྱག་འཚལ་ལོ། །མཁྱེན་བརྩེའི་དབང་ཕྱུག་མ་ལ་ཕྱག་འཚལ་ལོ། །རབ་འབྱམས་འཕྲིན་ལས་ལྷ་མོར་ཕྱག་འཚལ་ལོ། །བྱིན་རླབས་གཏེར་ཆེན་མ་ལ་ཕྱག་འཚལ་ལོ། །ཐུགས་རྗེས་གཟིགས་ནས་བྱིན་གྱིས་བརླབ་ཏུ་གསོལ། །ལས་ཉོན་སྡིག་སྒྲིབ་ཞི་བར་བྱིན་གྱིས་བརླབ་ཏུ་གསོལ། །ནད་གདོན་བར་ཆད་སེལ་བར་བྱིན་གྱིས་བརླབ་ཏུ་གསོལ། །འཆི་བདག་གཡུལ་ལས་རྒྱལ་བར་བྱིན་གྱིས་བརླབ་ཏུ་གསོལ། །ཚེ་དང་བསོད་ནམས་རྒྱས་པར་བྱིན་གྱིས་བརླབ་ཏུ་གསོལ། །བློ་ཁ་ཆོས་ལ་ཕྱོགས་པར་བྱིན་གྱིས་བརླབ་ཏུ་གསོལ། །ལུང་རྟོགས་ཡོན་ཏན་འཕེལ་བར་བྱིན་གྱིས་བརླབ་ཏུ་གསོལ། །གཞན་ཕན་འཕྲིན་ལས་རྒྱས་པར་བྱིན་གྱིས་བརླབ་ཏུ་གསོལ། །སྐྱེ་འགྲོ་དབང་དུ་འདུ་བར་བྱིན་གྱིས་བརླབ་ཏུ་གསོལ། །བསྟན་དགྲ་རྩད་ནས་ཆོད་པར་བྱིན་གྱིས་བརླབ་ཏུ་གསོལ། །བསྟན་འཛིན་སྐུ་ཚེ་བརྟན་པར་བྱིན་གྱིས་བརླབ་ཏུ་གསོལ། །སྦྱིན་བདག་མངའ་ཐང་དར་བར་བྱིན་གྱིས་བརླབ་ཏུ་གསོལ། །ནད་མུག་འཁྲུག་རྩོད་ཞི་བར་བྱིན་གྱིས་བརླབ་ཏུ་གསོལ། །ཡུལ་ཁམས་བདེ་སྐྱིད་རྒྱས་པར་བྱིན་གྱིས་བརླབ་ཏུ་གསོལ། །ཐམས་ཅད་དགེ་ལ་གཞོལ་བར་བྱིན་གྱིས་བརླབ་ཏུ་གསོལ། །རྣམ་དཀར་ལམ་དུ་འགྲོ་བར་བྱིན་གྱིས་བརླབ་ཏུ་གསོལ། །དོན་གཉིས་ལྷུན་གྱིས་གྲུབ་པར་བྱིན་གྱིས་བརླབ་ཏུ་གསོལ། །ཞེས་པ་འདི་ནི་དད་ལྡན་དགེ་སློང་དཀོན་མཆོག་རབ་རྒྱས་ཀྱིས་བསྐུལ་ངོར། སྐབས་འགར་བློ་འཁུལ་བ་ལ་འདི་འདྲས་ཕན་ཡང་སྲིད་སྙམ། ༸བཙུན་པ་དཀོན་མཆོག་བསྟན་པའི་སྒྲོན་མེས་ཐོལ་བྱུང་དུ་
སྨྲས་པའི་ཡི་གེ་པ་སྔགས་རམས་པ་དཀོན་མཆོག་ཀུན་དགའོ། ། ༈ བརྒྱད་བཞིའི་མཚན་མཆོག་ཚངས་དབྱངས་ཀྱིས་གསུངས་པའི། །བརྒྱད་ཁྲི་བཞི་སྟོང་ཆོས་ཕུང་ཀུན་གྱི་མཆོག །བརྒྱད་སྟོང་གཞུང་གི་སྦས་དོན་མངོན་པར་རྟོགས། །བརྒྱད་ཀྱི་རིམ་པས་ས་ལམ་མཐར་ཕྱིན་ཤོག །ཅེས་པ་འདི་ནི་བརྒྱད་སྟོང་པའི་གདོང་ཡིག་ཏུ་སྩལ་བའོ། ། ༈ ཟབ་མོ་རྟེན་འབྱུང་གཏམ་གྱི་འོད་སྟོང་གིས། །སྲིད་ཞིའི་རྒུད་པའི་མུན་པ་མཐར་བྱེད་ཅིང༌། །ངེས་ལེགས་སྦྲང་རྩིའི་དགའ་སྟོན་རྒྱས་མཛད་པ། །ཐུབ་དབང་སྨྲ་བའི་ཉི་མ་དེར་ཕྱག་འཚལ། །གང་གི་མགུར་ནས་དྲུག་ཅུའི་ཚངས་དབྱངས་ཀྱིས། །ལེགས་གསུངས་ཆོས་ཕུང་བརྒྱད་ཁྲིའི་སྙིང་པོ་འདི། །འཛིན་ཅིང་སྤེལ་མཛད་རྒྱལ་སྲས་སློབ་མར་བཅས། །འཕགས་བོད་མཁས་གྲུབ་བྱེ་བའི་ཚོགས་ལ་འདུད། །ཁྱད་པར་ཟབ་མོ་ལྟ་བའི་མཚོན་རྣོན་གདེངས། །བདེ་ཆེན་གསང་བ་སྔགས་ཀྱི་གོ་བགོས་ཏེ། །ཉོན་མོངས་དགྲ་སྡེ་འཇོམས་མཛད་ཙོང་ཁ་པ། །ཡབ་སྲས་བརྒྱུད་པར་བཅས་ལ་སྙིང་ནས་འདུད། །ས་གསུ༷མ་འགྲོ་བའི་མུན་སེལ་སྒྲོན་མེ་མཆོག །ཐེག་གསུ༷མ་ཐར་འདོད་ཡོངས་ཀྱི་བགྲོད་གཅིག་ལམ། །དུས་གསུ༷མ་རྒྱལ་བའི་གསུང་གི་གསང་མཛོད་འདིར། །སྒོ་གསུ༷མ་དད་པས་འཇུག་ཅིང་བསླབ་པར་འོས། །དེ་ཕྱིར་རྒྱལ་བའི་བསྟན་ལ་རབ་ཞུགས་ཏེ། །རྣམ་གྲོལ་དོན་གཉེར་བློ་བཟང་ཡོན་ཏན་གྱིས། །ཤེར་ཕྱིན་སྟོང་ཕྲག་བརྒྱད་པའི་གླེགས་བམ་འདི། །རྣམ་དག་བསམ་དང་སྦྱོར་བས་ཚུལ་བཞིན་བསྒྲུབས། །འདིས་མཚོན་
སྡོམ་གསུམ་བཅས་མཚམས་ལ་གནས་ཤིང༌། །མདོ་སྔགས་བསྟན་ལ་ཐོས་བསམ་སྒོམ་པས་ཞུགས། །མཆོག་གསུམ་རྟེན་བཞེངས་རྣམ་དཀར་མཆོད་སྦྱིན་སོགས། །དུས་གསུམ་དགེ་བའི་དངོས་པོ་ཅི་བགྱིས་པ། །བསྡོམས་ནས་རྒྱལ་བ་སྲས་དང་བཅས་པ་ཡི། །ཐུགས་བསྐྱེད་ཟག་མེད་དགེ་ཚོགས་རྒྱ་མཚོ་དང༌། །གཅིག་ཏུ་འདྲེས་ཏེ་བདག་སོགས་འགྲོ་ཀུན་གྱིས། །བླ་མེད་བྱང་ཆུབ་འཐོབ་པའི་རྒྱུར་གྱུར་ཅིག །གནས་སྐབས་དལ་བའི་རྟེན་བཟང་རྣམ་སྨིན་གྱི། །ཡོན་ཏན་བརྒྱད་ལྡན་བར་མ་ཆད་དུ་ཐོབ། །བཤེས་གཉེན་དམ་པས་འབྲལ་མེད་རྗེས་འཛིན་ཅིང༌། །བསམ་དང་སྦྱོར་བས་ཚུལ་བཞིན་བསྟེན་གྱུར་ཅིག །དེ་ཡིས་གདམས་ཤིང་རྗེས་སུ་བསྟན་པ་ཡིས། །སྲིད་ལས་ངེས་པར་འབྱུང་བའི་སྐྱོ་ཤས་ཀྱིས། །གཞོན་ནུ་ཉིད་ནས་བསྟན་ལ་རབ་བྱུང་སྟེ། །བསླབ་ཁྲིམས་མིག་འབྲས་བཞིན་དུ་བསྲུང་གྱུར་ཅིག །རང་ཉིད་ཇི་བཞིན་དྲིན་ཅན་མ་རྣམས་ཀྱང༌། །སྲིད་མཚོར་ལྷུང་ལ་བཟོད་མེད་སྙིང་རྗེ་ཡིས། །ལྷག་བསམ་བྱང་ཆུབ་སེམས་ཀྱི་གོ་བགོས་ཏེ། །རླབས་ཆེན་རྒྱལ་སྲས་སྤྱོད་ལ་སློབ་གྱུར་ཅིག །ཁྱད་པར་ཤེར་ཕྱིན་ཟབ་མོའི་དགོངས་པའི་དོན། །འཇམ་མགོན་རྒྱལ་བ་གཉིས་པའི་ཐུགས་ཀྱི་བཅུད། །མཐར་འཛིན་ནད་བརྒྱ་སེལ་བའི་སྨན་གཅིག་པུ། །ཟབ་མོ་རྟེན་འབྱུང་ཇི་བཞིན་རྟོགས་གྱུར་ཅིག །དེ་ནས་བྱང་ཆུབ་རྡོ་རྗེ་བླ་མ་ལྷས། །དཀྱིལ་འཁོར་མཆོག་ཏུ་དབང་གིས་སྨིན་བྱས་ཏེ། །དམ་ཚིག་སྡོམ་པ་རྣམ་པར་དག་པ་ཡིས། །དངོས་གྲུབ་གཉིས་ཀྱི་སྒོ་བརྒྱ་འབྱེད་གྱུར་ཅིག །རྡོ་རྗེ་འཆང་ཆེན་གངས་ཀྱི་རི་བོ་ལས། །འོངས་པའི་རྒྱུད་སྡེ་རྣམ་བཞིའི་ཆུ་ཀླུང་ཀུན། །ཉམས་མྱོང་རྒྱ་མཚོར་གཅིག་ཏུ་འཁྱིལ་བ་
ཡི། །ཡང་དག་སྒྲུབ་ལ་རྩེ་གཅིག་གཞོལ་གྱུར་ཅིག །ཀུན་རྫོབ་བསྐྱེད་རིམ་ཕྲ་རགས་རྣལ་འབྱོར་གྱིས། །ཐ་མལ་སྐྱེ་ཤི་བར་དོ་གསུམ་སྦྱོང་ཞིང༌། །རླུང་སེམས་དབུ་མར་ཞུགས་པས་སྒྱུ་འོད་གཉིས། །ཟུང་འཇུག་དོན་དམ་རྫོགས་རིམ་མཐར་ཕྱིན་ཤོག །མདོར་ན་བཤེས་གཉེན་དེད་དཔོན་གྱིས་དྲངས་ཤིང༌། །མདོ་སྔགས་ལམ་གྱི་གྲུ་གཟིངས་ལེགས་བཟུང་སྟེ། །ཕྲ་རགས་འཁོར་བའི་རྒྱ་མཚོ་མྱུར་བརྒལ་ནས། །སྐུ་གསུམ་ནོར་བུའི་གླིང་དུ་ཕྱིན་གྱུར་ཅིག །དགེ་ལྡན་བསྟན་དང་བསྟན་འཛིན་འཕེལ་ཞིང་རྒྱས། །མི་ཡི་དབང་ཕྱུག་ཆབ་སྲིད་མངའ་ཐང་དར། །འགྲོ་ཀུན་དགེ་བཅུའི་དཔལ་ལ་སྤྱོད་པ་ཡིས། །རྫོགས་ལྡན་གསར་པའི་དགའ་སྟོན་རྒྱས་གྱུར་ཅིག །བླ་མ་མཆོག་གསུམ་ཐུགས་རྗེ་བྱིན་རླབས་དང༌། །སྲུང་མའི་ནུས་མཐུ་བདག་ཅག་མོས་པའི་སྟོབས། །ཟབ་མོ་རྟེན་འབྱུང་ཆོས་དབྱིངས་བདེན་པ་ཀུན། །ཚོགས་པས་སྨོན་པ་ཇི་བཞིན་འགྲུབ་གྱུར་ཅིག །ཅེས་པ་འདི་ནི་མཁས་བཙུན་བཟང་པོའི་བདག་ཉིད་ཨོར་དུ་སུའི་སྨན་པ་བླ་ཟུར་བློ་བཟང་ཡོན་ཏན་གྱིས་ཤེར་ཕྱིན་སྟོང་ཕྲག་བརྒྱད་པའི་གླེགས་བམ་ངོ་མཚར་རྨད་དུ་བྱུང་བ་གསར་བསྐྲུན་བགྱིས་ཏེ་ངེད་ལ་ཆེད་གཏད་ཀྱིས་བྱིན་ནས་དེས་མཚོན་པའི་དགེ་རྩ་རྣམས་ཁ་བསྒྱུར་བའི་སྨོན་ཚིག་ཅིག་དགོས་ཚུལ་བྱུང་བ་ལྟར། ྋབཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགས་བགྱིས་པའོ། །༈ རྒྱལ་ཀུན་སྤངས་དང་རྟོགས་པའི་བྱང་ཆུབ་མཆོག །ཕྱོགས་མཐུན་ལམ་དང་བཅས་པའི་དངོས་པོ་ཉིད། །གཟུགས་སྐུར་ཤར་བ་སྐྱེ་དགུའི་བསོད་ནམས་ཞིང༌། །རིང་བསྲེལ་རྣམ་བཞིས་
ཕྱུར་བུར་གཏམས་པ་ཡིས། །མཆོད་སྡོང་ཆེ་འདིར་བསམ་སྦྱོར་ཅི་རིགས་ཀྱིས། །འབྲེལ་ཐོགས་ཕྱག་མཆོད་སྐོར་བ་བྱེད་རྣམས་དང༌། །མཐོང་ཐོས་དྲན་རེག་ཀུན་གྱི་ཤེས་རྒྱུད་ལ། །ཐར་པའི་ས་བོན་གྲུང་པོ་ཐེབས་གྱུར་ཅིག །ངན་སོང་གསུམ་སོགས་མི་ཁོམ་གནས་རྣམས་སུ། །ནམ་ཡང་མི་སྐྱེ་དལ་འབྱོར་རྟེན་ཐོབ་ཅིང༌། །མཚན་ཉིད་བཅུ་ལྡན་ཐེག་མཆོག་བཤེས་གཉེན་གྱིས། །འབྲལ་མེད་དགྱེས་བཞིན་རྗེས་སུ་འཛིན་པར་ཤོག །དེ་ནས་མདོ་སྔགས་ཟུང་འབྲེལ་ལམ་བཟང་ལ། །གེགས་མེད་ཐོས་བསམ་སྒོམ་པས་ཚུལ་བཞིན་དུ། །ཞུགས་ནས་རྒྱལ་སྲས་སྤྱོད་པ་མཐར་ཕྱིན་ཏེ། །འགྲོ་བའི་དེད་དཔོན་མཆོག་ཏུ་འགྱུར་བར་ཤོག །དགེ་འདུན་སྡེ་རྣམས་བསླབ་གསུམ་ཉམས་ལེན་འཕེལ། །སྐྱེ་བོ་ཀུན་ཀྱང་དགེ་བཅུའི་ནོར་གྱིས་ཕྱུག །བསྟན་པའི་སྙིང་པོ་ཡུན་དུ་གནས་པ་ཡིས། །ལུས་ཅན་ཕན་བདེའི་རྩ་བ་ཚུགས་གྱུར་ཅིག །ཅེས་པ་འདི་ནི་རྣམ་དཔྱོད་ཡངས་པ་དཀའ་བཅུ་དཀོན་མཆོག་སྦྱིན་པས་བསྐུལ་ངོར་ ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། ། ༈ གང་གི་མཚན་ཙམ་ཐོས་ཤིང་དྲན་པས་ཀྱང༌། །མི་ཁོམ་ངན་སོང་སྐྱེ་བའི་སྒོ་བཅད་དེ། །ཞིང་མཆོག་བདེ་བ་ཅན་དུ་འཁྲིད་མཛད་པ། །མགོན་པོ་འོད་དཔག་མེད་ལ་ཕྱག་འཚལ་ལོ། །དེ་ཡི་སྐུ་གཟུགས་ཕུལ་བྱུང་བཞེངས་པ་ལ། །མཐུན་རྐྱེན་སྒྲུབ་པར་བྱེད་པ་རྣམས་ཀྱིས་མཚོན། །ཕ་མ་རིགས་དྲུག་འབྲེལ་ཐོགས་འགྲོ་བ་ཀུན། །རྟག་ཏུ་འོད་དཔག་མེད་ཀྱིས་རྗེས་འཛིན་ཤོག །ནམ་ཞིག་ཚེ་ཡི་འདུ་བྱེད་གཏོང་བ་ན། །ཞེས་སོགས་དང༌། བར་དོའི་སྣང་བ་ཤར་བར་གྱུར་མ་ཐག །
ཅེས་སོགས། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །ཞེས་སོགས་དང༌། དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། ཞེས་སོགས། ཤཱཀྱའི་དབང་པོ་འདྲེན་པ་འོད་དཔག་མེད། །ཅེས་པ་ནས། བདེན་པས་སྨོན་ལམ་འདི་དག་མྱུར་འགྲུབ་ཤོག །ཅེས་པ་འདི་ནི། ༸བཙུན་པ་དཀོན་མཆོག་བསྟན་པའི་སྒྲོན་མེས་རང་གཞན་གཉིས་ཀ་མི་བསླུ་བའི་ཕྱིར་དཀོར་རྫས་ཀྱི་སྙིང་པོ་ལྟ་བུར་འོད་དཔག་མེད་ཀྱི་གོས་སྐུ་དཔངས་འདོམ་བཅུ་བདུན། ཞེང་འདོམ་བཅུ་གཅིག་ལྷག་ཙམ་གསར་བསྐྲུན་བགྱིས་སྐབས་ལྷག་བསམ་རྣམ་དག་གིས་ལས་ཁུར་འཛིན་པ་དཀའ་བཅུ་དཀོན་མཆོག་བསྟན་དར་གྱིས་གཙོས་བཟོ་བོ་རྣམས་ནས་སྨོན་ཚིག་ཅིག་དགོས་ཚུལ་བྱུང་བ་ལྟར་གོ་རིམ་ཙམ་བསྡེབས་པའི་ཡི་གེ་པའང་སྔགས་རམས་པ་དཀོན་མཆོག་ཀུན་དགའོ། ། ༈ ཟླ་བའི་འཁྲི་ཤིང་རོལ་པའི་འཇོ་སྒེག་གིས། །ཟླ་བྲལ་སྤོབས་པའི་མཆོག་སྦྱིན་གང་གི་ཞབས། །ཟླ་ཚེས་རི་མོ་གཙུག་གིས་གུས་བསྟེན་ན། །ཟླ་ལྟར་གསལ་བའི་ཤེས་རབ་སྣང་བ་སྩོལ། །རྣམ་མང་གཞུང་ལུགས་ཚིག་དོན་འཛིན་པ་དང༌། །བཟུང་བ་མི་བརྗེད་དྲན་པས་སྐྱོང་བ་དང༌། །དེ་ཡི་དགོངས་དོན་ཇི་བཞིན་རྟོགས་པ་ཡི། །གཟུངས་སྤོབས་ཤེས་རབ་ཐོབ་པར་བྱིན་གྱིས་རློབས། །ཐོས་པས་སྒྲ་སྤྱིའི་གོ་བ་མྱུར་དུ་ཆགས། །བསམ་པས་སྒྲོ་འདོགས་ལྷག་མ་མེད་པར་ཆོད། །སྒོམ་པས་རྟོགས་པ་མངོན་དུ་འགྱུར་བ་ཡིས། །བསྟན་ལ་ཚུལ་བཞིན་སློབ་པར་བྱིན་གྱིས་རློབས། །ཚད་མ་སྡེ་བདུན་རིགས་པས་བློ་མིག་ཕྱེ། །དབུ་ཕར་ཟབ་རྒྱས་ལམ་གྱིས་གཞུང་བསྲངས་ཤིང༌། །འདུལ་མངོན་ཇི་བཞིན་བླང་དོར་ལ་འབད་པས། །ཐར་པའི་
ལམ་དུ་ཚུད་པར་བྱིན་གྱིས་རློབས། །རྣམ་གྲོལ་ས་བོན་བསྐྲུན་ནུས་འཆད་མཁས་དང༌། །ལོག་རྟོག་དྲ་བ་གཅོད་ནུས་རྩོད་མཁས་ཏེ། །ཐུབ་བསྟན་རྒྱན་དུ་འགྱུར་བའི་རྩོམ་མཁས་ཀྱིས། །མང་ཐོས་དགའ་སྟོན་མྱོང་བར་བྱིན་གྱིས་རློབས། །བཤད་པ་ལུང་རིགས་ཚད་མས་གཞན་དག་དང༌། །སྒྲུབ་པ་བསླབ་གསུམ་དག་པས་རང་ཉིད་ནི། །ཡང་དག་ལམ་ལ་གཅིག་ཏུ་སྦྱོར་བ་ཡིས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །དེ༷་བཞིན་གཤེགས་པ་ཀུན་གྱི་ཡབ་གཅིག་ལ། །དེ༷་ལྟར་རྩེ་གཅིག་གསོལ་བཏབ་དགེ་བའི་མཐུས། །དེ༷་རིང་ནས་བཟུང་འབྲལ་མེད་བྱིན་བརླབས་ཏེ། །དེ༷་ཡི་གོ་འཕང་རིང་མིན་མངོན་འགྱུར་ཤོག །ཅེས་པ་འདི་དད་ལྡན་དགེ་སློང་དཀོན་མཆོག་རིན་ཆེན་གྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་བྷིཀྵུ་རཏྣ་ཨཱ་ནནྟའོ། །