མྱུར་འབྱོན་གསོལ་འདེབས་ཀྱི་སྐོར་ཉམ་ཐག་སྐྱེ་བོའི་གདུང་དབྱངས།
མྱུར་འབྱོན་གསོལ་འདེབས་ཀྱི་སྐོར་ཉམ་ཐག་སྐྱེ་བོའི་གདུང་དབྱངས་ཞེས་བྱ་བ་བཞུགས་སོ། །
སྟེང་ཡ་གི་དགའ་ལྡན་ལྷ་ཡུལ་ན། །མགོན་མི་ཕམ་རྒྱལ་བའི་ཐུགས་ཀྱི་སྲས། །རྗེ་མི་བསྐྱོད་དགྱེས་བཞད་ཐུགས་རྗེ་ཅན། །བུ་ཉམ་ཐག་གདུང་བའི་དབྱངས་འདི་གསོན། །སྐྱབས་དཀོན་མཆོག་གསུམ་འདུས་བདག་ཉིད་ལ། །རྗེ་འཇིགས་མེད་དབང་པོར་གསོལ་བ་ཡིས། །མཚན་སྙན་པའི་བ་དན་སྲིད་ན་གཡོ། །ཕ་བཀའ་དྲིན་ཅན་དེ་གང་ན་བཞུགས། །སྐུ་ནམ་མཁའི་ནོར་བུ་འོད་དང་བྲལ། །གསུང་ཚངས་དབྱངས་བདུད་རྩིའི་སྒོ་མོ་འགག །ཐུགས་མཁྱེན་བརྩེ་དངོས་སུ་མི་མཐོང་བས། །ཕྱོགས་གར་བལྟས་མྱ་ངམ་ཐང་སྟོང་འདྲ། །གཟུགས་མཐོང་ཚད་མི་སྡུག་བཙོན་རྭ་བཞིན། །སྒྲ་ཐོས་ཚད་མི་སྙན་རྣ་བར་རྩུབ། །གྲོས་ད་ལྟ་བསམ་པ་ད་ལྟ་བརྗེད། །སེམས་མྱ་ངན་སྒྱུ་མའི་འཕྲུལ་འདིས་སྐྱོ། །ང་རྨོངས་པའི་མུན་ནག་སྨག་རུམ་ན། །ལས་ཉོན་མོངས་གཅན་གཟན་གདུག་པས་གཙེས། །ད་འབྲོས་པའི་ཕྱོགས་ཀྱང་མི་ཤེས་ཚེ། །ཀྱཻ་ཐར་པའི་ས་མཁན་གང་དུ་གཤེགས། །ནོར་བསམ་འཕེལ་ཡོད་དུས་མི་ཤེས་པར། །ཕྱིའི་རྒྱ་མཚོར་ཡོད་སྐད་ཡི་རེ་མུག །རྗེ་བླ་མ་བཞུགས་དུས་མི་བསྟེན་པར། །དེ་དག་པའི་ཞིང་ལ་འབོད་དེ་སྐྱོ། །སྙན་སྒྲིབ་པ་མེད་པས་གསན་ན་ཡང༌། །ལན་གསུང་བ་ལས་ངན་བདག་མི་ཐོས། །ཞལ་འཛུམ་པའི་ཉམས་ཀྱིས་གཟིགས་ན་ཡང༌། །ང་ཆུ་བུར་མིག་གིས་
མཐོང་མི་ནུས། །ཡིད་གདུང་བའི་དུག་གིས་ཁྱབ་བྱེད་པའི། །གཏམ་ངན་པའི་སྦྲུལ་ནག་འཇུག་པའི་སྒོ། །ལས་ངན་པས་སྤྲུལ་པའི་རྣ་བ་འདི། །དུས་སྔར་ནས་འོན་ན་ཅི་མ་རུང༌། །ལར་དྲན་པའི་རླུང་གིས་བསྐྱོད་པ་ཡིས། །སེམས་མྱ་ངན་མེ་ལྕེ་འབར་བའི་རྟེན། །ལུས་ནད་མང་དུག་གི་འཁྲི་ཤིང་འདི། །ཚལ་སྟོང་དུ་གས་ན་དགའ་བ་ལ། །སྔོན་བརྩེ་བའི་མ་ཡིས་བུ་ལ་བཞིན། །ཆོས་བླང་དོར་རྗེན་པར་བསྟན་པའི་དུས། །རོ་མཉམ་པ་ཉིད་དུ་གཉིད་ལོག་པས། །བྱུར་འགོང་པོ་བདག་ལ་སྙིང་ཡང་ཚིམ། །སྐུ་མི་རྟག་སྒྱུ་མའི་ཚུལ་བསྟན་ཡང༌། །ཐུགས་མཁྱེན་བརྩེའི་ངང་ལས་མི་གཡོ་ཞེས། །ལུང་དྲི་མ་མེད་པར་གསུངས་བདེན་ན། །ཐུགས་བརྩེ་བའི་སྤྱན་རས་ཕྱིར་ལ་གཟིགས། །ཐུགས་མཁྱེན་རབ་མཛད་སྤྱོད་འཕྲིན་ལས་སོགས། །འོད་དཀར་པོའི་བསིལ་ཟེར་མ་འགྱུར་ཀྱང༌། །སྐུའི་ཆ་ཤས་གསར་དུ་ཚེས་པ་ཡི། །མཆོག་སྤྲུལ་བའི་ཟླ་བ་མྱུར་དུ་བྱོན། །མགོན་ཆོས་རྒྱལ་ལ་སོགས་སྲུང་མར་ཡང༌། །དུས་ད་དུང་མཐུ་ཞིག་ཡོད་སྲིད་ན། །སྐུའི་ཡང་སྲིད་འཁྲུལ་བྲལ་མྱུར་གསལ་ཏེ། །ཡོངས་བསྟན་འགྲོའི་མགོན་གྱུར་འཕྲིན་ལས་མཛོད། །དུས་རིང་ནས་གོམས་པའི་ཐུགས་བསྐྱེད་དང༌། །ངེད་དཔོན་སློབ་མི་ཕྱེད་དད་པའི་མཐུས། །སྐུའི་ཡང་སྲིད་ཉི་མ་གཞོན་ནུ་ཡི། །འོད་དགེ་མཚན་སྣང་བ་རྒྱས་གྱུར་ཅིག །ཅེས་པ་འདི་ནི་ཇུན་ཝང་དང་ཨ་པེ་རྣམ་གཉིས་ཀྱིས་གཙོས་གཞན་དུ་མས་
ཀྱང་ཉེ་བར་བསྐུལ་ཞིང༌། གཙོ་བོར་རང་སེམས་དད་གདུང་དྲག་པོས་བསྐུལ་བ་ལ་བརྟེན་ནས་རྗེ་ཉིད་ཀྱི་ཞབས་རྡུལ་སྤྱི་བོས་བསྟེན་པའི་བཙུན་པ་དཀོན་མཆོག་བསྟན་པའི་སྒྲོན་མེས་རྩེ་གཅིག་ཏུ་གསོལ་བ་བཏབ་པའོ། །
ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོའི་གསོལ་འདེབས།
ན་མོ་གུ་རུ་ཛྙཱ་ན་དྷྭ་ཛ་ཡ། རྣམ་འདྲེན་རྒྱལ་བ་ཀུན་གྱི་ཡེ༷་ཤེ༷ས་ནི། །བཤད་སྒྲུབ་བསྟན་པའི་རྒྱལ༷་མཚ༷ན་བསྒྲེངས་པའི་ཕྱིར། །གསུམ་ལྡན་རྡོ་རྗེ་འཛིན་པའི་རྣམ་རོལ་པ། །ཟླ་མེད་བླ་མ་མཆོག་ལ་གསོལ་བ་འདེབས། །སྤངས་དང་ཡེ་ཤེས་དཀྱིལ་འཁོར་རབ་རྒྱས་ཤིང༌། །གཞན་ཕན་སྦྲང་རྩིའི་རྒྱལ་མཚན་བཞད་པའི་གཉེན༌། །དུས་གསུམ་རྒྱལ་བའི་གདུང་འཚོབ་ཆོས་ཀྱི་རྗེ། །བཀའ་དྲིན་མཚུངས་མེད་མཆོག་ལ་གསོལ་བ་འདེབས། །ཁྱོད་ཀྱི་བཀའ་དྲིན་དྲན་པའི་དྲི་བཞོན་གྱིས། །བསྐྱོད་པའི་ཐལ་སྦྱར་སྙིམ་པའི་མེ་ཏོག་ཅན། །རྩེ་གཅིག་གདུང་བའི་དབྱངས་ཀྱིས་གསོལ་འདེབས་ན། །བརྩེ་བས་དགོངས་ཤིག་བླ་མ་ཐུགས་རྗེའི་གཏེར། །གདུག་པའི་སྤྱོད་ཚུལ་གླང་པོའི་དཔའ་སྒྲ་ཅན། །ཆེར་སྙིགས་ལྔ་བདོའི་དུས་ཀྱི་ནགས་མཐའ་ན། །ཉམ་ཆུང་བུས་བ་རང་དགར་འཁྱམ་པ་རྣམས། །དཔའ་བོ་ཁྱོད་ཀྱི་ཐུགས་རྗེས་འདོར་རིགས་སམ། །དབུས་འགྱུར་ཞེས་བྱ་གསེར་གྱི་རྔ་ཆེན་ཡང༌། །ཁྱོད་ཀྱི་ཐུགས་རྗེ་གཡོགས་མ་དང་བྲལ་ན། །དཔལ་དང་འབྱོར་པའི་འོད་རིས་བཀྲ་ན་ཡང༌། །ཟབ་གསང་ཆོས་ཀྱི་སྒྲ་དེ་གང་ནས་སྒྲོགས། །དེ་སླད་ཆོས་སྐུའི་ལྷ་དབང་གཡོ་མེད་ཀྱང༌། །སྐལ་བཟང་དད་པའི་བཻ་ཌཱུར་ས་གཞི་ལ། །གང་འདུལ་མཛད་པའི་གར་གྱིས་རོལ་པ་ཡི། །གཟུགས་སྐུའི་སྣང་བ་འགོག་མེད་བསྟན་དུ་གསོལ། །བདག་ཀྱང་དེང་ནས་ཚེ་རབས་ཐམས་ཅད་དུ། །ཁྱོད་ཞབས་པདྨོ་འབྲལ་མེད་གུས་བསྟེན་
ནས། །ཅི་གསུང་བཀའ་བཞིན་སྒྲུབ་པའི་ལེགས་སྨོན་ཡང༌། །ཁྱོད་ཀྱི་ཐུགས་རྗེ་བདེན་པའི་མཐུས་འགྲུབ་ཤོག །ཅེས་རྗེ་བཙུན་བླ་མ་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོ་དག་པའི་ཞིང་དུ་དགོངས་པ་གཏད་པའི་ཚེ་གསོལ་འདེབས་སྨོན་ཚིག་འདི་ལྟ་བུ་ཞིག་དགོས་ཞེས་དཀའ་བཅུ་འཇིགས་མེད་མཁས་མཆོག་གིས་བསྐུལ་ངོར་དམ་པ་དེ་ཉིད་ཀྱི་ཞབས་རྡུལ་གཙུག་གིས་བསྟེན་པའི། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །
གྲུབ་ཆེན་སྐལ་ལྡན་རྒྱ་མཚོའི་མཆོག་སྤྲུལ་མྱུར་འབྱོན་གྱི་སྨོན་ཚིག
བཤད་སྒྲུབ་རྩིབས་སྟོང་རྫོགས་པའི་འཁོར་ལོ་ཡི། །བློ་བཟང་ཆོས་ཀྱི་སྲིད་ལ་མངའ་བསྒྱུར་བ། །སྐལ་ལྡན་གདུལ་བྱ་རྒྱ་མཚོའི་གཉེན་གཅིག་པུ། །མཚུངས་མེད་བླ་མ་མཆོག་ལ་གསོལ་བ་འདེབས། །ཐེག་གསུམ་དགེ་འདུན་རྒྱུ་སྐར་བྱེ་བའི་མགོན། །གསུང་གསང་འཕྲིན་ལས་འོད་ཀྱི་དྲ་བས་འཁྱུད། །སྤངས་དང་རྟོགས་པའི་དཀྱིལ་འཁོར་རབ་ཏུ་རྒྱས། །སྐྱབས་གསུམ་ཀུན་འདུས་བླ་མ་ཐུགས་རྗེའི་གཏེར། །བཀའ་དྲིན་དྲན་པས་དད་པའི་དྲི་བཞོན་གྱིས། །བསྐྱོད་པའི་ཐལ་སྦྱར་སྙིམ་པའི་མེ་ཏོག་ཅན། །རྩེ་གཅིག་གདུང་བའི་དབྱངས་ཀྱིས་གསོལ་འདེབས་ན། །བརྩེ་བས་གཟིགས་པ་ནམ་ཡང་མ་གཡེལ་ཞིག །ཀྱཻ་མ་མ་ལ་ཆོས་དབྱིངས་ནུབ་རིའི་རྩེར། །བསྟན་པའི་ཉི་མ་མཐོང་བའི་ལམ་ལས་འདས། །མདོ་སྨད་བསྟན་པའི་པད་ཚལ་ཡོངས་སུ་ཟུམ། །བློ་གསལ་རྐང་དྲུག་དགའ་བའི་སྣང་བ་ནུབ། །མགོན་ཁྱོད་བགྲང་ཡས་བསྐལ་པར་གཞན་ཕན་ལ། །གཞོལ་བའི་གོ་ཆ་བཙན་པོ་མི་འདོར་ན། །སྙིགས་མའི་བརླང་སྤྱོད་ལྷག་པར་འཁྲུགས་པའི་ཚེ། །
བུ་ཆུང་སྨྱོས་པའི་མ་བཞིན་བརྩེ་བར་མཛོད། །རིགས་རུས་ཆོ་འབྲང་མི་དམན་ཤར་རིའི་རྩེར། །དགེ་མཚན་བདུད་རྩིའི་གཟེགས་མ་སྤྲོ་བ་ཡི། །མཆོག་སྤྲུལ་ཟླ་བའི་མྱུ་གུ་འཛུམ་རླབས་ཀྱིས། །སྙིང་གི་མུན་པ་སེལ་བའི་དགའ་སྟོན་སྩོལ། །ཐུགས་བསྐྱེད་རྙོག་པ་མེད་པའི་མཚོ་ལས་སྐྱེས། །མཁས་བཙུན་བཟང་པོའི་འདབ་བརྒྱ་མངོན་པར་བཞད། །འཕྲིན་ལས་དྲི་བསུང་ཕྱོགས་མཐར་ཁྱབ་པ་ཡིས། །ཐུབ་བསྟན་འཆི་མེད་དགའ་ཚལ་མཛེས་གྱུར་ཅིག །མཁྱེན་བརྩེའི་ཆུ་འཛིན་གཡོ་བའི་ཟློས་གར་ལས། །རྒྱལ་དབང་གྲགས་པའི་ལེགས་བཤད་སྤྲིན་གྱི་སྒྲས། །རྫོགས་ལྡན་དབྱར་གྱི་ལང་ཚོ་རྒྱས་མཛད་པ། །མཚུངས་མེད་མཆོག་སྤྲུལ་དམ་པ་མྱུར་གསལ་ཤོག །བླ་མ་ཡི་དམ་ཆོས་སྲུང་རྒྱ་མཚོ་དང༌། །ཁྱད་པར་ལྷ་ཆེན་གུར་མགོན་ལྕམ་དྲལ་གྱི། །མཐུ་སྟོབས་དཔུང་པས་དགྲ་སྡེའི་གཡུལ་བཅོམ་སྟེ། །སྨོན་པའི་རེ་འབྲས་ལྷུན་གྱིས་གྲུབ་པར་ཤོག །ཅེས་ཡུལ་མདོ་སྨད་ཀྱི་ལྗོངས་སུ་སྒྲུབ་པའི་རྒྱལ་མཚན་འཛིན་པ་མཐའ་དག་གི་གཙུག་རྒྱན་དམ་པ་གྲུབ་ཆེན་སྐལ་ལྡན་རྒྱ་མཚོའི་མཆོག་གི་སྤྲུལ་བའི་སྐུ་དགེ་འདུན་འཕྲིན་ལས་རབ་རྒྱས་ཀྱི་ཞལ་སྔ་ནས་གཟུགས་སྐུའི་བཀོད་པ་ཉེར་ཞིའི་དབྱིངས་སུ་བསྡུས་པའི་ཚུལ་བསྟན་པའི་ཚེ་སླར་ཡང་མཆོག་སྤྲུལ་མྱུར་འབྱོན་གྱི་སྨོན་ཚིག་འདི་ནི། རྗེ་བཙུན་དམ་པ་དེ་ཀའི་བཀའ་དྲིན་གྱིས་འཚོ་བའི་རབ་འབྱམས་པ་ངག་དབང་ཆོས་འབྱོར་གྱིས་བསྐུལ་ངོར་བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །
དཔལ་ལྡན་བླ་མ་དམ་པ་དགེ་འདུན་རྒྱ་མཚོའི་ཡང་སྲིད་མྱུར་འབྱོན་གསོལ་འདེབས།
ཕུལ་བྱུང་སྟོབས་བཅུའི་དཔལ་མངའ་རྫོགས་སངས་རྒྱས། །དག་པ་དོན་དམ་དབྱིངས་ཀྱི་རང་བཞིན་ཆོས། །བྱང་ཆུབ་ཡན་ལག་རྣམ་སྤྱོད་དགེ་འདུན་ཏེ། །བསླུ་མེད་སྐྱབས་གསུམ་བདེན་པས་ཤིས་པར་སྒྲུབས། །དགེ་ལྡན་ལུགས་
བཟང་ཡངས་པའི་མཁའ་ངོས་ལ། །འདུན་ལྡན་ཐུགས་བསྐྱེད་འོད་དཀར་དྲ་བས་འཁྱུད། །སྐལ་ལྡན་གདུལ་བྱ་རྒྱ་མཚོའི་གཉེན་གཅིག་པུ། །དཔལ་ལྡན་བླ་མའི་ཞབས་ལ་གསོལ་བ་འདེབས། །སྡེ་སྣོད་གསུམ་གྱི་རླབས་ཕྲེང་མངོན་པར་གཡོ། །རྣམ་དག་བསླབ་གསུམ་ནོར་བུའི་ཚོགས་ཀྱིས་གཏམས། །ཐེག་གསུམ་གདེངས་ཅན་བྱེ་བའི་ཉེར་འཚོའི་གཞི། །དུས་གསུམ་རྒྱལ་བའི་གདུང་འཚོབ་ཆོས་ཀྱི་རྗེ། །སྐལ་དམན་མིག་གིས་མཐོང་བའི་ལམ་ལས་འདས། །ཉམ་ཆུང་བུས་བ་བརྩེ་བའི་མགོན་གྱིས་བོར། །སྲིད་པའི་རྒྱ་མཚོ་བརྒལ་བའི་གྲུ་གཟིངས་ཞིག །ཀྱེ་མ་གདུང་བའི་འོ་དོད་སུ་ལ་འབོད། །འོན་ཀྱང་སྤྲོས་བྲལ་དབྱིངས་སུ་འཁོར་འདས་ཀུན། །མཉམ་ཉིད་བདེ་སྟོང་རོལ་པར་གཟུགས་པ་ཡིས། །དམིགས་མེད་སྙིང་རྗེའི་གོ་ཆ་མི་ལྷོད་པས། །བདག་སོགས་མགོན་མེད་འགྲོ་ལ་ཐུགས་རྗེས་གཟིགས། །རིགས་རུས་ཆོ་འབྲང་མི་དམན་དགའ་ཚལ་དུ། །མཆོག་སྤྲུལ་གསར་པའི་འདབ་བརྒྱ་རྒོད་པ་ལས། །ངོ་མཚར་རྟགས་ཀྱི་དྲི་བསུང་སྤྲོ་བ་ཡིས། །སྙིང་གི་གདུང་བ་སེལ་བའི་དགེ་ལེགས་སྩོལ། །རིང་ནས་གོམས་པའི་ཐུགས་བསྐྱེད་ལྟེ་བ་ལས། །མཁས་བཙུན་བཟང་པོའི་རྩིབས་སྟོང་འབར་བ་ཡིས། །བློ་བཟང་ཆོས་ཀྱི་སྲིད་ལ་མངའ་བསྒྱུར་ཏེ། །འགྲོ་ཀུན་གཏན་བདེའི་དཔལ་ལ་སྦྱོར་གྱུར་ཅིག །རྟག་ཏུ་ཁྱོད་ཞབས་པདྨོ་གུས་མཆོད་དེ། །གསུང་གི་བདུད་རྩི་ངོམས་མེད་མྱོང་བ་ཡིས། །འདི་ཕྱིའི་ལེགས་ཚོགས་མ་ལུས་ལྷུན་གྲུབ་པར། །བྱིན་གྱིས་རློབས་ཤིག་བླ་མ་ཐུགས་རྗེའི་གཏེར། །ཡི་དམ་མཆོག་གསུམ་
ཆོས་སྲུང་ཀུན་གྱི་དངོས། །རྗེ་བཙུན་བླ་མའི་ཐུགས་རྗེ་བདེན་པའི་མཐུས། །ཇི་ལྟར་སྨོན་པའི་འདོད་དོན་མ་ལུས་པ། །གེགས་མེད་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་དགེ་ལྡན་བསྟན་པའི་གསལ་བྱེད་ཆེན་པོ་དཔལ་ལྡན་བླ་མ་དམ་པ་དགེ་འདུན་རྒྱ་མཚོའི་ཞལ་སྔ་ནས་ཀྱི་ཡང་སྲིད་མྱུར་འབྱོན་འདི་ནི་མཁྱེན་རབ་ཀྱི་དབང་ཕྱུག་དམ་པ་སྤྲུལ་སྐུ་བློ་བཟང་དམ་ཆོས་ཡར་འཕེལ་ཞབས་སྡོད་དཔོན་པོ་བཅས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་དབེན་གནས་དགེ་འཕེལ་བསམ་གཏན་གླིང་དུ་བྲིས་པའོ། །
དུས་འཁོར་སློབ་ཟུར་དཀོན་མཆོག་དར་རྒྱས་པའི་སྐུའི་ཡང་སྲིད་མྱུར་འབྱོན་གསོལ་འདེབས།
ཆོས་འདུལ་གངས་ཀྱི་རི་བོའི་སྤོར་འགྱིང་ཞིང༌། །མདོ་དང་རྒྱུད་སྡེའི་རལ་བའི་ཁུར་གྱིས་བརྗིད། །ཆོས་མངོན་དྲི་མེད་རིགས་པའི་གད་རྒྱངས་སྒྲོག །མཁས་མཆོག་གདོང་ལྔའི་དབང་པོར་གསོལ་བ་འདེབས། །ཚུལ་ཁྲིམས་དག་པའི་དཀྱིལ་འཁོར་ཡོངས་སུ་རྫོགས། །ཕུལ་བྱུང་ཏིང་འཛིན་རི་དྭགས་མཚན་མས་མཛེས། །རྣམ་འབྱེད་ཤེས་རབ་སྣང་བའི་དགའ་སྟོན་འགྱེད། །གྲུབ་དབང་ཀུནྡའི་གཉེན་ལ་གསོལ་བ་འདེབས། །མང་དུ་ཐོས་པས་གསུང་རབ་གདམས་པར་ཤར། །ཚུལ་བཞིན་བསྒྲུབས་པས་སྤངས་རྟོགས་མངོན་དུ་གྱུར། །ཐུབ་བསྟན་མི་ནུབ་རྒྱལ་མཚན་འཛིན་པའི་གཙོ། །མཚུངས་མེད་བཤེས་གཉེན་རྣམ་ཐར་བསམ་ཞིང་དད། །དཀོན་མཆོག་མཐུ་དང་གཞན་ཕན་ཐུགས་བསྐྱེད་ཀྱི། །བདེན་པས་ཡང་སྲིད་འཁྲུལ་མེད་མྱུར་གསལ་ཞིང༌། །སླར་ཡང་མཁས་བཙུན་བཟང་པོའི་འཕྲིན་ལས་ཀྱིས། །བཤད་སྒྲུབ་ཐུབ་བསྟན་དར་ཞིང་རྒྱས་གྱུར་ཅིག །དུས་མཐར་ཐུབ་བསྟན་སྙིང་པོ་སྤེལ་བ་ལ། །འཇམ་དཔལ་དབྱངས་དངོས་བཞད་པའི་རྡོ་རྗེ་དང༌། །རླབས་ཆེན་ཐུགས་བསྐྱེད་སྨོན་ལམ་ལྷན་ཅིག་
པའི། །བདེན་པས་རེ་འབྲས་ལྷུན་གྱིས་གྲུབ་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང༌། །ཞེས་སོགས་དང༌། རྨད་བྱུང་སྲས་བཅས་རྒྱལ་བའི་བྱིན་རླབས་དང༌། །ཞེས་སོགས་བྱ། ཞེས་ངེས་པ་དོན་གྱི་བཤེས་གཉེན་དམ་པ་བསྟན་པའི་རྩ་ལག་ཆེན་པོ་དུས་འཁོར་སློབ་ཟུར་དཀོན་མཆོག་དར་རྒྱས་པའི་སྐུའི་ཡང་སྲིད་མྱུར་འབྱོན་འདི་ནི། ཉིད་ཀྱི་བཀའ་སློབ་རབ་འབྱམས་པ་ཡོན་ཏན་རྒྱ་མཚོ་དང་རྡོ་རམས་པ་དཀོན་མཆོག་རབ་བརྟན་གཉིས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །
བློ་བཟང་མཁས་མཆོག་གི་ཞལ་སྔ་ནས་ཀྱི་ཡང་སྲིད་མྱུར་འབྱོན་གསོལ་འདེབས།
བློ་བཟང་རྒྱལ་བསྟན་ཡོངས་ལ་དབང་བསྒྱུར་ཞིང༌། །མཁས་གྲུབ་བྱེ་བའི་རལ་བའི་གཙུག་གི་རྒྱན། །ལྷར་བཅས་སྐྱེ་དགུའི་འདྲེན་མཆོག་ཟླ་མེད་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཀུན་བཟང་སྤྱོད་པའི་ཟླ་ཤེལ་དྲི་མ་མེད། །རྨད་བྱུང་ཐུགས་བསྐྱེད་རི་དྭགས་མཚན་མས་མཛེས། །ཐུབ་བསྟན་ཀུ་མུད་བཞད་པའི་དཔལ་ཡོན་ཅན། །སྙིང་གི་མུན་སེལ་བླ་མ་ཐུགས་རྗེའི་གཏེར། །བཀའ་དྲིན་དྲན་པའི་དད་པའི་དྲི་བཞོན་གྱིས། །དབང་མེད་བསྐྱོད་པའི་རང་སེམས་པངྨོའི་ཁ། །མགོན་པོ་གང་དུ་གཤེགས་པའི་ཞིང་ཁམས་དེར། །ཕྱོགས་ནས་གདུང་བས་གསོལ་འདེབས་འདི་དགོངས་ཤིག །རྒྱལ་སྲས་དཔའ་བོ་སྙིང་རྗེའི་གོ་ཆ་ཅན། །འཁོར་འདས་མཉམ་ཉིད་སྒྱུ་མའི་རོལ་པར་ཤེས། །དངོས་ཀུན་ལྷན་སྐྱེས་བདེ་བར་སྡོམ་མཛད་རྣམས། །སྲིད་པའི་སྐྱོན་གྱིས་འཇིག་པར་ག་ལ་འོས། །དེ་ཕྱིར་ཁྱོད་ཀྱི་ཐུགས་རྗེ་སྦྲང་ཆར་གྱིས། །འཚོ་བའི་ཉམ་ཆུང་མྱུ་གུ་སྔོན་པོའི་ཚལ། །འཇོམས་པའི་ཐན་ཁྱེར་གདུང་བ་འཕྲོག་པའི་སླད། །ཐུགས་རྗེའི་
སྤྲིན་ཆེན་སླར་ཡང་གཏིབས་པར་མཛོད། །རྣམ་གྲོལ་ཐར་བའི་ལམ་བཟང་ལྟ་བའི་མིག །མཐའ་མེད་སྲིད་པའི་མཚོ་ལས་སྒྲོལ་བའི་གྲུ། །གནས་སྐབས་མཐར་ཐུག་དོན་གཉིས་འགྲུབ་པའི་རྟེན། །རེ་ས་གཞན་ན་མེད་དོ་བརྩེ་བས་དགོངས། །རིགས་རུས་ཆོ་འབྲང་མི་དམན་ཤར་རིའི་རྩེར། །དགེ་མཚན་ཁྱུང་སྔོན་སྐྱེས་ཀྱིས་དྲངས་པ་ཡི། །མཆོག་སྤྲུལ་མཁས་བཙུན་བཟང་པོའི་འོད་བརྒྱ་པ། །བློ་བཟང་བསྟན་པའི་དཔལ་དུ་མྱུར་གསལ་ཤོག །དམིགས་མེད་སྙིང་རྗེའི་རང་གཟུགས་མྱུར་མཛད་མགོན། །ཡེ་ཤེས་ལྔ་བདག་རྒྱལ་ཆེན་སྐུ་ལྔ་དང༌། །ཁྱད་པར་གནས་ཆུང་རྡོ་རྗེ་དྲེགས་ལྡན་གྱིས། །དོན་འདི་གེགས་མེད་འགྲུབ་པའི་སྡོངས་གྲོགས་མཛོད། །མདོར་ན་བླ་མ་མཆོག་གསུམ་ཐུགས་རྗེ་དང༌། །བདག་ཅག་དད་མོས་རྟེན་འབྱུང་མི་བསླུ་བས། །མཆོག་སྤྲུལ་ཉིན་མོའི་སྣང་བ་མྱུར་གསལ་ཏེ། །བསྟན་འགྲོའི་ཕན་བདེའི་པད་ཚལ་རྒྱས་གྱུར་ཅིག །ཅེས་མཁས་བཙུན་བཟང་པོའི་ཡོན་ཏན་གྱིས་བྱང་ཕྱོགས་བསྟན་འགྲོའི་ཕན་བདེའི་རྩ་ལག་དམ་པར་གྱུར་པ་བློ་བཟང་མཁས་མཆོག་གི་ཞལ་སྔ་ནས་ཀྱི་ཡང་སྲིད་མྱུར་འབྱོན་འདི་ནི་བསྟན་པའི་གསལ་བྱེད་སྤྲུལ་སྐུ་བློ་བཟང་ཐུབ་བསྟན་ཉི་མ་སོགས་དམ་པ་དེ་ཉིད་ཀྱི་སྐུའི་གམ་བཅར་རྣམས་ཀྱིས་བསྐུལ་ངོར་ཆོས་སྨྲ་བའི་བཙུན་པ་དཀོན་མཆོག་བསྟན་པའི་སྒྲོན་མེས་རྫོང་དཀར་བཀྲ་ཤིས་དར་རྒྱས་གླིང་ནས་བྲིས་པའོ། །
དགེ་འདུན་བསྟན་པ་དར་རྒྱས་པའི་སྐུའི་ཡང་སྲིད་མྱུར་འབྱོན་གསོལ་འདེབས།
ཡེ་ཤེས་དྲི་མ་མེད་པའི་ལྡིང་ཁང་ནས། །བརྩེ་བའི་སྤྱན་གྱིས་འགྲོ་ལ་རྟག་གཟིགས་པ། །དུས་གསུམ་བདེ་གཤེགས་སྲས་དང་བཅས་པ་ཡིས། །སྙིང་གི་གདུང་བ་སེལ་བའི་དགེ་ལེགས་སྩོལ། །རིག་གྲོལ་བརྒྱད་ལྡན་དགེ་
འདུན་འདུས་པའི་གཙོ། །ལུང་རྟོགས་བསྟན་པ་དམ་ཆོས་བདུད་རྩིའི་གཏེར། །སྐུ་བཞིའི་ལང་ཚོ་དར་བའི་རྫོགས་སངས་རྒྱས། །སྐྱབས་གསུམ་ངོ་བོ་བླ་མའི་ཞབས་ལ་འདུད། །ཕན་བདེའི་རྩ་བ་རྒྱལ་བསྟན་ཉི་འོད་འགྲིབ། །ལྔ་ཕྲག་སྙིགས་མའི་མུན་པ་ཀུན་ནས་འཐིབས། །དམ་པའི་མགོན་གྱིས་མྱ་ངམ་ཐང་དུ་བོར། །ཀྱཻ་མ་གདུང་བས་འོ་དོད་སུ་ལ་འབོད། །གཞན་ཕན་ཁོ་ནར་གཞོལ་བའི་དཔའ་བོ་རྣམས། །རབ་འབར་དམྱལ་བའི་གནས་སུ་མི་སྐྱོ་ན། །དམུ་རྒོད་འགྲོ་བའི་ངང་ཚུལ་མི་དགོངས་པར། །མཛེས་སྐུ་སྣང་བའི་སྒྱུ་འཕྲུལ་བསྟན་དུ་གསོལ། །ཆོ་རིགས་གཙང་མའི་སྐྱེད་ཚལ་ཉམས་དགའ་བར། །དམ་པའི་ངང་ཚུལ་དྲི་བསུང་རྫོགས་པ་ཡི། །མཆོག་སྤྲུལ་པུཎྜ་རི་ཀ་ཉེར་འཁྲུངས་ཏེ། །ཕན་བདེའི་སྦྲང་རྩིའི་དགའ་སྟོན་འགྱེད་པར་ཤོག །ཚུལ་ཁྲིམས་ལྟེ་བ་ལས་ཐོན་ཤེས་རབ་ཀྱི། །རྩིབས་སྟོང་རྫོགས་པ་ཏིང་འཛིན་མུ་ཁྱུད་ཅན། །ལུང་རྟོགས་བསྟན་པ་ཡོངས་ལ་མངའ་འབྱོར་བའི། །ཆོས་ཀྱི་རྒྱལ་པོའི་སྲིད་ལ་དབང་བསྒྱུར་ཤོག །རྡོ་རྗེའི་གཡར་དམ་གཉན་པོ་ལྷུར་བཞེས་པའི། །བཀའ་སྲུང་དམ་ཅན་རྒྱ་མཚོའི་ཚོགས་ཀྱིས་ཀྱང༌། །ཇི་ལྟར་སྨོན་པའི་འབྲས་བུ་མ་ལུས་པ། །གེགས་མེད་ལྷུན་གྱིས་འགྲུབ་པའི་བཀྲ་ཤིས་སྩོལ། །ཞེས་བསྟན་པའི་གསལ་བྱེད་ར་ངན་སྤྲུལ་སྐུ་དགེ་འདུན་བསྟན་པ་དར་རྒྱས་པའི་སྐུའི་ཡང་སྲིད་མྱུར་འབྱོན་འདི་ནི་སྤྲུལ་སྐུ་དཀོན་མཆོག་ཆོས་འཕེལ་སོགས་ནས་བསྐུལ་ངོར་བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །
དཀོན་མཆོག་བདེ་ཆེན་པའི་ཞལ་སྔ་ནས་ཀྱི་སྐུའི་ཡང་སྲིད་མྱུར་འབྱོན་གསོལ་འདེབས།
བསླུ་མེད་དཀོན་མཆོག་ཐུགས་རྗེའི་ཀུན་གསལ་མར། །བདེ་སྟོང་དབྱེར་མེད་ཡེ་ཤེས་ཟླ་ཤེལ་ཁམས། །བརྩེ་ཆེན་སྒྱུ་འཕྲུལ་དྲ་བའི་འོད་དཀར་ཅན། །དཔལ་ལྡན་བླ་མའི་ཞབས་ལ་གསོལ་བ་འདེབས། །རྣམ་དག་ཁྲིམས་ལྡན་དགེ་འདུན་འདུས་པའི་གཙོ། །གཞན་ཕན་ཐུགས་བསྐྱེད་ཟབ་རྒྱས་གདམས་པའི་གཏེར། །གྲུབ་པ་མཆོག་བརྙེས་དཀྱིལ་འཁོར་འཁོར་ལོའི་མགོན། །སྐྱབས་གསུམ་ངོ་བོ་གསུམ་ལྡན་རྡོ་རྗེ་འཛིན། །ཁྱོད་ཀྱི་ཐུགས་རྗེའི་ཆུ་འཛིན་གྲིབ་བསིལ་ལ། །ངལ་བསོ་བགྱིད་པའི་ཉམ་ཐག་འགྲོ་བ་ཀུན། །གློ་བུར་ཉིད་དུ་སྙིགས་མའི་ཚ་གདུང་གིས། །བསྲེགས་པའི་སྐལ་དམན་གདུང་བ་ཇི་ལྟར་བཟོད། །སྲིད་ལ་རྗེས་ཆགས་སྙིང་རྗེའི་དབང་གྱུར་ཅིང༌། །སྲིད་ཞི་མཉམ་ཉིད་གཟིགས་པའི་སེམས་དཔའ་ཆེ། །སྲིད་གསུམ་ལྷན་སྐྱེས་བདེ་བར་སྡོམ་མཛད་རྣམས། །སྲིད་པའི་སྐྱོན་གྱིས་འཇིགས་པར་ག་ལ་འོས། །དེ་ཕྱིར་ཐུགས་བསྐྱེད་ལྷ་ཡི་དགའ་ཚལ་དུ། །མཆོག་སྤྲུལ་པདྨོའི་མྱུ་གུ་ཉེར་འཁྲུངས་ཏེ། །དམ་པའི་ངང་ཚུལ་དྲི་བཟང་སྤྲོ་བ་ཡིས། །ཐར་འདོད་རྐང་དྲུག་ཡིད་ལ་དཔལ་སྟེར་ཤོག །རིང་ནས་ཐུགས་བསྐྱེད་དམ་བཅའ་ཉེར་དགོངས་ལ། །མཁས་བཙུན་བཟང་པོའི་འོད་བརྒྱ་འབར་བ་ཡི། །ཡང་སྲིད་ཉི་མ་གཞོན་ནུའི་སྐུར་བསྟན་ནས། །བཤད་སྒྲུབ་བསྟན་པའི་པད་ཚལ་རྒྱས་པར་མཛོད། །ནམ་ཡང་མི་བསླུ་མཆོག་གསུམ་ཐུགས་རྗེ་དང༌། །བཀའ་སྲུང་དམ་ཅན་རྒྱ་མཚོའི་མཐུ་སྟོབས་ཀྱིས། །ཇི་ལྟར་སྨོན་པའི་དོན་ཀུན་ལྷུན་གྲུབ་སྟེ། །བློ་བཟང་རྒྱལ་བའི་བསྟན་པ་རྒྱས་གྱུར་ཅིག ། ཅེས་རྗེ་བཙུན་བླ་མ་དམ་པ་མཁས་
ཤིང་གྲུབ་བའི་དབང་ཕྱུག་ཆེན་པོ་དཀོན་མཆོག་བདེ་ཆེན་པའི་ཞལ་སྔ་ནས་ཀྱི་སྐུའི་ཡང་སྲིད་མྱུར་འབྱོན་འདི་ནི་དམ་པ་དེ་ཉིད་ཀྱི་ཞབས་སྡོད་རྣམས་ནས་བསྐུལ་བ་ལྟར། བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །
སྤྲུལ་བའི་སྐུ་བསྟན་པ་ཆོས་ལྡན་པའི་ཞལ་སྔ་ནས་ཀྱི་ཡང་སྲིད་མྱུར་འབྱོན་གསོལ་འདེབས།
མཐའ་ཡས་འགྲོ་ལ་རྗེས་སུ་ཆགས་པ་ཡིས། །ཐུགས་རྗེའི་སྤྱན་གྱིས་ནམ་ཡང་མི་འདོར་བ། །བསླུ་མེད་སྐྱབས་གསུམ་འདུས་པའི་ངོ་བོ་ཉིད། །དཔལ་ལྡན་བླ་མ་སྙིང་གི་ཟེའུ་འབྲུར་བཞུགས། །ཐུབ་བསྟན་སྙིང་པོའི་ཡང་སྙིང་བླ་མེད་པ། །མདོ་སྔགས་ཟབ་རྒྱས་ཆོས་ཚུལ་བདུད་རྩི་ཡིས། །སྐལ་ལྡན་ཡིད་ཀྱི་རེ་བ་སྐོང་བའི་གཉེན། །འདྲེན་མཆོག་ཐུགས་རྗེའི་གཏེར་ཁྱོད་བདག་ལ་དགོངས། །སྔོན་བྱུང་རྒྱལ་དང་རྒྱལ་སྲས་མཐའ་དག་གི །གདུལ་བའི་ཞིང་དུ་མ་གྱུར་བདག་ཅག་ལ། །ཐུགས་རྗེའི་ཞལ་སྐྱིན་ཁྱོད་ལས་གཞན་མེད་ན། །གློ་བུར་ཞི་བའི་དབྱིངས་སུ་ཅི་སླད་གཞོལ། །ཉམ་ཆུང་དམིགས་བུ་མེད་པའི་བུས་བ་བདག །ལས་ཉོན་གཅན་གཟན་གདུག་པའི་ནགས་ཁྲོད་དུ། །ཐར་པའི་ས་མཁན་ཁྱོད་ཀྱིས་ཡལ་བོར་ན། །ཀྱེ་མ་གདུང་བའི་འོ་དོད་སུ་ལ་འབོད། །འོན་ཀྱང་སྐལ་དམན་ལས་ཀྱིས་ནོངས་པ་ལས། །རྒྱལ་སྲས་སྙིང་རྗེའི་གོ་ཆ་མི་ལྷོད་པས། །ཉེར་ཞིའི་མཁའ་ལས་གཟུགས་སྐུའི་ཟླ་སྣང་གི །སྒྱུ་འཕྲུལ་དྲ་བའི་རོལ་གར་བསྟན་དུ་གསོལ། །མ་སྨད་ཐུགས་བསྐྱེད་ཏེ་སེའི་གཙུག་ཏོར་ལས། །འཕྲིན་ལས་རླབས་ཀྱི་ཕྲེང་བའི་འཇོ་སྒེག་ཅན། །སོམ་ཉིའི་རྙོག་བྲལ་ཡང་སྲིད་ལྷ་ཡི་ཆབ། །གདུལ་བྱའི་བསོད་ནམས་འཛིན་མར་འབེབས་གྱུར་ཅིག །རྣམ་དག་ཁྲིམས་ཀྱི་རྩ་བ་རབ་
བརྟན་ཅིང༌། །ཐོས་བསམ་བསྒོམ་པའི་མེ་ཏོག་ཅི་ཡང་བཀྲ། །འཕྲིན་ལས་དྲི་བཟང་ཕྱོགས་བརྒྱར་སྤྲོ་བ་ཡིས། །དགེ་ལྡན་བསྟན་པའི་དགའ་ཚལ་མཛེས་གྱུར་ཅིག །ནམ་ཡང་མི་བསླུ་མཆོག་གསུམ་ཐུགས་རྗེ་དང༌། །རྡོ་རྗེའི་གཡར་དམ་ལྷུར་མཛད་སྲུང་མའི་མཐུས། །ཇི་ལྟར་སྨོན་པའི་རེ་འབྲས་མ་ལུས་པ། །གེགས་མེད་བདེ་བླག་ཉིད་དུ་འགྲུབ་གྱུར་ཅིག །བདག་ཀྱང་དེང་ནས་སྐྱེ་བའི་ཕྲེང་བ་རུ། །བླ་མའི་ཞབས་སྐྱེས་མཆོད་པ་མི་གཏོང་ཞིང༌། །བཤད་དང་སྒྲུབ་པའི་བྱ་བ་མཐར་ཕྱིན་ནས། །གཏན་བདེའི་དགའ་སྟོན་དཔལ་ལ་རོལ་གྱུར་ཅིག །ཅེས་བསྟན་པའི་གསལ་བྱེད་དམ་པ་སྤྲུལ་བའི་སྐུ་བསྟན་པ་ཆོས་ལྡན་པའི་ཞལ་སྔ་ནས་ཀྱི་ཡང་སྲིད་མྱུར་འབྱོན་འདི་ནི། ཆས་པ་གོ་ཡུ་ནང་ནས་ཉིད་ལ་ལྟོས་བཅས་སྤྱི་ཚོགས་དང༌། ཨ་འཁོར་བྲག་དཀར་རི་ཁྲོད་པ་བཅས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །
ངག་དབང་བློ་བཟང་འཕྲིན་ལས་ཀྱི་ཡང་སྲིད་མྱུར་འབྱོན་གསོལ་འདེབས།
ཟབ་རྒྱས་མན་ངག་དབང་ལུང་དགའ་སྟོན་གྱིས། །བློ་ལྡན་སྐལ་བཟང་གདུལ་བྱའི་རེ་སྐོང་ཞིང༌། །གཞན་ཕན་འཕྲིན་ལས་བསྟན་འགྲོའི་དཔལ་གྱུར་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །ངག་རིག་གྲུབ་དབང་ཚོགས་ཀྱི་བདེན་སྟོབས་དང༌། །བློ་བཟང་རྒྱལ་བསྟན་སྲུང་མའི་འཕྲིན་ལས་ཀྱིས། །ངོ་མཚར་དགེ་མཚན་དྲི་བསུང་མངར་བ་ཡི། །ཡང་སྲིད་ཙན་དན་ལྗོན་པ་མྱུར་འཁྲུངས་ཤོག །དལ་འབྱོར་རྟེན་གྱི་ཡུ་བ་རབ་ཏུ་བརྟན། །རྒྱ་ཆེན་མང་ཐོས་དར་གྱི་ཤམ་བུ་གཡོ། །བསླབ་གསུམ་དབང་གི་རྒྱལ་པོའི་ཏོག་མཛེས་པའི། །དགེ་མཚན་འོད་སྣང་ཀུན་ཏུ་རྒྱས་གྱུར་ཅིག །ཅེས་བསྟན་པའི་གསལ་བྱེད་ངག་དབང་བློ་བཟང་འཕྲིན་ལས་ཀྱི་
ཡང་སྲིད་མྱུར་འབྱོན་འདི་ནི། ལྟོས་བཅས་རྣམས་ཀྱིས་བསྐུལ་ངོར། ༸བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། །།སརྦ་མངྒ་ལཾ། །