རྟེན་གསུམ་གྱི་དཀར་ཆག་སྐོར།
གསུང་ཐོར་བུ་ལས་རྟེན་གསུམ་གྱི་དཀར་ཆག་དང་སྐོར་ཚད་ཀྱི་རིམ་པ་ཕྱོགས་བཀོད་བཞུགས་སོ། །
གང་གི་ཐུགས་རྗེའི་བདུད་རྩིའི་གཟེགས་མ་ཙམ། །སྙིང་ལ་ཞུགས་པས་སྲིད་ཞིའི་གདུང་སེལ་བ། །བསླུ་མེད་མཆོག་གསུམ་ཞབས་ཀྱི་པདྨོ་ལ། །གུས་པས་འདུད་དོ་བྱང་ཆུབ་བར་དུ་སྐྱོངས། །རྣམ་དཀར་ལས་ལ་འཇུག་པའི་སྒོ་གསུམ་ལས། །ལུས་ཀྱི་བྱ་བ་ཕྱག་དང་སྐོར་བ་ཡི། །ཕན་ཡོན་མཐོང་སྟེ་འབད་པར་བྱེད་པ་ནི། །རླབས་ཆེན་བསོད་ནམས་སྒྲུབ་པའི་ཐབས་མཆོག་ཡིན། །དེ་ཡི་ཕན་ཡོན་མཆོད་རྟེན་བསྐོར་བའི་མདོ། །པད་དཀར་ཏིང་འཛིན་རྒྱལ་པོ་ཟ་མ་ཏོག །སྤྱན་རས་གཟིགས་དང་གསལ་རྒྱལ་གྱིས་ཞུས་སོགས། །མདོ་དང་དམ་པའི་གསུང་རྒྱུན་མཐའ་ཡས་པ། །ཟུར་ཙམ་གཞན་དུ་བཀོད་ལས་ཤེས་དགོས་ལ། །འདིར་ནི་དེ་དག་རྣམས་ཀྱི་སྙིང་པོའི་དོན། །མཐོང་དང་མ་མཐོང་ཕན་ཡོན་མདོར་བསྡུས་ཙམ། །གཟུང་བདེ་གོ་སླའི་ངག་གིས་རྗོད་བྱེད་ན། །མཆོག་གསུམ་ཞིང་ལ་དད་གུས་རྩེ་གཅིག་གིས། །བཟླས་བརྗོད་དང་བཅས་བསྐོར་
བ་བྱ་བ་ནི། །ནད་རིམས་དྲི་མ་འཁྲུད་བྱེད་གཙང་མའི་ཆབ། །གདོན་དང་བགེགས་ཀྱིས་མི་ཚུགས་སྲུང་བའི་མཆོག །དུས་མིན་འཆི་བ་འཕྲོག་བྱེད་བདུད་རྩིའི་རྒྱུན། །བག་མེད་བྱ་བའི་རྒྱུན་གཅོད་རལ་གྲི་བཞིན། །སྡིག་ལྟུང་མུན་པ་སེལ་བྱེད་སྒྲོན་མེ་དང། །སྡུག་བསྔལ་ཚ་གདུང་སེལ་བ་ཟླ་བའི་འོད། །དད་པའི་མྱུ་གུ་སྨིན་བྱེད་ཆར་གྱི་རྒྱུན། །བྱིན་རླབས་ཀླུང་རྒྱུན་འབབ་པའི་འཇུག་ངོགས་ཟབ། །ཤེས་རབ་པདྨ་རྒྱས་པའི་ཉིན་མོར་བྱེད། །བསོད་ནམས་རིན་ཆེན་འདྲེན་པའི་ཤིང་རྟ་ཆེ། །འཇིག་རྟེན་ཕ་རོལ་འགྲོ་བའི་ལམ་གྱི་རྒྱགས། །སུས་ཀྱང་འཕྲོག་པར་མི་ནུས་ནོར་གྱི་མཆོག །འབྲས་བུ་ཟད་མི་ཤེས་པའི་དཔག་བསམ་ལྗོན། །རབ་འབྱམས་རྒྱལ་བ་དགྱེས་བྱེད་མཆོད་པའི་སྤྲིན། །མངོན་མཐོའི་ཚལ་དུ་བགྲོད་པའི་བཞོན་པ་དང། །ངེས་ལེགས་ཐར་པར་འཇུག་པའི་ཐེམ་སྐས་ཏེ། །ཚོགས་གཉིས་རྒྱ་མཚོར་བགྲོད་པའི་
གྲུ་བོ་ཆེ། །དོན་གཉིས་ལྷུན་གྱིས་གྲུབ་པའི་ནོར་བུ་ཡིན། །མཁའ་ལྟར་རྒྱ་ཆེ་རྒྱ་མཚོ་ལྟ་བུར་ཟབ། །ལྷུན་པོའི་སྤོ་ལྟར་མཐོ་བའི་བསོད་ནམས་ཀྱི། །ཕ་མཐའ་འཕགས་མཆོག་རྣམས་ཀྱང་གཞལ་དཀའ་ན། །བདག་ལྟས་ཇི་བཞིན་བརྗོད་པར་ག་ལ་ནུས། །སྐོར་ཚད་གཅིག་ཏུ་ངེས་པ་མ་མཆིས་ཀྱང། །རྟེན་གཙོར་གཞལ་བའི་འབུམ་ལ་སྐོར་ཚད་དུ། །བྱེད་པར་རྒྱལ་དབང་བདུན་པས་གསུངས་པ་བཞིན། །འགྲོ་བའི་བསོད་ནམས་ཞིང་མཆོག་འདི་ལ་ཡང། །རྟེན་གཙོ་ཇོ་བོའི་སྐོར་ཚད་ཆིག་ཁྲི་དང། །ཆིག་སྟོང་སུམ་བརྒྱ་བྱམས་སྐོར་ཁྲི་ཕྲག་གསུམ། །ཡིན་ཀྱང་བརྒྱ་ཕྲག་ཙམ་རེ་ལྷག་དང་བཅས། །སོང་སྟེ་བསྔོ་བས་རྒྱས་གདབ་བྱས་ན་ལེགས། །རྙེད་པར་དཀའ་བ་དལ་འབྱོར་རྟེན་བཟང་ཐོབ། །མཇལ་དཀའ་མཆོག་གསུམ་རྟེན་དང་མཇལ་བའི་དུས། །དོན་མེད་ལེ་ལོའི་དབང་དུ་མ་བཏང་བར། །མྱུར་བ་མྱུར་བར་སྙིང་པོ་བླངས་ན་ལེགས། །འདི་ཡིས་དགེ་བས་འབྲེལ་ཐོགས་ལུས་ཅན་ཀུན། །མཆོག་གསུམ་ཐུགས་རྗེའི་བྱིན་རླབས་གྲུ་གཟིངས་ལ། །བརྟེན་ནས་ཕྲ་རགས་སྲིད་པའི་མཚོ་བརྒལ་ཏེ། །སྐུ་གསུམ་ནོར་བུའི་གླིང་དུ་ཕྱིན་གྱུར་ཅིག །ཅེས་པ་འདི་ནི་གཞུང་བརྒྱ་སྨྲ་བའི་དབང་པོ་དམུ་དགེའི་སློབ་ཟུར་ལྷ་རམས་པ་ངག་དབང་རྒྱལ་མཚན་གྱིས་དེ་ཀའི་དགོན་པའི་རྟེན་དུ་ཇོ་བོའི་ལྷ་ཁང་གསར་བསྐྲུན་བགྱིས་སྐབས་སྐོར་ཚད་ཕན་ཡོན་དང་བཅས་གོ་བདེ་བ་ཞིག་དགོས་ཚུལ་བྱུང་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་
སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །། ༈ རྣམ་དག་ཆོས་དབྱིངས་བདེ་བའི་ཀུན་གསལ་ལས། །ཐེག་མཆོག་ལོངས་སྤྱོད་ཆ་ཤས་རྫོགས་པའི་ཟླ། །སྤྲུལ་བའི་འོད་དཀར་བཀོད་པའི་སྣང་བརྙན་བཅས། །སྤྲོས་པས་འཇིག་རྟེན་རྒྱན་གྱུར་དེ་ལ་འདུད། །རྒྱལ་རྣམས་ཐུགས་རྗེ་དབྱར་གྱི་ལང་ཚོ་ཡིས། །ཡོངས་བཟུང་གདུལ་བྱའི་བསོད་ནམས་འཛིན་མ་ལས། །ཇི་ལྟར་འཚམ་པའི་དགེ་ལེགས་རྐང་འཐུང་འཕྲེང། །གཏན་བདེ་འབྲས་བུས་སྤ་བ་ཅི་ཡང་འཆར། །བསླབ་གསུམ་ཆུ་གཏེར་ལུང་གི་རླབས་འཕྲེང་ཅན། །ཕན་བདེའི་འབྱུང་གནས་ཐུབ་བསྟན་རྒྱ་མཚོ་ཡང། །མཆོག་གསུམ་རྟེན་གྱི་གདེངས་ཅན་དབང་པོའི་བྱིན། །ཉམས་པ་མེད་པའི་རྟེན་འབྲེལ་མཐུ་ལ་རག །དེ་ཕྱིར་མ་འོངས་སྐྱེ་བའི་འཕྲེང་བ་ཀུན། །སྟོན་པ་མཆོག་དེས་འབྲལ་མེད་རྗེས་འཛིན་ཅིང། །བསྟན་པ་རིན་ཆེན་ཕྱོགས་བཅུར་རྒྱས་བྱའི་ཕྱིར། །བྱ་བ་ལས་ཀྱི་འཁོར་ལོ་མཆོག་འདི་བརྩམས། །དེ་ཡི་ངོ་མཚར་ཐོག་མ་བར་དང་མཐར། །དགེ་བའི་བརྗོད་པ་ཟད་མི་ཤེས་པ་ལས། །སྙིང་པོ་རིང་བསྲེལ་རྣམ་བཞིའི་ཕུང་པོ་རུ། །བསྒྲུབས་པའི་གླེང་གཞི་མདོ་ཙམ་སྤེལ་བར་བྱ། །དེའང་འཇིག་རྟེན་གསུམ་གྱི་བླ་མ། རྣམ་འདྲེན་སྟོབས་བཅུའི་བདག་ཉིད་མཉམ་མེད་ཤཱཀྱའི་རྒྱལ་པོའི་སྐུ་ལ་འཇམ་མགོན་ཙོང་ཁ་པ་ཆེན་པོས་བསྟན་པ་ཡུན་རིང་དུ་གནས་པའི་རྟེན་འབྲེལ་དུ་མདོ་ལས་ལུང་བསྟན་པ་བཞིན་
དབུ་རྒྱན་ཕུལ་བ་དང་རྣམ་པ་མཐུན་པར་ཇོ་བོ་རིན་པོ་ཆེའི་སྐུ་བརྙན་མཐོང་བ་དོན་ལྡན་འདིའི་ལོ་རྒྱུས་ནི། ༸སྐྱབས་མགོན་མཆོག་སྤྲུལ་རིན་པོ་ཆེ་བློ་བཟང་འཇིགས་མེད་རྒྱ་མཚོའི་གསན་སྦྱོང་སོགས་ཆོས་སྲིད་ཀྱི་ཞབས་འདེགས་སུ་འཇམ་དབྱངས་གོང་མ་ཆེན་པོའི་བཀས་ཨེར་ཏེར་ཐུ་མེར་གེན་མཁན་པོ་ཞེས་བསྐོས་པའི་དོན་བཞིན། ཀུན་གཟིགས་རྒྱལ་བའི་དབང་པོ་མཆོག་ནས་དེ་ལྟར་གཟེངས་བསྟོད་ཅིང། དཔལ་ལྡན་བཀྲ་ཤིས་འཁྱིལ་གྱི་ཁྲི་ཐོག་ཉེར་ལྔ་པ་གཞུང་ལུགས་རྒྱ་མཚོའི་དོན་ལ་ཐོགས་པ་མེད་པའི་མཁྱེན་རབ་ཀྱི་དབང་ཕྱུག་དཀོན་མཆོག་སེངྒེ་ནས་རྒྱལ་བའི་ལུང་གིས་ཟིན་པའི་ཆོས་གྲྭ་ཆེན་པོ་འདིས་མཚོན། མཐའ་དབུས་ཀུན་ཏུ་བསྟན་པ་རྒྱས་པ་དང། རང་གཞན་འབྲེལ་ཐོགས་ཀུན་ཀྱང་ཚེ་རབས་ཀྱི་ཕྲེང་བར་བསྟན་པའི་སྙིང་པོ་ཐོས་བསམ་སྒོམ་པས་ཉམས་སུ་བླངས་ཏེ་རྒྱལ་བ་དགྱེས་པར་བྱེད་པའི་རྟེན་འབྲེལ་དུ་དམིགས་ནས་བཞེངས་པའི་འདུན་པ་བསྐྱེད་ཅིང། ལང་ཇུས་ནས་མགར་བ་འདི་ཉིད་འོངས་ཏེ་ངེད་ལ་ལུང་སྟོན་བྱམས་པའི་སྐུ་བཞེངས་པ་ད་ལྟའི་རྒྱ་བོད་ཀྱི་བཟོ་བོ་ཀུན་གྱི་ངང་ཚུལ་ལས་ཆེས་རིང་དུ་འདས་པའི་ངོ་མཚར་ཕུལ་དུ་ཕྱིན་པས་ཀྱང་དམིགས་རྐྱེན་བྱས་ཏེ། རབ་བྱུང་བཅུ་བཞི་པའི་ནང་ཚན་དངོས་པོ་ཞེས་པ་ཤིང་ཕོ་ཁྱིའི་ལོའི་ས་ག་ཟླ་བའི་ཚེས་བཅོ་ལྔར་ལས་མགོ་བརྩམས། དེ་ནས་བཟུང་སྟེ་བར་མ་ཆད་པར་སྒྲུབ་པས་འཛིན་བྱེད་ཅེས་པ་མེ་བྱིའི་དགུན་ལེགས་པར་གྲུབ། ཕྱིའི་རྒྱུ་བཟོ་མཐའ་དག་ཤིན་ཏུ་བཟང་བའི་ཚོད་ཀྱིས་ནང་རྟེན་ཡང་འབད་རྩོལ་ཆེན་པོས་བསྒྲུབས་ཏེ་རིང་བསྲེལ་རྣམ་བཞིས་ཕྱུར་བུར་གཏམས་པའི་རིམ་པ་ནི། སྟོན་པ་ཐུབ་པའི་དབང་པོ་དང་སངས་རྒྱས་འོད་སྲུང་གི་འཕེལ་གདུང་མདོ་དབུས་རི་བོ་རྩེ་ལྔ་སོགས་ནས་
བྱུང་བ་བཅུ་ལྷག །བྱང་ཆུབ་སེམས་དཔའ་ཆོས་འཕགས་ཀྱི་ཚེམས། ཤཱ་རིའི་བུའི་ན་བཟའ། རྒྱ་གར་གྲུབ་ཆེན་དུ་མའི་གདུང་རུས་སྐུ་ཤ །ནག་པོ་སྤྱོད་པའི་རུས་རྒྱན། མ་ཅིག་གྲུབ་པའི་རྒྱལ་མོའི་ཚེམས། ཇོ་བོ་རྗེའི་སྣམ་སྦྱར་དབུ་ཞྭ། མར་པའི་བེར། རྗེ་བཙུན་མི་ལའི་སྒོམ་ཐག་ན་བཟའ། པོ་ཏོ་བའི་དབུ་ཞྭ་ན་བཟའ་གདུང་རུས། སྲས་དར་མ་མདོ་སྡེའི་ན་བཟའ། ལྷ་བླ་མ་བྱང་ཆུབ་འོད་ཀྱི་སྐུ་ཤ །ཕག་མོ་གྲུ་པའི་དབུ་ཞྭ། ཀརྨ་པ་ཀྴིའི་ན་བཟའ། ཡང་དགོན་པའི་དབུ་སྐྲ། པཎ་ཆེན་ཤཱཀྱ་ཤྲཱིའི་ན་བཟའ་སྣམ་སྦྱར། འགྲོ་མགོན་ཆོས་རྒྱལ་འཕགས་པའི་རྡོ་རྒྱུས་ཀྱི་སྒོམ་ཐག །བང་ཁེབས། བུ་སྟོན་རིན་པོ་ཆེའི་ན་བཟའ། བླ་མ་དམ་པ་བསོད་ནམས་རྒྱལ་མཚན་གྱི་སྐུ་ཆོས། ལྷོ་བྲག་གྲུབ་ཆེན་གྱི་ཚེམས་གདུང་དྲིལ། ཆོས་རྗེ་དོན་གྲུབ་རིན་པོ་ཆེའི་ཕྱག་ཕྲེང། རྗེ་རིན་པོ་ཆེའི་དབུ་སྐྲ་ན་བཟའ་སྐུ་ཆོས་སྐུ་གཟན་དབུ་ཞྭ་སྣམ་སྦྱར། རྒྱལ་བ་བློ་བཟང་དོན་གྲུབ་ཀྱི་ན་བཟའ་བཞུགས་འབོལ། མཁས་གྲུབ་སངས་རྒྱས་ཡེ་ཤེས་ཀྱི་དབུ་སྐྲ། ༸པཎ་ཆེན་བློ་བཟང་ཆོས་རྒྱན་གྱི་ཚེམས་དབུ་ལོ་དབུ་ཞྭ་སྐུ་གཟན་བཞེས་ཕྱམ། ཞྭ་ལུ་བསོད་ནམས་མཆོག་གྲུབ་ཀྱི་ན་བཟའ། ༸རྒྱལ་དབང་ལྔ་བའི་མགུལ་སྲུང་ཤངས་མཚལ། གདུང་དྲིལ་ན་བཟའ། གུ་རུ་ཆོས་དབང་གི་ཞབས་བཅག །པོ་པོ་གྲུབ་ཆེན་ཡེ་ཤེས་བཟང་གི་སྐུ་ཆོས། རིག་འཛིན་ངག་དབང་རྡོ་རྗེའི་འགན་སྦྱར། ཁྲ་ཚང་བའི་སྣམ་སྦྱར། བདུད་རྩི་ཆོས་སྨན། རྒྱལ་བ་ཚངས་དབྱངས་རྒྱ་མཚོའི་དབུ་སྐྲ་ན་བཟའ། པཎ་ཆེན་བློ་བཟང་ཡེ་ཤེས་ཀྱི་ན་བཟའ་དབུ་ལོ། རྒྱལ་བ་བསྐལ་བཟང་རྒྱ་མཚོའི་
སྐུ་གཟན་དབུ་ལོ། རྒྱལ་བ་འཇམ་དཔལ་རྒྱ་མཚོའི་དབུ་ཞྭ་ན་བཟའ་གདུང་ཚྭ། པཎ་ཆེན་དཔལ་ལྡན་ཡེ་ཤེས་ཀྱི་དབུ་སྐྲ་སྐུ་ཆོས་སྐུ་གཟན། གྲུབ་ཆེན་སྐལ་ལྡན་རྒྱ་མཚོའི་ན་བཟའ། བ་སོ་སྤྲུལ་སྐུ་ངག་དབང་ཆོས་ཀྱི་དབང་ཕྱུག་གི་སྐུ་འགག །སེ་སྟོན་རིན་ཆེན་རྒྱལ་མཚན་གྱི་སྐུ་ཤམ། བ་སོ་སྤྲུལ་སྐུ་ངག་དབང་དཀོན་མཆོག་ཉི་མའི་དབུ་ཞྭ། རྗེ་འཇམ་དབྱངས་བཞད་པའི་ན་བཟའ་ཕྱག་ཕྲེང་གསེར་འཛབ། ཀུན་མཁྱེན་འཇིགས་མེད་དབང་པོའི་ཚེམས་དབུ་ལོ་ན་བཟའ། རྡོར་ཕྲེང་མི་ཏྲ་སོགས་གནང་དུས་ཀྱི་བུམ་ཆུའི་རྒྱུན། གདུང་ཚ། ཁྲི་ཆེན་དགེ་འདུན་ཕུན་ཚོགས། ཁྲི་ཆེན་དཔལ་ལྡན་གྲགས་པ། ཁྲི་ཆེན་ངག་དབང་མཆོག་ལྡན་རྣམས་ཀྱི་ན་བཟའ་གདུང་རུས། དཔོན་སློབ་བྱམས་པ་རིན་པོ་ཆེའི་སྐུ་ཆོས། ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོའི་ཚེམས་དབུ་ལོ་ན་བཟའ། གདུང་དྲིལ། སྐུ་ལྕུག །ཀློང་རྡོལ་གྲུབ་དབང་རིན་པོ་ཆེའི་གདུང་དྲིལ་ན་བཟའ། འོན་རྒྱལ་སྲས་རིན་པོ་ཆེའི་དབུ་ལོ་གསང་ཆབ། མཆོག་སྤྲུལ་རིན་པོ་ཆེ་བློ་བཟང་འཇིགས་མེད་རྒྱ་མཚོའི་ཕྱག་ཕྲེང། སྟོང་སྐོར་རིན་པོ་ཆེའི་ན་བཟའ། ཁྲི་ཆེན་སྤྲུལ་སྐུ་འཇིགས་མེད་རིག་པའི་སེདྒེའི་ན་བཟའ་དབུ་ལོ། སྒོམ་ཆེན་བློ་བཟང་དཀོན་མཆོག་གི་དབུ་སྐྲ། བཀའ་འགྱུར་བ་འཇིགས་མེད་རབ་རྒྱས་ཀྱི་གདུང་རུས། བདེ་མཆོག་རང་བྱོན་གྱི་ན་བཟའ། སྒྲུབ་ཕུག་གི་ས། མར་པའི་བཞུགས་ཁྲི་རྡོ་ཨ་མོ་ལི་ཀའི་དུམ་བུ། རྗེའི་གསོལ་ལྷུང་ནང་གི་ནས། རྩེ་ལྔའི་དཔག་བསམ་ཤིང་གི་ཡལ་ག །སྒོ་མང་མགོན་པོའི་གཏོར་སྤུ། དགའ་ལྡན་ཆོས་རྒྱལ་གྱི་ན་བཟའ་དང་ཞལ་གྱི་ནས། སྐུ་འབུམ་ཙན་དན། ཨ་ར་པ་ཙའི་སྒྲུབ་ཕུག་གི་ས། རྒྱ་གར་རྡོ་
རྗེའི་གདན་དང་མཚོ་མ་དྲོས་པའི་བྱེ་མ། གངྒཱའི་ཆབ་རིལ། སྙེ་ཐང་ཇོ་བོའི་ཁྲིའི་ས། མ་ཕམ་གཡུ་མཚོའི་སིནྡྷུ་ར། ཙ་རི་སོགས་དབུས་གཙང་གི་གནས་ཆེན་མཐའ་དག་གི་ས་སྣ་གཞུང་གི་རྟེན་སྣ་འཛོམ་གང་ཆེའི་ཕབ་རྒྱུན། གཙང་དབུས་ཀྱི་རྟེན་བསྡུས་དང་མ་ཎི་རིལ་བུ་ཁག་མང་པོ། གཙང་དང་བྱ་ཁྱུང་ས་སྐྱ་རྣམས་ཀྱི་བདུད་རྩི་རིལ་བུ། ནཱ་ག་ཛུ་ནའི་མི་མཐུན་ཀུན་འཇོམས་སོགས་ཐོར་བུ་སྨོས་ཀྱིས་མི་ལང་ལ། ངེད་ཀྱི་རྟེན་ཞིག་དགོས་ཚུལ་ནན་ཆེ་བར་ཕྲེང་བ་ནི་ལྷའི་བསྐྱེད་ཆོག་བྱས་པ་དང་གཟུངས་སྔགས་བགྲང་བའི་རྟེན་བྱས་པ་དེ་རང་གི་ངོས་ནས་ཀྱང་ཕྱག་མཆོད་ཀྱི་རྟེན་དུ་བྱས་པ་འགལ་བ་མེད་དམ་སྙམ་སྟེ་བཞེད་པ་བཞིན་བྱས་པ་ཡིན། གཟུངས་ཀྱི་རིམ་པའང། གཟུངས་གཞུག་རྒྱས་པ་ཚར་ཉེར་གཅིག །འབྲིང་དང་བསྡུས་པ་ཚར་སྟོང་ཕྲག་རེ། དམིགས་བརྩེ་མ། རིགས་གསུམ་མགོན་པོའི་སྙིང་པོ། རྡོར་སེམས་ཡིག་བརྒྱ། དེ་བཞིན་གཤེགས་པའི་ཡིག་བརྒྱ། གསང་བདེ་འཇིགས་གསུམ་གྱི་སྙིང་པོ། གཙུག་ཏོར་འཁོར་བསྒྱུར་དང་བགེགས་མཐར་བྱེད་གཉིས་ཀྱི་སྔགས། རིག་བྱེད་མའི་སྙིང་པོ། རྟ་མགྲིན་མགོན་པོ་ཆོས་རྒྱལ། ལྷ་མོ། རྣམ་སྲས་རྣམས་ཀྱི་སྙིང་པོ། བྱམས་པས་དམ་བཅའི་གཟུངས། ཐུགས་རྗེ་ཆེན་པོའི་གཟུངས་སོགས་ཁྲི་ཕྲག་རེ་ལས་མི་ཉུང་བ། སྐྱབས་འགྲོ་ཁྲི་ཕྲག་ལྔ། གསང་འདུས་རྩ་རྒྱུད་གཅིག །མཚན་བརྗོད་གདུགས་དཀར་ཚར་མང་པོ། པོ་ཏི་ལྔའི་རྩ་བ་ཚར་རེ། ཐུགས་ཀར་ཡེ་ཤེས་སེམས་དཔའི་ཚུལ་གྱིས་རྗེ་བླ་མའི་སྐུ་བྱིན་ཅན། འོད་དཔག་མེད་ཀྱི་སྐུ་སོགས་རྗེའི་ཕྱག་ཚྭ་འགང་ཞིག་དང། ཐུབ་དབང་བྱམས་འཇམ་དབྱངས། ཀླུ་སྒྲུབ་ཐོགས་
མེད། ཇོ་བོ་རྗེ། རྗེ་རིན་པོ་ཆེ། རྡོ་རྗེ་འཆང། རྒྱལ་པོ་ཟླ་བཟང། ཨིནྟྲ་བོ་དྷི། ལཱུ་ཨི་པ། དྲིལ་བུ་པ། ལཱ་ལི་ཏ། སྐྱབས་མགོན་རིན་པོ་ཆེའི་འཁྲུངས་རབས་ཆ་ཚང། འཇིགས་བྱེད་དཔའ་གཅིག །འཇམ་དབྱངས་ཀུན་གཟིགས། འཇམ་དབྱངས་རིགས་ལྔ། དབྱངས་ཅན་མ། རིག་བྱེད་མ་རྣམས་ཀྱི་སྐུ་དྲི་བཟང་བསྒོས་པའི་ཤོག་བུ་ལ་པར་དུ་བཏབ་པ་སྟོང་ཕྲག་རེ། འཇིགས་བྱེད་ཀྱི་སྒོ་ནས་མན་ངག་ལྟར་བྲི་སྒྲུབ་བྱས་པའི་འཁོར་ལོ་བཞི། བགེགས་མཐར་བྱེད་དང་གཙུག་ཏོར་འཁོར་བསྒྱུར་གྱི་འཁོར་ལོ་གཉིས། ཁྲིའི་ནང་དུ་གཏེར་བུམ་གྱི་ཁར་བྲི་སྒྲུབ་བྱས་པའི་གནོད་སྦྱིན་དང་ཚོགས་བདག་འཁོར་ལོ། གཏེར་རྫས་རིན་པོ་ཆེའི་རིགས། འབྲུ་སྣ། གོས་དར། ཟས་སྣ་སོགས་དང། གོང་མ་ཁང་ཤི་རྒྱལ་པོའི་གདན། ཆན་ལུང་རྒྱལ་པོའི་བཞེས་འཕྲོ་ཕྱག་ནས། གོང་མའི་ཕོ་བྲང་གི་མཁར་ས་དང་ཐབ་ས། པི་ཅིང་གི་སྒོ་དགུའི་ས་སོགས་བཀྲ་ཤིས་པའི་རྫས་དང་གཡང་ཆགས་པའི་དངོས་པོ་དུ་མས་དགེ་མཚན་གྱི་གཏེར་ཆེན་པོས་བསྒྲུབས་སོ། །བདེ་གཤེགས་འཕྲིན་ལས་ཟླ་ཟེར་ཕྲ་མོས་ཀྱང། །གདུང་སེལ་བསིལ་བའི་བདེ་དགའ་མཆོག་སྦྱིན་ན། །སྐུ་གསུམ་རྟེན་གྱི་ཆ་ཤས་ཡོངས་གང་བས། །བསིལ་ཟེར་བྱེད་པ་སྙིང་གི་ཐིག་ལེ་ཡིན། །འོན་ཀྱང་ལེགས་བྱས་ཀུ་མུད་བཞད་པ་ལ། །ལོག་རྟོག་རི་བོས་སྒྲིབ་མེད་སྨོས་ཅི་འཚལ། །སོམ་ཉི་ཆུ་འཛིན་དྲ་བ་སེལ་དགོས་པས། །བློ་ལྡན་རྣམས་ཀྱིས་རང་སེམས་བྱི་དོར་གྱིས། །བཞུ་བརྟུལ་ལན་གྲངས་དུ་མར་བྱས་པའི་གསེར་སྦྱངས་ཉི་འོད་འབར་ཞིང། རྡོ་རྗེ་ཕ་ལམ། མུ་ཏིག །སུ་གནྡྷ། གཡུ་བྱི་རུ། རིན་པོ་ཆེའི་ཕྲ་ཚོམ་གྱིས་མཛེས་པར་བྱས། གདོང་ལྔས་བཏེག་པའི་ཁྲི་དང་རྒྱབ་ཡོལ་ལ་ཕ་རོལ་ཏུ་ཕྱིན་པ་དྲུག་མཚོན་པའི་ཁྲི་དྲུག་འགྱོག་
གི་བཀོད་པ་དང་མཐའ་སྐོར་དུ་པ་ཏྲའི་ལྷོངས་ལ་འཕགས་པའི་གནས་བརྟན་བཅུ་དྲུག་དགེ་བསྙེན་དྷརྨ་ཧ་ཤང། རྒྱལ་ཆེན་བཞི་སོགས་ཀྱིས་བསྐོར་ནས་བཞུགས་པ་ཐམས་ཅད་ཀྱང་རྒྱུ་དང་ཚེགས་ལ་མ་གཙིགས་པར་ཤིན་ཏུ་རུང་དངོས་དག་པར་བསྒྲུབ་པས་བཟོ་ཁྱད་ཕུལ་དུ་ཕྱིན་ཅིང་གསེར་འོད་འཁྱུག་པ་མིག་གི་བདུད་རྩི་ལྟ་བུར་བསྐྲུན་པའི་ཐོག་མཐའ་བར་གསུམ་གྱི་རྒྱུ་སོང་རགས་པ་ཕྱོགས་བསྡོམས་སུ་བྱས་པར་དངུལ་རྐྱང་སྲང་དྲུག་བརྒྱ་དང་སོ་ལྔ། དུང་ཙེ་ཁྲོན་ཉིས་སྟོང་བཞི་བཅུ་ཞེ་གཅིག་དང་ལྔ་བརྒྱ་བཅས་སོང། སྒྱུ་མའི་ནོར་རྫས་ཀྱིས་ཕུང་བོ་བསོད་ནམས་མི་ཟད་པའི་གཏེར་དུ་བསྒྲུབས་པ་ཡིན་ཏེ། རྒྱལ་བའི་སྐུ་གཟུགས་བཞེངས་པའི་ཕན་ཡོན་ནི། སྤྱན་རས་གཟིགས་ཀྱི་མདོ་ལས། འདྲེན་པའི་སྐུ་གཟུགས་རབ་ཏུ་མཛེས་བྱས་ན། །དེ་ནི་མཆོག་གྱུར་སྐྱེས་བུ་མང་མཆོད་འོས། །བློ་ལྡན་ཕྱུག་ཅིང་ཆེ་ཉིད་རྒྱ་ཆེན་ལྡན། །དབང་ལྡན་འཁོར་ལོས་བསྒྱུར་བའི་རྒྱལ་པོར་འགྱུར། །ཞེས་གནས་སྐབས་མངོན་མཐོའི་དཔལ་འབྱོར་ཕུན་སུམ་ཚོགས་པ་དང། ཏིང་ངེ་འཛིན་རྒྱལ་པོ་ལས། འཇིམ་པ་དང་ནི་དེ་བཞིན་རྡོ་བ་དང། །ཤིང་དང་རི་མོར་བྲིས་པའི་སྐུ་གཟུགས་དག །ཤིན་ཏུ་མཛེས་ཤིང་བལྟ་ན་སྡུག་པར་བགྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །ཅེས་དང། པད་དཀར་ལས། གང་གིས་རྩིག་ངོས་གཟུགས་ཀྱི་རི་མོ་དག །བསོད་ནམས་རྒྱལ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འདྲི་རུ་བཅུག་ཀྱང་རུང། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་ངེས་ལེགས་བྱང་ཆུབ་ཀྱི་གོ་འཕང་ངེས་པར་ཐོབ་པ་སོགས་ཕན་ཡོན་བསམ་གྱིས་མི་ཁྱབ་པར་གསུངས་ལ། དེའི་རྒྱུ་མཚན་ཡང་སྤྱན་རས་གཟིགས་
ཀྱི་མདོ་ལས། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སངས་རྒྱས་ཀྱི་ཆོས་ཐམས་ཅད་ཚད་མེད་པ་དེ་བཞིན་དུ། དེ་བཞིན་གཤེགས་པ་ལ་ཡོན་ཕུལ་བའང་ཚད་མེད་དོ། །མཐའ་ཡས་སོ། །བསམ་གྱིས་མི་ཁྱབ་བོ། །མཚུངས་པ་མེད་དོ། །དཔག་ཏུ་མེད་དོ། །གྲངས་མེད་དོ། །ཞེས་ཞིང་གི་མཐུ་ཡིན་པར་གསུངས་སོ། །འདིར་ཕན་ཡོན་ཟུར་ཙམ་སྨོས་པ་ཡིན་པས་ཞིབ་ཏུ་མདོ་སྡེ་དང། དེ་ལས་བཀོལ་བ་རྗེ་བདག་ཉིད་ཆེན་པོ། ཀུན་མཁྱེན་འཇིགས་མེད་དབང་པོ་རྣམས་ཀྱི་གསུང་འབུམ་དུ་བཞུགས་པ་དང། དེ་དག་ལས་རགས་རིམ་ཙམ་ཁོ་བོས་མཆོད་རྟེན་མཐོང་གྲོལ་ཆེན་མོའི་དཀར་ཆག་ཏུ་བསྡེབས་པ་རྣམས་ལས་ཤེས་པར་བྱའོ། །སླར་ཡང་དགེ་བ་གོང་ནས་གོང་དུ་སྤེལ་ཏེ་བྱང་ཆུབ་མཆོག་གི་རྒྱུར་བསྔོ་བས་རྒྱས་གདབ་པ་ནི། སིདྡྷྱ་ནྟུ། འདིར་འབད་ལས་བྱུང་བསོད་ནམས་འཛམ་བུའི་འབྲས། །བདེ་གཤེགས་ཐུགས་རྗེ་མ་དྲོས་མཚོར་སྨིན་པས། །དོན་གཉིས་ཕུན་ཚོགས་རང་འོད་འབར་བའི་གཟིས། །ས་གསུམ་རྒུད་པའི་མུན་པ་འཕྲོག་གྱུར་ཅིག །རྣམ་སྨིན་ཡོན་ཏན་རི་དྭགས་མཚན་མ་ཅན། །དལ་འབྱོར་ཆ་ཤས་ཡོངས་གང་ཟླ་བའི་ཕྲེང། །ཆད་མེད་མངོན་མཐོ་དགེ་བའི་འོད་དཀར་གྱིས། །ངེས་ལེགས་ཀུན་དའི་སྙེ་མ་འཛུམ་གྱུར་ཅིག །བསམ་སྦྱོར་རྣམ་དག་མཐོན་མཐིང་ཟུར་ཕུད་ལ། །ཐེག་མཆོག་བཤེས་གཉེན་ནོར་བུའི་ཅོད་པན་དང། །རྣ་བར་འབྲལ་མེད་ལེགས་བཤད་འཁྱིལ་བའི་རྒྱན། །རྣམ་དཔྱོད་ལང་ཚོའི་དཔྱིད་དུ་འབར་གྱུར་ཅིག །ཞེན་ལོག་འཁྱག་པས་བཅད་པའི་སྲིད་པའི་མཚོར། །སྲེད་པའི་འདྲེན་བྱེད་ཆ་ཙམ་མི་གཡོ་ཞིང། །བསླབ་གསུམ་གཤོག་རླབས་གཡོ་བའི་ཐར་འདོད་
ཀྱི། །ངང་མོ་ཞི་བའི་རྒྱ་མཚོར་འཇུག་གྱུར་ཅིག །ཕ་རོལ་ཕྱིན་དྲུག་རིན་ཆེན་ཁམས་ལས་གྲུབ། །བསྡུ་བ་རྣམ་བཞིའི་བང་རིམ་མངོན་པར་མཐོ། །བྱང་ཆུབ་སེམས་གཉིས་ཉི་ཟླའི་སྣང་བ་ཅན། །ཐེག་མཆོག་ལྷུན་པོའི་རྩེ་མོར་འཛེག་གྱུར་ཅིག །བློ་བཟང་ཐུབ་དབང་གཉིས་པའི་མདོ་སྔགས་བསྟན། །འཛིན་སྐྱོང་སྤེལ་ལ་འཇིགས་བྲལ་སྐྱེས་མཆོག་རྣམས། །ཞབས་པད་བརྟན་ཅིང་མཛད་འཕྲིན་གེགས་མེད་དུ། །རྒྱས་པས་རྒྱ་མཚོའི་གོས་ཅན་ཁྱབ་གྱུར་ཅིག །ལྟོས་བཅས་འབྲེལ་བ་ཐོགས་པ་རྣམས་ཀྱིས་མཚོན། །ནམ་མཁའི་མཐས་གཏུགས་མར་གྱུར་འགྲོ་བ་ཀུན། །བསྟན་ལ་ཐོས་བསམ་སྒོམ་པས་རབ་ཞུགས་ཏེ། །ཡང་དག་ལམ་བཟང་བདེ་བླག་བགྲོད་གྱུར་ཅིག །ལྗོངས་འདིར་ནད་མུག་འཁྲུག་བྲལ་བདེ་འབྱོར་རྒྱས། །སྡེ་འདིར་མདོ་སྔགས་ཆོས་སྲིད་བཤད་སྒྲུབ་འཕེལ། །རྟེན་འདིར་གཏན་གྱི་མདུན་མ་འགྲུབ་པ་སོགས། །དེང་འདིར་སྨོན་པའི་གནས་ཀུན་འགྲུབ་གྱུར་ཅིག །དགེ་བའི་གྲུ་གཟིངས་སྨོན་པའི་བ་དན་ཅན། །མཆོག་གསུམ་ཐུགས་རྗེ་མཐུན་པའི་དྲི་བཞོན་གྱིས། །བསྐྱོད་ནས་ཕྲ་རགས་སྲིད་མཚོའི་ཕ་རོལ་ཏུ། །ཕྱིན་ཏེ་མཁའ་མཉམ་འགྲོ་ཀུན་འདྲེན་གྱུར་ཅིག །ཅེས་པ་འདི་ནི་མཁྱེན་རབ་ཀྱི་དབང་ཕྱུག་ཁྲི་ཟུར་དཀོན་མཆོག་སེངྒེས་ཇོ་བོ་རིན་པོ་ཆེའི་སྐུ་བརྙན་ཁྱད་འཕགས་གསར་བསྐྲུན་གནང་སྟེ་དེ་ལ་དཀར་ཆག་སྨོན་ཚིག་དང་བཅས་པ་ཞིག་དགོས་ཚུལ་གྱི་བསྐུལ་མ་མཛད་པ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའོ།། །།