རྗེ་བསྟན་པའི་སྒྲོན་མེའི་རྣམ་ཐར་དད་པའི་པདྨོ་བཞད་པའི་ཉིན་བྱེད།
ཤྲདྡྷཀམལཧསསྱཨྲཧསྐརཎཱམགུརུམཉྫུགྷོཥབྷཊྚརཀརཏྣཤཱསནདཱིཔཾབིམོཀྵབཙནཀཐཱབིཧརཏིསྨ། །
འཇམ་དབྱངས་བླ་མ་རྗེ་བཙུན་དཀོན་མཆོག་བསྟན་པའི་སྒྲོན་མེའི་རྣམ་པར་ཐར་པ་བརྗོད་པའི་གཏམ་དད་པའི་པདྨོ་བཞད་པའི་ཉིན་བྱེད་ཅེས་བྱ་བ་བཞུགས་སོ། །
ཨོཾསྭསྟིགུརྦནཱལམྦྷདཱཡསྱམཧྱཱནིདྷིཿ ཤཱརཎསྠཱསམཱུཧཿ ཡཏེནཔྲྀཡཾ། །
ཨོཾ་སྭ་སྟི། དམིགས་མེད་ཐུགས་རྗེའི་གཏེར་ཆེན་བླ་མ་རྗེ། །སྐྱབས་གནས་ཀུན་འདུས་གང་དེས་དགྱེས་བཞིན་དུ། །
མཉྫོརྒྷོཥཤིརཽགུརུཿ ཧྲྀ དེ། ཨཱུཧཱངྷྱེཥཎཛིཧྭགྷོཥབཱཾ།
སྤྱི་བོར་བླ་མ་སྙིང་ལ་འཇམ་པའི་དབྱངས། །ལྕེ་ལ་དབྱངས་ཅན་བཀོད་དེ་གསོལ་འདེབས་ན། །
པྲཱསམཱ ནྱཱ྅བིཡོགཱནུངྷརྶིདྡྷཡཿ བྲྀཥྚིཛཱཏུཿ ནིརབྷོགསརྦཥྚཡོཿ
འབྲལ་མེད་རྗེས་བཟུང་མཆོག་ཐུན་དངོས་གྲུབ་ཀུན། །ནམ་ཡང་ལྷུན་གྲུབ་འདོད་དགུའི་ཆར་དུ་བསྙིལ། །
བཱཀྤུཥྤཱདྦྷཥབཱདབཻཀཊ། གཱཿ བཻམུཀྟིམདྷོཿ ཏུཥངྐེུརུཿ
འཆད་རྩོད་རྩོམ་པའི་ངག་གི་མེ་ཏོག་ལས། །འགྲོ་ཀུན་རྣམ་གྲོལ་སྦྲང་རྩིས་ཚིམ་པར་མཛོད། །
པད་དཀར་ལྟར་བསྔགས་ཐུགས་བསྐྱེད་ཁམས་ལས་བསོད་ནམས་ཡེ་ཤེས་ཚོགས་གཉིས་རྡུལ་བརྩེགས་སྐུ་བཞིའི་ལྷུན་པོ་ཤཱཀྱའི་ཏོག །མི་ཕམ་འཇམ་དབྱངས་གཏད་རབས་བདུན་དང་ཤིང་རྟ་ཆེ་སོགས་ལུང་རྟོགས་འོད་འབར་འཕགས་ཡུལ་པཎ་གྲུབ་གསེར་རིའི་ཚོགས། །གངས་ཅན་ཕན་བདེའི་རོལ་མཚོ་ཆོས་རྒྱལ་ལོ་པཎ་ལྔ་བརྒྱའི་གཙུག་རྒྱན་ཇོ་འབྲོམ་ཡབ་སྲས་རྣམ་དག་བཀའ་གདམས་བརྒྱུད། །རྒྱལ་བ་གཉིས་པར་སྟོན་པས་ཆེར་བསྔགས་ཉིན་བྱེད་དཔལ་བཅས་བདག་སྙིང་འདབ་བརྒྱའི་དབུས་བཞུགས་སྨིན་གྲོལ་མཆོག་སྩོལ་ཅིག །དུས་ཀྱི་རིམ་པས་བྱང་ནས་བྱང་དུ་རྒྱལ་བསྟན་སྣང་བས་ས་ཀུན་ཁྱབ་མཛད་གངས་ཅན་མགོན་པོ་རྒྱལ་དབང་ཡབ་སྲས་འཕྲེང༌། །ས་བཅུའི་མཐར་སོན་དྲི་མེད་གྲགས་སོགས་མཁས་དང་གྲུབ་པའི་གར་གྱིས་རིམ་བྱོན་ཀུན་མཁྱེན་བླ་མ་འཇམ་དབྱངས་བཞད་པའི་སྡེ། །ཐུབ་བསྟན་སྤེལ་ལ་ཐུབ་པའི་ཉི་མ་སླར་ཡང་བྱོན་པའི་རྗེས་འགྲོ་དངོས་བརྒྱུད་ཡོངས་འཛིན་ཚད་མའི་སྐྱེས་མཆོག་ཟླ་མེད་རྣམས། །ཚར་དུ་དངར་བཞིན་དང་བའི་ཡིད་མཚོར་གསལ་བར་བཀོད་དེ་ལག་པའི་པདྨོ་མགོ་ལྕོག་ལྡེམ་པས་ལན་བརྒྱར་ཕྱག་བགྱིད་དོ། །མཁྱེན་པའི་ཡེ་ཤེས་འཇམ་དབྱངས་གཞོན་ནུ་བཞིན། །མཐུ་ནུས་བརྩེ་བའི་མཛད་འཕྲིན་ཞི་དུལ་སོགས། །སྟོན་པའི་མཆོག་ཟུང་ཉེ་སྲས་ཀུན་འདུས་པའི། །དཔེར་འོས་བླ་མ་མཆོག་དེས་འབྲལ་མེད་སྐྱོངས། །ཚུལ་ཁྲིམས་རྣམ་དག་འདུལ་བ་ལ་མཁས་གནས་པར་ཕན་འདོགས་འཁོར་ནི་ཡོངས་སུ་དག །སྙིང་བརྩེ་དང་
ལྡན་དུས་སུ་འདོམས་སོགས་སོ་ཐར་ལས་བསྔགས་ཡོན་ཏན་རྒྱ་མཚོའི་མཛོད། །ཞི་དུལ་ཉེར་ཞི་བརྩེ་དང་བརྩོན་བཅས་ལུང་དང་དེ་ཉིད་ལ་མཁས་སྐྱོ་ངལ་སྤངས། །དེ་ཉིད་བཅུ་ཟུང་བྲི་དང་འཆད་མཁས་མཚན་ཉིད་ཀུན་ལྡན་ཟླ་མེད་ཡོངས་འཛིན་ཁྱོད། །དཀོན་མཆོག་ཀུན་དངོས་འཇིགས་མེད་དབང་པོའི་སྡེས། །བཤད་སྒྲུབ་བསྟན་པའི་བདག་པོར་དབང་བསྐུར་བཞིན། །ལུང་རྟོགས་ཉི་ཟླ་ཟུང་གི་སྒྲོན་མེ་ཡིས། །སྐྱེ་དགུའི་རྨོངས་མུན་སེལ་བ་འདི་རྨད་བྱུང༌། །གང་གི་རྣམ་ཐར་རྒྱ་མཚོ་ལྟ་བུ་ལས། །སྐྲ་རྩེས་བླངས་པའི་ཆ་ཙམ་བརྗོད་ཟིན་ཀྱང༌། །རྒྱལ་བའི་ཉི་མ་གཞན་གྱིས་སྤངས་པ་ཡི། །མགོན་སྐྱབས་བྲལ་བའི་སྙིགས་དུས་སྨག་རུམ་འདིར། །སངས་རྒྱས་གྲངས་མེད་བྱོན་ཀྱང་མ་ཐུལ་བའི། །དམུ་རྒོད་འགྲོ་རྣམས་བྱམས་བརྩེའི་མཐུ་ཆེན་པོས། །རྗེས་བཟུང་བཀའ་དྲིན་ཆ་རེའི་ཕྲ་རྡུལ་ཙམ། །བསྐལ་པར་མཆོད་ཀྱང་ཇི་ལྟར་གཞལ་བར་ནུས། །དེ་སླད་བདེ་གཤེགས་ལམ་བཟང་གསལ་ཕྱིར་དང༌། །རང་གཞན་དད་པ་སྤེལ་བར་བྱ་བ་དང༌། །ཆོས་དང་ལྡན་པའི་གཏམ་གྱིས་མགུ་ཕྱིར་དུ། །གསར་པའི་གཏམ་འགའ་འགོད་ལའང་སྤྲོ་བ་སྐྱེ། །ངན་སྤྱོད་རྒྱན་དུ་ངོམས་ལ་སྤོབས་པ་མཐོ། །བླང་དོར་འབྱེད་ལ་རྣམ་དཔྱོད་གོམ་འགྲོས་རྟུལ། །འདི་སྣང་བླུན་གཏམ་ང་རོ་ཆེར་སྒྲོགས་པར། །རང་རིགས་རྨོངས་པས་བཀུར་ལ་མཚར་དུ་ཅི། །ཟང་ཟིང་ཡལ་འདབ་ལང་ལོང་རྣམ་པར་རྒྱས། །དམ་པའི་མཚན་སྙན་མརྒད་ཚོན་བཟང་གིས། །
མངོན་པར་བཀྲ་ཡང་སྙིང་པོས་དབེན་པ་ལ། །ཐར་འདོད་ངང་པའི་བུ་མོ་ཆགས་བྲལ་འཛིན། །སྒྲ་སྙན་སྡེབ་སྦྱོར་དྲི་ཟའི་དབྱངས་སྙན་པོར། །བསྒྲགས་པས་གཞན་ཡིད་འགུགས་པར་མ་ནུས་ཀྱང༌། །མཉན་འོས་དོན་བཟང་གཟུར་གནས་བདེན་གཏམ་གྱིས། །སྐུ་བཞིའི་ཁམས་ཀྱི་ས་བོན་ཅིས་མི་སྤེལ། །ངོ་མཚར་ཡོན་ཏན་གསལ་བྱེད་སྒྲོན་མེ་དང༌། །བློ་སྣ་ཆོས་ལ་འགུགས་པའི་ལྕགས་ཀྱུ་སྟེ། །ལོག་ལམ་འཕྱན་པ་རྣམས་ལ་དེད་དཔོན་མཆོག །དམ་པའི་རྣམ་ཐར་གཏམ་ལས་གཞན་ཡོད་མིན། །ཆ་ཤས་རེས་ཀྱང་རེ་བ་ཀུན་སྐོང་ཞིང༌། །ལམ་འབྲས་ཡོངས་སུ་རྫོགས་པའི་ནོར་བུའི་མཛོད། །འདྲེན་བྱེད་རྣམ་ཐར་གཏམ་གྱི་གྲུ་བོ་ཆེར། །འཇུག་ལ་མི་སྤྲོ་བློ་ལྡན་སུ་ཞིག་ཡོད། །འཁོར་ལོ་བཞི་ལྡན་ལྗོན་ཤིང་བཟང་པོ་ལ། །ལེགས་བྱས་ཡལ་འདབ་རྣམ་པར་རྒྱས་པའི་རྩེར། །དད་པའི་མེ་ཏོག་བྱང་ཆུབ་སྙིང་པོ་ཅན། །བཞད་པའི་དགའ་སྟོན་དང་དུ་བླངས་པར་རིགས། །དེ་ཡང་དལ་འབྱོར་གྱི་རྟེན་ཁྱད་པར་ཅན་ཐོབ་པའི་དུས་འདིར་སྙིང་པོ་ཞིག་ལེན་དགོས་ལ། དེ་ཡང་མཚན་ཉིད་དང་ལྡན་པའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་པ་ལ་རག་ལས་པས་ན་ཐེག་པ་མཆོག་གི་བཤེས་གཉེན་གྱི་ཡོན་ཏན་དྲན་ནས་དད་པ་བསྐྱེད་པ་ནི་རང་དང་གཞན་གྱི་ཕན་བདེའི་གཞི་རྩ་རྨད་དུ་བྱུང་བ་ཡིན་ནོ། །དེའི་ཕྱིར་བདག་ཅག་གི་དཔལ་ལྡན་བླ་མ་དམ་པ་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་ཀྱང་ཁེངས་པ་དང་དྲེགས་པ་སོགས་ཀྱི་དྲི་མ་ཅུང་ཟད་ཙམ་ཡང་མི་མངའ་བར། འགྲོ་བ་རྣམས་བུ་གཅིག་པ་ལྟར་གཟིགས་པའི་སྙིང་རྗེའི་ཤུགས་ཀྱིས་བསྟན་པ་རིན་པོ་ཆེ་ལ་གཅིག་ཏུ་དགོངས་ཏེ་རྒྱལ་བའི་བཅས་མཚམས་ཕྲ་མོ་ལས་ཀྱང་ཅུང་ཟད་ཙམ་ཡང་མི་འདའ་ཞིང་མདོ་དང་
སྔགས་ཀྱིས་བསྡུས་པའི་གསུང་རབ་མཐའ་དག་གདམས་པར་ཤར་ཏེ་བཤད་སྒྲུབ་གཉིས་ཀྱི་སྒོ་ནས་བསྟན་པ་ཐམས་ཅད་གྲུ་བཞི་ལམ་གྱིས་འཁྱེར་བའི་རྒྱལ་བའི་རིང་ལུགས་པ་ཆེན་པོ། མཁས་གྲུབ་ཡོངས་ཀྱི་གཙུག་རྒྱན་དམ་པ་རྗེ་བཙུན་ཆོས་ཀྱི་རྒྱལ་པོ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་བརྩམས་ཏེ་གཏམ་དུ་གླེང་བར་བྱ་བ་ལ། དེ་ཡང་སྤྱིར་རྒྱལ་བ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་མ་ལུས་པ་གཅིག་ཏུ་འདུས་པའི་ངོ་བོ། སྟོན་པ་རྡོ་རྗེ་འཆང་དང༌། གསང་བ་ཐམས་ཅད་ཀྱི་བདག་པོ་འཕགས་པ་ལག་ན་རྡོ་རྗེའི་སྤྲུལ་བའི་རྣམ་རོལ་རྒྱ་གར་འཕགས་པའི་ཡུལ་དུ་ཏེ་ལོ་ནཱ་རོ་སོགས་དང༌། བོད་ཁ་བ་ཅན་གྱི་ལྗོངས་སུ་འཇམ་མགོན་རྒྱལ་བ་གཉིས་པ་ཤར་ཙོང་ཁ་པ་ཆེན་པོ་དང༌། གསང་ཆེན་བསྟན་པའི་མངའ་བདག་རྗེ་བཙུན་ཤེས་རབ་སེངྒེ་སོགས་འཆད་པ་པོ་དང་ཉན་པ་པོ་གཅིག་ལས་དུ་མར་ཤར་བའི་སྒྱུ་འཕྲུལ་གྱི་བཀོད་པ་ཇོ་འབྲོམ་ཡབ་སྲས་ཀྱི་རྣམ་པར་ཐར་པ་དང་མཚུངས་པའི་ལོ་རྒྱུས་དུ་མ་ཡོད་པར་མ་ཟད། སྐུ་ཚེ་འདི་ཉིད་ཀྱི་དབང་དུ་བྱས་ན་ཡང༌། སྒྲོན་གསལ་ལས། ཚུལ་ཁྲིམས་དག་ཅིང་མཁས་ལ་སྒྲིན། །ཤེས་རབ་ལྡན་ཞིང་རྒྱུད་གཅིག་པ། །ཐོས་ནས་ལེགས་པར་སྟོན་པ་ནི། །རིན་ཆེན་ཞེས་བྱའི་གང་ཟག་གོ །ཞེས་གསུངས་པ་ལྟར། རིན་པོ་ཆེ་ལྟ་བུའི་གང་ཟག་གི་དད་བརྩོན་རྣམ་དཔྱོད་སོགས་རྨད་དུ་བྱུང་བའི་རྒྱུ་རྐྱེན་གྲངས་ཚང་བའི་སྟོབས་ཀྱིས། གོ་འཕང་མཐར་ཐུག་པའི་དགའ་སྟོན་མངོན་དུ་མཛད་པའི་ཚུལ་ལས་བརྩམས་ཏེ་ལུང་དང་རིགས་པས་གྲུབ་པའི་གཏན་ཚིགས་དུ་མ་བརྗོད་དུ་ཡོད་མོད་ཀྱང༌། ཐུན་མོང་གི་སྣང་བ་དང་འཚམས་
པ་དོན་གྱི་སྙིང་པོ་བྱསཏེ་ཅུང་ཟད་ཙམ་ཞིག་བྲི་བར་བྱའོ། །དེ་ཡང་ཕྱོགས་བཅུའི་ཞིང་དུ་བྱང་ཆུབ་སེམས་དཔའ་ཆེན་པོ་རྣམས་སྙིང་རྗེའི་དབང་གིས་སྲིད་པའི་ཟློས་གར་སྣ་ཚོགས་པ་འཛིན་པ་ལ་དེ་དང་མཐུན་པའི་ངོ་མཚར་གྱི་གཏམ་དཔག་མེད་ཡོད་པ་ལས་བདག་ཉིད་ཆེན་པོ་འདི་ཉིད་གང་དུ་སྐུ་འཁྲུངས་པའི་ཡུལ་ནི་སྔོན་གྱི་ལྷ་བཙད་པོ་དག་གི་དུས་སུ་རྒྱ་བོད་ཀྱི་ས་མཚམས་ཕྱེ་སྟེ་རྡོ་རིང་མང་པོ་བཙུགས་པར་བཤད་པའི་རྡོ་རིང་འགའ་དང་ཉེ་ཞིང་མདོ་སྨད་ཀྱི་ཤར་ལྷོར་གཏོགས་པ་མཛོད་དགེ་སྨད་དུ་གྲགས་པའི་སའི་ཆ་ཡིན་ལ། ཆོས་རྒྱལ་སྲོང་བཙན་སྒམ་པོ་སོགས་ཀྱི་དུས་མདོ་སྨད་རྟའི་ཆོལ་ཁར་གྲགས་པ་ལ་ཁྲི་སྲོང་སྡེ་བཙན་གྱིས་བྷ་ཏ་ཧོར་གྱི་སྒོམ་གྲྭ་བཅོམ་ཚེ་བོད་ཀྱི་རུས་ཆེན་རྣམས་ལས་ཁྲལ་བསྡུས་ཏེ་ཡུལ་གྲུ་རྒྱ་ཆེ་ཞིང་བཙན་པར་བྱས། འགྲོ་མགོན་ཆོས་རྒྱལ་འཕགས་པའི་དུས་སུ་ཧོར་གོང་མ་སེ་ཆེན་ཧན་གྱིས་མནྫིའི་རྒྱལ་ཁབ་བླངས་པའི་སྡིག་བཤགས་སུ་དགོན་སྡེ་བརྒྱ་རྩ་བརྒྱད་བཏབ་ཅིང༌། ཇུ་ཞག་བསྒྲིགས་པར་བཤད་པ་ལས་འཁྲུངས་ཡུལ་འདི་ནི་ཇུ་ཞག་གི་ནང་ཚན། ཀ་ཇུ། ཐོའུ་ཇུ་གཉིས་ཀྱི་བར་མཚམས་རྒྱ་དང་ཐག་ཉེ་བའི་ཡུལ་ཡིན་ནོ། །ཁྲི་སྲོང་གིས་མཛོད་པའམ་ཕྱག་མཛོད་དགའ་ཡེ་ཤེས་དར་རྒྱས་བོད་ཀྱི་ཁ་འཛིན་ལ་གླིང་ཡུལ་དུ་མངགས་པ་དགེ་སློང་གི་ཆ་བྱད་དུ་ཡོད་པས་མཛོད་དགེར་གྲགས་ཤིང༌། དེ་ལས་འཕེལ་བའི་མི་བརྒྱུད་ཤིས་ཞིན་གྱི་ནང་ཚན་ཞིག་རིམ་གྱིས་ཡུལ་འཕོས་ནས་ཕྱོགས་འདིར་ཆད་དེ་རྒྱ་དང་ཉེ་བའི་སར་བསྡད་པས་མཛོད་དགེ་ཤིས་ཞིན་དུ་ཐོགས། རིམ་གྱིས་བོད་ཀྱི་ས་ཆར་འཕགས་ཏེ་ནགས་ཚལ་གྱི་མདོག་གིས་ས་གཞི་ནག་པོར་སྣང་བའི་ཡུལ་དུ་བསྡད་པས་སམ་སྤྱོད་ལམ་གྱི་དབང་གིས་ཧར་ཤིས་ཞིན་དུ་
གྲགས། གཟུངས་ཐར་བུ་ལྔར་གྲགས་པ་ལས་མཛོད་དགེ་ཤོག་ལྔར་གྱེས་ཤིང༌། འདི་ཀའི་དབོན་ཤེས་རབ་སེངྒེ་ཞེས་པ་དུག་ནད་སྦྱོང་ཕྱིར་ཀུན་མཁྱེན་གོང་མ་མཇལ་བར་གཏེར་ལུང་དུ་ཕྱིན། གཏེར་ཐོན་པ་དང་མཉམ་དུ་མཇལ་བས་ཀུན་མཁྱེན་རིན་པོ་ཆེ་ཐུགས་དགྱེས་ཤིང་བུམ་ཆུ་སྩལ་བ་ཙམ་གྱིས་བདེ་བའི་དགའ་སྟོན་ཐོབ། རང་ཡུལ་གྱི་གཞི་བདག་གི་བསང་མཆོད་ཞུས་པའི་ནང་དུ་མི་རྣམས་ཆོས་ལ་དཀར་བ་དང༌། བསླབ་གསུམ་འཛིན་པའི་དགེ་འདུན་གྱི་སྡེ་འཕེལ་བ་སོགས་ཀྱི་འཕྲིན་བཅོལ་མཛད་འདུག་པ་དགོངས་གཞི་ཅན་དུ་སྣང༌། གསུང་དེ་ལ་བརྟག་ན་དུས་དེར་མཛོད་དགེ་མར་ཁུ་ཐང་དུ་གྲགས་པའི་ཡུལ་ཕྱོགས་འདི་སྡེ་དཔོན་དེས་བཟུང་ཡོད་པར་མངོན། སྡེ་དཔོན་དེ་ལ་མངའ་རིས་མང་ཙམ་ཡོད་པ་ལས། རྗེ་ཉིད་ཀྱི་གདུང་རུས་ནི། ཆོས་རྒྱལ་ཁྲི་སྲོང་སྡེ་བཙན་གྱི་དུས། དེ་ཕུད་གཡག་ཁུར་དུ་གྲགས་པ་རྒྱའི་ཁ་གནོན་དུ་བཞག་སྟེ་མཐེབ་ཇུ་བྲག་དཀར་གཉན་གྱི་ཕོ་བྲང་དུ་ས་མཁར་བཟུང་ནས་བསྡད་པའི་ལྷོ་ཕྱོགས་ཐེ་བོ་སྟོད་སྨད་གཉིས་སུ་གྲགས་པ་ལས་ཐེ་བོ་སྟོད་མ་ཞེས་པ་རི་བྲག་གི་ས་ཆར་གནས་ཤིང་དཔའ་རྩལ་ངོམས་པའི་དུད་ཁྲི་ཕྲག་བརྒལ་བའི་ཡུལ་གྲུ་དེ་ལས་འབྲོང་པ་ཞེས་པ་ཆད་ནས་ཕྱོགས་འདིར་འབྲོག་གཞི་བཟུང་བ་ལ་ཡུལ་ཕྱོགས་ཀྱི་མིང་གིས་འབྲིང་པ་དང༌། ཐེ་བོ་སོགས་ཀྱི་སྡེ་ཚན་མང་ཞིང་ཨ་ཡོན་བུ་ལྔར་གྲགས་པའི་ནང་ནས་ཨ་རོལ་གྱི་བརྒྱུད་པ་ཐེ་བོ་ལྕགས་པོ་བྱམས་ཞེས་བྱ་བ་དཔའ་ཞིང་སྙིང་སྟོབས་ཆེ་བ་དེ་ཉིད་རྗེ་འདིའི་ཡབ་ཡིན་ལ། ཡུམ་ནི་བོ་ཆོག་ཅེས་བྱ་བ་རང་བཞིན་བཟང་ཞིང་ཆོས་ལ་དད་པ། བསོད་ནམས་ཀྱི་དཔལ་དང་ལྡན་ཞིང་ཡོན་ཏན་དུ་མས་
མཛེས་པ་ཞིག་གོ །དེ་ཡང་མངོན་རྟོགས་རྒྱན་ལས། རིགས་དང་རུས་དང་ཆོ་འབྲང་དང༌། །ཞེས་པའི་ཐད་ཀྱི་མདོ་ལས། དེ་ལ་བྱང་ཆེན་གྱི་རིགས་ཕུན་སུམ་ཚོགས་པ་གང་ཞེ་ན། བྱང་ཆེན་རིགས་མཐོན་པོ་དག་ཏུ་སྐྱེ་བ་སྟེ། དེ་ནི་བྱང་ཆེན་གྱི་རིགས་ཕུན་ཚོགས་ཡིན་ནོ། །རུས་ཕུན་སུམ་ཚོགས་པ་གང་ཞེ་ན། རིགས་གང་ལས་སྔོན་གྱི་བྱང་ཆེན་དག་བྱུང་བ་སྟེ། དེ་ནི་རུས་ཕུན་ཚོགས་ཡིན་ནོ། །ཞེས་པའི་རྒྱུད་ལས་བྱུང་བ་ནི་རིགས་དང༌། དེར་བྱང་སེམས་གཞན་འཁྲུངས་པའི་ཆ་ནས་རུས་ཕུན་ཚོགས་སུ་བཤད་པས་ཕྱོགས་འདིར་མཛོད་དགེ་རི་ཁྲོད་པ་རྗེ་མཁས་གྲུབ་བསྟན་འཛིན་སོགས་འདུལ་འཛིན་དང་མཁས་གྲུབ་ཆེན་པོ་དུ་མ་དང༌། བཀྲ་ཤིས་འཁྱིལ་ཁྲི་ཆེན་དཀོན་མཆོག་བདེ་ཆེན་པ་སོགས་དམ་པའི་ཡང་སྤྲུལ་བཞི་བཅུ་སྐོར་བྱུང་བར་རྗེ་ཉིད་ཀྱི་ཞལ་ནས་ཐོས་ཤིང༌། དེའི་ཕྱིས་སུ་ཡང་བཅུ་ཕྲག་བརྒལ་བ་བྱུང་བས་དེས་ན་བྱང་ས་ལས། མདོར་བསྡུས་ན་རྣམ་པར་སྨིན་པ་བརྒྱད་དེ་ཚེ་དང་ཁ་དོག་དང་རིགས་ཕུན་སུམ་ཚོགས་པ་དང༌། ཞེས་སོགས་རེ་རེའི་ཡོན་ཏན་སྦྱར་ན་ལེགས་ཀྱང་མང་བས་འཇིགས་ནས་སྐབས་དོན་ལ་འཇུག་སྟེ། དེ་ལྟ་བུའི་ཡབ་ཡུམ་གཉིས་ཀྱི་སྲས་སུ་རབ་བྱུང་བཅུ་གསུམ་པའི་ཆུ་རྟ་ཟླ་བ་གཉིས་པའི་ཚེས་བཅོ་བརྒྱད་ཀྱི་སྔ་དྲོ་ཉི་མ་རྩེ་ཤར་ལ་སྐུ་བལྟམས། དེ་མ་ཐག་ཙོག་པུར་བཞུགས་པ་དང༌། ཉིན་དེར་ཨ་མ་ཞེས་ལན་གསུམ་འབོད་པ་གནང་བས་ཀུན་ངོ་མཚར་དུ་གྱུར། དེ་ཡང་སྟོན་པ་མྱ་ངན་ལས་འདས་ནས་ལོ་ཉིས་སྟོང་བཞི་བརྒྱ་གྱ་གསུམ་དང༌། རྗེ་བདག་ཉིད་ཆེན་པོ་འདས་ནས་ཉིས་བརྒྱ་གོ་གཅིག་པ་རབ་བྱུང་བཅུ་གཅིག་པའི་ས་བྱི་ལ་ཀུན་མཁྱེན་གོང་མ་སྐུ་འཁྲུངས་ཤིང་རབ་བྱུང་བཅུ་གཉིས་པའི་ལྕགས་
གླང་ལ་སྐུ་འདས། དེ་ནས་བརྩིས་པའི་ལོ་ཞེ་ལྔ་ཀུན་མཁྱེན་སྐུ་འཕྲེང་གཉིས་པའི་དགུང་ལོ་སོ་ལྔ་པ་རབ་བྱུང་བཅུ་གསུམ་པའི་སྣ་ཚོགས་ཞེས་པ་ཆུ་ཕོ་རྟ་ནི་རྗེ་འདིའི་འཁྲུངས་ལོ་ཡིན་པས་བསྟན་པ་ཉིས་སྟོང་ལྔ་བརྒྱ་ཉག་མ་གོ་བདུན་པའི་དུས་སུ་ཤེས་པར་བྱའོ། །ལྷུམས་སུ་ཞུགས་ནས་རིང་པོ་མ་ལོན་པའི་སྐབས་རྗེ་བླ་མའི་བུ་སློབ་བསྟན་པ་ཕྱོགས་མཐར་སྐྱོང་བའི་དར་ཆེན་རོང་པོ་ལྗགས་ནག་པའི་སྐྱེ་བརྒྱུད་ཀིརྟི་སྤྲུལ་བའི་སྐུ་བློ་བཟང་བསྟན་པའི་རྒྱལ་མཚན་ཕྱོགས་དེར་ཕེབས་ལམ་ཞིག་ནས་སྦྲ་ནག་ཅན་འདི་སུ་རེད་དྲིས་པར། ཐེ་བོ་དགེ་རྒན་ཚང་ཡིན་ཞུས་པས། ཡ་མཚན། མདང་ངའི་རྨི་ལམ་དུ་རྩེ་དབུས་གསེར་ཁྲི་ཚང་གདུགས་བསྐོར། རྒྱ་གླིང་བཏང་ནས་འདི་པའི་ཁྱིམ་དུ་ཕེབས་པ་རྨིས་གསུངས། ལྷུམས་སུ་ཞུགས་པའི་སྔ་ཕྱིར་ཡབ་ཀྱི་རྨི་ལམ་དུ་འཇའ་ཚོན་སྣ་ལྔའི་གུར་ཁྱིམ་ཉིས་བརྩེགས་ཀྱིས་རང་གི་ཁྱིམ་འཁོར་བ་དང༌། ཡུམ་གྱི་རྨི་ལམ་དུ་ཟླ་བའི་དཀྱིལ་འཁོར་ཉ་གང་བ་གཉིས་ཤར་ཡོད་པར་མི་ཞིག་གིས་ཟླ་བ་རྗེས་མ་དེ་ཁྱེད་ཀྱི་ཟླ་བ་ཡིན་ཟེར་བ་དང་མཉམ་དུ་ཟླ་བ་དེ་རང་གི་པང་ན་ཡོད་པ་དང༌། ནམ་མཁའ་ནས་གསེར་གྱི་རྡོ་རྗེ་ཞིག་རང་གི་པང་དུ་བབས་པ་ཡང་ཡང་རྨིས་ཤིང༌། ཡུལ་མི་དག་ལ་ཡང་ཡབ་ཀྱི་ཁྱིམ་དེར་ལྗོན་ཤིང་སྣ་ཚོགས་སྐྱེས་པའི་རྩེར་རས་རིས་མང་པོ་བཀྲམ་པ་དང༌། ཁྱིམ་དེར་ལྗོན་ཤིང་སྐྱེས་པ་ལ་བཙུན་པ་གསེར་བུམ་ཐོགས་པས་ཁྲུས་གསོལ་བ་དང༌། ཡབ་ཀྱི་སྦྲའི་སྟེང་དུ་དར་ཚོན་སྣ་ལྔས་མཛེས་པའི་མདའ་མང་པོ་བཙུགས་ཡོད་པ་དང༌། ཞྭ་གོས་རིགས་མི་གཅིག་གི་མང་པོས་ཡུལ་འདི་ན་ཁྱེད་ཚོའི་བླ་མ་བཞུགས་ཡོད་པས་དད་གུས་གྱིས་ཞེས་སྦྲ་ལ་བསྐོར་བ་བྱེད་པ་དང༌། མི་ནག་པོ་རྟ་ནག་
ལ་ཞོན་པ་ཞིག་གིས་ལྕགས་པོ་བྱམས་ཚང་ན་ངའི་བླ་མ་བཞུགས་ཡོད་པ་ལ་བལྟ་ཟེར་ནས་འགྲོ་བ་སོགས་རྨི་ལྟས་ངོ་མཚར་ཅན་དུ་མ་བྱུང་འདུག །ལྷག་པར་མེས་པོ་གཅོད་པ་སྐྱབས་ཀྱི་རྨི་ལམ་དུ་ཚེས་ཉེར་བཞི་ཡིན་ཟེར་བ་ལ་ཟླ་བ་ཉ་གང་ཞིག་འོད་ཆེས་གསལ་བ་ཤར་ཡོད་པ་རྨིས་ཤིང༌། དངོས་སུ་ཡང་ལག་རིས་མཁན་ཞིག་གིས། ཡ་མཚན་ཁྱོད་ཀྱི་ལག་རིས་ལ་བརྟག་ན་གསེར་གྱི་བཀའ་འགྱུར་ཞིག་འདྲི་བའི་བསོད་ནམས་ཡོད་འདུག་ཟེར་བ་བྱུང་བ་སོགས་བསྟན་པ་སྤྱི་བབས་དང་མཐུན་ཞིང་འབྱུང་འགྱུར་གསལ་བའི་རྟགས་མཚན་མང་དུ་བྱུང༌། སྐུ་བལྟམས་པ་ནས་བཟུང་ཞག་བཅུ་ལྷག་གི་བར་ཨ་མ་ཞེས་ཡང་ཡང་གསུངས་ཤིང༌། གཞན་གྱི་བུ་ཆུང་ངག་གྲོལ་མ་ཐག་པ་འདྲ་བ་ཞིག་ཡོད་ཀྱང་གསུམ་པའི་ཚེས་གཅིག་གི་ཉིན་བོན་སྔགས་ཤིག་ཡོད་པ་དེས་མིང་བཏགས་པ་དང་མཉམ་དུ་ངག་སྨྲ་བ་རྦད་ཀྱིས་ཆད་ནས་ཀུན་སེམས་མ་བདེ་བར་ཡོད་པའི་སྐབས་ཤིག་ཁུ་བོ་རབ་འབྱམས་པ་དགེ་ལེགས་སེངྒེའི་རྨི་ལམ་དུ། སྐྱབས་མགོན་རྡོ་རྗེ་འཆང་བྱོན་ནས་མི་ཁྱོད་ངས་བསླུས་མི་ཡོང༌། ཡིད་མི་ཆེས་ན་རྟགས་འདི་ཡིན་གསུངས་ནས་ཕྱག་བཏེག་པས་མཆན་ཁུང་གཡས་ཕྱོགས་ན་རྟགས་མཚན་གསལ་བ་ཞིག་ཡོད་པ་རྨིས། ཕྱི་ཉིན་བུ་ཆུང་ལ་བལྟས་པས་རྨི་ལམ་ཇི་ལྟ་བ་བཞིན་འདུག་པ་རང་གི་ཨ་ཁུ་མཁས་བཙུན་ལ་བཤད་པས། དེས་ཡི་གེ་ཞིག་བྲིས་ནས་ཁྱོད་བཀྲ་ཤིས་འཁྱིལ་དུ་སོང་ལ་སྐུ་ཞབས་རིན་པོ་ཆེར་ཞུས་ཟེར་བ་ལྟར་ཕྱིན། སྐུ་མདུན་དུ་མཇལ་ནས་རྒྱུ་མཚན་ཞུས་པས་མདོ་སྡེ་བསྐལ་བཟང་རྒྱུན་དུ་ཐོན་ལ་ཁྲུས་གྱིས། ཁུ་བོ་མཁས་བཙུན་ལ་བྱབས་ཁྲུས་མང་དུ་བྱེད་ཆུག །གཙང་སྦྲ་ལ་རེམ། མིང་ལ་མགོན་པོ་ཚེ་བརྟན་གྱིས།
སང་ཕོད་ཡང་འདིར་ཤོག་ཅེས་བསྲུང་མདུད་གནང༌། དེ་དུས་ཀུན་མཁྱེན་མཆོག་སྐུ་མཚམས་ལ་བཞུགས་པ་ནི་དཔོན་བེ་སི་བཱ་ཐུར་དཱའི་ཆིང་གི་སྲིད་ཀྱི་དོན་དུ་ཡིན་འདུག་རུང་འདིར་ཡང་ཆེད་དམིགས་གནང་བ་མཚན་འདོགས་ལུགས་ཀྱིས་ཤེས། ཟླ་བ་བཞི་པའི་ཚེས་གསུམ་ལ་མེས་རྒད་པོ་དེས་སྲུང་མདུད་བཅིངས་ནས་འདི་ཁྱོད་ལ་འཇམ་དབྱངས་བཞད་པ་རིན་པོ་ཆེ་ནས་གནང་བ་རེད་ཞུས་པ་ལ་ཨང་ཞེས་ལན་བཏབ་པས་ཐམས་ཅད་ཡ་མཚན་པ་བྱུང༌། དེའི་ཕྱི་ལོ་ཡང་སྐྱབས་འཇུག་ཞུ་བར་དགེ་ལེགས་སེངྒེ་འགྲོ་སྐབས་ཁོ་རང་གི་མས་འདི་ལ་ཚེ་དབང་ནམ་བསྐུར་རེས་ཀྱིས་མཚན་མོ་ལྷག་པར་ངུ་བས་ཕྱིན་ཆད་ཚེ་དབང་བསྐུར་ཨེ་ཆོག་ཞུས་ཟེར་བ་ལྟར་ཞུས་པས་ཅུང་ཟད་ཐུགས་བསམ་གནང་བ་ལྟར་མཛད་ནས་ཁྱོད་ཀྱི་མ་དེ་ཞེད་པོ་ཞིག་ཡིན་པ་འདྲ། ད་ཚེ་དབང་བསྐུར་མི་དགོས། ངས་སྐྱབས་འཇུག་རྒྱུན་དུ་བྱེད། སྔར་རྒྱུན་ལྟར་བསྐལ་བཟང་དང་བྱབས་ཁྲུས་གཙང་སྦྲ་སོགས་ལ་རེམ་ཞེས་བུམ་ཆུ་དང་ཕྱག་མདུད་སྩལ། དོ་དམ་བྱེད་ལུགས་སོགས་ནང་སྦྱར་གྱི་ཞལ་བཀོད་གསལ་ཆ་དང་ལྷག་པར་ཟླ་བ་ལྔ་པའི་ཚེས་བརྒྱད་ཀྱི་ཉིན་མི་ཧྲེ་བོ་ལྭ་བ་དཀར་པོ་གྱོན་པ་མིག་ཡ་གཅིག་ལ་སྐྱོན་ཡོད་པ་འགྲམ་པ་སྨེ་བ་ཅན། རྟ་ཁམ་ནག་ཞོན་པ་ཞིག་ཡོང་ཤས་ཆེ་བས། དེ་ཁྱིམ་དུ་ཡོང་མ་འཇུག་གསུངས། ཕྱིས་སུ་ཉིན་དེར་མི་དེ་འདྲ་ཞིག་ཁྱིས་རུབ་ཅིང་འོངས་ནས་ཐེ་བོ་དགེ་རྒན་ཚང་གང་ན་ཡོད་ཟེར་བར། དགེ་ལེགས་སེངྒེའི་མས་ངན་སྨྲས་དང་བཅས་ཏེ། རྟའི་གདོང་ལ་དབྱུག་པ་བསྣུན་པས་དེ་མ་ཐག་རྟ་འདྲོགས། ཁྱིས་དེད་ནས་ལ་ཕར་ནང་དུ་གར་སོང་ཆ་མེད་དུ་ཡལ་ཟེར། རྗེ་དེ་ཉིད་ནས་འདི་འདྲ་གསུངས་མི་སྲིད་པ་ལྟ་བུ་ཡིན་
ཀྱང་འདི་ནི་བབས་གསུངས་པ་ལྟར་གསལ་ཆ་བྱུང་བའམ། ཤིན་ཏུ་ངོ་མཚར་བའི་གནས་ཏེ། གསང་བ་བསམ་གྱིས་མི་ཁྱབ་པའི་མདོ་ལས། བྱང་ཆུབ་སེམས་དཔའ་ལམ་ལ་གནས་པ་ནི་བདུད་སྡིག་ཅན་གྱིས་ཐུབ་པར་དཀའོ། །ཞེས་གསུངས་པ་ལྟར་རོ། །དགུང་ལོ་གཉིས་གསུམ་སོགས་སུ་རིམ་པར་སྐུའི་སྐྱེད་ཐོན་ཚུལ་དང༌། མཛད་སྤྱོད་སོགས་བྱིས་པ་གཞན་དང་མི་འདྲ་བར། དུས་རྒྱུན་སྐྱིལ་ཀྲུང་གིས་དྲང་པོར་བཞུགས་པ་དང༌། སྐུ་རྩེད་མཛད་པ་ན་ཡང་ཆོས་འཆད་པ། དཔེ་ཀློག་པ། ཕྱག་དབང་གནང་བ། ཤིས་པ་བརྗོད་པ་སོགས་ཀྱི་རྣམ་པ་དུ་མ་མཛད། ཉིན་ཅིག་ང་གུང་ཐང་པ་ཡིན་གསུངས་ཤིང་ཡར་ལ་བརྒྱུག་ནས་ཁྲི་པ་གུང་ཐང་པ། མར་ལ་བརྒྱུག་ནས་ཁྲི་པ་གུང་ཐང་པ་ཞེས་ཡང་ཡང་གསུངས་པར། དེ་སུས་ཟེར་བྱས་པས། སྐྱབས་མགོན་མཆོག་གི་སྲུང་མདུད་ལ་ཕྱག་གིས་རེག་ནས་འདིའི་ནང་ན་སི་ལི་ལི་བཤད་གི་གསུངས། ཉིན་གཅིག་མི་ཞིག་གིས་ནས་ཀྱི་ཚག་མིག་ཅིག་བཟུང་ཡོད་པ་ཕྱག་ཏུ་བླངས་ནས་ཁོའི་མགོ་ལ་བསྐོར་ཏེ་ཁོ་རོ་རོ་འཁོར་གསུམ་གསུངས་པ་སོགས་འཁོར་གསུམ་ཐལ་རྡེབ་ཡང་ཡང་གནང་བ་དང༌། ཤིན་ཏུ་སྐུ་ན་ཕྲ་དུས་ཀྱང་རྡོར་དྲིལ་ལ་ཐུགས་དགྱེས་ཤིང་ཕྱག་ཏུ་ཕུལ་ན་ཚུལ་བཞིན་དཀྲོལ་ཏེ་ས་དང་བྱེ་མ་སོགས་ཀྱིས་བགེགས་བསྐྲད་ཤིས་བརྗོད་ཀྱི་རྣམ་པ་མཛད་པ་དང༌། གཡས་སུ་དྲིལ་བུ་དང་གཡོན་དུ་རྡོ་རྗེ་ཕུལ་ན་ཐུགས་མི་དགྱེས་པར་དེ་མ་ཐག་གཡས་གཡོན་བརྗེ་བ་སོགས་ངོ་མཚར་འབའ་ཞིག་གི་གཏམ་གྱི་དབྱར་རྔ་ཕྱོགས་ཀྱི་སྐལ་བཟང་མགྲིན་སྔོན་ཡོངས་ཀྱི་དགའ་སྤྲོའི་སྒྲོ་གཤོག་གཡོ་ཞིང་དད་གུས་མངལ་ཁུར་ལྕི་བའི་སྒྲ་འཛིན་བདུད་རྩིར་གྱུར་ཏེ། མདོར་ན། ཤེར་ཕྱིན་གྱི་མདོ་ལས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེས་མ་ཐག་ཏུ་
འཇིག་རྟེན་གྱི་ཁམས་སྣང་བས་རྒྱས་པར་གང་ཞིང་དེ་དག་ཐམས་ཅད་རྣམ་པར་འགྱུར་བ་གཡོ་བར་བྱེད་པ་གང་ཡིན་པ་དེ་ནི་སྐྱེ་བ་ཕུན་སུམ་ཚོགས་པ་ཞེས་བྱའོ། །ཞེས་གསུངས་པ་ཇི་ལྟ་བ་བཞིན་གྱུར་ཏོ། །སྨྲས་པ། གང་ཚེ་སྒེག་མོ་དེ་ཡི་དྲི་མེད་མངལ། །གསེར་སྒོང་སྨིན་ལས་ཚངས་པའི་ཚུལ་ལྡན་པའི། །ཡིད་འཕྲོག་གཞོན་ནུ་བལྟམས་ཚེ་ནོར་འཛིན་ཁྱོན། །དགེ་ལེགས་བྱེ་བའི་གཟི་བྱིན་བཀྲ་བས་མཛེས། །གང་གསུང་སྨྲ་བའི་ལྗགས་ཡངས་དང༌། །ཡུམ་གྱི་མངལ་རྒྱ་ལྷན་ཅིག་གྲོལ། །གཟུགས་སྐུའི་མེ་ཏོག་གསར་པ་དང༌། །གསུང་སྙན་དབྱར་རྔ་ལྷན་ཅིག་རྒོད། །གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་སྐྱིལ་མོ་ཀྲུང་བཅས་ནས། །མ་ཞེས་འགྲོ་ལ་བརྩེ་བའི་དབྱངས་སྙན་སྒྲོགས། །དེའི་ཚེ་མཁས་པ་ཁྱོད་ལ་ཕྱག་འཚལ་ལོ། །ཀུན་བཟང་སྤྱོད་པ་པདྨ་དཀར་པོའི་མཚོར། །ཡིད་ཀྱི་ངང་མོ་ཞུགས་པའི་སྐལ་བཟང་ཚོགས། །ངོ་མཚར་བསྔགས་པའི་དབྱངས་སྙན་སྒྲོག་པ་ཡིས། །དཔྱོད་ལྡན་སྒྲ་འཛིན་ཡེངས་པའི་གོ་སྐབས་འཕྲོག །ན་ཚོད་ཕྲ་ཡང་ལེགས་བཤད་འོད་དཀར་དང༌། །མཛད་བཟང་རི་དྭགས་མཚན་མ་ཆེར་གསལ་བས། །སྤངས་རྟོགས་ཆ་རྫོགས་ཐུབ་བསྟན་ཀུནྡའི་གཉེན། །འཆར་ཞེས་སྐྱེ་དགུ་གཉིས་སྐྱེས་དགའ་བས་ཚིམ། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་སྐུ་བལྟམས་པ་དང་ངོ་མཚར་གྱི་སྣང་བ་ཐོག་མར་ངོམས་པའི་སརྒ་སྟེ་དང་པོའོ།། །། ༈ དཔག་མེད་བསྐལ་པའི་སྔོན་ནས་སངས་རྒྱས་ཀྱང༌། །གདུལ་བྱའི་དོན་དུ་བཤེས་གཉེན་ཚུལ་བཟུང་
ནས། །མ་ནོར་ལམ་བཟང་བརྩེ་བས་འདོམས་མཛད་པ། །ཁྱབ་བདག་འཁོར་ལོའི་མགོན་དེས་བདག་སྐྱོངས་ཤིག །དེ་སྐབས་སྤྲུལ་སྐུའི་དོགས་གནས་འགའ་བྱུང་ཞིང། དེའི་ནང་ནས་ལྭ་ཁ་ཏཱ་ལེ་ཧུ་ཐོག་ཐུ་ཀུན་བཟང་སྙན་གྲགས་རྒྱ་མཚོའི་སྐུ་ཚ་ཞིག་འཁྲུལ་མེད་ཡིན་པར་བླ་མ་འགའ་ཞིག་གིས་ལུང་ཕེབས་མཛད། ཁོང་སྟོབས་འབྱོར་སྙན་གྲགས་རྒྱས་ཤིང། སྔོན་ནས་འབྲེལ་ཆེ་བས་ཐོག་མར་ངོས་འཛིན་ཁྱེར་ཀྱང་ཧ་ཅང་རྟེན་འབྲེལ་ལེགས་པ་རང་མ་བྱུང། རིམ་གྱིས་ཨང་གསུམ་པ་ལ་མཛོད་དགེར་ངོས་འཛིན་འབྱོར་བས་ཁུ་བོ་རབ་འབྱམས་པ་ནས། སྐུ་ཞབས་རིན་པོ་ཆེའི་གསུང་གི་བབས་ལ་འདིར་འོང་བའི་བབས་འབྲེལ་ཡོད་མོད། ཁྱེད་ཚོ་སྟོད་སྨད་ཐམས་ཅད་དུ་སོང་ནས་མོ་སྟོན་ཕག་མགོའི་དཔེ་བྱས་པར། ངེད་རང་ལ་ཚ་བོ་གཅིག་ཁོ་ན་ཡོད་པ་བླ་བྲང་དཔོན་ཚང་ལ་བཙོང་དོན་དང་འཕྲོག་དོན་ཅི་ཡོད། ཁྱེད་ཚོའི་སྤྲུལ་སྐུ་སྨ་ར་གྲུབ་ཆེན་སོགས་ཀྱིས་ཐག་བཅད་ཚར་ཡོད་མོད་ཅེས་སོགས་སྨྲས་ནས་སྟོན་དུ་མ་ཉན། དེ་ནས་སྐུ་ཅུང་ཟད་མ་བདེ་བ་བྱུང་སྟབས་སྐུ་མདུན་དུ་འཕྲིན་པའི་རྐྱེན་གྱིས་མཁྱེན་སྤྱན་ལྷ་ལམ་ལྟར་ཡངས་པའི་བླ་མ་དབུ་མཛད་པ་ངག་དབང་འཕྲིན་ལས་གསོལ་དཔོན་རབ་འབྱམས་པ་ཞེས་གྲགས་པ་སྐུ་གོང་མའི་ཕྱག་མཛོད་དགེ་འདུན་གྲགས་པ། བླ་བྲང་སྐུ་ཚབ་དྲུང་ཡིག་མདོ་མཁར་བ་བློ་བཟང་ལེགས་གྲུབ་སོགས་ཀྱིས་ཉེར་སྤྱད་ངོས་འཛིན་ཕུལ་བ་མ་འཁྲུལ་བར་བླངས། དེའི་ཕྱི་ལོ་སྐྱབས་མགོན་རིན་པོ་ཆེ་ཅོ་ནེ་དཔོན་ཆེན་གྱིས་གདན་དྲངས་པའི་ལམ་བར་ནས་བཀྲ་ཤིས་ཆོས་འཕེལ་གླིང་དུ་ཕེབས། ཏཱ་དཔོན་པོ་དོན་ཡོད་སེངྒེ་དགེ་ལེགས་སེངྒེའི་རྩར་མངགས་ནས་གསེར་ཁྲི་ཆེ་བ་ཚང་གི་སྤྲུལ་སྐུ་སྔར་ཁྱེད་ཀྱིས་བླ་བྲང་ནས་འོངས་པའི་ཨེལ་
ཆི་རྣམས་ལ་ཚུལ་བཞིན་མ་བསྟན་པར་འདུག །ད་ལན་ང་འདིར་ཡོང་དོན་གྱི་གཙོ་བོ་དེ་ཡིན་པས་སྟོན་ན་གནངས་ཉིན་ཚེས་གཅིག་ལ་བལྟས་ནས་འགྲོ་རྒྱུ་ཡིན། སྟོན་མི་སྟོན་གྱི་ལན་དགོས་གསུངས་པར། དགེ་ལེགས་སེངྒེ་ཁོ་རང་སྐུ་མདུན་དུ་འོངས་ནས་སྤྱན་འབེབས་ཀྱི་ཆེད་རང་ཤག་ཏུ་གདན་འདྲེན་གྱི་སྙན་གསན་ཕབ། མཛོད་དགེ་དགོན་པ་སྤྱི་ནས་ཀུན་མཁྱེན་རིན་པོ་ཆེ་འདུ་ཁང་དུ་གདན་དྲངས་ཏེ་སྟོན་མོ་ཕུལ་བའི་སར་ཡུམ་གྱིས་ཁྱེར་ནས་སོང་བས་མི་ཚོགས་ཤིན་ཏུ་ཆེ་ཡང་བར་སྐབས་ཤིག་གྲལ་བར་བརྒྱུད་ནས་བཞུགས་ཁྲིའི་སྐས་ལ་འཛེག །ན་བཟའ་ལ་འཇུས་ཤིང་སྐུ་པང་དུ་ཕེབས་གྲབས་མཛད་པས། སྐྱབས་མགོན་མཆོག་ཐུགས་ཤིན་ཏུ་དགྱེས་ནས་བརྩེ་ཉམས་དཔག་མེད་མཛད། ཤེལ་ཀ་ར་ཐུམ་ཆེ་བ་ལྗགས་མཆིལ་བཏབ་ནས་གནང་སྟེ་རྟེན་འབྲེལ་གྱི་སྒོ་ཐོག་མར་ཕྱེ། ཐེ་བོ་རབ་འབྱམས་པའི་ཤག་ཏུ་ཡང་ཕེབས། དགྱེས་གཟིགས་ཆེན་པོ་གནང་ཞིང་ཕེབས་སྐབས་སྤྲུལ་བའི་སྐུ་ལ་ང་མི་འགྱང་བར་འདི་ཀར་ཡོང་རྒྱུ་ཡིན་གསུངས། དགུང་ལོ་བདུན་པ། ས་བྱི་ཧོར་ཟླ་དང་པོའི་ཚེས་བརྒྱད་ཀྱི་ཉིན། རྒྱལ་བས་ལུང་བསྟན་པའི་ཆོས་སྡེ་ཆེན་པོ་བཀྲ་ཤིས་འཁྱིལ་དུ་གདན་དྲངས། སྤྱི་བླ་བྲང་དང༌། དགོན་པའི་ནང་ཆེན་ཁག་སོགས་ཀྱིས་བསུ་བ་དང་ཇ་ཐབ། དགོན་པའི་གཞུང་ནས་སེར་སྦྲེང་རྒྱས་པ་ཞུས། སྔོན་སྡེ་ཁྲི་རིན་པོ་ཆེའི་གསུང་བཀོད་དང་ཡབ་སྲས་གོང་མ་རྣམས་ཀྱི་ལུགས་བཞིན་ཚོགས་ཆེན་གྱི་ཚོགས་དབུར་གནས་བཅུའི་སྤྱན་འདྲེན་གྱི་ཚིག་དང་བསྟུན་ནས་བཀུར་སྟི་ཆེན་པོས་གདན་དྲངས། བྱོན་ལེགས་ཀྱི་རྗེས་སུ་ཞབས་བརྟན་གྱི་ཚིགས་བཅད་དང་བཅས་
ནང་ཆེན་ཁག་བུ་སློབ་སྦྱིན་བདག་རྣམས་ཀྱིས་ཁྲི་འབུལ་བཏེག །གནས་བརྟན་ཕྱག་མཆོད་དང་སྦྲགས་གྲྭ་མང་གིས་མཇལ་དར་ཕུལ་ནས་བསྟན་པ་རྒྱས་པའི་བདེན་བརྗོད་སོགས་རྟེན་འབྲེལ་གྱི་སྒོ་འཕར་ཡངས་པོར་ཕྱེ། འགའ་ཞིག་གིས་ད་དུང་རབ་བྱུང་མ་སྒྲུབ་སྟབས་གྲྭ་མང་གིས་མཇལ་ཁ་ཞུས་ཆོག་མི་ཆོག་དང༌། བསྔོ་བ་གནང་མི་གནང་སོགས་ཀྱི་དོགས་པ་བསླང་བར། གསོལ་དཔོན་རབ་འབྱམས་པས་སྐུ་མདུན་དུ་ཞུར་བཅུག་པའི་ལན་དུ། མཇལ་ཁ་ལ་ཐེ་ཚོམ་བྱས་པ་ནི་ཁྱེད་ཚོ་བླ་མ་ལ་དད་པ་ཆུང་སོང་བ་ཡིན་པས་མཇལ་ཁ་ཞུས་ཆོག །བསྔོ་བ་བྱེད་མི་བྱེད་སྤྲུལ་སྐུ་ཚང་ཉིད་ལ་དྲིས་གསུངས། ཁོང་རང་གིས་བསྔོ་བ་བྱེད་རྒྱུ་ཡིན་གསུངས་ནས་མཇལ་ཁ་དང་ལྗགས་བསྔོ་སོགས་ཡིད་ཚིམ་པར་མཛད། མི་ཚོགས་ཆེ་བ་ལ་ཐུགས་མི་འཇིགས་པར་མ་ཟད་སྤྲོ་ཞིང་དགྱེས་ཉམས་ཀྱིས་ཡང་ཡང་གཟིགས་པ་དང༌། ཡིད་དགའ་ཆོས་འཛིན་གྱི་རི་ཁྲོད་པ་རྣམས་མཇལ་སྐབས་ངག་དབང་རྣམ་རྒྱལ་ཞེས་སྐུ་གོང་མའི་ཕྱག་གཡོག་ནང་མ་ཞིག་ཡོད་པ་དེས་ང་ཨེ་མཁྱེན་ཞེས་ལན་གཉིས་ཞུས་ཀྱང་གསུང་མ་གནང༌། གསུམ་པའི་ཚེ་གླེན་པ་ཁྱོད་ལོས་ཤེས་གསུངས་པས། ཁོ་རང་ལ་སྐུ་གོང་མས་ཀྱང་གླེན་པ་ཞེས་མིང་འབོད་གནང་གི་ཡོད་པ་དྲན་ནས་དགའ་སྐྱོ་འདྲེས་པས་མཆི་མ་བླགས། བཞུགས་གྲལ་དུ་རིགས་སྨྲ་སོ་སོས་བགྲོ་གླེང་དང་དགའ་སྤྲོའི་སྟོན་མོ་ལེགས་འབུལ་གྱི་མཆོད་སྤྲིན་བཅས་བསྟར་ཞིང༌། ཆིང་ཝང་རྡོ་རྗེ་ཕ་ལམ་དང༌། པེ་སི་བཱ་ཐུར་དའི་ཆིང་ནས་ཞབས་སྤྱི་བོར་བླངས་ཏེ་གུས་མཆོད་བླ་ན་མེད་པ་སྔོན་གྱི་དུས་ལས་ཀྱང་ལྷག་པ་མཛད། ཕྱིས་སུ་མ་འགྱངས་པར་ཇུན་ཝང་ངག་དབང་དར་རྒྱས་དཔོན་སར་ཕེབས་སྐབས་ཀྱང་
དཔོན་གོང་མའི་དུས་ལྟར་བཀུར་སྟི་ཕུ་དུད་ཆེ་བ་མཛད། ཚེས་བཅུ་གསུམ་གྱི་ཉིན། སྐྱབས་མགོན་མཆོག་ནས་དགེ་བསྙེན་རབ་བྱུང་དགེ་ཚུལ་བཅས་དཀྱུས་གཅིག་ལ་གནང་ནས་དཀོན་མཆོག་བསྟན་པའི་སྒྲོན་མེ་ཞེས་འབྱུང་འགྱུར་ལུང་བསྟན་གྱི་ཚུལ་དུ་མཚན་གསོལ། རྗེས་ཟློས་སྒྲ་དག་ཅིང་གསལ་བ་དང༌། ལྷག་པར་བསླབ་བརྗོད་ཀྱི་སྐབས་སྲོག་གཅོད་པ་སྤངས་ཏེ་ཞེས་པའི་ཚིག་གི་མགོར་ཐུགས་ཅུང་ཟད་ཡེངས་ནས་མ་ཟིན་པས་ཡུལ་སྐད་ཀྱིས་ཆི་གི་སྤངས་ཏེ་ཞེས་དྲིས་པར་ཐུགས་དགྱེས་ནས་བཞད་མོ་དང་ཆི་གི་སྤངས་ཏེ་ཞེས་ལད་མོ་མཛད། དེ་ནི་སྤང་བྱ་སྤོང་བྱེད་ལ་དཔྱོད་པ་ཞུགས་པའི་འབྲས་རྟགས་སུ་ཐེ་ཚོམ་ག་ལ་མཆིས། ཉིན་དེར་སྐྱབས་འགྲོའི་ཁྲིད། བླ་མའི་རྣལ་འབྱོར་དགའ་ལྡན་ལྷ་བརྒྱ་མའི་ཁྲིད་བཅས་གནང་སྟེ། བསྟན་པའི་གོ་རིམ་དང་མཐུན་པར་ལེགས་ཚོགས་སྒོ་བརྒྱ་འབྱེད་པའི་རྟེན་འབྲེལ་གྱི་སྣང་བ་གསལ་བར་མཛད་ཅིང༌། དེ་ནས་བཟུང་སྟེ་ཆོས་རྗེ་དོན་གྲུབ་རིན་ཆེན་གྱིས་རྗེ་རིན་པོ་ཆེ་ལ་ཇི་ལྟར་གནང་བ་ལྟར་སྤྱན་གྱི་འབྲས་བུ་བཞིན་དུ་སྐྱོང་བར་མཛད་དོ། །སྨྲས་པ། བཀྲ་ཤིས་དགེ་མཚན་ཀུན་འཁྱིལ་ཤར་རིའི་སྤོར། །དགྱེས་པའི་འཛུམ་ཞལ་ཉི་གཞོན་གསར་པའི་དཔལ། །ཤར་ཚེ་སྐལ་བཟང་ཡིད་ཀྱི་འཛིན་མའི་གཞིར། །ལེགས་ཚོགས་དགའ་བདེའི་འདབ་བརྒྱ་ཅིག་ཅར་བཞད། །མཁྱེན་དང་བརྩེ་བའི་བདུད་རྩིའི་འོད་ཟེར་འགྱེད། །གདངས་སྙན་གསུང་གིས་སྐྱེ་རྒུའི་ཡིད་དབང་འགུགས། །ཨུཏྤལ་སྤྱན་ཡངས་ཞི་དུལ་རྫོགས་པའི་སྐུ། །འཁོར་ཚོགས་རྒྱ་མཚོའི་དབུས་ན་ལྷུན་པོ་བཞིན། །བླ་མའི་ཞབས་པད་གཙུག་གི་རྒྱན་དུ་ངོམ། །ཚུལ་ཁྲིམས་
གོས་བཟང་དྲན་ཤེས་སྐ་རགས་ཀྱིས། །བཅིངས་ཚེ་བརྟུལ་ཞུགས་བག་ཡོད་སྤྱོད་པའི་མཚོ། །ཟླ་ཟེར་འཐུང་བའི་ཀུནྡའི་ཚལ་བཞིན་རྒྱས། །དཀོན་མཆོག་ཀུན་འདུས་རིགས་ཀྱི་བདག་པོ་དེས། །མདོ་སྔགས་ལུང་རྟོགས་བསྟན་པའི་སྒྲོན་མེ་ཞེས། །གསང་གསུམ་བཅུད་ལྡན་བདེན་ཚིག་ཀ་ལ་ཤས། །ཟླ་བྲལ་སྲས་ཀྱི་ཐུ་བོར་དབང་རབ་བསྐུར། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་གདན་ས་ཆེན་པོར་ཡབ་སྲས་ཞལ་མཇལ་ཞིང་དགེ་ཚུལ་གྱི་སྡོམ་པ་བཞེས་པའི་སརྒ་སྟེ་གཉིས་པའོ།། །། ༈ ཀུན་རྨོངས་འཁྲི་ཤིང་ཕྲ་རྒྱས་ཡལ་འདབ་ཅན། །གཅོད་པའི་དཔའ་བོ་འཇིགས་མེད་སྟོབས་བཅུའི་བདག །རལ་གྲིའི་འཁྲུལ་འཁོར་གཡོ་བའི་གར་མཁན་མཆོག །འཇམ་དབྱངས་བླ་མས་རྟག་ཏུ་འབྲལ་མེད་སྐྱོངས། །དེ་ནས་མཁས་པའི་དབང་པོ་རྡོ་རམས་པ་བློ་བཟང་རིན་ཆེན་ཀློག་གི་སློབ་དཔོན་དུ་བསྟེན། རྡོ་རྗེ་གཅོད་པ་ཤོག་ཕྱེད་གཉིས་ཙམ་ནས་རང་སྟོབས་ཀྱིས་སྦྱར་ཀློག་ཕེར་བ་བྱུང༌། དེ་ཡང་ངང་པ་པད་མཚོར་འཇུག་པ་དང༌། བྱིས་པ་ནུ་ཞོ་འཚོལ་བ་ལྟར་ཀ་ཁ་སོགས་ཆེར་སློབ་མ་དགོས་པར་རང་ཤུགས་ཀྱིས་ཤེས་པ་ནི། དམ་པ་རྣམས་རང་རང་གི་མཛད་པ་སྟོན་ཚུལ་གྱི་སྒྱུ་འཕྲུལ་ལ་རག་ལས་མོད། ཕལ་པའི་དབང་དུ་བྱས་ན་ཡང༌། རྣམ་འགྲེལ་ལས། རྒྱུ་ཚོགས་པ་ལས་འབྲས་སྐྱེ་བ། །རྗེས་སུ་དཔག་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་གསུངས་པ་ལྟར། སྔོན་གོམས་པའི་རང་བཞིན་མངོན་དུ་གྱུར་པ་ཡིན་པ་ནི། རྒྱུ་གྲངས་ཚང་སྒྲུབ་ཀྱི་འབྲས་རྟགས་ལས་ཤེས་སོ། །འཇིགས་བྱེད་བཅུ་གསུམ་མའི་
ཆོ་ག་ཐུགས་ལ་བཟུང་ནས་ཞལ་འདོན་མཛད་པའི་སྐབས་ཤིག་འཕྲོ་བཅད་ནས་བཞུགས་པར། ཅི་རེད་དྲིས་པས་ཉམས་མཚར། གཞལ་ཡས་ཁང་འདི་ཅུང་ཟད་འཐིབས་པ་ཞིག་རེད་ཨང་གསུངས་པར་དགེ་བཤེས་པ་དེ་ཉིད་ལས་ཐོས། ཉིན་གཅིག་གཟིམས་ཁང་ཐོག་ཁར་གུ་ཡངས་མཛད་སྐབས་ཤིག་ཁང་པའི་ཤར་ལྷོ་ངོས་ཀྱི་གྲུ་ལ་གཟིགས་ནས་བཞུགས་པར། སྔགས་རམས་པ་ངག་དབང་བསྟན་འཛིན་གྱིས་ཅི་རེད་ཞུས་པས། མི་ནག་པོ་ལག་པ་དྲུག་ཅན་ཞིག་གིས་ང་ལ་བལྟས་འདུག་གསུངས་པར་སྔགས་རམས་པ་ཉིད་ལས་ཐོས། སློབ་དཔོན་དེ་ཉིད་ཀྱི་དྲུང་ནས་འཇམ་དཔལ་མཚན་བརྗོད་ཀྱི་ལུང༌། ལམ་ཁྲིད་མདོར་བསྡུས། ལམ་ཁྲིད་གསེར་གྱི་ཡང་ཞུན་གྱི་ལུང་བཅས་གསན། འདི་སྐབས་ཆིང་ཝང་རྡོ་རྗེ་ཕ་ལམ་དགོན་པར་ཕེབས་པས། མཆོད་ཡོན་ཞལ་འཛོམ་གྱིས་དགའ་སྟོན་ཐོག་སྒྱུ་མ་མཁན་ཞིག་གིས་ལྟད་མོ་བཀྱེ་སྟེ། བླ་དཔོན་སོ་སོ་ལ་ཀུ་ཤུའི་ཤིང་ཐོག་སྤྲུལ་ནས་ཕུལ་བ་རྗེ་འདི་ཉིད་ཀྱིས་མཆོད་གྲལ་ནས་བཞག་པས། ཕྱི་ལོ་ཡང་དྲི་དང་རོ་མི་འདྲ་ཡང་མདོག་དབྱིབས་ཤིང་ཐོག་རྙིང་པ་ཇི་ལྟ་བ་བཞིན་འདུག་ཅེས་ཞལ་ནས་དངོས་སུ་ཐོས་ཏེ། ན་ཚོད་ཕྲ་བའི་ཉམས་མ་ཐོན་པར་མ་ཟད་གང་གི་བྱིན་གྱིས་སྒྱུ་མ་བཤིག་མ་ཐུབ་ཅིང༌། ཆོས་ཀྱི་རང་བཞིན་གཟིགས་པའི་རྣམ་ཐར་དུ་གསལ། ཆོས་ཀུན་སྒྱུ་མ་ལྟར་གཟིགས་ཀྱང༌། །སྔགས་རྫས་ཀྱིས་བསླད་སྒྱུ་མའི་ཆོས། །ཡང་དག་ཉིད་དུ་སྒྱུར་བྱེད་པའི། །སྔོན་མེད་སྒྱུ་མ་མཁན་འདི་སུ། །དགུང་ལོ་བརྒྱད་པ་ས་གླང་ལོ། ྋསྐྱབས་མགོན་མཆོག་ཤར་ཕྱོགས་རྒྱལ་ཁབ་ཆེན་པོར་ཕེབས་སྐབས་གསུང་བཀོད་གང་གནང་ལྟར་རྡོ་རྗེ་གཅོད་པ་ཐུགས་འཛིན་དང༌། བསྐང་གསོ་ཆོས་སྤྱོད་རྒྱན་འཇུག་སོགས་
མྱུར་དུ་ཐུགས་སུ་ཆུད་པར་མཛད། དགུང་ལོ་དགུ་པ་ལྕགས་སྟག་ལོ་སྐུ་གོང་མའི་དགོངས་རྫོགས་བསྒྲུབ་པ་དང༌། སྤྲུལ་བའི་སྐུ་རིན་པོ་ཆེ་ཉིད་ཀྱི་ཞབས་བརྟན་བསྒྲུབ་ཆེད་གསོལ་དཔོན་རབ་འབྱམས་པ་བོད་དུ་སོང་བས། ༸རྒྱལ་བའི་དབང་པོ་བློ་བཟང་འཇམ་དཔལ་རྒྱ་མཚོ་ནས་སྤྲུལ་བའི་སྐུ་ཉིད་ལ་ཆོ་ལོ་མཁན་ཆས། བཀའ་ཤོག་སོགས་ཀྱི་གཟེངས་བསྟོད་སྐུ་གོང་མའི་དུས་ལྟར་གནང་སྟེ་ལྕགས་ཡོས་ལ་འབྱོར། དེའི་ཕྱི་ལོ། ྋསྐྱབས་མགོན་མཆོག་ཤར་ཕྱོགས་ནས་གདན་ས་ཆེན་པོར་ཕེབས་ཏེ་ཞལ་གྱི་དཀྱིལ་འཁོར་མཇལ་ཞིང༌། དཔལ་གསང་བ་འདུས་པའི་དབང་བཞིའི་བདུད་རྩིས་ཐུགས་ཀྱི་བུམ་བཟང་ཡོངས་སུ་འགེངས་པར་མཛད། སླར་ཡང་འཁོར་ལོ་བདེ་མཆོག་ལཱུ་ཨི་པའི་ལུགས་ཀྱི་དབང་གསན་ཅིང༌། དེ་གཉིས་ཀ་ལ་སོ་སོར་སྟ་གོན་དང་ཚོགས་འཁོར་རྒྱས་པར་མཛད། བདེ་མཆོག་གི་སྐབས་སྐུ་ན་ཕྲ་ཡང་རུས་རྒྱན་བསྒྲོན་པས་དང་བ་འདྲེན་པ་བྱུང༌། གཞན་ཡང་བཀའ་གདམས་ཐིག་ལེ་བཅུ་དྲུག་གི་དབང༌། སྣར་ཐང་བརྒྱ་རྩ། ཚེ་རྟ་མགོན་གསུམ། སྒྲོལ་དཀར་འོད་ཟེར་དྲུག་སྦྲགས། ཇོ་ལུགས་སྒྲོལ་མ་ཉེར་གཅིག །འཇམ་དབྱངས་དམར་སེར། འཇམ་དབྱངས་དཀར་པོ་སོགས་ཀྱི་རྗེས་གནང་དུ་མ་དང༌། དགེ་བའི་བཤེས་གཉེན་རིན་ཆེན་ཆོས་བཟང་ལ་འཇིགས་བྱེད་ཞལ་ཕྱག་ཡོངས་རྫོགས་ཡུམ་བཅས་ཀྱི་རྗེས་གནང༌། འཇིགས་བྱེད་ཀྱི་ཆོ་ག །མགོན་ཆོས། ལྷ་མོ་རྣམ་སྲས་ཀྱི་གཏོར་ཆོག་གི་ལུང་སོགས་གསན། འདི་ལོ། ྋསྐྱབས་མགོན་རྡོ་རྗེ་འཆང་སྐུ་འབུམ་དུ་བཞུགས་སྐབས། ཧལ་ཧ་ཆོས་མཛད་ཟེར་བ་གློ་བུར་དུ་བོར་ནས་ཇི་ལྟར་བཙལ་ཀྱང་མ་རྙེད་ནས་རྗེ་འདི་ལ་ཞུས་པས་ཉམས་མཚར་ནགས་ཐར་ཐོར་ཞིག་གི་ནང་དུ་
ཤིང་ལོ་མང་པོའི་དཀྱིལ་ན་འདུག་གསུངས་པ་ལྟར། ཕྱི་ལོའི་དཔྱིད་ཆོས་གྲྭ་འོག་མའི་ཤིང་ལོ་སྤུངས་པའི་དོང་ནང་ནས་རོ་རྙེད་པས་ཀུན་ངོ་མཚར་དུ་གྱུར། འདི་དུས་དེ་འདྲ་ཤིན་ཏུ་ཞལ་གསལ་བ་འགའ་བྱུང་བར། སྐྱབས་མགོན་མཆོག་ནས་བཤད་རྒྱུ་མ་མང་ཞེས་དམ་དོག་ཆེ་བ་གནང༌། སློབ་དཔོན་བློ་བཟང་རིན་ཆེན་པས་ཉམས་སད་ལྟ་བུར་བདག་ལ་ལས་སྣེ་འདྲ་ཨེ་ཡོང་ཞུས་པར། རྣམ་བཅུ་དབང་ལྡན་ཞིག་རྨིས། དུས་འཁོར་བླ་མ་ཞིག་འོང་གསུངས་པ་ལྟར་མ་འགྱངས་པར་ཁོང་ལ་དུས་འཁོར་རྡོ་རྗེ་འཛིན་པ་བྱུང་ནས་བིས་མདོ་དབུ་མཛད་པ་ལས་ཀུན་རིག་གི་ཕྱག་རྒྱ་སློབ་པ་ལ་གཟིགས་པས་ཇི་བཞིན་ཐུགས་སུ་ཆུད་ཅིང་མི་བསྙེལ་བར་གྱུར། སུམ་རྟགས་དང་བཀླག་ཐབས་སོགས་གཟིགས་པ་ཙམ་གྱིས་མཁྱེན་ཅིང་དགེ་ཚུལ་གྱི་བསླབ་བྱ་ཡང་ཞིབ་ཁྲིད་མཛད། སློབ་དཔོན་དེ་ཉིད་ལ་ལས་སྣེ་ཁུར་ཆེ་སྟབས། གསོལ་དཔོན་རབ་འབྱམས་པས་དགེ་རྒན་གྱི་ལུང་གི་ཡོན་ཏན་དགེ་ཕྲུག་ལ་འགོ་བའི་ངེས་པ་མེད། ཀུན་སྤྱོད་དགེ་ཕྲུག་ལ་འགོ་བས་དགེ་རྒན་ཀུན་སྤྱོད་ཅན་ཞིག་གལ་ཆེ་ཞུས་པ་ལྟར། ྋསྐྱབས་མགོན་མཆོག་ནས་ཡིད་དགའ་ཆོས་འཛིན་གྱི་རི་ཁྲོད་པ་སོག་པོ་རབ་འབྱམས་པ་ཞེས་པའི་འདུལ་འཛིན་དེ་ཉིད་བསྐོ་བཞག་གནང༌། བསླབ་བྱའི་ལག་ལེན་ཞིབ་པར་མཛད་ཅིང༌། དགེ་རྒན་དེ་ཉིད་སྒོ་མང་དཔོན་སློབ་ཆོས་གྲགས་པའི་དུས་ཀྱི་དགེ་བཤེས་ཡིན་པས་ངག་རྒྱུན་ཡ་མཚན་པ་དུ་མ་ཕུལ། བཀའ་ཆོས་ཕྲན་ཚེགས་རེ་ཡང་གསན་འདུག་ཀྱང་ཞིབ་ཆ་མ་ངེས། སྦྲང་མ་ཞིག་གིས་འབད་རྩོལ་ཆེན་པོས་ཚང་བཅའ་བཞིན་པའི་སྐབས་བྱེའུ་ཞིག་གིས་གློ་བུར་དུ་བཟུང་
ཁྱེར་བ་ལ། སྙིང་རྗེ་ཤུགས་དྲག་སྐྱེས་ཏེ་ད་ལྟ་ཀུན་གྱི་བྱ་སྤྱོད་འདི་ཁོ་ན་འདྲ་སྙམ་ནས་འཁོར་རྣམས་ལ་གསུངས་ཤིང་བཤུམ་པ་སོགས་སྐུ་ན་ཕྲ་བའི་གནས་སྐབས་དེར་ཡང་སྔོན་ཚེ་སྦྱངས་པའི་དམ་པའི་རང་རྟགས་གསལ་བར་ངོམས་ཤིང༌། དོན་གཉིས་ལྷུན་གྲུབ་ཏུ་སྟེར་བའི་ལེགས་ཚོགས་བདུད་རྩིའི་གཏེར་དུ་གྱུར་ཏོ། །སྨྲས་པ། ཐུགས་རྗེའི་འོད་ཆགས་ཞལ་དཀྱིལ་ཟླ་བའི་དཔལ་འཛིན་ཨུཏྤལ་གཡོ་བའི་སྤྱན། །བརྩེ་བའི་འཛུམ་ཟེར་འགྲོ་བློའི་གདུང་སེལ་བག་མེད་མུན་པའི་གོ་སྐབས་སྤངས། །སྤྱན་དང་མངོན་ཤེས་རི་དྭགས་མཚན་མས་ཉེར་མཛེས་ཡོན་ཏན་བདུད་རྩིའི་གཏེར། །རྒྱལ་སྲས་རྒྱུ་སྐར་བྱེ་བས་ཆ་ཙམ་འགྲན་མིན་འོད་དཀར་ཅན་དེ་རྒྱལ། །དྲི་ཞིམ་རྒྱས་པའི་འདབ་བརྒྱ་བས། །རྐང་དྲུག་གཞོན་ནུ་དབང་མེད་འགུགས། །འབྲས་བུས་དུད་པའི་རྐང་འཐུང་གི །གྲིབ་བསིལ་བཟང་པོས་ཚིམ་པར་བྱེད། །ཁྱོད་ཀྱི་རྨད་བྱུང་མཛད་པ་ཡིས། །སྐལ་ལྡན་ཡིད་དབང་འགུག་པ་དང༌། །མཆོག་ཏུ་དད་ཅིང་ཚིམ་པའི་དཔལ། །ལྷན་ཅིག་སྦྱིན་པ་འདི་རྨད་བྱུང༌། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་སྐུ་ན་ཕྲ་ཡང་ཡ་མཚན་སྣང་བ་རྒྱས་པའི་སརྒ་སྟེ་གསུམ་པའོ།། །། ༈ ཚུལ་ཁྲིམས་དྲི་ངད་ཟླ་ཤེལ་ཐིག་འཕྲེང་གིས། །ལག་པའི་པདྨོ་ལན་བརྒྱར་ཟུམ་བྱེད་པ། །འཇམ་དཔལ་ཚངས་སྲས་ཐུབ་བསྟན་རྒྱ་མཚོའི་གཉེན། །བདག་ཡིད་ཀུ་མུད་ཚལ་དེ་རིང་དུ་སྐྱོངས། །དེ་ནས་དགུང་ལོ་བཅུ་གཉིས་པ་ཆུ་སྦྲུལ་ལོ་དཔྱིད་ཆོས་ཆེན་མོའི་ཚེས་གསུམ་གྱི་དགུང་མོ་ཆོས་གྲྭར་ཞུགས། ཡར་འཚོགས་སྐབས་ཆོས་ཁྲིའི་སྟེང་ནས་ཞལ་གྲྭ་མང་ལ་གཟིགས་
ནས་བཞུགས་པས་ཉིད་ཀྱི་སྐུ་གོང་མ་ཡང་སྒོ་མང་ཆོས་གྲྭར་ཕེབས་པའི་དགུང་མོ་འདི་ལྟར་གནང་བ་དང་མཚུངས་ཤིང༌། ཉིན་དེར་ལོ་དེའི་འབྲུག་གི་ཐོག་མ་ཡང་གྲགས་པ་སོགས་ཀྱིས་རྟེན་འབྲེལ་ལེགས་ཞེས་ཀུན་གྱིས་གླེང༌། དེའི་ཕྱི་ཉིན་ནས་ན་བཟའ་བཞེས་ཚུལ། གསུང་གི་གདངས། ཐལ་སྐད་འཁོར་གསུམ་སོགས་རྩོད་གྲྭ་བྱང་བ་རྣམས་དང་མཉམ་ཞིང༌། ཞག་གཅིག་ནས་རྩོད་པ་བདར་ཤ་གཅོད་ཐུབ་པ་བྱུང་བས་གཟུར་གནས་རྣམས་བསྔགས་བརྗོད་ཀྱི་རོལ་མོ་འཁྲོལ། ཆོས་མཚམས་ལ་སྐྱབས་མགོན་ཐམས་ཅད་མཁྱེན་པའི་དྲུང་ནས་དཔལ་དུས་ཀྱི་འཁོར་ལོའི་བྱིས་པ་འཇུག་པའི་དབང་བདུན། གོང་མ་གོང་ཆེན་དང་བཅས་པ་གསན་ཏེ་བྱིན་རླབས་བདུད་རྩིའི་བཅུད་ཀྱིས་ཐུགས་ཀྱི་བུམ་བཟང་ཡོངས་སུ་གཏམས། དེ་ཡང་འཛམ་གླིང་གི་སའི་ཆ་ཆུ་བོ་སི་ཏའི་ལྷོ་ཕྱོགས་སུ་ཀླ་ཀློའི་ཆོས་ཀྱིས་བསྟན་པ་ཉམས་དམའ་བ་ན་ཤམྦྷ་ལའི་ཡུལ་དུ་དྲག་པོ་འཁོར་ལོ་ཅན་གྱིས་ལྟ་ངན་ཅན་དཔུང་དང་བཅས་པ་ཀུན་ནས་རྨོངས་པར་བྱེད་པའི་རྟ་མཆོག་གི་ཏིང་ངེ་འཛིན་གྱིས་ཀླ་ཀློའི་རྒྱུན་བཅད་དེ་བསྟན་པ་རྫོགས་ལྡན་གྱི་དཔལ་ལ་འགོད་པའི་རྟེན་འབྲེལ་ཕུན་ཚོགས་ལྔ་ལྡན་དུ་འཛོམས་པ་འདི་འདྲ་སྐལ་བ་བཟང་ཞེས་ཀུན་གྱིས་སྒྲོག་ཅིང༌། སྐྱབས་མགོན་མཆོག་ནས་ཀྱང་ཉན་མཁན་གྱི་གྲངས་བརྩིས་ནས་སྔོན་པཎ་ཆེན་རིན་པོ་ཆེ་ནས་པོ་ཏ་ལར་དབང་གནང་སྐབས་ཁྱེད་རྣམས་སླར་དྲག་པོ་འཁོར་ལོ་ཅན་གྱི་དམག་མིའི་གྲས་བྱེད་དགོས་གསུངས་པའི་བཀའ་ཕེབས་ཚུལ་འཁོར་གྱི་དབུས་སུ་སྒྲོག་པར་མཛད་དོ། །དཔྱིད་ཆོས་གཉིས་པ་སོགས་ནས་ཆོས་གྲྭ་ཆག་
མེད་དུ་འགྲིམ་ཞིང༌། ཀུན་མཁྱེན་མཆོག་གི་བཀའ་ལྟར་བཀྲ་ཤིས་འཁྱིལ་གྱི་བརྩི་བཞག་གི་བསྡུས་གྲྭ་དང་བཙན་པོའི་བསྡུས་གྲྭ་ཐུགས་འཛིན་གནང༌། སྤྱིར་བསྡུས་གྲྭ་ཞེས་པ་ཚད་མ་སྡེ་བདུན་གྱི་རིགས་པའི་འགྲོ་ལུགས་ཤེས་ཆེད་དུ་གཞུང་ཚན་སོ་སོའི་རིགས་པའི་རྣམ་གྲངས་དུ་མ་ཕྱོགས་གཅིག་ཏུ་བསྡུས་པའི་གྲྭ་ཡིན་པས་མིང་ཡང་དེ་ལྟར་གྲགས་ལ། ལྷག་པར་བསྡུས་ཆེན་གྱི་སྐོར་རྣམས་མངོན་པ་གོང་འོག་དང་སྡེ་བདུན་གྱི་གཞུང་ལ་གོ་བ་ཆགས་པའི་ཐབས་འཕྲུལ་རྨད་དུ་བྱུང་བར་གྲགས་ཆེ་བ་ལྟར་གཞན་གྱིས་བསྐུལ་བ་ལ་མ་ལྟོས་པར་སྐྱོར་སྦྱངས་རྩོད་གྲྭ་སོགས་རྡོ་རུས་ཐུག་པ་གནང༌། བར་སྐབས་སུ་ཡབ་རྗེ་ཀུན་མཁྱེན་མཆོག་ལས་ལྷོ་བྲག་སྙན་བརྒྱུད་ཀྱི་དབང་ལུང་རྗེས་གནང་ཆ་ཚང༌། འཇམ་དབྱངས་ཆོས་སྐོར་གྱི་རྗེས་གནང༌། མཁའ་སྤྱོད་མ་དམར་མོའི་དབང༌། གདུགས་དཀར་ལྷ་བཅུ་བདུན་མའི་དབང་སོགས་གསན། དགུན་དུས་རྗེ་ཐུའུ་བཀྭན་རིན་པོ་ཆེ་བཀྲ་ཤིས་འཁྱིལ་དུ་བྱོན་པའི་དྲུང་ནས་ཚོགས་མང་དང་མཉམ་དུ་རྟེན་འབྲེལ་བསྟོད་པའི་བཤད་ལུང་གསན། གཟིམས་ཤག་ཏུ་གདན་དྲངས་ནས་བསྙེན་བཀུར་དང་འབུལ་ནོད་གཟབ་ཅིང་དེ་ནས་བཟུང་རིགས་ཀྱི་ཅོད་པན་དུ་མཛད། ཤིང་རྟའི་ལོ་ཆོ་འཕྲུལ་སྨོན་ལམ་གྱི་སྐབས་ཇུན་ཝང་ངག་དབང་དར་རྒྱས་གསུང་ཆོས་ལ་ཕེབས་ཏེ་རྗེ་འདི་ལ་མཇལ་ནས་དམ་བཅའ་ལ་བཞེངས་ཞུས་པ་ལྟར་བཞེངས་ནས་བགྲོ་གླེང་ཚ་བོ་གནང་བར་ས་ལ་མ་བཞུགས་ཀྱི་བར་དུ་ཝང་རང་ཉིད་འཁོར་བཅས་ཆོས་ཁྲིའི་ཟུར་ནས་བཞེངས་ཏེ་དགའ་སྤྲོ་དང་བཅས་ཏེ་གསན། མཚན་ཉིད་འདི་ངོ་མཚར་ཆེན་པོ་རེད་ཅེས་བསྔགས་བརྗོད་ཀྱང་གནང༌། རྗེ་འདི་ཡར་ཕེབས་
སྐབས་དགའ་དད་གུས་ཉམས་ཆེ་ཞིང༌། ཉིན་དེར་གཟིམས་ཤག་ཏུ་བྱོན་ནས་ལེགས་སོའི་མཇལ་དར་ཕུལ་ཏེ་འཆད་རྩོད་རྩོམ་གསུམ་གནང་དགོས་སོགས་ཀྱི་ཞུ་བ་ཕུལ། དེའི་ཉིན་ཁྲོམ་ཆེན་པོའི་མཇལ་མང་ཡང་འུར་ལངས་ཀྱིས་ཕྱག་འཚལ་ནས་བགྲོ་གླེང་ལ་མཇལ་བས་ཀུན་གྱི་སེམས་ལ་བག་ཆགས་བཟང་པོ་ཐེབས་པར་ངེས། ཀུན་མཁྱེན་བླ་མ་མཆོག་ལས་འཇིགས་བྱེད་ཀྱི་དབང་གསན། རྨི་ལྟས་བཀའ་འདྲི་གནང་བར། ཁྲག་རློན་པ་ཐོད་པ་གང་བཏུང་བ་རྨིས་ཞུས་པར་སྐབས་དེར་འདྲི་འཕྲོ་བཤོལ་ཀྱང་ཕྱིས་སུ་ཁྱད་པར་ཅན་གྱི་བཀའ་གནང་སྩལ་པ་གསུང་གི་ཟུར་ལས་ཐོས། མཇུག་ཏུ་པཎ་ཆེན་བློ་བཟང་ཆོས་རྒྱན་གྱིས་མཛད་པའི་དཔའ་གཅིག་བསྡུས་པའི་ལུང་གནང་སྟེ། ཁོ་བོས་སྟོང་འཁོར་རིན་པོ་ཆེའི་མདུན་ནས་དབང་ཐོབ་ཕྱིན་ཆད་དཔའ་གཅིག་ཆག་མ་མྱོང་བས་ཆོས་གྲྭ་པ་རྣམས་ཀྱིས་སློབ་གཉེར་མཐར་ཕྱིན་པའི་ཆེད་དུ་དཔའ་གཅིག་ཆག་མེད་བྱེད་དགོས་གསུངས། ཕྱིས་སུ་རྗེ་ཉིད་ནས་ཀྱང་བཀའ་ཕེབས་འདི་ཉིད་བསྐྱར་བའི་ཐོག་ཀུན་མཁྱེན་གོང་མས་འདུ་ཁང་ཆེན་མོར་འཇིགས་བྱེད་དཔའ་གཅིག་ལ་ཁྲོ་བཅུས་བསྐོར་བ་བྲིས་ནས་བཞག་པ་ནི་བློ་རྩེ་གཏད་ས་འདི་ཚོ་ལ་གྱིས་ཤིག་པའི་བརྡ་ཡིན་ཞེས་ཚོགས་གཏམ་སོགས་ལ་ཡང་ཡང་གནང༌། ཁྱད་པར་དུ། ཡེ་ཤེས་ལྔ་བདག་དཀྱིལ་འཁོར་ཆེན་པོ་རུ། །དཔལ་ལྡན་རྡོ་རྗེ་འཛིན་པའི་སྐུར་བཞེངས་ཏེ། །གསང་བ་མཆོག་གི་ལམ་དུ་སྨིན་མཛད་པའི། །མི་བསྐྱོད་དགྱེས་བཞད་རྡོ་རྗེ་གཙུག་ན་མཛེས། །ཞེས་གསུངས་པ་ནི་དབང་གྲལ་དུ་འཁོད་ཙམ་མ་ཡིན་པའི་གནད་གསང་ཁྱད་པར་ཅན་གོ་དགོས་
སོ། །མཧཱ་སུ་ཁ་རུ་དྷི་ར། །ཀུན་རྟོག་སྤྲོས་བྲལ་ཤཱུ་ནྱ་ཏ། །གཉིས་མེད་ཡེ་ཤེས་ཀ་པཱ་ལར། །རྟག་ཏུ་རོལ་བའི་ཧེ་རུ་ཀས། །ཕ་རྒྱུད་མ་རྒྱུད་ལམ་གྱི་གནད་ཚང་ཞིང༌། །རྣམ་འབྱེད་བློ་མྱུར་ཁྱད་པར་ལྔ་དང་ལྡན། །མཆོག་ཐུན་དངོས་གྲུབ་སྩོལ་བའི་ཡི་དམ་མཆོག །གཅེས་པར་གདམས་འདི་འཕྲལ་ཕུགས་ཀུན་ཏུ་གཅེས། །གཞན་ཡང་རྣམ་སྲས་རྟ་བདག་བརྒྱད་དང༌། སྒྲོལ་མའི་རྗེས་གནང་སོགས་གསན་ཞིང༌། གཙོ་བོར་ཆོས་གྲྭ་ཆག་མེད་ངོས་རྩོད་པ་དང་སྐྱོར་སྦྱངས་ཆུ་བོའི་རྒྱུན་ལྟ་བུ་གནང་བས་བསྡུས་གྲྭ་པ་ཡིན་ཀྱང་མངོན་པ་གོང་འོག་དང་ཚད་མའི་གཞུང་ལ་གོ་བ་དཔྱིས་ཕྱིན་པ་ཡོད་པ་འདི་འདྲ་སྔོན་སྦྱངས་དམ་པའི་རང་རྟགས་སུ་མངོན་ཞེས་གཟུར་གནས་དག་མགྲིན་གཅིག་ཏུ་གླེང༌། བསྡུས་གྲྭའི་སྐབས་འདི་དག་ཏུ་སྤྱིར་གཞུང་འགོད་ཀྱི་སྲོལ་ཆེར་མེད་ཀྱང་རྗེ་འདིས་ཁ་དོག་དཀར་དམར་ལྟ་བུར་བགྲོ་གླེང་གནང་རྒྱུ་ཡིན་ན་ཐོག་མར་མཛོད་ལས། གཟུགས་རྣམ་གཉིས་དང་རྣམ་ཉི་ཤུ། །སོགས་དང༌། ཡོད་རྟོགས་མེད་རྟོགས་ལྟ་བུ་ཡིན་ན་རྣམ་འགྲེལ་ལས། དམིགས་སུ་རུང་བའི་མེད་པ་ནི། །མི་དམིགས་པ་ལས་གཞན་མ་ཡིན། །སོགས་གང་འབྲེལ་རེ་དྲངས་ཏེ། དེའི་སྟེང་ནས་རེས་འགའ་བགྲོ་གླེང་གནང་བ་དང༌། ཁས་ལེན་ཤོར་བའི་ཚེ་མངོན་པ་གོང་འོག །ཕུང་པོ་ལྔའི་རབ་བྱེད། བདེ་གཤེགས་གཞུང་གི་རབ་བྱེད་སོགས་ཀྱི་ལུང་འདྲེན་ཐོགས་མེད་དུ་གནང་བ་གྲྭ་ཐོག་མཉམ་པ་རྣམས་ལ་མཐུན་གྲུབ་ཡིན་ལ། མཚོན་ཙམ་དཔེར་བརྗོད་ན། ཞོགས་པའི་ཆོས་གྲྭ་ནས་འཛིན་གྲྭ་གཏུགས་སྐབས་ཤིག །རྗེ་ཉིད་ལྷོད་བཞུགས་ལྟ་བུ་གནང་འདུག་པར། ཕྲན་རྣམས་ཀྱིས་
ཚོར་བ་དང་འདུ་ཤེས་གཉིས་རྣམ་པ་མཚུངས་ལྡན་ཡིན་མིན་བརྩད་པས་རིམ་གྱིས་མཚུངས་ལྡན་རྣམ་པ་ལྔ་མཚུངས་ཀྱི་ཡུལ་ངེས་ལྔ་མེད་པར་ཁས་ལེན་དགོས་བྱུང་སྟེ་ཁོང་གི་འཛིན་གྲྭ་ཕམ་སོང་ཞེས་ཧབ་ཆ་རང་བྱས་པས་རྗེ་ཉིད་ནས་ཚུར་རྒོལ་དུ་བྱུང་སྟེ། ཡུལ་ངེས་ལྔ་མཚུངས་ལྡན་དུ་མི་རུང་བར་ཐལ། དེ་ལྔ་རྒྱུ་འབྲས་སུ་འཇོག་པའི་ཕྱིར། དེར་ཐལ། དད་པ་ལས་འདུན་པ། འདུན་པ་ལས་བརྩོན་འགྲུས་སྐྱེ་བའི་རྒྱུ་འབྲས་དང༌། དད་པ་ལས་འདུན་པ། འདུན་པ་ལས་ཐོས་པ། དེ་ལས་བསམ་པ་དང་སྒོམ་པ་ནས་རྣམ་མཁྱེན་གྱི་བར་གྱི་རྒྱུ་འབྲས་སོགས་གསུངས་པའི་ཕྱིར་ཞེས་ལུང་འདྲེན་དུ་མ་དང་སྦྲགས་ནས་འཕངས་པས་ཕྲན་རྣམས་ཤགས་འགྱེད་ཙམ་ལ་རེ་དགོས་བྱུང༌། ཡང་དམ་བཅའ་བ་ཞིག་ལ། རྣམ་འགྲེལ་ལས། ཕྱེ་མ་ལེབ་ཁྲ་ལ་སོགས་གཟུགས། །ཞེས་སོགས་དྲངས་ནས་ཁྲ་འཛིན་མིག་ཤེས་ཡིན་པ་སྲིད་པའི་ཤེས་བྱ་ཡིན་མིན་འཕངས་ནས་དངོས་འགལ་གྱི་འཕྲེང་བ་མགོ་ལ་བཅིངས། ཡང་ལན་གཅིག །རྣམ་འགྲེལ་ལས། མིག་གིས་གཟུགས་དག་མཐོང་གྱུར་པ། །དེར་ནི་གསལ་བར་དེ་ཡི་བརྡ། །ཞེས་པ་དྲངས་ནས་སྦྲུལ་གྱི་རྒྱུད་ན་གཟུགས་ཀྱི་སྐྱེ་མཆེད་དང༌། སྒྲའི་སྐྱེ་མཆེད་གཉིས་ཀ་རྟོགས་པའི་དབང་ཤེས་ཡོད་མེད་འཕངས་པས་དམ་བཅའ་བ་མགོ་བོ་མགལ་མེའི་འཁོར་ལོ་ལྟར་འཁོར་བ་ལྟ་བུའོ། །ཀུན་མཁྱེན་མཆོག་ནས་ལོ་འདི་དང༌། རྗེས་མ་གཉིས་ཀྱི་ཆོ་འཕྲུལ་གསུང་ཆོས་ལ་ལེགས་བཤད་སྙིང་པོ་ཆུང་བའི་བཤད་ལུང་དང༌། དུས་འཁོར་གྲྭ་ཁང་དུ་ཀུན་རིག་གི་དབང་དང༌། རིམ་ལྔ་གསལ་སྒྲོན་གྱི་
བཤད་ལུང་གང་རྒྱས་སྩལ་པ་གསན། སྐབས་འདི་དག་ཏུ་བསྡུས་གྲྭའི་རྩོད་པ་ལ་རིག་པ་བཟང་བའི་ཚད་དུ་བརྩི་བ་སུས་ཀྱང་རྩོད་ཟླ་མི་ཕེར་བ་ཀུན་ལ་མཐུན་སྣང་དུ་གྲུབ་ཅིང༌། ཡིན་པ་མིན་པར་གྲུབ་ན་བསྡུས་གྲྭ་བྱང་བའི་རྟགས། མིན་པ་ཡིན་པར་གྲུབ་ན་བསྡུས་གྲྭ་བྱང་བའི་རྟགས་ཟེར་བ་དེ་ཙམ་མ་ཡིན་པར་རིགས་པ་གང་འཕངས་ཤུགས་ཆེ་ཞིང་གཞུང་དོན་དང་འབྲེལ་བས་རྒན་གཞོན་ཀུན་གྱི་དད་གུས་ལྷག་པར་འཕེལ། དགུང་ལོ་བཅུ་བཞི་པ་ལ་འཛིན་གྲྭ་རྟགས་རིགས་སུ་ཕེབས། ཡིག་ཆའི་བློ་རྟགས་གཉིས་ཐུགས་འཛིན་གནང་སྟེ་སྐྱོར་སྦྱངས་དང་རྩོད་པ་སྦྲགས་མ་སྔར་ལྟར་དང༌། ཁྱད་པར་ཡབ་རྗེ་མཆོག་གི་བཀའ་ལྟར་སྡེ་བདུན་ཡིད་ཀྱི་མུན་སེལ་ཐུགས་འཛིན་དང༌། ཞིབ་དཔྱད་གནང་བས་རིགས་ལམ་ཕྲ་མོའི་སྟོབས་ཀྱིས་མདོ་སྔགས་གང་ལ་གཟིགས་པ་ཙམ་གྱིས་དངོས་ཤུགས་མ་འདྲེས་ཐོགས་མེད་དུ་མཁྱེན་ཐུབ་པ་བྱུང༌། ཞལ་ནས། རང་དོན་ལེའུ་དང་གཞན་དོན་ལེའུ་གཉིས་གཙོ་ཆེར་རྟགས་རིགས་དང༌། ཚད་མ་གྲུབ་པའི་ལེའུ་དང་མངོན་སུམ་ལེའུ་གཉིས་གཙོ་ཆེར་བློ་རིག་གི་སྟེང་ནས་གོ་བ་ཞིག་བྱས་ན་ལེགས། དེའི་གནད་ཀྱིས་རང་རེའི་སྐྱབས་མགོན་རྡོ་རྗེ་འཆང་ནས། སྔར་རྣམ་འགྲེལ་གྱི་འཛིན་གྲྭ་ཕར་ཕྱིན་སྟོན་མོའི་འཛིན་གྲྭར་བྱས་ནས་བློ་རྟགས་ལས་ཟུར་དུ་རྣམ་འགྲེལ་མི་དགོས་པ་གནང་བ་རེད། འོན་ཀྱང་ཕྱིས་སུ་མངོན་སུམ་ལེའུ་དང་གཞན་དོན་ལེའུ་གཉིས་ཐལ་འཕྲེང་ཟུར་བཀོལ་བྱས་ནས་འཛིན་གྲྭ་ལོགས་སུ་ཕྱེ་རྒྱུའི་གསུང་བཀོད་གནང་བ་ནི། ལེའུ་བཞི་བློ་རྟགས་ཀྱིས་མི་འཆུན་པ་མང་པོ་ལ་དགོངས་པ་འདྲ་གསུངས། སྤྱིར་ལོག་རྟོག་རིགས་པས་སུན་དབྱུང་བ་ལ་རང་དོན་
ལེའུའི་སྐབས་ཀྱི་གཏན་ཚིགས་ཀྱི་སྒྲུབ་ཚུལ་ཤེས་དགོས། གཞལ་བྱ་གྲུབ་པ་དེ་ཚད་མ་གཉིས་དང་མཐུན་མི་མཐུན་གྱི་ཁྱད་པར་མངོན་སུམ་ལེའུ་ལྟར་ཤེས་དགོས། དེ་ལྟར་ངེས་པ་ཞིག་གིས་གདུལ་བྱ་རྗེས་སུ་འཛིན་པ་ལ་གཞན་དོན་ལེའུ་ནས་གསུངས་པའི་སྒྲུབ་དང་སུན་འབྱིན་གཉིས་དགོས། ལྟར་སྣང་གི་ལམ་གྱིས་གཞན་རྗེས་སུ་འཛིན་མི་ནུས་པས་ཚད་མ་གྲུབ་པའི་ལེའུ་ལྟར་སྟོན་པ་ཚད་མའི་སྐྱེས་བུར་ངེས་པ་ཞིག་ཐར་འདོད་ལ་མེད་མི་རུང་ཡིན་པ་ཀུན་གྱིས་གོ་བར་གྱིས་ཤིག །དགུང་ལོ་བཅོ་ལྔ་པ་མེ་སྤྲེལ་ལོ་འཛིན་གྲྭ་གཞུང་གསར་དུ་ཕེབས་ཤིང༌། ཡིག་ཆའི་སྐབས་དང་པོ་ཕལ་ཆེར་ཐུགས་འཛིན་གནང༌། སྒོ་མང་གྲྭ་ཚང་གི་རིགས་སྨྲ་རྩེར་སོན་བྱ་བྲལ་ཚུལ་ཁྲིམས་ནག་པོ་ཟེར་བས་གྲྭ་ཚང་ཐོས་བསམ་གླིང་ལ་དམ་བཅའ་བཞག་པར། དགེ་འདུན་ཉི་ཤུ་ནས་བགྲོ་གླེང་གནང་བས་ཐོག་མར་ངར་ངར་ཆེ་ཡང་རིམ་གྱིས་སྐད་ཀྱི་གདངས་ཆག་པ་སོགས་ཞུམ་པའི་ཁུར་གྱིས་ནོན། ཕྱིས་སུ་གཏིང་ནས་དད་གུས་ཀྱི་བསྔགས་བརྗོད་བཅོས་མིན་བྱེད་པ་ཐོས། དགུང་ལོ་བཅུ་དྲུག་པ་མེ་བྱ་ལོའི་འཛིན་གྲྭ་གཏུག་སྐབས་གཅིག་དུ་བྲལ་གྱི་རང་རྒྱུད་པའི་དགག་བྱ་ངོས་འཛིན་གྱི་སྟེང་ནས་བགྲོ་གླེང་མཛད་པས་སུས་ཀྱང་བློས་དཔོག་མི་ནུས་པར་སོང་སྟེ་ཕ་རོལ་པོ་རྣམས་སྨྲ་སྒོའི་ཤུན་པ་ལྷབ་ལྷབ་གཡོ་བ་ཙམ་དུ་གྱུར། དེ་སྐབས་གྲྭ་རྒན་རྣམས་ནས་ཁྲི་དགེ་འདུན་ཕུན་ཚོགས་ཀྱིས་གཅིག་དུ་བྲལ་དང༌། རྗེ་ངག་དབང་བསྟན་པའི་རྒྱལ་མཚན་པས་དབུ་མའི་དགག་བྱ་ངོས་འཛིན་གྱི་རྩོད་པའི་སྐབས་ནས་ལྟ་བ་རྙེད་དེ་རྩོད་པ་འགྲན་ཟླ་མེད་པའི་ཚུལ་ངོམས་པ་དང་ཆ་མཚུངས་
པས་རང་ཅག་སྐལ་བ་བཟང་ཞེས་གླེང་བ་ཐོས། ཕར་ཕྱིན་ཚུགས་ཕྱིན་ཆད་ཐུགས་རིག་ཇེ་ཟབ་དང་ཇེ་ཞིབ་ཏུ་སོང་བས་དགེ་བཤེས་རྒན་པ་རྣམས་ཀྱིས་རྩོད་ཟླ་ཕེར་བ་དཀའ་ལ། དཀའ་བཅུ་རབ་འབྱམས་ཀྱི་དམ་བཅའ་བཞག་ཚད་ལ་གྲྭ་ཚང་རང་གི་སློབ་གཉེར་བཟང་བའི་ཚད་དུ་བརྩི་བ་ཇི་འདྲ་ཞིག་ཡིན་ཀྱང་ཚར་མ་བཅད་པ་གཅིག་ཀྱང་མེད་པ་མངོན་སུམ་གྱི་ཡུལ་དུ་གྱུར། ལོ་དེར་གོང་མའི་ལུང་ལྟར་དགོན་པའི་འདུ་ཁང་དུ་གསེར་གྱི་ཙི་པེན་ཟི་ལིང་ཚཱེ་ཨམ་བན་གྱིས་བསྐྱལ་ནས་འོང་སྐབས་རྗེ་འདི་ཉིད་ཚོགས་སུ་བཞུགས་ཀྱང་ཡབ་རྗེའི་བཀའ་ལྟར་ཨམ་བན་ལ་འཚམས་ཞུས་ཕུལ་བར་ཨམ་བན་ནས་ཤིན་ཏུ་བསོད་ནམས་ཆེན་པོ་ཅན་ཞིག་འདུག་ཟེར་ཞེས་དཔོན་ཝང་གི་ཞལ་ནས་ཐོས། ལོ་སྔ་ཕྱི་འདི་དག་ཏུ། ྋཀུན་མཁྱེན་བླ་མ་མཆོག་ནས་སྐྱབས་འགྲོའི་ཁྲིད། བླ་མའི་རྣལ་འབྱོར་དངོས་གྲུབ་ཀུན་འབྱུང་གི་ཁྲིད། འཇམ་དཔལ་ཞལ་ལུང་གི་ཁྲིད་ཞིབ་རྒྱས་དང་མཇུག་ཏུ་སེམས་བསྐྱེད་མཆོད་པ་གནང་བར། མཆོད་འབུལ་གྱ་ནོམ་པ་དང་སེམས་བསྐྱེད་ཀྱི་རྫས་རྟེན་འབྲེལ་ཅན་ཕུལ་ཏེ་ཐུགས་སྨོན་མཛད་པས་ཐེག་ཆེན་ལམ་གྱི་གཞུང་ཤིང་རིན་ཆེན་སེམས་མཆོག་དབང་གི་རྒྱལ་པོས་ཐུགས་རྒྱུད་གཏམས་ཏེ་རྒྱལ་སྲས་སྤྱོད་པའི་མངའ་བདག་ཏུ་གྱུར། ཉིན་དེར་སྐྱབས་མགོན་མཆོག་ཚོགས་དབུས་སུ་བཞུགས། གྲྭ་མང་ཆོས་གྲྭའི་ལུགས་ལྟར་འཚོགས་ཀྱང་ཕྱག་བདེ་སོང་ཆོག་པ་བྱས། སྔར་ལམ་ཁྲིད་ཀྱི་སྦྱིན་པའི་ཕར་ཕྱིན་གྱི་ཉིན། བླ་བྲང་ཆེན་མོ་ནས་བླ་མ་བྱམས་པ་རིན་པོ་ཆེའི་ཕྱག་སྲོལ་ལྟར། ཆོས་ཉན་པ་ལ་ཇ་བག་རེའི་འགྱེད་གནང་ཐོག །ཉིན་འདིར་སླར་ཡང་ཇ་ཐུག་ཉིན་འཁྱོངས་འགྱེད་དང་བཅས་པ་གནང་སྟེ་སྐད་གྲྭ་པ་སོ་སོས་བསྐུལ་
ནས་གདངས་དབྱངས་དང་བཅས་མཚན་མོ་གཟིམས་བརྡ་རན་ཙམ་གྱི་བར་དུ་དུས་བཟང་ལྟར་ཆོས་སྤྱོད་གསུངས། དེར་ཡབ་རྗེ་མཆོག་གི་བཀས་རྗེ་འདི་ལ་ཇོ་བསྟོད་དང༌། ཚོགས་ཆེན་ཁྲི་རིན་པོ་ཆེ་འཇིགས་མེད་ལུང་རིགས་རྒྱ་མཚོ་པ་ལ་རྗེའི་གསང་བའི་རྣམ་ཐར་བསྐུལ་འཇུག་པ་གནང་སྟེ་རྟེན་འབྲེལ་ཞིག་ལ་དགོངས་པར་མངོན། གཞན་ཡང་འཇིགས་བྱེད་དཔའ་བོ་གཅིག་པའི་དབང༌། འཇིགས་བྱེད་བསྐྱེད་རིམ་གྱི་ཁྲིད་སྨིན་རྒྱས། མགོན་པོ་དཀར་ནག་གཉིས་དང༌། ཀུ་རུ་ཀུལླེ་སོགས་ཡི་དམ་དུ་མའི་རྗེས་གནང༌། འགའ་ཞིག་གི་བསྙེན་སྒྲུབ་ལས་གསུམ་སྦྱིན་སྲེག་སོགས་ཀྱི་ལུང་དང་ཁྲིད་ཅི་རིགས། ཡབ་རྗེ་མཆོག་གི་གསུང་སྔ་རྩོམ་གང་ཡོད་ཀྱི་ལུང༌། དུག་སྦྱོང་གི་མན་ངག་ཆིག་བརྒྱུད་འགའ་ཞིག་སོགས་སྤྱི་ཆོས་དང་སྒེར་ཆོས་མང་དུ་གསན་ཀྱང་ཞིབ་པར་མ་ངེས། སྤྱིར་རྡོ་རྗེ་འཆང་ནས་གྲྭ་པ་ཀུན་ལ་རྣམ་གཡེང་བཅད་ནས་སྐྱོར་སྦྱངས་ལ་བརྩོན་དགོས་ཚུལ། རྩོད་གྲྭ་བྱེད་ལུགས་ཐལ་མོ་རྡེབ་ཚུལ་སློབ་པ་སོགས་དང༌། དེའི་ནང་ནས་ཞབས་དྲུང་ཆེ་ཆུང་རིགས་ལ་ཆུང་དུས་གྲོང་ཆོག་ལ་མ་འགྲོ། ཆེ་ཚུགས་སྤངས་ནས་ཡོན་ཏན་སློབ་དགོས། ཞེས་སོགས་གསུང་བཀོད་ཡང་ཡང་གནང་བ་ཞིག་ཡོད་ལ། ལྷག་པར་རྗེ་འདི་ལ། གུང་ཚིགས་དང་ཆབ་ལེན་རུང་ཆུ་འདེབས་པ་སོགས་འདུལ་བ་དང་མཐུན་པའི་ཀུན་སྤྱོད་གཙང་བ་དང༌། ཤོ་བརྟག་བཀའ་བསྒོ་ཚུན་ཆད་གསལ་ཆ་མི་ཆེ་བ་དང༌། དམ་ཆ་ཆེ་བའི་སྒོ་ནས་མཆོད་འབུལ་ཕྱག་སྦྱངས་འཛིན་སྐྱོར་ཞལ་འདོན་སོགས་སྐབས་སུ་གང་བབས་ལ་ཐད་ཀ་ཐད་ཀར་ཞལ་བཀོད་དང༌། ཕེབས་བཞུད་ན་བཟའ་བཞེས་ཚུལ་སོགས་ཀྱང་བཀས་ཁྱབ་པའི་གཅེས་སྤྲས་ཆེ་བར་མཛད། དབང་རྗེས་
གནང་སོགས་ཀྱི་མཆོད་ཤོམ་ཕྱག་ལེན་སོགས་ཞིབ་གཟིགས་དང༌། བག་ཟན་ལས་གཏོར་མ་དང་གཟུགས་འགྲོས་བཟོ་བ་དང༌། ལྷ་བྲིས་དང་རི་མོ་སྣ་ཚོགས་སྐུ་རྩེད་ཀྱི་རྣམ་པ་ཚུན་ཆད་ཀྱིས་སློབ་པ་དང༌། རྒྱ་སོག་གི་སྐད་དང་ཡི་གེ་ཡང་ཐུགས་སུ་ཆུད་པ་བྱུང༌། དེ་དག་གི་བར་སྐབས་ཅི་རིགས་པར་སོག་པོ་ཇ་སག་ལྔ་དང༌། ཨ་རིག་སྡེ་མང༌། མཛོ་དགེ །དབལ་ཤུལ་སོགས་སུ་དབུས་ཕེབས་ཆ་རྐྱེན་དུ་ཐུགས་བྲེལ་དང་བསྟུན་ནས་འབུལ་སྡུད་མཛད་པ་ཕྱག་མཛོད་རབ་འབྱམས་པས་ཁུ་བསྡུས་བྱས་པར་དངུལ་དཀར་སྲང་ཁྲི་ལྷག་བྱུང་ཞིང་ཕེབས་བཞུད་གནང་སྐབས་གྲྭ་ཚང་ལ་ཞོ་རེ་དང༌། མ་གནང་སྐབས་སྐར་ལྔ་རེའི་རྩིས་ཀྱི་འགྱེད་ལོ་རེ་བཞིན་ཆག་མེད་དུ་གནང༌། དེ་ལྟའི་བྲེལ་གཡེངས་ཀྱིས་ཐུགས་གཉེར་ལ་མི་གནོད་པར་མ་ཟད། འཛིན་སྐྱོར་སྦྱངས་དང་དཔེ་གཟིགས་ཀྱིས་ཆོས་གྲྭར་ཕེབས་ཚེ་རྩོད་བཞིན་པ་རྣམས་ལས་ཀྱང་ཆེས་ལྷག་པ་ཡོད་དེ། རྗེ་ཉིད་ནས་གནང་བའི་རྣམ་ཐར་སྤྲིང་ཡིག་ལས་ཀྱང༌། བཅུ་གཉིས་སྟེང་དུ་བསྡུས་གྲྭའི་རྩོད་པར་ཞུགས། །དབུས་ཆས་འབུལ་སྡུད་གཡེངས་པ་ཤས་ཆེ་ཡང༌། །རྩོད་ཟླ་རྣམས་ཀྱི་རྗེས་སུ་མ་ལུས་ཙམ། །རྟོག་གེའི་བག་ཆགས་སད་པའི་རྣམ་ཐར་ཡིན། །ཞེས་གསུང་བ་ལྟར་རོ། །དགུང་ལོ་བཅུ་བདུན་པ་ས་ཁྱི་ཟླ་བ་དང་པོའི་ཚེས་ཀྱི་དགའ་སྟོན་བླ་བྲང་ཆེན་མོར་ཡབ་སྲས་ལྷན་རྒྱས་ནས་གནང་ཞིང༌། དཔྱིད་ཀྱི་རིང་དབུས་སུ་ཕེབས་ཆས་རྟ་ཁལ་སོགས་གྲ་སྒྲིག་མཛད། གྲྭ་སློབ་སྦྱིན་བདག་དུ་མས་ཕེབས་རྫོངས་ཞུས་ཤིང༌། སྐྱབས་འཇུག་འཕོ་བ་ཁྲུས་དབང་སོགས་འདོད་ཆོས་ཚིམ་པར་གནང༌། ཡབ་རྗེ་མཆོག་གི་དྲུང་དུ་ཐར་པ་རྩེར་ཉིན་བར་མ་ཆད་ལྟ་བུར་ཕེབས་པར་གང་ཅིའི་གསུང་བཀོད་ཕྲ་ཞིབ་ལུང་བསྟན་གྱི་ཚུལ་དུ་ལྷུག་པར་སྩལ།
ཉིན་གཅིག་སྐུ་མདུན་ནས་དཀར་སྤྲོ་དམར་སྤྲོའི་དགྱེས་སྟོན་དང་བཅས་ཕེབས་རྫོངས་གྱ་ནོམ་པ་གནང་སྟེ་ཞལ་ཏ་གནད་བསྡུས་དང༌། མདོར་ན་དབུས་སུ་སྐུ་ཡོན་གསན་སྦྱོང་མཐར་ཕྱིན་པ་གནང་ནས་སླར་མདོ་སྨད་དུ་བྱོན་ཏེ། དགོན་པ་འདིར་ཕན་གྲོགས་བཟང་པོ་གནང་དགོས། ང་ཡང་ལོ་མཐོན་པོ་འདི་ལྟར་སོང་བའི་ཚེགས་ལེན་རེ་བྱེད་དགོས་ཞེས་དབུ་ལོ་དཀར་པོ་སྟོན་པར་མཛད་པས་གསུང་གི་ཁུར་ཐུགས་ལ་ལྕི་བར་གྱུར། དེ་དུས་ཆོས་གྲྭར་རྩེད་མོ་ཚུན་ཆད་ཀྱི་རྩོམ་པ་བྱེད་མཁན་དང། སྙན་ངག་མཁན་ཤིན་ཏུ་མང་ཞིང་རྗེ་འདི་ཡང་སྡེབ་ལེགས་ཀྱི་རྩོམ་པ་ལ་ཐོགས་པ་མེད་པ་གསན་ནས་ཉིན་གཅིག་འདིར་གནས་བསྟོད་ཅིག་རྩོམ་གསུངས་པ་ལྟར་སྐུ་མདུན་དེར་ཐོགས་མེད་དུ་སྦྱར་བས་ཐུགས་དགྱེས་ཤིང་གསང་བའི་རྣམ་ཐར་འགའ་ཞིག་ཀྱང་གསུང་སྟེ་ཕ་དང་བུ་བཞིན་དུ་བཙའ་བར་མཛད་དོ། །དེ་ལྟར་བག་མེད་པའི་དྲི་བཞོན་ནི་ངང་གིས་ཞི། བཟང་པོའི་ཡོན་ཏན་གྱི་ཆུ་ཁུར་ནི་ཡོངས་སུ་རྫོགས། ལུང་དང་རིགས་པའི་གློག་འོད་ནི་རྣམ་པར་འཕྲོ། སྙན་པར་གྲགས་པའི་འབྲུག་སྒྲ་ནི་དལ་གྱིས་རྒོད་པའི་དབྱར་གྱི་དཔལ་མོ་གཉིས་པ་ཞིག་ཐུབ་བསྟན་པད་ཚལ་རྒྱས་པའི་གཉེན་དུ་གྱུར་ཏོ། །སྨྲས་པ། བཤེས་གཉེན་ཉིན་བྱེད་དབང་པོ་དེའི། །ལེགས་བཤད་འོད་སྟོང་འཐུང་བ་ཡིས། །བློ་གྲོས་པདྨོ་རྣམ་རྒྱས་པ། །ལུང་རིགས་སྦྲང་རྩིའི་གཏེར་དུ་རྫོགས། །ཕྱོགས་ཀྱི་འཁོར་ལོའི་རྒོལ་བ་གླང་ཆེན་གྱི། །སྤྱི་བོ་རིགས་པའི་སྦར་མོས་འགེམས་བྱེད་ཅིང༌། །མང་དུ་ཐོས་པའི་རལ་ཁུར་གཡོ་བ་ཁྱོད། །ཐུབ་བསྟན་གངས་རི་མཛེས་པའི་རྒྱན་དུ་གྱུར། །འབྲུག་སྒྲ་དལ་གྱིས་རྒོད་པས་རྨ་བྱ་བཞིན། །རྣར་སྙན་ཡིད་འབབ་ཡོངས་
འཛིན་དམ་པའི་ལུང༌། །སྙིང་ལ་སིམ་པས་གདུང་བ་ཀུན་འཕྲོས་ཀྱང༌། །བཀའ་བཞིན་སྒྲུབ་འདུན་ཐིག་ལེའི་ཁུར་ཆེན་ལྕི། །ཤེས་བྱའི་མཁའ་མཐའ་གཞལ་བའི་མཁྱེན་དཔྱོད་ཀྱི། །འདབ་ཡངས་རྣམ་བཀྲ་ཀ་ལ་པིང་ཀ་དེ། །སྐལ་བཟང་སྒྲ་འཛིན་བདུད་རྩིར་འགྱུར་བའི་དཔྱིད། །བཅུ་ཕྲག་རིག་གནས་དབྱངས་སྙན་རང་སྒྲ་འཁྲོལ། །རྨོངས་མུན་འཇོམས་པའི་དཀྱིལ་འཁོར་ཡོངས་རྫོགས་ཀྱང༌། །དམ་པའི་ལམ་སྲོལ་གོ་ལར་མ་ཞུགས་ཚེ། །རིས་མེད་ཐུབ་བསྟན་སྐྱོང་བར་མི་ནུས་ཞེས། །དབུས་འགྱུར་བགྲོད་པའི་སྐྱ་རེངས་དང་པོ་ཤར། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་བཀྲ་ཤིས་འཁྱིལ་དུ་ཕར་ཚད་གཙོ་བོར་གྱུར་པའི་བསླབ་སྦྱངས་མཛད་ཚུལ་གྱི་སརྒ་སྟེ་བཞི་པའོ།། །། ༈ གང་ཞིག་དྲན་པས་ཀུན་རྟོག་སྤྲོས་པའི་མུན། །འདབ་བརྒྱའི་གཉེན་དང་འཕྲད་པའི་བ་མོ་བཞིན། །འཇོམས་བྱེད་འཇམ་དཔལ་ཞི་ཁྲོ་བླ་མ་ལྷ། །སྙིང་དབུས་པདྨོར་བཞུགས་ལ་མཆོག་སྩོལ་ཅིག །ལོ་དེའི་ཟླ་བ་ལྔ་པའི་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་གཟིམས་ཁང་གི་རྭ་སྐོར་དུ་རྗེ་ཉིད་ཀྱི་འཛིན་གྲྭ་པ་རྣམས་ཀྱིས་ཐབ་སྐྱེལ་ཞུས་པར་དགའ་ལྡན་ལྷ་བརྒྱ་མའི་ཁྲིད་དང༌། སེམས་ལ་བཅང་རྒྱུའི་ཞལ་ཏ་བཟང་པོ་དང་དགོན་པའི་གྲྭ་མང་ལ་ཕྱག་དབང་གནང༌། ལྕགས་རིའི་ཕྱི་ལོགས་ནས་སྤྱི་སོས་ཐབ་སྐྱེལ་ཞུས། དེ་ནས་གྲྭ་མང་ཞལ་འཛོམས་སར་དགེ་བཤེས་ཆེན་པོ་སྨན་ལུང་རབ་འབྱམས་པ་བློ་བཟང་རྒྱལ་མཚན་གྱིས་གདངས་སྙན་ལ་གསལ་ཞིང་མཐོ་བ་དང༌། རྒྱུན་རིང་ལ་འགྱུར་གྱི་ཉམས་དོད་ཅིང་ཡིད་འཕྲོག་པའི་ཐལ་སྐད་དང་བཅས་དར་འབོད་བཏང་བ་ན་ཆིབས་ཞལ་ལན་གསུམ་
བསྒྱུར། དགེ་འདུན་པ་རྣམས་མཐོང་ཐོས་ཀྱི་མཛད་པ་དང༌། རྗེ་ཉིད་ཐག་རིང་དུ་འབྱོན་པའི་ངང་ཚུལ་ལ་སྐྱོ་བས་གདུངས་ཏེ་འབྲལ་མི་ཕོད་པར་གྱུར། རིགས་སྨྲའི་ཁྱུ་རྒྱན་ངང་པའི་རྒྱལ་པོ་དེས། །དབུས་གཙང་ཆོས་ཀྱི་རོལ་མཚོ་བསྙེགས་པ་ན། །ཆོས་མཐུན་རིགས་སྨྲའི་དར་འབོད་ཐལ་སྐད་དང༌། །ལྷན་ཅིག་འདུས་ཚོགས་ངང་མོ་སྐྱོ་བས་གདུངས། །དེ་དུས་ཀུན་མཁྱེན་མཆོག་ཀྱང་འཁོར་འགའ་དང་བཅས་ཏེ་ཐར་པ་རྩེའི་རི་དེའུ་ཞིག་གི་ཁར་བཞུགས་ནས་རྒྱང་རིང་པོའི་བར་དུ་སྤྱན་སྐྱེལ་གནང་བ་གྲྭ་མང་གིས་མཐོང་བས་ཡབ་སྲས་ཀྱི་མཛད་པ་རྣམ་ཐར་ལ་དད་གུས་འཕེལ་ཞིང༌། ཐུགས་སྐྱོ་བའི་ཉམས་ཀྱིས་སྤྱན་ཆབ་བསིལ་བ་ཐོས་པས་ཀུན་གྱི་སེམས་ལ་སྐྱོ་ཤས་བོགས་ཐོན་པ་ལྟ་བུ་བྱུང༌། སྤྲིན་གྱི་འཕྲེང་བ་འཁྲིགས་མིན་པར། །བདུད་རྩིའི་ཆར་ཟིམ་འགྲེམ་པ་དེས། །དྲི་བཞོན་རྒྱུ་བ་མེད་པར་ཡང༌། །ལུས་ཀྱི་བ་སྤུ་གཡོ་བར་བྱེད། །དེ་ནས་ཚོགས་ཆེན་ཁྲི་ལས་ཐོག་པ་སྡེ་ཁྲི་རིན་པོ་ཆེ་འཇིགས་མེད་ལུང་རིགས་རྒྱ་མཚོ། ཚོགས་ཆེན་ཁྲི་ཟུར་ངག་དབང་འཕྲིན་ལས། རྒྱུད་པ་དཔོན་སློབ་ཚོ་འདུ་སྤྲུལ་སྐུ་དོན་གྲུབ་རྒྱ་མཚོ་སོགས་བླ་མ་གདན་ཟུར། ལས་སྣེ་ཁག །དབོན་ཆོས་མཛད་ཀྱིས་ཐོག་དྲངས་ཆིབས་སྐྱེལ་བ་དུ་མ་དང་བཅས་ཏེ་རིམ་གྱིས་ཕེབས། རྗེ་ཉིད་ནས་ཀྱང་ཡབ་རྗེ་མཆོག་རི་རྩེར་བཞུགས་པ་ལ་རྒྱང་རིང་པོའི་བར་དུ་ཕྱི་མིག་སྤྱན་ཟུར་མི་གཡོ་བ་ལྟ་བུར་མཛད། རྣམ་གྲོལ་ཐར་པར་བགྲོད་པའི་གྲུ་བོ་ཆེ། །སྟོན་པས་ཆེར་བསྔགས་ཤེས་རབ་ཕ་རོལ་ཕྱིན། །བྱང་ནས་བྱང་དར་བདེན་པ་ངོམ་ཆེད་དུ། །དེད་དཔོན་མཆོག་དེ་དགའ་ཞིང་སྤྲོ་བས་ཞུགས། །འོན་ཀྱང་གོམ་པའི་འདེགས་འཇོག་ཉལ་འགྲོའི་
ཀླུང༌། །ཐག་རིང་ཡུར་བར་ཇི་ལྟ་ཇི་ལྟར་གཞོལ། །དེ་ལྟ་དེ་ལྟར་ཡིད་ཀྱི་དྲན་པའི་རྒྱུན། །ཡོངས་འཛིན་གདེངས་ཅན་གནས་དེར་མངོན་པར་འཁྱིལ། །དགོན་པའི་གཞུང་ནས་སྐྱེལ་མ་རིམ་པ་གསུམ་དང་བཅས་རིམ་གྱིས་ཕེབས་པར་ཝང་གི་ཨུ་རྒེ་དང༌། ཚ་གན་ནོ་མོན་ཧན་ནས་ཀྱང་བསུ་སྐྱེལ་ཇ་ཐབ་སོགས་བསྙེན་བཀུར་གང་དྲག་ཞུས། ལམ་འཁོད་ཀྱི་མཚོ་སྔོན་ཐོར་གོད་ཁ་གསུམ་དང༌། ཡོལ་ཤུལ་བ་སོགས་ཀྱིས་གང་མཉེས་ཀྱི་མཐུན་རྐྱེན་བསྒྲུབ་པ་སོགས་གྲོགས་སུ་གང་འགྱུར་ལས་ཉེར་འཚེ་གང་ཡང་མེད་པར་ཧོར་ཟླ་བརྒྱད་པའི་ཚེས་ལ་བོད་ཡུལ་ནོར་འཛིན་གྱི་ལྟེ་བ། འོག་མིན་ས་ལ་འཕོས་པ་ལྟ་བུའི་ཤཱཀྱའི་རྒྱལ་པོའི་ཕོ་བྲང་ལྷ་ལྡན་དུ་འབྱོར། གཟིམས་ཆུ་ཉི་འོད་འཁྱིལ་པར་རྒྱལ་བའི་དབང་པོ་མཆོག་ལ་འབྱོར་ཕྱག་ཞུས། གཞུང་ས་ནས་ཀྱང་ལམ་བར་གྱི་རྟ་ཐབ་བསུ། རྟ་འུལ། རྫོང་སྐྱེལ། ཕེབས་སྟོན་སོགས་སྐུ་གོང་མའི་བབས་དང་མཐུན་པའི་བཀུར་གཟོས་རྒྱ་ཆེན་པོ་མཛད། མ་འགྱངས་པར་མཁས་གྲུབ་འབུམ་སྡེའི་རོལ་མཚོ་དཔལ་ལྡན་འབྲས་དཀར་སྤུངས་པའི་གླིང་དུ་ཕེབས། འབྲས་སྤུངས་སྤྱི་སོ། སྒོ་མང་བླ་བྲང༌། གྲྭ་ཚང་སྡེ་པ། ཁམས་ཚན་སོ་སོ་དང་བཅས་པས་སྐབས་བབས་ཀྱི་ཐབ་བསུ། སྒོ་མང་གྲྭ་ཚང་ནས་ཁང་སྟེང་དུ་དཀར་སྤྲོའི་ཐོག །སྐུ་གསུང་ཐུགས་རྟེན་ན་བཟའ་ཉེར་སྤྱད་སོགས་ཕུལ་ཞིང༌། སྤྱི་སྒེར་ཐམས་ཅད་ཀྱིས་བཀུར་གཟོས་རྨད་དུ་བྱུང་བས་གང་ཅིའི་རྟེན་འབྲེལ་ཕུན་སུམ་ཚོགས་པ་བསྒྲིགས། ཟླ་བ་བཅུ་པའི་ཚེས་བཅུ་བདུན་གྱི་ཉིན་གངས་ཅན་མཁས་པའི་འབྱུང་གནས་དཔལ་ལྡན་བཀྲ་ཤིས་སྒོ་མང་གི་ཆོས་གྲྭར་ཞུགས། སྙན་གྲགས་ཀྱིས་འཛམ་གླིང་ཁེངས་ཙམ་གྱི་སྒོ་མང་དཔོན་སློབ་ཧོར་སྐལ་བཟང་དངོས་གྲུབ་པ་དགེ་རྒན་དུ་བསྟེན། ལུང་དང་རིགས་པའི་
རོལ་རྩེད་ཀྱིས། །ཐུབ་བསྟན་བྱི་དོར་བགྱིད་པ་པོ། །ཆོས་གྲྭ་ཆེ་དེར་དགའ་བཞིན་ཞུགས། །པདྨོའི་མཚོ་ལ་ངང་མོ་བཞིན། །དེ་ནས་བཀྲ་ཤིས་ལྷུན་པོར་ཕེབས་ཏེ་པཎ་ཆེན་ཐམས་ཅད་མཁྱེན་པ་བློ་བཟང་དཔལ་ལྡན་ཡེ་ཤེས་ལ་དངུལ་སྲང་ཉིས་བརྒྱ། རྟ་བཟང་ཉི་ཤུ། གོས་དར་རས་ཟམ་སོགས་ཀྱི་མཆོད་སྤྲིན་ཐོག་བརྟན་བཞུགས་འབྲེལ་ཆགས་ཞུས་པར་དགྱེས་པའི་བཀའ་ལན་སྩལ། བཀའ་གདམས་ཐིག་ལེ་བཅུ་དྲུག་གི་དབང༌། ཚེ་དཔག་མེད་ལྷ་དགུའི་དབང༌། བཅུ་གཅིག་ཞལ་གྱི་དབང༌། སྒྲོལ་དཀར། རྣམ་རྒྱལ་མ། ཁྱུང་ཁྲ་ནག །རྟ་མགྲིན། འཇམ་དབྱངས་དཀར་པོ། ཆོས་རྒྱལ་ནང་སྒྲུབ། མགོན་དཀར་སོགས་ཀྱི་རྗེས་གནང༌། འཕོ་ཁྲིད་དང༌། སྒྲ་མི་སྙན་གྱི་ཚེ་སྒྲུབ་ཀྱི་ཁྲིད་སོགས་དགྱེས་བཞིན་གནང༌། བཀྲས་ལྷུན་ཚོགས་ཆེན་ལ་དངུལ་སྐར་ལྔ་རེའི་འགྱེད་བཏང༌། པཎ་ཆེན་མཆོག་ནས་ཀྱང་དཀར་སྤྲོའི་ཐོག་གནང་ཆ་དང་དགྱེས་གཟིགས་དཔེ་མེད་ངོས་བསྟན་འགྲོའི་དོན་རླབས་པོ་ཆེ་གནང་དགོས་ཚུལ་གྱི་བསླབ་སྟོན་སྩལ། དཔལ་འཁོར་ཆོས་སྡེ། བཀྲ་ཤིས་ལྷུན་པོ། དབེན་དགོན། རོང་བྱམས་ཆེན། སྙེ་ཐང་སོགས་སུ་མཆོད་འབུལ་མཇལ་ཞུ། མང་འགྱེད་གང་འོས་བསྒྲུབས་ནས་དགུན་ཆོས་ཀྱི་མཇུག་ཙམ་ལ་འབྲས་སྤུངས་སུ་འབྱོར། དགུང་ལོ་བཅོ་བརྒྱད་པ་ས་ཕག་གནམ་ལོ་གསར་ཚེས་ལ་རྩེ་ནས་བཞུགས་གྲྭར་ཕེབས་དགོས་ཀྱི་བཀའ་གནང་བ་ལྟར། དེ་ནས་བཟུང་སྟེ་ལོ་རེ་བཞིན་ཕེབས་དགོས་པ་བྱུང༌། རྒྱལ་བའི་དབང་པོ་པད་དཀར་འཆང་བ་བློ་བཟང་འཇམ་དཔལ་རྒྱ་མཚོར་དངུལ་སྲང་སུམ་བརྒྱ་དང་ལྔ་བཅུ། རྟ་བརྒྱ། གོས་དར་སོགས་འབུལ་བའི་མཆོད་སྤྲིན་དང༌། རྒྱལ་ཚབ་ཚ་རྡོར་ནོ་མོན་ཧན་ལ་དངུལ་
སྲང་བརྒྱ་སོགས་ཀྱི་དངོས་འབུལ་བཏེག །གཞུང་ནས་བཞུགས་ཁྲི་རྒྱབ་ཡོལ་དཀར་སྤྲོའི་གཞིས་ལེན་གང་རྒྱས་མཛད། ལྷ་ལྡན་སྨོན་ལམ་ལ་མང་ཇ་གཉིས་དང་དངུལ་སྲང་སྟོང་དང་དྲུག་བརྒྱ་ལྷག་གིས་དངུལ་ཞོ་རེའི་འགྱེད། ཟམ་སོ་དགུ་བརྒྱ་ལྷག་གིས་གསུང་ཆོས་རྭ་བ་དྲུག་སྟོང་བརྒལ་བར་རས་འགྱེད། འབྲས་སྤུངས་ཚོགས་ཆེན་ལ་དངུལ་ཞོ་འགྱེད། སྒོ་མང་གྲྭ་ཚང་ལ་ཞོ་གསུམ་རེ། སེ་ར་དགའ་ལྡན་གཉིས་ལ་དེ་མཚུངས་ཀྱི་རས་འགྱེད་བཏང༌། སྨོན་ལམ་གྲོལ་རྗེས་རྒྱལ་དབང་རིན་པོ་ཆེ་ནས་བཀའ་ཕེབས་པ་ལྟར་པོ་ཏ་ལའི་གཟིམས་ཆུང་དུ་གུང་ཚིགས་ལྷན་རྒྱས་ཀྱི་དགྱེས་གཟིགས་དང༌། སྐུ་གསུང་ཐུགས་རྟེན་ན་བཟའ་ཉེར་སྤྱད་ཀྱི་གནང་སྒོ་ཕུན་སུམ་ཚོགས་པས་གཟེངས་བསྟོད། རིགས་གྲྭ་ལ་ཡང་འབྲས་སྤུངས་ཚོགས་ཆེན་ལ་སྐར་ལྔ་རེའི་འགྱེད་གནང་བ་དབུས་བཞུགས་ཀྱི་རིང་ལ་ལོ་ལྟར་ཆག་མེད་མཛད། དུས་རྒྱུན་དུ་ཆོས་ཐོག་ལ་ཆོས་གྲྭ་ཆག་མེད་དང༌། ཆོས་མཚམས་ལ་འཛིན་སྐྱོར་སྦྱངས་ཉིན་རེར་ཡང་ཐང་ལྷོད་མེད་ངོས་ནས་འགྲེལ་པ་དོན་གསལ། གསེར་འཕྲེང་གི་དགེ་འདུན་ཉི་ཤུ །དཔོན་སློབ་ཆོས་གྲགས་པའི་རྟེན་འབྲེལ་སོགས་ཐུགས་འཛིན་དང་ཡིག་ཆ་སོ་སོ་ལ་ཞིབ་གཟིགས་མཛད། ཞི་ཞིང་དུལ་བའི་ཀུན་སྤྱོད་ལྷན་སྐྱེས་སུ་འགྲོགས་ཤིང༌། མཐོ་རིས་ཀྱི་ཡོན་ཏན་ཡོངས་སུ་རྫོགས་པའི་སྐུ་མཐོང་བ་དང༌། རྩོད་ངག་གི་བརྗོད་པ་དག་ཅིང་གསུང་གདངས་མཐོ་ལ་སྙན་པ་ཐོས་པ་དང༌། རིགས་པའི་འཕྲུལ་གྱིས་ལོག་རྟོག་གཞོམ་པའི་ཡོན་ཏན་གྱིས་བློ་ལྡན་གཟུར་གནས་ཡོངས་ཀྱི་མིག་ཡིད་རྣ་བ་བདུད་རྩིའི་གཏེར་དུ་བསྒྱུར། དགུན་ཆོས་ལ་གཞུང་གསར་གོང་དུ་ཕེབས། དགུང་ལོ་བཅུ་དགུ་པ་ལྕགས་བྱི་ལ་རྩེའི་མཇལ་ཁ་དང་ལྷ་ལྡན་སྨོན་ལམ་གྱི་ཚོགས་ལ་ཕེབས་ཤིང༌། ཇོ་ཤཱཀ་ལ་ཕྱག་མཆོད། གྲྭ་སྐོར་ལ་
གཟིགས་རྟོག་དང་བགྲོ་གླེང་ལ་བཞེངས་པར་མཛད། ཆོས་གྲྭ་ཆག་མེད་ངོས། གསེར་འཕྲེང་གི་སྐབས་དང་པོ། ཡིག་ཆའི་ཕར་ཕྱིན། ལེགས་བཤད་སྙིང་པོའི་སྟོད་ཆ་སོགས་ཐུགས་འཛིན་མཛད། དགུན་ཆོས་ལ་འཛིན་གྲྭ་སྐབས་དང་པོར་ཕེབས། དགུང་ལོ་ཉི་ཤུ་པ་ལྕགས་གླང་ལ་རྩེའི་མཇལ་ཁ་དང་ལྷ་ལྡན་སྨོན་ལམ་མ་གཏོགས། སྐྱོར་སྦྱངས་རྩོད་གྲྭ་སྔར་རྒྱུན་ལྷོད་མེད་དང༌། དྲང་ངེས་རྣམ་འབྱེད་ཆེན་མོ་ཐུགས་འཛིན་མཛད། དགེ་རྒན་སོག་པོ་རབ་འབྱམས་པ་གཤེགས་ནས་བྱ་བྲལ་དཀའ་བཅུ་མཆོག་ལྡན་བཅར་བཞུགས་ཀྱི་ཆེད་དུ་སྐུ་མདུན་དུ་བཞག །ཁོང་གིས་འདུལ་བའི་ཀུན་སྤྱོད་དང་གང་མཐུན་གྱི་ཕྱག་གཡོག་དང༌། སྐྱོར་སྦྱངས་ཀྱི་ཚེ་དཔེ་འདོན་བྱས་ནས་སྐྱོར་གྲོགས་དང༌། དཔེ་གཟིགས་ཀྱི་རྟིང་བསྐུལ་དང༌། ཞབས་འདེགས་གང་ལེགས་ཞུས་པ་ལྟར་རྒྱ་འགྲེལ་ཉེར་གཅིག་དང་བཀའ་གདམས་གཞུང་དྲུག་སོགས་རྒྱ་གཞུང་དུ་མ་དང༌། གླེགས་བམ་རིན་པོ་ཆེ་སོགས་བཀའ་གདམས་ཀྱི་གཞུང་དུ་མ་ལ་ཞིབ་གཟིགས་དང༌། ཐོས་དོན་རང་རྒྱུད་ལ་སྦྱོར་བར་མཛད་པས་དགེ་བཤེས་རྒན་གཞོན་སུས་ཀྱང་འགྲན་མེད་ཀྱི་མཁྱེན་རབ་གཏིང་མི་དཔོག་པར་གྱུར་པ་ཀུན་ལ་ཡོངས་སུ་གྲགས་སོ། །དགུན་ཆོས་ལ་ཕར་ཕྱིན་སྟོན་མོ་བར་ཕེབས། སྔ་ཕྱི་འདི་དག་ཏུ་སེ་འབྲས་དགེ་གསུམ་གྱི་ཡིག་ཆ་སོ་སོར་ཇི་ཙམ་གཟིགས་པ་དེ་ཙམ་དུ། རང་རེའི་ཡིག་ཆ་ལ་ཐུགས་ངེས་ཇེ་ཆེར་སོང་གསུངས། དགུང་ལོ་ཉེར་གཅིག་པ་ཆུ་སྟག་ལ། བསམ་གཟུགས་ལེགས་བཤད་བུམ་བཟང་ཐུགས་འཛིན་དང་ས་སྡེ་ལ་ཞིབ་གཟིགས་མཛད། སྨོན་ལམ་སྐབས་མ་གཏོགས་ཆོས་ཐོག་ཆོས་མཚམས་ལ་སྐྱོར་སྦྱངས་རྩོད་གྲྭ་ཆུ་བོའི་རྒྱུན་བཞིན་ལྷོད་མེད་མཛད་པས་རྣམ་དཔྱོད་ཀྱི་ཀློང་རྡོལ་
ཞིང༌། གསོལ་དཔོན་རབ་འབྱམས་པས་བྱ་བྲལ་ཆོས་འབྱོར་སོགས་དགེ་བཤེས་གྲགས་གང་ཆེ་སྐུ་མདུན་དུ་བོས་ནས་འཕྲོས་པ་གནང་བཅུག་ཀྱང༌། རྒྱ་གཞུང་དང་དཀའ་གནད་ལ་འཇུག་པ་ཉུང་ཞེས་གསུངས་པ་ཐོས་ཏེ་གྲགས་སྐམ་ཙམ་གྱིས་ཐུགས་མི་ཁེངས་ཤིང༌། གཞན་དང་མི་མཉམ་པའི་མཁྱེན་དཔྱོད་ཀྱི་གཏེར་དུ་གྱུར་པའི་ཁྱད་ཆོས་བླ་ན་མེད་པའོ། །སྔ་ཕྱི་འཛིན་གྲྭ་གཏུག་སྐབས་དང། ཚོགས་གླེང། ལྷ་རམས་པ་སོ་སོའི་གྲྭ་སྐོར་སོགས་དམ་བཅའ་ཆེ་ཆུང་གང་གི་སྐབས་སུ་ཡང་མཁས་པ་དང། དགེ་བཤེས་དང། རིགས་སྨྲར་རློམ་པ་སུས་ཀྱང་ཇི་ལྟར་བསྒྲིམས་ཏེ་གཡོ་ཟོལ་སོགས་ཐབས་ཅི་བྱས་ཀྱང་གླགས་མི་རྙེད་པར་མ་ཟད་གུས་པས་ཞབས་སྤྱི་བོར་མ་བླངས་པ་གཅིག་ཀྱང་མེད་པར་ཀུན་གྱིས་མགྲིན་གཅིག་ཏུ་གླེང། གང་གི་བརྒལ་བརྟགས་གནམ་ལྕགས་ཐོག་མདའ་བཞིན། །ཕྱི་རྒོལ་དམ་བཅའ་བྱེ་མའི་ཕུང་པོ་བཞིན། །མཁྱེན་པ་མཁའ་བཞིན་བྱམས་བརྩེ་ཆུ་འཛིན་བཞིན། །རྣམ་འགྱུར་གློག་བཞིན་སྙན་གྲགས་འབྲུག་སྒྲ་བཞིན། །ཕྱིས་སུ་ཞལ་ནས། རྩོད་གྲྭ་བྱེད་དུས་བསྟན་པ་རིན་པོ་ཆེ་ལ་མ་རྟོགས་ལོག་རྟོག་ཐེ་ཚོམ་གྱི་དྲི་མ་བསལ་བ་དང། རང་གཞན་གྱི་བློ་ཕྱིན་ཅི་ལོག་སུན་ཕྱུང་ནས་ཡང་དག་པའི་རྟོགས་པ་འཕེལ་བ་དང། རང་རྒྱུད་འདུལ་བའི་ཐབས་སུ་བརྒལ་ཞིང་བརྟག་པ་བྱེད་དགོས་པ་ཡིན། ངས་ཀྱང་རྙེད་བཀུར་སྙན་གྲགས་བདག་རྒྱལ་གཞན་ཕམ་སོགས་ཀྱི་ཀུན་སློང་སྤངས་གང་ཐུབ་བྱས་པ་ཡིན་གསུངས། ས་ག་ཟླ་བའི་ཚེས་བཅོ་ལྔའི་ཉིན་རྒྱལ་བའི་དབང་པོ་པད་དཀར་འཆང་བ་བློ་བཟང་འཇམ་དཔལ་རྒྱ་མཚོའི་དྲུང་ནས་བསྙེན་རྫོགས་ཀྱི་སྡོམ་པ་མནོས་ཏེ་སྤོང་བདུན་ནོར་བུའི་བང་མཛོད་ཐུགས་གསང་ཟ་མ་ཏོག་ཏུ་ཅིར་ཡང་གཏམས། འཕགས་པའི་རིགས་བཞི་དང་དགེ་སྦྱོང་གི་ཆོས་བཞི་ལས་མི་ཉམས་
པའི་སྦྱངས་པའི་ཡོན་ཏན་ལྷུར་བཞེས་ཤིང། སྔ་ཆབ། ཕྱི་ཆབ། ཡོ་བྱད་བྱིན་རླབས་སོགས་འདུལ་བའི་ལག་ལེན་ཕྲ་མོ་རེ་ཡང་མ་ཉམས་པར་ཕྱག་ལེན་དུ་བཏབ་པས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པའི་གནས་བརྟན་ཉེ་བར་འཁོར་ལྟ་བུར་གྱུར། ཕྱག་མཛོད་རབ་འབྱམས་པ་དགེ་འདུན་གྲགས་པ་ཞི་བར་གཤེགས་པའི་དགེ་སྒྲུབ་རྒྱ་ཆེར་མཛད་ཅིང༌། ཐུགས་ངལ་བའི་སྐྱོ་ཤས་ཀྱི་སྟོབས་ཀྱིས་ཐུགས་བརྩོན་ལྷག་པར་བོགས་ཐོན་པ་བྱུང༌། གསེར་འཕྲེང་གི་སྐབས་ཕལ་ཆེར་དང༌། རྣམ་བཤད་སྙིང་པོ་རྒྱན་གྱི་ཚིག་དོན་རྣམས་ཡིག་ཆ་ངེས་པ་ཞིག་གིས་ཐལ་འཕྲེང་ལ་བསམ་བློ་བཏང་བ་ལྟར་ནོར་འཁྲུལ་མེད་པ་ཐུགས་ལ་ངེས་ཤིང༌། གྲྭ་ས་སོ་སོའི་ཡིག་ཆའི་ཚིག་རིས་ཐམས་ཅད་མ་འདྲེས་པར་ཞིབ་པར་མཁྱེན་པས་ཕར་ཕྱིན་སྟོན་མོའི་གྲྭ་སྐོར་སྐབས་འཛིན་གྲྭ་གང་དུ་ཡང་འཁོར་གསུམ་མ་སོང་བར་གླེང༌། ལྗོངས་འདིར་བགྲང་ཡས་རིགས་སྨྲ་འདུས་སྡེའི་ཁྲོད། །བཀྲ་ཤིས་སྒོ་མང་མཚན་སྙན་སྲིད་རྩེར་བརྒལ། །དེར་ནི་མཁས་མང་སྤྲིན་ལྟར་འཁྲིགས་པའི་དབུས། །ཁྱོད་ཉིད་རྒྱལ་མཚན་ཏོག་ལྟར་ལྷང་ངེར་གསལ། །དགུང་ལོ་ཉེར་གཉིས་པ་ཆུ་ཡོས་ལ་རྩེའི་མཇལ་ཁ་དང༌། ལྷ་ལྡན་སྨོན་ལམ་གྱི་སྐབས་མ་གཏོགས་ཆོས་གྲྭ་ཆག་མེད་དང༌། སྐྱོར་སྦྱངས་ཆུ་བོའི་རྒྱུན་ལྟ་བུ་མཛད། དབུ་མ་ལུང་རིགས་གཏེར་མཛོད་དང༌། ལེགས་བཤད་སྙིང་པོ་ཐུགས་འཛིན་གནང། རིགས་ཚོགས་འགྲེལ་བཅས་ཐུགས་ལ་བྱང་བའི་སྟེང་ནས་སྐྱོར་སྦྱངས་དང་དཔྱད་པ་ཟུང་དུ་འབྲེལ་ཞིང༌། ཚུལ་ཁྲིམས་རྣམ་པར་དག་པས་གཞི་བཟུང༌། ལྷག་མཐོང་གི་ཚོགས་ཚང་བར་གྲུབ་པའི་མཐུས་ཀླུ་སྒྲུབ་ཡབ་སྲས་ཀྱི་ཐུགས་བཅུད་རྩ་འཇུག་བཞི་གསུམ་
སོགས་ཀྱིས་གཏན་ལ་ཕབ་པ་ལྟར་ཡང་དག་པའི་ལྟ་བ་ཕྱིན་ཅི་མ་ལོག་པར་རྙེད་པའི་སྨྲ་བའི་ཁྱུ་མཆོག་ཏུ་གྱུར། ཟབ་མོ་རྟེན་འབྱུང་གཟིགས་པའི་རྣམ་དཔྱོད་ཀྱིས། །དངོས་པོར་སྨྲ་བའི་གླང་ཆེན་འདར་བྱེད་ན། །དེང་དུས་སྨྲ་མཁས་རི་དྭགས་ཚོགས་རྣམས་ཀྱིས། །འགྲན་དུ་མེད་ཅེས་བསྔགས་པ་བྱིས་པའི་གཏམ། །སྐབས་དེར་ལྷ་རམས་པའི་མཚན་བཏགས་གཏད་པའི་སྟབས་ཀྱིས་བཀའ་རམས་འཛིན་གྲྭར་ཕེབས་ཏེ་མངོན་པ་གོང་འོག་དང་འདུལ་བའི་རྒྱ་གཞུང་ཆེན་མོ་རྣམས་གཙོ་བོར་བཟུང༌། བོད་ཀྱི་མཁས་པ་སྔ་ཕྱིའི་གཞུང་ཞིབ་གཟིགས་དང༌། མཛོད་འདུལ་གྱི་རྩོད་པ་མཉམ་འགྲོ་བྱས་ཏེ་འགྲེལ་པ་དོན་གསལ། བྱམས་ཆོས་སྡེ་ལྔ། དམིགས་བརྟགས། ཉི་ཤུ་པ། སུམ་ཅུ་པ། མཛོད་རྩ། མདོ་རྩ་བ། གྲུབ་མཐའ་རྩ་བ། ཀུན་གཞི་རྩ་བ། ཚིག་གསལ་ཐལ་བཟློག་སོགས་དང༌། དགོངས་པ་རབ་གསལ་གྱི་ས་བཅད་དང་འཇུག་པ་སྦྲགས་ནས་སྐྱོར་སྦྱངས་རྒྱུན་དུ་གནང༌། གཞན་ཡང་དབུ་ཚད་མངོན་པའི་རྒྱ་གཞུང་མང་པོ་ཐུགས་འཛིན་གནང་སྟེ། ཆོས་མཚམས་རྣམས་ལ་དགུང་རེ་བཞིན་ཤོག་གྲངས་བརྒྱ་དང་སུམ་ཅུ་རེ་མ་མཐའ་ངེས་ཅན་བྱས་ནས་སྐྱོར་སྦྱངས་དང་སྡུག་རུས་བྱས་པ་ཡིན་པམ་པམ་བྱས་ནས་བསྡད་པ་མིན། ཞེས་ཚོགས་གཏམ་ལ་གནང༌། སྐབས་འདི་དག་ཏུ། གསེར་ཕྲེང་དང༌། རྣམ་བཤད་སྙིང་པོ་རྒྱན། རྩ་འཇུག་གི་རྣམ་བཤད་ཆེན་མོ་གཉིས་སོགས་ཕལ་ཆེར་ཚིག་དོན་ཐུགས་ལ་བྱང་ཞིང༌། དཀའ་ཆེན་བཞིའི་འཕགས་ཡུལ་གྱི་གཞུང་རྩ་འགྲེལ་དང༌། རྗེ་ཡབ་སྲས་ཀྱི་ཡིག་ཆ་ཕལ་ཆེར་དཀྱུས་གཅིག་ལ་མཐར་ཆགས་སུ་ཐུགས་ཐོག་ནས་མི་ཐོན་ན་ཡང་གང་གླེང་བསླངས་པའི་ཐད་ཀའི་ཚིག་ཕལ་ཆེར་ཐུགས་ནས་ཤར་ཤར་ཐོན་པ་དང༌།
དོན་རྣམས་ཝལ་གྱིས་ས་ལེར་འཆར་ཐུབ་པ་ཡོད་གསུངས་ཤིང༌། རྣམ་ཐར་སྤྲིང་ཡིག་ལས་ཀྱང༌། གཞུང་ཆེན་སོ་སོའི་རྩ་བ་རྒྱ་བོད་ཀྱི། །འགྲེལ་པ་མཐའ་དཔྱོད་བཅས་ལ་སྦྱངས་པ་ཡིས། །ཤེས་ལོ་ཐོས་ལོའི་རྣམ་གྲངས་བརྒྱ་ཕྲག་བརྒལ། །རྩྭ་སྦུར་མེ་མཆེད་ལྟ་བུའི་རྣམ་ཐར་ཡིན། །ཞེས་ཁེངས་སྐྱུང་དང་བཅས་གསུངས་པ་ལྟར་རོ། །རྒན་གཞོན་ཀུན་གྱིས་དྲི་གཏུགས་དང་དོགས་པ་གཅོད་པའི་ཡུལ་དུ་གྱུར་ཅིང༌། དཔེ་ཁྲིད་ཞུ་མི་ཤིན་ཏུ་མང་པོ་བྱུང་བ་ལ་ཡང་སྐྱོ་ངལ་མེད་པར་བློ་ལྡན་དོན་གཉེར་བ་རྣམས་ཀྱི་རྣམ་པར་དཔྱོད་པའི་གྲུ་རྫིངས་ལེགས་བཤད་རིན་པོ་ཆེས་འགེངས་པར་མཛད་པར། དེ་ཡི་མོད་ལ་རྟོག་གེས་ཁེངས་པའི་ཀུ་མུད་ཀྱི་ཚོགས་ཟུམ་སྟེ་དད་པའི་ཆུ་སྐྱེས་ཀྱི་འཕྲེང་བ་ཆེར་བཞད་པས་གྲགས་སྙན་གྱི་བུང་བ་ཐུབ་བསྟན་དབྱར་གྱི་དཔལ་མོའི་མཛེས་རྒྱན་དུ་གྱུར། ཐུབ་པའི་གདུང་འཚོབ་དམ་པ་གངས་ཅན་གྱི་ཉེ་བར་འཁོར་རྗེ་བཙུན་ཡེ་ཤེས་རྒྱལ་མཚན་ལྷ་སར་ཕེབས་པ་ནས་བཟུང་ཞབས་སྤྱི་བོར་བླངས། གནས་ཀྱི་བླ་མའི་ཚུལ་དུ་བྱ་བ་རྣམས་ཞུས་ཤིང༌། སྡོམ་པ་གསུམ་གྱི་བསླབ་བྱ་བསྔོ་བགྲང་དང་ཡོ་བྱད་བྱིན་རླབས། ནུབ་ལྷག་གཅོད་པ། སྔ་ཆབ། ཕྱི་ཆབ། རུང་ཆུ་འདེབས་པ་སོགས་ཀྱི་ཕྱག་ལེན་ཕྲ་མོ་རྣམས་ཀྱང་བླ་མའི་རྣམ་ཐར་ཇི་ལྟ་བ་བཞིན་མཛད། ཕྱིས་མདོ་སྨད་དུ་བྱོན་ནས་ཀྱང་ལྟུང་བའི་ཆ་ཕྲ་མོ་ལ་ཡང་འཛེམ་པ་དང༌། འདུལ་བའི་ལག་ལེན་ཕྲ་མོ་རེར་ཡང་ནན་ཏན་གྱི་ངང་ཚུལ་དེ་ཁོ་ན་ལས་མི་འདའ་བར་མཛད་པས་ཡོ་བྱད་བྱིན་རླབས་དང༌། ལྟུང་བ་བསྔོ་བགྲང་ལ་བརྩོན་པའི་ཆོས་མཐུན་གྱི་སྐྱེ་བོ་དབྱར་གྱི་མེ་ཏོག་ལྟ་བུར་འཕེལ། རྗེ་དེ་ཉིད་ལ་ལམ་རིམ་བདེ་ལམ་གྱི་ཁྲིད་ཞིབ་རྒྱས་དང༌། མན་ངག་
ཞལ་གདམས་ལྷུག་པར་མནོས། བདེ་ལམ་ལ་ཟིན་བྲིས་མཛད་ཀྱང་འབྲས་སྤུངས་སུ་ཆོས་ཐོག་ཚུགས་པའི་སྟབས་ཀྱིས་མཇུག་ཅུང་ཟད་ལུས། བདེ་མཆོག་ལཱུ་ཨི་པའི་དབང་དང་བསྐྱེད་རྫོགས་ཀྱི་ཁྲིད་ཞལ་ཤེས་དང་བཅས་པ་དགྱེས་བཞིན་དུ་གནང་བས་དེ་ནས་བཟུང་སྟེ་ཐུགས་དམ་གྱི་སྙིང་པོར་མཛད་ཅིང་མན་ངག་བཀའ་བབས་ཀྱི་བུ་ཆེན་དུ་སྣང༌། འཇམ་དཔལ་ཞལ་ལུང་གི་ཁྲིད་གནང་སྐབས་གྲྭ་ཚང་གི་ཆོས་ཐོག་གི་སྟབས་ཀྱིས་ཕེབས་མ་ཐུབ་ཀྱང་ཆོས་ཐོག་གྲོལ་མ་ཐག་ཡོངས་འཛིན་རིན་པོ་ཆེ་ཉིད་ནས་འབོད་པ་གནང་སྟེ་ལྷག་མཐོང་གི་གསུང་བཤད་དཔྱིས་ཕྱིན་པ་རྒྱས་པར་སྩལ་བ་ལ་ཟིན་བྲིས་ཐར་ལམ་སྣང་སྒྲོན་ཞེས་བྱ་བ་མཛད། རྗེ་རང་ཉིད་ཀྱིས་ཆེད་དུ་གཉེར་ནས་འདུལ་བ་མདོ་རྩའི་བཤད་ལུང་ཞུས་པར་དགྱེས་བཞིན་ཞལ་གྱིས་བཞེས་ཏེ་མཁས་འདུས་ལྔ་སྟོང་སྐོར་ལ་སྒོ་མང་གྲྭ་ཁང་ནས་གནང། མཇུག་ཏུ་ཐུགས་དམ་གྱི་རྟེན་ཐུབ་པའི་དབང་པོའི་སྐུ་བརྙན་དང༌། རྒྱུན་བསྣམས་འཁར་གསིལ་བཅས་གནང་སྟེ་ངེད་དཔོན་སློབ་འདི་ཙམ་ཞིག་གིས་ཆོས་འཆད་ཉན་བྱེད་རྒྱུ་བྱུང་བ་ཁྱེད་ལ་བརྟེན་པ་ཡིན་པས་བསོད་ནམས་ཆེ་གསུངས་ཏེ་རྒྱུན་དུ་ཡང་མཁས་པ་དང་བཙུན་པའི་ཡོན་ཏན་གྱིས་ཐུགས་འཕྲོག་པའི་དགྱེས་གཟིགས་དང་བསྔགས་བརྗོད་ཟླ་མེད་པ་གནང༌། དྲི་བྲལ་མཁྱེན་ཡངས་རིན་ཆེན་ཀ་ལ་ཤ །འདུལ་བ་འབུམ་སྡེའི་བཅུད་ཀྱིས་གཏམས་པ་གང༌། །རྨོངས་པའི་དྲི་མ་འཆལ་ཚུལ་གདུང་བ་དང༌། །ལྷན་ཅིག་དག་བྱེད་བདུད་རྩིའི་འདོད་པ་འཇོ། །མཁས་མང་བྱེ་བའི་ལྷག་བསམ་འོ་མའི་མཚོ། །ཁྱོད་བཞེད་ཨ་མྲའི་གྲོགས་སུ་གྱུར་པ་ལྟར། །དགག་པའི་ཚིག་ཀྱང་ལེགས་བཤད་དགའ་སྟོན་ལ། །སྐལ་བཟང་མགྲོན་དུ་འགུགས་པའི་ལྕགས་ཀྱུར་སོང༌། །རྟེན་འབྲེལ་རྐྱེན་རྣམས་བློ་ཡིས་བཏགས་པ་ཙམ། །བཏགས་ཙམ་གྱིས་ཀྱང་
རང་གི་བྱ་བ་བྱེད། །དེས་ན་སྲས་བཅས་རྒྱལ་བས་འགྲོ་བ་རྣམས། །སྐྱོང་བའི་འཕྲིན་ལས་ལྷུན་གྱིས་གྲུབ་འདི་སོམས། །དགུང་ལོ་ཉེར་གསུམ་པ་ཤིང་འབྲུག་ལ་ཡང་རྒྱལ་བའི་དགོངས་པ་དང་མཐུན་པར་ཚུལ་ཁྲིམས་རྣམ་དག་གིས་གཞི་བཟུང་བའི་ཐོས་བསམ་གཤའ་མ་སྔར་རྒྱུན་ལྟར་གནང་བས་གསུང་རབ་མཐའ་དག་གདམས་པར་གཟིགས་པའི་མཁྱེན་དཔྱོད་ཀྱིས་འཆད་རྩོད་རྩོམ་གསུམ་ལ་མི་འཇིགས་པའི་སྤོབས་པ་བརྙེས་པ་ཀུན་ལ་མཐུན་སྣང་དུ་གྲུབ། ཡབ་རྗེ་ཀུན་མཁྱེན་བླ་མ་དབུས་གཙང་དུ་འབྱོན་པའི་གཏམ་གསན་པས་ཐུགས་དགའ་བདེས་ཁྱབ་ཅིང་ཐོས་བརྩོན་ལྷག་པར་འཕེལ་ཏེ་མདོ་སྔགས་རིག་གནས་ལ་གཟིགས་པ་རྒྱ་ཆེན་པོ་མཛད། སྐབས་འདིར་ཕེབས་བསུའི་གྲ་སྒྲིགས་ཀྱིས་ཆོས་ཐུན་གཅིག་ཆག །སྔར་རབ་འབྱམས་པ་གཤེགས་སྐབས་ཆོས་ཐུན་གཅིག་ཆག་པ་བཅས་ཆོས་ཐུན་གཉིས་མ་གཏོགས་འདི་བར་ཆོས་གྲྭ་ཆག་མ་མྱོང་གསུངས། ཕེབས་བསུར་བྱོན་ཏེ་དབུ་མ་བཀྲ་ཤིས་ཐང་ནས་མཇལ་ཏེ་ཡབ་སྲས་ཞལ་འཛོམ། ལྷ་སར་འབྱོར་བའི་ཉིན་ཐབ་བསུ་ཡང་ཕུལ་ཞིང་སྐུ་མདུན་དུ་ནར་མར་འབྱོན་བཞུགས་མཛད། ཀུན་མཁྱེན་མཆོག་དང་མཉམ་དུ་ཀློང་རྡོལ་གྲུབ་དབང་རིན་པོ་ཆེར་བཀའ་གདམས་གླེགས་བམ་དང༌། རྒྱལ་བ་དགེ་འདུན་རྒྱ་མཚོའི་གསུང་འབུམ་གྱི་ལུང་སོགས་གསན། ཀློང་རྡོལ་རིན་པོ་ཆེ་ནས་ཀུན་མཁྱེན་མཆོག་ལ་བཀའ་ཆོས་ཞུས་པ་ཡང་ཕལ་ཆེར་མ་ཆག་པ་མཛད། ཀུན་མཁྱེན་མཆོག་གི་དྲུང་ནས་ས་རྒྱན། མཛོད་འདུལ། ས་སྡེ་སོགས་འཕགས་བོད་ཀྱི་གཞུང་གི་དཀའ་གནད་དུ་མ་དང༌། ཁྱད་པར་དུ་རྩ་འཇུག་གི་རྣམ་བཤད་ཆེན་མོ་གཉིས་ལ་ཞིབ་དཔྱོད་ཀྱི་དྲི་གཏུགས་ནན་ཏན་མཛད་པས་ཕྱོགས་སྔའི་ལྟ་
བ་ཐམས་ཅད་སུན་ཕྱུང་སྟེ། ཕྱི་ནང་གི་གྲུབ་མཐའ་ཡོངས་ཀྱི་གཞི་ལམ་འབྲས་གསུམ་གྱི་གནས་ཚུལ་ལག་མཐིལ་གྱི་རྫས་ལྟར་གསལ་བར་གྱུར། ཞལ་ནས། སྐུ་ཞབས་རིན་པོ་ཆེ་ནས་ང་རང་ལ་དོན་གྱི་སྤྱི་ཁོག་གམ། གཞུང་ཆེན་པོ་ཞིག་གི་གཞི་རྟེན་མེད་པར་དཔེ་མང་ཀློག་པ་འདི་ཤེས་རབ་འཆལ་བའི་རྒྱུ་ཡིན། རྗེའི་གསུང་རབ་གཞིར་བཞག །གཞུང་ཐམས་ཅད་ཀྱི་དགོངས་དོན་གཅིག་ཏུ་བསྒྲིལ་ནས་དཔྱད་དགོས་ཞེས་བཀའ་ཕེབས་པ་འདི་ཤིན་ཏུ་གལ་ཆེ་གསུངས། དེར་མ་ཟད་དཔེ་ཆ་གང་བྱུང་ཚད་ལ་བལྟས་ན་ད་ལྟ་ལྟ་བ་སྙིགས་མར་སོང་བའི་དབང་གིས་སེམས་ལད་དེ་བློ་སྣ་ཕྱིན་ཅི་ལོག་ཏུ་འགྲོ་བས་ལྟ་མི་ཉན་དོན་ལྡན་ལ་བསམ་རྒྱུ་དང་དྲན་རྒྱུ་གང་ཡང་མེད་པར། དོན་མེད་ལ་དྲན་རྒྱུ་མང་རིག་པ་རྣོ་བ་འདི་ལྟ་བ་སྙིགས་མ་ཡིན་པའི་རྟགས་ཡིན་ཞེས་ཡོངས་འཛིན་རིན་པོ་ཆེ་ནས་ཀྱང་གསུང་བར་ཞལ་ནས་ཐོས། ཀུན་མཁྱེན་མཆོག་དང་ལྷན་དུ་མཆོད་མཇལ་མཛད་སྐབས་ཤིག་ཀུན་མཁྱེན་རིན་པོ་ཆེ་ནས་འཇམ་དབྱངས་ཁོ་ཡོན་མ་ལ་སྙན་ཤལ་ཕུལ་བ་གྱང་ལོགས་ལ་འབྱར་བ་ཀུན་གྱིས་མཐོང་ཞིང༌། རྗེ་འདི་ཉིད་ཀྱིས་སྙན་དར་ཕྱག་ཏུ་བཞེས་པ་དངོས་སུ་གཟིགས་པར་གསུང་ཟུར་ལས་ཤེས་པས། གཡོ་མེད་གསལ་བའི་ཏིང་འཛིན་ཆུ་གཏེར་ལ། །དག་པའི་ཟླ་སྣང་འཆར་བ་མང་མོད་ཀྱང༌། །རྒྱལ་བའི་གསང་གསུམ་རོལ་མཚོར་ཐོགས་མེད་དུ། །འཇུག་པའི་སྤོབས་ལྡན་སར་གནས་རྒྱལ་སྲས་ཉིད། །དགུང་ལོ་ཉེར་བཞི་པ་ཤིང་སྤྲུལ་ལ་ཡབ་སྲས་ལྷན་རྒྱས་ནས་ལོ་གསར་གྱི་དགྱེས་སྟོན་རྟེན་འབྲེལ་ཆེ་བ་མཛད། རྩེའི་མཇལ་ཁ་སྨོན་ལམ་ཆེན་མོའི་སྐབས་ཀྱི་མཛད་པ་སོགས་སྔར་རྒྱུན་ལྟར་དང༌། རྗེ་ཡབ་སྲས་ཀྱི་གསུང་རབ་གཞིར་བཟུང་ནས་རྒྱ་གཞུང་ཚད་ལྡན་རྣམས་ཁོག་བསྡུར་སེ་འབྲས་དགེ་གསུམ་གྱི་
ཡིག་ཆ་དང༌། བོད་ཀྱི་མཁས་པ་སྔ་མ་སོ་སོའི་གསུང་ལ་གཟིགས་རྟོག་གནང་བས་བཤད་པ་ཡང་དག་དང་ལྟར་སྣང་གི་ཁྱད་པར་དང༌། རྗེ་བླ་མའི་རིང་ལུགས་ཀྱི་གནད་ཕྲ་ཞིང་ཕྲ་བ་ཡང་མ་འདྲེས་པར་འབྱེད་པ་དང༌། ཚིག་གཅིག་གི་དོན་ལ་ཡང་མདོ་སྔགས་ཐམས་ཅད་སྡུད་པའི་ནང་བྱན་ཆུད་པ་བྱུང༌། འདི་ཡང་རྒྱལ་བ་འབྲོམ་གྱི་གསུང་ལས། ང་ཐོས་པའི་དུས་ན་བསམ་སྒོམ་གཉིས་ཀ་བདོ། །ང་བསྒོམ་པའི་དུས་ན་ཐོས་བསམ་གཉིས་ཀ་བདོ། །ཞེས་པ་ལྟར་གྱི་ཐོས་བསམ་སྒོམ་གསུམ་གཅིག་གྲོགས་སུ་གཅིག་འགྲོ་བ་དང༌། གཅིག་གེགས་གཅིག་གིས་སེལ་བ་ཞིག་བྱུང་ན་ཀུན་མཁྱེན་བླ་མའི་རྣམ་ཐར་ལས། རྒྱས་སྲས་ཆེན་པོ་ཉི་ཐང་བླ་མ་ཤེས་རབ་སྦྱིན་པ་དཔེ་གཟིགས་ཀྱི་སྒོ་ནས་རྟོགས་པ་མཐོ་བར་བསྔགས་པ་ལྟར་ལུང་གི་དོན་སེམས་རྒྱུད་དང་འདྲེས་པའམ་ལུང་དོན་རྒྱུད་ལ་སྐྱེས་པ་ལ་རྟོགས་པའི་ཡོན་ཏན་ཞེས་བྱ་ལ། དེ་འདྲའི་ཡོན་ཏན་དེ་ཡང་གསུང་རབ་གདམས་ངག་ཏུ་ཤར་བའི་དཔྱད་སྒོམ་ལ་རག་ལས་པས་མཚན་ཉིད་ཀྱི་རིགས་ལམ་འདི་ནི་བུག་སྒོ་འདག་སྦྱར་དང༌། ལུས་གནད་ལྟ་སྟངས་སོགས་ལ་མི་ལྟོས་པར་གྲུབ་པའི་གོ་འཕང་མཐོན་པོར་གཤེགས་པའི་ཐབས་རྨད་དུ་བྱུང་བར་ཤེས་དགོས་ཏེ། བྱང་ཆུབ་ལམ་རིམ་ཆེན་མོ་ལས། གཞུང་ལུགས་ཆེ་ལ་ལོ་མང་སྦྱངས་པ་ཡི། །གྲོགས་དག་རང་གི་ནོར་བུ་རིན་པོ་ཆེ། །དོར་ནས་གཞན་གྱི་འཆིང་བུ་མ་ལེན་པར། །རང་ལ་རིན་ཆེན་ཡོད་པ་མཁྱེན་པར་མཛོད། །ཁྱེད་ཀྱིས་སྦྱངས་པའི་གཞུང་ལས་གདམས་པའི་མཆོག །ལོགས་སུ་མེད་པ་གཟིགས་ནས་ཐུབ་དབང་གིས། །མང་དུ་ཐོས་པ་ནགས་ན་བདེ་འོ་ཞེས། །གསུངས་པ་དེ་ཡི་དོན་ལ་བསམ་པར་རིགས། །
ཞེས་བཀའ་སྩལ་བའི་དོན་གོ་བར་གྱིས་ཤིག །ལོ་དེའི་དགུན་ཆོས་སྐབས་དངུལ་སྲང་སྟོང་དང་ལྔ་བརྒྱ་མ་ལོང་ཙམ་དང༌། ཁ་དར་སུམ་སྟོང་ལ་ཉེ་བས། འབྲས་སྤུངས་ཚོགས་ཆེན་ལ་མང་ཇའི་ཐོག་དངུལ་ཞོ་འགྱེད། སྒོ་མང་གྲྭ་ཚང་ལ་ཞོ་བཞི་སྐར་ལྔ་རེ་དང༌། ཁ་དར་རེ། སྔགས་པ་གྲྭ་ཚང་ལ་ཉིན་བདེ་མ་རེའི་འགྱེད་དང༌། བྱ་བྲལ་ཁམས་ཚན་ལ་བལ་ཊམ་རེའི་འགྱེད་བཏང༌། སྒོ་མང་གྲྭ་ཚང་ལ་དངུལ་སྲང་བརྒྱའི་རྩིས་ཀྱི་བཟང་གོས་སྣ་ཚོགས་ལས་བསྒྲུབས་པའི་འཕན་ཆ་གཅིག་ཕུལ། གྲྭ་ཚང་གི་དམ་བཅའི་སྐབས་སུ་ལན་མྱུར་ཞིང་ཞིབ་ཆ་ཆེ་བ་དང༌། ཁྱབ་འགྲིགས་སོགས་ནུས་པ་ཆེ་ཞིང་སུ་གང་གི་ཡང་སེམས་ལ་འཆར་དཀའ་བའི་རིགས་ལམ་གཞུང་ཆེན་མོ་དང་མཐུན་པ་ཤ་སྟག་བྱུང་བས་མཁས་པའི་ཡིད་འཕྲོག་པའི་རིན་པོ་ཆེ་ཁོ་ནར་གྱུར། ཞལ་ནས། མིང་བཏགས་སོགས་ཀྱི་སྐབས་སུ་གྲགས་སྐམ་དེ་ཆེ་ངེས་བྱུང་རུང༌། རང་གི་ངོས་ནས་ཐམས་ཅད་ཤེས་སྙམ་པའི་རློམ་སེམས་མེད་པར་མ་ཟད། མི་ཤེས་པ་ཇེ་མང་དུ་སོང་བ་ལྟ་བུ་ཞིག་གིས་ཚེ་གང་པོར་ཐོས་བསམ་བྱས་ན་སྙམ་ཀྱང་ཐོག་ཏུ་མ་ཁེལ་གསུངས། དགུང་ལོ་ཉེར་ལྔ་པ་མེ་རྟའི་སྨོན་ལམ་ཆེན་མོར་དངུལ་སྲང་སྟོང་དང་བརྒྱས་སྐར་ལྔ་རེའི་འགྱེད་དང༌། རས་ལྔ་བརྒྱ་སྐོར་གྱིས་གསུང་ཆོས་རྭ་བར་རས་འགྱེད་བཏང་བས་མཚོན་བོད་ཡུལ་དུ་བཞུགས་སྐབས་འདིར་སྔ་ཕྱིར་གྲྭ་ས་གྲྭ་ཚང་ལ་གཏོང་སྒོ་གནང་བ་ཕྱོགས་བསྡོམས་རགས་རྩིས་ལ་དངུལ་རྐྱང་སྲང་ཁྲི་ཕྲག་ལྷག་དངོས་པོ་སྣ་ཚོགས་རི་གོང་དུ་བསྒྲིལ་བ་སྲང་ཉིས་སྟོང་གི་རྩིས་སོང་ཞིང༌། ལོ་རེ་བཞིན་ལྷ་སར་མཆོད་འབུལ་དང༌། སྐུ་གཟུགས་བཞེངས་པ་དང༌། ཕྱག་དཔེ་གསར་བསྒྲིག་སོགས་ཀྱིས་དབུས་ཕེབས་སྐབས་སུ་ཕྱག་ཏུ་གང་ཡོད་རྣམ་དཀར་གྱི་ཚོགས་སུ་བཏང་ནས་
འབྲེལ་ཚད་དོན་ལྡན་དུ་མཛད་དོ། །ཆགས་མེད་སྤྲིན་ལས་ལྷོད་ལྷོད་བབས་པ་ཡི། །ཟང་ཟིང་ཆར་རྒྱུན་ཡང་ཡང་སྦྲེངས་པ་འདིས། །མང་མང་གདུལ་བྱ་རྫས་ཀྱིས་འབྲེལ་ལྡན་རྣམས། །གང་གང་རེ་འབྲས་དེ་དེར་ཐེ་ཚོམ་མེད། །གྲྭ་སྐོར་གྱི་ཉིན་རྒྱལ་དབང་རིན་པོ་ཆེ་དང༌། ཚ་རྡོར་ནོ་མོ་ཧན་འཁོར་བཅས་ཀྱང་ཁྱམས་རའི་སྟེང་དུ་བཞུགས་གདན་འཇགས། སྙན་གྲགས་ཀྱི་སྟབས་ཁྲོམ་ཆེན་པོ་ཁྱམས་རའི་ནང་དུ་མི་ཤོང་བ་འཛོམ། སྲིད་སྐྱོང་རྒྱལ་ཚབ་མཆོག་ནས་གསུང་གདངས་མཐོན་པོས། བགྲོ་གླེང་བ་རྣམས་ཀྱིས་རིགས་ལུང་གང་ཚ་ཚ་མཛེས་ལམ་སྤུ་ཙམ་ཡང་མ་བྱེད་པར་ཐོངས། སྤྲུལ་བའི་སྐུ་མཛེས་ལམ་གྱི་ཡུལ་མིན་ནོ་ཞེས་དགེ་བཤེས་ཆེན་པོའི་ཉམས་ཐོན་ཞིང༌། གྲགས་པ་དང་དོན་མཐུན་པའི་བཀའ་ཕེབས་པ་ལྟར་སེ་འབྲས་དགེ་གསུམ་གྱི་དགེ་བཤེས་ཡང་རྩེ་ཟེར་ཚད་ཀྱི་བློའི་རྩལ་ཡོད་སྤྲུག་ལྟ་བུ་བྱས་པར། དེ་ཡང་མཁས་གྲུབ་སྨྲ་བའི་ཉི་མས། དེ་ཕྱིར་རྟོག་གེ་རྣོ་ལྡན་པ། །ལེགས་སྦྱངས་རྒོལ་བ་སྟོང་དག་ནི། །ཁྱོད་དྲུང་ལྕེ་རྩེ་མགྲིན་པ་ན། །སྙིང་དང་ལྷན་ཅིག་འདར་བ་བསྟེན། །ཞེས་གསུངས་པ་ལྟར་རྒྱ་བོད་མཁས་པའི་བཤད་སྲོལ་མ་འདྲེས་པར་མཁྱེན་ཅིང༌། རྟོག་གེའི་གསང་ཚིག་སྒྲུབ་དང་སུན་འབྱིན་གྱི་ལམ་སྲོལ་ཕྲ་ཞིབ་གཟིགས་པའི་རིགས་པའི་གློག་འོད་འབུམ་ཕྲག་འཁྱུག་པའི་སྟོབས་ཀྱིས་ཁས་ལེན་འདི་ཤོར་ཟེར་རྒྱུ་གཅིག་ཙམ་ཕར་ཞོག་བགྲོ་གླེང་གང་བཏང་ལ་དོགས་པ་ཆོད་ངེས་ཀྱི་ལན་དང༌། དེའི་སྟེང་དུ་ལུང་འདྲེན་ཤར་ཤར་གནང་བས་རྗེ་ཡབ་སྲས་ཀྱི་གསུང་དང༌། རྒྱ་གཞུང་ཆེན་མོ་རྣམས་ཐུགས་ལ་བྱང་བའི་ཉམས་ཐོན་ཅིང༌། འཁོར་གསུམ་ཙམ་ཡང་བསྐོར་དཀའ་བར་སོང་བས་མཆོག་དམན་ཀུན་གྱིས་རྗེས་སུ་ཡི་རང་བ་འབའ་
ཞིག་གིས་དུས་ཀྱི་མཐའ་འདིར་རྗེ་ཡབ་སྲས་ཀྱི་གྲལ་དུ་འོས་པའི་མཁས་བཙུན་བཟང་འཛོམ་གྱི་སྐྱེས་ཆེན་དམ་པ་འདི་འདྲ་ཕེབས་པ་སྐལ་བ་བཟང་ཞེས་བསྔགས་བརྗོད་བུང་བའི་དབྱངས་སྙན་མཁས་བླུན་ཡོངས་ཀྱི་མགྲིན་པའི་པད་མཚོར་ལྷན་ཅིག་སྐྱེས་པའི་རོལ་མོ་ལྟ་བུར་གྱུར་པ་ནི་དབུས་གཙང་ཆོས་ཀྱི་ཞིང་དུ་གྲགས་པའི་རང་རྟགས་རྨད་དུ་བྱུང་བའོ། །དེ་ལྟར་ཡང་རྣམ་ཐར་སྤྲིང་ཡིག་ལས། གདན་ས་གསུམ་གྱི་མཁས་པའི་མདུན་ས་རུ། །བཀའ་པོད་ལྔ་ཡི་ཟབ་གནད་ཕྲ་ཞིབ་ནས། །ཚིག་འཁྲིའི་སྤྲོས་པ་ཚུན་ལ་ཞུམ་པ་མེད། །རྩོད་པའི་གྲགས་སྐམ་ཐོབ་པའི་རྣམ་ཐར་ཡིན། །ཞེས་གསུངས་པ་ལྟར་རོ། །ལུང་རིགས་དར་གྱི་ཤམ་བུ་རྣམ་པར་བཀྲ། །ཟབ་རྒྱས་རྩིབས་སྟོང་རྫོགས་པའི་གྲིབ་བསིལ་ལ། །ཤགས་འགྱེད་སྦྱོར་བས་མཁས་པར་རློམ་པ་འགའ། །གཉིད་ཀྱིས་ལོག་པ་བཞིན་དུ་ངལ་གསོ་ཐོབ། །འོན་ཀྱང་གཟུར་གནས་ཡིད་ཀྱི་རོལ་པའི་མཚོ། །དད་དང་གུས་པའི་རླབས་འཕྲེང་གཡོ་ལྡན་པ། །བསྔགས་བརྗོད་ལྦུ་བའི་འཛུམ་དཀར་འབུམ་འཁྲིགས་པས། །དབུས་འགྱུར་ཆོས་ཀྱི་མདུན་ས་ལྷག་པར་མཛེས། །རྩོད་ངག་རིགས་ལམ་སྨྲ་ལ་ཟླ་མེད་ཁྱོད། །ཕྱོགས་གླང་གྲགས་པ་གང་ཡིན་འཕྱང་མོ་ཉུག །བསིལ་ལྡན་ལྗོངས་འདིར་སྐྱེ་བའི་གར་མཛད་ཕྱིར། །འཇམ་དཔལ་དབྱངས་དངོས་བསྟན་པའི་སྒྲོན་མེར་ངེས། །སྒོ་མང་ཆོས་གྲྭར་ཕེབས་པའི་སྐབས་འདི་དག་ཏུ་ཡང༌། རྗེའི་དྲང་ངེས་རྣམ་འབྱེད་ཀྱི་དཀའ་གནད་ཀྱི་མཆན། ཡིག་ཆའི་ཕར་ཕྱིན་སྐབས་དང་པོའི་མཆན། མདོ་སྡུད་པའི་མཆན། འདུལ་བའི་སྡོམ་ཚིག །རྟེན་འབྲེལ་གྱི་མཐའ་དཔྱོད། མཛོད་གནས་བརྒྱད་དང་ཕར་ཕྱིན་སྐབས་བཞི་པའི་སྡོམ་ཚིག་སོགས་མིག་དང་འདྲ་བའི་ལེགས་བཤད་རྨད་དུ་བྱུང་བ་དུ་མ་འབྲས་སྤུངས་ཉིད་དུ་སྤེལ་བ་ནི་
བཤད་སྒྲུབ་ཡ་མ་བྲལ་བར་ཐོས་བསམ་སྒོམ་གསུམ་དང༌། འཆད་རྩོད་རྩོམ་གསུམ་གཅིག་གྲོགས་སུ་གཅིག་སོང་བའི་རྣམ་ཐར་དང༌། སྔོན་གྱི་མཁས་པ་ཆེན་པོ་དག་ལ་འགྲན་བཟོད་པའི་ལེགས་བཤད་ཀྱི་མཛོད་དང་མཁྱེན་པའི་གཏེར་དུ་གྱུར་པའི་གཏན་ཚིགས་རྨ་མེད་པ་ཉིད་དོ། །དམ་བཅའ་གྲུབ་རྗེས། ཡབ་རྗེ་མཆོག་ནས་ལྷ་སར་མི་ཏྲ་བརྒྱ་རྩ། རྡོ་རྗེ་འཕྲེང་བ། སྒྲུབ་ཐབས་རྒྱ་མཚོ། བཱ་རི་བརྒྱ་རྩ། མགོན་པོ་བཀའ་ཆེན་བཅུ་གསུམ་རྒྱ་གཞུང་དུ་མའི་ལུང་སོགས་བཀའ་ཆོས་གང་གནང་ཆག་མེད་དུ་གསན། མདོར་ན་རྣམ་ཐར་འདིར་མཚན་དངོས་སུ་སྨོས་པ་རྣམས་མ་གཏོགས་པ་གཞན་མདོ་དབུས་གང་དུ་ཡང༌། འབྲོམ་གྱི་རྣམ་ཐར་བཞིན་བླ་མ་མང་པོ་མ་བསྟེན་པར། གང་བསྟེན་པ་རྣམས་ལ་སངས་རྒྱས་དངོས་སུ་གཟིགས་པའི་མོས་གུས་ཀྱིས་ལེགས་ཚོགས་ཀྱི་རྩ་བ་ཚུགས་པར་མཛད་པའི་ཚུལ། རྣམ་ཐར་སྤྲིང་ཡིག་ལས། བླ་མ་མང་པོའི་ཆོས་སྣ་མ་བསོགས་ཀྱང༌། །མཚན་ལྡན་བཤེས་གཉེན་འགའ་ཡི་ཞབས་བསྟེན་ནས། །དེ་ལ་ལོག་རྟོག་མ་ཤོར་ཚུལ་བཞིན་བསྟེན། །ཁེ་ཉེན་དཔྱོད་པ་ཞུགས་པའི་རྣམ་ཐར་ཡིན། །ཞེས་གསུངས་པ་ལྟར་རོ། །དེ་སྐབས་འབྲུམ་དོགས་ཀྱི་བསྡམས་རའི་དབང་གིས་བཱ་རི་བརྒྱ་རྩ་དང༌། སྣར་ཐང་བརྒྱ་རྩའི་རེ་བ་མ་གྲུབ་པ་རྣམས་ཀྱིས་ཞུས་ངོར་འབྲས་སྤུངས་ནས་དོན་གཉེར་བ་སུམ་བརྒྱ་སྐོར་ལ་དམ་པའི་ཆོས་ཀྱི་བདུད་རྩི་འདོད་པ་ལྟར་སྩལ། གཞན་ཡང་སྒོ་མང་མཁན་རིན་པོ་ཆེར་ཚེ་དབང་བརྒྱ་རྩ། བློ་གསལ་གླིང་མཁན་ཟུར་དང༌། བྱམས་ཆེན་མཁན་པོ་ངག་དབང་ནོར་བུ་སོགས་ལ་རྟེན་འབྲེལ་བསྟོད་པའི་བཤད་ལུང༌། ལམ་གཙོའི་ཁྲིད། དགའ་ལྡན་ལྷ་བརྒྱ་མའི་ཁྲིད་
སོགས་སོ་སོའི་འདོད་སྦྱར་གྱི་ཆོས་བཀའ་མང་དུ་གནང༌། སྔ་ཕྱིར་ཀུན་མཁྱེན་མཆོག་ལ་མན་ངག་ལྐོག་ཁྲིད་དང་དོགས་གཅོད་དུ་མ་ཡང་ཡང་ཞུས་པ་དང༌། བཀའ་ཆོས་སོགས་སྐབས་དུ་མར་མདོ་སྔགས་ཀྱི་གསུང་བཤད་ཐང་མར་བདལ་བ་ལ་བརྟེན་ནས། སྡེ་སྣོད་གསུམ་དང་རྒྱུད་སྡེ་བཞིའི་དགོངས་དོན་ལ་འཕྱུག་མེད་ཀྱི་གཟེར་ཐེབས་པ་བྱུང༌། དགའ་ལྡན་དུ་བྱོན་ནས་རྗེ་རིན་པོ་ཆེའི་གསེར་གདུང་སོགས་རྟེན་རྣམས་ལ་མཆོད་འབུལ་གང་རྒྱས་ཐོག་བསྟན་འགྲོར་སྨན་པའི་ཐུགས་སྨོན་རྒྱ་གང་ཆེ་དང༌། ལྷག་པར་ཆོས་རྒྱལ་གྱི་མདུན་དུ་རྒྱལ་བ་གཉིས་པའི་རིང་ལུགས་རྫོགས་ལྡན་ལ་འགྲན་པའི་འཕྲིན་བཅོལ་ནན་ཏན་མཛད་པས་རྟགས་མཚན་ཁྱད་པར་ཅན་བྱུང༌། དགའ་ལྡན་ཚོགས་ཆེན་ལ་སྐར་ལྔ་རེའི་འགྱེད། ཏོག་ར་ཁམས་ཚན་ལ་ཡང་གཏོང་སྒོ་ཡོངས་གྲགས་དང་མཐུན་པ་མཛད། ལྷ་སར་ཕེབས་ནས་རྒྱུད་སྟོད་སྨད་གཉིས་ལ་དངུལ་ཞོ་འགྱེད་དང༌། ཇོ་ཤཱཀ་རྣམ་གཉིས་སོགས་རྟེན་རྣམས་ལ་མཆོད་འབུལ་བསྟན་པ་རྒྱས་པའི་ཐུགས་སྨོན་གང་ཟབ་གནང༌། སྔ་སོར་ཡོངས་འཛིན་རིན་པོ་ཆེ་ནས། ཁྱེད་བོད་དུ་བཞུགས་ནས་སྒྲུབ་པ་སྙིང་པོར་མཛད་ན་བྱམས་མགོན་བླ་མ་རིན་པོ་ཆེ་འདྲ་བ་ཡོང་ཞེས། རང་གི་ཆོས་ཀྱི་རྒྱལ་ཚབ་ཏུ་དབང་བསྐུར་རྒྱུའི་ཐུགས་བཞེད་ནར་མར་ཡོད་པ་ལས། འདི་སྐབས་ཤིག་ཀྱང་ཁྱེད་བོད་དུ་བཞུགས་ནས་སྒྲུབ་པ་སྙིང་པོར་མཛད་ན་འཚོ་བའི་མཐུན་རྐྱེན་ཀྱང་ངས་སྦྱོར། རང་རེས་ཐོབ་ཐོབ་མང་དགོས་པའི་ངེས་པ་མེད། ངས་བླ་མ་རྣམས་ནས་གང་ཐོབ་པའི་རིགས་དེ་ཁྱེད་ལ་ཆ་ཚང་བ་ཞིག་བྱེད་གསུངས་པར། བཀའ་དྲིན་ཤིན་ཏུ་ཆེ་རུང་བླ་མ་འཇམ་དབྱངས་བཞད་པ་རིན་པོ་ཆེ་དེ་བདག་ལ་སྡོམ་པ་གསུམ་སོགས་ཆོས་ཀྱི་བཀའ་དྲིན་ཆེ་བའི་བླ་མ་ཡིན་ཞིང༌། ཁོང་གིས་སྔ་སོར་ཨ་མདོར་ཡོང་དགོས་པའི་གསུང་བཀོད་ཡོད།
ད་རེས་ཀྱང་དེ་བཞིན་གསུངས་ཨེ་ཡོང་ཞུས་པར། ཁྱེད་ཀྱི་ཞལ་ནས་བླ་མའི་གསུང་གཅོག་མི་ནུས་པའི་གསུང་དེ་འདྲ་ཡོང་བའིེ་རེ་བ་ཡོད། བླ་མ་འཇམ་དབྱངས་བཞད་པ་རིན་པོ་ཆེ་ལ་ངས་བསྟུན་པས་ཆོག་གསུངས། ཡབ་རྗེ་མཆོག་བོད་དུ་ཕེབས་ནས་རིང་མིན་གྱི་སྐབས་ཤིག་གསུང་འཕྲོས་ཆེད་གཏད་ལ། ང་རང་སྐྲ་སྔར་ལས་ཀྱང་དཀར་བ་འདི་ལྟར་ན་ཚོད་མཐོ་ཡང༌། ཁྱེད་ལེན་པའི་ཕྱིར་འོང་བ་ཡིན་པས། གང་ཅིའི་གྲ་སྒྲིག་མཛོད་ཅེས་བླ་མ་གཉིས་ཀྱི་ཐུགས་བཞེད་གདུལ་བྱའི་བགོ་སྐལ་མི་འདྲ་ཡང་བསྟན་པའི་ཁུར་གཏད་པའི་དགོངས་བཞེད་གཅིག་འདྲེས་ཀྱི་ངང་ནས་ཡོངས་འཛིན་རིན་པོ་ཆེ་ནས་ཀུན་མཁྱེན་མཆོག་ལ་གོང་སྨོས་ལྟར་གྱི་བགྲོ་བ་ཡང་ཡང་མཛད་ཀྱང༌། མདོ་སྨད་མཐའ་འཁོབ་ཀྱི་ཡུལ་ཡིན་པས་དགེ་བའི་བཤེས་གཉེན་གལ་ཆེ་ཚུལ་ཡང་ཡང་ཞུས། འོ་ན་གྲོང་ཆོག་སོགས་ལ་མི་ཕེབས་པ་དགོས་གསུངས་པར། བླུན་པོ་དམུ་རྒོད་ཀྱི་རིགས་མང་བས་ཡུལ་ལུགས་དང་མཐུན་པའི་བླ་ཚུགས་ཤིག་མ་བཟུང་ན་དབུས་གཙང་ལྟར་ཆོས་ཁོ་ནས་ཕན་ཐོགས་པ་དཀའ་ཚུལ་དང༌། བཀྲ་ཤིས་འཁྱིལ་ནས་བྱང་ཕྱོགས་ཀྱི་འགྲོ་བ་རིས་མེད་ལ་ཕན་འདོགས་དགོས་ཚུལ་གསེང་བཀྲོལ་ནས་ཞུས་པས། ཐུགས་དགོངས་མཐུན་པར་བྱུང་སྟེ་ཡོངས་འཛིན་རིན་པོ་ཆེ་ནས། ད་ཁྱེད་བླ་མ་འཇམ་དབྱངས་བཞད་པ་རིན་པོ་ཆེའི་ཐུགས་དགོངས་དང་མཐུན་པར་མདོ་སྨད་ལ་མི་ཕེབས་ཐབས་མེད་དུ་སྣང་གསུངས་ནས་ཉིད་ཀྱི་ཐུགས་དམ་རྟེན་ལམ་རིམ་ཚོགས་ཞིང་གི་ཐང་ཀ །སྐུ་འགག་རྙིང་པ་སོགས་གནང་ཆ་དང༌། བསླབ་བྱ་ཚིགས་བཅད་མ་རྗེ་རང་ཉིད་ཀྱི་རྣམ་ཐར་གྱིས་གཞུང་བསྲང་བ་ཞིག་གནང་བ་ལྟར་ཕྱག་ལེན་ལ་ཡང་ཐེབས་པར་མཛད། ཀློང་རྡོལ་རིན་པོ་ཆེ་ནས་དུས་རྒྱུན་
མདོ་སྨད་དུ་ཕེབས་དགོས་གཞིར་བཞག་གི་གསུང་སྒྲོས་ཡོད་བཞིན་དང༌། ཉིན་གཅིག་སྐྱབས་མགོན་མཆོག་དང། ཀློང་རྡོལ་རིན་པོ་ཆེ། རྗེ་འདི་ཉིད་རྣམ་གསུམ་ཞལ་འཛོམ་སར་ཀློང་རྡོལ་རིན་པོ་ཆེ་ནས། བསྟན་པ་བྱང་ནས་བྱང་དུ་དར་བ་དེ་བཀྲ་ཤིས་འཁྱིལ་ཡིན་པ་རེད་ཨང་ཞེས་སྐུ་ཞབས་རིན་པོ་ཆེར་དྲིས་པར་སྐུ་ཞབས་ནས། དེ་འདྲ་ཟེར་གི་འདུག །བཀྲ་ཤིས་འཁྱིལ་ལ་དགེ་འདུན་ཁྲི་ཕྲག་བརྒྱད་འཚོགས་པའི་ལུང་བསྟན་ཡོད་ཟེར་བ་དེ་སྔ་ཕྱི་ཡིན་ནམ། དུས་གཅིག་ཡིན་ཞེས་ཚུར་དྲིས་པས་དེ་ལམ་ཞུགས་ཁྲི་ཚོ་བརྒྱད་ཡིན་མོད་གསུངས་པས་སྔར་གྱི་གསུང་བཀོད་རྣམས་ལ་ཐུགས་ངེས་བརྟན་པར་གྱུར། ཕེབས་སྐབས་སུ་ཡང་དགེ་འདུན་གྲུབ་ཡབ་སྲས་ཀྱི་རྣམ་ཐར་གསུངས་ནས། ད་ཁྱེད་ཀྱིས་འཇམ་དབྱངས་བཞད་པའི་ལས་ཀ་གང་ལ་ཡང་སྤུ་སུ་མ་ཤོར་བའི་སྒོ་ནས་ཐུགས་ཁུར་གང་དྲག་མཛོད་ཅེས་བླ་མ་རྣམས་ཐུགས་དགོངས་གཅིག་ཏུ་གྱུར་པ་ལྟར་ཡབ་སྲས་ལྷན་དུ་འབྱོན་པར་ཐག་བཅད་དོ། །སྨྲས་པ། སྔོན་སྦྱངས་གངས་ཀྱི་རི་བོ་ལ་གནས་ཐོས་བསམ་སྒོམ་པའི་ལུས་རྩལ་རྫོགས། །གཞུང་བརྒྱ་མཁྱེན་པའི་མིག་རྩ་དམར་འཁྲུགས་དགག་སྒྲུབ་རིགས་པའི་མཆེ་སྡེར་འབར། །མངོན་པར་རྟོགས་པའི་གཡུ་རལ་གྱིས་ཕྱུག་ལུང་རིགས་དབྱངས་ཀྱི་ང་རོ་སྒྲོགས། །མཁས་མང་རི་སྐྱེས་འབུམ་ཕྲག་ཟིལ་གནོན་འཇིགས་བྲལ་སྨྲ་བའི་སེངྒེ་ཉིད། །ཐོས་དང་བསམ་པའི་ཆུ་ཡི་ཁུར་ལྕི་བ། །གསུང་རབ་གདམས་པར་ཤར་བའི་སྤྲིན་སྔོན་ལས། །འཆད་རྩོད་རྩོམ་པའི་དབྱར་རྔ་བཞད་པ་ན། །ཐུབ་བསྟན་དཔྱིད་ཀྱི་ལང་ཚོ་མཆོག་ཏུ་དར། །མང་ཐོས་ཆོས་ཀྱི་སྤྱན་སྟོང་གཡོ་བ་ཁྱོད། །རང་གནས་སུམ་རྩེན་མདུན་སར་ཕྱོགས་པ་ན། །དབུས་འགྱུར་མིང་གི་འབྲུག་སྒྲའི་དབྱངས་ལྡན་དེ། །དོན་བཟང་ཆར་གྱིས་དབེན་སྙམ་དཔྱང་ཐག་འཛིན། །དེ་ཚེ་བདག་ཅག་སྐལ་བའི་ནུབ་ཀྱི་རི། །
བཤེས་གཉེན་ཉིན་བྱེད་དབང་པོས་སྤངས་སོ་ཞེས། །བློ་གསལ་ཡིད་ཀྱི་འཛིན་མར་དགའ་བའི་ཚལ། །ཟུམ་དང་ལྷན་ཅིག་གདུང་བའི་ཀུ་མུད་རྒྱས། །འོན་ཀྱང་ཀུན་རྟོག་དྲི་བཞོན་དང་བྲལ་བའི། །ཡོན་ཏན་རྡུལ་བརྩེགས་སྟོབས་བཅུའི་ལྷུན་པོ་ཡང༌། །སྔོན་གོམས་ཐུགས་བསྐྱེད་ཤུགས་ཀྱིས་བསྐུལ་བ་ན། །ཤིང་བལ་ལྟར་དུ་རྒྱུ་བ་དངོས་པོའི་གཤིས། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་དབུས་གཙང་ཆོས་ཀྱི་ཞིང་དུ་མདོ་སྔགས་ཀྱི་གསན་སྦྱོང་གྲུབ་སྟེ་མཁས་པའི་གཙུག་རྒྱན་དུ་གྱུར་པའི་སརྒ་སྟེ་ལྔ་པའོ།། །། ༈ མཁའ་ལྟར་མཐའ་ཡས་ཤེས་བྱའི་དཀྱིལ་འཁོར་ཁྱོན། །ཅིག་ཅར་སྒྲིབ་པའི་རྨོངས་མུན་སྟུག་པོ་ཡང༌། །སྐད་ཅིག་མཐར་བྱེད་མཁྱེན་པའི་འོད་སྟོང་ཅན། །བླ་མ་འཇམ་དབྱངས་ལྷག་པའི་ལྷ་དེས་སྐྱོངས། །དེ་ནས་བདུན་པ་རྗེས་མའི་ཚེས་ལ་འབྲས་སྤུངས་ནས་ཆིབས་བསྐྱོད་པར་ལྕགས་རིའི་ཕྱི་ལོགས་སུ་ཐབ་སྐྱེལ་གྱི་སར་གཞན་གྱིས་རྟིང་བསྐུལ་མེད་པར་གྲྭ་མང་ཞལ་འཛོམ་སྟེ་ཕྱག་དབང་དང་སྐྱབས་འཇུག་ཞུ་བ་སོགས་ཞལ་ཕྱག་དལ་ཁོམ་མེད་པའི་ཚུབ་ལིང་ཧ་ཅང་རྒྱུན་རིང་བ་དང༌། ཕལ་ཆེར་སྐྱོ་ཉམས་ཀྱིས་སྤྱན་ཆབ་འདོན་པ་བྱུང༌། རྗེ་ཉིད་ཆིབས་ཐོག་ནས་ཞལ་འབྲས་སྤུངས་ལ་ཕྱོགས་ཏེ་བསྟན་འབར་མའི་ཤིས་བརྗོད་གང་རྒྱས་མཛད། གྲྭ་ས་གྲྭ་ཚང༌། ཁམས་ཚན་སོ་སོས་ཐབ་སྐྱེལ་སོགས་ཞུ་བཞིན་ཡབ་སྲས་རྣམས་རིམ་གྱིས་བྱོན། མཚོ་མོ་རར་སྟག་ཕུ་སྤྲུལ་བའི་སྐུ་དགེ་འདུན་ཆོས་ཀྱི་དབང་ཕྱུག་ཀུན་མཁྱེན་མཆོག་གི་དྲུང་དུ་ཕེབས་པས་ཁོང་དང་མཉམ་དུ་ས་སྐྱའི་གསེར་ཆོས་བཅུ་གསུམ་དང༌། རྣམ་སྲས་བཀའ་བཅོ་ལྔའི་རྗེས་གནང་གསན། དེ་ནས་སྟག་ཕུ་
རིན་པོ་ཆེ་རང་ཡུལ་དུ་བྱོན་ནས་དགུན་དེར་བཅད་རྒྱ་མཛད་པའི་ཚེ། ཧོར་ཟླ་བཅུ་གཉིས་པའི་ཚེས་བཞིའི་ཐོ་རེངས་ཉམས་སྣང་ལ། པཎྚི་ཏ་ཛེ་ཏ་རི་དགྲ་ལས་རྣམ་རྒྱལ་གྱི་ཞལ་ནས། ངའི་སྙིང་གར་ཁྱེད་ཀྱི་ཡི་དམ་གྱི་ལྷ་ཡོད་པས་མཇལ་ལམ་གསུངས། ཅིས་ཀྱང་མཇལ་ཞུས་པས། ཐུགས་ཀ་རལ་གྲིས་གཤགས་པའི་ནང་ན། འཇམ་དབྱངས་དཀར་པོ་སྐུ་མདོག་ཕྱག་མཚན་རྒྱན་ལ་སོགས་པ་ཤིན་ཏུ་གསལ་བ་ཞིག་བཞུགས་འདུག །གསོལ་བ་བཏབ་པས། ཐུགས་ཀ་ནས་ཨ་ཡིག་དཀར་པོ་ཞིག་བྱུང་སྟེ་སྙིང་གར་ཐིམ་པའི་སྣང་བ་བྱུང༌། དེ་ནས་པཎྚི་ཏ་དེས་ཁྱོད་ཡི་དམ་གྱི་ལྷ་འདི་བསྟེན་ན་འབྲེལ་ཆེ་ཞིང་ཤེས་རབ་ཆེ་བ་ཡོང་ཙམ་འདུག་ཀྱང་ཁྱེད་ལེ་ལོ་ཅན་ཞིག་ཡིན་པ་འདྲ། ཁ་སང་བདག་གི་སྤྲུལ་བ་ཨིནྡྲའི་མིང་ཅན་ལས་འདིའི་དབང་དང་གདམས་པ་རྣམས་ཞུས་ན་རྟེན་འབྲེལ་རབ་གཅིག་འགྲིག་ཚོད་ཡིན་འདུག་ཀྱང་ཅུང་ཟད་མ་བྱུང་གསུངས་ནས་གཤེགས་སོང༌། ཞེས་ལུང་བསྟན་ཤེལ་གྱི་མཁར་བ་ན་ཡོད་པ་སོགས་སྤྲོ་དགོས་འགའ་ཞིག་འདུག་ཀྱང་ཟུར་ཙམ་བཀོད་པའོ། །དེ་ནས་སྔ་སོར་ལམ་རིམ་ཆེ་ཆུང་གི་བཤད་ལུང་སྙན་གསན་ཕུལ་བ་ལ་ལམ་བར་ནས་གནང་ཆོག་གསུངས་པ་ལྟར་བརྒྱད་པའི་ཚེས་བཅུ་ནས་ལམ་རིམ་ཆུང་ངུའི་བཤད་ལུང་ཚུགས་ཏེ་རྫོགས་པར་གནང༌། རྟ་བདུན་འོད་ཀྱིས་མི་སྙེམས་ཤིང༌། །མཁས་པ་ཡོན་ཏན་གྱིས་མི་སྙེམས། །རྒྱ་མཚོ་ཆུ་ཡིས་མི་ངོམས་ཤིང༌། །དམ་པ་ཐོས་པས་མི་ངོམས་ཉིད། །ཉིན་རེ་ཞིང་མདོ་སྔགས་ཀྱི་གསུང་འཕྲོས་གནང་བཞིན་ཕེབས་པས་འབྲི་ཆུ་ཁར་གདན་སའི་བསུ་བ་དང་པོ་འབྱོར། འདི་ནས་བཟུང་སྟེ་རྨ་ཆུ་ཁ་སོགས་སུ་སྤྱི་སྒེར་གྱི་བསུ་བ་ཇ་ཐབ་གང་ཡོད་ཡབ་སྲས་ཐུན་མོང་ལ་ཕུལ་ཞིང༌། བཱ་ཡན་ཧོ་ཤུས་ནས་རྗེ་འདི་ཉིད་འབལ་མགོ་བསྐོར་ནས་ཕེབས་པ་ཐོས་པས་ཆིབས་བསུ་བར་མའི་སྐོར་རྣམས་ཝང་གི་
ཨུ་རྒེ་ནས་ཚ་དྲགས་ཀྱིས་ཕྱིན་ནས་མདའ་ཆེན་གྱི་མདར་བཞུགས་ཞག་གི་ས་ནས་ཕེབས་བསུའི་མཇལ་དར་ཕུལ། བཅུ་གཅིག་པའི་ཚེས་དགུའི་ཉིན་དགེ་འདུན་ཉིས་སྟོང་ལྷག་པས་སངས་རྒྱས་འཇིག་རྟེན་དུ་བྱོན་པ་ལྟ་བུའི་དགའ་སྤྲོའི་སེར་སྦྲེང་དང་བཅས་ཡབ་སྲས་རྣམས་ཐོག་མར་བླ་བྲང་ཆེན་མོར་ཕྱག་ཕེབས་བླ་བྲང་ཆེན་མོ་ནས་དཀར་སྤྲོའི་རྟེན་འབྱུང་ཐོག་མར་ཕུལ་ཏེ་གཟིམས་ཤག་ཏུ་ཕེབས། བཀྲ་ཤིས་ཆོས་ཀྱི་ཆུ་ཀླུང་འབུམ་ཕྲག་ཏུ། །འཁྱིལ་བའི་རོལ་མཚོ་བཤེས་གཉེན་གདེངས་ཅན་གྱིས། །བཟུང་བ་དེ་ཚེ་བཤད་སྒྲུབ་རླབས་ཕྲེང་གིས། །ཕན་བདེའི་ཟེགས་མ་ཕྱོགས་བརྒྱར་འགྱེད་པར་རྩོམ། །ཕེབས་པའི་ཉིན་དེར་གཟིམས་ཁང་སྟེང་ཤོད་སོ་སོར་ཕེབས་སྟབས་མ་འགྲིག་པས་ཡོ་བྱད་བྱིན་རླབས་མ་གྲུབ། དེ་ཕྱིན་ཆད་ཡོ་བྱད་གང་ཡོད་མཆོག་གསུམ་གྱི་ཞིང་གཙོ་བོར་བྱས་ནས་གཞན་དོན་ཁོ་ནར་བསྔོས་པ་ཡིན་གསུངས། དེ་ཡང་སྲོད་ཀྱི་ཆ་ལ་ཉིན་དེར་གང་ཡོང་གི་དར་ཁ་ཡན་ཆད་སྐུ་གཟུགས་དང༌། གསུང་རབ་ཀྱི་ཆེད་དང༌། དགེ་འདུན་གྱི་ཞབས་ཏོག་དང༌། གཞན་ལ་གནང་སྦྱིན་སོགས་གང་ལ་གང་འོས་གཟིགས་ནས་དེ་བཞིན་དུ་འགྲོར་འཇུག་པ་མཐོང་སྟེ། བྱིན་རླབས་དང་རྣམ་བརྟག་ཀྱང་དེ་ལས་ལྷག་པར་བྱར་མེད་དོ། །བཅོ་ལྔའི་ཉིན་བླ་བྲང་ཆེན་མོ་ནས་ཡབ་སྲས་ལ་གསོལ་སྟོན་ལེགས་དར་སོགས་གང་རྒྱས་དང༌། དེའི་ཕྱི་ཉིན་སྤྱི་སོ་ནས་འདུ་ཁང་ཆེན་མོར་བཞུགས་གྲལ་གྱི་ཐོག །དགྱེས་སྟོན་དང་ལེགས་དར་ཕུལ་ཞིང༌། ཉིན་གཉིས་ཀར་རིགས་པ་སྨྲ་བ་རྣམས་ཀྱིས་ཚོགས་གླེང་དང༌། སྨད་སོག་གྲྭ་རྒྱུན་སྤྱི་ནས་གཟིམས་ཆུང་ཐུབ་བསྟན་ཕོ་བྲང་དུ་ཡབ་སྲས་ཐུན་མོང་ལ་སྟོན་ཆེན་ཐོག །དུས་འཁོར་བ་འགའ་དང་བསྡོམས་ནས་མདོ་དར་པི་ཝང་
གླིང་བུ་སོགས་སྒྲ་སྙན་གྱི་བྱེ་བྲག་སྣ་ཚོགས་འབུད་དཀྲོལ་གྱིས་མཚོན་ཆོས་དང་ཟང་ཟིང་གི་མཆོད་སྤྲིན་རྒྱ་ཆེར་སྤྲོས། མཇལ་ཁ་སྟོན་མོ་རིམ་བཞིན་བར་མ་ཆད་བྱུང་བ་ལ་སོ་སོར་བབས་འོས་ཀྱི་གནང་ཆ་ཡང་སྩལ། ཚོགས་ཆེན་ལ་ཞྭ་སྣམ་རེའི་འགྱེད་དང༌། འདུ་ཁང་བླ་བྲང་གི་སྟེང་དུ་འདོད་དཔལ་ནས་དངུལ་སྲང་བརྒྱད་བརྒྱའི་ཡོན་གྱིས་བསྒྲུབས་པའི་གསེར་ཟངས་ཀྱི་རྒྱལ་མཚན་ཆ་གཅིག་འཇོག་པ་གནང༌། ཡིད་དགའ་ཆོས་འཛིན་གྱི་རི་ཁྲོད་པ་རྣམས་ལ་སྒོམ་ཞྭ་རེ་དང་ལིའི་མཎྜལ་རེ་གནང་ཐོག །ནང་རེ་བཞིན་སེམས་བསྐྱེད་མཆོད་པ་ཆག་མེད་ཀྱི་སྲོལ་བཙུགས། དེ་ཡང་སྦྱོར་བའི་སྐབས་ཡན་ལག་བདུན་གྱི་བསགས་སྦྱངས་དང༌། དངོས་གཞི་སེམས་བསྐྱེད། མཇུག་བསྔོ་སྨོན་གྱི་རྒྱས་གདབ་པ་འདི་བསླབ་བཏུས་སུ་གསལ་རྒྱལ་ལ་གདམས་པའི་མདོ་ཁུངས་སུ་མཛད་ནས་གསུངས་པའི་གདམས་པ་དལ་བའི་རྟེན་ལ་སྙིང་པོ་ལེན་ཐབས་མཆོག་ཡིན་པས་འདི་ཙམ་གྱི་བཀའ་དྲིན་ཡང་གཞལ་བར་དཀའོ། །ཐུགས་བྲེལ་སངས་པ་ན་རི་ཁྲོད་ཡིད་དགའ་ཆོས་འཛིན་གྱི་སྒྲུབ་ཁང་དུ་སྐུ་མཚམས་ལ་བཞུགས་ནས་ཐུན་བཞིའི་རྣལ་འབྱོར་ཆག་མེད་དུ་མཛད། དགུང་ལོ་ཉེར་དྲུག་པ་མེ་ལུག་ལ་རི་ཁྲོད་ཡིད་དགའ་ཆོས་འཛིན་ནས་སྲིད་གསུམ་བདག་མོ་མཆོད་པའི་ཚེས་གཏོར་གྱི་ཚོགས་དབུ་མཛད་དེ་རྒྱལ་བསྟན་སྙིང་པོ་མཁའ་ཁྱབ་ཏུ་དར་ཞིང་རྒྱས་པའི་འཕྲིན་བཅོལ་ནན་ཏན་གནང༌། དེ་ཕྱིན་ལོ་གསར་ལ་རི་ཁྲོད་དུ་བཞུགས་ཕྱིན་ཚེས་གཏོར་ལ་ཆག་མེད་དང་དགོན་པར་བཞུགས་ན་ཡང་ཕལ་ཆེར་ཆེད་གཉེར་གྱིས་ཕེབས་པ་མཛད། ཚེས་གསུམ་ལ་དགོན་པར་ཕེབས་ནས་ཡབ་རྗེ་མཆོག་ལ་དཀར་སྤྲོ་དང་བཅས་མཇལ་ཞུ་མཛད། ཨ་རོ་ཧོར་ཆེན་ཆོས་རྗེ་ནམ་མཁའ་དང༌། བློ་གྲོས་ཐོ་ཡོན། དུས་འཁོར་སློབ་ཟུར་ངག་དབང་ཕུན་ཚོགས། རེབ་ཙ་སྤྲུལ་སྐུ་
དགེ་འདུན་རྒྱ་མཚོ་སོགས་ལ་སྒྲུབ་ཐབས་རྒྱ་མཚོའི་རྗེས་གནང༌། སྐྱབས་འགྲོའི་ཁྲིད་གང་རྒྱས། མགོན་པོ་བཀའ་བཅུ་གསུམ་དང༌། སྒྲོལ་མ་ཉེར་གཅིག་གི་རྗེས་གནང་སོགས་འདོད་མོས་ལྟར་སྩལ། སྐྱབས་མགོན་རྡོ་རྗེ་འཆང་གཟིམས་གཤག་ཏུ་སྤྱན་དྲངས་ནས་དགྱེས་སྟོན་ཕུལ་ཏེ་དངུལ། གོས་ཕྲུག་སོགས་རྣམ་གྲངས་བརྒྱ་དང་ལྔ་བཅུ་ཕུལ། གཟིམས་ཁང་གི་རྒྱབ་ཏུ་དྲི་གཙང་ཁང་སུམ་ཐོག་ཀ་བཞི་མ་གློ་འབུར་གྱི་ཚུལ་དུ་བཞེང་རྒྱུའི་ལས་མགོ་ཚུགས། བླ་བྲང་མགྲོན་གཉེར་དཀོན་མཆོག་གྲགས་པ་བོད་དུ་འགྲོ་གདོང་ཡོངས་འཛིན་རིན་པོ་ཆེ་དང༌། ཀློང་རྡོལ་གྲུབ་ཆེན། བ་སོ་རྗེ་དྲུང་བློ་བཟང་བསྟན་པའི་མགོན་པོ་སོགས་ལ་ཆབ་ཤོག་སྙན་ཚིག་གི་སྒོ་ནས་ཞུ་དགོས་ཀྱི་རིགས་སྤྲིངས། སྐུ་གཟུགས་ཅུང་ཟད་མ་བདེ་བར་ཚོགས་ཆེ་ཆུང་སོ་སོར་མང་འགྱེད་ཐོག་དང༌། གྲྭ་མང་ཟུར་འཚོགས་སོགས་ཀྱིས་ཞབས་བརྟན་ཕོན་ཆེར་བསྒྲུབས་ཀྱང་མཇུག་ཅུང་ཟད་མ་དྭངས་པས་ྋཡབ་རྗེ་རྡོ་རྗེ་འཆང་གདན་དྲངས་ནས་འཇིགས་བྱེད་ཞི་བའི་སྦྱིན་སྲེག་གནང་བས་སྐུ་རིན་པོ་ཆེ་ཟླ་བ་སྒྲ་གཅན་གྱི་རྒྱ་ལས་རྣམ་པར་གྲོལ་བ་བཞིན་དུ་དྭངས་ཤིང་གཟི་འོད་འབར་བར་གྱུར། ལེགས་འབུལ་འཇམ་ཕྲུག་རྩེར་སོན་འགའ་དང༌། གོས་ཟམ་སོགས་རྣམ་གྲངས་བརྒྱ་ལྷག་ཙམ་ཕུལ། དེ་སྐབས་ྋསྐུ་ཞབས་རིན་པོ་ཆེ་ནས་མདུན་དུ་བཞུགས་གདན་ཞིག་བཏིང་བར་རྗེ་འདི་ཉིད་བཞུགས་སུ་བཅུག །བླ་བྲང་ཞབས་ཕྱི་དྲག་བགྲེས་རྣམས་དང༌། དབོན་པོ་བློ་བཟང་དཀོན་མཆོག །རབ་འབྱམས་པ་དགེ་ལེགས་སེངྒེ༌། རོགས་རམ་པ་གྲྭ་རྒན་རྣམས་ལ་ཁྱེད་རྣམས་འདིར་བཞུགས་ན་ང་ལ་བཤད་རྒྱུ་ཞིག་ཡོད་གསུངས་ཏེ་ཞལ་ནས། ང་རང་གི་སྐྱེ་བ་སྔ་མ་འཇམ་དབྱངས་བཞད་པ་ཚང་ལ་སློབ་
མ་མདོ་དབུས་གཙང་གསུམ། ཁམས། ལི་ཐང༌། སྡེ་དགེ །རྒྱ་ནག །ཅུན་གར་ཚུན་ཆད་ན་གནམ་གྱི་སྐར་མ་ལྟ་བུ་བརྗོད་ཀྱིས་མི་ལང་བ་ཡོད་ཀྱང༌། དེ་ཐམས་ཅད་ཀྱི་ནང་ན་ཐུགས་སྲས་གཅིག་པུར་གྱུར་པ་ནི་ཁྱེད་ཀྱི་སྐྱེ་བ་སྔ་མ་ཁྲི་ཆེན་དགེ་འདུན་ཕུན་ཚོགས་པ་དེ་ཡིན། འཇམ་དབྱངས་བཞད་པ་ཚང་ཁོང་ཐུགས་ཚ་བའི་སྟབས་སྐབས་ལ་ལར་བཀའ་བཀྱོན་གནང་སྐབས་ཁྱོད་ཀྱིས་ཧ་མ་གོ་བ་ཡིན། ང་འཇིག་རྟེན་འདིར་ཁྱོད་གཅིག་པུའི་དོན་ལ་ཡོང་བ་ཡིན་ཞེས་གསུངས་པས་སློབ་མ་དགེ་བཤེས་གཞན་ཚོ་མ་རངས་པར། ངེད་ཚོའི་བསམ་པ་ལ་འཇམ་དབྱངས་བཞད་པ་སངས་རྒྱས་ཀྱི་བསྟན་པ་དང་སེམས་ཅན་གྱི་དོན་དུ་བྱོན་པ་ཡིན་མོད་བསམས་ཀྱང༌། མི་གཅིག་གི་དོན་དུ་བྱོན་པ་ཡིན་ན་རྩ་བ་ཆེ་རྒྱུ་མི་འདུག་ཅེས་ལྐོག་ལབ་བྱས་པ་རེད། རྗེས་སོར་སྐུ་གོང་མ་མདོ་སྨད་དུ་ཕེབས་སྐབས་གཞན་མང་པོས་དགེ་འདུན་ཕུན་ཚོགས་ཚང་བྱང་རྩེ་མཁན་པོ་མིན་ན་ཞབས་ཕྱི་ལ་ཁྲིད་ཆོག་པ་ཞེས་ཞུས་ཚེ། དེ་འདི་ནས་ངའི་མིང་སྒྲོག་དགོས་གསུངས་པ་ནི། རྗེས་སོར་དགའ་ལྡན་གསེར་ཁྲིར་བཞུགས་རྒྱུ་དང༌། པད་དཀར་འཛིན་པའི་ཡོངས་འཛིན། གཞུང་གི་ཆོས་སྲིད་ཀྱི་མངའ་བདག་བྱེད་རྒྱུ་སོགས་ལུང་བསྟན་པ་རེད། སྐུ་ཚེ་རྗེས་མ་དེ་ཡང་མདོ་སྨད་འདིར་གདན་དྲངས་པ་སོགས་ཀུན་གྱིས་ཤེས་པ་དེ་ཡིན་མོད། འདི་ནས་ཀྱང་སྐུ་ཡོན་མཐར་ཕྱིན། ཚོགས་ཕན་ཚུན་གཉིས་ཀྱི་ཁྲི་པ་གནང༌། ཆོས་འཇིག་རྟེན་གང་གི་ཐད་ནས་ཀྱང་བཀའ་དྲིན་བསམ་གྱིས་མི་ཁྱབ་པ་བསྐྱངས། ངེད་རྣམ་གཉིས་ཀྱང་བླ་སློབ་ཏུ་གྱུར་ཏེ་དད་པ་དམ་ཚིག་གཞན་དང་མི་འདྲ་བ་ཡིན་ཀྱང་བསྟན་པའི་ཆག་སྒོ་ཞིག་གིས་སྐུ་ཚེ་མཐར་མ་ཕྱིན། རྗེས་སོར་སྤྲུལ་སྐུའི་དོན་སྐོར་གྱི་སྐབས་སོགས་སུའང་ཡས་མས་མཐོ་
དམན་ཀུན་གྱི་ཁྲོད་ནས་སྤྲུལ་སྐུ་ཡིན་ཟེར་མཁན་མང་དུ་བྱུང་ཡང༌། དེ་དག་གི་རྗེས་སུ་མ་འབྲངས་པར་འདི་གཞན་དང་མི་འདྲ་བ་ཡིན་སྟབས་སྤྲུལ་སྐུ་འཁྲུལ་མེད་ཅིག་རྙེད་དགོས་བསམས་ནས་འཁྲུངས་ཡུལ་གྱི་མཐོ་དམའ། མངའ་ཐང་སྟོབས་འབྱོར་སོགས་ལ་མ་བལྟས་པར་བཙལ་བའི་སྟབས་ཁྱེད་ཀྱི་སྟེང་འདི་ན་ང་ལ་ཕྱི་ནང་ཀུན་ན་མི་ཁ་ཆེ། ད་ཁྱེད་སྤྲུལ་སྐུ་འཁྲུལ་མེད་ཡིན་སྟབས་མི་ཁ་ལ་སྐྱོན་གང་ཡང་མི་འདུག །ཁྱེད་ཀྱིས་ཀྱང་སྐུ་གོང་མ་དེའི་དགུང་ཀེགས་འཛུར་གྱི་བར་དུ་སྐུ་རིམ་ཞབས་བརྟན། སྐུ་མཚམས་སོགས་གང་ཅིའི་ཐད་ནས་རེམ་རེམ་བྱེད་དགོས། མི་ཐམས་ཅད་ཀྱི་ཁ་ངག་ལའང་བླ་མ་ལ་ཡོན་ཏན་ཞིག་དགོས། ཡོན་ཏན་ཞིག་མེད་ན་བླ་མ་ཞེས་མིང་བཏགས་ཏེ་གོ་ས་མཐོ་ན་ཡང་དོན་མེད། དེས་ལྟོས་བཅས་ཐམས་ཅད་བསླུ་བ་ཡིན་ཟེར་མོད་ཀྱང༌། ཁྱེད་ལ་ངས་ཡོན་ཏན་སློབ་དགོས་ཞེས་བཤད་རྒྱུ་ཅི་ཡོད། ཁྱེད་ཀྱི་ཡོན་ཏན་དབུས་གཙང་སེ་འབྲས་དགེ་གསུམ་སོགས་ན་གྲགས་ཡོད་པ་དེ་ཡིན་མོད། ང་ཅི་ལ་མི་མགུ །སྔ་མོ་འཇམ་དབྱངས་བཞད་པ་ཚང་གིས་ཁྲི་ཆེན་དགེ་འདུན་ཕུན་ཚོགས་པར། ངས་ཨ་མདོ་ནས་དགོན་པ་ཞིག་བཏབ་འཇོག་རྒྱུ་ཡིན། རྗེས་སོར་བདག་བྱེད་མི་བྱེད་ཁྱེད་རང་ཚོས་ལྟོས་གསུངས་པ་ལྟར། སྤྱིར་བཀྲ་ཤིས་འཁྱིལ་འདིར་ཡང་དགའ་ལྡན་གསེར་ཁྲི་གསུམ། གཞན་ཁྲི་གདན་ཟུར་སྤྲུལ་སྐུ་སོགས་བླ་ཆེན་ཉི་ཤུ་ལྷག་ཙམ་ཡོད་མོད་ཀྱང༌། ང་ལ་ཡང་རྗེས་སོར་སེམས་ལ་འཛིན་རྒྱུ་ཞིག་ཡོད་པ་ཁྱེད་གཅིག་པུ་ཡིན་ཨེ་གོ་ཞེས་ཡབ་སྲས་སྐུ་འཕྲེང་རིམ་བྱོན་གྱི་རྣམ་ཐར་གྱི་གནད་ཚང་ཞིང༌། སྔོན་བྱུང་དང་ཕྱིས་འབྱུང་གསལ་བའི་སྒོ་ནས་ཐུགས་གཏད་པའི་གསུང་བྱོན་པ་ནི་དམ་པ་ཏོག་དཀར་གྱིས་མ་ཕམ་པའི་དབུ་ལ་རིན་པོ་ཆེའི་པྲོག་ཞུ་བཅིངས་པ་དང་ཆོས་
མཚུངས་སོ། །དབང་བཅུ་ལྡན་ཡང་གང་ལས་བརྒལ་མིན་རྒྱལ་ཀུན་མཛད་པའི་ཁུར་ཆེན་མ་ལུས་འདེགས། །ཤེས་བྱའི་ཁྱོན་ཀུན་གསལ་བྱེད་མཁྱེན་པའི་འོད་སྟོང་གདུལ་བྱའི་ཁམས་དང་མོས་པར་མཐུན། །མ་བརྟག་མི་མངའ་བརྩེ་དང་སྦྱིན་བཅས་བདེན་དང་སྙིང་སྟོབས་བརྟུལ་ཞུགས་གཟི་བརྗིད་འབར། །ཐབས་ཤེས་གཤོག་རྩལ་རབ་རྫོགས་བསྟན་འགྲོ་སྐྱོང་ལ་མཁྱེན་བརྩེ་ནུས་སྟོབས་ཐོགས་མི་མངའ། །འདི་ཡི་བཟོད་པའི་གོ་ཆ་དང༌། །འཇིགས་མེད་སྤོབས་པའི་མཚོན་ཆ་ཡིས། །ཆུ་སྲིན་རྒྱལ་མཚན་ཅན་གྱི་དཔུང༌། །མིང་གི་ལྷག་མར་བྱེད་དགོངས་ནས། །རིག་དང་ཞབས་ལྡན་དྲང་སྲོང་གཙོ་བོ་དེའི། །ཀུན་བཟང་ཐུགས་བསྐྱེད་སྨོན་པའི་མཁའ་ཀློང་ལས། །ཕན་བདེའི་ཆར་འབེབས་བཀའ་ཡི་སྤྲིན་འཁྲིགས་ཚེ། །ལག་པའི་འཁྲི་ཤིང་ཐལ་སྦྱར་མེ་ཏོག་མཛེས། །ཉིན་ཁ་ཤས་ལ་ཡབ་སྲས་ལྷན་རྒྱས་ནས་གོས་སྐུ་ཐང་དུ་དབུས་ཕེབས་ཀྱི་དགྱེས་སྟོན་དང་སྤྲོ་སངས་མཛད། དེ་ནས་རི་ཁྲོད་དུ་ཕེབས་ཏེ་དབྱར་གནས་ལ་བཞུགས། ཚོགས་ཆེན་ཁྲི་ཟུར་བསོད་ནམས་གྲགས་པ། རྒྱུད་པ་སློབ་ཟུར་ནམ་མཁའ་རྒྱལ་མཚན། དགོན་པའི་དགེ་བཤེས་རིགས་སྨྲ་ཏིལ་གྱི་གང་བུ་ལྟར་བཅེར་ཞིང༌། རི་ཁྲོད་ཀྱི་འདུ་ཁང་སྒོ་འཕྱོར་དང་བཅས་པར་མི་ཤོང་ཙམ་ལ་ལམ་གྱི་གཙོ་བོ་རྣམ་གསུམ་གྱི་བཤད་ལུང་ཉིན་གསུམ་ལ་གནང་བས་སྔོན་ཆད་རྣ་བས་ཐོས་མ་མྱོང་བ་ལྟ་བུའི་ལེགས་པར་བཤད་པའི་གཏམ་གྱིས་མཁས་མང་གི་ཡིད་འཕྲོག་སྟེ། ལོ་གཅིག་གི་སློབ་གཉེར་ལ་ཡང་འདི་འདྲའི་བློ་སྐྱེད་ཐོན་པ་དཀའ་ཞེས་གླེང་བ་ཐོས་སོ། །སྟོན་མཇུག་ཅིག་ཐུ་མེད་པེ་སིའི་མི་སྣ་ཤཀ་ཤ་པད་ཀྱིས། དགོན་པར་གདན་དྲངས་ཏེ་རྗེས་གནང་འགའ་ཞིག་དང༌། པེ་སིའི་རིམ་གྲོར་རྣམ་སྲས་གཡང་འབོད་ཉིན་གཅིག་ལ་གཟིམས་ཁང་ནས་བསྒྲུབས། རྡོ་རྗེ་འཆང་གི་དྲུང་
ནས་མཚན་མོ་གཅིག་དུག་དབང་རྨ་བྱ་རྒྱས་པ་གསན་ཅིང༌། ནུབ་དེར་རི་ཁྲོད་དུ་བྱོན་ནས་ལོ་གསར་གྱི་བར་དུ་ཐུན་བཞིའི་རྣལ་འབྱོར་ཆག་མེད་ཀྱི་སྒོ་ནས་ཐུན་མོང་དང་ཐུན་མོང་མ་ཡིན་པའི་ཉམས་བཞེས་ལ་རྩེ་གཅིག་ཏུ་བརྩོན་པར་མཛད་དོ། །དགུང་ལོ་ཉེར་བདུན་པ་ས་སྤྲེལ་ལོར་ཚེས་གཏོར་སྔར་རྒྱུན་ལྟར་གནང༌། ཕྱི་དྲོ་ནས་ཡབ་རྗེ་རྡོ་རྗེ་འཆང་གི་དགུང་ཀེགས་ཞབས་བརྟན་གྱི་ཆེད་དུ་བདུན་གཅིག་བཅད་རྒྱར་བཞུགས། ཚེས་དགུའི་ཉིན་ཉི་མ་རྩེ་ཤར་ལ་སྐུ་མདུན་དུ་མཇལ་ཁ་ཞུས་ནས་གསུང་ཆོས་ལ་ཆག་མེད་དུ་ཕེབས། ཕྱོགས་ནས་འོངས་པ་དང་གཉུག་མར་གནས་པ་རྣམས་ལ་མཇལ་ཁ་དང༌། འདོད་ཆོས་རེ་བ་སྨིན་པར་མཛད། ཀུན་མཁྱེན་མཆོག་ལ་སྙན་ངག་གི་བཤད་ལུང་ཞུས་པར་བཅད་རྒྱའི་ཁོང་ནས་སྙན་ངག་མེ་ལོང་དང༌། དབྱངས་ཅན་དགྱེས་གླུའི་བཤད་པ་ཐུགས་ཁེངས་པ་ཞིག་གནང། སྤྱིར་ཐ་སྙད་རིག་པའི་སྐོར་འབད་རྩོལ་ལ་ཆེར་མ་ལྟོས་པར་སྤོབས་པའི་ཀློང་རྡོལ་བ་ཞིག་སྐུ་ན་ཕྲ་མོའི་དུས་ནས་ཡོད་ཀྱང། གཞན་དག་ལ་ཞལ་གདམས་གནང་སྐབས་ཞལ་ནས། རྟོགས་པ་མཐོ་ན་ཡང་ཐ་མལ་པ་ལྟར་བསྟན་ན་ཐ་མལ་པ་ལྟར་སློབ་དགོས་ཞེས་ཡང་ཡང་གསུངས་པ་ལྟར། སྐབས་འདི་དག་ཏུ་ཀུན་མཁྱེན་མཆོག་ལ་བཀའ་འདྲི་དོགས་གཅོད་ཡང་ཡང་ཞུས་པར། རྩིས་དང་སྡེབ་སྦྱོར་རྒྱ་བོད་ཀྱི་ཆོས་འབྱུང་དང་འབྲེལ་བའི་ལོ་རྒྱུས་དུ་མ་འབྱམས་ཀླས་པར་སྩལ་པས་གཙུག་ལག་རབ་འབྱམས་ལ་མཁྱེན་པའི་ཀློང་རྡོལ། སྒྲ་དང་རྩིས་ཀྱི་རི་མོ་ཕྱོགས་བསྟན་པ་ཙམ་གྱིས་ཐུགས་སུ་ཆུད་ཅིང༌། ཤན་སྦྱར་དུ་མ་དང༌། ལྷག་པར་འཕགས་བོད་ཀྱི་སྙན་ངག །སྡེབ་སྦྱོར། སྒྲའི་སྒྲུབ་ལུགས་དང་སྐད་དོད་སྦྱངས་པ་སོགས་གནད་གཅིག་ཏུ་བསྒྲིལ་
ནས་རྟོགས་བརྗོད་དཔག་བསམ་འཁྲི་ཤིང་ཤན་སྦྱར་སྐུ་འཁྲིས་སུ་བཞག་ནས་རྒྱུན་རིང་གཟིགས། སྐྱབས་མགོན་མཆོག་ནས་སྒྲའི་སྒྲུབ་ལུགས་ཀྱི་དཀའ་གནད་དུ་མར་གསུང་བཤད་མཛད་པ་ལ་དྲི་གཏུགས་ཞིབ་པར་བྱས་པས་རང་བཞིན་དང༌། རྐྱེན་དང༌། རྣམ་འགྱུར་གྱིས་བསྡུས་པའི་བརྡ་སྤྲོད་གཞུང་བརྒྱའི་གནད་དོན་ཐུགས་སུ་ཆུད་ནས་བཀའ་རྩོམ་རྣམས་སུ་སྒྲ་སྒྲུབ་ལུགས་ཀྱི་སྒོ་ནས་དོན་གསལ་བར་མཛད་པ་མང་དུ་ཡོད་པ་མཇལ་ན་ཤེས་ལ། དཔག་བསམ་འཁྲི་ཤིང་ལ་འགྱུར་སྐྱོན་མང་བ་དང༌། འདར་ལོའི་སྒྲ་ཊཱིཀ་ལ་འགྱུར་མི་ལེགས་པ་ཡོད་པ་གཞན་གྱིས་འགྱུར་བཅོས་མཛད་པ་སོགས་ཀྱི་གསུང་སྒྲོས་འགའ་ཞིག་ཐོས་ཀྱང་འདིར་འགོད་པ་སྐབས་སུ་མ་བབས། སྨྲ་སྒོ་མཚོན་ཆ་དང༌། སུམ་རྟགས་རྩ་འགྲེལ་ལ་ཞིབ་གཟིགས་མཛད་ཅིང༌། ཞལ་ནས། སྨྲ་སྒོའི་འགྲེལ་པ་ལ་བྲ་སྟི་དགེ་བཤེས་ཀྱིས་དགག་པ་མཛད་ཀྱང་སྨྲ་སྒོ་ནི་རྗེ་བདག་ཉིད་ཆེན་པོས་ཀྱང་ཁུངས་སུ་འདྲེན་པར་མཛད་གསུངས། རང་བཞིན་རྐྱེན་དང་རྣམ་འགྱུར་ཟླ་བའི་མ། །བློ་ཆུང་རི་བོང་རྐྱལ་གྱིས་བགྲོད་མིན་པ། །མཁྱེན་དཔྱོད་བརྩོན་པའི་གྲུ་ཡིས་བདེར་བརྒལ་ནས། །ལེགས་བཤད་ནོར་བུའི་གན་མཛོད་བདག་གིར་མཛད། །ནང་རིག་དཀའ་གནད་མདུད་བརྒྱ་དབྱེ་དཀའ་བ། །བརྡ་སྤྲོད་གཏན་ཚིགས་སོར་མོའི་འདུ་བྱེད་ཀྱིས། །དགྲོལ་མཁས་སྒྲ་ཚད་སེངྒེ་མཇིང་བསྣོལ་ཁྲིར། །འགྱིང་ཁྱོད་གནའ་བོའི་སྐད་གཉིས་སྨྲ་བའི་ཟླ། །བར་སྐབས་ཤིག་ནས། དུས་དེར་འཚོ་བྱེད་ཀུན་གྱི་གཙུག་ན་མཐོ་བ། རེབ་ཙ་སྨན་རྒན་ངག་དབང་ནོར་བུ་གཟིམས་གཤག་གི་འཁྲིས་སུ་བཅར་སྡོད་དུ་གནས་པ་ལ་སྨན་དང་རྩིས་ཀྱི་གསུང་གླེང་རྒྱུན་དུ་མཛད་ཅིང༌། ཡབ་རྗེ་མཆོག་གི་དྲུང་དུ་ཡང་དྲི་གཏུགས་གླེང་མོ་རྒྱུན་དུ་ཞུས་
པས་ཕྱི་སྣོད་ཀྱི་འཇིག་རྟེན་ཆགས་ཚུལ། ནང་བཅུད་ཀྱི་རྩ་རླུང་ཐིག་ལེའི་གནས་ཚུལ། དེའི་དབང་གིས་ས་གནམ་གྱི་གོ་ལར་ཉི་ཟླ་རྒྱུ་སྐར་སོགས་ཀྱི་བགྲོད་པ་ལ་ལྟོས་པའི་ཁྱིམ་བཅུ་གཉིས་འཁོར་ཚུལ། དེ་དག་གི་ཡུལ་རྣམས་ནི་ཕྲ་མོའི་རྡུལ་རྩི་གཞིར་བྱས་པའི་དཔག་ཚད་ཀྱིས་གཞལ་ཅིང༌། དུས་དང་ཡུན་ཚད་ནི་དབུགས་དང༌། ཆུ་སྲང་ཆུ་ཚོད་དང་ཉིན་ཞག་གིས་རིམ་པར་གཞལ། ཕྱི་ནང་གི་རྟེན་འབྲེལ་ལ་བརྟེན་ནས་གཞི་ལམ་འབྲས་གསུམ་འགྲུབ་ཚུལ་རྣམ་དག་གྲུབ་པའི་རྩིས་ལས་ཇི་ལྟར་ཐོན་ཚུལ་མཁས་གྲུབ་ཐམས་ཅད་མཁྱེན་པས་བཀྲལ་བ་ཉིད་ཇི་ལྟ་བ་བཞིན་ཐུགས་སུ་ཆུད། དེ་ཡང་ཕྱི་དུས་འཁོར་རྩིས་ཀྱིས་ཞིབ་པར་ཤེས་ན་ནང་དུས་འཁོར་རྩ་རླུང་ཐིག་ལེའི་གནད་ཕྲ་མོ་ཤེས། དེ་ལས་གཞན་དུས་འཁོར་གྱི་ཉམས་ལེན་མི་ནོར་བ་འབྱུང་བའི་རྩིས་ཀྱི་སྒོ་ནས་དལ་འབྱོར་དོན་ལྡན་དུ་བསྒྲུབ་པ་ལ་ཊཱིཀ་ཆེན་དེ་ཉིད་སྣང་བའི་རང་ལུགས་ཁོ་ན་གཞིར་གཞག་དགོས་པ་ཡབ་སྲས་ཀྱི་གསུང་སྒྲོས་འཁྲུལ་མེད་ཐོས་སོ། །ཉིན་ཟླ་གཟའ་སྐར་ཁྱིམ་གྱི་བགྲོད་ཚུལ་ལས། །ནང་གི་རྩ་རླུང་ཐིག་ལེའི་གནས་ཚུལ་རྣམས། །གཏན་ལ་འབེབས་པ་རྩིས་རིག་དྭངས་པའི་མཚོར། །སྟོང་གཟུགས་ཕྱག་རྒྱའི་རི་མོ་འབུམ་ཕྲག་གཟིགས། །སྣ་ཚོགས་སྣོད་བཅུད་ཀུན་རྫོབ་རྒྱ་ཆེ་ཡང༌། །གནས་ལུགས་སྦྲང་རྩིའི་བཅུད་དུ་རོ་གཅིག་པའི། །སྣང་སྟོང་ཟུང་འཇུག་མཁྱེན་པའི་མེ་ལོང་ལ། །མི་འཆར་ཤེས་བྱའི་གནས་དེ་སུ་ཡིས་དམིགས། །སྨན་གྱི་སྦྱོར་སྡེབ་དང་ངོས་འཛིན་སོགས་ཞིབ་པར་མཁྱེན་ཅིང༌། སྨན་རྒན་ངག་དབང་ནོར་བུ་དང༌། རེབ་ཙ་སྨན་པ་དཀོན་མཆོག་བསྟན་དར་གཉིས་ཚེ་ཇི་སྲིད་འཚོའི་བར་དུ་བླ་བྲང་དུ་རྒྱུན་སྡོད་ཀྱིས་སྨན་
སྦྱིན་པ་ལྟ་བུའི་ཚུལ་དུ་ཡོད་པ་ལ་རྗེ་རང་ཉིད་ནས་སྨན་གྱི་སྦྱིན་བདག་གནང་བ་དང༌། ནད་པ་ལ་སྨན་བཅོས་ཀྱི་གསུང་བཀོད་སོགས་མཛད་བཞིན་པ་ཡིན་ལ། མདོར་ན་རྣམ་པར་མ་གྱུར་པའི་ལུས་གནས་ཚུལ་རྒྱུ་རྐྱེན་འཇུག་སྒོ །གནས་དང་རྒྱུ་ལམ་ལྡང་དུས་ལྡོག་རྒྱུ་སོགས་ཀྱིས་འབྲས་བུ་ནད་དུ་སྨིན་ཚུལ། དེ་ཡང་དོན་ལྔ་སྣོད་དྲུག་སོགས་ལ་རླུང་མཁྲིས་བད་ཀན་སོགས་ཀྱི་འཕེལ་འགྲེབ་ལ་བརྟེན་ནས་ཇི་ལྟར་བྱུང་བ་རྣམས་བལྟ་རེག་དྲི་བ་གསུམ་གྱི་སྒོ་ནས་ལེགས་པར་བརྟག །ཟས་སྤྱོད་སྨན་དཔྱད་ཀྱིས་ལེགས་པར་གསོ་བའི་ཚུལ་ཞིབ་པར་མཁྱེན་ཅིང༌། གསུང་འཕྲོས་ཀྱི་སྐབས་སུ་ཡང་རྒྱུན་སྤྱོད་དང༌། འཕྲལ་གྱི་ཟས་སྤྱོད་སོགས་དང༌། བཀའ་ཆོས་ཀྱི་སྐབས་ཐུན་མཚམས་ཀྱི་རྣལ་འབྱོར་སྐྱོང་ཚུལ་སོགས་ལས་འཕྲོས་ཏེ་གསོ་དཔྱད་ཀྱི་བཤད་པ་འབྱམས་ཀླས་པར་སྩལ་བས་མཁས་པར་རློམ་པའི་འཚོ་བྱེད་ཆེན་པོ་རྣམས་ཀྱང་ཁེངས་པའི་རི་བོ་བསྙིལ་བར་མཛད། གསོ་རིག་འཆི་མེད་ཚེ་ཡི་རིག་བྱེད་ཀྱིས། །བཞི་བརྒྱ་རྩ་བཞིའི་ནད་རིགས་དྲུངས་ཕྱུང་སྟེ། །འབྱུང་བཞིའི་དངོས་པོ་ཕལ་པའི་སྲོག་གི་ཟུང༌། །རྡོ་རྗེའི་ལུས་སུ་སྒྲུབ་ལ་དབང་འབྱོར་ཡང། །མ་བསླབ་མི་ཤེས་ཤེས་རྫུས་འགྲོ་བའི་སྲོག །བུས་བ་ཆུང་ངུའི་རྩེད་མོའི་ཡོ་བྱད་ལྟར། །གང་བྱུང་སྤྱོད་ལ་དཔའ་རྣམས་འདུལ་བ་དང༌། །དོན་ཉུང་བྱ་བ་ཉུང་བ་ལྷུར་ལེན་མཛད། །པྲིཏྟ་ཛ་ཏིའི་སྡེབ་སྦྱོར་སོགས་ཞིབ་པར་མཁྱེན་ཅིང་ཞལ་ནས། ད་ལྟ་རྩོམ་པ་པོ་ཕལ་ཆེར་བསྟན་བཅོས་ཀྱི་ལུས་ལ་མ་ཚང་ཁ་སྐོང༌། འཐོར་བ་སྡུད་པ། འཁྲུགས་པ་སྡེབ་པ་སོགས་ཀྱི་དགོས་དོན་ལ་མི་བསམ་པར་འདྲ་བཤུས་ཙམ་ལ། མགོ་མཇུག་ཏུ་ཚིགས་བཅད་དང༌། མགོར་སྡེབ་སྦྱོར་ཡིན་ཁུལ་གྱིས་སྐད་དོད་དམ་
དུམ་རེ་བསྒྲིག །དེས་མ་ཆོག་པར་པ་ཏྲ་དང༌། དེས་ཀྱང་མ་ཆོག་པར་འབྲུག་དང་སེངྒེ་ཚུན་ཆད་འདྲིའང༌། དེས་རྩོམ་པའི་ན་འཕང་ཆེར་འགྲོ་རྒྱུ་མེད་ལ། ལྷག་ཏུ་རྒྱ་སྐད་ཀྱི་གཏིང་མ་ལོན་པར་རེ་རེའི་སྐད་དོད་ཡིན་ཚད་བསྡུས་པའི་ནང་ནས་ཡི་གེ་ལྕི་ཡང་གི་སྡེབ་སྦྱོར་ཁོ་ན་གཙོ་བོར་བྱས་ཏེ་བཙན་ཐབས་ཀྱིས་བསྒྲིག་པ་འདི་རྒྱ་སྐད་ལ་ཤིན་ཏུ་མཁས་པ་ཞིག་གིས་བལྟས་ཚེ་དཔེར་ན། བྱང་ཆུབ་སེམས་དཔའ་སྤྱན་རས་གཟིགས་ཟེར་རྒྱུ་ལ། ཐད་ཀ་ཐད་ཀར་དོན་འདྲ་བ་ཙམ་ལ་བསམ་ནས། བྱང་ཞེས་པའི་དོད་དུ་དག་དང༌། ཆུབ་ལ་རྟོགས། སེམས་ལ་ཡིད། དཔའ་ལ་མ་ཞུམ། སྤྱན་ལ་མིག །གཟིགས་ལ་མཐོང་བྱས་ཚེ། འབྲུ་གཅིག་ལྷག་པ་གཞན་རྣམས་འདོར་ཐབས་མེད་པས་རས་ཞེས་པ་བསྡུས་པའི་ལུགས་བྱས། ལྷག་མ་བསྡོམས་ཚེ་དག་རྟོགས་ཡིད་མ་ཞུམ་མིག་མཐོང་ཟེར་བ་ཞིག་འབྱུང་ཡང་འབྲེལ་དང་བརྗོད་བྱ་ཅི་ཡང་མེད་པ་བཞིན་ཡིན། དེས་ན་ངེས་པར་སྡེབ་སྦྱོར་བྱེད་འདོད་ཚེ་དང་པོར་རྒྱ་གར་གྱི་སྐད་དུ་བརྩམས་ཏེ། གཟོད་བོད་སྐད་དུ་བསྒྱུར་ན་ལེགས་གསུངས། བཟོ་རིག་པ་ལ་སྐུ་གསུང་ཐུགས་རྟེན་བཞེངས་ཚུལ་སོགས་ལུས་ཀྱི་བཟོའི་མཆོག་དང༌། བཟླས་བརྗོད་དང་འཆད་རྩོད་རྩོམ་གསུམ་སོགས་ངག་གི་བཟོའི་མཆོག་དང༌། ཏིང་ངེ་འཛིན་དང་ཤེས་རབ་ཀྱི་རྩལ་སྦྱངས་པ་ཡིད་ཀྱི་བཟོའི་མཆོག་ལ་ཡང་འདོད་དགུར་དབང་བསྒྱུར་བ་ཀུན་གྱི་མངོན་སུམ་གྱི་ཡུལ་དུ་གྱུར་པས་ཕལ་པའི་བཟོ་རིག་ལ་མཁས་པ་སྨོས་མ་དགོས་སོ། །སྙན་ངག་འདོད་འཇོ་དཔག་བསམ་འཁྲི་ཤིང༌དང། །སྙན་ངག་སྡེབ་སྦྱོར་ཀུན་གསལ་མེ་ལོང་སོགས། །སྙན་ངག་སྡེབ་སྦྱོར་ཇི་བཞིན་མདོ་སྔགས་ཀུན། །སྙན་ངག་པྲིཏྟ་ཛ་ཏིའི་ཀློང་དུ་ཞུགས། །
ཤར་ལྷོའི་བཞེད་སྲོལ་སྒྲ་དོན་ཟླ་སྐར་འབུམ། །རང་རང་ཉམས་འགྱུར་མ་འདྲེས་གསལ་གཟིགས་ནས། །སྡེབ་ལེགས་ཚིག་གི་འདབ་བརྒྱར་བརྗོད་དོན་གྱི། །ཟབ་བརླིང་སྦྲང་རྩིའི་ཟིལ་དངར་འབུམ་ཆགས་པས། །མཁས་མང་རྐང་དྲུག་བརྟན་པ་འཕྲོག་པ་ན། །དཔེ་དོན་འགྲིག་ཙམ་རི་མོ་མངོན་བརྗོད་ཀྱི། །ཚོན་གྱིས་ཁ་བསྒྱུར་དོན་བཟང་བཅུད་བྲལ་བའི། །བཅོས་མའི་མེ་ཏོག་རྣམས་ལ་རེ་བ་ཆད། །ཐ་སྙད་རིག་པ་དོན་དུ་གཉེར་མཁན་ཆེར་མ་བྱུང་བས་རིག་གནས་གཞན་ལ་གསུང་རྩོམ་ཟུར་པ་མ་མཛད་ཀྱང་ཚིགས་སུ་བཅད་པ་རེ་རེ་ལ་ཡང་རིག་པའི་གནས་ལྔ་ཡོངས་སུ་རྫོགས་པའི་སྟོབས་ཀྱིས་ཐ་སྙད་མཁན་པོ་མཐའ་དག་ཟིལ་གྱིས་གནོན་པ་ནི་དཀར་ཆག་ཆོས་ཀྱི་གཎྜིར། རྒྱན་མང་ཁུར་ལྕི་དོན་གྱི་བུས་བ་དང༌། །དོན་གྱི་གཞོན་ནུ་ཕྱོགས་ཀྱི་གོས་ཅན་རྣམས། །རང་བཞིན་གསལ་བྱེད་མཛེས་པའི་རྒྱན་གསུམ་ཅན། །སྙན་དངགས་རྒྱལ་པོ་འདི་ཡི་འབངས་སུ་རྒྱུག །མངོན་བརྗོད་མཁས་པའི་རྣ་རྒྱན་སྣ་ཚོགས་སུ། །སྤུང་ཞིང་གསིག་པས་རྣ་བ་ཚ་བ་ལ། །རྒྱན་དུ་རློམ་མིན་རྣ་བར་ལྷན་སྐྱེས་བཞིན། །འཛར་བའི་མུ་ཏིག་རྣ་ལུང་དོན་དམ་རྒྱན། །འོན་ཀྱང་ཐུབ་བསྟན་དབྱར་གྱི་དུས་སྟོན་ཡོལ། །གཞུང་ཆེན་སྒྲ་བརྒྱ་པ་རྣམས་སྒྲ་མེད་གྱུར། །གཅམ་བུའི་སྙན་ཚིག་གསེར་བུ་གཡུ་འབྲུག་བཞིན། །ཕྱོགས་བརྒྱར་རྒོད་པས་ཡིད་སྐྱོའི་སྤུ་ལོང་ལྡང༌། །བློ་ལྡན་དད་བརྩོན་ར་ཡིག་གཉིས་པའི་ཚོགས། །རྗོད་བྱེད་དྲི་བསུང་ཁོ་ནས་མ་ངོམས་པར། །དོན་ཟབ་པུཎྜ་རཱི་ཀའི་བཅུད་མྱང་སྟེ། །རྣམ་གྲོལ་སྦྲང་རྩི་གསོག་པའི་ཆོ་ག་མཛོད། །ཅེས་གསུངས་པ་ཙམ་གྱིས་ཤེས་སོ། །སྙན་དངགས་ཀྱི་བཤད་པ་གསན་སྐབས་ཉིན་རེ་ལ་ཤོག་གྲངས་བཅུ་ལྷག་རེ་མ་མཐའ་གནང་བས་
ཉིན་རེ་ཞིང་རྩོམ་རྒྱུགས་བར་མ་ཆད་པར་ཕུལ། ཕྲན་གྱིས་ཡི་གེ་པ་བྱས་པར་མཚན་མོ་ཁྱད་གཞི་མང་པོ་ལ་བསམ་བློ་བཏང་ནས་ཕྱི་ཉིན་དཔེ་དང་དཔེ་ཅན་རིམ་པར་ཞུས་ཚེ། རེ་རེ་ལ་འདི་འདྲ་བྱས་ན། འདི་འདྲ་བྱས་ན་ཞེས་ཤོ་ལོ་ཀ་མི་འདྲ་བ་བཞི་ལྔ་རེ་བློར་བཟུང་ཡོད་པ་ཞིག་བཏོན་པ་ལྟར་ཐོགས་མེད་དུ་གནང་ནས་བྲི་དཀའ་བ་བྱུང་སྟེ་རང་ཉིད་ངོ་མཚར་ཞིང་དཔའ་ཞུམ་པར་གྱུར། རེས་འགའ་རྩོམ་རྒྱུགས་ཀྱི་ཤོག་དྲིལ་ཕྲན་གྱིས་སྐུ་མདུན་དུ་ཁྱེར་བར་ཐུགས་དགྱེས་པའི་བསྔགས་བརྗོད་ཀྱང་གནང། ཁྱད་པར་འགོག་རྒྱན་གྱི་ཐབས་ཀྱིས་འགོག་པ་ལ། མི་གཡོའི་སར་གནས་རྒྱལ་སྲས་དཔའ་བོ་ཁྱོད། །ཞི་བདེར་གཞོལ་བར་འདོད་ན་མྱུར་དུ་མཛོད། །ཕྱི་ནས་ཕྱོགས་བཅུའི་ཞིང་གི་རྒྱལ་རྣམས་ཀྱིས། །བསྐུལ་བར་གྱུར་ཚེ་དེ་ལས་འདའ་བ་དཀའ། །ཞེས་པ་ལས་འཕྲོས་ནས་གཞུང་ཆེན་མོ་ལ་སྦྱངས་པའི་སྟབས་ཀྱིས་འདི་འདྲ་མང་པོ་འདུག་པ་ཤིན་ཏུ་ལེགས། འོན་ཀྱང་ཐུགས་རབ་ཀྱི་ཤུགས་ཀྱིས་ཅུང་ཟད་རྩུབ་ཉམས་འདུག་པས་དྲས་རྒྱག་དགོས། སྤྱིར་རྩོམ་པ་ལ་དྲས་ཡང་ཡང་བརྒྱབ་ན་འཇམ་པ་ཡོང། རྩོམ་པ་འཇམ་ན་ལེགས་པས་ཁྱོད་ཀྱིས་སྙན་བསྐུལ་ཡང་ཡང་མཐོང༌། སྙན་ངག་ཅེས་པ་རྣ་བར་སྙན་ཅིང་ཡིད་ཚིམ་པ་བསམ་བློ་བཏང་ན་ཉམས་འཆར་བ་ཞིག་དགོས་གསུངས། སྙན་ངག་ནམ་མཁའ་ཡངས་པ་ལ། །གང་གི་མཁྱེན་དཔྱོད་མཁའ་ལྡིང་གིས། །ཚིག་གི་གཤོག་རླབས་གཡོ་བའི་ཤུགས། །རྒྱལ་ཀུན་སྤྲིན་དང་འགྲོགས་པ་ན། །ཇི་ལྟར་ཉམ་ཆུང་བྱེ་འུ་ཡིས། །བློ་གྲོས་འདབ་གཤོག་བརྐྱངས་གྱུར་པ། །དེ་ལྟར་ངལ་བའི་རི་མོ་ནི། །དཔྲལ་བར་རྔུལ་ཆུའི་རྒྱུན་དུ་བབས། །འཆད་རྩོད་རྩོམ་ལ་གློག་ལྟར་འགྱུ་བའི་ལྗགས། །
ལེགས་བཤད་སྤྲིན་རྔའི་དབྱངས་སྙན་བཞད་པ་ན། །གདོང་ལྔའི་ང་རོས་ཝ་སྐྱེས་གཞོན་ནུ་ལྟར། །སྨྲ་བས་ཁེངས་ལྡན་མ་ལུས་ཟིལ་གྱིས་མནན། །མགྲིན་པའི་ཆོས་དུང་སྡེ་སྣོད་རི་མོ་གསུམ། །རྣམ་བཀྲ་བཅུ་དྲུག་འདབ་མ་རྫོགས་པ་དེར། །ཡེ་ཤེས་རང་འོད་རྣམ་ལྔ་བཀྲ་བའི་དབུགས། །དབྱངས་ཀྱི་རྒྱལ་མོའི་གཟུགས་ཀྱིས་རོལ་པ་ན། །ཁེངས་ལྡན་སེམས་ཀྱི་རི་དྭགས་ཉམས་འགྱུར་བརྒྱས། །སྐྲག་བཞིན་སྔངས་བཞིན་ལྐོག་མའི་རྫོང་ཆེན་དུ། །བྲོས་དང་ལྷན་ཅིག་རང་སེམས་ཁྱེ་འུ་དེ། །ཨེ་མ་རྨོངས་པའི་གཉིད་ལས་དེ་རིང་སད། །དབྱངས་ཀྱི་དཀྱིལ་འཁོར་གཅིག་ལ་ཡང༌། །ཟབ་རྒྱས་བཅུ་དྲུག་ཆ་རྫོགས་པས། །ཟླ་བའི་དཔལ་ལ་འགྲན་ནུས་ཀྱང༌། །འཕེལ་འགྲིབ་མེད་པས་ཇི་ལྟར་མཚུངས། །ཐུན་མོང་རིག་གནས་སྟོང་ཁུན་སྒེག་མོའི་དར། །གྲུབ་མཐའ་རྣམ་བཞིའི་རིགས་པའི་དྲས་དྲུབ་ཀྱིས། །མདོ་སྔགས་གཞུང་ལུགས་སྐུ་བཞིའི་ཚོན་བཀྲ་བར། །སྒྲུབ་པའི་བཟོ་བོ་དེང་འདིར་ཁྱོད་མིན་སུ། །དེ་སྐབས་དཔང་ལོ་ཙཱ་བ། སྡེ་པ་རིན་སྤུངས་པ། སྣར་ཐང་སངྒྷ་ཤྲི། བོད་མཁས་པ་སོགས་ཀྱི་འགྲེལ་པ་དཔེར་བརྗོད་ལྔ་དྲུག་ཙམ་ཞལ་ཕྱེ་ནས་རྒྱན་རེ་རེའི་ཐད་དུ་རྗེ་ཉིད་ནས་གཟིགས། འགའ་ཞིག་ཕྲན་གྱིས་བཀླག་ནས་གསན་པས་དེ་དག་ཐམས་ཅད་ཀྱི་བཤད་པ་ལས་ཀྱང་ཀུན་མཁྱེན་མཆོག་གི་གསུང་བཤད་ཚིག་གཅིག་རྣོ་ཞིང་གསལ་ལ་འདྲིལ་ཞེས་ཡང་ཡང་བསྔགས་པར་མཛད། དབྱངས་ཅན་དགྱེས་གླུར་དགེ་ལུགས་པའི་སྙན་ངག་པ་བགྲང་སྐབས་མགོ་འདིར་མཁས་གྲུབ་ཐམས་ཅད་མཁྱེན་པ་འཇོག་དགོས་པའི་བབས་འབྲེལ་ཡོད། མཁས་གྲུབ་རྗེའི་ཚིག་ལྷུག་རྗེ་རིན་པོ་ཆེ་དང་མི་མཉམ་ཡང༌། ཚིགས་བཅད་ཕལ་ཆེར་མཉམ། རྒྱལ་དབང་བསྐལ་བཟང་རྒྱ་མཚོ་སྙན་ངག་ལ་མཁས། ལྕང་སྐྱ་རྡོ་རྗེ་འཆང་ཧ་ཅང་
སྦྱངས་པའི་ཤུགས་ཀྱིས་སྙན་ངག་ལ་མཁས། པཎ་ཆེན་ཐམས་ཅད་མཁྱེན་པ་དཔལ་ལྡན་ཡེ་ཤེས་ཧ་ཅང་ཐུགས་རབ་ཆེ་བའི་ཤུགས་ཀྱིས་སྙན་ངག་ལེགས། གཞན་དུས་ཕྱིས་དགེ་ལུགས་པ་ལ་སྙན་ངག་པ་དཀོན་གསུངས་པ་དང༌། མངོན་བརྗོད་ལ་འདྲིས་དགོས་ཀྱང་མངོན་བརྗོད་ཀྱིས་མ་བཅིང་ན་ལེགས་ཚུལ་དང༌། སྙན་ངག་པ་སོ་སོའི་རྒྱན་གྱི་ཉམས་ཐོན་ཚུལ་མི་འདྲ་བ་དང༌། འགྲེལ་པ་སོ་སོའི་བཤད་པ་མི་འདྲ་བ་ལ་ཞིབ་ཆ་འདོན་ཚུལ་གྱི་ཁྱད་པར་དུ་མ་གསུང་བ་ཐོས་ཀྱང་འགོད་པར་མ་ནུས་སོ། །མཇུག་ཏུ་བྱམས་ཆེན་གསར་བཞེངས་ཀྱི་ཞལ་འདེབས་དང་སྦྲགས་དངུལ་སྲང་བརྒྱ་དང་གསེར་སྲང་འགའ་ཕུལ་ནས་བྱམས་ཆོས་སྡེ་ལྔའི་ལུང་ཞུས་ཏེ་ཐུགས་སྨོན་གནང་བར་ཞལ་བཞེས་བཟང་པོ་མཛད། དེ་དང་རྟེན་འབྲེལ་དུས་འཛོམ་པར་ལྷག་བསམ་རྣམ་དཔྱོད་ཡངས་པའི་ཐོར་གོད་དཀའ་བཅུ་དཀོན་མཆོག་བསམ་འགྲུབ་ཀྱིས་བྱམས་པའི་འཁོར་དུ་སྐྱེ་བའི་རྒྱུར་དམིགས་ནས་བྱམས་ཆོས་སྡེ་ལྔའི་ལུང་དང༌། མངོན་རྟོགས་རྒྱན་གྱི་བཤད་ལུང་གི་གསོལ་བ་བཏབ་པ་ཡབ་རྗེ་མཆོག་ལ་དགོངས་བསྟུན་ཞུས་པས། མངོན་རྟོགས་རྒྱན་ནི་ཁྱེད་ལ་བླ་མས་བཤད་ལུང་བྱས་ནས་གནང་བ་ཡིན་པས་དེ་ལྟར་མདོ་གང་དང་སྦྱར་ནས་བཤད་ན་ཡང་ཆོག །མདོ་སྡེ་རྒྱན་ལ་ཡང་ལུང་དང་སྦྲགས་ནས་བཤད་པ་ཞིག་གནང་ན་ཉན་པ་པོ་རྣམས་རྒྱ་གཞུང་ལ་བློ་འཇུག་པའི་དགོས་པ་ཡོད། རྟོགས་བརྗོད་དཔག་བསམ་འཁྲི་ཤིང་ཡང་རྒྱུན་དཀོན་པས་བྱམས་ཆོས་ཀྱི་མཇུག་ཏུ་གནང་རོགས་གྱིས་གསུངས་པ་ལྟར་མདོ་སྡེ་རྒྱན་གསུང་བཤད་དང་བཅས་པ། དཔག་བསམ་འཁྲི་ཤིང་དང༌། བྱམས་ཆོས་གཞན་གསུམ་གྱི་ལུང༌། མདོ་
སྡུད་པ་དང༌། མངོན་རྟོགས་རྒྱན་སྦྱར་བའི་གསུང་བཤད་གསལ་ལ་རྒྱས་ཤིང་གནད་འདྲིལ་བ། གཡོས་སུ་བྱས་པའི་བཟའ་བཏུང་ད་ལྟར་མིད་དུ་རུང་བ་ལྟ་བུ་བསྩལ་བས་ཉན་པ་པོ་རྣམས་རྒྱལ་བ་མི་ཕམ་མགོན་པོ་དངོས་དང་མཇལ་ནས་གསུང་གི་བདུད་རྩི་ཐོས་པ་ལྟ་བུའི་སྐལ་བ་བཟང་པོའི་དགའ་སྟོན་ལ་རོལ་པར་གྱུར་ཏོ། །སྐལ་བཟང་གདུལ་བྱ་བྱམས་པའི་ཆོས་ལ། །སྦྱངས་པའི་རྟེན་འབྲེལ་བླ་མའི་ཐུགས་རྗེ། །གོ་ལར་ཞུགས་པས་མི་ཕམ་མདུན་སར། །བགྲོད་པའི་སྐྱ་རེངས་དང་པོ་ཤར་རོ། །དགའ་ལྡན་ཆོས་ཀྱི་དགའ་ཚལ། །སྐྱེ་བའི་མྱུ་གུ་འཁྲུངས་ཤིང༌། །ལུང་དང་རྟོགས་པའི་འབྲས་བུས། །འགྲོ་ཀུན་ཚིམ་པར་སྨོན་ནོ། །མ་འོངས་བརྒྱད་ཁྲིའི་དུས་སུ། །བྱམས་མགོན་ཉིན་བྱེད་དབང་པོའི། །ཞལ་མཐོང་གསུང་གི་བདུད་རྩི། །མྱོང་བའི་རྟེན་འབྲེལ་འགྲིག་གོ །དེ་ཚེ་རྒྱལ་ཀུན་མདུན་སར། །གཟུངས་སྤོབས་ཏིང་འཛིན་མངོན་ཤེས། །རྫུ་འཕྲུལ་རྩེ་དགའ་འགྱེད་པས། །འགྲོ་ཀུན་སྐྱོང་བར་སྨོན་ནོ། །མཛོད་དགེ་སྨད་ཀྱི་མཁར་སྒོང་སྨྱུང་གནས་པ་སོགས་དུ་མའི་འདོད་པ་ལྟར་ཚེ་དཔག་ལྷ་དགུའི་དབང༌། སྒྲུབ་ཐབས་བརྒྱ་རྒྱམ་གཉིས་ཀྱི་རྗེས་གནང༌། ལྷོ་བྲག་བཀའ་འབུམ་སོགས་དམ་པའི་ཆོས་ཀྱི་ཆར་ཕབས་དགོན་པར་ཇ་སྲང་བཞི་རེའི་འགྱེད་བཏང་ཞིང༌། རྡོ་རྗེ་འཆང་གི་དྲུང་ནས་རིགས་གསུམ་མགོན་པོ། །རྟ་མགྲིན་ལྕགས་རལ་ཅན། བེག་ཙེ། ཀླུ་དབང་རྒྱལ་པོ། བཀའ་གདམས་ལྷ་བཞི། འཇམ་ལུགས་ཚེ་དཔག་མེད། མི་ཏྲ་ལུགས་ཀྱི་ཚེ་དཔག་མེད་དཀར་པོ། རྣམ་འཇོམས་ལྗང་སྔོན། འཇམ་དབྱངས་སྨྲ་སེང༌། ཕག་དཀར་ཤེས་རབ་གསལ་བྱེད། ཛམ་བྷ་ལ་དཀར་པོ་ལྷ་ལྔ་སོགས་ཀྱི་རྗེས་གནང༌། དྲིལ་བུ་ལུགས་ཀྱི་བདེ་མཆོག་ཕྱི་
ནང་གཉིས་ཀྱི་དབང༌། བཀའ་གདམས་གཞུང་དྲུག །རིགས་ཚོགས་དྲུག །བཞི་བརྒྱ་པ་རྣམས་ཀྱི་ལྗགས་ལུང་སོགས་ཆོས་བཀའ་མཐའ་ཡས་པ་གསན། གཞན་ཡང་ཕག་ལོའི་དཔྱིད་བར་དུ། རྗེ་འདི་ཉིད་གཅིག་པུར་གཟིམས་ཆུང་ཕུགས་ནས་བཀའ་ཆོས་དུ་མ་གནང་གི་འདུག་ཀྱང་ཕལ་ཆེར་གང་ཡིན་གྱི་མིང་ཙམ་ཡང་ཆ་མ་འཚལ་ཏོ། །རི་ཁྲོད་དུ་དབྱར་ཞལ་བཞེས་དང༌། ཕལ་ཆེར་རྒྱུན་བཞུགས་ལྟ་བུ་གནང་ནས་ཐུགས་དམ་ཉམས་བཞེས་ཉིན་མཚན་ཁོར་མོ་ཡུག་ཏུ་མཛད། དེ་ཡང་སྐྱ་རེངས་དང་པོ་ཤར་བསྟུན་ཁྲུས་ཆབ་བཞེས་པ་ནས་ཉི་དྲོས་བར་དུ་གསོལ་ཇ་པ་མ་གཏོགས་སྐུ་མདུན་དུ་མི་ཚུད་ཅིང༌། ཐུན་ཇ་བཞེས་སྐབས་སུ་ཡང་འཕགས་པའི་མི་སྨྲ་བ་ཁོ་ནའི་ངང་དུ་བཞུགས། གདུགས་ཚོད་སྔ་བར་གསོལ་རྗེས་སྐུ་པར་མང་པོ་ཕྱག་འདེབས་དང༌། བརྐྱངས་ཕྱག་སྟོང་ཕྲག་རེ། ཕྱི་དྲོ་ནས་བཟུང་སྟེ་ཐུན་སྔ་དྲོ་ལྟར་དམ་ཞིང༌། ནམ་གུང་གི་ཆ་ལ་ཅུང་ཟད་བསྙེལ་ཙམ་རེའི་ཚུལ་གནང་བ་འདི་ཙམ་ཀུན་ལ་མཐུན་གྲུབ་ཡིན་ལ། ཕལ་ཆེར་མཚན་ཕྱེད་ཀྱང་ཙོག་པུའི་ངང་ལ་བཞུགས་པར་སྣང༌། དེ་ལས་གཞན་རྗེ་ཡབ་སྲས་དང༌། ཀུན་མཁྱེན་བླ་མ་རིམ་བྱོན་གྱི་རྣམ་ཐར་དང་མཐུན་པའི་ཡི་དམ་ཆོས་སྐྱོང་གཙོ་བོར་བརྟེན་པ་ནི་མཛད་པའི་བབས་ལས་དཔག་ཙམ་མ་གཏོགས་ཐུགས་དམ་དཀྱུས་མ་ཅི་དང་ཅི་མཛད་སྦ་བར་མཛད་མོད། གཙོ་ཆེར་རིམ་གཉིས་དང༌། ཁྱད་པར་བདེན་གཉིས་ཟུང་དུ་འཇུག་པའི་རྫོགས་རིམ་ཉིད་ཡིན་པར་མངོན་ཏེ། ལོ་འདིར་རྗེ་བཙུན་མི་ལའི་བསྟོད་པ་གྲུབ་དབང་དགྱེས་པའི་འཛུམ་ཟེར་ཞེས་པ་གནང་བའི་མཛད་བྱང་དུ་འོད་གསལ་གྱི་ཐུན་བར་ཞིག་ལ་བྲིས་པའོ། །ཞེས་ཡོད་ཀྱང་ཕྱིས་སུ་མཚན་མོ་གཉིད་
ཀྱི་བར་སྐབས་ཞེས་སོགས་བཅོས་པས་ཤེས་ལ། དེ་འདྲ་གཞན་ཡང་རིམ་གྱིས་འཆད་པར་འགྱུར་རོ། །འོན་ཀྱང་སྔགས་ཀྱི་ཉམས་ལེན་སྦས་ནས་མཁྱེན་གསུམ་བསྡུས་སྒོམ་རྒྱས་བསྡུས་ཅི་རིགས་རེ་མཛད་པ་གསུང་ཟུར་ལས་ཐོས་ལ་རྒྱས་བསྡུས་ཞེས་པའི་དོན་གོ་ན་སྨོས་མ་དགོས། སྔར་གྲྭ་སར་བཞུགས་སྐབས་ཇ་ཡུན་རེ་ལ་འགྲེལ་པ་དོན་གསལ་སྐྱོར་སྦྱངས་ཚར་རེ་དང༌། སྐྱོར་ཐང་རེ་ལ་རྣམ་བཤད་གསེར་འཕྲེང་གི་ཚིག་རིས་མ་ལུས་པ་རྫོགས་པར་འཆར་ཐུབ་པ་ཡོད་གསུངས། མདོ་རྩ་དང་བྱམས་ཆོས་སོགས་ཀྱང་དེ་ལྟར་ཉམས་འོག་ཏུ་ཆུད་པ་ཞལ་ནས་ཐོས་ཏེ། དེ་ཡང་ལམ་ཤེས་པ་གསུམ་དང༌། སྦྱོར་བ་བཞིའི་སྒོ་ནས་གཞི་ཤེས་སྤང་བླང་ཕྱེ་སྟེ་རྣམ་མཁྱེན་ཉམས་སུ་བླངས་པ་ལས་འབྲས་བུ་ཆོས་སྐུ་འགྲུབ་ཚུལ་ཚིག་རེ་རེའི་སྟེང་ནས་འཆད་ཤེས་པ་དང༌། དོན་རེ་རེའི་སྟེང་ནས་ཉམས་སུ་ལེན་ཤེས་པའི་སྐབས་ཡིན་ལ། ལམ་རྐྱང་པ་དང་ཁུག་པ་གཉིས་ལས་ཕྱི་མ་རང་ལུགས་སུ་མཛད་པ་ལ་གནད་དེ་འདྲ་ཡོད་པ་ཤེས་དགོས་སོ། །ཇི་ལྟར་སྐྱེས་བུའི་ཟོ་ཆུན་རྒྱུན། །རྡོག་ཐབས་གཅིག་གིས་བསྐྱོད་པ་ལྟར། །གཡོ་འགུལ་ཙམ་ལ་ཡང་སྐད་ཅིག་གིས། །ཆོས་ཀུན་གདམས་པར་འཁྱེར་འདི་རྨད། །བལྟར་མི་སྣང་བའི་ཆོས་ཀྱི་རྔ་བོ་ཆེས། །ལྷ་རྣམས་བསྐུལ་ཞིང་ལྷ་མིན་ཕམ་བྱེད་ལྟར། །འགྲོ་བློ་ཆོས་ལ་བསྐུལ་བའི་ཐུགས་རྗེའི་འོད། །གང་འཚམས་མཛད་པའི་ཟེར་དང་འགྲོགས་པ་འདིས། །སྐྱེ་འཆིའི་རྡུལ་མང་སྤོ་མཐོར་བརྩེགས་པ་ཡི། །ལས་ཀྱི་རི་དབང་རྒྱུན་གྱི་བང་རིམ་ལ། །འདི་སྣང་བདེ་སྡུག་ལྷ་དང་ལྷ་མིན་གཡུལ། །འགྱེད་པའི་ཟིན་མེད་ལས་འདི་སྤོང་བར་རིགས། །ལས་ཀྱི་རྫིང་བུ་ཁྲག་གི་མཚོར་བབས་ཤིང༌། །མི་བརྟན་ལང་ཚོའི་ལྦུ་བ་རྣམ་བཀྲ་བའི། །
རུས་གོང་ཐལ་བའི་སྙིང་པོར་གྲུབ་པའི་ལུས། །དོན་མེད་སྐྱོང་བས་ངལ་རྣམས་ཡིད་དབང་བྲལ། །དགུང་ལོ་ཉེར་བརྒྱད་པ་ས་བྱ་ལ་ཚེས་གཏོར་སྔར་རྒྱུན་ལྟར་མཛད། ལོ་སྔ་མར་ལྗོངས་འདིར་ཞྭ་སེར་གྱི་རིང་ལུགས་གཙང་མ་སྐྱོང་དགོས་ཞེས། གོང་མའི་གསེར་ཡིག་བབས་པའི་དོན་དུ་ཡབ་རྗེ་མཆོག་བྱ་ཁྱུང་སོགས་སུ་ཆིབས་བསྐྱོད་པ་ནས་ཚུར་ཕེབས་སྐབས་དགོན་པའི་གཞུང་ནས་ཆིབས་བསུ་ཞུས་པའི་གྲངས་སུ་རྗེ་འདིས་གན་སྦྱར་ཞྭ་མོ། ཁྲི་ཆེན་ནམ་མཁའ་བཟང་སྤྲུལ་བའི་སྐུ་ནས་ཕྲུག་གཟན་དང་ཞྭ་མོ་ཙམ་མནབས་ཏེ་ཆིབས་བསུར་ཕེབས། རྨོས་ཞིང་ཞིག་གི་སྟེང་ནས་རྡུལ་ལ་མི་འཛེམ་པར་ཕྱག་ཕུལ། ཀུན་མཁྱེན་མཆོག་ཆིབས་ཐོག་ཏུ་བཞུགས་པ་ལ་ཁོང་རྣམ་གཉིས་ཀྱིས་མཇལ་དར་ཕུལ་ཏེ་ཞབས་སྤྱི་བོར་བླངས་པས་བློ་ལྡན་ཀུན་ཡབ་སྲས་ཀྱི་མཛད་པ་ལ་ཡི་རང་བར་གྱུར། དེང་སང་ཕལ་ཆེར་གནའ་བོའི་སྲོལ་བཟང་དང༌། ཆེ་ཆུང་གི་བབས་ཚུགས་དང་མཐུན་མིན་མི་དཔྱོད་པར་གོས་ནས་གཟབ་འཕྱོར་སོགས་ཀྱི་ཆོས་བརྒྱད་ངོམས་གང་ཐུབ་འགྲན་པ་ལ་བླ་མ་བསུ་སྐྱེལ་གྱི་མཆོད་པའི་ཐ་སྙད་ཅི་འདྲ་རང་སྙམ་དུ་སེམས་སོ། །གསུང་ཆོས་སྨོན་ལམ་ལ་རྒྱུན་པར་ཕེབས་ཤིང་ཡབ་རྗེ་མཆོག་ནས་བསྒྲུབ་བྱ་བརྒྱ་ཕྲག་བསྙེན་པར་རྫོགས་པའི་གསང་སྟེ་སྟོན་པ་མཛད། རྣམ་སྣང་མངོན་བྱང་གི་དབང༌། འདུལ་བ་མེ་ཏོག་ཕྲེང་རྒྱུད། སུམ་བརྒྱ་པ། འོད་ལྡན། ཇོ་བོའི་ཆོས་ཆུང་བརྒྱ་རྩ་སོགས་བཀླག་ལུང་མང་ཞིག་གསན། འདི་སྐབས་སོགས་སུ་ཡབ་རྗེ་མཆོག་ལ་ན་བཟའ་བསྒྲོན་པ། ཕྱག་དཔེ་འབུལ་བ། ཡི་གེ་མི་གསལ་བ་རྣམས་སྙན་དུ་ཞུ་བ། དབུས་གཙང་རྒྱ་ནག་ཏུ་ཨེལྖི་འགྲོ་སྐབས་ལྟ་བུར་ཉིན་མང་
པོར་དྲུང་ཡིག་ཁང་དུ་བཞུགས་ནས་བསྐུར་ཡིག་བསྒྲིག་པ། ཕྱག་དཔེ་ཞུས་དག་སོགས་ཀྱི་བཀུར་སྟི་ཕུ་དུད་དང༌། དད་གུས་ཀྱི་ཉམས་གྲྭ་རྐྱང་རང་བཞིན་པ་ལས་ཆེ་ཞིང༌། མདུན་དུ་བཞུགས་སྐབས་ཀྱང་འཇིགས་ཤིང་བསྡམས་པའི་ཚུལ་གྱིས་བཞུགས་ཚུལ་རྗེ་བཙུན་དམ་པ་འཇིགས་མེད་རིགས་པའི་སེངྒེ་དང༌། རྗེ་འདི་པ་རྣམ་གཉིས་སློབ་མ་གཞན་ཐམས་ཅད་ལས་ལྷག་སྟེ། རྗེ་བཙུན་མི་ལས་སྒམ་པོ་པ་ལ། ད་སྟེ་ལོ་གསུམ་ན་ཁྱེད་ལ་དགེ་སྦྱོར་གཤའ་མ་སྐྱེ། དེའི་དུས་སུ་ང་ལ་ཡང་མཐོང་འདི་མིན་པ་གཅིག་འོང་གསུངས་པ་ལྟར་ནང་གི་རྟོགས་པའི་ཡོན་ཏན་གྱི་དབང་གིས་ཕྱིའི་ཡོངས་འཛིན་སངས་རྒྱས་སུ་མཐོང་ཚུལ་གཞན་དང་མི་མཉམ་པའི་ཁྱད་ཆོས་སོ། །དུས་རྒྱུན་དུ་དམ་ཚིག་ཐམས་ཅད་ལས་བླ་མའི་དམ་ཚིག་གཉན་པ་དང༌། ཡོན་ཏན་ཐམས་ཅད་ཀྱི་རྩ་བ་བླ་མ་ལ་རག་ལས་པས་བླ་མ་བསྟེན་ཚུལ་གལ་ཆེ་བའི་ཞལ་ཏ་ནར་མ་དང༌། ཡང་ཐེག་པ་གོང་མ་དང་སྔགས་ལ་སྙད་བཏགས་ནས་འདུལ་བ་གུ་ཡངས་སུ་བྱེད་མི་རུང༌། སོ་ཐར་གྱི་བཅས་རྐྱང་ལ་གཞན་སེམས་བསྲུང་ཆེད་དང༌། དོན་དང་བྱ་བ་ཉུང་བའི་ཆེད་དུ་བཅས་པ་གཉིས་ཡོད་པས་སྔ་མ་བྱང་སེམས་ཀྱིས་ཀྱང་ཉན་ཐོས་དང་འདྲ་བར་བསྲུང་དགོས། སྦྱིན་སྲེག་གི་སྐབས་ས་བོན་རུང་བ་མ་བྱས་ན་འདུལ་བར་ལྟུང་བྱེད་དུ་སོང་ཡང༌། བྱང་སེམས་ལ་རྩ་ལྟུང་དངོས་སམ་དེའི་ཕྱོགས་གཏོགས་དང༌། སྔགས་ལ་སྦོམ་པོ་དང༌། ཁྱད་དུ་བསད་ན་བདེ་གཤེགས་བཀའ་འདས་ཀྱི་རྩ་ལྟུང་དུ་འགྱུར་བས་མཚོན་ཐེག་པ་གོང་མར་ལྷག་པར་དམ་ཆ་ཆེ་ཞེས་ཡང་ཡང་འདོམས་པར་མཛད་དོ། །ཀྱེ་མ་རི་གཟར་འབབ་ཆུ་དག །གཤོང་བུ་དམའ་བར་ཇི་བཞིན་དུ། །རྨོངས་པའི་སྐྱེ་བོ་འཁོར་བ་ཡི། །ཡུལ་ལ་ཆགས་པས་མངོན་
པར་རྒྱུ། །དེ་ཟློག་ཡིད་ཀྱི་གླང་ཆེན་ནི། །གདམས་ངག་ལྕགས་ཀྱུས་ཉེར་བཀུགས་ཏེ། །འདུལ་བྱེད་དྲན་ཤེས་ཁ་ལོ་པར། །གཏོད་ཁྱོད་ཐུབ་དབང་གཉིས་པ་འདྲ། །དོན་གཉེར་ཅན་དུ་མ་ལ་ལྷོ་བྲག་སྙན་བརྒྱུད་ཆ་ཚང༌། མགོན་པོ་བཀའ་བཅུ་གསུམ། སྒྲོལ་མ་ཉེར་གཅིག་སོགས་ཀྱི་རྗེས་གནང༌། རྒྱ་གཞུང་མང་པོའི་ལུང༌། དགའ་ལྡན་ལྷ་བརྒྱ་མའི་ཁྲིད་སོགས་ཆོས་བཀའ་མང་པོ་གནང༌། གཟིམས་ཁང་གསར་པའི་ལས་ཀ་དང་ཤིང་རྩི། རྙིང་པའི་ཞིག་གསོས་གང་དགོས་ལོ་འདིར་ལེགས་པར་གྲུབ། ཕལ་ཆེར་རི་ཁྲོད་དུ་རྒྱུན་བཞུགས་ལྟ་བུར་ཉམས་བཞེས་སྔར་བཞིན་མཛད། མགོན་པོའི་བསྙེན་པ་ཞིག་གི་སྐབས་དམིགས་རྟེན་རས་བྲིས་དེ་ཉིད་མགོན་པོ་དངོས་སུ་གྱུར་ནས་ཞི་རྒྱས་དབང་དྲག་གི་རྣམ་འགྱུར་མི་འདྲ་བ་དུ་མ་བསྟན་པས་སྐུ་མཚམས་གྲོལ་མ་ཐག་རས་བྲིས་དེ་ཉིད་ཀྱི་ཞལ་ཁེབས་ཕྱག་གིས་བཙེམས། ཡང་སྔ་ཉིན་དགུང་ཐུན་ལ་འཇུག་པར་གསུང་རྩོམ་གང་ཡང་མེད་ཀྱང་ཕྱི་ཉིན་ཞོགས་ཐུན་གྲོལ་མ་ཐག་དཔལ་མགོན་ཞལ་བཞི་པའི་བསྟོད་པ་རྒྱུན་ཆགས་ཤིག་སམ་ཊར་བཀོད་འདུག་པའང་དེ་དང་ཆ་མཚུངས་པར་མངོན། ཡང་བདེ་མཆོག་གི་བསྙེན་སྒྲུབ་ཅིག་གི་སྐབས་བླ་མ་ཡི་དམ་གྱི་སྐུའི་སྣང་བ་ཉིན་མཚན་ཁོར་མོ་ཡུག་ཏུ་བྱུང་བས་ལམ་གྱི་སྙིང་པོ་བདེ་སྟོང་གི་རྣལ་འབྱོར་ལ་བོགས་ཐོན་པའི་ཚུལ་གྱིས་བསྟོད་པ་ངོ་མཚར་ཅན་ཞིག་ཡོད་ཀྱང་ཕྱིས་སུ་སྦས་ནས་ཤོ་ལོ་ཀ་ཉུང་ངུ་ཞིག་གསུང་འབུམ་དུ་ཚུད་འདུག་པས་སྔ་རྩོམ་གྱི་དཔེ་དེ་གཟིགས་ན་གནད་མང་དུ་ཡོད་དོ། །ཆོས་ཀྱི་རྒྱུན་ཞེས་བྱ་བའི་ཏིང་འཛིན་དང༌། །རྣམ་པར་མི་རྟོག་ཞི་ལྷག་ཟུང་འབྲེལ་མཚོར། །བགྲང་ཡས་རྒྱལ་བའི་གཟུགས་སྐུ་སྣང་བ་ན། །དྭངས་
མཚོར་ཟླ་གཟུགས་སྐྲག་ནས་འདར་བ་བཞིན། །འཁྲུངས་ཡུལ་མཛོད་དགེ་སྨད་ནས་གདན་དྲངས་པར། ཆིབས་བསུ་ཇ་ཐབ་སེར་སྦྲེང་དང་བཅས་ཐོག་མར་བཀྲ་ཤིས་ཆོས་འཕེལ་གླིང་དུ་ཕེབས། གྲྭ་མང་ལ་མཇལ་ཁ་དང་ཆོས་འབྲེལ། རྒྱུད་གྲྭ་དང་ཚོགས་ཆེན་ལ་གྲྭ་ཇ་མང་ཇ་ཁ་དར་གྱི་འགྱེད་བཅས་བཏང་བར་སྐལ་བ་སྟོང་ཕྲག་མ་ལོང་ཙམ་སོང༌། རོང་འབྲོག་གི་སྦྱིན་བདག་སོ་སོས་དངོས་འབུལ་ཕུལ་བ་རྣམས་ལ་འཕོ་བ། བཀའ་བསྒོ། ལྗགས་བསྔོ་སོགས་འདོད་པ་ལྟར་གནང༌། དེ་སྐབས་མནལ་ལམ་དུ། གཉན་ཆེན་སྔོ་ལ་གཡུ་རྩེས་རྩེ་རྒོད་ཅེས་རྒྱངས་སྐད་བརྒྱབ་ནས། སྦ་ཡུ་འཛིན་དགོས་ཟེར་བ་རྨིས། རྐང་ཚའི་དཀའ་བཅུ་བློ་བཟང་བསྟན་འཛིན་ཞབས་ཕྱིར་ཡོད་པ་དེ་ཕྱོགས་ཀྱི་གཙོ་རྒན་ཡིན་སྟབས་ཐུགས་དོགས་མཛད་ཀྱང་ཕྱིས་སུ་མཛོད་དགེ་དགོན་པས་སྡེ་འཁྲུགས་སློང་བའི་ལྟས་རེད། ཡུལ་འཁྲུགས་པའི་སྔོན་དུ་གཞི་བདག་འཁྲུགས་ཟེར་བ་བདེན་པར་སྣང་གསུངས། གདན་སར་ཕེབས་བསྟུན་ཚོགས་ཆེན་ལ་མང་འགྱེད། རི་ཁྲོད་ཡིད་དགའ་ཆོས་འཛིན་ལ་རྟ་ནོར་བདུན་དང༌། མཛོ་མོ་བཅུ་གསུམ་བཞག །དགུང་ལོ་ཉེར་དགུ་པ་ལྕགས་ཁྱིའི་ལོ་ཚེས་གཏོར་དང། སྐྱབས་མགོན་མཆོག་གི་དྲུང་དུ་ལོ་གསར་མཇལ་ཞུ་སོགས་སྔར་ལྟར་དང། ལོ་སྔ་མ་བཞིན་བསྒྲུབ་བྱ་བརྒྱ་ཙམ་གྱི་གསང་སྟོན་མཛད། ཡབ་རྗེ་མཆོག་ལས། གསུང་འབུམ་ཕྱི་རྩོམ་ཕལ་ཆེར་དང། མི་ལའི་རྣམ་མགུར་སོགས་ཀྱི་ལུང༌། སྙིང་པོ་དོན་གསུམ་དང༌། བླ་མཆོད་དང་འབྲེལ་བའི་ཕྱག་ཆེན་གྱི་ཁྲོད་སོགས་གསན་ཏེ་ཟིན་བྲིས་ཀྱང་མཛད། དབུས་སུ་ཡོངས་འཛིན་རིན་པོ་ཆེའི་གསུང་ཟིན་བྲིས་མཛད་པ་རྣམས་མཐོང་བ་དང༌། གསུང་རྒྱུན་ལྟར་གསུང་བཤད་སྩལ་བ་ཐོས་པ་ཙམ་གྱིས་ཞལ་མཇལ་མ་མྱོང་བ་རྣམས་ཀྱིས་ཀྱང༌།
ཡོངས་འཛིན་རིན་པོ་ཆེའི་གསུང་གི་ཉམས་འདི་འདྲ་ཞིག་ངེས་པར་ཡིན་རྒྱུ་རེད་སྙམ་པ་ཁོ་ན་དང༌། ཀུན་མཁྱེན་མཆོག་གི་གསུང་ཉམས་ཀྱང་གསུང་ལ་བརྟེན་ནས་དེ་ལྟར་འཆར་ཐུབ་པ་ནི་གཟུངས་དང་སྤོབས་པ་ཕུན་སུམ་ཚོགས་པའི་མཐུ་ཡིན་ཏེ། སྒོ་མཐའ་ཡས་པའི་མདོ་ལས། གཟུངས་ཞེས་བགྱི་བ་ནི་ཆོས་རྣམས་དང་མཚམས་སྦྱོར་བ་ལ་མཁས་པའི་ཚིག་བླ་དྭགས་སོ། །གཟུངས་ཞེས་པ་ནི་རྗེས་སུ་དྲན་པའི་ལས་ཀུན་བགྱིད་པ་ལགས་སོ། །ཞེས་གསུངས་པ་ལྟར་རོ། །དེ་ལྟར་བླ་མའི་གསུང་གི་མཛད་པའི་རྒྱུན་མི་ཉམས་པར་སྐྱོང་བ་ནི་དེ་བཞིན་གཤེགས་པའི་གདུང་འཚོབ་པའི་མཛད་པ་རྨད་དུ་བྱུང་བ་ཡིན་ཏེ། མདོ་ལས། བྱང་ཆུབ་སེམས་དཔའ་དེ་དག་ནི། དེ་བཞིན་གཤེགས་པ་དེས་བདག་ཅག་ལ་ཕན་གདགས་པའི་དམ་པས་ཕན་བཏགས་ཏེ། དེ་བཞིན་གཤེགས་པ་དེ་ནི་བདག་ཅག་ལ་རྗེས་སུ་བརྩེ་བའི་ཕ་ཡིན་ནོ་ཞེས་ང་ལ་ཕའི་འདུ་ཤེས་འཇོག་པར་འགྱུར་རོ་ཞེས་གསུངས་ལ། དེར་མ་ཟད། སྙིང་རྗེ་ཆེན་པོ་པད་དཀར་ལས། ཀུན་དགའ་བོའི་ལག་པ་གཡས་པ་བཅོམ་ལྡན་འདས་ཀྱི་ཕྱག་གཡས་པས་བསྣམས་ཏེ། ཀུན་དགའ་བོ་ཁྱོད་ང་ལ་སྡུག་ན་སྡུག་པའི་བྱ་བ་གྱིས་ཤིག །བསྐལ་པ་གྲངས་མེད་པར་བསྒྲུབས་པའི་ཆོས་ཀྱི་མཛོད་འདི་ཁྱོད་ལ་བཅོལ་ཞིང་གཏད་ཀྱི་ཅི་ནས་ཀྱང་ཆོས་འདུལ་བ་འདི་རྣམ་པར་འཕེལ་བ་དང༌། ཡོངས་སུ་མི་ཉམས་པ་དང༌། ཀུན་ཏུ་བསྲུང་ཞིང་སྦ་བ་དང༌། ཆུད་མི་ཟ་བར་གྱིས་ཤིག །ཅེས་གསུངས་པ་ལྟར་གསུང་གི་མཛད་པ་མི་ཉམས་པར་གནས་པ་ནི་བཅོམ་ལྡན་འདས་ཀྱི་ཐུགས་ལ་བརྣག་པའི་འཕྲིན་ལས་ཡིན་པས་བསྟན་འཛིན་དམ་པ་རྣམས་ནས་བཤད་སྒྲུབ་ཀྱི་བྱ་བ་ཁུར་དུ་མ་སོང༌། རྒྱན་དུ་སོང༌
བ་ཞིག་མཛོད་མཛོད་ཅེས་ཐལ་མོ་སྦྱར་ནས་གསོལ་བ་འདེབས་པ་ལགས་སོ། །ཧལ་ཧ་ཆེ་ཆེན་ཧན་གྱི་བླ་མ་ཡེ་ཤེས་རྒྱ་མཚོས་ཞུས་ངོར། སྒྲུབ་ཐབས་བརྒྱ་རྒྱམ་གཉིས་སོགས་ཆོས་བཀའ་མང་དུ་གནང༌། འདི་དག་གི་སྔ་ཕྱིར་རྣམ་ཐར་སྒོ་གསུམ་གྱི་མཐའ་དཔྱོད། བདེན་བཞིའི་མཐའ་དཔྱོད། དམིགས་བརྟགས་འགྲེལ་པ། བློ་སྦྱོང་མཚོན་ཆ་འཁོར་ལོའི་འགྲེལ་བ། སཙྪའི་བཤད་པ། ལྷ་མང་པོའི་སྒྲུབ་ཐབས་བསྟོད་པ་སོགས་གསུང་རྩོམ་མང་དུ་སྤེལ། གཞུང་ཆེ་ཆུང་ཇི་འདྲ་ཞིག་རྩོམ་ཀྱང་ཆེད་དུ་གཉེར་ནས་དཔེ་ཆ་ལ་གཟིགས་རྟོག་གནང་མི་དགོས་པར། རྩོམ་པའི་ཐོག་མར་སྤྱན་བར་སྣང་ལ་གཏད་ཙམ་གནང་བ་ན་ཐམས་ཅད་ཐུགས་ལ་ཤར་སོང་ངམ་སྙམ་པ་ཙམ་ལས་ཐུགས་བསམ་ཅུང་ཟད་ཀྱང་གཏོང་མི་དགོས་པར་ཡིག་མཁན་གྱིས་ལྕོགས་ན་ཤར་ཤར་བཏོན་པ་ལྟ་བུ་ཞིག་ཡོད་ཅིང༌། དེའི་སེང་བར་ལ་མཇལ་ཁ་དང༌། གསུང་བརྟགས་སོགས་ཞུས་ཀྱང་གསུང་རྩོམ་གྱི་རྒྱུན་ལ་མི་གནོད་པ་ནི་གཞན་དང་མི་མཉམ་པའི་ཁྱད་ཆོས་ཡིན་ལ། ཡབ་རྗེ་མཆོག་གིས་ནི་འགྲུལ་པ་སོགས་ལ་གསུང་འཕྲོས། དྲུང་འཁོར་བ་རྣམས་ལ་དོགས་གཅོད་ཀྱི་བཀའ་ལན། དྲུང་ཡིག་ལ་གསུང་རྩོམ་བྲི་ཞུས། མཆོད་དཔོན་ལ་མཆོད་ཤོམས་ཀྱི་གསུང་བཀོད། གསུང་བརྟག་མཇལ་ཞུ་སོགས་དུས་མཉམ་པ་བྱས་ཀྱང་གཅིག་གིས་གཅིག་ལ་མི་གནོད་པས་ཡབ་སྲས་འདི་འདྲའི་ཞབས་ཟུང་གཙུག་རྒྱན་དུ་ཐོབ་པ་དག་ནི་རྙེད་པ་ལེགས་པར་རྙེད་པའོ་སྙམ་དུ་སེམས་སོ། །སེམས་ཅན་རྣམས་ནི་རྣམ་པར་ཤེས་པའི་རྒྱུན། །རེ་རེ་བ་ཞེས་རྒྱལ་བས་གསུངས་དེ་རྫུན། །འོན་ཏེ་དཔག་མེད་དུས་ནས་སངས་རྒྱས་ཀྱང༌། །རྒྱལ་སྲས་ཟློས་གར་བསྒྱུར་བར་གོར་མ་ཆག །ཀུན་མཁྱེན་མཆོག་གི་བཀའ་ལྟར་ད་ཚང་དགོན་དུ་ཆིབས་བསྒྱུར་བར་ལམ་བར་གྱི་
སྦྱིན་བདག་སོ་སོས་འབུལ་ནོད་གཟབ་སྟེ་ཕུལ། དགུང་ལོ་བཅུ་བདུན་གྱི་ཐོག་དབུས་སུ་ཕེབས་པ་ནས་འདི་བར་དུ་གཤིན་སྔས་ལ་ཕེབས་མ་མྱོང་བ་ཡང་འདུན་ལྡན་སེམས་ལ་དད་གུས་བདེ་བའི་བསིལ་བ་སྟེར་ཡང་དཀོར་ཟན་ཆེར་རློམ་རྣམས་འདར་བར་བྱེད་པའི་གྲང་རེག་བླ་ན་མེད་པའོ། །ཞལ་ནས། ལྷ་བསྒྲུབས་ན་དབང་ཐོབ་མ་ཐོབ་དང༌། རྒྱུད་སྦྱངས་མ་སྦྱངས་སུ་ལ་ཡང་དངོས་གྲུབ་ཕྲན་ཚེགས་རེ་འབྱུང་བ་ནི་སྔགས་ཀྱི་ཁྱད་ཆོས་ཡིན་ཀྱང་དངོས་གྲུབ་དེ་ཙམ་གྱིས་ངན་འགྲོ་སྐྱོབ་མི་ནུས་པ་དང༌། དབང་མ་ཐོབ་པ་དང༌། བསྙེན་སོགས་དག་པར་མ་བྱས་པ་དང༌། ཆོ་ག་ཉམས་པ་དང་འཁྲུགས་པ་ནི་དངོས་གྲུབ་ཀྱི་གེགས་ཡིན་པར་གསུངས་པས་ཞི་དྲག་གི་རིམ་གྲོ་སྣ་ཚོགས་སོགས་གྲོང་ཆོག་བྱུང་རྒྱལ་དུ་འགྲིམ་པ་འདི་ཉེན་ཆེ་གསུངས། ཀློང་རྡོལ་རྗེའི་གསུང་མགུར་ལས་ཀྱང༌། ནོར་ཅུང་ཟད་ཙམ་ཕྱིར་འབུལ་སྡུད་ཀྱིས། །ཚེ་འདི་པའི་མི་དང་འགྲོགས་འགྲོགས་ནས། །ཚུལ་ཡ་རབས་སྤྱོད་པ་ཀུན་དང་བྲལ། །རྒྱུད་དུག་གསུམ་འཁྲུགས་པའི་འཁོར་གྱིས་བསྐོར། །གནས་གྲོང་མཐའ་ཁྱི་རྐུན་བཞིན་དུ་ཉུལ། །ཁ་བཟའ་བཏུང་བག་མེད་དུད་འགྲོ་འདྲ། །ངག་འཆལ་གཏམ་མི་སྙན་སྣ་ཚོགས་སྒྲོག །མ་སེམས་ཅན་བརྡུང་བརྡེག་བཀོལ་སྤྱོད་བྱས། །འཇུ་དཀའ་བའི་དད་ཟས་གཤིན་ཟས་སོགས། །སྡིག་རི་བོ་ལྟ་བུའི་ཁུར་གྱིས་ནོན། །ལུས་རབ་བྱུང་གཟུགས་འཆང་ཁྱིམ་པའི་སེམས། །ལྟོ་གོས་ཕྱིར་སྲོག་འཚོ་སྡིག་དང་སྡུག །ཐབས་དེ་འདྲར་སྦྱོར་བའི་གྲོགས་དང་བཤེས། །དུས་ནམ་ཡང་འཕྲད་པར་མ་གྱུར་ཅིག །ཅེས་གསུངས་པ་ལྟར་གྲོང་ཆོག་དང་འབུལ་སྡུད་ཀྱི་ཞར་ལ་གཉེན་པོ་ཆུང་བ་རྣམས་ཚེ་འདི་སྣང་གི་དབང་
དུ་སོང་སྟེ། འདོད་ཆུང་ཆོག་ཤེས་ལ་དགྲར་བལྟ་བ་དང༌། མངོན་ཚན་ཅན་དང༌། ཉོ་ཚོང་དང༌། གསོག་འཇོག་གི་སྤང་བ་དང༌། ཡང་ཡང་ཟ་བ་དང༌། སྤངས་པ་ཟ་བ་དང༌། གསོག་འཇོག་ཟ་བ་དང༌། འདུས་ཤིང་ཟ་བ་སོགས་དབང་མེད་དུ་བྱེད་དགོས་པ་དང༌། བདག་བསྟོད་གཞན་སྨོད་དང༌། འཚོ་བ་ལོག་པ་དང་དུ་ལེན་པ་དང༌། རྫུན་གྱི་རྣལ་འབྱོར་ང་རྒྱལ་བྱེད་པ་དང༌། བསྟན་དགྲ་དང་དམ་ཉམས་ལ་ཡང་གཏམ་འདྲེ་བ་དང༌། ཕེབས་པར་སྨྲ་བ་དང༌། ལོངས་སྤྱོད་ཀྱིས་གནས་དགོས་པ་སོགས་སྡོམ་པ་གསུམ་གྱི་བཅས་འགལ་དུ་མས་དབང་མེད་དུ་ནོན་པ་དང༌། ཁ་གསག །གཞོག་སློང༌། ཟས་ཀྱི་ཞིམ་མངར་དང༌། ནོར་གྱི་བཟང་ངན། འབུལ་བའི་ཆེ་ཆུང་སོགས་སྨྲ་བ་དང༌། ཚུལ་འཆོས་དང༌། བརྣབ་སེམས། ཡོན་བདག་གི་ངོ་འཛིན། བརྒྱ་བཤིག་སྟོང་འགུག་གི་གཡོ་འཕྲུལ། ཁལ་རྟ་བཀོལ་སྤྱོད་དང་སྲོག་གཅོད། སྒེག་ཆས་དང་སྤྱོད་ལམ་སྣ་ཚོགས་སོགས་རང་བཞིན་གྱི་ཁ་ན་མ་ཐོ་བ་ལ་འཛེམ་མེད་དུ་སྤྱད་དེ། ལུས་ངག་ཡིད་གསུམ་གྱི་སྒོ་ནས་གང་བྱས་ཕལ་ཆེར་བློ་ཁ་ཐུར་དུ་ཕྱོགས་པའི་རྒྱུ་ཁོ་ན་ཤས་ཆེ་བས་ཕྱི་མ་ཕན་ཆད་ཀྱི་དོན་ལ་བསམ་བློ་བཏང་སྟེ་བག་ཡོད་པ་བྱེད་དགོས་སོ། །དཱ་ཚང་དགོན་དུ་ཉིན་བདེ་མ་རེ་དང། ཇ་རྒྱ་མ་བཞི་རེའི་འགྱེད་བཏང་བར་སྐལ་བ་བརྒྱད་བརྒྱ་སོང་ཞིང། ཚོགས་ཡོངས་ལ་བླ་མ་མཆོད་པའི་ཁྲིད་སོགས་ཆོས་བཀའ་མང་དུ་གནང་བས་སྐྱེ་རྒུ་ཀུན་གྱི་དད་གུས་སྦྲང་རྩི་རྒྱས་པས་ལུས་ཀྱི་པདྨོ་མགོ་ལྕོག་ལྡེམ་པར་གྱུར། དགོན་པར་བྱོན་ནས་ཇ་སྲང་གསུམ་རེའི་འགྱེད་སྩལ། སྐབས་འདིར་རྒྱལ་མཁན་པོ་སྤྲུལ་བའི་སྐུ་གྲགས་པ་རྒྱལ་མཚན་པ་དབུས་གཙང་ནས་བྱོན་པ་རྗེ་ཉིད་ཀྱི་ཞབས་དྲུང་དུ་མཇལ། དམ་པ་དེ་ཉིད་ནས་བཀྲ་ཤིས་འཁྱིལ་གྱི་ཆོས་གྲྭར་པོ་ཏི་
ལྔའི་དམ་བཅའ་བསྟན་པའི་རྒྱན་དུ་ཆེ་བ་བཞག་པ་སོགས་ལ་ཐུགས་དགྱེས་ཤིང་དཀར་སྤྲོ་དང༌། སྔ་ཕྱིར་གསུང་སྒྲོས་ཞིབ་ཏུ་མཛད། ཁོང་གི་ཕྱག་ནས་ལུང་བསྟན་ཤེལ་གྱི་མཁར་བ་བྱུང་བ་ལ་ལེགས་པར་གཟིགས་ཤིང༌། ལུང་བསྟན་དེར་དགོན་པ་ཆེན་པོ་ཞིག་ནས་དགེ་སློང་ཞིག་གིས་དར་དཀར་གཡབ་ཅིང་བྱམས་པ་མགོན་པོ་ཞེས་འོ་དོད་འབོད་པ་དང༌། དགོན་པ་ཤིན་ཏུ་ཆེ་བ་རྟེན་གྱི་གཙོ་བོ་བྱམས་མགོན་གྱི་སྐུ་བརྙན་ཤིན་ཏུ་ཆེ་བ་ཡོད་པ་ཞིག་ན་བླ་མའི་ཆས་སུ་ཞུགས་པ་ཞིག་གིས། ད་ལྟ་རྗེ་རིན་པོ་ཆེའི་བསྟན་པ་འདི་ན་འཕེལ་རྒྱས་ཆེ་བར་འདུག་ཅེས་པ་དང༌། གསེར་དང་པདྨ་རཱ་གའི་མཆོད་རྟེན། སྤྲེའུ་རྡོ་རྗེ་འཛིན་པ། རྒྱལ་པོ་ཨག་ཚོམ་དཀར་པོ་ཅན་སོགས་ཀྱི་གསུང་སྒྲོས་གནང་བ་ཞིབ་པར་ཐོས་ཀྱང་འདིར་སྐབས་སུ་མ་བབས་ལ། གྲུབ་པའི་གཙུག་རྒྱན་གར་དབང་ཆོས་ཀྱི་དབང་ཕྱུག་གི་ལུང་བསྟན་ཉེ་བར་མཁོ་བ་འགའ་ཞིག་དང༌། མ་ཅིག་ལབ་ཀྱི་སྒྲོན་མའི་ལུང་བསྟན་གུང་བསྒྲིགས་པའི་གསུང་སྒྲོས་སྐབས་སུ་བབས་པ་འགའ་ཞིག་ཡོད་ཀྱང་གླེགས་བམ་གྱི་ཁུར་དུ་ཆེ་བས་མ་བྲིས། གསེར་དང་བོང་བ་མཉམ་པའི་བློ་གྲོས་ཀྱིས། །འདོད་པའི་ལོངས་སྤྱོད་ཡང་ཡང་བཏང་གྱུར་ཀྱང༌། །ལྕགས་ཀྱུས་བཀུག་བཞིན་གཡང་དུ་འདུ་བ་ནི། །ཚ་ཟེར་ཅན་ལ་འོད་བཞིན་ཆོས་ཉིད་གཤིས། །མཁས་པའི་དྲུང་ན་མཁས་པ་ཆེར་མཛེས་ཏེ། །ཉིན་བྱེད་དྲུང་ན་གསེར་རི་ལྷག་པར་གསལ། །མཁས་དང་ཕྲད་ལས་མཁས་པའི་ལེགས་བཤད་འཕེལ། །བདུད་རྩིའི་ཟེར་གྱིས་ཀུན་དའི་ཚལ་རབ་རྒྱས། །དཔྱིད་ཀྱི་ཕོ་ཉའི་དབྱངས་སྙན་དང༌། །གཡུར་དུ་ཟ་བའི་སྟོན་འབྲས་ཀྱིས། །ཟླ་བའི་ཟེར་བཞིན་གདུང་སེལ་བ། །ཚོགས་དང་དུས་ལ་ལྟོས་པ་ཉིད། །
ཐུ་མེད་ཀྱཱ་ཧུ་བླ་མ་རྡོ་རམས་པ་ངག་དབང་ཤེས་རབ་ལ་སྒྲུབ་ཐབས་རྒྱ་མཚོ་དང༌། སྣར་ཐང་བརྒྱ་རྩ། རྣམ་སྲས་བཀའ་བཅོ་ལྔའི་རྗེས་གནང་སོགས་སྩལ། དགུང་ལོ་སུམ་ཅུ་པ་ལྕགས་ཕག་ལ་ཚེས་གཏོར་ལོ་གསར་གྱི་མཇལ་ཁ་སོགས་སྔར་རྒྱུན་ལྟར་ལ། ཐུ་མེད་ཀྱཱ་ཧུ་བླ་མ་དང་བྱ་བྲལ་དགེ་བཤེས་བསོད་ནམས་སོགས་ཀྱིས། སྐྱབས་མགོན་མཆོག་ལ་བཀའ་ཆོས་ཞུས་པ་རྣམས་ལས་མང་ཞིག་གསན། དེའི་སྐབས་ཤིག་སྐུ་མདུན་ནས་རྗེ་ཉིད་ལ་འབོལ་གདན་ཁྱད་འཕགས་བསྟབ་པ་ལ་འགའ་ཞིག་གིས་ཡི་རང་བྱས་པར། འཛུམ་པ་མཛད་ནས། སྲིན་བལ་འབའ་ཞིག་ཆ་གཉིས་དང༌། །ཞེས་གསུངས་པས་དེ་ཀུན་འཇིགས་ཞུམ་པར་གྱུར། བྱ་བྲལ་དགེ་བཤེས་བསོད་ནམས་ཀྱིས། སྡུག་བདེན་རྟོགས་ན་རང་རྒྱུ་ཀུན་འབྱུང་བདེན་པ་ལས་སྐྱེ་བར་རྟོགས་དགོས། ཀུན་འབྱུང་རྟོགས་ན་རང་འབྲས་སྡུག་བདེན་སྐྱེད་པར་རྟོགས་དགོས་པས། སྡུག་ཀུན་གཉིས་ཀྱི་རྟོགས་རིམ་ཇི་ལྟར་ཡིན་ཞུས་པར། དེ་གོར་གོར་ཞིག་རེད་མོད་གསུངས་པ་ལ་ཡང་ཡང་བསམ་བློ་བཏང་བས་སེམས་ལ་ཕན་ཞིང་བློ་སྐྱེད་ཆེན་པོ་བྱུང་ཞེས་བསྔགས་པ་ཐོས་ཏེ་གདུལ་བྱའི་ཁམས་དང་བསམ་པ་མཁྱེན་པའི་རྟགས་སུ་འདུག །བྱམས་སྐུ་མཐོང་བ་དོན་ལྡན་རབ་གནས་ཀྱི་སྐབས་དམ་ཚིག་པ་ལ་ཡེ་ཤེས་པ་སྲས་བཅས་རྒྱལ་བས་བསྐོར་བཞིན་ཐིམ་པ་མངོན་སུམ་དུ་གཟིགས་ཀྱང་ཡབ་སྲས་གཉིས་ཀས་གཟི་བྱིན་ཇེ་ཆེར་སོང་ཞེས་སྦས་པའི་ཚུལ་གྱི་གསུང་གླེང་མཛད་པ་ཐོས་ཤིང༌། དེ་ལྟར་དུ་རྣམ་ཐར་རྒྱལ་སྲས་རྒྱ་མཚོའི་འཇུག་ངོགས་སུ་ཡང་ཟུར་ཙམ་གསལ་མོད། དུས་དེར་སྔོན་གྱི་རྒྱལ་པོ་གུ་ཤྲཱི་ཧན་ཞེས་གྲགས་པ་གསང་བདག་མི་རྗེའི་རྣམ་རོལ་དེ་ཉིད་ཀྱི་གདུང་བརྒྱུད་དྲི་མ་མེད་པ། མཚོ་སྔོན་གཡས་རུའི་དཔོན་ཆེན་རྣམས་
ཀྱིས་ཀུན་མཁྱེན་བླ་མ་ཡབ་སྲས་དགེ་འདུན་གྱི་སྡེ་དང་བཅས་པར་རྙེད་དང་བཀུར་སྟིས་བླ་ལྷག་ཏུ་མཆོད་དེ། རྒྱལ་བ་རི་ཡི་དབང་པོའི་དྲུང་དུ། བསྟན་འཛིན་གསེར་རིའི་འཕྲེང་བ་ཚར་དུ་དངར་བར་བསྟན་པའི་སྦྱིན་བདག་རོལ་མཚོའི་དཔལ་གྱིས་རླབས་འཕྲེང་གཡོ་བཞིན་འཁྱུད་པའི་མཛེས་པ་སྲིད་འདིར་གསལ་བར་བྱས་སོ། །བྱ་བྲལ་དགེ་བཤེས་བསོད་ནམས་ཀྱིས་ཞུས་ངོར་བཀའ་གདམས་གླེགས་བམ་ཆ་ཚང་གི་ལུང་གནང་ཞིང༌། མདོ་རྩའི་བཤད་ལུང་གི་དབུ་ཚུགས་ཙམ་བྱས་ནས་སྔོན་ཆོག་ཡན་ཆད་ཀྱི་བཤད་པ་སྩལ་བར་ཁོང་པ་ཆོས་ཀྱི་རྗེས་སུ་འབྲང་བའི་དད་པ་ཤུགས་དྲག་པོ་འཁྲུངས་ཏེ་ཐལ་མོ་ཡང་ཡང་སྦྱོར་ཞིང་བཞུགས་ཡུལ་ཐག་རིང་བ་དང་དཀོན་པའི་འདུ་ཤེས་ཀྱིས་མིག་ནས་མཆི་མ་འཁྲུགས་པས་ཀུན་ཧ་ལས་པ་ལྟ་བུར་གྱུར། ས་ག་ཟླ་བའི་ཚེས་བཅོ་ལྔའི་ཉིན་བསྒྲུབ་བྱ་བཅོ་བརྒྱད་བསྙེན་རྫོགས་ཀྱི་དཔལ་ལ་བཀོད། འདི་བསྙེན་རྫོགས་གནང་བའི་ཐོག་མ་ཡིན་པས་ཡོངས་འཛིན་རིན་པོ་ཆེའི་ཕྱག་ལེན་ལྟར་ཐུབ་དབང་གི་སྐུ་རེ་འབྲལ་སྤངས་སུ་སྩལ། ཡབ་རྗེའི་བཀའ་ལྟར་རྔ་བའི་ཕྱོགས་སུ་དགོན་པ་གསར་འདེབས་ཀྱི་ཆེད་དུ་ཕེབས་ཏེ་བཀྲ་ཤིས་ཀྱི་གསོ་སྦྱོང༌། ས་བརྟག་བསླང༌། ལྟོ་འཕྱེའི་ཐིག་སོགས་རྒྱས་པར་གནང༌། ཟོང་འཕན་ཏཱ་ཞིན་མགོ་ལོག་གི་དོན་དུ་འོང་བ་མཇལ་ནས་ཚེ་དཔག་དང༌། སྒྲོལ་མའི་རྗེས་གནང་ཞུས་ཤིང་བཀུར་སྟི་བསྙེན་བཀུར་དཔེ་མེད་ཀྱི་སྒོ་ནས་དགོན་པའི་དོན་དུ་ཕན་གྲོགས་གང་ལེགས་བྱས། རིམ་གྱིས་དཱ་ཚང་དུ་ཕེབས་ཤིང་རྔ་བ་དང་ཁེ་ཐ་ཕྱོགས་ནས་ཐུགས་རྗེ་ཆེན་པོའི་དབང་ལན་གསུམ་གནང་བ་སོགས་སོ་སོའི་འདི་ཕྱིའི་རེ་འབྲས་ཡིད་སྨོན་ལྟར་གྲུབ་པར་མཛད། དཱ་ཚང་
དགོན་པར་ཇ་རྒྱ་མ་ལྔ་རེའི་འགྱེད་དང༌། འཇོག་པར་རྟ་ནོར་བརྒྱ་དང་ཉེར་ལྔ་གནང༌། དེར་སྐུ་མཚམས་ལ་བཞུགས་ནས་ཡབ་རྗེ་ཀུན་མཁྱེན་བླ་མའི་རྣམ་ཐར་བཀའ་རྩོམ་མཛད། ཉིན་གཅིག་བདག་ཀྱང་ལོ་ངོ་ལྔ་འགྲོ་བས་རྗེ་འདིའི་ཞབས་སེན་སྤྱི་བོར་རེག་པའི་སྐལ་བཟང་ཐོབ། ཅེས་པ་བྲིས་ནས་ཐུགས་སྤྲོ་ཉམས་དང་བཅས་ཏེ་གུང་ཚིགས་གནང༌། དེ་རྗེས་བྲིས་ན་སྙམ་དུ་ཐུགས་ལ་དགོངས་ནས་ཤོག་དྲིལ་ཕྱག་ཏུ་བསྣམས་པ་ན། དེ་རིང་མཚམས་འདིར་བཞག་ནས་སང་བརྩམས་ན་ཆོག་པར་འདུག་ཐུགས་ལ་དགོངས་ནས་བཞག །དེ་མ་ཐག་ཏུ་དངུལ་རའི་ལྷ་སྡེ་བརྒྱུད་ནས་བླ་བྲང་ཕྱག་མཛོད་ཀྱི་ཡི་གེ་འབྱོར་བའི་ནང་དུ། ྋསྐྱབས་མགོན་མཆོག་དགོངས་པ་གཞན་དུ་གཏད་པའི་གནས་ཚུལ་གཟིགས་ནས་ཐུགས་ངལ་བཟོད་དཀའ་བ་འཁྲུངས་ཏེ་ཅུང་ཟད་བརྒྱལ་བའི་ཉམས་བྱུང༌། འོན་ཀྱང་ཕྱིས་སུ་ཚིག་བཀྲ་དེ་རྟེན་འབྲེལ་ལེགས་པར་དགོངས་ནས། ཨེ་མ་ཧོ། ཞབས་སྐྱེས་གེ་སར་ར་ཡི་འཕྲེང༌། །ཟུར་ཕུད་བུང་བས་བསྟེན་པ་ཡིས། །བྱིན་རླབས་སྦྲང་རྩིའི་དོག་པ་ནི། །སྙིང་གི་ཟེའུ་འབྲུ་ལ་ཆགས་གྱུར། །ཅེས་པ་འདི་བྲིས་པ་ཡིན་ཞེས་ཞལ་ནས་ཐོས་པ་ལྟར་བཀོད་པ་ཡིན་ལ་འོག་ཏུ་ཡང་ཅུང་ཟད་གསལ་བར་འགྱུར་རོ། །དཱ་ཚང་ལྷུན་གྲུབ་གླིང་ལ་གདུང་མཆོད་རྒྱུན་འཛུག་གི་བཀོད་པ་དང་ཐེབས་བཅས་གནང་སྟེ་དེ་མ་ཐག་ཏུ་ཞབས་ཕྱི་གཉིས་ཙམ་དང་བཅས་རྐང་འགྲོས་ཀྱིས་ཕེབས་པས། ཞབས་ཕྱི་རྗེས་མ་རྣམས་ཀྱིས་ཁལ་རྟ་དང་དོ་པོ་བཞག་སྟེ་རྟ་དྲེལ་དང་ལམ་གྱི་དགོས་ཆས་ཙམ་བསྒྲིགས་ནས་མཚན་ཕྱེད་ཙམ་ནས་རྗེས་ལ་སླེབས། གུང་ཚིགས་རེ་གནང་ཙམ་བྱས་ནས་ཉིན་མཚན་གཉིས་ཀར་བར་མ་ཆད་པར་ཕེབས་པས་ཞག་དྲུག་གིས་དགོན་པར་འབྱོར། ཐུགས་སྐྱོ་ངལ་ཚད་
ལས་འདས་པ་སྐད་ཅིག་ཀྱང་རྒྱུན་མི་འཆད་པ་བྱུང༌། ཁྱད་པར་དཱ་ཚང་ནས་མཚན་མོ་དེར་ལ་གཟར་པོ་ལ་བབས་ནས་ཕེབས་ལམ་དུ་ངལ་ཅུང་ཟད་བསོས་ནས་ནམ་མཁར་གཟིགས་པས། དགུང་དབྱིངས་མཐོན་པོར་སྐར་མའི་རིགས་མི་གསལ་བ་ལ་ཟླ་བ་གཅིག་པུར་རྒྱུ་བ་གཟིགས་པའི་རྐྱེན་ལས་གདུང་བའི་དབྱངས་ཀྱི་མགུར་དབྱངས་མཛད། ཕྱིས་སྤྲུལ་སྐུ་མྱུར་འབྱོན་ཡང་དེ་ལས་བཏུས་པ་ཡིན་པས། སྟེང་ཡ་གི་དགའ་ལྡན་ལྷ་ཡུལ། ཞེས་ཟེར་དོན་དེ་ཡིན་གསུངས། རྒྱུ་མཚན་གཞན་ཡང་ཡོད་པར་ངེས་ཏེ་སྤྱན་ལྔ་དང་མངོན་ཤེས་དྲུག་སོགས་ཀྱི་རྒྱུ་མཚན་དཔྱད་ན་གསང་བའི་གནས་བསམ་གྱིས་མི་ཁྱབ་བོ། །དགོན་པར་འབྱོར་པའི་ཉིན་གདུང་མདུན་དུ་ཕེབས་པ་ན་སྐུ་ལུས་འདར་ནས་ཚུགས་མ་ཐུབ་པར་ཀུན་གྱིས་བརྟེན་དགོས་པ་བྱུང་ཞིང༌། སྤྱན་ཆབ་ཆར་རྒྱུན་ལྟར་བསིལ་ནས་མར་མེ་སྙན་ཤལ་སོགས་ཕུལ་ཏེ་ཐུགས་སྨོན་རྒྱུན་རིང་མཛད། བརྒྱ་མཆོད་སྣ་ལྔ་དང༌། དངུལ་སྲང་བརྒྱ། ལན་འདུའུ་ཉི་ཤུ། ཆིབས་ཆེན་བཅུ། དེ་འོག་རྟ་བཟང་བཅུ་སོགས་ཕུལ། ཐུའུ་བཀྭན་རིན་པོ་ཆེར་མཇལ་འཛོམ་མཛད་ཅིང༌། ཆིབས་ཆེན་ཁྱད་དུ་འཕགས་པ་ཕུལ། དགའ་ལྡན་ལྷ་བརྒྱ་མའི་ཁྲིད་གསན་ཅིང་བཀའ་མཆིད་ཞིབ་པར་མཛད། རྗེ་ཐུའུ་བཀྭན་རིན་པོ་ཆེ་འདི་ཉིད་ཆོས་སྲིད་གཉིས་ཀྱི་སྒོ་ནས། འཛམ་གླིང་ན་ཆེ་བའི་བླ་མ་ཡིན་ཡང༌། ྋསྐྱབས་མགོན་རྡོ་རྗེ་འཆང་ལ་བྲན་ལྟར་གུས་ཤིང༌། འདི་གར་གསེར་ཁྲི་རྣམ་གསུམ་ནམ་མཇལ་ཡང་ཕྱག་རྩེ་སྤྲོད་རྒྱུན་དུ་གནང་བ་ནི། བསྟན་པའི་ཆེ་བ་ལ་དགོངས་པ་དང་ཐུགས་སྣང་དག་པའི་རྣམ་ཐར་ཇོ་འབྲོམ་ཡབ་སྲས་ཀྱི་ཕྱག་སྲོལ་དང་མཚུངས་པར་སེམས། དེར་མ་ཟད་རྗེ་དེ་ཉིད་ཀྱི་ཞལ་ནས། མདོ་
སྔགས་ཀྱི་གཞུང་དོན་དཔྱིས་ཕྱིན་པ་ཕར་ཞོག །སྒྲ་སྙན་ངག་དང་སྡེབ་སྦྱོར་དང་མངོན་བརྗོད་ཙམ་ཡང་ཕར་ཞོག་ཕལ་སྐད་ངོ་འཕྲོད་པ་བྱང་པོ་ཙམ་ཡང་མི་ཤེས། དགེ་བའི་བཤེས་གཉེན་ཡང་མི་བསྟེན་པར་གཞན་ལས་བརྐུས་ནས་ལྷུ་མི་འགྲིག་བཞིན་དུ་རྡོ་ཆག་སྦྱར་བ་ལྟ་བུའི་འཆད་རྩོམ་འདི་མཚང་ཆེ། མདོ་རྒྱུད་ཀྱི་ཁུངས་དང་རྟེན་འབྲེལ་གྱི་གནད་ལ་མི་སེམས་པར་ཆོས་བརྒྱད་ངོམ་པའི་ལག་ལེན་ཐམ་ཐོམ་འདི་ཉེན་ཆེ་བས། གང་དང་གང་ལ་ཡང་སྔོན་དུ་སྦྱངས་པ་ཞིག་གལ་ཆེ་ཞེས་སོགས་ཀྱི་ཞར་ལ་འཆད་རྩོད་རྩོམ་གསུམ་དང༌། མཁས་བཙུན་བཟང་གསུམ་འཛོམ་པ་གུང་ཐང་རིན་པོ་ཆེ་འདི་ལྟ་བུ་ཞིག་དེང་སང་སྙིགས་མའི་དུས་འདིར་འབྱོན་ལུགས་མི་སྣང་སྟེ། ཅིའི་ཕྱིར་བྱོན་པ་ཡིན་སྙམ་གསུངས། ཡབ་རྗེའི་ཉིན་བྱེད་ཞིང་གཞན་གཤེགས་གྱུར་ཀྱང༌། །དྷརྨ་བཛྲ་སྨྲ་བའི་ཟླ་རྒྱས་དཔལ། །སྐལ་བཟང་ཀུནྡའི་གཉེན་དུ་ཤར་བའི་རྩེར། །བུ་སློབ་སིལ་མའི་རྒྱུ་སྐར་སྐྱོང་བ་ལས། །དོན་མཐུན་བསྔགས་པའི་འོད་དཀར་བརྒྱ་ཕྲག་གིས། །ཡོན་ཏན་གངས་རིའི་ཕུང་པོར་འཁྱུད་པ་ན། །དམ་པའི་རང་བཞིན་གཟི་བརྗིད་ཆེར་འབར་བ། །ཐུབ་བསྟན་ནོར་འཛིན་མཛེས་པའི་རྒྱུ་རུ་ངོམས། །དེ་ནས་སྐུ་གདུང་གི་མདུན་དུ་སྒྲུབ་མཆོད་ཡང་ཡང་གནང་ཞིང་བླ་བྲང་ཆེན་མོ་ནས་ཐུགས་དམ་གསལ་འདེབས་ཀྱི་ཡོན་འབུལ་གཟབ་པར་ཞུས། ཞལ་ནས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །ཞེས་གསུངས་པ་ལྟར་བླ་མའི་སྐུ་ནི་གདོད་ནས་གྲུབ་པའི་དཀྱིལ་འཁོར་ཡིན་པས་ལུས་དཀྱིལ་དུ་དབང་བསྐུར་ཆོག་པའི་རྒྱུ་མཚན་དེ་ཡིན་གསུངས། དེ་དང་མཐུན་པའི་ཐུགས་དམ་དང༌། དེ་དང་མཐུན་པའི་ཉམས་རྟོགས་འཁྲུངས་པ་ཡིན་སྣང་སྟེ། དབུས་གཙང་དང་མདོ་སྨད་དུ་བླ་མ་
ཡབ་སྲས་རྣམས་ཀྱིས་བདག་འཇུག་གནང་བའི་ལོ་རྒྱུས་གསུང་འཕྲོས་ཀྱི་སྐབས་ཤིག་ཁོང་རྣམས་ཀྱིས་བདག་འཇུག་བླངས། ངས་གཞན་འཇུག་བླངས་པ་ཡིན་གསུངས་པ་ནི་བླ་མའི་ལུས་ཀྱི་དཀྱིལ་འཁོར་དུ་དབང་ནོད་པའི་གསུང་དཔྱད་གཞི་ཅན་དུ་སྣང༌། བཅུ་གཅིག་པའི་བཅོ་ལྔའི་ཉིན་བླ་བྲང་ཆེན་མོ་ནས་མཆོག་སྤྲུལ་མྱུར་འབྱོན་གྱི་ཐོག་མའི་ཞབས་བརྟན་ཚུགས་པ་དང་བསྡེབས་ནས་རྗེ་ཉིད་ཀྱང་སྐུ་མཚམས་སུ་བཞུགས་ནས་ཉེར་བཞིའི་ཉིན་གྲོལ། དེ་ཉིན་རྒྱབ་རིའི་རྩེར་ནམ་མཁའ་འཇའ་ཚོན་གྱིས་ཁྱབ་པ་དང༌། དམ་པ་གཞན་ལའང་མནལ་ལྟས་ཁྱད་པར་ཅན་འགའ་ཡང་བྱུང༌། གདུང་མཆོད་དུ་དགོན་པར་སྲང་བཞི་རེ་ཐེམ་ངེས་ཀྱི་ཇ་འགྱེད་དང༌། ཇ་སྲང་བཞི་རེ་ཐེམ་རྩིས་ཀྱི་ཟོག་འགྱེད་སྩལ། དགུང་ལོ་སོ་གཅིག་པ་ཆུ་བྱི་ལ་ཚེས་གཏོར་སྔར་རྒྱུན་དང༌། ཚེས་བཅུ་གསུམ་གྱི་ཉིན་བསྒྲུབ་བྱ་བཅུ་དྲུག་དང། བཅོ་ལྔའི་ཉིན་གུང་ཚིགས་ཀྱི་རྒྱབ་ནས་བསྒྲུབ་བྱ་ང་བདུན་བསྙེན་རྫོགས་གནང་བར། དགེ་བཤེས་རི་ཁྲོད་པ་འཇིགས་མེད་རབ་རྒྱས་ཀྱིས་དུས་གོ་བ་དང། ཕྲན་གྱིས་གསང་སྟོན་གྱི་ཁུལ་བྱས། ཕྱག་ལེན་ཕྲ་ཞིབ་དང། མངོན་གྱུར་བཅུ་སོགས་སོ་སོའི་ཐད་དུ་གསུང་བཤད་རྒྱས་པར་སྩལ་ནས་ཟླ་བ་བཞི་ཆ་ཤར་བའི་དུས་སུ་ལེགས་པར་གྲུབ་ཅིང༌། མཇུག་ཏུ་བསྟན་འབར་མ་སོགས་བསྔོ་སྨོན་གང་རྒྱས་མཛད། དེ་ནུབ་ཉིད་ཀྱི་ཁུ་བོ་རབ་འབྱམས་པས་ང་དེ་རིང་བསླབ་སྐྱོར་བྱས་ན་ཅི་མ་རུང་ཟེར་བ་ལ། ཞལ་རྩེད་ཀྱི་ཚུལ་དུ། འོ་ན་ཁྱེད་དེར་སྡོད་དང༌། ངས་བསླབ་སྐྱོར་བྱེད། འདིའི་རྗེས་ཟློས་མཛོད། ཡང་ན་འདི་ལ་ལྷན་ཐབས་སུ་གླན་ནོ་ཞེས་གསུངས་པས་གད་མོ་དི་རི་བ་བྱུང༌། ཡང་སྙན་ངག་རྩོམ་རྒྱུགས་གནང་བའི་སྐབས་ཤིག །རྡོ་རམས་པ་བློ་བཟང་སྐུ་མདུན་དུ་འོངས་
ནས་སྙན་ངག་སྤྱི་དང་ལྷན་ཅིག་བརྗོད་པའི་རྒྱན་གྱི་འཕྲོས་པ་དུ་མ་གནང་ནས་ཕྱི་དྲོ་ལ་སླེབས། ཁོང་སོང་རྗེས་ཞལ་ནས། དགེ་བཤེས་བློ་བཟང་འཇིགས་མེད་དེ། །ཉི་མ་དང་ནི་ལྷན་ཅིག་སོང་གསུངས། འདི་འདྲའི་ཞལ་རྩེད་ཀྱི་རིགས་ཡ་མཚན་པ་ཤ་སྟག་ཡིན་ལ། ལྔ་རིག་སྨྲ་བའི་ཁྱུ་མཆོག་གུ་ཤྲི་སྐལ་བཟང་དང་མཉམ་དུ་བརྒྱད་སྟོང་པ་དང༌། གྲྭ་ལྔ་སོགས་ཀྱི་ལཉྫ་ན་དང༌། ན་ག་རའི་དཔེ་འགའ་ཞིག་གཟིགས་རྟོག་གི་ཞར་ལ་ལེགས་སྦྱར་སྐད་དུ་སྙན་ངག་རྩོམ་པ་སོགས་ཕན་ཚུན་རྣམ་དཔྱོད་རྩལ་འགྲན་པ་ལྟ་བུ་མཛད་ཀྱང་ཡི་གེར་མ་བཀོད་འདུག །ཁོ་རང་གིས་བརྩམས་པའི་རྟ་མགྲིན་གྱི་བསྟོད་པ་ཞིག་ཡོད་པ་རྗེ་འདིས་ཉམས་གཅིག་ལས་ཕན་ཚུན་བསྒྱུར་བ་ངོ་མཚར་ཅན་ཡོད་ཀྱང་བྲིར་མ་ལང༌། ཟླ་མཇུག་དེར་རྒྱ་དཔོན་ལྟ་བུ་ཞིག་གི་རྨི་ལམ་གྱི་སྣང་བར་ཡབ་རྗེ་རྡོ་རྗེ་འཆང་གི་གསུང་ཉམས་བྱུང་བ་སོགས་ཀྱི་རྐྱེན་གྱིས་བླ་བྲང་ཆེན་མོར་གཉིས་པའི་ཚེས་གཅིག་ནས་མགོན་པོའི་ཞི་བའི་གཏོར་སྒྲུབ་ཚུགས་པའི་དབུར་བཞུགས་ཏེ། བླ་མ་མགོན་པོ་དབྱེར་མེད་དུ་བསྒྲུབས་པས་མཚན་མ་བརྟན་པོ་རྙེད། སྔ་ལོ་ཞིག་སྐྱབས་མགོན་རྡོ་རྗེ་འཆང་ནས་གསུང་སྒྲོས་ཀྱི་ལྷོངས་ལ། སྔ་སོར་ཅུན་གར་གྱི་ཕྱོགས་སུ་རྗེའི་བསྟན་པ་དར་རྒྱས་ཆེ་ཡང་ཕྱིས་སུ་ཅུན་གར་ཉམས་ཚུལ། མདོ་སྨད་ཀྱི་ཕྱོགས་འདིར་ཡང་རྗེའི་བསྟན་པ་དར་ཁུལ་ཡིན་ཀྱང་བསྟན་པ་སྤྱི་ལ་ཐུགས་ཁུར་མཛད་མཁན་དཀོན་ཚུལ། ཁམས་ཕྱོགས་ས་ཆ་རྒྱ་ཆེ་ཡང་གྲུབ་མཐའ་སྣ་ཚོགས་ཀྱིས་གང་ཚུལ་སོགས་གསུངས་ནས། ཁྱེད་ཀྱིས་ཅུན་གར་ཕྱོགས་དང་ཁམས་ཕྱོགས་འདི་ཚོ་ལ་ཐུགས་བསམ་རེ་གནང་ན་ཞེས་པ་ལྟ་བུ་ཞིག་བྱུང་བས་ཐུགས་མ་བདེ་བར། བྱ་ལོ་བླ་བྲང་མགྲོན་གཉེར་རབ་འབྱམས་པ་བློ་བཟང་ཚུལ་ཁྲིམས་བོད་དུ་འགྲོ་གདོང་གནས་ཚུལ་དེ་གྲུབ་དབང་ཀློང་རྡོལ་རིན་
པོ་ཆེར་ཞུས་ནས་དེ་འདྲའི་བྲེལ་བ་མེད་པར་སྤོང་བ་བསམ་གཏན་གྱི་ཕྱོགས་ཁོ་ན་ལྷུར་བླངས་ཆོག་པ་ཞིག་སྐྱབས་མགོན་རྡོ་རྗེ་འཆང་ལ་ཞུས་ན་ཅི་འདྲ་ཡོང་ཞུས་པའི་བཀའ་ལན་དུ། བཞད་སྤྲུལ་བྱང་ཆུབ་སེམས་དཔའ་ས་བསམ་གྱིས་མི་ཁྱབ་པ་ཡིན་པས་ཉེ་སྐོར་བླ་མ་བསྐོ་བཞག་བྱས་ན་བཀའ་གང་གནང་ལྟར་སྒྲུབ་དགོས། ཐུགས་དང་འགལ་བ་གཏན་ནས་མི་རུང་གསུངས། ས་བསམ་གྱིས་མི་ཁྱབ་པ་ཞེས་པ་ནི་བསྐལ་པ་དཔག་མེད་ཀྱི་དུས་ནས་མངོན་པར་སངས་རྒྱས་ཟིན་ཀྱང༌། མཛད་པ་བཅུ་གཉིས་ཀྱི་རོལ་གར་ཡང་དང་ཡང་དུ་རྒྱུན་མི་འཆད་པར་སྟོན་བཞིན་པ་ལས་བཀོད་པ་འདི་ཉིད་ཐུན་མོང་གི་སྣང་བ་དང་འཚམ་པར་སྐྱེ་བ་སོགས་དབང་བཅུ་ལ་དབང་བའི་དག་ས་ལ་གནས་པའི་ཚུལ་བསྟན་ནས་བཞུགས་པའི་དོན་ཡིན་པར་མདོ་སྡེ་ལས་ཤེས་ཏེ། དཔལ་འཕྲེང་སེངྒེ་ང་རོའི་མདོ་ལས། བྱང་ཆུབ་སེམས་དཔའ་དབང་ཐོབ་པའི་ཡིད་ཀྱི་ལུས་ཅན་རྣམས་ཀྱི་འཆི་འཕོ་བར་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་བསམ་གྱིས་མི་ཁྱབ་པར་ཡོངས་སུ་བསྒྱུར་བ་ལགས་སོ། །ཞེས་དང༌། ཡབ་སྲས་མཇལ་བའི་མདོ་ལས། ད་དུང་དང་པོར་ཐུགས་བསྐྱེད་པར། །དེ་དང་དེ་ནི་ཡོངས་བསྟན་ཏེ། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོ་སྟོན་པར་མཛད། །ཅེས་དང༌། སྙིང་རྗེ་པད་དཀར་སོགས་མདོ་དུ་མར། ཀུན་དགའ་བོས་སངས་རྒྱས་ཐམས་ཅད་ཀྱི་ཆོས་ཀྱི་མཛོད་འཛིན་པ་དང༌། སྒྲ་གཅན་འཛིན་དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་ཐུ་བོར་འགྱུར་བ་དང༌། བྱམས་མའི་བུ་གང་པོ་ཡང་ཉན་ཐོས་སུ་གྱུར་པས། བསྐལ་པ་དཔག་མེད་ནས་བྱང་ཆུབ་ཀྱི་སྤྱོད་པ་ལ་གནས་ཏེ། དེ་བཞིན་གཤེགས་པ་ཐམས་ཅད་ཀྱི་ཆོས་བསྒྲགས་པ་
དང༌། སྒྲོག་པར་འགྱུར་བར་གསུངས་པ་ལྟ་བུ་མཐའ་ཡས་པས་སོ། །དེས་ན་ཀུན་མཁྱེན་གོང་མས། ངས་དགོན་པ་ཕྱོགས་བཅུའི་སངས་རྒྱས་ལ་བཅོལ་ཡོད་གསུངས་པ་ཡང་འདི་འདྲའི་སྟེང་ནས་ཤེས་དགོས་ཏེ། སྲས་སྒྲ་གཅན་འཛིན་གྱི་བྱུང་བ་ལྟ་བུའོ། །དེ་དུས་རྗེ་བཙུན་དམ་པ་འཇིགས་མེད་རིགས་པའི་སེངྒེ་ནས་ཁྲིའི་དགོངས་པ་ཞུས་པར་དྲག་ཞན་ཀུན་གྱིས་བཞུགས་དགོས་ནན་ཅན་ཞུས་ཀྱང་གསོལ་བ་མ་ཐེབས། ཁོང་ནས་གྲོས་འགོ་བཏོན་ཏེ་བླ་བྲང་དཔོན་ཚང་མགྲིན་གཅིག་པའི་ངོས་ནས་གཉིས་པའི་བཅུ་གཅིག་གི་སྔ་དྲོ་ཚོགས་ཆེན་ཁྲིར་བཞུགས་དགོས་ཀྱི་སྙན་གསན་ཕུལ་བར། དང་པོ་དཀའ་ཙམ་བྱུང་ཡང༌། རྗེ་འཇིགས་མེད་རིགས་པའི་སེངྒེ་ཉིད་ནས་ཀྱང༌། ྋསྐྱབས་མགོན་མཆོག་ནས་བདག་ལ་ཐོག་མར། ད་རེས་ཁྱེད་ཅིས་ཀྱང་བཞུགས་ན་ལེགས། ཁྱེད་ཀྱི་འཕྲོར་ཁྱེད་ལས་གཞོན་པ་གཅིག་ཡིན་དགོས་གསུངས་པས། དོན་གྱིས་བཀའ་ཕེབས་པ་སོགས་གསེང་བཀྲོལ་ཞིང༌། ཀུན་གྱིས་ནན་ཞུས་བྱས་པས་ཞལ་བཞེས་མཛད་དེ་དཀར་ཕྱོགས་སྐྱོང་བའི་དབུ་འཕང་དང་དམ་པའི་ཆོས་ཀྱི་བ་དན་དུས་གཅིག་ཏུ་མཐོ་བར་གྱུར་ཏོ། །སྨྲས་པ། མཁྱེན་བརྩེའི་ཀླུང་བཞི་ཆེར་འབབས་ལྷག་བསམ་མཚོ། །བརྩོན་པའི་དྲི་བཞོན་འགྲོས་ཀྱིས་བསྐྱོད་པ་ལས། །ཀུན་བཟང་སྤྱོད་པའི་རླབས་འཕྲེང་གཡོ་ལྡན་པར། །གཞན་ཕན་ངང་མོ་བྱེ་བའི་རྩེ་དགའ་འཛིན། །གསུང་རབ་གདམས་པར་ཤར་བའི་ལུང་རྟོགས་སྤྲིན། །མཛད་འཕྲིན་གློག་འོད་འཁྱུག་པའི་ལྡིང་ཁང་ནས། །གཞུང་བརྒྱའི་དབྱངས་དང་ལྷན་ཅིག་གདམས་པའི་ཆར། །ཁྱེད་ཐུགས་མ་དྲོས་མཚོ་ཆེན་གསོས་སུ་བབས། །མདོ་སྔགས་དཔྱད་འཇོག་ནམ་འཕང་གཅོད་པའི་འགྲོས། །ཡང་དག་འཇོག་གི་དབྱིངས་སུ་གཞོལ་བ་ན། །འདོད་ཡོན་ཆར་ལ་སྡོད་
པའི་སྙན་ལྡན་འགའ། །གཉིས་སྐྱེས་རྒྱལ་པོའི་ལམ་དེར་རེ་བ་སྐྱུངས། །བསྟན་པའི་ཉི་མ་ཤར་བའི་སྣང་བ་དང༌། །ཆོས་ཀྱི་གནྜིའི་དབྱངས་ཀྱིས་རྨོངས་པའི་གཉིད། །སད་ཚེ་སྐྱེ་རྒུ་རྐང་དྲུག་གཞོན་ནུའི་ཚོགས། །ཁྱོད་ཞབས་པདྨ་མཆོད་པས་ཅིར་ཡང་བྲེལ། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་མདོ་སྨད་བཀྲ་ཤིས་འཁྱིལ་དུ་ྋཡབ་རྗེ་མཆོག་གི་ཞབས་པད་བསྟེན་བཞིན་སྒྲུབ་པ་སྙིང་པོར་མཛད་པའི་སརྒ་སྟེ་དྲུག་པའོ།། །། ༈ འཇིགས་མེད་སྟོབས་བཅུའི་རྒྱ་མཚོ་ལས་འཁྲུངས་པའི། །བསྟན་པའི་གཉེན་ཁྱོད་སྙིང་དབུས་རྟག་བཞུགས་ནས། །འཆད་རྩོད་རྩོམ་པའི་ངག་གི་མེ་ལོང་ལ། །དོན་བཟང་སྣང་བརྙན་ཅིར་ཡང་བཀྲ་བར་མཛོད། །དེ་ནས་ཨུ་རན་འཇམ་དཔལ་དཀའ་བཅུས་ཞུས་ངོར་ལཱུ་ཨི་པའི་ལུགས་ཀྱི་བདེ་མཆོག་ལྷ་རེ་གཉིས་མའི་དབང༌། སླར་ཡང་སྟ་གོན་དང་བཅས་ཏེ་དྲིལ་བུ་ལྷ་ལྔ་དང་ལུས་དཀྱིལ་གྱི་དབང། བླ་མཆོད་དང་འབྲེལ་བའི་ཕྱག་ཆེན་གྱི་ཁྲིད། བདེ་མཆོག་གི་བསྐྱེད་རྫོགས་ཀྱི་ཁྲིད་སོགས་ཞག་ཉི་ཤུ་སྐོར་ལ་གནང། གསུམ་པའི་ཚེས་བརྒྱད་ལ་བསྒྲུབ་བྱ་སོ་གསུམ་བསྙེན་རྫོགས་དང། ང་གསུམ་དགེ་ཚུལ་དུ་བསྒྲུབ། བཅུ་གཅིག་གི་ཉིན་མཆོད་མཇལ་རྒྱས་པ་གནང་ནས་བསྟན་པ་རྒྱས་པའི་སྨོན་ལམ་ཐུགས་འདུན་ནན་ཏན་མཛད། ཚེས་བཅོ་ལྔའི་ཉིན་ཆོས་ཀྱི་ཁྲི་ལ་ཞབས་སེན་བཀོད་དེ། འདུས་པ་རྒྱ་མཚོའི་མགོན་དུ་གྱུར་པར་ཀུན་གྱིས་དམུས་ལོང་དམིགས་པུ་རྙེད་པ་ལྟ་བུའི་དགའ་བ་ཐོབ། དཔོན་ཚང་ནས་ཆོས་ཀྱི་ཁྲི་ལ་མངའ་གསོལ་བའི་ལེགས་འབུལ་མང་འགྱེད་ཕུན་སུམ་ཚོགས་པ་
བསྒྲུབས་ཤིང༌། བཞུགས་གྲལ་བགྲོ་གླེང་སོགས་ལེགས་པའི་རྟེན་འབྲེལ་འགྲིག །ཁྲི་བཤད་ངོ་མཚར་བས་ཀུན་གྱི་ཡིད་འཕྲོག་ཅིང་སྐུ་མཐོང་བ་དང༌། གསུང་ཐོས་པ་ཙམ་གྱིས་མཁས་བླུན་མཐའ་དག་དད་གུས་ཀྱི་མཆི་མ་འཁྲུགས་པར་གྱུར། དུས་མཐར་ཐུབ་བསྟན་ནོར་འཛིན་བུ་མོ་ནི། །བཤད་སྒྲུབ་ཉིན་བྱེད་གཞོན་ནུ་དང་བྲལ་མོད། །སླར་ཡང་མཁས་གྲུབ་རྟ་ལྗང་འོད་རྣོན་པོས། །ལུས་ཅན་བཤད་སྒྲུབ་སྦྲང་རྩིའི་མྱོས་པ་འཛིན། །ཆོས་གྲྭར་བརྩི་བཞག་ཆག་མེད་གནང་ནས་ལམ་རིམ་ཆུང་ངུའི་བཤད་ལུང་གི་དབུ་ཚུགས། ཉིན་ཁ་ཤས་ལ་བཅའ་ཡིག་བཀླགས་ཏེ། རྐུས་བྱས་པ་དང༌། བྲེ་ལོག་སྲང་ལོག་བུན་སྐྱེད་སོགས་ཕམ་པའི་རྒྱུར་འགྱུར་བ་ལ་ཁྱད་པར་མེད། གླ་རྔན་དང༌། གཡར་པོ་དང༌། བཅོལ་བ་སོགས་མི་སྟེར་བ་དང༌། བྲེ་སྲང་དང་གྲངས་རྩིས་དང༌། ཤོ་རྒྱན་སོགས་ལ་གཡོ་སྒྱུ་བྱས་ནས་རྫས་རིན་ཐང་ཚང་བ་ཐོབ་ན་ཕམ་པ་འབྱུང་ཚུལ་ཡོད་པ་སོགས་སྒྲིག་ལམ་སོ་སོར་འདུལ་བ་ལུང་གི་གླེང་གཞི་དང༌། མདོ་རྩའི་ལུང་འདྲེན་སྦྲགས་ཏེ་ཚོགས་གཏམ་གནང༌། དགེ་འདུན་གྲངས་མང་ཉུང་ལ་ལྟོས་པ་མེད། འདུལ་བའི་བཅས་ཁྲིམས་ལ་གནས་གལ་ཆེ་ཚུལ་དང༌། ལས་སྣེ་སོ་སོས་ཐབས་གང་མཁས་ཀྱི་སྒོ་ནས་སྒྲིག་ལམ་དམ་པར་བྱས་ན་ཆོས་འདུལ་བའི་ཕྱག་སྲོལ་ལ་ཕན་ཞིང་བསྟན་པ་ཡུན་རིང་དུ་གནས་པའི་ཐབས་རྨད་དུ་བྱུང་བ་ཡིན་ཚུལ། རྒྱུ་ནོར་བསོག་མཁས་པ་ཙམ་ལ་ཕོ་རྒོད་པར་བརྩི་བ་དེ་མགོ་འཁོར་བའི་རྟགས་རང་གི་ཕན་བདེ་རླག་བྱེད་ཡིན་ཚུལ་སོགས་ཀྱི་ཞལ་གདམས་སྩལ་བས་ཐམས་ཅད་ཡིད་འཁུལ་ངེས་བྱུང༌། ཨེ་མ་སྨྲ་བསམ་བརྗོད་མེད་ལྷུན་གྲུབ་ཡོན་ཏན་སྐྱིལ་ཀྲུང་ཉེར་འདེགས་བཛྲ་ཨ་ས་ན་གཉིས་པར། །སྐལ་བཟང་རེ་བའི་མེ་ཏོག་དགའ་བའི་
འདབ་རྒྱས་ཀུན་མཁྱེན་གཟུགས་ཅན་ཉི་གཞོན་འབར་བའི་སྣང་བ་ཐོབ། །བསྟན་ལ་སྡང་རྣམས་ངོ་ཟུམ་གནག་པས་བདུད་ལ་བསྡིགས་བཞིན་བག་མེད་རྒྱུ་སྐར་མ་བདས་པར་ཡང་བྲོས། །དོན་གཉེར་རྣམ་དཔྱོད་གཤོག་ཡངས་དད་བརྩོན་དྲི་བཞོན་གྱིས་བསྐྱོད་ཐུབ་བསྟན་མཁའ་ལ་འཕུར་ལྡིང་གར་གྱིས་རོལ། །བཞི་པ་སྔ་མའི་ཚེས་བརྒྱད་ལ་བསྒྲུབ་བྱ་སོ་བརྒྱད་དང༌། ཕྱི་མའི་ཚེས་བཅོ་ལྔ་ལ་བཅུ་ལྷག་བསྙེན་རྫོགས་དང༌། བསྒྲུབ་བྱ་གསུམ་ལ་དགེ་ཚུལ་གྱི་སྡོམ་པ་སྩལ། དཔྱིད་ཆོས་གསུམ་པ་ལ་བརྩི་བཞག་ཆག་མེད་དང། འཛིན་གྲྭ་གཏུགས་ཚུལ་གྱི་བཅའ་ཡིག་ཟུར་འདེབས་སྔ་ལོ་ཞིག་བོར་སོང་བ་དོན་མེད་ཀྱི་ས་ནས་རྙེད་པ་ཆོས་གྲྭ་ནས་བཀླགས་ཏེ་ཚོགས་གཏམ་གནང་བས་རྩོད་གྲྭ་གང་ལེགས་འཕེལ་བར་ཐུགས་ཤིན་ཏུ་གཉེས། བར་སྐབས་ཤིག་ནས་སྐྱོར་སྦྱངས་ཅུང་ཟད་ཉམས་ཡོད་པར་ཆོས་མཇུག་ཚོགས་གཏམ་ནན་ཅན་གནང་བས་ཆོས་མཚམས་དེ་ནས་སྐྱོར་སྦྱངས་འཕེལ་བའི་མགོ་ཚུགས། ཆོས་མཚམས་སྔ་ཕྱི་འདི་དག་ལ་བཀའ་ཆོས་གནང་བ་ཕྱོགས་གཅིག་ཏུ་བྲི་ན། འཇིགས་བྱེད་ལྷ་བཅུ་གསུམ་མ་དང༌། ཚེ་དཔག་ལྷ་དགུའི་དབང༌། ཆོས་རྒྱལ་ཕྱི་ནང་གསང་གསུམ་དང། ས་སྐྱའི་གསེར་ཆོས་བཅུ་གསུམ་གྱི་རྗེས་གནང། བདེ་མཆོག་དྲིལ་བུ་ཕྱི་ནང་གཉིས་ཀྱི་དབང། ཡང་ཆོས་རྒྱལ་ལྷ་མོ། རྡོར་སེམས་བླ་མེད་ལུགས། ཤྲ་མ་ཎ་སོགས་ཀྱི་རྗེས་གནང། བཀའ་གདམས་ཐིག་ལེ་བཅུ་དྲུག་གི་དབང། སྐྱབས་འགྲོའི་ཁྲིད། དམིགས་བརྩེ་མའི་ཁྲིད། རྣམ་སྲས་བཀའ་བཅོ་ལྔའི་རྗེས་གནང༌། ཚེ་རྟ་མགོན་གསུམ་སོགས་འདི་དག་ཞུ་བ་པོའི་དབང་གིས་བསྐྱར་མ་ཚར་ཁ་ཤས་རེ་ཡོད་ཀྱང་ཟུར་དུ་མ་བྲིས། ཟླ་ལྷག་ཆོས་ཐོག་
ལ་བཀའ་རམས་འཛིན་གྲྭའི་བགྲོ་གླེང་ལ་གཟིགས་ཀྱང་དབུ་ཕར་རྩོད་ལུགས་ལྟར་བྱས་སོང་ཞེས་ཧ་ཅང་ཐུགས་ཁེངས་པ་མ་བྱུང༌། དབྱར་ཆོས་ཆེན་མོར་བརྩི་བཞག་ཆག་མེད་དང༌། གླིང་བསྲེའི་དམ་བཅའ་ལ་གཟིགས་རྟོག་གནང༌། ཆར་འབེབས་མཁན་གྱི་རིགས་ངོ་ཚ་ཞིང༌། ཞིང་པ་རྣམས་ཨུ་ཐུག་པའི་ཐན་པ་བྱུང་སྟེ་དགོན་པའི་ལྷ་སྡེ་གོང་འོག་ཚང་མས་ཆར་འབེབས་ཞུས་པར། གསོ་སྦྱོང་ཞིག་བྱེད་ན་མ་གཏོགས་ཆར་འབེབས་ཀྱི་རིགས་མི་ཤེས་གསུངས་ནས་དྲུག་པའི་ཚེས་བརྒྱད་ཀྱི་ཉིན་བཀྲ་ཤིས་ཀྱི་གསོ་སྦྱོང་གནང་ནས། གསོ་སྦྱོང་གྲོལ་དུས་ནམ་མཁའ་ཕལ་ཆེར་སྤྲིན་གྱིས་ཁེབས་ཤིང༌། ཆར་ཟིམ་རེ་རེ་ཙམ་འཐོར་བ་བྱུང༌། དེ་ཡང་ཚུལ་ཁྲིམས་ཀྱི་ཕུང་པོ་ཡོངས་སུ་དག་པའི་བདེན་པ་མངོན་དུ་གྱུར་ཏེ། དེའི་ཕྱི་དྲོ་ནས་ཆར་གྱི་རྒྱུན་བཟང་པོ་ཞག་ཁ་ཤས་ལ་བབས་པས་ཐམས་ཅད་བག་ཕེབས་ཤིང་དད་གུས་ཀྱིས་རྒྱུད་སྨིན་པར་གྱུར། གང་གི་མགུལ་ནས་ཆོས་འདུལ་དཀོན་མཆོག་སྣོད། །བདག་པས་གཞན་གཅེས་བྱམས་བརྩེའི་གདེང་ལྡན་དབྱངས། །བསྒྲགས་པས་ས་གསུམ་དཀར་ཕྱོགས་སྐྱོང་བ་རྣམས། །རབ་དགའི་གར་གྱིས་ས་གསུམ་ཀུན་དགར་བསྒྱུར། །དེ་ནས་མཁའ་ལ་སྤྲིན་འཕྲེང་ཆུ་རིས་ཅན། །རྣམ་པར་འཁྲིགས་པ་སོར་མོས་བསྡུས་པ་བཞིན། །སྦྲང་ཆར་སྙོམས་པར་བབ་པས་འཛིན་མའི་ཁྱོན། །དེ་ཡི་མོད་ལ་འདོད་དགུའི་ཚལ་གྱིས་བརྒྱན། །དེ་ཚེ་སྐྱེ་དགུའི་ཡིད་མཁར་སྡུག་མུན་སངས། །བཞིན་ལ་དགའ་བའི་མདངས་ཀྱི་སྐྱ་རེངས་ཤར། །སྤྱི་བོར་ཐལ་སྦྱར་མེ་ཏོག་གསར་པ་འཛུམ། །ཨེ་མ་རོ་འཛིན་བུང་བ་མྱོས་སྙམ་བྱེད། །བླ་མ་གླིང་བསྲེའི་ཉིན་དང་པོར་པོ་ཏི་ལྔའི་ས་བཅད་ཀྱི་སྟེང་ནས་དོགས་གཅོད་དུ་མ་དང༌། ཁྱད་པར་ཕར་ཕྱིན་ལ་གསུང་བཤད་གང་རྒྱས་གནང་བས་བཤད་མཚམས་ཀྱི་བརྡ་རིམ་པ་
གསུམ་ཕུལ་བ་མ་གསན་པར། འཕྲིན་ལས་ཉེར་བདུན་གྱི་སྐབས་ནས་འཕགས་སེང་གི་བཞེད་པ་མི་འདྲ་བ་སོགས་འབྱམས་ཀླས་པར་སྩལ་ཏེ། ད་ནི་མཚན་དུས་ལ་སླེབ་པས་བརྡ་བྱས་ཚར་བ་ཡིན་རྒྱུ་རེད་དགོངས་ནས་མཚམས་གནང་བས་བགྲོ་གླེང་གྲོལ་ཚེ་མཇུག་གཅོད་ཐལ་སྐད་ཀྱི་ཚོད་ལ་སླེབ་འདུག །ཉིན་གཉིས་པར་རྗེ་ཉིད་ཀྱི་བཀའ་ལྟར་སྨན་པ་དཔོན་སློབ་མཁས་དབང་བློ་བཟང་འཇིགས་མེད་ནས་རིག་གནས་ལྔའི་བཤད་པའི་སྲོལ་གསར་དུ་བཏོད་པར་རིག་གནས་སོ་སོ་ནས་བགྲོ་གླེང་གནང་བས་ཀུན་གྱི་ཡིད་འཕྲོག་པར་གྱུར། དེ་སྐབས་ཤིག་སྨན་པ་དཔོན་སློབ་དང༌། དགེ་བཤེས་འགའ་ཞིག་གིས་མཛོད་ལས། ཡིག་འབྲུ་བརྒྱ་དང་བགྲང་བཅས་པའི། །སྙན་ངག་གྲངས་ཏེ་གོ་རིམ་བཞིན། །ཞེས་པ་སྒྲ་རིག་པ་དང༌། བཟོ་རིག་པ་དང༌། སྡེ་སྣོད་གསུམ་སོ་སོ་ལ་སྦྱར་ཆོག་མི་ཆོག་གི་འཕྲོས་པ་དང་དོགས་གཅོད་མང་ཙམ་བྱས་ནས་དཔྱད་པ་འཕེལ་བཞིན་པའི་མུར་སྨན་པ་དཔོན་སློབ་པ་སྐུ་མདུན་དུ་ཕེབས་པར་མཇལ་ཁ་གནང་བ་དང་མཉམ་དུ། ཡིག་འབྲུ་བརྒྱ་དང་བགྲང་བཅས་པའི། །ཞེས་གསུངས་པར་ཁོང་གི་ངག་ནས་ཐོས། བསྟན་པའི་རིམ་གྲོར་གཏོར་ཆེན་རྒྱུན་བསྟར་ལ་གཏོར་མ་བྲག་རི་མ་སྨད་རྒྱུད་ལུགས་ལྟར་བརྩེགས་ཏེ་ཚོགས་དབུར་ཆག་མེད་དུ་ཕེབས་ཤིང་ཟོར་བཀྲ་སོགས་ཀྱང་གང་ལེགས་བྱུང༌། བདུན་པའི་ཚེས་གཅིག་ནས་རིགས་གྲྭ་བཏང་བས་སྦྱིན་བདག་ཆད་མེད་དུ་འབྱོར་པར་མང་ཇ་བཞི་ཙམ་ལ་ཁྲུས་ཆོག་བྱས་ན་ཚོགས་གླེང་ལ་གནོད་གསུངས་ནས་ཁྲུས་ཆོག་ཡོད་དུས་མང་ཇ་ལྔ་རེ་དང༌། མེད་དུས་བཞི་རེ་གཏོང་བའི་སྲོལ་བཙུགས། ཀུན་མཁྱེན་གོང་མ་སྒོ་མང་བླ་མ་མཛད་སྐབས་རིགས་གྲྭ་ལ་ཚོགས་
གླེང་གཙོ་ཆེ་བས་ཞལ་འདོན་མང་པོ་འདོན་ས་མེད། སྐུ་རིམ་དགོས་ན་ཡང་བགྲོ་གླེང་ལས་ལྷག་པ་མེད་ཅེས་གསུང་བ་ལོ་རེ་བཞིན་བསྐྱར་ནས་ཚོགས་གཏམ་གནང༌། སྔ་སོར་ཕོགས་ཆེན་ལ་ཕོགས་ཡིག་བཀླགས་ནས་རྟ་ཕོགས་གཏོང་བ་དཀའ་ཚེགས་ཆེ་ཞིང་དངོས་མི་གཙང་བར་དགོངས་ནས་ཇ་བག་རེའི་འགྱེད་ལོ་རེ་བཞིན་བཏང༌། ཆོས་གྲྭའི་གསུང་ཆོས་ལ་ལམ་རིམ་ཆུང་ངུའི་གསུང་བཤད་མངོན་པ་གོང་འོག །བྱམས་ཆོས་ས་སྡེ་སོགས་དང་སྦྱར་ནས་རྒྱས་པར་གནང་བ་ཆུང་འབྲིང་གཉིས་གྲུབ། སྟོན་ཆོས་ཆེན་མོར་བརྩི་བཞག་ཆག་མེད་དང༌། འཛིན་གྲྭ་སོ་སོར་དོགས་གཅོད་འཕྲོས་པ་སོགས་འཆད་ཉན་དམར་བར་གནང༌། བརྩི་བཞག་གི་རྒྱུགས་ཞིབ་པར་བླངས་པས་འཛིན་སྐྱོར་ལ་དོན་གཉེར་ཆུང་བ་རྣམས་ནོངས་ཤིང་འདར་ཞུམ་པར་མཛད། སྟོན་དུས་རྩོད་གྲྭ་མཚན་ཕུད་ཀྱི་སྲོལ་ཡོད་པར་འགའ་ཞིག་གིས་ཇ་ཐུག་བཏུང་བ་འདུལ་བ་དང་མི་མཐུན་ཞིང༌། ངོ་ཚ་བའི་གནས་ཡིན་ཚུལ་དང༌། མཚན་མོ་རིག་པ་དྭངས་པས་རྩོད་གྲྭ་བདར་ཤ་ཆོད་པ་ཁོ་ན་དགོས་ཚུལ་གནང་བས་ད་ལོ་ལས་བློ་སྐྱེད་ཆེ་བ་མ་བྱུང་ཞེས་ཀུན་གྱིས་མགྲིན་གཅིག་ཏུ་གླེང༌། དེ་ཚེ་བསླབ་གསུམ་འཛིན་པའི་འདུས་པའི་སྡེ། །ཡིད་འཕྲོག་ཆོས་ཀྱི་དགའ་བདེས་ཚིམ་པ་དང༌། །ལུང་དང་རིགས་པའི་དབྱངས་སྙན་སྒྲོག་པ་ནི། །འདབ་བརྒྱའི་ཚལ་ལ་བུང་བ་རོལ་པ་བཞིན། །རྔ་ཆིངས་ཀྱི་ཚོགས་ལ་ཡང་ཆག་མེད་དུ་ཕེབས་ཏེ་གཟིགས་རྟོག་མཛད། འདོན་རྟ་དབྱངས་སྐོར་དབུ་མཛད་རྒྱ་རམ་པ་ལ་གསུང་བཀོད་ཞིབ་གནང་ལྟར། ཁོ་རང་གིས་ཀྱང་བཀའ་དང་བླངས་བྱས་པས་ཚོགས་ཆོས་གྲྭའི་འདོན་རྟ་དབྱངས་ཉམས་པ་ཐམས་ཅད་སོར་ཆུད་ཅིང༌། དལ་བྲེལ་ཡང་གནའ་བོའི་སྲོལ་བཟང་ཆུ་ལམ་ཞུགས་སུ་སོང་བ་ལ། ཐུགས་ཤིན་ཏུ་
དགྱེས་པའི་གསུང་འཕྲོས་ཡང་ཡང་ཐོས། ཆོས་མཇུག་ལ་སློབ་གཉེར་ཡོང་མི་ཡོང་སྐྱོར་སྦྱངས་ལ་རག་ལས་པ་དང༌། ཆོས་ཐོག་གི་རྩོད་པ་གནད་དུ་འགྲོ་བ་ཆོས་མཚམས་ཀྱི་སྐྱོར་སྦྱངས་ལ་རག་ལས་པས་འདུ་ཚོགས་དང་ལོང་གཏམ་སྤངས་ནས་དཔྱད་པ་དང་སྦྲགས་ཏེ་འཛིན་སྐྱོར་རྩལ་དུ་འདོན་དགོས་པ་དང༌། དུས་རྒྱུན་དྲན་ཤེས་བསྟེན་ནས་རང་རྒྱུད་བརྟག །མི་མང་གི་ཁ་ལ་མི་རྒྱུགས། གྲོགས་ངན་གྱི་ངག་ལ་མི་ཉན་པར་ཚུལ་ཁྲིམས་གཙང་མ་དགོས། གྲྭ་ཚོགས་མང་བ་ཙམ་ལ་དགོས་པ་མེད་ཅེས། མཁས་གྲུབ་ཐམས་ཅད་མཁྱེན་པས། ཕ་ཡུལ་ཉེ་དུ་གྲོགས་སོགས་བློས་བཏང་སྟེ། །རྩེ་གཅིག་དམ་ཆོས་བསྒྲུབ་པར་ཁས་བླངས་ནས། །གཞན་གྱི་ཡུལ་དུ་རྣམ་གཡེང་སྣ་ཚོགས་ཀྱིས། །དལ་འབྱོར་དོན་མེད་བྱེད་པ་སྨྱོན་པ་ཡིན། །ཞེས་པ་དང༌། རྒྱལ་སྲས་ཐོགས་མེད་དཔལ་གྱིས། སྐྱོང་རྒྱུའི་གཉེན་མེད་འདུལ་རྒྱུའི་དགྲ་མེད་ཅིང༌། །ཕར་ལྟོས་དཔོན་མེད་ཚུར་ལྟོས་གཡོག་མེད་པས། །དབེན་པའི་གནས་སུ་རང་སེམས་མི་འདུལ་ན། །ཁྱོད་ལ་བྱ་རྒྱུ་ཅི་འདུག་མ་ཎི་པ། །ཞེས་སོགས་གསུང་སྒྲོས་རྣམ་ཐར་དུ་མ་དང་སྦྱར་ནས་ཚོགས་གཏམ་ཡིད་འཁུལ་ངེས་གནང་བས། རྒན་གཞོན་བར་མ་མཐའ་དག་གཅིག་ཏུ་བློ་ཆོས་ལ་ཕྱོགས་པར་གྱུར། སྟོན་ཆོས་གཉིས་པར་མང་ཇ་ཟུར་པ་དཀོན་སྟབས་ཐོས་བསམ་གླིང་ལ་གྲྭ་ཇ་ཁྲིར་བཞུགས་རིང་ཆག་མེད་དང། བར་སྐབས་ཤིག་ནས་འབྲས་ཐུག་ཁ་ཤས་རེ་ཡང་བཏང། སྲོད་ཆོས་འདུལ་མཛོད་གཉིས་ལ་སྤྱི་བསྟན་དང་དུས་ཚིགས། དབུ་མ་ལ་ཚད་འགོག་དང་དུས་གསུམ་རྣམ་བཞག །ཕར་ཕྱིན་ལ་སྐབས་གསུམ་པ་ལྔ་པ་དྲུག་པ། བདུན་པ། བརྒྱད་པ། བློ་རྟགས་མན་ཆད་ལ་གྲུབ་
མཐའ་རྩ་བ་དང། གྲུབ་མཐའ་རིན་ཆེན་འཕྲེང་བ་རེས་མོས་ཀྱི་ཚུལ་དུ་གཏོང་བའི་སྲོལ་ཡོད་པ་ལྟར་རྫོགས་པར་གནང། ཆོས་ཐོག་ཕལ་ཆེར་ལ་འདུ་ཁང་ཡང་རྩེར་ཁྲི་པ་བླ་བྲང་དུ་བཞུགས་ནས་གྲྭ་ཚང་སོ་སོའི་བསྒྲིག་ལམ་ལ་བྱ་ར་རྒྱུན་དུ་གནང་ཞིང། བླ་མ་རྣམས་ཁྲི་པ་བླ་བྲང་དུ་བཞུགས་པ་དེ་གྲྭ་ཚང་རྟིང་བསྐུལ་ལ་གནད་ཆེ་བ་ཞིག་ཡིན་འདུག་ཀྱང། ཕྱིས་སུ་བླ་མ་ཚོ་རང་རང་གི་གཟིམས་ཤག་ནས་སྡོད་པའི་སྲོལ་དོད་པ་དེ་མ་ལེགས་འདུག་ཅེས་ཡང་ཡང་གསུངས་པ་ཞལ་ནས་ཐོས། ཁྲི་པ་བླ་བྲང་རྒྱལ་མཚན་བརྟན་པོར་བསྟན་པའི་འཕེལ་རྒྱས་ཀྱི་ཆེད་དུ་རྡོ་རྗེ་སློབ་དཔོན་མཛད་ནས་མགོན་པོའི་རྒྱས་པའི་གཏོར་སྒྲུབ་དང། ཟུར་དུ་རྒྱུན་བསྟར་ཞི་བའི་གཏོར་སྒྲུབ་གཉིས་ཀའང་ཁྲིར་བཞུགས་རིང་མ་ཆག་པར་མཛད། ལྔ་མཆོད་ཆོས་ཐོག་ལ་ཡང་བརྩི་བཞག་སྲོད་ཆོས་ཆག་མེད་དུ་གནང། ལོ་འདིར་དབྱར་གནས་ལ་བཞུགས་དུས་དབྱར་མཇུག་གི་བདུན་མཚམས་ཀྱི་སྔ་ཉིན་གདན་འདྲེན་པ་ཞིག་བྱུང་བས་མཚན་ཕྱེད་ཙམ་ལ་ཕེབས། དཱ་ནའི་སྟོད་ཀྱི་སུ་རུ་སྣེ་ཕྲན་དུ་ཀུན་རིག་སོགས་རྒྱས་པར་གསུངས། ཉི་ནུབ་སྐབས་སུ་ཚུར་བྱོན་ནས་སྐྱ་རེངས་དང་པོ་མ་ཤར་གོང་ལ་དགོན་པར་འབྱོར་བ་ལྟ་བུས་མཚོན་ནས་ཕྱོགས་ཡས་མས་ཀྱི་ཕེབས་བཞུད་ཀྱང་ཤིང་སློང་དང། ཆོས་འདོན་སོགས་དང་བསྒྲིགས་ནས་ཕར་བསྣུར་ཚུར་བསྣུར་དང། མཚན་མོ་ལ་འཐུད་བླངས་ནས་ཕེབས་པས་བརྩི་བཞག་མེད་དུས་སྲིད་མཐའ་ཙམ་ཞིག་ཡིན་ལ། མཚན་མོ་ཡང་སྦྱིན་བདག་གི་ས་ནས་དུས་རྒྱུན་གྱི་སྔ་ཐུན་ཕྱི་ཐུན་གྱི་ཐུགས་དམ་དང། ཐུན་ཇ་བཞེས་ནས་ཀྱང་ཞལ་རས་ན་བཟས་བསྒྲིབས་ནས་བཞུགས་པའི་རིང་ལ་གསོལ་དཔོན་མ་གཏོགས་སུ་གང་ཡང་སྐུ་མདུན་དུ་སོང་མི་ཆོག་པ་སོགས་བཤད་སྒྲུབ་ཟུང་འབྲེལ་གྱི་
ངང་ལས་སྐད་ཅིག་ཀྱང་མི་འདའ་བ་ནི་ཀུན་ལ་མཐུན་གྲུབ་ཡིན་ནོ། །དེས་ན་རྣམ་ཐར་འདི་འདྲ་ལ་ཁ་མིག་ཡར་བལྟ་བྱས་ཏེ་ལོངས་སྤྱོད་གསོག་བསྲུང་དང། གཉེན་གྲོགས་ཀྱི་ངོ་འཛིན་སྤངས་ཏེ་ཡིད་བཞིན་གྱི་ནོར་བུ་ལས་ཀྱང་ལྷག་པའི་རྟེན་བཟང་དོན་ལྡན་དུ་བྱ་དགོས་ཏེ། ཞལ་ནས། གཉིད་དང་ལོང་གཏམ་ལ་དགའ་བ་དང། ཟས་གོས་ཞིམ་བཟང་ལ་སྲེད་པ་འདི་རྣམ་གཡེང་དང་འདུ་འཛིའི་ཚང་ཡིན། འདུ་ལོང་ཉུང་ན་རིག་པ་དྭངས། ཚེ་འདི་སྣང་གི་མི་དང་སེམས་མི་འདྲེ་བར་རང་ཚུགས་འཛིན་པ་དང། ཆོག་ཤེས་བསྟེན་པ་གལ་ཆེ་གསུངས་པ་སྙིང་གི་ཟེའུ་འབྲུར་ཆོངས་ཤིག །བཅུ་པའི་ཚེས་གཅིག་གི་ཉིན་རབ་འབྱམས་པ་དགེ་འདུན་ཕུན་ཚོགས་ཞལ་ངོར་བསྐོ་བཞག་གནང། སྔར་རྒྱུན་ལས་སྣེའི་འོས་ཐོ་བླ་བྲང་ཆེན་མོ་དང། ཚོགས་ཆེན་ཁྲི་རིན་པོ་ཆེར་གཟིགས་འབུལ་སོ་སོར་བྱེད་པ་ཡིན་ཀྱང་སྐབས་འདིར་ཕྱག་མཛོད་དར་ཧན་ཆོས་རྗེ་བློ་བཟང་དར་རྒྱས་ཞེས་གཏིང་མི་དཔོག་ཅིང། བསོད་ནམས་ཀྱི་དཔལ་མངོན་པར་མཐོ་བ་དེ་ཉིད་ཀྱིས་ཚོགས་འདུ་རྒྱས་པ་གལ་ཆེན་ཡོད་དུས་ཁོ་རང་རྗེ་འདི་ཉིད་ཀྱི་སྐུ་མདུན་དུ་དངོས་འཛོམས་ཀྱི་ཐོག་འོས་ཐོ་དང་དགོངས་ལེན་ཞུ་བ་སོགས་གཅིག་འཐུས་སུ་མཛད་པ་དང། བླ་བྲང་ཆེན་མོར་བླ་མ་ཚོགས་འདུ་རྒྱས་པ་དགོས་དུས་གཟིམས་ཆུང་བཞུགས་ཁྲིའི་སྤྱན་སྔར་བླ་མ་རྣམས་ཁྲི་སྟན་བབས་འོས་ལ་བཞུགས་བསྟུན། ཕྱག་མཛོད་རང་ཉིད་ཀྱིས་ཐོག་དྲངས་ཞབས་ཕྱི་བྱིངས་ནས་མཇལ་ཞུ་དང། གྲོས་འགོ་ཆེ་རིམ་ནས་འདོན་པ་སོགས་ཆོས་སྲིད་དང་གང་མཐུན་ལས་བྱུང་རྒྱལ་གྱི་རིགས་མི་མཛད་ལ། བླ་བྲང་ཞབས་ཕྱི་འཁོར་ལོས་བསྒྱུར་བའི་མདུན་ན་འདོན་
དུ་འོས་པ་ཙམ་གྱི་བློ་རིག་སྙིང་སྟོབས་འཛོམ་པ་རྣམས་ནས། ༸སྐྱབས་མགོན་མཆོག་མ་བཞུགས་ཀྱང་ཕ་ཤུལ་བུས་ཟིན་ངེས་ཀྱི་ཐུགས་སྲས་དང། རྒྱལ་ཚབ་གཉིས་པ་གདན་སར་བཞུགས་པ་འདི་འདྲ་ཡབ་རྗེ་དེ་ཉིད་ཀྱི་བཀའ་དྲིན་ཡིན་ཞེས་འདུན་པ་ཆིག་དྲིལ་གྱིས་སྐུ་དོན་ཐམས་ཅད་ཀྱི་ཕུགས་རྗེ་འདི་ལ་གཏད་པ་ཞིག་ཡོད་དོ། །ཡབ་རྗེ་བླ་མའི་མཆོག་སྤྲུལ་མྱུར་ཕེབས་ཀྱི་ཆེད་དུ་དངུལ་སྲང་བརྒྱའི་རྩིས་ཀྱིས་སྲས་སྟོང་སྡེ་ངག་གི་དབང་ཕྱུག་གྲུབ་ཆེན་གྱི་ཆ་ལུགས་ཅན་བསྣན་པའི་འཁྲུངས་རབས་བཅུ་གསུམ་གྱི་ཞལ་ཐང་གྲབ་མཚུངས་བཞེངས། གསེར་ཁང་ཆེན་མོའི་ལོགས་རིས་ཀྱི་མཇུག་ཀྱང་གསུང་བཀོད་ལྟར་ལོ་འདིར་གྲུབ། མགོ་ཟླའི་ཚེས་བཅོ་ལྔའི་ཉིན་སྡེ་ཁྲི་སྤྲུལ་བའི་སྐུ་འཇམ་དབྱངས་ཐུབ་བསྟན་ཉི་མ་དགེ་ཚུལ་དུ་བསྒྲུབས་ཤིང། ཁོང་ནས་ཀྱང་རྗེ་འདི་ཉིད་ཀྱི་ཞབས་བསྟེན་ཏེ་ཆོས་གྲྭ་ཆག་མེད་ཙམ་དུ་མ་ཟད་ཚོགས་སུ་ཡང་རྒྱུན་ཕེབས་དང། བསླབ་བྱ་བསྔོ་བགྲང་ཕྱག་མཆོད། མཎྜལ། འཛིན་སྐྱོར་རྩོད་གྲྭ་སོགས་སྔོན་བྱོན་དམ་པའི་རྣམ་ཐར་ཕྱག་ལེན་དུ་ཐེབས་པར་མཛད། དགུན་ཆོས་ཆེན་མོར་བརྩི་བཞག་ཆག་མེད་དང། ཕར་ཕྱིན་སྟོན་མོའི་གྲྭ་སྐོར། སྨོན་རམས་པའི་གྲྭ་སྐོར་སོགས་དམར་པོ་འོང་བ་དང། རྡོ་བཅལ་ཆེན་མོར་ཤེར་སྙིང་དགུ་གསུམ་ངེས་ཅན་དུ་འགྲོ་དགོས་པ་སོགས་ཀྱི་རྟིང་བསྐུལ་ཚ་ནན་མཛད། དབུ་མཛད་ཐོན་པ་མཛོད་དགེ་བློ་བཟང་རིན་ཆེན་ལ་བཀའ་གནང་ནས་སྐད་གྲྭ་པ་འགར་གཤིན་རྗེའི་ངར་དབྱངས་ཞིབ་མོར་སློབ་བཅུག་ཅིང་ཕྲན་གྱིས་དེ་ཐོག་ནས་ཁྲི་ཆེན་བློ་བཟང་སྙན་གྲགས་དང། ཁྲི་ཆེན་དཀོན་མཆོག་བདེ་ཆེན་པ་ལས་ཞུས་དག་བྱས་པ་འཐེན་པའི་གདངས་ལྟར་རི་མོ་ཡང་ཕྱག་བྲིས་མཛད། མཁར་ཐབས་ཀྱི་བྲི་རྩིག་དང། ལིང་
རིས་དང་གནད་ཡིག་འགོད་ཚུལ་སོགས་ཞིབ་ཁྲིད་བྱེད་བཅུག་ཅིང། ཕྱག་ལེན་ལ་དག་ཐེར་ཞིབ་ཐིག་དང་བཅས་ལྕགས་མཁར་ཆེན་མོ་ཚུགས་པའི་དབུར་བཞུགས་ནས་བསྟན་འགྲོའི་སྤྱི་རིམ་ཁུར་དུ་བཞེས། དགུང་ལོ་སོ་གཉིས་པ་ཆུ་གླང་ལ་ལྷ་མོའི་ཚེས་གཏོར་རི་ཁྲོད་ནས་སྔར་རྒྱུན་ལྟར་བཏང་ཞིང། རྗེ་ཉིད་ནས་དགོན་པར་ལོ་གསར་གྱི་དགའ་སྟོན་དང་བཞུགས་གྲལ་ཚོགས་དབུར་ཕེབས། ཆོ་འཕྲུལ་སྨོན་ལམ་གྱི་གསུང་ཆོས་ལ་སྐྱེས་ཚོམས་གཉིས་སྦྱར། བསླབ་སྤྱོད་གཉིས་སྦྱར། ས་རྒྱན་གཉིས་སྦྱར་ཏེ་བཀའ་གདམས་གཞུང་དྲུག་གི་གསུང་བཤད་མཛད། འདི་སྐབས་དཔལ་ལྡན་ཡོན་ཏན་དམ་པས་ཡོངས་བཟུང་བཀྲ་ཤིས་པ་ཞེས་སོགས་ཚིགས་བཅད་གཅིག་དང། དགའ་ལྡན་ལྷ་བརྒྱ་མ་དང། དཔལ་ལྡན་ས་གསུམ་མའི་ཚིགས་བཅད་རེ་བཅས་སྦྱར་ཏེ་ཤོ་ལོ་ཀ་གཅིག་སྐུ་རྩེད་ཀྱི་ཚུལ་དུ་ཕྱག་བྲིས་སུ་མཛད་པ་ནི། དགའ་བའི་དཔལ་ལྡན་ལྷ་བརྒྱའི་མགོན་པོར་ཡོན་ཏན་དམ་པས་ཡོངས་བཟུང་ས་གསུམ་གཉེན་གྱི་ཐུགས་ཀ་བཀྲ་ཤིས་དཔལ་བེའུ་དམ་པ་ནས། །ཞེས་པ་མ་གཏོགས་ཕྱི་མ་གསུམ་ཕྲན་གྱིས་བརྗེད། དེ་ནི་མཁས་པས་བཤད་ན་ཅི་ཡང་བདེན་ཞེས་པ་དང། གང་ནས་བཤད་ཀྱང་འབྲེལ། ཇི་ཙམ་བཤད་ཀྱང་རན། ཇི་ལྟར་བཤད་ཀྱང་འཐད་ཅེས་པའི་རྣམ་ཐར་རོ། །སྨོན་ལམ་གསུང་ཆོས་ལ་སྤོས་ཕོར་ཆ། གདུགས། འབོག་ལྕགས། དངུལ་དེམ་རྟེན་ཁེབས་ཅན། ཆོས་ལྡན་ཁ་དར་ཟུང་གི་པང་ཁེབས་སོགས་ཉིད་ཀྱི་སྐུ་གོང་མའི་དུས་ལྟར་དང་འཆམ་གཟིགས་དང། བཅོ་ལྔའི་མཆོད་སྐོར་ལ་ཡང་ལུག་ཞོན་གྱི་འཆམ་དང་བཅས་ཕེབས། གོས་སྐུ་གདན་འདྲེན་གྱི་ཉིན་གདུགས་རྟ་དར། རིན་ཆེན་རྒྱན་ཆ་སོགས་སྤྲད་ནས་ཕེབས་པ་ན་མི་མང་
གིས། ཀུན་མཁྱེན་སྐུ་འཕྲེང་གཉིས་པ་དེ་ཉིད་མ་བཞུགས་པས་ཕྱོགས་འདིར་མི་མེད་བསམས་ཀྱང་ཆོས་སྲིད་གཉིས་འཛོམ་གྱི་བླ་མ་འདི་འདྲ་བཞུགས་པ་ངོ་མཚར་ཆེ་ཞེས་གསེར་ཁྲི་རྣམ་པ་དང། ཁྲི་གདན་ཟུར་བགྲངས་པ་ཐོས་ཏེ་ས་པཎ་གྱིས། མོས་པའི་ཚེ་ན་མིག་ཙུམ་བྱེད། །ཅེས་པ་ལྟར་བླུན་དད་ཡིན་རུང་མཛད་པ་དེ་ནི་གདུལ་བྱ་རྗེས་འཛིན་གྱི་ཐབས་མཁས་སོ། །བཅོ་ལྔའི་ཉིན་བསྒྲུབ་བྱ་ཞེ་གསུམ་ལ་བསྙེན་རྫོགས་ཀྱི་སྡོམ་པ་སྩལ། ལོ་འདིར་དཔོན་ས་ཝང་ངག་དབང་དར་རྒྱས་གསུང་ཆོས་སྨོན་ལམ་ལ་རེ་རེ་ཙམ་བྱོན་ནས་ཕུ་དུད་དཔེ་མེད་མཛད་ཀྱང་ཞལ་ནས། སྔ་སོར་སྐྱབས་མགོན་རྡོ་རྗེ་འཆང་གི་གསུང་ཆོས་ལ་དཔོན་ཚང་ཕེབས་པའི་ཐ་མའི་སྐབས་སུ་དང་པོའི་ཚིག་མཚམས། རྒྱལ་པོ་ཁྱོད་མཆོད་གནས་ངན་པས་བསླུས་ནས་ཞེས་སོགས་ལ་བབས་པ་ཤིན་ཏུ་སེམས་འཚེར་ཡོད་པའི་ཁར། ད་རེས་ཀྱང་རུས་པ་ཐར་ཐོར་ཞེས་སོགས་མ་ལེགས་གསུངས་ཏེ་མ་འགྱངས་པར་མཚོ་སྔོན་གཡས་རུ་གཡོན་རུ་ཐམས་ཅད་དགྲ་ཇག་གིས་འཐོར་བའི་ཚུལ་དེ་དགོངས་པར་སྣང། འཆམ་པ་གྲྭ་ཚང་གི་གསར་སློབ་རྣམས་ལ་དཔའ་གཅིག་གི་དབང་དང། ཆོས་རྒྱལ་ཕྱི་ནང་གསང་གསུམ་གྱི་རྗེས་གནང་སྩལ་ཏེ་བསྙེན་པ་ལས་རུང་དང། འཆམ་ལྕགས་མཁར་དབེན་ས་སྙན་བརྒྱུད་ཀྱི་ཕྱག་ལེན་མི་ཉམས་པ་དགོས་ཚུལ་ནན་ཏན་མཛད་པ་གསར་སློབ་ནམ་ཡོད་ལ་འདྲ། ཕྲན་ལ་བཀྲ་ཤིས་འཁྱིལ་གྱི་རྒྱུད་པ་དཔོན་སློབ་བྱུང་བར་གྲྭ་རྒན་ཚོས་འཆད་ཉན་དང། སྒྲིག་ལམ་ཉམས་གསོས་གལ་ཆེ་ཚུལ་རྣ་བ་ཚ་བར་གླེང་བ་ཞུས་པར། བཀའ་ལས། གཞན་སྟེང་གི་སྒྲིག་ལ་ཕན་ཐོགས་པ་ལ་རང་སྟེང་གི་སྒྲིག་ཁུར་ལེན་གལ་ཆེ་བས། གཏོར་ཆེན་བདག་འཇུག་གི་ཚོགས་དང། བརྩི་བཞག་
འགྲེལ་པ་སོགས་ཆག་མེད། གཏོང་སྒོ་དང་བྱ་བའི་ཁུར་གང་ཡོད་མ་ཉམས་པར་བྱས་ན་བསྡུ་བ་བཞིའི་ལག་ལེན་ཡང་དེ་ཡིན་གསུངས་པ་ལྟར་བསྒྲུབས་པས་བྱ་བ་ལམ་འགྲོ་བསམ་པ་ལྟར་བྱུང། ཕྲན་ཆུང་ངུའི་དུས་ཡབ་རྗེ་རྡོ་རྗེ་འཆང་གི་མདུན་དུ་ཕོར་པ་ལག་ནས་ལྷུང་བའི་རྟེན་འབྲེལ་གྱིས་འཚོ་ཆས་ཤིན་ཏུ་བཀྲེན་ཀྱང། འདི་དུས་ཉིན་གཅིག་ལྷུང་བཟེད་བཅུད་དང་ལྡན་པ་ཕྱག་གིས་གནང་ནས་འདིའི་ནང་ཟས་ཀྱིས་འགེངས་པ་བཞིན་དུ་རང་རྒྱུད་ཡོན་ཏན་གྱིས་འགེངས། འདིའི་ནང་ནས་ཟས་ལ་ལོངས་སྤྱོད་པ་བཞིན་དུ་ཆོས་ལ་ལོངས་སྤྱོད་ཅེས་གསུངས་པར་མཛད་པས་དེ་ཕྱིན་ཆད་མཐུན་རྐྱེན་ལ་ལག་མི་འཐོགས་པ་བྱུང་བ་ནི་དངོས་གྲུབ་ཀྱི་ཆ་ཤས་སོ་སྙམ་དུ་དད་གུས་ཀྱི་མེ་ཏོག་བཞད་པར་གྱུར། དཔྱིད་ཆོས་ཆེན་མོར་བགྲོ་གླེང་གི་རྒྱུགས་བླངས་ནས། བགྲོ་གླེང་གི་སྐབས་དམ་བཅའི་ཉེ་འཁོར་དུ་མ་བཅར་བ་ཡར་འགྲོ་མར་འགྲོ་རིང་པོ་དང། འཁོར་གསུམ་ཡང་རིང་པོ་བྱེད་དགོས་པ་དང། ཕྲེང་བ་ཞགས་འཕེན་དང། ཚིག་ལྷག་བཞག་མི་ཆོག་པ་དང། ཐལ་མོ་བརྡེབ་ལུགས། གཟན་རྐེད་པར་དཀྲི་ཚུལ་སོགས་ཞིབ་ཚགས་མཛད། སྔ་སོར་བལ་པོའི་བཟོ་བོ་རྟ་མགྲིན་རབ་བརྟན་དང། དོན་འགྲུབ་དབང་པོ་སོགས་བོད་དུ་འགྲོ་སྐབས་ལས་ཆོག་ཟེར་བ་སྡོད་བཅུག་པ་ལ་ལོ་སྔ་མ་ནས་གསུང་བཀོད་གནང་སྟེ། ༸སྐྱབས་མགོན་མཆོག་གི་སྐུ་གདུང་ཡིད་བཞིན་གྱི་ནོར་བུ་རིན་པོ་ཆེ་སྙིང་པོར་བཞུགས་པའི་མཆོད་རྟེན། ས་འཛིན་ནི་དྲི་གཙང་ཁང་གི་ཀ་བར་དུ་ཤོང་ཚོད་དང། བང་རིམ་ཡན་ཆད་དེ་ལས་ཆེ་བའི་ཐིག་གནང་སྟེ་བྱིངས་དངུལ་དང། སྒོ་ཁྱིམ་གསེར་འབའ་ཞིག་ལས་བསྒྲུབ་པ་ལེགས་པར་གྲུབ། མཛོད་
དགེ་རི་ཁྲོད་པ་མཁས་ཤིང་གྲུབ་པའི་དབང་ཕྱུག་བསྟན་པ་འཛིན་པའི་སྐྱེས་ཆེན་དེ་ཉིད་ཀྱིས་རྒྱུད་སྡེའི་དགོངས་པ་དང་མཐུན་པར་གཟུངས་གཞུག་ཕྱག་བཞེས་རྣམ་པར་དག་པས་ཕུལ། རྗེ་ཐུའུ་བཀྭན་རིན་པོ་ཆེ་གདན་དྲངས་ཏེ་གསུམ་པའི་ཚེས་བཞི་ནས་རྡོ་རྗེ་འཆང་དེ་ཉིད་དང། རྗེ་ཉིད་ཀྱིས་གཙོ་མཛད། ཁྲི་གདན་ཟུར་དང། གྲྭ་པ་བསྙེན་སོང་བརྒྱ་ལྷག་གིས་ཉིན་གསུམ་གྱི་རིང་དགེ་ལེགས་ཆར་འབེབས་ཀྱི་ཕྱག་ལེན་རྒྱས་པའི་སྟེང་ནས་རབ་གནས་ཞི་རྒྱས་ཀྱི་སྦྱིན་སྲེག་དང་བཅས་པ་མཛད། བྱང་ཆུབ་ལམ་གྱི་རིམ་པའི་མངའ་བདག་རྗེ་བླ་མ་འགྲན་གྱི་དོ་མེད་མཁས་ཤིང་གྲུབ་པའི་དབང་ཕྱུག་བློ་བཟང་ཆོས་ཀྱི་ཉི་མ་དཔལ་བཟང་པོའི་དྲུང་ནས་བདེ་ལམ་གྱི་ཁྲིད་སྨིན་རྒྱས་ཞལ་ཤེས་དང་བཅས་པ་དགོན་པའི་ཚོགས་ཡོངས་དང་ལྷན་ཅིག་ཏུ་གསན། མཇུག་ཏུ་རྗེ་ཉིད་ནས་བརྟན་བཞུགས་ཀྱི་བཤད་པ་ཞུས། དེ་སྐབས། ནཱ་ལེནྡྲའི་དགེ་འདུན་རྣམས་ནས་མགོན་པོ་ཀླུ་སྒྲུབ་ལ་ཕུལ་བའི་ཞུ་ཡིག་ཏུ། ཤིན་ཏུ་ཁུར་དཀའི་ཁུར་གྱིས་ལུས་དུབ་ཁྱུ་མཆོག་རྣམས་ནི་ཁྱེད་ལ་གསོལ་འདེབས་ན། །ཞེས་སོགས་དྲངས་ནས་བསྟན་པའི་ཁུར་བཞེས་དགོས་ཚུལ་ཞུས་པ་ན་ཡབ་རྗེ་རྡོ་རྗེ་འཆང་དག་པའི་ཞིང་དུ་དགོངས་པ་གཏད་པ་དང། བསྟན་པ་ཉམས་དམའ་བ་སོགས་ཀྱིས་སྤྱན་ཆབ་དབང་མེད་དུ་ཤོར་བས་དགེ་འདུན་མང་ཡང་འདྲེན་བྱེད་ཆབ་རྒྱུན་གྱིས་བརླན་བཞིན་སེམས་སྐྱོ་བས་བློང་བློང་པོར་གྱུར། བླ་མ་རྡོ་རྗེ་འཆང་དེ་ཉིད་ནས་ཀྱང་ཞལ་བཞེས་བཟང་པོ་དང་ཞལ་གདམས་བླ་ན་མེད་པ་སྩལ། དཔོན་སློབ་འདི་ཙམ་ཞིག་ཐུགས་མཐུན་པར་བླ་མའི་བཀའ་དྲིན་མ་གཏོགས་བསམ་རྒྱུ་མེད་པ་འདི་ནི་ཤིན་ཏུ་ཡི་རང་བའི་གནས་རྫོགས་ལྡན་དུས་ཀྱི་བྱ་བ་ལྟ་བུ་ཞིག་སྣང་
ཞེས་ཡང་ཡང་གསུངས་པ་ཐོས། ཐུའུ་བཀྭན་རྡོ་རྗེ་འཆང་ནས་གུང་ཐང་བླ་བྲང་དུ་ཉིད་ཀྱི་ཞབས་བརྟན་ལ། རྟ་མགྲིན་གྱི་སྦྱིན་སྲེག་གནང་བས་སྔར་སྐུ་འཁྲུགས་ཀྱི་ཉམས་ཤིག་རྒྱུན་དུ་ཡོད་ཀྱང་དེ་ནས་བཟུང་སྟེ་སངས་དྭངས་སུ་སོང། བརྩི་བཞག་གི་རྒྱུགས་མ་འཕྲོད་པ་རྣམས་ལ་བརྒྱ་ཕྱག །ཚོགས་ཆུ། རྡོ་བཅལ་བསྒྲིགས་པ་སོགས་ཀྱི་ཆད་ལས་མཛད་པ་འདི་འདྲ་ཡང་བསྟན་པའི་བྱ་བ་བསྒྲུབ་པའི་ཡན་ལག་ཏུ་བཅོམ་ལྡན་འདས་ཉིད་ཀྱིས་བཀའ་སྩལ་ཏེ། མདོ་ལས། དམ་པའི་ཆོས་རྣམ་པར་ཉམས་པ་ན་དགེ་སློང་མ་དད་པ། ཚུལ་ཁྲིམས་འཆལ་བ། སྡིག་པ་སྤྱོད་པ། སྙོམས་ལས་ཅན། ལེ་ལོ་ཅན། ཐོས་པ་ཉུང་བ། དམ་པའི་ཆོས་ལ་འདུན་པར་མི་འགྱུར་བ་དག་འབྱུང་ཞིང། དེ་དག་གིས་ཆོས་འཆད་ཉན་སྤངས་པའི་རྐྱེན་གྱིས་བསྟན་པ་ནུབ་པར་འགྱུར་བས་དེ་དག་ཡལ་བར་འདོར་མི་རུང་ཞེས་ཆོམ་རྐུན་གྱི་སར་མདའ་གཞུ་ཐོགས་ཏེ་ཟོང་སྦ་དགོས་ཤིང། ཚོང་འདུས་སུ་ཟོང་ཐང་མར་བདལ་དགོས་པ་དང། ཁྱིམ་མེས་ཚིག་པ་ན་མེ་གསོད་པ་ལ་གཡེལ་མི་རུང་བ་སོགས་དཔེ་དུ་མས་གསུངས་ཤིང་སྡོམ་གསུམ་སོ་སོའི་བསླབ་བྱར་ཡང་གསུངས་སོ། །ཆོས་ཐོག་རྣམས་དཀྱུས་དང་འདྲ་བར་བརྩི་བཞག་ཆག་མེད། འཕྲོས་པ་དང་དོགས་གཅོད། གསུང་བཤད་སོགས་འཆད་ཉན་དམར་བ་ཁོ་ནས་དུས་འདའ་བར་མཛད། ཚོགས་གཏམ་ཞིག་གི་སྐབས། ཟས་གོས་གནས་མལ་བཟང་དགོས་པའི་ངེས་པ་མེད། ལྟོ་སྐྱ་གོས་ཧྲུལ་བྱུང་ན་དེ་རྒྱན་དུ་གོ་ནས་ཆོས་ལ་བརྩོན་དགོས། རང་གི་དཀའ་སྤྱད་ལ་ཆོས་མིན་སྤྱོད་པའི་མིས་ཚུར་ལ་སྙིང་རྗེ་ཟེར་བའི་གནས་སུ་སོང་ཡང། རང་ཉིད་ཆོས་ཀྱི་
དགའ་བདེས་ཚིམ་ནས་གཞན་སྐྱིད་ཉལ་བྱས་ཀྱང་སྡིག་པའི་ཕུང་པོར་གྱུར་པ་ལ་ཕར་སེམས་ཀྱི་གཏིང་ནས་སྙིང་རྗེ་འཆོར་བ་དེ་འདྲ་དགོས། གོས་རྫི་བོའི་གོས་དང། ཟས་བྲན་གཡོག་གི་ཟས་ཙམ་བསྟེན་རྒྱུ་བྱུང་ན་དེ་ཙམ་གྱིས་ཆོག་ཤེས་བྱས་ནས་ཆོས་ལ་བརྩོན་དགོས། ཁ་ཕྱིར་བལྟས་ཀྱི་ཡེངས་མ་ལམ་ལ་མི་ཚེ་ཟད། རང་གི་བྱ་བ་རང་གིས་ངོས་མི་ཟིན་པར་གང་ཡག་ཡག་ཅིག་བྱས་ཡོད་མདོག་ཁ་བོ། མི་ཤི་བའི་མང་འགྱེད་ལ་དགའ་བཞིན་དུ་ལོངས་སྤྱད་ནས་དེ་ཁོ་ན་མ་གཏོགས་རང་ཉིད་འཆི་སྙམ་མེད་པར་གཏན་དུ་སྐྱིད་ཐག་ཆོད་ཡོད་པ་ལྟ་བུ། འཆི་བ་དྲན་ན་བཟའ་བཏུང་གི་བྲོ་བ་མི་ཚོར་དགོས་རྒྱུ་རེད་མོད་དེ། དེ་ཙམ་མིན་ཀྱང་སླར་རྟེན་འདི་འདྲ་དང། སྐལ་བ་བཟང་པོ་འདི་འདྲ་ཐོབ་རྒྱུ་ཨེ་རེད། བློ་ཁ་ནང་དུ་ཕྱོགས་ལ་སོམས་དང། ཆོས་བྱས་ཡོད་སྙམ་པའི་ཡམ་མེ་བ་ཞིག་ལས་བློ་བདེ་ངེས་ཀྱི་ཆོས་བྱས་ཨེ་འདུག །ཚེ་འདིའི་བདེ་བ་སྐད་ཅིག་མ་རེ་དང། སྐྱེ་བ་གཏན་གྱི་བདེ་བ་གཉིས་བརྗེ་ཚུལ་ཨེ་འདུག །བསམ་བློ་ཐོང་དང་མི་རེད་མོད། མཁས་པ་སློབ་པའི་དུས་ན་སྡུག །གསུངས་པ་དེ་སློབ་གཉེར་སྒོམ་སྒྲུབ་ཆོས་སྲིད་ཀྱི་བྱ་བ་ཐམས་ཅད་ལ་འདྲ་འདྲ་རེད་མོད། ཚེ་འདི་དང་འཇིག་རྟེན་གྱི་བྱ་བཞག་ཅིག་ལ་འུར་ལངས། ཆོས་ཀྱི་བྱ་བ་ཞིག་དང་ཕྱི་མ་ཕན་ཆད་ཀྱི་དོན་ཞིག་བཤད་ན་ཡང་དེ་ཡུད་དེ་མགོ་འཐོམས་པ་འདྲ་བ། སྐྱིད་འདོད་གཅིག་དང་མཐོ་སྙེགས་གཅིག་ཁོ་ན་སེམས་ལ་བཅངས་ནས། འདོད་ཡོན་གྱི་ཕྱོགས་དང་ཆོས་མིན་གྱི་ཕྱོགས་ལ་དྲན་རྒྱུ་དང་ལབ་རྒྱུ་མང། ཆོས་ཀྱི་ཕྱོགས་ལ་སྙོམས་ལས་ཐེ་ཚོམ་གྱིས་ཚེ་གར་སོང་མི་ཤེས། ཚབ་ཚུབ་ཀྱི་ངང་ལ་མི་ཚེ་ཟད་ན་སྨྱོན་པ་དང་ཁྱད་པར་ཨེ་འདུག །ཆོས་ཤིག་བྱེད་འདོད་ན་ལས་འབྲས་ཀྱི་སྤང་བླང་དང། ཕྱི་མ་ཕན་ཆད་ལ་
བསམ་བློ་ཞིག་གཏོང་དགོས་རྒྱུ་རེད་མོད། བསམ་བློ་དེ་ལྟར་གཏོང་མཁན་གྱི་ཆེད་དུ་ཀུན་མཁྱེན་བླ་མས། བསྟན་པ་སྤྱི་ལ་ཕན་ངེས་དང། རང་རང་གི་འདི་ཕྱིའི་དོན་ལ་ཕན་ངེས་ཀྱི་སྒྲིག་ལམ་ཞིབ་མོ་འདི་འདྲ་ཚུགས་པ་ཁྱེད་ཚོས་ཧ་གོ་བར་ཨེ་འདུག་གསུངས། གླིང་བསྲེའི་སྐབས་པོ་ཏི་ལྔའི་བརྒྱུད་པའི་ཆོས་འབྱུང་རྣམ་ཐར་དོགས་གཅོད་ཀྱིས་བརྒྱན་པའི་གསུང་བཤད་ཀུན་ཡིད་འཕྲོག་པ་དང། བགྲོ་གླེང་སོགས་ལ་ལན་གང་ཞིབ་གང་མྱུར་ངར་ངར་གྱིས་རྣམ་པ་མཚན་ཉིད་པ་སྤྱི་ལུགས་ཀྱི་མིག་རྒྱན་ལ་ཕན་པ་གནང། ཉིན་གཉིས་པར་རྒྱུད་བླའི་ཁུར་འཛིན་ཕྲན་ནས་འགྲེལ་པ་བཞི་སྦྲགས་ཀྱི་ས་བཅད་ཆ་ཚང་བའི་སྟེང་ནས་དོགས་གཅོད་དང་བཅས་པའི་བཤད་པའི་ཁུལ་བྱས་པར་བགྲོ་གླེང་གི་བཀའ་དྲིན་སྩལ་ཅིང། སྔ་སོར་བདག་ལ་དགོན་པ་འདིར་སྐུ་ཞབས་རིན་པོ་ཆེའི་ཐུགས་རྗེར་བགྲོ་གླེང་གཏོང་ཚུལ་ལེགས་ཀྱང་དམ་བཅའི་ལན་ངར་ཞིང་མྱུར་བའི་མིག་ལྟོས་གང་ལེགས་ཤིག་ཁྱོད་རང་གིས་རྡོ་རམས་པའི་དམ་བཅའི་སྐབས་སུ་ཀུན་གྱིས་མཐོང་བ་ཞིག་བྱེད་དགོས་གསུངས་པ་དགོས་པ་ཅན་གྱི་གསུང་དུ་བསམ་སྟེ་འདི་སྐབས་སྐད་གཟེངས་མཐོ་བར་བྱས་ཏེ་ལན་གང་མྱུར་ཕུལ་བར་ལུང་དང་རིགས་པའི་མེ་ཏོག་ཆར་དུ་བསྙིལ། ཐུའུ་བཀྭན་རྡོ་རྗེ་འཆང་ནས་དགོན་པའི་བྱང་ཕྱོགས་སུ་བདུད་འདུལ་མཆོད་རྟེན་བརྩིགས་པའི་འོག་ཏུ་དམ་སྲི་མནན་པ་དགོས་གསུངས་པ་ལྟར། མཛོད་དགེ་རི་ཁྲོད་དབང་པོ་དང། སློབ་མ་འདུལ་འཛིན་རྣམས་ཀྱིས་སྒྲུབ་པ་བྱས་ཏེ་མནན་རྟགས་ཐོན་པ་ན་རྗེ་འདི་ཉིད་ནས། བཀྲ་ཤིས་ཀྱི་གསོ་སྦྱོང། ས་བསླང། ལྟོ་འཕྱེ་བརྟག་ནས་བརྐོ་བ་སོགས་སྔོན་དུ་འགྲོ་བས་མཆོད་རྟེན་གྱི་ལས་གྲ་བདུན་པའི་ཚེས་བཞི་ལ་ཚུགས།
སྔ་ཕྱིར་བསྒྲུབ་བྱ་སུམ་ཅུ་མ་ལོང་ཙམ་རབ་བྱུང་བསྙེན་རྫོགས་ལ་བཀོད། རིགས་གྲྭའི་ཉིན་དང་པོར་ཁ་དར་ཉིན་བདེ་མ་རེའི་འགྱེད་དང། དོང་ཚེ་བཅུ་གཉིས་ཀྱི་དོད་དུ་ཞོ་གང་འཕར་ནས་གནང་བ་སོགས་འགྱེད་ཁྱོན་བསྡོམས་ལ་དངུལ་སྲང་སྟོང་དང་དྲུག་བརྒྱ་སུམ་ཅུ་ལྷག་དང་གུང་ཐང་བླ་བྲང་དུ་ཀུན་དགའ་ར་བ། མཆོད་ཁྲི་རྐོས་མ་གསེར་ཚོན་གྱིས་སྤྲས་པ་ཆ་མཚུངས་བསྒྲུབས་པར་དངུལ་སྲང་བརྒྱ་ལྷག །ཚོགས་ཆེན་རྒྱུན་ཇ་ཁྲ་ཙེ་གང་བཟང་རྒྱུན་འཇགས་ཀྱི་ཆེད་དུ་སྤྱི་སོར་དངུལ་དཀར་སྲང་བརྒྱ། འདུ་ཁང་ཆེན་མོར་ཀ་བར་དགུ་ཁེབས་པའི་གོས་ཀྱི་བླ་བྲེ་དངུལ་སྲང་བརྒྱ་དང་ལྔ་བཅུའི་རྩིས་ཀྱིས་བསྒྲུབས་ཏེ་ཕུལ། ལོ་སྔ་མར་མགྲོན་གཉེར་དཀའ་བཅུར་གྲགས་པ། བྱ་ཁྱུང་ཕྱག་མཛོད་ཤེས་རབ་རྒྱ་མཚོ། ༸སྐྱབས་མགོན་མཆོག་གི་དགོངས་རྫོགས་བསྒྲུབ་པར་བོད་དུ་འགྲོ་གདོང་མནལ་ལྟས་འཚུབ་པ་སོགས་ཀློང་རྡོལ་རིན་པོ་ཆེར་ཞུས་པའི་བཀའ་ལན་ཕྱིར་ཕེབས་སུ། ཉིད་སྐུ་ཡོན་གཞན་དང་མི་འདྲ་བས་བྱམས་སྙིང་རྗེའི་དམིགས་རྣམ་རྩལ་དུ་བཏོན་ན་འཚུབ་སློང་གི་རིགས་ལྷག་མེད་དུ་ཞི་འགྲོ་གསུངས་པ་དང། ཐུའུ་བཀྭན་རྡོ་རྗེ་འཆང་ནས་ཀྱང་གཅོད་བཏང་ན་ལེགས་ཚུལ་གསུངས་པ་ལྟར་ཁྲི་ཆེན་རྡོ་རྗེ་འཆང་བློ་བཟང་སྙན་གྲགས་ལ་དབེན་ས་ལུགས་ཀྱི་ནམ་མཁའ་སྒོ་འབྱེད་ཀྱི་དབང་གསན་ཅིང། ཁྲི་སྙན་ས་ལེའི་ར་དུང་ཡང་བཟོ་བར་མཛད། ཞལ་ནས། མ་ཅིག་གི་ལུང་བསྟན་དུ་གསུངས་པའི་བླ་མ་དུང་གི་མཆེ་བ་ཅན་ནི་ཁྲི་ཆེན་འདི་ཉིད་དང། བླ་མ་དངུལ་གྱི་སྨ་ར་ཅན་ནི་ཁྲི་ཆེན་ངག་དབང་འཕྲིན་ལས་ཡིན་པར་གྲགས་གསུངས། སྟག་གེ་སྤྲུལ་སྐུ་སོགས་བསྒྲུབ་བྱ་དྲུག་ཅུར་དགེ་ཚུལ་དང། བཅུ་གཉིས་ལ་བསྙེན་རྫོགས་ཀྱི་སྡོམ་པ་སྩལ། བདུད་འདུལ་མཆོད་རྟེན་གྱི་ཟ་ར་ཚགས་དང། ཉི་ཟླ་གསེར་ཟངས་ལས་བསྒྲུབ་ཆེད་
དུ་གསེར་སྲང་དོ་དང་ཞོ་བཞི་སོགས་གནང་སྟེ་ཐམས་ཅད་ལེགས་པར་གྲུབ་ནས་དགུ་པའི་ཉེར་གཉིས་ཀྱི་ཉིན་རབ་གནས་མཛད། ཞལ་ངོ་བསྐོ་བཞག་གི་སྐབས་དུས་འཁོར་དཔོན་སློབ་རྡོ་རམས་པ་ངག་དབང་དོན་གྲུབ། སྨན་པ་དཔོན་སློབ་རྡོ་རམས་པ་བློ་བཟང་འཇིགས་མེད། བླ་མ་དབུ་མཛད་པ་རྡོ་རམས་པ་དཀོན་མཆོག་ལྷུན་གྲུབ། དུས་འཁོར་རྡོར་འཛིན་རྡོ་རམས་པ་འཇམ་དབྱངས་གྲགས་པ། ཕྲན་སོགས་ཚོགས་འདུ་ཐུན་མོང་ནས་སྒྲིག་ལམ་ལ་དག་ཐེར་གལ་ཆེ་ཚུལ་དང། ཞལ་ངོ་སོགས་ཀྱང་དེ་མཐུན་དགོས་ཚུལ་ཞུས་པར། སྒྲིག་ལམ་གྱི་རྒྱུ་མཚན་བཤད་པ་ལེགས། ཞིབ་ཆ་སླར་ཚོགས་འདུ་རྒྱས་པ་ཞིག་གི་སྟེང་ནས་བྱས་ཆོག །དགེ་བསྐོས་བསྐོ་བཞག་ཀྱང་དེ་བཞིན་བྱས་པ་ཡིན་གསུངས་ནས་མདོ་སྔགས་གཉིས་འཛོམ་གྱི་དགེ་བཤེས་ལམ་རིམ་ཆེན་མོ་རྒྱུན་དུ་སྐྱོར་མཁན་རྡོ་རམས་པ་དཀོན་མཆོག་དགེ་ལེགས་བསྐོ་བཞག་གནང། རྒྱས་པའི་གཏོར་སྒྲུབ་གྲོལ་བའི་ཉིན་ཚོགས་འདུ་རྒྱས་པའི་སྟེང་ནས་སྒྲིག་ལམ་ཉམས་པའི་རིགས་གླེང་གཞི་བཀྲམ་དགོས་གསུངས་པར། རྒྱུད་པ་བླ་མ་དབུ་མཛད་པ་ནས། སྤྱིར་ཚོགས་འདུའི་ལུགས་སྲོལ་ལ་ཐོག་མར་ཀུན་གྱི་ཁ་བསྡུར། དེ་རྗེས་གྲོས་བསྡུས། དེ་རྗེས་བདར་ཤ་བཅད། དེ་རྗེས་དགོངས་ལེན་ཞུ་བ་ཡིན་མོད་ཀྱང་ད་རེས་སྔོན་གྱི་རྒྱུས་ཡོད་རྣམས་གཙོ་ཆེ་ཟེར་བ་ལྟར། ཆོས་རྗེ་རྡོ་རམས་པ་དགེ་སློང་སེར་དྲིས། གསོལ་དཔོན་གཙང་པ་རབ་འབྱམས་པ་བསྟན་པ་དར་རྒྱས། ལ་མོ་རབ་འབྱམས་པ་ངག་དབང་ཆོས་འབྱོར། ཨ་རྐོང་རབ་འབྱམས་པ་ནོར་བུ་རྒྱལ་མཚན། རབ་འབྱམས་པ་ངག་དབང་དར་རྒྱས་སོགས་རྒན་པ་ཆེ་བགྲེས་རྣམས་ནས་བཅའ་ཡིག་ཟུར་འདེབས་རེ་རེའི་གླེང་གཞི་བྱུང་བ་རྒྱུ་མཚན་དང་བཅས་གསུངས་པ་ལ་
བརྟེན་ནས་རུང་མཐུན་སྦྱར་འོས་པ་རྣམས་ཀྱང་གྲོས་བསྡུར་ནས་ཞུས་པར། བཀའ་ལས། ཁྱེད་རྣམས་ཀྱིས་གང་གསུངས་ཐམས་ཅད་དོན་དང་མཐུན་པ་ཤ་སྟག་ཏུ་སྣང། དགེ་འདུན་ཁྲིམས་གཙང་བ་ནི་སྐྱེ་རྒུའི་འཕྲལ་ཕུགས་ཀྱི་ཕན་བདེའི་གཞི་རྩ་གཅིག་པུ་ཡིན་མོད། ཁྲིམས་གཙང་བའི་གཞི་རྩ་ཐུགས་མཐུན་པ་ལ་རག་ལས། ཐུགས་མཐུན་ཞེས་པ་དེ་ལྟ་བ་བདེན་བཞིའི་བླང་དོར་ལས་མི་འདའ་བ་ཞིག་གི་མིང་ཡིན་པས། ཁྱེད་རྣམས་ཀྱང་སྒྲིག་ལམ་གྱི་རྩ་བ་བྱས་ནས་མགྲིན་གཅིག་དབྱངས་གཅིག་དགོས་གསུངས། ཀུན་གྱིས་བཀའ་བཞིན་བསྒྲུབ་པར་ཞུས། བསྒྲུབ་བྱ་བཅུ་གཉིས་བསྙེན་རྫོགས་ལ་བཀོད་ཅིང་འཆད་ཉན་དམར་བར་མཛད། བཅུ་པའི་ཉི་ཤུ་བརྒྱད་ལ་རྔ་ཆིངས་ཀྱི་ཚོགས་དབུར་ཕེབས་ཀྱང་མཚན་མོ་སྐུ་སྟོད་ལ་གཟེར་མིག་ལྟ་བུ་ཞིག་བྱུང་བར་བརྟེན། ཉེར་དགུའི་ཉིན་ཕྲན་གྱིས་རྡོར་སློབ་བྱས་ནས་ཟོར་འཕངས་པས་མེ་བཀྲ་སོགས་ལེགས་པར་བྱུང། ཀུན་གྱིས་ཞབས་བརྟན་ཁུར་དུ་བླངས་ནས་བསྒྲུབས་པས་སྐུ་འཁྲུགས་སངས་དྭངས་སུ་གྱུར། ནུབ་དེར་འདུ་ཁང་ཡང་རྩེར་བཞུགས་པར་རྒྱང་རིང་པོ་ཞིག་ན་ཨ་ལགས་ཚང་ཞེས་རྒྱང་འབོད་ཡང་ཡང་བྱེད་པར། སུ་ཞིག་ཡིན་དགོངས་ནས་མནལ་སད་པ་ན། དོན་ལ་ཁྱི་ཞིག་ཡིན་འདུག་པར། མནལ་སད་ནས་ཀྱང་ལན་ཁ་ཤས་ཀྱི་བར་ལ་ད་དུང་ཁྱི་སྐད་ཀྱི་ནང་ན་ཨ་ལགས་ཚང་ཞེས་གྲགས་པ་སོགས་སྐབས་འདིར་མནལ་ལམ་རྒྱུན་དུ་འཚུབ་ཀྱང། ནུབ་གཅིག་ཡབ་རྗེ་རྡོ་རྗེ་འཆང་བཞུགས་འདུག་པར། དུས་ཕྱིས་རྨི་ལམ་འཚུབ་པས་སྐུ་ཞབས་ལ་མཇལ་བ་དེ་བཟང་སྙམ་ནས་མཇལ་བས་ཕྱག་དབང་གནང། ཞལ་ཕུ་ཞིག་བཏབ་པས་སྤྱི་བོའི་གཙུག་ནས་སྙིང་གི་དཀྱིལ་གྱི་བར་དུ་བསིལ་བའི་རེག་བྱ་ཞིག་གིས་བདེ་སངས་ཀྱིས་
སོང་བ་རྨིས་པས་ད་ནི་སྐྱོན་མི་འདུག་གསུངས། མི་དང་མི་མིན་སྒྱུ་མ་མཁན་པོ་འགས། །བསམ་ངན་སྦྱོར་རྩུབ་སྣ་ཚོགས་སྔགས་རྫས་ཀྱིས། །རྟེན་འབྱུང་སྤྲོས་བྲལ་གཟིགས་པའི་ཡེ་ཤེས་མིག །དག་པའི་ཡུལ་དུ་འཁྲུལ་སྣང་ཇི་ལྟར་བསྐྲུན། །དད་དང་དམ་ཚིག་གཙང་མའི་རྫིང་བུ་རུ། །ལྷ་དང་བླ་མའི་བྱིན་རླབས་ཟླ་སྣང་གཟུགས། །ཇི་དགར་འཆང་བའི་འདོད་པ་འཇོ་བ་ནི། །ཐ་མལ་མོས་ལྡན་དག་ལའང་དགག་ཏུ་མེད། །ཞལ་ངོ་གསར་པ་ལ་བཀའ་གནང་ནས་ཚོགས་ཆོས་གྲྭའི་ཡུན་ཚད། དབྱར་དགུན་གྱི་ཉི་ཚོད་གྲིབ་ཚོད། མཚན་མོ་སྐར་ཚོད། ཉིན་མཚན་གྱི་སྤོས་རྒྱུན་སོགས་ཆ་མཚུངས་པ། དགུན་ཆོས་ཆེན་མོར་ཞོགས་ཇ་དང་པོ་ཐོན་པ་དང་ནམ་ལངས་པ་དུས་མཚུངས་སོགས་སྔར་སྲོལ་ལྟར་གནས་པ་མཛད། ཡབ་རྗེའི་མཆོག་སྤྲུལ་མྱུར་ཕེབས་ཀྱི་ཆེད་དུ་འཇིགས་བྱེད་རྩ་སྔགས་དང། གཙུག་ཏོར་འཁོར་བསྒྱུར་གྱི་ཕྲེང་སྔགས་གང་མང་ཚོགས་ཆེན་ནས་བསྒྲུབས། བསྒྲུབ་བྱ་བཅུ་དྲུག་བསྙེན་རྫོགས་གནང་ཞིང་འཆད་ཉན་དམར་བའི་ཞར་ལ་བཀའ་ཆོས་ཀྱང་ཞུ་བ་པོའི་འདོད་མོས་ལྟར་གནང། དགུང་ལོ་སོ་གསུམ་པ་ཤིང་སྟག་གི་ལོ་ཆོ་འཕྲུལ་སྨོན་ལམ་གྱི་གསུང་ཆོས་ལ་སྔར་གྱི་འཕྲོ་ནས་བཀའ་གདམས་གཞུང་དྲུག་གི་བཤད་པ་མཛད། ཚེས་བཅོ་ལྔའི་ཉིན་བསྒྲུབ་བྱ་སོ་བདུན་བསྙེན་རྫོགས་དང་དྲུག་ལ་དགེ་ཚུལ་གྱི་སྡོམ་པ་སྩལ། ཆོས་མཚམས་ལ་འཛིན་སྐྱོར་གྱི་རྟིང་བསྐུལ་དམ་པར་མཛད་ཐོག །ལྷ་སྡེ་ཁ་གསུམ་དུ་གཏོགས་པའི་སེར་སྐྱ་སྤྱི་ལ་ཇག་རྐུན་གྱི་གནས་ཚང་ཙམ་ཡང་བྱས་མི་ཆོག་པའི་བསྡམ་ར་དང། བཙུན་ཆས་སྤྲད་ནས་ཚོང་ཁེ་སྤོགས་དང་བྲེ་སྲང་གི་གཡོ་སྒྱུ་ཕར་ཞོག་སྤྱི་སོའི་བྲེ་སྲང་མ་གཏོགས་མངོན་སར་འགྲིམ་མི་ཆོག་པ་
དང། རབ་བྱུང་གིས་ནག་ཆང་རྐུས་གསུམ་དང་མཚོན་ཆ་ཐོགས་པ་ཕར་ཞོག་གོས་དམུ་ལུགས་མ་དང་ཞྭ་ཕོ་ཐོད་དང། ཚི་ལེན་དཀར་པོ་གྱོན་པ། ཤོ་འཕེན་པ་སོགས་བྱས་མི་ཆོག་ཚུལ་སྐྱ་སེར་སོ་སོར་ནན་ཅན་གནང་བ་ལྟར་ཞལ་ངོ་སོགས་ཀྱིས་ཉིན་པར་ཡང་གླིང་བསྐོར་ཞིང། ཚོགས་འདུས་ཚོང་རྭ་དང། མཐའ་བ་གོང་འགབ་སོགས་བསྐོར་ནས་དག་ཐེར་མཛད། བཟའ་བཏུང་ངག་འཁྱལ་འགྲོ་འདུག་སོགས་ཁྱིམ་པ་ལས་ཁྱད་པར་མ་དོད་ན་ཁྱིམ་པ་རྣམས་རབ་བྱུང་སྤྱི་ལ་མི་དད་པའི་སྡིག་རྐྱེན་དུ་འགྲོ་བ་ནི་བསྟན་པའི་དབུ་འཕང་སྨོད་པ་དང། དགེ་འདུན་གྱི་ཞབས་འདྲེན་པའི་བདུད་ལས་ཡིན་ཞེས་ཚོགས་གཏམ་བཙན་བརྗིད་དང། དགོན་པའི་གླིང་ན་མི་ཡན་པ་མང་ན་གནོད་ཚབས་ཆེ་ཞེས་ཀློང་རྡོལ་གྲུབ་ཆེན་ནས་སྐྱབས་མགོན་རྡོ་རྗེ་འཆང་ལ་གསུངས་ཚུལ་ཚོགས་གཏམ་གྱི་རྒྱུན་ལ་ཡོད་ཀྱང། སྒྲིག་ལ་མི་ཐེ་བའི་གྲྭ་པ་མང་ན་ལྷག་པར་གནོད་གསུངས་ནས། དགོངས་པ་གཏན་ཞུས་བྱས་ཡོད་པ་རྣམས་རང་རང་གི་གྲྭ་ཚང་ལ་བཅུག །གཞན་སྐྱ་སེར་སུ་ཡང་ཁང་པ་བཟུང་ནས་སྡོད་ས་མེད་པར་བྱས་ཏེ། ཆོས་སྒྲུབ་པར་འདོད་པ་རྣམས་ཞེ་གཙང་བར་མཛད། མི་ཟད་སྙིགས་མ་ལྔ་བདོའི་མུན་པའི་སྨག །སྡུག་བསྔལ་རང་བཞིན་ངོམས་པའི་སྡིག་པའི་ལས། །རང་གི་ཡིད་དང་ལྷན་ཅིག་གནག་པ་རྣམས། །ཁྱོད་ཀྱི་དྲིན་ལས་ཆོས་ལམ་སྣང་བར་ཞུགས། །ཚེ་འདིར་ཆགས་པས་བློ་ནི་རྨོངས་པར་བྱས། །བྱམས་པས་བསྐྱངས་ལའང་དྲིན་དུ་གཟོ་བ་སྤངས། །ཆོས་ཀྱི་འདུ་ཤེས་ལས་ནི་རང་ཉམས་པ། །དེ་དག་རྣམ་དཀར་ལས་ལ་ཁྱོད་བཀས་ཞུགས། །དོན་གཉེར་བ་འགའ་ཞིག་ལ། མགོན་པོ་བཀའ་བཅུ་གསུམ་གྱི་རྗེས་གནང། ནམ་མཁའ་སྒོ་འབྱེད་ཀྱི་དབང། བསྒྲུབ་བྱ་བརྒྱད་ལ་
རབ་བྱུང་བསྙེན་རྫོགས་འདོད་མོས་བཞིན་གནང། དཔྱིད་ཆོས་ཆེན་མོར་བགྲོ་གླེང་གི་རྒྱུགས་བཞེས་ཤིང། བླ་སློབ་ཐམས་ཅད་འཆད་ཉན་ལ་འདུན་པ་ཆིག་དྲིལ་གྱིས་ཐུབ་བསྟན་མཛེས་པའི་རྒྱན་དུ་མཐོང་བ་ནི་རྒྱལ་བུ་རྒྱལ་བྱེད་ཀྱི་ཚལ་གཉིས་པ་ལྟ་བུར་གྱུར། ཆོས་ཐོག་དང། ཆོས་མཇུག་ཏུ་སྔར་གྱི་འགྲིག་ལམ་དེ་དག་དང། མདུན་རི་དང། རྒྱབ་རི་སོགས་སུ་ཐོད་རྒལ་དུ་ལམ་མི་བཏོད་པ་དང། ལུང་བསྟན་ལྟར་གྱི་ས་དཔྱད་ལ་གནོད་པའི་ས་རྐོ་རྡོ་སློག་བྱུང་རྒྱལ་དུ་བྱས་ན་སྤྱི་སྒེར་ལ་གནོད་ཚུལ། ཐ་མ་ཁ་ལ་བཀག་ཆ་གང་ལྕི། རི་རྒྱ། ཀླུང་རྒྱ། ཀུ་ཅོ་རྒྱང་སྐད་སོགས་རེ་རེ་ལ་འདུལ་བ་མདོ་རྩ་དང། བྱང་ས་བསླབ་བཏུས་སོགས་དྲངས་ནས་ཚོགས་གཏམ་སེམས་ལ་ཕན་པ་གནང་བས། དགེ་འདུན་རྣམས་སྟོན་པའི་འཁོར་གྱི་ཉན་ཐོས་ལྟར་དུལ་ཞིང། སྐྱེ་བོ་ཀུན་གཅིག་ཏུ་རྣམ་པར་དཀར་བའི་ལས་ལ་འདུན་པར་གྱུར། དེ་ཡང་ཚོགས་ཆོས་གྲྭའི་སྒྲིག་ལམ་ནི་ཀུན་གྱི་རྩ་བ་ཡིན་ཀྱང། སྨིག་ཚལ་བྲེགས་པས་ཨ་མྲའི་ཚལ་ཉམས་བཞིན། །གསུངས་པ་ལྟར་ཕྲན་ཚེགས་ཀྱི་རིགས་སྣང་མེད་བྱས་ན་རྩ་བ་ཆེན་པོ་ཚོ་ཡང་ཉམས་འགྲོ་བས་གནད་གཅིག་ཏུ་བསྒྲིལ་དགོས་གསུངས། ཁྲིར་བཞུགས་པའི་ལོ་དང་པོར་ལམ་རིམ་ཆུང་ངུ་སྐྱེས་བུ་ཆུང་འབྲིང་གི་སྐོར་དང། ལོ་གཉིས་པར་ཆེན་པོའི་སྐོར། ས་རྒྱན་རིགས་ཚོགས་སོགས་སྦྱར་ཏེ། གསུང་བཤད་རྒྱས་པར་གྲུབ་ནས། ལོ་འདིར་འགྲེལ་པ་དོན་གསལ་གྱི་སྟེང་ནས་མངོན་རྟོགས་རྒྱན་དང་སྡུད་པ་སྦྱར། བརྒྱད་སྟོང་པ་ཕལ་ཆེར་དྲངས་ཤིང། ཡུམ་རྒྱས་འབྲིང་གཉིས་དང་སྦྱར་ཚུལ་འགྲེལ་པ་དང་བསྒྲིགས་ནས་རྒྱ་འགྲེལ་སོ་
སོའི་མདོ་རྒྱན་གྱི་བཤད་པ་མི་འདྲ་བ་དག་དང། སེ་འབྲས་དགེ་གསུམ་གྱི་ཡིག་ཆ་སོ་སོ་ལ་དོགས་གཅོད། དགག་བཞག་དང་བཅས་འབྱམས་ཀླས་པར་སྩལ་བས་འཕགས་སེང་གཉིས་དངོས་སུ་བྱོན་ཀྱང་འདི་ལས་ལྷག་པ་རང་རེ་ལ་གསུང་དུ་མེད་ཅེས་ཀུན་གྱིས་མགྲིན་གཅིག་ཏུ་གླེང། མདོ་རྒྱན་སྦྱར་ནས་ཐོས་བསམ་གཤའ་མ་བྱེད་མཁན་དང། ཟིན་བྲིས་ཐོར་བུ་བྱེད་མཁན་ཆེས་ཤིན་ཏུ་མང་ལ། དྲུང་ཡིག་དགེ་འདུན། མཛོད་དགེ་བློ་བཟང། ཐོར་གོད་ཆོས་ལྡན། དཀོན་མཆོག་དབང་ཕྱུག་སོགས་ཆ་ཚང་ཟིན་བྲིས་མཁན་ཡང་མང་བར་སྣང། མཁས་མང་ལྷ་བརྒྱས་ཉེར་བསྟེན་སུམ་རྩེན་གནས། །སྡེ་བཞིའི་བང་རིམ་རྣམ་བཀྲ་རི་དབང་སྤོར། །མཁྱེན་པའི་སྤྱན་སྟོང་གཡོ་བ་ཁྱོད་ཀྱིས་ནི། །འཆད་ཉན་དགག་སྒྲུབ་རྩེ་བརྒྱ་ཕྱར་ཙམ་གྱིས། །འགལ་འདུའི་ས་འཛིན་གཏིང་ན་མལ་བཅས་པའི། །ཕྱོགས་རེས་ཁེངས་ལྡན་རྨོངས་པའི་སྦྱིན་སྐྱེས་འགའ། །ཆོས་མིན་སྤྱོད་པའི་རུ་མཚོན་ཉལ་གྱིས་སོང། །སྐྲག་བཞིན་འདར་བཞིན་ཞུམ་པའི་ས་འོག་ཚུད། །དགོས་པ་མེད་པར་དབྱར་སྟོན་རོང་འབྲོག་ཏུ་འགྲོ་བ་ལ་བཀག་ཆ་ཆེ་བ་མཛད་ཅིང། ལྷག་པར་མཚན་ཉིད་ཀྱི་སློབ་གཉེར་ཐད་ལྷོད་མེད་པར་རྒྱུན་བསྲིང་བ་གལ་ཆེ་བས་འགྲོ་འདུག་མང་ན་སློབ་གཉེར་ལ་གནོད། མཚན་ཉིད་བདར་ཤ་ཆོད་པ་མེད་ན་རིགས་པའི་ལམ་ནས་དྲངས་པའི་ཐོས་བསམ་སྒོམ་གསུམ་རང་ཚུགས་ཟིན་པ་ཡོང་དཀའ་ཞིང། བླུན་སྒོམ་གྱིས་གང་ཡང་མི་ཡོང་བས་ས་མི་ཆོད་དགོངས་ནས་མཁས་གྲུབ་རྗེས་དགའ་ལྡན་དུ་མཚན་ཉིད་བཙུགས་པ་ཤེས་དགོས། ཕ་མའི་དྲིན་གཟོ་འདོད་ན་ཡང་གཡོག་བྱེད་པ་ལས་ཆོས་བསྒྲུབ་པ་དྲིན་གཟོའི་མཆོག་ཡིན་ཞེས་མཁས་གྲུབ་ཐམས་ཅད་མཁྱེན་པས། ཐོས་བསམ་སྒོམ་པའི་བྱ་བ་ཡལ་བོར་ནས། །མ་
མའི་བསྙེན་བཀུར་ཙམ་ལ་ཆགས་པ་ནི། །རྒྱལ་བའི་ལམ་བཟང་དེ་ཉིད་མ་རིག་པའི། །འཇིག་རྟེན་རྒན་པོའི་སྤྱོད་ཚུལ་ལགས་པར་འཁུམས། །ཞེས་པ་དྲངས། སྔ་ཕྱིར་བསྒྲུབ་བྱ་ཉེར་དགུ་བསླབ་པ་ཡོངས་རྫོགས་ཀྱི་གཞི་ལ་བཀོད། ཉེར་དྲུག་དགེ་ཚུལ་བསྒྲུབས་ཤིང། ཆོས་གྲྭ་ལ་མི་གནོད་པའི་སེང་བར་གང་ཡོད་ལ་མི་ལའི་རྣམ་མགུར་གྱི་ལུང། སྨེ་བརྩེགས། ཚོགས་བདག །རིག་བྱེད་མ། མགོན་པོ་ཞལ། མི་གཡོ་བ། རྣམ་སྲས་མདུང་དམར་ཅན། ལྷ་བཞི་དྲིལ་སྒྲུབ། སྒྲོལ་མ་དཀར་ལྗང། རྣམ་རྒྱལ་མ། རྣམ་འཇོམས། ལོ་གྱོན་མ་སོགས་ཀྱི་རྗེས་གནང། ཐུགས་རྗེ་ཆེན་པོའི་དབང། བསྒྲུབ་བྱ་དྲུག་བསྙེན་རྫོགས། གཉིས་དགེ་ཚུལ། དགེ་ཚུལ་མ་གཅིག་བཅས་སོ་སོར་ཆོས་མཐུན་གྱི་རེ་བ་སྨིན་པར་མཛད། བླ་མ་གླིང་བསྲེའི་ཉིན་དང་པོར་པོ་ཏི་ལྔའི་གསུང་བཤད་གང་རྒྱས། བགྲོ་གླེང་ལ་ལན་ངར་ཞིང་མྱུར་བ་སོགས་རྗེས་འཇུག་གི་མིག་ལྟོས་ལ་ཕན་པ་ཁོ་ན་མཛད། ཉིན་གཉིས་པར་མཁས་བཙུན་གྱི་གྲགས་སྙན་རྣ་བའི་རྒྱན་དུ་འབར་བའི་དུས་འཁོར་དཔོན་སློབ་ངག་དབང་དོན་གྲུབ་ནས་འགྲེལ་ཆེན་དྲི་མེད་འོད་ལ་བཤད་པ་མཛད་པར་མི་འགྱུར་བའི་བདེ་བ་ཉི་ཁྲི་ཆིག་སྟོང་གིས་སྒྲིབ་གཉིས་སྤོང་ཚུལ་ལས་བརྩམས་ནས་བགྲོ་གླེང་གནང་བར། ཁོང་སྔོན་གྱི་དགེ་བཤེས་རྙིང་པ་ཡིན་པས། སྐད་ཀྱི་གཟེངས་མཐོ་ཞིང། སྐུ་གཟུགས་བརྗིད་པ་སོགས་ཀྱིས་གཞན་ཡིན་ན་འདར་བར་འོས་པ་ཙམ་གྱི་ལན་མཛད་ཀྱང་ལུང་རིགས་སྤྲོས་པ་ན་རིམ་གྱིས་གསུང་གདངས་ཆག་པར་གྱུར། དངུལ་སྲང་སྟོང་དང་དྲུག་བརྒྱ་ལྔ་བཅུ་སྐོར་གྱིས་རིགས་གྲྭའི་ཕོགས་ཆེན་ལ། ཇ་ལན་འདུའུ་བརྒྱ་སྐོར་གྱི་ཕོགས་སོགས་འགྱེད་སྣ་བརྒྱད་དང།
ཟམ་དམར་ཆ་བདུན་བརྒྱ་བཞི་བཅུ་སྐོར་གྱིས། ཐོས་བསམ་གླིང་ལ་རས་ཡ་རེའི་འགྱེད་བཏང། ཐུགས་བསྐྱེད་གསེར་འགྱུར་རྩི་ཡིས་རེག་པའི་མདོ། །དད་གཤིན་དཀོར་གྱི་ཕུང་པོ་ལྕགས་ཀྱི་ཁམས། །ཚོགས་གཉིས་འཛམ་བུའི་གསེར་དུ་བསྒྱུར་བ་ལས། །འབྲེལ་ཐོགས་རྒྱལ་བའི་སྐུ་ཡི་ཁམས་སུ་བསྒྲུབ། །ལོ་སྔ་མར་རྗེ་ཐུའུ་བཀྭན་རིན་པོ་ཆེ་བཀྲ་ཤིས་འཁྱིལ་དུ་བྱོན་སྐབས། གཞུང་གི་ཚོགས་འདུ་ནས་རྗེ་འདི་ཉིད་ཀྱི་ཞབས་བརྟན་སོགས་བརྟགས་པ་ནན་ཆེན་ཞུས་ཏེ་ཕྲན་བཀའ་ལན་ཞུ་བར་སོང་བ་ན། བཀའ་གསལ་དཔྱིས་ཕྱིན་པ་གནང་ནས་དེ་རྣམས་གསལ་པོ་བྱུང། ཆོས་སྐྱོང་ཞིག་གི་ཐུགས་དམ་སྐོང་དགོས་པའི་ཉམས་ཤིག་འདུག་ཀྱང་ཁོང་ཉིད་ལ་ཞུས་ན་མཁྱེན་ཡོང་མོད་གསུངས། དེ་རྗེ་ཉིད་ལ་ཞུས་པས། ཞལ་ནས། དེ་མི་ཤེས་རྒྱུ་མེད། ཆོས་རྒྱལ་ཡིན་གསུངས། དེ་ཅི་ལགས་ཞུས་པས། སྔ་སོར་ལྕགས་མཁར་གྱི་ཚོགས་དབུར་བཞུགས་སྐབས། དམ་ཚིག་མི་གཙང་བའི་ས་ནས་རྫས་འབག་བྱུང་བའི་རྐྱེན་གྱིས་འཚུབ་ཉམས་དངོས་སུ་ཆེ་ལ། མནལ་ལམ་དུ། མགོན་ཁང་གི་ཆོས་རྒྱལ་ཁྲག་རོལ་མའི་མདུན་དུ་བྱོན་ནས་བསྟན་པའི་འཕེལ་རྒྱས་ཀྱི་ཆེད་དུ་འཕྲིན་བཅོལ་བྱེད་རྩིས་ལ། མ་ཧེའི་འོག་ན་དགྲ་བགེགས་ལུས་ཕྱེད་པ་ཞིག་འདུག་གསུངས། དུས་རྒྱུན་སྒྲུབ་གཏོར་གྱི་རིགས་འཁྱག་པ་དང་རུལ་བ་སོགས་མི་སྲིད་ཀྱང་ལྷག་པར་སྐབས་འདིར་ལྕགས་མཁར་མར་ཁུ་ཞུ་བ་ལྟ་བུར་གདན་འདྲེན་དཀའ་བ་བྱུང་ཞེས་མཆོད་དཔོན་གྱིས་གླེང། ཚུལ་དེར་དམིགས་ནས། དངུལ་སྲང་བརྒྱ་སྐོར་གྱི་ཟོང་གི་གོས་རྒྱུ་བཟང་འབའ་ཞིག་ལས། ཆོས་རྒྱལ་གྱི་གོས་ཐང་འཆམ་གྱི་ཉིན་བཀྲམ་རྒྱུར་བཞེངས་པར་མཛད། དེ་ཕྱིན་ཆད་གཞུང་གི་འདི་མི་མང་གི་སྤྱི་ལ་སོང་བ་དངོས་གཙང་ཡོང་དཀའ་གསུངས་ནས། གསེར་
ཁང་ཆེན་མོར། བླ་བྲང་ཐུབ་བསྟན་ཕོ་བྲང་ནས་སྲད་རྒྱུད་ལུགས་ཀྱི་ཕྱི་སྒྲུབ་ཀྱི་ལྕགས་མཁར་ཆག་མེད་དུ་བསྒྲུབ་པའི་རྡོ་རྗེ་སློབ་དཔོན་ལོ་རེ་བཞིན་མཛད། དེ་དག་གི་སྐབས་སུ་མཁས་གྲུབ་རིན་པོ་ཆེ་ཡིན་ཟེར་ཀྱང་དོན་ལ་རྗེ་འདི་ཉིད་བཞེངས་ནས། སངས་རྒྱས་ཀྱི་བསྟན་པ་འདིའི་དོན་ལ་ཞེས་ཚོགས་གཏམ་གནང་བ་སོགས་སྒྲུབ་པ་པོ་རྣམས་ལ་མཚན་ལྟས་ངོ་མཚར་བ་མང་པོ་བྱུང་བ་ཡོད་ཀྱང་མ་བྲིས། ལོ་འདིར་བདུན་པའི་ཉི་ཤུ་དགུ་ལ་ལྕགས་མཁར་འཕངས་པས། གཏོར་ཟོར་བརྡབ་པ་དང་དུས་མཉམ་དུ་ཁ་བ་བབས་ནས་རི་ཐམས་ཅད་དཀར་པོར་གྱུར། བསྟན་པ་སྤྱི་ལ་དམིགས་པ་ཁོ་ན་ཡིན་ཀྱང། ཡབ་རྗེ་མཆོག་ལ་དགྲར་འཛིན་པ་དུ་མ་བཛྲ་མུའི་གནས་སུ་སོང་བས། རྗེ་དགེ་འདུན་གྲུབ་ཀྱིས། མ་བསྐུལ་བར་ཡང་མཐུན་པའི་ལས་ཀུན་བསྒྲུབས། །གསུངས་པ་ལྟར་མངོན་དུ་གྱུར། སྟོན་ཆོས་གསུམ་པ་ལ་འཆད་ཉན་གོང་འཕེལ་དང། ཁྱད་པར་སྲོད་ཆོས་ལ་རྩལ་འདོན་མཛད། དགུན་ཆོས་ལ་ལོ་སྔ་མ་ལྟར་འཆད་ཉན་དང། ཕར་ཕྱིན་སྟོན་མོའི་སྐབས་འཛིན་གྲྭ་སོ་སོར་འཕྲོས་པ་དང། དོགས་གཅོད་གནང་བས་ཀུན་གྱིས་དོན་གཉེར་དང། བློ་གྲོས་ཡར་ཟླ་ལྟར་འཕེལ། དགུང་ལོ་སོ་བཞི་པ་ཤིང་ཡོས་ལོ་གསུང་ཆོས་ལ་བཀའ་གདམས་གཞུང་དྲུག་གི་གསུང་བཤད་ལོ་སྔ་མ་བས་ཀྱང་རྒྱས་པ་གནང། བསྙེན་རྫོགས་པ་ཞེ་བདུན་དང། དགེ་ཚུལ་དྲུག་ཅུ་རེ་བདུན་བསླབ་པའི་གཞི་ལ་བཀོད་ཅིང། དབང་དང་རྗེས་གནང་སོགས་སོ་སོའི་འདོད་མོས་བཞིན་སྩལ། དཔྱིད་ཆོས་ཆེན་མོ་དང། དཔྱིད་ཆོས་གཉིས་པ་ལ་བགྲོ་གླེང་དང་བརྩི་བཞག་གི་རྒྱུགས་རིམ་པར་བཞེས་ནས་རྒྱུགས་མ་འཕྲོད་པ་རྣམས་བསྡུས་ཆུང་གི་འཛིན་གྲྭ་བྱས་ཏེ་ཕར་ཕྱིན་སྟོན་མོ་མན་ཆད་དུ་སློབ་
གཉེར་མི་བྱེད་པར་བསྡད་མི་ཆོག་པའི་སྒྲིག་ལམ་ལ་རྟིང་བསྐུལ་ཚ་ནན་མཛད། དེ་ཡང་དགེ་འདུན་གྱི་བཅའ་ཁྲིམས་དམ་པར་བྱེད་པ་ནི་སྙིགས་མའི་དུས་སུ་བསྟན་པ་བསྲུང་བའི་མཆོག་ཏུ་བཅོམ་ལྡན་འདས་ཀྱིས་བསྔགས་ཏེ། ནམ་མཁའི་སྤྱན་གྱི་མདོ་དྲངས་པ་ལས། རྒྱལ་པོ་ཆེན་པོ་མ་འོངས་པའི་དུས་ན་གང་དེ་བཞིན་གཤེགས་པས་ཉན་ཐོས་རྣམས་ལ་བསླབ་པའི་ཁྲིམས་སུ་བཅའ་བ་འཆའ་བར་བྱེད་དེ། གནོང་མི་བཀུར་བ་རྣམས་ཚར་བཅད་པ་དང། ངོ་ཚ་ཤེས་པ་རྣམས་བདེ་བ་ལ་རེག་པར་གནས་པ་དང། ཚེ་འདིའི་ཟག་པ་སྤངས་པ་དང། མ་འོངས་པའི་ཟག་པ་བསྡམས་པ་དང། ངའི་བསྟན་པ་རིང་དུ་གནས་པར་བྱ་བའི་ཕྱིར་ལམ་གོལ་བར་ཞུགས་པ་ཁ་ཅིག་ལ་ལུས་དུབ་པ་སྤྱད་པའི་ཆད་པ་བཅའོ། །ཁ་ཅིག་ལ་ཡིད་དུ་མི་འོང་བ་དང་ཕྲད་པའི་ཆད་པའོ། །ཁ་ཅིག་ནི་དབྱུང་ཞིང་ཐ་དད་དུ་གནས་པའི་ཆད་པའོ། །ཁ་ཅིག་ནི་བསྙིལ་ཞིང་སྨད་པར་འོས་པའི་ཆད་པ་བཅད་དེ། རྒྱལ་རིགས་ད་ལྟ་བྱུང་བ་ཁྱེད་དང་མ་འོངས་པ་ཐམས་ཅད་ཀྱི་ལག་ཏུ་ཉན་ཐོས་ཀྱི་ཁྲིམས་སུ་བྱ་བ་གཏད་དོ། །ཞེས་པ་ནས། ལྔ་བརྒྱ་ཐ་མའི་བར་དུ་དེ་ལྟ་བུའི་བརྩོན་པ་དང། ཕ་རོལ་གནོན་པས་ངའི་ཆོས་ཀྱི་ཚུལ་འབར་བར་བྱེད་པ་དེ་དག་ནི་སངས་རྒྱས་ཀྱི་བསྟན་པ་བསྲུང་བ་ཡིན་ཏེ། ལྷ་རྣམས་ཀྱང་བསྲུང་ཞིང་ཡོངས་སུ་སྐྱོབ་པར་འགྱུར་རོ། །ཞེས་དགེ་འདུན་གྱི་བཅའ་ཁྲིམས་དགེ་སློང་གིས་བསྲུང་མི་ནུས་ན་རྒྱལ་པོས་ཀྱང་བསྲུང་དགོས་པར་གསུངས་སོ། །མདོ་གཞན་ལས་ཀྱང། སངས་རྒྱས་མྱ་ངན་ལས་འདའ་ཁར་ཚངས་པ་ཆེན་པོ་སྟོང་གསུམ་གྱི་འཇིག་རྟེན་གྱི་ཁམས་འདི་ནི་ངའི་སངས་རྒྱས་ཀྱི་ཞིང་ཡིན་པས། འཇིག་རྟེན་འདི་ཁྱོད་ལ་གཏད་ཀྱི་དགེ་བའི་ཚུལ་དང་དཀོན་མཆོག་གསུམ་གྱི་ཚུལ་རྒྱུན་མི་འཆད་པར་གྱིས་ཤིག །ངའི་བུ་ཐུ་བོ་སྐྱེ་བོ་མང་
པོའི་དོན་འདོད་པ་འོང་བ་རྣམས་ལ་ང་ལ་རྗེས་སུ་མཐུན་པར་བྱེད་པ་དེ་བཞིན་དུ་རྗེས་སུ་མཐུན་པར་གྱིས་ཤིག །ཅེས་ཞིང་ཁམས་གཏད་པར་གསུངས་པ་སོགས་ཐུབ་པའི་དབང་པོའི་བཀའ་དྲིན་དྲན་ནས་བཤད་སྒྲུབ་ལ་བརྩོན་པར་བྱ་དགོས་སོ། །སྔ་སོར་སྐུ་ཁམས་མ་བདེ་བའི་སྐབས་ཡབ་རྗེ་མཆོག་ནས་འཇིགས་བྱེད་སྦྱིན་སྲེག་དང། ལོ་སྔ་མར་ཐུའུ་བཀྭན་རིན་པོ་ཆེ་ནས་རྟ་མགྲིན་སྦྱིན་སྲེག་གནང་བ་ཆོད་ཆེ་བ་བྱུང་བས། སྐབས་འདིར་ཡང་འཚུབ་ཉམས་བཟློག་ཕྱིར་རྒྱུད་པ་གྲྭ་ཚང་ནས་སྦྱིན་སྲེག་བསྒྲུབ་དགོས་གསུངས་པ་ལྟར། ཕྲན་གྱིས་རྡོ་རྗེ་སློབ་དཔོན་བྱས་ནས་བདེ་མཆོག་གི་སྦྱིན་སྲེག་བཀའ་ལྟར་བསྒྲུབས། བཞན་ཡང་ཁྲིར་བཞུགས་རིང་གྲྭ་ཚང་གི་འཆད་ཉན་འཕེལ་རྒྱས་དང། བསྟན་པ་སྤྱིའི་རིམ་གྲོར་གུང་ཐང་བླ་བྲང་རང་ནས་ལོ་རེ་བཞིན་མགོན་པོའི་གཏོར་སྒྲུབ་གཉིས་རེ། གདུགས་དཀར་བཟློག་ཆེན། སྒྲོལ་མ་གཡུལ་བཟློག །སེང་གདོང་མའི་གཏོར་བཟློག །སྒྲོལ་དཀར་ཚེ་སྒྲུབ། མགོན་ཆོས། ཞལ། ལྷ་མོ་རྣམས་ཀྱི་བསྐང་བ་ཁྲི་ཚར་རེ། མགོན་པོའི་གློ་བུར་ལས་བཅོལ་བཅས་ཆག་མེད་དང། རྟ་མགྲིན་བྱེ་བ། སེང་གདོང་མ་བྱེ་བ། གདུགས་དཀར་འབུམ་ཐེར། རྣམ་རྒྱལ་གཟུངས་རིང་འབུམ་ཐེར། མགོན་པོའི་བསྐང་བ་འབུམ་ཐེར་སོགས་བསྒྲུབས་པ་དང། ཡབ་རྗེ་རྡོ་རྗེ་འཆང་གི་མཆོག་གི་སྤྲུལ་བའི་སྐུ་མྱུར་གསལ་གྱི་ཆེད་དུ། བླ་བྲང་ཆེན་མོར་གསུང་བཀོད་གནང་ནས། ཕྲན་རང་ཉིད་རྡོ་རྗེ་སློབ་དཔོན་བྱས་ནས་བསྙེན་སོང་དམ་གཙང་སྡེ་སྣོད་འཛིན་པ་ལྷ་གྲངས་ཀྱིས་རྡོ་རྗེ་འཇིགས་བྱེད་ཀྱི་ཞི་རྒྱས་དབང་གསུམ་གྱི་སྦྱིན་སྲེག་བཟླས་པའི་བཅུ་ཆ་རེ། མགོན་པོའི་ཞི་བའི་གཏོར་སྒྲུབ། བར་ཆད་སེལ་བའི་གཏོར་སྒྲུབ་ཀྱི་སྒོ་ནས་ཡུངས་ཀར་གྱི་སྦྱིན་སྲེག་ཁྲི་ཕྲག །
ལྕགས་མཁར་ཆེན་མོ་ལན་གསུམ་འཕངས་ཤིང། གྲྭ་ཚང་སོ་སོ་དང། གྲྭ་དཔོན་སློབ་སོ་སོས་ཡི་དམ་ཆོས་སྐྱོང་དུ་མའི་བསྙེན་སྒྲུབ་བསྐང་གསོ། མདོ་རྒྱུད་ཀྱི་ཀློག་འདོན་སོགས་བར་མ་ཆད་དུ་བསྒྲུབ་པ་ཞིབ་པར་མ་ངེས། གཟིམས་ཆུང་ཐུབ་བསྟན་ཕོ་བྲང་དུ་བཀའ་གདམས་ཐིག་ལེ་བཅུ་དྲུག་གི་སྒྲུབ་མཆོད་ཟླ་གང་མ་སྔ་ཕྱིར་ཡང་ཡང་བསྒྲུབས་པ་སོགས་དང། ཚོགས་ཆེན་ནས་ལོ་སྔ་མ་གཉིས་ལ། འཇིགས་བྱེད་ཀྱི་རྩ་སྔགས་དུང་ཕྱུར། ཁྲོ་བཅུའི་བསྙེན་པ་བྱེ་ཆེན། མགོན་ཆོས་གཉིས་ཀྱི་བསྐང་བ་འབུམ་ཐེར་རེ་ངོས་གཙང་བ་བསྒྲུབས་ནས། བཞི་པའི་ཚེས་གཅིག་གི་ཉིན་རྗེ་ཉིད་ནས་རྡོ་རྗེ་སློབ་དཔོན་མཛད། རུས་རྒྱན་སོགས་བཞེས་ནས་རྡོ་བཅལ་ཆེན་མོར་སྦྱིན་སྲེག་མཛད་པས་ལེགས་ཚོགས་ཀྱི་མཚན་མ་ཚེས་ཀྱི་འཕེལ་བ་ལྟ་བུར་གྱུར་པ་འདི་ཡང་རྗེ་ཡབ་སྲས་ནས་བདུད་ཀྱི་དམག་དཔུང་བཅོམ་པའི་རྣམ་པར་ཐར་པའི་རྗེས་འགྲོ་ཙམ་དུ་སེམས། དབྱར་ཆོས་དང་རིགས་གྲྭ་ལ་འགྲེལ་པ་དོན་གསལ་གྱི་སྟེང་ནས་མདོ་རྒྱན་སྦྱར་བའི་གསུང་བཤད་གྲུབ་པར་མཛད་པས་བློ་གསལ་བྱེ་བའི་ཡིད་ཀྱི་བུམ་བཟང་ལེགས་བཤད་བདུད་རྩིའི་བཅུད་ཀྱིས་ཡོངས་སུ་གང་བར་གྱུར། གསུང་རབ་ཀུན་གྱི་ཕུལ་གྱུར་ཤེར་ཕྱིན་མདོ། །དེའི་རྒྱན་ཚིག་ལེའུར་བྱས་པ་དང་སྦྱར་ནས། །དངོས་བསྟན་སྦས་དོན་སྦྱར་བའི་ཟབ་རྒྱས་ལམ། །འཆད་ལ་འཕགས་སེང་ལས་ཀྱང་བརྒལ་མིན་ནམ། །ཤེས་རབ་ཕ་རོལ་ཕྱིན་པའི་རང་བཞིན་ལུས། །དངོས་བརྒྱད་བདུན་ཅུའི་དོ་ཤལ་རྣམ་བཀྲ་བ། །གསལ་བྱེད་རྒྱན་གྱི་མེ་ལོང་ནང་ཤར་གཟུགས། །འཆད་མཁས་ངག་གི་སོར་མོས་མཛུབ་ཚུགས་བསྟན། །སྟོན་ཆོས་ཆེན་མོར་བརྩི་བཞག་གི་རྒྱུགས་བླངས་པས་བསྡུས་ཆུང་ལ་ཞལ་འདེབས་གསུམ་བཞི་ཙམ་བྱུང་བ་མ་གཏོགས་
ཀུན་ལ་བརྩི་བཞག་ངེས་པོ་བྱུང་བ་ལ་དགྱེས་ཚོར་ཆེ་བ་མཛད། ལོ་འདིར་རིགས་གྲྭ་སྔར་ལས་ཀྱང་ངོས་གཙང་བའི་ཐོག །སྟོན་ཆོས་གཉིས་པར་ཐོས་བསམ་གླིང་ལ་གྲྭ་ཇ། འབྲས་ཐུག་སྔར་ལྟར་མཛད། བྱས་པ་ཆུང་ངུ་ལ་ཡང་རྣམ་སྨིན་ཆེར། །འབྱུང་བའི་ཞིང་མཆོག་མཆོད་པའི་ཆར་རྒྱུན་གྱིས། །ཕྲ་མོའི་རྒྱུ་ལས་ལེགས་ཚོགས་མྱུ་གུའི་ཚལ། །བསྐྲུན་པའི་ཐབས་མཁས་བྱེད་པོ་ཁྱོད་མིན་སུ། །སྔར་ཀུན་མཁྱེན་གོང་མས་སྡེ་འདིར་འཇིགས་བྱེད་ཀྱི་རྩ་སྔགས་བསྙེན་པ་དུང་ཕྱུར་བདུན་སོང་ན། མི་དང་མི་མིན་གྱིས་གླགས་མི་རྙེད་ཅེས་པའི་གསུང་རྒྱུན་ལྟར། འཇམ་མགོན་ཁྲི་རིན་པོ་ཆེ་ངག་དབང་བཀྲ་ཤིས་ཀྱི་དུས་སུ་དུང་ཕྱུར་གཉིས། ལོ་སྔ་མ་གཉིས་ལ་དུང་ཕྱུར་གཅིག །ལོ་འདིར་སླར་ཡང་དུང་ཕྱུར་གཅིག་གི་དབུ་བཙུགས་ནས་ལྔ་མཆོད་དང་དགུན་ཆོས་ལ་འགྲོ་ཆེ་བར་མཛད། དུས་རྒྱུན་ཕལ་ཆེར་འདུ་ཁང་སྟེང་དུ་བཞུགས་ནས་ཚོགས་ཀྱི་ཞལ་འདོན་ཀུན་སྤྱོད། ཆོས་གྲྭའི་རྩོད་གྲྭ། གྲྭ་ཚང་སོ་སོའི་འཆད་ཉན་སྒྲིག་ལམ། སོ་སོའི་གཏོར་ཆེན། ལག་ཁྲིད། སྒྲུབ་མཆོད་སོགས་དང། ཆོས་མཚམས་ཀྱི་སྐྱོར་སྦྱངས་སོགས་ཐམས་ཅད་ལ་སྤྱན་རས་ཀྱིས་བཙའ་བར་མཛད་པས་མེ་འབར་བ་ལ་བུད་ཤིང་བསྣན་པ་བཞིན་དུ། ཆོས་སྡེ་ཆེན་པོ་གང་གི་བཤད་སྒྲུབ་རྣམ་དཀར་གྱི་འོད་སྣང་མཁའ་ཁྱབ་རྒྱལ་ཀུན་དགྱེས་པའི་མཆོད་སྤྲིན་དུ་གྱུར། དགུང་ལོ་སོ་ལྔ་པ་མེ་འབྲུག་ལོ་འདོད་ཁམས་དབང་མོ་དགྱེས་པའི་དུས་གཏོར་དང། གྲྭ་མང་ལ་ལོ་གསར་གྱི་མཇལ་ཁ་གནང། དེ་དང་སྦྲགས་ནས་འཁུར་བ་དང། ཀ་ར་ཤིང་ཐོག་སོགས་བཀྱེ་བ་དང། དགོན་པའི་ནང་ཆེན། བླ་སྤྲུལ་སོ་སོ་ནས་གནམ་ལོ་གསར་ཚེས་ཀྱི་དཀར་སྤྲོ་འབུལ་བ་དང། དགྱེས་སྟོན་གནང་བ་ལོ་ལྟར་འཆར་ཅན་དུ་ཤེས་
པར་བྱ། སྨོན་ལམ་གསུང་ཆོས་ལ་ཆག་མེད་དུ་ཕེབས་ནས། འཕགས་ཆེན་རྣམས་ཀྱང་སོམ་ཉིའི་རྒྱ་ལ་འཐུམ་པ་སྙམ་བྱེད་པའི་བཀའ་གདམས་གཞུང་དྲུག་གི་དཀའ་གནད་ལྷུག་པར་བཀྲོལ། འབྱམས་བཤད་ཐང་མར་བདལ་བས། མཁས་པར་རློམ་པ་མཐའ་དག་གི་ང་རྒྱལ་གྱི་རི་བོ་ཕྱེ་མར་བརླག །སྨོན་ལམ་གྱི་ཚོགས་དབུར་ཕེབས་ཏེ་ཉི་མའི་གཉེན་གྱི་རིང་ལུགས་སྤྱི་དང། བྱེ་བྲག་འཇམ་མགོན་བླ་མའི་བཀའ་སྲོལ་དྲི་བྲལ་བསྟན་པའི་སྙིང་པོ་མཁའ་ཁྱབ་ཏུ་འཕེལ་བའི་ཐུགས་སྨོན་ཤུགས་དྲག་མཛད། ཁེངས་ལྡན་དུ་མས་མ་ལྕིགས་དཀའ་བའི་གནས། །ངལ་བ་མེད་པར་ལྷོད་ཀྱིས་བཀྲོལ་བ་ན། །ཟུར་ཕུད་ལྔ་པ་དགེ་སློང་གཟུགས་ཅན་ཞེས། །དཔྱོད་ལྡན་མགྲིན་མཚོར་བསྔགས་པའི་སྦྲང་གླུ་སྒྲོགས། །བསྔོ་ཡིག་རྣམས་འདག་པ་ལ་སྦྱར་ནས། སཙྪ་དང་སྐུ་པར་རྒྱུན་དུ་འདེབས་ཤིང། དེ་ཙམ་གྱི་རྟེན་བཞེངས་ལ་ཡང་སླ་ཆོས་མཛད་མི་སྲིད། གཟུངས་གཞུག་སོགས་ཀྱི་བསྔོ་སྨོན་ལ་བསྟན་པའི་འཕེལ་རྒྱས་དང་འབྲེལ་ཐོགས་དོན་ལྡན་དུ་འགྲོ་བ་ཁོ་ན་མཛད། གཞན་གྱིས་ཕུལ་བའི་དད་རྫས་རྣམས་ཆུད་མི་འཛའ་བར་མཆོག་གསུམ་གྱི་ཞིང་ལ་བསྔོས་ནས་བསྟན་འགྲོ་སྤྱི་སྒེར་ལ་གང་ཕན་ཐུགས་ལ་དགོངས་པ་ལས། སྦྱིན་བདག་གི་ངོ་འཛིན་སོགས་འབྱོར་པ་སྡུད་ཐབས་གཞན་ཕར་ཞོག །སྐུ་ན་ཕྲ་དུས་གསོལ་དཔོན་རབ་འབྱམས་པས་མྱུར་མ་དཔའ་མོའི་བསྙེན་པ་བདུན་མཚམས་ཤིག་བཙན་ཐབས་ཀྱིས་བྱེད་བཅུག་པ་མ་གཏོགས་ནོར་སྒྲུབ་དང་དབང་སྡུད་ཀྱི་རིགས་ཤིག་བྱེད་འདོད་པ་དང་བྱེད་མྱོང་བ་ཡིད་ལ་མི་དྲན་གསུངས། རྣམ་ཐར་སྤྲིང་ཡིག་ལས་ཀྱང། བཟླས་བརྗོད་དམིགས་པ་རྒྱ་ཆེན་དཀའ་ན་ཡང། །ཅུང་ཟད་ཕྱི་མའི་དོན་དུ་དམིགས་པ་ལས། །ནོར་སྒྲུབ་དབང་སྡུད་གཅིག་ཀྱང་མ་བྱས་
པ། །མཁོས་ཆུང་འདོད་པ་སྐྱུང་བའི་རྣམ་ཐར་ཡིན། །ཞེས་གསུངས་པ་ལྟར་རོ། །ཆོ་འཕྲུལ་དང། ས་ག་ཟླ་བའི་དུས་ཆེན་སོགས་སྔ་ཕྱིར་བསྒྲུབ་བྱ་དོན་ལྔ་ལ་ཚིགས་སྔ་ཕྱིའི་སྡོམ་པ་བསྩལ། དཔྱིད་ཆོས་ཆེན་མོར་བགྲོ་གླེང་གི་རྒྱུགས་བླངས་པས། མཛོད་པ་མན་ཆད་ན་སློབ་གཉེར་མི་བྱེད་མཁན་མེད་པར་གྲྭ་ཐོག་ངོས་གཙང་བ་བྱུང་བས་ཐུགས་ཤིན་ཏུ་དགྱེས། ཆོས་གྲྭའི་གསུང་ཆོས་ལ་འདུལ་བ་མདོ་རྩ་བའི་གཞུང་གི་འབྲུ་འགྲེལ་ཞིབ་མོ་དང། ལུང་སྡེ་བཞི་འགྲེལ་པ་དང་བཅས་པའི་བཤད་སྲོལ་གྱིས་བརྒྱན་པ་གནང་བཀག་གི་ཆ་ལ་འཁྲུལ་པ་ཆོད་ངེས་ཀྱི་གསུང་བཤད་གནང་བས་བསྟན་པའི་གཞི་རྩ་རྨང་ནས་གསོས། འདུལ་བ་འབུམ་སྡེའི་གཞུང་གི་ཆུ་གཏེར་ཆེ། །དགག་སྒྲུབ་གནང་གསུམ་བཅས་པའི་རླབས་འཁྲུགས་པས། །བློ་དམན་བྱིས་པ་སྙིང་ལ་འཇིགས་སྐྱེད་པར། །བདེ་བླག་བགྲོད་བྱེད་མན་ངག་གྲུ་གཟིངས་སྦྱར། །རིག་གནས་མང་ཐོས་འདབ་མ་རྣམ་བཀྲ་ཡང། །ཚུལ་ཁྲིམས་སྦྲང་རྩིའི་བཅུད་དང་མི་ལྡན་ན། །རི་མོར་བྲིས་པའི་མེ་ཏོག་ཇི་བཞིན་དུ། །སྙིང་པོས་སྟོངས་ཞེས་ཁྱོད་ཀྱིས་འགྲོ་ལ་བསྟན། །དེ་སླད་ཐར་པ་འདོད་པའི་སྐྱེ་བོ་རྣམས། །ཚུལ་གནས་ཐོས་བསམ་སྒོམ་པའི་ལྗོན་པ་ལས། །སྐུ་བཞིའི་འབྲས་བུ་གཡུར་དུ་ཟ་བ་ལ། །སྤྱོད་པའི་ཐབས་ཚུལ་དང་དུ་བླངས་པར་མཛོད། །སྔ་སོར་མི་ཡན་དབྱུང་བའི་སྐབས་དཔོན་ཚང་གཉེར་པ་མ་ལི་ཁ་རབ་འབྱམས་པའི་མི་སེར་ཞིག་ལ་ཚོགས་འདུ་ནས་ཚ་འཇུན་དྲག་པོ་བྱས་པའི་རྐྱེན་གྱིས་ཝང་གི་དཔོན་མོ་ལྷ་ས་ནས་ཕྱིར་ཕེབས་པ་དང། མཉམ་དུ་གཉེར་པ་བླ་མ་ཡང་འབྱོར་ནས་ཁ་མཆུ་བསླང་ཞིང། དེའི་རྟིང་པ་ཆེན་པོ་དུ་མས་མནན་ཏེ་དགོན་པའི་ལྷ་སྡེའི་དོན་སོགས་ལ་ཟིང་
ཆ་ཆེན་པོ་བྱུང་ཡང། ཟི་ལིང་ཨམ་བན་ནས་སྔར་གྱི་ལུགས་སྲོལ་གཏན་འཇགས་སུ་ཐག་བཅད། དགོན་པའི་ངོས་ནས་མཆོད་ཡོན་གྱི་འབྲེལ་ལམ་ནོར་བ་གང་ཡང་མ་བྱས་ཀྱང། དཔོན་ཚང་ནས་གཏེ་པོར་ངོས་གཟུང་བའི་མི་འགའ་ཨུ་གེ་ཐོག་ཏུ་སོང་ནས་བཤགས་པ་ཕུལ། ལྷ་སྡེའི་སྐོར་སོགས་ལ་གླེང་བརྗོད་མེད་པའི་ཡི་གེ་ཐེལ་རྟགས་བཅས་དཔོན་རང་ཉིད་ནས་གནང་སྟེ་འཁྲུན་ཆོད་པ་བྱུང། བླ་མ་གླིང་བསྲེའི་སྐབས་བླ་མ་ཡི་དམ་དབྱེར་མེད་ལ་གསོལ་བ་བཏབ་ན། མཆོག་ཐུན་གྱི་དངོས་གྲུབ་ལག་རྩེར་ཡོད་པ་དང། བར་ཆད་ཀྱི་སྣང་བ་འགའ་ཞིག་ལེགས་ཚོགས་ཀྱི་རྒྱུར་འགྱུར་བ་ཡང་ཡོད་པས། གང་ལ་ཡང་རེ་དོགས་མི་བྱ་བར་མཆོག་གསུམ་ལ་བློ་རྩེ་གཏད་དགོས་པ་སོགས་ཚོགས་གཏམ་གྱི་ཞར་ལ་གསུང་བཤད་རུས་པ་ཅན་དུ་མ་དང། པོ་ཏི་ལྔའི་དཀའ་གནད་ལ་འབྱམས་བཤད་བློ་ཡུལ་ལས་འདས་པ་མཛད། སྐུ་དོན་ཆེ་ཕྲ་གང་ལ་ཡང་གཞན་ལ་ལུང་ཞུ་དང་མོ་རྩིས་སོགས་མི་བྱེད་པར་ལྷོད་བཞུགས་གནང་ཞིང། གལ་ཆེར་སྙན་བསྐུལ་ཞུས་ན་ཡང་དཀོན་མཆོག་མཁྱེན་མོད། ལས་ལ་རག་ལས་མོད་ཅེས་དང། གཞན་ལ་ཡང། སྐྱིད་སྡུག་གང་ལ་ཡང་ལས་བདག་གིར་བྱས་ནས་དཀོན་མཆོག་ལ་བློ་གཏད་དགོས། སྡུག་བསྔལ་ལས་ངན་གྱི་འབྲས་བུ་དང། བདེ་སྐྱིད་དཀོན་མཆོག་གི་བཀའ་དྲིན་དུ་བསམ་ཤེས་དགོས་གསུངས། ཕལ་ཆེར་རེ་དོགས་བྱ་བའི་ལོ་མ་འགའ། །སྟོང་པའི་དབྱིངས་སུ་ཡལ་བའི་སྔོ་མདངས་གསལ། །གང་ཐུགས་མཁའ་ངོར་དུས་གསུམ་གཟིགས་པའི་ཉི། །གསལ་མོད་མ་བརྟགས་བྱ་བའི་མེ་ཏོག་གང། །བགྲང་ཡས་འཇིག་རྟེན་ཁམས་ཀྱི་འདུལ་བྱའི་ཚོགས། །བསམ་པ་ཐ་དད་འཇའ་ཚོན་ལྟར་བཀྲ་ན། །ལག་མཐིལ་ཁྱོན་གྱི་སྐྱེ་བོའི་ཟེར་སྒྲོས་
ལ། །རེ་དོགས་བྱེད་རྣམས་བྱིས་ལས་བྱིས་པ་འོ། །ཞེས་ཁོ་བོ་སྨྲའོ། །གླིང་བསྲེའི་ཉིན་དང་པོར་ཕྲན་གྱིས་འོག་མིན་སྟུག་པོ་བཀོད་པ་མཁའ་ཁྱབ་ཀྱི་འཇིག་རྟེན་ཡིན་མིན་ལས་བརྩམས་ཏེ་བགྲོ་གླེང་ཕུལ་བར་དགྱེས་ཉམས་ཆེ་བ་མཛད། ཉིན་གཉིས་པར་ཕྲན་གྱིས་མདོ་ལུགས་ལ་ཆོས་སྐུ་དང་རྣམ་མཐུན་གྱི་ལམ་ཡོད་པར་ཁས་བླངས་པ་ལ། དེས་ཆོས་སྐུ་འགྲུབ་མི་འགྲུབ་དང། ཆོས་སྐུ་འགྲུབ་བྱེད་ཀྱི་ལམ་ལ་གཉུག་སེམས་ཀྱིས་སྟོང་ཉིད་རྟོགས་པ་དགོས་མི་དགོས་སོགས་འཕེན་པ་གནང་བས་ཐེ་ཚོམ་གྱི་ཁྱོགས་ལ་འཕྱང་བར་གྱུར། ཡབ་རྗེ་དམ་པའི་སྲས་མཆོག་བུ་སློབ་ཞབས་ཕྱི་མང་བཅས་བཀའ་བགྲོས་ལྟར་རྗེ་བཙུན་དམ་པ་འཇིགས་མེད་རིགས་པའི་སེངྒེས་གཙོ་མཛད་པ་རྣམས་སྐྱབས་མགོན་མཆོག་གི་སྤྲུལ་སྐུའི་དོགས་གནས་བཞི་ཡོད་པ་སོ་སོར་ངོས་འཛིན་སྟོན་པར་ཕེབས། ཚུར་ཕེབས་འཕྲལ་ཐུའུ་བཀྭན་རྡོ་རྗེ་འཆང་བཀྲ་ཤིས་འཁྱིལ་དུ་གདན་དྲངས། ངོས་འཛིན་གྱི་སྐོར་སོགས་ཞིབ་བཀྲོལ་གྱིས་བཀའ་གྲོས་དང་གསུང་བརྟག་ཞུས་པར། རྗེ་དེ་ཉིད་ཀྱི་ཞལ་ནས། ངེད་ཀྱི་རྨི་ལམ་དུ། རྒྱལ་ཁབ་པེའི་ཅིང་ན། བསང་གི་ལྷ་སྡེ་འཚོགས་ནས་མདའ་འཕེན་པར། མི་ཞིག་གི་ལག་ན་མདའ་བཞི་ཡོད་པའི་གཉིས་པ་འབེན་ལ་ཕོག་པ་རྨིས་པས་དོགས་གནས་བཞི་པོ་འདིའི་ནང་ན་སྤྲུལ་སྐུ་འཁྲུལ་མེད་ཡོད་ངེས་སུ་སྣང། ཞེས་གསུངས་ཤིང་སྤྲུལ་སྐུའི་དོན་སྐོར་ཨམ་བྷན་བརྒྱུད་ནས་གོང་དུ་གྲེའུ་ཙེ་འབུལ་བར་ཐག་བཅད། ཡུན་རིང་རེ་བས་ངལ་བའི་མཚན་མོའི་མཐར། །སྐྱེ་རྒུའི་ལེགས་བྱས་ཤར་གྱི་རི་བོའི་རྩེར། །ཀུན་དགའི་སྣང་བ་སྦྱིན་པའི་འོད་སྟོང་ཅན། །འདྲེན་བྱེད་ཡིད་ཆེས་ལུང་གི་སྐྱ་རེངས་ཤར། །ཀུན་མཁྱེན་གོང་མའི་དངོས་སློབ་མ་ཎི་པ་ཤེས་རབ་
བཀྲ་ཤིས་དང། ཁྲི་ཆེན་དགེ་འདུན་ཕུན་ཚོགས་གཉིས་འཛིན་གྲྭ་གཅིག་ཅིང། དམ་ཚིག་གི་འབྲེལ་ཆེ་བའི་རྒྱུ་མཚན་དང་བཅས་སྔར་རྫོང་དཀར་སྤྲུལ་བའི་སྐུ་ནས་ཞལ་ཏ་དང་ཞལ་ཆེམས་ནན་ཏན་དུ་ཕུལ་ཡོད་པ་ལྟར་སྐབས་འདིར་ཆོས་སྲིད་ཀྱི་ཡོན་ཏན་དཔག་པར་དཀའ་ཞིང། བཀའ་གདམས་པའི་རྣམ་ཐར་ལས་ཅུང་ཟད་ཀྱང་མི་འདའ་བ་སྤྲུལ་བའི་སྐུ་བློ་བཟང་མཁས་མཆོག་ཞི་བར་གཤེགས་པའི་སར་གདན་དྲངས། ཐུགས་དགོངས་རྫོགས་ཤིང་སྤྲུལ་བའི་སྐུ་འཁྲུལ་མེད་མྱུར་དུ་འབྱོན་པ་སོགས་ཀྱི་ཐུགས་དམིགས་ཞལ་འདོན་རེ་བ་བཞིན་མཛད། སྤྲུལ་བའི་སྐུ་བློ་བཟང་བསྟན་པའི་ཉི་མས་འབུལ་ནོད་རྒྱ་ཆེར་ཕུལ་ཐོག་སླད་མར་གང་ཅིའི་མགོ་འདྲེན་གནང་དགོས་ཀྱི་ཞུ་བ་ནན་ཏན་མཛད་པས་བླ་སློབ་ཐམས་ཅད་ཐུགས་ཡིད་གཅིག་ཏུ་འདྲེས། ལམ་བར་ཇ་ཐབ་སྟེང་ནས་སྐྱེ་རྒུའི་གཙུག་རྒྱན་དམ་པ་ལ་མོ་ཞབས་དྲུང་སྤྲུལ་བའི་སྐུ་བློ་བཟང་དགེ་ལེགས་རྒྱལ་མཚན་དང་མཇལ་འཛོམ་མཛད། ཇ་སྦྱོར་བར་དུ་ཆོས་སྲིད་ཀྱི་གསུང་འཕྲོས་རྒྱུན་རིང་དང། ཕན་ཚུན་བཀུར་སྟི་ཕུ་དུད་རྨད་དུ་བྱུང་བས་ཀུན་གྱི་མིག་དང་ཡིད་ལ་བདེ་དགའ་སྟེར་བ་བྱུང། སྟོན་ཆོས་ཆེན་མོར་བརྩི་བཞག་གི་རྒྱུགས་བཞེས་པར། མཛོད་པ་མན་ཆད་ན་རྒྱུགས་མི་འཕྲོད་མཁན་མེད་པར་མ་ཟད། སྒྲ་དག་གསལ་གསུམ་བྱང་ཆ་འཛོམ་པ་ལ་ཐུགས་དགྱེས་པས། སྐལ་ལྡན་དེ་རྣམས་བླ་མ་སྒྲུབ་པའི་མཆོད་པས་དགྱེས་པར་བྱེད་པའི་ལེགས་སྨོན་ཅན་དུ་འཕྲིན་ལས་དུས་ལས་མི་ཡོལ་བའི་ལུང་རིགས་ཀྱིས་གྲུབ་བོ། །སྐབས་དེ་དག་ཏུ་ཆོས་ཤིག་འདོད་ན་ཞིམ་ཟས་ཟོས་ནས་སྐྱིད་ཉལ་བྱེད་པ་འདི་ཆོས་ཀྱི་གེགས་ཡིན། ཉ་པ་གདོལ་པ་ཞིང་པ་ལ་སོགས་པ། །རང་གི་འཚོ་བ་ཙམ་ཞིག་སེམས་པ་ཡང། །གྲང་
དང་ཚ་ལ་སོགས་པའི་གནོད་བཟོད་ན། །འགྲོ་བ་བདེ་ཕྱིར་བདག་ལྟ་ཅིས་མི་བཟོད། །ཅེས་པ་ལྟར་བསམ་བློ་བཏང་ནས་དཀའ་སྤྱད་བཟོད་དགོས། སྡུག་སྲན་ཆུང་ན་ཆོས་འགོ་མི་ཐོན་པ་ཡང་སྲིད། གཉོམ་གང་ཆུང་དང་སྡོད་གང་ཚུགས་བྱེད་དགོས། མི་མང་གི་འདུ་ཚོགས་དང་ལོང་གཏམ་འདི་མི་ཚེ་སྟོང་ཟད་དུ་གཏོང་བའི་རྐྱེན་སྡུག་ཤོས་ཡིན་པས་སྨྲ་བ་ཉུང་དགོས། ངག་འཁྱལ་གྱིས་གཞན་གྱི་དཔེ་ཆ་འཛིན་སྐྱོར། ཁ་འདོན་སོགས་ལ་བར་ཆད་བྱས་ན་ཉེས་པ་ཆེ་བས་སྤང་དགོས་ཚུལ་མདོ་ལུང་དྲངས་ནས་གསུངས་ཤིང། སྤྱིར་ཚོགས་གཏམ་གྱི་རིགས་སེམས་ལ་ཕན་ངེས་དང། སློབ་གཉེར་བ་ཚོ་ལ་སློབ་གཉེར་བྱས་ཙམ་གྱིས་མི་ཆོག །རང་རྒྱུད་ལ་བརྟག་དགོས། འཆི་བ་མི་རྟག་པ་ལ་བསམ་བློ་བཏང་ན་འདོད་ཡོན་ལ་ཞེན་པ་ཇེ་ཆུང་དུ་འགྲོ །རིམ་གྱིས་ལས་འབྲས་ལ་བློ་ཁ་ཕྱོགས་ནས་བག་ཡོད་བསྟེན་པ་ཞིག་ཡོང། དེས་ཡོན་ཏན་ཐམས་ཅད་དྲངས་ཡོང་བས། མདོ་ལས། བག་ཡོད་གོ་འཕང་མཆོག་ཉིད་དུ། །དེ་བཞིན་གཤེགས་པ་རྣམས་ཀྱིས་གསུངས། །གང་ཡང་འཆི་བདག་རྟག་དྲན་དང། །མི་དགེ་རྣམས་ཀྱང་སྤང་བར་བགྱི། །ཞེས་གསུངས་པ་ཡིན་ཞེས་དང། ཆོས་ལ་བློ་རྩེ་གཏད་ན་ལྟོ་རྒྱབ་ལ་དཀའ་ལས་མི་ཡོང་ཞེས་སྟོན་པའི་སྐུ་ཚེ་སུམ་ཆ་རྗེས་འཇུག་གི་ལོངས་སྤྱོད་ཀྱི་ཆེད་དུ་བསྔོས་པའི་རྣམ་ཐར་སྙིང་རྗེ་པད་དཀར་ལྟར་གསུངས་པ་སོགས་ཆོས་མཐུན་གྱི་བསླབ་བྱ་རྒྱུན་དུ་གནང་བས་གྲྭ་ཐོག་དེར་ཚ་གྲང་བཀྲེས་སྐོམ་སོགས་ཀྱི་དཀའ་སྤྱད་སྡུག་བསྔལ་དང་དུ་བླངས་ཏེ། ཟས་གོས་གནས་མལ་ངན་ངོན་ཙམ་གྱིས་ཆོག་ཤེས་པ་དང། འཛིན་སྐྱོར་དང་དཔེ་ཀློག །ཁས་ལེན་འཛིན་ལུགས། བགྲོ་གླེང་གཏོང་ཚུལ་
སོགས་སློབ་ཅིང། དོགས་གཅོད་དང་གསུང་རྒྱུན་གླེང་མོས་དུས་འདའ་ཞིང། དམ་པའི་གསུང་གི་རྗེས་སུ་འབྲང་བ་མ་གཏོགས་ཚེ་འདི་སྣང་གི་མིས་འཕྱ་སྨོད་སོགས་ལ་ཅིར་ཡང་མི་བརྩི་བའི་ཆོས་མཐུན་གྱི་སྐྱེས་བུས་སྡེ་འདི་པད་མོའི་ཚལ་ལ་མེ་ཏོག་གསར་བས་ཁེབས་པ་ལྟ་བུ་གྱུར། སྟོན་ཆོས་གཉིས་པ་སོགས་ལ་འཆད་ཉན་དམར་བ་སྔར་རྒྱུན་ལྟར་གནང། ཕྱོགས་ཉེ་རིང་ནས་གསུང་གི་བདུད་རྩི་དོན་དུ་གཉེར་བའི་སྐྱེ་བོ་གློ་བུར་བ་དག་ལ་ཚོགས་ཆོས་གྲྭའི་སེང་བར་དུ། འཇིགས་བྱེད། བདེ་མཆོག་ལཱུ་ནག་དྲིལ་གསུམ། ཀུན་རིག །ཚེ་དཔག་མེད། ཐུགས་རྗེ་ཆེན་པོ་སོགས་ཀྱི་དབང། སྒྲུབ་ཐབས་བརྒྱ་རྒྱམ། སྣར་ཐང་བརྒྱ་རྩ། མགོན་པོ་བཀའ་བཅུ་གསུམ། རྣམ་སྲས་བཀའ་བཅོ་ལྔ། སྒྲོལ་མ་ཉེར་གཅིག་གི་རྗེས་གནང་སོགས་དང། བྱམས་ཆོས། རིགས་ཚོགས། བཀའ་གདམས་གཞུང་དྲུག །རྩ་འཇུག་བཞི་གསུམ་སོགས་ཀྱི་ལུང་དང། ཁྲིད་ཀྱི་རིགས་བར་མ་ཆད་ལྟ་བུར་གནང་བཞིན་པ་ཡིན་ཀྱང་ཞིབ་པར་མ་ངེས། ཟི་ལིང་ཨམ་བྷན་ནས་ཡབ་རྗེའི་མཆོག་སྤྲུལ་གྱི་དོགས་གནས་བཞི་ཡོད་པར། ཁོ་བོས་དངོས་སུ་བལྟ་བར་ཕྱིན་ནས་གོང་དུ་གྲེའུ་ཙེ་འབུལ་དགོས་ཟེར་ནས་བརྟག་སྐབས་ར་ངན་བེ་ཧུ་བདུད་ལ་རྒྱལ་གྱི་བུ་གསལ་ཁ་བྱུང་བར་བརྟེན་མི་མང་ནས། དེ་སྤྲུལ་སྐུ་འཁྲུལ་མེད་ཡིན་ངེས་ཀྱི་གཏམ་རྩྭ་སྦུར་མེ་མཆེད་ལྟ་བུ་བསྒྲགས་པར། ཞལ་ནས། དེ་གྲགས་ཆེ་བ་ནི་བདག་གིས་བསམ་ན་བགེགས་ཀྱི་སྟབས་ཤིག་ཨེ་ཡིན་སྙམ་གསུངས་ཤིང་དེ་མཐུན་གྱི་ཚོགས་གཏམ་ཡང་གནང་བ་དུས་གསུམ་སྒྲིབ་མེད་དུ་གཟིགས་པའི་གསུང་ཁོ་ནར་ངེས། དགུན་གྱི་རིང་འཆད་ཉན་དམར་ཞིང་མཆོག་སྤྲུལ་མྱུར་གསལ་གྱི་དོན་སྐོར་བསླུ་མེད་ཀྱི་རིམ་གྲོ་རྩལ་འདོན་མཛད། ཁྲིར་བཞུགས་ནས་རིང་པོ་མ་ལོན་པ་ཕྱི་ནང་ཀུན་ན་མི་བསྲུན་པའི་
ཡིད་ཅན་མང་སྐབས་ཤིག །ཆོས་གྲྭ་ནས་ཚོགས་གཏམ་གནང་སྟེ། དེང་སང་སྐྱབས་རྗེ་དམ་པ་དེ་ཉིད་དག་ཞིང་དུ་དགོངས་པ་གཏད་དེ་སླ་ང་ཁ་ཁེབས་མེད་པ་ལྟ་བུའི་མགོ་མེད་མཇུག་མེད་ཀྱི་སྐབས་འདིར་དྲལ་ཁུང་ནང་ནས་ལག་སྙོབ་རེ་བྱེད་སྙམ་པ་འདུག་སྟེ་རྭ་ལོ་ཆེན་པོས། རྡོ་རྗེ་འཇིགས་བྱེད་རྭ་མ་ཆག །རྭ་རྒན་ལོ་ཙཱ་མཐུ་མ་རྡུག །གསུངས་པ་ལྟར་ཡིན། ད་ཁྱེད་ཚོས་ཚད་རྒྱབ་ཐོག་ན་ཡོད་མེད་བལྟ་གསུངས་པ་ལྟར། སྐབས་འདི་དག་ཏུ་ཆོམ་རྐུན་གྱིས་གྲྭ་པ་དམར་གསོད་བྱས་པ་ཧ་ཅང་མང་བར། རྗེ་ཉིད་ཚོགས་དབུར་བཞུགས་ནས་ཁྲོམ་དཀྱིལ་དུ་བསྒྲལ་ཆོག་དང་མདོ་སྒྲུབ་བྱས་པས། རྒྱ་མི་རྣམས་ཀྱིས་ཧ་ཧ་རྐུན་མ་བཟུང་སོང་ཞེས་འཕྱ་རྒོད་བྱས་ཀྱང། དེའི་གནངས་ཉིན་མོ་ཆོམ་རྐུན་དེ་རྣམས་ཀྱིས་ཡང་བསྐྱར་འཕྲོག་བཅོམ་དང་དམར་གསོད་བྱས་པའི་རྐྱེན་གྱིས་ཆོམ་རྐུན་ལྔ་ཡོད་པ་མ་ལུས་པར་གཤིན་རྗེའི་བཙོན་ར་དང་འདྲ་བའི་རྒྱལ་ཁྲིམས་ཀྱི་ཁྲི་མོན་དུ་བཙུད་པས། རྒྱ་མི་རྣམས་ཧ་ལས་ནས་བོད་ཀྱི་ཆོས་འདི་གོང་མའི་ཁྲིམས་ལས་ཀྱང་མྱུར་ཞེས་གླེང་བ་བྱུང་བ་སོགས་ཆོས་སྐྱོང་གིས་འཕྲིན་ལས་བསྒྲུབ་པའི་རྟགས་མཚན་མངོན་སུམ་པ་མང་ཡང་འདི་མཚོན་བྱེད་ཙམ་ཡིན་ནོ། །སྤྱིར་རྗེ་འདི་ཉིད་ནས་ཚོགས་གཏམ་དང་གསུང་སྒྲོས། བཀའ་ཆོས་སོགས་གང་གི་སྐབས་སུ་ཡང་རྒྱལ་བ་ཙོང་ཁ་པ་ཆེན་པོའི་མདོ་སྔགས་ཀྱི་བསྟན་པའི་བསྔགས་བརྗོད་དང། གྲུབ་མཐའ་གཙང་དགོས་ཚུལ་ཞལ་གདམས་ནན་ཏན་དུ་མཛད་པ་ཞིག་ཡོད་ལ། ཁྱད་པར་སྐབས་འདིར། རྙིང་མ་པར་ཁས་འཆེ་ན་ཡང་ལྟ་སྤྱོད་རྙིང་མ་པ་དག་དང་མི་མཐུན་ཞིང། སྟོང་ཉིད་ཀྱི་ལྟ་བ་དང་རླུང་སེམས་ལ་དབང་བསྒྱུར་བའི་བརྡ་ཙམ་ཡང་མི་འཁྱོལ་
བར་ཚངས་སྤྱོད་ཀྱི་ཆ་ལུགས་བཟུང་བཞིན་དུ་བུད་མེད་དང་མཉམ་པར་སྦྱོར་བ་དང། བྱུག་རྫས་སོགས་ཀྱིས་ཕྱག་ཞབས་ཀྱི་རྗེས་འཇོག་ཁུལ་བྱས་ཀྱང་རྫས་དང་རྟེན་འབྲེལ་མ་ཚང་བ་སོགས་ཀྱིས་ཕྱེད་ཙམ་རེ་ལས་མ་བབས་ཀྱང་འུད་ཆེན་པོ་བྱེད་པ་དང། བྲག་བཤིག་ནས་སྒོ་འདྲ་བ་ཆ་འདྲ་རེ་བྱས་ཏེ་གནས་སྒོ་ཕྱེ་ཞེས་སྒྲོག་པ་དང། ས་དང་ལུང་པ་ཆེ་གེ་མོ་ན་གཏེར་འདོན་རྒྱུ་ཡོད་སོགས་རྫུན་གྱི་ངན་སྐད་སྒྲོག་པ་དང། བླུན་པོ་མིག་བསྒྱུར་བའི་ཆེད་དུ་ཆ་ལུགས་དང་ཆས་གོས་སྣ་ཚོགས་བྱེད་པ་དང། བདུག་རྫས་དང་བཏུང་རྫས་སོགས་ལ་བརྟེན་ནས་འདྲེ་ཕབ་པའམ་སྲོག་རླུང་དཀྲུགས་པའི་ཐབས་བྱས་ཏེ་ལྷ་དང་ཡེ་ཤེས་པ་བབས་སྐད་ཀྱིས། འདས་མ་འོངས་ལུང་བསྟན་འབྲེལ་མ་ཆགས་པ་དུ་མ་སྟོན་པ་སོགས་ཀྱིས་བསྟན་པ་ལ་བསླད་འཇུག་པའི་སྦྱོར་བ་རྩོམ་མཁན་འགའ་དང་འགའ་བྱུང་ན་ཡང་རྗེ་འདི་ཉིད་ནས་ལུང་དང་རིགས་པའི་བདེན་ཚིག་གིས་སུན་ཕྱུང། བསྟན་སྲུང་རྒྱ་མཚོའི་མཐུ་སྟོབས་ཀྱིས་ཚར་བཅད་པས་མེ་འབར་རེས་ཀྱིས་ཆར་བབས་པ་བཞིན་རེ་བ་འབྲས་མེད་ཁོ་ནར་གྱུར། སྤྱོད་ངན་དེ་འདྲ་འབྱུང་ཚུལ་བཀའ་ཆེམས་ཀ་ཁོལ་མའི་ལུང་བསྟན་གྱི་ཚིག་རེ་གཉིས་ཕྱོགས་བསྒྲིགས་ཀྱི་ཚུལ་དུ་འགོད་ན་ཇི་སྐད་དུ། ལྷ་ཡིས་བསྟན་ཞེས་འདྲེ་ཆོས་སྣ་ཚོགས་བྱེད། །འགོང་བོ་འདྲེ་ཡི་ཆས་དགུ་གྱོན་བྱེད་ཅིང། །ར་སློག་ཁྱི་སློག་རེ་བ་ཟེ་མོན་གོས། །རྩི་ཞྭ་བྷེ་ལོག་གོས་དཀར་ལུས་ལ་གྱོན། །བེར་ག་དབྱུག་པ་སྣ་ཚོགས་ཐོགས་པ་འབྱུང། །སྨྱོན་ཐབས་ཅན་ལ་རྟོགས་ལྡན་བྱེད་པ་འབྱུང། །ལོག་སྤྱོད་མཁན་ལ་རྣལ་འབྱོར་པ་ཞེས་ཟེར། །འདྲེས་བརླམས་པ་ལ་ཡེ་ཤེས་བབས་ཞེས་ཟེར། །བདུད་ཀྱིས་སྤྲོ་བསྐྱེད་བྱིན་རླབས་ཟེར་བ་འབྱུང། །གདམས་ངག་ཟེར་ཞིང་ལོག་ཆོས་མང་དུ་སྨྲ། །གདམས་པ་ཟེར་ནས་མུ་སྟེགས་གསང་ཚིག་སྟོན། །ལོག་
སྤྱོད་དག་ལ་ཤིན་ཏུ་དད་པར་འགྱུར། །རང་གི་རླུང་སེམས་དབང་དུ་མ་འདུས་པར། །གསང་བ་ཤེས་རབ་ཡེ་ཤེས་མངོན་སུམ་བསྐུར། །དེ་དག་སྨད་འཚོང་བསྟེན་དང་ཁྱད་པར་མེད། །ལ་ལས་དགེ་སློང་ཤེས་རབ་ཡེ་ཤེས་ནི། །བུད་མེད་དང་སྦྱོར་དབང་ནི་སྐུར་བར་བྱེད། །སྡོམ་ཁྲིམས་ཞིག་ནས་དམྱལ་བར་འཕེན་པར་བྱེད། །ཅེས་གསུངས་སོ། །དེ་ཡང་བྱང་ཆུབ་སེམས་དཔའི་སྐྱེས་པ་རབས་ཀྱི་རྒྱུད་ལས། མི་ཡི་བདག་པོ་ལྟ་བ་བཟང་ངམ་ངན། །རིགས་མཐུན་ལས་ནི་བསྒྲུབས་པའི་རྒྱུ་དག་གིས། །དེ་དང་དེ་ལ་ཁྱོད་ཀྱིས་བརྟག་ན་ནི། །ཚིག་དང་སྤྱོད་པ་རྣམས་ཀྱིས་གསལ་བར་སྟོན། །ཞེས་གསུངས་པ་ལྟར་བློ་དང་ལྡན་ན་ལྟ་སྤྱོད་བཟང་ངན་ནི་བལྟས་པ་ཙམ་གྱིས་ཤེས་ནུས་ཀྱང་སྙིགས་དུས་ཀྱི་སྐྱེ་བོ་བློའི་ནོར་གྱིས་དབུལ་བ་རྣམས་མགོ་བསྐོར་ཐུབ་ཙམ་སྙིང་པོར་གཟུང་སྟེ། མཐོ་བའི་ཁྲི་ལ་ཞིམ་པའི་ཟས་དང་མཛེས་པའི་གོས་ཀྱིས་རོལ་ཞིང་བླུན་པོའི་འཁོར་ལ་འཆལ་བའི་གཏམ་གྱིས་དུས་འདའ་བ་མཐོང་ཚེ་བདག་ཉིད་ཆེན་པོ་འདི་ནི་མཁས་བཙུན་བཟང་གསུམ་གྱི་རྣམ་ཐར་དང། བཤད་སྒྲུབ་འཕྲིན་ལས་ཀྱི་སྒོ་ནས། གསེར་རིའི་དབུས་ན་ལྷུན་པོ་ལྟར་གསལ་བར་མཐོང་ངོ་། །དགུང་ལོ་སོ་དྲུག་པ་མེ་སྦྲུལ་གྱི་ལོ་གསར་ཚེས་གཏོར། སྨོན་ལམ་གསུང་ཆོས་སོགས་སྔར་རྒྱུན་ལྟར་ལ། ལོ་འདིར་རྒྱ་རྩིས་དང་བོད་རྩིས་ཀྱི་ལོ་གསར་ལ་སྔ་ཕྱི་བྱུང་བས། ཟླ་བ་དང་པོའི་ཚེས་བཅུ་བཞིའི་ཉིན་གོང་ནས་གྲེའུ་ཙེ་བབས་པར། འཇམ་དབྱངས་ཧུ་ཐོག་ཐུའི་སྤྲུལ་སྐུའི་དོགས་གནས་གསེར་གྱི་བུམ་པ་ནས་གསལ་བརྟག་བྱེད་པར་ཕྱག་མཛོད་བློ་བཟང་དར་རྒྱས་སོངས་ཞེས་པའི་བཀའ་ཕེབས། དེ་དང་མཉམ་དུ་ཨམ་བྷན་ནས་ཕྱག་མཛོད་ལོ་བརྒྱད་ཅུར་སླེབས་པས་བྱང་ལམ་
བགྲོད་དཀའ་ཚུལ་ཁོ་བོས་ཞུས་ཆོག་པས་དོད་ཕེར་གྱི་མི་གཉིས་ཚགས་ཚུགས་ཞེས་ཡི་གེ་བྱུང་བ་ལྟར་ཚེས་བཅོ་ལྔའི་ཞོགས་ཀ་གཟིམས་ཆུང་ནས་འབུམ་སྟོད་ཇོ་བོའི་མདུན་དུ་ཐིག་ལེ་བཅུ་དྲུག་གི་སྒྲུབ་མཆོད་དང་འབྲེལ་བར་རྗེ་ཉིད་ནས་ཟན་བསྒྱུར་བས། བླ་བྲང་མགྲོན་གཉེར་སྟོང་འཁོར་དཀའ་བཅུ་ཤེས་རབ་རྒྱ་མཚོ་དང། ཕྲན་གཉིས་ལ་ཟན་བབས་པ་ལྟར་གསུང་དང་དུ་བླངས། ཉིན་དེར་བསྒྲུབ་བྱ་སོ་བརྒྱད་དང། བཞི་པའི་ཡར་ངོར་བསྒྲུབ་བྱ་སོ་གཅིག་བསྙེན་རྫོགས་ལ་བཀོད། དཔྱིད་ཆོས་གསུམ་ལ་བརྩི་བཞག་ཆག་མེད་ནས་གྲྭ་ཚང་གི་འཆད་ཉན་འཕེལ་ཐབས་ཀྱི་རྟིང་བསྐུལ་གོང་འཕེལ་ཁོ་ན་མཛད། ཆོས་སྡེ་ཆེན་པོ་དགོན་ལུང་ནས་འཆད་ཉན་དང། སྒྲིག་ལམ་ཉམས་གསོ་ཐུབ་ངེས་ཀྱི་བླ་མ་ཞིག་གལ་ཆེ་ཞེས་ཨམ་བྷན་ལ་ཞུས་ཏེ་ཀུན་ཁ་འཆམས་ཀྱི་ངོས་ནས་ཐུའུ་བཀྭན་རིན་པོ་ཆེའི་སྐུ་ཚབ། ཨམ་བན་གྱི་ཐོང་ཤི་རྒྱུད་པ་བླ་མ་སོགས་ལས་སྣེ་རགས་བསྡུས་གདན་འདྲེན་ལ་འབྱོར། འདི་ཀའི་གྲྭ་དཔོན་སློབ་མགྲིན་གཅིག་གིས་གདན་སའི་ཁུར་བཞེས་ཡུན་རིང་དགོས་ཚུལ་ནན་ཆེ་བ་བཅས་མཛད་དཀའ་བ་ལྟ་བུའི་ངང་ལ་ཞག་ཤས་འགྱང་ཡང་ཞལ་ནས། ཨམ་བན་དབང་ཆེ་ན་ཡང་ཐབས་སྣ་ཚོགས་བྱས་ཆོག་མོད། བླ་མའི་གསུང་འདི་བཟློག་དཀའ་ཞིང་མངོན་ལྐོག་སོགས་ཀྱི་ཐབས་བྱེད་ལུགས་མེད་གསུངས་ནས་རེ་ཞིག་གཉིས་འཛིན་བྱེད་རྒྱུའི་ཞལ་བཞེས་མཛད་པ་ལྟར་ལྔ་པའི་ཚེས་ལ་དེ་ཕྱོགས་སུ་ཆིབས་བསྒྱུར། ཐན་ཆེན་གྱིས་ལོ་ཏོག་ལ་རེ་བ་ཆད་སྐབས་ཡིན་ཀྱང། ཨམ་བན་ལ་འཚམས་ཞུས་གནང་ནས་དགོན་ལུང་དུ་ཕེབས་པར་རྩོམ་པ་ན་ཆར་ཟིམ་ཅུང་ཟད་བབས་པ་ལ་ཆར་གོས་མ་མནབས་པར་ཕེབས་པས་སྤྲིན་ལེགས་པར་འཐིབས་ཏེ། ཆར་གྱི་རྒྱུན་བཟང་པོ་ཉིན་མང་པོར་བབས། རིམ་གྱིས་ཆར་ཆུ་དུས་བབས་ཀྱིས་ལོ་ལེགས་
ཕུན་སུམ་ཚོགས་པ་བྱུང། གཟའ་སྐར་ཚེས་སྦྱོར་ཕུན་སུམ་ཚོགས་པའི་ཉིན་ཡུལ་མདོ་སྨད་ཀྱི་བཤད་གྲྭ་ཀུན་གྱི་ཕྱི་མོ་ལྟ་བུར་གྱུར་པ་ཆོས་སྡེ་ཆེན་པོ་དགོན་ལུང་བྱམས་པ་གླིང་གི་མི་འཇིགས་ཆོས་ཀྱི་ཁྲི་ལ་ཞབས་ཀྱི་པདྨོ་ཉེ་བར་བཀོད། དངུལ་སྲང་བརྒྱ་སྐོར་གྱིས་སྟོན་མོ་དང། བཞུགས་གྲལ་གྱི་དབུར་ཐུའུ་བཀྭན་རྡོ་རྗེ་འཆང་བྱོན་ནས་ཡུལ་ལུགས་ཀྱི་བཤད་པ་དང་སྦྲགས་ཏེ་ཚིག་བཀྲ་ལེགས་པའི་བདེན་ཚིག་ཀྱང་བརྗོད། ཁྲི་འགྱེད་ཁ་དར་དྲི་མེད་རེ་བཏང་བར་སྐལ་བ་ཉིས་སྟོང་ཉིས་བརྒྱ་ཙམ་སོང། ཆོས་གྲྭར་བརྩི་བཞག་འབད་མེད་དུ་གནང་བའི་ཞར་ལ་འདུལ་བ་རྒྱ་མཚོའི་སྙིང་པོའི་བཤད་ལུང། འདུལ་བའི་སྡོམ་ཚིག་དང་སྦྲགས་ནས་གསུང་བཤད་གང་རྒྱས། ལམ་རིམ་ཆུང་ངུའི་བཤད་ལུང། ཚོགས་ཆེན་ལ་འཇིགས་བྱེད་ལྷ་བཅུ་གསུམ་མའི་དབང་གནང། གྲྭ་མང་གིས་ཀྱང་དད་འདུན་རྩེ་གཅིག་པས་གསུང་བཀོད་དང་དུ་བླངས་པས་ཐུགས་མཐུན་ཁྲིམས་གཙང་གི་ངོས་ནས་འཆད་ཉན་སོགས་ཆོས་སྲིད་ཀྱི་བྱ་བ་དབྱར་མཚོ་ལྟར་རྒྱས། ཆོས་གྲྭར་བཀའ་ཆོས་ཤིག་གནང་སྐབས་ཐུའུ་བཀྭན་རིན་པོ་ཆེ་ནས་ཀྱང། གསུང་བཤད་གསན་ས་ཞིག་ཏུ་མི་མངོན་པའི་ཚུལ་གྱིས་བཞུགས་ནས་གསུང་བཤད་གསན་པས། ཨ་དེ་འདྲའི་སྐུ་ཡོན། དེང་སང་སྙིགས་མའི་མཐའ་འདིར་འདི་འདྲ་འབྱོན་པ་དེ་ཅི་ཞིག་ཡིན། འདིའི་ཡོན་ཏན་འདི་སུ་ཞིག་ལ་དགོས་པ་ཡིན་ནམ་ཞེས་ཡང་ཡང་གསུངས་པར་རྗེ་དེ་ཉིད་ཀྱི་ཞབས་ཕྱི་རྣམས་ལས་ཐོས། མཁས་པའི་ཡིད་འཕྲོག་གསར་བཤད་བདུད་རྩིའི་རྒྱུན། །རྒྱལ་ཀུན་དགྱེས་པའི་མཆོད་ཡོན་འགྲེམ་པ་ན། །མཁས་གྲུབ་གཙུག་རྒྱན་རིགས་ཀྱི་བདག་པོ་དེའི། །ཐུགས་མཚོར་བབ་ལས་བསྔགས་བརྗོད་རླབས་
འཕྲེང་སྤྲོས། །ལྷོ་བྲག་བཀའ་འབུམ་གྱི་ལུང་རྗེས་གནང་ཆ་ཚང། རྟ་མགྲིན། ཕྱག་རྡོར། རྡོར་སེམས་ཀྱི་རྗེས་གནང་སོགས་སོ་སོའི་མོས་པ་བཞིན་སྩལ། ལྕང་སྐྱ་མཆོག་སྤྲུལ་རིན་པོ་ཆེ་མཇལ་བར་ཕེབས་རྩིས་གནང་མུར་འཚམས་ཞུས་པ་ཡང་འབྱོར་ཏེ། ཆུ་བཟང་དུ་མཇལ་འཛོམ་དང་ཆོས་སྲིད་ཀྱི་དགའ་སྟོན་སྤེལ། ཐུའུ་བཀྭན་རིན་པོ་ཆེ་ནས་སྐྱེད་ཚལ་ཡིད་དགའ་ཆོས་འཕེལ་དུ་ཕེབས་གསུངས་པ་ལྟར་ཡབ་སྲས་ལྷན་རྒྱས་ཀྱིས་ཞག་མང་པོར་ཆོས་ཀྱི་བགྲོ་བ་མཛད། ཆོས་བཟང་རི་ཁྲོད་པ་རྣམས་ལ་ཞལ་སྒྲུབ་དུས་ཀྱི་རྗེས་གནང་ཞིག་གལ་ཆེ་གསུངས་པ་བཀའ་བཞིན་བསྒྲུབས། སླར་བཀྲ་ཤིས་འཁྱིལ་དུ་བྱོན་ནས་འཆད་ཉན་དམར་བ་ཁོ་ནའི་ངང་ནས་བསྒྲུབ་བྱ་དུ་མར་རབ་བྱུང་བསྙེན་རྫོགས། དོན་གཉེར་པ་རྣམས་ལ་འདོད་མོས་ཀྱི་ཆོས་བཀའ་སོགས་སྔར་རྒྱུན་བཞིན་གནང། གནའ་དུས་དགོན་འདིར་རྟ་དང་བཞོན་སོགས་འཛིན་པའི་དམིགས་བསལ་ཅན་ལ་ཡང་ཐེལ་ཚེ་སྟེར་སྲོལ་ཡོད་ཀྱང་བར་སྐབས་ཤིག །བཀའ་རམས་འཛིན་གྲྭར་ཡང་ཆ་བྱས་པ་སྒྲིག་ལམ་དང་འཆད་ཉན་སོགས་ལ་གནོད་གསུངས་ནས་ཅུང་ཟད་དམ་པར་མཛད། དེ་ཡང་བཀའ་གདམས་གླེགས་བམ་ལས། རྨིག་གཅིག་པ་དང་མཆེ་བ་ཅན། །ཁྲིམས་འཆལ་བྱོལ་སོང་སྐྱོང་བར་བྱེད། །སྡིག་གྲོགས་འཕེལ་ཞིང་སྐྱེ་བོས་གང། །རང་ཉིད་མི་བསྲུན་གཞན་ལ་འཕྱ། །ནོར་བདུན་དོར་ཞིང་ནོར་མིན་བསྒྲུབས། །ཁྲིམས་བོར་འདོད་ཡོན་དོན་དུ་གཉེར། །ཨེ་མ་དེ་འདྲའི་བསྟན་པ་ལ། །ཆོས་གྲྭ་དེ་ཡང་གཡེལ་བར་འགྱུར། །ཞེས་གསུངས་པ་ལྟར། རྟ་དྲེལ་སོགས་རྨིག་གཅིག་པ་དང། ཁྱི་དང་བྱི་ལ་སོགས་མཆེ་བ་ཅན་དང། མཛོ་འབྲི་བ་ལང་སོགས་བྱོལ་སོང་སྐྱོང་བ་དང། དེའི་སྟོབས་ཀྱིས་ཚོང་ཁེ་སྤོག་གསོག་
རུམ་སོགས་ཚེ་འདི་སྣང་གི་བྱ་བ་ལ་ཞེན་ནས་སྡིག་པ་ལ་སྦྱོར་མཁན་འཕེལ་བ་དང། མགར་བ་དང་ཤིང་བཟོ། ཚོང་པ་དང་གླ་མི་སོགས་གྲོང་པའི་སྐྱེ་བོས་གང་བ་དང། རང་གི་སྐྱོན་ལ་མི་རྟོག་པར་ཕ་རོལ་གྱི་བླ་མ་དགེ་བཤེས་སྦྱིན་བདག་སོགས་ལ་འཕྱ་ཞིང། དད་པ་དང་ཚུལ་ཁྲིམས་དང། ཐོས་པ་སོགས་འཕགས་པའི་ནོར་བདུན་ཡལ་བར་བོར་ནས་ངོ་ཚ་དང་ཁྲེལ་མེད་ཀྱི་བྱ་བ་དུ་མས་ཤེས་རབ་འཆལ་ཞིང། རྨོངས་པར་གྱུར་པས་ཚུལ་ཁྲིམས་ལ་མི་བརྩོན། འདོད་ཡོན་ཁོ་ན་དོན་དུ་གཉེར་མཁན་མང་ན་བསྟན་པ་ཉམས་པ་ཨེ་མ་ཞེས་སྐྱོ་བའི་ཚིག་གིས་གསུངས་ཤིང། ཆོས་གྲྭ་གཅིག་ཙམ་མ་ཡིན་པར་བཀའ་གདམས་ཀྱི་དགོན་པ་ཐམས་ཅད་ལ་སྦྱར་དགོས་པ་ནི། དེ་ཡང་ཞེས་པའི་ཚིག་གི་ནུས་པས་གསལ་བར་བསྟན་པས། གོང་དུ་སྨོས་པའི་སྒྲིག་ལམ་དེ་དག་ནི་བཀའ་གདམས་ཀྱི་བསྟན་པའི་དག་ཐེར་ཡིན་པ་ཤེས་པར་གྱིས་ཤིག །དེར་མ་ཟད་རྙེད་བཀུར་གྱི་བྱ་བས་བསྟན་པ་ལ་གནོད་པར་བཅོམ་ལྡན་འདས་ཉིད་ཀྱིས་བཀའ་སྩལ་ཏེ། མདོ་སྡེ་རབ་ཏུ་རྣམ་པར་འབྱེད་པ་ལས། ཤཱ་རིའི་བུ། སྐྱེས་བུ་དམ་པ་མ་ཡིན་པའི་འཚོ་བའི་ལམ་དང། བྱིས་པ་འཐབ་མོ་འཛིན་པས་བདག་དང་གཞན་ཕུང་བར་བྱེད་པ་དེ་ལྟ་བུས་འཛམ་བུའི་གླིང་འདི་གང་བར་འགྱུར་རོ། །ཤཱ་རིའི་བུ། བཅོམ་ལྡན་འདས་འོད་སྲུང་གིས་ཀྱང་ཤཱཀྱ་ཐུབ་པའི་གསུང་རབ་ནི་རྙེད་པ་དང་བཀུར་སྟིས་ནུབ་པར་འགྱུར་བར་ལུང་བསྟན་ཏེ། ཤཱ་རིའི་བུ་རྙེད་པ་དང་བཀུར་སྟིས་ནི་ཆོས་འདུལ་བ་འདི་མྱུར་དུ་ནུབ་པར་འགྱུར་རོ། །ཞེས་སོ། །འོ་ན་རབ་བྱུང་གི་གཟུགས་བརྙན་ལྟ་བུ་དག་སྨད་པར་རིགས་པ་ཁོ་ནའམ་ཞེ་ན་དེ་ནི་མ་ཡིན་ཏེ། སྤོས་བསྲེགས་ན་སྤོས་ཉིད་ཚིག་
སྟེ་མེད་པར་སོང་ཡང་གཞན་ལ་དྲི་བསུང་བྲོ་བར་བྱེད་པ་བཞིན་དུ། དགེ་སློང་ཚུལ་ཁྲིམས་འཆལ་བ་ཡང་དད་པས་བྱིན་པས་བསྲེགས་ཏེ་རང་ཉིད་ངན་འགྲོར་འགྲོ་ཡང་སེམས་ཅན་དཔག་ཏུ་མེད་པ་ལ་མཐོ་རིས་དང་ཐར་པའི་དྲི་བསུང་བྲོ་བར་བྱེད་ཅེས་མདོ་ལས་གསུངས་ལ། ཡུལ་འཁོར་མོ་འཇིག་གི་བཤང་གཅིའི་གནས་ན་སྲིན་བུ་དཔག་མེད་ཡོད་པར་སྤྱན་རས་གཟིགས་བུང་བའི་གཟུགས་སུ་སྤྲུལ་ནས་དཀོན་མཆོག་གསུམ་གྱི་སྒྲ་བསྒྲགས་པས། དེ་དག་བདེ་བ་ཅན་དུ་སྐྱེས་ནས། བྱང་སེམས་ཁ་ན་སྤོས་ཀྱི་དྲི་ཞེས་བྱ་བ་ཤ་སྟག་ཏུ་གྱུར་ཅེས་ཟ་མ་ཏོག་བཀོད་པའི་མདོ་ལས་གསུངས་པས་རང་རྒྱུད་ལ་བརྟག་པ་དང། བླ་མའི་བཀའ་བཞིན་དུ་བསྒྲུབས་པ་གནད་ཀྱི་དོན་པོར་ཟུངས་ཤིག །གླིང་བསྲེས་བསྟན་འབར་མའི་གོ་རིམ་དང་པོ་ཏི་ལྔ་སྦྱར་བའི་གསུང་བཤད་ངོ་མཚར་ཅན་དང། རིགས་གྲྭའི་གཏོང་སྒོ་སོགས་ཀྱང་འཆར་ཅན་ལྟར་མཛད། དུས་འཁོར་གྲྭ་ཚང་ལ་མགོན་པོ་ཞལ་གྱི་རྗེས་གནང། རི་ཁྲོད་ཡིད་དགའ་ཆོས་འཛིན་དུ་བཅུ་གཅིག་ཞལ་གྱི་དབང་སོགས་ཆོས་བཀའ་དུ་མ་སྩལ། ཨ་མཆོག་དགོན་པ་དགའ་ལྡན་ཆོས་འཁོར་གླིང་ནས་དེ་ཀའི་ཁྲིར་གདན་ཞུ་ཕུལ་ཀྱང་ད་རེས་མི་འགྲིག །སླར་སེམས་ལ་འཛིན་གསུངས་ནས་ཁ་དར་གྱི་འགྱེད་གནང། སྐུ་བཅར་ཐོར་གོད་དཀའ་བཅུ་མཆོག་ལྡན་ཞི་བར་གཤེགས་པ་ལ་མཛོ་རྟ་ལྔ་བཅུ་ཙམ་གྱི་འགྱེད། གཞན་ཡང་གྲྭ་ཚང་རི་ཁྲོད་སོ་སོར་འོ་རྒྱུན་གྱི་མཛོ་མོ་བཅོ་བརྒྱད། སྨོན་ལམ་སྐབས་སུ་འདུ་ཁང་དུ་བཀྲམ་རྒྱུའི་མཎྜལ་དངུལ་སྲང་བདུན་བརྒྱའི་སྐོར་ལས་བསྒྲུབས་པ། རྗེའི་རྣམ་ཐར་དང་མཐུན་པའི་གསེར་ཟངས་ཀྱི་དབུ་རྒྱན་ཁྱད་འཕགས་དངུལ་སྲང་བརྒྱ་ལྷག་ལས་བསྒྲུབས་པ་སོགས་གསར་འཇོག་གནང། སྔ་སོར་ཡབ་རྗེ་རྡོ་རྗེ་འཆང་གི་
དགོངས་རྫོགས་བོད་དུ་ཁྱེར་སྐབས་མགྲོན་གཉེར་དཀའ་བཅུས་གྲུབ་དབང་ཀློང་རྡོལ་རིན་པོ་ཆེར་སྤྲུལ་སྐུའི་སྐོར་གསུང་བརྟག་ཞུས་པར། ཞལ་ནས། རྒྱལ་དབང་ལྔ་པ་ཆེན་པོ་ཟེར་བའི་ཡོན་ཏན་ཆེན་པོ། སྐུ་བསོད་ཆེན་པོ། དབང་སྡུད་ཆེན་པོ། ཕན་ཐོགས་ཆེན་པོ་དེ་ཁྱེད་ཚོས་ཨེ་གོ་གསུངས། ཐོས་མྱོང་ཞུས་པར། དེ་རྭ་སྒྲེང་ཇོ་བོ་འཇམ་པའི་རྡོ་རྗེའི་མདུན་ནས་ཟན་བསྒྲིལ་གྱིས་ཐག་བཅད་པ་རེད། འཇམ་དབྱངས་བཞད་པའི་སྤྲུལ་སྐུ་ཡང་བླ་མ་དང་ཆོས་སྐྱོང་གིས་ཐག་ཆོད་མི་ཡོང། རྭ་སྒྲེང་ཇོ་བོ་འཇམ་པའི་རྡོ་རྗེའི་མདུན་ལྟ་བུ་ཞིག་ནས་བཀའ་གདམས་ཐིག་ལེ་བཅུ་དྲུག་གི་སྒྲུབ་མཆོད་བྱས་ཏེ་ཟན་བསྒྱུར་ན་འཁྲུལ་མེད་བབས་ཡོང་གསུངས། དེ་ནས་མ་འགྱང་བར་གོང་མ་བདག་པོ་ཆེན་པོ་ནས་སྤྲུལ་སྐུའི་རིགས་བརྟག་བསྒྲིལ་གྱིས་ཐག་གཅོད་དགོས་པར་བཀའ་བབས། དབུས་པ་འཁོར་བསྟུན་རྗེ་ཉིད་ཀྱི་མདུན་ནས་གླེང་མོ་ཞིག་གི་སྐབས། དེ་དུས་བཀྲ་ཤིས་འཁྱིལ་གྱི་རྒྱུད་པ་བླ་མ་སོགས་ཀྱིས་ཟན་བསྒྱུར་དགོས་རྒྱུ་རེད། གསུངས་པ་རྩེད་མོའི་རྣམ་པར་གོ་ཡང་ཕྱིས་སུ་ཡིད་ཆེས་བླ་མེད་རྙེད། དེར་མ་ཟད་ངེས་པར་སྤྲུལ་སྐུ་འཁྲུལ་མེད་ཅིག་ལག་ཏུ་ཨེ་ཡོང་ན་ཞུས་པར། དཱ་ཚང་དུ་རྣམ་ཐར་རྩོམ་སྐབས་ཀྱི་ལོ་རྒྱུས་དེ་ཞིབ་པར་གསུངས་ནས་རེ་ཞིག་གཞན་ལ་མ་བཤད་ཅེས་བཀའ་ཕེབས་པ་འབྲུག་ལོ་ངོས་འཛིན་ཚུན་ཆད་འདི་ལ་དགོངས་པར་སྣང། ཕྲན་རྣམས་དབུས་སུ་འགྲོ་སྐབས་གསུང་བཀོད་ལ། རྭ་སྒྲེང་ཇོ་བོའི་མདུན་དུ་ཟན་བསྒྱུར་རྒྱུ་སྟབས་མི་འགྲིག་ཀྱང་ཐིག་ལེ་བཅུ་དྲུག་གི་སྒྲུབ་མཆོད་ལེགས་པར་བསྒྲུབ་པ་གལ་ཆེ། དད་གུས་གསོལ་འདེབས་སོགས་རྒྱུ་ཚོགས་ཚང་བར་བསྒྲུབས་ན་ཟན་རིལ་མདུན་དེར་བསྒྲིལ་མ་བསྒྲིལ་ལ་ལྟོས་པ་ཅི་ཡོད། ལམ་བར་
ནས་ཐུའུ་བཀྭན་རིན་པོ་ཆེའི་སྐུ་མདུན་དུ་གསུང་བཀོད་ཞིབ་མོ་ཞུ་ཐབས་གྱིས་གསུངས། དེ་ནས་བཟུང་སྟེ་གདན་ས་རང་དུ་ཐིག་ལེ་བཅུ་དྲུག་གི་སྒྲུབ་མཆོད་བར་མ་ཆད་ལྟ་བུ་མཛད། ཕྲན་དོན་གྲུབ་གཞིས་ཀར་ཆེད་གཉེར་གྱིས་ཕྱིན་ཏེ་ཐུའུ་བཀྭན་རིན་པོ་ཆེར་མཇལ་ནས་ཞུས་པར། གུང་ཐང་ཚང་གི་གསུང་དེ་མད་པར་སྣང། སྔར་གྱི་ངེད་རང་གི་རྨི་ལྟས་དེ་དང་འགྲིག་དགོས་ལ། དེ་ཐོག་ཏུ་བབས་འགྲོ་བ་འདྲ་གསུངས། འགའ་ཞིག་གིས་བརྟག་བསྒྲིལ་ལ་དོགས་པ་ཟ་བའི་གཏམ་སྨྲས་པ་ཐོས་ཚུལ་ཞུས་པས་དེ་ལ་དོགས་པ་ཟ་རྒྱུ་ཅི་ཡོད། རྒྱལ་བ་གོང་མའི་དུས་ཡན་ཆད་དུ་གཞུང་གི་ལ་རྒྱ་འགངས་ཆེ་བའི་རིགས་ལ་ལྷ་མོའི་མདུན་གྱི་བརྟག་བསྒྲིལ་གཙོ་བོར་འཛིན་པ་ཡིན་གསུངས། ཕྲན་རྣམས་དབུས་སུ་སླེབས་ནས། ༸རྒྱལ་བའི་དབང་པོ་བློ་བཟང་འཇམ་དཔལ་རྒྱ་མཚོས་གཙོ་མཛད། སྲིད་སྐྱོང་རྒྱལ་ཚབ་རྟ་ཚག་རིན་པོ་ཆེ་བློ་བཟང་བསྟན་པའི་མགོན་པོ། རྒྱལ་ཚབ་སྤྲུལ་སྐུ་དེ་མོ་ཧུ་ཐོག་ཐུ་བློ་བཟང་འཇིགས་མེད་རྒྱ་མཚོ། རྭ་སྒྲེང་ནོ་མོ་ཧན་བློ་བཟང་བསྟན་པ་རབ་རྒྱས། གླིང་སྤྲུལ་བའི་སྐུ་སོགས་བོད་ཀྱི་བླ་ཆེན། བཀའ་བློན་བཞི་སོགས་མི་ཆེན། རྣམ་རྒྱལ་གྲྭ་ཚང་བ་དང། མཚན་ཉིད་ཞབས་ཕྱི། རྩེ་དྲུང་ལས་བྱེད་ཏིལ་གྱི་གང་བུ་ལྟར་བཅེར་བའི་དབུས་སུ། བོད་བཞུགས་ཨམ་བྷན་གཉིས་ནས་གོང་མ་བདག་པོ་ཆེན་པོའི་འདྲ་ཐང་གི་སྤྱན་སྔར་གསེར་བུམ་དཀྲུགས་ཏེ་མཚན་བྱང་འཐེན་པས་ཨང་གཉིས་པ་རོང་བོ་ཤ་བི་ནར་དུ་སྐུ་འཁྲུངས་པའི་ད་ལྟའི་མཆོག་སྤྲུལ་རིན་པོ་ཆེ་འདི་བ་ལ་བབས་པས་བླ་མ་རྣམས་ལ་བསླུ་མེད་ཀྱི་ངེས་པ་རྙེད། དེ་དུས་ཨམ་བྷན་གྱི་སྣང་བར་མཚན་བྱང་གྱེན་དུ་འཕར་ཟེར་བ་ཡང་ཕྱིས་སུ་ཐོས། ངེས་པ་དོན་གྱི་བློ་བཟང་བསྟན་པའི་མགོན་པོ་ས་མ་དྷི་པཀྵི་ནོ་མོ་ཧན་ནས་ཐུགས་ཁུར་ཆེ་བཞེས་ཀྱིས་ལྷ་སར་བྱོན་ནས་ཇོ་བོ་
ཤཱཀྱ་མུ་ནེའི་མདུན་དུ་ཟན་བསྒྱུར་གནང་བ་ཡང་དེ་དང་མཐུན་པར་བྱུང་བས་ལྷག་པར་ཡིད་ཆེས་བརྟན་པར་གྱུར་ཅིང། ཕྲན་གྱིས་ཚུར་ལམ་ཇོ་བོ་འཇམ་པའི་རྡོ་རྗེ་ལ་མཇལ་ནས་གསོལ་བ་འདེབས་བཞིན་དུ་སྤྱི་བརྟོལ་བསྐྱེད་དེ་བརྟག་དཔྱད་ཕྲན་བུ་བྱས་པ་ཡང་དེ་མཐུན་བྱུང་བ་རྗེས་འཛིན་གྱི་མཚན་མར་གོ །རྗེ་གྲུབ་པའི་དབང་ཕྱུག་སྐལ་ལྡན་རྒྱ་མཚོའི་སྤྲུལ་བའི་སྐུ་དགེ་འདུན་འཕྲིན་ལས་རབ་རྒྱས་ནས་གསུང་དུ་མ་རིམ་པར་བྱོན་ཚུལ་ཚད་ལྡན་ཡིད་ཆེས་པའི་ལུང་དང། རྟགས་མཚན་གྱི་གཏན་ཚིགས་སྤྲོ་དགོས་དུ་མ་ཡོད་ཀྱང་གཞན་དུ་གསལ་བར་འགྱུར་རོ། །རྩེ་ནས་བརྒྱད་པའི་ཚེས་ལ་ཐག་བཅད་པའི་གྲེའུ་ཙེ་ཕུལ་བའི་བཀའ་ལན་བོད་དུ་མ་འགྱང་བར་བབས་ཤིང། དེ་ཟི་ལིང་བརྒྱུད་དེ་མགོ་ཟླ་བའི་དམར་ཕྱོགས་ཀྱི་དགའ་བ་དང་པོའི་ཉིན། གོང་ནས་སྤྲུལ་སྐུ་ཐག་བཅད་ཚུལ་གྱི་གྲེའུ་ཙེ་བཀྲ་ཤིས་འཁྱིལ་དུ་འབྱོར་བ་ལྟར། རྗེ་ཉིད་ནས། མཐོང་བ་དོན་ལྡན་མཆོག་སྤྲུལ་རིན་པོ་ཆེའི་ཞབས་བརྟན་གསོལ་འདེབས་གསར་རྩོམ་མཛད་དེ་བསོད་ནམས་ཁ་དར་གྱི་འགྱེད་དང་བཅས་ཚོགས་འདོན་དུ་བཙུགས། དགུང་ལོ་སོ་བདུན་པ་ས་རྟའི་ལོ་གསར་དགྱེས་སྟོན་ཚེས་གཏོར་སོགས་སྔར་རྒྱུན་ལྟར་དང། ཆོ་འཕྲུལ་སྨོན་ལམ་གྱི་སྐབས་ཉིན་རེ་ཞིང་སྔ་དྲོ་བཀའ་གདམས་གཞུང་དྲུག་གི་བཤད་པ་དང། ཕྱི་དྲོ་བསྟན་པ་རྒྱས་པའི་ཐུགས་སྨོན་ནན་ཏན་མཛད། སྐབས་འགར་ཐུགས་བྲེལ་གྱི་དབང་གིས་རྗེ་བཙུན་དམ་པ་འཇིགས་མེད་རིགས་པའི་སེངྒེ་དཔལ་བཟང་པོ་སྨོན་ལམ་གསུང་ཆོས་ལ་ཕེབས། ལོ་སྔ་མ་འགའ་རེར་ཡང་ཆོས་སྲིད་ཀྱི་བྲེལ་བའི་དབང་གིས་ཁྲི་ཆེན་བློ་བཟང་སྙན་གྲགས་པས་སྨོན་ལམ་གསུང་ཆོས་ཀྱི་ཚོགས་དབུ་ལན་འགའ་མཛད་
དགོས་བྱུང། སྐྱབས་མགོན་མཆོག་སྤྲུལ་རིན་པོ་ཆེ་གདན་སར་སྤྱན་འདྲེན་རྒྱུར། སྔར་ནས་རིམ་བཞིན་ཆིབས་བསུ་རིམ་པ་གསུམ་སེར་སྦྲེང་སོགས་ཀྱི་བཀོད་ཁྱབ་ཞིབ་གནང་ལྟར་རྗེ་ཉིད་ཀྱང་ཆིབས་བསུར་བྱོན། ཆོ་འཕྲུལ་ཟླ་བའི་ཡར་ཚེས་བཅུ་གཅིག་གི་ཉིན་ཡབ་རྗེ་མཆོག་གི་སྤྲུལ་བའི་སྐུ་རིན་པོ་ཆེ་ནམ་མཁའི་ནོར་བུ་མཐོང་བ་དོན་ལྡན་གྱི་ཞབས་སྐྱེས་བཀྲ་ཤིས་འཁོར་ལོའི་རི་མོ་ཕྱོགས་ཐམས་ཅད་ལས་རྣམ་པར་རྒྱལ་བའི་བླ་བྲང་ཐུབ་བསྟན་ཕོ་བྲང་དུ་འཇིགས་བྲལ་རྡོ་རྗེའི་ཁྲི་ལ་མངའ་གསོལ་བར་མཛད། དེའི་ཚེ་མཆོག་སྤྲུལ་དམ་པའི་ཞལ་བཟང་ཉི་མའི་དཀྱིལ་འཁོར་ནི་མངོན་དུ་གྱུར། སྐལ་བཟང་དད་པའི་ཆུ་སྐྱེས་དགའ་བདེ་སྦྲང་རྩིས་ནི་མངོན་པར་གཏམས། ཕྱོགས་ཀྱི་སྐྱེད་ཚལ་དགའ་སྟོན་པདྨའི་འཕྲེང་བ་ནི་ཚར་དུ་དངར། ཐུབ་བསྟན་སྦྲང་རྩིར་རོལ་པའི་བསྟན་འཛིན་རྐང་དྲུག་གི་ཚོགས་རྣམས་བཤད་སྒྲུབ་རྩེད་འཇོར་ནི་རྣམ་པར་རོལ། རྫོགས་ལྡན་གསར་པའི་དཔལ་མོས་རབ་ཡངས་ནོར་འཛིན་གཞོན་ནུར་འཁྱུད་པའི་དགའ་སྟོན་སྲིད་མཐའི་བར་དུ་ཉམས་པ་མེད་པར་གྱུར་ཏོ། །སྨྲས་པ། འགྲོ་བའི་གཉེན་གཅིག་འཇམ་དབྱངས་རྒྱལ་བའི་ཞལ། །དགའ་བའི་མིག་གིས་མངོན་སུམ་མཐོང་བའི་མོད། །ཡང་ཡང་བསམ་པས་ཆེར་ངལ་སྐྱེ་བོའི་ཚོགས། །རེ་བའི་བང་བ་འབྲས་ལྡན་དུས་བཞིན་གང། །རྒྱལ་སྲས་མཚན་མོའི་མགོན་པོ་ཡིས། །མཛད་བཟང་བདུད་རྩིའི་འོད་ཟེར་གྱིས། །སྐལ་ལྡན་ཡིད་ཀྱི་འོ་མའི་མཚོ། །དགའ་བདེའི་རྦ་རླབས་ཅིར་ཡང་གཡོ། །གང་དེའི་ངོ་མཚར་ལྦུ་བའི་ཕྲེང། །འཛུམ་འཕྲེང་རོལ་པའི་རྣམ་འགྱུར་གྱིས། །མཁའ་ཡང་དོག་པོར་བྱེད་བཞིན་དུ། །ཕྱོགས་ཀུན་སྙིང་གི་བདུད་རྩིར་གྱུར། །འོན་ཀྱང་མགོན་ཁྱོད་ཐབས་མཁས་
མཛད་བཟང་གི །རྟ་ལྗང་རོལ་པའི་ཤིང་རྟས་མ་དྲངས་ན། །མཆོག་སྤྲུལ་ཉི་གཞོན་འོད་ཀྱིས་འཇིག་རྟེན་འདིར། །དགེ་མཚན་རྒྱ་མཚོའི་སྣང་བ་གང་དུ་མཐོང། །དེ་སླད་སྐུ་ཚེ་འཕྲེང་བར་ཡབ་སྲས་ཟུང། །ཐུགས་བསྐྱེད་སྨོན་ལམ་མི་ཤིགས་ལུ་གུ་རྒྱུད། །གཅིག་ཏུ་སྦྲེལ་བའི་རྣམ་ཐར་ཟླ་ཤེལ་ལ། །དད་པའི་ལག་པད་ཟུམ་སྟེ་ཕྱག་བགྱི་འོ། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་ཡབ་རྗེའི་གདན་ས་ཆོས་ཀྱིས་སྐྱོང་བཞིན་པར་མཆོག་སྤྲུལ་ཉི་མ་གཞོན་ནུ་སྤྱན་དྲངས་པའི་སརྒ་སྟེ་བདུན་པའོ།། །། ༈ ཐུབ་བསྟན་རིན་ཆེན་རྡུལ་བརྩེགས་རི་བོའི་སྤོར། །རྟག་འཆར་འཇིགས་མེད་རྒྱལ་དབང་ཉི་མ་མཆོག།།འཇམ་དཔལ་དབྱངས་ཅན་བྱེ་བའི་ཟློས་གར་གྱིས། །བདག་སྙིང་འདབ་བརྒྱའི་ཟེའུ་འབྲུར་རྟག་བཞུགས་གསོལ། །དེ་ནས་ཉིན་མང་པོར། ༸སྐྱབས་མགོན་མཆོག་སྤྲུལ་རིན་པོ་ཆེར་སྤྱི་སྒེར་སོ་སོ་ནས་ལེགས་འབུལ་གྱི་གསོལ་སྟོན་ཟམ་མ་ཆད་པ་ལ་ཚོགས་གླེང། གྲལ་འཕྲོས། མདོ་དར་སོགས་རོལ་ཆ་སྣ་ཚོགས་ཀྱི་རྩེད་སྣ། ཁྲི་འབུལ་སོགས་ལུགས་སྲོལ་དང་མཐུན་པའི་སྤྲོས་པ་གང་རྒྱས་ཀྱི་བཀོད་ཁྱབ་དང། རྗེ་ཉིད་ནས་ཀྱང་ཟུར་དུ་དཀར་སྤྲོ་དང་མཛོད་བཏགས། གོས་ཕྲུག་ལྔ། ལན་འདུའུ་བཅོ་ལྔ་སོགས་ཀྱི་མཆོད་སྤྲིན་སྤྲོས། དགེ་ཚུལ་སློང་དོན་དུ་གཉེར་བའི་བསྒྲུབ་བྱ་བརྒྱ་ལྷག་བསླབ་པའི་གཞི་ལ་བཀོད་ཅིང། རྒྱུད་གྲྭ་སྤྱི་ནས་ཞུས་པ་ལྟར། རྒྱུད་ཁང་དུ་དོན་གཉེར་པ་བཞི་བརྒྱ་ལྷག་ལ་བདེ་མཆོག་ལཱུ་ཨི་པའི་དབང། དགེ་འཕེལ་རི་ཁྲོད་སྤྱི་ཞུས་ཀྱིས་བདེ་མཆོག་ལྷ་ལྔ་དང་ལུས་དཀྱིལ་གྱི་དབང། གཞན་ཡང་རྒྱལ་བ་དགེ་འདུན་རྒྱ་མཚོའི་བཀའ་འབུམ་གྱི་
ལུང་སོགས་ཆོས་བཀའ་དུ་མ་འདོད་མོས་བཞིན་གནང། རྗེ་ཐུའུ་བཀྭན་རིན་པོ་ཆེ་གདན་འདྲེན་ལ་སྔ་ཕྱིར་མངགས་ནས་གང་མྱུར་ཕེབས་དགོས་ཞུས་པ་ལྟར་ཕེབས་པ་ལ་གསུམ་པའི་ཚེས་དྲུག་གི་ཉིན་སྟག་རི་ཐང་ནས་ཆིབས་བསུ་ཞུས་ནས་བླ་བྲང་ཐུབ་བསྟན་ཕོ་བྲང་དུ་གདན་དྲངས། ཚེས་བཅོ་ལྔའི་ཉིན་མཆོག་སྤྲུལ་རིན་པོ་ཆེའི་གཙུག་ཕུད་བཞེས་ཏེ། བློ་བཟང་ཐུབ་བསྟན་འཇིགས་མེད་ཉི་མ་ཞེས་མཚན་གསོལ་བར། ཡབ་སྲས་རྣམས་ཆོས་སྲིད་ཀྱི་དགའ་སྟོན་དུ་མས་མཉེས་པར་མཛད། བཀྲ་ཤིས་འཁྱིལ་དུ་ཁྲི་ཁུར་སྤོ་དགོས་ཀྱི་གསུང་གནང་བར་གྲྭ་དཔོན་སློབ་ཚང་མས་ཕ་མས་བོར་བའི་བུ་ཆུང་ལྟར་ངུ་ངག་དང་བཅས་ཏེ་གསོལ་བ་བཏབ་ཀྱང་བསྒྱུར་དུ་མ་བཏུབ་པར་རྗེ་ཉིད་ཀྱིས་སྙན་སྒྲོན་ཕུལ་བ་ལྟར། མཆོག་སྤྲུལ་རིན་པོ་ཆེ་ནས་ལས་སྣེ་བསྐོ་བཞག་གི་དང་པོ་སྒོ་མང་དཔོན་སློབ་བསམ་བློ་པ་བློ་བཟང་ཆོས་དར་བ་ལ་བཀའ་ཕེབས་ཤིང་ཁོང་ནས་ཀྱང་གང་ཅིའི་ངོས་ནས་དམ་པའི་ངང་ཚུལ་གསལ་བར་བསྟན། དཔོན་སློབ་དེ་ཉིད་ཀྱི་ཞལ་ནས། ཀུན་མཁྱེན་འཇམ་དབྱངས་བཞད་པ་དེ་རྗེ་བཙུན་འཇམ་དབྱངས་དངོས་རེད་མོད། དེའི་བྱིན་རླབས་ཡིན་པ་འདྲ། བཀྲ་ཤིས་འཁྱིལ་འདིར་ཤེས་རབ་ཅན་ཧ་ཅང་མང་པོ་རེད་གསུངས་པ་ནི་རྗེ་འདིས་འཆད་ཉན་གྱིས་ཐུགས་ཁེངས་པའི་གསུང་དུ་སྣང། ཡེ་ཤེས་མཚོན་གྱིས་བདུད་སྡེའི་སྙིང་ལ་འབིགས། །བསོད་ནམས་མཐུ་ཡིས་དྲེགས་ལྡན་ཟིལ་གྱིས་མནན། །ཐུགས་རྗེའི་སྣང་བས་སྙིགས་མའི་མུན་པ་བཅོམ། །མཛད་འཕྲིན་འོད་བརྒྱས་འགྲོ་བློའི་པད་ཚལ་རྒྱས། །བར་སྐབས་དེར་ནག་པོའི་ཕྱོགས་སུ་གྱུར་པ་འགའ་ཞིག་གིས་མཛོད་དགེའི་སྨད་ཀྱི་རྒྱུད་གྲྭ་དང་འབུམ་ཁང་རི་ཁྲོད་གཉིས་བཤིག །བསྟན་འཛིན་དམ་པ་དུ་མ་ཐུགས་དཀྲུག་པའི་སྦྱོར་བ་ལ་བརྟེན་ནས། དེ་ཕྱོགས་ཀྱི་དཔོན་པོ་དཀོན་མཆོག་རབ་བརྟན། ཚེ་དབང་
མགོན་པོ། པདྨ་རྡོ་རྗེ་གསུམ་གྱིས་རྒྱུད་ལམ་རིམ་གྱི་དགོན་པ་གཉིས་ཚུགས་རྒྱུར་བྱས་པ་ལྟར་མཆོག་གསུམ་སྤྱི་དང་སྐྱབས་མགོན་མཆོག་ལ་དད་པ་བརྟན་པའི་དཔོན་པོ་དཀོན་མཆོག་རབ་བརྟན་གྱིས་སྐྱབས་མགོན་མཆོག་སྤྲུལ་རིན་པོ་ཆེར་དགོན་པ་དང་གྲྭ་རྒྱུན་བཅས་ཕུལ་ནས་རྗེ་འདི་ལ་རྒྱུད་གྲྭ་འཛུགས་དགོས་ཀྱི་གསོལ་བ་བཏབ་པ་ལྟར་ཞལ་གྱིས་བཞེས། དེར་ས་རྟགས་གསུམ་ཡོད་པ་རྗེ་ཐུའུ་བཀྭན་རིན་པོ་ཆེར་གསུང་བརྟག་ཞུས་པར་གཡས་གཡོན་དང་རྒྱབ་མདུན་གྱི་རི། མདུན་གྱི་ཆུ་དང་འདམ། རྡོ་དང་བྲག་དང་ས་དབྱིབས་སོགས་མིག་གིས་མཐོང་བ་ལྟ་བུའི་གསལ་ཆ་མཛད་པ་ལྟར། ཟླ་བ་གསུམ་པའི་ཚེས་བཅུ་བདུན་ལ་དེར་བྱོན་ནས་བཀྲ་ཤིས་ཀྱི་གསོ་སྦྱོང། ས་བརྟག་བསླང། ལྟོ་འཕྱེ་བརྟགས་ནས་བརྐོ་བ་སོགས་ས་འདུལ་གྱི་ཆོ་ག་ཚང་བར་བསྒྲུབས། འདུ་ཁང་སོགས་དགོན་པ་གསར་འདེབས་ཀྱི་ཡོ་བྱད་གཞན་གང་ཡང་ལག་འཐོགས་མི་ཡོང། དཀར་རྩི་རྒྱག་རྒྱུ་རང་ཅི་འདྲ་ཡིན་གསུངས་པར། དགེ་སློང་ངག་དབང་བསྟན་འཛིན་གྱིས་དེ་རྐང་ཚའི་ས་ན་ཡོད་ཞུས་པར་ཡིན་ཤས་ཆེ། དཔོན་པོ་འདིའི་ས་ཆ་ན་མི་འདུག་གསུངས། ཐོ་བཙུན་བསྡུས་པ་ཉིས་བརྒྱ་ལྔ་བཅུ་སྐོར་ལ་ཁ་དར་གྱི་འགྱེད་དང། ཚེ་དབང་སྩལ་ཏེ་བཀྲ་ཤིས་འཁྱིལ་དུ་བྱོན། ཐུའུ་བཀྭན་རྡོ་རྗེ་འཆང་གི་བཀའ་བཞིན་གདན་ས་པ་སྒོ་མང་སློབ་ཟུར་སོགས་དགོན་པའི་ཚོགས་འདུ་རྒྱས་པ་མགྲིན་གཅིག་གིས་མཆོག་སྤྲུལ་རིན་པོ་ཆེའི་ཡོངས་འཛིན་གནང་དགོས་ཞུས་པ་ལྟར་ཞལ་གྱིས་བཞེས་ཏེ། བཞི་པའི་བཅོ་ལྔ་ནས་ཚེ་དབང་བརྒྱ་རྩ་སོགས་འབུལ་བའི་དབུ་ཚུགས། ཟུང་འཇུག་རྡོ་རྗེའི་སྐུ་ཡི་ཉིན་བྱེད་ལ། །སྐྱེ་འགག་མུན་པའི་གོ་སྐབས་ག་ལ་སྲིད། །ལུས་ཅན་ཉེར་འཚོ་རགས་པའི་ཟ་མ་ཏོག །ཀུན་དགའི་གཞི་རྩར་
བརྟན་པའི་རྟེན་འབྱུང་དུ། །རྒྱལ་ཀུན་སོ་སོར་རྟོག་པའི་ཡེ་ཤེས་ཉིད། །ཐུན་མཚམས་ལི་ཁྲིའི་དཔལ་ཆགས་ཚེ་མཐའ་ཡས། །མཐར་བྱེད་ལས་རྒྱལ་འཆི་མེད་གྲུབ་པའི་གཉེན། །དེ་ཡི་འཕྲིན་ལས་སྦྲང་རྩིའི་དུས་སྟོན་རྒྱས། ཁྲི་ཆེན་དགེ་འདུན་ཕུན་ཚོགས་སོགས་སྐུ་འཕྲེང་གསུམ་གྱི་ཐུགས་དམ་གྱི་རྟེན་ཟླ་གྲགས་འབྲལ་སྤང་ཐུབ་དབང་གི་སྤྱན་སྔར་སྡེ་ཁྲི་སྤྲུལ་བའི་སྐུ་འཇམ་དབྱངས་ཐུབ་བསྟན་ཉི་མ་བསྙེན་རྫོགས་དང། གཞན་ཡང་བསྒྲུབ་བྱ་གོ་གཉིས་བསྙེན་རྫོགས་བཅུ་གཅིག་དགེ་ཚུལ་དུ་བསྒྲུབས། དེ་ནས་དགོན་ལུང་དུ་བྱོན་ནས་ཆོས་གྲྭར་བརྩི་བཞག་ཆག་མེད་དང་གསུང་བཤད། ཀུན་གཞིའི་མཐའ་དཔྱོད་དང་མི་འཁྲུགས་པའི་སྒྲུབ་དཀྱིལ་སོགས་ལྗགས་རྩོམ་ཡང་མང་དུ་གནང། རྡོ་རྗེ་འཆང་ཐུའུ་བཀྭན་རིན་པོ་ཆེའི་དྲུང་ནས། སྒྲུབ་ཐབས་རིན་འབྱུང་གི་རྗེས་གནང། ཉི་མ་སྦས་པའི་ལུགས་ཀྱི་སྒྲོལ་མ་ཡན་ཆད་ཡོངས་རྫོགས། འཇམ་དབྱངས་ཆོས་སྐོར་ནང་གི་གཅོད་ཁྲིད། སྒྲོལ་དཀར་གྱི་རྗེས་གནང། རོལ་པའི་རྡོ་རྗེའི་གསུང་གི་རྡོར་སེམས་བུམ་ཆོག་དང་རྗེས་གནང་གི་ཆོ་ག །སྒྲོལ་དཀར་ཚེ་ཁྲིད་བསྟོད་པ་སོགས་ཀྱི་ཉེར་མཁོ་དུ་མ་མན་ངག་ལྐོག་ཁྲིད་དུ་གསན་པ་དང། རྒྱུད་གྲྭ་པ་སོགས་ཉན་མཁན་དྲུག་བརྒྱ་སྐོར་ལ་བདེ་མཆོག་ལཱུ་ཨི་པའི་དབང། གཞན་ཡང་བདེ་ལམ་གྱི་ཁྲིད། སྙིང་པོ་དོན་གསུམ་དང་ལམ་གཙོའི་ཁྲིད། ཐུན་དྲུག་རྣལ་འབྱོར་གྱི་ཁྲིད། འཇིགས་བྱེད་ཞལ་ཕྱག་ཡོངས་རྫོགས། མགོན་པོ། ཆོས་རྒྱལ་ཕྱི་ནང་གསང་གསུམ་སོགས་ཀྱི་རྗེས་གནང། གཏོར་ཆོག་སོ་སོའི་ལུང་སོགས་དོན་གཉེར་ཡིད་ཀྱི་རེ་བ་སྨིན་པར་མཛད། དགོན་ལུང་གི་བཙན་ཁང་དང། ཆོས་བཟང་རི་ཁྲོད་རྟེན་དང་བརྟེན་པར་བཅས་པ་ལ་རབ་གནས་མཛད་དེ་བྱིན་རླབས་ཀྱི་གཏེར་དུ་བསྒྲུབས། དྲུག་པའི་སྨོན་ལམ་སྐབས་
སྨོན་ལམ་གསུང་ཆོས་ཆག་མེད་དང་དབྱར་ཞལ་བཞེས་མཛད་དེ་བསྙེན་རྫོགས་གསར་སྒྲུབ་དུ་མ་གཙོར་གྱུར་ཉན་མཁན་མང་པོར་བསླབ་བྱ་གཞན་ཕན་སྙིང་པོའི་བཤད་པ་དང། བུ་སྟོན་གྱི་འདུལ་བའི་ལས་ཆོག །མདོ་རྩ། རྒྱན་འཇུག །ལམ་སྒྲོན་སོགས་ཀྱི་ལུང་གནང། ཚོགས་ཆེན་དུ་དགེ་འདུན་ཞལ་གྲངས་ཉིས་སྟོང་སྐོར་ལ་མང་ཇ་དང། དོང་ཚེ་ཞོ་འགྱེད། མན་ཐོའི་རི་ཁྲོད་དུ་གདན་དྲངས་པར་ཡང་དགའ་ལྡན་ལྷ་བརྒྱ་མའི་ཁྲིད། སྒྲོལ་མའི་རྗེས་གནང། རྒྱལ་བ་དགེ་འདུན་རྒྱ་མཚོའི་ཡི་དམ་སྒྲུབ་སྐོར། རྡོར་གཅོད། ནཱ་རོ་ཆོས་དྲུག་གི་ཁྲིད་ཡིག་སོགས་ཀྱི་ལུང། མང་འགྱེད་གྱ་ནོམ་པ་གནང་བ་དང། རིགས་སྨྲ་དྲུང་ཡིག་དགེ་འདུན་དང། མཛོད་དགེ་བློ་བཟང་གཉིས་ཞབས་ཕྱིར་ཁྲིད་ནས་དོན་གཉེར་པ་འགའ་ལ་སྒྲ་དང་སྙན་ངག་ཁྲིད་བཅུག །བཀྲ་ཤིས་འཁྱིལ་གྱི་མཛོད་འདུལ་དབུ་ཕར་གྱི་རིགས་སྨྲ་མང་པོ་བྱང་ཕྱོགས་ཀྱི་ཆོས་སྡེ་སོ་སོར་གྲྭ་སྐོར་ལ་མངགས་པ་སོགས་ཉིན་མཚན་ཁོར་མོ་ཡུག་ཏུ་བསྟན་པའི་བྱ་བ་འབའ་ཞིག་ལ་གཞོལ་བ་མཛད། ནོར་འཛིན་དཔལ་མོའི་རྒྱན་གྱུར་འདུས་པའི་སྡེས། །ཟབ་རྒྱས་ལེགས་བཤད་དགའ་སྟོན་ཚོལ་བ་ན། །བཅུ་ཕྲག་རིག་པའི་གནས་ལ་དབང་འབྱོར་བའི། །མཁྱེན་གཏེར་ཁྱོད་ཞབས་གཙུག་གི་རྒྱན་དུ་ཐོབ། །ཆོས་ཀྱི་སྡེ་ཆེན་གངས་ཀྱི་རི་བོའི་སྤོར། །ཟླ་བྲལ་སྨྲ་བའི་སེདྒེ་ཁྱོད་ཉིད་ཀྱིས། །མདོ་སྔགས་ཆོས་ཀྱི་སྒྲ་དབྱངས་བསྒྲགས་པ་ན། །མངོན་རློམ་གླང་ཆེན་ཚོགས་རྣམས་འདར་ཞིང་ཞུམ། །དགུ་པའི་ཚེས་ལ་སླར་ཡང་བཀྲ་ཤིས་འཁྱིལ་དུ་ཕེབས་ཏེ་ཚོགས་ཆེན་ལ་མང་ཇའི་ཐོག་ཇ་སྲང་བཞི་རེའི་འགྱེད་གནང། སྔར་དགོན་ལུང་གཟིམས་གཤག་ཏུ་ཐུའུ་བཀྭན་རིན་པོ་ཆེ་ཉིད་གློ་བུར་དུ་ཕེབས་ནས་དངུལ་གྱི་
འཁོར་ལོ་ནང་མཛོད་ཀྱིས་སྤྲྲས་པ། མཎྜལ་སོགས་ཕུལ་ཏེ་ས་རྒྱན་སྦྱར་བའི་འགྲེལ་པ་ཞིག་གནང་ན་བབས་འོས་ཆེ་བའི་བསྔགས་བརྗོད་དང་བཅས་རྩོམ་པར་བསྐུལ་བ་བཀའ་དང་བླངས་མཛད་བཞེད་ཀྱིས་རྒྱ་གཞུང་ལ་གཟིགས་རྟོག་མཛད། གཞུང་གི་མགོར་ས་སྡེའི་སྤྱི་དོན་ཞིག་གལ་ཆེ་གསུངས་ནས་མགོ་བརྩམས། བཅུ་པའི་ཉེར་གཅིག་ལ་མཛོད་དགེ་སྨད་དུ་དགོན་པ་གསར་འདེབས་ཀྱི་སར་བྱོན་ནས་ཐོ་བཙུན་རྣམས་ལྔ་མཆོད་ལ་བསྡུས་ནས་ཇ་ཐུག་དང། དོང་ཙེ་ཞོ་ལྔ་རེའི་འགྱེད་གནང། ཉི་ཤུ་དགུའི་ཉིན་ཉིད་དཔོན་སློབ་ཀྱིས་སྨད་རྒྱུད་ལྟར་བསྐང་གསོ་བཏང། རྗེ་ཉིད་ནས་གཏོར་རྒྱག་གནང་སྟེ་གནས་འདིར་ལས་རབ་འབྱམས་འགྲུབ་པའི་རྟེན་འབྲེལ་གྱི་སྒོ་འཕར་ཕྱེ། དེ་ནས་གདན་སར་བྱོན་ནས་བཞུགས་ཡོད་སྐབས་སྟོད་ཀྱི་ལྷ་སྡེ་འགའ་ཞིག་གིས་རྒྱ་ཚོང་བ་ཞིག་བཅོམ་པའི་དོན་སྐོར་ཟ་འདོད་གཙོར་བཟུང་གིས་ཟི་ལིང་དུ་ཕེབས་བྱས་པར། སླར་བསྙད་འདོགས་ཀྱིས་བླ་མ་དང་དགོན་པ་སོ་སོར་གནོད་ན་མི་ལེགས་པར་དགོངས་ཏེ་རྗེ་ཉིད་ཟི་ལིང་བརྒྱུད་དེ་ལན་ཇུར་ཕེབས། དགུང་ལོ་སོ་བརྒྱད་པ་ས་ལུག་གི་གནམ་ལོ་གསར་ཚེས་ཀྱི་དགའ་སྟོན་ལན་ཇུ་མཁར་མོ་ཆེར་གནང། དེ་ནས་ཀ་ཇུའི་མཁར་དུ་ལིན་ཐོའུ་བརྒྱུད་ནས་བྱོན། བྱམས་ཆེན་ཆོས་རྗེའི་བཞུགས་གནས་ཤན་ཆིན་ཟིར་བཞུགས་གདན་འཇགས། ལོ་མཇུག་ནས་བཟུང་སྟེ་དགོན་པའི་ཚོགས་སྤྱི་སྒེར་བླ་བྲང་ཆེན་མོ་དང། ཉིད་ཀྱི་བླ་བྲང་སོགས་ནས་ཞབས་བརྟན་ཕོན་ཆེར་བསྒྲུབས། ཕྲན་གྱིས་རྡོར་སློབ་བྱས་ཏེ་བསྙེན་སོང་སུམ་ཅུས་མགོན་པོའི་སྟོབས་ཆེན་ཤུགས་བཟློག་དང་འབྲེལ་པར་གློ་བུར་ལས་བཅོལ་གྱི་གཏོར་མ་བརྡབ་པས་མི་དགུ་མ་གཏོགས་བྲོ་འཚལ་བ་སོགས་དང་པོར་འཚུབ་ཀྱང་མཐར་ཐམས་ཅད་སངས་དྭངས་སུ་སོང་སྟེ་ཟོར་བཀྲ་ལེགས་ཤིང་འཇམ་པ་སོགས་
བྱུང། ཀ་ཇུར་ཕེབས་པའི་གཏམ་ཐོས་འཕྲལ་གདན་ས་ནས་ཆོས་སྲིད་གཉིས་འཛོམ་གྱི་རྒྱུད་པ་དཔོན་སློབ་དཀོན་མཆོག་ལྷུན་གྲུབ་དང། བླ་བྲང་ཆེན་མོའི་ཞབས་ཕྱི་ཆེ་ཆུང་སོགས་རིམ་པར་སོང། ཕྲན་ཡང་མྱུར་དུ་ཤོག་གསུངས་པ་ལྟར་མགྱོགས་ཤད་ཀྱིས་ཕྱིན་ནས་ཞལ་དཀྱིལ་མཇལ། ལན་ཇུ་སོགས་གང་དུ་ཕེབས་སར་རྒྱ་དཔོན་རྣམས་སྐུ་མཐོང་བ་ཙམ་གྱིས་དད་པས་བསྙེན་བཀུར་དང་ཆོས་འབྲེལ་ཞུ་བ་ལས་འཚེ་བའི་ཉམས་ཙམ་ཡང་མེད་པ་ནི། སྟོབས་ཀྱིས་བསྡིགས་པ་མེད་པར་འགྲོ་ཀུན་འདུད། །ཅེས་པའི་དོན་དེར་སྣང། ཀ་ཇུ་མཁར་གྱི་མི་དཔོན་ཚང་མས་གུས་འདུད་ལྷག་པར་ཆེ་བའི་ཁར་ཟླ་བ་དང་པོའི་ཚེས་བཅོ་ལྔའི་ཉིན་མོ་ས་འགུལ་ཆེ་བ་བྱུང་སྟེ་སྲང་བར་དང་ཁྲོམ་གྱི་མི་རྣམས་ཕར་ཁ་ཚུར་ཁར་ལན་ཁ་ཤས་རེ་འབྲོས་ལོང་གི་བར་དུ་ལྡེམ་ལྡེམ་དུ་གཡོས་པས་ཐམས་ཅད་ཤིན་ཏུ་སྐྲག་ནས་གླེང་བརྗོད་མང་པོ་བྱུང། དེ་ནས་རྒྱུད་པ་དཔོན་སློབ་དང། བླ་བྲང་མགྲོན་གཉེར་དཀོན་མཆོག་གྲགས་པ་སོགས་ཀྱིས་རྒྱ་དཔོན་སོ་སོའི་ངོ་ཚབ། ལིའུ་བན་ཐོའུ་སོགས་ཁྲིད་ནས་མཛོད་དགེ་སྟོད་ཕྱོགས་སུ་སོང། ཕྲན་གྱིས་ཞབས་ཕྱི་ཞུས་ཏེ་སྔ་དྲོ་ཕྱི་དྲོ་རྡོ་རྗེ་འཇིགས་བྱེད་ཀྱི་སྒོ་ནས་ཕྱིར་བཟློག་གི་བསྒོམ་བཟླས་དང། འོད་ཟེར་ཅན་གྱི་དགྲ་དང་ཆོམ་རྐུན་ཞི་བའི་ལས་སྦྱོར། ཆོས་སྐྱོང་སོ་སོར་འཕྲིན་བཅོལ་བཅས་ཐུན་རིང་པོ་གཉིས་རེ་ཆག་མེད་མཛད་པས་བྱ་གཟུགས་དང་བྱ་སྐད་མངོན་སུམ་དུ་བྱུང་ནས་ས་དེར་མེད་འགྲོ་བ་སོགས་ལྟས་སྣ་ཚོགས་པ་བྱུང་ཡང་ཇེ་འཇམ་ཁོ་ནར་སོང། ཉི་མ་རེ་རེ་བཞིན་གུང་ཚིགས་ཀྱི་སྔ་ཕྱིར་ཉིན་ལམ་གསུམ་ཚུན་ཆད་ནས་འོངས་པའི་དོན་གཉེར་པ་རྣམས་ལ་འདོད་ཆོས་དང། བསྙེན་རྫོགས་གནང་བ་བསྡོམས་ན་ཉིས་བརྒྱ་མ་ལོང་ཙམ་གྱི་
ཚོད་བྱུང། ཕྱི་དྲོའི་ཆ་ལ་ཕྲན་གྱིས་ཡི་གེ་པ་བྱས་ནས་ཡབ་རྗེ་རྡོ་རྗེ་འཆང་གི་རྣམ་ཐར་སྔར་གྱི་ཚིག་མཚམས། ཞབས་སྐྱེས་གེ་སར་ར་ཡི་འཕྲེང། །ཞེས་སོགས་ཀྱི་འཕྲོས་ནས་བཀའ་རྩོམ་ཕལ་ཆེར་གྲུབ་ཀྱང་རྟེན་འབྲེལ་གྱི་ཁྱད་མཛད་བྱང་དགོན་པ་རང་ནས་གནང་རྒྱུ་བྱས། སྐབས་འདིར་ཡང་དོན་རེ་རེ་ལ་སྡེབ་ལེགས་ཚིགས་བཅད་མང་པོ་ཐོགས་མེད་དུ་སྤེལ་བའི་མཚན་གཞི་ཙམ་ནི་མཇུག་གི་སྨོན་ཚིག་གི་སྐབས་སུ། ད་ནི་ཚིག་བཀྲ་ལེགས་པའི་ཁྱད་གཞི་ཞིག་ཞོག་གསུངས་པར་བཀྲ་ཤིས་རྟགས་བརྒྱད་ཞུས་པར། རྒྱུན་ཆགས་གཅིག་དང་བཅས་མི་འདྲ་བ་འགའ་གསུངས་པ་ཕྲན་གྱིས་རྔོ་མ་ཐོགས་པར། གཏམ་འདི་སྲིད་པའི་ཚ་གདུང་སེལ་བའི་གདུགས། །སྨྲ་མཁས་ཡོངས་ཀྱི་མགྲིན་པར་ཆོས་ཀྱི་དུང། །སྐལ་བཟང་ཡིད་ལ་དགེ་མཚན་དཔལ་བེའུའི། །བཀྲ་ཤིས་རི་མོའི་རྣམ་པར་གནས་གྱུར་ཅིག །ཅེས་སོགས་བཞད་མོ་མཛད་བཞིན་དུ་གནང། དེ་དུས་ཞལ་ནས། ཁོ་བོ་མངལ་ན་ཡོད་སྐབས་རྩིས་པ་ཞིག་གིས་བྱམས་ཆེན་ཆོས་རྗེའི་ཐང་ཀ་ཞིག་བཞེངས་དགོས་བྱས་ནས་བཞེངས་པ་ད་ལྟའི་མ་ཁྱིམ་དུ་ཡོད་ཅིང། ད་རེས་འདིར་ཀུན་གྱིས་ལྷ་ཁང་སོ་སོར་བཀུར་སྟི་དང། ཆོས་འབྲེལ་སྨོན་ལམ་ཁ་ཞེ་མེད་པའི་ཐོག་བྱམས་ཆེན་ཆོས་རྗེའི་དབུ་ནབ་དང། དགེ་སློང་བསོད་ནམས་རིན་ཆེན་ལ་ཏཱ་མིང་གིས་གནང་བའི་འཇའ་ས་སོགས་བསྟན། སྙིང་ཐག་པ་ནས་དད་ཅིང་གུས་པས་ངུ་ངག་རྩོལ་མེད་ཀྱིས་འདི་ཕྱིའི་བློ་རྩེ་གཏད་ཚུལ་འདི་དག་རྟེན་འབྲེལ་ཁྱད་པར་བ་ཞིག་ཏུ་སྣང་གསུངས་པ་གསང་བའི་གནས་ཤིག་དཔག་རྒྱུ་ཡོད་དམ་སྙམ། དེ་ནས་མཛོད་དགེ་སྟོད་དུ་སོང་བའི་དོན་གཅོད་པ་རྣམས་ཕྱིར་འཁོར་འཕྲལ་ཐང་ཤང་ནས་ཐག་བཅད་པ་ལོག་སྒྲུབ་མཁན་གྱི་རྒྱ་མི་ཚོས་དང་བླངས་མི་བྱེད་ཁུལ་བྱས་མ་ཐག་ཁྲིམས་
ལས་ཀྱིས་ཚར་བཅད་དེ་ཡི་གེ་བཞག །བཞི་པའི་བཅུ་དགུའི་ཉིན་མཁར་ནས་ཆིབས་བསྒྱུར་བར་སེར་མོ་བ་རྣམས་ཀྱིས་མཆོད་རྫས་རོལ་མོ་སོགས་དང། སྐྱེ་ཕོ་མོ་ས་གཞི་གང་བ་རྣམས་ཀྱིས་སྤོས་དང་མེ་ཏོག་སོགས་ཅི་རིགས་ཐོགས་ནས་སྐྱེལ་མ་ཞུ་ཞིང་ཕྱག་འཚལ་བའི་རྡུལ་དང། རྒྱ་སྐད་ཀྱིས་སྐྱབས་འཇུག་ཞུ་བའི་སྒྲས་ལུང་པ་གང་ཞིང་ཀུན་ཀྱང་མིག་ནས་མཆི་མ་འཁྲུག་བཞིན་འབྲལ་མ་ཕོད་པར་ལེ་བར་དུ་མའི་བར་དུ་རྗེས་བསྙེགས་པ་མཐོང་ནས་དམ་པའི་བྱིན་རླབས་ལ་ངེས་པ་རྙེད། དབང་སྔོན་མདངས་ལྡན་ཆེ་མཐོ་མཁར་ཆེན་བ་གམ་སུམ་རྩེན་གནས་སུ་སྙེགས། །བདེ་དགས་འཚོ་བའི་མི་རྣམས་འདོད་པས་མྱོས་ཤིང་དགའ་བའི་གླུ་དབྱངས་ལེན། །བྱ་རྣམས་གར་བྱེད་སྲོག་ཆགས་སྣ་ཚོགས་རྣམ་མང་རྟོག་པའི་ཆོ་འཕྲུལ་འགྱེད། །ལྗོན་ཤིང་ལོ་ཏོག་ཆུ་གཙང་གིས་བསྐོར་སྤྲིན་སྔོན་བླ་བྲེ་བྲེས་པ་དེར། །མགྲོན་དུ་གཉེར་བ་བཞིན་དུ་སློབ་མ་འདུ། །ལྗོན་ཤིང་དུད་པ་བཞིན་དུ་ཕྱག་འཚལ་ཞིང། །མཁའ་ལས་ཆར་པ་བཞིན་དུ་ཟང་ཟིང་འབུལ། །འབྲས་བུ་སྨིན་པ་བཞིན་དུ་དུལ་བར་མཛད། །གདན་སར་ཕེབས་ནས་ཚོགས་སུ་མང་ཇའི་ཐོག་བསལ་དོང་ཙེ་ཞོ་རེ་དང། ཇ་སྲང་བརྒྱད་རེའི་འགྱེད་གནང། རེབ་ཙ་བཀའ་འགྱུར་བ་སྤྲུལ་བའི་སྐུ་དཀོན་མཆོག་དམ་ཆོས་ཡར་འཕེལ་སོགས་བསྒྲུབ་བྱ་བདུན་ཅུ་བསྙེན་རྫོགས་དང་སོ་བརྒྱད་དགེ་ཚུལ་དུ་བསྒྲུབས། འཇིགས་བྱེད་ལྷ་བཅུ་གསུམ་མའི་དབང། ཆོས་རྒྱལ་གསུམ་གྱི་རྗེས་གནང། བླ་མཆོད་དང་འབྲེལ་བའི་ཕྱག་ཆེན་གྱི་ཁྲིད་རྒྱས་པ་སོགས་སོ་སོའི་མོས་པ་བཞིན་གྱི་ཆོས་བཀའ་དང་བཀའ་རྩོམ་ཡང་ཅི་རིགས་མཛད། དབྱར་སྔ་ཕྱི་འདི་དག་ཏུ་གཟིམས་གཤག་གི་ནུབ། མེ་ཏོག་གི་སྐྱེད་ཚལ་དུ་བསིལ་
ཁང་བསྒྲུབས་ནས་བཞུགས་ཤིང། བསིལ་ཁང་དེར་སྒོ་མེད་སར་སྒོའི་རི་མོ་དང་ལག་ཟུང་བཞག །སྒོ་ངོས་ཡུག་འཇམ་བྱས་པས། ཕལ་ཆེར་གྱིས་སྒོ་མེད་སར་འཛུལ་རེ་བྱེད་ཅིང། ཤེལ་སྒོ་དུ་མར་རྗེ་ཉིད་ཁང་བཟང་དང་བཅས་པའི་གཟུགས་བརྙན་ཤར་བར་རྒྱུས་མེད་ཀྱིས་མཇལ་ཁ་ཞུ་རྩིས་བྱེད་པ་དང། གཟུགས་བརྙན་ལ་དད་གུས་ཀྱི་སྒོ་ནས་གསུང་ལ་ཉན་ཅིང། གཟུགས་བརྙན་ལ་ཐལ་མོ་སྦྱོར་བ་དང། མི་གཟུགས་ཀྱི་རི་མོ་ལ་མི་མགོ་འབུར་གཟུགས་བཞག །ལག་ན་ཤིང་སྒམ་འབུར་དུ་དོད་པ་ཐོགས་པ་དང། ཤེལ་སྣོད་ཀྱི་རི་མོ་ལ་ཤེལ་མདངས་བྱུག་པའི་ཤོག་སྲུབ་ལ་རྨ་བྱའི་སྒྲོ་བཙུགས་པ་སོགས་ཕལ་པས་བལྟས་ན་རྩེད་མོའི་རྣམ་པ་མང་པོ་དང། འཕྲུལ་གྱི་གླེགས་བམ་གཟུགས་བྱས་པའི་སྟེང་ཀུན་རྫོབ་སྒྱུ་མའི་འཁྲུལ་འཁོར་སྦ་མེན་བཞུགས་སོ་ཞེས་བྲིས་པ། གདུལ་བྱ་རྣམས་ཡང་དག་པའི་ལྟ་བ་ལ་བཀྲི་བའི་ཐབས་དམ་པར་གོ །ཆགས་སྡང་གྲྭ་ཟུར་ཐོགས་ས་མེད་པས་བདེ། །ཡུལ་དྲུག་བྱིས་པའི་རྩེད་འཇོར་མ་གཡེངས་བདེ། །ཏིང་འཛིན་དམིགས་པར་ཆོས་ཀུན་ཆུབ་པས་བདེ། །རྟག་ཏུ་ཟག་མེད་དགའ་བས་འཛུམ་པས་བདེ། །སོགས་ཀྱི་རི་མོ་ཡང་འདིར་ཐོག་མར་འགོད་པ་གནང་སྟེ་གོ་དགོས་པའི་གནད་མང་དུ་མཆིས། སྟོན་ཀ་དགོན་ལུང་གི་ཚོགས་གྲྭ་ཚང་སོ་སོར་གཏོང་སྒོ་དང། ཐུའུ་བཀྭན་རྡོ་རྗེ་འཆང་ལ་དངུལ་རྡོ་ཚད་སོགས་ཀྱི་ལེགས་འབུལ། དཀར་སྤྲོ་དང་བཅས་དགོན་ལུང་གི་ཁྲི་ཁུར་སྤོས་པས་དགེ་འདུན་པ་རྣམས་མཚོ་འཁྱག་པའི་ངང་པ་ལྟར་ཅི་བྱ་གཏོལ་མེད་ཀྱི་ཐུགས་ངལ་མཛད། དེ་ཡང་རྗེ་འདི་ཉིད་ཀྱིས་སྐབས་དེ་དག་ཏུ་འཆད་ཉན་གཙོ་བོར་མཛད་ཅིང། དེའི་མཐུས་དགེ་འདུན་གྱི་སྡེ་རྣམས་སུ་གཞི་ཚུལ་ཁྲིམས་རྣམ་པར་དག་པ་ལ་གནས་ནས་ཐོས་པ་དོན་དུ་གཉེར་བ་དང། ཐོས་པ་འཛིན་པའི་
ཐར་འདོད་བློ་གསལ་གྱི་སྐྱེ་བོ། དབྱར་གྱི་ཆུ་མཚོ་བཞིན་དུ་འཕེལ་བ་ནི་རྒྱལ་བས་བསྔགས་པའི་གནས་སུ་གྱུར་པ་ཡིན་ཏེ། གཟི་བརྗིད་ཅན་གྱི་མདོ་ལས། མང་དུ་ཐོས་པའི་དགེ་སློང་གིས་སྒྲིབ་པའི་གནས་ཐམས་ཅད་རྒྱུན་འཆད་པར་འགྱུར་རོ། །ལམ་ངན་པ་ཐམས་ཅད་བཀག་པར་འགྱུར་རོ། །འདིའི་ནང་དུ་དཀར་པོའི་ཆོས་རྣམས་འདུ་བར་འགྱུར་རོ། །མཆོག་ཏུ་ཉེ་བ་ཉིད་ཀྱི་སངས་རྒྱས་བཅོམ་ལྡན་འདས་རྣམས་བཞུགས་པར་འགྱུར་ཏེ། གནས་བརྟན་ཤཱ་རིའི་བུ་དང། གནས་བརྟན་རབ་འབྱོར་དང། དགེ་སློང་ཀུན་དགའ་བོ་བཞིན་ནོ། །ཀུན་དགའ་བོ་དེ་ལྟར་དགེ་སློང་མང་དུ་ཐོས་པ་དག་ནི་སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་དུ་མི་སྐྱེ་ཞིང་གང་དང་གང་དུ་སྐྱེ་བ་ཐམས་ཅད་དུ་ཤེས་རབ་ཆེན་པོར་འགྱུར་རོ་ཞེས་དང། དགེ་སློང་མང་དུ་ཐོས་པ་འཚོལ་བ་ནི་གནས་ལྔ་འཛིན་པར་འགྱུར་རོ། །ལྔ་གང་ཞེ་ན། འདིའི་ཡིད་ཆོས་ཀྱི་ནང་དུ་ཆུད་པར་འགྱུར་བ་དང་ཤི་འཕོས་ཀྱང་མཐོ་རིས་ཀྱི་འཇིག་རྟེན་དུ་སྐྱེ་བ་དང། དེར་ཡང་ལྷ་རྣམས་འཁོར་བྱེད་པ་དང། ལྷ་དང་མི་རྣམས་ཆོས་དང་ལྡན་པའི་གཏམ་གྱིས་དགའ་བར་བྱེད་པ་དང། ལྷ་དང་མི་རྣམས་ཀྱིས་ཟིལ་གྱིས་མི་ནོན་པར་འགྱུར་བ་དང། ཤི་འཕོས་ནས་ཀྱང་མིའི་ནང་དུ་སྐྱེ་ཞིང་རྒྱལ་སྲིད་བྱེད་པར་འགྱུར་རོ། །ཞེས་གསུངས་པ་ལྟར་རོ། །དེས་ན་ཐོས་པ་ལས་འདས་པ་ནི་རྒུད་པ་ཐམས་ཅད་ཀྱི་གནས་སུ་མདོ་ལས་གསུངས་པས་རྒྱལ་སྲས་གཞོན་ནུ་ནོར་བཟང་ཐོས་པས་མི་ངོམས་པའི་རྣམ་ཐར་ལྟར་ཐར་འདོད་རྣམས་ཀྱིས་ཐོས་པ་དང་ཡོན་ཏན་འཚོལ་བ་ལ་འབད་པར་བྱའོ། །དེ་ལྟར་མདོ་སྨད་ཀྱི་བཤད་གྲྭ་ཀུན་ལས་ཕྱི་མོ་ལྟ་བུར་གྱུར་པ་དགོན་ལུང་
བྱམས་པ་གླིང་དང། དཔལ་ལྡན་བཀྲ་ཤིས་འཁྱིལ་གྱི་གདན་ས་མཛད་པའི་དུས་འདིར་བཤད་པ་དང་སྒྲུབ་པའི་སྦྲང་རྩིའི་ཁུར་གྱིས་ལྕི་བའི་དགེ་འདུན་གྱི་སྡེ་པདྨའི་མཚོ་ཆེན་ལྟ་བུ་དག །ཉི་མའི་ཟེར་གྱིས་ཕྱེ་བའི་ཆུ་སྐྱེས་བཞིན་དུ་ཆོས་དང་སྲིད་ཀྱི་དཔལ་འབྱོར་འདབ་བརྒྱ་རྣམ་པར་རྒོད་པས་བློ་གསལ་རྐང་དྲུག་བྱེ་བའི་ཉེར་འཚོ་ཟླ་མེད་པར་གྱུར་ཏོ། །སྨྲས་པ། མཁས་པས་ཉེར་བཏེག་འཇིགས་མེད་ཆོས་ཀྱི་ཁྲིར། །རྒྱལ་ཀུན་ཡེ་ཤེས་སྒྱུ་འཕྲུལ་ཁྱོད་འཁོད་ཚེ། །སྐྱེ་རྒུའི་གཙུག་ཏུ་ཞབས་སྐྱེས་པདྨའི་རྡུལ། །དྲི་མེད་ནོར་བུའི་ཅོད་པན་ཇི་བཞིན་མཛེས། །བྱིས་པའི་བློ་གྲོས་མེ་ལོང་ཆུང་ངུའི་ངོར། །དོགས་པའི་གཟུགས་བརྙན་འཆར་དཀའ་ཤིང་རྟ་ཆེའི། །བཞེད་གཞུང་སྟོང་གསུམ་བྱེ་བ་ཕྲག་བརྒྱའི་ཞིང། །ཕྲ་རྡུལ་གནས་སུ་འགོད་མཛད་ཁྱོད་མིན་སུ། །མཁས་མཁས་པཎ་གྲུབ་བྱེ་བའི་གཞུང་བརྒྱའི་དོན། །དམ་དམ་ཚིག་དོན་རྒྱས་སྤྲས་དཀའ་གནད་མདུད། །གསལ་གསལ་ལུང་དང་རིགས་པས་ལེགས་བཀྲོལ་ནས། །ལྷོད་ལྷོད་མགྲིན་པའི་ལམ་ནས་འཆད་མཁས་ཁྱོད། །ཐོགས་མེད་འཆད་པས་ཐོགས་མེད་གཉིས་པ་བཞིན། །ཕྱོགས་ལས་རྣམ་རྒྱལ་ཕྱོགས་ཀྱི་གླང་པོའམ། །ཆོས་མིན་ཕམ་བྱེད་ཆོས་ཀྱི་གྲགས་པ་ལྟར། །སྙན་པར་གྲགས་པ་སྙན་པའི་དབྱར་རྔ་བཞིན། །རྩོད་ངག་དགག་སྒྲུབ་རཱ་མ་ཎ་ཡི་མདའ། །འཕངས་པས་དཀའ་གནད་མགྲིན་པའི་དངོས་བཏགས་ལ། །རྨོངས་པའི་འབོད་གྲོགས་མགྲིན་བཅུ་བཅད་མཐོང་ཚེ། །ཚིག་སྤྱིའི་རི་དྭགས་སྙེགས་རྣམས་གྱི་ནར་ངལ། །ཁྱོད་གསུང་བདུད་རྩིས་འཚོ་བའི་སློབ་མའི་ཚོགས། །མང་ཐོས་ཞི་དུལ་དཔལ་གྱིས་ཉེར་མཛེས་ཤིང། །རང་གཞན་ཕན་བདེའི་བསིལ་བ་མི་འདོར་བ། །སོས་ཀའི་དུས་ཀྱི་ཤིང་གི་
མེ་ཏོག་བཞིན། །མཁས་མང་གསེར་གྱི་རི་བོ་ཚར་དུ་དངར། །ཐུབ་བསྟན་རོལ་མཚོ་འཆད་ཉན་རྦ་རླབས་གཡོ། །བཤེས་གཉེན་ལྷུན་པོ་འཕྲིན་ལས་ཉི་ཟླས་མཛེས། །ཐུབ་བསྟན་གླིང་བཞི་རྫོགས་ལྡན་རྩེ་དགའ་འཛིན། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་མདོ་སྨད་ལྷོ་བྱང་གི་ཆོས་གྲྭ་ཆེན་པོ་དག་ཏུ་བཀའ་པོཏ་གཙོར་གྱུར་གྱི་འཆད་ཉན་སྤེལ་བའི་སརྒ་སྟེ་བརྒྱད་པའོ།། །།འཇིགས་མེད་གསང་གསུམ་རྒྱ་མཚོ་ལས་འཁྲུངས་པའི། །བླ་མ་མཁྱེན་པའི་གཏེར་ཆེན་དབྱངས་ཅན་ཟུང། །སྙིང་དབུས་རྨོངས་འཇོམས་སྒྲྲོན་མེར་རྟག་བཞུགས་ནས། །ནམ་ཡང་གཟུངས་སྤོབས་རྣམ་དཔྱོད་ཟླ་མེད་མཛོད། །དེ་ནས་ཟླ་བ་བཅུ་བའི་ལྔ་མཆོད་ལ་དགོན་གསར་དགའ་ལྡན་རབ་རྒྱས་གླིང་དུ་བྱོན། འདུ་ཁང་གི་འོག་ཤོད་གྲུབ་པའི་ནང་དུ་ཐོ་བཙུན་བསྡུས། མང་འགྱེད་གཏོར་རྒྱག་སྔ་ལོ་ལྟར་གནང། རྟེན་འབྲེལ་གྱི་ཁྱད་མཆོད་རྫས་གདུགས་གཅིག །རྒྱལ་མཚན་ཕྱེ་ཕུར་ཆེ་ལེགས་དྲུག་བཅས་བཞག །ཚུར་ཕེབས་འཕྲལ་དགུན་གྱི་རིང་བཅད་རྒྱ་མཛད་ཅིང། ཉི་ཟློག་གི་སྐབས་སུ་བསྟན་འཛིན་གྱི་སྐྱེས་བུ་མཐའ་དག་གི་ཞབས་བརྟན་དུ། ཡིད་དགའ་ཆོས་འཛིན་གྱི་སྤོང་བ་པ་རྣམས་ཀྱིས་སྒྲོལ་དཀར་ཚེ་སྒྲུབ་ཉིན་བདུན་རེ་མཛད་པར་ཇ་ཐུག་དང། ཇ་སྲང་བརྒྱད་རེའི་འགྱེད་གནང་བ་ལོ་འདི་ནས་བཟུང་སྟེ་ད་ལྟའི་བར་དུ་མ་ཆད་པར་གནས། དགུང་ལོ་སོ་དགུ་པ་ལྕགས་སྤྲེལ་ལོ་གསར་དགའ་སྟོན་སོགས་དཀྱུས་ལྟར་ལ། བསྒྲུབ་བྱ་བཅུ་གཉིས་རབ་བྱུང་དང། དོན་བདུན་བསྙེན་རྫོགས་ལ་བཀོད། མགོན་པོའི་བཀའ་
ཆེན་བཅུ་གསུམ། ཁྱུང་ཁྲ། འཇམ་ནག །ལྷོ་བྲག་སྙན་རྒྱུད་ཀྱི་རྗེས་གནང་སོགས་སྩལ། གཉིས་པའི་ཚེས་དགུའི་ཉིན་རི་ཁྲོད་དུ་ཕེབས་པའི་ལམ་ནས་བརྒྱད་སྟོང་པའི་ཤོག་གུ་གཅིག་རླུང་གིས་ཁྱེར་འོངས་ནས་ཕྱག་ཏུ་བབས་པ་ལ་གཟིགས་པས་ཆོས་ཟབ་མོ་འོད་བྱེད་པ་ཞེས་བྱ་བའི་ཏིང་ངེ་འཛིན་དང། ཞེས་པ་ནས། དགེ་བའི་བཤེས་གཉེན་ལ་གུས་པར་བྱའོ། །རབ་ཏུ་དང་བར་བྱའོ་ཞེས་ཡོད་པ་གཟིགས་ནས་རྟེན་འབྲེལ་ལེགས་ཞེས་དགྱེས་ཚོར་མཛད། ཕྱིས་སུ་ཐུའུ་བཀྭན་རིན་པོ་ཆེའི་སྤྲུལ་སྐུའི་དོན་བརྟག་ཞུར་འོངས་སྐབས་རྗེ་ཉིད་ནས་བོད་ཀྱི་གྲུབ་མཐའ་ཤེལ་དཀར་མེ་ལོང་ལ་དཔེ་མོ་གཟིགས་པས་རྡོ་རིང་པའི་མདུན་དུ་ཚར་ཆེན་ཕེབས་ཏེ་བཙུན་མ་ཞིག་ནས་མཁའ་སྤྱོད་མའི་བེའུ་བུམ་བྱིན་ནས་འདི་ཁྱོད་ལ་རྡོ་རིང་པས་བསྐུར་ཚུལ་བཤད་པ་ཞུས་པར་རྡོ་རིང་རྗེ་ནས་རྗེ་བཙུན་མས་དཔེ་ཆ་བརྐུ་བར་འདུག་ཅེས་བེའུ་བུམ་དཔེ་ཁང་དུ་བསྐྱལ་ཏེ་སྔར་གྱི་དཔེ་བཏོན་ཤུལ་དུ་ཁྲིགས་ཀྱིས་འགྲིག་པ་བྱུང་ཞེས་པ་དེ་བབས་པས་ཐག་བཅད་པ་སོགས། དོན་གལ་ཆེ་བ་འགའ་ཞིག་ལ་དཔེ་མོ་བཏབ་པས་ཕྱིས་འབྱུང་ཇི་ལྟ་བ་བཞིན་ཐོན་པ་མང་སྟེ་འགོད་པར་མ་ནུས་སོ། །ཚེས་བཅུ་ནས་བདེ་ལམ་གྱི་ཁྲིད་སྨིན་རྒྱས། སེམས་བསྐྱེད་མཆོད་པ་དང་བཅས་པ། འཇིགས་བྱེད་དབང་སྟ་གོན་བཅས་ཞག་བཅུ་བཞིའི་རིང་ལ་གནང་སྟེ། གདུལ་བྱ་རྣམས་ལམ་ཐུན་མོང་བས་རྒྱུད་སྦྱངས་པ་སྔོན་དུ་འགྲོ་བས་རིམ་གཉིས་སྨིན་གྲོལ་གྱི་སྐལ་བ་བཟང་བོར་བཀོད། ཆབ་ཚན་གྱི་འཕྲོད་བསྟེན་ཞག་བདུན་མཛད་ནས་ཧལ་ཧ་དགེ་བཤེས་བསོད་ནམས་དབང་རྒྱལ་སོགས་དོན་གཉེར་བ་དུ་མ་ལ། བཀའ་གདམས་ཐིག་ལེ་བཅུ་དྲུག་གི་དབང། བདེ་མཆོག་ནག་པོའི་དབང། ལྷོ་བྲག་བཀའ་
འབུམ་གྱི་ལུང་རྗེས་གནང་ཆ་ཚང། བདེ་མཆོག་གི་བསྐྱེད་རྫོགས་ཀྱི་ཁྲིད། བདེ་མཆོག་ནག་པོ་ལུགས་ཀྱི་སྒྲུབ་ཐབས་དཀྱིལ་ཆོག་ཆ་ལག་ཚང་མའི་བཀའ་རྩོམ་ལུང་དང་བཅས་པ་གསུམ་པའི་ཟླ་ཁོངས་སུ་གྲུབ། དགོན་པ་སྤྱི་ནས་ཞུས་པ་ལྟར་བཞི་པའི་ཚེས་གཅིག་ནས་ཚོགས་ཆེན་འདུ་ཁང་དུ་ཉན་མཁན་དེར་ཤོང་ལ་བདེ་ལམ་གྱི་ཁྲིད་སྨིན་རྒྱས་སུ་སྩལ་ཏེ་བཅོ་ལྔའི་ཉིན་སེམས་བསྐྱེད་མཆོད་པ་མཛད། སྐབས་འདིར་མ་ཟད་ལམ་ཁྲིད་རྒྱས་པ་ནམ་གནང་ལ་སེམས་བསྐྱེད་མཆོད་པ་རེ་ཕལ་ཆེར་ཆག་མེད་གནང། མདོ་རེ་རེ་གསུངས་པ་ན་ལྷ་དང་མི་མང་པོས་སེམས་བསྐྱེད་པ་ནི་ཐོས་པའི་སྟོབས་སུ་གསུངས་པ་ལྟར། འདི་ཡང་སྟོབས་བཞིའི་ནང་གི་ཐོས་པའི་སྟོབས་ཀྱིས་སེམས་བསྐྱེད་པ་ཞེས་བྱ་སྟེ། མདོ་སྡེ་རྒྱན་གྱི་འགྲེལ་བཤད་སློབ་དཔོན་བློ་བརྟན་གྱིས་མཛད་པ་ལས། ཚེ་འདི་ལ་དགེ་བའི་བཤེས་གཉེན་མང་པོ་ལས་ཆོས་ཐོས་པ་ཡང་ལན་གྲངས་མང་དུ་མཉན་ཏེ་ཆོས་དང་དོན་ཤེས་རབ་ཀྱིས་མཐོང་ནས་སེམས་བསྐྱེད་པ་ནི་ཐོས་པ་གོམས་པའི་སྟོབས་ཀྱིས་སེམས་བསྐྱེད་པ་ཞེས་བྱའོ། །ཞེས་གསུངས་པ་ལྟར་རོ། །སེམས་བསྐྱེད་པ་ཙམ་ལ་ཡང་ཕན་ཡོན་དང་བསྔགས་པ་བསམ་གྱིས་མི་ཁྱབ་པ་མདོ་ལས་གསུངས་པ་ལྟར་དོན་ཤིན་ཏུ་ཆེ་ཞིང། ཉིན་མོའི་སྐར་མ་ལས་ཀྱང་དཀོན་པས་ཤིན་ཏུ་དད་པར་བྱ་རིགས་ཏེ། སྡོང་པོ་བཀོད་པའི་མདོ་ལས། རིགས་ཀྱི་བུ་སེམས་ཅན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྨོན་པ་དེ་དག་ཀྱང་དཀོན་ནོ། །ཞེས་གསུངས་སོ། །བཅུ་བདུན་ནས་བཅད་རྒྱ་མཛད་ཅིང། བཤོལ་ཟླ་ཕྱི་མ་ལ་བཅད་རྒྱའི་ཁོངས་ནས་སུམ་ཅུ་དགེ་ཚུལ་དང་
དོན་བདུན་བསྙེན་རྫོགས་སུ་བསྒྲུབས་ཏེ་བསྟན་པའི་རྒྱལ་མཚན་བསྒྲེངས། སྐྱབས་མགོན་མཆོག་སྤྲུལ་རིན་པོ་ཆེར་སྐྱེས་རབས། སྤྱོད་འཇུག །རྣམ་ཐར་དད་པའི་འཇུག་ངོགས་སོགས་ཀྱི་ལུང་ཕུལ། དཱ་ཚང་ནས་གདན་འདྲེན་པ་འབྱོར་བ་ལྟར་ཟླ་བ་ལྔ་པའི་ཚེས་དགུ་ལ་བཏེག །དངུལ་རའི་ལྷ་སྡེ་ནས་གདན་འདྲེན་ཞུས་ཏེ་མར་རྒྱ་མ་སྟོང་སོགས་བསྙེན་བཀུར་གྱ་ནོམ་པ་ཞུས། ཚ་གན་པེ་ཤིང་དུ་གདན་དྲངས་པ་ལྟར་རྨ་ཆུ་ཚུར་བརྒལ་ནས་བྱོན། སེར་སྐྱའི་ཁྲོམ་ཆེན་པོ་ལ་ལམ་གཙོའི་ཁྲིད་དང། འཇིགས་བྱེད་ཀྱི་དབང་བསྐུར་མཛད། རྨ་ཆུ་བརྒལ་ནས་བྱམས་མེ། གླིང་པ། ཟངས་དཀར། རོང་རུ། སྐྱ་མགོ་སོགས་ལམ་བར་གྱི་འབྲོག་པ་རྣམས་ཀྱིས་གདན་དྲངས། བཅུ་གཅིག་ཞལ་གྱི་དབང་ཚར་བདུན་སོགས་ཀྱིས་སོ་སོའི་རེ་བ་ཚིམ་པར་མཛད། སོ་སོས་དད་འདུན་རྩེ་གཅིག་གིས་ནོམ་རྫས་སབ་སོབ་དང་གནག་རྟ་ཁག་ཁོག་མིན་པར་གཅེས་ནོར་བཟང་དགུ་ཡོད་འབུལ་ལྟ་བུ་བྱས་པས་ཞག་ཉུང་ཤས་ལ་རྟ་ནོར་གང་བཟང་བཞི་བརྒྱ་ལྷག་དང་གོས་ཕྲུག་རས་ཟམ་སོགས། འབུལ་ནོད་བློར་མི་ཤོང་བ་ལྟ་བུ་འདུས། རབ་བྱུང་བསྙེན་རྫོགས་རེ་རེ་གཉིས་གཉིས་ཞུས་པ་འཕྲལ་དུ་གནང་བས་སུམ་ཅུ་སྐོར་ཅིག་བསླབ་པ་ལ་བཀོད། དཔའ་རྩལ་དྲེགས་པས་ལྷ་མིན་ཕམ་བྱེད་གེ་སར་དམག་གི་རྒྱལ་པོ་ཡིས། །གནའ་དུས་བཟུང་བས་གླིང་ཡུལ་ཞེས་གྲགས་འབྱོར་པའི་མཛོ༷ད་དང་དགེ༷་བའི་དཔལ། །ལྷ་ཡུལ་འགྲན་ནུས་མར་གད་ས་གཞིར་ནེའུ་གསིང་དག་གིས་ཕྲ་བཀོད་ཅིང། །བཞད་དང་ཁྲུང་ཁྲུང་ངང་པས་འཕུར་ལྡིང་རྣམ་རོལ་ནོར་འཛིན་ཐིག་ལེ་དེར། །གནམ་སྔོན་ས་ལ་ལྷུང་འདྲའི་ཁྱོན་ཡངས་པོར། །གནག་ལུག་རྟ་ཁྱུ་ཐང་མར་བདལ་བས་གང། །ཉི་ཟླ་རྒྱུ་སྐར་རྩེ་དགའ་ལ་འགྲན་པར། །མི་རྣམས་
སྟོབས་འབྱོར་ལང་ཚོས་འགྱིང་བག་འཛིན། །རྩྭ་བཅུད་མེ་ཏོག་དོ་རར་རྐང་དྲུག་ཚོགས། །སྙན་པའི་སྦྲང་གླུས་རྣ་བའི་བཅུད་ལེན་འགྱེད། །སྐྱེ་འགྲོའི་ཚོགས་རྣམས་སྣོད་བཅུད་ཕུན་ཚོགས་པའི། །བདེ་སྐྱིད་དཔལ་གྱིས་མྱོས་པའི་ཅ་ཅོ་སྒྲོགས། །ཆུ་ཀླུང་ཆེ་རྣམས་ཆད་མེད་དལ་གྱིས་འབབ། །སྣ་ཚོགས་རླབས་ཀྱི་མེ་ཏོག་ཕྱོགས་བརྒྱར་འཕེན། །འབྱོར་པ་ཆེ་རྣམས་དད་སྟོབས་ཕན་ཚུན་འགྲན། །མཆོག་གསུམ་མཆོད་པའི་མེ་ཏོག་ཕྱོགས་བརྒྱར་འཐོར། །གང་དུ་མཆོད་ཡུལ་མཁའ་ལ་ཆར་སྤྲིན་ནམ། །ས་ལ་མེ་ཏོག་སྣ་ཚོགས་འཁྲིགས་པ་བཞིན། །གཏོང་བ་མཚོ་ལས་རླངས་པ་འཕྱུར་བའམ། །མཁའ་ལས་ཆར་པ་འབེབས་པའི་ཚུལ་འཛིན་མོད། །ཁྱད་པར་མགོན་ཁྱོད་བྱིན་རླབས་འོད་སྟོང་གི །བགྲོད་པ་ཞུགས་པ་དེ་ཚེ་གདུལ་བྱའི་ཚོགས། །ཞལ་མཐོང་ཙམ་གྱིས་ཚེ་འདིའི་སྣང་མུན་སངས། །དད་པའི་པདྨོ་གཞན་ལ་འཕྱ་བཞིན་རྒོད། །དགའ་བདེའི་གཉིད་ལ་ཡུར་བའི་སྐྱེ་བོ་འདི། །གློ་བུར་མི་ལུས་ཐོབ་བཞིན་དྲན་པ་རྙེད། །འོན་ཀྱང་འཕྲལ་དུ་རང་གིས་རང་ཉིད་བརྗེད། །ཁྱོད་ཉིད་སེམས་པའི་ངང་ལ་ཅུང་ཟད་བརྒྱལ། །དེ་དག་མོས་འདུན་གསེར་གྱི་དཀྱིལ་འཁོར་ལ། །སྣ་ཚོགས་ཁམས་དང་མཐུན་པའི་ཆོས་ཆར་ཕབ། །བསྔོ་སྨོན་རླུང་གིས་རྒྱ་ཆེར་བསྲུབས་པ་ལས། །བརྟན་གཡོ་རྣམ་དག་འགྲུབ་པའི་རྟེན་འབྲེལ་འགྲིག །ཟླ་བ་བདུན་པའི་ཚེས་ཉེར་གཉིས་ལ་དཱ་ཚང་དུ་ཕེབས། བརྒྱད་པའི་ཚེས་མགོར་ཇ་ཕུའི་སྡེ་གཤམ་མ་དང། ཟླ་མཇུག་ལ་སྡེ་སྟོད་མས་གདན་འདྲེན་ཞུས་པར་ཞག་ཁ་ཤས་རེ་ཕེབས་པ་མ་གཏོགས་དགོན་དེར་རྒྱུན་རིང་ཙམ་བཞུགས་ནས་ཞག་བཅུ་གཅིག་གི་བར་དུ་བདེ་ལམ་གྱི་
ཁྲིད་སྨིན་རྒྱས། གཞན་ཡང་རིགས་གསུམ་མགོན་པོ། ཁྱུང་ནག །རྣམ་འཇོམས། རྟ་མགྲིན། མགོན་པོ་དཀར་ནག །ལྷ་མོ་སོགས་ཀྱི་རྗེས་གནང། དམུ་དགེའི་ཁྲི་པ་གླིང་སྤྲུལ་བའི་སྐུ་དང་ཁྲི་ཟུར་ལྷ་རམས་པ་དགེ་བའི་བཤེས་གཉེན་ཁྲིམས་ཆོས་མཛད་ཀྱིས་ཞུས་པ་ལྟར་ཚོགས་མང་ལ་བཅུ་གཅིག་ཞལ་དང། ཚེ་དཔག་མེད་ཀྱི་དབང། ཉུང་བསྡུས་ལ་གཅོད་དབང། བསྒྲུབ་བྱ་དུ་མར་རབ་བྱུང་བསྙེན་རྫོགས་སོགས་གང་འདོད་ཀྱི་རེ་བ་བསྐང་ཞིང། བཀའ་རྩོམ་ཐོར་བུ་ཡང་ཅི་རིགས་གནང། རྟ་དང་མཛོ་མཛོ་མོ་འདྲེས་པ་བདུན་ཅུ་སྐོར་ཅིག་གིས་གྲྭ་པ་རེ་ལ་ཇ་བག་གཉིས་རེ་ཐེམ་རྩིས་ཀྱི་འགྱེད་དང། སླར་ཡང་མང་ཇ་དང་ཁ་དར་ཉིན་བདེ་མ་རེའི་འགྱེད་བཏང་ནས། ཞབས་བརྟན་གསོལ་འདེབས་སྐལ་བཟང་བསོད་ནམས་མ་ཚོགས་ལ་བཙུགས། ཨ་མཆོག་བྱིང་འདྲེན་ཞབས་ཕྱིར་ཡོད་པ་ཟས་མ་འཕྲོད་པའི་གཟེར་ནད་ཀྱིས་འཆི་ལ་ཐུག་པར་བཞེས་ཕོར་གྱི་ཇ་ལ་རྩམ་པ་ཅུང་ཟད་བསྲེས། ཞལ་ཕུ་བཏབ་ནས་གནང་བས་འཕྲལ་དུ་ཟུག་གཟེར་ཆག་ཅིང་དེ་ནུབ་ནས་སྦྱོང་རྒྱུགས་ཏེ་སངས་དྭངས་སུ་སོང། དེ་ནི་གྲུབ་ཆེན་ལ་ལི་ཏས་ཨུ་རྒྱན་གྱི་ཡུལ་ནས་འཇིགས་བྱེད་ཀྱི་རྒྱུད་སྤྱན་དྲངས་པའི་ལོ་རྒྱུས་ལྟར་དཔལ་རྡོ་རྗེ་འཇིགས་བྱེད་ཀྱི་ཕྱག་མཚན་སོ་སོའི་ལས་ཚོགས་ཀྱིས་མཚོན་པའི་ལས་རབ་འབྱམས་ལ་མངའ་བརྙེས་པའི་འབྲས་རྟགས་ཀྱི་མཛད་པ་ཐུན་མོང་དུ་བསྟན་པའོ། །ལུས་ཟུངས་གསོ་བར་འདོད་ནས་སྣ་ཚོགས་ཟས། །སྤྱད་པས་མི་འཕྲོད་སྦྱར་ལོག་གྱུར་དུག་གིས། །གདུངས་པ་སྦྱོང་བྱེད་སྔགས་དང་ཏིང་འཛིན་མཐུ། །སྲོག་འཕྲོག་བི་ཥའི་གཤེད་དུ་བདུད་རྩིར་སྨིན། །དགུ་པའི་ཚེས་ལྔ་ལ་བསྒྲུབ་བྱ་རེ་དགུ་དགེ་ཚུལ་དུ་བསྒྲུབས། བཅུ་གཅིག་ལ་དེ་ནས་བཏེག་སྟེ། རིམ་གྱིས་ཕེབས་པས་ཁ་ནག་དབལ་ཤུལ་བ་རྣམས་ཀྱིས་
ཀུན་རིག་གི་ཁྲོམ་དབང་ཞུས་ནས་དངུལ་སྲང་ལྔ་བཅུ། མར་རྒྱ་ཆེན་སུམ་བརྒྱ་ལྔ་བཅུ་ཕུལ་བ་ཕྱིར་སློག་ཅིང་གང་མྱུར་གྱིས་ཕེབས་ཀྱང་སྦྱིན་བདག་འགའི་འདུན་པ་སྐོང་དགོས་ཐབས་མེད་བྱུང་བས་བཅུ་པའི་བཅུ་དགུའི་ཉིན་བཀྲ་ཤིས་འཁྱིལ་དུ་ཕྱག་ཕེབས། ཉི་གཞོན་གསར་བའི་འོད་རླབས་མཁའ་ལམ་ཁྱབ་པར་བདལ་ཡང་ས་ལ་སྙོམས་པར་འབབ། །སྤྲིན་སྔོན་བླ་བྲེ་ཀུན་གསལ་ཁྱབ་པར་འཁྲིགས་ཀྱང་འཛིན་མའི་ཁྱོན་ལ་ཆར་རྒྱུན་སྙོམས། །དག་པ་གཉིས་ལྡན་ཆོས་སྐུར་གཞོལ་ཡང་ཕན་བདེའི་འཕྲིན་ལས་རིས་མེད་འགྲོ་ལ་སྙོམས། །འདི་དག་མཚུངས་པར་སྒྲོགས་ཀྱང་དམ་པའི་མཛད་བཟང་མི་མཉམ་ཁྱད་པར་བླ་ན་མཐོ། །ཚ་ཁོར་མ་ཕེབས་གོང་དུ་ཕྲན་མཛོད་དགེར་དགོན་པ་གསར་འདེབས་ཀྱི་རྡོ་རྗེ་སློབ་དཔོན་དུ་རྗེ་ཉིད་ཀྱི་ཐུགས་བཞེད་ལྟར། སྐྱབས་མགོན་མཆོག་སྤྲུལ་རིན་པོ་ཆེ་ནས་བཀའ་བབས་པ་བཞིན་ཟླ་བ་བརྒྱད་པའི་ཚེས་གསུམ་ལ་ཁྲི་འདོན་བྱས། དགེ་ཚུལ་སློང་ཁ་ཤས་ཡོད་པ་ལ་ཕྱིར་བཅོས་ཀྱི་ཕྱག་ལེན་སོགས་བསླབ་ནས་བཅོ་ལྔའི་ཉིན་གསོ་སྦྱོང་ཚུགས། གཟན་ཤམ་ཞྭ་ཟླམ་སོགས་ཞིབ་ཚགས་བྱས། ལོ་བཞི་བཅུ་ལོན་པ་མན་ཆད་ལ་རང་རང་གི་བབས་དང་བསྟུན་པའི་རྒྱུགས་དང། གཞོན་བཟང་སུམ་ཅུ་སྐོར་ལ་འཇིགས་བྱེད་བདག་འཇུག་འཛིན་བཅུག་སྟེ། གདངས་དབྱངས་སོགས་བསླབས་ནས་རྒྱུན་རིང་ཙམ་སོང་སྐབས་མ་ཡུམ་གཟུགས་གཞི་ཅུང་ཙམ་མ་བདེ་བར་བརྟེན། རྗེ་ཉིད་ཚ་ཁོ་ནས་ཕེབས་མིན་བལྟ་ཕྱིར་སོང་བ་རྣམས་གདན་སར་ཕེབས་པ་དང་འགྲིག །མ་ཡུམ་གྱི་རྒྱུ་མཚན་ཞུས་ནས་གདན་འདྲེན་གྱི་ཞུ་བ་ཕུལ་བས་འཕྲལ་དུ་ཕེབས། རིམ་གྲོ་ཅུང་ཟད་གནང་བས་ཡུམ་གྱི་གཟུགས་གཞིའི་ན་ཚ་
དྭངས། ལྔ་མཆོད་ཀྱི་རིང་དགོན་གསར་དུ་བཞུགས་ཤིང། གདངས་དབྱངས་དང་ཕྱག་རྒྱ་བསླབ་པ་ལ་གཟིགས་རྟོག་མཛད། གྲྭ་པ་ཐམས་ཅད་ཞྭ་ཟླམ་དང་བཅས་ཏེ་འཚོགས་ནས་འཇིགས་གསང་གཉིས་གདངས་དང་བཅས་ཏེ་ཚུགས། ཉི་ཤུ་དགུའི་ཉིན་བསྐང་གསོ་བཏང་ནས་ཕྲན་གྱིས་གཏོར་མ་འཕང་བར་སྐུ་འཁོར་རྣམས་ཕྲན་གྱི་རྗེས་སུ་མངགས་ཏེ་སྤྱན་དམིགས་བཀའ་དྲིན་བསྐྱངས། གདན་སར་བྱོན་པའི་ལམ་ནས། ཤིས་ཚང་དུ་ཕེབས་དགོས་བྱུང་བར་དུས་རྒྱུན་ཧོ་ཤི་སྔ་བར་འགྲོ་བཞིན་པ་ཡིན་ཀྱང་ནུབ་གཅིག །སང་ཞོགས་ཉི་མ་མ་ཤར་བར་དུ་སྡོད་གསུང་བ་ལྟར་བྱས་ནས་ཕེབས་པས། ཧོ་ཤི་སྔོན་མའི་ཐོག་ཏུ་ཇག་པ་རྒྱུག་གྲབས་བྱེད་པའི་བར་དུ་རྗེ་ཉིད་ཀྱི་དབུ་གདུགས་མཐོང་ནས་ལེན་རྒྱུ་བཤོལ་ཏེ་མཇལ་ཁ་ཞུས། བསྒྲུབ་བྱ་ཉེར་ལྔ་ལ་ཚིགས་སྔ་ཕྱིའི་བསླབ་པ་སྩལ། བཅུ་གཉིས་པའི་ཉེར་གསུམ་ལ་སྔ་སོར་གསོལ་བ་བཏབ་པ་ལྟར་སླར་ཡང་དགོན་གསར་དུ་བྱོན། ཚེས་ཉེར་ལྔ་མཁའ་འགྲོ་འདུ་བའི་དུས་ཆེན་དང་སྦྲགས་ནས་བདེ་མཆོག་དང། འཇིགས་བྱེད་ཀྱི་དབང་སྟ་གོན་དང་བཅས་པ་གནང། གསང་འདུས་ཀྱི་དབང་ཁྱོད་རང་གིས་བསྐུར་ཞེས་ཕྲན་ལ་བཀའ་བབས། རྗེ་ཉིད་ནས་མཁན་པོ་གནང། ཕྲན་གྱིས་ལས་སློབ་བྱས་ནས་བསྒྲུབ་བྱ་གོ་བདུན་བསྙེན་རྫོགས་དང། བརྒྱ་དང་སུམ་ཅུ་དགེ་ཚུལ་དུ་བསྒྲུབས། དགུང་ལོ་བཞི་བཅུ་པ་ལྕགས་བྱ་གནམ་ལོ་གསར་ཚེས་ཀྱི་དགའ་སྟོན་དགོན་དེ་ཉིད་དུ་མཛད། ཚེས་གཅིག་གི་ཕྱི་དྲོ་ཆོས་གྲྭ་གསར་ཚུགས་ཀྱི་རྟེན་འབྲེལ་དུ་རྗེ་ཉིད་ནས་ཆོས་གྲྭར་ཡོན་ཏན་གཞིར་གྱུར་མའི་སྟེང་ནས་མདོ་སྔགས་ཡོངས་རྫོགས་ཀྱི་གསུང་བཤད་དང། བརྩི་བཞག་སོ་སོའི་མགོ་ནས་
ཆོས་ཐུན་རེ་གནང། དེ་ཡང་ཞལ་ནས། དབུས་སོགས་ན་རྒྱུད་སྟོད་སྨད་དང་གྲྭ་ས་ཚོ་ཕན་ཚུན་གཅིག་གྲོགས་སུ་གཅིག་འགྲོ་བ་ཡིན་ཀྱང་འདིར་གྲྭ་ཚང་གཅིག་ལས་མེད་སྟབས་ལམ་རིམ་དང་འདུལ་བའི་བརྡ་རྣ་བར་བྱང་བ་གལ་ཆེ། འཛིན་གྲྭ་གོང་མ་ལ་ལམ་རིམ་དང་འདུལ་བའི་བསླབ་བྱ་རེ་མོས་བརྩི་བཞག་དང། ཆོས་གྲྭ་དགུན་ཆོས་ལྟར་འཚོགས་ཏེ་བློ་སྦྱོང་རེ་གསུང་ཆོས་བྱས་ན་ལམ་རིམ་དང། འདུལ་བའི་བརྩི་བཞག་གསུང་བཤད་བཅས་འཛིན་གྲྭ་གསུམ་གས་ཉན་ཆོག་པའི་དགོས་པ་ཡོད་གསུངས། ཚེས་གསུམ་གྱི་ཕྱི་དྲོ་ཚ་ཁོ་སྔགས་རམས་པ་བཀྲ་ཤིས་རྒྱ་མཚོས་དགེ་བསྐོས་དང། བྱིང་འདྲེན་སྔགས་རམས་པ་བསྟན་འཛིན་གྱིས་བྱིང་འདྲེན་བྱས། གྲྭ་པ་རྣམས་བསླབ་གྲྭའི་ལུགས་ལྟར་འཚོགས་ནས་རྒྱུད་གྲྭ་གསར་དུ་ཚུགས་པར་དོང་ཙེ་ཞོ་ལྔ་རེ་དང། ཁ་དར་གྱི་འགྱེད། འདུ་ཁང་དུ་རྒྱལ་མཚན་ཆ་གཅིག་ཕྱེ་ཕུར་བཅས་གནང། ཚེས་བཞིའི་ཉིན་རྗེ་ཉིད་ཚོགས་དབུར་བྱོན། ཕྲན་བླ་མ་དབུ་མཛད་པའི་ཚུལ་བྱས་ཏེ་རས་བྲིས་ལ་བརྟེན་ནས་འཇིགས་བྱེད་བདག་འཇུག་གསར་ཚུགས་དང། སྒྲུབ་མཆོག་ཞག་ལྔ་དང། རིམ་གྱིས་ཚོགས་ཆོས་གྲྭ་དགུང་ཇ་སྐུ་རིམ་སོགས་རྒྱུད་གྲྭའི་ལུགས་ལྟར་བྱས། ཚེས་ལྔའི་ཉིན་རྗེ་ཉིད་གདན་སར་བྱོན། སྨོན་ལམ་ཆེན་མོའི་རིང་དགེ་འདུན་སུམ་སྟོང་ལ་ཇ་ཐུག་དངོས་གཙང་དང། དངུལ་སྲང་བརྒྱད་སྟོང་བཞི་བརྒྱ་ལྷག་གི་རྩིས་ཀྱིས་གྲྭ་པ་རེ་རེའི་ཕྱག་ཏུ་དོང་ཙེ་ཁྲོན་དྲུག་རེ་ཐེམ་ངེས་ཀྱི་འགྱེད་ཉིན་རེ་མོས་ཀྱི་ཚུལ་དུ་གནང། སྐོར་ལམ་ནས་ཉིན་རེ་ཞིང་མུ་ལྟོ་བ་སུམ་བརྒྱ་ལྷག་མན་ཆད་ལ་ཇ་ཐུག་དང། ཇ་མར་རྩམ་གསུམ་གྱི་སྦྱིན་གཏོང་རྒྱ་ཆེར་མཛད། ཚེས་བཅུ་
གསུམ་གྱི་ཉིན་སྐྱབས་མགོན་མཆོག་སྤྲུལ་རིན་པོ་ཆེ་ཚོགས་དབུར་གདན་དྲངས་ཏེ་དངུལ་སྲང་སྟོང་དང་ལྔ་བརྒྱའི་རྩིས་ཀྱི་ནོར་སྣ་རྣམ་གྲངས་མང་ཙམ་ཕུལ། དེ་དང་འབྲེལ་བར་འཁྲུངས་རབས་ལྷ་ཁང་དུ་སྐྱབས་མགོན་མཆོག་གི་འཁྲུངས་རབས་བཅུ་གསུམ་གྱི་སྐུ་བརྙན་གསེར་ཟངས་ལས་གྲུབ་པ་གཙོ་འཁོར། བླ་བྲེ། ཀ་འཕན་མཆོད་རྫས་སོགས་ལ་དངུལ་སྲང་ཉིས་སྟོང་གི་རྩིས་ཀྱིས་ལེགས་པར་བཞེངས་ཏེ་རིང་བསྲེལ་རྣམ་བཞིས་བྱུར་བུར་གཏམས། སྨོན་ལམ་གྱི་སྐབས་སུ་བཀྲམ་རྒྱུའི་ངོ་མཚར་བའི་མཆོད་པ་བཅོ་བརྒྱད་ནི་སྒྲུབ་པའི་མཆོད་པ་འབའ་ཞིག་ཡིན་པས་རི་མོ་བྲི་དཀའ་གསུངས་ནས། ༸སྐྱབས་མགོན་རྡོ་རྗེ་འཆང་གི་དུས་བཏང་སྙོམས་སུ་བཞག་ཡོད་པ་ལོ་འདིར་ཕར་ཕྱིན་བཅུ་ལ། གཏེར་དང་རིན་ཆེན་འབྱུང་གནས་མཚོ། །ཞེས་སོགས་ལྟར་དང། རྣམ་ཐར་སྒོ་གསུམ་ལ་ཆོས་འབྱུང་གྲུ་གསུམ་པ་སོགས་མདོ་རྒྱུད་དང་མཐུན་པར་བྲིས་ནས་བཞག་པ་འདི་ཙམ་ཡང་མཁས་རློམ་ཕལ་གྱིས་བསམ་པའི་ཡུལ་ལས་འདས་པའི་གནས་ཤིག་ཡིན་ནོ། །དེ་དག་གི་ཞར་ལ་བསྒྲུབ་བྱ་བརྒྱ་དང་ཞེ་གསུམ་ལ་ཚིགས་སྔ་ཕྱིའི་སྡོམ་པ་དང། རྣམ་སྲས་བཀའ་བཅོ་ལྔའི་རྗེས་གནང་སོགས་སྩལ་བ་དང། རྒྱུད་པའི་མགོན་ཁང་གི་མགོན་ཆོས་འཇིགས་གསུམ་གྱི་གསེར་སྐུ་རབ་གནས་སོགས་ཟླ་ཕྱེད་འདི་ཙམ་གྱི་རིང་ལ་ཡང་བསྟན་པའི་བྱ་བ་རྒྱ་ཆེ་བར་མཛད། སྨོན་ལམ་གྲུབ་པའི་དགའ་སྟོན་དུ་མཆོག་སྤྲུལ་རིན་པོ་ཆེ་གཟིམས་ཤག་ཏུ་གདན་དྲངས་ཏེ་དགྱེས་སྟོན་དང་དངུལ་སྲང་ལྔ་བཅུ་སོགས་ཀྱི་ལེགས་འབུལ་ཞུས། ཉི་མའི་གཉེན་གྱིས་མུ་སྟེགས་སྟོན་པ་དྲུག །ཉི་མའི་འོད་ཀྱིས་མེ་ཁྱེར་ཟིལ་གནོན་ལྟར། །ཆོ་འཕྲུལ་གྱིས་བཅོམ་ཆོ་འཕྲུལ་དུས་ཆེན་ལ། །ཆོ་འཕྲུལ་ལ་
འགྲན་ཆོ་འཕྲུལ་མཆོད་སྤྲིན་སྤྲོས། །ཕལ་པའི་རྫས་ཀྱི་དངོས་པོ་འཛམ་བུའི་འབྲས། །ཞིང་མཆོག་མཆོད་པའི་མ་དྲོས་མཚོར་ལྷུང་བས། །བྱང་ཆུབ་སྙིང་པོ་བླ་མེད་གསེར་སྦྱངས་སུ། །གྲུབ་པས་འཕྲལ་ཕུགས་ཕན་བདེའི་འོད་བརྒྱ་འབར། །གཉིས་པའི་བཅུ་གཅིག་ལ་རྒན་ཀྱའི་བྲག་དཀར་དུ་གདན་དྲངས་པ་ལྟར་བྱོན། ཚོགས་ཆོས་གྲྭ་སོ་སོར་འདོད་མོས་ལྟར་ཕེབས་ནས་གསུང་གི་བདུད་རྩིས་ཚིམ་པར་མཛད། འབུལ་བ་རྣམས་ཕྱིར་སློག་ཅིང་ཚོགས་སུ་མང་ཇ་དང་ཉིན་བདེ་མ་རེའི་འགྱེད་གནང། གཟིམས་ཁང་རྙིང་པ་ཞིག་རལ་དུ་སོང་བར་གསར་ཕུབས་ཀྱི་ཐེབས་བཞག །སླར་ཡང་དགོན་པར་བྱོན་ནས་ཟླ་བ་ལྔ་པའི་བཅུ་དགུ་བར་དུ་བཅད་རྒྱ་དམ་པར་མཛད། མཚམས་ཁོང་དེར་བསྒྲུབ་བྱ་བརྒྱད་ཅུ་དགེ་ཚུལ་སློང་དུ་བསྒྲུབ་ཅིང། ཚོགས་སུ་མང་ཇ་ཉིན་འཁྱོངས་དང་ཁ་དར་གྱི་འགྱེད་སྩལ། དེ་ནས་ཁྱ་དགེ་དགོན་དུ་གདན་དྲངས་པ་ལྟར་ཉེར་ལྔ་ལ་བཏེག །ལམ་བར་ནས་བྲག་ལུང་རི་ཁྲོད་དུ་གཞི་གསུམ་ཆོ་གའི་ལུང། ཨ་འཁོར་བྲག་དཀར་རི་ཁྲོད་དུ་རྣམ་རྒྱལ་མ། རྟ་མགྲིན། ལོ་གྱོན་མ་སོགས་ཀྱི་རྗེས་གནང་སྩལ། དགེ་སློང་རི་ཁྲོད་པ་ངག་དབང་དཔལ་འབྱོར་ཟེར་བའི་ཕ་སྔགས་པ་ཞིག་ཡོད་པས་རྟ་མགྲིན་གསང་སྒྲུབ་ཀྱི་བསྙེན་པ་བགྲངས་ནས་ཐོད་འཕྲེང་གཅིག་དང་བཅས་ཕྲེང་བ་བཅུ་གཅིག་ཟད། རི་ཁྲོད་པ་ཁོ་རང་གིས་ཀྱང་དེ་དང་འདྲ་ལ་ཁད་བགྲང་བས་འདིར་རྟ་མགྲིན་གྱི་རྗེས་གནང་སྐབས་རྗེ་ཉིད་ཀྱི་ཞལ་རས་དང་ན་བཟའ་ཐམས་ཅད་དམར་པོ་དང། ཁྱད་པར་སྤྱན་ནས་འོད་དམར་པོ་མེའི་ཕུང་པོ་ལྟ་བུ་འཕྲོ་བ་མཐོང་ཚུལ་ཆོས་གྲོགས་རི་ཁྲོད་པ་གཅིག་ལ་བཤད་པས་བླ་མ་ཡི་དམ་དབྱེར་མེད་ཀྱི་མཐོང་སྣང་
ཞིག་ཡིན་མོད་ཟེར། དུས་ཕྱིས་ཤིག་རི་ཁྲོད་པ་ཁོ་རང་བཀྲ་ཤིས་འཁྱིལ་དུ་ཞལ་མཇལ་ནས། སྔར་གྱི་ལོ་རྒྱུས་དང་དད་པའི་ངུ་ངག་གིས་མ་ཤི་ཚུན་ཆད་དུ་མཇལ་ཐུབ་མི་ཐུབ་གང་ལྟར་ཡང་སྐྱབས་འཇུག་གནང་དགོས་ནན་གྱིས་ཞུས་པར། མཇལ་མ་མཇལ་ལ་ལྟོས་པ་མེད་ང་དང་འོད་དཔག་མེད་དབྱེར་མེད་པ་མ་བརྗེད་པ་གྱིས་གསུངས་པ་རི་ཁྲོད་པ་རང་གི་ངག་ནས་ཐོས། སྤྱིར་རྗེ་བླ་མ་འདི་ཉིད་ཀྱི་སྐུ་གསུང་ཐུགས་ཀྱི་མཛད་པ་གཞན་ལྟ་ཅི། སྤྱན་གྱིས་གཟིགས་སྟངས་གཅིག་པོ་ལ་ཡང་དུས་རྒྱུན་བརྩེ་བའི་ཉམས་དང་འདྲེས་པའི་ཞི་བའི་གཟིགས་སྟངས་ཀྱིས་ཐམས་ཅད་ཡིད་དང་བར་བྱེད་ཅིང། རེས་འགའ་མི་ཚོགས་ཆེ་སྐབས་སོགས་སུ་སྤྱན་རྩ་དམར་ཁྱུར་རེ་ནམ་མཁའ་ལ་འབུར་ཚུགས་སུ་གཟིགས་པས་མཆོག་དམན་ཀུན་ཟིལ་གྱིས་གནོན་པ་དང། དྲེགས་པ་ཅན་རྣམས་སྤ་བཀོང་བས་ཞུམ་སྟེ་རྒྱལ་དབང་ལྔ་པའི་སྐུ་ཉམས་ངོ་མ་ལྟ་བུའི་གཟི་བརྗིད་འདུག་ཅེས་དཔྱོད་ལྡན་རྣམས་མཐུན་པར་གླེང་ཞིང། སྐབས་འགར་གཟིགས་སྟངས་ཀྱི་ཉམས་ཤིག་གིས་སོ་སོའི་བསམ་ངོར་རང་ཁོ་ནར་སྒེར་དུ་གཟིགས་པ་སྙམ་དུ་ཆོས་མིན་གྱི་སྤྱོད་པ་དང། ལྐོག་ཏུ་འཕྲོས་གླེང་སྣ་ཚོགས་སོགས་གནོང་ལ་ཕོག་པས་འཇིགས་ཞུམ་པ་དང། སྐབས་གཞན་དུ་སྤྱན་གྱིས་གཟིགས་སྟངས་ཀྱིས་མི་མ་ཡིན་གྱིས་གཙེས་པ་འགའ་བརྒྱལ་འགྲོ་བ་སོགས་དགྱེས་ཤིང་བརྩེ་བའི་ཉམས། བརྟན་ཅིང་ཕ་རོལ་གནོན་པའི་ཉམས་སོགས་སྣ་ཚོགས་ཤིག་ཡོད་པ་ཐམས་ཅད་ཀྱང་གདུལ་བྱ་རྗེས་སུ་འཛིན་པའི་ཐབས་མཁས་དང་འབྲེལ་བ་ཁོ་ནར་ཡོད་པ་ཀུན་ལ་མཐུན་སྣང་དུ་གྲུབ་པ་དེ་ལྟར་ཡིན་ནོ། །བརྩེ་བའི་ཉམས་ལྡན་ཞི་བའི་གཟིགས་སྟངས་ཀྱིས། །ཀུན་ཡིད་དད་པའི་ཆབ་ཀྱིས་རླན་བྱེད་ཅིང། །དམར་བའི་མདངས་ཆགས་འབུར་ཚུགས་
གཟིགས་སྟངས་ཀྱིས། །སྐྱེ་རྒུ་ཟིལ་གནོན་བདུད་རིགས་འཇིགས་པར་བྱེད། །བརྟན་ཅིང་ཕ་རོལ་གནོན་དང་འབྱུང་པོའི་ཚོགས། །སྐྲག་སོགས་གང་ལ་གང་འཚམ་སྣ་ཚོགས་སུ། །སྣང་བའི་སྤྱན་ཟུར་གཟིགས་པའི་སྟངས་ཙམ་ཡང། །མཁས་དང་གྲུབ་རློམ་བརྒྱ་ཡི་དོ་ཟླ་མིན། །ཁྱ་དགེ་དགོན་དུ་བྱོན་ནས་ཉིན་གསུམ་གྱི་རིང་ལ་བདེ་ལམ་གྱི་ཁྲིད་སེམས་བསྐྱེད་མཆོད་པ་དང་བཅས་པ། དེ་ནས་ཚོགས་པ་སྟོང་དང་སུམ་བརྒྱར་སྟ་གོན་གཅིག་འཐུས་ཀྱི་སྒོ་ནས་འཇིགས་བྱེད་དཔའ་གཅིག །བཅུ་གསུམ་མ། བདེ་མཆོག །སླར་ཡང་སྟ་གོན་གཅིག་འཐུས་བྱས་ཏེ་ཀུན་རིག །གདུགས་དཀར། བཅུ་གཅིག་ཞལ། ཚེ་དཔག་མེད་བཅས་ཀྱི་དབང། ལེགས་ལྡན་མཆེད་གསུམ། ཆོས་རྒྱལ་གསུམ། མ་མགོན། རྣམ་སྲས། སེང་གདོང་མ། ཁྱུང་ནག།།རྟ་མགྲིན། ཚེ་དཔག་མེད། རྣམ་རྒྱལ་མ། འཇམ་དབྱངས་དཀར་པོ་སོགས་ཀྱི་རྗེས་གནང། བསྙེན་གནས་པ་བཞི་བརྒྱ། དགེ་ཚུལ་སློང་བཅུ་བདུན་འདོད་མོས་ལྟར་གནང་ཞིང། ཆོས་རྗེ་དོན་གྲུབ་རིན་ཆེན་གྱི་རྣམ་འཕྲུལ་ཁྱ་དགེ་དཔོན་སློབ་རིན་པོ་ཆེ་ཡབ་སྲས་ཀྱི་གདུང་མདུན་དུ་མཆོད་པ་གང་རྒྱས་དང་བསྔོ་སྨོན་ཤུགས་དྲག་མཛད། དགེ་འདུན་བཞི་བརྒྱ་ལྷག་ལ་དོང་ཚེ་ཞོ་བཞི་རེ་ཁ་དར་ཉིན་བདེ་མ་རེའི་འགྱེད་དང། སྤྱི་འཇོག་ལ་མཛོ་མོ་བཅོ་ལྔ་བཞག །ལྗགས་རྩོམ་ཐོར་བུ་ཅི་རིགས་དང། མཇལ་བ་བསགས་ནས་དྲུག་བརྒྱ་སྐོར་རེ་ལྷན་དུ་མཇལ་བ་ལ་ཡིག་དྲུག་གི་ལུང་སོགས་ཀྱིས་འབྲེལ་ཚད་དོན་ལྡན་དུ་བསྒྲུབས། དྲུག་པའི་བཅོ་ལྔའི་ཉིན་དེ་ནས་བཏེག་སྟེ་མཛོད་དགེ་དགོན་གསར་དུ་བྱོན། ཞག་ཁ་ཤས་ལྷོད་བཞུགས་མཛད། རེབ་ཙ་སྤྲུལ་བའི་སྐུ་དབུས་
ནས་འབྱོར་ཏེ་མཇལ་བར་ཕེབས། བདག་གིས་གླེང་མོ་བྱས་སྐབས་ཁོ་བོ་དབུས་སུ་འགྲོ་རྒྱུ་སོགས་ཀྱི་འདུན་གྲོས་བློ་རྩེ་ཙམ་ཡང་མེད་ཀྱང། སྡེ་སྤྲུལ་རིན་པོ་ཆེ་དང། ཁོ་བོ་ཅག་གཉིས་ཀར་ཉམས་མཚར་གྱི་རྣམ་པས་ཕྱག་བྲིས་ཀྱི་རི་མོའི་སྟེང་ནས། སེ་འབྲས་དགེ་གསུམ། ལྷ་ས། པོ་ཏ་ལ་བཅས་ཀྱི་བཀོད་པ་ཐ་ན་རི་རྒྱུད་སོ་སོའི་རྣམ་པ་ཡང་ཆེས་གསལ་བ། རྒྱུས་མེད་ཀྱིས་བལྟས་ན་ཡང་ཡུལ་གྱི་དོན་སྤྱི་ཡིད་ལ་འཆར་ཐུབ་པ་ཞིག་སྟོན་པ་གནང་སྟེ་ངོ་སྤྲོད་ཞིབ་རྒྱས་མཛད་དེ། ཁྱེད་རྣམ་པ་གཉིས་ཀའི་གཅིག་དབུས་ལ་སྔ་མགྱོགས་སུ་ཕེབས་དགོས་ཡོང་ན་འདི་ལ་བལྟས་ན་བཟང་གསུང་བ་ལུང་བསྟན་དུ་ངེས། ཁོ་བོ་དབུས་སུ་འགྲོ་སྐབས་རྐྱེན་སེལ་རྗེས་གནང་དང་གསུང་བཀོད་གནང་བའི་ཞོར་ལ། ངེད་ལ་བྱང་ས་མཆན་ཅན་ཞིག་དགོས་པས་ཁྱོད་ཀྱིས་རྩད་ཆོད་གསུངས། གང་ཚོར་རྩད་གཅོད་ཞུས་པས། གཙང་གི་དགོན་རྙིང་ཚོར་རྙེད་འགྲོ་མོད་གསུངས་པ་ཁོ་བོས་དབུས་གཙང་གི་དགོན་པ་ཀུན་ཏུ་བཙལ་ཡང་མ་རྙེད་པ་སྣར་ཐང་དུ་ཚེགས་མེད་ལག་ལ་འབྱོར་པ་དང། སྐུ་པར་མང་པོ་རྩད་གཅོད་ཀྱི་བཀའ་གནང་ཁྲོད་ན་མི་ལ་རས་པའི་སྐུ་པར་གྱི་མ་དཔེ་བྱེད་རྒྱུའི་ཕྱག་ཚ་ཨེ་དཀོན་ནམ་ཞུས་པར། ཁམས་ཚན་སོ་སོ་ན་ཡོད་འགྲོ་གསུངས། དེ་ཡང་ཕྱོགས་ཀུན་ནས་མ་རྙེད་པ་བཀྲས་ལྷུན་སྟག་མོ་སྤྱི་ཁང་ནས་ཚེགས་མེད་དུ་རྙེད་པ་སོགས་ཁོ་བོ་ལ་མིག་མཐོང་ལག་ཟིན་དེ་འདྲ་མང་ཞེས་གླེང་བ་ཐོས་སོ། །སྔར་ས་ཕྱོགས་འདིར་བདེ་མཆོག་གི་སྒྲ་གྲགས་མ་མྱོང་བས་ཕྲན་གྱིས་རྟིང་བསྐུལ་དང། གྲྭ་མང་གིས་བརྩོན་འགྲུས་བྱས་ཏེ་སྐབས་འདིར་བདེ་མཆོག་བདག་མདུན་གཉིས་ཚོགས་སུ་ཚུགས་ཐུབ་ཙམ་བྱུང་བ་ལ། རྒྱ་མཐོངས་ནས་དགྱེས་བཞིན་དུ་གསན། ཕྱག་
རྒྱ་ལ་གཟིགས་ནས་མཉེས་པའི་གསུང་ཕེབས། གྲྭ་པ་བཅུ་ལྷག་ཙམ་ལ་ཚགས་བཙུགས་ནས་འགྲེལ་པའི་ས་ཁུངས་ཁྲིད་དེ་འགྲེལ་པ་བཞི་སྦྲགས་ཀྱི་འཆད་ཉན་ཚུགས་པ་དང། རྒྱུད་གཞུང་གི་ཡང་ལེའུ་ཁ་ཤས་ཚུགས་ཐུབ་པ་སོགས་ལ་གྲྭ་མང་དང་ཕྲན་ལ་ཡང་ཐུགས་དགྱེས་ཤིང། ཚོགས་སུ་མང་ཇ་དང་དོང་ཙེ་ཞོ་འགྱེད། འདུ་ཁང་གི་ཤིང་རྩི་གཟིགས་རྟོག་དང། ལོགས་རིས་སོགས་ཀྱི་བཀོད་པ་མཛད་ནས། སླར་ཡང་གདན་སར་བྱོན་ཏེ་བཅད་རྒྱ་གནང། དེ་ཡང་གསང་ཆེན་ཆོས་ཀྱི་དབྱངས་སྙན་ཕྱོགས་བཅུའི་རྒྱལ་བའི་མཆོད་སྤྲིན་དུ་སྤེལ་བའི་ལེགས་བྱས་ཉམས་པ་མེད་པའི་གཞི་རྟེན་དམ་པ་དགའ་ལྡན་རབ་རྒྱས་གླིང་ཞེས་ཡོངས་སུ་གྲགས་པའི་རྟེན་དང་བརྟེན་པའི་ངོ་མཚར་གྱི་གཏམ་ནི། གང་གི་ས་གཞི་ལག་མཐིལ་ལྟར་མཉམ་པའི་དཔལ་ནི་ཤིན་ཏུ་དག་པའི་གཙང་མའི་མེ་ལོང་ལ་འགྲན་ཞིང། དྭངས་ཤིང་བསིལ་བའི་ཉལ་འགྲོ་རྣམས་ནི་མུ་ཏིག་གི་ལྦུ་བ་ངོམ་པས། སྟོན་གྱི་ནམ་མཁར་རྒྱུ་སྐར་གྱི་ཕྲེང་བ་འོད་འཚེར་བ་ལ་རྩེ་བ། རྫ་བྲག་སྤང་རིའི་འཕྲེང་བ་ཚར་དུ་དངར་བས་མིག་ལ་དགའ་བ་བསྐྱེད་པ་ནི་རོལ་མཚོའི་དབུས་སུ་གསེར་རིའི་ཕྲེང་བ་མཐོང་བ་སྙམ་བྱེད་པ་ཁ་དོག་སྣ་ཚོགས་པའི་མེ་ཏོག་གི་ཕྲེང་བ་བཞད་ཅིང་འཁྲིགས་པས་ས་གཞི་མཛེས་པ་ནི་པཉྩ་ལི་ཀའི་གོས་བཟང་པོས་ནོར་འཛིན་ཀླུབས་པའམ། ནམ་མཁའི་ངོས་སུ་དབང་གཞུའི་རི་མོ་བཀྲ་བ་ལྟ་བུ། གནག་ཕྱུགས་ཀྱི་ཁྱུ་ཚོགས་མང་པོས་རི་ལུང་གང་ཞིང། རོ་བརྒྱའི་འབྲས་བུ་དུས་སུ་སྨིན་པ་སོགས་སྣོད་བཅུད་ཀྱི་འབྱོར་བས་སྐྱེ་དགུ་བདེ་སྐྱིད་དང་དགའ་བས་བརླན་པ་ནི་སུམ་རྩེན་གྱི་ལོངས་སྤྱོད་འགྲོ་ལ་མཚོན་པ་ལྟ་བུ། ངུར་སྨྲིག་འཛིན་པའི་དགེ་འདུན་གྱི་ཚོགས་
རྣམས་གསང་ཆེན་རྒྱུད་སྡེའི་བཤད་སྒྲུབ་ཀྱིས་འགྲོ་ལ་ཕན་བདེའི་མཆོག་སྦྱིན་མཛད་པ་ནི་གུར་ཀུམ་མེ་ཏོག་རྒྱས་པའི་ཚལ་ལས་ཡིད་དུ་འོང་བའི་དྲི་བསུང་འགྱེད་པ་ལྟ་བུ་སོགས་སྣོད་དང་བཅུད་ཀྱིས་བསྔགས་པའི་རོལ་མོ་དབྱངས་སུ་སྒྲོགས་པས་སྐྱེ་དགུའི་རོ་འཛིན་ངལ་བར་བྱེད་དོ། །དེ་ལ་འདི་སྐད་ཅེས་བྱ་སྟེ། ལེགས་བྱས་བང་མཛོ༷ད་དགེ༷་བཅུ་གཡང་དུ་འཁྱིལ། །སྣོད་བཅུད་ཕུན་ཚོགས་དག༷འ་བདེའི་དཔལ་དང་ལྡ༷ན། །ཆོས་སྲིད་འབྱོར་པའི་གཟི་བྱིན་ར༷བ་ཏུ་གསལ། །བཤད་སྒྲུབ་དགའ་སྟོན་རྣམ་པར་རྒྱ༷ས་པའི་གླི༷ང། །གང་གི་འཛིན་མར་སྤང་ལྗོངས་ཉམས་དགའ་མེ་ལོང་ངོས་ལྟར་མཉམ། །ལྷུང་ལྷུང་སྒྲ་སྒྲོགས་དྭངས་བསིལ་ཆུ་བོ་ཆད་མེད་དལ་གྱིས་འབབ། །གཙང་ཞིང་ཡིད་འོང་རྩྭ་འཇམ་མྱུ་གུ་འཛིན་མའི་གོས་སུ་བསྟར། །ཆེ་ཆུང་སྙོམས་པའི་རི་ཡི་འཕྲེང་བ་སྐར་མའི་ཕྲེང་བཞིན་མཛེས། །དགུན་གྱི་དུས་སུ་ཉལ་འགྲོའི་ཚོགས་རྣམས་ཆུ་ཤེལ་གོས་གྱོན་ཟླ་གཞོན་གསར་པའི་དཔལ་ལ་འགྲན། །བར་སྣང་སྒྲིབ་པའི་རྡུལ་ཚོགས་རྣམ་འཐོར་དཔྱིད་ཀྱི་རླུང་གིས་ཕྱོགས་ཀྱི་ཁོར་ཡུག་བྱི་དོར་བྱེད། །སོས་ཀའི་དུས་སུ་ནོར་འཛིན་བུ་མོ་མེ་ཏོག་གོས་གྱོན་གསེར་བཟང་འོད་ཀྱི་མཛེས་པ་འཕྲོག །དཀར་སེར་དམར་ལྗང་སྔོ་བའི་མེ་ཏོག་འབྲས་བུས་རྣམ་བཀྲ་སྟོན་གྱི་ལང་ཚོའི་དགེ་མཚན་ངོམས། །འོད་དཀར་ཅན་གྱི་བསིལ་ཟེར་ལ་འཁུ་རྟ་བདུན་བདག་པོ་ཆུ་མཐོངས་གནས་སུ་འགོག་མེད་རྒྱུ་བས་ཆུ་སྐྱེས་ཚོགས་རྣམས་དགའ་ཞིང་འཛུམ། །མཁའ་དབྱིངས་མཛེས་མའི་སྟོང་གསལ་ལ་རོལ་འདབ་ལྡན་ཚོགས་རྣམས་འཕུར་ལྡིང་རོལ་པས་ཕྱོགས་རྣམས་ཉུལ་ཞིང་རྩེ་དགའི་གར་གྱིས་བལྟ་བས་བྲེལ། །ཉི་ཟླའི་དཔལ་གྱི་མཐོ་བ་ལ་སྙེགས་རྫ་བྲག་སྤང་རི་རྔམས་བརྗིད་རླབས་
ཀྱི་འཁྲི་ཤིང་གཡོ་ལྡན་རི་རབ་ཟོམ་གྱི་གཟི་བྱིན་འཕྲོག །རེས་འགའ་རི་རྣམས་ཁ་བའི་གོས་གྱོན་ཤེལ་དཀར་མདངས་འཛིན་དྲི་བཞོན་རླབས་གཡོ་གངས་རིའི་ལྗོངས་ཀྱི་གྲགས་པའི་བ་དན་གསལ་བར་བྱེད། །ཞི་དུལ་སྡོམ་བརྩོན་ངུར་སྨྲིག་གོས་འཆང་གུར་ཀུམ་ཚལ་གྱིས་ཟབ་གསང་ཆོས་ཀྱི་དྲི་བསུང་འཐུལ་བས་སྨིན་གྲོལ་དགའ་སྟོན་བདུད་རྩི་མཆོག་གིས་སྙིང་ལ་སིམ་པ་སྟེར། །ཐུན་མོང་ལམ་གྱིས་ལེགས་སྦྱངས་སྣོད་དུ་རིམ་གཉིས་ནོར་བུས་ལེགས་པར་གཏམས་པའི་ངོ་མཚར་རི་མོ་གདངས་དབྱངས་ཕྱག་རྒྱའི་གར་གྱིས་མཁའ་སྤྱོད་གནས་ལ་ཅོ་འདྲི་བྱེད། །འབུམ་ཕྲག་གཟི་འོད་མཆོག་ཏུ་འབར་བའི་བགྲང་ཡས་རྟེན་རྣམས་སྐར་ཚོགས་ལྟར་བཀྲ་གཙུག་ལག་ཁང་བཟང་སྤོ་མཐོར་བརྩེགས་པས་རྣམ་རྒྱལ་ཁང་བཟང་མཆོག་གི་དཔལ་ལ་འགྲན། །ངོ་མཚར་བྱེ་བའི་རླབས་ཀྱི་འཕྲེང་བ་ཆེས་ཆེར་སྤྲོ་བས་གང་འདིའི་འགྲོ་རྣམས་ལེགས་སྨོན་གྲུབ་པའི་བཀོད་པ་གསལ་བྱེད་འདི་ཡི་དཔེ་ཟླ་སྲིད་འདིར་བཙལ་ཀྱང་དཀོན། །བླ་མ་ལ་གུས་དད་དང་སྙིང་སྟོབས་ཡོན་ཏན་རབ་རྒྱས་སྟོབས་འབྱོར་དཔུང་དང་དྲེགས་པའི་འཕྱང་འཕྲུལ་ཆེས་ཆེར་གཡོ་བས་ཕྱོགས་ཀྱི་འཁོར་ལོའི་ཁྱོན་ཡངས་འགེངས་བྱེད་ཅིང། །ཞི་བའི་བདེ་སྟེར་ཆོས་ཀྱི་དཔལ་ལས་ནམ་ཡང་མི་གཡེལ་སྦྱིན་བདག་ཚོགས་རྣམས་མཁོ་དགུའི་དངོས་པོ་འདོད་དགུར་སྟོབ་པས་རོལ་མཚོའི་རླབས་ཕྲེང་དུས་སུ་བསྐྱོད་པ་བཞིན། །ཆོས་དང་སྲིད་ཀྱི་དགའ་བདེའི་འཁྲི་ཤིང་ལེགས་བྱས་འབྲས་བུ་རྣམ་པར་རྒྱས་པས་ཚིམ་པ་རབ་སྟེར་སྙན་པའི་དྲི་བཞོན་ཕྱོགས་ཀྱི་འཁོར་ལོར་རྣ་བའི་བཅུད་ལེན་འགྱེད། །བདེ་སྐྱིད་འོད་བརྒྱ་འབར་བས་སྟོང་ཕྲག་ཉི་མ་འབུམ་གྱི་རྩེ་དགའ་ཟིལ་གནོན་རྨད་
བྱུང་དམ་པའི་མཛད་བཟང་སྣང་བརྙན་མཆོག་ཏུ་གསལ་འདིར་མི་གུས་བློ་ལྡན་སུ། །འདི་ཡི་ངོ་མཚར་ཡོན་ཏན་གྱིས། །སྐྲག་ལྡན་རྣམ་སད་གཞོན་ནུའི་ཚོགས། །སིལ་བུའི་རྒྱུ་སྐར་ཟོལ་གྱིས་ནི། །མཁའ་དབྱིངས་མཐོན་པོར་བྲོས་སམ་སྙམ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ཡང་རྣམ་ཐར་སྤྲིང་ཡིག་ལས། བླ་མའི་སྐུ་དགྲར་མཛའ་གཅུགས་མ་བྱས་ཀྱང། །རང་ལ་སྒེར་གྱི་གནག་པ་སུ་ལ་ཡང། །སྡང་བས་དམོད་བཅོལ་ཙམ་ཡང་བགྱིས་པ་མེད། །མ་ནུས་ཇོ་བཟང་བྱས་པའི་རྣམ་ཐར་ཡིན། །ཞེས་གསུངས་པ་ལྟར། ཆོས་སྡེ་འདི་ཉིད་གསར་འདེབས་ཀྱི་དུས་སུ་ཡབ་རྗེ་བླ་མའི་མཛད་འཕྲིན་ལ་ཤིན་ཏུ་སྡང་བའི་བླུན་པོ། བདུད་ཀྱི་ཕྱོགས་སུ་ཞུགས་པ་དུ་མས་ལོག་པར་འཁུ་བའི་སྦྱོར་བ་མང་དུ་བརྩམས་པ་ལ་རྗེ་བླ་མ་ཉིད་ཀྱི་ངོས་ནས་ཇི་མི་སྙམ་པར་བཞུགས་ཀྱང་སྲས་བཅས་རྒྱལ་བའི་ཐུགས་བསྐྱེད་དུས་སུ་སྨིན་པའི་མཐུ་དང་བསྟན་སྲུང་དམ་ཅན་རྒྱ་མཚོའི་འཕྲིན་ལས་ལ་བརྟེན་ནས། དེ་དག་རིས་དང་བཅས་པ་མེ་ཁྱེར་ལ་ཉི་མའི་འོད་ཟེར་བབས་པའམ། རི་དྭགས་ཀྱི་ཁྱུ་ལ་སེངྒེ་བབས་པ་ལྟར་ཟིལ་གྱིས་མནན། ཕུབ་མ་སྤར་གང་ལ་རླུང་དམར་བབས་པའམ། བ་རྗེས་ཀྱི་ཆུ་ལ་ཉི་ཚན་བབས་པ་ལྟར་རྣམ་པར་འཐོར་ཞིང་ཉམས་ཏེ། ཁྲུང་ཁྲུང་རྒན་པོ་འདབ་མ་བྲེགས་པ་བཞིན་དུ་གནས་པར་གྱུར་ཏོ། །རི་ཁྲོད་ཡིད་དགའ་ཆོས་འཛིན་དུ་བདེ་ལམ་གྱི་ཁྲིད། བླ་མ་ལྔ་བཅུ་པའི་བཤད་ལུང། བདེ་མཆོག་གི་དབང་སོགས་དང། རི་ཁྲོད་པ་རྣམས་ཀྱི་འདོན་ཆ་ཕྱག་ལེན་ལ་གཟིགས་རྟོག་དང་བཀོད་ཁྱབ་འཆམ་པ་ལྕགས་མཁར་བ་ཡོངས་རྫོགས་ལ་ཆོས་རྒྱལ་གསུམ་གྱི་རྗེས་གནང། དོན་གཉེར་བ་འགའ་ལ་ཚེ་རྟ་མགོན་གསུམ་གྱི་རྗེས་གནང་སོགས་ཅི་རིགས་སྩལ་ཞིང་སྔ་ཕྱིར་
བསྒྲུབ་བྱ་ཉེར་ལྔ་བསྙེན་རྫོགས་སུ་བསྒྲུབས། ཚ་ཁོ་རྒྱལ་ཁག་སོ་སོས་སྔར་ནས་གདན་འདྲེན་ཞུས་ཡོད་པ་བཞིན་དགུ་པའི་ཉེར་བདུན་ལ་བཏེག །སྦྱིན་བདག་གི་སར་མི་ཕེབས་གསུངས་ཀྱང་ལམ་ཀྱོག་མེད་པར་ཞུ་ནན་ཟློག་ཐབས་མ་རྙེད་ནས་རིམ་བཞིན་ཕེབས་པས། རྗེ་བླ་མའི་བུ་ཆེན་ཚ་ཁོ་ངག་དབང་གྲགས་པས་དགོན་པ་བརྒྱ་རྩ་བརྒྱད་འདེབས་པའི་དམ་བཅའ་མཐར་ཕྱིན་པའི་དབང་གིས་མཚན་གསོལ་བ་དཱ་ཚང་ལྷུན་གྲུབ་གླིང་དུ་བཅུ་པའི་ཉེར་གསུམ་ལ་བབས་ཏེ་ལྔ་མཆོད་ཀྱི་ཚོགས་དབུ་མཛད། ཅོག་རྩེ་རྒྱལ་པོ་རྒྱ་གར་འབུམ་གཤེགས་ནས་གདན་འདྲེན་པ་གློ་བུར་དུ་འབྱོར་པས་ཉེར་དགུའི་ཉིན་ཕེབས་དགོས་བྱུང། ས་ལམ་རྩུབ་པས་མགྱོགས་བྱང་ལ་ཕེབས་ན་ཞུས་ཀྱང་འཁུར་མཁན་གྱི་མི་ལ་གནོད་གསུངས་ནས་མ་གསན་པ་ནི་འདུལ་བ་ལ་གཅེས་སྤྲས་དང་སྙིང་རྗེ་ཆེ་བའི་རང་མདངས་སུ་སྣང། ཏཱ་རོ་ཆེ་ཆུང། བདག་མོ་ཡུམ་སྲས། ནང་སོ་དཔོན་གཡོག་སོགས་ཀྱི་མང་བསུ་དང། སེར་སྦྲེང་སོགས་དང་བཅས་རྒྱལ་ས་དེར་བབས། ས་དགེ་རྙིང་གསུམ། ཇོ་ནང། ཀར་བོན་སོགས་བདུན་བརྒྱའི་ཚོགས་དབུར་བྱོན་ནས་བསྔོ་བ་ཡོན་བཤད་རྒྱས་པ་གནང་བས། སྐུ་གསུང་ཐུགས་ཀྱི་མཛད་པ་ལ་གྲུབ་མཐའ་རིས་མེད་ཐམས་ཅད་གཅིག་ཏུ་དད་པར་གྱུར། དེ་ཉིན་ན་བཟའ་གསར་པ་འགའ་མནབ་ན་ཞུས་ཀྱང་སྣེ་རིང་གིས་ཆོག་གསུངས། པཎ་ཞྭ་མནབ་ན་ཞུས་པར་དེ་རིང་ཅིས་ཀྱང་སྣེ་རིང་གྱོན་དགོས་གསུངས་ནས་མནབ་པས་གསེར་མདོག་ཅོད་པན་གྱི་གཟི་བརྗིད་དང། སྐུའི་གཟི་བརྗིད་ལྷང་ངེ་བར་གྱུར་ཏེ་ཚོགས་པ་དང་གྱོན་པ་ཐམས་ཅད་ཟིལ་གྱིས་མནན་པས་ཀུན་ངོ་མཚར་བར་གྱུར། རྩེ་མོ་རྣོ་བ་མཁའ་ལ་གཟེངས་པས་སྐྱོན་མེད་
ཡིད་འོང་ལྟ་བ་དྲན། །སྣེ་ཤལ་རིང་པོ་བཤད་སྒྲུབ་རྒྱུན་དང་འགྲོ་ལ་བརྩེ་བའི་ལས་ལ་འགྲན། །ཅུང་ཟད་དུད་པས་ང་རྒྱལ་སོགས་ཞི་དུལ་བའི་དཔལ་གྱི་དགེ་མཚན་ངོམ། །རྣམ་དག་ཐབས་ཤེས་ལྟ་སྒོམ་སྤྱོད་མཚོན་གསེར་མདོག་ཅོད་པན་གཟི་བརྗིད་ཀྱིས། །སྣ་ཚོགས་གོས་དང་རྒྱན་མང་ཟིལ་མནན་ནས། །མཛེས་པའི་གྲགས་པ་ཕྱོགས་སུ་རྒྱས་པ་ནི། །པདྨའི་གེ་སར་རྡུལ་གྱི་བྱེ་མ་དག །མཚོ་རླབས་ཀྱིས་བཀྲམ་བཞིན་དུ་འགོག་པ་མེད། །རྒྱལ་ས་ནས་ཀྱང་གཟིམས་ཁང་དང། གནས་གཞིའི་ཉེར་སྤྱད་ཆ་ཚང། དུད་ཁག་གཉིས། དངུལ་སྲང་བརྒྱ་སོགས་དངོས་འབུལ་གཟབ། ཚ་ཁོ་དགོན་དུ་གདན་དྲངས་པར། མཁན་ཆེན་ངག་དབང་གྲགས་པའི་གདུང་མདུན་དུ་མཆོད་པ་ཕུལ་ཏེ་བསྟན་འགྲོའི་དོན་ལ་བསྔོ་སྨོན་གང་རྒྱས་དང། གདུང་མདུན་དེར་སྐུ་བསྟོད་ཀྱང་བརྩམས། མཆོད་ཐེབས་དངུལ་སྲང་ཉི་ཤུ་སོགས་ཕུལ། རྙིང་བོན་སོགས་སུས་ཀྱང་ཞལ་མཇལ་བ་ཙམ་གྱིས་དད་གུས་ཀྱི་ངང་ནས་འབྲལ་མི་ཕོད་བཞིན་དུ་ཏཱ་རོ་སྟག་འབུམ། ཏཱ་རོ་ལྷ་འབུམ་ཐར། ཏཱ་རོ་འབའ་ལ་སོགས་ཀྱིས་གདན་དྲངས་པར་རིམ་ཕེབས་ཀྱིས་བཀའ་བསྒོ། ཕྱག་དབང་ལྗགས་བསྔོ། རབ་གནས་ཆོས་སྦྱིན་གང་མོས་ཀྱི་རེ་བ་བསྐངས། ཨ་མཆོག་དགེ་བཤེས་སྤྲུལ་སྐུ་ལོ་གསུམ་ལོན་པ་དགེ་བསྙེན་དུ་བསྒྲུབས་ཤིང་སྒྲོལ་དཀར་གྱི་རྗེས་གནང་སྩལ། བོན་འབར་ཁམས་སོགས་ཀྱིས་གདན་དྲངས་པ་ལྟར་རེ་བའི་རྫིང་བུ་འགེངས་པར་མཛད། རྫིང་འགག་ཏུ་གདན་འདྲེན་ཞུས་པ་ལྟར་བཅུ་བདུན་གྱི་ཉིན་རྒྱལ་པོའི་བློན་པོ་ད་རོ་ང་རོ་མདའ་འཁོར་གོ་ཆ་ཅན་སུམ་ཅུ་དམག་ཆས་སྣ་ཚོགས་ཅན་བཞི་བཅུ་སོགས་རྟ་པ་མང་པོས་ཆིབས་བསུ་རིང་ཐུང། སེང་འཆམ་རོལ་ཆ་སྣ་ཚོགས།
སེར་སྦྲེང་དང་བཅས་རྫིང་འགག་ཕུན་ཚོགས་རྫོང་དུ་བབས། བདག་མོ་སྲས་སྲས་མོ་བློན་འཁོར་མང་ལ་ཚེ་ལྷ་རྣམ་གསུམ་གྱི་རྗེས་གནང། དགོན་ནོར་བུ་གླིང་དུ་བཅུ་གཅིག་ཞལ་གྱི་དབང་སྟ་གོན་དང་བཅས་པ། སྤྱི་འཇོག་ལ་རྟ་ནོར་དྲུག་གནང། རབ་བྱུང་ཉེར་བཞི། བསྙེན་རྫོགས་གཉིས་སོགས་སོ་སོའི་རེ་བ་བསྐངས། བདག་མོས་བསྐུལ་ཏེ་འཁྲུངས་རབས་ཀྱང་བརྩམ་ཞིང། རིམ་གྲོ་ལ་མགོན་ཆོས་རྣམ་སྲས་ཀྱི་བསྐང་གསོ་ཡང་གནང། དངོས་འབུལ་དངུལ་སྲང་ཉིས་བརྒྱ་ལྔ་བཅུ། གོས་ཟམ་ཕྲུག་ཐེར། པགས་རིགས་སོགས་རྒྱ་ཆེར་སྤེལ་ཞིང། འཆམ་གཟིགས་རོལ་རྩེད་སྣ་ཚོགས་དང། མཚན་མོ་མེའི་འཕྲུལ་འཁོར་གྱི་གཟིགས་མོ་སོགས་ཐུགས་མཉེས་ཐབས་ཀྱི་བཀུར་སྟི་ཕུ་དུད་ཁོ་ན་ལྷུར་བླངས། སོ་མང་དུ་གདན་འདྲེན་ཞུ་བ་ཏཱ་རོ་གཤེན་རབ་རྒྱལ་སོགས་འོངས་ཀྱང་དུས་ཚོད་དང་བགྲོད་དཀའ་བ་བཅས་འདི་རེས་བཤོལ་ནས། བཅུ་གཉིས་པའི་ཚེས་ལ་གོ་གྲུ་ཟེར་བར་བབས། བརྒྱ་རྩ་བརྒྱད་ཟེར་བའི་ལམ་འཕྲང་ཤིན་ཏུ་དཀའ་ཡང། མི་མང་ནས་དད་གུས་ཀྱིས་བཅོས་ཡོད་ས་བརྒྱུད། ཆོས་སྐྱབས་དགོན་དུ་ཕེབས། མང་ཇ་དང་ཁ་དར་གྱི་འགྱེད། རྟ་ནོར་གཉིས་ཀྱི་སྤྱི་འཇོག་དང་འདོད་ཆོས་མོས་པ་བཞིན་གནང། ལམ་འཕྲང་ཆུ་འགག་སོགས་ལ་ཡང་མི་འཛེམ་པར་གཞན་ཕན་མཛད་པ་ནི་བསྔགས་པའི་འོས་ཡིན་ཏེ། ནད་ཀྱི་དང། དགོན་པ་དང། ཆུའི་དང། མུ་གེའི་དང། མི་རྒོད་ལ་སོགས་པ་མཐོང་ན་འཇིགས་པར་མི་བྱ། དངངས་པར་མི་བྱ། སྐྲག་པར་མི་བྱ་བར་བདག་སངས་རྒྱས་པའི་ཞིང་དུ་དེ་དག་མི་འབྱུང་བར་བྱ་བ་ལ་བསླབ་པ་ནི་ཞིང་དག་པར་བྱ་ཚུལ་ཡིན་པར་
གངྒཱའི་ལྷ་མོའི་ལེའུ་ལས་གསུངས་སོ། །ད་ཚང་དུ་བབས་ནས་ཉིན་བདུན་གྱི་རིང་ལ་ཚོགས་པར་མང་ཇ་བཟང་པོ་དང་བཅས་འཇིགས་བྱེད་ཀྱི་རྩ་སྔགས་བསྒྲུབས་པའི་མཇུག་ཏུ་ཚོགས་དབུར་རྗེ་ཉིད་བྱོན་ཏེ་སྦྱིན་སྲེག་གནད་དུ་སྨིན་པར་མཛད། དགེ་འདུན་ལྔ་བརྒྱ་ལ་ནས་རོང་ཡ་རེ་ཕུལ། དེ་ནས་བཅད་རྒྱ་མཛད་དེ་ཐུགས་དམ་ཉམས་བཞེས་ཀྱི་ངང་ནས་རིག་བྱེད་མའི་བསྟོད་འགྲེལ་ཕལ་ཆེར་གྲུབ་པར་མཛད། འབྱོར་པའི་བང་མཛོད་རྨུགས་འཛིན་དབང་པོར་འགྲན། །རྣམ་བཞིའི་དཔུང་ཚོགས་ལྷ་མིན་དཔལ་ལ་འཁུ། །བརྟན་གཡོའི་གཟི་བརྗིད་ལང་ཀའི་གྲོང་ཁྱེར་ལ། །འགྲན་པའི་སྟོབས་ལྡན་རྒྱལ་རོང་ཕོ་བྲང་གིས། །ཉེར་མཚོན་འཛིན་མའི་ཐིག་ལེ་དེ་དང་དེར། །དྲང་སྲོང་གཙོ་བོ་ཡུལ་འཁོར་གཤེགས་པ་ལྟར། །མཐོང་ཐོས་དྲན་པའི་ཟེར་གྱིས་རྣམ་མང་འགྲོ །བརྒྱ་ཕྲག་ཉེས་པའི་སྦུབས་རྒྱ་གྲོལ་བར་མཛད། །དགུང་ལོ་ཞེ་གཅིག་པ་ཆུ་ཁྱིའི་ལོ་གསར་དགྱེས་སྟོན་ད་ཚང་ལྷུན་གྲུབ་གླིང་ནས་མཛད་ཅིང། གསུང་ཆོས་སྨོན་ལམ་ལ་ལན་གསུམ་རེ་ཕེབས། ཏཱ་ཞི་འབྲུག་སོགས་བཞི་དགེ་བསྙེན་དང། བདུན་བསྙེན་རྫོགས་ལ་བཀོད། ཚེས་བརྒྱད་ཀྱི་ཉིན་མཁན་ཆེན་ངག་དབང་གྲགས་པའི་སྐུ་བསྟོད་ཚོགས་འདོན་དུ་ཚུགས་པར་མང་ཇ་དང། དངུལ་ཞོ་དོ་རེ། ཉིན་བདེ་མ་རེའི་འགྱེད། གཞན་ཡང་ལུང་རྗེས་གནང་སོགས་འདོད་ཆོས་ཀྱིས་རེ་བ་ཚིམ་པར་མཛད། ད་ཚང་རི་ཁྲོད་དུ་གདན་དྲངས་པར་མི་ལའི་རྣམ་མགུར་གྱི་ལུང་གནང། ཆོས་དང་མཐུན་པའི་ཞལ་གདམས་མཛད། ད་ཚང་ལྷུན་གྲུབ་གླིང་གདན་ས་ཁྱད་དུ་འཕགས་པས། དེར་ཀུན་མཁྱེན་བླ་མའི་གཟིམས་ཁང་ཞིག་ཡོད་ན་བསྟན་པ་ལ་ཕན་པར་དགོངས་ཏེ་ཐེབས་བཞག་པའི་སྟེང་ནས།
གྲྭ་མང། ཅོག་ཙེ། རྫིང་འགག་སོགས་སྤྱི་འདུས་ཀྱིས་ཁུར་བླངས་ནས་ལེགས་པར་གྲུབ་པའི་ནང་དུ། ཀ་ཅ་གདན་ཆ་ཉེར་སྤྱད་ཆ་ཚང་བཅས་ཁང་གཉེར་ལ་རྩིས་སྤྲད། སྤྱིའི་སྐུ་ཚབ་ཀྱང་བཞག་སྟེ་ཉེར་གསུམ་ལ་དེ་ནས་བཏེག །ལམ་བར་རོང་རུ་ནས་ཝམ་པ་དགེ་བཤེས་ཀྱི་སྤྲུལ་སྐུ་རབ་བྱུང་དང། དབལ་ཤུལ་མཛོད་དགེ་ནས་ཀྱང་རབ་བྱུང་བསྙེན་རྫོགས་འགའ་རེ་མ་གཏོགས་ཕེབས་བཞུད་ཆེར་མ་གནང་བར་གཉིས་པའི་བཅུ་དྲུག་ལ་གདན་སར་བབས། སུ་ཉིད་ཨོ་ཡོ་ཐུ་རབ་འབྱམས་པ་ལ་དངུལ་སྲང་སྟོང། ལམ་བར་གྱི་བྲོ་ཆས་ཁལ་རྟ། སྦྱིན་བདག་བསྐུལ་ཐེབས་ཐེར་སྣམ་བྱིན་རྟེན་ཕོན་ཆེ་བ་དང་བཅས། མཆོད་རྟེན་བཞེང་རྒྱུའི་ཆོས་འཁོར་ཡན་ཆད་ཀྱི་གསེར་ཟངས་དང་དབུ་རྒྱན་འགའ་སོགས་བསྒྲུབ་ཕྱིར་སྨད་ཕྱོགས་སུ་བརྫངས་པས་སུ་ཉིད་ཀྱི་གྲྭ་རྒྱུན་སྦྱིན་བདག་གིས་བཀའ་བཞིན་བསྒྲུབས། མཆོད་རྟེན་མཐོང་གྲོལ་གསར་བཞེངས་ཀྱི་ཆེད། མི་ལྔ་བཅུས་རྡོ་ཆེན་བླངས། ཆུ་ཚན་གྱི་འཕྲོད་བསྟེན་ཅུང་ཟད་ཙམ་མ་གཏོགས། དྲུག་པའི་བཅོ་ལྔ་བར་བཅད་རྒྱ་མཛད། དེའི་ཁོངས་སུ་སྔ་ཕྱིར་བསྙེན་རྫོགས་བདུན་ཅུ། རབ་བྱུང་དགེ་ཚུལ་ཉེར་ལྔ། དོན་གཉེར་བ་རྣམས་ལ་འཇིགས་བྱེད་ཞལ་ཕྱག་ཡོངས་རྫོགས་ཀྱི་རྗེས་གནང། མགོན་པོ་བཀའ་བཅུ་གསུམ། ཆོས་རྒྱལ་ཕྱི་ནང་གསང་གསུམ། སེང་གདོང་མ། རྣམ་འཇོམས། སྣར་ཐང་བརྒྱ་རྩ་སོགས་ཀྱི་རྗེས་གནང། སྐྱབས་ཁྲིད། དགའ་ལྡན་ལྷ་བརྒྱ་མའི་ཁྲིད། ལམ་ཁྲིད། འཕོ་ཁྲིད། ཚེམ་བུ་དམར་ཁྲིད་སོགས་ཀྱང་གནང། ཐུའུ་བཀྭན་རྡོ་རྗེ་འཆང་དག་པའི་ཞིང་དུ་དགོངས་པ་གཏད་པར་དགོན་ལུང་གི་རྒྱུད་པ་བླ་མ་
དཔོན་གཡོག་འགའ་གདན་འདྲེན་དུ་འབྱོར། ཐུགས་ངལ་ཚད་མེད་པ་དང་བཅས་འཕྲལ་དུ་བྱོན་ནས་ཉི་ཤུ་གསུམ་ལ་དགོན་ལུང་དུ་བབས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་དུ་མོས་པས་དབང་བཞི་བླངས་ནས་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པས་མཉེས་པར་མཛད། སྤྲུལ་སྐུ་མྱུར་འབྱོན་དང། འབྲལ་མེད་རྗེས་འཛིན་གྱི་བསྔོ་སྨོན་གསོལ་འདེབས་ནན་ཏན་གནང། མཎྜལ། མཛོད་བཏགས། དངུལ་སྲང་བརྒྱ། གོས་ཆེན་གཉིས། ཕྲུག་གསུམ་སོགས་ཀྱི་གདུང་འབུལ་ཞུས། དགོངས་རྫོགས་སུ་དགོན་ལུང་ཚོགས་ཆེན་ལ་མང་ཇ་དང། ཞོ་དོ་སྐར་ལྔ་རེ་དང་ཁ་དར་རེའི་འགྱེད། དགོན་ལུང་འདུ་ཁང་གི་ཐེབས་སུ་དངུལ་སྲང་བཅུ་འཇོག་པ་གནང། ཚོགས་མང་ལ་གདུགས་དཀར་གྱི་དབང་སྟ་གོན་དང་བཅས་པ་སྩལ། ཞག་ཁ་ཤས་བཞུགས་ཏེ་བཀྲ་ཤིས་འཁྱིལ་བླ་བྲང་ཆེན་མོའི་སྐུ་ཚབ་དང། བླ་བྲང་བཀྲ་ཤིས་འོད་འབར་གྱི་ཞབས་ཕྱི་གྲོས་བསྟུན་གྱིས་རྡོ་རྗེ་འཆང་དེ་ཉིད་ཀྱི་སྐུ་དོན་དོགས་གཅོད་ཞུས་པ་རྣམས་ཐེ་ཚོམ་སེལ་བར་མཛད། ཕེབས་ལམ་ནས་བཀྲ་ཤིས་ཆོས་རྫོང་དང་གསང་སྔགས་ཆོས་ལྡིངས་གཉིས་ལ་མང་འགྱེད་དང། སོ་སོར་དངུལ་སྲང་ལྔ་བཅུ་རེ་སྤྱི་འཇོག་གནང་སྟེ་ཉི་ཤུ་གསུམ་ལ་གདན་སར་བབས། སྔར་ནས་གདན་འདྲེན་ཡང་ཡང་ཞུས་པ་བཞིན་ཟླ་བ་བརྒྱད་པའི་ནང་དུ་རྫོང་དཀར་རི་ཁྲོད་དུ་བྱོན། ཆིབས་བསུ་སེར་སྦྲེང་སོགས་ཕུ་དུད་ཆེ་ཞིང་རྟིས་ཚང་མ་ཎི་པ་སྤྲུལ་བའི་སྐུ་རབ་བྱུང་དང་དགེ་ཚུལ་དུ་བསྒྲུབས་ཏེ་མཚན་དཀོན་མཆོག་བློ་བཟང་བསྟན་འཛིན་དུ་གསོལ། དགའ་ལྡན་ལྷ་བརྒྱ་མའི་ཁྲིད་དང། འཕྲོ་ཁྲིད་སོགས་བཀའ་ཆོས་འགའ་ཞིག་ཀྱང་གནང། རི་ཁྲོད་པ་རྣམས་ལ་རས་ཡ་རེ་དང་
ཁ་དར་རེའི་འགྱེད་བཏང། འདབས་འབྲེལ་གྱི་གྲོང་སྡེ་རྣམས་དང། མགོན་ཤུལ། མང་ངེ། ནེ་མོ་ཆི། ཝང་གི་རུ་སྡེ་དུ་མས་གདན་དྲངས་ཏེ་འབུལ་ནོད་རྒྱ་ཆེར་ཕུལ་བ་དང། ཚོགས་ཆེན་གྱི་ཁྲིར་བཞུགས་སྐབས་ཤིག་སོག་ཡུལ་དུ་ཕེབས་པར་འབུལ་ནོད་རྒྱ་ཆེ་བ་བྱུང་སྟེ་རྩེ་ཆུའི་འགྲམ་ནས་ཉིན་ཞག་འགར་བཞུགས་སྐབས་སློང་མོ་བ་མང་དུ་བྱུང་བ་ལ་གནང་སྦྱིན་གྲངས་བརྩིས་ནས་ལུག་སྟོང་ཕྲག་གཅིག་དང་བརྒྱ་མ་ལོང་ཙམ་སོང་བ་སོགས་ཀྱིས་མཚོན་ཟང་ཟིང་གི་འདུ་ལོང་བྲིས་ན་འབྲེལ་ཚད་དོན་ལྡན་གྱི་རྣམ་ཐར་ཡིན་ཀྱང་པོ་ཏིར་མི་ཤོང་ཞིང། རྗེ་ཉིད་ཟང་ཟིང་གི་འདུ་ལོང་ལ་མི་དགྱེས་པས་དམིགས་བསལ་ཅན་འགའ་རེ་མ་གཏོགས་གོང་འོག་ཀུན་ཏུ་མ་བྲིས་ཏེ། རྗེ་བླ་མས། འདྲེན་པ་དེ་ཡི་ཆོས་ཀྱི་ཀུན་སྤྱོད་ནི། །འགའ་ཞིག་སྙན་ངག་ལམ་དུ་མཚོན་པར་བྱས། །དམ་པ་རྣམས་ཀྱིས་མཐོང་ན་ཁྲེལ་བའི་གཞི། །ཟང་ཟིང་གཏམ་གྱི་སྦྱོར་བ་འདིར་མ་བཀོད། །ཅེས་པ་ལྟར་རོ། །སྐྱེ་བོ་སེར་སྣའི་ཞགས་པས་ཉེར་བཅིངས་པས། །ནོར་དང་ལོངས་སྤྱོད་སྲོག་དང་ཤ་ཁྲག་ལྟར། །གཅེས་པར་འཛིན་ཀྱང་ཁྱོད་སྐུ་མཐོང་བ་ན། །མཁོ་བར་འཛིན་པའི་འདུ་ཤེས་གཏིང་ནས་ནུབ། །གློ་བུར་མེ་ཤོར་བཞིན་དུ་ཁྱིམ་ནས་འབྱིན། །བུ་ལོན་འབོགས་པ་བཞིན་དུ་ཁྱོད་ལ་འབུལ། །རང་གི་རྙེད་པ་བཞིན་དུ་དགའ་བས་ཚིམ། །ཡིད་ལ་སྨོན་པ་བཞིན་དུ་ཁྱོད་མཐུས་འགྲུབ། །གདན་སར་ཕེབས་ནས་མ་འགྱངས་པར་བྲག་དཀར་དགོན་དུ་བྱོན། དགེ་འདུན་ཉིས་བརྒྱ་ལྷག་ལ་ཟམ་ཆ་རེའི་འགྱེད་གནང། གཟིམས་ཁང་གསར་པར་བྱིན་རླབས་
དང། གནས་གཟིགས་ལ་ཕེབས་ཏེ་བདེ་མཆོག་གི་ཆོ་ག་དང་འབྲེལ་བར་ཚོགས་འཁོར་དང་རྡོ་རྗེའི་གླུ་སོགས་གང་རྒྱས་མཛད་པའི་ཚུལ་གྱི་གསུང་སྒྲོས་ལ་དཔགས་ན་ནང་དུ་འཁོར་ལོ་སྡོམ་པའི་ཕོ་བྲང་གི་རང་བཞིན་དུ་གྲུབ་ཅིང། ཕྱི་རུ་ས་འཛིན་གྱི་རྣམ་པར་སྣང་བ་རྩེ་མོ་གངས་རིའི་ཐོར་ཚུགས་མཛེས་ཤིང། རྐེད་པར་བྲག་རིའི་འཕྲེང་བ་ཚར་དུ་དངར་བ་ལ་ན་བུན་གྱི་གོས་བཟང་འཕྱང་བ། རྩ་བར་སྤང་ལྗོངས་མེ་ཏོག་གི་ཚལ་དུ་བུང་བའི་ན་ཆུང་མགྲིན་པའི་དབྱངས་སྙན་སྒྲོག་པའི་གནས་དེར། རིམ་གཉིས་ཟབ་མོའི་རྣལ་འབྱོར་གྱི་ལང་ཚོ་ངོམ་པ་ན་དཔའ་བོ་མཁའ་འགྲོའི་ཚོགས་རྣམས་རྡོ་རྗེའི་གླུ་གར་གྱི་རོལ་པས་རྩེན་པར་གྱུར་པ་ལ་ཐེ་ཚོམ་མེད་དམ་སྙམ། གདན་སར་བྱོན་ནས་ལོ་མཇུག་བར་དུ་བཅད་རྒྱ་མཛད་ཅིང། ཀུན་རིག་དང་འཇིགས་བྱེད་ཀྱི་དབང་སོགས་བཀའ་ཆོས་འགའ་ཞིག་ཀྱང་གནང། དགུང་ལོ་ཞེ་གཉིས་པ་ཆུ་ཕག་གི་ལོ་གསར་སོགས་གྲུབ་རྗེས། དུས་འཁོར་སློབ་ཟུར་ངག་དབང་ཕུན་ཚོགས་པས་རྡོར་ཕྲེང་གི་དབང་ཞུས་པར་བརྟེན་དཀྱིལ་འཁོར་འགའ་ཞིག་གི་བསྙེན་པ་གནང། མགོན་པོ་བཀའ་བཅུ་གསུམ་གྱི་རྗེས་གནང། འཇིགས་བྱེད་ཀྱི་དབང་སྟ་གོན་དང་བཅས་པ། བསྙེན་རྫོགས་དོན་ལྔ། དགེ་ཚུལ་བཅོ་བརྒྱད་སོགས་སོ་སོའི་རེ་བ་འཕྲལ་དུ་བསྐང། ཁྲི་ལས་ཐོག་པ་རྒྱལ་མཁན་པོ་གྲགས་པ་རྒྱལ་མཚན་གྱིས་རྡོར་ཕྲེང་ཚོགས་ཆེན་འདུ་ཁང་ནས་གནང་དགོས་ནན་ཏན་ཞུས་པ་ལྟར་གཉུག་མར་གནས་པའི་དགེ་འདུན་ཉིས་སྟོང་ལྔ་བརྒྱ་དང་བདུན། ཕྱོགས་འདུས་བཞི་བརྒྱ་གྱ་བརྒྱད་བཅས་ལ་ཕྲེང་བ་དང་ཀྲི་ཡ་སྦྲགས་པའི་དཀྱིལ་འཁོར་ཞེ་ལྔའི་དབང་རྫོགས་པར་གནང། འདི་སྐབས་བློ་ལྡན་དོན་གཉེར་བ་རྒྱ་
ཆེ་ལ་གྲངས་མང་བར་རྒྱུད་སྡེ་བཞིའི་ལམ་གྱི་གནད་ཡོངས་སུ་རྫོགས་པའི་གསུང་བཤད་ཐང་མར་བདལ་ཞིང། ལྷག་པར་དབང་གོང་མ་རྣམས་ལ་རྒྱུད་རྒྱ་གཞུང་རྗེ་ཡབ་སྲས་ཀྱི་ལེགས་བཤད་གཞིར་བཟུང། ས་ལུགས་ལམ་འབྲས་སོགས་ཀྱི་བཤད་པ་རྒྱ་ཆེན་པོ་དགག་སྒྲུབ་ཀྱི་ལམ་དུ་དྲངས་ནས་གནང་བས་གདུལ་བྱའི་ཡིད་ཀྱི་ཞིང་སར་ལུང་དང་རྟོགས་པའི་མྱུ་གུ་ཅི་ཡང་བསྐྲུན་པར་མཛད་དོ། །ཕྱིས་སུ་གསུང་འཕྲོས་ཤིག་གི་སྐབས་འགའ་ཞིག་གིས་རྡོ་རྗེ་འཕྲེང་བའི་དབང་འདི་སློབ་དཔོན་གང་ཡིན་གྱིས་བསྐུར་རྒྱུ་ཞིག་མིན་འདྲ་ཞུས་པར། དེ་ཅི་ལ་ཡིན། འཕྲེང་བ་ལས། རྣམ་པ་ཀུན་གྱི་མཆོག་ལྡན་པ། །ཡེ་ཤེས་སྐད་ཅིག་གིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །ཞེས་གསུངས་དོན་དེ་ཡིན་གསུངས། དེ་ནི་རྟེན་དང་བརྟེན་པའི་ང་རྒྱལ་གསལ་སྣང་ལས་གཡོ་བ་མེད་པར་དཀྱིལ་འཁོར་དུ་མ་སྤྲོ་བ་དང། བསྡུ་བའི་ཏིང་ངེ་འཛིན་ལ་སྐད་ཅིག་གིས་འཇུག་ལྡང་ནུས་པའི་གསུང་དུ་ཤེས་སོ། །ཁྱོད་ནི་བགྲང་ཡས་དཀྱིལ་འཁོར་བདག་པོའི་སྐུར་བཞེངས་སྐལ་བཟང་འདོད་པ་འཇོ་བ་ན། །དབང་གཞུའི་ལྡིང་ཁང་ལ་འགྲན་རིགས་ལྔའི་ལྷ་ཚོགས་མཁའ་དབྱིངས་ཏིལ་གྱི་གང་བུ་བཞིན། །སྤྱན་སོགས་རིག་པའི་ལྷ་མོ་རྡོ་རྗེའི་གླུ་ལེན་སྣ་ཚོགས་རོལ་མོའི་རྩེ་དགའ་ངོམ། །ཁྲོ་བོས་བགེགས་བསྐྲད་དགེ་ལེགས་མེ་ཏོག་ཆར་འབེབས་ཤིས་བརྗོད་དབྱར་རྔ་དལ་བུར་བཞད། །གསང་གསུམ་ཡེ་ཤེས་བདུད་རྩི་ལུགས་སུ་བླུག །སྒོ་གསུམ་དྲི་བཀྲུས་སྐུ་གསུམ་ས་བོན་གཏོར། །རྡོ་རྗེ་གསུམ་གྱི་ངོ་བོར་གྲུབ་པའི་སྐུ། །འགྲོ་སེམས་མེ་ལོང་ཉིད་དང་དབྱེར་མེད་ཤར། །སྤྱན་རས་གཟིགས་རྒྱལ་བ་རྒྱ་མཚོའི་དབང་དང་ལྷོ་བྲག་བཀའ་
འབུམ་གྱི་ལུང་རྗེས་གནང། དཔའ་གཅིག་གི་དབང། རྗེ་ཉིད་ཀྱི་བཀའ་རྩོམ་རགས་རིམ་གྱི་ལུང་སོགས་གནང་བཞིན་པར་བཤོལ་ཟླ་གཉིས་པའི་ཚེས་ནས་མཆོད་རྟེན་མཐོང་གྲོལ་ཆེན་མོའི་སར་ལྟོ་འཕྱེའི་ཐིག་བཏབ་སྟེ་ལས་མགོ་བརྩམས། ཤིང་བཟོ། རྡོ་བཟོ། འབག་བཟོ། མགར་བ་སོ་སོར་གསུང་བཀོད་རྒྱུན་དུ་གནང་ཞིང་དགོན་པར་བཅར་བཞུགས་མཛད། ཕྱོགས་ཀྱི་དགོན་ལག་རི་ཁྲོད་སོ་སོ་ནས་སློབ་མ་ཆོས་མཐུན་དང་སྐྱེ་བོ་དད་ལྡན་དུ་མ་རང་གི་བཟའ་བཏུང་ལ་བརྟེན་ནས་ལུས་ཀྱི་དཀའ་བ་ཁྱད་དུ་བསད་དེ་ཞག་བཞི་ལྔ་དང། ཟླ་ཕྱེད་སོགས་ལ་ལས་གྲྭར་རྡོ་ཆེན་ཁུར་ནས་ཞབས་འདེགས་ཀྱི་མཆོད་པ་འབུལ་མཁན་ལས་ཀ་མ་རྫོགས་ཀྱི་བར་དུ་བར་མ་ཆད་པ་བྱུང། དགུང་ལོ་ཞེ་གསུམ་པ་ཤིང་བྱིའི་ལོ་གསར་སོང་རྗེས། དོན་གཉེར་བ་འགའ་ཞིག་གི་ངོར་བདེ་མཆོག་ལྷ་ལྔ་དང་ལུས་དཀྱིལ་གྱི་དབང། སྐྱབས་འགྲོའི་ཁྲིད། དགའ་ལྡན་ལྷ་བརྒྱ་མའི་ཁྲིད་བཅས་གནང་ཞིང། བྲག་དཀར་དགོན་དུ་གདན་དྲངས་པ་ལྟར་བྱོན། གསུང་ཆོས་ལ་ལན་བཞི་སྨོན་ལམ་ལ་ལན་གཅིག་ཕེབས། ཚོགས་ལ་ཞོ་དར་དང་ཇ་བག་རེའི་འགྱེད་དང། འདུ་ཁང་དུ་འཕན་ལེགས་པ་ཆ་གཅིག་གནང། བཅོ་ལྔའི་ཉིན་བསྒྲུབ་བྱ་བཅུ་གསུམ་དགེ་སློང་གི་བསླབ་པ་ལ་བཀོད། སླར་ཡང་གདན་སར་བྱོན། དོན་གཉེར་ཅན་རྣམས་ལ་བཅུ་གཅིག་ཞལ། རྡོར་སེམས། ཁྱུང་ནག །ལོ་མ་གྱོན་མ་སོགས་ཀྱི་རྗེས་གནང། ཚེམ་བུ་པའི་དམར་ཁྲིད་སོགས་གནང། བྱང་ཕྱོགས་བསྟན་པའི་གསལ་བྱེད་ལྕང་ལུང་པཎྚི་ཏར་སྒྲུབ་ཐབས་བརྒྱ་རྒྱམ་གཉིས་ཀྱི་རྗེས་གནང། ཉང་ཚང་སྤྲུལ་བའི་སྐུ་དགོན་པར་ཐུགས་གཉེར་ལ་བྱོན་པ་ཁོང་དང་ཐུན་མོང་ལ་དུག་དབང་རྨ་བྱ་རྒྱས་པ་དང། དེ་སྐོར་གྱི་ལུང་བཅས་སྩལ།
བདེ་ཐང་དགའ་ལྡན་ཆོས་འཁོར་གླིང་དུ་གདན་འདྲེན་ཞུས་པ་ལྟར་གཉིས་པའི་བཅོ་ལྔ་ལ་བྱོན། སྟ་གོན་སྔོན་དུ་འགྲོ་བའི་འཇིགས་བྱེད། བདེ་མཆོག །ཀུན་རིག །བཅུ་གཅིག་ཞལ་བཅས་ཀྱི་དབང། མགོན་ཆོས་ལྷ་མོ། རྣམ་སྲས། རྟ་མགྲིན། རིགས་གསུམ་མགོན་པོ་སོགས་ཀྱི་རྗེས་གནང་སྩལ་ནས་དད་གུས་ཀྱིས་རྒྱུད་སྨིན་པར་མཛད། ཆས་པ་དང་དགེ་དགོན་དུ། གདུགས་དཀར་གྱི་དབང། སྒྲོལ་དཀར་ལྗང། ཁྱུང་ཁྲ་ནག །རྟ་མགྲིན། སྨེ་བརྩེགས། ལོ་གྱོན་མ། རྣམ་འཇོམས་སོགས་ཀྱི་རྗེས་གནང། དོན་གཉེར་བ་སུམ་བརྒྱ་ལ་བསྙེན་གནས་ཀྱི་སྡོམ་པ་སྩལ། ཆས་པ་ཀོའུ་ནང་དུ། བདེ་གསང་འཇིགས་གསུམ་གྱི་སྐུ་རབ་གནས། རིགས་གསུམ་མགོན་པོ། སེང་གདོང་མ། བེག་ཙེ། ཚེ་དཔག་གྲུབ་རྒྱལ་ལུགས་སོགས་ཀྱི་རྗེས་གནང། ཉེར་མཁོའི་ལུང་གང་འདོད་དུ་གནང་སྟེ་གསུམ་པའི་ཚེས་ལ་གདན་སར་བབས་ནས། ཆབ་ཚན་གྱི་འཕྲོད་བསྟེན་མཛད། ཀིརྟིའི་ཐ་ལར་གྲགས་པ་ཐེ་བོ་སྤྲུལ་བའི་སྐུ་ཞིང་ལ་གཤེགས་ནས་གདན་དྲངས་པར་མཆོག་ཁྲུས་བསྔོ་སྨོན་སོགས་ཀྱིས་ཐུགས་དགོངས་རྫོགས་པར་མཛད། དེ་ཀའི་ཚོགས་མང་ལ་ཐུགས་རྗེ་ཆེན་པོའི་དབང་དང། རྡོར་སེམས། ཚེ་དཔག་མེད་ཀྱི་རྗེས་གནང། ཀིརྟིའི་སྤྲུལ་བའི་སྐུ་རིན་པོ་ཆེར། ཚེ་དབང་སོགས་ཆོས་བཀའ་ཅི་རིགས་གནང། གདན་སར་བྱོན་ནས་ལྕང་ལུང་པཎྚི་ཏར་མགོན་པོ་ཞལ་རྣམ་འགྱུར་བཅུ་བདུན་གྱི་རྗེས་གནང། རྣམ་འཇོམས་ཀྱི་དབང་བཅས་སྩལ། གཞན་ཡང་བདེ་མཆོག་ནག་པོའི་དབང། འཇམ་ལུགས་ཚེ་དཔག་ལྷ་ལྔ། ཚེ་དཔག་མེད་དཀར་པོ། ཤྲ་མ་ཎ། སེང་གདོང་མ།
ལྷ་མོ། དཔལ་ལྷ། རྟ་མགྲིན་དམར་ཆུང། རིག་བྱེད་མ་གསང་སྒྲུབ་སོགས་ཀྱི་རྗེས་གནང་སོགས་གནང་བཞིན་པར་ཟླ་བ་གསུམ་པ་ནས་མཐོང་གྲོལ་ཆེན་མོའི་ཚོན་རྩི་དང། བུམ་པའི་རྩིག་པ་ཚུགས་ཏེ་དྲུག་པའི་ཚེས་དྲུག་ལ་ཆོས་འཁོར་འཛུག་ཐུབ་པ་བྱུང་བས་རྟེན་འབྲེལ་ལེགས་པར་འགྲིག །ཟླ་བ་བདུན་པའི་ཚེས་གཅིག་ནས། ༸སྐྱབས་མགོན་མཆོག་སྤྲུལ་རིན་པོ་ཆེར་བ་རི་བརྒྱ་རྩ། རྣམ་སྲས་བཀའ་བཅོ་ལྔ། དུག་དབང་རྨ་བྱ་རྒྱས་པ། འཇམ་ལུགས་ལྷ་ལྔ། ཚེ་དཔག་མེད་དཀར་པོ། ཛམ་དམར། རྡོར་སེམས་ཡབ་རྐྱང་དང་ཡུམ་བཅས། འཇིགས་བྱེད་ཞལ་ཕྱག་ཡོངས་རྫོགས། དམག་ཟོར་མ། ཁྱུང་ཁྲ། སྨན་བླ། བཀའ་གདམས་ལྷ་བཞི། སེང་གདོང་མ། ལོ་གྱོན་མ། ཤྲ་མ་ཎ། ཕྱག་རྡོར་གཏུམ་ཆུང། ཨུ་ཙརྻ། འཇམ་དཀར། དབྱངས་ཅན་མ་དཀར་དམར་གྱི་རྗེས་གནང་སོགས་ཐུགས་བཞེད་བསྐངས། སྔ་ཕྱིར་བསྒྲུབ་བྱ་སོ་ལྔ་བསྙེན་རྫོགས་དང། མཐོང་གྲོལ་ཆེན་མོའི་ལས་མཇུག་གྲུབ་པར་མཛད། སྔ་ལོ་ནས་གདན་འདྲེན་ཞུས་པ་ལྟར། བཅུ་པའི་ཚེས་ལ་ད་ཚང་དུ་གདན་བཏེག །ལམ་བར་ཆོས་འཁོར་གྱི་ཧོར་སྤྲུལ་སྐུ་འཇམ་དབྱངས་མཁས་གྲུབ་ཞི་བར་གཤེགས་པའི་སར་གདན་དྲངས། མཆོག་ཁྲུས་དང་བསྔོ་སྨོན་གང་རྒྱས་མཛད། མཛོད་དགེ། ཁེ་ཐ། ཁ་ནག །དབལ་ཤུལ། ཟངས་དཀར། རོང་རུ་སོ་སོའི་གདན་འདྲེན་ནན་ཆེ་རུང་མ་ཕེབས་པར་ཉི་ཤུ་གསུམ་ལ་ད་ཚང་དུ་འབྱོར། ཚོགས་པར་མང་ཇ་དང་ཇ་རྒྱ་མ་བདུན་རེའི་རྩིས་ཀྱི་རྟ་ཕོགས་ཞོ་དར་གྱི་འགྱེད། འདུ་ཁང་དུ་རྗེའི་གསེར་སྐུ་མི་ཚད་ཁྲི་རྒྱབ་ཡོལ་ཅན། སྤྱི་འཇོག་ལ་རྟ་ནོར་བདུན། སྐུ་ཞབས་རིན་
པོ་ཆེ་གདན་འདྲེན་གྱི་ཞལ་འདེབས་སུ་ཇ་ལན་འདུའུ་བཅུ་བཞི། ནས་རོང་ཡ་བཞི་བརྒྱ་སོགས་བཞག །ཚོགས་མང་ལ་བསྐང་གསོ་ཡོངས་རྫོགས་ཀྱི་ལུང། རྡོར་སེམས། མགོན་པོ། ལྷ་མོ། ཚེ་དཔག་མེད། རྟ་མགྲིན། སེངྒེ་སྒྲ། རྣམ་སྲས་བཅས་ཀྱི་རྗེས་གནང། ཇོ་ནང་བླ་མ་ལ་སྐྱབས་འགྲོའི་ཁྲིད། རྡོར་སེམས་ཀྱི་ཁྲིད། སྤྱི་འབུལ་ཕྱིར་སློག་ཅིང་འཕྲལ་ཕུགས་སུ་ཕན་པའི་བསླབ་བྱ་རྒྱས་པར་གནང་བས་ཀུན་ཡིད་གདུངས་ཤིང། སྔར་ནང་འཛིང་ཞིག་ཡོད་པ་རང་ཞིར་སོང་བས་བྱིན་རླབས་ལ་ཡིད་ཆེས་རྙེད། ཡང་བསྐྱར་སྐྱབས་མགོན་མཆོག་གི་གཟིམས་ཁང་དུ་ཉེར་མཁོའི་སྤྱད་པ་སྣ་ཚོགས་བཞག་པ་ཁང་གཉེར་ལ་རྩིས་སྤྲད་དེ། བཅུ་གཅིག་པའི་ཚེས་གཅིག་ལ་ད་ཚང་ནས་བཏེག །ཆིབས་བསུ་རིང་ཐུང་སེར་སྦྲེང་དང་བཅས་བཅོ་ལྔའི་ཉིན་སོ་མང་རྒྱལ་སར་བབས། རྒྱལ་མོ་བསོད་ནམས་སྒྲོལ་མ། རྒྱལ་པོ་ནང་སོ། སྲས་མོ་བསོད་ནམས་དབང་མོ། ཅོག་ཙེའི་སྲས་མོ་བསོད་ནམས་མཚོ་རྒྱལ། རྔ་རྩ་ཐེ་ཐེ། ཁུ་འཇོ་ཉ་རྒྱལ། ང་རོ་ཁ་ཁ། ཚ་ཁོ་པ་འབྲུག་རྒྱལ་བཅས་བློན་ཆེན་བཞི་ལ་སོགས་པའི་དཔོན་བློན་འཁོར་བཅས་ལ་ཚེ་དབང་གསུང་བཤད་དང་བཅས་པ་རྒྱས་པར་གནང། ལྷ་ཁང་རྟེན་དང་བརྟེན་པར་བཅས་པ་ལ་བཀྲ་ཤིས་སྙེ་མའི་སྒོ་ནས་རབ་གནས་གང་རྒྱས་སྦྱིན་སྲེག་དང་བཅས་པ་སླ་ཆོས་སུ་མ་སོང་བ་དང། སྟ་གོན་སྔོན་དུ་བཏང་སྟེ། ཀུན་རིག་གི་དབང་གསུང་བཤད་དང་བཅས་པ་ཕྱག་ལེན་ཞིབ་རྒྱས་མཛད། སྒྲོལ་མ་དཀར་ལྗང། རྟ་མགྲིན། ཐུགས་རྗེ་ཆེན་པོ་སོགས་ཀྱི་རྗེས་གནང་སྩལ་ཞིང་དཔོན་བློན་ལ་གསུང་འཕྲོས་ཀྱང་ཞིབ་པར་གནང། ཀམ་ཀྱོའུ་ཟེར་བའི་ལྷ་ཁང་ལ་གདན་དྲངས་
པར་རབ་གནས་དང། རྒྱལ་མོ་སོགས་ཉུང་ཤས་ལ། འཇམ་ལུགས་ལྷ་ལྔ། སྒྲོལ་མ་ཉེར་གཅིག །སེང་གདོང་མ་བཅས་ཀྱི་རྗེས་གནང་སྩལ། སྔ་ཕྱིར་དངུལ་སྲང་བདུན་བརྒྱ། རྟ་དྲེལ་བཅོ་ལྔ། གཅན་གཟན་གྱི་པགས་རིགས་གང་མང་སོགས་གཟབ་ནས་ཕུལ་ཞིང། ཐམས་ཅད་དད་གུས་ཀྱིས་ཡིད་བརླན་ཏེ་འདྲེན་བྱེད་ནས་ཆུ་རྒྱུན་རྩོལ་མེད་དུ་འབབ་པ་བྱུང། གོང་འོག་ཏུ་ཡོད་པའི་རྣམ་ཐར་འཕྲིན་ཡིག་དེ་རྒྱལ་མོ་འདི་ཉིད་ལ་གནང་བའི་འཕྲིན་ཡིག་གི་བར་སྐབས་སུ་ཚིགས་བཅད་གནང་བ་སྟེ། བསྟན་པའི་ལྕགས་རི་ཚ་བ་ཁ་གསུམ་གྱི། །གཙོ་བོར་གྱུར་པ་སོ་མང་རྒྱལ་ཁབ་ནས། །གསེར་བཟང་ཁྲི་ཕྲག་འཐག་རིས་ལྷ་དར་གྱི། །སྐྱེས་བཅས་མི་སྣ་ཆེད་དུ་མངགས་པའི་གདོང། །སྙན་ངག་ཀུན་གྱི་རྒྱལ་པོ་འཁྲི་ཤིང་གི །དོན་འགྲེལ་རྟོགས་བརྗོད་ལྷུག་པར་བྱས་པ་དང། །ཁོ་བོའི་གནས་ཚུལ་ཞིབ་པར་བཀོད་པ་ཡི། །རྣམ་ཐར་དགོས་ཚུལ་ཡི་གེ་ནན་ཆེར་བྱུང། །མ་ག་དྷ་བཟང་གཉིས་པ་མིའི་དབང་མོ། །མ་ཆེན་བསོད་ནམས་སྒྲོལ་མའི་དགོངས་བཞེད་བཞིན། །མ་བཅོས་རྣམ་ཐར་གཙང་མ་འགའ་མཆིས་ན། །མ་སྦས་གསོང་པོར་སྨྲ་བའི་འོས་ཡིན་ཀྱང། །རྙེད་བཀུར་ལོངས་སྤྱོད་འདུ་འཛིའི་ཞགས་པ་ཡིས། །རྣམ་པར་བཅིངས་པའི་ངང་ཚུལ་བརྗོད་པ་ལ། །རྣམ་པར་ཐར་ཅེས་དོན་མི་མཐུན་གྱི་གཏམ། །ཅོ་འདྲི་ལྟ་བུར་སྙིགས་མའི་དུས་འདིར་སྒྲོགས། །འདི་ན་དམ་པའི་མཚན་ཙམ་བཟུང་བྱས་ཏེ། །འདི་སྣང་གཡེང་བའི་བྲན་དུ་ཁོལ་བ་ལས། །འདི་ཕྱིར་བསྟན་འགྲོའི་དོན་དུ་འགྱུར་ངེས་པ། །འདི་འདྲ་བགྱིས་ཞེས་བསྙད་དུ་མེད་པས་གནོངས། །འོན་ཀྱང་སྐྱོན་ཡོན་འདྲེས་མའི་སྤྱོད་ཚུལ་རྣམས། །སྒྲོ་སྐུར་སྤངས་ཏེ་དྲང་པོར་བརྗོད་བྱས་ན། །དགག་བྱ་ཆུང་ཞིང་སྐལ་
མཉམ་འགའ་ཞིག་ལ། །ཅུང་ཟད་ཕན་ཡང་སྲིད་པས་འདི་སྐད་གསོལ། །ཞེས་གསུངས་པ་ལྟར་རོ། །ཉི་ཤུ་གཉིས་ཀྱི་སྔ་དྲོ་སོ་སོའི་སྡེ་མང་གི་ཁྲོམ་ཆེན་པོར་ཐུགས་རྗེ་ཆེན་པོ་བཅུ་གཅིག་ཞལ་གྱི་དབང་གནང། ཕྱི་དྲོ་དེ་ནས་བཏེག་སྟེ་རྣ་ལུང་ལ་རྩར་ཞག །ཁང་དམར་དགོན་དུ་མཆོད་རྫས་ཤིག་གནང་ན་དགོངས་ཡོད་པར་གདུགས་གཅིག་རང་ཤུགས་ཀྱིས་འགྲིག་ནས་གནང་བས་ཆོས་ཀྱི་རྒྱལ་སྲིད་བརྟན་པའི་རྟེན་འབྲེལ་ལེགས། ལྷ་དབང་གཟི་བྱིན་འཕྲོག་འདྲའི་རྒྱལ་པོ་དང། །ཉེ་དབང་ས་ལ་འཕོས་འདྲའི་བློན་པོའི་ཚོགས། །མགོན་མེད་ཟས་སྦྱིན་སྲས་མོ་མ་ག་དྷ། །གཉིས་པའི་ཚོགས་ཀྱིས་ཁྱོད་ཞབས་གུས་པས་མཆོད། །བསྐལ་པར་གོམས་པའི་ཐུགས་བསྐྱེད་ལྟེ་བ་རུ། །གདུལ་བྱའི་ལེགས་སྨོན་ཟླུམ་པོར་འཁྲིལ་བ་ཡི། །ལུང་རྟོགས་འོད་འབར་བཤད་སྒྲུབ་གསེར་འཁོར་ལོས། །ཆེ་དགུའི་དབུས་ན་འཁོར་སྒྱུར་ལྟ་བུར་མཛེས། །རོང་རུ་དང་དབལ་ཤུལ་མཛོད་དགེ་ནས་རབ་བྱུང་དགེ་ཚུལ་ཉེར་གཅིག་ཙམ་གནང་ཞིང། ཁ་ནག་དབལ་ཤུལ་བར་དུ་རྒྱལ་ཁག་པ་རྣམས་ཀྱིས་རྟ་འུལ་གྱི་སྟེང་ནས་ཕེབས་སྐྱེལ་ཞུས། ཤིས་ཚང་སྒར་བདེ་ཆེན་ཆོས་གླིང་དུ་གདན་དྲངས་ཏེ་དགོན་པ་ཕུལ་ཞིང། མར་རྒྱ་མ་བདུན་བརྒྱ་སོགས་དངོས་འབུལ་བཏེག་པར་འབུལ་བ་རྣམས་ཕྱིར་སློག །དགོན་པ་སྐུ་ཞབས་རིན་པོ་ཆེར་ཕུལ་ན་ལེགས་ཚུལ་གྱི་གསུང་བཀོད་གནང་བ་ལྟར། ཁོང་ཚོས་ཀྱང་བཀའ་བཞིན་ཕུལ་ཏེ། ཚོགས་ཆེན་ཁྲི་པ་གང་ཡིན་གྱིས་སྐྱོང་བའི་སྲོལ་བཙུགས། བཅུ་དྲུག་གི་ཉིན་གདན་སར་བབས་ཏེ་དོན་གཉེར་བ་འགའ་ཞིག་ལ་དཔའ་གཅིག་དང། གདུགས་དཀར་སོགས་ཀྱི་
དབང་སྩལ། དགུང་ལོ་ཞེ་བཞི་པ་ཤིང་གླང་གི་ལོ་གསར་སོགས་དཀྱུས་ལྟར་མཛད་ནས། རྒན་ཀྱའི་བྲག་དཀར་དུ་བྱོན། གསུང་ཆོས་དང་སྨོན་ལམ་ལ་ལན་རེ་ཕེབས། ཇ་བག་རེ་དང་ཁ་དར་རེའི་འགྱེད་གནང་ནས་མྱུར་བར་གདན་སར་བབས། ཚེས་བཅུ་ནས་བཟུང་སྟེ། སྐྱབས་མགོན་ཀུན་གཟིགས་མཆོག་སྤྲུལ་རིན་པོ་ཆེས་གཙོ་མཛད། ཁྲི་ཆེན་སྤྲུལ་བའི་སྐུ་འཇིགས་མེད་རིགས་པའི་སེངྒེ། སྡེ་ཁྲི་སྤྲུལ་བའི་སྐུ་འཇམ་དབྱངས་ཐུབ་བསྟན་ཉི་མ། སྒོ་མང་མཁན་ཟུར་རིན་པོ་ཆེ་བློ་བཟང་ཆོས་དར། རྒྱལ་མཁན་ཆེན་གྲགས་པ་རྒྱལ་མཚན། གཞན་བསྙེན་སོང་སུམ་ཅུས་བཀྲ་ཤིས་སྙེ་མའི་ཕྱག་ལེན་རྒྱས་པའི་ལུགས་ལྟར་མཆོད་རྟེན་མཐོང་གྲོལ་ཆེན་མོ་རབ་གནས་མཛད། དངུལ་སྲང་ཉིས་སྟོང་ཆིག་བརྒྱའི་རྩིས་ཀྱིས་ཚོགས་སུ་རབ་སྟོན་ལ་ཇ་ཐུག་གི་ཐོག་ཇ་བག་རེ་དང་བསོད་བཏགས་རེའི་འགྱེད་གནང། དབོན་ཆོས་མཛད་ཚུན་ཆད་རབ་ཡོན་གྱིས་མཉེས་པར་མཛད་པ་འདིས་མཚོན་སྐུ་ཚེ་ཧྲིལ་པོར་ནོར་རྫས་ཀྱི་རྙེད་པ་གང་བྱུང་བླ་མ་དཀོན་མཆོག་གི་ཞིང་ཁོ་ནར་གཏོང་བ་ལས། ཉེ་དུའི་འཛིན་སྐྱོང་སོགས་དོན་མེད་ཀྱི་ཕྱོགས་སུ་ཆུད་འཛའ་བ་གཏན་མི་གནང་བ་ཀུན་ལ་མཐུན་སྣང་དུ་གྲུབ་པ་སྟེ། རྣམ་ཐར་སྤྲིང་ཡིག་ལས་ཀྱང། དད་རྫས་ཉེ་དུའི་ཚོགས་སུ་མ་བསྐོར་བར། །སྐུ་གསུང་ཐུགས་ཀྱི་རྟེན་མང་བཞེངས་པ་དང། །དགོན་སྡེ་དུ་མར་བསྙེན་བཀུར་བགྱིས་པ་སོགས། །དཀོར་གྱི་བུ་ལོན་ཆུང་བའི་རྣམ་ཐར་ཡིན། །ཞེས་གསུངས་པ་ལྟར་རོ། །བཅོ་ལྔའི་ཉིན་བླ་བྲང་ཆེན་མོར་སྐུ་ཞབས་རིན་པོ་ཆེའི་མདུན་དུ་དགོན་པའི་བླ་མ་ཁྲི་གདན་ཟུར། ལས་སྣེ་ཆེ་ཆུང། དབོན་ཆོས་མཛད། ཚོགས་འདུས་རྒྱས་པ་བཅས་འཛོམས་ནས་གསོལ་སྟོན་རྒྱས་པའི་ཐོག་རྟེན་བཞེངས་གྲུབ་པའི་ལེགས་
འབུལ་མཎྜལ། མཛོད་བཏགས། དངུལ་སྲང་ལྔ་བཅུ། ན་བཟའ་ཉེར་སྤྱད་གོས་ཕྲུག་འགའ་བཅས་བཀའ་དྲིན་ཆེ་ཚུལ་དང། ཞབས་བརྟན་གསོལ་འདེབས་ཀྱི་མཚམས་སྦྱོར་ཕྲན་གྱིས་ཞུས་པས། ཡབ་སྲས་རྣམས་ཀྱི་སྐུ་ཚེ་སྔ་ཕྱིའི་འབྲེལ་དང། སེམས་ཅན་གྱི་བདེ་སྐྱིད་སངས་རྒྱས་ཀྱི་བསྟན་པ་ལ་རག་ལས་པས། ཀུན་གཟིགས་མཆོག་སྤྲུལ་རིན་པོ་ཆེས་གཙོ་མཛད། ཐམས་ཅད་ཀྱིས་བསྟན་དོན་ཁུར་དུ་བཞེས་དགོས་ཚུལ་གྱི་བཀའ་ལན་རུས་པ་ཅན་གནང། དེ་ཡང་མདོ་ལས། ས་ཕྱོགས་གང་ན་ཆོས་ཀྱི་རྣམ་གྲངས་འདི་ཀློག་གམ་སྟོན་ཏམ་ཞེས་པ་ནས། ས་ཕྱོགས་དེར་དེ་བཞིན་གཤེགས་པའི་ཕྱིར་མཆོད་རྟེན་བྱས་པའི་ས་ཕྱོགས་དེ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་རིག་པར་བྱའོ། །ཞེས་གསུངས་པ་ལྟར། ཤིན་ཏུ་བསྔགས་པར་འོས་ཀྱང་ཞིབ་པར་དཀར་ཆག་ལྷའི་རྔ་ཆེན་དུ་ཤེས་པར་བྱ་ལ། སྐབས་འདིར་སྔོན་གྱི་བྱུང་བ་ཟུར་ཙམ་འགོད་པར་བྱ་སྟེ། སྔ་སོར་སྐྱབས་མགོན་རྡོ་རྗེ་འཆང་ནས་འདུ་ཁང་ཆེན་མོའི་རྡོ་གཅལ་གྱི་མདུན་དེར་སངས་རྒྱས་སྟོང་སྐུའི་ལྷ་ཁང་ཞིག་བཞེང་དགོས་གསུངས་ཀྱང། རྗེས་སོར་དེར་ལྷ་ཁང་མཐོན་པོ་བཞེངས་ན་དགོན་པའི་གླིང་ནས་ཆབ་སྐད་ཐོས་དཀའ་བས། དགོན་པའི་མཐའ་ཞིག་ནས་བཞེངས་ན་ལེགས་ཞེས་ས་དེར། གསོ་རིག་གཞན་ཕན་གླིང་གི་གྲྭ་ཁང་བཞེངས་པ་དང། ཡང་མཆོད་རྟེན་ཆེན་པོ་ཞིག་གམ་ལྷ་ཁང་ཞིག་བཞེང་རྒྱུར་དགོས་གསུངས་ནས། ལྷོ་ཟམ་ངོས་ཀྱི་ཁང་པ་འགའ་བསྒྲིལ་ཏེ་ར་སྐོར་ཁད་ཡངས་པར་བཞག་པས། ལྷ་ཁང་ཅི་འདྲ་བཞེང་རྒྱུ་ཞུས་པར། ཐག་མི་ཆོད་ཀྱང་འོག་ཤོད་ཀ་བར་དགུ །དེའི་
སྟེང་མ་ཀ་བར་བདུན། དེའི་སྟེང་མ་ལྔ། དེའི་སྟེང་མ་གསུམ་བྱས་ཏེ་མཆོད་རྟེན་གྱི་དབྱིབས་དོད་པའི་ལྷ་ཁང་ཞིག་བཞེངས་ན་ཅི་འདྲ་ཡོང་གསུངས་པ་མཐོང་གྲོལ་ཆེན་མོ་འདིར་ཁྲིག་གིས་འགྲིག་ཅིང། ཡང་ཚོང་རའི་ཁྲོམ་གྱི་འཚོགས་ས་དེར་རྐེད་ཉག་ཡོད་པ་བཅོས་ན་ལེགས་གསུངས་པས། ད་ལྟ་ས་དེར་བསྐལ་བཟང་ལྷ་ཁང་བྱུང་བ་དང། ཚོགས་ཆེན་ཁྲི་པ་འདུ་ཁང་སྟེང་ཤོད་དུ་བཞུགས་རྒྱུ་འདི་ཤིན་ཏུ་གལ་ཆེ་ཡང། ཁྲི་པ་བླ་བྲང་གི་གཞི་ཡོངས་རྫོགས་དེར་བྱས་ན་འདུ་ཁང་ལ་གནོད་གསུངས་ནས། དམ་ཅན་གྱི་ལྷ་ཐོ་དང་ཉེ་བར་སྔོན་གྱི་རྒྱུད་ཁང་ཀ་བཞི་མའི་གྱང་རོ་ཡོད་པ་བདེ་ཁོད་སྙོམས་བཅུག་སྟེ། འདིར་ཁྲི་པ་བླ་བྲང་ཞིག་བསྐྲུན་དགོས་གསུངས་པ་ལྟར་རྗེ་འཇིགས་མེད་རིགས་པའི་སེངྒེ་ནས་དེར་དམིགས་ཏེ་ཞབས་བརྟན་ལྷ་ཁང་རྟེན་དང་བརྟེན་པར་བཅས་པ་བཞེངས་པ་དང། སྔོན་གྱི་ཇོ་ཁང་སུམ་ཐོག་བསྐྱོད་ཤུལ་དུ་ད་ལྟའི་གསེར་ཁང་ཆེན་མོ་བཞེངས་སྐབས། ཇོ་བོ་རིན་པོ་ཆེ་འདུ་ཁང་དང་སྟེང་ཤོད་ཀྱི་རྟེན་རྣམས་ངོ་མཚར་ལྷ་ཁང་དུ་གདན་དྲངས། བེ་སི་བ་ཐུར་དཱའི་ཆིང་གིས་བཞེངས་པའི་བྱམས་ཆེན་དང། མངར་རིས་པ་དར་ཧན་ཆོས་རྗེས་བཞེངས་པའི་སེངྒེའི་ང་རོ་ཐོག་ཚད་མ་གཉིས་ཀ་ཨར་ཆོག་བྱས་པས། རྗེ་འཇིགས་མེད་ནམ་མཁའ་སྐུ་ན་ཕྲ་ཡང་བྱམས་པ་དང་སེངྒེའི་ང་རོ་གཉིས་ཀ་བཞེང་རྒྱུ་ཨེ་ཡིན་ཞུས་པས། བཀའ་ལས་བྱམས་པ་མ་གཏོགས་མི་ཐུབ། སེངྒེའི་ང་རོ་སླར་ཁྱེད་ཀྱི་སེམས་ལ་འཛིན་དགོས་གསུངས་པར། དེ་དུས་ཁོང་ཆ་རྐྱེན་བཀྲེན་ཞིང་གཟིམས་སྤྱིལ་དང་ཐབ་གཞི་ཡང་མ་ཟིན་པར་ཡོད་པས་གསུང་དེ་ཅི་འདྲ་རང་སྙམ་ཡང་ཕྱིས་དོན་ཐོག་ཏུ་སྨིན་པ་སོགས་ལ་བསམ་ན་ཀུན་མཁྱེན་གོང་མས། ངའི་རྗེས་སུ་སངས་རྒྱས་བྱང་སེམས་དུ་མ་བསམ་
བཞིན་སྐྱེ་བ་བཞེས་ནས་བསྐྱངས་ཡོང་གསུངས་པ་བསླུ་མེད་རྡོ་རྗེའི་ཚིག་ཏུ་ངེས་པ་རྙེད་པར་མ་ཟད། ངེས་པ་དོན་གྱི་སྐྱེས་མཆོག་མཛོད་དགེའི་རི་ཁྲོད་པ་མཁས་གྲུབ་བསྟན་འཛིན་པའི་མནལ་ལམ་དུ་དཀྱིལ་འཁོར་མཚན་ཉིད་ཡོངས་སུ་རྫོགས་པ་ཞིག་གི་གཙོ་བོའི་གོ་སར་སྐྱབས་མགོན་རྡོ་རྗེ་འཆང་དང། འཁོར་གྱི་གོ་སར་རལ་གྲི་རེ་ཡོད་པར་རྨིས་པ་ནི་ཡབ་སྲས་ཐམས་ཅད་འཇམ་པའི་དབྱངས་དང་ཐ་མི་དད་པའི་བརྡ་དང། དེ་དང་མཐུན་པར་སྲས་མཆོག་སོ་སོའི་གསུང་སྒྲོས་ངོ་མཚར་བ་དུ་མ་ཡོད་ཀྱང་བཏང་སྙོམས་སུ་བཞག་གོ །ད་ནི་དཀྱུས་ལ་འཇུག་པར་བྱ་སྟེ། དེ་ལྟར་རྗེ་བླ་མ་ཐུགས་རྗེའི་གཏེར་ཆེན་འདི་ཉིད་འགྲོ་འཆག་ཉལ་འདུག་ཚུན་ཆད་དུ་ཏིང་ངེ་འཛིན་ལས་གཡོ་བ་མེད་པ་ནི་དགྲ་བཅོམ་པ་འགོག་པ་ལ་སྙོམས་པར་ཞུགས་པའི་དཔེ་ཟླར་འོས་པ། ལུང་ཆོས་བརྒྱུད་པའི་མན་ངག་འཆད་པ་དང་སྤེལ་བས་གདུལ་བྱ་འདུལ་བ་ནི་བསྟན་པའི་གཏད་རབས་མདོ་སྡེ་འཆད་ཅིང་ཐུབ་བསྟན་སྐྱོང་བའི་ཚུལ་ལ་འགྲན་པ། དགེ་འདུན་གྱི་སྡེ་ཉམས་པ་གསོ་ཞིང་གསར་པ་སྤེལ་ཏེ་བསྟན་པའི་གནས་གཞི་འདིང་བ་ནི་ལྷ་བླ་མ་ཁུ་དབོན་དང་ཇོ་འབྲོམ་སྐུ་མཆེད་སོགས་ཀྱི་རྗེས་སུ་འགྲོ་བ། དད་པས་ཕུལ་བའི་དངོས་པོ་ཆུད་མི་འཛའ་བར་མཆོད་པའི་ཞིང་ཁྱད་པར་ཅན་ལ་བསྙེན་བཀུར་བས་ནི་ཀུན་ཏུ་བཟང་པོའི་མཆོད་སྤྲིན་གྱི་རྗེས་སུ་རྐང་པ་འཇོག་པ། མདོར་ན་སྔོན་བྱོན་དམ་པ་ཡོངས་ཀྱི་རྣམ་ཐར་རིན་ཆེན་རྡུལ་མང་བསྟན་འགྲོའི་ཉེར་འཚོའི་དཔལ་དུ་སྤོ་མཐོར་བརྩེགས་པའི་ཡོན་ཏན་ས་འཛིན་དབང་པོ་ཟླ་མེད་པར་གྱུར་ཏོ། །སྨྲས་པ། གང་གི་ལེགས་མཛད་པུཎྜ་རི་ཀའི་ཚལ། །བཞད་པས་ཕྱོགས་ཀྱི་འཁོར་ལོ་
མཛེས་པ་ནི། །ལུམྦིའི་ཚལ་དུ་དོན་ཀུན་གྲུབ་པའི་ཚེས། །ངོམ་ཚེ་ནོར་འཛིན་ཤིས་པས་ཁྱབ་པ་བཞིན། །ལུང་རྟོགས་ནོར་བུས་གཏམས་པའི་ཐུགས་ཀྱི་མཚོར། །མཁྱེན་བརྩེ་ཀློང་འཁོར་ཟབ་ཡངས་འཁྱིལ་བའི་བཅུད། །ཡིད་འོང་ལེགས་པར་བཤད་པའི་བདུད་རྩིའི་རྒྱུན། །དཔལ་གྱི་མགུར་ནས་ཆད་མེད་དལ་གྱིས་བབས། །གང་གཱའི་བྱེ་སྙེད་ཏིང་འཛིན་ཆོས་ཀྱི་སྒོ། །ཕྱེ་བས་ངེས་ལེགས་རིན་ཆེན་ཁང་བཟང་རྩེར། །བདེ་བར་ངལ་གསོ་མངོན་མཐོའི་ཐེམ་སྐས་ལ། །བཤད་སྒྲུབ་གོམ་པ་འདོར་རྣམས་ཨེ་མ་མཚར། །ཁ་བད་དཀར་པོ་གྲུ་བཞིར་རྣམ་བཀྲ་བང་རིམ་དག་གིས་རིན་ཆེན་རི་ཡི་དབང་པོར་འགྲན། །གསེར་བཟང་འོད་འབར་གདུགས་དང་ཟར་ཚགས་ཉི་ཟླའི་དཔལ་གྱིས་རྣམ་རྒྱལ་ཁང་བཟང་མཛེས་པ་འཕྲོག །ཀུན་གསལ་མཛེས་མའི་རྣ་ཆ་ཟིལ་གནོན་ཨེ་ཝཾ་གཟུགས་ཀྱིས་ལམ་འབྲས་རྫོགས་པའི་ཤིས་པ་སྟེར། །གང་བློ་རིན་ཆེན་རི་བོའི་དཔལ་ངོམ་གང་དེ་ནོར་འཛིན་ཁྱོན་འདིར་ལྷུན་པོ་གཉིས་པ་བཞིན། །དབང་གཞུའི་རི་མོ་ཅིར་ཡང་རྣམ་བཀྲ་ཀུན་གསལ་མཛེས་མའི་ཁྱོན་ཡངས་པོར། །རྒྱུ་སྐར་བྱེ་བའི་དཔལ་གྱིས་མིག་ལ་ཡ་མཚན་སྐལ་བཟང་བྱིན་པ་ལྟར། །སྣ་ཚོགས་ཚོན་གྱིས་མཛེས་པའི་ཁང་བཟང་ངོ་མཚར་རྟེན་གྱིས་གཏམས་པའི་དཔལ། །གང་གི་དྲི་བཞོན་རེག་པས་ཐར་པ་འདོད་རྣམས་སྙིང་ལ་བསིལ་བ་སྟེར། །མེ་ཏོག་ཕྲེང་བ་ཚར་དུ་དངར་བས་རྐང་དྲུག་ཚོགས་རྣམས་དར་དིར་དབྱངས་སྒྲོག་ལྗོན་ཤིང་གསར་པའི་ནགས་ཚལ་བཞིན། །ལི་ཁྲིའི་མདངས་འཛིན་བསླབ་གསུམ་ལྡན་པའི་དགེ་འདུན་སྡེ་རྣམས་བཤད་སྒྲུབ་ཁུར་གྱིས་རྒྱ་མཚོའི་གོས་ཅན་འདར་བ་སྟེར། །བྱིན་རླབས་སྦྲང་རྩིའི་
ཐིག་ལེས་རྣམ་ཁེངས་ཞབས་སྐྱེས་པངྨོས་རེག་པ་ཡིས་ཀྱང་ལྗོངས་འདིར་འཁོར་བའི་སྐལ་བཟང་རྣམས། །ཀུན་ཏུ་རྨོངས་པའི་འཁྲུལ་འཁོར་ཉེར་འཇིག་ལེགས་བྱས་ཆུ་འཛིན་དཀར་པོའི་འཕྲེང་བས་དགེ་ལེགས་བྱེ་བའི་དཔལ་བཟང་ངོམ། །དེ་ལྟར་ངོ་མཚར་བདུད་རྩི་ཡིས། །སྙིང་ལ་ཡང་དག་བྲན་པ་དག །འཁོར་བ་ཆུ་སྲིན་འབྱུང་གནས་ལས། །ཐར་པའི་དབྱིངས་སུ་འཕུར་བར་རྩོམ། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་འཁོར་ལོ་གསུམ་གྱི་མཛད་བཟང་ཟུང་འབྲེལ་དུ་ངོམ་པའི་སརྒ་སྟེ་དགུ་པའོ།། །།༈ མགྲིན་པའི་འཁོར་ལོ་ལེགས་བཤད་འདབ་སྟོང་དུ། །རྣམ་གྲོལ་སྐུ་གཉིས་དབྱེར་མེད་ཆོས་ཀྱི་དུང། །ཆུ་ལ་རླན་བཞིན་འབྲལ་མེད་སྙིང་དབུས་སུ། །རྟག་བཞུགས་ཐོས་བསམ་སྒོམ་པ་མྱུར་འགྲུབ་སྩོལ། །དུས་འཁོར་སློབ་ཟུར་དོན་ཡོད་ཚུལ་ཁྲིམས་དགུང་ལོ་བརྒྱད་ཅུ་ཡོལ་ནས་ཞིང་ལ་གཤེགས་ཁར། དམ་སྡོམ་གསོ་བའི་ཆེད་དུ་དཔའ་གཅིག་གི་དབང་ཞུས་པར་འཕྲལ་དུ་སྩལ་ཞིང་དགྱེས་པའི་བསྔགས་བརྗོད་ཀྱང་གནང། དགེ་ཚུལ་སློང་སུམ་ཅུ་ཙམ་གྱི་རེ་བ་བསྐངས་ཤིང། སྐྱབས་འགྲོའི་ཁྲིད། དགའ་ལྡན་ལྷ་བརྒྱ་མའི་ཁྲིད། ཡོན་ཏན་གཞིར་གྱུར་མའི་ཁྲིད། སྒྲོལ་མ་དང་འཇམ་དབྱངས་ཀྱི་རྗེས་གནང་སོགས་སོ་སོའི་འདོད་པ་བཞིན་སྩལ། ཟོག་ཧྲུག་གི་ལུག་བཙོང་བ་དང་བཤའ་བ་སོགས་བྱས་ན་སྡིག་སྤྱོད་ཆེ་བས་བལ་ཙམ་གྱིས་ཆོག་ཤེས་བྱེད་དགོས་གསུངས་ནས་ཁྱུང་རྩེའི་མདོར་ལྷ་སྡེ་རྣམས་འཛོམ་ཐོག་ནས་ཟོག་ཧྲུག་གི་ལུག་གང་ཡོད་ཚེ་ཐར་ལ་བཏང། བསང་དང་ཤིས་བརྗོད་
གནང་བས་ལྷ་འབངས་རྣམས་དར་བར་གྱུར། དེ་ནས་སྔོན་བ་སོ་ཆོས་ཀྱི་རྒྱལ་མཚན་དགའ་ལྡན་གྱི་ཁྲི་མཐར་ཕྱིན་ནས་ཀུན་སྤངས་མཛད་པ་སོགས་སྔོན་བྱོན་དམ་པའི་རྣམ་ཐར་དང། རྗེས་འཇུག་གི་དམིགས་རྐྱེན་ལ་དགོངས་པ་དང། སྙན་གྲགས་ལོངས་སྤྱོད་འཁོར་གྱི་འདུ་ལོང་སོགས་འཇིག་རྟེན་ཆོས་བརྒྱད་ཀྱི་ཉེས་དམིགས་འདོམས་པའི་ཆེད་དུ་གྲོང་ཆོག་འདི་སྐམ་ལུག་གི་སྲོག་གཅོད་དང། སྲེད་པ་འཕེལ་བ་སོགས་ཉེས་དམིགས་ཀྱི་འབྱུང་ཁུངས་ཡིན་གསུངས་ནས། ཕྱིན་ཆད་གྲོང་ཆོག་ཏུ་མི་ཕེབས་པར་ཐག་བཅད། ཀུན་གྱིས་དེ་འདྲ་མི་གནང་བ་དགོས་ཚུལ་ཞུས་ཀྱང་མ་གསན་པར་བཅད་རྒྱ་མཛད་ནས་དྲུག་པའི་ཡར་ངོའི་བར་དུ་གདན་ས་རང་ན་བཞུགས། བཅད་རྒྱའི་སེང་བར་དུ་སྔ་ཕྱིར་བསྒྲུབ་བྱ་ང་གཉིས་བསྙེན་རྫོགས་དང་སུམ་ཅུ་དགེ་ཚུལ་དུ་བསྒྲུབས། བླ་མ་མཆོད་པའི་ཁྲིད་ཉིན་བདུན་དང། དཔའ་གཅིག་གི་དབང་སོགས་ཀྱིས་དོན་གཉེར་བ་འགའ་ཞིག་གི་རེ་བ་བསྐངས། ཐུགས་ཟིན་གྱི་ཉེ་གནས་གཉེར་པ་བློ་བཟང་དར་རྒྱས་ལྔ་པའི་ནང་དུ་བྲོ་འཚལ་བར་གཤེགས་ཁ་སེམས་གསོ་དང་རྗེས་འཛིན་གྱི་ཞལ་བཞེས། འཕེལ་གདུང་དང་བྱིན་རྟེན་གནང་ཐོག་བསྔོ་སྨོན་གྱི་མཚམས་སྦྱོར་གནང། གཉེར་པ་ཆོས་གོས་གྱོན། སྤྱི་བླུགས་བཟུང་ནས་འགྲོ་བ་རྨིས་པས་སྐྱེ་བ་དགའ་སེ་ཞིག་ལེན་པ་འདྲ་གསུངས། དགེ་སྒྲུབ་ཡོངས་གྲགས་དཔངས་མཐོ་བའི་སྟེང་དུ་ལྷ་ཁང་སོ་སོར་སྟོང་མཆོད་དང་བཅས་ཡིག་དྲུག་བྱེ་ཆེན་བཞི་སོགས་གཟུངས་སྔགས་དུ་མ་སྒྲུབ་པར་མཛད། སྔར་ཚོགས་ཆེན་ཁྲིར་བཞུགས་སྐབས་ད་ལྟ་ངག་འདོན་ཆེར་མི་ཐུབ་ཅེས་རི་ཁྲོད་གོང་འོག་དང། དེའི་སྟེང་བཟླས་བརྗོད་མཁན་བརྒྱ་ཕྲག་ལ་དོང་ཙེ་ཁྲོན་གསུམ་རེ་ཕུལ་ནས་མ་ཎི་བྱེ་བ་རེ་བཅོལ་ཏེ་དུང་ཕྱུར་
བསྒྲུབ་པ་ལྟར་འདི་ཡང་ཞིང་གཤེགས་དེ་ཉིད་ཀྱི་ཁ་ཏོན་བྱེད་རྒྱུའི་དོད་ཡིན་གསུངས་ཀྱང་དེ་ཙམ་ག་ལ་ཡིན། སྐབས་འདི་དག་ཏུ་གུང་ཚིགས་ཐོན་རྗེས་མཆོད་རྟེན་མཐོང་གྲོལ་ཆེན་མོའི་ནང་དུ་ཞབས་བསྐོར་མཛད་ཅིང། དེར་སྐྱབས་ཞུར་འོང་བ་རྣམས་གཟུངས་སྔགས་བཟླ་བ་དང། སྨོན་ལམ་སོགས་འདེབས་བཞིན་ཞབས་བསྐོར་ལ་འཁྲིད་པ་དུས་རྒྱུན་གནང། དེ་ནི་ཀུན་མཁྱེན་གོང་མས་ཐང་སྟོང་ཞིག་ལ་རྟེན་མེད་ཀྱི་བསྐོར་བ་མཛད་པ་མཐོང་ནས། ཅི་མཛད་པ་ལགས་ཞུས་པས་དགོན་པ་འདི་ནས་ཤི་ཚད་ངན་འགྲོར་མི་སྐྱེ་བའི་སྨོན་ལམ་བཏབ་པ་ཡིན་གསུངས་པ་ལྟར། འབྲེལ་ཚད་ཐར་པར་འདྲེན་པའི་ཐབས་མཁས་སུ་གོར་མ་ཆག །རི་ཁྲོད་ཡིད་དགའ་ཆོས་འཛིན་དུ་དབྱར་ཞལ་བཞེས་མཛད། དེ་ནས་བཟུང་སྟེ་ཐུགས་བྲེལ་ཆེ་བའི་སྐབས་དགོན་པར་ཕེབས་ནས་ཐུགས་བྲེལ་མ་སངས་བར་དུ་བཞུགས་པ་མ་གཏོགས་ཕལ་ཆེར་དབེན་གནས་དེ་ཉིད་དུ་བཞུགས་པ་ཡིན་ཏེ། དེ་ཡང་རང་ཅག་རྣམས་སྐྱེས་ཙམ་ནས་ལས་ཉོན་གྱི་ཞགས་པས་རང་དབང་མེད་པར་བཅིངས་ནས་ཉེར་ལེན་གྱི་ཕུང་པོའི་ངོ་བོར་གནས་ཤིང། སྡུག་བསྔལ་ལ་བདེ་བ་དང། མི་རྟག་པ་ལ་རྟག་པར་འཛིན་པ་སོགས་ཀྱིས་བསྒྲིབས་ནས་གཅེས་འཛིན་དང་བདག་འཛིན་ལ་དགྲར་མ་བལྟས་པས། རྣམ་པར་ཤེས་པ་ནི་ཤིང་བལ་རླུང་གིས་བདས་པ་བཞིན་དུ་སྲིད་པའི་འཕྲང་རིང་པོར་ངེས་མེད་དུ་འཁྱམས་ནས་རྟག་ཏུ་སྡུག་བསྔལ་གྱིས་མནར་བས་ངལ་ཞིང་དུབ་ན་ཡང་ད་དུང་མི་གཙང་བའི་དྲི་ལ་སྦྲང་བུ་འཁོར་བ་བཞིན་དུ་ཐར་པའི་ལམ་ལས་ཕྱིར་ཕྱོགས་པ་ནི་
འདོད་པའི་འདམ་དུ་བྱིང་བས་ཐར་པའི་ལམ་ལས་གོལ་ཚུལ་ཕྱོགས་གཅིག་ཙམ་ཡིན་ལ། དེ་ལྟ་བུའི་ཚུལ་གྱིས་བློ་ནང་དུ་ཕྱོགས་ནས་བསམ་ན་སྐྱོ་བ་ཡང་སྒོ་སྣ་ཚོགས་ནས་སྐྱེ་བ་སྲིད་ཀྱང་ཚུལ་དེ་མ་བསམ་པའི་དབང་གིས་ཚེ་འདིའི་ཆོས་བརྒྱད་ཀྱི་སྒྲོག་གིས་བཅིངས་ཏེ། སྲིད་པའི་བཙོན་ར་ལས་ཐར་འདོད་ཙམ་ཡང་མ་སྐྱེས་ན་ཐར་ལམ་འཚོལ་བ་ལྟ་ཅི་སྨོས། དེ་ཡང་ཉོན་མོངས་པས་བསྡུས་པའི་བློ་ཕྱིན་ཅི་ལོག་གི་གཉེན་པོ་བསྟེན་ཏེ། སེམས་ལས་ཉོན་གྱི་དབང་དུ་སོང་བ་དེ་ལས་ཁ་ཕྱིར་བསླན་ཏེ་ཡང་དག་པའི་བསམ་པའི་ངང་དུ་གནས་པ་དང་དུལ་བར་བྱེད་པ་ནི་ཐར་ལམ་སྒྲུབ་ཚུལ་ཡིན་ལ། སེམས་ཉོན་མོངས་པ་ལས་གྲོལ་བ་ནི་ཐར་པ་ཐོབ་ཚུལ་ཡིན་གྱི། རྒྱ་གར་ནག་ཏུ་འགྲོ་བ་དང། དགྲ་ཇག་གི་ས་ལས་ཐར་པ་ལྟ་བུའི་ཕྱི་ཚུལ་ཙམ་གྱིས་ག་ལ་ཡིན། སེམས་རྒྱུད་འདུལ་བའི་ཚུལ་ཡང་བླ་མའི་མན་ངག་ལས་ཐོས་པ་སྔོན་དུ་འགྲོ་བའི་དྲན་པ་དང་ཤེས་བཞིན་གྱི་སྒོ་ནས། ཏིང་ངེ་འཛིན་དང། ཤེས་རབ་ཀྱི་སྒྲུབ་ཚུལ་ལ་རག་ལས་ཤིང། དེ་ཡང་ལུས་འདུ་འཛི་དང། སེམས་རྣམ་རྟོག་ལས་ཐག་བསྲིང་བའི་ཆེད་དུ་དབེན་པ་བསྟེན་དགོས་པ་དང་བསྟེན་ན་དོན་ཆེ་བ་ཡིན་ཏེ། ཏིང་ངེ་འཛིན་རྒྱལ་པོ་ལས། རྟག་ཏུ་རི་ཁྲོད་དབེན་པ་བསྟེན་པར་གྱིས། །གྲོང་དང་གྲོང་ཁྱེར་དག་ལ་དགའ་བ་སྤངས། །བསེ་རུ་ལྟ་བུར་གཉིས་སུ་མེད་པར་གྱིས། །ཞེས་དང། གང་ཞིག་འདུས་བྱས་ཆོས་ལ་ཡིད་སྐྱོ་ནས། །བླ་མེད་བྱང་ཆུབ་ཏུ་ནི་འདོད་མོས་ཤིང། །དབེན་པར་བལྟས་ཏེ་གོམ་པ་བདུན་བོར་ན། །དེ་བས་བསོད་ནམས་འདི་ནི་ཁྱད་པར་འཕགས། །ཞེས་གསུངས་སོ། །དོན་དེ་ཉིད་ཕྱི་རབས་ཀྱི་གདུལ་བྱའི་མིག་ཡུལ་དུ་འདོམས་པར་བྱ་བའི་ཕྱིར་ཉིན་མོ་དང་མཚན་མོའི་ཐུན་གྱི་མཚམས་
སུ་ཉི་ཟླའི་སྟོད་གཡོགས་བགོ་བ་ལ་རིངས་པར་ཞུགས་པ་བཞིན་དུ་རྩེ་མོ་ནམ་མཁའི་དབྱིངས་སུ་བསྙེགས་པའི་ས་འཛིན་གྱི་འཕྲེང་བས་སྣ་ཚོགས་འདུ་འཛིའི་རི་མོ་ནི་མངོན་པར་བསྒྲིབས། མར་གད་ཀྱི་ཁུ་བས་བྱུགས་པའི་འཛིན་མར་མེ་ཏོག་རྒྱས་པའི་ཚལ་དུ་བུང་བའི་མགྲིན་རྔ་ནི་བརྡུང། ནུ་ཞོས་མྱོས་པའི་རི་སྐྱེས་གཞོན་ནུ་རྩེད་འཇོའི་གར་ལ་རྩེན་པ་ནི་གཉིས་སྐྱེས་གཞོན་ནུ་མཁའ་ལ་ལྡིང་བའི་སྒྱུ་རྩལ་ལ་འགྲན་པ་ལྟར་ཡིད་ཀྱི་ཁྱེའུ་ཆོས་ལ་བསྐུལ་བའི་དབེན་གནས་དམ་པ་དེ་ཉིད་དུ། སྲིད་པའི་རོ་ལ་ཆགས་པའི་རྡུལ་དང་བྲལ་བའི་མཁྱེན་པའི་མེ་ལོང་ནི་གསལ། གསུང་རབ་གདམས་པར་ཤར་བའི་ཏིང་འཛིན་དགུ་ཚིགས་ཀྱིས་སྲས་བཅས་རྒྱལ་བའི་མངོན་རྟོགས་ལྷ་ལམ་ནི་འཁྱུད། ལུང་དང་རྟོགས་པའི་ཡོན་ཏན་དཔལ་གྱིས་སྙིང་གི་ཆུ་གཏེར་དགའ་བདེའི་རླབས་ཀྱིས་ཀུནྡའི་ཚལ་ལ་ཟླ་ཟེར་བྱུགས་པ་བཞིན་དུ་དྲང་སྲོང་བྱེ་བའི་རྒྱུ་སྐར་གྱི་དབུས་ན་ཡོན་ཏན་ཉ་གང་བའི་ཚུལ་དུ་འཚོ་ཞིང་གཞེས་པར་མཛད་དོ། །ནོར་འཛིན་བཞིན་རས་ནེ་ཙོའི་སྒྲོ་ཐུལ་གྱོན། །གསེར་རིའི་ཁེངས་འཕྲོག་ཡིད་འོང་ས་འཛིན་འཕྲེང། །མེ་ཏོག་སྣ་ཚོགས་འཇའ་ཚོན་འོག་པག་འཛིན། །གསེར་གྱི་ཆུ་སྐྱེས་སོ་འཕྲེང་གེ་སར་འཛུམ། །པངྨོའི་གཉེན་དང་ཆུ་ཤེལ་དབང་པོ་ཡིས། །མུན་པའི་གོ་སྐབས་འཕྲོག་པའི་རོལ་རྩེད་ངོམས། །ཡིད་འོང་ངོ་མཚར་བཀོད་པའི་རི་མོ་ཡིས། །འོག་མིན་ཞིང་ཡང་སྐྱེངས་བྱེད་དབེན་གནས་དེར། །ནམ་མཁའི་ཁྱོན་བཞིན་མཁྱེན་པའི་དཀྱིལ་འཁོར་རྒྱས། །ཉི་ཟླ་བཞིན་དུ་ལུང་རྟོགས་གཟི་བརྗིད་འབར། །ས་ཆེན་ཇི་བཞིན་སྐྱེ་རྒུའི་རྟེན་གྱུར་ཁྱོད། །མི་གཡོ་ལྷུན་པོའི་དཔལ་བཞིན་བཞུགས་པ་ན། །བྱང་ཆུབ་སྙིང་
པོ་བཛྲ་ཨ་ས་ནར། །སྟོབས་བཅུའི་དཔལ་མངའ་རྣམ་འདྲེན་མུ་ནཱིནྟྲ། །མངོན་པར་འཁོད་པ་བཞིན་དུ་བདུད་ཀྱི་སྡེ། །འདར་བའི་སྒྲ་བརྒྱས་གདུལ་བྱ་གཙུག་ཅན་ཚིམ། །གདུལ་བྱ་སྨིན་བྱེད་ཐུབ་བསྟན་བཤད་སྒྲུབ་ཉིད་ཡིན་ངན་གཡོ་སྤྲེའུའི་ཟློས་གར་དེ་མ་ཡིན། །ཉམས་རྟོགས་གོ་འཕང་ལུང་རྟོགས་ཡོན་ཏན་ཉིད་ཡིན་ཆོས་བརྒྱད་སྤྲོས་པའི་ཡོ་ལང་དེ་མ་ཡིན། །སྙིང་རྗེའི་རང་མདངས་བདག་པས་གཞན་གཅེས་ཉིད་ཡིན་བསླུ་བྲིད་བྱི་ལའི་སྤྱོད་ཚུལ་དེ་མ་ཡིན། །དམ་པའི་རྣམ་ཐར་ཆོས་དང་མཐུན་པ་ཉིད་ཡིན་བླུན་པོ་མགོ་སྐོར་ཟང་ཟིང་དེ་མ་ཡིན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ནས་ཟླ་བ་བཅུ་པ་བར་དུ་བཅད་རྒྱ་མཛད་པའི་སེང་བར་ནས། སྟོང་འཁོར་གྱི་སོག་པོ་ཞབས་དྲུང་པཎྚི་ཏ་ལ་བདེ་མཆོག་ལྷ་ལྔའི་དབང། དྲག་པོ་སུམ་སྦྲེལ་གྱི་རྗེས་གནང། རྟ་མགྲིན་དང། ཆོས་རྒྱལ་གསུམ། འགའ་ཞིག་ལ་རིགས་གསུམ་མགོན་པོ་དང། རྣམ་འཇོམས་ཀྱི་རྗེས་གནང་སོགས་སྩལ། བཅུ་པའི་ཚེས་གཅིག་ནས་གདན་སར་བྱོན་ནས་བསྟན་པ་སྤྱིའི་རིམ་གྲོར་མགོན་པོ་ཞི་བའི་གཏོར་སྒྲུབ་བདུན་ཕྲག་གཅིག་བསྒྲུབ་པའི་ཚོགས་དབུར་བཞུགས། ཀུན་གཟིགས་མཆོག་སྤྲུལ་རིན་པོ་ཆེར་དཔའ་གཅིག །གདུགས་དཀར། བཅུ་གཅིག་ཞལ་བཅས་ཀྱི་དབང་ཕུལ་བ་དང། བསྒྲུབ་བྱ་བཅུ་དགུ་དགེ་ཚུལ་དང་ལྔ་དྲུག་ཙམ་བསྙེན་རྫོགས་སུ་བསྒྲུབས་པ་མ་གཏོགས་ལོ་གསར་བར་དུ་བཅད་རྒྱ་མཛད། དགུང་ལོ་ཞེ་ལྔ་པ་མེ་སྟག་ལོ་གསར་སོགས་དཀྱུས་དང་འདྲ། སྔར་བཀོད་པ་ལྟར་དགུང་ལོ་དྲུག་ཅུ་རེ་གཉིས་བར་དུ་དགོན་པ་དང་རི་ཁྲོད་ཡིད་དགའ་ཆོས་འཛིན་གཉིས་རེས་མོས་སུ་བཅད་རྒྱའི་ཚུལ་དུ་བཞུགས་པས།
འདི་མན་ཆད་དུ་ཡི་གེར་འཁོད་མ་འཁོད་གང་ལྟར་ཡང་བཀའ་ཆོས་སོགས་ཀྱི་ཐུགས་བྲེལ་ཟུར་བ་མེད་པའི་བར་སྐབས་ཀྱི་རིགས་ལ་སྤོང་བ་བསམ་གཏན་ལས་གཡོ་མེད་དུ་བཞུགས་པ་ཤེས་པར་བྱ། ཟླ་བ་དང་པོའི་ནང་དུ་འཇིགས་བྱེད་དཔའ་གཅིག་གི་དབང་སྟ་གོན་དང་བཅས་པ། དགའ་ལྡན་ལྷ་བརྒྱ་མའི་ཁྲིད། ཉེར་མཁོའི་ལུང་མང་པོ་གནང། བཅད་རྒྱའི་སྐབས་སུ་ཐུན་བར་ལ་བཀའ་རྩོམ་གནང་བ་ཡིན་ཀྱང། དེ་རིགས་ཐད་ཀར་བྲིས་ན་མང་འགྲོ་བས་དཀར་ཆག་ཟུར་དུ་ཡོད་པ་ལས་ཤེས་པར་བྱ། བཞི་པའི་ཚེས་གཉིས་ཀྱི་ཉིན་གློ་བུར་དུ་མཆོད་གཏོར་དང་བཅས་གནས་ཆུང་ཆོས་ཀྱི་རྒྱལ་པོ་ལ་ལྷ་ཚེས་རྒྱས་པ་མཛད། དོན་གཉེར་པ་རྣམས་ལ་ཐེག་ཆེན་གསོ་སྦྱོང་དང་འབྲེལ་བར་བཅུ་གཅིག་ཞལ་གྱི་དབང་གནང་བ་དང་སྦྲགས་སྨྱུང་གནས་ཀྱི་ཕན་ཡོན་རྒྱས་པར་གསུངས་པས་ཀུན་ཆོས་ལ་འདུན་པ་ལྷག་པར་འཕེལ། ལོ་སྔ་མར་ཨམ་བྷན་ཡཱུས་ཏཱ་ཞིན་ས་སྐོར་ལ་ཡོང་དུས་སྐུ་མདུན་དུ་མཇལ་ནས་ཆོས་འབྲེལ་ཞུས། སླར་ཟི་ལིང་དུ་སླེབས་པ་དང་གོང་ནས་བཀའ་འདྲི་གནང་བ་དུས་འཛོམས་པས། འདི་ཕྱོགས་ཀྱི་འཇམ་དབྱངས་ཧུ་ཐོག་ཐུའི་དགོན་པར་གོང་མའི་ཞབས་བརྟན་དུ་མཆོད་རྟེན་ངོ་མཚར་ཅན་འདི་འདྲ་གསར་བཞེངས་གྲུབ་འདུག་ཅེས་གྲེའུ་ཙེ་ཕུལ་བར་བརྟེན། གོང་མ་ཀྱཱ་ཁྱིན་རྒྱལ་པོ་ནས་ཕྱག་བྲིས་ལ་བཀོད་པའི་གསེར་གྱི་ཙི་པེན་འབྱོར་བའི་དོན་འགྱུར་བོད་སྐད་ལ། དཀོན་མཆོག་ཐུགས་རྗེའི་འོད་ཀྱིས་འཛམ་གླིང་ཀུན་ཁྱབ་ཅེས་ཡོད་འདུག་ལ་སྔར་གྱི་ལྷ་ཚེས་དེ་ཡང་དོན་འདི་གཟིགས་པར་སྣང། ཀུན་གཟིགས་མཆོག་སྤྲུལ་རིན་
པོ་ཆེར་ཟབ་ཁྲིད་འགའ་ཞིག་དང། གཞན་ཡང་དོན་གཉེར་པ་རྣམས་ལ་ཆོས་བཀའ་མང་དུ་གནང། ལྔ་པའི་ནང་དུ་རྒན་ཀྱའི་བྲག་དཀར་ལ་ཕེབས། ཞག་བཅུ་ཙམ་བཅད་རྒྱ་དང་གནས་ཁང་དུ་ཚོགས་འཁོར་རྒྱས་པ་མཛད། བདེ་མཆོག་དང་འཇིགས་བྱེད་ཀྱི་དབང། ཚེ་རྟ་མགོན་གསུམ་གྱི་རྗེས་གནང་སོགས་སྩལ་ཞིང། གཏོར་ཆེན་སྨད་རྒྱུད་ལུགས་ལྟར་བརྩེགས། ཚོགས་པར་མང་འགྱེད་གྱ་ནོམ་པ་དང་བཅས་ཉིན་གཉིས་ལ་གཏོར་ཆེན་གྱི་ཚོགས་དབུར་ཕེབས་ཤིང་བསྟན་འགྲོའི་ཕན་བདེ་འཕེལ་རྒྱས་ཀྱི་ཐུགས་དམིགས་ནན་ཏན་མཛད། དེ་ནས་རི་ཁྲོད་དུ་བྱོན་ནས་བཅད་རྒྱའི་ངང་ལ་བཞུགས། འདུ་ཁང་གསར་ཕིབས་ཀྱི་ལོགས་རིས་ལ་ལམ་རིམ་བླ་བརྒྱུད་གནས་བཅུ་སོགས་དང། ཤིང་བཟང་པོ་ལས་བདེ་གཤེགས་མཆོད་རྟེན་ཆེ་བ་བརྒྱད་ཀྱང་བཞེངས། འདུ་ཁང་ལེགས་པར་གྲུབ་པའི་ཞལ་བསོར་བཀྲ་ཤིས་ཀྱི་གསོ་སྦྱོང། རབ་བྱུང་དགེ་ཚུལ་ལྔ། བསྙེན་རྫོགས་སོ་གཉིས་བྱུང་བ་འཁོར་ལྔ་སྡེ་དང་འདུས་པའི་ལྷ་གྲངས་དང་མཐུན་པས་རྟེན་འབྲེལ་ལེགས། ལོ་འདིར་བསྙེན་རྫོགས་སྔ་ཕྱི་བསྡོམས་པར་བརྒྱ་དང་གོ་བཞི། རབ་བྱུང་དགེ་ཚུལ་གྱ་གསུམ་བྱུང་འདུག །གདན་ས་ཆེན་པོའི་དཔོན་སློབ་སྤྱི་མང་ནས་ལེགས་བཤད་སྙིང་པོའི་བཤད་ལུང་ནན་ཏན་དུ་གསོལ་བ་བཏབ་པ་བཞིན་དགོན་པར་བྱོན་ཏེ་དགུ་པའི་ཚེས་དགུ་ནས་གནང་རྒྱུ་ཞལ་བཞེས་མཛད་ཀྱང་མཚན་མོ་ཞིག་མནལ་ལམ་དུ། རྗེ་ཉིད་ནས་མར་མེ་མང་པོ་སྦར་བ་སྣོད་གཅིག་ཏུ་བསྒྲིགས་ནས་ཀུན་མཁྱེན་གོང་མ་རྣམ་གཉིས་ཀྱི་སྐུ་གདུང་གི་མདུན་དུ་ཕེབས་བཞིན་པ་ལ་ཤར་ཕྱོགས་ནས་རྔ་མོ་མང་པོ་འོང་བས་གཅིག་གིས་མར་མེ་གཅིག་ཐང་དུ་འཕངས་པ་རྨིས་ཏེ་
མནལ་སད་པར་གཟིམས་ཁང་ཚེག་སྒྲ་དང་བཅས་ཏེ་ཡུན་རིང་འདར་བ་སོགས་བྱུང་བས་བཅད་རྒྱ་དམ་པར་མཛད། ཞལ་བཀོད་ལྟར་དགོན་པའི་གཞུང་ནས་ཀྱང་ཞབས་བརྟན་གང་མང་བསྒྲུབས་པས་འཚུབ་གེགས་རྣམས་ཆོས་ཀྱི་དབྱིངས་སུ་རང་ཞིར་སོང་ཞིང། ཚུལ་དེ་ནི་ཤིང་རྟ་ཆེན་པོ་རྣམ་གཉིས་ཀྱི་དགོངས་པ་ལྟར། ཟབ་མོ་སྟོང་པ་ཉིད་ཀྱི་གནས་ལུགས་ཇི་བཞིན་དུ་འཆད་པས། བློ་གསལ་སྐལ་ལྡན་མང་པོ་རང་གི་སྤྱོད་ཡུལ་ལས་འདའ་བར་ཤེས་ཏེ་འདོད་པའི་བདག་པོ་དཔུང་དང་བཅས་པ་གཡོས་པའི་མཚན་མར་ངེས་ཤིང། ཆོས་དང་གང་ཟག་ཀུན་གྱི་ཆེ་བ་བླ་ན་མེད་པའོ། །རྟེན་ཅིང་འབྲེལ་འབྱུང་སྤྲིན་སྔོན་འཁྲིགས་པའི་ཀློང། །ལྟ་བའི་གནམ་ལྕགས་རིགས་པའི་གློག་འོད་འཕྲེང། །སྲིད་པའི་བྲག་རི་གཞོམ་པར་ཆས་པ་ན། །ཡིད་སྲུབས་སྡེ་བཅས་སྐྲག་ནས་འདར་བ་ལས། །ཚུལ་ཁྲིམས་ཤེས་རབ་མཆོག་གི་བསམ་གཏན་གྱིས། །མི་འཇིགས་བཞི་ལྡན་རྒྱལ་བའི་གདུང་འཚོབ་བརྙེས། །གདོང་བཞི་པས་ཀྱང་གཙུག་ཏུ་མཆོད་འོས་ཁྱོད། །འདོད་ལྷས་འཇིགས་པའི་གོ་སྐབས་དམིགས་སུ་མེད། །དགུང་ལོ་ཞེ་དྲུག་པ་མེ་ཡོས་ལོ་གསར་ལ་གྲོལ་ཙམ་མ་གཏོགས་ཟླ་བ་གསུམ་པ་བར་དུ་རི་ཁྲོད་ནས་བཅད་རྒྱ་མཛད་ཅིང་སེང་བར་ལ་བཅུ་གཅིག་ཞལ་གྱི་དབང་སྟ་གོན་དང་བཅས་པ། འཇིགས་བྱེད་བཅུ་གསུམ་མ་དང་དཔའ་གཅིག་གི་དབང་སྟ་གོན་དང་བཅས་པ། རྣམ་སྲས་བཀའ་བཅོ་ལྔ། རྟ་མགྲིན། ཁྱུང་ཁྲ་ནག །ཀླུ་དབང་རྒྱལ་པོ། རྣམ་འཇོམས། ཤེར་ཕྱིན་མ་སོགས་ཀྱི་རྗེས་གནང། དགའ་ལྡན་ལྷ་བརྒྱ་མའི་ཁྲིད། བདེ་ལམ་གྱི་ཁྲིད་སེམས་བསྐྱེད་མཆོད་པ་དང་
བཅས་པ། འཇམ་དབྱངས་དཀར་སེར། དབྱངས་ཅན་མ་དཀར་དམར། རིག་བྱེད་མ། ཚེ་དཔག་མེད་སོགས་ཀྱི་རྗེས་གནང། ལམ་གཙོའི་ཁྲིད། བཅུ་གཅིག་ཞལ་གྱི་དབང། ལྟ་ཁྲིད་དང་ལམ་གཙོའི་ཁྲིད་གང་རྒྱས། འཇིགས་བྱེད་དཔའ་གཅིག་དང། གསང་འདུས་སྤྱི་བཀའི་དབང། སྐྱབས་མགོན་མཆོག་གི་རྣམ་ཐར་གྱི་ལུང་སོགས་ཆོས་བཀའ་མང་དུ་གནང། ཇུན་ཝང་ངག་དབང་དར་རྒྱས་སྐུ་གཤེགས་པར་བརྟེན། དཔོན་མོ་རིག་འཛིན་དབང་མོས་ཕེབས་བཞུད་གནང་གི་མེད་པ་ཤེས་བཞིན་པ་ཡིན་ཀྱང། ད་རེས་མ་ཕེབས་ན་ཐུགས་ན་མེད་པའི་རྟགས་ཡིན་ཞེས་མི་འོས་པའི་ཞུ་ནན་མ་བཟློག་པར་གསུམ་པའི་ཚེས་དྲུག་ལ་བཏེག །ཀུན་རིག་དང་འབྲེལ་བའི་གདུང་ཆོག་རྒྱས་པ་དང་དཔོན་མོ་སྲས་བློན་དང་བཅས་པར་སེམས་ལ་ཕན་པའི་བསླབ་བྱ་མཛད། སླར་ཡང་གདན་སར་བྱོན་མ་ཐག་ནས་བཅད་རྒྱ་དང། བཞི་པའི་བཅོ་ལྔའི་ཉིན་རི་ཁྲོད་དུ་བྱོན་ནས་རེ་ཞིག་གི་བར་དུ་བཅད་རྒྱ་མཛད། རི་ཁྲོད་དུ་འདུ་ཁང་གི་ཚོན་རྩི་དང་བཀའ་འགྱུར་ཡོངས་རྫོགས་བཞུགས་པའི་ཆོས་འཁོར་ལྷ་ཁང་གི་ལས་མགོ་བརྩམས། དེ་སྐབས་སུ་རྣམ་ཐར་དུ་ཀུ་ལའི་གོས་བཟང་ལས། བསམ་ཡས་ཀྱི་ཆོས་འཁོར་ལ་བསྐོར་བའི་ཐ་སྙད་མི་ཡོང་བ་འདྲ་ཞེས་སོགས་གསུངས་པའི་འཕྲོས་བྱུང་བར། ཞལ་ནས། བསྐོར་བའི་ཐ་སྙད་ཇི་བཞིན་དཀའ་ཡང་དྲན་པ་དང། རེག་པ་དང། མིག་གིས་མཐོང་བ་དང། རླུང་གིས་ཕོག་པས་དགོས་པ་ཆེན་པོ་འབྱུང་ལ། གདོང་དར་ཕྱི་རོལ་ཏུ་བསྟན་པ་ལས་གླེགས་བམ་འཕྲེད་འཇོག་བྱས་པ་ཅུང་དགའ་བ་འདྲ་གསུངས། བར་སྐབས་ཤིག་བཅད་རྒྱ་གྲོལ་ཏེ་བརྒྱད་པའི་བཅོ་ལྔ་ནས་ཉིན་
གསུམ་གྱི་རིང་གསེར་ཁང་ཆེན་མོར་རྡོ་རམས་པ་ངག་དབང་ཡོན་ཏན་གྱིས་ཉེ་བའི་སྲས་བརྒྱད་ཀྱི་སྐུ་བརྙན་བསྒྲུབས་པར། ཡབ་སྲས་ཞལ་འཛོམ་ཐོག་ནས་སྤྱན་དབྱེའི་ཆོ་ག་རྒྱས་པ། ཞི་རྒྱས་ཀྱི་སྦྱིན་སྲེག་དང་བཅས་པ་དང། བདུད་འདུལ་མཆོད་རྟེན་ལ་ཡང་རྒྱང་ནས་རབ་ཡངས་མའི་ཤིས་བརྗོད་རྒྱས་པ་མཛད། རི་ཁྲོད་འདུ་ཁང་གི་ཤིང་རྩི་བ་རྒྱ་ལྷ་བཟོ་རྣམས་དང། ལམ་རིམ་ཚོགས་ཞིང་དང། གནས་བཅུ་བཞེངས་མཁན་གྱི་ལྷ་བཟོ་རྣམས་ལ་བདག་རྐྱེན་ཚིམ་པར་གནང། སླར་ཡང་བརྒྱད་པའི་ཉེར་གཅིག་ནས་ལོ་མཇུག་བར་དུ་བཅད་རྒྱ་དམ་པོ་མཛད་ཅིང་ཐུན་གསེང་ཞིག་ཏུ། ཐུབ་བསྟན་དབྱར་གྱི་ལང་ཚོ་འདས་ཟིན་པས། །ཀུན་རྨོངས་ཡིད་ཀྱི་སྐྱོ་བ་སངས་ནུས་པ། །སྦྱར་བྱང་སྤོས་མིན་གསར་དུ་སྤྲོས་པ་ཡི། །གཞུང་ཆེན་ཁུ་བྱུག་དབྱངས་དེ་རིང་ནས་ནུབ། །བརྗོད་དོན་དཀྱུས་མའི་སྦྲང་ཆར་སྲབ་ན་ཡང། །སྒྲོ་བཏགས་འུད་ཀྱི་ང་རོ་གསེང་མཐོ་བ། །རང་འདོད་ཞེན་ཕྱོགས་བླ་མའི་རྣམ་པར་ཐར། །སྟོན་གྱི་འབྲུག་སྒྲ་ལྟ་བུ་རེས་འགའ་སྒྲོག །ཕལ་ཆེར་བསང་མཆོད་གསོལ་འདེབས་སྤྲིང་ཡིག་སོགས། །དོན་ཆུང་ཚིག་གི་སྦྱོར་བ་སྣ་ཚོགས་པ། །རང་རང་ཁུང་བུའི་སྒོ་ན་འཚེར་བ་ཡི། །བྱེ་འུ་སྦྲང་མའི་དབྱངས་ཀྱིས་ས་འདི་ཁྱབ། །མཚན་དུས་རྒྱང་རིང་བལྟ་བའི་དོན་མེད་ན། །ཟླ་བའི་གཟི་བྱིན་ཉི་མ་ལས་ལྷག་ཅིང། །རྒྱུ་སྐར་བྱེ་བའི་རང་འོད་སྤྲོ་བ་དེ། །སྣང་བའི་དགའ་སྟོན་དར་བ་ཅིས་མ་ཡིན། །ཀུན་བྱང་བླང་དོར་སྟོན་པའི་མཐུ་མེད་ཀྱང། །རྣར་སྙན་གཅམ་བུ་ཙམ་གྱིས་ཡིད་མགུ་ན། །ཏྲ་ཏྲ་ཀྲི་ཀྲིའི་ཟུང་ལྡན་སྤེལ་བ་
ཡི། །ལྕོག་ཆུང་བྱེ་འུ་ཡོན་ཏན་ལྷུན་གྱིས་གྲུབ། །ཀྱེ་མ་རང་སྐྱོན་རང་གིས་མ་མཐོང་བར། །བདག་འཛིན་འདི་ཡང་དོན་མེད་ཚིག་གི་མཚོར། །ཆུ་ཐིགས་སྣོན་པར་སྣང་ཕྱིར་འཕྲོ་སྤངས་ཏེ། །ད་ཨོཾ་མ་ཎི་པདྨེ་ཧཱུཾ་རང་ཐོན། །འདི་ཡང་མཚམས་ཀྱི་ཐུན་གསེང་དུ་སྙན་ངག་གི་འཕྲིན་ཡིག་ཅིག་འདྲི་འདུན་སྐྱེས་པའི་ལོག་གནོན་དུ་སྨྲས་པའོ། །ཞེས་སམ་ཊར་བཀོད་འདུག་པ་དྲུང་ཡིག་ཀུན་དགས་བྲིས་བཤུས་བྱས་པར་སྣང། འདི་དང་མཐུན་པར་ཞལ་ནས་དགེ་སྦྱོར་བཟང་པོ་ཞིག་བྱེད་བསམས་ཀྱང་ཟང་ཟིང་འདུ་ལོང་གིས་བྱེད་དུ་མ་བཅུག །གཞུང་ཆེན་འགའ་རྩོམ་བསམས་ཀྱང་སོ་སོའི་འདོད་བསྟུན་གྱི་རྩོམ་པ་ཕྲན་ཚེགས་སྐུལ་མཁན་མང་སོང་བས་ཐོག་ཏུ་མ་ཁེལ་གསུངས་ཏེ་ལེགས་པར་གོ་དགོས་པ་ཞིག་ཏུ་སྣང། ལོ་འདིར་སྔ་ཕྱི་བསྡོམས་པར་ཆས་པ་ཞབས་དྲུང་སོགས་བསྙེན་རྫོགས་བརྒྱ་དང་ཞེ་བརྒྱད། རབ་བྱུང་དགེ་ཚུལ་གོ་གསུམ། དགེ་ཚུལ་མ་གཉིས། དགེ་བསྙེན་འགའ་བཅས་བསླབ་པ་ལ་བཀོད་དེ་དལ་འབྱོར་དོན་ལྡན་དུ་བསྒྲུབས། དགུང་ལོ་ཞེ་བདུན་པ་ས་འབྲུག་ལོ་གསར་སོགས་དཀྱུས་ལྟར་གནང། དགོན་པར་བྱོན་ནས་དོན་གཉེར་པ་རྣམས་ལ། རིགས་གསུམ་མགོན་པོ། རྣམ་འཇོམས། འཇམ་དབྱངས་དཀར་སེར། སྒྲོལ་དཀར། རྟ་མགྲིན་སོགས་ལྷག་པའི་ལྷ་མང་པོའི་རྗེས་གནང་དང་འདོད་མོས་ཀྱི་ལུང་མང་དུ་གནང། མཆོད་རྟེན་མཐོང་གྲོལ་ཆེན་མོའི་ནང་དུ་རྣམ་རྒྱལ་སྟོང་མཆོད་བསྒྲུབ་པའི་སྲོལ་བཙུགས་ཏེ་ཐེག་ཆེན་གསོ་སྦྱོང་སོགས་སྦྱོར་དངོས་མཇུག་གི་ཕྱག་ལེན་ཞིབ་པར་མཛད་ཅིང། རྣམ་རྒྱལ་མའི་རྗེས་གནང་ཡང་སྩལ། རྟེན་སོ་སོའི་མདུན་དུ་མར་མེ་བདུག་སྤོས་སྙན་ཤལ་མཆོད་པ་
རྒྱ་ཆེན་པོ་དང་བཅས་གསེར་ཁང་ཆེན་མོར་མངོན་རྟོགས་རྒྱན་དང། གདུང་མདུན་དུ་དབུ་མ་འཇུག་པ། མཇུག་ཏུ་བསྟན་འབར་མ་དང་བཅས་བསྟན་པ་རྒྱས་པའི་ཐུགས་སྨོན་རྒྱ་ཆེར་གནང་བ་འདི་ལོ་ལྟར་འཆར་ཅན་དུ་མཛད། གཉིས་པའི་ཚེས་མགོར་འགྲེལ་པ་དོན་གསལ་གྱི་བཤད་ལུང། གཞན་ཡང་ཚེ་རྟ་མགོན་གསུམ། དྲག་པོ་སུམ་སྒྲིལ། སྒྲོལ་དཀར་སོགས་ཀྱི་རྗེས་གནང། དགའ་ལྡན་ལྷ་བརྒྱ་མའི་ཁྲིད་སོགས་ཆོས་བཀའ་ཅི་རིགས་སྩལ། ཀིརྟི་སྤྲུལ་བའི་སྐུ་ཀུན་དགའ་ཆོས་འཕགས་ཐུབ་བསྟན་ཉི་མ་བཀའ་ཆོས་གསན་ཆེད་དུ་བྱོན་པ་ལ་ཚེས་བཅོ་བརྒྱད་ཀྱི་ཉིན་སྐྱབས་འགྲོའི་ཁྲིད། རྡོ་རྗེ་འཛིན་པ་དཀོན་མཆོག་རྒྱལ་མཚན་གྱིས་མཛད་པའི་ལམ་རིམ་ཚིགས་བཅད་མའི་ལུང་སོགས་སྩལ། ཚེས་བཅུ་དགུ་ནས་ཆོས་ཐུན་གཉིས་རེ་བྱས་ཏེ་བདེ་ལམ་གྱི་ཁྲིད་དང་རྡོར་འཕྲེང་གི་དབང། ཉེར་མཁོའི་ལུང་དང་རྗེས་གནང་དུ་མ་བར་མ་ཆད་པར་གནང་བའི་མཇུག་ཏུ་ཚོགས་འཁོར་རྒྱས་པར་མཛད། བཞི་པའི་ཚེས་གཅིག་ནས་བཀའ་རམས་དང་དགེ་བཤེས་རི་ཁྲོད་ཀྱི་འདུ་ཁང་དུ་མི་ཤོང་ཙམ་ལ་བདེ་ལམ་གྱི་ཁྲིད་གཟབ་རྒྱས་སེམས་བསྐྱེད་མཆོད་པ་དང་བཅས་པ་ཞག་བརྒྱད་ཀྱི་རིང་ལ་གནང། འདི་སྐབས་དུས་འཁོར་སློབ་ཟུར་བློ་བཟང་འཇིགས་མེད་དང། སློབ་ཟུར་དཀོན་མཆོག་དར་རྒྱས་སོགས་དགེ་བཤེས་བགྲེས་གཞོན་ཆེ་ཧྲགས་མང་དུ་འཛོམས་པས། གསུང་བཤད་གཞུང་ཆེན་མོ་མང་པོ་དང་སྦྱར། ཁྱད་པར་མངོན་རྟོགས་རྒྱན། རྒྱན་སྣང་དང་ཉི་སྣང། བྱམས་ཆོས་སྒོམ་རིམ་སོགས་ཀྱི་ལུང་རིགས་རི་བོ་སྙིལ་བ་ལྟ་བུ་
དང། སྐབས་སྐབས་སུ་དཀའ་གནད་དུ་མ་ལ་དོགས་གཅོད་གནང་ཞིང། དགེ་བཤེས་རྣམས་ལ་ལྐོག་ནས་བསྔགས་བརྗོད་ཀྱང་མཛད། སྤྱིར་བཤད་བྱའི་གནས་དཀའ་སླ་གང་འཆད་ན་ཡང་སྐུ་ཚེ་སྟོད་ལ་བྱམས་ཆོས་ས་སྡེ་རིགས་ཚོགས་སོགས་དང། སྐུ་ཚེ་སྨད་ལ་དེའི་སྟེང་དུ་མདོ་རྒྱུད་དང། གྲུབ་ཆེན་གྱི་གཞུང་ཐོགས་མེད་དུ་འདྲེན་པས་བཀའ་བསྟན་ཐུགས་ལ་བཟུང་ཡོད་པ་ལྟ་བུར་འཆད་ཅིང། དེའི་མཐུས་གཞུང་གི་ཁོག་ལ་གོ་བ་སྟེར་ཕུལ་ཆེ་བ། དཔེ་དང་གཏན་ཚིགས་འཇིག་རྟེན་གྱི་ཁ་ངག་ཚུན་ཆད་དང་སྦྱར་ནས་གསུངས་པས་ངེས་པ་རྙེད་སླ་བ། ཉམས་ལེན་དང་སྦྱར་ཏེ་སེམས་རྒྱུད་ལ་བསྐོར་ནས་གསུངས་པས་རྡོ་རུས་ཐུག་པར་ངོ་སྤྲོད་པ་ཞིག་ཡོད་ལ། མགོ་མཇུག་ཏུ་སངས་རྒྱས་ཆོས་ཚོགས་མ་དང་ཆོས་རྒྱལ་མ་ཚར་གསུམ་རེ་དལ་བུས་གནད་དུ་སྨིན་ནས་ཕྱག་ཐལ་མོ་སྦྱར་ཏེ་བསྟན་འགྲོའི་དོན་དུ་བསྔོ་བ་རྒྱུན་དུ་མཛད། ཞལ་ནས་ཀྱང་སྔ་ཕྱིའི་འབྲེལ་ཤེས་པའི་ཆེད་དུ་མཚམས་སྦྱོར། དོན་གྱི་གནད་ཤེས་པའི་ཆེད་དུ་བསྡུས་དོན། ཡན་ལག་ཞིབ་པར་ཤེས་པའི་ཆེད་དུ་ཚིག་དོན། ལོག་བཤད་དང་གོལ་ས་སྤངས་པའི་ཕྱིར་དུ་བརྒལ་ལན། མཐར་སངས་རྒྱས་ཀྱི་གོ་འཕང་ཇི་ལྟར་ཐོབ་ཚུལ་ཤེས་པའི་ཆེད་དུ་དགོས་དོན་ཏེ། བཤད་ཐབས་ཡན་ལག་ལྔ་པོ་འདི་རྒྱ་གར་པཎ་ཆེན་གྱི་ལུགས་ཡིན་པས་དགོས་པ་དེ་རྣམས་ཡིད་ལ་བཞག་ནས་གཞུང་ཆེན་མོའི་ཚིག་གི་ནུས་པ་འདོན་ལུགས་དང་ལམ་ལ་ངེས་པ་བསྐྱེད་ནས་ཉམས་སུ་ལེན་ཚུལ་གཙོ་བོར་བཟུང་ན་ཐོས་པ་གནད་དུ་འགྲོ། དེ་ཡང་མདོ་རྒྱུད་རྒྱ་གཞུང་མཐའ་དག་ལ་གནད་འདྲིལ་བའི་གོ་བ་བཙལ་ན་རྗེ་རིན་པོ་
ཆེའི་གསུང་ལ་འདྲིས་པ་གལ་ཆེ་གསུངས། འཆད་ཉན་ཉིན་བྱེད་སྣང་བ་དང་བྲལ་ན། །བླང་དང་དོར་བྱའི་རི་མོ་ཇི་ལྟར་གསལ། །གང་གསུང་ལུང་རིགས་དགག་སྒྲུབ་འོད་སྟོང་ཅན། །གདུལ་བྱའི་བློ་མིག་གསལ་བའི་གཉེན་དུ་ཤར། །འཆད་ཉན་གྲུ་གཟིངས་འདུ་བྱེད་དང་བྲལ་ན། །གཞུང་ལུགས་རྒྱ་མཚོའི་ཕ་མཐར་སུ་ཡིས་བགྲོད། །མཁྱེན་དཔྱོད་དར་ཆེན་འཆར་བའི་སྒྱུ་འཕྲུལ་གྱིས། །གཞུང་དོན་ནོར་བུའི་ལོངས་སྤྱོད་སྐལ་བཟང་སྟེར། །དད་བརྩོན་རླུང་ཤུགས་མཁྱེན་དཔྱོད་དར་ཆེན་དང། །ཡོན་ཏན་རྒྱ་མཚོའི་རླབས་འགྲོས་མཐུན་པར་སྤྱོད། །ལུང་རྟོགས་རླབས་གཡོ་བཤད་སྒྲུབ་མཚོ་ཆེན་དང། །འདུན་ལྡན་དོན་གཉེར་གྲུ་གཟིངས་མཐུན་པར་སྤྱོད། །སངས་རྒྱས་དངོས་ཀྱི་དགེ་བའི་བཤེས་གཉེན་ལས། །ཐུབ་བསྟན་ཡོངས་སུ་རྫོགས་པའི་གདམས་ངག་རྒྱུན། །དད་བརྩོན་བློ་གྲོས་ཧུབ་ཀྱིས་འདྲེན་ནུས་པའི། །ཐར་འདོད་དེ་དག་ཨེ་མ་སྐལ་བ་བཟང། །ཀུན་གཟིགས་མཆོག་སྤྲུལ་རིན་པོ་ཆེར། ཚེ་དཔག་མེད་ལྷ་དགུ། བདེ་མཆོག་ལཱུ་ཨི་པ། དྲིལ་བུ་ལྷ་ལྔ། ལུས་དཀྱིལ། བདེ་མཆོག་ནག་པོ་ལུགས་ཀྱི་དབང་སོགས་དང། ལྷོ་བྲག་སྙན་བརྒྱུད་ཀྱི་རྗེས་གནང་ལུང་ཡོངས་རྫོགས། ཞལ་རྣམ་འགྱུར་བཅུ་བདུན་གྱི་རྗེས་གནང། དེའི་བེ་བུམ་གྱི་ལུང། བྱང་ཆུབ་བདེ་ལམ་གྱི་ཁྲིད་རྒྱས་པ། བླ་མཆོད་དང་ཕྱག་ཆེན་སྦྲགས་པའི་ཁྲིད་གཟབ་རྒྱས་བཅས་ཕུལ། བཤོལ་ཟླ་ལྔ་པའི་ཚེས་ལ་མཛོད་དགེར་དགོན་གསར་གཟིགས་རྟོག་གི་ཆེད་གདན་དྲངས་པ་ལྟར་བྱོན། ཀུན་རིག་གི་དབང་སྟ་གོན་དང་བཅས་པ། ཁྱ་དགེ་
ལེགས་བཤད་གླིང་གི་བླ་གྲྭ་རྣམས་དང་བཅས་པར་རྡོར་འཕྲེང་ནས་འབྱུང་བའི་གསང་འདུས་ཀྱི་དབང་དང་ཆོས་བཀའ་ཅི་རིགས་སྩལ། མང་འགྱེད་གྱ་ནོམ་པ་དང། རྒྱུད་གཞུང་ཚར་ཕུད་སོགས་ཚོགས་འདོན་དང་ཕྱག་ལེན་ལ་ཞིབ་གཟིགས་དག་ཐེར་མཛད། བསྒྲུབ་བྱ་དུ་མར་དགེ་ཚུལ་བསྙེན་རྫོགས། དགེ་བསྙེན་ཕ་མ། བསྙེན་གནས་སོགས་ཀྱི་སྡོམ་པ་སྩལ་ཏེ་ཐར་ལམ་ལ་བཀོད། མཛོད་དགེ་རི་ཁྲོད་དབང་པོའི་གདན་ས་དགེ་ལྡན་བསྟན་པ་འཕེལ་རྒྱས་གླིང་དུ་བྱོན། བདེ་ལམ་གྱི་ཁྲིད་སེམས་བསྐྱེད་མཆོད་པ་དང་བཅས་པ་གནང། དུས་འབྲེལ་གྱི་གསོ་སྦྱོང་མཛད་ཅིང་འདོད་ཆོས་འགའ་ཞིག་ཀྱང་སྩལ། དགོན་པ་སོ་སོར་འབུལ་བ་རྣམས་ཕྱིར་སློག་པའི་སྟེང་དུ་མང་འགྱེད་སྤྱི་འཇོག་སོགས་འཚེམས་མེད་སྩོལ་བར་མཛད། དགོན་གསར་ནས་རྒྱུད་གྲྭ་པ་འགའ་ཞིག་གིས་དྭགས་པོའི་བསྐྱེད་རིམ་དང། འགྲེལ་པའི་ས་ཁུངས། དཀྱིལ་འཁོར་སོ་སོའི་ཐིག་སོགས་ཀྱི་རྒྱུགས་ཕུལ་བར་དགྱེས་པའི་བཀའ་དང་གསོལ་རས་གནང། གུར་དཀར་ཐང་དུ་སྐྱོ་སངས་ལ་ཡང་གདན་དྲངས་པ་ལྟར་ཕེབས། དྲུག་པའི་ཚེས་ལྔ་ལ་དེ་ནས་བཏེགས་ཏེ་བཀྲ་ཤིས་འཁྱིལ་དུ་བྱོན། དབྱར་ཞལ་བཞེས་དང་སྦྲགས་ནས་རི་ཁྲོད་དུ་སྐུ་མཚམས་ལ་བཞུགས། ཐུའུ་བཀྭན་རྡོ་རྗེ་འཆང་གི་སྤྲུལ་བའི་སྐུ་དགོན་ལུང་དུ་སྤྱན་དྲངས་པ་ལ་སྙན་ངག་གི་ཞུ་ཡིག་དང། ལེགས་འབུལ་དུ་མཎྜལ་དར་ཚོན་སྣ་ལྔའི་སྣེ་འདོགས་ཅན། སྐུ་གསུང་ཐུགས་རྟེན། དངུལ་རྡོ་ཚད་གཅིག །གོས་ཆེན་སེར་པོ་ཡུག །ཕྲུག་དམར་པོ་བུབས། གཟིག་ལྤགས་གཅིག །ཟམ་ཡུག་ལྔ། རྟ་ཆེན་གཅིག །
བཀྲ་ཤིས་པའི་ལྷ་རྫས་བཅས་འབུལ་བར་དབོན་པོ་ལྷུན་གྲུབ་ཆེད་མངགས་མཛད། བརྒྱད་པའི་ཚེས་གཅིག་ཉིན་ལྗོངས་རྒྱུར་ཕེབས་ཤིང། སྔོན་བྱོན་དམ་པ་དུ་མའི་རྣམ་ཐར་གསུང་སྒྲོས་མཛད། སྤྱིར་ན་དུས་ནམ་དུ་ཡང་ས་རྙིང་བཀའ་བརྒྱུད་བཀའ་གདམས་ཀྱི་རྣམ་ཐར་ཐམས་ཅད་གཟིགས་པ་མི་བསྙེལ་བར་གཞན་ཡིད་ཆོས་ལ་བསྐུལ་ཞིང། རྒྱ་བོད་ན་གྲུབ་མཐའ་སྣ་ཚོགས་ཡོད་པས། སངས་རྒྱས་ཀྱིས་གང་གསུངས་ཐམས་ཅད་འགྲོ་བའི་དོན་དུ་འགྱུར་བ་རེ་ལོས་ཡིན་ཀྱང་བསྟན་པའི་སྙིང་པོ་དང་མཇལ་བའི་དུས་འདིར་སྐལ་བ་བཟང་བ་ངོ་ཤེས་པར་བྱས་ནས་གྲུབ་མཐའ་གང་ཡིན་གྱི་རྗེས་སུ་འབྲང་ནས་ཕར་བསྲེ་ཚུར་བསྲེ་མི་བྱེད་པར་རྗེའི་བསྟན་པ་འདི་ལ་བག་ཆགས་ཅི་ཐེབས་བྱེད་པ་གལ་ཆེ་ཞེས་ཡང་ཡང་གསུངས་ཤིང། རྣམ་ཐར་སྤྲིང་ཡིག་ལས་ཀྱང། གྲུབ་མཐའ་སོ་སོའི་བཞེད་གཞུང་ཕྱོགས་ཙམ་མཐོང། །ཀུན་ཀྱང་རྣམ་གྲོལ་སྒྲུབ་པའི་ཐབས་སུ་གོ །དེ་ཕྱིར་ཡབ་རྗེའི་བསྟན་ལ་ངེས་པ་རྙེད། །ཆགས་སྡང་རྨོངས་ཞེན་དོར་བའི་རྣམ་ཐར་ཡིན། །ཞེས་གསུངས་པ་ལྟར་རོ། །དོན་གཉེར་ཅན་མང་པོ་ལ། དགའ་ལྡན་ལྷ་བརྒྱ་མའི་ཁྲིད། འཇམ་དབྱངས་དཀར་པོའི་རྗེས་གནང། བླ་མ་མཆོད་པའི་ཁྲིད། མགོན་པོ་བཀའ་བཅུ་གསུམ་གྱི་རྗེས་གནང། འཇམ་དབྱངས་དཀར་སེར། དབྱངས་ཅན་མ། ཤྲ་མ་ཎ། རྣམ་རྒྱལ་མ་སོགས་ཀྱི་རྗེས་གནང། གཞན་ཡང་ལུང་རྗེས་གནང་ཐོར་བུ་མང་དུ་གནང། རྡོར་འཕྲེང་གི་དཀྱིལ་འཁོར་གསར་བཞེངས་གྲུབ་པ་དང། རི་ཁྲོད་འདུ་ཁང་དུ་སྐུ་འདྲ་མཆོད་རྟེན་གསར་བཞེངས་རྣམས་བཞུགས་སུ་བཅུག་སྟེ་ཚོགས་དབུར་བྱོན་ནས་སྤྱན་དབྱེའི་ཆོ་ག་དང། བཟོ་བོ་རྣམས་ཡོན་གྱིས་ཚིམ་པར་གནང་སྟེ་སླར་ཡང་བཅད་
རྒྱ་མཛད། བདེ་ཐང་སྤྲུལ་བའི་སྐུ་གཤེགས་ནས་གདན་འདྲེན་ནན་ཆེ་རུང་མ་ཕེབས་པར་སྤྲུལ་སྐུ་མྱུར་འབྱོན་ལྗགས་རྩོམ་མཛད་ནས་གནང། ཉི་ལྡོག་གི་སྐབས་སུ་བསྟན་འཛིན་གྱི་སྐྱེས་བུ་དམ་པ་རྣམས་ཀྱི་ཞབས་བརྟན་ལ། རི་ཁྲོད་ཚོགས་ཡོངས་ནས་གཙུག་ཏོར་འཁོར་བསྒྱུར་གྱི་འཕྲེང་སྔགས་ཉིན་བདུན་རེ་བསྒྲུབ་པའི་མཇུག་ཏུ་དཔའ་གཅིག་གི་སྦྱིན་སྲེག་དང། སྒྲོལ་དཀར་གྱི་ཚེ་སྒྲུབ་ཉིན་བདུན་རེ་བཅས་ལ་མང་འགྱེད་གནང་བ་ལོ་ལྟར་ཆག་མེད་ཡིན་ཞིང། ལོ་རྙིང་གི་ཉེར་དགུ་ལ་སྐུ་མཚམས་གྲོལ། ལོ་འདིར་བསྙེན་རྫོགས་བརྒྱ་དང་བཅུ་དྲུག །དགེ་ཚུལ་བརྒྱ་དང་དགུ་བཅས་བསླབ་པ་ལ་བཀོད་དེ་ཐར་པའི་རྒྱལ་མཚན་བརྟན་པར་མཛད། དགུང་ལོ་ཞེ་བརྒྱད་པ་ས་སྦྲུལ་ལོ་གསར་གྱི་དགའ་སྟོན་ཚེས་གཏོར་སོགས་དཀྱུས་ལྟར་གནང། ལོ་འདིར་ཀུན་གཟིགས་མཆོག་སྤྲུལ་རིན་པོ་ཆེ་དབུས་གཙང་དུ་གསན་སྦྱོང་གི་ཆེད་ཕེབས་དགོས་སྟབས། ཡབ་སྲས་རྣམས་བླ་བྲང་ཆེན་མོར་ཡང་ཡང་ཞལ་འཛོམ་དགོས་སོགས་ཀྱིས་རེ་ཞིག་བཅད་རྒྱ་མ་གྲུབ། མཆོག་སྤྲུལ་རིན་པོ་ཆེ་ནས་དགེ་རྒན་ལྷ་རམས་པ་མེར་གན་མཁན་པོ་དབུས་སུ་འགྲོ་དགོས་ཀྱི་བཀའ་གནང་ཡང། སླར་ཡང་དགོན་པའི་གདན་ས་གལ་ཆེ་བར་དགོངས་ནས་ཚོགས་ཆེན་ཁྲིར་བཞུགས་དགོས་ཀྱི་བཀའ་བསྒྱུར། ཁོང་ནས་དགོངས་པ་ཞུ་ནན་མཛད་པས། སྐུ་ཞབས་རིན་པོ་ཆེར་དགོངས་བསྟུན་གྱི་ཐོག །བླ་མ་ཁྲི་གདན་ཟུར་ལས་སྣེ་ཚོགས་འདུ་རྒྱས་པ་ནས། སྐྱབས་མགོན་མཆོག་དབུས་ཕེབས་སྐབས་འདིར་གདན་སའི་འཛིན་སྐྱོང་བཀའ་དྲིན་ཆེ་དགོས་ཞེས་ནན་གྱིས་ཞུས་པར། བྱ་བཞག་མང་པོ་བློས་མི་འཆུན་ཞིང། ཞེ་སུན་པ་ཞིག་འདུག །དགེ་སྦྱོར་མི་ཡོང་ན་ཡང་འགྲོ་འདུག་བཤོལ་བ་འདིས་སོས་བདེ་ཞིང། ལུག་སྡིག་ཇེ་ཉུང་དུ་སོང་ཡོད་པས་འདི་ཇེ་
མང་ལ་མི་གཏོང་བ་ཁྱེད་རྣམས་མཁྱེན་ཞེས་གསུང་ལྕི་བ་རིམ་པར་གནང་བས་ནན་ཞུས་མ་སྤོབས། རྟེན་འབྲེལ་གྱི་ཁྱད་ཁ་དར་ཅིས་ཀྱང་བཞེས་དགོས་ཞེས་ཕུལ་བས་ཞལ་འཛུམ་པ་དང་བཅས་ཕྱག་གཉིས་ཀྱིས་བཞེས། ཐུ་མེད་དཀོན་མཆོག་འོད་ཟེར་གྱིས་ཡིག་ཆའི་ཕར་ཕྱིན་སྐབས་དང་པོ་ནས་བརྒྱད་པའི་བར། ལེགས་བཤད་སྙིང་པོ། འགྲེལ་པ་དོན་གསལ། གྲུབ་མཐའ་རྩ་བ་རྣམས་ཀྱི་རྒྱུགས་ཕུལ་བར་གསེར་ཟངས་ཀྱི་རྗེའི་སྐུ་བཟོ་ཉམས་ཁྱད་འཕགས་ཁྲི་རྒྱབ་ཡོལ་དང་བཅས་པ་སོགས་གནང་ནས་ད་དུང་སློབ་གཉེར་ལ་འབད་དགོས་པའི་བསླབ་བྱ་སྩལ། ཟླ་བ་གཉིས་པའི་ནང་དུ་ཁྲི་ཆེན་མཆོག་གི་སྤྲུལ་བའི་སྐུ་རིན་པོ་ཆེ་འཇིགས་མེད་ནམ་མཁའ་ནས་གོང་མ་བདག་པོ་ཆེན་པོར་དགོངས་པ་ཞུས་ནས་གདན་སར་བྱོན་པས་སྔ་ཕྱིར་དགྱེས་སྟོན་ལེགས་འབུལ་ཕན་ཚུན་འབུལ་རེས་དང། ཆོས་སྲིད་ཀྱི་གསུང་འཕྲོས་ཆུ་བོའི་རྒྱུན་ལྟ་བུ་མཛད། བཱ་རིན་ཝང་གི་ཐོ་ཡོན་ལྷ་བཙུན་བློ་བཟང་དགེ་ལེགས་བསྟན་འཛིན་ནས་ཞུས་པ་བཞིན་ཞག་བཅུ་དགུའི་རིང་བྱང་ཆུབ་བདེ་ལམ་གྱི་ཁྲིད་སྨིན་རྒྱས། མཇུག་ཏུ་གསེར་ཁང་ཆེན་མོར་ཁྲི་མཆོད་སོགས་མཆོད་པ་རྒྱ་ཆེན་པོ་དང་བཅས་སེམས་བསྐྱེད་མཆོད་པ། སླར་ཡང་སྤྱོད་འཇུག་གི་ལུང་དང་སྦྲགས་བསམ་གཏན་ལེའུ་དང། ཤེས་རབ་ལེའུའི་གཟབ་བཤད་སོགས་ཆོས་བཀའ་མང་དུ་གནང། རྒྱལ་བའི་གསུང་རབ་ཀུན་གྱི་སྙིང་པོའི་བཅུད། །ཤིང་རྟ་ཆེན་པོས་ཕྱེ་བའི་ལམ་གྱི་སྲོལ། །སྐྱེ་བོ་མཆོག་གི་ཆོས་ལུགས་བགྲོད་གཅིག་ལམ། །སྐལ་ལྡན་ཀུན་མཁྱེན་ས་རུ་བགྲོད་པའི་ཐབས། །ཟབ་གསང་སྡེ་སྣོད་རི་མོ་གསུམ་པའི་དུང། །བསྒྲགས་པས་སྐྱེ་དགུའི་སྡིག་པའི་རིམས་ནད་ཞི། །གསུང་རབ་གདམས་པར་ཤར་
བའི་གདུལ་བྱའི་སྤྲིན། །དགེ་ལེགས་དབྱར་གྱི་རྔ་གསང་ཁྱབ་པར་སྒྲོགས། །གསུམ་པའི་ཚེས་ལྔའི་ཉིན་མཆོག་སྤྲུལ་རིན་པོ་ཆེ་རི་ཁྲོད་དུ་གདན་དྲངས་ཏེ། འདུ་ཁང་ནས་གསོལ་སྟོན་རྒྱས་པའི་ཐོག་དངུལ་སྲང་ལྔ་བཅུ། རས་ཆེན་ལྔ་བཅུ། དོང་ཚེ་ཁྲོན་ལྔ་བཅུ་སོགས་ཀྱི་ཕེབས་རྫོངས་ཞུས། གཟིམས་ཕུགས་ནས་གུང་ཚིགས་ལྷན་དུ་གནང་ཞིང་ལམ་རིམ་བསྡུས་དོན་གྱི་ལུང་ཡོངས་རྫོགས་དང། བདེ་ལམ་ལ་དབུ་ཚུགས་ཙམ་གནང་སྟེ་རྟེན་འབྲེལ་བསྒྲིགས། ལམ་རིམ་ཆེན་མོ་སོགས་སྐུ་གསུང་ཐུགས་རྟེན་ཕུལ། དགོན་པའི་གཟིམས་ཤག་ཏུ་ཡང་གདན་དྲངས་ཏེ་གསོལ་སྟོན་རྒྱས་པའི་ཐོག །སྲིད་ཞིའི་གཙུག་རྒྱན་གཏན་གྱི་སྐྱབས་གཅིག་ཐམས་ཅད་གཟིགས་པ་ཆེན་པོའི་ཞབས་པད་རྣམ་པར་བཞད་པའི་དྲུང་དུ། གསོལ་བ་འདེབས་པ་ནི། དེ་ཡང་དཀར་པོ་ཞེས་པ་རབ་བྱུང་བཅུ་བཞི་པའི་གནམ་ལོ་གསུམ་པ། སྣོད་བཅུད་ཀྱི་ལེགས་ཚོགས་ཐམས་ཅད་འཕེལ་བ་དབྱར་གྱི་ཟླ་བ་དང་པོ། དེའི་དཀར་ཕྱོགས་ཀྱི་ཚེས་གཅིག་དགའ་བ་དང་པོའི་ཉིན་འདིར་སྐྱབས་མགོན་ཐམས་ཅད་མཁྱེན་པ་ཉིད་སྤྱན་དྲངས་ཏེ། གང་གི་རྣམ་པར་དཀར་བའི་འཕྲིན་ལས་ཀྱིས་ས་སྟེང་གི་བསྟན་འགྲོ་མཐའ་དག་ཕན་བདེའི་སྣང་བ་དམ་པས་དཀར་འཇམ་ཡུག་གཅིག་ཏུ་བྱེད་པའི་རྟེན་འབྲེལ་མཚོན་པར་ཇོ་བོ་ཡབ་སྲས་ཀྱི་རྣམ་ཐར་བཞིན་དུ་དངུལ་དཀར་གྱི་མཎྜལ་ལ་དུང་དཀར་གྱི་ཕྲ་བཀོད་པ་དར་དཀར་པོའི་སྣེ་འདོགས་ཅན། སྒྲོལ་དཀར་ཡིད་བཞིན་འཁོར་ལོའི་སྣང་བརྙན། ཆོས་གྲྭར་ཕེབས་སྐབས་འདིང་རྒྱུའི་བཞུགས་གདན་གསར་བཟོས་སྤུས་ལེགས། དུང་དཀར་གཅིག །བྱུར་དཀར་གྱི་འཕྲེང་བ་གཅིག །གོས་ཆེན་དཀར་པོ་གཅིག །ཧ་སག་དཀར་པོ་གཅིག །ཕྲུག་དཀར་པོ་གཅིག །ཁེ་བེ་
སུ་དཀར་པོ་གཅིག །ཤིན་ཐུས་དཀར་པོ་གཉིས། ཏྭ་ཆེན་དཀར་པོ་གསུམ། རས་ཆེན་དཀར་པོ་ཡུག་བཅོ་ལྔ། གྲྭ་ས་སོ་སོའི་གཏོང་སྒོའི་ཞལ་འདེབས་ལྟ་བུར་དངུལ་དཀར་པོ་སྲང་སྟོང་ཕྲག་གཅིག །ཆོས་གྲྭར་ཕེབས་བཞིན་པའི་ཟླ་བ་རེ་ལ་སྲང་གསུམ་རེའི་དབང་དུ་བྱས་ཏེ་ལོ་གསུམ་གྱི་གུང་ཚིགས་ཐེབས་དངུལ་སྲང་བརྒྱ་དང་བརྒྱད། རྟ་ལྔ། མཛོད་བཏགས་བཅུ། ཚོས་འདོན་ཉི་ཤུ། བསོད་བཏགས་སུམ་བརྒྱ། ཞོ་དར་བརྒྱ། བཀྲ་ཤིས་པའི་ལྷ་རྫས་དང་བཅས་ཁྱོན་རྣམ་གྲངས་སྟོང་དང་ལྔ་བརྒྱ་བདུན་ཅུ་དོན་གསུམ་འབུལ་ལམ་ཞུ་ལགས་པས། རང་ཅག་ལྟོས་བཅས་ཐམས་ཅད་བྱང་ཆུབ་སྙིང་པོའི་བར་དུ་འབྲལ་མེད་རྗེས་སུ་འཛིན་ཅིང། ཁྱད་པར་དབུས་འགྱུར་ཆོས་ཀྱི་ཞིང་ས་ནས་ཐུབ་བསྟན་ཡོངས་སུ་རྫོགས་པའི་གན་མཛོད་བདག་གིར་བཞེས་ཏེ་ཆེར་མ་འགྱང་བར་གདན་ས་འདི་ཉིད་དུ་ཕེབས་ནས་ཟབ་རྒྱས་ཆོས་ཀྱི་འཁོར་ལོ་རྒྱ་ཆེར་བསྐོར་ཏེ་ཐར་འདོད་ཡོངས་ཀྱི་བློ་མིག་འབྱེད་ཅིང། འཇམ་མགོན་རྒྱལ་བ་གཉིས་པའི་བསྟན་པ་ཉི་མ་བཞིན་དུ་གསལ་བར་མཛད་དུ་གསོལ་ཞེས་གསོལ་བ་སྙིང་ནས་འདེབས་པ་ལགས། ཞེས་པའི་ཞུ་ཐོ་དོན་མཐུན་དང་བཅས་འབུལ་བ་ཕུལ། དེ་ནས་ཞབས་སྡོད་བགྲེས་གཞོན་མཐའ་དག་འཛོམ་སར། རྗེ་ཉིད་དང་པོར་དགུང་ལོ་བཅུ་བདུན་ཐོག་དབུས་སུ་ཕེབས་ཏེ་གསན་སྦྱངས་གནང་ཚུལ། གྲྭ་ས་སོ་སོར་གཏོང་སྒོ་གནང་ཚུལ། དགུང་ལོ་ཉེར་ལྔའི་ཐོག་ལྷ་རམས་པའི་མཚན་བཏགས་མཛད་ནས་ཕྱི་ལོ་༸ཀུན་མཁྱེན་གོང་མ་དང་ལྷན་དུ་གདན་སར་བྱོན་ཚུལ། སྐུ་ཞབས་གོང་མ་དེ་ཉིད་རྗེ་ཉིད་ལ་བཀའ་དྲིན་ཐུགས་རྗེ་གཞན་དང་མི་འདྲ་བས་ཐུགས་དགོངས་རྫོགས་ཕྱིར་དག་ཞིང་དུ་ཕེབས་པ་ནས་བཟུང་མཆོག་
སྤྲུལ་རིན་པོ་ཆེ་ཉིད་གདན་སར་བྱོན་གྱི་བར་དུ་དགོན་པའི་འཛིན་སྐྱོང་གནང་ཚུལ། དེ་རྗེས་སྨོན་ལམ་ཆེན་མོའི་གཏོང་སྒོ། རིམ་བྱོན་གྱི་སྤྱན་ལྟོས་དང་རྟེན་བཞེངས་ཀྱི་སྲོལ་ལྟ་བུར་འཁྲུངས་རབས་ལྷ་ཁང་དང། མཆོད་རྟེན་མཐོང་གྲོལ་ཆེན་མོ་བཞེངས་ཚུལ། དེ་ནས་ཕེབས་བཞུད་བཙན་ཆོད་གནང་ཚུལ་དང། སྐུ་ཞབས་མཆོག་ནས་ཀྱང་དབུས་གཙང་དུ་རྒྱལ་བ་གཉིས་པའི་རྣམ་ཐར་བཞིན་ཐུན་མོང་གི་སྣང་ཚོད་དང་མཐུན་པར་མདོ་སྔགས་རིག་གནས་མཐའ་དག།།ཐ་ན་འདོན་རྟ་དབྱངས་ཕྱག་ལེན་ཕྲན་ཚེགས་སོགས་གང་ཐད་ནས་གཅིག་ཀྱང་ལུས་པ་མེད་པར་གསན་སྦྱངས་ཧུར་བསྐྱེད་གནང་སྟེ་མདོ་སྔགས་བསྟན་པའི་མངའ་བདག་མཛད་དགོས་ཚུལ། དད་རྫས་ཆུད་ཟོས་སུ་མི་འགྲོ་བར་ཆོས་སུ་འགྲོ་ཐབས་གནང་དགོས་ཚུལ། མདོར་ན་ཀུན་མཁྱེན་གོང་མ་གཉིས་ཀྱི་མཛད་པ་ལྟར་སྙན་པའི་གྲགས་པས་ས་སྟེང་ཀུན་ཏུ་ཁྱབ་པ་ཞིག་དབུས་འགྱུར་ཆོས་ཀྱི་ཞིང་ས་དེ་ནས་འབྱུང་དགོས་ཚུལ་སོགས་བསླབ་བྱ་ཟབ་ཅིང་བརླིང་བ་ཞུས། ཐོ་ཡོན་ལྷ་བཙུན་རིན་པོ་ཆེར་ལྷོ་བྲག་སྙན་རྒྱུད་ཀྱི་དབང་རྗེས་གནང། བདེ་མཆོག་ནག་པོ་ལུགས་ཀྱི་དབང། ཕྱག་རྡོར་གཏུམ་ཆེན་གྱི་རྗེས་གནང། རྗེ་ཉིད་ཀྱི་བཀའ་རྩོམ་པོ་ཏི་ལྔ་ལྷག་ཙམ་གྱི་ལུང། རྡོ་རམས་པ་ངག་དབང་ཡོན་ཏན་གྱིས་ཞུས་ངོར། དབུ་མའི་ལྟ་ཁྲིད། འཇིགས་བྱེད་བསྐྱེད་རིམ་གྱི་ཁྲིད། རྗེ་བླ་མའི་བསྟོད་པ་དོན་དང་ལྡན་པའི་བཤད་ལུང། གཞན་ཡང་ཀླུ་དབང་གཙོ་འཁོར་ལྔ་པ། འཇམ་དབྱངས་ནག་པོ། རྣམ་སྲས། རྣམ་འཇོམས། ཚེ་དཔག་མེད། སྒྲོལ་དཀར། ཁྱུང་ནག་སོགས་ཀྱི་རྗེས་གནང། ཞི་ཁྲོ་སྦྲགས་སྒྲུབ་ཀྱི་ཁྲིད་ཡིག་གི་གསུང་བཤད་སོགས་སྩལ། ལྔ་པའི་བཅུ་གཅིག་གི་ཉིན། སྐྱབས་མགོན་མཆོག་སྤྲུལ་རིན་པོ་ཆེར་ཚེ་དབང། འཇམ་དབྱངས་
དཀར་པོ། མགོན་པོ་བར་ཆད་ཀུན་སེལ་གསུམ་གྱི་རྗེས་གནང་ཕུལ། ཀུན་གཟིགས་སྤྲུལ་བའི་སྐུ་རིན་པོ་ཆེ་ནས་ཀྱང་སྐུ་གསུང་ཐུགས་རྟེན། དངུལ་གྱི་མཎྜལ་སྣེ་འདོགས་ཅན། དངུལ་རྡོ་ཚད་ལྔ། གོས་དར་སྣམ་ཕྲུག་སོགས་དང་བཅས་ཞབས་པད་བརྟན་པ་དང། བསྟན་འགྲོར་སྨན་པའི་ཐུགས་བསྐྱེད་གང་དྲག་གནང་དགོས་ཚུལ་ནན་གྱིས་ཞུས་པར། ཐུགས་ཤིན་ཏུ་དགྱེས་ཉམས་དང་བཅས་ཞལ་གྱིས་བཞེས། མཆོག་སྤྲུལ་རིན་པོ་ཆེ་ནས་འབྲལ་སྤངས་ལྟ་བུར་བསྣམས་ཆེད་དགོས་གསུངས་པ་ལྟར་རྗེ་ཉིད་ཀྱི་ཕྱག་དྲིལ་དང། སྐུ་ཆོས་རྙིང་པ་བཅས་ཕུལ། ཉིན་འདིར་སྐུ་མདུན་དུ་གསེར་ཁྲི་རྣམ་གསུམ་ཞལ་འཛོམ་སྟེ། རྒྱལ་བ་སེངྒེ་ང་རོའི་ལྷ་ཁང་རྟེན་བཅས་བཞེང་རྒྱུར་ཐག་བཅད་པ་ན་སྡེ་ཁྲི་རིན་པོ་ཆེ་ནས་སྐུ་མདུན་དུ་དབུས་རྫོངས་འབྱོར། རྗེ་འདི་པས་འདི་ལྟར་ན་སྡེ་པ་ཚང་ནས་རྟེན་བཞེངས་འདི་ལྟ་བུ་ཞིག་འགྲུབ་པ་འདྲ་གསུངས་པར། ཡབ་སྲས་གཞན་རྣམས་ཀྱིས་དེ་བཞིན་དུ་གྱུར་ཅིག་ཅེས་པའི་བདེན་པ་བརྗོད་པས་མ་འགྱང་བར་ཁོང་ནས་ཀྱང་སྐལ་བཟང་ལྷ་ཁང་རྟེན་དང་བརྟེན་པར་བཅས་པ་བཞེངས་པ་ལྐོག་གྱུར་ཇི་བཞིན་གཟིགས་པའི་རྣམ་ཐར་ཟླ་མེད་པར་ངེས། བཅུ་གཉིས་ཀྱི་ཉིན་ཆིབས་སྐྱེལ་དང་སྦྲགས་རིམ་གྱིས་ཡབ་སྲས་ལྷན་དུ་པཎ་ཆེན་ཐང་བར་དུ་ཕེབས། གྲྭ་ས་གྲྭ་ཚང་ལ་གཏོང་སྒོ། རྒྱལ་བ་ཡབ་སྲས་ལ་མཚམས་ཞུས་སོགས་ཀྱི་ཆེད་དུ་དབོན་པོ་ལྷུན་གྲུབ་ངོ་གཡོག་དབུས་སུ་བརྫངས། བཅུ་དྲུག་གི་ཉིན་རྗེ་འདི་དང་ཁྲི་ཆེན་དཔལ་ལྡན་གྲགས་པའི་སྤྲུལ་བའི་སྐུ་འཇིགས་མེད་རིགས་པའི་སེངྒེ། ཁྲི་ཆེན་ནམ་མཁའ་བཟང་སྤྲུལ་བའི་སྐུ་འཇིགས་མེད་ནམ་མཁའ་བཅས་ཕྱིར་གདན་སར་འབྱོན་རྒྱུར། ༸སྐྱབས་མགོན་
མཆོག་ནས་ཆིབས་ཞལ་ལན་གསུམ་བསྒྱུར་བ་སོགས་ཐུགས་འཕྲེང་བའི་རྣམ་པ་ཆེར་མཛད། སླར་གདན་སར་བྱོན་ནས་ཚེས་ཉེར་ལྔའི་ཉིན་གསེར་ཁྲི་རྣམ་གསུམ་ཞལ་འཛོམ་སྟེ། རྒྱལ་བ་སེངྒེ་ང་རོའི་ལྷ་ཁང་ཆེན་མོ་གསར་བཞེངས་ཀྱི་སར་རྩིག་པའི་འགྲམ་ཐིག་དང་ཤིས་བརྗོད་རྒྱས་པར་གནང། ཁྲི་ཆེན་སྤྲུལ་བའི་སྐུ་འཇིགས་མེད་ནམ་མཁའ་ནས། འཇིགས་བྱེད་དཔའ་བོ་གཅིག་པའི་དབང་ཞིག་གནང་དགོས་ཞུས་པས། ཉིན་གཉིས་ཀྱི་རིང་ལ་གསུང་བཤད་ཕྱག་ལེན་ཞིབ་རྒྱས་དང་བཅས་ཏེ་སྩལ། ཁོང་ཡང་ཐུགས་ཤིན་ཏུ་དགྱེས་ཏེ་སྔར་ཡབ་རྗེ་རྡོ་རྗེ་འཆང་ནས། དཔའ་གཅིག་གི་བདག་འཇུག་མ་ཆག་པ་གྱིས་གསུངས་པ་ལྟར་ཆག་མེད་བྱེད་བཞིན་པ་ཡིན་ཀྱང། ད་རེས་སླར་ཡང་གདན་ས་ཆེན་པོ་འདིར་དབང་སྨིན་རྒྱས་སུ་ཐོབ་པ་སྐལ་བ་བཟང། གསུང་བཤད་མཁས་བཤད་ཙམ་མིན་པར་རྟོགས་པ་མཐོ་བའི་ཉམས་ཐོན་ཞིང་གསང་བའི་གནད་ལྷག་པར་སྩལ་ཆེ་བས་སངས་རྒྱས་དངོས་སུ་འདུག་ཅེས་གསུངས། ཕྱིས་པེ་ཅིན་དུ་ཕེབས་ནས་གསེར་གྱི་མཎྜལ་ཞིག་བསྐུར་འབུལ་མཛད་སྐབས། ཞིང་འདི་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་ལ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེར་ཤེས་རབ་ཅན་གྱིས་དབུལ། །ཞེས་ཞུས་པའི་ལན་དུ། ཞིང་འདི་རིན་ཆེན་སྣ་བདུན་གྱི། །མཁས་པས་བཀང་སྟེ་ཕུལ་བ་ལ། །དངོས་གྲུབ་སྦྱིན་པར་མི་ནུས་ཀྱང། །ཉིན་རེ་བཞིན་དུ་དབུལ་བར་བགྱི། །ཞེས་ཞལ་རྩེད་གནང་འདུག །བྱང་ཆུབ་རྡོ་རྗེས་སངས་རྒྱས་རིགས་ལྔ་ལ། །མཆོད་ཆེན་ཇི་ལྟར་སྩལ་བ་དེ་ལྟར་དུ། །འགྲོ་ཀུན་བསྒྲལ་ཕྱིར་གསང་གསུམ་རོལ་གར་མཁན། །དེ་དག་ནམ་མཁའི་རྡོ་རྗེར་དེང་བདག་ཁུམས། །ཟླ་བ་དྲུག་པའི་ཚེས་གཅིག་ནས་རི་
ཁྲོད་དུ་བཅད་རྒྱ་དམ་པར་མཛད་ཅིང། དབྱར་ཞལ་གྱིས་བཞེས། དགག་དབྱེའི་ཉིན་སྐུ་མཚམས་གྲོལ་ཞིང་དེའི་ཕྱི་ཉིན་ལྗོངས་རྒྱུ་མཛད། མི་ཏྲའི་དཀྱིལ་འཁོར་གསར་པ་བཞེངས་གྲུབ་པར་བཟོ་བོ་རྣམས་ཡོན་གྱིས་ཚིམ་པར་མཛད། ཚེས་ལྔའི་ཉིན་འཆར་ཅན་མཆོད་མཇལ་གནང། ཚོགས་ཆེན་མགོན་ཁང་དུ་ཕེབས་ནས་འཕྲིན་བཅོལ་དང་ཞིབ་གཟིགས་ངོས་རྒྱུད་པའི་མགོན་ཁང་གསར་པར་འཇིགས་བྱེད་དང། མགོན་ཆོས་ཀྱི་ལྡེམ་སྐུ་གསར་བཞེངས་ཀྱི་བཀོད་ཁྱབ་ཞིབ་པར་མཛད། ཟླ་བ་བརྒྱད་པའི་བཅུ་གསུམ་ནས་གནས་མཇལ་ལ་ཕེབས་པའི་ཐོག་མར་དགེ་ལྡན་བསྟན་པའི་ཆུ་མགོར་བསྔགས་པར་འོས་པ་བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་དུ་བྱོན། འཇམ་དབྱངས་སྒྲུབ་ཁང་དུ་ཞག་ཁ་ཤས་བཞུགས་ནས་བདག་འཇུག་སོགས་བཞེས། བསྐལ་བཟང་རྣམ་འདྲེན་སྟོང་གི་ཐ་མ་མ་བྱོན་སངས་རྒྱས་མོས་པར་འབྱོན་འགྱུར་ཆོས་ཀྱི་རྗེ་དོན་གྲུབ་རིན་ཆེན་པའི་སྐུ་གདུང་ཡིད་བཞིན་གྱི་ནོར་བུ་རིན་པོ་ཆེ་ནས་གཙོས་པའི་རྟེན་རྣམས་ལ་མཆོད་མཇལ་ཞིབ་རྒྱས་དང་ཚོགས་མང་ནས་ནན་ཞུས་ངོར་ལམ་གཙོའི་ཁྲིད་གང་རྒྱས་གནང། ལྷ་ཆེན་དཔལ་འབར་ལ་ཕེབས་ལམ་ནས་ཨན་ཆུང་གནམ་རྫོང་གཟིགས་ཏེ་མཁས་པ་མི་གསུམ་གྱི་སྒྲུབ་གནས་ཡིན་གསུངས་ཏེ་ཐུགས་འུར་བའི་ཉམས་མཛད། ལུམྦི་ནའི་སྐྱེད་ཚལ་གཉིས་པ་སྐུ་འབུམ་བྱམས་པ་གླིང་དུ་བྱོན། འཇམ་མགོན་རྒྱལ་བ་གཉིས་པ་ཙོང་ཁ་པ་ཆེན་པོ་སྤྲུལ་བའི་གར་གྱིས་རོལ་ཏེ། ལྟེ་ཁྲག་འཛིན་མར་ལྷུང་བའི་ས་བོན་ལས་བྱང་ཆུབ་ཤིང་འཁྲུངས་པའི་ལོ་མ་ལ་རྒྱལ་བ་སེངྒེ་ང་རོའི་སྐུ་འབུམ་ཕྲག་བྱོན་པ་སྙིང་པོར་བྱས་པའི་མཆོད་སྡོང་ཆེན་མོ་
དང། དེ་ཉིད་བཞུགས་པའི་གཙུག་ལག་ཁང་སྟུག་པོ་བཀོད་པའི་ཕོ་བྲང་ས་ལ་འཕོས་པ་ལྟ་བུ་དེ་ཉིད་ཀྱིས་མཚོན་སྐུ་གསུང་ཐུགས་རྟེན་དང་ལྷ་ཁང་སོ་སོར་ཞིབ་མཇལ་ཞུས། གྲྭ་མང་ལ་དགའ་ལྡན་ལྷ་བརྒྱ་མའི་ཁྲིད། འཇམ་དབྱངས་དང་སྒྲོལ་མའི་རྗེས་གནང། མཚན་བརྗོད་གདུགས་དཀར། བླ་མཆོད། ཆོས་སྤྱོད་གསལ་བའི་སྒྲོན་མེ་སོགས་ཀྱི་ལུང། སྨན་པ་གྲྭ་ཚང་ལ་སྨན་ཆོག་གི་ལུང། བཤད་སྒྲུབ་གླིང་གི་ཆོས་གྲྭར་མངོན་རྟོགས་རྒྱན་སྐབས་དང་པོ་ལ་གསུང་བཤད་དང། དམ་བཅའ་ཚུགས་པར་གཟིགས་རྟོག་མཛད། ཆོས་གྲྭ་ཆེན་པོ་གསེར་དགོན་དང་ཆུ་བཟང་དགོན་གཉིས་ལ་ཡང་ཕེབས། བཀའ་ཆོས་དང་གསུང་རྩོམ་གང་ཞུས་འཕྲལ་དུ་གནང། སྟག་རྩེའི་ཇོ་བོ་སོགས་རྟེན་སོ་སོར་མཆོད་མཇལ་ཞིབ་རྒྱས་མཛད། ཆུ་བཟང་རིན་པོ་ཆེར་མཎྜལ་སྐུ་གསུང་ཐུགས་རྟེན་གོས་ཡུག་སོགས་དང་བཅས་མཇལ་ཞུ་མཛད་དེ་ཞལ་གདམས་ཐུགས་ལ་བརྣག་པ་ཇི་ལྟ་བ་བཞིན་དུ་དྲང་པོར་ཞུས། དགོན་ལུང་དུ་ཞག་ཉི་ཤུ་རྩ་གྲངས་བཞུགས་ཏེ་མཆོད་མཇལ་དང། ཐུའུ་བཀྭན་མཆོག་སྤྲུལ་རིན་པོ་ཆེར་མཎྜལ་སྐུ་གསུང་ཐུགས་རྟེན། དངུལ་རྡོ་ཚད། རྟ་བཟང་གཉིས་བཅས་ཕུལ་ཏེ། ཁྱེད་རྡོ་རྗེ་འཆང་དེའི་སྤྲུལ་སྐུ་འཁྲུལ་མེད་ཡིན། ངེད་ཚོས་ཀྱང་བློ་རྩེ་དཀོན་མཆོག་ལ་གཏད། ལས་འབྲས་དཔང་པོར་བཞག་སྟེ་བཙལ། ཁྱེད་རང་གིས་ཀྱང་ཐུགས་རྗེ་གཟིགས་པ་ཡིན་པས་དེ་དོན་བཞིན་སྐུ་གོང་མ་རྣམས་དང་འདྲ་བར་བསྟན་པའི་བདག་པོ་ཞིག་གནང་དགོས་ཞེས་ཞུས་པས་སྐུ་ན་ཧ་ཅང་ཕྲ་རུང་ཐུགས་ཤིན་ཏུ་དགྱེས་པའི་ཉམས་མཛད་ཀྱིན་སྣང། ཞེས་ཞལ་ནས་གསུངས། འདི་སྐབས་དྲེའུ་ཁ་ཤས་ལས་མེད་པའི་སྟབས་བདེ་བྱ་བྲལ་གྱི་ཚུལ་གྱིས་ཕེབས་པ་བྱ་ཁྱུང་དུ་གློ་བུར་
བར་སོང་བ་དང་སྤྲོས་པའི་རིགས་མ་བྱེད་ཅེས་གསུངས་པ་ལྟར་བྱུང་བས། ཉིན་མཚན་གཉིས་ཀར་བསྐོར་བ་དང་གནས་གཟིགས་སོགས་ཐུགས་བཞེད་ལྟར་དང། སྐུ་འབུམ་དུ་སྤྲོས་པ་བཀག་ཀྱང་མ་ཁེགས་པས་མཚན་མོ་ཞབས་སྐོར་མཛད། དེ་ནས་བཟུང་སྟེ་ཆིབས་བསུ་སྐྱེལ་སེར་སྦྲེང་སོགས་སྤྲོས་པ་བར་མ་ཆད་པས་ཐུགས་བཞེད་ལྟར་གྱི་ཕྱག་སྐོར་སོགས་མ་གྲུབ། མཇལ་དར་ཙམ་ཡང་བཞེས་རྩིས་མེད་ཀྱང་ཕྱིར་ཡང་ཡང་འཕངས་པས་ཐབས་མ་རྙེད་པར་བཞེས་དགོས་བྱུང། འབུལ་བའི་རིགས་ཕྱིར་སློག་སྟེ་མང་འགྱེད་དང། རྟེན་སོ་སོར་མཆོད་འབུལ་གང་རྒྱས། ཞལ་འདོན་སྐབས་བབ་རྣམ་པ་དོད་ཅིང་ངོ་མཚར་བ་མཛད་པ་སོགས་བྲི་བར་མ་ལང། ལྕང་སྐྱ་བླ་བྲང་དང། ཐུའུ་བཀྭན་བླ་བྲང་གི་ནང་རྟེན་སོ་སོར་ཞིབ་མཇལ་དང་རྒྱུད་ཁང་རབ་གནས་ཀྱང་མཛད། ཐུའུ་བཀྭན་མཆོག་སྤྲུལ་རིན་པོ་ཆེར་ཚིགས་སྔ་མ་དགེ་ཚུལ་གྱི་སྡོམ་པ་སྩལ་ཏེ་མཚན་བློ་བཟང་ཐུབ་བསྟན་ཆོས་ཀྱི་རྒྱལ་མཚན་དུ་གསོལ། ལམ་གཙོའི་ཁྲིད། དགའ་ལྡན་ལྷ་བརྒྱ་མའི་ཁྲིད། ལམ་སྒྲོན། རྒྱན་འཇུག་གཉིས། ཆོས་སྐྱོང་ཚང་མའི་གཏོར་ཆོག །ཀུན་མཁྱེན་སྐུ་འཕྲེང་གཉིས་པའི་ཡི་དམ་སྒྲུབ་སྐོར་དང་དཔའ་གཅིག་རྒྱས་བསྡུས། གཟུངས་དང་བསྟོད་པ་སྣ་ཚོགས། བླ་མ་མཆོད་པ་དང། ཕྱག་ཆེན་རྩ་བ་གསོལ་འདེབས་དང་བཅས་པ། ཤེས་བྱའི་མཁའ་དབྱིངས་མ། བདེ་ལམ་ཚིགས་བཅད་མ་སོགས་བཀའ་རྩོམ་འགའ། ཁྱད་པར་འཕགས་བསྟོད། ལྷ་ལས་ཕུལ་བྱུང་གི་བསྟོད་པ། སྨོན་ལམ་བདུན་ཅུ་པ་སོགས་ཉེར་མཁོའི་ལུང་དུ་མ། འཇིགས་བྱེད་བཅུ་གསུམ་མའི་དབང། འཇམ་དབྱངས་དཀར་པོ། དབྱངས་
ཅན་མ་དཀར་མོ། འཇིགས་བྱེད་ཡུམ་བཅས། ཀླུ་དབང་རྒྱལ་པོ། སྣ་ཚོགས་ཡུམ། ལོ་གྱོན་མ་གཙོ་འཁོར་གསུམ་པ། བདེ་མཆོག་དཀར་པོ། ཁྱུང་ཁྲ། དྲག་པོ་སུམ་སྒྲིལ། རྣམ་འཇོམས། སྨེ་བརྩེགས། རྡོར་སེམས་ཡུམ་བཅས། རྣམ་སྲས་སེར་ཆེན། དཔལ་མགོན་སོགས་ཀྱི་རྗེས་གནང། སྐུ་ཞབས་རིན་པོ་ཆེ་གཅིག་པུར་ཞལ་སྒྲུབ་དུས་ཀྱི་ཐུན་མོང་མ་ཡིན་པའི་རྗེས་གནང་དང། གཞན་འགའ་ཞིག་ལ་ཞལ་བྲམ་གཟུགས་དང། སེར་པོ་རྒྱས་བྱེད་ལྷ་དགུ། མགོན་པོ་སྙིང་ཞུགས་དང་ཆོས་རྒྱལ་ཕྱི་ནང་གསང་གསུམ་སོགས་ཀྱི་རྗེས་གནང། ཉན་མཁན་ཧྲག་བསྡུས་ལ་དཔའ་གཅིག་གི་དབང། གསང་འདུས་ཀྱི་དབང། བདེ་མཆོག་ལྷ་ལྔའི་དབང། ལྷོ་བྲག་སྙན་བརྒྱུད་ནས་འབྱུང་བའི་རྣམ་འཇོམས་ཀྱི་དབང། སྨན་བླ་མཆེད་བདུན། འཇམ་དབྱངས་དཀར་པོ། སྒྲོལ་དཀར། འཇིགས་བྱེད། རྟ་མགྲིན། རྣམ་སྲས་སེར་ཆེན། མདུང་དམར་ཅན། དམག་ཟོར་མ། ལྕམ་སྲིང། དབྱངས་ཅན་མ། གཏུམ་པོ་མེ་འབར་དྲག་པོ་སོགས་ཀྱི་རྗེས་གནང་དང་ལུང་དུ་མ་སྩལ་ཞིང་བཀའ་རྩོམ་ཡང་མང་དུ་གནང། ཆུ་བཟང་གསེར་ཁོག །སྐུ་འབུམ་སོགས་ནས་ཆེད་གཏད་ཀྱིས་འོངས་པ་དང་བཅས་བསྙེན་རྫོགས་པ་རེ་ལྔ་དང། དགེ་ཚུལ་བཅོ་བརྒྱད་ཀྱི་རེ་བ་བསྐངས། དེ་ནས་དམར་གཙང་བྲག་ཏུ་ཕེབས་ཏེ་བསྟན་པ་ཕྱི་དར་གྱི་ཐོག་མར་བསྟན་པའི་མེ་རོ་གསོ་བའི་བཀའ་དྲིན་ཅན་བླ་ཆེན་པོ་དགོངས་པར་རབ་གསལ་བའི་སྐུ་དངོས་ཀྱི་མདུན་དུ་བརྒྱ་མཆོད་དང། དར་ཚོན་སྣ་ལྔའི་སྙན་ཤལ་ཕུལ་ཏེ་བསྟན་པ་རྒྱས་པའི་ཐུགས་སྨོན་གནང། གདུང་མདུན་དེར་ཏཱ་རི་ཀང་ཀའི་པཎྚི་ཏ་བླ་མ་ཆེད་གཏད་ཀྱིས་
འོང་བར་འདུལ་བ་རྒྱ་མཚོའི་སྙིང་པོ་སོགས་ཀྱི་ལུང་དང། དགོན་ལུང་ཁྲི་པ་ཨོའུ་ཤི་ཞབས་དྲུང་གི་སྤྲུལ་སྐུ་རབ་བྱུང་བསྒྲུབས་ནས་མིང་དཀོན་མཆོག་བསྟན་པ་རབ་རྒྱས་སུ་བཏགས་ཏེ་རྟེན་འབྲེལ་བསྒྲིགས། དེ་ནས་གྲོ་ཚང་དགོན་དུ་ཕེབས། གྲོ་ཚང་བླ་བྲང་ལ་རབ་གནས་དང། གྲོ་ཚང་སྤྲུལ་སྐུར་མགོན་པོ་བཀའ་བཅུ་གསུམ་གྱི་རྗེས་གནང། ཚོགས་མང་ལ་བཅུ་གཅིག་ཞལ་གྱི་དབང་སྟ་གོན་དང་བཅས་པ། ཀ་རིང་བླ་བྲང་དུ་སྤྲུལ་བའི་སྐུ་དཀོན་མཆོག་བསྟན་འཛིན་རྒྱལ་མཚན་ལ་རྡོར་སེམས་ཀྱི་རྗེས་གནང། ཆོས་སྤྱོད་གསལ་སྒྲོན་གྱི་ལུང་སྩལ། གྲོ་ཚང་ནང་འོག་མར་རྗེ་རིན་པོ་ཆེའི་གཎྜི་བཞུགས་པ་དང། རྡོ་རྗེ་འཆང་གི་ལྷ་ཁང། ཇོ་བོའི་ལྷ་ཁང་རིན་ཆེན་འོད་འབར། གོ་ཏམ་སྡེར་གྲགས་པའི་དུས་གསུམ་སངས་རྒྱས་ཀྱི་ལྷ་ཁང་སོགས་ལ་མཆོད་མཇལ་དང་ཏཱའི་མིང་རིམ་བྱོན་གྱིས་བཞེངས་པའི་ལོ་རྒྱུས་དང་གསུང་འཕྲོས་ཞིབ་ངོ་འཕྲོད་པ་གནང། གྲོ་ཚང་གཞིས་སུ་ཡང་རྗེ་རིན་པོ་ཆེས་བྱ་ཁྱུང་ནས་གཙུག་ཕུད་ཕུལ་བའི་སྟོན་པ་དུང་གཡས་འཁྱིལ་དུ་གྲགས་པ་སོགས་ལ་ཞིབ་མཇལ་མཛད་ཅིང་ཐུགས་སྨོན་རྒྱ་གང་ཆེ་གནང། གྲོ་ཚང་སྤྲུལ་སྐུ་བློ་བཟང་དཀོན་མཆོག་ཉི་མས་མགོན་པོ་སྙིང་ཞུགས་ཀྱི་རྗེས་གནང་ཞུས་པའི་ཐུགས་བཞེད་བསྐངས། དེ་ཡང་བསྟན་པ་སྔ་དར་གྱི་དུས་ནས་ད་ལྟའི་བར་དུ་ཐུབ་བསྟན་བཤད་སྒྲུབ་ཀྱི་རྒྱུན་བར་མ་ཆད་དུ་གནས་ཤིང། མཁས་པ་མི་གསུམ་གྱིས་དབེན་གནས་སོ་སོར་སྒྲུབ་པའི་རྒྱལ་མཚན་བཙུགས་ཏེ་བླ་ཆེན་པོ་དགོངས་པ་རབ་གསལ་ཐུབ་པའི་གདུང་འཚོབ་ཏུ་དབང་བསྐུར་བའི་བཀའ་དྲིན་ལས་བསྟན་པ་ཕྱི་དར་ཞེས་གྲགས་པའི་དུས་འདིའི་ཚུལ་ཁྲིམས་རྣམ་དག་གི་བདུད་རྩིའི་ཆུ་རྒྱུན་གང་ལས་བབ་
པའི་ཁུངས་དང། ཉེས་པའི་བུད་ཤིང་ལྷག་མེད་དུ་སྲེག་བྱེད་སྡེ་སྣོད་བཤད་སྒྲུབ་ཀྱི་བསྟན་པའི་མེ་རོ་གང་ནས་བསླངས་པའི་གཞིར་གྱུར་ཅིང། འཇམ་མགོན་ས་སྐྱ་པཎ་ཆེན་དང་འགྲོ་མགོན་ཆོས་རྒྱལ་འཕགས་པའི་བཀའ་དྲིན་ལས་མདོ་སྔགས་ཀྱི་འཆད་ཉན་དང། སྒྲུབ་རྒྱུད་འཛིན་པའི་དགེ་འདུན་ཡུལ་གྱི་ཐ་གྲུ་ཀུན་ཏུ་ཁྱབ་པ། ཀརྨ་རིམ་བྱོན་སོགས་རིས་མེད་མཁས་གྲུབ་དུ་མས་བསྟན་པའི་རྒྱུན་རྒྱ་ཆེར་སྤེལ་ཞིང། སྒྲུབ་པ་སྙིང་པོར་མཛད་པའི་སྒྲུབ་གནས་ཀྱི་ཕྲེང་བ་ཚར་དུ་དངར་བ། ཤར་ཕྱོགས་རིགས་པའི་དཔའ་བོ་ཆོས་ཀྱི་རྗེ་དོན་གྲུབ་རིན་ཆེན་དང། རྒྱལ་བ་གཉིས་པ་ཤར་ཙོང་ཁ་པ་ཆེན་པོས་སྤྲུལ་བའི་ཟློས་གར་མངོན་པར་བསྟན་ཏེ། འཇམ་དཔལ་ཞི་ཁྲོ་བསྙེན་ཅིང་བསྒྲུབས་པའི་མཐུ་ལས། དུས་ཀྱི་མཐར་ཡང་སྐལ་བཟང་གདུལ་བྱ་མཐའ་དག་འཇམ་དབྱངས་གསུང་གི་བདུད་རྩིའི་རྩེ་དགའ་ལ་སྤྱོད་པའི་སྐལ་བཟང་མི་ཉམས་པར་གནས་པ། གངས་ཅན་འགྲོ་བའི་མགོན་པོ་རྒྱལ་བ་ཡབ་སྲས་རིམ་བྱོན་གྱིས་ཞབས་ཀྱིས་བཅགས་ཤིང། འཕྲིན་ལས་བཟང་པོས་བསྐྱངས་པའི་མཐུ་ལས་མདོ་སྔགས་བཤད་སྒྲུབ་ཀྱི་ཆ་ཤས་ཡོངས་སུ་རྫོགས་པའི་དགའ་སྟོན་ཟླ་བ་ཉ་གང་བ་ལ་འགྲན་པའི་ཆོས་སྡེ་ཆེན་པོ་དུ་མ་དང། བཤད་པ་དང་སྒྲུབ་པའི་སྦྲང་རྩིའི་བཅུད་ཀྱིས་ཚིམ་པའི་འདུས་སྡེ་ཆེ་ཕྲ་དུ་མས་བར་མཚམས་མེད་པར་ཁྱབ་པ། སྤངས་པ་དང་རྟོགས་པའི་ཡོན་ཏན་གྱི་ཁྲི་འཕང་མཐོན་པོར་ཆེན་པོར་བསྔགས་པའི་ལུང་ལས་ཀྱི་འཕྱང་འཕྲུལ་རྣམ་པར་གཡོ་བའི་སྐྱེས་ཆེན་དམ་པའི་འཕྲེང་བ་རིམ་བྱོན་བསྟན་འགྲོའི་ཕན་བདེ་སྐྱོང་བཞིན་པར་བཞུགས་པའི་དགའ་སྟོན་ཉམས་པ་མེད་པས་ཡུལ་དབུས་ཆོས་ཀྱི་ཞིང་ས་ལྗོངས་འདིར་འཕོས་པ་ལྟ་
བུ་མདོ་སྨད་ཙོང་ཁ་སྤྲུལ་བའི་ཞིང་ཞེས་ཡོངས་སུ་གྲགས་པའི་གནས་དེར་སྲིད་མཐའི་བར་དུ་ཐུབ་པའི་རིང་ལུགས་ཉམས་པ་མེད་པར་བཤད་པ་དང་སྒྲུབ་པའི་དགེ་འདུན་གྱི་སྡེ་རྣམས་རྒྱལ་བའི་དམ་ཆོས་མཐའ་དག་རྒྱལ་བའི་དགོངས་པ་བཞིན་དུ་འཛིན་ཞིང་སྐྱོང་བ་དང། འཇིག་རྟེན་མཐའ་དག་རྣམ་དཀར་དགེ་བཅུ་སྨིན་པའི་འབྲས་བཟང་ལ་སྤྱོད་ཅིང་སྙིགས་དུས་རྒུད་པའི་གྲང་རེག་དྲུངས་ནས་ཕྱུང་སྟེ་སྲས་བཅས་རྒྱལ་བའི་དགོངས་བཞེད་ལྷུན་གྱིས་གྲུབ་པའི་ཆེད་དུ་བགྲང་ལས་འདས་པའི་གཙུག་ལག་ཁང་དང་སྐུ་གསུང་ཐུགས་རྟེན་ཏིལ་གྱི་གང་བུ་ལྟར་གཏམས་པ་རྣམས་ལ་མཆོད་འབུལ་དང་གསོལ་འདེབས། དགེ་འདུན་གྱི་སྡེ་ཆེ་ཕྲ་སོ་སོར་ཟང་ཟིང་གི་མཆོད་པ་དང་བསྙེན་བཀུར། ཐར་འདོད་དོན་གཉེར་གྱི་ཚོགས་ལ་གང་འཚམ་གྱི་གདམས་པའི་བདུད་རྩི་སོགས་ཕན་ཚུན་འགྲན་བཞིན་སྤེལ་ཞིང་ཀུན་ཏུ་བཟང་པོའི་སྨོན་ལམ་གྱིས་རྒྱས་བཏབ་སྟེ་བསྟན་འགྲོའི་བདེ་སྐྱིད་རྫོགས་ལྡན་གསར་པའི་དཔལ་མོ་སྲིད་མཐའི་བར་དུ་ཉམས་པ་མེད་པའི་དགའ་སྟོན་ལ་འགོད་པར་མཛད་དོ། །མཁས་པ་མི་གསུམ་བླ་ཆེན་དགོངས་པ་གསལ། །དོན་གྲུབ་རིན་ཆེན་རྒྱལ་བ་གཉིས་པ་སོགས། །འདེགས་ནུས་ཀུན་བཟོད་མ་འདིའི་ཕྲ་མོའི་རྡུལ། །གཞིག་བྲལ་རྡོ་རྗེའི་ངོ་བོར་གནས་སམ་སྙམ། །གུར་ཀུམ་མེ་ཏོག་ཚལ་ལ་འགྲན་བཟོད་པའི། །བགྲང་ཡས་དགེ་འདུན་སྡེ་རྣམས་མདོ་སྔགས་ཀྱི། །བཤད་སྒྲུབ་ལ་སྤྱོད་ལྗོངས་འདིའི་འགྲོ་བ་རྣམས། །སྔོན་གྱི་རྒྱལ་ལ་ལྷག་པར་བྱས་པ་སྙམ། །གྲངས་མེད་སྐུ་གསུང་ཐུགས་ཀྱི་རྟེན་རྣམས་ལ། །མཆོད་དང་གུས་པས་བསྙེན་ཅིང་བཀུར་བ་དང། །བལྟ་དང་རེག་དང་དྲན་པར་
བྱས་པ་ཡི། །བསོད་ནམས་ཕུང་པོ་སྲིད་འདིར་ཇི་ལྟར་ཤོང། །འཇམ་དབྱངས་མི་རྗེའི་གཟུགས་ཅན་གནམ་གྱི་ལྷའི། །བཀའ་ཁྲིམས་གསེར་གྱི་གཉའ་ཤིང་ཆེས་ལྕི་བས། །སྙིགས་དུས་སྐྱེ་བོ་མི་བསྲུན་བརླང་སྤྱོད་ལས། །ལྡོག་པ་འདིས་ཀྱང་འཇམ་དཔལ་ཞིང་དུ་ངེས། །དེ་ནས་ཐང་རིང་དུ་ཕེབས། རྒྱལ་བ་བླ་མ་རིན་ཆེན་པས་རྒྱལ་དབང་ལྔ་པར་ཞུས་ཏེ་གདན་དྲངས་པ་སྟོན་པ་དགུང་ལོ་བརྒྱད་པའི་ཚད་ཀྱི་ཇོ་བོ་སོགས་ལ་རྟེན་མཇལ་དང། འདུ་ཁང་ལ་རབ་གནས། དགེ་འདུན་ཡོངས་ལ་ལམ་གཙོའི་བཤད་ལུང། འཇམ་དཔལ་མཚན་བརྗོད་དང། སྨོན་ལམ་རྣམ་ལྔའི་ལུང། མན་ཇུའི་རྒྱལ་རབས་ཐོག་མའི་དུས་ཀྱི་བླ་མ་སེ་ཆེན་ཆོས་རྗེའི་གདན་ས་བ་ཀྱོའི་དགོན་པར་བླ་མ་དེ་ཉིད་ཀྱིས་གདན་དྲངས་པའི་སྨན་བླ་བདེ་གཤེགས་བརྒྱད་སོགས་རྟེན་ཁྱད་འཕགས་རྣམས་ལ་མཆོད་མཇལ་དང། རྒྱལ་པོ་རིམ་བྱོན་གྱིས་གནང་བའི་ཆ་སྤྱད་འགང་ཅན་རྣམས་ལ་ཞིབ་གཟིགས་མཛད། ཆོས་འབྲེལ་ཞིག་ཞུས་ཀྱང་བོད་སྐད་ཤེས་མཁན་མེད་སྟབས་དགའ་ལྡན་ལྷ་བརྒྱ་མའི་ལུང་སྩལ། མཛོ་མོ་མཁར་དུ་བྱམས་ཆེན་ཆོས་རྗེའི་སྐུ་གདུང་དང། རྒྱལ་པོས་བཞེངས་པའི་འདྲ་སྐུ་སོགས་རྟེན་མཇལ་ཞིབ་པར་མཛད་ཅིང་བྱམས་ཆེན་ཆོས་རྗེའི་ཐུགས་དམ་གྱི་རྟེན་བདེ་མཆོག་དང་དུས་འཁོར་གྱི་ཞལ་ཐང་གཉིས་ཕྱག་ཏུ་འབྱོར་བ་ལ་ཐུགས་དགྱེས་ཚོར་ཆེན་པོས་བྲིས་སྐུ་གསར་བཞེངས་ཀྱི་ཐེབས་དང་གསེར་ཟངས་ཀྱི་མཆོད་རྟེན་གཅིག་བཅས་གནང། དེ་ནས་བཏེག་སྟེ་ཕོའུ་ཀྱ་ཟིར་བཞུགས། ཐང་རིང་རྒྱུད་གྲྭ་དེར་བཞུགས་དང་དགོན་པའི་གྲྭ་པ་བཅས་ལ་གནས་བཅུ་དང་དགའ་ལྡན་ལྷ་བརྒྱ་མའི་ལུང་སྩལ། ཀན་ཀོ་ཟིར་ཞག་གཅིག་བཞུགས་
ཏེ། ཐུགས་རྗེ་ཆེན་པོ་རང་བྱོན་སོགས་ལ་ཞིབ་གཟིགས་དང་ཐུགས་ཉམས་སྤྲོ་བའི་རྣམ་པ་མཛད་ཅིང། དཀར་ཆག་ཀྱང་ཞུས་པ་ལྟར་གནང། དགུ་པའི་ཚེས་བརྒྱད་ཀྱི་དགུང་མོ་ལོ་ཀྱ་ཏུན་དུ་འབྱོར། རྗེ་ཉིད་གཅིག་པུར་བདེ་མཆོག་གི་མདུན་ནས་བཞུགས་ཏེ་མཚན་མོ་དེར་བདེ་མཆོག་བདག་མདུན་གྱི་ཆོ་ག་དང། ཚེས་བརྒྱད་ཀྱི་ཐོ་རངས་སྐྱ་རེངས་ཀྱི་དུས་ཚོད་ལ་བདག་འཇུག་བཞེས། ཉིན་དེར་དཔོན་སློབ་ཚང་མས་བདེ་མཆོག་ལྷ་ལྔའི་ཆོ་ག་གསུངས་ནས་ཚོགས་འཁོར་རྒྱས་པ་གནང། སྐུ་ལ་གསེར་ཆབ་ཕྱག་གིས་བྱུགས་པས་ཡབ་ཡུམ་གྱི་མཁའ་གསང་ནས་གསང་རྫས་ཤིན་ཏུ་བསིལ་བའི་རེག་བྱ་ཅན་ཞལ་དུ་གསོལ་བས་ཟད་མི་ཤེས་པ་ལྟ་བུ་ཕྱག་ཏུ་བབས། ལུས་འཇོམས་འཆི་བདག་སེམས་འཇོམས་རྨོངས་པའི་ཁྲག །བདེ་སྟོང་དབྱིངས་སུ་སྡོམ་པའི་དཔའ་བོ་ཆེ། །མི་ཤིགས་རླུང་སེམས་སྒྱུ་མའི་གུར་ཁང་དུ། །འཇིགས་མཛད་པད་གསང་ལྷ་སྐུའི་འཇའ་ཚོན་བཀྲ། །མཁའ་དབྱིངས་ཏིལ་གང་ལྟར་བཞུགས་རྒྱལ་རྣམས་ཀྱི། །ཐུགས་རྗེའི་དྲོད་ཀྱིས་སྤངས་དང་རྟོགས་པའི་ཁམས། །བཞུས་པའི་བཏུང་བ་རིན་ཆེན་འདི་གསོལ་བས། །རྡོ་རྗེའི་ལུས་ཀྱི་གྲོང་ཁྱེར་མཐོན་པོར་འཕགས། །འདུ་ཁང་དུ་གདན་དྲངས་པར་བླ་མཆོད་ཀྱི་ལུང་གནང། ཞལ་ནས། འདི་ལ་ལོ་རྒྱུས་འདྲ་མིན་འདུག་ཀྱང་བ་སོ་རྗེ་དྲུང་གིས་མཛད་ཟེར་བའི་དཀར་ཆག་དང། པཎ་ཆེན་དཔལ་ལྡན་ཡེ་ཤེས་ཀྱི་གསུང་མཐུན་པར་ཕམ་མཐིང་པ་ཆུང་བའི་སྐུ་གདུང་ཡིན་གསུངས་པ་རྗེའི་གསུང་ཟུར་དང་མཐུན་པས་དེ་ཀ་རང་ཡིན། དང་པོ་བྲག་ཁུང་གཅོད་བྱེད་ཀྱི་བྲག་རི་རྩར་ལྷུང་བ་འདི་ཡང་ཡབ་ཡུམ་ཞལ་སྦྱོར་གྱི་རྣམ་པ་དང།
སྒྲུབ་ཁང་གི་མདུན་ངོས་གཡས་གཡོན་ན་དབང་ཕྱུག་ཡབ་ཡུམ་གྱི་རྟགས་ཀྱི་རྣམ་པ་ཐད་སོར་གནས་པ་སོགས་བདེ་མཆོག་གི་གནས་ཀྱི་ཁྱད་ཆོས་ཚང་བ་ཞིག་འདུག་གསུངས། གདུང་མདུན་དེར་སྨོན་ཚིག་ཅིག་ཀྱང་བཀའ་རྩོམ་མཛད། མཆོད་རྟེན་དཀར་པོར་ཞག་གཅིག་བཞུགས། དགེ་འདུན་ལྔ་བཅུ་སྐོར་ལ་རྡོ་རྗེ་གཅོད་པའི་ལུང་སྕལ། མཆོད་རྟེན་འདི་སངས་རྒྱས་འོད་སྲུང་དུས་ཀྱི་མཆོད་རྟེན་ཞིག་ཡིན་ཟེར་བ་དང། བདག་ཅག་གི་སྟོན་པའི་འཕེལ་གདུང་བཞུགས་པའི་མཆོད་རྟེན་ཡིན་ཟེར་བའི་ལོ་རྒྱུས་ཅི་རིགས་སྣང་གསུངས། རྨ་ཆུར་གྲུ་བཏང་ནས་ཨ་འགང་དགོན་པར་བྱོན། རྟེན་སོ་སོར་མཆོད་འབུལ་དང་ཐུགས་སྨོན་རྒྱ་གང་ཆེར་གནང། རྟ་མགྲིན་ལ་གཟིགས་ནས་འདི་ཐུབ་པའི་སྐུ་འདི་ལ་སེམས་དཔའ་གཉིས་དང་ཁྲོ་བོ་གཉིས་ཏེ་བཞིས་བསྐོར་བའི་ནང་ཚན་ཡིན་འདུག་པས། སྐུ་དངོས་ལྡེར་བཟོ་ཡིན་ཀྱང་སྔོན་གཞན་གྱི་གནོད་འཚེ་བཟློག་པའི་ཆོ་འཕྲུལ་དང་མཐོང་སྣང་སྣ་ཚོགས་བསྟན་པས་རང་བྱོན་དུ་བཏགས་པ་ཡིན་པ་འདྲ། ཨ་འགང་ཟེར་བ་ནི་སྔོན་གྲུང་འདི་ཆུས་ཁྱེར་ནས་ཡོང་བ་ཐད་འདི་ནས་ཐོན་སྐབས་འགང་ཟེར་བའི་སྒྲ་ཞིག་གྲགས་པ་དེའི་སྒོ་ནས་བཏགས་པ་ཡིན་ཟེར་ལ། གྲུང་འདི་སེར་བ་སོགས་བཟློག་ཐུབ་པའི་གྲུབ་ཐོབ་ཅིག་ཀྱང་ཡིན་སྐད་སྣང་གསུངས་ཏེ་བཞད་མོ་མཛད། བྱམས་སྤྲིན་ལ་གདན་དྲངས་པར་བླ་མཆོད་ཀྱི་ལུང་གནང། རྨ་ཆུར་གཟིངས་ཀྱིས་བགྲོད་ནས་རྫོང་ཐོག་ལྷ་ཁང་དུ་བྱོན་རྟེན་སོ་སོར་མཆོད་མཇལ་དང། ཁྱད་པར་ཐུགས་རྗེ་ཆེན་པོ་རང་བྱོན་གྱི་སྐུ་བརྙན་ལ་གཟིགས་ཏེ། སྐུ་དངོས་དེ་མཆོད་རྟེན་དཀར་པོ་སོགས་སུ་གཟིངས་ཀྱི་སྟེང་ནས་ལོ་ལྟར་གདན་འདྲེན་གྱིན་ཡོད་པ་ལ་སྔ་མ་ཞིག་ཀླུས་སྤྱན་དྲངས་
ཏེ་འདི་སྐུ་ཚབ་ཡིན་ཟེར་མཁན་ཡང་འདུག་གསུངས་ཏེ་དཔྱད་གཞི་ཅན་དུ་སྣང། འབུམ་གླིང་གི་བྱམས་ཆེན་ས་གནོན་མཉམ་གཞག །བཟང་པོའི་བཞུགས་སྟངས་ཅན་ལ་མཇལ། འདི་སྟོད་སྨད་གང་ཡང་མ་འཛོལ་བའི་ཐིག་ལྡན་ཤིན་ཏུ་བྱོན་ལེགས་པ་ཡ་མཚན་པ་ཞིག་སྣང། རྒྱ་བཟའ་ཀོང་ཇོ་བོད་དུ་ཕེབས་ལམ་ནས་བྲག་ལ་བྱམས་པ་ཁྲུ་བརྒྱད་ཅུ་པ་བཞེངས་ཞེས་པ་གཞན་ན་སྟོན་རྒྱུ་མེད་ལ། འདིའི་ཉེ་འཁོར་དུ་སྒྲོལ་མ་རང་བྱོན་ཡང་བཞུགས་པས་འབུམ་གླིང་གི་བྱམས་པ་ཀོང་ཙེས་བཞེངས་ཟེར་བ་དེ་ཀོང་ཇོ་དང་སྒྲ་ནོར་བ་འདུག་ཅེས་གསུངས། དེ་དུས་ཀྱི་གོང་མའི་ཕོ་བྲང་གི་གནས་ཞི་ངན་ཕུ་ཡིན་པས་དེར་ཇོ་བོ་ཤཱཀྱ་མུ་ནེའི་བཞུགས་ཁྲི་ད་ལྟའི་བར་དུ་ཡོད་ལ། ཞི་ངན་ཕུ་ནས་ཀོང་ཇོ་སྟོང་འཁོར་དུ་ཕེབས་ཏེ་རྡོ་ཉི་ཟླ་ནས་བློན་པོ་མགར་གྱིས་རྗེས་ཟིན་པར་གྲགས་ཆེ་བས་འདི་ཀ་ཕེབས་ལམ་འཁྲུལ་མེད་དུ་ཤེས་སོ། །འོན་ཀྱང་བཟོ་ཀོང་ཙེ་ཕྱོགས་གོང་འོག་གི་འདི་དག་ཏུ་ཕེབས་པའི་ལོ་རྒྱུས་དུ་མ་དང་ལྷག་པར་ཀོང་ཙེ་ནས་རིམ་པར་བགྲང་བའི་མི་བརྒྱུད་བདུན་ཅུ་རྩ་གྲངས་ཤིག་ཞལ་ནས་ཐོས་ལ། རྟེན་སོ་སོའི་ལོ་རྒྱུས་དུ་མ་གསུངས་པ་ཡང་ཐོས་ཀྱང་མང་བས་འཇིགས་ནས་མ་བྲིས། འདུ་ཁང་བཞི་བརྩེགས་གསར་བཞེངས་ལ་བཀྲ་ཤིས་ཀྱི་མེ་ཏོག་འཐོར། ཡང་ཀྱ་ལོ་ཡེའི་སྒར་པར་བཞུགས་སྐབས་མཛོ་མོ་མཁར་ནས་གདན་དྲངས་པའི་བྱམས་ཆེན་ཆོས་རྗེའི་ཕྱག་ཌམ་ཕུལ་བར་ཐུགས་ཤིན་ཏུ་དགྱེས། སླར་ཡང་ཨ་འགང་དུ་བྱོན་ཏེ་སེར་སྐྱ་ཉིས་བརྒྱ་སྐོར་ལ་ཀུན་རིག་གི་དབང་སྩལ་ཞིང། བསྒྲུབ་བྱ་ལྔ་བསྙེན་པར་རྫོགས། ཆེན་མིང་གི་དུས་བཞེངས་པ་ཏཱ་མིང་རྒྱལ་པོའི་ཐུགས་དམ་རྟེན་ཕྱག་རྡོར་སེམས་
དཔའི་ཆ་ལུགས་ཅན་ཁྲུ་གང་ལྷག་ཙམ་བཟོ་ལེགས་ཁྱད་མཚར་ཅན་ཕུལ་བས་དགྱེས་ཚོར་ཆེ་བར་མཛད། དེ་ལྟར་མདོ་སྨད་བསིལ་ལྡན་གྱི་ལྗོངས་འདི་གང་གི་གཟི་བྱིན་གྱི་སྒོ་ནས་དབུས་འགྱུར་གཉིས་པར་བསྔགས་པར་འོས་པའི་སྔོན་གྱི་གནས་ཆེན་རྣམས་དང། བྱིན་རླབས་ཀྱི་གཟི་འོད་ཕྱོགས་བརྒྱར་འཕྲོ་བའི་རྟེན་འགངས་ཅན་རྣམས་ལ་མཆོད་འབུལ་དང། བསྟན་པ་ཕྱོགས་མཐར་རྒྱས་ཤིང་ཡུན་རིང་གནས་པའི་ཐུགས་སྨོན་ཤུགས་དྲག་མཛད། ལམ་བར་གྱི་དགོན་གྲོང་སོ་སོས་ཇ་ཐབ་དང་ཆོས་འབྲེལ་གང་ཞུས་འདོད་མོས་ལྟར་གྱི་རེ་བ་བསྐངས། དེ་ཕྱོགས་ཀྱི་དགོན་པ་ཆེ་ཕྲ་མཐའ་དག་གིས་དངོས་འབུལ་ཕུལ་བ་རྣམས་ཕྱིར་སློག་པའི་སྟེང་དུ་མར་འགྱེད་སྤྱི་འཇོག་འཚེམ་ལུས་མེད་པ་གནང་སྟེ་ཐུགས་བསྐྱེད་སྤྲིན་གྱི་ལྡིང་ཁང་ནས་མཛད་འཕྲིན་ཆར་རྒྱུན་དལ་གྱིས་སྦྲེངས་པས་ལུས་ཅན་ཞིང་པའི་ཚོགས་ཀྱིས་སྨོན་པའི་རེ་བ་ཅི་ཡང་སྐོང་བར་མཛད་དོ། །མཁའ་ལ་རྒྱུ་སྐར་ཚོགས་རྣམས་སིལ་བུར་གནས། །ས་ལ་བྱིན་རླབས་རྟེན་མཆོག་ཚར་དུ་དངར། །དེ་དག་རང་འོད་སྤྲོ་བར་བྱེད་པ་སྟེ། །འདི་དག་མཐོང་ཐོས་དྲན་རེག་འདོད་པ་འཇོ། །མཁའ་ལ་རྟ་བདུན་བཅུ་གཉིས་ཁྱིམ་དུ་རྒྱུ། །ས་ལ་དམ་པས་གནས་ཆེན་དུ་མ་འགྲིམ། །དེ་ཉིད་པངྨོའི་གཉེན་དུ་གྱུར་པ་སྟེ། །འདི་ནི་སྐྱེ་རྒུ་སྲིད་ལས་སྒྲོལ་བའི་བཤེས། །བདག་བདེའི་ཕྱིར་མིན་སེམས་ཅན་མ་ལུས་པ། །གནས་སྐབས་མཐར་ཐུག་བདེ་ལ་འགོད་ཕྱིར་དུ། །སྐུ་གསུང་ཐུགས་རྟེན་དགེ་འདུན་མཆོད་པ་དང། །ཐུགས་རྗེ་བསྐུལ་ཞིང་རབ་ཏུ་གནས་པ་དང། །ཐུབ་བསྟན་རྒྱས་ཤིང་བསྟན་འཛིན་དར་བ་དང། །བཤད་སྒྲུབ་འཕེལ་ཞིང་མཐོང་ཐོས་དྲན་རེག་གིས། །འགྲོ་བ་འདྲེན་སོགས་ཀུན་ཏུ་ཤིས་པའི་རིགས། །མ་བསྒྲིམ་པར་
ཡང་ལྷུན་གྱིས་གྲུབ་པར་མཛད། །གདན་སར་ཕེབས་ལམ་ནས་སྟག་ལུང་དགོན་དུ་བཅུ་གཅིག་ཞལ་གྱི་རྗེས་གནང་སྩལ། ཆོས་གྲྭ་གསར་ཚུགས་ལ་བརྩི་བཞག་གནང་སྐབས་འཇའ་ཚོན་སོགས་ཤར་བས་རྟེན་འབྲེལ་ལེགས། བསྒྲུབ་བྱ་དྲུག་དགེ་བསྙེན་ལ་བཀོད་ཅིང་ལམ་ཁྲིད་གསེར་གྱི་ཡང་ཞུན་གྱི་ལུང་གནང། ཨ་འབིའི་སྒར་པ་དང། ཨ་མཚོའི་སྒར་པར་འཇིགས་བྱེད་ཀྱི་དབང་གནང་ཞིང་བསྒྲུབ་བྱ་སོ་ལྔ་བསླབ་པ་ལ་བཀོད། དེ་ནས་སྒོ་མོག་སྒར། སྒ་ཤུལ་རི་ཁྲོད། རྡོ་བིས་ལྕང་ཤར་དགོན་སོགས་ནས་གདན་འདྲེན་པ་ཡང་ཡང་འབྱོར་ཏེ་ཨུ་ཚུགས་མཐར་བསྐྱེལ་ཀྱང་འགྲོ་འདུག་ཧ་ཅང་ཐལ་ཆེ་སོང་གསུངས་ནས་མཚམས་བཅད་དེ་ཧོར་ཚང་བརྒྱུད་ནས་ཕེབས་པར། སྒོ་མོག་སྒར་པའི་ཇ་ཐབ་ཐོག་གྲྭ་མང་ལ་ཕྱག་དབང་ཆོས་འབྲེལ་གནང་བ་མ་གཏོགས་དགོན་རི་ཁྲོད་དུ་མས་ཞུས་ཀྱང་མ་ཕེབས་པར། བཅུ་པའི་ཉེར་གཉིས་ལ་གདན་སར་བབས། དེའི་ཕྱི་ཉིན་ནས་བཟུང་རི་ཁྲོད་ནས་ལོ་མཇུག་བར་ལ་བཅད་རྒྱ་མཛད། འདི་སྐོར་འགའ་ཞིག་སྔར་ས་བོན་གྱི་ཚུལ་དུ་བྲིས་པ་ཡང་ཡོད་ལ། དེ་ལས་འཕྲོས་ཏེ་སྤྲོ་དགོས་པ་དང། གསར་དུ་བྲི་དགོས་པ་མང་དུ་སྣང་ན་ཡང། ཡི་གེས་འཇིགས་ནས་མ་བྲིས་པས་རྣམ་ཐར་རྒྱས་པ་གཞན་དུ་ཤེས་པར་བྱའོ། །ལོ་འདིར་གཞི་བྱེས་གཉིས་ཀར་ཐུ་མེད་ལོ་ཙཱ་བ་ཞབས་དྲུང་སོགས་བསྙེན་རྫོགས་པ་ཉིས་བརྒྱ་དང་དྲུག །རབ་བྱུང་དགེ་ཚུལ་ཞེ་གསུམ་བྱུང་འདུག་པས་མཚོན་བསྙེན་རྫོགས་གང་བྱུང་གི་ཐོ་ཕྱག་བྲིས་སུ་བཀོད་འདུག་སྟེ། པཎ་ཆེན་བློ་བཟང་ཆོས་རྒྱན་གྱི་དགོངས་བཞེད་རྣམ་ཐར་ནོར་བུའི་ཕྲེང་བར་གསལ་བ་ལྟར་ཡིད་ཆེས་ངོ་མཚར་གྱི་གནས་སུ་སྣང། དགུང་ལོ་ཞེ་དགུ་པ་ལྕགས་
རྟའི་ལོ་གསར་གྱི་ཚེས་ལ་སྨད་ཕྱོགས་ནས་འོངས་པའི་གྲྭ་རྒྱུན་སྦྱིན་བདག་རྣམས་ཀྱིས་གསེར་ཟངས་ཀྱི་སྐུ་བརྙན་དུ་མས་ཐོག་དྲངས་དངོས་འབུལ་གཟབ་ནས་ཞུས་ཤིང། སོ་སོར་བསྙེན་རྫོགས་དང་དབང་རྗེས་གནང་སོགས་འདོད་ཆོས་ཀྱིས་ཚིམ་པར་མཛད། དོན་གཉེར་བ་ཉིས་བརྒྱ་སྐོར་ལ་དགའ་ལྡན་ལྷ་བརྒྱ་མའི་ཁྲིད། དཔའ་གཅིག་གི་དབང། འཇམ་དབྱངས་དཀར་པོའི་རྗེས་གནང་སོགས་སྩལ། རི་ཁྲོད་ཀྱི་འདུ་ཁང་ནས་ཆོས་ཉན་པ་ཉིས་བརྒྱ་ལྔ་བཅུ་སྐོར་ལ། རྡོ་རྗེ་འཕྲེང་བའི་དབང་ཡོངས་རྫོགས། མཇུག་ཏུ་ཚོགས་འཁོར། བསྟན་པ་རྒྱས་པའི་བསྔོ་སྨོན་དང་བཅས་གང་རྒྱས་གནང། སླར་ཡང་སེར་སྐྱ་སྟོང་དང་ལྔ་བརྒྱ་སྐོར་ལ་ཉིན་གཉིས་ཀྱི་རིང་བཅུ་གཅིག་ཞལ་གྱི་དབང། གཞན་ཡང་ཕྱག་རྡོར་གཏུམ་ཆེན་དང། ཛམ་དཀར་གྱི་རྗེས་གནང་སོགས་དང། དགོན་པར་ཡང་དོན་གཉེར་བ་རྣམས་ལ་ཆོས་རྒྱལ་ཕྱི་ནང་གསང་གསུམ་དང་དམག་ཟོར་མའི་རྗེས་གནང་སོགས་འདོད་ཆོས་འགའ་ཞིག་སྩལ། རྗེ་ཉིད་ཀྱི་སྐུ་ཚད་དང་མཉམ་པའི་བྱམས་པ་ལུང་སྟོན་མའི་སྐུ་ཁྲི་རྒྱབ་ཡོལ་དང་བཅས་པ་བཞེངས་པའི་དབུ་ཚུགས། རྒྱུད་པའི་མགོན་ཁང་གི་འཇིགས་བྱེད་ཀྱི་སྐུ་བཞེངས་སྐབས་ལྷ་བཟོས་ཞལ་ཉམས་དང་སྐུ་ཚད་སོགས་ལྗགས་བཀོད་ཞུས་པར། ཉིད་ཀྱི་ཐུགས་དམ་རྟེན་རྭ་ལོའི་ཕྱག་མཛུབ་གཟུངས་གཞུག་ཏུ་བཞུགས་པ་དེ་ཉིད་ལ་དཔེ་བྱས་ཏེ་ཕྱག་བཟོ་མཛད་པའི་མ་ཡིག་ལྟར་ལྷ་བཟོས་བཞེངས། སྐུ་ཚད་ཀྱང་ཁ་དགུ་ཙམ་གྱི་རྩིས་བྱས་ཀྱང་སྲོག་ཤིང་གི་ཚད་ཁ་བཅུ་གཅིག་ཙམ་དུ་སོང་འདུག་པར། ཚད་གོང་འཕེལ་དུ་སོང་བ་རྟེན་འབྲེལ་བཟང་གསུངས་དགྱེས་ཚོར་ཆེ་བ་མཛད། གཟུངས་གཞུག་རྟེན་སྣ་མང་པོ་གནང་ཞིང་ཁྱད་པར་དུ་རྗེ་ཙོང་ཁ་པ་ཆེན་པོའི་ཕྱག་
ཚྭ་ཉན་པོ་འཇམ་དབྱངས་སུ་གྲགས་པ་སྡེ་རྒན་རིན་པོ་ཆེ་བློ་བཟང་དོན་གྲུབ་པས་སྐུ་ལ་རྒྱུན་བཅར་མཛད་པ་ཞིག་འཇིགས་བྱེད་ཀྱི་ཐུགས་ཀར་ཡེ་ཤེས་སེམས་དཔའི་ཚུལ་དུ་བཞུགས་པར་མཛད། ལྗགས་བཀོད་གང་དགོས་འཕྲལ་དང་འཕྲལ་ལ་གནང་བ་བླ་མ་དབུ་མཛད་པ་དཀོན་མཆོག་དབང་ཕྱུག་གིས་ཁུར་ལེན་རུང་བ་བྱས་པས་སྐུ་བརྙན་རྣམས་ཀྱི་བཟོ་རགས་རིམ་གྲུབ་པ་ནས་བཟུང་སྟེ་ལྷ་བཟོ་རྣམས་གཅིག་པུར་མགོན་ཁང་དུ་འགྲོ་མི་ནུས་པ་སོགས་ཀྱི་ཟིལ་ཆེ་ཞིང་ཁོང་ཚོས་གཙང་རྩོག་ཤོར་བའི་སྤྱོད་ལམ་གྱི་དབང་གིས་འཚུབ་ཉམས་དང་རྨི་ལམ་ཡང་ངོ་མཚར་བ་དུ་མ་བྱུང། ཐོས་བསམ་གླིང་ལ་གྲྭ་ཇ་ཁ་ཤས་དང། གྲྭ་ཚང་གཞན་གསུམ་ལ་ཉིན་འཁྱོངས་ཁ་ཤས་རེ་བཏང་སྟེ་ཞབས་བརྟན་བསྒྲུབ་པར་ཇ་སྲང་དོ་རེའི་འགྱེད་གནང། ཟླ་བ་བཞི་པའི་ཚེས་ནས་མགོ་བརྩམས་ཏེ་དགོན་པའི་བླ་གྲྭ་གཉུག་མར་གནས་པ་དང། སྐུ་འབུམ་སྨན་པ་བླ་ཟུར་གྲོ་ཚང་སྤྲུལ་སྐུ། འབྲུ་གུ་དགོན་པའི་ཁྲི་ཟུར་ཀོ་ཙ་ཞབས་དྲུང། སེམས་ཉིད་མཁན་པོ། བེའུ་མདོའི་ཁྲི་པ་ལྷ་ཞིས་སྤྲུལ་སྐུ་ངག་དབང་འཇམ་དཔལ་བསྟན་འཛིན། ཁྲི་ཟུར་འགའ་དག་སྤྲུལ་སྐུ་དགེ་འདུན་ཐུབ་བསྟན་འོད་ཟེར། གཞན་ཡང་ཕྱོགས་ནས་ཕེབས་པའི་བཀའ་རབ་འབྱམས་དགེ་བཤེས་དུ་མ་དང་བཅས་ཉིས་སྟོང་དྲུག་བརྒྱ་ལྔ་བཅུ་སྐོར་ལ་འདུ་ཁང་ཆེན་མོ་ནས། མི་ཏྲ་བརྒྱ་རྩའི་དབང་རྒྱས་པར་སྩལ་ཏེ་ཐར་འདོད་ཡིད་ཀྱི་བུམ་བཟང་བྱིན་རླབས་བདུད་རྩིའི་བཅུད་ཀྱིས་ཚིམ་པར་མཛད། མཇུག་ཏུ་འབུལ་ནོད་རྒྱ་ཆེན་པོ་དང་བཅས་ཏེ་བརྟན་བཞུགས་ཕུལ་བར། སྤྱི་འབུལ་རྣམས་ཕྱིར་སློག་ཅིང། བསྟན་པའི་རྩ་བ་ཚུལ་ཁྲིམས་ལ་རག་
ལས་པས་ལེགས་ཚོགས་ཀུན་གྱི་རྩ་བ་སྡོམ་ཁྲིམས་ལེགས་པར་བཟུང་དགོས་པ་དང། དེའི་ཆེད་དུ་སྒྲིག་ལམ་ཞིབ་དགོས་ཚུལ། ཐོས་བསམ་སྒོམ་གསུམ་ཡ་མ་བྲལ་བའི་ངོས་ནས་སློབ་གཉེར་ཧུར་ཐག་གལ་ཆེ་ཚུལ་སོགས་བསླབ་བྱ་ནན་ཏན་དུ་མཛད། རྗེ་འདི་ཉིད་ནས་དབང་གང་དང་གང་གནང་ན་བདག་མདུན་འཇུག་པ་ཐ་དད་དང་ཐ་མི་དད་ཀྱི་སྒྲུབ་ལུགས། རང་ཉིད་འཇུག་ཅིང་དབང་བླངས་པ། བུམ་པ་སྒྲུབ་ཅིང་འགོད་པ། མཆོད་གཏོར་བཤམས་ཚུལ། དབང་རྫས་འདེགས་ཚུལ། གཏད་ཚུལ་སོགས་ཀྱི་ཕྱག་ལེན། ཐ་ན་ཕྱག་སོར་གྱི་རྣམ་འགྱུར་ཚུན་ཆད་ཀུན་མཁྱེན་བླ་མ་མཆོག་ནས་གར་གནང་ལྟར་ལས་མི་འདའ་བ་ཞུས་དག་ཕེར་བ་ལྟ་བུ་ལ། དབང་རྫས་ཀྱང་ཕལ་ཆེར་རྗེ་རང་ཉིད་ཀྱིས་འགྲིམ་པར་མཛད། དབང་བཤད་ལ་རྒྱུད་སྡེ་གོང་འོག་གང་གི་སྐབས་སུ་ཡང། ཐད་ཀ་ཐད་ཀའི་དམིགས་རྣམ་ལེགས་པར་ངོ་སྤྲད་དེ་གནང་བས་སྐུ་གཉིས་དང་སྐུ་བཞིའི་ས་བོན་ཐེབས་ངེས་སུ་མཛད་པ་ཞིག་ཡོད་ལ། ལྷག་པར་འདི་སྐབས་རྒྱུད་སྡེ་སོ་སོའི་རྩ་བཤད་ལེགས་པར་སྦྱར། མཐའ་དྲུག་ཚུལ་བཞིའི་གསང་རྒྱ་བཀྲོལ། དབང་དོན་ལམ་གྱི་རིམ་པར་བསྒྲིགས་པའི་གསུང་བཤད་མཐའ་ཆོད་པ་གནང་བས་རྡོ་རྗེ་སློབ་མ་རྣམས་ཀྱིས་རྒྱན་བདུན་གྱིས་མཛེས་པའི་ཟབ་གནད་ལ་ངེས་པ་རྙེད་ཅིང་གཞི་ལམ་འབྲས་གསུམ་ངོ་འཕྲོད་པའི་བྱིན་རླབས་ཀྱི་དགའ་སྟོན་མྱོང་བས་ཚིམ་པར་གྱུར། སྣང་སྟོང་ཟུང་འཇུག་བདེ་ཆེན་རོལ་པའི་དབྱིངས། །དོན་གཉིས་ལྷུན་གྲུབ་གློག་འོད་འཁྱུག་པའི་གར། །སྒྱུར་མཁས་རིགས་ཀུན་ཁྱབ་བདག་སྤྲིན་སྔོན་ལས། །སྨིན་བྱེད་དབང་བཞིའི་བསང་གཏོར་ཅིར་ཡང་འགྲེམ། །མཐའ་དྲུག་ཚུལ་བཞིའི་རྒྱ་ཡིས་ཉེར་བཅིངས་པའི། །མཁའ་འགྲོའི་གསང་མཛོད་རྒྱུད་
རྒྱལ་ཟ་མ་ཏོག །རྩ་བཤད་སྦྱོར་བའི་ལྡེ་མིག་གིས་བཀྲོལ་ནས། །ཟུང་འཇུག་ནོར་བུའི་བང་མཛོད་མཁའ་ཁྱབ་ཏུ། །ས་མུ་ཏྲ་ལས་མེ་གྷ་བཞིན། །ས་གསུམ་འགྲོ་ལ་འགྲེམ་པ་པོ། །ས་ར་ཧ་དང་ཀླུ་སྒྲུབ་ལྟར། །ས་ཡི་དབང་ཕྱུག་ཉིད་དུ་ངེས། །དེ་དག་གི་སེང་བར་དུ་ཡང་བསྙེན་རྫོགས་གྱ་དགུ། རབ་བྱུང་དགེ་ཚུལ་བཅུ་དགུ་སོགས་ལ་བསླབ་པ་སྩལ་ཏེ་ཐར་པའི་ས་བོན་བསྐྲུན། ཕྱོགས་ནས་ཕེབས་པའི་དོན་གཉེར་བ་བརྒྱ་ལྔ་བཅུ་སྐོར་ལ་གསང་འདུས་ཀྱི་དབང་རྡོར་ཕྲེང་ལྟར་དང། འཇིགས་བྱེད་དང་བདེ་མཆོག་གི་དབང། གྲོ་ཚང་སྤྲུལ་བའི་སྐུ་སོགས་ཉུང་བསྡུས་ལ་གསེར་ཆོས་བཅུ་གསུམ་གྱི་རྗེས་གནང་བཅས་སྩལ། ལྔ་པའི་ཚེས་བདུན་ལ་རི་ཁྲོད་དུ་བྱོན་ནས་བཅད་རྒྱ་མཛད། བར་སྐབས་སུ་སྐུ་གཟུགས་ཅུང་ཟད་མི་བདེ་བ་བྱུང་རུང་གཞན་ལ་མ་གསུངས་པས་རིམ་གྱིས་བབས་ལྕི་བར་སོང་སྟེ། རི་ཁྲོད་ཚོགས་ཡོངས་ཀྱིས་རྣམ་འཇོམས་བུམ་སྒྲུབ་དང། རྒྱུད་དུས་འཁོར་སྨན་པ་གསུམ་ནས་ཁྱུང་ཁྲ། རྣམ་འཇོམས། རྟ་མགྲིན་བཅས་བསྒྲུབས། ཚོགས་ཆེན་ནས་ཞབས་བརྟན་བསྒྲུབས་ན་རིགས་གྲྭའི་ཚོགས་གླེང་ལ་གནོད་གསུངས་ནས་གྲྭ་ཚང་གཞན་གསུམ་ལ་མང་འགྱེད་དང་བཅས་ཞབས་བརྟན་གང་མང་བསྒྲུབས། ཀུན་གྱིས་དགོན་པར་འབྱོན་དགོས་ཚུལ་ཞུས་པ་ལྟར་བདུན་པའི་བཅོ་ལྔའི་མཚན་མོ་དགོན་པར་ཕེབས། དེ་ནུབ་ནས་བསྙུན་བབས་ལྕི་རུ་སོང་སྟེ། ཚོགས་ཆེན་དང་གྲྭ་ཚང་སོ་སོ་ནས་ཞབས་བརྟན་ཉིན་མཚན་བར་མ་ཆད་དུ་བསྒྲུབས། བླ་བྲང་ཆེན་མོ་ནས་ཀྱང་མང་ཇའི་ཐོག་ཞབས་བརྟན་ཕོན་ཆེ་བ་བསྒྲུབ་ཅིང། གྲྭ་མང་གཟིམས་ཁང་གི་ར་སྐོར་དང། བླ་མ་ཁྲི་གདན་ཟུར། ལས་སྣེ་རྣམས་གཟིམས་ཆུང་དུ་ཕེབས་ཏེ་ཁྲི་
ཆེན་མེ་རྒན་མཁན་རིན་པོ་ཆེ་ནས་ཞབས་བརྟན་གྱི་གསོལ་འདེབས་ནན་གྱིས་ཞུས་པར། ཞལ་ནས་ངེད་ཅག་གྲྭ་དཔོན་སློབ་མཐའ་དག་ཁ་ཙམ་ཚིག་ཙམ་མ་ཡིན་པར་དད་པ་དམ་ཚིག་ཤིན་ཏུ་གཙང་བའི་བདེན་སྟོབས་དང། དཀོན་མཆོག་གི་བྱིན་མཐུས་མྱུར་དུ་བདེ་འགྲོ་གསུངས་པ་ལྟར། དེ་ནུབ་ནས་སྐུ་ཁམས་ལ་དྭངས་བསྐྱེད་བྱུང། སྔ་སོར་ཀུན་གཟིགས་མཆོག་སྤྲུལ་རིན་པོ་ཆེ་དབུས་ཕེབས་ཀྱི་སྐབས་ཕྲན་འབལ་གཞུང་བར་དུ་ཕེབས་སྐྱེལ་ལ་ཕྱིན། སང་ཉིན་བློན་པོ་ལྷ་བཀྲའི་ཐང་ནས་ཚུར་འོང་རྩིས་ཀྱིས་དོ་ནུབ་སྐུ་མདུན་དུ་སྒེར་མཇལ་དང་སྐྱབས་འཇུག་ཞུས། འོང་རྩིས་ཀྱི་སྐབས་སུ་ཅུང་ཟད་སྡོད་གསུངས། ལན་གསུམ་གྱི་བར་དུ་འོང་རྩིས་བྱས་ཀྱང་ད་དུང་སྡོད་གསུངས། བསྡད་པས་རེ་ཞིག་ཐུགས་དགོངས་གནང་བ་ལྟར་མཛད་དེ་ངེད་དབུས་གཙང་ནས་ཚུར་མ་འཁོར་གྱི་བར་ལ་ཨ་ལགས་ཚང་ཞབས་པད་བརྟན་ཐབས་གལ་ཆེ་བས་དེ་སེམས་ལ་ཟུངས་གསུངས། འོ་ན་ཞབས་བརྟན་སོགས་གང་དགོས་གསུང་བཀོད་གནང་ན་ཁུར་ལེན་བཀའ་བཞིན་བསྒྲུབ་པ་ལས་འོས་ཅི་ཡོད་ཞུས་པར། ཞབས་བརྟན་སོགས་ལ་ལྟོས་པ་ཆེར་མེད། ཐུགས་འདུན་ལ་རག་ལས་པས་སྙན་བསྐུལ་ཡང་ཡང་ཞུས་གསུངས། དེ་སེམས་ལ་བཅངས་ཏེ་ཆིབས་སྐྱེལ་ནས་ཚུར་འཁོར་བསྟུན། ཚེ་དཔག་མེད་ཀྱི་སྐུ་སྔོན་གྱི་རྒྱ་ནག་མ་རྙིང་པ་བཟོ་ཁྱད་ལེགས་ཤིང་གཟི་བྱིན་དང་ལྡན་པ་ཁྲུ་གང་ལོང་བ་ཞིག་ཕྱག་ཏུ་ཕུལ། བཀྲ་ཤིས་པའི་ལྷ་རྫས་དང་བཅས་གོང་གི་རྒྱུ་མཚན་ཞུས་ནས་ཕྲན་གྱི་སྙན་བསྐུལ་ལ་ཐུགས་ཡེངས་མི་གནང་བར་ཅིས་ཀྱང་ཐུགས་ལ་བཅང་དགོས་ཞུས་པར་ཞལ་བཞེས་བཟང་པོ་གནང། སྐབས་འདིར་ཕྲན་མཛོད་དགེ་དགོན་གསར་དུ་ཡོད་སྐབས། སྐུ་ཁམས་
སྟེམས་པའི་གཏམ་ཐོས་ཏེ་མགྱོགས་ཤད་ཀྱིས་དགོན་པར་འོངས་ནས་མཇལ། སྙན་བསྐུལ་རིམ་བཞིན་ཞུས་པར་ཞལ་ནས། དང་པོར་མི་གཞོན་གོས་ཧྲུལ་སྐྱ་བོ་གྱོན་པ་ལག་ན་ལྕགས་ཀྱི་ཐིག་ཤིང་བཟུང་བ་ཞིག་འོངས་ནས། ཧ་ཧ་འདིའི་ལུས་དུམ་བུ་དུམ་བུར་གཏུབ་ན་ཨ་ཟེར་བར་བདག་གིས་ཀྱང། ཧ་ཧ་འདིའི་ལུས་དུམ་བུ་དུམ་བུར་གཏུབ་ན་ཨ་ཟེར་ཀྱང་ཁོ་གཟི་བྱིན་ཆེ་སེ་བ་སོགས་འཚུབ་ཉམས་ཆེ་རུང་ཁ་སང་ཞིག་བདག་ཁྲི་མཐོན་པོའི་སྟེང་ན་ཡོད་པར། ཁྲི་གཞན་ཞིག་གི་སྟེང་ན་བླ་མ་ལུས་བོངས་ཆེ་ཞིང་ཤ་བརྒྱག་པ། རྦོད་གཏོང་མཁན་ཡིན་རྒྱུ་བ་ཞིག་བསྡད་འདུག་རུང། བདག་གིས་སྣང་རྟགས་ཅུང་ཟད་ཀྱང་མི་བྱེད་ཅིང། མིག་ཟུར་གྱིས་ཀྱང་མི་ལྟ་བར་ལྷོད་ཀྱིས་འདུག་པ་རྨིས། ད་ནི་རྒྱལ་ཁ་ངེས་པར་ལོན་པ་ཡིན་པས་སེམས་བདེ་བར་གྱིས། འོན་ཀྱང་སྐུ་ཞབས་རིན་པོ་ཆེ་ཐག་རིང་ན་བཞུགས་པ་སོགས་གང་ཅིའི་ངོས་ནས་ད་དུང་རིམ་གྲོ་དགོས་གསུངས་ནས་ཚོགས་སུ་མང་འགྱེད་དང། མགོན་པོའི་གཏོར་སྒྲུབ། སྟོབས་ཆེན་ཤུགས་བཟློག །སྒྲོལ་དཀར་ཚེ་སྒྲུབ་སོགས་རྒྱུན་རིང་མཛད། སྤྱིར་ཕལ་པའི་རིགས་ལ་ནད་ཕལ་ཆེར་སྔ་མའི་རྒྱུ་མཐུན་ལས་བྱུང་བ་ཤས་ཆེ་ལ། འཕགས་ཆེན་དམ་པ་སར་གནས་རྣམས་སྐྱེ་རྒ་ན་འཆི་ལས་འདས་ཀྱང་སྐལ་བ་དམན་པའི་གང་ཟག་གི་ལས་སྣང་རྟེན་འབྲེལ་ལས་བྱུང་བ་དང། རང་གིས་གདུལ་བྱ་རྗེས་སུ་འཛིན་པའི་ཆེད་དུ་དེ་འདྲའི་སྣང་བ་སྟོན་པ་ཙམ་ཡིན་ཏེ། བསླབ་བཏུས་སུ་མདོ་དྲངས་པ་ལས། སྔོན་སངས་རྒྱས་འཁོར་བཅས་ལྷོ་ཕྱོགས་ཀྱི་རི་ལ་གཤེགས་པ་ན་བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་སླར་སངས་རྒྱས་འདས་
ནས་སུ་ལ་བརྟེན་སྙམ་པར། ཀྭ་ཡེ་མཐོང་བ་དོན་ཡོད་ཉོན། །ཕྱི་མའི་དུས་སུ་གྱུར་པ་ན། །ང་ཉིད་སློབ་དཔོན་གཟུགས་ཀྱི་སྐུ། །ང་ཡིན་སྙམ་དུ་ཤེས་བྱོས་ལ། །དེའི་ཚེ་དེ་ལ་གུས་པར་གྱིས། །ཞེས་གསུངས། སངས་རྒྱས་ནི་ཟག་མེད་ཀྱི་སྐུ་ཅན་ཡིན་ལ་སློབ་དཔོན་ནི་དེ་ལྟ་མ་ཡིན་ནོ་སྙམ་པ་ན། ང་ནི་སྐྱེ་འཆི་ན་བ་དང། །རྒ་བའི་སྡུག་བསྔལ་ལས་འདས་ཀྱང། །སེམས་ཅན་རྣམས་ཀྱི་དོན་དུ་ནི། །འཆི་དང་ན་དང་སྐྱེ་བར་སྟོན། །ཞེས་གསུངས་པ་ལྟར་རོ། །ཀུན་འབྱུང་ཕྲ་མོས་བསྐྱེད་པའི་ཡིད་ཀྱི་ལུས། །གནས་གྱུར་གཙང་བདེ་རྟག་བདག་དམ་པའི་སྐུ། །བརྙེས་ཀྱང་ཐ་མལ་ཟོལ་གྱིས་གདུལ་བྱའི་ཁམས། །སྨིན་ཕྱིར་གང་འཚམ་མཛད་པའི་རོལ་གར་འགྱེད། །དབོན་པོ་ལྷུན་གྲུབ་དབུས་ནས་འབྱོར་ཏེ་རྒྱལ་བ་ཡབ་སྲས་གཉིས། དགའ་ལྡན་ཁྲི་རིན་པོ་ཆེ་ངག་དབང་སྙན་གྲགས། གྲིབ་ཡོངས་འཛིན་སྤྲུལ་བའི་སྐུ། རྒྱལ་སྲས་རིན་པོ་ཆེ་སོགས་ནས་བསྔགས་བརྗོད་དང་འབྲེལ་བའི་གསུང་ཤོག་གནང་རྟེན་ཕོན་ཆེ་བ་དང། མཆོག་སྤྲུལ་རིན་པོ་ཆེ་ནས་ཀྱང་གསུང་ཤོག་མ་བུ་རྟེན་བཅས་འབྱོར། ལྷག་པར་རྒྱལ་ཚབ་རྗེ་དྲུང་རིན་པོ་ཆེ་བློ་བཟང་བསྟན་པའི་མགོན་པོ་ནས་ལོ་སྔ་མ་ཞིག་ཨམ་བན་གྱི་ངག་འཕྲོས་ལ། ཨ་མདོ་ན་ཡོད་པའི་བླ་མ་གུང་ཐང་པ་ལྟ་བུ་ཞིག་ས་གཞན་ནས་མི་རྙེད་ཚུལ། རྒྱལ་བའི་ཡོངས་འཛིན་ལ་བླ་མ་དེ་ལྟ་བུ་ཞིག་གལ་ཆེ་ཚུལ། དེ་གོང་དུ་ཞུས་ན་འོས་འགབ་ཆེ་ཚུལ་སོགས་མོལ་བར་གང་ས་ནས་འཐད་ཀྱང་ཉིད་ཀྱི་དགོངས་པར་མཐུན་མི་མཐུན་མི་ཤེས་སྙམ་ནས། གྱ་ཚོམ་མ་བྱས་པར་རེ་ཞིག་བཤོལ་ཀྱང། སྤྱི་སྒེར་གྱི་བསྟན་འགྲོ་ལ་ཕན་རླབས་ཤིན་ཏུ་ཆེ་བས་དེ་ལྟར་བྱེད་རྩིས་ཡིན་ཚུལ་གྱི་ཡི་གེ་གནང་བར། འཇིག་རྟེན་གྱི་སྤྲོས་པ་བསྐྱུངས་ཏེ་ལུང་སྐྱོག་ནས་
མ་ཎི་འདོན་མཁན་ཡིན་པས། སྐྱབས་མགོན་གོང་མ་དེའི་ཞབས་ལ་མཉམ་དུ་གཏུགས་པའི་ཆོས་དམ་ཚིག་གི་འབྲེལ་ཟབ་ལ་དགོངས་ནས་དེ་འདྲ་ཐོག་ཏུ་མི་ཡོང་བའི་མགོ་འདྲེན་ཅིས་ཀྱང་གནང་དགོས་ནན་ཅན་ཞུས་ལན་དུ། ལོ་འདིར་ཡང་འཇམ་ཕྲུག་ལེགས་པ་དྲུག །སྲབ་ཐེར་དྲུག །ཞྭ་མོ་བཞི། ནང་མཛོད་བཅས་དང། བོད་འདི་མགོ་རྒྱལ་དུ་སོང་བས་བསྟན་པ་ཉམས་དམའ་ཚུལ། བསྟན་པ་རིན་ཆེན་མཆོག་གིས་མ་ཁྱབ་པའམ། །ཞེས་སོགས་ཀྱི་ལུང་འདྲེན་དང་བཅས་བོད་དུ་བྱོན་ནས་ལོ་རེ་གཉིས་ཡིན་རུང་བཞུགས་ན་བཀའ་དྲིན་ཆེ་ཞིང་བསྟན་པ་ལ་ཕན་རླབས་ཆེ་ཚུལ། ཀུན་མཁྱེན་མཆོག་གི་རྩོམ་འཕྲོ་སྐྱེས་རབས་འགྲེལ་པ་དང། དགའ་ལྡན་ཆོས་འབྱུང་གི་མཇུག་ཁ་འགེང་དགོས་ཚུལ་གྱི་བསྐུལ་མ་གནང་རྟེན་མཛོད་བཏགས། སྲབ་ཐེར་ལེགས་པ་གསུམ། རྟེན་སྣ་བརྒྱ་ཕྲག་ཏུ་ལོངས་པ་ཙམ་བསྐུར་གནང་མཛད་འདུག་པ་བསྟན་པ་ལ་དགོངས་པའི་ལེགས་མཛད་རྗེས་སུ་ཡི་རངས་པའི་གནས་སུ་སྣང། དེ་ཙམ་དུ་མ་ཟད་འཇམ་དབྱངས་གོང་མ་བདག་པོ་ཆེན་པོ་ནས་བླ་མ་གོང་མ་ཚོ་གོང་ནས་མཁྱེན་བཞིན་པ་ཡིན་ཀྱང། ད་སྐབས་ངེད་ལ་གོ་བར་མ་བྱས་པའི་ཧུ་ཐོག་ཐུ་སུ་འདྲ་ཞིག་ཡོད་ཀྱང། ཐེ་ཚོམ་མེད་པར་ངེས་པར་ཞུས་ཆོག་ཅེས་ཟི་ལིང་ཨམ་བྷན་བརྒྱུད་ནས་བཀའ་ལན་གཉིས་ཙམ་བབས་ཀྱང་སྦས་པའི་ཐབས་ཁོ་ན་མཛད་པ་ནི། རྣམ་ཐར་སྤྲིང་ཡིག་ལས། མཐོ་ལ་གུས་པས་ངོ་འཛིན་མ་བྱས་ཤིང། །དམའ་ལ་སྨོད་པའི་བརྙས་པ་མ་བྱས་ཏེ། །མཉམ་ལ་འགྲན་པའི་གྲལ་རྩོད་མ་བྱས་པ། །བློ་རྒྱ་ཡོང་ཐང་ཞན་པའི་རྣམ་ཐར་ཡིན། །ཞེས་གསུངས་པ་ལྟར་ཆགས་སྡང་འགྲན་སེམས་མཐོ་སྙེགས་སྤུ་ཙམ་ཡང་མི་མངའ་བའི་
འབྲས་རྟགས། ཁ་སྔོན་རྗེ་བཙུན་ཙོང་ཁ་པ་ཆེན་པོ། གོང་མ་ཏཱ་མིང་རྒྱལ་པོས་གདན་དྲངས་པའི་ཚེ་སེ་ར་རྩེ་དང་ར་ཁ་བྲག་སོགས་སུ་གབ་སྟེ་དང་དུ་མ་བཞེས་པའི་ངང་ཚུལ་ལ་འགྲན་བཟོད་པ་ཆེན་པོ་ཕལ་ལས་ཆེས་ཁྱད་པར་དུ་འཕགས་པའི་རྣམ་ཐར་ཞིག་ཡིན་ནོ། །ལེགས་བཤད་རིན་ཆེན་དོ་ཤལ་མཆོག །པད་དཀར་འཆང་བའི་མགུལ་རྒྱན་དུ། །བྱ་བར་འོས་ཞེས་བསྔགས་པའི་གཏམ། །མངོན་པར་ཤེས་པའི་ཀློང་དུ་སྦས། །ཞབས་སྐྱེས་ནོར་བུའི་ཅོད་པན་འོད་འབར་བ། །འགྲོ་འདིའི་གཙུག་ཏོར་མཛེས་རྒྱན་རུང་ངོ་ཞེས། །དགའ་བའི་གཏམ་སྙན་རྒྱ་ཆེར་བསྒྲགས་པ་ཡང། །རྨི་ལམ་སྨིག་རྒྱུ་བྲག་ཆ་ལྟ་བུར་དགོངས། །རྒྱུད་པའི་མགོན་ཁང་དུ་གསར་བཞེངས་མགོན་ཆོས་འཇིགས་གསུམ་སྟབས་ནམ་འགྲིག་ཅིག་ལ་རབ་གནས་ཐུགས་རྗེ་གཟིགས་དགོས་ཞུས་པར། གཞུང་གི་དགོས་དོན་རྩ་བ་ཅན་ཡིན་སྟབས་འདི་ལས་གལ་ཆེ་བ་མེད་རུང་ཧ་ཅང་འགོར་ན་མི་བདེ་བས་ད་རེས་དགེ་ལེགས་ཆར་འབེབས་ཀྱི་སྟེང་ནས་རབ་གནས་རྒྱས་པ་ཞིག་བྱས་ན་སླར་སེམས་ལ་འཛིན་ཞེས་དཔོན་སློབ་ཀྱི་གྲངས་སོགས་ཀྱི་གསུང་བཀོད་གནང། སྐུ་ཁམས་དྭངས་རྗེས་དགུ་པ་ནས་ཟླ་བ་གསུམ་གྱི་རིང་སྐུ་མཚམས་ལ་བཞུགས། དེ་རྗེས་མཆོད་མཇལ་ལོ་ལྟར་གྱི་འཆར་ཅན་དང། དེ་དང་འབྲེལ་བར་བཅུ་གཅིག་པའི་ཉེར་བརྒྱད་ཀྱི་ཉིན། དཔོན་གཡོག་ཉུང་བསྡུས་དང་བཅས་རྒྱུད་པའི་མགོན་ཁང་དུ་ཕེབས་ཏེ་རབ་གནས་མདོར་བསྡུས་གནད་དུ་སྨིན་པ་མཛད། དེ་གོང་ལྷ་བཟོའི་ལག་ལེན་གྱི་སྟབས་ཆོས་རྒྱལ་གྱི་འབག་རྒྱབ་ཏུ་དགྱེས་ཉམས་དང། མགྲིན་པ་མཐོ་བ་སོགས་ཡིན་ཀྱང་ཉིན་འདིར་རབ་གནས་ཀྱི་སྐབས་ཤིག་ནས་རིམ་གྱིས་བཏུད་དེ་ཙ་མུཎྜི་དང་བྲང་སྤྲོད་ལྟ་བུར་གྱུར་པ་ཀུན་གྱིས་
མངོན་སུམ་མཐོང་སྟེ། སྡེ་ཁྲི་རིན་པོ་ཆེ་བློ་བཟང་དོན་གྲུབ་པ་སོགས་ཀུན་མཁྱེན་བླ་མ་ཡབ་སྲས་རིམ་བྱོན་གྱི་རྣམ་ཐར་དུ་མ་གླེང་བརྗོད་ཀྱིས་དུས་འདའ་བར་གྱུར། དེ་ནས་སྔར་གྱི་ལྕགས་ཐག་གིས་བསྟོད་པ་ཕྱིས་བར་སྐབས་འགར་ལྕགས་ཐག་ལྷོད་དུ་འགྲོ་བ་སོགས་ངོ་མཚར་གྱི་རི་མོ་མང་དུ་སྣང། ཉིན་འདིར་རི་ཁྲོད་དུ་བྱོན། དེ་ནུབ་ནས་བཅད་རྒྱ་མཛད་དེ་ལོ་མཇུག་ལ་གྲོལ། ལོ་འདིར་བསྙེན་རྫོགས་པ་བརྒྱ་ང་བདུན་དང། རབ་བྱུང་དགེ་ཚུལ་སོ་བཞི་ཤཱཀྱའི་སྲས་ཀྱི་གྲལ་སོ་སོར་བཀོད། སྔར་ནས་ཀྱང་གསུང་རབ་ཀྱི་དོན་དང། ཟབ་རྒྱས་ཀྱི་དམིགས་རྣམ་གང་དང་གང་ལ་ཐུགས་གཏད་པ་ཙམ་གྱིས་དེ་དང་དེའི་ངང་ལ་ལྷན་གྱིས་འགྲོ་བ་ནི་སྐུའི་ཉམས་ལས་ཀྱང་དཔོག་ནུས་ལ། མཉམ་གཞག་གི་དུས་དཔྱད་འཇོག་གི་ངོར་དེ་དང་དེའི་གནད་འཁྲུལ་མེད་བཅོས་མིན་དུ་ཤར་བས་རྗེས་ཐོབ་ཏུ་ཡུལ་སྣང་ཀུན་ལ་རྒྱས་ཐེབས་པས་སྣང་བ་ཐམས་ཅད་གདམས་ངག་ཏུ་ཤར་བ་ཞིག་ཡོད་པ་ནི་ཤིང་གི་བསྟན་བཅོས་སོགས་ཀྱིས་ཤེས་ནུས་ལ། ལྷག་པར་སྒྲུབ་གནས་འདིར་བཅད་རྒྱ་དམ་པོའི་སྐབས་ཡིག་འཕྲིན་གྱི་རྒྱུ་འགྲུལ་ཡང་བཅད་ནས་འགོལ་བཞུགས་ཀྱི་ཐུགས་དམ་ཆུ་བོའི་རྒྱུན་གྱི་རྣལ་འབྱོར་ལ་ཆིག་དྲིལ་མཛད་པས་རི་ཁྲོད་དུ་འགྱང་ཙམ་སོང་བ་ནས་གསུང་རབ་གདམས་ངག་ཏུ་ཤར་བའི་བཤད་པ་འབྱམས་ཀླས་ཤིང་རྩལ་ཐོན་པ་ཀུན་ལ་མཐུན་གྲུབ་ཏུ་བསྟན་པས་ཆོས་ཀུན་གདམས་ངག་ཏུ་ཤར་ན་ཚིག་གཅིག་ལ་ཡང་དོན་མང་པོ་འབྱུང་གསུངས་པ་ལྟར་ཡོངས་ལ་མངོན་དུ་གྱུར་པས། པོ་ཏོ་བས། བསྒོམས་པས་མང་པོ་མང་པོ་གོ་འོང་གསུངས་པ་ལྟར་འཇིག་རྟེན་དྲེགས་ལྡན་ཞུམ་པར་བྱེད་པའི་ཚུལ་ཁྲིམས་དང།
མངོན་ཤེས་ལྔ་ལྡན་གྱི་དྲང་སྲོང་ཕམ་པར་བྱེད་པའི་ཏིང་ངེ་འཛིན་དང། རྒྱལ་བ་དགྱེས་པའི་ཡང་དག་པའི་ཤེས་རབ་ལ་དབང་འབྱོར་བའི་མཛད་པ་དང། བསྟན་པ་ཡོངས་རྫོགས་ཀྱི་གནད་ལ་མཁྱེན་དཔྱོད་ཕ་རོལ་ཏུ་སོན་པའི་ལུང་གི་ཡོན་ཏན། བསམ་གྱིས་མི་ཁྱབ་པའི་ཏིང་ངེ་འཛིན་གྱི་སྒོ་དུ་མར་མངའ་བརྙེས་པས་ཉམས་རྟོགས་ཆུ་ཀླུང་བརྒྱ་ཕྲག་རང་རྡོལ་དུ་སོང་བའི་རྟོགས་པའི་ཡོན་ཏན། བཀའ་སྲུང་དམ་ཅན་རྒྱ་མཚོ་བྲན་དུ་འཁོལ་ཞིང་འཁོར་ལོ་གསུམ་གྱི་མཛད་པ་ལ་འདོད་དགུར་དབང་བསྒྱུར་བའི་ནུས་པ་འཕྲིན་ལས་ཀྱི་ཡོན་ཏན་ཏེ། མདོར་ན་མཁས་གྲུབ་ཀྱི་ཡང་རྩེར་སོན་པའི་རྣམ་ཐར་མཁས་བླུན་ཀུན་ལ་བསྙོན་མེད་དུ་གྲུབ་བོ། །དེས་ན་ལམ་གཙོ་གསུམ་སོགས་ཀྱི་གསུང་མགུར་ཕལ་ཆེར་དཔྱད་འཇོག་གི་སྒོམ་ཐུན་རེའི་མཇུག་ཏུ་གནང་བ་ཤས་ཆེ་བས་ཉམས་བཞེས་དང་ཐད་ཀ་ཐད་ཀ་སྦྱར་ནས་བཤད་ན་དགའ་བ་བསྐྱེད་པ་ཡོད་དེ། ས་སྦྲུལ་གྱི་ལོར་དབེན་པའི་གནས་ལ་ཐུགས་སྤྲོ་བའི་ཉམས་ཀྱིས་གསུང་མགུར་མཛད་པ་ནི་འདི་ལྟར། ཀེ་ལ་ཤའམ་རྫ་རི་སྨུག་པོ་ཡི་མགུལ་ན། །ཁེ་འདོད་གྲགས་འདོད་མེད་པ་རི་དྭགས་ཀྱི་བུ་བཞིན། །གེ་སར་དྲི་བསུང་འཐུལ་བའི་རྫི་ངད་ལ་སྣོམས་ཤིང། །ངེ་རང་གཅིག་པུར་བག་ཡངས་སུ་རྒྱུ་བ་ཞིག་བྱུང་ན། །ཅེ་སྤྱང་བཞིན་དུ་ཟས་ཀྱིས་གདུངས་པ་འདི་སྤངས་ཤིང། །ཆེ་མཐོའི་ཆ་ལུགས་སྡེ་དཔོན་སྤྱོད་ཚུལ་འདི་དོར་ཏེ། །ཇེ་རིང་ཇེ་རིང་དབེན་པའི་བས་མཐའ་རུ་ཕྱིན་ནས། །ཉེ་དུ་མཛའ་བཤེས་འབྲེལ་ཐག་ཆད་པ་ཞིག་བྱུང་ན། །ཏེ་ལོ་ནཱ་རོའི་རྣམ་ཐར་འཁྱོངས་པ་རུ་དཀའ་ཡང། །ཐེ་གཏོགས་གྲོས་བསྡུར་མང་པོའི་བྱ་བྱེད་འདི་བཞག་ནས། །དེ་ན་འདི་ན་མེད་པ་སྐྱི་བསེར་གྱི་རླུང་བཞིན། །ནེའུ་གསིང་སྤང་ལྗོངས་གང་
དགར་མྱུལ་བ་ཞིག་བྱུང་ན། །པེ་ཧར་དཀོར་མཛོད་བསྲུང་འདྲའི་གཉེར་ཁ་ཡང་མ་དགོས། །ཕེ་ར་རྒྱག་པའི་ཁྲིམས་དཔོན་སྤྱོད་པ་ཡང་མ་དགོས། །བེའུ་ལུག་ཚུན་ཆད་བོར་བརླག་དོགས་པ་ཡང་མ་དགོས། །མེ་ཆུ་ཤིང་གསུམ་འཛོམ་པས་ཆོག་པ་ཞིག་བྱུང་ན། །ཙེ་ནེ་ལངས་པ་ཁོ་ནས་གཞིས་རྫོགས་ཀྱི་འགྲོ་བདེ། །ཚེ་འདི་གར་ཕྱིད་ཕ་ཡུལ་བྱེད་པ་ཡི་འདུག་བདེ། །ཛེ་རེག་ཕོག་ཐུག་མེད་པར་ཀུན་སྙོམས་ཀྱི་འགྲོགས་བདེ། །ཝེ་ལྟར་གར་ཡིབ་མི་ཤེས་སྟབས་བདེ་ཞིག་བྱུང་ན། །ཞེ་ས་ངོ་འཛིན་དགོས་པའི་དཔོན་པོ་ཡང་མེད་ལ། །ཟེ་བ་ཡར་འཐེན་དགོས་པའི་གཡོག་པོ་ཡང་མེད་ཅིང། །འེ་གནོད་དོགས་པ་དགོས་པའི་དགྲ་བོ་ཡང་མེད་པར། །ཡེ་ཤེས་ལྷ་ཚོགས་ཁོ་ནར་བསྟེན་པ་ཞིག་བྱུང་ན། །རེ་ཐག་བཅད་པའི་མངའ་ཐང་རྒྱང་སྐྱུར་དུ་བྱས་ལ། །ལེ་ལོ་སྤངས་པའི་དམ་ཆོས་རྣལ་མ་ཞིག་བྱས་ཏེ། །ཤེས་རབ་ཐབས་ཀྱིས་ཟིན་པ་རྒྱལ་སྲས་ཀྱི་སྤྱོད་པས། །སེམས་ཅན་ཀུན་ལ་ཕན་པ་སྒྲུབ་ནུས་ཤིག་བྱུང་ན། །ཧེ་ཧེ་ཡིད་སྨོན་ལྟར་གྱི་སྐལ་བ་ཞིག་ཡོད་ན། །ཨེ་མ་དེ་ལས་ལྷག་པའི་དགའ་རྒྱུ་ཞིག་ཅི་ཡོད། །ཨེ་ཀྱཻ་དགའ་བ་ཆེན་པོའི་གླུ་དབྱངས་ཤིག་བླངས་ཏེ། །ཨེ་ཝཾ་ཟུང་འཇུག་ས་ལ་བྲོ་བརྡུང་ཞིག་བྱའོ། །ཞེས་སོ། །འདི་ལ་ཆོས་བརྒྱད་ཀྱི་ཉེས་དམིགས་ངོས་ཟིན་པར་བྱས་ཏེ་འདོད་ཆུང་ཆོག་ཤེས་ལ་གནས་ཚུལ། ཡེ་ཤེས་པའི་ལྷ་དཔང་དུ་བཟུང་སྟེ་སྐྱབས་འགྲོ་དང་ལས་འབྲས་སྒྲུབ་ཚུལ། སྲིད་པར་ཞེན་ལོག་གིས་བསླབ་གསུམ་གྱི་ཉམས་ལེན་རྣལ་མ་བྱེད་ཚུལ། ཕར་ཕྱིན་དྲུག་ལྡན་གྱི་སྤྱོད་པ་རླབས་པོ་ཆེ་དང། ཁྱད་པར་ཐབས་ཤེས་ཟུང་འཇུག་རིམ་གཉིས་ཀྱི་ལམ་བགྲོད་ནས་མཁའ་
ཁྱབ་འགྲོ་བའི་དོན་སྒྲུབ་ཚུལ་གྱི་གདམས་པ་ཁྱད་པར་ཅན་ཡོད་པ་ལྟར་གསུང་མགུར་གཞན་རྣམས་ཀྱང་དེ་དང་མཚུངས་པ་གོ་དགོས་སོ། །དགུང་ལོ་ལྔ་བཅུ་པ་ལྕགས་ལུག་གི་ལོ་གསར་སོགས་དཀྱུས་ལྟར་དང། སྨད་ཕྱོགས་ནས་འོངས་པའི་གྲྭ་རྒྱུན་དང་སྦྱིན་བདག་རྣམས་ལ་སྐྱབས་འགྲོ་དང་དགའ་ལྡན་ལྷ་བརྒྱ་མའི་ཁྲིད། བདེ་མཆོག་དྲིལ་བུ་ཕྱི་ནང་གཉིས་ཀྱི་དབང། ཚེ་རྟ་མགོན་གསུམ། ཐུགས་རྗེ་ཆེན་པོ། དབྱངས་ཅན་མ་དཀར་དམར། ཤྲ་མ་ཎ། རྣམ་རྒྱལ་མའི་རྗེས་གནང་སོགས་འདོད་ཆོས་མང་དུ་གནང། སོ་སོ་ནས་སྐུ་བརྙན་དུ་མ་དང། དངོས་འབུལ་གཟབ་ནས་ཞུས་ཤིང་ཇ་གྲལ་དང། བྱིན་རྟེན་སྣམ་ཕྲུག་སོགས་ཀྱི་ཐོན་ཕྱག་འབྱོར་ལན་ཚིམ་པར་སྩལ། བསྟན་པའི་གསལ་བྱེད་ལྕང་ལུང་པཎྚི་ཏ་ངག་དབང་བློ་བཟང་བསྟན་པའི་རྒྱལ་མཚན་ནས་དངུལ་རྟ་རྨིག་མ་སོགས་ཞུ་རྟེན་དཔངས་མཐོ་བ་དང་བཅས་གསུང་རྩོམ་ཅི་རིགས་དང། བསླབ་བྱ་ཞིག་གནང་དགོས་ཞུས་པར། གདམས་ངག་རུས་པ་ཅན་དང། ཁྲོ་བཅུའི་སྲུང་འཁོར་གྱི་མན་ངག་ཀྱང་ལྗགས་རྩོམ་མཛད་དེ་བསྐུར། ཕ་རོལ་མཆོག་དམན་སུས་ཀྱང་རྟེན་ཆེ་ཆུང་ལ་མ་ལྟོས། ཞུ་དོན་གྱི་ངོ་བོ་ལ་མ་ལྟོས་པའི་ཡིག་འཕྲིན་ཇི་འདྲ་ཞིག་ཕུལ་ན་ཡང་དེ་དང་མཐུན་པའི་ལན་མི་གནང་བ་མི་སྲིད་ལ། གལ་ཆེ་བ་མང་པོ་ལ་ཆབ་ཤོག་སྐྱེས་བཟང་སྙན་ངག་གིས་སྤྲས་པ་ཡང་གནང་སྟེ། དེ་ཡང་རང་དགར་སྤྲོས་པ་མཛད་པ་མ་ཡིན་པ་ནི། ཤེར་མདོ་གསུངས་སྐབས། ཕྱོགས་བཅུའི་དེ་བཞིན་གཤེགས་པས་པདྨའི་སྐྱེས་བསྐུར་བ་ནི་འཇིག་རྟེན་ཐམས་ཅད་བྱིན་གྱིས་བརླབས་པའི་ཆེད་ཡིན་པར་ཉི་སྣང་ལས་གསུངས་པ་ལྟར་ཏེ། སྣོད་ཀྱི་འཇིག་རྟེན་
བྱིན་གྱིས་རློབ་པ་དང། བཅུད་ཀྱི་སྐྱེ་བོ་སྨིན་པར་བྱ་བའི་ཆེད་དུ་ཡིན་པ་ཤེས་དགོས་སོ། །གཉིས་པའི་ཚེས་གཅིག་ནས་བཅད་རྒྱ་རྒྱུན་རིང་མཛད་ཅིང། མཚམས་ཁོང་ནས་སུ་ཉིད་གཡོན་རུའི་ཐོ་ཡོན་ཆོས་རྗེའི་སྤྲུལ་སྐུ་སོགས་ལ་འཇམ་དབྱངས་དཀར་པོ་དང་འཇིགས་བྱེད་ཞལ་ཕྱག་ཡོངས་རྫོགས་ཀྱི་རྗེས་གནང་སོགས་འདོད་ཆོས་འགའ་ཞིག་གནང། དྲུག་པའི་ཚེས་བཅུ་བཞི་ལ་སྐུ་མཚམས་གྲོལ་ནས་རི་ཁྲོད་དུ་དབྱར་ཞལ་བཞེས་མཛད། ཆོས་ཉན་པ་རི་ཁྲོད་ཀྱི་འདུ་ཁང་དུ་མི་ཤོང་ཙམ་ལ་བླ་མཆོད་དང་ཕྱག་ཆེན་སྦྲགས་མའི་ཁྲིད་གང་རྒྱས། རྗེ་ཉིད་ཀྱི་བཀའ་རྩོམ་མང་པོའི་ལྗགས་ལུང། འཕོ་ཁྲིད་དང། རྗེས་གནང་ཟུར་བཀའ་དུ་མ་གནང། ཁྲིད་ཆེ་ཆུང་གང་གནང་ན་ཡང་མདོ་རྒྱུད་དགོངས་འགྲེལ་གྱི་གཞུང་ལ་རྒྱབ་རྟེན་བཅོལ་ནས་གསུངས་པས་གོ་བ་ཤ་ཆོད་རུས་ཆོད་དུ་སྟེར། དཔེ་དང་གཏན་ཚིགས་ལ་བརྟེན་ནས་བཀྲོལ་མཁས་པས་གདམས་དོན་བདེ་བླག་ཏུ་གོ །གོང་མའི་གསུང་སྒྲོས་དང་བླ་མའི་མན་ངག་གིས་བརྒྱན་པས་ཡིད་ཆེས་ངེས་ཤེས་སྐྱེ། དམིགས་རིམ་མྱོང་ཐོག་ནས་གསུངས་པས་གནས་སྐབས་རྒྱུད་ཐོག་ཏུ་འདྲིལ་བདེ་བ་ཞིག་ཡོད་ལ། སྤྱིར་གསུང་བཤད་གང་དང་གང་གི་སྐབས་སུ་ཡང་གཞུང་ཆེན་མོ་རྣམས་ཀྱི་སྤྱི་ཁོག་གཞུང་བསྲང། རྗེ་ཡབ་སྲས་ཀྱི་ལེགས་བཤད་ཀྱི་སྲོལ་ཆེན་པོར་དྲངས། དཀའ་གནས་དོགས་སློང་དང། དོགས་གཅོད་དང་བཅས་རིགས་པ་དང། ལུང་གིས་བསྒྲུབས་ནས་ཕྲ་མོ་རེའི་སྟེང་ནས་ཀྱང་གསུང་རབ་རབ་འབྱམས་ཀྱི་དོན་འབྱམས་ཀླས་པར་འགྲོ་བས་དཔྱོད་པའི་སྒོ་བརྒྱ་ཕྲག་ཕྱེ་ནས་དགའ་བ་སྐྱེད་པ་ནི་ཀུན་ལ་མཐུན་སྣང་དུ་གྲུབ་བོ། །
ལྗོངས་རྒྱུར་བྱོན་དུས་དམ་པ་མང་པོའི་རྣམ་ཐར་གསུངས་ནས་དགེ་འདུན་པ་རྣམས་ཀྱི་ཤེས་རྒྱུད་ལེགས་བཤད་བདུད་རྩིའི་ཆར་གྱིས་བརླན་པར་མཛད། ཟླ་བ་བརྒྱད་པའི་ཚེས་གཅིག་ནས་དགོན་པར་བཅད་རྒྱ་མཛད། བར་སྐབས་ཤིག་བཀྲ་ཤིས་དགེ་འཕེལ་དུ་སྒྲུབ་མཆོད་གསར་དུ་ཚུགས་རྒྱུར་བཀའ་གདམས་ཐིག་ལེ་བཅུ་དྲུག་གི་དབང་གནང། སྔ་སོར་ལྔ་པའི་ནང་དུ་རྒྱལ་བ་སེངྒེ་ང་རོ་རྟེན་དང་བརྟེན་པར་བཅས་པ་རབ་གནས་ཀྱི་ཉིན་རྗེའི་བསྟོད་འགྲེལ་གསར་རྩོམ་གྱི་མཇུག་ལྷ་ཁང་དེ་ཉིེད་དུ་གྲུབ་པར་མཛད་ཅིང་སྐབས་འདིར་བཤད་ལུང་ཡང་སྩལ། གསུང་རྩོམ་གང་ལ་ཡང་སྙན་ངག་གི་ཉམས་ཐོན་པས་ངོ་མཚར་ཞིང་དགའ་བ་སྐྱེད་པ། མདོ་སྔགས་ཀྱི་གཞུང་དོན་དང་འབྲེལ་བས་བསྟན་པའི་གནད་ལ་གོ་བ་སྟེར་བ། ཤེས་རྒྱུད་འདུལ་བའི་ཐབས་སུ་འདྲིལ་བས་བློ་སྦྱོང་གི་གནད་ཚང་བ། སྐུ་ཚེ་སྟོད་ལ་ཤར་ཕྱོགས་གོ་ཌ་བ་ལྟར་བརྗིད་པའི་ཤུགས་ཆེ་ཡང། སྐུ་ཚེ་སྨད་ལ་ལྷོ་ཕྱོགས་བེ་དྷརྦྷ་ལྟར་འཇམ་ཞིང་སྙན་པ་བླ་མའི་བཀའ་ལྟར་མཛད། སྔར་ཡིག་བསྐུར་ཡང་ཞལ་མི་གསལ་བས་བརླིང་བ་ཞིག་ཡོད་ཀྱང། ཐུའུ་བཀྭན་རྡོ་རྗེ་འཆང་ནས་ངེད་ཚོས་ཡིག་བསྐུར་ལ་དངོས་བསྟན་དང། སྦས་དོན་གྱི་རིམ་པ་གཉིས་རེ་འབྱེད་མི་ཤེས་ཞེས་བཀྱོན་པས་དེ་ཕྱིན་ཆད་བསྐུར་ཡིག་དང། གསུང་འཕྲོས་གཉིས་ཀ་ཞལ་གསལ་བར་མཛད། གསུང་རིས་ཆེ་ཆུང་གང་ལ་ཡང་གཞན་གྱི་རིགས་འགྲེ་དང། མཁས་ཉམས་ཀྱིས་ཧང་རྒྱག་མི་མཛད་པར། རིགས་པས་ལེགས་པར་གྲུབ་པའི་འཐད་ལྡན་གསེར་བཙོ་མ་ལྟ་བུ། མདོ་རྒྱུད་ཀྱི་ཁུངས་དང་སྦྱར་ཏེ་གསུངས་པ་ཤ་སྟག་ཡིན་པ་ནི། བཞི་བརྒྱ་པའི་ཚིགས་བཅད་གཅིག་ལས་ཉམས་མྱོང་རྒན་པོའི་འབེལ་གཏམ་གནང་བ་
དང། མི་འགྱུར་མཆོག་ཡངས་མ་ཚར་གཅིག་ལམ་ཙམ་གཟིགས་ནས་ཇ་སྦྱོར་སྦྲེལ་བའི་བར་ལ་སྤྱི་དོན་འགངས་ཆེ་བའི་འགྲེལ་པ་མཐར་ཆགས་སུ་བརྩམས་གྲུབ་པ་ལ་མདའ་ཚད་ཀྱི་ཤོག་བྱང་མདའ་དང་གཟུགས་ཙམ་ཡོད་པ་དང། ཡོན་སྦྱོང་གི་ཆོ་ག་དང། ཀླུ་དབང་གི་སྒྲུབ་ཐབས་སུ་མཚན་རེ་རེའི་སྒྲུབ་བྱེད་ཀྱི་ལུང་རིགས་བཀོད་པ་དང། རྗེའི་བསྟོད་འགྲེལ་འདི་དང་རྡོ་རྗེ་གསུམ་གྱི་སྣང་བ། དྲང་ངེས་རྣམ་འབྱེད་ཀྱི་དཀའ་འགྲེལ་དང་ཟུར་མཆན། འདུལ་མཛོད་དང། སྐབས་བཞི་པའི་སྡོམ་ཚིག་སོགས་ལྟ་བུ་ཚིག་དོན་གྱི་ཆ་གང་ནས་ཀྱང་མཁས་པ་ཕལ་གྱིས་འགྲན་ཟླ་ལོ་བརྒྱར་བསྐྲུན་དཀའ་ལ། མཎྜལ་གྱི་བཤད་པར། དེ་ཁོ་ན་ཉིད་ཀྱི་མཎྜལ་གྱི་གནད་གསུངས་པ་དང། བཀྲ་ཤིས་རྫས་བརྒྱད་ཀྱི་རྣམ་བཤད་ལྟ་བུར་བརྟག་ན་གཟུར་གནས་བློ་ལྡན་རྣམས་དད་གུས་མི་སྐྱེས་པའི་དབང་མེད་པར་མ་ཟད། དཀར་ཆག་ཆོས་ཀྱི་གཎྜིར། གང་ཞིག་ཤེས་པར་བྱ་བ་ཀུན་མཁྱེན་མེ། །གང་ཞིག་སྒྲུབ་པར་བྱེད་པ་སྦྱོར་བ་ཆུ། །གང་ཞིག་ཟག་མེད་ཆོས་ཀུན་བསགས་པའི་ས། །གང་གང་ཇི་ལྟར་གསུང་བཞིན་འགྲུབ་པར་ཤོག །ཅེས་ཚིག་དང་པོས་བསྒོམ་བྱའི་ཡུལ་མཁྱེན་པ་གསུམ། གཉིས་པས་སྒོམ་བྱེད་ཀྱི་ཡུལ་ཅན་སྦྱོར་བཞི། གསུམ་པས་བསྒོམ་པའི་འབྲས་བུ་ཆོས་སྐུ་སྟེ་དངོས་པོ་བརྒྱད་ཀྱི་ཉམས་ལེན་རྫོགས་པར་སྨོན་པའི་སྒོ་ནས་མངོན་རྟོགས་རྒྱན་གྱི་དོན་བསྡུས་པ་དང། ཐེག་མཆོག་རིགས་ཀྱི་ས་བོན་མྱུ་གུར༡༠་བཅས། །ཐོས་བསམ་སྒོམ་པའི་དྲོད་གཤེར་གྱིས་བསྐྱངས་པས། །རྒྱལ་སྲས་སྤྱོད་པ་ཡལ༥་གའི་ཁྱོན་རྫོགས་ཏེ། །སྤངས་རྟོག༡ས་འབྲས་བུས་ཁུར་གྱིས་དུད་པར་ཤོག །ཅེས་ཚིག་རྐང་དང་
པོས་རིགས་ཀྱི་ལེའུ་སོགས་བཞི་ས་བོན་དང། སེམས་བསྐྱེད་སོགས་ལེའུ་དྲུག་མྱུ་གུ་དང་སྦྱར། ཚིག་རྐང་གཉིས་པས་ཆོས་ལ་མོས་པའི་ལེའུ་སོགས་ལྔ་དྲོད་གཤེར་དང་སྦྱར། ཚིག་རྐང་གསུམ་པས་ཐབས་ལྡན་གྱི་ལེའུ་ལྗོན་པ་དང། བྱང་ཆུབ་ཕྱོགས་མཐུན་དང། ཡོན་ཏན་གྱི་ལེའུ་ཡལ་གའི་ཁྱོན་རྫོགས་པ་དང་སྦྱར། རྐང་པ་བཞི་པས་མཐར་ཐུག་གི་ལེའུ་སྟེ་མདོ་སྡེ་རྒྱན་གྱི་ལེའུ་ཉེར་གཅིག་གི་དོན་བསྡུས་པ་དང། ཆོས་ཀུན་མཚན་ཉིད་མཐ༡འ་བྲལ་དབུ་མའི་ལམ། །མཐོང་བ་སྒྲིབ་བྱེ༢ད་རབ་རིབ་ཀུན་སེལ་བའི། །གཉེ༣ན་པོ་དེ་ཉིད་རྟོ༤གས་པའི་མིག་སྨན་གྱིས། །བླ༥་མེད་ཐེག་པའི་འཇུག་ངོགས་གསལ་བྱེད་ཤོག །ཅེས་རྐང་པ་བཞིས་རིམ་བཞིན་དབུས་མཐའ་རྣམ་འབྱེད་ཀྱི་ཚིག་དང་དོན་གྱི་ལེའུ་ཚན་སོ་སོར་བྱས་ཏེ་དོན་བསྡུས་པ་དང། ཁྱད་པར་ཆོ༡ས་ཅན་རྒྱ་ཆེན་ཀུན་རྫོབ་དང། །ཆོ༢ས་ཉིད་སྤྲོས་བྲལ་ཟབ་མོ་གཉིས་མེད་དོན། །ཇི་བཞིན་རྟོགས་ནས་ཚོགས་གཉིས་སྤྱོད་པ་ཡིས། །རྒྱལ་བའི་ཆོས་གཟུགས་སྐུ་གཉིས་འགྲུབ་པར་ཤོག །ཅེས་ཆོས་ཉིད་རྣམ་འབྱེད་ཀྱི་དོན་བསྡུས་པ་དང། མདོར་ན་མཆོ༣ག་གསུམ་ཐུགས་རྗེ་མཐུ་ལ་བརྟེན། །མ་དག་ཁ༤མས་ཀྱི་དྲི་མ་ཡོངས་སྦྱངས་ནས། །བྱང་ཆུབ༥་སྙིང་པོར་ཡོན་ཏ༦ན་གཏེར་ཐོབ་སྟེ། །འཕྲི༧ན་ལས་བཟང་པོས་འགྲོ་ཀུན་སྒྲོལ་གྱུར་ཅིག །ཅེས་རྡོ་རྗེའི་གནས་བདུན་ཉམས་ལེན་གྱི་རིམ་པར་བསྒྲིག་སྟེ་རྒྱུད་བླ་མའི་དོན་བསྡུར་གསུངས་པ་འདི་ཙམ་གྱིས་རྟོག་གེའི་རིགས་པ་དང་ཐ་སྙད་གཙུག་ལག་གིས་ཆེས་ཆེར་ཁེངས་པ་རྣམས་ཞུམ་ཞུམ་པོར་བྱེད་ལ། བསྟན་བཅོས་རྩོམ་པའི་རྒྱུ་གསུམ་ཟླ་བ་ཉ་གང་བའི་ཚུལ་དུ་ཚང་བས་ན་བཀྲ་ཤིས་རྫས་བརྒྱད་ཀྱི་རྣམ་བཤད་བཀྲ་ཤིས་དགའ་སྟོན་ལས། གང་ལས་
བརྩམས་ཀྱང་གཞུང་ལུགས་རྒྱ་མཚོའི་དོན། །མི་ཟད་འདོད་པ་འཇོ་བའི་བུམ་པ་བཟང། །སྩོལ་མཛད་ཛྙཱ་ནའི་མཚན་དང་ཨ་བྷྱེནྟྲས། །འབྲལ་མེད་བྱང་ཆུབ་བར་དུ་རྟག་ཏུ་སྐྱོངས། །ཞེས་གསུངས་པ་ནི་བློ་ལྡན་རྣམས་ཀྱིས་མཆོག་ཏུ་དད་པར་བྱ་བའི་གནས་ཏེ། རྩོམ་པའི་སྒོ་ནས་བསྟན་པ་ལ་བྱ་བ་མཛད་ཚུལ་ཟུར་ཙམ་ཡིན་ལ། དེ་ལྟར་དུ་རྣམ་ཐར་སྤྲིང་ཡིག་ལས། སྔ་མའི་གཞུང་ལ་སྦྱར་བྱང་བཏགས་མིན་ཅིང། །མངོན་བརྗོད་སྤེལ་བའི་ཚིག་བསྒྲིགས་ཙམ་མིན་པར། །བརྩམས་ཆོས་འགའ་ཟུང་བསྟན་དུ་ཡོད་པ་འདི། །བསྟན་ལ་ལག་རྗེས་བཞག་པའི་རྣམ་ཐར་ཡིན། །ཞེས་གསུངས་པ་ལྟར་རོ། །དེས་ན་ཚིག་དོན་ཕུན་སུམ་ཚོགས་པའི་ལེགས་བཤད་གསར་རྩོམ་བསིལ་ལྡན་གྱི་ལྗོངས་འདིའི་ཁོར་ཡུག་ཀུན་ཏུ་བཙལ་ཀྱང་སྟོན་མཇུག་གི་མེ་ཏོག་གསར་པ་ལྟར་རྙེད་དཀའ་བའི་དུས་འདིར་ཚིགས་སུ་བཅད་པ་རེ་རེས་ཀྱང་ཚིག་གི་འདབ་བརྒྱ་གྲོལ་ཞིང་དོན་གྱི་ཟིལ་དངར་ཆགས་པས་ཐར་འདོད་ཀྱི་དགའ་སྟོན་དུ་གྱུར་པ་འདི་འདྲ་བློ་ལྡན་རྣམས་ཀྱིས་རང་གི་བགོ་སྐལ་དུ་བྱ་བར་འོས་སོ། །ཤེས་བྱ་གནས་ལྔ་རིག་པའི་པི་ཝང་རྒྱུད། །མདོ་རྒྱུད་བཞུང་ལུགས་སོར་མོས་བསྐུལ་བ་ཡི། །ཡིད་འཕྲོག་སྒྲ་དོན་ཉམས་ཀྱི་འགྱུར་ཁུག་སྟོང། །རྣ་བའི་བཅུད་ལེན་སྙིང་གི་བདུད་རྩིར་མཛོད། །ཆོས་སྐྱོང་གི་གཏོར་ཆོག་བསྙེན་སྒྲུབ་འཕྲིན་བཅོལ་གྱི་རིགས་ཚིག་བརྗིད་རྔམས་ཆེ་བ། དོན་ཉམས་རྟོགས་ཀྱི་གདེང་མངོན་པ། ལས་ལ་སྦྱར་ན་རྟགས་མཚན་མངོན་སུམ་འབྱུང་བ། འདི་རྩོམ་པ་པོ་རྣལ་འབྱོར་དབང་ཕྱུག་ཅིག་ཡིན་པར་ཐེ་ཚོམ་ག་ལ་ཡོད་སྙམ་པའི་རྡོ་རྗེ་ཚིག་སྣང་བ་བསྒྱུར་ནུས་པའི་བྱིན་རླབས་ཅན་ཤ་
སྟག་ཡིན་ལ། ཁྱ་དགེ་ལེགས་བཤད་གླིང་དུ་རྐུན་མ་ཞུགས་ནས་འདུ་ཁང་ཐེབས་ཀྱི་དངུལ་དང་གསེར་ཕྲན་ཚེགས་ཡོད་པ་ཁྱེར་བ་བརྟག་པ་གསལ་ཟེར་ཚད་ལ་ཞུས་ནས་ངལ་བ་མང་དུ་བྱས་ཀྱང་དོན་མེད་ཀྱི་ལས་རོ་འབའ་ཞིག་ཏུ་སོང་སྟེ། རྗེ་འདིའི་དྲུང་དུ་འོངས་ནས་ཞུས་པར། ཆོས་རྒྱལ་གྱི་བསྐུལ་བ་བརྩམས་ནས་ཚོགས་འདོན་དུ་གནང་བས་མ་འགྱང་བར་རྐུན་མས་གླིང་གསེབ་ཏུ་རྐུན་རྫས་བཙོང་རྒྱུ་ཁྱེར་ཡོང་བའི་ས་ནས་ལག་ཏུ་ཆུད་པ་དང། བཀྲ་ཤིས་འཁྱིལ་རྒྱུད་གྲྭའི་ཟོག་ཧྲུག་གི་རྟ་མང་ཇག་པས་དེད་པར་དམ་ཅན་ལ་བསྐུལ་བ་ཉུང་ངུ་ཞིག་གསུང་རྩོམ་གནང་བས་ཇག་རྐུན་གྱི་ཡུལ་དུ་ཡམས་ནད་བྱུང་སྟེ་དུར་ཁྲོད་ལྟ་བུར་གྱུར་པ་སོགས་ཆེས་མང་ངོ་། །ལོ་མཇུག་ལ་བཅད་རྒྱ་གྲོལ་ཏེ་ལྷོ་བྲག་སྙན་བརྒྱུད་ཀྱི་རྗེས་གནང་སོགས་འདོད་ཆོས་འགའ་ཞིག་གནང། ལོ་འདིར་བསྙེན་རྫོགས་པ་བརྒྱ་དང་རེ་བཞི། རབ་བྱུང་དགེ་ཚུལ་སོ་བདུན་གྱི་ཡིད་ཀྱི་བུམ་བཟང་ཚུལ་ཁྲིམས་བདུད་རྩིའི་བཅུད་ཀྱིས་འགེངས་པར་མཛད། དགུང་ལོ་ང་གཅིག་པ་ཆུ་སྤྲེལ་ལོ་གསར་གྱི་ཚེས་ལ། དོན་གཉེར་ཅན་མང་པོར་མགོན་པོ་དང། ཛམ་དཀར་གྱི་རྗེས་གནང་སོགས་སྩལ། ཞབས་དྲུང་དཀོན་མཆོག་གྲགས་པས་འགྲེལ་པ་དོན་གསལ། མཛོད་རྩ། གྲུབ་མཐའ་རྩ་བ། རྣམ་འགྲེལ་རྩ་བ། རྩ་འཇུག་གཉིས། བསྡུས་གྲྭ། འབོ་ར་དཀོན་མཆོག་དོན་འགྲུབ་ཀྱིས་ཡིག་ཆའི་སྐབས་དང་པོ། ཇ་རོད་མཆོག་གྲུབ་ཀྱིས་སྐབས་དང་པོ་དང་འགྲེལ་པ་དོན་གསལ། ཞབས་དྲུང་བསྟན་པ་རྒྱ་མཚོས་དབུ་མ་ལུང་རིགས་གཏེར་མཛོད་སྟོད་ཆ་སྨད་ཆ་ཆ་ཚང། དར་ཧན་པའི་ལི་བློ་བཟང་རྡོ་རྗེས་ཕར་ཕྱིན་སྐབས་དང་པོ་ནས་བརྒྱད་པའི་བར། ཐོར་གོད་དཀོན་མཆོག་
ཆོས་ལྡན་གྱིས་ཡིག་ཆའི་མཛོད་ཡོངས་རྫོགས། གཅུ་འཁོར་རབ་འབྱམས་པས་དྭགས་པོ་ནམ་མཁའ་གྲགས་ཀྱི་གསང་འདུས་བསྐྱེད་རིམ། པཎ་ཆེན་ཆོས་རྒྱན་གྱིས་མཛད་པའི་བདེ་མཆོག་བསྐྱེད་རིམ། ཐེ་བོ་བློ་བཟང་ཤེས་རབ་ཀྱིས་བྱམས་ཆོས་སྡེ་ལྔ་སོགས་ཀྱི་རྒྱུགས་ཕུལ་བར་སློབ་གཉེར་བྱེད་ཚུལ་གྱི་བསླབ་བྱ་དང། དགྱེས་པའི་བཀའ་ཕེབས་གསོལ་རས་དང་བཅས་པ་སྩལ། དུས་ནམ་གྱི་ཚེ་ན་ཡང། འཛིན་སྐྱོར་སྦྱངས་བྱེད་མཁན་དང། དམ་བཅའ་ལེགས་པོ་ཐོན་པ་དང། དམིགས་རྐྱེན་ལ་ཕན་པའི་བགྲོ་གླེང་དང། ལས་སྣེ་བསྒྲིག་ལམ་ཚུལ་བཞིན་བྱེད་མཁན་རྣམས་ལ་ཐུགས་ལྷག་པར་དགྱེས་པ་ནི་ཐེག་པ་ཆེན་པོའི་དགེ་བའི་བཤེས་གཉེན་གྱི་རྣམ་པར་ཐར་པ་རྨད་དུ་བྱུང་བའོ། །དེས་ན་ཐར་འདོད་དག་གིས་བླ་མ་ཡི་དམ་སྒྲུབ་པའི་མཆོད་པས་མཉེས་པ་ངོ་ཤེས་པའི་སྒོ་ནས་ཆོས་བརྒྱད་དང་འདྲེས་པའི་ཐོས་བསམ་ཙམ་གྱིས་མི་ངོམས་པར་སྟོན་གྱི་མེ་ཏོག་ལྟ་བུའི་ཚེ་འདིའི་མཇུག་ལ་བབས་དུས་རང་ལ་རང་ཁྲེལ་མི་དགོས་པའི་ལམ་རྒྱགས་ཚོལ་བར་གྱིས་ཤིག །སྤྱིར་ཟང་ཟིང་གི་མཆོད་པ་ལས་ཆོས་ཀྱི་མཆོད་པ་ཕན་ཡོན་ཆེ་སྟེ་བྱམས་པ་སེངྒེ་སྒྲའི་མདོ་ལས། ངས་ནི་ཚུལ་ཁྲིམས་ལ་གནས་ཏེ་མང་དུ་ཐོས་པ་བཙལ་བར་བྱའོ། །ཞེས་བསྟན་ན་དེ་དག་དེའི་ཚེ་ན་ཚུལ་ཁྲིམས་འཆལ་བར་གནས་ཤིང་ཆོས་འཚོལ་བ་སྤངས་ཏེ། མཆོད་རྟེན་ལ་མཆོད་པའི་ལས་བྱ་བར་བརྩོན་ཞིང་གཞི་དེས་འཚོ་བར་སེམས་པ་ལ་ལྟོས་ཞེས་དང། བྲམ་ཟེ་དང་ཁྱིམ་བདག་རྣམས་ངའི་སྐུ་གདུང་མཆོད་པར་འགྱུར་རོ་ཞེས་དེ་སྐད་གསུངས་ན། མི་བླུན་པོ་
དེ་དག་རྣལ་འབྱོར་དང། སྤོང་བ་དང། ལུང་ནོད་པ་དང། ཁ་འདོན་སྤངས་ནས་སྐུ་གདུང་གི་མཆོད་པ་ལ་བརྟེན་ནས་འཚོ་བར་བྱེད་པ་ལ་ལྟོས་ཞེས་སྨད་ཅིང། ཟང་ཟིང་གི་མཆོད་པས་ཆོས་ཀྱི་མཆོད་པ་ལ་བརྒྱད་ཆ་དང་སྟོང་ཆས་འགྲན་མི་ནུས་པར་མདོ་སྡེ་དུ་མ་ལས་གསུངས་སོ། །སྡིག་པའི་ལས་ཀྱིས་བསྒྲུབ་པའི་ལོངས་སྤྱོད་ནི། །གྲུབ་ཀྱང་ཉམས་འགྱུར་རྩྭ་རྩེའི་ཟིལ་པ་འདྲ། །ནོར་གྱིས་དྲེགས་ནའང་རང་གཞན་ཕུང་བྱེད་པ། །གླང་ཆེན་སྨྱོན་པ་གཡུལ་དུ་ཆས་པ་འདྲ། །རབ་ཏུ་བྱུང་བའི་བྱ་བ་ཚུལ་ཁྲིམས་དང། །མང་དུ་ཐོས་དང་རྣལ་འབྱོར་བརྩོན་པར་བསྔགས། །དེ་སླད་ཁྱོད་ནི་ཆོས་མཐུན་སྐྱེ་བོ་ལ། །ཡིད་བཞིན་ནོར་ལྟར་ཕངས་ཤིང་གཅེས་པར་དགོངས། །བླ་གྲྭ་སུམ་བརྒྱ་སྐོར་ལ་དཔའ་གཅིག་གི་དབང། དགའ་ལྡན་ལྷ་བརྒྱ་མ་དང་བདེ་ལམ་གྱི་ཁྲིད། གཞན་ཡང་ལུང་རྗེས་གནང་ཕྲན་ཚེགས་འགའ་ཞིག་གནང་ནས་བཅད་རྒྱ་མཛད། དེའི་ཁོང་ནས། ལུགས་གཉིས་གཟིགས་པའི་མཁྱེན་དཔྱོད་མཁའ་ལྟར་ཡངས་ཤིང། སྡེ་བཞིའི་དཔལ་གྱིས་མངོན་པར་མཐོ་བའི་མཚན་སྒྲོག་མཁན་ཆེན་སྤྲུལ་བའི་སྐུ་རིན་པོ་ཆེ་ངག་དབང་འཇམ་དཔལ་བསྟན་པ་རབ་རྒྱས་ལ་རིག་བྱེད་མའི་ཐུན་མོང་མ་ཡིན་པའི་རྗེས་གནང། དགའ་ལྡན་ལྷ་བརྒྱ་མའི་ཁྲིད་སྩལ། དེ་ནས་ཚིགས་སུ་བཅད་པ་བརྒྱ་པ་ལས། དམ་པ་རིང་ན་གནས་གྱུར་ཀྱང། །ཕོ་ཉ་ཡོན་ཏན་ཉིད་ཀྱིས་བྱེད། །ཅེས་གསུངས་པ་ལྟར། ཅོ་ནེ་དགོན་ཆེན་ཏིང་འཛིན་དར་རྒྱས་གླིང་ནས་གཡོ་སའི་སྐྱེས་བུ་དམ་པར་གྲགས་པ་དཔོན་སློབ་ངག་དབང་བློ་གྲོས། རྒོད་ཚང་དཔོན་སློབ་རིན་ཆེན་དཔལ་བཟང། ཚལ་མགོ་དཔོན་སློབ་དོན་ཡོད་སྦྱིན་པ། མར་ཐང་དཔོན་སློབ་སྤྲུལ་སྐུ་བློ་བཟང་བསྟན་འཛིན་ལྷུན་གྲུབ་སོགས་དཔོན་སློབ་བརྒྱ་
ཕྲག་ཙམ་དཀའ་བས་འོང་སྟེ། ཧ་ཅང་ནན་ཆེ་བར་བརྟེན། ནག་ཟླའི་བཅོ་ལྔ་ནས་མགོ་བརྩམས་ཏེ། གསན་མཁན་རྔ་རྒོད་སྤྲུལ་སྐུ་བློ་བཟང་བྱམས་པ་རབ་རྒྱས། དགོན་ལི་སྤྲུལ་སྐུ་བློ་བཟང་བསྟན་འཛིན་ཆོས་གྲགས། སྟག་ཚང་སྤྲུལ་སྐུ་བློ་བཟང་བསྟན་པའི་རྒྱལ་མཚན་སོགས་ཕྱོགས་ནས་འོངས་པའི་གསན་མཁན་ཉིས་བརྒྱ་ལྔ་བཅུ་སྐོར་ལ་རྡོ་རྗེ་འཕྲེང་བའི་དབང་རྫོགས་པར་གནང། གཞན་ཡང་བཀའ་གདམས་ཐིག་ལེ་བཅུ་དྲུག་གི་དབང། འདུལ་བའི་སྡོམ་ཚིག་གི་ལུང། དགའ་ལྡན་ལྷ་བརྒྱ་མའི་ཁྲིད། རྔ་གདོང་ཁྲི་སྤྲུལ་དཀོན་མཆོག་བསྟན་འཛིན་རྒྱ་མཚོ་དགེ་ཚུལ་དང་དཔོན་སློབ་བཅུ་གསུམ་ལ་ཕུན་ཚོགས་གོང་འཕེལ་གྱི་ཚུལ་དུ་བསྙེན་རྫོགས་ཀྱི་སྡོམ་པ་སྩལ་ཏེ་རེ་བའི་ཤིང་རྟ་འགེངས་པར་མཛད། གཞུང་བཟང་སྟོང་གི་ཆུ་བོ་འདུ་བ་ལས། །བཤད་སྒྲུབ་རྒྱུན་འབེབས་ཆོས་ཀྱི་མཚོ་ཆེན་དེར། །ཐར་འདོད་བློ་གསལ་ཆད་མེད་འདུ་བ་ནི། །ཉལ་འགྲོ་མ་ལུས་ཟླ་བའི་མ་མར་བཞིན། །སླར་ཡང་བཅད་རྒྱ་མཛད་པ་ལས། མ་ཡུམ་འདུ་ཕུང་མ་བདེ་ནས་མཛོད་དགེ་དགོན་གསར་དུ་ཕེབས་དགོས་བྱུང། ཕྱག་དབང་དང་བཀའ་བསྒོ་སོགས་དང། ཀུན་རིག་གི་དཀྱིལ་འཁོར་དུ་བཅུག་ནས་དབང་གིས་སྨིན་པར་མཛད། ཞལ་ཏ་དང་སེམས་གསོ་ལེགས་པར་གནང། དགེ་ཚུལ་བདུན་དང་བསྙེན་རྫོགས་པ་ཉེར་བདུན་བསླབ་པ་ལ་བཀོད། གདན་སར་བྱོན་ནས་བཅད་རྒྱ་མཛད་ཅིང། དེའི་ཁོང་ནས་བཱ་རིན་ལྷ་བཙུན་ལ་ལེགས་བཤད་སྙིང་པོའི་བཤད་ལུང། རིག་བྱེད་མ་གསང་སྒྲུབ། ཛམ་དམར་སྲོག་སྒྲུབ། གསང་བདག་ཨུ་ཙརྻ། རྣམ་
འཇོམས། མཁའ་ལྡིང་གསེར་མིག་འཁྱིལ་བ། འབྱུང་པོ་འུར་འདེད་བཅས་ཀྱི་རྗེས་གནང། འཇིགས་བྱེད་དང་བདེ་མཆོག་གི་དབང་བཅས་གནང། སྐུ་མཚམས་གྲོལ་ནས་མགོན་པོ་སྙིང་ཞུགས་ཀྱི་རྗེས་གནང། འདོད་རྒྱལ་གསང་སྔགས་སྒྲ་ཡབ་ཡུམ་སྦྲགས་མ་ཐུན་མོང་མ་ཡིན་པ་འཁོར་ལོ་སོགས་ལ་བརྟེན་པའི་རྗེས་གནང། འཇམ་དབྱངས་ནག་པོའི་རྗེས་གནང། ལམ་གཙོའི་ཁྲིད། ལྗགས་རྩོམ་དྲུག་ཅུ་པའི་རྣམ་བཤད། ཆོས་སྤྱོད་གསལ་བའི་སྒྲོན་མེ། ཁྲོ་བཅུའི་སྲུང་འཁོར་གྱི་ལུང་སོགས་སྩལ་ཏེ་བཞེད་པ་བསྐངས་ཤིང་ཐུགས་ཡིད་གཅིག་ཏུ་འདྲེས། བདུན་པའི་ཡར་ངོ་ནས་ལོ་མཇུག་བར་དུ་དགོན་དང་རི་ཁྲོད་ནས་བཅད་རྒྱ་མཛད། དགུ་པའི་ཉེར་གཉིས་ལ་མ་ཡུམ་གཤེགས་པའི་གཏམ་ཉེར་བཞིའི་ཉིན་སྙན་དུ་འབྱོར། དགོན་རི་ཁྲོད་བཅས་ལ་མང་འགྱེད་དང། དགོན་གསར་དུ་དགེ་སྒྲུབ་རྒྱུན་འཛུགས་ཀྱང་མཛད། འདི་ལོ་ཟླ་བ་བཞི་པའི་དབུས་པ་ཡར་འགྲོའི་སྐབས་ཞུ་ཡིག་སོ་སོར། མ་རྒན་བོ་ཆོག་སྐྱིད་དུས་ཀྱི་ཆོས་ཉིད་དུ་གྱུར་པའི་བསྔོ་རྟེན་ཞེས་ཕུལ་བ་ཐེ་ཚོམ་དུ་གྱུར་ཀྱང། སྐབས་འདིར་མ་ཡུམ་འདས་ཚོད་དང་ཞུ་ཡིག་དབུས་སུ་འབྱོར་ཚོད་དུས་འགྲིག་པས་ངོ་མཚར་དུ་གྱུར། ལོ་འདིར་བསྙེན་རྫོགས་པ་ཉིས་བརྒྱ་དང་དོན་བཞི། དགེ་ཚུལ་སོ་ལྔ་བསླབ་པ་ལ་བཀོད་དེ་ཐར་པའི་རྒྱལ་མཚན་སྲིད་རྩེར་བསྒྲེངས། ལོ་མཇུག་སྒོ་མང་མཁན་རིན་པོ་ཆེ་བློ་བཟང་ཆོས་དར་བ་ཞིང་གཤེགས་ཁར་དམ་པ་དེ་ཉིད་ཀྱི་མནལ་ལམ་དུ། བདེ་མཆོག་གི་རྣལ་འབྱོར་པ་ཞིག་གིས་ཀ་པཱ་ལ་ནས་ང་ལ་བདུད་རྩི་སྟེར་བ་རྨིས་གསུངས། རྣལ་འབྱོར་པ་དེ་སུ་ཡིན་ཞུས་པས། ངའི་བླ་མ་ཁྲི་ཆེན་
དགེ་འདུན་ཕུན་ཚོགས་པ་བདེ་མཆོག་གི་རྣལ་འབྱོར་པ་ཡིན་ཞེས་སྔོན་གནས་རྗེས་དྲན་གྱི་གསུང་དང་བཅས་རྗེ་འདི་ཉིད་སྤྱན་དྲངས་ཏེ། བདེ་མཆོག་གི་དབང་ཞུས་སྐབས་སྔར་བདེ་མཆོག་རང་བྱོན་ནས་རྙེད་པའི་གསང་རྫས་དེ་ཡང་གནང། ཕྱིས་དེ་ཉིད་ཀྱི་རྣམ་ཐར་གསུངས་པའི་ནང་དུ། རང་གིས་འཕྲིན་པ་ཙམ་བྱས་ཀྱང་རྩ་བའི་འབྱུང་ཁུངས་འཁོར་ལོ་སྡོམ་པའི་རྣལ་འབྱོར་གྱི་དབང་ཕྱུག་ཕམ་མཐིང་པ་ཡིན་པས་ཉིད་ཀྱི་མནལ་ལམ་དུ་བྱུང་བའི་རྣལ་འབྱོར་པ་ཡང་དེ་ཉིད་ཡིན་པར་མངོན་ཞེས་གསུངས་པ་ལ་དཔག་ན་རྣལ་འབྱོར་གྱི་དབང་ཕྱུག་ཆེན་པོ་དེ་ཉིད་དུས་ཀྱི་མཐར་ཡང་གསང་ཆེན་བསྟན་པའི་སྙིང་པོ་གསལ་བར་མཛད་པའི་ཕྱིར་དུ་བདག་ཅག་རྣམས་ཀྱི་མགོན་དུ་བྱོན་པར་གོར་མ་ཆག་གོ་སྙམ་དུ་དད་པའི་པངྨོ་ལན་བརྒྱར་ཟུམ་པར་བྱེད་དོ། །དགུང་ལོ་ང་གཉིས་པ་ཆུ་བྱའི་ལོ་སྨོན་ལམ་གྱི་སྐབས་སུ་ཐག་ཉེ་རིང་གི་མཇལ་བ་རྣམས་ལ་བསྔོ་སྨོན་ཆོས་འབྲེལ་གང་འདོད་དང། བྱང་འགྲུལ་མང་པོ་ལ། སྒྲོལ་དཀར། རྟ་མགྲིན། རྣམ་སྲས། མགོན་པོ་སྙིང་ཞུགས། ཐུགས་རྗེ་ཆེན་པོ། ཚེ་རྟ་མགོན་གསུམ་སོགས་ཀྱི་རྗེས་གནང་ལན་གྲངས་དུ་མ་དང། གསུང་རྩོམ་དུ་མའི་ལུང་སོགས་ཚིམ་པར་གནང་ཞིང་ཐོན་ཕྱག་ཀྱང་དཔངས་མཐོ་བ་སྩལ། དགོན་པར་བྱོན་ནས་བཅད་རྒྱ་མཛད་ཅིང་བཞི་པའི་ཡར་ངོར་སྐུ་མཚམས་གྲོལ། ཐུགས་རྗེ་ཆེན་པོ་བཅུ་གཅིག་ཞལ་རྒྱལ་པོ་ལུགས་ཀྱི་སྐུ་འདྲ་གསར་བཞེངས་མཛད་ནས་དྲུག་པའི་ཚེས་ལ་དགོན་གསར་དུ་སྤྱན་དྲངས། ཚེས་པ་ལྔའི་མཚན་མོར་འདུ་ཁང་ཕུར་བཞུགས་སུ་
བཅུག་སྟེ་མཆོད་སྤྲིན་སྤྲོས། དྲུག་གི་ཉིན་རབ་གནས་མཛད་ཅིང་མ་ཎིའི་མངོན་རྟོགས་ཚིགས་བཅད་མ་ཚོགས་འདོན་དུ་ཚུགས། བདུན་བརྒྱད་གཉིས་ལ་གཞི་བྱེས་ཀྱི་བླ་གྲྭ་སྟོང་ཕྲག་བརྒལ་བར་ཐུགས་རྗེ་ཆེན་པོའི་དབང་གནང། དེ་ཡང་ཆོས་རྒྱལ་སྲོང་བཙན་གྱིས་གནས་ཆེན་བརྒྱད་ཀྱི་ས་སྣ་དང། ཙནྡན་གྱི་ཕྱེ་མ་སོགས་སྤུངས་པ་ལས་སྐུ་རང་བྱོན་དུ་ཕེབས་པ་དང་ཆ་མཚུངས་པར་འདིར་ཡང་རྒྱ་གར་རྡོ་རྗེ་གདན། རི་བོ་རྩེ་ལྔ། རི་བོ་གྲུ་འཛིན། བྲག་དཀར་རྟ་སོ་སོགས་མི་ལའི་སྒྲུབ་གནས། ལོ་ཀྱ་ཏུན། མཆོད་རྟེན་བྱ་རུང་ཁ་ཤོར་དང། གོ་མཱ་ས་ལ་གནྡྷ། མཚོ་མ་ཕམ་དང། ཆུ་བོ་གངྒཱ་སོགས་ཀྱི་ས་སྣ་དང་སྨན་སྤོས་ལས་བསྒྲུབས་པ་དང་གཅིག །སིདྒ་ལའི་གླིང་གི་ཙནྡན་སྦྲུལ་སྙིང་ལས་འཁྲུངས་པའི་སྐུ་ཐུགས་ཀར་བཞུགས་པ་དང་མཚུངས་པར། རི་བོ་གྲུ་འཛིན་གྱི་ཙནྡན་ལས་གྲུབ་པའི་སྤྱན་རས་གཟིགས་ཀྱི་སྐུ་ཐུགས་ཀར་བཞུགས་པ་དང་གཉིས། རྒྱལ་པོ་ཡབ་ཡུམ་གསུམ་གནས་སོ་སོར་ཐིམ་པ་དང་མཚུངས་པར། གནས་སོ་སོར་རྒྱལ་པོ་ཡབ་ཡུམ་གསུམ་གྱི་སྐུ་བཀོད་པ་དང་བཅས་རང་བྱོན་ལྔ་ཚང་བ་དང། མཚན་མོ་རང་བྱོན་དུ་གྲུབ་པ་དང་ཆ་མཚུངས་པས་དུས་དེར་བཞུགས་གནས་སུ་སྤྱན་དྲངས་པ་ཡིན་ལ། ཞལ་ནས་ཀྱང། ཐུགས་རྗེ་ཆེན་པོ་ལ་སྐུའི་རྣམ་འགྱུར་མང་ན་ཡང་རྒྱལ་པོ་ལུགས་འདི་བསྟན་པའི་འཕེལ་རྒྱས་ལ་གལ་ཆེ་གསུངས། དེ་ཉིན་བཀྲ་ཤིས་རྫས་བརྒྱད་མཆོག་ཐུན་གཉིས་དང། ཞི་རྒྱས་དབང་དྲག་ལ་སྦྱར་བ་དང། འཕགས་ལམ་ཡན་ལག་བརྒྱད་དང་སྦྱར་བའི་གསུང་བཤད་སྔར་མ་ཐོས་པ་
གནང་བས། རེབ་ཙ་སྤྲུལ་སྐུས་དེ་འཕྲལ་གསུང་བཤད་དེ་བཞིན་ཡི་གེར་འཁོད་པའི་གསུང་རྩོམ་ཞུས་པར། རྣམ་རྟོག་གིས་སྒྲོ་བཏགས་ན་འགྲིག་འགྲིག་ལྟ་བུ་འོང་བར་སྣང་ཡང། དཔལ་སྒང་ལོ་ཙཱ་བ་སོགས་ཀྱིས་རྗེའི་གསུང་གི་འདི་སྐོར་ལ་ཟུར་ཟ་ཁུལ་བྱས་པས་བཤད་འདོད་སྐྱེས་པ་ཡིན་པས་བརྩམས་ཆོག་གསུངས་ཏེ་ལྗགས་རྩོམ་མཛད། ཨ་མོ་སྤྲུལ་སྐུ་བློ་བཟང་དཀོན་མཆོག་བསྟན་པའི་རྒྱལ་མཚན་སོགས་བསྒྲུབ་བྱ་བཅོ་ལྔ་བསྙེན་རྫོགས་དང་གཅིག་དགེ་ཚུལ་དུ་བསྒྲུབས། དོན་གཉེར་བ་རྣམས་ལ་འཇམ་དབྱངས་དཀར་པོའི་རྗེས་གནང་སོགས་འདོད་ཆོས་ཅི་རིགས་སྩལ། གུར་དཀར་དབུ་མདུན་དང་རི་རྩེ་གཉིས་ཀར་བྱོན་ཏེ་ཆར་འབེབས་དང་འབྲེལ་བའི་བསང་ཡིག་ལྗགས་རྩོམ་མཛད་ནས་བསང་མཆོད་དང་བཅས་ཆོས་བསྒྲགས་པའི་མདོ་དང། གང་སེར་མའི་ཤིས་བརྗོད་གསུངས། བྲག་གི་རྩེ་ནས་བྲག་ལ་ཁྲུས་གནང་བས་ཐན་པ་ཤིན་ཏུ་ཆེ་བའི་སྐབས་ཡིན་ཀྱང་ཉིན་མཚན་མང་པོར་ཆར་གྱི་རྒྱུན་བཟང་པོ་བབས་ཤིང་དེ་ནས་བཟུང་སྟེ་བྲག་མདོག་སོར་ཆུད་དེ་དཀར་པོར་སོང། དགེ་ལྡན་བསྟན་པ་འཕེལ་རྒྱས་གླིང་དུ་གདན་དྲངས་ཏེ་བྲག་མགོན་གྱི་སྡིངས་སུ་རི་ཁྲོད་ཀྱི་གནས་བྱིན་གྱིས་བརླབས། མིང་ཐར་པ་གླིང་ཞེས་བཏགས། དགོན་པར་བྱོན་ནས་མགོན་ཆོས་ལྷ་མོ། རྣམ་སྲས། བེག་ཙེ་བཅས་ཀྱི་རྗེས་གནང་དང། ལུང་ཁ་ཤས་སྩལ། ཆོས་རྫོངས་དགོན་དུ་གདན་དྲངས་པ་ལྟར་བྱོན་ནས་སེར་སྐྱ་མང་ལ་མགོན་ཆོས། ལོ་གྱོན་མ་བཅས་ཀྱི་རྗེས་གནང། འཕོ་ལུང་ཕྱག་དབང་སོགས་ཡིད་ཚིམ་ངེས་མཛད། དགོན་པ་ཆེ་ཆུང་གང་དུ་བྱོན་ན་ཡང་དངོས་འབུལ་གྱི་རིགས་ཕྱིར་སློག་པ་ཁོ་ན་
མཛད་ཅིང། དེའི་སྟེང་དུ་སྤྱི་འཇོག་མང་འགྱེད་སོགས་སྤམ་མཐོ་བ་གནང་བ་སྐབས་ནམ་ཡིན་ལ་འདྲ། དེ་ནས་གདན་སར་བྱོན་ཏེ་ཆེད་གཏད་ཀྱིས་འོངས་ནས་སྒུག་སྡོད་བྱས་པའི་ཕྱོགས་འགྲུལ་སོ་སོར་ཕྱག་རྡོར་གཏུམ་པོ། སྒྲོལ་ལྗང། དབྱངས་ཅན་མ་དམར་མོ། ནོར་རྒྱུན་མ། མགོན་པོ། རྟ་མགྲིན། མི་འཁྲུགས་པ་སོགས་ཀྱི་རྗེས་གནང་དུ་མ་དང། འཇིགས་བྱེད་དཔའ་གཅིག །བདེ་མཆོག་ལཱུ་ཨི་པ། བདེ་མཆོག་ལུས་དཀྱིལ་སོགས་ཀྱི་དབང། ཉེར་མཁོའི་ལུང་གང་མོས། རྡོ་རྗེ་རྣལ་འབྱོར་མའི་བྱིན་རླབས། རིག་བྱེད་མའི་ཐུན་མོང་དང་ཐུན་མོང་མ་ཡིན་པའི་རྗེས་གནང། འཇིགས་བྱེད་བཅུ་གསུམ་མ་དང། གདུགས་དཀར་གྱི་དབང་སོགས་དང་ལུང་གི་རིགས་མང་ཞིག་གནང། ཀུན་གཟིགས་མཆོག་སྤྲུལ་རིན་པོ་ཆེ་དབུས་ནས་བྱོན་པའི་ཆིབས་བསུར་མང་མང་རྒྱང་ནས་འུར་ལངས་ལྟ་བུས་བརྒྱད་པའི་ཚེས་ལ་སོང་བར། རྗེ་ཉིད་ནས་ཉི་ཤུ་སྐོར་ལ་སོང་ན་རན་ཞེས་གསུངས་ཏེ། ཉི་ཤུའི་ཉིན་དལ་འགྲོས་ཀྱིས་རིམ་པར་ཕེབས་པས་ཉེར་དྲུག་གི་ཉིན་རྩེ་འགྲམ་ནས་དུས་ཚོད་བསྒྲིག་པ་ལྟ་བུར་ཞལ་འཛོམ། དགོན་པར་བྱོན་ནས་ཉིན་ཁ་ཤས་ཀྱི་རིང་ཡབ་སྲས་ལྷན་རྒྱས་ནས་བཞུགས་གྲལ་རྒྱས་པ་དང། སྒེར་གྱི་དཀར་སྤྲོ་དམར་སྤྲོ་རྒྱས་པ་ཕུལ་ནས་གསུང་སྒྲོས་ཞིབ་པར་མཛད། དེ་ཡང་མཆོག་སྤྲུལ་རིན་པོ་ཆེ་གྲྭ་སར་ལོ་བརྒྱད་དགུ་ཞིག་མ་མཐའ་བཞུགས་རྩིས་ཡིན་ཀྱང། ཞབས་བསྙུན་དང་ལུང་ཕེབས་ཀྱི་དབང་གིས་ལོ་ངོ་ལྔ་ཙམ་ལས་བཞུགས་རྒྱུ་མ་བྱུང་བ་ན། སྔར་གུང་ཚིགས་ཀྱི་ཐེབས་ཕུལ་བ་ལོ་ཧྲིལ་པོ་གསུམ་གྱི་ཟླ་གྲངས་དང་འགྲིག་ཅེས་ཡ་མཚན་དུ་གླེང་བའང་བྱུང། དོན་གཉེར་བ་འགའ་ཞིག་ལ་ལུང་རྗེས་གནང་དུ་མ་སྩལ་ཞིང། ལོ་
གསར་བར་དུ་ཉི་ཟློག་སྦྱིན་སྲེག་སྐབས་མ་གཏོགས་རི་ཁྲོད་དུ་བཅད་རྒྱ་མཛད། ལོ་འདིར་མཁར་སྔོན་ཧུ་ཐོག་ཐུ་དཀོན་མཆོག་བསྟན་འཛིན་རྒྱ་མཚོ། ཆེས་པ་རྒྱ་མཁར་སྤྲུལ་སྐུ་དཀོན་མཆོག་བསྟན་པའི་རྒྱལ་མཚན་སོགས་བསྙེན་རྫོགས་པ་བརྒྱ་དང་བརྒྱད་ཅུ། དགེ་ཚུལ་ང་གཉིས་ལ་བསླབ་པ་སྩལ་ཏེ་ཐར་ལམ་ལ་བཀོད། དགུང་ལོ་ང་གསུམ་པ་ཤིང་ཁྱིའི་ལོ་གསར་ལ་དགོན་པར་བྱོན་ནས་སྨོན་ལམ་གྱི་རིང་ཕྱོགས་འགྲུལ་རྣམས་ལ་ཕྱག་དབང་འདོད་ཆོས་ཀྱིས་ཚིམ་པར་མཛད། ཕལ་ཆེར་བཅད་རྒྱའི་ངང་ལ་བཞུགས་པའི་ཐུན་མཚམས་རྣམས་སུ་ཟློས་གར་གྱི་བསྟན་བཅོས་ཡང་དག་ལམ་དུ་དཀྲི་བའི་རོལ་རྩེད་གསུང་རྩོམ་གནང། འདི་ནི་ཡེ་ཤེས་རྒྱས་པའི་མདོ་ལས། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་མངོན་པར་རྫོགས་པར་འཚང་རྒྱ་བར་འདོད་པས་བསྟན་བཅོས་ཐམས་ཅད་ཤེས་པར་བྱ་བ་ལ་མངོན་པར་བརྩོན་པར་བྱའོ། །མོའུ་འགལ་གྱི་བུ་འདི་ལྟ་སྟེ་བཤད་པ་དང་སྔོན་གྱི་རབས་ཀྱི་གྲུབ་པའི་མཐའ་འདི་ལ་སྤྱོད་པའི་བྱང་ཆུབ་སེམས་དཔའ་ནི་གང་ཟག་གི་ཐ་སྙད་དང། གྲོང་གི་ཐ་སྙད་ལ་བསླབ་པར་བྱའོ། །ཡུལ་གྱི་ཐ་སྙད་ལ་བསླབ་པར་བྱའོ། །གང་དང་གང་དུ་འགྲོ་བ་དེའི་ཐ་སྙད་ལ་བསླབ་པར་བྱའོ། །ཇི་ཙམ་དུ་འཇིག་རྟེན་གྱི་ཤེས་པ་གང་དག་ཤེས་པ་ཐམས་ཅད་ལ་མཁས་པར་བྱའོ་ཞེས་གསུངས་པ་ལྟར་ཐབས་ལ་མཁས་པའི་སྤྱོད་པ་རླབས་པོ་ཆེ་དང་དགོས་པ་མང་པོ་སྡུད་པ་ཤེས་པར་གྱིས། བར་སྐབས་སུ་མཐོང་གྲོལ་ཆེན་མོར་ཁྲི་མཆོད་ཀྱི་དབུར་བྱོན། བདེ་མཆོག་ལྷ་ལྔ། ལུས་དཀྱིལ་སོགས་ཀྱི་དབང། འཇིགས་བྱེད་
བསྐྱེད་རིམ་གྱི་ཁྲིད། འབྱུང་འདུལ་མེ་དབང་མ་དང། འབྱུང་པོ་འུར་འདེད་སོགས་ཀྱི་རྗེས་གནང། མགོན་པོ་སྙིང་ཞུགས། རྣམ་སྲས་གསུང་མཆོག་ལུས་ངན་པོའི་རྗེས་གནང། གཞན་ཆོས་བཀའ་མང་དུ་གནང་ནས་སླར་བཅད་རྒྱ་མཛད། བྱམས་པ་ལུང་སྟོན་མའི་སྐུ་བརྙན་ཁྱད་འཕགས། གཟུངས་གཞུག་དང་བཅས་པ་ལེགས་པར་གྲུབ་ནས་གསུམ་པའི་ཚེས་དགུའི་ཉིན་སྤྱན་དབྱེའི་ཆོ་ག་མཛད་དེ་མཆོད་འཕྲེང་གི་མགོར་གསེར་མགར་ལ་ཡོན་དང་སྟོན་མོ་གཟབ་རྒྱས་བསྟར། དེ་སྐབས་ཡོན་བསྟར་བའི་ཐོ་ཕྱག་བྲིས་གནང་བའི་ནང་ན། སྤྲུལ་བའི་བཟོ་བོ་དམ་པར་འབུལ་བ་མཚོན་བྱེད་ཙམ་དུ་ཞེས་འདུག་པས་སྤྲུལ་བར་ངེས་སམ་སྙམ་པའི་ལོ་རྒྱུས་དཀར་ཆག་ཆོས་ཀྱི་གཎྜིར་གསལ་ལ། མགར་བ་འདི་ལ་སྐུའི་རྣམ་པ་ལེགས་པར་མ་ཤར་བར་བཟོ་མི་བྱེད་ཚུལ་དང། དབུ་གདུགས་ལྟར་རྒྱས་པ་དང། སྙན་མཉམ་ཞིང། སྙན་ཤལ་རིང་བ་སོགས་ཀྱི་རྒྱུ་མཚན་ཐུགས་ལ་འབབ་ངེས་ཞུ་མཁས་པ་བྱུང་ཚུལ་དང། མགར་གཡོག་ལ་ཆོག་ཤེས་ཀྱི་གདམས་ངག་བཤད་པ་དང། ཡོ་བྱད་ལ་མི་དགའ་བ་སོགས་ཀྱི་བསྔགས་བརྗོད་མང་པོ་གནང། སྐུ་འདི་ལ་གང་ཐད་ནས་ཆ་མི་མཚུངས་པ་ཅུང་ཟད་ཙམ་ཡང་མེད་ལ། ནམ་བལྟས་ན་ངོ་མཚར་ཞིང་ཡིད་དུ་འོང་བ་བལྟས་ནས་སྡོད་དགོས་པ་འདི་ལྟ་བས་མི་ངོམས་པའི་རྟགས་ངོ་མ་རང་ཡིན་གསུངས་ཏེ་བྱམས་མགོན་དགྱེས་པའི་འཛུམ་ཞལ་མངོན་དུ་གྱུར་བ་སོགས་ཀྱི་རྟགས་རྨད་དུ་བྱུང་བར་སེམས་སོ། །རབ་གནས་ཀྱི་མཇུག་ཏུ་སྨོན་ལམ་ལྔ། ལམ་རིམ་བསྡུས་དོན། ཟབ་ཡངས་མ། བྱམས་པའི་སྐུ་གཟུགས་མ་བཅས་གསུངས་ཤིང། ཕྱག་གཡས་བདག་གི་མགོ་ལ་བཞག་བཞིན་དུ། །ཞེས་
པའི་སྐབས་སུ་སྙན་དར་ཕུལ་ནས་མཇལ་ཁ་ཞུ་བར་མཛད། རབ་གནས་གྲུབ་འཕྲལ་མངོན་རྟོགས་རྒྱན་གྱི་མགོ་ནས་གསུང་བཤད་འབྱམས་ཀླས་པ་དང་སྦྲགས་ནས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པའི་བར་གནང། ཐུགས་བསྐྱེད་གདམས་པའི་ཡོངས་འདུའི་ས་བོན་ནི། །སེམས་ཀྱི་ཞིང་སར་བཤད་སྒྲུབ་ཀྱིས་བསྐྱངས་པས། །ལུང་རྟོགས་ཡོན་ཏན་སྙེ་མ་གཡུར་ཟ་བར། །སྐུ་བཞིའི་འབྲས་བུ་མཆོག་ཏུ་མྱུར་སྨིན་ཤོག །རྟེན་བཞེངས་སྔ་ཕྱི་འདི་དག་གི་དགོངས་བཞེད་ནི། བརྙན་པོའི་ལོངས་སྤྱོད་ལ་ཤི་སྦར་འཐམས་པ་རྣམས་ལ་སེར་སྣའི་ཉེས་དམིགས་འདོམས་ཤིང་བསོད་ནམས་སྒྲུབ་པ་ལ་བསྐུལ་བ་དང། སྦྱིན་བདག་སོ་སོས་ཕུལ་བའི་དད་རྫས་བསོད་ནམས་མི་ཟད་པའི་གཏེར་དུ་སྒྲུབ་པས་ཕན་གདགས་པ་དང། དད་ཟས་དང་གཤིན་ཟས་གཉེན་འཁོར་དང་དགའ་འདུས་ཀྱི་ལོངས་སྤྱོད་བྱས་ནས་སྐྱིད་དུ་ཚོར་བ་རྣམས་ལ་མཛོ་སྦྲེལ་གཡང་ལ་ལྷུང་འདྲའི་ངང་ཚུལ་སྟོན་པ་དང། ངར་འཛིན་གྱི་སྣང་ཚུལ་ལ་ཚུལ་མིན་ཡིད་བྱེད་ཀྱིས་སྒྲོ་བཏགས་ནས་མཐོན་པོར་ཁེངས་པའི་ཆོས་བརྒྱད་རྩྭ་ཤིང་གི་ཕོན་པོ་འདི་སྣང་དྲེས་ཐག་གིས་བཅིངས་པའི་སྲིད་པར་ངལ་བྱེད་ཙམ་མིན་པར། འགྲོ་ཀུན་བྱང་ཆེན་གྱི་སར་བཀྲི་བ་དང། ཞྭ་ཡི་ཁ་དོག་ཙམ་དང་སྡེ་དགོན་ཕྱོགས་རེ་ཙམ་གྱི་བསྟན་པ་མ་ཡིན་པར་ཐུབ་པ་ཆོས་ཀྱི་གངས་རི་ལས་འཕགས་བོད་མཁས་དང་གྲུབ་པའི་བཤད་སྒྲུབ་ཀྱི་སྲོལ་ཆེན་པོར་བབས་པའི་འཁྲུལ་བྲལ་མདོ་སྔགས་ཟུང་འཇུག་གི་ཆོས་ཀྱི་ཉིང་ཁུ་གདུལ་བྱའི་ལེགས་བྱས་ཀྱི་གཤོང་བུར་ཡུན་རིང་དུ་འཁྱིལ་བའི་ཆེད་དང། མཁས་པ་ལ་ལེགས་བཤད་
དང་ཕལ་པ་ལ་ནོར་གྱི་དངོས་པོ་རྩིས་སུ་ཆེ་ཚུལ་མི་འདྲ་ཡང། མཆོག་གསུམ་གྱི་རྟེན་རྣམས་མཁས་བླུན་མཐའ་དག་གི་མིག་གི་བདུད་རྩིར་འགྱུར་བས་ཡིད་ཀྱི་དྲི་མ་འཁྲུད་པ་དང། ཁྱད་པར་འདྲེན་པ་འོད་སྲུང་གི་བསྟན་པ་ལ་རྣམ་དཀར་གྱི་ས་བོན་ཕྲ་མོ་རེ་བསྐྲུན་པ་ཡང་ཉི་མའི་གཉེན་གྱི་འཁོར་དུ་སྨིན་གྲོལ་གྱི་དགའ་སྟོན་ཐོབ་པ་ལྟར་བསྟན་པ་འདི་ལ་ཞུགས་ཀྱང་ལམ་གྱི་བགྲོད་པ་བཤོལ་བ་དག་རྣམ་འདྲེན་ལྔ་པའི་བསྟན་པ་ལ་གྲོལ་བར་གསུངས་པའི་བདེན་པ་མངོན་འགྱུར་གྱི་དུས་སྟོན་ལ་སྦྱོར་བའི་ཆེད་དུ་ཡིན་པར་དཀར་ཆག་ལྷའི་རྔ་ཆེན་དང། གཎྜིའི་དབྱངས་ཀྱི་ཚིགས་བཅད་དག་ལས་ཤེས་ལ། བདོག་པའི་དངོ༡ས་པོ་སྡིག་མེ༢ད་གཙང་མའི་རྫས། །གཏོང་བའི་རྒྱུ་འབྲས་སེམ༣ས་པ་སྤྲོ་བ༤་ཡིས། །རྩེ༥་གཅིག་ཡིད་ཀྱིས་བླང་དོར་མ༦་དོར་བར། །བསྒྲུབས་པ་འདི་ཡང་རྒྱལ་བའི་གཞུང་ལམ་ཡིན། །ཞེས་ཚིག་དང་པོས་སྦྱིན་པ་དང་ཚུལ་ཁྲིམས། གཉིས་པས་བཟོད་པ་དང་བརྩོན་འགྲུས། གསུམ་པས་བསམ་གཏན་དང་ཤེས་རབ་ཀྱི་ཕར་ཕྱིན་བསྟན་ནས། ཐ་མས་ཕར་ཕྱིན་དྲུག་ལྡན་དུ་བསྒྲུབས་པ་བདེ་གཤེགས་གཞུང་ལམ་དུ་གསུངས་པ་ལྟར་རྒྱལ་བ་ཀུན་གྱི་མཛད་པའི་ཁུར་ཆེན་འཛིན་པའི་རྣམ་ཐར་རྨད་དུ་བྱུང་བར་ཤེས་སོ། །དེ་ནས་རིམ་གྱིས་དོན་གཉེར་ཅན་མང་པོར་མངོན་རྟོགས་རྒྱན་གྱི་ལུང། མི་འཁྲུགས་པའི་རྗེས་གནང། མཁའ་སྤྱོད་མའི་དབང། ཞལ་སྒྲུབ་དུས། བསྙེན་དུས། ལས་སྦྱོར་དུས་ཀྱི་དཀར་པོ་ཚེ་འཕེལ་སོགས་ཀྱི་རྗེས་གནང་དང་ལུང་མང་དུ་སྩལ། ཟླ་བ་བཞི་པའི་ཚེས་གསུམ་ལ་བསྐལ་བཟང་ལྷ་ཁང་གི་ཐིག་བཏབ་སྟེ་ཤིས་བརྗོད་གནང་ཞིང་མེ་ཏོག་གི་ཆར་ཕབས། ཚེ་སྒྲུབ་དང་འབྲེལ་བའི་བརྟན་བཞུགས་དང་རྣམ་རྒྱལ་སྟོང་མཆོད་
ཀྱི་ཚོགས་དབུར་ལན་འགའ་ཕེབས། སྟོང་མཆོད་ཀྱི་དབུར་ཕེབས་དུས་གསོ་སྦྱོང་ཕྱག་སྐོར་གཟུངས་ཀྱི་གྲངས་སོགས་ཆོག་གྲྭ་བ་བྱིངས་དང་འདྲ་བ་ཁོ་ན་མཛད། སུ་ཉིད་ཞབས་དྲུང་སོགས་ལ་བདེ་ལམ་གྱི་ཁྲིད་སེམས་བསྐྱེད་མཆོད་པ་དང་བཅས་པ། ཐེ་བོ་ལུང་བཟང་ནང་སྤྲུལ་སྐུ་དཀོན་མཆོག་བསྟན་འཛིན་རྒྱ་མཚོ་ཆེད་གཏད་ཀྱིས་འོང་བ་བསྙེན་རྫོགས་དང། སོ་སོར་ཚེ་དཔག་མེད། འཇམ་དབྱངས་དམར་སེར། ཛམ་དཀར། རིག་བྱེད་མ་བཅས་ཀྱི་རྗེས་གནང་སྩལ། རི་ཁྲོད་ནས་དབྱར་ཞལ་བཞེས་མཛད་དེ་ཉིན་བདུན་གྱི་རིང་སྦྱོར་བའི་ཆོས་དྲུག་གཟབ་རྒྱས་དང། ཞག་བཅུ་དགུའི་རིང་ལ་བདེ་ལམ་གྱི་ཁྲིད་སེམས་བསྐྱེད་མཆོད་པ་དང་བཅས་པ་གནང། སྤྱིར་མདོ་སྔགས་ཀྱི་གསུང་བཤད་གང་གི་སྐབས་སུ་ཡང་ཤིང་རྟ་ཆེན་པོའི་གཞུང་དང། རྗེ་ཡབ་སྲས་ཀྱི་ལེགས་བཤད་གུང་བསྒྲིགས། དོན་ཟབ་ན་ཡང་འཆར་བདེ་བ་དཀའ་གནད་རྣམས་ལག་མཐིལ་གྱི་རི་མོ་བཞིན་དུ་སྟོན་པ་ཞིག་ཡོད་ལ། ཁྱད་པར་ལམ་ཁྲིད་གནང་དུས། ལམ་གྱི་ངོ་བོ་གོ་རིམ་གྲངས་ངེས་ལ་ཡང་ཡང་ནན་ཏན་མཛད་ཅིང། རེས་འགའ་བློ་ཁ་མཐོ་དམན་སོ་སོར་རང་ལ་འཚམ་པའི་དོགས་པ་བསླངས་ནས་སྙིང་ལ་བཅང་རྒྱུའི་གདམས་ངག་སྐབས་དང་མཐུན་པར་འདོམས་ཤིང། གང་ཤེས་རང་རྒྱུད་འདུལ་བའི་ཐབས་སུ་བསྐོར་ནས་གསུངས་པས་གསུང་གི་ཟླ་ཟེར་གྱིས་བློ་གྲོས་ཀྱི་ཀུ་མུད་བཞད་པའི་སྐལ་ལྡན་དག་ལས་ཁ་ཅིག་གིས་ཚེ་འདིའི་འཁྲི་བ་ཆོད་ནས་སྒྲུབ་པ་སྙིང་པོར་བྱེད་པ་དང། འགའ་ཞིག་གིས་ཆོས་ཀྱི་མེ་ལོང་དུ་རང་སྤྱོད་ཀྱི་གཟུགས་བརྙན་གསལ་བས་འགྱོད་ཅིང་ཆོས་ལ་གཞོལ་བ་དང།
ཀུན་ཀྱང་ངོ་མཚར་དང་དགའ་བས་མྱོས་པའི་བསྟོད་བསྔགས་ཀྱི་ཅ་ཅོས་དུས་འདའ་བར་བྱེད་དོ། །སྐབས་འདིར་མཚན་མོ་མནལ་ལམ་འགའ་ཞིག་སཾ་ཊར་ཕྱག་བྲིས་མཛད་པ་དྲུང་ཡིག་གིས་གསང་ཐབས་ཀྱིས་བྲིས་པ་ཞིག་མཐོང་ན་ཡང་དེ་མཐུན་གྱི་ཉམས་མགུར་ཞིག་ཡོད་འདུག་སྙམ་པ་མི་མངོན་པའི་དབྱིངས་སུ་རྒྱས་འདེབས་མཛད་པས་ཁ་ཚོན་ཆོད་དཀའ་མོད། སྤྱིར་ན་དུས་ནམ་ཡང་བག་ཡོད་ཀྱི་བརྟུལ་ཞུགས་ལས་མི་འདའ་ཞིང་ལམ་གྱི་ངོ་བོ་གོ་རིམ་གྲངས་ངེས་མ་ནོར་བའི་ཉམས་བཞེས་ཆུ་བོ་རྒྱུན་གྱི་རྣལ་འབྱོར་དང། གཞན་གྱིས་ལད་མོ་ཙམ་ཡང་མི་ནུས་པའི་བསགས་སྦྱངས་ལ་ཉིན་མཚན་ཁོར་ཡུག་ཏུ་གཞོལ་བར་མཛད་པས་ད་རེས་བཏང་སྙོམས་གུ་ཡངས་སུ་བཞུགས་འདུག་སྙམ་པ་སུ་ལ་ཡང་འཆར་རྒྱུ་མི་སྲིད་པ་དང། དེའི་མཐུས་གང་ཤར་དག་པའི་སྣང་བར་འབྱམས་སུ་ཀླས་པའི་ནང་གི་རེ་རེ་ཙམ་ལས་དང་པོ་བ་དག་ལ་ཡང་སྣང་བ་རང་མཚན་པ་ལྟ་བུར་འགྲོ་ལ་ཁད་པ་བྱུང་བ་ལས་འགའ་ཞིག་གོང་འོག་ཏུ་ཟུར་ཙམ་གསལ་བ་ལྟར་དང། ལྷག་པར་འདི་སྐབས་རྟོགས་ལྡན་འཇམ་དཔལ་རྒྱ་མཚོ་དང། གྲུབ་ཐོབ་རྡོ་རྗེ་མཆེད་གསུམ་གྱི་རྣམ་ཐར་དང་ཆ་འདྲ་བ་བྱུང་བར་མངོན་ལ། དེ་དང་མཐུན་པའི་འཁོར་ལོ་གསུམ་གྱི་མཛད་པ་ཡང་དུས་དེ་ནས་བཟུང་སྟེ་ཀུན་ལ་མཐུན་སྣང་དུ་གྲུབ་པ་ཞིག་བྱུང་ཡང་ཞིབ་པར་འགོད་མ་ནུས་སོ། །ལུང་དང་རིགས་པའི་བྱི་དོར་གྱིས། །ལེགས་སྦྱངས་ཞི་ལྷག་ཨ་དརྴར། །དག་སྣང་ངོ་མཚར་བཀོད་པ་འབུམ། །མ་འདྲེས་གསལ་བར་ཤར་བ་ན། །གནས་ཆ་ཕྲ་མོའི་རྨིག་རྗེས་ཆུར། །ཉམས་སྣང་སྐར་མའི་འོད་ཙམ་གྱིས། །དག་སྣང་ཟླ་སྐར་ཞི་གནས་མཚོར། །ཤར་རློམ་ཁེངས་ལྡན་ཞུམ་ཞིང་འདར། །ཉམས་
དང་རྨི་ལམ་སྨིག་རྒྱུ་འཛིང་བ་ལ། །ཡན་ལག་བརྒྱད་ལྡན་ལམ་གྱི་དག་བྱེད་དུ། །ཆེར་འཁྲུལ་སྒྱུ་མའི་རྫས་སྔགས་ཀྱིས་བསླད་དེ། །རྡེའུ་ཤིང་རྟར་ཞོན་ངལ་བར་མ་བྱེད་ཅིག །སྤྱིར་ན། མངོན་རྟོགས་རྒྱན་གྱི། ཆོས་རྣམས་རྨི་ལམ་འདྲ་བའི་ཕྱིར། །སྲིད་དང་ཞི་བར་མི་རྟོག་པ། །ཞེས་པའི་ཐད་ཀྱི་ཤེར་མདོར། ཤཱ་རིའི་བུས་དྲིས་པའི་ལན་དུ། རབ་འབྱོར་གྱིས་སྨྲས་པ། ཤཱ་རིའི་བུ་ཤེར་ཕྱིན་ཉིན་པར་བསྒོམས་པས་རྣམ་པར་འཕེལ་ན་རྨི་ལམ་དུ་བསྒོམས་པས་ཀྱང་རྣམ་པར་འཕེལ་ལོ། །ཞེས་གསུངས་པ་ལྟར་སྲིད་ཞི་མཉམ་པ་ཉིད་ལ་དབང་ཐོབ་པའི་བདག་ཉིད་ཆེན་པོ་རྣམས་ཉམས་དང་རྨི་ལམ་གྱི་སྣང་བ་སོགས་ཀྱི་སྒོ་ནས་ཅི་ལྟར་བསྟོད་ན་ཡང་བསྔགས་པ་རྨད་དུ་བྱུང་བར་མི་འགྲོ་མོད། ཡོན་ཏན་མཆོག་ལ་བློ་གྲོས་ཀྱི་འཇུག་པ་ཞན་པ་རྣམས་ཀྱིས་ཉམས་སྣང་ཙམ་ལ་ཡང་མཚར་དུ་འཛིན་པས་དམ་པ་སོ་སོའི་རྣམ་ཐར་དུ་དེ་འདྲ་ཡང་སྐབས་འགར་བརྗེད་ནས་གསང་བའི་རྣམ་ཐར་གྱི་ཐ་སྙད་བཏགས་པ་ནི། བཀའ་གདམས་པའི་སྲོལ་ཚུགས་གཙང་མ་བསྐྱངས་པ་དང། ལོག་རྟོག་ཅན་སོགས་ལ་གསང་བའི་ཕྱིར་ཡིན་གྱི། ལམ་བསླབ་པ་གསུམ་གྱི་ཉམས་ལེན་ལས། རྨི་ལམ་དང་ཉམས་སྣང་སོགས་མཆོག་ཏུ་བསྔགས་པ་མ་ཡིན་ནོ། །ཨེ་མ་ཧོ། སྨོན་ལམ་ཆོ་ག་ཆོས་སྤྱོད་སོགས། །ཕལ་ཆེར་ཚང་བའི་གླེགས་བམ་འདི། །སྤྲུལ་བའམ་དུས་ལ་བབས་པ་ན། །གསལ་བར་སྟོན་ཅིག་ཐུགས་རྗེའི་གཏེར། །སྙན་ནས་སྙན་དང་ཐུགས་ནས་ཐུགས། །བརྒྱུད་པའི་མན་ངག་གདོང་ལྔའི་བཅུད། །མཆོག་གྱུར་ས་ལེ་སྦྲམ་གྱི་སྣོད། །འཛོམ་པའི་སྐལ་བཟང་མངོན་གྱུར་སྨོན། །ལོ་འདིར་བསྒྲུབ་བྱ་བརྒྱ་དང་
བཅུ་གཅིག་བསྙེན་རྫོགས། དོན་དྲུག་དགེ་ཚུལ། ཧལ་ཧ་དར་ཧན་པེ་ལིའི་སྲས་མོ་དགེ་ཚུལ་མར་བསྒྲུབས་ཏེ་རྣམ་པར་གྲོལ་བའི་གྲུ་བོ་ཆེར་བཅུག །དགག་དབྱེ་གྲོལ་ནས་ལྗོངས་རྒྱུ་མཛད་ཅིང། ཆོས་དང་མཐུན་པའི་གསུང་སྒྲོས་ཀྱིས་དགེ་འདུན་པ་རྣམས་ཀྱི་འདུན་པའི་ལྕགས་ཀྱུ་ཆོས་ལ་ཐེབས་པར་མཛད། སྐབས་འདིར་ལྷ་བཟོ་ཀུན་དགའ་དང། ཤིང་བཟོ་ཀུན་དགའི་ལོ་རྒྱུས་ལ་བརྟེན་ནས་སྐུ་སྐྱེ་མྱུར་འབྱོན་གྱི་དེ་ཉིད་གསལ་བྱེད་ཅེས་བྱ་བ་མཛད་པ་དགོས་པ་ཅན་གྱི་གསུང་དུ་སྣང། རིམ་གྱིས་བཅད་རྒྱ་གནང་ཞིང། ལོ་མཇུག་ཏུ་བླ་མཆོད་དང་ཕྱག་ཆེན་སྦྲགས་མའི་ཁྲིད། བདེ་མཆོག་ལུས་དཀྱིལ་གྱི་དབང་སོགས་གནང། དགུང་ལོ་ང་བཞི་བ་ཤིང་ཕག་གི་ལོ་གསར་ཚེས་གཏོར་སོགས་རི་ཁྲོད་དུ་མཛད། དགོན་པར་བྱོན་ནས་སྨད་ཕྱོགས་ཀྱི་གྲྭ་རྒྱུན་སྦྱིན་བདག་སོགས་སེར་སྐྱ་མང་པོར་བླ་མཆོད་ཀྱི་ཁྲིད། དཔའ་གཅིག་གི་དབང་སྟ་གོན་དང་བཅས། རྡོར་སེམས་བླ་མེད་ལུགས། བདེ་མཆོག་དཀར་པོ། འཇམ་དབྱངས་དཀར་པོ། རྣམ་འཇོམས། སྒྲོལ་མ་དཀར་ལྗང་གི་རྗེས་གནང་སོགས་ཀྱིས་སོ་སོའི་རེ་བ་འགེངས་པར་མཛད། སླར་ཡང་བླ་མཆོད་དང་ཕྱག་ཆེན་གྱི་ཁྲིད། ལུང་རྗེས་གནང་དུ་མ། གསུང་རྩོམ་གསར་སྤེལ། རྣམ་རྒྱལ་ཁྲི་མཆོད་དང་སྟོང་མཆོད་ཀྱི་ཚོགས་དབུར་འབྱོན་བཞུད་སོགས་ཁོར་མོ་ཡུག་གི་ངང་ནས་དགོན་པར་བཞུགས་གདན་འཇགས། བཞི་པའི་བཅུ་གཅིག་གི་ཉིན་དུས་འཁོར་གྲྭ་ཁང་རྟེན་དང་བརྟེན་པར་བཅས་པ་ལ་སྤྱན་དབྱེའི་ཆོ་ག་སྦྱིན་སྲེག་དང་བཅས་པ་གནང། སྐབས་འདིར་རྩ་འགྲམ་ལྟ་བུས་སྐུ་ཅུང་ཟད་བསྙེལ་བར་ཞབས་བརྟན་ཡང་ཡང་བསྒྲུབས་ཀྱང་དྭངས་སྐྱེད་ཆེར་མ་བྱུང་བའི་ཁར་
རོང་པོ་ཕྱོགས་ནས་སྐྱ་བཙུན་མང་པོ་དགོན་པའི་སྟེང་དུ་དམག་ཆེན་ལ་འོང། དེ་དུས་རྗེ་ཉིད་ནས་དགོན་པའི་ནང་དུ་དམག་འོང་སྟེ་ཁང་པ་སོ་སོ་བཤིག་ན་ཡང། གྲྭ་པ་རྣམས་བག་ཡོད་ཚུལ་མཐུན་གྱིས་བཞུགས་པ་མ་གཏོགས་མཚོན་ཆ་འཛིན་པ་ཕར་ཞོག །ཁ་འཐབ་ཙམ་ཡང་བྱས་མི་ཆོག་གསུངས་ཤིང། ཀུན་གཟིགས་མཆོག་གི་སྤྲུལ་བའི་སྐུ་རིན་པོ་ཆེ་ནས་ཀྱང་བཀའ་དེ་བཞིན་གནང་བ་ལྟར་ཀུན་གྱིས་དང་དུ་བླངས་པས་དམག་འཕྲལ་དུ་ལོག་ཀྱང། དེ་རྗེས་སོ་སོས་འདོད་བསྟུན་གྱི་ཕྱོགས་རིས་ཀྱི་གཏམ་དང། རང་འདོད་ཀྱི་བྱ་བ་རྩྭ་ལ་མེ་མཆེད་པ་ལྟ་བུ་བྱུང་བས་སྙུན་བབས་ལྕིར་སོང། ཞབས་བརྟན་ཞུས་པར་ཡིག་བརྒྱ་གནད་སྨིན་སྒྲུབ་གསུངས་པ་ལྟར་བསྒྲུབས། ཁྲི་ཟུར་ཕྱག་མཛོད་མཁན་པོ་ནས་མི་མང་གི་བྱེད་ལུགས་ལ་ཐུགས་མ་དགྱེས་པར་གོ་ནས། གྲྭ་དཔོན་སློབ་རྣམས་མདུན་དུ་འཛོམ་པར་བྱས་ཏེ་དངོས་འབུལ་དང་བཅས་བརྟན་བཞུགས་གསོལ་འདེབས་གནད་དུ་སྨིན་པ་དང། སེར་སྐྱ་དྲག་ཞན་སུ་ཐད་ནས་མི་མཁས་པའི་བྱ་བ་ཐུགས་ཟུར་སྤྱན་ཟུར་ལ་ཕོག་པའི་རིགས་གང་ཡོད་བཟོད་པར་བཞེས་དགོས་ཚུལ་དང། བསྟན་པའི་དོན་ཁུར་དུ་བཞེས་ནས་ཞབས་པད་བརྟན་དགོས་ཚུལ་ནན་གྱིས་ཞུས་པའི་ལན་དུ་སྤྱིར་སངས་རྒྱས་ཀྱི་བསྟན་པ་འདི་ལ་བསྟན་འཛིན་མང་པོ་བྱོན་ཀྱང། མཐུན་སྣང་ལ་རྗེ་རིན་པོ་ཆེ་ལས་ལྷག་པ་མ་བྱུང་ཚུལ་ཁོང་གིས། འདྲེན་པ་མཆོག་དེས་དཀའ་བ་དཔག་མེད་ཀྱིས། །ནན་ཏན་སྙིང་པོར་མཛད་ནས་བསྒྲུབས་པ་འདི། །ཐབས་གང་ཞིག་གིས་འཕེལ་བར་འགྱུར་སྙམ་པའི། །རྣམ་པར་དཔྱོད་པས་ཉིན་མཚན་འདའ་བར་ཤོག །ཅེས་སྟོན་པ་
ཐུགས་རྗེ་ཅན་དེས་དཀའ་བ་དཔག་མེད་ཀྱི་སྒོ་ནས་རང་རེའི་དོན་དུ་བསྒྲུབ་པའི་བསྟན་པ་འདི་འཕེལ་རྒྱས་ཀྱི་ཐབས་ཁོ་ན་དུས་རྟག་ཏུ་བསམ་པར་སྨོན་པ་གནང་ཚུལ་དེ་བཞིན་དུ་ཕྱག་ལེན་ལ་བཏབ་ནས། གྲུབ་མཐའ་སོ་སོའི་ཁྱད་པར་རྒྱུད་སྡེ་གོང་འོག་གི་ཟབ་ཁྱད་མི་འདྲ་བ་སོགས། མདོ་སྔགས་གང་གི་ཐད་དུ་ཡང་དཔྱོད་ཤེས་པ་ཞིག་གིས་བརྟག་ན་ཐུན་མོང་མ་ཡིན་པའི་ཁྱད་ཆོས་རེ་མ་ཐོན་པ་མེད་པ་འདི་འདྲ་སྔར་མཁས་པ་སུ་ལ་ཡང་བྱུང་བ་མེད་པ་རྗེའི་ལེགས་བཤད་རྣམས་མཇལ་ན་ཤེས་ཚུལ། རྗེ་བླ་མས་སྡོམ་གསུམ་གྱི་རྨང་གཞི་བརྟན་པ་གཞིར་བཟུང་ནས་མདོ་སྔགས་ཀྱི་བཤད་སྒྲུབ་ས་སྟེང་ཁྱབ་པར་མཛད་པས་སྐུ་དྲིན་ཆེ་ཚུལ། རྗེ་རིན་པོ་ཆེ་ཕྱིན་ལ་བསྟན་པ་ལ་བྱ་བ་མཛད་མཁན་ཆེས་མང་ཡང། སྐྱབས་མགོན་རྡོ་རྗེ་འཆང་དེ་ཉིད་ཀྱིས་སྐུ་ཚེགས་དང་གཏམ་ངན་ཐམས་ཅད་ཁྱད་དུ་བསད་ནས་ཆོས་སྲིད་ཞི་དྲག་གི་ཐབས་སྣ་ཚོགས་ཀྱི་སྒོ་ནས་ཉིན་མཚན་ཀུན་ཏུ་བསྟན་པ་མ་གཏོགས་ཐུགས་ལ་དགོངས་རྒྱུ་མེད་པར། དགོན་པ་འདི་གཞུང་ཤིང་ལྟ་བུ་དང། གཞན་རྣམས་ཡན་ལག་གི་ཚུལ་དུ་བྱས་ནས་བསྟན་པ་ཡོངས་རྫོགས་ཀྱི་རྒྱུན་ལ་ཕན་ངེས་ཀྱི་མཛད་པ་གནང་ཚུལ། དེ་རེ་རེའི་སྟེང་ནས་ཉམས་སུ་བླངས་ན་གནད་ཐམས་ཅད་འུབས་ཀྱིས་འདུས་པ་རེ་འོང་ཚུལ། དེ་འདྲའི་མཛད་པ་དེ་སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་མཛད་པར་མཐོང་མཁན་དཀོན་ཚུལ། མཛོད་དགེའི་དགེ་ཚུལ་ཚང་ཁོང་གིས་སྐུ་ཞབས་ནས་མཛད་པ་ཅི་བསྟན་ཡང་དེ་སངས་རྒྱས་ཀྱི་བསྟན་པའི་དོན་ཁོ་ན་ཡིན་པ་གོ་འདུག་པས། དེ་གོ་ན་སེམས་ཅན་གྱི་དོན་ཡིན་པ་གོ་བ་ཡིན་ཚུལ། བླ་མ་སངས་རྒྱས་སུ་མཐོང་བའི་རྟགས་དེ་
ཡིན་ཚུལ། ཕྱིས་པཱ་རིན་ཐོ་ཡོན་ཚང་གིས་ཁོ་བོ་སྐུ་ཞབས་དེའི་ཞལ་མ་མཇལ་ཡང་དད་པ་ཐུན་མོང་མ་ཡིན་པ་ཡོད། སྔོན་གྱི་དམ་པ་རྣམས་གར་ཕེབས་སར་བཀའ་ཆོས་མང་རབ་རེ་གནང་ནས་ཕེབས་སོང་ཟེར་བ་ལྟ་བུ་ལས་མེད། སྐུ་ཞབས་དེ་གར་ཕེབས་སུ་བསྟན་རྒྱུན་ལ་ཕན་ངེས་ཀྱི་ཕྱག་རྗེས་རེ་བཞག་པ་ཡུན་དུ་མི་གནས་པ་མི་སྲིད་པ་འདི་ནི་རྒྱལ་སྲས་སྙིང་སྟོབས་ཆེན་པོའི་རྣམ་ཐར་རེད་ཟེར་བ་མཁས་པ་རྣམ་དཔྱོད་ཅན་གྱི་གཏམ་ཡིན་ཚུལ། བསྟན་པའི་འབྱུང་གནས་དབུས་གཙང་དང་རྒྱ་སོག་གི་ས་ཆ་ཚོ་ཡང་ས་ཆོད་སྔོན་དུས་དང་མི་འདྲ་ཚུལ། མདོ་སྨད་དམུ་རྒོད་འདིར་མདོ་སྔགས་ཡོངས་རྫོགས་ཀྱི་བསྟན་པའི་སྲོལ་སེ་འབྲས་ལྟ་བུ་ཞིག་ཡོད་པ་འདི་རྗེ་འཇམ་དབྱངས་བཞད་པ་དེའི་ཐུགས་བསྐྱེད་ཀྱི་མཐུ་ཁོ་ན་ཡིན་ཚུལ། དགོན་པ་འདི་སྐྱོང་མཁན་སངས་རྒྱས་བྱང་སེམས་མང་པོ་བསམ་བཞིན་དུ་སྐྱེ་བ་བཞེས་ནས་བསྐྱངས་ཡོང་ཞེས་གསུངས་པའི་གསུང་སྒྲོས་ཡོད་ཚུལ། རང་ངོས་ནས་དེ་འདྲའི་ཁ་ཐབས་ག་ན་ཡོད་ཀྱང། སྐྱབས་རྗེ་དེ་ཉིད་ཀྱི་ཐུགས་ལ་དགོངས་རྒྱུ་བསྟན་པ་ཁོ་ན་ཡིན་པ་ལྟར་འབད་འབད་བྱས་ཁུལ་ཡིན་ཚུལ། ད་བསྟན་པ་ཟེར་བ་སུ་གང་དང་མ་འབྲེལ་བའི་སྤྱི་ལྡོག་མ་ཞིག་ལོགས་སུ་བཞག་ནས། ངས་དེ་འཛིན་ཐུབ་རྒྱུ་མ་རེད་སྙམ་ནས་རང་གར་མ་བསྡད་པར། རང་རང་གི་སྟེང་ན་རང་ཚོད་ཀྱི་བསྟན་པའི་བྱ་བ་དང་སྡོམ་གསུམ་གྱི་ཁུར་རེ་ཡོད་པ་དེ་བཟུང་ན་བསྟན་འཛིན་གྱི་སྐྱེས་བུ་དེ་ལ་ཟེར་བ་ཡིན། ཁ་སང་དམག་ཡོང་ནས་ཁང་པ་འགའ་བཤིག་ན། དེ་ཁང་པ་བཤིག་པ་རེད། བསྟན་པ་བཤིག་པ་
ག་ན་ཡིན། རང་ཚོ་འདུན་པ་གཅིག་པའི་སྒོ་ནས་མི་གཅིག་བསད་ན་བསྟན་པ་བཤིག་བཏང་བ་རེད་དེ། དེར་མ་སོང་བ་དཀོན་མཆོག་གི་ཐུགས་རྗེ་ཡིན་ཚུལ། སྐྱབས་མགོན་རྡོ་རྗེ་འཆང་ནས་ཀུན་མཁྱེན་གོང་མ་དེ་རྡོ་རྗེ་འཇིགས་བྱེད་དངོས་ཡིན་ཞེས་ཡང་ཡང་གསུང་ཚུལ། དེ་ལ་ཐམས་ཅད་ཀྱིས་ཉམས་མི་འཇོག་པར་དེང་སང་ཐམས་ཅད་ཡར་ཟེར་ན་མར། མར་ཟེར་ན་ཡར། གྱིས་བྱས་པ་དེ་མི་བྱེད་པར་ཁ་ཕྱིན་ཅི་ལོག་ཞིག་ཏུ་འཁོར་ཏེ་ནོར་རྫས་བསོག་རྒྱུ་མ་གཏོགས་བསམ་རྒྱུ་མེད་པ་འདི་ལ་བསམ་བློ་བཏང་ན་སངས་རྒྱས་ཀྱི་བསྟན་པ་འདི་ཅི་འདྲ་ཞིག་གི་ཚོད་ལ་སླེབ་འདུག་སྙམ་ནས་ཐུགས་སྐྱོ་ཚུལ། ནོར་རྫས་ཁོ་ན་བསམ་ན་ཆོས་སྐྱོང་གིས་འཕྲིན་ལས་ཚུལ་བཞིན་དུ་མི་སྒྲུབ་ཚུལ། བསླབ་ཁྲིམས་དག་པའི་སྒོ་ནས་བསྟན་པའི་བྱ་བ་ལ་འབད་ན་ཆོས་སྐྱོང་རྣམས་རང་ཤུགས་ཀྱིས་འཁོར་ཚུལ། དེས་ན་ཚོགས་ཆོས་གྲྭའི་ཆ་རྐྱེན་འགྲིག་ཙམ་གྱིས་ཆོག་ཤེས་པའི་ཚེ་བློས་བཏང་ལྟ་བུ་དང་བསླབ་ཁྲིམས་དག་པར་བྱས་ཏེ། བསླབ་པ་སློབ་གཉེར་འཛིན་གཤར་སྦྱངས། རང་སྟེང་ན་བསྟན་པའི་ཁུར་རེ་ཡོད་པ་དེ་མ་ཤོར་བ་བྱས། ཐམས་ཅད་ཀྱིས་ཆོས་ཕྱོགས་ལ་འདུན་པ་གཅིག་དྲིལ་བྱས་ན་ངེད་ཀྱིས་ཀྱང་སེམས་ལ་འཛིན། མདོར་ན་རྗེ་འཇམ་དབྱངས་བཞད་པ་དེ་གསང་བ་བསམ་གྱིས་མི་ཁྱབ་པ་ལ་དབང་འབྱོར་བ་ཞིག་ཡིན་པས་དེའི་ཐུགས་བསྐྱེད་སྨོན་ལམ་དེ་ལ་རང་རེ་ཐམས་ཅད་ཀྱིས་རྒྱབ་རི་ལྟ་བུ་བྱས་ནས། བསམ་པ་ཐག་པས་བློ་རྩེ་གཏད་དེ་བསྡད་ན་རྟེན་འབྲེལ་རང་ཤུགས་ཀྱིས་འགྲིག་འགྲོ་གསུངས། འདི་ནི་རྣམ་ཐར་སྤྲིང་ཡིག་ལས། ཐུབ་བསྟན་རྒྱ་ཆེན་སྤེལ་བར་
མ་ནུས་ཀྱང། །ཁས་བླངས་བསླབ་ཁྲིམས་གཙོར་གྱུར་རང་རྒྱུད་ཀྱིི། །བསྟན་པ་བསམ་བཞིན་བཤིག་པར་མ་བྱས་པ། །བསྟན་འཛིན་གྲལ་མཇུག་སྙེགས་པའི་རྣམ་ཐར་ཡིན། །ཞེས་དང། ཅི་དགར་སྤྱོད་པའི་སྙིང་སྟོབས་བདག་ལ་མེད། །ལྷ་མཐོང་འདྲེ་མཐོང་མངོན་ཤེས་བདག་ལ་མེད། །དགྲ་བོ་སྒྲོལ་བའི་ནུས་པ་བདག་ལ་མེད། །ལས་ཅན་ཆོས་མགོ་ཐོན་པའི་རྣམ་ཐར་ཡིན། །ཞེས་གསུངས་པ་ལྟར། མིང་དོན་མཐུན་པའི་བསྟན་འཛིན་དམ་པའི་རྣམ་ཐར་ཡིན་ཏེ། ལྷ་མཐོང་འདྲེ་མཐོང་གིས་རང་གཞན་བསླུས་ཏེ་མི་ཆོས་བླ་མའི་རྫུན་སྨྲ་བ་དང། ཞེ་སྡང་གི་སྟོབས་དང་རིག་སྔགས་ཀྱི་ནུས་པས་ཁེངས་ནས་དགྲ་བོ་སྒྲོལ་བའི་ལས་ལ་སྦྱར་ཏེ། ཕ་རོལ་པོ་རང་དགར་ཤི་བ་བདག་གིར་བྱས་ནས་ལྟོ་ཕམ་པས་འགེངས་པ་དང། ཚུལ་ཁྲིམས་ཡལ་བར་བོར་ནས་ཆགས་སྡང་གཡོ་སྒྱུ་སོགས་ཀྱི་སྒོ་ནས་ཅི་དགར་འཚོ་བ་ནི། རང་རྒྱུད་ཀྱི་བསྟན་པ་རང་གིས་བཤིག་པ་ངོ་ཚ་བའི་གནས་ཁོ་ན་ཡིན་ལ། འདུལ་བ་ལུང་ལས། ཁྱོད་ཚོ་ཆོམ་རྐུན་གྱིས་བཅོམ་མམ་དྲིས་པའི་ལན་དུ། ཆོམ་པོས་མ་བཅོམ་གྱི་རང་གིས་རང་བཅོམ་ཞེས་པ་ལྟར། དེའི་ཚེ་ཆོས་ཀྱི་སྡེ་འདིར་བཞུགས་པའི་དགེ་འདུན་པ་དེ་རྣམས་རང་གིས་རང་མ་བཅོམ་པར་ཐར་པའི་རྒྱལ་མཚན་བརྟན་པར་གནས་པ་ནི་རྗེ་འདི་ཉིད་ཀྱི་བཀའ་དྲིན་བླ་ན་མེད་པ་ཡིན་པས། བསྟན་པ་འཛིན་ཞེས་པའི་དོན་གོ་བར་བྱས་ནས་ཚུལ་གནས་ཐོས་བསམ་སྒོམ་པ་ལ་འབད་དགོས་སོ། །ཨེ་མ་ག་བུར་རྒྱུན་ལས་རིམས་ནད་དང། །ཉི་ཟླའི་འོད་ལས་སྟུག་པོའི་མུན་ཚོགས་བཞིན། །ཐུགས་ལས་ཉོན་མོངས་ཉེས་པའི་འཆར་སྒོ་དང། །ཞལ་ལས་ཉེས་བཤད་འབྱུང་མིན་མགོན་དེ་
ཡིས། །སྡོམ་གསུམ་བཅས་མཚམས་ལས་འབྲས་བླང་དོར་གྱི། །གསུང་སྙན་ལེགས་བཤད་འཕང་འགྲོའི་གླུ་དབྱངས་དེས། །ཉི་མའི་འོད་ཀྱིས་ཁ་བ་ཞུ་བ་བཞིན། །ཞེ་སྡང་གདུག་པའི་སྦྱོར་རྩུབ་མོད་ལ་ཞི། །བླ་མ་མཉེས་བྱེད་སྒྲུབ་པའི་མཆོད་པ་ཡིན་གྱི་འཐབ་རྩོད་འཁྲུག་ལོང་མིན། །བཙུན་པའི་ཆས་རྟགས་ངུར་སྨྲིག་རྒྱལ་མཚན་ཡིན་གྱི་གོ་ཁྲབ་མཚོན་ཆ་མིན། །ཕས་རྒོལ་ཟིལ་གནོན་རྣམ་དཀར་གཟི་འོད་ཡིན་གྱི་མི་དགེ་སྡིག་ལས་མིན། །རང་གིས་རང་ཉིད་འཇོམ་བྱེད་དེ་དག་ཀྱེ་ཧུད་སྙིང་རྗེའི་ཡུལ་དུ་དགོངས། །ཚེ་འདིར་ཞེན་སྤངས་འདོད་ཆུང་ཆོག་ཤེས་བསྟེན། །ཚུལ་གནས་ཐོས་བསམ་སྒོམ་པས་ཉིན་མཚན་འདའ། །འགྲོ་ཀུན་དོན་དུ་ཐུབ་བསྟན་བཤད་སྒྲུབ་ལ། །བརྩོན་པར་བྱས་ན་ལྷ་ཡི་འཛུམ་ཞལ་ངོམས། །བླ་མས་འབྲལ་མེད་བརྩེ་བས་དགྱེས་ཤིང་སྐྱོངས། །དེ་མཐུས་ཕྱོགས་ལས་རྣམ་རྒྱལ་གྲགས་པ་ཡི། །བ་དན་སྲིད་པའི་རྩེ་མོར་འཕྱར་བ་སོགས། །སྨོན་པ་ཆོས་བཞིན་འགྲུབ་བོ་གྲོགས་དག་ཀྱཻ། །ཟླ་བ་བརྒྱད་པའི་ཚེས་ལ་ཐེ་བོ་ཆབ་ཚན་དུ་བྱོན་ནས་ཞག་བདུན་འཕྲོད་བསྟེན་མཛད། སྐྱང་ཚ་ཁ་གསུམ། ཐེ་བོ་གཟའ་རུ་ཚོང་རུ་སོགས་ཕྱོགས་ཕྱོགས་ནས་བར་མ་ཆད་པར་འོང་བའི་མཇལ་བ་རྣམས་ལ་ཕྱག་དབང་ཆོས་འབྲེལ། འཕོ་ལུང་ལྗགས་བསྔོ་སོགས་དང། ཕྱོགས་འདུས་ཀྱི་རི་ཁྲོད་པ་རྣམས་ལ་ལམ་ཁྲིད་མདོར་བསྡུས་སོགས་ཆོས་བཀའ་འདོད་མོས་དང་སོ་སོར་མང་འགྱེད་ཀྱང་གནང། བསྒྲུབ་བྱ་འགའ་ཞིག་བསྙེན་རྫོགས་ལ་བཀོད། ནན་གྱིས་གདན་དྲངས་པ་ལྟར་ལུང་བཟང་རི་ཁྲོད་དུ་བྱོན། བདེ་མཆོག་རེ་གཉིས་མའི་དབང་སྟ་གོན་དང་བཅས་པ་གནང་ཞིང་དངོས་འབུལ་རྣམས་ཕྱིར་སློག་མང་འགྱེད་སྩལ། ཀིརྟི་སྤྲུལ་བའི་སྐུ་དཔོན་གཡོག་
ཆིབས་བསུ་དང་བཅས་མཇལ་ནས་གཡུང་དྲུང་འཁྱིལ་དུ་བཞུགས་ཞག་ལྷན་དུ་མཛད། དངོས་འབུལ་གཟབ་སྟེ་ཕུལ་བ་ཕྱིར་སློག་ཅིང། དབུས་ཕེབས་སྐོར་ལ་ཞལ་བཀོད་ཞིབ་རྒྱས་དང་ཕེབས་རྫོངས་ཀྱང་བསྟབ། གྲྭ་ས་ཆེན་པོ་གསུམ་གྱི་ཁྲོད་དུ་མཁས་པའི་སྙན་པ་དབྱར་རྔ་ལྟར་གསལ་བའི་ཤིང་བཟའ་སྤྲུལ་བའི་སྐུ་བློ་བཟང་དར་རྒྱས་པ་ཟམ་ཚ་ན་བཞུགས་པ་ནས་ཆེད་གཉེར་གྱིས་འབུལ་བ་གྱ་ནོམ་པ་དང་བཅས་མཇལ་ཁ་ཞུས་ཏེ་ཇ་སྦྱོར་གསུམ་ཙམ་གྱི་ཡུན་ལ་ཆོས་སྲིད་ཀྱི་བཀའ་མཆིད་འབྱམས་ཀླས་པ་མཛད། ཕར་ཡང་འབུལ་བ་དང་བཀུར་གཟོས་རྨད་དུ་བྱུང་བ་གནང། དེ་ནས་ཕེབས་ལམ་དུ་མཇལ་བ་བགྲང་གིས་མི་ལང་བར་ཕྱག་དབང་ལྗགས་བསྔོ། ཆོས་འབྲེལ་སོགས་གནང་བཞིན་པར་ཟླ་མཇུག་ལ་གདན་སར་འབྱོར། ཨོར་ཏུ་སུ་སྨན་པ་བླ་ཟུར་བློ་བཟང་ཡོན་ཏན་སོགས་ཀྱིས་སྒུག་སྡོད་བྱས་ཡོད་པར་ཕྱག་དབང་ཇ་གྲལ་དང། མགོན་པོ་བཀའ་བཅུ་གསུམ་གྱི་རྗེས་གནང་སོགས་འདོད་ཆོས་ཀྱིས་ཚིམ་པར་མཛད། ལོ་འདིར་བསྙེན་རྫོགས་བརྒྱ་དང་དྲུག་ཅུ། དགེ་ཚུལ་རེ་གཉིས་བསྒྲུབས་ནས་འཆལ་ཚུལ་མུན་པའི་དཔུང་ཚོགས་ཉུང་ངུར་བྱས། དེ་ནས་ལོ་མཇུག་བར་དུ་རི་ཁྲོད་ནས་བཅད་རྒྱ་མཛད་ཅིང། བར་སྐབས་ཤིག་རྗེ་བཙུན་དམ་པ་འཇིགས་མེད་རིགས་པའི་སེངྒེ་སྐུ་ཁམས་རིམ་ལོད་དུ་སོང་བར་གཟིམས་ཤག་ཏུ་ཕེབས་ནས། ཁོང་གི་ཐུགས་བཞེད་ལས་ཞབས་ཕྱིའི་མོས་པ་ལྟར་ཀུན་རིག་གི་དབང་ཆེན་སྩལ། ཀུན་གཟིགས་མཆོག་སྤྲུལ་རིན་པོ་ཆེའི་སྐུ་དོན་གྱི་སྐོར་སོགས་ལ་གསུང་འཕྲོས་ཞིབ་མོ་དང། ཞལ་ཆེམས་བཞིན་སྐུ་གདུང་ཞུགས་འབུལ་ཀྱང་གནང་ཤིང་
སྐུ་དོན་ཐམས་ཅད་ལ་གསུང་བཀོད་ཀྱིས་ཁྱབ་པར་མཛད། དགུང་ལོ་ང་ལྔ་པ་མེ་བྱིའི་ལོ་གསར་ཚེས་གཏོར་སོགས་དཀྱུས་བཞིན། ཐག་ཉེ་རིང་གི་མཇལ་མང་ལ་ཕྱག་དབང། ཆོས་འབྲེལ། ལྗགས་བསྔོ་སོགས་བཀག་འགོག་མེད་པར་གནང། གཟིམས་ཁང་བདེ་ཡངས་ནས་བསྒྲུབ་བྱ་ལྔ་ལ་བསྙེན་རྫོགས་ཀྱི་འབོག་ཆོག་དང། སྒྲོལ་དཀར་འོད་ཟེར་དྲུག་སྦྲགས། རྟ་མགྲིན་གསང་སྒྲུབ། ལོ་གྱོན་མ་གཙོ་འཁོར་གསུམ་བཅས་ཀྱི་རྗེས་གནང་སོགས་བཀའ་ཆོས་དུ་མ་ཞལ་བསྲོའི་ཚུལ་དུ་གནང། བདེ་ལམ་གྱི་ཁྲིད་སྨིན་རྒྱས་སེམས་བསྐྱེད་མཆོད་པ་དང་བཅས་པ། ཚེ་དཔག་མེད་ཀྱི་དབང། རྡོར་སེམས་བླ་མེད་ལུགས་དང། མགོན་ཆོས་རྒྱལ་བེག་ཙེའི་རྗེས་གནང་སོགས་ཆོས་བཀའ་རིམ་པར་གནང་བ་ལ་བླ་གྲྭ་སུམ་བརྒྱ་ལྷག་རེ་འདུས། དགེ་བའི་བཤེས་གཉེན་ཨ་རིག་ར་ཡོབ་སྤྲུལ་སྐུའམ་གསེར་ཁང་ཚང་ཞེས་གྲགས་པས་ཆེད་དུ་གསོལ་བ་བཏབ་པ་བཞིན་ཉིན་གསུམ་གྱི་རིང་ལམ་གཙོའི་ཁྲིད་རྒྱས་པ་དང། བྱམས་པ་ལུང་སྟོན་མའི་མདུན་ནས་སེམས་བསྐྱེད་མཆོད་པ་ཡང་གནང། དེ་ནས་ཟླ་བ་དྲུག་པ་བར་དུ་བཅད་རྒྱ་མཛད་ཅིང། རེབ་ཙ་ཞབས་དྲུང་དཀོན་མཆོག་ཡར་འཕེལ་གྱིས་རང་ལ་འབྲེལ་ཐོགས་ཐམས་ཅད་རྒྱལ་བ་དགྱེས་པའི་ལམ་དང་མི་འབྲལ་ཞིང། འདི་སྣང་འགག་མ་ཐག་ཏུ་བདེ་བ་ཅན་དུ་སྐྱེ་བའི་སྨོན་ཚིག་ཡན་ལག་བདུན་པ་དང་འབྲེལ་བ་ཞིག་བཅུ་གསུམ་གྱི་ཉིན་གསུང་དགོས་ཞེས་གསུམ་པའི་ཚེས་ལྔའི་ཉིན་ཞུས་པར་དེ་བྱེད་ཀྱང། འོད་དཔག་མེད་ཀྱི་གོས་སྐུ་ཞིག་བཞེང་རྒྱུའི་སྐྱ་ཐིག་སྔ་མྱུར་ལ་བཏབ་ན་བསམ་ཡང། ཉི་མ་རེ་རེ་བཞིན་ཁ་བ་འབབ་པ་འདིས་སྟབས་མི་འགྲིག་པས་སྐྱ་ཐིག་འདེབས་ཉིན་ནམ་ཡིན་ཀྱང་རོགས་བྱེད་དགོས་
གསུངས་པར། དེ་ནས་བཟུང་ཁ་བ་མ་ཆད། བཅུ་གསུམ་གྱི་ནངས་པར་སྐད་གནང་སྟེ། ཞབས་ཕྱིར་ཁྲིད་ནས་ཀླུ་ཐང་ལ་བྱོན། ཞལ་རས་ཀྱི་ཐིག་བཏབ་མ་ཐག །དེ་རིང་ཁྱོད་ཀྱི་སྐར་མ་དང་འགྲིག་སོང་བ་དེ་ང་རང་ཚོ་སྨོན་ལམ་ལྷན་ཅིག་པའི་རྟགས་ཡིན་པས་འདྲི་དགོས་གསུངས་ནས་དེ་ཉིད་དུ་ཕྱག་བྲིས་མཛད་དེ་ལུང་ཡང་གནང། ཕྱིས་སུ་ལུང་གནང་སྐབས་ཤིག་ཀྱང་གསུང་བཤད་དང་སྦྲགས་ནས་སྔར་གྱི་རྒྱུ་མཚན་དང་བཅས་ཆོས་ཉན་པ་མང་ལ་སྩལ། དེ་ཉིན་ཀླུ་ཐང་དེར་ཐོག་མར་ཞལ་ནུབ་ལ་ཕྱོགས་ཏེ་ཐིག་བཏབ་རིང། ལྗོན་ཤིང་ཕྲེང་བསྒྲིགས་པ་ལ་གཟིགས་ནས། རིན་ཆེན་ཏ་ལའི་ཤིང་གི་ཕྲེང་བ་ཡིས། །ཡོངས་སུ་བསྐོར་བ་སྐར་མས་ཟླ་བ་བཞིན། །ཞེས་པ་འདི་ཡིན་ཞེས་གསུངས། དྲུག་པའི་ཚེས་ལ་གོས་སྐུ་གྲུབ་སྟེ་བཟོ་བོ་རྣམས་ཡོན་གྱིས་ཚིམ་པར་མཛད། འདི་ལོ་ཐོག་སེར་འཚུབ་ཅིང་མོ་རྩིས་པས་ཉི་མ་འདི་དང་འདིར་ངན་ཟེར་ཚད་ལ་ཐིག་པ་བྱུང། ལྷག་པར་བཅོ་བརྒྱད་ལ་ཤིན་ཏུ་ངན་ཅིང་བཟློག་ཐབས་དཀའ་ཟེར་བར་བཅོ་ལྔའི་ཉིན་རི་ཁྲོད་ནས་གནོད་པ་བཟློག་པའི་གསོ་སྦྱོང་མཛད་པ་དེ་ནས་བཟུང་སྟེ་གནམ་གཤིས་ཤིན་ཏུ་ལེགས་པ་བྱུང། སྤྱིར་སྐུ་ན་ཕྲ་བའི་དུས་ནས་བྱམས་པའི་ཏིང་ངེ་འཛིན་དང། རྣམ་པར་མི་རྟོག་པའི་ངང་དུ་བཞུགས་པས་གཞན་གྱི་གདུག་པའི་ནད་དང། སྨྱོ་འབོག་རིམས་ནད་ཐོག་སེར་སོགས་ཞི་ཞིང་ཆར་ཆུ་དུས་འབེབས་བྱུང་བ་ལྟ་བུ་ཤིན་ཏུ་མང་ལ། ལྕགས་མཁར་ཆེན་མོ་དང་བསྒྲལ་ཆོག་སྦྱིན་སྲེག་སོགས་ལ་ཐོད་བཅིངས་གནང་བ་དང། རུས་རྒྱན་བཞེས་སྐབས་སོགས་སུ་ཞལ་ལ་ལྟ་མི་ཕོད་པའི་ཟིལ་ཆེ་བས་ལྷའི་ང་རྒྱལ་དང་གསལ་སྣང་བརྟན་པོར་
དཔོག་ནུས་པ་ནི་ཀུན་ལ་བསྙོན་མེད་དུ་གྲུབ་བོ། །ལྷག་པར་ལོ་ཀྱ་ཏུན་དུ་དང་པོ་ཕེབས་པའི་སྔ་ཕྱི་ཞིག་ནས་བདེ་སྟོང་དབྱེར་མེད་ཀྱི་ཡེ་ཤེས་ཟབ་མོའི་རོལ་པ་ལས་མི་གཡོ་བའི་སྐུའི་ཉམས་དང། དབང་རྗེས་གནང་སོགས་ཀྱི་སྐབས་སྟོང་ཉིད་སྙིང་རྗེ་དབྱེར་མེད་ཀྱི་ངོ་སྤྲོད་དང་ཕྱག་བཞེས་གནང་ཚུལ་སོགས་ལ་དཔགས་ན་རྟོགས་པ་ཀློང་དུ་གྱུར་ཏེ་ཐུན་གྱི་དུས་བདེ་སྟོང་གི་གཟུང་རྣམ་ལྷར་འཆར་བ་དང། ཐུན་མཚམས་སུ་གང་སྣང་དག་པའི་རོལ་པར་བདེ་སྟོང་གི་རྒྱས་ཐེབས་པའི་འབྲས་རྟགས་མང་ངོ་། །མི་འགྱུར་བདེ་ཆེན་སྟོང་པའི་མཁའ་དབྱིངས་སུ། །ཅི་དགར་རོལ་པའི་རིག་སྔགས་དྲི་བཞོན་གྱིས། །ཐ་མལ་སྣང་ཞེན་སྤྲིན་ཚོགས་བསྐྲད་པ་ན། །ཉི་མ་བརྒྱ་ཕྲག་འབར་བཞིན་གཟི་བརྗིད་རྒྱས། །བྱིན་རླབས་བདུད་རྩིས་ཉེར་འཚེའི་ཟུག་རྔུ་འཇོམས། །ཐུགས་རྗེ་ཉིན་བྱེད་བདེ་སྐྱིད་པངྨོའི་གཉེན། །ཏིང་འཛིན་ལྕགས་ཀྱུས་སྲིད་ཞིའི་དཔལ་ཀུན་འགུགས། །མཐུ་སྟོབས་མེ་ལྕེས་མི་མཐུན་བུད་ཤིང་སྲེག །མཁས་བཙུན་གྲུབ་པའི་རྣམ་ཐར་ཟུང་དུ་འཇུག །གསང་གསུམ་འཕྲིན་ལས་དུས་ལས་ཡོལ་བ་མེད། །དང་སེམས་འཛིན་མར་ཕན་བདེའི་ཆར་བ་འབེབས། །དེང་འདིར་རྒྱལ་བའི་གདུང་འཚོབ་ཁྱོད་མིན་སུ། །དབྱར་ཞལ་བཞེས་མཛད་པའི་བར་སྐབས་ཤིག །མཛོད་དགེ་དཔོན་པོ་དཀོན་མཆོག་རབ་བརྟན་འཆི་ལ་ཐུག་པའི་ནད་གཞི་ཤིན་ཏུ་ལྕི་བ་བྱུང་སྟེ་ཨུ་ཚུགས་མཐར་སྐྱེལ་གྱིས་གདན་འདྲེན་ཞུས་པར་དབྱར་བྱིན་རླབས་གནང་སྟེ་ཞག་གཅིག་གིས་དགོན་གསར་དུ་འབྱོར་བ་གནང། རིམ་གྲོ་རྗེས་གནང་དང་བྱད་གྲོལ་གནང་ཙམ་གྱིས་ནད་ལས་གྲོལ་ཏེ་ཕྱིར་ཕེབས་སྐབས་ཆིབས་སྐྱེལ་བྱེད་ཐུབ་པས་བྱིན་རླབས་ཀྱི་བདེན་པ་མངོན་དུ་གྱུར། ཞག་དྲུག་པའི་ཉིན་རི་
ཁྲོད་དུ་འབྱོར་པ་གནང། སེར་བཟང་སྤྲུལ་སྐུ་ནས་ཞུས་ངོར་དོན་གཉེར་བ་འགའ་ཞིག་ལ་བདེ་མཆོག་ལཱུ་ཨི་པ་དང་ལྷ་ལྔ། ལུས་དཀྱིལ། ཚེ་དཔག་མེད། གདུགས་དཀར་བཅས་ཀྱི་དབང་ལུང་མང་དུ་སྩལ། དབྱར་གནས་གྲོལ་ནས་དགོན་པར་བྱོན་ཏེ་བླ་མཆོད་དང་ཕྱག་ཆེན་སྦྲགས་མའི་ཁྲིད། དཔའ་གཅིག་གི་དབང་སོགས་ཆོས་བཀའ་འགའ་ཞིག་གནང། རྣམ་རྒྱལ་སྟོང་མཆོད་ཀྱི་ཚོགས་དབུར་སྔ་ཕྱིར་ལན་ཁ་ཤས་བྱོན་པ་མ་གཏོགས་ལོ་མཇུག་བར་དུ་བཅད་རྒྱ་མཛད། སྔ་ཕྱིར་བསྒྲུབ་བྱ་བརྒྱ་དང་ཉེར་གསུམ་བསྙེན་རྫོགས་དང། བརྒྱད་ཅུ་དགེ་ཚུལ་དུ་བསྒྲུབས། ལོ་འདིར་རྗེ་ཉིད་ཀྱིས་མཛད་པའི་ག་ཏེའི་འགྲེལ་པར། འདི་ལྟ་སྟེ་ཞེས་པ་མཛད་པ་པོའི་ཆེ་བ་དང། ཆོས་ཀྱི་ཆེ་བ་དགོས་སོགས་བཞི། སོང་ཞིག་ཅེས་པ་བདེན་པ་བཞི་ལ་སྦྱར་བ་སོགས་མདོར་ན། ཇི་ལྟར་བཤད་ཀྱང་ལུང་རིགས་ཀྱིས་གྲུབ་པའི་འཐད་ལྡན་གང་འདོད་དུ་འཆད་ནུས་པ་ནི་གསུང་རབ་ལ་ནང་བྱན་ཆུད་པའི་རྣམ་ཐར་ལ་བསྙོན་དུ་མེད་པ་ནི་ག་ཏེའི་འགྲེལ་པ་བཀླག་པ་ཙམ་གྱིས་ཤེས་ལ། དེའི་མཛད་བྱང་དུ་ཐུབ་པ་ཀུན་གྱི་ཡེ་ཤེས་ཀྱི་སྐུ་ཅན་ཡབ་གཅིག་འཇིགས་མེད་དབང་པོའི་ཞབས་ལ་གསོལ་བ་ནན་ཆེར་བཏབ་པས་གོ་ལུགས་འདི་འདྲ་བྱུང། ཞེས་པའི་ངོ་མཚར་གྱི་གནས་དཔྱོད་ལྡན་རྣམས་ཀྱིས་དགོངས་པར་ཞུ། དགུང་ལོ་ང་དྲུག་པ་མེ་གླང་ལོ་གསར་གྱི་ཚེས་ལ་བྱང་འགྲུལ་མང་པོར་ཚེམ་བུ་དམར་ཁྲིད། ལམ་རིམ་བསྡུས་དོན་གྱི་ཁྲིད། སིན་དྷུ་རའི་དཀྱིལ་འཁོར་དུ་མཁའ་སྤྱོད་མའི་བྱིན་རླབས། ཐུགས་རྗེ་ཆེན་པོའི་རྗེས་གནང། གྲུབ་རྒྱལ་ལུགས་ཀྱི་ཚེ་དབང། སྒྲོལ་དཀར་རྣམ་རྒྱལ་མ་སོགས་ཀྱི་རྗེས་གནང་དང། ལྗགས་ལུང་ཐོར་
བུ་ཡང་མང་དུ་སྩལ། སྔ་ཕྱིར་སྐུ་བརྙན་དང་གསུང་རབ་ཀྱི་གླེགས་བམ་ཕུལ་བ་དང་བཞེངས་པ་རྣམས་བསྒྲིགས་ཏེ་བླ་བྲང་ཐུབ་བསྟན་སྐྱེད་ཚལ་དུ། གསུང་རབ་ལྷ་ཁང་དང། ལི་མ་ལྷ་ཁང་ལྔ་དྲུག་ཙམ་བསྐྲུན། བསླུ་མེད་རིན་ཆེན་གསུམ་གྱི་བྱིན་རྟེན་བགྲང་ལས་འདས་པ་ཚར་དུ་དངར་བའི་མཐུ་ལས་བྱིན་རླབས་ཀྱི་ཟ་མ་ཏོག་ཏུ་རྒྱལ་བ་སྲས་དང་བཅས་པའི་འཕྲིན་ལས་དཔལ་དང་གཡང་དུ་འཁྱིལ་ཏེ། གང་དང་གང་གིས་མཐོང་ཙམ་གྱིས་ཀྱང་སྣང་བ་འགྱུར་ཞིང་དད་པའི་མེ་ལོང་སྒྲིབ་པའི་གཡའ་དང་བྲལ་ནས་ཡོན་ཏན་གྱི་རི་མོ་རྣམ་པར་བཀྲ་བར་བྱེད་དོ། །ནོར་བུའི་འོད་འབར་གྲངས་མེད་རྒྱལ་བའི་སྐུ། །བྱེ་བ་ཕྲག་བརྒྱ་ཚར་དུ་དངར་བ་ཡིས། །རྨད་བྱུང་ངོ་མཚར་ཕུང་པོའི་རི་མོ་ནི། །པིར་གྱིས་བྲིས་མིན་འཇའ་ཚོན་བཞིན་དུ་བཀྲ། །བཅུ་གསུམ་གྱི་ཉིན་འོད་དཔག་མེད་ཀྱི་གོས་སྐུ་གསར་དུ་ཞལ་ཕྱེ། ཀུན་གཟིགས་མཆོག་སྤྲུལ་རིན་པོ་ཆེ་ནས་གཙོ་མཛད། དགེ་འདུན་མང་དང་ལྷན་ཅིག་ཏུ་སྤྱན་འདྲེན་ཁྲུས་གསོལ་དང། བསྟན་འགྲོའི་དོན་དུ་བསྔོ་སྨོན་རྣམ་དག་གི་མཚམས་སྦྱོར་གནང་སྟེ་གོས་སྐུ་འདུ་ཁང་ཡང་རྩེར་གདན་དྲངས། དོན་གཉེར་བ་འགའ་ཞིག་ལ་འདོད་ཆོས་ཕྲན་ཚེགས་གནང་ནས་བཅད་རྒྱ་ལ་བཞུགས། ཐུབ་དབང་གི་གོས་སྐུ་གསར་བཞེངས་མཛད། བཞི་པའི་ཚེས་ལ་བདེ་མཆོག་རང་བྱོན་མཇལ་བར་ཕེབས། ལམ་བར་ནས་སྟག་ལུང་དགོན་དུ་གདན་དྲངས་པར་ལྷ་ཁང་སོ་སོར་རྟེན་མཇལ་དང། དགོན་པར་མང་འགྱེད་སྤྱི་འཇོག་སྤམ་མཐོ་བ་གནང། བསྒྲུབ་བྱ་བཅུ་བསྙེན་རྫོགས་ལ་བཀོད་ཅིང། བདེ་མཆོག་ལཱུ་ཨི་པ་དང་གདུགས་དཀར་ལྷ་བཅུ་བདུན་མའི་དབང་གནང། ཨ་འགང་དགོན་དུ་གདན་དྲངས་པ་ལྟར་བྱོན་ཞིང་
གསོ་སྦྱོང་ལ་སོ་ཐར་གྱི་མདོ་གསུངས། བཅུ་གཅིག་ཞལ་གྱི་དབང་སྟ་གོན་དང་བཅས་པ་སྩལ། བཅུ་དྲུག་ལ་ལོ་ཀྱ་ཏུན་ཏུ་འབྱོར། བཅུ་བདུན་གྱི་སྔ་དྲོ་བདེ་མཆོག་གི་བདག་འཇུག་གནང་སྟེ་ཕྱི་དྲོ་ནས་ཉེར་ལྔའི་བར་དུ་བཅད་རྒྱ་དམ་པོ་མཛད། ཉེར་ལྔའི་ཉིན་ལྷ་དང་མཁའ་འགྲོ་དགྱེས་པ་བསྐྱེད་པའི་ཕྱིར་དུ་བཟའ་བཅའ་བཏུང་བའི་ཚོགས་བསམ་གྱིས་མི་ཁྱབ་པ་ཏིང་ངེ་འཛིན་གྱིས་བྱིན་གྱིས་བརླབས་ནས་ཚོགས་འཁོར་བརྒྱ་རྩ་ཕུལ་ཏེ་ཚིམ་པ་དྲུག་ལྡན་དུ་རོལ། བསྔོ་སྨོན་གྱི་མཚམས་སྦྱོར་ནན་ཏན་དང། བཀྲ་ཤིས་ཀྱི་གླུ་དབྱངས་བརྗོད་དེ་མེ་ཏོག་གི་ཆར་ཕབས། ཟུང་འཇུག་རྡོ་རྗེའི་སྐུ་བརྙེས་ཕམ་མཐིང་པའི། །ཡེ་ཤེས་སྒྱུ་མའི་རོལ་པ་བརྟན་གཡོའི་གར། །ཅིར་ཡང་འཆར་བ་དག་པའི་གཞལ་ཡས་སུ། །བདེ་སྟོང་ཆོས་སྐུའི་རྣམ་འགྱུར་འབུམ་གྱིས་རྩེན། །ཡིད་འོང་བཟའ་བཅའ་བཏུང་བ་རྣམ་མང་པོ། །ཏིང་འཛིན་སྔགས་དང་ཕྱག་རྒྱས་བྱིན་བརླབས་ཏེ། །ཧེ་རུ་ཀ་དཔལ་དཔའ་བོ་མཁའ་འགྲོའི་ཚོགས། །བདེ་ཆེན་ཉམས་བརྒྱས་གླུ་གར་མཆོད་པས་བྲེལ། །གཞི་བྱེས་ཀྱི་དགེ་འདུན་རྣམས་དང། མཇལ་མང་ལ་འདུ་ཁང་ནས་ཕྱག་དབང་དང། ཆོས་འབྲེལ་འདོད་མོས་བཞིན་དང་མང་འགྱེད་ཀྱང་གནང། མཆོད་རྟེན་དཀར་པོ་དང་ཨ་འགང་དགོན། བྱམས་སྤྲིན་གླིང་སོགས་སུ་གདན་དྲངས་པར་འདོད་མོས་ཀྱི་ཆོས་བཀའ་མང་འགྱེད་དང་བཅས་པ་གནང། མགོ་མོག་དགོན་པར་གདན་དྲངས་པ་ལྟར་གསོ་སྦྱོང་གི་མགོན་དུ་ཕེབས་ཤིང། འཇིགས་བྱེད་ཀྱི་དབང། བཅུ་གཅིག་ཞལ་གྱི་རྗེས་གནང་བཅས་སྩལ། བསྒྲུབ་བྱ་བཅུ་དྲུག་བསྙེན་རྫོགས་ལ་བཀོད་ཅིང། འགྱེད་སྤྱི་འཇོག་དང་
བཅས་པ་བསྟར། ལམ་བར་ནས་གང་ཕེབས་སུ་ཆིབས་བསུ་སྐྱེལ། ཇ་ཐབ། ཕྱག་དབང། འཕོ་ལུང་བསྔོ་ཞུས་སོགས་བར་མ་ཆད་པ་ཡོད་ཀྱང་བྲིར་མ་ལང། གདན་སར་བྱོན་ནས་བླ་གྲྭ་མང་པོར་འདུལ་བའི་སྡོམ་ཚིག་གི་བཤད་ལུང། རྗེའི་བསྟོད་འགྲེལ་གྱི་བཤད་ལུང། བླ་མ་མཆོད་པའི་ཁྲིད། བཀའ་རྩོམ་དུ་མའི་ལུང། རྣམ་རྒྱལ་སྟོང་མཆོད་དང་ཁྲི་མཆོད་ཀྱི་ཚོགས་དབུ། བསྙེན་རྫོགས་སོགས་བསྟན་པའི་བྱ་བ་འབའ་ཞིག་ལ་གཞོལ། ལྔ་པའི་ཉི་ཤུ་ལ་དངུལ་སྲང་བཞི་བརྒྱ་སྐོར་ལས་བསྒྲུབ་པའི་ཐུབ་པའི་གོས་སྐུ་ཁྱད་འཕགས་ལེགས་པར་གྲུབ་སྟེ་མཛོད་དགེ་དགོན་དུ་གདན་དྲངས། སྤྱན་དབྱེའི་ཆོ་ག་དང་མཆོད་པ་རྒྱ་ཆེན་པོ་ཕུལ་ཏེ་ཁྲུས་གསོལ་སྨོན་ལམ་བསྟན་འབར་མ་བཅས་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་པའི་ཐུགས་སྨོན་ནན་ཏན་མཛད། སྐོང་བུ་ནང་ཁྱ་དགེ་སྤྲུལ་སྐུ་སོགས་བསྒྲུབ་བྱ་དོན་བདུན་བསྙེན་རྫོགས་སུ་བསྒྲུབས། འཇིགས་བྱེད་བཅུ་གསུམ་མའི་དབང། ཆོས་སྐྱོང་འགའ་ཞིག་གི་རྗེས་གནང། སྐྱབས་འགྲོའི་ཁྲིད། ལུང་ཐོར་བུ་མང་དུ་གནང། ཞག་དགུའི་རིང་ལ་བཅད་རྒྱ་མཛད། རྐང་ཚ་དགོན་པས་སྔ་ཕྱིར་གདན་འདྲེན་ནན་ཆེ་བ་ལྟར་བྱོན་ནས་བླ་གྲྭ་བཞི་བརྒྱ་ལྷག་སེར་སྐྱ་སྟོང་ལྷག་གི་ཁྲོམ་ཆེན་པོར་བླ་མཆོད་ཀྱི་ཁྲིད། ཚེ་དཔག་མེད་ཀྱི་དབང། གདུགས་དཀར། སེང་གདོང་མ། རྟ་མགྲིན་གསང་སྒྲུབ་རྣམས་ཀྱི་རྗེས་གནང། བདེ་ལམ་ཚིགས་བཅད་མའི་ལུང། བསྒྲུབ་བྱ་བཅོ་བརྒྱད་དགེ་ཚུལ་དུ་བསྒྲུབས་ཤིང། དོང་ཚེ་ཞོ་ལྔ་རེ་དང་ཞོ་དར་རེའི་འགྱེད་བསྟར། དེར་ཁྲི་བྱམས་པ་རྒྱ་མཚོའི་ནང་རྟེན་གྱི་རིགས་བཞུགས་པ་ལ་རྟེན་མཇལ་དང་ཀུན་ལ་བྱིན་རླབས་སྩལ། ཐེ་བོའི་
ཆབ་ཚན་ལ་ཕེབས་ལམ་དུ། བྲག་མགོན་བཀྲ་ཤིས་ལྷ་སྡིངས་ཀྱི་རི་ཁྲོད་དུ་བཞུགས་ཞག་ངོས། ཀུན་ལ་ཕྱག་དབང་ཆོས་འབྲེལ་དང། བསྒྲུབ་བྱ་བཅུ་དྲུག་བསྙེན་རྫོགས་གནང། བྲག་ལུང་རི་ཁྲོད་དུ་གདན་དྲངས་པར་འདུ་ཁང་ནས་བཀྲ་ཤིས་ཀྱི་གསོ་སྦྱོང་དང། དགེ་འདུན་རྣམས་ལ་ཕྱག་དབང་ཆོས་འབྲེལ་མང་འགྱེད་བཅས་སྩལ། ཚ་མདོ་དགོན་པས་ཐབ་བསུ་ཞུས་པར། ཕྱག་དབང་ཆོས་འབྲེལ་མང་འགྱེད་བཅས་གནང། རེབ་ཚ་རྒྱལ་མོ་དགོན་བསམ་འགྲུབ་གླིང་དུ། ལྷ་ཁང་གསར་པ་རྟེན་དང་བརྟེན་པར་རབ་གནས། ལམ་རིམ་བསྡུས་དོན་གྱི་ཁྲིད། ཐུགས་རྗེ་ཆེན་པོའི་དབང། མང་འགྱེད་སྤྱི་འཇོག་བཅས་དང་ཞག་གསུམ་བཞུགས། དེར་རྗེ་ཙོང་ཁ་པའི་དབུ་སྐྲ་བུབ་ཚང་བཞུགས་པའི་རྗེ་གྱེ་རེ་མར་གྲགས་པ་རྟེན་གཙོ་བྱིན་རླབས་ཅན་དེ་ཀུན་དགའ་ར་བའི་མཐོ་སར་བཞུགས་པ་ལ་སྙན་ཤལ་རྒྱང་ནས་འཕང་བ་དབུ་གདུགས་ལ་ཕོག་པས་གཡས་སྐོར་དུ་འཁོར་ཞིང། སྙན་དར་སྐུ་གཟུགས་ཀྱི་མགུལ་དུ་དར་དཔྱངས་ཀྱི་ཚུལ་དུ་གཡས་གཡོན་རིང་ཐུང་མེད་པར་བབས་པས་དེར་འཚོགས་ཐམས་ཅད་དད་པ་ཐོབ། ཀླུ་ཆུང་རྒྱ་མཁར་དགོན་དགའ་ལྡན་ཕུན་ཚོགས་གླིང་དུ་གདན་དྲངས་པ་ལྟར་བྱོན་ཞིང་ཆོས་འབྲེལ་གནང། སྨན་ཆུ་ཁར་ཆབ་ཚན་འཕྲོད་བསྟེན་གྱི་ཞར་ལ། བསྒྲུབ་བྱ་འགའ་ཞིག་བསྙེན་རྫོགས་དང། འདོད་ཆོས་མོས་པ་བཞིན་མཛད། དེ་ནས་ཆས་པ་གཤོང་བརྒྱུད་དེ་བྱོན་པར་བརྒྱ་མཆོད་རི་ཁྲོད་དང་སྡེ་པས་ཐབ་བསུ་ཞུས་ཤིང། རྒྱལ་ཏེའུ་མགོའི་དགོན་པར་བཞུགས། ཐུགས་རྗེ་ཆེན་པོའི་དབང་དང་མང་འགྱེད་དཔེ་འགྲེ་གནང། གང་དང་གང་དུ་ཞབས་
སེན་བཀྲ་ཤིས་ཀྱི་རི་མོ་བཀོད་པ་དེར་འཇའ་ཚོན་ཤར་བ་དང་འཁྲུག་ལོང་ཞི་བ་དང། ལོ་ལེགས་པ་སོགས་བཀྲ་ཤིས་དང་དགེ་ལེགས་ཀྱི་དགའ་སྟོན་ཡར་ཚེས་ཀྱི་འཕེལ་བ་ལ་འགྲན་པ་འཕྲལ་དང་འཕྲལ་དུ་རྒྱ་ལས་རྒྱ་ཡི་འབུར་གསལ་བ་ལྟ་བུ་བྱུང་བའི་ལོ་རྒྱུས་མང་ཡང་བྲི་མ་ནུས་སོ། །ཆས་པ་དར་དགེ་དགོན་དུ་བྱོན། ལྷ་ཁང་གསར་པ་དཔག་བསམ་འཁྲི་ཤིང་སོགས་རབ་གནས་དང། ལུང་རྗེས་གནང། མང་འགྱེད་སོགས་ཀྱིས་ཚིམ་པར་མཛད། དེ་ནས་ཐབ་བསུ་ཁ་ཤས། ཆིབས་བསུ་སེར་སྦྲེང་དང་བཅས་ཏེ་བདེ་ཐང་ཆོས་འཁོར་གླིང་དུ་བབས། བླ་གྲྭ་འདུ་ཁང་དུ་མི་ཤོང་ཙམ་ལ་ལམ་རིམ་བསྡུས་དོན་གྱི་ཁྲིད། ཀུན་རིག་གི་དབང་སྟ་གོན་དང་བཅས་པ། སྤྲུལ་སྐུ་གཉིས་ལ་དགེ་ཚུལ་གྱི་སྡོམ་པ་དང། སྒེར་དུ་འཇམ་དབྱངས་དཀར་པོ་དང་སྒྲོལ་དཀར་གྱི་རྗེས་གནང་སྩལ། དངོས་འབུལ་ཤིན་ཏུ་སྤམ་མཐོ་བ་བཏེག་སྟེ་བཞེས་དགོས་ནན་ཆེ་རུང་རྒྱུ་མཚན་དང་བཅས་ཕྱིར་སློག་སྟེ་མང་འགྱེད་གྱ་ནོམ་པ་གནང། ཆས་པ་རྒྱ་མཁར་དགོན་ཕུན་ཚོགས་ཐར་པ་གླིང་དུ་གདན་དྲངས་པ་ལྟར་བྱོན་ཞིང། དཔའ་གཅིག་གི་དབང་དང། མང་འགྱེད། ཨ་འཁོར་བྲག་དཀར་རི་ཁྲོད་བྱང་ཆུབ་གླིང་དུ་ཞག་གཅིག་བཞུགས་ཤིང། རྡོར་གཅོད་ཀྱི་ལུང་སོགས་དང། མང་འགྱེད་དེ་མཚུངས་སྕལ། དེ་ནས་དགོན་གསར་དུ་ཕྱག་ཕེབས་ཏེ་ཞག་ཁ་ཤས་ཀྱི་རིང་འཇིགས་བྱེད་བསྐྱེད་རིམ་གྱི་ཁྲིད་སོགས་ཆོས་བཀའ་འགའ་ཞིག་གནང། ཆོས་རྫོང་དགོན་དུ་གདན་དྲངས་པར་འཇིགས་བྱེད་ཡུམ་བཅས་ཀྱི་རྗེས་གནང། སེར་སྐྱའི་ཁྲོམ་ཆེན་པོར་འཕོ་བ་ཕྱག་དབང། མང་འགྱེད་བཅས་སྩལ། འབུལ་བ་ཕྱིར་སློག་པ་སོགས་དུས་རྒྱུན་ལྟར་མཛད། ཞལ་ནས་དེང་སང་བྲེལ་བ་བཅད་ནས་དགེ་སྦྱོར་གྱི་ཁུལ་ཡིན་
རུང། དགོས་པའི་དབང་གིས་ཆབ་ཚན་གྱི་ཞར་ལ་ལྷོ་ཕྱོགས་ཀྱི་དགོན་པ་ཐམས་ཅད་ལ་རེ་རེ་སོང་བ་ཡིན། འབུལ་བ་བླངས་ན་གྲོང་ཆོག་དང་དོན་གཅིག་པས་རི་ཁྲོད་ཀྱི་ཐ་སྙད་ཞིག་འགྲོ། ཞར་ལ་དགེ་འདུན་པ་ཐམས་ཅད་ལ་མང་འགྱེད་ཀྱི་འབྲེལ་ཐེབས་པ་སྐལ་བ་བཟང་གསུངས། དུས་རྒྱུན་དུ་དགོན་པ་སོ་སོའི་མདོ་སྔགས་ཀྱི་བསྟན་སྲོལ་དང། བྱ་བ་ལས་ཀྱི་འཁོར་ལོ་ལ་བཀོད་ཁྱབ་མཛད་པས་སོ་སོའི་རེ་བ་སྐོང་བར་མཛད་ཅིང། ཞལ་ནས་ཀྱང། ཀུན་མཁྱེན་བླ་མས་སངས་རྒྱས་ཀྱི་བསྟན་པའི་འབྲས་བུ་འཕེལ་བའི་ཕྱིར་ཆོས་ཀྱི་ལྗོན་ཤིང་གི་དགོན་པ་མང་པོ་བཏབ་པ་ཡིན། བཀྲ་ཤིས་འཁྱིལ་ནི་ལྗོན་པའི་རྩ་བ་ལྟ་བུ་དང། དགོན་ལག་གཞན་རྣམས་ཡལ་ག་ལྟ་བུ་ཡིན་པས། འབྲས་བུ་ཆགས་པ་ལ་གལ་ཆེ་མཉམ་ཡིན་གསུངས། སྣ་ཚོགས་མོས་ལྡན་རིས་མེད་གདུལ་བྱ་ཡི། །བཅུ་གཉིས་ཁྱིམ་གྱི་འཁོར་ལོ་དང་འཚམ་པར། །རྒྱལ་ཀུན་འཕྲིན་ལས་ཉི་ཟླ་རྒྱུ་སྐར་གྱི། །བགྲོད་པ་རྫོགས་པ་གང་ཐུགས་ལྷ་ལམ་ནས། །བཤད་སྒྲུབ་ཟུང་འཇུག་ཉི་གཞོན་འཆར་བའི་འོད། །སྙིང་བརྩེའི་གསེར་ཞུན་རྒྱུན་དུ་འབབ་པ་ཡིས། །མཐའ་བྲལ་ནོར་འཛིན་ཁྱོན་ལ་ཉེར་བྲིས་པའི། །ཡོན་ཏན་གླེགས་བམ་ཡོངས་རྫོགས་རྒྱལ་ཀུན་ཡུལ། །བརྒྱད་པའི་ཚེས་ལྔ་ལ་གདན་སར་བབས་ནས་བསྙེན་རྫོགས་དང། རྣམ་རྒྱལ་མཆོད་པ་འགའ་མ་གཏོགས་དགུ་པའི་ཟླ་མཇུག་བར་དུ་བཅད་རྒྱ་མཛད། རོང་པོ་ནས་སླར་ཡང་འཁྲུགས་པ་སློང་སྐད་དང། ལན་ཇུའི་ཙུན་ཏུ་གཟུ་ཆིངས་ལ་འོང་སྐད་སོགས་འུར་ཟིང་ཆེ་བར་བརྟེན། དགུ་པའི་ཉེར་བཞིའི་ཉིན་གཏོར་ཆེན་སྨད་རྒྱུད་ལྟར་བརྩེགས་ནས་ཉིན་
གཉིས་ལ་མགོན་པོའི་གཏོར་ཆེན་བསྒྲུབས། སླར་ཡང་ཉེར་བདུན་གྱི་ཉིན་གཏོར་ཆེན་བརྩེགས་ནས་ཉིན་གཉིས་ལ་གཏོར་ཆེན་སྨད་རྒྱུད་ལྟར་བསྒྲུབ་པའི་ཚོགས་དབུར་བར་མ་ཆད་པར་བྱོན། བླ་མ་ཁྲི་གདན་ཟུར་དང། གྲྭ་མང་ཡང་གདན་འཛོམ་སྟེ་ཐུགས་འདུན་ཆིག་དྲིལ་མཛད་པས་དར་འཇམ་ཡུག་གཅིག་ལ་སོང། གཏོར་ཆེན་གྱི་རྗེས་ཤིག་གསུང་འཕྲོས་ཀྱི་ཞར་ལ། དམ་ཚིག་དང་སྡོམ་པ་ཚུལ་བཞིན་དུ་བསྲུང། ལས་འབྲས་ཀྱི་བླང་དོར་དང་འགལ་བར་མ་བྱས། སངས་རྒྱས་ཀྱི་བསྟན་པ་ལ་གཅེས་སྤྲས་བྱས་ན་ཆོས་སྐྱོང་དབང་མེད་དུ་འཁོར་དགོས་པ་དམ་ཚིག་རེད་མོད། རེབ་ཙ་བཀའ་འགྱུར་བ་ངག་དབང་བློ་བཟང་ཉི་མ་བཞུགས་དུས་བྲག་ལུང་རི་ཁྲོད་པ་ཚོའི་ཁང་པ་ལ་སྒོ་ལྕགས་མི་དགོས་པ་རེད། སྒྲུབ་པ་པོ་ངོ་མ་རང་ཡིན་པའི་རྟགས་རེད། དེ་བཞིན་དུ་སྒྲིག་ལམ་དང་འཆད་ཉན་ལ་འབད་དགོས། ཐམས་ཅད་དེ་ལ་རག་ལས་གསུངས། དམུ་དགེ་ཕ་མཐའ་སྤྲུལ་སྐུ་སོགས་ལ། ལྷོ་བྲག་སྙན་བརྒྱུད་ཀྱི་རྗེས་གནང། དུག་དབང་རྨ་བྱ་རྒྱས་པ་སོགས་གནང། ལོ་འདིར་གཞི་བྱེས་སུ་བསྙེན་རྫོགས་སུམ་བརྒྱ་བཅུ་གཉིས། རབ་བྱུང་དགེ་ཚུལ་རེ་དགུ་བསྒྲུབས་ཏེ་མངོན་མཐོ་ངེས་ལེགས་ཀྱི་ཟམ་པ་བརྟན་པར་མཛད། དགུང་ལོ་ང་བདུན་པ་ས་སྟག་གི་དཔྱིད་བདེ་ལམ་གྱི་ཁྲིད་སྨིན་རྒྱས་ལན་གཉིས། བླ་མ་མཆོད་པའི་ཁྲིད། སྙིང་པོ་དོན་གསུམ་གྱི་ཁྲིད། ཚེམ་བུ་དམར་ཁྲིད། དགའ་ལྡན་ལྷ་བརྒྱ་མའི་ཁྲིད། འཇིགས་བྱེད་དཔའ་གཅིག་གི་དབང་ལན་གཉིས། བསྐྱེད་རྫོགས་ཀྱི་ཁྲིད། དྲིལ་བུ་ལྷ་ལྔ་དང། ལུས་དཀྱིལ་གྱི་དབང་བསྐྱར་མ་སོགས་བར་མ་ཆད་དང། རྣམ་རྒྱལ་ཁྲི་མཆོད། རབ་བྱུང་བསྙེན་རྫོགས་སོགས་
ཉིན་མཚན་ཁོར་མོ་ཡུག་ཏུ་གནང། བཞི་པའི་ཚེས་གཅིག་ནས། ༸ཀུན་གཟིགས་མཆོག་སྤྲུལ་རིན་པོ་ཆེར་མི་ཏྲ་རྡོར་འཕྲེང་གཉིས་ཀྱི་དབང་ཡོངས་རྫོགས་ཆ་ཚང་བར་ཕུལ་ཞིང། བར་སྐབས་སུ་ཡང་བསྙེན་རྫོགས་དང་རྣམ་རྒྱལ་མཆོད་པའི་ཚོགས་དབུ་ལན་ཁ་ཤས་མཛད། ལྷ་ལམ་མ་ཡིན་འཇམ་དབྱངས་བླ་མའི་ཐུགས། །འབྲུག་སྒྲ་མ་ཡིན་འཆད་རྩོད་རྩོམ་པའི་གསུང། །སྦྲང་ཆར་མ་ཡིན་ཨ་བྷི་ཥིཉྩའི་ཆུ། །སྐྱེད་ཚལ་མ་ཡིན་བསྟན་འགྲོའི་དཔལ་དུ་སྨིན། །འཇམ་དཔལ་ཞི་ཁྲོའི་གར་ཐབས་བརྒྱ་ཕྲག་གིས། །བདེ་སྟོང་རྣོ་ལྡན་སྒྱུ་འཕྲུལ་དྲ་བའི་མདའ། །དབང་བཞིའི་གཞུ་མོར་སྦྱར་བས་སངས་རྒྱས་ལ། །བྱང་ཆུབ་རྡོ་རྗེས་མཆོད་ཆེན་སྩལ་བ་བཞིན། །སྲིད་གསུམ་འཇོམས་པའི་བི་ཥའི་དཔུང་བཅིལ་ཞིང། །དབྱངས་གསལ་མཐའ་ཅན་ཟབ་མོའི་རྒྱུད་ཀྱི་སྡེ། །བཤད་སྒྲུབ་སྦྲང་རྩིས་མྱོས་པའི་བུང་བའི་དབྱངས། །སྐལ་བཟང་སྙིང་དབུས་པད་མཚོར་དར་དིར་སྒྲོགས། །རིམ་གཉིས་ཀློང་འཁོར་ཆེས་ཟབ་ཅིང། །དངོས་གྲུབ་རིན་ཆེན་བྱེ་བས་གཏམས། །རྒྱུད་རྒྱལ་གདེངས་ཅན་རོལ་པའི་མཚོ། །རྒལ་བྱེད་དབང་གི་གྲུ་བོ་ཆེ། །ཡབ་སྲས་ཐུགས་བསྐྱེད་སྨོན་པའི་ཤུགས། །བསྐལ་པར་གོམས་པའི་མཐུན་པའི་རླུང། །དོན་ཡོད་ཞགས་པའི་འཁྲུལ་འཁོར་བཞིན། །ལྷུན་གྱིས་གྲུབ་འདི་ཨ་ཧོ་རྨད། །རྗེ་ཐུའུ་བཀྭན་མཆོག་སྤྲུལ་རིན་པོ་ཆེ་ནས་བཀའ་ཆོས་གསན་རྒྱུར་ཡང་ཡང་གདན་འདྲེན་ཞུས་ཀྱང་རིམ་འགྱངས་སུ་སོང་བར། ལོ་འདིར་གདན་འདྲེན་པ་ནན་ཅན་ཡང་ཡང་འབྱོར་བས། ལྔ་པའི་ཉི་ཤུ་གཉིས་ལ་དགོན་ལུང་དུ་གདན་དྲངས་པ་ལྟར་བྱོན། ལམ་བར་ནས་གཅུ་འཁོར་དགོན། བེའུ་མདོ་
དགོན། ཀ་རིང་དགོན། ཀ་མདོ་དགོན་སོ་སོས་གདན་དྲངས། གང་ཞུས་ཀྱི་དབང་རྗེས་གནང། མང་འགྱེད། སྤྱི་འཇོག་སོགས་ཀྱིས་ཚིམ་པར་མཛད་བཞིན་པའི་ངང་ནས་དྲུག་པའི་ཚེས་བཞིའི་ཉིན་བླ་བྲང་བཀྲ་ཤིས་འོད་འབར་དུ་ཕྱག་ཕེབས། སྤྲུལ་བའི་སྐུ་རིན་པོ་ཆེར་ཐོག་མའི་ཕྱག་རྟེན་དུ་ནང་མཛོད། ལམ་རིམ་ཆེན་མོའི་ཕྱག་དཔེ། ཆིབས་ཆེན་ལེགས་པ་བཅས་ཕུལ། ཉིན་དེར་རྟོགས་བརྗོད་མདུན་ལེགས་མའི་ལུང་གནང་སྟེ་བཀའ་ཆོས་ཀྱི་དབུ་ཚུགས། ཚེས་ལྔའི་ཉིན་བྱམས་ཆོས་སྡེ་ལྔའི་ལུང། ཚེས་དྲུག་གི་ཉིན་དགོན་ལུང་ཚོགས་ཆེན་གྱི་གསུང་ཆོས་སྨོན་ལམ་གྱི་མགོན་དུ་གདན་དྲངས་པ་བཞིན་ཕེབས་ཤིང། ཕྱི་དྲོ་དབུ་མ་རིགས་ཚོགས་དྲུག་གི་ལུང་སྩལ། ཚེས་བདུན་ལ་སྣར་ཐང་བརྒྱ་རྩ་ནས་ཐུབ་དབང་གཙོ་རྐྱང་སོགས་རྗེས་གནང་ལྔ། ཚེས་བརྒྱད་ལ་འཇམ་དབྱངས་ཨ་ར་པ་ཙ་སོགས་རྗེས་གནང་བདུན། ཕྱི་དྲོ་བཞི་བརྒྱ་པ་དང་སྤྱོད་འཇུག་གི་ལུང། ཚེས་དགུའི་སྔ་དྲོ་ཐུགས་རྗེ་ཆེན་པོ་བཅུ་གཅིག་ཞལ་སོགས་ཀྱི་རྗེས་གནང་བདུན། ཕྱི་དྲོ་འགྲེལ་པ་དོན་གསལ་དང་སྡུད་པ་སྦྱར་ནས་བཤད་ལུང་གི་དབུ་ཚུགས། ཚེས་བཅུ་ལ་ལོ་གྱོན་མ་སོགས་རྗེས་གནང་བདུན། ཕྱི་དྲོ་བཤད་ལུང། འདན་མ་སྤྲུལ་བའི་སྐུ་སོགས་ལ་འཁོར་ཆེན་བསྐྱེད་རིམ་གྱི་ལུང། བཅུ་གཅིག་གི་སྔ་དྲོ་རྗེས་གནང་བདུན། ཕྱི་དྲོ་བཤད་ལུང། བཅུ་གཉིས་ཀྱི་སྔ་དྲོ་སྣར་ཐང་བརྒྱ་རྩའི་རྗེས་གནང་རྫོགས། གུང་ཐུན་ལ་གཞི་བྱེས་ཀྱི་བླ་གྲྭ་མང་པོར་རྟེན་འབྲེལ་བསྟོད་པའི་བཤད་ལུང། ཕྱི་དྲོ་སྐུ་མདུན་ལ་སྔ་མའི་བཤད་ལུང་གི་འཕྲོ། བཅུ་གསུམ་གྱི་སྔ་དྲོ་མཁྱེན་ཡངས་གླིང་ནས་བསྒྲུབ་བྱ་གྱ་དགུ་བསྙེན་རྫོགས་
དང་བརྒྱད་དགེ་ཚུལ། ཕྱི་དྲོ་སྐུ་མདུན་ལ་བ་རི་བརྒྱ་རྩའི་མགོ་ནས་རྗེས་གནང་བཅུ། སྒྲུབ་ཐབས་རང་རང་གི་རྒྱ་གཞུང་གི་ལུང། བཅུ་བཞིར་བསྒྲུབ་བྱ་རེ་དགུ་བསྙེན་རྫོགས། ཕྱི་དྲོ་སྐུ་མདུན་ལ་རྗེས་གནང་བཅུ་གཅིག །མང་ལ་དྲག་པོ་སུམ་སྒྲིལ། ཆོས་སྤྱོད་གསལ་སྒྲོན། དགེ་ཚུལ་སློང་གི་ཕྱིར་བཅོས་རྣམས་ཀྱི་ལུང། བཅོ་ལྔའི་སྔ་དྲོ་རྗེས་གནང་བཅུ་གཅིག །མང་ལ་དཔའ་གཅིག་དབང་གི་སྟ་གོན། ཕྱི་དྲོ་འགྲེལ་པ་དོན་གསལ་དང་སྡུད་པའི་བཤད་ལུང་རྫོགས། བཅུ་དྲུག་གི་སྔ་དྲོ་རྗེས་གནང་བཅུ་གཅིག །ཚོགས་ཆེན་གྱི་ཚོགས་དབུར་གདན་དྲངས་ཏེ་བརྟན་བཞུགས་ཕུལ། ཚུལ་ཕེབས་འཕྲལ་བླ་གྲྭ་སུམ་བརྒྱ་སྐོར་ལ་དཔའ་གཅིག་གི་དབང། ཐུབ་དབང་གནས་བཅུས་བསྐོར་བ། སེང་ལྡེང་ནགས་སྒྲོལ། སྒྲོལ་དཀར་འོད་ཟེར་དྲུག་སྦྲགས་རྣམས་ཀྱི་རྗེས་གནང་སྩལ། བཅུ་བདུན་གྱི་སྔ་དྲོ་རྗེས་གནང་བཅུ་གཉིས། ཕྱི་དྲོ་ལྗགས་ལུང་ཁ་ཤས། བཅོ་བརྒྱད་ཀྱི་སྔ་དྲོ་ལྷ་ཁང་འདུ་ཁང་སོ་སོར་མཆོད་མཇལ་མཛད། ཕྱི་དྲོ་རྗེས་གནང་བཅུ་གཉིས། བཅུ་དགུའི་སྔ་དྲོ་རྗེས་གནང་བཅུ་གཅིག་གིས་བ་རི་བརྒྱ་རྩ་རྫོགས། གུང་ཐུན་མང་ལ་འཇིགས་བྱེད་ཞལ་ཕྱག་ཡོངས་རྫོགས། ཚེ་ལྷ་རྣམ་གསུམ། ཁྲོ་བོ་སྨེ་བརྩེགས། ནཱ་ག་རཀྴ་རྣམས་ཀྱི་རྗེས་གནང་དང་ལུང་ཐོར་བུ་འགའ་སྩལ། ཕྱི་དྲོ་སྐུ་མདུན་ལ་སྐྱེས་རབས་སོ་བཞི་པའི་ལུང་གི་དབུ་ཚུགས། ཉི་ཤུའི་སྔ་དྲོ་མགོན་པོ་བཅུ་གསུམ་གྱི་རྗེས་གནང་བདུན། ཕྱི་དྲོ་སྐྱེས་རབས་རྫོགས། ཉེར་གཅིག་གི་སྔ་དྲོ་བཀའ་བཅུ་གསུམ་སྙིང་ཞུགས་དང་བཅས་པ་གྲུབ། ཕྱི་དྲོ་ཆོས་ཆུང་བརྒྱ་རྩའི་ལུང་གི་དབུ་ཚུགས། ཉེར་གཉིས་ཀྱི་སྔ་དྲོ་མང་ལ་གཏུམ་པོ་ཁྱུང་ལྔ། ལོ་གྱོན་མ། ཤེར་ཕྱིན་མ་སེར་མོ་རྣམས་
ཀྱི་རྗེས་གནང། སྨན་ཆོག་བསྡུས་པའི་ལུང། ཕྱི་དྲོ་ཆོས་ཆུང་བརྒྱ་རྩ་གྲུབ། ཉེར་གསུམ་གྱི་སྔ་དྲོ་སྒྲུབ་ཐབས་རིན་འབྱུང་ནས་ཐུབ་པ་དམ་ཚིག་གསུམ་བཀོད། སྨན་བླ། ཀླུ་དབང་རྒྱལ་པོ། ཀྱཻ་རྡོར། དུས་འཁོར། གཤེད་དམར། སྤྱན་རས་གཟིགས་གསང་སྒྲུབ། ནམ་མཁའ་རྒྱལ་པོ། རྒྱལ་བ་རྒྱ་མཚོ་རྣམས་ཀྱི་རྗེས་གནང། གུང་ཐུན་མང་ལ་བྱིན་རླབས་སྤུང་ཞུས་ཀྱི་ཁྲིད། ཕྱི་དྲོ་བསྟོད་པ་བརྒྱ་ལྔ་བཅུ་པ། རྒྱལ་བ་དགེ་འདུན་རྒྱ་མཚོའི་ཡི་དམ་སྒྲུབ་སྐོར་གྱི་ལུང། ཉེར་བཞིའི་སྔ་དྲོ་རིན་འབྱུང་ནས་ཕྱག་རྡོར་གཏུམ་ཆེན་དང་གཏུམ་ཆུང་གཉིས། རྟ་མགྲིན་ཤྭ་ན་བཞི་སྐོར། ལྕགས་རལ། མི་གཡོ་བ་དཀར་པོ། ཚེ་དཔག་མི་ཏྲ་ལུགས། འཆི་མེད་རྡོ་རྗེ་ལྷ་མོ། རྣམ་འཇོམས་ལྗང་གུ །རྣམ་འཇོམས་དཀར་པོ་བཅས་རྗེས་གནང་དགུ། གུང་ཐུན་སུམ་པ་བླ་བྲང་ནས་མཁན་སྤྲུལ་ཉིད་ཀྱིས་གཙོས་བླ་གྲྭ་ཧྲག་བསྡུས་ལ་དྲིལ་བུ་ལྷ་ལྔའི་དབང་གི་སྟ་གོན། ཕྱི་དྲོ་སྐུ་མདུན་ལ་མཛོད་རྩ་སོགས་ཀྱི་ལུང། ཉེར་ལྔའི་སྔ་དྲོ་རིན་འབྱུང་ནས་སྣ་ཚོགས་ཡུམ། སོར་འབྲང་མ། སྨེ་བརྩེགས་དུད་ཁ། སྨེ་བརྩེགས་ལྗང་གུ། སེང་གདོང་མ་སྔོན་མོ། ནཱ་ག་རཀྴ། འོད་དཔག་མེད། ཉེ་སྲས་བདུན་གྱི་རྗེས་གནང། གུང་ཐུན་ལ་སུམ་པ་བླ་བྲང་ནས་ལྷ་ལྔའི་དབང། ཕྱི་དྲོ་སྐུ་མདུན་ལ་སྔགས་ཆེན་དཀོན་རྒྱམ་པའི་ལམ་རིམ་ཚིགས་བཅད་མའི་ལུང། ཉེར་དྲུག་གི་སྔ་དྲོ་སུམ་པ་བླ་བྲང་དུ་ལུས་དཀྱིལ་གྱི་དབང། ཕྱི་དྲོ་སྐུ་མདུན་ལ་ཡོན་ཏན་གཞིར་གྱུར་མའི་ཁྲིད། ཉེར་བདུན་གྱི་སྔ་དྲོ་སྐུ་མདུན་ལ་བདེ་ལམ་གྱི་ཁྲིད་ཀྱི་དབུ་བཙུགས། གུང་ཐུན་ལ་གཞི་བྱེས་ཀྱི་བླ་གྲྭ་སུམ་སྟོང་བརྒལ་བར་ཀུན་རིག་དབང་གི་སྟ་གོན། ཉེར་བརྒྱད་ཀྱི་སྔ་དྲོ་བདེ་ལམ། གུང་ཐུན་ཚོགས་ཆེན་ལ་ཀུན་རིག་གི་དབང། ཕྱི་དྲོ་བདེ་ལམ། ཉེར་དགུའི་
སྔ་དྲོ་བདེ་ལམ་གྱི་ཁྲིད། གུང་ཐུན་མང་ལ་ཚེ་དཔག་ལྷ་དགུའི་དབང་དང་གདུགས་དཀར་གྱི་རྗེས་གནང། ལམ་མཆོག་སྙིང་པོའི་ལུང། ཕྱི་དྲོ་བདེ་ལམ་གྱི་འཕྲོ། གནམ་གང་གི་སྔ་དྲོ་བདེ་ལམ། གུང་ཐུན་མང་ལ་བདེ་ལམ་ཚིགས་བཅད་མའི་ཁྲིད། ཕྱི་དྲོ་བདེ་ལམ་གྱི་འཕྲོ། བདུན་པའི་ཚེས་གཅིག་གི་སྔ་དྲོ་བདེ་ལམ་གྱི་ཁྲིད། སུམ་པ་མཁན་སྤྲུལ་རིན་པོ་ཆེ་སོགས་ལ་མགོན་པོ་བཀའ་བཅུ་གསུམ་གྱི་རྗེས་གནང། དབུས་མཐའ་རྣམ་འབྱེད། ཆོས་ཉིད་རྣམ་འབྱེད། བཀའ་རྩོམ་ཞི་ཁྲོ་སྦྲགས་སྒྲུབ་རྣམས་ཀྱི་ལུང། མཁན་པོ་ཉིད་ལ་མགོན་པོ་སྙིང་ཞུགས་དང། བྲམ་ཟེ་མངགས་གཏད་ཀྱི་རྗེས་གནང་བཅས་སྩལ། ཚེས་གཉིས་ཀྱི་སྔ་དྲོ་བདེ་ལམ་གྱི་ཁྲིད། ཕྱི་དྲོ་མང་ལ་ཆོས་བཀའ་འགའ་ཞིག །ཚེས་གསུམ་གྱི་སྔ་དྲོ་བདེ་ལམ་གྱི་ཁྲིད་རྫོགས་ཏེ་ལྗགས་ལུང་ཡང་སྩལ། གུང་ཐུན་མང་ལ་རྣམ་རྒྱལ་མ་དང་གནས་བཅུའི་རྗེས་གནང། ལམ་རིམ་བསྡུས་དོན་གྱི་ཁྲིད། ཕྱི་དྲོ་སྐུ་མདུན་ལ་བདེ་མཆོག་ཐུན་མོང་གི་སྟ་གོན། ཚེས་བཞིའི་སྔ་དྲོ་ལཱུ་ཨི་པའི་དབང། གུང་ཐུན་ལ་ཚོགས་ཆེན་དུ་ཐུགས་རྗེ་ཆེན་པོའི་དབང། ཕྱི་དྲོ་སྐུ་མདུན་ལ་ལྗགས་རྩོམ་བླ་མའི་རྣལ་འབྱོར་གྱི་འགྲེལ་པའི་ལུང། ཚེས་ལྔའི་སྔ་དྲོ་དྲིལ་བུ་ལྷ་ལྔའི་དབང། བསྒྲུབ་བྱ་སོ་གསུམ་བསྙེན་རྫོགས་དང་གཉིས་དགེ་ཚུལ་དུ་བསྒྲུབས། ཕྱི་དྲོ་སྐུ་མདུན་ལ་འཇམ་དཔལ་ཞལ་ལུང་གི་ལུང། ཚེས་དྲུག་གི་སྔ་དྲོ་ལུས་དཀྱིལ་གྱི་དབང། གུང་ཐུན་མང་ལ་ཕྱག་རྡོར། ཐུགས་རྗེ་ཆེན་པོ། རྟ་མགྲིན་གསང་སྒྲུབ། སྒྲོལ་དཀར། མགོན་པོ་བར་ཆད་ཀུན་སེལ་རྣམས་ཀྱི་རྗེས་གནང། བདེ་ལམ་གྱི་ལུང། ཕྱི་དྲོ་སྐུ་མདུན་ལ་འཇམ་དཔལ་ཞལ་ལུང་རྫོགས། ཚེས་བདུན་གྱི་སྔ་དྲོ་
ནག་པོ་པའི་ལུགས་ཀྱི་བདེ་མཆོག་གི་དབང། གུང་ཐུན་མང་ལ་ཚེ་རྟ་ཟུང་འབྲེལ་དང་འཇམ་དབྱངས་དཀར་པོའི་རྗེས་གནང། ཕྱི་དྲོ་ཝང་སྤྲུལ་བའི་སྐུ་སོགས་ཉུང་འདུས་ལ། བཀའ་རྩོམ་ཆོས་རྒྱལ་བསྙེན་སྒྲུབ་ལས་གསུམ་དང། དྲུག་ཅུ་པའི་རྣམ་བཤད་ཀྱི་ལུང། ཚེས་བརྒྱད་ཀྱི་སྔ་དྲོ་ཕྱག་མཛོད་ཆོས་རྗེ་སོགས་བསྒྲུབ་བྱ་བཞི་བསྙེན་རྫོགས། ཕྱི་དྲོ་སྐུ་མདུན་ལ་ཀུན་རིག་དབང་གི་སྟ་གོན། ཚེས་དགུའི་སྔ་དྲོ་དེའི་དབང། གུང་ཐུན་མང་ལ་ཕྱག་ཆེན་གྱི་ཁྲིད། ཕྱི་དྲོ་སྐུ་མདུན་ལ་འདུལ་བ་མདོ་རྩའི་ལུང། ཚེས་བཅུའི་སྔ་དྲོ་ཐུགས་རྗེ་ཆེན་པོའི་དབང། གུང་ཐུན་མང་ལ་བླ་མེད་ལུགས་ཀྱི་རྡོར་སེམས། བཅུ་གཅིག་ཞལ། འཇིགས་བྱེད་ཞལ་ཕྱག་ཡོངས་རྫོགས་ཡུམ་བཅས། ཆོས་རྒྱལ་ཕྱི་སྒྲུབ་རྣམས་ཀྱི་རྗེས་གནང། ཚེམ་བུ་དམར་ཁྲིད། ཕྱི་དྲོ་སྐུ་མདུན་ལ་བླ་མཆོད་དང་ཕྱག་ཆེན་སྦྲགས་མའི་ཁྲིད་ཀྱི་དབུ་བཙུགས། བཅུ་གཅིག་གི་སྔ་དྲོ་ཚེ་དཔག་ལྷ་དགུའི་དབང། གུང་ཐུན་མང་ལ་བདེ་ལམ་གྱི་ཁྲིད་ཀྱི་དབུ་བཙུགས། ཕྱི་དྲོ་བླ་མཆོད་དང་ཕྱག་ཆེན་གྱི་ཁྲིད། བཅུ་གཉིས་ཀྱི་སྔ་དྲོ་ཐིག་ལེ་བཅུ་དྲུག་གི་དབང། གུང་ཐུན་མང་ལ་བདེ་ལམ་དང། ཕྱི་དྲོ་ཚེམ་བུ་དམར་ཁྲིད། བཅུ་གསུམ་གྱི་སྔ་དྲོ་གདུགས་དཀར་ལྷ་བཅུ་བདུན་མའི་དབང། ལེགས་ལྡན་མཆེད་གསུམ་གྱི་རྗེས་གནང། གུང་ཐུན་མང་ལ་བདེ་ལམ། ཕྱི་དྲོ་ཕྱག་ཆེན་དང་བླ་མཆོད་སྦྲགས་མའི་ཁྲིད་རྫོགས་ཏེ་ལུང་ཡང་སྩལ། བཅུ་བཞིའི་སྔ་དྲོ་རིན་འབྱུང་ནས་ནཱ་རོ་མཁའ་སྤྱོད། མཻ་ཏྲི་མཁའ་སྤྱོད། ཨིནྟྲ་མཁའ་སྤྱོད་གསུམ་གྱི་སིནྡྷུ་རའི་བྱིན་རླབས། གུང་ཐུན་མང་ལ་བདེ་ལམ་གྱི་ཁྲིད་རྫོགས། བཅོ་ལྔའི་སྔ་དྲོ་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་དང་བཅས་སྤྱི་སྒེར་
བསྡོམས་པར་སེམས་བསྐྱེད་ཀྱི་ཁྲིད་སྨིན་རྒྱས་སྩལ་ཏེ་ཐེག་པ་ཆེན་པོའི་རིགས་ཀྱི་ནུས་པ་ཡོངས་སུ་སད་པར་མཛད། དེ་དང་འབྲེལ་བར་ཐིག་ལེ་བཅུ་དྲུག་གི་དབང་སྩལ། ཕྱི་དྲོ་སྐུ་མདུན་ལ་ཉི་མ་སྦས་པའི་ལུགས་ཀྱི་སྒྲོལ་མ་ཉེར་གཅིག་གི་རྗེས་གནང་སོ་སོ་བ་དང། ཇོ་ལུགས་སྒྲོལ་མ་ཉེར་གཅིག་གི་རྗེས་གནང་དཀྱུས་གཅིག་ཏུ་བྱས་པ། མཚན་མོ་སྐུ་འབུམ་སྨན་པ་བླ་ཟུར་གྲོ་ཚང་སྤྲུལ་སྐུར་བདེ་མཆོག་ལུས་དཀྱིལ་གྱི་དབང། བཅུ་དྲུག་གི་སྔ་དྲོ་ལྷོ་བྲག་སྙན་བརྒྱུད་ཀྱི་ཐུབ་དབང་ཉེ་སྲས་བཅས་དང། ཕྱག་རྡོར་སྐུ་ལྔའི་རྗེས་གནང། གུང་ཐུན་ལ་བསྒྲུབ་བྱ་བཅུ་གཅིག་བསྙེན་རྫོགས། ཕྱི་དྲོ་སྐུ་མདུན་ལ་ཕྱག་རྡོར་ཞལ་གསུམ་ཕྱག་དྲུག །ཕྱག་རྡོར་སེམས་དཔའ་སུམ་བརྩེགས། སྲོད་ཐུན་སྐབས་འབག་འཆམ་པ་རྣམས་ལ་ཆོས་རྒྱལ་ནང་སྒྲུབ་དང་གསང་སྒྲུབ་གཉིས་ཀྱི་རྗེས་གནང། བཅུ་བདུན་གྱི་སྔ་དྲོ་དྲག་པོ་སུམ་སྒྲིལ་གྱི་རྗེས་གནང། མང་ལ་གནས་བཅུ་དང་ཀླུ་དབང་རྒྱལ་པོའི་རྗེས་གནང། རྟེན་འབྲེལ་བསྟོད་པ། གནས་བཅུ། བཀའ་རྩོམ་མིག་གཟུངས་འདོན་ཐབས་སོགས་ཀྱི་ལུང། གུང་ཐུན་མང་ལ་ནག་པོ་པའི་ལུགས་ཀྱི་བདེ་མཆོག་གི་དབང་སྩལ་ཏེ་སྐུ་བཞིའི་ས་བོན་ཐེབས་ངེས་མཛད། རྒྱལ་སྲས་རི་ཁྲོད་དུ་གདན་འདྲེན་ནན་ཆེ་བ་བཞིན། ཚེས་བཅོ་བརྒྱད་ལ་དེར་ཕེབས་ཏེ་ཐུབ་དབང་གནས་བརྟན་བཅུ་དྲུག་གིས་བསྐོར་བ་དང། སྨན་བླ་མཐོ་བརྩེགས་ཀྱི་རྗེས་གནང། ལྗགས་ལུང་ཁ་ཤས་སྩལ། ཕྱིར་ཕེབས་ཏེ་མང་ལ་ཀླུ་དབང་རྒྱལ་པོའི་རྗེས་གནང། ཀུན་མཁྱེན་འཇམ་དབྱངས་བཞད་པའི་གསུང་གི་འཇམ་དབྱངས་མངོན་རྟོགས་རྒྱས་པ། འཇམ་དཀར་བསྟོད་སྤྲིན་རྒྱ་མཚོ་
རྣམས་ཀྱི་ལུང། སྐུ་མདུན་ལ་ལྷོ་བྲག་སྙན་བརྒྱུད་ཀྱི་ཚེ་དབང། གཏུམ་པོ་མེ་འབར་གྱི་རྗེས་གནང་བཅས་སྩལ། བཅུ་དགུའི་སྔ་དྲོ་ཞལ་བསྙེན་དུས་ལྷ་བཞི། ཙ་ཏུར་མུ་ཁ་རྒྱས་བྱེད་སེར་པོ་ལྷ་དགུ། དམར་པོ་དབང་སྡུད་ལྷ་བཞི། དཀར་པོ་ཚེ་འཕེལ་ལྷ་བཞི་རྣམས་ཀྱི་རྗེས་གནང། ཉི་ཤུའི་སྔ་དྲོ་ཛམ་དཀར་ལྷ་ལྔ་དང་ཤྲ་མ་ཎའི་རྗེས་གནང། སྙིང་པོ་དོན་གསུམ་གྱི་ཁྲིད། གུང་ཐུན་མང་ལ་སྨན་བླ་མཆེད་བརྒྱད་དང། ཛམ་དཀར་གྱི་རྗེས་གནང་སོགས་སྩལ། ཉེར་གཅིག་གི་སྔ་དྲོ་སྐུ་ཞབས་རིན་པོ་ཆེར་འཇམ་ལུགས་ཚེ་དཔག་མེད་ཀྱི་རྗེས་གནང་གིས་མཚམས་སྦྱར་ཏེ། ཐུའུ་བཀྭན་བླ་བྲང་དུ་ཡབ་སྲས་གཉིས་ལྷན་དུ་བཞུགས་པ་ལ་གསོལ་སྟོན་གྱི་ཐོག་ཁོང་དཔོན་སློབ་རྣམས་ཀྱིས་དད་འདུན་རྩེ་གཅིག་པས་དངོས་འབུལ་རྒྱ་ཆེར་ཕུལ་ཀྱང་ཕལ་ཆེར་ཕྱིར་སློག་པར་མཛད། ཆོས་སྲིད་གཉིས་ཆར་གྱི་མཛད་པ་གང་ཐད་ནས་སྐུ་གོང་མ་ཇི་ལྟ་བ་གནང་དགོས་ཚུལ་གྱི་ཞལ་གདམས་ཟབ་ཅིང་བརླིང་བ་ཞུས། སེང་བར་རྣམས་སུ་བཀའ་རྩོམ་ཅི་རིགས་དང། མཚན་མོའི་ཆ་ལ་ཐུགས་དམ་ཉམས་བཞེས་ཀྱི་རིགས་ཆག་མེད་དུ་མཛད་ཅིང། དགོན་ལུང་ཚོགས་ཆེན་དང། བུ་སློབ་སོ་སོ་ནས་དངོས་འབུལ་གང་གཟབ་དང་བཅས་བརྟན་བཞུགས་གསོལ་འདེབས་ནན་ཅན་ཞུས་པ་ལ་དགྱེས་གཟིགས་ངོས་ཞལ་བཞེས་བཟང་པོ་སྩལ། འབུལ་བ་རྣམས་ཕྱིར་སློག་ཅིང་མང་འགྱེད་གྱ་ནོམ་པ་དང། ཆོས་བཟང་རི་ཁྲོད། ཐར་པ་གླིང། རྒྱ་ཡག་དགོན་སོགས་དགོན་དང་སྒྲུབ་སྡེ་དུ་མར་སྤྱི་འཇོག་མང་འགྱེད་ཀྱི་ཐེབས་འཚེམ་མེད་དུ་གནང། ཉེར་གཉིས་ལ་ཨོར་དུ་སུ་མེ་རིན་དཔོན་གཡོག་སོགས་མང་འདུས་ལ་སྒྲོལ་དཀར་གྱི་རྗེས་གནང། དགའ་ལྡན་ལྷ་བརྒྱ་མ་དང། ཡིད་དགའ་ཆོས་འཛིན་དུ་སྐྱེ་བའི་སྨོན་ལམ་གྱི་ལུང་སོགས་
སྩལ། ཕྱོགས་སོ་སོར་ཕེབས་པའི་ཚེ་ན་ཡང། སྐབས་སྐབས་སུ་ཞབས་ཕྱི་རྣམས་ཁམས་གསོ་བའི་ཕྱིར། བླ་མ་སོ་སོའི་རྣམ་ཐར་དང་ཆོས་ལྡན་གྱི་ལོ་རྒྱུས་རེ་གསུངས་པ་མ་གཏོགས་ཕལ་ཆེར་ཐུགས་དམ་གྱི་ངང་ནས་ཕེབས་ཤིང། གྲོང་སྡེ་དང་ཉེ་བའི་སར་རང་རང་གི་རྣམ་དཀར་གྱི་བྱ་བ་ལ་བརྟེན་ནས་ཐར་པའི་སར་བཀྲི་ཐབས་ཁོ་ན་མཛད་པ་གོང་འོག་ཏུ་གསལ་ལོ། །ཚུལ་འཆལ་རྙོག་བྲལ་ཤེས་རབ་གཏིང་ཟབ་མཚོ། །ཏིང་འཛིན་རླབས་ཕྲེང་གཡོ་བའི་རྩེ་མོ་རུ། །འཆད་ཉན་ཟེགས་མ་དཀར་པོ་འགྱེད་པ་ན། །དགེ་ལྡན་ཆུ་གཏེར་རྒྱས་པའི་ལང་ཚོ་ངོམ། །མདོ་སྔགས་དྲང་ངེས་གཞུང་བརྒྱའི་ལྷ་ལམ་ངོས། །ཚུལ་གཉིས་གཞུང་བཤད་ཤིང་རྟའི་བགྲོད་པ་ཡིས། །ཐར་འདོད་དཔུང་བཞི་ཐར་པའི་མཁར་བསྙེགས་ཚེ། །ཆེར་རློམ་དྲེགས་པའི་རལ་པ་ས་ལ་ལྷུང། །ཐུབ་བསྟན་ཆོས་ཀྱི་རྒྱ་མཚོ་བསྐལ་པའི་མཐར། །བཏུང་བས་མི་ངོམས་སྐྱེས་མཆོག་རྟ་གདོང་རི། །ཆོས་ཀྱི་དབང་ཕྱུག་འབྱོར་པ་རྒྱ་ཆེའི་རླབས། །རེག་པས་རྒྱལ་སྲས་གློག་འོད་མཚན་མས་མཛེས། །ཉེར་གསུམ་ལ་ཆིབས་སྐྱེལ་དར་འབོད་སོགས་ཀྱི་རྟེན་འབྲེལ་དང་བཅས་དགོན་ལུང་ནས་བཏེག །གདན་ས་ཆེན་པོ་སྐུ་འབུམ་དུ་གདན་དྲངས་པ་ལྟར་བྱོན། གསེར་གདུང་ཆེན་མོའི་མདུན་དུ་མཆོད་པའི་སྤྲིན་ཕུང་སྤྲོས་ནས་བསྟན་པ་རྒྱས་པའི་ཐུགས་སྨོན་གནང། ཚོགས་ཆེན་ལ་ལམ་གཙོའི་ཁྲིད་དང། དགེ་ལྡན་བསྟན་འབར་མའི་ལུང་སྩལ། དངོས་འབུལ་སྤམ་མཐོར་བཏེག་པ་ཕྱིར་སློག་སྟེ་ཚོགས་ཆེན་དང། བཤད་སྒྲུབ་གླིང་གཉིས་ལ་མང་ཇ། གྲྭ་ཇ། འགྱེད་བཅས་གནང། སྒར་པ་འགའ་ཞིག་ནས་གདན་དྲངས་པར་ཆོས་འབྲེལ་སྩལ་ཞིང་འབུལ་བ་རྣམས་ཕྱིར་སློག །བསྒྲུབ་བྱ་མང་པོ་དགེ་ཚུལ་སློང་གི་
བསླབ་པ་ལ་བཀོད། སྔ་ཕྱིར་ཆོས་སྡེ་ཆེན་པོ་འདི་ཉིད་ཀྱི་མཁན་ཁྲིར་གདན་འདྲེན་གྱི་སྒོ་ནམ་དོད་ལ་བཤོལ་ཐབས་ཁོ་ན་མཛད་པས་ཐོག་ཏུ་མ་ཁེལ་ཀྱང་གདན་ས་ཆེན་པོ་ཉིད་ཀྱི་མཁན་བརྒྱུད་གོང་མ་རིམ་བྱོན་མང་ཞིག་ཁྲི་ཆེན་དགེ་འདུན་ཕུན་ཚོགས་ཀྱི་དངོས་སློབ་ཡིན་པས་རྗེ་ངག་དབང་བསྟན་པའི་རྒྱལ་མཚན་པ་རྒྱལ་ཁབ་པེ་ཅིན་དུ་འབྱོན་སྐབས་ཀྱང་ཆོས་སྡེ་ཆེན་པོ་འདི་ཉིད་དུ་སྤྱན་དྲངས་ཏེ་དགེ་འདུན་འདུས་པའི་ཚོགས་ལ་ཟབ་རྒྱས་ཆོས་ཀྱི་བདུད་རྩི་དང། ཞལ་གདམས་མགུར་མ་སོགས་སྩལ་བ་དང། དེང་འདིར་ཡང་རྒྱལ་བ་ཙོང་ཁ་པ་དངོས་སུ་བྱོན་པ་ལྟ་བུའི་རྗེ་བླ་མ་འདི་ཉིད་ལན་སྔ་ཕྱིར་བྱོན་ནས། ལམ་ཡོངས་སུ་རྫོགས་པའི་གདམས་ངག་ཁྱད་པར་ཅན་དུ་མ་སྩོལ་རྒྱུ་བྱུང་བ་ནི་བློ་བཟང་འཇམ་དཔལ་སྙིང་པོའི་བསྟན་པ་ཕྱོགས་མཐར་དར་བའི་རྟེན་འབྲེལ་གྱི་ཆེ་བ་དང། དད་དང་དམ་ཚིག་གཙང་བའི་འབྲེལ་བ་བར་མ་ཆད་པའི་རྟེན་འབྲེལ་རྨད་དུ་བྱུང་བར་ཤེས་པར་བྱའོ། །བཤད་སྒྲུབ་ཆུ་ཀླུང་འབུམ་ཕྲག་འཁྱིལ་བའི་མཚོ། །མཁས་གྲུབ་གདེངས་ཅན་བྱེ་བས་རོལ་པའི་གནས། །ཆོས་གོས་མདངས་ཀྱིས་མཁའ་ཡང་དམར་སེར་དུ། །བསྒྱུར་ནུས་དམ་ཆོས་ནོར་བུའི་འབྱུང་གནས་དེར། །ཆོས་འདུལ་རྒྱ་མཚོར་གསོལ་བཞིའི་གྲུ་སྦྱར་ནས། །ངེས་ལེགས་ནོར་བུའི་གླིང་གི་འཇུག་ངོགས་བསྟན། །ཐུབ་བསྟན་ལྷ་ཡི་ཕོ་བྲང་དམ་པ་དེར། །འཆད་ཉན་ཕུལ་དུ་བྱུང་བའི་རྒྱལ་མཚན་བཀོད། །ལུང་རིགས་དར་གྱི་ཤམ་བུ་རྣམ་བཀྲ་བས། །བློ་གྲོས་མིག་ཡངས་དགའ་བའི་དཔལ་ལ་བཀོད། །རྣམ་པར་དག་པའི་འཆད་ཉན་རྒྱལ་མཚན་རྩེར། །བསླབ་གསུམ་ནོར་བུའི་ཏོག་གིས་མཛེས་པར་བྱས། །འཇམ་དཔལ་སྙིང་པོའི་ཞབས་སྐྱེས་གེ་སར་རྡུལ། །ལན་མང་འཐུང་བའི་ངོ་མཚར་དགེ་མཚན་གྱིས། །སྟུག་པོ་བཀོད་པའི་དཔལ་ལ་རེག་པ་ཡི། །
གནས་དེར་ཡབ་རྗེ་སླར་ཡང་བྱོན་པ་བཞིན། །བརྒྱད་པའི་ཚེས་གཅིག་ལ་ཆིབས་སྐྱེལ་དར་འབོད་སོགས་དང་བཅས་ཕེབས་ཏེ་བསམ་གཏན་གླིང་དུ་བཞུགས། ཆོས་འབྲེལ་ཕྱག་དབང་དང་མང་འགྱེད་ཀྱང་གནང། སྔར་ནས་ཡང་ཡང་ནན་ཏན་ཞུས་ཡོད་པ་བཞིན་བྱ་ཁྱུང་ཆོས་སྡེ་ཆེན་པོར་ཕེབས། ཆོས་རྗེ་དོན་གྲུབ་རིན་ཆེན་གྱི་སྐུ་གདུང་རིན་པོ་ཆེར་མཆོད་སྤྲིན་སྤྲོས་ཏེ་རྒྱལ་བསྟན་སྙིང་པོ་མཁའ་ཁྱབ་ཏུ་སྤེལ་བའི་ཐུགས་སྨོན་གནང། དགེ་འདུན་ཚོགས་ཡོངས་ལ་ཉིན་གསུམ་གྱི་རིང་བླ་མ་མཆོད་པའི་ཁྲིད། ཡོན་ཏན་གཞིར་གྱུར་མའི་ཁྲིད། ཡང་ཟུར་དུ་བླ་གྲྭ་མང་པོའི་སྒེར་ཞུས་འཇིགས་བྱེད་དཔའ་གཅིག་གི་དབང་གནང། དེ་ཡང་གདན་ས་ཆེན་པོ་འདི་ཉིད་གང་དུ་གནས་པའི་ས་འཛིན་གྱི་དབྱིབས་ནི་གཡས་སྤུངས་གཡོན་སྤུངས་ཀྱི་ཁྱད་པར་ཙམ་མ་གཏོགས་དགེ་ལྡན་རྣམ་པར་རྒྱལ་བའི་གླིང་གང་དུ་བཏབ་པའི་གནས་འབྲོག་རི་བོ་ཆེ་དང་ཆ་མཚུངས་ལ། ཆུ་དང་མེ་ཤིང་རྒྱང་རིང་བ་སོགས་ཀྱིས་ཐ་མལ་གྱི་སྐྱེ་བོས་བརྟེན་པར་དཀའ་ན་ཡང་འདིར་བཞུགས་པའི་དགེ་འདུན་པ་རྣམས་ནི་ཟང་ཟིང་གི་འདུ་ལོང་ལ་མི་དགྱེས་ཤིང། འདོད་པ་ཆུང་ཞིང་ཆོག་ཤེས་པ། ཚུལ་གནས་བཤད་སྒྲུབ་ལ་བརྩོན་པའི་དབང་གིས་གྲགས་ཆེན་གང་ཡིན་ལ་འགྲམ་ཆུ་མི་ལྡང་ན་ཡང། རྗེ་བླ་མ་འདི་ཉིད་ལ་སྙིང་ནས་དད་ཅིང་གུས་པའི་སྒོ་ནས་གདམས་པའི་བདུད་རྩི་ལ་རོལ་པའི་འདུན་པ་གཞན་དང་མི་མཉམ་པ་ནི་ཆོས་ཀྱི་རྗེས་སུ་འབྲང་བའི་རང་རྟགས་སུ་སྣང་ངོ་། །མཁྱེན་པའི་ཆུ་འཛིན་མདོ་སྔགས་གཞུང་བརྒྱའི་མཁར། །འཁྲིགས་པའི་ལུང་རིགས་གློག་འོད་དང་འགྲོགས་པར། །གཞུང་བཤད་དབྱར་གྱི་རྔ་གསང་བཞད་པ་ན། །གདམས་ངག་གྲུ་ཆར་འཇོ་བས་སྐལ་ལྡན་ཚིམ། །ཡང་དག་གདམས་
པའི་ནོར་བུ་ཀེ་ཏ་ཀ །འདུན་ལྡན་ཡིད་ཀྱི་ཆུ་མཚོར་རེག་པ་ན། །ཕྱིན་ཅི་ལོག་གི་རྙོག་མ་དྭངས་པའི་དབུས། །ཐོས་བསམ་སྒོམ་པའི་སྣང་བརྙན་བརྒྱ་ཕྲག་འབར། །ས་འདིའི་སྨྲ་དབང་བྷྲ་མ་རཿཡི་ཁྱུ། །ཁྱོད་ཐུགས་པད་མཚོ་ཁོ་ན་ལ་ཆགས་པས། །ཟང་ཟིང་ཡལ་འདབ་སྟུག་པོའི་ཨེ་རནྜ། །བླུན་པོ་བྱེའུའི་ཚོགས་ཀྱིས་བསྟེན་བྱ་ཙམ། །ཀ་ཀྱཱའི་དགོན་དུ་སེར་སྐྱ་སྟོང་ཕྲག་བརྒལ་བར་བཅུ་གཅིག་ཞལ་གྱི་དབང། སྨྱུང་གནས་ཆོ་གའི་ལུང་སོགས་སྩལ། ས་ག་ཟླ་བར་སྨྱུང་གནས་རྒྱུན་འཛུགས་ཀྱི་ཐེབས་བཞག །རྨ་ཆུ་ཕར་ཀ་ཚུར་ཀའི་ལམ་བར་གྱི་སྡེ་པ་སོ་སོས་དད་འདུན་རྩེ་གཅིག་པས་ཇ་ཐབ་བར་མ་ཆད་པ་དང། མཇལ་ཁ་ཞུ་མི་ལམ་མི་ཐོབ་པ་ལྟ་བུ་བྱུང་བ་ལ་ཕྱག་དབང་བསྔོ་སྨོན་སོགས་གནང་བཞིན་པར་རོང་པོ་བཀྲ་ཤིས་ཆོས་སྡེར་བབས། ཐོས་དོན་རྒྱུད་ལ་སྦྱར་ནས་ཚེ་དང་སྒྲུབ་པ་སྙོམས་པར་བསྐྱངས་ཏེ་མཐའ་འཁོབ་ཀྱི་ཡུལ་འདིར་སྒྲུབ་བརྒྱུད་ཀྱི་བསྟན་པ་སྤེལ་བའི་སྐྱེས་མཆོག་བྱང་ཕྱོགས་ཀྱི་མི་ལ་རས་པ་གཉིས་པ་རྗེ་གྲུབ་པའི་དབང་ཕྱུག་སྐལ་ལྡན་རྒྱ་མཚོའི་སྐུ་གདུང་སོགས་རྟེན་རྣམས་ལ་མཆོད་འབུལ་བསྔོ་སྨོན་ནན་ཏན་མཛད། དགེ་འདུན་རྣམས་ལ་བླ་མ་མཆོད་པའི་ཁྲིད། ཀུན་རིག་གི་དབང། བདེ་ལམ་ཚིགས་བཅད་མ་དང། དགེ་ལྡན་བསྟན་འབར་མའི་ལུང། བསྒྲུབ་བྱ་བཅུ་བསྙེན་རྫོགས་ལ་བཀོད། ཚོགས་ལ་མང་ཇའི་ཐོག་དོང་ཚེ་ལྔ་བརྒྱ་རེ་དང་བསོད་བཏགས་རེའི་འགྱེད། བཞི་པའི་སྨོན་ལམ་གྱི་ཐེབས་དང། སྐུ་ཞབས་རིན་པོ་ཆེའི་གཟིམས་ཁང་ཞིག་གསོས་ཀྱི་ཐེབས་ལ། གྲོ་ནས་གཉིས་བྲེ་བཞི་སྟོང་ལ་རེག་ཙམ་གྱི་འཇོག་པ་གནང། ཐར་པ་གླིང་དུ་རི་ཁྲོད་པ་རྣམས་ལ་བླ་མཆོད་དང། ལམ་སྒྲོན་གྱི་ལུང། སེ་ཆང་དགོན་པར། སྐྱེ་ཕོ་མོ་མང་པོར་སྡོམ་
ལུང། སེར་སྐྱའི་ཁྲོམ་ཆེན་པོར་ཀུན་རིག་གི་དབང་སྟ་གོན་དང་བཅས་པ། ཕྱག་དབང་འཕོ་ལུང་སོགས་གང་འདོད་དུ་སྩལ། འབུལ་བ་ཕྱིར་སློག་ཅིང། འདུ་ཁང་དུ་ཐུབ་སྐུ་ཞིག་བཞེང་རྒྱུའི་ཐེབས་སུ། ནས་ཤིང་ཚེ་སུམ་བརྒྱ་དང་དྲུག་ཅུ། རྟ་རྒོད་མ་གཉིས། མཛོ་མོ་གཉིས་བཅས་བཞག །རོང་པོ་དགོན་ནས་བཟུང་སྟེ་ལམ་བར་གྱི་སྡེ་པ་སོ་སོས་ཇ་ཐབ་ཆིབས་བསུ་སེར་སྦྲེང་དང་བཅས། བྲག་དཀར་དགོན་དུ་བྱོན། དེར་དགེ་འདུན་རྣམས་ལ་འཇིགས་བྱེད་ཞལ་ཕྱག་ཡོངས་རྫོགས། མགོན་ཆོས་གཉིས་བཅས་ཀྱི་རྗེས་གནང་སྩལ། ལམ་བར་གྱི་ཇ་ཐབ་གསུམ་ཙམ་ལ་གདན་དྲངས་པ་ལྟར་རེ་བ་སྐོང་བར་མཛད་དོ། །སྤྲུལ་བའི་སྐྱེས་རབས་ཚེམས་ཀྱི་འཕྲེང་བ་ཡིས། །ཐུབ་བསྟན་ལང་ཚོ་གསར་པ་ངོམ་བྱེད་པ། །དམ་པ་རྣམས་ཀྱི་སྤྱི་བོས་ཉེར་མཆོད་པས། །ཆེར་རློམ་ཕལ་གྱི་ཁེངས་པའི་ཀུ་མུད་ཟུམ། །སྐར་འཕྲེང་མཁའ་ལ་སྡོད་པར་མ་ནུས་ཏེ། །ས་ལ་འཁོད་སྙམ་བྱེད་པའི་འདུས་པའི་སྡེ། །ནོར་འཛིན་ལི་ཁྲིའི་མདངས་སུ་སྒྱུར་བྱེད་པ། །དེ་དག་ཁྱོད་ཞབས་གཙུག་ཏུ་མཆོད་པས་བྲེལ། །ཀུན་བཟང་སྤྱོད་པ་ཤར་རིའི་ཕྲག་པ་ལས། །ཡོན་ཏན་དཀྱིལ་འཁོར་རྫོགས་པའི་ཉིན་བྱེད་ཀྱིས། །བསྐྱངས་པས་མདོ་སྔགས་སྦྲང་རྩིས་ཉེར་གཏམས་པའི། །མཁས་གྲུབ་མེ་ཏོག་གསར་པས་ས་འདི་གང། །དེའི་ཚེ་ཕལ་པས་ཕྱག་བྱས་ས་རྡུལ་གྱིས། །གངྒཱའི་བྱེ་མ་ཉུང་ངུར་བྱས་སོ་ཞེས། །བསྔགས་པའི་གྲེ་འགྱུར་དབྱངས་ཀྱིས་སྐྱེ་བོ་འདི། །མགྲིན་པ་ངལ་མོད་བྲག་ཆའི་སྤུན་དུ་ཟད། །འོན་ཏེ་ལུས་དང་སྲོག་གི་གེ་སར་རྡུལ། །མི་རྟག་བུང་བའི་ཟས་སུ་མ་གྱུར་བར། །ཁྱོད་ཞབས་མཆོད་པའི་སྐལ་བ་ཐོབ་པ་ཡིས། །སྲིད་པའི་རི་བོ་བསྙིལ་རྣམས་ཨ་ཧོ་རྨད། །བརྒྱད་པའི་བཅུ་བདུན་ལ་གདན་སར་བྱོན། འགའ་
ཞིག་བསྙེན་རྫོགས་དང། རྣམ་རྒྱལ་མཆོད་པའི་ཚོགས་དབུར་ལན་ཁ་ཤས། འཇམ་དབྱངས་དམར་སེར། འཇམ་དབྱངས་དཀར་པོ། དབྱངས་ཅན་དཀར་དམར། འཇིགས་བྱེད་ཞལ་ཕྱག་ཡོངས་རྫོགས། མགོན་པོ་ཞལ་གྱི་རྗེས་གནང་སོགས་འདོད་ཆོས་དང། ལོ་ལྟར་འཆར་ཅན་གྱི་མཆོད་མཇལ་རྒྱས་པ་གནང་སྟེ་བཅད་རྒྱ་མཛད། བར་སྐབས་སུ་ལྕང་སྐྱ་ཕྱག་མཛོད་སོགས་དགོན་ལུང་གི་མི་སྣ་རྣམས་འབྱོར་བར་བཅད་རྒྱ་ཅུང་ཟད་ལྷོད་ནས། སླར་ཡང་བཅུ་གཉིས་པའི་ཚེས་གཅིག་བར་དུ་སྐུ་མཚམས་ལ་བཞུགས། ཉིན་དེར་སྒོ་མང་དཔོན་སློབ་ངག་དབང་དགེ་ལེགས་ཀྱི་སྤྲུལ་བའི་སྐུ་སྐལ་བཟང་དགེ་ལེགས་རྒྱ་མཚོ་ལ་མཇལ་འཛོམ་དང། ལོ་མཇུག་རི་ཁྲོད་དུ་བྱོན་ཏེ་ཆོས་བཀའ་འགའ་ཞིག་གནང། རི་ཁྲོད་ཀྱི་གསོ་སྦྱོང་གི་མགོན་དུ་ཕེབས་པ་ཡང་རི་ཁྲོད་དུ་ནམ་བཞུགས་ཀྱི་སྐབས་ཆག་མེད་ཡིན་པ་དུས་ཐམས་ཅད་དུ་ཤེས་པར་བྱ། འདི་ལོ་གཞི་བྱེས་བསྡོམས་པར་སུམ་བརྒྱ་སོ་དགུ་བསྙེན་རྫོགས་དང། དགེ་བསྙེན་རབ་བྱུང་དགེ་ཚུལ་བཅས་བརྒྱ་དང་ལྔར་འཆལ་ཚུལ་གྱི་རྒྱུན་འགོག་པའི་ཆུ་ལོན་བརྟན་པར་མཛད། དགུང་ལོ་ང་བརྒྱད་པ་ས་ཡོས་ལ་འདོད་ཁམས་དབང་མོ་དགྱེས་པའི་དུས་གཏོར། ལོ་གསར་གྱི་དགྱེས་སྟོན་སོགས་དཀྱུས་བཞིན་དང། དགོན་པར་བྱོན་ནས་སྨད་སོག་སྦྱིན་བདག་སོགས་ཕྱོགས་ནས་འོང་བ་རྣམས་ལ། དགའ་ལྡན་ལྷ་བརྒྱ་མའི་ཁྲིད་ཟབ་གནད་དང་འབྲེལ་བ། དེའི་མན་ངག་ནོར་བུའི་ཐེམ་སྐས་ཀྱི་བཤད་པ། ཡོན་ཏན་གཞིར་གྱུར་མའི་ཁྲིད་སེམས་བསྐྱེད་མཆོད་པ་དང་བཅས་པ། དཔའ་གཅིག་གི་བསྐྱེད་རྫོགས་ཀྱི་བཤད་ལུང། བདེ་མཆོག་དྲིལ་བུ་ལྷ་ལྔ་དང་ལུས་དཀྱིལ་གྱི་དབང། མགོན་པོ་བཀའ་བཅུ་གསུམ། ཐུགས་རྗེ་ཆེན་པོ། སྒྲོལ་ལྗང། རིག་བྱེད་མ་ཐུན་མོང་དང་ཐུན་མོང་མ་ཡིན་པ།
གྲུབ་རྒྱལ་ལུགས་ཀྱི་ཚེ་དབང། ཁྱུང་ཁྲ་ནག །ལོ་གྱོན་མ་གཙོ་འཁོར་གསུམ། ཆོས་རྒྱལ་ཕྱི་སྒྲུབ། ལྷ་མོ་སོགས་ཀྱི་རྗེས་གནང་གིས་མཚོན་ཆོས་བཀའ་ཅི་རིགས། རྣམ་རྒྱལ་མཆོད་པ། རབ་བྱུང་བསྙེན་རྫོགས་འདོད་མོས་བཞིན་གནང། ཨ་བ་ཀ་ཉང་ཚང་ཧུ་ཐོག་ཐུས་བདེ་མཆོག་ལྷ་རེ་གཉིས་ཡོངས་རྫོགས་ཀྱི་པཔདྨ་བུམ་སྐུ་གསེར་ཟངས་ལས་དངུལ་སྲང་ལྔ་བརྒྱའི་ཟོང་གིས་བསྒྲུབས་པ་ཁྱད་མཚར་ཕུལ་བ་ལ་དགྱེས་གཟིགས་དཔེ་མེད་མཛད། འབྱོར་ལན་དུ་བྱམས་ཆེན་ཆོས་རྗེའི་བདེ་མཆོག་གི་བྲིས་སྐུ་དང། བདེ་ཆེན་བདེ་འཐུང་ཞེས་སོགས་སྨོན་ཚིག་ཀྱང་སྩལ། ཟླ་མཇུག་ནས་བཟུང་སྟེ་བཱ་རིན་ཐོ་ཡོན་དཀོན་མཆོག་བསྟན་པའི་ཉི་མ་རང་ཡུལ་དུ་འགྲོ་དུས་གཏུགས་པས་བསྙེན་རྫོགས་དང། གཞན་རྣམ་རྒྱལ་མཆོད་པ་དང། རྗེས་གནང་ཁ་ཤས་ཙམ་གནང་བ་མ་གཏོགས་བཅད་རྒྱ་དམ་པར་མཛད། དགོན་པའི་གོང་འོག་གི་ལྷ་སྡེ་དང་བསང་གི་ལྷ་སྡེ་ལས་འབྲུམ་པ་མ་ཐར་པའི་རིགས་སོ་སོར་གསུང་བཀོད་གནང་སྟེ་ལྷ་འབྲུམ་བཏབ་པས་གཅིག་ཀྱང་མ་གྲོན་པར་ཐམས་ཅད་རྡོ་རྗེ་ཚེར་མའི་ནད་ལས་གྲོལ་བར་གྱུར། ཞལ་ནས། སྐུ་ཞབས་ནས་ལོ་ཁ་ཤས་རེའི་མཚམས་སུ་ལྷ་འབྲུམ་བཏབ་པས་འདུམ་བདེ་བ་དང། སེམས་བདེ་ཁྱད་ཆེ་ཡང་དུས་ཕྱིས་ལོ་ཉི་ཤུ་ལྷག་ཕྱིན་ཆད་ཀྱི་མི་ཕལ་ཆེར་མ་ཐར་བས། ད་རེས་ཐམས་ཅད་དུས་གཅིག་པ་བྱུང་ན་དུད་ཚང་འགའ་ཞིག་ལ་ཆུ་ལེན་མཁན་ཡང་དཀའ་བའི་ཚོད་དུ་སོང་བས་སེམས་འཚེར་ཆེན་པོ་བྱས་ཀྱང་དཀོན་མཆོག་གི་ཐུགས་རྗེས་ལེགས་པོ་བྱུང་ཞེས་གསུངས། དབུས་པ་འགའ་ཞིག་གིས་ཇོ་ཤཱཀ་མཇལ་སྐབས་འདོན་རྒྱུའི་སྨོན་ཚིག་ཞུས་པར། ཐུགས་རྗེའི་གཏེར་ཆེན་གང་དུ་བཞུགས་པའི་མཐུ། །ཁོ་ནས་བསྟན་པ་མཆོག་ཏུ་གནས་འགྱུར་
ཞིང། །མཇལ་བ་ཙམ་གྱིས་ལུང་རྟོགས་ཡོན་ཏན་ཀུན། །རྫོགས་མཛད་སྐྱབས་ཀྱི་དམ་པར་ཕྱག་འཚལ་ལོ། །ཞེས་པ་གནང་སྟེ་འདི་སངས་རྒྱས་བཅོམ་ལྡན་འདས་ཀྱི་གསུང་དང་མི་མཐུན་པ་ཞིག་ཡིན་གསུངས། དེ་ཡང་བྱིན་རླབས་ཀྱི་རྒྱུ་རང་གིས་བསྒྲུབ་དགོས་པ་ལ་དགོངས་པའི་གསུང་དཔྱད་གཞི་ཅན་དུ་སྣང། ཟླ་བ་གསུམ་པའི་ནང་དུ་སྐུ་མཚམས་གྲོལ་ཏེ་ལུང་རྗེས་གནང་མང་ཙམ་དང། ཆབ་ཚན་གྱི་འཕྲོད་བསྟེན་གནང། བཞི་པའི་ཡར་ངོ་ལ་ཡང་གྲོལ་ཙམ་དང། མདོ་སྡུད་པ་དང་འགྲེལ་པ་དོན་གསལ་སྦྱར་བའི་བཤད་ལུང་སོགས་སྩལ། བཤོལ་ཟླ་བཞི་པའི་ནང་དུ་ཏ་རི་ཀང་ཀའི་ཨིརྡྷི་ནི་ཧུ་ཐོག་ཐུའི་མཚམས་ཞུས་པ་སོགས་འབྱོར་བའི་རྐྱེན་གྱིས་སྐུ་མཚམས་གྲོལ་ཙམ་དང། དེ་གསུམ་ཀ་ལ་རྣམ་རྒྱལ་མཆོད་པའི་ཚོགས་དབུ་དང། རབ་བྱུང་བསྙེན་རྫོགས་འགའ་རེ་ཙམ་མ་གཏོགས་བཅད་རྒྱ་མཛད། ལྔ་པའི་བཅུ་བདུན་ལ་ཇོ་བོ་ཤཱཀྱ་མུ་ནིའི་སྐུ་ཚད་ལས་ཅུང་ལྷག་པའི་ཇོ་བོའི་སྐུ་དངུལ་སྲང་སྟོང་ཕྲག་ཁ་ཤས་ལས་བསྒྲུབས་པ་དེ་ཉིད་བཀུར་སྟི་ཕུན་སུམ་ཚོགས་པ་དང་བཅས་ཏེ་གཟིམས་ཁང་ཐུབ་བསྟན་རྒྱལ་མཚན་དུ་གདན་དྲངས། ཟླ་གྲགས་འབྲལ་སྤངས་ཀྱི་ཐུབ་སྐུ་ཐུགས་ཀར་བཞུགས་ཤིང། གཞན་ཡང་གཟུངས་གཞུག་ཚད་ལྡན། བཞུགས་ཁྲི་རྒྱབ་ཡོལ་གསེར་གསོལ་སོགས་མཛེས་པར་བསྒྲུབས་ཏེ་དྲུག་པའི་ཚེས་བཞིའི་ཉིན་སྤྱན་དབྱེའི་ཆོ་ག་དང། མཇུག་ཏུ་གནས་བཅུ། ལམ་རིམ་བསྡུས་དོན། བསྟན་འབར་མ་བཅས་གསུངས་ཏེ་རིས་མེད་ཀྱི་བསྟན་འགྲོའི་དོན་དུ་ཐུགས་སྨོན་ནན་ཏན་མཛད། དེ་དང་དུས་མཚུངས་པར་སྔོན་གྱི་སྡུད་པའི་མཆན་མཇུག་ཁ་བསྐངས་པ་དང། བརྒྱད་སྟོང་པའི་མཆན་བུ་ཉུང་ངུ་རྗེ་ཉིད་ཀྱིས་མཛད་པ་དང། བརྒྱད་སྟོང་པ་ཡོངས་འཛིན་པཎྚི་ཏ་ཆེན་པོས་མཛད་
པའི་མཆན་དང་བཅས་པ་དགོན་སྡེ་སོ་སོར་པར་དུ་བཀོད་པ་ནི་སངས་རྒྱས་དཔག་ཏུ་མེད་པ་ལ་བསྙེན་བཀུར་བའི་བྱང་སེམས་དུ་མས་ཤེར་ཕྱིན་སྤེལ་བར་གསུངས་པའི་བདེན་པའི་ཆ་ཤས་གསལ་བར་མཛད་པའོ། །གང་ཕྱིར་དགེ་ལེགས་ཐམས་ཅད་ནི། །རྟག་ཏུ་སྦྱིན་ཞིང་འཕེལ་འགྱུར་བའི། །ཐུབ་བསྟན་དཔག་བསམ་ལྗོན་ཤིང་གི །ངོ་མཚར་གླེང་ལ་སུ་མི་གུས། །ཞེས་པ་ལྟར་རང་གཞན་གྱི་དད་པ་སྤེལ་བའི་ཆེད་དུ་འདི་ལྟར་གླེང་སྟེ། མི་སྣང་བ་མ་དམིགས་པའི་མདོ་ལྟར་དཔག་དཀའ་ཡང། རྗེས་དཔག་གིས་དཔྱད་ན་རྣམ་འདྲེན་སྟོང་སོགས་སངས་རྒྱས་ཐམས་ཅད་སློབ་དཔོན་གྱི་གཟུགས་སུ་ཤར་བ་ནི། འཕགས་བོད་དུ་པཎ་གྲུབ་ཇི་སྙེད་བྱོན་པ་རྣམས་ཡིན་པ་དང། གནས་བརྟན་བཅུ་དྲུག །ཉེ་སྲས་སོགས་བསྟན་པ་གནས་ཀྱི་བར་དུ་བཤེས་གཉེན་གྱི་གཟུགས་སུ་འབྱོན་པ་ནི་ཇོ་འབྲོམ་གྱི་རྣམ་ཐར་དང་སྤྱན་རས་གཟིགས་གངས་ཅན་འདུལ་ཕྱིར་བྱོན་པའི་ལོ་རྒྱུས་ཀྱིས་ཤེས་ལ། དེ་ཡང་ཆོས་རྒྱལ་མེས་དབོན་རྣམ་གསུམ་གྱིས་བསྟན་པའི་གཞི་བཙུགས། ལོ་པཎ་རིམ་བྱོན་གྱིས་མདོ་སྔགས་རིག་གནས་བཀྲལ་ཞིང་བསྒྱུར། མཉམ་མེད་ཇོ་བོ་ཆེན་པོས་ཆོས་ལྟར་སྣང་ཚར་བཅད་དེ་གསུང་རབ་གདམས་པར་འཆར་བའི་བློ་མིག་ཕྱེ། དེས་སེམས་འདུལ་བའི་རིམ་པ་གཙོ་བོར་བཏོན་པའི་དོན་བཞིན་དུ་རྒྱལ་བ་ཙོང་ཁ་པ་ཆེན་པོས་སྡེ་སྣོད་དང། རྒྱུད་སྡེ་ཡོངས་ཀྱི་ཉིང་ཁུ་ཕྱོགས་གཅིག་ཏུ་བསྡུས་ཏེ་དར་ཞིང་རྒྱས་པར་མཛད་པས་རྒྱལ་བའི་ཞལ་སྐྱིན་ཇོ་ཤཱཀ་སོགས་བཞུགས་པ་དང། གཞན་ཡང་བཀའ་གདམས་གསར་རྙིང། མར་མི། དྭགས་ཤངས། ས་ཆེན་རྣམ་ལྔ། ཤོང་དཔང་བུ་སོགས་གསར་རྙིང་གི་མཁས་གྲུབ་འབུམ་སྡེ་
ཏིལ་གྱི་གང་བུ་ལྟར་གཏམས་པའམ་མཁའ་ལ་རྒྱུ་སྐར་གྱི་ཕྲེང་བ་ཚར་དུ་དངར་བ་ལྟ་བུའི་ཚོགས་བཤད་སྒྲུབ་ཀྱི་བྱ་བའི་སྒོ་ནས་བྱང་ཕྱོགས་གངས་ཅན་གྱི་ལྗོངས་ནི་འཕགས་ཡུལ་རྡོ་རྗེ་གདན་དང་ཆོས་མཚུངས་ལ། བོད་ཀྱི་བྱང་ཕྱོགས་མདོ་སྨད་ཀྱང་བྱང་དང་པོ་དབུས་གཙང་དང་ཆ་འདྲ་བར་རྗེ་གྲུབ་པའི་དབང་ཕྱུག་སྐལ་ལྡན་རྒྱ་མཚོ་སོགས་ཀྱིས་བསྔགས་ཤིང། འཛམ་གླིང་གི་བྱང་ཕྱོགས་ཁ་བ་ཅན། དེའི་བྱང་ཕྱོགས་མདོ་སྨད། དེའི་ཆའམ་ལྷོ་བྱང་གཉིས་སུ་ཕྱེ་བའི་ལྷོ་རྒྱུད་འདིར། འབྲས་བུའི་ལེའུ་གསུམ། ལྷག་མཐོང་གི་ལེའུ་བཅས་ལ་ཉིས་སྟོང། ཏིང་འཛིན་གྱི་ལེའུའི་ལྔ་བརྒྱ། ཚུལ་ཁྲིམས་ལེའུའི་ཞེ་གསུམ་སོང་བའི་ཞེ་བཞི་པ་ས་གླང་ལ་དགོན་པ་འདི་བཏབ་པ་ཡིན་ལ། དེའི་ལེགས་ཚོགས་ཀྱི་ཐོག་མར་ལྷ་སའི་ཇོ་བོ་དང་སྐུ་རྒྱུ་གཅིག་པའི་ཇོ་བོ་གཅིག་མཁན་ཆེན་ཞི་བ་འཚོའི་ཐུགས་དམ་གྱི་རྟེན་དུ་མཛད་པ་ལས་བསྟན་པ་དར་ཞིང་རྒྱས་པའི་རྟེན་འབྲེལ་དུ་བོད་ཡུལ་འདིར་ཕེབས་ཏེ་ཕྱིས་སྐྱིད་ཤོད་འབུམ་སྟོད་དུ་བཞུགས་པ་ལས་འབུམ་སྟོད་ཇོ་བོར་གྲགས་པ་དེ་ཉིད་དང། བཀྲ་ཤིས་དོ་ཁ་མ་བརྒྱད་ཀྱི་ནང་ཚན་འཁྲུལ་མེད་རྒྱལ་བའི་དབང་པོ་དགེ་འདུན་རྒྱ་མཚོའི་ཐུགས་དམ་རྟེན་སྡེ་པ་ལྷ་རྒྱ་རི་བ་སོགས་ནས་རིམ་པར་བྱུང་བའི་ལོ་རྒྱུས་ངེས་འདྲོངས་ཅན་སོགས་ཀུན་མཁྱེན་བླ་མའི་ཕྱག་ཏུ་བྱུང་སྟེ་མདོ་སྨད་འདིར་ཕེབས་པ་དང། མ་ཅིག་ལབ་སྒྲོན་ཡུམ་སྲས་ཀྱང་ཕྱོགས་འདིར་ཕེབས་པ་སོགས་ནི་བྱང་ཕྱོགས་མཐའ་འཁོབ་ཀྱི་ཡུལ་དུ་བསྟན་པ་དར་བའི་རྟེན་འབྲེལ་དང། ཀུན་མཁྱེན་བླ་མ་ཡང་ཞི་འཚོ་དང་འཕྲིན་ལས་མཉམ་པའི་གཏན་ཚིགས་ཡིན་པས། རབ་བྱུང་བདུན་པའི་ས་གླང་ལ་དགེ་ལྡན་བཏབ་ནས་སུམ་བརྒྱ་གོ་བདུན་དང། ལྔ་བརྒྱ་ཐ་མ་ཚུགས་ནས་ལོ་བཅུ་ལྷག་ན་ཀུན་མཁྱེན་རིན་པོ་ཆེ་འཁྲུངས་པ་དང། བཀྲ་ཤིས་འཁྱིལ་
བཏབ་ནས་གོ་བདུན་པ་ཤིང་གླང་ལ་མཐོང་གྲོལ་ཆེན་མོ་བཞེངས་པ་སོགས་དུས་ཚོད་ཕན་ཚུན་ཤན་སྦྱར་བ་ཡང་ཤེས་ལ། ད་དུང་བྱང་ཕྱོགས་ནས་བྱང་ཕྱོགས་རྒྱ་མཚོའི་མཐའི་བར་དུ་བསྟན་པ་དར་བར་འགྱུར་བ་ལ་ཐེ་ཚོམ་མི་དགོས་པའི་གསུང་རྒྱུན་ཡོད་དེ། ཤེར་ཕྱིན་གྱི་མདོ་སྡེ་སོ་སོར་ཡུལ་སྤྱད་པའི་ཡོན་ཏན་གྱི་སྐབས་སུ་ཆོས་དང་འདུལ་བ་དར་ལ་བབ་པ་ན་དམ་པའི་ཆོས་ནུབ་པར་མི་འགྱུར་ཞེས་བཀའ་སྩལ་ནས། དེ་རྗེས་སླད་མའི་དུས་དང་སླད་མའི་ཚེ་བྱང་གི་ཕྱོགས། ཞེས་དང། ཕྱི་མའི་དུས་དང་ཕྱི་མའི་ཚེ་བྱང་ཕྱོགས་སུ་ཞེས་དང། བྱང་ཕྱོགས་ནས་ཀྱང་བྱང་ཕྱོགས་སུ་ཞེས་དང། སླད་མའི་དུས་དང་སླད་མའི་ཚེ་ན་བྱང་ཕྱོགས་ཀྱི་ཆ་དེར་ཞེས་བསྔགས་བརྗོད་རིམ་པར་བཀའ་སྩལ་པ་ལ་དོན་གྱི་ཁྱད་པར་མི་འདྲ་བ་འབྱུང་ལ། སྤྱིར་ཡུལ་དབུས་ནས་ལྷོ་ཕྱོགས་ཀྱི་རྒྱུད་དང། དེ་ནས་བར་ད་ནི་དང། དེ་ནས་བྱང་ཕྱོགས་ཀྱི་རྒྱུད་དུ་ཤེར་ཕྱིན་འདིས་སངས་རྒྱས་ཀྱི་མཛད་པ་བྱེད་པར་འགྱུར་ཞེས་གསུངས་པས་རྒྱུད་ཅེས་པ་སའི་ཐིག་ལེ་ཉི་ཚེ་ཙམ་མ་ཡིན་པའི་ཕྱིར་རོ། །དེས་ན་གསང་བ་བསམ་གྱིས་མི་ཁྱབ་པའི་མདོ་ལས། གསང་བའི་བདག་པོ་གང་གི་ཚེ། བཅོམ་ལྡན་འདས་ཀྱིས་སྤྲུལ་བ་སྤྲུལ་བ་དེའི་ཚེ་ཁྱོད་ཀྱིས་སྤྲུལ་བ་སྤྲུལ་ལམ། ལག་ན་རྡོ་རྗེས་སྨྲས་པ། བཅོམ་ལྡན་འདས་མངོན་སུམ་དུ་བཞུགས་པ་འདི་ཁོ་བོའི་དཔང་ཡིན་ཏེ། ཞི་བའི་བློ་གྲོས་གལ་ཏེ། དེ་བཞིན་གཤེགས་པས་དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ཅིག་སྤྲུལ་ན་ཁོ་བོའི་སྤྲུལ་བ་གཟུགས་ཐ་དད་པའོ། །སྲིད་པར་བརྩོན་པ་ཐ་དད་ལ་ཡང་དེ་སྙེད་དེ་དག་གི་རྗེས་སུ་འབྲང་བ་ཡིན་ཏེ། ཞི་བའི་བློ་གྲོས་འདི་ནི་སྔོན་གྱི་བསམ་པ་ཡོངས་སུ་དག་པའི་རྒྱུ་མཐུན་པའོ། །ཞེས་གསུངས་པ་ལྟར། ཏེ་ལོ། ནཱ་རོ། ཇོ་འབྲོམ་མར་མི། རྗེ་དང་ཤེར་སེང་སོགས་དུས་
མཉམ་པའི་སྤྲུལ་བ་ལ་ཐེ་ཚོམ་མ་དགོས་པར་མ་ཟད། བཅོམ་ལྡན་འདས་དང་དྲི་མེད་གྲགས་པ། འདུལ་དཀར་བ་དང་ཤེར་སེང། དཔོན་སྟོན་སྐྱེར་སྒང་བ་དང། ཀུན་མཁྱེན་བླ་མ་སོགས་ཐུགས་རྒྱུད་གཅིག་པར་གསུང་རྒྱུན་རྣམ་ཐར་ཅི་རིགས་ལས་འབྱུང་ངོ་། །སླར་ཡང་འདི་སྐད་ཅེས་བྱ་སྟེ། རི་ཡི་དབང་པོ་བྱ་རྒོད་ཕུང་པོའི་སྤོར། །ཐུབ་པའི་ཉི་མ་སྐྱེ་དགུའི་དཔལ་དུ་ཤར། །རྨོངས་པའི་མུན་སེལ་ཟབ་རྒྱས་ཤེར་ཕྱིན་དོན། །འོད་བརྒྱའི་སྣང་བ་ས་གསུམ་ཁྱབ་པར་སྤྲོས། །དེའི་ཚེ་ལྷོ་ཡི་ཕྱོགས་དང་བར་དུ་ནི། །བྱང་དང་བྱང་ནས་བྱང་གི་ཕྱོགས་དང་ཆར། །རྒྱུད་དང་ཡུན་དུ་ཆོས་འདི་དར་རོ་ཞེས། །བདེན་པའི་བཀའ་ལུང་ཚངས་པའི་དབྱངས་ཀྱིས་བསྒྲགས། །དེ་བཞིན་ཁྱོད་སྐུའི་བཀོད་པས་ས་གསུམ་ཁྱབ། །གསུང་གི་སྣང་བས་འགྲོ་བློའི་མུན་པ་བསལ། །ཐུགས་རྗེ་འཇུག་པ་སྐལ་བའི་རིམ་པར་བབས། །ཆོས་སྤྱོད་དགའ་སྟོན་ཟླ་བ་ཚེས་པ་བཞིན། །རྙོགས་བྲལ་དྭངས་པའི་རྫིང་བུར་ཟླ་ཤེལ་གཟུགས། །གཅིག་ལས་རྒྱ་མཚོའི་རྡུལ་སྙེད་གྲངས་འཆར་ན། །མི་ཟད་རྒྱན་གྱི་འཁོར་ལོ་བྱེ་བའི་མཛོད། །སྤྲོ་བའི་བྱེད་པོ་ཐ་དད་སུ་ཡིས་དམིགས། །ལ་ལར་རིམ་དང་ལ་ལར་ཅིག་ཅར་དུ། །ལ་ལར་སློབ་དཔོན་ལ་ལར་སློབ་མའི་ཚུལ། །བགྲང་ཡས་རྣམ་པར་རོལ་པ་སྲིད་མཐའི་བར། །སྤྲོས་དང་སྤྲོ་བའི་ཕན་བདེས་འགྲོ་ཀུན་ཚིམ། །བདག་འཛིན་རྨོངས་པས་ཕྱེ་བའི་རྒྱུ་ཐ་དད། །དག་པའི་ཡེ་ཤེས་མེ་ལོང་ངོས་ལ་མེད། །ཡེ་ཤེས་རྣམ་ལྔ་རིགས་ལྔའི་དབང་གཞུ་རུ། །དྭངས་ཤེལ་ཚོན་བརྒྱའི་རི་མོ་བཞིན་དུ་བཀྲ། །ལྷག་པར་བོད་ཡུལ་ནོར་འཛིན་ཐིག་ལེར་མཁན་སློབ་ཆོས་རྒྱལ་ལོ་པཎ་ཟོལ་གྱིས་ཐུབ་བསྟན་དབུ་བརྙེས་སྲོལ་བཏོད་དར་རྒྱས་མཛད། །མཁའ་དབྱིངས་རྒྱུ་སྐར་དཔལ་ལ་ཅོ་འདྲི་མཁས་གྲུབ་འཕྲེང་བ་རིམ་པར་བགྲངས་པས་རིས་
མེད་ཆོས་ཚུལ་འོ་མཚོ་ཕྱོགས་བརྒྱར་སྤེལ། །རིགས་པའི་བསྲུབས་ཤིང་དྲི་མེད་མདོ་རྒྱུད་བསྲུབས་ཐག་གིས་བཟུང་ལེགས་བསྲུབས་ཉིང་ཁུ་དགེ་ལྡན་རིང་ལུགས་གསེར་སྦྱངས་འབར་འདྲའི་བཅུད། །སྐལ་བཟང་སྙིང་གི་ཡོལ་གོར་འཁྱིལ་ལས་དད་བརྩོན་སྡོང་བུར་བསླབ་གསུམ་རིམ་གཉིས་བཤད་སྒྲུབ་མེ་འོད་རྨོངས་པའི་གཤེད་དུ་སྤྲོས། །དེ་ལྟའི་ཡ་མཚན་རི་མོ་ནི། །དུས་ཀྱི་མཐར་ཡང་ཉམས་མེད་ཕྱིར། །གང་གིས་གང་གི་གཟུགས་ཀྱི་སྐུ། །རིན་ཆེན་ལྷུན་པོ་བརྩེགས་འདྲ་དང། །འཛད་མེད་ཆོས་སྦྱིན་བདུད་རྩིའི་སྒོ། །ཕྱེ་བའི་ངོ་མཚར་རྩེ་དགའ་ནི། །ཐུབ་པ་བྱ་རྒོད་ཕུང་པོའི་སྤོར། །བྱོན་པའི་ངོ་མཚར་བྲིས་པ་བཞིན། །སྔོན་དང་ཕྱི་མཐའི་རྟེན་འབྲེལ་དག །དུས་དང་དུས་སུ་སྨིན་པ་ཡི། །བརྗོད་པ་ཡང་དག་རྫོགས་པའི་མཐའ། །ཀུན་མཁྱེན་མཁྱེན་པས་དམིགས་སུ་མེད། །དེ་སླད་འགྲོ་བའི་ནགས་ཀླུང་ཡངས་པའི་ཁྱོན། །སྒྲིབ་གཉིས་འཁྲི་ཤིང་མིང་གི་ལྷག་མ་རུ། །མ་བཅོམ་དེ་སྲིད་ཁྱོད་དང་མི་འབྲལ་བར། །མཛད་པའི་ཁུར་འདེགས་དགྱེས་པས་སྐྱོངས་གྱུར་ཅིག །ཅེས་པའང་བར་སྐབས་ཀྱི་ཚིགས་སུ་བཅད་པའོ། །ཇོ་བོ་བཞེངས་སྐབས་མགར་བས་སྣང་མེད་ཀྱིས་གསེར་སྲང་སུམ་ཅུ་བཞུས་ནས་གསེར་ལད་སོང་བར་ཞབས་ཕྱི་རྣམས་ཀྱིས་སེམས་འཚེར་བྱས་པས། དེ་ལེགས་པོ་བྱུང། མགར་བ་འདིས་དང་པོར་སྣང་རྟག་མི་བྱེད་པ་དང། རྗེས་སོར་འགྱོད་པ་མེད་པ་འདི་ངོ་མཚར་པོ་རེད་གསུངས། ཁོང་ཚོ་ཁྲོས་ནས་འོ་ན་གསེར་འདི་ཅི་བྱེད་རྒྱུ་ཡིན་ཞུས་པས། དེ་གསེར་ཡིན་སྙམ་ནས་བཞག་བཏང་ན་དེ་རེད་མོད་གསུངས། འདི་ནི་ཆོག་ཤེས་ནས་ལྟ་བའི་བར་འདོམས་པའི་གསུང་ཡིན་ལ། གསུང་གི་ཕེབས་སྒོ་ཐམས་ཅད་འདི་དང་འདྲ་ཡང་བྲི་མ་ནུས། དོན་གཉེར་ཅན་དུ་མ་
ལ། ནཱ་རོ་མཁའ་སྤྱོད་མའི་བྱིན་རླབས། རིག་བྱེད་མའི་རྗེས་གནང་ཐུན་མོང་དང་ཐུན་མོང་མ་ཡིན་པ། ཇོ་ལུགས་སྒྲོལ་མ་ཉེར་གཅིག་གི་རྗེས་གནང་སོགས་ཆོས་བཀའ་དུ་མ་དང་འབྱོར་ཕྱག་ཐོན་ཕྱག་སོགས་མོས་པ་བཞིན་གནང་སྟེ་ཐེ་བོ་ཆབ་ཚན་དུ་ཆིབས་བསྒྱུར། དེར་ཡང་ཕྱོགས་འདུས་པ་མང་པོར་གྲུབ་རྒྱལ་ལུགས་ཀྱི་ཚེ་དབང། མགོན་པོ་བར་ཆད་ཀུན་སེལ་དང། སེང་གདོང་མའི་རྗེས་གནང། ལམ་རིམ་སྙིང་པོ་དངོས་གྲུབ་ཀུན་འབྱུང་གི་ལུང་སོགས་སྩལ། ཟླ་མཇུག་ལ་གདན་སར་འབྱོར། དགེ་བའི་བཤེས་གཉེན་རྒྱུད་པ་སློབ་ཟུར་དགེ་འདུན་དཔལ་བཟང་པོས་གསོལ་བ་བཏབ་པ་བཞིན་ལུང་རིགས་སྨྲ་བ་ལྔ་བཅུ་ལྷག་ལ་རྟེན་འབྲེལ་བསྟོད་པའི་བཤད་ལུང། དགའ་ལྡན་ལྷ་བརྒྱ་མའི་ལུང། བླ་མཆོད་དང་ཕྱག་ཆེན་སྦྲགས་པའི་ཁྲིད་གཟབ་རྒྱས། རྣམ་རྒྱལ་མཆོད་པ་དང་རབ་བྱུང་བསྙེན་རྫོགས་འགའ་གནང། ཨ་མཆོག་དགོན་དུ་གདན་འདྲེན་ཞུས་པ་མཛོད་དགེ་དགོན་གསར་དང་སྦྲགས་ནས་ཆིབས་བསྒྱུར། བརྒྱད་པའི་ཚེས་ལྔ་ལ་དགོན་པའི་བླ་མ་ལས་སྣེ། ཚོ་པ་བརྒྱད་ཀྱི་རྒན་སེམས་ཤེས་སོགས་སྐྱ་སེར་གྱི་རྟ་བསུ་ཇ་ཐབ། ཞག་བབ་ཀྱི་བསྙེན་བཀུར་སོགས་ཕུལ་ཞིང། གཉན་རྗེ་གོང་སྔོན་གྱི་ལྷ་ཞོལ་དུ་བཞུགས་ཏེ། ཕྱི་ཉིན་སེར་སྦྲེང་དཀྱུས་རིང་དང་བཅས་དགོན་པར་བབས། སེར་སྐྱ་སུམ་སྟོང་ལྷག་ལ་ལམ་གཙོའི་ཁྲིད་སྙན་བརྒྱུད་མན་ངག་གིས་བརྒྱན་པ། བཅུ་གཅིག་ཞལ་གྱི་རྗེས་གནང་བཅས་སྩལ། ཚེས་བརྒྱད་ཀྱི་ཉིན་བཀྲ་ཤིས་གསོ་སྦྱོང་མཛད། དགེ་འདུན་དགུ་བརྒྱ་སྐོར་ལ་ཟམ་ཡ་རེ་དང་ཁ་དར་རེའི་འགྱེད། སྤྱི་འཇོག་སོ་སོར་རྟ་ནོར་བརྒྱད། འདུ་ཁང་གི་ཐེབས་སུ་རྟ་ནོར་བཞི་བཅུ་ཞེ་གསུམ། བླ་མ་སོ་སོར་རྟ་ཕྲུག་རེས་གཙོས་པའི་ཚན་གྲངས་བསྟར། བསྒྲུབ་བྱ་གཉིས་དགེ་བསྙེན། བཅུ་
དགེ་ཚུལ། ཞེ་དགུ་བསྙེན་རྫོགས་སུ་བསྒྲུབས། དེ་ནས་བཏེག་སྟེ་ལམ་བར་གྱི་སྡེ་པ་སོ་སོས་ཇ་ཐབ་བཞི་ལྔ་ཙམ་ཕུལ་བའི་རེ་བ་བསྐངས། མཆོད་རྟེན་ཤར་དགོན་པ་བཀྲ་ཤིས་རབ་རྒྱས་ལ་འདུ་ཁང་ཐེབས་སུ་རྟ་ནོར་ལྔ། ནས་བྲེ་བཞི་བརྒྱ། འགྱེད་ཐེབས་སུ་ཟམ་དམར་དགུ་བཅུ། ཁ་དར་བརྒྱ་དང་བརྒྱད་ཅུ་བཅས་ཕུལ། མཛོད་དགེ་དགོན་གསར་དུ་བྱམས་སྐུ་ཆེན་མོ་དང། དྲི་གཙང་ཁང་གསར་བཞེངས་སོགས་ལ་སྤྱན་དབྱེའི་ཆོ་ག་མཛད། རབ་དར་ཡང་སྩལ། དགེ་འདུན་སྟོང་ལྷག་ལ་སྣར་ཐང་བརྒྱ་རྩ། སྨན་བླ་མཐོ་བརྩེགས། སྒྲོལ་དཀར་འོད་ཟེར་དྲུག་སྦྲགས་སོགས་ཀྱི་རྗེས་གནང། བྱམས་ཆོས་སྡེ་ལྔའི་ལུང་སོགས་འདོད་མོས་བཞིན་གནང། ཁྲི་པ་རྡོ་རམས་པ་དཀོན་མཆོག་དབང་ཕྱུག་ནས་ཞབས་བརྟན་གསོལ་འདེབས་ནན་ཅན་ཞུས་པར་དགྱེས་པའི་ཞལ་བཞེས་དང་བཅས་འབུལ་བ་རྣམས་ཕྱིར་སློག །སླར་ཡང་རྟེན་བཞེངས་ཀྱི་ཐེབས་སུ་ཐོའུ་ཁྲོན་ཉིས་བརྒྱ་བཅུ་གསུམ་བཞག །དོང་ཚེ་ཞོ་བདུན་རེའི་ཟོག་འགྱེད་བསྟར། ཚོགས་དབུར་བཞུགས་ནས་རྣམ་རྒྱལ་མཆོད་པའི་སྲོལ་གསར་དུ་ཚུགས། དེ་ནས་ཆིབས་བསུ་སྐྱེལ། ལམ་བར་གྱི་སྡེ་པ་སོ་སོས་ཇ་ཐབ་བཞི་ལྔ་ཙམ་ཞུས་པར་འཕོ་ལུང། ལྗགས་བསྔོ། ཕྱག་དབང་སོགས་ཀྱིས་རེ་བ་སྐོང་བཞིན་པར་ཙ་ཡུ་དགོན་པར་བྱོན། ལམ་ཁྲིད་མདོར་བསྡུས་སྔོན་དུ་བཏང་སྟེ་ཕྲེང་བའི་ཆིངས་ཀྱི་སྟེང་ནས། འདུས་པ་འཕགས་ལུགས་ཀྱི་དབང་སྟ་གོན་དང་བཅས་པ། དགེ་འདུན་བཞི་བརྒྱ་སྐོར་ལ་ཟམ་དམར་ཡ་རེ་དང་ཁ་དར་རེའི་འགྱེད་སྕལ། འབུལ་བ་ཕྱིར་སློག་སྟེ་ནས་འཇག་བརྒྱ་དང་ཉི་ཤུ། རྟ་ནོར་བཅུ་གསུམ། ཆས་འཇུག་གཅིག །རྡོར་དྲིལ་གཅིག་བཅས་སྒྲུབ་མཆོད་གསར་ཚུགས་ཀྱི་ཐེབས་སུ་གནང།
དེ་ནས་ཕེབས་པས་ཉིན་དེར་ལམ་བར་གྱི་སྡེ་པ་སོ་སོས་ཇ་ཐབ་བརྒྱད་དགུ་ཙམ་ཞུས་པའི་འབུལ་བ་རྣམས་ཀྱང་ཙ་ཡུ་དགོན་པར་སྤྱི་འཇོག་ལ་གནང་སྟེ་བརྒྱད་པའི་ཉེར་བརྒྱད་ལ་དགོན་པར་བབས། སྨད་སོག་མང་པོ་དང་སྐུ་འབུམ་པ་འགའ་སོགས་སྒུག་སྡོད་བྱས་ཡོད་པ་རྣམས་དང། འཆམ་པ་ལྕགས་མཁར་བ་སོགས་ཀྱིས་ཞུས་ངོར་འདོད་ཆོས་གང་འདོད་དུ་གནང་ཞིང། རྣམ་རྒྱལ་མཆོད་པའི་ཚོགས་དབུར་ལན་ཁ་ཤས་ཕེབས། དགུ་པའི་ཉེར་བདུན་གྱི་ཉིན་ཚོགས་ལ་གཏོང་སྒོ་དང་འཆར་ཅན་གྱི་མཆོད་མཇལ་སྦྲགས་ནས་མཛད། ཉིན་དེར་ཚོགས་སུ་ཕུལ་བའི་ཞུ་ཐོ་ནི། བསླབ་གསུམ་ནོར་བུའི་གཏེར་མཛོད་འཕགས་ཆེན་འདུས་པ་རྒྱ་མཚོའི་ཞབས་དྲུང་དུ་གང་ཞུ་ན། པཎ་ཆེན་དགེ་འདུན་གྲུབ་ཀྱི་ཞལ་ནས། ཤར་གངས་རི་དཀར་པོའི་རྩེ་མོ་ན། །སྤྲིན་དཀར་པོ་དགུང་ལ་བསྙེགས་པ་འདྲ། །དེ་མཐོང་བའི་མོད་ལ་བླ་མ་དྲན། །དྲིན་བསམ་ཞིང་བསམ་ཞིང་དད་པ་སྐྱེ། །ཞེས་གསུངས་པ་ལྟར། དེང་དུས་རྒྱ་བོད་ཧོར་གསུམ་གྱི་མཆོག་དམན་སེར་སྐྱ་ཐམས་ཅད་ཀྱི་སྤྱོད་ཚུལ་དང། བསྟན་པའི་འཕེལ་འགྲིབ་གང་ལ་བརྟག་ནའང་ཡབ་རྗེ་རྡོ་རྗེ་འཆང་དེ་ཉིད་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་འཕྲིན་ལས། སྐྱོབ་པའི་ནུས་མཐུ་གང་ནས་བསམས་ཀྱང་མཚུངས་པའི་ཟླ་དང་བྲལ་བས་དུས་ཅི་ཙམ་འགོར་བ་བཞིན་ལྷག་པར་དྲན་དགོས་ལ། སྤྱིར་སྙིགས་མ་ལྔ་བདོ་བའི་དུས་སུ་ཐུབ་པའི་དབང་པོ་དང། དེའི་དངོས་ཀྱི་འདུལ་ཞིང་དུ་མ་གྱུར་བའི་ཁ་བ་ཅན་གྱི་གདུལ་བྱ་ལ་འཕགས་པ་སྤྱན་རས་གཟིགས་ལྷག་པར་བཀའ་དྲིན་ཆེའང། དེ་ལས་ཀྱང་ཆེས་ཆེར་སྙིགས་པའི་དུས་ངན་གྱི་མཐའ། ཡུལ་ངན་གཤིན་རྗེའི་འཐབ་ར་ལྟ་བུ་འདིར་གཞན་གྱི་ལོག་སྒྲུབ་དང་ངན་སྨྲས་སོགས་གང་ལ་ཡང་མ་འཛེམ་པར་བསྟན་འགྲོ་
མཐའ་དག་གི་དོན་ཁུར་དུ་བཞེས་ཏེ། རྒྱལ་བ་ཀུན་ལས་ལྷག་པའི་ཐུགས་རྗེ་ཅན། །ཟླ་མེད་བླ་མ་ཞེས་པ་དེ་ཁོ་ན་ཡིན་ཀྱང་སྐྱེ་བོ་བློ་གྲོས་ཀྱི་མིག་དང་བྲལ་ཞིང་བསོད་ནམས་ཀྱི་མཐུ་དམན་པ་དུ་མས་སངས་རྒྱས་དངོས་ཀྱི་མཛད་པ་བསྟན་ཀྱང་ཡོན་ཏན་དུ་མ་མཐོང། ཕན་པའི་ཐབས་གང་དགོས་ཐམས་ཅད་མཛད་ཀྱང་དྲིན་ངོ་མ་ཤེས་པར་རྟེན་འབྲེལ་ཅུང་ཟད་འཕྱུགས་པའི་རྐྱེན་གྱིས་ད་ལྟ་ཕྱི་ནང་གི་རྐྱེན་ངན་སྣ་ཚོགས་པ་འདི་བྱུང་བར་སྣང་ནའང། རང་ངོས་ནས་སྐྱོན་རྟོག་སྐད་ཅིག་ཀྱང་སྐྱེས་པ་མི་དྲན་ལ། ད་དུང་ཚེ་རབས་ཀུན་ཏུ་དགྱེས་བཞིན་རྗེས་སུ་འཛིན་པའི་རྒྱུར་དམིགས་ཏེ་དུས་མཆོད་དང་འབྲེལ་བར་ཇ་ཐུག་ཉིན་འཁྱོང་གི་བསྙེན་བཀུར་ཞུས་པའི་ཐོག་སྤྱི་འཇོག་ལ་རས་ལྔ་ཁ་དར་ཕྱི་མཛོད། འཇོག་པ་གཞན་རྣམས་ལ་ཟམ་ཆ་རེ་དང་ཁ་དར་རེ། སྐུ་འགྱེད་དོང་ཙེ་ཁྲོན་རེ་བཅས་འབུལ་ལམ་ཞུ་ལགས་པས། སྐྱབས་གསུམ་ཀུན་འདུས་ཀྱི་ངོ་བོ་བླ་མ་མཆོག་གི་ཐུགས་རྗེ་དང། དགེ་འདུན་མི་ཕྱེད་འདུན་པའི་སྟོབས་ཀྱིས་ཇི་ལྟར་སྨོན་པའི་དོན་ཐམས་ཅད་དེ་བཞིན་དུ་འགྲུབ་པར་གྱུར་ཅིག །ཅེས་པ་འདི་ཡིན་ནོ། །འདིའི་རྟེན་འབྲེལ་ནོར་བ་ཞེས་པ་ནི། སྒྲིག་ལམ་ཡལ་བར་བོར་བ་སོགས་གསུང་ལ་མངོན་ལྐོག་བཏང་བ་ཁོ་ནའི་སྟེང་ནས་ཤེས་པར་གྱིས་ཤིག །བཅུ་པའི་ཚེས་ལ་རི་ཁྲོད་ཀྱི་གཟིམས་ཁང་གསར་པ་ནས་བསྒྲུབ་བྱ་འགའ་ཞིག་བསྙེན་རྫོགས་དང། བཱ་རིན་ཞབས་དྲུང་སོགས་དགེ་འདུན་མང་པོར་ལམ་གཙོའི་ཁྲིད་དང། སྤྱོད་འཇུག་གི་བཤད་པ་ཉིན་བཞི་ཙམ་ལ་གནང་སྟེ་ཚེས་ལྔ་ནས་བཅད་རྒྱ་མཛད། བར་སྐབས་སུ་གསོ་སྦྱོང་ལ་ཕེབས་པ་དང་སྦྲགས་ནས་བྱང་འགྲུལ་པ་སོགས་དོན་གཉེར་ཅན་སྒུག་སྡོད་བྱས་པ་རྣམས་ལ་རབ་བྱུང་བསྙེན་
རྫོགས་ཀྱི་རེ་བ་བསྐང་ཙམ་མ་གཏོགས་ལོ་མཇུག་བར་དུ་བཅད་རྒྱ་ཁོ་ན་མཛད། བཅུ་གཉིས་པའི་ཉེར་ལྔ་ལ་སྐུ་མཚམས་གྲོལ་ཏེ་འགྲུལ་པ་མང་པོ་ལ། བླ་མཆོད་དང་ཕྱག་ཆེན་སྦྲགས་མའི་ཁྲིད། དགའ་ལྡན་ལྷ་བརྒྱ་མའི་ཁྲིད། བདེ་ལམ་གྱི་ཁྲིད་སོགས་རིམ་པར་གནང་ཞིང། ལོ་འདིར་བསྒྲུབ་བྱ་བཞི་བརྒྱ་མ་ལོང་ཙམ་བསྙེན་རྫོགས་དང། དགེ་ཚུལ་གྱ་བརྒྱད་བསྒྲུབས་ཏེ་འཁོར་འདས་བརྗེ་བའི་བསླབ་ཟོང་ཆེན་པོ་སྩལ། དགུང་ལོ་ང་དགུ་པ་ལྕགས་འབྲུག་གི་ལོ་གསར་ལ་སྔར་གྱི་བཀའ་ཆོས་འཕྲོས་ནས་དཔའ་གཅིག་དང་ཀུན་རིག །བདེ་མཆོག་ལཱུ་ཨི་པའི་དབང། རིག་བྱེད་མ། ཛམ་དམར། སྒྲོལ་མ་ཉེར་གཅིག །གདུགས་དཀར་སོགས་ཀྱི་རྗེས་གནང་དུ་མ་སྩོལ་བཞིན་པར་ཚེས་བརྒྱད་ཀྱི་ཉིན་ཇོ་བོ་རིན་པོ་ཆེར་ན་བཟའ་དང་དབུ་རྒྱན་ཕུལ་ཏེ། དཔོན་སློབ་ལྔ་བཅུ་སྐོར་གྱིས་སྤྱན་འདྲེན་ཁྲུས་གསོལ། རྟེན་འབྲེལ་བསྟོད་པ། ཡོན་ཏན་གཞིར་གྱུར་མ། བསྟན་འབར་མ་བཅས་གསུངས་ཏེ་ཐུགས་སྨོན་རྒྱ་གང་ཆེ་གནང་ཞིང། རྗེ་བདག་ཉིད་ཆེན་པོས་ལྷ་སའི་ཇོ་བོ་རིན་པོ་ཆེར་དབུ་རྒྱན་ཕུལ་བའི་ཉི་མ་ཡིན་ཞེས་ཐུགས་དགྱེས་ཚོར་ཆེ་བ་མཛད། ཇོ་བོའི་སྐུ་འདི་ཉིད་ཀྱི་རྒྱུ་སོང་སོགས་མ་ངེས་ཀྱང་ཕྱག་གཡས་པའི་མཁྲིག་མ་ནས་སོར་རྩེའི་བར་ལ་དངུལ་དཀར་སྲང་བདུན་ཅུ་སྐོར་ཅིག་སོང་བར་ཞལ་ནས་ཐོས། ས་གསུམ་ན་རྙེད་པར་དཀའ་བའི་རྒྱ་བོད་ཀྱི་བྱིན་རྟེན་གཟུངས་གཞུག་འཛོམ་ཆེ་བ་འདི་འདྲ་མདོ་སྨད་ཀྱི་ཕྱོགས་འདིར་དཀོན་པ་ལྟ་བུར་ཡོད་ཀྱང་གབ་པའི་ཚུལ་གྱིས་དཀར་ཆག་ཙམ་ཡང་མ་བཀོད་པས་གསལ་ཆ་བྲི་བར་མ་ནུས་སོ། །བཅུ་གསུམ་གྱི་ཉིན་རྗེ་ཉིད་ཀྱིས་གཙོས་གནས་བརྟན་འདུལ་བ་འཛིན་པ་བཅུ་གཅིག་གིས་ཇོ་བོ་རིན་པོ་ཆེར་སྤྱན་དབྱེའི་ཆོ་ག་མཛད། གང་གི་ཡོན་ཏན་ཕུང་པོ་ལ། །མངོན་དགའ་རྒྱས་
པའི་སྐྱེ་བོའི་སྤྲིན། །ཟང་ཟིང་ནོར་གྱི་ཆར་འབེབས་པས། །ཆགས་བྲལ་བདུད་རྩི་བྱིན་པ་བཞིན། །འགྲོ་བའི་སེམས་རྒྱུད་ཀུན་མཁྱེན་གྱི། །གཏེར་དུ་སྒྲུབ་ཕྱིར་གཟུགས་ཀྱི་སྐུ། །བཞེངས་པས་གདུལ་བྱ་ནོར་འཛིན་མ། །ཕན་བདེའི་མེ་ཏོག་འབུམ་དུ་བཞད། །འཇམ་དབྱངས་དམར་སེར། རྣམ་འཇོམས། རྡོར་སེམས། རིག་བྱེད་མ། སྒྲོལ་དཀར་ལྗང་རྣམས་ཀྱི་རྗེས་གནང། ཉན་མཁན་བརྒྱ་ཕྲག་དུ་མ་ལ་སྐྱབས་འགྲོའི་ཁྲིད། བླ་མཆོད་ཀྱི་ཁྲིད་སོགས་འདོད་མོས་བཞིན་གནང། སྦྱིན་བདག་རྣམས་ལ་ཐོན་ཕྱག་བྱིན་རྟེན་སྐུ་བརྙན། སྣམ་ཐེར། སྡེ་དགེའི་དྲིལ་བུ། ཏིང་ཤག །དབུས་སྤོས། སྟག་གཟིག་གི་པགས་པ་སོགས་སྩལ་ཞིང། ལྷག་པར་ཨུ་ཅུ་མུ་ཆིན་ཙ་ཁ་རུག་ཆི་གསེར་སྐྱེམས་ཀྱི་བུ་ལ། སྔར་ཕ་མེས་ཀྱི་དུས་ནས་ཚོགས་བསགས་རྒྱ་ཆེན་པོ་རྒྱུན་མི་འཆད་དུ་བྱས་པ་འདིའི་རྒྱུན་མ་ཉམས་པར་བསྐྱངས་ན་འདི་ཕྱིའི་དོན་ལེགས་པར་འགྲུབ་ཚུལ་སོགས་དགྱེས་པའི་གསུང་གི་སྒོ་ནས་དགའ་སྤྲོ་ཚད་མེད་པའི་གནས་ལ་བཀོད། འདི་མཚོན་བྱེད་ཙམ་དུ་བཀོད་ལ། དུས་ནམ་གྱི་ཚེ་ཡང་འགྲུལ་པ་སོ་སོར་ཐོན་ཕྱག །ཇ་གྲལ། བླ་དཔོན་སྦྱིན་བདག་གི་བབས་དང་བསྟུན་པའི་དཀར་སྤྲོ་དང། གནང་སྦྱིན་སོགས་ལ་ལེ་ཤོར་མེད་ལ་དགྱེས་པའི་གསུང་གིས་ཚིམ་པར་མཛད་པས་བྱམས་པའི་སྟོབས་ཀྱི་སྐྱེས་རབས་ལས། ཕོངས་ཏེ་སློང་དུ་འོངས་པ་རྣམས་ཀྱི་གདོང། །རེ་བ་བཟློག་པས་ངོ་ཟུམ་གནག་གྱུར་པ། །བུ་ཡུག་རླུང་གིས་པཔདྨ་རྙིང་པ་བཞིན། །མི་དགའ་བྱས་པ་ནམ་ཡང་བདག་མི་དྲན། །ཞེས་པ་ལྟར་ཡིན་ནོ། །དུས་རྒྱུན་དུ་ཡོངས་གྲགས་ལྟར་གྱི་འཇིག་རྟེན་མཐུན་འཇུག་གི་རིགས་མི་མཛད་པར་བཀའ་གདམས་གཙང་མའི་རྣམ་ཐར་ཁོ་ན་ལྷུར་
བཞེས་པར་མཛད་ཀྱང། ཐག་རིང་གི་ལམ་ནས་དཀའ་བ་ཁྱད་དུ་བསད་དེ་ཆོས་དོན་གཉེར་ལ་འོང་བ་དང། བླ་མ་དགེ་འདུན་དང་བཅས་པའི་ཞལ་མཐོང་ཞིང་གསུང་ཐོས་འདོད་དང། བསྙེན་བཀུར་ནས་བསྔོ་སྨོན་གྱི་འབྲེལ་བ་ཐོབ་འདོད་རྣམས་ལ་མོས་པ་དང་མཐུན་པའི་རེ་བ་རྫོགས་པར་མཛད་དེ། མཁོ་བའི་དངོས་པོ་སྟོབ་པ་དང། དགྱེས་པའི་གསུང་གི་སྒོ་ནས་རྣམ་དཀར་ལ་མོས་པ་བརྟན་ཅིང་སྤྲོ་བ་འཕེལ་བར་མཛད་པ་ནི། བྱང་ཆུབ་སེམས་དཔའི་སྤྱོད་པ་རྨད་དུ་བྱུང་བ་ཡིན་ཏེ། བྱང་ས་ལས། བྱང་ཆུབ་སེམས་དཔའ་ནི་སྦྱིན་པར་བྱ་བའི་ཆོས་དག་ལས་ནན་ཏན་དུ་གདམས་ཤིང་གདམས་ཤིང་ཟས་དང། སྐོམ་དང། བཞོན་པ་དང། གོས་ལ་སོགས་པ་མཆོག་དང། རབ་མཆོག་གང་ཡིན་པ་དེ་དག་སྦྱིན་པར་བྱེད་དོ་ཞེས་དང། བྱང་ཆུབ་སེམས་དཔའ་གཏམ་སྣ་ཚོགས་དང། སྙན་པའི་གཏམ་དང། སྤོབས་པ་དགེ་བ་དང་ལྡན་པ་ཅི་ནས་སེམས་ཅན་དབུལ་པོ་རྣམས་ཀྱང་སྦྱིན་པར་བྱེད་འདོད་པ་དང་སེར་སྣ་ཅན་རྣམས་ཀྱང་སྦྱིན་པ་བྱེད་པར་འདོད་པ་དེ་ལྟ་བུར་གཞན་ལ་ཆོས་སྟོན་པར་བྱེད་དོ། །ཞེས་གསུངས་པ་ལྟར་རོ། །མཛོད་དགེ་གྲོ་པཎྚི་ཏ་སོགས་མང་པོར། འཇམ་དཔལ་ནག་པོ། དྲག་པོ་སུམ་སྒྲིལ། ཡེ་ཤེས་ཁྱུང་ཁྲ་སོགས་ཀྱི་རྗེས་གནང་དང། སྐབས་འདི་སོགས་སྔ་ཕྱིར་གཟིམས་ཁང་བདེ་ཡངས་ནས་བཀའ་ཆོས་རྒྱུན་ཆགས་གནང་སྐབས་ཉན་མཁན་བརྒྱ་ཕྲག་རེ་མ་མཐའ། བཞི་བརྒྱ་ལྔ་བཅུ་བརྒལ་བ་ཡོད་ཀྱང་ཞིབ་པར་བྲིར་མ་ལང། ཞྭ་སེར་བསྟན་པའི་གསལ་བྱེད་གྲོ་པཎྚི་ཏ་ངག་དབང་འཕྲིན་ལས་ལྷུན་གྲུབ་དཔོན་གཡོག་ཉུང་བསྡུས་ལ། རྒྱལ་པོ་ལྷན་སྐྱེས་རོལ་པའི་ལུགས་ཀྱི་ཀུ་རུ་ཀུལླེ་ཐུན་མོང་དང་ཐུན་མོང་མ་ཡིན་པ། ཌོཾ་བྷི་ཧེ་རུ་ཀ་ནས་བརྒྱུད་པའི་གསང་སྒྲུབ་ཐུན་མོང་མ་ཡིན་པའི་རྗེས་གནང་
བཅས་དང། ཁོང་གཅིག་པུར་འཇིགས་བྱེད་དམར་པོའི་དུག་དབང་སྩལ། སྨན་བླ་བདེ་གཤེགས་བརྒྱད་སོགས་ཐང་ཆེན་བཅུ་གཅིག་དང། རྒྱལ་བ་སེངྒེ་ང་རོ། སྟོན་པ་ཐུབ་པའི་དབང་པོ། མཉམ་མེད་ཇོ་བོ་ཆེན་པོ། རྒྱལ་བ་ཙོང་ཁ་པ། སྐྱབས་མགོན་རྡོ་རྗེ་འཆང་བཅས་གོས་སྐུ་ཆེ་ཚད་ལྔ་བཟོ་དྲུབ་གྲས་མཚུངས་བྱེད་རྒྱུའི་མགོ་ཚུགས། ཕལ་ཆེར་བཅད་རྒྱའི་ངང་དུ་བཞུགས། བཞི་པའི་ཚེས་ལ་ཐང་ཆེན་རྣམས་གྲུབ་སྟེ་ལྷ་བྲིས་པ་རྣམས་དང། གསེར་མགར་ལགས་སོགས་ཡོན་གྱིས་མཉེས་པར་མཛད། མང་འགྱེད་དང་བཅས་ཚོགས་ཆེན་ནས་ཏཱ་རེ་དུང་ཕྱུར་བསྒྲུབས། མཁའ་སྤྱོད་སྐོར་གསུམ་གྱི་སིནྡྷུ་རའི་བྱིན་རླབས་སོགས་འདོད་ཆོས་དང་རྣམ་རྒྱལ་མཆོད་པ་སོགས་ཀྱིས་འདུན་ལྡན་རྣམས་ཀྱི་རེ་བ་བསྐངས་ཏེ་ཕལ་ཆེར་བཅད་རྒྱ་ལ་བཞུགས། རེབ་ཙ་སྨན་པ་དཀོན་མཆོག་བསྟན་དར་གློ་བུར་དུ་མ་བདེ་བར་ཨུ་ཚུགས་མཐར་སྐྱེལ་གྱིས་གསོལ་བ་བཏབ་པ་ལྟར། བཞི་པའི་ཉེར་བརྒྱད་ལ་བྲག་ལུང་རི་ཁྲོད་དུ་བཏེག །ཀུན་གྱིས་མི་འཚོ་བར་ཐག་བཅད་ཀྱང་བཀའ་བསྒོ་སྲུང་འཁོར་གྱི་དམིགས་རིམ་དང། སྒྲོལ་དཀར་གྱི་རྗེས་གནང་མགོན་ཆོས་ལྷ་མོའི་བསྐང་གསོ་བཅས་གནང་བས་སྐྱེད་ཐོན་ཏེ་སངས་དྭངས་སུ་སོང་བས་བྱིན་རླབས་དང་དད་པ་འཛོམ་པའི་བདེན་པ་མངོན་དུ་གྱུར། དེ་ནས་ངར་རྒོད་སྒང་དུ་གདན་དྲངས་པའི་ལམ་བར་དུ། ལུང་ནག་རི་ཁྲོད། གྱི་ལིང་དགོན་པ། རེབ་ཙ་ཕུག་གྲོང་དགོན་སོགས་ཀྱིས་ཇ་ཐབ་ཞུས་པར་དགོན་པ་སོ་སོར་མང་ཇ་དང། ཟམ་ཡ་རེའི་འགྱེད་དུས་རྒྱུན་དང་མཐུན་པ་གནང། བཀྲ་ཤིས་བཤད་སྒྲུབ་གླིང་གི་ལྷ་ཁང་རྟེན་དང་བརྟེན་པར་བཅས་པ་ལ་རབ་གནས་དང། འདུ་ཁང་ནས་སྙིང་པོ་དོན་གསུམ་
གྱི་ཁྲིད་སོགས་དང། སྔོན་པོ་ཐང་བཤད་སྒྲུབ་གླིང་དུ་གདན་དྲངས་པ་ལྟར་གཞི་བྱེས་ཀྱི་བླ་གྲྭ་སྟོང་ཕྲག་གཉིས་ལྷག་ལ། དཔའ་གཅིག་གི་དབང། ལུང་འགའ་ཞིག་སྩལ། ལྔ་པའི་ཚེས་བརྒྱད་ཀྱི་ཉིན་བཀྲ་ཤིས་ཀྱི་གསོ་སྦྱོང་མཛད། བོར་ཆུང་རི་ཁྲོད་བཀྲ་ཤིས་ཆོས་འཕེལ་གླིང་དུ། ལམ་གཙོའི་ཁྲིད། ལམ་རིམ་ཆེན་མོ་ལ་དབུ་ཚུགས་ཙམ་གནང་སྟེ་རྟེན་འབྲེལ་བསྒྲིགས། སླར་ཡང་སྔོན་པོ་ཐང་དུ་བྱོན། རྟ་རྒོད་མ་བཅུ་བཞི། མཛོ་མཛོ་མོ་བདུན། ཇ་ལན་འདུའུ་གཅིག །མར་རྒྱ་མ་རེ་བདུན། ནས་བྲེ་དྲུག་བརྒྱ་སོགས་ཆོ་འཕྲུལ་སྨོན་ལམ་གྱི་ཐེབས་སུ་བཞག །གསང་སྔགས་ཆོས་རྫོང་དགོན་དུ་ཐུགས་རྗེ་ཆེན་པོ་དང། ཛམ་དཀར་གྱི་རྗེས་གནང་སྩལ་ཞིང། མང་ཇ་ཁ་དར་ཟམ་འགྱེད་དང་འབུལ་བ་ཕྱིར་སློག་དཀྱུས་ལྟར་གནང། དེ་ནས་དགོན་གསར་དགའ་ལྡན་རབ་རྒྱས་གླིང་དུ་བྱོན། ཅོ་ནེ་དགོན་ཆེན། ཡེར་པ་སོགས་དེ་ཕྱོགས་ཀྱི་དགོན་ཁག་སོ་སོ་དང། རེབ་ཚ་ཁ་བཞི། རོང་ཚོ་ཆེན་བཅོ་བརྒྱད། ཐེ་བོ་སྟོད་སྨད། སེ་པོ་རོང་སོགས་ནས་འདུས་པ་བཅས་གཞི་བྱེས་བླ་གྲྭ་ཉིས་སྟོང་ལྷག་ལ་ཚེས་བཅོ་ལྔ་ནས་བརྩམས་ཏེ་མི་ཏྲ་བརྒྱ་རྩའི་དབང་རྫོགས་པར་གནང་ཞིང། མཇུག་ཏུ་ཚོགས་ཀྱི་འཁོར་ལོ་ཚིམ་པ་དྲུག་ལྡན་དུ་རོལ་པར་མཛད། དབུས་ནས་འོངས་པའི་ཧལ་ཧ་ལྷ་རམས་པ་དཔོན་གཡོག་སྟོང་འཁོར་ནས་ཆེད་གཏད་ཀྱིས་འོང་བར་དགའ་ལྡན་ལྷ་བརྒྱ་མའི་ཁྲིད། བདེ་མཆོག་དཀར་པོའི་རྗེས་གནང་བཅས་སྩལ། བསྒྲུབ་བྱ་གཅིག་དགེ་བསྙེན། བདུན་རབ་བྱུང། ཉེར་གསུམ་བསྙེན་རྫོགས་ལ་བཀོད། བཀྲ་ཤིས་འཁྱིལ་གྱི་དགེ་བཤེས་བགྲེས་པ་ཁྱོམ་དགེ་དཔོན་སློབ་ངག་དབང་བསྟན་འཛིན་དགུང་ལོ་བརྒྱད་ཅུ་ལོན་པ་ཆེད་གཏད་ཀྱིས་འོངས་ནས་ཧ་
ཅང་ཨུ་ཚུགས་མཐར་སྐྱེལ་གྱི་སྒོ་ནས་རང་གི་དགོན་པར་གདན་དྲངས་པ་དང། ཅོ་ནེ་མཁན་པོ་ངག་དབང་མཁས་བཙུན་རྒྱ་མཚོས་གཙོ་མཛད་པའི་ཅོ་ནེ་དགོན་ཆེན་གྱི་གྲྭ་དཔོན་སློབ་དང། ཅོ་ནེ་དཔོན་བཅས་ནས། གྲྭ་ཚང་གཉིས་ཀྱི་བླ་མ། མགོ་པ་སྐུ་ཚབ་བཅས་གདན་འདྲེན་དུ་མངགས་ཏེ། ཅིས་ཀྱང་ཕེབས་དགོས་པར་མ་ཟད་རྡོར་འཕྲེང་གི་དབང་ཞིག་ཀྱང་བཀའ་དྲིན་སྐྱོང་དགོས་ཞེས་ཞུས་པར་ལོང་ཁོམ་མེད་པ་སོགས་གང་ཅི་ནས་ད་རེས་མི་འགྲིག་གསུངས་ཀྱང་ཀུན་གྱི་ཨུ་ཚུགས་དང་ཞུ་ནན་ཐབས་གང་གིས་ཀྱང་མ་ཟློག་སྟེ་ཞལ་བཞེས་མི་གནང་ཐབས་མེད་བྱུང། དེའི་རྐྱེན་གྱིས་ལམ་བར་གྱི་དགོན་པ་སོ་སོས་ཀྱང་གདན་དྲངས་པ་ལྟར་རེབ་ཚ་སྟོད་མའི་དགོན་དགའ་ལྡན་གླིང་དུ་ཕེབས། དེར་གདུགས་དཀར། རྟ་མགྲིན། མགོན་པོ་བཅས་ཀྱི་རྗེས་གནང། འཇོག་པར་རྟ་ནོར་བཅུ། ཐོའུ་ཁྲོན་ལྔ་བཅུ་བཅས་བཞག །ཁང་ཐོག་དགོན་པ་དར་རྒྱས་གླིང་དུ་ཡོན་ཏན་གཞིར་གྱུར་མའི་ཁྲིད། ནམ་མཁའ་སྒོ་འབྱེད་ཀྱི་དབང། ཀུན་སྤངས་རི་ཁྲོད་པ་བྱམས་པ་འོད་ཟེར་ལ་བྱམས་པ་དང་འབྲེལ་བའི་འཕོ་བ་གསུང་བཤད་འབྱམས་ཀླས་པ་དང་བཅས་གནང། བསྒྲུབ་བྱ་ལྔ་དགེ་བསྙེན། ཉེར་ལྔ་དགེ་ཚུལ། སུམ་ཅུར་བསྙེན་རྫོགས་ཀྱི་སྡོམ་པ་སྩལ། འཇོག་པར་རྟ་ནོར་བཅུ། ཐོའུ་ཁྲོན་བདུན་ཅུ། མར་རྒྱ་མ་སུམ་ཅུ་བཅས་བཞག །ཁ་དྲོན་རི་ཁྲོད་བསམ་གཏན་གླིང་དུ་བཞུགས་ཞག་མཛད། ཁྱ་དགེ་ལེགས་བཤད་གླིང་དུ་གཙུག་ལག་ཁང་རྟེན་དང་བརྟེན་པར་བཅས་པ་རབ་གནས་དང། ཀུན་རིག་གི་དབང་སྟ་གོན་དང་བཅས་པ་གནང། བསྒྲུབ་བྱ་གཉིས་དགེ་ཚུལ། བཅུ་གཉིས་བསྙེན་རྫོགས་ལ་བཀོད། འབུལ་བ་ཕྱིར་སློག་
དང་མང་ཇའི་ཐོག་རྟ་རྒོད་མ་བཅུ་ཙམ་གྱི་འགྱེད། བླ་མ་གཉིས་ལ་རྟ་རེ་དང་བཅས་པའི་ཚན་གྲངས། ཁྲི་ཟུར་གཉིས་ལ་རྟ། སྤྱི་འཇོག་ལ་རྟ་ནོར་གསུམ། ལྷ་ཁང་ཐེབས་སུ་རྟ་ནོར་གསུམ། ཆོས་རྒྱལ་གཏོར་སྒྲུབ་ལོ་ལྟར་བསྒྲུབ་ཐེབས་སུ་རྟ་ནོར་སུམ་ཅུ་སོ་གཅིག་སོགས་ཐོའུ་ཁྲོན་སུམ་བརྒྱ་ལྷག་ཙམ་གྱི་རྩིས་དང་དེའི་སྟེང་དུ་མེ་མདའ་དགུ་བཞག །ཤིན་ཚང་སྟེང་ཁར་གྲགས་པ་བཀྲ་ཤིས་ཆོས་སྡིངས་སུ་སྤྲུལ་སྐུ་བསོད་ནམས་ཡེ་ཤེས་དབང་པོ་དང། རྟ་ཚག་རྗེ་དྲུང། ཀུན་མཁྱེན་གོང་མ་སོགས་ཀྱིས་བྱིན་གྱིས་བརླབས་པའི་བཞུགས་ཁྲིའི་སྟེང་ནས་སེར་སྐྱའི་ཁྲོམ་ཆེན་པོར་བཅུ་གཅིག་ཞལ་གྱི་དབང་སྩལ། ཚོ་གསུམ་དཔོན་པོ་སོགས་ཀྱིས་ཆིབས་བསུ་དང་ཇ་ཐབ་ཏུ་གདན་དྲངས་པ་ལྟར་སེར་སྐྱའི་ཁྲོམ་ཆེན་པོར་ཐུགས་རྗེ་ཆེན་པོའི་དབང་གནང། ཡེར་པ་དགོན་དུ་རྡོ་རྗེ་འཕྲེང་བ་ལྟར་གསང་འདུས་ཀྱི་དབང་སྟ་གོན་དང་བཅས་པ། འབུལ་བ་སློག་པ་དང་མང་འགྱེད་སོགས་སྔར་རྒྱུན་བཞིན་མཛད། ཨ་མོ་རི་ཁྲོད་རྒྱལ་ལུང་རྣམ་རྒྱལ་གླིང་དུ་སྔ་མོ་ནས་གདན་འདྲེན་ནན་ཆེར་ཞུས་པ་ལྟར་བཅུ་བཞིའི་ཉིན་ཕེབས་ནས། བཅོ་ལྔའི་སྔ་དྲོ་བཀྲ་ཤིས་ཀྱི་གསོ་སྦྱོང་དང། ཕྱི་དྲོ་བྱམས་ཆེན་གཙུག་ལག་ཁང་དང་བཅས་པ་རབ་གནས་མཛད། བཅུ་དྲུག་ནས་ཞག་ལྔའི་རིང་བདེ་ལམ་གྱི་ཁྲིད་ཆོས་ཐུན་རེ་དང། དེའི་ཞར་ལ་བཅུ་གཅིག་ཞལ་གྱི་དབང། གཙུག་ཏོར་རྣམ་རྒྱལ་གྱི་དབང། བསྒྲུབ་བྱ་ཉེར་གསུམ་རབ་བྱུང་བསྙེན་རྫོགས་ལ་བཀོད། ཅོ་ནེ་དཔོན་ཆེན་རྒྱའི་ལུགས་སྲོལ་ལྟར་གྱི་སྤྲོས་པ་རྒྱ་ཆེ་བ་དང་བཅས་དེར་བྱོན་ནས་མཇལ་བ་དང་རྣམ་རྒྱལ་མའི་དབང་གནང་བ་དུས་འགྲིག་པ་བྱུང་བས་རྟེན་འབྲེལ་ལེགས། རི་ཁྲོད་དེར་མང་ཇ་དང། འགྱེད་ཐེབས་ཐོའུ་ཁྲོན་སུམ་ཅུ། བསོད་བཏགས་བཞི་བཅུ། འདུ་ཁང་ཞིག་གསོས་ཀྱི་ཐེབས་སུ་དངུལ་སྲང་བརྒྱ། ཐོའུ་ཁྲོན་བརྒྱ་
བཅས་བཞག །འདི་སྐབས་གང་ཕེབས་དང་བཀའ་ཆོས་སོགས་ཀྱི་སྐབས་ས་གཡོ་བ་དང་འཇའ་ཤར་བ་སོགས་ཀྱི་དགེ་ལྟས་ཚད་མེད་བྱུང་བར་ཀུན་གྱིས་གླེང་ན་ཡང་ཞིབ་ཆ་མ་ངེས། དེ་ནས་ཕེབས་པར་ཅོ་ནེ་དགོན་གྱི་ཁྲི་གདན་ཟུར་ལས་སྣེ་མགོ་བ། གྲྭ་མང་བཅས་ཀྱི་ཆིབས་བསུ། ཅོ་ནེ་མདོའི་འགོ་བ་གཉིས་ཀྱིས་གཙོས་གྲོང་པའི་ཆིབས་བསུ། ཅོ་ནེ་དཔོན་པོ་ཤིང་རྟའི་འགྱོགས་སྦྱངས་ལ་སྐུ་འཁོར་མང་པོ་དང་བཅས་བསུ་བར་འབྱོར། མཆོད་རྫས་སྣ་ཚོགས་ཐོགས་པའི་གྲྭ་མང་གིས་མདུན་བདར། ཅོ་ནེ་མཁན་ཆེན་དང་དགེ་འདུན་མང་གི་སེར་སྦྲེང་དང་བཅས་མཁན་པོ་བླ་བྲང་དུ་ཕྱག་ཕེབས། བླ་དཔོན་གཉིས། མདོ་དགོན་གྱི་འགོ་བ་བཞི། བླ་མ་ལས་སྣེ་སོ་སོའི་མཇལ་ཁའི་ཐོག་འབྱོར་སྟོན་རྒྱ་ཆེ་བ་ཞུས། རྡོར་འཕྲེང་གི་དབང་གནང་བར་ཅོ་ནེ་མཁན་པོ་ངག་དབང་མཁས་བཙུན་རྒྱ་མཚོ། ཡི་ལེ་མཁན་པོ་ལྷ་རམས་པ་ངག་དབང་བཟང་པོ། དགོན་པའི་ཁྲི་གདན་ཟུར་ཡོངས་རྫོགས། ཅོ་ནེ་དཔོན་ཆེན་ཆོས་རྒྱལ་འཇིགས་མེད་སྟོབས་རྒྱལ། གཞན་ཡེར་པ་དགོན། གོང་སོ་དགོན། ནགས་མདོ་དགོན། ཁྱ་དགེ་དགོན། དམར་སླུད་དགོན། སེ་པོ་རོང་སོགས་ཞི་ངན་ཕུ་དང་ཟི་ཁྲོན་ཚུན་ཆད་ནས་གཞི་བྱེས་ཀྱི་བླ་གྲྭ་བཞི་སྟོང་ལྷག་འདུས་ཤིང། སྐབས་རེར་ལྔ་སྟོང་ལྷག་པའང་བྱུང། བར་སྐབས་སུ་ཅོ་ནེ་མདོར་དཔོན་བློན་མང་གིས་བཀུར་སྟི་རྒྱ་ཆེན་པོ་དང་བཅས་ཡཱ་མིན་ཕུག་གི་ལྷ་ཁང་དུ་ཞག་གཉིས་བཞུགས། ཡཱ་མོན་ཆེན་མོའི་ནང་དུ་དཔོན་ཡབ་སྲས་ལ་གྲུབ་རྒྱལ་ལུགས་ཀྱི་ཚེ་དབང། ཆོས་རྒྱལ་ཕྱི་ནང་གསང་གསུམ་གྱི་རྗེས་གནང་བཅས་སྩལ་ཞིང། ལྷ་ཁང་དང་ཕོ་བྲང་ལ་རབ་གནས་ཀྱི་ཆོ་ག་མཛད། དེའི་སྟེང་དུ་ཆོས་ཉན་པ་ཤིན་ཏུ་མང་པོ་
ལ། སྒྲོལ་དཀར། ཐུགས་རྗེ་ཆེན་པོ། རྟ་མགྲིན་གསང་སྒྲུབ་བཅས་ཀྱི་རྗེས་གནང། འཕོ་བ། ཕྱག་དབང་སོགས་ཚིམ་པར་གནང། སླར་ཡང་དགོན་པར་བྱོན་ནས་རྡོར་འཕྲེང་གི་མཇུག་རྫོགས་པར་མཛད། ཞལ་ནས་རྡོར་འཕྲེང་གི་ཕྱག་ལེན་བསྡུས་པར་དབང་དངོས་གཞི་ཉི་མ་བཅོ་བརྒྱད་ལ་བྱེད་པའི་སྲོལ་ཡོད་ཀྱང། ད་རེས་བྲེལ་དབང་གིས་ཉི་མའི་གྲངས་མ་ཚང་ཡང་ཆོས་ཐུན་བཅོ་བརྒྱད་བྱས་ནས་དེའི་གྲངས་ཀྱི་བདག་འཇུག་ལེན་རྒྱུ་སོགས་ཕྱག་ལེན་གྱི་རིགས་ཅུང་ཟད་ཀྱང་སླ་ཆོས་སུ་སོང་བ་མེད། བར་ནས་གཉིད་རྒྱུ་ཁ་ཤས་ལུས་སོང་བ་འདྲ་ཞེས་ཀུ་རེ་ཡང་མཛད། ཚེས་དགུའི་ཉིན་ཚོགས་སུ་ཇ་ཐུག་བཏང་སྟེ་སྐུ་འགྱེད་ཀ་ཁྲོན་རེ་དང། ཞོ་དར་རེ། སྐུ་ཞབས་མཁན་རིན་པོ་ཆེར་རྟ་ཆེན་སོགས་འབུལ་བ་ཚན་གྲངས། བླ་མ་རྣམས་ལ་ཚན་གྲངས་དང་སྤྱི་འཇོག་བཅས་བསྟར་ཏེ་ཆོས་སྲིད་ཀྱི་དགའ་སྟོན་སྤེལ་བར་མཛད་དོ། །དེ་ཡང་རྗེ་བདག་ཉིད་ཆེན་པོ་དགུང་ལོ་ཞེ་བཞི་པ་ལྕགས་འབྲུག་གི་ལོ་དཔོན་ཆེན་པོ་གོང་མ་ཞིག་གིས་ཡུལ་འདིར་མངའ་བསྒྱུར་བར་གྲགས་ལ། རྒྱལ་བ་གཉིས་པ་ཙོང་ཁ་པ་ཆེན་པོ་དགའ་ལྡན་དུ་འཇམ་དཔལ་སྙིང་པོའི་རྣམ་པར་རོལ་པའི་ཕག་ལོ་ནས་བརྩིས་པའི་ཞེ་གཅིག་པ་མྱོས་ལྡན་ཞེས་པ་ས་ཡོས་ཀྱི་དུས་སུ་ཆོས་རྒྱལ་རིན་ཆེན་ལྷུན་པོས་ཆོས་སྡེ་ཆེན་པོ་འདི་ཉིད་བཏབ་ཅིང། དེ་ནས་རིམ་པར་སྲས་ཁང་བ་སངས་རྒྱས་རྒྱ་མཚོ། ར་རོང་ཆོས་རྗེ་ངག་དབང་དཀོན་མཆོག་གྲུབ་པའི་སྡེ། རྒྱལ་བ་བསོད་ནམས་རྒྱ་མཚོ། སྤྲུལ་སྐུ་བསོད་ནམས་ཡེ་ཤེས་དབང་པོ། བ་སོ་རྗེ་དྲུང་ངག་དབང་དཀོན་མཆོག་ཉི་མ། ཀུན་མཁྱེན་འཇམ་དབྱངས་བཞད་པ་སྐུ་འཕྲེང་སྔ་ཕྱི་སོགས་སྐྱེས་ཆེན་དམ་པ་དུ་མས། དམ་པའི་ཆོས་ཀྱི་འཁོར་ལོ་རྒྱ་ཆེར་བསྐོར་ཞིང། ཁྱད་པར་རྒྱལ་བའི་འཕྲིན་ལས་པ་ཆེན་པོ་དཔོན་སློབ་གྲགས་པ་
བཤད་སྒྲུབ་པ་དེ་ཉིད་ཀྱིས་མདོ་སྔགས་ཀྱི་གྲྭ་ཚང་གཉིས་ཚུགས་ཤིང་དར་རྒྱས་སུ་མཛད་པ་ད་ལྟའི་བར་དུ་མ་ཉམས་པར་ཡོད་ལ། མི་ཡི་བདག་པོ་ཆེན་པོ་ཅོ་ནེ་དཔོན་ཆེན་རིམ་བྱོན་ཡང་འཇམ་དབྱངས་གོང་མ་ཆེན་པོའི་ལུང་ལས་ཀྱིས་མངོན་པར་མཐོ་ཞིང། ཆོས་སྲིད་ཀྱི་དཔལ་འབྱོར་གཟི་བརྗིད་རྒྱ་ཆེ་བ་དང། ཇོ་བོ་ཡབ་སྲས་དང། འགྲོ་མགོན་ཆོས་རྒྱལ་འཕགས་པ་སོགས་ཀྱི་དུས་ནས། ཆོས་གྲྭ་དུ་མ་ཚར་དུ་དངར་ཞིང། ཆུ་མང་མཁར་དང། ཐོའུ་ཇུ་མཁར་སོགས་གྲོང་དང་གྲོང་རྡལ་ཆེན་པོ་མང་པོ་འདབས་འབྲེལ་བ་སོགས་ཕུན་ཚོགས་ཀྱི་བཀོད་པ་རྒྱ་ཆེ་ཞིང་ངོ་མཚར་བའི་གནས་དེར། མགོན་པོ་གང་གིས་དམ་པའི་ཆོས་ཀྱི་འཁོར་ལོ་རྒྱ་ཆེར་བསྐོར་བ་ན། སྟོན་པ་ཟས་གཙང་གི་སྲས་པོ་བུ་རམ་ཤིང་འཕེལ་གྱི་ཚལ་དུ་བྱོན་པའམ། བྱ་རྒོད་ཕུང་པོའི་རིར་ཞབས་པད་བཀོད་པ་ལྟ་བུའི་དགའ་སྟོན་གྱིས་ས་འདི་མཛེས་པར་གྱུར་ཏོ། །སྣ་ཚོགས་སྙེ་མའི་གང་བུ་གཡུར་དུ་ཟ་བས་ནོར་འཛིན་ཁྱོན་ལ་མི་ཕྱུགས་རྒྱུ་བའི་གོ་སྐབས་འཕྲོག །འབྲས་བུས་དུད་པའི་ལྗོན་ཤིང་འཁྲིགས་པས་དགའ་བའི་དཔལ་སྟེར་རྫ་རི་བྲག་རི་རྩེ་མོ་མཁའ་ལ་བསྙེགས། །ཐུབ་པའི་བཀའ་ཁྲིམས་ཚུལ་བཞིན་སྐྱོང་རྣམས་བཤད་སྒྲུབ་ལ་བརྩོན་ཆོས་ལྡན་རྒྱལ་པོ་སྡེ་བཞིའི་དཔལ་གྱིས་སྙེམས། །ཆབ་འབངས་འགྲོ་རྣམས་སྔོན་རབས་ཆོས་སྲིད་སྲོལ་འཛིན་དགའ་བདེའི་དཔལ་ལ་ཉེར་སྤྱོད་ཉམས་དགའི་གྲོང་ཁྱེར་དེར། །མགོན་ཁྱོད་ཐུགས་རྗེ་ཉིན་མོར་བྱེད་པའི་དཔལ། །གསར་པའི་འོད་རླབས་འབུམ་གྱིས་འཕྲལ་ཕུགས་སུ། །དགེ་བའི་ལེགས་བྱས་འདབ་སྟོང་ཚལ་བཞད་པས། །སྐྱེ་དགུའི་བུང་བ་ཕན་བདེ་སྦྲང་རྩིས་ཚིམ། །ཐུབ་བསྟན་འཆི་མེད་སྐྱེད་ཚལ་ཉམས་དགའ་བར། །ཐུགས་བསྐྱེད་འཕྲིན་
ལས་ཨུཏྤལ་མིག་ཡངས་ལས། །རྣམ་གྲོལ་སྦྲང་རྩིའི་ཆང་གི་དགའ་སྟོན་གྱིས། །འགྲོ་ཀུན་མྱ་ངན་བྲལ་བའི་དགེ་མཚན་འཛིན། །གོང་སོ་དང་ནགས་མདོ་དགོན་པ་གཉིས་ནས་ཞབས་ཀྱིས་མ་བཅག་ན་ཐུགས་ནས་དོར་བ་ཡིན་ཞེས་ནན་ཆེ་བར་བརྟེན་ཅོ་ནེ་དགོན་ནས་བཏེག །བཟང་གདོང་རི་ཁྲོད་ནས་ཐབ་བསུ་ཞུས་ཤིང་གོང་སོ་དགོན་པ་བྱང་ཆུབ་གླིང་དུ་ལྷ་མོའི་རྗེས་གནང་དང་ལུང་ཁ་ཤས། ལྗགས་བསྔོ་ཕྱག་དབང་གིས་ཚིམ་པར་མཛད་དེ་ཆིབས་བསུ་སྐྱེལ་དང་ཇ་ཐབ་གཉིས་ལ་རིམ་བཞིན་དུ་ཕེབས་ཏེ་ནགས་མདོ་དགོན་པར་བབས། ཚེ་དཔག་ལྷ་དགུའི་དབང། འཕོ་བ་ལྗགས་བསྔོ་སོགས་ཆོས་སྦྱིན་གྱིས་ཚིམ་པར་མཛད། འབུལ་བ་ཕྱིར་སློག་པ་དང་མང་འགྱེད་བཅས་དཀྱུས་བཞིན་གནང། དེ་ནས་བཏེག་པར་ལམ་བར་གྱི་སྡེ་བ་སོ་སོས་ཇ་ཐབ་དང། དཔལ་ཡུལ་དཔོན་པོ་དང་སྡེ་པ་སྤྱིས་ཐབ་བསུ་དང་དངོས་འབུལ་བསྟར་བས་ལྗགས་བསྔོ། ཆོས་སྦྱིན། དགྱེས་པའི་གསུང་གིས་ཚིམ་པར་མཛད་ནས་གུར་ཡག་རི་ཁྲོད་ནས་བཞུགས། ཀླུ་ཆུའི་འགྲམ་གྱི་སྤང་ལྗོངས་སུ་རས་གུར་ཡངས་པ་ཞིག་གི་ནང་ནས་ཅོ་ནེ་དགོན་གྱི་བླ་མ་ཁྲི་གདན་ཟུར་གྲྭ་མང། གུར་ཡག་བླ་མ་གཉིས། ཨ་མོ་སྤྲུལ་སྐུ། ཅོ་ནེ་དཔོན་བློན་བཅས་སེར་སྐྱ་ཉིས་སྟོང་ལྷག་ལ་འཇིགས་བྱེད་ཀྱི་དབང་སྟ་གོན་དང་བཅས་པ། དགའ་ལྡན་ལྷ་བརྒྱ་མའི་མན་ངག་ནོར་བུའི་ཐེམ་སྐས་ཀྱི་བཤད་ལུང་བཅས་སྩལ། བསྒྲུབ་བྱ་བཅུ་དགུ་བསྙེན་རྫོགས་ལ་བཀོད་ཅིང། འབུལ་བ་ཕྱིིར་སློག་པ་སོགས་རྒྱུན་ལྟར་གནང། དེར་བཞུགས་རིང་གུར་ཡག་སྒྲུབ་སྡེ་ནས་བསྙེན་བཀུར་བ་ལ་མང་འགྱེད། རི་ཁྲོད་སྤོ་བའི་གནས་ལ་གཟིགས་ནས་གསུང་བཀོད་ཀྱང་སྩལ། བཅུ་བཞིའི་ཉིན་མདོ་དགོན་གཉིས། དགོན་རི་ཁྲོད་སོ་སོས་ཆིབས་སྐྱེལ་བཅས་
བཏེག་སྟེ་ཇ་ཐབ་དགུར་རིམ་བཞིན་འཕོ་ལུང་ལྗགས་བསྔོ་སོགས་ཆོས་སྦྱིན་གྱིས་ཚིམ་པར་མཛད་ཅིང། སྤྲོ་སྟེང་ངམ་ཀྲི་ཀྲིའི་རི་ཁྲོད་དུ་བཞུགས། གཞི་བྱེས་གང་དུ་ཡང་གུང་ཚིགས་ཡོལ་ནས་ཟས་འབྲུ་གཅིག་ཀྱང་ཞལ་དུ་མི་གསོལ་ཞིང། གཞན་གྱིས་ཇ་ཐབ་ཕུལ་བ་ལྟ་བུ་ལ་ཡང་བསྔོ་སྨོན་རེ་གནང། སྤྱིར་གསོལ་བ་བྱུང་ན་གསུང་འཕྲོ་བཅད་ནས་ཟས་ཀྱི་རྣལ་འབྱོར་ལ་གཞོལ་བར་མཛད། འདི་ལ་ཞལ་ནས། བཟའ་བཏུང་སོགས་མཆོག་གསུམ་ལ་མཆོད་པར་ཕུལ་ནས་གསོལ་བའི་ལྷག་མ་རང་གིས་ལོངས་སྤྱོད་པའི་མོས་པ་བྱས་ན་སྡིག་སྦྱོང་དུ་ཡང་སོང་ཆོག་པ་ནི། འོ་ཐུག་བསྒྲུབ་སྐབས། དེ་བཞིན་གཤེགས་པའི་ལྷག་མ་ནི། །སྡིག་པ་རྣམ་པར་སྦྱོང་ཕྱིར་གསོལ། །ཞེས་པ་ལྟར་ཡིན། དེར་མ་ཟད་རང་ལ་གང་ཡོད་དཀོན་མཆོག་ལ་ཕུལ་ན་སངས་རྒྱས་ཀྱི་མཐུས་ཡོ་བྱད་དེ་དག་བཀྲ་ཤིས་པའི་དངོས་པོར་འགྱུར་བ་ནི། འདི་ལ་རོ་མི་ཞིམ་པ་རོ་མཆོག་སྣང། །ཞེས་པས་ཀྱང་འགྲུབ་ལ། ན་བཟའ་དང་གཏོར་སྐམ་སོགས་ཟོས་པ་དང་བདུག་པ་ལ་བྱིན་རླབས་འབྱུང་བས་ཀྱང་ཤེས་གསུངས། བཅོ་ལྔའི་ཉིན་སེར་སྐྱ་མང་པོར་ཚེ་དབང། འབུལ་བ་ཕྱིར་སློག་མང་འགྱེད་བཅས་སྩལ་ཏེ་ཆོས་རབ་རི་ཁྲོད་སོགས་རི་ཁྲོད་འགའ་ཞིག་དང་ཇ་ཐབ་ལྔར་ཆོས་འབྲེལ་ཕྱག་དབང། ལུང་ནག་སྟེང་ཁ་ཐོས་བསམ་དར་རྒྱས་གླིང་དུ། ནམ་མཁའ་སྒོ་འབྱེད་ཀྱི་དབང། འབུལ་བ་ཕྱིར་སློག །མང་འགྱེད། རྒྱལ་ཏེའུ་དགོན་པ་བཀྲ་ཤིས་ཆོས་འཕེལ་གླིང་དུ་ཀུན་རིག་གི་དབང་སྟ་གོན་དང་བཅས་པ། མང་འགྱེད། གཞན་ཡང་དེ་མཐུན་བྱ་ཕུག་རི་ཁྲོད་ཡིད་དགའ་ཕུན་ཚོགས་གླིང། ཡིན་ཛ་རི་ཁྲོད་ཕུན་ཚོགས་ཆོས་འཕེལ་གླིང། ཤིང་ཁམས་རི་ཁྲོད་
དགའ་ལྡན་བཤད་སྒྲུབ་གླིང་སོགས་དེ་ཕྱོགས་ཀྱི་དགོན་སྒྲུབ་སྡེ་སེར་སྐྱ་མ་ལུས་པས་ཆོས་འབྲེལ་གང་ཞུས་ལྟར་གནང་ཡང་བྲིར་མ་ལང། ལམ་བར་གྱི་སྡེ་པ་སོ་སོའི་ཇ་ཐབ་ནས་བསྔོ་བ་འཕོ་ལུང། ཆོས་འབྲེལ་གྱིས་ཚིམ་པར་མཛད་བཞིན་བཅོ་བརྒྱད་ཀྱི་སྔ་དྲོ་ཆབ་ཚན་དུ་འབྱོར་འཕྲལ་ཆབ་བཞུགས་གནང། དེར་ཡང་ཀིརྟི་དགོན་གྱི་དཔོན་སློབ་གདན་ཟུར་གཉིས་སོགས་བསྒྲུབ་བྱ་ཉེར་གཅིག་བསྙེན་རྫོགས། འགའ་ཞིག་ལ་ཞི་ཁྲོ་སྦྲགས་སྒྲུབ་ཀྱི་ཁྲིད་ཡིག་གི་སྟེང་ནས་གསུང་བཤད། འཇམ་དབྱངས་དམར་སེར་དང། དབྱངས་ཅན་མ་དཀར་དམར་གྱི་རྗེས་གནང་བློ་གསལ་གླིང་དཔོན་སློབ་ཟུར་པ་བློ་བཟང་ཕུན་ཚོགས་སོགས་ལ་སྒྲོལ་དཀར་འོད་ཟེར་དྲུག་སྦྲགས་ཀྱི་རྗེས་གནང་དང་ལུང་ཕྲན་ཚེགས་འགའ་ཞིག་སྩལ། དེ་ནས་བཏེག་པར་ནོར་ལྗོངས་རི་ཁྲོད་དང། འབྲིང་ཁོག་སྡེ་མང་སོ་སོས་ཇ་ཐབ། ཆིབས་བསུ་སྐྱེལ་སེར་སྦྲེང་དང་བཅས་ལུང་བཟང་རི་ཁྲོད་དུ་ཞག་གསུམ་བཅག་མལ་མཛད། ལྷ་ཁང་གི་ཐེབས་སུ་དངུལ་སྲང་ཉེར་ལྔ། རས་ལྔ་བཅུ། དད་འབུལ་གྱི་འབྲུ་གང་ཡོད་སྦྱོར་འཇགས་དང་མང་འགྱེད་བཅས་གནང། ཉི་མའི་ལ་བརྒྱུད་ནས་ཕེབས་པར་ལམ་བར་གྱི་དགོན་གྲོང་རི་ཁྲོད་སོ་སོས་ཇ་ཐབ་གང་མང། ཞག་བབས་སོགས་ཀྱི་བསྙེན་བཀུར་ཞུས་ཤིང། སྒང་ཚ་རི་ཁྲོད་བཀྲ་ཤིས་བསམ་གཏན་གླིང་དུ་མི་འཁྲུགས་པའི་དབང། བདེ་ཐང་དགོན་དུ་སྐྱབས་འགྲོའི་ཁྲིད། གྲུབ་རྒྱལ་ལུགས་ཀྱི་ཚེ་དབང། མ་མགོན་གཉིས་ཀྱི་རྗེས་གནང། སྟག་ཚང་རི་ཁྲོད་དུ་གྲགས་པ་པཎ་ཆེན་ཐམས་ཅད་མཁྱེན་པ་བློ་བཟང་ཡེ་ཤེས་དང། རྒྱལ་དབང་བདུན་པ་ཆེན་པོ་རྣམ་གཉིས་ཀྱིས་མིང་སྩལ་བའི་བྱ་རྒོད་སྤུངས་རིའི་མགུལ་གྱི་རི་ཁྲོད་བྱང་ཆུབ་གླིང་དུ་ལམ་རིམ་བསྡུས་
དོན་གྱི་ཁྲིད་གནང་ཞིང། སྤྲུལ་སྐུ་བློ་བཟང་བསྟན་པའི་ཉི་མ་དགེ་ཚུལ་དུ་བསྒྲུབས། དགོན་པ་གར་ཕེབས་ལ་བབས་དང་བསྟུན་པའི་སྤྱི་འཇོག །འབུལ་བ་ཕྱིར་སློག །ཟམ་ཡ་རེ་ཡན་ཆད་ཀྱི་འགྱེད་སྤུས་གཙང་ཆ་མཚུངས་སུ་གནང། གང་ཐུགས་དགྱེས་པའི་ཉམས་ཀྱིས་འཁོར་ལོའི་ཞབས། །ཕྱོགས་འདིར་བཀོད་པའི་ངོ་མཚར་དགའ་སྟོན་གང། །རྨི་ལམ་ཉིད་དམ་ངེས་པར་བདེན་ནོ་ཞེས། །འགྲོ་སེམས་རི་དྭགས་ཐེ་ཚོམ་རྒྱར་ཚུད་ཀྱང། །དབང་ལུང་མན་ངག་སྤྲིན་གྱི་ཕང་བ་ནས། །དབང་ཕྱུག་བརྒྱད་ཀྱི་བགོ་སྐལ་བདུད་རྩིའི་ཆར། །ཕབ་པས་གདུལ་བྱ་ཁུ་བྱུག་གཞོན་ནུའི་ཚོགས། །རབ་དགས་མྱོས་པའི་དབྱངས་སྙན་སྲིད་རྩེར་སྒྲོག །ཟང་ཟིང་འབུལ་ནོད་སྤྲིན་ལྟར་འཁྲིགས་པ་ལས། །གཏོང་བའི་ལེགས་མཛད་ཆར་ལྟར་བབས་གྱུར་ཀྱང། །མཆོད་པའི་དངོས་པོའི་མཚོ་རླབས་འཕྱུར་བ་ལས། །ཟད་མེད་ནམ་མཁའ་མཛོད་ཀྱི་ན་བུན་གཏིབས། །ཀླུ་ཆུང་དགོན་ཕུན་ཚོགས་གླིང་སོགས་འགའ་ཞིག་ནས་གདན་འདྲེན་ཤིན་ཏུ་ནན་ཆེ་རུང་ནམ་ཟླ་སོགས་ཀྱི་དུས་གཏུགས་པས་རྗེས་སོར་སྟབས་འགྲིག་འགྲོ་གསུངས་ནས་ལམ་བསྲངས་ཏེ་ཕེབས་པར་བྲག་ལྕོག་གྲོང་དང། བས་རིས་གྲོང་གཉིས་ཀྱིས་ཇ་ཐབ་ཞུས་ཏེ་ཆས་པ་རྒྱ་མཁར་དགོན་དུ་བྱོན། འཕོ་ཁྲིད་དང་ལྗགས་ལུང་འགའ་ཞིག་དང་མང་འགྱེད་གནང། བསྒྲུབ་བྱ་བཅོ་ལྔ་བསྙེན་རྫོགས་ལ་བཀོད། ལམ་བར་གྱི་སྡེ་པ་སོ་སོའི་ཇ་ཐབ་དང་བཅས་བྲག་དཀར་ལྷ་ཞོལ་རི་ཁྲོད་བྱང་ཆུབ་གླིང་དུ་ཕེབས། སྐྱབས་འགྲོའི་ཁྲིད་སོགས་ཆོས་དང་ཟང་ཟིང་གིས་ཚིམ་པར་མཛད་ནས་མཛོད་དགེ་དགོན་པ་དགེ་ལྡན་བསྟན་པ་འཕེལ་རྒྱས་གླིང་དུ་གདན་དྲངས་པ་ལྟར་བྱོན། ཀུན་རིག་གི་དབང་
སྟ་གོན་དང་བཅས་པ། གསོལ་འདེབས་བླ་མ་མཆོག་གསུམ་མ་ལྟར༸ཀུན་མཁྱེན་བླ་མའི་འཁྲུངས་རབས་གསེར་ཟངས་ལས་བཞེངས་པ་སོགས་འདུ་ཁང་རྟེན་དང་བརྟེན་པར་བཅས་པ་ལ་རབ་གནས་གནད་དུ་སྨིན་པ་གནང། ཕྲན་གྱིས་མིག་ནས་མཆི་མ་ཆར་ལྟར་བབས་ཏེ་རེ་གཅིག་གི་དགུང་གེགས་མེད་པར་དགུང་ལོ་བརྒྱ་ཕྲག་གི་བར་དུ་ཞབས་པད་བརྟན་དགོས་པའི་གསོལ་འདེབས་དམ་ཚིག་ལ་བཀར་ནས་ནན་ཆེན་ཞུས་པར་དགྱེས་པའི་གསུང་དུ་མ་དང་བཅས་ཏེ་རེ་ཞིག་སེམས་བདེ་བ་བྱས་ཆོག་གསུངས། མནའ་སྐྱེལ་བ་དཀའ་གསུངས་པ་ལས་ཀྱིས་བསྒྲིབས་ནས་ཀུ་རེ་ཡིན་པར་གོ །འབུལ་བ་ཕྱིར་སློག །མང་འགྱེད་དཀྱུས་བཞིན་གནང། སྤྱི་འཇོག་ལ་མཛོ་མོ་གཅིག །བདེ་ལམ་དུས་བཟང་གི་ཐེབས་ལ་མཛོ་རྟ་དགུ། འཁྲུངས་རབས་བར་ཐེབས་ལ་རྟ་ནོར་ལྔ་བཅས་སྩལ། དེ་ནས་དགའ་ལྡན་རབ་རྒྱས་གླིང་དུ་ཕྱག་ཕེབས་ཏེ་རྟ་ནོར་ཆེ་ཆུང་སུམ་ཅུ་ཙམ་གྱི་ཟོག་འགྱེད་འཇོག་པ་དང་བཅས་གནང། དེ་ཡང། འཇམ་མགོན་ས་པཎ་གྱིས། ཡོན་ཏན་ལྡན་ན་སྐྱེ་བོ་ཀུན། །མ་བསྡུས་པར་ཡང་ངང་གིས་འདུ། །ཞེས་གསུངས་པ་ལྟར། སྐྱེ་དགུ་ཐམས་ཅད་ངང་གིས་འདུ་བ་དང། ཟང་ཟིང་གི་འབུལ་ནོད་སྤྲིན་ལྟར་འདུས་པ་དེ་ཐམས་ཅད་ཀྱང། ལུང་རྟོགས་ཡོན་ཏན་གྱི་གཟི་བྱིན་ཁོ་ན་མ་གཏོགས། གཞན་ཡིད་འགུགས་པའི་ཐབས་འཕྲུལ་ཅི་ཡང་མི་མཛད་པ་ནི་ཀུན་ལ་མཐུན་གྲུབ་ཡིན་ལ། རྣམ་ཐར་སྤྲིང་ཡིག་ལས་ཀྱང། དད་ལྡན་དུ་མས་བསྐུལ་ཏེ་མདོ་སྨད་ཀྱི། །ཕྱེད་ཙམ་བསྐོར་ཀྱང་དངོས་འབུལ་གང་བྱུང་ལས། །ཕ་རོལ་འདྲིད་པའི་ཐབས་དང་འཕྲུལ་མ་བཀྱེ། །ལུགས་གཉིས་མཁྱེན་རྒྱ་ཆུང་བའི་རྣམ་ཐར་ཡིན། །ཞེས་གསུངས་པ་ལྟར་རོ། །དེས་ན་ཕྱོགས་གང་དུ་ཕེབས་པའི་ལམ་བར་ཐམས་ཅད་དུ། དེ་དང་དེར་འཁོད་པའི་སྐྱེ་བོ་མཆོག་
དམན་མཐའ་དག་གིས་བསུ་སྐྱེལ་ཇ་ཐབ། འབུལ་ནོད་སོགས་གཞན་གྱིས་རྟིང་བསྐུལ་ལ་མི་ལྟོས་པར་ངམ་ངམ་ཤུགས་ཀྱིས་འདུ་ཞིང། གཏིང་ནས་དད་གུས་ཤུགས་དྲག་པོས་ལུང་རྗེས་གནང། འཕོ་བ་བསྔོ་སྨོན་སོགས་རང་གི་འདོད་མོས་དང་མཐུན་པའི་བགོ་སྐལ་ནོད་པ་དག་ནི་བུང་བས་མེ་ཏོག་ལས་སྦྲང་རྩི་ལེན་པ་དང་ཀུན་ནས་མཚུངས་ལ། ཁྲོམ་ཆེ་ཆུང་གང་ལ་ཡང། ཕྱག་དབང་བྱིན་རླབས། བུམ་ཆུ། སྲུང་མདུད། ཞལ་ཕུ་སོགས་གནང་བ། གཟུངས་དང་མཚན་སྔགས་རྣ་ལམ་དུ་སྒྲོགས་པ། མ་ཎི་སོགས་ཀྱི་ལུང་སྩོལ་བ། ཁ་འདོན་བསྐོར་བ། ཉལ་ཕྱག །ལངས་ཕྱག །མདོ་ཀློག །མཆོད་འབུལ་རྟེན་བཞེངས་སོགས་གསུང་བརྟགས་ཚུན་ཆད་ཀྱི་སྒོ་དུ་མ་ནས་ཆོས་ལ་བསྐུལ་ཏེ་ས་ལ་གསེར་གྱི་ཚུལ་དུ་གནས་པའི་རྣམ་དཀར་གྱི་ས་བོན་རྣམས་དགེ་བའི་ངོ་བོར་སྤེལ། དགེ་བ་ཕྲ་མོ་རྣམས་ཐབས་མཁས་ཀྱིས་གོང་དུ་སྤེལ། ཀུན་ཀྱང་བྱམས་བརྩེའི་ཤུགས་ཀྱིས་བྱང་ཆུབ་ཏུ་བསྔོས་ནས་མི་ཟད་པའི་གཏེར་དུ་བསྒྱུར་བ་ནི་བཏང་སྲུང་དག་སྤེལ་གྱི་སྤྱོད་པ་བསྔགས་པར་འོས་པ་ཡིན་ཏེ། ཏིང་ངེ་འཛིན་རྒྱལ་པོ་ལས། བྱེ་བ་ཁྲག་ཁྲིག་དཀྲིགས་པའི་ཞིང་དག་ན། །མཆོད་པ་རྣམ་མང་དཔག་མེད་ཇི་སྙེད་དེ། །སྐྱེས་མཆོག་རྣམས་ལ་དེ་ཡིས་རྟག་མཆོད་པས། །བྱམས་པའི་སེམས་ཀྱི་གྲངས་དང་ཆར་མི་ཕོད། །ཅེས་གསུངས་པ་ལྟར་རོ། །མཆོག་དམན་འགྲོ་ལ་བགྲང་དུ་ཡས་པ་ཡི། །མོས་པ་ཐ་དད་གངྒཱའི་བྱེ་སྙེད་ལ། །དེ་སྙེད་བློ་དང་འཚམ་པར་འཇུག་པ་ཡི། །ཐབས་མཁས་སྤྱོད་པ་དཔག་བསམ་ལྗོན་ཤིང་བཞིན། །མོས་ལྡན་གླིང་བཞིའི་མཁའ་ལ་བགྲོད་པ་དུས་ལས་ཡོལ་བ་མེད། །འཕྲིན་ལས་བསིལ་བའི་ཟེར་འཕྲེང་འཛིན་མའི་ཁོར་ཡུག་མཉམ་པར་འབེབས། །བྱིན་རླབས་བདུད་རྩིའི་དཔུང་གིས་ཉེར་
འཚེ་ཚ་གདུང་ལྷག་མེད་འཇོམས། །ཐུགས་རྗེའི་ཟླ་གཞོན་འདི་ཀོ་སྙིང་གི་ཀུནྡ་དགའ་བའི་དཔྱིད། །དེ་ནས་བརྒྱད་པའི་བཅུ་གསུམ་ལ་གདན་སར་འབྱོར། མཁྱེན་རབ་ཀྱི་དབང་ཕྱུག་ཨ་མཆོག་དགེ་བཤེས་སྤྲུལ་སྐུ་དཀོན་མཆོག་བསྟན་པའི་རྒྱལ་མཚན་ལ་འཇིགས་བྱེད་བཅུ་གསུམ་མ་དང་དཔའ་གཅིག །བདེ་མཆོག་ལྷ་ལྔ་དང་ལུས་དཀྱིལ། བཀའ་གདམས་ཐིག་ལེ་བཅུ་དྲུག །ནམ་མཁའ་སྒོ་འབྱེད། གདུགས་དཀར་སོགས་ཀྱི་དབང། དབྱངས་ཅན་མ་དཀར་མོ། ཤྲ་མ་ཎ། གཏུམ་ཆེན་སོགས་ཀྱི་རྗེས་གནང། བསྙེན་རྫོགས་དང་རྣམ་རྒྱལ་མཆོད་པ་སོགས་འདོད་མོས་བཞིན་གནང། ཅུན་གར་དགེ་སློང་ཆོས་འཕེལ་དང། ཚ་ཁོ་ཏཱ་རོ་སངས་རྒྱས་འབུམ་སོགས་ཏཱ་རོ་གསུམ། གཞན་ཆོས་ཉན་པ་དུ་མའི་ངོར། སླར་ཡང་འཇིགས་བྱེད་ཀྱི་དབང། བདེ་མཆོག་ནག་པོའི་དབང། ཨུ་རད་ཞབས་དྲུང་ཡེ་ཤེས་སྨོན་ལམ་སོགས་མི་ལྔ་ཙམ་ལ་ཞལ་སྒྲུབ་དུས་ཀྱི་མགོན་པོ་ཞལ་ཁྲ་ཅན་ཐུན་མོང་བ། བསྙེན་དུས་ཀྱི་མགོན་པོ། སྒྲུབ་དུས་ཐུན་མོང་མ་ཡིན་པ། དཀར་པོ་ཚེ་འཕེལ། སེར་པོ་བསོད་ནམས་རྒྱས་བྱེད། དམར་པོ་དབང་སྡུད། ནག་པོ་ཉམས་པ་སྒྲོལ་བྱེད། རྒྱས་བྱེད་སེར་པོ་ཐུན་མོང་མ་ཡིན་པ་ལྷ་དགུ། མགོན་པོ་སེདྒེ་ནག་པོ། དཔལ་མགོན་གདོང་བརྙན་ཅན། དཔལ་མགོན་ཁྱུང་ཞལ་ཅན། བྲམ་ཟེ་མངགས་གཏད་བཅས་ཀྱི་རྗེས་གནང་སོགས་སྩལ་ནས་བཅད་རྒྱ་ལ་བཞུགས། བཅུ་གཅིག་པའི་ཚེས་གསུམ་གྱི་ཉིན་ཀུན་གཟིགས་མཆོག་སྤྲུལ་རིན་པོ་ཆེ་དང་ལྷན་ཅིག་པར་མགོན་ཁང་དང། སྐུ་གདུང་ལྷ་ཁང་དུ་ཕེབས་ཏེ་གཏོར་བསྔོས་འཕྲིན་བཅོལ། གསོལ་འདེབས་ཤུགས་དྲག་དང་བཅས་ཏེ་རྗེ་བཙུན་དམ་པ་འཇིགས་མེད་རིགས་པའི་སེདྒེའི་སྤྲུལ་བའི་སྐུ་བརྟག་བསྒྲིལ་གྱིས་གསལ་ཆ་མཛད། སྤྲུལ་བའི་སྐུ་སྐལ་བཟང་དགེ་ལེགས་རྒྱ་
མཚོ་ལ་ནཱ་རོ་མཁའ་སྤྱོད་ཀྱི་བྱིན་རླབས་དང། ཧལ་ཧ་ཇ་སག་ཐུ་ཧན་གྱི་ཐོ་ཡོན་བླ་མ་དཀོན་མཆོག་བསྟན་པ་དར་རྒྱས་སོགས་འགའ་ཞིག་ལ་བཀའ་ཆོས་ཕྲན་ཚེགས་དང་ཐོ་ཡོན་བླ་མ་ཁོང་ཐུགས་གཉེར་གྲུབ་ནས་རང་ཡུལ་དུ་ཕེབས་རྒྱུར་ཐོན་ཕྱག་དང་དགྱེས་པའི་གསུང་གི་ཕེབས་སྒོ་བླ་ན་མེད་པ་སྩལ་ཏེ། ཚེས་བཞི་ནས་བཅད་རྒྱ་མཛད། བཅུ་གཉིས་པའི་ཉེར་བཞི་ལ་སྐུ་མཚམས་གྲོལ་ཏེ་ཕྱོགས་འགྲུལ་རྣམས་ལ་འབྱོར་ཕྱག་དང། བཀའ་ཆོས་ཐོར་བུ་འགའ་ཞིག་འདོད་མོས་བཞིན་གནང། ལོ་འདིར་གཞི་བྱེས་སུ་བསྙེན་རྫོགས་སུམ་བརྒྱ་བཅུ་དྲུག །དགེ་བསྙེན་རབ་བྱུང་དགེ་ཚུལ་དོན་དགུའི་ཉོན་མོངས་གཡུལ་ངོ་ཕམ་པའི་རྒྱལ་མཚན་གྱིས་ཐུབ་བསྟན་ཁང་བཟང་མཛེས་པར་བསྒྲུབས། དགུང་ལོ་དྲུག་ཅུ་པ་ལྕགས་སྦྲུལ་གྱི་ཚེས་གཏོར་སོགས་དཀྱུས་ལྟར་དང། བྱང་འགྲུལ་སོ་སོས་གསེར་ཟངས་ལས་བསྒྲུབས་པའི་སྐུ་བརྙན། གོས་དར་དངུལ་སོགས་ཀྱི་མཆོད་སྤྲིན་དང་བཅས་བརྟན་བཞུགས་གསོལ་འདེབས་རིམ་པར་ཞུས། འདོད་མོས་བཞིན་དགའ་ལྡན་ལྷ་བརྒྱ་མའི་ཁྲིད། མཁའ་སྤྱོད་མའི་བྱིན་རླབས། སྐྱབས་འགྲོའི་ཁྲིད། གྲུབ་རྒྱལ་ལུགས་ཀྱི་ཚེ་དབང། ཚེ་ལྷ་རྣམ་གསུམ། བཅུ་གཅིག་ཞལ། ཁྱུང་ནག །སེང་གདོང་མ། ལྷ་མོ། རྟ་མགྲིན་དམར་ཆུང། བེག་ཙེ། བྱམས་འཇམ་དབྱངས། སྒྲོལ་དཀར་འོད་ཟེར་དྲུག་སྦྲགས། ཛམ་དཀར་ལྷ་ལྔ་སོགས་ཀྱི་རྗེས་གནང། ལམ་མཆོག་སྙིང་པོའི་ཁྲིད་བཅས་སྩལ། ཐོན་ཕྱག་རྒྱས་པར་གནང་ནས་དགའ་བས་རང་ཡུལ་དུ་ཐེགས། སླར་ཡང་བྱང་འགྲུལ་རྗེས་མ་རྣམས་ལ་བཅུ་གཅིག་ཞལ་གྱི་དབང། ཚེ་རྟ་ཟུང་འབྲེལ་གྱི་རྗེས་གནང། འགྲེལ་པ་དོན་གསལ་གྱི་ལུང་སོགས་གང་འདོད་ཀྱི་ཆོས་བཀའ་དང།
ཐོན་ཕྱག་གནང་སྟེ་ཟླ་མཇུག་བཅད་རྒྱ་མཛད། གཉིས་པའི་ཚེས་བདུན་ལ་སྐུ་མཚམས་གྲོལ་ཏེ་ཐུའུ་བཀྭན་བླ་བྲང་གི་མི་སྣ་རྣམས་ལ་མཇལ་ཕྱག་གནང། ཐུའུ་བཀྭན་མཆོག་སྤྲུལ་རིན་པོ་ཆེ་དབུས་སུ་ཕེབས་ནས་སློབ་གཉེར་གནང་རྒྱུར་བསླབ་བྱ་ཞིག་ཞུས་པར། ལན་དུ་ཞུ་ཆུང་ཕུལ་དོན། ཐུགས་གཉེར་གནང་ཚུལ་གྱི་བསླབ་བྱ་དགོས་གསུངས་པ། ཀུན་མཁྱེན་གོང་མའི་གསུང་དང་ངེད་ཀྱིས་ཀྱང་དེ་འདྲའི་བསླབ་བྱ་ཞིག་བྲིས་ཡོད་པ་དེ་དག་གིས་འཐུས། ཚིགས་བཅད་དུ་འདྲི་མི་དགོས། དོན་གྱི་སྙིང་པོ་ནི་ཐག་རིང་པོ་ནས་དཀའ་ཚེགས་ཀྱིས་ཕེབས་པའི་དགོས་དོན་གཙོ་བོ་ནོར་བུའི་གླིང་དུ་ཕྱིན་པའི་དེད་དཔོན་བཞིན་ཐུགས་གཉེར་ཕུལ་དུ་ཕྱིན་པ་ཞིག་གནང་དགོས། དེའང་དཔེ་གཟིགས་ཙམ་གྱིས་གོ་མི་ཆོད་པས་གཞུང་རང་རང་གི་རྩ་བ་དང་ཐལ་འཕྲེང་ཐུགས་འཛིན་དང་སྐྱོར་སྦྱངས་དཔྱད་པ་དང་སྦྲགས་པ། དེའི་སྟེང་ནས་རྩོད་པ་བདར་ཤ་ཆོད་པ་གནང་དགོས། ཡིག་ཆའང་གཞན་འགའ་ཞིག་བལྟས་མ་ཐག་གོ་བདེ་ཞིང་མདོར་འདུ་བ་ལྟ་བུ་ཡོད་ནའང། དང་པོར་གོ་བ་དེ་ལས་ལྷག་པའི་ཡུན་དུ་བལྟས་ཀྱང་ཕར་འབྱམས་ནས་ཟབ་རྒྱས་སུ་འགྲོ་རྒྱུ་མེད། ཀུན་མཁྱེན་བླ་མའི་ཡིག་ཆ་འདི་ཚིག་དུམ་ཆོད་དང་འགའ་ཞིག་བར་སྐབས་དེར་མ་འབྲེལ་བ་ལྟ་བུ་ཡོད་ཀྱང། ཤིང་རྟ་ཆེན་པོའི་གཞུང་མང་པོ་ལ་བལྟས་ཏེ་ཕྱིར་འཁོར་བ་ན་འདིའི་རྩ་བ་འདི་ལ་ཐུག་པར་འདུག་སྙམ་དུ་དེ་དག་གི་སྒོ་ནས་ཡིག་ཆ་ལ་ཡིད་ཆེས་དང། ཡིག་ཆའི་སྟེང་ནས་དེ་ཐམས་ཅད་ཀྱི་ཁོག་འགྲིག་པས་རབ་འབྱམས་གསུང་རབ་ཀུན་ལ་བལྟ་བའི་མིག་ཏུ་འགྲོ་ལུགས་ཤིག་ཡོད། ཕར་ཕྱིན་ལ་འགྲེལ་པ་དོན་གསལ་ལྟ་བུ་དང་པོར་བལྟས་ཚེ་གྲངས་འདྲེན་ཙམ་ལྟ་བུར་ཡོད་ཀྱང་ཤིན་ཏུ་འདྲིས་ན་མཆོད་བརྗོད་སྐོར་ཅུང་ཟད་འཕྲོས་ཆེ་བ་མ་གཏོགས་ཐལ་འཕྲེང་དུ་
ཡོད་པ་ཐམས་ཅད་རྣམ་བཤད་གསེར་འཕྲེང་གཉིས་ལ་ཐུག་ཅིང། དེ་གཉིས་འགྲེལ་པའི་ཚིག་ལ་མ་འཁྲིས་པ་མེད་པས། འགྲེལ་པ་སྐྱོར་ཐེངས་གཅིག་གི་ཁོངས་སུ་ཕར་ཕྱིན་གྱི་རྩོད་པ་ཐམས་ཅད་དྲན་ཐུབ་པ་ཞིག་བྱུང་ན་ཉམས་འོག་ཏུ་ཚུད་པ་ཡིན། དབུ་མ་ལ་དགོངས་པ་རབ་གསལ་གྱི་ས་བཅད་སྟེང་ནས་འཇུག་པའི་དོན་ཚན་ཐམས་ཅད་ངེས་པ་བྱུང་ན་དབུ་མའི་རིགས་པ་གཙོ་ཆེ་ཤོས་རགས་རིམ་ཙམ་དེར་ཚང་ཡང། ཀླུ་སྒྲུབ་བློ་མཚོ་ཤིན་ཏུ་རྒྱ་ཆེ་ཁ་དོག་གིས་འཇིགས་གསུང་དོན། རྩ་ཤེས་ཀྱིས་རྣམ་གྲངས་རེ་རེའང་ཡང་ཡང་བསྐྱར་ནས་གསུངས་པས་བལྟས་འཕྲལ་ཟློས་པ་ལྟ་བུར་ཡོད་པ་དེ་རྒྱུས་ལོན་ན་ཚིག་རེ་རེ་བཞིན་གྱིས་རིགས་པའི་ཟུར་ཇེ་རྣོ་དང་ཇེ་ཟབ་ཀྱིས་གཏུགས་ས་མེད་པར་འགྲོ་བས། སྟོང་ཉིད་ལ་ཟབ་པ་ཞེས་པ་དེར་མྱོང་ཐོག་ནས་གོ་བ་རྙེད་པ་ཞིག་བྱུང་ན་དབུ་མ་འཇུག་པ་རྩ་ཤེས་ལ་ཟབ་པའི་སྒོ་ནས་འཇུག་ཅེས་པའི་དོན་དེ་བྱུང་བ་ཡིན། རྩ་ཤེས་ཀྱི་རིགས་པ་ལ་ཟུར་སྣོན་བྱེད་རིགས་ཚོགས་གཞན་རྣམས་ཀྱང་ཡིན་ལ། རྗེས་འཇུག་གི་གཞུང་གི་ཁྲོད་ན་རིགས་པའི་ཟུར་སྣོན་བྱེད་བཞི་བརྒྱ་པ་ལས་ལྷག་པ་མེད། མཛོད་འདུལ་གཉིས་ལ་དབུ་ཕར་ལྟ་བུའི་གཏིང་བཙལ་གཏོང་རྒྱུ་མེད་ཀྱང་རྣམ་གྲངས་ངེས་ཤིང་ཤིན་ཏུ་འདྲིས་པ་གལ་ཆེ། མཛོད་གནས་དང་པོ་ལྟ་བུར་བགྲོ་གླེང་གཏོང་ཚེ་ཁས་བླངས་ཤོར་བ་ལ་གནས་དང་པོའི་ལུང་འདྲེན་རྒྱུ་ཡོད་པས་གོ་མི་ཆོད། གནས་གཅིག་གི་སྟེང་ནས་ཁས་བླངས་ཤོར་དུས་གནས་བརྒྱད་ཀའི་ནང་ནས་ལྷུ་མ་འགྲིག་པ་རེ་ངེས་པར་བྱས་ཡོད་པས་དེ་ཐམས་ཅད་ནས་གནོད་བྱེད་གཏོང་རྒྱུ་དང། དེའི་རེ་རེ་བཞིན་རྩ་བའི་ལུང་རེ་འདྲེན་རྒྱུ་མེད་པ་ཡང་མི་སྲིད་པས་དེ་ལྟར་གོང་འོག་ཐམས་ཅད་བསྡེབས་ཤེས་པ་
བྱུང་ན་མཛོད་ལ་གོམས་ཆ་སོང་བ་ཡིན། འདུལ་བའང་མདོ་རྩར་བལྟས་ཚེ་རྩོད་རྒྱུ་དང་གཉིས་ཀ་ཕྱོགས་མི་གཅིག་པ་ལྟ་བུར་ཡོད་ཀྱང། མཚོ་ཊཱིཀ་ལྟ་བུའི་སྟེང་ནས་གོང་འོག་གི་གནང་བཀག་སོ་སོར་ཞིབ་ཆ་འབྱེད་ལུགས་དང། ཡན་ལག་ཚང་མ་ཚང་གི་ཁྱད་པར་ཁ་འགེངས་ལུགས་ཐམས་ཅད་ངེས་པའི་ཚེ་མཐའ་དཔྱོད་དུ་གང་ཡོད་ཐམས་ཅད་རྩ་བ་རང་གི་ནང་དུ་ཧྲུག་གེ་ཚང་བ་ཞིག་འབྱུང། རྣམ་འགྲེལ་ད་ལྟ་ཀུན་ན་གཟུགས་བརྙན་ཙམ་ལས་མེད་པས་རིགས་ལམ་ཕྲ་མོའི་ཟུར་དཔྱིས་ཕྱིན་པར་ཐོན་པར་དཀའ་ནའང་ལེའུ་གཉིས་པའི་ཐར་པ་དང་ཐམས་ཅད་མཁྱེན་པའི་སྒྲུབ་ཚུལ་གྱི་རྣམ་གཞག་སྤྱི་པམ་གཅིག་ཐུགས་ལ་འཇགས་པ་མེད་མི་རུང་ཡིན། དེ་ལྟར་བཀའ་པོཏ་ཆེན་པོ་ལྔ་ལ་རྩ་འགྲེལ་མཐའ་དཔྱོད་ཐམས་ཅད་གུང་འགྲིག་པའི་གོ་བ་གཏིང་ཚུགས་པ་དང། ཚིག་འཁྲི་ཕྲ་མོ་ཚུན་ཆད་ཀྱང་ཆོད་པའི་རིགས་ལམ་གྱི་བདར་ཤ་ཆོད་པ་མང་དུ་ཐོས་པའི་ཕ་རོལ་ཏུ་སོན་པ་ན་གཞུང་ལུགས་གདམས་པར་འཆར་ཚུལ་ཡང། གསུང་རབ་ཐམས་ཅད་ཀྱི་དགོངས་འགྲེལ་བྱང་ཆུབ་ལམ་གྱི་རིམ་པ་ཡིན་ཞིང། དེའི་དོན་སྐྱེས་བུ་ཆུང་འབྲིང་གི་ངེས་འབྱུང། ཆེན་པོའི་བྱང་ཆུབ་ཀྱི་སེམས་དང་ཡང་དག་པའི་ལྟ་བ་སྟེ་ཟབ་རྒྱས་ཀྱི་རིམ་པ་གཉིས་སུ་འདུ། ངེས་འབྱུང་གིས་འཁོར་བ་སྤྱི་བྱེ་བྲག་གི་སྡུག་བསྔལ་ལ་འཇིགས་ཤིང་སྐྲག་ནས་ཡིད་འབྱུང་བར་བྱེད་པ་ལ་ཁམས་གསུམ་འཁོར་བའི་གནས་ཚུལ་རང་ཤེས་དགོས། དེ་མངོན་པ་མཛོད་དུ་སྣོད་བཅུད་ཀྱི་འཇིག་རྟེན། ཕུང་ཁམས་སྐྱེ་མཆེད་སོགས་བཤད་པ་དེ་ཡིན། དེ་ལ་འཇིགས་ནས་སྐྱབས་སུ་འགྲོ་བ་མོས་མནོ་ཙམ་མ་ཡིན་པར་སྐྱབས་ཀྱི་ཡོན་ཏན་དངོས་སྟོབས་ཀྱི་རིགས་པས་འགྲུབ་པ་ཞིག་དགོས་ཤིང། དེ་ཚད་མ་རྣམ་འགྲེལ་ལ་མ་བརྟེན་པའི་
ཐབས་མེད། འཁོར་བ་མཐའ་དག་ལས་ངེས་པར་འབྱུང་བའི་ཚུལ་ཁྲིམས་ལ་སློབ་ཚུལ་འདུལ་བ་རང་ཡིན་ཞིང། བདེན་བཞིའི་འཇུག་ལྡོག་བཤད་ཚུལ་ཡང། བཀའ་འཁོར་ལོ་དང་པོ་བདེན་བཞིའི་ཆོས་འཁོར་གྱི་དགོངས་འགྲེལ་གྱི་གཙོ་བོ་མངོན་པ་མཛོད་ཡིན་པས་དེའི་སྟེང་ནས་ཤེས་དགོས། སྐྱེས་བུ་ཆེན་པོའི་བྱང་ཆུབ་ཀྱི་སེམས་དང་སྤྱོད་པ་ཕྱིན་དྲུག་ལ་སློབ་ཚུལ་སོགས་ཕར་ཕྱིན་ལ་བརྟེན་ནས་གོ་དགོས་ལ། ཤེར་མདོ་ཙམ་མ་ཡིན་པར་ཐེག་པ་ཆེན་པོའི་མདོ་སྡེ་མཐའ་དག་གི་དོན་ཉམས་སུ་ལེན་ཚུལ་མདོ་སྡེ་རྒྱན་གྱི་སྟེང་ནས་ཤེས་དགོས་པས། རྒྱ་ཆེ་བའི་ལམ་གྱི་རིམ་པ་ཐམས་ཅད་མཐའ་ཆོད་པར་ངེས་པ་ལ་རྒྱན་གཉིས་སྦྱར་ཏེ་གཏན་ལ་འབེབས་དགོས། ཟབ་མོ་ལྟ་བའི་ལམ་གྱི་རིམ་པ་ནི་དབུ་མའི་སྟེང་ནས་ཤེས་དགོས་པ་ཀུན་ལ་རླུང་ལྟར་གྲགས་པ་དེ་ཡིན། དེ་ལྟར་གསུང་རབ་ཐམས་ཅད་ཀྱི་དགོངས་པ་བཀའ་པོཏ་ཆེན་པོ་ལྔའི་སྟེང་ནས་མདོ་ཕྱོགས་ཀྱི་ལམ་གྱི་རིམ་པའི་ལུས་གཅིག་ཏུ་ངེས་པ་རྙེད་པ་ན། འོ་མའི་ནང་ནས་མར་ལེན་པ་བཞིན་ཟབ་པ་དང་རྒྱ་ཆེ་བའི་ལམ་དེ་གཉིས་ཀྱི་ཁོངས་ནས་སྔགས་ཀྱི་མཚན་བཅས་མཚན་མེད་གཉིས། བསྐྱེད་རྫོགས་གཉིས། སྒྱུ་ལུས་འོད་གསལ་གཉིས། དེ་གཉིས་དབྱེར་མི་ཕྱེད་པ་ཟུང་འཇུག་དང་བཅས་པ་ཐམས་ཅད་ལ་ངེས་པ་ཁྱད་པར་ཅན་སྙིང་པོ་དང་ཡང་སྙིང་གི་ཚུལ་དུ་ལོན་པ་འབྱུང་བས། དེ་ལྟར་འཇམ་མགོན་བླ་མའི་མདོ་སྔགས་ཀྱི་བསྟན་པ་ཡོངས་སུ་རྫོགས་པའི་གནད་ལ་མངའ་བསྒྱུར་ཏེ། འཆད་རྩོད་རྩོམ་གསུམ་གྱི་སྒོ་ནས་ཕྱོགས་མཐར་སྤེལ་ཞིང། སྐལ་ལྡན་གྱི་གདུལ་བྱ་མཐའ་དག་རྣམ་གྲོལ་ནོར་བུའི་གླིང་དུ་འཁྲིད་པའི་དེད་དཔོན་མཚུངས་ཟླ་མེད་པར་འགྱུར་བ་ཞིག་ཅི་ནས་
ཀྱང་བཀའ་དྲིན་སྐྱོང་བར་ཞུ། ཞེས་སྩལ་ཞིང་གང་ཅིའི་བཀོད་ཁྱབ་ཞུས་པའང་ཞིབ་པར་གནང། འདི་རིགས་སྨྲ་དོན་གཉེར་བ་རྣམས་ལ་མཁོ་བར་བསམ་ནས་ཇི་ལྟ་བ་བཞིན་དུ་བྲིས་པ་ཡིན་པས་རྒྱ་ཆེར་རོལ་བ་ལས། འདོད་པ་ཐམས་ཅད་མི་གཅིག་གིས་ཐོབ་ཀྱང། །དེས་ཀྱང་ཆོག་པ་མེད་པར་དེར་ཡང་འཚོལ། །ཞེས་པ་ལྟར་འདོད་པའི་ཡོན་ཏན་གྱི་ཉེས་དམིགས་དང། འདོད་པ་དུག་འདྲ་ཉེས་པ་མཐའ་ཡས་ལྡན། །ངར་སྣབས་རུལ་བ་བཞིན་དུ་ཁོ་བོས་བོར། །ཞེས་གསུངས་པ་ལྟར་ཐུབ་པ་མཆོག་གི་རྣམ་ཐར་དྲན་ནས་ཚུལ་གནས་ཐོས་བསམ་ལ་བརྩོན་པར་བྱས་ན་དོན་ཆེ་བ་ཡིན་ཏེ། མདོ་ལས། འཇིག་རྟེན་གཏེར་ཆེན་རྣམས་ནི་རྒྱལ་པོ་དང། །རྐུན་པོ་མེ་ཆུ་བསླུས་པས་ཟད་པར་འགྱུར། །དེ་བཞིན་གཤེགས་པ་རྣམས་ཀྱི་ཐོས་གཏེར་ནི། །བསྐལ་པ་བྱེ་བ་མང་པོར་ཆུད་མི་ཟ། །ཞེས་གསུངས་པ་ལྟར་རོ། །ལོག་སྨྲ་འདར་བྱེད་རིགས་པའི་རྒྱལ་རྔ་དང། །འགྲོགས་པའི་གསུང་ངག་སྣ་ཚོགས་བརྗོད་པ་ཀུན། །བཀའ་པོཏ་རྒྱུད་ཀྱི་དབྱངས་སུ་འབབ་པ་འདིས། །གསུང་རབ་གདམས་པར་ཤར་བ་ཅིས་མི་དཔོག །མ་སྨད་བསམ་དད་སྦྱོར་བ་ཕུན་ཚོགས་ལས། །རང་གཞན་དོན་གཉིས་ཕུན་ཚོགས་མངོན་གྱུར་པས། །ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་པ་ཁྱོད་མིན་སུ། །དོན་གཉེར་ཅན་འགའ་ཞིག་ལ་འདོད་ཆོས་ཕྲན་ཚེགས་གནང་ནས་སླར་ཡང་བཅད་རྒྱ་མཛད། ཡིད་དགའ་ཆོས་འཛིན་གྱི་རི་ཁྲོད་པའི་གྲངས་མཉམ་གྱི་ཆས་འཇུག་དང་མི་འཁྲུགས་པའི་གོས་སྐུ་གསར་དྲུབ་ཀྱི་དབུ་བརྩམས། བཅད་རྒྱའི་ཁོང་ནས་རེབ་ཙ་བཀའ་འགྱུར་བ་དཀོན་མཆོག་དམ་ཆོས་ཡར་འཕེལ་ཕུན་ཚོགས་གོང་འཕེལ་དང། ལྷ་ཁང་ལུང་སྤྲུལ་བའི་སྐུ་དཀོན་མཆོག་འཕྲིན་ལས་རྒྱ་མཚོ་བསྙེན་རྫོགས། ཞབས་དྲུང་
དཀོན་མཆོག་རྒྱ་མཚོ། ཞབས་དྲུང་དཀོན་མཆོག་ཡར་འཕེལ་གཉིས་ལ་དུག་དབང་དང། མགོན་པོ་སྙིང་ཞུགས་ཀྱི་རྗེས་གནང་བཅས་སྩལ། ཚོགས་ཆེན་ནས་ཞབས་བརྟན་དུ་སྒྲོལ་དཀར་སྙིང་པོ་བསྒྲུབས་པར་བསོད་བཏགས་རེ་དང་དོང་ཚེ་ཁྲོན་རེའི་འགྱེད་བཏང་བར་སྐལ་བ་སྟོང་ཕྲག་གསུམ་མ་ལོང་ཙམ་སོང། བཞི་པའི་ཡར་ངོར་རྣམ་རྒྱལ་མཆོད་དབུ་དང་རབ་བྱུང་བསྙེན་རྫོགས་འགའ་གནང་ནས་སླར་ཡང་བཅད་རྒྱ་མཛད། ཆར་ཤིན་ཏུ་དཀོན་ཞིང་རིམས་ནད་སྣ་ཚོགས་མཆེད་པ་སོགས་ཀྱིས། ཚོགས་འདུ་ནས་ཞུས་པ་བཞིན་ལྔ་པའི་བཅོ་ལྔའི་ཉིན་གསོ་སྦྱོང་ལ་སོ་ཐར་གྱི་མདོ་གནང་བས་དེ་ནུབ་ནས་ཆར་གྱི་རྒྱུན་རྩོལ་མེད་དུ་བབས། ནད་རིམས་སྣ་ཚོགས་ཆད་པ་སོགས་བྱིན་རླབས་ཀྱི་བདེན་པ་ཀུན་གྱིས་མངོན་སུམ་དུ་མཐོང། སྔོན་དུས་དགེ་ལུགས་ཙམ་དུ་མ་ཟད། ས་སྐྱ། བཀའ་བརྒྱུད། རྙིང་མ་གང་ལ་ཡང་གོལ་ཤོར་གཉིས་ཀའི་མཐའ་སྤངས་ཏེ་མདོ་སྔགས་དབུ་མའི་ལམ་གྱི་རྟོགས་པ་བརྙེས་པའི་མཁས་གྲུབ་རྒོད་པོ་མཁའ་ལ་ལྡིང་བ་ལྟ་བུ་བྱ་ཁྱུ་འཕུར་བ་འདྲ་བ་བྱུང་ཡང་དེང་དུས་ཞྭ་ཡི་མདོག་ཙམ་གྱིས་ཕྱེ་སྟེ་ཞྭ་དམར་གྱོན་ཚད་གྲུབ་མཐའ་འདྲེས་པར་སྤྱོད་ཅིང། སྡེ་དགོན་གྱི་ཕྱོགས་རིས་ཙམ་མ་གཏོགས་རང་ལུགས་ཅི་ཡང་ངོས་མ་ཟིན་པའི་དུས་འདིར་འདི་ལྟ་བུའི་བསླབ་གསུམ་ཟུང་འཇུག་དང། བཤད་སྒྲུབ་ཟུང་འཇུག་གི་འཕྲིན་ལས་ལྷུན་གྱིས་གྲུབ་པའི་རྣམ་པར་ཐར་པ་ནི་ངོ་མཚར་བའི་གནས་སུ་གྱུར་ཏོ། །རྣམ་རྟོག་མི་གཡོ་མཉམ་གཞག་ཀློང་དུ་དཔག་ཡས་ཏིང་འཛིན་ཟག་མེད་བདེ་ལ་རོལ། །གཞུང་ལུགས་འཆད་དང་རྩོམ་པའི་ཆར་འབེབས་གདུལ་བྱའི་འཛིན་མར་ལུང་རྟོགས་མྱུ་གུ་སྤེལ། །དགེ་འདུན་སྡེ་དང་གཙུག་ལག་ཁང་སྤེལ་ཆོས་སྤྱོད་བཅུ་
ཡི་རྣམ་དཀར་ཀླུང་རྒྱུན་འབེབས། །མཆོག་དམན་ཞིང་ལ་མཆོད་སྦྱིན་སྦྲང་རྩིས་ཡིད་ཀྱི་རྐང་དྲུག་ལན་བརྒྱར་ཚིམ་པ་སྟེར། །རྒྱལ་བསྟན་སྤེལ་བའི་འཕྲིན་ལས་ཡོངས་རྫོགས་གློག་འོད་འཁྱུག་པའི་སྐད་ཅིག་རེར། །སྐྱེ་དགུའི་དབྱར་རྔ་སྙན་གྲགས་སྒྲ་ཆེན་འུར་འུར་སྒྲོགས་པས་ངལ་བྱེད་ཀྱང། །ཁ་སྦྱོར་ཡན་ལག་གདེངས་ཀ་བདུན་ལྡན་ལྷུན་གྱིས་གྲུབ་པའི་ཆོས་ཉིད་ལ། །སུ་ཞིག་བསྟོད་ཅིང་སུ་ཞིག་སྨད་པའི་སྤྲོས་པའི་མཚན་མ་ཀུན་དང་བྲལ། །འོན་ཏེ་དད་པའི་རྒྱལ་མཚན་རྩེ་མོ་རུ། །སྐུ་གསུམ་གོ་འཕང་སྐད་ཅིག་ཉིད་སྩོལ་བའི། །བསམ་འཕེལ་དབང་གི་རྒྱལ་པོ་གུས་མཆོད་ན། །དངོས་གྲུབ་འདོད་དགུར་འབྱུང་བར་སོམ་ཉི་བྲལ། །སྐབས་དེར་རྣམ་རྒྱལ་མཆོད་དབུ་ལན་ཁ་ཤས་དང། བདེ་མཆོག་ལྷ་ལྔའི་དབང། མགོན་ཆོས་རྣམ་སྲས་ཀྱི་རྗེས་གནང་སོགས་ཆོས་བཀའ་ཕྲན་ཚེགས་སྩལ་ནས་སླར་ཡང་བཅད་རྒྱ་མཛད། དྲུག་པའི་ཚེས་མགོར་མི་འཁྲུགས་པའི་གོས་སྐུ་གྲུབ་སྟེ་འདུ་ཁང་སྒོ་འཕྱོར་དུ་བཤམས་ནས་གྲྭ་མང་དང་ལྷན་དུ་ཤིས་བརྗོད་མཛད། མཆོད་རོལ་དང་བཅས་ཏེ་རི་ཁྲོད་དུ་གདན་དྲངས་ཤིང། དེར་དབྱར་ཞལ་བཞེས་མཛད། ཧལ་ཧ་བླ་མ་དཀོན་མཆོག་སྨོན་ལམ་དང། རི་ཁྲོད་སྤྱི་ནས་གསོལ་བ་བཏབ་པ་ལྟར་བཅུ་བདུན་ནས་བཟུང་སྟེ་ཉིན་དྲུག་ལ་སྐྱབས་འགྲོའི་ཁྲིད། དེ་ནས་རིམ་གྱིས་མཎྜལ་གྱི་ཁྲིད། རྡོར་སེམས་སྒོམ་བཟླས་ཀྱི་ཁྲིད། བླ་མ་མཆོད་པའི་ཁྲིད། ལམ་གཙོའི་ཁྲིད། བདེ་ལམ་གྱི་ཁྲིད་སྨིན་རྒྱས་བཅས་བདུན་པའི་བཅོ་ལྔ་བར་དུ་བར་མ་ཆད་པར་གནང་ཞིང། བཅོ་ལྔའི་ཉིན་སྔ་དྲོ་སེམས་བསྐྱེད་མཆོད་པ་དང་དུས་འབྲེལ་གྱི་གསོ་སྦྱོང། ཕྱི་དྲོ་འཇིགས་བྱེད་བཅུ་གསུམ་མའི་དབང་གི་སྟ་གོན་དང་བཅུ་དྲུག་ལ་དངོས་གཞི། ཚེས་བཅུ་བདུན་ནས་འདུལ་བ་མདོ་རྩའི་བཤད་ལུང་གནད་འདྲིལ་བ་སྩལ། གཞུང་ཆེ་ཆུང་
གང་འཆད་ན་ཡང་དོན་གྱི་ངོ་བོ་གསལ་ལ་འདྲིལ་བ། དགག་སྒྲུབ་ཀྱི་རིགས་པས་ཐེ་ཚོམ་ཆོད་པ། སྤྱི་དོན་འབྲེལ་བསྒྲིགས་ཀྱི་གོ་བ་སྟེར་བ། བཤད་དོན་ཉམས་ལེན་དུ་དྲིལ་བས་ལག་ཏུ་ལེན་བདེ་བ། རྒྱ་གར་མཁས་པའི་གཞུང་གི་ཉམས་དང་འདྲ་བ་ཞིག་ཡོད་ལ། ཞལ་ནས། བོད་གཞུང་ལས་རྒྱ་གཞུང་ནུས་པ་ཆེ། དོན་འདྲིལ། གོ་བདེ་བས་རྒྱ་གཞུང་ལ་བལྟ་དགོས་ཞེས་ཡང་ཡང་འདོམས་པར་མཛད་དེ་འཕགས་བོད་ཀྱི་མདོ་སྔགས་གཞུང་བརྒྱར་མི་འཇིགས་པའི་སྤོབས་པ་མྱུར་ལ་ཟབ་པའི་གསུང་ངོ་། །དེ་དང་འབྲེལ་བར་གསུང་སྒྲོས་འགའ་དགོད་པར་བྱ་སྟེ། ཞལ་ནས་ལམ་རིམ་ཆེན་མོར་ལམ་བགྲོད་པ་ལ་སྟོང་ཉིད་ཀྱི་ལྟ་བ་དགོས་པ་ལ་མིང་ཙམ་སྣང་ཡང། བྱང་ཆུབ་ཀྱི་སེམས་དེ་དང་འདྲ་བར་ཁྱད་ཞུགས་པ་དགོས་པ་ལ་མིང་ཙམ་མི་སྣང་གསུངས་པ་ལྟར་ལྟ་བ་དང་བྱང་ཆུབ་ཀྱི་སེམས་གཉིས་གལ་ཆེ་མཉམ་ཡིན། ཉམས་ལེན་དང་སྒོམ་སྒྲུབ་ཕྱོགས་རེ་བ་ཙམ་གྱིས་མི་ཡོང་ལྟ་བས་བྱང་ཆུབ་ཀྱི་སེམས་ལ་ངེས་པ་ཇེ་བརྟན་དང། བྱང་ཆུབ་ཀྱི་སེམས་ཀྱིས་ལྟ་བ་ལ་བོགས་ཇེ་ཐོན་དུ་འགྲོ་བ་རེ་དགོས་གསུངས། ཡང་རྟ་ཕུག་པས་འཁོར་རྣམས་ལ་བླ་མ་རྒྱལ་ཚབ་པས་འདུལ་མ་ནུས་པ་ཁྱེད་ཚོ་ཡིན་མོད་གསུངས་པ་རེད། དེ་བཞིན་དུ་ཀློང་རྡོལ་རིན་པོ་ཆེ་ནས་གསུང་ཆོས་ཀྱི་སྐབས་བཀའ་བཀྱོན་གནང་ནས། ༸རྒྱལ་བ་བསྐལ་བཟང་རྒྱ་མཚོ་ངུ་གི་འཇུག་མཁན་དེ་ཁྱོད་ཚོ་ཡིན་མོད་གསུངས་པས་མཚོན་བླ་མས་གང་གསུངས་རང་རྒྱུད་ལ་སྦྱར་བ་གལ་ཆེ་གསུངས། ཡང་བྱང་ཆུབ་སེམས་དཔའི་ཐབས་ལ་མཁས་པའི་སྤྱོད་པ་འགའ་ཞིག་དང། གཡོ་སྒྱུའི་སྤྱོད་པ་གཉིས་རྣམ་པ་འདྲ་བ་རེ་འོང། གང་ཟག་རླབས་པོ་ཆེའི་བསྟན་འགྲོའི་དོན་མཛད་ཚུལ་དང། ཚེ་འདིའི་དགྲ་འདུལ་གཉེན་སྐྱོང་
གི་ཆ་འགའ་རེ་འདྲ་བ་ཡོང་ཡང། ཀུན་སློང་གཏན་ནས་མི་འདྲ་བས། ནམ་མཁའ་དང་ས་གཞིའི་ཁྱད་ཡོད་པ་མི་ཤེས་པར་ཞྭ་དཔེ་ལྷམ་ལ་བཀབ་ནས་རང་སྡིག་པའི་དབང་དུ་འགྲོ་བ་དང། གཞན་ལ་སྡིག་གསོག་པ་མང་གསུངས། ཡང་བརྒལ་བརྟག་ལ་བྱང་འཛིན་སྐྱོར་སྦྱངས་སོགས་ཀྱི་སྒོ་ནས་ཐོས་པ་བཙལ་ན་གོ་བ་རྙེད་ཡོང་ན་ཡང་ཉམས་ལེན་གྱི་གནད་འགག་ཤེས་པ་ལ་བླ་མའི་མན་ངག་ཐོས་ན་འཕུལ་ཆེ་གསུངས། ཡང་རང་རེ་ལ་ཆོས་བྱེད་ལོང་མེད་པ་འདི་བྱ་བ་ཐམས་ཅད་ལོགས་སུ་བྱས། ཆོས་ལོགས་སུ་བྱས་པའི་སྐྱོན་ཡིན། བྱ་བ་གང་བྱས་ཆོས་སུ་འགྲོ་བ་ཞིག་དགོས་གསུངས། ཡང་ལོངས་སྤྱོད་ཆེ་བ་དང། རྙེད་པ་དང། གྲགས་པ་འཕེལ་བ་སོགས་ཕལ་ཆེར་བདུད་ཀྱི་བར་ཆད་ཡིན། པདྨའི་རྩ་བའི་སྐྱེས་རབས་སུ། བྲམ་ཟེ་མིང་སྲིང་རྣམས་ཀྱིས་དམོད་པ་བོར་བར། བྲམ་ཟེ་ཁྱོད་ཀྱི་རྩ་བ་སུས་ཁྱེར་བ། །རིག་བྱེད་ལེགས་པར་ལོབ་ནས་སྟོན་པ་བྱེད། །དཀའ་ཐུབ་ཅན་དུ་རེ་བ་ཆེན་པོ་ཡིས། །ཡུལ་མི་དག་གིས་དེ་ལ་མཆོད་པར་ཤོག །ཅེས་དང། བྲམ་ཟེ་ཁྱོད་ཀྱི་རྩ་བ་སུས་ཁྱེར་བ། །ཕྲེང་བ་ཙན་དན་དོ་ཤལ་གོས་བཟང་དང། །ཡུལ་གྲུ་དམ་པ་འབྱོར་བ་བཞི་བརྒྱ་ཙམ། །ཐོབ་ནས་འདོད་ཡོན་དག་ལ་ལོངས་སྤྱོད་ཤོག །ཅེས་སོགས་སྨྲས་པ་འདི་ང་རང་ཚོས་ཁ་ནས་ཁྲག་སྐྱུག་ཅེས་པ་ལས་ཀྱང་ཐུ་བའི་ཚིག་སྨྲས་པ་ཡིན་པས། བག་ཡོད་དང་ངོ་ཚ་ཁྲེལ་ཡོད་ལ་གནས་དགོས་གསུངས། ཡང་བུད་སྙེགས་ཐོབ་གསུམ་མ་ཡོང་རུང་ཚེ་འདི་དང་ཕྱི་མ་གཉིས་ལས་ཕྱི་མ་དང། ཆོས་དང་འཇིག་རྟེན་གཉིས་ལས་ཆོས་གལ་པོ་ཆེར་བཟུང་སྟེ་དམན་ཆ་བཟུང། བླ་མ་དང་ཆོས་དང་གྲོགས་ལ་དག་སྣང་སྦྱངས། གཞན་ལ་ཕྲག་དོག་སྐྱེ་དུས་སུ་རྗེས་སུ་ཡི་རང་སྦྱངས། ང་རྒྱལ་སྐྱེ་དུས་རློམ་སེམས་མགོ་མནན། ཁོང་ཁྲོ་དང་ལོག་ལྟ་འདི་གནོད་ཚབས་ཆེ་བས་ནམ་སྐྱེ་དུས་
འབུར་འཇོམས་བྱེད་པ་སོགས་རྐྱེན་དང་ཕྲད་དུས་ཆོས་ཀྱིས་མ་ཕན་ན་དགོས་པ་མེད་པས་རྐྱེན་ལམ་དུ་འཁྱེར་གང་ཐུབ་བྱེད་དགོས་གསུངས། གོང་འོག་ཏུ་གསུང་སྒྲོས་ཐོར་བུ་འགའ་ཞིག་བཀོད་པ་འདི་དག་ཅུང་ཟད་མང་སོང་བ་ལྟར་སྣང་ཡང། གླེང་བསླང་བའི་དབང་གིས་འཕྲལ་དུ་དྲན་པ་རྣམས་བསྐྱུར་བར་ཕངས་ཏེ་གང་ཟག་རེ་རེ་ཙམ་ལ་རྣམ་དཀར་གྱི་བློ་སྣ་སྐད་ཅིག་མ་རེ་སྐྱེ་བའི་རྐྱེན་དུ་སོང་ན་ཡང་ཅི་མ་རུང་སྙམ་ནས་བྲིས་པ་ལགས་ཤིང། སྤྱིར་དོན་མེད་ཀྱི་ལོང་གཏམ་ཅི་ཙམ་མང་ན་ཡང་སྤྲོ་བ་མ་གཏོགས་སུན་པ་མེད་ལ། དོན་ལྡན་གྱི་གཏམ་ལ་ཞེ་སུན་པ་དང་མང་བའི་འདུ་ཤེས་སྐྱེས་པ་དག་ནི་ཉན་ས་ལས། གལ་ཏེ་དབང་པོ་རྟུལ་པོ་ཞིག་ཡིན་ན་གསལ་བའི་གསལ་བའི་གཏམ་བྱས་ན་ཡང་སོ་སོར་རྟོགས་པ་ལ་ཤིན་ཏུ་རྨོངས་ཤིང་བརྟུལ་བར་འགྱུར་རོ། །ཞེས་གསུངས་པ་ལྟར་བག་ཆགས་ངན་པའི་དབང་གིས་བླང་བར་བྱ་བའི་གནས་ལ་རྨོངས་པའི་རང་རྟགས་ཡིན་པས་བློ་ཁ་ཆོས་ལ་ཕྱོགས་པའི་སྒོ་ནས་ལེགས་པར་བཤད་པའི་གཏམ་ཅི་ཙམ་ཐོས་པ་དེ་ཙམ་དུ་སོ་སོར་རྟོགས་པའི་ཤེས་རབ་འཕེལ་བ་ལ་བརྩོན་པར་བྱ་དགོས་སོ། །རྟ་ལྗང་ཅན་ལས་འོད་ཟེར་དང། །ཟླ་བ་ལས་ནི་ག་བུར་འཕྲེང། །རྒྱ་མཚོ་ཆེ་ལས་ཆུ་རྒྱུན་བཞིན། །ཞལ་ལས་ལེགས་བཤད་ཟད་པ་མེད། །ཨ་མོ་སེང་བཟང་སྤྲུལ་སྐུ་ལ་སྒེར་དུ་སྙིང་ཞུགས་ཀྱི་རྗེས་གནང་དང་གཞན་ཡང་མགོན་པོ་བཀའ་བཅུ་གསུམ། དབྱངས་ཅན་མ་དཀར་མོ། འབྱུང་པོ་འུར་འདེད་ཀྱི་རྗེས་གནང་སོགས་དབྱར་གནས་ཀྱི་རིང་ཆོས་བཀའ་བར་མ་ཆད་པར་གནང། བར་སྐབས་ཤིག་དབྱར་བྱིན་རླབས་མཛད་ནས་དགོན་པར་བྱོན་ཏེ་བཟང་སྐོར་ཞབས་དྲུང་དཀོན་མཆོག་བསྟན་འཛིན་འབྱུང་གནས་སོགས་བསྙེན་རྫོགས་དང།
རྣམ་རྒྱལ་མཆོད་པའི་ཚོགས་དབུ་ལན་གཉིས། བཅུ་གཅིག་ཞལ་གྱི་དབང། བདེ་མཆོག་ལུས་དཀྱིལ་གྱི་དབང་ནམ་མཁའ་སྒོ་འབྱེད་བཅས་གནང། དགག་དབྱེ་གྲོལ་ནས་ལྗོངས་རྒྱུ་མཛད་དེ་དགོན་པར་བྱོན། རྣམ་རྒྱལ་མཆོད་པ་དང་དབང་རྗེས་གནང་འགའ། རབ་བྱུང་བསྙེན་རྫོགས་སོགས་ཀྱི་རེ་བ་བསྐངས་ནས་བཅད་རྒྱ་མཛད། བར་སྐབས་སུ་བཅད་རྒྱ་གྲོལ་ཙམ་གནང་ནས་རྣམ་རྒྱལ་མཆོད་དབུ་དང་ཆོས་བཀའ་ཕྲན་ཚེགས། སྒུག་སྡོད་བྱས་ཡོད་པ་རྣམས་ལ་ཕྱག་དབང་སོགས་ཀྱིས་རེ་བ་བསྐངས་ནས་སླར་ཡང་བཅད་རྒྱ་མཛད། བཅུ་པའི་བཅུ་དགུ་ལ་རི་ཁྲོད་དུ་བྱོན་ནས་ཉི་ཟློག་སྦྱིན་སྲེག་གི་ཚོགས་དབུ་དང། བཅུ་གཉིས་པའི་བཅུ་གསུམ་ཉིན་མི་འཁྲུགས་པའི་གོས་སྐུ་བཤམས་ནས་མཆོད་འབུལ་བསྔོ་སྨོན་གང་རྒྱས། ཁྲོམ་ཆེན་པོར་ཕྱག་དབང་གནང་བ་ཙམ་མ་གཏོགས་ལོ་མཇུག་བར་དུ་བཅད་རྒྱ་མཛད། དེ་ཡང་རི་ཁྲོད་དུ་བཞུགས་པ་ནས་བཟུང་སྟེ་དགེ་འདུན་པ་རྣམས་ལ་གསུང་བཀོད་རིམ་པར་སྩལ་ཏེ་བཅའ་ཡིག་ཟུར་འདེབས་དང་བཅས་པ་བཞག །རང་རང་གི་བློ་དང་འཚམ་པའི་ཞལ་ཏའི་སྒོ་ནས་བློ་ཁ་གོང་དུ་བཀྲི་གང་མཁས་མཛད་པས་སྤོང་བ་པ་རྣམས་ཀྱིས་ལྟུང་བའི་བསྔོ་བགྲངས་གཞིར་བཟུང། ནང་ནུབ་ཀྱི་ཐུན་ཆག་མེད་ཀྱི་ཁོངས་ནས་ལམ་ཡོངས་རྫོགས་ཀྱི་ཉམས་ལེན་ཐུན་བཞིའམ་ཐུན་དྲུག །བདེ་ལམ་རྒྱུན་འདོན་གཞིར་བཞག་གི་སྟེང་ནས་ལམ་རིམ་ཆེ་ཆུང་འཛིན་སྐྱོར། བདེ་གསང་འཇིགས་གསུམ་གྱི་བསྙེན་པ། སྨྱུང་གནས། རེས་མོས་ཀྱི་ཚུལ་དུ་ལོ་མཚམས་པ་གསུམ་བཞི་རེ་བཅས་རྒྱུན་གྱི་འགྲིག་ལམ་ཆུ་ལམ་ཞུགས་ལྟ་བུ་དང། ཕྱག་མཆོད་མཎྜལ་སོགས་བཀའ་གདམས་པའི་རྣམ་ཐར་དང་མཐུན་པའི་དགེ་སྦྱོར་དབྱར་
མཚོའི་དཔལ་ལ་འགྲན་བཞིན་པར་ཡོད་ལ། དེ་དང་མཐུན་པར་འདུ་ཁང་གསར་ཕིབས་དང་རྟེན་བཞེངས། བཀའ་འགྱུར་རོ་ཅོག་བཞུགས་པའི་ཆོས་ཀྱི་འཁོར་ལོ་བཞེངས་པ་སོགས་དང། སྒྲུབ་ཤག་སོ་སོའི་ཞིག་རལ་བཅོས་ཤིང་ས་དཀར་གསོ་བ་དང། གསུང་བཀོད་ལྟར་གྱི་སྤོང་ཁང་གསར་བཟོ་དང། མདུན་རི་ལ་སྐྱེ་ཤིང་འཛུགས་པ་སོགས་གང་ཅིར་བཀོད་ཁྱབ་མཛད་པས་ཡིད་དང་མིག་གི་བདུད་རྩི་ཁོ་ནར་ཡོད་དོ། །དེ་ལྟར་ཆར་སྤྲིན་གསར་པའི་རྐེད་ཆིངས་རྣམ་པར་གཡོ་བའི་ས་འཛིན་གྱི་སྡིངས་སུ་རྒྱུ་སྐར་བྱེ་བའི་ཕྲེང་བ་ལ་འགྲན་པའི་སྤྱོད་ལམ་བཞི་ཤོང་གི་སྤྱིལ་བུ་ནི་མངོན་པར་མཛེས། ཕྱོགས་ཀྱི་ངོས་ཀུན་རི་དྭགས་གཞོན་ནུའི་ཚོགས་རྣམས་རྩྭ་ཡི་མྱུ་གུས་ཚིམ་ཞིང་འཚེ་བ་མེད་པའི་དགའ་བདེའི་རྩེད་འཇོ་ལ་ནི་རོལ། དྲི་ཞིམ་སྨན་དང་མེ་ཏོག་གི་འཕྲེང་བ་ལ་བུང་བའི་ཚོགས་ཀྱིས་དབྱངས་སྙན་སྒྲོགས་པས་བསམ་གཏན་གྱི་བདེ་བ་ནི་བསྐུལ། འདབ་ཆགས་སྣ་ཚོགས་སྐད་སྙན་པར་སྒྲོག་པས་སྐྱོ་སངས་ཀྱི་དཔལ་ལ་འགོད་ཅིང། སེམས་རྒྱུད་ཆོས་ལ་གཞོལ་བའི་སྒྲུབ་པ་པོ་སྤྲོ་བར་བྱེད། ཉིན་མོ་སྤྱོད་པའི་རྣལ་འབྱོར་དང། མཚན་མོ་ཟླ་སྐར་གྱི་བགྲོད་པས་མི་རྟག་པའི་འདུ་ཤེས་ཉེ་བར་མཚོན་པའི་སྤོང་བ་པ་རྣམས་འཕགས་པའི་རིགས་བཞི་ལ་གནས་ཤིང། ཐུན་མོང་དང་ཐུན་མོང་མ་ཡིན་པའི་རྣལ་འབྱོར་ལ་གཞོལ་བའི་སྒྲུབ་བརྒྱུད་བསྟན་པའི་གསོས་སུ་གྱུར་པའི་སྙན་པ་རྣ་བའི་རྒྱན་དུ་མཛེས་པར་གྱུར་ཏོ། །སྨྲས་པ། དགའ་བར་བྱེད་དོ་སྐྱོ་ཤས་ལྡན་རྣམས་ལ། །འདུ་འཛི་རྣམ་སྤངས་ཡིད་འོང་དབེན་གནས་དང། །བཀྲེས་པས་གདུང་ལ་གཡོས་ལེགས་རོ་བརྒྱའི་ཟས། །རྨ་བྱ་གཞོན་ནུར་དབྱར་རྔ་བཞད་པའི་སྒྲས། །གང་
གི་མཛད་བཟང་ཉིན་བྱེད་འོད་རྣོན་པོས། །བཤད་སྒྲུབ་འདབ་བརྒྱའི་ཚལ་རབ་བཞད་པ་ན། །ཐོས་ཉུང་ཆེན་པོར་རློམ་པའི་རྨོངས་པ་འགའ། །རང་རིགས་རྨོངས་པའི་ཁང་བུར་ཡིབ་ལས་ཅི། །ནེའུ་གསིང་སྨད་གཡོགས་ན་བུན་ཟུར་ཕུད་ཅན། །གཉིས་སྐྱེས་འཕུར་ལྡིང་རོལ་པའི་རི་སུལ་དུ། །དྲང་སྲོང་ངུར་སྨྲིག་འཛིན་པས་གང་མཐོང་ནས། །འོད་ལྡན་གསེར་རིའི་འཕྲེང་རྣམས་རོལ་མཚོར་བྲོས། །ཚེ་འདིའི་སྣང་ཤས་སྲོད་ཀྱི་སྨག་འཐུག་སངས། །བཤད་སྒྲུབ་ཟླ་བའི་འཕེལ་བ་རྫོགས་པར་རྩོམ། །དད་ལྡན་སྙིང་གི་ཀུ་མུད་མགོ་ལྕོག་ལྡེམ། །ལོག་སྨྲ་ཝ་སྐྱེས་ཞུམ་པ་ལྷན་ཅིག་ངོམས། །གང་གི་བཀའ་དྲིན་ནོར་བུ་ཀེ་ཏ་ཀས། །རྨོངས་པའི་རྙོགས་མ་དྭངས་བྱས་གཟུར་གནས་ཀྱི། །བློ་མཚོར་བླང་དོར་རྒྱུ་སྐར་གསལ་བ་ནི། །དྲི་བྲལ་སྟོན་གྱི་ནམ་མཁའ་དྭངས་པ་བཞིན། །བར་སྐབས་ཀྱི་ཚིགས་སུ་བཅད་པའོ། །ཀ་ཐོག་དགོན་ནས་ཆེད་གཏད་ཀྱིས་འོངས་པའི་སྤྲུལ་བའི་སྐུ་ཐུགས་མཆོག་རྡོ་རྗེ་ལ་མངོན་རྟོགས་རྒྱན་གྱི་བཤད་ལུང་ཉིན་ལྔའི་བར་དུ་སྩལ། ལོ་འདིར་བསྙེན་རྫོགས་བརྒྱ་དང་སོ་གཉིས། དགེ་ཚུལ་སོགས་རེ་བརྒྱད་བསྒྲུབས་ཏེ་ངུར་སྨྲིག་འཆང་བའི་དྲང་སྲོང་གི་ཚོགས་རྒྱ་ཆེར་སྤེལ་བར་མཛད། དགུང་ལོ་རེ་གཅིག་པ་ཆུ་རྟ་གནམ་ལོ་གསར་བའི་ཚེས་གཏོར་ལོ་གསར་གྱི་དགྱེས་སྟོན་སོགས་དཀྱུས་ལྟར་དང། ཉིན་དེར་དགོན་པར་བྱོན་ནས་ཕྱོགས་འགྲུལ་བ་རྣམས་ལ་ཕྱག་དབང་དང། རིམ་གྱིས་དོན་གཉེར་བ་རྣམས་ལ་དཔའ་གཅིག་དང་བཅུ་གཅིག་ཞལ་གྱི་དབང། འཇིགས་བྱེད་ཞལ་ཕྱག་ཡོངས་རྫོགས། མ་མགོན་གཉིས། བདེ་གསང་ལྷན་སྐྱེས་གཉིས། བླ་མེད་རྡོར་སེམས། ཁྱུང་ཁྲ། ཛམ་དཀར་བཅས་ཀྱི་རྗེས་གནང། ཡོན་ཏན་གཞིར་གྱུར་མ་དང་དགའ་ལྡན་ལྷ་བརྒྱ་མའི་ཁྲིད་སོགས་སྩལ། ཀ་ཐོག་སྤྲུལ་སྐུ་ཐུགས་མཆོག་རྡོ་རྗེ་བསྙེན་རྫོགས་
སུ་བསྒྲུབས་ཏེ་དཀོན་མཆོག་ཐུབ་བསྟན་རྒྱ་མཚོ་ཞེས་བཏགས། རྣམ་རྒྱལ་མཆོད་པ་དང། རབ་བྱུང་བསྙེན་རྫོགས། ཆུ་མར་སྒོམ་ཆེན་སྤྲུལ་སྐུ་དང། འགའ་དག་སྤྲུལ་སྐུ་སོགས་དང། དོན་གཉེར་བ་མང་པོར་བླ་མཆོད་དང་འབྲེལ་བའི་ཕྱག་ཆེན་གྱི་ཁྲིད་སོགས་ཆོས་བཀའ་འགའ་ཞིག་གནང། ཨ་མཆོག་དགོན་གྱི་བླ་མ་ལས་སྣེ་སེར་སྐྱ་གྲོས་མཐུན་གྱི་ཐོག་ནས། ཀུན་གཟིགས་མཆོག་སྤྲུལ་རིན་པོ་ཆེ་གདན་སར་ཞུ་བ་ཕུལ་ཀྱང་ཧ་ཅང་ནན་ཆེ་བ་མ་སྤོབས་པར་བརྟེན། དེ་ཉིད་ལ་ཨུ་ཚུགས་མཐར་སྐྱེལ་གྱི་སྒོ་ནས་ཞུས་པར་ལོ་རྗེས་མར་འབྱོན་རྒྱུའི་ཞལ་བཞེས་མཛད། ཚེས་བཅོ་ལྔའི་ཉིན་རྣམ་རྒྱལ་མཆོད་པར་ཕེབས་ཏེ་ཕྱི་དྲོ་ནས་བཅད་རྒྱ་མཛད་ཅིང། བར་སྐབས་སུ་རྣམ་རྒྱལ་མཆོད་པར་ལན་ཁ་ཤས། དོན་གཉེར་བ་འགའ་ལ་རབ་བྱུང་བསྙེན་རྫོགས་དང་ནམ་མཁའ་སྒོ་འབྱེད་ཀྱི་དབང། མགོན་ཆེན་བཅུ་གསུམ་གྱི་རྗེས་གནང་བཅས་སྩལ། སྐབས་འདིར་སོག་ཡུལ་གྱི་གཞི་བདག་གི་བསང་མཆོད་ཅིག་གསུང་རྩོམ་གནང་བའི་མཛད་བྱང་དུ། ཅེས་པ་འདི་ནི་སུ་ཉིད་ཤོག་ནས་དད་བརྩོན་ལྷག་བསམ་མཆོག་ཏུ་དགེ་བ་དགེ་སློང་དཀོན་མཆོག་བློ་བཟང་གིས་ཡུལ་ཕྱོགས་དེའི་ས་ཆུ་བཙན་པའི་སྟབས་ཀྱིས་མི་རྣམས་རྐང་ལག་མི་བདེ་བ་དང། ཟོག་ཞར་བ། གྱོལ་བོ་སོགས་མི་མཐུན་པ་སྣ་ཚོགས་འབྱུང་བ་ཞིག་འདུག་པས་དེ་སངས་བྱེད་དུ་ཡུལ་ལྷ་འདི་རྣམས་ཀྱི་མིང་ཐོན་པའི་བསང་མཆོད་ཅིག་དགོས་ཞེས་ནན་ཏན་ཆེན་པོས་ཡང་ཡང་བསྐུལ་བའི་ངོར། བསང་མཆོད་ཁམས་གསུམ་དགོས་འདོད་རྒྱ་མཚོ་སྤུངས་པ་ཞེས་བྱ་བ་འདི་ཉིད། ༸བཙུན་པ་དཀོན་མཆོག་བསྟན་པའི་སྒྲོན་མེའམ། ད་ལྟའི་སྲོལ་བསྟུན་གྱི་མིང་གཞན་བློ་བཟང་རྡོ་རྗེ་ངག་དབང་སངས་རྒྱས་ནམ་མཁའ་རྒྱ་མཚོ་བསོད་
ནམས་དཔལ་འབྱོར་དོན་གྲུབ་རྒྱལ་མཚན་བདེ་ཆེན་ཆེ་མཆོག་མཚན་སྙན་དཔལ་བཟང་པོས་དངོས་གཞི་མདོར་བསྡུས་ཤིང། དགོས་དོན་ཚང་བར་བྱས་ཏེ་སྦྱར་བའི་ཡི་གེ་པ་ནི་སྔགས་རམས་པ་དཀོན་མཆོག་ཀུན་དགའ་འོ། །ཞེས་པ་གཅིག་གནང་བ་དགོས་པ་ཅན་གྱི་གསུང་དུ་སྣང། བར་སྐབས་ཤིག་སྐུ་མཚམས་གྲོལ་ནས་ནེ་མན་ཝང་གི་སྲས་འཇམ་དཔལ་རྡོ་རྗེ། ཧལ་ཧའི་གྲྭ་པ་འགའ་ཞིག་སོགས་ཀྱི་འདུན་མོས་ལྟར་བདེ་ལམ་གྱི་ཁྲིད། བླ་མ་མཆོད་པའི་ཁྲིད་གཟབ་རྒྱས། འཇིགས་བྱེད་དབང་ལན་གཉིས། འགྱང་རོ་སྤྲུལ་སྐུ་འཇམ་དཔལ་བསྟན་པའི་སྒྲོན་མེ་སོགས་བསྙེན་རྫོགས་ལ་བཀོད། ཐུ་མེད་ཀུ་ཤྲི་བླ་མ་དགེ་བཤེས་ཚེ་འཕེལ་ལ་ཡི་གེ་གནང་བའི་ནང་དུ། དེང་དུས་བསྟན་པའི་འཕེལ་འགྲིབ་ཆགས་སྡང་གི་ལ་རྒྱ་ཙམ་དུ་གོ་སྟེ་ལུང་རྟོགས་གཉིས་གར་སོང་མི་ཤེས། བསྟན་འཛིན་གྱི་རྣམ་ཐར་སྟོབས་འབྱོར་ཁ་དྲེགས་ཀྱི་ཡོ་ལང་ཙམ་དུ་བཟུང་ནས་བཤད་སྒྲུབ་ཀྱི་མཛད་པ་ཅི་མཛད་པ་མི་སེམས། དགོན་སྡེའི་ན་འཕངས་གྲྭ་ཚོགས་ཁང་བཀོད་འགྱེད་ཕོགས་ལ་བརྩི་ཡི། མང་ཐོས་ཚུལ་ལྡན་ལ་ལྟོས་པ་རང་མེད། སྙིགས་མའི་སྙིགས་མ། བསྟན་པའི་ཐ་མ་ཤིན་ཏུ་ཡི་ཆད་དེ། ཡི་ཆད་འགྱོད་ཀྱང་ལས་དབང་བཅོས་སུ་མེད་གསུང་བ་དེར་སྣང། ཞེས་སོགས་ཐུགས་སྐྱོ་ཉམས་མཛད་ཅིང་ལྷག་པར་རྗེ་ཉིད་ལས་ཀྱང་ཅུང་ཟད་བགྲེས་ཙམ་གྲྭ་ཐོག་དུས་རགས་པ་མཉམ་པའི་ཟོང་ཆུ་ཁྲིམས་ཆོས་མཛད་དཔོན་སློབ་ལ་འདི་ལྟར། ཕུལ་བྱུང་བསོ༷ད་ན༷མས་ཡངས་པའི་ལྷ་ལམ་ངོས། །གཞུང་ལུགས་འབུམ་སྡེའི་སྤྲིན་འཕྲེང་བཀྲ༷་བ་ལས། །གཞན་ཕན་ཤི༷ས་པའི་དབྱངས་ཀྱི་སྒྲ་བརྒྱ་རྒོད། །མཚུངས་མེད་བཤེས་གཉེན་དམ་པའི་ག་ལ་བར། །ཆེད་གསོལ་སྔོན་གོམས་ལེགས་བྱས་ཤེལ་དཀར་གྱི། །ཁམས་ལས་གྲུབ་པ་སྐུ་འཚོའི་མེ་ལོང་ནི། །མཆོག་ཏུ་དྭངས་
པར་དོན་གཉིས་རི་མོ་འབུམ། །རྣམ་པར་བཀྲ་བའི་སྣང་བ་འགོག་མེད་ནས། །དོན་ལྡན་སྙན་པའི་དབྱངས་ཀྱི་འཕྲིན། །དྲི་མེད་ལྷ་དར་གོས་ཁ་ཟུང། །ངོ་མཚར་རི་མོའི་ཚོགས་དང་བཅས། །སོན་པས་ཡིད་ལ་སྤྲོ་བ་འཕེལ། །སྔོན་ཚེ་འབྲས་དཀར་སྤུངས་པའི་སྡེ་ཆེན་དུ། །ལྷན་ཅིག་ལེགས་བཤད་གར་གྱིས་རྩེན་པ་དེ། །དེང་ནས་དྲན་པའི་ཡུལ་དུ་གྱུར་པས་སྐྱོ། །ཕྱི་མའི་ཚེ་ཡང་དེ་བཞིན་འགྲོགས་པར་སྨོན། །དབུས་འགྱུར་བསྟན་པའི་ཉི་མ་གཅིག་པུ་བ། །ཡེ་ཤེས་མཚན་ཅན་གསུང་གི་དགའ་སྟོན་མཆོག །མྱོང་བ་དེ་ཡང་རྨི་ལམ་བཞིན་དུ་དྲན། །ཕྱིས་ཀྱང་དེ་འདྲའི་བཤེས་གཉེན་མཇལ་བར་སྨོན། །གདན་ས་གསུམ་གྱི་མཁས་མང་ངང་པའི་ཁྱུ། །ལུང་རིགས་མགྲིན་རྔ་འགྲན་བཞིན་སྒྲོགས་པ་ལས། །ཕྱོགས་སུ་བཀར་ཏེ་སྐྱོ་བའི་ཤུགས་འབྱིན་ཡང། །རྟག་ཏུ་རྒྱལ་བའི་དམ་ཆོས་འཛིན་པར་སྨོན། །སླད་ཀྱང་སྐུ་འཚོའི་ཡིད་བཞིན་ནོར། །བསྲུང་བའི་བྱི་དོར་མི་གཡེལ་ཞིང། །ཟབ་ལམ་རྣལ་འབྱོར་གཟི་འབར་བའི། །ངེས་ལེགས་འདོད་པ་འཇོ་བར་མཛོད། །རྟེན་ལྷ་དར། སྣང་བརྙན། ཕྲེང་བ་རྒྱན་ལྡན། ཅོད་པན་བཅས། ཞེས་པ་དང། ཐུབ་དབང་རྡོ་རྗེ་འཆང་དང་བློ་བཟང་གྲགས། །ཡི་དམ་མཆོག་གསུམ་རྒྱ་མཚོར་བཅས་པ་ལ། །སྙིང་ནས་མི་ཕྱེད་དད་པས་གསོལ་འདེབས་ན། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །བློ་བཟང་རྒྱལ་བའི་བསྟན་ལ་ཐོས་བསམ་སོགས། །ཇི་ལྟར་ནུས་བཞིན་བགྱིས་པ་འདི་ཡིས་མཚོན། །དུས་གསུམ་དགེ་ཚོགས་མཐའ་དག་གཅིག་བསྡུས་ནས། །ཡང་དག་ལམ་བཟང་འགྲུབ་པའི་རྒྱུ་རུ་བསྔོ། །ནམ་ཞིག་ཚེ་འདིའི་སྣང་བ་འགག་མ་ཐག །ས་མཁན་འཇམ་དཔལ་སྙིང་པོས་ཉེར་ཁྲིད་ནས། །དགའ་ལྡན་གནས་སུ་པངྨོ་ལས་སྐྱེས་ཏེ། །མི་ཕམ་
གསུང་གི་བདུད་རྩིས་ཚིམ་གྱུར་ཅིག །ངེས་འབྱུང་འཛིན་མར་སེམས་མཆོག་རྩ་བརྟན་ཅིང། །དམིགས་མེད་ལྟ་བའི་ཡལ་འདབ་མཐའ་དང་བྲལ། །རིམ་གཉིས་ལམ་བཟང་མེ་ཏོག་བཞད་པའི་རྩེར། །མཐར་ཐུག་སྐུ་བཞིའི་འབྲས་བཟང་སྨིན་གྱུར་ཅིག །མདོར་ན་ཚེ་རབས་ཀུན་ཏུ་བླ་མ་ལྷས། །རྗེས་གཟུང་ས་ལམ་བགྲོད་པ་མཐར་ཕྱིན་ནས། །ནམ་མཁའི་མཐས་གཏུགས་མར་གྱུར་འགྲོ་བ་ཀུན། །ཟུང་འཇུག་ནོར་བུའི་གླིང་དུ་འཁྲིད་གྱུར་ཅིག །ཅེས་གསུང་ཤོག་སྨོན་ལམ་དང་བཅས་པ་འདི་ཉིད་གནང་བ་དང། གཞན་ལ་ཡང་དེ་འདྲའི་རིགས་མང་བར་གནང། ཟླ་བ་ལྔ་པ་ཡོངས་རྫོགས་ལ་བཅད་རྒྱ་མཛད་ཅིང། ཟླ་མཇུག་ལ་ཐེ་བོ་ཆབ་ཚན་དུ་ཆིབས་བསྒྱུར། ཆབ་བཞུགས་ཀྱི་སྐབས་སུ་ཡང་དོན་གཉེར་བ་མང་པོར་བདེ་ལམ་གྱི་ཁྲིད། བསྒྲུབ་བྱ་གཅིག་དགེ་ཚུལ། ཉེར་དགུ་བསྙེན་རྫོགས་ལ་བཀོད། ཚུར་ཕེབས་ལམ་བླ་རི་མགུལ་གྱི་དཀར་མཛེས་དགོན་དགའ་ལྡན་ཆོས་འཕེལ་གླིང་དུ་སེར་སྐྱ་ཡོངས་ལ་བདེ་ལམ་གྱི་ཁྲིད་གནང། མར་རྒྱ་ཆེན་སུམ་ཅུ་དང། ཇ་ལན་འདུའུ་གཅིག་ལམ་རིམ་དུས་བཟང་གི་ཐེབས་སུ་བཞག །ཧོར་དགོན་པ་དང། གོའུ་དགེ་གཞིས་ཀར་ཡང་གདན་དྲངས་པར་དགྱེས་གཟིགས་ཀྱི་བཀའ་དྲིན་བསྐྱངས། ཆུ་མིག་དཀར་མོར་སྒྲུབ་པའི་རྒྱལ་མཚན་འཛིན་པ་ནམ་མཁའ་རི་ཁྲོད་པའི་སྒྲུབ་ཁང་དུ་སེར་སྐྱ་མང་པོར་སྐྱབས་ཁྲིད་སྩལ་ཞིང། སྙིང་ཐག་པ་ནས་ཡོད་དགུ་སྤྲུགས་པའི་དད་དབུལ་རྣམས་བརྩེ་ཉམས་དང་བཅས་དགྱེས་བཞེས་མཛད། རྗིས་ཚང་དགོན་དུ་ཡོན་ཏན་གཞིར་གྱུར་མའི་ཁྲིད་དང། ལྗགས་ལུང་ཁ་ཤས་གནང། འབུལ་བ་ཕྱིར་སློག་པ་དང་མང་འགྱེད་གོང་འོག་ཀུན་ལ་འདྲ། ཕུགས་བདེ་ཐང་གི་དགོན་པ་དགའ་ལྡན་བཀྲ་ཤིས་ཆོས་འཕེལ་གླིང་དུ་ཞག་གཅིག་བཞུགས་ཤིང། དགེ་
ལྡན་བསྟན་འབར་མའི་བཤད་ལུང་སྩལ། འདུ་ཁང་ཐེབས་སུ་རྟ་རྒོད་མ་དགུ། མཛོ་འབྲི་བཅུ་གཅིག །ནས་བྲེ་བཞི་བརྒྱ་བཅས་གནང། ལམ་བར་གྱི་སྡེ་པ་སོ་སོ་དང། ཀོའུ་ཚང་རི་ཁྲོད། དམེ་རྒྱ་རི་ཁྲོད་སོགས་ནས་ཇ་ཐབ་ཞུས་པར་རི་ཁྲོད་གཉིས་ལ་མང་འགྱེད་དང། ལོ་བ་དགོན་པ་བཀྲ་ཤིས་ཆོས་འཁོར་གླིང་དུ་ཡོན་ཏན་གཞིར་གྱུར་མའི་ཁྲིད། གྱི་ལིང་དགོན་པ་དགའ་ལྡན་དར་རྒྱས་གླིང་དུ་ཀུན་རིག་གི་དབང་བསྐུར་མཛད། དགོན་གསར་དགའ་ལྡན་རབ་རྒྱས་གླིང་དུ་བསྒྲུབ་བྱ་བཅུ་གཉིས་དགེ་ཚུལ། ང་ལྔ་བསྙེན་རྫོགས་ལ་བཀོད་ཅིང། ཚོགས་སུ་མང་འགྱེད་དཀྱུས་འདྲ་སྩལ། ཚ་གོ་ཏཱ་རོ་རྣམ་རྒྱལ་ཆེད་གཏད་ཀྱིས་མཇལ་བར་འོང་བ་ལ་ཕྱག་དབང་ཆོས་འབྲེལ་དང་གནང་སྐྱེས་ཀྱིས་ཚིམ་པར་མཛད། གསེར་ཟངས་ལས་གྲུབ་པའི་རྗེའི་སྐུ་མི་ཚད་གསར་འབྱོར་སོགས་རྟེན་དང་བརྟེན་པ་ལ་སྤྱན་དབྱེའི་ཆོ་ག་དང། འདུ་ཁང་ནས་བླ་གྲྭ་སྟོང་ཕྲག་བརྒལ་བར་འཇམ་དབྱངས་དམར་སེར། འཇམ་དབྱངས་དཀར་པོ། འཇིགས་བྱེད་ཞལ་ཕྱག་ཡོངས་རྫོགས། ཆོས་རྒྱལ་ཕྱི་སྒྲུབ་བཅས་ཀྱི་རྗེས་གནང། དགའ་ལྡན་ལྷ་བརྒྱ་མའི་ཁྲིད། དགེ་ལྡན་བསྟན་འབར་མའི་བཤད་ལུང་བཅས་སྩལ་ཞིང་བརྟན་བཞུགས་ཀྱི་རྟེན་འབྲེལ་བསྒྲིགས། ཅོ་ནེ་བསྟན་འགྱུར་གདན་འདྲེན་རྒྱུར་སྣག་ཚའི་ནང་དུ་བསྲེ་རྒྱུའི་གསེར་བཏུལ་མ་ཕོན་ཆེ་བ་དང། ཡོན་དངུལ་སྲང་དགུ་བརྒྱ་སུམ་ཅུ་སྐོར་ཕུལ་ནས་བཀུར་སྟི་ཆེན་པོས་གདན་དྲངས་ཏེ། བདུན་པའི་ཚེས་དགུའི་ཉིན་གདན་ས་ཆེན་པོ་བཀྲ་ཤིས་འཁྱིལ་དུ་ཕྱག་བབས། སྨད་སོག་དང་ཕྱོགས་འགྲུལ་སྒུག་སྡོད་བྱས་ཡོད་པ་རྣམས་ལ་ཕྱག་དབང་དང་ཆོས་འབྲེལ་གནང། ལྷག་པར་སྒོ་མང་གྲྭ་ཚང་གི་དགེ་བཤེས་ཨོར་དུ་སུ་སྨན་པ་བླ་ཟུར་བློ་བཟང་ཡོན་
ཏན་གྱིས་བརྒྱད་སྟོང་པ་རྒྱལ་ཁབ་པེ་ཅིན་གྱི་པར་མ་ཁྱད་མཚར་དངུལ་སྲང་སུམ་ཅུའི་ཡོན་གྱིས་སྤྱན་དྲངས་པ་ཕུལ་བས་ཐུགས་ཤིན་ཏུ་དགྱེས་ཏེ་དགེ་རྩ་སྤེལ་བའི་སྨོན་ཚིག་ཚིགས་བཅད་བཅུ་བདུན་པ་ཞིག་དང། ཚེ་དཔག་མེད་ལྷ་དགུའི་དབང། འོད་ཟེར་ཅན་གྱི་རྗེས་གནང་སོགས་སྩལ། མི་རིན་དགེ་ལེགས་བཀྲ་ཤིས་དང་ཁོང་གཉིས་ནས། ཨོ་ཐོག་ཏཱ་པེ་ལི་བསོད་ནམས་དགེ་འདུན་རབ་རྒྱས་ཀྱི་ངག་བཀོད་བཞིན་དུ་དཔོན་དེ་ཉིད་ཀྱི་རིམ་གྲོར་རྣམ་རྒྱལ་ཁྲི་མཆོད་བསྒྲུབས་པའི་ཚོགས་དབུར་སྤྱན་དྲངས་ཏེ་བརྟན་བཞུགས་ཕུལ་བར། བདག་གི་བསམ་པའི་སྟོབས་དང་ནི། །ཞེས་སོགས་མཐར་ཆགས་སུ་གསུངས་ནས། བླ་མ་ལྷག་པའི་ལྷ་མཆོག་ཁྱད་པར་ཅན་གྱི་ནུས་མཐུར་ལེགས་ལམ་ཡོང་བ་གཞིར་བཅས། རང་གིས་ཀྱང་སེམས་ལ་འཛིན། མཆོག་གསུམ་ལ་ཞབས་འདེགས་དང། རིམ་གྲོ་མི་ལྷོད་པ་གལ་ཆེ་གསུངས། བཀའ་བསྟན་གསར་པ་རྣམས་ལ་ན་བཟའ་དང། གདོང་དར་བསྒྲིགས་ཏེ་བརྒྱད་སྟོང་པ་ཐུབ་དབང་གི་དངུལ་སྐུའི་མདུན་དང། བཀའ་བསྟན་གཉིས་ཀྱི་དཀྱིལ་དུ་རྗེའི་གསུང་འབུམ་བཞུགས་ནས། རྗེ་བླ་མའི་གསུང་རབ་ཆོས་ཀྱི་ཉིང་ཁུར་བྱས་ཡོད་ཨང་གསུངས་པ་དཔྱད་གཞི་ཆེ་བར་སྣང། བརྒྱད་པའི་བཅོ་ལྔ་ནས་བཅད་རྒྱ་མཛད། པཎ་ཆེན་འཁྲུངས་རབས་ཀྱི་ཐང་ཀ་པར་མ་བཅུ་ལ་གསར་ཚོན་གྲུབ་པར་ལྷ་བཟོ་ལ་ཡོན་སྩལ། རྣམ་རྒྱལ་མཆོད་པར་ཕེབས་སྐབས་གྲོལ་ཙམ་རེ་དང། དགུ་པའི་ཉེར་བདུན་ནས་རི་ཁྲོད་དུ་བཅད་རྒྱ་གནང་བ། བཅུ་གཅིག་པའི་ཉེར་དྲུག་ལ་གྲོལ་ཏེ། ཉེར་བདུན་ལ་དགོན་པར་བྱོན། ཉེར་བརྒྱད་ནས་ཆིང་སུ་ཅུག་ཐུ་ནོ་མོན་ཧན་གྱི་དགོན་པའི་ཆོས་རྗེ་བླ་མ་དཀོན་མཆོག་བསྟན་འཛིན་གྱིས་གསོལ་བ་བཏབ་ངོར་རྒྱལ་མཁན་ཟུར་གྲགས་པ་རྒྱལ་མཚན་སོགས་བླ་མ་དགེ་བཤེས་སུམ་བརྒྱ་སྐོར་ལ་
བླ་མཆོད་དང་ཕྱག་ཆེན་སྦྲགས་པའི་ཁྲིད་དགེ་ལྡན་སྙན་བརྒྱུད་ནས་འོང་བའི་མན་ངག་ཞལ་ཤེས་ཀྱིས་བརྒྱན་པ་ཞག་ལྔའི་རིང་སྩལ། སྐབས་འདིར་སྡེ་ཁྲི་སྤྲུལ་བའི་སྐུ་འཇམ་དབྱངས་ཐུབ་བསྟན་ཉི་མ་སྨད་ཕྱོགས་ནས་བྱོན་ཏེ་འབྱོར་ཕྱག་ཞུས། དེ་ཡང་ཁོང་ལ་སྔ་ལོ་ཡི་གེ་གནང་བའི་ནང་དུ། ངེད་རང་ལ་ཐུག་འདོད་ན་ལོ་རྗེས་མར་ཕེབས་དགོས་གསུངས་པ་དང། སྐབས་འདིར་ཡང་བག་ཕེབས་ཀྱི་གསུང་གླེང་གི་དང་པོ་ལ། ད་ངོ་ཐུག་ནས་སེམས་བདེ་བ་ཡིན་གསུངས་པ་ཉིད་ནས་ས་མཐར་བཞུགས་ཡུན་རིང་བ་ལ་བཀའ་བཀྱོན་མཛད་དམ་དགོངས་འདུག་ཀྱང་དོན་ལ་ཐུགས་གཏད་པའི་གསུང་དུ་སྣང། ཉིན་གཉིས་ལ་བདེ་ལམ་གྱི་ཁྲིད་མདོར་བསྡུས་དང། ཞག་བརྒྱད་ལ་འཇམ་དཔལ་ཞལ་ལུང་གི་ཁྲིད་སྨིན་རྒྱས་སེམས་བསྐྱེད་མཆོད་པ་དང་བཅས་པ་གནང། ལོ་འདིར་གཞི་བྱེས་སུ་བསྙེན་རྫོགས་སུམ་བརྒྱ་དང་ལྔ། རབ་བྱུང་དགེ་ཚུལ་གྱ་ལྔའི་ཡིད་ཀྱི་ཀུན་གསལ་སོ་ཐར་ཉི་ཟླའི་འོད་ཀྱིས་མཛེས་པར་བསྒྲུབས། ཉང་ཚང་སྤྲུལ་བའི་སྐུ་ལ་བདེ་མཆོག་ལྷ་ལྔ་དང་ལུས་དཀྱིལ་གཉིས་ཀྱི་དབང་རྒྱས་པར་སྩལ་ཏེ། མཇུག་ཏུ་ཚོགས་འཁོར་ཀྱང་མཛད། གཞན་ཡང་གྲུབ་རྒྱལ་ལུགས་ཀྱི་ཚེ་དབང། གདུགས་དཀར། རྣམ་འཇོམས། སྒྲོལ་མ་དཀར་ལྗང་གཉིས། མྱ་ངན་མེད་པའི་འོད་ཟེར་ཅན་ཞལ་གཅིག་ཕྱག་གཉིས་མའི་རྗེས་གནང་སོགས་ཆོས་བཀའ་དུ་མ་བར་མ་ཆད་པར་གནང་ཞིང། སེང་བར་རྣམས་སུ་ཧལ་ཧ་ཆིང་སུ་ཅུག་ཐུ་ནོ་མོན་ཧན་རིན་པོ་ཆེ་བློ་བཟང་བསྟན་དར་དབང་ཕྱུག་གིས་བསྐུལ་བའི་ཚེ་བདག་མགོན་པོ་ལ་བརྟེན་པའི་འཆི་བླུའི་ཆོ་ག་སོགས་བཀའ་རྩོམ་ཡང་མང་དུ་སྤེལ། ཉི་ཤུ་དགུ་ལ་དབེན་གནས་ཡིད་དགའ་ཆོས་འཛིན་དུ་ཕེབས། དགུང་ལོ་རེ་གཉིས་པ་ཆུ་ལུག་གི་ཟླ་བ་དང་པོའི་ཚེས་གཅིག་གི་ཉིན་རི་ཁྲོད་ནས་
འདོད་ཁམས་དབང་མོ་དགྱེས་པའི་དུས་གཏོར་གྱི་ཆོ་ག་རྒྱས་པར་གནང་ཞིང་ལོ་གསར་དགྱེས་སྟོན་ཀྱང་མཛད། དེ་གྲོལ་འཕྲལ་དགོན་པར་བྱོན་ནས་ཀྱང་ཐུགས་དགྱེས་ཉམས་ཆེན་པོ་དང་བཅས་ལོ་གསར་མཇལ་ཁ་སོགས་གང་རྒྱས་གནང། ཚེས་གསུམ་ནས་རིམ་པར་འཇིགས་བྱེད་བཅུ་གསུམ་མ། གདུགས་དཀར་ལྷ་བཅུ་བདུན་མའི་དབང། འཇིགས་བྱེད་བསྐྱེད་རིམ་གྱི་ཁྲིད། མཁའ་སྤྱོད་མའི་སིན་དྷུ་རའི་བྱིན་རླབས། མགོན་པོ་ཞལ་སྒྲུབ་དུས། བསྙེན་དུས། དཀར་པོ་ཚེ་འཕེལ། སེར་པོ་རྒྱས་བྱེད། ཁྱུང་ཁྲ། རྣམ་རྒྱལ་མ་སོགས་ཀྱི་རྗེས་གནང། གྲུབ་རྒྱལ་ཚེ་དབང་སོགས་བསྐྱར་མ་དུ་མ། སྡེ་ཁྲི་རིན་པོ་ཆེའི་ཐུགས་བཞེད་ལྟར་ཉིན་གཉིས་ལ་བསྐལ་བཟང་ལྷ་ཁང་རྟེན་དང་བརྟེན་པར་བཅས་པ་ལ་སྐྱབས་མགོན་ཡབ་སྲས་ལྷན་རྒྱས་ནས་རབ་གནས་དང། རབ་བྱུང་དགེ་ཚུལ་སོ་གཉིས། བསྙེན་རྫོགས་གོ་གཅིག་གི་རེ་བ་བསྐངས། གཉིས་པའི་ཚེས་བདུན་ལ་ཨ་མཆོག་དགོན་པར་ཆིབས་བསྒྱུར་ཏེ་བཅུ་གཅིག་གི་ཉིན་ཁྲི་སྟོན་གྱི་རྟེན་འབྲེལ་བསྒྲིག །མང་ཇ་གཉིས་བཏང་ཐོག་བསོད་བཏགས་རེའི་འགྱེད་སྩལ། དགའ་ལྡན་ཁྲི་ལ་དབང་མཛད་ཁྱོད་ཉིད་ཀྱིས། །དགའ་ལྡན་ཆོས་ཀྱི་འཁོར་ལོའི་གླིང་ཆེན་པོར། །དགའ་ལྡན་བསྟན་པའི་སྒྲོན་མེ་སྦར་བ་ན། །དགའ་བརྒྱའི་འོད་སྣང་སྲིད་གསུམ་ཀུན་ཏུ་ཁྱབ། །ཉིན་ཁ་ཤས་ལ་ཆོས་གྲྭར་བརྩི་བཞག་ལ་ཕེབས་ཤིང། བརྩི་བཞག་གི་སྐབས་གསུང་བཤད་དང། འཛིན་གྲྭ་སོ་སོར་གསུང་འཕྲོས་ཀྱང་མཛད། བླ་མ་མཆོད་པའི་ཁྲིད་སྨིན་རྒྱས་དང། མགོན་པོ་བར་ཆད་ཀུན་སེལ་གྱི་རྗེས་གནང་སྩལ། བཅོ་ལྔའི་ཉིན་གསོ་སྦྱོང་གི་མགོན་དུ་བྱོན་ནས་སོ་ཐར་གྱི་མདོ་གསུངས་ཤིང། གུང་ཚིགས་ཆོས་གྲྭར་སེམས་ལ་ཕན་པའི་བསླབ་བྱ་དང་ཚོགས་གཏམ་བརྩི་བཞག་རྒྱས་པར་གནང། བཅུ་བདུན་ལ་དེ་ནས་ཆིབས་བསྒྱུར་ཏེ་
གདན་སར་བྱོན། བསྒྲུབ་བྱ་བཞི་ཙམ་བསྙེན་རྫོགས་དང། བཀའ་ཆོས་ཐོར་བུ་རྒྱུན་ཆགས་ཀྱི་ངང་ནས་བསྐལ་བཟང་ལྷ་ཁང་གི་དཀར་ཆག་དང་འཇམ་དཔལ་ཞལ་ལུང་ཉམས་སུ་ལེན་ཚུལ་སོགས་གསར་རྩོམ་གྱི་དབུ་ཚུགས། ནམ་མཁའི་མཐའ་བཞིན་འགྲོ་བའི་ཁམས། །དེ་བཞིན་དཔའ་ཆེན་བྱང་ཆུབ་ཐུགས། །དེ་བཞིན་འགྲོ་བའི་དོན་སྤྱོད་པ། །ཚད་དང་གྲངས་ཀྱིས་གཞལ་དུ་མེད། །གསུམ་པའི་ཚེས་ནས་ཞག་བཅུ་བདུན་གྱི་རིང་བདེ་ལམ་གྱི་ཁྲིད་སྨིན་རྒྱས་དང། སེམས་བསྐྱེད་ཆོ་ག་ཕྱག་ལེན་གསུང་བཤད། མཆོད་པ་གང་རྒྱས་གནང། དེ་ཡང་བསྟན་པའི་རྒྱུན་ལ་དགོངས་ནས་བཀའ་ཆོས་བར་མ་ཆད་དུ་གནང་བ་ནི་མདོ་ལས། གངྒཱའི་བྱེ་སྙེད་རིན་ཆེན་གསེར་དག་གིས། །བཀང་སྟེ་གང་ལ་སྦྱིན་པ་བྱིན་པ་བས། །དུས་ངན་ཚེ་ན་ཚིགས་བཅད་གཅིག་བརྗོད་པ། །དེ་ཡིས་ཕན་འདོགས་དེ་འདྲ་ཁྱད་པར་འཕགས། །ཞེས་གསུངས་པ་ལྟར་བསྔགས་པའི་གནས་སུ་ཆེ་བར་མ་ཟད། ཉན་མཁན་རྒྱུན་མི་འཆད་དུ་བྱུང་བ་རྗེས་སུ་ཡི་རང་བའི་གནས་ཡིན་ཏེ། ད་ལྟ་ཁྱོད་ཀྱིས་ཆོས་ཉན་ནས་ཅི་བྱེད་ཅེས་སྨྲ་བ་མང་བས་སོ། །དེས་ན་མདོ་ལས། དགེ་བའི་བཤེས་གཉེན་ལ་འདུན་པ་མེད་པ་དང། ཡིད་ལ་མི་བྱེད་པ་དང། ཁེངས་པའི་ཚིག་སྨྲ་བ་དང། འཇིག་རྟེན་འདི་ལ་སེམས་པ་སྟེ་བཞི་པོ་འདི་དག་ནི་བདུད་ཀྱི་ལས་སོ། །ནོར་ལ་བརྐམ་པ་དང། མི་དགེ་བའི་བཤེས་གཉེན་དང་རྒོད་ཅིང་སྨྲ་བ་དང། ཆུང་མས་ཡིད་བདེ་བ་དང། ཆོས་ཉན་པ་དེ་དག་གི་འདུན་པ་བཟློག་པ་སྟེ་བཞི་པོ་འདི་དག་ནི་བདུད་ཀྱི་ལས་སོ། །ཞེས་གསུངས་པ་ལྟར་ཐར་པ་འདོད་པ་རྣམས་ཀྱིས་བདུད་ཀྱི་ལས་སྤངས་ནས་ཆོས་ཉན་པ་ལ་འབད་དགོས་ཏེ། མདོ་ལས། བྱང་ཆུབ་མངོན་པར་འདོད་
བྱེད་ང་ཡིས་ནི། །རང་གི་ཡན་ལག་ལན་སྟོང་སྙེད་དུ་བཏང། །ཆོས་ཉན་པས་ནི་ང་ལ་ངོམས་མེད་ན། །དེ་དག་ཆོས་ཉན་པས་ནི་སྐྱོ་བར་འགྱུར། །རིགས་ཡིན་སྨྲ་དང་རིགས་པ་མ་ཡིན་སྨྲ། །རྣམ་པ་ཀུན་ཏུ་ཡོངས་སུ་སྤང་བར་བྱ། །བསྐལ་པ་བྱེ་བ་དུ་མར་གང་དཀོན་པ། །ཆོས་ཀྱི་དམ་པ་འདི་ལ་དགའ་བསྐྱེད་ཅིག །ཅེས་དང། འོད་སྲུང་གིས་ཞུས་པ་ལས། མང་དུ་ཐོས་པ་ལས་ཤེས་རབ་འབྱུང་བར་མཐོང་ནས་མགོའམ་གོས་ལ་མེ་འབར་བ་བཞིན་དུ་བསྒྲིམས་ཏེ་ཐོས་པ་འཚོལ་བར་བྱའོ། །ཞེས་པའི་དོན་བསམ་པར་རིགས་སོ། །བསྒྲུབ་བྱ་ལྔ་བཅུ་དགེ་ཚུལ་དང། རེ་གསུམ་བསྙེན་རྫོགས་སུ་བསྒྲུབས་ཏེ་ཐུབ་བསྟན་ལྷ་ཡི་དགའ་ཚལ་ངུར་སྨྲིག་འཆང་བའི་པད་དཀར་གྱིས་ཁྱབ་པར་མཛད། བཞི་པའི་བཅོ་ལྔའི་ཉིན་དཀོན་མཆོག་ཚུལ་ཁྲིམས། བློ་བཟང་དཀོན་མཆོག །དཀོན་མཆོག་ཐབས་མཁས་གསུམ་བསྙེན་པར་རྫོགས་ཏེ་བསླབ་གསུམ་བདུད་རྩིའི་བཅུད་ཀྱིས་ཚུལ་འཆལ་གདུང་བ་ཀུན་ནས་ཞི་བར་མཛད། ཨ་མཆོག་དགོན་པའི་འདུ་ཁང་རྒྱ་མཐོངས་འཁོར་བའི་གོས་ཀྱི་ཆུ་དར་བཟོ་རྒྱུ་མི་དྲུག་ལ་གཏད་ནས་མྱུར་དུ་བཟོས་གྲུབ་པ་དགོས་གསུངས། རྣམ་རྒྱལ་མཆོད་པའི་དབུར་ལན་ཁ་ཤས་ཕེབས་པ་དང། ཆོས་བཀའ་དང་གསུང་རྩོམ་བར་མ་ཆད་པར་མཛད། དེ་ཡང་རྣམ་ཐར་སྤྲིང་ཡིག་ལས། ཉིན་མཚན་དོན་ལྡན་ཆོས་ཀྱིས་འདའ་བ་ཡིས། །དགེ་སྦྱོར་ངང་དུ་མི་ཚེ་བསྐྱལ་མིན་ཡང། །ཚེ་དང་གྲོང་ཆོག་སྙོམས་པར་མ་བྱས་པ། །མི་རྒན་སྐྱིད་ཉལ་བརྒྱབ་པའི་རྣམ་ཐར་ཡིན། །ཞེས་གསུངས་པ་ལྟར། དགུང་ལོ་ཞེ་ལྔ་ནས་བཟུང་སྟེ་རེ་གཉིས་བར་གཤིན་སྔས་ལ་ཕེབས་པ་སོགས་གྲོང་ཆོག་གི་གཡེང་བ་བཙན་ཆོད་དུ་སྤངས་ཏེ་རི་ཁྲོད་ཡིད་དགའ་ཆོས་འཛིན་དང། གདན་ས་བཀྲ་ཤིས་འཁྱིལ་གཉིས་རེ་མོས་ཀྱི་ཚུལ་དུ་རྒྱུན་
བཞུགས་མཛད་དེ་ཐུན་བཞིའི་རྣལ་འབྱོར་ཆག་མེད་དང། ཆབ་ཚན་ལ་ཕེབས་སྐབས་སོགས་ཀྱི་ལམ་བར་ནས་ཀྱང་གྲོང་ནག་གི་ཁྱིམ་དུ་གཏན་མི་ཕེབས་ཤིང་གྲོང་སྡེ་སོ་སོས་ཇ་ཐབ་ཕུལ་བ་ལ་ཡང་རས་གུར་གྱི་ནང་ནས་འདོད་ཆོས་མོས་པ་བཞིན་གནང་བ་དང། ཕེབས་ལམ་ནས་དགོན་པ་སོ་སོར་ནན་གྱིས་གདན་དྲངས་པ་ལ་ཡང་བསྟན་པའི་རྒྱུན་ལ་དགོངས་ནས་ཆོས་བཀའ་གང་ཞུས་འདོད་མོས་ལྟར་དང། སྤྱི་འབུལ་གྱི་རིགས་བདག་གིར་མི་མཛད་ཅིང་གཞན་གྱི་དད་འབུལ་རྣམས་ཀྱང་མང་འགྱེད་སྤྱི་འཇོག་སོགས་ལ་གནང་སྟེ། མདོར་ན་ཕྱི་བཀའ་གདམས་གཙང་མའི་རྣམ་ཐར་འཕགས་པའི་རིགས་བཞི་ལ་གནས་པའི་སྒོ་ནས། ལམ་བསླབ་པ་གསུམ་ལ་གཅེས་སྤྲས་སུ་མཛད་པ། ནང་ཕར་ཕྱིན་དྲུག་དང་བསྡུ་དངོས་བཞིའི་སྒོ་ནས་བསྟན་འགྲོའི་དོན་ལྷུར་ལེན་པའི་ཚུལ་གྱིས་རྒྱལ་སྲས་ཀྱི་སྤྱོད་པ་ལ་གཞོལ་བ། གསང་བ་རིམ་གཉིས་བདེ་སྟོང་གི་རྣལ་འབྱོར་ལས་སྐད་ཅིག་ཙམ་ཡང་མི་འདའ་བའི་སྒོ་ནས་བློ་བཟང་རྒྱལ་བ་གཉིས་པའི་སྒྲུབ་བརྒྱུད་བསྟན་པའི་རྒྱལ་མཚན་སྲིད་རྩེར་བསྒྲེང་བར་མཛད་དོ། །སྨྲས་པ། རྨོངས་མུན་རྩད་ནས་བཅད་ཀྱང་ད་དུང་ཐོས་བསམ་སྒོམ་པས་བྲེལ། །རྒྱལ་ཀུན་མེས་པོར་གྱུར་ཀྱང་ད་དུང་རྒྱལ་སྲས་གཞོན་ནུའི་ཚུལ། །མ་འདྲེས་སྤྱོད་པ་དག་ཀྱང་ད་དུང་ངུར་སྨྲིག་ཟོལ་བརྟེན་ཁྱོད། །བཀའ་དྲིན་འཁོར་མཐའ་བྲལ་ཡང་ད་དུང་བྱང་ཆུབ་བར་དུ་སྐྱོངས། །གཞན་ཕན་ཁུར་འཁྱེར་ལྷག་བསམ་དག་པའི་མཁར། །སྐྱོ་ངལ་ཆུ་འཛིན་ཀུན་རྟོག་དྲི་བཞོན་བཅས། །དག་པས་ཐབས་མཁས་མཛད་བཟང་འོད་ཟེར་འབུམ། །ཐར་ལམ་སྣང་བའི་དཔལ་དུ་ཆད་མེད་ཤར། །རི་དྭགས་ཁྲོད་ན་གདོང་ལྔའི་དབང་པོ་བཞིན། །གངས་ཅན་
མཐའ་དབུས་བསྟན་འཛིན་བྱེ་བའི་ཁྲོད། །མཁས་བཙུན་བཟང་པོའི་རྣམ་ཐར་རྨད་བྱུང་དང། །ལེགས་བཤད་གཏམ་གྱི་སྦྱོར་བས་ཁྱོད་ཉིད་འཕགས། །ཁྱད་པར་རྒྱལ་ཀུན་ཁྲག་ཁྲིག་བསྐལ་པའི་བར། །སྲིད་ན་ཡིད་འོང་ལྷ་རྫས་དངོས་ཀུན་གྱིས། །མཆོད་པས་དཔེ་དང་ཆར་ཡང་མི་བཟོད་པའི། །སྒྲུབ་ལ་གཞོལ་བའི་རྣམ་ཐར་འདི་རྨད་བྱུང། །གནའ་དུས་རབ་ཡངས་རྒྱ་མཚོའི་གོས་ཅན་ཁྱོན། །ཚུལ་གནས་མང་ཐོས་དྲང་སྲོང་སྤོང་བ་པས། །མེ་ཏོག་འཛུམ་བཞད་མགོ་ལྕོག་ལྡེམ་པའི་འཕྲེང། །ཚལ་དུ་དངར་བའི་དགའ་བའི་ཚལ་བཞིན་མཛེས། །དེང་འདིར་རྣམ་ཐར་གཙང་མའི་སྐྱེད་ཚལ་དུ། །རིམ་གཉིས་སྦྲང་རྩིའི་ཆང་གིས་སྐལ་བཟང་འགྲོ །ཉམས་བརྒྱའི་གར་གྱི་རྩེ་དགས་རོལ་པ་ཡིས། །རྒྱལ་ཀུན་དགྱེས་པའི་བྱེད་པོ་ཁྱོད་མིན་སུ། །ཀྭ་ཡེ་ས་བཟང་གྲོགས་བཟང་འདུ་འཛིས་དབེན་པའི་ལྔ་ལྡན་གནས། །དམ་པའི་མགོན་དང་ཉེར་ཕྲད་ལྷ་ཆོས་སྐལ་བ་ལྡན་པ་དག །མ་དུལ་གླང་ཆེན་སྨྱོས་འདྲའི་རྨོངས་སེམས་ལོག་ལམ་དུ་འཕྱན་པ། །དྲན་ཤེས་ལྕགས་ཀྱུས་ཉེར་དུལ་ཆོས་ལམ་བདེ་བར་གཞོལ་བའི་རིགས། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་བཤད་སྒྲུབ་ཟུང་དུ་འབྲེལ་བའི་སྒྲུབ་པ་སྙིང་པོར་མཛད་པའི་སརྒ་སྟེ་བཅུ་པའོ།། །།འཆད་པའི་གླེགས་བམ་རྩོད་པའི་རལ་གྲི་ཅན། །རྩོམ་པའི་དབྱངས་ཅན་དཔལ་མོར་རྗེས་ཆགས་བཞིན། །སྙིང་དབུས་ལ་བཞུགས་ལོངས་སྤྱོད་འཁོར་ལོའི་འདབ། །ལེགས་བཤད་སྦྲང་རྩིའི་རྒྱུད་དུ་རྒྱས་པར་མཛོད། །དེ་ཡང་པོ་ཏོ་བའི་ཞལ་ནས། ཐེག་ཆེན་གྱི་བླ་མ་བྱ་བ་བཤད་པ་ན་འབྱམས་ཀླས་པར་གོ་བ་བསྐྱེད་ལ། ལག་ཏུ་ལེན་པ་ན་བསྟན་པའི་ཐ་མ་ལ་
གང་ཕན་དང། ཐད་ཀར་དོན་དུ་གང་འགྱུར་སྟོན་པ་གཅིག་དགོས་གསུངས་པ་ལྟར་རྗེ་འདི་ཉིད་ནི་འཆད་རྩོད་རྩོམ་གསུམ་ལ་འགྲན་ཟླ་དང་བྲལ་བའི་ལུང་གི་ཡོན་ཏན་དང། བསླབ་གསུམ་རིམ་གཉིས་ལ་མངའ་བརྙེས་པའི་རྟོགས་པའི་ཡོན་ཏན་གྱི་མཛོད་དུ་གྱུར་ཀྱང་ལས་དང་པོ་བའི་དགེ་སློང་རྣམ་པར་དག་པ་ཐ་མལ་པ་འབའ་ཞིག་གི་ངང་ཚུལ་ཁོ་ན་ལྷུར་བཞེས་ཏེ་སྙིགས་མའི་དུས་སུ་སླེབས་ཀྱང་བསྟན་པའི་གཞི་རྩ་བརྟན་པ་ཁོ་ན་དང། སེམས་ཅན་ལ་ཐད་ཀར་དོན་དུ་གང་འགྱུར་གྱི་ཕན་པ་ཁོ་ན་གཙོ་བོར་མཛད་པ་ཡིན་ཏེ། སེམས་ཅན་ཐམས་ཅད་བདག་གིར་མཛད་པའི་བྱམས་སྙིང་རྗེ་བྱང་ཆུབ་ཀྱི་སེམས་ཀྱི་རང་བཞིན་ཀུན་ལ་གསལ་ཞིང། ནང་དུ་དེ་ལྟ་བུའི་ཡོན་ཏན་གྱི་མཐུ་ཆེན་པོ་དང་ལྡན་པས་གྲགས་པའི་མེ་ཏོག་རྒྱུན་ཆགས་པ་སྐྱེ་རྒུའི་རྣ་བའི་རྒྱན་དུ་གྱུར་པ་དང། རྒྱལ་བ་དགྱེས་པའི་སྤྱོད་པ་མ་གཏོགས་ཆོས་མིན་གྱི་འཇིག་རྟེན་མཐུན་འཇུག་སོགས་ཅུང་ཟད་ཀྱང་མི་མཛད་པ་དང། སེར་སྣ་མེད་པར་གཏོང་ཕོད་ཆེ་བས་འབྲེལ་ཚད་དོན་དང་ལྡན་ཞིང་གསུང་འཕྲོས་དང་ཞལ་རྩེད་ཚུན་ཆད་ཀྱང་ལེགས་པར་བཤད་པའི་གཏེར་དུ་གྱུར་པ་དང། ཚེ་འདི་པའི་མི་དང་མི་བསྟུན་ཀྱང་འདུན་པ་ཡང་ལྡོག་མི་འཇུག་པར་གར་བཞུགས་དང་གར་ཕེབས་སུ་ཆོས་དང་ཟང་ཟིང་གིས་ཚིམ་པར་མཛད་ནས་དགེ་བའི་བྱ་བ་གང་འཚམ་ལ་འགོད་པ་དང། ཐོས་བསམ་དང་བཟླས་བརྗོད་སྦྱིན་གཏོང་མཁན་རྣམས་ལ་བསྔགས་ནས་གཟེངས་བསྟོད་ཅིང་སྤྲོ་བ་བསྐྱེད་པ་དང། རྐྱེན་དང་བྱ་བ་བཟང་ངན་གང་བྱུང་རང་གཞན་ཆོས་ལ་བསྐུལ་བའི་ཐབས་སུ་སྦྱོར་བ་མ་གཏོགས་གཞན་ལ་བརྙས་སྨོད་དང་མཚང་འབྲུ་བ་སོགས་སེམས་ལ་གནོད་པའི་རིགས་མི་མཛད་ཅིང། ཚུར་ལ་བསླུ་མི་ཚུགས་
པས་རང་གཞན་ཆོས་ཀྱིས་བསྲུང་བ་དང། ཇི་ལྟར་གྱུར་ཀྱང་མི་ཞུམ་ཞིང། ཇི་ལྟར་བྱས་ཀྱང་བརྩེ་བ་མི་ལྷོད་པའི་སྙིང་སྟོབས་བརྟན་པ་དང། ཀུན་གྱིས་ཇི་ལྟར་བཀུར་ཀྱང་མཆོག་དམན་བར་མ་སུ་ལ་ཡང་ཇི་མི་སྙམ་པ་མི་བྱེད་པར་ངོ་ཚ་ཁྲེལ་ཡོད་བག་དང་ལྡན་པས་འཇུག་པ་དང། སྐྱིད་དེ་བ་ལས་རབ་ཏུ་བྱུང་བའི་རང་བཞིན་དུ་གྱུར་ཀྱང་ཐོས་བསམ་སྒོམ་གསུམ་དང་བསྟན་འགྲོའི་དོན་ལ་སྐྱོ་ངལ་མེད་ཅིང་ཚ་གྲང་བཀྲེས་སྐོམ་རྐྱེན་ངན་གང་ལ་སྲན་ཐུབ་པས་བརྟན་པ་དང། ལྷག་པར་མཁྱེན་དཔྱོད་ཆེ་བས་མདོ་སྔགས། སྨན་རྩིས། སྒྲ་སྙན། ལྷ་སྐུའི་ཐིག་དང་རི་མོ། ཟངས་ལྕགས་སོགས་ཀྱི་བཟོ་དང། སྒྱུ་རྩལ་སྐད་རིགས་ཐམས་ཅད་ལ་མཁས་པས་གཞན་དོན་སྒྲུབ་པའི་ཡན་ལག་རྫོགས་པ་དང། ཚུལ་ཁྲིམས་ཀྱི་མཐུས་འཕྲལ་དུ་ཡང་སྨོན་པ་ཙམ་གྱིས་དོན་འགྲུབ་ཅིང་བདེན་པའི་ཚིག་ལས་འབྱུང་བ་བཞི་ཡང་འདའ་མི་ནུས་པས་ཚིག་ཙམ་གྱིས་ཀྱང་གནོད་པ་ལས་ཐར་ཞིང་བདེ་བའི་འབྲས་བུ་ལ་འགོད་པ་དང། དུལ་བ་དང་ཞི་བས་བརྒྱན་ཅིང་བརྩེ་བའི་ངང་དུ་གནས་ཀྱང་ཉེས་སྤྱོད་ལས་བཟློག་པའི་ཕྱིར་བརྟན་ཅིང་ཕ་རོལ་གནོན་པ་དང། སྦྱིན་པ་དང་སྙན་པར་སྨྲ་བས་འཁོར་དུ་བསྡུས་པ་རྣམས་དོན་བཟང་པོ་ལ་འགོད་ཅིང་རང་ཡང་དེ་ལ་གནས་པ་དང། ཏིང་ངེ་འཛིན་དང་ཤེས་རབ་ཟུང་དུ་འབྲེལ་བའི་ངང་ལས་མི་གཡོ་བར་སྦྱིན་པ་དང་ཚུལ་ཁྲིམས་ཀྱི་སྤྱོད་པས་གདུལ་བྱ་འདུལ་བ་ལ་བཟོད་ཅིང་སྤྲོ་བས་བརྒྱན་པ་དང། ཟབ་མོའི་ཏིང་ངེ་འཛིན་ལས་གཡོ་མེད་ཀྱི་ངང་ནས་ཕྱག་དང་སྐོར་བ་དཔེ་གཟིགས། བཟླས་བརྗོད་སཙྪ་སྐུ་པར་མཆོད་འབུལ་སོགས་སྤྲོས་བཅས་ཀྱི་དགེ་སྦྱོར་ཆུ་བོའི་རྒྱུན་ལྟ་བུར་མཛད་པ་ལས་བཏང་སྙོམས་ཀྱི་ངང་ནས་སོས་བདེར་བཞུགས་པ་སྐད་ཅིག་ཀྱང་མི་མཛད་པ་དང།
འུད་དང་གྲགས་སྐམ་ལ་མི་དགྱེས་པས་ཆེ་ཕྲ་སུས་ཀྱང་རང་གཞན་ལ་བསྟོད་སྨད་ཀྱི་ཚིག་དོན་མེད་ཞུས་པ་དང་ལེན་མི་མཛད་པ་དང། རྒྱུན་དུ་ཡང་བསྟན་འགྲོའི་དོན་དུ་དགོངས་པའི་ཞལ་ཏ་མ་གཏོགས་གསུང་འཕྲོས་ཕལ་བའི་རིགས་ཆེར་མི་མཛད་ཅིང། ཆོས་མཐུན་གྱི་གཏམ་ལ་ཕྱོགས་སྐྱོར་བ་མ་གཏོགས་སྙིང་པོ་མེད་པའི་གཏམ་ལ་ལན་མི་མཛད་པར་བཟླས་བརྗོད་དང་དཔྱད་འཇོག་གི་ངང་ལ་བཞུགས་པ་དང། ཚུལ་ཁྲིམས་ཡལ་བར་བོར་ནས་བཟླས་བརྗོད་དང་ཕྱག་སྐོར་མང་འགྱེད་ཙམ་རེས་གྲོལ་བར་རེ་བའི་བློ་དམན་ལ་འདོམས་ཆེད་འདུལ་བའི་ལག་ལེན་གང་ཞིབ་མཛད་པ་དང། སྐུ་གཟུགས་སྟེམ་པ་དང་ཆབ་ཚན་སོགས་ཀྱི་ཚེ་ཡང་གུང་ཚིགས་དུས་ལས་མི་ཡོལ་བ་སོགས་ཚུལ་ཁྲིམས་དང་བཤད་སྒྲུབ་ཀྱི་ལག་ལེན་ལ་གནོད་པའི་རིགས་སྤངས་པས་སྡོམ་གསུམ་དག་པ་དང། བཞེས་ཕོར་གསོལ་ཏེམ་སོགས་ཆ་སྤྱད་གང་ལ་ཡང་རིན་པོ་ཆེའི་ཤན་མི་བསྲེ་ཞིང། རིན་ཆེན་རྒྱན་སྤྲོད་སོགས་ཀྱི་སྐབས་སུ་ཡང་གོ་བ་ལེན་པའི་ཐབས་མ་གཏོགས་རེག་པ་དང། རེག་ཏུ་མི་འཇུག་ཅིང་རྒྱུན་གྱི་ན་བཟའ་ལ་ཡང་གསར་པ་མདོག་དབྱིབས་ངོམ་ཆེ་བའི་རིགས་མི་བཞེས་པ་སོགས་འདོད་པ་བསོད་སྙོམས་ཀྱི་མཐའ་སྤངས་པ་དང། ཟས་གོས་དང་གཉིད་ཀྱི་བདེ་བ་ལ་ཞེན་པ་དང། ཆགས་སྡང་དང་འགྲན་སེམས། ཁ་བསག་གཞོག་སློང་སོགས་མི་མངའ་བ་ནི་དགྲ་གཉེན་བར་མ་སུས་ཀྱང་བསྙོན་དུ་མེད་པར་མངོན་སུམ་གྱིས་གྲུབ་པ་དང། དད་པ་དང་བརྩོན་འགྲུས་ཆེ་བའི་མཛད་པ་ཡོངས་ལ་གསལ་ཞིང། མཁྱེན་རབ་རྣོ་ཞིང་གཏིང་ཟབ་པས་ཤགས་འདེབས་དང། རྩེད་མོ་ཚུན་ཆད་ཉམས་དོད་ཅིང་དཔྱད་ན་གོ་རྒྱུ་ཆེ་བ་དང། སྡུག་བསྔལ་གྱིས་ནོན་པ་དག་ལ་ཞལ་རྩེད་སོགས་ཀྱིས་སྤྲོ་བསྲིངས་པ་དང།
ཞལ་རས་མཐོང་ཙམ་གྱིས་དགའ་ལྷང་གིས་འགྲོ་ཞིང། དེའི་ཞར་ལ་ཞལ་རས་ཀྱི་ཉམས་ཤིག་གིས་སྤྱོད་ངན་གྱིས་ནོངས་པ་རྣམས་འཇིགས་ཞུམ་གྱིས་འགྲོ་བ་དང། སྐུ་གཟུགས་ཆེ་ཞིང་བརྗིད་པ། ཆ་མི་སྙོམས་པ་མེད་པར་ཕྱག་ཞབས་ཀྱི་མཐིལ་སྙོམས་ཤིང། སྤྱན་དང་ཕྱག་སོར་སོགས་གང་དང་གང་ལ་ཡང་མཚན་དཔེའི་ཉམས་མང་དུ་དོད་པ་དང། མཐའ་དབུས་གང་ནས་ཉན་ཀྱང་གསུང་གདངས་མཐོ་དམན་འདྲ་བར་ཐོས་ཤིང། འཛེར་བག་མེད་པར་མཉེན་འཇམ་སྙན་ཆ་ཆེ་ཞིང་འགྱུར་ཁུག་དོད་པས་ལྷང་ལྷང་ཐོས་པ་ཙམ་གྱིས་ཡིད་དབང་མེད་དུ་འགྱུར་བ་དང། ཐུགས་དཀྱེལ་ཆེ་ཞིང་བྱ་བ་གང་ལ་གྱ་ཚོམ་མེད་པར་འཕྲལ་ཕུགས་ཁེ་དང་ཉེན་ལ་གཟིགས་ཏེ་ལས་འབྲས་སྤང་བླང་མཛད་པ་ལས། དགའ་སྡུག་ཁྲོ་ཆགས་ཀྱི་རྣམ་པ་ཚུབ་ལིང་མི་མཛད་པ་དང། སྐུ་སྐེད་བསྙུང་ན་མ་གཏོགས་རྒྱབ་བསྙེལ་སྤངས་ཤིང། སྐྱིལ་ཀྲུང་ལས་གཡོ་བ་དང་འཕྲེད་ཉལ་མི་སྲིད་ལ། ཕེབས་དུས་གཉའ་ཤིང་གང་ཙམ་ལ་གཟིགས་ནས་འཕགས་པའི་མི་སྨྲ་བའི་ངང་ནས་སམ་ཆོས་མཐུན་གྱི་སྤྱོད་པས་ཕེབས་པ་སོགས་སྤྱོད་ལམ་མཐོང་བ་ཙམ་གྱིས་དང་བ་འདྲེན་པ་དང། ཡིག་དྲུག་ཞལ་འདོན་དུ་གནང་བ་མ་གཏོགས་གཞན་བསྐྱེད་རྫོགས་ཀྱི་ཉམས་བཞེས་ཕར་ཞོག་ཞལ་འདོན་ཅི་མཛད་ཀྱང་མི་མངོན་ཞིང། ཐུགས་དམ་གྱི་རྟེན་བྲིས་ཐང་གླེགས་བམ་བགྲང་འཕྲེང་སོགས་ཉེ་གནས་དག་གིས་ཀྱང་མཐོང་མ་མྱོང་བ་ལྟ་བུའི་སྦས་པའི་བརྟུལ་ཞུགས་ཁོ་ན་མཛད་པ་དང། ཐོས་བསམ་གནད་དུ་འགྲོ་བ་ཚུལ་ཁྲིམས་ལ་རག་ལས་པ་དང། ཚུལ་ཁྲིམས་ལ་གནས་ནས་ཐོས་བསམ་སྒོམ་གསུམ་བྱེད་པ་ལས་ཟུར་དུ་ཚོགས་བསགས་སྒྲིབ་སྦྱོང་ཚོལ་མི་དགོས་པ་དང། ཚུལ་ཁྲིམས་ཡལ་བར་བོར་བའི་སྦྱིན་སོགས་ཀྱིས་ས་གང་ཡང་མི་ཆོད་ཚུལ་ཡང་ཡང་འདོམས་པ་དང། ཚུལ་ཁྲིམས་ཀྱི་
དྲིས་དགའ་བདེས་ཚིམ་པར་བྱེད་ཅིང། ཞལ་དཀྱིལ་དང་གསུང་གདངས་བྱམས་བརྩེ་བྱང་སེམས་ཀྱིས་བརླན་ཅིང་འཇམ་པས་ཡིད་དུལ་བར་མཛད་པ་དང། མངོན་ཤེས་སོགས་ཀྱི་ཟུར་ཙམ་ཡང་མི་གསུངས་པར་མ་ཟད་ཆུང་དུས་ཅུང་ཟད་གསལ་བ་ཡང་བར་ཆད་ཡིན་ཞེས་དང་དུ་མི་ལེན་ཀྱང་བློ་རྩེ་གཏད་ན་གང་གསུང་འཁྲུལ་པ་མེད་པའི་བསླུ་མེད་ཀྱི་གདེང་ཀུན་གྱིས་མཐོང་རུང་དུ་ཡོད་པ་དང། གསུང་གི་ཟུར་ལ་བརྟགས་ན་འཕོ་འགྱུར་སོགས་འབྱུང་འགྱུར་ཐམས་ཅད་ཐོག་ཏུ་མི་ཁེལ་བ་མི་སྲིད་ལ། ཕ་རོལ་གྱི་བསམ་པ་དང་བྱ་བྱེད་མངོན་སུམ་དུ་གཟིགས་པས་རྩེད་མོ་དང་བཀའ་བཀྱོན་གྱི་གསུང་ལས་རང་སྤྱོད་རང་གིས་དྲན་པ་ཀུན་ལ་མཐུན་སྣང་དུ་གྲུབ་པ་དང། སྨད་དུ་རུང་བའི་སྐྱོན་གྱི་རྣམ་པ་བརྟག་ཏུ་མེད་ཅིང་ཡིད་དུ་འོང་བའི་ཡོན་ཏན་འབའ་ཞིག་གིས་བརྒྱན་པས་བསྟན་པ་དང་བསྟན་འཛིན་ལ་མི་གུས་པའི་སྡིག་ཅན་རྣམས་ཀྱང་རང་བཞིན་གྱིས་འདུད་པ་དང། མདོར་ན་ཇི་མཛད་བསྟན་འགྲོའི་དོན་ལས་གཡོ་བ་མེད་པས། དྲུང་དུ་བཏུད་པ་དག་གིས་ཇི་ཙམ་བརྟག་ཀྱང་ད་རེས་ཀྱི་འདི་མངོན་ལྐོག་ཅུང་ཟད་མི་མཐུན་པ་འདྲ་སྙམ་པའི་ཐེ་ཚོམ་ཞིག་སུ་ལ་ཡང་སྐྱེ་བའི་གནས་སྤུ་ཙམ་མི་སྲིད་པ་ནི་སངས་རྒྱས་ཐམས་ཅད་ཀྱི་ཡེ་ཤེས་དང་ཡོན་ཏན་ལ་འཇུག་པའི་མདོ་ལས། གསང་བའི་བདག་པོ་ལག་ན་རྡོ་རྗེས་སྨྲས་པ། ཞི་བའི་བློ་གྲོས། གང་ཚུན་ཆད་དེ་བཞིན་གཤེགས་པ་མར་མེ་མཛད་ཀྱིས་དེ་བཞིན་གཤེགས་པ་བྱང་ཆུབ་སེམས་དཔར་བླ་མེད་བྱང་ཆུབ་ཏུ་ལུང་བསྟན་པ་དེ་ཚུན་ཆད་ཁོ་བོ་བྱང་ཆུབ་སེམས་དཔའི་ཞམ་འབྲིང་ན་འདུག་ཀྱང་བྱང་ཆུབ་སེམས་དཔའི་ལུས་འགྱུར་བའམ། ཚུལ་འཆོས་པའམ། ངག་འགྱུར་བའམ། ཁ་གསག་གམ། སེམས་འགྱུར་བའམ། སེམས་
གཡོ་བ་ཡང་མ་མཐོང་ངོ་། །ཞེས་གསུངས་པ་ལྟར་རོ། །གཞན་ཡང་བཙན་པོའི་ལུང་ལས་ཀྱི་དཔུང་དང་སྟོབས་འབྱོར་ལོངས་སྤྱོད་ཀྱི་ཡོ་ལང་གིས་ཆེན་པོར་བསྒྲགས་ཙམ་མ་ཡིན་པར་མཁས་བཙུན་བཟང་པོར་གྲུབ་པའི་དཔལ་གྱིས་ཞབས་མཐིལ་རྡུལ་གྱི་འཕྲེང་བ་སྐྱེ་རྒུའི་གཙུག་ན་མངོན་པར་མཐོ་བ་ནི་ཉི་མའི་དཀྱིལ་འཁོར་རྟ་ལྗང་བདུན་གྱི་ཤིང་རྟས་བཀུར་བ་ལྟ་བུ། འཆད་པའི་ཚེ་ཤེས་བྱེད་ཀྱི་ལུང་དང་སྒྲུབ་བྱེད་ཀྱི་རིགས་པ། གསལ་བྱེད་ཀྱི་དཔེ་གསུམ་སྦྱར་བའི་སྒོ་ནས་བློ་ལྡན་དོན་གཉེར་བ་རྣམས་ཀྱི་ཡིད་ཀྱི་མུན་པ་སེལ་བ། སྤྱི་དོན་གྱི་སྣང་བས་མ་རྟོགས་པའི་མུན་པ་འཇོམས་པ། ཚིག་དོན་གྱི་སྲོལ་ཡངས་པོར་ཕྱེ་བས་ལོག་རྟོག་གི་གོལ་ས་སྤངས་པ། དཀའ་གནད་ཀྱི་མདུད་པ་དཀྲོལ་བས་ཡིད་གཉིས་ཀྱི་ཐེ་ཚོམ་གཅོད་པ་སྟེ། བཤད་ཐབས་ཡན་ལག་ལྔ་དང་རྒྱན་བདུན་གྱི་སྒོ་ནས་མདོ་སྔགས་འཆད་པའི་ཡོན་ཏན་གྱིས་ཉན་པ་པོའི་རྒྱུད་ལ་ལུང་རྟོགས་ཀྱི་ཡོན་ཏན་སྤེལ་བ་ནི་སྤྲིན་ཆེན་འབྲུག་སྒྲས་གང་བ་ན་རྨ་བྱ་དགའ་བདེའི་མངལ་འཛིན་པ་ལྟ་བུ། རྩོད་པའི་ཚེ་དངོས་སྟོབས་ཀྱི་རིགས་པས་སྨྲ་ངན་སུན་འབྱིན་ཅིང་ཕས་རྒོལ་གྱི་ལོག་རྟོག་དྲུངས་འབྱིན་པ་ནི་སྲིད་སྒྲུབ་ཉག་ཕྲན་གྱི་རྩལ་ལ་ཞུགས་པ་ལྟ་བུ། རབ་འབྱམས་གྲུབ་མཐའི་གནད་དོན་འཁྲུལ་མེད་མ་འདྲེས་པར་གཟིགས་པའི་མི་འཇིགས་པའི་དམ་བཅའ་བརྟན་པ་ནི་འཛིན་མའི་སྤོ་ལ་རི་ཡི་དབང་པོ་ལྷུན་ཆགས་པ་ལྟ་བུ། རྩོམ་པའི་ཚེ་བརྗོད་བྱ་བདེན་བཞི་གང་ལས་བརྩམས་ཀྱང་ཆོས་སྲིད་གང་འབྲེལ་དེའི་རྩ་བ་སྡུད་པའི་ལེགས་བཤད་ཀྱི་གཏེར་དུ་གྱུར་པ་ནི་ནོར་བུའི་བང་མཛོད་ཁ་ཕྱེ་བ་ལྟ་བུ། བཅད་ལྷུག་སྤེལ་མའི་ལུས་ཇི་ལྟར་བྱས་ཀྱང་འགལ་ཟློས་མ་འབྲེལ་བའི་སྐྱོན་དང་བྲལ་ཞིང་སྙིང་གི་བདུད་རྩི་ཁོ་ནར་གྱུར་པ་ནི་ཚ་བས་གདུངས་པ་ལ་ཟླ་ཟེར་
གྱིས་བསིལ་བ་ལྟ་བུ། སྒྲ་དང་དོན་གྱི་རྒྱན་ཕུན་སུམ་ཚོགས་པས་ཇི་ལྟར་བརྒྱན་ཀྱང་རྣ་བར་སྙན་ཅིང་ཡིད་དུ་འཐད་པ། བསམ་ན་ངོ་མཚར་ཞིང། གདམས་དོན་བསླུ་བ་མེད་པ་དྲུག་ཅུའི་དབྱངས་ལྟ་བུ། ཆོས་སྲིད་ཀྱི་བྱ་བ་གང་ལ་ཞུགས་ཀྱང་དཀར་ནག་གི་ཐབས་ཚུལ་སྣ་ཚོགས་ལ་ལྟོས་པ་མེད་པར་ཐུགས་བསྐྱེད་དང་ཏིང་ངེ་འཛིན་གྱི་མཐུས་འདོད་དགུར་ལྷུན་གྲུབ་ཏུ་འབྱུང་བ་ནི་འཇིག་རྟེན་གྱི་མེས་པོ་ཚངས་པ་ཆེན་པོ་བརྟན་གཡོའི་སྣོད་བཅུད་སྤྲུལ་བ་ལ་ཞུགས་པ་ལྟ་བུ་སོགས་མདོར་ན་སྲས་བཅས་རྒྱལ་བའི་མཛད་འཕྲིན་གྱི་ཆུ་ཀླུང་གཅིག་ཏུ་འཁྱིལ་བའི་རྒྱལ་སྲས་ཀྱི་སྤྱོད་པའི་རླབས་ཕྲེང་ཕྱོགས་བརྒྱར་གཡོ་བ་ལ་འདོད་དགུར་དབང་བསྒྱུར་བར་གཟིགས་ནས་སྔར་དུས་ཚད་མ་ངེས་ཀྱང་ཡབ་རྗེ་རྡོ་རྗེ་འཆང་དེ་ཉིད་ནས། རྗེ་འདི་ལ་པཎ་ཞྭ་སྣེ་རིང་མནབ་བཞིན་པ་ཞིག་གནང་བ་ཡིན་འདུག །དེ་དུས་ཞལ་ནས། འདི་རྗེ་རིན་པོ་ཆེས་རྒྱལ་ཚབ་རྗེ་སོགས་ལ་གནང་བའི་རྟེན་འབྲེལ་ཅན་ཡིན་པས། ཁྱེད་ལ་རང་དགར་བྱིན་པ་ཡིན་གསུངས། རང་དགར་ཞེས་པ་ནི་རྗེས་གནང་བའི་དུས་དང་མི་འདྲ་བ་དང་ཁེངས་སྐྱུངས་པ་སོགས་གོ་རྒྱུ་མང་བར་ངེས་ཤིང། དགེ་བའི་རྩ་བ་ཡོངས་སུ་འཛིན་པའི་མདོ་ལས། སྔོན་སྟོན་པ་བཅོམ་ལྡན་འདས་ཀྱིས་འོད་སྲུང་ཆེན་པོ་ལ་གདན་གྱི་ཕྱེད་གནང་བའི་སྐབས་ལས་འཕྲོས་ནས་འོད་སྲུང་གིས། བཅོམ་ལྡན་འདས་ལས་ཤ་ནའི་རས་ཕྱག་དར་ཁྲོད་མནོས་པ་རྣམས་མི་སློབ་པའི་ས་ལ་ཐུག་གི་བར་དུ་སྤྱི་བོས་མནོས་ལགས་སོ། །བདག་གིས་ལོངས་སྤྱད་པའི་སླད་དུ་བླངས་པ་ནི་མ་ལགས་ཀྱི་གདམས་པ་དང་རྗེས་སུ་བསྟན་པ་ལས་བརྩམས་ནས་བླངས་ལགས་སོ། །དེ་སླན་ཆད་སེམས་མཐོ་བའམ་དམའ་བར་གྱུར་པ་དང། སངས་རྒྱས་རྗེས་སུ་དྲན་པ་མ་ལགས་པར་
དེ་ལས་གཞན་སྙོམས་པར་འཇུག་པ་དག་གིས་བདག་གཞན་དུ་གནས་པར་མི་དྲན་ལགས་སོ། །ཞེས་སོགས་ཞུས་པར་གསུངས་པ་ལྟར། དམ་པའི་སྤྱོད་པ་འདི་འདྲ་བའི་རང་བཞིན་ནི་ངོ་མཚར་བའི་གནས་སུ་ཤེས་དགོས་ཏེ། སྔོན་གྱི་ལུང་རྟོགས་ཅུང་ཟད་ཀྱང་མ་ཉམས་ཤིང་ཕེབས་བཞུད་ཆོས་སྲིད་ཀྱི་མཛད་སྲོལ་ཡབ་རྗེ་རྡོ་རྗེ་འཆང་ལ་སྤྱན་ལྟོས་གནང་བས་སློབ་མ་རྣམས་ཀྱང་ངང་ཚུགས་བཟང་པོ་འགྱུར་ལྡོག་མེད་ཅིང། ལྷག་པར་འབྱོན་བཞུད་དང་གསུང་གི་གདངས་ནོར་འགྲོ་བ་ལྟ་བུར་ཡོད་པ་ནི་ཡབ་སྲས་གཉིས་ཀའི་དྲུང་དུ་ཉེ་བའི་བུ་སློབ་ཀུན་གྱིས་གྲུབ་ལ། གང་གི་སྲས་ཀྱི་ཐུ་བོ་འགའ་ཞིག་ཀྱང་ཡབ་སྲས་གོང་མ་གཉིས་ཀྱི་གསུང་གདངས་རྣམ་འགྱུར་མ་ཉམས་པར་ཡོད་པ་ཕྱིས་འབྱུང་གི་རྟེན་འབྲེལ་རྨད་དུ་བྱུང་བར་སེམས་སོ། །གཞན་ཡང་ཡུལ་དུས་གང་དུ་ཡང་ཆོས་མཐུན་གྱིས་གཞན་སེམས་བསྲུང་བ་དང། སུ་ལ་ཡང་གནོད་ལན་མི་འཇལ་བར་ཕན་སེམས་རང་བསྲིངས་ཤིང་གཞུང་བཟང་བ་དང། རང་བཞིན་འཇམ་པོས་མཐུན་པར་འགྲོགས་ལུགས་མཁས་ཤིང། སྦྱིན་བདག་དང་འཁོར་སློབ་སོགས་འཁོར་དུ་ཉེ་ཞིང་ཡིད་གཏད་པའི་རིགས་ཇི་ཙམ་གམ་དུ་བཅར་ཀྱང་བསྙེན་པར་དཀའ་བ་ཅུང་ཟད་ཀྱང་མི་སྲིད་ལ། དེ་དག་ལ་རང་རང་སོ་སོར་བརྩེ་སེམས་དང། བྱ་བྱེད་བློ་དང་བསྟུན་པ་མ་གཏོགས་ལེགས་ཉེས་ཅུང་ཟད་ལ་ཡང་དགའ་ཁྲོའི་འགྱུར་ལྡོག་མི་མངའ། ཟས་གོས་རྙེད་པ་སྟོབ་ཅིང་བློ་ཚོད་དང་འཚམ་པའི་ཆོས་ལ་སྦྱོར་བ་སོགས་འདི་ཕྱིའི་དོན་ཡལ་བར་མི་འདོར་བར་བརྩེ་སེམས་ཀྱིས་སྐྱོང་བ་དང། དྲག་ཞན་སོ་སོར་བབས་བསྟུན་གྱི་ཞེ་ས་དང་བཀུར་སྟི་སྟོབ་པ་སོགས་གཞན་རྒྱུད་སྨིན་གྲོལ་གྱི་ཐབས་ཁོ་ན་མཛད་པས་མཚོན་རྒྱུན་གྱི་མཛད་སྤྱོད་ཐམས་ཅད་མདོ་རྒྱུད་ལུང་རིགས་དང་སྦྱར་ནས་བཤད་ན་ལེགས་
ཀྱང་ཚིག་ཚོགས་ལ་འཛེམ་ནས་མདོར་བསྡུས་ཙམ་དགེ་བའི་བཤེས་གཉེན་བསྟེན་པའི་སྐལ་ལྡན་རྣམས་ཀྱིས་ཡོན་ཏན་དང་བཀའ་དྲིན་དྲན་པའི་དད་གུས་སྦྱོང་བའི་ཕྱིར་དང། བློ་རབ་འབྲིང་ཐ་གསུམ་གྱི་དམིགས་རྐྱེན་དུ་འགྱུར་བའི་ཆེད་དང། གཙོ་ཆེར་མདོ་ལས། སྡིག་པས་གང་བའི་མི་མཇེད་ཀྱི་ཞིང་ནི་མི་གཙང་བའི་འདམ་རྫབ་ཀྱི་ཁུང་ལྟ་བུ་དང། དེར་གནས་པའི་ཕལ་པ་རྣམས་ནི་གདོལ་བ་ལྟ་བུ་དང། ཞིང་དེའི་བྱང་སེམས་རྣམས་ནི་ནོར་བུ་རིན་པོ་ཆེ་ལྟ་བུར་སེམས་ཅན་དེ་དག་གིས་དེའི་ཡོན་ཏན་མི་མཐོང་བ་དང། འདམ་གྱི་ནང་དུ་གནས་པའི་ནོར་བུ་བཞིན་དུ་བསམ་གྱིས་མི་ཁྱབ་པའི་གོ་ཆ་བགོས་པའི་བྱང་སེམས་ཆེན་པོའི་འོད་མི་འདོར་ཀྱང། སེམས་ཅན་རྣམས་ཀྱི་བསམ་པ་དང་མོས་པ་ཆུང་བའི་སླད་དུ་དེ་བཞིན་གཤེགས་པས་ཀྱང་འོད་འདོམ་གང་ཙམ་དུ་བྱིན་གྱིས་བརླབས་པ་སོགས་གསུངས་ནས། བཅོམ་ལྡན་འདས་རིགས་ཀྱི་བུ་དེ་དག་གིས་ཇི་ཙམ་དུ་སྨོན་ལམ་དག་ཤིན་ཏུ་སྦྱངས་པ་དང། སེམས་ཅན་གང་དག་གིས་དེ་དག་གི་སྨོན་ལམ་དེ་དག་ཐོས་པ་དང། མིང་ཡང་བསྒྲགས་པ་དེ་དག་སྡུག་བསྔལ་མང་པོས་རེག་པའི་སྡུག་བསྔལ་དེ་དག་ལས་ཡོངས་སུ་ཐར་བར་འགྱུར་བ་དང། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་ནི་ངོ་མཚར་ལགས་སོ། །ཞེས་གསུངས་པ་ལྟར་གྱི་ཕན་ཡོན་ལ་རང་གཞན་འགོད་པའི་ཕྱིར་དུ་བཀོད་པ་ཡིན་ནོ། །དེས་ན་བླ་མ་དང་གྲོགས་བཟང་པོའི་དྲིན་ལས། བཀའ་དང་བསྟན་བཅོས་དུ་མ་དང་མཇལ་ནས་ཐོས་བསམ་ཕྲན་ཚེགས་ཙམ་བྱས་ཀྱང་རྒྱུད་སྟེང་དུ་ཉམས་ལེན་མ་བྱས་པས། འདི་སྣང་གི་བྱ་བས་གཡེལ་ཏེ་དགེ་མི་དགེ་སྣ་གཅིག་ཙམ་གྱི་བླང་དོར་ཞེ་གཙང་མེད་པའི་རིགས་དང། དེང་དུས་འདིར་ཡང་ཐལ་བའི་
གསེབ་ན་གསེར་བཞིན་དུ་དམ་པའི་སྐྱེ་བོ་མང་དུ་ཡོད་པར་ངེས་ཀྱང་བརྟག་དཔྱད་ཀྱི་བློ་མིག་མེད་པར་འོལ་ཚོད་ཀྱིས་ལག་ནོམ་བྱས་ཏེ་ཕ་རོལ་བོའི་ཡོན་ཏན་གྱི་ཞྭ་དཔེ་རང་སྐྱོན་གྱི་ལྷམ་ལ་བཀབ་ནས་མིག་ལྟོས་མི་བྱེད་པ་དག་དང། མི་དགེ་བའི་འདམ་རྫབ་ཀྱི་ནང་དུ་སྐྱེ་རྒ་ན་འཆིའི་འགྲེ་ལྡོག་བྱེད་བཞིན་དུ་གཞན་སྨོད་ཀྱི་འོ་དོད་དབྱངས་སུ་གྱེར་བ་དག་དང། དགེ་བའི་བཟའ་བཏུང་ལ་སྤྱོད་པར་འདོད་ཀྱང་སྡིག་གྲོགས་ཀྱི་ནད་དྲག་པོས་བཏབ་སྟེ་གདམས་ངག་གི་བདུད་རྩི་སྒྲ་འཛིན་གྱི་ཁ་སྤུར་གོས་པ་ཚུན་ཆད་ཀྱང་སྤྲུག་པར་བྱེད་པ་དག་གིས་རང་ཉིད་འཁོར་བའི་གཏིང་རྡོ་འབའ་ཞིག་ཏུ་སོང་བ་ལ་བློ་ཁ་ནང་དུ་ཕྱོགས་ཏེ་རྣམ་ཐར་འདི་ལྟ་བུ་ལ་བརྟེན་ནས་རང་རྒྱུད་ལ་ཞུ་གཏུགས་དང། ཆོས་མཐུན་གྱི་སྤྱོད་པ་ཞིག་གལ་ཆེ་བས། རབ་བཤད་སྒྲུབ་གཅིག་གྲོགས་སུ་གཅིག་སོང་བའི་སྒོ་ནས་སྐུ་གསུམ་བསྒྲུབས་པ། འབྲིང་བསླབ་པ་གསུམ་གྱིས་རང་མགོ་ཐོན་པ། མ་མཐའ་འང་ལས་འབྲས་གཞིར་བཟུང་སྟེ་ཐོས་བསམ་དང་བཟླས་བརྗོད་ལ་བརྩོན་པ་ཞིག་གལ་ཆེའོ། །གཞན་ཡང་སྟོན་པ་ཐུབ་པའི་དབང་པོ་དང། རྒྱལ་བ་ཙོང་ཁ་པ་ཆེན་པོ་ལས་ཟབ་རྒྱས་ཆོས་ཀྱི་བདུད་རྩི་མནོས་པ་དང། ཡི་དམ་རྡོ་རྗེ་འཇིགས་བྱེད་དང། ཆོས་སྐྱོང་མགོན་ཆོས་གཉིས་གཙོ་བོར་མཛད་པས་ཞལ་གཟིགས་ཤིང་འཕྲིན་ལས་བསྒྲུབ་པ་དང། སྐྱབས་མགོན་རྡོ་རྗེ་འཆང་གི་ཞལ་ནམ་འདོད་ལྟ་བུར་མཇལ་བ་ལས་སྤྲིན་གསེབ་ན་བཞུགས་པའི་སྐུའི་རི་མོ་ཕྱག་གིས་བཀོད་པ་དང། འཕགས་པ་སྤྱན་རས་གཟིགས་ཀྱིས་རིགས་དྲུག་གི་དོན་མཛད་པའི་གཟིགས་སྣང་གི་བཀོད་པ་རི་མོར་བྲིས་པ་དང། ཡོངས་འཛིན་རིན་པོ་ཆེ་དང། སྐྱབས་མགོན་རྡོ་རྗེ་འཆང་ནས་བདེ་མཆོག་གི་བཀའ་བབས་པ་ལྟར་ཐུགས་དམ་ལྷུར་བཞེས་
པས་ཡང་ཡང་ཞལ་གཟིགས་ཤིང་བྱིན་གྱིས་བརླབས་པའི་མཚན་མ་ཁྱད་པར་ཅན་ཐོབ་ཅིང་བླ་མ་དེ་གཉིས་ཐུབ་དབང་རྡོ་རྗེ་འཆང་དངོས་སུ་མཐོང་བ་དང། དཔལ་མགོན་ཞལ་བཞི་པ་དང། བཀའ་སྲུང་གནོད་སྦྱིན་དྲེགས་པ་ལྕམ་སྲིང་གིས་འཕྲིན་ལས་ཚུལ་བཞིན་དུ་བསྒྲུབ་པའི་རྟགས་མཚན་དུ་མ་མངོན་དུ་གྱུར་ཅིང། སྒྲ་དབྱངས་ལྷ་མོ་དང། རྡོ་རྗེ་དབྱངས་ཅན་མ་སོགས་ཐུགས་དམ་གྱི་ལྷར་མཛད་པ་མི་མངོན་ཀྱང་མངོན་སུམ་དུ་མཇལ་བར་མ་ཟད། ཇི་ལྟ་ཇི་སྙེད་འབྱེད་པའི་བློ་གྲོས་ཀྱི་སྣང་བ་དང་ངག་གི་དངོས་གྲུབ་ཅི་འདོད་དུ་སྩོལ་བ་དཔོག་པར་ནུས་ལ། བྱམས་མགོན་འཁོར་ཚོགས་རྒྱ་མཚོས་བསྐོར་བ་དང། རྒྱལ་བའི་ཡབ་གཅིག་མཁྱེན་པའི་གཏེར་གྱིས་སྒྱུ་འཕྲུལ་གྱི་ཟློས་གར་མཛད་པའི་སྣང་བ་སོགས་ཡབ་སྲས་ཐུན་མོང་གི་གཟིགས་སྣང་ཡང་མང་དུ་ཡོད་པ་གོང་དུ་བཀོད་པ་དག་ལས་ཤེས་ལ་མདོ་སྨད་ཀྱི་ལྗོངས་འདིར་མཁས་པ་དང་བཙུན་པའི་གྲལ་རིང་དུ་ཆུད་པ་དང། ཆོས་ལ་འདུན་པའི་དྲག་ཞན་ཕལ་ཆེར་དང། ཤར་ཕྱོགས་དང་བྱང་ཕྱོགས་ཀྱི་ཧོར་སོག་བློ་གྲོས་ཀྱི་མིག་དང་ལྡན་པ་དང། དད་པ་དང་གཏོང་བའི་ནོར་གྱིས་ཕྱུག་པ་ཆེས་མང་བ་དག་གིས་ཞབས་སྐྱེས་ཀྱི་མེ་ཏོག་གཙུག་རྒྱན་དུ་བཀུར་བའི་ཚུལ་བྲི་བར་མ་ནུས་ཏེ། སླར་བུ་སློབ་བསྟན་པའི་མངའ་བདག་དང། བསྟན་པ་འཛིན་པའི་སྐྱེས་བུ་རྣམས་ཀྱིས་རྒྱ་ཆེར་སྤེལ་བར་འགྱུར་བས་ཞིབ་པར་དེ་དག་ཏུ་ཤེས་པར་བྱ་ལ་བདག་གིས་ཀྱང་སྔར་ནས་ས་བོན་གྱི་ཚུལ་དུ་བཀོད་པ་ཞིག་ཀྱང་ཡོད་པས་བལྟ་འདོད་ན་ཆ་འགའ་ཞིག་དེར་ཡང་བལྟ་བར་བྱའོ། །སྨྲས་པ། རི་དང་རྒྱ་མཚོར་བཅས་པའི་སྟོང་གསུམ་ཁམས། །དུས་མཐའི་མེ་དང་ཆུ་དང་རླུང་དག་གིས། །རྣམ་པ་གཞན་དུ་གྱུར་ཀྱང་མགོན་ཁྱོད་ཀྱི། །གསང་གསུམ་
རང་བཞིན་འགྱུར་བ་ག་ལ་སྲིད། །འཆི་བདག་སྟག་གི་ཁ་ནང་འདྲར་གནས་ཀྱང། །ཚེ་འདིའི་བྱ་བ་སྙིང་པོར་བྱེད་བྱེད་ནས། །མི་དགེ་སྡིག་པའི་མུན་པར་འཁྱམས་པ་རྣམས། །དགྲ་བོ་རྣམས་ཀྱང་སྙིང་རྗེ་སྐྱེ་བའི་གནས། །འདོད་པའི་ཡོན་ཏན་སྡུག་བསྔལ་ཀུན་གྱི་གཞི། །མ་འཕངས་པར་ཡང་དམྱལ་བར་ལྟུང་བྱེད་པ། །དེ་སྤངས་ཡོན་ཏན་དམ་པའི་རྒྱན་བཟང་ལ། །སྣ་ཚོགས་འོད་འབར་ནོར་བུས་ཆར་མི་ཕོད། །གཞན་ལ་ཕན་ཕྱིར་རང་གི་སྡུག་བསྔལ་ལ། །སྲེད་ལྡན་ཁེ་སྤོགས་རྙེད་ལྟར་སྤྲོ་བ་ཡི། །དམ་པའི་རང་བཞིན་རྣམ་ཐར་བཟང་པོ་དེར། །སྟོང་གསུམ་ནོར་གྱིས་མཆོད་ཀྱང་བཀུར་སྟི་ཆུང། །བསམ་གཏན་རྣམ་ཐར་ཞི་བའི་བདུད་རྩི་ཡིས། །ཐུགས་ཀྱི་བུམ་བཟང་ཡོངས་སུ་གཏམས་གྱུར་ཀྱང། །སྲིད་ལ་ཞེན་པས་བཅིངས་པའི་བག་མེད་འགྲོ། །སྒྲོལ་བའི་ཁུར་ཆེན་འདེགས་པ་འདི་རྨད་བྱུང། །གང་ཞིག་ཐོས་དང་མཚན་ཙམ་དྲན་པས་ཀྱང། །འགྲོ་འདིའི་ཉེས་པའི་རྡུལ་མང་ཞི་གྱུར་ཏེ། །དད་དང་དགེ་བའི་མྱུ་གུ་འཕེལ་བ་ནི། །སྤྲིན་ལས་ཆར་བབས་ལོ་ཏོག་རྒྱས་པ་བཞིན། །བསྐལ་པར་ཉེར་གོམས་ཀུན་བཟང་སྤྱོད་པ་ཡི། །དྲི་ལྡན་ཡོན་ཏན་མེ་ཏོག་བྱེ་མའི་ཚོགས། །ཁྱབ་པར་འགྲེམ་པའི་གྲགས་པའི་དྲི་བཞོན་གྱིས། །ནོར་འཛིན་ཁྱོན་འདིར་དགེ་ལེགས་བྱིན་པ་ཡིས། །འདྲིས་དང་མ་འདྲིས་སྐྱེ་བོ་གང་དག་གིས། །ཁྱོད་ཞལ་མཐོང་བའི་མོད་ལ་དད་པའི་བཞིན། །འཛུམ་པའི་མདངས་གསལ་རྣམ་པར་མཛེས་པ་ནི། །ཟླ་བའི་འོད་ཀྱིས་ཀུ་མུད་མཚོ་གསལ་འདྲ། །དེ་ལྟའི་རྗེས་སུ་སློབ་འདོད་ན། །ཟིན་མེད་སྡུག་ཀུན་འཁོར་ལོ་ལས། །ཐབས་ཤེས་གཤོག་ཟུང་ཆེར་བསྐྱོད་དེ། །སྐུ་བཞིའི་མཁའ་དབྱིངས་བསྙེགས་པར་རིགས། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེའི་དཔལ་བཟང་པོའི་
རྣམ་པར་ཐར་པ་ལས་རྣམ་ཐར་གྱི་དོན་བསྡུ་བའི་སརྒ་སྟེ་བཅུ་གཅིག་པའོ།། །།ཇི་ལྟ་ཇི་སྙེད་ཆོས་ཀུན་ཉམས་འགྱུར་བརྒྱས། །དབྱངས་སུ་ལེན་མཁས་ཀུན་འདུས་བླ་མ་ལྷ། །རི་མོ་གསུམ་པའི་འོ་མཚོར་རྟག་བཞུགས་ནས། །ལེགས་བཤད་ཆོས་ཀྱི་དབྱངས་སྙན་སྒྲོགས་པར་མཛོད། །དེ་ནས་བཞི་པའི་བཅུ་བདུན་གྱི་ཉིན་ཡི་ངོག་མཁན་ཆེན་སྤྲུལ་བའི་སྐུ་དོན་ཡོད་རྒྱ་མཚོ་སོགས་དོན་གཉེར་བ་སུམ་བརྒྱ་སྐོར་ལ་མི་ཏྲ་བརྒྱ་རྩའི་དབང་གི་སྟ་གོན་གཤེད་དམར་དང་སྦྲགས་ནས་གནང། དབང་རིམ་གྱིས་གནང་བ་ལས་སྐུ་ཁམས་ཅུང་ཟད་སྟེམས་པས་ཉི་ཤུའི་ཉིན་བཀའ་ཆོས་བཤོལ། ཉེར་གཅིག་ལ་འཇིགས་བྱེད་ཞལ་གཅིག་ཕྱག་གཉིས་པའི་དབང་གནང། ཉེར་ལྔ་ནས་སྐུ་ཁམས་ལྕི་བར་སོང་སྟེ། ཀུན་གཟིགས་མཆོག་སྤྲུལ་རིན་པོ་ཆེ་ནས་བཀའ་གནང་བ་ལྟར་རྒྱུད་པ་གྲྭ་ཚང་ནས་མགོན་ཆོས་ཀྱི་བསྐང་བ་ཁྲི་ཚོ་བཞི་རེ། དུས་འཁོར་གྲྭ་ཚང་ནས་ཞལ་བཞི་པའི་བསྐང་བ་ཁྲི་ཚོ་གསུམ་ལྷག །རི་ཁྲོད་ཡིད་དགའ་ཆོས་འཛིན་ནས་ཉིན་མང་པོར་ལྷ་མོའི་བསྐང་བ། ཚོགས་ཆེན་ནས་ཆོས་རྒྱལ་བསྐང་བ་དང་ཡིག་བརྒྱ་གང་མང། སྒྲོལ་དཀར་གྱི་སྙིང་པོ་དུང་ཕྱུར་སོགས་བསྒྲུབས། ཉི་ཤུ་དྲུག་གི་ཉིན་སྐུ་ཁམས་ཤིན་ཏུ་ལྕི་བར་སོང་སྟེ། གྲྭ་མང་གཟིམས་ཁང་གི་རྭ་སྐོར་དུ་ཕེབས་ནས་ཞབས་བརྟན་གང་མང་དང། དེ་ནས་བཟུང་སྟེ་ཉིན་མཚན་བར་མ་ཆད་དུ་ཞབས་བརྟན་བསྒྲུབས། སླར་ཡང་གྲྭ་མང་གཟིམས་ཁང་གི་རྭ་སྐོར་དུ་ལན་གཉིས་ཕེབས་པར་ཁ་དར་དབང་ལྡན་མ་རེ་དང། སྲིད་ཞིའི་བདེ་སྐྱིད་མ་རེ་གནང། སྐུ་ཞབས་རིན་པོ་ཆེ་ཡང་ལན་གཉིས་ཙམ་ཕེབས་ཏེ་ཚེ་དཔག་མེད་ཀྱི་གསེར་སྐུ་དང། མཎྜལ་མཛོད་བཏགས་དང་བཅས་ཞབས་པད་
བརྟན་དགོས་ཚུལ་སྩལ་བར་ལན་བཟང་པོ་འདྲ་བ་ཕུལ། སྐུ་ཞབས་རིན་པོ་ཆེར་ཡང་མཎྜལ་དང་ཚེ་དཔག་མེད་ཀྱི་སྐུ་ཕུལ་ནས་གསུང་འཕྲོས་འགའ་ཞིག་མཛད་པ་དགོས་པ་ཅན་དུ་སྣང། སྔར་སྐུ་བསྙུན་མ་བཞེས་པའི་གོང་ཞིག་ཏུ་སྡེ་ཁྲི་རིན་པོ་ཆེར། ཚེ་དཔག་མེད་ཀྱི་བྲིས་སྐུ་ཤིན་ཏུ་ཆེ་བ་གཅིག་དང། ལམ་རིམ་ཆེན་མོའི་གླེགས་བམ་བཅས་གནང་ནས་ལམ་རིམ་འདི་རྗེའི་གསུང་གི་སྙིང་པོ་ཡིན་པས་དགོན་པ་འདིར་འདིའི་སྒོ་ནས་བསྟན་པ་ལ་ཕན་གང་ཐོགས་ཀྱིས། ཚེ་དཔག་མེད་ཀྱི་འབུར་གཟུགས་མང་པོ་ཁྱེད་ལ་ཡོད་འགྲོ། འདི་གཟི་བརྗིད་ཆེ་བས་རྟེན་འབྲེལ་གྱིས་ཁྱེད་ལ་ཕུལ་བ་ཡིན། བཀྲ་ཤིས་འཁྱིལ་འདི་མི་རེ་གཉིས་རེས་ཁུར་བཟུང་གིན་བཟུང་གིན་བསྟན་པ་སྤྱིའི་བྱ་བ་བསྒྲུབ་པ་ཞིག་རེད། དེ་ཐུགས་ལ་འཛིན་དགོས་གསུངས། ལོ་སྔ་མར་ཐེ་བོ་ཆབ་ཚན་དུ་བཞུགས་སྐབས་གྲོ་ཚང་པཎྚི་ཏ་ནས་གྲོ་ཚང་དགོན་དུ་སྔར་ཡང་ཡང་གདན་འདྲེན་ཞུས་ཀྱང་ཐོག་ཏུ་མ་ཁེལ། ད་རེས་ཅིས་ཀྱང་ཕེབས་དགོས་ཞེས་ནན་གྱིས་ཞུས་པར། ད་ལོ་མི་འགྲིག །ལོ་རྗེས་མ་ལུག་གི་ལོ་ལ་ཕེབས་ཐུབ་པ་བྱེད་གསུངས། འོ་ན་ལུག་ལོར་ཅིས་ཀྱང་འབྱོན་དགོས་ཞེས་ཡང་ཡང་ནན་ཞུས་བྱས་པར། དེ་ཅིས་ཀྱང་སྟབས་འགྲིག་ཚུལ་དང། ལོ་རྗེས་མར་ཆབ་ཚན་གྱི་ཞར་ལ་ཕེབས་རྒྱུ་སོགས་ཐག་ཆོད་ངེས་ཀྱི་གསུང་དང། རྗེའི་སྐུ་གཅིག་དང། དབུ་པཎ་བཅས་གནང་ནས་གང་བྱས་བསྟན་འགྲོར་དམིགས་དགོས་ཀྱི་ཞལ་གདམས་དང། དགོན་པ་འཕེལ་རྒྱས་སོགས་སེམས་ལ་བཅང་རྒྱུའི་བཀའ་གནང། གྲོ་པཎྚི་ཏས་ཐོན་ཕྱག་ཞུས་ནས་ཕེབས་ཁར་ཡང་ལོ་རྗེས་མར་ཕེབས་རྒྱུ་ལ་འགྱུར་བ་མེད་ཨང་ཞུས་པར། འགྱུར་བ་མེད་ཚུལ་སྔར་ལྟར་གསུངས་ནས་མཇུག་ཏུ་ངེས་མེད་ཀྱིས་རང་རེ་ཚོར་ན་སྐད་ཤི་སྐད་རེ་བྱུང་ཚེ་ཡོང་རྒྱུ་ཡོད་རྒྱུ་མ་རེད་གསུངས་ཀྱང་ཁོང་ལ་
དོགས་པ་ཙམ་ཡང་མ་ཤར་འདུག །ལོ་འདིའི་ཨ་མཆོག་ལ་ཕེབས་རྒྱུའི་གླེང་མོའི་སྐབས་ཕྲན་གྱིས་ཆབ་ཚན་ལ་ཕེབས་པ་དང་སྦྲགས་ན་ཞུས་པར། ཆབ་ཚན་ལ་ཨེ་འགྲོ་མི་ཤེས་གསུངས། གྲོ་ཚང་ལ་ཕེབས་རྒྱུ་བྱས་ཡོད་མོད་ཞུས་པར། འགྲོ་རྒྱུ་ཁས་བླངས་པ་ཡིན་ཏེ་འགྲོ་ཨེ་ཐུབ་མི་ཤེས་གསུངས་ཀྱང་དོགས་པ་ཙམ་ཡང་མ་ཤར། ཨ་མཆོག་ན་བཞུགས་སྐབས་ཐུགས་ནང་གཙང་བ་འགའ་ཞིག་གིས། འདིར་ཡུན་རིང་བཞུགས་དགོས་སོགས་ཞུས་པར། འདི་ལྟར་བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ། །ཞེས་གསུངས་པ་ཡང་ཡང་ཡང་འབྱོན་མི་ནུས་པའི་གསུང་དུ་གོ །བཀའ་ཆོས་འགའི་མཇུག་གི་བརྟན་བཞུགས་ལན་སྤྱིར་སེམས་ལ་འཛིན་རྒྱུའི་བཀའ་ཕེབས་སེམས་སྤྲོ་ཡང། ཞབས་བརྟན་དངོས་གཞིའི་ལན་གསལ་ཆ་མ་བྱུང་བ་དེ་ཅི་ཡིན་སྙམ་པ་རེ་ཤར་ཀྱང་དེ་མ་ཐག་བརྗེད་སོང་བ་ལྟ་བུས་གང་ཡང་མ་དྲན། སྐབས་འདིར་སྐུ་བསྙུན་ལྕི་བའི་གཏམ་ཐོས་འཕྲལ། གང་མྱུར་གྱིས་དགོན་པར་འོང་སྟེ་སྙུན་འདྲི་ཞུར་བཅུག་པར། སྐྱོན་མི་འདུག །ག་ལེ་བྱས་ནས་མདུན་དུ་འོང་ཆོག་གསུངས། རེབ་ཙ་སྨན་པ་དཀོན་མཆོག་བསྟན་དར་ལ་དྲིས་པར། སྨྱུང་གཞི་འགྱུར་ལྡོག་ཆེ་བ་མ་གཏོགས་ཕྱག་རྩའི་བབས་ལ་སྐྱོན་མེད་ངེས་རེད་ཟེར་ཞིང། རྗེ་ཉིད་ནས་ཀྱང་སྨན་པ་དུས་རྒྱུན་གྱི་བློ་གཏད་ཕེར་ངེས་ཡིན་པ་ལྟར། སྐྱོན་མེད་ཟེར་བ་འདིར་ཡིད་ཆེས་བྱས་ཆོག་གསུངས་པས་སེམས་བདེ་བར་བྱས། གྲྭ་མང་ལ་ཡང་ཁྱེད་རྣམས་ཀྱིས་ངའི་སེམས་དང་མི་མཐུན་པ་སྤུ་ཙམ་ཡང་མ་བྱས། འདུན་པ་ཆིག་དྲིལ་གྱིས་འབད་འབད་བྱས་ཤིང་དད་པ་དམ་ཚིག་གཙང་བས་དགའ་མོ་ཡོང་འགྲོ་ཞེས་སྤྲོ་བསྲིངས་པ་མཛད། བདག་ལ་ཚེས་བརྒྱད་ཀྱི་ཉིན་ཁྱོད་རང་མདུན་
དུ་ཡོང་ན་ཆོག་ཅེས་གསུང་བསྐུར་གནང་ཡང་ཕྱོགས་གཞན་ནས་སློབ་མ་སྦྱིན་བདག་གལ་ཆེན་མང་པོ་ཡོད་པ་རྣམས་ཆུད་དགོས་པའི་རྐྱེན་དུ་འགྱུར་ཤས་ཆེ་སྙམ་ནས་ག་ལེ་བྱས་ནས་ཡོང་ཆོག་ཅེས་ཞུས། དེའི་ཕྱི་ཉིན་ཡང་སྐུ་མདུན་དུ་ཡོང་ཆོག་གསུངས་ཀྱང་ཕྱོགས་གཞན་གྱི་འགྲུལ་བ་མང་འདུག་པས་ངེད་རང་ལ་བྲེལ་བ་མེད་ཞུས་པར། འོ་ན་བཅུ་གཉིས་སམ་བཅུ་གསུམ་གྱི་ཉིན་ཤོག་གསུངས། དེ་ནས་བཅུ་གཅིག་གི་མཚན་མོ་སྔར་བཞིན་སྐུ་སྟོད་ཕྱི་ནང་གི་གཟེར་མིག་སོགས་འཕར་ཏེ་སྙུན་བབས་ལྕིར་སོང་བས་བཅུ་གཉིས་ཀྱི་ཉིན་གྲྭ་ཚང་བཞི་ནས་མཉམ་འཚོགས། སྒེར་འཚོགས། རྭ་སྐོར་དུ་ཕེབས་པ་སོགས་ཀྱིས་ཞབས་བརྟན་བར་མ་ཆད་དུ་བསྒྲུབས། སྨན་པ་ལ་དྲིས་པས་སྔ་མར་ཡང་འདི་བཞིན་བྱས་ཀྱང་སྨན་ཕུལ་བས་ཞག་གཅིག་ནས་བདེ་སོང། ད་རེས་ཀྱང་ཕྱག་རྩ་ལ་འགྱུར་ལྡོག་མི་འདུག་པས་སྨན་ཕུལ་ན་སྐྱོན་མེད་མོད་ཟེར། བླ་མ་ཁྲི་གདན་ཟུར་རྣམས་གདུང་མདུན་དང། ལྷ་ཁང་སོ་སོར་ཕེབས་ནས་ཁྲུས་གསོལ་དང་འཕྲིན་བཅོལ་སྐྱབས་འཇུག་ནན་ཏན་ཞུས། ཀུན་གཟིགས་སྐུ་ཞབས་རིན་པོ་ཆེ་ནས་སྒྲོལ་དཀར་གྱི་རྗེས་གནང་ཕུལ། སྐུ་ཉམས་ལོད་པའི་གནས་ཚུལ་གསན་འཕྲལ་སྟབས་པའི་ཚུལ་གྱིས་འཇམ་དབྱངས་དམར་སེར་གྱི་སྐུ་གཅིག་ཕུལ་བར་ཞལ་ཏ་རུས་པ་ཅན་ཞུ་བ་གནང། ཕེབས་ཀར་ཕྱག་ངའི་ལག་ཏུ་ཞོག་གསུངས། ཕྱག་སྦྲེལ་ནས། ཁྱོད་ནི་བླ་མ་ཁྱོད་ནི་ཡི་དམ་ཁྱོད་ནི་མཁའ་འགྲོ་ཆོས་སྐྱོང་སྟེ། །ཞེས་པ་ནས། སྲིད་ཞིའི་འཇིགས་སྒྲོལ་དངོས་གྲུབ་ཀུན་སྩོལ་གཏན་གྱི་གྲོགས་མཛོད་བར་གཅོད་སྲུངས། །འདི་མ་གཏོགས་ཞུ་རྒྱུ་ཅང་མེད་ཨེ་གོ་གསུང་བ་བསྟན་པ་སྤྱི་སྒེར་གྱི་འཛིན་སྐྱོང་དང། སྐྱེ་དགུའི་མངོན་མཐོ་ངེས་ལེགས་སྒྲུབ་པའི་ཁུར་གཏད་པ་ཡིན་འདུག །ཕྲན་རང་ཉིད་བླ་མ་འགའ་ཞིག་དང་མཉམ་
དུ་ཞབས་བརྟན་གྱི་གྲས་སུ་བསྡད་ཡོད་པར། བར་སྐབས་ཤིག་སྨན་པ་ནས་བརྡ་བྱས་ཏེ་སོང་བར་དེ་གློ་བུར་དུ་ཕྱག་རྩ་ཐམས་ཅད་མེད་སོང། ཁྱེད་རང་སྐུ་མདུན་དུ་ཅིག་སོང་ན་ཟེར་བར་གློ་བུར་དུ་སྙིང་སྟོར་བ་ལྟ་བུའི་འཇིགས་སྐྲག་དང་བཅས་ཏེ་མཇལ་བས་ཞུ་བ་ཡང་ཐལ་ཐོལ་བས་མ་འབྱོར་ཀྱང་དགྱེས་པའི་གསུང་གནང། སྤྱོད་ལམ་གང་བདེ་མཛད་ནས་མི་བདེ་བ་ཅི་ཡང་མི་མངོན་པ་ལྟ་བུར་བཞུགས་འདུག །དེ་ཀའི་ངང་ལ་བར་སྐབས་ཤིག་ཞལ་དབུགས་མི་མངོན་པར་སོང་བས་ཕྱིས་སུ་གཞན་གྱིས་གསལ་བཏབ་པ་ལས་སྤྱན་རས་གཟིགས་སེམས་ཉིད་ངལ་གསོའི་བཞུགས་སྟངས་སུ་གོ་བ་མ་གཏོགས་སྐབས་འདིར་སྐུའི་རྣམ་འགྱུར་ཀྱང་མ་ངེས་ན། ནང་གི་རྣལ་འབྱོར་ཇི་ལྟར་མཛད་པ་ལྟ་ཅི་སྨོས། དེ་ཡང་ཞལ་ནས། གྲགས་སྐམ་གྱིས་ཕན་ཐོགས་གང་ཡང་མེད་ཀྱང་འདས་རྟགས་ཚུན་ཆད་འདོད་པ་དེ་འཇིག་རྟེན་ཆོས་བརྒྱད་ཁོ་སླེབ་པ་རེད། ཅེས་ཡང་ཡང་གསུངས་པ་ལྟར། ཆོས་བརྒྱད་དོན་གཉེར་ཁ་མ་བྲི་བར་མངོན་པའི་ང་རྒྱལ་གྱིས་རློམ་པ་དུ་མ་འདུལ་བའི་ཐབས་མཁས་སུ་སྣང་ངོ་། །དེ་ལྟར་སྐུ་དངོས་ཀྱི་གདུལ་བྱ་རྫོགས་ནས་རྟག་འཛིན་ཅན་རྣམས་བསྐུལ་བའི་ཕྱིར་མཛད་པའི་ཐ་མ་དེ་ལྟ་བུ་བསྟན་པ་ན་ལུས་དང་སྲོག་ཀྱང་སོ་སོར་འབྲལ་བ་ལྟ་བུའི་ཅི་བྱ་གཏོལ་མེད་དུ་གྱུར་ཀྱང་སྲན་བཙུགས་ཏེ། སྡེ་ཁྲི་རིན་པོ་ཆེ་འཇམ་དབྱངས་ཐུབ་བསྟན་ཉི་མས་གཙོ་མཛད། རྒྱུད་པ་དཔོན་སློབ་རྡོ་རམས་པ་དཀོན་མཆོག་དབང་ཕྱུག །རེབ་ཚ་སྤྲུལ་བའི་སྐུ་དཀོན་མཆོག་དམ་ཆོས་ཡར་འཕེལ་གསུམ་གྱིས་སྲོག་བཟུང། ཕྲན་གྱིས་ཀྱང་ཞབས་ཕྱི་བྱས། དཔོན་པོ་དཀོན་མཆོག་ལྷུན་གྲུབ། དྲུང་ཡིག་དཀོན་མཆོག་ཀུན་དགའ་བཅས་དྲི་བཟང་འབུལ་བ་སོགས་སྲི་ཞུ་བགྱིད་འོས་རྣམས་ཞུས་
པས། སྐུའི་ཡན་ལག་རྣམས་ཞལ་བཞུགས་དུས་དང་འདྲ་བར་གང་བཀོལ་ལས་སུ་རུང་ཞིང་བྱེད་སླ་བ་བྱུང་བ་ཐུགས་རྗེས་གཟིགས་པ་མ་དོར་བའི་རྟགས་སུ་སྣང། དེ་ནས་བླ་གོས་སྣམ་སྦྱར་རིགས་ལྔའི་དབུ་རྒྱན་བཅས་བསྒྲོན་ཏེ་གཟིམས་མདོར་སྤྱན་དྲངས་ནས་བཞུགས་སུ་བཅུག །བཅུ་གསུམ་གྱི་སྐྱ་རེངས་ཤར་བ་ན་ཀུན་གཟིགས་མཆོག་སྤྲུལ་རིན་པོ་ཆེར་ཐུགས་དམ་གསལ་འདེབས་སྙན་གསན་ཞུས་ཤིང། ཉི་མ་ཤར་བ་ན་གཟིམས་ཁང་གི་སྟེང་དུ་མཆོད་རྫས་བསྡུ་བཤམས་དང། དུང་བརྡ་སོགས་དུས་རྒྱུན་གྱི་སྲོལ་ལྟར་བཏང། གྲྭ་དཔོན་སློབ་ཀྱིས་མཇལ་ཁ་ཞུས་ཤིང། སྐུ་ཞབས་རིན་པོ་ཆེ་ཕེབས་ཏེ་མཆོག་ཁྲུས་ཕུལ་ནས་ཆོས་སྤྱོད་སྨོན་ལམ་སོགས་གསུངས། བླ་མ་ཁྲི་གདན་ཟུར་དང་བུ་སློབ་རྣམས་ནས་རིམ་བཞིན་རྒྱུད་སྡེ་སོ་སོའི་དཀྱིལ་འཁོར་ཞལ་ཕྱེ་སྟེ་སྒྲུབ་མཆོད་སོགས་མཛད། དེ་ཡང་སྤྱིར་ཐུགས་དམ་མ་གྲོལ་བར་དུ་རོལ་མོ་དང་བདུག་སྤོས་སོགས་མི་འབུལ་བ་དང། མཇལ་ཁ་ཞུ་བ་དང་འགྲུལ་བ་སོགས་ལ་ཡང་འཛེམ་སྲོལ་ཡོད་ཀྱང་ཕྱོགས་འདིར་ཀུན་མཁྱེན་གོང་མའི་དུས་སོགས་ནས་ཐུགས་དམ་མ་གྲོལ་གོང་ནས་གདུང་མཇལ་ཞུ་བའི་སྲོལ་ཡོད་པ་ལྟར་བྱས་པས། བཅོ་ལྔའི་སྔ་དྲོ་གློ་བུར་དུ་དྲི་བཟང་ཞིག་གིས་ཕྱི་ནང་ཀུན་ཏུ་ཁྱབ་པར་གྱུར་པ་དང་མཉམ་དུ་ཐུགས་དམ་གྲོལ་བའི་རྟགས་ཤར། དེ་ནས་མཚན་མོ་སླར་ཡང་སྐུ་ཁྲུས་དང་དྲི་བཟང་སོགས་རྒྱས་པར་ཕུལ། གནས་ཡིག་གདགས་པ་སོགས་བྱས་ནས་གོས་དར་སྨན་དང་དྲི་བཟང་སོགས་དྲིལ་ཆས་དང་བཅས་གདུང་སྒྲོམ་དུ་བཞུགས་ཤིང། གདུང་སྒྲོམ་གྱི་མདུན་དུ་དཀྱིལ་འཁོར་སྒྲུབ་མཆོད་སྔར་ལྟར་དང། གྲྭ་ཚང་སོ་སོ་དང་འཛིན་གྲྭ་སོ་སོ། ཕྱོགས་ནས་འོང་བའི་དགོན་ལག་སོ་སོ་རང་རང་གི་འདོད་མོས་ལྟར། རྒྱན་འཇུག །ཆོས་སྤྱོད།
རྒྱུད་གཞུང་། འཇམ་དཔལ་མཚན་བརྗོད། བདེ་ལམ་དང་སྦྱོར་བའི་ཆོས་དྲུག །སྨན་མཆོག་རིང་ཐུང། སྨོན་ལམ་ལྔ་སོགས་གང་མོས་བཞིན་སྐོར་ཚན་སྐོར་ཚན་བྱས་འཚོགས་ཏེ་ཉིན་མཚན་བར་མ་ཆད་དུ་གསུངས། ཐམས་ཅད་ཀྱིས་མཆོད་པའི་རྣམ་གྲངས་བློར་མི་ཤོང་བ་ལྟ་བུ་ཕུལ་བས། མར་མེའི་འོད་ཀྱིས་ཕྱི་ནང་དེར་ཉིན་མཚན་ངོ་མི་ཤེས་པ་ལྟ་བུ་བྱུང། དེའི་ཚེ་འཁོར་དུ་ཉེ་བའི་གདུལ་བྱ་རྣམས་ནི། ཕྱོགས་འདིའི་བསྟན་པའི་བཤད་སྒྲུབ་ནི་རི་རྩེའི་ན་བུན་རླུང་གིས་རེག་པ་ལྟ་བུ་དང། འགྲོ་བའི་བདེ་སྐྱིད་ཀྱི་སྣང་བ་ནི་མེ་ཏོག་གི་ལང་ཚོ་སྟོན་མཇུག་ལ་བབས་པ་ལྟ་བུ། གསུང་གི་བདུད་རྩི་ལ་རོལ་པ་བདག་ཅག་ནི་ནམ་མཇུག་གི་བུང་བ་ལྟ་བུ། ཕྱོགས་ཀྱི་དོན་གཉེར་བ་དག་གི་རེ་འབྲས་ནི་ལོ་ལེགས་ལ་བ་མོས་རེག་པ་ལྟ་བུར་སོང་སྙམ་སྟེ་ཡིད་ཁོང་དུ་ཆུད་ནས་གདུང་བར་གྱུར་ཀྱང། དཔལ་ལྡན་དང་པོའི་མགོན་པོ་གང་གིས་ནང་དུ་འོད་གསལ་མངོན་དུ་མཛད་པའི་ཕྱི་རྟགས་སུ་རེས་འགའ་ནམ་མཁའ་སྔོ་ཞིང་དྭངས་པ་དྲི་བཞོན་གྱི་རྒྱུ་བ་ཕྲ་མོ་ཙམ་ཡང་དབེན་པས་འགྲོ་བ་ཀུན་ལ་སེམས་ཀྱི་དེ་ཉིད་མཚོན་པ་ལྟ་བུ། རེས་འགའ་རྒྱུ་སྐར་གྱི་འོད་ཟེར་དང་འཇའ་སྤྲིན་ན་བུན་ཕན་ཚུན་འཁྱུད་པས་དག་པའི་རླུང་འོད་ཟེར་ལྔ་པ་ཀུན་གསལ་གྱི་ངོས་སུ་ཤར་བ་ལྟ་བུ། རེས་འགའ་ལྷ་རྣམས་ཀྱིས་དད་པའི་ཡིད་ཀྱིས་མཆོད་པའི་རི་མོ་འཇིག་རྟེན་དུ་ཤར་བ་སྙམ་བྱེད་པའི་དགེ་མཚན་གྱིས་ཁྱབ་པར་གྱུར་ཅིང། དེ་ནས་གཟིམས་ཁང་བདེ་ཡངས་ཀྱི་མཐིལ་དུ་མཆོད་རྟེན་ཆོས་འཁོར་ཉི་ཟླ་ཟ་ར་ཚགས་དང་བཅས་པ་དང། མཆོད་པའི་ཡོ་བྱད་གྲ་བསྒྲིགས་ཏེ་བཅུ་དགུའི་ཞོགས་ཁ་སྡེ་ཁྲི་རིན་པོ་ཆེ་ནས་གཞུང་ནས་བཤད་པ་ལྟར་གྱི་ཞུགས་
འབུལ་ལག་ལེན་ཚད་དང་ལྡན་པ་གནང་བས་དེའི་ཚེ་ཞུགས་ཁང་གི་དུ་བ་ནམ་མཁའི་དབྱིངས་སུ་འདྲེས་ནས་ཀུན་ཏུ་ཁྱབ་པ་ནི་སྤྲུལ་བའི་བཀོད་པ་ཕྱོགས་བཅུར་འཕྲོ་བ་ལྟ་བུ། ཉེ་འཁོར་གྱི་ས་འཛིན་སོ་སོའི་རྩེ་མོར་སྤྲིན་དཀར་ཕོན་པོ་དུམ་བུ་དུམ་བུར་གནས་པ་ནི། ཚངས་པ་དང་བརྒྱ་བྱིན་འཁོར་བཅས་འོད་ཀྱི་ཕུང་པོས་བསྐོར་ནས་མཆོད་པ་ལྟ་བུ། ཆར་སྤྲིན་འཁྲིགས་པའི་ཀློང་ནས་སྦྲང་ཆར་དལ་གྱིས་འབབས་པ་ནི་འདོད་གཟུགས་ཀྱི་ལྷ་དག་གིས་མེ་ཏོག་གི་འཕྲེང་བ་མངོན་པར་གཏོར་བ་ལྟ་བུ། གྲྭ་ཚང་ཕན་ཚུན་བཞི་སོགས་གཉུག་མར་གནས་པ་དང། ཕྱོགས་ནས་བྱོན་པའི་གྲྭ་སློབ་རྣམས་ཀྱིས་དད་ཅིང་གུས་པས་གསོལ་འདེབས་དབྱར་གྱི་ང་རོ་སྒྲོགས་པ་ནི་འབྲུག་སྒྲ་དལ་གྱིས་རྒོད་པ་ལྟ་བུ། མཛད་པའི་ཚུལ་འདི་ཉིད་ལ་བརྟེན་ནས་འདུལ་བྱའི་ཡིད་ཀྱི་འཛིན་མར་རྣམ་དཀར་དགེ་བའི་འདབ་བརྒྱ་བཞད་པ་ནི་སྟོན་པ་བཅོམ་ལྡན་འདས་ཀྱིས་དུས་ལས་མི་ཡོལ་ཞིང་ལྷུན་གྱིས་གྲུབ་པའི་འཕྲིན་ལས་ཀྱི་འོད་ཟེར་འགྱེད་པ་ལ་འགྲན་པ་ལྟ་བུ་བྱུང་ངོ་། །དེ་ཡང་མདོ་ལས། བཅོམ་ལྡན་འདས་ཀྱིས་རྡོ་རྗེ་ལྟ་བུའི་ཏིང་ངེ་འཛིན་ལ་མཉམ་པར་བཞག་ནས་རྡོ་རྗེ་ལྟ་བུའི་སྐུ་བཤིག་སྟེ་སེམས་ཅན་གྱི་རིས་ན་དེ་བཞིན་གཤེགས་པའི་རིང་བསྲེལ་གྱིས་འདུལ་བའི་སེམས་ཅན་གྱི་སླད་དུ་ཐུགས་རྗེ་ཆེན་པོས་དེ་བཞིན་གཤེགས་པའི་སྐུ་གདུང་བྱིན་གྱིས་བརླབས་སོ། །ཞེས་གསུངས་པ་ལྟར། དེ་ནས་པུར་ཁང་ཞལ་ཕྱེ་བས་ལྷ་སྐུ་དང་ཡིག་འབྲུའི་རྣམ་པ་ཆེས་གསལ་བ་མང་དུ་བྱོན་པ་བྱིངས་ཆེར་མ་གོད་པའི་སྟེང། རིང་བསྲེལ་རྣམ་བཞི་རྒྱ་ཆེ་ལ་ངོས་གཙང་བ་ལྷུན་པོར་སྤུངས་པ་ལྟ་བུ་སྙིང་པོར་བྱས་ཏེ་དངུལ་དཀར་སྲང་བརྒྱ་ཕྲག་དུ་མ་ལས་བྱང་ཆུབ་མཆོད་རྟེན་ཆ་ཚད་དང་ལྡན་ཞིང་འཕངས་མཐོ་བ་བཞེངས་ཏེ་གཟིམས་ཁང་
བདེ་ཡངས་སུ་བཞུགས། གཞན་བྱེ་མའི་ཆ་ཕྲ་རྡུལ་ཙམ་ཡང་ཆུད་མ་ཟོས་པར་དོ་དམ་བྱས་པ་དད་ལྡན་གྱི་རྟེན་དུ་བཀྲམ་པ་ལས་ཅོ་ནེ་དགོན་ཆེན་ཏིང་འཛིན་དར་རྒྱས་གླིང། དགའ་ལྡན་རབ་རྒྱས་གླིང། དགའ་ལྡན་ཆོས་འཁོར་གླིང། དགའ་ལྡན་དར་རྒྱས་གླིང། ཁྱ་དགེ་ལེགས་བཤད་གླིང། དགའ་ལྡན་བསམ་འགྲུབ་གླིང་སོགས་སུ་ཡང་གདུང་རྟེན་དུ་མ་བཞེངས་པ་དད་ལྡན་རྣམས་ཀྱི་མཆོད་པའི་གནས་སུ་བཞུགས་པ་ནི་སྟོན་པ་ཐུབ་པའི་དབང་པོའི་རིང་བསྲེལ་ཆ་བརྒྱད་དུ་བགོས་པའི་རྣམ་ཐར་ལ་འགྲན་བཟོད་པར་བྱུང་ངོ་། །དེ་དག་ཀྱང་ཐུགས་བསྐྱེད་དང་དད་འདུན་ལྷན་ཅིག་པའི་རྟེན་འབྲེལ་ལས་བྱོན་པས་ཤིན་ཏུ་དོན་ཆེ་བ་ཡིན་ཏེ། པད་མ་དཀར་པོའི་མདོ་ལས། གང་གི་རིང་བསྲེལ་གནང་བ་དེ་དག་ལ། །གཡེང་བའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིག་གཅིག་ལན་འགའ་བརྗོད་པར་བྱས་ན་ཡང། །དེ་དག་ཀུན་གྱིས་བྱང་ཆུབ་མཆོག་འདི་ཐོབ། །ཅེས་གསུངས་པ་ལྟར་རོ། །སྤྱིར་རྣམ་ཐར་མང་པོ་ལས། དབུ་མའི་ལྟ་བ་ཅན་ལ་ནམ་མཁའ་དྭངས་པ། ཁྲིམས་གཙང་ལ་མེ་ཏོག་གི་ཆར་བ། བྱང་སེམས་ལ་རིང་བསྲེལ། བསྐྱེད་རིམ་པ་ལ་ལྷ་སྐུ། རྡོར་བཟླས་ཅན་ལ་ཡིག་འབྲུ། ཕྱིར་མི་ལྡོག་པའི་སེམས་དཔའ་ལ་དུང་གཡས་འཁྱིལ། འཁོར་བ་མི་སྤོང་བའི་སེམས་དཔའ་ལ་ཐུགས་ལྗགས་སྤྱན་གསུམ་འབྱུང་བར་བཤད་པ་སོགས་སྣང་ཡང། སྡོམ་གསུམ་རབ་དབྱེ་ལས་དེ་དག་ལ་འཁྲུལ་བ་ཆེ་བའི་དགག་བཞག་ཀྱང་མང་དུ་མཛད་ལ། བཀའ་གདམས་པ་རྣམས་རྟགས་མེད་རྟགས་ཀྱི་རྒྱལ་པོར་མཛད་པ་ནི་ཚད་ལྡན་ཡོངས་ལ་གྲགས་པ་ལྟར་སྙིགས་མའི་དུས་འདིར་སུས་ཀྱང་བསྒྲུན་དུ་མེད་པའི་མཁས་བཙུན་གྲུབ་པའི་རྣམ་ཐར་ཟླ་དང་བྲལ་བ་དེས་མ་ཆོག་
པར་འཇའ་འོད་དང་རིང་བསྲེལ་ཙམ་ལ་རེ་བས་དམ་པའི་སྐྱེས་བུར་འུད་ཀྱིས་བསྟོད་པ་དེ་ལྟ་བུ་མིན་པར་གདུལ་བྱ་རྣམས་ལ་མཐུན་སྣང་དུ་གྲུབ་པ་ཙམ་སྒྲོ་མ་བཏགས་པར་བརྗོད་པ་ཡིན་ནོ། །གཞན་ཡང་གདན་ས་ཆེན་པོ་འདི་ཉིད་དང། སྐུ་འབུམ་བྱམས་པ་གླིང་སོགས་ཆོས་སྡེ་ཆེ་ཕྲ་རྣམས་དང། བདེ་མོ་ཐང་དགའ་ལྡན་ཆོས་འཁོར་གླིང། མཛོད་དགེ་དགོན་གསར་དགའ་ལྡན་རབ་རྒྱས་གླིང་སོགས་མདོ་སྨད་ལྷོ་ཕྱོགས་ཀྱི་དགོན་སྡེ་ཆེ་ཕྲ། བསྟན་པའི་བདག་པོ་རྒྱལ་བ་ཡབ་སྲས་སོགས་མདོ་དབུས་ཀྱི་བསྟན་འཛིན་སྐྱེས་མཆོག་རྣམས་དང་བླ་སློབ་ཆེ་ཕྲ། སེ་འབྲས་དགེ་གསུམ། རྒྱུད་པ་སྟོད་སྨད། བཀྲ་ཤིས་ལྷུན་པོ་སོགས་གཙང་དབུས་ཀྱི་དགོན་སྡེ་རྣམས་སུ་དགོངས་རྫོགས་ཇི་ལྟར་བསྒྲུབ་པའི་ཚུལ་སོགས་གཞན་དུ་ཤེས་པར་བྱའོ། །དེ་ཡང་མདོ་མྱང་འདས་ལས། ང་མྱ་ངན་ལས་མི་འདའ་བར་ཧ་ཅང་ཡུན་རིང་འདུག་ཅིང་རྒྱུན་དུ་མཐོང་ན། སེམས་ཅན་དགེ་བའི་རྩ་བ་མ་བྱས་པ་ལྟ་བའི་དྲ་བས་ཁེབས་པ་རྣམས་ཀྱིས་ཁམས་གསུམ་ནས་འབྱུང་བའི་ཕྱིར་བརྩོན་འགྲུས་མི་རྩོམ་ཞིང། དེ་བཞིན་གཤེགས་པ་ལ་དཀོན་པར་འདུ་མི་ཤེས་སོ་ཞེས་དང། དེ་བཞིན་གཤེགས་པ་རྙེད་དཀའ་བར་མཐོང་ན་ངོ་མཚར་དང་མྱ་ངན་གྱི་འདུ་ཤེས་བསྐྱེད་དོ། །དེ་བཞིན་གཤེགས་པ་ལ་བལྟ་བས་སྒོམ་པ་དང། ཡིད་ལ་བྱེད་པའི་དགེ་བའི་རྩ་བ་འཕེལ་ལོ། །ཞེས་གསུངས་པ་ལྟར། གདུལ་བྱ་ཐུན་མོང་བ་འདུལ་བའི་ཕྱིར་དུ་མཛད་པ་དེ་ལྟ་བུ་གདོན་མི་ཟ་བར་སྟོན་དགོས་ཀྱང་ངེས་པའི་དོན་དུ་ནི་མདོ་ལས། རིགས་ཀྱི་བུ་དག་ངས་ད་དུང་ཡང་སྔོན་གྱི་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱས་པའི་ཚེའི་ཚད་དུ་ཡང་མ་ཕྱིན་ཏེ། ད་དུང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཉིས་འགྱུར་གྱིས་ཀྱང་ཚེའི་ཚད་ཚང་བར་མི་འགྱུར་རོ་ཞེས་དང། གསེར་འོད་ལས། སངས་རྒྱས་མྱ་ངན་ཡོངས་མི་
འདའ། །ཆོས་ཀྱང་ནུབ་པར་མི་འགྱུར་ཏེ། །ཞེས་གསུངས་པ་ལྟར་ལགས་མོད། སྣང་ཚོད་ཀྱི་མཛད་པ་དེ་དག་ཀྱང་དེ་བཞིན་གཤེགས་པ་འགྲོ་བ་ཐམས་ཅད་ལས་འདས་པས་བྱང་ཆུབ་སེམས་དཔའ་མཐའ་ཡས་ཤུགས་འཆང་ལ། ཁྱོད་ཀྱི་ཚེ་གཅིག་པོ་འདིས་སེམས་ཅན་ཐམས་ཅད་ཡོངས་སུ་སྨིན་པར་བྱ་ནུས་སམ་ཞེས་གསུངས་པར། བཅོམ་ལྡན་འདས་ཀྱི་བཀའ་བཞིན་དུ་བསྐལ་པ་གྲངས་མེད་པར་མེ་མུར་གྱི་འོབས་དུ་བ་མ་མཆིས་པར་གནས་ནས་གཞན་གྱི་དོན་བསྒྲུབ་པ་ལ་སྤྲོ་ཞེས་ཞུས་པས། དེ་བཞིན་གཤེགས་པ་མྱ་ངན་ལས་འདས། བྱང་སེམས་དེས་དེ་བཞིན་གཤེགས་པའི་སྐུ་གདུང་རྒྱ་ཆེན་བྱས་ནས་མཆོད་པ་བྱས། དེ་བཞིན་གཤེགས་པའི་བཀའ་བཞིན་དུ་སེམས་ཅན་ལ་སྙིང་བརྩེ་བས་སྤྲུལ་བ་བྱེ་བ་ཁྲག་ཁྲིག་དཔག་མེད་སྤྲུལ། སངས་རྒྱས་ཀྱི་ཞིང་དེར་བྱང་སེམས་ཕྱིར་མི་ལྡོག་པ་རྣམས་ཀྱིས་པདྨའི་ཚལ་བཞིན་དུ་གང་བར་མཛད་ནས། ཚེའི་འདུ་བྱེད་བཏང་བར་མདོ་ལས་གསུངས་པ་ལྟར། རྗེ་འདི་ཉིད་ཀྱིས་ཡབ་རྗེའི་རིང་ལུགས་ཉམས་མེད་དུ་འཛིན་ནུས་པར་གཟིགས་ནས་སྐྱབས་མགོན་རྡོ་རྗེ་འཆང་དེ་ཉིད་ཞི་བར་གཤེགས་རྗེས་སུ་བླ་མའི་བཀའ་བཞིན་གདན་ས་མ་ཉམས་པར་བསྐྱངས་ནས་ཀུན་གཟིགས་མཆོག་གི་སྤྲུལ་བའི་སྐུ་རིན་པོ་ཆེ་ཉིད་ཀྱི་ཕྱག་ཏུ་ཕུལ། དབང་དང་གདམས་ངག་དུ་མ་ཕ་ནོར་བུ་ལ་འབོག་པ་བཞིན་མཛད། སློབ་མའི་ཚོགས་དུ་མ་བསྐྱངས་ནས་བཤད་སྒྲུབ་ཀྱི་སྣང་བས་འཇིག་རྟེན་གསལ་བར་བྱས་ཏེ་ཞི་བར་གཤེགས་པ་ཡང་དེ་དང་ཆ་མཚུངས་སོ། །སྨྲས་པ། གང་གི་དྲིན་ལས་མདོ་སྨད་ཡུལ་ལྗོངས་འདིར། །ཐུབ་བསྟན་བཤད་སྒྲུབ་ཉི་མ་དགུང་དུ་འབར། །ཆོས་འདུལ་དྲི་མེད་ལག་ལེན་སྤྱོད་ཚུལ་འཕེལ། །བསླབ་གསུམ་སྡེ་སྣོད་འཛིན་པས་ས་སྟེང་ཁྱབ། །དབང་ལུང་མན་ངག་
ནོར་བུའི་བང་མཛོད་ཀྱིས། །སྐལ་ལྡན་གདུལ་བྱའི་རེ་འབྲས་ལྷུན་གྱིས་གྲུབ། །གང་ལ་གང་འཚམ་ཐབས་མཁས་མཛད་བཟང་གིས། །མཐོ་རིས་ཐར་པའི་ལམ་སྲོལ་ཡངས་པོར་ཕྱེ། །ཁྱོད་ནི་འཕགས་ཡུལ་མཁས་པའི་གྲྭར་ཞུགས་ན། །རྒྱན་དྲུག་མཆོག་གཉིས་ལྟ་བུའི་གྲགས་པ་འཛིན། །གལ་ཏེ་ཡུལ་དབུས་ནོར་འཛིན་ལྟེ་བར་འཁོད། །མཁས་དང་གྲུབ་རིགས་བྱེ་བས་གཙུག་གིས་མཆོད། །མདོ་སྨད་གཅོང་རོང་ནགས་མའི་ལྗོངས་འདི་ན། །གསེར་དང་ར་གན་གཉིས་ཀྱི་དབྱེ་བ་དཀའ། །བླང་དང་དོར་བྱའི་དེ་ཉིད་ཤེས་པ་དཀོན། །དཀར་ནག་ལས་ལ་རང་དགར་ཆོལ་བུར་སྤྱོད། །དམ་པའི་མགོན་ལས་གཡོ་ཅན་ཟོག་པོ་བཀུར། །ལེགས་བཤད་གཏམ་ལས་ཟན་དྲོན་ཁམ་གང་འདམ། །རིག་གནས་ལྔ་ལས་ཞོ་ལྔའི་ཚོང་ཟོང་བྲིན། །སྣོད་ཅན་གདུལ་བྱས་ཁྱོད་འདྲ་ཇི་ལྟར་ཐེགས། །འོན་ཏེ་ཀུན་མཁྱེན་ཐུགས་བསྐྱེད་དགའ་ཚལ་དུ། །དམ་པའི་མགོན་གྱི་པདྨ་དཀར་པོ་འཁྲུངས། །རྨད་བྱུང་ཡོན་ཏན་དམ་པའི་དྲི་བསུང་གིས། །ཕྱོགས་ཀྱི་ཐར་འདོད་རྐང་དྲུག་མགྲོན་དུ་བཀུག །ལེགས་བཤད་སྦྲང་འཐུང་ཆོས་ཀྱི་དབྱངས་སྙན་སྒྲོགས། །ཆེ་བརྗོད་བསྔགས་པས་ཕྱོགས་ཀྱི་འཁོར་ལོ་འགེངས། །མཁས་བླུན་ཀུན་གྱི་སྙིང་གི་སྐྱེད་ཚལ་དུ། །དད་པའི་འདབ་བརྒྱ་བཞད་པའི་དགའ་སྟོན་རྒྱས། །ཡིད་འཕྲོག་རྣམ་ཐར་དབྱར་གྱི་དཔལ་མོ་ཡིས། །ཉམ་ཆུང་བུང་བའང་དགའ་བདེའི་དབྱངས་སྙན་སྒྲོག །ལེགས་པར་བཤད་པའི་བདུད་རྩི་སྙིང་ལ་ཆགས། །འཆད་རྩོད་རྩོམ་པའི་དབྱིངས་སུ་འཕུར་བར་རྩོམ། །ཨ་ཏི་ཤ་དང་རྗེ་བཙུན་ཙོང་ཁ་པའི། །གསེར་བཟང་བཙོ་མ་ལྟ་བུའི་རིང་ལུགས་ལས། །གྲུབ་མཐའ་གཞན་ལ་གུས་པའི་རེ་བ་ལྷོད། །འདི་འདྲ་འདི་ཡང་མགོན་པོ་ཁྱོད་ཀྱི་དྲིན། །འོན་ཏེ་གཟུགས་སྐུ་རགས་པའི་ཟ་མ་ཏོག །ཡེ་ཤེས་སྐུ་ཡི་དབྱིངས་སུ་བསྡུས་པའི་གཏམ། །སྐབས་སུ་བབ་པས་ཡིད་
ཀྱི་ལྷ་ལམ་ངོས། །སྐྱོ་བའི་སྤྲིན་ནག་སྟུག་པོ་ཅི་ཡང་འཛིན། །ཀྱེ་ཧོ་ཡུན་རིང་མདོ་སྔགས་ཆོས་ཀྱི་ཆར། །སྤངས་དང་རྟོགས་པའི་ཁམས་ཀྱི་སྙིང་པོ་ཅན། །འབེབས་པར་རེ་བའི་སྤྲིན་སྔོན་སྟོང་པར་ཡལ། །ཨེ་མ་འགྲོ་འདིའི་བསོད་ནམས་ཇི་འདྲ་རང། །སྙིགས་མ་ལྔ་ཕྲག་ལྷག་པར་འཕེལ་ལུགས་འདིས། །མཁས་བཙུན་བཟང་དང་འཆད་རྩོད་རྩོམ་གསུམ་དང། །མཁྱེན་བརྩེ་ནུས་གསུམ་འཛོམ་པ་ཁྱོད་འདྲ་བ། །ས་ཡི་སྟེང་འདིར་ད་ནི་འབྱོན་ཏ་རེ། །འོན་ཀྱང་ཐུགས་བསྐྱེད་མཐུ་དཔུང་སྟོབས་བསྐྱེད་གསོལ། །འབྲལ་མེད་སྤྱི་བོའི་རྒྱན་དུ་རྟག་ཏུ་བཞུགས། །ཆད་མེད་གསུང་དབྱངས་བདུད་རྩི་རྟག་ཏུ་སྩོལ། །སྒྲིབ་མེད་ཡེ་ཤེས་སྤྱན་གྱིས་རྟག་ཏུ་གཟིགས། །ཐུགས་རྗེ་སྤྲིན་གྱི་ལྡིང་ཁང་གསར་པ་ནས། །ཐུགས་གསུང་སྐུ་ཡི་རོལ་པ་མཐའ་ཡས་པས། །ཐུགས་བསྐྱེད་མཐུ་ལྡན་རྒྱལ་བའི་འཕྲིན་ལས་ཀུན། །ཐུགས་བསྐྱེད་ལྷུན་གྱིས་གྲུབ་པར་དེང་མཛོད་ཀྱི། །མགོན་ཁྱོད་ཞི་བའི་དབྱིངས་སུ་མནལ་བ་ཡི། །ཚུལ་གྱིས་ལེགས་བྱས་འོད་སྣང་སྤྲོས་པ་གང། །བསྟན་འཛིན་རྒྱུ་སྐར་ཕལ་གྱིས་ངལ་བ་བརྒྱས། །བསྒྲུབ་ཀྱང་ཆ་དང་དཔེར་ཡང་ཇི་ལྟར་བཟོད། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་རྗེ་བཙུན་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པའི་ཚུལ་བསྟན་པར་མཛད་པའི་སརྒ་སྟེ་བཅུ་གཉིས་པའོ།། །།བླ་མ་འཇམ་དཔལ་འབྲལ་མེད་སྙིང་དབུས་སུ། །རྟག་བཞུགས་ཡིད་ལ་མཉམ་རྗེས་དབྱེར་མེད་ཐུགས། །ལུས་ལ་ཡེ་ཤེས་སྐུ་དང་ངག་ལ་ནི། །འཆད་རྩོད་རྩོམ་དབྱངས་དྲུག་ཅུ་མྱུར་འགྲུབ་སྩོལ། །དེ་ཡང་རྗེ་བླ་མ་ཉིད་ཞལ་བཞུགས་པའི་སྐབས་དད་པའི་དྲི་བཞོན་གྱིས་ཡིད་དབང་མེད་དུ་བསྐུལ་བ་ཞིག་གིས་བླ་མ་དམ་པ་ཉིད་བསྟན་འགྲོའི་མགོན་དུ་ཡུན་རིང་འཚོ་ཞིང་གཞེས་པའི་རྟེན་འབྲེལ་དུ་རྗེ་
ཉིད་དགུང་ལོ་ལྔ་པའི་ཚད་ཀྱི་སྐུ་ཞིག་མཚོ་བདུན་ནས་བཞེངས་ཏེ་གསེར་ཕུལ་བར་གསེར་བཞེས་སུ་མ་འདོད་པས་ཐེ་ཚོམ་གྱི་ངང་ནས་བཏང་སྙོམས་སུ་བཞག །བར་སྐབས་ཤིག་ཞིང་གཞན་དུ་གཞོལ་བའི་གཏམ་ཐོས་ཏེ་སླར་ཡང་གསེར་གསོལ་བས་སྔར་དང་མི་འདྲ་བར་རྐྱེན་པར་བྱུང་སྟེ་དད་ལྡན་མང་པོས་གདུང་འབུལ་གྱི་སྐྱེས་དང་ལྷན་ཅིག་པར་ཕུལ་བ་གདན་ས་འདིར་ཤིང་སྤྲེལ་ལོ་ཟླ་བ་ལྔ་པའི་ཚེས་བཅུ་གསུམ་གྱི་ཉིན་འབྱོར་བས་ཀུན་གྱིས་མཆོག་གི་སྤྲུལ་བའི་སྐུ་འཁྲུལ་མེད་འབྱོན་པའི་རྟེན་འབྲེལ་དུ་གླེང། ལོ་དེའི་མགོ་ཟླ་བའི་ཚེས་བཅུ་གཅིག་གི་ཉིན། ཀུན་གཟིགས་མཆོག་གི་སྤྲུལ་བའི་སྐུ་རིན་པོ་ཆེ་བློ་བཟང་ཐུབ་བསྟན་འཇིགས་མེད་རྒྱ་མཚོའི་སྡེ་དགེ་ལྡན་བསྟན་པ་འཕེལ་རྒྱས་གླིང་དུ་བཞུགས་པ་ལས་སྦྱིན་བདག་གཅིག་གིས་གདན་དྲངས་པའི་ལམ་བར་ནས་ཆིབས་བཤོལ་ཏེ་རྐྱེན་གཞན་ཅི་ཡང་མེད་པར་རི་ཆུང་ཞིག་གི་སྟེང་ནས་ཞལ་བྱང་དུ་ཕྱོགས་ནས་དགྱེས་ཉམས་ཀྱིས་ཡུན་རིང་བཞུགས་པས། མཚམས་ཤིག་ནས་བྱང་ངོས་ཀྱི་ནམ་མཁར་འཇའ་སྤྲིན་འཁྲིགས་པ་དང། ཉིན་དེར་གདན་ས་བཀྲ་ཤིས་འཁྱིལ་དུ་ཡང་ལྷོ་ངོས་ཀྱི་ནམ་མཁའ་འཇའ་ཚོན་ཉིས་བརྩེགས་ཤར་བའི་སྣེ་མཆོད་རྟེན་མཐོང་གྲོལ་ཆེན་མོ་ལ་ཟུག་པར་ཀུན་གྱིས་མཐོང། དེ་དང་དུས་མཚུངས་པར་བྷ་ནུ་ཏ་རའམ་ཉི་སྒྲོལ་བྱེད་ཅེས་པ་ཤིང་སྤྲེལ་མགོ་ཟླ་བའི་དཀར་ཕྱོགས་ཀྱི་དགའ་བ་གསུམ་པའི་ཉིན་དེར་ཡབ་སྒོམ་པ་ཡག་ལ་བུ་ཆུང་མཚན་དང་ལྡན་པ་ཞིག་འཁྲུངས། རིམ་གྱིས་གསལ་ཆ་དང་གྲགས་པ་ཆེ་བར་སོང་སྟེ། ཀུན་གཟིགས་ཡེ་ཤེས་ཀྱི་དབང་པོ་མཆོག་ནས་ཞབས་བརྟན་སོགས་གང་ཅིའི་གསུང་བཀོད་དང་དགོངས་དཔྱད་ཞིབ་འཇུག་གི་བཀའ་དྲིན་སྩལ། གླང་ལོ་ཟླ་བ་ལྔ་པའི་ཚེས་བཅོ་ལྔའི་ཉིན། ཀུན་མཁྱེན་སྤྲུལ་བའི་སྐུ་རིན་པོ་ཆེ། སྡེ་ཁྲི་རིན་པོ་ཆེ། ཁྲི་ཆེན་སྤྲུལ་
བའི་སྐུ་འཇིགས་མེད་བསྟན་པའི་ཉི་མ། མཁན་པོ་རྣམ་གཉིས་སོགས་དང་བཅས་ཀུན་མཁྱེན་གོང་མ་རྣམ་གཉིས་ཀྱི་སྐུ་གདུང་གི་མདུན་དུ་བརྟག་བསྒྲིལ་མཛད་པས་སྔར་གྱི་ཐུགས་དམ་བརྟག་པ་རིམ་པར་གནང་བ་དང་མཐུན་པར་བབས། ལོ་དེའི་ཟླ་བ་དྲུག་པའི་ཚེས་བཞིའི་ཉིན་དཔོན་པོ་རབ་འབྱམས་པ་དཀོན་མཆོག་ལྷུན་གྲུབ་དང། རྡོ་རམས་པ་དཀོན་མཆོག་དཔལ་བཟང་མཆེད་གཉིས་སོགས་རྗེ་གོང་མའི་སྐུ་འཁོར་རྣམས་དང། དུས་འཁོར་རྡོ་རྗེ་འཛིན་པ་དཀོན་མཆོག་བསྟན་དར་སོགས་བླ་གྲྭ་མང་གིས་ཐོག་མའི་རྟེན་འབྱུང་གི་མཇལ་དར་དཀར་སྤྲོ་དང་བཅས་ན་བཟའ་ཕུལ་བར། གོས་སེར་གྱིས་གཡོགས་པའི་ཚར་ཙག་ཕུ་དུང་མ་ཞིག་ཕུལ་བ་ཐབས་ཅི་བྱས་ཀྱང་བཞེས་སུ་མ་འདོད་པས་གཟན་ཤམ་མི་འབུལ་ཐབས་མེད་ཀྱིས་འབུལ་དགོས་བྱུང་བ་བཞེས་ནས་གཟིགས་ཚུལ་དང་མཇལ་ཁ་གནང་ཚུལ་ཚུན་ཆད་དང་བ་འདྲེན་པ་དང་ཀུན་ཡིད་ཚིམ་པར་མཛད། དེ་ནས་བོད་ཡུལ་ཐིག་ལེར་ལྷ་ཟླ་ཞེས་འབོད་པ་ཧོར་ཟླ་བཅུ་པའི་དཀར་ཕྱོགས་ངོམས་པའི་ཚེས་གསུམ་གྱི་ཉིན་གདན་ས་ཆེན་པོ་བཀྲ་ཤིས་འཁྱིལ་དུ་གདན་དྲངས། སྟོན་པ་བཅོམ་ལྡན་འདས་ཤཱཀྱའི་རྒྱལ་པོས་མུ་སྟེགས་སྟོན་པ་དྲུག་འགྲན་ཟླ་མེད་པའི་ཆོ་འཕྲུལ་གྱིས་ཚར་བཅད་པའི་དུས་ཆེན་ལྕགས་སྟག་ཧོར་ཟླ་དང་པོའི་ཚེས་བརྒྱད་ཀྱི་སྔ་དྲོ་ཀུན་མཁྱེན་སྐུ་འཕྲེང་གསུམ་པ་རྗེ་བཙུན་བློ་བཟང་ཐུབ་བསྟན་འཇིགས་མེད་རྒྱ་མཚོའི་སྡེའི་ཞལ་སྔ་ནས་ལས་རབ་བྱུང་དང་དགེ་ཚུལ་དཀྱུས་གཅིག་ལ་བསྒྲུབ་སྟེ་མཚན་དཀོན་མཆོག་བསྟན་པའི་རྒྱ་མཚོ་ཞེས་གསོལ། ཡོན་ཏན་གཞིར་གྱུར་མའི་ལུང་དང་སྦྲགས་ཏེ་ཐུན་མོང་དང་ཐུན་མོང་མ་ཡིན་པའི་ལམ་གྱི་རིམ་པའི་གདམས་ངག་གི་བདུད་རྩིས་ཐུགས་ཀྱི་བུམ་བཟང་འགེངས་པར་མཛད།
ལྷ་དང་མི་རྣམས་ཀྱི་མིག་གི་དགའ་སྟོན་དང་ཡིད་ཀྱི་བདུད་རྩིར་བཞུགས་ཤིང་འཁོར་ལོ་གསུམ་གྱི་མཛད་འཕྲིན་ཟླ་བ་ཡར་ངོའི་ཚེས་ཀྱི་འཕེལ་བ་ལ་འགྲན་བཞིན་པ་འདི་ལགས་སོ། །སྨྲས་པ། གང་དུ་གནས་པ་ཙམ་གྱིས་ཐུབ་པའི་བསྟན། །རྫོགས་ལྡན་དཔྱིད་དུ་བསྒྱུར་མཁས་ཁྱོད་ཀྱི་ཞལ། །མཐོང་ཙམ་གྱིས་ཀྱང་རབ་དགའི་ས་ལ་འགྲན། །མི་འགྱུར་དགའ་བ་སྩོལ་ཕྱིར་རྟག་བརྟན་གསོལ། །གང་གི་ལུས་ནི་དགེ་སྦྱོང་རྒན་པོའི་གཟུགས། །འགྱིང་བག་ཉམས་ནི་ལྔ་རིག་པཎྚི་ཏ། །གཞོན་ནུའི་གཟུགས་ནི་ཆོས་སྲིད་དྲེགས་ལྡན་ཚོགས། །ཟིལ་གྱིས་ནོན་བྱེད་གྱུར་འདི་ཨ་ཧོ་རྨད། །ཐུགས་བསྐྱེད་འཕྲིན་ལས་སྐྱེས་སྦྱངས་ལུང་རྟོགས་ཀྱི། །གདེངས་ཀ་ཆེ་མཐོ་བདུད་སྡེ་འདར་བྱེད་ཀྱང། །ཉམ་ཆུང་བག་འཁུམ་མི་འོས་འཕགས་ཆེན་གྱི། །ཞབས་རྡུལ་ཙམ་གྱིས་ངོ་མཚར་སྐལ་བཟང་འཐོབ། །སྤངས་རྟོགས་རང་བཞིན་ཡོན་ཏན་འགོག་མེད་གསལ། །སྒོ་གསུམ་ཀུན་བཟང་སྤྱོད་པས་ཅི་དགར་མཛེས། །གང་འདུལ་ཟློས་གར་མོས་བཞིན་འདོད་པ་འཇོ། །དམ་པ་འདི་དག་མཐོང་ཐོས་དྲན་རེག་འདྲེན། །གང་སྐུ་མིག་དང་གང་གསུང་སྒྲ་འཛིན་གྱི། །བདུད་རྩིར་འདོད་པས་འགྲོ་འདི་གདུངས་པ་ན། །མཁྱེན་བརྩེ་ལང་ཚོ་རྒྱས་པའི་སྟོབས་བཅུའི་མདངས། །འགྲོ་ལ་མཚན་དཔེའི་གར་གྱི་སྒྱུ་རྩལ་ངོམས། །ཞེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་རྗེ་བཙུན་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་ལས་མཆོག་སྤྲུལ་ཟླ་གཞོན་གསར་པ་ཤར་བའི་གཏམ་གྱི་སརྒ་སྟེ་བཅུ་གསུམ་པའོ། །དེ་ཡང་སྤྱིར་ན། སྔོན་གྱི་བཀའ་གདམས་པ་རྣམས་ཀྱིས། ངེས་འབྱུང་དང་བྱང་ཆུབ་ཀྱི་སེམས་དང་བྲལ་ན་བསྐལ་པའི་རླུང་གིས་མི་བསྐྱོད་པའི་ཏིང་ངེ་འཛིན་ཡོད་ཀྱང་ལྷག་སྤྱོད་ཀྱི་རྗེས་སུ་འགྲོ་ཉེན་ཆེ་གསུངས་པ་
ལྟར། ཐོས་བསམ་གྱིས་མི་ཚེ་ཆོས་ལ་བསྐྱལ་ཀྱང་རང་སེམས་ལ་ཆོས་ཀྱི་དྲི་མི་བྲོ་བ་དང། རི་སུལ་སྟོང་པར་དཀའ་ཐུབ་ལ་མི་ཚེ་བསྐྱལ་ཀྱང་འཁོར་བའི་རྩ་བ་སྦྲམ་པོར་ལུས་པ་མང་མོད། འདིར་ནི་དེ་ལྟ་བུ་མ་ཡིན་པར་བཤད་སྒྲུབ་ཕན་ཚུན་གྲོགས་སུ་སོང་ན་ཐོས་བསམ་ཉིད་ཉམས་ལེན་དང། སྒོམ་སྒྲུབ་ཉིད་ཐོས་བསམ་གྱི་བོགས་འདོན་དུ་གསུངས་པ་ལྟར། བུག་སྒོ་འདག་སྦྱར་སོགས་ལ་མ་ལྟོས་པའི་འཆད་རྩོད་རྩོམ་གསུམ་ཉིད་སྤོང་བ་བསམ་གཏན་གྱི་ཉམས་ལེན་དུ་སོང་སྟེ། འཁོར་ལོ་གསུམ་གྱི་སྒོ་ནས་ས་ལམ་མཐོན་པོར་བགྲོད་པའི་རྣམ་ཐར་གྱིས། པོ་ཏོ་བས་བྱ་སྒྲུང་དང་བྱ་ཚང་འཇོག་ཚུལ་ཚུན་ཆད་གདམས་པར་ཤར་ནས་གྲུབ་པའི་གོ་འཕང་མཐོན་པོར་གཤེགས་པ་སོགས་མཁས་གྲུབ་ཕལ་མོ་ཆེའི་མཛད་པ་ལ་འགྲན་པའི་ཚུལ་ཆ་ཤས་ཙམ་ཡང་སྐུ་བཞི་ཟུང་འཇུག་ཏུ་གྲུབ་པའི་བདུད་རྩིའི་ཐིག་ལེ། གདུལ་བྱའི་མོས་པའི་རྫིང་བུར་གང་འདུལ་གྱི་རོལ་པར་འཆར་བས། དེ་སྙེད་ཀྱི་ཚིག་གི་སྤྲོས་པ་ཞིང་ཁམས་རྒྱ་མཚོའི་རྡུལ་གྲངས་དང་མཉམ་པའི་རྒྱལ་བ་སྲས་བཅས་ཀྱི་བཀོད་པ་རྒྱ་མཚོའི་ཁྱོན་དང་མཉམ་པ་ལས། ཕྲ་རྒྱས་རྒྱ་མཚོའི་རྦ་རླབས་ཀྱིས་གཡེངས་པའི་ཚུར་མཐོང་གི་སྐྱེ་བོ་རབ་འབྱམས་རྒྱ་མཚོའི་བྱེ་སྙེད་ལས་བརྒལ་བ་དག་གིས་དབྱངས་ཀྱི་ཡན་ལག་རྒྱ་མཚོས་ཀྱང་བརྗོད་པར་ག་ལ་ནུས། སྤངས་དང་རྟོགས་པའི་ཡོན་ཏན་གྱི་རྡུལ་འཕྲེང་སྤོ་མཐོར་བརྩེགས་པའི་རྣམ་ཐར་རི་ཡི་དབང་པོའི་ངོས་ལ་ཚིག་གི་གོམ་པ་རེ་རེས་ཀྱང། རྣམ་ཀུན་གཟིགས་པའི་ཆོས་བཟང་ལྷ་ཡི་གཞལ་མེད་ཁང་དུ་ཉེ་བར་འགྱུར་བའི་སྤྲོ་བས་ཡིད་དྲངས་ཏེ། རྣམ་ཐར་གྱི་ངོ་བོ་རང་བཞིན་དྲང་པོར་བརྗོད། གསུང་སྒྲོས་བསླབ་བྱའི་ཚུལ་དུ་བཀོད་པ་འགས་ཟུར་བརྒྱན། ཐུན་མོང་གི་སྣང་བ་ལྟར་གྱི་མཛད་སྤྱོད་ལོ་ཟླ་རིམ་ཤར་དང་འབྲེལ་
བར་རང་གི་བློ་ལ་ངེས་ཚོད་དང། ས་བོན་དུ་གསལ་བ་གོ་བསྡུར་ནས་རགས་རིམ་ཙམ་ཞིག་འུད་ཀྱི་སྒོ་ནས་ཉམས་བཏོད་པ་སྤངས་ཏེ་མཉན་པར་འོས་པའི་ལུགས་སུ་བཀོད་པ་ལགས་སོ། །སྨྲས་པ། གང་གི་བ་སྤུའི་སྒོ་ཡི་ཞིང་ཁམས་རེར་ཡང་རབ་འབྱམས་རྒྱལ་བའི་དཀྱིལ་འཁོར་རྫོགས། །བཅུ་གཉིས་དཔེས་མཚོན་སྒྱུ་འཕྲུལ་གར་གྱིས་ཆོས་དབྱིངས་དགའ་མར་རྣམ་རོལ་བདེ་བས་མྱོས། །ཨནྡྲ་རྙིལ་གྱི་ཐོར་ཅོག་གསེར་ཞུན་ཅོད་པན་དག་དང་རིན་ཆེན་དོ་ཤལ་ཡང། །ངུར་སྨྲིག་བླ་གོས་རྫུ་བག་ལ་བརྟེན་གསུམ་ལྡན་རྡོ་རྗེ་འཛིན་པའི་གཙོ་བོ་ཁྱོད། །ལེགས་བཤད་ཆོས་ཀྱི་རོལ་མོ་ཙམ། །མ་ཡིན་སྨན་གྱི་ལྗོན་པ་བཞིན། །ཕན་བདེའི་མཆོད་སྦྱིན་འགྱེད་པ་ཡི། །ཐབས་མིན་སྤྱོད་པ་གང་ཞིག་མཆིས། །གང་སྐུ་ཡིད་འོང་གསེར་གྱི་མཆོད་སྡོང་བཞིན། །ཞི་དུལ་སྨྲ་མཁས་མི་ཕམ་འཇམ་དབྱངས་བཞིན། །ཡོན་ཏན་རིན་ཆེན་མཛོད་འཛིན་རྒྱ་མཚོ་བཞིན། །མཁས་པས་བཀུར་བ་ལྷ་ཡི་དབང་པོ་བཞིན། །དེ་མཐུས་ངུར་སྨྲིག་གོས་ཀྱིས་རིན་ཆེན་རྒྱན། །དུར་ཁྲོད་ཆས་བཞིན་ཟིལ་གྱིས་གནོན་བྱེད་ན། །གཞན་དང་མ་འདྲེས་མདོ་སྔགས་ལེགས་བཤད་ལ། །ཕལ་པའི་རིག་བྱེད་བཞི་ཡིས་ཇི་ལྟར་འགྲན། །བདེ་འབྱུང་གཙུག་ན་ཟླ་བ་དང། །འཁོར་སྒྱུར་སྤྱི་བོར་ཅོད་པན་བཞིན། །གང་གི་ཞབས་སེན་དམར་བའི་འོད། །འགྲོ་འདིའི་གཙུག་ཏོར་རྒྱན་དུ་མཛེས། །བ་སྤུའི་ཁུང་བུར་རྒྱལ་སྲས་བྱེ་བ་དང། །ལྷན་ཅིག་རྫོགས་སངས་རྒྱས་སྐུ་གྲངས་མེད་ཀྱིས། །མཁའ་ཁྱབ་ཞིང་དུ་འགྲོ་རྣམས་སྨིན་པའི་གར། །སྐད་ཅིག་སྐད་ཅིག་ལ་ཡང་སྟོན་པ་ལས། །ཐུན་མོང་སྐུ་ཡི་བཀོད་པ་གཅིག་ཉིད་ཙམ། །ཉུང་བར་སྣང་མོད་བསམ་མི་ཁྱབ་པའི་ཡུལ། །ནམ་མཁའི་ཁྱོན་ཡངས་བྱིས་བློའི་སོར་རྩེ་ཡིས། །བསྐལ་པར་གཞལ་བའི་གོ་སྐབས་ག་ལ་ཞིག །
འོན་ཏེ་སྲི་ཞུ་ཆུང་ཡང་རླབས་ཆེན་ཚོགས། །སྡུད་ཕྱིར་དད་གུས་ལྡན་པའི་སློབ་མ་ལ། །བཀའ་དྲིན་གསུམ་ལྡན་བླ་མ་ལས་ལྷག་པའི། །ཞིང་མཆོག་མེད་ཅེས་བསྔགས་ཕྱིར་འདིར་ངལ་བྱས། །ཀུན་རྟོག་སེམས་ཀྱི་རྣམ་འགྱུར་མཐའ་ཀླས་ཕྱིར། །ཚིག་དང་དོན་གྱི་སྦྱོར་བ་མ་མཚུངས་སོགས། །སེམས་རྒྱུད་སྒྲིབ་བྱེད་ནོངས་ཚོགས་ཅི་མཆིས་པ། །འཇིག་རྟེན་མགོན་གྱི་སྤྱན་སྔར་སྙིང་ནས་བཤགས། །ཐུགས་རྗེའི་ཕྱག་གིས་ཉེ་བར་བསྐྱངས་ན་ཡང། །མཉམ་འགྲོགས་སྐྱོན་གྱིས་བསམ་སྦྱོར་བསྟེན་ཚུལ་ལ། །ནོངས་པར་གྱུར་གང་ཁྱོད་ཀྱི་ཐུགས་རྗེའི་མཐུས། །དྲི་མ་མ་ལུས་བྱང་ཞིང་དག་པར་མཛོད། །སངས་རྒྱས་དངོས་ཀྱི་མཛད་པས་ལེགས་བསྐྱངས་ཀྱང། །བསྟེན་ཚུལ་ཚུལ་བཞིན་མ་ནུས་ཚུར་མཐོང་སྐྱོན། །དེ་ཡི་དྲི་མ་མི་སྨོད་ལྷག་པར་ཡང། །བརྩེ་བས་མ་དང་བུ་བཞིན་རྟག་ཏུ་སྐྱོངས། །མཁས་པ་དགྱེས་པའི་སྡེབ་སྦྱོར་མ་མཆིས་ཀྱང། །དད་གདུང་ལྷག་བསམ་རེ་བས་འདི་སྦྱར་མཐུས། །རྟག་ཏུ་ཐེག་མཆོག་བཤེས་དང་མི་འབྲལ་བར། །དགྱེས་བཞིན་རྗེས་སུ་འཛིན་པ་ཉིད་གྱུར་ཅིག །རྣམ་འདྲེན་སྟོབས་བཅུ་མངའ་བའི་སྲས་ཀྱི་མཆོག །ཁྱོད་བཞིན་བདག་ནི་སྤྱད་པ་སྤྱོད་ཚེ་ཡང། །འགྲོ་ཀུན་བདུད་ཀྱི་ཞགས་པ་ལས་བཀྲོལ་ཏེ། །སྲིད་ཞིའི་མཐའ་དང་བྲལ་བའི་ཐང་ཆེན་དུ། །རྒྱལ་བསྟན་ཉམས་པ་མེད་པ་ཀུན་དགའི་ཤིང། །རྒྱལ་བ་གཉིས་པའི་དགོངས་བཞེད་ཇི་བཞིན་དུ། །བསྐྱངས་པའི་གྲིབ་མར་བདེ་བར་ངལ་གསོ་ཞིང། །སྐུ་བཞིའི་འབྲས་བུས་ཚིམ་པ་སྟེར་བར་སྨོན། །སྐལ་བཟང་རྒྱལ་བསྟན་ཀུན་གསལ་མཛེས་མའི་དབྱིངས། །འགྲོ་ཁམས་ནོར་འཛིན་ཁྱོན་དང་མཉམ་པ་དེར། །ཐོས་བསམ་སྒོམ་པའི་ཡོན་ཏན་རྟ་བདུན་འོད། །ཕན་བདེ་པདྨོའི་གཉེན་
དུ་རྟག་འཆར་ཤོག །བློ་བཟང་རྒྱལ་བའི་སྙན་བརྒྱུད་སྦྲང་རྩིའི་རོས། །ངེས་འབྱུང་བྱང་སེམས་ལྟ་བའི་བྷྲ་མ་རཿ །སྙིང་གི་པདྨར་འགུགས་པའི་བརྩེ་བ་ཆེ། །དོན་ཡོད་ཞགས་པའི་འཕྲུལ་འཁོར་ཉིད་དུ་མཛོད། །སྟོང་ཕྲག་སོ་གཉིས་རྒྱུད་ཀྱི་འོ་མཚོའི་བཅུད། །གཏན་བདེའི་ལུས་ཕུང་རྒྱས་བྱེད་རིམ་གཉིས་ཀྱི། །བདུད་རྩིས་ཨེ་ཝཾ་ཁ་སྦྱོར་དབང་གི་རྒྱལ། །བདག་སྙིང་དཔྱིད་དུ་བརྟན་པ་ཉིད་དུ་ཤོག །བཤད་སྒྲུབ་སྤོ་མཐོ་ཐུབ་བསྟན་རི་དབང་རྒྱན། །འཇམ་དཔལ་དགྱེས་བཞད་ཡབ་སྲས་ཉི་ཟླའི་འོད། །བསྟན་འཛིན་གསེར་རིའི་འཕྲེང་དང་ལྷན་ཅིག་པར། །འཇིག་རྟེན་ཉེར་འཚོའི་ཞིང་དུ་ཉམས་མེད་ཤོག །རྒྱལ་སྲས་སྤྱོད་པའི་ཆ་རྫོགས་རྟེན་བཟང་ལ། །གང་གི་ཞབས་སྐྱེས་བཀྲ་ཤིས་རི་མོ་ནི། །རིམ་པར་བཀོད་པས་དོན་གཉིས་ནོར་བུའི་ཆར། །རིས་མེད་འགྲོ་བ་ཡོངས་ལ་འགྱེད་པར་ཤོག །དགའ་ལྡན་རྨད་བྱུང་བཀོད་པ་ཀུན་གཟིགས་ཞིང། །བདེ་བ་ཅན་དང་མངོན་དགའ་ཤམྦྷ་ལ། །བགྲང་ཡས་འཇིག་རྟེན་ཀུན་ཏུ་དམ་ཆོས་ཀུན། །འཛིན་པས་འགྲོ་ཀུན་ཀུན་མཁྱེན་སར་འགོད་ཤོག །རྒྱལ་བསྟན་དབྱར་གྱི་མཚོ་བཞིན་འཕེལ་ཞིང་རྒྱས། །བསྟན་འཛིན་པད་དཀར་ཚལ་བཞིན་རྣམ་ཐར་གཙང། །བདེ་སྐྱིད་ཉི་ཟླའི་འོད་བཞིན་ཕྱོགས་བཅུ་རུ། །འགྲན་བཞིན་ཁྱབ་པ་རྫོགས་ལྡན་དུས་བཞིན་ཤོག །བླ་མ་ཡི་དམ་བསྟན་སྲུང་ཚོགས་རྣམས་ཀྱིས། །བླ་མའི་རྣམ་ཐར་འཕྲིན་ལས་སྤེལ་བ་དང། །བླ་མའི་བཀའ་བཞིན་མར་གྱུར་འགྲོ་ཀུན་གྱིས། །བླ་མ་ཚུལ་བཞིན་བསྟེན་པའི་འཕྲིན་ལས་མཛོད།། །།ཅེས་རྒྱལ་བའི་རིང་ལུགས་པ་ཆེན་པོ་འཇམ་དབྱངས་བླ་མ་དཀོན་མཆོག་བསྟན་པའི་སྒྲོན་མེ་དཔལ་བཟང་པོའི་རྣམ་པར་ཐར་པ་གཏམ་དུ་བརྗོད་པ་དད་པའི་པངྨོ་བཞད་པའི་ཉིན་བྱེད་ཅེས་བྱ་བ་འདི་ནི་མཁས་བཙུན་བཟང་པོའི་མཛད་འཕྲིན་
གྱིས་མངོན་པར་མཐོ་བའི་ལྷའི་བཙུན་པ་རིན་ཆེན་དགེ་ལེགས་བསྟན་འཛིན་པ་ནས། རང་ཉིད་བླ་མའི་ཞབས་འབྲིང་རྒྱུས་ཡོད་ལྟ་བུར་དགོངས་ནས་སྔ་ཕྱིར་གྱ་ནོམ་པའི་སྐྱེས་བཟང་དང་བཅས་བཀའ་ནན་སྩལ་བ་བཟློག་མ་ཕོད་པར་རྩོམ་གདན་ས་བོན་འདྲ་བ་ཞིག་བསྒྲིགས་ནས་ཕུལ་བ་རྗེ་བླ་མ་ལ་དད་གུས་དགའ་བའི་ཤུགས་ཀྱིས་དགོན་ཆེན་དགའ་ལྡན་དར་རྒྱས་བཤད་སྒྲུབ་གླིང་དུ་པར་ལ་བརྐོས་ཟིན་པར། ད་དུང་བྲི་འོས་ཡོད་ཀྱང་མང་བས་འཇིགས་ཤིང། ཧ་ཅང་བསྡུ་བར་ཡང་རང་ཉིད་ཕངས་པའི་ལོ་རྒྱུས་སོགས་ལ་བརྟེན་ནས། གཙུག་ལག་རབ་འབྱམས་ལ་མཁྱེན་དཔྱོད་ལྷ་ལམ་ལྟར་ཡངས་པའི་མཁྱེན་རབ་ཀྱི་དབང་ཕྱུག་དམ་པ་རེབ་ཙ་བཀའ་འགྱུར་བ་དཀོན་མཆོག་དམ་ཆོས་ཡར་འཕེལ་ནས་སྔ་མ་སོར་བཞག །སླར་ཡང་བྲི་བསྣན་ཅི་རིགས་ཀྱི་སྒོ་ནས་འཇུག་བདེ་བ་ཞིག་དགོས་ཞེས་བསྐུལ་ཞིང། མང་པོས་ཀྱང་ནན་བྱས་པའི་ངོར། བླ་མའི་བཀའ་འབངས་ཐ་ཤལ༸རཏྣ་དྷྭ་ཛས་ལྕགས་ཡོས་ས་ག་ཟླ་བའི་དཀར་ཕྱོགས་དགའ་བ་གསུམ་པའི་ཚེས་ལ་འགོ་བརྩམས། སྣྲོན་ཟླ་བའི་དཀར་ཕྱོགས་རྒྱལ་བ་དང་པོའི་ཚེས་ཀྱི་ཉིན་གྲུབ་པར་བགྱིས་པའི་ཡི་གེ་པ་ནི་རང་གི་སློབ་བུ་མདོ་སྔགས་རིག་གནས་བལྟ་བའི་མིག་ལྡན་ཞབས་དྲུང་དཀོན་མཆོག་བསྟན་པ་རབ་རྒྱས་ཀྱིས་བགྱིས་པ་འདིས་ཀྱང་དུས་གསུམ་རྒྱལ་བ་སྲས་དང་བཅས་པའི་ཐུགས་བཞེད་མཐའ་དག་ལྷུན་གྱིས་གྲུབ་པར་གྱུར་ཅིག ། །། མངྒ་ལཾ།