ཞེ་ཆེན་མ་ཧཱ་པཎྜི་ཏ་དབོན་སྤྲུལ་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོའི་རྣམ་ཐར་མདོར་བསྡུས་བློ་གསར་ཡིད་ཀྱི་དགའ་སྟོན།
༼དང་པོ།༽ སྔོན་གྱི་སྐྱེས་རབས་དང་འབྲེལ་སྐུ་བལྟམས་ཚུལ་སོགས་ཀྱི་མཛད་པ་བསྡུས་ནས་བརྗོད་པ།
ཞེ་ཆེན་མ་ཧཱ་པཎྜི་ཏ་དབོན་སྤྲུལ་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོའི་རྣམ་ཐར་མདོར་བསྡུས་བློ་གསར་ཡིད་ཀྱི་དགའ་སྟོན་ཞེས་བྱ་བ་བཞུགས་སོ། །དེ་ཡང་འཇམ་མགོན་ཀོང་སྤྲུལ་ཡོན་ཏན་རྒྱ་མཚོའི་ཞལ་སྔ་ནས། འཕགས་པའི་རྣམ་ཐར་འཕགས་པ་ཁོ་ནའི་ཡུལ། །ཕྱོགས་མཐོང་ཙམ་ཡང་སོ་སྐྱེས་བརྗོད་པར་དཀའ། །ཞེས་གསུངས་པ་ལྟར་འཕགས་པའི་རྣམ་ཐར་ཇི་བཞིན་སོ་སྐྱེའི་བློ་ཡིས་བརྗོད་པར་དཀའ་ན་ཡང་། གངས་ཅན་མཁས་གྲུབ་ཡོངས་ཀྱི་གཙུག་རྒྱན་འཇམ་དབྱངས་མཁྱེན་བརྩེའི་དབང་པོའི་ཞལ་ནས། རང་ཅག་གི་བླ་མ་རྡོ་རྗེ་འཆང་ཆེན་པོ་བསྟན་པ་རྒྱ་མཚོའི་གསལ་བྱེད་དུ་གྱུར་པ་ལ་རྣམ་ཐར་ཞིག་སྔ་འགྱུར་བསྟན་པའི་རྒྱན་དུ་ཅི་ནས་སྤེལ་དགོས། དེ་ཡི་མཚན་ལ་སྐལ་བཟང་མགུལ་རྒྱན་ཞེས་པ་ཐོགས། ཞེས་རྡོ་རྗེའི་ལྗགས་ཀྱིས་བསྐུལ་བ་བཞིན་གྲུབ་དབང་རྒྱལ་བ་རྫོགས་ཆེན་པའི་མཁན་པོ་རྡོ་རྗེ་རབ་བརྟན་གྱིས་མཛད་པའི་རྗེ་འདིའི་རྣམ་ཐར་སྐལ་བཟང་མགུལ་རྒྱན་དང་། གྲུབ་དབང་སྒྲ་རམས་པ་འགྱུར་མེད་རྣམ་རྒྱལ། རྒྱལ་ཚབ་པདྨ་བི་ཛ་སོགས་ཀྱི་རྗེ་འདིའི་རྣམ་ཐར་དང་། རྒྱལ་ཚབ་དང་པོའི་རྣམ་ཐར་སྐལ་བཟང་གདུང་སེལ། ཀོང་སྤྲུལ་ཡོན་ཏན་རྒྱ་མཚོའི་རང་རྣམ་བྱུང་བ་བརྗོད་པ་ནོར་བུ་སྣ་ཚོགས་མདོག་ཅན། རྡོ་རྗེ་གཟི་བརྗིད་རྩལ་གྱི་རྣམ་ཐར་ངོ་མཚར་ཨུ་དུམྦ་རའི་དགའ་ཚལ། ཐུབ་བསྟན་རྡོ་རྗེ་བྲག་གི་ཆོས་འབྱུང་ངོ་མཚར་གཏམ་གྱི་ཕྲེང་བ། ཀཿ ཐོག་གདན་རབས་ངོ་མཚར་མུ་ཏིག་གསར་པའི་ཕྲེང་མཛེས། སྡེ་དགེའི་རྒྱལ་རབས་ལོ་རྒྱུས་སོགས་ལས་བཏུས་ཏེ་གཞུང་འདི་མཛད་པ་པོའི་རྣམ་ཐར་ཆེ་ལོང་ཙམ་ཞིག་སྤྲོ་བ་ལ།
༼དང་པོ།༽ སྔོན་གྱི་སྐྱེས་རབས་དང་འབྲེལ་སྐུ་བལྟམས་ཚུལ་སོགས་ཀྱི་མཛད་པ་བསྡུས་ནས་བརྗོད་པ། དེ་ཡང་ཆོས་ཚིགས་ཀྱི་ཡུལ་དབུས་སྡེ་བཞིའི་དཔལ་གྱིས་མངོན་པར་མཐོ་བའི་སྡེ་དགེ་ཆོས་རྒྱལ་ཆེན་པོའི་མངའ་ཁོངས་མདོ་ཁམས་ལྷ་སྒང་རིང་མོའི་སའི་ཆ་འབྲོང་པ་ལྷ་སྡེ་རུ། ལུགས་གཉིས་ཀྱི་རྣམ་དཔྱོད་མཆོག་ཏུ་མངའ་བའི་ཕོ་ཏེ་གྲ་ལྔ་ནོར་བུ་དང་འབྲོང་པ་དཔོན་གྱི་སྲས་མོ་ཟི་སྨན་སྐྱིད་གཉིས་ཀྱི་སྲས་སུ། ཕྱི་ལོ་༡༧༨༧རབ་བྱུང་བཅུ་གསུམ་པའི་ལོ་རབས་ཞེ་གཅིག་མེ་མོ་ལུག་གི་ལོར་ཐུགས་ཆེན་སྙིང་པོ་ཡིག་བཅུ་གསུང་བཞིན་ངོ་མཚར་བའི་ལྟས་དང་བཅས་མཚན་དཔེའི་ཟླ་བ་གཞོན་ནུ་གསར་དུ་ཤར། དེ་དུས་རྒྱལ་ཚབ་རྡོ་རྗེ་འཆང་ལྷོ་ཁོག་ཏུ་ཕེབས་ནས་སིབ་སྤྲུལ་པདྨ་དབང་རྒྱལ་མཆོག་གི་ཡང་སྲིད་ངོས་འཛིན་དང་མཚན་གསོལ་སྐབས་རྗེ་འདི་ཡང་གསར་འཁྲུངས་ལ་བསྟན་འགྲོར་ཕན་པའི་ཉམས་རྨིས་གསལ་བར་བྱུང་ནས་ཐུགས་གཏད་དང་ཕྱག་མདུད་བསྩལ་ཏེ་ཐུགས་དགྱེས་བརྩེས་བཟུང་། དམ་པ་འདིའི་སྐྱེས་རབས་ནི། སྤྲུལ་གཞི་སྤྲེལ་སྒོམ་བྱང་ཆུབ་སེམས་དཔའ་དང་། ཐོན་མི་སམ་བྷོ་ཊ། གཡུ་སྒྲ་སྙིང་པོ། དུམ་པ་རྒྱ་ཞང་ཁྲོམ། ཟུར་ཆུང་ཤེས་རབ་གྲགས་པ། ནག་ཚོ་ལོ་ཙཱ་བ། གསལ་ལྡོམ་སྒོམ་པ་ཤེས་རབ། རྩེ་ལེ་སྣ་ཚོགས་རང་གྲོལ། ལོ་ཆེན་དྷརྨ་ཤྲཱི། གཏེར་སྟོན་ཨོ་རྒྱན་དྲི་མེད་ཀུན་དགའ་སོགས་ཀྱི་ཡེ་ཤེས་གཅིག་ཏུ་བསྡུས་པའི་རྣམ་འཕྲུལ་དུ་ལུང་གིས་ཟིན་ཅིང་། སྐུ་དངོས་ཀྱི་སྐྱེ་བ་སྔ་མ་ནི་རྗེ་རབ་འབྱམས་གཉིས་པའི་ཐུགས་སྲས་གཙོ་བོ་རྟོགས་ལྡན་སངས་རྒྱས་རབ་བརྟན་ཞེས་ཚེ་ལུས་གཅིག་ལ་གྲུབ་པའི་རྒྱལ་ས་ཟིན་པ་གང་གི་ཡང་སྲིད་དུ་རྒྱལ་ཚབ་རིན་པོ་ཆེའི་སྒྲིབ་བྲལ་ཡེ་ཤེས་ཀྱིས་གཟིགས། ལྕགས་ཁྱི་དགུང་ལོ་བཞིར་རྒྱལ་ཚབ་བསྟན་འཛིན་
ཆོས་རྒྱལ་གྱིས་གཙུག་ཕུད་བཞེས་ནས་འགྱུར་མེད་མཐུ་སྟོབས་རྣམ་རྒྱལ་ཞེས་མཚན་གྱི་ཅོད་པན་གསོལ་ནས་རྗེ་འདི་དང་སིབ་སྤྲུལ་རྣམ་གཉིས་ལ་རབ་བྱུང་གི་སྡོམ་པ་གནངས་ཏེ་རང་ལུགས་སྔ་འགྱུར་སིབ་རྫོགས་ཆེན་བཀྲ་ཤིས་ཆོས་གླིང་དུ་ཆེ་དགུ་འདུས་པ་རྒྱ་མཚོས་ཁྲི་སྟོན་གཟབ་རྒྱས་མཛད། སྔ་འགྱུར་ལྕང་བྲག་རིག་འཛིན་མཁའ་སྤྱོད་གླིང་དུའང་ཆོས་ཁྲིར་མངའ་གསོལ་ཅིང་ཞེ་ཆེན་བླ་སྐོས་འགྱུར་མེད་མཐའ་ཡས་ལས་འབྲི་ཀློག་བསླབ་སྦྱང་མཛད། རིག་པ་ཤིན་ཏུ་བཟང་ཞིང་ན་མཉམ་གཞན་ལས་ཁྱད་དུ་འཕགས་པ་ཆུང་ངུའི་སྐབས་ནས་དམ་པའི་རིགས་སད་པའི་ངང་ཚུལ་གྱིས་བློ་ལྡན་དག་ལ་དང་བ་འདྲེན་ནུས་པ་ཞིག་བྱོན་པའོ། །
༼གཉིས་པ།༽ བཤེས་གཉེན་བསྟེན་ཏེ་ཆོས་རིག་ཡོན་ཏན་རྒྱ་མཚོའི་གན་མཛོད་བདག་གིར་བཞེས་ཚུལ་གྱི་མཛད་པ།
༼གཉིས་པ།༽ བཤེས་གཉེན་བསྟེན་ཏེ་ཆོས་རིག་ཡོན་ཏན་རྒྱ་མཚོའི་གན་མཛོད་བདག་གིར་བཞེས་ཚུལ་གྱི་མཛད་པ། ཤིང་ཡོས་དགུང་ལོ་བརྒྱད་ལ་སྐུ་ཉིད་དང་སྐྱེལ་བསུ་བ་བཅས་ཆུ་ཀླུང་ཆེན་པོ་གསེར་ལྡན་དལ་འབབ་རིང་མོ་བརྒལ་ནས་གསང་ཆེན་སྔ་འགྱུར་རྙིང་མའི་མ་དགོན་ཆེན་མོ་དྲུག་གི་ཡ་གྱལ་མཁས་གྲུབ་གསེར་རི་ཕྲེང་བའི་གདན་ས་འོག་མིན་གཉིས་པ་དཔལ་རྒྱལ་བ་ཞེ་ཆེན་བསྟན་གཉིས་དར་རྒྱས་གླིང་གི་ཆོས་སྡེ་ཆེན་མོ་ག་ལ་བ་དེར་ཞབས་ཟུང་གསེར་གྱི་འཁོར་ལོ་བསྒྱུར་ཏེ་དགོན་དེ་ཡི་སྲུང་མ་དང་གཉུག་མར་གནས་པའི་གཞི་བདག་དཀར་ཕྱོགས་སྐྱོང་བ་རྣམས་དགའ་བའི་རྟགས་མཚན་མངོན་དུ་བྱུང་ཞིང་ཆིབས་བསུ་རིང་ཐུང་དང་སེར་སྦྲེང་བཅས་ཟླ་བ་བཞི་པའི་ཚེས་བཞི་གཟའ་སྐར་དགེ་བར་གདན་སར་འཁོད་དེ་མི་འཇིགས་གདོང་ལྔས་བཏེགས་པའི་ཆོས་ཀྱི་ཁྲི་ལ་མངའ་གསོལ། སྐྱབས་མགོན་རྣམ་གཉིས་ཀྱིས་བཤད་སྒྲུབ་བསྟན་པའི་རྒྱལ་མཚན་ལ་ཕྲིན་ལས་ཅན་ཞིག་འོང་བར་དགོངས་ནས་ཐུགས་དགྱེས་བརྩེས་བསྐྱང་སྟེ།
མགོན་བླ་ཀུན་བཟང་མི་འགྱུར་དང། བྱང་འདྲེན་པ་བསྟན་འཛིན། མཁས་དབང་དྲུང་ཡིག་བསྟན་འཛིན། མཁས་གྲུབ་ཆེན་པོ་ཕྱག་མཛོད་པདྨ་དོན་ལྡན། ལྔ་རིག་སྨྲ་བ་དབང་ཆེན་འབུམ་སོགས་ལས་འབྲི་ཀློག་དང་སྒྲིག་འདོན། ཆོ་ག་ཆོས་སྤྱོད་བློ་འཛིན་ནས་བཟུང་། སྔ་ཕྱི་ཅི་རིགས་སུ་ཡིད་བཞིན་མཛོད་དང་སྡོམ་གསུམ་རྣམ་ངེས་སོགས་གཞུང་ལུགས་ཀྱི་རྩ་བ་རྣམས་བློ་རྒྱུགས་དང་། སྒྲ་རྩིས་སྙན་སྡེབ་སོགས་ཐུན་མོང་ཐུན་མིན་གྱི་གནས་ལ་སྐྱེས་སྦྱངས་ཀྱི་ཤེས་རབ་རྣམ་གཉིས་ཀྱི་འཇུག་པ་ཤིན་ཏུ་ཡངས་པས། ན་ཚོད་དང་ཡོན་ཏན་ལྷན་ཅིག་རྫོགས་ཏེ་ཡོངས་འཛིན་རྣམ་པ་ཐུགས་ཤིན་ཏུ་དགྱེས་ནས་ཐུགས་རིག་བཀྲ་བའི་ཚད་དུ་གྲགས། མཁས་པ་མཁས་པའི་དབུས་ན་མཛེས་ཟེར་བ་ལྟར་དགུང་གྲངས་བཅུ་གཉིས་ཐོག་སྡེ་གླིང་གཉིས་དང་ཞེ་རྫོགས་གཉིས་སོགས་ཀྱི་ཆེ་མཁས་རྣམས་གདན་གཅིག་ཏུ་འཛོམས་པའི་ལྷ་གྲལ་ནས་ཁྲོམ་སྐྱ་སེར་ཁྲི་ལྷག་གི་དབུས་སུ་མདོ་སྔགས་ཆོས་ཀྱི་བབས་ཚུལ་སོགས་འབེལ་གཏམ་མཁས་པ་དགྱེས་པའི་ལེགས་བཤད་ཁྱད་ཐོན་དགའ་སྟོན་དུ་ཕུལ་བ་དུས་དེ་ཡི་ཚེ་ལྷ་རྫས་ཀྱི་ལེགས་སྐྱེས་དང་གཟེངས་བསྟོད་ཀྱི་དབུགས་དབྱུང་ཐོབ་སྟེ་མཁས་པའི་སྙན་གྲགས་ཀྱི་བེརྒ་སྐུ་ཆུང་ངུའི་དུས་ནས་བྲིས། བདེ་གཤེགས་མྱ་ངན་མེད་པའི་རྣམ་རོལ་རབ་འབྱམས་གསུམ་པ་ ༧ རིག་འཛིན་དཔལ་འབྱོར་རྒྱ་མཚོ་མཆོག་གིས་རྒྱལ་སྲས་ལམ་བཟང་གི་སྟེང་ནས་སྨོན་འཇུག་གི་སྡོམ་པ་དང་། སྨིན་གླིང་གཏེར་ཆེན་བཀའ་འབུམ། འདུས་པ་མདོ་དབང་ཆེན་མོ་རྩ་བ་ཡན་ལག་དང་བཅས་པ། བཀའ་བརྒྱད་རྣམ་གསུམ། བདེ་གཤེགས་ཀུན་འདུས། ཞི་ཁྲོ་སོགས་ཀྱི་དབང་ལུང་གདམས་ཁྲིད་ཀྱི་ཕ་ཕོག་བསྩལ་ཅིང་ཐུགས་དགྱེས་ཚོར་ཆེན་པོས་རྗེས་སུ་བཟུང་། རིགས་བདག་མཚུངས་མེད་ ༧ རྒྱལ་ཚབ་བསྟན་འཛིན་ཆོས་རྒྱལ་མཆོག་གིས་ཀུན་མཁྱེན་མཛོད་བདུན་
དང་། སྙིང་ཐིག་ཡ་བཞི་དབང་ལུང་། འདོད་འཇོའི་བུམ་བཟང་། དཀོན་མཆོག་སྤྱི་འདུས་ཀྱི་དབང་ལུང་ཁྲིད་སྦྲགས་མ་སོགས་ཆོས་ཀྱི་བདུད་རྩི་རྒྱ་ཆེར་བཀའ་དྲིན་བསྐྱངས། དེ་ནས་སྐྱབས་མགོན་རྣམ་གཉིས་ཀྱི་ལུང་གིས་བསྐུལ་ཏེ་ལྕགས་སྤྲེལ་དགུང་ལོ་བཅུ་བཞི་དུས་སྔ་འགྱུར་བསྟན་པའི་ཆུ་མགོ་ཀཿཐོག་རྡོ་རྗེ་གདན་དུ་བྱོན་ནས་གནས་ལྔ་རིག་པའི་པཎྜི་ཏ་ཆེན་པོ་ ༧ འགྱུར་མེད་ཚེ་དབང་མཆོག་གྲུབ་ཀྱི་ཞབས་པད་ལོ་ལྔར་བསྟེན་ཏེ། སྒྲ་ཀ་ཙན་དབྱངས་གསུམ་སྙན་ངག་སོགས་དང་། ཐུན་མིན་ཀློང་གསལ་སྐོར་པོད་བཅུ་གཉིས། བླ་མ་དགོངས་འདུས་ཀྱི་དབང་ལུང་ཆ་ཚང་། སྒྱུ་འཕྲུལ་ཞི་ཁྲོའི་དབང་། རབ་འབྱམས་པ་ཨོ་རྒྱན་ཆོས་གྲགས་ཀྱི་ཡིག་ཆའི་སྟེང་ནས་རྒྱུད་ཀྱི་སྤྱི་དོན། གསང་བདག་དགོངས་རྒྱན་སྨིན་ཁྲིད་ཟབ་རྒྱས། ཁྱད་པར་ཀློང་གསལ་རྡོ་རྗེ་སྙིང་པོའི་ཁྲིད་སྔོན་འགྲོ་དང་། བསྐྱེད་རྫོགས་ཀྱི་ཉམས་ཁྲིད། གསར་རྩོམ་ལམ་རིམ་འགྲེལ་ཆེན། ཁྲེགས་ཆོད་དང་ཐོད་རྒལ་གྱི་ཁྲིད་སོགས་ཆོས་ཚུལ་རྒྱ་མཚོའི་གན་མཛོད་བདག་གིར་བཞེས་ནས་བཀའ་དྲིན་འཁོར་མེད་ཀྱི་རྩ་བའི་བླ་མར་གྱུར་ཏེ་སློབ་ཚོགས་རྒྱུ་སྐར་གྱི་ཕྲེང་བ་ལྟ་བུ་ཡོད་པའི་ནང་ནས་མཚན་མོའི་མགོན་པོ་ལྟར་ཁྱད་དུ་འཕགས་པའི་གོ་སར་དབུགས་དབྱུང་ཞིང་འགྲན་ཟླ་དང་བྲལ་བའི་ངེས་པ་དོན་གྱི་ཐུགས་སྲས་མཆོག་ཏུ་གྱུར། རྗེ་ཉིད་ཀྱི་ཞལ་ནས། འཇམ་མགོན་མི་ཡི་གཟུགས་ཅན་དགེ་རྩེ་རིན་པོ་ཆེས་མན་ངག་ལམ་རིམ་འགྲེལ་ཆེན་པོད་གཉིས་གསར་རྩོམ་གྱི་ཞབས་ཕྱི་ལུང་ཁུངས་ཀྱི་དཔེ་ཆ་རྣམས་འཚོལ་རྒྱུ་དང་ཚིག་དོན་ལྗགས་བཀོད་རིགས་སྒྲ་དོན་འདྲེས་འཛིན་གྱི་སྤོབས་པས་ནོར་འཁྲུལ་ལྷག་ཆད་བྲལ་བ་ཉིན་མོར་སྐུ་མདུན་ནས་བྱང་ནག་ཏུ་ཕབ་རིགས། དེའི་མཚན་མོ་གཉིད་སྤངས་ཏེ་སྣང་གསལ་གྱི་འོད་ལ་ཤོག་ཐོག་ཏུ་འབེབས་པའི་ངལ་བ་དང་དུ་བླངས་ནས་རང་ལའང་གསང་སྔགས་ཐུན་མོང་མ་ཡིན་པའི་ཆོས་མཐའ་དག་གི་སྒྲོ་འདོགས་ཞར་ལ་ཆོད་པ་དང་།
རྩ་བའི་བླ་མའི་ཞབས་ཕྱི་ཐུགས་ཀྱི་བཞེད་པ་ལྟར་འགྲུབ་པ་དང་། ཆོས་ལ་དཀའ་བ་སྤྱད་པས་ལས་ཀྱི་སྒྲིབ་པ་བྱང་ཞིང་ཚོགས་རྫོགས་པ། རྙིང་བསྟན་མཛེས་པའི་རྒྱན་དུ་ཆེ་བ་སོགས་བྱ་བ་གཅིག་གིས་དགོས་པ་མང་པོ་ཆབས་ཅིག་ཏུ་འགྲུབ་པས་དགའ་སྤྲོ་ཆེན་པོ་བྱུང་བ་ཡིན། ཞེས་གསུངས་པ་དང། གཞན་ཡང་ཀུན་གཟིགས་ཀཿཐོག་སི་ཏུ་དང་པོ་སོགས་བཤེས་གཉེན་རྣམ་ལྔའི་ཞབས་ལ་བཏུད་ནས་བཀའ་བརྒྱད་བདེ་འདུས་པོད་བཅུ་གཉིས་དབང་ལུང་ཆ་ཚང་སོགས་དབང་ཁྲིད་གདམས་པ་མང་དུ་བཞེས། དགུང་ལོ་བཅུ་དགུ་ཤིང་གླང་ཟླ་བ་བཞི་པའི་ཚེས་བཅུར་རང་དགོན་དུ་ཕྱག་ཕེབས་ནས། ཟབ་རྒྱས་ཀྱི་ཆོས་ཚུལ་རྒྱ་མཚོ་ལྟ་བུ་ཐུགས་སུ་ཆུད་པའི་དགའ་སྟོན་དུ་ཐོག་རོལ་གྱིས་བསུ་བ་སོགས་མཛད་དེ་སྐྱབས་མགོན་རྣམ་གཉིས་ཐུགས་དགྱེས་པའི་རྩེར་སོན། དེ་ནས་རང་དགོན་གྱི་གྲྭ་སའི་ཕྱག་སྲོལ་བཞིན་རྒྱུགས་དང་པོ་དང་གཉིས་པ་གསུམ་པ་རྣམས་དང་། ལོ་མཇུག་དུས་རིམ་ཆེན་མོའི་འཆམ་སྣ་ཡོངས་དང་། སྤྲོས་བཅས་ཚེས་བཅུ་ཆེན་མོའི་འཆམ་སྣ་ཡོངས་དང་། གཞན་ཡང་འབུད་དབྱངས་རྡུང་གསུམ་སོགས་རང་ལུགས་མཐོང་བ་བརྒྱུད་པའི་ཕྱག་བཞེས་ཀྱི་སྒྲིག་ལམ་ཇི་སྙེད་ཡོད་པ་རྣམས་དཔྱིས་ཕྱིན་པ་བྱང་ཆུབ་པར་མཛད་ནས་བླ་དབུ་ཆོས་གསུམ་ལ་རྒྱུགས་ཕུལ་ནས་ཕྱིན་ཆད་དེ་རྣམས་གཞན་ལ་སྤེལ་བ་ལ་ཞུམ་མེད་ཀྱི་སྤོབས་པ་བརྙེས། བར་ཁྲོད་དབེན་རི་བདེ་ཆེན་པདྨ་འོད་ཀྱི་ཕོ་བྲང་དུ་གསང་ཆེན་རྒྱུད་སྡེའི་མངའ་བདག་བཀའ་དྲིན་མཚུངས་མེད་སྐྱབས་རྗེ་རབ་འབྱམས་གསུམ་པ་ལས། ཀློང་ཆེན་སྙིང་ཐིག་རྩ་བ་ཡན་ལག་དང་བཅས་པའི་སྨིན་བྱེད་དབང་། གྲོལ་བྱེད་ཁྲིད། རྒྱབ་རྟེན་ལུང་སྟེ། གསུང་འབུམ་ཡོངས་རྫོགས་ལྗགས་ལུང་མཐའ་རྒྱས་སུ་མནོས་ནས་དོན་བརྒྱུད་འཛིན་པའི་ཐུགས་སྲས་ཐུ་བོར་གྱུར།
མེ་སྟག་དགུང་གྲངས་ཉི་ཤུ་པར་ཆོས་འཁོར་དུས་ཆེན་ཆུ་སྟོད་ཟླ་བའི་ནང་རྡོ་རྗེ་འཆང་རྒྱལ་ཚབ་རིན་པོ་ཆེས་བཀའ་འགྱུར་ལྗགས་ལུང་གནང་བ་མཐའ་ལེགས་པར་རྫོགས་ཏེ། གནམ་སྟོང་ཉིན་ཉི་མ་བཞི་ཆ་ཤར་བ། གྲིབ་ཚོད་སྐྱེས་བུ་གསུམ་གྱི་དུས་སུ། བླ་ཆེན་དགོངས་པ་རབ་གསལ་བསམ་བཞིན་མིའི་སྲིད་པ་བཟུང་བ་མཁན་ཆེན་སྡེ་སྣོད་འཛིན་པ་རྗེ་དེ་ཉིད་ལས་བསྙེན་པར་རྫོགས་ཏེ་དགེ་སློང་གི་དངོས་པོ་བཞེས། མཚན་སྔ་མ་འགྱུར་མེད་མཐུ་སྟོབས་རྣམ་རྒྱལ་ལ་དཔལ་བཟང་པོ་ཞེས་བསྩལ། གཞན་ཡང་བཀའ་བརྒྱད་རྣམ་གཉིས་ཀྱི་དབང་ཆེན། ཟབ་ལམ་བདེ་གཤེགས་ཀུན་འདུས་ཀྱི་སྨིན་ཁྲིད་དང། བཀའ་བརྒྱད་བདེ་གཤེགས་འདུས་པའི་དབང་ལུང་། སྒྱུ་འཕྲུལ་ཞི་ཁྲོའི་དབང་རྒྱས་པ་སོགས་སྔ་ཕྱི་ཀུན་ཏུ་དབང་ཁྲིད་གདམས་པའི་ཆོས་ཚུལ་རྒྱ་མཚོ་ལྟ་བུ་བསྩལ་ཏེ་ཐུགས་གཏད་ཤིན་ཏུ་ཆེ་བས་སྤྱིར་རྒྱལ་བའི་བསྟན་པ་རིན་པོ་ཆེ་འཛིན་སྐྱོང་སྤེལ་བའི་ཕྲིན་ལས་མྱུར་ཞིང་། ལྷག་ཏུ་སྔ་འགྱུར་རྒྱལ་བ་ཞེ་ཆེན་པའི་རིང་ལུགས་འཛིན་སྤེལ་ལ་རྨད་དུ་བྱུང་བའི་ཕྲིན་ལས་ཅན་ཞིག་ཏུ་གྱུར། ཤིང་ཁྱི་དགུང་ལོ་ཉེར་བརྒྱད་ལ་དབུས་འགྱུར་འཆང་དང་བྱིན་རླབས་དོ་མཉམ་པའི་ཆོས་ཚིགས་ཀྱི་ཡུལ་དབུས་ལྷ་ལྡན་དག་པའི་ཞིང་དུ་ཆིབས་བསྐྱོད་གནང་སྟེ་ཆོས་འཁོར་རྣམ་གསུམ་གཙོ་བོར་གྱུར་པའི་རྟེན་མཆོག་དགོན་གནས་སོགས་ལ་གསེར་གསོལ་མཆོད་འབུལ་ཕྱག་སྐོར་སོགས་རྣམ་དཀར་དགེ་ཚོགས་ཀྱི་སྤྲོས་པ་རྒྱ་ཆེར་སྤེལ། གཞུང་ས་ནས་ཀྱང་རྒྱལ་བ་ཞེ་ཆེན་པ་ལ་སྔར་ཐོབ་གང་ཡོད་ཀྱིས་བཀུར་བཟོས་བླ་མེད་བསྐྱངས། རྒྱལ་བསྟན་མདོ་སྔགས་རིག་གནས་དང་བཅས་པའི་འབྱུང་གནས་གདན་ས་ཆེན་མོ་འོག་མིན་ཨོ་རྒྱན་སྨིན་གྲོལ་གླིང་དུ་ཟླ་བ་གསུམ་ལྷག་བཞུགས་ནས་གཏེར་ཆེན་རྣམ་འཕྲུལ་ཁྲི་ཆེན་ ༧ འགྱུར་མེད་པདྨ་དབང་རྒྱལ་ལས་སྔ་འགྱུར་བཀའ་མ་དང་། ཞི་བྱེད་སྐོར་སོགས་དབང་ཁྲིད་གདམས་པ་མང་དུ་
མནོས། གཞན་ཡང་རྒྱལ་མཆོག་ལུང་རྟོགས་རྒྱ་མཚོ། བོད་རྒྱལ་པོ་དེ་མོ་ཐུབ་བསྟན་རྣམ་རྒྱལ། ས་སྐྱ་ཁྲི་ཆེན་པདྨ་བདུད་འདུལ་དབང་ཕྱུག །མཁར་རྡོ་གྲུབ་ཆེན་ཆོས་ཀྱི་རྡོ་རྗེ། ཡར་ཀླུང་བཀྲ་ཤིས་ཆོས་སྡེའི་དབོན་རིན་པོ་ཆེ་སོགས་ལས་གསར་རྙིང་གི་དབང་ལུང་མང་དུ་གསན་བཞེས་མཛད། ཤིང་ཕག་ཟླ་བ་བདུན་པར་རང་དགོན་དུ་ཉེ་ཞོ་མེད་པ་དགའ་སྤྲོས་བསུ་མ་རིང་ཐུང་བཅས་གདན་སར་ཕྱིར་བྱོན། ཆུ་ལུག་ལོར་བྱ་བཏང་བའི་ཚུལ་གྱིས་སྨད་རྒྱ་ནག་གླང་ཆེན་དང་རོང་བཙན་ཁ་བ་དཀར་པོ་ནས་བཟུང་ཙཱ་རི་དང་དབུས་རི་བར་སྐོར་རྒྱས་པ་མཛད་ནས་བོད་ཡུལ་དབུས་ཀྱི་ནོར་འཛིན་ཆོས་འཁོར་ལྷ་ལྡན་དུ་ཕེབས། དགུང་གྲངས་སོ་བརྒྱད་ཤིང་སྤྲེལ་ཟླ་བ་དང་པོའི་ཚེས་བཅུ་དགུ་ཐོག །དེ་ཡང་གུ་རུ་པདྨའི་རྒྱལ་ཚབ་བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་ཆོས་འབྱུང་ལྷ་དབང་གཡུལ་ལས་རྒྱལ་བའི་རྔ་བོ་ཆེའི་སྒྲ་དབྱངས་ལས། ཡང་སྒོས་ཁྲི་སྲོང་མཆོད་ཡོན་ཕྱག་རྗེས་སྔ་འགྱུར་རྙིང་མ་བཀའ་མ་མདོ་སྒྱུ་སེམས་གསུམ་གྱི་གཙོས་རིང་ལུགས་རྨད་དུ་བྱུང་བ་རྣམས་ཀྱི་བཤད་སྒྲུབ་སྣུམ་ཟད་ཀྱི་མར་མེ་ལྟ་བུར་མནལ་དུ་ཉེ་བ་ན། ཐུགས་སྟོབས་ཞུམ་པ་མེད་པའི་འབད་རྩོལ་ཆེན་པོས་བཙལ་ཏེ་བཤད་སྒྲུབ་ལས་གསུམ་གྱི་སྒོ་ནས་བསྟན་པ་ཉམས་པ་རྨང་ནས་གསོས་ཤིང་། དོན་གྱི་སྙིང་པོ་རྗེ་བཙུན་ཆེན་པོ་འདི་ཉིད་མཆེད་ཞལ་གདུང་བརྒྱུད་དང་བཅས་པའི་བཀའ་དྲིན་ལ་བརྟེན་གསང་སྔགས་རྙིང་མ་མཚན་དོན་མཐུན་པ་འཁྲུལ་མེད་ཚད་ཐུབ་ཀྱི་རྒྱུན་ད་ལྟའི་བར་མ་ཉམས་པར་གོང་འཕེལ་དུ་རྒྱས་པ་འདི་བྱུང་བས་ན། ངོ་མཚར་བའི་ཕྱག་རྗེས་དང་བཀའ་དྲིན་ལ་སུས་ཀྱང་འགྲན་བྱར་མ་གྱུར་པས། སླད་ཀྱི་རྙིང་མ་བའི་ཆོས་གྲལ་དུ་སྐྱེས་པ་རྣམས་ནས་ཀྱང་ཟབ་ཆོས་སུ་བཏགས་པའི་ཆོག་ཕྲིན་ཉི་ཚེ་བ་ཙམ་ལ་བློ་མི་གཏོད་པར་བསྟན་པའི་སྒྲོམ་ཆེན་པོ་ཕྱོགས་འདིའི་རིང་ལུགས་
རྒྱ་ཆེར་འཛིན་ཅིང་སྤེལ་བ་ལ་བརྩོན་པ་ཆེ་ཐང་དུ་བསྐྱེད་པར་རིགས་པ་ཡིན་ནོ། །ཞེས་གསུངས་པ་ལྟར་བསྟན་པ་ཡོངས་རྫོགས་ཀྱི་མངའ་བདག་འོག་མིན་ཨོ་རྒྱན་སྨིན་གྲོལ་གླིང་རིག་འཛིན་འདུས་པའི་དགའ་ཚལ་དེར་ལོ་གསུམ་བཞུགས་ཏེ། ཐོག་མར་གྲྭ་ས་དེའི་ལུགས་སྲོལ་ལྟར་རྗེ་ཉིད་ཀྱི་གཙུག་ཕུད་དགེ་བའི་བཤེས་གཉེན་མཁན་ཆེན་ཨོ་རྒྱན་ཆོས་འཕེལ་ལ་ཕུལ། མཚན་འགྱུར་མེད་བསྟན་འཛིན་འཕེལ་རྒྱས་ཞེས་བསྩལ། ལྕམ་རྗེ་བཙུན་མ་ཕྲིན་ལས་ཆོས་སྒྲོན་ལས་ལེགས་བཤད་དོ་ཤལ་བརྒྱ་ཡིས་བསྒྲུན་དུ་མེད་པའི་གསང་ཆེན་སྔ་འགྱུར་པའི་གཅེས་ནོར་རྙིང་མ་རྒྱུད་འབུམ་རིན་པོ་ཆེའི་ལུང་ཡོངས་རྫོགས་སོགས་དང་། མཁས་གྲུབ་གཉིས་ལྡན་མ་ཧཱ་པཎྜི་ཏ་ཆེན་པོ་དགེ་ཟུར་བསྟན་འཛིན་སྐྱེས་མཆོག །མྱོས་རིགས་རྡོ་རྗེ་འཛིན་པ་ཆོས་མཛད་ཀུན་ལྡན་རྣམས་ལས་རྩ་རྒྱུད་གསང་བ་སྙིང་པོ། འགྲེལ་ཆེན་གསང་བདག་དགོངས་རྒྱན། འདུལ་བ་གཞི་གསུམ་གྱི་ལག་ལེན་ཞལ་ཁྲིད་སོགས་དང། སྔ་འགྱུར་པ་ཡོངས་ཀྱི་ཕྱི་མོར་གྱུར་པ་འོག་མིན་ཨོ་རྒྱན་སྨིན་གྲོལ་གླིང་གི་རིག་འཛིན་མཐོང་བ་བརྒྱུད་པའི་ཕྱག་བཞེས་བྱིན་རླབས་ཀྱི་ཚན་ཁ་མ་ཉམས་པ་བུམ་པ་གང་བྱོས་ཚུལ་དུ་གསན་བཞེས་མཛད་ནས་ཐུན་མོང་ཐུན་མིན་གྱི་གནས་ལ་མཁྱེན་རབ་ཀྱི་པདྨོ་རབ་ཏུ་རྒྱས་ཏེ་ཕྱིས་སུ་གཏེར་ཆེན་ཡབ་སྲས་ཀྱི་རང་ལུགས་འཛིན་པ་ལ་རྒྱུ་སྐར་གྱི་དབང་པོ་ལྟར་ཁྱད་པར་དུ་འཕགས། རྗེ་ཉིད་ཀྱིས་དབྱངས་ཡིག་གི་མཇུག་རྩོམ་དུ། འོག་མིན་ཨོ་རྒྱན་སྨིན་གླིང་གི་བསྟན་པ་དང་ཕྱག་བཞེས་སྤེལ་བའི་བྱེད་པོ་བཀའ་དྲིན་ཟླ་མེད་སྔགས་རམས་པ་འགྱུར་མེད་བློ་ལྡན་ལགས་ཀྱི་ཁྲིད་རྒྱུན་རྣམས། ཚངས་པའི་དབྱངས་ལྡན་ལམ་འདིར་སྨོན་ལམ་གྲུབ་ཅིང་ངེས་པ་རྙེད་པར་དབུ་མཛད་འགྱུར་མེད་ལྷུན་གྲུབ་ནས་སྦྱོང་བརྩོན་ནན་ཏན་དང་། སྨིན་གླིང་བྱང་འདྲེན་རིགས་ལམ་བསྐྱེད་རྫོགས་སོགས་ལ་ནང་བྱན་ཆུབ་པ་སྔགས་རམས་པ་པེ་སྒང་བློ་འཕེལ་ནས་ཞུས་དག་བགྱིས།
སླར་ཡང་གྲྭ་སར་ལོ་གསུམ་སྡོད་སྐབས་དགེ་སློང་བགྲེས་པ་རྡོར་འཛིན་ཆོས་མཛད་ཀུན་ལྡན་དང་། དགེ་སློང་སྔགས་རབ་དཔལ་མགོན། རབ་འབྱམས་པ་ཚེ་དབང་། བྱང་འདྲེན་པ་བཀྲ་ཤིས་སོགས་ལས་ཞུས་དག་ཞིབ་ཆ་མང་ཞིག་དང་། ཚོགས་ཆེན་གདུང་དབྱངས་ལ་ཡང་རྣ་ཉན་ཞུས་ཤིང་། ཁྱད་པར་ཡོངས་ཀྱི་འདྲེན་པ་ཆེན་པོ་མཁས་གྲུབ་གཉིས་ལྡན་པཎྜི་ཏ་ཆེན་པོ་དགེ་ཟུར་བསྟན་འཛིན་སྐྱེས་མཆོག་རིན་པོ་ཆེའི་སྐུ་མདུན་དུ་བློ་རྒྱུགས་ཕུལ་བ་བཞིན་བཅོས་བསྒྱུར་བཅས་དགེ་སྔགས་འགྱུར་མེད་བསྟན་འཛིན་འཕེལ་རྒྱས་ནས་སླར་ཡང་དག་པར་བྱས། ཞེས་གསུངས་པ་ལྟར་བསྲེགས་བཅད་བརྡར་བའི་གསེར་ཞུན་མ་ལྟར་ལེགས་པར་གཏན་ལ་ཕབ་སྟེ་སླན་ཆད་དྭངས་གཙང་དྲི་མེད་ཀྱི་གནས་ལ་རང་བཟོའི་བསྲེ་བསླད་ཀྱི་སྐབས་མེད་པར་མ་ཟད་བློ་ནེམ་ནུར་ཙམ་ཡང་མི་དགོས་པས་སྒྲུབ་པ་པོ་རྣམས་ལ་ལེགས་སྐྱེས་རྨད་དུ་བྱུང་བའོ། །གསང་ཆེན་སྔ་འགྱུར་པའི་གདན་ས་ཆེན་པོ་ཐུབ་བསྟན་རྡོ་རྗེ་བྲག་ཏུ་རིག་འཛིན་ཆེན་པོ་དང་། མཚོ་རྒྱལ་རྣམ་འཕྲུལ་གངས་ར་རྗེ་བཙུན་མ། ཡོངས་འཛིན་ཆུ་བཟང་རིན་པོ་ཆེ་ནམ་མཁའ་ཀློང་ཡངས་སོགས་ལ་ཉང་གཏེར་བཀའ་བརྒྱད་བདེ་འདུས་ཀྱི་དབང་ལུང་ཡོངས་རྫོགས། གུ་རུ་ཆོས་དབང་གཏེར་བྱོན་བཀའ་བརྒྱད་གསང་རྫོགས་དབང་ལུང་ཆ་ཚང་སྟེ་གཏེར་ཁ་གོང་འོག་གཉིས་དང་། ཀཿཐོག་དགེ་པཎ་ལམ་རིམ་འགྲེལ་ཆེན་པོད་གཉིས་སོགས་ཕུལ་ཏེ་དྲིན་ཆེན་བླ་མ་རྣམ་གསུམ་ལས་བརྒྱུད་པ་དབུས་སུ་སྤེལ་ནས། གདན་ས་ཆེན་པོ་རྡོར་སྨིན་གཉིས་གཙོས་དབུས་གཙང་གི་བཤེས་གཉེན་མང་དུ་བསྟེན་ནས་དེད་དཔོན་མཁས་པ་ནོར་བུའི་གླིང་དུ་ཕྱིན་པ་ལྟར་དམ་པ་ཆོས་ཀྱི་འདོད་དོན་ཡོངས་སུ་རྫོགས་ཏེ་སླར་རང་ཡུལ་དུ་ཕེབས་ནས་ཤིང་བྱ་ཟླ་དྲུག་པའི་ཚེས་བཅུ་ལ་དཔལ་ཞེ་ཆེན་བསྟན་གཉིས་དར་རྒྱས་གླིང་དུ་གཞིས་བྱེས་ལྷན་འཛོམས་ཐོག་དགའ་སྤྲོའི་སྟོན་མོ་བླ་གྲྭ་འཁོར་བཅས་ཀྱིས་གཟབ་རྒྱས་དང་། ཆོས་སྲུང་ལ་
གཏང་རག་གི་བསྐང་གསོ་གྲངས་ལྡན་བཅས་བཀྲ་ཤིས་ལེགས་ལམ་གྱི་དཔལ་ལ་རོལ་བའོ། །དེ་ལྟར་རྗེ་འདིས་སྔ་ཕྱི་ཀུན་ཏུ་མཚུངས་མེད་ཡོངས་འཛིན་རྣམ་པ་གསུམ་གཙོ་བོར་གྱུར་པའི་སྤྲུལ་པའི་གཏེར་སྟོན་ཆེན་པོ་བསམ་གཏན་གླིང་པ་ལས་རང་གཏེར་སོགས་གསན་ནས་ཆོས་བདག་ཏུ་ཟིན། གླང་ནག་གཏེར་སྟོན་གྱིས་རང་གཏེར་ཕུར་པའི་ཆོས་སྐོར་བསྩལ་ནས་ཆོས་ཀྱི་བདག་པོར་དབུགས་དབྱུང་། མཁར་རྡོ་གྲུབ་ཆེན་གྱིས་རང་གཏེར་གྱི་ཆོས་བདག་ཏུ་ལུང་གིས་བཟུང་། རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ། རྡོ་གྲུབ་ཆེན་ཀུན་བཟང་གཞན་ཕན། ཟུར་མང་གཏེར་སྟོན་རོལ་པའི་རྡོ་རྗེ་སོགས་ཁམས་དབུས་གསར་རྙིང་གི་བཤེས་གཉེན་ལྔ་ཕྲག་བཅུ་ལྷག་བསྟེན་ནས་སྒྲ་རྩིས་སྙན་སྡེབ་ནས་བཟུང་། སྔ་འགྱུར་མདོ་སྒྱུ་སེམས་གསུམ་ལ་སོགས་པ་རྒྱུད་སྡེ་དང་སྒྲུབ་སྡེའི་དབང་བཀའ་བཤད་ལུང་མན་ངག །སྔགས་གསར་མའི་བཀའ་སྲོལ་ཡང་ཕལ་ཆེ་བ་དང་། བཀའ་བརྒྱད་རྣམ་གསུམ་སོགས་གལ་ཆེ་བ་རྣམས་ལན་གསུམ་རེ་བཅས་ཐུན་མོང་ཐུན་མིན་གྱི་མདོ་སྔགས་བསྟན་པ་རྒྱ་མཚོའི་འབྱུང་གནས་ཀྱི་མཛོད་ཆེན་པོ་ཞིག་ཏུ་གྱུར་ནས་ཐམས་ཅད་མཁྱེན་པའི་གནས་ལ་བདག་གིར་མཛད་པའི་སྙན་གྲགས་དབྱར་གྱི་རྔ་གསང་མདོངས་ལྡན་དགེས་པའི་དཔྱིད་དུ་གྱུར། །རྣམ་ཐར་མགུལ་རྒྱན་ལས། མདོར་ན་བཟོ་རིག་ལག་ཁྲ་ཕྲན་བུ་མ་གཏོགས་ཕྱི་ནང་གི་ཤེས་བྱ་མཐའ་དག་གྲུབ་པའི་བུམ་པ་བཟང་པོར་ལག་པ་བཅུག་པ་བཞིན་གཞི་གཅིག་ལས་སྣ་ཚོགས་པའི་འདོད་པ་ཅི་དགར་འབྱུང་བ་མཐོང་ཆོས་ཚད་མས་གྲུབ། ཅེས་གསུངས་པ་ལྟར་དང་། རྒྱལ་མཆོག་བཅུ་བཞི་པ་ཐེག་པ་མཆོག་གི་རྡོ་རྗེས་ཀྱང། ཁྱེད་རང་ཁམས་དབུས་གཉིས་ན་མཁས་པ་འགྲན་ཟླ་དང་བྲལ་བ་རེད་འདུག་གསུངས་ནས། གཞུང་ཡིག་ཤེ་བམ་གནངས་ཏེ་ཞེ་ཆེན་མ་ཧཱ་པཎྜི་ཏ་ཞེས་མཚན་གྱི་ཅོད་པན་དཔྱངས་པའི་སྒྲ་ཆེན་པོས་ཁྱབ་པར་གྱུར་ཏོ། །
༼གསུམ་པ།༽ ངོ་མཚར་གསུང་གི་ཕྲིན་ལས་ཀྱིས་རྨད་བྱུང་གི་སློབ་ཚོགས་བསྐྱངས་ཏེ་བཀའ་གཏེར་ཉི་ཟླའི་རྒྱལ་མཚན་བསྒྲེངས་པའི་མཛད་པ།
༼གསུམ་པ།༽ ངོ་མཚར་གསུང་གི་ཕྲིན་ལས་ཀྱིས་རྨད་བྱུང་གི་སློབ་ཚོགས་བསྐྱངས་ཏེ་བཀའ་གཏེར་ཉི་ཟླའི་རྒྱལ་མཚན་བསྒྲེངས་པའི་མཛད་པ། ༧ བཀའ་བབས་བདུན་ལྡན་པདྨ་འོད་གསལ་མདོ་སྔགས་གླིང་པའི་རྣམ་ཐར་ངོ་མཚར་ཨུ་དུམྦ་རའི་དགའ་ཚལ་ལས། ཆོས་རྒྱལ་སྡེ་དགེ་མཆོད་ཡོན་གྱི་བཀས་བསྐུལ་ཏེ་ཞེ་ཆེན་རི་ཁྲོད་པདྨ་འོད་གླིང་དུ་ཕེབས། བཅུ་ཕྲག་རིག་པའི་གནས་མཐར་སོན་པའི་མ་ཧཱ་པཎྜི་ཏ་སྣང་བའི་བདེན་འཛིན་གྱི་འཁྲུལ་པ་གཏད་མེད་དུ་ཞིག་པའི་གྲུབ་བརྙེས་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོའི་ཞབས་པད་བསྙེན་ཏེ། ཞེས་གསུངས་པ་ལྟར། རྗེ་བླ་མ་དགུང་གྲངས་ང་གཅིག་ནས་འཇམ་མགོན་མཁྱེན་བརྩེའི་དབང་པོ་མཆོག་ཞེ་ཆེན་རི་ཁྲོད་པདྨ་འོད་གླིང་དུ་ལན་འགའ་ཕེབས་པ་ལ་དགེ་རྩེ་པཎ་ཆེན་གྱི་འགྲེལ་པའི་སྟེང་ནས་དབྱངས་ཅན་སྒྲ་མདོའི་ས་རིས་ཆིག་རྒྱུགས་འཕེར་བ་ཟླ་བ་གཅིག་དང་ཞག་བཞིས་འདྲིལ་བ་མཛད། དེ་རྗེས་ས་བཟང་སྒྲ་ཊཱིཀ་སོགས་ཀྱི་སྟེང་ནས་ཀ་ལཱ་པའི་གཞུང་། སི་སོགས། ཏི་སོགས། བྱིངས་མདོ་རྩ་འགྲེལ་གྱི་རི་མོ་ཚང་མ། སི་ཏུ་རིན་པོ་ཆེའི་འགྲེལ་ཆེན་སྟེང་ནས་ཙནྡྲ་པའི་གཞུང་དང་། སིཔ྄་མཐའ། ཏིད྄་མཐའ། ཨུཎ་སོགས་ཀྱི་རི་མོ་ཚང་མ། སི་ཏུ་རིན་པོ་ཆེའི་ཞལ་ལུང་ཁམས་པའི་འགྲེལ་ཆེན་སྟེང་ནས་སྙན་ངག་མེ་ལོང་མའི་ལེའུ་གསུམ་གའི་གོ་དོན་རྩོམ་རྒྱུགས་རྒྱས་སྤྲོས་ཞག་ཉི་ཤུས་འདྲིལ་བ། མངོན་བརྗོད་འཆི་མེད་མཛོད་རྩ་འགྲེལ། སྡེབ་སྦྱོར་ལོ་ཆེན་འགྲེལ་པ་སོགས་བྱང་བར་མཛད། མདོ་བསྐལ་བཟང་། མངའ་རིས་པཎ་ཆེན་སྡོམ་གསུམ། འགྲེལ་ཆེན་དཔག་བསམ་སྙེ་མ། དུག་དབང་རྡོ་རྗེ་ཕ་ལམ། ཉང་གཏེར་ཁྲོས་ནག་གི་དབང་ལུང་ཁྲིད་གསུམ། ཟབ་ལམ་བདེ་གཤེགས་ཀུན་འདུས་ཀྱི་དབང་ལུང་ཁྲིད་གསུམ་རྒྱས་པ། ཚེ་སྒྲུབ་འཆི་མེད་ཡང་སྙིང་། གཙུག་ཏོར་དྲི་མེད་དབང་ལུང་། གྲུབ་ཆེན་བརྒྱད་ཅུའི་རྗེས་གནང་། ལྔ་པ་རིན་པོ་ཆེའི་དག་སྣང་རྒྱ་ཅན་ཉེར་
ལྔའི་དབང་ལུང་ཡོངས་རྫོགས། མངའ་བདག་ཉང་གི་བཀའ་བརྒྱད་དབང་ཆེན། ཐུགས་ཆེན་རྒྱལ་པོ་ལུགས་ཀྱི་ཁྲིད་ལུང་། བྱད་གྲོལ་གསེར་ལྡེའུ་ལུང་མན་ངག་དང་བཅས་པ། སྔགས་སྡེབ་ཀྱི་ཕྱག་ཁྲིད། གཤིན་རྗེ་དྲེགས་པ་འཇོམས་བྱེད་དབང་ལུང་། གཟའ་དང་དུར་ཁྲོད་མ་མོའི་བེའུ་བུམ། རྗེ་བླ་མ་མཐུ་སྟོབས་རྣམ་རྒྱལ་གྱི་གསུང་འབུམ། བཀའ་བརྒྱད་རྣམས་ཀྱི་དབང་ཆེན། སྒྱུ་འཕྲུལ་ཞི་ཁྲོའི་དབང་སྔོན་དུ་འགྲོ་བས་རྒྱུད་རྒྱལ་གསང་བ་སྙིང་པོའི་རྒྱུད་ཀྱི་བཤད་པ། དེ་བཞིན་འགྲེལ་ཆེན་གསང་བདག་ཞལ་ལུང་དང་། གསང་བདག་དགོངས་རྒྱན། རབ་འབྱམས་པ་ཨོ་རྒྱན་ཆོས་གྲགས་ཀྱི་འགྲེལ་པ་རིན་ཆེན་ཕྲེང་བ། དགེ་རྩེ་པཎྜི་ཏའི་པདྨའི་ལམ་རིམ་འགྲེལ་ཆེན་པོད་གཉིས། རྒྱུད་འགྲེལ་ཕྱོགས་བཅུའི་མུན་སེལ། སྒེག་པ་རྡོ་རྗེའི་སྤར་ཁབ། རོང་ཟོམ་དཀོན་མཆོག་འགྲེལ། སྒྲོལ་ཊཱིཀ །གཡུང་ཊཱིཀ །སྨན་ཊཱིཀ་སོགས་བཤད་པའི་ལེ་ལག་ཏུ་གཏོགས་པའི་ཡིག་ཆ་ཚང་མ་དང་། བཀའ་མའི་སྒྲུབ་དཀྱིལ་གྱི་ལུང་རྣམས་ཀྱང་ཕུལ་ནས་མདོ་མགོན་ལེགས་ལྡན་ལྗང་ནག་གཙང་ཤོད་པའི་ཡིག་ཆའི་སྟེང་ནས་དབང་ལུང་མཛད་དེ། དེ་དང་མཉམ་དུ་བུ་འདི་དང་ལུས་དང་གྲིབ་མ་ལྟར་མི་འབྲལ་བར་འགྲོགས་པ་དང་ཅི་བསྒོ་བའི་ཕྲིན་ལས་ཐོགས་མེད་དུ་སྒྲུབ་དགོས་པའི་བཅོལ་དམ་དྲག་པོ་མཛད་པ་བཅས་དབང་ལུང་མན་ངག་ཟབ་ཁྲིད་མཐའ་རྒྱས་དང་། བརྡ་སྤྲོད་ཀུན་བཤད་ཀྱི་མཚན་དང་འབྲེལ་ཕྱི་མཐའ་གཟིགས་པའི་ཆེད་བརྗོད་ཐེག་དགུའི་གྲངས་ཀྱིས་སྙེད་པའི་ཤོ་ལོ་ཀ་བཅས་བསྩལ་ནས་སྲས་ཀྱི་དྭངས་མར་རྗེས་སུ་བཟུང་སྟེ་འགྲན་ཟླ་དང་བྲལ་བའི་བརྒྱུད་འཛིན་མཆོག་ཏུ་གྱུར། རྗེ་བླ་མ་གཤེགས་རྗེས་སུའང་ཡེ་ཤེས་སྐུ་ཡིས་རྗེས་སུ་བཟུང་སྟེ་བྱིན་གྱིས་བརླབས་པ་ལ་བརྟེན་ནས་གཏེར་ཆོས་ཤོག་སེར་རིགས་གཏན་ལ་དབབ་རྒྱུ་མ་བྱུང་བ་དག་ཚང་མ་གཏན་ལ་ཕབ་སྟེ་ཀོང་སྤྲུལ་བློ་གྲོས་མཐའ་ཡས་སོགས་ལ་དབང་ཁྲིད་ཆིག་རྫོགས་སུ་བསྩལ་པའི་ལོ་རྒྱུས་འཇམ་དབྱངས་མཁྱེན་
བརྩེའི་དབང་པོའི་རྣམ་ཐར་ཆེན་པོར་རྒྱས་པར་གསལ་ཡང་འདིར་ཡིག་ཚོགས་ལ་འཛེམས་པར་བྱས། བཀའ་བབས་བདུན་ལྡན་པདྨ་འོད་གསལ་མདོ་སྔགས་གླིང་པ་ཉིད་ཀྱིས་རྒྱང་རིང་མོ་ནས་བསྐུལ་ངོར་རྗེ་བླ་མས་རང་ཉིད་ལ་རིངས་པར་ཞབས་བརྟན་གསོལ་འདེབས་རྩོམ་མཛད་ཚུལ་དང་། རྣམ་ཐར་མགུལ་རྒྱན་ལས། ཟླ་བ་བདུན་པའི་ནང་སྤྲུལ་སྐུ་མཁྱེན་བརྩེ་སླར་ཡང་བྱོན་པར་སྡོམ་གསུམ་རྣམ་ངེས་ཀྱི་བཤད་པ་དང་། སྒྱུ་འཕྲུལ་ཞི་ཁྲོའི་དབང་སྔོན་དུ་འགྲོ་བས། ཞེས་པ་ལ་སོགས་པ་ནས། སྨན་ཊཱིཀ་སོགས་ལུང་གང་བཞུགས་ཐམས་ཅད་གནང་། ཕྲན་ཡང་དེ་སྐབས་ཤིག་ལ་སྐུ་རྩར་གཅར་ནས་སྒྲ་དབྱངས་ཅན་མ་ཞིག་སྦྱང་རློམ་བྱས། སྤྲུལ་སྐུ་མཁྱེན་བརྩེར་མདོ་མགོན་ལེགས་ལྡན་ལྗང་ནག་གཙང་ཤོད་པའི་ཡིག་ཆའི་སྟེང་ནས་དབང་ལུང་མཛད། དེ་དང་མཉམ་དུ་བུ་འདི་དང་ལུས་དང་གྲིབ་མ་ལྟར་མི་འབྲལ་བར་འགྲོགས་པ་དང་། ཅི་བསྒོ་བའི་ཕྲིན་ལས་ཐོགས་མེད་དུ་སྒྲུབ་དགོས་པའི་བཅོལ་དམ་དྲག་པོ་མཛད། ཚུལ་དེས་སྲུང་མས་ཕྲིན་ལས་མངོན་དུ་སྒྲུབ་པའི་རྒྱུ་མཚན་དུ་གཟིགས་ནས། མཁྱེན་བརྩེ་རྡོ་རྗེ་འཆང་དང་། གཏེར་ཆེན་མཆོག་གྱུར་བདེ་ཆེན་གླིང་པས་རྟེན་འབྲེལ་གྱི་སྒོ་འཕར་ཕྱེ་སྟེ་དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་དུ་སྔ་འགྱུར་བཀའ་མའི་སྒྲུབ་ཕྲིན་ཡོད་དོ་ཅོག་གི་སྒྲུབ་མཆོད་གསར་འཛུགས་མཛད་ཚེ། དཔལ་ཡུལ་རྒྱ་སྤྲུལ་མདོ་སྔགས་བསྟན་འཛིན་ལ་བཀའ་མའི་དབང་ལུང་ཡོངས་རྫོགས་གནང་བའི་མཐའ་རྟེན་དུ་ལེགས་ལྡན་གྱི་དབང་མཛད་དེ་བརྒྱུད་པའི་མཚན་གཤར་དང་། ཁྱད་པར་དུ་རྡོ་རྗེ་འཆང་དངོས་འགྱུར་མེད་བསྟན་འཛིན་འཕེལ་རྒྱས་ཀྱིས་བཀའ་བསྒོས་པ་བཞིན་བུ་འདིའི་ལུས་དང་གྲིབ་མ་ལྟར་འགྲོགས་ནས་སྔ་འགྱུར་གྱི་བསྟན་པའི་རྒྱལ་མཚན་མཆོག་ཏུ་བསྒྲེང་བའི་ཕྲིན་ལས་མཛོད་ཅིག་ཅེས་བཅོལ། དེ་དུས་དབང་གྲལ་དུ་སྐུ་ཞབས་དགེ་མང་མཆོག་སྤྲུལ་སོགས་འདུས་པ་མང་ཞིག་ཡོད་པ་དང་། ཁོ་བོས་མཆོད་གཡོག་
བྱས་པས་མངོན་སུམ་ཚད་མས་མྱོང་བ་ཡིན། རྒྱུ་མཚན་དེའི་ཕྱིར་བསྟན་འཛིན་གྱི་སྐྱེས་བུ་དང་བསྟན་པ་སྲུང་བའི་ཆོས་སྐྱོང་ཟེར་བ་དེ་འདི་འདྲ་ཞིག་ལ་མཚན་ཆགས་པ་རེད་སྙམ་པ་བྱུང་། ཞེས་གསུངས་པ་སོགས་བླ་སློབ་དམ་ཚིག་རྡོ་རྗེའི་སྲད་བུ་བསྐལ་པར་མི་ལྷོད་ཅིང་སྔ་འགྱུར་བཀའ་གཏེར་བསྟན་པའི་ཆུ་བོ་རྣམས་ཕྱོགས་ཀུན་ཏུ་སྤེལ་ཚུལ་རྣམ་པར་ཐར་པ་ངོ་མཚར་བའི་ཡུལ་མང་དུ་བཞུགས། མེ་ཕག་དགུང་ལོ་ཞེ་གཅིག་ནས་ལོ་དྲུག་རིང་ཟླ་བྲལ་གྱི་བརྒྱུད་འཛིན་རྣམ་གཉིས་ལས་རྒྱལ་བའི་ལུང་ཟིན་འཇམ་མགོན་ཀོང་སྤྲུལ་རིན་པོ་ཆེ་ལ་རྩིས་ནག་གི་མ་བུ་དགྲ་གྲོགས་ཀྱི་ལག་རྩིས་སོགས་རིག་གནས་ཕྲ་མོ་ཁ་ཤས་སློབ་པ་དེ་མ་ཐག་ཚེགས་མེད་དུ་མཁྱེན་པས། སྒྲ་གཞུང་ཆེ་བ་ཙནྡྲ་པ་པོད་ཆེན་གསུམ་གྱི་རི་མོ། རྗེས་འབྲེལ་འཆི་མེད་མཛོད་པོད་གཉིས། གཞན་ཀ་ལཱ་པ། དབྱངས་ཅན་སྒྲ་མདོ། པ་ཎི་པ་བཅས་དང་། སྙན་ངག་མེ་ལོང་མ། ཁམས་པའི་འགྲེལ་ཆེན། སྡེབ་སྦྱོར་ལ་མཁོ་བའི་དགུ་མཐའ་བསླབ་པ་དང་། གྲུབ་མཐའི་རྣམ་གཞག །སྨིན་ལུགས་ཀྱི་དབྱངས། སྡོམ་གསུམ་རྣམ་ངེས་རྩ་འགྲེལ་བཤད་པ་སོགས་གཞུང་ཆེན་པོད་དུ་མ་ལ་འཆད་ཉན་དང་། གཞན་ཡང་བསྙེན་རྫོགས་ཀྱི་དངོས་པོར་བསྒྲུབས། མ་ཏིའི་འཇམ་དཀར་དང་དབྱངས་ཅན་མའི་དབང་། ཚེ་དབང་གསང་འདུས་དང་ཕུར་པ་སོགས་དང་། མཚན་བརྗོད་ལུང་། རྙིང་རྒྱུད་པོད་ཉེར་དྲུག་དཀར་ཆག་དང་བཅས་པ། རྫོགས་པ་ཆེན་པོ་སེམས་སྡེ་མ་བུ་བཅོ་བརྒྱད་ཀྱི་དབང་། ཆོས་དབང་གཏེར་བྱོན་ཕུར་པ་སྤུ་གྲིའི་དབང་ལུང་། ཀློང་ཆེན་མཛོད་བདུན། ངལ་གསོ་སྐོར་གསུམ། དོན་ཁྲིད་སྐོར་སོགས་གསུང་ཐོར་བུའི་སྐོར་ཡོངས་རྫོགས། ཇོ་ནང་རི་ཆོས་ངེས་དོན་རྒྱ་མཚོ། ཟབ་མོ་ནང་དོན་རྩ་འགྲེལ། རྩ་རྒྱུད་གསང་བ་སྙིང་པོ། འགྲེལ་བ་ཕྱོགས་བཅུའི་མུན་སེལ། གསང་བདག་ཞལ་ལུང་དང་། གསང་བདག་དགོངས་རྒྱན། དཀར་
ཆག །གསང་སྙིང་འགྲེལ་བ་གཡུང་ཊཱིཀ །རོང་ཊཱིཀ །སྒྲོལ་ཊཱིཀ །སྨན་ལུང་པའི་སྤྱི་དོན་ཊིཀྐ། སྨིན་གླིང་རབ་འབྱམས་པ་ཨོ་རྒྱན་ཆོས་གྲགས་ཀྱི་སྤྱི་དོན། རྣམ་ཤེས་ཡེ་ཤེས་འབྱེད་པ། སྙིང་པོ་བསྟན་པ། ཀུན་མཁྱེན་འཇིགས་གླིང་དགོངས་གཏེར་དང་བཀའ་འབུམ་ཚང་མ། ཀོང་པོ་བདེ་ཆེན་རྒྱ་མཚོའི་རྩ་གསུམ་ཟབ་མོ་ཀུན་འདུས་ཀྱི་དབང་ལུང་། མདོ་མགོན་གཙང་ཤོད་པའི་ཡིག་ཆ་ལྟར། ཙིའུ་དམར་དང་ཐང་ལྷའི་སྲོག་གཏད། གོ་འཇོ་གཏེར་སྟོན་འོད་ཆོག་དབང་ལུང་། པདྨ་བཀའ་ཐང། ཐང་ཡིག་སྡེ་ལྔ། མ་ཎི་བཀའ་འབུམ། རྗེ་རབ་འབྱམས་གཉིས་པའི་བཀའ་འབུམ། སྨིན་གླིང་གཏེར་ཆོས་དབང་ལུང་ཡོངས་རྫོགས། གཏེར་ཆེན་བཀའ་འབུམ། བཀའ་བརྒྱད་རྣམ་གསུམ་གྱི་དབང་ལུང་ཡོངས་རྫོགས། གཏེར་སྟོན་སངས་རྒྱས་གླིང་པའི་བླ་མ་དགོངས་འདུས་ཀྱི་དབང་རྣམས་དང་པོད་བཅུ་གསུམ་གྱི་ལུང་ཡོངས་རྫོགས་དང་། འཇམ་མགོན་ཀོང་སྤྲུལ་རང་རྣམ་ལས། སྨིན་གླིང་འདོད་འཇོ་བུམ་བཟང་གི་སྨིན་བྱེད་ཆ་ཚང་། སྒྲུབ་ཐབས་པོད་ཀྱི་དབང་ལུང་། ཞལ་ཤེས་རྣམས་ཞལ་ཁྲིད་མཛད་ནས་འདི་རྣམས་ཡིད་ལ་མ་བརྗེད། བསྟན་པ་ལ་ཕན་སུས་ཐོགས་ཅི་ཤེས་སོགས་གསུངས། ལར་འདི་ཉིད་ཀྱི་གསུང་སྒྲོས་ཆེད་དུ་གནང་བ་ཐམས་ཅད་ཕྱིས་ལུང་བསྟན་ཁོ་ནར་སོང་འདུག །ཅེས་དང་། ཡང་། འཇམ་མགོན་བླ་མ་རིན་པོ་ཆེས་ཉིད་ཀྱིས་གསོལ་བའི་བཟང་གོས་ཀྱི་ཆོས་གོས། བུམ་པ་ཆ། ཤིས་བརྗོད་ཀྱི་ཚིག་བཀྲ་ལ་ཡོན་ཏན་རྒྱ་མཚོ་ཡོད་པ་ཞིག་གནང་ནས་བླ་མར་མངའ་གསོལ་བའི་རྟེན་འབྲེལ་ཡིན། དུས་རྒྱུན་དུ་བློ་སྣ་སྟུངས། དྲན་ཤེས་སྟེན། ཕྱོགས་རིས་མ་བྱེད་ཅེས་པའི་བསླབ་སྟོན་སྩལ། ཞེས་སོགས་གསུངས་པ་དེ་དག་དང་། གཞན་ཡང་རྒྱལ་བའི་བཀའ་འགྱུར་གྱི་བཀླག་ལུང་། དུས་འཁོར་འགྲེལ་ཆེན་དྲི་མེད་འོད། གསང་འདུས་འགྲེལ་བ་སྒྲོན་གསལ། ཞི་བ་ལྷའི་སྤྱོད་འཇུག །བསླབ་བཏུས། ཇོ་བོའི་ཆོས་ཆུང་བརྒྱ་རྩ། ཟླ་གྲགས་གསང་འདུས་འགྲེལ་པ། སྐྱེས་རབས་དཔག་
བསམ་འཁྲི་ཤིང་། འདུལ་བ་མདོ་རྩ། ཀརྨ་ཤ་ཏཾ། མེ་ཏོག་ཕྲེང་རྒྱུད། དབུ་མ་རིགས་ཚོགས་དྲུག །བྱམས་ཆོས་སྡེ་ལྔ། མངོན་མཛོད་སོགས་བསྟན་འགྱུར་ལས་མང་དུ་གསུངས། བཀའ་བརྒྱད་བདེ་གཤེགས་འདུས་པའི་དབང་ཆེན་དང་པོད་ཆེན་བཅུའི་ལུང་ཡོངས་རྫོགས། དབང་ཕྲན་སྐོར་ཚང་མ། ཕུར་པ་ཡང་གསང་བླ་མེད་ཀྱི་དབང་ཞེ་ཆེན་ལྗགས་འགྲིགས་ཀྱི་ལུང་། བདེ་གཤེགས་ཀུན་འདུས་ཀྱི་དབང་ལུང་ཁྲིད་གསུམ། སྙིང་ཐིག་བླ་བརྒྱུད་རྣམ་ཐར་དང། བི་མ་སྙིང་ཐིག །མཁའ་འགྲོ་སྙིང་ཐིག །བླ་མ་ཡང་ཏིག །མཁའ་འགྲོ་ཡང་ཏིག །ཟབ་མོ་ཡང་ཏིག་རྣམས་ཀྱི་དབང་ལུང་མཐའ་རྒྱས་སོགས་གསང་ཆེན་སྨིན་གྲོལ་ཞལ་ཤེས་དམར་ཁྲིད་རྒྱབ་རྟེན་དང་བཅས་པ་བགྲང་བྱ་དྲུག་གི་རིང་ཞིབ་པར་བསྩལ་ཏེ། ཐུན་མོང་ཐུན་མིན་གྱི་གཞུང་ལུགས་ལ་མཁྱེན་རབ་ཀྱི་དཀྱིལ་འཁོར་ཡོངས་སུ་རྫོགས་ཏེ། རྗེ་ཉིད་ཀྱི་ཞལ་ནས། དེང་སྔོན་སྦྱངས་སྐྱེས་ཐོབ་ཀྱི་ཤེས་རབ་མངོན་པར་རྒྱས་པའི་མཁྱེན་རབ་ཀྱི་མྱུ་གུ་གསར་པ་ཐོས་བསམ་སྒོམ་པའི་འདབ་སྟོང་རྣམ་པར་རྒྱས་གྲུབ་པས། བློ་གསལ་བུང་བ་གཞོན་ནུའི་གསོས་སུ་གྱུར་པ་ལ་ཐེ་ཚོམ་བྲལ་ཞིང་། སླད་ཀྱི་ཆར་རིས་བྲལ་རྒྱལ་བ་མཆོག་གི་བསྟན་པ་བླ་ནས་བླར་འཕེལ་བའི་བྱེད་པོ་སྲིད་ཞིའི་འདྲེན་པ་མཆོག་ཏུ་མངའ་གསོལ་བར་བྱ་ཕྱིར། རྟེན་འབྱུང་གི་སྒོ་འཕར་བརྒྱ་ཕྲག་ཕྱེ་བའི་ལེགས་སོ་འབུལ་བའི་རྟེན་མཚོན་ལ། བཀྲ་ཤིས་པའི་ལྷ་རྫས། བུམ་པ་ལེགས་ཆ། རང་གི་གྱོན་པ་བཟང་གོས་ཀྱི་ཆོས་གོས་བཅས་ཕུལ་བ་བརྩེ་བ་མཆོག་གིས་རྗེས་སུ་བཞེས་པ་ནས། འཆད་རྩོད་རྩོམ་པ་དང་བཤད་སྒྲུབ་སྒོམ་པས་བསྟན་འགྲོའི་དོན་ཆེན་སྒྲུབ་པའི་མཛད་པ་སྐྱོ་ངལ་སྤངས་ནས་རང་གཞན་དོན་གཉིས་དཀའ་བ་མེད་པ་འགྲུབ་པར་གདོན་མི་ཟ་བ་ལགས་པས་ཐུགས་ལ་བསྟིམ་འཚལ། ཞེས་སོགས་འབྱུང་འགྱུར་ལུང་བསྟན་ཁོ་ན་ལྟར་སོང་བའི་ཕྱག་བྲིས་གནངས་ཏེ། བརྡ་སྤྲོད་ཀུན་བཤད་ཀྱི་མཚན་དང་བཀའ་གཏེར་མདོ་སྔགས་རྒྱ་མཚོ་ཕྱོགས་
བརྒྱར་སྤེལ་བའི་བྱེད་པོར་མཆོག་ཏུ་མངའ་གསོལ་དང་གཟེངས་བསྟོད་བཅས་མཛད་དེ་སྲས་ཀྱི་ཐུ་བོ་དང་ཕྲིན་ལས་ཀྱི་བྱེད་པོ་འགྲན་ཟླ་དང་བྲལ་བར་བྱོན་པ་སྟེ། ཤིང་རྟ་ཆེན་པོ་འདིས་ཕྱིས་སུ་ཁྱབ་བདག་རྒྱལ་བ་ཞེ་ཆེན་པའི་བརྒྱུད་པའི་ཆུ་བོ་འཛམ་གླིང་ཐ་གྲུར་ཡོངས་ཁྱབ་ཏུ་སྤེལ་ཏེ། མཁས་གྲུབ་དབང་པོ་རྒྱལ་ཚབ་པདྨ་བི་ཛས་ཐུབ་མིན་རིགས་བདག་ཏུ་བསྙེན་པ་སོགས་བསྟན་པ་སྤྱི་དང་བྱེ་བྲག་ལ་བཀའ་དྲིན་མཚུངས་ཟླ་བྲལ། ལྕགས་ཁྱི་དགུང་གྲངས་རེ་བཞིར་དཔལ་རི་བོ་དགེ་ལྡན་པའི་སྐྱེས་ཆེན་ལུགས་གཉིས་དཔལ་གྱིས་མངོན་པར་མཐོ་བའི་བྲག་ཡབ་སྐྱབས་མགོན་ནོ་མི་ཧན་དཔལ་ལྡན་འཇིགས་མེད་བསྟན་པའི་རྒྱལ་མཚན་གྱིས་དགའ་ལྡན་ཁྲི་རིན་པོ་ཆེར་རྙིང་མའི་ཆོས་གསན་བཞེས་ཆོག་པར་སྙན་ཞུས་བཞིན། ཁམས་ཞེ་ཆེན་པཎྜི་ཏ་ཟེར་བ་སྔར་སྨིན་གླིང་གི་སྔགས་རམས་པ་བསྟན་འཛིན་སྐྱེས་མཆོག་སོགས་གསར་རྙིང་གི་ཡོངས་འཛིན་ཚད་ཐུབ་མང་པོའི་ཞབས་ལ་གཏུགས་པས་ཕྱི་ནང་གི་རིག་པའི་གནས་ལ་མཁྱེན་རྒྱ་ཆེ་ཞིང་། བསྟན་པ་ཐམས་ཅད་འགལ་མེད་ལམ་དུ་ཁྱེར་ཐུབ་པ་ཞིག་ཡོད་པ་དེ་བླ་མར་བསྟེན་ན་ལེགས་ཚུལ་བཀའ་གསལ་དམ་འབྱར་ཕེབས་པར་བརྟེན། ནོ་མི་ཧན་གྱིས་སྡེ་དགེ་ཚང་ལ་བཀའ་ནན་སྩལ་པ་ལྟར། སྡེ་དགེ་རྒྱལ་བློན་བཀའ་བགྲོས་ཀྱིས་བྱོན་ཆས་ཕྱག་མཐུད་རྒྱ་དངུལ་སྲང་ཉེར་ལྔ་སོགས་དང་། སྣ་ཤན་ཧོར་འདྲ་ས་ཚུགས་ལམ་ཡིག་བཅས་མི་འབྱོན་ཀ་མེད་བཞིན་ཕེབས། དེར་བྲག་ཡབ་རྫིས་དཔོན་ཨ་འབྲུག་སྐོར་རིང་བསུ་དང་། ལྷ་ཐོག་ཏུ་བྲག་ཡབ་མཛེས་བཅུ་དཔོན་ལྷུན་གྲུབ་རྒྱལ་དཔོན་གཡོག་བརྒྱད་ཅུ་ཐམ་པ་བར་བསུ། ཐུང་བསུ་ལ་ཕྱག་མཛོད་དཔོན་གཡོག་བརྒྱ་ལྷག་ཙམ། དེའི་ཕྱི་ཉིན་ཟླ་བ་བདུན་པའི་དགའ་བ་དང་པོ་ལ་བྲག་ཡབ་སྐུ་ཞབས་ནོ་མི་ཧན་དང་མཇལ་འཕྲད་བྱས། ཕྱི་ཉིན་ནས་སྔ་འགྱུར་རྡོ་རྗེ་ཐེག་པའི་ཆོས་སྒོ་རྒྱ་ཆེན་འབྱེད་པའི་སྣ་སེལ་དུ་བཀའ་བརྒྱད་བདེ་
གཤེགས་འདུས་པའི་གཏོར་བཟློག་མཛད། དེ་ནས་ཐོག་མའི་ཆོས་སྒོ་བླ་མ་དགོངས་པ་འདུས་པས་ཕྱེ་སྟེ་དབང་ལུང་ཆ་ཚང་དང་། བཀའ་བརྒྱད་སྒྲུབ་མཆོད་དང་སྦྲེལ་ཏེ་དབང་ཆེ་ཆུང་རྣམས་དང་པོད་ལུང་ཡོངས་རྫོགས་བསྩལ། ཆབ་མདོ་དགོན་ཆེན་ནས་གདན་ཞུས་བཞིན་ཕེབས་མ་ཐུབ་ནས་གཡོ་མདའ་ཆོས་རྗེ་ངག་དབང་འཇམ་དབྱངས་ཆེད་བཏང་མཛད་པ་དེ་དང་སྐྱབས་མགོན་ནོ་མི་ཧན་མཆོག་བཅས་ལ་རྙིང་མ་རྒྱུད་འབུམ་དང་། བསྟན་འགྱུར་ལུང་རྒྱུན་ཡོད་རིགས་དང་། མདོ་སྒྱུ་སེམས་གསུམ་གྱི་གཙོས་བཀའ་མ་སྐོར་གྱི་དབང་ལུང་དང་། མངའ་བདག་ཉང་དང་གུ་རུ་ཆོས་དབང་གཉིས་ཀྱི་གཏེར་ཁ་ཡོངས་རྫོགས། རཏྣ་གླིང་པ་སོགས་གཏེར་སྟོན་ཡོངས་སུ་གྲགས་པ་ཕལ་མོ་ཆེའི་ཆོས་སྐོར། རྒྱལ་མཆོག་ལྔ་པའི་དག་སྣང་རྒྱ་ཅན་ཡོངས་རྫོགས། སྨིན་གླིང་གཏེར་བྱོན་ཡོངས་རྫོགས་ཀྱི་དབང་ལུང་གདམས་ཁྲིད་བཞུགས་རིགས་རྣམས་ཞིབ་པར་ཕུལ། བྲག་ཡབ་ནོ་མི་ཧན་མཆོག་སྔགས་རྙིང་མའི་ཆོས་དང་གང་ཟག་ལ་རྒྱུ་མཚན་ཤེས་ནས་དད་པ་དང་དག་སྣང་ལྷག་པར་འཁྲུངས་ཏེ། རྙིང་མའི་གྲྭ་ཚང་ཞིག་གསར་དུ་བཙུགས་པ་དེ་ལ་སྨིན་ལུགས་གཙོར་བཏོན་གྱི་སྒྲུབ་པ་ཆེན་པོ་བཀའ་བརྒྱད་སོགས་ཀྱི་སྒྲུབ་ཕྲིན་གྱི་ཕྱག་བཞེས་དང་། གདངས་དབྱངས་རོལ་མོ་འབུད་ཚིགས་སོགས་ཞིབ་པར་བསླབས། བཀའ་བརྒྱད་བདེ་གཤེགས་འདུས་པའི་སྒྲུབ་ཆེན་ཕྱག་ལེན་རྒྱས་པའི་ལུགས་དང་འབྲེལ་བ་བདུད་རྩི་སྨན་སྒྲུབ་ཆེན་མོ་བདུན་ཕྲག་གཉིས་ལ་མཛད། གྲྭ་ཚང་གསར་ཞུགས་ལ་རབ་བསྙེན་དང་བྱང་སྡོམ་འབོགས་པ་སོགས་བསྟན་འགྲོའི་དོན་ཆེན་ཕྱོགས་ཀུན་ནས་ལེགས་པར་འགྲུབ་སྟེ་དེར་ལོ་གཉིས་ཙམ་བཞུགས། ཕྱོགས་འདིར་རྒྱལ་བ་ཞེ་ཆེན་པའི་ཆོས་བརྒྱུད་འཛིན་པའི་དགོན་ལག་ཀྱང་མང་དུ་འཕེལ། དེ་ནས་བཀའ་དྲིན་གཏང་རག་གི་མཎྜལ་ལ་ཆབ་མདོ་ཆོས་རྗེས་དངོས་པོ་རྒྱ་གང་ཆེར་དང་། བྲག་ཡབ་གཞུང་ནས་གསེར་རྡིལ་ཚད་གཅིག །
དངུལ་རྡིལ་ཚད་བཅུ། རྟ་ཉི་ཤུ། མཛོ་མཛོ་མོ་སུམ་ཅུ་ལྷག །ཡུག་ཆེན་སྣ་ལྔའི་གྲངས་ཚན་བཞི་ལྷག །གཅན་གཟན་སྣ་ཚང་གི་པགས་པ་སོགས་ཚན་གྲངས་བརྒྱ་ཕྲག་གསུམ་སོགས་རྒྱ་ཆེར་དང་། ནོ་མི་ཧན་སྐུ་སྒེར་ནས་ཀྱང་ཐུགས་དགྱེས་པའི་རྩེར་སོན་ཏེ་སྐུ་གསུང་ཐུགས་རྟེན་ཁྱད་ཐོན་གྱིས་ཐོག་དྲངས་ཏེ་དངོས་པོ་རིན་ཐང་ཅན་ལེགས་སྐྱེས་རྒྱ་ཆེར་བསྟབས་ཏེ་མཆོད་ཡོན་བླ་སློབ་འབྲལ་དཀའ་བའི་ངང་ནས་སྔར་ཆིབས་བསུའི་གོ་རིམ་ལྟར། ཆིབས་སྐྱེལ་ཡང་རིམ་པ་གསུམ་གྱིས་རང་དགོན་དུ་ཆིབས་ཞལ་བསྒྱུར། སྡེ་དགེ་ཆོས་རྒྱལ་ཆེན་པོ་བྱང་སྒར་ལྷ་ལུང་ཁུག་ཏུ་བཞུགས་པར་མཆོད་ཡོན་ཞལ་འཛོམས་མཛད། ཆབ་བྲག་སྒ་ཉག་སྐོར་སོགས་ལ་དམ་པ་ཆོས་ཀྱི་དགའ་སྟོན་སྤེལ་ཚུལ་གྱི་བཀའ་མོལ་དང་། བྲག་ཡབ་ནོ་མི་ཧན་གྱིས་བླ་མ་བྱོན་ཅིང་ཆོས་ཀྱི་བཀའ་དྲིན་ལེགས་པར་བསྐྱངས་ཚུལ་གྱི་ཞུ་རྒྱ་ལེགས་སྐྱེས་རྣམས་ཕུལ་བས་རྒྱལ་བློན་འཁོར་བཅས་ཐུགས་ཤིན་ཏུ་དགྱེས་པར་མཛད། གོང་ཞུས་དེ་དག་གིས་མཚོན་མཛད་པ་གསུང་གི་འཕྲིན་ལས་ཐུན་མོང་གི་རིག་གནས་སུམ་རྟགས་དག་གསུམ། ཀ་ཙན་དབྱངས་གསུམ། སྙན་མངོན་སྡེབ་གསུམ། རྩིས་དཀར་ནག་སོགས་ཐ་སྙད་རིག་གནས་ཀྱི་སྐོར་འཆད་སྤེལ་ཆེས་མང་བས་བཤད་རྒྱུན་དང་སློབ་ཚོགས་ཀྱིས་མདོ་དབུས་གཉིས་ལ་ཁྱབ། ཕྱིས་སུ་ཐུགས་སྲས་དམ་པ་རྣམས་ཀྱི་གསུང་རྩོམ་རྣམས་སྙན་འཇེབས་སྡེབ་ལེགས་ཀྱིས་ཁྱད་པར་དུ་འཕགས་པ་འབའ་ཞིག་བཞུགས། རྒྱལ་བའི་བཀའ་འགྱུར་རིན་པོ་ཆེའི་ལྗགས་ལུང་ཚར་གསུམ་སྤེལ་བའི་རྒྱུན་གསར་རྙིང་ཡོངས་ལ་འབྱམས། ཁྱད་པར་རྩ་རྒྱུད་གསང་བ་སྙིང་པོའི་རྒྱུད་རྒྱུད་འགྲེལ་དང་བཅས་པའི་བཤད་རྒྱུན་གྱི་སྒྲོན་མེ་ཡང་ཡང་སྦར་བ་འདི་གཅིག་པུའི་བཀའ་དྲིན་བསམ་ལས་འདས། དགོངས་འགྲེལ་བསྟན་བཅོས་རྒྱུན་ཡོད་རིགས་དང་། སྙིང་ཐིག་མ་བུ་ལྔ་དང་མཛོད་བདུན་ངལ་གསོ་སྐོར་གསུམ་སོགས་ཀུན་མཁྱེན་ཆེན་པོའི་གསུང་རབ་རྣམས་དང་།
ཀུན་མཁྱེན་འཇིགས་མེད་གླིང་པའི་བཀའ་འབུམ་སོགས་མཁས་གྲུབ་གོང་མ་རྣམས་ཀྱི་གསུང་འབུམ། གསར་རྙིང་གི་རྒྱུད་འབུམ་རྣམས་དང་། སྔ་འགྱུར་བཀའ་གཏེར་རྒྱ་མཚོའི་དབང་ལུང་ཁྲིད་མན་ངག །བདུད་རྩི་སྨན་སྒྲུབ་ཀྱི་ལག་ལེན་དང་ཉམས་མྱོང་གི་བསླབ་བྱ་སོགས་བཀའ་གཏེར་སྒྲུབ་ཕྲིན་གྱི་མཐོང་བ་བརྒྱུད་པའི་ཕྱག་བཞེས་ཆེ་ཕྲ། ལྷ་བྲིས་འབུར་ཐིག་དང་སྤོས་སྦྱོར་ནས་བཟུང་གང་ལ་གང་འདོད་དེ་ལ་དེ་ལྟར་མི་ཟད་པ་ཆོས་རིག་རྒྱ་མཚོའི་ཆུ་གཏེར་གྱིས་བརྒྱུད་པ་ཟིན་ངེས་ཀྱི་སློབ་ཚོགས་ཨུ་དུམྦ་རའི་སྐྱེད་ཚལ་ལྟ་བུ་བསྐྱངས་ཏེ། གོང་སྨོས་ཟླ་བྲལ་གྱི་བརྒྱུད་འཛིན་རྣམ་གཉིས་ཏེ་འཇམ་མགོན་མཁྱེན་ཀོང་གཉིས་དང་། རྗེ་ཉིད་ཀྱི་རྒྱལ་ཚབ་ཏུ་བྲག་ཡབ་དང་ནང་ཆེན་སོགས་སུ་དབུ་བླར་ཕེབས་ཏེ་བསྟན་འགྲོའི་ཕྲིན་ལས་ཅན་ལྔ་རིག་སྨྲ་བ་སྒྲ་རམས་པ་གྲུབ་དབང་འགྱུར་མེད་རྣམ་རྒྱལ། མདོ་སྔགས་རིག་གནས་དང་བཅས་པ་ཐུགས་སུ་ཆུབ་པའི་ལྷོ་སེང་ཚ་སྨན་རམས་པ་བློ་གྲོས་མཆོག་རྒྱས་འོད་ཟེར་ཏེ་ནང་ཐུགས་ཀྱི་སྲས་བཞི། བྲག་ཡབ་སྐྱབས་མགོན་ནོ་མི་ཧན་གོང་སྨོས་ཉིད་དང་། གསེར་མདོག་ཅོད་པཎ་འཆང་བའི་ལུགས་བཟང་མཁའ་ཁྱབ་ཏུ་སྤེལ་བའི་ཕྲིན་ལས་ཅན་ཧོར་དགོན་སྡེ་བཅུ་གསུམ་གྱི་བདག་པོ་ལུང་དང་རིགས་པ་སྨྲ་བའི་དགེ་བའི་བཤེས་གཉེན་དགོན་སར་ཆོས་རྗེ་བློ་བཟང་མཐུ་སྟོབས། པདྨའི་ཐུགས་སྲས་མདོ་སྨད་སྐྱེ་དགུའི་གཙུག་རྒྱན་ཁམས་སྤྲུལ་ལྔ་པ་སྒྲུབ་བརྒྱུད་བསྟན་པའི་ཉི་མ། འཁྲུལ་ཞིག་ལྔ་པ་ཨ་ལྡེའུ་པཎྜི་ཏ་དཔལ་ལྡན་འགྱུར་མེད་ཚེ་དབང་ཕྲིན་ལས། ཆབ་མདོ་གཡོ་མདའ་ཆོས་རྗེ་ངག་དབང་འཇམ་དབྱངས་ཏེ་ཆེ་བཙུན་མཁས་པའི་བཤེས་གཉེན་ལྔ། སངས་རྒྱས་གཉིས་པ་གུ་རུ་པདྨས་བསྩལ་པའི་ཆེ་མཆོག་འདུས་པ་བདུད་འཇོམས་རོལ་པ་རྩལ་ཞེས་མཚན་གྱི་ཅོད་པཎ་འཆང་བའི་རྗེ་བླ་མ་རྒྱལ་ཚབ་དང་པོ་དང། རྡོ་བྲག་རྗེ་ཙུན་མའམ་མཚོ་རྒྱལ་རྣམ་འཕྲུལ་གངས་ར་རྗེ་བཙུན་མ་བྱང་ཆུབ་སྒྲོལ་མ། གྲུབ་པའི་དབང་ཕྱུག་གཏེར་
སྟོན་གླིང་རྗེ་དྲུང་པདྨ་འགྲོ་འདུལ་རྩལ། མཚོ་འཁྲུངས་པདྨ་ཀ་རའི་ཞལ་སྐྱིན་ལྷ་འབྲང་གྲུབ་དབང་དཔལ་ལྡན་ཆོས་རྒྱལ། རྡོ་གྲུབ་ཆེན་ཀུན་བཟང་གཞན་ཕན་གྱི་ཐུགས་སྲས་གྲུབ་དབང་རྡོ་བླ་འཇིགས་མེད་སྐལ་བཟང་། མཚོ་ཕུ་སྒྲུབ་ཆེན་ཆོས་དབྱིངས་རང་གྲོལ། མཚུངས་མེད་ཆོས་ཀྱི་སྤྱན་ལྡན་གྲུབ་དབང་གཞི་ཆེན་སྤྲུལ་བསོད་ནམས་དཔལ་ལྡན། ཟུར་མང་གཏེར་སྟོན་རོལ་པའི་རྡོ་རྗེ་སོགས་གྲུབ་བརྙེས་ཀྱི་སྐྱེས་ཆེན། རྡོ་བྲག་རིག་འཛིན་ཆེན་པོ་བདུན་པ་ངག་དབང་མི་འགྱུར་ལྷུན་གྲུབ་རྡོ་རྗེ། རབ་འབྱམས་བཞི་པ་མི་མཇེད་ཞིང་གི་མགོན་པོ་གར་དབང་ཆོས་ཀྱི་རྒྱལ་མཚན། ཀཿཐོག་སི་ཏུ་གཉིས་པ་ཆོས་ཀྱི་བློ་གྲོས་ཨོ་རྒྱན་བསྟན་པ་རྣམ་རྒྱལ། ཀཿ ཐོག་དགེ་རྩེ་གཉིས་པ་རིག་འཛིན་ཚེ་དབང་རྒྱ་མཚོ། རྒྱལ་ཚབ་གཉིས་པ་མི་བསྐྱོད་མཁས་གྲུབ་རྒྱ་མཚོ་ཚེ་དབང་གྲུབ་པ་རྩལ། ཀཿ ཐོག་ཉིན་དགོན་གསུམ་པ་འགྱུར་མེད་ངེས་དོན་བསྟན་འཛིན་སོགས་བསྟན་ལ་ཕྱག་རྗེས་ཆེ་བའི་ཁྲི་ཆེན། ལུང་རིགས་སྨྲ་བའི་ཁྱུ་མཆོག་ཡོངས་ཀྱི་བཤེས་གཉེན་ཆེན་པོ་རྫ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་སྟེ། རྣམ་ཐར་མགུལ་རྒྱན་ལས། ལྕགས་སྟག་ལོ་དཔལ་སྤྲུལ་རྡོ་རྗེ་འཆང་སྙིགས་དུས་ཀྱི་ཐམས་ཅད་མཁྱེན་པ་དེ་ཉིད་ཕེབས། ཟླ་བ་ལྔ་དྲུག་གཅིག་བཞུགས་སྒྲ་དབྱངས་ཅན་མ་དང་ཕྱི་ནང་གི་གཙུག་ལག་དུ་མ་གསན་བཞེས་མཛད་ནས་སྨྲ་བའི་སེངྒེ་ལྟ་བུར་གྱུར། ཇི་སྐད་དུ་། ལ་ལས་ལོ་བརྒྱར་སྦྱངས་ན་ཡང་། །ལ་ལས་ཡུད་ཙམ་ཞིག་གིས་ཤེས། །ལ་ལས་ཚེགས་ཀྱིས་སྒྲུབ་པ་ཡང་། །ལ་ལས་འབད་པ་ཆུང་ངུས་འགྲུབ། །ཅེས་གསུངས་པའི་ཚུལ་ལྟར་ལས། མཁས་དབང་འདིས་གཞན་ནས་ཐུན་མོང་གི་རིག་གནས་སོགས་སློབ་སྦྱོང་མཛད་པའི་ལོ་རྒྱུས་མེད། ཅེས་གསུངས་པ་ལྟར་ཕྱི་ནང་གི་གཙུག་ལག་དུ་མ་གསན་བཞེས་མཛད་ནས་སྨྲ་བའི་སེངྒེ་ལྟ་བུར་གྱུར་པའི་ཆོས་རྗེ་མཆོག་དང་། རྡོ་བྲག་རིག་འཛིན་ཆེན་པོ་དྲུག་པའི་ཐུགས་སྲས་ཐུ་བོ་རིག་འཛིན་བདུན་
པ་དང་བརྒྱད་པའི་ཡོངས་འཛིན་ཆུ་བཟང་མཁན་རིན་པོ་ཆེ་ནམ་མཁའ་ཀློང་ཡངས། རྫོགས་ཆེན་མཁན་རབས་དང་པོ་སེང་ཕྲུག་པདྨ་བཀྲ་ཤིས། ཁྲོ་ཤུལ་མཁན་ཆེན་ཚུལ་ཁྲིམས་རྒྱ་མཚོ། སྔ་འགྱུར་བསྟན་པའི་སྒྲོན་མེ་མཆིམས་ཕུའི་ཟུར་མཁར་སྤྲུལ་སྐུ་སོགས་ལུང་རིགས་སྨྲ་བའི་སྟོན་ཆེན། གཞན་ཡང་རྒྱལ་སྲས་འགྱུར་མེད་རྡོ་རྗེས་མཛད་པའི་ཨ་འཛོམས་འགྲོ་འདུལ་དཔའ་བོ་རྡོ་རྗེའི་རྣམ་ཐར་ལས། བཤེས་གཉེན་དམ་པས་རྗེས་བཟུང་རབ་ཏུ་བྱུང་། །པདྨ་མདོ་སྔགས་ལྷུན་གྲུབ་བཟང་པོ་ལ། །གསོལ་བ་འདེབས་སོ་སྲིད་ལས་ངེས་འབྱུང་ཤོག (འདི་རང་རྣམ་ཞལ་གསུང་མ།) ཅེས་གསུངས་ཏེ། དགུང་གྲངས་བཞི་ལྔར་སོན་པ་ན། གནུབས་ཆེན་སངས་རྒྱས་ཡེ་ཤེས་ཀྱི་རྣམ་འཕྲུལ་ཞེ་ཆེན་མ་ཧཱ་པཎྜི་ཏ་མཐུ་སྟོབས་རྣམ་རྒྱལ་ལས་བསྟན་པའི་སྒོར་ཐོག་མར་ཞུགས་པ་ཡིན་ཏེ། ཁོང་གི་མནལ་ལམ་དུ་དུང་དཀར་ཆེ་ཆུང་གཉིས་འདུག་པའི་ཆུང་བ་དེ་ཕྱག་ཏུ་བཞེས་ནས་བུས་པས། དུང་གི་སྐད་དེས་ལྷ་ལྡན་ཕྱོགས་མན་ཆད་གྲགས་སྙམ་བྱུང་། སྐྱེས་བུ་འདི་ཉིད་ངེས་པར་རིགས་བཟང་ཞིག་ཡིན་ཞེས། མཚན་སྙན་ལི་ཤིའི་དྲི་བསུང་འཐུལ་བ་ལས། །སོགས་སྙན་ཚིག་དང་སྦྱར་བའི་བསྟོད་པ་བཅས་མཚན་དེ་ཉིད་གསོལ་བ་ཡིན། ཞེས་གསུངས་པ་ལྟར་རྫོགས་ཆེན་བསྟན་པའི་མངའ་བདག་ཨ་འཛོམས་འགྲོ་འདུལ་དཔའ་བོ་རྡོ་རྗེ་དང་། མཁྱེན་བརྩེ་ནུས་ལྡན་མཆོག་སྤྲུལ་བྱང་ཆུབ་རྡོ་རྗེ། ལྕང་སྐྱའི་དབུ་བླ་མདོ་ཤུལ་བླ་མ་ངག་དབང་རྒྱ་མཚོ། རྫོགས་ཆེན་མཁན་བཤད་སྒྲུབ་ཉི་མ།(འདིས་རྗེ་བླ་མའི་སྐུ་གམ་དུ་ཡང་ཡང་གཅར་ནས་ཐུན་མོང་སྒྲ་རིག་ནས་བཟུང་ཐུན་མིན་མཐོང་བ་བརྒྱུད་པའི་ཕྱག་བཞེས། དབང་ལུང་གདམས་ཁྲིད་སོགས་གསན་རྒྱ་ཆེ་བས། བསྟན་པའི་གནས་གཞི་དགོན་ཆེན་དག་ཏུ་མཁན་པོ་འདིའི་ཕྱག་རྗེས་ཀྱི་མཛད་ཕྲིན་འོད་སྟོང་འཕྲོ་བཞིན་པའི་དམིགས་བསལ་མཛད་འཕྲིན་ཅན་ཞིག་གོ།) གཙང་མདའ་སྤྲུལ་ཨོ་རྒྱན་མདོ་སྔགས་དོན་རྟོགས་སྐུ་མཆེད། མཁས་གྲུབ་བསྟན་འཛིན་ཆོས་དབང་། གཙང་མཐིལ་སེངྒེ་བླ་མ་བསོད་ནམས་དབང་
རྒྱལ་དང་བླ་མ་གུ་རུ་བླ་མ་ཨོ་རྒྱན་བསོད་ནམས། གོ་ཆ་མཆོག་སྤྲུལ་འཇིགས་མེད་དཔལ་གྱི་སེངྒེ། བདེ་གྲོལ་བརྒྱད་པ་ཀུན་བཟང་ཡེ་ཤེས་རྒྱལ་མཚན། སྤང་ལེབ་སྤྲུལ་སྐུ་ཕྲིན་ལས། དགེ་མང་བླ་མ་སྨོན་ལམ་དར་རྒྱས། ཝ་ཤུལ་བླ་མ་སངས་རྒྱས་བཟང་པོ། གོར་རྩ་བླ་མ་ཨོ་རྒྱན་དཔལ་འབྱོར། གཅོད་ཀྱི་གྲུབ་བརྙེས་ཁྲོཾ་ཐར་རྒྱ་སྒོང་བླ་མ་ངག་དབང་། ཁམས་པ་སྒར་ནས་ཆེད་མངགས་མཁས་པའི་དབང་པོ་བྲག་ཡབ་ཉི་མ་དང་ཆབ་མདོ་ཤེས་རབ། སྐྱ་ནང་བླ་མ་ཀློང་ཆེན་པ། དགོན་ཆེན་ལུག་ར་བླ་མ་འཇམ་དབྱངས་ཡོན་ཏན། ཞྭ་སེར་བསྟན་པའི་རྒྱལ་མཚན་འཛིན་པ་ཇོ་བོ་སྤྲུལ་སྐུ། ཀཿ ཐོག་ཧོར་མདོ་སྨྱོན་རིན་པོ་ཆེ། སྨར་ཁམས་མཆོག་སྤྲུལ་འགྱུར་མེད་ཆོས་ཀྱི་རྒྱལ་མཚན། སྟག་སྒང་སྤོར་འགུར་བླ་མ་ཨོ་རྒྱན་བསམ་འགྲུབ། རྩེ་བ་མདའ་མཁན་བུ་སངས་རྒྱས་ཆོས་འཕེལ་སོགས་དང། གཞན་ཡང་ཆོས་སྡེ་ཆེན་མོ་འདིའི་དགོན་མ་ལག་དང་བཅས་པའི་བླ་སྤྲུལ་མཁན་གསུམ་སྟེ། བསྟན་འགྲོའི་དཔལ་མགོན་དམ་པ་སིབ་རྫོགས་ཆེན་གསུམ་པ་པདྨ་ཐེག་མཆོག་བསྟན་པ་རྣམ་རྒྱལ། བཞི་པ་འགྱུར་མེད་སྲིད་ཞི་ཕུན་ཚོགས། ལྕང་བྲག་བླ་མ་ཨ་འཇའ་འགྱུར་མེད་རྒྱ་མཚོ་དང་གྲུབ་དབང་བླ་མ་རྟ་མགྲིན། ལྷ་འབྲང་རྗེ་དབོན་རིན་པོ་ཆེ་སངས་རྒྱས་བཀྲ་ཤིས། གྲུབ་པའི་དབང་ཕྱུག་ཁྱབ་བདག་པ་ཕུག་ཁང་འགྱུར་མེད་སྟོབས་རྒྱས། མཁས་གྲུབ་དབང་པོ་ཕུག་ཁང་པདྨ་རྒྱལ་མཚན། ཕུག་ཁང་བླ་མ་འགྱུར་མེད་སྙིང་པོ། ཕུག་ཁང་བླ་མ་འགྱུར་མེད་དོན་འགྲུབ། འཇུ་ཉུང་དབོན་གྲུབ་དབང་འཇིགས་མེད་རྡོ་རྗེ། འཇུ་བླ་བསྟན་དར། གཟུར་ལྷ་འབུམ་བསྟན་པའི་མངའ་བདག་དབོན་ལྷུན་གྲུབ་བཀྲ་ཤིས་དང་མཁས་དབང་བླ་མ་པདྨ་ཆོས་འབྱོར་རྒྱ་མཚོ་སོགས་དང་། རང་དགོན་གྱི་ལྔ་རིག་པ་ཆེན་པོ་སྒྲ་རབ་བློ་གྲོས་མཆོག་རྒྱས། ལྔ་རིག་སྨྲ་བ་གྲུབ་ཆེན་དབང་ཆེན་འབུམ། ལྔ་རིག་སྨྲ་བ་བླ་མ་པདྨ་སྐལ་བཟང་། ཀུན་མཁྱེན་འཇིགས་གླིང་ཐུགས་སྲས་མཁས་བཙུན་བཟང་པོའི་དཔལ་གྱིས་འབྱོར་
པའི་བཤེས་གཉེན་དམ་པ་བླ་མ་འཇིགས་མེད་བློ་གསལ་འོད་ཟེར་ཏེ།(རྗེ་འདིས། ལྷ་སྲས་མི་ཡི་དབང་པོས་སྡེ་དགེ་པར་ཁང་ཆོས་མཛོད་དུ་སྙིང་ཐིག་ཡ་བཞིའི་པར་ཤིང་གསར་བཞེངས་ལ་བཀའ་ལུང་ལྟར་མཁའ་འགྲོ་སྙིང་ཐིག་ཞུས་དག་དང་དཀར་ཆག་ཉིན་མོའི་སྣང་བ་དང་། གཞན་ཡང་སྙིང་ཐིག་གཏོར་མའི་རེག་གཟིག་སོགས་མཛད།) བླ་མ་དྷརྨ་ཙཀྲ། མཁན་པོ་འགྱུར་མེད་རང་གྲོལ་སོགས་མདོར་ན་སྐལ་ལྡན་སློབ་མའི་འདུ་བ་ཆེས་ཆེར་རྒྱས་ཏེ་བསྟན་ལ་ཕྱག་རྗེས་ཆེ་བའི་མཁས་གྲུབ་གསེར་རིའི་ཕྲེང་བ་ལྟར་བྱོན་པ་དེ་དག་སློབ་བརྒྱུད་དང་བཅས་པའི་ཕྲིན་ལས་ས་ཆེན་པོས་ཁྱབ་པ་བཞིན་དུ་གྱུར། (དམ་པ་དེེ་དག་ལས་རྗེ་བླ་མ་དང་ཕན་ཚུན་བླ་སློབ་ཏུ་གྱུར་པའང་ཡོད།) གཞན་ཡང་ལུགས་གཉིས་དཔལ་གྱིས་མངོན་པར་མཐོ་བའི་ས་སྐྱོང་སྡེ་གླིང་ནང་གསུམ་དང་། བྲག་ཡབ། ལྷ་ཐོག །འབྲོང་པ་སོགས་ཀྱི་རྒྱལ་བློན་དཔོན་ཁག་སོགས་ཀྱིས་མཆོད་ཡོན་དུ་བཀུར་བའི་སྐལ་ལྡན་སློབ་མའི་ཚོགས་རྒྱ་ཆེ་ཡང་འདིར་སྤྲོས་པ་བསྐྱུངས། སྔར་ཀཿཐོག་དགེ་པཎ་རིན་པོ་ཆེས་རྗེ་འདི་དགུང་ལོ་བཅུ་དགུའི་དུས་མངའ་གསོལ་གཟེངས་བསྟོད་ཀྱི་རྟེན་འབྱུང་གི་སྒོ་འཕར་གསར་དུ་ཕྱེ་སྐབས་ཆེད་དུ་བརྗོད་པའི་ཤིས་སྨོན་ཁྱད་པར་བ་སྟེ། ཁྱོད་ཀྱི་བསྡུ་བཞིའི་དཔག་བསམ་དར་བའི་ཚལ། །སྡིག་ལྟའི་བྲང་འགྲོ་འགྲོགས་པའི་སྐབས་མེད་པར། །གཞན་ཕན་ཁོ་ལག་རྒྱས་པར་རྒྱལ་རྣམས་ཀྱི། །ཐུགས་བསྐྱེད་འབྲས་བུ་སྨིན་པའི་བཀྲ་ཤིས་ཤོག །ཅེས་གསུངས་པ་ལྟར་རོ། །
༼བཞི་པ།༽ རྟོག་གེའི་ཡུལ་ལས་འདས་པའི་ཐུན་མིན་ནང་གི་ངོ་མཚར་གྱི་མཛད་པ་མཚོན་ཙམ་གླེང་བ།
༼བཞི་པ།༽ རྟོག་གེའི་ཡུལ་ལས་འདས་པའི་ཐུན་མིན་ནང་གི་ངོ་མཚར་གྱི་མཛད་པ་མཚོན་ཙམ་གླེང་བ། སྨིན་གླིང་ཡབ་སྲས་ཀྱི་གདན་སར་ཕེབས་དུས་ཡེ་ཤེས་ཀྱི་མཁའ་འགྲོ་མ་མི་ཡི་རྣམ་པར་སྣང་བ་རྗེ་བཙུན་མ་ཕྲིན་ལས་ཆོས་སྒྲོན་གྱི་བྱིན་རླབས་ཀྱིས། སྣང་ཤེས་ཀྱི་ཉམས་ལ་སྤྲུལ་པའི་
གུ་རུ་མཚན་བརྒྱད་ཀྱི་ཞབས་རྗེས་གསལ་པོར་མངོན་པ་དང་། མཚན་བརྒྱད་པོའི་སྐུ་ཡི་རྣམ་འགྱུར་རྣམས་ཀྱང་རིག་པ་རང་བབས་སུ་བཞག་པའི་ངོར་ཤིན་ཏུ་གསལ་ལ། བརྟག་ཅིང་དཔྱད་ན་ལྷག་པར་གསལ་དུ་མི་འགྲོ་བའི་དག་སྣང་མངོན་སུམ་དུ་བྱུང་བ་དང་། བླ་མ་དང་ལྷག་པའི་ལྷ་ཡིས་རྗེས་སུ་བཟུང་ཞིང་། དཔའ་བོ་དང་མཁའ་འགྲོའི་ཚོགས་གྲལ་དུ་ལྷན་གཅིག་ཏུ་ལོངས་སྤྱོད་པ་དང་། གཞན་ཡང་འཇམ་མགོན་ཀོང་སྤྲུལ་དང་དཔལ་སྤྲུལ་ཆོས་ཀྱི་དབང་པོ་གཉིས་བྱ་བྲལ་བའི་ཚུལ་གྱིས་རྗེ་འདི་ལས་གསན་སྦྱང་གནང་སྐབས་སུ་གྲྭ་འཁོར་ཀུན་ལ། ཁྱེད་རྣམས་ཀྱིས་འདི་རྣམ་པ་གཉིས་ཀུ་སཱ་ལི་རེད་སྙམ་ནས་བརྙས་བཅོས་མི་རུང། མ་འོངས་པར་བསྟན་ལ་བྱ་བ་ནུས་པ་བཻ་རོ་ཙ་ན་དང་ཞི་བ་ལྷར་གྲགས་པ་འབྱུང་ཞེས་གསུངས་པས་མཚོན་དུས་གསུམ་སྒྲིབ་མེད་དུ་གཟིགས་པ་དང་། བྲག་ཡབ་མ་བུ་དགོན་དུ་སྐྱབས་མགོན་མཆོག་གི་དབུ་བླར་ཕེབས་སྐབས་ཁྲོམ་ཚོགས་མཆོག་དམན་སྐར་ཚོགས་ལྟ་བུའི་དབུས་ནས་སྨིན་གཏེར་འཇམ་དཔལ་གཤིན་རྗེ་དྲེགས་པ་འཇོམས་བྱེད་ཀྱི་ཟོར་རྒྱག་སྐབས། སྣ་ཚོགས་ཟོར་ཀོང་ཕྱག་ཏུ་བསྣམས་པར་མེ་དངོས་སུ་འབར་བ། ཟོར་ཁང་དུ་འཕངས་པས་ཟོར་མེ་རང་འབར་དུ་སོང་བས་རང་གཞན་དེར་འཁོད་ཐམས་ཅད་ངོ་མཚར་བའི་གནས་ལ་བཀོད། གཞན་ཡང་ཨོ་རྒྱན་རིན་པོ་ཆེ་དང་རྗེ་གཏེར་བདག་གླིང་པ་རྣམས་ཀྱི་ཞལ་གཟིགས་བྱིན་རླབས་ཐོབ་པ་སོགས་དང་། སྐུ་ཤིན་ཏུ་ཆུང་དུས་སུ་ཀློག་ཡིག་མ་བསླབ་གོང་ཀཻ་ཤ་ཅན་གྱི་ཡི་གེ་གཟིགས་ཚེ་འདི་ཀློག་དུས་སྒྲ་རིང་པོ་འཐེན་དགོས་གསུངས་པས་མཚོན་ངོ་མཚར་བའི་གནས་ཐུན་མིན་གྱི་རྣམ་ཐར་མང་དུ་བཞུགས་སོ། །
༼ལྔ་པ།༽ འཁོར་ལོ་གསུམ་གྱི་མཛད་པ་དང་འབྲེལ་རྒྱལ་བསྟན་སྤྱི་བྱེ་ལ་ཕྱག་རྗེས་ཀྱི་རེ་ཁ་བཀྲ་བའི་མཛད་པ།
༼ལྔ་པ།༽ འཁོར་ལོ་གསུམ་གྱི་མཛད་པ་དང་འབྲེལ་རྒྱལ་བསྟན་སྤྱི་བྱེ་ལ་ཕྱག་རྗེས་ཀྱི་རེ་ཁ་བཀྲ་བའི་མཛད་པ། མེ་ཡོས་དགུང་ལོ་ཉེར་གཅིག་ཐོག་རྒྱལ་ཚབ་རྡོ་རྗེ་འཆང་དང་། རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་། གླིང་རྗེ་དྲུང་པདྨ་འགྲོ་འདུལ་རྩལ་གསུམ་གྱིས་སྔར་གྱི་ལུང་བྱང་ལྟར་ཁམས་ཀྱི་གནས་ཆེན་ཉེར་ལྔའི་ནང་ཚན་ཕྱི་ལྟར་སེངྒེ་གནམ་རྫོང་ནང་ལྟར་མཁའ་འགྲོ་འབུམ་རྫོང་གསང་བ་ཟངས་མདོག་དཔལ་རིར་གྲགས་པའི་གནས་མཆོག་འདི་ཡི་སྒོ་འཕར་གསར་དུ་འབྱེད་པའི་སྐབས་ཐུན་མོང་མ་ཡིན་པའི་རྟེན་འབྲེལ་གྱི་སྒོ་མངོན་དུ་གྱུར་པའི་མཐུན་རྐྱེན་ཐམས་ཅད་མཛད་པས་རྗེ་བླ་མ་ཐུགས་ལྷག་ཏུ་མཉེས་པར་གྱུར། དགུང་གྲངས་བཅུ་དགུའི་ཐོག་ཁྱབ་བདག་རྡོ་རྗེ་འཆང་རྒྱལ་ཚབ་མཆོག་གིས་བསྟན་པ་གཏད་པ་ནས་བཟུང་གཞན་དོན་མཛད་དེ་དགོན་ལེ་ལག་དང་བཅས་པ་ལ་འཁོར་ལོ་གསུམ་གྱི་མཛད་ཕྲིན་ཡར་ངོས་ཟླ་བ་ལྟར་རྒྱས་པ་སྟེ། སྐྱབས་མགོན་རྣམ་གཉིས་ཀྱི་སྐུ་གདུང་གསར་བཞེངས་དང་ཡང་སྲིད་ཁྲི་འདོན། ལྕང་བྲག་དང་སིབ་རྫོགས་ཆེན་རྫ་ཕུག་ཁང་གཟུར་ལྷ་འབུམ་སོགས་ལ་བླ་སྐོས་གཏོང་ཞིང་སྤྲུལ་སྐུ་ཁྲིར་བཀོད་དང་དབང་ཁྲིད་བསྩལ་ཅིང། ཉག་རོང་གཟུར་ལྷ་འབུམ་གསང་སྔགས་ཆོས་གླིང་གསར་བཏབ་ལ་མེ་ཡོས་ལོར་ཐོག་མའི་རབ་གནས་དང་དགོན་དེར་དབང་ལུང་སོགས་ཀྱི་ཐུགས་བཞེད་ལེགས་པར་བསྐངས། ཁྱད་པར་གཟུར་བ་ལྷ་འབངས་སྟོང་ཕྲག་ཙམ་ལ་ཟབ་ལམ་བདེ་གཤེགས་ཀུན་འདུས་ཀྱི་ཐུན་མོང་གི་སྔོན་འགྲོའི་ཁྲིད་རྒྱས་པའི་ལུགས་སུ་མཛད་དེ། སྔོན་འགྲོའི་ཁྲིད་ཉམས་ལེན་བྱེད་མཁན་མང་དུ་བྱུང་། ཡུལ་སྡེ་ནང་འཁྲུགས་བསྡུམས་པ་སོགས་འཕྲལ་ཡུན་གྱི་བསྟན་འགྲོར་སྨན་པའི་ལེགས་ཚོགས་དུ་མ་ཡོངས་སུ་གྲུབ་པ་སོགས་དང་། རང་
ལུགས་འགྲོ་འདུལ་གཏེར་བདག་གླིང་པ་ཡབ་སྲས་ཀྱི་ཕྱག་བཞེས་ཇི་ལྟ་བར་བུམ་པ་གང་བྱོས་ཀྱི་དཔེ་ལྟར་བསྲེ་བསླད་ཉམས་ཆག་མེད་པ་དགོན་འདིར་སྔར་ནས་ཡོད་རིགས་ལ་རྗེ་ཉིད་ཀྱིས་ཐ་ན་འཚོགས་པའི་བྱོན་ལུགས་བཞུགས་སྟངས་དང་ཇ་མཆོད་གསུང་ལུགས་ཚུན་ལ་དག་ཐེར་ཁུངས་དག་པར་མཛད། སྐྱབས་མགོན་རྣམ་གཉིས་ཀྱི་ཐུགས་སྲས་ལྔ་རིག་སྨྲ་བ་གྲུབ་ཆེན་དབང་ཆེན་འབུམ་ལ་བཀའ་གཏེར་སྒྲུབ་ཆོག་གི་ལག་ལེན་སྲིད་ན་དཀོན་པ་ད་ལྟ་ཡང་མ་ཉམས་པ་བཞུགས་ཡོད་པ་འདི་རྣམས་རྗེ་བླ་མ་ཡབ་སྲས་ཀྱིས་མཛད་བསྐུལ་གནང་བ་དེ་དང་། རྗེ་ཉིད་ཀྱིས་སྒྲུབ་ཁོག་རྣམས་ཀྱི་དབྱངས་ཀྱི་དཔྱད་ཁྲ་དང་འབྲེལ། བླ་མ། ལས་རྡོར། བྱང་འདྲེན་པ། འབུད་རྡུང་སོགས་ལག་ལེན་ཅི་ཡོད་ཀུན་འདུས་ནོར་བུ་རིན་པོ་ཆེ་ལྟ་བུ་མཛད་ནས་དགོན་འདིར་མཐོང་བ་བརྒྱུད་པའི་ཕྱག་བཞེས་གང་ཅིའི་ཐད་ནས་ཁུངས་བཙན་ལ་བྱིན་ཆེ་བ་ད་ལྟའི་བར་ཀུན་གྱིས་ཁུངས་གཏུགས་ས་ཉིད་དུ་གྱུར་པ་འདི་རྣམས་དམ་པ་འདི་དག་གི་བཀའ་དྲིན་ལས་བྱུང་། ལྷག་ཏུ་སྔ་འགྱུར་བཀའ་གཏེར་གྱི་བསྟན་པ་ལ་ཕྱག་རྗེས་ཤིན་ཏུ་ཆེ་ཚུལ་སྐྱབས་རྗེ་རྡོ་རྗེ་འཆང་མཁྱེན་བརྩེ་རིན་པོ་ཆེས་གསུངས་པ་བཞིན་བློ་ལྡན་དག་གིས་མཁྱེན་གསལ་ལྟར་ལས་འདིར་ངལ་བར་མ་བྱས། སྡེ་དགེ་ས་སྐྱོང་ཁྲི་རབས་བཅུ་པ་དང་བཅུ་གཅིག་པ་སྔ་ཕྱིའི་བཀའ་ལུང་ལྟར་རྟོགས་བརྗོད་དཔལ་གྱི་དུམ་བུ་དང་འགྲེལ་པ་དཔག་བསམ་ལྗོན་འབྲས། བི་མ་སྙིང་ཐིག་དང་ཟབ་མོ་ཡང་ཏིག་གི་དཀར་ཆག་རྣམས་མཛད་དེ་ལུགས་གཉིས་གང་ཐད་ནས་བཀའ་དྲིན་ཁྱད་ཐོན་བསྐྱངས་ཚུལ་མང་དུ་བདོག་ཀྱང་ཡིག་ཚོགས་ལ་འཇིགས་ནས་མ་སྤྲོས། མེ་ཕག་ནས་ཆུ་སྦྲུལ་བར་བགྲང་བྱ་དྲུག་གི་རིང་དབེན་རི་སེངྒེ་གནམ་རྫོང་བདེ་ཆེན་པདྨ་འོད་གླིང་གི་ནགས་ཁྲོད་རིག་འཛིན་གྲུབ་པའི་དགའ་ཚལ་དུ་ཟབ་ལམ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་རྩ་བསྙེན་དུང་ཕྱུར་ལྗགས་བཟླས་ཀྱིས་མཚོན། གཞན་ཡང་ལོ་ཟླ་
མང་དུ་བསྐྱེད་རྫོགས་ཀྱི་ཉམས་བཞེས་ནང་གི་རྣལ་འབྱོར་ལ་གཙོ་བོར་སྦྱོར་བས། རྩ་གསུམ་ལྷག་ལྷ་དུ་མའི་སྒྲུབ་པའི་རྒྱལ་མཚན་བསྒྲེངས་པས་རྟགས་མཚན་བྱུང་ཞིང་ཕྲིན་ལས་བཞི་གང་རྩོམ་ལ་ཐོགས་པ་མེད་པའི་སྤོབས་པ་དགེ་བར་གྱུར་ཏེ་གྲུབ་པའི་རྒྱལ་ས་མཐོན་པོར་གཤེགས། སྐུ་མཚམས་གྲོལ་ནས་ཆུ་སྦྲུལ་ཟླ་བ་ལྔ་པའི་ཚེས་བཅུའི་དམར་འཆམ་རྣམས་ལ་འཆམ་སྣ་ཚང་མ་མང་གྲལ་དུ་སྐུ་འཆམ་དང་། དངོས་གཞིའི་ཉིན་བྱང་འདྲེན་པ་རྣམས་ཀྱི་གྲལ་ལ་འཆམ་རོལ་གདངས་དབྱངས་རྣམས་ཇི་ལྟ་བར་མཛད་པས། བླ་མ་འདིས་ལོ་དྲུག་གི་རིང་ཚེས་བཅུའི་འཆམ་གཟིགས་ཐོས་མེད་པ་ལ། ད་རེས་འདི་འདྲ་ཐོགས་མེད་མཁྱེན་པ་མི་བརྗེད་པའི་གཟུངས་ཐོབ་པ་རེད་མ་གཏོགས། གཞན་རྣམས་ཀྱིས་ལོ་ལྟར་འཆམ་གྲལ་དུ་འགྲོ་ན་ཡང་དུས་ལ་བབ་ཚེ་བློ་གསོ་བཟང་བ་རེ་མ་བྱས་པར་མི་ཤེས་འདུག་ཟེར་ནས་ཀུན་ཡ་མཚན་གྱི་གནས་ལ་བཀོད། རྩོམ་པས་རྒྱལ་བསྟན་གསལ་བར་མཛད་ཚུལ་ཡང་། ཐེག་པ་མཐའ་དག་གི་ལམ་རིམ་མདོ་སྔགས་རྒྱུད་སྡེ་རབ་འབྱམས་ཀྱི་གོ་དོན་དཀའ་གནད་ལྷུག་བཀྲོལ་སྦྲང་ཆུང་རྩི་བཅུད་དང་། གསང་སྙིང་སྤྱི་དོན་སོགས་(ཆོས་ཚན་དྲུག་ཅུ་ལྷག་གི་མཚན་བྱང་བཞུགས་པའི་དཔེ་ཐོ་མུ་ཏིག་ཕྲེང་བར་གཟིགས།)གསུང་འབུམ་པོད་བདུན་ཙམ་ཕྱི་རབས་བསྟན་འགྲོ་ལ་ཕན་པའི་ལེགས་བཤད་གསུང་གི་དགའ་སྟོན་བསྩལ། མདོར་ན་དམ་པ་འདི་ནི། སྒྲུབ་བརྒྱུད་ཤིང་རྟ་བརྒྱད་ཀྱི་བྱུང་བ་བརྗོད་པའི་གཏམ་མདོར་བསྡུས་ལེགས་བཤད་པདྨ་དཀར་པོའི་རྫིང་བུ་ལས། ཕྱི་ཚུལ་དམ་པའི་ཆོས་འདུལ་བ་ནས་གསུངས་པའི་ཁྲིམས་ཉིས་བརྒྱ་ལྔ་བཅུ་རྩ་གསུམ་ལ་ཉེས་ལྟུང་གི་རྙོག་མས་མ་བསླད་པའི་མཁན་ཆེན་འདུལ་བ་འཛིན་པ་ཆེན་པོ། ནང་དུ་རང་དོན་ཡིད་བྱེད་ཀྱི་འཆིང་བ་ལྷོད་པོར་གྱུར་པས་རྟག་པར་གཞན་དོན་ལས་མི་གཡེལ་བའི་རྒྱལ་སྲས་སེམས་དཔའ་ཆེན་པོ༑ གསང་བར་དམ་ཚིག་རྣམ་པར་དག་ཅིང་རིམ་གཉིས་ཀྱི་ལམ་ལ་གཤེགས་པའི་སྔགས་སྤྱོད་རྣལ་འབྱོར་གྱི་དབང་ཕྱུག་ཆེན་པོ། ཡང་གསང་རྫོགས་པ་ཆེན་པོ་ལྷུན་གྲུབ་འོད་གསལ་
གྱི་སྣང་བ་ཚད་ལ་ཕེབས་ཏེ་སངས་རྒྱས་ཀྱི་ཞིང་ཁམས་རྒྱ་མཚོར་མཉམ་པ་ཉིད་དུ་སྤྱོད་ནུས་ཤིང་། དུས་གསུམ་སྒྲིབ་མེད་དུ་གཟིགས་པས་ལྐོག་གྱུར་གྱི་ཆོས་ཀུན་གཏན་ལ་དབབ་པ་ལ་མི་བསྙེང་དམ་ཅན་བྲན་དུ་ཁོལ་བས་ལས་གང་བཅོལ་ཐོགས་མེད་དུ་གྲུབ་ཀྱང་གཞན་ལ་གནོད་པའི་མཐུ་གཏད་དང་ལས་སྦྱོར་མི་མཛད། ལུང་རིགས་ཀྱི་སྤོབས་པ་མཐོ་བས་འཇིགས་མེད་སེངྒེའི་ངང་ཚུལ་བརྟན་ཡང་གཞན་ལུགས་ཀྱི་གྲུབ་མཐར་དཔྱས་གདགས་མི་གནང་། དགོན་ཚང་ཁག་ལྔ་སོགས་ཆེན་པོ་རྣམས་ཀྱིས་ཏི་ཤྲཱི་བཀུར་ཡང་ཁེངས་དྲེགས་དང་སྙེམས་པ་མི་མངའ། ཆོས་བརྒྱད་ཀྱི་འཛིན་པ་དག་པས་ཆེ་ཐབས་དང་སྙན་གྲགས་མི་བསྒྲུབ། གསུང་རབ་ཐམས་ཅད་གདམས་ངག་ཏུ་ཤར་བས་གྲུབ་མཐའི་ཁ་འཛིན་དང་ཕྱོགས་ཞེན་མི་མངའ་བ་སོགས་དམ་པའི་རྣམ་ཐར་བརྗོད་ཀྱིས་མི་ལང་། ཞེས་གསུངས་པ་ལྟར་རོ། །
༼དྲུག་པ།༽ རེ་ཞིག་གཟུགས་སྐུའི་བཀོད་པ་ཆོས་སྐུའི་དབྱིངས་སུ་བསྡུས་ཚུལ་གྱི་མཛད་པ།
༼དྲུག་པ།༽ རེ་ཞིག་གཟུགས་སྐུའི་བཀོད་པ་ཆོས་སྐུའི་དབྱིངས་སུ་བསྡུས་ཚུལ་གྱི་མཛད་པ། འཇམ་མགོན་ཀོང་སྤྲུལ་ཡོན་ཏན་རྒྱ་མཚོའི་རང་རྣམ་ལས། རྗེ་བླ་མ་མཁྱེན་བརྩེ་དབང་པོའི་གཟིམས་ལམ་འོད་གསལ་དུ། མདུན་དེར་པདྨ་སཾ་བྷ་ཝ་ལྟ་བུའི་སྐུ་ཚབ་ཁྱད་ཅན་བཞུགས་ཁྲི་པད་སྡོང་རྒྱབ་ཡོལ་བཞུགས་ཁང་སོགས་ངོ་མཚར་བའི་བཀོད་པ་ཅན་ཞིག་འདུག་པ་བུད་མེད་གཅིག་ལ་འདི་ཅི་རེད་དྲིས་པར། འདི་བཻ་རོ་ཙ་ན་རེད་ཟེར། བཻ་རོ་མ་རེད་པདྨ་སཾ་བྷ་འདྲ་འདུག་གསུངས་པས་དེ་གཉིས་གཅིག་པ་རེད་ཁྱད་པར་ཡོད་མ་རེད་ཟེར་མ་ཐག །ཕག་ཅེས་པ་ལྟ་བུའི་སྒྲ་ཞིག་གྲག་ནས་བཞུགས་ཁང་དེ་སིལ་གྱིས་འཐོར། སྐུ་ཚབ་དེ་ཡོ་བྱུང་བས་འདི་ཆག་ལེ་ཡོད་དགོངས་ཐུགས་ངལ་ཆེ་བས་མནལ་སད་པས་མི་བདེ་བ་ལྷོང་བྱུང་། ཡང་དེ་རྗེས་མནལ་དུ་
སོང་བས་ཞེ་ཆེན་དབོན་སྤྲུལ་རིན་པོ་ཆེ་དེ་མཇལ་འདུག་པར་སྔར་གྱི་མནལ་ལྟས་དེ་ཅི་རེད་ཞུས་པས། ལོ་རྗེས་མར་ཀོང་སྤྲུལ་ལ་སྲི་ཀེག་གི་རྐྱེན་ཆག་ཡོད་པའི་ལྟས་རེད་གསུངས། སྲི་ཅི་རེད་ཞུས་པས། བླ་མའི་དུས་སྲི་ཟེར་བ་དེ་རེད། ཁོང་ཡང་དགུང་ལོ་རེ་བརྒྱད་ཐོག་གྲོངས་པ་ཡིན། ཀོང་སྤྲུལ་ཡང་ད་ཕྱིས་རེ་བརྒྱད་རེད་གསུངས། དེ་ལ་ཅིས་ཕན་ཞུས་པས། ལོ་གཅིག་ཏུ་སུ་དང་མི་འཕྲད་པའི་མཚམས་དམ་པོར་བསྡམས་ནས་བསྙེན་སྒྲུབ་དང་ཁྱད་པར་པདྨ་བཅུད་སྡུད་ཀྱི་ཉམས་ལེན་གནད་དུ་འགྲོ་བ་ཞིག་བྱས་ན་སྐྱོན་མེད་གསུངས་པའི་མནལ་ལམ་བྱུང་། ཞེས་གསུང་ཚན་འདི་ཡང་བི་མ་བཻ་རོ་གཡུ་སྒྲ་གསུམ་གྱི་རྣམ་འཕྲུལ་དུ་ལུང་གིས་བསྔགས་པའི་འཇམ་མགོན་ཡབ་སྲས་གསུམ་ལ་སླར་ཡང་ལྷག་ཏུ་དད་གུས་དྲན་སྐུལ་གྱི་ཚུལ་དུ་སྐབས་འདིར་འབྲེལ་བ་རྒྱུ་མཚན་དུ་བྱས་ཏེ་འདིར་དྲངས་ནས། དེ་ཡང་རྗེ་བླ་མ་འདིས་སྐུ་ཚེ་གང་པོར་གཙུག་ལག་འཆད་ཉན་སྒོམ་སྒྲུབ་ཀྱིས་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་གྱི་མཛད་པ་བསྐྱངས་པས། སྐུ་འདའ་ལ་ཉེ་བའི་དུས་སུ་ཡང་སྙུན་ཁམས་ཀྱིས་གསུང་ཇི་བཞིན་འབྱོན་དཀའ་ན་ཡང་རྒྱལ་བའི་ལུང་རྟོགས་ཀྱི་བསྟན་པ་ལ་སྲོག་ལས་གཅེས་པའི་ཁུར་ཆེན་དང་དུ་བཞེས་ནས་ཀཿཐོག་སི་ཏུ་རིན་པོ་ཆེ་དང་མདོ་སྨྱོན་སྤྲུལ་སྐུ། ཞྭ་སེར་བསྟན་པའི་རྒྱལ་མཚན་འཛིན་པ་ཇོ་བོ་སྤྲུལ་སྐུ་སོགས་ལ་ཟླ་བ་གཉིས་ལྷག་རིང་དབང་ལུང་དང་རིག་གནས་འཆད་སྤེལ་གྱི་མཛད་པ་སྐྱོང་བཞིན་མཐར་དགུང་གྲངས་རེ་བརྒྱད་ཐོག །སྤྲུལ་པའི་སྐུ་མཆོག་རབ་འབྱམས་བཞི་པ་གར་དབང་ཆོས་ཀྱི་རྒྱལ་མཚན་ལ་བསྟན་པ་གཏད་ཅིང་ཐ་མའི་ཞལ་གདམས་བཅས། སྤྱི་ལོ་༡༨༥༤རབ་བྱུང་བཅུ་བཞི་པའི་ཤིང་སྟག་ཧོར་ཟླ་བཅུ་གཉིས་པའི་ཚེས་བཅོ་བརྒྱད་དེ་ཀུན་མཁྱེན་ཆོས་ཀྱི་རྒྱལ་པོ་འོག་མིན་ཆོས་དབྱིངས་སུ་སྐུ་གཤེགས་པའི་དུས་ཚེས་ཁྱད་པར་ཅན་ཉིན་སྐུ་དྲང་པོར་བསྲངས། སྤྱན་ནམ་མཁའ་ལ་ཅེར་གྱིས་གཟིགས། ཞབས་སྐྱིལ་
ཀྲུང་དང་། ཕྱག་མཉམ་བཞག་མཛད་དེ། རླུང་དང་དྲོད་ཐམས་ཅད་གྱེན་དུ་ལྡོག་སྟེ། སྦྲུལ་གྱིས་ཤུན་པ་བརྗེ་བ་ལྟར་འདིར་སྣང་གི་ཞེན་འཛིན་དང་། ཕལ་པ་ལྟར་གནད་གཅོད་ཀྱི་ཟུག་རྔུ་སོགས་ཕྲ་མོ་ཙམ་ཡང་མེད་པར་ངོ་མཚར་བའི་ལྟས་དང་བཅས་གཟུགས་སྐུའི་བཀོད་པ་ཡེ་གྲོལ་ཆོས་སྐུའི་ཀློང་དུ་བསྡུས་ཏེ། འཇའ་འོད་རིང་བསྲེལ་སོགས་ཆོས་སྐུའི་རྒྱལ་ས་ཟིན་པའི་རྟགས་རྣམས་རྒྱུད་ནས་ཇི་སྐད་བསྟན་པ་ལྟར་བྱུང་ཚུལ་ཡང་། ཐུགས་ཀྱི་བུ་ཆེན་སྒྲ་རམས་པ་གྲུབ་དབང་འགྱུར་མེད་རྣམ་རྒྱལ་གྱིས་མཛད་པའི་རྗེ་འདིའི་རྣམ་ཐར་ལས། རྒྱལ་བའི་ཉི་མ་ནུབ་རིར་གཞོལ་བའི་དུས། །ས་ཆེན་རྣམ་དྲུག་གཡོ་བའི་ཉམས་དང་བཅས། །ཆོས་དབྱིངས་གཞོན་ནུ་བུམ་སྐུའི་གཏན་སྲིད་བཟུང་། །རིང་བསྲེལ་གོང་བུར་འདྲིལ་དེར་གསོལ་བ་འདེབས། །ཀ་དག་སྟོན་གནམ་དྭངས་པའི་ནམ་མཁའ་ལ། །སྣ་ཚོགས་འཇའ་གུར་འཁྲིགས་པའི་འོད་ཀློང་ནས། །མེ་ཏོག་ཆར་འབེབས་རོལ་མོའི་སྒྲ་དང་བཅས། །གཞན་སྣང་ཟིལ་གྱིས་གནོན་དེར་གསོལ་བ་འདེབས། །ཞེས་གསུངས་པ་ལྟར་རོ། །སྐྱེ་དགུའི་བསོད་ནམས་ཀྱི་རྟེན་ཟངས་གསེར་ལས་གྲུབ་པའི་སྐུ་གདུང་མཆོད་རྟེན་གསེར་གདུང་ལྷ་ཁང་དུ་བཞུགས་སུ་གསོལ། གདུང་རུས་རྡོ་རྗེ་འཆང་འཇམ་དབྱངས་མཁྱེན་བརྩེ་དབང་པོ་སོགས་དད་འབྱོར་ལྡན་པའི་སློབ་བུ་རྣམས་ཀྱིས་རྟེན་གསར་བཞེངས་ཀྱི་ནང་གཟུངས་སོགས་སུའང་སྤྱན་དྲངས་སོ། །ཞེས་ཞེ་ཆེན་མ་ཧཱ་པཎྜི་ཏའི་རྣམ་ཐར་རགས་བསྡུས་འདི་ནི་ཁུངས་ཐུབ་ཀྱི་ཡིག་ཆ་ལས་བཏུས་ཏེ་མཚམས་སྦྱོར་རྣམས་སུའང་རང་ཚིག་ཉུང་གང་ཐུབ་དང་། ངག་སྒྲོས་ལ་ཁ་གཡར་ཏེ་སྒྲོ་སྐུར་གྱི་དྲི་མས་མ་བསླད་པ་བྱས་ཏེ་སྦྱར་བ་འདི་ཡང་དོན་ཡོད་པར་གྱུར་ཅིག །འདི་ལ་རྨོངས་བློས་བྱས་པའི་ཚིག་དོན་གྱི་ནོངས་ཆ་ཅི་མཆིས་གཟིགས་པ་པོ་ཡོངས་ལ་བཟོད་གསོལ་བཅས་ཐུབ་བསྟན་འགྱུར་མེད་ཤེས་རབ་ནས།