མཐའ་དཔྱད་ཀྱི་འགགས་བསྡུ་བ།
སྐོར་ཚོ་ལྔ་ལས་དང་པོ་ཡང་ཏིའི་སྐོར།
༈ གཉིས་པ་དེའི་མཐའ་དཔྱད་ཀྱི་འགག་བསྡུ་བ་ལ། དེང་དུས་རང་རེ་རྙིང་མ་བར་གྲགས་པ་རྣམས་ཉམས་ལེན་གྱི་གཙོ་བོ་རྫོགས་ཆེན་ལས་མེད་རུང་། དེ་ལ་རྒྱབ་རྟེན་ལུང་གི་ཁུངས་འདྲེན་ཡུལ་རྒྱུད་གཅིག་གི་
མིང་ཡང་ཤེས་དཀའ་བར་སྣང་ཚེ། འདིར་རྫོགས་པ་ཆེན་པོ་ཨ་ཏི་ཡོ་གའི་རྒྱུད་སྡེའི་རིམ་པ་གཙོ་གང་ཆེའི་མིང་ཙམ་བྲིས་ན་སྐོར་ཚོ་ལྔ་ལས།[1] དང་པོ་ཡང་ཏིའི་སྐོར་ལ། ༼ཀ་༽གུ་རུ་ཆོས་ཀྱི་དབང་ཕྱུག་གིས་སྤྱན་དྲངས་པའི་ཡང་ཏི་རྫོགས་པ་ཆེན་པོ་སངས་རྒྱས་མཉམ་སྦྱོར་གྱི་ཆོས་སྡེར་བཞུགས་པའི་མ་རྒྱུད་སྤྲོས་བྲལ་དོན་གསལ་ཆེན་པོའི་རྒྱུད་ལེའུ་བརྒྱ་དང་༼ཏ་༽ཉེར་གསུམ་པ། རྒྱུད་ཐམས་ཅད་ཀྱི་རྩེ་རྒྱལ་ནམ་མཁའ་འབར་བའི་རྒྱུད་ལེའུ་སོ་དགུ་པ། རྒྱུད་ཐམས་ཅད་ཀྱི་སྤྱི་ཕུད་ཉི་ཟླ་བཀོད་པ་ནམ་མཁའི་མཐའ་དང་མཉམ་པའི་རྒྱུད་ལེའུ་བཅོ་ལྔ་པ། ནམ་མཁའི་འབྲུག་སྒྲོག་ཐོག་བབ་ཀློང་འདུས་སྤྱི་རྒྱལ་རྒྱ་མདུད་ཀྱི་རྒྱུད་ལེའུ་བཅུ་པ། ལྟ་བ་ལ་ཤན་རིན་ཆེན་སྒྲོན་མ་ལེའུ་བཅུ་བཞི་པ། རྩ་རླུང་ཐིག་ལེའི་རྒྱུད་ལེའུ་བདུན། འཇམ་དཔལ་འདུས་པའི་རྒྱུད་ལས་བཏུས་པ་རྩ་རླུང་གི་རྩ་བ་ཞེས་པ་རྫོགས་སོའི་མཐའ་ཅན། སྲོག་གི་འཁོར་ལོའི་རྒྱུད། བརྒྱུད་པ་གསུམ་པ་ལྟ་བ་ལ་ཐལ་གྱི་རྒྱུད། སྣང་བྱེད་སྤུ་གྲིའི་རྒྱུད། ཀུན་ཏུ་བཟང་པོ་སྲོག་གི་ཐིགས་པ་འབྲས་བུ་ཡེ་གྲོལ་ཆེན་པོའི་རྒྱུད། ཐིག་ལེ་མཐོང་བརྡོལ་ཡང་ཏི་ནག་པོའི་རྒྱུད། རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོའི་ཀློང་གསལ་ཀྱི་རྒྱུད་ལེའུ་༼ཏ་༽ཉེར་བཞི་པ། རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལེའུ་ཉེར་གཅིག་པ། དེའི་རྒྱུད་ཕྱི་མ་ལེའུ་ཉེར་བརྒྱད་པ། རྡོ་རྗེ་སེམས་
དཔའ་ཡི་གེ་བརྒྱ་པ་ཐུགས་ཕྲིན་ལས་ཐམས་ཅད་ཀྱི་དམ་ཚིག་གི་རྒྱུད་ལེའུ་ཉེར་བདུན། རྫོགས་པ་ཆེན་པོ་ངེས་དོན་འདུས་པ་ལེའུ་བརྒྱད་ཅུ་གཅིག་པ། རྫོགས་པ་ཆེན་པོ་རིན་ཆེན་འཁོར་བ་རྩད་གཅོད་ཀྱི་རྒྱུད་ལེའུ་བདུན་པ། རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་རིག་པའི་རྒྱུད་ལེའུ་ཉེར་བཞི། རྫོགས་པ་ཆེན་པོ་ལྟ་བའི་ཡང་སྙིང་སངས་རྒྱས་ཐམས་ཅད་ཀྱི་དགོངས་པ་ནམ་མཁའ་ཀློང་ཡངས་ཀྱི་རྒྱུད་ལེའུ་ང་གསུམ་པ། རྫོགས་པ་ཆེན་པོ་སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན་རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལེའུ་དྲུག་ཅུ་རེ་ལྔ་པ། རྫོགས་པ་ཆེན་པོ་ཤིན་ཏུ་རྣལ་འབྱོར་སངས་རྒྱས་ཐམས་ཅད་འབྱུང་བའི་རྒྱུད་ཡེ་ཤེས་ཀྱི་སྐུ་དོན་འདུས་རིག་པའི་གསུང་ལེའུ་དྲུག་ཅུ་རྩ་བདུན། རྫོགས་པ་ཆེན་པོ་ངེས་དོན་འདུས་པའི་ཡང་སྙིང་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་རིན་པོ་ཆེ་གསེར་གྱི་ཡང་ཞུན་ཞེས་བྱ་བ་ལེའུ་སོ་བདུན། རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལེའུ་ཉིས་བརྒྱ་བཅུ་གཉིས་༼ཁ་༽པ། རྫོགས་པ་ཆེན་པོ་ངེས་དོན་རིག་པའི་གསུང་རང་བྱུང་བདེ་བའི་འཁོར་ལོ་ལེའུ་སོ་གསུམ་པ། རྫོགས་པ་ཆེན་པོ་མ་རིག་མུན་པ་རབ་ཏུ་སེལ་བར་བྱེད་པ་ལྟ་བ་ཡེ་ཤེས་གཉིས་ནས་རྫོགས་པའི་རྒྱུད་ལེའུ་ཞེ་གཅིག་པ། རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོའི་རྒྱུད་ལེའུ་ཉེར་བཞི། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལེའུ་བཅུ་གཉིས་པ། དེའི་རྒྱུད་ཕྱི་
མ་ལེའུ་བཞི། དེའི་ཕྱི་མའི་ཡང་ཕྱི་མ་ལེའུ་བཞི། ཡེ་ཤེས་འཁོར་ལོའི་རྒྱུད་ལེའུ་བདུན་པ། རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལེའུ་བཅུ་དགུ་པ། འཇམ་དཔལ་འདུས་པའི་རྒྱུད་ལེའུ་བཅུ་དྲུག་པ། འཕགས་པ་སྤྱན་རས་གཟིགས་ཏིང་འཛིན་རྩེ་གཅིག་པའི་རྒྱུད་ལེའུ་བཅུ་གསུམ་པ་རྣམས་སོ། །
རྫོགས་པ་ཆེན་པོ་སྤྱི་ཏིའི་སྐོར།
[2]གཉིས་པ་རྫོགས་པ་ཆེན་པོ་སྤྱི་ཏིའི་སྐོར་ལ། སྣང་སྲིད་ཁ་སྦྱོར་བདུད་རྩིའི་བཅུད་ཐིགས་འཁོར་བ་ཐོག་མཐའ་གཅོད་པའི་རྒྱུད་ལེའུ་བརྒྱ་རྩ་བརྒྱད་པ། རིན་པོ་ཆེ་བཅུད་ཀྱི་ཡང་སྙིང་ཐོག་ཐ་དྲས་ཐག་གཅོད་པ་སྤྲོས་གཅོད་རྩ་བའི་རྒྱུད་ལེའུ་བཅུ་གཅིག་པ། སྤྲོས་པ་གཅོད་པ་སྡེ་ལྔའི་རྒྱུད། རིན་པོ་ཆེ་བདུད་རྩི་བཅུད་ཐིགས་ཀྱི་རྒྱུད་ལེའུ་བཅོ་ལྔ་པ། རིན་པོ་ཆེ་སྣང་གསལ་སྤུ་གྲི་འབར་བ་འཁྲུལ་སྣང་ཐམས་ཅད་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལེའུ་སོ་ལྔ་པ། རིན་པོ་ཆེ་སྤྱི་གནད་སྐྱོན་སེལ་ཐིག་ལེ་ཀུན་འདུས་ཀྱི་རྒྱུད་ལེའུ་བཅུ་པ། གཏེར་སྙིང་རིན་པོ་ཆེ་སྤུངས་པའི་རྒྱུད་ལེའུ་དགུ་པ། ཐིག་ལེ་ཡེ་ཤེས་བཅུད་སྤུངས་སྒྲོན་མ་འོད་འབར་བའི་རྒྱུད་ལེའུ་བཅུ་བདུན་པ། བདུད་རྩི་བཅུད་ཐིགས་སྒྲོན་མ་བརྩེགས་པའི་རྒྱུད་ལེའུ་ཉེར་གཉིས་པ། སྙིང་པོ་བཅུད་སྤུངས་ནམ་མཁའ་ཀློང་ཡངས་ཀྱི་རྒྱུད་ལེའུ་ཉི་ཤུ་པ། ཐུགས་ཀྱི་ཡང་སྙིང་དགོངས་པའི་བཅུད་འདུས་པ་བཀའ་བརྒྱུད་རྣམས་ཀྱི་གསང་དོན་བཅུད་དྲིལ་བ་མ་རིག་མུན་སེལ་ཉི་ཟླ་འབར་བའི་རྒྱུད་ལེའུ་བཅུ་གསུམ་པ། རི་བོ་བརྩེགས་
པའི་རྒྱུད་ལེའུ་༼ག་༽ཉེར་གཅིག་པ། དྲི་མེད་ཀ་དག་གི་རྒྱུད་རིན་པོ་ཆེ་གསལ་བ་ཆེན་པོ་ཞེས་བྱ་བ་ལེའུ་བཅུ་གཉིས། རྒྱུད་ཐམས་ཅད་ཀྱི་རྒྱལ་པོ་ཉི་ཟླའི་སྙིང་པོ་འོད་འབར་བ་བདུད་རྩིའི་རྒྱ་མཚོ་འཁྱིལ་བའི་རྒྱུད་ལེའུ་གྱ་གཅིག་པ། སྐྱེ་མེད་ཀ་དག་ཟང་ཀའི་རྒྱུད་ལེའུ་བཅུ་པ་རྣམས་སོ། །
མན་ངག་སྡེའི་སྐོར།
[3]གསུམ་པ་མན་ངག་སྡེའི་སྐོར་ལ། ཤིན་ཏུ་ཟབ་པ་ཡང་གསང་བླ་ན་མེད་པ། གསང་སྐོར། ཕྱི་སྐོར། ནང་སྐོར་གྱི་མན་ངག་དང་བཞི་ལས། དང་པོ་ཡང་གསང་སྐོར་ལ། སྐུ་ཐམས་ཅད་ཀྱི་སྣང་བ་སྟོན་པ་དབང་རྫོགས་པ་རང་བྱུང་ཆེན་པོའི་ལེའུ་ཉེར་ལྔ་པ། རྫོགས་པ་རང་བྱུང་གི་རྒྱུད་དུམ་བུ་བཅུ་གཉིས་པ་རྫོགས་སོའི་མཐའ་ཅན། ཡི་གེ་མེད་པའི་རྒྱུད་ཆེན་པོ་ཞེས་བྱ་བ་རིན་པོ་ཆེ་རྒྱལ་མཚན་རྒྱུད། རྒྱལ་པོའི་གདུང་རྒྱུད། ལྟ་བ་ནམ་མཁའ་དང་མཉམ་པའི་རྒྱུད་ཆེན་པོ་ལེའུ་དྲུག་པ། རིག་པ་རང་ཤར་ཆེན་པོའི་རྒྱུད་ལེའུ་བརྒྱད་ཅུ་གྱ་དྲུག །རིག་པ་རང་གྲོལ་ཆེན་པོའི་རྒྱུད་ལེའུ་བཅུ་པ། རིན་ཆེན་སྤུངས་པ་ཡོན་ཏན་ཆེན་པོ་སྟོན་པ་རྒྱུད་ཀྱི་རྒྱལ་པོ་ལེའུ་ལྔ་པ། འབུམ་ཕྲག་དྲུག་ཅུ་རྩ་བཞིའི་བཅུད་ཕྱུང་བ་རྫོགས་སོའི་མཐའ་ཅན། སྐུ་གདུང་འབར་བ་ཆེན་པོའི་རྒྱུད་ལེའུ་གསུམ་པ། སྒྲ་ཐལ་འགྱུར་ཆེན་པོའི་རྒྱུད་ལེའུ་དྲུག་པ། རྫོགས་པ་ཆེན་པོ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་ལས་ཁྱད་པར་དུ་བཀོད་པ་རྫོགས་སོའི་མཐའ་ཅན། བཀྲ་ཤིས་མཛེས་ལྡན་ཆེན་པོའི་རྒྱུད་ལེའུ་༼ང་༽ལྔ་པ།
རྡོ་རྗེ་སེམས་དཔའ་སྙིང་གི་མེ་ལོང་ལེའུ་བརྒྱད་པ། ཀུན་ཏུ་བཟང་པོ་ཐུགས་ཀྱི་མེ་ལོང་གི་རྒྱུད་ལེའུ་བཞི་པ། ངོ་སྤྲོད་རིན་པོ་ཆེ་སྤྲས་པ་ཞིང་ཁམས་བསྟན་པའི་རྒྱུད་ལེའུ་གསུམ་པ། མུ་ཏིག་རིན་པོ་ཆེ་ཕྲེང་རྒྱུད་ལེའུ་བརྒྱད་པ། ཀུན་ཏུ་བཟང་པོ་ཀློང་དྲུག་གི་རྒྱུད་སྐབས་དྲུག་པ། གསེར་གྱི་མེ་ཏོག་མཛེས་པ་རིན་པོ་ཆེ་སྒྲོན་མ་འབར་བའི་རྒྱུད་ལེའུ་བཞི་པ། ཉི་མ་དང་ཟླ་བ་ཁ་སྦྱོར་བ་ཆེན་པོ་གསང་བའི་ལེའུ་བཞི་པ། སེངྒེ་རྩལ་རྫོགས་ཆེན་པོའི་རྒྱུད་ལེའུ་བཅུ་གསུམ་པ། ནོར་བུ་ཕྲ་བཀོད་རང་གི་དོན་ཐམས་ཅད་གསལ་བར་བྱེད་པའི་རྒྱུད་ལེའུ་བཅུ་བཞི་པ། རྒྱུད་ཀྱི་ཁོག་སྙིང་སྡེབ་པ་གསལ་བའི་ལྡེའུ་མིག་ཅེས་བྱ་བ་གསང་བའི་ཐེམ་རྫོགས་སོའི་མཐའ་ཅན། གཉིས་པ་གསང་སྐོར་ལ། རྒྱུད་ལུང་མན་ངག་ཐམས་ཅད་ཀྱི་དོན་འགྲེལ་ཐིག་ལེ་ཀུན་གསལ་ཆེན་པོའི་རྒྱུད་ལེའུ་གོ་བདུན་པ། ཡེ་ཤེས་མར་མེའི་རྒྱུད་ལེའུ་གསུམ་པ། སངས་རྒྱས་རྡོ་རྗེ་སེམས་དཔའི་དགོངས་པ་ཚིག་གསུམ་པའི་རྒྱུད་ལེའུ་གསུམ་པ། ཐིག་ལེ་ཀུན་འདུས་ཆེན་པོའི་རྒྱུད་ལེའུ་བཅུ་གཉིས་པ། སྐུའི་རྒྱུད་པདྨ་འཁྱིལ་བ་ལེའུ་ཉེར་གཅིག་པ། རྡོ་རྗེ་རྩེ་མོ་འདུས་པའི་རྒྱུད་ཅེས་ལེའུ་དང་པོའི་མཐའ་ཅན། ཡང་ལེའུ་གཉིས་པའི་མཐའ་ཅན། བྱང་ཆུབ་སེམས་ཀྱི་མུན་པའི་སྒྲོན་མ་ཞེས་བྱ་བ་ལེའུ་གསུམ་པའི་མཐའ་ཅན། རིན་པོ་ཆེ་དྲ་བའི་མཛོད་ལེའུ་བཞི་པའི་མཐའ་ཅན། རིན་པོ་ཆེ་སྤྱི་བཅིངས་ཀྱི་མན་ངག་ལེའུ་ལྔ་པའི་མཐའ་ཅན། རྡོ་རྗེ་སེམས་དཔའ་རིན་པོ་ཆེའི་ཟ་མ་ཏོག་སྤྲས་པའི་མན་ངག་
ལེའུ་དྲུག་པའི་མཐའ་ཅན། བྱང་ཆུབ་སེམས་དཔའ་ཐུགས་ཀྱི་ཉི་མ་ཞེས་བྱ་བ་ལེའུ་བདུན་པའི་མཐའ་ཅན། སངས་རྒྱས་ཐམས་ཅད་ཀྱི་རྒྱུད་ལྔ་གདམས་པར་བཞག་པ་ཞེས་ལེའུ་བཅུ་པའི་མཐའ་ཅན། ཡེ་ཤེས་བླ་མ་ཆེན་པོའི་རྒྱུད་ལེའུ་བདུན་པ། རྫོགས་པ་ཆེན་པོ་བྱང་ཆུབ་ཀྱི་སེམས་རྒྱལ་མཚན་རྩེ་མོའི་རྒྱུད་ལེའུ་ལྔ་པ། རྫོགས་པ་ཆེན་པོ་ཐིག་ལེ་གསང་བ་དེ་ཁོ་ན་ཉིད་ངེས་པའི་རྒྱུད་ལེའུ་གྲངས་མེད་པ། རྡོ་རྗེ་སྲིན་པོ་རྣོ་བ་རྡོ་རྗེའི་མཆུ་ཅན་གྱི་རྒྱུད་ཅེས་བྱ་བ་རྒྱུད་ཐམས་ཅད་ཀྱི་སྙིང་པོ་འཁོར་བ་དོང་སྤྲུགས་ཆེན་པོའི་རྒྱུད་ལེའུ་བདུན་པ་རྣམས་སོ། གསུམ་པ་ཕྱི་སྐོར་དང་བཞི་པ་ནང་སྐོར་གྱི་མན་ངག་སྡེ་ལ། རིན་པོ་ཆེ་སྲིད་པ་བར་མ་དོ་སྣང་བའི་རྒྱུད་ལེའུ་བཅུ་དྲུག་པ། ལྷ་མིན་གཡུལ་ངོ་བཟློག་པའི་རྒྱུད་ལེའུ་སུམ་ཅུ་པ། རོ་སྲེག་ཐལ་བ་ནག་པོའི་རྒྱུད་ལེའུ་བཅུ་དྲུག་པ། ལྷ་རྒྱུད་རིན་ཆེན་སྤུངས་པ་༼ཅ༽ལེའུ་སོ་གསུམ་པ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་བཤད་རྒྱུད་རིན་ཆེན་ཕྲེང་བ་ལེའུ་དགུ་པ། འཇམ་དཔལ་དགོངས་པ་འདུས་པ་གསང་སྔགས་ཆེན་པོའི་རྒྱུད་ལེའུ་དྲུག་པ། དུར་ཁྲོད་ཕུང་པོ་འབར་བ་མན་ངག་གི་རྒྱུད་ལེའུ་བཅུ་གཅིག་པ། རྡོ་རྗེ་ཡང་རྩེའི་རྒྱུད་ལེའུ་ཉེར་གཅིག་པ། རྡོ་རྗེ་ཡང་ཏོག་གི་རྒྱུད་ལེའུ་བཅོ་ལྔ་པ། སྙིང་པོ་རྡོ་རྗེ་རིན་པོ་ཆེ་ཐམས་ཅད་གཅིག་པའི་རྒྱུད་ལེའུ་ཉེར་གསུམ་པ། དམ་ཚིག་བཀོད་པ་ས་གཞིའི་རྒྱུད་རིན་པོ་ཆེ་སྤུངས་པའི་རྒྱན་ལེའུ་གསུམ་པ། འབྱུང་པོ་ཀུན་འདུལ་ཀྱི་རྒྱུད་ལེའུ་སོ་གཉིས་པ། ལྷ་རྒྱུད་དབང་རིན་པོ་ཆེ་འཁོར་ལོ་ལེའུ་བཅུ་གསུམ་པ། རྡོ་རྗེ་
གསང་བ་ཆེན་པོའི་སྐུ་རིན་པོ་ཆེ་དབྱིག་གི་སྒྲོན་མ་ཤེས་རབ་ཆེན་པོའི་མདོ་རྣམས་སོ། །
ཀློང་སྡེའི་སྐོར།
[4] བཞི་པ་ཀློང་སྡེའི་སྐོར་ལ། ཀློང་ཆེན་རབ་འབྱམས་རྒྱལ་པོའི་རྒྱུད་ལེའུ་བཞི་བཅུ་རྩ་བརྒྱད་པ། ཀུན་ཏུ་བཟང་པོ་ནམ་མཁའ་ཆེ་རྩ་བ་བསྡུས་པའི་རྒྱུད་ལེའུ་བཅུ་བདུན་པ། བྱང་ཆུབ་ཀྱི་སེམས་ཀུན་ཏུ་བཟང་པོ་རིག་པ་རང་རྩལ་ཤར་བའི་རྒྱུད་ལེའུ་བཅུ་བཞི་པ། རིན་པོ་ཆེ་གདམས་ངག་སྣ་ཚོགས་འཁོར་ལོའི་རྒྱུད་ཕྱི་མ་ལེའུ་བཅུ་དྲུག་པ། རིན་པོ་ཆེ་འཕགས་ལམ་བཀོད་པའི་རྒྱུད་ལེའུ་བཅུ་གཉིས་པ། རྡོ་རྗེ་སེམས་དཔའ་ནམ་མཁའི་མཐའ་དང་མཉམ་པའི་རྒྱུད་ཆེན་པོ་ལེའུ་ཉེར་བདུན་པ། ཡེ་ཤེས་གསང་བའི་སྒྲོན་མ་རིན་པོ་ཆེ་མན་ངག་གི་རྒྱུད་ལེའུ་བཅུ་དྲུག་པ། རིན་པོ་ཆེ་འཁོར་ལོའི་རྒྱུད་ལེའུ་བརྒྱད་པ་ཡེ་ཤེས་གསང་བའི་རྒྱུད་ལེའུ་བཅུ་གཉིས་པ། བྱང་ཆུབ་ཀྱི་སེམས་རྫོགས་པའི་རྒྱུད་ལེའུ་བཅུ་པ། རྫོགས་པ་ཆེན་པོ་བྱང་ཆུབ་ཀྱི་སེམས་ཀུན་ལ་འཇུག་པ་རྣམ་དག་སྟོན་པའི་རྒྱུད་ལེའུ་ལྔ་པ། བྱང་ཆུབ་ཀྱི་སེམས་རྡོ་རྗེ་འོད་འཕྲོའི་རྒྱུད་ལེའུ་བཅུ་གཉིས་པ་རྣམས་སོ། །
སེམས་སྡེའི་སྐོར།
[5]ལྔ་པ་སེམས་སྡེའི་སྐོར་ལ། ཀུན་བྱེད་རྒྱལ་པོའི་སྐོར་དང་། སེམས་སྨད་བཅོ་བརྒྱད་ཀྱི་སྐོར་དང་། དེར་མ་འདུས་པ་སེམས་སྡེའི་སྤྱི་སྐོར་དང་གསུམ་མོ། །
དང་པོ་ནི། ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལེའུ་ལྔ་བཅུ་རྩ་བདུན་པ། དེའི་རྒྱུད་ཕྱི་མ་གོང་གི་འཕྲོས་ལེའུ་ང་བརྒྱད་ནས་བརྒྱད་ཅུ་རྩ་བཞིའི་བར་ཆོས་ཐམས་ཅད་རྫོགས་པ་བྱང་ཆུབ་སེམས་སུ་འདུས་པའི་མདོ་ལེའུ་བཞི་པ་དེའི་དོན་འགྲེལ་རྫོགས་སོའི་མཐའ་ཅན། རྣམ་པར་བགྲང་བའི་མདོ་ལེའུ་གསུམ་པ། ཕུན་སུམ་ཚོགས་པའི་མདོ་ལེའུ་གཅིག་པ་དོན་འགྲེལ་རྫོགས་སོའི་མཐའ་ཅན། བྱེ་བྲག་འབྱེད་པའི་མདོ་ལེའུ་གཅིག་པ་དོན་འགྲེལ་རྫོགས་སོའི་མཐའ་ཅན། ཁྱད་པར་འཕགས་པའི་མདོ་རྩ་བ་དང་དོན་འགྲེལ་རྫོགས་སོའི་མཐའ་ཅན། གོལ་སྒྲིབ་བསྟན་པའི་མདོ་རྩ་བ་དང་དོན་འགྲེལ་རྫོགས་སོའི་མཐའ་ཅན། གཏན་ལ་འབེབས་པའི་མདོ་རྩ་བ་དང་དོན་འགྲེལ་རྫོགས་སོའི་མཐའ་ཅན། ངེས་པར་བསྟན་པའི་མདོ་རྩ་བ་དང་དོན་འགྲེལ། ཐེག་པ་ཡས་འབུབས་ཀྱི་མདོ་དང་དོན་འགྲེལ་དགུ་པ་རྫོགས་སོའི་མཐའ་ཅན། ཡོངས་སུ་རྫོགས་པའི་མདོ་རྩ་བ་དང་དོན་འགྲེལ་བཅུ་པ་རྫོགས་སོའི་མཐའ་ཅན། དོན་འགྲེལ་ལྔ་པ་རྫོགས་སོའི་མཐའ་ཅན། ཡོངས་སུ་གཏད་པའི་ལེའུ་མདོ་འགྲེལ་ཆེན་པོ་བཅུ་པ་རྫོགས་སོའི་མཐའ་ཅན། ཆོས་ཐམས་ཅད་བྱང་ཆུབ་ཀྱི་སེམས་རྫོགས་པ་ཆེན་པོ་འཁོར་བ་རྩད་ནས་གཅོད་པ་ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལེའུ་བཅུ་གསུམ་པ། ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་འཁོར་བ་རྩད་ནས་གཅོད་པ་རྒྱ་མཚོ་དང་མཉམ་པ་རྙོག་པ་མེད་པའི་རྒྱུད་ལེའུ་བདུན་པ། ཆོས་ཐམས་ཅད་བྱང་ཆུབ་ཀྱི་སེམས་རྫོགས་པ་ཆེན་པོ་འཁོར་བ་རྩད་ནས་གཅོད་པ་ཉི་ཟླ་
དང་མཉམ་པ་དྲི་མ་མེད་པའི་རྒྱུད་ལེའུ་བཅུ་གཅིག་པ། གཅོད་པ་ཉི་ཟླ་དང་མཉམ་པའི་རྒྱུད་ཀྱི་དཀའ་འགྲེལ་སློབ་དཔོན་ཆེན་པོ་དགའ་རབ་རྡོ་རྗེས་མཛད་པ་ཆོས་ཐམས་ཅད་བྱང་ཆུབ་ཀྱི་སེམས་རྫོགས་པ་ཆེན་པོ་འཁོར་བ་རྩད་ནས་གཅོད་པ་རིན་པོ་ཆེ་དང་མཉམ་པ་སྐྱེ་བ་མེད་པའི་རྒྱུད་ལེའུ་བཅུ་བཞི་པ་རྣམས་སོ། །གཉིས་པ་སེམས་སྨད་བཅོ་བརྒྱད་ལ། བྱང་ཆུབ་སེམས་རྩལ་ཆེན་གྱི་༼སྔ༽རྒྱུད་ལེའུ་དགུ། ཁྱུང་ཆེན་གྱི་༼སྔ༽རྒྱུད་ལེའུ་བཅུ་པ། རྡོ་རྗེ་སེམས་༼སྔ༽དཔའ་ནམ་མཁའ་ཆེ་རྒྱས་པ་ཡི་གེ་མེད་པའི་རྒྱུད་ལེའུ་བརྒྱད་པ། བདེ་བ་རབ་༼ཕྱི༽འབྱམས། ནམ་མཁའི་རྒྱལ་༼ཕྱི༽པོ། རྩེ་མོ་བྱུང་༼ཕྱི༽རྒྱལ། སྲོག་གི་༼ཕྱི༽འཁོར་ལོ། བྱང་ཆུབ་ཀྱི་སེམས་༼ཕྱི༽བདེ་བའི་མྱུ་གུ། བྱང་ཆུབ་ཀྱི་སེམས་བདེ་བ་༼ཕྱི༽ཕྲ་བཀོད། བྱང་ཆུབ་ཀྱི་སེམས་རྫོགས་པ་༼ཕྱི༽སྤྱི་གཅོད་རྣམས་ལེའུ་གྲངས་མེད་པ་རྫོགས་སོའི་མཐའ་ཅན་རྣམས་སོ། །གསུམ་པ་སེམས་སྡེ་སྤྱིའི་སྐོར་ལ། རྒྱུད་ཐམས་ཅད་ཀྱི་རྒྱལ་པོ་གསེར་གྱི་རུས་སྦལ་རྡོ་རྗེ་ཐེག་པ་རྩ་བའི་རྒྱུད་ལེའུ་སུམ་ཅུ་པ། བྱང་ཆུབ་ཀྱི་སེམས་བསྒོམ་པ་ཡི་གེ་མེད་པ་སྐབས་རྫོགས་སོའི་མཐའ་ཅན། བྱང་ཆུབ་ཀྱི་སེམས་བསྒོམ་པ་ཡི་གེ་མེད་པའི་རྒྱུད་བསྡུ་བ་གསུངས་པའི་སྐབས་རྫོགས་སོའི་མཐའ་ཅན། བྱང་ཆུབ་ཀྱི་སེམས་རྫོགས་པ་ཆེན་པོ་ཡེ་ཤེས་བདུན་འབྱུང་བའི་རྒྱུད་ལེའུ་བརྒྱད་པ། རྫོགས་པ་ཆེན་པོ་ཆོས་ཉིད་བྱང་ཆུབ་ཀྱི་སེམས་བཀྲ་ཤིས་མི་འགྱུར་བ་གསལ་བར་གནས་པའི་རྒྱུད་ལེའུ་བཅུ་པ། བྱང་ཆུབ་སེམས་ཀྱི་མན་ངག་རིན་པོ་ཆེའི་
ཕྲེང་བ་བང་མཛོད་འཕྲུལ་གྱི་ལྡེའུ་མིག་ལེའུ་དྲུག་ཅུ་རེ་གཅིག་པ་རྫོགས་སོའི་མཐའ་ཅན། ཡང་འབྱེད་འཕྲུལ་གྱི་ལྡེའུ་མིག་ལེའུ་བཅུ་བཞི་པ་ཚིག་ལེའུར་བྱས་པ་རྫོགས་སོའི་མཐའ་ཅན། བང་མཛོད་འཕྲུལ་གྱི་མེ་ལོང་ལེའུ་བཅུ་པ། འཁོར་ལོ་རྡོ་རྗེའི་རྒྱུད་ལེའུ་བཞི་པ། བྱང་ཆུབ་ཀྱི་སེམས་རིན་པོ་ཆེ་འཁོར་ལོའི་ལེའུ་བཅུ་པ། རྡོ་རྗེ་སེམས་དཔའ་ནམ་མཁའ་ཆེ་རྒྱས་པ་ཞེས་བྱ་བ་རྣལ་འབྱོར་མའི་རྒྱུད་ལེའུ་བཅོ་ལྔ་པ། རིན་པོ་ཆེ་འཁོར་ལོ་བརྩེགས་པའི་རྒྱུད་ལེའུ་བཅུ་གསུམ་པ། བྱང་ཆུབ་ཀྱི་སེམས་ཉ་མོ་བག་ལ་ཉལ་གྱི་རྒྱུད་ལེའུ་དྲུག་པ། རིན་པོ་ཆེ་སྣང་བྱེད་ཀྱི་རྒྱུད་ལེའུ་བཅུ་དགུ་པ། བྱང་ཆུབ་ཀྱི་སེམས་རྨ་བྱ་མཇིང་བསྣོལ་གྱི་རྒྱུད་ལེའུ་དྲུག་པ། ཆོས་ཆེན་པོ་རྨད་དུ་བྱུང་བ་ལེའུ་ཉེར་གཉིས། རྫོགས་པ་ཆེན་པོ་ཆོས་ཉིད་བྱང་ཆུབ་ཀྱི་སེམས་རིན་པོ་ཆེ་བཀོད་པ་རྣམ་པར་དབྱེ་བའི་རྒྱུད་ལེའུ་ལྔ། བྱང་ཆུབ་ཀྱི་སེམས་རྨད་དུ་བྱུང་བ་ལེའུ་སུམ་ཅུ་རྩ་དགུ། བྱང་ཆུབ་ཀྱི་སེམས་རྨད་དུ་བྱུང་བའི་རྒྱུད་ལེའུ་བཅུ་གཅིག་པ། བཀྲ་ཤིས་པའི་དཔལ་རིག་པའི་ཁུ་བྱུག་གི་༼སྔ༽རྒྱུད་ལེའུ་བདུན་པ། རྫོགས་པ་ཆེན་པོ་ལྟ་བ་ཡེ་ཤེས་གཏིང་རྫོགས་ཀྱི་རྒྱུད་ལེའུ་ཉི་ཤུ་རྩ་བདུན་པ། རྡོ་རྗེ་སེམས་དཔའ་ནམ་མཁའ་ཆེ་གསང་བའི་སྙིང་པོ་རྣལ་མ་དོན་གྱི་རྒྱུད་ལེའུ་བཅུ་གཉིས་པ། བྱང་ཆུབ་ཀྱི་སེམས་བསྒོམ་པའི་རྒྱུད་ལེའུ་བཅུ་གཅིག་པ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པ་གསང་སྔགས་ལམ་མཆོག་འདུས་པའི་རྒྱུད་ལེའུ་ལྔ་པ། བྱང་ཆུབ་སེམས་བསྒོམ་པ་རྡོ་ལ་གསེར་ཞུན་༼སྔ༽ལེའུ་མེད་པ། ཐུགས་རྒྱུད་རི་པོ་ཆེ་སྤུངས་པའི་རྒྱུད་ལེའུ་ལྔ་པ།
སེམས་ལུང་ཆེན་མོའི་མདོ་གསང་བ་སྤྱི་རྒྱུད་ལེའུ་ཉེར་ལྔ་པ། རིན་པོ་ཆེ་རྒྱས་པའི་རྒྱུད་ལེའུ་དྲུག་ཅུ་རེ་གཅིག་པ་རྣམས་སོ། །དེ་ལྟར་བཀོད་པ་རྣམས་ཆོས་རྒྱལ་ཆེན་པོ་ས་སྐྱོང་སྡེ་དགེའི་རྒྱལ་ཁབ་ཏུ་རྙིང་མ་རྒྱུད་འབུམ་པུསྟི་ཉེར་དྲུག་པར་དུ་བསྐྲུན་པའི་དཀར་ཆག་བདག་གི་འདྲེན་མཆོག་དམ་པ་མཁས་དང་གྲུབ་པ་གཉིས་ལྡན་རྗེ་ཐམས་ཅད་མཁྱེན་པ་ཤར་རྒྱལ་བ་ཀཿ ཐོག་རྡོ་རྗེའི་གདན་གྱི་ཁྲི་ལ་ཞབས་པད་མི་ཤིགས་རྡོ་རྗེའི་རང་བཞིན་དུ་རྟག་པར་བརླིངས་པ་དོན་གྱི་སླད་དུ་མཚན་ནས་སྨོས་ན་མཆོག་སྤྲུལ་འགྱུར་མེད་ཚེ་དབང་མཆོག་གྲུབ་ངེས་དོན་བསྟན་འཕེལ་དཔལ་བཟང་པོས་མཛད་པ་ལས་རྫོགས་ཆེན་སྐོར་རགས་པ་ཙམ་བཏུས་པ་༼ཁ་སྐོང་སྐོར་མ་བྲིས། མཆན།༽སྟེ། གཞན་དུ་ཞིབ་པར་མཚན་ཙམ་ཡང་མཐོང་ཐོས་སུ་མ་གྱུར་པ་ལ་ཚད་མེད་ཕྱིར་བྲིར་ག་ལ་ལང་ཞིང་། ཁྱད་པར་རྒྱུད་རྣམས་སྡེ་གསུམ་གྱི་རྣམ་འབྱེད་ཀྱིས་སོ་སོར་དབྱེ་ནུས་པ་ནི་ཐམས་ཅད་མཁྱེན་པའི་སྤྱོད་ཡུལ་ལོ། །དེ་ཡང་སེམས་སྡེའི་རྒྱུད་བོད་དུ་འགྱུར་བ་ལ་སེམས་སྨད་བཅོ་བརྒྱད་དུ་གྲགས་པའི་སྔ་འགྱུར་ལྔ་ནི། རིག་པའི་ཁུ་བྱུག །རྩལ་ཆེན་སྤྲུགས་པ། ཁྱུང་ཆེན་ལྡིང་པ། རྡོ་ལ་གསེར་ཞུན། མི་ནུབ་པའི་རྒྱལ་མཚན་ནམ་མཁའི་ཆེའོ། །དེ་དག་བཻ་རོ་ཙ་ནས་བསྒྱུར་པས་སྔ་འགྱུར་དུ་གྲགས། ཕྱི་འགྱུར་བཅུ་གསུམ་ནི། རྩེ་མོ་བྱུང་རྒྱལ། ནམ་མཁའི་རྒྱལ་པོ། བདེ་བ་འཕྲ་བཀོད། རྫོགས་པ་སྤྱི་ཆིངས། བྱང་ཆུབ་སེམས་ཏིག །བདེ་བ་རབ་འབྱམས། སྲོག་
གི་འཁོར་ལོ། ཐིག་ལེ་དྲུག་པ། རྫོགས་པ་སྤྱི་སྤྱོད། ཡིན་བཞིན་ནོར་བུ། ཀུན་འདུས་རིག་པ། རྗེ་བཙན་དམ་པ། སྒོམ་པ་དོན་གྲུབ་སྟེ། བི་མ་ལ་དང་ཀུ་མཱ་ར་གཡུ་སྒྲ་གསུམ་གྱིས་བསྒྱུར་བས་ཕྱི་འགྱུར་དུ་གྲགས། དེ་དག་ནི་བཻ་རོས་བསྒྱུར་པའི་ཀུན་བྱེད། རྨད་བྱུང་། མདོ་བཅུ་གསུམ་བསྡོམས་པས་སེམས་སྡེ་ཉེར་གཅིག་གོ །ཀློང་སྡེའི་རྒྱུད་ལ་འཁོར་བ་དོང་སྤྲུགས། རིན་པོ་ཆེན་གསང་བའི་རྒྱུད། བྱ་རྩོལ་མེད་པའི་རྒྱུད། ནམ་མཁའ་ཀློང་ཡངས་ཀྱི་རྒྱུད་ལ་སོགས་པ་འབུམ་ཕྲག་གཅིག་ཏུ་གསུངས་སོ། །མན་ངག་གི་རྒྱུད་ལའང་པདྨ་ཀློང་གསལ། པདྨ་དབང་རྒྱས། ཡིད་བཞིན་ཏོག་གི་རྒྱུད་ལ་སོགས་པ་ཁྲི་ཕྲག་ལྔ་དང་སྟོང་ཕྲག་གཅིག་གོ །ཁྱད་པར་སངས་རྒྱས་མཉམ་སྦྱོར་ཐིག་ལེ་སྐོར་གྱི་སྙིང་པོའི་རྒྱུད་ལྔ་སྟོང་སུམ་བརྒྱ། སྒྲ་ཐལ་འགྱུར་སོགས་གསང་ཆེན་ངེས་པའི་རྒྱུད་བཅུ་བདུན་༼ཕྱི་ནས་སོ་སོར་མིང་སྨྲོས་ལྟར།༽ ཁྲོས་མ་དང་བཅས་བཅོ་བརྒྱད། གསང་བ་སྤྱོད་པ་ས་བོན་གྱི་རྒྱུད་ལས་འཕྲོས་ཏེ་བྱོན་པ་རྣམས་སོ། །
རྫོགས་པ་ཆེན་པོ་སྤྱིའི་རྒྱུད།
རྫོགས་པ་ཆེན་པོ་སྤྱིའི་རྒྱུད་ལ། སེམས་ཉིད་བྱ་རྩོལ་ལས་འདས་པ་ནམ་མཁའ་ཆེའི་རྒྱུད་དང་། དེ་ཉིད་ཉམས་སུ་བླང་བ་ནམ་མཁའ་ཆེ་ཕྱི་མའི་རྒྱུད་། དེ་ཉིད་ཡོངས་སུ་རྫོགས་པའི་འབྲས་བུ་ནམ་མཁའ་ཆེ་ཕྱི་མ་ཕྱི་མའི་རྒྱུད་ཡོངས་སུ་བགྲོ་བ། སེམས་ཉིད་འཕོ་འགྱུར་མེད་པ་ཆོས་ཉིད་རྒྱལ་པོའི་རྒྱུད། སེམས་ཉིད་ཐིག་ལེ་ཉག་གཅིག་ཏུ་སྟོན་པ་བྱང་ཆུབ་ཀྱི་སེམས་ཐིག་ལེའི་རྒྱུད། སེམས་ཉིད་
རང་བྱུང་གི་ཡེ་ཤེས་སུ་བསྟན་པ་ཡེ་ཤེས་ཐིག་ལེའི་རྒྱུད། སེམས་ཉིད་ཐམས་ཅད་ཀྱི་རྩ་བར་བསྟན་པ་མན་ངག་ཕྲེང་བའི་རྒྱུད། སེམས་ཉིད་ཀུན་ཁྱབ་ཆེན་པོར་བསྟན་པ་གསང་བ་རྒྱལ་པོའི་རྒྱུད། སེམས་ཉིད་རང་རིག་ཏུ་བསྟན་པ་ཡེ་ཤེས་དམ་པའི་རྒྱུད། སེམས་ཉིད་ཀུན་ཏུ་བཟང་པོའི་རོལ་པར་སྟོན་པ་མཁའ་དབྱིངས་རྣམ་དག་གི་རྒྱུད། སེམས་ཉིད་ཀུན་གྱི་སྙིང་པོ་སྟོན་པ་མན་ངག་སྙིང་པོའི་རྒྱུད། སེམས་ཉིད་རང་རིག་ཏུ་ཡིད་ཆེས་པ་སྙིང་པོ་གསང་བའི་རྒྱུད། སེམས་ཉིད་ཀུན་གྱི་རྩ་བ་ནམ་མཁའ་ཆེ་རྩ་བ་ཅན་གྱི་རྒྱུད། སེམས་ཉིད་གཅིག་ཏུ་འདུས་པ་ཉག་གཅིག་དགོངས་པའི་རྒྱུད། སེམས་ཉིད་ཇི་བཞིན་པར་བཞག་པ་བསམ་གཏན་ཆེན་པོའི་རྒྱུད། སེམས་ཉིད་རྒྱུན་ཆགས་སུ་གོམས་པ་བསམ་གཏན་རྒྱུན་ཆགས་ཀྱི་རྒྱུད། སེམས་ཉིད་ཐམས་ཅད་དུ་གསུང་སྒོ་མང་མདོའི་རྒྱུད། སེམས་ཉིད་དབང་དང་སྦྱར་བ་ནམ་མཁའ་ཆེ་དབང་གི་རྒྱུད། སེམས་ཉིད་སྒྲ་ཚིག་ལས་འདས་པ་ནམ་མཁའ་ཆེ་ཡི་གེ་མེད་པའི་རྒྱུད། སེམས་ཉིད་གདོད་མའི་གནས་སུ་བསྟན་པ་ནམ་མཁའ་ཆེ་གཞིའི་རྒྱུད། སེམས་ཉིད་འོད་གསལ་དུ་བསྟན་པ་རིན་ཆེན་འབར་བའི་རྒྱུད། སེམས་ཉིད་ཡོན་ཏན་ལྷུན་གྲུབ་བསྟན་པ་རིན་པོ་ཆེ་ཕྲེང་བའི་རྒྱུད། སེམས་ཉིད་ཁམས་གསུམ་ལས་གསལ་བ་ཁམས་གསུམ་སྒྲོན་མའི་རྒྱུད། སེམས་ཉིད་སྤང་བླང་ལས་འདས་པར་སྟོན་པ་ངེས་པ་སྙིང་པོའི་རྒྱུད། སེམས་ཉིད་འཕོ་འགྱུར་མེད་པར་སྟོན་པ་རྡོ་རྗེ་གསང་བའི་རྒྱུད། སེམས་ཉིད་ཡེ་ནས་སངས་རྒྱས་པར་སྟོན་པ་ཡེ་སངས་རྒྱས་པའི་རྒྱུད་སྡེ་ཉི་ཤུ་རྩ་ལྔ་དང་། ལུང་བམ་པོ་བཅོ་བརྒྱད་ལ། ཐམས་ཅད་
བྱང་ཆུབ་ཀྱི་སེམས་ལས་བྱུང་བ་རིག་པའི་ཁུ་བྱུག །རྩོལ་སྒྲུབ་ཟིལ་གནོན། རྩལ་ཆེན་སྤྲུགས་པ། སེམས་ཉིད་དབྱིངས་སུ་རྫོགས་པ་ཁྱུང་ཆེན་རྫོགས་པ། ཆོས་ཉིད་ཡེ་གནས་ཀྱི་སྒོམ་པ་རྡོ་ལ་གསེར་ཞུན། སེམས་ཉིད་ལྷུན་གྲུབ་ཀྱི་ལྟ་བ་མི་ནུབ་རྒྱལ་མཚན། སེམས་ཉིད་ཡེ་ནས་སྟོང་པ་རྨད་བྱུང་རྒྱལ་པོ། །སེམས་ཉིད་ཆོས་སྐུར་བསྟན་པ་ཡེ་ཤེས་དམ་པ། སེམས་ཉིད་ཐིག་ལེར་བསྟན་པ་ཡང་ཏིག་རྒྱལ་པོ། སེམས་ཉིད་སྐྱེ་ཤི་མེད་པར་བསྟན་པ་སྲོག་གི་འཁོར་ལོ། །སེམས་ཉིད་འདོད་དགུ་འབྱུང་བར་སྟོན་པ་ཡིད་བཞིན་ནོར་བུ། སེམས་ཉིད་མཉམ་རྫོགས་ཆེན་པོར་སྟོན་པ་ཐིག་ལེ་ཀུན་འདུས། སེམས་ཉིད་ཐེག་པ་ཀུན་རྫོགས་སུ་སྟོན་པ་ནམ་མཁའ་ཆེ་རྒྱལ་པོ། །སེམས་ཉིད་ཀུན་གྱི་ཡང་རྩེར་སྟོན་པ་རྩེ་མོ་བྱུང་རྒྱལ། སེམས་ཉིད་ཡེ་བདེ་སྤྲོས་བྲལ་དུ་སྟོན་པ་བདེ་བ་རབ་འབྱམས། སེམས་ཉིད་ཉོན་མོངས་མེད་ཅིང་ཟག་མེད་དུ་སྟོན་པ་བདེ་བ་འཕྲ་བཀོད། སེམས་ཉིད་འཁོར་འདས་ཀྱི་གཞི་འདུས་པར་བསྟན་པ་གཏེར་ཆེན་ཡོངས་རྫོགས། སེམས་ཉིད་ཐེག་པ་ཀུན་གྱི་སྤྱི་ཆིངས་སུ་བསྟན་པ་ལྷུན་རྫོགས་སྤྱི་ཆིངས། སེམས་ཉིད་རྒྱ་ཆད་དང་ཕྱོགས་ལྷུང་མེད་པར་སྟོན་པ་ནམ་མཁའ་མཐའ་དབུས་ཀྱི་རྒྱུད་རྣམས་སོ། །འདི་དག་ཏུ་ངེས་པའི་དོན་གྱི་སྙིང་པོ་རྣམས་ཡོངས་སུ་ཚང་བར་བསྟན་པས་སྤྱིའི་རྒྱུད་དུ་རྣམ་པར་བཞག་པར་རྒྱལ་བ་ཀློང་ཆེན་རབ་འབྱམས་བཞེད་དོ། །དེ་ཡང་ཐེག་པ་ཐམས་ཅད་ཀྱི་མཆོག་དང་རབ་དང་ཕུལ་དང་རྩེ་མོར་གྱུར་པ་ནི་རྫོགས་པ་ཆེན་པོ་ཡིན་ལ། དེ་བས་ཀྱང་སེམས་ཀློང་གཉིས་སུ་མ་ཟད་ཐིག་ལེ་
སྐོར་གསུམ་པོས་ཀྱང་ཡང་གསང་བླ་མེད་ཀྱི་མན་ངག་སྡེའི་དགོངས་པའི་གནད་གསང་ཇི་བཞིན་དུ་འཇལ་མི་ནུས་ཏེ། གཡུ་ཡིག་ཅན་ལས། ཨེ་མ་ཧོ་རིགས་ཀྱི་བུ་ཡང་གབ་སྦས་པའི་སྙིང་ཐིག་འདིའི་ཚད་མ་ཟིན་པར། ཕྱི་ནང་གསང་བ་གསུམ་གྱི་ངོ་སྤྲོད་ལ་ཡིད་ཆེས་པར་བྱེད་པའི་གང་ཟག་ནི། རྒྱུ་ཁ་བའི་ས་བོན་ལ་འབྲས་བུ་མངར་བ་འདོད་པ་དང་འདྲའོ། །ཞེས་དང། ཨེ་མ་ཧོ། རིགས་ཀྱི་བུ་གསང་བ་ཡང་གསང་སྙིང་ཏིག་གི་དོན་མ་མཐོང་བ་ཕྱི་ནང་གསང་བའི་བར་དོ་བཞི་ལ་ཕུག་གཏོད་པ་ནི་ནམ་མཁའི་སྤྲིན་ལ་འཇོལ་འཛུགས་པ་དང་འདྲའོ། །ཞེས་སོ། །
མན་ངག་གི་སྡེ་དེ་ལ་ཚིག་གི་རྒྱུད་ཀྱི་དབྱེ་བ་བཅོ་བརྒྱད།
དེ་ལྟ་བུའི་ཡང་གསང་བླ་ན་མེད་པའི་མན་ངག་གི་སྡེ་དེ་ལ་ཚིག་གི་རྒྱུད་ཀྱི་དབྱེ་བ་ནི་རྣམ་པ་བཅོ་བརྒྱད་དེ། རྒྱ་མཚོ་ལྟ་བུའི་རྒྱུད་རིག་པ་རང་ཤར། ཉི་མ་ལྟ་བུའི་རྒྱུད་རྡོ་རྗེ་སེམས་དཔའ་སྙིང་གི་མེ་ལོང་། སེངྒེ་ལྟ་བུའི་རྒྱུད་སེངྒེ་རྩལ་རྫོགས། རི་རྒྱལ་ལྟ་བུའི་རྒྱུད་ཡི་གེ་མེད་པ། འཁོར་ལོ་ལྟ་བུའི་རྒྱུད་བཀྲ་ཤིས་མཛེས་ལྡན། ལྡེ་མིག་ལྟ་བུའི་རྒྱུད་སྒྲ་ཐལ་འགྱུར། རལ་གྲི་ལྟ་བུའི་རྒྱུད་ཀུན་ཏུ་བཟང་པོ་ཐུགས་ཀྱི་མེ་ལོང་། གསལ་ཤིང་ལྟ་བུའི་རྒྱུད་སྒྲོན་མ་འབར་བ། གསེར་ཞུན་ལྟ་བུའི་རྒྱུད་ནོར་བུ་ཕྲ་བཀོད། མ་བུ་འབྲེལ་བ་ལྟ་བུའི་རྒྱུད་ཉི་ཟླ་ཁ་སྦྱོར། མེ་ལོང་ལྟ་བུའི་རྒྱུད་ངོ་སྤྲོད་སྤྲས་པ། མུ་ཏིག་བསྟར་ལ་བརྒྱུས་པ་ལྟ་བུའི་རྒྱུད་མུ་ཏིག་ཕྲེང་བ། སྦྲུལ་མདུད་ལྟ་བུའི་རྒྱུད་རིག་པ་རང་གྲོལ། ཁྱུང་ཆེན་ལྟ་བུའི་རྒྱུད་ཀློང་དྲུག་པ། ཆུ་བོ་ལྟ་བུའི་རྒྱུད་རྫོགས་པ་རང་བྱུང་། སྤུ་གྲི་ལྟ་བུའི་རྒྱུད་ནག་མོ་ཁྲོས་མ། རྒྱལ་པོ་ལྟ་བུའི་རྒྱུད་སྐུ་གདུང་འབར་བ།
བང་མཛོད་ལྟ་བུའི་རྒྱུད་རིན་ཆེན་སྤུངས་པའོ། །དེ་སྐད་དུའང་མུ་ཏིག་ཕྲེང་བ་ལས། རྒྱ་མཚོ་དང་ནི་ཉི་མ་དང་། །སེངྒེ་དང་ནི་རི་རྒྱལ་དང་། །འཁོར་ལོ་དང་ནི་ལྡེ་མིག་དང་། །རལ་གྲི་དང་ནི་གསལ་ཤིང་དང་། །གསེར་ཞུན་དང་ནི་མ་བུ་འབྲེལ། །མེ་ལོང་དང་ནི་མུ་ཏིག་བརྒྱུས། །སྦྲུལ་མདུད་དང་ནི་ཁྱུང་ཆེན་དང་། །ཆུ་རྒྱུན་དང་ནི་སྤུ་གྲི་དང་། །རྒྱལ་པོ་དང་ནི་བང་མཛོད་དང་། །དེ་དག་རྣམ་པར་ཕྱེ་བས་ནི། །ཚིག་རྒྱུད་གསལ་བར་བྱེད་པའོ། །དེ་ཡི་དོན་རྣམས་རྣམ་དབྱེ་བས། །ངོ་བོ་ཉིད་ཀྱང་མཐོང་བར་འགྱུར། །ཞེས་སོ། །
རྒྱུད་དེ་དག་སོ་སོའི་དོན་གྱི་ཆིངས་སྡུད་ཚུལ་བཤད་པ།
རྒྱུད་དེ་དག་སོ་སོའི་དོན་གྱི་ཆིངས་སྡུད་ཚུལ་གྱི་སྒོ་ནས་བཤད་པ་ནི། རང་ཤར། རང་གྲོལ། ཡི་གེ་མེད་པ་གསུམ་རྒྱུད་ཀྱི་སྙིང་པོ་གསུམ་ཡིན། ནོར་བུ་ཕྲ་བཀོད། མེ་ལོང་གཉིས་ཏེ་གསུམ་ནི་རྒྱུད་ཀྱི་དངས་མ་གསུམ་ཡིན། མུ་ཏིག་ཕྲེང་བ། སེངྒེ་རྩལ་རྫོགས། བཀྲ་ཤིས་མཛེས་ལྡན་གསུམ་ནི་རྒྱུད་ཀུན་གྱི་དགོངས་དོན་ཟབ་མོར་གསལ་བས་མེ་ཏོག་གསུམ་ཡིན། རྫོགས་པ་རང་བྱུང་གི་རྒྱུད་ནི་རྒྱུད་ཀུན་གྱི་སྡོམ་འདུས་པ་གཅིག་པུ་ཡིན། ངོ་སྤྲོད་སྤྲས་པ་ནི་དཔེ་དོན་གསལ་བས་སྣང་བ་གཏིང་ནས་རྫོགས་པ་ཡིན། ཉི་ཟླ་ཁ་སྦྱོར་ནི་བར་དོར་གྲོལ་བས་ཡེ་ཤེས་གཡུལ་བཟློག་ཡིན། རིན་ཆེན་སྤུངས་དང་། སྐུ་གདུང་འབར་བ་ནི་རྒྱུད་ཀྱི་མ་ཚང་བ་ཁ་སྐོང་བའི་ཡན་ལག་སྟེ་རྒྱུད་ཆེན་གཉིས་ཡིན། སྒྲོན་མ་འབར་བ་ནི་ཉམས་ལེན་གསལ་བས་རྣལ་འབྱོར་གྲོལ་བའི་རྒྱུད་ཡིན། ཀློང་དྲུག་པ་ནི་དགོངས་པ་དྲང་ཐད་དུ་སྟོན་པས་སྙིང་དང་འདྲ་བ་ཡིན། ཐལ་འགྱུར་ནི་རང་
གི་གྲུབ་མཐའ་གསལ་ཞིང་ཕ་རོལ་གྱི་རྒོལ་བས་མི་ཚུགས་པས་གསང་བ་རང་གཞུང་ཡིན། ནག་མོ་ཁྲོས་མ་ནི་འགལ་བྱེད་ཆོམ་ལ་འབེབས་པས་མཚོན་ཆ་ལྟ་བུ་ཡིན་ཏེ། དེ་རྣམས་མུ་ཏིག་ཕྲེང་བ་ལས། རྒྱུད་ཀྱི་སྙིང་པོ་གསུམ་ཤེས་ན། །རྒྱལ་བློན་འབངས་གསུམ་འཛོམས་པ་འདྲ། །རྒྱུད་ཀྱི་དངས་མ་གསུམ་ཤེས་ན། །རི་གསུམ་༼རྒྱུད་ཐམས་ཅད་ཀྱི་དོན་མཐོང་བས་རི་རྒྱལ་གྱི་༽རྩེ་མོར་ཕྱིན་པ་འདྲ། །རྒྱུད་ཀྱི་མེ་ཏོག་གསུམ་ཤེས་ན། །མཁའ་ལ་ཉི་མ་གསུམ་ཤར་འདྲ། །རྒྱུད་ཀུན་སྡོམ་གཅིག་ཤེས་པ་ན། །མཁར་གྱི་འགྲམ་རྡོ་ལེགས་ཚུགས་འདྲ། །སྣང་བ་གཏིང་རྫོགས་རྒྱུད་ཤེས་ན། །རྩེ་མོར་འབྱོངས་པའི་མཁར་དང་འདྲ། །ཡེ་ཤེས་གཡུལ་བཟློག་རྒྱུད་ཤེས་ན། །ཕྱོགས་བཞིར་སྐར་ཁུང་བཏོད་པ་འདྲ། །ཡན་ལག་རྒྱུད་ཆེན་གཉིས་ཤེས་ན། །ངོས་བཞིར་བ་གམ་བཏགས་པ་འདྲ། །རྣལ་འབྱོར་གྲོལ་བའི་རྒྱུད་ཤེས་ན། །རྒྱལ་པོ་མཁར་གྱི་རྩེར་བཞུགས་འདྲ། །སྙིང་དང་འདྲ་བའི་རྒྱུད་ཤེས་ན། །དེ་ལ་སྒོ་མོ་དམ་༼མཚན་འཛིན་གྱི་དམག་མི་འཇུག་པས་༽བསྒྲིགས་འདྲ། །གསང་བ་རང་གཞུང་རྒྱུད་ཤེས་ན། །མཐའ་མ་ལྕགས་རིས་བསྐོར་བ་འདྲ། །མཚོན་ཆ་ལྟ་བུའི་རྒྱུད་ཤེས་ན། །གོ་ཞུབ་ལྡན་པའི་སྒོ་བསྲུངས་འདྲ། །ཞེས་སོ། །
རྒྱུད་དེ་དག་གི་གོ་རིམ་དོན་གྱི་ཆིངས་ངེས་པ།
རྒྱུད་དེ་དག་གི་གོ་རིམ་དོན་གྱི་ཆིངས་ངེས་པ་ཡང་། དེ་ཉིད་ལས། དེ་ལ་རྒྱུད་ཀྱི་རིམ་པ་ནི། །རྩ་བའི་རྒྱུད་ཆེན་རྣམ་གཉིས་ཀྱིས། །ཆོས་ཀུན་ངོ་བོ་གཅིག་པར་བཤད། །བཤད་རྒྱུད་མ་བུ་གཉིས་ཀྱིས་ནི། །ལོ་འདབ་རྒྱས་པའི་ཚུལ་དུ་བཤད། །ཡན་ལག་རྒྱུད་ནི་གཉིས་དག་གིས། །རྒྱ་མཚོར་
གཟའ་སྐར་ཤར་བཞིན་བཤད། །ལུང་རིག་གསལ་བའི་རྒྱུད་གཉིས་ཀྱིས། །མེ་ཏོག་ཁ་བྱེའི་ཚུལ་དུ་བཤད། །མན་ངག་རྒྱུད་སྡེ་བཞི་ཡིས་ནི། །འབྲས་བུ་སྨིན་པའི་ཚུལ་དུ་བཤད། །དགོངས་པ་རང་གནས་རྒྱུད་གསུམ་གྱིས། །མཐོང་བྱེད་མིག་གི་ཚུལ་དུ་བཤད། །འཇུག་པ་རང་གྲོལ་རྒྱུད་གཉིས་ཀྱིས། །དྲན་གཞི་སྙིང་གི་ཚུལ་དུ་བཤད། །མཁས་པ་ཆོ་གའི་རྒྱུད་ཀྱིས་ནི། །མེལ་ཚེ་བྱེད་པའི་ཁྱི་ལྟར་བཤད། །ཅེས་སོ། །དེའང་རྫོགས་པ་རང་བྱུང་རྩ་བའི་རྒྱུད་ལེའུ་ཉེར་ལྔ་པར་བརྟེན་ནས་ཕྱི་སྤྲོས་བཅས་དབང་གིས་སྤྲོས་པ་ལ་དགའ་བ་རྣམས་སྨིན་པར་བྱེད། ཡི་གེ་མེད་པའི་རྒྱུད་ལེའུ་དྲུག་པ་ལ་བརྟེན་ནས་སྨིན་ཟིན་གྲོལ་བར་བྱེད་པའི་མན་ངག་གི་གནད་རྫོགས་པར་བསྟན་པས་རྩ་བའི་རྒྱུད་ཆེན་གཉིས་པོས་ཆོས་ཐམས་ཅད་ངོ་བོར་དབྱེར་མེད་དུ་བཤད། རིག་པ་རང་ཤར་ལེའུ་བརྒྱད་ཅུ་རྩ་དྲུག་ལ་བརྟེན་ནས་ལྟ་སྒོམ་སྤྱོད་པ་འབྲས་བུ་བཞིའི་བརྗོད་བྱ་ཁྱད་པར་གསལ་བར་བྱེད་ལ། རིག་པ་རང་གྲོལ་ལེའུ་དགུ་པ་ལ་བརྟེན་ནས་དམིགས་གསལ་བར་བྱེད་དེ། དེ་ལྟར་བཤད་རྒྱུད་མ་བུ་གཉིས་ཀྱིས་ཤིང་ལོ་འདབ་བརྒྱད་པ་ལྟར་བཤད་དོ། །རིན་ཆེན་སྤུངས་པ་ལེའུ་ལྔ་པས་ཡོན་ཏན་རང་རྫོགས་སུ་བསྟན་པ་དང་། སྐུ་གདུང་འབར་བས་རྟགས་རྣམས་བསྟན་པ་སྟེ། ཡན་ལག་གི་རྒྱུད་གཉིས་ཀྱིས་རྒྱ་མཚོ་ལ་གཟའ་སྐར་ཤར་བ་ལྟར་བཤད། སྒྲ་ཐལ་འགྱུར་ལེའུ་དྲུག་པས་སྡེ་སྣོད་ཀུན་གྱི་རྩ་བར་བསྟན་པ་དང་། བཀྲ་ཤིས་མཛེས་ལྡན་ལེའུ་བདུན་གྱིས་འཁྲུལ་པ་བཟློག་ཚུལ་ངོས་
བཟུང་སྟེ། ལུང་རིག་གསལ་བའི་རྒྱུད་གཉིས་པོ་དེས་མེ་ཏོག་ཁ་བྱེ་བའི་ཚུལ་དུ་བཤད། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལེའུ་བརྒྱད་པས་ངོ་སྤྲད་པ་དང་དབང་དང་དམ་ཚིག་གི་མན་ངག་བསྟན། ཀུན་ཏུ་བཟང་པོ་ཐུགས་ཀྱི་མེ་ལོང་ལེའུ་བདུན་པས་གོལ་སྒྲིབ་ཤན་འབྱེད་དུ་བསྟན། ངོ་སྤྲོད་སྤྲས་པ་ལེའུ་གསུམ་པས་དཔེ་དོན་གྱི་ཡིད་ཆེས་བསྐྱེད་པ་བསྟན། མུ་ཏིག་ཕྲེང་བ་ལེའུ་བརྒྱད་པས་མན་ངག་ཐ་དད་པའི་ཐབས་ཀྱིས་གྲོལ་བར་བསྟན་ཏེ། དེ་ལྟར་མན་ངག་གི་རྒྱུད་ཆེན་བཞིས་འབྲས་བུ་སྨིན་པའི་ཚུལ་དུ་བཤད་དོ། །ཀློང་དྲུག་པ་སྐབས་དྲུག་གིས་རིགས་དྲུག་གནས་སུ་དག་པར་བསྟན། སྒྲོན་མ་འབར་བ་ལེའུ་བཞི་པས་སྒྲོན་བཞི་བསྟན། ཉི་ཟླ་ཁ་སྦྱོར་ལེའུ་བཞི་པས་བར་དོ་བསྟན་ཏེ། དེ་ལྟར་དགོངས་པ་རང་གནས་ཀྱི་རྒྱུད་གསུམ་གྱིས་མཐོང་བྱེད་མིག་གི་ཚུལ་དུ་བཤད་དོ། །སེངྒེ་རྩལ་རྫོགས་ལེའུ་བཅུ་གསུམ་པས་ལྟ་བ་ཕྱོགས་རིས་མེད་པར་བསྟན། ནོར་བུ་ཕྲ་བཀོད་ལེའུ་བཅུ་བཞི་པས་ལམ་སྲོལ་དུ་འཇུག་པར་བསྟན་ཏེ། དེ་ལྟར་འཇུག་པ་རང་གྲོལ་གྱི་རྒྱུད་གཉིས་པོས་དྲན་གཞི་སྙིང་གི་ཚུལ་དུ་བཤད་དོ། །མཁས་པ་ཆོ་གའི་རྒྱུད་དཔལ་ནག་མོ་ཁྲོས་མས་བསྟན་པ་བསྲུང་བའི་ལས་རྒྱས་པར་བསྟན་ཏེ་ཁྱི་བཟང་པོས་མེལ་ཚེ་བྱེད་པ་ལྟར་བཤད་དོ། །དེ་ལྟར་སྡེ་ཚན་བརྒྱད་དུ་རྒྱུད་བཅོ་བརྒྱད་བསྡུས་ཏེ་བཤད་པ་ནི་དགོངས་པའི་དབང་གིས་བཞག་གོ ། དེ་ཡང་རྩ་རྒྱུད་གཉིས་མེད་ན་སྡོང་པོ་རྩ་བ་རུལ་བས་ཡལ་ག་ལོ་འབྲས་མི་འབྱུང་བ་དང་འདྲ། བཤད་རྒྱུད་གཉིས་མེད་ན་ལོ་མ་མེད་པས་མེ་ཏོག་འོང་མི་སྲིད་
པ་དང་འདྲ། ཡན་ལག་གི་རྒྱུད་གཉིས་མེད་ན་ལག་རྡུམ་གྱིས་བྱ་བ་མི་འགྲུབ་པ་དང་འདྲ། འཇུག་པ་རང་གྲོལ་གྱི་རྒྱུད་གཉིས་མེད་ན་སྙིང་མེད་པའི་རོ་དང་འདྲ། ལུང་རིག་གསལ་བའི་རྒྱུད་གཉིས་མེད་ན་མེ་ཏོག་མེད་པས་འབྲས་བུ་མི་འབྱུང་བ་དང་འདྲ། མན་ངག་གི་རྒྱུད་བཞི་མེད་ན་འབྲས་བུ་མི་འབྱུང་བ་ལ་སོ་ནམ་བྱས་ཀྱང་དོན་མེད་པ་དང་འདྲ། དགོངས་པ་རང་གནས་ཀྱི་རྒྱུད་གསུམ་མེད་ན་མིག་མེད་ཀྱིས་སྣང་བ་མི་མཐོང་བ་དང་འདྲ། མཁས་པ་ཆོ་གའི་རྒྱུད་མེད་ན་མེལ་ཚེ་མེད་པས་དགྲ་རྐུན་འོང་བ་དང་འདྲའོ། །དེ་ལྟར་དོན་ཚན་བརྒྱད་མེད་ན་བསྟན་པ་གཅིག་གི་ཆ་རྐྱེན་མི་རྫོགས་ལ། དེ་བས་མང་ཡང་དགོས་པ་མེད་པས་བརྒྱད་དུ་གྲངས་ངེས་ཤིང་གོ་རིམ་ངེས་པའི་འཐད་པའང་དེ་ཡིན་ནོ། །དེ་དག་ཀྱང་བློ་དམན་པ་སྤྲོས་པ་ལ་དགའ་བའི་ངོར་རྣམ་པ་བཅོ་བརྒྱད་དུ་བསྟན། འབྲིང་པོ་རྣམས་ལ་དོན་ཚན་བརྒྱད་པོ་དེར་བསྟན། དབང་པོ་རབ་ལ་མཚོན་བྱ་མཚོན་བྱེད་གཉིས། གཞིའི་རྒྱུད། སྙིང་པོའི་རྒྱུད། བཅུད་ཀྱི་རྒྱུད་གསུམ་སྟེ་ལྔས་རྟོགས་པར་བསྟན། ཤིན་ཏུ་ཡང་རབ་རྣམས་ལ་ཚིག་དོན་གྱི་རྒྱུད་གཉིས་ཀྱིས་རྟོགས་པར་བསྟན་ཏེ། མུ་ཏིག་ཕྲེང་བ་ལས། གཞི་གཅིག་ངོ་བོའི་ཁྱད་པར་ལས། །མཚོན་བྱ་དང་ནི་མཚོན་བྱེད་དོ། །ཞེས་དང་། རང་བཞིན་རྒྱུད་ནི་འདི་ལྟར་ཏེ། །གཞི་དང་སྙིང་པོ་བཅུད་ཉིད་དོ། །ཞེས་དང་། དེ་ཉིད་རྣམ་པར་བཤད་བྱ་བ། །དོན་གྱི་རྒྱུད་དང་ཚིག་གི་རྒྱུད། །ཅེས་སོགས་གསུངས་པ་ལྟར་སྤྲོས་པས་ཆོག་ལ། དོན་དུ་རྣལ་འབྱོར་པ་རབ་ཏུ་སྤྲོས་པ་མེད་པ་རྣམས་ལ་རྒྱུད་བཅུ་བདུན་པོ་རང་
གི་རིག་པའི་ངང་དུ་ཚང་བར་བསྟན་པ་ཡང་། སྒྲ་ཐལ་འགྱུར་ལས། རང་གི་ངོ་བོ་ཡི་གེ་མེད། །རང་རིག་ཡེ་ཤེས་སྒྲོན་འོད་འབར། །ཆོས་ཉིད་དག་པས་བཀྲ་ཤིས་མཛེས། །ལྟ་བ་འཇིགས་བྲལ་སེང་རྩལ་རྫོགས། །རང་རིག་སྨིན་པས་རྫོགས་རང་བྱུང་། །ལུ་གུ་རྒྱུད་འབྲེལ་མུ་ཏིག་ཕྲེང་། །ཉམས་ཀྱི་སྣང་བ་ནོར་ཕྲ་བཀོད། །རང་སྣང་སྟོན་པས་སྙིང་མེ་ལོང་། །གོལ་ས་རང་ཆོད་ཐུགས་མེ་ལོང་། །གཞན་ལས་མ་བྱུང་རང་ཤར་ཉིད། །རང་བྱུང་ཡིན་པས་རང་གྲོལ་ལ། །དབྱིངས་སུ་གཅིག་པས་ཀློང་ཡང་དྲུག །ཡོན་ཏན་རྫོགས་པས་རིན་ཆེན་སྤུངས། །རང་རིག་བསྟན་པས་ངོ་སྤྲོད་སྤྲས། །སྣང་བ་དག་པས་ཉི་ཟླ་སྦྱོར། །རིག་པ་སྨིན་ཕྱིར་སྐུ་གདུང་འབར། །འདི་དག་རྣམས་ཀྱང་གཞི་ལས་ཤར། །འདི་ལྟར་ཆོས་ཉིད་བརྗོད་མེད་ལས། །ཐ་དད་ཚིག་གི་གཞི་མར་ཤར། །ཚིག་བརྗོད་རིམ་པ་རྣམ་དག་པས། །ད་ལྟ་བརྗོད་མེད་ངང་ལ་རྫོགས། །ཞེས་སོ། །དེ་ལྟར་རྫོགས་པ་ཆེན་པོ་ལས་འཕྲོས་པའི་བཤད་པ་སྔ་རབས་པ་དག་གི་ལེགས་བཤད་ལས་ཁོལ་དུ་ཕྱུངས་ཏེ་གཞན་ཕན་གྱི་བསམ་པ་རྣམ་པར་དག་པས་ཡང་བསྐྱར་དུ་བཀོད་པ་ནི། དོན་འདི་ལ་ངེས་ཤེས་ཀྱི་དད་པ་ཁྱད་པར་ཅན་རྒྱུད་ལ་ལྡན་པས་ཚིག་དོན་གཉིས་ཆར་གཟུ་བོས་བློས་བླ་མའི་དྲིན་ལས་རིགས་མིན་གྱི་རྣམ་འབྱེད་ཅུང་ཙམ་ཐོབ་པས་སྤྲོས་པ་ནི་དགོས་པ་ཁྱད་པར་དང་ལྡན་ཏེ།
ཆོས་སྨྲ་བའི་བཙུན་པར་མིང་གི་ཅོད་པཎ་སྦྱིན་པའི་བཀའ་ལུང་།
རྗེ་མཚུངས་མེད་ཀཿ ཐོག་པ་ཆེན་པོས་བོང་བ་གསེར་གཟིགས་ཀྱིས་ཆོས་སྨྲ་བའི་བཙུན་པར་མིང་གི་ཅོད་པཎ་སྦྱིན་པའི་བཀའ་ལུང་ལས། གང་གི་ཞབས་ཀྱི་ཆུ་སྐྱེས་ལ་ཆགས་རྡུལ། །སྲིད་ན་དྲེགས་པ་རྣམས་ཀྱིས་དོ་ཀེར་རྩེ། །རབ་ཏུ་འདར་ལྡན་བཏུད་པའི་བསྟི་སྟང་གིས། །མཆོད་བྱས་སངས་རྒྱས་གཉིས་པས་བཀྲ་ཤིས་སྩོལ། །ཞེས་ཤིས་པར་བརྗོད་པའི་དབྱངས་ཀྱི་མེ་ཏོག་མན་ད་ར་བས་མངོན་པར་འཐོར་བ་སྔོན་དུ་འགྲོ་བས་ཐོག་མའི་དུས་ནས་གཞན་ཕན་ཐུགས་བསྐྱེད་དམ་བཅའི་ས་བོན་གྲུང་པོ་རིགས་ཀྱི་ནུས་པ་སད་པ་ལས་ཐུབ་བསྟན་ཡོངས་སུ་རྫོགས་པའི་མྱུ་གུ་གཞོན་ནུ་སྔོན་བྱོན་གྲུབ་པ་རྣམས་ཀྱི་བསྟི་གནས་ཁྱད་པར་དུ་འཕགས་པ་འདིར་བྱོན་ནས། ཁོ་བོ་ཅག་གི་གམ་དུ་ཉེ་བར་བསྙེན་པར་མཛད་པའི་རིང་ཕྱིའི་རིག་པ་འཛིན་པ་རྗོད་བྱེད་ཐ་སྙད་ཀྱི་གཞུང་ཆེན་པོ་ཕལ་ཆེ་བ་རྣམས་ལ་གསན་བསམ་དཔྱིས་ཕྱིན་པ་དང་། ནང་རིག་པ་སྨིན་གྲོལ་གྱི་གདམས་ཁྲིད་ཟབ་མོའི་བདུད་རྩི་ལེགས་པར་གསོལ་བས་བརྗོད་བྱ་རིམ་པ་གཉིས་ཀྱི་དེ་ཁོ་ན་ཉིད་ཐོག་མར་གཟིགས་ཤིང་བསྒྲུབ་པ་ཉམས་ལེན་གྱི་གོམས་པ་སྟོབས་སུ་འགྱུར་བའི་ཉེར་ལེན་གྱི་རྒྱུ་ཕུན་སུམ་ཚོགས་པར་བསྒྲུབས་ཟིན་པས་གསང་སྔགས་སྔ་འགྱུར་གྱི་བསྟན་པ་འདི་ལ་གཞན་དྲིང་མི་འཇོག་པའི་མཁས་པ་ཆེན་པོ་རོང་ཟོམ་པཎྜི་ཏ་དང་། ཀུན་མཁྱེན་ཆེན་པོ་དྲི་མེད་འོད་ཟེར། མངའ་རིས་པཎ་ཆེན་རིན་པོ་ཆེ། སྨིན་
གླིང་པ་གཏེར་ཆེན་ཆོས་ཀྱི་རྒྱལ་པོ་སྐུ་མཆེད་ཡབ་སྲས། གོང་ལོ་གཞན་ཕན་རྡོ་རྗེ། མཁས་མཆོག་སོག་བཟློག་པ། ཀུན་མཁྱེན་འཇིགས་མེད་གླིང་པ་སོགས་ཀྱི་རྨད་དུ་བྱུང་བའི་རྣམ་པར་ཐར་པ་བཟང་པོ་ལ་བདག་གིར་མཛད་པས། མཁས་བཙུན་བཟང་པོའི་དབང་ཕྱུག་ཆེན་པོའི་གནས་ལ་བརྫི་བ་མེད་པར་སྤྱོན་ནས་སངས་རྒྱས་གཉིས་པའི་བཤད་སྒྲུབ་ཀྱི་བསྟན་པ་དྲི་མ་མེད་པ་འདི་ཉིད་ཀུན་ནས་ཀུན་ཏུ་འཛིན་པ་དང་། འཆད་པ་དང་། རྩོམ་པ་དང་། སྤེལ་བ་དང་། ཀུན་ནས་ཀུན་ཏུ་སྐྱོང་བ་དང་། སྒྲུབ་པ་ལ་སོགས་པས་མཚོན་འཁོར་ལོ་གསུམ་གྱི་སྒོ་ནས་བྱ་བ་ཡང་དག་པར་བྱེད་པར་མངའ་གསོལ་ཞིང་གཟེངས་བསྟོད་པས། དགེ་མཚན་འགོག་པ་མེད་པའི་རྟེན་འབྱུང་གི་སྒོ་གསར་དུ་དབྱེ་བ་ལ་གེགས་ཀྱི་རྒྱུ་བ་ཕྲ་མོ་ཙམ་གྱིས་ཀྱང་སྐབས་རྙེད་པར་མ་གྱུར་མི་འགྱུར། འགྱུར་བ་མེད་པས་སྟོན་འཁོར་གནས་དུས་ཕུན་སུམ་ཚོགས་ཤིང་བཀྲ་ཤིས་ལེགས་ལམ་གྱི་དགེ་མཚན་བསམ་གྱིས་མི་ཁྱབ་པའི་དགའ་སྟོན་ཉམས་སུ་བསྟར་བ་ལ་མངོན་དུ་ཕྱོགས་པའི་རྟེན་ཅིང་འབྲེལ་འབྱུང་གི་རེ་ཁ་གསལ་བར་བྱེད་པའི་ཕྱིར། ཞེས་དང་། བཏུང་བའི་ཕུལ་གྱུར་ཞི་བསིལ་བདུད་རྩིའི་རྒྱུན། །གསན་བསམ་སྒོམ་པས་རྫོགས་པ་ཆེན་པོའི་རོ། །ཆོས་རྣམས་ཡོངས་ཀྱི་མདོ་དང་རྒྱས་པ་རུ། །ཉམས་སུ་མྱོང་བ་སྟོབས་སུ་འགྱུར་བ་དང་། །བྱང་ཆུབ་སེམས་གཉིས་མཆིལ་པའི་གཞན་དབང་དུ། །
གྱུར་ཞིང་བསླབ་གསུམ་གསེར་གྱི་དྲ་བས་མཛེས། །བསྐྱེད་རྫོགས་གསུམ་གྱི་ཐེག་པ་རྨད་བྱུང་བ། །གླང་པོ་ཆེན་པོའི་བྱ་བ་འགྲུབ་གྱུར་ཅིག །ཅེས་སོགས་གསུངས་པའི་དོན་དངོས་བསྟན་གྱི་ནུས་པ་ལུས་རྟེན་འདིར་རང་ལ་ཅི་བཞིན་པ་ཚང་བ་རི་བོང་གི་རྭ་ལས་ཀྱང་ཆེས་དཀའ་མོད། སླར་སྐྱེ་བ་འདི་ནས་བརྩམས་ཚེ་རབས་ཀུན་ཏུ་བསྟན་པ་ལ་བྱ་བ་བགྱིད་འགྱུར་དུ་སྨོན་པས་དགོངས་པ་ཅན་གྱི་གསུངས་ཏེ། དེས་ན་འཆད་རྩོད་རྩོམ་པར་བཀའི་གནང་བ་ནོད་པས་རང་ཡང་ཟབ་མོའི་གནད་ལ་གོམས་པ་མཐུ་བརྟས་པའི་སླད་དུ་བག་ཆགས་འཇོག་པ་དང་། ད་ལྟར་ཡང་ཟབ་ཆོས་ཁྱད་པར་ཅན་འདི་ལ་སྤྱོད་པས་ལས་སྐལ་མི་དམན་པར་སྤྲོ་བ་དང་བཅས་པ་སྟེ། རིན་ཆེན་སྤུངས་པ་ལས། དེ་ཡི་ཕྱིར་ན་གསང་བའི་རྒྱུད། །འདི་ཉིད་འཛིན་པའི་སྐྱེས་བུ་ནི། །རང་རིག་རྣམས་ཀྱི་དབང་ཐོབ་སྟེ། །རྒྱུད་འདི་བཅངས་པ་ཙམ་གྱིས་ནི། །རྡོ་རྗེ་འཆང་གི་སྤྲུལ་པར་འགྱུར། །རྒྱུད་འདི་སུ་ཡིས་བཀླག་པ་ཡིས། །ལྟ་བའི་དོན་ཀུན་སེམས་ལ་འཆར། །འདི་ཉིད་སུ་ཡིས་བྲིས་པ་དེས། །སངས་རྒྱས་ཀུན་གྱི་གསུང་ལ་རོལ། །དེ་ཡི་ཕྱིར་ན་དམ་པར་གཟུང་། །ཞེས་དང་། ཉི་ཟླ་ཁ་སྦྱོར་གྱི་རྒྱུད་ལས། ང་ཡི་རྒྱུད་འདི་སུས་བཟུང་བ། །འཇིག་རྟེན་ཕན་པའི་འབྲས་བུ་དང་། །ངེས་པར་སྣང་བའི་ས་ཐོབ་སྟེ། །སྐུ་གསུམ་ལ་ཡང་ལོངས་སྤྱོད་དོ། །འདི་ཉིད་བཅངས་པ་ཙམ་གྱིས་ནི། །མ་བསྒོམས་བསམ་གཏན་འབབ་པ་དང་། །མ་བསླབས་ཆོས་རྣམས་ཤེས་པ་དང་། །མ་བསྟན་གདམས་
ངག་ཉིད་གོམས་དང་། །མ་བཤད་རྒྱུད་རྣམས་རང་ཤེས་དང་། །མ་བསྐྱེད་ལྷ་ཡང་མངོན་དུ་སྣང་། །དེ་ཡི་ཕྱིར་ན་རྒྱུད་འདི་དག །རྣལ་འབྱོར་གང་ཞིག་སྐལ་ཆེ་བས། །འདི་ཉིད་བཅངས་པས་དངོས་གྲུབ་ཐོབ། །སངས་རྒྱས་མཛད་སྤྱོད་དང་དུ་ལོངས། །ངན་སོང་གནས་གསུམ་དོང་སྤྲུགས་ཏེ། །བདེ་བ་ཆེན་པོའི་ལམ་དུ་འཛུད། །རང་སྣང་གོམས་པའི་གདེང་ཐོབ་ནས། །དབྱིངས་སུ་འཕྱོ་བའི་འཇིགས་མེད་རྙེད། །ཅེས་སོ། །ཨ་ཧོ། ཐེག་ཀུན་རྩེ་རྒྱལ་ཡང་གསང་རྫོགས་པ་ཆེ། །གྲུབ་བརྙེས་བྱེ་བའི་གཤེགས་ལམ་སྙིང་པོའི་ཆོས། །མཐོང་ཐོས་དྲན་པས་གཏན་བདེའི་དཔལ་སྦྱིན་པ། །མཐའ་དག་ཐེག་པའི་གྲུབ་འབྲས་མ་ནོར་ཉིད། །དེང་དུས་ཆོས་འདིར་སྤྱོད་རློམ་གང་ཟག་ཕལ། །ངེས་པའི་གནད་གསང་རྟོགས་པ་རི་བོང་རྭ། །མཚན་ཙམ་དོན་ལ་སྤྱོད་ནུས་ཉིན་མོའི་སྐར། །རྒྱ་མཚོའི་གོར་མོ་རླན་གྱིས་མ་སྦགས་སྐྱོ། །འགྲོ་ཀུན་ཁམས་ལ་བདེ་གཤེགས་སྙིང་པོ་ཉིད། །རྟག་བརྟན་ཞི་བ་གཡུང་དྲུང་འདུས་མ་བྱས། །ཀུན་ཁྱབ་ཆོས་སྐུར་བཞུགས་ལ་དེའི་ངོ་བོ། །སྤང་བླང་བསལ་བཞག་མེད་པར་མངོན་སུམ་དུ། །
སྟོན་ལ་ཚད་མའི་གཞུང་གྲུབ་མན་ངག་སྡེའི། །དགོངས་དོན་རྟོགས་དཀའི་ཉིན་མོར་བྱེད་པའི་གཟིས། །ལོག་རྟོག་བློས་བྱས་གྲུབ་མཐའི་ལྟ་བ་ལ། །གདེང་བཅའི་འབྱུང་བྱ་མུན་པའི་ཁུང་བུར་ཡིབས། །གཟོད་ནས་སྐྱོན་ཀུན་ལས་གྲོལ་ཀ་དག་དབྱིངས། །རྟེན་འབྱུང་འགོག་མེད་ལྷུན་གྲུབ་རོལ་པའི་རྩལ། །དཔྱད་བཟོད་བྲལ་བར་ཁས་བླང་ལས་འདས་པའི། །དབུ་མ་ཆེན་པོ་དངོས་ཀྱང་འདི་ཉིད་དོ། །ཐེག་པའི་རིམ་པ་གྲུབ་མཐའི་རྣམ་གྲངས་སོགས། །ཚུལ་འདི་རྟོགས་བྱེད་ཉིད་ཕྱིར་འདིས་གཞལ་ན། །ཀུན་ཀྱང་འགལ་མེད་རྒྱ་མཚོར་ཆུ་བྲན་ལྟར། །དེས་ན་བསྒྲུབས་འབྲས་ཉིད་ཕྱིར་རྩོད་དང་བྲལ། །ཐེག་པ་མཆོག་འདིར་ཚུལ་བཞིན་ཞུགས་པ་ལྟ། །ལན་གཅིག་མཚན་ཙམ་རྣ་བར་ཐོས་པ་ཡང་། །དེ་འདྲོག་འགྲོལ་བའི་ས་བོན་རྒྱུད་བཞག་པར། །སྲས་བཅས་རྒྱལ་བས་བསླུ་མེད་བདེན་མཐུས་བསྒྲུབས། །འདི་ན་དལ་འབྱོར་ལུས་ཀྱི་ལྗོན་པ་ཡང་། །ཐོས་བསམ་རླན་གྱིས་སྨིན་ལས་འཆད་རྩོད་རྩོམ། །
འབྲས་བུའི་ཁུར་དུད་ཀུན་སློང་རྣམ་དཀར་གྱི། །ཡལ་འདབ་ཡངས་པོར་གྲོལ་བའི་དགེ་མཚན་ནོད། །སླར་ཡང་འདི་ནས་འཁོར་བ་མཐའ་ཅན་བར། །རང་ཉིད་ཞི་བདེར་གཞོལ་བའི་བློ་བཏང་ནས། །མ་རྣམས་གཏན་བདེར་སྦྱོར་དང་དེ་སྲིད་དུ། །ལམ་མཆོག་འདི་ལས་གཡོ་བ་མ་གྱུར་ཅིག །ཁྱད་པར་ཡང་གསང་བླ་མེད་མན་ངག་སྡེའི། །རྟོགས་དཀའི་གནས་ལ་གཞན་དྲིང་མི་འཇོག་པས། །རང་གཞན་སྨིན་གྲོལ་ལམ་ལ་འགོད་མཁས་པའི། །རྒྱལ་དབང་པདྨའི་རྗེས་སུ་འགྲོ་ནུས་ཤོག །ཚུལ་འདིར་ལེགས་བྱས་རྗེ་བཙུན་བླ་མའི་དྲིན། །ནོངས་པར་གྱུར་ན་སོ་སྐྱེའི་སྐྱོན་དུ་ཟད། །འོན་ཏེ་དཔྱོད་པའི་བློ་རྟོག་གཡོས་སྲིད་ན། །རྒྱ་ཆེན་གཞུང་འགྲེལ་ལྡེ་མིག་ཉིད་དུ་བས། །ཞེས་ཀྱང་སྨྲས་སོ། །