འཕྲོས་དོན་དུ་གྲོལ་ལམ་ཕྱག་རྒྱ་ཆེན་པོའི་རྣམ་གཞག
གྲོལ་ལམ་ཕྱག་རྒྱ་ཆེན་པོའི་རྣམ་གཞག་བསྡུས་ཙམ་ནི།
༈ གསུམ་པ་འཕྲོས་དོན་དུ་གྲོལ་ལམ་ཕྱག་རྒྱ་ཆེན་པོའི་རྣམ་གཞག་བསྡུས་ཙམ་ལ། སྤྱིར་རྒྱུའི་ཐེག་པར་ཕྱག་རྒྱ་ཆེན་པོའི་མིང་ཙམ་ཡང་མ་གྲགས་པར་འདོད་པ་ནི་མཐོང་རྒྱ་ཆུང་བ་སྟེ། རྣམ་པར་འདུས་མ་བྱས་པའི་དབྱིངས་ལ་ཕྱག་
རྒྱའི་མཚན་གྱིས་གསུངས་པར་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་སྣང་བ་རྒྱན་གྱི་མདོ་(དགེ་རྩ་ཡོངས་སུ་འཛིན་པའི་མདོ་)ལས། ཀུན་དགའ་བོ་ཆོས་ཀྱི་ཕྱག་རྒྱ་དེ་ནི་ཆོས་ཐམས་ཅད་ཀྱི་ཕྱག་རྒྱ་སྟེ་ཕྱག་རྒྱ་མེད་པ་ཡིན་ནོ། །མ་བྱས་པའི་ཕྱག་རྒྱ་ཡིན་ནོ། །དབྱེར་མེད་པའི་ཕྱག་རྒྱ་ཡིན་ནོ། །ཀུན་དགའ་བོ་གང་དག་ཕྱག་རྒྱ་དེས་བཏབ་པ་དེ་དང་དེ་དག་ནི་བྱང་ཆུབ་སེམས་དཔའ་ཆེན་པོ་ཡིན་ཏེ། རིགས་བཙུན་པ་ཡིན། མིའི་སེངྒེ་ཡིན། ཞེས་པ་ལ་སོགས་པ་དང་། སློབ་དཔོན་ཡེ་ཤེས་གྲགས་པས་དེ་ཁོ་ན་ཉིད་འཇུག་པར་ཡང་། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱི་མཚན་གཞན་ནི་ཕྱག་རྒྱ་ཆེན་པོ་སྟེ། དེ་ནི་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཡིན་པའི་ཕྱིར་རོ། །ཞེས་སོགས་རྒྱས་པར་བཤད་པའི་ཕྱིར། མདོའི་དངོས་བསྟན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྐབས་འགར་ཕྱག་རྒྱ་ཆེན་པོའི་སྒྲས་སྨོས་པར་མཛད་ཅིང་། སྔགས་སུ་དེ་ཉིད་བདེ་བ་ཆེན་པོའི་ཐབས་ཀྱིས་བསྒྲུབས་པས་བདེ་སྟོང་ཕྱག་རྒྱ་ཆེན་པོར་འགྱུར་བའི་ཕྱིར་མདོ་སྔགས་ཀྱི་ཁྱད་ཙམ་ལས་མདོའི་ཐེག་པར་ཕྱག་རྒྱ་ཆེན་པོ་གཏན་མ་བཤད་པར་སྨྲ་བ་ནི་ཆེས་མི་ལེགས་ཏེ་བདེ་གཤེགས་སྙིང་པོ་སྤྱི་ཙམ་ཞིག་མདོའི་ལམ་དུ་བསྟན་ནས་ཤིན་ཏུ་རྒྱས་པའི་ཚུལ་རྣམས་སྔགས་སུ་བསྟན་པ་དང་མཚུངས་པའི་ཕྱིར་རོ། །
དང་པོ་གཞི།
ཚུལ་དེ་འཆད་པ་ལ་གཞི་ལམ་འབྲས་གསུམ་ལས། དང་པོ་གཞི་ནི། དེ་ཡང་འཁོར་འདས་གང་དུའང་མ་གྲུབ་ཅིང་ཕྱོགས་དང་རིས་སུ་མ་ཆད་པའི་རང་ངོ་ལ་
བདེ་སྡུག་ཡིན་མིན་ཡོད་མེད་རྟག་ཆད་བདག་གཞན་ལ་སོགས་པའི་མིང་འདོགས་ཀྱི་ཐ་སྙད་གང་གིས་ཀྱང་མ་གོས་ཤིང་མ་བསླད་པས་སྒྲོ་སྐུར་གྱི་མཐའ་དང་བྲལ་བ། ངོ་བོ་ཅིར་ཡང་མ་གྲུབ་པའི་གནད་ཀྱིས། རྣམ་པའམ་མཚན་ཉིད་ཅིར་ཡང་འཆར་བའི་གཞིར་རུང་ལ། གང་ལྟར་ཤར་ཡང་དོན་ལ་བདེན་པར་མ་གྲུབ་པ་སྟེ། སྐྱེ་འགག་གནས་གསུམ་གྱི་མཐའ་དང་བྲལ་བའི་སྟོང་པ་ཆེན་པོ་འདུས་མ་བྱས་པའི་ཆོས་ཀྱི་དབྱིངས་དེ་ཉིད་སྐུ་གསུམ་ལྷུན་གྲུབ་ཀྱི་རང་བཞིན་ཉིད་དུ་ཡེ་ནས་ཡིན་པ་དེ་ལ་གཞི་དངོས་པོ་གཤིས་ཀྱི་གནས་ལུགས་ཕྱག་རྒྱ་ཆེན་པོ་དང་། སྦྱོར་བ་དོན་གྱི་ཀུན་གཞི་སོགས་མིང་འདོགས་ཀྱི་ཐ་སྙད་བྱས་པ་སྟེ། གནས་ལུགས་དེས་ཏིལ་ལ་མར་གྱིས་ཁྱབ་པ་ལྟར་འཁོར་འདས་ཀྱི་ཆོས་ཐམས་ཅད་ལ་ཁྱབ་ཅིང་སྲོག་ཏུ་གྱུར་པའི་ཕྱིར་ལམ་སྒོམ་པས་གྲོལ་བའང་དེའི་གནད་ཀྱིས་ཏེ། སྒྱུ་འཕྲུལ་ལས། གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །ཞེས་སོ། །སེམས་ཉིད་དེའི་རང་བཞིན་ལ་འཁོར་བ་དང་འདས་པ་གང་ཡང་མ་གྲུབ་ཅིང་གཉིས་ཆོས་ཐམས་ཅད་ལས་འདས་པ་ཡིན་ལ་ཐ་སྙད་ཙམ་དུ། དེ་ཉིད་མངོན་སུམ་རང་ངོ་འཕྲོད་པས་རྟོགས་པ་ལ་དག་པ་སངས་རྒྱས་དང་། དེའི་ལྡོག་ཆར་མ་དག་པ་སེམས་ཅན་དུ་བཏགས་པ་སྟེ། དེ་ལས་སེམས་ཅན་འཁྲུལ་གྲོལ་གྱི་ཚུལ་ཇི་ལྟར་བྱུང་ཞེ་ན། དེ་ལྟ་བུའི་གཞི་དེ་རྟོགས་མ་རྟོགས་གང་དུའང་དཔྱད་མ་ཞུགས་པར་འཁོར་འདས་གཉིས་སུ་ཁ་ཚོན་མ་བཅད་པས་རང་བབ་ཏུ་གནས་པ་འདུས་མ་བྱས་པའི་ཆོས་ཉིད་དེ་ལ་ལུང་མ་བསྟན་གྱི་ཀུན་གཞི་སྟེ་སྤྱི་གཞིར་ཡང་འདོད་
པ་ཡོད་དེ། ཇི་སྐད་དུ་སློབ་དཔོན་ཀླུ་སྒྲུབ་ཀྱིས། ཀུན་གཞི་ཀུན་གྱི་གཞི་ཡིན་ཏེ། །འཁོར་དང་མྱ་ངན་འདས་པའི་གཞི། །ཞེས་བཤད་ལ། ལུང་འདིའི་དོན་གོང་དུ་སྨོས་པའི་ལུང་མ་བསྟན་དེ་ལ་དཔྱོད་འཛིན་གྱི་བློས་འཁྲུལ་པའི་རྒྱུན་མ་སྤེལ་བས་འཁོར་བའི་བག་ཆགས་མ་བསོགས་པར་སྐད་ཅིག་ཉིད་ལ་རང་ངོ་རང་གིས་རིག་ཅིང་ཤེས་པས་རང་སར་གདོད་མའི་གཞིར་གྲོལ་བ་ལ་དགོངས་ནས་འདས་པའི་གཞིར་གསུངས་པ་སྟེ། 
དགོངས་པ་ཟང་ཐལ 
་ལས། ཀུན་གྱི་གཞི་ནི་འདུས་མ་བྱས། །རང་བྱུང་ཀློང་ཡངས་བརྗོད་དུ་མེད། །འཁོར་འདས་གཉིས་ཀའི་མིང་མེད་དོ། །དེ་ཉིད་རིག་ན་སངས་རྒྱས་ཏེ། །ཞེས་གསུངས། གཞན་དུ་དེ་ལྟ་བུའི་ལུང་མ་བསྟན་གྱི་ཆ་མ་རིག་པ་དང་མཚུངས་ལྡན་དུ་གནས་པ་དང་། ཀུན་གཞི་ཡང་དག་པའི་གནས་སྐབས་སུ་གནས་འགྱུར་དགོས་པས་རྣམ་གྲོལ་གྱི་གཞིར་མི་འཐད་དེ། རྗེ་མི་བསྐྱོད་རྡོ་རྗེས། མངོན་པར་རྫོགས་པ་སངས་རྒྱས་པ་ན་ཀུན་གཞིའི་རྣམ་ཤེས་མེ་ལོང་ཡེ་ཤེས་སུ་གནས་འགྱུར་བ་དེས་མྱང་འདས་ཀྱི་བག་ཆགས་ཀྱང་འཇོག་རུང་དང་ལེན་ནུས་ཀྱི་དགོས་པ་མེད་དེ་སྤངས་པར་བྱས་ཟིན་པའི་ཕྱིར། ཞེས་དང་། ཀུན་གཞིའི་རྣམ་ཤེས་ཀྱི་བདག་ཉིད་དུ་གྲུབ་ཕྱིན་ཆད་འཁོར་བའི་རྣམ་སྨིན་དང་ས་བོན་དུ་གྱུར་ཟིན་པའི་ཕྱིར་འཁོར་བའི་ཕྱོགས་སུ་མ་ལྷུང་བ་མི་སྲིད་དོ། །ཞེས་གསུངས་པའང་དོན་འདིར་དགོངས་སོ། །ཀུན་གཞི་དེ་ཉིད་ཅི་ཡང་མེད་པའི་སྟོང་པ་ཕྱང་ཆད་མ་ཡིན་པར། རང་གསལ་གྱི་ཤེས་པ་འགག་མེད་འཆར་རུང་དུ་ཡོད་པ་དེ་ལ་ཀུན་གཞིའི་རྣམ་ཤེས་ཞེས་
བྱ་སྟེ། མེ་ལོང་དང་དེའི་དངས་ཆ་བཞིན་ནོ། །ཀུན་གཞི་ལུང་མ་བསྟན་དེའི་གཏི་མུག་གི་ཆ་ལས་རང་ངོ་རང་གིས་མ་རིག་ཅིང་གནས་ལུགས་མ་རྟོགས་པར་རང་གིས་རང་ཉིད་བསྒྲིབས་པ་ལྟ་བུ་དེ་ལ་ནི་ལྷན་ཅིག་སྐྱེས་པའི་མ་རིག་པ་ཞེས་ཀྱང་བྱ། འདི་ལ་བརྟེན་ནས་ཉོན་མོངས་པ་དང་། འཁྲུལ་རྟོག་མཐའ་དག་འབྱུང་ཕྱིར་བག་ཆགས་སྣ་ཚོགས་པའི་ཀུན་གཞི་ཞེས་ཀྱང་བྱ་ལ་སེམས་ཅན་གྱི་འཁྲུལ་གཞིར་ཡང་འདོད་དེ། དགོངས་པ་ཟང་ཐལ ་གྱི་སྨོན་ལམ་དུ། གཞི་ལ་རིག་པ་མ་ཤར་བས། །ཅི་ཡང་དྲན་མེད་ཐོམ་མེ་བ། །དེ་ཀ་མ་རིག་འཁྲུལ་པའི་རྒྱུ། །ཞེས་གསུངས་ཤིང་། མ་རིག་པ་འདིའི་འཁོར་གྱི་ཚུལ་དུ་ཆགས་པ་བར་མ་དང་བརྗེད་ངེས་པ་ལ་སོགས་གཏི་མུག་གི་རྟོག་པ་བདུན་ཀྱང་ཡོད་དེ། དེ་ལྟ་བུའི་ལྷན་སྐྱེས་ཀྱི་མ་རིག་པ་དེ་ལ་ང་དང་བདག་ཏུ་འཛིན་པའི་རྣམ་པར་རྟོག་པ་ཤར། བདག་ལ་བརྟེན་ནས་གཞན་དུ་འཛིན་པ་བྱུང་ཞིང་། རང་སྣང་ལ་རང་སྣང་ཡིན་པར་ངོ་མ་ཤེས་པས་ཕྱིའི་ཡུལ་དུ་བཟུང་སྟེ། གཟུང་འཛིན་གྱི་རྟོག་པ་ངོ་མ་ཤེས་པས་འཁྲུལ་པའི་མགོ་རྩོམ་པ་དེ་ལ་ཀུན་ཏུ་བཏགས་པའི་མ་རིག་པ་ཟེར། ཡིད་ཀྱི་རྣམ་ཤེས་ཀྱང་ཟེར་ཏེ། ཡུལ་སེམས་ཐ་དད་དུ་འཁྲུལ་པའི་སེམས་ཡིན་ལ། འདིའི་འཁོར་དུ་ཆགས་པ་དང་ཞེན་པ་ལ་སོགས་འདོད་ཆགས་ལས་གྱུར་པའི་རྟོག་པ་བཞི་བཅུ་པོ་རྣམས་ཡོད་དོ། །དེ་ནས་ཡིད་ཀྱི་རྣམ་ཤེས་དེའི་རྩལ་ལས་བག་ཆགས་འཁྲུལ་པ་སྣ་ཚོགས་པ་ཤར་ཞིང་རྒྱས་པ་དང་། དེའི་གྲོགས་སུ་ལས་རླུང་ཁྱབ་བྱེད་ཀྱི་རྐྱེན་དང་ཀུན་གཞི་
མ་རིག་པའི་རྒྱུ་སོགས་རྟེན་ཅིང་འབྲེལ་འབྱུང་གི་མཐུ་བརྟས་པའི་དབང་གིས་ལུས་སྣང་སེམས་གསུམ་ཚང་བར་གྲུབ་ཅིང་སྒོ་ལྔའི་དབང་ཤེས་ཀྱི་བྱེ་བྲག་དང་ཚོགས་དྲུག་སྣང་རྟོག་ཤར་བ་དེ་ལ་གཞན་དབང་ཞེས་ཀྱང་བྱ། རྩ་བའི་རླུང་ཆེན་ལྔ་དང་ཡན་ལག་གི་རླུང་ཕྲན་ལྔ་སོགས་ཀྱིས་རྣམ་རྟོག་གི་ཞེན་པ་བྱས་ཤིང་། རང་སྣང་འཁྲུལ་འཛིན་གོམས་པའི་མཐུ་ལས་གྲུབ་པའི་སྣོད་བཅུད་དུ་སྣང་བས་གཞི་རྟེན་དང་ཡུལ་དུ་བྱས་ནས་ཉོན་མོངས་པ་མཐའ་དག་བསྐྱེད་པའི་ཕྱིར་ན་ཉོན་མོངས་པ་ཅན་གྱི་ཡིད་ཀྱང་ཟེར། དབང་པོ་སྒོ་ལྔ་སོ་སོར་རྒྱུ་ཞིང་ཞེན་ཆགས་སོགས་ཀྱི་བྱེད་པོ་ཡིན་ཕྱིར་སྒོ་ལྔའི་རྣམ་པར་ཤེས་པ་ཡང་ཟེར་ལ། འདིའི་འཁོར་དུ་ཆགས་བྲལ་བར་མ་སོགས་ཞེ་སྡང་ལས་གྱུར་པའི་རྟོག་ཚོགས་སུམ་ཅུ་རྩ་གསུམ་ཀྱང་ཡོད་དེ། དེ་ལྟར་ན་རྩ་བ་བག་ཆགས་སྣ་ཚོགས་པའི་ཀུན་གཞི་དང་། ཡན་ལག་རང་བཞིན་བརྒྱད་ཅུའི་རྣམ་རྟོག་རྣམས་རིམ་གྱིས་མཆེད་པས་འཁྲུལ་པ་ལུ་གུ་རྒྱུད་དུ་གྱུར་ཅིང་འཁོར་བ་མཐའ་མེད་པར་འཁྱམས་པ་འདི་ནི་མ་རྟོགས་སེམས་ཅན་གྱི་འཁྲུལ་ཚུལ་ཡིན་ལ། ཀུན་གཞི་དེ་ནི་བག་ཆགས་སྣ་ཚོགས་བསོག་པའི་གཞི་བྱེད་པ་ས་བོན་གྱི་ཚུལ་དུ་གནས་པའི་མཐུས། ནང་གི་ལུས་རྡོས་བཅས་རགས་པ་རྩ་རླུང་ཐིག་ལེ་དངས་སྙིགས་སྣ་ཚོགས་པའི་དངོས་པོ་རྣམས་དང་། ཕྱི་རོལ་དུ་འཁོར་འདས་ཁམས་གསུམ་སྣོད་བཅུད་ཀྱི་དངོས་པོ་ཐམས་ཅད་གཅིག་ལ་གཅིག་བརྟེན་གྱི་ཚུལ་དུ་སྣང་བ་དེ་ཐམས་ཅད་སེམས་འཁྲུལ་པས་བཏགས་པའི་ངོར་སྒྱུ་མ་ལྟར་སྣང་བ་སྟེ། དྲན་པ་ཉེར་བཞག་ལས། འདི་ལྟར་ལུས་དང་ལོངས་
སྤྱོད་དང་། །བདེ་སྡུག་ཉིད་དུ་སྣང་བ་ནི། །སེམས་ཀྱིས་སྤྲུལ་ཞིང་སེམས་ཀྱིས་བྱས། །སེམས་ལས་གཞན་དུ་ཅུང་ཟད་མེད། །དཔེར་ན་རྨི་ལམ་ཇི་བཞིན་ནོ། །ཞེས་སོ། །
གཉིས་པ་ལམ་གྱི་རིམ་པ།
གཉིས་པ་ལམ་གྱི་རིམ་པ་ནི། གཞི་དངོས་པོ་གཤིས་ཀྱི་གནས་ལུགས་ཀྱི་ཕྱག་རྒྱ་ཆེན་པོ་དེའི་བཞུགས་ཚུལ་དང་། དེ་གློ་བུར་གྱི་དྲི་མས་སྒྲིབ་པ་སྦྱོང་བའི་སྐབས། སྦྱངས་ཟིན་པའི་དུས་ཏེ་གསུམ་དུ་ཕྱེ་ནས་གཞི་ལམ་འབྲས་བུའི་རྣམ་པར་བཞག་མོད། དོན་དུ་གཞི་འབྲས་ལྟོ་འབྱོར་ཉིད་ཕྱིར། གཞིའི་རང་བཞིན་ལ་བཟང་ངན་སྤང་བླང་བཅོས་བསྒྱུར་སོགས་ཀྱིས་བསྒྱུར་དུ་བཏུབ་པ་ཅི་ཡང་མེད་ཀྱང་གནས་སྐབས་སུ་འགྲོ་བ་རྣམས་ཉོན་མོངས་པས་བསྒྲིབས་ཏེ་རང་ངོ་རང་གིས་མ་རིག་ཅིང་རྨོངས་པས་དབུལ་པོའི་ཁྱིམ་གྱི་ས་འོག་གི་གཏེར་ལྟར་གཞི་རང་ངོ་མ་འཕྲོད་པ་འཕྲོད་པར་བྱེད་པའི་ཐབས་རྨད་དུ་བྱུང་བ་ལམ་ཕྱག་རྒྱ་ཆེན་པོ་ལ་བརྟེན་དགོས་ཤིང་། དེ་ཡང་བརྒྱུད་པ་ཁྱད་པར་ཅན་གྱི་བརྒྱུད་འཛིན་མཚན་ལྡན་གྱི་བླ་མས་སྨིན་བྱེད་ཀྱི་དབང་དང་། གྲོལ་བྱེད་ཀྱི་གདམས་པ། རྒྱབ་རྟེན་གྱི་ལུང་རྣམས་མཉན་པས་རང་གི་ལས་སྐལ་དང་བླ་མའི་བྱིན་རླབས་བརྩོན་འགྲུས་དྲག་པོ་གསུམ་འཛོམས་པས་རང་སེམས་གཉུག་མའི་རང་ཞལ་རྗེན་པར་རྟོགས་པ་ན་ཕྱག་རྒྱ་ཆེན་པོའི་ལྟ་བ་རྟོགས་པ་ཡིན་ཏེ། ཞི་བྱེད་ཆུ་ཀླུང་ཆེན་པོའི་རྒྱུད་ལས། བརྗོད་བྲལ་ལྷན་ཅིག་སྐྱེས་པའི་ཡེ་ཤེས་འདི། །ཚོགས་བསགས་སྒྲིབ་པ་དག་པའི་ལག་རྗེས་དང་། །
རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བརྟེན་ན་རྨོངས་པར་ཤེས་པར་བྱ། །ཞེས་སོ། །དེ་ཡང་ཇི་ལྟར་ཉམས་སུ་ལེན་པའི་ཚུལ་ཞི་ལྷག་གི་ཏིང་ངེ་འཛིན་བསྒོམ་པའི་རིམ་པ་རྣམས་ཁྲིད་གཞུང་རྣམས་སུ་གསལ་བ་ལ་འདིར་མ་ཟློས་ཤིང་། དྭགས་ལུགས་རྣལ་འབྱོར་བཞི་དང་དེར་གསུམ་གསུམ་དུ་ཕྱེ་བས་བཅུ་གཉིས་ཀྱིས་ས་ལམ་བགྲོད་པའི་ཐ་སྙད་མཛད་པ་ནི། རྒྱུད་གསང་བ་བསམ་གྱིས་མི་ཁྱབ་པའི་ལུང་གི་དགོངས་པ་གསལ་བར་མཛད་པ་སྟེ། ཇི་སྐད་དུ། སེངྒེ་རྣམ་པར་བསྒྱིངས་པའི་ཏིང་འཛིན་གྱིས། །མི་གཡོ་རྩེ་གཅིག་དངས་པའི་ཤེས་པ་གསལ། །རང་རིག་ཡེ་ཤེས་ཁོང་ནས་སད་པར་བྱེད། །བཟོད་པ་བརྟན་པོས་ངན་སོང་སྡུག་བསྔལ་སྤངས། །གཉིས་པ་སྒྱུ་མ་ལྟ་བུའི་ཏིང་འཛིན་གྱིས། །སྤྲོས་དང་བྲལ་བའི་མཉམ་བཞག་ཆེན་པོ་ལས། །བསམ་གྱིས་མི་ཁྱབ་ཏིང་འཛིན་རྩལ་དུ་ཤར། །དྲོད་ཐོབ་ནས་ནི་སྐྱེ་ལ་དབང་བ་ཡིན། །གསུམ་པ་དཔའ་བར་འགྲོ་བའི་ཏིང་འཛིན་གྱིས། །དུ་མ་རོ་གཅིག་ས་བཅུའི་རྟོགས་པ་ཤར། །དུས་གསུམ་རྒྱལ་བའི་སྲས་པོ་གཞན་དོན་མཛད། །རྩེ་མོ་ཐོབ་ནས་འཕེལ་བ་རྒྱུན་མི་ཆད། །བཞི་པ་རྡོ་རྗེ་ལྟ་བུའི་ཏིང་འཛིན་གྱིས། །སྒོམ་དུ་མེད་པའི་ཉམས་ལེན་བརྩོན་པ་ལས། །མཁྱེན་པའི་ཡེ་ཤེས་སངས་རྒྱས་ཞིང་ཁམས་མཐོང་། །མ་བཙལ་ལྷུན་གྲུབ་ཆོས་མཆོག་ཆེན་པོའི་ངང་། །ཞེས་སོ། །འདི་དང་མཐུན་པར་ལང་གཤེགས་ཀྱི་མདོ་ཡང་བསྟན་ལ། སློབ་དཔོན་ཤཱནྟི་པས་ཀྱང་གསལ་བར་མཛད་དོ། །
གསུམ་པ་འབྲས་བུ།
གསུམ་པ་འབྲས་བུ་ནི། སྐུ་གསུམ་ཡེ་ཤེས་ལྔའི་བདག་ཉིད་ཁྱབ་བདག་རྡོ་རྗེ་འཆང་གི་གོ་འཕང་མངོན་དུ་བྱེད་པ་ཡིན་ཞིང་སྐུ་གསུམ་པོ་དེ་ལ་ཁ་སྦྱོར་ཡན་ལག་བདུན་དང་། དབང་ཕྱུག་གི་ཡོན་ཏན་བརྒྱད་སོགས་ལྡན་པ་སྟེ། དེ་ཡང་འོག་མིན་གྱི་གནས་སུ་སེམས་དཔའ་ཆེན་པོ་རྣམས་ལ་ཟབ་རྒྱས་གསང་སྔགས་ཀྱི་ཆོས་འཁོར་རྟག་པ་རྒྱུན་དུ་བསྐོར་བར་ལོངས་སྤྱོད་མཛད་པའི་ཕྱིར་ལོངས་སྤྱོད་ཀྱི་ཡན་ལག །མཚན་དཔེ་རྫོགས་པའི་ཡེ་ཤེས་ཀྱི་སྐུ་ཉིད་རང་འོད་ཀྱི་ཡུམ་དང་སྦྱོར་བས་ཁ་སྦྱོར་གྱི་ཡན་ལག །ཟག་མེད་ཀྱི་བདེ་བ་ཆེན་པོ་རྒྱུན་མེད་ཕྱིར་བདེ་བ་ཆེན་པོའི་ཡན་ལག་དང་གསུམ་ནི་ལོངས་སྐུའི་ཁྱད་ཆོས་ཡིན། དམིགས་མེད་ཀྱི་ཐུགས་རྗེ་མཁའ་ལྟར་ཁྱབ་པ་ནི། སྙིང་རྗེས་ཡོངས་སུ་གང་བའི་ཡན་ལག །ཕྲིན་ལས་རྒྱ་ཆེན་པོས་འཁོར་བའི་མཐའ་དང་མཉམ་པར་དོན་རྟོག་མེད་ལྷུན་གྲུབ་ཏུ་མཛད་པ་ནི་རྒྱུན་མི་འཆད་པའི་ཡན་ལག །མྱང་འདས་ཞི་བའི་མཐའ་ལ་མི་གནས་པ་ནི་འགོག་པ་མེད་པའི་ཡན་ལག་སྟེ། འདི་གསུམ་ནི་སྤྲུལ་པ་སྐུའི་ཁྱད་ཆོས་ཡིན། སྟོང་པ་སྙིང་རྗེ་ཟུང་དུ་འཇུག་པ་སྤྲོས་པ་ཐམས་ཅད་དང་བྲལ་བས་རང་བཞིན་མེད་པའི་ཡན་ལག་ནི་ཆོས་སྐུའི་ཁྱད་ཆོས་སུ་བཞེད་དེ་ཁ་སྦྱོར་བདུན་ནོ། །སྐུ་གང་ལ་གང་འདུལ་རྣམ་པ་ཐམས་ཅད་དང་ལྡན་པ་ནི་སྐུའི་དབང་ཕྱུག །གང་འདུལ་ཆོས་འཁོར་རྒྱུན་མི་འཆད་པ་གསུང་གི་དབང་ཕྱུག །རྟོག་མེད་ཐུགས་རྗེ་མངའ་བ་ཐུགས་ཀྱི་དབང་ཕྱུག །རྫུ་འཕྲུལ་ཐོགས་པ་མེད་པ་རྫུ་འཕྲུལ་གྱི་དབང་ཕྱུག །འཁོར་འདས་དུས་
གསུམ་མཉམ་ཉིད་རོ་གཅིག་པར་མངོན་པར་བྱང་ཆུབ་པ་ནི་ཀུན་འགྲོའི་དབང་ཕྱུག །རི་རབ་སོ་གཉིས་ཀྱི་རྡུལ་དང་གྲངས་མཉམ་པའི་ལྷ་མོས་འདོད་ཡོན་གྱིས་མཆོད་ཀྱང་འདོད་པས་གོས་པ་མེད་པ་ནི་འདོད་པའི་དབང་ཕྱུག །ཡིད་བཞིན་གྱི་ནོར་བུ་ལྟར་འགྲོ་བའི་རེ་འདོད་ཡིད་མཐུན་དུ་བསྐང་བ་ཅི་འདོད་བསྐྱེད་པའི་དབང་ཕྱུག །འོག་མིན་གྱི་དབྱིངས་ན་ཁམས་གསུམ་ཆོས་ཀྱི་རྒྱལ་པོར་རྟག་ཏུ་བཞུགས་པ་ནི་གནས་ཀྱི་དབང་ཕྱུག་སྟེ། དབང་ཕྱུག་བརྒྱད་པོ་དེ་ལོངས་སྐུའི་ཡོན་ཏན་གྱི་རྣམ་གྲངས་ཡིན་ནོ། །དེ་ཡང་ད་ལྟ་ལམ་གྱི་གནས་སྐབས་སུ་དོན་དམ་སྟོང་ཉིད་ལམ་གྱི་ཕྱག་རྒྱ་ཆེན་པོ་ལས་གནད་དུ་བསྣུན་པར་འབྲས་བུ་ཆོས་ཀྱི་སྐུ་དངོས་འགྲུབ་ཅིང་། དེའི་ཡན་ལག་གམ་ཐབས་ཀྱི་ཆར་སེམས་བསྐྱེད་སྨོན་ལམ་རྣམ་པར་དག་པ་བགྱིས་པའི་མཐུ་ལས་སྤྲུལ་པའི་སྐུ་དང་། བསྐྱེད་རིམ་ཟབ་མོ་བསྒོམ་པའི་རྒྱུ་འབྲས་ལས་ལོངས་སྤྱོད་རྫོགས་པའི་སྐུ་སྟེ། ཉམས་ལེན་དེ་དག་ཀྱང་སོ་སོ་ཡ་བྲལ་རེས་འཇོག་ལྟ་བུར་ནི་མ་ཡིན་པར་ཐབས་ཤེས་ཟུང་འཇུག་འཁོར་གསུམ་ཡོངས་དག་ཆེན་པོར་འབད་པའི་མཐུ་འབྲས་ཀྱིས་སྐུ་གསུམ་འདུ་འབྲལ་མེད་པའི་ངོ་བོར་གཏན་སྲིད་ཟིན་པར་འགྱུར་བའོ། །
བཞི་པ་ཕྱག་རྫོགས་ཀྱི་ཁྱད་པར།
བཞི་པ་ཕྱག་རྫོགས་ཀྱི་ཁྱད་པར་ལ། མཁས་པ་འགའ་ཞིག་ཁྱད་མེད་དུ་འདོད་དེ། རྫོགས་ཆེན་ལ་ཕྱི་ནང་གསང་གསུམ་གྱི་སེམས་ཀློང་མན་ངག་གི་སྡེ་དང་། ཡང་གསང་བླ་ན་མེད་པའི་སྡེ་སྐོར་
རྣམས་ཀྱི་ཁྲེགས་ཆོད་གཞི་ཡི་ཉམས་ལེན་གྱི་ལྟ་སྒོམ་ཐམས་ཅད་ཕྱག་རྫོགས་ཁྱད་མེད་དང་། དེའི་བོགས་འདོན་ཐབས་ཀྱི་མྱུར་ལམ་དུ་གསར་མ་ལ་གཏུམ་མོ་བདེ་སྟོང་ཕྱག་ཆེན་ཆོས་དྲུག་སྐོར་དང་། སྦྱོར་དྲུག་གི་སྲོག་རྩོལ་རྗེས་ཏིང་སོགས་ཀྱི་དོད་དུ་རྫོགས་ཆེན་གྱི་སྡེ་གོང་མ་རྣམས་སུ་འོད་གསལ་ཐོད་རྒལ་གྱི་སྐོར། དཀར་ཁྲིད་དམར་ཁྲིད་སེར་ཁྲིད་ཁྲ་ཁྲིད་སོགས་སུ་གསུངས་སོ། །ཡང་ཁྱད་ཡོད་པར་བཞེད་མཁན་རྣམས། གཞིའི་སྐབས་སུ་ཀུན་གཞི་དང་ཀ་དག་གི་ཁྱད། ལམ་གྱི་སྐབས་སུ་རྣམ་རྟོག་ཆོས་སྐུར་འདོད་མིན། སེམས་རིག་དབྱེ་བ། སྣང་སེམས་གཅིག་མིན། དྲན་པ་སྒོམ་དུ་བྱེད་མི་བྱེད། འབྲས་བུའི་སྐབས་སུ་དངས་མའི་སྐུ་འགྲུབ་མིན་བཅས་ཀྱིས་དབྱེ་བར་བཤད་ལ། དོན་དུ་ཆོས་ཅན་གང་ཤར་གྱི་སྣང་བ་ལ་ཆོས་ཉིད་ཀྱི་རྒྱས་ཕར་བཏབ་ནས་སྣང་རིག་ངོས་བཟུང་བྲལ་བའི་གསལ་སྟོང་དུ་སྐྱོང་བ་ཕྱག་ཆེན་པའི་ལུགས། ཆོས་ཐམས་ཅད་ཆོས་ཉིད་བྱང་ཆུབ་ཀྱི་སེམས་རང་བྱུང་ཡེ་ཤེས་ཀྱི་དབྱིངས་སུ་ཚུར་རྫོགས་པས་དོན་དུ་རང་བྱུང་གི་ཡེ་ཤེས་ལ་འཁོར་འདས་སུ་གྲུབ་པ་མེད་པས་ཡེ་གྲོལ་སྤང་བླང་ལས་འདས་པར་འདོད་པ་རྫོགས་ཆེན་པའི་ལུགས་ཏེ་ཞེས་རྗེ་གཏེར་ཆེན་བླ་མས་གསུངས་སོ། །ལར་དྭགས་བརྒྱུད་ཕྱག་ཆེན་པ་རྣམས། གནས་ལུགས་ཕྱག་ཆེན་ཞེས་མདོ་ཏིང་ངེ་འཛིན་རྒྱལ་པོ་དང་། རྒྱུད་བླ་མའི་དགོངས་པ་ལྟར་མདོ་ལུགས་སུ་བཞེད། བདེ་སྟོང་ཕྱག་རྒྱ་ཆེན་པོ་ཞེས་སྔགས་ལུགས་དབང་ལས་བྱུང་བའི་ཡེ་
ཤེས་ཏེ་བརྒྱུད་ལུགས་ཐ་དད་པ་གཉིས་རྗེ་མར་པ་ལ་བཀའ་བབ་ཡོད་པར་བཞེད། ཤངས་ལུགས་སོགས་ཕྱག་ཆེན་གྱི་མཚན་ཅན་གཞན་བོད་འདིར་བྱུང་བ་ཐམས་ཅད་དང་། སྦྱོར་དྲུག་རིམ་ལྔ་ལམ་འབྲས་སོགས་དབང་ལས་བྱུང་བའི་ཡེ་ཤེས་ཕྱག་རྒྱ་ཆེན་པོར་བཞེད། ཞི་བྱེད་པ་རྣམས་ངོ་བོ་ཕ་རོལ་ཏུ་ཕྱིན་པ་སྔགས་དང་རྗེས་སུ་མཐུན་པ་ཞེས་ཤེར་ཕྱིན་གྱི་དགོངས་པ་སྔགས་ཀྱིས་ཟབ་ལམ་བདེ་མྱུར་དུ་འཁྲིད་པས་ཁྱད་པར་འཕགས་པར་བཞེད་དོ། །
དཔྱད་ན་ཕྱག་རྫོགས་ཀྱི་ལམ་ལ་ཁྱད་པར་ཡོད།
དཔྱད་ན་ཕྱག་རྫོགས་ཀྱི་ལམ་ལ་ཁྱད་པར་ཡོད་དེ། རྫོགས་ཆེན་སེམས་སྡེ་བ་དང་ལམ་གྱི་སྣེ་ཁྲིད་ཚུལ་ཕྱག་ཆེན་དང་ཕྱོགས་མཚུངས་ཙམ་ལ། སེམས་སྡེ་བས་ཡུལ་ཅན་སེམས་ཉིད་རིག་སྟོང་ཀ་དག་ཏུ་གཏན་ལ་འབེབས་པས་ཁྱད་པར་དུ་བྱས། ཀློང་སྡེ་བས་འོད་གསལ་ལ་རྩིས་སོ་ཆེར་བྱེད་པ་གསར་མའི་རིམ་ལྔ་དང་ཆ་འདྲ་ཙམ་ལ་རིམ་ལྔ་ནི། རླུང་གི་བྱེད་ཆིངས་ཀྱི་གནད་ལས་སྒྱུ་ལུས་སྟོང་གཟུགས་ཀྱི་སྣང་བརྙན་རིལ་འཛིན་དང་རྗེས་གཞིག་གིས་འོད་གསལ་དུ་དངོས་སུ་འཇུག་པ་ཡིན་པས་བྱ་རྩོལ་དང་བཅས་པ་ཡིན་ལ། ཀློང་སྡེས་ནི་དམིགས་གཏད་དང་བྲལ་བའི་གནད་ཟབ་མོས་བྱ་རྩོལ་མེད་པའི་ངང་དུ་འཇོག་པ་ཟབ་གསལ་ཡེ་ཤེས་ཟུང་འཇུག་གིས་འཇའ་ལུས་རྡོ་རྗེའི་སྐུར་འགྲུབ་པའི་ཐབས་ཟབ་པས་ལམ་འདིར་ཞུགས་པ་རྣམས་ཡེ་ཤེས་ཀྱི་སྐུར་གཤེགས་པ་ཤ་སྟག་བྱུང་བས་ཁྱད་པར་དུ་བྱས། མན་ངག་སྡེས་ལམ་ཐོད་རྒལ་གྱི་སྣང་བ་གཙོ་བོར་བྱེད་པས་གསར་མའི་སྦྱོར་
དྲུག་དང་ཆ་འདྲ་མོད། དོན་ལ་ཁྱད་པར་ཆེ་སྟེ། སྦྱོར་དྲུག་པས་རླུང་ལྔ་དབུ་མར་བཅིངས་པའི་གནད་ཀྱིས་སྟོང་གཟུགས་ཀྱི་སྣང་བ་ཤར་བ་བྱེད་རྩོལ་གྱིས་བདེ་བ་ཆེན་པོའི་ལམ་ལ་རིམ་གྱིས་དཀྲི་བ་ཡིན་ལ། འདིར་ནི་རིག་གདངས་རྡོ་རྗེ་ལུ་གུ་རྒྱུད་ལ་དྲན་པ་གཞུར་དུ་འཛུད་ནས་འཁོར་འདས་ཀྱི་ཆོས་ཐམས་ཅད་ཆོས་ཉིད་སྟོང་འཛིན་དང་བྲལ་བའི་ངང་དུ་རང་རིག་ཆོས་ཉིད་ཀྱི་ཡུལ་ལ་མངོན་སུམ་དུ་ཤར་ནས་རིག་པ་ཡེ་ཤེས་ཀྱི་སྐུར་སྨིན་ཏེ་གདོད་མའི་དབྱིངས་སུ་སྐྱེལ་བས་ཁྱད་པར་དུ་འཕགས་ཤིང་། ལམ་འདིས་ཡེ་ཤེས་ཀྱི་སྐུ་འཇའ་ལུས་སུ་གྲོལ་བའང་ཀློང་སྡེ་སོགས་ཀྱིས་བསྒྲུབ་པ་ལས་འཕགས་ཏེ། འདིར་ནི་རགས་པའི་སྒོ་གསུམ་ཕྲ་བ་དངས་མའི་སྐུར་བསྒྱུར་བ་ཙམ་མ་ཡིན་པར། ཆོས་ཉིད་ཟད་པའི་སྣང་བ་མཐར་ཕྱིན་པས་སྒོ་གསུམ་ཕྲ་རགས་ཐམས་ཅད་སྐུ་དང་ཡེ་ཤེས་ཀྱི་ངང་ལ་གཞི་མེད་དུ་དངས་པ་ཡིན་པའི་ཕྱིར་རོ། །ཞེས་སྨིན་གླིང་པ་བཞེད།དོན་དུ་རྒྱལ་བས་གདུལ་བྱའི་ཁམས་དབང་བསམ་པ་དང་རྗེས་མཐུན་ཆོས་ཀྱི་རྣམ་གྲངས་མཐའ་ཡས་པར་བསྟན་པ་དག་རང་རང་གི་གནས་སྐབས་དེ་དང་དེར་སོ་སོར་བདེན་ཅིང་འབྲས་བུ་འབྱུང་བ་ལ་མི་བསླུ་བས་ཟབ་མི་ཟབ་དང་། བཟང་རྟོག་ངན་རྟོག་གི་ལྷད་མ་ཕྱེས་པར་ཆོས་ཉིད་བསམ་གྱིས་མི་ཁྱབ་པའི་དོན་ལ་བློ་བཞག་ན་རྡོ་རྗེ་ཐེག་པའི་རྩ་ལྟུང་དྲུག་པས་ཀྱང་མི་གོས་ཤིང་ཆོས་སྤང་གི་ལས་མི་བསོག་པ་འདི་རང་གནད་ཟབ་ལ།
ཐོས་བསམ་སྒོམ་པས་ཕྱུག་ཅིང་སྐྱེས་སྦྱངས་ཀྱི་ཡོན་ཏན་མངོན་པར་མཐོ་བ་དང་། ཁྱད་པར་སྒོམ་བྱུང་གི་ཤེས་རབ་ཀློང་རྡོལ་བས་ཆོས་ཀྱི་དེ་ཉིད་རིག་པ་རྣམས་ཀྱིས་ནི། ཟབ་མོའི་གནད་གསང་མཁྱེན་ཅིང་རྟོགས་པས་ཐེག་པ་དང་གྲུབ་མཐའི་རྩེ་མོར་གྱུར་པའི་རྫོགས་ཆེན་དངོས་ཀྱི་སྐོར་ལ་ཡང་ལྟ་བ་མཐོ་དམན་དང་ལམ་གྱི་ཁྱད་འབྱེད་པ་ལ་མཁས་ཕྱིར་། ཕྱག་རྫོགས་ཀྱི་ལམ་མྱུར་བུལ་དང་འབྲས་བུ་ཁྱད་དབྱེ་བ་ནི་ལོས་ཀྱང་བདེན། དེང་དུས་ལམ་ཁྱད་མྱུར་བུལ་དང་ཟབ་མི་ཟབ་ལྟ་བ་མཐོ་དམན་བཅས་ཆོས་ལ་མ་ལྟོས་པར་ཉམས་སུ་ལེན་པའི་གང་ཟག་དེར་རག་ལས་འདུག་སྙམ་ཞིང་། འབྲས་བུ་མཐར་ཕྱིན་དུས་ཆུ་དང་འཁྱགས་རོམ་ངོ་བོ་དབྱེར་མེད་ལྟར་ལ། གནས་སྐབས་སུ་ཇི་བཞིན་མངོན་དུ་གྱུར་ནུས་མ་ནུས་དང་། ཡོན་ཏན་གྱི་རྩལ་ཁ་རྫོགས་མ་རྫོགས་ལ་ཐེག་པ་དང་གྲུབ་མཐའ་སོ་སོའི་འབྲས་བུ་རིམ་པ་ཇི་སྙེད་ཅིག་སྣང་བ་སྟེ། དེ་ལྟར་མིན་ན་གྲོལ་འབྲས་ཐ་དད་པས་དབྱིངས་མི་མཚུངས་པར་མེ་དང་ཆུར་འགྱུར་ན་འབྲས་བུ་རྟག་པར་འགྱུར་ཞིང་ཕྱི་རོལ་པའི་ལུགས་སོ། །
མཁས་བཞེད་བཙན་པ་རྣམས་འདི་སྐབས་ཕྱག་རྫོགས་ཀྱི་ཁྱད་པར་ལ།
མཁས་བཞེད་བཙན་པ་རྣམས་འདི་སྐབས་ཕྱག་རྫོགས་ཀྱི་ཁྱད་པར་ལ། ཕྱག་ཆེན་མན་ཆད་ཀྱི་སྤྱི་གཞི་ཀུན་གཞིར་འདོད་དེ་འཁོར་བ་དང་མྱང་འདས་གཉིས་ཀའི་སྤྱི་གཞི་ལྷན་སྐྱེས་ཀྱི་མ་རིག་པ་དང་མཚུངས་ལྡན་དུ་འགྲོགས་པའི་ཕྱིར། ལྷན་སྐྱེས་ཀྱི་དྲི་མ་སྦྱངས་ཏེ། ད་གཟོད་རིག་པའི་ཡེ་ཤེས་གསལ་དགོས་པ་དང་། ཞེས་པ་འདིའང་དཔྱད་དེ། ཕྱག་ཆེན་མན་ཆད་ཅེས་པས་གནས་ལུགས་
ཕྱག་ཆེན་མདོའི་དགོངས་པ་ཡིན་ན་དེ་ལས་འོག་ཏུ་ཐེག་པ་དང་གྲུབ་མཐའ་གང་ཡང་མེད་ལ། སྔགས་སུ་བཞེད་ཚེ་རྫོགས་ཆེན་སེམས་སྡེ་དང་གཅིག་པར་འདོད་པའང་ཡོད་སྲིད་པས་དེས་ཀྱང་གཞི་ཀུན་གཞིར་འདོད་དགོས་ན་ཧ་ཅང་ཐལ་ལ། ལྷན་སྐྱེས་ཀྱི་མ་རིག་པ་དང་མཚུངས་ལྡན་དུ་འགྲོགས་ན་རྣམ་བྱང་གི་རྟེན་བྱེད་པའང་མི་འཐད་དེ། དག་པ་གཉིས་ལྡན་སངས་རྒྱས་ཀྱི་ཡེ་ཤེས་དང་སྙིང་པོ་གཉིས་ཀྱི་རྟེན་མི་བྱེད་ཅིང་ཀུན་གཞི་མེ་ལོང་ཡེ་ཤེས་སུ་གནས་འགྱུར་དགོས་པར་འབྱུང་བཞི་ཟད་པའི་རྒྱུད་ལས། ཀུན་གཞི་དག་པ་ཆོས་ཀྱི་དབྱིངས། །ཞེས་དང་། གསེར་འོད་དམ་པ་ལས། ཀུན་གཞི་གནས་འགྱུར་བ་ནི་ངོ་བོ་ཉིད་ཆོས་ཀྱི་སྐུའོ། །ཞེས་གསུངས། ལྷན་སྐྱེས་ཀྱི་དྲི་མ་སྦྱངས་ཏེ། ད་གཟོད་རིག་པའི་ཡེ་ཤེས་གསལ་དགོས་ན་ལམ་པ་དང་མཚུངས་པས་ཐོག་མའི་གྲོལ་གཞིར་ག་ལ་འཐད་དེ་འཁྲུལ་ཟིན་པས་སོ། །འོ་ན་ཕྱག་ཆེན་གྱི་གཞི་ཀུན་གཞིར་མི་འདོད་དམ་ཞེ་ན། དེ་ལ་གྲོལ་གཞི། སྤྱི་གཞི། འཁྲུལ་གཞི་གསུམ་ཡོད་དེ། གྲོལ་གཞི་སྦྱོར་བ་དོན་གྱི་ཀུན་གཞི་ནི་རྫོགས་ཆེན་གྱི་ཀ་དག་དང་མཚུངས་པར་རྒྱན་སྟུག་པོ་བཀོད་པ་ལས། ཟླ་བའི་དཀྱིལ་འཁོར་རྣམ་དག་ཅིང་། །རྟག་ཏུ་དྲི་མེད་ཡོངས་གང་ཡང་། །ཚེས་ཀྱི་དབང་གིས་འཇིག་རྟེན་ན། །ཟླ་བ་སྐྱེ་འབྲི་རྣམ་པར་རྟོག །དེ་བཞིན་དོན་གྱི་ཀུན་གཞི་ཡང་། །རྟག་ཏུ་བདེ་གཤེགས་སྙིང་པོ་ཅན། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་པས་བསྟན་པར་མཛད། །ཅེས་དང་། རང་བཞིན་དག་ཅིང་དྲི་
མ་མེད། །ཡོན་ཏན་ཡིད་བཞིད་ནོར་བུ་འདྲ། །འཕོ་བ་མེད་ཅིང་འགྱུར་བ་མེད། །དེ་ལྟར་ཡོངས་ཤེས་རྣམ་པར་གྲོལ། །ཞེས་སོ། །སྤྱི་གཞི་ཙམ་ཞིག་ལུང་མ་བསྟན་གྱི་ཀུན་གཞིར་ངོས་འཛིན་ཏེ། འཁོར་བ་དང་འདས་པ་གཉིས་ཀར་ལུང་མ་བསྟན་པ་ཙམ་ལ་དགོངས་ཏེ། དོན་དུ་ལུང་མ་བསྟན་པ་དེ་གཏི་མུག་གི་ཆར་འགྱུར་བས་དེ་ལས་རྟོག་དཔྱོད་ཀྱི་ཤེས་པ་འགྱུས་མ་ཐག་རང་གི་རིག་པའི་རང་གདངས་སུ་ངོ་ཤེས་མ་ཐག་གོང་གི་གཞིར་གྲོལ་བ་ཐོབ་པས་སླར་མི་འཁྲུལ་པ་ཡིན་ལ་ཀུན་གཞིར་གྲོལ་རུང་སླར་ཡང་ཡིད་ཀྱི་རྣམ་ཤེས་གཡོས་མ་ཐག་འཁྲུལ་པས་མཐའ་མེད་ལ། གོང་གི་རིག་པའི་རང་གདངས་ངོས་མ་ཟིན་པར་བདག་ཏུ་བཟུང་ན་འཁྲུལ་པ་ཡིན་ལ། འཁྲུལ་གཞི་དངོས་ལུང་མ་བསྟན་གྱི་ཀུན་གཞིའི་ཆ་ལ་རང་ངོ་རང་གིས་མ་རིག་པ་ལྟ་བུའི་ལྷན་སྐྱེས་ཀྱི་མ་རིག་པ་དང་། དེ་ལས་ཀུན་གཞིའི་རྣམ་ཤེས་མེ་ལོང་གི་དངས་ཆ་ལྟར་ཅིར་ཡང་འཆར་རུང་གི་ནུས་པ་མ་འགགས་པ་ལ་ཀུན་ཏུ་བཏགས་པའི་མ་རིག་པས་གཉིས་འཛིན་གྱི་བག་ཆགས་མཐུ་བརྟས་པས་ཡིད་ཀྱི་རྣམ་ཤེས་གཡོས་ནས་བདག་དང་གཞན་དུ་རྣམ་པར་རྟོག་པས་ཉོན་མོངས་པ་ཅན་གྱི་ཡིད་དང་སྒོ་ལྔའི་རྣམ་ཤེས་སོགས་ཀྱིས་འཁྲུལ་པ་རྒྱུན་ཆགས་སུ་བྱུང་བ་དེའི་ཡུལ་ལྷན་སྐྱེས་ཀྱི་མ་རིག་པ་དེ་ལ་བག་ཆགས་སྣ་ཚོགས་པའི་ཀུན་གཞིར་འབོད་པ་དེ་ཡིན་ཏེ། དགོངས་པ་ཟང་ཐལ ་ལས། དང་པོ་སེམས་ཅན་འཁྲུལ་པའི་གཞི། །གཞི་ལ་རིག་པ་མ་ཤར་བས། །ཅི་ཡང་དྲན་མེད་ཐོམ་མེ་བ། །དེ་ག་མ་རིག་འཁྲུལ་པའི་རྒྱུ། །ཞེས་གསུངས།
འོ་ན་གཞི་དེ་གསུམ་ཐ་དད་དམ་ཞེ་ན་མི་དད་དེ། དོན་དུ་རང་ངོས་ལ་འཁྲུལ་མ་འཁྲུལ་གྱི་དྲི་མས་ཡེ་ནས་གོས་མ་མྱོང་བ་ནམ་མཁའ་ལྟ་བུ་ལ་ཅིར་ཡང་འབྱུང་རུང་གི་ཆ་མི་འདོར་བས་གློ་བུར་དུ་སྤྲིན་གཡོས་པ་དང་ཆ་མཚུངས་སོ། །ཡང་རྫོགས་པ་ཆེན་པོའི་མྱང་འདས་ཐོག་མའི་གྲོལ་གཞི་དང་། མཐར་ཐུག་གི་གྲོལ་ས་གཞི་འབྲས་དབྱེར་མི་ཕྱེད་པར་དབྱིངས་འགྱུར་བ་མེད་པ་རིག་སྟོང་ཀ་དག་མཚན་མའི་སྤྲོས་པ་ཐམས་ཅད་ལས་ཡེ་ནས་རིང་དུ་སོང་བ་ཡེ་ཤེས་གསུམ་གྱི་བདག་ཉིད་སངས་རྒྱས་ཀྱི་ཡོན་ཏན་རྒྱ་མཚོའི་རང་བཞིན་དེ་ཁོ་ནར་ངོས་འཛིན་པས་ཁྱད་པར་འཕགས་ཞེས་པའང་དཔྱད་དེ། རྫོགས་ཆེན་པས་གཞི་ཀ་དག་ལྷུན་གྲུབ་གཉིས་ཆར་འདོད་ཀྱིས་ཀ་དག་རྐྱང་པར་མི་འདོད་དེ། འདོད་ན་ཀློང་དྲུག་པ་ལས། ངོ་བོ་ཉིད་ལ་ཡེ་དག་པས། །སེམས་ཅན་འཁོར་བ་འདིར་མི་རིགས། །མ་རིག་དྲི་མ་ཡེ་ཟད་ཕྱིར། །ཞེས་གསུངས་པའི་ལུང་གི་གནོད་བྱེད་བབས་ཤིང་། ཀ་དག་རྐྱང་པ་དེ་ནི་སྟོང་རྐྱང་ལ་བཞེད་ཕྱིར་ཡེ་ཤེས་གསུམ་གྱི་བདག་ཉིད་ཅེས་པ་མི་འཐད་པར། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་ནས་ཞི་སྟེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །ཅེས་བཤད་ལ། ཀློང་གསལ་གྱི་ལུང་ནི་ངོ་བོ་ཀ་དག་གི་ཡེ་ཤེས་ཀ་དག་རང་ལ་བརྗོད་པ་ཡིན། བདག་ཉིད་ཀྱི་སྒྲས་འདིར་ལོགས་སུ་ཕྱེས་པ་ལྟར་སོང་འདུག་ཅིང་། སངས་རྒྱས་ཀྱི་ཡོན་ཏན་རྒྱ་མཚོ་ནི་གྲོལ་ཟིན་པའི་འབྲས་བུ་ཆོས་སྐུའི་ཡོན་ཏན་རྣམས་ཡིན་ལ། རང་བཞིན་ནི་ཡོན་ཏན་དེ་
གཞན་གྱིས་བཅོས་པ་དང་བསྒྱུར་དུ་བཏུབ་པ་མ་ཡིན་པས་མ་བཅོས་པའི་དོན་ཡིན་ཚེ། དེ་ཁོ་ནར་ཞེས་ངེས་བཟུང་གི་ཚིག་སྒྲས་གྲོལ་འཁྲུལ་གྱི་གཞི་ལ་ངོས་ཚུལ་བཞིན་དུ་བཟུང་བ་ནི་སངས་རྒྱས་ཀྱི་ཡོན་ཏན་ལ་འཁྲུལ་པ་འབྱུང་ཡུལ་གྱི་ཆར་བཞག་པས་ཉེས་པ་མི་བཟད་པའོ། །ལར་ཀ་དག་དང་ཀུན་གཞིའི་ཁྱད་ཕྱེ་ནས་དེ་གཉིས་ཐ་དད་དུ་འདོད་པར་ཐག་ཆོད་པ་ཡང་དཀའ་སྟེ། ལང་ཀར་གཤེགས་པ་ལས། བློ་གྲོས་ཆེན་པོ་འདི་ལྟ་སྟེ། དཔེར་ན་འཇིམ་པའི་རྡུལ་ཕྲ་རབ་དང་འཇིམ་པའི་གོང་བུ་ནི་གཅིག་པ་ཡང་མ་ཡིན། ཐ་དད་པ་ཡང་མ་ཡིན་པ་དང་། ཇི་ལྟར་གསེར་དང་རྒྱན་བཞིན་དེ། བློ་གྲོས་ཆེན་པོ་ཅི་སྟེ་འཇིམ་པའི་གོང་བུ་འཇིམ་པའི་རྡུལ་ཕྲ་རབ་དང་ཐ་དད་པ་ཞིག་ཡིན་ན་ནི་དེ་དག་ལས་བརྩམས་པར་མ་ཡིན་པར་འགྱུར་ན། དེ་ནི་འཇིམ་པའི་རྡུལ་ཕྲ་རབ་དེ་དག་ལས་ཀྱང་བརྩམས་པས་ན་དེའི་ཕྱིར་ཐ་དད་པ་མིན་ནོ། །དེ་སྟེ་ཐ་དད་པ་མ་ཡིན་ན་ནི་འཇིམ་པའི་གོང་བུ་དང་རྡུལ་ཕྲ་རབ་ཏུ་བྱེ་བྲག་མེད་པར་འགྱུར་རོ། །དེ་བཞིན་བློ་གྲོས་ཆེན་པོ་འཇུག་པའི་རྣམ་པར་ཤེས་པ་རྣམས་ཀུན་གཞིའི་རྣམ་པར་ཤེས་པའི་རིགས་ཀྱི་མཚན་ཉིད་དང་གལ་ཏེ་ཐ་དད་པ་ཡིན་ན་ནི་ཀུན་གཞིའི་རྣམ་པར་ཤེས་པའི་རྒྱུ་ལས་འབྱུང་བར་མི་འགྱུར་རོ། །དེ་སྟེ་ཐ་དད་པ་མ་ཡིན་ན་ནི་འཇུག་པའི་རྣམ་པར་ཤེས་པ་འགགས་ན་ཀུན་གཞིའི་རྣམ་པར་ཤེས་པ་ཡང་འགག་པར་འགྱུར་ན། དེ་ལྟར་བདག་གི་རིགས་ཀྱི་མཚན་ཉིད་འགག་པར་ཡང་མི་འགྱུར་ཏེ། དེའི་ཕྱིར་བློ་གྲོས་ཆེན་པོར་རྣམ་པར་ཤེས་པ་རྣམས་ཀྱི་
རང་གི་རིགས་ཀྱི་མཚན་ཉིད་འགག་པར་མི་འགྱུར་གྱི་ལས་ཀྱི་མཚན་ཉིད་ནི་འགག་གོ །ཞེས་ཁམས་ས་ལས་བྱས་པའི་རྫ་བུམ་ལ་ཁམས་སའི་རིགས་ཡོད་ཀྱང་དེ་ཁམས་ས་ཉིད་མ་ཡིན་ཏེ་གལ་ཏེ་ཡིན་ན་འདི་ནི་ཁམས་སའི་འོ། །འདི་ནི་བུམ་པའོ་ཞེས་ཁྱད་པར་མི་འགྱུར་ལ། རྫ་བུམ་ལ་ཁམས་སའི་རིགས་མེད་ན་དེ་ལ་རིགས་གཞན་ཅི་ཡང་མེད་པ་དཔེར་མཛད་ལ་དེ་བཞིན་ཆབ་རོམ་ཆུའི་རིགས་ཅན་ཡིན་ཀྱང་ཆུ་ཉིད་མ་ཡིན་ཏེ། དེ་ཞུ་བ་ན་ཆུར་འགྱུར་བ་བཞིན་ནོ་ཞེས་མཁས་པ་སོག་བཟློག་པ་བཞེད་དོ། །ཡང་ལམ་གྱི་སྐབས་སུ་ཕྱག་རྫོགས་སེམས་རིག་གི་ཁྱད་པར་དབྱེ་སོགས་ཟེར་བའང་དཔྱད་དེ། ཕྱག་རྒྱ་བས་རང་སེམས་རང་བབ་བཅོས་སླད་མེད་པར་འཇོག་པ་རྣམ་ཐར་སྒོ་གསུམ་གྱི་མཚན་ཉིད་ཅན་དུ་འདོད་པ་གང་ཞིག་གང་ཤར་རང་ངོ་ཤེས་པས་རང་གྲོལ་དུ་ལ་བཟླ་བར། བྲམ་ཟེ་ཆེན་པོས། འགྲོ་རྣམས་བསམ་གཏན་རྩོལ་བས་བསླད། །བསྒོམ་རྒྱུ་ཅི་ཡང་མེད་པ་ལ། །ཡེངས་སུ་སྐད་ཅིག་མི་འདོད་པས། །ཕྱག་རྒྱ་ཆེན་པོའི་སྒོམ་པ་ཡིན། །ཞེས་སེམས་ཉིད་ཀྱི་གནས་ལུགས་ཇི་བཞིན་པའི་སྟེང་དུ་མཉམ་པར་འཇོག་པར་བཤད་ཀྱིས། ཐ་མལ་གྱི་འཁྲུལ་རྟོག་རྒྱ་འབྱམས་ལ་མཉམ་བཞག་གི་མཐིལ་མི་མཛད་ཅིང་། ཐ་མལ་གྱི་ཤེས་པ་སྤུ་མ་ཉམས་གྲ་མ་བརྗེས་པ་ནི་རྫོགས་ཆེན་པས་ཀྱང་བཞེད། གང་ལྟར་རྣམ་རྟོག་ཆོས་སྐུ་གཅིག་མིན་ཡང་། ཐ་མལ་པའི་རྣམ་རྟོག་འཁྲུལ་འཛིན་རང་ག་མ་ནི་ཕྱག་རྒྱ་བས་ཀྱང་ཆོས་སྐུར་མི་འདོད། གནད་ཀྱིས་ཟིན་པའི་རྣམ་རྟོག་གི་
འཆར་སྒོ་ནི་རྫོགས་ཆེན་པས་མི་འགོག་པས་དོན་ལ་གཅིག །སྣང་སེམས་སྐབས་ཀྱང་། དོན་དམ་པར་གཤིས་ངོར་བདེན་རྫུན་གྱི་མཐའ་ལས་འདས་པ་དང་། ཀུན་རྫོབ་རིག་རྩལ་ཙམ་དུ་ཅིར་ཡང་འཆར་ལ་ཅིའི་ངོ་བོར་ཡང་མ་གྲུབ་པ་སོགས་དང་། སྣང་བ་དགག་བསྒྲུབ་མི་དགོས་པ་སོགས་མཐུན། དྲན་པ་སྒོམ་ཡིན་མིན་གྱི་སྐབས་ཀྱང་གང་ཟག་ཐབས་རྨོངས་པ་འགའ་ཞིག་ཨ་འཐས་འཇུར་སྒྲིམ་བྱས་ཏེ་རང་སེམས་བཙོན་འཛིན་ལ་ཕྱག་ཆེན་གྱི་སྒོམ་ཡིན་པར་འདོད་མཁན་སྣང་བ་དེ་དག་ནི་གང་ཟག་གི་རང་སྐྱོན་དུ་ཟད་མོད། བཀའ་བརྒྱུད་པའི་སྐྱེས་མཆོག་ཚད་ལྡན་རྣམས་རང་གསལ་གྱི་དྲན་པ་ལ་སྒོམ་དུ་མཛད་པ་ནི་རྫོགས་ཆེན་གྱི་ཀ་དག་རང་རིག་དང་མིང་ཁྱད་ཞུགས་པ་ལས་དོན་མཚུངས། དྲན་པ་ལ་མཆོག་འཛིན་གྱི་བློ་ནི་ཕྱག་རྫོགས་གཉིས་ཀ་མི་བཞེད། རྫོགས་ཆེན་གྱི་ངོ་བོ་ཀ་དག །རང་བཞིིན་ལྷུན་གྲུབ། ཐུགས་རྗེ་ཀུན་ཁྱབ་སྟེ་ཡེ་ཤེས་གསུམ་ལྡན་ལ་ཕྱག་རྒྱ་བས་གཤིས་སྐྱེ་མེད། གདངས་འགག་མེད། རྩལ་ཅིར་འཆར་དུ་བརྗོད་པ་ཡིན་པས་མཚུངས་སོ། །སྤྱིར་ཕྱག་རྒྱ་བས་བརྟག་དུས་རྫོགས་ཆེན་གཤིས་ཐོག་ལ་ཤོར་བ་སྐད་ཀྱིས་གོལ་སའི་རྣམ་གྲངས་སུ་བྱེད་ཀྱང་། རྫོགས་ཆེན་པས་བརྟགས་ན་ཕྱག་ཆེན་སོགས་ཡིད་དཔྱོད་འཛིན་པའི་ལྟ་བར་གསུངས་པ་སོགས་ཕན་ཚུན་ལྡེམ་དགོངས་ཀྱི་གསུངས་ལ་བློ་ཆུང་དག་ཕྱོགས་འཛིན་གྱི་སྒྲ་ཇི་བཞིན་པར་མི་བཟུང་སྟེ། མདོར་ན། མཁས་གྲུབ་ཆེན་པོ་རྩེ་ལེ་སྣ་ཚོགས་རང་གྲོལ་གྱིས། ཕྱག་རྒྱ་ཆེན་པོའི་དོན་ཇི་
ལྟ་བར་རྟོགས་མཁན་དག་ནི་སེམས་ཉིད་བློ་བྲལ་རྗེན་པའི་རང་ཞལ་མཐོང་ཚེ་ཡིད་དཔྱོད་ལ་རག་མ་ལུས་པར་གསུངས་ཏེ་རྫོགས་ཆེན་པས་སེམས་དང་རིག་པར་བརྗོད་ཀྱང་ཕྱག་ཆེན་པས་སེམས་སེམས་ཉིད་གཉིས་ཕྱེ་བས་སོ། །ཡང་ཕྱག་ཆེན་པས་ཞི་གནས་འབའ་ཞིག་ལ་གཙོར་སྟོན་ཞེས་པ་དང་དགེ་སྦྱོར་སྤང་དོགས་པ་སོགས་མ་བརྟགས་པའི་གཏམ་སྟེ། ཐོག་མར་ཞི་གནས་ཀྱིས་སེམས་གནས་པ་བརྟན་དགོས་པར་ཕྱག་རྫོགས་གཉིས་ཀ་མཐུན། བརྟན་པ་ཐོབ་ནས་གྲོལ་བར་བྱེད་པའི་ལམ་དངོས་ལ་ལྷག་མཐོང་གཙོ་ཆེ་ཞིང་། ཞི་གནས་རྐྱང་པར་ཕྱག་ཆེན་པས་ཀྱང་མཆོག་ཏུ་མི་འཛིན་པར། རྒྱལ་བ་ལོ་རས་ཀྱིས། གསལ་ཆ་མེད་པའི་ཞི་གནས་ལྡིང་པོ། །བསྒོམ་ཡུན་རིང་ཡང་དོན་མི་རྟོགས་ཀྱིས། །ཞེས་སོ། །དེས་ན་ཞི་ལྷག་ཟུང་འབྲེལ་གྱི་ཉམས་ལེན་སྐྱོང་བར་ཕྱག་རྫོགས་མཐུན་ཏེ། ཞི་གནས་དང་ལྷག་མཐོང་ཟུང་དུ་འཇུག །སྒོམ་མེད་རྫོགས་ཆེན་ལྟ་བ་རྟོགས། །ཞེས་སོ། །ལུས་ངག་གི་དགེ་སྦྱོར་གསར་བུ་ལས་དང་པོ་པས་གཞག་དགོས་པར་ཕྱག་རྫོགས་གཉིས་ཀས་ཡིན། ཉམས་ལེན་ལ་གོམས་པ་བརྟན་ཅིང་གདེང་དུ་གྱུར་ན་དགེ་སྦྱོར་བྱེད་པ་མི་འགོག་ཀྱིས་རྫོགས་ཆེན་པ་ལས་དང་པོས་ཀྱང་དགེ་སྦྱོར་མི་འགོག་ན། འདས་རྗེས་ལས། གནས་བརྟན་གྲོལ་བའི་གདེང་ཐོབ་ནས། །ཕྱི་ནང་བྱ་བ་ཀུན་བཏང་ནས། །ཞེས་དང་། ཀློང་གསལ་ལས། མངོན་སུམ་གནད་དུ་དབབ་པའི་ཕྱིར། །ཕྱི་ནང་གསང་བའི་བྱ་བ་ནི། །ལུས་ངག་ཡིད་གསུམ་དགུ་ཕྲུག་བཏང་། །ཞེས་པའི་ལུང་དོན་ཡང་བསམ་དགོས་སོ། །
ཡང་འབྲས་བུ་ཕྱག་རྫོགས་རྡོ་རྗེ་འཆང་དང་ཀུན་ཏུ་བཟང་པོའི་གོ་འཕང་ཀྱི་ཁྱད་ཞུགས་པར་འདོད་པ་ཡང་། དེ་གཉིས་ཀ་ཆོས་སྐུའི་ཆོས་སྐུ་དང་ལོངས་སྐུར་དབྱེ་བ་ཙམ་ལས་སྤངས་རྟོགས་ཀྱི་ཡོན་ཏན་ཁྱད་ཞུགས་པར་མི་འདོད་ཕྱིར་མཐར་ཐུག་གི་གྲོལ་སའི་ཁྱད་མེད་ལ། སྒྱུ་ལུས་རྡུལ་ཕྲན་དེངས་པ་དང་། འཕོ་བ་ཆེན་པོའི་སྐུར་བཞེངས་པ་ནི་ཡོན་ཏན་གྱི་རྩལ་རྫོགས་པའི་རླབས་ཆེ་ཆུང་སྟེ། མདོ་ལམ་དུ་དགྲ་བཅོམ་རྒྱན་ཅན་རྒྱན་མེད་དགྲ་བཅོམ་ཡིན་པར་གཅིག་པ་བཞིན་ནོ། །གཞན་ཡང་ཕྱག་རྫོགས་རྒྱུའི་ཐིག་ལེ་དང་། འབྲས་བུའི་ཐིག་ལེར་ལམ་བྱེད་ཀྱིས་མི་མཚུངས་པ་དང་། ཐབས་བསྐྱེད་པ་དང་། ཤེས་རབ་རྫོགས་པས་དབྱེ་ཚུལ་མང་དུ་སྤྲོར་ཡོད་ཟེར་བ་རྣམས་ཚིག་ཙམ་མོ། །རང་ཡང་ཕྱག་ཆེན་ལ་སྦྱངས་འདྲིས་ཅི་ཡང་མེད་རུང་རྟོག་དཔྱོད་ཀྱིས་ཡིད་ངོར་ཤར་བ་རྣམས་སླར་དཔྱོད་པའི་རྟེན་དུ་བྲིས་པ་ལས་ཡིད་བརྟན་ཕེར་བ་མེད་པས་འདི་གཟིགས་པ་རྣམས་ཀྱིས་ཡིད་ཆེས་སུ་མི་བྱ་སྟེ། ཕྱག་རྫོགས་རྣམས་དབྱེ་རྩོམ་མཁན་དང་། རྩོམ་པར་བསྐུལ་པོ་རྣམས་མཁྱེན་རབ་རླབས་ཆེ་བས་འཁྲུལ་མི་སྲིད་དོ། །འོ་ན་འདིར་འགོག་པ་ཅི་ཞེ་ན། དབུ་མ་རྩ་ཤེར་ལས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། །ཞེས་པས་གནས་སྐབས་སུ་དཔྱད་པའི་གཏམ་གྱིས་འཕྲོས་པར་འགལ་བར་མི་སེམས་ཏེ། སྟོན་པས། སྲེག་བཅད་བརྡར་པའི་གསེར་བཞིན་དུ། །ལེགས་པར་བརྟགས་པ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་དང་། དོན་དང་ལྡན་ན་བསྟན་བཅོས་བྱིས་པ་ལས་ཀྱང་ལོངས། ཞེས་བཻ་རོ་ཙ་ནས་སོ། །
འདིར་སྨྲས་པ།
འདིར་སྨྲས་པ། སྤྲོས་པ་ཀུན་བྲལ་གཟོད་མའི་ཡེ་ཤེས་ཉིད། །བག་ཆགས་རྨོངས་པའི་རྒྱར་འཐུམས་སྦྱངས་པའི་ལམ། །བསམ་གྱིས་མི་ཁྱབ་འགྲོ་བློར་འཚམས་རྣམས་ཀྱིས། །བསྒྲུབས་འབྲས་བསླུ་མེད་སྐུ་དང་ཡེ་ཤེས་འགྲུབ། །གང་དག་རྒྱལ་བའི་ཕྲིན་ལས་ཡེ་ཤེས་ནི། །བསམ་མི་ཁྱབ་པར་རྟོགས་པའི་བློ་ཆེན་གྱིས། །དཔྱད་གསུམ་དག་པས་ཆོས་ཀུན་འགལ་མེད་མཁྱེན། །དེས་ནི་མཐའ་དག་ངེས་པའི་དོན་དུ་བསྒྲུབས། །དེ་ལྟར་མ་ཡིན་བློ་ཆུང་གང་ཟག་གིས། །མདོ་སྔགས་ཐེག་པའི་རྣམ་གྲངས་མཐའ་ཀླས་པ། །རྟོགས་འདོད་ནམ་མཁའི་མཐའ་འཇལ་ངལ་བར་ཟད། །དེས་ན་ཀུན་གྱི་དོན་གནད་འདུས་འདི་བསྔགས། །ཆོས་སྤྱིའི་ངེས་ཚིག་དབྱེ་དང་སྡེ་སྣོད་འབྱེད། །ཆོས་འཁོར་གྲངས་ངེས་རིམ་གསུམ་བཤད་པ་དང་། །རྒྱུ་འབྲས་ཐེག་ཁྱད་གྲུབ་མཐའ་བཞི་རུ་འབྱེད། །རྡོ་རྗེའི་ཐེག་བཤད་རྫོགས་ཆེན་གཙོ་བོར་བསྒྲུབ། །
རྡོ་རྗེའི་གནས་བདུན་རྫོགས་ཆེན་གཞི་ལམ་འབྲས། །མཐའ་དཔྱོད་ཕྱག་ཆེན་རྣམ་གཞག་ཕྱག་རྫོགས་ཁྱད། །འདི་རྣམས་རང་ལ་སྐྱེས་སྦྱངས་ཡོན་ཏན་ཆ། །ཕྲ་རུང་མཚུངས་མེད་བླ་མའི་དྲིན་ལས་རྙེད། །དུག་ཅན་བསམ་པས་བསླད་པའི་བསྟན་བཅོས་ལ། །རྣམ་མཁྱེན་འཐོབ་པའི་ཡོན་ཏན་ཉིན་མོའི་སྐར། །གཞན་ཕན་དང་ལེན་སེམས་བསྐྱེད་རྩིས་ཟིན་པའི། །བདུད་རྩིས་ལྕགས་ཁམས་གསེར་དུ་ཅིས་མི་འགྱུར། །དཔེ་མང་ཀློག་དང་ཡུན་རིང་ཐོས་བསམ་ལ། །འབད་པར་མི་ནུས་རང་འདྲར་འགྱུར་ཆེ་བས། །རྟོགས་དཀའི་གནས་རྣམས་རི་དྭགས་ལྟེ་བས་བཅུད། །བསོག་པའི་ངང་ཚུལ་ལ་བསྒྲུན་ཉིད་ཀྱིས་གྲུབ། །སྔོན་ཆད་མ་གྲགས་གསར་བྱུང་བསྟན་བཅོས་ནི། །བརྗོད་དོན་སྟོང་ཞིང་བསྟན་ལས་ཕྱི་རོལ་འགྱུར། །དེས་ན་འདི་ཉིད་ལྟ་རྣམས་སྔོན་གཞུང་དུ། །ཡོད་པ་ཡང་བསྐྱར་བལྟ་བདེར་བཀོད་དྲན་གནད། །དེང་དུས་འགའ་ཞིག་ཐོས་བསམ་ལས་ཕྱིར་ཕྱོགས། །འགའ་ཞིག་ཐོས་པས་དྲེགས་ཏེ་ངེས་པའི་དོན། །
བཤད་ལ་མཚར་དུ་མི་འཛིན་ག་གེ་མོར། །ཡོད་ཅེས་རང་རིག་གླེགས་བམ་གནས་མི་དྲན། །བདག་ནི་རིས་སུ་མ་ཆད་གསར་རྙིང་གི། །ཆོས་དང་དེ་འཛིན་བཅས་ལ་སྙིང་ནས་གུས། །ཚིག་དོན་ཕྲ་མོ་རེ་ཙམ་གོ་ན་ཡང་། །བསམ་མི་ཁྱབ་པའི་ངེས་ཤེས་ཁོ་ནས་སྤྲོ། །དེས་ན་འདིར་ཡང་སྐྱེ་དང་ཚེ་རབས་ཀུན། །རང་ཉིད་འདི་ལྟའི་ཆོས་ལ་མིག་རྣོ་བས། །མཁས་དང་གྲུབ་པའི་བདག་ཉིད་དུ་གྱུར་ཏེ། །མཆོག་གསང་བསྟན་ལ་བྱ་བ་བགྱི་ནུས་པའི། །བག་ཆགས་རྒྱུད་ལ་གོམས་སླད་ངལ་བས་བསྐྲུན། །ཨ་ཧོ། དལ་འབྱོར་ལུས་ཀྱི་ལྗོན་བཟང་ཐོབ་པ་འདིའི། །ལེགས་བྱས་དགེ་ཚོགས་མཐའ་དག་གཅིག་བསྡོམས་ཏེ། །ཡང་གསང་རྫོགས་པ་ཆེ་དང་གཞན་སྟོང་པའི། ། བསྟན་ལ་བྱ་བ་བགྱིས་པའི་ཆེད་དུ་བསྔོ། །དགེ་དེས་སྐྱེ་ཀུན་རང་གིས་རིགས་མཐོང་དང་། །ཐོས་པའི་ཕྱོགས་བཅས་འགྲོ་བ་མཐའ་དག་ཀུན། །
ངེས་པའི་ལམ་མཆོག་འདི་ལ་ཡིད་རྟོན་པས། །རྒྱལ་བ་མཆོག་དང་ཕྲིན་ལས་མཉམ་གྱུར་ཅིག །སྔོན་གྱི་ལས་དང་འཕྲལ་གྱི་རྐྱེན་སོགས་ཀྱིས། །རང་ལ་བསྟོད་དམ་གཤེ་འམ་བཟང་ངན་གྱི། ། འབྲེལ་བ་ཐོབ་པ་ཀུན་ཀྱང་བྱང་གྲོལ་ལ། །མ་འཁོད་དེ་སྲིད་ཞི་བར་གཞོལ་མ་གྱུར། །མདོར་ན་མཉམ་མེད་བུ་རམ་ཤིང་པ་དེས། །ཐུགས་བསྐྱེད་དམ་བཅའི་སྨོན་ལམ་རྒྱ་མཚོའི་རྗེས། །བདག་ཅག་འཇུག་པར་སྲས་བཅས་རྒྱལ་རྣམས་ཀྱིས། །དཔང་དང་གྲོགས་སུ་གཟིགས་པས་ཡོལ་མི་མངའ། །ཐ་སྙད་རྟོག་གེས་མ་དཀྲུགས་ངེས་པའི་དོན། །བློས་བྱས་ཡིད་དཔྱོད་ལྟ་བས་བསྒྲུན་དུ་མེད། །ཚིག་དང་ཡི་གེས་མི་མཚོན་དོན་དམ་པའི། །བདེན་པ་མཆོག་དེ་མངོན་དུ་རྟོགས་གྱུར་ཅིག །དེ་ལྟར་མདོ་སྔགས་རྒྱུད་སྡེ་ཀུན་གྱི་དཀའ་གནད་རྣམས་སྔོན་བྱོན་མཁས་པ་རྣམས་ཀྱིས་མཛད་པ་ལས་ཁོལ་དུ་ཕྱུང་སྟེ་དཔེ་མང་ཀློག་པའི་ངལ་བ་སྤང་སླད་ཉེར་མཁོར་བྲིས་པ་སྦྲང་ཆུང་རྩི་བཅུད་ཅེས་པ་འདི་ནི་རང་གི་དྲན་གསོས་དང་བརྗེད་བྱང་ཚུལ་དང་གཞན་རེ་གཉིས་ལའང་ཕན་རེས་རང་ལོ་ཉེར་ལྔ་པ་སྐྱེས་
བདག་ལྕགས་ལུག་ལོར་ཁྲུམས་སྟོད་ཟླ་བའི་ཡར་ཚེས་དང་པོ་ལ་རྡོ་རྗེ་ལྷུན་གྲུབ་རྩལ་ལམ་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོས་རང་གནས་ཞེ་ཆེན་བསྟན་གཉིས་དར་རྒྱས་གླིང་དུ་གྲུབ་པར་སྦྱར་བས་དྲིན་ཆེན་བླ་མ་རྒྱལ་ཚབ་རིན་པོ་ཆེའི་ཐུགས་ཀྱི་དགོངས་བཞེད་མཐའ་དག་གེགས་མེད་ཉིད་དུ་འགྲུབ་པ་དང་། མཚུངས་མེད་རབ་འབྱམས་པའི་སྤྲུལ་པའི་ཟློས་གར་མྱུར་དུ་གསལ་བའི་སྐལ་བཟང་ལ་ལོངས་སུ་སྤྱོད་པར་གྱུར་ཅིག །ཚུལ་བཞིན་སྦྱངས་པས་ཟབ་མོའི་གནས་ཤེས་པར་དག་ལས། རང་མཐོང་མ་སྤངས་པའི་ཐོས་དྲེགས་ཅན་རྣམས་ལ་གསང་རྒྱ་ཟབ་རྒྱ་བྱས་ན་ལེགས་ཏེ། དེ་རྣམས་ལ་ཟབ་མོའི་ཆོས་ཀྱི་ངེས་ཤེས་སྐྱེ་བར་མི་འགྱུར་བས་སོ། །སརྦ་མངྒ་ལཾ།། །།