མཎྜལ་གྱི་རྣམ་པར་བཞག་པ་ཅུང་ཟད་ཅིག་བརྗོད་པ།
དེ་ཡང་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་གཤེགས་ཤུལ་ལམ་ལྔར་གྲགས་པ་ལས། ཐོས་བསམ་དང་བསོད་ནམས་ཀྱི་ཚོགས་ལ་རྒྱ་ཆེར་སྤྱོད་པས་ཚོགས་ལམ་གྱི་རྣམ་གྲངས་སུ་འདུ་བའི་མཎྜལ་གྱི་རྣམ་པར་བཞག་པ་ཅུང་ཟད་ཅིག་བརྗོད་ན།
སྤྱིར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གཞི་ལམ་འབྲས་གསུམ་གྱི་ངོ་བོར་བཞུགས་པ་ལས། གཞི་ནི་སེམས་ཅན་གྱི་ཁམས་བདེ་བར་གཤེགས་པའི་སྙིང་པོ་ལ་འཁོར་འདས་ལམ་གསུམ་གྱི་འཆར་གཞིར་གྲུབ་ཅིང་། དེ་ཉིད་ཚོགས་གཉིས་ཀྱིས་འཕེན་པས་བསྐྱེད་སྲིང་སྟེ་སྤངས་རྟོགས་ཀྱི་ཕྲིན་ལས་མཐར་ཕྱིན་པ་ལ་མངོན་པར་སངས་རྒྱས་པའི་མིང་དུ་གྲུབ་སྟེ། རྒྱན་སྟུག་པོ་བཀོད་པ་ལས། ཀུན་གཞི་བསོད་ནམས་དྲི་མེད་ཀྱིས། །དེ་བཞིན་གཤེགས་པར་འགྱུར་བ་ཡིན། །དེ་ཉིད་རྟོགས་ནས་མཐོང་བ་ནི། །རྣལ་འབྱོར་འཇིགས་མེད་རྣལ་འབྱོར་རོ། །ཞེས་སོ། །དེ་ཕྱིར་འབྲས་བུ་དག་པ་གཉིས་ལྡན་གྱི་གོ་འཕང་མངོན་དུ་བྱེད་པ་ལ་ལམ་གྱི་དུས་བསོད་ནམས་དང་ཡེ་ཤེས་ཀྱི་ཚོགས་ཟུང་འབྲེལ་དུ་བསགས་པ་ཐབས་ཀྱི་མཐར་ཕྱིན་པ་ཡིན་ཏེ། དབྱིག་གཉེན་གྱི་ཚོགས་གཏམ་ལས། དེ་ལྟར་བསོད་ནམས་ཡེ་ཤེས་ཀྱི། །རང་བཞིན་ཆུ་བོ་འགོང་བ་དག །འགྲོ་བའི་ཐར་ལམ་གཅིག་ཏུ་མཁས། །བྱང་ཆུབ་ལག་པའི་མཐིལ་ན་གནས། །ཞེས་གསུངས་ཤིང་། བསོད་ནམས་ཀྱི་ཚོགས་གསོག་པའི་རིམ་པ་ནི་མཎྜལ་ཏེ། དེལའང་ངོ་བོ། ངེས་ཚིག །དབྱེ་བ་སྟེ་གསུམ་ལས།