མཎྜལ་ཞེས་ངེས་ཚིག་སྒྲ་བཤད་ཀྱི་རྣམ་བཞག་ཕྱི་ལྟར་དུ་བཞག་པ་དང་ནང་ལྟར་བཞག་པ།
གཉིས་པ་མཎྜལ་ཞེས་པའི་ངེས་ཚིག་སྒྲ་བཤད་ཀྱི་རྣམ་པར་བཞག་པ་ལའང་གསུམ་སྟེ། ཕྱི་ལྟར་དུ་བཞག་པ། ནང་ལྟར་དུ་བཞག་པ། གསང་བ་ལྟར་དུ་བཞག་པའོ། ། དང་པོ་ནི། མ་དྲི་རྒྱན་གྱི་བྱིངས་ལ་ཨ་ཙ྄་སྦྱར་བས་མཎྜལ་ཞེས་སྒྲུབ་སྟེ་བི་ཤྭ་པྲ་ཀ་ཤར་མཎྜ་སྙིང་པོ་ལ་འཇུག་པ་དག་ནི་རྒྱན་དག་ལ། མཎྜ་བྱས་པའམ་མཎྜལ་ནི་ཡག་གའི་དབྱེ་བ་དག་ལའོ། །ཞེས་པ་ལྟར་ཡང་འདི་ནི་མནན་པའམ་ལྗི་ཕབ་པ་ལ་འཇུག་ཅིང་། ལ་ནི་གཞི་འཛིན་པའི་དོན་ལ་ཚིག་བླ་ཐབས་སུ་བསྣན་པ་སྟེ། དེས་ན་གླིང་བཞི་རི་རབ་དང་བཅས་པས་ཤིན་ཏུ་བརྗིད་ཆགས་ལ། འཕོ་འགྱུར་དང་བྲལ་བའི་དཀྱིལ་འཁོར་ཞེས་བྱ་སྟེ། གཉིས་པ་ནི། མཎྜ་ནི་སྙིང་པོའི་ཉིང་ཁུའམ་དཀྱིལ་འཁོར་ལྟ་བུ་ལ་བྱ་ལ། ལ་ནི་ལེན་ཅིང་འཛིན་པ་སྟེ། དེས་ན་ཆོས་ཀྱི་རྒྱལ་སྲིད་སྒྲུབ་པར་བྱ་བ་ལ། སྙིང་པོ་གཞི་འཛིན་དུ་གྱུར་ཕྱིར་བསོད་ནམས་ཁྱད་པར་ཅན་བསགས་ཏེ་མངོན་མཐོའི་དཔལ་ཡོན་ཐོབ་པར་འགྱུར་བས་ན་དེ་སྐད་ཅེས་བྱ་ལ། མཎྜ་ལ་ཞེས་པ་མ་ཌི་དགའ་བའི་བྱིངས་ལ་ཨུཎ་སོགས་ཀྱི་ཨ་ལ་ཙཱ་སྦྱར་བས་སྒྲ་གཟུགས་པོ་ཟླུམ་པོའི་སྐོར་བའི་དོན་ལ་འཇུག་པས་དཀྱིལ་འཁོར་ཞེས་བྱའོ། ཡང་འགྲེལ་པ་འདོད་འཇོ་ལས། མཎྜལ་ཏེ་དཀྱིལ་འཁོར་ནི་མཎྜ་ཡ་ཏི་ལས་ཤྲཱྀ་ཥ་ལ་སོགས་པ་ཉིད་ཀྱི་ཕྱིར་ཀ་ལའོ། །ཞེས་པས་མ་ཌི་དགའ་བས་བྱིངས་ལ་
ཙནྡྲའི་ཨུན྄་མདོར་ཤྲཱྀར་ལ་སོགས་པ་ལ་ཙིཏྟ་བཞིན་ནོ་ཞེས་ཀ་ལ་བྱིན། ཀིརྟ་འགྲོ་བ་ཕྱིན་ཨི་ཏི་ཏྲའི་ནུམ྄་སྦྱར་དྲངས་པས་མཎྜལ་གྲུབ་སྟེ་སྒྲ་གཟུགས་པོ་ཟླུམ་པོའི་སྐོར་བའི་དོན་ལ་འཇུག་པས་གང་གཙོ་བོ་ལ་འཁོར་གྱིས་བསྐོར་བའི་ཕྱིར་དཀྱིལ་འཁོར་ཞེས་བྱའོ། །