རྣལ་འབྱོར་གྱི་རྒྱུད་ཐབས་གཙོ་བོར་སྟོན་པའི་རྒྱུད།
༈ གཉིས་པ་རྣལ་འབྱོར་གྱི་རྒྱུད་ཐབས་གཙོ་བོར་སྟོན་པ་དང་། ཤེས་རབ་གཙོ་བོར་སྟོན་པའི་རྒྱུད་གཉིས། དང་པོ་ལ་རྩ་བཤད་ཆ་མཐུན་གསུམ་ལས་དང་པོ་ནི། ༼ཉ་པར།༽ དེ་ཁོ་ན་ཉིད་བསྡུས་པ་རྩ་བའི་རྒྱུད་དུམ་བུ་བཞི་པ་རྒྱུད་ཕྱི་མ། ཕྱི་མའི་ཕྱི་མ་རྒྱུད་ཉེར་བར་བསྡུས་པ་བཅས་བམ་པོ་དགུ་ལྷག་གི་བརྒྱུད་པ་ནི། སངས་རྒྱས། ཕྱག་རྡོར། རབ་གསལ་ཟླ་བ། རྒྱལ་པོ་སྒྲ་གཅན་འཛིན། སྭོ་སྟི་ཕ་ལ། ཡེ་ཤེས་རྡོ་རྗེ། ༼པྲཛྙཱ་སིདྡྷི༽ བཞི་ཀ་ལ་སློབ་དཔོན་ཀུན་དགའ་སྙིང་པོས་གསན། དེ་ནས་པྲཛྙཱ་བ་ལི་ཏ། ༼པྲཛྙཱ་བོ་དྷི།༽ རབ་འབྱོར་བསྐྱངས། ༼དྷརྨཱ་ཕ་ལ༽ རིན་ཆེན་བཟང་པོ། བརྩོན་འགྲུས་རྒྱལ་མཚན། ཉི་མ་ཤེས་རབ། ཉི་མ་སེངྒེ། སྐྱ་རྩ་སྟོན་གྲགས། མཉམ་གད་པ་ཆེན་པོ་གླན་ཆོས་ཀྱི་འབྱུང་གནས །རྩ་སྐྱ་ཤཱཀྱ་འབུམ། སངས་རྒྱས་འབུམ། ལོ་མཆོག །བློ་ཆེན། རྒྱལ་བཟང་དཔལ། སྤང་ཁང་པ། མ་ཏི་མན་མཉམ་སྦྱོར་དང་འདྲ། གཉིས་པ་ནི། ཡོ་ག་བཤད་རྒྱུད་རྡོ་རྗེ་རྩེ་མོ་རོག་པ་བཅུ་པ་རྡོ་རྗེ་མཚན་བརྒྱས་གསོལ་བ་བཏབ་པ་ཡན་ཆད་རྟོག་པ་ཕྱེད་དྲུག །བམ་པོ་བཅུ་གཉིས་པའི་བརྒྱུད་པ་ནི། སངས་རྒྱས། བྱམས་པ། གམ་ག་དྷ་ར། ས་མཱནྟ་བྷ་དྲ། ཛྙཱ་ན་ཤྲཱི། ཉི་མ་ཤེས་རབ། ཉི་མ་སེངྒེ། རྡོ་རྗེ་སེངྒེ། གླན་ཆོས་འབྱུང་། རྩ་སྐྱ་ཤཱཀྱ་འབུམ། རིན་ཆེན་ཤེས་རབ། ལོ་མཆོག །བློ་ཆེན་མན་དེ་ཉིད་བསྡུས་པ་དང་འདྲ། ༼ཏ་པར།༽ ཐམས་ཅད་གསང་བའི་རྒྱུད་ཀྱི་བརྒྱུད་པ་ནི། སངས་རྒྱས། ཕྱག་རྡོར། རབ་གསལ་ཟླ་བ། དེའི་སློབ་མ་པད་དཀར་ཡེ་ཤེས། ༼ཛྙཱ་ན་ཤྲཱི༽ སྒྲ་གཅན་
འཛིན། ཉི་མའི་སྙིང་པོ། རྒྱལ་རིགས་ས་ར་ཧ། ལྔ་ཀ་སློབ་དཔོན་ཀུན་སྙིང་གིས། དེ་ནས་ཏ་ཐ་ག་ཐཱ་བཛྲ། ཤྲཱངྷ་ཀ་ར་ཝརྨ། རིན་ཆེན་བཟང་པོ། ལེགས་པའི་ཤེས་རབ། ས་ཆེན་གོང་མ་ལྔ། བློ་ཆེན་མན་དེ་ཉིད་བསྡུས་པ་དང་འདྲ། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་རྒྱུད་ཀྱི་ཕྱི་མ་དང་བཅས་པའི་བརྒྱུད་པ་ནི། རྩ་སྐྱ་ཤཱཀྱ་འབུམ་ཡན་དེ་ཉིད་བསྡུས་པ་ལྟར་ལ། དེས་འཇིམས་རིན་ཆེན་ཤེས་རབ། བློ་ཆེན་བག་སྟོན། མགོན་པོ་འབུམ། བྲམ་ཟེ་ནམ་མཁའ་རྒྱལ་མཚན། མ་ཏི་མན་དེ་ཉིད་བསྡུས་པ་དང་འདྲ། གསུམ་པ་ནི། ངན་སོང་སྦྱོང་བ་གཟི་བརྗིད་ཀྱི་རྒྱལ་པོ། རྟོག་པ་བམ་པོ་གསུམ་པའི་བརྒྱུད་པ་ནི། ཤཱཀྱའི་རྒྱལ་པོ། ཕྱག་རྡོར། རབ་གསལ་ཟླ་བ། རབ་འབྱོར་བསྐྱངས། ཀུན་དགའ་སྙིང་པོ། ཤེས་རབ་བསྐྱངས། ཤཱནྟིངྒརྦྷ། དགེ་མཚན་བཤེས་གཉེན། བདེ་བའི་རྡོ་རྗེ། དད་བྱེད་གོ་ཆ། ལོ་ཆེན་རིན་ཆེན་བཟང་པོ། བྲག་སྟེང་པ། ཡོན་ཏན་ཚུལ་ཁྲིམས། མར་པ་ལོ་ཙཱ། ས་ཆེན། གཉགས་སྟོན་དབང་རྒྱལ། རྗེ་བཙུན་གྲགས་པ། ས་པཎ། འཕགས་པ། ཞང་དཀོན་མཆོག་དཔལ། རྒྱལ་བ་བྲག་ཕུག་པ། རི་ཁྲོད་པ་བློ་བརྟན། དཔལ་ལྡན་ཚུལ་ཁྲིམས། ཤར་ཆེན་པ། ངོར་ཆེན་པ། ཡོངས་འཛིན་དཀོན་མཆོག་འཕེལ། ལྷ་མཆོག་སེངྒེ་མཉམ་སྦྱོར་ལྟར་རོ། །དེའི་བཤམས་སུ་མངོན་སྤྱོད་ཀྱི་ལས་ཞེས་པ་ལུང་རྒྱུན་མེད་པ། ངན་སོང་ཐམས་ཅད་སྦྱོང་བའི་སྙིང་པོའི་གཟུངས། ངན་སོང་སྦྱོང་བ་གཟི་བརྗིད་ཀྱི་རྒྱལ་པོ་བརྟག་པ་ཕྱོགས་གཅིག་པ་གཉིས་ཀའི་བརྒྱུད་པ་ནི། རྩ་སྐྱ་ཤཱཀྱ་འབུམ་
ཡན་དེ་ཉིད་བསྡུས་པ་ལྟར་ལ། དེས་འཇིམས་རིན་ཆེན་ཤེས་རབ། བླ་མ་འཇམ་དབྱངས་པ། སེངྒེ་རྒྱལ་མཚན་ནས་རྡོ་རྗེ་གདན་པ་ཡན་གཏུམ་པོ་གསང་རྒྱུད་ཕྱི་མ་དང་འདྲ། དེས་མཁས་གྲུབ་རིག་པའི་གློག་འཕྲེང་། བླ་མ་བསྟན་པ་རྒྱ་མཚོ། རྗེ་ངག་དབང་ཆོས་རྒྱལ། ངག་དབང་གྲགས་པ་རྒྱལ་མཚན། ངག་དབང་ནོར་བུ། ངག་དབང་བཟང་པོ། ཀུན་དགའ་བློ་གྲོས། དཔལ་འབྱོར་གླིང་པ། བཀའ་འགྱུར་བ་མན་འདྲ། རབ་གནས་མདོར་བསྡུས་ཀྱི་བརྒྱུད་པ་ནི། རིན་བཟང་ཡན་དེ་ཉིད་བསྡུས་པ་ལྟར་ལ། དེ་ཕྱིན་ཡོན་ཏན་ཚུལ་ཁྲིམས། མར་ལོ། ས་ཆེན་གོང་མ་ལྔ། བསོད་ནམས་སེངྒེ། ཁུ་སྟོན། ལོ་མཆོག་མན་འདྲ།