བྱ་བ་སྤྱི་རྒྱུད་ལ།
གཉིས་པ་བྱ་བ་སྤྱི་རྒྱུད་ལ། དཀྱིལ་འཁོར་སུམ་སྟོང་ལྔ་བརྒྱ་སྤྱིའི་ཆོ་ག །སྟོན་པ་གསང་བ་སྤྱི་བརྒྱུད་པ་ནི། སངས་རྒྱས་ཤཱཀྱ་ཐུབ་པ། ཕྱར་རྡོར། པྲ་ཀ་ཤ་ཙནྟྲ།
རྒྱལ་བུ་རཱ་ཧུ་ལ། ཨ་ནན་གརྦྷ། ཏ་ཐཱ་ག་ཏ་བཛྲ། ཤྲ་དྡྷཱ་ཀ་ར་ཝརྟ། ལོ་ཆེན་རིན་ཆེན་བཟང་པོ། ལོ་ཆུང་ལེགས་པའི་ཤེས་རབ། གྲགས་འབྱོར་ཤེས་རབ། རྗེ་བཙུན་ཡབ་སྲས། ཆོས་རྗེ་ཁུ་དབོན། བློ་ཆེན་པ། རྒྱལ་བཟང་དཔལ། སྤང་ཁང་པ། མ་ཏི་མན་དཔུང་བཟང་ལྟར་རོ། ། དཔུང་བཟང་གིས་ཞུས་པའི་ལེའུ་བཅུ་གཅིག་པའི་བརྒྱུད་པ་ནི། སངས་རྒྱས། ཕྱག་རྡོར། ཛེ་ཏཱ་རི་པ། ཤུནྱཏཱ་པ་མ་ཏི། རྡོ་རྗེ་གདན་པ་ཆེ་ཆུང། བིཀྵ་ཏ། ཁ་ཆེ་པཎ་ཆེན། དཱ་ན་ཤྲཱི་ལ། ལོ་མཆོག་པ། བློ་ཆེན་བ། བག་སྟོན་པ། མགོན་པོ་འབུམ། བྲམ་ནམ་མཁའ་རྒྱལ་མཚན། མ་ཏི་མན་མཉམ་སྦྱོར་དང་འདྲ། ལེགས་གྲུབ་རྒྱུད་ཆེན་ལས་སྒྲུབ་ཐབས་རིམ་པར་ཕྱེ་བའི་བརྒྱུད་པ་ནི། བ་རི་ཡན་བསམ་གཏན་ཕྱི་མ་དང་འདྲ། དེ་ནས་ས་ཆེན་ཡབ་སྲས། ཆོས་རྗེ་ཁུ་དབོན། པདྨ་མགོན་པོ། ལོ་མཆོག་པ། བློ་ཆེན། རྒྱལ་བཟང་དཔལ། སྤང་ཁང་བ། ས་བཟང་མ་ཏི་མན་དཔུང་བཟང་གི་བརྒྱུད་ཚུལ་དང་འདྲ། བསམ་གཏན་ཕྱི་མར་གྲགས་པའི་བརྒྱུད་ཚུལ་ནི། སངས་རྒྱས། འཇམ་དཔལ། ཛེ་ཏཱ་རི། རྡོ་རྗེ་གདན་པ་གསུམ། བ་རི་ལོ་ཙཱ། སྐྱུ་རུ་ཨ་སྐྱབས། རྡོ་རྗེ་རྒྱལ་པོ། དོན་གྲུབ་ཡེ་ཤེས། ཤཱཀྱ་རྡོ་རྗེ། སངས་རྒྱས་འབུམ། ལོ་མཆོག་པ། བློ་ཆེན་པ། རྒྱལ་བཟང་དཔལ། གྲངས་ཁྲོད་པ། མ་ཏི་མན་དཔུང་བཟང་གི་བརྒྱུད་པ་དང་འདྲ། གསུམ་པ་བསྔོ་བ་སྨོན་ལམ་ཤིས་བརྗོད་ཀྱི་སྐོར་ལ། དགོངས་རྒྱུད་ཀྱི་ཕྲེང་བ་
ཡོངས་སུ་བསྔོ་བ་ཆེན་པོའི་བརྒྱུད་པ་ནི། སངས་རྒྱས། བྱམས་པ། ཀླུ་སྒྲུབ། སྐལ་ལྡན་གྲགས་པ། ཟླ་བ་གྲགས་པ། འཇམ་དཔལ་གྲགས་པ། ཆོས་ཀྱི་གྲགས་པ། ཏཻ་ལོ་པ། ནཱ་རོ་པ། ཞི་བའི་བཤེས་གཉེན། ཛྙཱ་ན་ཤྲཱི། གཙན་ལོ་ཙཱ་བ། ཁྱུང་པོ་གྲགས་སེང་། འོད་སྟོན་ལྷ་དབང་། སོ་སྟོན་ཆོས་ཤེས། ཞང་དར་སེང་། རོང་པ་ཆོས་མགོན། སངས་རྒྱས་འབུམ། ལོ་མཆོག་པ། བག་སྟོན། བླ་མ་མགོན་པོ་འབུམ། སྤྲུ་སྟོན་བསོད་རྒྱལ། མཁན་ཤེར་རྡོར་བ། ཆོས་སྒོ་བ། བསོད་ནམས་སེངྒེ། ཚལ་གྲགས་དོན་པ། རིན་ཆེན་གྲགས་པ། ཤཱཀྱ་རྒྱལ་མཚན། ཁུ་སྟོན་རྡོ་རྗེ་གདན་པ། ཆེན་པོ་བློ་གྲོས་རྒྱལ་མཚན། འབུམ་རམས་པ་རིན་ཆེན་ཆོས་དབང་མན་དྷཱི་རྟགས་ཅན་ལྟར་རོ། །འཕགས་པ་ཡོངས་སུ་བསྔོ་བའི་རྒྱལ་པོ། སྔགས་དང་བཅས་པའི་བརྒྱུད་པ་བསམ་གཏན་ཕྱི་མ་དང་འདྲ། གཞན་ཡང་མདོ་སྔགས་ཀྱི་བསྔོ་སྨོན་ཅི་རིགས་པས་མཐའ་བརྒྱན་པ་དེ་ཐམས་ཅད། མདོ་ཁུངས་གང་ནས་ཕྱུང་བ་དེ་དང་དེའི་བརྒྱུད་པ་ལྟར་རོ། ། དེ་དག་ལས་གཟུངས་ཕྲན་འགའ་ཞིག་འགྲོ་ཕན་གྱི་ཆེད་དུ་ཉེར་མཁོར་ཟུར་དུ་བཀོལ་བའི་པུསྟི་ཨེ་ཝཾ་གྱི་རྟགས་ཅན་གཉིས་གཤམ་དུ་བཀོད་པར་གཟུངས་འདུས་ཞེས་གྲགས་ཤིང་ལུང་རྒྱུན་ཡོད་མེད་གོང་གསལ་རྣམས་ཀྱིས་ཤེས་པར་ནུས་ལ། གཞན་དུ་པུསྟི་ཀ་ཤྲཱི་ལཀྵྨཱི་རྟགས་ཅན་གཉིས་ལ། བཀའ་དངོས་མིན་ཀྱང་། བྱིན་རླབས་ཀྱི་གཞིར་བཀོད་པའི་དུས་འཁོར་གྱི་རྒྱས་འགྲེལ་དྲི་མེད་འོད་ཅེས་པ་དང་། དཀར་ཆག་སི་ཏུས་མཛད་པ་བཅས་བཞུགས་ཀྱང་ལུང་རྒྱུན་མི་བཞུགས་ལ།
དེ་ལྟར་རྒྱལ་བཀའ་འགྱུར་རོ་ཅོག་གི་པུསྟི་ཀ་བརྒྱ་ཕྲག་གི་གྲངས་སུ་བཞུགས་པས་ཆོས་ཚན་ཐམས་ཅད་སྔོན་རབས་དམ་པའི་དཀར་ཆག་ཁུངས་མ་ལྟར་དུ་གོ་རིམ་ལེགས་པར་བསྒྲིགས་པ་ཏེ་ལུང་རྒྱུན་འདྲ་མིན་ཡང་ན་བམ་པོ་དག་ལྔ་པ་དང། སྨིན་གླིང་ཡབ་སྲས་ཀྱི་གསན་ཡིག་ཏུ་གསལ་བ་རྣམས་ཡིག་ཚོགས་ཉུང་ཕྱིར་དེ་རྣམས་ནས་རྟོགས་པར་བྱའི་ཡུལ་དུ་བྱས་ཏེ། གཞན་སྤྱི་དང་བྱེ་བྲག་གི་དགོས་བརྒྱུད་ལུང་རྒྱུན་ཡོད་མེད་སོགས་དཔེ་ཅན་དུ་བྱས་ནས། ཁྱད་པར་ཐམས་ཅད་མཁྱེན་པ་ཆེན་པོ་ཞེ་ཆེན་རབ་འབྱམས་གཉིས་པ་འགྱུར་མེད་ཀུན་བཟང་རྣམ་རྒྱལ་བློ་གསལ་རྒྱ་མཚོའི་སྡེ་ཆེན་པོ་ཞེས་གྲགས་པ་གང་དེའི་ལུང་རྒྱུན་ཡོད་མེད་དོགས་སེལ་གནང་བ་སོགས་ལ་བརྟེན་ཏེ། རང་བློས་གང་ལྕོགས་སུ་ཞིབ་དཔྱད་བགྱིས་པས་བློ་ལྡན་རྣམས་ཀྱིས་ཡིད་རྟོན་ཆོག་པར་ཡོད་དོ། །