༼འཇམ་དབྱངས་མཁྱེན་བརྩེ་དབང་པོ་ལ་ཆེད་བརྗོད།༽
༈ ༼འཇམ་དབྱངས་མཁྱེན་བརྩེ་དབང་པོ་ལ་ཆེད་བརྗོད། ཐོས་བསམ་སྒོམ་པའི་ལུས་སྟོབས་ཡོངས་སུ་རྒྱས་ཤིང་འཆད་རྩོད་རྩོམ་པའི་སྒྲ་ཆེན་གྱིས་ལོག་སྨྲ་རི་དྭགས་མཐའ་དག་ཞུམ་པར་མཛད་ཅིང་། མཁྱེན་བརྩེ་ནུས་པའི་གཡུ་རལ་གྱི་ཁུར་ཆེན་རྣམ་པར་བརྗིད་པའི་གདོང་ལྔའི་དབང་པོ་ཐུབ་བསྟན་གངས་རིའི་རྒྱན་དུ་ཅིར་ཡང་མཛེས་པའི་ཆེད་དུ་བརྗོད་པ་ནི།༽ ཚ༵ངས་སྲས༵་མཚོ༵་བྱུ༵ང་ལྷ་མོ་ཉིད། །དགྱེ༵ས་པ༵འི་གར་གྱིས་སྙིང་ལ་སིམ། །བློ༵་ལྡན༵་གདོ༵ང་དྲུ༵ག་ལ༵ང་ཚོ༵་འཛིན། །བརྟན་པའི་འཁོར་ལོ་ཁྱོད་མིན་སུ། །ཚོགས་གཉིས་རིན་ཆེན་འབྱུང་གནས་བསྲུབས་སྐྱེས་ལས། །ཉེར་ཐོན་མཚན་དཔེའི་གཟུགས་སྐུ་སྲིད་པའི་མིག །ཕར་ཕྱིན་བཅུ་ཡི་ཆོ་གའི་འོད་སྟོང་གིས། །མཛེས་བསྒྲུབ་སྲིད་ཞིའི་མཁའ་ལ་རྒྱལ་གྱུར་ཅིག །འདི་ན་སྔར་མེད་ཟླ་བ་གསར་པའི་འཛུམ། །ལྔ་རིག་ཆ་ཤས་ཡོངས་རྫོགས་བྲི་གང་བྲལ། །འཆད་རྩོད་རྩོམ་པའི་བསིལ་ཟེར་སྤྲོ་བ་གང་། །
རྒྱལ་བསྟན་གྲོང་གསུམ་མཐར་གྱི་གཙུག་ན་བཀྲ། །གངྒཱ་ལྟོ་བར་བསྐྱིལ་ཞེས་ཛཧྦུའི། །སྙེམས་པར་མི་འཚལ་ལུང་རྟོགས་ཤེས་བྱའི་མཚོ། །རྣམ་འདྲེན་གང་གི་མཁྱེན་དཔྱོད་ཡོལ་གོ་རུ། །མ་བཟུང་མེད་པའི་ངོ་མཚར་འདི་ཡིས་ཀྱང་། །ཀུན་མཁྱེན་གོ་སར་བསླབ་གསུམ་རྒྱན་བཀླུབས་སྐུའི། །ལང་ཚོ་འདྲེན་བྱེད་བདུད་རྩིར་ཆགས་པའི་རོས། །སྙིགས་འགྲོ་གདུལ་བ་རྣམ་བཞིའི་དང་པོ་ཡི། །གདུལ་བྱར་མ་གྱུར་གཏམ་གྱི་རྫུན་རིས་ཡལ། །འཆད་པ་རྡོ་རྗེའི་ལྗགས་ཀྱི་འཇུག་པ་བརྒྱས། །མདོ་སྔགས་ཟབ་གནད་འགྲོལ་བྱེད་དབྱར་གྱི་རྔ། །བརྡུང་དེས་སྲིད་པ་ཧྲུལ་བྱེད་ལྟས་བཅོ་ལྔ། །མི་འཇིགས་འོད་སྲུང་བྱིན་འདི་ཅི་ཡིས་བརླིང་། །ཡུད་རེར་ཏིང་འཛིན་བྱེ་བའི་སྤྲོ་བསྡུ་ལ། །མཁའ་ཁྱབ་སྐྱོབ་པའི་ཐུགས་གསང་བཀྲ་བའི་ཚོན། །རྣམ་དཔྱོད་ཀཱ་ཤི་སྐྱོན་སྤངས་དྭངས་པའི་ངོས། །བཀྲ་ལ་སྲས་བཅས་རྒྱལ་རྣམས་གཟིགས་མོར་འབྱམས། །ཁྱོད་ཀྱི་རྣམ་ཐར་ལི་ཤི་དར་དྲགས་དྲིས། །
རབ་བགོས་པུཥྤེའི་ཚལ་ནས་ཅུང་ཟད་ཙམ། །འཐོར་བའི་བསྟོད་དབྱངས་དབྱར་གྱི་དཔལ་མོ་གང་། །བདག་བློ་འཁྱུད་པའི་བསོད་ནམས་ལྷུན་པོར་འཁུ། །མ་འདྲིས་བརྩེ་བའི་དགྱེས་ཞལ་ཟླ་བ་གསར། །སྐྱེ་དགུའི་སྙིང་ལ་འཇོ་བས་ཉེས་བརྒྱའི་མུན། །བཅིལ་བའི་ནགས་ཀླུང་བསྡུ་བཞིའི་བཟང་པོ་དྲུག །ཡོངས་སྨིན་དོན་གཉིས་ནོར་བུ་འབྱོར་བར་མཛོད། །ཅེས་ལུང་དང་རྟོགས་པའི་མཛོད་འཛིན་མཁྱེན་རབ་རྨད་བྱུང་རྣམ་འདྲེན་རྗེ་དབོན་བླ་མ་འཇིགས་མེད་མཁྱེན་བརྩེའི་མྱུ་གུ་རང་ཉིད་ནས་ཕྱི་ནང་རིག་པའི་གནས་ལ་གསན་བསམ་ཕུལ་བྱུང་གྲུབ་པར། བརྡ་སྤྲོད་ཀུན་བཤད་ཀྱི་མཚན་དུ་ཚང༵ས་སྲས༵་དགྱེ༵ས་པ༵འི་བློ༵་ལྡན༵་གདོང༵་དྲུག༵་དག༵འ་བ༵འི་ལ༵ང་ཚོ༵་ཞེས་པའི་མཚན་འབུལ་བསྟོད་བསྔགས་བཅས་ཆོས་རྗེ་ཐམས་ཅད་མཁྱེན་དངོས་ཀཿཐོག་པའི་སློབ་འབངས་ཤཱཀྱའི་དགེ་སློང་ལྔ་རིག་པ་འགྱུར་མེད་མཐུ་སྟོབས་རྣམ་རྒྱལ་གྱིས་དབེན་རི་བདེ་ཆེན་པདྨ་འོད་ནས་ཆེད་དུ་བརྗོད་པ་ཛ་ཡནྟུ།། །།