༼འཇམ་མགོན་ཀོང་སྤྲུལ་ལ་ཆེད་བརྗོད།༽
༈ ༼འཇམ་མགོན་ཀོང་སྤྲུལ་ལ་ཆེད་བརྗོད། ཆུ་སྦྲུལ་དཔྱིད་ཐོག་འཇམ་མགོན་ཀོང་སྤྲུལ་རིན་པོ་ཆེ་རྗེ་འདི་ཉིད་ཀྱི་སྐུ་རྩར་ལོ་དྲུག་བསྙེན་ཏེ་ཚུར་ཕེབས་སྐབས། ཤེས་རབ་གསུམ་གྱི་ཡོན་ཏན་ཡར་ངོའི་ཟླ་བའི་རྗེས་སུ་འགྲོ་ཞིང་། འཆད་རྩོད་རྩོམ་པའི་འོད་སྟོང་ཐུབ་བསྟན་གླིང་བཞིའི་རྒྱན་དུ་མཛེས་ཤིང་། བསྟན་འགྲོའི་མི་མཐུན་རྒུད་པའི་མུན་པ་རིང་དུ་བསྐྲད་ཅིང་། ཕན་བདེའི་སྣང་བའི་དགའ་སྟོན་ཕྱོགས་བརྒྱར་སྤེལ་བའི་བྱེད་པོའི་མཆོག་ཏུ་མངའ་གསོལ་བའི་བརྡ་སྤྲོད་ཀུན་བཤད་ཀྱི་མཚན་དུ།༽ ༡ བློ༵་གྲོས་གཏེར༵་ཆེན་རྙེད་པས་བདེ། །ར༵བ་དཀར་ལྷག་བསམ་བསྟན་འགྲོར་དག༵འ། །ཚ༵ངས་བྱུ༵ང་སྙིང་དབུས་བསྙེ༵མས་པ༵འི་གར། །ལ༵ང་ཚོ༵འི་ཟླ༵་སྣ༵ང་གསལ་གྱུར་ཅིག །༢ གཟོད་ནས་ཆོས་ཁམས་དགེ་བའི་ཕྱག་རྒྱ་ཆེ། །འགྲོ་འདིའི་ལེགས་བཟུང་རྫོགས་བྱང་ཉེ་བའི་རྒྱུར། །ཡེ་ཤེས་གཟིགས་པས་བསྔགས་པ་མི་བསླུ་བའི། །བདེན་ངེས་གང་གི་གསང་གསུམ་བརྟན་པར་མཛོད། །༣ ཐོས་པས་བཅུ་ཕྲག་རིག་པར་བྱང་ཆུབ་ཅིང་། །བསམ་པས་ཐེ་ཚོམ་འཆིང་གྲོལ་ངེས་པ་རྙེད། །སྒོམ་པས་དེ་དོན་རྒྱུད་འབྱོར་ལུང་རྟོགས་བསྟན། །
བདག་གིར་བགྱིད་ལ་རྒྱལ་བའི་རྗེས་སུ་སྙེགས། །༤ རང་རྒྱུད་མ་བཏུལ་གཞན་རྒྱུད་མི་དུལ་གཤིས། །སོ་བྱང་སྔགས་ལྡན་ས་ཟླའི་ཀཱ་ལ་ཤ ། ཁྱད་ཆོས་བཞི་ཡི་རིན་ཆེན་ཕྲ་ཚོམ་ཅན། །དོན་གཉིས་སྒྲུབ་པའི་རྟགས་སུ་བླང་བར་རིགས། །༥ ཉེ་རིང་མེད་པར་ཀུན་ལ་མ་འདྲིས་པའི། །མཛའ་བཤེས་ཉིད་བྱ་གཞན་གནོད་གཞི་བཅས་དོར། །དངོས་སམ་བརྒྱུད་ནས་ཕན་པ་འབའ་ཞིག་གིས། །བྱང་ཆུབ་སྤྱོད་མཆོག་རྒྱ་མཚོ་རྫོགས་པར་མཛོད། །༦ བློ་གྲོས་བརྒྱ་ཕྲག་ཉི་མ་འབར་བའི་མཐུན། །ཤེས་བྱའི་ལྟད་མོ་མ་ཆུད་ཅི་ཞིག་ཡོད། །གནས་སྐབས་ཉི་ཚེའི་ཆུ་ཁུར་དྲི་ཕྲ་མོ། །རྟོག་དཔྱོད་དྲི་གཞོན་དར་བས་བསལ་བར་འོས། །༧ གང་ཐུགས་རིང་ནས་བསྟན་འགྲོར་རྗེས་ཆགས་ཀྱིས། །
ཟུར་མིག་འཕངས་པའི་དམ་བཅའ་སྨིན་ལེགས་མས། །བློ་ལྡན་གྲོགས་སུ་སྦྲོན་ལ་གེགས་བྱེད་ཆ། །ཕྲ་མོ་ཙམ་གྱིས་གླག་ལྟར་མ་གྱུར་ཅིག །༨ ཆོས་ཀུན་རྟེན་འབྲེལ་ལྟོས་གྲུབ་བླ་སློབ་ཀྱི། །དམ་ཚིག་རྡོ་རྗེའི་སྲད་བུས་སྦྲེལ་བ་ཡང་། །བསྐལ་པར་མི་འགྱུར་ཉི་དང་ཟེར་བཞིན་འབྲེལ། །མདོར་ན་བསམ་པའི་དོན་ཀུན་ཡོངས་རྫོགས་ཤོག །ཅེས་སྐྱེས་སྦྱངས་ཤེས་རབ་ཕུལ་བྱུང་ཁྱུང་པོ་བླ་མ་བསྟན་འཛིན་གཡུང་དྲུང་སྒྲ་ཀཱ་ཙན་པཱ་ཎི་དབྱངས་ཅན་སོགས་སྒྲ་རིག་རྒྱ་མཚོར་བསླབ་སྦྱོང་རྫོགས་སྐབས་བརྡ་སྤྲོད་ཀུན་བཤད་ཀྱི་མིང་དུ། བློ༵་གཏེ༵ར་ར༵བ་དག༵འ་ཚ༵ངས་བྱུ༵ང་བསྙེ༵མས་པ༵འི་ལ༵ང་ཚོ༵འི་ཟླ་༵སྣང༵་དུ་གསོལ་བའི་སྨོན་ཚིག་བསླབ་བྱ་དང་འབྲེལ་བ་ཤཱཀྱའི་དགེ་སློང་ཞེ་ཆེན་པ་འགྱུར་མེད་མཐུ་སྟོབས་རྣམ་རྒྱལ་ནས་སྦྱར་པའི་ཡི་གེ་པ་ནི་ལྔ་རིག་སྨྲ་བ་དགེ་བླ་པདྨ་སྐལ་བཟང་གིས་བགྱིས་པ་དགེ་ལེགས་འཕེལ། སརྦ་མངྒ་ལཾ་བྷ་བ་ཏུ།། །།