༼འཇམ་མགོན་ཀོང་སྤྲུལ་ལ་ཆེད་བརྗོད།༽
༈ ༼འཇམ་མགོན་ཀོང་སྤྲུལ་ལ་ཆེད་བརྗོད། སྲུང་མ་སྤྱི་སྒོས་རྣམས་ལ་བུ་འདིའི་ཕྲིན་ལས་སྒྲུབ་དགོས་པའི་བཅོལ་དམ་དང་ལེགས་སྐྱེས་ཀྱི་གནང་སྦྱིན་བསྩལ་པའི་ཆེད་དུ་བརྗོད་པ།༽ འགྲོ་ཕྱིར་དམ་བཅའ་ཆེན་པོའི་ཁུར་ཐོགས་ནས། །སྤངས་རྟོགས་ཡོ༷ན་ཏ༷ན་རྒྱ༷་མཚོ༷ར་ལོངས་སྤྱོད་པ། །བསྐལ་བཟང་རྒྱལ་བ་སྟོང་དང་ཐ་མི་དད། །ཨོ་རྒྱན་རྡོ་རྗེ་འཆང་དེས་ཁྱོད་ལ་སྲུངས། །དེང་སྔོན་སྦྱངས་སྐྱེས་ཐོབ་ཀྱི་ཤེས་རབ་མངོན་པར་རྒྱས་པའི་མཁྱེན་རབ་ཀྱི་མྱུ་གུ་གསར་པ། ཐོས་བསམ་སྒོམ་པའི་འདབ་སྟོང་རྣམ་པར་རྒྱས་གྲུབ་པས། བློ་གསལ་བུང་བ་གཞོན་ནུའི་གསོས་སུ་གྱུར་པ་ལ་ཐེ་ཚོམ་བྲལ་ཞིང་། སླད་ཀྱི་ཆར་རིས་བྲལ་རྒྱལ་བ་མཆོག་གི་བསྟན་པ་བླ་ནས་བླར་འཕེལ་བའི་བྱེད་པོ་སྲིད་ཞིའི་འདྲེན་པ་མཆོག་ཏུ་མངའ་གསོལ་བར་བྱ་ཕྱིར། རྟེན་འབྱུང་གི་སྒོ་འཕར་བརྒྱ་ཕྲག་ཕྱེ་བའི་ལེགས་སོ་འབུལ་བའི་རྟེན་མཚོན་ལ། བཀྲ་ཤིས་པའི་ལྷ་རྫས། བུམ་པ་ལེགས་པ་ཆ། རང་གི་གྱོན་པ་བཟང་གོས་ཀྱི་ཆོས་གོས་བཅས་ཕུལ་བ་བརྩེ་བ་མཆོག་གིས་རྗེས་སུ་བཞེས་པ་ནས། འཆད་རྩོད་རྩོམ་པ་དང་བཤད་སྒྲུབ་སྒོམ་པས་བསྟན་འགྲོའི་དོན་ཆེན་སྒྲུབ་པའི་མཛད་པ་སྐྱོ་ངལ་སྤངས་ནས་རང་གཞན་དོན་གཉིས་དཀའ་བ་མེད་པར་འགྲུབ་པར་གདོན་མི་ཟ་བ་ལགས་པས་ཐུགས་ལ་བསྟིམ་འཚལ།
གང་གི་གསང་གསུམ་བསྐལ་པ་བརྒྱ་ཕྲག་བར། །ཚེ་མཐའ་ཡས་པའི་ངོ་བོར་ལྷུན་ཆགས་ཤིང་། །མི་ཤིགས་རྡོ་རྗེ་མི་འགྱུར་གཡུང་དྲུང་དང་། །མི་ནུབ་རྒྱལ་མཚན་ལྟ་བུར་བརྟན་གྱུར་ཅིག །བཅུ་ཕྲག་རིག་ལམ་ཉིན་མོར་བྱེད་པའི་གཟིས། །རྨོངས་པའི་མུན་སྟུག་མ་ལུས་བསལ་བྱས་ནས། །བསྟན་འགྲོའི་དཔལ་གྱི་འདབ་མ་རྣམ་གྲོལ་བར། །རྣམ་མཁྱེན་སྐུ་བཞིའི་འབྲས་བཅུད་རྒྱས་འགྱུར་སྨོན། །སརྦ་ཐཱ་ཤུ་བྷཾ།