ཟབ་མོ་ཡང་ཏིག་གི་དཀར་ཆག་དཔག་བསམ་ལྗོན་པ།
ཟབ་མོ་ཡང་ཏིག་གི་དཀར་ཆག་དཔག་བསམ་ལྗོན་པ་བཞུགས་སོ།། གཟོད་ནས་འཁྲུལ་པའི་དངོས་ཀུན་མི་འཛིན་པས། །སྒྲིབ་གཉིས་ཆ་དང་བཅས་པའི་དག་བྱ་ཀུན། །རང་བཞིན་མ་གྲུབ་འདུས་མ་བྱས་པའི་གཞིར། །ཆོས་སྐུའི་རོལ་པར་བལྟས་ཏེ་ངང་གིས་འདུད། །རྣམ་གྲོལ་མཁའ་ལ་སྣ་ཚོགས་གསལ་བའི་ཆ། །འགོག་མེད་ཆུ་འཛིན་སྒྲོད་བྱེད་བསིར་བའི་ཟླར། །ལམ་བདེན་སྒྲ་ཚིག་བྱ་རྩོལ་ཡོངས་བྲལ་ཡང་། །ལོངས་སྐུའི་དགྱེས་ཚུལ་སྟོན་ལ་གོམས་བཞིན་གུས། །སྔར་མེད་གསར་ཐོབ་མ་ཡིན་གསང་བ་བཞིས། །ཆོད་པ་དེ་བསལ་བུམ་ནང་མར་མེ་བཞིན། །སྐུ་ཡི་འདུ་འབྲལ་མེད་པ་བྲལ་སྨིན་གྱིས། །ཡོན་ཏན་ཀུན་རྫོགས་སྤྲུལ་སྐུར་མོས་གུས་བསྟེན། །
འགྲོ་ཀུན་རྨོངས་པའི་ཐིབ་བུར་བག་མེད་པས། །འཕྱན་ལས་གདོན་ནུས་བློ་གྲོས་མི་ཟད་མིག །སྦྱིན་བྱེད་དུས་གསུམ་མཁས་དང་གྲུབ་པའི་ཚོགས། །རིས་སུ་མ་ཆད་ཡོངས་ལ་དད་ཕྱག་འབུལ། །མ་ཧཱ་སེནྡྷེའི་ལུང་རྟོགས་དམ་པའི་མཛོད། །བལྟ་འདོད་ཚིག་བརྒྱུད་མི་ཆད་ཡི་གེའི་ཕྱིར། །སྤེལ་བའི་ངོ་མཚར་རྡོ་རྗེ་ཆོས་གཉིས་པ། །ཁྱོད་ལས་གཞན་དུ་མི་དམིགས་ཡི་རངས་འབུལ། །གང་གིས་བཀའ་དྲིན་གྲིབ་མ་སྣུམ་པོ་ལ། །ལས་ཉོན་ཚ་གདུང་དྲག་པོ་ནམ་དུའང་མིན། །ཞི་བསིལ་མྱང་འདས་གོ་སར་འཇུག་འདོད་ཆེད། །སྔར་མེད་ཟབ་པ་པོད་བཞིའི་ཐེམ་སྐས་གསར། །འགྲོ་ཁམས་རྒྱ་མཚོར་འབབས་པ་ཇི་སྙེད་ཀྱི། །ཆོས་ཆར་རྒྱ་མཚོར་འབེབས་པའི་ཀླུ་དབང་ནི། །རྫོགས་སངས་རྒྱས་ཏེ་ཡེ་ཤེས་རྒྱ་མཚོ་དང་། །ཡོན་ཏན་རྒྱ་མཚོའི་འབྱུང་གནས་དུ་ཤེས་བྱ། །དེས་གསུངས་ནང་གི་མངོན་པའི་ཡོངས་རྩེ་ནི། །ཉེ་ལམ་ཁྱད་པར་ཅན་གྱུར་བརྩོན་འགྲུས་རབ། །
སྐྱེ་བ་གཅིག་གིས་རིག་འཛིན་གྲལ་སྙེགས་པ། །རྫོགས་པ་ཆེན་པོ་སྙིང་ཐིག་ལས་གཞན་མིན། །དེ་དོན་ཉམས་སུ་ལེན་དང་འཛིན་པ་ནི། །སྐྱེས་སྦྱངས་ཡོན་ཏན་ཕུན་ཚོགས་སྐལ་ལྡན་ཡིན། །ཕྱོགས་རེའི་བློ་ཅན་ཁྲོན་པའི་འཕར་འགྲོ་ཡིས། །གཏིང་མཐའ་མི་མངོན་རྒྱ་མཚོའི་ཚུལ་མི་ཕིག །དགའ་རབ་རྡོ་རྗེ་ནས་བརྩམས་དེང་གི་བར། །གསང་མཛོད་འཆང་རྣམས་རྒྱལ་བ་ཉི་མའི་གཉེན། །གང་འདུལ་དེར་སྟོན་སྣ་ཚོགས་སྤྲུལ་སྐུ་ལས། །ཐ་དད་མ་ཡིན་ངོ་བོ་ཉིད་དུ་གཅིག །ལུང་གི་རྗོད་བྱེད་ཐེག་པའི་རིམ་ཀུན་ཡང་། །འགལ་བར་མི་འགྲོ་བརྗོད་བྱའི་གནད་ཀྱིས་མཐུན། །ལམ་གྱི་ཁྱད་པར་མྱུར་བུལ་ཡོད་མེད་དེ། །འབྲས་བུ་མྱང་འདས་གོ་སར་ཆབས་ཅིག་འབབས། །རྒྱ་བོད་གཉིས་ཀར་མཆོག་གསང་ལམ་འདི་ཡིས། །གྲུབ་པའི་གོ་སར་གཤེགས་པ་དུ་མའི་ཕྱིར། །མི་བསླུའི་ཚད་མ་ཡོད་པས་འཁྲུལ་པ་བྲལ། །དེ་ཕྱིར་ལམ་འདིར་མི་བརྩོན་ཤེས་ལྡན་སུ། །
སྙིང་ཐིག་རྣམ་བཞི་འོ་མའི་རྒྱ་མཚོ་ལས། །གདམས་ངག་ཡོངས་བཅུད་མར་གྱི་གོང་བུ་འཁྲུངས། །ཟབ་མོ་ཡང་ཐིག་ཀུན་མཁྱེན་ཀློང་ཆེན་པའི། །མཁྱེན་དཔྱོད་དངས་ཤེལ་སྣོད་ལས་བཏོན་པ་བཞིན། །དྲི་མེད་ལྷ་ལམ་ཡངས་པར་བརྒྱ་ཕྲག་གི ། འོད་ཟེར་འགྱེད་པའི་ཉི་མ་གསར་འཁྲུངས་དེས། །ལྷུན་གྲུབ་སྣང་བཞིའི་པད་ཚལ་བཞད་པ་ན། །ཚེ་གཅིག་གྲོལ་འདོད་རྐང་དྲུག་ཅི་དགའ་རྩེ། །དེ་ཚུལ་ཡི་གེའི་ཕྱི་མོ་པར་གྱི་འཕྲུལ། །གླེག་བམ་གཉིས་སུ་བྱས་པའི་དཔེ་ཐོ་ནི། །དཔག་བསམ་ལྗོན་པ་བློ་ལྡན་རྣམ་པད་ཀྱི། །ཚོགས་ལ་སྨན་ཕྱིར་བཀོད་པ་དོན་ལྡན་ཡིན། །དེ་ལ་ཐོག་མར་དཀར་ཆག་དཔག་བསམ་ལྗོན་པ་སྡེབ། བཤད་རྒྱུད་སྐོར་ལ། ༼ཀ༽ ལོ་རྒྱུས་རིན་པོ་ཆེ་འོད་ཀྱི་ཕྲེང་བ་སྡེབ།༡༠ ༼ཁ༽ ཕྱག་འཚལ་ཡིད་བཞིན་ནོར་བུ་སྡེབ།༥ ༼ག༽ གསོལ་འདེབས་བདུད་རྩིའི་ཆར་རྒྱུན་སྡེབ།༣ ༼ ང༽ མཎྜལ་ཆོ་ག་གླིང་བཞི་རྒྱན་གྱུར་སྡེབ།༨ ༼ཅ༽ བི་མ་ལའི་བསྒྲུབ་ཐབས་སྡེབ།༣ ༼ཆ༽ སྙིང་པོ་ཡེ་ཤེས་བླ་སྒྲུབ་སྡེབ།༤ ༼ཇ༽ སྤྲོས་བཅས་
དབང་ཆོག་དངོས་གྲུབ་ཆུ་བོ་སྡེབ།༡༠ ༼ཉ༽ སྤྲོས་བཅས་མིང་གི་རིམ་པ་སྡེབ།༤ ༼ཏ༽ སྤྲོས་མེད་དབང་ཆོག་ཀློང་གསལ་ཆུ་བོ་སྡེབ།༡༢ ༼ཐ༽ བུམ་པའི་བརྡ་དོན་སྡེབ།༣ ༼ད༽ ཤིན་ཏུ་སྤྲོས་མེད་དབང་ཆོག་ཡེ་ཤེས་ཆུ་བོ་སྡེབ།༣ ༼ན༽ རབ་ཏུ་སྤྲོས་མེད་དབང་ཆོག་བྱིན་རླབས་ཆུ་བོ་སྡེབ།༥ ༼པ༽ དམ་ཚིག་གསུམ་བཀོད་སྡེབ།༡༢ ༼ཕ༽ ཐུན་མོང་རིན་ཆེན་པྲ་ཁྲིད་སྡེབ།༣ ༼བ༽ ཁྲིད་ཡིག་སངས་རྒྱས་མཉམ་སྦྱོར་སྡེབ།༢༣ ༼མ༽ གཞི་མ་བཅོས་ཇི་བཞིན་དུ་ངོ་སྤྲོད་པའི་རིམ་པ་སྡེབ།༣༢ ༼ཙ༽ རྒྱ་མཚོ་ཨར་གཏད་སྡེབ།༤ ༼ཚ༽ ཁྱུང་ཆེན་གཤོག་རྫོགས་སྡེབ།༣ ༼ཚ༽ ཁྱུང་ཆེན་བསྡུས་དོན་སྡེབ།༤ ༼ཛ༽ གསང་བ་བླ་མེད་སྤྱི་བབས་སྡེབ།༣ ༼ཝ༽ ཟབ་མོ་བཅུད་བསྡུས་སྡེབ།༢ ༼ཞ༽ སྙིང་པོ་དོན་བསྡུས་སྡེབ།༢ ༼ཟ༽ འོད་གསལ་སྙིང་པོ་སྡེབ།༢ ༼འ༽ ངེས་དོན་སྙིང་པོ་སྡེབ།༢ ༼ཡ༽ མཐར་ཐུག་དོན་གྱི་སྙིང་པོ་སྡེབ།༧ ༼ར༽ གཞི་ལམ་འབྲས་བུ་གནས་གསལ་བ་སྡེབ།༧ ༼ལ༽ རྣལ་འབྱོར་བཞིའི་རིམ་པ་སྡེབ།༡༩ ༼ཤ༽ ཟབ་མོ་པྲ་ཁྲིད་སྡེབ།༩ ༼ས༽ སྙིང་པོ་ཡང་བཅུད་སྡེབ།༤ ༼ཧ༽ རིག་པ་བརྟུལ་ཞུགས་སྡེབ།༣ ༼ཨ༽ དུས་ཀྱི་གསལ་བྱེད་སྡེབ།༦ ༼ཀི༽ འདའ་ཁ་དོན་གྱི་མན་ངག་སྡེབ།༧ ༼ཁི༽ བཏགས་གྲོལ་སྙིང་པོ་སྡེབ།༤ ༼གི༽ ཟབ་དོན་སྙིང་པོ་སྡེབ།༩ ༼ངི༽ ཚིག་དོན་སྙིང་པོ་སྡེབ།༡ ༼ཅི༽ གདམས་ཁྲིད་དོན་གྱི་མདོ་ཆིངས་སྡེབ་༤རྣམས་སོ། །
༈ པོད་གཉིས་པར། སྙན་བརྒྱུད་སྐོར་ལ། ༼ཆི༽ སྙན་བརྒྱུད་གནད་ཀྱི་མདོ་ཆིངས་སྡེབ།༤ ༼ཇི༽ བརྒྱུད་པའི་ཕྱག་འཚལ་བྱིན་རླབས་སྤྲིན་ཕུང་སྡེབ།༣ ༼ཉི༽ དགོངས་བརྒྱུད་གསོལ་འདེབས།༦ ༼ཏི༽ གསང་སྐོར་དབང་གི་ལག་ལེན་གསལ་བའི་སྒྲོན་མེ་སྡེབ།༧ ༼ཐི༽ མཆོག་གསང་ལམ་ཁྲིད་ཆེན་མོསྡེབ།༣ ༼དི༽ ཡེ་གྲོལ་སོར་བཞག་སྡེབ།༥ ༼ནི༽ སྙན་བརྒྱུད་ཐུགས་ཀྱི་མེ་ལོང་སྡེབ།༧ ༼པི༽ སྙན་བརྒྱུད་དོན་གྱི་མེ་ལོང་སྡེབ།༢༤ ༼ཕི༽ ལག་ཁྲིད་སྙིང་པོ་སྡེབ།༣ ༼བི༽ སྙན་བརྒྱུད་ཀྱི་རྒྱབ་ཆོས་ཆེན་མོ་ཟབ་དོན་གནད་ཀྱི་མེ་ལོང་སྡེབ།༡༢༣ ༼མི༽བཀའ་སྲུང་དྲག་པོ་སུམ་སྒྲིལ་སྡེབ།༥ ༼ཙི༽ བསྐང་གསོ་དངོས་གྲུབ་ཆར་འབེབས་སྡེབ།༢༡ ༼ཚི༽ དཀར་ཆག་ཉི་ཟླ་གཟའ་སྐར་སྡེབ་༥སྟེ་ཆོས་སྡེ་བཞི་བཅུ་རྩ་དགུ་སྡེབ་གྲངས་རྣམས་བཞུགས་སོ།། འདིར་སྨྲས་པ། རྨི་ལམ་ཙམ་གྱི་ཉི་ཚེའི་བདེ་བ་ལ། །མི་ཞེན་གཏན་གྱི་སྡུག་བསྔལ་སྤོང་འདོད་རྣམས། །ཐོས་བསམ་སྒོམ་པས་རང་རྒྱུད་ཆོས་མཐུན་དུ། །མཛད་ན་དམ་པ་རྣམས་ཀྱི་རྗེས་སུ་བསྙེག །དེ་ཡང་རྟོག་དཔྱོད་ནང་བལྟས་ཆོས་མིན་དབང་། །སྐད་ཅིག་མི་གཏོང་ཉོན་མོངས་རག་པའི་མགོ ། རིམ་ནོན་བློ་སྣ་ཐུང་ངུས་ཆོས་བརྒྱད་ལ། །
འདོད་པ་ཆུང་ན་ཉམས་ལེན་གནད་སོང་རྟགས། །དེ་ལྟར་རང་རྒྱུད་ཆོས་དང་མི་མཐུན་ན། །ཡང་ཟབ་གདམས་པར་འཕྲད་ཀྱང་མི་གྲོལབས། །སྒོ་གསུམ་བག་ཡོད་དྲན་དང་ཤེས་བཞིན་གྱིས། །དལ་འབྱོར་དོན་ཡོད་མཛོད་ཅེས་ཐལ་མོ་སྦྱར། །ཚུལ་འདི་ངལ་བརྒྱས་པར་དུ་སྐྲུན་པ་པོ། །ལྷ་སྲས་མཆོག་གང་སྔོན་དགེའི་བག་ཆགས་ཁམས། །སད་ལྟར་ཆོས་མཐུན་ཐུགས་འདོད་ཡོངས་རྫོགས་ནས། །ཞབས་པད་བརྟན་ཅིང་ཆོས་སྲིད་རྒྱས་གྱུར་ཅིག །ཡུལ་འདིར་ཕྱྭ་བཅུད་དཔལ་འབྱོར་ཆེར་རྒྱས་ནས། །ལོ་ལེགས་ལྗོངས་འཁྲུངས་མི་ཕྱུགས་ནད་ཀུན་མེད། །ཆར་ཆུ་དུས་བབ་བཙའ་སད་སེར་གསུམ་ཞི། །རྫོགས་ལྡན་བསྐལ་པའི་བདེ་སྐྱིད་འཕེལ་གྱུར་ཅིག །རྒྱལ་བསྟན་རི་མོ་གཡས་སུ་འཁྱིལ་བའི་དུང་། །དཀར་ཕྱོགས་རྒྱལ་བའི་མཚན་མར་སྒྲོགས་པའི་དབྱངས། །སྲིད་གསུམ་ཀུན་ཏུ་ཁྱབ་པའི་ལྷའི་རོལ་མོ། །མཆོག་གསུམ་བཀྲ་ཤིས་ཕུན་སུམ་ཚོགས་གྱུར་ཅིག །ཅེས་ཟབ་མོ་ཡང་ཐིག་པོད་གཉིས་པར་དུ་བསྒྲུབས་པའི་དཀར་ཆག་དཔག་
བསམ་ལྗོན་པ་འདི་རྒྱལ་རིགས་ཤིང་ས་ལ་ཆེན་པོ་ལྟ་བུར་འཁྲུངས་པ་ལེགས་བྱས་ཡོན་ཏན་གྱིས་སྤ་བ་ལྷ་སྲས་དམ་ཚིག་རྡོ་རྗེའི་བཀའ་གནང་བཞིན་ཞེ་ཆེན་པ་ཤཱཀྱའི་དགེ་སློང་མཐུ་སྟོབས་རྣམ་པར་རྒྱལ་བས་ཉུང་ངུའི་ཚིག་གིས་འདོམས་པ་དོན་དང་ལྡན་པར་གྱུར་ཅིག །སརྦ་མངྒ་ལཾ།། །།