ཡིག་དྲུག་བསྐུལ་བའི་སྒྲ་དབྱངས་ཐར་ལམ་ཐེམ་སྐས།
ཡིག་དྲུག་བསྐུལ་བའི་སྒྲ་དབྱངས་ཐར་ལམ་ཐེམ་སྐས་བཞུགས་སོ། །༼དབུ་མཛད་ཁོ་ནས།༽ ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་དག་ན་དུས་གསུམ་དུ་གཤེགས་ཤིང་བཞུགས་པའི་རྒྱལ་བ་སྲས་དང་བཅས་པ་རྣམས་དང་། ཁྱད་པར་དུ་འཕགས་པ་སྤྱན་རས་གཟིགས་ཀྱི་ལྷ་ཚོགས་ཐམས་ཅད། རྒྱུ་སྦྱོར་བ་ཡོན་གྱི་བདག་པོས་ཐོག་དྲངས་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོས་གཟིགས་ཤིང་༼ཐམས་ཅད་ཀྱིས་༽དགོངས་སུ་གསོལ། ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ༼དབུ་མཛད་གཅིག་པུས་གསུང་བར།༽ ཉི་མ་ན་ཉིན་ལོ། ད་ཞག་གི་ཟླ་བ། མདང་ད་ནངས་འདི་ལ་ཤི་ཟེར་བ་རྣ་བས་ཐོས་ཚད། མིག་གིས་མཐོང་ཚད། སྔོན་ནས་སོང་བ་མེད་པ། རྒྱབ་ནས་དགེ་བའི་བསྐུལ་བ་མེད་པ། དམ་པའི་ཆོས་ཀྱི་ར་མདའ་ མེད་པ། བར་དོ་ན་ཡ་ང་བ། འཇིག་རྟེན་ན་ཡི་མུག་པ། མི་ཚེ་སྟོང་ཟད། འཁོར་བ་སྟོང་འཁྱམས། ལས་ངན་སྡིག་ཅན་རྣམས་ཀྱིས་གཙོར་བྱས་འབྲེལ་ཐོགས་ཀྱི་སེམས་ཅན་ཐམས་ཅད་འཕགས་པ་སྤྱན་རས་གཟིགས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །ཨོཾ་མ་ཎི་པདྨེ་ཧཱུྃ། ཨོཾ་མཎི་པདྨེ་ཧཱུྃ།
སྤྱིར་ཁམས་གསུམ་གྱི་སེམས་ཅན་ཐམས་ཅད། སྒོས་ངན་སོང་གསུམ་གྱིས་བསྡུས་པའི་འགྲོ་བ་རིགས་དྲུག་གི་སྡུག་བསྔལ་ལ་སྤྱོད་པ་ཐམས་ཅད་དམྱལ་བ་ཚ་གྲང་། ཡི་དྭགས་བཀྲེས་སྐོམ། དུད་འགྲོ་བླུན་རྨོངས། མི་སྐྱེ་རྒ་ན་འཆི། ལྷ་མིན་འཐབ་རྩོད། ལྷ་འཆི་འཕོ་ལྟུང་བའི་སྡུག་བསྔལ་ཐམས་ཅད་གསུང་མཆོག་ཡི་གེ་དྲུག་མའི་བྱིན་རླབས་ཀྱིས་སྐད་ཅིག་ཉིད་ལ་བྱང་ཞིང་དག་ནས། གནས་མཆོག་རི་བོ་ཏ་ལའི་ཞིང་ཁམས་སུ་འཕགས་པ་སྤྱན་རས་གཟིགས་ཀྱི་ཞབས་དྲུང་དུ་སྐྱེ་བར་ཤོག །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཁྱད་པར་དུ་འདིར་འདུས་ཤིང་ཚོགས་པ་རྣམས་ཀྱི་ལུས་བསྐྱེད་པའི་དྲིན་ཆེན་ཕ་མ། སེམས་བསྐྱེད་པའི་རྡོ་རྗེ་སློབ་དཔོན། རྒྱུ་ཟས་ནོར་ཟོག་གསུམ་སྦྱིན་པའི་ཡོན་བདག །ཕོ་མོ་ཕུ་ནུ་རུས་ཐོབ་ཀྱི་འབྲེལ་བ། གཞན་ཡང་ནུ་ཞོ་འཐུང་ཚད། ཤ་ཁྲག་ཟོས་ཚད། སྤུ་གོས་གྱོན་ཚད། འོག་རྟ། འགེལ་མཛོ། ཁ་ལག་གི་འབྲེལ་བ་ཐོབ་པའི་བསྔོ་དགོས་ཡིད་ལ་དྲན་ཚད། བསྔོ་ཡིག་ལག་ཏུ་བླངས་པའི་སེམས་ཅན་ཐམས་ཅད་ལས་ངན་པའི་སྒྲིབ་པ་སྐད་ཅིག་ཉིད་ལ་བྱང་ཞིང་དག་ནས། ནུབ་ཕྱོགས་བདེ་བ་ཅན་གྱི་ཞིང་ཁམས་སུ་མགོན་པོ་འོད་དཔག་མེད་ཀྱི་ཞབས་དྲུང་དུ་སྐྱེ་བར་ཤོག །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། རྒྱུ་ཁ་ལག་གི་འབྲེལ་བའི་སེམས་ཅན་ཐམས་ཅད་ཀྱི་ཁ་ཐོག་ཏུ་མནའ་གང་བསྐྱལ། ལག་ཐོག་ཏུ་སྡིག་པ་གང་བྱས། སེར་སྣ་འཇུར་གེགས་གཡོ་སྒྱུ་གསོག་འཇོག །ཁས་ལེན་དང་དམ་ཚིག་ཉམས་པ་མདོར་ན་ལུས་ངག་ཡིད་གསུམ་གྱི་སྒོ་
ནས་མི་དགེ་བའི་སྡིག་པ་དང་། སྒྲིབ་པའི་ལས་བྱས་པ་ཐམས་ཅད་ཚེ་འདིའི་འགལ་རྐྱེན་དུ་མ་གྱུར། ཕྱི་མའི་ལན་ཆགས་སུ་མ་གྱུར། བར་དོར་འཁྲུལ་སྣང་དུ་མ་གྱུར་པ་སྐད་ཅིག་ཉིད་ལ་གསུང་མཆོག་ཡི་གེ་དྲུག་མའི་བྱིན་རླབས་ཀྱིས་བྱང་ཞིང་དག་ནས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ས་ཕྱོགས་ཡུལ་ཁམས་འདི་དག་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་ཐམས་ཅད་རྒྱུན་ཆད། དུས་ཀྱི་འཁྲུགས་པ་ཐམས་ཅད་ཉེ་བར་ཞི་ནས་ཐམས་ཅད་བདེ་སྐྱིད་རྫོགས་ལྡན་གྱི་བསྐལ་པ་ལ་ལོངས་སྤྱོད་ཅིང་། སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ༼དབུ་མཛད་ཁོ་ནས་འབྲེལ།༽ དུས་གསུམ་བདེ་བར་གཤེགས་པ་ཆོས་ཀྱི་སྐུ། །འགྲོ་དྲུག་སེམས་ཅན་རྣམས་ལ་ཐུགས་རྗེས་གཟིགས། །༼ཐམས་ཅད་ཀྱིས།༽ ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ། །གཟི་བརྗིད་འོད་དཔག་མེད་ལ་ཕྱག་འཚལ་ལོ། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ༈ ཕ་སངས་རྒྱས་ཀུན་དངོས་སྤྱན་རས་གཟིགས། །མ་ཁམས་གསུམ་འགྲོ་བ་
ཀུན་གྱི་མགོན། །བུ་འདིར་ཚོགས་ཀུན་གྱི་སྐྱབས་དང་གཉེན། །རྗེ་མཐོང་ཐོས་གྲོལ་བྱེད་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ལར་འཁོར་བའི་རྒྱ་མཚོ་གཏིང་རེ་ཟབ། །ལས་རླུང་ནག་འཚུབ་མ་ཤུགས་རེ་ཆེ། །རྐྱེན་ནད་དང་གདོན་གྱི་རྦ་རླབས་འཁྲུགས། །བུ་ཐར་འདོད་ཡོད་ན་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། དུས་ད་ལྟ་དལ་འབྱོར་མི་ལུས་ཐོབ། །ཆོས་དགེ་བ་སྒྲུབ་ན་རང་དབང་ཡོད། །འདི་རྙེད་པ་དཀའ་ལ་འཇིག་པ་སླ། །ད་ནམ་འཆི་མི་ཤེས་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། གནས་གང་དུ་འདུག་ཀྱང་འཆི་བ་འོང་། །གྲོགས་སུ་དང་འགྲོགས་ཀྱང་གཤོལ་ ཐབས་མེད། །ཚེ་དུས་ལ་བབ་ན་ཕན་པ་མེད། །ཤི་རྒས་གཞོན་མ་ངེས་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ལས་དགེ་སྟོབས་ཆེ་བ་མཐོ་རིས་འགྲོ། །ལས་སྡིག་སྟོབས་ཆེ་བ་ངན་སོང་འགྲོ། །ལས་དགེ་སྡིག་འདྲེས་མ་བར་དོ་འཁྱམས། །ལས་དེ་འདྲ་བསམ་ན་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཆོས་གསུང་མཆོག་ཡི་གེ་དྲུག་མ་འདི། །ཡར་མཐོ་རིས་ཐར་པའི་ལམ་སྐས་ཡིན། །མར་ན་རག་དམྱལ་བའི་སྒོ་འདན་ཡིན། །བར་སྲིད་པ་བར་དོའི་སྐྱེལ་མ་ཡིན། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཁྱེད་གསོན་པོ་རྣམས་ཀྱི་རིམ་གྲོ་ཡིན། །ཁོང་གཤིན་པོ་རྣམས་ཀྱི་འགྲོ་
བརྫང་ཡིན། །ཚེ་འདི་ཕྱི་གཉིས་ཀྱི་གྲོགས་པོ་ཡིན། །བློ་གཏད་ན་མི་བསླུ་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ནམ་འཆི་བའི་དུས་སུ་གཅིག་པུ་འགྲོ། །གཉེན་ཉེ་འབྲེལ་བརྩེ་གདུང་ཆེ་བར་ བསྐྱུར། །ཟོག་བསགས་པ་ཕངས་སེམས་ཆེ་ཡང་ལུས། །རང་གར་སྐྱེ་མི་ཤེས་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། མི་ཤི་བའི་ར་མདའ་ལྷ་ཆོས་ཡིན། །ཆོས་ཤི་གསོན་མ་དགོས་ཐུན་མོང་ཡིན། །ལྷ་བླ་མ་སེར་སྐྱ་ཕོ་མོ་ཚོགས། །མི་འདི་ཚོགས་ཀུན་གྱིས་ཡིག་དྲུག་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཐར་པའི་ལམ་སྟོན་བླ་མ་དཀོན་མཆོག་གསུམ། །ཐར་པའི་དེད་དཔོན་འཕགས་པ་སྤྱན་རས་གཟིགས། །ཐར་ལམ་མཆོག་གྱུར་གསུང་མཆོག་ཡིག་དྲུག་ཡིན། །ཐར་འདོད་ཀུན་གྱིས་ཡི་གེ་དྲུག་མ་གསུངས། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཐུགས་རྗེ་ཆེན་པོ་འཕགས་མཆོག་སྤྱན་རས་གཟིགས། །འགག་པ་མེད་པ་ ཡི་གེ་དྲུག་མའི་སྒྲ། །རེ་དོགས་མེད་པ་ཐུགས་རྗེ་ཆེན་པོའི་ཐུགས། །བཀའ་དྲིན་རྒྱུན་ཆད་མེད་པར་གསོལ་བར་ཐོབ། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། འདིར་ཚོགས་སྐལ་ལྡན་ཕོ་མོ་ཐམས་ཅད་ཀྱི། །ཤི་བ་མཐོང་ཐོས་དྲན་རེག་ བསྔོ་དགོས་དང་། །བདག་ལ་འབྲེལ་བ་ཐོགས་པའི་སེམས་ཅན་རྣམས། །ཕྱིར་མི་ལྡོག་པའི་ས་ལ་འགོད་པར་ཤོག །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ།
དྲིན་ཆེན་ཕ་མའི་གཙོ་བྱས་སེམས་ཅན་རྣམས། །འབྲུ་དྲུག་སྙིང་པོས་ལམ་ སྣ་འདྲེན་པར་ཤོག །ཁམས་གསུམ་འཁོར་བ་དོང་ནས་སྤྲུག་གྱུར་ཅིག །ན་རཀ་དམྱལ་བ་མི་ཟད་སྟོང་པར་ཤོག །ཨོཾ་མཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། དཀོན་མཆོག་རིན་ཆེན་གསུམ་གྱི་བདེན་པ་དང་། །ཆོས་འཁོར་དྲི་མེད་འདི་ ཡིས་བྱིན་རླབས་ཀྱིས། །བདག་གི་ལྷག་བསམ་རྣམ་པར་དག་པའི་མཐུས། །ཡོངས་པའི་རྒྱལ་ཁམས་བདེ་བའི་བཀྲ་ཤིས་ཤོག །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ས་ཆུ་མེ་རླུང་འབྱུང་བཞིའི་སྒྲ་རྣམས་ཀུན། །རིགས་ལྔ་ཡེ་ཤེས་ལྔ་ཡི་འོད་ཀློང་དུ། །ཆོས་སྐུ་སྟོང་གསལ་རང་སྒྲ་ངོ་ཤེས་ནས། །ཡི་གེ་དྲུག་མའི་སྒྲ་རུ་འགྱུར་བར་ཤོག །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། སྦྱིན་བདག་ཕོ་མོ་གཙོ་བྱས་མཁའ་ཁྱབ་རྣམས། །དམིགས་མེད་རབ་འབྱམས་རྒྱལ་བའི་ཞིང་ཁམས་ནས། །འགག་མེད་གསུང་དབྱངས་ཡིག་དྲུག་བརྒྱ་ཕྲག་གཅིག །ཐུགས་རྗེ་རྩོལ་མེད་ངང་ནས་འདྲེན་པར་ཞུ། །ཨོཾ་མ་ཎི་པདྨེ་ཧཱུྃ། ཨོཾ་མ་ཎི་པདྨེ་ཧཱུྃ། ཞེས་སོ། །དེ་ལྟར་ཡི་གེ་དྲུག་མའི་སྒྲ་དབྱངས་ཅི་ནུས་གསོལ་བ་བཏབ་ན་གནས་སྐབས་དང་མཐར་ཐུག་གི་གཏན་བདེ་བླ་ན་མེད་པ་འགྲུབ་པར་སྨོས་ཅི་དགོས། ༼ཕ་སངས་རྒྱས་ཀུན་དངོས་མན་ཆད་རྣམས།༽མ་ཧཱ་པཎྜི་ཏ་འགྱུར་མེད་མཐུ་སྟོབས་རྣམ་རྒྱལ་བས་སོ། །