ཀར་གླིང་ཞི་ཁྲོའི་བར་དོ་དྲུག་ཁྲིད་ཀྱི་ཟིན་བྲིས་ཀུན་གསལ་མེ་ལོང་།
ཀར་གླིང་ཞི་ཁྲོའི་བར་དོ་དྲུག་ཁྲིད་ཀྱི་ཟིན་བྲིས་ཀུན་གསལ་མེ་ལོང་བཞུགས་སོ། །ན་མཿཤྲཱི་མཱཾ་གུ་ར་ཝེ། འགྲོ་ཁམས་དུག་ལྔའི་བག་ཆགས་སྲ་མཁྲེགས་ལྕགས། །སྨིན་གྲོལ་དངུལ་ཆུའི་སྦྱོར་བས་ཡེ་ཤེས་ཀྱི། །གསེར་ཁམས་བཟང་པོར་མ་བཅོས་ལྷུན་གྲུབ་ཏུ། །སྟོན་མཛད་ཁྱབ་བདག་བླ་མས་ཤིས་པ་སྩོལ། །གསང་སྔགས་མྱུར་ལམ་ཚེ་གཅིག་གདོད་མའི་སར། །དཀའ་བ་མེད་སྒྲོད་དགོངས་པ་རང་གྲོལ་གྱི། །བར་དོ་དྲུག་ཁྲིད་ཉམས་སུ་ལེན་པའི་ཐབས། །བླ་མའི་ཞལ་གྱི་བདུད་རྩི་འདིར་གསལ་བྱ། །ཞེས་ཤིས་པར་བརྗོད་དེ་བསྟན་པར་བྱ་བ་ལ། ཐོག་མར། ས་བཅད་སྡེ་མིག་རང་གྲོལ་རྩ་བར་བྱས་པར་གོང་འོག་འཁྲུགས་སྡེབ་བྱེད་རྒྱུར། སྔོན་འགྲོ། དངོས་གཞི། རྗེས་དང་གསུམ་མོ། །དང་པོ་སྔོན་འགྲོ་རང་རྒྱུད་འདུལ་བར་ལྷན་ཐབས་སྦྱར་དགོས་པས་ཆོས་ཐུན་གསུམ་སྟེ། དེ་ཡང་འཁོར་བའི་སྡུག་བསྔལ་
མ་བསམ་ན་སོགས་ནས་ཆོས་ཐུན་གཉིས་པ་དལ་འབྱོར་རྙེད་དཀའ། ཆོས་ཐུན་གསུམ་པ་འཆི་བ་མི་རྟག་པ་རྣམས་ཞག་གྲངས་མང་ཉུང་གང་ལྟར་ནར་འདེད་ཀྱི། འཆི་བ་མི་རྟག་པ་བསྒོམ་པ་སྟེ། ཆོས་ཐུན་གསུམ་པའོ། །བར་ས་བཅད་ནས་སྔོན་འགྲོ་རང་རྒྱུད་སྦྱོང་བ་ལ་ཆོས་ཐུན་ལྔ་ཡོད་རྒྱུར། སྔོན་འགྲོ་རང་རྒྱུད་སྦྱོང་བའི་ཁྲིད་རིམ་གྱི་འདོན་ཆ་རྒྱད་པས་སཱུརྱ་ཙནྟྲ་རསྨིས་མཛད་པ་ལྟར། གཏི་མུག་གཉིད་དཀྲོགས་ནས་སྐྱབས་འགྲོ་སེམས་བསྐྱེད། རྡོར་སེམས། མཎྜལ། བླ་མའི་རྣལ་འབྱོར་སོགས་ཞག་གྲངས་ཀྱིས་སྦྱང་བྱ་བཅས་ཁྲིད་རིམ་སྤྱི་ལྟར་རྒྱས་སྤྲོས་མཛད་དེ། སྣང་སྲིད་བླ་མའི་རོལ་པར་བལྟ་བར་བྱའོ། །བར་བཏང་། གཉིས་པ་དངོས་གཞིའི་སྤྱི་དོན་ལ། སྐྱེ་གནས་བར་དོ། རྨི་ལམ་བར་དོ། བསམ་གཏན་བར་དོ། འཆི་ཁ་བར་དོ། ཆོས་ཉིད་བར་དོ། སྲིད་པ་བར་དོ་དང་དྲུག་ཡོད་པའི། སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ་གྱིས། ཕྱི་ནང་གི་སྒྲོ་འདོགས་ཆོད་པ་ཐི་བྱ་ཚང་དུ་འཇུག་པ་ལྟ་བུའི་གདམས་ངག་ནི། དེ་ལས་དང་པོ་སྐྱེ་གནས་བར་དོ་ཉམས་སུ་ལེན་པ་ལ། ཀུན་གཞིའི་གནས་ལུགས་གཏན་ལ་དབབ་པ་ལ་གསུམ། སོགས་ནས། ལྷག་མཐོང་རིག་པའི་ཡེ་ཤེས་ངོ་སྤྲད་པའི་ཆོས་ཐུན་དང་པོའོ། །བར་ནར་འདེད་ཞག་གྲངས་སོ་སོར་སྦྱང་ཞིང་། ནང་གསེས་རྣམས་ས་བཅད་ལྡེ་མིག་རང་གྲོལ་ལ་དཔྱོད་དགོས། སྤྱི་དོན་གཉིས་པ་རྨི་ལམ་བར་དོའི་ཁྲིད་ཡིག་འཁྲུལ་པ་རང་གྲོལ་གྱིས། བག་ཆགས་ཀྱིས་མཚམས་སྦྱར་ཞིང་འོད་གསལ་ལམ་དུ་ཁྱེར་བ་མུན་ཁང་དུ་སྒྲོན་མེ་
བཏེག་པ་ལྟ་བུའི་གདམས་ངག་ནི། རྨི་ལམ་བར་དོའི་ཁྲིད་ཡིག་ལའང་གསུམ་སྟེ། ཉིན་པར་སྒྱུ་ལུས་ཀྱི་ཁྲིད་སོགས་ནས། གྱུར་ཏེ་བར་དོར་གྲོལ་བར་ངེས་སོ། །བར་ནར་འདེད་བྱ། ནང་གསེས་ཞག་གྲངས་སོགས་ལྡེ་མིག་རང་གྲོལ་ལྟར་དཔྱད། སྤྱི་དོན་གསུམ་པ་བསམ་གཏན་བར་དོའི་ཁྲིད་ཡིག་རིག་པ་རང་གྲོལ་གྱི་ཁྲིད། དྭ་ཕྲུག་མ་དང་འཕྲད་པ་ལྟ་བུའམ། སྒེག་མོས་མེ་ལོང་ལ་བལྟ་བ་ལྟ་བུའི་གདམས་ངག་ནི། དེ་ཡང་གོང་དུ་རིག་པ་ངོ་སྤྲད་ཅིང་འདི་ཁོ་ནའོ་ཞེས་བསྟན་པས༔ སོགས་ནས། སངས་རྒྱས་པར་བྱེད་པ་བསམ་གཏན་བར་དོའི་ཁྲིད་ཀྱི་རིམ་པའོ༔ ཞེས་ཚིག་མཐའ་བསྒྱུར། ནང་གསེས་ཞག་གྲངས་སོགས་ལྡེ་མིག་རང་གྲོལ་ལྟར་དཔྱོད། སྤྱི་དོན་བཞི་པ་འཆི་ཁ་བར་དོའི་ཁྲིད་ཡིག་འཕོ་བ་རང་གྲོལ་གྱི་གདམས་ངག་མི་གསལ་བ་ལ་གསལ་གདབ་པ་རྒྱལ་པོས་བཀའ་ཐམ་བསྐུར་བ་ལྟ་བུའི་གདམས་ངག་ནི། དེ་ཡང་གོང་གི་ཁྲེགས་ཆོད་ཀྱི་སྐོར་དང་། སོགས་ནས། ཤི་བ་མཁས་པ་གཅིག་གལ་ཆེའོ། །བར་ནར་འདེད་ལས་ས་བཅད་དམིགས་རྐང་སོགས་ལྡེ་མིག་རང་གྲོལ་ལྟར་བྱའོ། །སྤྱི་དོན་ལྔ་པ་ཆོས་ཉིད་བར་དོའི་ཁྲིད་ཡིག་མཐོང་བ་རང་གྲོལ་གྱིས། རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་གདམས་ངག་ནི། སྐྱེ་གནས་བར་དོའི་ཁྲིད་ཡིག་ཀུན་གཞི་སོགས་ནས། རྒྱས་པར་གཞན་ནས་འབྱུང་ངོ་། །བར་ནར་འདེད་བྱ། ས་བཅད་ཞག་གྲངས་སོགས་ལྡེ་མིག་རང་གྲོལ་དང་བསྟུན། སྤྱི་དོན་དྲུག་པ་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ་གྱིས་ཡུར་བ་
རྐང་ཆད་པ་ལ་ཝ་འཛུགས་པ་ལྟ་བུའི་གདམས་ངག་ནི། སྣང་བ་བཞི་མ་མཐོང་བ་དང་༔ ཆོས་ཉིད་སོགས་ནས། འཕྲོ་མཐུད་ནས་གྲོལ་བར་ཐེ་ཚོམ་མེད་དོ༔ བར་ནར་འདེད། ས་བཅད་དང་ཞག་གྲངས་སོགས་ལྡེ་མིག་རང་གྲོལ་ལྟར་བྱ། གསུམ་པ་མཇུག་གི་དོན་ལ། ལྡེ་མིག་ནས། སྤྱི་དོན་གསུམ་པ་མཇུག་གི་དོན་ལ། སོགས་ནས། རྒྱས་བཏབ་པ་དང་གསུམ་མོ༔ བར་བརྗོད། སྐབས་འདི་ངག་ཏུ་ཉིན་ལྟར་བར་དོའི་དབྱིངས་གྲོལ་གསོལ་འདེབས་མ་ཆག་པར་བྱའོ། །ཕྱག་ལེན་སྤྲོས་བཅས་གནང་ན་ངོ་སྤྲོད་མཐོང་བ་རང་གྲོལ་གྱི་ལག་ལེན་ཟིན་བྲིས་རྒྱད་པས་མཛད་པ་ལྟར་སྦྲེལ་བར་སྔར་དབང་མ་ཐོབ་པ་ཡིན་ན་དབང་བསྐུར་དགོས་ཤིང་ཐོབ་ན་མ་བྱས་ཀྱང་རུང་། སྔོན་འགྲོ་རང་རྒྱུད་འདུལ་བ་ལྟར་སྡུག་བསྔལ་ལ་བསམ་པ་དང་། དལ་འབྱོར་རྙེད་དཀའ། འཆི་བ་མི་རྟག་པ་རྣམས་རྫོགས་ནས་ཟིན་བྲིས་ལྟར་ནས། ལས་དང་པོ་ལ་སྐྱོ་ཤས་བསྐྱེད་པ་ལ། དུར་ཁྲོད་ཀྱི་མི་རོ་བསྐྱལ་བ་ལ་བརྟེན་ནས་མི་རྟག་པར་བསྐུལ་མ་ངོ་སྤྲད་པ་བརྟགས། དེ་རྗེས་སྔོན་འགྲོ་རང་རྒྱུད་སྦྱོང་བ། གཏི་མུག་གཉིད་དཀྲོགས་ནས། སྐྱབས་འགྲོ། སེམས་བསྐྱེད། ཡིག་བརྒྱ། མཎྜལ། བླ་མའི་རྣལ་འབྱོར། སྐྱེ་གནས། རྨི་ལམ། བསམ་གཏན་བར་དོ་རྣམས་བཏང་རྗེས། འཆི་ཁ་བར་དོའི་ཁྲིད་ཡིག་འཕོ་བ་རང་གྲོལ་ལྟར་སྒོས་ཆོས་མ་ཉམས་པ་ཚར་ནས། སྐབས་འདིར་རང་གཞུང་གི་འཕོ་ཚུལ་གྱི་གདམས་ཁྲིད་དང་། ཆོས་རྒྱུན་གཏེར་གནས་སོགས་བྱིན་རླབས་དོན་བརྒྱུད་མཚུངས་ཕྱིར། ཉི་ཟླ་སངས་རྒྱས་ཀྱི་འཕོ་བ་འཇག་ཟུག་མ་ཁྲིད་རྒྱུན་ལྟར་རྒྱུད་
སྨིན་རྟགས་ཐོན་པར་གནང་ན་ལེགས། སྐབས་འདིར་ཟིན་བྲིས་ལྟར་ཁམས་པའི་མི་མོར་བརྟེན་ནས་རྣམ་ཤེས་འབྱུང་འཇུག་གནས་གདམས་དང་མཉམ་གཞག་བསྒོམ་པའི་དཔེ་ལ་ངོ་སྤྲོད་བྱ། དཔོན་མོ་འདོ་ལི་མའི་གཏམ་རྒྱུད་གསུངས། སྐབས་འདིར་ཟབ་དབང་གསུམ་བསྐུར་ཞིང་ཤིན་ཏུ་སྤྲོས་མེད་ཤེལ་རྡོ་ངོ་སྤྲོད་ཉི་ཟེར་མ། སྐུ་གསུམ་ངོ་སྤྲོད་དུག་གསུམ་རང་གྲོལ། སྒྲོན་མ་དྲུག་གི་ངོ་སྤྲོད་སོགས་ཀྱང་གནང་ཆོག །ཡང་ཟིན་བྲིས་ལྟར་སྐྱེ་གནས་བར་དོའི་ཁྲིད་ཉམས་སུ་མྱོང་བར་བརྟེན་ནས། གཞིའི་འོད་གསལ་ངོ་སྤྲོད་པ་གཉིས་ཏེ་སྔོན་ནས་དེ་དག་ནི་བར་དོའི་གཞི་སྣང་གི་ངོ་སྤྲོད་དོ། །བར་ཕྱག་ལེན་གནང་། དེ་ནས་ཆོས་ཉིད་བར་དོའི་གཞུང་མཐོང་བ་རང་གྲོལ་སོར་བཞག་མཛད་གསུངས། དེ་རྗེས་ཟིན་བྲིས་ནས་ཆོས་ཉིད་ཡིད་ལ་མི་དྲན་ཞིང་དགེ་སྡིག་འཆོལ་ཉོག་ཏུ་སྤྱོད་པ་རྣམས་སྲིད་པ་བར་དོའི་ངོ་སྤྲོད་པ་ནི། སྲིད་པ་བར་དོའི་ངོ་སྤྲོད་དགེ་སྡིག་རང་གཟུགས་བསྟན་པའི་གདམས་པ་ལྟར་བྱ། ལྷན་ཐབས་དབྱངས་སྙན་ལྷའི་གནྡྷེ་ཡང་སྦྱར་ནས། ཡིག་དྲུག་བསྐུལ་བ་དང་། རྩི་དཀར་དྲུང་པའི་རྨི་ལམ་བཤད་པ་སོགས་བྱ། དེ་རྗེས་སྲིད་པ་བར་དོའི་ཁྲིད་གཞུང་རྫོགས་པར་བྱས་ལ། བར་དོའི་སྨོན་ལམ་ཐམས་ཅད་འདོན་པ་ཡང་གནད། དེ་ལྟར་གནང་ན་དམིགས་ཆ་གཞན་རྣམས་ཀྱང་འདིའི་ཁོངས་སུ་ཚང་བར་འཇུག་གོ །སྤྱིར་གོང་སྨོས་བཞིན། བར་དོ་དྲུག་གི་ཁྲིད་དེར་སྦྱོང་བ་ཚད་ལྡན་སོང་ན་ཐམས་ཅད་ཚང་བ་ཡིན་ལ། ཕྱག་ལེན་རྒྱས་པ་འདི་སེམས་རྒྱུད་དང་འདྲེས་ངེས་བྱུང་ན་
བྱིན་རླབས་ཆེས་ཆེ་བ་སྨོས་མ་དགོས་རུང་། བྱིས་པའི་རྩེད་མོ་ལྟར་ལས་དུས་ཀྱི་དབང་གིས་དོན་དཀའ་བར་སྣང་ཞེས་ཀཿཐོག་པཎ་ཆེན་གྱིས་གསུངས་སོ། །སྐྱེ་འདིར་སྨིན་གྲོལ་ལམ་སྦྱང་བར་དོ་དྲུག །གོམས་འདྲིས་གདེངས་ལྡན་ཆོས་ཉིད་མ་བུ་འདྲེས། །དོན་གཉིས་ལྷུན་གྲུབ་འགྲོ་ཀུན་ཐབས་བདེའི་སར། །བདེ་བླག་བྱེད་དེ་ལམ་འདིའི་ཁྱད་ཆོས་ཡིན། །ཞེས་པའང་རྒྱལ་དབང་པདྨའི་གདུང་ཚབ་ཁྱབ་བདག་རྡོ་རྗེ་འཆང་གཏེར་ཆེན་༧གར་དབང་ཆོས་ཀྱི་རྒྱལ་མཚན་གྱི་བཀའ་ཡི་གནང་བ་ཐོབ་ཅིང་། ཀུན་མཁྱེན་མ་ཧཱ་པཎྜི་ཏ་ཚེ་དབང་མཆོག་གྲུབ་ཀྱི་ཞལ་རྒྱུན་སྔོན་རབས་ཀཿ ཐོག་པའི་ཁྲིད་རྒྱུན་ཕྱག་ལེན་ཇི་བཞིན་ལེགས་པར་སྩལ་བའི་སྲོལ་མི་ནུབ་པའི་ཆེད་དུ་དང་། མཁྱེན་བརྩེ་ནུས་པའི་མངའ་བདག་གྲུབ་དབང་བླ་མ་ཛཿ ཀ་བསོད་ནམས་དཔལ་ལྡན་ནས་ཀྱང་བསྐུལ་མ་མཛད་དོན་བཞིན་རྫོགས་ཆེན་རབ་འབྱམས་པའི་བཀའ་འབངས་ཐ་ཤལ་པ་ཤཱཀྱའི་དགེ་སློང་མཐུ་སྟོབས་རྣམ་རྒྱལ་པས་གོང་སྨོས་དམ་པ་མཆོག་གཉིས་ལ་ཡང་། བཀའ་དྲིན་ཞུ་བསྟུན་ཟིན་ཐོར་བགྱིས་པ་ཡོངས་ལ་ཕན་གྱུར་ཅིག །ཅེས་དབེན་རི་བདེ་ཆེན་པདྨ་འོད་གླིང་དུ་བཀའ་འདུས་ཆོས་ཀྱི་རྒྱ་མཚོའི་དལ་ཞལ་ཕྱེ་སྐབས་སུའོ། །ཤྲཱི་མཱ་གུ་རུ་ཝེ་མ་ཧཱ་ནི་དྷི་པཱཽ་ད་ཏིཥྛནྟུ། དགེའོ། །དགེའོ། །དགེའོ། །