གནས་འདྲེན་དང་འགྲོ་དྲུག་རང་གྲོལ་འཕྲད་ཚད་སོགས་ལ་སྦྱོར་བའི་ཕྱག་ལེན།
ནིཀེཏཱོནྣཡཤྩཥཥྒཏིཿ སྦརཱུབམུཀྟྱསཱཔཀྲྀཎྟཱསྶཧརསྱཧསྟོཔཱདཱཡོབིཛཧརཾ། གནས་འདྲེན་དང་འགྲོ་དྲུག་རང་གྲོལ་འཕྲད་ཚད་སོགས་ལ་སྦྱོར་བའི་ཕྱག་ལེན་བཞུགས་སོ། །ན་མོ་གུ་ར་ཝེ། གནས་འདྲེན་ཟིན་བྲིས་ལ། ཐོག་མར་ལས་བུམ་ཆུས་ཆབ་བྲན་ཞིང་། ཨོཾ་མ་ཧཱ་ཤུ་ནྱ་ཏཱ་སོགས། རང་སེམས་མ་བཅོས་སྟོང་ཉིད་སོགས་ནས་མདུན་གྱི་རྟེན་སྣང་རང་བཞིན་སོགས། དཀོན་མཆོག་གསུམ་གྱི་བདེན་པས་འདིར་ཁུག་ཅིག །ཇི་ལྟར་བལྟམས་པ་ཙམ་གྱིས་ནི་སོགས་ཡིག་བརྒྱ་བཟླ། ཨོཾ་བཛྲ་ཨ་མྲ་ཏ་སོགས། ཨོཾ་སྭ་བྷཱ་ཝ་སོགས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿ ཧཱུྃ། ཨོཾ་བཛྲ་ཨ་ཀརྴ་ཡ་ཛཿ ཨོཾ་སརྦ་བིགྷྣཾ་ན་མཿ སརྦ་ཏ་ཐཱ་བྷྱོ་བི་ཤྭ་སོགས། ག་ག་ན་ཁཾ་གྷྲ་ཧྣ་ཨི་དམ་བ་ལིངྟ་སྭཱ་ཧཱ། ལན་གསུམ་གྱི་མཐར། ས་དང་ལམ་ལ་སོགས། གཞན་དུ་དེངས༔ ན་མོ། རྩ་རྒྱུད་ཀྱི་བླ་མ་མཆོག་གསུམ་རྒྱལ་བ་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང་། ངན་འགྲོ་ཐམས་ཅད་རྣམ་པར་སྦྱོང་བ་རྒྱལ་བ་ཞི་ཁྲོ་རབ་འབྱམས་
ཀྱི་ལྷ་ཚོགས་རྣམས་ཀྱི་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་གྱི་བདེན་པ་དང་། བདེན་པ་ཆེན་པོའི་བྱིན་གྱིས་བརླབས་ཀྱིས། སློབ་མ་འདི་རྣམས་ལ་དབང་བསྐུར་གྱི་ཆོ་ག་ཟབ་མོ་སྒྲུབ་པར་བྱེད་པ་ལ་བར་དུ་གཅོད་པ་སྤྱི་དང་། ཁྱད་པར་ཚེ་ལས་འདས་པ་རྣམས་གསོན་གྱི་དུས་སུ་ཚེ་ལ་བར་དུ་གཅོད་ཅིང་། གཤིན་གྱི་དུས་ན་སྡིག་པ་སྦྱོང་བ་ལ་བར་དུ་གཅོད་པའི་གདོན་བགེགས་ཐམས་ཅད་གཏོར་མ་འདིས་ཚིམ་པར་གྱིས་ལ། དཔག་ཚད་དང་རྒྱང་གྲགས་སུ་མ་གནས་པར་སོང་ཞིག །གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་འབར་བས་མགོ་བོ་ཚལ་བ་བརྒྱར་འགས་པར་གྱུར་ཏ་རེ། ཨོཾ་ཨཱཿ ཧཱུྃ་བྷོ་དྷི་ཙིཏྟ་སོགས། ཨོཾ་རུ་ལུ་སོགས། ཨོཾ་སུམྦྷ་ནི་སོགས། དྲག་སྔགས་དང་ཡུངས་ཐུན་གྱིས་བྲབ། ཧཱུྃ༔ རང་ཉིད་ལྷ་ཡི་ཐུགས་ཀ་ནས༔ སོགས། ཙཀྲ་ཛྭ་ལ་རཾ་ཧཱུྃ་ཕཊ༔ ཞེས་བརྗོད་པས་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་རྭ་བ་གུར་བླ་རེ་ཡེ་ཤེས་ཀྱི་མེ་དཔུང་མཐའ་མེད་དུ་འཕྲོ་བས་བཅིངས་ཏེ་ཅིས་ཀྱང་མི་ཤིགས་པའི་མོས་པ་མཛོད། ཧཱུྃ༔ ཚེ་འདས་ལུས་བརྗེས་སོགས་ནས། ས་མ་ཡ་ཏིཥྛ་ལྷན༔ གང་འདིར་བཅོམ་ལྡན་འདས་དེ་བཞིན་གཤེགས་པ་སོགས་ནས་དཀྱིལ་འཁོར་གྱི་ལྷ་ཚོགས་རྣམས་ལ་སྦྱིན་པའི་བདག་པོའི་སྡིག་པ་དང་། སྒྲིབ་པ་སྦྱོང་བའི་ཕྱིར་བདག་ཅག་གི་ཡོ་བྱད་ཐམས་ཅད་དང་ལྡན་པས་སྐུ་ཁྲུས་དམ་པ་གསོལ་བར་བགྱིའོ། །ཁྲུས་ཀྱི་ཁང་པ་སོགས་རོལ་མོར་བཅས་པ་དུ་མས་སྐུ་ཁྲུས་གསོལ། ཇི་ལྟར་བལྟམས་པ་སོགས། འདི་ནི་ཁྲུས་མཆོག་སོགས། ཀུན་བཟང་རིགས་ལྔ་སོགས། རྒྱལ་བའི་སྐུ་གསུང་
ཐུགས་མཆོག་སོགས། དེ་དག་སྐུ་ལ་སོགས། དེ་ནས་དེ་ལ་ཁ་དོག་སོགས། སྣ་ཚོགས་དབང་པོའི་སོགས། དྲི་མེད་མཚན་ལ་སོགས། ཝ་ས་སེ་པྲ་ཏཱིཙྪ་ཡེ་སྭཱ་ཧཱ། དེ་ལྟར་རྒྱལ་བའི་སྐུ་གསུང་ཐུགས་ལ་ཁྲུས་གསོལ་བས་ཚེ་ལས་འདས་པ་དང་། སྦྱིན་པའི་བདག་པོའི་སྒྲིབ་པ་སྦྱོང་བའི་ཁྲུས་ཆུ་ནུས་པ་དང་ལྡན་པར་གྱུར། ཧཱུྃ༔ འདི་ནི་སྦྱིན་པའི་རང་བཞིན་ཆུ༔ སོགས་ནས། དུག་རྣམས་གཏན་ནས་དག་གྱུར་ཅིག༔ ཡིག་བརྒྱ་དང་། ཀཾ་ཀ་ནི་སོགས་བརྗོད། འདི་ནས་ཀྱང་འཕྲད་ཚད་སྟ་གོན་དང་བསྒྱུར་མཚམས་ཡིན། གནས་འདྲེན་སྐབས། དེ་ནས་གསོལ་བ་གདབ་པ་འདི་ཡི་རྗེས་ཟློས་མཛོད། ཀྱེ་མ་མགོན་པོ་ཐུགས་རྗེ་ཅན༔ སོགས། བཟུང་དུ་གསོལ༔ འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་རྫོགས་པའི་སངས་རྒྱས་ཟུང་འཇུག་སྐུ་བཞི་ཡེ་ཤེས་ལྔའི་བདག་ཉིད་ཁྱབ་བདག་གདོད་མའི་མགོན་པོ་ཀུན་བཟང་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་སྒོ་ནས་མངོན་པར་དབང་བསྐུར་བ་ཟབ་མོ་གསན་ཏེ། དོན་ཚུལ་བཞིན་དུ་བསྒྲུབ་པར་བགྱིའོ་སྙམ་པའི་སེམས་བསྐྱེད་ཡང་དག་པ་དང་བཅས་ཏེ་ལེགས་པར་གསན་འཚལ། དེ་ཡང་འོ་སྐོལ་གྱི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེས། སེམས་ཅན་གྱི་བསམ་པ་དང་མཐུན་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་བསྟན་པ་ཐམས་ཅད་ཀྱང་བསྡུ་ན། ཐེག་པ་ཆེ་ཆུང་གཉིས་སུ་འདུ་བ་ལས། འདིར་ཐེག་པ་ཆེན་པོ་དང་། ཐེག་པ་ཆེན་པོ་ལ་ཡང་གསར་རྙིང་གཉིས་སུ་ཡོད་
པ་ལས། འདི་གསང་སྔགས་རྙིང་མ། དེ་ལའང་ཕྱི་རྒྱུད་སྡེ་གསུམ། ནང་རྒྱུད་སྡེ་གསུམ་དུ་ཕྱེ་བའི་ནང་ཚན། རྫོགས་པ་ཆེན་པོ་ཨ་ཏི་ཡོ་ག །དེ་ལ་འདིར་བསྐྱེད་རྫོགས་རྣམ་པ་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་ཉམས་ཆག་སྐོང་ཞིང་རྟོག་སྒྲིབ་སྦྱོང་ལ། སེམས་ཅན་ཐམས་ཅད་ངན་སོང་གི་སྡུག་བསྔལ་ལས་དྲངས་ནས། བླ་ན་མེད་པའི་དངོས་གྲུབ་ཀྱི་སྐལ་བ་ཅན་དུ་བྱེད་པའི་ཐབས་མཁས་ཀྱི་སྒོ་རྨད་དུ་བྱུང་བའི་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྒོ་ནས་དབང་བསྐུར་བ་ཡིན་ལ། ཐོག་མར་ལོ་རྒྱུས་མདོ་ཙམ་ནི། སྔོན་འདོད་ཁམས་ཀྱི་གནས་འདི་ན་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་མཁས་པ་ཞིག་ལ། སློབ་མ་རྒྱལ་པོའི་བུ་ཞིག་ཡོད་པ་དེས་སློབ་སྦྱོང་མཐར་ཕྱིན་པ་ན། ད་ནི་ང་ཡི་གོང་ན་རིག་པར་སྨྲ་བ་སློབ་དཔོན་འདི་ཙམ་དུ་ཟད་པས། འདི་གོང་དུ་མི་གཏོང་སྙམ་དུ་བསམ་ནས། སློབ་དཔོན་ལ་ཐོ་འཚམས་ཤིང་། སློབ་དཔོན་གྱིས་ཀྱང་ཞེ་སྡང་གིས་དམོད་བོར་བའི་ལས་ཀྱིས། གཉིས་ཀ་ངན་འགྲོར་ལྟུང་ནས་སྡུག་བསྔལ་གྱིས་ཉམ་ཐག་པར་གྱུར་པ་ལ། ཡུལ་དང་འཕྲད་པའི་ཐུགས་རྗེ་སྐྱེས་ནས། དཔལ་རྡོ་རྗེ་སེམས་དཔའ་མངོན་སུམ་དུ་བྱོན་ནས་འགྱོད་ཚངས་ཀྱི་བཤགས་པ་དང་། ཡི་གེ་བརྒྱ་པའི་སྔགས་བསྟན་པས། སྔོན་གྱི་གནས་དྲན་ཏེ་འགྱོད་པ་དྲག་པོ་སྐྱེས་པ་ལ། གསང་བའི་བདག་པོས་ཕྱི་ནང་གསང་བའི་དབང་བསྐུར་པས་དགེ་བས་གསོས་ཐེབས་ཏེ་བྱང་ཆུབ་ཀྱི་མྱུ་གུ་སྐྱེས་པས། རིམ་གྱིས་རིག་འཛིན་གྱི་ས་ལ་
གནས་པར་གྱུར་ཏོ། །དེ་ལྟར་ཀུན་བཟང་རྡོ་རྗེ་འཆང་ཆེན་པོས། རྡོ་རྗེ་སེམས་དཔའ་ལ་དགོངས་པས་བྱིན་གྱིས་བརླབས་པས་རྒྱལ་བ་དགོངས་བརྒྱུད། རྡོ་རྗེ་སེམས་དཔའ་མན་ངག་གི་གནད་རྫོགས་ཆེན་འཁོར་འདས་རང་གྲོལ་བཏགས་གྲོལ་རྒྱུད་དྲུག་གི་ཆོས་སྐོར་སོགས་བརྡའི་སྒོ་ནས་རིག་འཛིན་དགའ་རབ་རྡོ་རྗེ་དང་། དེས་ཤྲཱི་སེང་ཧ། དེས་སངས་རྒྱས་གཉིས་པ་པདྨ་འབྱུང་གནས་སོགས་ལ་བརྡ་ཙམ་བསྟན་པས་དོན་ཁོང་དུ་ཆུད་ལ། དེ་ཡན་རིག་འཛིན་བརྡ་བརྒྱུད། འགྱོད་ཚངས་བཤགས་པའི་རྒྱུད་ནི། གླང་པོ་ཆེ་རབ་འབོག་གི་རྟོགས་པ་གཅིག་ཁོལ་དུ་ཕྱུང་བ་ཡིན་ཞིང་། དེ་ནི་གསང་བདག་གི་མཐུས་རྒྱལ་པོ་ཛཿ ལ་གླེགས་བམ་གྱི་ཆར་བབས་པའི་ནང་ཚན་ཡིན་ཞིང་། འཕགས་ཡུལ་གྱི་རིག་འཛིན་རྣམས་ལས་བརྒྱུད་དེ། ཤིང་རྟ་ཆེན་པོ་སངས་རྒྱས་གསང་བ་ལ་བཀའ་བབ། དེ་ཉིད་ཀྱིས་བི་མ་ལ་དང་། པདྨ་འབྱུང་གནས་ལ་གནང་ཞིང་། པདྨ་འབྱུང་གནས་ཀྱིས་གངས་ཅན་གྱི་ལྗོངས་སུ་ཡོ་གའི་རྒྱུད་དང་། ཨ་ཏིའི་མན་ངག་ཟུང་དུ་བསྡེབས་པའི་བསྐྱེད་རྫོགས་རྣམ་པ་གསུམ་གྱི་སྒོར་ཞུགས་པའི། རྣལ་འབྱོར་པ་རྣམས་ཀྱི་ཉམས་ཆག་སྐོང་ཞིང་རྟོག་སྒྲིབ་སྦྱོང་བ། སེམས་ཅན་ཐམས་ཅད་ངན་སོང་གི་སྡུག་བསྔལ་ལས་དྲངས་ནས། བླ་ན་མེད་པའི་དངོས་གྲུབ་ཀྱི་སྐལ་བ་ཅན་དུ་བྱེད་པ་ལ། ཐབས་མཁས་ཀྱི་སྒོ་རྨད་དུ་བྱུང་བ་རྣལ་འབྱོར་སྤྱི་ཁྲུས་ན་རཀ་དོང་སྤྲུགས་ཀྱི་ཆོ་ག་མང་དུ་མཛད་པ་གཉགས་ལོ་ཡེ་ཤེས་གཞོན་ནུ་ལ་བཀའ་བབ་སྟེ། བཀའ་མ་ལྟར་དུ་དར་བར་མཛད། དེ་ལྟར་དོང་སྤྲུགས་ལས་ཁོལ་དུ་བྱུང་བ་དགོངས་པ་རང་གྲོལ་
འདི་ཉིད་རྒྱུད་བསྐྱེད་པ་མ་ཧཱ་ཡོ་ག་ལྟར་ཁོག་ཕུབ། ལྟ་སྒོམ་རྫོགས་པ་ཆེན་པོ་གཙོ་བོར་བཏོན་ཏེ་བསྒྲུབ་ཕྲིན་གྱི་རིམ་པ་དང་། འཁོར་འདས་ཀྱི་ཆོས་ཐམས་ཅད་བར་དོ་རྣམ་པ་དྲུག་གིས་གཏན་ལ་ཕབ་སྟེ། ལམ་རྫོགས་ཆེན་ལྟར་ཉམས་སུ་ལེན་བྱའི་གདམས་པ་ཟབ་མོ་འདི་ཉིད། མཁའ་འགྲོའི་གཙོ་མོ་མཁར་ཆེན་མཚོ་རྒྱལ་དང་། ལོ་ཙཱ་བ་ཅོག་རོ་ཀླུའི་རྒྱལ་མཚན་སོགས་ལ་སྙན་བརྒྱུད་དུ་གནང་ཞིང་། མ་འོངས་སྙིགས་དུས་ཀྱི་འགྲོ་བ་བསོད་ནམས་དམན་པ་རྣམས་ཀྱི་དོན་དུ་བཀའ་བབས་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱའི་བརྒྱུད་པ་གསུམ་ལྡན་དུ་གཏེར་དུ་སྦ་བར་མཛད་པ། ཕྱིས་སྤྲུལ་པའི་གཏེར་སྟོན་ཀརྨ་གླིང་པས་གཏེར་ནས་སྤྱན་དྲངས་ཏེ། བརྒྱུད་པ་གསུམ་གྱི་བར་དུ་ཆིག་བརྒྱུད་མཛད་ལ། དེ་ནས་རིམ་པར་བརྒྱུད་དེ། བདག་ཅག་གི་རྣམ་འདྲེན་དཔལ་ལྡན་བླ་མ་དོན་གྱི་སླད་དུ་མཚན་ནས་སྨོས་ན། རང་གི་རྩ་བའི་བླ་མའི་མཚན་དེ་ལས་དགྱེས་པ་ཆེན་པོའི་ངང་ནས་ལེགས་པར་སྩལ་པ་ནི། གང་ནས་བྱུང་བའི་བརྒྱུད་པའི་ལོ་རྒྱུས་ཡིན་ལ། ལོ་རྒྱུས་དེ་ལྡན་གྱི་གདམས་པ་འདི་ནི། མ་བསྒོམས་པར་འཚང་རྒྱ་བའི་གདམས་པ་དྲུག་གི་ནང་ཚན། ཚིག་རྣ་བར་ཐོས་པ་ཙམ་གྱིས་གྲོལ་ནུས་པའི་རྒྱུད་ཐོས་གྲོལ་ཆེན་མོ་ཞེས་བྱ་བ། ཐོས་པ་ཙམ་གྱིས་གྲོལ་བ་ཐོབ་པའི་ཆོས། སྡིག་པོ་ཆེ་གསང་ལམ་དུ་ཁྲིད་པའི་ཆོས། སྐད་ཅིག་གཅིག་གིས་རྫོགས་སངས་རྒྱས་པའི་ཆོས། མཚམས་མེད་པ་ལྔ་བསགས་པའི་མིའི་རྣ་ལམ་དུ་ཐོས་ནའང་། ངེས་པར་
གྲོལ་བར་འགྱུར་ཏེ། དཔལ་ཀུན་ཏུ་བཟང་པོ་ཉིད་ཀྱི་ཞལ་ནས། གལ་ཏེ་རྣལ་འབྱོར་ཕོ་མོ་གང་ཞིག་གིས། དཀྱིལ་འཁོར་གྱི་ལྷ་འདི་རྣམས་ཀྱི་མཚན་རྣ་བར་ལན་གཅིག་ཐོས་པ་ཙམ་གྱིས་ན་རཀ་ཆེན་པོར་མི་ལྟུང་ངོ་། །ཞེས་གསུངས་པ་དང་། གཞན་ ཡང་། རང་བཞིན་སྒྱུ་འཕྲུལ་ཞི་ཁྲོ་ལ༔ གང་ཞིག་གུས་པས་ཕྱག་འཚལ་ན༔ ཉམས་ཆག་སྐོང་ཞིང་དངོས་གྲུབ་ཐོབ༔ ཅེས་གསུངས་པས། དེ་ལྟ་བུའི་གདམས་པ་ཁྱད་པར་ཅན་འདིའི་སྒོ་ནས་ཚེ་ལས་འདས་པ་རྣམས་ལ་གནས་ལུང་དབང་བསྐུར་༼གྱི་ཆོ་ག་བྱེད་པ་ཡིན་པས་྿༽བ་དང་། གསོན་པོ་རྣམས་རིགས་དྲུག་གི་གནས་ནས་དྲང་ཞིང་། དབང་བསྐུར་བ་ལྷན་ཅིག་ཏུ་མཛད་པའི་ཕྱག་སྲོལ། ད་ལྟར་བླ་མ་རྣམས་ཀྱི་མཛད་པ་ལྟར། སྒྲུབ་པ་དེ་སྐབས་སུ་བབས་པ་ཡིན་པས། ྿ བླ་མ་དང་དཀྱིལ་འཁོར་གཙོ་བོ་ཐ་མི་དད་པའི་དད་མོས་གདུང་ཤུགས་དྲག་པོའི་གསོལ་བ་དྲག་ཏུ་ཐོབ་ཅིག །༈ འཕྲད་ཚད་དུས་སྐབས་འདིར་དབང་གི་སྟ་གོན་བྱ་བར་སྤྲོ་ན། གོང་གི་ད་ལྟར་བླ་མ་རྣམས་ཀྱི་མཛད་པ་ལྟར། སྒྲུབ་པ་སྐབས་སུ་བབས་པ་ཡིན། དེ་ཡང་ཇི་སྐད་དུ། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། །ཞེས་གསུངས་པ་ལྟར། དབང་བསྐུར་བ་དེ་ཡང་དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དཀྱིལ་འཁོར་ལ་དབྱེ་ན། རང་བཞིན་ཡེ་ཤེས་ཀྱི་དཀྱིལ་འཁོར་དང་། སྤྲུལ་བའི་དཀྱིལ་འཁོར་དང་། རིག་པ་ཉམས་ཀྱི་དཀྱིལ་འཁོར་གསུམ་གསུངས་ པ་ནི། འཕགས་པ་རྣམས་ཀྱི་སྤྱོད་ཡུལ་ཡིན་ཞིང་། ཏིང་འཛིན་ལ་བརྟན་པ་རྗེས་མཐུན་ཙམ་ཐོབ་པ་ལ་སོགས་པའི་སློབ་དཔོན་གྱིས་ནི། གདུལ་བྱའི་དབྱེ་བས།
སྐལ་དམན་འཇུག་པ་ལ་རྡུལ་ཚོན། འབྲིང་རས་བྲིས། རབ་ཚོམ་བུ། ཡང་རབ་བླ་མའི་ལུས་དཀྱིལ་ལ་བརྟེན་པའི་ཚུལ་བཞིན་ལས། འདིར་ད་ལྟར་གྱི་བླ་མ་དམ་པ་རྣམས་ཀྱི་ཕྱག་བཞེས་སུ། རྡུལ་ཚོན་དང་། རས་བྲིས་གང་རུང་ལ་བརྟེན་ ནས་དབང་བསྐུར་བར་མཛད་པའི་ཚུལ་གཉིས་ལས། རས་བྲིས་ལྟར་སྟ་གོན་གྱི་ཆོ་ག་སྟེ། ལྷ་དང་བུམ་པའི་སྟ་གོན་གཉིས་སྔར་སོང་ནས། ད་ལྟ་སློབ་མ་སྟ་གོན་གྱི་བྱ་བ་དེ་སྒྲུབ་པ་སྐབས་སུ་བབས་པ་ཡིན་པས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་ལྷ་གནས་ཀྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། དེ་ལྟར་མཎྜལ་ཕུལ་ནས་བློ་བཅོས་པ་ནི། ཁྱེད་ཅག་མཆོག་གི་དངོས་གྲུབ་སྐུ་བཞི་ཡེ་ཤེས་ལྔ་ཡི་བདག་ཉིད་མི་སློབ་པའི་ཟུང་འཇུག་ཐོབ་པར་བྱ་བའི་ཆེད་དུ། དཀྱིལ་འཁོར་ཆེན་པོ་འདིར་འཇུག་པར་བྱ་ཡི། དེ་ལས་གཞན་དུ་འདི་ཕྱིའི་འཁོར་བའི་བདེ་འབྱོར་མངོན་པར་མཐོ་བའི་གོ་འཕང་དང་། ཞི་བདེ་དོན་གཉེར་ཉན་རང་གི་བྱང་ཆུབ་ཀྱང་དོན་དུ་གཉེར་བྱའི་འབྲས་བུ་མ་ཡིན། དེ་བས་ན། སེམས་ཅན་ཐམས་ཅད་ཡེ་ནས་རང་བཞིན་གྱིས་རྣམ་པར་དག་པས། འཁོར་བ་མེད་སྣང་སྒྱུ་མ་ལྟ་བུའི་ཆོས་ཡིན་ཀྱང་། དེ་ལྟར་མ་རྟོགས་པས་འཁོར་བར་འཁྱམས་པའི་སེམས་ཅན་འདི་དག །ཕན་ཚུན་མ་བུ་ཁྱོ་ཤུག་སོགས། ལན་གྲངས་དཔག་ཏུ་མེད་པ་བྱས་ནས་ཕན་བཏགས་པ་ལ་ཚད་མེད་པའི་དྲིན་ཆེན་ཤ་སྟག་ཡིན་པ་ལ། འདི་ཐམས་ཅད་སྡུག་བསྔལ་གྱི་ཁུར་ཆེན་པོས་ནི་ནོན། བདེ་བའི་ཐབས་ནི་མི་ཤེས། བདེ་བར་འདོད་ཀྱང་སྡུག་བསྔལ་གྱི་རྒྱུ་ཁོ་ན་སྒྲུབ་པ་ལ་བརྩོན་པས། ཞེ་འདོད་
དང་ལག་ལེན་ཕྱིན་ཅི་ལོག་ཏུ་གྱུར་པ། སྨྱོན་པ་ལྟ་བུ་འདི་རྣམས་ལ་བཅོས་མིན་སྙིང་རྗེ་ཚད་མེད་པས་ཀུན་ནས་བླངས་ཏེ། ཤེས་རབ་དང་སྙིང་རྗེ་ཆེན་པོས་སྲིད་པ་ཞི་བའི་མཐའ་གཉིས་ལ་མི་གནས་པའི་མྱང་འདས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་ལམ་གྱི་རྩ་བ་དབང་བསྐུར་བ་ལེགས་པར་མནོས་ཏེ། ལམ་ལ་ཚུལ་བཞིན་དུ་བསླབ་པར་བྱ་སྙམ་དུ་རྙོགས་པ་དང་བྲལ་བའི་བྱང་ཆུབ་ཀྱི་སེམས་དུང་ངེ་བ་ཞིག་བསྐྱེད་འཚལ། སླར་ཡང་མི་ཕྱེད་དད་པའི་གདུང་ཤུགས་དྲག་པོས་སྙིམ་པ་མེ་ཏོག་དང་བཅས་ཏེ་ཐལ་མོ་སྦྱར་ནས་འདི་ཡི་རྗེས་ཟློས་མཛོད། ཀྱེ་མ་མགོན་པོ་ཐུགས་རྗེ་ཅན༔ སོགས་བཟུང་དུ་གསོལ༔ སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་གི་ལུས་ལ་ཕོག་པས་འོད་ཀྱི་གོང་བུར་ཞུ་བ་ལས། བཅོམ་ལྡན་འདས་དཔལ་རྡོ་རྗེ་སེམས་དཔའི་སྐུར་གྱུར། སློབ་དཔོན་རྡོ་རྗེ་དང་བཅས་པས། དྲི་ཆུས་ཁྱོད་རང་གི་སྤྱི་བོ་མགྲིན་པ་སྙིང་ག་རྣམས་སུ་རེག་པས་ཐིག་ལེ་བྱས་ཏེ། ཨོཾ་ཨཱཿ ཧཱུྃ་ཞེས་བརྗོད་པས། གནས་གསུམ་ཡི་གེ་འབྲུ་གསུམ་བྱུང་། ཡང་མས་ནས་ཡར་སྙིང་མགྲིན་དཔྲལ་བ་རྣམས་སུ་རེག་སྟེ། ཧཱུྃ་ཨཱཿ ཨོཾ་ཞེས་བརྗོད་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་གསལ་བར་གྱུར། ཡང་དཔྲལ་བ་ནས་མར་རེག་སྟེ། ཨོཾ་ཨཱཿ ཧཱུྃ་ཞེས་བརྗོད་པས་སྒོ་གསུམ་རྡོ་རྗེ་གསུམ་དུ་བརྟན་པར་བྱས་པའི་མོས་པ་མཛོད། དེ་ལྟར་ལྷར་བསྐྱེད་ཅིང་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པ་དེ་ལ་མཆོད་པའི་ཡུལ་དུ་བཟང་བ་ཡིན་པས། མེ་ཏོག་དབུ་ལ་
ཕུལ་བའི་མོས་པ་མཛོད། ཨོཾ་བཛྲ་པུཥྤེཔྲ་ཏཱིཙྪ་སྭཱ་ཧཱ། དེ་བཞིན་དུ་བདུག་སྤོས་ཤངས་ལ་ཕུལ་བའི་མོས་པ་མཛོད། ཨོཾ་བཛྲ་དྷཱུ་པེ་པྲ་ཏཱིཙྪ་སྭཱ་ཧཱ། མར་མེ་སྤྱན་ལ་ཕུལ་བའི་མོས་པ་མཛོད། ཨོཾ་བཛྲ་ཨཱ་ལོ་ཀེ་པྲ་ཏཱིཙྪ་སྭཱ་ཧཱ། དྲི་ཆབ་ཐུགས་ཀར་ཕུལ་བའི་མོས་པ་མཛོད། ཨོཾ་བཛྲ་གྷནྡྷེ་པྲ་ཏཱིཙྪ་སྭཱ་ཧཱ། ཧཱུྃ་ལས་བྱུང་བའི་སོ་ཤིང་བྱང་ཆུབ་ཀྱི་ཤིང་གི་རང་བཞིན། སོར་བཅུ་གཉིས་པའི་ཚད་ཅན་དྲིས་བྱུག་པ་ལ། རྩེར་མེ་ཏོག་གི་ཅོད་པན་བཅིངས་པ། དངོས་གྲུབ་ཀྱིས་ལྟས་བརྟགས་པའི་ནུས་པ་དང་ལྡན་པར་གྱུར། དེ་ཉིད་ཁྱེད་རྣམས་ཀྱི་ཐལ་མོའི་བར་དུ་བྱིན་པས་རྩེ་མོས་སོ་དྲུད་ནས། ཁ་ཤར་དུ་ཕྱོགས་པས་རྨོད་བོར་ལ། བཛྲ་ཧ་ས་ཧ། ཞེས་བརྗོད་ཅིང་སོ་ཤིང་གི་ར་བར་ལྟོས་པ་མེད་པར་དོར་ཅིག །བུ་ཁྱོད་དཀྱིལ་འཁོར་ཆེན་པོ་རུ༔ སོགས་ནས་སོ་ཤིང་དོར༔ ཞེས་པའི་ལན་དུ་འདི་ཡི་རྗེས་ཟློས་མཛོད། ཀྱེ་ཧོ། བླ་མ་ཇི་ལྟར་སོགས། བཛྲ་ཧ་ས་ཧ། རྩེ་མོ་སྟེང་དུ་བསྟན་ན་མཆོག་འགྲུབ། ཕྱོགས་བཞིར་ཞི་སོགས་ལས་བཞི་འགྲུབ་པས་འབྲིང་། མཚམས་བཞིར་བུམ་པ་བཟང་པོ་སོགས་ཕྲ་མོའི་དངོས་གྲུབ་འགྲུབ་པར་འགྱུར་རོ། །རྨི་ལམ་གསལ་བའི་ཆེད་དུ་འཁྱོར་ཆུ་བླུད་པ་ནི། དྲིའི་ཆུ་ཁྱོར་བར་ལན་གསུམ་བྱིན་པ་འཐུང་ལ་ལྷག་མ་རྒྱབ་ཏུ་དོར་ཅིག །བཾ་བཾ་བཾ་ཨོཾ་ཧྲཱིཿ བི་ཤུདྡྷཿ སརྦ་དྷརྨཿ སོགས་ན་ཡ་ཧཱུྃ༔ རྨི་ལམ་ལ་བར་ཆད་ཀྱིས་མི་སྒྲིབ་པའི་ཕྱིར་སྲུང་སྐུད་གདགས་པ་ནི། སློབ་བུའི་ལུས་ཚད་མཉམ་པའི་སྐུད་པ་དམར་པོ་སུམ་ལྡབས་སུ་དྲིལ་བར་མདུད་པ་གསུམ་བཏབ་སྟེ། སྲད་བུ་མི་དམིགས་པ་ཧཱུྃ་ལས་བྱུང་བའི་རྡོ་རྗེའི་སྲད་བུ་དམར་པོ་རྡོ་རྗེའི་མདུད་
པ་གསུམ་དང་བཅས་པ་ལ། ཡེ་ཤེས་སྲད་བུ་སྤྱན་དྲངས་ཏེ་ཐིམ་པས། རྡོ་རྗེའི་སློབ་བུ་རྣམས་ཀྱི་སྒོ་གསུམ་གྱི་བར་ཆད་བསྲུང་བའི་ནུས་པ་ཅན་དུ་གྱུར། རྡོ་རྗེ་ཐེག་པའི་དཀྱིལ་འཁོར་དུ༔ སོགས་ནས། རཀྵཿ སརྦ་ན་སྭཱ་ཧཱ། ཧཱུྃ་དང་ལས་སྔགས་ཀྱིས། སྐྱེས་པའི་དཔུང་པ་གཡོན་པ་དང་། བུད་མེད་ཀྱི་གཡས་སུ་གཉིས་བསྐོར་གྱིས་བཅིངས། ལས་བུམ་གྱི་ཆུས་གཏོར་ནས། རྡོ་རྗེ་རྒྱ་གྲམ་དུ་རྒྱས་གདབ་བོ། །རྨི་ལམ་མི་འཁྲུགས་པར་བྱེད་པའི་ཕྱིར་ཀུ་ཤའི་སྔས་སྟན་སྦྱིན་པ་ནི། ཀུ་ཤ་མི་དམིགས་པས་དྷཱིཿ དང་ཧཱུྃ་ལས་བྱུང་བའི་ཀུ་ཤ་སྔོ་ལྗང་རྩ་རྩེ་མ་ཉམས་པ་རྨི་ལམ་མི་འཁྲུག་པར་བྱེད་པའི་ནུས་པ་ཅན་དུ་གྱུར། ཧཱུྃ༔ སྐལ་ལྡན་ཁྱོད་ཀྱི་དུས་གསུམ་དུ༔ སོགས་ཏིཀྵྞ་དྷི་སིདྡྷི་ཧཱུྃ༔ དྷཱིཿ བཟླས་པའི་ཀུ་ཤ་ཆུང་བ་སྔས་ཀྱི་དོན་དུ་གཡས་དང་། ཧཱུྃ་བཟླས་པའི་ཆེ་བ་སྟན་གྱི་དོན་དུ་གཡོན་དུ་གཏད། དེ་ནས་མི་ལྡོག་པའི་ཆེད་དུ་ཆོས་བཤད་པས་སྤྲོ་བ་བསྐྱེད་པ་ནི། རྣམ་སྣང་མངོན་བྱང་ལས། འཇིག་རྟེན་དུ་ནི་ཀུན་མཁྱེན་དག །ཨུ་དུམྦ་རའི་མེ་ཏོག་བཞིན། །བརྒྱ་ལམ་ལ་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གི་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །ཞེས་བྱ་བ་ལ་སོགས་
པ་གསུངས་ཏེ། དེ་ཡང་འཇིག་རྟེན་ན་ཨུ་དུམྦ་རའི་མེ་ཏོག་དཀོན་པ་ལྟར། སངས་རྒྱས་འཇིག་རྟེན་དུ་འབྱོན་པར་དཀོན། བྱོན་ཀྱང་ཆོས་གསུངས་པ་དང་ཁྱད་པར་ཐེག་ཆེན་དེའི་ནང་ནས་ཀྱང་རྡོ་རྗེ་ཐེག་པ་གསུང་བ་དཀོན། དེ་ལྟར་དཀོན་པ་ཙམ་དུ་མ་ཟད། དཀོན་པ་རྙེད་ན་ཕན་ཡོན་ཆེན་པོ་དང་ལྡན་ཏེ། དེའི་རྒྱུ་མཚན་བསྐལ་པ་བྱེ་བ་དུ་མར་བསགས་པའི་སྡིག་སྒྲིབ་རྣམས་དཀྱིལ་འཁོར་མཐོང་བ་ཙམ་གྱིས་འདག་པར་འགྱུར་ན། དེར་ཞུགས་ནས་དབང་ཐོབ་ཅིང་། རྟོགས་གོམས་ཀྱི་སྦྱོར་བས་ཉམས་སུ་བླང་ན། སྲིད་པ་ལས་ཐར་བ་ལྟ་ཅི་སྨོས། དེའི་ཕྱིར་ན་ཁྱེད་ཅག་རྣམས་བདེ་ཞིང་མྱུར་བའི་ལམ་འདི་ལ་བརྟེན་ནས་མྱུར་དུ་བླ་ན་མེད་པའི་བྱང་ཆུབ་ཐོབ་པར་གདོན་མི་ཟ་བའི་ཕྱིར་རྙེད་པའི་མཆོག་རབ་ཏུ་རྙེད་པ་ཡིན་པས་དགའ་བ་བསྒོམ་པར་མཛད་འཚལ། དེ་ནས་རྨི་ལམ་བརྟག་ཅིང་ངན་ན་བཟློག་པའི་ཆོ་ག་ནི། དོ་ནུབ་བླ་མ་དང་དཀྱིལ་འཁོར་ལ་མགོ་བོ་ཕྱོགས་པས་ཀུ་ཤའི་སྔས་སྟན་ལ་སེངྒེའི་ཉལ་སྟབས་དང་། དགེ་བའི་སེམས་ཀྱིས་ཉོལ་ལ། ངག་ཏུ་ཨོཾ་མུ་ཙི་ནི་སྭཱ་ཧཱ༔ ཨོཾ་མུ་ཁེ་ལེ་སྭཱ་ཧཱ༔ ཨོཾ་མོ་ཧཱ་ནི་སྭཱ་ཧཱ༔ ཨོཾ་དནྡྷ་ལེ་སྭཱ་ཧཱ༔ ཞེས་ཉེར་གཅིག་བཟླས་པས། ཐོ་རངས་རྨི་ལམ་གྱི་མཚན་མ་བཟང་ངན་དག་མཐོང་བར་འགྱུར་བས། ནང་བར་ཁོ་བོ་ལ་སྨྲོས་ཤིག །དེ་སྟ་གོན་གྱི་ཆོ་ག་འགྲུབ་པས་བར་དེར་ཞག་གཅིག་སོང་བས་རྨི་ལམ་བཟང་པོ་ཤ་སྟག་རྨིས་པའི་འདུ་ཤེས་ཞོག་ཅིག །འཇུག་པ་བདེ་ཕྱིར་སྟ་གོན་འདི་འགྲོ་དྲུག་རང་གྲོལ་ལྟར་བཀོད་པ་ཡིན་ལ། སྔོན་འགྲོ་རྒྱས་པར་འཕྲད་ཚད་རང་གྲོལ་ལྟར་སྤྲོ་ན་ཡང་མཚམས་སྦྱོར་འདི་ལྟར་བྱས་པས་འཐུས་པ་ཤེས་དགོས།
༈ ཀྱེ་མ་ཚེ་འཕོས་ལུས་བརྗེས་བར་དོའི་སོགས། ཐུབ་ཆེན་དྲུག་ལ་གསོལ་བ་ཐོབ༔ དང་པོ་དམྱལ་བའི་གནས་ནས་དྲང་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་མ་བདག་འདྲའི་སེམས་ཅན་སོགས། ཆོས་ཀྱི་རྒྱལ་པོ་ཁྱོད་ལ་སྐྱབས་སུ་མཆི༔ འོ་རིགས་ཀྱི་བུ༔ དཀྱིལ་འཁོར་དབུས་ཀྱི་བུམ་པ་འདི་ནི་སྨན་ལྔའི་བུམ་པ་ཡིན་ཏེ༔ སངས་རྒྱས་རྡོ་རྗེ་རིགས་ཀྱི་གཙོ་འཁོར་ལྷ་ཚོགས་བཞུགས་པའི་ཁྱོད་ལ་དབང་བསྐུར་བ་ཙམ་གྱིས་ཞེ་སྡང་དམྱལ་བའི་གནས་ནས་ཐར་ཏེ༔ ཐུགས་རྡོ་རྗེ་རིགས་ཀྱི་དབང་ཐོབ་པ་ཡིན་སྙམ་པའི་མོས་པ་དུང་དུང་མཛོད་ཅིག༔ ཧཱུྃ༔ ཚ་གྲང་སྐྱོབ་མཛད་མེ་ཆུས་སོགས། ཧཱུྃ༔ ཀུན་བཟང་ཡབ་ཡུམ་བུམ་པ་སོགས། ཧཱུྃ་བཛྲ་ཨ་བྷི་ཥིཉྩ་ཨཱ༔ སྐལ་ལྡན་ཁྱོད་ལ་སྨན་ལྔའི་བུམ་པ་དང་༔ མེ་ཆུས་དབང་བསྐུར་བས་ཉོན་མོངས་པ་ཞེ་སྡང་གི་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས༔ སེམས་ཅན་དམྱལ་བ་ཆེན་པོར་སྐྱེ་བའི་སྒོ་བཅད་དེ་ནད་ལྔའི་ཉེས་པ་ལས་གྲོལ་ནས༔ དབུས་ཕྱོགས་འཐུག་པོ་བཀོད་པའི་ཞིང་ཁམས་ཀྱི་སྒོ་ཕྱེས་ནས་ཐུགས་རྡོ་རྗེ་སེམས་དཔའ་རིགས་ལྔའི་དབང་ཐོབ་སྟེ༔ སངས་རྒྱས་རྡོ་རྗེ་རིགས་ཀྱི་ཞིང་ཁམས་ལ་དབང་བསྒྱུར་ཏེ༔ སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག༔ དེ་ནས་སྒོ་ཕྱེ་བར་གསོལ་བ་གདབ་པ་འདིའི་རྗེས་ཟློས་མཛོད། ཧཱུྃ༔ ལྷུན་གྲུབ་གཞལ་ཡས་ཆེན་པོ་ཡི༔ ཤར་ལྷོ་ནུབ་བྱང་སྒོ་བཞི་ནས༔ ཡེ་ཤེས་ཆེན་པོ་སྒོ་ཕྱེས་
ཤིག༔ བྷྲཱུྃ་པྲ་ཝེ་ཤ་ཡ་ཕཊ༔ ཧཱུྃ༔ དབུས་ཕྱོགས་ཆོས་དབྱིངས་རང་རྩལ་གྱི༔ ཡེ་ཤེས་ཆེན་པོའི་སྒོ་ཕྱེས་ཤིག༔ བྷྲཱུྃ་པྲ་ཝེ་ཤ་ཡ་ཕཊ༔ ཧཱུྃ༔ དབུས་ནས་བཀྲ་ཤིས་གང་ལགས་པ༔ རྡོ་རྗེ་སེམས་དཔའི་བཀྲ་ཤིས་ལྷ༔ ཞི་བ་གྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ ཨོཾ་ཨཱཿཧཱུྃ༔ཧཱུྃ༔ གཏོར་མ་འདོད་ཡོན་ལྔ་དང་སོགས་ནས། ས་ཐོབ་ཤོག༔ གཉིས་པ་ཡི་དྭགས་ཀྱི་གནས་ནས་དྲང་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་མ་བདག་འདྲའི་སོགས། ཁ་འབར་ཞབས་ལ་སྐྱབས་སུ་མཆི༔ འོ་རིགས་ཀྱི་བུ༔ ནུབ་ཀྱི་བུམ་པ་འདི་ནི་དྲི་ལྔའི་བུམ་པ་ཡིན་ཏེ༔ སངས་རྒྱས་སྣང་བ་མཐའ་ཡས་རིགས་ལྔའི་ལྷ་ཚོགས་བཞུགས་པས༔ ཁྱོད་ལ་དབང་བསྐུར་བ་ཙམ་གྱིས་འདོད་ཆགས་ཡི་དྭགས་ཀྱི་གནས་ནས་ཐར་ཏེ། གསུང་པདྨ་རིགས་ཀྱི་དབང་ཐོབ་པ་ཡིན་སྙམ་དུ་མོས་པ་དུང་དུང་མཛོད་ཅིག༔ ཨཱཿ རིན་ཆེན་སྒྲོམ་གྱི་སོགས། ཧཱུྃ༔ བདུད་རྩི་དྲི་ལྔའི་སོགས། ཨཱཿ པདྨ་ཨ་བྷི་ཥིཉྩ་ཨཱཿ སྐལ་ལྡན་ཁྱོད་ལ་དྲི་ལྔའི་བུམ་པ་དང་རིན་པོ་ཆེའི་སྒྲོམ་བུའི་དབང་བསྐུར་བས༔ ཉོན་མོངས་པ་འདོད་ཆགས་ཀྱིས་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས་ཡི་དྭགས་སུ་སྐྱེ་བའི་སྒོ་བཅད་དེ༔ དུག་ལྔའི་ཉེས་པ་ལས་གྲོལ་ནས་ནུབ་ཕྱོགས་བདེ་བ་ཅན་གྱི་ཞིང་ཁམས་ཀྱི་སྒོ་ཕྱེས་ནས༔ སྣང་བ་མཐའ་ཡས་རིགས་ལྔའི་དབང་ཐོབ་སྟེ༔ སངས་རྒྱས་གསུང་པདྨའི་རིགས་ཀྱི་ཞིང་ཁམས་ལ་དབང་བསྒྱུར་ནས་སེམས་ཅན་གྱི་
དོན་ཐོགས་པ་མེད་པར་འབྱུང་བར་གྱུར་ཅིག༔ དེ་ནས་སྒོ་ཕྱེ་བར་གསོལ་བ་གདབ་པ་འདིའི་རྗེས་ཟློས་མཛོད། ཧཱུྃ༔ ནུབ་ཕྱོགས་མ་འདྲེས་གསལ་བ་ཡི༔ སོར་རྟོག་ཡེ་ཤེས་སྒོ་ཕྱེས་ཤིག༔ བྷྲཱུྃ་པྲ་ཝེ་ཤ་ཡ་ཕཊ༔ ཧཱུྃ༔ ནུབ་ནས་བཀྲ་ཤིས་གང་ལགས་པ༔ སྣང་བ་མཐའ་ཡས་བཀྲ་ཤིས་ལྷ༔ དབང་སྡུད་གྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ ཨོཾ་ཨཱཿ ཧཱུྃ༔ ཧཱུྃ༔ གཏོར་མ་འདོད་ཡོན་ལྔ་དང་སོགས་ས་ཐོབ་ཤོག༔ གསུམ་པ་དུད་འགྲོའི་གནས་ནས་དྲང་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། །ཀྱེ་མ་བདག་འདྲའི་སོགས། སེངྒེ་རབ་བརྟན་ཞབས་ལ་སྐྱབས་སུ་མཆི༔ འོ་རིགས་ཀྱི་བུ༔ ཤར་གྱི་བུམ་པ་འདི་ནི་འབྲུ་ལྔའི་བུམ་པ་ཡིན་ཏེ༔ སངས་རྒྱས་རྣམ་པར་སྣང་མཛད་རིགས་ལྔའི་ལྷ་ཚོགས་བཞུགས་པས༔ ཁྱོད་ལ་དབང་བསྐུར་བ་ཙམ་གྱིས་གཏི་མུག་དུད་འགྲོའི་གནས་ལས་ཐར་ནས༔ སྐུ་བདེ་གཤེགས་རིགས་ཀྱི་དབང་ཐོབ་པ་ཡིན་སྙམ་དུ་མོས་པ་དུང་དུང་མཛོད་ཅིག༔ ཨོཾ༔ ཤེས་རབ་རིག་པའི་སོགས། ཧཱུྃ༔ རིན་ཆེན་འབྲུ་ལྔའི་སོགས། ཨོཾ་བྷུདྷ་ཨ་བྷི་སོགས། སྐལ་ལྡན་ཁྱོད་ལ་འབྲུ་ལྔའི་བུམ་པ་དང་པོ་ཏིའི་དབང་བསྐུར་བས༔ ཉོན་མོངས་པ་གཏི་མུག་གིས་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས༔ དུད་འགྲོའི་གནས་སུ་སྐྱེ་བའི་སྒོ་བཅད་དེ༔ ཉོན་མོངས་པའི་ཉེས་པ་ལས་གྲོལ་ནས༔ ཤར་ཕྱོགས་མངོན་པར་དགའ་བའི་ཞིང་ཁམས་ཀྱི་སྒོ་ཕྱེས་ནས༔ སྐུ་རྣམ་པར་སྣང་མཛད་རིགས་ལྔའི་དབང་ཐོབ་སྟེ༔
སངས་རྒྱས་བདེ་གཤེགས་རིགས་ཀྱི་ཞིང་ཁམས་ལ་དབང་བསྒྱུར་ནས༔ སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག༔ དེ་ནས་སྒོ་ཕྱེ་བར་གསོལ་བ་གདབ་པ་འདིའི་རྗེས་ཟློས་མཛོད། ཧཱུྃ༔ ཤར་ཕྱོགས་རིག་པ་རང་གསལ་གྱི༔ མེ་ལོང་ལྟ་བུའི་སྒོ་ཕྱེས་ཤིག༔ བྷྲཱུྃ་པྲ་ཝེ་ཤ་ཡ་ཕཊ༔ ཧཱུྃ༔ ཤར་ནས་བཀྲ་ཤིས་གང་ལགས་པ༔ རྣམ་པར་སྣང་མཛད་བཀྲ་ཤིས་ལྷ༔ ལྷུན་གྱིས་གྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ ཨོཾ་ཨཱཿཧཱུྃ༔ ཧཱུྃ༔ གཏོར་མ་འདོད་ཡོན་ལྔ་དང་སོགས། ས་ཐོབ་ཤོག༔ བཞི་པ་ལྷ་མིན་གྱི་གནས་ནས་དྲང་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་མ་བདག་འདྲའི་སེམས་ཅན་སོགས། ཐགས་བཟང་རིས་ལ་སྐྱབས་སུ་མཆི༔ འོ་རིགས་ཀྱི་བུ༔ བྱང་གི་བུམ་པ་འདི་ནི་སྙིང་པོ་ལྔའི་བུམ་པ་ཡིན་ཏེ༔ སངས་རྒྱས་དོན་ཡོད་གྲུབ་པ་རིགས་ལྔའི་ལྷ་ཚོགས་བཞུགས་པས༔ ཁྱོད་ལ་དབང་བསྐུར་བ་ཙམ་གྱིས་ཕྲག་དོག་ལྷ་མིན་གྱི་གནས་ལས་ཐར་ནས༔ ཕྲིན་ལས་ཀརྨ་རིགས་ཀྱི་དབང་ཐོབ་པ་ཡིན་སྙམ་དུ་མོས་པ་དུང་དུང་མཛོད་ཅིག༔ ཧ༔ ཤེས་རབ་དོན་མཚོན་སོགས། ཧཱུྃ༔ སྙིང་པོ་ལྔ་ཡི་སོགས། ཧ་ཀརྨ་ཨ་བྷི་ཥིཉྩ་སོགས། སྐལ་ལྡན་ཁྱོད་ལ་སྙིང་པོ་ལྔའི་བུམ་པ་དང་གོ་མཚོན་གྱི་དབང་བསྐུར་བས༔ ཉོན་མོངས་པ་ཕྲག་དོག་གི་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས༔ ལྷ་མིན་དུ་སྐྱེ་བའི་སྒོ་བཅད་དེ༔ ཕུང་པོ་ལྔའི་ཉེས་པ་ལས་གྲོལ་ནས༔ བྱང་ཕྱོགས་ལས་རབ་རྫོགས་པའི་ཞིང་ཁམས་
ཀྱི་སྒོ་ཕྱེས་ནས༔ དོན་ཡོད་གྲུབ་པ་རིགས་ལྔའི་དབང་ཐོབ་སྟེ༔ སངས་རྒྱས་ཕྲིན་ལས་རིགས་ཀྱི་ཞིང་ཁམས་ལ་དབང་བསྒྱུར་ནས་སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག༔ དེ་ནས་སྒོ་དབྱེ་བར་གསོལ་བ་གདབ་པ་འདིའི་རྗེས་ཟློས་མཛོད། ཧཱུྃ༔ བྱང་ཕྱོགས་ལས་རབ་གྲུབ་པ་ཡི༔ ནན་ཏན་ཡེ་ཤེས་སྒོ་ཕྱེས་ཤིག༔ བྷྲཱུྃ་པྲ་ཝེ་ཤ་ཡ་ཕཊ༔ ཧཱུྃ༔ བྱང་ནས་བཀྲ་ཤིས་གང་ལགས་པ༔ དོན་ཡོད་གྲུབ་པ་བཀྲ་ཤིས་ལྷ༔ དགྲ་བགེགས་ཚར་གཅོད་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ ཨོཾ་ཨཱཿ ཧཱུྃ༔ ཧཱུྃ༔ གཏོར་མ་འདོད་ཡོན་སོགས། ས་ཐོབ་ཤོག༔ ལྔ་པ་ལྷ་ཡི་གནས་ནས་དྲང་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་མ་བདག་འདྲའི་སོགས། བརྒྱ་བྱིན་ཁྱོད་ལ་སྐྱབས་སུ་མཆི༔ འོ་རིགས་ཀྱི་བུ༔ ལྷོའི་བུམ་པ་འདི་ནི་རིན་པོ་ཆེ་སྣ་ལྔའི་བུམ་པ་ཡིན་ཏེ༔ སངས་རྒྱས་རིན་ཆེན་འབྱུང་ལྡན་རིགས་ལྔའི་ལྷ་ཚོགས་བཞུགས་པས༔ ཁྱོད་ལ་དབང་བསྐུར་བ་ཙམ་གྱིས་ང་རྒྱལ་ལྷའི་གནས་ནས་ཐར་ཏེ། ཡོན་ཏན་རིན་ཆེན་རིགས་ཀྱི་དབང་ཐོབ་པ་ཡིན་སྙམ་དུ་མོས་པ་དུང་དུང་མཛོད་ཅིག༔ སྭཱ༔ ལོངས་སྤྱོད་བདུད་ཀྱི་སོགས། ཧཱུྃ༔ རིན་ཆེན་སྣ་ལྔའི་སོགས། སྭཱ་རཏྣ་ཨ་བྷི་སོགས། འོ་སྐལ་ལྡན་ཁྱོད་ལ་རིན་པོ་ཆེ་ལྔའི་བུམ་པ་དང་༔ པི་ཝང་གིས་དབང་བསྐུར་བས༔ ཉོན་མོངས་པ་ང་རྒྱལ་གྱིས་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས༔ ལྷའི་གནས་སུ་སྐྱེ་བའི་སྒོ་བཅད་དེ༔ འདོད་
ཡོན་ལྔའི་ཉེས་པ་ལས་གྲོལ་ནས༔ ལྷོ་ཕྱོགས་དཔལ་ལྡན་རིན་ཆེན་བཀོད་པའི་ཞིང་ཁམས་ཀྱི་སྒོ་ཕྱེས་ནས༔ བྱམས་པ་ལྔ་རྒྱུད་ལ་སྐྱེས༔ ཞིང་ཁམས་ལྔ་ལ་དབང་སྒྱུར་ནས༔ རིན་ཆེན་འབྱུང་ལྡན་རིགས་ལྔའི་དབང་ཐོབ་སྟེ༔ སངས་རྒྱས་རིན་ཆེན་རིགས་ཀྱི་ཞིང་ཁམས་ལ་དབང་བསྒྱུར་ནས་སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག༔ དེ་ནས་སྒོ་དབྱེ་བར་གསོལ་བ་གདབ་པ་འདིའི་རྗེས་ཟློས་མཛོད། ཧཱུྃ༔ ལྷོ་ཕྱོགས་དགོངས་པ་མཉམ་ཉིད་ཀྱིས༔ ཡེ་ཤེས་ཆེན་པོའི་སྒོ་ཕྱེས་ཤིག༔ བྷྲཱུྃ་པྲ་ཝེ་ཤ་ཡ་ཕཊ༔ ཧཱུྃ༔ ལྷོ་ནས་བཀྲ་ཤིས་གང་ལགས་པ༔ རིན་ཆེན་འབྱུང་ལྡན་བཀྲ་ཤིས་ལྷ༔ ཡོན་ཏན་གྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ ཨོཾ་ཨཱཿ ཧཱུྃ༔ ཧཱུྃ༔ གཏོར་མ་འདོད་ཡོན་སོགས། ས་ཐོབ་ཤོག༔ དྲུག་པ་མིའི་གནས་ནས་དྲང་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་མ་བདག་འདྲའི་སོགས། ཐུབ་དབང་ཁྱོད་ལ་སྐྱབས་སུ་མཆི༔ འོ་རིགས་ཀྱི་བུ་རྣམས༔ བུམ་པ་འདི་སྤྱི་བོར་བཞག་ནས་བྱུང་བའི་དུས་སུ་རྫའམ་ཤིང་གི་རང་བཞིན་དུ་མ་སྒོམས་པར༔ ཕྱི་རིན་པོ་ཆེ་བུམ་པའི་དབྱིབས་ལ་ནང་རིན་པོ་ཆེ་གཞལ་ཡས་ཁང་གི་དབུས་སུ་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་དཔུང་ངེ་ཐིབས་སེ་བྱོན་པ་ཙམ་གྱིས་ལུས་ཀྱི་སྒྲིབ་པ་དག༔ སྐུའི་དམ་ཚིག་ཉམས་ཆག་བསྐང་ཞིང་༔ བུམ་པ་ལྷའི་དབང་ཐོབ་པ་ཡིན་ཨང་སྙམ་པའི་མོས་པ་དུང་དུང་མཛོད་ཅིག༔ ཧཱུྃ༔ རིན་ཆེན་པར་བུའི་སོགས། ཧཱུྃ༔ རིན་ཆེན་བུམ་པ་སོགས། ཧཱ་ཀརྨ་ཨ་བྷི་
ཥིཉྩ་ཨཱཿ འོ་རིགས་ཀྱི་བུ་རྣམས་ལ་ཐོག་མར་ལུས་སྨིན་པར་བྱེད་པ་བུམ་པ་ལྷའི་དབང་བསྐུར་བས༔ བུམ་པ་འདིའི་ནང་ནས་སྨན་ལྔས་དབང་བསྐུར་བས་ནད་ལྔ་ལས་གྲོལ༔ སྙིང་རྗེ་ལྔ་རྒྱུད་ལ་སྐྱེས༔ ཞིང་ཁམས་ལྔ་ལ་དབང་སྒྱུར༔ སྒྲིབ་པ་ལྔ་དག༔ རྡོ་རྗེ་སེམས་དཔའ་སྐུ་ལྔའི་དབང་ཐོབ༔ འབྲུ་ལྔས་དབང་བསྐུར་བས༔ དུག་ལྔའི་ཉེས་པ་ལས་གྲོལ༔ བཏང་སྙོམས་ལྔ་རྒྱུད་ལ་སྐྱེས༔ ཞིང་ཁམས་ལྔ་མཐོང་༔ སྒྲིབ་པ་ལྔ་དག༔ རྣམ་པར་སྣང་མཛད་རིགས་ལྔའི་དབང་ཐོབ༔ རིན་པོ་ཆེ་ལྔས་དབང་བསྐུར་བས༔ ཞིང་ཁམས་ལྔ་མཐོང་༔ བྱམས་པ་ལྔ་རྒྱུད་ལ་སྐྱེས༔ སྒྲིབ་པ་ལྔ་དག༔ རིན་ཆེན་འབྱུང་ལྡན་སྐུ་ལྔའི་དབང་ཐོབ༔ དྲི་ལྔས་དབང་བསྐུར་བས༔ དུག་ལྔའི་ཉེས་པ་ལས་གྲོལ༔ དགའ་བ་ལྔ་རྒྱུད་ལ་སྐྱེས༔ ཞིང་ཁམས་ལྔ་མཐོང་༔ སྒྲིབ་པ་ལྔ་དག༔ སྣང་བ་མཐའ་ཡས་སྐུ་ལྔའི་དབང་ཐོབ༔ སྙིང་པོ་ལྔས་དབང་བསྐུར་བས༔ ཕུང་པོ་ལྔ་དག༔ གཏེར་ལྔ་ཐོབ༔ ཞིང་ཁམས་ལྔ་མཐོང་༔ དོན་ཡོད་གྲུབ་པ་སྐུ་ལྔའི་དབང་ཐོབ་པའི་དགོས་པ་ཡོད་དོ༔ ཨོཾ་ཨཱཿ ཧཱུྃ༔ ཧཱུྃ༔ གཏོར་མ་འདོད་ཡོན་ལྔ་དང་སོགས། ལྡོག་པའི་ས་ཐོབ་ཤོག༔ དེ་ཡང་གསང་ཆེན་ལམ་གྱི་འཇུག་སྒོ་དབང་བསྐུར་བ་སྐབས་སུ་བབས་པ་ཡིན་པས། དེ་ལ་རྡོ་རྗེ་སློབ་དཔོན་གྱི་བྱ་བ་དང་། སློབ་མའི་བྱ་བ་གཉིས་ལས། སློབ་དཔོན་གྱི་བགྱི་འོས་དཀྱིལ་འཁོར་བཞེངས་པ། བསྒྲུབ་ཅིང་མཆོད་པ། བདག་ཉིད་དཀྱིལ་འཁོར་དུ་འཇུག་ཅིང་དབང་བླང་བ་སོགས། བླ་མ་དམ་པའི་ཕྱག་བཞེས་ལས་ཇི་ལྟར་འབྱུང་བ་ལྟར་ཆད་ལྷག་མེད་པར་སྔོན་དུ་སོང་གྲུབ། ད་ཁྱེད་རང་རྣམས་
ཀྱི་ངོ་སྐལ་དུ་གྱུར་པ་དབང་བསྐུར་ཟབ་མོ་ཞུ་བའི་ཡོན་དུ་མཎྜལ་ཕུལ་མཛོད། དེ་ལྟར་མཎྜལ་ཕུལ་བ་སོང་ནས་དཀྱིལ་འཁོར་དུ་འཇུག་པའི་ཕྱིར། ཆས་སུ་འཇུག་པ་ནི། སྔོན་ཆད་གཉིས་འཛིན་གྱི་ཞེན་རྟོག་འཐུག་པོས་མིག་བསྒྲིབས་ཏེ། དཀྱིལ་འཁོར་གྱི་ལྷ་ཚོགས་མ་མཇལ་བའམ། མཇལ་ནའང་དཀྱིལ་འཁོར་སོ་མ་འདི་ཉིད་མ་མཇལ་བའི་མཚོན་བྱེད་དུ་རས་དམར་པོ་རེས་གདོང་བཅིངས་པའི་མོས་པ་མཛོད། ཨོཾ་ཨཱཿ ཧཱུྃ༔ དཀྱིལ་འཁོར་གྱི་ལྷ་དང་མཇལ་བའི་ཚེ། ཕྱག་སྟོང་པར་མཇལ་དུ་མི་རུང་བས། ཕྱག་རྟེན་དུ་ཨུ་དུམ་ཝ་རའི་མེ་ཏོག་གི་ཕྲེང་བ་ཁ་དོག་ལྔ་པ་རེ་བྱིན་པའི་མོས་པ་མཛོད། ཨོཾ་ཨ་ཁཱཾ་ཝི་ར་ཧཱུྃ། དེ་ནས་ཕྱི་འཇུག་གི་ཐོག་མར་གསོལ་བ་གདབ་པའི་སླད་དུ་དམིགས་པ་འདི་བཞིན་དུ་མཛོད་ཅིག །ས་ཕྱོགས་འདི་ཉིད་དག་པ་རབ་འབྱམས་ཡེ་ཤེས་ཀྱི་དཀྱིལ་འཁོར་ཆེན་པོར་གྱུར་པའི་ནང་དུ། སློབ་དཔོན་ཉིད་བཅོམ་ལྡན་འདས་དཔལ་རྡོ་རྗེ་སེམས་དཔའི་རྣམ་པར་བཞུགས་པ་ལ་མི་ཕྱེད་གདུང་ཤུགས་དྲག་པོའི་གསོལ་བ་གདབ་པ་འདིའི་རྗེས་ཟློས་མཛོད། ཨེ་མ་མགོན་པོ་ཐུགས་རྗེ་ཅན༔ སོགས་འཇུག་ཏུ་གསོལ༔ དེ་ནས་གནང་བ་སྦྱིན་པ་འདི་ལ་གསན་པའི་ཁྱབ་པར་གདལ། ཨེ་མ་སྐལ་ལྡན་བུ་ཁྱོད་ལེགས་པར་ཉོན༔ སོགས། གཉེར་བར་གྱིས༔ ཞེས་པའི་ལན་དུ་འདིའི་རྗེས་ཟློས་མཛོད། ཀུན་བཟང་ཞི་ཁྲོའི་ལྷ་ཚོགས་དང་༔ སོགས། འཇུག་ཏུ་གསོལ༔ དེ་ནས་ཉན་པར་བསྐུལ་ཞིང་སྤྲོ་བ་བསྐྱེད་པ་ནི། རྟོག་པ་ཐམས་ཅད་ལེགས་པར་བསྡུས་ནས་ནི༔ སོགས་ལེགས་པར་ཉོན༔ མདུན་གྱི་ནམ་མཁར་རྒྱལ་བ་ཞི་
ཁྲོའི་ལྷ་ཚོགས་དཔང་དུ་བཙུགས་ཏེ། བདག་གཞན་སེམས་ཅན་ཐམས་ཅད་ཀྱི་ལུས་རྡུལ་སྙེད་དུ་སྤྲུལ་ནས། གནོང་འགྱོད་དྲག་པོ་དང་བཅས་སྒོ་གསུམ་གུས་པས་ཕྱག་འཚལ་བར་བསམ། མགོན་པོ་ཐུགས་རྗེ་ཆེ་ལྡན་པ་སོགས། ཕྱག་འཚལ་བ་དང་སོགས། དེ་ནས་མདུན་གྱི་ནམ་མཁར་རྒྱལ་བ་ཞི་ཁྲོའི་ལྷ་ཚོགས་རྣམས་སྤྲིན་ཕུང་འཁྲིགས་པ་བཞིན་བཞུགས་པ་ལ། ཐུན་མོང་དང་ཁྱད་པར་གྱིས་སྐྱབས་སུ་འགྲོ་བ། སོ་སོར་ཐར་པའི་སྡོམ་པ་བཟུང་བ། སྨོན་པ་དང་འཇུག་པའི་སེམས་བསྐྱེད་བླངས་པ་སྤྱི་དང་། ཁྱད་པར་གྱི་དམ་ཚིག་དང་སྡོམ་པ་རྣམས་གཟུང་བར་བྱའོ་སྙམ་པས་འདིའི་རྗེས་ཟློས་མཛོད། ཕྱོགས་བཅུའི་སངས་རྒྱས་བྱང་སེམས་རྣམས༔ སོགས། ཨོཾ་བཛྲ་ཤྲཱི་ཧེ་རུ་ཀ་ཨུ་ཙ་ཏ་ཡ་ཕཊ༔ ཁྱེད་རང་རྣམས་ཀྱི་སྤྱི་བོར་བླ་མ་དང་གཉིས་སུ་མེད་པ། དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས། ཕྱག་གཡས་རྡོ་རྗེ་རྩེ་ལྔ་པ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། དར་དང་རིན་པོ་ཆེའི་རྒྱན་ཅན་མཚན་དཔེའི་གཟི་བྱིན་མཆོག་ཏུ་འབར་བའི་སྐུར་གསལ་བའི་ཐུགས་ཀར་ཧཱུྃ་ཡིག་དཀར་པོའི་མཐར་ཡི་གེ་བརྒྱ་བའི་གཡས་སུ་བསྐོར་བ་ལས་བདུད་རྩིའི་རྒྱུན་བབས། ཁྱེད་རང་རྣམས་ཀྱིས་སྤྱི་བོར་ཚངས་བུག་ནས་ཞུགས། ལུས་ཐམས་ཅད་གང་། ཉམས་ཆག་དང་རྟོག་སྒྲིབ་ཐམས་ཅད་སྦྱངས་པར་བསམ་ལ། ཡི་གེ་བརྒྱ་བ་ལན་གསུམ་གསུང་བར་ཞུ། ཨོཾ་བཛྲ་ས་ཏྭ་ས་མ་ཡཱ། སོགས། བདག་ནི་མི་ཤེས་གཏི་མུག་སོགས། ཞེས་གསོལ་བ་བཏབ་པས་རྡོར་སེམས་འོད་
དུ་ཞུ་ནས་རང་ལ་ཐིམ་པར་གྱུར། ཨོཾ་སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་སློབ་མའི་རིག་པའི་ངོ་བོ་དཔལ་རྡོ་རྗེ་སེམས་དཔར་གསལ་བའི། གནས་གསུམ་འབྲུ་གསུམ་ལས་འོད་ཟེར་འཕྲོས་པས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། ཀུན་བཟང་རྡོ་རྗེ་སེམས་དཔའ་སྒྱུ་འཕྲུལ་ཞི་ཁྲོའི་ལྷ་ཚོགས་ཐམས་ཅད་ཁ་བ་དང་བུ་ཡུག་འཚུབ་པ་ལྟར་ཁྱེད་རང་རྣམས་ལ་སིབ་སིབ་ཐིམ་པའི་མོས་པ་གྱིས། ཧཱུྃ༔ ཆོས་དབྱིངས་ཀ་དག་སོགས་རྩ་སྔགས་མཐར། ས་མ་ཡ་ཛྙཱ་ན་ཨ་བེ་ཤ་ཡ་ཨ་ཨཱཿ ཞེས་བཏགས་པ་བཟླ་ཞིང་ཌཱ་དྲིལ་ཡུན་བསྲིངས། དེ་ལྟར་བྱིན་ཕབ་པའི་ཡེ་ཤེས་པ་རྣམས། ཁྱེད་རང་རྣམས་ལ་རོ་གཅིག་ཏུ་ཐིམ་པའི་མོས་པ་མཛོད། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ དེ་ནས་སྒོ་དབྱེ་བར་གསོལ་བ་གདབ་པའི་མོས་པ་མཛོད། ཧཱུྃ༔ དཀྱིལ་འཁོར་ཆེན་པོའི་ཤར་སོགས། བྷྲཱུྃ་པྲ་ཝེ་ཤ་ཡ་ཕཊ༔ དེ་ཡང་འདི་ན་རྒྱལ་བ་ཞི་ཁྲོ་རབ་འབྱམས་ཀྱི་དཀྱིལ་འཁོར་ལྷ་ཚོགས་རྣམས་བཞུགས་པ་ཡིན་ཏེ། དེ་ཉིད་ངོ་བོ་ཡེ་ཤེས་གཅིག་གི་རོལ་པར་ཤར་བ་མ་གཏོགས་བཟང་ངན་མེད་ཀྱང་། རང་གི་ལས་འབྲེལ་ཡོད་པའི་ལྷ་དེ་ལ་དབབ་པར་ཤོག་སྙམ་དུ་འདིའི་རྗེས་ཟློས་དང་བཅས་ཏེ་མེ་ཏོག་ལྟོས་པ་མེད་པར་དོར་མཛོད། ཧཱུྃ༔ བདག་ཅག་རིག་པའི་སོགས། པྲ་ཏི་ཛ་ཧོ༔ དེ་ལྟར་ཕུལ་བའི་མེ་ཏོག་གི་ཕྲེང་བ་དེ་ཉིད་དབང་རྟགས་ཅོད་པཎ་གྱི་ཚུལ་དུ་ཁྱེད་རང་རྣམས་ཀྱི་སྤྱི་བོར་བཅིངས་པའི་མོས་པ་མཛོད། ཨོཾ་པྲ་ཏཱི་གྲ་ཧྞ་ཨི་མཾ་ས་ཏྭ་མ་ཧཱ་བ་ལ་ཏིཥྛ༔ དེ་ནས་མ་རིག་པའི་ལིང་ཐོག་མིག་དར་དང་ལྷན་ཅིག་ཏུ་བསལ་བའི་མོས་པ་མཛོད། ཀུན་བཟང་རིགས་ལྔ་རྡོ་རྗེ་སོགས། པྲ་ཝེ་ཤ་ཡ་
ཕཊ༔ དེ་ནས་ཡེ་ཤེས་ཀྱི་མིག་གསར་དུ་ཐོབ་པ་དེ་ལ་མཐོང་བ་བསྟན་པར་བྱ་སྟེ། ཀྱེ་མ་སྐལ་ལྡན་རིགས་ཀྱི་བུ༔ སོགས། སྔགས་ལ་བརྩོན་པར་གྱིས༔ དཀྱིལ་འཁོར་རྣམ་དག་བསྟན་པ་ནི། ཀྱེ་སྐལ་བ་དང་ལྡན་པའི་རིགས་ཀྱི་བུ་རྣམས་ཉོན་ཅིག༔ འདི་ལྟ་བུའི་དཀྱིལ་འཁོར་མཐོང་བ་ནི་བསྐལ་པ་དཔག་ཏུ་མེད་པ་ནས༔ ཚོགས་བསགས་པ་ལས་བྱུང་བ་ཡིན་པས༔ དེའི་ཕྱིར་མིག་གི་དབང་པོ་མ་ཡེངས་པར་དཀྱིལ་འཁོར་ལ་ལྟོས་ལ༔ རྣ་བའི་དབང་པོ་མ་ཡེངས་པར་ལེགས་པར་ཉོན་ཅིག༔ དེ་ཡང་དཀྱིལ་འཁོར་གྱི་དབྱིབས་གྲུ་བཞི་པར་བྱུང་བ་ནི་ཚད་མེད་བཞིས་འགྲོ་དོན་མཛད་པའི་བརྡ་རྟགས་སུ་མཚོན་པའོ༔ ཁ་དོག་ལྔ་ལྡན་དུ་བྱུང་བ་ནི་ཡེ་ཤེས་རྣམ་པ་ལྔའི་རང་བཞིན་དུ་མཚོན་པའི་བརྡའོ༔ དེ་བཞིན་དུ༔ འཕྲིན་ལས་རྣམ་པ་བཞི་མཚོན་པའི་སྒོ་བཞི༔ འདོད་དོན་ལྷུན་གྲུབ་འབྱུང་བའི་འདོད་སྣམ༔ སྐུ་ལྔ་ཡོངས་སུ་རྫོགས་པའི་བརྩིགས་པ་ལྔ་རིམ༔ དངོས་གྲུབ་ཟད་མི་ཤེས་པ་རིན་པོ་ཆེའི་ཕ་གུ༔ མཚན་དཔེ་ཡོན་ཏན་གྱིས་མཛེས་པའི་དྲ་བ་དྲྭ་ཕྱེད༔ མ་རིག་པའི་མུན་པ་སེལ་ཞིང་འགྲོ་དོན་ཆགས་ཐོགས་མེད་པའི་ཤར་བུ་དང་མདའ་ཡབ༔ འཕགས་ལམ་ཡན་ལག་བརྒྱད་ལྡན་གྱི་ཀ་བ༔ རྫུ་འཕྲུལ་རྐང་པ་བཞིའི་ཐེམ་སྐས༔ དྲན་པ་ཉེ་བར་བཞག་པ་བཞིའི་རྟ་བབས༔ ས་ལམ་རིམ་པ་བཅུ་གསུམ་རྫོགས་པའི་ཆོས་འཁོར་བཅུ་གསུམ༔ ཉོན་མོངས་པའི་གདུང་བ་ལས་སྐྱོབས་པའི་ཆར་ཁེབས་བསྐྱོན་པ༔ ཐེག་པ་ཀུན་གྱི་རྩེ་རྒྱལ་དུ་གྱུར་བའི་དབུས་ཕྱུར་བུ་རིན་པོ་ཆེའི་ཏོག་གིས་མཚན་པ༔ ཆོས་ཉིད་འགྱུར་བ་མེད་པའི་འོག་གཞི་སྣ་ཚོགས་རྡོ་རྗེ༔ འཁོར་
བའི་སྐྱོན་གྱིས་མ་གོས་པའི་པདྨའི་དྲྭ་བ༔ བདུད་ཀྱི་དཔུང་འཇོམས་པའི་རྡོ་རྗེའི་རྭ་བ༔ ཉོན་མོངས་ཚང་ཚིང་བསྲེགས་ཤིང་མ་རིག་མུན་པ་སེལ་བའི་ཡེ་ཤེས་སམ༔ མེ་དཔུང་འབར་བའི་གུར་ཁང་འཁྲིགས་པ་དང་བཅས་པ་ནི༔ སྣོད་རྣམ་པར་དག་པ་གཞལ་ཡས་ཁང་གི་དག་སྦྱོར་ཡིན་ལ༔ དེ་ཡི་ནང་དུ་བཅུད་རྣམ་པར་དག་པ་ཡེ་ཤེས་ལྷ་ཚོགས་བཞུགས་ཚུལ་ནི༔ བཅོམ་ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་སྐུ་སྣང་ལ་རང་བཞིན་མེད་པ་མཚན་དང་དཔེ་བྱད་ཀྱི་དཔལ་དུ་འབར་ཞིང་། རྒྱན་ཆ་ལུགས་ཡོངས་སུ་རྫོགས་པ༔ གསལ་སྟོང་འཇའ་འོད་འཁྱིལ་བར་བཞུགས་པ་རྣམས༔ མངོན་སུམ་མཇལ་བའི་མོས་པ་དང་སྤྲོ་བ་རྒྱ་ཆེན་པོ་མཛད་པར་ཞུ༔ དེ་དག་ནི་དཀྱིལ་འཁོར་དུ་འཇུག་པའི་རིམ་པའོ། །དེ་ནས་བུམ་དབང་གི་སྔོན་འགྲོ་ཐུན་མོང་རིག་པའི་དབང་ལྔ་ཞུ་བ་ལ། གསོལ་བ་གདབ་པ་འདིའི་རྗེས་ཟློས་མཛོད༔ ཀྱེ་མ་བླ་མ་རྡོ་རྗེ་འཛིན༔ སོགས་ནས། རྣམ་ཀུན་དུས་འདིར་སྩོལ༔ ཞེས་གསོལ་བ་བཏབ་པས་ནམ་མཁར་བཞུགས་པའི་དེ་བཞིན་གཤེགས་པ་རྣམས་དབང་གི་བྱ་བ་ལ་དགྱེས་ཤིང་མཆོད་པའི་རྣམ་རོལ་དུ་མ་དང་བཅས་ཏེ་དབང་བསྐུར་བར་གྱུར། ཧཱུྃ༔ སྐུ་གསུམ་དམ་ཚིག་ལས་སོགས། འོ་དེ་ལྟར་ཐུན་མོང་རིག་པའི་སོགས། ནུས་པར་གྱུར་ཅིག༔ ༈ འདི་ནས་འཕྲད་ཚད་རང་གྲོལ་དང་། འགྲོ་དྲུག་རང་གྲོལ་གང་དགོས་ཀྱི་བསྒྱུར་མཚམས་ཡིན། ཐོག་མར་འགྲོ་དྲུག་རང་གྲོལ་ལྟར་བྱས་ན། དེ་ནས་བུམ་དབང་ཆེན་མོ་ཞུ་བའི་དོན་དུ་གསོལ་བ་གདབ་པ་འདིའི་རྗེས་
ཟློས་མཛོད། ཀྱེ་ཧོ༔ བླ་མ་རྡོ་རྗེ་འཛིན་པ་སོགས། བུམ་པའི་དབང་མཆོག་བསྐུར་དུ་གསོལ༔ ཁྱེད་རང་རྣམས་དཀྱིལ་འཁོར་གྱི་ཤར་ཕྱོགས་སུ་བཅོམ་ལྡན་འདས་དཔལ་རྡོ་རྗེ་སེམས་དཔའི་རྣམ་པས་འཁོད་པའི་མོས་པ་མཛོད། སྙིང་གའི་ས་བོན་ལས་འོད་ཟེར་འཕྲོས་པས་མདུན་གྱི་ནམ་མཁར་དབང་གི་ལྷ་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་སྤྲིན་ཕུང་གཏིབ་པ་བཞིན་དུ་སད་ནས་བཞུགས་པར་གྱུར། དེ་རྣམས་ལ་སློབ་དཔོན་གྱིས་མཆོད་ཅིང་གསོལ་བ་བཏབ་པའི་མོས་པ་མཛོད། ཨོཾ་སརྦ་ཏ་ཐཱ་ག་ཏཱ་ས་པཱ་རི་ཝ་ར་པུཥྤེ་པྲ་ཏཱིཙྪ་སྭཱ་ཧཱ། དེ་བཞིན་དུ་ཤཔྟའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པའི་ནམ་མཁར་བཞུགས་པའི་དེ་བཞིན་གཤེགས་པ་ཡབ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་བུམ་པའི་ཆུ་རྒྱུན་གྱིས་དབང་བསྐུར། འཁོར་གྱི་སེམས་དཔའ་སེམས་མ་རྣམས་ཀྱིས་ཤིས་པར་བརྗོད། ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད་པའི་སྦྱོར་བ་དང་བཅས་ཏེ་དབང་བསྐུར་བར་གྱུར། འོ་རིགས་ཀྱི་བུ་བུམ་པ་འདི་སོགས། ཧཱུྃ༔ རིན་ཆེན་བུམ་པ་གཞལ་ཡས་ཁང༔ སོགས། ཀརྨ་ཨ་བྷི་ཥིཉྩ་ཨཱཿ ཧཱུྃ༔ རྡོ་རྗེ་འཁོར་ལོ་རིན་པོ་ཆེ༔ སོགས། ཨ་བྷི་ཥིཉྩ་ཧཱུྃ༔ འོ་རིགས་ཀྱི་བུ་རྣམས་ལ་ཐོག་མར་སོགས། དེ་ནས་བུམ་དབང་གི་རྗེས་འབྲེལ་དུ་ནང་ལུས་དཀྱིལ་གྱི་བསྐྱེད་རིམ་ལ་དབང་བའི་ཕྱིར། སྐུའི་རྗེས་གནང་ཞུ་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། །ཀྱེ་ཧོ༔བླ་མ་རྡོ་རྗེ་འཛིན་པ་ཆེ༔ སོགས། ལྷ་
དབང་ཡོངས་རྫོགས་བསྐུར་དུ་གསོལ༔ ལན་གསུམ། ཞེས་གསོལ་བ་བཏབ་པས་ཁྱེད་རང་རྣམས་དཔལ་རྡོ་རྗེ་སེམས་དཔར་གསལ་བ་ལ། སློབ་དཔོན་གྱི་ལུས་དཀྱིལ་དང་། མདུན་བསྐྱེད་དཀྱིལ་འཁོར་གྱི་སྟེང་འོག་ནས་ཞི་ཁྲོ་དམ་པ་རིགས་བརྒྱ་ཚིག་རིས་དང་མཐུན་པར་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན་ནས་སྙིང་གར་ཞི་བ་དང་། སྤྱི་བོར་ཁྲག་འཐུང་སོགས། སོ་སོར་གདན་དང་བཅས་གསལ་བར་བཞུགས་པའི་མོས་པ་མཛོད། ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ ཀུན་བཟང་ཡབ་ཡུམ་སོགས་ནས། མ་མོ་དང་དམ་ཅན་གྱི་སྲོག་ལ་དབང་དམ་པ་ཐོབ་པར་གྱུར་ཅིག༔ འོ་སྐལ་ལྡན་རིགས་ཀྱི་བུ་རྣམས༔ ཁྲག་འཐུང་དྲུག་ཅུའི་སོགས་གྲོལ་བ་དུས་མཉམ་དུ་འོང་ངོ༔ དེ་ལྟར་བུམ་དབང་གི་རྗེས་འབྲེལ་དུ་ནང་ལུས་དཀྱིལ་གྱི་བསྐྱེད་རིམ་ལ་དབང་བའི་ཕྱིར། སྐུའི་རྗེས་གནང་བཅས་ཐོབ་པའི་ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པའོ། །བླ་མ་ཡབ་ཡུམ་སྙོམས་པར་འཇུག་པའི་བྱང་ཆུབ་སེམས་ཀྱི་ཐིག་ལེ་ལྕེ་ཐོག་ཏུ་བཞག་པར་གྱུར། ཧཱུྃ༔ གསང་བ་ཡེ་ཤེས་བདུད་རྩིའི་ཆུ༔ སོགས། ཨ་ཧོ་སུ་ཀ་ཨཱཿ དེ་ལྟར་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་གི་དྲི་མ་སྦྱང་། ལམ་རྩ་རླུང་སྒོམ་པ་ལ་དབང་། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས་པའོ། །ལྷ་སྔགས་ཀྱི་སྣང་ཆ་ཐམས་ཅད་འཛིན་མེད་ཁྱབ་བརྡལ་སྤྲོས་པ་དང་བྲལ་བའི་དོན་མཚོན་ཕྱིར་གསལ་སྟོང་དབྱེར་མེད་དུ་ངོ་སྤྲོད་པ། དཔེ་དོན་ཟུང་དུ་འབྲེལ་བ་
འདི་ལ་གསན་པས་ཁྱབ་པར་གདལ། ཧཱུྃ༔ མེ་ལོང་སྤྲོས་བྲལ་ཆོས་སྐུ་ཟླུམ༔ སོགས། ཙིཏྟ་ཛྙཱ་ན་ཨ་ཧོ་སུ་ཁ་ཨཱཿ དེ་ལྟར་རྟེན་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ལམ་ཐིག་ལེ་སྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས་སོ། །དེ་དོན་རྒྱུད་ལ་སྦྱོར་ཕྱིར་ངོ་སྤྲོད་ཀྱི་ཚིག་རྣ་བར་གདབ་པ་འདི་དོན་སྒོམས་ཤིག །ཧྲཱིཿ ངོ་བོ་ཉིད་ནི་ཀ་དག་སོགས། དྷརྨ་དྷཱ་ཏུ་ཛྙཱ་ན་ཨ་བྷི་ཥིཉྩ་ཨཱཿ དེ་ལྟར་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ། ཡེ་ཤེས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་སྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། །ཧཱུྃ༔ འཁོར་ལོ་རིན་ཆེན་རྣམ་བཅུ་སོགས། འོ་རིགས་ཀྱི་བུ་རྣམས་ལ་རྒྱལ་སྲིད་སྣ་བདུན་སོགས། ཧཱུྃ༔ ཇི་ལྟར་སྔོན་གྱི་རྒྱལ་བ་སོགས་ནས། འོ་རིགས་ཀྱི་བུ་ཁྱོད་ལ་བཀྲ་ཤིས་རྟགས་བརྒྱད་སོགས། འོ་སྐལ་ལྡན་རིགས་ཀྱི་བུ༔ དད་པ་དང་དམ་ཚིག་ལྡན་པ་རྣམས་ཉོན་ཅིག༔ སོགས། ཨོཾ་ཨཱཿ ཧཱུྃ༔ སྐྱེ་མེད་དབྱིངས་ཀྱི་སོགས་ནས། ཨོཾ་གུ་རུ་དེ་ཝ་ཌཱཀྐི་ནི་སིདྡྷི་ཕ་ལ་ཨ་བྷི་ཥིཉྩ༔ ཨོཾ་ཨཱཿ ཧཱུྃ་ཧྲཱིཿ ཨོཾ་ཨཱཿ ཧཱུྃ༔ ཆོས་སྐུ་ཀུན་ཏུ་བཟང་པོ། དྲུག་པ་རྡོ་རྗེ་འཆང་ཆེན། སྟོན་པ་རྡོ་རྗེ་སེམས་དཔའ། རིག་འཛིན་དགའ་རབ་རྡོ་རྗེ། མཁས་པ་ཤྲཱི་སེངྷ། འཆི་མེད་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། རྗེ་འབངས་ཉི་ཤུ་རྩ་ལྔ། གཏེར་སྟོན་གྲུབ་ཐོབ་ཡབ་སྲས། རིག་འཛིན་བརྒྱུད་པའི་བླ་མ། ཞི་བ་བཞི་བཅུ་རྩ་གཉིས། ཁྲག་འཐུང་ལྔ་བཅུ་རྩ་བརྒྱད། དག་པ་རིག་འཛིན་ལྷ་ཚོགས། བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས་སློབ་མ་འདི་
རྣམས་ལ། དབང་བསྐུར་ཞིང་བྱིན་གྱིས་བརླབ་པར་མཛད་དུ་གསོལ། ཉམས་ཆག་དང་རྟོག་སྒྲིབ་ཐམས་ཅད་དག་པར་མཛད་དུ་གསོལ། ནད་གདོན་བར་ཆད་ཐམས་ཅད་ཞི་བར་མཛད་དུ་གསོལ། ཚེ་བསོད་དཔལ་འབྱོར་ཐམས་ཅད་རྒྱས་པར་མཛད་དུ་གསོལ། འགྲོ་བ་རིགས་དྲུག་གི་སྐྱེ་སྒོ་ཆོད་ནས། འཁོར་བ་དོང་ནས་སྤྲུགས་པར་མཛད་དུ་གསོལ། ཚེ་འདིར་སྣང་བཞི་མཐར་ཕྱིན་ནས། གདོད་མའི་གྲོལ་སར་ཕྱིན་པར་མཛད་དུ་གསོལ། འཆི་བ་ཆོས་ཀྱི་སྐུར་འཚང་རྒྱ་བར་མཛད་དུ་གསོལ། བར་དོ་ལོངས་སྤྱོད་རྫོགས་པའི་སྐུར་གྲོལ་བར་མཛད་དུ་གསོལ། སྐྱེ་བ་སྤྲུལ་པའི་སྐུ་ཐོབ་ནས་དོན་གཉིས་ལྷུན་གྱིས་གྲུབ་པར་མཛད་དུ་གསོལ། ཅེས་བརྒྱུད་པའི་གཤར་འདེབས་སྨོན་ལམ་བཅས་རྒྱས་པའི་མཐར། ཀཱ་ཡ་སིདྡྷི་ཨོཾ༔ སོགས། སརྦ་སིདྡྷི་ཧྲཱིཿ ཞེས་དང་། ཞི་ཁྲོའི་སྤྱི་སྔགས་འཛབ་དབྱངས་བཅས་དབང་འགྲིམ་མཐར། ཕྱོགས་བཅུའི་རྒྱལ་བ་སྲས་བཅས་རྩ་བརྒྱུད་བླ་མ་ཡི་དམ་མཁའ་འགྲོ་ཆོས་སྐྱོང་གི་ཚོགས་དང་བཅས་པ་མདུན་གྱི་ནམ་མཁར་སྤྲིན་ཕུང་འཁྲིགས་པ་ལྟར་བྱོན་ནས་ཁྱེད་རང་རྣམས་ལ་དབང་དོན་གྱི་ཡེ་ཤེས་པ་དེ་ཉིད་མ་བསྐྱེད་པ་བསྐྱེད་ཅིང་། བརྟན་པ་རྣམས་མི་ཉམས་ཤིང་བརྟན་པར་རབ་ཏུ་གནས་ཕྱིར་མེ་ཏོག་གི་ཆར་དབབ་ཅིང་ཤིས་བརྗོད་མཛད་པའི་མོས་པ་མཛོད་ཅིག །ཨོཾ་ཡེ་དྷརྨཱ་སོགས་བཀྲ་ཤིས་བརྗོད་ཅིང་ཁས་བླངས་ལ། ལུས་འབུལ་གཏང་རག་དགེ་བསྔོ་སོགས་བྱའོ། །༈ གོང་གི་བསྒྱུར་མཚམས་ནས་འགྲེ་ཤེས་དགོས། འཕྲད་ཚད་རང་གྲོལ་ལྟར་ན། དེ་ལྟར་རིགས་དྲུག་གི་གནས་ནས་སྤར་བའི་སྔོན་འགྲོའི་དབང་རྣམས་ལེགས་པར་སོང་ནས། དངོས་གཞི་སྤྲོས་བཅས་བུམ་པའི་དབང་ཞུ་བའི་ཆེད་དུ་
ཐོག་མར་གསོལ་བ་གདབ་པ་འདིའི་རྗེས་ཟློས་མཛོད། ཀྱེ༔མ་བླ་མ་དཔལ་ལྡན་རྡོ་རྗེ་འཛིན༔ བདག་ཅག་སྐལ་ལྡན་བུ་སློབ་ལ༔ དབང་བཞིའི་ཆུ་བོ་བསྐུར་དུ་གསོལ༔ བརྒྱུད་པའི་ཆེ་བ་གང་ལྟར་ལགས༔ དེ་ནས་བླ་མས་དམ་ཚིག་བསྒྲགས་པ་ནི། བུ་རྣམས་མ་ཡེངས་ང་ལ་ཉོན༔ བླ་མེད་གནད་ཀྱི་གདམས་པ་འདི༔ སྣོད་མེད་རྣམས་ལ་བསྐུར་མི་རུང༔ སྣོད་ལྡན་མོས་གུས་དྭངས་པ་བསྐྱེད༔ སླར་ཡང་སྤྲོས་བཅས་བུམ་པའི་དབང་ཆེན་མོ་ཞུ་བའི་དོན་དུ་མཎྜལ་ཕུལ་མཛོད། ཅེས་མཎྜལ་ཕུལ་འཇུག དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད། ཀྱེ་ཧོ་བླ་མ་འགྲོ་བའི་མགོན༔ སོགས། བུམ་པའི་དབང་མཆོག་བསྐུར་དུ་གསོལ༔ ཅེས་ཞུ། བླ་མས། ༼ཚུར་ཤོག་ཚུར་ཤོག་རིགས་སོགས།༽ བདག་གིས་ཁྱོད་སྨིན་བྱ༔ ཁྱེད་རང་རྣམས་དཀྱིལ་ འཁོར་ཤར་ཕྱོགས་སུ་བཅོམ་ལྡན་འདས་དཔལ་རྡོ་རྗེ་སེམས་དཔའི་རྣམ་པར་འཁོད་པའི་མོས་པ་མཛོད། སྙིང་གི་ས་བོན་ལས་འོད་ཟེར་འཕྲོས་པས་མདུན་གྱི་ནམ་མཁར་དབང་གི་ལྷ་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་སྤྲིན་ཕུང་གཏིབ་པ་བཞིན་སད་ནས་བཞུགས་པར་གྱུར། དེ་རྣམས་ལ་སློབ་དཔོན་གྱི་མཆོད་ཅིང་གསོལ་བ་བཏབ་པའི་མོས་པ་མཛོད། ཨོཾ་སརྦ་ཏ་ཐཱ་ག་ཏཱ་ས་པྰ་རི་ཝཱ་ར་པུཥྤེ་པྲ་ཏཱིཙྪ་སྭཱ་ཧཱ། དེ་བཞིན་དུ་ཤཔྟའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱི་འདི་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པའི་ནམ་མཁར་བཞུགས་པའི་དེ་བཞིན་གཤེགས་པ་ཡབ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་བུམ་པའི་ཆུ་རྒྱུན་གྱི་དབང་
བསྐུར། འཁོར་གྱི་སེམས་དཔའ་སེམས་མ་རྣམས་ཀྱིས་ཤིས་པར་བརྗོད། ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད་པའི་སྦྱོར་བ་དང་བཅས་ཏེ་དབང་བསྐུར་བར་གྱུར། ཧཱུྃ༔ བུམ་པའི་རང་བཞིན་ཆོས་ཀྱི་སྐུ༔ སོགས། འདི་ཕྱིན་བླ་མའི་སྒེར་འདོན་མཛད་རྒྱུའི་ཚིག་ལྷུག་ཐམས་ཅད་ཀྱི་གྱུར་ཅིག་གར་ཡོད་ལ། གྲྭ་ཚང་ནས་མཐུན་འགྱུར་མཛད་རྒྱུ་འགྲེ་ཤེས་དགོས། བུམ་པའི་མཚམས་རྣམས་སུ་བླ་མའི་མེ་ཏོག་འཐོར་ཞིང་ཌཱ་དྲིལ་བྱེད་བཞིན་པས། བསྐྱེད་རིམ་ལྷ་དབང་ཐོབ་པར་ཤོག༔ ཨོཾ་ཨཱཿ ཧཱུྃ་སརྦ་ཏ་ཐཱ་ག་ཏ་ཨ་བྷི་ཥཉྩ་ཨོཾ་ཨཱཿ ཧཱུྃ་ཧྲཱིཿ སྭཱ་ཧཱ༔ ཧཱུྃ༔ རྡོ་རྗེ་འཁོར་ལོ་རིན་པོ་ཆེ༔ སོགས། པདྨ་ཁངྒ་ཨ་བྷི་ཥིཉྩ་ཧཱུྃ༔ འོ་རིགས་ཀྱི་བུ་ཁྱེད་རྣམས་ལ་བུམ་པ་འདིས་དབང་བསྐུར་བས༔ ཕྱི་སྣོད་ཐམས་ཅད་གཞལ་ཡས་ཁང་དུ་ཤེས་པའི་དབང་ཐོབ་པར་གྱུར་ཅིག༔ བུམ་ཆུས་དབང་བསྐུར་བས༔ ནང་བཅུད་ཀྱི་སེམས་ཅན་ཐམས་ཅད་ལྷ་དང་ལྷ་མོར་ཤེས་པའི་དབང་ཐོབ་པར་གྱུར་ཅིག༔ མཚན་མ་ལྔས་དབང་བསྐུར་བས༔ བདུད་བཞི་ཟིལ་གྱིས་གནོན་པའི་དབང་ཐོབ་པར་གྱུར་ཅིག༔ ཁ་རྒྱན་གྱི་དབང་བསྐུར་བས༔ འབྲས་བུ་མྱུར་དུ་སྨིན་པའི་དབང་ཐོབ་པར་གྱུར་ཅིག༔ མགུལ་ཆིངས་ཀྱིས་དབང་བསྐུར་བས༔ གཞན་དོན་དཔག་མེད་འགྲུབ་པའི་དབང་ཐོབ་པར་གྱུར་ཅིག༔ གཟུངས་ཐག་རྡོ་རྗེས་དབང་བསྐུར་བས༔ སྡོམ་པ་གསུམ་དང་དམ་ཚིག་མཐར་ཕྱིན་པའི་དབང་ཐོབ་པར་གྱུར་ཅིག༔ བུམ་ཆུས་དབང་བསྐུར་བས་རྩ་ཐིག་རླུང་གི་ཁམས་དག་ནས་བསྐྱེད་རྫོགས་ཟུང་དུ་འབྲེལ་བའི་དབང་ཐོབ་པར་གྱུར་ཅིག༔ འོ་མ་བུམ་རྫས་དང་བཅས་པས་དབང་བསྐུར་བས༔ རང་དོན་མཐར་ཕྱིན་ནས་གཟུགས་སྐུ་རྣམ་གཉིས་ཀྱིས་བསྐལ་
པ་མ་སྟོང་གི་བར་དུ་འགྲོ་བ་སེམས་ཅན་ཐམས་ཅད་འདྲེན་པའི་དཔལ་མགོན་དམ་པར་གྱུར་ཅིག༔ གཟུངས་ཐག་རྣམ་ལྔས་དབང་བསྐུར་བས༔ སེམས་ཅན་ཐམས་ཅད་ཉོན་མོངས་པའི་སྡུག་བསྔལ་ལས་སྐྱོབ་པར་གྱུར་ཅིག༔ བུམ་ཆུ་གཙང་མས་དབང་བསྐུར་བས༔ ཐུགས་རྗེས་འཛིན་པའི་ཆུ་རྒྱུན་མི་འཆད་ཅིང་༔ སྟོང་ཉིད་སྙིང་རྗེ་དང་འབྲེལ་བའི་དབང་དམ་པ་ཐོབ་པར་གྱུར་ཅིག༔ བུམ་པ་རྒྱན་བཀོད་པ་གཟི་བྱིན་ཅན༔ བླ་མ་ཡབ་ཡུམ་རོལ་མོ་རྒྱན་དང་བཅས་པས་དབང་བསྐུར་བ་ལ་བརྟེན་ནས༔ ཞི་རྒྱས་དབང་དྲག་བཞིའི་ཕྲིན་ལས་རྣམས་མཐར་ཕྱིན་པའི་དབང་དང་དངོས་གྲུབ་དམ་པ་ཐོབ་པར་གྱུར་ཅིག༔ དབང་བར་གྱུར་ཅིག༔ གསལ་བར་གྱུར་ཅིག༔ མཆེད་པར་གྱུར་ཅིག༔ འབར་བར་གྱུར་ཅིག༔ རྒྱས་པར་གྱུར་ཅིག༔ དབང་དུ་གྱུར་ཅིག༔ སྨིན་གྲོལ་རིག་ཅིང་རྟོགས་པར་གྱུར་ཅིག༔ བརྟན་པར་གྱུར་ཅིག༔ གྲོལ་བར་གྱུར་ཅིག༔ མེ་ཏོག་གང་ལ་བབ་པའི་ལྷ་གང་ཡིན་པ་དང་དབྱེར་མེད་དུ་སངས་རྒྱས་པར་གྱུར་ཅིག༔ དེ་ནས་བུམ་དབང་གི་རྗེས་འབྲེལ་དུ་ནང་ལུས་དཀྱིལ་གྱི་བསྐྱེད་རིམ་ལ་དབང་བའི་ཕྱིར། སྐུའི་རྗེས་གནང་ཞུ་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་ཧོ༔ བླ་མ་རྡོ་རྗེ་འཛིན་པ་ཆེ༔ སོགས། ལྷ་དབང་ཡོངས་རྫོགས་བསྐུར་དུ་གསོལ༔ ཅེས་གསོལ་བ་བཏབ་པས་ཁྱེད་རང་རྣམས་དཔལ་རྡོ་རྗེ་སེམས་དཔར་གསལ་བ་ལ། སློབ་དཔོན་གྱི་ལུས་དཀྱིལ་དང་། མདུན་བསྐྱེད་དཀྱིལ་འཁོར་གྱི་སྟེང་འོག་ནས་ཞི་ཁྲོ་དམ་པ་རིགས་བརྒྱ་ཚིག་རིས་དང་མཐུན་པར།
མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན་ནས། སྙིང་གར་ཞི་བ་དང་། སྤྱི་བོར་ཁྲག་འཐུང་སོགས་སོ་སོར་གདན་དང་བཅས་པ་གསལ་བར་བཞུགས་པའི་མོས་པ་མཛོད། ཧཱུྃ༔ མཐིང་གསལ་ཐིག་ལེའི་དཀྱིལ་འཁོར་དུ༔ ཀུན་ཏུ་བཟང་པོ་སོགས་ནས། འཆི་བའི་དུས་སུ་ངོ་ཤེས་པ་དང་གྲོལ་བ་དུས་མཉམ་དུ་འོང་ངོ༔ དེ་ལྟར་བུམ་དབང་གི་རྗེས་འབྲེལ་དུ་ནང་ལུས་དཀྱིལ་གྱི་བསྐྱེད་རིམ་སོགས་ནས་གོང་གི་འགྲོ་དྲུག་དུས་ལྟར། མཆོག་དབང་གོང་མ་གསུམ། རྒྱལ་སྲིད་སྣ་བདུན། རྟགས་བརྒྱད། གཏོར་དབང་བཅས། བརྒྱུད་པའི་གཤར་འདེབས་རྫོགས་འཕྲལ། སརྦ་སིདྡྷི་ཧྲཱིཿ དེ་ལྟར་སྤྲོས་བཅས་བུམ་དབང་མཐའ་རྟེན་དང་བཅས་པ་ལེགས་པར་ཐོབ་པའི་ཡོན་ཏན་གྱི་ཚོགས་བསྟན་དུ་གསོལ་སྙམ་པའི་ཞུ་བ་འདིའི་རྗེས་ཟློས་མཛོད། ཀྱེ་ཧོ༔ བླ་མ་རིན་པོ་ཆེ༔ སོགས། རྣམས་ལ་བསྟན་དུ་གསོལ༔ དེ་ལྟར་དབང་ཐོབ་པའི་ཡོན་ཏན། རྒྱུད་ལས། དེ་ལྟར་དབང་བསྐུར་ཡོན་ཏན་གྱིས༔ ལུས་ཀྱི་སྡིག་པ་འདག་པ་དང་༔ བསྐྱེད་རིམ་ལྷ་སྐུ་བསྒོམ་ལ་དབང༔ འབྲས་བུ་སྤྲུལ་བའི་སྐུ་ཡང་འཐོབ༔ དམ་ཚིག་ལུས་ཀྱིས་བསྲུང་བར་རིགས༔ ཡོན་ཏན་ལུས་ལ་བདེ་བ་སྐྱེ༔ ས་ཡང་བརྒྱད་པ་མན་ཆད་ནོན༔ འཕྲིན་ལས་ཞི་བ་འགྲུབ་པར་འགྱུར༔ བླ་མ་ཡོན་གྱིས་མཉེས་པར་བྱ༔ ཁྱད་པར་སྨན་འབྲུའི་མཎྜལ་དབུལ༔ ཞེས་གསུངས་པས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་དབང་ཐོབ་པའི་བཀའ་དྲིན་གཏང་རག་གི་ཆེད་དུ་མཎྜལ་འབུལ། ཞེས་མཎྜལ་འབུལ་འཇུག །ཕྱོགས་བཅུའི་རྒྱལ་བ་སྲས་བཅས་རྩ་རྒྱུད་བླ་མ་ཡི་དམ་མཁའ་འགྲོ་ཆོས་སྐྱོང་
གི་ཚོགས་དང་བཅས་པ་མདུན་གྱི་ནམ་མཁར་སྤྲིན་ཕུང་འཁྲིགས་པ་ལྟར་བྱོན་ནས། ཁྱེད་རང་རྣམས་ལ་དབང་དོན་གྱི་ཡེ་ཤེས་པ་དེ་ཉིད་མ་བསྐྱེད་པ་བསྐྱེད་ཅིང་བརྟན་པ་རྣམས་མི་ཉམས་ཤིང་བརྟན་པ་རབ་ཏུ་གནས་ཕྱིར་མེ་ཏོག་གི་ཆར་དབབ་ཅིང་། ཤིས་བརྗོད་མཛད་པའི་མོས་པ་མཛོད་ཅིག །ཨོཾ་ཡེ་དྷརྨཱ་སོགས། ཤིས་བརྗོད་རྒྱས་པར་བྱས་མཐར། དེ་ལྟར་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཞི་འཕྲད་ཚད་རང་གྲོལ་མཐའ་རྟེན་དང་བཅས་པ་ལེགས་པར་གྲུབ་པའི་གསང་སྔགས་ཀྱི་རྩ་བ་དབང་ལ་རག་ལས་ཤིང་། དབང་གི་རྩ་བ་དམ་ཚིག་བསྲུང་བ་གལ་ཆེ་སྟེ། པད་སྡོང་བརྩེགས་པ་ལས། གསང་སྔགས་རྩ་བ་དབང་ཉིད་དེ། །དེ་ཉིད་རྩ་བ་དམ་ཚིག་ལ། །འདའ་བར་མི་བྱ་བསྲུང་མཚམས་རྣམས། །གཉིས་ཀྱི་ཤེར་ཕྱིན་དངོས་གྲུབ་འབྱུང་། །ཞེས་གསུངས་སོ། །མདོར་བསྡུ་ན། ཐུན་མོང་གི་དམ་ཚིག་ཏུ། སྤྱིར་གསང་སྔགས་པ་ལ་དམ་ཚིག་བསྲུང་མཚམས་ས་ཡ་འབུམ་སྡེ་གསུངས་པ་ལ། མདོར་བསྡུ་ན། ཐལ་འགྱུར་ལས། དབང་བརྟེན་པ་ཡི་དམ་ཚིག་ནི། །དབྱེ་བ་བརྗོད་ཀྱིས་མི་ལང་ཡང་། །མདོར་བསྡུས་སྐུ་དང་གསུང་དང་ཐུགས། །རྣལ་འབྱོར་ལུས་ངག་ཡིད་ལ་སྦྱར། །ཞེས་གསུངས་པས། རྩ་བ་སྐུ་གསུང་ཐུགས་ལ་ཕྱི་ནང་གསང་བ་གསུམ་ལ་དགུ་དགུར་དབྱེ་བའི་ཉི་ཤུ་རྩ་བདུན་དུ་གསུངས་པ་ལས། བསྡུས་ན་ཕྱིའི་དམ་ཚིག་ཏུ། ལུས་ངག་ཡིད་གསུམ་གྱི་སྒོ་ནས་མི་དགེ་བ་ཐམས་ཅད་སྤངས། ནང་གི་དམ་ཚིག་ཏུ་རྡོ་རྗེ་སློབ་དཔོན་གྱི་སྐུ་གསུང་ཐུགས་དང་མི་འགལ་ཞིང་། ལུས་ངག་ཡིད་གསུམ་གུས་པས་མཉེས་པར་བྱ། གསང་བའི་
དམ་ཚིག་ཏུ། སྒོ་གསུམ་ལྷ་ཡི་སྐུ་གསུང་ཐུགས་སུ་གསལ་བས། བསྐྱེད་རིམ་བཟླས་པ་ཏིང་ངེ་འཛིན་གསུམ་དང་མ་བྲལ་བར་བྱའོ། །སྤྱི་ཡི་དམ་ཚིག་དེ་ལྟར་སོང་ནས། དགོས་སུ་དབང་བཞིའི་དམ་ཚིག་གི་དམིགས་བསལ་ནི། བུམ་དབང་ཐོབ་ནས་སྣོད་བཅུད་ཐ་མལ་དུ་མི་འཛིན་པར་ལྷ་ཡི་དཀྱིལ་འཁོར་དུ་བལྟ། གསང་དབང་ཐོབ་ནས་སྒྲ་སྐད་བརྗོད་ཚིག་ཐ་མལ་དུ་མི་འཛིན་པར་སྔགས་སུ་ཤེས་པར་བྱ། ཤེར་དབང་ཐོབ་ནས་བཟང་ངན་འཆར་རྟོག་ཐམས་ཅད་ཆོས་དབྱིངས་ལྷན་སྐྱེས་ཡེ་ཤེས་སུ་ཁྱེར། མ་རིག་ལོག་ལྟ་ཆགས་སེམས་སྤངས། ཚིག་དབང་ཐོབ་ནས་སྒོ་གསུམ་ཐ་མལ་ཞེན་འཛིན་འཁྲུལ་ཕྱིར་མི་འབྲང་བར་ཅིར་སྣང་ཆོས་ཉིད་དུ་ཁྱེར་བ་ཡིན་ནོ། །དེ་ལྟར་དམ་ཚིག་རྣམས་མ་ཉམས་པར་བསྲུངས་ན་གནས་སྐབས་དང་མཐར་ཐུག་ཐམས་ཅད། བདེ་སྐྱིད་ཀྱི་གཞི་ཐིང་ཞིང་བླ་མེད་བྱང་ཆུབ་མྱུར་དུ་ཐོབ་ལ། དམ་ཚིག་ཉམས་ན་གནས་སྐབས་མཐར་ཐུག་ཐམས་ཅད་སྡུག་བསྔལ་བཟོད་དཀའ་བ་མྱོང་ཞིང་། བྱང་ཆུབ་ཀྱི་འབྲས་བུ་བརླག་པར་འགྱུར་ཏེ། རྒྱུད་པད་སྡོང་བརྩེགས་པ་ལས། མ་ཉམས་བསྲུང་ན་དོན་འབྲས་འགྲུབ། །ཉམས་ན་ཡུན་རིང་དུ་ཁཿ མྱོང་། །དེ་ཕྱིར་དེ་དོན་ལེགས་པར་བྱ། །ཞེས་གསུངས་པས། དམ་ཚིག་དང་སྡོམ་པ་རྣམས་སྤངས་བླང་མ་ཉམས་པར་བསྲུང་སྙམ་པས་འདི་ཡི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། །སླར་ཡང་ལུས་ལོངས་སྤྱོད་དུས་གསུམ་དགེ་ཚོགས་དང་བཅས་པ་ཀུན་
བཟང་མཆོད་པའི་སྤྲིན་ཕུང་དུ་སྤྲོས་ཏེ་ཕུལ་ན། ཆ་ཤས་ནས་ལོངས་སྤྱད་དུ་གསོལ་སྙམས་པས་འདི་ཡི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་བཟུང་བ་དང་། །བདག་གི་ལུས་ཀྱང་བཞེས་སུ་གསོལ། །དེ་ལྟར་དབང་ཡོངས་སུ་རྫོགས་པ་ལེགས་པར་ཐོབ་པའི་དགེ་རྩ་སེམས་ཅན་ཐམས་ཅད་ཀྱི་དོན་དུ་བསྔོ་བར་བྱོས་ཤིག །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཅེས་སོགས་བརྗོད་ལ་སློབ་མ་རྣམས་རང་གནས་སུ་བཏང་། སླར་ཡང་གཤིན་ཆོག་གི་ཟས་༼རཾ་ཡཾ་ཁཾ། འདོད་ཡོན་ཟག་སོགས།༽གཏད་ནས་བྱང་བུ་བསྲེག་པའི་བར་བྱའོ། །ཞེས་པ་འདི་ཡང་མཁས་བཙུན་བཟང་པོའི་དཔལ་གྱིས་འབྱོར་པའི་བཤེས་གཉེན་བླ་མ་དམ་པ་འཇིགས་མེད་བློ་གསལ་དང་། བླ་མ་ཀུན་བཟང་ཆོས་རྒྱལ་གཉིས་ཀའི་གསུང་བསྐུལ་ནན་ཟབ་ཆེ་བས། མདོར་བསྡུས་ལ། དམ་ཚིག་གི་འཕྲོས་ཅུང་ཟད་རྒྱས་པར་བྱས་ཏེ། རྒྱལ་བ་ཀཿ ཐོག་པ་དང་། ཞེ་རྫོགས་ཀྱི་ཕྱག་བཞེས་ཟུང་འབྲེལ་དུ་མཐུ་སྟོབས་རྣམ་རྒྱལ་པས་སོ། །མངྒ་ལཾ།། །།